\id 1PE - Hinsaal \h 1 PITA \toc3 1 Pt \toc1 No Luena Pakpakat ta PITA \toc2 1 Pita \mt1 No Luena \mt2 Pakpakat ta \mt1 PITA \ip Pita ga pakat iakan ra pakpakat maras ‘Babilon’ (nas 1 Pita 5.13). Aring diet lik bia Pita ga kis aras Babilon tutun tano hanua Mesopotemia. Aring diet lik bia Pita ga kilam ‘Babilon’ hoing tiga nianga harharuat ta tiga sakana taman ma ga kis tutun aras Rom bia Ierusalem. Ga tulei no pakpakat tupas diet ing diet ga lon harbasiai ta aring hanua (1.1) ing ga dadas ira nilon ta ira Kristian kaia. Pita ga nem bia na haragat ira Kristian ing ira tena sakena diet ga manga hagawai ta diet (1.6; 2.18-26; 3.13-17; 4.6-19). Pita ga tangai bia kaiken ra tinirih i la umubal dahat wara walawalar ira nudahat nurnur bia na haminis bia ira nudahat nurnur i tutun (1.6-7). 1 Pita i la harharagat dahat bia dahat na mur ira bilai na tintalen ta Iesu nong ga kap ra ngunngutaan mah hua (2.21-24; 3.18) ma nong na tapukus balin wara uta dahat (1.3-5; 1.13; 4.7). Dahat ira mataniabar tus ta Kalou (2.9-10) hua \bd i tahut bia dahat na lon hua ma ira bilai na magingin nalamin ta kaiken ra tinirih ma dahat na tur dadas tano nudahat nurnur.\bd* Iakan no suruna ta iakan ra pakpakat. \c 1 \p \v 1-2 Iau Pita tiga apostolo ta Iesu Karisito, iau pakat iakan ra nianga ukaia ta muat ing muat lon harbasiai hoing ira hasira kaia ta ira kaba hanua Pontas ma Galesia ma Kapadosia ma Esia ma Bitinia. Iau pakat iakan ra nianga tupas muat ing Kalou no adahat Sus gata pilak laah muat haruat ma no nuna lilik manaluai. Ma Kalou ga luena bul no nuna lilik manaluai wara nunurei um muat. Ga pilak muat ma no pinapalim tano Tanua ing no Tanua ga bul hasisingen muat bia muat naga gamgamatien. Ma ga pilak muat waing muat na taram Iesu Karisito ma bia Iesu na sapur hagamgamatien muat ma no gapina. \p Iau sasaring bia muat na hung tutun at ma ra harmarsai tikai ma ra malum. \s1 Dahat na tinanei ra harhalon nong pa na panim laah \p \v 3 A pirharlat uram tupas Kalou. Ia no God ma no Sus ana no nudahat Watong Iesu Karisito. Ga manga marsei dahat hua gaam tar ra sigara nilon ta dahat bia dahat naga kis kahai ma ra nurnur uta ira bilai na linga na tabar dahat manei. Ma kaiken ra linga na kis hatikai. Ma ga tale bia na tar ra sigara nilon ta dahat kanong Iesu Karisito ga taman tut hut sukun ra minaat. \v 4-5 Kalou ga marsei dahat hua bia dahat naga kap kaiken ra bilai na linga wara nudahat at. Kaiken ra linga pa na panim laah ma pa na marota. Ma Kalou i ta bul hakabet timaan kaiken ra linga aram ra mawai wara uta muat ing Kalou i balbalaurei bat muat bia pa muat na hirua. Tano numuat nurnur, hua gi balaurei bat muat hoken ing muat naga kap no harhalon. Ma iakan ra harhalon i tagura taar bia na hanuat palai tano mutuaina pakana bung. \p \v 6 Io hua, muat manga guama sukmaal bia kaiken ma namur ta dahina i nanaas bia aring kaba mangana walawalar na umubal muat. \v 7 Kaiken ra walawalar i haan tupas muat wara haminis bia ira numuat nurnur i tutuna. Ma di la walwalar gol mah hua. Di la bulbul ia narako tano iaah wara hamhaminis no bilbilai tana. Ma sen i tale