\id COL - Patpatar NT [gfk] -Papua New Guinea 1997 (DBL 2014) 
\h KOLOSE 
\toc1 No Pakpakat ta Pol tupas ira Kolose 
\toc2 Kolose 
\toc3 Kol 
\mt2 No Pakpakat ta Pol tupas ira  
\mt1 KOLOSE  
\ip I nanaas bia Pol ga kis ra hala na harpidanau kenas Rom ing ga pakat iakan ra pakpakat tupas diet ira Kolose tano hanuo Esia (nes Apostolo 28.16-21). Ga pakat ira iruo pakpakat tupas Pilemon ma ira Epesas ta iakano pakana bung mah. Pol pa ga so no lotu aras Kolose. I nanaas bia Epaparas ga hadade no tahut na hinhinawas ta Pol kenas Epesas, gaam haan uras Kolose ma ga harpir kaia (Kolose 1.7-8 ma Apostolo 19.10). Pol ga pakat kan ra pakpakat wara hakhakatom diet ira Kolose ta ira tena harausur bisbis. Diet ga harabota uta ari a haleng na mangana linge. Diet ga bul hatamat ari a mangana bung (Kolose 2.16) ma ira angelo (2.18). Diet ga sip bia ira tunotuno na kis ra hena ira harkurai (2.21) ma no magingin na kut palatamaina tunotuno (2.11). Diet ga hatamat ira udiet mangana lilik bia aie no mangana mintot i lamus dahat tano nilon (2.4; 2.8; 2.18). Iesen Pol ga manga bul hatamat Krais bia aie sen mon i haruat bia na halon ira tunotuno. Krais no malalarine God (1.15). Krais ga hakisi ira linge bakut (1.16). Krais i balaure ira linge bakut (1.17). Krais no luena wara tuntunut hut sukun ra minaat (1.18). Krais i haruat harsakit ma God (1.19; 2.9). Krais na kap pakus ira linge bakut ukaia ho God (1.20-22). Io kaik, \bd Krais i tamat ta ira linge bakut ma i manga haruat wara halhalon dahat,\bd* ma iakano no suruno ta iakan ra pakpakat.  
\c 1  
\p
\v 1-2 Iau Pol tiga apostolo ta Krais Jisas haruat tano sinisip ta God, ma Timoti no tasi dahat narako ta Krais, mir tule ken ra nianga tupas muat ira matanaiabar tus ta God kaia Kolose, muat ira ut na nurnuruan tano numuat kinkinis ta Krais.  
\p A harmarsai ma ra malum tupas muat meram ho God no adahat Sus.   
\s1 Pol ga tanga tahut uta ira nurnuruan ma ira harmarsai ta ira Kolose, ma ga sasaring bia diet na nunure timaan God.  
\p
\v 3 Mir la tangtanga tahut ta God no Sus ana no udahat Watong Jisas Krais ing mir la saasaring uta muat.  
\v 4-6 Mir tanga tahut huo tana kanong mir te hadade uta ira numuat nurnuruan ta Krais Jisas ma uta ira numuat harmarsai tupas diet bakut ira matanaiabar gar ta God. Ma muat la harmarsai ma nurnur huo kanong muat kis na nanaho ta ira haridaan i kis taguro taar uta muat aram ra mawe. Ma muat gate hadade tar uta kaike ra haridaan ing no nianga tutun ga haan tupas muat, aie no tahut na hinhinawas. Iakan ra tahut na hinhinawas i la huhuai ma i la hanahaan hakakari tano ula hanuo bakut, hoing gate tatalen huo kaia nalamin ta muat tur leh tano luena bung muat ga hadadei ma muat ga palai ta ira tutun tano harmarsai ta God.  
\v 7 Ma no numehet bilai na harwis Epaparas nong i tur tika ma mehet tano pinapalim ma a bilai na ut na pinapalim ie tane Krais wara gaie muat, aie nong ga hausur muat uta iakan.  
