\id EPH Reconstructed from Ventura Publisher
\ide UTF-8
\h Efesus
\toc1 Khe Por Efesusiŋ Ndi Khergi Gap
\toc2 Efesus
\toc3 Ef
\mt1 EFESUS
\mt2 Khe Por Efesusiŋ Ndi Khergi Gap
\imt Khe fharav ganɨnga buni khare.
\ip\fig [introduction - needs no cap]|src="HK-19F.tif" size="span" loc="1/4 page picture spans both columns" copy="Horace Knowles/Louise Bass"\fig*Kha gava nɨɨŋge khaŋ muuŋgi, Fhe Bakɨme za kha bigir Krais farve khɨngir za mbui. Ana kha Hevenan ki bigi, ana zam ntan ana farve ga suv, vhɨra kha nuianan ki bigi, ana vhɨra ntan ana farve khɨngirga. Ana ntan Krais farve khɨngirga, Krais, ana za mba bigi gari guman pan kɨrga (1.10). Fhe Bakɨme kha gumgi gu mbigi khavɨrga, mbe guigira anan gumgi gu mbigi kɨv, mbe guigira Krais phorgɨp havhargip, ndava bavira kɨrga.
\ip Kha gavar, Por fharav ana buni vhɨrvera mba Fhe Bakɨme fhura kha gumgi gu mbigi kora mbui kora muumbara bun mbe nzuai. Fhe Bakɨme mba Krais khothɨgi gumgi gu mbigi, ana mbe muuŋgim, mbe wari tɨgap ki. Ana Krais Zisas muuŋgi ŋaarar panan, ana taagia mba gumgi gu mbigi ndigi. Ana mbe ndigap, ana won Ŋina Ŋaarar mbe nɨɨŋgi. Mbe ana ntɨɨri ma. Ana tɨvir vhuuin mben muunga, ana fhum maaŋ mben muun za suaŋgi ŋgɨrkameŋ ki. Ana mba ŋgɨrkameŋ zɨn vugi (1.14). Kha gavar, kha kameŋra ndegi kameŋ, Por khaŋ mba guigira Zisas khothɨgap guigira ana phorgi gumgi gu mbigi, mbe guigira wari tɨgɨp ndava bavira kɨv, mbe Fhe Bakɨmera tɨvi zɨn ŋgɨri.
\ip Kha gavar, Por vhunaa ga si bunin mbe nzuai. Ana khuen mbe khɨvɨrga, mbe tuituigip ne kaŋgir zav, mbe Krais phorgi, mbe wari heegi fhu, mbe za wari tɨgɨp kɨrga. Ana khaŋ mbe nzuai, nde Fhe Bakɨmen gumgi gu mbigi, nde wari tɨgap guma bavira ki fara muuŋgim, Krais, ana nden pan ma. (4.1-16) Khueŋ vhɨra, nde Fhe Bakɨmen gumgi gu mbigi, nde phena fara muuŋgim, Krais ana mba phena rɨgɨrkuaaŋ fara muuŋgi. (2.19-22) Khueŋ vhɨra, Fhe Bakɨmen gumgi gu mbigi, mbe mbiga fara muuŋgim, Krais, ana mba mbigar man ma. (5.22-32) Nza kha gavar, nza guigira, Fhe Bakɨme kha gumgi gum mbigir muunga bigir vhuuiŋ ganɨnga.
\c 1
\ms Nza Kraisan panan Fhe Bakɨme fhura bigir vhuuiŋ vhɨrver nza nɨɨŋgi.
\p
\v 1 \x - \xo 1.1: \xo*\xt FG 18.19-21; 19.1; Ro 1.1; 1.7; 1 Ko 1.1; Kor 1.1\xt*\x*Gu Por, gu Krais Zisas farasarigi ŋaara guma ma. Ana vuzvugara Fhe Bakɨme nan farasarigim, gu ana ŋaara guma ki. Gu kha gava khergiap, nde Fhe Bakɨmen gumgi gu mbigi, nde Efesus ŋgu bakɨmen kav, guigira Krais Zisas phorga havhargiap, zazera ana zɨn vui. Gu kha gavar nde ndi mbai. 
\v 2 \x - \xo 1.2: \xo*\xt 2 Ko 1.2; Ga 1.3; Kor 1.2; Ta 1.4\xt*\x*Nza Ndia Fhe Bakɨme, gum nza Bakɨme Zisas Krais, mani nden korar muuŋv, ndava mɨɨtɨgar nden nɨɨŋrim, nde kɨri.
\s Nza Kraisan panan Fhe Bakɨme za Hevenan ki bigir vhuuin nza ndɨɨi.
\p
\v 3 \x - \xo 1.3: \xo*\xt Ef 2.6\xt*\x*Nza Fhe Bakɨme zɨ ndiv vun kuamkuarga, ana Fhe Bakɨme ma! Ana vhɨra nza Bakɨme Zisas Kraisan Ndia ma. Nza guigira Krais phorga havhargim, ana Kraisan panan, ana nzan ntuun kurkurar zav, ana za Hevenan ki bigir vhuuiŋra nza ndɨɨi. 
\v 4 \x - \xo 1.4: \xo*\xt Zo 15.16; 17.24; Ro 8.28; Ef 5.27; Kor 1.22; 2 Te 2.13; 2 T 1.9; Ze 2.5; 1 Pi 2.20\xt*\x*Fhe Bakɨme zumgum kha nuiana muuŋgi. Ana fhumra nzan Krais phorgɨ kɨr zav nzan fararav nzan wora mbuigi, nza ŋgaravra kɨrga. Nza tɨvir vhuuiaŋ mbui gumgi gu mbigi kɨv, nza ana nɨman bigɨn thueŋ suaŋv simtɨk kɨrga fhu. 
\v 5 \x - \xo 1.5: \xo*\xt Zo 1.12; Ro 8.29-30; 2 Ko 6.18; Ga 4.5\xt*\x*Ana fhum guarara wo ndavar nza nɨɨŋgiap, kha ndɨkndɨga mbui. Zisas Krais muuŋgirga ŋaarar panan, ana taagip nza ndigip, nzan wo kaman farga, nza anan tari kɨrga. Ana vuzvugara Fhe Bakɨme maaŋ muuŋgi. 
\v 6 \x - \xo 1.6: \xo*\xt Mt 3.17; Zo 3.35; Ro 3.24; 5.15; Kor 1.13\xt*\x*Ana mba guigira vuzvugi Kama panan, ana guigira fhura kora muumbara bakɨmen nza muuŋgi. Maaŋ muuŋgiap, ana mba nzan kora muuŋgi kora muumbara bakɨme ndɨkndɨgɨp, nza guigira Fhe Bakɨme zɨ ndiv vun kuamkuarga.
\p
\v 7 \x - \xo 1.7: \xo*\xt FG 20.28; Ef 2.7; Kor 1.14; 1.20; Hi 9.12; 1 Pi 1.18-19\xt*\x*Fhe Bakɨmen kora muumbar, ana guigira kɨvgi. Krais nza bɨkbɨɨgir zav, ana nza nzuav rimgi. Ana rimgim, ana vɨzɨn nza muuŋgi tɨvi mbatɨgi vhɨzɨ zav sia suagim, Fhe Bakɨme ana vɨzɨna panan nza muuŋgi tɨvi mbatɨgi, ana nta vhɨzgiap, nta ndɨkndɨk ŋangi. 
\v 8 Fhe Bakɨme, za kha bigi kaŋgi. Ana vhɨra guigira ndɨkndɨgi vhuuiŋ kav, ana kha bigir guigira nzan kurkurav nza muuŋgi. 
\v 9 \x - \xo 1.9: \xo*\xt Ro 16.25; Ef 3.4; 3.9-11; Kor 1.26; 2 T 1.9\xt*\x*Fhe Bakɨme, ana fhum guarara, ana mba Krais muuŋgi ŋaara panan muunga bigeŋ, ana ne ndɨrigi. Ana fhum ne ndɨrigim, mba ndɨkndɨk fhum zorga kav kav, ana ntigem, wo vuzvugara mba ndɨkndɨgar nza khɨvigi. 
\v 10 \x - \xo 1.10: \xo*\xt 1 Ko 3.22-23; Ga 4.4; Fi 2.9-10; Kor 1.16; 1.20; Hi 1.2; 1 Pi 1.20\xt*\x*Ana mba muun za mbui bigeŋ khaŋ muuŋgi. Ana za kha bigi shɨman suigɨrim, nta ŋgɨp, kɨv, ana mba sarigi tugara, ana mba bigi, ana za nta fugɨp, nta ndi Krais farve khɨngirga. Ana kha Heven gum nuianan ki bigi, ana zam nta ndim ana farve khɨngirga. Krais za mba bigir pan kɨrga.
\p
\v 11 \x - \xo 1.11: \xo*\xt Ro 8.17; 8.28-29; Kor 1.12; Ta 3.7; Ze 2.5; 1 Pi 1.4\xt*\x*Fhe Bakɨme, ana wo vuzvuk gum won ndɨkndɨga zɨn vuav za kha bigi ga mbuim, nta hi. Ana wo vuzvugara, ana fhum guarara, ana nza Zudaiŋ, ana nza farasegim, nza Krais phorgɨp, nza guigira Fhe Bakɨmen gumgi gu mbigi guari kɨrga. 
\v 12 Nza Zudaiŋ, nza fharav Krais khothɨgap, anan rarga ki ntɨɨri ma. Nza maaŋ mbuim, Fhe Bakɨme nzan farasegi, nza zazera ana tɨvir vhuuiŋ gum ana ŋkasŋka bakɨme ndɨkndɨgɨp, ana zɨ ndiv vun kuamkuarga.
\p
\v 13 \x - \xo 1.13: \xo*\xt 2 Ko 1.22; 6.7; Ef 4.30; Kor 1.4-6\xt*\x*Nde mba harigi fhaiŋ ŋgui gumgi gu mbigi, nde vhɨra mba buna guareŋ mbararagi. Mba buna guareŋ, ne buna vhuueŋ ma. Mba buna vhuuen panan, Fhe Bakɨme taagiap nde ndigi. Nde vhɨra Krais khothɨgap, ana nde ndigi, ana phorgim, Fhe Bakɨme, ana fhum wo suaŋgi kameŋ zɨn vov, ana won Ŋina Ŋaarar nde nɨɨŋgiap, anan panan, nden wora mbuigim, nde ana gumgi gu mbigi ma. 
