\id 2TH Reconstructed from Ventura Publisher
\ide UTF-8
\h 2 Tesaronaika
\toc1 Khe Por Phenatɨtɨgap Tesaronaikaiŋ Ndi Khergi Gap
\toc2 2 Tesaronaika
\toc3 2 Te
\mt1 2 TESARONAIKA
\mt2 Khe Por Phenatɨtɨgap Tesaronaikaiŋ Ndi Khergi Gap
\imt Khe fharav ganɨnga buni khare.
\ip Mbe Tesaronaikan kav guigira Zisasan khothɨgi gumgi gu mbigi, mbe ndɨkndɨgi vhɨrve ga mbui. Mbe kha ndɨkndɨga mbui, Krais taagip zirɨrim, thagɨna bigeŋ hɨgɨrie? Mbe mbari khaŋ nzuai, Guma Bakɨme zirɨrga tuk, ana fhum hɨgim, ana zergi. Mbe mba khesharigi ndɨkndɨgi ga mbuim, Por gu Sairas, Timoti, mbe ndɨkndɨgi ndi thɨgar maan zav mba gava khergi.
\ip Mbe mba gava kherav, Por khaŋ mbe nzuai, mba tuk hɨgi fhuvara. Kha nuianan ki gumgi gu mbigi guigira rɨɨŋrɨɨnga, mbarkɨrga tɨvi mbatɨgi khaŋ tɨgɨ havhargip, kha nuianan hɨrga. Fhe Bakɨme suaŋgi tɨvi dai guma kha nuianan hɨgɨp, guigira panan Krais ga kegɨrga.
\ip Por thɨgɨ havhargip, Zisas khothɨgɨp simtɨgi ndir zav mba gumgi gu mbigi ga nzuai. Ana khueŋ vuzvugi, mbe thɨgɨ havhargip, nduarira wari ganɨnga. Mbe ana phorga ŋgari gumgi, mbe mbe mbui tɨvar muunga. Mbe ŋaarar vhukvhugɨrga fhu. Mbe vhɨra harigi ntɨɨrir kurkurargen vhukvhugɨrga fhu.
\c 1
\ms Guma Bakɨme taagi zirɨrga tuk zumgum hɨrga.
\p
\v 1 \x - \xo 1.1: \xo*\xt FG 17.1; 1 Te 1.1\xt*\x*Gu Por, Sairas, gu Timoti, nza kha gava khergiap, nde Tesaronaikan ŋgu bakɨmen kav guigira Zisas khothɨgi gumgi gu mbigi, nza anan nde ndi mbai. Nde nza won Ndia Fhe Bakɨme gum nzan Bakɨme Zisas Krais phorga ki gumgi gu mbigi ma.
\p
\v 2 \x - \xo 1.2: \xo*\xt Ro 1.7\xt*\x*Nza Ndia Fhe Bakɨme gum nza Bakɨme Zisas Krais, mani nden korar muuŋv ndava mɨɨtɨgar nden nɨɨŋrim, nde kɨri.
\s Mbe Tesaronaikaiŋ, mbe simtɨgi hi tugir, mbe thɨga havhargi.
\p
\v 3 \x - \xo 1.3: \xo*\xt 1 Te 1.2-3; 2 Te 2.13\xt*\x*Nde nza phorgap guigira Zisas khothɨgi gumgi, nza zazera nde ndɨkndɨgap, nde nzuav Fhe Bakɨme phorga nzuav anan ndikndigi. Nza maaŋ mbui, ne guigira nzerigi. Ne khaŋ muuŋgi, nde guigira khaŋ tɨgap Zisas khothɨgap ana zɨn vui ne guigira havhargi. Nde maaŋ mbuav, nde bevbevira wari won ndavi ndiv wari ga ndɨɨi. Nde mba tɨva mbuim, mba tɨv guigira kɨvgi. 
\v 4 \x - \xo 1.4: \xo*\xt 2 Ko 7.4; 7.14; 1 Te 2.19; VB 1.9\xt*\x*Mba bigɨna nɨɨeŋra, nza Fhe Bakɨmen siosi ga ruav, nza nde zɨri ndiv vun kuamkuagi. Nza nden pana gumgi nde mbui tɨvi mbatɨgi, nza nta bun mbe nzuav, nden hi simtɨgi, nza vhɨra nta bun nzuai. Nza mbe nzuav khaŋ nzuai, “Tesaronaikaiŋ mbe thɨga havhargiap, Zisas khothɨgap, ana zɨn vui tɨva suirav, mben hi simtɨgi gu zaagi, mbe nta ndi.”
