\id 1PE - Patpatar NT [gfk] -Papua New Guinea 1997 (DBL 2014) \h 1 PITA \toc1 No Luena Pakpakat ta Pita \toc2 1 Pita \toc3 1 Pi \mt1 No Luena \mt2 Pakpakat ta \mt1 PITA \ip Pita ga pakat kan ra pakpakat meras ‘Babilon’ (nes 1 Pita 5.13). Ari diet lik bia Pita ga kis aras Babilon tutun tano hanuo Mesopotemia. Ari diet lik bia Pita ga kilam ‘Babilon’ hoing tiga nianga harharuat ta tiga sakana taman ma ga kis tutun aras Rom bia Ierusalem. Ga tule no pakpakat tupas diet ing diet ga lon harbasia ta ari a hanuo (1.1) ing ga dadas ira lon ta ira Kristian kaia. Pita ga sip bia na haragat ira Kristian ing ira ut na sakena diet ga manga hahelar ta diet (1.6; 2.18-26; 3.13-17; 4.6-19). Pita ga tange bia kaiken ra haraubaal i la umubal dahat wara walwalar ira udahat nurnuruan bia na hamines bia ira udahat nurnuruan i tutun (1.6-7). 1 Pita i la harharagat dahat bia dahat na mur ira bilai na tintalen ta Jisas nong ga kap ra ngunngutaan mah huo (2.21-24; 3.18) ma nong na tapukus baling wara gaie dahat (1.3-5; 1.13; 4.7). Dahat ira matanaiabar tus ta God (2.9-10) kaik \bd i tahut bia dahat na lon huo ma ira bilai na magingin nalamin ta kaiken ra haraubaal ma dahat na tur dadas tano udahat nurnuruan.\bd* Iakano no suruno ta iakan ra pakpakat. \c 1 \p \v 1-2 Iau Pita tiga apostolo ta Jisas Krais, iau pakat iakan ra nianga ukaia ho muat ing muat lon harbasia hoing ira wasire kaia ta ira kaba hanuo Pontas ma Galesia ma Kapadosia ma Esia ma Bitinia. Iau pakat iakan ra nianga tupas muat ing God no adahat Sus gate gilamis muat haruat ma no uno lilik menalua. Ma God ga huna bul no uno lilik menalua wara nunure um muat. Ga gilamis muat ma no pinapalim tano Tanuo ing no Tanuo ga bul hasisingen muat bia muat naga halhaal. Ma ga gilamis muat waing muat na taram Jisas Krais ma bia Jisas na sapur hagamgamatien muat ma no dena. \p Iau sasaring bia muat na hung tun at ma ra harmarsai tika ma ra malum. \s1 Da pirhakasing God kanong dahat na tinane ra harhalon nong pa na panim laah. \p \v 3 A pirhakasing uram tupas God. Aie no God ma no Sus ana no udahat Watong Jisas Krais. Ga manga marse dahat kaik gaam tar ra sigar nilon ta dahat bia dahat naga kis nanaho ma ra nurnuruan uta ira bilai na linge na tabar dahat me. Ma kaiken ra linge na kis hatikai. Ma ga tale bia na tar ra sigar nilon ta dahat kanong Jisas Krais ga taman tut hut sukun ra minaat. \v 4-5 God ga marse dahat huo bia dahat naga tinane kaiken ra bilai na linge wara udahat at. Kaiken ra linge pa na panim laah ma pa na marota ma pa na marmarukuan. Ma God i te hakabet timaan kaiken ra linge aram ra mawe wara gaie muat ing God i balbalaure bat muat bia muat pa na hiruo. Tano numuat nurnuruan, kaik gi balaure bat muat hokaiken waing muat naga kap nora harhalon. Ma iakan ra harhalon i taguro taar bia na hanuat palai tano hauhawatine ta ira pakana bung. \p \v 6 Io kaik, muat manga guama sukmaal bia kaiken ma namur ta dahin i nanaas bia ari a matahu harwalar i umubal muat. \v 7 Kaiken ra harwalar i haan tupas muat wara hamines bia ira numuat nurnuruan i tutun. Ma di la walwalar gol mah huo. Di la bul ie narako tano iaah wara