\v 14 \x - \xo 1.14: \xo*\xt Ru 21.28; Ro 8.23; 2 Ko 1.22; 1 Pi 2.9\xt*\x*Nza Fhe Bakɨmen Ŋina Ŋaara ndigi, maaŋ muuŋgiap nza kaŋgi, nza zumgum, Fhe Bakɨme won gumgi gu mbigir nɨɨn zav suaŋgi bigir vhuuiŋ, nza vhɨra nta ndigirga. Nza mba bigi ndir zav Fhe Bakɨmen rargi, ana taagi nza ndigɨrim, nza bɨkbɨɨgip, nza ana ntɨɨri ma. Nza ana phorgɨ kɨv, ana mba ŋkasŋka bakɨme ki ŋaari bakɨvi ana nta muuŋgi. Nza nta ndɨkndɨgɨp, ana zɨ bakɨme ndiv vun kuamkuarga.
\s Por Fhe Bakɨme ndɨkndɨgi vhuuin Efesusiŋ nɨɨn zav mbe nzuav Fhe Bakɨme phorga nzuai.
\p
\v 15 \x - \xo 1.15: \xo*\xt Kor 1.4\xt*\x*Gu nde mbararagim, nde guigira Guma Bakɨme Zisas khothɨgap, nde guigira wari won ndavir za Fhe Bakɨmen gumgi gu mbigi ga ndɨɨi. 
\v 16 \x - \xo 1.16: \xo*\xt Fi 1.3-4; Kor 1.3; 1 Te 1.2\xt*\x*Gu ne nzuav, gu zazera Fhe Bakɨme phorga nzuav, gu zazera nde ndɨkndɨgap, nde nzuav Fhe Bakɨme nzuav ana ndikndigi. 
\v 17 \x - \xo 1.17: \xo*\xt Kor 1.9\xt*\x*Gu nza wo Bakɨme Zisas Kraisan Fhe Bakɨme phorga nzuai, ana guigira vhava ŋaar bakɨme gum ŋkasŋka bakɨme ki Ndia ma. Gu khueŋ nzuav ana phorga nzuav, ana nzai. Ana won Ŋina Ŋaarar nden nɨɨŋgirim, ana ndɨkndɨgi vhuuin nden nɨɨŋrim, nde guigira Fhe Bakɨme kaŋgip, nde vhɨra tuituigip ana kaŋgirga. 
\v 18 \x - \xo 1.18: \xo*\xt FG 26.18; Ef 2.12; 4.4; Kor 1.12\xt*\x*Gu khueŋ vuzvugi, ana nden ndɨkndɨgi ntararim, ana mba ndir zav nden kamgi, nde tuituigip nta kaŋgirga. Nde mba bigi ndir zav ntan rarga ki. Maaŋ muuŋgirga, nde mba bigir vhuuiŋ guarira, nde nta kaŋgirga. Mba bigi, Fhe Bakɨme nzan ana gumgi gu mbigi, ana nzan mbuigi bigi ma. 
\v 19 \x - \xo 1.19: \xo*\xt Ef 3.7; Kor 1.11; 1.29; 2.12\xt*\x*Maaŋ muuŋgip, nde vhɨra kaŋgirga, Fhe Bakɨmen ŋkasŋka bakɨme zazera nza ana khothɨgi gumgi gu mbigi, ana zazera nzan kurkurigi. Ana guigira ŋkasŋka bakɨ guar ma. Mba Fhe Bakɨmen ŋkasŋka bakɨme, ana nza phorga ŋgari. 
\v 20 \x - \xo 1.20: \xo*\xt Sng 110.1; 2 Ko 13.4; Kor 1.16; 2.10-12; 3.1; Hi 1.3\xt*\x*Mba ŋkasŋkara fhum Krais phorga ŋgargi. Krais fhum rimgim, Fhe Bakɨme mba ŋkasŋka bakɨmera taagia ana khavgiap, ana ndigap Hevenan ndagim, ana anan han, anan guva hareŋ ga perigi. 
\v 21 \x - \xo 1.21: \xo*\xt Ro 8.38; Fi 2.9-10; Kor 2.10; 2.15; Hi 1.4\xt*\x*Maaŋ muuŋgiap, Krais, ana za mba ŋkasŋka ki ŋiniŋgi, ana za nta kharav vu guarara ki. Ana vhɨra za mba gumgir pani kharav, mba ŋkasŋka ki bigi, ana vhɨra mbe kharigi. Ana ntigem kha tugen zɨri ki gumgi, ana mbe kharav, ana mba zumgum zɨri kɨrga gumgi, ana vhɨra mbe kharigi. 
\v 22 \x - \xo 1.22: \xo*\xt Sng 8.6; Mt 28.18; Kor 1.18; Hi 2.7\xt*\x*\x - \xo 1.22: \xo*\xt Kor 1.18\xt*\x*Fhe Bakɨme za kha bigir Krais farve khɨngim, nta zam ana piin ki. Ana ana muuŋgim, ana za kha bigi gari guman pan ki. Ana sios ganɨn zav mba tɨvar ana muuŋgim, ana maaŋ muuŋgiap ki. 
\v 23 \x - \xo 1.23: \xo*\xt Ro 12.5; Ef 4.10; 4.15; Kor 2.9; 3.11\xt*\x*Sios vhen ki gumgi gu mbigi, mbe Kraisan kharɨga fara muuŋgi. Krais, ana mba kharɨgar pan ma. Nza siosan vhen ki gumgi gu mbigi, nza bevbevira ana kharɨgar fɨgi ma. Krais gum, ana ŋkasŋka gum, ana muun za mbui tɨvi, nta siosan ki, nta za tugɨratɨgi. Krais, mba Heven gu nuianan ki bigi, ana za nta mbuim, nta vhɨra za tugɨratɨgi.
\c 2
\s Fhe Bakɨme nza vhɨzgi gumgi, ana nza muuŋgim, nza Krais phorgap zazera mbara muuŋgiap ki bɨɨŋbɨɨŋ ndigi.
\p
\v 1 \x - \xo 2.1: \xo*\xt Ef 4.18; Kor 1.21\xt*\x*\x - \xo 2.1: \xo*\xt Kor 2.13\xt*\x*Nde fhum, nde Fhe Bakɨme vuzvugi tɨvi daasuav, tɨvi mbatɨgi ga mbuim, nta nde shogim, nde vhɨzgi gumgi fara muuŋgiap ki. 
\v 2 \x - \xo 2.2: \xo*\xt Zo 12.31; Ef 5.6; 6.12; Kor 1.21; 3.6-7; Ta 3.3\xt*\x*Nde mba tugivigen, nde kha nuianan tɨvi mbatɨgi, nde nta zɨn vuav, wari rui. Nde kha buivar ki ŋiniŋgi mbatɨgi gari guman pan, nde ana tɨvi zɨn vegi. Mba ŋina mbatɨk, ana ŋkasŋka ntigem Fhe Bakɨme buni daasui gumgi gu mbigi ndavi vheri gari. 
\v 3 \x - \xo 2.3: \xo*\xt Ro 5.12; Ga 5.16; Kor 3.6; Ta 3.3; 1 Pi 4.3\xt*\x*Nza fhum, nza zam mba gumgi phorga kav, nza wari won ndavi vuri tɨvi zɨn vov, nza wari wo vuzvugi mbatɨgi, nza ntara zɨn vui. Nza maaŋ muuŋgiap kav, nza mba khesharigi tɨvi ga mbui gumgi gu mbigi, Fhe Bakɨme nza nzuav guigira ndav shigap nza nzuav vheza bevahegim, ana mbur ki. Nza ana ndige.
\p
\v 4-5 \x - \xo 2.4-5: \xo*\xt Ru 15.24; 15.32; FG 15.11; Ro 5.6-10; 6.4-5; 6.13; 10.12; Ef 1.7; 2.1; 2.7; Kor 2.12-13\xt*\x*Khueŋ guigira, nza mbui tɨvi mbatɨgi nza shogim, nza vhɨzgi. Nza za vhɨzgi gumgi fara muuŋgiap wari ki. Nza maaŋ muuŋgim, Fhe Bakɨmen kora muumbar, ana guigira kɨvgi. Ana guigira won ndavar nza nɨɨŋgi. Ana maaŋ muuŋgiap, nza muuŋgim, nza Krais phorgap taagia khavgi fara muuŋgiap wari kav, nza tɨvir ŋkaa zɨn vui. Ahaŋ, Fhe Bakɨmen kora muumbarara, ana taagia nza ndigi. 
\v 6 \x - \xo 2.6: \xo*\xt Ef 1.20; Kor 2.12\xt*\x*Ana Krais rimgim, ana taagia ana khavi fara muuŋgiap, ana vhɨra nza khavgi. Ana nza khavgiap, nza muuŋgim, nza vhɨra Krais phorgap, Hevenan ŋgui vhɨrve gari guman pan pigi mpirmpirɨga piigi. 
\v 7 \x - \xo 2.7: \xo*\xt Ef 1.7\xt*\x*Ana Krais Zisas muuŋgi ŋaarar panan, ana mba tɨvar vhuun nza mbui. Ana khaŋ muuŋgi ne nzuav, ana guigira won kora muumbara bakɨmen za kha gumgi khɨvɨv ŋgɨp, zumtugum, ana vhɨra mbe khɨvɨrga. 
\v 8 \x - \xo 2.8: \xo*\xt Zo 4.10; Ro 4.16; 10.14-17; Fi 1.29; 2 T 1.9; Hi 6.4\xt*\x*Nde ne nzuav guigira Krais khothɨgim, Fhe Bakɨme won kora muumbarara, ana taagia nde ndigi. Khe nde nduarira muuŋgi bigeŋ fhuvara. Zakɨra fhuvara! Fhe Bakɨme fhura mba bigen nde nɨɨŋgi. 
\v 9 \x - \xo 2.9: \xo*\xt Ro 3.20; 3.27; 4.2; 1 Ko 1.29-31; 2 T 1.9\xt*\x*Khe nde ŋaara the muuŋgim, ana nen vhezar nde nɨɨŋgi fhuvara. Nde ne suaŋv nde guma the nduara wo zɨ ndiv vun kuamkua thari. 
