\id EPH - Gaammo project 
\h ኤፌሶኔ 
\toc1 ጳዉሎሲ ኤፌሶኔ ኣሳስ ፃፊዳ ኪታ 
\toc2 ኤፌሶኔ 
\toc3 ኤፌ 
\mt2 ጳዉሎሲ 
\mt1 ኤፌሶኔ ኣሳስ 
\mt2 ፃፊዳ ኪታ 
\imt1 ጊዶ ቆፋ 
\ip ጳዉሎሲ ኤፌሶኔ ኣሳስ ፃፊዳ ኪታይ ሃራፔካ ካሴቲዲ ኢዚ ሎዔꬂ ፄሊዛይ “ፆሳ ሼኔይ ፖሌታናይ ሳሎኒኔ ሳዓን ዲዛ ሜꬌቴꬃቲ ዉሪካ ኢሲፌ ኢሲ ኪርስቶሳ ጎዳቴꬃ ጋርስ ኣꬊዛ ዎዴይ ጋኪሺና” (1፡10) ጊዛ ቆፋ ቦላ። ቃሴካ ጎዳ ዬሱስ ኪርስቶሳ ኢሲፌቴꬃን ኣሳ ዜሬꬂ ዉሪካ ኢሲኖ ጊዳና ማላ ሃይሳ ጊታ ቆፋ ኦሶን ፔይሻና ማላ ፆሳ ዴሬዛ ቆፒሲዛዛ። 
\ip ኤፌሶኔ ኪታን ኮይሮ ኪፊሌዛ ፃፌዚ ኢሲፌቴꬃ ጊሽ ዶሚዲ ኣይፌ ዮዖዛ ኣሲዲ ፆሳ ኣዋይ ዴሬዛ ዎስቲ ዶሪዳኮ፥ ባ ናዛ ዬሱስ ኪርስቶሳ ባጋራ ኢስቲ ባ ናጋራፔ ማሮቴꬅ ዴሚዲ ዋኒ ኣቲዳኮኔ ፆሳ ጊታ ሂዶታ ቃላይ ፂሎ ኣያና ባጋራ ዋኒ ቆንጪዳኮ ኤሪሴስ። ናምዓንꬆ ኪፊሌዛን ቃሴ ፃፌዚ ናባቢዛይቲ ኢሲፌቴꬃ ዴዖን ኪርስቶሳን ኢስታስ ዲዛ ኢሲፌቴꬃይ ቱሙ ጊዳና ማላ ኢስቲ ዋኒ ዋኒ ዴዓናኮኔ ኢስታ ቆፒሴስ። 
\ip ኣሳይ ኪርስቶሳን ዲዛ ኢሲፌቴꬃን ኣይ ማላ ኢሲፌቴꬂ ኢስታስ ዲዛኮኔ ዱማ ዱማ ሃሳያ ቆሞታን ቆንጪዴስ። ዎሳ ኬꬂ ኪርስቶሳ ኣሳቴꬅ ጊዲሺን ኪርስቶሲ ቃስ ኣሳቴꬃስ ሁዔ ማላ። ዎሳ ኬꬃያ ጊምቤ ኬꬃ ማላ ጊዲሺን ኪርስቶሲ ቃስ ኬꬃስ ዴንቄሼን ኡቲዛ ሹቻ ማላ። ዎሳ ኬꬂያ ማቺ ማላ ጊዲሺን ኪርስቶሲ ቃስ ኣዚና ማላ። ፃፌዚ ኪርስቶሳ ባጋራ ቆንጪዳ ፆሳ ኪያቴꬃ ኬሂ ꬎቂሲ ዮቲዛ ዎዴ ጪማቴꬂ ዲዛ ቃላን ዮቴስ። ኡባ ሚሼካ ኢዚ ፄሊዛይ ኪርስቶሳ ሲቆን፥ ኢዛ ያርሼቴꬃን፥ ኢዛ ማሮቴꬃን፥ ኢዛ ኪያቴꬃኒኔ ኢዛ ሳሮቴꬃ ባጋራኮ! 
\is1 ሃ ማፃፋይ ኦይኪዳ ኩሜꬃ ቆፋ 
\io1 ጌሎሶ 1፡1-2 
\io1 ኪርስቶሳኔ ዎሳ ኬꬄ 1፡3-3፡21 
\io1 ኪርስቶሳን ጊዲዳ ኦራꬃ ዴዖ 4፡1-6፡20 
\io1 ኩሻ ቆፋ 6፡1-24 
\c 1  
\p  
\v 1 ፆሳ ሼኔ ማላ ዬሱስ ኪርስቶሳ ሃዋሬ ጊዲዳ ጳዉሎሳፔ። ዬሱስ ኪርስቶሳን ዲዛ ኣማኔቲዛይታስ ኤፌሶኔን ኣማኒዛ ኣሳስ። \x * \xo 1:1 \xt ሃዋ 18፡19-21\x* 
\v 2 ኑ ኣዋ ፆሳፌኔ ጎዳ ዬሱስ ኪርስቶሳፔ ኪያቴꬂኔ ሳሮቴꬂ ኢንቴስ ጊዶ። 
\s1 ኪርስቶሳፔ ቤቲዛ ኣያና ኣንጆ 
\p  
\v 3 ኑ ጎዳ ዬሱስ ኪርስቶሳ ባጋራ ሳሎን ኣያና ኣንጆ ኡባን ኑና ኣንጂዳ ጎዳ ዬሱስ ኪርስቶሳ ኣዋይ ፆሲ ኣንጄቶ።  
\v 4 ኑ ኢዛ ሲንꬃን ጌሺኔ ዎሶይ ባይንዳይታ ጊዳና ማላ ቡሮ ኣላሜይ ሜꬌታናፔ ካሴ ባ ሲቆን ኪርስቶሳ ባጋራ ኑና ዶሪዴስ።  
\v 5 ዬሱስ ኪርስቶሳ ባጋራ ኑ ኢዛ ና ጊዳና ማላ ባ ሎዖ ቆፋን ኮይሮ ዉርሲ ዎꬂዴስ።  
\v 6 ሄሲካ ባ ዶሲዛዴ ባጋራ ጮ ሜላ ኑስ ኢሜቲዳ ቦንቾ ኪያቴꬃይ ጋላቴታና ማላ። 
\p  
\v 7 ፆሳ ኣꬎ ኪያቴꬃ ዱሬቴꬃፌ ዴንዶይሳን ዬሱሳ ሱꬃን ዎዜቲዲ ናጋራፔ ኑ ማሬቲዶስ። \x * \xo 1:7 \xt ቆላ 1፡14\x* 
\v 8 ኢዚ ባ ኪያቴꬃ፥ ሂላቴꬃኒኔ ኤራቴꬅ ኡባን ኑ ቦላ ኬሂ ዳርሲዴስ።  
