\id COL - Hinsaal 
\h KOLOSE 
\toc3 Ko 
\toc1 No Pakpakat ta Pol tupas ira KOLOSE 
\toc2 Kolose 
\mt2 No Pakpakat ta Pol tupas ira  
\mt1 KOLOSE  
\ip I nanaas bia Pol ga kis ra hala na harpidinau kinas Rom ing ga pakat iakan ra pakpakat tupas diet ira Kolose tano hanua Esia (nas Apostolo 28.16-21). Ga pakat ira airua pakpakat tupas Pilimon ma ira Epesas ta iakano pakana bung mah. Pol pa ga so no lotu aras Kolose. I nanaas bia Epaparas ga hadadei no tahut na hinhinawas ta Pol kinas Epesas, gaam haan uras Kolose ma ga warawai kaia (Kolose 1.7-8 ma Apostolo 19.10). Pol ga pakat iakan ra pakpakat wara hatumarang diet ira Kolose ta ira tena hausur bisbis. Diet ga bisbis uta aring haleng na mangana linga. Diet ga bul hatamat aring mangana bung (Kolose 2.16) ma ira angelo (2.18). Diet ga nem bia ira tunatuna na kis manapu ta ira warkurai (2.21) ma no magingin na kut palatamaina tunatuna (2.11). Diet ga hatamat ira nudiet mangana lilik bia ia no mangana mintota i lam dahat tano nilon (2.4; 2.8; 2.18). Senbia Pol ga manga bul hatamat Karisito bia ia sena mon i haruat bia na halon ira tunatuna. Karisito no malalari ne Kalou (1.15). Karisito ga hakisi ira linga bakut (1.16). Karisito i balaurei ira linga bakut (1.17). Karisito no luena wara tuntunut hut talur ra minaat (1.18). Karisito i haruat ma Kalou (1.19; 2.9). Karisito na kap pukus ira linga bakut ukatika ta Kalou (1.20-22). Io hua, \bd Karisito i tamat ta ira linga bakut ma i manga haruat wara halhalon dahat,\bd* ma iakan no suruna ta iakan ra pakpakat.  
\c 1  
\p
\v 1-2 Iau Pol tiga apostolo ta Iesu Karisito haruat tano sinisip ta Kalou, ma Timoti no tasi dahat narako ta Karisito, mamir tulei ken ra nianga tupas muat ira mataniabar tus ta Kalou kaia Kolose, muat ira tena nurnur tano numuat kinkinis ta Karisito.  
\p A harmarsai ma ra malum tupas muat maram ta Kalou no adahat Sus.   
\s1 Pol ga tanga tahut ma ga sasaring  
\p
\v 3 Mamir la tangtanga tahut ta Kalou no Sus ana no nudahat Watong Iesu Karisito ing mamir la saasaring uta muat.  
\v 4-6 Mamir tanga tahut hua tana kanong mamir ta hadadei uta ira numuat nurnur ta Iesu Karisito ma uta ira numuat harmarsai tupas diet bakut ira mataniabar gar ta Kalou. Ma muat la harmarsai ma nurnur hua kanong muat kis kahai ira haridaan i kis tagura taar uta muat aram ra mawai. Ma muat gata hadadei tar uta kaikek ra haridaan ing no nianga tutun ga haan tupas muat, ia no tahut na hinhinawas. Iakan ra tahut na hinhinawas i la huhuai ma i la hanahaan kakari tano ula hanua bakut, hoing gata gil hua kaia nalamin ta muat tur lah tano luena bung muat ga hadadei ia ma muat ga palai ta ira tutun tano harmarsai ta Kalou.  
\v 7 Ma no numehet bilai na harhis Epaparas nong i tur tikai ma mehet tano pinapalim ma a bilai na tena pinapalim ia ta Karisito wara gaia muat, ia nong ga hausur muat uta iakan.  
\v 8 Ia nong ga hasasei mamir utano numuat magingin na harmarsai nong no Halhaliana Tanua i ta tabar muat ma ia.   
