\id 1JN - SOKAREK Published 
\h 1 JON 
\toc3 1 Jon 
\toc1 No Luaina Pakpakat tane JON 
\toc2 1 JON 
\mt1 No Luaina  
\mt2 Pakpakat tane  
\mt1 JON  
\ip Jon no apostolo ga pakat ikin ra pakpakat ma ra haleng na nianga naramon tana i manga haruat ma ira nianga da nes tano Tahut na Hininaawas nong Jon ga pakat ie. Ira haleng na ut na minanes di lik be Jon ga kis tusu Esia ing iga pakat ikin ra pakpakat ma iga pakpakat tupas ira lotu rusu Esia. Jon ga ura hakatom di ira ut na nurnur ta ira tena harausur harabota (nes 1 Jon 2:26) ing di git tangtange be ira linge da nes tano ula hanuo ma ira palatamai dait i sana ma ira tanua dait i tahut. Io kaie, di git tangtange be pata ta linge be dait gil ira sasana ta ira sana palatamai dait, ma ing no turadi Jisas ga mat, paile Krais no Natine God nong ga mat. Iesene Jon ga manga harus leise no nudi mangana lilik hobi. Iga tange be ing dait gil ra sasana dait lake ira harkurai tane God (3:4), ma be di ira natine God pa di lale gilgil ra sasana (2:28-3:12). Jon ga manga sip be dait na tiktikai ma ne Jisas ma no nuno Mama naramon ta ira tintalen na madares. Ikin no surno ta ikin ra pakpakat, be \bd ira ut na nurnur di na murmur ira tintalen na madares (1:5-7).\bd* Paile tale tikenong be na tange be ite nurnur tane Krais ma sene ila murmur ira sana tintalen na kadado. Iesene nesi tikenong i tartaram ira harkurai tane God i kis ter tane God (3:24) ma no surno ta ira harkurai tane God horek, be dait na harmarsai harbasie ma dait na nurnur tane Jisas Krais no Natine God (3:23). Jon ga sip be dait nage palai be no turadi Jisas (1:1; 4:2-3), aie no Mesaia (nong di kilam ie be ‘Krais’; 2:22; 5:1), no Natine God (2:23; 3:23; 4:9-10; 4:14-15; 5:5-13; 5:20), ma be aie iat ga mat uta dait be na halon dait (5:4-8). Jon ga sip be dait nage manga palai be dait te hatur kawase ikin ra nilon hathatikai ing be dait te nurnur tano Natine God (5:13).  
\c 1  
\s1 No Nianga na Nilon.  
\p
\v 1  \x - \xo 1:1 \xt Jon 1:1\x*Mem hinawase mu uta nong ga kis ter menalalie tano hathatahun, nong mem ga hadade ma mem ga nes ie ma ira mata mem. Io, mem ga nesnes ie ma mem ga sigire ie ma ira luma mem. Ma ikin iat mon mem hinawase mu utana, no Nianga na Nilon.  
\v 2  \x - \xo 1:2 \xt Jon 1:14\x*Ma no nilon ga harapuasa ma mem hinawase mu uta ikin ra nilon hathatikai. Mem ga nes ie ma mem hatutuno ie ta mu. Ikino nong ga kis tikai ma ne Mama ma iga harapuasa ter ta mem.  
\v 3 Ma mem hinawase bileng mu uta nong mem gate nes ma mem gate hadade waing mu bileng mu nage tiktikai ma mem. Ma mem tiktikai iat ma ne Mama ma no Natine, Jisas Krais.  
\v 4  \x - \xo 1:4 \xt Jon 16:24\x*Ma mem pakat ter kakarek ra linge ta mu waing ira nudait gungunuama na duk.   
\s1 I tahut be dait na hanana tano madares.  
\p
\v 5  \x - \xo 1:5 \xt 1 Timoti 6:16; Jemes 1:17\x*Io, ikin no hininaawas mem ga hadade leh ie tane Jisas Krais ma mem hinawase mu urie horek: God aie no lulungo ma pata tutuno ta kadado tana.  
