\id TIT Reconstructed from Ventura Publisher
\ide UTF-8
\h Taitus
\toc1 Khe Por Taitus Ndi Khergi Gap
\toc2 Taitus
\toc3 Ta
\mt1 TAITUS
\mt2 Khe Por Taitus Ndi Khergi Gap
\imt Khe fharav ganɨnga buni khare.
\ip Taitus, ana Zuda guma fhuvara. Ana guigira Zisas khothɨgap, ruagiap, ana Por Fhe Bakɨme ana farasarigi ŋaar, ana Porar kurav mba ŋaara mbui. Por Taitus ndi Krit rɨgɨkɨrige tɨgim, ana niŋgen ki. Ana niŋgen kav, maaŋ guigira Zisas khothɨgi gumgi gu mbigi, mbe mba siosan ki, ana mben siosan ŋaari gari.
\ip Kha gap fharav khaŋ nzuai, mba Kritan ki ntɨɨri, mben tɨvi nzerigi fhuvara. Maaŋ muuŋgiap, guma ana sios gari guman pan kɨr zav mbui, ana guigira tɨvi vhuuiŋra zɨn ŋgɨri. Por zumgum mba gumgi gu mbigi khɨvɨv mbe suanga tɨvir Taitus ga nzuav, mba gumgi vuri khɨvɨv mbe suanga tɨvi, mba mbigi vuri khɨvɨv mbe suanga tɨvi, mba gumgir ŋkaa khɨvɨv mbe suanga tɨvi, mba ŋaari gumgi, ana mbe suaŋv mbe khɨvɨrga tɨvir ana suaŋgi.
\ip Ana mpuu bunin, ana mba gavar khaŋ suaŋgi, Taitus, ndu mba gumgi gu mbigi ga suaŋrim, mbe wari tɨgɨp ndava bavira kɨv, tɨvar vhuun harigi gumgir muuŋri. Mbe fhura wari ga vhegɨp, wari daaŋ thari.
\c 1
\ms Taitus mba Krit rɨgɨkɨrigen guigira Zisas khothɨgi gumgi gu mbigi, ana mbe guigira Zisas khothɨgi ndɨkndɨgi havharɨv, mbe tɨvi ndiv thɨgar maaŋri.
\p
\v 1 Gu Por, gu Fhe Bakɨmen ŋaara guma ma. Gu vhɨra Zisas Krais farasarigi ŋaara guma mbe ma. Ana na farasarav, na sarigim, gu Fhe Bakɨme won mbuigi gumgi gu mbigi, mbe guigira Zisas khothɨgi, gu mben kurkurav, mbe suaŋrim, mbe guigira Fhe Bakɨmen buna vhuueŋ kaŋgip, ana tɨvi zɨn ŋgɨrga. 
\v 2 \x - \xo 1.2: \xo*\xt Ro 16.25; Kor 1.27; 2 T 1.1; 1.9; 1 Pi 1.20\xt*\x*Gu mben kurkurarim, mbe khaŋ tɨgɨp havhargip guigira Zisas khothɨgɨp, mbe Fhe Bakɨme rargɨ kɨrim, ana zazera mbara muuŋgiap ki bɨɨŋbɨɨn mben nɨɨnga. Fhe Bakɨme fhum guarara, ana zumgum kha bigi ga muuŋgi, ana fharav mba zazera mbara muuŋgip ki bɨɨŋbɨɨn nzan nɨɨn za suaŋgi. Ana guiguigi guma fhuvara. 
\v 3 \x - \xo 1.3: \xo*\xt Ef 1.9-10; 1 Te 2.4; 1 T 1.1; 1.11; 2.3; 2 T 1.10; Ta 2.10; 3.4\xt*\x*Ana zumgum ana nduara mba tuga sarav, ana gumgi mbari farasegim, mbe mba buna vhuueŋ bun nzuai. Ana mba tɨva mbuav, ana za wo buna vhuueŋ ndi hiaŋ tɨgi. Fhe Bakɨme, ana taagiap nza ndi guma ma. Ana nzuaim, gu ana buna vhuueŋ bun nzuai ŋaara ndigi.