\v 8 Aie nong ga hinawase mir utano numuat magingin na harmarsai nong no Halhaliana Tanuo i te tabar muat mei.   
\p
\v 9 Kaiken ra linge no burena bia mir pai sangeh ma ra sinasaring wara gaie muat tur leh tano bung mir ga ser leh no hinhinawas uta muat. Mir la sarsaring God bia na tabar muat ma ra tamat na minminonas ta ira linge i haruat ma ira numuat nilon na tanuo bia muat naga hung ma ra mintota utano uno sinisip.  
\v 10-12 Ma mir sasaring mah huo bia muat naga lon hoing i sip bia muat na lon huo ma bia ta ira linge bakut ing muat la gilgil muat naga hakanakana ie hoken: na mon hunena ta ira numuat bilai na gingilaan bakut, muat na tahtahuat hanahaan ta ira numuat mintota utana, muat na kap ira dadas bakut haruat ma no uno tamat na baso sakit bia muat naga tur dadas ma muat na bala maat ta ira tirtirih, ma bia muat na tanga tahut tano adahat Sus ma ra gungunuama nong i te harahut muat bia muat naga petlaar bia muat na kap no pinlawe muat tika ma ira matanaiabar tus ta God ing diet kis taar tano madaraas.  
\v 13 Ma aie nong ga halon dahat sukun no udahat kinkinis ra hena no harkurai tano kankado ma ga hamaren dahat taar ra hena no bilai na harkurai tano Natine nong i manga sip ie.  
\v 14 Ma no Natine at nong ga kul halangalanga dahat ing ga lik luban se ira udahat magingin sakena.   
\s1 Krais i tamat ta ira linge bakut ma i te hamaraam tikane dahat ma God.  
\p
\v 15 Ma aie no malalarine God nong pa di la nesnes ie. Aie hoing no luena bulu kanong no uno kinkinis i tamat sakit ta ira linge bakut ing God ga hakisi.  
\v 16 Ma no uno kinkinis i manga tamat huo kanong God ga hakisi ira linge bakut ma no lima Krais, ira linge aram ra mawe ma kai tano pise, ira linge da nes ma ing pa di la nesnes, ma ira mangana tanuo hokaiken: ira lualua ma diet ing diet manga dadas ma diet ing diet la harkurai. Diet bakut kaiken, God ga hakisi diet ma no lima Krais ma wara hatamat Krais.  
\v 17 Krais at ga kis menalua ta ira linge bakut ma diet bakut diet kis timaan taar ra hena no uno harbalaurai.  
\v 18 Aie no tamat na lualua ta ira matanaiabar na lotu, diet no palatamaine. Aie no burena ta ira udiet nilon kanong aie no luena wara tuntunut hut sukun ra minaat, ma ga lua na tut hut huo waing naga tamat sakit ta ira linge bakut.  
\v 19 Krais i ngan huo kanong God ga kanakana bia Krais na hung ma ira bilai na linge bakut ing God i la hung taar me.  
\v 20 Ma tano pinapalim tano Natine, God ga sip bia na kap pukus ira linge bakut baling ukaia ho ie. Ga bul ra malum ma no dene Krais aram ra ula kabai, kaik gaam kap pukus habaling ira linge bakut, ira linge kai tano pise ma aram mah ra mawe.   
\p
\v 21 Nalua muat ga kis sisingen talur God. Muat ga malentakuanei ma muat git gilgil ira magingin sakena.  
\v 22 Iesen kaiken God i te hamaraam leh muat ukaia ho ie ma no minaat tano palatamaine Krais waing naga hatur muat ra matmataan tana ma muat na gamgamatien ma pataie um ta bilinge bia ta sakena ta muat.  
