\id 1JN - Hinsaal 
\h 1 IOANES 
\toc1 No Luena Pakpakat ta IOANES 
\toc2 1 Ioanes 
\mt1 No Luena  
\mt2 Pakpakat ta  
\mt1 IOANES  
\ip Ioanes no apostolo ga pakat kan ra pakpakat ma ra haleng na nianga narako tana i manga haruat ma ira nianga da nas tano Tahut na Hinhinawas nong Ioanes ga pakat ia. Ira haleng na tena mintota diet lik bia Ioanes ga kis aras Esia ing ga pakat kan ra pakpakat ma ga pakpakat tupas ira lotu kinas Esia. Ioanes ga wara hatumarang diet ira tena nurnur kanong ira tena hausur bisbis (nas 1 Ioanes 2.26) diet ga tangtangai bia ira linga da nas tano ula hanua ma ira palatamai dahat i sakena ma ira tanua dahat i tahut. Io, diet ga tangtangai bia pataia ta linga bia dahat gil ira sakena ta ira sakana palatamai dahat, ma ing no tunatuna Iesu ga maat, pai Karisito no Nati Kalou nong ga maat. Iasen Ioanes ga manga harhus sei no nudiet mangana lilik hua. Ga tangai ing bia dahat gil ra sakena dahat lakai ira warkurai ta Kalou (3.4), ma diet ira nati Kalou pa diet sala gilgil ira sakena (2.28-3.12). Ioanes ga manga nem bia dahat na tiktikai ma Iesu ma no ana Sus narako ta ira magingin na madaraas. Iakan no suruna ta iakan ra pakpakat, bia \bd ira tena nurnur diet na murmur ira magingin na madaraas (1.5-7). \bd* Pai tale tikai bia na tangai bia i ta nurnur ta Karisito ma sen i la murmur ira sakana magingin na kankado. Iasen bia siga tikai i tartaram ira warkurai ta Kalou i kis taar ta Kalou (3.24) ma no suruna ta ira warkurai ta Kalou hoken, bia dahat na marsei ira mesa ma dahat na nurnur ta Iesu Karisito no Nati Kalou (3.23). Ioanes ga nem bia dahat naga palai bia no tunatuna Iesu (1.1; 4.2-3), ia no Mesaia (nong di kilam ia bia ‘Karisito’; 2.22; 5.1), no Nati Kalou (2.23; 3.23; 4.9-10; 4.14-15; 5.5-13; 5.20), ma ia at ga maat wara uta dahat bia na halon dahat (5.4-8). Ioanes ga nem bia dahat naga manga palai bia dahat ta kap iakan ra nilon hathatikai ing bia dahat ta nurnur tano Nati Kalou (5.13).  
\c 1  
\s1 No Nianga na Nilon  
\p
\v 1 Mehet hasasei muat uta nong ga kis taar manaluai tano hathatahun, nong mehet ga hadadei ma mehet ga nas ia ma ira mata mehet. Io, mehet ga nasnas ia ma mehet ga sigirei ia ma ira lima mehet. Ma iakan a mon mehet hasasei muat utana, no Nianga na Nilon.  
\v 2 Ma iakan ra nilon ga hanuat puasa ma mehet hasasei muat uta iakan ra nilon hathatikai. Mehet ga nas ia ma mehet hatutuna ia ta muat. Naluai ga kis tikai ma Mama ma i hanuat puasa taar ta mehet.  
\v 3 Ma mehet hasasei mah muat uta nong mehet gata nas ma mehet gata hadadei ing muat mah muat naga tiga bala tikai ma mehet. Ma mehet tiga bala tikai at ma Mama ma no Natina, Iesu Karisito.  
\v 4 Ma mehet pakat tar kaiken ra nianga ta muat ing naga kidilona no nudahat gungunuama.   
\s1 Dahat na hanahaan tano madaraas  
\p
\v 5 Io, iakan no hinhinawas mehet ga hadadei lah ia ta Iesu Karisito ma mehet hasasei muat uranai hoken: Kalou i haruat ma ra lulunga ma pataia tutun at ta kankado i kis tana.  
\v 6 Ing bia dahat tangai bia dahat tiktikai ma ia senbia dahat hanahaan ra kankado, io, dahat bisbis ma ira nudahat magingin pai haruat ma ira tutuna Kalou i ta hapuasnei.  