hamhamines no bilbilai tana. Ma sen i tale bia gol na panim laah ma no matana no nurnuruan tutun i lua tano matana no gol. Hokaiken, ira walwalar na haan tupas muat bia ira numuat nurnuruan naga tur dadas. Io kaik, ing Jisas Krais na harapuasa na pirlat muat ma na hamar muat ma na hatamat muat. \v 8 Muat pai le nes ie iesen muat sip ie. Ma kaiken mah muat pai nes ie ma sen muat nurnur tana. Io kaik, muat manga hung ma ra bilai na gungunuama sakit ing pai tale bia da hapupuo. \v 9 Ma muat guama huo kanong muat hatur kawase no harhalon, aie no hunena no numuat nurnuruan. \p \v 10 Ma ira tangesot ing diet git iangianga utano harmarsai ing na haan tupas muat, diet git manga walwalar wara sisilih uta iakan ra harhalon at. \v 11 No Tanuo ta Krais narako ta diet git tangtange hamines ira linge uta Krais, gom huna hinawas bia Krais na kap nora harangunngutaan ma bia na kap ira uno minamar namur. Diet git walwalar bia diet na nunure iakan ra pakana bung ma bia kaiken ra linge na hanuat hohe. \v 12 God ga hapuasne ta diet bia diet pa ga iangianga na tangesot uta kaike wara gaie diet at. Taie. Diet ga tangtange kaike wara gaie muat. Ma diet ing diet ga pir muat ma no tahut na hinhinawas narako tano dadas tano Halhaliana Tanuo God ga tulei meram ra mawe, diet ga hinawase muat uta kaiken ra linge at. Ma kaiken ra linge ira linge ing ira angelo diet sip bia diet na nunure. \s1 Dahat na halhaal sukun ira sakena ma dahat na manga ru God. \p \v 13 Io kaik, muat na kure ira numuat lilik bia muat na taguro wara nilon timaan. Na tahut bia palai ira numuat lilik. Waak muat nanaho ta ira linge bia. Muat na nanaho sen mon ma ra nurnuruan tano harmarsai nong Jisas Krais na kap hawaat taar ta muat ing na hanuat puasa. \v 14 Nalua muat ira tabuna palpalai muat gaam git murmur ira numuat sakana sinisip. Ma sen kaiken muat ira bulu na ut na taram nianga, kaik waak muat bale leh kaike ra tuarena sinisip bia na kure muat huo. \v 15 God nong ga tatau muat i halhaal. Io, i tahut bia ta ira numuat magingin, muat at mah, muat na halhaal sukun ira sakena haruat mei. \v 16 Kanong warah, no nianga ta God di ga pakat ie i tange hoken: \it “I tahut bia muat na halhaal sukun ira sakena kanong a halhaliana iau.”\it* \p \v 17-18 Ma bia muat sasaring tupas God, muat kilam ie bia Mama. Aie nong i kure ira matanaiabar. Ma no uno harkurai i takodas. Pa na kure hagahe tikai ma harahut bia tiga mes. Taie. Na kure ira tunotuno haruat ma ira udiet magingin. Io kaik, i tahut bia muat na lon ma ra but na urur tupas ie ing muat kis na wasire baak ta iakan ra ula hanuo kanong muat nunure no kunkulaan ing God ga tar wara kul halangalanga muat sukun ira numuat mangana nilon menalua. Iakano nilon ing muat ga kap harausur laah ta ira hintubu muat ma pa ga tale bia na harahut muat ta dahin. Ma God pa ga kul halangalanga muat ma ra linge hoing ra gol ma ra siliwa ing i tale bia na panim laah. Taie. \v 19 No kunkulaan ga tabi matana. Aie no de Krais. Aie hoing tiga nat na sipsip na hartabar, pataie ta da sakena tana, i melmel harsakit. \v 20 Menalua tano hakhakisi tano ula hanuo God ga bul no uno lilik