\id 2TH - Gaammo project 
\h 2 ታሶሎንቄ 
\toc1 ጳዉሎሲ ታሶሎንቄ ኣሳስ ፃፊዳ ናምዓንꬆ ኪታ 
\toc2 2 ታሶሎንቄ 
\toc3 2ታሶ 
\mt2 ጳዉሎሲ 
\mt1 ታሶሎንቄ ኣሳስ 
\mt2 ፃፊዳ ናምዓንꬆ ኪታ 
\imt1 ጊዶ ቆፋ 
\ip ኪርስቶሲ ናምዓንꬆ ያናይሳ ጊሽ ኦይሾይኔ ኦሺ ዴንዲዳ ጊሽ ታሶሎንቄ ዎሳ ኬꬃ ጋርሳን ሜቶይ ዳሪ ዳሪ ቢዴስ። ጳዉሎሲ ታሶሎንቄ ኣሳስ ፃፊዳ ናምዓንꬆ ኪታይ “ጎዳ ዩሳ ጋላሲ ማቲዴስ” ጊዛ ኣማኖ ቃላ ቲሺ ሂስቲ ዮቲዴስ። ጳዉሎሲ ፃፊሼ ኪርስቶሲ ያናፔ ካሴቲዲ “ማካላ ኣስ” ጌቴቲዛዴይ ኪርስቶሳራ ኤቄቲዛዴይ ባሌꬆን ሃይሳ ኣላሜዛ ቦላ ኢታቴꬂኔ ማካላይ ዳሪ ዳሪ ባና ጉሳን ኢስታ ኣማኖ ጊጊሳናስ ዳፌቴስ። 
\ip ናባቢዛይቲ ዋዬይኔ ሜቶይ ኢስታ ቦላ ዳሪኮካ ኢስቲ ባ ኣማኖን ሚኒ ኤቃና ማላ ጳዉሎሲኔ ሃራቲ ኢዛራ ኢሲፌ ኦꬂዛይቲ ኦꬂዛ ማላ ኢስቲካ ባ ዱሳስ ኮሺዛይሳ ዴማናስ ሚኒ ኦꬃና ማላኔ ሎዖ ኦሶ ኦꬃናስ ኣዛሎንታ ማላ ኢስታ ሎዔꬂ ዞሬስ። 
\is1 ሃ ማፃፋይ ኦይኪዳ ኩሜꬃ ቆፋ 
\io1 ጌሎሶ 1፡1-2 
\io1 ጋላታኔ ሃዳራ ኢሞ 1፡3-12 
\io1 ኪርስቶሲ ናምዓንꬆ ያናይሳ ጊሽ ኢሜቲዳ ቲሚርቴ 2፡1-17 
\io1 ኣማኖን ዱሳ ጊሽ ኢሜቲዳ ዞሬ 3፡1-15 
\io1 ኩሻ ቆፋ 3፡16-18 
\c 1  
\p  
\v 1 ጳዉሎሳፔ፥ ሲልዋኖሴፔኔ ፂምቶሳፔ፤ ኑ ኣዋ ፆሳኒኔ ጎዳ ዬሱስ ኪርስቶሳን ጊዲዳ ታሶሎንቄን ኣማኒዛ ኣሳስ። \x *- \xo 1:1 \xt ሃዋ 17፡1\x* 
\v 2 ፆሳ ኣዋፔኔ ጎዳ ዬሱስ ኪርስቶሳፔ ኪያቴꬂኔ ሳሮቴꬅ ኢንቴስ ጊዶ። 
\s1 ጋላታኔ ዎሳ 
\p  
\v 3 ታ ኢሻቶ! ኢንቴ ኣማኖይ ዎዴፔ ዎዴን ዲጪ ዲጪ ቢዛ ጊሺኔ ኢንቴ ሲቆይካ ካሴፔ ጉጄቲ ጉጄቲ ቢዛ ጊሽ ኑ ኢንቴ ጊሽ ፆሳ ሎዔꬂ ጋላታናስ ቤሴስ።  
\v 4 ሄሳ ጊሽ ኢንቴ ቦላ ጋኪዳ ጎዴቴꬃኒኔ ሜቶ ኡባን ኢንቴ ሚኒዳ ጊሽ ኑኒ ኑ ባጋራ ኢንቴ ዳንዳያ ጊሺኔ ኢንቴ ኣማኖ ጊሽ ኣማኒዛ ኣሳ ኡባ ኣቻን ጬቄቶስ። 
\p  
\v 5 ሄሲ ዉሪካ ፆሳ ፒርዳይ ሱሬ ጊዲዳይሳ ቤሴስ። ሄሳ ጌዶን ዋዬ ቤዪዛ ኢንቴ ፆሳ ካዎቴꬃስ ቤሲዛይታ ጊዲ ቤቲዴታ።  