\s Fhe Bakɨme tɨvir vhuuiŋra zɨn vov, nza mbui tɨvi ga nzuav nza nzuai.
\p
\v 5 \x - \xo 1.5: \xo*\xt Fi 1.28\xt*\x*Mba nden hi bigi, Fhe Bakɨme khuen nza khɨvigi, ana tɨvar vhuuŋra zɨn vov nza mbui tɨvi ga nzuav, nza nzuai. Nde zaa ndi, ne khaŋ muuŋgi, nde Fhe Bakɨme won gumgi gu mbigi ganɨrim, mbe ana piin kɨrga ŋgu khavi. Nde maaŋ mbuim, Fhe Bakɨme nde muuŋgim, nde guigira ana wo gumgi gu mbigi ganɨrim, mba ana piin ki ntɨɨri, nde mbe phorgɨ kɨrga tuktɨgi. 
\v 6 \x - \xo 1.6: \xo*\xt Ro 12.19; VB 18.6-7\xt*\x*Fhe Bakɨme tɨvar vhuun muuŋv, khaŋ muunga. Ana simtɨgar nde ndɨɨi gumgi, ana nen ŋgarkarav simtɨgar mben nɨɨnga. 
\v 7-8 \x - \xo 1.7-8: \xo*\xt Mt 25.31; 1 Te 3.13; 4.16\xt*\x*\x - \xo 1.7-8: \xo*\xt Sng 79.6; Ais 66.15; Jer 10.25; Ro 2.8; 1 Pi 4.17\xt*\x*Nde ntige mba ndi simtɨgi, ana nta vhɨzgip, vhuksur nden nɨɨŋv, vhɨra nzan nɨɨnga. Nza Bakɨme Zisas won enseri ŋkasŋkagir kov, mbe Hevenan kegɨp, kɨrar hɨrga tugar, Fhe Bakɨme maaŋ muunga. Ana vhava bakɨ guarara phorgɨ zirɨrga. Ana zirɨv, Fhe Bakɨme kangeŋ thagi gumgi gu mbigi gum, nza Bakɨme Zisas buna vhuueŋ mbararargeŋ thagi gumgi gu mbigi, ana muumbara mbatɨgar mben muuŋgirga. 
\v 9 \x - \xo 1.9: \xo*\xt Ais 2.10; 2.19-21; Fi 3.19; 2 Pi 3.7\xt*\x*Mba gumgi gu mbigi, mbe mba khesharigi vheza mbatɨga ndigirga. Mbe Guma Bakɨme thav, samra kɨrga, mbe vhɨra, ana vhava ŋaara ŋkasŋka thav, samra kɨv, mbe zazera mbatɨgip mbara muuŋgip kɨrga. 
\v 10 \x - \xo 1.10: \xo*\xt Sng 68.35; 89.7; Kor 3.4; 1 Te 3.13\xt*\x*Fhe Bakɨme mba sarigi tugar, Guma Bakɨme zɨv muumbara mbatɨgar mben muunga. Mba Fhe Bakɨmen gumgi gu mbigi, mbe guigira ana khothɨgi gumgi gu mbigi ma. Mbe ana zɨ ndiv vun kuamkuav, anan ndikndigɨrga. Nde vhɨra mbe phorgɨp ndikndigɨrga. Ne khaŋ muuŋgi, nza nde rɨgar kav, Fhe Bakɨme buna vhuueŋ bun nde suaŋgim, nde guigira ne khothɨgi.
\s Mbe Tesaronaikaiŋ havharɨ zav Fhe Bakɨme phorga nzuai.
\p
\v 11 \x - \xo 1.11: \xo*\xt Kor 1.9; 1 Te 1.2-3\xt*\x*Nza mba hɨr zav mbui bigi ga ndɨkndɨgap, nza zazera nde nzuav, nza won Fhe Bakɨme phorga nzuav, anan nzai, ana nden kurkurarga. Nza khueŋ vuzvugi, nde guigira ana muun zav nden kamgi tɨvi, nde ntan muunga. Nza ana ŋkasŋkar nden nɨɨn zav, nza ne nzuav ana phorga nzuai. Nde ana khothɨgi ndɨkndɨk nde ndavi khavɨrim, nde mba muun zav mbui tɨvir vhuuiŋ, nde zam ntan muunga. 