\v 6  \x - \xo 1:6 \xt 1 Jon 2:4\x*Ing be dait tange be dait tiktikai ma ie iesene dait hanana ra kadado, io, dait harakale ma ira nudait tintalen paile haruat ma ira tutuno God te hapuasne.  
\v 7 Iesene be dait hanana tano madares hoke aie iat i kis tano madares, io, dait tiktikai harbasie ta dait ma no de ne Jisas no Natine i hagamgamatien dait ta ira sana tintalen bakut.   
\p
\v 8  \x - \xo 1:8 \xt Sam 32:5; Snd 28:13\x*Ing be dait tange be pata nudait ta sana tintalen dait hasakit baling ta dait ma dait lik be ikino hinarakale i tutuno iesene ira tutuno tane God paile kis ta dait.  
\v 9 Iesene be dait na hinawas palai ta ira nudait sana tintalen, io, God na gil haruat ta ira nuno kunubus ma ina gil ra takados horek: na lik luban leise ira nudait sasana ma ina hagamgamatien dait sukun ira tintalen bakut paile takados.  
\v 10 God i tange be dait te gil ra sasana. Ing be dait tange be dait paile gil ta sasana, io, dait kilam God be a ut na harakale ma no nuno nianga paile kis ta dait.   
\c 2  
\p
\v 1  \x - \xo 2:1 \xt Hibru 9:24\x*Iou pakat kakarek ra linge ter ta mu ira natigu tane Krais waing pa mu nale gil ra sasana. Iesene be tikenong na gil ta sasana, a nudait tikenong kanaia nong i iangianga uta dait ra matmataan tane God. Ma aie ne Jisas Krais no takadoswana.  
\v 2  \x - \xo 2:2 \xt Jon 1:29; Kolose 1:20; 1 Jon 4:10\x*Ma aie iat no hartabar uta ira nudait sana tintalen nong ga hamane no ngalngaluan tane God. Ma pata be uta ira nudait sasana sene. Uta ira sasana bileng tano ula hanuo bakut.   
\s1 Dait na nunure hohaam be dait nunure God.  
\p
\v 3 Dait nunure be dait nunure ter God horek, ing be dait taram ira nuno harkurai.  
\v 4 Nesi tikenong i tange be i nunure ter ie ma sene paile taram ira nuno harkurai, io, a ut na harakale ie ma ira tutuno tane God paile kis tana.  
\v 5  \x - \xo 2:5 \xt Jon 14:21,23\x*Iesene tutuno sakit, be tikenong i taram ira nuno nianga, i hamanis be no nuno sinisip utuma hone God te duk. Ma dait nunure hohaam be dait kis ter tana? I horek:  
\v 6 Nesi tikenong i tange be ila kis ter tane God, io, i tahut be na hanana hoke Jisas ga hana hobi.   
\p
\v 7  \x - \xo 2:7 \xt Jon 13:34; 2 Jon 5-6\x*Ira bilai na hinsaagu tane Krais, iou paile pakpakat tike sigar harkurai ukaia ho mu, iesene no tuarena mon nong mu ga hatur kawase tur leh menalalie tano hathatahun. Ikin ra tuarena harkurai, aie no hininaawas mu ga hadade ie.  
\v 8  \x - \xo 2:8 \xt Rom 13:12; Jon 1:9\x*Iesene i tutuno bileng be iou pakpakat tike sigar harkurai ukaia ho mu. Ma da palai be i tutuno be ikin ra harkurai i sigarna kinong da nes ie tano nilon tane Jisas ma ira numu. Ma i palai hobi kinong no kadado i ura patpataam ma no lulungo tutuno ite murarang um.   
\p
\v 9  \x - \xo 2:9 \xt 1 Jon 4:20\x*Nesi tikenong i tange be i kis ter ra madares iesene be i malentakuane no hinsaana tane Krais, io, i kis ter baak ra kadado.  
