\id 2TH - Wipi NT -Papua New Guinea 2001 (web -2013) 
\h 2Tesalonika 
\toc1 Polɨmna Ɨrɨki Nɨmogɨm Tesalonika Sosim pɨlwa Leta 
\toc2 Nɨmogɨm Tesalonika Leta 
\toc3 2Ts 
\mt1 Nɨmogɨm Tesalonika Leta  
\mt2 Polɨmna Ɨrɨki Nɨmogɨm Tesalonika Sosim pɨlwa Leta  
\imt1 Isɨpkita Yɨtkak  
\ip Onggɨtyam Nɨmogɨm Tesalonika Leta ɨrɨka rɨga re Polte. Ɨ ɨtemb nɨmogɨm leta yɨrɨkonj re Korinto taun kena dɨde ma jog mobi kak kae naskanyam letam pɨlke. Sɨ nɨnda rɨgap Polɨnd negɨr nya kena yokateno, re ton yɨtkak erɨkinonj naskanyam letand. Ɨ ton ket kea towa nony mana momtakɨp yomnɨko da Keriso ma pajajog e tɨtenj. Ɨ ton ket onggɨt map ɨtemb nɨmogɨm leta yerɨk, dɨde ket resɨpkenain rɨdede wɨp e Yesumna ɨtenda. Mop nokɨp rɨgap kea wɨko omnɨkam yɨm b'ɨtrarkɨto ɨ ket Yesu nena na yɨr yungaeneno.  
\ip Ɨ ket Pol yindeny da, “Keriso yɨmta kena tɨtenj dem, ajɨ naska komkesa negɨrjog mɨle im pɨta taukanj dem.” Sɨ opimemb mɨle taukanj ra dem, moga kɨma rɨga ogenaya da, “Negɨrjog Rɨga” tina wɨp b'amnena wɨra nasim. Sɨ onggɨt rɨgatemb Kerisond gensi omneny dem.  
\ip Ɨ ket ɨtmɨkitijog rɨga Pol danda kɨma yɨt apulisiny towaina gar ke utkunda mɨlend ɨmnɨneni kesa onyitam towaina bebɨg dɨde b'ɨdgotnena wɨngɨrɨnd. Ɨ ton kwa ten amninonj da ton b'ogla wɨko tamnɨkenanj towanɨm yilo yɨrkokarɨnd wɨmenam odede rɨja na re Pol dɨde tina wɨkomadwar wɨmena wuwenenonj. Ɨ dɨde kwa da ton b'ogla mɨmkam wɨmena tuweny b'ogɨl mɨle omnɨkam ukoijog bebɨg wɨngɨrɨnd.  
\c 1  
\s1 Simesime Yɨtkak  
\p
\v 1 Simesime! Pol ɨ Sila ɨ dɨde Timote, sɨn ɨtemb leta yɨrɨku re Tesalonika sosi mor pɨlwa e rɨnte re man Abu Godɨm pɨlɨnd dɨde Yonggyam Yesu Kerisom pɨlɨnd mɨbnyɨt.  
\v 2 Mera B'u Godɨm pɨlke dɨde Yonggyam Yesu Kerisom pɨlke wurar dɨde ngɨmbla wɨn kɨma.   
\s1 Yunɨm B'ɨdgotnena dɨde Warɨm B'ogɨl Ɨsma  
\p
\v 3 Gar ke utkunda nany dɨde yɨngganwar! Sɨn b'ogla wa gatab Godɨnd sɨteket yɨt omnenenyu ita wɨnɨnd. Ɨ ɨtemb re sowanɨm b'ogɨljog e omnɨkam. Mop nokɨp sɨn opima utkundenenindam wa gatab yɨt odede da waina gar ke utkunda mɨle re ukoijog danda kɨma e ɨnɨka yikeny dɨde wa wɨngɨrɨnd yɨpayɨpa rɨgaina singi b'iyena mɨle re kea ukoi kana e warabag auka yikeny.  