\v 10 \x - \xo 2.10: \xo*\xt 1 Ko 3.9; 2 Ko 5.5; 5.17; Ef 4.24; Ta 2.14\xt*\x*Fhe Bakɨme Krais Zisasan panan, ana nza muuŋgim, nza won ndava vura tɨvi vhɨzgiap, nza tɨvir ŋkaa zɨn vui gumgi gu mbigi ki. Nza ntigem mba Fhe Bakɨme fhum nza nzuav, mba tɨvir vhuuiŋ zɨn vui tuav, ana ana bevahegim, ana ki. Nza ntigem mba tuavar ŋgɨrga.
\s Panan wari ga ki tɨv, Krais mba tɨva vhɨzgim, phɨna phunini, mani ntigem wani tɨgap phɨna bavira ki.
\p
\v 11 \x - \xo 2.11: \xo*\xt Ro 2.28-29; 1 Ko 12.2; Ef 5.8; Kor 1.21\xt*\x*Nde harigi fhaiŋ ŋgui gumgi, nde kaŋgi, mbe Zudaiŋ, mbe warir fooi. Mbe warir foov, kha suambarar nde mbui, “Nde fooi fhuv gumgi ma.” Kha kameŋ, ne mbe gumgi nduarira wari won fhavi ga mbui bigeŋ, mbe ne nzuai. Nde tuituigip khueŋ ndɨkndɨgɨri, nde fhum, nde harigi fhaiŋ ŋgui gumgi kegi. 
\v 12 \x - \xo 2.12: \xo*\xt Ro 9.4; 9.8; Ga 4.8; Ef 4.18; Kor 1.21; 1 Te 4.5; 4.13\xt*\x*Nde mba tugen, nde Krais thav samra ki. Nde Isreriŋ bɨna thav kɨrar ki. Fhe Bakɨme mba kamen Isreriŋ ga suaŋgi, nde mbe thav kɨrar ki ntɨɨri ma. Nde kha nuianan kav, nde bigɨna vhuuŋ the zumgum hɨr za mbuim, nde ana rarga ki fhuvara. Nde vhɨra Fhe Bakɨme kaŋgi fhuvara. 
\v 13 \x - \xo 2.13: \xo*\xt Ga 3.28; Ef 2.17; Kor 1.20\xt*\x*Nde fhum Fhe Bakɨme thav shama guarara kegi. Krais nde nzuav wo vɨzɨna siasuagi. Nde ntigem Krais vɨzɨn nde ndiga zim, nde Krais Zisas phorgap nde guigira Fhe Bakɨme hara ki. 
\v 14 \x - \xo 2.14: \xo*\xt Ais 9.6; Mai 5.5; Zo 16.33; FG 10.36; 1 Ko 12.13; Kor 1.20; 2.14\xt*\x*Krais nduara nza mbuim, nza ndavi mbɨrav, tuituigiap wari tɨgap ki. Fhum Zudaiŋ, mbe panan harigi fhaiŋ ŋgui gumgi ga kegi. Mbe maaŋ mbuim, mba tɨv bɨna fara muuŋgiap, mbe Zudaiŋ, ana mbe thugim, mbe khar ki, mbu harigi fhaiŋ ŋgui, mbe mbur ki. Krais, ana won fhavara, ana mba bɨna kargiap, mba panan wari ga kegi tɨv, ana ana vhɨzgiap, ana mba phɨna phuni, ana mani ga muuŋgim, mani phɨna bavira ki. 
\v 15 \x - \xo 2.15: \xo*\xt 2 Ko 5.17; Ga 6.15; Ef 4.24; Kor 1.20-22; 2.14; 2.20\xt*\x*Ana Moses suaŋgi tɨvi, ana nta vhɨzgiap, ntan buni gum ntan tɨvi, ana vhɨra nta vhɨzgi. Ana maaŋ muuŋgirga, ana mba phɨna phuni, ana mani fugɨp, mani ndi wani tɨkhɨngirga, mani harigi khesharigi Zisasan phɨna kama bavira kɨrga. Ana mba tɨvar muuŋgirga, nza wari tɨgɨp ndava bavira kɨrga. 
\v 16 \x - \xo 2.16: \xo*\xt Sek 9.10; Ro 6.6; 8.3; Kor 1.20; 2.14\xt*\x*Ana khanarareŋ ga ntorgap rimgiap, mba fhum panan wari ga kegi tɨv, ana ana shogim, ana vhɨzgi. Ana mba phɨna phuni, ana mani fugɨrim, mani wani tɨgɨp phɨna bavira kim, mani Zisas phorgap kharɨga bavira fara muuŋgiap ki. Ana mani ndigap, Fhe Bakɨme han zi. 
\v 17 \x - \xo 2.17: \xo*\xt Ais 57.19; Sek 9.10; FG 2.39; Ro 5.1\xt*\x*Ana zav, buna vhuueŋ bun nzuav khaŋ nzuai, “Nde harigi fhaiŋ ŋgui ntɨɨri, nde Fhe Bakɨme thav samra ki ntɨɨri. Nde Zudaiŋ, nde Fhe Bakɨme hara ki. Nde ntigem wari tɨgɨp ndava bavira kɨri.” 
\v 18 \x - \xo 2.18: \xo*\xt Ro 5.2; 1 Ko 12.13; Ef 3.12; Hi 4.16; 1 Pi 3.18\xt*\x*Nza wari tɨgap ndava bavira ki, ne khaŋ muuŋgi. Nza Kraisan, nza phɨna phuninin ki ntɨɨri, nza wari tɨgap, Fhe Bakɨme Ŋina Ŋaarara nza nzuav tuav fhɨrgim, nza won Ndia han vui.
\s Nza guigira Zisas khothɨgi gumgi gu mbigi, nza Fhe Bakɨmen phena guar ma.
\p
\v 19 \x - \xo 2.19: \xo*\xt Ga 6.10; Ef 3.6; Fi 3.20; Hi 12.22-23\xt*\x*Nde ntigera kaŋgi, nde ntigem vhunaa fara muuŋgiap, nuiana sosuagiap fhura tuigap ki fhuvara. Zakɨra fhuvara! Nde ntigem Fhe Bakɨmen gumgi gu mbigi phorgap, nde tuga bavira ki. Nde ntigem guigira Fhe Bakɨme ntɨɨri ki. 
\v 20 \x - \xo 2.20: \xo*\xt Mt 16.18; 1 Ko 3.9-11; Ga 2.9; VB 21.14\xt*\x*Nde Fhe Bakɨme muuŋgi phena fara muuŋgiap ki. Nza Zisas farasegi ŋaara gumgi gum Fhe Bakɨme kamthooŋ gumgi, ana nza ndi fegim, nza mba phenan kɨnivige fara muuŋgiap wari ki. Krais Zisas, ana guigira mba phena rɨgɨrkuaaŋ khɨngi kuaŋ guar ma. 
\v 21 \x - \xo 2.21: \xo*\xt 1 Ko 3.16-17; 2 Ko 6.16; Ef 4.15-16; Kor 2.19\xt*\x*Mba phena khek Krais ana phufurigim, mba phena feiŋ gu bigi za zav anan kuamkuagiap, nta wari tɨgap nzerara ki. Fhe Bakɨme ntigar mba phena mbuim, mba phen ntigar kɨvav vui. Mba phen, ana Fhe Bakɨme phenara. 
\v 22 \x - \xo 2.22: \xo*\xt 1 Pi 2.5\xt*\x*Nde vhɨra Krais phorgim, Fhe Bakɨme nden mba won gumgi gu mbigi phorgim, nde Fhe Bakɨmen phena guar ma. Ana won Ŋina Ŋaarar panan mba phenan kɨrga.
\c 3
\s Por ŋaar ki, ana Fhe Bakɨmen buna vhuueŋ bun harigi fhain ŋgui gumgi gu mbigi ga suanga.
\p
\v 1 \x - \xo 3.1: \xo*\xt Ef 4.1; Fi 1.7; 1.13; Fm 1.1; 1.9\xt*\x*Fhe Bakɨme tɨvar vhuun nde muuŋgi. Gu Por, gu mba bigɨna nɨɨeŋra nzuav, gu bɨnan ki. Gu bɨnan ki, ne khaŋ muuŋgi, gu Krais Zisasan ŋaara mbuav, gu nde harigi fhaiŋ ŋgui gumgi gu mbigi, gu nden kurkurigi nera nzuav, gu bɨnan ki. 
\v 2 \x - \xo 3.2: \xo*\xt Kor 1.25\xt*\x*Gu khueŋ ndɨkndɨgi, nde khueŋ mbararagi thi? Fhe Bakɨme nan kora muuŋgiap, kha ŋaarar muun zav na farasarigi. Ana vhɨra nde kora muuŋgim, gu nde nzuav mba ŋaara muuŋgi. 
\v 3 \x - \xo 3.3: \xo*\xt Ef 1.9-10; Kor 1.26\xt*\x*Fhe Bakɨme mba fhum muun za suaŋgi bigeŋ, ne zorga ki. Ana nduara ne bun na suaŋgim, gu mba buni mbarire kherav nde suaŋgi. 
\v 4 \x - \xo 3.4: \xo*\xt Kor 1.26-27\xt*\x*Nde maaŋ muuŋgip, gu kha khergi buni ganɨv, nde khaŋ muuŋgip kaŋgirga, gu mba Krais muunga ŋaara nzuai zorga ki kameŋ, gu guigira ne kaŋgi. 
\v 5 Fhum tugen, mbe Fhe Bakɨme mba zorga ki buna vhuueŋ vhagia ki. Ana ne bun mbe suaŋgi fhuvara. Ana ntigem won Ŋina Ŋaar panan, ana mba vhagi buna guareŋ, ana nen nza Zisas farasarigi ŋaara gumgi gum anan kamthooŋ gumgi, ana mba ŋaarar muun zav, nzan farasegap, nza khɨvigi. 
