\id COL - Nobonob NT [gaw] -Papua New Guinea 1990 (DBL 2014) 
\h Kolosi 
\toc1 Kolosi Dilag Nai Paulus Yom 
\toc2 Kolosi 
\toc3 Kol 
\mt1 KOLOSI DILAG NAI PAULUS YOM  
\c 1  
\s1 PAULUS NUG KOLOSI DILAGNU KAYAK UNUQIṮOM  
\p
\v 1 Da Paulus, da Kristus Jesusnu totol danab. Kayak Nug da Jesusnu totol danab daaḵulnu da onilp̱a eum amu da amu da layal Timotius ele  
\v 2 i uḏug imu ag Kayaknu danab ah ag ap̱a Kolosi daaṯeb, ag i laintad, ag Kristusnu oolagp̱a genab dooṯeb, ahilagnu yaaṯep. Ig Mamenig Kayak amu Naḏi Jesus Kristus ele, ahilah ehaniṯak oḵai hamu megṯep amu ahilah maḏoḏ ele ahilagp̱a daaglahnu oonih daaṯe.   
\p
\v 3-4 Ag Jesusnu oolagp̱a genab doonna, ag lailḵad ag oolagp̱a genab dooṯeb ele, amu dilagnu ele oolag mauhṯe amu i anam doyoḏa, unuqiṯak ihinihp̱a haen oh amu i ihinig Naḏi Jesus Kristus Mameg Kayak amegp̱a ahilagnu, “Ena heme,” aoḏ aṯep.  
\v 5 Ag tatam Jesusnu Nai Ena doon, keeke Kayak Nug hab aṯan ahilagnu tituanom amu ag amu aoglagnu ele doona, ag aoglagnu gemu ameg meṯeb amunu ag oop̱a genab doyak ahilag amu oo mauhak ahilag ele aḏan daaṯeb.  
\v 6 Nai Ena amu wan atu ohp̱a uḵe, danab ag doonna heeg, naḏi ma amu kobol ena, doyak diigdiig ena ele danab kuḏum ag aaḵu aon heṯeb. Anamib aaḵu ahilagp̱a dig meum, deḏ amup̱a Nai Ena amu nug he, ag aon, ag Kayaknu ehaniṯak oḵai hamu megṯe ele diig doon, ag kobol ena, dab mak ena ele aḏan oiṯeb.  
\v 7 Epapras, i lainihnab, nug am Kristusnu uḏat nid ena, ihinih uḏat laip̱u, nug i ehanita, Kristusnu uḏat amu dab meṯa auta aoṯe ele amu, nug ag Jesusnu Nai Ena amu ip̱uanaṯe, ag doop̱ig.  
\v 8 Nug ag Kolosi danab ah, ag Kayaknu danab oh dilagnu oolag mauhṯe, nug amunu i amenihp̱a a doomuḏ. Kobol amuam Kayak Ouḏi Nug ag maṯom.   
\p
\v 9 I nai amu doomuḏ, deḏ amup̱a, i doomuḏ diig amunu i Kayak ag ehanadḵunu dig meḏa unuqidḏaḏa daaṯep. I ahilagnu daunih ii atiṯe. I Kayak ag ehanaṯeb, ag Nug oo aṯem niiṯe amu ag dooglagnu, Kayak Ouḏi Nug ag doyak ena diigdiig ag maṯeb, ahilag dab makp̱a am ba leta neḵunu unuqidṯep.  
\v 10 Anam dayeb amu ag Naḏinu dab mak dim lamidḵulagnu, ag Nug oo niiṯep̱a oiglagnu elele daanna, ag uḏat ena diigdiig henana, ag Kayaknu doyak oḵai ele aoglag.  
\v 11 Ag Kolosi danab ag anam daanna, ag anen anen ag Kayak ep̱egp̱a uḏat heḵulagnu g̱agaṯag ena diigdiig aona henana, ug diigdiignu maon, g̱agaṯag ahan daanna, oṯaina bitumtum ii gomana. Iiṯa, ag ug amunu geha ag gamalag ahebeb, maoglag.  
