\id 1TI - Gaammo project 
\h 1 ፂምቶሳ 
\toc1 ጳዉሎሲ ፂምቶሳስ ፃፊዳ ኮይሮ ኪታ 
\toc2 1 ፂምቶሳ 
\toc3 1ፂም 
\mt2 ጳዉሎሲ 
\mt1 ፂምቶሳስ 
\mt2 ፃፊዳ ኮይሮ ኪታ 
\imt1 ጊዶ ቆፋ 
\ip ፂምቶሳ ጌቴቲዛ ኢሲ ናቴꬃ ናይ ኢዛስካ ዬሌቴꬃ ዴሬይ ቄሪ ኢሲያ ጊዲሺን፤ ኢዛ ኣዬያ ኣይሁዳ ኣሴ፥ ኣዋይ ቃሴ ጊሪኬ ኣሴ። ኢዚ ሚሺራቾ ቃላ ኦሶን ጳዉሎሳራ ኢሲፌ ኦꬂዛ ማታ ላጌ። (ሃዋ 16፡1-3) ጳዉሎሲ ፂምቶሳስ ኮይሮ ፃፊዳ ኪታዚ ሄꬑ ኣይፌ ዮዖታ ኦይኪዴስ። 
\ip ሄ ኪታዛን ኣይፌ ቆፋይ ሲንꬃቲዲ ዎሳ ኬꬃ ጋርሳን ዴንዲዳ ዎርዶ ቲሚርቴፌ ኣሳይ ናጌታና ማላ። ሃ ዎርዶ ቲሚርቴዚ ባጋይ ኣይሁዳታፔ ባጋይ ቃስ ኣይዛቤታ ቆፋ ኦይኪዳዚ ጊዲሺን “ሃይሲ ኣይፌን ቤቲዛ ኣላሜዚ ናጋራን ሞሬቲዳ ጊሽ ኣሳስ ፓፄቴꬂ ቤታናይ ሃራ ዱማ ዱማ ፁራ ኤራቴꬃኒኔ ኢሲ ኢሲ ቁማታ ሞንታ ኣጎኒኔ ኤኮንታኔ ጌሎንታ ኣጎና” ጊዛ ቆፋ ማላ። ሄሳፌካ ቦላራ ኢዛ ኪታዚ ዎሳ ኬꬃ ኣይሶ ጊሺኔ ፆሴ ጎይኖ ጊሽ ታማርሲዛ ዎጋይ ሄሳꬆካ ዎሳ ኬꬃ ጪማቲኔ ኢስታ ማዲዛይታስ ዴዓናስ ቤሲዛይ ኣዛኮኔ ዮቴስ። ዉርሴꬃን ፂምቶሲ ዬሱስ ኪርስቶሳስ ሎዖ ኦꬃንቻ ዋኒ ጊዳናስ ቤሲዛኮኔ ኢዛስ ዱማ ዱማ ኣማኒዛይታ ቦላ ዲዛ ኣላፌቴꬃ ጊሽ ጳዉሎሲ ኢዛስ ኢሚዳ ዞሬ ቤዮስ። 
\is1 ሃ ማፃፋይ ኦይኪዳ ኩሜꬃ ቆፋ 
\io1 ጌሎሶ 1፡1-2 
\io1 ዎሳ ኬꬃ ጊሺኔ ዎሳ ኬꬃ ጋርሳን ኦꬂዛይታ ጊሽ 1፡3-3፡16 
\io1 ፂምቶሳስ ኢዛ ኦꬆ ጊሽ ኢሜቲዳ ቲሚርቴ 4፡1-6፡21 
\c 1  
\p  
\v 1 ኑና ኣሺዳ ፆሳን፥ ኑስ ሂዶታ ጊዲዳ ዬሱስ ኪርስቶሳ ኣዛዞን ሃዋሬ ጊዲዳ ጳዉሎሳፔ  
\v 2 ኣማኖን ታስ ቱሙ ና ጊዲዳ ፂምቶሳስ ፆሳ ኑ ኣዋፔ ኑ ጎዳ ዬሱስ ኪርስቶሳፔ ኪያቴꬅ፥ ማሮቴꬂኔ ሳሮይ ኔስ ጊዶ። \x * \xo 1:2 \xt ሃዋ 16፡1\x* 
\s1 ዎርዶ ኣስታማሬታፔ ናጌታና ማላ ኢሜቲዳ ኣዛዞ 
\p  
\v 3 ታኒ ማቂዶኒያ ባሼ ኔና ሃዳራ ጊዳ ማላ ሃይሳፌ ሲንꬃን ኢሲ ኢሲ ኣሳቲ ዎርዶ ቲሚርቴ ታማርሶንታ ማላ ኔ ኣዛዛናስ ኤፌሶኔን ዳሻ።  
\v 4 ቃሴካ ኣሳይ ዮቲን ዉሮንታ ቤኒ ዎዴ ሃይሲዔን ባ ዎዴ ዉርሶንታ ማላ ኣዛዛ። ሄይታ ማላ ዮዖይ ፓላማ ዴንꬄꬄስ ኣቲን ኣማኖን ኦሴቲዛ ፆሳ ኦሶስ ኣይኮካ ጎዔና።  
\v 5 ሃ ኣዛዞዛስ ዋና ኣይፌ ዮዖይ ጊዲኮ ጌሻ ዎዝናፔ ሎዖ ቆፋራ ሄሳꬆካ ቱሙ ኣማኖፔ ቤቲዛ ሲቆ።  
\v 6 ኢሲ ኢሲ ኣሳይ ሃይታፔ ፖቂ ኤቂዲ ጎዓይ ባይንዳ ዮዖታኮ ሲሚዴስ።  
