\id 2PE - Gamo project 
\h 2 ጴፅሮሳ 
\toc1 ጴፅሮሲ ፃፊዳ ናምዓንꬆ ኪታ 
\toc2 2 ጴፅሮሳ 
\toc3 2ጴፅ 
\mt1 ጴፅሮሲ 
\mt2 ፃፊዳ ናምዓንꬆ ኪታ 
\imt1 ጊዶ ቆፋ 
\ip ሃዋሬ ጴፅሮሲ ናምዓንꬆ ኪታ ፃፊዳይ ዱማ ዱማሶን ዲዛ ቤኒ ኣማኒዛ ኣሳሳ። ሄ ኢዛ ኪታስ ኣይፌ ዮዖይ ዎርዶ ኣስታማሬታ ኢታ ኦꬆኔ ሄ ኢስታ ቲሚርቴ ጌዶን ዪዳ ባላ ዴዖ ኣሳይ ኣጋና ማላ። ሄ ዎዴ ሜꬌቲዳ ሜቶታ ቢርሻናስ ዳንዳያናይ ዬሱስ ኪርስቶሳ ካሴ ባ ኣይፌራ ቤዪዳይታኔ ኢዚ ታማርሲሺን ባ ሃይꬃን ሲዪዳ ኣሳቲ ኢሚዳ ቲሚርቴ ባጋራ ፆሳ ጊሺኔ ጎዳ ዬሱስ ኪርስቶሳ ጊሽ ቱማ ኤራቴꬅ ዴሜቶ። ፃፌዚ ሃራፔካ ሎዔꬂ ናጌቲዳይ “ኪርስቶሲ ሃ ሲሚ ዬና” ጊዛ ዎርዶ ቲሚርቴ ጊሻሳ። ኢዚ ሄሳ ጊሽ ዮቲሼ “ኪርስቶሲ ኤሌሊ ሲሚ ዮንታ ማላ ኢዛ ዲጊዛይ ኣሲ ዉሪካ ባ ናጋራፔ ሲሚዲ ኣታና ማላፔ ኣቲን ኦኒካ ꬋያና ማላ ኮዮንታ ጊሻሳ” ጌስ። 
\is1 ሃ ማፃፋይ ኦይኪዳ ኩሜꬃ ቆፋ 
\io1 ጌሎሶ 1፡1-2 
\io1 ኣማኒዛይታ ፄይጌቴꬅ 1፡3-21 
\io1 ዎርዶ ኣስታማሬታ 2፡1-22 
\io1 ኪርስቶሳስ ናምዓንꬆ ዩሳ 3፡1-18 
\c 1  
\p  
\v 1 ዬሱስ ኪርስቶሳ ኦሳንቻኔ ኢዛን ሃዋሬ ሲሞና ጴፅሮሳፔ፥ ኑ ጎዳፔኔ ኑ ꬋሌ ዬሱስ ኪርስቶሳፔ ቤቲዳ ፂሎቴꬃ ባጋራ ኑ ዴሚዳ ኣማኖ ማላ ቦንቼቲዳ ኣማኖ ዴሚዳይቶ!  