\v 12 Ele amu ag ig Mamenig amegp̱a, “Ena heme,” oo gamag ahak elep̱a aḵulag. Nug he, ag keeke oh, Nug ag aoglagnu tituanom amu, aoglagnu elele daaṯeb. Ao geha ag amu Kayaknu danab laa ele ig oh nuhig ḏo maḏoḏ, amahlak ele oop̱a daaṯem amu ig oh ele aognig.  
\v 13 Nug ig hip̱uninnu g̱agaṯag hip̱aliḵak amu amunu uhuqiḵom. Nug ig eḏua awiḵa, nid nuhig Jesus, nuhig ḏo maḏoḏ oop̱a daagnignu meiḵom. Nug Beḵanu amu Nug oo huan mauhṯe.  
\v 14 Nug Beḵa Jesus, Nug tiigp̱a Nug hip̱unin ihinig uhuqa meḵowa amu Nug ig eḏua awiḵom.   
\s1 KRISTUSNU KOBOL AMU NUHIG UḎAT ELE  
\p
\v 15 Kayak Beḵa Nug am Kayak, danab laa nug Nug anidḵunu elele iiṯa, Nug bianab aaḵu daaṯe. Nug am keeke oh Kayak he beum daaṯe, Nug amunu iḵi anuqaknab daaṯe.  
\v 16 Ig amuam genab anidḵunignu diig am Kayak Beḵa Jesus, Nug wan imup̱an keeke, hab aṯannu keeke, keeke ig anidṯem ii anidṯem ele amu, amu oh Nug heum. Amu gumaṯak aben oh, laa oḵainab, laa am oḵai, laa am nakok oḵai, laala am oḵaiib amu Nug amu dilag ehah amu aben ele heum. Nug amu oh heum amu ag Nug ehanidḵulagnu daaṯeb.  
\v 17 Nug keeke oh ii bep̱igp̱a dayom, amu keeke amu oh nuhig g̱agaṯagp̱a daaṯe.  
\v 18 Jesus Kristus Nug am kristen tamaniak iḵi daaṯe amu kristen tamaniak amu Nug beḏu daaṯe. Kristen tamaniak diig amu Nugib aaḵu. Nug am danab anuqak moḏp̱an bau eḏua hibaiṯak danab. Nug anam daaṯe amunu keeke oh iḵi amu Nug aaḵu daaṯe.  
\v 19 Aḏinu? Kayak oo niiom bia amu Nug he, Kayak Nug am aṯemnab daaṯe, nuhigp̱a aḏi kobol keeke am bak daaṯe ele, amu oh amu anamib aaḵu Jesus nuhigp̱a anam dayom.  
\v 20 Kayak Nug wanp̱an keeke oh amu hab aṯannu keeke oh ele amu Nug heeb, ag Nug ele oolag laip̱u daaglagnu oo dayom. Anam oo dayom amunu Nug Kristus ad emaitakp̱a mauhe, tiig goḵaḏe, Kristus tiigp̱a amu Nug nuhiḵud kekeḏ oh amu ebehilag oḵule, maḏoḏ daaṯe.   
\p
\v 21 Anuḵa ag Kolosi danab ah ag dab mak eheḏ aon, kobol nau ele hep̱ig amunu ag Kayaknu kekeḏ daap̱ig. Ag Kayak ele ou qak ii daap̱ig, piḏe laih daap̱ig.  
\v 22 Amge Kristus Nug danab beḏu awa, ad emaitakp̱a mauhom, ib amup̱a Kayak he, ag Nug noobp̱a beḏulagp̱a ab iiṯa, op̱ia awak, eheḏ laa iiṯa ele daaglagnu ag Nug ele oolag laip̱u daaṯeb.  