\v 7 Iasen bia dahat hanahaan tano madaraas hoing ia at i kis tano madaraas, io, dahat tiga bala hargilaas ta dahat ma no gapi ne Iesu no Natina i hagamgamatien dahat ta ira sakana magingin bakut.   
\p
\v 8 Ing bia dahat tangai bia pataia nudahat ta sakana magingin dahat bis baal at dahat ma dahat lik bia iakano bisbis i tutuna senbia ira tutuna ta Kalou pai kis ta dahat.  
\v 9 Iasen bia dahat na hinawas palai ta ira nudahat magingin sakena, io, Kalou na gil haruat ta ira nuna kunubus ma na gil ra takodas hoken: na lik luban sei ira nudahat sakena ma na hagamgamatien dahat talur ira magingin bakut pai takodas.  
\v 10 Ing bia dahat tangai bia pa dahat gil ta sakena, io, dahat kilam Kalou bia a tena bisbis ia ma no nuna nianga pai kis ta dahat.   
\c 2  
\p
\v 1 Iau pakat kaiken ra nianga taar ta muat ira natigu gar ta Karisito waing pa muat na gil ra sakena. Iasen bia tikai na gil ta sakena, a nudahat tikai kana nong i iangianga wara gaia dahat ra matmataan ta Kalou. Ma ia ne Iesu Karisito no takodasiana.  
\v 2 Ma ia at no hartabar uta ira nudahat sakana magingin nong ga hau no ngalngaluan gar ta Kalou. Ma taia bia wara gaiana ira nudahat sakena sena. Wara gaiana mah ira sakena tano ula hanua bakut.   
\s1 Dahat na nunurei hoeh bia dahat nunurei Kalou  
\p
\v 3 Dahat na nunurei bia dahat nunurei tar Kalou hoken, ing bia dahat taram ira nuna warkurai.  
\v 4 Siga tikai i tangai bia i nunurei timaan tar Kalou, senbia pai taram ira nuna warkurai, io, a tena bisbis ia ma ira tutuna ta Kalou pai kis tana.  
\v 5 Senbia tutuna sakit, bia tikai i taram ira nuna nianga i haminis bia no nuna nemnem uram ta Kalou i ta kidilona. Ma dahat nunurei bia dahat kis taar tana hoken:  
\v 6 Siga tikai i tangai bia i sala kis taar ta Kalou, io, i tahut bia na hanahaan hoing Iesu ga haan hua.   
\p
\v 7 Ira bilai na tasigu ta Karisito, iakan ra warkurai iau pakat ia ukatika ta muat, pai sigara warkurai ia. Taia. Senbia no tuarena mon nong muat ga hatur kahai ia tur lah manaluai tano hathatahun. Iakan ra tuarena warkurai, ia no hinhinawas muat gata hadadei ia.  
\v 8 Iasen iakan ra warkurai iau pakat ia ukatika ta muat, a sigarina ia kanong da nas ia tano nilon ta Iesu ma ira numuat mah, kanong no kankado i wara patpataam ma no lulunga tutuna i ta murarang taar.   
\p
\v 9 Siga tikai i tangai bia i kis taar ra madaraas, iasen i la bala ngungut tano tasina gar ta Karisito io, i kis taar baa ra kankado.  
\v 10 Siga nong i marsei no tasina gar ta Karisito i sala kis taar tano madaraas ma taia ta sakena tana bia na hapuka ia.  
\v 11 Iasen bia siga tikai i malentakuanei no tasina, io, i kis taar tano kankado ma i sala hanahaan tano kankado. Ma pa na nunurei bia i hanahaan uha kanong no kankado i ta hapula ira airua matana.   
\p
\v 12 Iau pakpakat tupas muat ira natigu gar ta Karisito kanong Kalou i ta lik luban sei ira numuat sakana magingin utano hinsa ne Karisito.  
\v 13 Iau pakpakat tupas muat ira kaba tamat tano lotu kanong muat nunurei tar ia nong ga kis manaluai tano hathatahun. Iau pakpakat tupas muat ira marawana tano lotu kanong muat ta bul hasur no Tena Sakena.  