\v 23 Ma i tale bia muat na tur taar huo ing bia muat na manga tur dikdikit taar tano numuat nurnuruan tano tahut na hinhinawas ma ing bia muat pa na kakari talur no numuat nanahai ma ra nurnuruan uta ira linge muat ga hadade tano tahut na hinhinawas. Ma iakan ra tahut na hinhinawas at nong di ga harpir mei tupas ira matanaiabar kai ra ula hanuo. Ma iau Pol, iau tiga tultulai ta iakano tahut na hinhinawas.   
\s1 Pol ga manga papalim dadas wara gaie diet ira matanaiabar na lotu.  
\p
\v 24 Ma iau guama kaiken uta ira ngunngutaan i ubal iau wara gaie muat. Ma iau puspusak kaiken ra ngunngutaan tano palatamaigu wara haphapataam ira ngunngutaan ta Krais ing i kis taar baak. Ma iau la puspusak huo wara gaiena no palatamaine, muat ira matanaiabar na lotu.  
\v 25 Iau te kap no pinapalim na harharahut uta muat ira matanaiabar na lotu kanong God ga tar no uno pinapalim tagu bia ni pakilei haruat ma no uno lilik ma bia ni gil huo wara hatahutne muat. Ga tar ie tagu bia ni hadukduk timaan no nugu pinapalim na harpir ma no uno nianga.  
\v 26 Ma iakan ra nianga nong ga susuhai ta ira tunotuno ta ira tintinahon menalua ma sen i te hapuasne um ta ira uno matanaiabar tus kaiken.  
\v 27 God ga sip bia na hapalaine diet bia iakano linge nong ga susuhai na manga haidane timaan diet ing diet pai Iudeia. Ma no suruno ta iakano linge nong ga susuhai, aie hoken, bia Krais i kis taar ta muat, kaik muat naga nanaho ma ra nurnuruan bia muat na laka tano tamat na minarine.  
\v 28 Ma mehet la harharpir uta Krais ta ira mangana tunotuno bakut. Mehet hausur diet ma mehet hakhakatom diet ma ra tamat na minminonas sakit waing diet bakut diet naga bilai harsakit tano udiet kinkinis narako ta Krais ing mehet lamus tar diet ra matmataan ta God.  
\v 29 Ma iakanong no burena bia iau papalim dadas. Iau manga baso haruat ma no uno tamat na dadas ing i la manga harharahut iau mei bia ni gil huo.   
\c 2  
\p
\v 1 Ma iau sip bia muat na palai bia iau manga papalim dadas wara gaie muat ma uta diet mah kenas Laudisia ma uta diet bakut mah ing diet pai nes baak iau.  
\v 2 Iau papalim dadas huo bia ni haragat ira bala diet ma bia diet na tikai mon tano udiet harmarsai hargilaas waing diet naga hung ma ira tamat na minminonas bakut, kaik diet naga nunure iakano tutun nong God ga suhei, ma aie ne Krais at.  
\v 3 Ma ira mangana minminonas ma ira mintota bakut i kis susuhai taar ta Krais hoing tiga bilai na bunbulaan.  
\v 4 Iau tange kaiken ra linge ta muat bia taie ta tikai kabi hakalak muat ma no uno keskes na nianga ma na lamus habato muat.  
\v 5 A tutun bia no palatamaigu pai kis tika taar ma muat kaiken. Iesen no tanuagu i kis tika taar ma muat ma iau kanakana ing iau nunure kilam bia i takodas ira numuat magingin ma bia ira numuat nurnuruan i tur dadas taar ta Krais.   
\s1 Tano udahat kinkinis ta Krais, dahat langalanga sukun ira harkurai gar na tunotuno mon.  
\p
\v 6 Io kaik, hoing muat te hatur kawase Krais Jisas bia aie no Watong, i tahut bia muat na lalon haruat ma no numuat kinkinis tana.  
\v 7 Muat na tur dikdikit taar tano numuat kinkinis ta Krais ma muat na hadadas ira numuat nilon narako tana. Muat na tur dadas taar ta ira linge muat te nurnur ine hoing di ga hausur tar muat huo. Ma muat na manga hung sakit ma no magingin na tanga tahut tupas God.   