\v 23 Ag anam aaḵu daaṯeb amge ahilag oop̱a genab doyak amu ag g̱agaṯag aḏan, tuḏidna, g̱agaṯagnab dayeg! Anam ii dayeb amu keeke laa nug ag eeḏaṯeb, ag Jesusnu Nai Ena doona, oolagp̱a genab doop̱ig ele amu, ag g̱agaṯag amu uuna, ag nena qeḵulag. Jesusnu Nai Ena amu danab wan ohp̱a daaṯeb, ag amunu mehuqak doop̱ig. Amu da Paulus, da am nai amunu uḏat danab daaṯem.   
\s1 PAULUS NUG KOLOSI AḎI ELE EHANAṮOM  
\p
\v 24 Amu da gemu beḏulp̱a guiṯak maoṯem imu am da amunu gamal ahaṯe. Aḏinu? Amu da ag ehanadp̱i, ag ena daaglag. Da Kristusnu kristen tamaniak ehanidḵulnu ool daaṯe amu kristen tamaniak am Nug beḏu aaḵu. Guiṯak Kristus Nug kristen tamaniak ehanidḵunu mawom amuam daaṯe amge guiṯak da daḵa beḏulp̱a maoṯem imu am da amup̱a hei, Kristus Nug guiṯak mawom amu aaḵu elele medaṯe.  
\v 25 Kayak nuḵa Nug da tituaniḏe, da kristen tamaniaknu uḏat danab, ag ehanadḵulnu bemi. Uḏat dahil amu da Kayaknu Nai Ena oh genab tutuḵu mehuqḵulnu heṯem.  
\v 26 Anuḵa Nai Ena amu danab buḏub oh amelagp̱a hanhan loḵumak dayom amge gemu Nai Ena amu Kayaknu danab ah, Nug ag amu anidḵulagnu oo daye he, amelagp̱a miag beum.  
\v 27 Loḵumak nai amuam enanagnab, danab oh dilagnu. Amu Nug danab ah nuhiḵud ag amu dooglagnu heum. Nai loḵumak amuam iiḵu. Kristus Nug ag ele daaṯeb amunu ag Nug ameg mena daap̱eg, Nug ag omalaṯeb gona, Nug ele hab aṯan ena daaglag.   
\p
\v 28 Ig Kristus nuhigp̱aib danab oh amelagp̱a aṯem. Ig doyak ena diigdiigp̱a danab oh ip̱uniṯak nai amu dab meṯak nai ele ip̱uanadp̱up̱ut, ag dab mena autna aona, ag Kristusnu danab tutuḵu elelenab beḵulagnu heṯem.  
\v 29 Diig amunu da dahil g̱agaṯag ohp̱a da uḏat amu heḵulnu heḏiag oḵai heṯem. Kristus Nug nuḵa da uḏat anam heḵulnu g̱agaṯag amu meḏa, Nug da tap̱aḏilele heṯem.   
\c 2  
\p
\v 1 Da ag Kolosi danab amu Leodisia danab amu danab oh da iḏul ii anidp̱ig ele amu, da ag imu dooglagnu ool daaṯe. Da Kayak ag ehanadḵunu amu da haen oh uḏat heḏiag ele heṯem.  
\v 2 Da heḏiag heṯem, amu diig am, ahilag oop̱a genab doyak amu ag oolagp̱a g̱agaṯag beeb, ag aḵa anen anen ag nug oo mauhak doon oina, ag dab mak genab, ehaniṯak megṯe ele amu, dab mak genab amu aon, maḏoḏ doon daaglagnu heṯem. Ag anam heḵulag amu ag Kayaknu dab mak loḵumak dayom amu ag dooglag. Kayaknu dab mak loḵumak dayom am laa iiṯa, Kristus aaḵuib.  
\v 3 Nuhigp̱aib doyak ena diigdiig amu dab mak ena ele loḵuma dayaya, am ba leta naana daaṯe.  
\v 4 Amu da danab laa nug nuhig nai meu iiṯap̱a ag eeḏadmanu dab mein, da ag amelagp̱a nai amu madiṯem.  