\p
\v 9 Kaiken ra linga, no burena bia pa mamir sangeh ma ra sinsaring wara uta muat tur lah tano bung mamir ga ser lah no hasahesa uta muat. Mamir la sarsaring Kalou bia na tabar muat ma ra tamat na mintota ta ira linga i haruat ma ira numuat nilon na tanua bia muat naga hung ma ra mintota utano nuna sinisip.  
\v 10-12 Ma mamir sasaring mah hua bia muat naga lon hoing i sip bia muat na lon hua ma bia ta ira linga bakut ing muat la gilgil muat naga haguama ia hoken: na mon hunuena ta ira numuat bilai na gingilaan bakut, muat na tahtahuat hanahaan ta ira numuat mintota utana, muat na kap ira dadas bakut haruat ma no nuna tamat na dadas sakit bia muat naga tur dadas ma pa muat na ngarau ta ira tirtirih, ma bia muat na tanga tahut tano adahat Sus ma ra gungunuama nong i ta harahut muat bia muat naga tale bia muat na kap no pinlawe muat tikai ma ira mataniabar tus ta Kalou ing diet kis taar tano madaraas.  
\v 13 Ma ia nong ga halon dahat talur no nudahat kinkinis manapu tano warkurai tano kankado ma ga hamaren dahat taar manapu tano bilai na warkurai tano Natina nong i manga sip ia.  
\v 14 Ma no Natina at nong ga kul halangalanga dahat ing ga lik luban sei ira nudahat magingin sakena.   
\s1 Karisito i tamat ta ira linga bakut  
\p
\v 15 Ma ia no malalari ne Kalou nong pa di la nasnas ia. Ia hoing no luena bulu kanong no nuna kinkinis i tamat sakit ta ira linga bakut ing Kalou ga hakisi.  
\v 16 Ma no nuna kinkinis i manga tamat hua kanong Kalou ga hakisi ira linga bakut ma no lima Karisito, ira linga aram ra mawai ma kai tano pisa, ira linga di nas ma ing pa di la nasnas, ma ira mangana tanua hokaiken: ira lualua ma diet ing diet manga dadas ma diet ing diet la warkurai. Diet bakut kaiken, Kalou ga hakisi diet ma no lima Karisito ma wara hatamat ia.  
\v 17 Karisito at ga kis manaluai ta ira linga bakut ma diet bakut diet kis timaan taar manapu tano nuna harbalaurai.  
\v 18 Ia no tamat na lualua ta ira mataniabar na lotu, ma diet no palatamaina. Ia no burena ta ira nudiet nilon kanong ia no luena wara tuntunut hut talur ra minaat, ma ga luena tut hut hua waing naga tamat sakit ta ira linga bakut.  
\v 19 Karisito i ngan hua kanong Kalou ga guama bia Karisito na hung ma ira bilai na linga bakut ing Kalou i la hung taar manei.  
\v 20 Ma tano pinapalim tano Natina, Kalou ga sip bia na kap pukus ira linga bakut balin ukaia hoing ia. Ga bul ra malum ma no gapi ne Karisito aram ra ula kabai, hua gaam kap pukus habal ira linga bakut, ira linga kai tano pisa ma aram mah ra mawai.   
\p
\v 21 Naluai muat ga kis sisingen talur Kalou. Muat ga malentakuanei ia ma muat git gilgil ira magingin sakena.  
\v 22 Senbia kaiken Kalou i ta hamaraam lah muat ukaia hoing ia ma no minaat tano palatamai Karisito waing naga hatur muat ra matmataan tana ma muat na gamgamatien ma na taia um ta bilinga bia ta sakena ta muat.  
\v 23 Ma i tale bia muat na tur taar hua ing bia muat na manga tur dadas taar tano numuat nurnur tano tahut na hinhinawas ma ing bia pa muat na kakari talur no numuat nanaho ma ra nurnur uta ira linga muat ga hadadei tano tahut na hinhinawas. Ma iakan ra tahut na hinhinawas at nong di ga warawai ma ia tupas ira mataniabar kai ra ula hanua. Ma iau Pol, iau tiga tultulai ta iakano tahut na hinhinawas.   
