\id 1CO - Gaammo project 
\h 1 ቆሮንቶሴ 
\toc1 ጳዉሎሲ ቆሮንቶሴ ኣሳስ ፃፊዳ ኮይሮ ኪታ 
\toc2 1 ቆሮንቶሴ 
\toc3 1ቆሮ 
\mt2 ጳዉሎሲ 
\mt1 ቆሮንቶሴ ኣሳስ 
\mt2 ፃፊዳ ኮይሮ ኪታ 
\imt1 ጊዶ ቆፋ 
\ip ጳዉሎሲ ቆሮንቶሴ ኣሳስ ፃፊዳ ኮይሮ ኪታይ ፃፌቲዳይ ኢዚ ካሴ ቆሮንቶሴን ኤሲዳ ዎሳ ኬꬃ ጊዶን ዲዛ ኣማኖን ዱሳ ጊሺኔ ኣማኖ ጊሽ ዴንዲዳ ሜቶታ ቢርሻናስ ጊዲኮ። ሄ ዎዴ ቆሮንቶሴ ካታማያ ኩሜꬃ ኣላሜን ኤሬቲዳ ጊሪኬ ኣሳ ካታማ ጊዶይሳፔካ ቦላራ ኣካያ ጌቴቲዛ ኦሮሜ ካዎይ ሃሪዛ ዋና ካታማ። ሂና ሄ ካታማያ ኢዚን ዳሮ ጊታ ዛልዔይ ዛልዔቲዛሶ። ሃንኮ ዴሬ ዎጋ ባጋራ ጊዲኮ ዳሮ ዲቻ ቦላ ዳዉሲኔ ኢታ ሃኖኒኔ ዱማ ዱማ ሚሼ ኣማኖን ዳሮ ኤሬቲዳሮ። 
\ip ሃዋሬይ ሃራፔካ ሎዔꬂ ፄሊዳይ ዎሳ ኬꬃይ ጊዶን ዲዛ ሻኮቴꬃ ጊሽ፥ ኢስታ ኢታ ኦꬆ ጊሽ፥ ላይማ ጊሺኔ ኤኮኔ ጌሎ ጊሽ፥ ዎሳ ኬꬃ ጊሽ፥ ፂሎ ኣያና ኢሞታታ ጊሺኔ ሃይቆፔ ዴንꬃ ጊሻሳ። ሄሳꬆካ ሃዋሬይ ሚሺራቾ ቃላዛ ሃይታ ሃ ኦይሻታ ቦላ ኢስታስ ሎዔꬂ ሚንꬂ ዛሮ ኢሜስ። 
\ip “ሲቆይ” ፆሲ ባ ኣሳስ ኢሚዳ ኢሞታ ኡባፌ ኣꬌꬅ ጊዲዳይሳ ቆንጪሲዛይ ታማኔ ሄꬓንꬆ ሼምፖይ ሃይሳ ሃ ማፃፋ ጊዶን ዳሮ ኤሬቲዳ ኪፍሌ ጊዲ ቆፌቴስ። 
\is1 ሃ ማፃፋይ ኦይኪዳ ኩሜꬃ ቆፋ 
\io1 ጌሎሶ 1፡1-9 
\io1 ኣማኒዛይታ ጋርሳን ሜꬌቲዳ ሻኮቴꬅ 1፡10-4፡21 
\io1 ኢታ ኦሶኔ ሶ ኣሳ ዱስ 5፡1-7፡40 
\io1 ኣማኒዛይታኔ ኣማኖንታ ኣሳ 8፡1-11፡1 
\io1 ኣማኒዛይታ ዱሲኔ ፆሴ ጎይኖ ዎጋ 11፡2-14፡40 
\io1 ሃይቆፔ ኪርስቶሳ ዴንꬂኔ ኣማኒዛይታ ዴንꬂ 15፡1-58 
\io1 ዩሁዳን ዋዬ ቦላ ዲዛ ኣማኒዛይታ ማዳናስ ኬሶ ሚሽ ሺሾ 16፡1-4 
\io1 ኩሻ ቆፋ 16፡5-24 
\c 1  
\p  
\v 1 ፆሳ ሼኔን ዬሱስ ኪርስቶሳስ ኪቴታናስ ፄይጌቲዳ ጳዉሎሳፔኔ ኑ ኢሻ ሶስቲኔሴፔ፤ 
\p  
\v 2 ቆሮንቶሴን ዲዛ ፆሳ ዎሳ ኬꬃስ፤ ጎዳ ዬሱስ ኪርስቶሳስ ዱማቲዳይታሲኔ ኢስታሳራ ኑሳራ ጎዳ ጊዲዳ ጎዳ ዬሱስ ኪርስቶሳ ሱንꬃ ኣዋን ኣዋንካ ፄይጊዛ ኣማኒዛይታራ ጊዳናስ ፄይጌቲዳ ኣሳ ኡባስ።  
\v 3 ኑ ኣዋ ፆሳፌኔ ጎዳ ዬሱስ ኪርስቶሳፔ ኪያቴꬂኔ ሳሮይ ኢንቴስ ጊዶ። 
\s1 ፆሳስ ጋላታ 
\p  
\v 4 ጎዳ ዬሱስ ኪርስቶሳ ባጋራ ኢንቴስ ኢሜቲዳ ፆሳ ኪያቴꬃ ጊሽ ኡባ ዎዴ ኢንቴ ጊሺካ ታኒ ፆሳ ጋላታይስ።  
\v 5 ጋሶይ ኣይ ዮዖንካ፤ ሄሲካ ሃሳያን ጊዲን ኤራቴꬃ ኢንቴ ኡባን ዱሬቲዴታ።  
\v 6 ኪርስቶሳ ጊሽ ኑ ኢንቴስ ማርካቲዳይሲ ኢንቴ ኣቻን ሚኒዴስ።  
\v 7 ሄሳ ጊሽ ኢንቴ ዬሱስ ኪርስቶሲ ቆንጫና ጋላስ ናጊሺን ኣያና ኢሞቴꬃታፔ ኣይኮይካ ኢንቴስ ፓጬና።  
\v 8 ጎዳ ዬሱስ ኪርስቶሲ ናምዓንꬆ ያና ጋላሳን ኢንቴ ኢንቴ ቦላ ቦሮይ ባይንዳ ቤታና ማላ ዉርሴꬅ ጋካናስ ኢዚ ኢንቴና ሎዔꬅ ናጋና።  
\v 9 ኢዚ ባ ናዛ ኑ ጎዳ ዬሱስ ኪርስቶሳ ኢሲፌቴꬃኮ ኢንቴና ፄይጊዳ ፆሲ ኢዚ ኣማኔቲዳ ፆሳ። 
\s1 ቆሮንቶሴ ዎሳ ኬꬃ ጋርሳን ሜꬌቲዳ ሻኬቴꬅ 
\p  
\v 10 ታ ኢሻቶ! ኢንቴ ጋርሳን ሻኬቴꬂ ዶንታ ማላ ኢንቴስ ኢሲ ዎዝናይኔ ኢሲ ቆፋይ ዳና ማላ ኢንቴ ኢንቴ ጋርሳን ኢሲኖ ጊዳና ማላ ጎዳ ዬሱስ ኪርስቶሳ ሱንꬃን ታ ኢንቴና ዎሳይስ።  
\v 11 ታ ኢሻቶ! ኢንቴ ጋርሳን ፓላማይ ዲዛይሳ ታ ቃሎዔ ሶ ኣሳፔ ሲያዲስ።  
\v 12 ዮዖዚካ ሃይሳ ማላ፤ ኢንቴ ጋርሳን ኢሲ ኢሲ ኣሳይ “ታ ጳዉሎሳ ባጋ” ጌስ፤ ባጋይ ቃሴ “ታ ኣጲሎሳ ባጋ” ጌስ፤ ባጋይ ቃሴ “ታ ኬፋ ባጋ” ጊሺን ሃራይ ቃሴ “ታ ኪርስቶሳ ባጋ” ጌስ። \f + \fr 1:12 \ft ኬፋ ጉሲ ጴፅሮሳ ጉስ።\f*\x * \xo 1:12 \xt ሃዋ 18፡24\x* 
\v 13 ሂስቲኮ ኪርስቶሲ ሻኬቲ ዎꬊዴ? ኢንቴ ጊሽ ጳዉሎሲ ካቄቲዴ? ዎይኮ ጳዉሎሳ ሱንꬃን ፃማቄቲዴቲ?  
\v 14 ኢንቴ ጊዶፌ ቄሪስጶሳፔኔ ጋዪዮሳፔ ኣቲን ሃራ ኦናካ ታ ፃማቆንታ ጊሽ ፆሳ ጋላታይስ። \x * \xo 1:14 \xt ሃዋ 18፡8፤ 19፡29፤ ኦሮ 16፡23\x* 
\v 15 ሄሳ ጊሽ ኦኒካ “ታ ጳዉሎሳ ሱንꬃን ፃማቄታዲስ” ጋና ኣሲ ዴና።  
\v 16 ቱሙካ ኢስቲፋኖሴ ሶ ኣሳ ፃማቃዲስ። ሄይታፔ ሃራ ታ ፃማቂዳኮኔ ታ ኤሪዛዴይ ዴና። \x * \xo 1:16 \xt 1ቆሮ 16፡15\x* 
\v 17 ኪርስቶሲ ታና ኪቲዳይ ሚሺራቾ ቃላ ዮታናስ ኣቲን ፃማቃናስ ጊዴና። ኪርስቶሳ ማስቃሌይ ሃዳ ጊዶንታ ማላ ታ ኣሳፔ ጊዲዳ ጪንጫቴꬃን ሳባኪኬ። 
\s1 ፆሳ ዎልቃኔ ኤራቴꬅ ጊዲዳ ኪርስቶሳ 
\p  
\v 18 ማስቃሌዛ ኪታይ ꬋያና ዲዛይታስ ኤያቴꬃ። ጊዶ ኣቲን ኣታና ዲዛ ኑስ ጊዲኮ ፆሳ ዎልቃ።  
\v 19 “ጪንጫታ ጪንጫቴꬂ ታ ኢስታፌ ꬋይሳና፤ ኤራንቻታ ኤራቴꬃ ታ ሃዳ ኦꬃና” ጌቴቲ ጌሻ ማፃፋን ፃፌቲዴስ። \x * \xo 1:19 \xt ኢሳ 29፡14\x* 
\p  
\v 20 ጪንጫይ ኣዋን ዲዜ? ታማሪዳ ኤራይ ኣዋን ዲዜ? ሃይሳ ዎዴዛ ፒልጊ ኤሪዛይ ኣዋን ዲዜ? ፆሲ ሃ ኣላሜዛ ኤራቴꬅ፥ ኤያቴꬅ ኦꬂቤኔ? \x * \xo 1:20 \xt ኢዮ 12፡17፤ ኢሳ 19፡12፤ 33፡18፤ 44፡25\x* 
\v 21 ፆሳ ኤራቴꬃፌ ዴንዲዳይሳን ኣላሜይ ባ ኤራቴꬃ ጋሶን ፆሳ ኤሮይ ፆኒን ሳባኮ ኤያቴꬃን ኣማኒዛይታ ኣሻናስ ፆሳ ሼኔ ጊዲዴስ።  
\v 22 ኣይ ዎዴካ ኣይሁዳቲ ዱማ ማላታ ኮዬቴስ። ጊሪኬ ኣሳቲ ቃሴ ኤራቴꬅ ኮዬቴስ፤  
\v 23 ኑኒ ጊዲኮ ካቄቲዳ ኪርስቶሳ ሳባኮስ። ሄሲካ ኣይሁዳታስ ꬉጴ፤ ኣይዛቤታስ ቃሴ ኤያቴꬃ።  
\v 24 ፆሲ ፄይጊዳይታስ ኢስቲ ኣይሁዳታ ጊዲን ዎይኮ ጊሪኬ ዴሬ ኣሳ ጊዲኮካ ኪርስቶሲ ፆሳ ዎልቃኔ ፆሳ ኤራቴꬃ።  
\v 25 ጋሶይካ ኣሳ ኤራፔ ፆሳ ኤያቴꬂ ኣꬊዳ ኤራቴꬃ፤ ኣሳ ሚኖቴꬃፌ ፆሳ ላፋቴꬂ ኣꬌስ፤ 
\p  
\v 26 ታ ኢሻቶ! ካሴ ኢንቴ ፄይጌቲዛ ዎዴ ኢንቴ ኣይ ማላ ኣሳኮኔ ኣኔ ቆፒቴ። ኣሳ ቆፋ ማላ ጊዲኮ ኢንቴፌ ዳሪዛይቲ ኤራታ ጊዴኬታ። ኢንቴፌ ዳሮቲ ዎልቃይ ባይንዳይታ፤ ዳሮቲካ ጊታ ኬꬃ ኣሳፔ ዬሌቲቤኬታ።  
\v 27 ጊዶ ኣቲን ፆሲ ኤራታ ዬላቻናስ ዴራፔ ኤያታ ዶሪዴስ፤ ፆሲ ሚኖታ ዬላቻናስ ኣላሜዛፔ ዳቡራንቻታ ዶሪዴስ።  
\v 28 ፆሲ ሃንኮ ኣማኖንታ ኣሳ ኣቻን ዴቴስ ጌቴቲ ኤሬቲዛ ሚሻታ ባይንዳ ሚሻ ማላ ኦꬃና ሃይሳ ኣላሜዛን ሌቄቲዳይታኔ ካዉዪዳይታ ላፋታ ዶሪዴስ።  
\v 29 ሄሳካ ኢዚ ኦꬂዳይ ኦኒካ ኢዛ ሲንꬃን ጬቄቶንታ ማላ።  
\v 30 ኢንቴና ቃሴ ፆሲ ዬሱስ ኪርስቶሳራ ኢሲፌቴꬂ ዳና ማላ ኦꬂዴስ። ሄሳ ጊሽ ፆሲ ዬሱስ ኪርስቶሳ ኑ ኤራቴꬅ፥ ኑ ፂሎቴꬅ፥ ኑ ጌሻቴꬂኔ ኑና ኣሺዛዴ ጊዳና ማላ ኦꬂዴስ።  
\v 31 ሄሳ ጊሽ ካሴ “ጬቂዛ ኣሲ ጎዳን ጬቆ” ጌቴቲ ጌሻ ማፃፋን ፃፌቲዳ ማላ። \x * \xo 1:31 \xt ኤር 9፡24\x* 
\c 2  
\s1 ካቄቲዳ ኪርስቶሳ ጊሽ ታማርሶ 
\p  
\v 1 ታ ኢሻቶ! ታ ኢንቴኮ ፆሳ ፁራ ቆንጪሳና ቢዳይ ታስ ዱና ቃራቴꬂ ዎይኮ ኤራ ዳሮይ ዲዛ ጊሽ ጊዴና።  
\v 2 ታ ኢንቴ ጊዶን ዲዛ ዎዴ ካቄቲዳ ዬሱስ ኪርስቶሳፔ ኣቲን ሃራ ኤሮንታ ማላ ታ ባጋራ ሙርታዲስ።  
\v 3 ታ ኢንቴኮ ዳሮ ዳቡራን፥ ያሻቴꬃኒኔ ዳሮ ኮኮራሼ ባዲስ።  
\v 4 ታ ቃላይኔ ሳባኮይካ ኣያና ዎልቃ ቆንጪሴꬃንፔ ኣቲን ጪሞኒኔ ኤራ ዳሮን ጊዴና።  
\v 5 ሄሲካ ኢንቴ ኣማኖይ ፆሳ ዎልቃንፔ ኣቲን ኣሳ ጪንጫቴꬃ ቦላ ፃጶንታ ማላ ሃኒዴስ። 
\s1 ፂሎ ኣያናፔ ኢሜቲዳ ኤራቴꬅ 
\p  
\v 6 ኑ ካሃ ኩንꬂዳ ኣሳታ ኣቻን ኤራ ሃሳያ ሃሳዮስ፤ ጊዶ ኣቲን ሃይሳ ሃ ኣላሜዛ ኤራቴꬅ ጊዴና፤ ዎይኮ ꬋያና ዲዛ ሃ ኣላሜዛ ሃሪዛይታ ኤራቴꬅ ጊዴና።  
\v 7 ጊዶ ኣቲን ኑ ሃሳዪዛይ ካሴ ቆቴቲ ዲዛ ፆሳ ፁራ ኤራቴꬃ፤ ሄ ኤራቴꬃይ ፆሲ ዳሮ ዎዴፔ ካሴ ኑና ቦንቾስ ካሴቲዲ ዉርሲ ዎꬂዳይሳ።  
\v 8 ሃ ኣላሜዛ ሃሪዛይታፔ ኦኒካ ሃ ኤራቴꬃ ኤሪቤና፤ ኤሪዳኮ ኢስቲ ቦንቾ ጎዳ ካቄቴና።  
\v 9 ጊዶ ኣቲን ጌሻ ማፃፋን 
\q1 “ኣሳ ኣይፌይ ቤዮንታዝ፥ 
\q2 ኣሳ ሃይꬂ ሲዮንታዝ፥ 
\q1 ኣሳ ዎዝናይካ ቆፖንታዝ 
\q2 ፆሲ ባ ዶሲዛይታስ ጊጊሲዴስ” ጌስ። \x * \xo 2:9 \xt ኢሳ 64፡4\x* 
\m  
\v 10 ፆሲ ጊዲኮ ሄሳ ባ ኣያና ባጋራ ኑስ ቆንጪሲዴስ። ኣያናይካ ፆሳስ ዲዛ ጪማ ዮዖ ኣሾንታ ዉርሲ ፒልጊ ፄሌስ።  
\v 11 ኣሳ ጋርሳን ኢዛዴስ ዲዛ ኣያናፔ ኣቲን ኢዛዴ ዎዝና ኤሪዛይ ኦኔ? ሄሳꬆካ ፆሳ ኣያናፔ ኣቲን ፆሳ ቆፋ ኤሪዛይ ኦኒካ ዴና።  
\v 12 ፆሳፌ ኑስ ኢሜቲዳይሳ ኑኒ ኤራና ማላ ፆሳ ኣያናይ ኑስ ኢሜቲዴስ ኣቲን ኑኒ ሃይሳ ሃ ኣላሜዛ ኣያና ኤኪቤኮ። 
\p  
\v 13 ኑ ዮቲዛይ ሃይሳ፤ ኑ ኣሳፔ ታማሪዳ ቃላ ጊዶንታ ኣያናፔ ታማሪዳ ቃላ ሃሳዮስ። ኣያና ቱማቴꬃካ ኑ ቆንጪሲዛይ ኣያና ቃላና።  
\v 14 ፆሳ ኣያናይ ኢዛን ባይንዳ ኣሲ ፆሳ ኣያናፔ ጊዲዳዝ ኤካናስ ዳንዳዬና፤ ጋሶይካ ሄሳ ማላ ዮዖይ ኢዛስ ኤያቴꬃ፤ ኢዚ ባሲ ኣያናን ፓጬቲዛዴ ጊዲዳ ጊሽ ኢዚ ኤራናስ ዳንዳዬና።  
\v 15 ፆሳ ኣያናይ ኢዛን ዲዛዴይ ቃስ ዉርሲካ ፓጬስ ኣቲን ባሲ ኦናንካ ፓጬቴና።  
\v 16 ሄሲካ 
\q1 “ጎዳ ቆፋ ኤራናስ ዳንዳዪዛይ ኦኔ? 