\v 7 ዎጋ ታማርሲዛይታ ጊዳና ማላ ኮዬቴስ። ጊዲኮካ ኢስቲ ባ ዮቲዛይሳ ዎይኮ ኬሂ ሞቴቲዛ ዮዖዛ ሎዔꬂ ኤሬቴና። 
\p  
\v 8 ጊዶ ኣቲን ኣሲ ማራን ጎዔቲዛኮ ዎጋይ ሎዖ ጊዲዳይሳ ኑ ኤሮስ።  
\v 9 ቃሴካ ዎጋይ ኢሜቲዳይ ፂሎ ኣሳስ ጊዶንታ ዎጋ ዬꬊ ኣꬊዛይታስ፥ ኣዛዜቶንታይታስ፥ ፆሳስ ባቦንታይታስ፥ ናጋራንቻታስ፥ ጌሻቴꬂ ባይንዳይታስ፥ ፆሴ ሌቂዛይታስ፥ ባ ኣዮኔ ባ ኣዋ ዎꬊዛይታሲኔ ሼምፖ ዎꬊዛይታስ ጊዲዳይሳ ኑ ኤሮስ።  
\v 10 ሄሳꬆካ ላይማቲዛይታስ፥ ኣዴራ ኣቂዛ ኣዴታስ፥ ኣስ ባይዚዛይታሲኔ ሻሚዛይታስ፥ ዎርዳንቻታስ፥ ኣሳስ ዎርዶራ ጫቂዛይታስ፥ ሎዖ ቲሚርቴራ ኤቄቲዛ ኡባታሳ።  
\v 11 ሄ ሎዖ ቲሚርቴይ ኣንጄቲዳ ፆሲ ታስ ሃዳራ ኢሚዳ ቦንቾ ሚሺራቾ ቃላራ ጋጊዛይሳ። 
\s1 ጳዉሎሳስ ኢሜቲዳ ፆሳ ኢሞታ 
\p  
\v 12 ታና ባ ኦሶስ ሹሚዲኔ ኣማኔቲዛዴ ኦꬂ ኤኪዲኔ ታስ ሚኖቴꬅ ኢሚዳ ኑ ጎዳ ዬሱስ ኪርስቶሳ ታ ጋላታይስ።  
\v 13 ሃይሳፌ ካሴ ታ ኣይ ማላ ኣስ ጫዪዛዴኔ ጎዴꬂዛዴ፥ ቃሴ ማካላ ኣስ ጊዲኮካ ሄሳ ታ ኤሮንታኔ ኣማኖንታ ዳሼ ኦꬂዳ ጊሽ ፆሲ ታና ማሪዴስ። \x * \xo 1:13 \xt ሃዋ 8፡3፤ 9፡4-5\x* 
\v 14 ዬሱስ ኪርስቶሳፔ ጊዲዳ ኣማኖራኔ ሲቆራ ኑ ጎዳ ኪያቴꬅ ታስ ኬሂ ዳሪዴስ። 
\p  
\v 15 ዬሱስ ኪርስቶሲ ናጋራንቻታ ኣሻናስ ዱጌ ሃይሳ ሃ ኣላሜ ዪዴስ ጊዛ ቃላይ ቱማኔ ኣሲ ዉሪካ ኤካናስ ቤሲዛይሳ። ናጋራንቻታፔካ ኣꬊዛ ናጋራንቻይ ታና።  
\v 16 ጊዶ ኣቲን ታ ማሬቲዳይካ ዬሱስ ኪርስቶሲ ዛዋይ ባይንዳ ባ ዳንዳያ፥ ኡባፌ ኣꬊዳ ናጋራንቻ ጊዲዳ ታ ቦላ ቤሲዳይ ኢዛን ኣማናናይታሲኔ ሜርና ዴዖ ዴማናይታስ ሌሚሶ ጊዳና ማላ።  
\v 17 ሄሳ ጊሽ ሜርናስ ሃይቂ ኤሮንታ፥ ኣይፌን ቤቲ ኤሮንታ ባርካ ፃላ ፆሴ ጊዲዳ ካዎስ ሜርናፔ ሜርና ጋካናስ ኢዛስ ቦንቾይኔ ጋላታይ ጊዶ። ኣሚን። 
\p  
\v 18 ታ ና ፂምቶሳ ኔ ጊሽ ካሴቲዲ ዮቴቲዳ ማላ ሃይሳ ኣዛዞዛ ታ ኔስ ኢማዲስ። ሄሲካ ኔ ሄ ቃላ ካላሼ ሎዖ ባፄ ባፄታናሳ።  
\v 19 ኣማኖይኔ ሎዖ ቆፋይ ኔስ ዴዖ። ኢሲ ኢሲ ኣሳቲ ባ ሎዖ ቆፋ ዬꬊ ኣꬊዲ ኣባ ቦላ ሜቶይ ኢዛ ቦላ ጋኪን ዋዬቲዛ ማርካቤ ማላ ባ ኣማኖ ꬋይሲዳ።  
\v 20 ኢስታ ጊዶን ፆሳ ጫሽ ኣጊዲ ታማራና ማላ ታኒ ፃላዔስ ኣꬃ ኢሚዳይቲ ሄሜኔዎሲኔ ኢስኪንዲሮሲ ዴቴስ። 
\c 2  
\s1 ፆሳስ ጎይኖ ጊሽ ኢሜቲዳ ዎጋ 
\p  
\v 1 ሄሳ ጊሽ ኡባፌ ኮይሮ ሃራ ኣሳስ ሾቤꬃ ዎሳ፥ ጋናቴꬃ ዎሳኔ ጋላታ ዎሳ ኣሳ ኡባስ ካዎታሲኔ ዴሬ ኣይሲዛይታስ ኡባስ ዎሳና ማላ ታ ኔና ቆፊሳይስ።  