\v 5 Da ag ele oh ii daaṯem amge da dahil dab makp̱a amu da ag ele oh daaṯem bia doyeye, da ag uḏat ena tutuḵu hena, ag Kristusnu oolagp̱a genab g̱agaṯag dooṯeb ele amu, da amu oh anidṯem amunu da ool gamag ahak dooṯem.   
\s1 KRISTUS ELE OU QA, BAU DAYAK AWAKNU NAI  
\p
\v 6 Ag Jesus Kristus, Nug amu ahilag Naḏi daaḵunu ag oolag matulp̱ig amunu ag tuḏidna, anamib Nug ele dayeg!  
\v 7 Ag nuhigp̱a ad wanp̱a g̱agaṯag hibaiṯa daaṯe bia g̱agaṯag dayeg! Ag nuhigp̱aib g̱agaṯag aweg! Ag Kayak amegp̱a, “Ena hen meḵame,” anana, laa ag Nai Ena ip̱uanaṯeg, ag oolagp̱a genab doop̱ig ele amu, ag hep̱eg, oop̱a genab doyak amu g̱agaṯag dayaḏ!  
\v 8 Ag danab laa nug ag ulah nai, nai meu iiṯa ele amelagp̱a maṯia, ham bup̱ualaṯeb, nug waap̱a daamnanu dab meig! Danab kobol amu heṯeb ele amu, ag maṯiak ahilagp̱a alai aḏi dilag kobolnu amu wannu ḏo g̱agaṯag iiṯa ele amunu madiṯeb. Kristusnu amu ag ii madiṯeb.   
\p
\v 9 Ag amu dab meḵulagnu diig amu, Kayak Nug aṯemnab daaṯe, nuhigp̱a aḏi kobol keeke am bak daaṯe ele amu, amu oh Jesus Kristus nuhigp̱a aaḵu dayeye, Nug am danab ele dayom.  
\v 10 Nugib ḏo ohnu amu g̱agaṯag ohnu ele iḵi daaṯe. Nuhigp̱aib amu Kayak Nug miag ba, ahilagp̱a am bete.  
\v 11 Ag Nug ele ou qep̱ig, amup̱a amu ag gaḏa otaḏak kobolnab amu ag aaḵu aop̱ig. Keeke amuam gaḏanignu keeke iiṯa. Iiṯa, ag Kristusnu ehaniṯakp̱a amu ag oolag alag, beḏunu kobol amu geḏidp̱ig. Kristusnu kobol amuam gaḏa otaḏak kobol meunab daaṯe.  
\v 12 Ag layaṯak aop̱ig, haen amup̱a ag Kristus ele laip̱u ou qena daaeg, ag Nug ele oh laip̱u moḏp̱a boomaṯeg daan, ag Kayak uḏat he, Jesus eḏua hibaiṯom amu oolagp̱a genab dooṯeb amunu ag Kristus ele oh laip̱u maḏ aṯe, ag eḏun hip̱aidp̱ig daaṯeb.   
\p
\v 13 Anuḵa amu ag kobol eheḏ nau diigdiig henana, ag beḏunu oo alag kobol amu dim lamiṯegeg, kobol amu nug ag aqe mauhp̱ig, ag bau ii daap̱ig. Amge Kayak Nug he, ig Kristus ele oh laip̱u bau daaut, Kayak Nug ig kobol nau hemut amu uhuqa meḵom.  
\v 14 Am ḏo nai yak oh am ihinig ib oo ne dayom amge Kayak Nug ib oo nak am lop̱aḏom. Ḏo nai nug am ig heṯoḏiḵa hip̱aliḵom amge Kayak Nug ihinig ab amu awa, Jesus beḏup̱a ma, Nug ad emaitakp̱a atula he, ab ihinig oh aaḵu iiṯa meum.  
\v 15 Nug Satannu iḵi danab, anuqak danab ele amu Nug g̱agaṯag ahilag aḏaṯa, ad emaitakp̱a Nug ag eḏaṯowa amu nug danab amelagp̱a diia, keeke hamu bia haṯom.   