\q2 ኢዛ ዞራናስ ዳንዳዪዛይ ኦኔ?” 
\m ጌቴቲ ካሴ ጌሻ ማፃፋን ፃፌቲዳ ማላ፤ ኑስ ጊዲኮ ኪርስቶሳ ዎዝናይ ዴስ። \x * \xo 2:16 \xt ኢሳ 40፡13\x* 
\c 3  
\s1 ዎሳ ኬꬃ ጊዶን ሜꬌቲዳ ሻኬቴꬅ 
\p  
\v 1 ታ ኢሻቶ! ታ ኢንቴና ኢንቴ ኪርስቶሳን ቡሮ ጉꬃ ናይታ ማላኔ ቡሮ ኣማኖይ ጌሎንታ ኣሳ ማላፔ ኣቲን ኣያናን ኩሚዳ ኣሳ ማላ ጋዳ ኢንቴስ ሃሳያናስ ዳንዳያቤኬ።  
\v 2 ኢንቴ ቡሮ ሚኖንታ ጊሽ ታ ኢንቴና ማꬅ ፓሃዲስ ኣቲን ቡሮ ሚኖ ካꬅ ሚዛቤኬ፤ ሃዒካ ጊዲኮ ኢንቴ ቡሮኮ! \x * \xo 3:2 \xt ኢብ 5፡12-13\x* 
\v 3 ኢንቴ ሃዒካ ቡሮ ኣማኖን ሚኖንታይታ ጊዲዳ ጊሽ ኢንቴ ጊዶን ቃናቴቴꬂኔ ፓላማይ ዴስ፤ ሂስቲን ኢንቴ ቡሮ ኣማኖን ሚኖንታ ኣሳ ማላ ጊዴኬቲ? ኢንቴ ኦሶይ ጮ ሜላ ኣሲ ኦꬂዛይሳ ማላ ጊዴኔ?  
\v 4 ጋሶይካ ኢንቴ ጋርሳፌ ኢሶይ “ታ ጳዉሎሳሳ” ሃንኮይስ ቃስ “ታ ኣጲሎሳሳ” ጊኮ ኢንቴ ጮ ኣሾ ቆፋን ፃላላ ዲዛ ኣሳ ማላ ጊዴኬቲ? \x * \xo 3:4 \xt 1ቆሮ 1፡12\x* 
\p  
\v 5 ኤሮ! ጊዶ ኣቲን ኣጲሎሲ ኣዜ? ጳዉሎሲካ ኣዜ? ኢስቲ ጎዳይ ኢስታስ ኢሳስ ኢሳስ ኢሚዳ ማላ ኦꬂዛ ኦꬃንቻታ፤ ኢንቴካ ኢስታ ባጋራ ኣማኒዴታ።  
\v 6 ታ ቶካዲስ፤ ኣጲሎሲ ሃꬄ ኡሺዴስ፤ ዲቺዳይ ጊዲኮ ፆሳ። \x * \xo 3:6 \xt ሃዋ 18፡4-11፤ 24-28\x* 
\v 7 ሄሳ ጊሽ ዲቺዛይ ፆሴ ኣቲን ቶኪዛዴይካ፥ ሃꬄ ኡሺዛዴይካ ኣይኮካ ጊዴቴና።  
\v 8 ቶኪዛዴ ጊዲን ዎይኮ ኡሺዛዴ ጊዲን ኢስቲ ኢሲኖ፤ ኢስታፌ ኢሳዴይ ኢሳዴይ ባ ኦሶ ማላ ዎይቶ ኤካና።  
\v 9 ጋሶይካ ኑ ፆሳራ ኢሲፌ ኦꬂዛይታ። ኢንቴካ ፆሳ ጎሻ ጋዴኔ ፆሳ ኬꬃታ። 
\p  
\v 10 ፆሳፌ ታስ ኢሜቲዳ ኢሞቴꬃ ጊና ኬꬄ ኬፂዛ ሂላ ማላ ኬꬃይ ኤቃናስ ሎዔꬃ ጊጊሳዲስ፤ ኢዛ ቦላ ሃራ ኣሲ ኬꬃ ኬፃና። ጊዶ ኣቲን ኬꬃ ኬፂዛዴይ ዎስቲ ኬፃናኮኔ ናጌታናስ ቤሴስ።  
\v 11 ጋሶይካ ኬꬃይ ኬፄቴꬅ ኦይኬቲዳፔ ጉዬ ሃራ ዎꬂ ቃሴ ኬፃና ዳንዳዪዛዴይ ኦኒካ ባዋ፤ ሄሲካ ኬꬃስ ኮይሮይ ዬሱስ ኪርስቶሳ።  
\v 12 ኦኒካ ኬꬃይ ኮይሮ ኬፄቲዳይሳ ቦላ ዎርቃን ዎይኮ ቢራን ቦንቼቲዳ ሹቻን ዎይኮ ሚꬃኒኔ ማታን ዎይኮ ማቃን ኬፂኮ፥  
\v 13 ኢዛዴ ኦሶይ ኣይ ማላ ፒርዳ ጋላስ ቆንጫና። ጋሶይካ ሄ ጋላሳይ ኢዛ ሃ ፖዖይ ዲዛሶ ኬሳና። ሄ ኦሶይ ታማን ፓጬታና ጊሽ ኢሳዴ ኢሳዴ ኦሶይ ኣይ ማላ ቡሮ ታማን ፓጬታና።  
\v 14 ኦኒካ ኬፂዳ ኬꬂ ሚኒ ኤቂዛ ጊዲኮ ሄሳዴይ ባ ዎይቶ ኤካና።  
\v 15 ኢዛ ኦሶይ ፁጌቲዳዴይ ጊዲኮ ዎይቶይ ኢዛስ ዴና ሺን ኢዛዴይ ባ ሁዔስ ኣታና። ጊዶ ኣቲን ኢዛዴ ኣቴꬂ ታማፔ ኣሲ ዋይዲ ኣቲዛ ኣቴꬃ ማላ ጊዳና። 
\p  
\v 16 ኢንቴ ኢንቴ ሁዔስ ፆሳ ኬꬄ ጊዲዳይሳኔ ፆሳ ኣያናይ ኢንቴ ጊዶን ዲዛይሳ ኤሬኬቲ? \x * \xo 3:16 \xt 1ቆሮ 6፡19፤ 2ቆሮ 6፡16\x* 
\v 17 ኦኒካ ፆሳ ኬꬄ ላሊኮ ፆሲ ኢዛዴ ላላና። ፆሳ ኬꬂ ጌሻ። ሄሲካ ኢንቴናኮ! 
\p  
\v 18 ኦኒካ ባርካ ባና ባሌꬆፎ፤ ኢንቴፌ ኦኒካ ሃይሳ ሃ ኣላሜዛን ባና ኤራንቻ ማላ ቆፒኮ ኢዛዴይ ኤራንቻ ጊዳና ማላ ባና ባርካ ኤያ ማላ ቆዶ።  
\v 19 ሃይሳ ሃ ዴሬዛ ኤራቴꬂ ፆሳ ኣቻን ኤያቴꬃ። ካሴ ጌሻ ማፃፋን “ኢዚ ኤራንቻታ ኢስታ ጌኔ ኦሶ ጌዶን ዛሪዲ ኦይካና” ጌቴቲ ፃፌቲዴስ። \x * \xo 3:19 \xt ኢዮ 5፡13\x* 
\v 20 ቃሴካ ሃራሶን 
\q1 “ኤራንቻታ ቆፋይ 
\q2 ሜላ ሃዳ ጊዲዳይሳ ጎዳይ ኤሬስ” 
\m ጌቴቲ ፃፌቲዴስ። \x * \xo 3:20 \xt ማዛ 94፡11\x* 
\v 21 ሄሳ ጊሽ ዉሪካ ኢንቴስ ጊዲዳ ጊሽ ኦኒካ ኣሳን ጬቄቶፎ።  
\v 22 ጳዉሎሳ ጊዲን፥ ኣጵሎሳ ጊዲን፥ ዎይኮ ኬፋ ጊዲን፥ ኣላሜ ጊዲን፥ ዴዖ ጊዲን፥ ዎይኮ ሃይቆ ጊዲን፥ ሃዒ ዲዛዝ ጊዲን፥ ዎይኮ ቡሮ ያና ሚሽ ጊዲን፥ ዉሪካ ኢንቴሳ።  
\v 23 ኢንቴካ ኪርስቶሳይታ፤ ኪርስቶሲካ ፆሳይሳ። 
\c 4  
\s1 ኪርስቶሳ ሃዋሬታ 
\p  
\v 1 ሄሳ ጊዲዳ ጊሽ ኣሲ ዉሪካ ኑና ኪርስቶሳ ኦሳንቻታ ማላኔ ፆሳ ፁራ ቆንጪሳናስ ሃዳራ ኤኪዳ ኣሳ ማላ ቆዳናስ ቤሴስ።  
\v 2 ሃዳራ ኤኪዳይቲካ ኣማኔቲዳይታ ጊዳናስ ቤሴስ።  
\v 3 ታ ቦላ ኢንቴ ፒርዲንካ ዎይኮ ዱላታ ኣሳይ ፒርዲንካ ታ ባጋራ ታስ ኣይኮይ ባዋ። ሃራይ ኣቶሺን ታርካ ታ ቦላ ፒርዲኬ።  
\v 4 “ታ ኤሪዛ ማላ ታኒ ታ ዎዝናራ ሲꬊዛ ሚሺ ባዋ፤ ጊዶ ኣቲን ሄሳ ጉስ ታ ቦላ ሞሮይ ባዋ” ጉስ ጊዴና። ቡሮ ታ ቦላ ፒርዳናይ ጎዳ።  
\v 5 ሄሳ ጊሽ ፒርዳና ዎዴይ ጋኮንታ ሃራ ኣይ ዮዖካ ፒርዶፍቴ። ጎዳይ ያና ጋካናስ ናጊቴ፤ ኢዚ ꬉማ ጊዶን ቆቴቲዳይሳ ቡሮ ቆንጬ ኬሳና። ኣሳ ዎዝና ጊዶን ዲዛ ቆፋካ ቆንጬ ኬሳና። ሄ ዎዴ ኢሲ ኢሲ ኣሲ ባሲ ቤሲዛ ጋላታ ፆሳ ኣቻፌ ኤካና። 
\p  
\v 6 ሄሳ ጊሽ ታ ኢሻቶ! ታ ኢንቴና ጎዓና ማላ ሃ ዮዖዛን ታናኔ ኣጲሎሳ ኢንቴስ ሌሚሶ ሺሻዲስ፤ ታ ሃይሳ ኦꬂዳይ “ፃፌቲዳይሳፌ ኣꬎፋ” ጊዛይሳ ኢንቴ ኑፔ ታማራና ማላ ጋዳ። ሄሳ ጊሽ ኢንቴ ኢሳዴ ሳቢዲ ሃራ ኣስ ካꬋናስ ቤሴና።  
\v 7 ኔኒ ኣዛን ኣꬋይ? ኔኒ ሃራፔ ኤኮንታ ኣቲዳ ሚሺ ኣዜ? ሂስቲን ኔ ዉርሳካ ኤኪዳይ ሃራ ኣሳፔ ጊዲኮ፥ ሃራ ኣሳፔ ኤኮንታ ኣሳ ማላ ኣዛስ ጬቄታይ? 
\p  
\v 8 ሃዒ ጊዲኮ ኢንቴስ ኮሺዛዝ ኢንቴ ዉርሲ ዴሚዴታኔ ዱሬቲዴታ፤ ኑፔካ ሻኬቲዲ ካዎቲዴታ። ኢንቴ ቱሙካ ካዎቲዳኮ ኑካ ኢንቴናራ ካዎታናኮ ሺን።  
\v 9 ጋሶይካ ፆሲ ኑና ሃዋሬታ ኑ ቦላ ሃይቆ ፒርዳይ ፒርዴቲዳ ኣሳታ ማላ ኣሳ ኡባፌ ዉርሴꬂ ኦꬂዳዝ ታስ ሚሳቴስ። ሄሳ ጊሽ ኣላሜስ ኪታንቻታሲኔ ኣሳ ኡባስ ካሳ ሚሽ ጊዲዶስ።  
\v 10 ኑ ኪርስቶሳ ጊሽ ኤያታ ጊዲዶስ። ኢንቴ ቃስ ኪርስቶሳን ኤራንቻታ፤ ኑኒ ዳቡራንቻታ፤ ኢንቴ ጊዲኮ ሚኖታ፤ ኢንቴ ቦንቼቲዳይታ፤ ኑኒ ጊዲኮ ካዉሻታ።  
\v 11 ሃኖ ጋካናስ ኑ ጋፎስ፤ ሳሜቶስ፤ ካሎቶስ፤ ቡኬቶስ፤ ኣቂዛሶይ ꬋዪን ዋዬቶስ።  
\v 12 ኑ ኩሼራ ኦꬂ ዳቡሪ ኣቆስ። ኑና ቃንጊሺን ኑ ቃስ ኣንጆስ፤ ኑና ጎዲሺን ኑ ዳንዳዮስ። \x * \xo 4:12 \xt ሃዋ 18፡3\x* 
\v 13 ኑ ሱንꬅ ኢስቲ ሞሪሺን ኑ ቃስ ሎዖ ዛሮስ፤ ሃኖ ጋካናስ ኑ ቢታፌ ፒቴቲዳ ቡራ ጊዲዶስ። 
\p  
\v 14 ታ ሃይሳ ኢንቴስ ፃፊዛይ ኢንቴና ታ ዶሲዛ ታ ናይታ ማላ ዞራናስ ጋዳ ኣቲን ኢንቴና ዬላቻናስ ጊዴና።  
\v 15 ኢንቴና ኪርስቶሳን ዲቺዛ ዳሮ ኣሳቲ ዲኮካ ኢንቴስ ዳሮ ኣዋቲ ዴቴና። ታኒ ቃስ ዬሱስ ኪርስቶሳ ሚሺራቾ ቃላን ኢንቴና ዬላዲስ።  
\v 16 ሄሳ ጊሽ ኢንቴ ታና ሚሳታና ማላ ታ ኢንቴና ዎሳይስ።  
\v 17 ጎዳን ዳሮ ዶሴቲዳይሳኔ ኣማኔቲዳ ታ ና ፂምቶሳ ታ ኢንቴኮ ኪቲዳይ ሄሳ ጋሶና። ኢዚካ ዱማ ዱማ ሶን ዲዛ ዎሳ ኬꬃ ኣሳ ዉርሲ ታ ታማርሲዳ ቲሚርቴዛራ ጋጊዛይሳ ዬሱስ ኪርስቶሳን ዲዛ ዴዖ ኦጌ ጊሽ ኢንቴና ኢዚ ቆፊሳና። 
\p  
\v 18 ኢንቴፌ ኢሲ ኢሲ ኣሳቲ ታ ናምዓንꬆ ኢንቴና ቤያናስ ቦንታዝ ኢስታስ ሚሳቲን ኦቶሬቲዳ።  
\v 19 ጊዶ ኣቲን ጎዳ ሼኔ ጊዲኮ ማታራ ታ ኢንቴኮ ባና። ሄ ባዳ ሄ ኦቶራንቻቲ ሃሳዪዛዝ ፃላላ ጊዶንታ ኢስታስ ኣዛ ዎልቃይ ዲዛኮኔ ቤያና ኮያይስ።  
\v 20 ጋሶይካ ፆሳ ካዎቴꬂ ጮ ዱና ፃላላ ጊዶንታ ዱናፔ ቦላራ ፆሳ ዎልቃ።  
\v 21 ኤሮ! ኢንቴ ኮዪዛይ ኣዋይሴ? ዱርቃ ኤካ ቦዬ? ዎይኮ ሲቆራኔ ኣሽኬቴꬃ ኣያናራ ቦ? 