\p
\v 4 \x - \xo 1.4: \xo*\xt Ro 1.7; 2 Ko 8.23; Ga 2.3; 2 T 1.2; 4.10\xt*\x*Taitus, gu kha gava khergiap ndu ndi mbai. Ndu nan kama guara fara muuŋgi, ndu nza guigira Zisas khothɨgi tɨvara muuŋgiap ana khothɨgi. Nza Ndia Fhe Bakɨme gum nza Bakɨme Krais Zisas, ana taagia nza ndi guma ma, ana ndu korar muuŋv ndava mɨɨtɨgar ndun nɨɨŋrim, ndu kɨri.
\s Taitus sios gari gumgir pani vhuuiŋ ndi fegɨri.
\p
\v 5 Gu ndu ndim Krit rɨgɨkɨrige tɨgim, ndu niŋgen ki. Ndu kɨv, mba ŋaari gu bigi mbari vhɨzgi, ndu nta ndiv thɨgar maaŋri. Ndu nta ndiv thɨgar maaŋv, ndu za mbe ŋgui bakɨvir, gu mba fhum ndu suaŋgi tɨvar muuŋv, ndu mben siosi gari gumgir pani ndi fɨri. 
\v 6 \x - \xo 1.6: \xo*\xt 2 T 2.24-26\xt*\x*\x - \xo 1.6: \xo*\xt 1 T 3.2-7\xt*\x*Ndu mbe ndi fɨr saŋv, ndu mba gumgi gu mbigi nɨman tɨva mbatɨga thueŋ muuŋgi fhuv guma, ana vhɨra mbiga bavira man ki. Ndu mba khesharigi guma ndi fɨri. Mba guman tari mbe vhɨra Krais khothɨgɨp, mbe Fhe Bakɨme rɨmani nɨman, mbe tɨvi mbatɨgi zɨn ŋgɨrga fhu, mbe vhɨra rɨɨrɨɨi tɨvi zɨn ŋgɨp, wari won ndegi gu ndegmbori nzuai buni daaŋsurga fhu. 
\v 7 \x - \xo 1.7: \xo*\xt Wkp 10.9; 1 Ko 4.1; Ef 5.18; 1 Pi 5.2\xt*\x*Ndu kaŋgi, sios gari guman pan, ana Fhe Bakɨmen ŋaara gari guma ma. Maaŋ muuŋgiap ana rurur vhuuŋra muuŋri, mba gumgi gu mbigi, mbe ana muuŋgi tɨva mbatɨk thueŋ ganɨnga fhu. Ana khueŋ ndɨkndɨgi thari, ana zɨ bakɨme ki, ana tamtam mba gumgi gu mbigi ganɨnga. Ana vhemkora ndav shi thari. Ana pharar ŋanŋanin mbɨv ŋanŋanɨ thari. Ana vhemkora ndav shiv harigi gumgi shogɨ thari. Ana ŋkɨɨa vhɨrve ndirga ne suaŋv thaginen muuŋ thari. 
\v 8 Ana wo phenan zi gumgi, ana mben ndikndigɨp ana tuituigira mbe ganɨri. Ana za tɨvir vhuuiŋra vuzvugɨp, ana ndɨkndɨgi vhuuiŋra zɨn ŋgɨri. Ana tɨvir vhuuiŋra zɨn ŋgɨp, za Fhe Bakɨmen tɨva guara zɨn ŋgɨri. Ana vhɨra won kɨrɨ tɨvi gu bigi, ana tuituigip nta ganɨri. 
\v 9 \x - \xo 1.9: \xo*\xt 1 T 1.10; 1.15; 2 T 1.13; 2.15; 4.3; Ta 2.1\xt*\x*Ana vhɨra mbe ana khɨvav, ana suaŋgi buna vhuueŋ, ana nen suirav havhargiri. Ana maaŋ muuŋgirga, ana buni guari, ana ntan mba gumgi gu mbigi khɨvɨrga, mbe mba buni khothɨgɨrga. Ana maaŋ muuŋv, vhɨra mbe ndɨkndɨgi khavɨrga, mbe mba buni zɨn ŋgɨrga. Ana maaŋ muuŋv mba buni daasui gumgi, ana khaŋ tɨgɨp havhargip mbe suanga, mbe guigira wari wo nzuai buni nta kaŋgirga.
\s Krit rɨgɨkɨrigen ki gumgi mbari, guigira Zisas khothɨgim, gumgi vhɨrve mben ndɨkndɨgir farfagi.