\v 14 Iau pakpakat tupas muat ira natigu kanong muat nunurei tar Mama. Iau pakpakat tupas muat ira kaba tamat kanong muat nunurei tar ia nong ga kis manaluai tano hathatahun. Iau pakpakat tupas muat ira marawana kanong muat dadas ma no nianga ta Kalou i sala kis taar ta muat ma muat ta bul hasur no Tena Sakena.   
\s1 Waak dahat sipsip ira magingin ma ira linga tano ula hanua  
\p
\v 15 Waak muat sipsip ira magingin ma ira linga tano ula hanua. Ing bia siga tikai i sipsip ira magingin tano ula hanua, io, pai sip Mama.  
\v 16 Iau tangai hua kanong ira linga bakut tano ula hanua, ira sakana nemnem ta ira palatamai dahat, no magingin na mangaha, ma ira magingin na latlaat pai hanuat maram ta Mama. Taia. I hanuat makai ra ula hanua.  
\v 17 Ma no ula hanua i patpataam hanahaan, ma ira linga tano ula hanua mah ing ira tunatuna diet sip. Iasen bia siga tikai i mur haruatanei ing Kalou i nem bia na gil hua, io, na lon hathatikai.   
\s1 Ira ebar tane Karisito diet harhus sei no Natina  
\p
\v 18 Ira natigu gar ta Karisito, kaiken no mutuaina pakana bung. Ma hoing muat ga hadadei bia no ebar tane Karisito na hanuat, ma kaiken at a haleng na ebar tane Karisito diet ta hanuat taar. Io, kaiken dahat ta nunurei bia no mutuaina pakana bung kanong diet ta hanuat um.  
\v 19 Diet ga haan talur dahat senbia pai nudahat tutun diet. Ing bia nudahat tutun diet, pa diet gaar haan talur dahat. Senbia no nudiet hinahaan laah i haminis bia diet bakut, pai nudahat diet.  
\v 20 Senbia no Halhaliana i ta tabar muat ma iakanong nong i hapalainei muat, kaikek muat bakut muat gi nunurei ira tutuna Kalou i ta hapuasnei.  
\v 21 Iau pakpakat tupas muat kanong muat nunurei kaikek ra tutuna, ma taia bia pa muat nunurei, ma kanong muat nunurei bia taia ta bisbis na hanuat maram narako ta ira tutuna.  
\v 22 Siga no tena bisbis? Ia nong i harhus sei Iesu bia ia no Mesaia. Tiga mangana tunatuna hua, ia no ebar tane Karisito kanong i harhus sei Mama ma no Natina.  
\v 23 Siga nong i harhus sei no Natina pai hatur kahai Mama. Ma siga nong i haut bia Iesu ia no Nati Kalou, io, i hatur kahai mah Mama.   
\p
\v 24 Ma muat, i tahut bia muat na taram lah iakano hinhinawas nong muat gata hadadei lah tano hathatahun bia na baa kis taar ta muat. Ing bia iakano hinhinawas nong muat ga hadadei lah tano hathatahun i sala kis taar ta muat, io, muat mah muat na kis taar ta Mama ma tano Natina.  
\v 25 Ma no kunubus nong ia at ga tar ta dahat i hoken: no nilon hathatikai.   
\p
\v 26 Iau pakpakat kaiken ra linga wara uta diet ing diet walwalar wara lamlam harango muat.  
\v 27 Ma muat, pa muat supi bia ta tikai na hausur muat ta tiga linga kanong Karisito ga tabar muat ma nong i hapalainei muat ma iakan i sala kis taar ta muat ma i sala hauhausur muat uta ira linga bakut ma i tutuna mah ma pai bisbis. Io, i tahut bia muat na kis taar ta Karisito hoing nong i hapalainei muat i ta hausur muat hua,   
\s1 Ira nati Kalou pa diet sala gilgil sakena  
\p
\v 28 Io, ira natigu gar ta Karisito i tahut bia muat na kis taar ta Karisito waing dahat naga balamasa taar ing bia na hapuasa, kaba dahat gi malahuan ta iakano tamat na bung bia na hanuat.  
\v 29 Ma muat nunurei bia Karisito i takodas, io, muat nunurei mah bia siga tikai i sala gilgil ra magingin i takodas, ia tiga nati Kalou.   