\v 4 Sɨ onggɨt paemb sɨn wa gatab b'asourena wuwenyɨn God ma jogjog sosi wɨngɨr nata odede da wɨn b'engabenga wɨp negɨr kɨma b'ɨdgotnena dɨde ukoi b'ɨdgotnena akatenindam, ajɨ wɨn b'obogɨl mɨmkam wɨmena im wuwenyɨt dɨde Yesund danda kɨma gar ke utkunda ke yokatenya onggɨtyam komkesa b'ɨdgotnena wɨngɨrɨnd.  
\v 5 Onggɨtyam komkesa b'ɨdgotnena mɨle re Godɨmna ɨmɨnjog omni mal e meranɨm da Tina ɨta negɨr kesa dɨmdɨmjog b'ɨsagɨka pɨta tainy dem. Nokɨm da ɨdenat God wen temjateniny da wɨn re rɨrɨrjog rɨga im Tina pumb tunggɨnd wɨmenam. Ɨ yu wɨn b'ɨdgotnena akatenenindam re onggɨt God ma pumb tungg mapaim.  
\v 6 Ɨ God re negɨr kesa dɨmdɨmjog b'ɨsagɨka rɨga e. Sɨ Ton opima ukoi b'ɨdgotnena ke rɨga mɨra tamniny dem yepim re wa pɨlɨnd ukoi b'ɨdgotnena aramitenenanj.  
\v 7 Ɨ kwa God opima yɨpand sɨn kɨma wa wɨram takainy dem yepim re wɨn ukoi b'ɨdgotnena akatenenindam. Sɨ onggɨtyam b'ɨsagɨka mɨle tawɨk dem, ɨdenate ra Yonggyam Yesu wub kumb ke pɨta tainy dem wul dɨmɨl borand yɨpand Tina dandajog aneru kɨma.  
\v 8 Ɨ dɨde God kwa opima b'ɨsagɨka ke mɨra tamniny dem rɨga yepim re maka Tin yɨt yutkundenyi dɨde yepim re maka yɨmta undoka yiyenyi mera Yonggyam Yesumna b'ogɨl yɨrkokar bage yɨt.  
\v 9 Sɨ onggɨt rɨgap opima negɨr ma b'ɨsagɨka okasi dem. Sɨ Yonggyam ket ten tawaikisiny dem Ti wɨp ke dɨde kwa onggɨt b'ogɨl ɨnyomarenam pɨlke rɨnte ra Ton pɨta omɨny dem Tina ukoijog danda kɨma. Seg ton ket dadal ngɨrpu kesa negɨr taukanj dem.  
\v 10 Ɨ Yonggyam Yesu ɨta ik dem Godɨmna obagendi bibɨrɨnd, nokɨm da ɨdenat Ton komkesa yɨna rɨga wa pɨlke b'ogɨl ɨnyomarena okateny, dɨde ɨdenat kwa Ton ket esourena okateny komkesa gar ke utkunda rɨga wa pɨlke. Sɨ wɨn opima onggɨt rɨga wa wɨngɨrɨnd tekenyɨt dem, mop nokɨp wɨn kea gar ke utkunda ke yokatenya sowaina pɨtapɨta omneni Yesum gatab yɨr ungata yɨt.  
\v 11 Sɨ onggɨt mop paemb sɨn ita wɨnɨnd wanɨm yɨr opmitenenindam. Nokɨm da ɨdenat mera God wen temjateniny da, wɨn re kea rɨrɨrkɨpjog rɨga im aindam pumb tunggɨnd wɨmenam Tina ara b'emoka rɨrɨrɨnd. Ɨ kwa nokɨm da ɨdenat Ton Tina danda wa takaeniny, sɨ ɨngkaimemb wɨn kupkakupka b'ogɨl rɨga taukindam odede rɨja im re wɨn singi aindam dɨde kwa wɨn b'ogɨl wɨko tundwasindam nangga mim re wɨn singi aindam Yesund gar ke utkunda wɨmena wɨngɨrɨnd.  
\v 12 Ɨ ra wɨn odede taukindam, sɨ ɨngkaimemb wɨn mera Yonggyam Yesund b'obogɨl esourena iyenya Tina nyɨ pumb wa urowatenam, ɨ Yonggyam daka ket wen opima taramisiny b'ogɨl esourena pɨpmetɨnd. Sɨ mera God dɨde Yonggyam Yesu Keriso towaina wurarɨt opima wanɨm onggɨtyam mɨle rɨrɨrkɨp tamnɨkiny.   