\v 10  \x - \xo 2:10 \xt Rom 14:13\x*Nesi nong i marse no hinsaana tane Krais ila kis ter tano madares ma pata ta sasana tana be na hapuko ie.  
\v 11  \x - \xo 2:11 \xt Jon 12:35\x*Iesene nesi tikenong i malentakuane no hinsaana, io, i kis ter tano kadado ma ila hanana hurbit tano kadado. Ma pai nale nunure be i hanana uha kinong no kadado te hapulo ira iruo matana.   
\p
\v 12 Iou pakpakat tupas mu ira natigu tane Krais kinong God te lik luban leise ira numu sana tintalen utano hinsane Krais.  
\v 13 Iou pakpakat tupas mu ira nongtamat tano lotu kinong mu nunure ter ie nong te kis ter menalalie tano hathatahun. Iou pakpakat tupas mu ira marawan tano lotu kinong mu te bul hanapu no Ut na Sana.  
\v 14 Iou pakpakat tupas mu ira natigu kinong mu nunure ter Mama. Iou pakpakat tupas mu ira nongtamat kinong mu nunure ter ie nong te kis ter menalalie tano hathatahun. Iou pakpakat tupas mu ira marawan kinong mu dades ma no nianga tane God ila kis ter ta mu ma mu te bul hanapu no Ut na Sana.   
\s1 Waak dait sipsip ira tintalen ma ira linge tano ula hanuo.  
\p
\v 15  \x - \xo 2:15 \xt Rom 8:7\x*Waak mu sipsip ira tintalen ma ira linge tano ula hanuo. Ing be nesi tikenong i sipsip ira tintalen tano ula hanuo, io, paile sip Mama.  
\v 16  \x - \xo 2:16 \xt Rom 13:14\x*Iou tange hobi kinong ira linge bakut tano ula hanuo, ira sana harsipsip, ira sana nes kalak, ma ira tintalen na sa butbut, paile hanawat metuma hone Mama. Pata. I hanawat mekira ra ula hanuo.  
\v 17  \x - \xo 2:17 \xt Matiu 7:21\x*Ma no ula hanuo i patpataam hanana, ma di bileng ing di sip no ula hanuo. Iesene nesi tikenong i gil haruatne ing God i sip be na gil hobi, io, na lon hathatikai.   
\s1 Ira ebar tane Krais di harus leise no Natine iesene dait la kis ter tano Natine ma dait nunure ira tutuno God te hapuasne.  
\p
\v 18  \x - \xo 2:18 \xt Matiu 24:5,24; 2 Jon 7\x*Ira natigu tane Krais, kakarek no patpataam tano ula hanuo. Ma hoke mu ga hadade be no ebar tane Krais na hanawat, ma kakarek iat a haleng na ebar tane Krais di te hanawat ter. Io kakarek dait te nunure be no haphapatam kinong di te hanawat um.  
\v 19  \x - \xo 2:19 \xt Apostolo 20:30\x*Di ga hana sukun dait iesene paile nudait tutuno di. Ing be a nudait tutuno di, pa di gorle hana sukun dait. Iesene no nudi hinana leh i hamanis be di bakut, paile nudait di.  
\v 20  \x - \xo 2:20 \xt 1 Korin 2:15\x*Iesene no Halhaaliena te tabar mu ma ikino nong i hapalaine mu kaie mu bakut mu ge nunure ira tutuno God te hapuasne.  
\v 21 Iou pakpakat tupas mu urah? Kinong mu nunure kike ra tutuno pata be kinong pa mu le nunure ie? Iou pakpakat ukaia ho mu kinong mu nunure ter ira tutuno ma mu nunure be pata ta hinarakale na hanawat metuma naramon ta ira tutuno.  
\v 22  \x - \xo 2:22 \xt 1 Jon 4:3; 2 Jon 7\x*Nesi no ut na harakale? Aie nong i harus leise Jisas be aie no Mesaia. Tike mangana turadi hobi, aie no ebar tane Krais kinong i harus leise Mama ma no Natine.  