\v 9 ፆሲ ቆፒዳ ፁራ ባ ቆፋ ኪርስቶሳ ባጋራ ባ ሎዖ ቆፋ ማላ ኑና ኤሪሲዴስ።  
\v 10 ቡሮፔ ዎዴ ዉርሴꬃን ሃናናስ ዲዛ ኢዛ ቆፋይ ሳሎ ቦላኔ ቢታ ቦላ ዲዛይታስ ኡባስ ሁዔ ጊዲዳ ዬሱስ ኪርስቶሳፔ ዉርሲ ጋርስ ኣꬃናሳ።  
\v 11 ዉርሲካ ባ ሼኔ ማላ ኦꬂዛ ኢዛ ሼኔን ኮይሮካ ኢዚ ቆፒ ዎꬂዳይቲ ኑኒ ኢዛን ዶሬቲዶስ።  
\v 12 ኑኒ ካሴቲዲ ኪርስቶሳ ባጋራ ኤካና ጊዲ ኡፋይሳን ናጊዛይቲ ፆሳ ቦንቾ ጋላታን ቆንጪሳናሳ። 
\p  
\v 13 ኢንቴካ ቃሴ ቱማ ቃላ ሄሲካ ኢንቴና ኣሺዛ ሚሺራቾ ቃላ ሲይዲ ኪርስቶሳን ኣማኒዴታ። ኢዛ ኣማኒዲ ካሴ ኢሜታና ጌቴቲዳ ፂሎ ኣያና ማታሜን ኣታሜቲዴታ።  
\v 14 ሄ ኣያናዚካ ኢዛ ቦንቾ ጋላታን ቆንጪሳና ማላ ፆሲ ኤራይስ ጊዲዳይታ ኡባታ ዎዛና ጋካናስ ኑ ላታስ ኦይꬆ። 
\s1 ጋላታኔ ዎሳ 
\p  
\v 15-16 ሄሳ ጊሽ ኢንቴ ጎዳ ዬሱሳ ኣማኒዳ ጊሺኔ ኣማኒዛ ኣሳ ኢንቴ ሲቂዛይሳ ታ ሲዮሳፔ ሃ ሲሚን ኢንቴና ቆፓ ቆፓ ኤካዳ ታኒ ታ ዎሳን ኢንቴ ጊሽ ፆሳስ ጋላታ ሺሾ ኣጋቤይኬ።  
\v 17 ቦንቾ ኣዋ ጊዲዳ ኑ ጎዳ ዬሱስ ኪርስቶሳ ኣዋ ፆሳ ኢንቴ ሎዔꬂ ኤራና ማላ ቆንጪሲዛ ኣያናይኔ ኤራቴꬃ ኣያናይ ኢንቴስ ኢሜታና ማላ ታ ኢንቴስ ፓጬይ ባይንዳ ዎሳይስ።  
\v 18 ሄሳꬆካ ኢንቴ ኢዛን ፄይጌቲዳ ኡፋይሳይ ሄሲካ ኣማኒዛይታ ኣቻን ዲዛ ኢዛ ዱሬቴꬃይ ኣዛኮኔ ኢንቴ ኤራና ማላ ኢንቴ ዎዝና ኣይፌይ ፖዓና ማላ ዎሳይስ። 
\p  
\v 19-20 ኑስ ኣማኒዛይታስ ኡባፌ ቦላ ጊዲዳ ኢዛ ዎልቃ ꬎቃቴꬅ ኢንቴ ኤራና ማላ ታ ዎሳይስ። ሄ ዎልቃይካ ኢዛ ጊታቴꬃ ሚኖቴꬃ ኦሶን ቤሲዳይሲ ሃይቆፔ ኪርስቶሳ ዴንꬂዲ ሳሎን ባ ኡሻቻን ኡቲሲዳ ኪርስቶሳ ባጋራ። \x * \xo 1:19-20 \xt ማዛ 110፡1\x* 
\v 21 ኣይሲዛይታፔ፥ ጎዳቴꬃፔ፥ ዎልቃፌኔ ካዎቴꬃፌ ቃሴካ ሃዒ ፃላ ጊዶንታ ቡሮፔ ያና ዎዴካ ጊዲን ሱንꬅ ኡባፌ ኢዚ ቦላ።  
\v 22 ፆሲ ሃራ ዉርሲ ኢዛ ቶሆፔ ጋርሳን ሃሪሲዴስ። ዎሳ ኬꬃንካ ኡባ ቦላ ሁዔ ኦꬂዴስ። \x * \xo 1:22 \xt ማዛ 8፡6\x* 
\v 23 ዎሳ ኬꬂያ ኪርስቶሳ ኣሳቴꬃ። ሄ ኢዛካ ኡባሶን ኡባ ሚሽ ኩንꬂዛ ሄ ኢዛ ኩሜꬃ። 
\c 2  
\s1 ኪርስቶሲ ፓፂ ዴንዲዴስ 
\p  
\v 1 ኢንቴ ኢንቴ ቆሂዳ ቆሆ ጊሺኔ ኢንቴ ናጋራ ጋሶን ሃይቂዴይታ ሺን፥  
\v 2 ሄሳ ኢንቴ ሃይሳ ኣላሜዛ ኢታ ኦጌ ካሊዴታ። ቦላ ጫርኮ ቦላ ዲዛ ዎልቃማ ሃሪዛይሳስ ሃዒካ ፆሳስ ኣዛዜቶንታ ኣሳ ቦላ ኦꬂዛ ኢታ ኣያናስ ኢንቴ ኣዛዜቲሼ ጋምዒዴታ።  
\v 3 ሃይሳፌ ካሴ ኑኒ ኑ ኣሾ ኣሞቴꬅ ፖሊሼ ኣሾይ ኮዪዛ ኦጌ ካሊሼ ኢስታራ ዶስ። ኑኒካ ሃንኮ ኣሳ ማላ ኑ ሜꬌቴꬃፌ ፆሳ ሃንቆ ጊዶን ዴዖስ። 
\p  
\v 4-5 ጊዶ ኣቲን ፆሲ ኬሂ ሲቂዳ ጊሽ ባ ማሮቴꬃ ዳሮን ኑኒ ኑ ቆሆ ዳሬቴꬃን ሃይቂዳይታ ጊዲ ዲሺን ኪርስቶሳ ባጋራ ኑና ኣሺዴስ። ኢንቴ ፓፂዳይ ኢዛ ኪያቴꬃና።  
\v 6 ፆሲ ኑና ኪርስቶሳራ ጋꬂ ዴንꬂዴስ። ዬሱስ ኪርስቶሳ ባጋራ ኑና ሳሎን ባናራ ኡቲሲዴስ።  
\v 7 ሄሲካ ሃይሳፌ ጉዬ ያና ዎዴዛን ዬሱስ ኪርስቶሲ ኑስ ባ ኪያቴꬃን ቆንጪሲዳ ዛዋይ ባይንዳ ባ ኪያቴꬃ ዱሬቴꬃ ኑና ቤሳናሳ።  