bia gol na panim laah ma no matana no nurnur tutun i luai tano matana no gol. Hoken, ira walawalar na haan tupas muat bia ira numuat nurnur naga tur dadas. Io hua, ing Iesu Karisito na puasa, na pirlat muat ma na hamar muat ma na hatamat muat. \v 8 Pa muat nas baa ia, senbia muat sip ia. Ma kaiken mah pa muat nas ia ma sen muat nurnur tana. Io hua, muat manga hung ma ra bilai na gungunuama sakit ing pai tale bia da hasahesa tanei. \v 9 Ma muat guama hua kanong muat hatur kahai no harhalon, ia no hunena no numuat nurnur. \p \v 10 Ma ira poropet ing diet git iangianga utano harmarsai nong na haan tupas muat, diet git manga walawalar wara ninaas uta iakan ra harhalon at. \v 11 No Tanua ta Karisito narako ta diet git tangtangai haminis ira linga uta Karisito, gaam luena hinawas bia Karisito na kap ra ngunngutaan ma bia na kap ira nuna minamar namur. Diet git walawalar bia diet na nunurei iakan ra pakana bung ma bia kaiken ra linga na hanuat hoeh. \v 12 Kalou ga hapuasnei ta diet bia pa diet ga iangianga na poropet uta kaikek wara uta diet at. Taia. Diet ga tangtangai kaikek wara uta muat. Ma diet ing diet ga ianga ta muat ma no tahut na hinhinawas narako tano dadas tano Halhaliana Tanua Kalou ga tulei ia maram ra mawai, diet ga hasasei muat uta kaiken ra linga at. Ma kaiken ra linga ira linga ing ira angelo diet sip bia diet na nunurei. \s1 Dahat na gamgamatien talur ira sakena \p \v 13 Io hua, muat na kurei ira numuat lilik bia muat na tagura wara nilon timaan. I tahut bia na palai ira numuat lilik. Waak muat kis kahai ira linga bia. Muat na nanaho sen mon ma ra nurnur tano harmarsai nong Iesu Karisito na kap hahuat taar ia ta muat ing na hanuat puasa. \v 14 Naluai pa muat ga palai ma muat git murmur ira numuat sakana sinisip. Ma sen kaiken muat ira tena taram nianga, hua waak muat tartaram lah kaikek ra tuarena nemnem bia na kurei muat. \v 15 Kalou nong ga tatau muat i gamgamatien. Io, i tahut bia ta ira numuat magingin, muat a mah, muat na gamgamatien talur ira sakena haruat ma ia. \v 16 Kanong warah, no nianga ta Kalou di ga pakat ia i tangai hoken: \qt “I tahut bia muat na gamgamatien talur ira sakena kanong ia i gamgamatien.”\qt* \p \v 17 Ma bia muat sasaring tupas Kalou, muat kilam ia bia Mama. Ia nong i kurei ira mataniabar. Ma no nuna warkurai i takodas. Pa na kurei hagawai tikai ma pa na harahut bia tiga mesa. Taia. Na kurei ira tunatuna haruat ma ira nudiet magingin. Io hua, i tahut bia muat na lon ma ra tamat na bunurut tupas ia ing muat kis na hasira baa ta iakan ra ula hanua \v 18 kanong muat nunurei no kunkulaan nong Kalou ga tar wara kulkul halangalanga muat sukun ira numuat mangana nilon manaluai. Iakano nilon nong muat ga kap hausur laah ta ira hintubu muat ma pa ga tale bia na harahut muat ta dahina. Ma Kalou pa ga kul halangalanga muat ma ra linga hoing ra gol ma ra siliwa ing i tale bia na panim laah. Taia. \v 19 No kunkulaan ga tabi matana. Ia no gapi Karisito. Ia hoing tiga nat na sipsip na hartabar, pataia ta da sakena tana, i manga bilai sakit. \v 20 Manaluai tano hakhakisi tano ula hanua Kalou ga bul