\c 3  
\p
\v 1 Nas baa! A tamat no harmarsai tikai ma ra nemnem nong Mama i ta tar ta dahat! Hua, di gi kilam dahat bia a nati Kalou dahat. Ma iakanin i tutuna. No ula hanua pai nunurei kilam dahat kanong warah, pa ga nunurei kilam mah Kalou.  
\v 2 Ira bilai na tasigu ta Karisito a nati Kalou dahat kaiken. Ma senbia pai hanuat palai baa bia dahat na hanuat a mangana tunatuna hoeh namur. Senbia dahat nunurei bia dahat na ngan hoing Karisito ing Karisito na hanuat puasa kanong na hanuat palai ta dahat bia a mangana tunatuna hoeh tutuna ia.  
\v 3 Ma siga tikai i sala kiskis nanaho ma ra nurnur bia na ngan ba hoing Karisito, io iakano tunatuna i sala hagamgamatien no nuna nilon hoing Karisito mah i gamgamatien.   
\p
\v 4 Siga tikai i gil sakena i haminis bia a ul pat ia ta Kalou kanong i lakai ira nuna warkurai. Tutuna sakit, ira sakana magingin i haruat hoing tikai i lakai ira warkurai gar ta Kalou, kaikek i ul pat ta Kalou.  
\v 5 Ma muat nunurei bia Karisito ga hanuat wara kapkap sei ira magingin sakena. Ma taia ta sakena i kis tana.  
\v 6 Taia tikai i sala kis taar tana i la gilgil sakena. Ma taia tikai i sala gilgil sakena i nunurei tar ia.  
\v 7 Ira natigu gar ta Karisito muat na harbalaurai timaan, kaba tikai gi lam harango muat. Siga nong i sala gilgil no takodas a takodasiana ia hoing Karisito a takodasiana ia.  
\v 8 Siga tikai i sala gilgil sakena a gar ta Satan ia kanong Satan ga gil lah ra sakena tur lah tano hathatahun. No burena iakan bia no Nati Kalou gaam hanuat bia na haliarei ira pinapalim ta Satan.  
\v 9 Taia tiga nati Kalou i sala gilgil sakena kanong i ta kap ira mangana tintalen ta Kalou uram narako tana. Ma pai tale bia na gil sakena, warah, a nati Kalou ia.  
\v 10 Hoken ing dahat na nunurei lah bia siga ira nati Kalou ma siga ira nati ne Satan: ing bia tikai pai sala gilgil no takodas, pai gar ta Kalou ia, ma nong mah pai sala marmarsei no tasina gar ta Karisito, pai gar ta Kalou mah ia.   
\s1 Dahat na marsei hargilasanei dahat  
\p
\v 11 Io, iakan no hinhinawas muat gata hadadei lah ia maram ra hathatahun, bia dahat na marsei hargilasanei dahat.  
\v 12 Waak muat ngan hoing Kain, ia gar tano Tena Sakena. Ma ia nong ga bu bing no tasina. Ma ga bu bing ia warah? Kanong ira nuna magingin ga sakena ma ing tano tasina ga takodas.  
\v 13 Io, ira tasigu ta Karisito, waak muat karup bia no ula hanua i malentakuanei muat.  
\v 14 Kanong dahat nunurei bia dahat ta haan talur no minaat ma dahat ta laka tano nilon. Ma dahat nunurei kanong dahat marsei hargilasanei ira tasi dahat gar ta Karisito. Siga tikai pai sala harmarsai, i sala kis taar ra minaat.  
\v 15 Siga tikai i malentakuanei no tasina ta Karisito a tena hinarubu bingbing ia. Ma muat palai bia no nilon hathatikai pai kis ta tiga tena hinarubu bingbing.  
\v 16 Dahat na nunurei no kukuraina no magingin na harmarsai hoken: Iesu ga tar sei no nuna nilon, ma ga maat wara uta dahat. Io, i tahut bia dahat, dahat na tagura wara minaat wara uta ira tasi dahat gar ta Karisito.  
\v 17 Iasen bia siga tikai a nuna ta linga makai tano ula hanua ma i nas ra sunupi tano tasina ta Karisito senbia pai marsei ia, io, tutuna sakit no mangana harmarsai gar ta Kalou pai sala kis taar tana.  
