\id TIT - Nobonob NT [gaw] -Papua New Guinea 1990 (DBL 2014) 
\h Titus 
\toc1 Titusnu Nai Paulus Yom 
\toc2 1 Titus 
\toc3 Tit 
\mt1 TITUSNU NAI PAULUS YOM  
\c 1  
\s1 PAULUS TITUSNU AMEG WAKNU NAI YOM  
\p
\v 1-2 Da Paulus, da bau dayak hanhannu Kayak, Nug ham ii bubuṯe, Nug anuḵanab, keeke laa ii heump̱a, bau dayak hanhannu amu megaḵunu nai qaḵa aum, amunu oolp̱a genab doyen, ameg mein, Kayak Nug danab ah nuhiḵud daaglagnu tituanaṯom ele amu ahilag oop̱a genab doyak ip̱unigṯe bia, amu Kayaknu nai genab ip̱unigṯe amubia ele, da Kayaknu uḏat danab amu Jesus Kristusnu totol danab ele daaṯem.  
\v 3 Amu Nug haen tituanom ele amu elele anṯa, Nug he, nuhig nai amu miag atiom. Kayak, Nug ig eḏua aiḵom ele amu, Nug da ele nai amu mehuqḵulnu uḏat meḏom.  
\v 4 O Titus, i oh oop̱a genab doyak laip̱u aḏaṯep, oop̱a genab doyak amup̱a na da beḵalnab daaṯem amu, da nahipnu iiḵu yaaṯem. Kayak, ig Mamenig, amu ig eḏua awiḵak danab Jesus Kristus ele, ahilah ehaniṯak oḵai hamu megṯep amu ahilah maḏoḏ ele nahipp̱a daaglahnu ool daaṯe.   
\p
\v 5 Da am Krit nudp̱a uuidmi, amunu diig amu da anuḵa na amenp̱a ami amubia, na dahil uḏat peheṯan tuḏidna, tutuḵu meṯan, na Kristen tamaniak oop̱a ab aben abenp̱a iḵi danab otiadḵutnu ap̱a uuidmi.  
\v 6 Amu aun nug danab ah noolagp̱a onig ena ele, nug ah laip̱uib gamu daya, nug beḵod amu ag oolagp̱a genab dooṯeb, ag mamelag oḏe tap̱aeg ii neṯe, ag kobol dubuṯid ele ii heṯeb ele amu, danab amubia na iḵi danab maadḵutnu elele.  
\v 7 Kristen tamaniaknu gumak iḵi danab amu nug Kayaknu uḏat gumaṯe amunu nug beḏup̱a eheḏ laa ii daama, nug danab laa amu ahilag dab mak ele hamu tap̱eb ii nema, nug paha op̱oḏi ii bema, nug le g̱agaṯag huana lanak danab ii daama, nug ban hak kobol beḏup̱a ii niima, nug keeke kuḏumnu ameg ii qema.  
\v 8 Nug amu ii hema. Iiṯa! Nug ḏo danab, ab laap̱anu uḏip̱eg amu ehanaṯaḏ! Nug kobol ena ohnu oo mauhaḏ! Nug oop̱a dab mak ena ele dayaḏ! Nug tutuḵu op̱ia awak dayaya, Kayaknu kobol oh dim lamiṯaḏ! Nug nuḵa beḏu atog noa hagaḵa awak ele oiyaḏ!  
\v 9 Nug danab ah nai genab tutuḵu op̱ia awak ip̱uanadḵunu, nug ḏo tap̱e nak danab nai g̱agaṯagp̱a toliaṯeb, ag ahilag eheḏ hak amu genab miag atiak tutuḵu dooglagnu, nug nai genab, laa ag nug ip̱unidp̱ig ele amu, g̱agaṯag aḏaḏ!   
\p
\v 10 Aḏinu? Nai tap̱e nak danab, ag oḏelagp̱a nai meu iiṯa ham bup̱uak kuḏum madiṯeb ele, ag kuḏum daaṯeb. Danab amunu oolagp̱a Juda laa ag gaḏa otaḏaknu dab mak oḵai aoṯeb ele amu, ag eḏaṯak anuqak daaṯeb.  
\v 11 Danab amu ag ham bup̱una, men doḏo aoglagnu ip̱uniṯak nau heegeg, laa ag ahilag nai dooṯeb ele amu, ag amunu ena anana, nob laa, men doḏo, madaṯeb. Danab ag ip̱uniṯak nau amu heṯeb amu ag amu henana, kobol ig heḵunignu elele iiṯa ele amu ip̱uanadna, kobol amup̱a ag danab laala, ag waalḵad beḵalḵad ele oh amu ahilag dab mak kaboliṯeb amunu na ap̱e, danab amu ag oḏelag qamuteg!  
\v 12 Anuḵa Krit danab ag ahilag nai mehuqak danab laa nug nuḵa kobol amunu aum. Nug inam aum. “Krit danab ag nai ham bup̱uak danab, ag am doḏ daḵuḏ nau, ag e huanak lanana, bahilag ele yaaṯe,” awa aum.  
