\id 1TH - Gaammo project 
\h 1 ታሶሎንቄ 
\toc1 ጳዉሎሲ ታሶሎንቄ ኣሳስ ፃፊዳ ኮይሮ ኪታ 
\toc2 1 ታሶሎንቄ 
\toc3 1ታሶ 
\mt2 ጳዉሎሲ 
\mt1 ታሶሎንቄ ኣሳስ 
\mt2 ፃፊዳ ኮይሮ ኪታ 
\imt1 ጊዶ ቆፋ 
\ip ታሶሎንቄይ ማቂዶኒያ ጌቴቲዛ ኦሮሜስ ዋና ካታማ። ጳዉሎሲ ታሶሎንቄ ዎሳ ኬꬃዮ ኤሲዳይ ፒሊጲሲዮሴ ዬጊ ቢዳፔ ጉዬና። ሄራካ ኢሲ ኣጊና ኩሞንታ ዲሺን ኣይሁዳቲ ኢዚ ፒሊጲሲዮሴ ዬጊ ቢዳይሳ ሲዪዳ። ሄሳ ጊሽ ጳዉሎሲ ኢስታስ ፃፊዳ ባ ኪታዛን ሚሺራቾ ቃላ ቃንꬃራ ቆንጪሲዴስ። (1፡9-10) ኢስቲካ ኣይሁዳታ ኣማኖ ኤካናስ ማቲ ኡቲዳ ኣይዛቤቲ ጳዉሎሲ ዮቲዛ ኣማኖን ዎዝና ቦቼቲዳ። ሄሳ ጊሽ ኣይሁዳቲ ቃናቴቴꬃን ጳዉሎሳ ቦላ ፓላማ ዴንꬂዳ። ሄሳ ጊሽ ጳዉሎሲ ታሶሎንቄ ዬጊዲ ጌዴ ቤሪያ ባናይሲ ኢዛስ ማኔ ጊዲዴስ። ጉꬂ ጋምዒሼ ቆሮንቶሴ ካታማ ቢ ጋኪዳ ማላ ፂምቶሲ ዎሳ ኬꬃይ ሃኒዛይሳ ዉርሲካ ኢዛስ ዮቲዴስ። 
\ip ጳዉሎሲ ኮይሮ ኪታ ታሶሎንቄ ኣሳስ ፃፊዳይ ኣማኒዛይታ ዴንꬄꬃናሲኔ ሚንꬄꬃናሳ። ኢዚ ኢስታ ሎዖ ኣማኖ ጊሺኔ ኢስታ ሲቆቴꬃ ጊሽ ሎዖ ዎሬ ሲይዲ ፆሴ ጋላቲዴስ። ካሴ ጳዉሎሲ ኢስታራ ዲዛ ዎዴ ኢዚ ኢስታራ ኣይ ማላ ዱስ ዴዪዳኮኔ ኢስታ ቆፊሴስ። ሄሳፌካ ኪርስቶሳስ ናምዓንꬆ ዩሳ ጊሽ ዴንዲዳ ኦይሻታስ ዛሮ ኢሜስ። 
\ip ሄ ኦይሻታፔ ባጋቲ “ኪርስቶሲ ሃ ሲሚ ያናፔ ካሴቲዲ ካሴ ሃይቂዳ ኣማኒዛ ኣሳይ ኪርስቶሳ ዩሳን ቤቲዛ ሜርና ዴዖ ዴማኔ?” ጊዛይታ። ጳዉሎሲካ ሄሳ ጋሶ ሂስቲዲ “ኪርስቶሳስ ናምዓንꬆ ዩሳ ቲሚርቴዛ ሂዶታን ናጊሼ ሄ ዎዴ ጋካናስ ጮዑ ጊዲ ኢንቴ ኦሶ ኦꬂቴ” ጊዲ ኢስታ ዞሬስ። 
\is1 ሃ ማፃፋይ ኦይኪዳ ኩሜꬃ ቆፋ 
\io1 ጌሎሶ 1፡1 
\io1 ጳዉሎሳ ኡፋይሲኔ ኢዛ ጋላታ 1፡2-3፡13 