\c 5  
\s1 ዎሳ ኬꬃን ኦሴቲዳ ዬላቺዛ ናጋራ 
\p  
\v 1 ኢንቴ ጋርሳን ዬላቺዛ ላይማይ ዲዛይሲ ዎሬቴስ። ሄሳ ማላ ቱናቴꬂ ኣማኖንታ ዴሬታ ኣቻንካ ዴና። ባ ኣዋ ማቾ ኤኪዳ ኣሲ ኢንቴኮን ዴስ። \x * \xo 5:1 \xt ዛሬ 22፡30\x* 
\v 2 ሂስቲን ሄሳ ማላ ዬላቺዛ ሚሺ ኢንቴ ጊዶን ዲሺን ኣዛስ ኦቶሬቴቲ? ሄሳፌ ሄ ዮዖዛን ኢንቴ ሙዞታናስ ኢንቴና ቤሴኔ? ሄሳ ማላ ኦꬂዳዴ ኢንቴ ጋርሳፌ ዲጊቴ። 
\p  
\v 3 ታ ኢንቴናራ ኣሾን ኢሲፌ ዶንታ ኣጊኮካ ኣያናን ቃስ ኢንቴናራ ዳይስ፤ ታ ሃዒ ኢንቴናራ ዲዛ ማላ ሄሳ ኦꬂዳዴ ቦላ ፒርዳዲስ።  
\v 4-5 ኢንቴ ሺቂዛሶን ታ ኢንቴናራ ዲዛ ጊሽ ጎዳ ዬሱሳ ሱንꬃኒኔ ኢንቴ ጊዶን ዲዛ ኑ ጎዳ ዬሱሳ ዎልቃን ሄ ሞራንቻዛ ኣሾይ ꬋዪን ኢዛ ሼምፖይ ጎዳ ጋላሳን ኣታና ማላ ሄሳ ማላ ኣሲ ፃላዔስ ኣꬊ ኢሜቶ። 
\p  
\v 6 ኢንቴ ጬቄቲዛይሲ ሎዖስ ጊዴና። ጉꬃ ኢርሾይ ዳሮ ቡኬሶ ዴንꬄꬂዛ ኤሬኬቲ? \x * \xo 5:6 \xt ጋላ 5፡9\x* 
\v 7 ኢንቴ ሃዒ ኢርሾይ ባይንዳ ኦራꬃ ቡኬሶ ጊዳና ማላ ካሴ ጫላ ኢርሾዛ ኢንቴ ጊዶፌ ዲጊቴ። ኑ ፓዚጋ ዶርስ ጊዲዳ ኪርስቶሲ ኑስ ያርሼቲዴስ። \f + \fr 5:7 \ft ፓዚጋ ቦንቺዛ ዎዴ ኣሳይ ጫላ ኢሪሾ ጊዲዳ ሚሺ ካꬃን ዬጌና።\f*\x * \xo 5:7 \xt ኬሳ 12፡5\x* 
\v 8 ሄሳ ጊሽ ኣኔ ኑኒ ፓዚጋ ባዓሌዛ ቆሆይኔ ኢታቴꬂ ኢዛን ኩሚዳ ካሴ ጫላ ኢርሾ ቦላ ጊዶንታ ኢርሾይ ባይንዳ ኡኬꬃን ሱሬቴꬃኒኔ ቱማን ቦንቾስ። \x * \xo 5:8 \xt ኬሳ 13፡7፤ ዛሬ 16፡3\x* 
\p  
\v 9 ኢንቴስ ላይማቲዛ ኣሳታራ ኢሲፌቴꬂ ዶንታ ማላ ታ ኢንቴስ ካሴ ዳብዳቤ ፃፋዲስኮሺን።  
\v 10-11 ኢንቴ ሜላ ኣማኖንታ ላይማቲዛ ኣሳራ ጊዶንታ ዎይኮ ጮ ጋጲጋጲዛይታራ፥ ካይሶቲዛይታራ፥ ኤቃስ ጎይኒዛይታራ ጋጎፍቴ ጉስ ጊዶንታ ዲሺን ሃዒ ታ ፃፊዳይ ኣማናይስ ጊሼ ላይማቲዛይታራ ዎይኮ ማꬆቲዛይታራ፥ ጋጲጋጲዛይታራ፥ ኤቃስ ጎይኒዛይታራ፥ ኣሳ ሱንꬅ ሞሪዛይታራ ዎይኮ ጫይዛይታራ፥ ኣሳ ሚሽ ቦንቂዛዴንታራ ኢንቴስ ኢሲፌቴꬅ ዶፖ። ሄይታንታ ማላራ ሃራይ ኣቶ ሺን ካꬂካ ኢሲፌ ሞፕቴ። 
\p  
\v 12 ሃንኮ ኣማኖንታ ኣሳ ቦላ ፒርዳናስ ታና ኣዚ ጋꬂዜ? ዎሳ ኬꬃን ዲዛይታ ቦላ ኢንቴ ፒርዴኬቲ?  
\v 13 ዎሳ ኬꬃፌ ካሬራ ዲዛይታ ቦላ ጊዲኮ ፆሲ ፒርዳና “ኢንቴ ኢንቴ ጊዶፌ ኢታ ኣስ ዲጊቴ” ጌቴቲ ጌሻ ማፃፋን ፃፌቲዴስ። 
\c 6  
\s1 ኣማኒዛይቲ ባ ጋርሳን ሞቴታናስ ቤሴና 
\p  
\v 1 ኢንቴ ጋርሳፌ ኢሳዴስ ሃራ ኣማኒዛዴራ ዮዖይ ዲኮ ሄ ዮዖዛ ኣማኒዛይታ ኣች ሺሻናይሳ ዎስቲ ኣማኖንታ ኣሳ ሲንꬃን ፒርዴታና ሺሺዜ?  
\v 2 ኣማኒዛ ኣሳይ ኣማኖንታ ኣሳ ቦላ ፒርዳናይሳ ኢንቴ ኤሬኬቲ? ኢንቴ ቡሮ ኣላሜ ቦላ ፒርዳንዴታ። ጊዲኮካ ሄሳ ጉꬃ ዮዖ ቦላ ፒርዳናስ ዳንዳዬኬቲ?  
\v 3 ሃይሳ ቢታ ቦላ ዲዛ ፒርዳይ ኣቶሺን ኢንቴ ቡሮ ኪታንቻታ ቦላ ፒርዳናይሳ ኤሬኬቲ?  
\v 4 ኢንቴ ኢንቴ ጋርሳን ኦዬቲኮ ኣማኒዛይታ ማባራፔ ካሬን ዲዛይታኒኔ ካꬌቲዳ ኣሳታ ሲንꬃን ዎስቲ ኢንቴ ዮዖ ሺሼቲ?  
\v 5 ታ ሄሳ ኢንቴስ ጊዛይ ኢንቴና ዬላቻናሳ። ኢንቴ ጋርሳን ኣማኒዛይታ ጊጊሳናስ ዳንዳዪዛ ዋዝናማ ኣሲ ዴኔ?  
\v 6 ጊዶ ኣቲን ኣማኒዛዴይ ሃራ ኣማኒዛዴ ሞታናስ ኣላሜ ፒርዳ ኬꬄ ባናስ ቤሲዜ? 
\p  
\v 7 ኢንቴ ጋርሳን ኢሶይ ኢሳ ሞቶይ ኢንቴ ኩንዴꬃስ ማላታ ቤሴስ። ኢንቴ ቆሃናፔ ቆሄቲኮ ሎዔኔ? ቃሴካ ኢንቴ ኣስ ባሌꬃናፔ ኢንቴና ኣሲ ባሌꬂኮ ሎዔኔ?  
\v 8 ኢንቴ ሃ ቆሄታናፔ ጌዴ ቆሄታኔ ባሌꬄታ። ሄሲካ ኢንቴ ኢሻታ። 
\p  
\v 9 ማካላንቻቲ ፆሳ ካዎቴꬅ ጌሎንታይሳ ኤሬኬቲ? ሄሳ ማላ ዮዖን ባሌቶፍቴ። ላይማታና ቃቃቲዛይቲ፥ ኤቃ ኤቂዛይቲኔ ኣዴይ ኣዴራ ላይማቲዛይቲ፥  
\v 10 ዎይኮ ካይሶቲ፥ ጋጲጋጲዛይቲ፥ ማꬆቲዛይቲ፥ ኣስ ጫይዛይቲኔ ቦንቂዛይቲ ፆሳ ካዎቴꬅ ላቴቴና።  
\v 11 ኢንቴፌ ኢሲ ኢሲ ኣሳቲ ሄይታንታ ማላ ሺን ሃዒ ቃስ ጎዳ ዬሱስ ኪርስቶሳ ሱንꬃኒኔ ኑ ፆሳ ኣያናን ሜጬቲዴታ፤ ዱማቲዴታኔ ፂሊዴታ። 
\s1 ባ ኣሳቴꬃን ፆሳ ቦንቾ 
\p  
\v 12 ሃራይ ዉሪካ ታስ ኢሜቲዴስ፤ ጊዶ ኣቲን ዉሪካ ጎዒዛዝ ጊዴና። ዉሪካ ታስ ኢሜቲዴስ ጊዶ ኣቲን ኣይ ሚሺካ ታና ሃሬና። \x * \xo 6:12 \xt 1ቆሮ 10፡23\x* 
\v 13 ቃሴ ካꬂ ኡሎሳ፤ ኡሎይካ ካꬃሳ፤ ጊዶ ኣቲን ፆሲ ናምዓካ ꬋይሳና፤ ኣሳቴꬂ ጎዳስፌ ኣቲን ላይማስ ጊዴና። ጎዳይካ ኣሳቴꬃሳ።  
\v 14 ፆሲ ጎዳ ሃይቆፔ ዴንꬂዳ ማላ ኑናካ ቃሴ ኢዚ ባ ዎልቃን ሃይቆፔ ዴንꬃና። 
\p  
\v 15 ኢንቴ ኣሳቴꬃይ ኪርስቶሳ ኣሳቴꬅ ቢሊቴ ጊዲዳይሳ ኢንቴ ኤሬኬቲ? ሂስቲን ታ ኪርስቶሳ ኣሳቴꬃፌ ኢሳ ላይማን ኣቂዛ ኣሳታራ ኢሲኖ ሂስቶ? ሙሌካ ቤሴና።  
\v 16 ዎይኮ ላይማቲዛሪራ ኣቂዛዴይ ኢዚራ ኢሲ ኣሾ ጊዲዛይሳ ኢንቴ ኤሬኬቲ? “ናምዓይ ኢሲ ኣሾ ጊዴቴስ” ጌቴቲዴስ። \x * \xo 6:16 \xt ሜꬌ 2፡24\x* 
\v 17 ጊዶ ኣቲን ጎዳራ ኢሲኖ ጊዲዛዴይ ኢዛራ ኢሲ ኣያና ጊዴስ። 
\p  
\v 18 ላይማፔ ሃኪቴ፤ ኣሲ ኦꬂዛ ሃራ ናጋራይ ዉሪ ኢዛዴ ኣሾፔ ካሬራ ሃኔስ። ላይማ ላይማቲዛዴይ ጊዲኮ ባርካ ባ ኣሳቴꬅ ቦላ ናጋራ ኦꬄስ።  
\v 19 ኢንቴ ኣሳቴꬃይ ኢንቴ ጋꬃን ዲዛ ፂሎ ኣያናስ ዱሳሶ ጊዲዳይሳ ኢንቴ ኤሬኬቲ? ሄ ኣያናይካ ኢንቴ ፆሳፌ ኤኪዳይሳ። ኢንቴካ ኢንቴስ ጊዴኬታ። \x * \xo 6:19 \xt 1ቆሮ 3፡16፤ 2ቆሮ 6፡16\x* 
\v 20 ኢንቴ ሚሻን ሻሜቲዴታ። ሄሳ ጊሽ ኢንቴ ኢንቴ ኣሳቴꬃን ፆሴ ቦንቺቴ። 
\c 7  
\s1 ኤኮ ጊሺኔ ጌሎ ጊሽ ሺቂዳ ኦይሾኔ ዛሮ 
\p  
\v 1-2 ኢንቴ ታስ ፃፊዳ ማላ ኣሲ ማጫሳኮ ጋኮንታ ኣጊዛኮ ሎዖኮ! ጊዶ ኣቲን ላይማፔ ናጌታናስ ኣቱማሳስ ኢሳስ ኢሳስ ማቻ ዱ። ማጫሳስካ ኢሲኔይስ ኢሲኔይስ ኣዚናይ ዶ።  
\v 3 ኣዚናይ ባ ማቼይስ ኮሺዛዝ ዉርሲ ኦꬆ። ማቻካ ባ ኣዚናስ ኮሺዛዝ ዉርሳ ኦꬁ።  
\v 4 ማቺ ኣሳቴꬂ ኢዚስ ፃላላ ጊዶንታ ኣዚናሳራ ኮꬃ። ሄሳꬆካ ኣዚና ኣሳቴꬂ ኢዛስ ፃላላ ጊዶንታ ማቼይሳራ ኮꬃ።  
\v 5 ናምዓይ ዶሳን ዎሳስ ጊዲ ዞሬን ጊዶ ጊዲ ቃቺዳ ጋላሳታፔ ኣቲን ሃራ ጋላስ ኢሶይ ኢሳስ ኣካይ ጎፒቴ። ሄሳ ጋሶን ኢንቴስ ኢንቴና ሃሮይ ፆኒን ፃላዔይ ኢንቴና ፓጮንታ ማላ ናምዓይ ኢሲፌ ኣቂቴ። 
\p  
\v 6 ታ ሄሳ ጊዛይ ጮ ኣዛዞ ማላ ጊዶንታ ዞሬ ዞራይስ።  
\v 7 ኣሲ ዉሪ ታ ማላ ማቾ ኤኮንታ ዲዛኮ ታ ዶሳይስ። ጊዶ ኣቲን ኢሲ ኢሲ ኣሳስ ፆሳፌ ኢሜቲዳ ዱማ ኢሞታይ ዴስ። ኢሳስ ዱማ ኢሲ ኢሞታይ ዴስ። ሃንኮይሳስ ቃስ ሃራ ኢሞታይ ዴስ። 
\p  
\v 8 ቡሮ ኤኮንታይታኔ ጌሎንታይታ ጊሽ ቃሴካ ኣዚናይ ሃይቂዳ ማጫሳታ ጊሽ ታ ጊዛይ ኢስቲ ጌሎንታኔ ኤኮንታ ታ ማላ ዲዛኮ ኢስታስ ሎዖ ጋይስ።  
\v 9 ጊዶ ኣቲን ኢስቲ ባና ናጋናስ ዳንዳዮንታይታ ጊዲኮ ጌሌቶኔ ኤኬቶ፤ ጮ ኣሞን ፁጌታናፔ ኤኮይኔ ጌሎይ ሎዖ። 
\p  
\v 10 ኤኪዳይታሲኔ ጌሊዳይታስ ታ ኢሚዛ ኣዛዞይ ሃይሳ። ሄሲካ ጎዳ ኣዛዞፔ ኣቲን ታ ኣዛዞ ጊዴና። ኣዚና ጌሊዳ ማጫሳያ ባ ኣዚናፔ ሻኬቱፉ።  
\v 11 ሻኬቲዛ ጊዲኮ ሃራ ኣዚና ጌሎንታ ኡቱ። ኣካይ ጊኮ ባ ኣዚናራ ጊጉ። ኣዚናይካ ባ ማቾ ኣንጂ ዬዶፎ። 
\p  
\v 12 ሃንኮ ኣሳስ ቃስ ታ ሂዝጋይስ። ሄሳ ጊዛይካ ታና ኣቲን ጎዳ ጊዴና። ኣማኖንታ ማቻ ዲዛ ኣማኒዛዴይ ማቼያ ኢዛራ ዳና ዶሲኮ ኢዚ ኢዞ ኣንጃናስ ቤሴና።  
\v 13 ኣማኖንታ ኣዚናይ ዲዛ ኣማኒዛ ማጫሲያ ሄ ኣማኖንታ ኣዚናይ ኢዚራ ዳናስ ኮይኮ ኢዛ ኢዛፔ ኣንጄታ ባናስ ቤሴና።  
\v 14 ጋሶይካ ኣማኖንታ ኣዚናይ ኣማኒዛ ባ ማቼዪን ኣንጄቴስ። ኣማኖንታ ማጫሳያካ ኣማኒዛ ባ ኣዚናን ኣንጄታዉስ። ሄሳꬆ ሃኖንታ ኣጊኮ ኢንቴ ዬሊዳ ናይቲ ቱናታ ጊዳና ሺን ሃዒ ቃስ ኣንጄቲዳይታ። 
\p  
\v 15 ጊዶ ኣቲን ናምዓፌ ኢሶይ ኣማኖንታዴይ ሻኬታና ኮይኮ ሻኬቶ። ኣዴ ጊዲን ማጫ ጊዲን ኣማኒዛዴይ ሄሳ ማላ ዎጋን ቃሼቴና። ፆሲ ኑና ሳሮን ዳና ማላ ፄይጊዴስ።  
\v 16 ሃኔ ኔኒ ኔ ኣዚና ኣሻናኮኔ ኣይ ኤራይ? ዎይኮ ሃይሶ ኔ ኔ ማቾ ኣሻናኮኔ ኣይ ኤራይ? 