\v 2 ፆሳኔ ኑ ጎዳ ዬሱሳ ኤሮን ኪያቴꬂኔ ሳሮይ ኢንቴስ ጊዶ። 
\s1 ፆሳን ፄይጌቲ ኢዛን ዶሬቴꬅ 
\p  
\v 3 ባ ቦንቾኒኔ ባ ኪያቴꬃን ኑና ፄይጊዳይሳ ኑኒ ኢዛ ኤሪዳ ጊሽ ኢዛ ፆሳቴꬃ ዎልቃይ ዴዖሲኔ ፆሴ ጎይናናስ ኑስ ኮሺዛዝ ዉርሲ ኢሚዴስ።  
\v 4 ባ ቦንቾኒኔ ባ ኪያቴꬃን ቦንቾ ዎጋይ ዲዛይሳኔ ኬሂ ጊታ ጊዲዳ ኢዛ ሂዶታ ኑኒ ዴሚዶስ። ሄይታንታ ባጋራ ኢንቴ ኢታ ኣሞ ጋሶን ሃይሳ ሃ ኣላሜዛን ዲዛ ꬋዮፔ ኬሲ ኤኪዲ ፆሳቴꬃ ሃኖዛፔ ኢዛራ ጊሼቲዛዴንታ ጊዲዴታ። 
\p  
\v 5 ሄሳ ጌዶን ሃይሳፌ ካሊዛ ሚሻቲ ኢንቴስ ጉጄታና ማላ ኣኔ ሚኒቴ። ኣማኖ ቦላ ኪያቴꬅ፥ ኪያቴꬃ ቦላ ኤራቴꬅ፤  
\v 6 ኤራቴꬃ ቦላ ባና ሃሮ ባና ሃሮ ቦላ ዳንዳያን ሚኔቴꬅ፤ ዳንዳያን ሚኔቴꬃ ቦላ ፆሴ ጎይኖ፥  
\v 7 ፆሴ ጎይኖ ቦላ ኢሻንታ ዶሴቴꬂ፥ ኢሻንታ ዶሴቴꬃ ቦላ ሲቆ ጉጂቴ።  
\v 8 ሃይቲ ኢንቴስ ዳሪ ዲዛዝ ጊዲኮ ሄይቲ ኢንቴና ኢንቴ ጎዳ ዬሱስ ኪርስቶሳ ኤሮን ጎዓይኔ ኣይፌይ ባይንዳይታ ጊዶንታ ማላ ናጋና።  
\v 9 ሃይቲ ሃ ሚሻቲ ባይንዳ ኣሲ ጊዲኮ ሃሆን ዲዛ ሚሽ ዴሞንታ ቆቄ ኣሳ ማላ። ሄሳዴይ ካሴ ኣꬊዳ ባ ናጋራፔ ጌይዳይሳካ ባሌቲዴስ። 
\p  
\v 10 ታ ኢሻቶ! ሄሳ ጊሽ ኢንቴ ፄይጌቲዳይሳኔ ዶሬቲዳይሳ ሻኪ ኤራናስ ኬሂ ኣሞቲዛይታ ጊዲቴ። ኢንቴ ሄሳꬆ ኦꬂኮ ሙሌካ ꬉጴቴኬታ።  
\v 11 ኢንቴ ሄሳꬆ ሃኒኮ ሜርናፔ ሜርናስ ዲዛ ኑ ጎዳ ዬሱስ ኪርስቶሳ ካዎቴꬃን ጌላናስ ኢንቴስ ኩሜꬃ ማታይ ኢሜታና። 
\p  
\v 12 ኢንቴ ሃይታ ሃ ዮዖታ ኤሪዲኔ ሄ ኢንቴ ኤሪዳ ቱማን ሚኒ ዴዒኮካ ሄይታ ታኒ ኢንቴና ቆፊሳናፔ ጉዬ ጊኬ።  
\v 13 ታኒ ፓፃ ዲዛ ዎዴ ኡባን ኢንቴና ኡባ ዎዴ ዴንꬄꬃናይሲ ቤሲዛዝ ሚሳቲዲ ታስ ቤቴስ።  
\v 14 ኑ ጎዳ ዬሱስ ኪርስቶሲ ታስ ቆንጪሲዳ ማላ ታኒ ሃይሳ ኣላሜዛፔ ኤሌላዳ ሃይቃናይሳ ታ ኤራይስ።  
\v 15 ታኒ ሃዒ ሚኔቲዛይ ታ ሃይቃዳ ኢንቴፌ ሻኬቲዳፔ ጉዬ ኢንቴ ሃይታ ሃ ዮዖታ ኡባ ዎዴ ቆፓና ማላሳ። 