\s1 Pol ga manga papalim dadas wara gaia diet ira mataniabar na lotu  
\p
\v 24 Ma iau guama kaiken uta ira ngunngutaan i ubal iau wara gaia muat. Ma iau puspusak kaiken ra ngunungut tano palatamaigu wara haphapataam ira ngunngutaan ta Karisito ing i kis taar baa. Ma iau la puspusak hua wara utano palatamaina, muat ira mataniabar na lotu.  
\v 25 Iau ta kap no pinapalim na harharahut uta muat ira mataniabar na lotu kanong Kalou ga tar no nuna pinapalim tagu bia ena gil ia haruat ma no nuna lilik wara hatahutnei muat ing iau ga hasasei muat ta ira nuna nianga bakut.  
\v 26 Ma iakan ra nianga nong ga susuhai ta ira tunatuna ta ira tintinahon manaluai ma senbia i ta hapuasnei um ta ira nuna mataniabar tus kaiken.  
\v 27 Kalou ga sip bia na hapalainei diet bia iakano linga nong ga susuhai na manga haidanei timaan diet ing pai Iudeia diet. Ma no suruna ta iakano linga nong ga susuhai, ia hoken, bia Karisito i kis taar ta muat, hua muat naga nanaho ma ra nurnur bia muat na laka tano tamat na minarina.  
\v 28 Ma mehet la warawai uta Karisito ta ira mangana tunatuna bakut. Mehet hausur diet ma mehet hatumarang diet ma ra tamat na mintota sakit waing diet bakut diet naga bilai sakit tano nudiet kinkinis narako ta Karisito ing mehet lam tar diet ra matmataan ta Kalou.  
\v 29 Ma iakanong no burena bia iau papalim dadas. Iau manga dadas haruat ma no nuna tamat na dadas ing i la manga harharahut iau ma ia bia ena gil hua.   
\c 2  
\p
\v 1 Ma iau sip bia muat na palai bia iau manga papalim dadas wara uta muat ma uta diet mah kinas Laudisia ma uta diet bakut mah ing pa diet nas baa iau.  
\v 2 Iau papalim dadas hua bia ena haragat ira bala diet ma bia diet na tikai mon tano nudiet harmarsai hargilaas waing diet naga hung ma ira tamat na mintota bakut, hua diet naga nunurei iakano tutun nong Kalou ga suhai ia, ma ia ne Karisito iat.  
\v 3 Ma ira mangana mintota bakut i kis susuhai taar ta Karisito hoing tiga bilai na bunbulaan.  
\v 4 Iau tangai kaiken ra linga ta muat kanong kaba ta tikai gi lam habisbis lah muat ma no nuna keskes na nianga.  
\v 5 A tutun bia no palatamaigu pai kis tikai taar ma muat kaiken. Senbia no tanuagu i kis tikai taar ma muat ma iau guama ing iau nunurei lah bia i takodas ira numuat magingin ma bia ira numuat nurnur i tur dadas taar ta Karisito.   
\s1 Dahat langalanga talur ira warkurai gar na tunatuna mon  
\p
\v 6 Io hua, hoing muat ta hatur kahai Iesu Karisito bia ia no Watong, i tahut bia muat na lonlon haruat ma no numuat kinkinis tana.  
\v 7 Muat na tur dadas taar tana, hoing tiga dahai i tur dadas tano pisa, ma hoing tiga hala i tur dadas naliu ra dadas na kasong. Muat na tur dadas taar ta ira linga muat ta nurnur tanai hoing di ga hausur tar muat hua. Ma muat na manga hung sakit ma no magingin na tanga tahut tupas Kalou.   