\v 2 ሄሲካ ቱሙ ኣያና ዱሳኒኔ ጌሻቴꬅ ኡባን ኑኒ ሳሮቴꬃኒኔ ዎጋን ዳና ማላሳ።  
\v 3 ሃይሲ ኑና ኣሺዛ ፆሳ ኣቻን ሎዖኔ ኡፋይሲዛዛ።  
\v 4 ኢዚ ኣሲ ዉሪ ኣታና ማላኔ ቱማ ኤራና ማላ ኮዬስ።  
\v 5 ኢሲ ፆሲ ፃላ ዴስ። ቃሴካ ፆሳሲኔ ኣሳስ ጊዶን ኢሲ ጊጊሲዛ ጋናይ ዴስ። ኢዚካ ኣስ ጊዲዳ ዬሱስ ኪርስቶሳ።  
\v 6 ኢዚ ባና ኣሳ ኡባስ ኣꬂ ኢሚዴስ። ሄሲካ ሄራካ ዎዴይ ኣꬎንታ ኢዛስ ማርካቲዴስ።  
\v 7 ታካ ሃይሳስ ሚሺራቾ ዮታናስ ኪቴቲዳዴ። ቃሴካ ዴሬታስ ቱሙ ኣማኖ ኣስታማሬ ጊዳዳ ሹሜታዲስ። ሄሳካ ታ ዎርዶቶንታ ቱሙ ዮታናሳ። \x * \xo 2:7 \xt 2ፂም 1፡11\x* 
\p  
\v 8 ሄሳ ጊሽ ኣቱማ ኣሳይ ኡባ ሶን ሃንቆይ ባይንዳኔ ፓላማይ ባይንዳ ባ ጌሻ ኩሼታ ፑዴ ꬎቁ ሂስቲዲ ዎሳና ማላ ታ ኮያዪስ።  
\v 9 ሄሳꬆካ ማጫሳቲ ቦንቾራ ባና ሺሺ ኤኪዲ ቤሲዛ ማይዖ ማይዔቶ፥ ኣቲን ባ ሁዔ ዳዲ ኤኪዲ ዎይኮ ኣልዖ ማይዖ፥ ዎርቃኔ ኢንቁ ኣꬂዲ ዋልቅ ዋልቅ ጎፔቶ። \x * \xo 2:9 \xt 1ጴፅ 3፡3\x* 
\v 10 ጊዶ ኣቲን ፆሴ ዎሶስ ጊዛ ማጫሳቲ ኢስታስ ኦꬃና ቤሲዛ ሎዖ ኦሶን ሎዔቶ። 
\p  
\v 11 ማጫሲ ጮዑ ጋዳ ኩሜꬃራ ኣዛዜቴꬅ ታማሩ።  
\v 12 ማጫሲ ጮዑ ጋናፔ ኣቲን ኢዛ ታማርሳና ማላ ዎይኮ ኣዴ ቦላ ጎዳታና ማላ ታ ኮዪኬ።  
\v 13 ጋሶይካ ኮይሮ ኣዳሜይ ሜꬌቲዴስ፤ ካላዳ ሄዋና ሜꬌታዱስ። \x * \xo 2:13 \xt ሜꬌ 2፡7፤ 21-22\x* 
\v 14 ቃሴካ ኮይሮ ባሌቲዳይ ኣዳሜ ጊዴና። ባሌታዳ ፆሳ ዎጋፔ ኣꬊዳይ ማጫሳዮ። \x * \xo 2:14 \xt ሜꬌ 3፡1-6\x* 
\v 15 ጊዲኮካ ማጫሲ ኣማኖኒኔ ሲቆን ጌሻቴꬃን ባርካ ባና ሃሮን ሚኒኮ ና ዬሎን ኣታና። 
\c 3  
\s1 ዎሳ ኬꬅ ካሌꬂዛይታ 
\p  
\v 1 “ኦኒካ ዎሳ ኬꬃ ጪማ ጊዳና ኮይኮ ሎዖ ኦሶ ኣሞቴስ” ጊዛ ቃላይ ቱማ።  
\v 2 ሄሳ ጊዲኮ ዎሳ ኬꬄ ካሌꬂዛዴይ ቦሬይ ባይንዳዴ፤ ኢሲ ማቻ ዲዛ ኣዴ፤ ጊናራ ዲዛዴ፤ ባና ሃሪዛዴ፤ ዎጋራ ኣቂዛዴ፤ ኢማꬅ ሞኪዛዴ፤ ታማርሳናስ ዳንዳዪዛዴ፤  
\v 3 ማꬆቶንታዴ፥ ኦሽ ኦዬቶንታዴ፥ ቃስ ማራጌ ኣስ፥ ኣሳራ ፓላሜቶንታዴ፥ ሚሽ ጎዶንታዴ፥ ጊዳናስ ቤሴስ።  
\v 4 ባ ናይታ ኣዛዜቲዛይታኔ ኣስ ቦንቺዛይታ ሂስቲ ዲቺዲ ባ ኬꬃ ኣሳ ዎጋራ ኣይሲዛዴ ጊዳናስ ቤሴስ።  
\v 5 ኢሳዴይ ባ ኬꬃ ኣሳ ዎጋራ ኣይሶ ኤሮንታ ኣጊኮ ፆሳ ዎሳ ኬꬄ ዎስቲ ናጋና ዳንዳዪዜ?  