\v 6 ፆሲ ፂሎ ጊዲዳ ጊሽ ኢንቴና ዋይሲዛይታ ኢዚ ዋይሳና።  
\v 7 ዋዬ ኤኪዳ ኢንቴሲኔ ኑስ ሼምፖ ኢማና። ሄሲካ ጎዳ ዬሱስ ኪርስቶሲ ዎልቃማ ሳሎ ፆሳ ኪታንቻታራ ሳሎ ቦላ ቆንጪዛ ዎዴ ሃናና።  
\v 8 ሄ ዎዴ ፆሴ ኤሮንታ ኣሳታኔ ጎዳ ዬሱስ ኪርስቶሳ ሚሺራቾ ቃላስ ኣዛዜቶንታ ኣሳታ ቦላ ኢዚ ባ ሃሎ ላጮ ታማን ኬሳና። \f + \fr 1:8 \fq ላጮ ታማን \ft ጊዛይሲ ኢሲ ኢሲ ቃላ ቢርሼꬃታን ፃፌቲቤና።\f* 
\v 9 ኢስቲካ ጎዳ ሲንꬃፌኔ ኢዛ ቦንቾ ዎልቃ ኣቻፌ ኪቺዲ ሜርናስ ꬋዮን ቃፃዬታና። \x * \xo 1:9 \xt ኢሳ 2፡10\x* 
\v 10 ኢስቲ ቃፃዬታናይ ኢዚ ጌሻታ ኣቻን ቦንቼታናሲኔ ኣማኒዛይቲ ዉሪ ኢዛን ማላሌታና ማላ ኢዚ ዪዛ ጋላሳን ሃናና። ኢንቴካ ሄ ኣማኒዛ ኣሳራ ዳና፤ ጋሶይካ ኑ ኢንቴስ ማርካቲዳይሳ ኢንቴ ኣማኒዳ ጊሻሳ። 
\p  
\v 11 ኑ ሄሳ ቆፒሼ ኑ ፆሲ ኢንቴና ባ ፄይሳስ ጊዲዛይታ ሂስቲ ቆዳና ማላ ኢንቴ ሎዖ ኦꬃናስ ኣሞቲዛ ኣሞዛኔ ኣማኖን ኢንቴ ኦꬂዳ ኦሶዛ ዉርሲ ኢዚ ኢንቴስ ባ ዎልቃን ፖላና ማላ ኑ ኢንቴስ ኡባ ዎዴ ዎሶስ።  
\v 12 ቃሴካ ኑ ጎዳ ፆሳኔ ኑ ጎዳ ዬሱስ ኪርስቶሳ ኪያቴꬃ ማላ ዬሱስ ኪርስቶሳ ሱንꬂ ኢንቴ ኣቻን ቦንቼታና ማላኔ ኢንቴካ ኢዛን ቦንቼታና ማላ ኑ ኢንቴስ ዎሶስ። 
\c 2  
\s1 ማካላ ኣስ 
\p  
\v 1 ታ ኢሻቶ! ጎዳ ዬሱስ ኪርስቶሳ ዩሳ ጊሺኔ ኑ ኢዛኮ ባና ቡሳ ጊሽ ኑ ኢንቴና ቆፊሶስ። \x * \xo 2:1 \xt 1ታሶ 4፡15-17\x* 
\v 2 ኣያናይ ቆንጪሲዴስ ዎይኮ ቃላይ ጌስ ጊዲ ዎይኮ ኑፔ ኢንቴስ ኪቴቲዳ ኪታ ማላ “ጎዳ ዩሳ ጋላስ ጋኪዴስ” ጊዲ ኢንቴ ቆፋን ያርክ ያርኮፊቴኔ ዳጋሞፍቴ።  
\v 3 ኦኒካ ኣይ ሃኖንካ ኢንቴና ባሌꬆፎ። ዳሮ ኣሳይ ኣማኖ ካዳናፔ ሲንꬄ ꬋያናስ ቤሲዛ ኢሲ ማካላ ኣሲ ቆንጮንታ ዲሺን ሄ ጋላሳይ ጋኬና።  
\v 4 ኢዚካ ፆሴ ጌቴቲ ጎይኔቲዛ ኤቃ ፆሳታ ኡባፌ ቦላራ ባና ꬎቁ ꬎቁ ሂስቲዛዴኔ ፆሳራ ኤቄቲዛዴ። ኢዚካ ፆሳ ኬꬃን ኡቲዲ ባና “ታኒ ፆሳ” ጊዲ ኣዋጃ ኣዋጂሳና። \x * \xo 2:4 \xt ሂዚ 28፡2\x* 
\p  
\v 5 ታ ኢንቴናራ ዲዛ ዎዴ ሃይታ ሃ ዮዖታ ኢንቴስ ታ ዮቲዳይሲ ኢንቴስ ቆፌቲዜሻ?  