\p
\v 8 Muat na harbalaurai timaan kaba ta tikai gi lam habisbis muat taar tano nuna pabona lilik, naga his kahai muat. Kaikek ra mangana lilik i tahuat ta ira hausur ta ira tunatuna mon. I tahuat ta ira mintota mon makai napu ma pataia bia ta Karisito.   
\p
\v 9 Muat na harbalaurai timaan hua kanong, ira bilai na linga bakut ing Kalou i la hung taar manei i kis taar ta Karisito nong ga hanuat tunatuna.  
\v 10 Ma Kalou i ta hakidilona muat tano numuat kinkinis ta Karisito, ia nong i tamat sakit ta ira tanua ing diet la warkurai taar, ma ira mes na lualua mah.  
\v 11 Tano numuat kinkinis ta Karisito i ngan hoing bia Karisito ga mur no magingin na kutkut sei tiga sibaan ta ira palatamai muat. Iasen pataia bia hoing ira tunatuna mon diet la gilgil ma ira lima diet. Taia. Karisito iat ga kap sei no dadas makai napu maram narako ta ira numuat nilon.  
\v 12 Ma Kalou ga bus muat tikai ma ia ing di ga bapitaiso muat. Ma tano numuat nurnur tano dadas ta Kalou nong ga hatut Karisito talur ra minaat, Kalou ga hatut pakur muat ma ia.  
\v 13-14 Naluai muat gata maat taar ing muat ga gil ira sakana magingin ma ing iakano dadas makai napu ga kis taar baa ta ira numuat nilon. Senbia Kalou ga halon tikanei muat ma Karisito. Ga lik luban sei ira nudahat sakana magingin hoken, ing ga pun sei no pakpakat nong i tahuat laah ta ira warkurai, iakano pakpakat nong i tangai haminis bia a mon ronga kana ta dahat ing i tale bia dahat na hirua uranai kanong pa dahat mur kaikek ra warkurai, ma ira warkurai at diet ga wara halhaliarei dahat. Ga kap sei no dadas ta iakan ra pakpakat ing ga lau tar no pakpakat taar tano ula kabai.  
\v 15 Ing Kalou gata kap sei ira dadas ta ira tanua ing diet la warkurai taar ma ira mes na lualua mah, ga bul haminis ra matmataan na haruat bia pataia um a nudiet ta dadas gaam paas hasur diet ma no pinapalim tano ula kabai ma hoing tiga tamat na umri ga lamlam hani diet hoing ira nuna hirua.   
\p
\v 16 Waak muat haut lah tikai bia na kurei muat uta ira sa ing i bilai bia muat na ien ma bia muat na mamai. Ma hua mah ta ira tamat na bung na lotu, bia a sigara teka, bia no Bung na Sinangeh.  
\v 17 Diet bakut kaikek ra magingin diet haruat ma ra malalar mon uta ira linga ing ga wara hinanuat. Senbia ira linga tutun uranai, dahat nas lah ta Karisito.  
\v 18 Ma aring diet harbabo bia diet manga nem bia a matien na tunatuna diet, ma diet lotu tupas ira angelo, ma diet manga hinhinawas uta ira nudiet mangana ninaas na tanua. Iasen waak muat tartaram lah diet bia diet na kurei muat uta ira sa i bilai ing muat nem bia muat na gil. Ira nudiet sakana lilik mon i hatamat habalin diet ma pataia ta burena bia diet na gil hua.  
\v 19 Ira mangana tunatuna hua diet ta tamakutus laah talur Karisito, ia no walina ta dahat no palatamaina. Ia nong i la balaurei timaan tar no kidilona palatamaina bia no tamaina na kap ra dadas ma na harpasum timaan ma no harharahut ta ira lalas na harpasum, ma bia na tahuat hoing Kalou i sip bia na tahuat hua.   
\p
\v 20-21 Muat ta maat tikai ma ne Karisito ma muat langalanga talur no mangana mintota makai napu. Io hua, wara biha muat lonlon hoing bia gar tano ula hanua a baa muat? Wara biha muat la bulbul habalin muat manapu ta ira warkurai? Kaikek ra warkurai i tangai bia, “Waak muat palim! Waak muat namianei! Waak muat sigirei!”  