\v 8 ኢንቴ ፆሳ ኪያቴꬃን ኣማኖን ኣቲዴታ። ሄሲካ ፆሲ ኢንቴስ ሜላ ጮ ኢሚዳዛፔ ኣቲን ኢንቴ ኦሶፔ ጊዴና።  
\v 9 ኦኒካ ጬቄቶንታ ማላ ኦሶፔ ጊዴና።  
\v 10 ሄሲካ ፆሲ ካሴ ኮይሮ ጊጊሲ ዎꬂዳ ሎዖ ኦሶ ኑኒ ኦꬃና ማላ ዬሱስ ኪርስቶሳ ባጋራ ኑኒ ናምዓንꬆ ሜꬌቲዳይታኔ ፆሳ ሜꬌቴꬃታ። 
\s1 ኪርስቶሳን ቤቲዳ ኢሲፌቴꬅ 
\p  
\v 11 ሄሳ ጊሽ ኢንቴ ካሴ ኢንቴ ዬሌቴꬃን ኣይዛቤቲ ኢንቴ ኣሳቴꬃ ቦላ ኣሳ ኩሼ ኦሶ ጌዶን “ኑኒ ቃፃሬቲዶስ” ጊዛ ኣሳቲ ኢንቴና “ቃፃሬቶንታይታ” ጊዛይቶ! ኢንቴ ሄሳ ኣኔ ዎዝናን ዎꬂቴ።  
\v 12 ኢንቴ ሄ ዎዴ ኪርስቶሳፔ ሻኬቲዲ፥ ኢስራዔሌ ናይታፔ ሃኪዲ፥ ጫቆ ቃላሲካ ኣላጋ ጊዲዲ፥ ሃይሳ ኣላሜዛ ቦላ ሂዶታይኔ ፆሲ ባይንዳ ኢንቴ ካሴ ዲዛይሳ ዩሺ ቆፒቴ።  
\v 13 ሃዒ ቃሴ ኢንቴ ካሴ ሃሆን ዲዛይቲ ዬሱስ ኪርስቶሳን ጊዲዲ ኢዛ ሱꬃ ባጋራ ሺቂዴታ። 
\p  
\v 14 ናምዓታ ኢሲ ቦላ ጋꬂዲ ጊዶን ሻኪ ኦሺዛ ሚሻ ላሊዳ ኑ ሳሮይ ኢዛ።  
\v 15 ዎጋ፥ ዎጋ ኣዛዞራ ጋꬂ ኢሲፌ ባ ኣሾን ሻሪዴስ። ሄሳ ኢዚ ኦꬂዳ ጋሶይ ኢዛስ ዋና ቆፋይ ናምዓታፔ ኢሲ ኦራꬃ ኣስ ባ ባጋራ ሜꬊዲ ሳሮቴꬅ ኤሃናሳ።  
\v 16 ኢዚ ማስቃሌ ቦላ ሃይቂዲ ሞርኬቴꬅ ዲጊዴስ። ናምዓታካ ኢሲ ኣሾ ሂስቲዲ ፆሳራ ማቃዪንꬂዴስ። \x * \xo 2:16 \xt ቆላ 1፡20\x* 
\v 17 ኢዚ ዪዲ ኢንቴና ሃኪ ዲዛይታሲኔ ማታን ዲዛይታስ ጋꬂ ሳሮቴꬅ ሳባኪዴስ። \x * \xo 2:17 \xt ኢሳ 57፡19\x* 
\v 18 ኑ ዉሪካ ኢዛ ባጋራ ኢሲ ኣያናን ኣዋ ኣች ሺቃና። 
\p  
\v 19 ሄሳ ጊሽ ኢንቴ ኣማኒዛይታራ ኢሲፌ ኢሲ ዴሬ ኣሳኔ ፆሳስ ሶ ኣሳ ኣቲን ሃይሳፌ ጉዬ ቤቴታኔ ኢማꬃታ ጊዴኬታ።  
\v 20 ኢንቴ ሃዋሬታኔ ናቤታ ባሳን ኬፄቲዴታ፤ ኬꬃስ ዉርሴꬃ ኩሻይ ዬሱስ ኪርስቶሳ።  
\v 21 ኬꬃዚ ዉሪካ ኢሲፌ ኦይኬቲዲ ጎዳስ ዱማ ኬꬄ ጊዳናስ ዲጬስ።  
\v 22 ኢንቴንካ ፆሲ ባ ኣያናን ዳናስ ኢዛስ ዱሳሶ ጊዳና ማላ ኢሲፌ ኬፄቲሼ ዴታ። 
\c 3  
\s1 ኣይዛቤታስ ሃዋሬ ጊዲዳ ጳዉሎሳ 
\p  
\v 1 ሄሳ ጌዶን ታ ጳዉሎሲ ኢንቴስ ኣማኖንታይታ ጊሽ ዬሱስ ኪርስቶሲ ቃቺዳዴ ጊዳዲስ።  
\v 2 ታ ኢንቴና ጎዓና ማላ ፆሲ ኪያቴꬃን ታስ ኦሶስ ኤፃ ኢሚዳይሳ ኢንቴ ቱማፔ ሲዪዴታ።  
\v 3 ሃይሳፌ ካሴ ታ ኢንቴስ ቃንꬃራ ፃፊዳ ማላ ታስ ቆንጪን ታ ኤራናስ ዳንዳዪዳ ፁራይ ሃይሳ።  
\v 4 ሄሳ ጊሽ ኢንቴ ሄሳ ናባቢሼ ኪርስቶሳ ፁራ ታ ኣይ ማላ ኤሪዳኮኔ ኢንቴካ ኤራናስ ዳንዳዬታ።  
\v 5 ሄ ፁራይካ ሃዒ ኣማኒዛ ሃዋሬታሲኔ ናቤታስ ቆንጪዳ ማላ ካሴ ቤኒ ኣꬊዳ ዎዴ ዲዛ ኣሳታስካ ቆንጪቤና።  
\v 6 ሄሲ ሄ ፁራይ ኣይዛቤቲ ሚሺራቾ ቃላ ባጋራ ኢስራዔሌ ናይታራ ኢሲፌ ላቲዛይታ፤ ኢሲፌ ኢሳዴ ኣሳቴꬅ ማላ ጊዲዲ ዬሱስ ኪርስቶሳ ባጋራ ቤቲዳ ሂዶታ ኢሲፌ ጊሼቲ ላቲዛይታ ጊዳናሳ። 
\p  
\v 7 ታካ ኢዛ ዎልቃ ኦሶ ማላ ታስ ኢሜቲዳ ፆሳ ኪያቴꬃ ኢሞታ ማላ ሃይሳ ሚሺራቾ ቃላ ኦሳንቻ ጊዳዲስ።  