\v 12 \x - \xo 1.12: \xo*\xt Ais 24.15; Mal 1.11; 1 Pi 1.7; 4.14\xt*\x*Nde mba tɨvar muuŋv, nza wo Bakɨme Zisas zɨ ndiv vun kuamkuarga, ana vhɨra nde zɨri ndiv vun kuamkuarga. Nza Fhe Bakɨme gum nza Bakɨme Zisas Krais nden korar muuŋv, mba tɨvar nden muuŋri.
\c 2
\s Fhe Bakɨme suaŋgi tɨvi daai guma hɨgɨrga.
\p
\v 1 \x - \xo 2.1: \xo*\xt Mt 24.31; 1 Te 4.13-17\xt*\x*Nde nza phorgap guigira Zisas khothɨgi gumgi, nza ntigem nza wo Bakɨme Zisas Krais taagi zirɨrim, nza ana phorgɨp phogar vhorga ne bun nde suan zav mbui. Nza khueŋ vuzvugi, nde tuituigip khuarir nza kha nzuai bunen tɨgɨri. 
\v 2 \x - \xo 2.2: \xo*\xt Mt 24.4; Ef 5.6; 1 Zo 4.1\xt*\x*Gumgi thari khaŋ nde suaŋgi thi, “Guma Bakɨme zirɨrga tuk hɨgim, ana taagia zergi?” Maaŋ suaŋgi guma khueŋ ndɨkndɨgi thi? Fhe Bakɨmen Ŋina Ŋaar mba kamen ana nɨɨŋgi, ana zumgum hɨrga bigeŋ ana ne bun suaŋgi o, guma the Fhe Bakɨmen buni vhuuiŋ bun nzuav ne bun suaŋgire? O, guma the khaŋ suaŋgi, nza kha gava kherav, mba khesharigi kamen nde suaŋgi. Nde maaŋgi ŋanen kha kameŋ mbararagi, ne fhura ki kameŋ ma. Nde ne mbararagip, nde vhemkora ŋgava mbatɨgar muuŋv ne suaŋv simɨ thari. 
\v 3 \x - \xo 2.3: \xo*\xt Zo 17.12; 1 T 4.1; 1 Zo 2.18; 4.3; VB 13.11-14\xt*\x*Nde fhura guma the ganɨrim, ana nde guiguigi thari. Ana mbui tɨva thueŋ vhɨra nde guiguigɨ thari. Nde mbarara. Mba tuk fhura hɨgɨrga fhuvara. Zakɨra fhuvara! Gumgi vhɨrve, mbe fharav rɨɨŋrɨɨŋv kɨr Fhe Bakɨme segɨrga. Mba Fhe Bakɨme suaŋgi tɨvi daasui guma, ana za kɨrar hɨgɨrga. Mba guma, ana Herar kɨv mbarɨgɨrga guma ma. 
\v 4 \x - \xo 2.4: \xo*\xt Dan 7.25; 11.36; Ese 28.2; 1 Ko 8.5; VB 13.6\xt*\x*Ana zɨv, mbarɨvi gu tori, ana panan nta kegɨrga. Ana maaŋ muuŋv, fhura ndikndigɨp nduara wo zɨ ndiv vun kuamkuagi bigi, ana zam nta mbevarga. Ana maaŋ muuŋv, Fhe Bakɨme Phena vhen ŋgirgɨp perav, khaŋ suanga, “Gu nduara Fhe Bakɨme ma.”
\p
\v 5 Gu nde phorga kav mba bigir nde suaŋgi. Nde nta ndɨkndɨk ŋangi thi? 
\v 6 Nde ntigem, mba guma kɨrar hɨr za mbuim, ana tuav mpɨrigi bigɨn, nde ana kaŋgi. Ana Fhe Bakɨme ana sarigi tugara, ana hɨrga. 
\v 7 \x - \xo 2.7: \xo*\xt 1 Zo 2.18; 4.3\xt*\x*Nde kaŋgi, ntigem, Fhe Bakɨme suaŋgi tɨvi daai tɨv, ana zorgap vhee mbugum ŋgarav ki. Ana mbara muuŋgip vhen mbugum ŋgarɨv kɨrim, Fhe Bakɨme farasarigi tuk hɨrga, mba anan tuav mpɨrigi guma, mba tuav thav sarga. 