no nuna lilik bia na pilak ia. Senbia ta kaiken ira mutuaina pakana bung i ta hanuat puasa wara uta muat. \v 21 Ma muat, muat ira tena nurnur ta Kalou kanong muat haan tupas ia narako ta Karisito. Ma Kalou, ia nong ga hatut haut Karisito talur ra minaat ma ga tar ra minamar tana. Io hua, ira numuat nurnur i kis ta Kalou ma ira bilai na linga muat kis kahai ma ra nurnur i hanuat maram ta Kalou. \s1 Dahat na tar ra harmarsai hargilaas haruat \p \v 22 Io, muat ta taram ira tutun Kalou i ta hapuasnei, hua muat ta hagamgamatien ira numuat nilon wara tartar ra harmarsai tutun ta ira tasi muat gar ta Karisito. Muat ta gil um hua, io hua, i tahut bia muat na tar tutun at ra harmarsai harbasiai ta muat maram narako ta ira kati muat. \v 23 Kanong warah, muat ta kap ra sigara nilon. Pa muat kap no sigara nilon tano pat na dahai nong na marota. Taia. Muat ta kap ia ta nong pa na marota. Ma ia no nianga gar ta Kalou, a lilona ia ma pa na panim laah. \v 24 Ma i palai bia iakan i tutun kanong, \q1 “Ira tunatuna diet haruat ma ra hura, \q1 ma ira minarina no tunatuna i haruat ma no lamarina no hura. \q1 No hura na mahiawa, \q1 ma no lamarina na puka laah. \q1 \v 25 Senbia no nianga gar tano Watong na kis hatikai.” \m Ma iakan ra nianga, ia nong di ga warawai taar ta muat ma ia. \c 2 \p \v 1 Io hua, i tahut bia muat na kap sei ira mangana magingin na hangungut tikai ma ira kaba bisbis bakut. Kap sei mah no harbabo, ira lilik sakasaka, ma ira kaba nianga na hanghagawai. \v 2 Hoing ira sigara bulu diet manga nem ira palona sus, i tahut bia muat mah muat na sip no nianga ta Kalou waing muat naga patpatuan narako ta ira numuat nilon Kalou i ta halon muat manei. \v 3 Ma i tahut bia muat na gil hua kanong muat ta namianei um bia no Watong i tahut. \p \v 4 Ma bia muat haan tupas no Watong, muat haan tupas ia hoing bia ia tiga lilona haat. Ira tunatuna diet ga mola sei ia, senbia Kalou ga nas kilam ia bia a tabi matana gaam pilak ia. \v 5 Ma bia muat haan tupas ia hua, muat hoing ira lilona haat mah. Ma Kalou i la paapalim ma muat wara pakpakilei tiga hala ma ira tanua muat waing muat naga papalim hoing ira halhaliana pris. Muat la tartar ra hartabar tupas ia maram narako ta ira tanua muat. Ma Kalou i taram lah kaiken ra hartabar kanong muat narako ta Iesu Karisito. \v 6 Ma i palai bia iakan i tutun kanong no nianga ta Kalou di ga pakat ia i tangai hoken, \q1 “Nas baa! Iau ta pilak lah tiga haat ing a tabi matana. \q1 Ma iau hakuban ia kaia Saion ma ia no dadas na burena tano hala. \q1 Siga tikai i nurnur tana pa na kis ta ra hirhir.” \m \v 7 Iakan ra haat na manga harahut muat ing muat nurnur. Senbia uta diet ing pa diet nurnur, i tangai hoken, \q1 “No haat nong ira tena gil hala diet ga sura sei ia kanong diet ga lik bia a linga bia ia, \q1 i nanaas taar bia ia balik um no bilai na burena tano hala bakut.” \m \v 8 Ma i tangai mah bia, \q1 “Iakan ra haat ing i sua taar, ira tunatuna diet tukai diet tana. \q1 Diet kap tubak diet tana.” \m Diet tukai diet kanong diet malentak tano nianga gar ta Kalou. Ma Kalou ga hakilang at bia na ngan hua ta