\v 8 ታ ቃስ ሃንኮ ኣማኒዛ ኣሳፔ ላፋ ጊዲኮካ ኦኒካ ዛዋይ ባይንዳ ኪርስቶሳ ዱሬቴꬅ ኣይዛቤታስ ሳባካና ማላ ፆሳ ኪያቴꬃን ሃይሲ ታስ ኢሜቲዴስ።  
\v 9 ሄሳꬆካ ዉርሲካ ሜꬊዳ ፆሳን ቤኒ ዎዴ ቆቴቲ ዲዛ ፆኦሳስ ፁራ ቆፋይ ኣዛኮኔ ኡባስ ታ ቆንጪሳና ማላ ታስ ፆሳ ኪያቴꬂ ኢሜቲዴስ።  
\v 10 ኢዛ ቆፋይ ሃዒ ዎዴ ዎሳ ኬꬃ ባጋራ ዱማ ዱማ ሜꬋይ ዲዛ ፆሳ ሂላቴꬂ ሳሎን ዲዛ ሃላቃታሲኔ ጎዳታስ ኤሬታና ማላ ሃኒዴስ። 
\p  
\v 11 ፆሲ ኑ ጎዳ ዬሱስ ኪርስቶሳ ባጋራ ሃይሳ ፖሊዳይ ሜርና ባ ቆፋ ማላ።  
\v 12 ኑኒ ኢዛይታ ጊዲዳ ጊሺኔ ኢዛን ኣማኒዳ ጊሽ ጌሻቴꬃራኔ ሂርጋይ ባይንዳ ኑኒ ፆሳኮ ሺቃና ዳንዳዮስ።  
\v 13 ሄሳ ጊሽ ኢንቴ ቦንቼታና ማላ ታኒ ኢንቴ ጊሽ ታ ቦላ ጋኪዳ ዋዬዛን ኢንቴ ኡፋይስ ቃንፆንታ ማላ ታ ኢንቴና ሃዳራ ጋይስ። 
\s1 ኤፌሶኔን ኣማኒዛ ኣሳስ ዎሴቲዳ ዎሳ 
\p  
\v 14 ሄሳ ጊሽ ታኒ ፆሳ ሲንꬃን ጉልባታይስ።  
\v 15 ሳሎን ዲዛይኔ ቢታ ቦላ ዲዛ ኢዛሶ ኣሳይ ዉሪካ ኢዚ ሱንꬂን ሱሜስ።  
\v 16 ኢንቴ ጋርሳ ባጋራ ሚናና ማላ ኣያና ባጋራ ኢዛ ቦንቾ ዱሬቴꬃይ ኢንቴስ ኢሜታና ማላ ታ ዎሳይስ።  
\v 17 ሄሲካ ኪርስቶሲ ኢንቴ ዎዝናን ኣማኖን ዳና ማላኔ ቃሴካ ኢንቴ ኢዛን ፃጲዲ ሲቆን ሚናና ማላ።  
\v 18 ኪርስቶሳ ሲቆስ ኣሆቴꬃይ፥ ኣዱሳቴꬃይ፥ ꬎቃቴꬃይኔ ጪማቴꬃይ ኣይ ጊናኮ ኢንቴ ኣማኒዛ ኣሳ ኡባራ ኢሲፌ ሻኪ ኤራና ማላ።  
\v 19 ኢንቴ ፆሳ ኩሜꬃራ ሻኪ ኤሪዲ ኢዛን ኩሜꬅ ጊዳና ማላ ኣሳ ኤራፔ ቦላ ጊዲዳ ኪርስቶሳ ሲቆ ኢንቴ ኤራና ማላ ታ ዎሳይስ።  
\v 20 ሄሳ ጊሽ ኑ ጊዶን ኦꬂዛ ባ ዎልቃ ጊና ኑ ዎሲዛይሳፌኔ ዎይኮ ኑ ቆፒዛይሳፌ ኡባፌ ቦላራ ኬሂ ዳርሲ ኦꬃናስ ዳንዳዪዛ ፆሳስ፥  
\v 21 ዎሳ ኬꬃን ቃሴካ ዬሱስ ኪርስቶሳ ባጋራ ዎዴ ኡባን ሜርናፔ ሜርና ጋካናስ ኢዛስ ቦንቾይ ጊዶ። ኣሚን። 
\c 4  
\s1 ኪርስቶሳ ባጋራ ቤቲዳ ኢሲፌቴꬅ 
\p  
\v 1 ሄሳ ጊሽ ጎዳ ሱንꬃን ቃሼቲዳ ታኒ ኢንቴ ፄይጌቲዳ ፄይሳስ ቤሲዛ ዱስ ዳና ማላ ኢንቴና ዎሳይስ።  
\v 2 ሙሌካ ኣሽኬታኔ ሹጎታ ጊዲቴ። ኢሶይ ኢሳራ ሲቆን ዲቴኔ ኢሶይ ኢሳ ዳንዳዪቴ። \x * \xo 4:2 \xt ቆላ 3፡12-13\x* 
\v 3 ሳሮቴꬅ ኢሚዛ ኣያና ኢሲፌቴꬅ ናጋናስ ሚኒቴ።  
\v 4 ኢንቴ ፄይጌቲዳ ጋላስ ኢሲ ሂዶታኮ ፄይጌቲዳ ማላ ኢሲ ኣሳቴꬂኔ ኢሲ ኣያናይ ዴስ።  
\v 5 ኢሲ ጎዳይ፥ ኢሲ ኣማኖይኔ ኢሲ ፂንቃታይ ዴስ።  
\v 6 ኡባፌ ቦላራ ጊዲዳይ፥ ኡባ ቦላ ኦꬂዛይ፥ ኡባሶን ዲዛይ፥ ኡባስ ኣዋ ጊዲዳ ኢሲ ፆሲ ዴስ። 
\p  
\v 7 ጊዲኮካ ኪርስቶሲ ኢማና ጊ ቃቺዳ ማላ ኑስ ኢሳስ ኢሳስ ዱማ ዱማ ኢሞቴꬂ ኢሜቲዴስ።  
\v 8 ሄሳ ጊሽ 
\q1 “ኢዚ ፑዴ ኬዚዳ ዎዴ ዲዖ ዲዒዴስ፤ 
\q2 ኣሳስ ኪያቴꬃ ኢሞታ ኢሚዴስ” 
\m ጌቴቲ ጌሻ ማፃፋን ፃፌቲዴስ። \x * \xo 4:8 \xt ማዛ 68፡18\x* 
\v 9 ሂስቲን “ኢዚ ፑዴ ኬዚዴስ” ጉሲ ቃሴካ ዱጌ ቢታ ጋርስ ዎꬊዴስ ጉስ ጊዶንታ ኣጊኮ ሄሲ ኣይ ጉሴ?  