\s1 ኪርስቶሳ ቦንቾ ባ ኣይፌን ቤዪዳ ማርካታ 
\p  
\v 16 ጎዳ ዬሱስ ኪርስቶሳ ዎልቃፌ ኢዛስ ዩሳ ጊሽ ኑ ኢንቴስ ዮቲዳ ዎዴ ኑኒ ኑ ኣይፌራ ኢዛ ቦንቾዛ ቤዪዲ ማርካቶስ ኣቲን ኣሲ ጮ ሜላ ሜꬊ ኤኪዲ ጌኔ ሃሳዪዛ ሃይሲዔ ማላ ጊዴና።  
\v 17 “ታኒ ኢዛን ኡፋዬቲዛዴይ ታ ዶሲዛ ታ ናዚ ሃይሳ” ጊዛ ቃላ ጊሪሳይ ጊታ ቦንቾራ ኢዛስ ዪዳ ዎዴ ኢዚ ፆሳ ኣዋፔ ቦንቾኔ ጊታቴꬅ ኤኪዴስ።  
\v 18 ኑኒ ኢዛራ ኣንጄቲዳ ዙማ ቦላ ዲሼ ሃይሳ ሃ ሳሎፔ ዪዳ ጊሪሳ ኑኒ ኑ ሃይꬃን ሲዪዶስ።\x * \xo 1:18 \xt ማቶሆሳ 17፡1-5፤ ማር 9፡2-7\x* 
\p  
\v 19 ሄሲ ዉሪካ ካሴ ናቤቲ ዮቲዳይሲ ቱሙ ጊዲዳይሳ ሎዔꬅ ቆንጪሴስ። ሄሳ ጊሽ ኢንቴ ꬉማሶን ፆምፔስ ሎዔꬅ ናጌቲዛይሳ ማላ ካሴ ናቤቲ ዮቲዳይሳ ሎዔꬂ ናጌቲቴ። ኢንቴ ሄሳꬆ ኦꬃናይ ጋዴይ ዎንታናስ፥ ባዞይ ዞዓና ጋካናሲኔ ዎንት ማꬃ ፆሊንቴዚ ኢንቴ ዎዝናን ፖዓና ጋካናሳ።  
\v 20 ኢንቴ ሃራፔ ኣꬂ ቆፓናስ ቤሲዛይ ጌሻ ማፃፋን ዲዛ ቲንቢቴ ቃላን ዮቴቲዳ ኣይ ሚሺካ ኦኒካ ባስ ሚሳቲዳ ማላ ቢርሻናስ ቤሴና።  
\v 21 ኣይ ቲንቢቴይካ ኣሳ ሼኔ ማላ ሙሌካ ዪቤና። ጊዶ ኣቲን ቲንቢቴይ ዉሪካ ፂሎ ኣያናይ ካሌꬂን ኢዛ ካሊዳ ኣሳቲ ፆሳፌ ኤኪዲ ዮቲዳዛ። 
\c 2  
\s1 ዎርዶ ኣስታማሬታ 
\p  
\v 1 ጊዶ ኣቲን ቤኒ ዎዴ ዎርዶ ናቤቲ ዴሬዛ ጊዶን ዲዛይሳ ማላ ሄሳꬆካ ሃዒ ኢንቴ ጊዶን ዎርዶ ኣስታማሬቲ ዴዓንዴቴስ። ሄይታንቲ ኣሳ ꬋይሲዛ ዎርዶ ቲሚርቴ ቆታራ ዲጫና ማላ ኦꬄቴስ። ባና ኣሺዳ ጎዳካ ካዲዲ ባና ኤሶን ꬋይሲዛዝ ባ ቦላ ኤሄቴስ።  
\v 2 ሄሳ ጌዶን ዳሮ ኣሳይ ዬላቺዛ ኢስታ ኦጌዛ ካሌስ። ሄ ኢስታ ኦሶዛ ጌዶን ቱማ ኦጌይ ጫዬቴስ።  
\v 3 ሄይቲ ዎርዶ ኣስታማሬቲ ሚሻስ ጋጲጋጲዛ ጊሽ ባርካ ሜꬊ ኤኪዳ ዮዖ ዮቲ ዮቲዲ ኢንቴስ ዲዛዝ ባስ ቦንቂ ኤኬቴስ። ቤኒ ቤኒ ዎዴሶፔ ፒርዳይ ኢስታስ ጊጌቲ ኡቲዴስ። ኣዳፌ ኢስታ ꬋዮይ ናጌስ። 