\io1 ኣማኒዛ ኣሳይ ካላና ዎጋ 4፡1-12 
\io1 ኪርስቶሲ ናምዓንꬆ ያና ዩሳ ጊሽ ኢሜቲዳ ቲሚርቴ 4፡13-5፡11 
\io1 ዉርሴꬃ ዞሬ 5፡12-22 
\io1 ኩሻ ቆፋ 5፡23-28 
\c 1  
\p  
\v 1 ጳዉሎሳፔ፥ ሲልዋኖሴፔኔ ፂምቶሳፔ፤ ፆሳ ኣዋሲኔ ጎዳ ዬሱስ ኪርስቶሳይታ ጊዲዳ ታሶሎንቄን ዲዛ ኣማኒዛ ኣሳስ ኑ ኣዋ ፆሳፌኔ ጎዳ ዬሱስ ኪርስቶሳ ኪያቴꬂኔ ሳሮቴꬅ ኢንቴስ ጊዶ።\x * \xo 1:1 \xt ሃዋ 17፡1\x* 
\s1 ታሶሎንቄን ኣማኒዛ ኣሳ ኣማኖ ጊሽ ሺቂዳ ጋላታ 
\p  
\v 2 ኑ ኢንቴና ኑ ዎሳን ቆፒሼ ኡባ ዎዴ ፆሳ ኢንቴ ጊሽ ጋላቶስ።  
\v 3 ኣማኖኒኔ ሚኖ ሲቆቴꬃን ኢንቴ ኦꬂዳ ኦሶ ጊሽ ጎዳ ዬሱስ ኪርስቶሳ ቦላ ዲዛ ኢንቴ ሚኖ ኡፋይሳን ቤቲዳ ኢንቴ ሚኖቴꬃ ጊሽ ኑ ጎዳ ፆሳ፥ ኑ ኣዋ ሲንꬃን ኡባ ጋላስ ኢንቴ ጊሽ ቆፖስ። 
\p  
\v 4 ፆሳን ዶሴቲዳ ኑ ኢሻቶ! ኢዚ ኢንቴና ዶሪዳይሳ ኑ ኤሮስ።  
\v 5 ጋሶይካ ሚሺራቾ ቃላይ ኢንቴኮ ዪዳይ ዎልቃራ ፂሎ ኣያናኒኔ ሎዔꬂ ሻኪ ኤሪን ኣቲን ጮ ቃላ ፃላን ጊዴና፤ ቃሴካ ኑ ኢንቴ ጊሽ ጊዲ ዋኒ ዴዒዳኮኔ ኢንቴ ኤሬታ።  
\v 6 ሃዒ ኢንቴ ኑናኔ ጎዳ ሚሳቲዴታ። ኢንቴ ቦላ ኣይ ሜቶይ ጋኪዳ ጊዲኮካ ፂሎ ኣያና ኡፋይሳ ቃላ ኢንቴ ኤኪዴታ። \x * \xo 1:6 \xt ሃዋ 1፡5-9\x* 
\v 7 ሄሳፌ ዴንዲዳይሳን ኢንቴ ማቂዶኒያኒኔ ኣካያን ኣማኒዛ ኣሳ ኡባስ ሎዖ ሌሚሶታ ጊዲዴታ።  
\v 8 ጎዳ ቃላይ ኢንቴፌ ኬዚዲ ማቂዶኒያኒኔ ኣካያን ሲዬቴꬅ ፃላ ጊዶንታ ኢንቴስ ፆሳ ቦላ ዲዛ ኣማኖይ ኡባሶን ኤሬቲዴስ፤ ሄሳ ጊሽ ኑ ኢንቴስ ዮታናስ ኣይኮካ ኮሼና።  
\v 9 ኢንቴ ኑና ዎስቲ ሞኪ ኤኪዳኮኔ ዴዖን ዲዛ ቱሙ ፆሳስ ኦꬃናስ ኢንቴ ኤቃታፔ ፆሳኮ ዋኒ ሲሚዳኮ ኣሳይ ኢንቴ ጊሽ ሃሳዬስ።  