\v 23  \x - \xo 2:23 \xt Jon 5:23; 1 Jon 4:15; 5:1\x*Nesi nong i harus leise no Natine paile hatur kawase Mama. Ma nesi nong i haut be Jisas no Natine God, io, i hatur kawase bileng Mama.   
\p
\v 24 Ma mu, i tahut be mu na bala leh ikino hininaawas nong mu gate hadade leh tano hatahun be na be kis ter ta mu. Ing be ikino hininaawas nong mu ga hadade leh tano hatahun ila kis ter ta mu, io, mu bileng mu na kis ter tane Mama ma tano Natine.  
\v 25 Ma no kunubus nong aie iat ga ter ta dait i horek: no nilon hathatikai.   
\p
\v 26 Iou pakpakat kakarek ra linge uta dong ing di walwalar ura lamlamus harara mu.  
\v 27  \x - \xo 2:27 \xt Jon 16:13\x*Ma mu, pa mu le supi ter be ta tikenong na hausur mu ta tike linge kinong Krais ga tabar mu ma ikino nong i hapalaine mu ma ikinong ila kis ter ta mu ma ila hausur mu uta ira linge bakut ma i tutuno bileng ma paile harakale. Io kaie, i tahut be mu na kis ter tane Krais hoke ikino nong i hapalaine mu ite hausur mu hobi.   
\s1 Ira natine God pa di lale gilgil sasana.  
\p
\v 28 Io, ira natigu tane Krais, i tahut be mu na kis ter tane Krais waing dait nage balaraan ter be ing na harapuasa, dait nahula malahuan ta ikino tamat na bung be na hanawat.  
\v 29  \x - \xo 2:29 \xt 1 Jon 3:10\x*Ma mu nunure be Krais i takados. Io kaie, mu nunure bileng be nesi tikenong ila gilgil ra tintalen takados, aie tike natine God.   
\c 3  
\p
\v 1  \x - \xo 3:1 \xt Jon 1:12-13; 16:3\x*Nes baak! A tamat no harmarsai tikai ma ra sinisip nong Mama te ter ta dait! Io kaie, di ge kilam dait be ira natine God dait. Ma ikinin i tutuno. No ula hanuo paile nunure kilam dait, kinong urah, pai gale nunure kilam God bileng.  
\v 2  \x - \xo 3:2 \xt 2 Korin 3:18\x*Ira bilai na hinsaagu tane Krais, a natine God dait kakarek. Ma sene paile hanawat palai baak be a mangana turadi hohaam dait namur. Iesene dait nunure be dait na ngan hoke ne Krais ing Krais na hanawat puasa kinong na hanawat palai ta dait be a mangana turadi hohaam tutuno ie.  
\v 3 Ma nesi tikenong ila kiskis nanahe ma ra nurnur be na ngan baak hoke ne Krais, io, ikino turadi ila hagamgamatien no nuno nilon hoke Krais bileng i gamgamatien.   
\p
\v 4 Nesi tikenong i gil sasana i hamanis be a ul pat ie tane God kinong i lake ira nuno harkurai. Tutuno sakit, ira sana tintalen i haruat hoke tikenong i lake ira harkurai tane God kaie i ul pat tane God.  
\v 5  \x - \xo 3:5 \xt Jon 1:29; 1 Pita 2:22-24; 1 Jon 2:2\x*Ma mu nunure be Krais ga hanawat ura kapkap leise ira sana tintalen. Ma pata ta sasana i kis tana.  
\v 6 Pata tikenong ila kis ter tana ila gilgil sasana. Ma pata tikenong ila gilgil sasana i nunure ter ie.  
\v 7 Ira natigu tane Krais, mu na harbalaurai timaan, tikenong nahula lamus harara mu. Nesi nong ila gilgil no takados a takadoswana ie hoke Krais a takadoswana ie.  
\v 8  \x - \xo 3:8 \xt Jon 8:44\x*Nesi tikenong ila gilgil sasana, a gar tane Satan ie, kinong Satan ga gil leh ra sasana tur leh tano hathatahun. No burwana ikin be no Natine God gom hanawat be na haliare ira pinapalim tane Satan.  