\v 8 \x - \xo 2.8: \xo*\xt Jop 4.9; Ais 11.4; Dan 7.10; Hi 10.27; VB 19.15\xt*\x*Mba tugar Fhe Bakɨme suaŋgi tɨvi daai guma za kɨrar hɨgɨrga. Nza Bakɨme Zisas won kamthooŋ bɨɨŋbɨɨŋra ana shogirim, ana rimgirga. Nza Bakɨme vhemkora won vhava ŋaara bakɨme phorgɨp kɨrar hɨgɨrga, ana Fhe Bakɨme suaŋgi tɨvi daai guman farfagirga. 
\v 9 \x - \xo 2.9: \xo*\xt Mt 24.24; Zo 8.41; Ef 2.2; VB 13.11-13; 18.23; 19.20\xt*\x*Mba Fhe Bakɨme suaŋgi tɨvi daai guma, ana Satan ŋkasŋkar panan kɨrar hɨgɨrga. Ana kɨrar hɨgɨp, Satan bigi guiguigi tɨvar muuŋv, ana mbarkɨrga ŋaari bakɨvir muuŋv, mbarkɨrga guiguigi mirikori, ana ntan muunga. 
\v 10 \x - \xo 2.10: \xo*\xt 2 Ko 2.15; 4.3\xt*\x*Ana mba guiguigi tɨvi mbatɨgi, ana zam ntan mba za mbarɨgirga tuavara vui gumgi gu mbigi, ana mbe guiguigirga. Mba gumgi gu mbigi, mbe mbatɨgirga. Ne khaŋ muuŋgi, Fhe Bakɨme taagip mbe ndir zav buni guarir mbe nɨɨŋgim, mbe mba buni vuzvugi fhu. 
\v 11 \x - \xo 2.11: \xo*\xt Mt 24.5; 24.11; Ro 1.24; 1 T 4.1; 2 T 4.4\xt*\x*Maaŋ muuŋgiap, Fhe Bakɨme mbe ndɨkndɨgi ga muuŋgim, mbe mba guiguigi buni, mbe nta khothɨgɨrga. 
\v 12 \x - \xo 2.12: \xo*\xt Ro 1.32\xt*\x*Maaŋ muuŋgiap, mba buni guari khothɨgi fhuv gumgi gu mbigi, mbe zam tɨvi mbatɨgir muungeŋ nzuav ndikndigi. Mbe Fhe Bakɨme za kha nuianan ki gumgi gu mbigi muuŋgi tɨvi mbatɨgi ga suaŋv mbe suanga tugar mbe ne suaŋv vheza mbatɨga ndirga.
\s Fhe Bakɨme taagip nde ndir zav nden farasarigi.
\p
\v 13 \x - \xo 2.13: \xo*\xt Ru 1.75; Zo 15.16; Ef 1.4; 1 Te 4.7; 5.9; 2 Te 1.3\xt*\x*Nde nza phorgap guigira Zisas khothɨgi gumgi, Guma Bakɨme guigira wo ndavar nde nɨɨŋgi. Nza zazera mba ndɨkndɨgar muuŋv, nza khueŋ ndɨkndɨgɨrga, nza zazera nde suaŋv Fhe Bakɨme phorgɨv suaŋv ana ndikndigirga. Fhe Bakɨme fhum guarara nde farasarigi, nde ana ndir za mbui gumgi gu mbigi, rɨgar ki. Fhe Bakɨme won Ŋina Ŋaarar nde nɨɨŋgi, nde anan gumgi gu mbigir vhuuiŋ ma. Nde Fhe Bakɨme buna guareŋ khothɨgim, Fhe Bakɨme maaŋ muuŋgiap taagia nde ndigi. 
\v 14 Nza mba Fhe Bakɨme buna vhuuen nde suaŋgi. Fhe Bakɨme mba buna vhuuen panan, ana khueŋ vuzvugiap, nden kamgi, nde vhɨra nza wo Bakɨme Zisas Kraisan vhava ŋaara bakɨme gum ana ŋkasŋka bakɨme vhen kɨrga. 
\v 15 \x - \xo 2.15: \xo*\xt 1 Ko 11.2; 16.13; Fi 4.1; 2 Te 3.6\xt*\x*Maaŋ muuŋgiap, nde nza phorgap guigira Zisas khothɨgi gumgi nde guigira thɨgɨ havhargiri. Nde thɨgɨ havhargip, nde nza mba Fhe Bakɨme buni vhuuiŋ bun nde suaŋgi, nde nta suira havhargip, nde vhɨra nza kha gava khergiap, nde nzuai buni, nde vhɨra nta suirav havhargiri.