\v 10 ቃሴካ ፆሲ ሃይቆፔ ዴንꬂዳይሳ ቡሮ ያና ሃንቆፌ ኑና ኣሻና ሳሎፔ ያና ፆሳ ና ዬሱሳ ዩሳ ኢንቴ ዎስቲ ናጊዛኮኔ ኣሳይ ሃሳዬስ። 
\c 2  
\s1 ታሶሎንቄን ጳዉሎሳ ኦሶ 
\p  
\v 1 ኑ ኢሻቶ! ኑ ኢንቴኮን ጋምዒዳ ጋምዖይ ጮ ሜላ ጊዶንታይሳ ኢንቴካ ኤሬታ።  
\v 2 ኢንቴካ ኤሪዛይሳ ማላ ሃይሳፌ ካሴ ፒሊጲሲዮሴን ኑ ዋዬኔ ሜቶ ቤይዶሲኔ ጫዬቲዶስ፤ ጊዶ ኣቲን ኣይኔ ሚኖ ዋዬይ ኑና ጋኪኮካ ፆሳ ሚሺራቾ ቃላ ኢንቴስ ዮታናስ ኑ ጎዳፔ ፃላቴꬅ ዴሚዶስ። \x * \xo 2:2 \xt ሃዋ 16፡19-24፤ 17፡1-9\x* 
\v 3 ኑ ኢንቴና ዞሪዳ ዞሬይ ኢታ ቆፋራ ዎይኮ ኢንቴና ባሌꬃናስ ኮይዲ ጊዴና።  
\v 4 ጊዶ ኣቲን ኑ ሚሺራቾ ቃላ ሃዳራ ኤካናስ ዳንዳዪዛ ኣሳታ ማላ ፆሲ ኑና ቆዲዳ ጊሽ ኑ ሃሳዮስ፤ ሄሳካ ኑ ኦꬂዛይ ኑ ዎዝና ፓጪ ኤሪዛ ፆሳ ኡፋይሳናስ ኣቲን ኣስ ኡፋይሳናስ ጊዲ ጊዴና።  
\v 5 ኑ ሙሌካ ባሌꬆ ቃላ ዮቲቤኮ ዎይኮ ኑ ኡዜቴꬅ ካማናስ ጊዲ ባሌꬆ ሃኖ ኑ ሃኖታይሳ ኢንቴ ኤሬታ። ሃይሳስካ ኑ ማርካይ ፆሳ። 
\p  
\v 6 ኢንቴፌ ጊዲን ዎይኮ ሃራታፔ ኦናፔካ ኣሳፔ ኢሜቲዛ ቦንቾ ኑ ኮይቤኮ።  
\v 7 ኑ ኪርስቶሲ ኪቲዳይታ ጊዲዳ ጊሽ ኢንቴስ ቶሆ ጊዳናስ ዳንዳዮስ፤ ጊዶ ኣቲን ኣያ ባ ናይታ ዲቺዛ ማላ ኑካ ኢንቴ ጊዶን ኣሽኬቴꬃን ሲሜሬቲዶስ።  
\v 8 ፆሳ ቃላ ፃላ ጊዶንታ ዲሺን ኑ ሼምፖካ ኢንቴ ጊሽ ኡፋይሳን ኢማና ጋካናስ ኢንቴና ሲቂዶስ። ጋሶይካ ኑ ኢንቴና ዳሮ ሲቂዳ ጊሻሳ።  
\v 9 ኑ ኢሻቶ! ኑ ዳፌቴꬃኔ ኑ ዳቡራ ኢንቴ ኤሬታ፤ ኦናስካ ቶሆ ጊዶንታ ማላ ቃማኔ ጋላስ ኑስ ኦꬂሼ ሚሺራቾ ቃላ ኢንቴስ ዮቲዶስ። 
\p  
\v 10 ኑ ኢንቴናራ ኣማኒዛይታራ ዲዛ ዎዴ ፂሎቴꬃኒኔ ጌሻቴꬃን ቃሴካ ዎሶይ ባይንዳ ኑ ዋኒ ዴዒዳኮኔ ኢንቴካ ፆሲካ ኑስ ማርካ።  