\v 6 ኦቶሬቴꬃን ፑርዲ ፃላዔይ ኩንዲዳ ፒርዳን ኢዚ ኩንዶንታ ማላ ኦራꬅ ኣማኒዛዴ ጊዶፖ።  
\v 7 ቃሴካ ኢዛ ሱንꬃን ቦሬቶንታ ማላኔ ፃላዔ ናርፃን ኢዚ ጌሎንታ ማላ ኣማኖንታ ኣሳ ኣቻን ሎዖ ማርካቴꬅ ዳናስ ኮሼስ። 
\p  
\v 8 ዳቆኔቲካ ሄሳꬆ ቦንቼቲዳይታኔ ባ ጊዳ ቃላ ላሚ ላሚ ዬጎንታይታ፥ ዳሮ ዎይኔ ኡሻስ ኣሞቶንታይታ፥ ኦጌይ ባይንዳ ጎዓ ጎዶንታይታ ጊዳናስ ቤሴስ።  
\v 9 ኣማኖ ፁራ፥ ሎዖ ቆፋራ ናጋናስ ቤሴስ።  
\v 10 ሃይታንቲካ ኮይሮቲ ፓጬቴቶ። ኢሲ ኢታይ ኢስታ ቦላ ቤቶንታ ኣጊኮ ሄሳፌ ጉዬ ዳቆኔቴꬃን ኦꬄቶ።  
\v 11 ማጫ ዳቆኔቲካ ቦንቼቲዳይታ፥ ዚጊሮንታይታ፥ ቃስ ዎጋራ ዲዛይታ፥ ሃኖ ኡባን ኣማኔቲዳይታ ጊዳናስ ቤሴስ።  
\v 12 ዳቆኔቲ ኢሲ ማች ኣዴ ጊዳናስ ቤሴስ። ቃሴካ ባ ናይታኔ ባ ኬꬃ ኣሳ ዎጋራ ኣይሲዛይታ ጊዳናስ ቤሴስ።  
\v 13 ዎጋራ ኦꬂዳይቲ ኤራይስ ጊታ ቦንቾኔ ዬሱስ ኪርስቶሳን ኢስታስ ዲዛ ኣማኖን ዳሮ ፃላቴꬅ ዴማና። 
\p  
\v 14 ታ ኔኮ ኤሌ ባና ኮይኮካ ሃይታ ኣዛዞታ ኔስ ፃፋይስ።  
\v 15 ታ ሃኖ ኔስ ፃፊዛይ ታ ጋምዒዛ ጊዲኮካ ኣሳይ ፆሳ ኬꬃን ዋኒ ዳናኮኔ ኔ ኤራና ማላ ጋዳኮ! ኬꬃይ ዴዖ ፆሳ ዎሳ ኬꬃ፤ ሄሲካ ቱሙ ቱሲኔ ፃጶ።  
\v 16 ቱሙ ኣያና ዱሳ ፁራይ ሲꬌይ ባይንዳ ጊታ፤ ኢዚካ 
\q1 “ኣሴ ጊዲዴስ፤ 
\q2 ኢዛ ፂሎቴꬂ ፂሎ ኣያናን ቆንጪዴስ፤ 
\q2 ኪታንቻታስ ቤቲዴስ፤ 
\q1 ዴሬ ኡባስ ሳባኬቲዴስ፤ 
\q2 ኣላሜን ዲዛይታን ኣማኔቲዴስ፤ 
\q2 ቦንቾራ ፑዴ ዴንዲ ቢዴስ” ጊዛይሳ። 
\c 4  
\s1 ዎርዶ ታማርሲዛይታ 
\p  
\v 1 ዎዴ ዉርሲሴꬃ ቦላ ኢሲ ኢሲ ኣሳይ ኣማኖ ኣጊዲ ባሌꬂዛ ኣያናታኔ ኢታ ኣያና ቲሚርቴ ካላናይሳ ፂሎ ኣያናይ ቆንጬራ ዮቴስ።  
\v 2 ሄሳ ማላ ቲሚርቴይ ኢስታ ቆፋይ ቦንቆ ቢራታን ፁጌቲዳ ማላ ጌላቴꬃን ዶጪዳ ቆꬌፔ ቆሞን ሃኒዛ ዎርዳንቻ ኣሳታፔ ያና።  
\v 3 ሄ ኣሳቲ ኣሳይ ኤኮንታ ማላኔ ጌሎንታ ማላ ዲጋና። ኣማኒዛይቲኔ ቱማ ሻኪ ኤሪዛ ኣሳይ ፆሲ ሜꬊዳ ካꬅ ጋላታራካ ኤኪዛይቲ ሞንታ ማላ ዲጋናኔ ኣዛዛና።  
\v 4 ፆሲ ሜꬊዳይ ዉሪካ ሎዖ። ኣሲ ጋላታራ ኤኪኮ ዎራ ዎꬊዛይ ኢሲናካ ባዋ።  