\p
\v 16 Kayak Nug anam heum amunu danab laa nug nuhig dab makp̱anu e lanaknu, le lanaknu amu deḏ oḵai meṯidnu, kalam baunu meṯidnu amu meṯid haknu ele ḏo laala, ag dim lamidḵulagnu, ii mema.  
\v 17 Keeke amu oh amu keeke doṯog bia, nai ulah hamu dimp̱a keeke beḵu amunu gaḏaib daaṯeb. Amu Kristus Nug am amu oh eḏaṯak, Nug genabnab meunab aaḵu daaṯe.  
\v 18 Danab laa nug danab amelagp̱aib nug onig qe neṯe amge oop̱a nug nuḵa nuhignu, “Da am danab onil ele,” dooṯe, nug ele engel binalag meṯe amu nug ag ham bup̱ualaṯeb, ag nob ena Kayak madaḵunu dab meṯe ele amu, ag ii aomnanu, danab amubia waap̱a aib daap̱ig. Danab amubia amu nug tul niiakp̱a o ib aṯenp̱a aḏi keeke anṯom ele amu nug amunu nai kuḏum maṯiaya, nuhig dab mak, Kayak Ouḏi Nug dab mak nuhig ii gumaṯe ele amu, nuhig dab mak amu he, danab amu nug nuḵa nuhignu am binag oḵai ele dooṯe.  
\v 19 Danab amu nug Kristus ele ou qak ii daaṯep. Jesus Nug ig kristen, ig iḵinignab anuqak daaṯe. Iḵi nug am beḏu oh g̱agaṯag medaṯa he, beḏu nug diḏip̱a tuḏiṯak ou qak laip̱u dayaya, ena daaṯe. Beḏu nug am Kayaknu g̱agaṯagp̱a amu ba oḵai meṯe.   
\p
\v 20 Ag am Kristus ele oh laip̱u mauhna, ag wanp̱an ḏo, g̱agaṯag iiṯa ele amu, ag uup̱ig dayeb am, aḏinu gemu ag eḏun wan danab oiṯeb bia oiṯeb? Am aḏinu ag eḏun ḏo meu iiṯa amu waap̱a daaṯeb? Ḏo amuam inam.  
\v 21 “Na amu aib aḏame, na amu aib lame, na amu ep̱enp̱a aib lauḏidme?”  
\v 22 Keeke ag ig ii aḏamtanu, ii lamatanu, ii lauḏidmatanu aṯeb ele amu, keeke amu oh am dimp̱a iiṯa meḵu. Ḏo amuam danab dab makp̱anuib. Keeke genabnab iiṯa.  
\v 23 Genab, ḏo meu iiṯa kuḏum, amuam ag meṯid haknu aṯeb, ag ig iḵa ig oninig qep̱ut neḵunu aṯeb amu ag ig beḏunig ele guiṯak meṯagnignu aṯeb amu, ag neeḵak hamup̱a amu ena bia daaṯeb amge anamnab iiṯa. Ig dooṯem, danabnu dab makp̱anu ḏo laa nug ig ehaniḵeb, beḏunu oo alag kobol, beḏunigp̱a eeḏigṯe amu, ig ḏo amup̱a qep̱ut noḵunu elele iiṯa.   
\c 3  
\s1 OP̱IA AWAK DAYAKNU IP̱U  
\p
\v 1 Kayak Nug he, ag Kristus ele oh eḏun hip̱aidp̱ig amunu ag keeke aṯannu, aben amup̱a Kristus Nug Kayak ep̱eg naḏiapp̱a, amuam anuqak aben, amup̱a daaṯe ele amu, ag keeke amuib aoglagnu dab menana oiyeg!  
\v 2 Ag hanhan keeke aṯan amunuib dab mak aweg! Wanp̱anu keeke amu ag amunu dab mak aib aop̱ig.  
\v 3 Aḏinu? Ag oolagp̱a genab doop̱ig, haen amup̱a ag wan imup̱an oiyak am uuna, gemu ag Kristusnu uḏatp̱a bauklel aoeg, Kristus ele Kayak amegp̱a daaṯeb.  
