\id 1JN - Patpatar NT [gfk] -Papua New Guinea 1997 (DBL 2014) 
\h 1 JON 
\toc1 No Luena Pakpakat ta Jon 
\toc2 1 Jon 
\toc3 1 Jo 
\mt1 No Luena  
\mt2 Pakpakat ta  
\mt1 JON  
\ip Jon no apostolo ga pakat kan ra pakpakat ma ra haleng na nianga narako tana i manga haruat ta ira nianga da nes tano Tahut na Hinhinawas nong Jon ga pakat ie. Ira haleng na ut na mintot diet lik bia Jon ga kis aras Esia ing ga pakat kan ra pakpakat ma ga pakpakat tupas ira lotu kenas Esia. Jon ga wara hakhakatom diet ira ut na nurnur ta ira tena harausur bisbis (nes 1 Jon 2.26) ing diet git tangtange bia ira linge da nes tano ula hanuo ma ira palatamai dahat i sakena ma ira tanua dahat i tahut. Io kaik, diet git tangtange bia pataie ta linge bia dahat gil ira sakena ta ira sakana palatamai dahat, ma ing no tunotuno Jisas ga maat, pai Krais no Nati God nong ga maat. Iesen Jon ga manga harus ise no udiet mangana lilik huo. Ga tange bia ing dahat gil ra sakena dahat lake ira harkurai ta God (3.4), ma bia diet ira nati God diet pai la gilgil ira sakena (2.28–3.12). Jon ga manga sip bia dahat na tiktika ma Jisas ma no ana Sus narako ta ira magingin na madaraas. Iakan no suruno ta kan ra pakpakat, bia \bd ira ut na nurnur diet na murmur ira magingin na madaraas (1.5-7).\bd* Pai tale tikai bia na tange bia i te nurnur ta Krais ma sen i la murmur ira sakana magingin na kankado. Iesen sige tikai i tartaram ira harkurai ta God i kis taar ta God (3.24) ma no suruno ta ira harkurai ta God hoken, bia dahat na harmarsai hargilaas ma dahat na nurnur ta Jisas Krais no Nati God (3.23). Jon ga sip bia dahat naga palai bia no tunotuno Jisas (1.1; 4.2-3), aie no Mesaia (nong di kilam ie bia ‘Krais’; 2.22; 5.1), no Nati God (2.23; 3.23; 4.9-10; 4.14-15; 5.5-13; 5.20), ma bia aie at ga maat wara gaie dahat bia na halon dahat (5.4-8). Jon ga sip bia dahat naga manga palai bia dahat te hatur kawase iakan ra nilon hathatika ing bia dahat te nurnur tano Nati God (5.13).  
\c 1  
\s1 No Nianga na Nilon.  
\p
\v 1 Het hinawase muat uta nong ga kis taar menalua tano hathatahun, nong het ga hadade ma het ga nes ie ma ira mata mehet. Io, het ga nesnes ie ma het ga sigirei ma ira lima mehet. Ma iakan at mon het hinawase muat utana, no Nianga na Nilon.  
\v 2 Ma no nilon ga harapuasa ma het hinawase muat uta iakan ra nilon hathatika. Het ga nes ie ma het hatutun ie ta muat. Iakanong nong ga kis tika ma Mama ma i harapuasa taar ta mehet.  
\v 3 Ma het hinawase mah muat uta nong het gate nes ma het gate hadade waing muat mah muat naga tiktika ma mehet. Ma het tiktika at ma Mama ma no Natine, Jisas Krais.  
\v 4 Ma het pakat tar kaiken ra linge ta muat waing ira udahat gungunuama na duk.   
\s1 I tahut bia dahat na hanahaan tano madaraas.  
\p
\v 5 Io, iakan no hinhinawas het ga hadade leh ie ta Jisas Krais ma het hinawase muat urie hoken: God i haruat ma ra lulungo ma pataie harsakit ta kankado tana.  
\v 6 Ing bia dahat tange bia dahat tiktika mei iesen dahat hanahaan ra kankado, io, dahat harabota ma ira udahat magingin pai haruat ma ira tutun God i te hapuasne.  