\c 2  
\s1 Yesumna Ɨtenda Wɨn gatab Nonony Yɨtkak  
\p
\v 1 Gar ke utkunda nany dɨde yɨngganwar! Sɨn wen nonony tamnindam mera Yonggyam Yesu Kerisomna ɨtenda wɨn gatab dɨde meraina b'atabɨka Ti wɨpɨnd. Sɨ wɨn b'obogɨl utkundena.  
\v 2 Sɨ nɨnda b'anygɨnena ouyaena rɨgap opima odede nya ke danda kɨma b'agenaya wuweny da rɨka Yɨnayɨna Wɨngawɨnga ɨja na wumɨr nomɨny, o rɨka God ɨja na yɨdɨr yɨt nitiyau, o rɨka Pol dɨde ton kɨma rɨgap ɨja na leta nɨrɨkai. Sɨ ton odede bage yɨt kaim wen wumɨr amnenanj da Yonggyamɨmna ɨtenda bibɨr re kea ɨte ke ik. Ɨ ɨngkaimemb ton wen ugungatenenanj nonysɨpsɨp dɨde gar moga omnɨkam. Ajɨ wɨn goro wanaka towaina yɨt ɨmɨnjogɨm temjateninam.  
\v 3 Sɨ nangga ma jɨ rada odede rɨgap opima jogjog b'engabenga wɨp b'anygɨnena nya ke wen ugungatena eyenanj, ajɨ goro wen yet b'anygɨnenam ramnenin. Mop nokɨp Yonggyam Yesumna ɨtenda bibɨr ma ɨta wanakana pɨta tainy dem ngɨrpu ra naska jogjog rɨgap Godɨnd kak ɨaenyi dem nenegɨrjog mɨle ke, ɨ ket God ɨta yɨpa gog kesa Negɨrjog Rɨga pɨta wa omɨny dem yena ra Ton wul tungg wa ɨtmɨkis dem.  
\v 4 Ɨ ɨtemb gog kesa Negɨrjog Rɨga gejam tamneniny dem komkesa gasa rɨnsim re rɨgap godɨm agenairanj ɨ komkesa god ya pɨlwa im re rɨgap kumsos b'amka wuweny. Ɨ ton kwa tilenggyam b'uturowas dem onggɨtyam komkesa gasa dɨde god wa pɨlke. Sɨ ɨngkaemb ket ton Godɨmna yɨnametɨnd tomis dem, ɨ ket ton tilenggyam pɨtapɨta aena ikeny dem da ton re God e.  
\v 5 Re kon dea de wɨn kɨma nɨbnond, kon kea komkesa onggɨtyam yɨtkak wa usenenawainond. Ma sɨ ma wɨn opima nonyɨnd awamindam?  
\v 6 Ɨ yu wɨn wumɨr im da gog kesa Negɨrjog Rɨga re ena ognati e yɨbɨm, nokɨm da ɨdenat ton pɨta tainy dem rɨdenat ra tinajog wɨn itkau.  
\v 7 Sɨ onggɨt gog kesa Negɨrjog Rɨgat singi ainy rɨga ingaenam God ma yɨtkak erbekam. Ajɨ ton ma rɨrɨr e tilenggyam onggɨtyam wɨko omnɨkam. Nokɨp God ɨta ingaena yiyeny Tina wɨko rɨga onggɨt gog kesa Negɨrjog Rɨgand ena ognatenam. Sɨ onggɨt wɨko rɨgat ket ɨta onggɨt gog kesa Negɨrjog Rɨgand ena ognatena yiyeneny, ngɨrpu ra God ingau dem Tina wɨko rɨga yɨm b'atogɨkam ti pɨlke. Ajɨ yu Satanate onggɨt gog kesa Negɨrjog Rɨgamna wɨgawɨga negɨrjog mɨle danda kɨma omnɨka eyeniny rɨga wa wɨngɨrɨnd, sɨ rɨgap ket opima Godɨmna yɨtkak erbeka eyenanj, ngɨrpu ra ɨtemb gog kesa Negɨrjog Rɨga pɨta tainy dem.  