\p  
\v 17 ጮ ኢሲ ኢሲ ኣሲ ፆሲ ፄይጊዳ ማላኔ ጎዳይ ዎꬂዳ ማላ ዴዖ። ዎሳ ኬꬃታስ ታ ዎꬂዛ ዎጋይ ሄሳ።  
\v 18 ኢሳዴይ ኣማናናፔ ካሴ ቃፃሬቲዳዝ ጊዲኮ ቃፃሬቶንታ ኣሳ ማላ ሃኖፖ። ቃስ ቃፃሬቶንታ ዲሼ ኣማኒዳዴይካ ቃፃሬቶፎ።  
\v 19 ቃፃሬቲን ቃፃሬቶንታ ኣጊን ናምዓንካ ጎዓይ ባዋ። ዋና ኣይፌ ዮዖይ ፆሳ ኣዛዞ ፖሎ።  
\v 20 ኢሲ ኢሲ ኣሲ ባ ፄይጌቲዳ ፄይጌቴꬃን ሚኒ ዴዖ።  
\v 21-22 ኣማኒዛ ዎዴ ኔ ኣይሌ? ኔ ሄሳስ ዳሮ ሜቶቶፓ፤ ዎዜታና ዳንዳዪኮ ዎዜታ። ጋሶይካ ኣይሌ ጊዲ ዲሼ ጎዳ ኣማኒዳዴይ ኢዚ ጎዳ ጎቃ። ሄሳꬆካ ኣማኒዛ ዎዴ ጎቃ ጊዶንታዴይ ኢዚ ኪርስቶሳስ ኣይሌ።  
\v 23 ኢንቴ ሚሻን ሻሜቲዴታ። ሄሳ ጊሽ ኣሳ ኣይሌ ጊዶፒቴ።  
\v 24 ታ ኢሻቶ! ኢንቴፌ ኢሲ ኢሲ ኣሲ ባ ፄይጌቲዳ ማላ ፆሳራ ሚኒ ዴዖ። 
\s1 ጌላዖታ፥ ፓንꬃታኔ ኣምዔታ ጊሽ ሺቂዳ ኦይሾ 
\p  
\v 25 ጌላዖታኔ ፓንꬃታ ጊሽ ታስ ጎዳፔ ኢሜቲዳ ኣዛዞይ ዴና። ጊዶ ኣቲን ጎዳ ማሮቴꬃፌ ዴንዲዳይሳን ታ ኢንቴስ ኣማኔቲዳዴ ጊዳዳ ኢንቴና ዞራይስ።  
\v 26 ሃይሳ ሃዒ ዎዴ ሜቶ ጋሶን ኢንቴ ሃዒ ዲዛ ማላ ዲዛኮ ታስ ሎዖ ሚሳቴስ።  
\v 27 ኔ ማቺዳዴ ጊዲኮ ኣንጃናስ ኮዮፓ። ማቾንታዴ ጊዲኮ ማቾ ኤካናስ ኮዮፓ።  
\v 28 ማቾ ኤኪኮካ ናጋራ ጊዴና። ጌላዖያካ ጌሊኮ ናጋራ ጊዴና። ጊዶ ኣቲን ኤኪዛ ኣሳታኔ ጌሊዛይታ ቦላ ሃይሳ ኣላሜዛን ኢስታ ዳሮ ሜቶይ ጋካና። ታ ቃስ ሄሲ ኢንቴ ቦላ ጋኮንታ ኣጋናይሳ ዶሳይስ። 
\p  
\v 29 ታ ኢሻቶ! ታ ቆፋይ ሃይሳ ማላ፤ ዎዴዚ ቃንꬅ ጊዲዳ ጊሽ ማቻ ዲዛዴይ ማቻ ባይንዳዴ ማላ ዴዖ።  
\v 30 ዬኪዛይቲ ዬኮንታ ኣሳ ማላ፥ ኡፋዬቲዛይቲ ኡፋዬቶንታ ኣሳ ማላ ጊዴቶ። ሚሼ ሻሚዳዴንቲ ሻሜቲዳ ሚሻ ባስ ጊ ቆፖፌቶ።  
\v 31 ሃይሳ ኣላሜዛ ሚሻን ጎዔቲዛይቲ ዉርሲ ጎዔቶንታ ኣሳ ማላ ጊዲ ዴቶ። ጋሶይካ ሃይሳ ኣላሜዛ ሃኖይ ኣꬋናስ ዴስ። 
\p  
\v 32 ኢንቴ ሂርጋይ ባይንዳ ዳና ማላ ታ ኮያይስ። ማቾንታዴይ ጎዳ ኡፋይሳናስ ጎዳ ጊሽ ቆፔስ።  
\v 33 ማቺዳዴይ ቃስ ባ ማቺዮ ኡፋይሳናስ ሃይሳ ኣላሜዛ ሚሽ ቆፔስ።  
\v 34 ሃይሳን ኢዛ ቆፋይ ናምዑ ኬዚ ሻኬቴስ። ጌሎንታ ማጫሳያ ዎይኮ ጌላዖያ ጎዳዝ ፃላላ ቆፓዉስ። ኢዚስ ጊታ ቆፋይካ ኣሾኒካ፥ ኣያናንካ ጎዳስ ዱማቴꬃ። ጌሊዳራ ጊዲኮ ባ ኣዚና ኡፋይሳናስ ሃይሳ ኣላሜዛ ሃኖ ፃላላ ቆፓዉስ። 
\p  
\v 35 ታ ሄሳ ጊዛይ ኢንቴስ ሎዓናዝ ቆፓዳፔ ኣቲን ኢንቴና ዳሮ ቆፋን ዬጋናስ ጊዴና። ታስ ጊታ ቆፋይ ኢንቴ ዎዝናይ ሻኬቲ ናምዑ ኬዞንታ ኢንቴ ጎዳን ሚኒዲ ዎጋራ ዴ7ያናሳ። 
\p  
\v 36 ኢሳዴይ ባ ኦይቺዳ ጌላዖዮ ዎጋራ ኦይኮንታ ኣጊኮ ኢዚ ዎዴይካ ጪሚ ጪሚ ቢኮ ኤካና ኮይኮ ባ ኮይዳ ማላ ኤኮ። ኤኪኮኔ ጌሊኮ ሎዖ። ናጋራ ጊዴና።  
\v 37 ጊዶ ኣቲን ሃይሳ ሃ ዮዖዛን ኢዛ ዎዝናይ ቃፆንታ ባና ሃሪዲ ጌላዖዮ ኤኪኬ ጊዲ ሙርቲዳ ኣሲ ሎዖ ኦꬂዴስ።  
\v 38 ሄሳ ጊሽ ጌላዖዮ ኤኪዳዴይ ሎዖ ኦꬂዴስ። ኤኮንታዴይካ ኣꬌꬃ ሎዖ ኦꬂዴስ። 
\p  
\v 39 ኢሲ ማጫሲ ኣዚናይ ፓፃ ዲዛ ዎዴ ኩሜꬃን ባ ኣዚናራ ቃሼታዱስ። ኣዚናይ ሃይቂኮ ባ ኮይዳ ኣስ ጌላና ዳንዳያዉስ። ኢዛ ጌላናዴይ ኣማኒዛዴ ጊዶ ኣቲን ጌሉ።  
\v 40 ታ ቆፋ ማላ ጊዲኮ ኢዛ ጌሎንታ ዲዛኮ ዳሮ ኡፋይሳን ዴዓንዱስ። ታስካ ታናን ፆሳ ኣያናይ ዲዛ ሚሳቴስ። 
\c 8  
\s1 ኤቃስ ያርሼቲዳ ኣሾ ሙሳ ጊሽ 
\p  
\v 1 ኤቃስ ሹኬቲዳ ኣሾ ጊሽ ኢንቴ ታስ ፃፊዳይሳ ማላ ጊዲኮ ቱሙካ ኑ ዉሪካ ኤሪዛ ሚሺ ዴስ። ኤሮይ ኦቶሪሴስ፤ ሲቆይ ቃስ ጎዔስ።  
\v 2 ታ ኤራይስ ጊዛ ኣሲ ኤራናስ ቤሲዛ ማላ ቡሮ ኤሪቤና።  
\v 3 ፆሴ ሲቂዛዴይ ጊዲኮ ኢዚ ፆሳ ኣቻን ኤሬቲዳዴ። 
\p  
\v 4 ሄሳ ጊሽ ኤቃስ ያርሼቲዳ ኣሾ ሙሳ ጊሽ ታ ኢንቴስ ጊዛይ ሃይሳ ኣላሜዛን ኤቃይ ሃዳ ጊዲዳይሳኔ ኢሲ ፆሳፌ ኣቲን ሃራ ፆሲ ባይንዳይሳ ኑ ኤሮስ።  
\v 5-6 ኣይዴካ ጊዲኮ ዳሮ ኤቃቲኔ ዳሮ ጎዳቲ ዴቴስ ሺን ሳሎን ጊዲን ሳዓ ቦላ ፆሴ ጌቴቲዛ ዳሮ ኤቃቲ ዲኮካ ኑስ ጊዲኮ ሃኒዳይ ዉሪካ ኢዛን ሃኒዴስ። ኑካ ኢዛስ ጊዲዳ ኢሲ ፆሲ ኣዋይ ዴስ። ቃሴካ ሃኒዳዚ ዉሪካ ኢዛን ሃኒዳይ ኑካ ኢዛን ሃኒዳ ኢሲ ጎዳይ ዬሱስ ኪርስቶሲ ፃላላ ኑስ ዴስ። 
\p  
\v 7 ጊዶ ኣቲን ሄሳ ኣሲ ዉሪ ኤሬና። ኢሲ ኢሲ ኣሳቲ ሃኖ ጋካናስ ኤቃ ጎይኖ ዶሲዳ ጊሽ ሄሳ ማላ ኣሾ ሚሼ ኣዳካ ኤቃስ ሹኬቲዳይሳ ቆፔቴስ። ኢስታስ ቆፋይ ላፋ ጊዲዳ ጊሽ ኢስቲ ቱኔቴስ።  
\v 8 ጊዶ ኣቲን ካꬂ ኑና ፆሳ ኣች ጋꬄና። ኑ ሞንታ ኣጊኮካ ኑስ ፓጪዛይ ዴና። ኑ ሚኮካ ኑስ ዎꬌይ ዴና። 
\p  
\v 9 ጊዶ ኣቲን ኢንቴ ሜቶይ ባዋ ጉሳን ኦꬂዛይስ ኣማኖን ሚኖንታ ኣሳስ ꬉጴ ጊዶንታ ማላ ናጌቲቴ።  
\v 10 ኔስ ሄሳ ሚሳቲዛ ኤራቴꬅ ዲዛ ጊሽ ሂንኮ ኣማኖን ሚኖንታዴይ ኤቃ ኬꬃን ኔ ሚዛይሳ ቤዪዲ ኤቃስ ሹኬቲዳይሳ ማናስ ፃሌኔ?  
\v 11 ሄሳ ጊሽ ኪርስቶሲ ኢዛ ጊሽ ሃይቂዳ ሄ ኣማኖን ሚኖንታ ኢሻይ ኔ ኤራቴꬃ ጋሶን ꬋዬስ ጉሳ።  
\v 12 ሄሳꬆካ ኢንቴ ኢንቴ ኢሻታ ቆሆኒኔ ኢስታ ላፋ ቆፋ ማዱንꬆን ኪርስቶሳ ቆሄታ።  
\v 13 ሄሳ ጊሽ ታ ሚዛ ሚሺ ታ ኢሻ ꬉጲዛዝ ጊዲኮ ታ ኢሻ ታ ꬉጴꬆንታ ማላ ሙሌካ ኣሾ ሚኬ። 
\c 9  
\s1 ሃዋሬታስ ዲዛ ማታ 
\p  
\v 1 ታኒ ጎቃ ኣስ ጊዲኪና? ታ ሃዋሬ ጊዲኪና? ኑ ጎዳ ዬሱሳ ታኒ ታ ኣይፌራ ቤያቤኪና? ኢንቴካ ጎዳን ታ ኦሶን ቤቲዳ ኣይፌ ጊዴኬቲ?  
\v 2 ሃራታስ ታ ሃዋሬ ጊዶንታ ኣጊኮካ ታ ኢንቴስ ቱማፔ ሃዋሬ። ጋሶይካ ጎዳን ታ ሃዋሬቴꬃ ቤሲዛ ማታሜይ ኢንቴና። 
\p  
\v 3 ታና ፓጪዛይታስ ታ ኢሚዛ ማልꬄይ ሄሳ።  
\v 4 ኤሮ! ማናሲኔ ኡያናስ ኑስ ቤሴኔ?  
\v 5 ሃራ ሃዋሬታ ማላ ጎዳ ኢሻታ ማላኔ ኬፋንታ ማላ ኑካ ኣማኒዛ ኑ ማቼታ ኤኪ ዩያና ዳንዳዮኮኒ?  
\v 6 ዎይኮ ዋዬቲ ዳቡሪዲ ዳናስ ቤሲዛይ ታናኔ ባርናባሳ ፃላላ? 
\p  
\v 7 ኤሮ! ባ ሚሻራ ዎታዳራቴꬅ ኦꬂዛይ ኦኔ? ዎይኔ ሚꬂ ቶኪዲ፥ ሄ ቶኪዳ ሚꬃ ኣይፌ ሞንታይ ኦኔ? ሜሄ ሄሚሼ ባ ሄሚዛ ሜሄዛ ማꬅ ኡዮንታይ ኦኔ? 
\p  
\v 8 ታ ሃይሳ ጊዛይ ጮ ኣሳ ቆፋ ማላ ፃላላ? ሙሴ ዎጋይ ሄሳꬆ ጌኔ?  
\v 9 ሙሴ ዎጋ ጋርሳን “ካꬅ ቡኪዛ ሜሄ ዱና ቃቾፋ” ጌቴቲ ፃፌቲዴስ። ሂስቲን ፆሴ ሜቲዳይ ሄ ሜሄዛ ቃንꬄ? \x * \xo 9:9 \xt ዛሬ 25፡4፤ 1ፂም 5፡18\x* 
\v 10 ኢዚ ሄሳ ጊዳይ ቱማፔ ኑ ጊሽ ጊዴኔ? ሄሲ ፃፌቲዳይ ኣዳፌ ኑ ጊሻሳ። ጎሻንቻይኔ ቃሴካ ቡኪዛይሲ ባ ኦሶ ኣይፌፔ ባና ጋኪዛይሳ ኤካናስ ኡፋይስ ኦꬄስ። 
\p  
\v 11 ኑ ኢንቴ ጊዶን ኣያና ዜሬꬂ ዜሪዳይቲ ኣሾስ ጊዲዛዝ ማፂኮ ሄሲ ጊታ ሚሼ? \x * \xo 9:11 \xt ኦሮ 15፡27\x* 
\v 12 ሃራ ኣሳቲ ኢንቴፌ ሄሳ ማላ ጎዓ ኤካናስ ዳንዳዪኮ ኑ ቃስ ሄሳፌ ዳሮ ዴማናስ ቤሴኔ? ጊዶ ኣቲን ኑኒ ኑስ ቤሲዛ ማላ ጎዔቲቤኮ። ሃራፔካ ኑ ኪርስቶሳ ሚሺራቾ ቃላስ ꬉጴ ጊዶንታ ማላ ሃኒዛዝ ዉርሲካ ዳንዳዮስ።  
\v 13 ፆሳ ኬꬃን ኦꬂዛይቲ ባ ማናይሳ ፆሳ ኬꬃፌ ኤኪዛይሳ ማላ ያርሾሶን ኦꬂዛይቲካ ሄ ባ ኦꬂዛ ያርሺዛይሳፌ ሚዛይሳ ኢንቴ ኤሬኬቲ? \x * \xo 9:13 \xt ዛሬ 18፡1\x* 
\v 14 ሄሳꬆካ ሚሺራቾ ቃላ ሳባኪዛይቲ ባሲ ኮሺዛይሳ ሚሺራቾ ቃላ ኦꬂዛሶፔ ኤካና ማላ ጎዳይ ዎጋ ዎꬂዴስ። \x * \xo 9:14 \xt ማቶ 10፡10፤ ሉቃ 10፡7\x* 
\p  
\v 15 ታኒ ጊዲኮ ሄሳ ኡባፌካ ኣይኮካ ጎዔታቤኬ። ሃዒካ ታ ኢንቴስ ሃይሳ ፃፊዛይ ሄይታንታ ማላ ሚሽ ታስ ኦꬄቶ ጋዳ ጊዴና። ኣይሲ ጊኮ ኦኒካ ታኒ ታ ጎዳን ጬቄቲዛሮ ታፔ ዎꬂ ኤካናፔ ታስ ሃይቆይ ሎዖ።  
\v 16 ሚሺራቾ ቃላ ሳባኪዳይሲ ታና ጬቂሴና። ታ ሳባኪዛይ ዶሳን ጊዲዳ ጊሽ ጊዶንታ ዎልቃራ ታና ጋኪዳ ጊሻሳ። ታ ሚሺራቾ ቃላ ሳባኮንታ ኣጊኮ ታና ኣዬ-ኣና!  