\v 11 ኣዋይ ባ ናይታስ ሃኒዛ ማላ ኑካ ኢንቴስ ኢሳስ ኢሳስ ኣይ ሃኒዳኮኔ ኢንቴ ኤሬታ።  
\v 12 ኢንቴ ኢንቴና ባ ካዎቴꬃሲኔ ባ ቦንቾስ ፄይጊዳ ፆሳስ ቤሲዛ ማላ ኢንቴ ዳና ማላ ኑ ኢንቴና ሚንꬂዶስ፤ ሎዔꬂ ዞሪዶሲኔ ሃዳራ ጊዶስ። 
\p  
\v 13 ኢንቴ ኑፔ ሲዪዳ ፆሳ ቃላ ኤኪዳ ዎዴ ኣማኒዛ ኢንቴ ኣቻን ቱሙ ኦꬂዛ ፆሳ ቃላ ማላ ኤኪዴታ ኣቲን ጮ ኣሳ ቃላ ማላ ኢንቴ ኤኮንታ ኣጊዳ ጊሽ ኑ ፆሳ ቃንፆይ ባይንዳ ጋላቶስ። 
\p  
\v 14 ኑ ኢሻቶ! ዩሁዳ ቢታን ዬሱስ ኪርስቶሳ ኣማኒዛ ፆሳ ዎሳ ኬꬃታ ሚሳቲዴታ፤ ኢስቲ ኣይሁዳታፔ ሜቶኔ ዋዬ ኤኪዳ ማላ ኢንቴካ ኢንቴ ኣሳፔ ዋዬ ኤኪዴታ። \x * \xo 2:14 \xt ሃዋ 17፡5\x* 
\v 15 ኢስቲ ጎዳ ዬሱሳኔ ካሴ ናቤታካ ዎꬊዳ፤ ኑናካ ጎዲዳ፤ ፆሳካ ኡፋይሲቤቴና፤ ኣሳ ኡባራ ኤቄቲዛይታ ጊዲዳ። \x * \xo 2:15 \xt ሃዋ 9፡23፥29፤ 13፡45፥50፤ 14፡2፥5፥19፤ 17፡5፥13፤ 18፡12\x* 
\v 16 ሄሲካ ኣይዛቤቲ ሲይዲ ኣታና ቃላ ኑ ኢስታስ ዮቶንታ ማላ ዲጋናሳ። ሄሳ ማላ ኦሶን ባ ናጋራ ኡባ ዎዴ ባ ቦላ ዉርሴꬅ ጋካናስ ጉጂ ጉጂ ቤቴስ፤ ፆሳ ሃንቆይካ ኢስታ ቦላ ዎꬊዴስ። 
\s1 ጳዉሎሲ ታሶሎንቄ ኣሳ ቤያናስ ላሞቲዴስ 
\p  
\v 17 ጊዲኮካ ኑ ኢሻቶ! ኑ ጉꬃ ዎዴስ ኢንቴፌ ኣያናን ጊዶንታ ኣሾን ሻኬቲኮካ ኢንቴ ላሞታይ ኑና ዎꬊዛ ጊሽ ኢንቴ ኣይፌሶ ቤያናስ ዳሮ ዳፌቴꬃን ዶስ።  
\v 18 ኑ ኢንቴኮ ባናስ ዳሮ ላሞቲዶስ ሺን ሃራፔካ ታ ጳዉሎሲ ዳሮ ዎዴ ዳፌታዲስ ሺን ፃላዔይ ኑና ዲጊዴስ።  
\v 19 ጎዳ ዬሱሲ ሃ ዪዛ ዎዴ ኢዛ ሲንꬃን ኑ ኣሞይ ዎይኮ ኑ ኡፋይሲ ዎይኮ ኑ ዛዉዴይ ኑስ ኢንቴፌ ሃራይ ኦኔ?  