\v 8 Sɨ God ɨta onggɨt gog kesa Negɨrjog Rɨgand pɨta wa omɨny dem Tina obagendi wɨnɨnd. Ɨ Yonggyam Yesu ra ket ik dem, Ton ket Tina tu gungar ke ɨtemb gog kesa Negɨrjog Rɨgand uj ondras dem. Ɨ ra Yonggyam b'ogɨl ɨnyomarena kɨma pɨta tainy dem, Ti wɨpɨnd onggɨt gog kesa Negɨrjog Rɨgamna danda ɨta kupkakupka b'eteomneny dem.  
\v 9 Ɨ ɨtemb gog kesa Negɨrjog Rɨga ik ra Satanamna danda wɨko kɨma e dem, sɨ ton ket b'anygɨnena nya ke odede komkesa mɨle tamnɨkiny dem rɨga wa wɨpɨnd, opi re b'engabenga wɨp kɨd kesa kɨma danda wɨko dɨde moga kɨma danda wɨko. Ɨ onggɨt mɨle kaimemb ton ket rɨga b'anygɨnena nya wa wɨp teyeniny dem.  
\v 10 Ɨ kwa onggɨt gog kesa Negɨrjog Rɨgat opima komkesa b'engabenga wɨp nenegɨr kaokao mɨle tamnɨkeneniny dem, ɨ ɨngkaimemb ton ten b'anygɨnena nya wa wɨp teyeniny dem yepim re negɨr aukanj. Mop nokɨp God kea Tina ɨmɨnjog yɨtkak rɨga wa akainonj yepim re wul tungg wa menon yokatenyi, nokɨm da ɨdenat ton yɨrkokar okasi. Ajɨ ton onggɨtyam Godɨmna singi b'ɨsaenenyi ɨ ket Tina ɨmɨnjog yɨtkak ma ɨta singi yiyenyi utkundam.  
\v 11 Sɨ onggɨt mop paemb God kea towaina gar wa yɨnjɨkeny yɨpa ɨmjatena kɨma negɨr b'anygɨnena singi, nokɨm da ɨdenat ton onggɨtyam gog kesa Negɨrjog Rɨga ma b'anygɨnena mɨle gar ke utkunda ke okatenyi.  
\v 12 Sɨ kwa nokɨm da ɨdenat komkesa rɨga yepim re maka onggɨtyam ɨmɨnjog yɨtkakɨnd gar ke utkunda ke yokatenyi ajɨ negɨr kɨma kaokao mɨlend sam yomnɨkenenyi, ton b'ogla negɨr ma b'ɨsagɨka yakate.   
\s1 God ma Yɨtkakɨnd Danda kɨma Owɨnkam  
\p
\v 13 Ajɨ gar ke utkunda nany dɨde yɨngganwar yena re Yonggyam singi eyeniny, sɨn b'ogla ita wɨnɨnd Godɨnd sɨteket yɨt omnenenyu wanɨm. Mop nokɨp gowukoi otomapu kena God wen abagenjinonj, ɨ ket Yɨnayɨna Wɨngawɨngat kea wen yɨpayɨpa amnɨkeneninonj yɨna mɨle omnɨkam, nokɨm da ɨdenat wɨn God ma ɨmɨnjog yɨtkakɨm pɨlɨnd gar ke utkunda oramisya, ɨ ket wɨn yɨrkokar okasya.  
\v 14 Sɨ God wen ara emokinonj re Tina b'ogɨl yɨrkokar bage yɨt ke yɨrkokar okatena mana rɨna re sɨn pɨtapɨta yomnenonda wa pɨlwa. Nokɨm da ɨdenat wɨn mera Yonggyam Yesu Keriso kɨma yɨpand wɨmenam yingg okatenya Tina b'ogɨl ɨnyomarenand.  
\v 15 Gar ke utkunda nany dɨde yɨngganwar! Sɨ onggɨt paemb wɨn b'ogla ita wɨnɨnd omanda danda kɨma towɨnkenenindam Yesund gar ke utkundand, ɨ kwa b'ogla sɨn ɨtmɨkitijog rɨga sowa pɨlke b'ɨsateni yɨtkak\f + \fr 2:15 \ft Ɨtmɨkitijog rɨgaina ouyaena re sosi ma get ke yɨtkak im owamam dɨde yɨmta undokam.\f* emorka teyenindam rɨna re sɨn wa akautondam opurena ke dɨde leta ɨrɨka ke.  