bia na gilamis ie. Iesen ta kaiken ira hauhawatina pakana bung i te hanuat puasa wara gaie muat. \v 21 Ma muat, muat ira ut na nurnuruan ta God kanong muat haan tupas ie narako ta Krais. Ma God, aie nong ga hatut haut Krais sukun ra minaat ma ga tar ra minamar tana. Io kaik, ira numuat nurnuruan i kis ta God ma ira bilai na linge muat nanaho ma ra nurnuruan i hanuat meram ho God. \s1 Dahat na tar ra harmarsai hargilaas haruat ma ira udahat sigar nilon. \p \v 22 Io, muat te taram ira tutun God i te hapuasne, kaik muat te hagamgamatien ira numuat lon wara tartar ra harmarsai tutun ta ira hinsaka muat gar ta Krais. Muat te gil um huo, kaik i tahut bia muat na tar tun at ra harmarsai harbasia ta muat meram narako ta ira kati muat. \v 23 Kanong warah, muat te kap ra sigar nilon. Muat pai kap no sigar nilon tano pat na daha ing na marota. Taie. Muat te kap ie ta nong pa na marota. Ma aie no nianga gar ta God, a lilonai ma pa na panim laah. \v 24 Ma i palai bia iakan i tutun kanong, \q1 “Ira tunotuno diet haruat ma ra huro, \q1 ma ira minarine no tunotuno i haruat ma no puspusuno no huro. \q1 No huro na mahiawa, \q1 ma no puspusuno na puko laah. \q1 \v 25 Iesen no nianga gar tano Watong na kis hatikai.” \m Ma iakan ra nianga, aie nong di ga harpir taar ta muat mei. \c 2 \p \v 1 Io kaik, i tahut bia muat na kap se ira mangana magingin na harangunngutaan tika ma ira kaba hinarabota bakut. Kap se mah no harababo, ira lilik sakasaka, ma ira matahu nianga na haragahai. \v 2 Hoing ira sigar bulu diet manga sip ira polona sus, i tahut bia muat mah muat na sip no nianga ta God waing muat naga patpatuan narako ta ira numuat nilon God te halon muat me. \v 3 Ma i tahut bia muat na gil huo kanong muat te nam um bia no Watong i tahut. \p \v 4 Ma bia muat haan tupas no Watong, muat haan tupas ie hoing bia aie tiga lilona haat. Ira tunotuno diet ga malok sei iesen God ga nes kilam ie bia a tabi matana gaam gilamis ie. \v 5 Ma bia muat haan tupas ie huo, muat hoing ira lilona haat mah. Ma God i la paapalim ma muat wara pakpakile tiga hala ma ira tanua muat waing muat naga papalim hoing ira halhaliana ut na lamus tunotuno tupas God. Muat la tartar ra hartabar tupas ie meram narako ta ira tanua muat. Ma God i bale leh kaiken ra hartabar kanong muat narako ta Jisas Krais. \v 6 Ma i palai bia iakan i tutun kanong no nianga ta God di ga pakat ie i tange hoken, \q1 “Nes baak! Iau te gilamis leh tiga haat ing a tabi matana. \q1 Ma iau hainoh ie kaia Saion ma aie no dadas na burena tano hala. \q1 Sige tikai i nurnur tana pa na kis ta ra hirhir.” \m \v 7 Iakan ra haat na manga harahut muat ing muat nurnur. Iesen uta diet ing diet pai nurnur, i tange hoken, \q1 “No haat nong ira ut na pakila hala diet ga malok sei kanong diet ga lik bia a linge bia ie, \q1 i nanaas taar bia aie balik um no bilai na burena tano hala bakut.” \m \v 8 Ma i tange mah bia, \q1 “Iakan ra haat ing i noh taar, ira tunotuno diet tuke diet tana. \q1 Diet kap tuhar diet tana.” \m Diet tuke diet kanong diet taklain tano nianga gar ta God. Ma God ga tibe bia na ngan huo ta diet. \v 9 Iesen muat tiga huntunaan