\id 1PE - Gamo project 
\h 1 ጴፅሮሳ 
\toc1 ጴፅሮሲ ፃፊዳ ኮይሮ ኪታ 
\toc2 1 ጴፅሮሳ 
\toc3 1ጴፅ 
\mt1 ጴፅሮሲ 
\mt2 ፃፊዳ ኮይሮ ኪታ 
\imt1 ጊዶ ቆፋ 
\ip ሃዋሬ ጴፅሮሲ ፃፊዳ ኮይሮ ኪታዛ ጊዶን “ፆሳስ ዶሬቲዳ ዴሬ” ጌቴቲ ፄይጌቲዛይታሲኔ ፑዴሃ ባጋራ ቄሪ ኢሲያ ዴሬን ላሌቲ ዲዛ ኣማኒዛይታሳ። ሄ ኪታስ ዋና ቆፋይ ኣማኖ ጌዶን ዳሮ ሜቶይኔ ጎዴቴꬅ ኢስታ ቦላ ጋኪዳይታ ሚንꬄꬃናሲኔ ዴንꬄꬃናሲኮ። ፃፌዚ ሄሳꬆ ኦꬂዳይ ዬሱሳ ሃይቆ ጊሽ፥ ሃይቆፔ ዴንꬃ ጊሺኔ ኢዚ ናምዓንꬆ ሃ ሲሚ ያና ዩሳ ሂዶታ ቆንጪሲዛ ዬሱስ ኪርስቶሳ ሚሺራቾ ቃላ ናባቢዛይታ ቆፊሳናሳ። ዬሱስ ኪርስቶሲ ካሴ ዴዪዳ ዱሳ ሌሚሶ ማላ ፄሊዲ ኢስታካ ሜቶ ጌንጪ ኣꬃናስ ቤሲዛይሳ ቆፊሴስ። ሄይታራ ዉርሲ ጋꬂዲ ሜቶይ ኢስታ ኣማኖ ሚኖቴꬅ ፓጪዛይሳኔ “ዬሱስ ኪርስቶሲ ቆንጪዛ ጋላስ” ኢስቲ ባስ ቤሲዛ ዋጋ ኤካናይሳ ኢስታ ቆፊሴስ። 
\ip ፃፌዚ ኢስቲ ሜቶ ዳንዳያና ማላ ኢስታ ሚንꬄꬆፌካ ቦላራ ሄሳ ናባቢዛይቲ ኪርስቶሳ ካሊዛይቲ ዴዓናስ ቤሲዛ ዱስ ዳና ማላ ቆፊሴስ። 
\is1 ሃ ማፃፋይ ኦይኪዳ ኩሜꬃ ቆፋ 
\io1 ጌሎሶ 1፡1-2 
\io1 ፆሲ ኣሺዛዴ ጊዲዳይሳ ኤሪሶ 1፡3-12 
\io1 ፆሳስ ዱማቲ ዳና ማላ ኢሜቲዳ ዞሬ 1፡13-2፡10 
\io1 ሜቶ ዎዴ ኣማኒዛይታ ኣላፌቴꬅ 2፡11-4፡19 
\io1 ኣማኒዛይታ ኣሺኬቴꬂኔ ኢስታ ኦሶ 5፡1-11 
\io1 ኩሻ ቆፋ 5፡12-14 
\c 1  
\p  
\v 1 ዬሱስ ኪርስቶሳ ሃዋሬ ጊዲዳ ጴፅሮሳፔ፥ ኣሳ ቢታን ቤቴን ዲዛይታስ ጳንፆሳን፥ ጋላቲያን፥ ቃጶዶቂያን፥ ኢሲያኒኔ ቢቲኒያ ቢታን ላሌቲ ዲዛ ኢንቴስ፥  
\v 2 ኣዋይ ፆሲ ካሴ ኢንቴና ኤሪዳ ማላ ዶሬቲዳይታስ፥ ዬሱስ ኪርስቶሳስ ኣዛዜታናሲኔ ኢንቴ ኢዛ ሱꬃን ኣራጬቲዲ ጌያና ማላ ፂሎ ኣያናን ዱማቲዳ ኢንቴስ ኪያቴꬂኔ ሳሮቴꬂ ዳሮ። 
\s1 ጊታ ሂዶታ 
\p  
\v 3 ዬሱስ ኪርስቶሲ ሃይቆፔ ዴንዲዳ ጊሽ ኑስ ዴዖ ጊዲዳ ሂዶታ ኢሚዳይሲ ባ ጊታ ማሮቴꬃን ኑና ባስ ኦራꬃ ናይታ ሂስቲዳ ኑ ጎዳ ዬሱስ ኪርስቶሳ ኣዋይ ፆሲ ጋላቴቶ።  
\v 4 ኢዚ ꬋዮንታ፥ ሞሬቶንታኔ ጬጎንታ ላታሶ ኢንቴስ ሳሎን ጊጊሲ ዎꬂዴስ።  
\v 5 ኢንቴካ ዉርሴꬃ ጋላሳን ቡሮ ቆንጫና ኣቶቴꬃስ ኣማኖ ጌዶን ፆሳ ዎልቃን ናጌቲዴታ። 
\p  
\v 6 ሃዒ ጉꬃ ዎዴስ ዱማ ዱማ ፓጬቲ ኢንቴና ዋይሲኮካ ኢንቴ ሄሳን ኡፋዬቲቴ።  