\v 6 ኢዚ ባ ዎዴን ቆንጫና ጋካናስ ሃዒ ኢዚ ቆንጮንታ ማላ ኣዚ ዲጊዛኮኔ ኢንቴ ኤሬታ። 
\p  
\v 7 ማካላንቻ ፁራይ ሃራይ ኣቶሺን ሃዒካ ኦሶ ቦላ ዴስ። ጊዶ ኣቲን ሃይሲ ሃናናይ ኢዚ ሃዒ ኦꬆንታ ማላ ኢዛ ዲጊዛዴይ ኢዛ ኦጌፔ ኪቻና ጋካናስ ፃላ።  
\v 8 ሄሳፌካ ካሊዲ ጎዳ ዬሱሲ ባ ዱና ፔኖኒኔ ባ ቦንቾ ዩሳን ꬋይሳና፤ ማካላንቻይ ቆንጫና። \x * \xo 2:8 \xt ኢሳ 11፡4\x* 
\v 9 ሄ ማካላንቻ ዩሲ ፃላዔ ዎልቃን ሄሲካ ኣስ ባሌꬂዛ ማላታታኒኔ ማላሊሲዛ ሚሻታን ሃናና። \x * \xo 2:9 \xt ማቶ 24፡24\x* 
\v 10 ሄሳꬆካ ኤኪዲ ኣቶንታ ማላ ቱማ ኢፂዲ ꬋዪዛ ኣሳታ ባሌꬃናስ ዱማ ዱማ ኢታ ኦሶይ ያና።  
\v 11 ሄሳ ጌዶን ኢስቲ ዎርዶ ዮዖ ኣማናና ማላ ፆሲ ኢስታ ቦላ ባላ ኦሶ ኪታና።  
\v 12 ሄሲ ሃናናይ ቱማ ኣማኖንታ ኢፂዲኔ ዎርዶ ዮዖን ኡፋዬቲዛይቲ ዉሪ ፒርዴታናሳ። 
\s1 ሚኒ ኤቂቴ 
\p  
\v 13 ጎዳን ዶሴቲዳ ታ ኢሻቶ! ኑ ጊዲኮ ኡባ ዎዴ ኢንቴ ጊሽ ፆሴ ጋላታናስ ኑስ ቤሴስ። ጋሶይካ ፆሲ ኢንቴና ኮይሮፔ ኦይኪዲ ኢንቴ ፂሎ ኣያናን ዱማቲዳይታኔ ቱሙ ኣማኒዲ ኢንቴ ኣታና ማላ ኢንቴና ዶሪዴስ።  
\v 14 ኑ ጎዳ ዬሱስ ኪርስቶሲ ቦንቾ ጊሼቲዛይታ ኢንቴ ጊዳና ማላ ኑ ዮቲዳ ሚሺራቾ ቃላ ባጋራ ኢንቴና ፄይጊዴስ።  
\v 15 ሄሳ ጊሽ ታ ኢሻቶ! ኢንቴ ሚኒ ኤቂቴ፥ ኑ ኑ ዱናን ጊዲን ዎይኮ ኪታን ዎይኮ ኑ ኢንቴስ ኣꬂ ዬዲዳ ቲሚርቴዛ ሎዔꬂ ኦይኪቴ። 
\p  
\v 16 ኢዚ ኑ ጎዳ ዬሱስ ኪርስቶሲ ቃሴ ኑና ሲቂዳይኔ ባ ኪያቴꬃን ሜርና ሚንꬄꬆኔ ሎዖ ሂዶታ ኢዚ ኑስ ኢሚዳ ኑ ኣዋ ፆሳይ፥  
\v 17 ኢዚ ኢንቴ ዎዝና ሎዖ ኦሶኒኔ ቃላን ሚንꬆ። 
\c 3  
\s1 ዎሳ ጊሽ ሺቂዳ ኦይሾ 
\p  
\v 1 ዉርሴꬃን ታ ኢሻቶ! ቃሴካ ጎዳ ቃላይ ኢንቴ ኣቻን ሃኖይሳꬆካ ኤሌሊ ኡባሶ ጋካና ማላኔ ቦንቼታና ማላ ኑስ ዎሲቴ።  
\v 2 ቃሴካ ኣሲ ዉሪ ኣማኒዛይሳ ጊዶንታ ጊሽ ማካላንቻታፔኔ ኢታ ኣሳታፔ ኑ ኣታና ማላ ኑስ ዎሲቴ።  