\v 18 Ira natigu gar ta Karisito waak dahat tangai mon bia dahat marsei ira mesa. Iasen i tahut bia dahat na haminis ira nudahat harmarsai ma ira nudahat magingin tupas diet, kaikek ra mangana magingin ing i haruat ma ra tutuna Kalou i ta hapuasnei ta dahat.  
\v 19-20 Ing bia dahat harmarsai, dahat na nunurei bia dahat kis narako ta ira tutuna ta Kalou. Ma ing dahat tur ra matmataan ta Kalou i tale bia tikatikai na kilinganei bia a mon sakena tana. Senbia dahat ing dahat harmarsai, dahat na kis na balamasa um. Kanong warah Kalou i tamat ta ira warkurai ta ira bala dahat ma i nunurei bia siga tutun dahat.  
\v 21-22 Ira bilai na tasigu ta Karisito ing bia pa dahat kilinganei bia a mon sakena ta dahat, io, dahat na kis na balamasa ra matmataan ta Kalou. Ma Kalou na tabar dahat ma ing dahat saring lah kanong dahat taram ira nuna warkurai ma dahat gil ira linga ing i haguama ia.  
\v 23 Ma iakan no nuna warkurai, bia dahat na nurnur tano hinsana no Natina Iesu Karisito ma dahat na harmarsai hargilaas ta dahat haruat ma no nuna warkurai ga tar ta dahat.  
\v 24 Ma siga tikai i taram ira nuna warkurai i sala kis taar ta Kalou ma Kalou mah i sala kis taar tana. Ma dahat nunurei hoeh bia i sala kis taar ta dahat? No Tanua nong Kalou i ta tar ia ta dahat i hapalainei dahat hua.   
\c 4  
\s1 Dahat na walar ira poropet  
\p
\v 1 Ira bilai na tasigu ta Karisito a haleng ira poropet bisbis diet ta haan harbasiai tano ula hanua. Io, waak muat nurnur ta ira tunatuna bakut ing diet tangai bia no Tanua ta Kalou i hasasei diet taring linga. Senbia muat na walar diet wara nunurei bia Kalou i tar ra nianga ta diet bia taia.  
\v 2 Ma i tale muat bia muat na nas kilam baa no Tanua ta Kalou narako ta tiga tunatuna ta ira nuna nianga. Siga tikai i hinawas palai bia Iesu Karisito ga hanuat ukai ma bia ga hanuat a tunatuna ia, ma i hinawas palai hua, io, muat na nunurei bia no Tanua maram ta Kalou i kis tana.  
\v 3 Iasen bia siga tikai i harhus sasei Iesu, io, no Tanua maram ta Kalou pai kis tana. Taia. I kap mon no tanua tano ebar tane Karisito. Muat ga hadadei bia ira ebar ta Karisito na hanuat. Ma tutuna, kaiken um diet ta hanuat taar kai ra ula hanua.   
\p
\v 4 Ira natigu gar ta Karisito muat gar ta Kalou ma muat ta bul hasur kaikek ra mangana tunatuna tikai ma ira nudiet hausur kanong nong i kis narako ta muat i tamat ta Satan nong i kis tano ula hanua.  
\v 5 Diet gar tano ula hanua, io hua, diet ianga makai ra ula hanua ma no ula hanua i taram diet.  
\v 6 Dahat gar ta Kalou ma siga tikai i nunurei tar Kalou na taram dahat. Senbia siga tikai nong pai gar ta Kalou pa na taram dahat. Hokaiken ing dahat na nas kilam ira tunatuna ing no Tanua ta ira tutuna ta Kalou i kis ta diet, ma diet ing diet kap ra tanua na bisbis.   
\s1 No harmarsai ta Kalou ma no nudahat harmarsai  
\p
\v 7 Ira bilai na tasigu ta Karisito i tahut bia dahat na marsei hargilasanei dahat kanong no magingin wara tar harmarsai, ia maram ta Kalou. Ma siga tikai i tar harmarsai, a nati Kalou ia ma i nunurei tar Kalou.  
\v 8 Siga tikai pai tar ra harmarsai, pai nunurei Kalou kanong ira tintalen bakut ta Kalou, a tintalen na harmarsai ma ra nemnem ukai ta dahat.  