\v 5 ዉሪካ ፆሳ ቃላኒኔ ዎሳን ጌያና። 
\s1 ኪርስቶሳስ ሎዖ ኦꬂዛ ኦሳንቻ 
\p  
\v 6 ሃይሳ ሃ ኣዛዞዛ ኣማኒዛ ኣሳ ኔ ቆፍሲኮ፥ ኣማኖ ቃላኒኔ ኔ ኤኪዳ ሎዖ ቲሚርቴዛን ሚናዳ ዬሱስ ኪርስቶሳስ ሎዖ ኦሳንቻ ጊዳንዳሳ።  
\v 7 ፆሴ ቦንቺሶንታ ጎዓይ ባይንዳ ሃይሲዔፔኔ ጪማ ማጫሳታ ሃይሲዔፔ ሃካዳ ቱማ ኣያና ኦሶስ ኔ ኣሳቴꬅ ጊጊሳ። 
\p  
\v 8 ኣሳቴꬃ ኣሾ ኦጌን ዶሲሶይ ጉꬃ ዎዴስ ጎዔስ ሺን ቱሙ ኣያና ዱሳስ ባና ታማርሶይ ጊዲኮ ሃይሳ ሃ ኣላሜዛሲኔ ቡሮ ያና ዱሳስ ሂዶታይ ዲዛ ጊሽ ኡባስ ጎዔስ።  
\v 9 ሃይሲ ሃ ቃላይ ኣማኔቲዳይሳኔ ዉርሲ ኤካናስ ቤሲዛ ቃላ።  
\v 10 ኑ ሄሳስ ጊዲ ዳፌቶሲኔ ዳቡሮስ። ሄሲካ ኣሳ ኡባስ ሃራፔካ ኣማኒዛይታስ ኣሺዛ ዴዖ ፆሳን ኑ ሂዶታ ኦꬂዛ ጊሻሳ። \f + \fr 4:10 \fq ዳፌቶሲኔ \ft ኢሲ ኢሲ ቢርሼታ ማፃፋቲ “ባፄቶስ” ጊሺን ኢሶቲ ኢሶቲ “ጫዬቶስ” ጊዲ ቢርሺዳ።\f* 
\p  
\v 11 ሃይታ ዮዖታ ኣዛዛኔ ታማርሳ።  
\v 12 ኔ ያላጋቴꬃ ኦኒካ ሌቆፎ፤ ጊዶ ኣቲን ኔ ሃሳያን፥ ኔ ዱሳን፥ ሲቆን፥ ኣማኖኒኔ ጌሻቴꬃን ኣማኒዛይታስ ሎዖ ሌሚሶ ጊዳ።  
\v 13 ታ ሄ ባና ጋካናስ ቃላ ናባባናስ፥ ዞራናሲኔ ታማርሳናስ ሚና።  
\v 14 ጪማቲ ኔ ቦላ ባ ኩሼ ዎꬂ ዎሲሺን፥ ኔስ ኢሜቲዳ ቲንቢቴ ኢሞቴꬃ ሌፒ ሂስታ ኣጎፋ።  
\v 15 ኣሲ ዉሪ ኔ ዲቻ ቤያና ማላ ሃ ዮዖታ ሎዔꬃ ሚንꬃዳ ዳንዳያን ፖላ።  
\v 16 ኔ ዱሳ ጊሺኔ ኔ ታማርሲዛ ቲሚርቴዛስ ናጌታ፥ ሃይታን ሚና። ኔ ሄሳ ኦꬂኮ ኔናኔ ኔ ጊዛይሳ ሲዪዛይታ ኣሻና። 
\c 5  
\s1 ኣምዔታ፥ ጪማታኔ ኣይሌታ ጊሽ ኢሜቲዳ ዞሬ 
\p  
\v 1 ጪማ ኣሳ ኔ ኣዋ ማላ ቦንቾራ ዞራ ኣቲን ዶምዖፋ። ናቴꬃ ኣቱማ ናይታ ኔ ኢሻታ ማላ ፄላ።  
\v 2 ሄሳꬆካ ጪማ ማጫሳታ፥ ኔ ኣይ ማላ፥ ናቴꬃ ማጫሳታ ቃሴ ኔ ሚቼታ ማላ ሱሬ ዎዝናፔ ፄላ። 
\p  
\v 3 ኣዳፌ ሜቶቴቲዳ ኣምዔታ ሎዔꬃ ናጋ።  
\v 4 ኢሲ ኣምዔይስ ናይ ዎይኮ ና ናይ ዲዛ ጊዲኮ፥ ሄ ናይቲ ባሶ ኣሳታ ማዳናሲኔ ባና ዬሊዳይታስ ካሴ ኢስቲ ኦꬂዳይሳ ኩሼ ዛሮን ሃራፔ ካሴቲዲ ባ ኣማኖ ኦሶን ቤሳናሲኔ ታማራናስ ቤሴስ። ሄሲካ ፆሳ ኡፋይሲዛይሳ። 