\v 4 Amu Kristus, Nug am ihinig bauklel diig, Nug miag atiebeb, ag Nug ele onilag oḵai ele miag atiak beḵulag.   
\p
\v 5 Amunu ag wan imunu kobol, kobol amu ag, ag oolagp̱a uḏat henana daaṯeb ele amu, ag kobol amu oh aqap̱eg iiṯa meig! Amu da kobol imunu aṯem, gap̱ai kobol, kobol dubuṯid laala, kobol naunu oo ahe iṯag doyak, danab laanu keeke ameg qak kobol. Keeke ameg qak kobol am kayak genab iiṯa dim lamiṯak kobol laa aaḵu.  
\v 6 Danab ag kobol amu dim lamidnana, Kayak oḏe ii dim lamidṯeb ele amu, diig amunu hip̱uninnu bu aqak, Kayak ep̱egp̱anu uḏiṯe amu, nug ahilagp̱a neṯe.  
\v 7 Anuḵa ag Kolosi danab ag ele danab amunu oolagp̱a nona oinna amu ag kobol amu hedap̱ig  
\v 8 amge ag Jesus ele bau hip̱aidp̱ig, ag kobol amu oh uup̱ig amunu gemu ag kobol nau imu, nai hak, op̱oḏi bak, op̱oḏi be amya oiyak, dimug nai anak, nai nau maṯiak ele, ag kobol amu oh ele agap̱eg uḵeg!  
\v 9 Amu ag lailḵad aib bup̱ualadp̱ig. Aḏinu? Ag oolag alagnu kobol oh am uuna,  
\v 10 ag danab bau bep̱ig daaṯeb. Amu Kayak Nug danab bau amu heum. Amu Nug ag hanhan doyak madaṯa he, ag bau bena, Nug biaib daaṯeb.  
\v 11 Amunu kobol bau amup̱a, Juda danab amu iiṯa aḏi danab, gaḏa otaḏp̱ig, gaḏa ii otaḏp̱ig, Rom danab, Rom danab iiṯa amu begbeg danab, begbeg danab iiṯa, amu oh am keeke hamu, huu anen anen dayak amubia ii daaṯe. Iiṯa. Kristus Nug nuḵa ag iḵilag daaṯe amu Kristus Nug nuḵa nuhiḵud danab iḏu iḏu ohnu oolagp̱a noum daaṯe.   
\p
\v 12 Amu ag am Kayaknu danab, Nug ahilagnu oo mauhe, ag tituanaṯom daaṯeb amunu ag kobol imu aweg! Ag laa dilagnu oo gai iiṯa doonna, ehanaṯeg! Amu ag aḵa ag onilag qep̱eg neeb, ag lailḵad dilagp̱a kobol ena heig! Ag maḏoḏ daanna, danab laa ahilagp̱a eheḏ hep̱eg amu ag oolagp̱a maḏoḏib doona, ug amu maweg!  
\v 13 Ag nug oo makp̱a daanna, amu ag oolagp̱a lailag laa nug layagnu eheḏ heeb amu layag amu nug eheḏ hak amu, Naḏi Nug ihinig eheḏ hak oh amu uhuqa meḵom, amubia nug uhuqa meṯaḏ!  
\v 14 Oo mauhak kobol nug kobol laa oh eḏaṯom, nug keeke ohnu laip̱unab tamaniṯe amunu ag ele laa dilagnu oolag mauhaḏ!   
\p
\v 15 Kayak Nug ag tamaniak laip̱u maḏoḏ ele daaglagnu ag onilagp̱a eum amunu Kristusnu maḏoḏ, Nug ig megṯe ele amu, maḏoḏ amu nug hanhan ag oolag gumebeb oiyeg! Amu ag hanhan Kayak amegp̱a, “Ena hen megṯem,” aon aig!  
\v 16 Ag hep̱eg, Kristusnu nai enanag meu ele amu, ag oolagp̱a dayaḏ! Ag aḵa aḵa doyak elep̱a nug ip̱unidnana, nug ehaniṯak ele heig! Ag Sam amu Meṯid ahi amu Kayak binag mak ahi ele eṯeg! Ag oolag gamag ahebeb, Kayak noobp̱a ahi eṯaglag.  