\v 9  \x - \xo 3:9 \xt 1 Jon 5:18\x*Pata tike natine God la gilgil sasana kinong ite kap ira mangana tintalen tane God utuma naramon tana. Ma paile tale be ina gil sasana, urah, a natine God ie.  
\v 10 Kaie na palai horek be garim ira natine God ma garum ira natine Satan: ing be tikenong pai lale gilgil no takados paile gar tane God ie, ma nong bileng pai lale marmarse no hinsaana tane Krais.   
\s1 Dait na marse harbasiane dait.  
\p
\v 11  \x - \xo 3:11 \xt Jon 13:34\x*Io, ikin no hininaawas mu gate hadade leh metuma ra hatahun, be dait na marse harbasiane dait.  
\v 12  \x - \xo 3:12 \xt Stt 4:8\x*Waak mu ngan hoke ne Kain. Aie tano Ut na Sana. Ma aie nong ga ubu bing no tesne. Ma iga ubu bing ie urah? Kinong ira nuno tintalen ga sana ma ing tano tesne ga takados.  
\v 13  \x - \xo 3:13 \xt Jon 5:18-19\x*Io kaie, ira hinsaagu tane Krais, waak mu karup be no ula hanuo i malentakuane mu.  
\v 14  \x - \xo 3:14 \xt Jon 5:24\x*Urah? Kinong dait nunure be dait te hana sukun ra minat ma dait te lala tano nilon. Ma dait nunure hobi kinong dait marse harbasiane ira hinsaa dait tane Krais. Nesi tikenong paile hatur kawase ra harmarsai, ila kis ter ra minat.  
\v 15  \x - \xo 3:15 \xt Ninanaas 21:8\x*Nesi tikenong i malentakuane no hinsaana tane Krais, a ut na harubu bingibing ie. Ma mu palai be no nilon hathatikai paile kis ter ta tike ut na harubu bingibing.  
\v 16  \x - \xo 3:16 \xt Jon 13:1; Galesia 1:4\x*Dait nunure no pipilaina tano tintalen na harmarsai horek: Jisas ga ter leise no nuno nilon, iga mat uta dait. Io kaie, i takados be dait, dait na taguro ura minat uta ira hinsaa dait tane Krais.  
\v 17  \x - \xo 3:17 \xt Lo 15:7\x*Iesene nesi tikenong a nuno ta linge ma i nes ra sunupi tano hinsaana tane Krais sene be paile marse ie, io, tutuno sakit no mangana harmarsai tane God pai lale kis ter tana.  
\v 18  \x - \xo 3:18 \xt Jemes 2:15-16\x*Ira natigu tane Krais, waak dait tange mon be dait marse ira mes. Iesene i tahut be dait na hamanis ira nudait harmarsai ma ira nudait tintalen tupas di, kike ra mangana tintalen ing i haruat ma ra tutuno God te hapuasne ta dait.  
\v 19-20 Ing be dait harmarsai hobi dait na nunure be dait kis naramon ta ira tutuno tane God. Ma ing dait tur ra matmataan tane God i tale be tiketike na kilingane be a mon sasana tana. Iesene dait ing dait harmarsai, dait na kis na balaraan um. Urah, kinong God i tamat ta ira harkurai ta ira tinga dait ma i nunure be nesi tuno dait.  
\v 21-22  \x - \xo 3:21-22 \xt Hibru 4:16\x*Ira bilai na hinsaagu tane Krais, ing be dait paile kilingane be a mon sasana ta dait, io, dait na kis na balaraan ra matmataan tane God. Ma ne God na tabar dait ma ing dait saring leh kinong dait taram ira nuno harkurai ma dait gil ira linge ing i halaro ie.  
\v 23  \x - \xo 3:23 \xt Jon 6:29; 13:34\x*Ma ikin no nuno harkurai, be dait na nurnur tano hinsana no Natine Jisas Krais ma be dait na marmarse harbasiane dait haruat tano nuno harkurai ga ter ta dait.  