nong God i te gilamis. Muat ira ut na lamus tunotuno tupas God no udahat Lualua. Muat ira halhaliana matanaiabar ing God i te bul hasisingen wara uno at waing muat naga hinawas palai ta ira kaba bilai na gingilaan ta nong ga tatau muat sukun ra kankado ukaia taar tano uno bilai na madaraas sakit. \v 10 Nalua muat pa ga matanaiabar gar ta God. Iesen kaiken muat ira uno matanaiabar um. Nalua muat pa ga kis ta ra harmarsai. Iesen kaiken um muat te kis tano uno harmarsai. \s1 Dahat na hansiksik dahat ma dahat na gil ira bilai na magingin nalamin ta ira matanaiabar. \p \v 11 Io, iau haragat muat, ira nugu bilai na harwis ing muat kis na wasire kai, bia muat na tur sisingen laah ta ira sakana sinisip ing diet la harharubu ma muat narako ta ira numuat nilon. \v 12 Ma i tutun bia ira tabuna nurnuruan diet la tungtung muat bia muat gil ira sakana magingin. Iesen i tahut bia muat na gil ira bilai na magingin nalamin ta diet waing diet naga nes ira numuat bilai na tintalen ma diet naga pirhakasing God tano uno bung na hinanuat. \p \v 13 I tahut bia muat na hansiksik muat ta ira lualua bakut kai napu kanong no Watong i sip bia muat na lon huo. Muat na hansiksik muat tano tamat na lualua na gil harkurai kai napu nong i tamat ta ira mes na lualua. \v 14 Ma ta diet ira mes na lualua ing diet hansik dahin tano tamat ing i tar harkurai ta diet wara haphapidanau ing diet gil ronga ma wara pirpirlat diet ing diet gil ra tahut, io, muat na hansiksik habaling muat ta diet mah. \v 15 Muat na gil huo kanong God i sip bia muat na pakile ra bilai na magingin, kaik muat naga tur bat ira nianga bia ta ira sakbatbat. \v 16 I tahut bia muat na lon hoing ira tunotuno ing diet langalanga sukun ira harkurai. Iesen waak muat tange bia muat langalanga huo, kaik a linge bia mon bia muat gil ra sakena. Taie. Muat na lon hoing ira tultulai ra hena no harkurai ta God. \v 17 Muat na ru ira tunotuno bakut. Muat na tar ra harmarsai ta ira hinsaka muat ta Krais. Muat na manga urur ta God. Ma muat na ru nong i kap no kinkinis na tamat na lualua na gil harkurai kai napu. \p \v 18 Io, muat ira tultulai i tahut bia muat na hansiksik muat ta ira numuat watong ma ra tamat na urur. Waak bia muat gil huo ta diet sen mon ing diet tar ra harmarsai ma diet tahut ma muat. Muat na gil mah huo ta ing diet hagahe muat. \v 19 Ing bia tikai pai gil tiga nironga ma sen i kanan bia na pusak ra harangungut kanong i palai bia no sinisip ta God huo, io, iakano mangana tintalen i haguama God. \v 20 Bia ing di dangat tikai kanong i te gil ra sakena, muat lik bia da pirlat ie? Taie. Iesen bia ing di hangungut tikai wara uno bilai na magingin ma i kanan bia na pusak iakano tirtirih, io, iakano tintalen i haguama God. \v 21 God ga tatau muat bia muat na lon huo. Kanong warah? Krais ga kilingane ra harangungut wara gaie muat ma ga hamines no uno nilon hoing tiga malalar ta muat waing muat naga paas mur ira tanuana kakena. \v 22 \it Pa ga gil tiga nironga ma pa di ga hadade tiga harabota tano hana.