\v 3 ጎዳይ ጊዲኮ ኣማኔቲዳይሳ። ኢዚካ ኢንቴና ሚንꬃና፤ ፃላዔፓካ ኢንቴና ናጋና።  
\v 4 ኑ ኢንቴና ኣዛዚዳይሳ ኢንቴ ሃዒ ኦꬂዴታ ሺን ሲንꬃፌካ ኢንቴ ኦꬃናይሳ ኑኒ ጎዳን ኣማኔቶስ።  
\v 5 ጎዳይ ኢንቴ ዎዝና ፆሳ ሲቆኮኔ ኪርስቶሳ ዳንዳያኮ ካሌꬆ። 
\s1 ኦሶ ኦꬃና ማላ ኢሜቲዳ ዞሬ 
\p  
\v 6 ታ ኢሻቶ! ኦሶ ኦꬆንታ ኣሳፔኔ ኢንቴ ኑፔ ኤኪዳ ቲሚርቴዛ ማላ ዶንታ ኣማኒዛይታፔ ኢንቴ ሃካና ማላ ጎዳ ዬሱስ ኪርስቶሳ ሱንꬃን ኢንቴና ኑ ኣዛዞስ።  
\v 7 ኢንቴ ኑ ሌሚሶ ዎስቲ ካላናኮኔ ኢንቴ ኢንቴ ባጋራ ኤሬታ። ኑ ኢንቴናራ ዲዛ ዎዴ ኦሶ ኦꬆንታ ጮ ዴዒቤኮ።  
\v 8 ቃሴካ ኦና ሶፔካ ካꬅ ጮ ሜላ ሚቤኮ። ጊዶ ኣቲን ኢንቴፌ ኦናሲካ ኑ ቶሆ ጊዶንታ ማላ ቃማኔ ጋላስ ዳቡራን ኦꬂ ሚዶስ።  
\v 9 ኑ ሄሳ ኦꬂዳይ ኢንቴ ኑና ካላና ማላ ኢንቴስ ሎዖ ሌሚሶ ጊዳና ጊዲፔ ኣቲን ኑስ ኮሺዛይሳ ኢንቴፌ ኤካና ኑና ዲጊዛ ዎጋይ ዲን ጊዴና።  
\v 10 ኑ ኢንቴናራ ዲዛ ዎዴ “ኦሶ ኦꬃናስ ዶሶንታ ኣሲ ካꬅ ሞፖ” ጊዛ ኣዛዞ ኢንቴስ ኢሚዶስ።  
\v 11 ኢንቴ ጊዶን ኢሲ ኢሲ ኣሳቲ ኦሶ ኦꬆንታይሳ ኑ ሲዪዶስ። ሄይታንቲ ኦሶ ኦꬆንታ ሜላ ኣሳ ዮዖን ጌሊዛ ኣሳታ።  
\v 12 ሄይታ ማላ ኣሳቲ ባ ኦሶ ጮዑ ጊ ኦꬃና ማላኔ ባ ካꬅ ማና ማላ ጎዳ ዬሱስ ኪርስቶሳ ሱንꬃን ኑ ኢስታ ኣዛዞሲኔ ዞሮስ።  
\v 13 ኢንቴ ጊዲኮ ታ ኢሻቶ! ሎዖ ኦሶ ኦꬃናፔ ሙሌካ ኣዛሎፍቴ።  
\v 14 ሃይሳ ኑ ኪቲዳ ቃላስ ኣዛዜቶንታይ ኦኒካ ዲኮ ሄሳ ሚሳቲዛዴ ሎዔꬂ ካሊቴኔ ኢዚ ባ ኦሶን ዬላታና ማላ ኢዛራ ጋጎፍቴ።  
\v 15 ጊዶ ኣቲን ኢዛ ኢንቴ ኢሻ ማላ ሃንቂቴ ኣቲን ሞርኬ ማላ ፄሎፍቴ። 
\s1 ዉርሴꬃ ሳሮካ 
\p  
\v 16 ሳሮቴꬃ ጎዳይ ኢዚ ባ ባጋራ ዮዖ ኡባን ኢንቴስ ሳሮቴꬅ ኢሞ። ጎዳይ ኢንቴናራ ኡባራ ጊዶ።  
\v 17 ሃይሳ ሳሮካ ታ ታ ኩሼራ ኢንቴስ ፃፊዳይ ታና ጳዉሎሳ። ታ ኪታስ ዱማ ማላታይ ሃይሳ፤ ኢዚካ ሃይሳ ታኒ ታ ኩሼን ፃፎይሳ።  
\v 18 ኑ ጎዳ ዬሱስ ኪርስቶሳ ኣꬎ ኪያቴꬂ ኢንቴናራ ኡባራ ጊዶ።