\v 7 ሄሲ ሄ ፓጬዚ ኢንቴ ቦላ ጋኪዛይ ኢንቴ ኣማኖዚ ቱሙ ጊዲዳይሳ ቆንጪሳናሳ። ꬋያና ዎርቃይካ ታማን ፓጬቴስ። ዎርቃፌ ኣꬊ ቦንቾ ጊዲዳ ኢንቴ ኣማኖይካ ሄሳꬆ ፓጬታናስ ቤሴስ። ሄሲ ሄ ፓጬቲዳ ኢንቴ ኣማኖይ ዬሱስ ኪርስቶሲ ቆንጪዛ ጋላስ ጋላታስ፥ ቦንቾሲኔ ሳባስ ኢንቴና ጋꬃና።  
\v 8 ኢንቴ ዬሱስ ኪርስቶሳ ኣይፌራ ቤዮንታ ኣጊኮካ ኢንቴ ኢዛ ዶሴታ፤ ሃዒካ ኢንቴ ኢዛ ቤዮንታ ኣጊኮካ ኢዛ ኣማኔታ፤ ጮ ቃላን ቆንጪሳና ዳንዳዮንታ ጊታ ቦንቾ ኡፋይስ ኢንቴ ኡፋዬቴታ።  
\v 9 ኢንቴ ናጊዛ ኢንቴ ሼምፖይስ ኣቶቴꬅ ኢንቴ ኣማኖን ዴሚዴታ። 
\p  
\v 10 ሄ ኣቶቴꬃዛ ጊሽ ኢንቴስ ኢሜታና ኪያቴꬃስ ካሴ ናቤቲ ሎዔꬂ ዎዝናፔ ፒልጊ ፄሊዳ።  
\v 11 ካሴ ኢስታን ዲዛ ኪርስቶሳ ኣያናይ ፆሳፌ ቲዬቲዳይሳ ቦላ ጋካና ዋዬዛኔ ሄ ዋዬዛፔ ጉዬ ኢዚ ዴማና ቦንቾዛ ጊሽ ካሴ ባስ ዎꬂዴስ። ኢስቲ ቃስ ሄሲ ዉሪካ ኣይዴ ዋኒ ሃናናኮኔ ዩሺ ቆፒዳ።  
\v 12 ሄ ካሴ ናቤቲ ኢንቴስ ኦꬂዳ ኣቲን ኢስቲ ባስ ኦꬆንታይሲ ኢስታስ ቆንጬን ኤሬቲዴስ። ኢስቲ ኢንቴስ ኦꬂዳይ ቦላ ሳሎፔ ኪቴቲዳ ፂሎ ኣያና ባጋራ ሃዒ ኢንቴስ ሚሺራቾ ቃላ ዮቲዳ ኣሳቲ ኢንቴስ ዮቲዳይሳ ቆንጪሳናሳ። ሄሳ ኔ ቃላ ኪታንቻቲካ ቤያናስ ኣሞቲዳ። 
\s1 ፆሳስ ዱማቲ ዱስ 
\p  
\v 13 ሄሳ ጊሽ ኢንቴ ኢንቴ ዎዝና ሱሪሲዲ ኦሶስ ጊጌቲቴ። ዎጋራ ዴዒቴ። ዬሱስ ኪርስቶሲ ቆንጪዛ ዎዴ ኢንቴ ኢዛ ኪያቴꬃ ዴማናስ ኢንቴስ ኩሜꬃ ሂዶታይ ዴዖ።  
\v 14 ኢንቴ ኣዛዜቲዛ ናይታ ጊዲዲ ኤሮንታ ዲሼ ኢንቴ ካሴ ኢዛን ዲዛ ኢታ ቆፋ ካሎፍቴ።  
\v 15 ኢንቴና ፄይጊዳ ፆሳይ ዱማ ጊዲዳ ማላ ኢንቴካ ኢንቴ ዱሳን ኡባን ዱማቲቴ።  
\v 16 ጋሶይካ “ታኒ ጌሽ ጊዲዳ ጊሽ ኢንቴካ ጌሽ ጊዲቴ” ጌቴቲ ጌሻ ማፃፋን ካሴ ፃፌቲዴስ። \x * \xo 1:16 \xt ሌዌ 11፡44-45፤ 19፡2\x* 
\p  
\v 17 ኦናካ ዱማ ሻኪ ማዶንታ ኢሳ ኢሳስ ኢዛዴ ኦሶ ማላ ፒርዲዛ ፆሳ “ኢዚ ኑ ኣዋ” ጊዲ ኢንቴ ፄይጊኮ ሃይሳ ኣላሜዛን ኢንቴ ኢማꬄኔ ቤቴ ኣስ ጊዲዲ ዲዛ ዎዴ ኡባን ኢዛስ ባቢቴ።  
\v 18 ኢንቴ ካሴ ኢንቴ ኣዋታፔ ላቲዳ ጮ ሜላ ሃዳ ዱሳፌ ዎዜቲዳይ ꬋዪዛ ቢራን ዎይኮ ዎርቃን ጊዶንታይሳ ኢንቴ ኤሬታ።  
\v 19 ጊዶ ኣቲን ኢንቴ ዎዜቲዳይ ኢታይኔ ዎሶይ ኢዛ ቦላ ባይንዳ ጌሻ ዶርሳ ማላ ጊዲዳ ኪርስቶሳ ቦንቾ ሱꬃና።  
\v 20 ኢዚ ኤሬቲዳይ ሃይሲ ኣላሜዚ ሜꬌታናፔ ካሴ ጊዲሺን ሃዒ ቃስ ዉርሴꬃ ዎዴን ኢንቴስ ቆንጪዴስ።  
\v 21 ኢንቴስ ኣማኖይኔ ኢንቴ ሂዶታይ ፆሳን ጊዳና ማላ ዬሱስ ኪርስቶሳ ባጋራ ሄ ኢዛ ሃይቆፔ ዴንꬂዲ ኢዛስ ቦንቾ ኢሚዳ ፆሳን ኢንቴ ኣማኔቴታ። 
\p  