\v 17 ሚሺራቾ ቃላ ታ ዶሳን ታ ሳባኪኮ ታስ ዎይቶይ ዴስ። ታኒ ታ ዶሳን ጊዶንታ ዎልቃራ ኦꬂዛይሳ ጊዲኮ ሃዳራ ፖላና ማላ ኦሶ ፃላላ ጊዳና።  
\v 18 ሂስቲን ታስ ኣዛ ዎይቶይ ዲዜ? ታስ ዎይቶይ ዳናይ ሚሺራቾ ቃላ ሳባካሼ ታስ ቤሲዛይታ ታ ጎዔቶንታ ኣጊኮኮ። 
\p  
\v 19 ታ ጎቃፔ ኣቲን ኦናስካ ኣይሌ ጊዲኬ። ጊዶ ኣቲን ዳሮታ ጎዳኮ ዛራና ጊሽ ኣሳ ኡባስ ኣይሌ ማላ ጊዳዲስ።  
\v 20 ኣይሁዳታ ኣሻናስ ኣይሁዳታራ ኢስታ ሚሳታዲስ። ታኒ ታ ባጋራ ሙሴ ዎጋፔ ጋራሳራ ጊዶንታ ዳሼ ሙሴ ዎጋፔ ጋርሳራ ዲዛይታ ኣሻናስ ኢስታ ሚሳታዲስ።  
\v 21 ታኒ ታ ባጋራ ፆሳ ዎጋይ ዲዛዴኔ ኪርስቶሳ ዎጋስ ሃሬቲዛዴ ጊዲኮካ ዎጋይ ባይንዳይታ ኣሻናስ ኢስታ ማላ ዎጋይ ባይንዳዴ ጊዳዲስ።  
\v 22 ዳቡራንቻታ ኣሻናስ ጋዳ ታካ ዳቡራንቻታራ ኢስታ ማላ ዳቡራንቻ ጊዳዲስ። ታስ ዳንዳዬቲዳ ማላ ኡባን ኢሲ ኢሲ ኣሳታ ኣሻናስ ኣሳ ኡባራ ኢስቲ ሃኒዛዝ ሃናዲስ።  
\v 23 ታ ሃይሳ ዉርሳ ኦꬂዛይ ሚሺራቾ ቃላ ኣንጆ ኢስታራ ጊሼታናስ ሚሺራቾ ቃላ ጊሽ ኦꬃዲስ። 
\p  
\v 24 ጋዴ ዎꬂ ዎፂዛይቲ ዳሮ ሺን ፆኒዲ ሺልማቴ ዴሚዛይ ኢሳዴ ፃላላ ጊዲዳይሳ ኢንቴ ኤሬኬቲ? ሄሳ ጊሽ ሺልማቴ ኤካናስ ዎፂዛዴ ማላ ኢንቴካ ዎፂቴ።  
\v 25 ጋዴን ዎፂ ኣꬋናስ ጊጌቲዛዴይ ኦኒካ ሃኖ ባርካ ባና ናጌስ። ሄይታንቲ ኣꬋናኔ ꬋያና ኣክሊሌ ኤካናስ ዳቡሬቴስ ሺን ኑ ቃስ ሜርናስ ꬋዮንታ ኣክሊሌ ዴማናስ ዳቡሮስ።  
\v 26 ሄሳ ጊሽ ታ ቃስ ፖሎይ ባይንዳ ጮ ሜላ ዎፂዛዴ ማላ ዎፂኬ። ቃሴካ ጫርኮራ ባፄቲዛዴ ማላ ጮ ሜላ ጋዴን ባፄቲኬ።  
\v 27 ታ ቃስ ሃራታስ ሳባካ ፔዓዳ ታስ ኩንዳ ኣቶንታ ማላ ታ ኣሳቴꬅ ሺሻ ኦይካዳ ሃራይስ። 
\c 10  
\s1 ኢስራዔሌ ናይታ ቦላ ጋኪዳይሲ ጋኮንታ ማላ ናጌቴꬅ 
\p  
\v 1 ታ ኢሻቶ! ካሴ ኑ ኣዋቲ ሻራይ ኢስታፌ ቦላራ ጊዲዲ ካሌꬂዳይሳ ማላኔ ኢስቲ ዉሪካ ዞዖ ኣባ ፒኒዳይሳ ታ ኢንቴና ቆፒሳናስ ኮያይስ። \x * \xo 10:1 \xt ኬሳ 13፡21-22፤ 14፡22-29\x* 
\v 2 ኢስቲ ሙሴራ ጊዳናስ ጊዲ ሻራኒኔ ኣባን ፃማቄቲዳ።  
\v 3 ዉሪካ ኢሲ ኣያና ቁማ ሚዳ። \x * \xo 10:3 \xt ኬሳ 16፡35\x* 
\v 4 ዉሪካ ኢሲ ኣያና ኡሺ ኡዪዳ። ኢስቲ ኡዪዳይካ ባና ካሊዛ ኣያና ዛላፌ ፑልቲዳይሳፌ። ሄ ዛላይካ ኪርስቶሳ። \x * \xo 10:4 \xt ኬሳ 17፡6\x* 
\v 5 ጊዶ ኣቲን ፆሲ ዳሮታን ኡፋዬቲቤና። ሄሳ ጊሽ ኢስታ ኣሃይ ባዞን ኩንዲ ኣቲዴስ። \x * \xo 10:5 \xt ታይ 14፡29-30\x* 
\p  
\v 6 ኢስቲ ኢታ ሚሽ ኣሞቲዳይሳꬆ ኑካ ኣሞቶንታ ማላ ሄ ኢስታ ሃኖይ ኑ ናጌታና ማላ ኑስ ሌሚሶ ጊዲዴስ። \x * \xo 10:6 \xt ታይ 11፡4\x* 
\v 7 “ዴሬይ ማናሲኔ ኡያናስ ኡቲዴስ፤ ዬፃናስካ ዴንዲዴስ” ጌቴቲ ካሴ ጌሻ ማፃፋን ፃፌቲዳ ማላ ኢስታ ጋርሳፌ ኢሲ ኢሲ ኣሳቲ ኦꬆይሳꬆ ኢንቴካ ኤቃ ጎይኒዛያታ ጊዶፒቴ። \x * \xo 10:7 \xt ኬሳ 32፡6\x* 
\v 8 ኢስታ ጋርሳፌ ኢሲ ኢሲ ኣሳቲ ላይማቲዲ ኢሲ ጋላስ ናምዑ ታማኔ ሄꬑ ሺ ኣሳይ ዲፒ ጊ ዉሮይሳꬆ ዉሮንታ ማላ ኑካ ኣኔ ላይማቶኮ። \x * \xo 10:8 \xt ታይ 25፡1-18\x* 
\v 9 ኢስታ ጋርሳፌ ኢሲ ኢሲ ኣሳቲ ጎዳ ፓጪዲ ሾሻን ዱኬቲ ሃይቂ ꬋዪዳይሳ ማላ ኑካ ኣኔ ጎዳ ፓጮኮ። \x * \xo 10:9 \xt ታይ 21፡5-6\x* 
\v 10 ኢስታ ጋርሳፌ ኢሲ ኢሲ ኣሳቲ ዙዙሜቲዲ ꬋይሲዛ ቦሻ ኪታንቻን ꬋዪዳይሳꬆ ኢንቴካ ꬋዮንታ ማላ ዙዙሞፒቴ። \x * \xo 10:10 \xt ታይ 16፡41-49\x* 
\p  
\v 11 ሄሲ ዉሪ ኑስ ሌሚሶ ጊዳና ማላ ኢስታ ቦላ ጋኪዴስ። ዎዴ ዉርሴꬃን ዲዛ ኑስ ቲሚርቴ ጊዳና ማላ ኑስ ፃፌቲዴስ።  
\v 12 ሄሳ ጊሽ ታ ሚና ኤቃ ዳይስ ጊዛዴይ ዲኮ ኩንዶንታ ማላ ባሲ ናጌቶ።  
\v 13 ኣሳ ቦላ ጋኪዳ ፓጬፔ ሃራ ኣꬊዛ ፓጬይ ኢንቴ ቦላ ጋኪቤና። ፆሲ ኣማኔቲዛ ፆሴ ጊዲዳ ጊሽ ኢንቴ ዳንዳዮንታ ኢንቴ ዎልቃፌ ቦላራ ኢንቴ ፓጬቴና ማላ ኢዚ ኢንቴና ኣጋጌና። ጊዶ ኣቲን ኢንቴ ፓጬቲዛ ዎዴ ሄ ፓጬዛ ኢንቴ ዳንዳያና ማላ ዎልቃ ኢሚዲ ፓጬፔ ኢንቴ ኬሲ ኤካና ኦጌ ኢዚ ኢንቴስ ጊጊሳና። 
\s1 ኤቃራ ኢሲፌቴꬂ ዳናስ ቤሴና 
\p  
\v 14 ሄሳ ጊሽ ታ ሲቆቶ! ኤቃስ ጎይኖፒቴ፤ ኢዛፔ ሃኪቴ።  
\v 15 ታ ኢንቴስ ሃይሳ ጊዛይ ዎዝናማ ጊዲዳ ጊሻሳ። ሄሳ ጊሽ ታ ዮቲዛይሳ ኣኔ ኢንቴ ኢንቴርካ ፒርዲቴ።  
\v 16 ኑኒ ፆሳ ጋላቲዲ ኤኪዛ ኡሻይ ኪርስቶሳ ሱꬃራ ጋጎቴꬂ ዲዛይሳ ጊዴኔ? ሄሳꬆካ ኑ ባꬂ ባꬂ ጊሼቲ ሚዛ ኡኬꬃይ ኪርስቶሳ ኣሾራ ጋጎቴꬂ ዲዛይሳ ጊዴኔ? \x * \xo 10:16 \xt ማቶ 26፡26-28፤ ማር 14፡22-24፤ ሉቃ 22፡19-20\x* 
\v 17 ኡኬꬃይ ኢሲኖ ጊዲዳ ማላ ኑኒካ ዳሮ ጊዲ ኡቲዲካ ዉሪካ ኢሲ ኣሾ። ኑ ዉሪካ ኢሲ ኡኬꬃዛ ጊሼቲ ሞስ። 
\p  
\v 18 ኣኔ ኢንቴ ኢስራዔሌ ናይቲ ኦꬂዳይሳ ቆፒቴ። ሺቅዛ ያርሾዛፔ ሚዛይታስ ያርሾይ ሺቅዛሶራ ጋጎቴꬂ ዴኔ? \x * \xo 10:18 \xt ሌዌ 7፡6\x* 
\v 19 ሂስቲን ኤቃስ ያርሼቲዳ ያርሾ ጊዲን ዎይኮ ኤቃይ ባ ባጋራ ጎዓራ ዴስ ጋዚና?  
\v 20 ጊዴና! ኣማኖንታ ኣሳይ ሺሺዛ ያርሾይ ፆሳስ ጊዶንታ ፃላዔሳ። ኢንቴስ ፃላዔራ ኢሲፌቴꬂ ዳና ማላ ታ ኮዪኬ። \x * \xo 10:20 \xt ዛሬ 32፡17\x* 
\v 21 ፃላዔ ኡሺኔ ጎዳ ኡሺ ኢንቴ ኢሲፌ ጋꬂ ኡያና ዳንዳዬኬታ። ጎዳ ማዳፌኔ ፃላዔ ማዳፌ ጋꬂ ማና ዳንዳዬኬታ።  
\v 22 ኑኒ ጎዳ ሃንቄꬂኖ? ኑ ኢዛፔ ሚኒዞኒ? \x * \xo 10:22 \xt ዛሬ 32፡21\x* 
\s1 ኡባካ ፆሳ ቦንቾስ ኦሶ 
\p  
\v 23 ዉሪካ ታስ ኢሜቲዴስ ሺን ዉሪካ ታና ጎዒዛዝ ጊዴና። ዉሪካ ታሳ ሺን ዉሪካ ታና ማዴና። \x * \xo 10:23 \xt 1ቆሮ 6፡12\x* 
\v 24 ኣሲ ዉሪካ ባ ላጌ ጎዓናዝ ጋꬂ ፄሎ ኣቲን ባና ጎዓናዝ ፃላላ ኮዮፖ። 
\p  
\v 25 ጊያን ባይዜቲዛ ኣሾ ዉርሲ ሲꬌይ ባይንዳ ሚቴ።  
\v 26 ቢታይኔ ቢታ ቦላ ዲዛይ ዉሪካ ጎዳይሳ። 
\p  
\v 27 ኣማኖንታ ኣሲ ኢንቴና ባሶ ፄይጊዲ ሺሺዳ ካꬅ ዉርሲ ኣይኮካ ሲꬎንታ ሚቴ።  
\v 28 ጊዶ ኣቲን ኢሳዴይ “ሃይሲ ኤቃስ ያርሼቲዳ ካꬃ” ጊኮ ሄ ካꬃ ሄ ኣዴዛ ቆፋ ጊሺኔ ኢንቴና ሲꬊሲኮ ሞፒቴ።  
\v 29 ታ ኢንቴስ ሄሳ ጊዛይ ሄ ዮቲዳዴ ቆፋ ጊሽ ጋዲስ ኣቲን ኢንቴ ቆፋ ጊሽ ጋቤይኬ። ታ ፂሎ ጊዳ ዲሺን ኣዛስ ሃራ ኣሳ ቆፋ ጌዶን ታ ቦላ ፒርዴቲዜ?  
\v 30 ታ ፆሴ ጋላታዳ ሚዛዴ ጊዳ ኡታዳ ኣዛስ ሃራ ኣሳን ፒርዴቶ? 
\p  
\v 31 ሂስቲኮ ኢንቴ ኣይ ሚኮካ፥ ኣይ ኡዪኮካ ዎይኮ ኣይኮ ኦꬂኮ ዉርሲካ ፆሳ ቦንቾስ ኦꬂቴ።  
\v 32 ኣይሁዳ ኣሳስ ጊዲን ኣይዛቤታስ ጊዲን ዎይኮ ፆሳ ዎሳ ኬꬃስ ኦናስካ ꬉጴ ጊዶፒቴ።  
\v 33 ታ ኣስ ዉርሳካ ኣይ ኦጌራካ ኡፋይሳና ኮዪዛ ማላ ኢንቴካ ሄሳꬆ ኦꬂቴ። ዳሮቲ ኣታና ማላ ታ ታና ጎዒዛዝ ጊዶንታ ኢስታ ጎዒዛዝ ኮያይስ። 
\c 11  
\p  
\v 1 ታኒ ኪርስቶሳ ሚሳታዳ ኢዛ ካሊዛይሳꬆ ኢንቴካ ታና ሚሳቲዲ ካሊቴ። \x * \xo 11:1 \xt 1ቆሮ 4፡16፤ ፒሊ 3፡17\x* 
\s1 ፆሳ ጎይኖ ዎጋ 
\p  
\v 2 ኢንቴ ታስ ዉርሲ ቆፒዛ ጊሺኔ ታፔ ኤኪዳ ቲሚርቴዛ ሎዔꬂ ኦይኪዳ ጊሽ ታ ኢንቴና ጋላታይስ።  
\v 3 ጊዶ ኣቲን ታ ኢንቴ ኤራና ማላ ኮዪዛይ ኣቱማሳስ ኡባስ ሁዔይ ኪርስቶሳ ጊዲዳይሳ ማላ ኣቱማሳይ ማጫሳስ ኡባስ ሁዔ። ቃሴ ፆሲ ኪርስቶሳስ ሁዔ።  
\v 4 ባ ሁዔ ጉሉንቲዲ ፆሴ ዎሲዛዴይ ዎይኮ ቃላ ዮቲዛዴይ ኦኒካ ባርካ ባና ካዉሼስ። 
\p  
\v 5 ባ ሁዔ ጎዞንታ ዎሲዛ ማጫሲያ ዎይኮ ቲንቢቴ ቃላ ዮቲዛ ኣይ ማጫስካ ባርካ ባና ካዉሻዉስ። ሄሲ ኢዛ ባ ሁዔ ቡሊሲዳዴራ ጊና።  
\v 6 ማጫሲ ባ ሁዔ ጎዞንታ ኣጊኮ ሜዴቱ ዎይኮ ቃንፂሱ። ኢዚስ ባ ሁዔ ሜዴቴꬂ ዎይኮ ቃንፂሴꬂ ዬላቺዛዝ ጊዲኮ ጎዙ።  
\v 7 ኣዴይ ባ ሁዔ ጉሉንታናስ ቤሴና። ኣቱማሲ ፆሳ ሌሚሶኔ ፆሳ ቦንቾ። ማጫሲ ጊዲኮ ኣዴስ ቦንቾ። \x * \xo 11:7 \xt ሜꬌ 1፡26-27\x* 
\v 8 ጋሶይካ ማጫሲ ኣዴፌ ሜꬌታዱስ ኣቲን ኣቱማሲ ማጫሳፔ ሜꬌቲቤና።  
\v 9 ቃሴካ ማጫሲ ኣዴስ ሜꬌታዱስ ኣቲን ኣዴይ ማጫሳስ ሜꬌቲቤና።  
\v 10 ሄሳ ጊሽ ኪታንቻቲ ቤያናስ ናጊዛ ማጫሳስ ኢሜቲዳ ማታ ቤሲዛ ጎሴ ባ ሁዔን ጎዙ። 
\p  
\v 11 ጎዳ ኣቻን ጊዲኮ ማጫሲ ኣዴይ ባይንዳ፥ ኣዴይካ ማጫሲ ባይንዳ ዴዬቴና።  
\v 12 ማጫሲ ኣዴፌ ቤቲዳይሳꬆ ኣዴይካ ማጫሳፔ ዬሌቴስ። ጊዶ ኣቲን ናምዓይካ ፆሳፌ ቤቲዳ። 
\p  
\v 13 ማጫሲ ባ ሁዔ ጎዞንታ ፆሴ ዎሳናስ ቤሲዛኮኔ ኣኔ ኢንቴ ፒርዲቴ።  
\v 14 ኣቱማሲ ባ ሁዔ ኣዱሲ ዲቺኮ ቦርሶ ጊዲዳይሳ ኢንቴና ሜꬌቴꬃ ሃኖቴꬂ ኤሪሱዌ?  