\p  
\v 5 ቃሴ ቱማፔ ማዶይ ባይንዳ፥ ባርካ ዲዛ ኣምዔያ ፆሴ ፃላ ፄላዉስ። ዎሳሲኔ ፆሳፌ ማዶ ዴማናስ ጋላሲኔ ቃማ ሚኔታዉስ።  
\v 6 ሃ ቢታ ሎዖ ዱሲ ፃላ ኮዪዛ ኣምዔያ ጊዲኮ ኢዛ ፓፃ ዳሼ ሃይቂዳሮ።  
\v 7 ኦና ቦላካ ዎሶይ ዶንታ ማላ ሃይሳ ኣዛዞዛ ኣሳስ ኣꬃ።  
\v 8 ኢሲ ኣሲ ባ ዳቦታ ሃራፔካ ባሶ ኣሳ ማዶንታይሳ ጊዲኮ ኢዚ ኣማኖ ካዲዳዴኔ ኣማኖንታ ኣሳፔካ ኣꬊ ኢታ ኣሳ። 
\p  
\v 9 ኢዚስ ላይꬃይ ኡሱፑን ታሙ ላይꬃፌ ጋርሳን ዲዛ ኣምዔይ ሱንꬅ፥ ኣምዔታ ማዝጋባን ፃፎፓ። ቃሴካ ኢዛ ካሴ ኢሳዴ ፃላ ጌልዳሮ ጊዳናስ ቤሴስ።  
\v 10 ናይታ ዲቾኒኔ ኢማꬃ ሞኮን፥ ኣማኒዛይታ ቶሆ ሜቻን፥ ሜቶቲዳይታ ማዶኒኔ ሎዖ ኦሶን ኡባን ባና ኣꬃ ኢማዳ ሎዖ ኦሶንካ ኬሃ ኤሬቲዳሮ ጊዳናስ ቤሴስ። 
\p  
\v 11 ናቴꬃ ኣምዔታ ጊዲኮ ሄሳ ማላ ማዝጋባን ፃፎፓ። ጋሶይካ ኢስታስ ዲዛ ኣዚናራ ዳና ኣሞይ ኢስቲ ኪርስቶሳስ ኦꬃና ጊ ጌሊዳ ቃላፔ ቦላራ ኣꬊዛ ዎዴ ኣዴ ጌላና ኮዬቴስ።  
\v 12 ኢስቲ ካሴ ጫቂዳ ቃላ ሚዛ ጊሽ ሄ ዮዖዛን ባ ቦላ ፒርዳ ኤሄቴስ።  
\v 13 ሄሳፌካ ኦሶ ኦꬃናፔ ዩዪ ዩዪ ኣሳ ኬꬄ ጌላና ዶሴቴስ። ኦሶ ኢፆ ፃላ ጊዶንታ ሃሳያናስ ቤሶንታይሳ ሃሳዪሼ ዚጊርዛይታኔ ኮሾንታ ኣሳ ዮዖ ጊዶ ጮ ዎፂ ጌሊዛይታ ጊዴቴስ።  
\v 14 ሄሳ ጊሽ ኣዚናቲ ሃይቂዳ ናቴꬃ ማጫሳቲ ኣዴ ጌላና ማላ፥ ናይታ ዬላና ማላኔ ባሶ ኣስ ኣይሳና ማላ፥ ሞርኬይካ ኢስታ ቦላ ዎꬂዛ ሚሼ ዴሞንታ ማላ ታ ዞራይስ።  
\v 15 ኣዳካ ሃይሳፌ ካሴ ኢሲ ኢሲ ኣሳቲ ፃላዔ ካላና ጉዬ ሼርዒ ጊዳ።  
\v 16 ኣማኒዛ ማጫሲ ኦኒካ ባሶ ኣሳ ጊዶን ኣምዔቲ ዲዛ ጊዲኮ ዎሳ ኬꬂ ቱሙ ኣምዔታ ፃላ ማዳና ማላ ኢዛካ ባ ባጋራ ባ ኣምዔታ ማዱ ኣቲን ዎሳ ኬꬃስ ቶሆ ጊዳና ማላ ኣጋጉፑ። 
\p  
\v 17 ዎሳ ኬꬃ ሎዔꬂ ኣይሲዛይቲ ሃራፔካ ሳባኮኒኔ ታማርሶን ሚኒዛ ጪማቲ ጊዲኮ ዳኮ ማዶ ማዴታናስ ቤሴስ።  
\v 18 ማፃፋን “ካꬅ ቡኪዛ ቦራ ዱና ቃቾፋ” ቃሴካ “ኦሶ ኦꬂዛዴይ ዳሞዛ ኤካና ቤሴስ” ጌስ። \x * \xo 5:18 \xt ዛሬ 25፡4፤ ማቶ 10፡10፤ ሉቃ 10፡7\x* 