\v 24  \x - \xo 3:24 \xt 1 Jon 4:13\x*Ma nesi tikenong i taram ira nuno harkurai ila kis ter tane God ma ne God bileng ila kis ter tana. Ma dait nunure hohaam be ila kis ter ta dait? No Tanuo nong God te ter ie ta dait i hapalaine dait hobi.   
\c 4  
\s1 Dait na walar dong ing di tange be no tanuo tane God i hinawase di tari linge.  
\p
\v 1  \x - \xo 4:1 \xt Matiu 7:15; 1 Jon 2:18; 2 Jon 7; 1 Tesolonaika 5:21\x*Ira bilai na hinsaagu tane Krais, a haleng ira tangetus harabota di te hana harbasie tano ula hanuo. Io kaie, waak mu nurnur ta ira turadi bakut ing di tange be no Tanuo tane God i hinawase di tari linge. Iesene mu na walar di ura nunure be God i ter ra nianga ta di be pata.  
\v 2  \x - \xo 4:2 \xt 1 Korin 12:3\x*Ma i tale mu be mu na nes kilam baak no Tanuo tane God naramon ta tike turadi ta ira nuno nianga. Nesi tikenong i nurnur be Jisas Krais ga hanawat ukira ma ing be iga hanawat a turadi ie, ma i hinawas palai hobi, io, mu na nunure be no Tanuo metuma hone God i kis tana.  
\v 3  \x - \xo 4:3 \xt 1 Jon 2:18\x*Iesene nesi tikenong i harus leise Jisas hobi, io, no Tanuo metuma hone God paile kis tana. Pata. I hatur kawase mon no tanuo tano ebar tane Krais. Mu ga hadade be ira ebar tane Krais na hanawat. Ma tutuno, kakarek um di te hanawat ter kira ra ula hanuo.   
\p
\v 4  \x - \xo 4:4 \xt Matiu 12:29; 1 Jon 5:4-5\x*Ira natigu tane Krais, mu gar tane God, ma mu te bul hanapu kike ra mangana turadi tikai ma ira nudi harausur kinong ikino nong i kis ta mu i tamat tane Satan nong i kis tano ula hanuo.  
\v 5  \x - \xo 4:5 \xt Jon 8:47; 15:19\x*Di tano ula hanuo, io kaie, di ianga mekira ra ula hanuo ma no ula hanuo i taram di.  
\v 6 Dait gar tane God, ma nesi tikenong i nunure ter God na taram dait. Iesene nesi tikenong paile gar tane God pai nale taram dait. Horek ing dait na nes kilam ira turadi ing no Tanuo ta ira tutuno tane God i kis ta di, ma dong ing di hatur kawase ra tanuo na harakale.   
\s1 Dait na marse harbasiane dait kinong God ga huna marse dait.  
\p
\v 7 Ira bilai na hinsaagu tane Krais, i tahut be dait na marse harbasiane dait kinong no tintalen ura ter harmarsai, aie metuma hone God. Ma nesi tikenong i ter harmarsai, a natine God ie ma i nunure ter God.  
\v 8 Nesi tikenong paile ter ra harmarsai, paile nunure God kinong ira tintalen bakut tane God, a tintalen na harmarsai.  
\v 9  \x - \xo 4:9 \xt Jon 3:16\x*Ma ne God ga hamanis no nuno harmarsai uta dait horek: iga tule leise no nuno halhaaliena bulukasa ukira tano ula hanuo ura haalon dait.  
\v 10  \x - \xo 4:10 \xt Rom 5:8-10; 1 Jon 2:2\x*Ma a mangana linge so ikin ra tintalen na harmarsai? No surno paile horek, be dait te sip God. Pata. Iesene no surno be God ga sip dait gom marse dait, ma iga tule leise no Natine, a hartabar ie uta ira nudait sana tintalen ura hamane no ngalngaluan tane God.  
\v 11 Ira hinsaagu tane Krais, ing be God ga marse dait hobi, io, i takados be dait, dait na marse harbasiane dait.  