\p
\v 8 Muat na harbalaurai timaan ta tiga nong kabi habato lamus muat taar tano uno pabona lilik, naga wis kawase muat. Kaike ra mangana lilik i tahuat ta ira harausur ta ira tunotuno mon. I tahuat ta ira minminonas mon mekai napu ma pataie bia ta Krais.   
\p
\v 9 Muat na harbalaurai timaan hokaike kanong ira bilai na linge bakut ing God i la hung taar me i kis taar ta Krais nong ga hanuat tunotuno.  
\v 10 Ma God i te hakidilona muat tano numuat kinkinis ta Krais, aie nong i tamat sakit ta ira tanuo ing diet la harkurai taar, ma ira mes na lualua mah.  
\v 11 Tano numuat kinkinis ta Krais i ngan hoing bia Krais ga mur no magingin na kutkut se tiga sibaan ta ira palatamai muat. Iesen pataie bia hoing ira tunotuno mon diet la gilgil ma ira lima diet. Taie. Krais at ga kap se no sakana sibaan ta ira numuat nilon.  
\v 12 Ma God ga bus muat tika mei ing di ga baptais muat. Ma tano numuat nurnuruan tano dadas ta God nong ga hatut Krais sukun ra minaat, God ga hatut pakur muat mei.  
\v 13-14 Nalua muat gate maat taar ing muat ga gil ira magingin sakena ma ing iakano sakana sibaan ga kis taar baak ta ira numuat nilon. Iesen God ga halon pakur muat ma Krais. Ga lik luban se ira udahat magingin sakena hoken, ing ga suge se no pakpakat nong i tahuat laah ta ira harkurai, iakano pakpakat nong i tange hamines bia a mon nironga kana ta dahat ing i haruat bia dahat na hiruo urie kanong dahat pai le mur kaike ra harkurai, ma ira harkurai at diet ga wara halhaliare dahat. Ga kap se no dadas ta iakan ra pakpakat ing ga lau tar no pakpakat taar tano ula kabai.  
\v 15 Ing God gate kap se ira baso ta ira tanuo ing diet la harkurai taar ma ira mes na lualua mah, ga bul hamines ra matmataan na haruat bia pataie um audiet ta dadas gaam paas hasur diet ma no pinapalim tano ula kabai ma hoing tiga tamat na umri ga lamus hagalgalen hani diet hoing ira uno hiruo.   
\p
\v 16 Waak muat haut leh tikai bia na kure muat ta sa ing i bilai bia muat na ien bia muat na mame. Ma huo mah ta ira tamat na bung na lotu, bia a sigar teka, bia no Bung na Sinangeh.  
\v 17 Diet bakut kaike ra magingin diet haruat ma ra malalar mon uta ira linge ing ga wara hinanuat. Iesen ira linge tutun urie, dahat nes leh ta Krais.  
\v 18 Ma diet ing diet harababo bia diet manga sip bia a matien na tunotuno diet, ma diet lotu tupas ira angelo, ma diet manga hinhinawas uta ira udiet mangana ninanaas na tanuo, io, waak muat bale leh diet bia diet na kure muat ta sa i bilai ing muat sip bia muat na gil. Ira udiet sakana lilik mon i hatamat habaling diet ma pataie ta burena bia diet na gil huo.  
\v 19 Ira mangana tunotuno huo diet te tamakutus laah talur Krais, aie no uluno ta dahat no palatamaine. Aie nong i la balaure timaan tar no kidilona palatamaine bia no tamaine na kap ra dadas ma na harpasum timaan ma no harharahut ta ira lalos na harpasum, ma bia na tahuat hoing God i sip bia na tahuat huo.   
\p
\v 20-21 Muat te maat tika ma ne Krais ma muat langalanga sukun no mangana minminonas mekai napu. Io kaik, wara bih muat lalon hoing bia gar tano ula hanuo baak muat? Wara bih muat la bulbul habaling muat ra hena ira harkurai? Kaike ra harkurai i tange bia, “Waak muat palim! Waak muat namien! Waak muat sigire!”  