\v 7 Iesen bia dahat hanahaan tano madaraas hoing aie at i kis tano madaraas, io, dahat tiktika hargilaas ta dahat ma no de ne Jisas no Natine i hagamgamatien dahat ta ira magingin sakena bakut.   
\p
\v 8 Ing bia dahat tange bia pataie audahat ta magingin sakena dahat hasakit baling ta dahat ma dahat lik bia iakano hinarabota i tutun iesen ira tutun ta God pai kis ta dahat.  
\v 9 Iesen bia dahat na hinawas palai ta ira udahat magingin sakena, io, God na gil haruat ta ira uno kunubus ma na gil ra takodas hoken: na lik luban se ira udahat sakena ma na hagamgamatien dahat sukun ira magingin bakut pai takodas.  
\v 10 God i tange bia dahat te gil ra sakena. Ing bia dahat tange bia dahat pai le gil ta sakena, io, dahat kilam God bia a ut na harabotai ma no uno nianga pai kis ta dahat.   
\c 2  
\p
\v 1 Iau pakat kaiken ra linge taar ta muat ira natigu gar ta Krais waing muat pa na gil ra sakena. Iesen bia tikai na gil ta sakena, audahat tikai kana nong i iangianga wara gaie dahat ra matmataan ta God. Ma aie ne Jisas Krais no takodasiana.  
\v 2 Ma aie at no hartabar uta ira udahat magingin sakena nong ga hau no ngalngaluan gar ta God. Ma taie bia wara gaiena ira udahat sakena sen. Wara gaiena mah ira sakena tano ula hanuo bakut.   
\s1 Dahat na nunure hohe bia dahat nunure God.  
\p
\v 3 Dahat nunure bia dahat nunure tar God hoken, ing bia dahat taram ira uno harkurai.  
\v 4 Sige tikai i tange bia i nunure tar ie ma sen pai taram ira uno harkurai, io, a ut na harabota ie ma ira tutun ta God pai kis tana.  
\v 5 Iesen tutun sakit, bia tiga nong i taram ira uno nianga i hamines bia no uno sinisip uram ho God i te duk. Ma dahat nunure hohe bia dahat kis taar tana? I hoken:  
\v 6 Sige tikai i tange bia i la kis taar ta God, io, i tahut bia na hanahaan hoing Jisas ga haan huo.   
\p
\v 7 Ira bilai na hinsakagu ta Krais, iau pai pakpakat tiga sigar harkurai ukaia ho muat, iesen no tuarena mon nong muat ga hatur kawase tur leh menalua tano hathatahun. Iakan ra tuarena harkurai, aie no hinhinawas muat ga hadadei.  
\v 8 Iesen i tutun mah bia iau pakpakat tiga sigar harkurai ukaia ho muat. Ma da palai bia i tutun bia iakan ra harkurai i sigarine kanong da nes ie tano nilon ta Jisas ma ira numuat. Ma i palai huo kanong no kankado i wara patpataam ma no lulungo tutun i te murarang taar.   
\p
\v 9 Sige tikai i tange bia i kis taar ra madaraas iesen bia i malentakuane no hinsakana gar ta Krais, io, i kis taar baak ra kankado.  
\v 10 Sige nong i marse no hinsakana gar ta Krais i la kis taar tano madaraas ma taie ta sakena tana bia na hapukoi.  
\v 11 Iesen sige tikai i malentakuane no hinsakana, io, i kis taar tano kankado ma i la hanahaan hurbit tano kankado. Ma pa na nunure bia i hanahaan uhe kanong no kankado i te hapulo ira iruo matana.   
\p
\v 12 Iau pakpakat tupas muat ira natigu gar ta Krais kanong God i te lik luban se ira numuat magingin sakena utano hinsane Krais.  
\v 13 Iau pakpakat tupas muat ira nongtamat tano lotu kanong muat nunure tar ie nong i te kis taar menalua tano hathatahun. Iau pakpakat tupas muat ira marawaan tano lotu kanong muat te bul hasur no Ut na Sakena.  