\v 22 Diet bakut kaiken ra linga, diet na panim laah ing dahat papalim manei bia dahat ien bia dahat gil sa mah manei. Waak muat murmur kaiken ra mangana warkurai kanong i tahuat ta ira hartulai ma ira hausur ta ira tunatuna mon.  
\v 23 A tutun, aring diet lik bia a mon mintota ta diet ing bia diet mur kaiken ra warkurai ing i tangai bia i tahut bia tikai na mamahien no balana wara gil lotu, bia na bul hanapu habalin ia, bia na kurei hadadas no palatamaina. Senbia pataia. Kaiken ra magingin pai harahut ta dahina wara turtur bat ira sakana nemnem.   
\c 3  
\s1 Dahat na sigam ira tahut na sigara magingin  
\p
\v 1 Io hua, i tahut bia ira kati muat na mur ira linga maram naliu kaia tane Karisito ing i kis taar kaia tano tamat na kinkinis tano sot na lima Kalou, kanong Kalou i ta hatut pakur muat ma Karisito.  
\v 2 Muat na hatur ira numuat lilik ta ira linga maram naliu, ma pataia bia ta ira linga makai tano ula hanua.  
\v 3 Kanong warah, muat gata maat, ma ira numuat mangana nilon kaiken i kis susuhai tikai ma ne Karisito ra matmataan ta Kalou.  
\v 4 Ma bia Karisito nong no burena tano numuat nilon na hanuat puasa, io, ta iakano pakana bung muat mah, muat na hanuat puasa tikai ma ia ma ra tamat na minamar.   
\p
\v 5 Io hua, i tahut bia muat na bing sasei ira numuat mangana tintalen gar ta iakan ra ula hanua. Muat na bing sei ira magingin na hilawai ma ira bilingana magingin ma kaikek ra mangana masmasingan, ira sakana nemnem ma no magingin na mangaha ta ira linga gar na mesa. Ma iakano magingin na mangaha i haruat ma no magingin na lotu tupas ira palimpua.  
\v 6 Kaiken ra mangana magingin no burena bia no ngalngaluan ta Kalou na puka burung diet ira mangana tunatuna hua.\f + \fr 3.6 \ft Ari tuarena pakpakat diet tangai balik hoken: \+qt Kaiken ra mangana magingin no burena bia no ngalngaluan ta Kalou na puka burung ira tabuna taram nianga.\+qt* \f*  
\v 7 Muat mah, muat git tatalen hua ta ira numuat ngaas na nilon ing muat ga lon hua naluai.  
\v 8 Senbia kaiken i tahut bia muat na kap sei kaiken ra tintalen bakut talur muat. Muat na kap sei ira mangana ngalngaluan ma no sinisip wara hangungut ira mesa, no magingin na tangtangai hagawai tikai, ma muat na bul sei ira nianga na harhuli talur ira ha muat.  
\v 9 Waak muat bisbis harbasianei muat kanong muat ta kap sei ira numuat tuarena nilon tikai ma ira nuna tintalen,  
\v 10 ma muat ta sigam no sigara nilon nong Kalou i sala hashasigarina ia hoing tiga malalari ne Kalou at nong ga hakisi iakano nilon. Ma i sala hashasigarina ia hua waing muat naga nunurei timaan ia.  
\v 11 Ma ta iakan ra sigara nilon, ira Iudeia ma diet ing pai Iudeia diet, diet haruat mon. Diet ing di ga kut sei ira palatamai diet, ma diet ing pa di ga kut sei, diet haruat mah. Ma i ngan hua mah ta ira tultulai ma diet ing pai tultulai diet. Ma bia da nas hanapu uga kanong uga ma tapaka ma a mesa uga, taia ta linga. No tamat na linga, Karisito sena mon, ma bia i kis ta dahat bakut.   