\v 22 Diet bakut kaiken ra linge, diet na panim laah ing dahat papalim me bia dahat ien bia dahat gil sa mah me. Waak muat mur kaiken ra mangana harkurai kanong i tahuat ta ira hartula ma ira harausur ta ira tunotuno mon.  
\v 23 A tutun, ari diet lik bia a mon minminonas ta diet ing bia diet mur kaiken ra harkurai ing i tange bia i tahut bia tikai na mamahien no balana wara pakila lotu, bia na bul hanapu habaling ie, bia na kure hadadas no palatamaine. Iesen bia pataie. Kaiken ra magingin pai harahut ta dahin wara turtur bat ira sakana sinisip.   
\c 3  
\s1 Dahat na kap se ira tuarena sakana magingin ma dahat na sigam ira tahut na sigar magingin.  
\p
\v 1 Io kaik, i tahut bia ira kati muat na mur ira linge meram naliu kaia ho ne Krais ing i kis taar kaia tano tamat na kinkinis tano kata na lima God, kanong God i te hatut pakur muat ma Krais.  
\v 2 Muat na hatur ira numuat lilik ta ira linge meram naliu, ma pataie ta ira linge mekai tano ula hanuo.  
\v 3 Kanong warah, muat gate maat, ma ira numuat mangana nilon kaiken i kis susuhai tika ma ne Krais ra matmataan ta God.  
\v 4 Ma bia Krais nong no burena tano numuat nilon na hanuat puasa, io, ta iakano pakana bung muat mah, muat na hanuat puasa tika mei ma ra tamat na minamar.   
\p
\v 5 Io kaik, i tahut bia muat na bing se ira numuat mangana tintalen gar ta iakan ra ula hanuo. Muat na bing se ira magingin na hilawa ma ira bilingana magingin huo ma kaike ra mangana masmasingan mah. Huo mah, muat na bing se ira sakana sinisip ma no magingin na nes kalak linge gar na mes. Ma iakano magingin i haruat ma no magingin na lotu tupas ira palimpuo.  
\v 6 Kaiken ra mangana magingin no burena bia no ngalngaluan ta God na puko burung diet ira mangana tunotuno huo.  
\v 7 Muat mah, muat git tatalen huo ta ira numuat ngaas na nilon ing muat ga lon huo menalua.  
\v 8 Iesen bia kaiken i tahut bia muat na kap se kaiken ra tintalen bakut sukun muat. Muat na kap se ira mangana ngalngaluan ma no sinisip wara hangungut ira mes. Waak muat tange hagahe tikai, ma muat na bul se ira nianga na harhuli sukun ira ha muat.  
\v 9-10 Waak muat habato harbasiane muat kanong muat te kap se ira numuat tuarena nilon tika ma ira uno tintalen, ma muat te sigam no sigar nilon nong God i la hashasigarinei hoing tiga malalarine God at nong ga hakisi iakano nilon. Ma i la hashasigarinei huo waing muat naga nunure timaan ie.  
\v 11 Ma ta iakan ra sigar nilon, ira Iudeia ma diet ing diet pai Iudeia, diet haruat mon. Diet ing di ga kut se ira palatamai diet, ma diet ing pa di ga kut se, diet haruat mah. Ma i ngan huo mah ta ira tultulai ma diet ing diet pai tultulai. Ma bia da nes hanapu ugu bia augu me tapaka ma a mes ugu, bia da tange bia a ba sokopi ugu, taie ta linge. No tamat na linge, Krais sen mon, ma bia i kis ta dahat bakut.   
\p
\v 12 Muat ira tunotuno ing God gate gilamis muat, ma muat ira halhaliana tunotuno ing God i sip muat. Io kaik, i tahut bia muat na sigam no bala maat, no magingin na bala marmaris uta ira tirtirih i ubal ira mes, ma no magingin na gilgil ra tahut ta ira mes mah. Muat na bul hanapu habaling muat ma muat na lon hoing ira matien na tunotuno.  