diet. \v 9 Senbia muat tiga huntunaan nong Kalou i ta gilimis. Muat ira pris tano nudahat King. Muat ira gamgamatien na mataniabar ing Kalou i ta bul hasisingen wara nuna at waing muat naga hinawas palai ta ira kaba bilai na pinapalim ta nong ga tatau laah muat talur ra kankado ukaia taar tano nuna bilai na madaraas sakit. \v 10 Naluai pa muat ga mataniabar gar ta Kalou. Senbia kaiken muat ira nuna mataniabar um. Naluai pa muat ga kis ta ra harmarsai. Senbia kaiken um muat ta kis tano nuna harmarsai. \s1 Dahat na hanapu dahat \p \v 11 Io, iau haragat muat, ira nugu bilai na harhis ing muat kis na hasira kai, bia muat na tur sisingen laah ta ira sakana nemnem ing diet la harharubu ma muat narako ta ira numuat nilon. \v 12 Ma i tutun bia ira tabuna nurnur diet la taktakun muat bia muat gil ira sakana magingin. Senbia i tahut bia muat na gil ira bilai na magingin nalamin ta diet ing diet naga nas ira numuat bilai na tintalen ma diet naga pirlat Kalou tano nuna bung na hinanuat \p \v 13 I tahut bia muat na hanapu muat ta ira lualua bakut kai napu kanong no Watong i sip bia muat na lon hua. Muat na hanapu muat tano king kai napu nong i tamat ta ira mes na lualua. \v 14 Ma ta diet ira mes na lualua ing diet hansik dahina tano tamat nong i tar warkurai ta diet wara haphapidinau ing diet gil sakena ma wara pirpirlat diet ing diet gil ra tahut, io, muat na hanapu habalin muat ta diet mah. \v 15 Muat na gil hua kanong Kalou i sip bia muat na gil ra bilai na magingin, hua muat naga tur bat ira nianga bia ta ira sakbatbat. \v 16 I tahut bia muat na lon hoing ira tunatuna ing diet langalanga talur ira warkurai. Senbia waak muat tangai bia muat langalanga hua, kaikek a linga bia mon bia muat gil ra sakena. Taia. Muat na lon hoing ira tultulai napu tano warkurai ta Kalou. \v 17 Muat na ruu ira tunatuna bakut. Muat na tar ra harmarsai ta ira tasi muat ta Karisito. Muat na manga urur ta Kalou. Ma muat na ruu nong i kap no kinkinis na tamat na lualua na gil warkurai kai napu. \p \v 18 Io, muat ira tultulai i tahut bia muat na hanapu muat ta ira numuat watong ma ra tamat na wariru. Waak bia muat gil hua ta diet sen mon ing diet tar ra harmarsai ma diet tahut ma muat. Muat na gil mah hua ta ing diet hagawai muat. \v 19 Ing bia tikai pai gil tiga sakena ma sen i guama bia na pusak ra ngunungut kanong i palai bia no sinisip ta Kalou ia hua, io, iakano mangana tintalen i haguama Kalou. \v 20 Ing bia di bu tikai kanong i ta gil ra sakena, muat lik bia da pirlat ia? Taia. Iasen ing bia di hangungut tikai uta ira nuna bilai na magingin ma i guama bia na pusak iakano tinirih io, iakano tintalen i haguama Kalou. \v 21 Kalou ga tatau muat bia muat na lon hua. Kanong warah? Karisito ga kilinganei ra ngunungut wara uta muat ma ga haminis no nuna nilon hoing tiga malalar ta muat waing muat naga paas mur ira tanuana kakena. \v 22 \qt Pa ga gil tiga sakena ma pa di ga hadadei tiga bisbis tano hana.