\v 20 ቱማፔካ ኑ ኡፋይሲኔ ኑ ቦንቾይ ኢንቴና። 
\c 3  
\p  
\v 1 ሄሳ ጊሽ ኑስ ዳንዳዬቶንታ ኢፂን ሄ ዎዴ ኣቴናን ኑርካ ኑ ኣታናይሲ ኑስ ሎዖ ጊዲ ቤቲዴስ። \x * \xo 3:1 \xt ሃዋ 17፡15\x* 
\v 2 ኢንቴና ኣማኖን ሚንꬃና ማላ ኑናራ ኣሳስ ኪርስቶሳ ሚሺራቾ ቃላ ዮቲዛ ፆሳ ኣሽካራ ጊዲዳ ፂምቶሳ ኢንቴኮ ዬዲዶስ።  
\v 3 ሄሲካ ሃይሳ ፓጬዛን ኦኒካ ኣማኖፔ ቃንፆንታ ማላ፤ ኑካ ሃይሳስ ዶሬቲዳይሳ ኢንቴካ ኤሬታ።  
\v 4 ኑ ቃሴ ኢንቴናራ ዲዛ ዎዴ ዋዬይ ኑ ቦላ ጋካናይሳ ካሴቲዲ ኢንቴስ ዮቲዶስ፤ ኢንቴ ኤሪዛ ማላካ ሃኒዴስ።  
\v 5 ሄሳ ጊሽ ኣይኮካ ታ ጌንጬጪን ታስ ዳንዳዬቶንታ ኢፂዳ ጊሽ ኢንቴ ኣማኖ ጊሽ ኤራናስ ጋዳ ፂምቶሳ ኪታዲስ። ታ ሄሳ ኦꬂዳይ ኦኒ ኤሪዜ ፓጪዛዴይ ኢስታ ፓጪን ሃኒ ዎዴ ኑ ዳቡራይ ዉሪካ ሜላ ጊዶንታ ኣጌና ጋዳ ባቢዳ ጊሻሳ። 
\s1 ፂምቶሲ ኤኪ ዪዳ ሚንꬄꬂዛ ቃላ 
\p  
\v 6 ሃዒ ቃሴ ፂምቶሲ ኢንቴ ኣቻፌ ኑኮ ዪዲ ኢንቴ ኣማኖ ጊሺኔ ኢንቴ ሲቆቴꬃ ጊሽ ሎዖ ዎሬ ኑና ሲሲዴስ። ቃሴካ ኢንቴ ኡባ ዎዴ ኑና ሎዔꬂ ቆፒዛይሳኔ ኑካ ኢንቴና ቤያናስ ላሞቲዛ ማላ ኢንቴካ ኑና ቤያናስ ላሞቲዛይሳ ኑስ ዮቲዴስ። \x * \xo 3:6 \xt ሃዋ 18፡5\x* 
\v 7 ሄሳ ጊሽ ኑ ኢሻቶ! ኑ ዲዛይ ዋዬኒኔ ሜቶ ጋርሳን ጊዲኮካ ኢንቴ ኣማኖ ጋሶን ኢንቴናን ሃዒ ኑ ሚኔቶስ።  
\v 8 ኢንቴ ጎዳን ሚኒ ኤቂዳ ጊሽ ቱማፔ ሃዒ ኑ ፓፃ ዳና።  
\v 9 ኢንቴ ጌዶን ኑ ፆሳ ሲንꬃን ኑ ዴሚዳ ኡፋይሳ ኡባ ጊሽ ፆሳ ኣይ ማላ ጋላታናስ ዳንዳዪዞኒ?  