\v 9 Ma Kalou ga haminis no nuna harmarsai ma no nuna nemnem uta dahat hoken: ga tulei sei no kapawena natina ukai tano ula hanua wara halhalon dahat.  
\v 10 Ma a mangana linga sa iakan ra magingin na harmarsai tikai ma ra nemnem? No suruna pai hoken, bia dahat ta nem Kalou. Taia. Senbia no suruna bia Kalou ga marsei dahat ma ga nem dahat, ma ga tulei sei no Natina, a hartabar ia uta ira nudahat sakana magingin wara hauhau no ngalngaluan gar ta Kalou.  
\v 11 Ira tasigu ta Karisito ing bia Kalou ga marsei dahat hua, io, i takodas bia dahat mah dahat na marsei hargilasanei dahat.  
\v 12 Taia ta tikai pai nas baa Kalou. Taia. Sen ing bia dahat marsei hargilasanei dahat, io, Kalou i sala kis taar ta dahat ma no mangana harmarsai gar ta Kalou i ta kidilona narako ta dahat.   
\p
\v 13 Dahat nunurei bia dahat sala kis taar tana ma ia i sala kis taar ta dahat hoken, kanong i ta tar no Tanuana ta dahat.  
\v 14 Ma Mama ga tulei no Natina ukai bia ia no Tena Halon tano ula hanua. Mehet gata nas iakan ma mehet hatutuna ia ma ira numehet hinhinawas ta muat.  
\v 15 Siga tikai i haut bia Iesu ia no Nati Kalou, io, Kalou i sala kis taar tana ma ia i sala kis taar ta Kalou.  
\v 16 Ma dahat ta kilinganei no harmarsai ma no nemnem gar ta Kalou uta dahat ma dahat nuruan iakano nuna harmarsai ma no nuna nemnem tupas dahat.  
\p Ira tintalen bakut ta Kalou, a tintalen na harmarsai tikai ma ra nemnem ukai ta dahat. Ma siga tikai i sala kis taar ta iakano mangana nilon i sala kis taar ta Kalou ma Kalou i sala kis taar tana.  
\v 17 Io, dahat na kis na balamasa tano bung na warkurai kanong dahat hoing Karisito kai ra ula hanua. Ma ing bia dahat na kis na balamasa i haminis bia no nuna harmarsai ta dahat i kidilona ma no nudahat nemnem tupas ia i kidilona mah.  
\v 18 Ing dahat nem ia hua, ma ia mah i nem dahat, pai tale bia dahat na burut. Taia. Ing dahat nem tutun at ia ma ia i nem tutun dahat, iakano magingin i sala kapkap sei no bunurut. Io, ing bia tikai i burut, iakan ra magingin na nemnem pai kidilona taar tana kanong no bunurut i kis tikai ma ra harpidinau.  
\v 19 Io, dahat nem um ia kanong ia ga luena nem dahat. Ma dahat marsei ira mesa kanong ia ga luena marsei dahat.  
\v 20 Ma ing bia tikai na tangai bia, “Iau nem Kalou,” senbia i malentakuanei no tasina narako ta Karisito, io, a tena bisbis ia. Ma i nanaas bia a tutuna iakan kanong siga tikai pai nem ira mes na mataniabar gar ta Kalou ing i ta nas tar diet, io, pai tale bia na nem Kalou nong pai nas baa ia tiga pakaan.  
\v 21 Ma dahat kap iakan ra warkurai makaia ta Karisito, bia siga tikai i nem Kalou na marsei no tasina ta Karisito.   
\c 5  
\p
\v 1 Siga tikai i nurnur bia Iesu ia no Mesaia, io, a nati Kalou ia. Ma i nanaas bia siga i marsei no sus ana tikai na marsei mah no natina.  
\v 2 Dahat nunurei hoken bia dahat marsei ira nati Kalou: dahat nem Kalou ma dahat gil haruatanei ira nuna warkurai.  
\v 3-4 Ma ing bia dahat taram ira nuna warkurai i haminis bia dahat nem ia. Ma ira nuna warkurai pa diet tirih kanong ira nati Kalou diet haruat wara papaas hasur ira sakana magingin tano ula hanua. Ma dahat paas hasur ira sakena tano ula hanua hoken: dahat nurnur ta ira tutuna Kalou i ta hapuasnei.   