\v 13 Nai amuam genab amunu na ag daulag g̱agaṯag batap̱e, ag oop̱a genab doyak tutuḵu meṯaglag.  
\v 14 Ag Juda dilag kaya hamu amu danab laa ag nai genab di meṯan, ḏo laala meṯeb ele amu, ag Krit ag nai amu, ḏo amu ele dim lamidmananu na ap̱e doyeg!  
\v 15 Am danab ag oolag dubuṯid iiṯa ele amu, ahilagnu keeke oh op̱ia awak ele daaṯe amge danab ag dubuṯid ele, ag oolagp̱a genab ii dooṯeb ele amu, ahilagnu amu keeke oh op̱ia awak iiṯa. Ahilag dab mak amu ag oolag ele aaḵu dubuṯid teum daaṯe.  
\v 16 Ag oḏelagp̱a, “Ig Kayak dooṯem,” aṯeb amge ahilag hakp̱a amu ag Kayak di medaṯeb. Ag danab naunab, ag oolag dagom iiṯa. Kobol ena laa ahilagp̱a ii daaṯe amunu ag ena heḵulagnu elele iiṯa.   
\c 2  
\s1 IP̱UNIṮAK NAI DIIGDIIG  
\p
\v 1 Nahipnu amu na danab ah oh amelagp̱a, ip̱uniṯak nai ena aḏi ip̱unigṯe ele amu, na amu ip̱uanadna, elelep̱a ap̱e doyeg!  
\v 2 Na danab kaino ag atog noak oina, ag kobol tutuḵunu dab menana, dab mak ahilag tutuḵu atog nonana, ag ahilag oop̱a genab doyak ena tutuḵu daaḵunu, ag oo mauhak dooglagnu amu ag ug ohp̱a g̱agaṯag daaglagnu ele ap̱e doyeg!   
\p
\v 3 Amu na ah kaino ag ele danab ah op̱ia awak doon oiglagnu ib daaṯe, amubia ag tutuḵu oinna, ag dimug nai ii maṯimnanu, ag le g̱agaṯag huana ii lamananu, ag kobol ena ip̱uniṯak ah daaglagnu,  
\v 4 ag ah bau ag gamulḵad amu ahilḵad nid naunau ele dilagnu oo mauhak dooglagnu,  
\v 5 ag ahilag dab mak atog nonana tutuḵu daaglagnu, ag laulag atog nona dab meṯanna bap̱aidḵulagnu, ag danab ahilḵad amu ahilḵad nid naunau ele atog nona ehanadnana, dimiṯim danab ag Kayak nainu nai nau ii maṯimnanu, ag gamulḵad waalagp̱a daaglagnu, na ah kaino ag ah bau anam ip̱uanadḵulagnu ap̱e doyeg!   
\p
\v 6 Amubia na danab bau ag ele oiyak ahilag elelep̱aib oiglagnu ap̱e doyeg!  
\v 7-8 Na amu na aḏi heṯem amu na danab ah ip̱ulag enaib ip̱uanadnana, tutuḵu he! Na danab ip̱uniṯak madaḵutnu amu danab ag nahip nai eheḏ laa ii anidmananu amu na nai nau ele aib ou qeme. Haen oh na kobol genabib aḏan, na nai tutuḵuib maṯie! Na anam heḵutnu diig am nahip kekeḏ ag ihinignu nai nau laa ii anidnana, ag uḏa nak dooglagnu na anam heḵut.   
\p
\v 9 Aria begbeg danab dilagnu amu na ag ahilḵad oḵai waalagp̱a daanna, uḏat oh ahilḵad oḵai oolag ena daaḵunu henana, ag dagom daanna, ahilḵad oḵai dilag nai dim lamidḵulagnu,  
\v 10 ag ahilḵad oḵai dilagp̱a yabhok ii hemananu, ag oolag tutuḵu genab ele daaglagnu, ahilḵad oḵai ag Kayak, Nug ig eḏua awiḵom ele amu, nuhig nai binag meḵulagnu amu begbeg ag ahilag kobol ohp̱a enaib heḵulagnu ap̱e doyeg!   
\p
\v 11 Kayaknu ehaniṯak oḵai hamu megṯe ele, ehaniṯak amuam eḏua awiḵaknu diig, nug danab oh amelagp̱a aaḵu miag atiom.  
\v 12 Kayaknu ehaniṯak oḵai hamu megṯe amu nug ig Kayak di meṯak kobol amu wannu oo gamag ahaknu dab mak nau ele, ig amu oh uuta, ig wan danab nau oolagp̱a oitta, ig dab mak atog nota aota, tutuḵu oitta, Kayaknu kobol dim lanidḵunignu ip̱unigṯe.  
\v 13 Ig anam oitta amu ig Jesus eḏua uḏiaknu deḏ oḵai amu ameg meṯem. Deḏ amup̱a amu Jesus Kristus, Nug am ihinig Kayak Naḏi, Nug amahlak oḵai ele miag atiak uḏiḵu.  