\v 14 Iau pakpakat tupas muat ira natigu kanong muat nunure tar Mama. Iau pakpakat tupas muat ira nongtamat kanong muat nunure tar ie nong i te kis taar menalua tano hathatahun. Iau pakpakat tupas muat ira marawaan kanong muat dadas ma no nianga ta God i la kis taar ta muat ma muat te bul hasur no Ut na Sakena.   
\s1 Waak dahat sipsip ira magingin ma ira linge tano ula hanuo.  
\p
\v 15 Waak muat sipsip ira magingin ma ira linge tano ula hanuo. Ing bia sige tiga nong i sipsip ira magingin tano ula hanuo, io, pai sip Mama.  
\v 16 Iau tange huo kanong ira linge bakut tano ula hanuo, ira sakana harsipsip, ira sakana nes kalak, ma ira magingin na butbut, pai hanuat meram ho Mama. Taie. I hanuat mekai ra ula hanuo.  
\v 17 Ma no ula hanuo i patpataam hanahaan, ma diet mah ing diet sip no ula hanuo. Iesen sige tikai i gil haruatne ing God i sip bia na gil huo, io, na lon hathatika.   
\s1 Ira suk ane Krais diet harus ise no Natine iesen dahat la kis taar tano Natine ma dahat nunure ira tutun God i te hapuasne.  
\p
\v 18 Ira natigu gar ta Krais, kaiken no patpataam tano ula hanuo. Ma hoing muat ga hadade bia no suk ane Krais na hanuat, ma kaiken at a haleng na suk ane Krais diet te hanuat taar. Io kaiken dahat te nunure bia no hauhawatine kanong diet te hanuat um.  
\v 19 Diet ga haan sukun dahat iesen pai udahat tutun diet. Ing bia audahat tutun diet, diet pa gor haan sukun dahat. Iesen no udiet hinaan laah i haminas bia diet bakut, pai udahat diet.  
\v 20 Iesen no Halhaliana i te tabar muat ma iakano nong i hapalaine muat kaik muat bakut muat gi nunure ira tutun God i te hapuasne.  
\v 21 Iau pakpakat tupas muat warah? Kanong muat nunure kaike ra tutun bia kanong muat pai nunurei? Iau pakpakat ukaia ho muat kanong muat nunure tar ira tutun ma muat nunure bia taie ta hinarabota na hanuat meram narako ta ira tutun.  
\v 22 Sige no ut na harabota? Aie nong i harus ise Jisas bia aie no Mesaia. Tiga mangana tunotuno huo, aie no suk ane Krais kanong i harus ise Mama ma no Natine.  
\v 23 Sige nong i harus ise no Natine pai hatur kawase Mama. Ma sige nong i haut bia Jisas no Nati God, io, i hatur kawase mah Mama.   
\p
\v 24 Ma muat, i tahut bia muat na bale leh iakano hinhinawas nong muat gate hadade leh tano hathatahun bia na be kis taar ta muat. Ing bia iakano hinhinawas nong muat ga hadade leh tano hathatahun i la kis taar ta muat, io, muat mah muat na kis taar ta Mama ma tano Natine.  
\v 25 Ma no kunubus nong aie at ga tar ta dahat i hoken: no nilon hathatika.   
\p
\v 26 Iau pakpakat kaiken ra linge wara uta diet ing diet walwalar wara lamlamus harango muat.  
\v 27 Ma muat, muat pai supi bia ta tikai na hausur muat ta tiga linge kanong Krais ga tabar muat ma iakano nong i hapalaine muat ma iakanong i la kis taar ta muat ma i la hauhausur muat uta ira linge bakut ma i tutun mah ma pai harabota. Io kaik, i tahut bia muat na kis taar ta Krais hoing iakano nong i hapalaine muat i te hausur muat huo.   
\s1 Ira nati God diet pai la gilgil sakena.  
\p
\v 28 Io, ira natigu gar ta Krais, i tahut bia muat na kis taar ta Krais waing dahat naga balaraan taar bia ing na harapuasa, dahat kabi malahuan ta iakano tamat na bung bia na hanuat.  