\it* \v 23 Bia diet ga tangtange hagahei, aie balik pa ga tange hagahe diet. Bia ga pusak ra harangungut pa ga mang diet bia na hagahe diet. Taie. Ga bul tar ira linge bakut tano limane God nong i la gilgil ira takodasiana harkurai. \v 24 Aie at ga pusak ira udahat magingin sakena ma no palatamaine uram tano ula kabai waing dahat naga haan talur ira sakena ma dahat na lon ma ra magingin takodas. Ma dahat langalanga ta ira uno unien. \v 25 Muat git hanahaan ronga hoira sipsip. Iesen kaiken muat te galis tupas nong i nes mur ira tanua muat hoing tiga ut na balaura sipsip. \c 3 \s1 Ira hahin diet na hansiksik diet ta ira udiet tunaan ma ira tunaan diet na lon timaan ma ra urur ta ira udiet hahin. \p \v 1 Ma huo mah muat ira hahin. I tahut bia muat na hansiksik muat ta ira numuat tunaan. Ma ing bia ari ta diet, diet pai nurnur tano nianga gar ta God, no numuat tintalen huo na lamus tar diet bia diet na nurnur. Ing bia muat gil huo muat pa na supi bia muat na tange tiga linge ta diet. \v 2 Taie. Diet na nes ira numuat gamgamatien na nilon ma ira numuat urur ta diet. \v 3 Ma waak muat hamar ira palatamai muat mon hoing muat gil ta ira hi muat ma ira minamar na gol ma ira bilai na maal. \v 4 Iesen i tahut bia muat na hamar muat uram narako ta ira bala muat at. Muat na hanapu muat ma muat na matien na hahin, kaik muat na melmel tutun ma kaiken ra mangana melmel na tintalen pa na panim laah. Ira tintalen huo God i nes kilam bia a tabi matana. \v 5 Ira bilai na hahin menalua ing diet ga nurnur ta God, diet git hamhamar mah diet huo. Diet ga hansiksik diet ta ira udiet tunaan. \v 6 Sara mah huo. Ga taram Abraham gaam kilam ie bia no uno watong. Ma muat ira nat na hahine Sara ing bia muat gil ira tahut ma bia muat pa na burte tiga linge. \p \v 7 Ma huo mah muat ira tunaan. I tahut bia muat na lon timaan tika ma ira numuat hahin ma ra palai na lilik bia ira udiet baso pai haruat ma muat kanong a hahin diet. Muat na urur ta diet kanong God i te marse diet hoing muat ma diet na tinane mah no nilon haruat ma muat. Muat na gil huo waing pataie ta linge pa na tur bat ira numuat sinasaring. \s1 Dahat na kanan bia dahat na kilingane ira harangungut ta ira udahat bilai na magingin hoing Krais ga gil huo. \p \v 8 Io, wara hapataam ira nugu nianga, iau tange bia muat bakut muat na lon ma tiga mangana lilik sen mon. Ma bia tikai na kilingane tiga linge i bilai, bia muat ira mes, muat na kilingane harahut ie. Muat na marse hargilasane muat hoing ira harahinsakaan gar ta Krais. Muat na gil ra tahut na harharahut ma muat na matien na tunotuno harbasia ta muat. \v 9 Waak muat balbalu ra sakena ma ra sakena baling. Ma waak muat tange hagahe diet ing diet tange hagahe muat. Iesen i tahut bia muat na balu pukus diet ma ra haridaan kanong ing God ga tatau muat ga kukubus taar ta muat bia na tar ra haridaan ta muat. \v 10 Muat na gil huo kanong no nianga ta God di ga pakat ie i tange hoken, \q1 “Sige tikai i sip bia na guama ma no uno nilon, \q1 ma i sip bia na nes ira tahut na bung, \q1 io, i tahut bia na banus bat no hana wara iangianga ma ira sakena \q1 ma wara tangtange ira harabota. \q1 \v 11 I tahut bia na tahurus talur ira sakena ma na gil sen mon ira bilai. \q1 Na walar bia na lon ma