\v 22 ኢንቴ ኣማኒዛይታ ሱሬ ዎዝናፔ ሲቃና ማላ ቱማስ ኣዛዜቴꬃን ኢንቴ ኢንቴ ኣሳቴꬅ ጌሺዴታ። ሄሳ ጊሽ ኢንቴ ኢንቴ ጊዶን ኢሶይ ኢሳራ ሎዔꬂ ሲቄቲቴ። \f + \fr 1:22 \fq ሱሬ ዎዝናፔ \ft ኢሲ ኢሲ ጌኢሻ ማፃፋቲ ኩሜꬃ ዎዝናፔ ጌቴስ።\f* 
\v 23 ኢንቴ ናምዓንꬆ ዬሌቲዳይ ሜርናስ ሚኒ ዲዛ ꬋዮንታ ዴዖ ፆሳ ቃላን ꬋዮንታ ዜሬꬃፌ ኣቲን ꬋዪዛ ዜሬꬃፌ ጊዴና።  
\v 24 ጌሻ ማፃፋይ ጊዛ ማላ 
\q1 “ኣሾ ማይዒዳይ ዉሪካ ማታ ማላ፤ 
\q2 ኢዛ ቦንቾይካ ዉሪካ ዎራ ጪሻ ማላ፤ 
\q1 ማታይካ ሜሌስ፤ ጪሻይካ ቆኬስ። 
\q1  
\v 25 ጎዳ ቃላይ ጊዲኮ ሜርናስ ኤቂ ዴስ።” 
\m ኢንቴስ ሳባኬቲዳ ሚሺራቾ ቃላይካ ሄሳ። 
\c 2  
\s1 ዴዖ ሹቺኔ ጌሻ ዴሬ 
\p  
\v 1 ሄሳ ጊሽ ኢታቴꬅ ዉርሲ፥ ባሌꬆ ዉርሲ፥ ቆꬌፔ ቆሞን ሃኖ፥ ቃናቴቴꬅ ኣይኮ ቆሞ ዚጊርስ ኢንቴፌ ዲጊቴ።  
\v 2 ሃዒ ዬሌቲዳ ጉꬃ ናይቲ ማꬅ ኣሞቲዛይሳ ማላ ኢንቴካ ኣታናስ፥ ኢዛን ዲጪ ዲጪ ባናስ ጌሺ ጊዲዳ ኣያና ቲሚርቴ ላሞቲቴ።  
\v 3 ኢንቴ ላሞታናስ ቤሲዛይ ጎዳይ ኪያ ጊዲዳይሳ ሻኪ ኤርኮኮ! \x * \xo 2:3 \xt ማዛ 34፡8\x* 
\p  
\v 4 ሄሳ ጊሽ ጌዴ ዴዖ ሹች ጊዲዳ ዬሱሳኮ ሺቂቴ። ሄ ሹቻይ ኣሳይ ሌቂ ኣጊዳይሳ ሺን ፆሳ ኣቻን ቃስ ዶሬቲዳይሳኔ ቦንቾ ዋጋይ ዲዛይሳ።  
\v 5 ኢንቴ ጌዴ ጎዳ ዬሱሳኮ ሺቃናይካ ዴዖ ሹቻ ማላ ፂሎ ኣያና ዱሳሶ ጊዳና ማላ ኦሴቴታ፤ ሄሳꬆካ ኢንቴ ዬሱስ ኪርስቶሳ ባጋራ ኡፋይሲዛ ኣያና ያርሾ ፆሳስ ሺሻናስ ጌሻ ቄሴታ ጊዳንዴታ።  
\v 6 ጌሻ ማፃፋን “ሄኮ ዶሬቲዳ ቦንቾ ጊዲዳ ኬꬃስ ማዜኔን ኡቲዛ ሹች ታኒ ፂዮኔን ዎꬃና። ኢዛን ኣማኒዛዴይ ዬላቴና” ጊዛ ቃላይ ፃፌቲ ኡቲዴስ። \x * \xo 2:6 \xt ኢሳ 28፡16\x* 
\v 7 ሄሳ ጊሽ ኢንቴስ ኣማኒዛይታስ ሄ ሹቻይ ቦንቾ ሹቺኮ ሺን ሂንኮ ኢዛን ኣማኖንታይታስ ቃስ “ሹቻን ኬፂዛ ኬꬃ ሂላቲ ሌቂ ዎራ ዬጊዳይስ ኢዚ ኬꬃ ማዜኔስ ሁዔ ጊዲዴስ”\x * \xo 2:7 \xt ማዛ 118፡22\x* 
\v 8 ቃሴካ “ሄኮ ኣሴ ꬉጲዛ ሹቻይ ሃይሲች! ኣሳ ꬉጲ ኩንዲሲዛ ዛላ ሹቻይ ሃይሳኮ” ጌስ። ኢስቲ ቃላ ኣማኖንታ ኢፂዳ ጊሽ ꬉጴቴቴስ። ካሴካ ኢስቲ ሄሳስ ዲዛይታ። \x * \xo 2:8 \xt ኢሳ 8፡14-15\x* 
\p  
\v 9 ኢንቴ ቃስ ꬉማፔ ጌዴ ዳሮ ማላሊሲዛ ኢዛ ፖዖኮ ፄይጊዳ ማላሊሲዛ ፆሳ ኦꬆ ኣዋጃናስ ዶሬቲዳ ዬሌቴꬅ፥ ካዎ ቄሴታ፥ ፆሲ ኢንቴና ባስ ሂስቲዳ ኢንቴ ዱማ ዴሬታ። \x * \xo 2:9 \xt ኬሳ 19፡5-6፤ ኢሳ 43፡20-21፤ ዛሬ 4፡20፤ 7፡6፤ 14፡2፤ ቲቶ 2፡14፤ ኢሳ 9፡2\x* 