\v 10 ኢዚ ዱጌ ጋርሴ ዎꬊዳይሲ ኩሜꬅ ኣላሜ ሜꬌቴꬅ ኩማና ማላ ሳሎፔካ ቦላ ኬዚዳይ ኢዛ። 
\p  
\v 11 ኢሲ ኢሲ ኣሳቲ ሃዋሬታ፥ ባጋቲ ናቤታ፥ ሃራቲ ሚሺራቾ ቃላ ሳባኬ፥ ባጋይቲ ቃሴ ሄሚዛይታኔ ታማርሲዛይታ ጊዳና ማላ ኢዚ ኢሞታ ኢሚዴስ።  
\v 12 ሄሲካ ኪርስቶሳ ኣሳቴꬅ ጊዲዳ ዎሳ ኬꬂያ ኬፄታና ማላ ኣማኒዛይታ ኣማኖ ኦሶስ ጊጊሳናሳ።  
\v 13 ሄሲካ ሃናናይ ኑ ዉሪካ ፆሳ ና ኣማኖኒኔ ኢዛ ኤሮን ቤቲዛ ኢሲፌቴꬃኮ ጋኪዲ ኩሜꬃ ኣስ ጊዳናስ ኪርስቶሳን ኑኒ ኪርስቶሳꬆ ኩሜꬂኔ ፖሎ ጊዳና ማላ። 
\p  
\v 14 ሄሳ ጊሽ ኣባ ቦላ ዴንዲዛ ጎቴ ጫርኮይ ሄኔ ሃ ሾጬቺዛ ማላ ዱማ ዱማ ቲሚርቴ ጫርኮን ኣሳ ጌኔኒኔ ባሌꬆን ኣኔ ኑኒ ሄኔ ሃ ጶንቄቲሼ ቄሪ ጉꬃ ናይታ ማላ ሃኖኮ።  
\v 15 ሄሳꬆ ሃኖ ኣጊዲ ቱማ ሲቆን ሃሳዪሼ ሁዔ ጊዲዳይሳኮ ሃኒዛዛን ኡባን ኣኔ ዲጮስ። ሄ ሁዔዚካ ኪርስቶሳ።  
\v 16 ኢዛ ጌዶን ኣሳቴꬂ ዉሪ ፃጶን ኦይኬቲዲ ኢሲ ኢሲ ኣሳቴꬂ ባ ኦሶ ኦꬂሼ ዉሪካ ሲቆን ዲጬሲኔ ባናካ ሚንꬄስ። \x * \xo 4:16 \xt ቆላ 2፡19\x* 
\s1 ፖዖ ናይታ ማላ ዱስ 
\p  
\v 17 ኣይዛቤታ ማላ ጮ ሜላ ቆፋን ሜላ ሲሜሬታናስ ኢንቴስ ቤሴና ጋዳ ታ ኢንቴና ዞራይስ።  
\v 18 ኢስታ ዎዝናይ ሙሚዳ ጊሺኔ ዩሺ ቆፖንታ ጊሽ ኢስታ ዎዝና ኣይፌይ ቆቂዴስ። ኢስቲ ፆሳ ዴዖፔ ሻኬቲዳ።  
\v 19 ኢስታ ዎዝናይ ዶጪዳ ጊሽ ካሎይ ባይንዳ ባ ኮይዳ ማላ ባና ካልꬆንታ ኣሞኒኔ ቱናቴꬃን ዳናስ ዎጋይ ባይንዳ ኢታ ኦሶስ ባና ኣꬂ ኢሚዳ። 
\p  
\v 20 ኢንቴ ቃሴ ኪርስቶሳ ሄሳ ማላን ኤሪቤይኬታ።  
\v 21 ኤ ቱሙካ ኢንቴ ኢዛ ጊሽ ሲዪዴታኔ ዬሱሳን ዲዛ ቱማ ኢዛፔ ታማሪዴታ።  
\v 22 ኢንቴ ካሴ ዲዛ ዱሳይ ባሌꬂዛ ኣሞን ቂታቲዳ ጊሽ ካሴ ጬጋ ኣሳቴꬅ ኢንቴፌ ቃሪ ዬጋና ማላ ታማሪዴታ። \x * \xo 4:22 \xt ቆላ 3፡9\x* 
\v 23 ቃሴካ ኢንቴ ቆፋይ ኣያናን ኦራፆ።  
\v 24 ቱሙ ፂሎቴꬃኒኔ ጌሻቴꬃን ፆሴ ሚሳታና ሜꬌቲዳ ኦራꬃ ኣሳቴꬅ ማይዒቴ። \x * \xo 4:24 \xt ቆላ 3፡10\x* 
\p  
\v 25 ኑ ዉሪካ ኢሲ ኣሾ ጊዲዳ ጊሽ ዎርዶቴꬅ ዲጊዲ ኑኒ ኑ ጋርሳን ኢሶይ ኢሳራ ኣኔ ቱማ ሃሳዮስ። \x * \xo 4:25 \xt ዛካ 8፡16\x* 
\v 26 ሃንቄቲቴ ሺን ናጋራ ኦꬆፍቴ፤ ኢንቴ ሃንቆን ዲሺን ኣዋ ኣርሼይ ዉሎፎ። \x * \xo 4:26 \xt ማዛ 4፡4\x* 
\v 27 ፃላዔስ ሶሆ ኢሞፍቴ።  
\v 28 ካሴ ካይሶቲዛዴይ ሃይሳፌ ጉዬ ካይሶቶፓ። ጊዶ ኣቲን ሜቶቴቲዲ ኢዛ ዎሲዛይታስ ኢሚዛ ሚሽ ኢዛ ኩሼን ዳና ማላ ሎዖ ሚሽ ባ ኩሼራ ኦꬂ ዴማናስ ዳቡሮ። 
\p  
\v 29 ኮሺዛ ማላ ሃንኮ ሲዪዛይታ ጎዒዛዚኔ ማዲዛ ቃላፔ ኣቲን ጎዖይ ባይንዳ ቃላይ ኢንቴ ዱናፔ ኬዞፖ።  