\v 13 Muat na balane ira mes ing diet gil harongane muat. Muat na lik luban se harbasiane ta muat ira linge muat kilingane bia di hagahe muat me. Hoing no Watong ga lik luban se ira numuat sakena, muat mah muat na gil huo.  
\v 14 Ma no magingin na harmarsai um, muat na sigam ie me naliu ta kaiken ra tintalen bakut. No magingin na harmarsai, aie nong i wis tikane diet bakut bia diet na kapawena tun at tano udiet tuntunur tika.   
\p
\v 15 I tahut bia no malum ta Krais na kure ira numuat nilon. Hokaiken, God ga tatau muat tano numuat kinkinis na tuntunur tika bia muat na kis ma ra malum harbasia ta muat. Ma muat na tangtanga tahut tupas ie.  
\v 16 I bilai bia no hinhinawas uta Krais na manga kis dadas ta ira bala muat. Huo kaik, muat naga hausur ma muat na pir hargilasane muat ma ira minminonas bakut ma ira mangana halhaliana ninge mah. Ma ing bia muat na inge huo, muat na kilam tahut tupas God meram narako ta ira bala muat.  
\v 17 Ma ra sa ing muat tange ma ra sa ing muat gil, muat na tatalen hoing i takodas bia nong i mur no Watong Jisas na tatalen huo. Ma ing muat lalon huo, i tahut bia tano numuat kinkinis ta Krais, muat na tanga tahut tupas God no adahat Sus.   
\s1 Ira hatatamaan diet na tatalen hohe.  
\p
\v 18 Muat ira hahin, muat na hanapu habaling muat ra hena ira numuat tunaan kanong iakan tiga takodasuana magingin haruat ma no numuat kinkinis narako tano Watong.   
\p
\v 19 Muat ira tunaan, muat na manga marse ira numuat hahin ma waak muat bala ngungut taar ta diet.   
\p
\v 20 Muat ira bulu ma ira hinasik, muat na taram ta ira amuat sus ma ira pawasi muat ta ira mangana linge bakut kanong iakan ra magingin i haguama no Watong.   
\p
\v 21 Muat ira adiet sus ira bulu ma ira hinasik, waak muat hamalaslaas ira nati muat, diet kabi kalale ira numuat hartula.   
\s1 Ira tultulai ma ira udiet tamat diet na tatalen hohe.  
\p
\v 22 Muat ira maris na tultulai, muat na taram ta ira numuat tamat mekai napu ta ira linge bakut. Waak muat taram ta diet tano pakana bung sen mon diet ngok taar ta muat bia diet naga kanakana. Taie. Muat na taram ta diet ma ra tutun na bala muat tano numuat tamat na urur tupas no Watong.  
\v 23 Ma ta sa ing muat gil, muat na gil ie ma no numuat dadas bakut hoing bia muat gilgil ie tupas no Watong, ma pataie bia tupas ira tunotuno mon.  
\v 24 Ma i tahut bia muat na gil huo kanong muat nunure bia muat na hatur kawase iakano pinlawe muat meram ho no Watong hoing ra hunena no numuat mangason. Io, ne Krais um no Watong nong muat papalim utana.  
\v 25 Sige tikai ing i gil ronga na kap ra harkul haruat ma no uno nironga. God na tar ra takodasuana harkul. Pa na habilaine tikai ma na hagahe bia tiga mes.   
\c 4  
\p
\v 1 Ma muat ira tamat, muat na tar ta ira numuat tultulai ing i takodas ma i tahut. Muat nunure tar bia numuat mah tiga Tamat iekenam ra mawe.   
\s1 Pol ga hapalaine diet bia diet na sasaring hohe ma bia diet na wawor tika hohe ma ira tabuna nurnur.  