\qt* \v 23 Bia diet ga tangtangai hagawai ia, ia balik pa ga tangai hagawai diet. Bia ga kap ra ngunungut pa ga mang diet bia na hagawai diet. Taia. Ga bul tar ira linga bakut tano lima ne Kalou nong i la gilgil ira takodasiana warkurai. \v 24 Ia at ga pusak ira nudahat sakana magingin ma no palatamaina uram tano ula kabai waing dahat naga haan talur ira sakena ma dahat naga lon ma ra takodasiana magingin. Ma dahat langalanga ta ira nuna tahula manua. \v 25 Muat git hanahaan ronga hoira sipsip. Senbia kaiken muat ta tapukus tupas nong i nas mur ira tanua muat hoing tiga tena balaura sipsip. \c 3 \s1 Ira hahina ma ira tunana \p \v 1 Ma hua mah muat ira hahina. I tahut bia muat na hanapu muat ta ira numuat tunana. Ma ing bia aring ta diet, pa diet nurnur tano nianga gar ta Kalou, no numuat tintalen hua na lam tar diet bia diet na nurnur. Ing bia muat gil hua pa muat na supi bia muat na tangai tiga linga ta diet. \v 2 Taia. Diet na nas mon ira numuat gamgamatien na nilon ma ira numuat urur ta diet. \v 3 Ma waak muat hamar ira palatamai muat mon hoing muat gil ta ira hi muat ma ira minamar na gol ma ira bilai na maal. \v 4 Senbia i tahut bia muat na hamar muat uram narako ta ira bala muat at. Muat na hanapu muat ma muat na matien na hahina, hua muat na melmel tutun ma kaiken ra mangana bilai na tintalen pa na panim laah. Ira tintalen hua Kalou i nas kilam bia a tabi matana. \v 5 Ira bilai na hahina manaluai ing diet ga nurnur ta Kalou, diet git hamhamar mah diet hua. Diet ga hanapu diet ta ira nudiet tunana. \v 6 Sara mah hua. Ga taram, Abraham gaam kilam ia bia no nuna watong. Ma muat ira nati ne Sara ing bia muat gil ira tahut ma bia pa muat na burtei tiga linga. \p \v 7 Ma hua mah muat ira tunana. I tahut bia muat na lon timaan tikai ma ira numuat hahina ma ra palai na lilik bia ira nudiet dadas pai haruat ma muat kanong a hahina diet. Muat na wariru ta diet kanong Kalou i ta marsei diet hoing muat ma diet na kap mah no nilon haruat ma muat. Muat na gil hua waing pataia ta linga pa na tur bat ira numuat sinsaring. \s1 Dahat na guama bia dahat na kilinganei ira ngunungut \p \v 8 Io, wara hapataam ira nugu nianga, iau tangai bia muat bakut muat na lon ma tiga mangana lilik sena mon. Ma bia tikai na kilinganei tiga tinirih, io, i bilai bia muat ira mesa, muat na kilinganei harahut ia. Muat na marsei harbasianei muat hoing ira haratasin gar ta Karisito. Muat na gil ra tahut na harharahut ma muat na matien na tunatuna harbasiai ta muat. \v 9 Waak muat balbalu ra sakena ma ra sakena balin. Ma waak muat tangtangai hagawai diet ing diet tangai hagawai muat. Senbia i tahut bia muat na balu pukus diet ma ra haridaan kanong ing Kalou ga tatau muat ga kukubus taar ta muat bia na tar ra haridaan ta muat. \v 10 Muat na gil hua kanong no nianga ta Kalou di ga pakat ia i tangai hoken, \q1 “Siga tikai i nem bia na guama ma no nuna nilon, \q1 ma i nem bia na nas ira tahut na bung, \q1 io, i tahut bia na banus bat no hana wara nianga ma ira sakena \q1 ma wara tangtangai ira bisbis. \q1 \v 11 I tahut bia na talingan talur ira sakena ma na gil sena mon ira bilai. \q1 Na walar bia na lon ma ra malum ma na manga dadas bia na kis taar at hua. \q1 \v 12 Kanong warah, no Watong i la nasnas mur ira tena takodas \q1 ma i la hanhadoda taar ta ira nudiet sinsaring. \q1 Senbia no Watong i la turtur talur diet ing diet gil ra sakena.” \p \v 13 Io, ma siga um na hagawai muat ing bia muat walar ma ra dadas wara gilgil ra tahut? \v 14 Iasen, bia muat kilinganei balik ra ngunungut ta ira numuat magingin takodas, io, muat daan. Waak muat burtei diet ing diet wara haburut muat. Ma waak muat ngarngarau. \v 15 Iasen muat na bul hatamat Karisito aram narako ta ira kati muat bia ia no numuat Watong. Muat na kis na tinagura ta ira bungbung bakut wara binabalu ta diet ing diet saring muat wara hinhinawas palai tano numuat nanaho ma ra nurnur tupas Kalou. \v 16 Senbia muat na babalu ma ra wariru hoing ira matien na tunatuna. Muat na gil ira linga sena mon ing muat nunurei bia i bilai. Muat na lon hua waing diet na hirhir ing diet tangai hagawai muat ta ira numuat bilai na magingin muat gilgil wara murmur Karisito. \v 17 I tahut bia muat na gil hoken kanong ing bia Kalou i sip bia muat na kilinganei ra ngunungut i tahut bia muat na kilinganei ira ngunungut ta ira numuat bilai na magingin. Ma sen pai tahut bia muat na kilinganei ra ngunungut uta ira sakena muat ta gil. \v 18 Kanong warah, Karisito no tena takodas ga maat uta diet ing pa diet takodas. Ga maat tiga kapawena pakaan mon uta ira sakana magingin wara lamlam muat tupas Kalou. Ing di ga bu bing ia, a tunatuna ia. Ing ga lon balin, a tanua ia. \v 19 Ma hua ga haan ma ga harpir taar ta ira tanua ing diet kis narako tano sibaan wara harpidinau. \v 20 Ma kaikek ra tanua, diet ing pa diet ga taram Kalou ing Kalou ga kis kahai diet ma pa ga hapidinau hagasiaan diet ta kaikek ra bung ing Noa ga gilgil no nuna tamat na mon. A bar nong mon ira tunatuna diet ga lon tano mon. A len ma itul mon diet, diet ga kap no harhalon kaia tano taah. \v 21 Ma iakano taah a malalar ia tano magingin na bapitaiso nong i halon muat kaiken. Pai gis sei ira bilinga ta ira palatamai muat. Taia. Ia no numuat hinhinawas palai tupas Kalou maram narako ta ira numuat palai na lilik ing pataia ta bisbis tanai. Ma no tuntunut hut ta Iesu Karisito nong i hadadas no magingin na bapitaiso wara halon muat. \v 22 Ma Karisito ia nong i ta hanhut uram ra mawai ma i kis taar tano tamat na kinkinis tano sot na lima Kalou. Ma ira angelo ma ira mangana tena warkurai ma ira lualua diet kis manapu tano nuna dadas. \c 4 \s1 Pa dahat na mur ira nudahat sakana magingin manaluai \p \v 1 Karisito ga kilinganei ra ngunungut tano palatamaina. Io hua, i bilai bia muat mah muat na tagurei muat ma iakano mangana lilik ta Karisito, kanong ia nong i ta kilinganei ra ngunungut tano palatamaina i ta haan talur no sinisip wara gilgil no magingin sakena. \v 2 Tiga tunatuna hua pa na mur ira sinisip ta ira tunatuna mon ing i lonlon baa kai napu. Taia. Na lon murmur ira sinisip ta Kalou. \v 3 I tahut bia muat na lon hua kanong i ta talona um ira numuat pakana bung ing muat ga murmur ira nemnem ta ira tabuna nurnur. Pai tahut bia muat na gil habalin hua. Muat git murmur ra magingin na hilawai ma ira mangana sakana sinisip. Muat git manga mamom, muat git