\p
\v 16 Fhe Bakɨme won ndavar nzan nɨɨŋv, ana nza kora muuŋgiap, ana nza ndavi vheri ga muuŋgim, nta zazera nzerara ki. Ana vhɨra nzan kurkurigim, nza ana khothɨgap, ana guigira tɨvar vhuun nzan muungen rarga ki. 
\v 17 \x - \xo 2.17: \xo*\xt 1 Ko 1.8; 1 Te 3.13; 1 Pi 5.10\xt*\x*Gu maaŋ muuŋgiap, gu nza Guma Bakɨme Zisas Krais gum nzan Ndia Fhe Bakɨme phorga nzuav manin nzai, mani nde ndavi vherir muuŋrim, nde ndavi havhargip, nde tɨvir vhuuin muuŋv bunin vhuuiŋra suanga.
\c 3
\ms Mbe Tesaronaikaiŋ, mbe vhukvhuga kɨvgi gumgi, mbe mbe nzuav mben tɨvi ndiv thɨgar mbai.
\s Nde Fhe Bakɨme phorgɨv suaŋrim, ana nzan kurkurari.
\p
\v 1 \x - \xo 3.1: \xo*\xt Ef 6.19; Kor 4.3; 1 Te 5.25\xt*\x*Nde nza phorgap guigira Zisas khothɨgi gumgi, nza nde suanga buna mueŋ phorga khar ki. Mba buneŋ khaŋ muuŋgi. Nde nza suaŋv Fhe Bakɨme phorgɨp suaŋrim, ana nzan kurkurarim, Guma Bakɨme buna vhuueŋ vhemkora za kha bigir ŋgɨrim, ana zɨ guigira kɨvgip, ana nde han maam, nden rɨgar zɨ kɨvgi farar muuŋgirga. 
\v 2 \x - \xo 3.2: \xo*\xt FG 28.24; Ro 10.16; 15.31\xt*\x*Nde vhɨra Fhe Bakɨme phorgɨp suaŋrim, ana mba gumgi mbatɨgi farve tɨn nza ndigirga. Mba gumgi, mbe tɨvi mbatɨgi ga mbui gumgi ma. Nde kaŋgi, gumgi mbari, mbe Krais khothɨgi fhu.
\p
\v 3 \x - \xo 3.3: \xo*\xt Zo 17.15; 1 Ko 1.9; 1 Te 5.24; 2 Pi 2.9\xt*\x*Guma Bakɨme, ana wo nzuai buni, ana za nta zɨn vui. Ana nde ganɨv, nden havhargirga, Satan bigɨn thuen nden muuŋgirga tuktɨgi fhu. 
\v 4 \x - \xo 3.4: \xo*\xt 2 Ko 7.16; Ga 5.10; 1 Te 4.10\xt*\x*Guma Bakɨme ndɨkndɨgar nza ndɨɨim, nza tuituigiap khueŋ kaŋgi, nza mba muun zav nde suaŋgi tɨvi, nde zam nta mbui. Nde zumgum vhɨra mba tɨvara muunga.
\p
\v 5 Nza khueŋ vuzvugi, Guma Bakɨme ndɨkndɨgar nden nɨɨŋrim, nde ndɨkndɨgi nzerara kɨv, nde Fhe Bakɨme guigira won ndavar kha gumgi gu mbigi ga ndɨɨi tɨv, nde guigira ana kaŋgip, nde vhɨra Krais thɨga havhargiap simtɨgi ndigine, nde vhɨra ne kaŋgirga.
\s Gumgi za ŋgarɨri.
\p
\v 6 \x - \xo 3.6: \xo*\xt Mt 18.17; Ro 16.17; 1 Ko 5.11-13; 1 Te 3.11-13; 1 T 6.5; 2 Zo 1.10\xt*\x*Nde nza phorgap guigira Zisas khothɨgi gumgi, nza wo Guma Bakɨme Zisas Krais zɨn panan, nza khaŋ tɨga havhargiap, khaŋ nde nzuai. Maaŋ muuŋgip, guigira nza phorgap guigira Zisas khothɨgi gumgi thari, mbe fhura piigip kɨv, nza mbe suaŋgi buni, mbe nta zɨn ŋgɨ thagi, nde mbe thav samra kɨri. 