ra malum ma na manga baso bia na kis taar huo. \q1 \v 12 Kanong warah, no Watong i la nesnes mur ira ut na takodas \q1 ma i la hanhadoda taar ta ira udiet sinasaring. \q1 Iesen no Watong i la tur talur tar diet ing diet gil ra sakena.” \p \v 13 Io, ma sige um na hagahe muat ing bia muat walar ma ra baso wara gilgil ra tahut? \v 14 Iesen bia muat kilingane balik ra harangungut ta ira numuat magingin takodas, io, muat daan. Waak muat burte diet ing diet wara haburut muat. Ma waak muat ngarngarau. \v 15 Iesen muat na bul hatamat Krais aram narako ta ira kati muat bia aie no numuat Watong. Muat na kis na tinaguro ta ira bungbung bakut wara binabalu ta diet ing diet saring muat wara hinhinawas palai tano numuat nanahai ma ra nurnuruan tupas God. \v 16 Iesen muat na babalu ma ra urur hoing ira matien na tunotuno. Muat na gil ira linge sen mon muat nunure bia i bilai. Muat na lon huo waing diet na hirhir ing diet tange hagahe muat ta ira numuat bilai na magingin muat gil wara murmur Krais. \v 17 I tahut bia muat na gil hokaiken kanong ing bia God i sip bia muat na kilingane ra harangungut i tahut bia muat na kilingane ira harangungut ta ira numuat bilai na magingin. Ma sen pai tahut bia muat na kilingane ra harangungut uta ira sakena muat te gil. \v 18 Kanong warah, Krais no ut na takodas ga maat uta diet ing diet pai takodas. Ga maat tiga kapawena pakaan mon uta ira magingin sakena wara lamlamus muat tupas God. Ing di ga bu bing ie, a tunotunoi. Ing ga lon balin, a tanuoi. \v 19 Ma huo kaik ga haan ma ga harpir taar ta ira tanuo ing diet kis narako tano katon wara harpidanau. \v 20 Ma kaike ra tanuo, diet ing diet pa ga taram God ing God ga nanaho ta diet ma ra bala maat ta kaike ra bung ing Noa ga gilgil no uno tamat na mon. A bar nong mon ira tunotuno diet ga lon tano mon. A liman ma itul mon diet. Ma diet ga kap no harhalon kaia tano taah. \v 21 Ma iakano taah a malalar ie tano magingin na baptais nong i halon muat kaiken. Pai gis ise ira bilinge ta ira palatamai muat. Taie. Aie no numuat hinhinawas palai tupas God meram narako ta ira numuat palai na lilik ing pataie ta harabota ine. Ma no tuntunut hut ta Jisas Krais nong i hadadas no magingin na baptais wara halon muat. \v 22 Ma Krais aie nong i te hanut uram ra mawe ma i kis taar tano tamat na kinkinis tano kata na lima God. Ma ira angelo ma ira mangana ut na harkurai ma ira lualua diet kis ra hena no uno dadas. \c 4 \s1 Dahat pa na mur ira udahat sakana magingin menalua. \p \v 1 Krais ga kilingane ra harangungut tano palatamaine. Io kaik, i bilai bia muat mah muat na tagure muat ma iakano mangana lilik ta Krais, kanong aie nong i te kilingane ra harangungut tano palatamaine i te haan talur no sinisip wara gilgil no magingin sakena. \v 2 Tiga tunotuno huo pa na mur ira sinisip ta ira tunotuno mon ing i lalon baak kai napu. Taie. Na lon mur ira sinisip ta God. \v 3 I tahut bia muat na lon huo kanong i te talona um ira numuat pakana bung ing muat ga murmur ira sinisip ta ira tabuna nurnuruan. Pai tahut bia muat na gil habaling huo. Muat git murmur ra magingin na hilawa ma ira mangana sakana sinisip. Muat