\v 15 ማጫይ ጊዲኮ ባ ሁዔ ቢናና ዲቺኮ ሄሲ ኢዚስ ቦንቾ ጊዴኔ? ኢዚስ ኣዱሳ ሁዔ ቢናናይ ኢሜቲዳይ ሴሎ ጊዳናሳ።  
\v 16 ሄሳ ጊሽ ኦኒካ ሃይሳ ሃ ዮዖዛን ፓላሜታና ኮይኮ ኑስ ጊዲንካ ፆሳ ዎሳ ኬꬃታስ ሃይሳፌ ሃራ ዎጋይ ዴና። 
\s1 ጎዳ ካዎ ኤኮ ዎጋ 
\p  
\v 17 ኢንቴ ኢሲ ሶ ሺቄቲዛ ዎዴ ቆሆስ ኣቲን ጎዓስ ጊዶንታ ጊሽ ታ ሃይሳ ኣዛዞዛ ኢንቴስ ኣꬂዛይ ኢንቴና ጋላታሼ ጊዴና።  
\v 18 ኢንቴ ዎሳ ኬꬃን ሺቂዛ ዎዴ ኢንቴ ጋርሳን ሻኮቴꬂ ዲዛይሳ ታ ካሴታ ሲያዲስ። ታ ሲዮይሳፌ ባጋይ ቱሙ ጊዳናይሳ ታ ኣማናይስ።  
\v 19 ኢንቴ ጊዶፌ ቱማንቻቲ ሻኬቲ ኤሬታና ማላ ሄሳ ማላ ሻኮይ ኢንቴ ጊዶን ዳናይሲ ዶሳ ጊዴና።  
\v 20 ኢንቴ ኢሲፌ ሺቄቲዲ ሚዛይ ጎዳ ካዎ ጊዴና።  
\v 21 ኢንቴ ሺቄቲዲ ኢሶይ ኢሳ ናጎንታ ዲሼ ካꬅ ሜታ። ኢንቴፌ ኢሳዴይ ጋፋን ዲሺን ሃንኮይሲ ቃስ ማꬆቴስ።  
\v 22 ሂስቲን ኢንቴስ ኡያናሶይኔ ማናሶይ ባዌ? ዎይኮ ፆሳ ኬꬄ ሌቂዲ ኣይኮይካ ባይንዳይታ ዬላቼቲ? ሂስቲን ታ ኢንቴና ኣይ ጎ? ሃይሳ ሃ ሃኖዛስ ኢንቴና ጋላቶ? ሙሌካ ጋላቲኬ። 
\p  
\v 23-24 ታ ጎዳፔ ኤኪዳይሳ ኢንቴስ ኣꬃዲስ። ሄሲካ ጎዳ ዬሱሲ ኣꬊ ኢሜቲዳ ኦማርስ ኡኬꬅ ዴንꬂዲኔ ፆሴ ጋላቲ ባꬂዲ “ሄዪቴ! ሚቴ! ሃይሲ ኢንቴስ ጊዲዛ ታ ኣሾ። ታና ቆፓናስ ኢንቴ ሃይሳ ኦꬂቴ” ጊዴስ።  
\v 25 ሄሳꬆካ ካዎፔ ጉዬ ኡሻ ዴንꬂዲ “ሃይሲ ኡሻይ ታ ሱꬃን ሃኒዛ ኦራꬃ ጫቆ። ሄሳ ጊሽ ኡሻፌ ኢንቴ ኡዪዛ ዎዴ ሃይሳ ታና ቆፓና ማላ ኦꬂቴ” ጊዴስ። \x * \xo 11:25 \xt ኬሳ 24፡8፤ ኤር 31፡31-34\x* 
\p  
\v 26 ሃይሳ ኡኬꬃ ኢንቴ ሚዛ ዎዴኔ ሃይሳ ኡሻካ ኡዪዛ ኡባ ዎዴ ጎዳይ ያና ጋካናስ ኢንቴ ኢዛ ሃይቆ ዮታና።  
\v 27 ሄሳ ጊሽ ኦኒካ ቤሶንታ ዲሺን ሃይሳ ኡኬꬃ ሚኮ ዎይኮ ጎዳ ኡሻ ኡዪኮ ኢዛዴይ ጎዳ ኣሾኔ ኢዛ ሱꬃ ካዉሺዳ ጊሽ ኢዚ ኦይሼታና።  
\v 28 ኦኒካ ሃይሳ ሃ ኡኬꬃ ማናፔኔ ኡሻፌ ኡያናፔ ካሴቲ ባርካ ባና ፓጮ።  
\v 29 ጋሶይካ ኦኒካ ጎዳ ኣሾ ባሲ ጌሎንታ ዲሺን ሚኮኔ ጎዳ ኡሻ ኡዪኮ ኢዛዴይ ባርካ ባ ቦላ ፒርዳ ኤሄስ።  
\v 30 ኢንቴ ጋርሳን ዳሮ ኣሳይ ዳቡሪዳይኔ ሳኬቲዳይ ቃሴካ ባጋይ ሃይቂዳይ ሄሳ ጋሶና።  
\v 31 ኑ ኑርካ ኑና ፓጪዛኮ ኑ ቦላ ፒርዳና።  
\v 32 ጊዶ ኣቲን ጎዳይ ፒርዲዛ ዎዴ ኑ ሃንኮ ኣማኖንታ ኣሳራ ፒርዴቶንታ ማላ ኢዚ ኑና ካሴቲ ሙሬስ። 
\p  
\v 33 ሄሳ ጊሽ ታ ኢሻቶ! ኢንቴ ማና ሺቂዛ ዎዴ ኢሶይ ኢሳራ ናጌቲቴ።  
\v 34 ኢንቴ ሺቂዛ ሺቆይ ፒርዳስ ጊዶንታ ማላ ኢንቴፌ ኦኒካ ጋፊዳዴይ ዲኮ ካሴቲዲ ባ ሶን ሞ። ሃንኮ ኣቲዳይሳ ታኒ ሃራ ዎዴ ሄ ኢንቴኮ ባዳ ዎጋ ዎꬃና። 
\c 12  
\s1 ፂሎ ኣያና ኢሞታታ 
\p  
\v 1 ታ ኢሻቶ! ኣያናይ ኢሚዛ ኢሞቴꬃ ጊሽ ኢንቴ ኢሲ ሚሽ ኤራና ማላ ታ ኮያይስ።  
\v 2 ኢንቴ ኣማናናፔ ካሴ ጮ ሜላ ያኔ ሃኔ ጉሳን ኢንቴ ኤሮንታ ካሌꬄቲዲ ዱና ዱዴ ጊዲዳ ኤቃታኮ ቢዳይሳ ኢንቴካ ኤሬታ።  
\v 3 ሄሳ ጊሽ ኦኒካ ፆሳ ኣያናን ሃሳዪሼ “ዬሱሲ ቃንጌቲዳዴ” ጌና። ሄሳꬆካ ፂሎ ኣያናን ጊዲዲ ኣቲን ኦኒካ “ዬሱሲ ጎዳ” ጋና ኣሲ ዶንታይሳ ታ ኢንቴስ ዮታይስ። 
\p  
\v 4 ኣሳስ ኢሞቴꬂ ዱማ ዱማ ጊዲሺን ኣያናይ ጊዲኮ ኢሲኖ።  
\v 5 ኦሶይካ ዱማ ዱማ ጊዲሺን ጎዳይ ጊዲኮ ኢሲኖ።  
\v 6 ዱማ ዱማ ኦሶ ኦጌቲ ዲኮካ ዉርሲካ ኦꬂዛይ ኢሲ ፆሳ። 
\p  
\v 7 ጊዶ ኣቲን ፂሎ ኣያና ቆንጪሶ ኢሞታይ ኢሳዴስ ኢሜቲዛይ ኢሲፌ ጎዔታናሳ።  
\v 8 ኢሳዴስ ሂላን ሃሳያና ኤራቴꬂ ኢሜቴስ። ሃራ ኣሳስ ቃስ ሄ ኣያናንካ ኤራቴꬃ ቃላን ሃሳያና ቃላይ ኢሜቴስ።  
\v 9 ኢሳዴስ ሄ ኣያናን ኣማኖይ ኢሜቴስ። ሃራ ኣሳስ ቃስ ሄ ኣያናኒካ ሃርጊዛይታ ፓꬂዛ ኢሞታይ ኢሜቴስ።  
\v 10 ኢሳዴስ ማላሊሲዛ ኦሶ ኦꬂዛ ኢሞታይ፤ ቃሴካ ሃራ ኣሳ ቡሮ ቲንቢቴ ቃላ ሃሳያ ኢሞታይ፤ ሃራ ኣሳ ቃሴካ ኣያናታ ሻኪ ኤሮይ፤ ሃራ ኣሳስ ዱማ ዱማ ቃላን ሃሳያይ፤ ቃሴካ ሃራ ኣሳስ ሃራ ዱማ ዱማ ቃላን ሃሳዬቲዳይሳ ቢርሻና ኢሞታይ ኢሜቴስ። \f + \fr 12:10 \fq ቲንቢቴ ቃላ \ft ፆሳ ቃላ ቢርሼꬅ ዎይኮ ቆንጪስ ዮቶ።\f* 
\v 11 ሄይቲ ዉሪካ ሄ ኢሲ ኣያናይ ኢሚዛ ኢሞታ ጊዲሺን ኢሲ ኢሲ ኣሳስ ባ ኮይዳ ማላ ኢሜስ። 
\s1 ኢሲ ኣሳቴꬅ ቦላ ዱማ ዱማ ቢሊቴቲ ዴቴስ 
\p  
\v 12 ኢሲ ኣሳቴꬃ ቦላ ዳሮ ቢሊቴቲ ዲኮካ ኣሳቴꬃይ ኢሲኖ። ጊዶ ኣቲን ቢሊቴቲ ዳሮ ጊዲኮካ ኣሳቴꬃይ ኢሲኖ ፃላላ። ኪርስቶሲካ ሄሳ ማላ። \x * \xo 12:12 \xt ኦሮ 12፡4-5\x* 
\v 13 ኣይሁዳ ኣሳታ ጊዲንካ ጊሪኬ ኣሳታ ጊዲንካ፥ ኣይሌ ጊዲንካ ዎይኮ ጎቃ ኣሳታ ጊዲንካ ኑ ዉሪካ ኢሲኖ ጊዳናስ ኢሲ ኣያናን ፃማቄቲዶስ። ኑ ዉሪካ ሃ ኢሲ ኣያናፔ ኡዪዶስ። 
\p  
\v 14 ኣሳቴꬂ ሜꬌቲዳይ ዳሮ ቢሊቴታፔ ኣቲን ኢሲ ቢሊቴፔ ፃላላ ጊዴና።  
\v 15 ቶሆይ “ታ ኩሼ ጊዶንታ ጊሽ ኣሳቴꬃ ጊዶን ዲኬ” ጊኮ ኢዚ ሂዝጊዳ ጊሽ ኢዛስ ኣሳቴꬃን ዱሲ ኣታኔ?  
\v 16 ሃይꬂ “ታ ኣይፌ ጊዶንታ ጊሽ ኣሳቴꬃ ጊዶን ዲኬ” ጊኮ ሄሳ ጊሽ ኣሳቴꬅ ጊዶን ዱሲ ኢዛስ ኣታኔ?  
\v 17 ኣሳቴꬂ ዉሪካ ኣይፌ ፃላላ ጊዲዳኮ ኣዛን ሲያኔ? ኣሳቴꬂ ዉሪካ ሃይꬄ ፃላላ ጊዲዳኮ ኣዛን ሲንጋኔ?  
\v 18 ጊዶ ኣቲን ፆሲ ኢሳ ኢሳ ባ ኮይዳ ማላ ኣሳቴꬃ ጊዶን ዳናስ ቤሲዛሶን ዎꬂዴስ።  
\v 19 ቢሊቴይ ዉሪካ ኢሲኖ ጊዲዳኮ ኩሜꬃ ኣሳቴꬂ ኣዋፔ ቤታኔ?  
\v 20 ሄሳ ጊሽ ቢሊቴቲ ዳሮ ሺን ኣሳቴꬂ ጊዲኮ ኢሲኖ ፃላላ። 
\p  
\v 21 ኣይፌይ ኩሼ “ኔና ታ ኮዪኬ” ጋናስ ዳንዳዬና። ሁዔይ ቶሆ “ኔና ታስ ኮሼና” ጋና ዳንዳዬና።  
\v 22 ሃራይ ኣቶሺን ኡባፌ ላፋ ሚሳቲዛ ቢሊቴቲ ዳሮ ኮሺዛይታ።  
\v 23 ኑኒ ላፋ ጊ ሌቂዛ ቢሊቴታ ሃንኮይታፔ ኣꬂ ቦንቾስ። ቃሴካ ኑ ኢስታን ዬላቲዛ ቢሊቴታ ሃራፔ ኣꬂ ናጎስ።  
\v 24 ኑ ኢስታን ዬላቶንታ ቢሊቴታስ ጊዲኮ ሄሳ ማላ ቦንቾ ኮሼና። ፆሲ ጊዲኮ ኣሳቴꬅ ቢሊቴታ ኢሲ ቦላ ኦይꬄꬂዲ ቦንቾይ ፓጪዛይታስ ኣꬌꬃ ቦንቾ ኢሚዴስ።  
\v 25 ኢዚ ሄሳ ኦꬂዳይ ኣሳቴꬃ ቢሊቴታ ጋርሳን ሻኮቴꬂ ዶንታ ኢስቲ ባ ጋርሳን ኢሶይ ኢሳ ባናራ ጊና ጊ ቆፓናሳ።  
\v 26 ኢሲ ቢሊቴይ ሳኬቲኮ ሃንኮ ቢሊቴቲ ዉሪካ ኢዛራ ኢሲፌ ሳኬቴቴስ። ኢሲ ቢሊቴይ ቦንቼቲኮ ቢሊቴቲ ዉሪካ ኢሲፌ ኡፋዬቴቴስ። 
\p  
\v 27 ሂስቲኮ ኢንቴ ዉሪካ ኪርስቶሳ ኣሳቴꬅ፤ ኢንቴ ኢሶይ ኢሶይ ኢዛ ኣሳቴꬃ ቢሊቴታ።  
\v 28 ፆሲ ዎሳ ኬꬃ ጊዶን ኮይሮ ሃዋሬታ፥ ናምዓንꬆ ቃሴ ናቤታ፥ ሄꬓንꬆ ኣስታማሬታ፥ ካሌꬂዲ ማላታ ኦꬂዛይታ፥ ፓꬂዛ ኢሞቴꬂ ዲዛይታ፥ ሃራታካ ኣስ ማዲዛ ኢሞታይ ዲዛይታ፥ ዴሬ ኣይሶ ኤራቴꬂ ዲዛይታኔ ዱማ ዱማ ቃላ ሃሳያና ኢሞቴꬂ ዲዛ ኣሳታ ዎꬂዴስ።  
\v 29 ዉሪካ ሃዋራቴ? ዉሪካ ናቤቴ? ዉሪካ ኣስታማሬቴ? ዉሪካ ማላሊሲዛ ሚሼ ኦꬂዞ?  
\v 30 ኡባስካ ሃርጊዛይታ ፓꬂዛ ኢሞታይ ዲዜ? ኣሲ ዉሪካ ዱማ ቃላን ሃሳዪዜ? ዱማ ቃላን ሃሳዬቶይሳ ኣሲ ዉሪ ቢርሺዜ?  
\v 31 ጊዶ ኣቲን ኢንቴ ዉሪካ ኡባፌ ኣꬊዛ ኢሞቴꬅ ሎዔꬂ ኮዪቴ። 
\p ቃሴካ ሃራ ኡባፌ ኣꬊዛ ኦጌ ታ ኢንቴና ቤሳና። 
\c 13  
\s1 ቱሙ ሲቆ 
\p  
\v 1 ታ ኣሳ ቃላኒኔ ሳሎ ኪታንቻታ ቃላን ሃሳዪኮካ ታስ ሲቆይ ባይንዳ ኣጊኮ ጮ ሜላ ቢራታ ጊሪሳ ማላ ዎይኮ ዳላ ጊሬꬃ ማላ።  
\v 2 ቲንቢቴ ሃሳዪዛ ኢሞታይ ታስ ዲኮካ፥ ዎይኮ ፁራ ዮዖታኔ ኤራቴꬅ ዉርሳ ታ ኤሪኮካ፥ ዙማይ ኢዚ ዲዛሶፔ ꬎቃዳ ሃራሶ ዲጊዛ ኣማኖይ ታስ ዲኮካ ሄሳ ዉርሳካ ሲቆይ ባይንዳ ታ ኦꬂኮ ሄሲ ሜላ ሃዳ። \x * \xo 13:2 \xt ማቶ 17፡20፤ 21፡21፤ ማር 11፡23\x* 
\v 3 ታስ ዲዛዝ ዉርሳ ማንቆታስ ታ ኢሚኮካ፥ ታ ኣሳቴꬅ ታ ታማን ፁጊኮካ፥ ሲቆይ ባይንዳ ኣጊኮ ታና ሄሲ ኣይኮካ ማዴና። \f + \fr 13:3 \fq ታማን ፁጊኮካ \ft ኢሲ ኢሲ ጌሻ ማፃፋቲ ኦቶሬቴꬃስ ጊዛ።\f* 
\p  
\v 4 ሲቆይ ዳንዳያ፥ ቃሴካ ኪያ፤ ሲቆይ ሚቃይኔና፤ ጬቄቴና፤ ኦቶሬቴና፤  
\v 5 ቤሶንታዝ ኦꬄና፥ ባርካ ባ ጎዓ ፃላላ ፄሌና። ቆሆ ቆዳን ዬጌና።  
\v 6 ሲቆይ ቱማንፔ ኣቲን ማካላን ኡፋዬቴና።  
\v 7 ሲቆይ ኡባ ዎዴ ዳንዳዬስ። ኡባ ዎዴካ ኣማኔስ። ኡፋይስ ኦꬄሲኔ ሚኒ ኤቄስ። 
\p  
\v 8 ሲቆይ ሙሌካ ኩንዴና። ቲንቢቴይ ጊዲኮ ኣታና። ሃራ ቃላን ሃሳያይካ ኣታና። ኤራቴꬂካ ሻሬታና።  
\v 9 ጋሶይካ ኑ ኤሪዛይ ዉርሲ ጊዶንታ ሻኪ ኤሮስ። ቲንቢቴ ሃሳያ ጊዲኮካ ባጋ ሃሳዮስ።  
\v 10 ጊዶ ኣቲን ዉርሴꬂ ጋኪዛ ዎዴ ኩሜꬅ ጊዶንታ ኢሞታይ ሄ ዎዴ ሻሬታና። 
\p  
\v 11 ታ ጉꬃ ናቴቴꬃን ዳሼ ና ማላ ሃሳያይሲኔ ና ማላ ቆፓይስ። ና ማላካ ዩሻ ቆፓይስ። ካሃ ኩንꬂዳፔ ጉዬ ካሴ ናቴꬃን ሃኒዛይሳ ዉርሳካ ዬጋ ኣጋዲስ።  
\v 12 ኑኒ ሃዒ ቤይዛይሲ ሃꬃን ፄሊዛ ማላ ጮ ቦዢ ቦዤስ ሺን ሄ ዎዴ ጊዲኮ ኑ ኢዛ ኣይፌሶ ሎዔꬂ ቤያና። ታ ሃዒ ኩሜꬅ ጊዶንታ ባጋ ፃላላ ኤራይስ። ሄ ዎዴ ጊዲኮ ታኒ ታ ሁዔስ ኤሬቲዳይሳ ማላ ኤራና። 
\p  
\v 13 ሄሳ ጊሽ ኣማኖይ፥ ሂዶታይኔ ሲቆይ ሃይቲ ሄꬓቲ ኤቂ ዳና። ሃይታ ኡባፌ ኣꬊዛይ ሲቆ። 
\c 14  
\s1 ኢሞታታን ቤሲዛ ማላ ጎዔቴꬅ 
\p  
\v 1 ሲቆ ካሊቴ፤ ኣያና ኢሞቴꬃታ ሃራፔካ ቲንቢቴ ሃሳዪዛ ኢሞታታ ሎዔꬂ ኮዪቴ።  
\v 2 ሃራ ቃላን ሃሳዪዛዴይ ፆሳስ ኣቲን ኣሳስ ሃሳዬና። ፁራ ጊዲዳ ዮዖ ኣያናን ሃሳዪዛ ጊሽ ኢዚ ጊዛይ ኣሳስ ጌሌና።  
\v 3 ቲንቢቴ ሃሳዪዛዴይ ኣሳ ሚንꬄꬃናስ፥ ዴንꬄꬃናሲኔ ጎዓናስ ሃሳዬስ።  
\v 4 ሃራ ቃላን ሃሳዪዛዴይ ቃስ ባርካ ባና ሚንꬄꬄስ። ቲንቢቴ ሃሳዪዛዴይ ጊዲኮ ዎሳ ኬꬃ ጎዔስ። 
\p  
\v 5 ኢንቴ ዉሪካ ሃራ ቃላን ሃሳዪዛኮ ታ ዶሳይስ ሺን ሄሳፌካ ቦላራ ኢንቴ ቲንቢቴ ቃላን ሃሳዪዛኮ ታ ዶሳይስ። ዎሳ ኬꬃይ ሚናና ማላ ሃራ ቃላራ ሃሳዪዛዴይ ባ ሃሳዪዛይሳ ቢርሾንታ ኢዚ ሃራ ቃላራ ሃሳዪዛይሳፌ ቲንቢቴ ሃሳዪዛዴይ ኣꬌስ።  
\v 6 ሄሳ ጊሽ ታ ኢሻቶ! ታ ኢንቴኮ ቢዛ ዎዴ ታ ኢንቴስ ቆንጪሴꬃን ዎይኮ ኤራቴꬃን ዎይኮ ቲንቢቴን፥ ዎይኮ ቲሚርቴን ዮቶንታ ሃራ ቃላራ ዮቲኮ ሄሲ ኢንቴና ኣይ ጎዓኔ? 