\v 10 ቃሴካ ኑ ኢንቴና ቤያናሲኔ ኢንቴ ኣማኖፔ ፓጪዳይሳ ኩንꬃናስ ኦማርሲኔ ጋላስ ኬሂ ዎሶስ። 
\p  
\v 11 ሃዒካ ኑ ኢንቴኮ ባና ማላ ኑ ኣዋይ ፆሲ ጎዳ ዬሱስ ኪርስቶሲ ኦጌዛ ኢዚ ኑስ ሱሪሶ።  
\v 12 ኑ ኢንቴና ሲቂዛ ማላ ኢንቴስ ኢንቴ ጋርሳን ዲዛ ሲቆኔ ኢንቴ ሃራታ ሲቂዛ ሲቆዛ ጎዳይ ዳርሶኔ ኬሂ ጉጆ።  
\v 13 ኑ ጎዳ ዬሱስ ኪርስቶሲ ጌሻታ ኡባታራ ዪዛ ዎዴ ኑ ኣዋ ጎዳ ፆሳ ሲንꬃን ኢንቴ ዎሶይ ባይንዳይታኔ ጌሻታ ጊዲዲ ቤታና ማላ ኢንቴ ዎዝና ኢዚ ሚኒሶ። 
\c 4  
\s1 ፆሴ ኡፋይሲዛ ዱስ 
\p  
\v 1 ሃዒ ዉርሴꬃን ታ ኢሻቶ! ኢንቴ ፆሳ ኡፋይሳናስ ኢንቴ ዋኒ ዋኒ ዳና ቤሲዛኮኔ ኑ ኢንቴና ታማርሲዶስ። ቱማፔካ ኑ ታማርሲዳ ማላ ዴታ፤ ሄሳ ጊሽ ጎዳ ዬሱስ ኪርስቶሳን ኑ ኢንቴና ዎሲዛይኔ ዞሪዛይ ሃይሳፌካ ኣꬊዛ ሃኖራ ኢንቴ ሲንꬄ ጉጃና ማላ።  
\v 2 ጎዳ ዬሱስ ኪርስቶሳ ዎልቃን ኑ ኢንቴስ ኣይ ኣዛዞ ኢሚዳኮኔ ኢንቴ ኤሬታ። 
\p  
\v 3 ፆሳ ሼኔይ ኢንቴ ላይማፔ ሃኪዲ ዱማታናሳ።  
\v 4 ቃሴ ኢሲ ኢሲ ኣሳይ ባ ማቾ ጌሻቴꬃኒኔ ቦንቾን ኣይሶ ቤሲዛይሳ ሻኪ ኤሮ።  
\v 5 ሄሲካ ፆሴ ኣማኖንታ ኣይዛቤታ ማላ ላይማ ቃቄቴꬃን ጊዶፖ።  
\v 6 ሄሳ ማላን ኦኒካ ባሌቲዲ ባ ኢሻ ባሌꬆፎ፤ ጋሶይካ ሃይሳፌ ካሴ ኑ ኢንቴስ ዮቲዳ ማላኔ ናጌታናስ ኣኬኪሲዳ ማላ ጎዳይ ሄይታንታ ማላ ናጋራ ኦꬂዛ ኡባታ ቦላ ባ ሃንቆ ኤሃና።  
\v 7 ፆሲ ኑና ጌሻቴꬃስ ፄይጊዴስ ኣቲን ቱናቴꬃስ ፄይጊቤና።  
\v 8 ሄሳ ጊሽ ሃይሳ ሃ ዞሬዛ ካꬊዲ ኤኮንታዴይ ፂሎ ኣያና ኢዛስ ኢሚዳ ፆሳ ካꬌስ ኣቲን ኣስ ካꬊዛዴ ጊዴና። 
\p  
\v 9 ኢሻታ ሲቆቴꬃ ጊሽ ኢንቴስ ኦኒካ ፃፋናስ ኮሼና፤ ጋሶይካ ኢንቴ ኢንቴ ጊዶን ሲቄታና ማላ ኢንቴ ኢንቴ ባጋራ ፆሳፌ ታማሪዴታ።  
\v 10 ኩሜꬃ ማቂዶኒያን ዲዛ ኣማኒዛ ኣሳ ኢንቴ ዉርሲ ሲቂዛይስ ኤሬቲዳይሳ። ጊዶ ኣቲን ኑ ኢሻቶ! ሲንꬃ ባጋን ኢንቴ ሃይሳፌ ኣꬂ ሲቄታና ማላ ኑ ኢንቴና ዞሮስ።  