\p
\v 12 Muat ira tunatuna ing Kalou gata pilak muat, ma muat ira halhaliana tunatuna ing Kalou i sip muat. Io hua, i tahut bia muat na sigam no magingin na bala marmaris uta ira tinirih i ubal ira mesa, ma no magingin na gilgil ra tahut ta ira mesa mah. Muat na bul hanapu habalin muat, ma muat na lon hoing ira matien na tunatuna, ma pa muat na ngalngaluan gasien.  
\v 13 Muat na balak ira mesa ing diet gil harango muat ma muat na lik luban sei harbasianei ta muat ira linga muat kilinganei bia di hagawai muat manei. Hoing no Watong ga lik luban sei ira numuat sakena, muat mah muat na gil hua.  
\v 14 Ma no magingin na harmarsai, muat na sigam ia naliu ta kaiken ra tintalen bakut. No magingin na harmarsai, ia nong i his tikanei diet bakut bia diet na kapawena tutun at tano nudiet tuntunur tikai.   
\p
\v 15 I tahut bia no malum ta Karisito na kurei ira numuat nilon. Hokaiken, Kalou ga tatau muat tano numuat kinkinis na tuntunur tikai bia muat na kis ma ra malum harbasiai ta muat. Ma muat na tangtanga tahut tupas ia.  
\v 16 I tahut bia no nianga ta Karisito na manga kis dadas ta ira bala muat. Hua, muat naga hausur ma muat na pir hargilasanei muat ma ira mintota bakut ma ira mangana halhaliana nirudu mah. Ma ing bia muat na rudu hua, muat na tanga tahut uram ta Kalou maram narako ta ira bala muat.  
\v 17 Ma asa ing muat tangai ma asa ing muat gil, muat na gil hoing i takodas bia nong i mur no Watong Iesu na tatalen hua. Ma ing muat lonlon hua, i tahut bia tano numuat kinkinis ta Karisito, muat na tanga tahut ta Kalou no adahat Sus.   
\s1 Ira haratamaan diet na tatalen hoeh  
\p
\v 18 Muat ira hahina, muat na hanapu habalin muat manapu ta ira numuat tunaan kanong iakan tiga takodasiana magingin haruat ma no numuat kinkinis narako tano Watong.   
\p
\v 19 Muat ira tunaan, muat na manga marsei ira numuat hahina ma waak muat bala ngungut taar ta diet.   
\p
\v 20 Muat ira bulu ma ira hinasik, muat na taram ta ira amuat sus ma ira puasi muat ta ira mangana linga bakut kanong iakan ra magingin i haguama no Watong.   
\p
\v 21 Muat ira tata, waak muat hamalmalaas ira nati muat, kaba diet gi kalalai ira numuat hartulai.   
\s1 Ira tultulai ma ira nudiet tamat  
\p
\v 22 Muat ira maris na tultulai, muat na taram ta ira numuat tamat makai napu ta ira linga bakut. Waak muat taram ta diet tano pakana bung sena mon ing diet ngok taar ta muat bia diet naga guama. Taia. Muat na taram ta diet ma ra tutun na bala muat tano numuat tamat na urur tupas no Watong.  
\v 23 Ma asa ing muat gil, muat na gil ia ma no numuat dadas bakut hoing bia muat gilgil ia tupas no Watong, ma pataia bia tupas ira tunatuna mon.  
\v 24 Ma i tahut bia muat na gil hua kanong muat nunurei bia muat na hatur kahai iakano pinlawe muat maram tano Watong hoing ra hunuena no numuat mangason. Io, Karisito no Watong nong muat papalim utana.  
\v 25 Siga tikai nong i gil sakena na kap ra harkul haruat ma no nuna sakena. Kalou na tar ra takodasiana harkul. Pa na habilainei tikai ma na hagawai bia tiga mesa.   
\c 4  
\p
\v 1 Ma muat ira tamat, muat na tar ta ira numuat tultulai ing i takodas ma i tahut. Muat nunurei tar bia numuat mah tiga Tamat ia kinam ra mawai.   