\v 10 ኢንቴ ካሴ ፆሳ ዴሬ ጊዴኬታ ሺን ሃዒ ጊዲኮ ኢንቴ ፆሳ ዴሬ። ኢንቴ ካሴ ኢንቴስ ፆሴ ቃꬌቶንታ ዴሬኮ ሺን ሃዒ ጊዲኮ ቃꬌቲዴስ።\x * \xo 2:10 \xt ሆሴ 2፡23\x* 
\s1 ፆሳ ኦሳንቻታ 
\p  
\v 11 ታ ሲቆቶ! ኢንቴ ሃይሳ ኣላሜዛ ቦላ ኢማꬄኔ ቤቴ ኣስ ጊዲዳ ጊሽ ሼምፖራ ኦሌቲዛ ኣሾ ኣሞቴꬃታፔ ሃካና ማላ ታ ኢንቴና ሃዳራ ጋይስ።  
\v 12 ኦኔ ኤሪዛይ “ኢንቴና ኢስቲ ኢታ ኦꬄቴስ” ጊዲ ኣሳይ ዚጊሪኮካ ፆሲ ኑና ቤያናስ ዪዛ ጋላስ ኣይዛቤቲ ኢንቴ ኦሶይ ሎዖ ጊዲዳይሳ ቤዒዲ ፆሴ ጋላታና ማላ ኢንቴ ኢስታራ ዲዛ ዎዴ ኢንቴ ኣማሌይ ሎዖ ጊዶ። 
\p  
\v 13 ኢንቴ ጎዳ ዬሱሳ ጊሽ ጊዲ ዴሬ ኣይሲዛይታስ ኣዛዜቲቴ። ካዎይ ቃስ ኡባፌ ቦላራ ዲዛ ጊሽ ካዎሲካ ኣዛዜቲቴ።  
\v 14 ዴሬ ኣይሲዛይታስ ኣዛዜቲቴ። ኢስቲ ኢታ ኦꬂዛይታ ቃፃያናሲኔ ሎዖ ኦꬂዛይታ ጋላታናስ ካዎፔ ኪቴቲዛይታ።  
\v 15 ኢንቴ ሎዖ ኦሶን ሃንኮ ኤራይ ባይንዳ ኤያቴꬃን ሃሳዪዛይታ ጮዑ ሂስታና ማላ ሄሲካ ፆሳ ሼኔ።  
\v 16 ኢንቴ ፆሳስ ኦꬂዛ ኣሳታ ማላ ጊዲዲ ሂርጋይ ባይንዳ ዴዒቴ ኣቲን ኢንቴ ኢንቴ ሼኔ ማላ ዲዛ ዱሳ ኢታቴꬃ ካሚዛ ሚሽ ሂስቶፍቴ።  
\v 17 ኣስ ኡባካ ቦንቺቴ። ኣማኒዛይታ ሲቂቴ። ፆሳስ ባቢቴ። ካዎ ቦንቺቴ። 
\s1 ኪርስቶሳ ዋዬቴꬃ ሌሚሶ 
\p  
\v 18 ኢንቴኖ ኣሳስ ኦꬂ ኣቂዛይቶ! ኢንቴና ኦሲሲዛ ጎዳታስ ቦንቾን ኣዛዜቲቴ። ኢንቴ ኣዛዜታናይ ሎዖታሲኔ ኣሽኬታስ ፃላላ ጊዶንታ ሃንኮ ኢታታሳራኮ!  
\v 19 ኣሲ ጋላቴቲዛይ ጮ ሜላ ቆሄቲሼ፤ ሄሲካ ፆሳ ጊሽ ጊዲ ዳንዳያና።  
\v 20 ኢንቴ ኢታ ኦꬂዳ ጊሽ ቃፃዬቲሼ ዳንዳዪኮ ኢንቴስ ኣዛ ጋላታይ ዳኔ? ኢንቴ ሎዖ ኦꬂዲ ዋዬ ኤኪሼ ዳንዳዪኮ ኢንቴ ፆሳፌ ጋላታ ኤካንዴታ።  
\v 21 ኢንቴ ፄይጌቲዳይካ ሄሳሳ። ኢንቴ ኢዛ ሌሚሶ ካላና ማላ ኪርስቶሲ ኢንቴ ጊሽ ዋዬ ኤኪዲ ኢንቴስ ሌሚሶ ጊዲዴስ።  
\v 22 ኢዚ ኣይኮ ናጋራካ ኦꬂቤና። ኢዛ ዱናን ጌኔይ ቤቲቤና። \x * \xo 2:22 \xt ኢሳ 53፡9\x* 
\v 23 ኣሳይ ኢዛ ጫዪሺን ኢዚ ዛሪ ጫዪቤና። ዋዬቲሼ ባና ቱሙ ፒርዲዛ ጎዳስ ሃዳራ ኣꬂ ኢሚዴስ ኣቲን ሃሎ ኬሳና ማንዲቤና። \x * \xo 2:23 \xt ኢሳ 53፡7\x* 
\v 24 ኑኒ ናጋራፔ ሻካቲዲ ፂሎቴꬃን ዳና ማላ ኢዚ ባርካ ባ ኣሾን ኑ ናጋራ ማስቃሌ ቦላ ቶኪዴስ። ኢንቴ ኢዛ ማዱንꬃን ፓፂዴታ። \x * \xo 2:24 \xt ኢሳ 53፡5\x* 