\p  
\v 7 ሄሲ ጮ ሱሱልዔ ማላኔ ዲꬃ ማላ ሼምፖይ ባይንዳ ኢስታ ጊሪሳስ ዱማቴꬂ ሻኬቲ ኤሬቶንታ ኣጊኮ ኢዛ ዎስቲ ኤራኔ?  
\v 8 ቃሴካ ፁሩምባይ ኣዛስ ፑኔቲዛኮ ዎይኮ ዛዬይ ኣዛስ ዛዬቲዛኮኔ ሻኪ ኤሬቶንታ ኦጌራ ፑኔቲኮ ኦኒ ኦላስ ጊጌታኔ? 
\p  
\v 9 ኢንቴካ ሄሳ ማላ። ኢንቴ ዱናፔ ኤሬቲዛ ቃላይ ኬዞንታ ኣጊኮ ኢንቴ ጊዛይሳ ኦኒ ኤራኔ? ጮ ሜላ ጫርኮን ꬋያና።  
\v 10 ኣላሜ ቦላ ዳሮ ዱማ ዱማ ቃላይ ዴስ ሺን ቢርሼꬂ ባይንዳ ቃላይ ባዋ።  
\v 11 ሄሳ ጊሽ ኢሳዴይ ሃሳዪዛ ቃላ ቢርሼꬂ ታ ኤሮንታ ኣጊኮ ሃሳዪዛዴስ ታ ኢማꬄ ጊዳይስ። ኢዛዴይካ ታስ ኢማꬅ ጊዴስ።  
\v 12 ኢንቴካ ሄሳ ማላ ኣያናን ኢሞቴꬃታ ዴማናስ ኮዪዛ ጊሽ ዎሳ ኬꬃ ጎዒዛ ኢሞቴꬅ ዴማናስ ሎዔꬂ ኮዪቴ። 
\p  
\v 13 ሄሳ ጊሽ ሃራ ቃላን ሃሳዪዛ ኣሲ ባ ሃሳዪዳይሳ ቢርሼꬂ ኤራና ማላ ባሲ ዎሶ።  
\v 14 ታኒ ሃራ ቃላራ ዎሲዛ ዎዴ ታ ኣያናን ዎሳይስ ኣቲን ታ ኢዛፔ ኣይኮካ ኤሪኬ።  
\v 15 ሂስቲን ታ ኣይ ኦꬃና ማላ ታስ ቤሲዜ? ታኒ ታ ኣያናንካ ዎሳና። ዎዝናን ዎꬃዳካ ዎሳና። ታ ኣያናንካ ዬፃና። ዎዝናራካ ዬፃና።  
\v 16 ሄሳꬆ ጊዶንታ ኣጊኮ ኔ ፆሴ ኣያናን ጋላቲዛ ዎዴ ሄሳ ኤሮንታ ኢሲ ኢማꬃ ኣሲ ኔ ጋላታ ዎሳ ዎስቲ “ኣሚን” ጋናስ ዳንዳዪዜ?  
\v 17 ኔ ቤሲዛ ማላ ጋላታናስ ዳንዳያሳ። ሃንኮይሲ ጊዲኮ ኢዛን ጎዔቴና። 
\p  
\v 18 ታኒ ኢንቴፌ ቦላራ ሃራ ቃላን ሃሳዪዛ ጊሽ ፆሴ ጋላታይስ።  
\v 19 ጊዶ ኣቲን ዎሳ ኬꬃን ኤሬቶንታ ዳሮ ሺ ቃላታ ሃሳያናፔ ሃራ ኣሳታ ታማርሳናስ ኣሳይ ኤሪዛ ኢቻሽ ቃላ ሃሳያና ዶሳይስ። 
\p  
\v 20 ታ ኢሻቶ! ኢንቴ ኢንቴ ቆፋን ጉꬃ ናይታ ማላ ጊዶፒቴ። ኢታ ኦሶስ ጊዲኮ ጉꬃ ናይታ ማላ ጊዲቴ። ቆፋን ጊዲኮ ካሃ ኩንꬂዳ ኣሳታ ጊዲቴ።  
\v 21 ካሴ ዎጋንካ 
\q1 “ ‘ኢስታ ቃላይ ኢማꬅ ጊዲዳ ኣላጋ ኣሳታ ቃላራ 
\q2 ታ ሃይሳ ኣሳስ ዮታና። 
\q2 ሄሳꬆ ዮቲንካ ታ ጊዛዝ ኢስቲ ሲዬቴና’ ጌስ ጎዳይ” 
\m ጌቴቲ ካሴ ጌሻ ማፃፋን ፃፌቲዴስ። \x * \xo 14:21 \xt ኢሳ 28፡11-12\x* 
\p  
\v 22 ሄሳ ጊሽ ሃራ ቃላን ሃሳያይ ኣማኖንታ ኣሳስ ማላታ ጊዴስ ኣቲን ኣማኒዛይታስ ማላታ ጊዴና። ቲንቢቴይ ጊዲኮ ኣማኒዛይታስ ኣቲን ኣማኖንታይስ ጊዴና። 
\p  
\v 23 ሂስቲኮ ዎሳ ኬꬃን ኣማኒዛ ኣሳይ ኢሲፌ ሺቂዳሶን ዉሪካ ኤሮንታ ሃራ ቃላን ሃሳዪሺን ኢማꬃ ኣሳቲ ዎይኮ ኣማኖንታ ኣሳይ ሺቂዲ ሃሳዪዛሶ ጌሊኮ “ሃይቲ ጎዬቴስ” ጌቴኔ?  
\v 24 ጊዶ ኣቲን ኣሳይ ዉሪ ቲንቢቴ ቃላ ሃሳዬቲሺን ኢማꬂ ዎይኮ ኣማኖንታዴይ ጌሊኮ ባ ሲዪዳይሳ ኡባ ኤራናኔ ሄ ቃላን ፒርዴታና።  
\v 25 ኢዛዴይ ባ ዎዝናን ቆቲ ዎꬂዳዚ ዉሪ ቆንጫናኔ ኢዚካ ባ ባጋራ “ቱማፔ ፆሲ ኢንቴናራ ዴስ” ጊዲ ጉፋኒዲ ፆሳስ ጎይናና። 
\p  
\v 26 ሄሳ ጊሽ ታ ኢሻቶ! ሂስቲን ኣይ ጊኖ? ኢንቴ ኢሲፌ ሺቂዛ ዎዴ ኢንቴፌ ኢሲ ኢሲ ኣሳስ ዬꬅ ቃሴ ኢሲ ኢሲ ኣሳስ ቲሚርቴይ ዴስ። ኢሲ ኢሲ ኣሳስ ቆንጮንታ ፁራ ሚሻታ ቆንጪሲዛ ኢሞታይ ዴስ። ሃራ ኣሳስ ዱማ ቃላን ሃሳያና ኢሞታይ ዴስ። ሃራስ ቃሴ ሄ ቃላ ቢርሼꬃ ኢሞታይ ዴስ። ሄሲ ሄ ኢሞታይ ዉሪካ ኣማኒዛይታ ጎዓናስ ቤሴስ።  
\v 27 ሃራ ቃላራ ሃሳዪዛይ ዲኮ ናምዑ ኣስ ዎይኮ ዳሪ ዳሪኮ ሄꬑ ጊዲዲ ታራን ታራን ዮቴቶ። ሃራ ኣሲ ቃሴ ቢርሾ።  
\v 28 ቢርሺዛዴይ ባይንዳ ኣጊኮ ሺቂዳ ኣሳ ጊዶን ጮዑ ጊዲ ባሲ ፃላላኔ ፆሳስ ፃላላ ዮቶ። 
\p  
\v 29 ቲንቢቴ ሃሳያ ኢሞታይ ዲዛይቲ ናቤቲ ናምዓቲ ዎይኮ ሄꬓቲ ቲንቢቴ ሃሳዬቶ። ሃንኮ ኣሳይ ዮቴቲዳይሳ ሎዔꬂ ፓጮ።  
\v 30 ኡቲዳ ኣሳ ጋርሳፌ ኢሳዴይ ኢሲ ሚሺ ቆንጪኮ ኮይሮ ሃሳዪዛይሲ ጮዑ ጎ።  
\v 31 ኢንቴ ጋርሳፌ ኢሲ ኢሲ ኣሲ ታማራና ማላኔ ሚኔታና ማላ ኢንቴ ዉሪካ ታራን ታራን ቲንቢቴ ዮታናስ ዳንዳዬታ።  
\v 32-33 ናቤታ ኣያናይ ናቤታስ ኣዛዜቴስ። ጋሶይካ ፆሲ ሳሮቴꬃ ፆሳፌ ኣቲን ዎጫማ ፆሴ ጊዴና። ኣማኒዛይታ ዎሳ ኬꬄ ኡባሶንካ ሄሳ ማላ።  
\v 34 ኣማኒዛ ኣሳይ ጎይኖስ ሺቂዛሶን ማጫሳቲ ጮዑ ጌቶ። ሙሴ ዎጋይ ካሴ ጊዳ ማላ ኢስቲ ኣዛዜቴቶ ኣቲን ሺቆሶን ኢስቲ ሃሳያና ማላ ኢስታስ ኢሜቲቤና።  
\v 35 ማጫሳቲ ኤራናስ ኮዪዛ ኢሲ ኢሲ ዮዖቲ ዲኮ ባ ኬꬃን ባ ኣዚናታ ኦይቼቶ። ጋሶይካ ማጫሲ ሺቆሶን ሃሳያይ ዬላቺዛዛ። 
\p  
\v 36 ፆሳ ቃላይ ኢንቴፌ ኬዚዴ? ዎይኮ ኢንቴኮ ፃላላ ጋኪዴ?  
\v 37 ኦኒካ ባና “ናቤ” ጊኮ ዎይኮ “ታስ ፂሎ ኣያናፔ ኢሞቴꬂ ዴስ” ጊዛዴይ ዲኮ ሃይሲ ታ ኢንቴስ ፃፊዳይሲ ጎዳ ኣዛዞ ጊዲዳይሳ ኤሮ።  
\v 38 ሃይሳ ኤሮንታ ኣሲ ዲኮ ኢዚ ባ ሁዔስ ኤሬቴና። 
\p  
\v 39 ሄሳ ጊሽ ታ ኢሻቶ! ቡሮ ቲንቢቴ ሃሳያናስ ሎዔꬅ ኮዪቴ። ዱማ ዱማ ቃላን ሃሳያካ ዲጎፍቴ።  
\v 40 ጊዲኮካ ዉሪካ ማራራኔ ዎጋራ ጊዶ። 
\c 15  
\s1 ኪርስቶሳ ዴንዶ 
\p  
\v 1 ሃዒካ ታ ኢሻቶ! ታ ኢንቴና ሳባኪን ኢንቴ ኤኪዲኔ ኢዛን ሚኒ ኤቂዳ ሚሺራቾ ቃላ ሃዒ ቆፊሳና ኮያይስ።  
\v 2 ታ ኢንቴስ ሳባኪዳ ቃላ ኢንቴ ሎዔꬂ ኦይኪኮ ሄ ሚሺራቾ ቃላን ኢንቴ ኣታና። ሄሳ ማላ ጊዶንታ ኣጊኮ ኢንቴ ኣማኖይ ጮ ሜላ ሃዳ። 
\p  
\v 3 ታኒ ታስ ኤኪዳይሳኔ ኡባፌ ኣꬊዛይሳ ኢንቴስ ኣꬃ ኢማዲስ። ጌሻ ማፃፋቲ ጊዛይሳ ማላ ኪርስቶሲ ኑ ናጋራ ጊሽ ሃይቂዴስ። \x * \xo 15:3 \xt ኢሳ 53፡5-12\x* 
\v 4 ሞጌቲዴስ፤ ጌሻ ማፃፋታን ፃፌቲዳይሳ ማላ ሄꬓንꬆ ጋላስ ሃይቆፔ ዴንዲዴስ። \x * \xo 15:4 \xt ማዛ 16፡8-10፤ ማቶ 12፡40፤ ሃዋ 2፡24-32\x* 
\v 5 ሄሳፌ ካሊዲ ጴፅሮሳስ ቤቲዴስ። ቃሴካ ዬሱሳ ካሊዛ ታማኔ ናምዓታስ ቤቲዴስ። \x * \xo 15:5 \xt ሉቃ 24፡34፥36፤ ማቶ 28፡16-17፤ ማር 16፡14፤ ዮሃ 20፡19\x* 
\v 6 ሄሳፌ ጉዬ ኢቻሹ ፄቱፔ ቦላራ ዲዛ ኣማኒዛይታስ ኢሲቶ ቤቲዴስ። ሄ ኢዛ ቤይዳ ኣሳፔ ዳሪዛ ባጋይ ፓፃ ዴስ። ባጋይ ቃሴ ሃይቂዴስ።  
\v 7 ሄሳፌ ጉዬ ያቆቤስ ቤቲዴስ። ካሊዲካ ኩሜꬃ ሃዋሬታስ ቤቲዴስ። 
\p  
\v 8-9 ታኒ ሃዋሬታ ኡባፌ ላፋኔ \x * \xo 15:8-9 \xt ሃዋ 9፡3-6\x* ካሴ ፆሳ ዎሳ ኬꬄ ጎዲዳ ጊሽ ሃዋሬ ጌቴታናስ ታኒ ቤሶንታዴኮ ሺን ኣሳ ዉርሶፌ ኣዉጫያ ሚሳቲዛ ታስካ ቤቲዴስ። \x * \xo 15:8-9 \xt ሃዋ 8፡3\x* 
\v 10 ጊዶ ኣቲን ፆሳ ኪያቴꬃን ሃዒ ታ ሃናናይሳ ሃናዲስ። ታስካ ኢሜቲዳ ፆሳ ኪያቴꬂ ሜላ ሃዳ ጊዲቤና። ታኒ ኦናፔካ ቦላራ ዳሮ ሚና ኦꬃዲስ። ጊዶ ኣቲን ሄሳ ኦꬂዳይ ታና ጊዶንታ ፆሳ ኣꬎ ኪያቴꬂ ኦꬂዴስ።  
\v 11 ሄሳ ጊሽ ታና ጊዲን ኢስታካ ጊዲን ኑ ዉሪካ ሳባኪዛይ ሄሳ። ኢንቴካ ኣማኒዳይ ሄሳ። 
\s1 ሃይቂዳ ኣሳ ዴንꬅ 
\p  
\v 12 ኪርስቶሲ ሃይቆፔ ዴንዲዳይሳ ኑ ታማርሲኮ ሂስቲን ኢንቴ ጋርሳፌ ኢሲ ኢሲ ኣሳቲ ዋኒዲ ሃይቆፔ ዴንዶይ ባዋ ጊዞ?  
\v 13 ሃይቂዳ ኣሳስ ዴንꬂ ዶንታዝ ጊዲኮ ኪርስቶሲካ ዴንዲቤና ጉሳካ?  
\v 14 ኪርስቶሲካ ሃይቆፔ ዴንዶንታዝ ጊዲኮ ኑ ሳባኮስ ጎዓይ ባዋ። ኢንቴ ኣማኖይካ ጮ ሜላ ሃዳ።  
\v 15 ሄሳፌካ ቦላራ “ፆሲ ኪርስቶሳ ሃይቆፔ ዴንꬂዴስ” ጊዲ ኑ ማርካቲዳ ማርካይካ ኑና ዎርዶ ፆሳ ማርካታ ኬሲዴስካ? ሃይቂዳ ኣሳይ ሃይቆፔ ዴንዶንታዝ ጊዲኮ ፆሲ ኪርስቶሳካ ዴንꬂቤና ጉሳ።  
\v 16 ጋሶይካ ሃይቂዳይቲ ዴንዶንታዝ ጊዲኮ ኪርስቶሲካ ሃይቆፔ ዴንዲቤና።  
\v 17 ኪርስቶሲ ሃይቆፔ ዴንዶንታዝ ጊዲኮ ኢንቴ ኣማኖይ ጮ ሜላ። ኢንቴካ ሃኖ ጋካናስ ኢንቴ ናጋራራ ዴታ ጉሳ።  
\v 18 ሃኖይ ሄሳ ማላ ጊዲኮ ኪርስቶሳ ኣማኒዲ ሃይቂዳይቲ ዉሪካ ꬋዪዳ ጉሳ።  
\v 19 ኑኒ ኪርስቶሳን ኡፋይስ ኦꬂዛይ ሃኖ ቢታይ ቦላ ዱሳስ ፃላላ ጊዲኮ ኑ ኣሳ ኡባፌ ላፋታ። 
\p  
\v 20 ጊዶ ኣቲን ኪርስቶሲ ሃይቂዳይታስ ኡባስ ባይራ ጊዲዲ ሃይቆፔ ቱሙ ዴንዲዴስ።  
\v 21 ሃይቆይ ኢሲ ኣሳ ኣዳሜ ባጋራ ዪዳ ማላ ሃይቂዳይታ ዴንꬂ ኪርስቶሳ ባጋራ።  
\v 22 ኣሲ ዉሪካ ኣዳሜ ባጋራ ሃይቂዳ ማላ ሄሳꬆካ ኣሲ ዉሪካ ኪርስቶሳ ባጋራ ሃይቆፔ ዴንዳና።  
\v 23 ጊዶ ኣቲን ዉሪካ ባ ታራራ ታራራ ዴንዳና። ኮይሮ ባይራ ጊዲዳ ኪርስቶሲ ዴንዲዴስ። ኢዛፔ ካሊዲ ኢዚ ዪዛ ዎዴ ኪርስቶሳስ ጊዲዛይቲ ዴንዳና።  
\v 24 ሄሳፌ ጉዬ ሃሬቲዛ ዴሬታ ጎዳቴꬂኔ ዎልቃማታ ዉርሲ ꬋይሲዳፔ ጉዬ ካዎታ ፆሳ ኣዋስ ኣꬂ ኢሚዛ ዎዴ ሄ ዎዴ ዉርሴꬅ ጊዳና። 
\p  
\v 25 ኢዚ ባ ሞርኬ ዉርሲካ ባ ቶሆ ጋርስ ኣꬃና ጋካናስ ኢዚ ካዎታናስ ቤሴስ። \x * \xo 15:25 \xt ማዛ 110፡1\x* 
\v 26 ቡሮ ዉርሴꬃን ፆኔቲ ꬋያና ሞርኬይ ሃይቆ።  
\v 27 “ፆሲ ዉርሲካ ኢዛ ጎዳቴꬃፌ ጋርሳን ዎꬂዴስ” ጊዛዚ ጌሻ ማፃፋን ፃፌቲዴስ። ጊዶ ኣቲን “ዉሪካ ኢዛ ጎዳቴꬃ ጋርሳን ጊዲዴስ” ጊሺን ዉሪካ ኢዛ ጎዳቴꬃ ጋርሳን ኦꬂዳ ፆሳ ኣዋ ጉጄና። \x * \xo 15:27 \xt ማዛ 8፡6\x* 
\v 28 ዉሪካ ኢዛስ ሃሬቲዳይሳፌ ጉዬ ፆሲ ዉርሶፌ ቦላ ጊዳና ማላ ፆሳ ናይ ቃሴ ኡባ ባሲ ሃሪሲዳይሳስ ፆሳ ኣዋስ ሃሬታና። 
\p  
\v 29 ሃይቆፔ ዴንꬂ ዶንታ ኣጊኮ ሂስቲን ሃይቂዳ ኣሳ ጊሽ ጊዲ ፃማቄቲዛ ኡባስ ጎዓይ ኣዜ? ሃይቂዳይቲ ሙሌካ ዴንዶንታዝ ጊዲኮ ሂስቲን ኣሳይ ኢስታ ጊሽ ኣዛስ ፃማቄቲዜ?  