\p
\v 10 \x - \xo 1.10: \xo*\xt 1 T 1.6; 4.7\xt*\x*Ndu sios gari gumgir pani vhuuiŋ ndi fegɨri. Ne khaŋ muuŋgi, Kritan ki siosi vhɨrver ki gumgi, mbe buni daasui. Mbe fhura shɨshɨgi buni khɨni nzuav, fhura gumgi guiguigi. Maaŋ mbui gumgi vhɨrve, mbe Zudaiŋ ma. Mbe vhɨra Zisas khothɨgi gumgi ma. Mbe khaŋ tɨga havhargiap fooi tɨva zɨn vui. 
\v 11 \x - \xo 1.11: \xo*\xt Mt 23.14; Zo 10.12; 1 T 6.5; 2 T 3.6; 1 Pi 5.2\xt*\x*Mba gumgi tɨvir mbatɨgir muungeŋ vuzvugiap, mbe fhura gumgi guiguigap, mben tɨn mbe ŋkɨɨa ŋgi. Mbe maaŋ mbuav, mbe mbe nzuav mbe khɨvi tɨvi, nza mba tɨvir muuŋgirga tuktɨgi fhuvara. Mbe mba tɨva mbuav, mbe guigira Zisas khothɨgi gumgi gu mbigir vhɨrve, mbe ana khothɨgi ndɨkndɨgi, mbe mben ndɨkndɨgir farfagi. Mbe mben farfav, vhɨra mben mbik gu tarir ndɨkndɨgir farfagi. Maaŋ muuŋgiap, nde mbe thɨvɨri, mbe mba khesharigi bunin mbe suaŋ thari. 
\v 12 Fhum Kritan bigi kaŋgi guma mbera khaŋ suaŋgi, “Mbe Kritiŋ, mbe bigi guiguigi ntɨɨri ma. Mbe guigira gumgi mbatɨgi ma. Mbe ruaŋruaŋgi sɨgi fara muuŋgi. Mbe mba kɨvgi mbɨrgen ndikndigap, guigira vhukvhuga kɨvgi.” 
\v 13 \x - \xo 1.13: \xo*\xt 1 T 4.7; 2 T 4.2; 4.4; Ta 2.2\xt*\x*Kha buneŋ ne guigi guarara. Maaŋ muuŋgiap ndu kama havharara mbe suaŋv, mbe tɨvi ndiv thɨgar maanga, mbe guigira Zisas khothɨgɨrga. 
\v 14 Mbe fhura mba Zudain nzɨgi neŋgi nzari khɨni, mbe khuarir nta rɨgɨrga tuktɨgi fhuvara. Mbe vhɨra kɨr buna vhuueŋ ga segɨp, gumgi nduarira tɨgi tɨvi zɨn ŋgɨrga tuktɨgi fhuvara.
\p
\v 15 \x - \xo 1.15: \xo*\xt Mt 15.11; Ru 11.39-41; Ro 14.14; 14.20; 14.23; 1 Ko 6.12\xt*\x*Mba gumgi gu mbigi, mbe nduarira, mbe Fhe Bakɨme nɨman ŋgararga, mbar kɨrga bigi, nta vhɨra ŋgarigim, mbe nta ndi. Mba gumgi gu mbigi, mbe Fhe Bakɨme nɨman maaŋ muuŋgip, tɨvi mbatɨgi zɨn ŋgɨp, mbe Krais khothɨgi fhu, mba bigɨn the ŋgararga tuktɨgi fhu. Ne khaŋ muuŋgi, mben ndɨkndɨgi gum mben ndavi Fhe Bakɨme rɨmani nɨman nzaŋnzaŋgi. 
\v 16 \x - \xo 1.16: \xo*\xt Ro 1.28; 2 T 3.5; 3.8; 1 Zo 1.6; 2.4; Zu 1.4\xt*\x*Mben kaathoorin khaŋ nzuai, “Nza Fhe Bakɨme kaŋgi.” Mben tɨvi khaŋ nzuai, mbe kɨr ana segi. Fhe Bakɨme guigira mbe vuzvugi fhu. Mbe buni daasui gumgi ma. Mbe tɨvar vhuuŋ thuen muuŋgirga tuktɨgi fhuvara.
\c 2
\s Nde gumgi vuri, nde Fhe Bakɨme vuzvugi tɨvi, nde tuituigip nta zɨn ŋgɨri.