\v 11 ኑ ሃይሳፌ ካሴ ኢንቴና ኣዛዚዳ ማላ ኢንቴ ኢንቴ ኩሼራ ኦꬂቴ፤ ዎፑ ጊ ዲቴ፤ ኢንቴስ ጊዲዛይሳ ሎዔꬂ ፄሊቴ።  
\v 12 ሄሲካ ጋላስ ጋላስ ኢንቴ ዱሳይ ሃንኮ ኣማኖንታ ኣሳ ኣቻን ኢንቴና ቦንቺሳና ማላኔ ኢንቴ ኣይ ኣሳስካ ቶሆ ጊዶንታ ማላ። 
\s1 ጎዳስ ናምዓንꬆ ዩስ 
\p  
\v 13 ታ ኢሻቶ! ኢንቴ ኣሾን ሃይቂዳይታ ጊሽ ኤሮንታ ኣታና ማላ ኑ ኮዮኮ። ቃሴካ ሂዶታይ ባይንዳ ሃራ ኣሳታ ማላ ኢንቴ ካዮታና ማላ ኑ ኮዮኮ።  
\v 14 ዬሱሲ ሃይቂዲ ዴንዲዳይሳ ኑ ኣማኒዛ ጊዲኮ ዬሱሳ ኣማኒዳይታ ፆሲ ዬሱሳራ ሄሳꬆካ ዛሪ ሃ ዬዳና። 
\p  
\v 15 ኑ ጎዳ ቃላን ኢንቴስ ጊዛይ ሃይሳ። ኑኒ ሃይቆንታ ፓፃ ዲዛይቲኔ ጎዳይ ያና ጋካናስ ጋምዓናይቲ ካሴ ሃይቂዳይታፔ ሲንꬃቶኮ።  
\v 16 ጎዳይ ባ ሁዔራ ጊታ ኣዛዞን ኪታንቻታ ሃላቃ ጊሪሳራ ፆሳ ፁሩምባ ጊሪሳን ሳሎፔ ዎꬋና። ካሴ ኪርስቶሳ ኣማኒዲ ሃይቂዳይቲ ኢስቲ ካሴቲ ዴንዳና።  
\v 17 ሄሳፌ ጉዬ ኑ ቃሴ ፓፃ ዲዛይቲ ጎዳ ጫርኮ ቦላ ጋጋናስ ኢስታራ ኢሲፌ ሻራራ ዴንዳና፤ ሄሳꬆካ ኑ ሜርናስ ጎዳራ ዳና።  
\v 18 ሄሳ ጊሽ ሃይሳ ቃላን ኢሶይ ኢሳራ ሚኔቲቴ። 
\c 5  
\p  
\v 1 ታ ኢሻቶ! ሄሲ ሃናና ዎዴዛ ጊሽ ኑ ኢንቴስ ፃፋናስ ኮሼና።  
\v 2 ካይሶይ ቃማን ዪዛ ማላ ጎዳ ጋላሲካ ሄሳ ማላ ያናይሳ ኢንቴ ኢንቴ ባጋራ ሎዔꬂ ኤሬታ። \x * \xo 5:2 \xt ማቶ 24፡43፤ ሉቃ 12፡39፤ 2ጴፅ 3፡10\x* 
\v 3 ኣሳይ “ጋዴይ ሳሮኔ ሎዖኮ” ጊሺን ሚፃይ ቃንꬃራ ዲዛ ማጫስ ኦይኪዛ ማላ ሄሳꬆካ ኣስ ꬋይሲዛይ ቆፖንታ ኣሳ ቦላ ጋካና። ኦኒካ ኬሲ ኤኬና። 
\p  
\v 4 ኢንቴኖ ኢሻቶ! ሄ ጋላሳይ ካይሶ ማላ ኢንቴና ዳጋንꬃናስ ኢንቴ ꬉማን ዴኬታ።  
\v 5 ኢንቴ ዉሪካ ፖዖ ናይታ፤ ኑኒ ꬉማ ዎይኮ ቃማ ባጋ ጊዶኮ።  
\v 6 ሂስቲኮ ኣኔ ቤጎስ፤ ኣኔ ኑርካ ኑና ሃሮስ ኣቲን ሃንኮ ꬊስኪዛ ኣሳ ማላ ኑካ ኣኔ ꬊስኮኮ።  
\v 7 ꬊሲኪዛይቲ ቃማራ ꬊሲኬቴስ፤ ማꬆቲዛይቲካ ቃማራ ማꬆቴቴስ።  