\v 17 Ag nai madiṯebtai o iiṯa ag uḏat heṯebtai, ag aḏi keeke heṯeb amu ag Jesus onigp̱a Mame Kayak amegp̱a, “Ena hen meḵame,” anana, ag keeke amu oh Naḏi Jesus onigp̱aib heig!   
\s1 EWAU AMU NID NAUNAU ELE, AG AṮEM DAAGLAG  
\p
\v 18 Amu ah ag Naḏi Nug oo niiṯe amubia ag gamulḵad waalagp̱a dayeg!  
\v 19 Amu ah gamulḵad ag, ag waalḵad dilag oolag mauhaḏ! Ag aib g̱agaṯag hadap̱ig.  
\v 20 Amu nid naunau ag keeke ohp̱a ag anilḵad mamelḵad oḏelag dim lamiṯeg! Aḏinu? Naḏi Nug kobol anamnu oo enaib dooṯe.  
\v 21 Amu nid naunau mamelḵad, ag nid ahilḵad ag kobol ena dim lamidḵulagnu, bahi yak doomnanu, ag op̱oḏilag ele bemanu amu ag toliṯak tutuḵuib maṯeg!   
\s1 BEGBEG AM GUMAK DANAB ELE DILAG NAI  
\p
\v 22 Begbeg danab ag ahilḵad oḵai keeke ohnu waalagp̱a dayeg! Ag oḵai ahilḵad amelagp̱aib ag oolag iṯag aqaḵunuib aib hep̱ig. Ag oolag aḏitp̱a uḏat aib hep̱ig. Iiṯa! Ag Kayaknu enanag doon, ag oolag ele oṯaiebeb, ag uḏat tutuḵup̱aib heig!  
\v 23 Keeke oh ag heṯeb amu ag heḵulagnu ag oolag meṯan heig! Amu ag, “Ig danabnu uḏat heṯem,” doonna aib hep̱ig. Iiṯa. Ag, “Ig Naḏinu uḏat heṯem,” doonna heig!  
\v 24 Aḏinu? Ag dooṯeb, buṯi aḏi Naḏi Nug nob ena, Nug danab ah nuhiḵud, ahilagnu matu babaiṯom daaṯe ele amu, Nug ag madaḵu. Ag am Kristusnu uḏat nid, Nug am ahilag Naḏi daaṯe.  
\v 25 Amu danab nug eheḏ heum, nug geha eheḏ heumnu nob aoḵu. Amu Kayak Nug danab oh melemel laip̱up̱aib epeḏiadḵu.   
\c 4  
\p
\v 1 Gumak danab ag ele ahilag Naḏi, Nug hab aṯan daaṯe ele amu, ag Nug waap̱a daaṯeb amunu ag amu dab menana, ag begbeg ahilḵad dilagp̱a kobol ena tutuḵuib heig!   
\s1 G̱AGAṮAG UNUQIṮAK KOBOL AMU TUTUḴU OIYAK KOBOL ELE  
\p
\v 2 Amu ag oh ag Kolosi daaṯeb amu, ag unuqiṯak kobol g̱agaṯag aḏan unuqidnana, dab mena autna aonna, Kayak amegp̱a, “Ena hen meḵame,” ele aon aig!  
\v 3 Ag ihinignu ele, ig Kayaknu dab mak Kristusnu, tatam loḵumak dayom, ig nai amu mehuqḵunignu amu ag Kayak Nug ib babaiṯa megaḵunu unuqiṯeg! Da nai amu mehuqmi amunu da mani guiṯakp̱a daaṯem.  
\v 4 Da Kristusnu nai miagib mehuqḵulnu amu ag amunu ele unuqiṯeg! Aḏinu? Kayak Nug uḏat amu da heḵulnu meḏom.  