\p
\v 1 \x - \xo 2.1: \xo*\xt 1 T 1.10; 6.3; 2 T 1.13; Ta 1.9\xt*\x*Ndu mba gumgi gu mbigi khɨvav mbe nzuai tɨvi, nta guigira Fhe Bakɨme suaŋgi tɨvi zɨn ŋgɨri. 
\v 2 Ndu mba gumgi vuri ga suaŋrim, mbe phara ŋanŋanin mbɨv ŋanŋanɨ thari. Mbe wari wo mbui tɨvi, mbe tuituigip nta ndɨkndɨgɨp, mbe tuituigip wari wo mbui tɨvi ganɨri. Mbe Zisas buna vhuueŋ, mbe guigira ne khothɨgɨp, mbe guigira wari won ndavir harigi ntɨɨri ga ndɨɨi tɨv, mbe guigira ne kaŋgip, mbe khaŋ tɨgɨp thɨgɨ havhargip simtɨgi ndiri.
\p
\v 3 \x - \xo 2.3: \xo*\xt 1 T 3.11; 2 T 2.9-10; 1 Pi 3.3-4\xt*\x*Ndu vhɨra mba mbigi vuri ga suaŋrim, mbe vhɨra Fhe Bakɨme vuzvugi, mbe nta zɨn ŋgɨri. Mbe fhura shɨshɨgɨp buna thuen harigi gumgi ga sɨv buna thueŋ suaŋ thari. Mbe vhɨra phara ŋanŋani mbɨrgeŋ ndɨkndɨgɨ thari. Mbe tɨvir vhuuin muungen harigi ntɨɨri khɨvɨv mbe suaŋri. 
\v 4 Mbe mbe suaŋrim, mba mbigir ŋkaa, mbe guigira wari won mani gu tari vuzvugi ne kaŋgiri. 
\v 5 \x - \xo 2.5: \xo*\xt Ef 5.22; Kor 3.18; 1 T 2.11; 6.1; 1 Pi 3.1; 3.5\xt*\x*Mba mbigir ŋkaa, mbe tuituigip piigip, ndɨkndɨgi vhuuiŋra zɨn ŋgɨp mbe Fhe Bakɨme rɨmani nɨman ŋgarav kɨrga. Mbe vhɨra tuituigip wari wo pheni gari tɨva kaŋgip, mbe tɨvar vhuun wari won mani gu tarir muuŋv, mbe won mani piin kɨrga. Mbe maaŋ muuŋgip mba tɨvar muunga, guma the buni mbatɨgir Fhe Bakɨmen buna vhuueŋ ga suanga fhu.
\s Taitus tɨvar vhuun muuŋrim, mba gumgir ŋkaa anan tɨvi zɨn ŋgɨrga.
\p
\v 6 Ndu mba tɨvara, ndu mba gumgir ŋkaa, ndu mbe ndɨkndɨgi khavɨrim, mbe tuituigip wari wo mbui tɨvi ganɨri. 
\v 7 \x - \xo 2.7: \xo*\xt Ef 6.24; 1 T 4.12; 1 Pi 5.3\xt*\x*Ndu mba mbui tɨvi, ndu tɨvar vhuuŋra zɨn ŋgɨp, ntan muuŋrim, mba gumgi ndu ganɨp ndu zɨn ŋgɨri. Ndu mba gumgi gu mbigi khɨvav mbe nzuai ŋaarar muuŋv, ndu mbe guiguigi thari. Ndu fhura sunuv ŋgɨzi buni suaŋ thari. Fhuvara. Ndu zazera tɨvir vhuuiŋra ndɨkndɨgɨp, buni vhuuiŋra suaŋri. 
\v 8 \x - \xo 2.8: \xo*\xt 1 T 6.3; 2 T 3.14; 1 Pi 2.12; 2.15\xt*\x*Ndu buni vhuuiŋra suanga, mba gumgi, mbe mba buni vhen tɨva mbatɨga thueŋ gangirga fhu. Nzan pana gumgi, mbe vhɨra, mbe buna mbatɨk thuen nza suaŋgirga fhu. Zakɨra fhuvara! Mbe won ndɨkndɨgi mbatɨgir mbergirga.
\s Fhura ŋaara khɨna mbui gumgi, mbe tuituigip wari gari gumgir pani nzuai buni zɨn ŋgɨri.