\p  
\v 4 ሃራይ ኣቶ ሺን ናጋራ ኦꬂዳ ኪታንቻታስ ፆሲ ሚሼቶንታ ኢስቲ ጪማ ጊዲዳ ꬉማ ኦላ ጊዶን ዴዒዲ ፒርዳ ጋላስ ጋካናስ ናጌታና ማላ ጌዴ ጋናሜን ዬጊዴስ።  
\v 5 ሄሳꬆካ ፂሎቴꬃ ጊሽ ሳባኬ ጊዲዳ ኖሄ ሃንኮ ላፑን ኣሳታራ ኣሺዲ ፆሳስ ጎይኖንታ ኣሳቲ ዲዛ ኣላሜዛ ቦላ ꬋይሲዛ ሃꬄ ኤሂሼ ቃꬌቲዲ ካሴ ሄ ዎዴ ኣላሜዛ ማሪቤና። \x * \xo 2:5 \xt ሜꬌ 6፡1-7፡24\x* 
\v 6 ቃሴካ ፆሴ ጎይኖንታይታ ቃፃያናስ ኡባስ ሌሚሶ ጊዳና ማላ ሶዶሜይኔ ጋሞራ ካታማቲ ቢዲንꬅ ጊዳና ጋካናሲኔ ፁጌቲ ꬋያና ጋካናስ ኢስታ ቦላ ፒርዲዴስ። \x * \xo 2:6 \xt ሜꬌ 19፡24\x* 
\p  
\v 7 ዎጋይ ባይንዳ ዬላቺዛ ኦሶ ኦꬂዛ ኣሳታ ኦሶን ኡባ ዎዴ ሶዑ ጊሼ ዲዛ ፂሎ ሎፄ ጊዲኮ ኣሺ ኤኪዴስ። \x * \xo 2:7 \xt ሜꬌ 19፡1-16\x* 
\v 8 ሄ ፂሎ ኣዴዚ ኢስታ ጊዶን ዲሺን ጋላስ ጋላስ ኢዚ ቤዪዛይሳኒኔ ሲዪዛይሳን ሄ ዎጋይ ባይንዳ ኣሳታ ኦሶዛን ኢዛ ሼምፖያ ዋዬታዱስ።  
\v 9 ሂስቲን ሄሲ ዉሪካ ሄሳ ማላ ጊዲኮ ጎዳይ ባስ ጎይኒሼ ዲዛ ኣሳታ ፓጬፔ ኣሻናይሳኔ ናጋራንቻታካ ዎስቲ ቃፃያናኮኔካ ፒርዳ ጋላሳስ ዎስቲ ኢስታ ናጊዲ ጋꬃናኮኔ ሄሳ ኢዚ ኤሬስ ጉሳ። 
\p  
\v 10 ሃራፔካ ሄይቲ ቱና ጊዲዳ ባ ኣሾ ኣሞ ካሊዛይታኔ ፆሳ ጎዳቴꬅ ካꬊዛይታ ፒርዳ ጋላሳስ ናጊ ዎꬂዴስ። ሄይቲ ዎርዶ ኣስታማሬቲ ኢስቲ ፃላታኔ ኦቶራንቻታ ጊዲዳ ጊሽ ሳሎ ቦላ ኢስታስ ጎዳቴꬂ ዲዛይታ ጫዪሼ ባቤቴና።  
\v 11 ኪታንቻቲ ኢስታፌ ቦላራ ዎልቃይኔ ጎዳቴꬂ ዲዛይታ ጊዲኮካ ጎዳ ሲንꬃን ኢስታ ቦላ ካꬌ ቃላ ኬሲ ሞቴቴና። 
\p  
\v 12 ሄይቲ ዎርዶ ኣስታማሬቲ ቃስ ባስ ኤሬቶንታ ኢፂዳ ሚሽ ዉርሲ ጫሺ ጫዬቴስ። ሄይታንቲ ናርፃን ኦይኬታናሲኔ ሃይቃናስ ዬሌቲዳ። ጮ ሜላ ባ ሼኔን ዲዛይታኔ ቆፋይ ባይንዳ ዶዓታ ማላ። ዶዓቲ ጮ ሜላ ꬋዪዛይሳꬆ ኢስቲካ ሙሌራ ꬋያና።  