\v 6 \x - \xo 3.6: \xo*\xt Ga 3.14; 3.28-29; Ef 2.13-19\xt*\x*Mba vhagia ki buna vhuueŋ khaŋ muuŋgi. Mba harigi fhaiŋ ŋgui gumgi, mbe vhɨra Fhe Bakɨme Zudain nɨɨn za mbui bigi, mbe vhɨra nta ndigirga. Mba harigi fhaiŋ ŋgui gumgi, mbe ntigem Zudaiŋ guari phorgɨp, mbe wari tɨgɨra kɨrga. Mbe wari tɨgɨp kɨv, mbe wari tɨgɨp Fhe Bakɨme mba Kraisan muun zav suaŋgi bigi, mbe mba bigi ndigirga. Ne khaŋ muuŋgi, mbe Zisas Kraisan buna vhuueŋ panan, mbe wari tɨgɨp mba ŋaara vhen kɨrga. 
\v 7 \x - \xo 3.7: \xo*\xt Kor 1.23-25\xt*\x*Fhe Bakɨme na kora muuŋgiap ana won ŋkasŋka bakɨmen panan, ana fhura harigi khesharigi bigɨnan na nɨɨŋgim, gu ana buna vhuueŋ bun nzuai ŋaara guma ki. 
\v 8 \x - \xo 3.8: \xo*\xt 1 Ko 15.9-10; Ga 1.16; Ef 1.7; Kor 1.27; 1 T 1.13-15\xt*\x*Gu fhum guigira guma mbatɨk ma. Gu guigira za mba Fhe Bakɨmen gumgi gu mbigi piin ki. Ana fhura nan kora muuŋgiap, mba ŋaarar na nɨɨŋgi. Mba ŋaar khare, ana Zisas Kraisan buna vhuueŋ bun harigi fhaiŋ ŋgui gumgi gu mbigi ga suan zav, mba ŋaarar na nɨɨŋgi. Mba buna vhuueŋ, ne Krais nza nzuav mbui bigir vhuuiŋ vhɨrvera bun nzuai. Nza gumgi, nza mba bigi ganɨv, za ntan ruemgirga tuktɨgi fhuvara. 
\v 9 \x - \xo 3.9: \xo*\xt Ro 16.25; 1 Ko 2.7; Ef 1.9; Kor 1.16; 1.20; Hi 1.2\xt*\x*Fhe Bakɨme fhum za mba bigi ga muuŋgiap, ana fharav wo vuzvugar muunga bigi, ana nta vhagiap ki. Ana kav kav, ana ntigem mba vhagia ki ndɨkndɨgi, ana nta bun suan zav nan farasarigi. 
\v 10 \x - \xo 3.10: \xo*\xt Ro 8.38; 11.33; Ef 1.21; 1 Pi 1.12\xt*\x*Ana fhum mba bigi vhagiap, kegap, ntigem ana won siosan panan hɨgap, ana ntigem won mbarkɨrga ndɨkndɨgir vhuuiŋ, ana nta ndiv hiaŋ tɨgi. Ana ntigem wo ndɨkndɨgi vhuuiŋ guarira, ana nta ndi hiaŋ tɨgim, Hevenan enseri mbe buiva gari ŋkasŋkagi ki, mbe vhɨra Fhe Bakɨmen ndɨkndɨgi kaŋgirga. 
\v 11 Fhe Bakɨme fhum guarara mba bigir muungeŋ ndɨkndɨgiap, ana ntigem, nza Bakɨme Krais Zisasan panan, ana mba bigi ga muuŋgim, nta hɨgi. 
\v 12 \x - \xo 3.12: \xo*\xt Zo 14.6; Ro 5.2; Ef 2.18; Hi 4.16\xt*\x*Nza guigira Krais khothɨgap, nza vhɨra ana phorga havhargiap, nza maaŋ muuŋgiap Fhe Bakɨme nɨman ŋgɨrgip, nza ana phorgɨ suanga, ana nza mbarararga. 
\v 13 \x - \xo 3.13: \xo*\xt Kor 1.24\xt*\x*Maaŋ muuŋgiap, gu ntige guigira nde nzuai. Gu nden kurkurav ndi simtɨgi, nde ndɨkndɨgi vhɨrver ntan muuŋv, guigira Zisas khothɨgi ndɨkndɨk kuemkuegɨ thari. Nde kha hi bigi, nde ntan ndikndigɨri. Ne khaŋ muuŋgi, mba bigi nden kurarim, nde nzerara Fhe Bakɨme phorgɨp kɨrga.
\s Por Efesusiŋ havhargip kɨr zav, mbe nzuav Fhe Bakɨme phorga nzuai.
\p
\v 14 Gu Fhe Bakɨme muuŋgi bigi ga nzuav, ana nɨman thɨpanani phɨrav, ana nɨman fi. 
\v 15 \x - \xo 3.15: \xo*\xt Ef 1.10; Fi 2.9-11\xt*\x*Ana Heven gu nuianan ki ntɨɨri, ana za mben Ndia ma. Ana nduara za mbe muuŋgiap zɨrir za mbe nɨɨŋgi. 
\v 16 \x - \xo 3.16: \xo*\xt Ro 9.23; 2 Ko 4.16; Fi 4.19; Kor 1.11; 1.27\xt*\x*Gu thɨpanani phɨrgiap nde nzuav Fhe Bakɨme phorga nzuav anan nzav khaŋ nzuai, “Dara, ndu mbarkɨrga bigir vhuuiŋ guarira ki. Ndu maaŋ muuŋgip, won Ŋina Ŋaara si mbe suaŋrim, anan ŋkasŋka guigira mbe phorgɨ kɨrim, mbe ndavi havhargip wari kɨrga. 
\v 17 \x - \xo 3.17: \xo*\xt Zo 14.23; Ef 2.22; Kor 1.23; 2.7\xt*\x*Ana nden kɨrim, nde guigira Zisas khothɨgɨrim, Zisas zazera guigira nden ndɨkndɨgi ganɨv, nde ndavi vherir kɨri. Nde maaŋ muuŋv, guigira wari won ndavir harigi ntɨɨri ga ndɨɨi tɨv havhargip, nde ndavi vherir kɨv, nde havhargirim, nde kha nuiana thɨgim, nuian ana suirav, ana havhargim, ana thɨga havhargi farar muuŋgiri. 
\v 18-19 \x - \xo 3.18-19: \xo*\xt Zo 1.16; Ro 10.3; 10.11-12; Ef 1.18; 1.23; Kor 2.2; 2.9-10\xt*\x*Nde maaŋ muuŋgirga, nde za Fhe Bakɨmen gumgi gu mbigi phorgɨp ŋkasŋka ndiv, nde guigira Krais won ndavar nde ndɨɨi tɨva kaŋgirga. Mba tɨv, ana guigira kɨvgiap, guigira mpeeŋgiap, guigira vun mbar ndav, guigira nɨɨn mbar vergi. Ahaŋ, Krais, ana guigira wo ndavar za kha gumgi gu mbigi ga ndɨɨi tɨv, ana guigira za mba ndɨkndɨgi kambarigi. Nde vhɨra tuituigira ana kaŋgiri. Fhe Bakɨme vhɨra tɨvir vhuuiŋ guigira anan givigi, mba tɨvi vhɨra nde givarga.”
\p
\v 20 \x - \xo 3.20: \xo*\xt Ro 16.25; 1 Ko 2.9; Kor 1.29\xt*\x*Fhe Bakɨmen ŋkasŋka, ana nduara nzan ndavi vherir ŋgari. Mba ŋkasŋka guigira za nzan ndɨkndɨgi kambarigi. Nza muun zav Fhe Bakɨmen nzai bigi, ana ŋkasŋka guigira za mba bigi kambarigi. 
\v 21 \x - \xo 3.21: \xo*\xt Ro 11.36; 16.27; Hi 13.21\xt*\x*Maaŋ muuŋgiap, sios vhen ki gumgi gu mbigi, mbe guigira Krais Zisas phorgɨp, mbe zazera Fhe Bakɨme zɨ ndiv vun kuamkuav, mbara muuŋgip kɨv, zumgum nzan nzɨgi gu tori mbe mbara muuŋv kɨrga. Nai guigi guarara.
\c 4
\ms Krais nzan vhen kim, nza Fhe Bakɨmen tɨvira zɨn ŋgɨrga.
\s Nza guigira Krais khothɨgi gumgi gu mbigi, Krais nzan vhen ki. Nza Kraisan karɨga fara muuŋgi.
\p
\v 1 \x - \xo 4.1: \xo*\xt Ef 3.1; Fi 1.27; Kor 1.10; 1 Te 2.12; Fm 1.1; 1.9\xt*\x*Gu Por, gu phena tɨvanen ki. Ne khaŋ muuŋgi, gu Guma Bakɨmen ŋaara mbui. Fhe Bakɨme guigira wo zɨn ŋgɨr zav nden kamgim, nde guigira anan gumgi gu mbigi ki ne nzuav, gu nde ndɨkndɨgi khavi. Nde ana vuzvugi tɨvi, nde guigira nta zɨn ŋgɨri. 
\v 2 \x - \xo 4.2: \xo*\xt FG 20.19; Ga 5.22-23; Kor 3.12-13\xt*\x*Nde wari tɨgap guigira Zisas khothɨgi gumgi, nde khaŋ muuŋgi ndɨkndɨgɨri. Nde za wari tɨgɨp tuga bavira kɨv, nde za mbarara wari tɨgɨp kɨri. Mbe pham bigɨn thuen nden muuŋgirim, nde vhemkora mbe suaŋv ndav shi thari. Nde bevbevira, guigira wari won ndavir mben nɨɨŋgip, mbe nde ndɨɨi simtɨgi, nde nta ndiri. 
\v 3 \x - \xo 4.3: \xo*\xt Kor 3.14-15\xt*\x*Fhe Bakɨmen Ŋina Ŋaar, ana ndava bavira ki tɨvar nza ndɨɨi. Maaŋ muuŋgiap, nde ndavi mbarav, nde khaŋ tɨgɨp, mba tɨva suirav havhargiri. Mba tɨv ana mpiin fara muuŋgiap nza kegim, nza wari tɨgap ki. 