\p
\v 9 \x - \xo 2.9: \xo*\xt 1 T 6.1-2\xt*\x*Ndu mba ŋaara gumgi ga suaŋrim, mbe wari wo gari gumgir pani piin kɨri. Mbe mbe piin kɨv, ŋaari vhuuiŋra muuŋrim, mben gumgir pani mbe mbui ŋaari vuzvugɨri. Mbe wari gari gumgir pani nzuai buni ŋgarɨgar muuŋv buni mbatɨgir mbe suaŋ thari. 
\v 10 \x - \xo 2.10: \xo*\xt Mt 5.16; Fi 2.15; Ta 1.3\xt*\x*Mbe wari gari gumgir panin bigi kɨmɨ thari. Fhuvara. Mbe wari gari gumgir pani nzuai buni, mbe za nta zɨn ŋgɨrim, mbe gari gumgir pani, mbe mbui tɨvi, mbe guigira ntan ndikndigirga. Maaŋ muuŋgiap, mbe mbui bigi mba gumgi ndɨkndɨgi khavɨrga, mbe nza nzuai buni ndiv vun kuamkuav zɨ bakɨmen ntan nɨɨnga. Mba buni nta guigira Fhe Bakɨmen buna vhuueŋ ma. Ana taagiap nza ndi guma ma.
\s Nza Fhe Bakɨme suaŋgi tɨvi zɨn ŋgɨp, Krais taagi zirɨrga tugar rargɨp kɨrga.
\p
\v 11 \x - \xo 2.11: \xo*\xt Zo 1.9; Ro 5.15; 1 Pi 5.12\xt*\x*Nza maaŋ muuŋgip Fhe Bakɨme vuzvugi tɨvi zɨn ŋgɨrga. Nza kaŋgi, Fhe Bakɨmen kora muumbar, ana kɨrar hɨgi. Ana za kha nuianan ki gumgi gu mbigi ndigirga tuktɨgi. 
\v 12 \x - \xo 2.12: \xo*\xt Ro 6.19; Ef 1.4; Kor 1.22; 1 Te 4.7; 1 Zo 2.16\xt*\x*Mba Fhe Bakɨmen kora muumbar, ana khuen nza khɨvi, nza kɨr Fhe Bakɨme sɨrga tuktɨgi fhu. Nza vhɨra kha nuiana vuzvugi mbatɨgi, tharga. Ana vhɨra khuen nza khɨvi, nza tuituigi piigip tɨvir vhuuiŋra zɨn ŋgɨp za Fhe Bakɨmen tɨva guara zɨn ŋgɨrga. Khueŋ guigira, nza kha nuiana gumgi rɨgar ki. Fhe Bakɨmen kora muumbar ana khuen nza khɨvigi, nza Fhe Bakɨmen tɨvi zɨn ŋgɨrga. 
\v 13 \x - \xo 2.13: \xo*\xt 1 Ko 1.7; Fi 3.20; Kor 3.4; Hi 9.28; 1 Zo 3.2\xt*\x*Nza ana tɨvi zɨn ŋgɨp, nza khaŋ tɨgɨp havhargip mba bigɨna vhuuŋ ganɨ saŋv, nen ndikndigip nen rargɨp kɨrga. Nza Zisas Krais rargap ki, ana ŋkasŋkagi Fhe Bakɨme ma. Ana taagia nza ndi guma ma. Ana Fhe Bakɨmen sɨɨn vhuuŋ gum, ana vhava ŋaara bakɨme, ana ŋkasŋka bakɨme phorgɨp kɨrar hɨrga. 
\v 14 \x - \xo 2.14: \xo*\xt Kis 19.5; Lo 4.20; 7.6; 14.2; Sng 130.8; Ese 37.23; Ga 1.4; 1 Pi 2.9\xt*\x*Krais ana taagiap nza ndir zav won tuma fekhɨngip, nza muuŋgim, nza muuŋgi tɨvi mbatɨgi vhɨzgim, nza guigira ŋgarav, nza ana gumgi gu mbigi ki. Nza khaŋ tɨgɨ havhargip anan tɨvir vhuuiŋ zɨn ŋgɨrga.