\v 13 ቆሆ ኦሶ ኦꬂዳ ጊሽ ኢስቲ ሙሌራ ባ ኦሶ ዋጋ ኤካና። ኢስታ ኡፋይሲ ሴታ ጋላስ ማꬆቴꬂኔ ዎጋይ ባይንዳ ቡራቆ። ኢስቲ ሄሳ ማላ ዎጋይ ባይንዳ ጉፋን ኢንቴናራ ኢሲፌ ፄይጌቲዛ ዎዴ ኣስ ባሌꬂዛ ባ ኣሾ ኦሶዛን ኢስቲ ኢታኔ ዬላቺዛይታ።  
\v 14 ኢስታስ ናጋራ ኦሶፔ ናጌቶንታ ኣሞቲዛ ኣይፌይ ዴስ። ኢስታስ ናጋራ ኦሶ ሲቂዛ ኣሞቴꬂ ኣይ ዎዴካ ሲሜና። ኣማኖን ቡሮ ሚኒ ኤቆንታ ኣሳታ ባሌꬄቴስ። ሚሻስ ጋጲጋጴቴስ። ኢስቲ ቃንጌቲዳይታ።  
\v 15 ኢስቲ ሱሬ ኦጌዛ ኣጋጊዲ ꬋዪዳ። ኢታ ኦሶ ኦꬂዲ ዴሚዛ ሚሽ ሲቂዳ ቢዖሬ ና ባላዓሜ ኦጌ ቢዲ ባሌቲዳ።  
\v 16 ባላዓሜይ ጊዲኮ ባ ኦꬂዳ ናጋራ ጊሽ ሴሬቲዴስ ሺን ሃሳያ ኤሮንታ ሃሬያ ኣሳ ቃላን ኢዛስ ሃሳያዳ ሄ ናቤዛ ባላፔ ሴራ ዛራዱስ። 
\p  
\v 17 ሄይቲ ሄ ኣሳቲ ሃꬂ ባይንዳ ፑልቶታ። ጎቴ ጫርኮን ቢዛ ሻራ ማላ፤ ኢስታ ሳካና ꬉማይ ናጌስ።  
\v 18 ካሴ ባላ ጋርሳን ዲዛ ኣሳታ ጊዶፌ ኬሲ ኤኪ ዪዲ ዳሮ ጋምዖንታ ኣሳታ፥ ጮ ሜላ ሃዳ ጊዲዳ ኦቶሮ ቃላ ሃሳያን፥ ኣሾ ኣሞኒኔ ላይማን ባሌꬄቴስ።  
\v 19 “ኢንቴ ዎዜታና” ጊሼ ኢንቴስ ኡፋይስ ኢሜቴስ። ፆኔቲዳ ኣሲ ባና ፆኒዳዴስ ኣይሌ ጊዲ ሃሬቲዛይሳꬆ ኢስቲካ ባስ ናጋራስ ኣይሌ።  
\v 20 ኑ ጎዳኔ ኑና ኣሺዳ ዬሱስ ኪርስቶሳ ኤሪዲ ሃ ኣላሜዛ ቱናቴꬃፌ ኬሲ ኤኪዳፔ ጉዬ ቃሴካ ጉዬ ሲሚዲ ሄ ካሴ ቱናቴꬃን ፆኔቲዲ ጌሊኮ ኢስታስ ካሴይሳፌ ጉዬይሲ ኣꬎ ኢታ ጊዳና።  
\v 21 ኢስቲ ፂሎቴꬃ ኦጌ ሻኪ ኤሪዳፔ ጉዬ ኢስታስ ኢሜቲዳ ጌሻ ኣዛዞዛፔ ጉዬ ሲማናፔ ኢስቲ ካሴ ሄ ፂሎቴꬃ ኦጌዛ ኤሮንታ ኣጊዳኮ ኢስታስ ሎዖሺን።  
\v 22 “ካናይ ባ ጮዪዳ ጮሻ ማናስ ጉዬ ሲሜስ” ሄሳꬆካ “ጉዱንꬂ ሜጬቲዲ ጉዬ ሲሚ ኡርቃን ጌንዴሬቴስ” ጌቴቲዛ ቱሙ ሌሚሶይ ኢስታ ቦላ ጋኪዴስ። \x * \xo 2:22 \xt ሌም 26፡11\x* 
\c 3  
\s1 ጎዳ ዬሱስ ኪርስቶሳስ ናምዓንꬆ ዩስ 
\p  