\v 25 ኢንቴ ꬋዪዳ ዶርሳታ ማላ ጮ ሜላ ቱይሩ ቱይሪዴታ ሺን ሃዒ ቃስ ኢንቴ ሼምፖ ሄሚዛይሳኮኔ ናጊዛይሳኮ ሲሚዴታ። 
\c 3  
\s1 ኣዚና ጊሺኔ ማቺ ጊሽ 
\p  
\v 1 ሄሳꬆካ ማቼቶ! ኢንቴ ኢንቴ ኣዚናታስ ኣዛዜቲቴ። ሄሳꬆ ኢሲ ኢሲ ኣዚናቲ ፆሳ ቃላ ኣማኖንታይታ ጊዲኮካ ጮ ሜላ ባ ማቼታ ሎዔቴꬃን ፃላላ ሲሞንታ ኣጌቴና። \x * \xo 3:1 \xt ኤፌ 5፡22፤ ቆላ 3፡18\x* 
\v 2 ኢስቲ ሲማና ዳንዳዪዛይ ኢንቴ ጌሻቴꬃኔ ኢንቴ ኣሴ ቦንቺዛ ዱስ ዲዛይሳ ቤዪዲኮ።  
\v 3 ኢንቴ ሎዔቴꬂ ጮ ሜላ ሁዔ ዳꬃኒኔ ዎርቃን ጌፄቴꬃን፥ ኣልዖ ማዮ ማይዖን፥ ጮ ሜላ ኣይፌን ቤቲዛ ጌፄን ጊዶፖ። \x * \xo 3:3 \xt 1ፂም 2፡9\x* 
\v 4 ኢንቴ ሎዖይ ፆሳ ሲንꬃን ዋጋራ ዲዛ ኬሂ ቦንቼቲዳዚኔ ꬋዮንታ ጌፄን፥ ኣሽኬቴꬃን፥ ኣዳቴꬃኒኔ ኣያናን ጌፄቲዳ ዎዝና ጋርሳን ቆቴቲ ዲዛ ጊዶ ዎዝና ሎዔቴꬅ ጊዶ።  
\v 5 ቤኒ ዎዴ ባ ሂዶታ ፆሳን ኦꬂዳ ጌሻ ማጫሳቲ ጌፄቲዳይ ሃይሳ ማላና። ኢስቲ ባ ኣዚናታስ ኣዛዜቲዳ።  
\v 6 ኢስቲ ኣዛዜቲዳይካ ሳራይ ኣብራሃሜ “ታ ጎዶ!” ጋዳ ኣዛዜቲዳይሳ ማላ። ኢንቴካ ሎዖ ሚሽ ኦꬂኮኔ ኢሲ ኢታ ሚሺ ኢንቴና ዳጋንꬆንታ ኣጊኮ ኢንቴ ሳራ ናይታ። 
\p  
\v 7 ኣዚናቶ! ኢንቴ ኢንቴ ማቼታራ ኣኬካን ኢሲፌ ዴዒቴ። ኢስቲ ኢንቴፌ ዳቡራንቻ ሜꬌቴꬅ ጊዲዳ ጊሺኔ ቃሴካ ፆሲ ጮ ሜላ ኪያቴꬃን ኢሚዛ ዴዖ ኢስቲ ኢንቴናራ ኢሲፌ ላታናይሳ ጊሽ ኢንቴ ኢስታ ቦንቺቴ። ኢንቴ ሄይሳꬆ ኦꬂኮ ኢንቴ ዎሳ ꬉጲዛ ሚሺ ዴና። \x * \xo 3:7 \xt ኤፌ 5፡25፤ ቆላ 3፡19\x* 
\s1 ሎዖ ኦꬂዛ ጊሽ ዋዬ ቤዖ 
\p  
\v 8 ሄሳፌ ኣሳ ባጋራ ቃስ ኢንቴ ኢሶይ ኢሳራ ሲቆን ዲቴ። ሃራ ኣሳ ቦላ ጋኪዛ ሜቶ ኢንቴ ሜቶ ማላ ፄሊቴ። ኢንቴ ኢንቴ ጋርሳን ኢሻንታ ማላ ሲቄቲቴ። ኣሺኬታኔ ኪያታ ጊዲቴ።  
\v 9 ኣንጂቴ ኣቲን ኢስታስ ኢታ ጫሻስ ጫሽ ዛሮፒቴ። ኢንቴ ፄይጌቲዳይ ሄሳꬆ ኦꬂዲ ኣንጆ ላታናሳ።  
\v 10 ጌሻ ማፃፋይ ጊዛ ማላ “ዴዖን ዳና ኮዪዛይኔ ሎዖ ጋላሳታ ቤያናስ ኮዪዛ ኣሲ ባ ዱናፔ ኢታ ሃሳዮንታ ማላኔ ባ ሜቴርሻቲካ ጌኔ ሃሳዮንታ ማላ ናጌቶ።  
\v 11 ኢታ ዮዖፔ ሃኮ፥ ሎዖ ኦꬆ፤ ሳሮቴꬅ ኮዮኔ ካሎ።  
\v 12 ጎዳ ኣይፌቲ ፂሎታ ባጋ ፄሌቴስ። ኢዛ ሃይꬄቲካ ኢስታ ዎሳ ሲያናስ ዶያ ዴቴስ። ሂንኮ ኢታ ኦꬂዛይታ ቃስ ጎዳይ ባ ሃንቆ ኣይፌሶ ቤሳና” ጊዴስ። 
\p  
\v 13 ኢንቴ ሎዖ ኦꬃናስ ሚኔቲኮ ኢንቴ ቦላ ኢታ ሚሽ ጋꬃናይ ኦኔ?  