\s1 Dahat na worwor tikai hoeh ma ira tabuna nurnur  
\p
\v 2 Io, ma muat na balaan ma ra sinsaring. Ma bia muat na sasaring, i tahut bia muat na tagura timaan ma muat na tangtanga tahut tupas Kalou.  
\v 3 Muat na sasaring uta mehet mah, bia Kalou na papos no matanangas ta ira numehet hinarpir waing mehet naga hasahesa utano linga nong ga susuhai narako ta Karisito. Ma iau ta kis tano hinihis wara gaiana iakano tahut na hinhinawas.  
\v 4 Muat na sasaring bia iau na tale bia ni hapalainei timaan ia hoing i tahut bia iau na gil hua.   
\p
\v 5 Muat na mintota panei ira numuat magingin tupas diet ing pa diet nurnur. Muat na gil ira bilai hokaiken ta ira pakana bung bia i tale bia muat na gil hua.  
\v 6 I tahut bia ira numuat winor tikai ma diet na hung ma ra nianga ing i bilai ma i namnamien waing muat naga nunurei bia muat na balu diet tikatikai hoeh.   
\s1 Pol ga tula harkaro  
\p
\v 7 Io, ma no bilai na tasi dahat Tikikus na hasasei muat ta ira linga bakut utagu. I tur tikai ma iau tano pinapalim tano Watong ma a bilai na tena pinapalim ia.  
\v 8 No burena tutun bia iau wara tultulei ia ukai ta muat, bia naga hasasei hapalainei muat bia no numehet nilon i ngan hoeh ma bia naga haragat ira bala muat.  
\v 9 Dir na tikai huat ma ne Onesimus no bilai na tasi dahat. A tutun na tunatuna ia ma ia iat tikai ta muat makaia. Dir na hasasei muat ta ira mangana linga bakut i hanuat ta mehet kai.   
\p
\v 10 Aristarkus nong i kis tikai ma iau kai ra hinhisaan i karo lah muat. Hua mah ne Mak, no tasi Banabas. (Muat ta hadadei ra hinhinawas utana ma ing bia na hanuat ukai ta muat, muat na balak lah ia.)  
\v 11 Iesu nong di kilam mah ia bia Jastus i tula harkaro mah ta muat. Dal sena mon kaikek ing a Iudeia dal nalamin ta diet ing diet tur tikai ma iau tano pinapalim utano matanitu ta Kalou. Ma dal ta manga hamaraam um iau.  
\v 12 Epaparas nong ia mah tikai ta muat ma a tultulai ia ta Iesu Karisito, i karo mah muat. I la saasaring hait uta muat ma ra tamat na dadas bia muat na patpatuan ma muat na manga palai ta ira sinisip ta Kalou.  
\v 13 I papalim dadas wara uta muat ma uta diet mah kaia Laudisia ma Hirapolis. Ma i tale bia ena tangai hua ta muat kanong iau nunurei tar bia i tutun.  
\v 14 Luk no tena harulai, no bilai na tura mehet, dir ma ne Demas, dir tula harkaro mah ta muat.  
\v 15 Muat na tar no nugu harkaro ta ira tasi dahat narako ta Karisito kaia Laudisia. Ma tupas mah ne Nimpa ma ira mataniabar ing diet kis hulungai wara lotu kaia ra nuna hala.   
\p
\v 16 Ing bia di ta was tar iakan ra pakpakat ra matmataan ta muat, i tahut bia muat na lik lah bia da was mah ia ta ira mataniabar na lotu kaia Laudisia. Ma muat na lik lah mah bia muat na was no pakpakat makaia Laudisia.   
\p
\v 17 Muat na tangai ta Arkipus bia, “U na harbalaurai timaan ing u naga gil haruatanei no pinapalim u ga kap lah ia tano num kinkinis narako tano Watong.”  
\v 18 Iau Pol, iau pakat iakan ra harkaro ma no limagu at. I tahut bia muat na lik kahai ira agu hinihis. A harmarsai tupas muat.