\v 1 ታ ሲቆቶ! ታኒ ኢንቴስ ፃፊሺን ሃይሲ ናምዓንꬆ ኪታ። ታኒ ኢንቴስ ናምዑ ኪታታካ ፃፊዳይ ሃይታ ሃ ዮዖታ ኣኬኪ ኤኪዲ ኢንቴ ሱሬ ቆፋ ቆፓና ማላ ኢንቴና ቤጎꬃና ጋዳ።  
\v 2 ሃይሳፌ ካሴ ጌሻ ናቤቲ ዮቲዳ ቃላኔ ቃስ ኢንቴ ሃዋሬታ ባጋራ ኢንቴ ዴሚዳ ኑ ጎዳኔ ኑና ኣሺዳይሳ ኣዛዞ ኢንቴ ዩሺ ቆፓና ማላ ታ ኮያይስ። 
\p  
\v 3 ሃራ ኡባፌ ካሴቲዲ ሃይሳ ዩሺ ቆፒቴ። ዉርሴꬃ ጋላሳታን ቂꬊዛይቲኔ ባ ኢታ ኣሞ ካሊሼ ኣሳ ካꬊዛይቲ ያና። \x * \xo 3:3 \xt ዩሁ 18\x* 
\v 4 ኢስቲ ቃስ “ጎዳ ዬሱሲ ‘ያና’ ጊዛ ሂዶታይ ዮቴቲቤኔ? ሂስቲን ኢዚ ኣዋን ዲዜ? ቤኒ ኑ ኣዋቲ ሃይቆሳፔ ሃ ሲሚን፥ ሃኒዛ ሚሺ ዉሪካ ሜꬌቶሳፔ ሃ ሲሚን ሄኮ ካሴ ባ ዲዛ ማላ ዴስ” ጌቴስ።  
\v 5 ሄይቲ ሄ ኣሳቲ ካሴ ዳሮ ዎዴፔ ካሴ ሳሎይ ፆሳ ቃላን ሜꬌቶይሳኔ ቢታይካ ሃꬃፌኔ ሃꬃን ዲዛይሳ ኤሪሼ ካዴቴስ። \x * \xo 3:5 \xt ሜꬌ 1፡6-9\x* 
\v 6 ሄ ዎዴ ዲዛ ኣላሜዚ ሃꬃን ሚቴቲ ꬋዪዴስ። \x * \xo 3:6 \xt ሜꬌ 7፡11\x* 
\v 7 ሄሳꬆካ ሃዒ ዲዛ ሳሎይኔ ቢታይ ናጋራንቻቲ ꬋያና ዲዛ ፒርዳ ጋላስ ጋካናስ ታማስ ጊጊ ኡቲዳ። 
\p  
\v 8 ታ ሲቆቶ! ኢንቴ ጊዲኮ ጎዳ ኣቻን ኢሲ ጋላሲ ሺ ላይꬃ ማላ፥ ቃሴካ ሺ ላይꬂ ኢሲ ጋላሳ ማላ ጊዲዳይሳ ሄሳ ሄ ሃኖዛ ባሎፒቴ። \x * \xo 3:8 \xt ማዛ 90፡4\x* 
\v 9 ኢሲ ኢሲ ኣሳታስ ሚሳቲዛ ማላ ጎዳይ ባ ዮቲዳ ሂዶታ ቃላ ፖላናስ ጋምዔናኮ ሺን ኣሲ ዉሪካ ማሬታና ማላኔ ኣይ ኣሲካ ꬋዮንታ ማላ ኮይዲ ኢዚ ኢንቴ ጊሽ ታኬስ። 
\p  
\v 10 ጎዳ ጋላሳይ ቃሴ ካይሶ ዬꬃ ማላ ቆፖንታ ዲሺን ጋኪ ዎꬋና። ሄ ጋላስ ሳሎቲ ጊታ ጊሪሳን ኣꬋና። ሜꬌቴꬂ ዉሪካ ታማን ፁጌቲ ꬋያና፤ ቢታይኔ ኢዛ ቦላ ዲዛዚ ዉሪካ ፁጌታና። \x * \xo 3:10 \xt ማቶ 24፡43፤ ሉቃ 12፡39፤ 1ታሶ 5፡2፤ ኣጁ 16፡15\x* 
\v 11 ሄሳ ጊሽ ሄይቲ ዉሪካ ሄሳꬆ ꬋያናዚ ጊዲኮ ሂስቲን ኢንቴ ጌሻቴꬃን ፆሳስ ጎይኒሼ ዳናስ ኢንቴስ ዋኒ ቤሴኔ?  