\p
\v 15 \x - \xo 2.15: \xo*\xt 1 T 4.12; 2 T 4.2\xt*\x*Ndu zazera kha bunin mba gumgi gu mbigi ga suaŋri. Ndu mbe ndɨkndɨgi khavɨrim, mbe kha buni zɨn ŋgɨri. Ndu vhɨra kama havharan mba buni daasui gumgi ga suaŋv, mben tɨvi ndi thɨgar maaŋri. Ndu fhura mba gumgi ganɨrim, mbe ndu buni farfav, nta suaŋ thari.
\c 3
\s Fhe Bakɨme tɨvar vhuuŋ guarara nza muuŋgim, nza tɨvir vhuuin muunga.
\p
\v 1 \x - \xo 3.1: \xo*\xt Ro 13.1-7; Kor 1.10; Hi 13.21; 1 Pi 2.13-14\xt*\x*Ndu kha gumgi gu mbigi ga suaŋrim, mbe ŋgui vhɨrve gari gumgir pani gum ŋgui gari gumgir pani, mbe mben piin kɨv, mbe nzuai buni zɨn ŋgɨri. Mbe zazera ŋaari vhuuiŋra muun saŋv kɨri. 
\v 2 \x - \xo 3.2: \xo*\xt Ef 4.2; 4.31; Fi 4.5; Kor 3.12; 2 T 2.24-25\xt*\x*Mbe buni mbatɨgir guma the suaŋ thari. Mbe buni ga suaŋv wari daaŋ thari. Mbe zazera mbarara kɨv, tɨvir vhuuin za kha gumgi gu mbigir muuŋri.
\p
\v 3 \x - \xo 3.3: \xo*\xt 1 Ko 6.11; Ef 2.1-2; 5.8; Kor 1.21; 1 Pi 4.3\xt*\x*Ndu kaŋgi, nza fhum mbara muuŋgi, nza ndɨkndɨgi vhuuiŋ ki fhu, nza buni daasui. Satan nza guigim, nza Fhe Bakɨmen tuav zɨn vui fhu. Nza kha tɨva muuŋgi, nza fhura ndavi khavav mbarkɨrga tɨvi mbatɨgir ŋaara gumgi kav, ndavi khavav mbarkɨrga vuzvugi zɨn vui. Nza fhura vhegap, harigi gumgi ga nzuav ndavi mbarɨgi tuav, nza ana zɨn vui. Gumgi panan nza kim, nza bevbevira panan harigi gumgi ga ki.
\p
\v 4-5 \x - \xo 3.4-5: \xo*\xt 1 T 2.3; Ta 1.3; 2.11\xt*\x*\x - \xo 3.4-5: \xo*\xt Zo 3.3-5; Ro 11.6; Ef 5.26; 2 T 1.9; 1 Pi 3.21\xt*\x*Fhe Bakɨme ana taagiap nza ndi guma ma. Ana guigira won ndavar nza nɨɨŋgiap, nza kora muuŋgiap, ana tɨvar vhuuŋra nza mbui. Ana mba tɨva ndi kɨra khɨngiap, ana taagiap nza ndi. Ana nza muuŋgi tɨvar vhuuŋ thueŋ ndɨkndɨgap, ana mba tɨvar nza muuŋgiap taagiap nza ndigi fhuvara. Zakɨra fhuvara! Ana won kora muumbarar, ana taagiap nza ndigi. Ana nza ndigap, nza ruagim, nza ntigera niamuuŋ ruagi tara fara muuŋgim, ana Ŋina Ŋaar tɨvar kaman nza nɨɨŋgi. 
\v 6 \x - \xo 3.6: \xo*\xt Jol 2.28; FG 2.17-18; 2.33; Ro 5.5\xt*\x*Taagia nza ndi guma Zisas Kraisan ŋaara panan, Fhe Bakɨme khaŋ tɨgap won Ŋina Ŋaara siav nza suagi. 
\v 7 \x - \xo 3.7: \xo*\xt Ro 3.24; 8.23-24; Ga 2.16; Ta 2.11\xt*\x*Krais nza kora muuŋgip, nza muuŋgim, nza Fhe Bakɨme nɨman tɨvar vhuuaŋ mbui gumgi gu mbigi ki. Mba tɨvara Fhe Bakɨme mba zazera mbara muuŋgip ki bɨɨŋbɨɨŋ ndir zav nza farasarigim, nza mba kɨrɨ tɨva rarga wari ki. 