\v 30 ኢንቴ ኣታና ጋላሳስ ኣታሜቲዳ ፆሳ ፂሎ ኣያና ሚሺሶፒቴ።  
\v 31 ጫሞ ዮዖ ዉርሲ ሃንቆካ፥ ዪሎ፥ ኦሽ፥ ጫሼ፥ ቃሴካ ሃንኮ ሃራ ኢታቴꬅ ዉርሲ ኢንቴፌ ዲጊቴ።  
\v 32 ኢንቴና ፆሲ ኪርስቶሳ ባጋራ ኣቶ ጊዳ ማላ ኢንቴካ ኢንቴ ጋርሳን ኣቶ ኣቶ ጌቴቲቴ፤ ኢሶይ ኢሳራ ኪያታኔ ኢሶይ ኢሳስ ቃꬌቲዛይታ ጊዲቴ። \x * \xo 4:32 \xt ቆላ 3፡13\x* 
\c 5  
\p  
\v 1 ሄሳ ጊሽ ኢንቴ ዶሴቲዛ ናይታ ማላ ፆሴ ሚሳቲቴ።  
\v 2 ኪርስቶሲ ኑና ሲቂዳ ማላ ቃሴካ ኑ ጊሽ ባና ሳዊዛ ያርሾ ኦꬅ ፆሳስ ኢሚዳ ማላ ኢንቴካ ሲቆን ሲሜሬቲቴ። \x * \xo 5:2 \xt ኬሳ 29፡18፤ ማዛ 40፡6\x* 
\p  
\v 3 ላይማይ ዎይኮ ቱናቴꬂ ዎይኮ ኡዜቴꬂ ሙሌካ ኢንቴ ጊዶን ቤቶይ ኣቲን ዚጊርሲካ ሲዬቶፎ። ሄሳ ማላይ ጌሻ ፆሳ ኣሳስ ቤሴና።  
\v 4 ኢንቴ ጋላታ ጋላቲዛይታ ጊዲቴ ኣቲን ኣሴ ዬላቺዛ ላፋ ሃሳያይ ጮ ኤያቴꬃ ዮዖይ ኢንቴስ ቤሶንታ ጊሽ ሄሳ ማላይ ኢንቴ ጋርሳን ዶፖ።  
\v 5 ቃሴካ ኢንቴ ላይማቲዛይታስ ዎይኮ ቱናታስ ዎይኮ ኡዜቲዛይታሲኔ ኤቃስ ጎይኒዛይታስ ኪርስቶሳ ካዎቴꬃኒኔ ፆሳ ካዎቴꬃን ኢስታስ ላታሶይ ባይንዳይሳ ኢንቴ ኤሪቴ። 
\p  
\v 6 ኢንቴና ኦኒካ ዎርዶ ሃሳዮን ባሌꬆፎ። ጋሶይካ ፆሳ ሃንቆይ ኢዛስ ኣዛዜቶንታ ናይታ ቦላ ያናይ ሃይታንታ ማላና።  
\v 7 ሄሳ ጊሽ ሄሳንታ ማላራ ዙፔቶፒቴ።  
\v 8 ካሴ ኢንቴ ꬉማ ሺን ጎዳን ሃዒ ኢንቴ ፖዖ። ኢንቴ ፖዖ ናይታ ማላ ዲቴ።  
\v 9 ፖዖስ ኣይፌይ ሎዔቴꬃን፥ ፂሎቴꬃኒኔ ቱማቴꬃን ኡባን ዴስ። 
\p  
\v 10 ሄሳꬆካ ጎዳ ኡፋይሲዛ ሚሽ ኮዪቴ።  
\v 11 ኣይፌይ ባይንዳ ꬉማ ኦሶራ ኢንቴስ ኣይኮ ጋጎቴꬂ ዶፖ። ሄሳፌ ኢታ ኦሶ ቆንጬ ኬሲቴ።  
\v 12 ꬉማን ዲዛ ኣሳቲ ጌማን ኦꬂዛ ሚሻ ጊሽ ሃሳያይካ ዬላቼስ።  
\v 13 ፖዖይ ፖዒዳዚ ዉሪ ቆንጬን ቤቴስ።  
\v 14 ጋሶይካ ዉርሲ ቤሲዛይ ፖዖ። ሄሳ ጊሽ “ኔኖ፥ ꬊስኪዛይሶ ቤጋ! ሃይቆፔ ዴንዳ፥ ኪርስቶሲ ኔስ ፖዒሳና” ጌቴቲዴስ። 
\p  
\v 15 ሄሳ ጊሽ ኤራቴꬂ ባይንዳይታ ማላ ጊዶንታ ኢንቴ ዋኒዲ ኤራታ ማላ ዳናኮኔ ናጌቲቴ።  
\v 16 ሃይሲ ዎዴዚ ኢታ ጊዲዳ ጊሽ ሄሳ ሎዔꬂ ኤሪቴ። \x * \xo 5:16 \xt ቆላ 4፡5\x* 
\v 17 ሄሳ ጊሽ ኤያታ ጊዶፒቴ፤ ጎዳ ሼኔይ ኣዛኮኔ ዩሺ ቆፒቴ። 
\p  
\v 18 ኣያናይ ኩሚዳይታ ጊዲቴ ኣቲን ማꬆሲዛ ኡሻን ማꬆቶፍቴ። ሄሲ ሜላ ሚሻ ላሌꬃ።  
\v 19 ኣያና ዬꬃን ጋላታራ ጋꬂ ዬፂሼ ኢንቴ ጊዶን ኢሶይ ኢሳራ ሃሳዬቲቴ። ኢንቴ ሳባኒኔ ዬꬃን ኩሜꬃ ዎዝናፔ ጎዳ ጋላቲቴ።  
\v 20 ሄሳን ፆሳ ኣዋ፥ ጎዳ ዬሱስ ኪርስቶሳ ሱንꬃ ኡባ ሚሻስ ኡባ ዎዴ ጋላቲቴ። 