\v 12  \x - \xo 4:12 \xt Jon 1:18\x*Pata ta tikenong pai gale nes God. Pata. Sene be ing dait marse harbasiane dait, io, God ila kis ter ta dait ma no mangana harmarsai tane God te duk naramon ta dait.   
\p
\v 13  \x - \xo 4:13 \xt 2 Korin 1:22; 1 Jon 3:24\x*Dait nunure be dait la kis ter tana ma ila kis ter ta dait horek, kinong ite ter no Tanuana ta dait.  
\v 14 Ma ne Mama ga tule no Natine ukira be aie no ut na Haralon tano ula hanuo. Mem gate nes ikin ma mem hatutuno ie ma ira numem hininaawas ta mu.  
\v 15 Nesi tikenong i haut be Jisas aie no Natine God, io, God ila kis ter tana ma ila kis ter tane God.  
\v 16 Ma dait te kilingane ma dait nuruan no harmarsai tane God tupas dait.  
\p Ira tintalen bakut tane God, a tintalen na harmarsai. Ma nesi tikenong ila kis ter ta ikino mangana nilon ila kis ter tane God ma ne God la kis ter tana.  
\v 17 Io, dait na kis na balaraan tano bung na harkurai kinong dait hoke ne Krais kira ra ula hanuo. Ma ing be dait na kis na balaraan hobi i hamanis be i manga marse hababane dait ma dait manga sip hababane ie.  
\v 18 Ing dait sip ie hobi, ma aie bileng i sip dait, paile tale be dait na burut. Pata. Ing dait sip tutuno iat ie ma i sip tuno dait, ikino tintalen ila kapkap leise no bunurut. Io kaie, ing be tikenong i burut, ikin ra tintalen na sinisip paile duk ter tana kinong no bunurut i kis tikai ma ra harpadano.  
\v 19 Io, dait sip um ie kinong iga huna sip dait. Ma dait marse ira mes kinong iga huna marse dait.  
\v 20 Ma ing be tikenong na tange be, “Iou sip God,” sene be i malentakuane no hinsaana tane Krais, io, a ut na harakale ie. Ma i nanaas be a tutuno ikin kinong nesi tikenong paile marse ira mes na matanabar tane God ing ite nes ter di, io, paile tale be na sip God nong paile nes ie tike pana.  
\v 21  \x - \xo 4:21 \xt Mak 12:29-31\x*Ma dait hatur kawase ikin ra harkurai mekaia ho ie, be nesi tikenong i sip God na marse bileng no hinsaana tane Krais.   
\c 5  
\p
\v 1  \x - \xo 5:1 \xt 1 Jon 4:15\x*Nesi tikenong i nurnur be Jisas aie no Mesaia, io, a natine God ie. Ma i nanaas be nesi i sip no mama nuno tikenong na marse bileng no natine.  
\v 2 Dait nunure horek be dait marse ira natine God: dait sip God ma dait gil haruatne ira nuno harkurai.  
\v 3-4  \x - \xo 5:3-4 \xt Jon 14:15,23-24\x*Ma ing be dait taram ira nuno harkurai i hamanis be dait sip ie. Ma ira nuno harkurai pa dile tirih kinong ira natine God di haruat ura papaas hasur ira sana tintalen tano ula hanuo. Ma dait paas hasur ira sasana tano ula hanuo horek: dait nurnur ta ira tutuno God te hapuasne.   
\s1 Jisas aie no Natine God ma no nilon mekaia ho ie sene mon.  
\p
\v 5 Ma nesi nong i bul hanapu ira sana tintalen tano ula hanuo? Nong sene mon nong i nurnur be Jisas aie no Natine God.  
\v 6  \x - \xo 5:6 \xt Jon 1:29-34\x*Jisas Krais aie iat nong ga kap baptais ma iga mat ing iga hanawat ukira. Ing be iga hanawat ukira pai gale kap baptais sene mon. Pata. Iga kap baptais ma iga mat bileng. Ma no Halhaaliena Tanuo iat nong i hatutuno ikin ma no nuno hininaawas. Ma i hatutuno ie hobi kinong ila tangtange ra tutuno.  