\v 14 ኢንቴ ሎዖ ኦꬂዳ ጊሽ ዋዬ ቤዒኮካ ኢንቴ ኣንጆ ኤካና። ኣሳይ ኢንቴ ቦላ ኢታ ኦꬃናስ ማንዴቲዛይሳስ ባቦፊቴኔ ዳሮ ቆፖፍቴ። \x * \xo 3:14 \xt ማቶ 5፡10፤ ኢሳ 8፡12-13\x* 
\v 15 ጎዳ ኪርስቶሳ ኢንቴ ዎዝናን ቦንቺቴኔ ኢዛ ኢንቴ ዴዖስ ጎዳ ሂስቲቴ። ኢንቴስ ዲዛ ሂዶታ ጊሽ ኢንቴና ኦይቺዛይታስ ኡባስ ዛሮ ኢማናስ ኡባ ዎዴ ጊጌቲ ኡቲቴ።  
\v 16 ኢንቴ ኢስታስ ኢማና ዛሮይ ቃስ ኣሽኬቴꬃኒኔ ቦንቾን ጊዶ። ኢንቴ ኪርስቶሳይታ ጊዲዳ ጊሽ ኢንቴስ ዲዛ ሎዖ ኣማሌዛ ጊሽ ኢታ ሃሳዪዛ ኣሳይ ባ ኢታ ሃሳያን ዬላታና ማላ ኢንቴስ ሎዖ ቆፋይ ዴዖ።  
\v 17 ፆሳ ሼኔ ጊዲኮ ኢንቴ ኢታ ኦሶ ኦꬂዲ ዋዬታናይሳፌ ሎዖ ኦሶ ኦꬂዲ ዋዬቲኮ ሎዖ።  
\v 18 ኪርስቶሲካ ኑና ፆሳኮ ሺሻናስ ኢዚ ባ ሁዔስ ፂሎኮ ሺን ሃንኮ ፂሎ ጊዶንታ ኑ ናጋራ ጊሽ ናምዓንꬄቶንታ ማላ ኢሲቶ ዋዬቲዲ ሃይቂዴስ። ኢዚ ኣሾን ሃይቂዴስ ሺን ኣያናን ቃስ ፓፂዴስ።  
\v 19 ሄሳ ሄ ኣያናን ቃሾ ኬꬃን ዲዛ ሼምፖታኮ ቢዲ ኢስታስ ሚሺራቾ ቃላ ዮቲዴስ።  
\v 20 ሄይቲ ሄን ዎይኔ ኬꬃን ዲዛ ሼምፖቲ ካሴ ኖሄ ዎዴ ማርካቤዚ ኦꬄቲ ጊጊሺን ኢስቲ ሲማና ማላ ፆሲ ዳንዳያን ናጊሺን ኑኒ ኔስ ኣዛዜቶኮ ጊዳይታ። ሄ ማርካቤዛን ጌሊን ሃꬄፌ ኣቲዳይታ ቆዳይ ኦሱፑን ጊዲዳ ጉꬃ ኣሳታ ፃላላ። \x * \xo 3:20 \xt ሜꬌ 6፡1-7፡24\x* 
\v 21 ሄሲ ሄ ሃꬃይ ሃዒ ቃስ ኢንቴ ኢዛን ኣቲዛ ፂንቃቴ ሌሚሶ። ሃይሲ ፂንቃቴይ ቂታ ቦላ ጌያናስ ሜጬቴꬂ ጊዶንታ ጌሻ ቆፋ ኤካናስ ፆሳኮ ሺሺዛ ዎሳ። ኢዚ ኢንቴና ኣሻናይካ ዬሱስ ኪርስቶሳ ዴንꬃ ባጋራ።  
\v 22 ኢዚ ፑዴ ሳሎ ቢዲ ሃዒ ፆሳ ኣቻን ዴስ። ኪታንቻቲኔ ጎዳቴꬂ ኢስታስ ዲዛይቲ ዎልቃማታካ ኢዛስ ሃሬቲዳ። 
\c 4  
\s1 ጌሻቴꬃን ዱስ 
\p  
\v 1 ኪርስቶሲ ባ ኣሾን ዋዬ ኤኪዳ ጊሽ ኢንቴካ ኦላ ኦሌቲዛ ሚሼ ጊፂዳ ኣሳ ማላ ሃይሳ ሃ ቆፋን ሚኒዲ ጊጌቲቴ። ባ ኣሾን ዋዬ ቤዪዳ ኣሲ ናጋራ ኦሶ ኣጊዴስ።  
\v 2 ሄሳፌ ጉዬ ባ ዲዛ ዎዴ ኡባን ኢዚ ዳናይ ኢታ ኣሾ ኣሞቴꬂ ኦሶን ጊዶንታ ዲሼ ፆሳ ሼኔ ፖሎና።  
\v 3 ሂንኮ ዴሬ ኣሳቲ ኦꬂዛይሳ ማላ ኢንቴ ጮ ሜላ ዬዳ ዱሳን ኣሾ ኣሞን፥ ማꬆን፥ ኦጌይ ባይንዳ ካሳን፥ ዎጋፔ ኣꬂ ኡዪዲ ዱሩሳኒኔ ሃራሲዛ ኤቃ ጎይኖን ካሴ ኢንቴ ኣꬂዳ ዎዴዚ ኢንቴስ ጊዳና።  