git manga mamom, muat git murmur ira sakana kis hulungai wara minom ma muat git harharat haan huo. Ma muat git gilgil no miligiruana lotu tupas ira palimpuo. \v 4 Ma kaiken um ira tabuna nurnuruan diet te karup bia muat pai tur tika ma diet ta kaiken ra udiet rakaia na magingin. Io kaik, diet tange hagahe muat. \v 5 Iesen diet na tur ra harkurai ra matmataan tano ut na gil harkurai nong na kure ira lilona ma ira minaat. Ma na hagut diet bia diet na walar wara binabalu uta ira udiet mangana gingilaan. \v 6 Io, ma no burena bia diet ing diet te maat diet gate hadade no hinarpir tano tahut na hinhinawas i hokaiken. I tutun bia diet ga maat haruat ma no harkurai kanong diet lon kai tano palatamai diet. Iesen diet ga hadade no tahut na hinhinawas waing diet naga lon ta ira tanua diet hoing God i lon. \s1 Dahat na lon takodas ma dahat na papalim timaan ma ira hartabar meram ho God. \p \v 7 Io, no hauhawatine ta ira linge bakut i hutet um, kaik i tahut bia na palai ira numuat lilik ma bia muat na balaure timaan muat waing muat naga sasaring. \v 8 Muat na manga harmarsai hargilaas ma ra tutun kanong ing bia u marse tikai pa nu manga lilik ta ira sakena i gil. \v 9 Muat na bale halaka ira mes ta ira numuat hala, muat naga balaure diet, ma muat pa na ngurungur bia muat gil huo. \v 10 Muat na papalim ma ira numuat hartabar ing muat tikatikai muat te kap, wara harharahut harbasiane muat. Ma muat na papalim timaan ma kaiken ra hartabar na harmarsai ing God i tar. \v 11 Ing bia tikai i hatur kawase ra hartabar wara nianga, i tahut bia na ianga hoing bia God at i iangianga. Ing bia tikai i hatur kawase ra hartabar wara harharahut, i tahut bia na harahut ma ira uno baso ing God i tabar ie mei. Muat na papalim huo waing daga pirhakasing God ta ira linge bakut meram narako no udahat kinkinis ta Jisas Krais. Aie nong i hatur kawase no minamar ma no dadas hathatika. A tutun. \s1 Waak dahat hirhir ing bia dahat kap ra ngunngutaan kanong a Kristian dahat. \p \v 12 Io, ira nugu bilai na harwis, waak muat karup ta ira dadas na harangungut i walar muat. Pai tiga sigar na mangana linge i te haan tupas muat. \v 13 Iesen i tahut bia muat na guama bia muat te laka ta ira harangungut ta Krais waing muat naga manga kanakana ing no uno minamar na harapuasa. \v 14 Ing bia di tanga hagahe muat kanong muat tano hinsa Krais, io, muat daan, kanong no Tanuo ta God ma no uno minamar i kis burung muat. \v 15 Ing bia di hangungut muat, pa na tahut bia no burena bia muat te harubu bingibing ma bia muat te kikinau. Ma pa na tahut mah bia muat te lake ira harkurai ma bia muat hamalaslaas ira nilon ta ira mes. \v 16 Iesen ing bia di hangungut muat kanong a Kristian muat, waak muat hirhir. Taie. Muat na pirlat God bia muat te kap no hinsa Krais. \v 17 Kanong warah, no pakana bung i te hanuat um bia no huntunaan ta God na tur ra harkurai. Ma ing bia i luena haan tupas dahat huo, muat lik bia na ngan hohe ta diet ing diet pai taram no tahut na hinhinawas ta God? \v 18 Hoing no nianga ta God di ga pakat ie i tange, \q1 “Ing bia i dadas ta ira ut na takodas bia diet na kap no harhalon, \q1 