\v 7-8  \x - \xo 5:7-8 \xt Jon 15:26\x*Io, aitul ing duhat hatutuno be Jisas aie no Natine God. Ma duhat horek: no Tanuo, no nuno baptais, ma no nuno minat. Ma duhat bakut duhat haut tikai.  
\v 9  \x - \xo 5:9 \xt Jon 5:32-37\x*Ma i nanaas be da haut leh no hininaawas ta tike turadi ing be i hatutuno tike linge. Iesene ing be God i hatutuno ikin ma no nuno hininaawas, io, no nuno hininaawas i manga tutuno tano hininaawas gar na turadi kinong no nuno hininaawas, no hininaawas tane God utano Natine.  
\v 10  \x - \xo 5:10 \xt Galesia 4:6\x*Nesi tikenong i nurnur tano Natine God i kap usurane ikin ra hininaawas. Nesi tikenong paile nurnur tane God i kilam God be a ut na harakale ie kinong paile nurnur tano hininaawas tane God ing God i hatutuno ira linge utano Natine.  
\v 11 Ma no hininaawas nong God te hatutuno ter ie ta dait, aie horek: God te tabar dait ma no nilon hathatikai ma ikin ra nilon mekaia hono Natine.  
\v 12  \x - \xo 5:12 \xt Jon 3:36\x*Nesi tikenong i hatur kawase no Natine i hatur kawase bileng no nilon. Ma nesi tikenong paile hatur kawase no Natine God paile hatur kawase no nilon.   
\s1 I tale be dait na nunure be dait hatur kawase ter no nilon hathatikai.  
\p
\v 13  \x - \xo 5:13 \xt Jon 20:31\x*Iou pakat kakarek ra linge ukaia ho mu ing mu nurnur tano hinsana no Natine God waing mu na nunure be mu hatur kawase ter no nilon hathatikai.  
\v 14  \x - \xo 5:14 \xt Jon 14:13; 1 Jon 3:21-22\x*Ma dait balaraan ter ra matmataan tane God kinong dait nunure ter be God i hadade dait ing be dait sasaring haruat tano nuno sinisip.  
\v 15 Ma ing be dait nunure hobi be i hadade ira nudait sinsaring bakut, io, dait nunure bileng be dait hatur kawase ira binabalu ta ira nudait sinsaring tupas ie.   
\p
\v 16  \x - \xo 5:16 \xt Matiu 12:31\x*Be tikenong i nes no hinsaana tane Krais i gil tike sasana ing paile haruat be na lamus ter ie tano minat, io, ina sasaring ma ne God na ter no nilon tana. Iou iangianga uta ira sana tintalen ing paile haruat be na lamus ter tikenong tano minat. Iesene a mangana sasana kanaia i haruat be na lamus ter tikenong tano minat. Iou paile tange be ina sasaring uta ikinong.  
\v 17 Ira tintalen bakut paile takados, a sana tintalen. Iesene ari mangana sasana paile haruat be na lamus ter tikenong tano minat.   
\p
\v 18  \x - \xo 5:18 \xt 1 Jon 3:9\x*Dait nunure ter be nesi a natine God ie, pai lale gilgil ra sana tintalen. Iesene no Natine God ila balbalaure timaan ie ma no Ut na Sasana paile tale be na hagae ie.  
\v 19 Ma dait nunure ter be dait gar tane God sene be no ula hanuo bakut i kis ter tano harkurai tano Ut na Sasana.  
\v 20 Ma dait nunure ter bileng be no Natine God te hanawat ukira ma ite hapalaine dait waing dait nage nunure ie, aie no God tutuno. Ma dait kis ter tana nong i tutuno. Ma ikinong, aie no Natine Jisas Krais. Aie no God tutuno ma aie no nilon hathatikai.  
\v 21 Ira natigu tane Krais, mu na kis pas ira god harabota.