\v 8 ኑ ቃስ ጋላሳ ኣሳታ ጊዲዳ ጊሽ ኣማኖኔ ሲቆ፥ ቲራን ማይዒዛ ፁሩሬ ማይዖ ማላ ማይዒዲ ኣቶቴꬃ ሂዶታ ሁዔን ዎꬂዛ ቢራታ ቆቤ ማላ ሁዔን ዎꬂዲ ኣኔ ኑናቴꬃ ሃሪዲ ዴዖስ። \x * \xo 5:8 \xt ኢሳ 59፡17፤ ኤፌ 6፡13-17\x* 
\v 9 ፆሲ ኑ ጎዳ ዬሱስ ኪርስቶሳ ባጋራ ኣቶቴꬅ ዴማና ማላ ኣቲን ኑና ሃንቆስ ፄይጊቤና።  
\v 10 ኑ ሃይቂኮካ ዎይኮ ፓፃ ዲኮካ ኢዛራ ዳና ማላ ኢዚ ኑ ጊሽ ሃይቂዴስ።  
\v 11 ሄሳ ጊሽ ቱማፔ ኢንቴ ሃዒ ኦꬂዛይሳ ማላካ ኢሶይ ኢሳራ ሚኔቲቴኔ ሚንꬄꬂቴ። 
\s1 ዉርሴꬃ ዞሬኔ ሳሮካ 
\p  
\v 12 ሂስቲኮ ታ ኢሻቶ! ኢንቴ ጊዶን ሚኒ ኦꬂዛይታ ጎዳን ኢንቴፌ ቦላራ ዲዛ ሃላቃታኔ ኢንቴና ዞሪዛይታ ኢንቴ ቦንቻና ማላ ኑ ኢንቴና ዎሶስ።  
\v 13 ኢስታ ኦሶ ጊሺካ ኢስታ ሲቆራ ሎዔꬂ ቦንቺቴ፤ ኢንቴ ኢንቴ ጊዶን ሳሮን ዲቴ። 
\p  
\v 14 ታ ኢሻቶ! ኑ ኢንቴና “ኦሶ ኦꬆንታ ኣሳታ ሃንቄቲቴ፤ ባቢዛይታ ሚኒሲቴ፤ ዳቡራንቻታ ማዲቴ፤ ኣስ ኡባ ዳንዳዪቴ” ጊ ዞሮስ።  
\v 15 ኦናስካ ኢታ ጊሽ ኢታ ዛሮንታ ማላ ናጌቲቴ፤ ጊዶ ኣቲን ኢንቴ ኢንቴ ጊዶን ጊዲን ሃራ ኣሳራ ጊዲን ኡባ ዎዴ ሎዖ ጊዲዛይሳ ኦꬃናስ ባፄቲቴ። 
\p  
\v 16 ኡባ ዎዴ ኡፋዬቲቴ።  
\v 17 ቃንፆንታ ዎሲቴ።  
\v 18 ኣይ ሃኖንካ ጋላቲቴ ፆሳ ሼኔይ ኢንቴስ ዬሱስ ኪርስቶሳ ባጋራ ሄሳ። 
\p  
\v 19 ፂሎ ኣያና ታማ ቶይሶፍቴ።  
\v 20 ቲንቢቴ ቃላ ካꬎፒቴ።  
\v 21 ዉርሲካ ፓጪ ፄሊቴ፥ ሎዖ ጊዲዳዝ ኦይኪቴ።  
\v 22 ኢታ ጊዲዳ ኣይ ሚሻፔካ ሃኪቴ። 
\p  
\v 23 ሳሮቴꬃ ጎዳይ ኢዚ ኢንቴናቴꬃ ኤራይስ ዱማሶ፤ ኢንቴ ኣያናይ፥ ኢንቴ ሼምፖይኔ ኢንቴ ኣሾይ ጎዳ ዬሱስ ኪርስቶሲ ዪዛ ዎዴ ዎሶይ ባይንዳ ናጌቶ።  
\v 24 ኢንቴና ፄይጊዳይሲ ኣማኔቲዳዴ ጊዲዳ ጊሽ ኢዚ ሄሳ ኦꬃና። 
\p  
\v 25 ኑ ኢሻቶ! ኑ ጊሺካ ዎሲቴ።  
\v 26 ኣማኒዛይታ ኡባ ጌሻ ዬሬቴꬃን ሳሮኪቴ።  
\v 27 ሃ ኪታይ ኣማኒዛይታስ ኡባስ ናባቤታና ማላ ጎዳ ሱንꬃን ሃዳራ ጋይስ። 
\p  
\v 28 ኑ ጎዳ ዬሱስ ኪርስቶሳ ኣꬎ ኪያቴꬂ ኢንቴናራ ጊዶ።