\v 16 Ɨ mera Yonggyam Yesu Keriso Tilenggyam ɨ kwa mera B'u God, Ton ma sobijog singi i men niyeneninya. Sɨ Ton ma sobijog wurar i mera nogoneneninya. Ɨ Ton opima mera dadal ngɨrpu kesa b'ugowa yɨt ogona niyeneninya. Sɨ men sam kɨma yɨr yungaenenyu warɨm b'ogɨl ɨsma okatam rɨna re Ton tɨrɨr yomnonda mera okawam.  
\v 17 Sɨ sɨn yɨr opmitenindam da mera Yonggyam Yesu Keriso dɨde mera B'u God, wen b'obogɨl ugowa teyeninya waina garɨnd dɨde wen danda ogona teyeninya komkesa b'ogɨl wɨko omnɨka wɨngɨrɨnd dɨde komkesa b'ogɨl yɨtkak opurena wɨngɨrɨnd.   
\c 3  
\s1 Polɨmna B'ɨgekita Towa gatab Yɨr Opmitenam  
\p
\v 1 Gar ke utkunda nany dɨde yɨngganwar! Be wɨn sowa gatabɨm yɨr opmitenina da mera Yonggyam Yesum gatab God ma b'ogɨl yɨrkokar bage yɨt wanakana warabag auka yeken komkesa gatab wa. Ɨ kwa daka ɨdenat komkesa rɨgap b'ogla esourena iyenyi onggɨtyam yɨtkak odede rɨngma na re wɨn yesourenonda re wɨn naskand onggɨtyam yɨtkak yokatonda.  
\v 2 Ɨ kwa ma komkesa rɨgapim onggɨtyam God ma b'ogɨl yɨrkokar bage yɨt gar ke utkunda ke yokatenyi. Sɨ onggɨt paemb negɨr dɨngdɨng rɨga dɨde negɨrjog rɨga opima singi kesa mɨle omnɨka eyenenanj sowa pɨlɨnd. Sɨ wɨn b'ogla yɨr topmitenindam da God sɨn nɨtrɨngasiny towa pɨlke.  
\v 3 Nangga ma jɨ nɨnda rɨga odede maka gar ke utkunda yokatenyi, ajɨ Yonggyam Yesu Keriso re nony ɨjawa rɨga e wanɨm. Sɨ Ton opima wa danda ogona teyeniny b'obogɨl gar ke utkundand onyitam, dɨde Ton kwa wen yɨrgong tamneniny negɨrjogyam Satanam pɨlke.  
\v 4 Ɨ sɨn kea wa gatab ɨmɨnjog wumɨr yokatenyu Yonggyamɨm pɨlke da wɨn opima onggɨtyam mɨle omnɨka eyenindam dɨde kwa omnɨka teyenindam rɨnsim re sɨn engaenenindam wanɨm omnɨkam.  
\v 5 Sɨ sɨn yɨr opmitenindam da Yonggyam waina gar wɨp tamneniny singi b'iyena mɨle omnɨkam odede rɨja im re God wen singi eyeniny. Ɨ kwa Ton wen wɨp tamneniny mɨmkam wɨmenam bebɨg wɨngɨrɨnd odede rɨja e re Keriso wanɨm mɨmkam wɨmena yikeny.   
\s1 Nonony Yɨtkak Dɨnder Wɨmena gatab  
\p
\v 6 Gar ke utkunda nany dɨde yɨngganwar! Yu sɨn mera Yonggyam Yesu Kerisomna nyɨ kɨma wen tengaindam. Wa wɨngɨrɨnd nɨnda gar ke utkunda rɨga re dɨnder kɨma im wɨmena wuweny dɨde ɨtmɨkitijog rɨga wa pɨlke b'ɨsateni sosimna get ke mɨle ma opima yɨmta undoka eyenanj rɨna re ton sowa pɨlke akatto. Sɨ wɨn b'ogla komkesa odede rɨga wa pɨlke pajapaja wɨmena tuwenyɨt.  