\v 4 \x - \xo 4.4: \xo*\xt Ro 12.5; 1 Ko 12.4; 12.11-12; Ef 1.18; 2.16-18\xt*\x*Nza guigira Zisas khothɨgi gumgi, nza wari tɨgap kharɨga bavira ki fara muuŋgi. Ŋina Ŋaara bavira vhɨra nzan vherir kɨri. Fhe Bakɨme bigɨna bavira rargɨ kɨr zav nden kamgi. 
\v 5 \x - \xo 4.5: \xo*\xt Zo 10.16; 1 Ko 1.13; 2 Ko 11.4; Ga 3.27-28; Hi 6.6\xt*\x*Guma Bakɨ bavira ki, bigi khothɨgi tɨva bavira ki. Nza Fhe Bakɨme bavira zɨn panan ruai. 
\v 6 \x - \xo 4.6: \xo*\xt Ro 11.36; 1 Ko 12.6\xt*\x*Fhe Bakɨ bavira ki, ana za nzan Ndia ma. Ana za kha gumgi gu mbigi kharav vu guarara kav, mbe gari. Ana vhɨra za won gumgi gu mbigi phorga ŋgari. Ana vhɨra za wo gumgi gu mbigir vherir ki.
\p
\v 7 \x - \xo 4.7: \xo*\xt Ro 12.3; 12.6; 1 Ko 12.11\xt*\x*Krais nza bevbevira, ana fhura nza kora muuŋgiap, ana fhura bigɨna bakɨ guarara nza nɨɨŋgi. Ana mba fhura nza ndɨɨi bigɨn, ana nzan kurkurav, won ŋaarar muun zav anan nza nɨɨŋgi. Krais mba bigɨna bakɨmen nza khɨvigi, ana fhura nza nɨɨŋgi tɨv, ana guigira kɨvgi. 
\v 8 \x - \xo 4.8: \xo*\xt Sng 68.18; Kor 2.15\xt*\x*Fhe Bakɨmen buni vhuuiŋ ki gap khaŋ nzuai,
\b
\q1 “Ana vu guarara ndagi. Ana fharav guigira won pana gumgi gu mbigi mbevi ŋkasŋkar farfagim, mbe bɨkbɨɨgim, ana za kha bigi kharav, vu guarara ndagi.
\q1 Ana maaŋ muuŋgiap fhura ndɨkndɨgi vhuuiŋ gum ŋkasŋkagir gumgi mbari ga nɨɨŋgi.”
\b
\m
\v 9 \x - \xo 4.9: \xo*\xt Zo 3.13\xt*\x*Mba khaŋ nzuai kameŋ, “Ana Hevenan ndagi”, mba kameŋ khuen nza khɨvigim, nza kaŋgi, Krais, ana fharav Hevenan kegap, kha nuianana zerav, za kha nuianan vhen khɨna guarara vergi. \f a \fr 4.9 \fr*\ft Bigi kaŋgi gumgi mbari kha kameŋ dorga khaŋ nzuai, “Ana fharav za kha nuianan zergi.” \ft*\f* 
\v 10 \x - \xo 4.10: \xo*\xt Hi 4.14; 9.24\xt*\x*Kha guma, Kraisra, ana fharav nuiana vhen khɨna guarara vergap, ana zumgum vun ndagi. Ana guigira vun ndav, vu guarara ndagi. Ana ndav, ana za mba bigi ana za nta tugara tɨgap, nta garim, nta ana piin ki. 
\v 11 \x - \xo 4.11: \xo*\xt Ro 12.7; 1 Ko 12.28; 2 T 4.5\xt*\x*Ana nduara fhura kha khesharigi ndɨkndɨgi vhuuiŋ ndi ndɨɨi. Ana gumgi mbari, ana won ŋaarar muun zav mben farasegi. Ana mbari, ana Fhe Bakɨmen kamthoon gumgi kɨrga, ŋaara mbe nɨɨŋgi. Mbari, ana won buna vhuueŋ bun gumgi gu mbigi ga suanga ŋaarar mbe nɨɨŋgi. Ana mbari, ana won ŋaara gumgi kɨv guigira Zisas khothɨgi gumgi gu mbigi kurkurav, Fhe Bakɨme vuzvugi tɨvir mbe khɨvɨrga. 
\v 12 \x - \xo 4.12: \xo*\xt 1 Ko 12.7; Ef 1.23; 2 T 3.17\xt*\x*Krais nza Fhe Bakɨmen gumgi gu mbigi, ana nzan kurkurar zav fhura mba ndɨkndɨgi vhuuin mbe nɨɨŋgi. Mbe nzan kurkurarga, nza maaŋ muuŋgip ana ŋaarar vhuun muunga. Mbe mba ŋaarar muunga, nza guigira Krais khothɨgi gumgi gu mbigi, nza khaŋ tɨgɨp havhargip guma kharɨk ŋkasŋkagiap, vhuuv, nzerara ki farar muuŋgip kɨrga. 
\v 13 \x - \xo 4.13: \xo*\xt 1 Ko 14.20; Kor 1.28; 2.2\xt*\x*Kha ŋaar, ana mbara muuŋgip ŋgɨp kɨrim, nza zam guigira ndava bavira wari phorgɨp Zisas khothivɨv, nza zam guigira Fhe Bakɨmen Kama kaŋgirga. Nza maaŋ muuŋgip, guma ruma farar muuŋgip, nza guigira Zisas khothɨgap, ana zɨn vui tɨvi, nta Zisas tɨvira fara muuŋgirga. 
\v 14 \x - \xo 4.14: \xo*\xt Ais 28.9; 1 Ko 14.20; 2 Ko 2.17; Hi 13.9\xt*\x*Nza wom tarire ki farar muuŋgip kɨrga fhu. Nza kɨv, mba raaŋ shav bigi guiguigi gumgi, mbe guigira guiguigɨ kaŋgi. Mbe guiguigi buni fhura bɨɨŋbɨɨŋ gum mbasɨk phuri kema si fara muuŋgi, mba kem, ana fhura tamtam vui. Ana wo vui ŋanen vui fhuvara. Nza mba fara muunga fhu. 
\v 15 \x - \xo 4.15: \xo*\xt Ef 1.22; 4.25; Kor 1.18; 1 Zo 3.18\xt*\x*Nza khuarir mba khesharigi bunin rɨgɨrga fhu. Zakɨra fhuvara! Nza guigira wari won ndavir wari ga ndɨɨi tɨvi zɨn ŋgɨv, vhɨra khaŋ tɨgɨp buni guari bun suanga. Nza maaŋ muunga, nza havhargiap ki gumgi gu mbigi kɨv, nza guigira Krais phorgɨrga, ana nzan pan ma. 
\v 16 \x - \xo 4.16: \xo*\xt Kor 2.19\xt*\x*Ana suira gu hari, anan rɨmgi, ana nta garim, nta bevbevira ana nɨɨŋgi ŋaari, nta nta mbui. Ana vhɨra thɨvi ŋkɨriiŋ gum hari gu bigi ga mbuim, nta tuituigiap wari suigiap, guigira ndavir wari ga ndɨɨv, ŋkasŋkagiap vhuui. Nza mba tɨva mbuav, nzan fhavi ŋkasŋkagiap vhuui.
\s Guigira Krais khothɨgi gumgi gu mbigi, mbe Krais tɨva zɨn ŋgɨri.
\p
\v 17 \x - \xo 4.17: \xo*\xt Ro 1.21; 1 Pi 1.14\xt*\x*Maaŋ muuŋgiap, gu buna muen nde suan za mbui. Gu Guma Bakɨme zɨn panan, gu kama havharar khaŋ nde nzuai, nde wom harigi ŋgui gumgi gu mbigi tɨva zɨn ŋgɨ thari. Mbe ndɨkndɨgi, nta fhura ki ndɨkndɨgi ma. 
\v 18 \x - \xo 4.18: \xo*\xt FG 26.18; Ga 4.8; Ef 2.12; 1 Te 4.5\xt*\x*Mbe ndɨkndɨgi gɨngɨngi. Mbe bigɨn the kaŋgi fhuvara, mben pani havhargim, mbe Fhe Bakɨmen kɨrɨ tɨvi thav, kɨrar ki. 
\v 19 \x - \xo 4.19: \xo*\xt Kor 3.5\xt*\x*Mbe wari wo mbui tɨvi, mbe ntan mberi fhu. Mbe guigira tɨvi mbatɨgi vhen vergap, mbe mbarkɨrga tɨvi mbatɨgi guarira muun zav thagi ne mbui.
\p
\v 20-21 Gu kaŋgi, nde Kraisan kameŋ mbararagim, mba buna guareŋ Kraisan ki. Mbe nen nde khɨvav nde suaŋgi. Maaŋ muuŋgiap, gu kaŋgi, mbe ndava vura tɨvi zɨn ŋgɨr zav, nde khɨvav, nde suaŋgi fhuvara. 
\v 22 \x - \xo 4.22: \xo*\xt Ro 6.6; 8.13; Ef 2.2-3; 4.17; Kor 3.9; Hi 12.1; 1 Pi 4.3\xt*\x*Nde fhum, nde vhɨra ndavi vuri tɨvi zɨn vuim, nta nde guiguigim, nde tɨvi mbatɨgir muun zav ndavi khavi. Mba tɨvi, nta guma ndiga mbarɨgɨrga tuavar vui. Nde ntigem, mba tɨvi vuri, nde nta vharari. 
\v 23 \x - \xo 4.23: \xo*\xt Ro 12.2; Kor 3.10\xt*\x*Nde ntigem, nde ndɨkndɨgi ŋkaa zɨn ŋgɨri. 
\v 24 \x - \xo 4.24: \xo*\xt Stt 1.26; Ro 6.4; Ef 2.10; Kor 3.10\xt*\x*Nde tɨvir ŋkaa zɨn vui gumgi gu mbigi kɨri. Nde Fhe Bakɨme nde muuŋgi, nde tɨvir ŋkaa zɨn ŋgɨri. Nde Fhe Bakɨmera farar muuŋgip kɨri. Ne khaŋ muuŋgi, nden tɨvi guigira nzerara kɨrim, nde ŋgaravra kɨri.
\p
\v 25 \x - \xo 4.25: \xo*\xt Sek 8.16; Ro 12.5; Kor 3.8-9\xt*\x*Maaŋ muuŋgiap, nde guiguigi tɨvi thari. Nde buni guarira mba guigira Zisas khothɨgi gumgi gu mbigi ga suaŋri. Ne khaŋ muuŋgi, nza zam Krais ntɨɨri ma, nza Ndia bavira nza tegi. 