\v 19 ናምዑ ማርካይ ዎይኮ ሄꬑ ማርካይ ማርካቶንታ ዲሺን ጪማ ቦላ ሺቂዛ ሞቶ ኤኮፋ። \x * \xo 5:19 \xt ዛሬ 17፡5-7፤ 19፡15\x* 
\v 20 ሃራቲ ቤይዲ ናጌታና ማላ ናጋራ ኦꬂዛይታ ኣሳ ኡባ ሲንꬃን ሃንቃ። 
\p  
\v 21 ፆሳኒኔ ዬሱስ ኪርስቶሳን ዶሬቲዳ ኪታንቻታ ሲንꬃን ሃይታ ኣዛዞታ ኦናካ ማዶንታ ኔ ናጋና ማላኔ ኢሲ ሚሺካ ታ ጎሪፔ ዚቂ ꬎቁ ሂስቶንታ ማላ ታ ኔና ሃዳራ ጋይስ።  
\v 22 ፆሳ ኦሶስ ዶራናስ፥ ኦና ቦላካ ኔ ኩሼ ዎꬃ ዎሳናስ ኤሶቶፓ። ቃሴ ሃራታራ ናጋራ ኦꬃናስ ዙፔቶፓ። ናጋራፔ ኔና ፂሎቴꬃን ናጋ። 
\p  
\v 23 ኔና ቃንꬃን ሳኪዛይሳሲኔ ዴንꬃ ሳኮዛ ጊሽ ዎይኔ ጫጄፌ ጉꬅ ጉጃዳ ኡያ ኣቲን ሃይሳፌ ጉዬ ሃꬄ ፃላ ኡዮፓ። 
\p  
\v 24 ኢሲ ኢሲ ኣሳ ናጋራይ ፒርዳይ ያናፔ ካሴቲዲ ቆንጬስ፤ ባጋይታ ናጋራይ ቃስ ፒርዳፌ ጉዬ ቆንጬስ።  
\v 25 ሎዖ ኦሶይካ ሄሳ ማላ ቆንጬ። ቆንጮንታይ ዲኮካ ቆቴቲ ኣቴና። 
\c 6  
\p  
\v 1 ፆሳ ሱንꬂኔ ኢዛ ቲሚርቴይ ጫዬቶንታ ማላ ኣይሌቴꬃ ቃምባራ ጊዶን ዲዛይቲ ዉሪ ባ ጎዳስ ኩሜꬃ ቦንቾይ ቤሲዛይሳ ኤሬቶ።  
\v 2 ኣማኒዛ ጎዳቲ ዲዛ ኣማኒዛ ኣሽካራቲ ጎዳቲ ኢስታስ ኢሻታ ጊዲዳ ጊሽ ጎዳታስ ቤሲዛ ቦንቾ ኢሜቶ። ሃራፔካ ኢስታ ኦሶን ማዴቲዛ ኣማኒዛ ጎዳቲ ኢስታስ ዶሴቲዳይታ ጊዲዳ ጊሽ ኔካ ሃይታንታ ማላ ዮዖታ ታማርሳናሲኔ ዞራናስ ቤሴስ። 
\s1 ዎርዶ ቲሚርቴኔ ቱሙ ዱሬቴꬅ 
\p  
\v 3 ኦኒካ ዎርዶ ቲሚርቴ ታማርስኮ ጎዳ ዬሱስ ኪርስቶሳ ሎዖ ቃላኔ ኣያና ቱማቴꬃ ሚኒሲዛ ቲሚርቴራ ጋጎንታይሳ ጊዲኮ፥  
\v 4 ሄሳዴይ ኦቶሬቴꬃን ኩሚዴሲኔ ኣይኮካ ዩሺ ቆፔና። ኢሲ ኢሲ ቃላታ ጊሽ ፓላሜታናሲኔ ኦዬታናስ ኢታ ኣሞይ ኢዛን ዴስ። ሄይቲካ ቃናቴቴꬅ፥ ኦሽ፥ ጫሽ፥ ኢታ ሲꬌ ካሌꬄቴስ።  
\v 5 ቱማይ ኢስታፌ ኤኬቲ ጊዲን ኤራይስ ኣያና ኦሶን ዎꬌ ዴማና ሚሳቲዛ ኣሳታኔ ቆፋ ፓጬ ኣሳታ ጊዶን ጎሼቲዲ ዱፆንታ ኦሽ ኤሄቴስ። 
\p  
\v 6 ጊዶ ኣቲን ቱሙ ኣያና ኣስ ጊዴꬅ ኑስ ዲዛይሳን ዎፑ ጊዲ ዱሳራ ጊታ ዎꬌ።  
\v 7 ጋሶይካ ኑ ሃይሳ ሃ ኣላሜዛ ዪሼ ኣይኮካ ኤኪ ዪቤኮ፤ ቢሼካ ቃሴ ኣይኮካ ኤኪ ቦኮ።  