\s1 ማቾኔ ኣዚና 
\p  
\v 21 ኢንቴ ኪርስቶሳ ቦንቾስ ጊዲ ያሻራ ኢሶይ ኢሳስ ኣዛዜቲቴ። 
\p  
\v 22 ማቼቶ ኢንቴ ጎዳስ ሃሬቲዛ ማላ ኢንቴ ኣዚናታስ ሃሬቲቴ። \x * \xo 5:22 \xt ቆላ 3፡18፤ 1ጴፅ 3፡1\x* 
\v 23 ኪርስቶሲ ባ ኣሾ ጊዲዳ ዎሳ ኬꬃይስ ሁዔ ጊዲዳ ማላ ኣዚናይካ ባ ማቼይሲ ሁዔ።  
\v 24 ሄሳ ጊሽ ዎሳ ኬꬂያ ኪርስቶሳስ ኣዛዜቲዛ ማላ ማቼቲካ ባ ኣዚናታስ ኣይ ሃኖንካ ኣዛዜታናስ ቤሴስ። 
\p  
\v 25 ኣዚናቶ! ኪርስቶሲ ዎሳ ኬꬃዮ ሲቂዳ ማላኔ ባና ኢዚ ጊሽ ኣꬂ ኢሚዳ ማላ ኢንቴካ ኢንቴ ማቼታ ሲቂቴ። \x * \xo 5:25 \xt ቆላ 3፡19፤ 1ጴፅ 3፡7\x* 
\v 26 ባ ቃላ ባጋራ ሃꬃን ሜጪ ጌሺዲ ኤራይስ ዱማሲዳ ማላ።  
\v 27 ሄሳꬆካ ቂታይ ዎይኮ ኣይፌሶ ፂርጶቴꬂ ዎይኮ ኢሲ ኢታይ ኢዚ ቦላ ቤቶንታ ጌሺኔ ባላይ ኢዚ ቦላ ባይንዳሮ ቦንቾ ዎሳ ኬꬄ ሂስቲዲ ኤራይስ ሺሻናሳ።  
\v 28 ኣዚናቲካ ሄሳꬆ ባ ማቼታ ባ ኣሾ ማላ ሲቃናስ ቤሴስ። ባ ማቾ ሲቂዛዴይ ባና ሲቄስ።  
\v 29 ባርካ ባና ኢፂዛዴይ ኦኒካ ባዋ። ባ ኣሾስ ሜሲኔ ባና ናጌስ። ኪርስቶሲካ ዎሳ ኬꬃስ ሂኒꬆ ኦꬂዴስ።  
\v 30 ኑኒ ኪርስቶሳ ኣሳቴꬃ።  
\v 31 ሄሳ ጊሽ “ኣሲ ኣዮኔ ኣዋ ኣጊዲ ባ ማቼይራ ኢሲኖ ጊዴስ፤ ናምዓይካ ኢሲ ኣሾ ጊዴቴስ” ጌቴቲ ጌሻ ማፃፋን ፃፌቲዴስ። \x * \xo 5:31 \xt ሜꬌ 2፡24\x* 
\v 32 ሃይሲ ዳሮ ፁራ ዮዖ፥ ታካ ሃይሳ ኪርስቶሳ ጊሺኔ ዎሳ ኬꬃ ጊሽ ዮታይስ።  
\v 33 ጊዲኮካ ኢንቴፌ ኢሲ ኢሳዴይ ባ ማቾ ባና ሲቂዛ ማላ ሲቆ፤ ማቻካ ባ ኣዚና ቦንቹ። 
\c 6  
\s1 ዬሊዳይታኔ ናይታ 
\p  
\v 1 ናይቶ! ኢንቴ ኢንቴና ዬሊዳይታስ ጎዳን ኣዛዜቲቴ። ሄሲ ኢንቴስ ቤሴስ። \x * \xo 6:1 \xt ቆላ 3፡20\x* 
\v 2 “ኔ ኣዋኔ ኔ ኣዪዮ ቦንቻ” ጊዛ ኣዛዞ ጊዶን ዲዛ ሂዶታይ ኮይሮ ኣዛዞ።  
\v 3 ኔ ሄሳꬆ ኦꬂኮ ኔስ ሎዓናኔ ኔስ ላይꬃይ ቢታ ቦላ ኣዱቃና።  
\v 4 ዬሊዳይቶ! ኢንቴካ ኢንቴ ናይታ ሃንቄꬆፍቴ፤ ጊዶ ኣቲን ኢንቴ ናይታ ጎዳ ዞሬኒኔ ሴራን ዲቺቴ። \x * \xo 6:4 \xt ቆላ 3፡21\x* 
\s1 ኦꬂሲዛይታኔ ኦꬂዛይታ 
\p  
\v 5 ኦሳንቻቶ ኢንቴ ኪርስቶሳስ ኣዛዜቲዛ ማላ ቢታ ቦላ ኢንቴና ኦꬂሲዛይታስ ያሻቴꬃኒኔ ቦንቾን ሱሬ ዎዝናፔ ኣዛዜቲቴ።  
\v 6 ጮ ኣሳ ኣይፌን ቤታና ማላኔ ኦꬂሲዛይታፔ ዱና ኣንጆ ኤካናስ ጊዶንታ ኢንቴ ኪርስቶሳ ኣይሌታ ማላ ፆሳ ሼኔ ኩሜꬃ ዎዝናፔ ፖላና ማላ ዎዝናፔ ኣዛዜቲቴ።  
\v 7 ኣሳስ ኦꬂዛ ማላ ጊዶንታ ጎዳስ ኦꬂዛ ማላ ኢንቴ ኩሜꬅ ዎዝናፔ ኦꬂቴ።  
\v 8 ጋሶይካ ኣይሌ ጊዲን ዎይኮ ጎዳ ጊዲን ባ ኦꬂዛ ሎዖ ኦሶስ ኡባስ ዎይቶ ኤካናይሳ ኢንቴ ኤሬታ። 