\v 14 Kristus Nug ig ḏo tap̱e nak kobol ohp̱anu eḏua awiḵunu, ig nuhiḵudnab danab ah op̱ia awak ele daatta, kobol ena tutuḵu aaḵuib heḵunignu amu Nug ihinignu mauhom.   
\p
\v 15 Na nai imu haen oh danab ah daulag g̱agaṯag batap̱e doon, ag nai amu dim lamiṯeg! Danab ag na nai madiṯem, amunu na am keeke hamu bia aib doop̱ig.   
\c 3  
\s1 KOBOL TUTUḴU DIM LAMIṮAKNU NAI  
\p
\v 1 Na danab oh ag ahilag gabman waap̱a ele daaglagnu daulagp̱a doḵunu, ag dagom danab ele daan oina, ag uḏat ena oh heḵulagnu,  
\v 2 ag danab laanu nai nau ii amananu, naip̱a nug qak ele ii hemananu, ag haen oh kobol maḏoḏib heḵulagnu, ag danab ah noolagp̱a dagom daaglagnu ap̱e doyeg!   
\p
\v 3 Aḏinu ig anam oignig? Ig ele anuḵa dab mak naup̱a oimut, nai tap̱e nakp̱a, Satan nuhig ham bup̱uakp̱a, ig kaaka mauhnoak oimut. Ig oo ahaknu keeke kuḏum, ig beḏunig gamag ahak aoḵunu hemut. Ig op̱oḏi be, amya oiyak kobolp̱a oitta, laa dilagnu ele oonigp̱a aeg beum. Ig oonigp̱a lainḵad dilagnu nau, ninig ele doot oimut. Ag ele ihinignu anamib doon oip̱ig.  
\v 4 Amge Kayak, Nug am eḏua awiḵaknu diig amu, nuhig ḏo ena, oo doyak ele miag atie,  
\v 5 Nug ig eḏua awiḵom. Ig ihinig hak tutuḵu hemutnu laa anṯa ii heum. Iiṯa. Nug ihinignu oo gai iiṯa doyom amunu Nug ig ihiḵa, nuhig Ouḏip̱a Nug bauklel meḵe, ig bau menuak aomut.  
\v 6 Kayak Nug Jesus Kristus, Nug am ihinig eḏua awiḵak danab amu, nuhig uḏatp̱a Nug nuhig Ouḏi ig elelenab meḵom.  
\v 7 Nug anam heum, amunu diig am, Nug Jesusnu ehaniṯak oḵai hamu megṯe, amup̱a Nug ig op̱ia awak danab daagnignu, ig nuhig bauklel aot, hanhan daagnignu ameg meḵunignu heum.  
\v 8 Nai amuam genabnab. Aria na nai imunu amu na hanhan peheṯana abep̱e, danab ag Kayaknu oolagp̱a genab doop̱ig ele amu, ag dab menana, hak enap̱a g̱agaṯag daaglagnu dab meḵulag. Hak ena diigdiig amu oh am danab ah ele ehanadṯe.   
\p
\v 9 Amge na oḏ mak mauhnoak, kaino onilagnu ge iiṯa maṯiak, ḏo meunu nug meh qak ele amu na uue! Ig dooṯem, keeke amu oh amu ig kobol enap̱a laa ii ehanigmana.  
\v 10 Laa ele danab laa nug tamaniak ena lop̱aḏṯe ele amu, na toliṯak uḏat laip̱u hewona, laa ele hep̱e amu anam bataḏ! Amu laa nug doyaya, baula tip̱aleb amu tamaniak oop̱anu geḏiṯe!  
\v 11 Na dooṯem, danab amu nug ib ena eḏiṯom. Nuka nuhig hip̱uninp̱a nug geḏidṯe.   
\s1 BAG QAK NAI  
\p
\v 12 Dimp̱a da Atemastai o iiṯa Tikikastai mep̱i, na gumiṯa uḵeb amu na paha da gumiḏna, Nikapolis uḏie! Da oug haenp̱a amu da ap̱a daaḵulnu dab meṯem.  
\v 13 Na ḏo doyak danab Senas amu Apolos ele, a oiglahnu keekenu amu na elele ehanate! A amunu keeke laanu tutu aib daapiḏ!  
\v 14 Aria ihinig danab, kristen aḏi, ag uḏat heḵulagnu, ag amup̱a bau dayaknu keeke aoglagnu dooglag am ena. Ag hamuib daaglagnu am aib.   
\p
\v 15 Am danab da ele daaṯem imu oh na humidṯeb. Na danab aun aḏi ag ig ele oh Kayaknu oonigp̱a genab dooṯem, ag ig lainḵad daaṯeb amu ag humiṯak ihinig ag maṯe!  
\p Kayaknu ehaniṯak oḵai Nug hamu megṯe amu nahipp̱a dayaḏ!