\v 8 ጊዶ ኣቲን ኑስ ማናይሲኔ ኑ ማይዓናይስ ዲኮ ጊዳና።  
\v 9 ዱሬ ጊዳናስ ኮዪዛይቲ ጊዲኮ ጌዴ ፓጬኒኔ ናርፃን ጌሊዲ ኦይኬቲዛይሳ ማላ ዳሮ ሃዳኒኔ ኢታ ኣሞን ኡንዔቴቴስ።  
\v 10 ጋሶይካ ሚሻ ሲቆይ ኢታቴꬅ ኡባስ ፃጶ። ኢሲ ኢሲ ኣሳቲ ዱሬ ጊዳና ጊዲ ኣሞፔ ዴንዲዳይሳን ኣማኖ ኦጌፔ ባሌቲዲ ሃራሶ ቢዳኔ ባርካ ባና ዳሮ ሜቶ ጊዶ ጌልꬂዳ። 
\s1 ጳዉሎሲ ፂምቶሳስ ኢሚዳ ሃዳራ ቃላ 
\p  
\v 11 ኔኖ ፆሳ ኣሶ! ኔ ሄሳ ኡባፌ ባቃታ። ፂሎቴꬅ፥ ቱሙ ኣያናን ዱስ፥ ኣማኖ፥ ሲቆ፥ ዳንዳያኔ ኣሽኬቴꬅ ካላ።  
\v 12 ኣማኖ ባፄ ሎዔꬃ ባፄታ። ዳሮ ማርካታ ሲንꬃን ሎዖ ኣማኔቴꬃን ኔ ማርካቲዳይሳኔ ኔ ኢዛስ ፄይጌቲዳ ሜርና ዴዖዛ ሎዔꬃ ኦይካ።  
\v 13 ኡባስካ ዴዖ ኢሚዛ ፆሳ ኣቻን ሄሳꬆካ ጳንፆሳ ጲላፆሳ ሲንꬃን ቱማ ማርካቲዳ ዬሱስ ኪርስቶሳ ሲንꬃን ታ ኔና ሃዳራ ጊዛይ፥ \x * \xo 6:13 \xt ዮሃ 18፡37\x* 
\v 14 ጎዳ ዬሱስ ኪርስቶሲ ቆንጫና ጋካናስ ኔስ ኢሜቲዳ ኦሶዛ ዎሶይ ባይንዳ ኔ ፖላና ማላ።  
\v 15 ሄ ቆንጬꬃይ ኣንጄቲዳይሲ ባርካ ኡባ ሃሪዛይሲኔ ካዎታ ካዎይ፥ ጎዳታስ ጎዳይ ኢዚ ባ ዎዴን ቤሳና።  
\v 16 ኢዚ ፃላ ሃይቆንታይሳ። ኦኒካ ሺቃናስ ዳንዳዮንታ ፖዖ ጊዶን ዴስ። ኢዛ ቤዪዳ ኣሲ ኦኒካ ባዋ፥ ቤያና ዳንዳዪዛዴይካ ዴና። ኢዛስ ዎልቃይኔ ቦንቾይ ሜርናፔ ሜርናስ ጊዶ። ኣሚን። 
\p  
\v 17 ሃይሳ ሃ ኣላሜዛን ዱሬቲዳይቲ ኦቶሬቶንታ ማላ ኣዛዛ፤ ኑ ኡፋዬታና ማላ ዉርሲካ ዳርሲ ቲርፊሲዲ ኑስ ኢሚዛ ፆሳን ኣቲን ኣማንꬆንታ ሚሻን ኣማኔቶንታ ማላ ኣሳስ ዮታ።  
\v 18 ሎዖ ኦꬃና ማላኔ ሎዖ ኦሶን ዱሬታ ጊዳና ማላ፥ ኪያታኔ ሻኪ ኢማናስ ዶሲዛይታ ጊዳና ማላ ኣሳ ኣዛዛ።  
\v 19 ሄሳꬆካ ቱሙ ጊዲዳ ዴዖ ዴማና ማላ ቡሮፔ ያና ዎዴስ ኣሳይ ሚኖ ፃጶ ጊዲዛ ሃሮ ኤራይስ ሺሻና። 
\p  
\v 20 ፂምቶሳ፥ ኔ ሃዳራ ኤኪዳይሳ ዉርሳ ናጋ። ፆሳ ቦንቺሶንታ ሃዳ ዱና ሎምዑ ሎምዓፔኔ ዎርዶ ኤራቴꬅ ጌቴቲዛ ኣሲ ባፔ ሜꬊ ኬሲዳ ቲሚርቴፌ ሃካ።  
\v 21 ኑስ ሄሳ ማላ ኤራቴꬅ ዴስ ጊዛ፥ ኢሲ ኢሲ ኣሳቲ ሄሳꬆ ኦሶን ኣማኖ ኦጌፔ ባሌቲዳ። ፆሳ ኪያቴꬂ ኢንቴናራ ጊዶ።