\v 7 \x - \xo 3.7: \xo*\xt 1 Ko 4.16; Fi 3.17; 1 Te 1.6\xt*\x*Nde kaŋgi, nde nza mbui tɨvi zɨn ŋgɨri. Nza nde phorga kav, nza fhura piigiap kegi fhuvara. 
\v 8 \x - \xo 3.8: \xo*\xt 2 Ko 11.9; 1 Te 2.9\xt*\x*Nza vhɨra fhura nden han mba thari ndigi fhuvara. Zakɨra fhuvara! Nza nde han vhezi. Nza simtɨgar nden nɨɨŋ thav, nza raa gu maan, nza ŋaara mbatɨga muuŋgi. 
\v 9 \x - \xo 3.9: \xo*\xt 1 Ko 9.4-6; 1 Te 1.6\xt*\x*Nza nden han mba ndi thav, mba ŋaara muuŋgi, fhuvara. Nza nde han mba ndirga tuktɨgi, nza nde han mba ndigi fhuvara. Ne khaŋ muuŋgi, nza nde muunga tɨvar vhuuŋ, nza anan nde khɨvigi, nde nduarira mba tɨva zɨn ŋgɨri.
\p
\v 10 \x - \xo 3.10: \xo*\xt 1 Te 4.11\xt*\x*Nde kaŋgi, nza nde phorgara kav, nza kha kamen nde suaŋgi, maaŋ muuŋgip, guma ŋaara thagi, nde mban ana nɨɨŋ thari. 
\v 11 \x - \xo 3.11: \xo*\xt 1 T 5.13; 1 Pi 4.15\xt*\x*Nza ntigem mbararagi, nde mbari fhura piigiap ki. Mbe ŋgari fhu, mbe fhura ka harigi gumgi muuŋgi bigi, mbe nta neŋga rui. 
\v 12 \x - \xo 3.12: \xo*\xt 1 Te 4.11\xt*\x*Nza ntigem Guma Bakɨme Zisas Kraisan zɨn panan, nza kama havharar khaŋ mba gumgi ga nzuai, mbe tuituigiap piigip ŋgarɨri. Mbe ŋgarɨp, nduarira mban wari ganɨri.
\p
\v 13 \x - \xo 3.13: \xo*\xt Ga 6.9\xt*\x*Nde nza phorgap guigira Zisas khothɨgi gumgi, nde tɨvar vhuun muungen vhukvhugɨ thari. 
\v 14 \x - \xo 3.14: \xo*\xt 1 Ko 5.9-11\xt*\x*Maaŋ muuŋgip, guma the nza kha khergi gavara ki buni, ana zam nta zɨn vui fhu, nde mba guma gangip, ana hiav, nde ana thav, samra kɨri. Nde samra kɨrim, ana nde gangip, ana wo mbui tɨvar mbergirga. 
\v 15 \x - \xo 3.15: \xo*\xt 1 Te 5.14; Ta 3.10\xt*\x*Nza kha ndɨkndɨgar anan muun zav nde nzuai fhuvara, ana nden pana guma ma. Fhuvara. Nde kha ndɨkndɨgar ana muuŋri, ana nde phorge rɨgine ma. Nde mba ndɨkndɨgar ana muuŋv, nde ndɨkndɨga vhuun ana ndɨɨi bunin ana suaŋri.
\s Por won raar vhuun mbe ndɨɨi.
\p
\v 16 \x - \xo 3.16: \xo*\xt 1 Te 5.23\xt*\x*Guma Bakɨme, ana ndava mɨɨtɨgar nɨɨŋge ma. Ana zazera nden kurkurarim, nde za bigir muuŋv ndavi mbɨrav kɨrga. Guma Bakɨme zam nde phorgɨ kɨri.
\p
\v 17 \x - \xo 3.17: \xo*\xt 1 Ko 16.21\xt*\x*Gu Por, gu nduara kha raar vhuun nde ndɨɨi kameŋ khergiap, nde ndi mbai. Gu wo gavi kherav, nta ndi mbav, gu zazera nduara won raar vhuuŋ kherav, ntan ndi mbai. Nde gu khergi gavi ganɨnga, nde nan ŋkeeri ganɨnga, nta za gu khergi gavir ki.
\p
\v 18 Nza Bakɨme Zisas Kraisan kora muumbar nde phorgɨ kɨri.