na ngan hohe ta ira ut na sakena ing diet tur talur God?” \m \v 19 Io kaik, diet ing diet kap ra harangungut haruat ma ira sinisip ta God, i tahut bia diet na gilgil at ira bilai na magingin ma bia diet na tar habaling diet tano limana nong ga hakisi diet ma i la balbalaure timaan diet. \c 5 \s1 Dahat na matien na tunotuno nalamin ta ira haraubaal. \p \v 1-2 Muat ira kabinsit na lotu, iau mah tiga kabinsit hoing muat. Iau ga nes ira harangungut ta Krais ma iau nong iau hinhinawas ine. Iau nong ni hatur kawase mah no minamar ing na harapuasa. Io kaik, iau saring muat bia muat na balaure ira matanaiabar gar ta God nalamin ta muat hoing ira ut na balaura sipsip diet la balbalaure ira udiet sipsip. I tahut bia muat na kanan wara balbalaure diet hoing God i sip bia muat na gil huo. Waak muat balaure diet hoing bia tikai mon i hagut muat. Waak muat gil iakan ra pinapalim wara gaiena kinewa mon. Iesen muat na gil ie kanong muat manga sip bia muat na papalim huo. \v 3 Waak muat lik hatamat muat wara kurkure hadadas ira matanaiabar ing God i te tar ta muat bia muat na balaure diet. Iesen bia ira numuat tintalen na haruat ma ra tahut na malalar bia diet na mur, hoing ira sipsip diet la gilgil huo. \v 4 Ma bia no Tamat na Ut na Balaura Sipsip i harapuasa, muat na hatur kawase nora minamar, hoing ra bilai na balaparik ing pa na panim laah ira minarine. \p \v 5 Ma huo mah ta muat ira marawaan. Muat na hansiksik tar muat ta ira numuat kabinsit na lotu. Ma muat bakut, muat na matien na tunotuno harbasia ta muat kanong no nianga ta God di ga pakat ie i tange bia, \q1 “God i malok se diet ira ut na latlaat, \q1 ma i tar no uno harmarsai ta ira matien na tunotuno.” \m \v 6 Io, muat na hansiksik tar um muat ra hena no dadas na limane God waing naga hatamat muat tano pakana bung haruat ma no uno sinisip. \v 7 Muat na tar se ira numuat nginarau na bunurut tana kanong i manga lilik uta muat ma i balaure muat. \p \v 8 Na palai ira numuat lilik ma muat na balaure timaan muat! No amuat suk Sataan i wawawar haan hoing tiga laion i sisilih ta tikai bia na kanam kudule. \v 9 Iesen muat na tur dadas ta ira numuat nurnuruan ma muat na tur bat ie kanong muat nunure bia ira hinsaka muat tano hinsa Krais kai ra ula hanuo diet puspusak kaiken ra mangana harangungut mah. \v 10 Iesen no harangungut pa na ubal halawaas baak muat, ma namur God no burena ta ira harmarsai bakut nong ga tatau muat bia muat na laka tano uno minamar hathatika narako ta Krais, io, na hanunuhuan muat ma na hadadas muat bia muat na manga dikdikit. \v 11 Aie nong i hatur kawase ira dadas hathatika. A tutun. \s1 Pita ga haragat diet ma ga haatne diet. \p \v 12 Iau pakat iakan ra da pakpakat ma no harharahut ta Sailas no tasi dahat. A tutun na tunotunoi. Iau wara haragat muat ma iau wara hinhinawas palai bia iakan no tutun na harmarsai ta God. Muat na tur dadas tana. \p \v 13 Ira matanaiabar na lotu kai Babilon ing God i te gilamis diet tika ma muat, diet haatne muat. Huo mah no nugu bulu Mak. \v 14 Muat na haatne hargilasane muat ma ra tamat na harmarsai. \p A malum ta muat bakut ing muat kis taar ta Krais.