\v 5 Danab ag nai enanu oolagp̱a genab ii dooṯeb ele, ag Kolosi danab ag danab amu oolagp̱a oinna, ag aḵa ahilag oiyaknu dab mena autna aonna, uḏat heig! Ag haen ahilag hamu aib kakidp̱ig.  
\v 6 Ahilag nai maṯiak amu hanhan enanag amu doyaknu iṯag ele maṯieg! Ag danab oh dilag oḏ mak oolagp̱a daaṯe amu ag nob meḵulagnu elele dab menan dayeg!   
\s1 PAULUS KOLOSI TAMANIAK DILAG HUMIṮAK NAI ME UḴOM  
\p
\v 7 Ig lainignab Tikikas, nug geha da uḏat heṯem ele imu ohnu maṯieb, ag dooglag. Nug am ig ele uḏat laip̱u, nug Naḏinu uḏat nid enanag.  
\v 8 Nug uḵa, ag amelagp̱a ab, ag ig aṯem daaṯem dooglagnu, nug ag oolag g̱agaṯag qedaḵunu ele, diig aḏit amunu amu da mei goṯe.  
\v 9 Amu da hei, Onisimas Tikikas ele oh goṯep. Onisimas nug ele am ig lainignab, nug ele am Naḏinu uḏat nid ena amu nug am ag ele ab laip̱up̱anu. Danab aḏit amu a geha aḏi keeke oh ip̱a ihinignu beṯe ele amu, a amunu maṯiglah.   
\p
\v 10 Aristakus, nug da ele oh mani guiṯakp̱a daaṯep amu Makus ele a ag humadṯep. Makus, nug Banabas ele a tiilah laip̱u amu, ag nuhignu maṯiak aop̱ig, nug ag gumaṯa uḵeb amu ag nug aweg!  
\v 11 Josua, onig laa Jastas, nug ele ag humadṯe. Juda danab oolagp̱anu danab ewam amu aaḵuib ag Rom ip̱a da ele Kayaknu ḏo maḏoḏnu uḏat laip̱u heṯem. Ahilagp̱a da oo maḏoḏ ele dayak aoṯem.  
\v 12 Epapras, ahilag nid laa, Kristus Jesusnu uḏat danab, nug ele ag humadṯe. Haen oh nug nuhig unuqiṯak g̱agaṯagp̱a nug ag ehanaṯaṯa, Nug Kayak heeb, ag Kayak oo niiṯe ele amu peheṯan doon, anamib g̱agaṯag daanna, danab kalulag ele daanna, ag dab mak aḏit ele iiṯa daaglagnu unuqidṯe.  
\v 13 Nug ag Kolosi daaṯeb amu Leodisia danab ah amu Hirapolis daaṯeb ele, ahilagnu ehanaṯak uḏat oḵainab heṯe amu, da amu doyeye madiḵulnu elele.  
\v 14 Lukas, ig lainignab, nug dokta, nug Dimas ele a ele ag humadṯep.  
\v 15 Amu ag dahil humiṯak ig lainḵad laa Leodesia daaṯeb ele amu ag maṯeg! Laa ele, ag dahil humiṯak Nimpas amu kristen tamaniak nug laugp̱a qag meṯeb ele, ag maṯeg!   
\p
\v 16 Ag uḏug imu eb qewona amu mep̱eg uḵeb, Leodisia kristen tamaniak ele eb qeig! Aria uḏug Leodisia dilag yaami amu ag Kolosi daaṯeb amu ag amu ele eb qeig!  
\v 17 Aria ag Akipas amegp̱a, “Na uḏat Naḏi ep̱egp̱anu aome amu na uḏat amu hep̱e gogp̱a taḏ!” aon ap̱eg doyaḏ!  
\v 18 Da Paulus, da daḵa humaṯak nai ahilagnu iiḵu yaaṯem. Da mani guiṯakp̱a daaṯem amunu Kayak dahilnu unuqidḵulagnu aib daulag atiom. Kayaknu ehaniṯak oḵai Nug hamu megṯe ele amu ahilagp̱a dayaḏ!