\v 4 ሃዒ ቃስ ኢንቴ ሃ ዮዖዛን ኢስታራ ዎጋይ ባይንዳ ቂፂ ቂፆንታ ጊሽ ኢስቲ ማላሌቴቴሲኔ ኢንቴና ጫዬቴስ።  
\v 5 ጊዶ ኣቲን ሃይቂዳይታ ቦላኔ ፓፃ ዲዛይታ ቦላ ፒርዳናስ ጊጊ ኡቲዳይሳስ ኢስቲ ዛሮ ኢማና።  
\v 6 ሃይቂዳይታሳራ ሚሺራቾ ቃላይ ዮቴቲዳይ ሄሳ ጊሻሳ። ሄሳꬆካ ኣይ ኣሳ ቦላካ ፒርዲዛ ማላ ኢስታ ኣሾ ቦላ ፒርዳና። ኢስታ ሼምፖይ ቃስ ፆሲ ዲዛ ማላ ዴዖን ዴያና። 
\s1 ፆሳ ኢሞታታ ዎጋራ ጎዔቴꬅ 
\p  
\v 7 ሄሳ ጊሽ ዎዴ ዉርሴꬂ ማቲዴስ። ኢንቴ ሚኒ ዎሳናስ ዳንዳያና ማላ ዎጋራ ዲቴኔ ዎፑ ጊዳ ቆፋይ ኢንቴስ ዴዖ።  
\v 8 ሲቆይ ዳሮ ናጋራ ካሚዛ ጊሽ ሃራፔ ቦላራ ኢንቴ ኢንቴ ጋርሳን ሎዔꬂ ሲቄቲቴ። \x * \xo 4:8 \xt ሌም 10፡12\x* 
\v 9 ዙዙንꬂ ባይንዳ ኢሶይ ኢሳ ኢማꬃቴꬅ ሞኪ ኤኪቴ።  
\v 10 ዱማ ዱማ ጊዲዳ ፆሳ ኪያቴꬃ ኢሞታታ ኣማኔቴꬃን ኦይኪዲ ኢንቴፌ ኢሲ ኢሲ ኣሲ ባስ ኢሜቲዳ ፆሳ ኪያቴꬃ ኢሞታን ሃራ ኣስ ማዶ።  
\v 11 ታማርሲዛዴይ ፆሳ ቃላ ታማርሲዛ ማላ ታማርሶ፤ ሃጋዚዛዴይ ፆሲ ኢዛስ ኢሚዛ ዎልቃን ሃጋዞ፤ ሄሳ ማላን ፆሲ ዬሱስ ኪርስቶሳ ባጋራ ሃኒዛ ኡባን ጋላቴታና። ቦንቾይኔ ጎዳቴꬅ ሜርናፔ ሜርና ጋካናስ ኢዛስ ጊዶ። ኣሚን! 
\s1 ሜቶ ዳንዳዮ 
\p  
\v 12 ታ ሲቆቶ! ኢንቴ ታማ ማላ ፓጪዛ ሜቶ ጊዶን ጌሊዛ ዎዴ ሄሳ ማላይ ካሴ ባይንዳ ኦራꬃ ሚሺ ጋኪዳዝ ኢንቴስ ሚሳቲን ማላሌቶፍቴ።  
\v 13 ሄሳፌ ቦላራ ኪርስቶሳ ቦንቾይ ቆንጪዛ ዎዴ ኢንቴ ኬሂ ኡፋዬታና ማላ ኢንቴ ኢዛራ ኢዛ ዋዬዛ ኤኪዛይታ ጊዲዳ ማላ ኡፋዬቲቴ።  
\v 14 ኢንቴ ኪርስቶሳ ሱንꬃ ጊሽ ጫዬቲኮ ቦንቾ ኣያናይ ሄሲካ ፆሳ ኣያናይ ኢንቴ ቦላ ሼምፒዛ ጊሽ ኡፋዬቲቴ።  
\v 15 ኢንቴፌ ኦና ቦላካ ሜቶይ ጋኪኮ ሄሳዴይ ሼምፖ ዎꬊዳ ኣሳ ማላ፥ ካይሶ ማላ፥ ኢታ ኦꬂዳ ኣሳ ማላኔ ኣሳ ዮዖ ጊዶ ጮ ዎፂ ጌሊዳዴ ማላ ጊዶፖ።  
\v 16 ኢዚ ኣማኒዛዴ ጊዲዳ ጊሽ ኢዛ ቦላ ጋኪዛ ሜቶይ ዲኮ ቃስ ኪርስቶሳ ሱንꬃን ኢዚ ፆሳ ጋላቶ ኣቲን ዬላቶፖ። 
\p  
\v 17 ፒርዳይ ዶሜታናስ ዎዴይ ማቲዴስ። ሄ ፒርዳይ ዶሜታናይ ኮይሮ ፆሳ ኣሳ ቦላኮ! ሂስቲን ፒርዳይ ኑናን ዶሚኮ ፆሳ ሚሺራቾ ቃላስ ኣዛዜቶንታ ኢፂዳ ኣሳ ዉርሴꬂ ኣይ ጊዳኔ?  