\p
\v 2 Io, ma muat na nanget ma ra sinasaring. Ma bia muat na sasaring, i tahut bia ira numuat lilik na taguro timaan ma muat na tangtanga tahut tupas God.  
\v 3 Muat na sasaring uta mehet mah, bia God na papos no matanangas ta ira numehet harpir waing mehet naga hinhinawas utano linge nong ga susuhai narako ta Krais. No burena uta iakano tahut na hinhinawas kaiken, iau te kis tano winwisaan.  
\v 4 Muat na sasaring bia iau ni petlaar bia ni hapalaine timaan ie hoing i tahut bia ni gil huo.   
\p
\v 5 Muat na mintot pane ira numuat magingin tupas diet ing diet pai nurnur. Muat na gil ira bilai hokaiken ta ira pakana bung bia i tale muat bia muat na gil huo.  
\v 6 I tahut bia ira numuat winor tika ma diet na hung ma ra nianga ing i bilai ma i namnamien waing muat naga palai bia muat na balu diet tikatikai hohe.   
\s1 Pol ma ira uno harwis, diet ga haatne leh ira tunotuno wara hapataam iakan ra pakpakat.  
\p
\v 7 Io, ma no bilai na tasi dahat Tikikus na hinawase muat ta ira linge bakut wara utagu. I tur tika ma iau tano pinapalim tano Watong ma a bilai na ut na pinapalim ie.  
\v 8 No burena tutun bia iau wara tultulei ukai ho muat, bia naga hinawase hapalaine muat bia no numehet nilon i ngan hohe ma bia naga haragat ira bala muat.  
\v 9 Dir na tika huat ma ne Onesimus no bilai na tasi dahat. A tutun na tunotunoi ma aie at tiga nong ta muat mekaia. Dir na hinawase muat ta ira mangana linge bakut i hanuat ta mehet kai.   
\p
\v 10 Aristarkus nong i kis tika ma iau kai ra winwisaan i haatne leh muat. Huo mah ne Mak, no tasi Banabas. (Muat te hadade ra hinhinawas utana ma ing bia na hanuat ukai ho muat, muat na bale leh ie.)  
\v 11 Jisas nong di kilam mah ie bia Iustus i haatne mah muat. Dal sen mon kaike ing a Iudeia dal nalamin ta diet ing diet tur tika ma iau tano pinapalim wara utano kinkinis na harkurai ma ra harbalaurai ta God. Ma dal te manga habalaraan um iau.  
\v 12 Epaparas nong aie mah tikai ta muat ma a tultulai ie ta Krais Jisas, i haatne mah muat. I la saasaring hait uta muat ma ra tamat na dadas bia muat na tur patpatuan ma muat na manga palai ta ira sinisip ta God.  
\v 13 I papalim dadas wara gaie muat ma uta diet mah kaia Laudisia ma Hirapolis. Ma i tale bia ni tange huo ta muat kanong iau nunure tar bia i tutun.  
\v 14 Luk no ut na harulai, no numehet bilai na harwis, dir ma ne Demas, dir haatne mah muat.  
\v 15 Muat na tar no nugu haratna ta ira hinsaka dahat narako ta Krais kaia Laudisia. Ma tupas mah ne Nimpa ma ira matanaiabar ing diet kis hulungai wara lotu kaia ra uno hala.   
\p
\v 16 Ing bia di te was tar iakan ra pakpakat ra matmataan ta muat, i tahut bia muat na lik leh bia da was mah ie ta ira matanaiabar na lotu kaia Laudisia. Ma muat na lik leh mah bia muat na was no pakpakat mekaia Laudisia.   
\p
\v 17 Muat na tange ta Arkipus bia, “Nu harbalaurai timaan bia nugu pakile haruatne no pinapalim u ga hatur kawasei tano num kinkinis narako tano Watong.”  
\v 18 Iau Pol, iau pakat iakan ra haraatna ma no limagu at. I tahut bia muat na lik kawase ira agu winwisaan. A harmarsai tupas muat.