\v 29 Ma muat nunure bia Krais i takodas. Io kaik, muat nunure mah bia sige tikai i la gilgil ra magingin takodas, aie tiga nati God.   
\c 3  
\p
\v 1 Nes baak! A tamat no harmarsai tika ma ra sinisip nong Mama i te tar ta dahat! Io kaik, di gi kilam dahat bia ira nati God dahat. Ma iakanin i tutun. No ula hanuo pai nunure kilam dahat kanong warah, pa ga nunure kilam God mah.  
\v 2 Ira bilai na hinsakagu ta Krais, a nati God dahat kaiken. Ma sen pai hanuat palai baak bia a mangana tunotuno hohe dahat namur. Iesen dahat nunure bia dahat na ngan hoing Krais ing Krais na hanuat puasa kanong na hanuat palai ta dahat bia a mangana tunotuno hohe tutun ie.  
\v 3 Ma sige tikai i la kiskis nanaho ma ra nurnuruan bia na ngan baak hoing Krais huo, io iakano tunotuno i la hagamgamatien no uno nilon hoing Krais mah i gamgamatien.   
\p
\v 4 Sige tikai i gil sakena i hamines bia a ul pat ie ta God kanong i lake ira uno harkurai. Tutun sakit, ira magingin sakena i haruat hoing tikai i lake ira harkurai gar ta God kaik i ul pat ta God.  
\v 5 Ma muat nunure bia Krais ga hanuat wara kapkap se ira magingin sakena. Ma taie ta sakena i kis tana.  
\v 6 Taie tikai i la kis taar tana i la gilgil sakena. Ma taie tikai i la gilgil sakena i nunure tar ie.  
\v 7 Ira natigu gar ta Krais, muat na harbalaurai timaan, tikai kabi lamus harongane muat. Sige nong i la gilgil no takodas a takodasianai hoing Krais a takodasianai.  
\v 8 Sige tikai i la gilgil sakena a gar ta Sataan ie kanong Sataan ga gil leh ra sakena tur leh tano hathatahun. No burena iakan bia no Nati God gaam hanuat bia na haliare ira pinapalim ta Sataan.  
\v 9 Taie tiga nati God i la gilgil sakena kanong i te kap ira mangana tintalen ta God uram narakoman tana. Ma pai tale bia na gil sakena, warah, a nati God ie.  
\v 10 Kaik na palai hoken bia gahim ira nati God ma gahim ira natine Sataan: ing bia tikai pai la gilgil no takodas pai gar ta God ie, ma nong mah nong pai la marmarse no hinsakana gar ta Krais.   
\s1 Dahat na marse hargilasane dahat.  
\p
\v 11 Io, iakan no hinhinawas muat gate hadade leh meram ra hathatahun, bia dahat na marse hargilasane dahat.  
\v 12 Waak muat ngan hoing Kain. Aie gar tano Ut na Sakena. Ma aie nong ga bu bing no tasine. Ma ga bu bing ie warah? Kanong ira uno magingin ga sakena ma ing tano tasine ga takodas.  
\v 13 Io kaik, ira hinsakagu ta Krais, waak muat karup bia no ula hanuo i malentakuane muat.  
\v 14 Warah? Kanong dahat nunure bia dahat te haan sukun no minaat ma dahat te laka tano nilon. Ma dahat nunure huo kanong dahat marse hargilasane ira hinsaka dahat gar ta Krais. Sige tikai pai hatur kawase ra harmarsai, i la kis taar ra minaat.  
\v 15 Sige tikai i malentakuane no hinsakana ta Krais, a ut na harubu bingibing ie. Ma muat palai bia no nilon hathatika pai kis taar ta tiga ut na harubu bingibing.  
\v 16 Dahat nunure no kukuraina tano magingin na harmarsai hoken: Jisas ga tar se no uno nilon, ga maat wara gaie dahat. Io kaik, i takodas bia dahat, dahat na taguro wara minaat wara gaiena ira hinsaka dahat gar ta Krais.  