\v 12 ሄሳ ጊሽ ፆሳ ጋላሳይ ያናይሳ ኢንቴ ላሞቲዛይታኔ ኢዚ ኤሌሊ ያና ማላ ኦꬂዛይታ ጊዲቴ። ሄ ጋላስ ሳሎይ ታማን ፁጌቲ ꬋያና። ሜꬌቴꬃቲካ ታማ ሴላን ሴራና።  
\v 13 ጊዶ ኣቲን ኑኒ ኢዚ ኑስ ኢሚዳ ሂዶታ ማላ ፂሎቴꬃ ኦሶይ ኦሴቲዛሶ ኦራꬃ ሳሎኔ ኦራꬃ ቢታ ናጎስ። \x * \xo 3:13 \xt ኢሳ 65፡17፤ 66፡22፤ ኣጁ 21፡1\x* 
\v 14 ሄሳ ጊሽ ታ ሲቆቶ! ሄሲ ዉሪካ ሃናና ጋላስ ኢንቴ ናጊሼ ዲኮ ጎዳይ ኢንቴና ኢንቴ ቦላ ቦሮይ ባይንዳ ዲሺን ሳሮቴꬃን ዴማና ማላ ሚኒ ዲቴ።  
\v 15 ኑ ጎዳ ዳንዳያይ ኢንቴና ኣሻናስ ጊዲዳይሳ ኢንቴ ኤሪቴ። ኑ ሲቆ ኢሻ ጳዉሎሲ ባስ ኢሜቲዳ ኤራቴꬃ ማላ ኢዚ ኢንቴስ ፃፊዳይሲ ሃይሳ።  
\v 16 ኢዚ ሃይሳ ሃ ሃኖዛ ጊሽ ባ ኪታታን ኡባን ሃይሳꬆካ ፃፊዴስ። ኢዛ ኪታታ ጊዶን ኤራናስ ዋይሲዛ ኢሲ ኢሲ ሃኖቲ ዴቴስ። ኤራቴꬂ ኢስታስ ፓጪዳይቲኔ ናምዑ ቆፋን ዮቁ ጊዛይቲ ሃራ ጌሻ ማፃፋታ ሚርቂዛይሳꬆካ ሃይታካ ኢስቲ ሚርቃና። ኢስቲ ሄሳꬆ ኦꬂዛይ ባስ ꬋያናሳ። 
\p  
\v 17 ታ ኢሻቶ! ኢንቴ ቃስ ሄሳ ካሴቲዲ ኤሪዳ ጊሽ ሃንኮ ማካላታ ባላ ጌዶን ጎሼቲ ቢዲ ካሴ ኢንቴ ሚኒ ዲዛሶፔ ኩንዶንታ ማላ ናጌቲቴ።  
\v 18 ሄሳፌ ቦላራ ኑ ጎዳኔ ኑ ꬋሌ ዬሱስ ኪርስቶሳ ኪያቴꬃኒኔ ኢዛ ሻኪ ኤሮን ፑዴ ዲጪቴ። ኢዛስ ሃዒካ ሜርናስካ ቦንቾይ ጊዶ። ኣሚን።