\s1 Iesu ia no Nati Kalou ma no nilon makaia tana sena mon  
\p
\v 5 Ma siga nong i bul hasur ira sakana magingin tano ula hanua? Nong sena mon nong i nurnur bia Iesu ia no Nati Kalou.  
\v 6 Iesu Karisito ia at nong ga kap bapitaiso ma ga maat ing ga hanuat ukai. Ing bia ga hanuat ukai pa ga kap bapitaiso sena mon. Taia. Ga kap bapitaiso ma ga maat mah. Ma no Halhaliana Tanua at nong i hatutuna iakan ma no nuna hinhinawas. Ma i hatutuna ia kanong i sala tangtangai ra tutuna.  
\v 7-8 Io, aitul ing dal hatutuna bia Iesu ia no Nati Kalou. Ma dal hoken: no Tanua, no nuna bapitaiso, ma no nuna minaat. Ma dal bakut dal haut tikai.  
\v 9 Ma i nanaas bia da haut lah no hinhinawas ta tiga tunatuna ing bia i hatutuna tiga linga. Iasen ing bia Kalou i hatutuna iakan ma no nuna hinhinawas, io, no nuna hinhinawas i manga tutuna tano hinhinawas gar na tunatuna kanong no nuna hinhinawas, a gar ta Kalou ia utano Natina.  
\v 10 Siga tikai i nurnur tano Nati Kalou i kap timaan lah iakan ra hinhinawas. Siga tikai nong pai nurnur ta Kalou i kilam Kalou bia a tena bisbis ia kanong pai nurnur tano hinhinawas ta Kalou ing Kalou i hatutuna ira linga utano Natina.  
\v 11 Ma no hinhinawas nong Kalou i ta hatutuna tar ia ta dahat, ia hoken: Kalou i ta tabar dahat ma no nilon hathatikai ma iakan ra nilon makaia tano Natina.  
\v 12 Siga tikai i hatur kahai no Natina i kap mah no nilon. Ma siga tikai pai hatur kahai no Nati Kalou pai kap no nilon.   
\s1 I tale bia dahat na nunurei bia dahat ta kap no nilon hathatikai  
\p
\v 13 Iau pakat kaiken ra nianga ukatika ta muat ing muat nurnur tano hinsana no Nati Kalou ing muat naga nunurei bia muat kap tar no nilon hathatikai.  
\v 14 Ma dahat balamasa taar ra matmataan ta Kalou kanong dahat nunurei tar bia Kalou i hadadei dahat ing bia dahat sasaring haruat tano nuna sinisip.  
\v 15 Ma ing bia dahat nunurei bia i hadadei ira nudahat sinsaring bakut, io, dahat nunurei mah bia dahat ta kap ira binabalu ta ira nudahat sinsaring tupas ia.   
\p
\v 16 Ing bia tikai i nas no tasina ta Karisito i gil tiga sakena ing pai haruat bia na lam tar ia tano minaat, io, na sasaring ma Kalou na tar no nilon tana. Iau iangianga uta ira sakana magingin ing pai haruat bia na lam tar tikai tano minaat. Senbia a mangana magingin sakena kana ing i tale bia na lam tar tikai tano minaat. Taia bia iau tangai bia na sasaring uta iakanong.  
\v 17 Ira magingin bakut pai takodas, a magingin sakena. Senbia aring mangana magingin sakena pai tale bia na lam tar tikai tano minaat.   
\p
\v 18 Dahat nunurei tar bia siga a nati Kalou ia, pai sala gilgil ra magingin sakena. Senbia no Nati Kalou i sala balbalaurei timaan tar ia ma no Tena Sakena pai tale bia na hagawai ia.  
\v 19 Ma dahat nunurei tar bia dahat gar ta Kalou senbia no ula hanua bakut i kis taar tano warkurai tano Tena Sakena.  
\v 20 Ma dahat nunurei tar mah bia no Nati Kalou i ta hanuat ukai ma i ta hapalainei dahat waing dahat naga nunurei ia, no God tutuna. Ma dahat kis taar tana tikai ma no Natina Iesu Karisito. Ma Iesu Karisito ia no God tutuna, ma ia no burena no nilon hathatikai.  
\v 21 Ira natigu gar ta Karisito muat na kis pas ira god bisbis.