\v 17 Iesen sige tikai auno ta linge ma i nes a sunupi tano hinsakana ta Krais sen bia pai marsei, io, tutun sakit no mangana harmarsai gar ta God pai la kis taar tana.  
\v 18 Ira natigu gar ta Krais, waak dahat tange mon bia dahat marse ira mes. Iesen i tahut bia dahat na hamines ira udahat harmarsai ma ira udahat magingin tupas diet, kaike ra mangana magingin ing i haruat ma ra tutun God i te hapuasne ta dahat.  
\v 19-20 Ing bia dahat harmarsai huo dahat na nunure bia dahat kis narako ta ira tutun ta God. Ma ing dahat tur ra matmataan ta God i tale bia tikatikai na kilingane bia a mon nironga tana. Iesen dahat ing dahat harmarsai, dahat na kis na balaraan um. Warah, kanong God i tamat ta ira harkurai ta ira bala dahat ma i nunure bia sige tun dahat.  
\v 21-22 Ira bilai na hinsakagu ta Krais, ing bia dahat pai kilingane bia a mon nironga ta dahat, io, dahat na kis na balaraan ra matmataan ta God. Ma God na tabar dahat ma ing dahat saring leh kanong dahat taram ira uno harkurai ma dahat gil ira linge ing i haguama ie.  
\v 23 Ma iakan no uno harkurai, bia dahat na nurnur tano hinsana no Natine Jisas Krais ma bia dahat na marmarse hargilasane dahat haruat tano uno harkurai ga tar ta dahat.  
\v 24 Ma sige tikai i taram ira uno harkurai i la kis taar ta God ma God mah i la kis taar tana. Ma dahat nunure hohe bia i la kis taar ta dahat? No Tanuo nong God i te tar ie ta dahat i hapalaine dahat huo.   
\c 4  
\s1 Dahat na walar diet ing diet tange bia no tanuo ta God i hinawase diet tari linge.  
\p
\v 1 Ira bilai na hinsakagu ta Krais, a haleng ira tangesot harabota diet te haan harbasia tano ula hanuo. Io kaik, waak muat nurnur ta ira tunotuno bakut ing diet tange bia no Tanuo ta God i hinawase diet tari linge. Iesen muat na walar diet wara nunure bia God i tar ra nianga ta diet bia taie.  
\v 2 Ma i tale muat bia muat na nes kilam baak no Tanuo ta God narako ta tiga tunotuno ta ira uno nianga. Sige tikai i nurnur bia Jisas Krais ga hanuat ukai ma ing bia ga hanuat a tunotuno ie, ma i hinawas palai huo, io, muat na nunure bia no Tanuo meram ho God i kis tana.  
\v 3 Iesen sige tikai i harus ise Jisas huo, io, no Tanuo meram ho God pai kis tana. Taie. I hatur kawase mon no tanuo tano suk ane Krais. Muat ga hadade bia ira suk i Krais na hanuat. Ma tutun, kaiken um diet te hanuat taar kai ra ula hanuo.   
\p
\v 4 Ira natigu gar ta Krais, muat gar ta God ma muat te bul hasur kaike ra mangana tunotuno tika ma ira udiet harausur kanong iakano nong i kis ta muat i tamat ta Sataan nong i kis tano ula hanuo.  
\v 5 Diet gar tano ula hanuo, io kaik, diet ianga mekai ra ula hanuo ma no ula hanuo i taram diet.  
\v 6 Dahat gar ta God ma sige tikai i nunure tar God na taram dahat. Iesen sige tiga nong pai gar ta God pa na taram dahat. Hoken ing dahat na nes kilam ira tunotuno ing no Tanuo ta ira tutun ta God i kis ta diet, ma diet ing diet hatur kawase ra tanuo na harabota.   
\s1 Dahat na marse hargilasane dahat kanong God ga luena marse dahat.  
\p
\v 7 Ira bilai na hinsakagu ta Krais, i tahut bia dahat na marse hargilasane dahat kanong no magingin wara tar harmarsai, aie meram ho God. Ma sige tikai i tar harmarsai, a nati God ie ma i nunure tar God.  