\v 18 ጌሻ ማፃፋይ “ፂሎይካ ዋይዲ ኣታናዝ ጊዲኮ፥ ሃንኮ ፆሳስ ጎይኖንታ ኣሳይኔ ናጋራንቻቲ ዋናንዴቶ?” ጊዛ ማላ። \x * \xo 4:18 \xt ሌም 11፡31\x* 
\v 19 ሄሳ ጊሽ ፆሳ ሼኔ ማላ ዋዬቲዛ ኣሳቲ ባናቴꬃ ዉርሲ ኣማኔቲዳ ባና ሜꬊዳይሳስ ሃዳራ ኢሚዲ ሎዖ ኦሶ ኦꬆንታ ኣጎፌቶ። 
\c 5  
\s1 ፆሳ ኣሳ ኣይሳናስ ኢሜቲዳ ዎጋ 
\p  
\v 1 ሄሳ ጊሽ ታካ ኢስታራ ኢሲፌ ዎሳ ኬꬃስ ጪማኔ ኪርስቶሳ ዋዬዛስ ማርካ ጊዲዳ ታኒ ቃሴካ ቡሮፔ ቆንጫና ቦንቾዛ ጊሼታናስ ዲዛ ታኒ ኢንቴናራ ዲዛ ዎሳ ኬꬃ ጪማታ ዞራይስ።  
\v 2 ኢንቴስ ሃዳራ ኢሜቲዳ ፆሳ ዉዴ ናጊቴ። ሄ ኢዛ ዉዴዛ ዎልቃራ ጊዶንታ ፆሲ ኮዪዛ ኦጌራ ዶሳራ ሄሚቴ። ሚሼስ ዪቄቴꬃን ጊዶንታ ሃጋዛናስ ዎዝናፔ ኮሻን ጊዶ። \x * \xo 5:2 \xt ዮሃ 21፡15-17\x* 
\v 3 ሄሳꬆካ ኢንቴ ኣላፌቴꬃ ጋርሳን ዲዛይታ ዬꬊ ሃሮን ጊዶንታ ዉዴዛስ ሎዖ ሌሚሶ ቤሶን ጊዶ።  
\v 4 ኢንቴ ሄሳꬆ ኦꬂኮ ሃንኮ ዋና ሄሚዛይሲ ቆንጪዛ ዎዴ ኢንቴ ሞሬቶንታ ቦንቾ ኣክሊሌ ኤካና። 
\p  
\v 5 ሄሳꬆካ ኢንቴኖ ናቴꬃቶ! ኢንቴ ጪማታስ ኣዛዜቲቴ። ኢንቴ ዉሪካ ኣሽኬቴꬅ ኣፋላ ማላ ማይዒዲ ኢሶይ ኢሳስ ኦꬂቴ። “ፆሲ ኦቶሪዛይታ ኢፄስ። ኣሽኬታስ ቃሴ ባ ኪያቴꬅ ኢሜስ” ጌቴቲ ካሴ ጌሻ ማፃፋን ፃፌቲዴስ። \x * \xo 5:5 \xt ሌም 3፡34\x* 
\v 6 ሄሳ ጊሽ ፆሲ ባ ዎዴን ꬎቁ ሂስታና ማላ ሚኖ ፆሳ ኩሼፔ ጋርሳራ ኢንቴና ዚቂ ሂስቲቴ። \x * \xo 5:6 \xt ማቶ 23፡12፤ ሉቃ 14፡11፤ 18፡14\x* 
\v 7 ኢዚ ኢንቴስ ቆፒዛ ጊሽ ኢንቴና ሜቲዛ ቆፋ ዉርሲ ኢዛ ቦላ ዬጊቴ። 
\p  
\v 8 ዎጋራ ዴዒቴ! ቤጊቴ! ኢንቴ ሞርኬ ዳቡሎሲ ባስ ሚታና ሚሽ ኮዪሼ ፃጊዛ ጋሞ ማላ ኢንቴ ዩሾን ሃርቡቄስ።  
\v 9 ኣላሜ ኩሜꬃን ዲዛ ኢንቴ ኢሻቲ ሄሳ ማላ ሜቶ ኤካና ዲዛይሳ ኢንቴ ኤሪዲ ኣማኖን ሚኒ ኤቂዲ ኢዛራ ኤቄቲቴ።  
\v 10 ኢንቴ ጉꬃ ዎዴስ ዋዬቲዳይሳፌ ጉዬ ኢንቴና ኪርስቶሳ ባጋራ ጌዴ ሜርና ቦንቾስ ፄይጊዳ ኪያቴꬅ ኡባስ ጎዳይ ኢዚ ባርካ ኢንቴና ጋኪዳ ዋዬዛፔ ኣሻና፥ ማዳናኔ ሚንꬄꬃና ቃሴካ ዳዝጊሳና።  
\v 11 ቦንቾይኔ ዎልቃይ ሜርናፔ ሜርና ጋካናስ ኢዛስ ጊዶ። ኣሚን። 
\s1 ዉርሴꬃ ሳሮካ 
\p  
\v 12 ታኒ ኢዛን ኣማኔቲዳ ኢሻ ጋ ቆፒዛ ሲልዋኖሴ ባጋራ ሃይሳ ኪታዛ ቃንꬃራ ኢንቴስ ፃፋዲስ። ታ ሄሳ ፃፊዳይ ኢንቴና ዞራናሲኔ ሃይሲ ቱሙ ፆሳ ኪያቴꬅ ጊዲዳይሳ ኢንቴስ ቆንጪሳናስ ጋዳ። ሄሳ ጊሽ ኢንቴ ሃይሳን ፆሳ ኪያቴꬃን ሚኒ ኤቂቴ። \x * \xo 5:12 \xt ሃዋ 15፡22፥40\x* 
\p  
\v 13 ኢንቴ ማላ ዶሬቲዳራ ባቢሎኔን ዲዛ ሚቾ ጊዲዳ ዎሳ ኬꬃያ ኢንቴስ ሳሮካ ሺሻዉስ። ታ ና ማርቆሲካ ኢንቴና ሳሮኬስ። \x * \xo 5:13 \xt ሃዋ 12፡12፥25፤ 13፡13፤ 15፡37-39፤ ቆላ 4፡10፤ ፒል 24\x* 
\v 14 ኣማኖ ሲቆቴꬃን ኢንቴ ኢሶይ ኢሳ ዬሪ ኤኪዲ ሳሮኬቲቴ። 
\p ኢንቴስ ኪርስቶሳይታስ ኡባስ ሳሮይ ጊዶ።