\v 26 \x - \xo 4.26: \xo*\xt Sng 4.4; Ze 1.19-20\xt*\x*Nde maaŋ muuŋgip ndavi shiv, nde tuituigira wari ganɨri. Nde tɨva mbatɨga thueŋ muuŋ thari. Nde bigɨn thueŋ suaŋv ndav shigip, mba ndav shirɨ mbara muuŋgip kɨrim, ra ŋgirɨv vhɨzɨ thari. 
\v 27 \x - \xo 4.27: \xo*\xt 2 Ko 2.10-11; Ze 4.7; 1 Pi 5.9\xt*\x*Nde Satan ga suaŋv thɨma fhɨrɨ thari. 
\v 28 \x - \xo 4.28: \xo*\xt 1 Te 4.11; 2 Te 3.8; 3.11-12\xt*\x*Mba kɨɨi gumgi, mbe wom kɨmɨ thari. Zakɨra fhuvara! Mbe ntigem wari won harira ŋgarɨri. Mbe wari won harira ŋaarir vhuuin muuŋri. Mbe wari wo harira ŋgarɨv, bigi tuktɨgɨp, maaŋ muuŋgip bigi sosuagi gumgir kurkurarga. 
\v 29 \x - \xo 4.29: \xo*\xt Ef 5.4; Kor 3.8; 3.16; 4.6; 1 Te 5.11\xt*\x*Nde fhura mbarkɨrga buni mbatɨgi, nde wari won kaathoorin nta suaŋ thari. Fhuvara. Buni vhuuiŋra nde kaathoorin kegɨp hɨv, guigira Zisas khothɨgi ndɨkndɨk havhargi fhuv gumgir kurkurav, mbe havharɨrga. Mba khesharigi buni, nta Fhe Bakɨmen kora muumbara ndiga zim, gumgi gu mbigi ana mbararagi. 
\v 30 \x - \xo 4.30: \xo*\xt Ais 63.10; Ro 8.23; Ef 1.13-14; 1 Te 5.19\xt*\x*Nde ndava simtɨgar Fhe Bakɨmen Ŋina Ŋaarar nɨɨŋ thari. Fhe Bakɨme nden won mbuiav, won Ŋina Ŋaarar nde nɨɨŋgim, ana nden vhen ki. Ana Ŋina Ŋaar nden vhen ki, ne khaŋ muuŋgi, nde ana gumgi gu mbigi ma. Ana nen nde khɨvɨr zav, ana tuga sarigi. Ana mba tugar nde ndigip, nden muuŋgirim, nde guigira bɨkbɨɨgirga. 
\v 31 \x - \xo 4.31: \xo*\xt Kor 3.8; 3.18-19; Ta 3.2-3; 1 Pi 2.1\xt*\x*Nde harigi gumgi ga nzuav ndavi mbarɨgi tɨvi, panan ki tɨvi, nde za nta vharari. Nde vhɨra vhegi tɨvi, ndav shi tɨvi, kama saan ndiav tuara huri tɨvi, harigi gumgi nzɨɨi tɨvi, nde mba khesharigi tɨvi mbatɨgi, nde za nta vharari. 
\v 32 \x - \xo 4.32: \xo*\xt Mt 6.14; 18.22-35; Mk 11.25; 2 Ko 2.10; Kor 3.13\xt*\x*Nde guigira Zisas khothɨgi gumgi gu mbigi nde tɨvir vhuuin mben muuŋv, wari won ndavir mben nɨɨŋri. Fhe Bakɨme mbara muuŋgiap Kraisan zɨn panan, ana nde muuŋgi tɨvi mbatɨgi, ana nta vhɨzgiap nta ndɨkndɨk ŋangi. Nde mbara muuŋgip, mbe nde muuŋgi tɨvi mbatɨgi, nde vhɨra nta ndɨkndɨk ŋangiri.
\c 5
\s Nza vhava ŋaarar rurga.
\p
\v 1 \x - \xo 5.1: \xo*\xt Mt 5.48; Ru 6.36\xt*\x*Fhe Bakɨme guigira won ndavar nde nɨɨŋgim, nde ana tari ki. Maaŋ muuŋgiap, nde ana mbui tɨvi zɨn ŋgɨri. 
\v 2 \x - \xo 5.2: \xo*\xt Kis 29.18; Wkp 1.9; Sng 40.6; Zo 13.34; Ro 14.15; 2 Ko 2.15; Ga 2.20; Hi 7.27; 10.10; 1 Zo 3.11; 3.23\xt*\x*Nde guigira wari won ndavir harigi ntɨɨri ga ndɨɨi tɨvi zɨn ŋgɨp, wari ruri. Krais, ana guigira won ndavara nza nɨɨŋgiap won tuma fekhɨngiap nzan kurigi. Nde mba tɨva zɨn ŋgɨri. Ana won tuma fekhɨngiap Fhe Bakɨme nzuav ndɨgar vhuuŋ hi ofa mbui fara muuŋgi ofa muuŋgi.
\p
\v 3 \x - \xo 5.3: \xo*\xt Ro 6.13; 1 Ko 5.1; 2 Ko 12.21; Kor 3.5; 1 Te 4.3\xt*\x*Nde fhura ruarir ferferɨv, ruarir mbigi gu gumgi wari kɨmɨv, wari ndi thari. Nde vhɨra mbarkɨrga tɨvi mbatɨgir muuŋ thari. Nde vhɨra harigi gumgi bigi niihɨ thari. Mba kɨr Fhe Bakɨme segi gumgi gu mbigi, mbe mba khesharigi tɨva thaneŋ ganɨrim, ne nden rɨgar kɨ thari. 
\v 4 \x - \xo 5.4: \xo*\xt Mt 12.35; Ro 1.28; Ef 4.29\xt*\x*Nde buni mbatɨgi suaŋv, ndɨkndɨk ki fhuv buni suaŋ, ŋgɨza buni mbatɨgi suaŋ thari. Nza mba khesharigi buni, nza nta suanga tuktɨgi fhuvara. Zakɨra fhuvara! Nde Fhe Bakɨmera phorgɨv suaŋv anan ndikndigɨri. 
\v 5 \x - \xo 5.5: \xo*\xt 1 Ko 6.9-10; Ga 5.19-21; Kor 3.5\xt*\x*Nde tuituigip khueŋ kaŋgiri, mba ruarir fhura ferferav, gumgi gu mbigi ruarir wari kɨɨv wari ndi tɨva mbuav, tɨvi mbatɨgi ga mbuav, mba bigi garav, nta niihi gumgi gu mbigi, mbe Krais gu Fhe Bakɨme piin kɨrga ntɨɨri phorgɨp kegɨrga tuktɨgi fhuvara. Mba bigi niihi tɨv, ana tori gu mbarɨvi rotu ga mbui tɨva fara muuŋgi.
\p
\v 6 \x - \xo 5.6: \xo*\xt Ro 1.18; Kor 2.4; 2.8; 2 Te 2.3\xt*\x*Nde tuituigira wari ganɨri. Nde fhura mba shɨshɨgi buni khɨni nzuai gumgi ganɨrim, mbe nde ŋgɨ thari. Mba khesharigi tɨvira, Fhe Bakɨme mba ana buni daasui gumgi gu mbigi, ana mbe nzuav ndav shi. 
\v 7 Maaŋ muuŋgiap, nde khurkhur mba khesharigi gumgi gu mbigi khuma thari. 
\v 8 \x - \xo 5.8: \xo*\xt Zo 12.36; FG 26.18; Ro 1.21; 2 Ko 3.18; Ef 2.11-13; Kor 1.13; 1 Pi 2.9; 1 Zo 2.9\xt*\x*Nde fhum mba tɨvi mbatɨgi gɨngɨnan kegi. Nde ntigem, Guma Bakɨme nde ndiv vhava ŋaarar fegi. Maaŋ muuŋgiap, nde vhava ŋaarar rui fara muuŋgi gumgi gu mbigi ruri. 
\v 9 \x - \xo 5.9: \xo*\xt Ga 5.22\xt*\x*Vhavar ŋaar, ana mbarkɨrga tɨvir vhuuiŋ ndi hiaŋ rɨgi. Ana nzerara ki tɨvi gum buni guari ndi hiaŋ rɨgi. 
\v 10 \x - \xo 5.10: \xo*\xt Ro 12.2; Fi 1.10; 1 Te 5.21; 1 T 2.3\xt*\x*Nde guigira khaŋ tɨgɨp havhargip Guma Bakɨme vuzvugi tɨvi kaŋgir saŋv nta suaŋv ŋgarɨri. 
\v 11 \x - \xo 5.11: \xo*\xt Ro 6.21; 1 Ko 5.9-11; Ga 6.8; 2 Te 3.6; 3.14; 2 Zo 1.10-11\xt*\x*Nde gɨngɨnan ki tɨvi ga mbui gumgi, nde khurkhuman mbe khumu thari. Mba khesharigi tɨvi, nta mban vhuuiŋ ti fhuvara. Zakɨra fhuvara! Nde khuen gumgi gu mbigi khɨvɨri. Mba khesharigi tɨvi, nta tɨvi mbatɨgi ma. 
\v 12 Nza zomzora mbui tɨvi, ga suangeŋ thari. Nza mba bigi ga suangen mbergi. 
\v 13 \x - \xo 5.13: \xo*\xt Ais 26.19; 60.1; Zo 3.20-21; Ro 13.11; Hi 4.13\xt*\x*Mba vhava ŋaar, ana za mba tɨvi mbatɨgi nɨɨŋge ndi kɨra suim, nta za hiiŋra ki. 
\v 14 Mba vhava ŋaar, ana bigɨn the ndi kɨra khɨngirga, mba bigɨn vhava ŋaara farar muuŋgip kɨrga. Maaŋ muuŋgiap, mba kameŋ ki,
\b
\q1 “Ndu ntigem kui guma, ndu khavgiri.
\q1 Ndu mbok thav khavgirim, Krais ndun muuŋgirim, ndu vhava ŋaarar kɨrga.”