\v 30 ኑ ቃስ ኡባ ዎዴ ኢታ ሜቶስ ኣꬊ ኢሜቲዛይ ኣዛሴ?  
\v 31 ታ ኢሻቶ! ሃች ሃች ሃይቆይ ታናራ ጋጌስ። ሄሳካ ኑ ጎዳ ዬሱስ ኪርስቶሳ ጌዶን ኢንቴ ቦላ ዲዛ ኣማኔቴꬅ ታ ኢንቴስ ቆንጪሳይስ።  
\v 32 ታኒ ኤፌሶኔን ዶዓ ሚሳቲዛ ኣሳታራ ባፄቲዳይሲ ኣሲ ቤያና ማላ ፃላላ ጊዲኮ ታስ ኢዛን ኣዛ ዎꬌይ ዲዜ? ሃይቂዳይታስ ዴንꬂ ዶንታ ኣጊኮ “ኑ ዎንቶ ሃይቃና ጊሽ ኣኔ ሞስ፥ ኣኔ ኡዮስ” ጊዛይታ ማላ ኑካ ኢስታ ማላ ጊዶስ። \x * \xo 15:32 \xt ኢሳ 22፡13\x* 
\p  
\v 33 ኢንቴ ባሌቶፍቴ! ኢታ ላጌቴꬂ ሎዖ ኣማሌራ ዲዛይታ ሞሬስ።  
\v 34 ዎዝናማ ጊዲቴ፤ ናጋራ ኦꬆፍቴ፤ ፆሴ ኤሮንታይታ ኢሲ ኢሲ ኣሳቲ ኢንቴ ጋርሳን ዲዛ ጊሽ ታ ሄሳ ኢንቴና ዬላቻናስ ጋይስ። 
\s1 ሃይቆፔ ዴንዳና ኣሳቴꬅ 
\p  
\v 35 “ሃይቂዳይቲ ዋኒ ዴንዳኔ? ኣይ ማላ ኣሾራ ዴንዳኔ?” ጊዛዴይ ዳና ዳንዳዬስ።  
\v 36 ኔኖ ኤያዞ! ኔ ዜሪዛ ዜሬꬃይ ሃይቆንታ ዲሼ ጫሬና።  
\v 37 ኔኒ ዜሪዛ ካꬃ ሞꬌያ ጊስቴ ዎይኮ ሃራ ካꬃ ኣይፌ ጊዲኮካ ጉዬፔ ኔ ኤካናራ ሃዒ ኔ ዜሮሮ ጊዱኩ።  
\v 38 ፆሲ ቃሴ ባ ኮይዳ ማላ ሄ ዜሬꬃስ ኢዛ ማላ ሜꬎ ኢሜስ። ዜሬꬃ ቆሞታስ ኢሳስ ኢሳስ ኢዛ ሚሳቲዛ ኣሳቴꬅ ኢሜስ። 
\p  
\v 39 ኣሾይ ዉሪካ ኢሲ ማላ ጊዴና። ኣሳ ኣሾይ ኢሳ ጊዲሺን ሜሄ ኣሾይ ቃሴ ሃራ፤ ካፎ ኣሾይ ሃራ፤ ሞሌ ኣሾይካ ሃራ ቆሞ። 
\p  
\v 40 ሄሳ ማላካ ሳሎን ዲዛይታሲካ ኢስታ ሚሳቲዛ ሜꬎይ ዴስ። ቢታ ቦላ ዲዛይታሲካ ኢስታ ሚሳቲዛ ሜꬎይ ዴስ። ጊዶ ኣቲን ሳሎይታ ቦንቾይ ኢሲ ማላ። ቢታ ቦላ ዲዛይታ ሜꬎ ቦንቾይካ ዱማ።  
\v 41 ኣዋ ኣርሼ ቦንቾይ ኢሲኖ። ጊዶ ኣቲን ኣጊና ቦንቾይ ቃሴ ዱማ። ፆሊንቴታ ቦንቾይካ ሃራ። ኢሲ ፆሊንቴ ቦንቾይ ሃራ ፆሊንቴ ቦንቾፌ ዱማቴስ። 
\p  
\v 42 ሃይቂዳ ኣሳ ዴንꬂካ ሄሳ ማላ። ዎቂዛ ሜꬎይ ዜሬቲን ዎቆንታ ሜꬎይ ዴንዳና።  
\v 43 ካዉሻቴꬃን ዜሬታና ሺን ቦንቾን ዴንዳና። ዳቡርሳን ዜሬታና ሺን ዎልቃማ ጊዲዲ ዴንዳና።  
\v 44 ሜꬌቴꬅ ሜꬎይ ዜሬታና ሺን ኣያና ሜꬎይ ዴንዳና። ሜꬌቴꬅ ሜꬎይ ዲኮ ቃሴካ ኣያና ሜꬎይካ ዴስ። 
\p  
\v 45 ሄሳ ጊሽ “ኮይሮ ኣስ ኣዳሜይ ዴዖይ ዲዛ ሜꬌቴꬅ ጊዲዴስ” ጌቴቲ ጌሻ ማፃፋን ፃፌቲዴስ። ናምዓንꬆ ኣዳሜ ጊዲዳ ኪርስቶሲ ጊዲኮ ኣሳስ ዴዖ ኢሚዛ ኣያና። \x * \xo 15:45 \xt ሜꬌ 2፡7\x* 
\v 46 ጊዶ ኣቲን ኮይሮ ዪዳይ ኣያናይሳ ጊዶንታ ሜꬌቴꬃይሳ። ኣያናይሲ ቃስ ጉዬፔ ዪዳይሳ።  
\v 47 ኮይሮ ዪዳ ኣዳሜይ ቢታፌ ሜꬌቲዳ ጊሽ ኢዚ ቢታፌ። ናምዓንꬆ ዪዳይሲ ሳሎፔ።  
\v 48 ቢታፌ ጊዲዳይቲ ኢስቲ ቢታፌ ሜꬌቲዳይሳ ማላ። ሳሎፔ ጊዲዳይቲ ሳሎፔ ዪዳይሳ ማላ።  
\v 49 ኑኒ ቢታ ኣሳ ሜꬋ ማዮዖይሳꬆካ ሳሎይሳ ሜꬋካ ማይዓና። 
\p  
\v 50 ታ ኢሻቶ! ታ ሃይሳ ኢንቴስ ዮታይስ ኣሾይኔ ሱꬂ ፆሳ ካዎቴꬅ ላቴቴና። ꬋያናይሲ ꬋዮንታይሳ ላቴና። 
\p  
\v 51 ኣኔ ታ ኢንቴስ ኢሲ ፁራ ዮዖ ዮታይስ። ኑኒ ዉሪካ ሃይቆኮ። ጊዶ ኣቲን ኑ ዉሪካ ላሜታና።  
\v 52 ሄሲካ ሃናናይ ኑ ቆፖንታ ዲሺን ዉርሴꬃ ፁሩምባይ ፑኔቲዛ ዎዴ ቂጲዳ ኣይፌይ ፄሊዛ ማላ ኢሲቶ ሃናና። ፁሩምባይ ፑኔታና፤ ሃይቂዳ ኣሳይ ዎቆንታይታ ጊዲዲ ዴንዳና። ኑኒካ ላሜታና።  
\v 53 ꬋዪዛይሲ ꬋዮንታይሳ ማይዓናስ፥ ሃይቂዛይ ሃይቆንታይሳ ማይዓናስ ቤሴስ። 
\p  
\v 54 ꬋዪዛይ ꬋዮንታዝ፥ ሃይቂዛይ ሃይቆንታዝ ማይዒዛ ዎዴ “ሃይቆይ ፆኔቲ ሚቴቲዴስ” ጌቴቲ ካሴ ጌሻ ማፃፋን ፃፌቲዳ ቃላይ ፖሌታና። \x * \xo 15:54 \xt ኢሳ 25፡8\x* 
\v 55 ሄሳꬆካ 
\q1 “ሃይቆ! ካሴ ኔ ፆኖይ ኣዋን ዲዜ? 
\q2 ሃይቆኮ! ኔ ኢዛራ ጫዲዛ ዪሻይ ኣዋን ዲዜ?” 
\m ጌቴቲ ፃፌቲዴስ። \x * \xo 15:55 \xt ሆሴ 13፡14\x* 
\v 56 ሃይቆይ ኢዛራ ዱኪዛ ዎልቃይ ናጋራ፤ ናጋራ ዎልቃይ ዎጋ።  
\v 57 ጊዶ ኣቲን ጎዳ ዬሱስ ኪርስቶሳ ባጋራ ኑስ ፆኖ ኢሚዛ ፆሳስ ጋላታይ ጊዶ። 
\p  
\v 58 ሄሳ ጊሽ ታ ሲቆ ኢሻቶ! ሚኒ ኤቂቴ። ኣይ ሚሻንካ ያርክ ያርኮፍቴ። ጎዳ ኦሶስ ኢንቴ ዳቡሪዛ ዳቡርሳይ ሃዳ ጊዶንታይሳ ኤሪዲ ኡባ ዎዴ ፓጬይ ባይንዳ ጎዳስ ኦꬃናስ ሚኔቲቴ። 
\c 16  
\s1 ዬሩሳላሜን ዋዬቲዛ ኣማኒዛይታስ ሚሻ ኬሶ 
\p  
\v 1 ሃዒ ቃሴ ኣማኒዛይታስ ሚሻ ኬሶ ጊሽ ጋላቲያን ዲዛ ዎሳ ኬꬃታስ ታኒ ኢሚዳ ኣዛዞ ማላ ኢንቴካ ኦꬂቴ። \x * \xo 16:1 \xt ኦሮ 15፡25-26\x* 
\v 2 ሚሻይ ኬዛናይ ቡሮ ታ ሄ ቢን ጊዶንታ ማላ ኢንቴፌ ኢሲ ኢሲ ኣሲ ባሲ ዲዛ ማላ ሳሚንታን ሳሚንታን ኢሲ ጋላስ ዎጋ ዎጋ ኬሲ ዎꬆ።  
\v 3 ታ ሄ ቢዛ ዎዴ ኢንቴ ዶሪዳ ኣሳታስ ታ ሞይዞ ዳብዳቤ ፃፋ ኢማዳ፥ ኢስቲ ኢንቴ ኢሚዳ ኢሞታ ዬሩሳላሜ ጋꬃና ማላ ሃፔ ታ ኪታና።  
\v 4 ታ ኢስታራ ባናስ ኮሺዛዝ ጊዲኮ ታናራ ባንዴቴስ። 
\s1 ጳዉሎሳስ ኦጌ ባና ቆፋ 
\p  
\v 5 ታኒ ባሼ ማቂዶኒያራ ኣꬋ ቡሲ ታስ ኣቶንታ ጊሽ ታ ማቂዶኒያ ጋካዳ ሄራ ኢንቴኮ ባና። \x * \xo 16:5 \xt ሃዋ 19፡21\x* 
\v 6 ታ ኣዋካ ቢሺን ታና ኦጌይ ዋይሶንታ ማላ ኢንቴ ታና ማዳና ማላ ባሼ ታ ኢንቴ ኣቻን ጋምዖንታ ኣጊኬ። ኦኔ ኤሪዛይ ባልጎይ ኣꬋና ጋካናስ ታ ኢንቴ ኣቻን ባልጎዛ ኣꬆንታ ዋያ ኣጋና።  
\v 7 ታ ኢንቴ ኣቻን ዳሮ ዎዴ ጋምዓናስ ኮዪዛ ጊሽ ኢንቴና ጮ ኦጌራ ኣꬋ ባሼ ቤያናስ ኮዪኬ። ጎዳ ሼኔ ጊዲኮ ኢንቴ ኣቻን ኣዱሳ ዎዴ ጋምዓናስ ኮያይስ። 
\p  
\v 8 ጊዶ ኣቲን ጴንፃቆስቴ ጌቴቲዛ ባዓሌ ጋላስ ጋካናስ ታ ኤፌሶኔን ጋምዓና። \x * \xo 16:8 \xt ሌዌ 23፡15-21፤ ዛሬ 16፡9-11\x* 
\v 9 ታ ሄን ጋምዓና ጋሶይካ ታስ ሄን ጊታ ኦሶ ፔንጌይ ዶዬቲዴስ ሺን ታናራ ኤቄቲዛይቲ ዳሮቲ ዴቴስ። 
\p  
\v 10 ፂምቶሲ ኢንቴኮ ቢኮ ኢዚ ታ ማላ ጎዳ ኦሳንቻ ጊዲዳ ጊሽ ኢዚ ባቦይ ባይንዳ ዳና ማላ ኢንቴ ኢዛ ማዲቴ። \x * \xo 16:10 \xt 1ቆሮ 4፡17\x* 
\v 11 ሄሳ ጊሽ ኦኒካ ኢዛ ካꬎፖ። ኢዚ ታኮ ሳሮን ሲማና ማላ ኢንቴ ማዲቴ። ኑካ ሃራ ኣማኒዛይታራ ኢዛ ዩሳ ናጎን ዶስ። 
\p  
\v 12 ኑ ኢሻ ኣጲሎሲ ሃራ ኣማኒዛይታራ ኢንቴኮ ባና ማላ ኬሃ ዎሳዲስ ሺን ኢዚ ቃስ ሃዒ ኢንቴኮ ባናስ ኮይቤና። ጊዶ ኣቲን ባና ኦጌይ ጊጊሺን ኢዚ ኢንቴኮ ባና። 
\s1 ዉሪሴꬃ ዞሬኔ ሳሮካ 
\p  
\v 13 ቤጊቴ! ኣማኖን ሚኒ ኤቂቴ፤ ሚኒቴ፤ ጎብቴ።  
\v 14 ኢንቴ ኦꬂዛዝ ዉርሲካ ሲቆን ኦꬂቴ። 
\p  
\v 15 ታ ኢሻቶ! ኣካያ ቢታን ኮይሮ ኣማኒዳይ ኢስቲፋኖሴሶ ኣሳ ጊዲዳይሳኔ ኣማኒዛ ኣሳ ማዳናስ ኢስቲ ባና ኣꬂ ኢሚዳይሳ ኢንቴካ ኤሬታ። \x * \xo 16:15 \xt 1ቆሮ 1፡16\x* 
\v 16 ኢስታ ሚሳቲዛ ኣሳታሲኔ ኢስታራ ኢሲፌ ዳቡሪዛ ኣሳታስ ኡባስ ኣዛዜታና ማላ ታ ኢንቴና ዎሳይስ። 
\p  
\v 17 ኢስቲፋኖሲ፥ ፌርዶናፆሲኔ ኣካይቆሲ ዪዳ ጊሽ ታ ዳሮ ኡፋዬታይስ። ጋሶይካ ኢንቴ ሃን ታናራ ዶንታ ጊሽ ኢስቲ ታስ ፓጪዛዝ ዉርሲ ኩንꬂዳ።  
\v 18 ታ ዎዝናኔ ኢንቴ ዎዝና ዉርሲ ሼምፒሲዳ። ሄሳ ጊሽ ሄሳንታ ማላ ኣሳታ ሙሌ ባሎፒቴ። 
\p  
\v 19 ኢሲያ ቢታን ዲዛ ዎሳ ኬꬃቲ ኢንቴና ሳሮ ጌቴስ። ኣቂላይኔ ጲርሲቂላይካ ኢስታ ሶን ሺቂዛ ኣማኒዛ ኣሳይ ጎዳ ሱንꬃን ቦንቾ ሳሮታ ኢንቴስ ሺሼቴስ። \x * \xo 16:19 \xt ሃዋ 18፡2\x* 
\v 20 ሃን ኣማኒዛይቲ ዉሪካ ኢንቴና ሳሮ ጌቴስ። ኢንቴ ኢንቴ ጊዶን ኢሶይ ኢሳራ ሲቆ ዬሬቴꬅ ዬሬቲቴ። 
\p  
\v 21 ሃይሳ ሳሮካ ታ ኩሼራ ፃፊዳይ ታና ጳዉሎሳ። 
\p  
\v 22 ጎዳ ዶሶንታዴይ ዲኮ ኢዚ ቃንጌቲዳዴ ጊዶ! ጎዶ ሃያ!  
\v 23 ጎዳ ዬሱሳ ኪያቴꬂ ኢንቴናራ ጊዶ። 
\p  
\v 24 ታ ሲቆይ ጎዳ ዬሱስ ኪርስቶሳ ባጋራ ኢንቴስ ኡባስ ጊዶ። ኣሚን።