\v 8 Sige tikai pai tar ra harmarsai, pai nunure God kanong ira tintalen bakut ta God, a tintalen na harmarsai ma ra sinisip ukai ho dahat.  
\v 9 Ma God ga hamines no uno harmarsai ma no uno sinisip uta dahat hoken: ga tule se no uno halhaliana bulukasa ukai tano ula hanuo wara halhalon dahat.  
\v 10 Ma a mangana linge sa iakan ra magingin na harmarsai tika ma ra sinisip? No suruno pai hoken, bia dahat te sip God. Taie. Iesen no suruno bia God ga sip dahat gaam marse dahat, ma ga tule se no Natine, a hartabar ie uta ira udahat magingin sakena wara hauhau no ngalngaluan gar ta God.  
\v 11 Ira hinsakagu ta Krais, ing bia God ga marse dahat huo, io, i takodas bia dahat, dahat na marse hargilasane dahat.  
\v 12 Taie ta tiga nong pa gale nes God. Taie. Sen bia ing dahat marse hargilasane dahat, io, God i la kis taar ta dahat ma no mangana harmarsai gar ta God i te duk narako ta dahat.   
\p
\v 13 Dahat nunure bia dahat la kis taar tana ma aie i la kis taar ta dahat hoken, kanong i te tar no Tanuana ta dahat.  
\v 14 Ma Mama ga tule no Natine ukai bia aie no ut na Halon tano ula hanuo. Het gate nes iakan ma het hatutun ie ma ira numehet hinhinawas ta muat.  
\v 15 Sige tikai i haut bia Jisas aie no Nati God, io, God i la kis taar tana ma aie i la kis taar ta God.  
\v 16 Ma dahat te kilingane no harmarsai ma no sinisip gar ta God uta dahat ma dahat nuruan iakano uno harmarsai ma no uno sinisip tupas dahat.  
\p Ira tintalen bakut ta God, a tintalen na harmarsai tika ma ra sinisip ukai ho dahat. Ma sige tikai i la kis taar ta iakano mangana nilon i la kis taar ta God ma God i la kis taar tana.  
\v 17 Io, dahat na kis na balaraan tano bung na harkurai kanong dahat hoing Krais kai ra ula hanuo. Ma ing bia dahat na kis na balaraan huo i hamines bia i manga marse hasakitne dahat ma dahat manga sip hasakitne ie.  
\v 18 Ing dahat sip ie huo, ma aie mah i sip dahat, pai tale bia dahat na burut. Taie. Ing dahat sip tun at ie ma aie i sip tun dahat, iakano magingin i la kapkap se no bunurut. Io kaik, ing bia tikai i burut, iakan ra magingin na sinisip pai duk taar tana kanong no bunurut i kis tika ma ra harpidanau.  
\v 19 Io, dahat sip um ie kanong aie ga luena sip dahat. Ma dahat marse ira mes kanong aie ga luena marse dahat.  
\v 20 Ma ing bia tikai na tange bia, “Iau sip God,” sen bia i malentakuane no hinsakana ta Krais, io, a ut na harabota ie. Ma i nanaas bia a tutun iakan kanong sige tikai pai marse ira mes na matanaiabar gar ta God ing i te nes tar diet, io, pai tale bia na sip God nong pai le nes ie tiga pakaan.  
\v 21 Ma dahat hatur kawase iakan ra harkurai mekaia ho ie, bia sige tikai i sip God na marse mah no hinsakana ta Krais.   
\c 5  
\p
\v 1 Sige tikai i nurnur bia Jisas aie no Mesaia, io, a nati God ie. Ma i nanaas bia sige i sip no sus ana tikai na marse mah no natine.  
\v 2 Dahat nunure hoken bia dahat marse ira nati God: dahat sip God ma dahat gil haruatne ira uno harkurai.  
\v 3-4 Ma ing bia dahat taram ira uno harkurai i hamines bia dahat sip ie. Ma ira uno harkurai diet pai tirih kanong ira nati God diet haruat wara papaas hasur ira sakana magingin tano ula hanuo. Ma dahat paas hasur ira sakena tano ula hanuo hoken: dahat nurnur ta ira tutun God i te hapuasne.   