\b
\p
\v 15 Maaŋ muuŋgiap, nde tuituigip wari wo rui ruru tɨvi gu bigi ganɨri. Nde ndɨkndɨk ki fhuv gumgi rui rurur muuŋ thari. Fhuvara. Nde ndɨkndɨgi vhuuiŋ ki gumgi rui rurur muuŋri. 
\v 16 \x - \xo 5.16: \xo*\xt Ga 6.10; Kor 4.5\xt*\x*Nde ntigem Fhe Bakɨmen tɨvir muunga tuk ki, nde tɨvir vhuuin muuŋri. Nde ntigem khar ki tuk, ana tuga mbatɨk ma. Maaŋ muuŋgiap, nde tuituigip wari ganɨri. Nde fhura kɨv, fhura mba tuga vhɨzɨ thari. 
\v 17 \x - \xo 5.17: \xo*\xt Ro 12.2; Kor 1.9; 1 Te 4.3; 5.18\xt*\x*Nde ndɨkndɨk ki fhuv gumgi gu mbigi mbui tɨvir muuŋ thari. Fhuvara. Nde Guma Bakɨme vuzvugi tɨvi, nde nta kaŋgiri.
\p
\v 18 \x - \xo 5.18: \xo*\xt Snd 20.1; Ais 5.11; 5.22; Ru 21.34\xt*\x*Nde pharar ŋanŋanin mbɨv ŋanŋanɨ thari. Fhuvara. Mba khesharigi tɨv, ana nden farfagi. Nde fhura Fhe Bakɨmen Ŋina Ŋaara ganɨrim, ana nde ganɨv guigira nden ndavi vherir, kɨri. 
\v 19 \x - \xo 5.19: \xo*\xt Sng 33.2-3; FG 16.25; 1 Ko 14.26\xt*\x*\x - \xo 5.19: \xo*\xt Kor 3.16-17\xt*\x*Nde guigira Zisas khothɨgi gumgi gu mbigi, nde wari phorgɨp buni suaŋv, nde Ŋgavi Ki Gavar ŋgavi, gum rotu mbui ŋgavi, gu Fhe Bakɨmen Ŋina Ŋaar nde ndavi khavav nde ndɨɨi ŋgavi, nde mba ŋgavir wari won buni phorgɨp mbe suaŋri. Nde vhɨra Guma Bakɨme suaŋv, nde wari wo kaathoori gum wari won ndavi vherir ana zɨ ndi vun kuamkuav, ana suaŋv ŋgavir muuŋri. 
\v 20 \x - \xo 5.20: \xo*\xt Sng 34.1; Ais 63.7; Hi 13.15; 1 Pi 2.5\xt*\x*Nde maaŋ muuŋv, nde zazera Zisas Kraisan zɨn panan, nde za mba bigi ga suaŋv Fhe Bakɨme phorgɨp suaŋv anan ndikndigɨri.
\s Por mani gu mburi ga nzuai.
\p
\v 21 \x - \xo 5.21: \xo*\xt Fi 2.3; 1 Pi 5.5\xt*\x*Nde Krais, nde Bakɨme ki ne ndɨkndɨgɨp, nde bevbevira, nde guigira Zisas khothɨgi gumgi gu mbigi piin kɨri.
\p
\v 22 \x - \xo 5.22: \xo*\xt Stt 3.16; Ef 6.5; Kor 3.18; 1 Pi 3.1\xt*\x*Nde mbigi, nde Guma Bakɨme piin ki tɨvara, nde wari won mani piin kɨri. 
\v 23 \x - \xo 5.23: \xo*\xt 1 Ko 11.3; Ef 1.22-23; Kor 1.18\xt*\x*Ne khaŋ muuŋgi, guma ana won muun pan ma. Krais mba tɨvara muuŋgi, Krais, ana siosan pan ma. Guma won kharɨga vuzvugi tɨvara, Krais won siosa vuzvugi. Krais ana taagiap ana ndigap, ana tuituigira ana gari. 
\v 24 Sios ana Kraisan piin ki. Mba tɨvara nde mbigi, nde vhɨra, nde za kha bigi, nde wari won manin piin kɨri.
\p
\v 25 \x - \xo 5.25: \xo*\xt Ga 1.4; Kor 3.19; 1 Pi 3.7\xt*\x*Nde gumgi, nde guigira wari won ndavir wari won muuin nɨɨŋgiri. Krais mba tɨvara muuŋgi, Krais ana guigira won ndavar sios ga nɨɨŋgiap, ana won tuma fekhɨngiap siosan kurigi. 
\v 26 \x - \xo 5.26: \xo*\xt Zo 15.3; 17.17; Ta 3.5; Hi 10.10; 10.22; 1 Zo 5.6\xt*\x*Ana wo suaŋgi kameŋ zɨn vugap, ana mbɨn sios ruagim, sios Fhe Bakɨme nɨman ŋgarigi. Ana mba tɨva muuŋgiap, ana siosan wora mbuigi. 
\v 27 \x - \xo 5.27: \xo*\xt 2 Ko 11.2; Ef 1.4; Kor 1.22\xt*\x*Ana siosan muuŋgirim, ana guigira ana rɨmani, nɨman vhergir zav mbui. Ana ana rɨmani nɨman nzaŋnzaŋgip, mbekmbegip, vharvhari kɨrga fhu. Zakɨra fhuvara! Sios ana ŋgaravra kɨv, ana simtɨk kɨrga fhu. 
\v 28 Mba tɨvara, nde gumgi, nde guigira wari won ndavir wari won muuin nɨɨŋgiri. Nde ndavir warira ndɨɨi tɨvara, nde mba tɨvara, nde mben muuŋri. Guma, ana guigira ndavar won muuaŋ ndɨɨi, ana taagia guigira ndavar wora ndɨɨi. 
\v 29 Nza khueŋ kaŋgi, guma the taagiap panan wora kegɨrga tuktɨgi fhuvara. Zakɨra fhuvara! Ana tuituigira won fhava garav, mban ana ndɨɨi. Krais ana mba tɨvara sios ga mbui. 
\v 30 \x - \xo 5.30: \xo*\xt Ro 12.5; 1 Ko 6.15; 12.27; Ef 1.22-23\xt*\x*Ne khaŋ muuŋgi, nza Kraisan kharɨgar fɨgiveiŋ ma. Nza anan suira gu hari gum ana rɨmgi ma. 
\v 31 \x - \xo 5.31: \xo*\xt Stt 2.24; Mt 19.5; Mk 10.7-8; 1 Ko 6.16\xt*\x*Fhe Bakɨme buni vhuuiŋ ki gap khaŋ nzuai, “Maaŋ muuŋgiap, guma ana won niamuuŋ gu ndia thav, ana won muuŋ phorgi, mani wani tɨgap guma bavira ki.” 
\v 32 \x - \xo 5.32: \xo*\xt Kor 3.19; 1 Pi 3.6; VB 19.7\xt*\x*Kha zorgi kameŋ, ne guigira ndɨkndɨk bakɨme nen vhen ki. Gu nduara kha ndɨkndɨga mbui, mba kameŋ, ne Krais gum ana sios ga nzuai. 
\v 33 Kha kameŋ ne vhɨra nde gumgi gu mbigi nde nzuai. Nde gumgi bevbevira, nde ndavar warira ndɨɨi tɨvara, nde guigira wari won ndavir wari won muuin nɨɨŋgiri. Nde mbigi, nde guigira wari won ndavir wari won manin nɨɨŋv, mbe piin kɨv, tɨvir vhuuiŋra mben muuŋri.
\c 6
\s Por tari gum ndegi gu ndegmbori ga nzuai.
\p
\v 1 \x - \xo 6.1: \xo*\xt Snd 23.22; Kor 3.20\xt*\x*Nde tari, nde wari won ndegi gu ndegmbori nzuai buni mbararav, nta zɨn ŋgɨri. Nde za Guma Bakɨme phorgi, mba tɨv, ana nde muunga tɨvar vhuuŋ ma. 
\v 2 \x - \xo 6.2: \xo*\xt Mt 15.4\xt*\x*\x - \xo 6.2: \xo*\xt Kis 20.12; Lo 5.16\xt*\x*Fhe Bakɨme buni vhuuiŋ ki gap khaŋ nzuai, “Nde wari won ndegi gu ndegmbori piin kɨv, mbe nzuai buni mbararav nta zɨn ŋgɨri.” Kha tɨveŋ ne fharigi tɨveŋ Fhe Bakɨme suaŋgi kameŋ nen ki. 
\v 3 Fhe Bakɨme mba suaŋgi kameŋ khaŋ nzuai, “Nde maaŋ muunga, nden kɨrɨ tɨvi gu bigi nzerarga. Nde tugar mpeeŋra kha nuianan kɨrga.”
\p
\v 4 \x - \xo 6.4: \xo*\xt Lo 4.9; 6.7; 6.20-25; Sng 78.4; Snd 19.18; 22.6; Kor 3.21\xt*\x*Nde ndegi, nde fhura wari won tarir muuŋrim, mbe nde suaŋv ndavi shi thari. Fhuvara. Nde Guma Bakɨme nɨman, nde khaŋ tɨgɨp tɨvir vhuuiŋra mbe khɨvɨrim, mbe nta zɨn ŋgɨri. Nde vhɨra, Guma Bakɨmen buni vhuuin mbe khɨvɨri.
\s Por ŋaara gumgi gum mbe gari mpiiŋsɨgi ga nzuai.
\p
\v 5 \x - \xo 6.5: \xo*\xt 2 Ko 7.15; Fi 2.12; Ta 2.9-10; 1 Pi 2.18\xt*\x*\x - \xo 6.5: \xo*\xt Kor 3.22-25\xt*\x*Nde fhura ŋaara gumgi ki gumgi, nde wari wo gari mpiiŋsɨgi piin kɨri. Nde guigira mben piin kɨv, zazera mbe buni zɨn ŋgɨp, mbe guiguigɨ thari. Nde Krais ŋaara mbuav mbui tɨvara muuŋri. 
\v 6 Nde mbe gansaman mbe raaŋ shi tɨvar muuŋv, mba ŋaarar vhuun muuŋ thari. Fhuvara. Nde mba ŋaarar muuŋv nde fhura Krais ŋaara gumgi ki tɨvara muuŋv, nde guigira wari won ndavir Fhe Bakɨme nɨɨŋgip, nde vhɨra Fhe Bakɨmen vuzvuga zɨn ŋgɨri. 