murmur ira sakana kinkinis hulungai wara minminom ma muat git hatangale haan hua. Ma muat git gilgil no miligiruana lotu tupas ira palimpua. \v 4 Ma kaiken um ira tabuna nurnur diet ta karup bia pa muat tur tikai ma diet ta kaiken ra nudiet roka na magingin. Io hua, diet tangai hagawai muat. \v 5 Senbia diet na tur ra warkurai ra matmataan tano tena gil warkurai nong na kurei ira lilona ma ira minaat. Ma na hait diet bia diet na walar wara binabalu uta ira nudiet mangana gingilaan. \v 6 Io, ma no burena bia diet ing diet ta maat diet gata hadadei no harpir tano tahut na hinhinawas i hokaiken. I tutun bia diet ga maat haruat ma no warkurai kanong diet lon kai tano palatamai diet. Senbia diet ga hadadei no tahut na hinhinawas waing diet naga lon ta ira tanua diet hoing Kalou i lon. \s1 Dahat na lon takodas \p \v 7 Io, no haphapataam ta ira linga bakut i ta huteta um, hua i tahut bia na palai ira numuat lilik ma bia muat na balaurei timaan muat ing muat naga sasaring. \v 8 Muat na manga harmarsai hargilaas ma ra tutun kanong ing bia u marsei tikai pau na manga lilik ta ira sakena i gil. \v 9 Muat na balak halaka ira mesa ta ira numuat hala, muat naga balaurei diet, ma pa muat na rungurung bia muat gil hua. \v 10 Muat na papalim ma ira numuat hartabar ing muat tikatikai muat ta kap, wara harharahut harbasianei muat. Ma muat na papalim timaan ma kaiken ra hartabar na harmarsai ing Kalou i tar. \v 11 Ing bia tikai i hatur kahai ra hartabar wara nianga, i tahut bia na ianga hoing bia Kalou at i iangianga. Ing bia tikai i hatur kahai ra hartabar wara harharahut, i tahut bia na harahut ma ira nuna dadas ing Kalou i tabar ia manei. Muat na papalim hua ing daga pirlat Kalou ta ira linga bakut maram narako tano nudahat kinkinis ta Iesu Karisito. Ia nong i hatur kahai no minamar ma no dadas hathatikai. A tutuna. \s1 Ira ngunungut kanong a Kristian dahat \p \v 12 Io, ira nugu bilai na harhis, waak muat karup ta ira dadas na ngunungut i walar muat. Pai tiga sigara mangana linga i ta haan tupas muat. \v 13 Senbia i tahut bia muat na guama bia muat ta laka ta ira ngunungut ta Karisito waing muat naga manga guama ing no minamarina na hanuat puasa. \v 14 Ing bia di tangai hagawai muat kanong muat tano hinsa Karisito, io, muat na daan, kanong no Tanua ta Kalou ma no minamarina i kis burung muat. \v 15 Ing bia di hangungut muat, pa na tahut bia no burena bia muat ta harubu bingbing ma bia muat ta kikinau, ma pa na tahut mah bia muat ta lakai ira warkurai ma bia muat hamalmalaas ira nilon ta ira mesa. \v 16 Iasen ing bia di hangungut muat kanong a Kristian muat, waak muat hirhir. Taia. Muat na pirlat Kalou bia muat ta kap no hinsa Karisito. \v 17 Kanong warah, no pakana bung i ta hanuat um bia no huntunaan ta Kalou na tur ra warkurai. Ma ing bia i luena haan tupas dahat hua, muat lik bia na ngan hoeh ta diet ing pa diet taram no tahut na hinhinawas ta Kalou? \v 18 Hoing no nianga ta Kalou di ga pakat ia i tangai, \q1 “Ing bia i dadas ta ira tena takodas bia diet na kap no harhalon, \q1 na ngan hoeh ta ira tena sakena ing diet tur talur Kalou?” \m \v 19 Io hua, diet ing diet kap ra ngunungut haruat ma ira sinisip ta Kalou, i tahut bia diet na gilgil at ira bilai na magingin ma bia diet na tar habalin diet tano limana nong ga hakisi diet ma i la balbalaurei timaan diet. \c 5 \s1 Dahat na matien na tunatuna nalamin ta ira tinirih \p \v 1 Muat ira lualua na lotu, iau mah tiga lualua hoing muat. Iau ga nas ira ngunngutaan ta Karisito ma iau nong iau hinhinawas tanai. Iau nong iau na hatur kahai mah no minamar nong na hanuat puasa. \v 2 Io hua, iau saring muat bia muat na balaurei ira mataniabar gar ta Kalou nalamin ta muat hoing ira tena balaura sipsip diet la balbalaurei ira nudiet sipsip. I tahut bia muat na guama wara balbalaurei diet hoing Kalou i sip bia muat na gil hua. Waak muat balaurei diet hoing bia tikai mon i duan muat. Waak muat gil iakan ra pinapalim wara gaiana kinewa mon. Senbia muat na gil ia kanong muat manga sip bia muat na papalim hua. \v 3 Waak muat lik hatamat muat wara kurkurei hadadas ira mataniabar ing Kalou i ta tar ta muat bia muat na balaurei diet. Senbia ira numuat tintalen na haruat ma ra tahut na malalar bia diet na mur, hoing ira sipsip diet la gilgil hua. \v 4 Ma bia no Tamat na Tena Balaura Sipsip i hanuat puasa, muat na hatur kahai no minamar, hoing ra bilai na vuvu ing pa na panim laah ira minarina. \p \v 5 Ma hua mah ta muat ira marawana. Muat na hanapu tar muat ta ira numuat lualua na lotu. Ma muat bakut, muat na matien na tunatuna harbasiai ta muat kanong no nianga ta Kalou di ga pakat ia i tangai bia, \q1 “Kalou i mola sei diet ira tena latlaat, \q1 ma i tar no nuna harmarsai ta ira matien na tunatuna.” \m \v 6 Io, muat na hanapu tar um muat manapu tano dadas na lima ne Kalou waing naga hatamat muat tano pakana bung haruat ma no nuna sinisip. \v 7 Muat na tar sei ira numuat nginarau na bunurut tana kanong i manga lilik uta muat ma i balaurei muat. \p \v 8 Na palai ira numuat lilik ma muat na balaurei timaan muat! No numuat ebar Satan i wawawar haan hoing tiga laion i nanaas ta tikai bia na kanam kidilon ia. \v 9 Senbia muat na tur dadas ta ira numuat nurnur ma muat na tur bat ia kanong muat nunurei bia ira tasi muat tano hinsa Karisito kai ra ula hanua diet kapkap mah kaiken ra mangana ngunungut. \v 10 Senbia no ngunungut pa na ubal halawaas baa muat, ma namur Kalou, no burena ta ira harmarsai bakut nong ga tatau muat bia muat na laka tano nuna minamar hathatikai narako ta Karisito, ia na hanunuhuan muat ma na hadadas muat bia muat na manga tur dadas. \v 11 Ia nong i hatur kahai ira dadas hathatikai. A tutuna. \s1 Pita ga haragat diet ma ga tula harkaro \p \v 12 Iau pakat iakan ra da pakpakat ma no harharahut ta Sailas no tasi dahat. A tutun na tunatuna ia. Iau wara haragat muat ma iau wara hasahesa palai bia iakan no tutun na harmarsai ta Kalou. Muat na tur dadas tana. \p \v 13 Ira mataniabar na lotu kai Babilon ing Kalou i ta pilak laah diet tikai ma muat, diet tula harkaro ta muat. Hua mah no nugu bulu Mak. \v 14 Muat na karo hargilasanei muat ma ra tamat na harmarsai. \p A malum ta muat bakut ing muat kis taar ta Karisito.