\p  
\v 9 ኢንቴኖ ጎዳቶ! ኢንቴካ ኢንቴ ኦꬂሲዛይታስ ሄሳꬆ ኦꬂቴ። ኢስታሲኔ ኢንቴስ ጎዳ ጊዲዳይ ቦላ ሳሎን ዲዛይሳ፤ ኢዚካ ኣስ ኣይፌሶ ፄሊ ማዶንታይሳካ ኢንቴካ ኤሪዛ ጊሽ ኦሳንቻታ ባቢሶ ኣጊዲ ሎዖ ኦꬂቴ። \x * \xo 6:9 \xt ቆላ 4፡1፤ ዛሬ 10፡17፤ ቆላ 3፡25\x* 
\s1 ፆሳፌ ቤቲዛ ኦላ ሚሽ 
\p  
\v 10 ሃራ ባጋራ ሚኖ ጎዳኒኔ ኢዛ ጊታ ዎልቃን ሚኒቴ።  
\v 11 ዳቡሎሳ ጌኔ ኦሶ ኢንቴ ኤቄታናስ ዳንዳያና ማላ ፆሳ ኦላ ማይዖታ ማይቴ።  
\v 12 ጋሶይካ ኑ ኦሌታናይ ኣሾራኔ ሱꬃራ ጊዶንታ ሃይሳ ꬉማ ኣላሜዛ ሃሪዛ ጎዳታራኔ ዎልቃማታራ ቃሴካ ሳሎ ቦላ ዲዛ ቱና ኣያና ኦላንቻታራ ኦሌቶስ።  
\v 13 ኢታ ጋላሳይ ጋኪሺን ኢንቴ ሞርኬ ዎልቃራ ኤቄታናስ ዳንዳያና ማላ ፆሳ ኦላ ማይዖታ ኩሜꬅ ማይዒቴ። ኢንቴ ኡባካ ፖሊዳፔ ጉዬ ሚኒ ኤቃናስ ዳንዳዬታ። 
\p  
\v 14 ሄሳ ጊሽ ኢንቴ ፄሳን ቱማ ዚናሬ ማላ ዳንጬቲዲ ፂሎቴꬃ ፁሩሬታ ማላ ቲራን ማይዒዲ፥\f + \fr 6:14 \ft ፁሩሬ ጉሲ ቤኒ ዎዴ ኦላ ኣሳቲ ቲራን ማይዒዛ ኦላ ማይዖ።\f*\x * \xo 6:14 \xt ኢሳ 11፡5፤ 59፡17\x* 
\v 15 ሳሮቴꬃ ሚሺራቾ ቃላ ቶሆን ጫማ ማላ ኣꬂዲ ጊጌቲ ኤቂቴ። \x * \xo 6:15 \xt ኢሳ 52፡7\x* 
\v 16 ሄይታንታፌካ ቦላራ ታማ ማላ ፖፖልዑ ጊዛ ኢታ ኣያና ዎንዳፌታ ኢንቴ ዉርሲ ቶይሳና ዳንዳያና ማላ ኣማኖ ጎንዳሌ ማላ ዴንꬂቴ።  
\v 17 ኣቶቴꬅ ቢራታ ቆቤ ማላ ሁዔን ዎꬂቴ። ኣያና ጊꬃ ማሻ ኦይኪቴ፤ ሄሲካ ፆሳ ቃላ። \x * \xo 6:17 \xt ኢሳ 59፡17\x* 
\p  
\v 18 ዎሳን ኣይ ሃኖንካ ኣያናን ዎሲቴ። ሄሳ ቆፒዲ ቤጊቴ፤ ኣማኒዛይታ ኡባ ጊሽ ቃንፆንታ ዎኣሲቴ።  
\v 19 ታኒ ሚሺራቾ ቃላ ፁራ ኣሳስ ቆንጪሳናስ ዱና ዶዪዛ ኡባ ዎዴ ያሺ ባይንዳ ታ ፃላቴꬃን ዮታና ቃላይ ታስ ኢሜታና ማላ ታስ ዎሲቴ።  
\v 20 ታኒ ሚሺራቾ ቃላ ጊሽ ሳንሳላታን ቃሼታዳ ኪቴቲዳዴ ጊዲዳይ ሄሳሳ። ሄሳ ጊሽ ታ ዮታናስ ቤሲዛይሳ ባቦንታ ዮታና ማላ ታስ ዎሲቴ። 
\s1 ዉርሴꬃ ሳሮካ 
\p  
\v 21 ታ ኣይ ማላ ዲዛኮኔ ኣይ ኦꬂዛኮ ኢንቴ ኤራና ማላ ዶሴቲዳ ታ ኢሻይ ጎዳስ ኣማኔቲዳ ኦሳንቻይ ቲቂቆሲ ኢንቴስ ሃኒዳይሳ ዉርሲካ ኢንቴስ ዮታና። \x * \xo 6:21 \xt ሃዋ 20፡4፤ 2ፂም 4፡12\x* 
\v 22 ኢንቴ ኑ ሃኖቴꬅ ኤራና ማላኔ ኢንቴ ዎዝና ኢዚ ሚንꬄꬃና ማላ ታ ኢዛ ኢንቴኮ ዬዳዲስ። \x * \xo 6:22 \xt ቆላ 4፡7-8\x* 
\p  
\v 23 ኣዋ ፆሳፌ፥ ጎዳ ዬሱስ ኪርስቶሳፔ ሳሮቴꬂኔ ሲቆይ ኣማኖራ ኢንቴስ ታ ኢሻታስ ጊዶ።  
\v 24 ጎዳ ዬሱስ ኪርስቶሳ ፓጬይ ባይንዳ ሲቂዛ ኡባስ ሳሮቴꬂ ጊዶ። ኣሚን።