\s1 Jisas aie no Nati God ma no nilon mekaia ho ie sen mon.  
\p
\v 5 Ma sige nong i bul hasur ira magingin sakena tano ula hanuo? Nong sen mon nong i nurnur bia Jisas aie no Nati God.  
\v 6 Jisas Krais aie at nong ga kap baptais ma ga maat ing ga hanuat ukai. Ing bia ga hanuat ukai pa ga kap baptais sen mon. Taie. Ga kap baptais ma ga maat mah. Ma no Halhaliana Tanuo at nong i hatutun iakan ma no uno hinhinawas. Ma i hatutun ie huo kanong i la tangtange ra tutun.  
\v 7-8 Io, aitul ing dal hatutun bia Jisas aie no Nati God. Ma dal hoken: no Tanuo, no uno baptais, ma no uno minaat. Ma dal bakut dal haut tika.  
\v 9 Ma i nanaas bia da haut leh no hinhinawas ta tiga tunotuno ing bia i hatutun tiga linge. Iesen ing bia God i hatutun iakan ma no uno hinhinawas, io, no uno hinhinawas i manga tutun tano hinhinawas gar na tunotuno kanong no uno hinhinawas, no hinhinawas gar ta God ie utano Natine.  
\v 10 Sige tikai i nurnur tano Natine God i kap usurane iakan ra hinhinawas. Sige tiga nong pai nurnur ta God i kilam God bia a ut na harabota ie kanong pai le nurnur tano hinhinawas ta God ing God i hatutun ira linge utano Natine.  
\v 11 Ma no hinhinawas nong God i te hatutun tar ie ta dahat, aie hoken: God i te tabar dahat ma no nilon hathatika ma iakan ra nilon mekaia hono Natine.  
\v 12 Sige tikai i hatur kawase no Natine i hatur kawase mah no nilon. Ma sige tikai pai hatur kawase no Nati God pai hatur kawase no nilon.   
\s1 I tale bia dahat na nunure bia dahat hatur kawase tar no nilon hathatika.  
\p
\v 13 Iau pakat kaiken ra linge ukaia ho muat ing muat nurnur tano hinsana no Nati God waing muat na nunure bia muat hatur kawase tar no nilon hathatika.  
\v 14 Ma dahat balaraan taar ra matmataan ta God kanong dahat nunure tar bia God i hadade dahat ing bia dahat sasaring haruat tano uno sinisip.  
\v 15 Ma ing bia dahat nunure huo bia i hadade ira udahat sinasaring bakut, io, dahat nunure mah bia dahat hatur kawase ira binabalu ta ira udahat sinasaring tupas ie.   
\p
\v 16 Bia tikai i nes no hinsakana ta Krais i gil tiga nironga ing pai haruat bia na lamus tar ie tano minaat, io, na sasaring ma God na tar no nilon tana. Iau iangianga uta ira magingin sakena ing pai haruat bia na lamus tar tiga nong tano minaat. Iesen a mangana nironga kana i haruat bia na lamus tar tikai tano minaat. Iau pai tange bia na sasaring uta iakano.  
\v 17 Ira magingin bakut pai takodas, a magingin sakena. Iesen ari a mangana nironga pai haruat bia na lamus tar tikai tano minaat.   
\p
\v 18 Dahat nunure tar bia sige a nati God ie, pai la gilgil ra magingin sakena. Iesen no Nati God i la balbalaure timaan tar ie ma no Ut na Sakena pai tale bia na hagahei.  
\v 19 Ma dahat nunure tar bia dahat gar ta God sen bia no ula hanuo bakut i kis taar tano harkurai tano Ut na Sakena.  
\v 20 Ma dahat nunure tar mah bia no Nati God i te hanuat ukai ma i te hapalaine dahat waing dahat naga nunure ie, aie no God tutun. Ma dahat kis taar tana nong i tutun. Ma iakano, aie no Natine Jisas Krais. Aie no God tutun ma aie no nilon hathatika.  
\v 21 Ira natigu gar ta Krais, muat na kis pas ira god bisbis.