\v 7 Mop nokɨp wɨn walenggyam wumɨr im wekenyɨt da, rɨdede im wɨn b'obogɨl sowaina wɨngata mɨle yɨmta tundokindam. Sɨ sɨn maka dɨnder kɨma wɨmena wuwenond, re sɨn wɨn kɨma wekenond.  
\v 8 Ɨ sɨn makwa yaina owou na autondam mɨra omni kesa. Ajɨ sɨn ita bibɨr dɨde sɨwɨny re b'asowa na wuwenenond dɨde bebɨg kɨma wɨko amnɨkenentondam, nokɨm da ɨdenat sɨn wa wɨngɨrɨnd maka ya pɨlɨnd bebɨg oramisu sowaina wɨmena wɨngɨrɨnd.  
\v 9 Ɨ sɨn ma odede mop penaemb b'asowa wuwenond da, sowa awɨr im danda wekeny wa pɨlke jabajaba odede wurar gasa imdam. Ajɨ onggɨtɨm mop ɨja naemb jɨ da sɨn sowalenggyam b'ogɨl mɨle im tamnɨkindam, nokɨm da ɨdenat wɨn onggɨtyam wɨngata mɨle takasindam sowa pɨlke dɨde yɨmta tundokindam.  
\v 10 Ɨ re sɨn wɨn kɨma wekenond, sɨn kwa daka odede wen engaenentondam da, “Yet ra maka singi tainy wɨko omnɨkam, ton goro kwa owou rawin.”  
\v 11 Mop nokɨp sɨn kea yɨdɨr yɨt utkundonda wa wɨngɨrɨnd nɨnda dɨnder rɨga gatab. Sɨ ton dɨnderɨp makwa opima nanggamog wɨkond b'obogɨl b'ingaenenanj, ajɨ ton wɨn asomnenanj re nɨnda rɨgaina wɨko gatab yɨt b'usenena kaim.  
\v 12 Sɨ sɨn Yonggyam Yesu Kerisom nyɨ kɨma odede rɨga engaenindam dɨde danda kɨma yɨt amnenindam da, “Wɨn goro wɨn tasomnenina rɨgaina wɨko gatab b'usenena ke ajɨ mɨmkam wɨmena na tuwenyɨt. Ɨ kwa wɨn b'obogɨl wɨkond b'itngaenindam wainajog owou okatam ɨ ket tawindam.”  
\v 13 Gar ke utkunda nany dɨde yɨngganwar! Ajɨ ra wɨn nangga b'ogɨl mɨle na omnɨka teyenindam, wɨn goro dɨnder taininam.  
\v 14 Sɨ sɨn ɨtemb leta ɨtmɨkisu wa pɨlwa, ajɨ yet ra maka yɨmta tundokiny onggɨtyam sowaina yɨtkak, wɨn b'obogɨl sosind wumɨr oramitenya tina utkunda kesa mɨle gatab. Ɨ wɨn goro ket ton kɨma b'itɨnkenina, nokɨm da ɨdenat ton ɨngar okateny tina mɨle gatab dɨde ket ton ɨrar odede negɨr mɨle.  
\v 15 Ajɨ onggɨtyam mɨle wɨngɨrɨnd wɨn goro tin omnenya waina geja rɨga pɨla, ajɨ wɨn nonony omnenya ɨja na ɨt re da ton re wa yɨpa gar ke utkunda nany e o yɨnggan e.   
\s1 Undwatapu Yɨtkak  
\p
\v 16 Sɨ ngɨmbla ogonayam Yonggyam Yesu ita wɨnɨnd ngɨmbla wa ragonin komkesa gatab ke. Ɨ Yonggyam komkesa wɨn kɨma.   
\p
\v 17 Kon Polten koinajog yɨm kae yɨrɨken simesime yɨtkak. Kon ɨja emb jɨ komkesa koina leta petɨrɨnd odede yɨtkak yoramitenenyɨn ongwatam mal da ɨtemb re koina ɨrɨki leta e. Sɨ kon ɨtemb yɨrɨken dɨkɨnd.  
\v 18 Mera Yonggyam Yesu Kerisomna wurar komkesa wɨn kɨma.