\v 7 Nden ndavi nzerara kɨv, mba ŋaarar muuŋri. Nde guma khɨnan ŋaara mbui ne ndɨkndɨgɨ thari. Fhuvara. Nde Guma Bakɨmen ŋaarara mbui. 
\v 8 \x - \xo 6.8: \xo*\xt 2 Ko 5.10; Ga 3.28; Kor 3.11\xt*\x*Nde ndɨkndɨgɨ. Maaŋ muuŋgip, guma the ŋaara vhuuŋra mbui, Guma Bakɨme vheza vhuuŋra anan nɨɨnga. Mba guma, ana ŋaara khɨna mbui guma o, ana bɨkbɨɨgiap kav ŋgari guma, ana vheza vhuuŋra anan nɨɨnga.
\p
\v 9 \x - \xo 6.9: \xo*\xt Lo 10.17; Ro 2.11; Kor 3.25; 4.1\xt*\x*Nde mbe gari mpiiŋsɨgi, nde vhɨra tɨvir vhuuiŋra mba nden ŋgari ŋaari gumgir khɨnin muuŋri. Nde fhura rɨrɨvar mbe ndɨɨi tɨvi, nde nta kuegɨri. Nde khueŋ kaŋgiri, kha Hevenan ki Guma Bakɨme, ana nde Guma Bakɨme gum, ana vhɨra mben Guma Bakɨme ma. Ana tɨva bavira zɨn vov, za kha gumgi gu mbigi mbui tɨvi ga nzuav, mbe garav mbe nzuai.
\s Guigira Zisas khothɨgi gumgi gu mbigi, mbe ntari ga mbui gɨɨtɨvi fara muuŋgiap wari ki.
\p
\v 10 \x - \xo 6.10: \xo*\xt 1 Ko 16.13; Ef 1.19; 3.16; Kor 1.11\xt*\x*Gu ntigem khaŋ muuŋgi tɨgɨp wo buni vhɨzɨ zav mbui. Nde Guma Bakɨme phorgi. Nde ana ŋkasŋka bakɨme panan, nde thɨgɨ havhargiri. 
\v 11 \x - \xo 6.11: \xo*\xt Ro 13.12; 2 Ko 6.7; 10.4; Ef 4.14; 1 Te 5.8\xt*\x*Nde Fhe Bakɨme ntarir muun zav nde nɨɨŋgi bigi, nde zam nta shargiri. Nde maaŋ muuŋgirga, nde thɨgɨ havhargip, mba Satan zomzorav, nde guiguigiap, nden muun za mbui tɨvi, nde nta daaŋgi mbur khɨngirga. 
\v 12 \x - \xo 6.12: \xo*\xt Zo 12.31; 14.30; Ro 8.38; 1 Ko 15.50; Kor 2.15; 1 Pi 5.8-9\xt*\x*Nde tuituigira ndɨkndɨgɨri. Nza gumgi gu mbigi phorga shogi fhuvara. Zakɨra fhuvara! Nza ŋiniŋgi ŋkasŋkagi phorga shogav, kha nuianan ŋiniŋgir pani phorga shogav, mbarkɨrga ŋkasŋkagi ki bigi phorga shogi. Nta ntigem kha tuga gɨngɨnan kav, kha nuiana gari. Nza vhɨra kha vun ki ŋiniŋgi mbatɨgi phorga shogi. 
\v 13 \x - \xo 6.13: \xo*\xt 2 Ko 10.4; Ef 5.16\xt*\x*Maaŋ muuŋgiap, nde Fhe Bakɨme ntarir muun zav nde nɨɨŋgi bigi, nde za nta ndigip, nta shargiri. Nde za maaŋ muuŋgip, mba tuga mbatɨk nden hi tugen, nde nta shargip thɨgɨ havhargip shogɨrga. Maaŋ muuŋgip mba ntar vhɨzgirga, nde mba ntara kambarigi, nde mbara muuŋgip thɨgɨ havhargip kɨrga. \fig Fhe Bakɨme khothɨgi gumgi ntari ga mbui shagi shargi. (6.11)|src="LB00196C-flip.tif" size="col" copy="Horace Knowles/Louise Bass" ref="6.11"\fig*
\p
\v 14 \x - \xo 6.14: \xo*\xt Ais 11.5; 59.17; 2 Ko 6.7; 1 Te 5.8\xt*\x*Nde thɨgɨ havhargiap Fhe Bakɨme bun nzuai buni guari, nde rɨkavar wari won vhaari ga rɨgi farar muuŋgip, ntan wari won vhaari rɨgiri. Nde tɨvir vhuuiŋ zɨn vui tɨv, ana siot kapa fara muuŋgip, nde ana shararim, ana nde fheeŋphugive vharari. 
\v 15 \x - \xo 6.15: \xo*\xt Ais 40.9; 52.7; Nah 1.15; Ro 10.15\xt*\x*Nde maaŋ muuŋgip, wari thɨthɨm tɨgɨp, nde Fhe Bakɨme kha gumgi gu mbigi phorgɨp ndava bavira kɨrga buna vhuueŋ bun mbe suaŋri. Mba tɨv, nde ntari ga mbui ŋkari sharive shari farar muuŋgip mba tɨva suirari. 
\v 16 \x - \xo 6.16: \xo*\xt 1 Zo 5.4\xt*\x*Nde za kha ntara bigi ndigɨp, nde vhɨra zazera guigira Zisas khothɨgi tɨv, nde ana suirari. Nde rama farar muuŋgip ana suira havhargiri. Nde maaŋ muuŋgip, nde mba guma mbatɨk Satan, nde ana vhava khɨgap si fugi, nde nta shogɨ nta phɨrɨ suegɨrga. 
\v 17 \x - \xo 6.17: \xo*\xt Ais 49.2; 59.17; 1 Te 5.8; Hi 4.12; VB 19.15\xt*\x*Nde Fhe Bakɨme taagiap nde ndigi, ne ndɨkndɨgɨri. Mba ndɨkndɨk, nde bɨna vhuigim, nde kapa khorar fagi farar muuŋgip, ana fari. Nde anan fav, nde Fhe Bakɨmen Ŋina Ŋaarar kos suirari. Ana Fhe Bakɨmen buna guareŋ ma. 
\v 18 \x - \xo 6.18: \xo*\xt Mt 26.41; Ru 18.1; Ro 12.12; Kor 4.2; 1 Te 5.17; 1 T 2.1\xt*\x*Nde Fhe Bakɨmen Ŋina Ŋaarar ŋkasŋkar panan, nde zazera Fhe Bakɨme phorgɨ suaŋri. Nde mbarkɨrga bunin Fhe Bakɨme phorgɨp suaŋv, anan nzaŋrim, ana nden kurkurari. Nde vhɨra zazera wari ganɨri. Nde vhuksu thari. Nde zazera Fhe Bakɨme phorgɨp suaŋv, za mba guigira Zisas khothɨgi gumgi gu mbigir kurkurar saŋv, ana nzaŋri. 
\v 19 \x - \xo 6.19: \xo*\xt FG 4.29; 2 Ko 3.12; Kor 4.3-4; 2 Te 3.1\xt*\x*Nde vhɨra nan kurkurar saŋv Fhe Bakɨme phorgɨp suaŋv ana nzaŋri. Gu khueŋ vuzvugi, nde khaŋ muuŋgi tɨgɨp Fhe Bakɨme phorgɨp suaŋri. Gu ana buna vhuueŋ bun suan saŋv muuŋrim, Fhe Bakɨme wo buna vhuuen na kamthooŋ khɨngirim, gu rɨvɨ thav, guigira thɨgɨ havhargip ana zorga ki buna vhuuen nɨɨŋge ne bun suanga. 
\v 20 \x - \xo 6.20: \xo*\xt 2 Ko 5.20; Fi 1.20; Fm 1.9-10\xt*\x*Fhe Bakɨme nduara na sarigim, gu mba buna vhuueŋ bun suan zav vugi. Gu mba buna nɨɨeŋra nzuav gu bɨnan ki. Gu Fhe Bakɨmen buna vhuueŋ bun suanga ŋaar ki. Maaŋ muuŋgip, nde Fhe Bakɨme phorgɨp suaŋrim, ana na havhargirim, gu rɨvɨ thav, khaŋ tɨgɨp havhargip, gumgi gu mbigi phorgɨp suanga.
\s Por tɨvar vhuun mben muun zav Fhe Bakɨme nzuai.
\p
\v 21 \x - \xo 6.21: \xo*\xt FG 20.4; Kor 4.7-8; 2 T 4.12; Ta 3.12\xt*\x*\x - \xo 6.21: \xo*\xt Kor 4.7-8\xt*\x*Tikikus, gu muuŋgi ŋaari gum nan kɨrɨ tɨvi, ana za nta bun nde suanga. Tikikus, nza guigira ana vuzvugi. Ana nza phorgap guigira Zisas khothɨgi guma ma. Ana vhɨra Guma Bakɨmen ŋaara guman vhuuŋ ma. 
\v 22 Gu ana sarigim, ana mba bigeŋra nzuav, ana nden han mbar vui. Ana ŋgɨp, gu ki kɨrɨ tɨva bun nde suanga, nde gu ki kɨrɨ tɨvi kaŋgip, nde wari won ndavi havhargirga.
\p
\v 23 Nde na phorgap guigira Zisas khothɨgi gumgi gu mbigi, nza Ndia Fhe Bakɨme gum nza Bakɨme Zisas Krais, mani ndava mɨɨtɨgar nden nɨɨŋrim, nde khaŋ tɨgɨp havhargip guigira Zisas khothɨgɨp, guigira wari won ndavir warir nɨɨnga. 
\v 24 \x - \xo 6.24: \xo*\xt 1 Pi 1.8\xt*\x*Fhe Bakɨme kora muumbar za mba guigira wari won ndavir nza wo Guma Bakɨme Zisas Krais ga ndɨɨ gumgi gu mbigi phorga ki. Mbe guigira wari won ndavir Zisas ga ndɨɨi tɨv, ana vhɨzgirga tuktɨgi fhuvara.