\v 8 \x - \xo 3.8: \xo*\xt 1 T 1.14-15; Ta 2.14\xt*\x*Kha kameŋ ne guigi guarara.
\p Gu khueŋ vuzvugi, ndu khaŋ tɨgɨ havhargip mba kameŋ bun suaŋrim, mba gumgi gu mbigi, mbe guigira Fhe Bakɨme khothɨgɨp, mbe khaŋ tɨgɨp havhargip tɨvir vhuuin muunga. Mba khesharigi tɨvi nta guigira gumgi gu mbigir kurkurigi. Nta guigira bigir vhuuiŋ guari ma. 
\v 9 \x - \xo 3.9: \xo*\xt 1 T 1.4; 2 T 2.14-16; 2.23; Ta 1.14\xt*\x*Ndu khuarar mba fhura shɨshɨgap tamtam buni nzuai gumgi bunin rɨgɨ thari. Mba gumgi, mbe fhura ntari vuzvugap, wari wo nzɨgi zɨri ga nzuav daai buni gum, Moses suaŋgi tɨvi ndɨɨri, mbe fhura nta nzuav wari daav, wari ga vhegap wari shogi. Nza kaŋgi, mba khesharigi buni nzan kurarim, nza tɨvir vhuuiŋ zɨn ŋgɨgɨrga tuktɨgi fhuvara.
\p
\v 10 \x - \xo 3.10: \xo*\xt Mt 18.15-17; 2 Ko 13.2; 2 Te 3.6; 3.14; 2 T 3.5; 2 Zo 1.10\xt*\x*Maaŋ muuŋgip guma the sios shɨgɨrga, ndu ana ndɨkndɨk ndi thɨgar mbai bunin ana phorgɨp suaŋri. Ndu tuga mpuanin ana phorgɨ suaŋrim, ana ndu nzuai buneŋ mbararagi fhu, ndu ana thav, za kɨr ana segɨri. 
\v 11 \x - \xo 3.11: \xo*\xt FG 13.46; 1 T 6.3-5\xt*\x*Ndu kaŋgi, mba khesharigi guma, ana tuav thav, ana tɨvi mbatɨgi ga mbui guma ki. Ana tɨvi mbatɨgira ana nzuav suaŋgi.
\s Taitus zɨv Por ganɨri.
\p
\v 12 \x - \xo 3.12: \xo*\xt FG 20.4; Ef 6.21-22; Kor 4.7-8; 2 T 4.12\xt*\x*Gu Artemis o Tikikus ga sararim, mani the ŋgɨp ndun hɨgɨrim, ndu khaŋ tɨgɨp havhargip tuavi ndi ganɨp, ndu zɨv, Nikoporisan na ganɨri. Ne khaŋ muuŋgi, gu rugahap bɨɨŋbɨɨŋ kɨvgi tugen Nikoporisan kɨrga. 
\v 13 \x - \xo 3.13: \xo*\xt FG 18.24; 1 Ko 3.5-6; 16.12\xt*\x*Ndu, Aporos gum, mba Romiŋ suaŋgi tɨvi kaŋgi guma Senas, ndu tuituigip mani ganɨri. Ndu mani ndigi ŋgɨrga bigi, ndu manin kurari. Mani maaŋ muuŋgip tuavar ŋgɨp, mani bigɨn the sosuagirga fhu.
\p
\v 14 \x - \xo 3.14: \xo*\xt Mt 7.19; Ro 15.28; Ef 4.28; Fi 1.11; Kor 1.10; Ta 2.14\xt*\x*Nza phorgap guigira Zisas khothɨgi gumgi gu mbigi, mbe bigi sosuagi ntɨɨri, mbe mben kurkurarga ŋaar, mbe tuituigip ana kaŋgiri. Mbe muuŋv kɨv, maaŋ guigira Zisas khothɨgi gumgi gu mbigi, mbe fhura kɨv, mbe Fhe Bakɨme tɨvi zɨn ŋgɨgɨrga fhu.
\p
\v 15 Na phorga ki gumgi gu mbigi, mbe za wari won raar vhuun ndu ndɨɨi. Ndu nzan raar vhuun mba guigira Zisas khothɨgav nza vuzvugi gumgi gu mbigir nɨɨŋri.
\p Fhe Bakɨmen korar muumbar za nde phorgɨ kɨri.