\id 2TI - Nobonob NT [gaw] -Papua New Guinea 1990 (DBL 2014) 
\h 2 Timotius 
\toc1 Timotiusnu Dilag Nai 2 Paulus Yom 
\toc2 2 Timotius 
\toc3 2 Ti 
\mt1 TIMOTIUSNU NAI 2 PAULUS YOM  
\c 1  
\s1 NAI ENANU UḎA NAK II DOYAKNU NAI  
\p
\v 1 Kayak Nug Kristus Jesus nuhigp̱a ig bauklel megaḵunu nai qaḵa aum amunu Nug he, da Paulus, da Kristus Jesusnu totol danab daaṯem  
\v 2 amu o Timotius, da nahipnu nai imu yaaṯem. Nahipnu amu da beḵalnab doyeye, ool ele mauhṯe. Kayak, ig Mamenig, amu ihinig Naḏi Kristus Jesus ele, a ahilah ehaniṯak oḵai hamu megṯep amu ahilah oo gai iiṯa doyak kobol amu ahilah maḏoḏ ele nahipp̱a daaglagnu ool daaṯe.   
\p
\v 3 Da tuqan amun ele, da alalad hep̱ig bia, da oolp̱a ab iiṯa doyen, Kayak oḏe dim lamiṯen dayeye, Nug amegp̱a, “Ena hen meḏame,” awe ainne, da nahipnu ele hanhan unuqidṯem.  
\v 4 Da na amen leb neum amu amelp̱a do, da ool gamag ahaḵunu na gumiṯen goḵulnunab dab meṯem.  
\v 5 Nahip oop̱a genab doyak am genabnab da daulp̱a daaṯe. Danab laa amelagnuib iiṯa. Oop̱a genab doyak amuam tatam na alan Lois, nuhigp̱a daye amu na anin Yunis, nuhigp̱a ele dayom. Amu oop̱a genab doyak amu nahipp̱a ele daaṯe, amu da oolp̱a genab dooṯem.  
\v 6 Amunu amu da na dautp̱a doḵunu imu aṯem. Haen da ep̱el na qaḏenp̱a memi, haen amup̱a Kayak Ouḏi Nug na ehah meṯom daaṯe amu, na haen oh ehah amu maḏ eṯe!  
\v 7 Kayak Nug baḏaknu dab mak ii meḵom. Iiṯa, Nug g̱agaṯag dayaknu, nug oo mauhaknu amu ig iḵa ihinig hak atog notata daagnignu amu dab mak amu ig meḵom.   
\p
\v 8 Amunu amu na ihinig Naḏinu madiḵutnu uḏan aib neum. Da nuhig nai mehuqen, mani guiṯakp̱a daaṯem amu dahilnu ele na uḏan aib neum. Iiṯa. Kayaknu g̱agaṯag amu ehaniṯebeb, da na ele i oh ug laala Kayaknu Nai Ena mehuqaknu beṯeb amu ug amu oh i maoḏ oiḏu!  
\v 9 Kayak Nug ig eḏua awiḵom, ig nuhiḵud danab ah op̱ia awak ele daagnignu oninigp̱a eum. Nug ihinig uḏat nobnu oninigp̱a ii eum. Iiṯa, Nug nuḵa oo niiom amu Nug nuhig ehaniṯak oḵai hamu megṯe amu ele dab maama, oninigp̱a eum. Nug ehaniṯak oḵai hamu megṯe amu ig megaḵunu anuḵanab, keeke ii dayom haenp̱a, babaiṯa, ig meḵom daaṯe.  
\v 10 Amu loḵumak dayom amge gemu ihinig eḏua awiḵak danab, Kristus Jesus, Nug uḏia he, miag atiom. Nug mauhaknu g̱agaṯag he, iiṯa me amu ig aṯemun bauklel aognig amu Nug Nai Enap̱a ip̱uniḵom.  
\v 11 Nug da Nai Ena imu mehuqḵulnu, da totol danab daaḵulnu amu ip̱uniṯak danab ele daaḵulnu meiḏom.  
\v 12 Diig amunu amu da ug imu maoṯem amge da amunu uḏal ii neṯe. Aḏinu? Da nuhignu oolp̱a genab dooṯem amunu da keeke Nug da meḏom amu Nug tutuḵu atog noobob, haen oh dayeb uḵeb, gog tak haenp̱a bataḵunu dooṯe.   
\p
\v 13 Amu na Kristus Jesusnu ootp̱a genab doona, na nuhig daaṯem amunu na nuhig bauklelnu nai na dahilp̱anu aome amu, na amu dab menana, amuib dim lamidna oiye!  
\v 14 Kayak Nug Nai Ena meṯom amu Kayak Ouḏi, Nug am ihinigp̱a daaṯe ele amu, Nug na ehaniṯebeb, na peheṯak atog no!   
\p
\v 15 Na doome, Asia danab ag oh da uuiḏna gop̱ig, danab amunu oolagp̱a amu Piselas, Hemosenia ele a laa aaḵu.  
\v 16 Da Naḏi Nug Onesiporas amu nug baeḵudp̱a ele amu da Kayak Nug ahilagnu oo gai iiṯa dooḵunu Kayak unuqidṯem. Aḏinu? Onesiporas nug haen kuḏum da qagaiṯak daaiyi amu nug da ool ena daaḵunu ehaniḏom. Da mani guiṯak daami amunu ele nug uḏa ii neum.  
\v 17 Iiṯa, nug Rom ip̱a uḏia, uḏat oḵai ha, da maṯiḏa aniḏom  
\v 18 amunu da keeke amu ohnu amu da gogtak haenp̱a, Naḏi Nug nuhignu oo gai iiṯa dooḵunu unuqidṯem. Nug Epesus ap̱a keeke kuḏump̱a ehaniḏom ele amu na amu doon malame.   
\c 2  
\s1 KRISTUSNU DAUP ENA DAYAKNU NAI  
\p
\v 1 O da beḵal, na Kristus Jesusnu ehaniṯak oḵai hamu megṯe ele amu amup̱a na g̱agaṯag daye!  
\v 2 Am nai oh dahil, da danab ah kuḏum noolagp̱a maṯiyi doome ele amu, na danab diilag ena ele, ag am oḏe dim lamiṯak danab, ag laa nai amu ip̱uanadḵulagnu amu na ag amelagp̱a madip̱e doyeg!  
\v 3 Na Kristus Jesusnu daup ena daanna, uḏat imunu ug maop̱e, na ig Kristusnu daup laala ig ele oh laip̱u maognig.  
\v 4 Danab nug daup uḏat heṯe amu nug uḏat laala ele ii aḏaṯe. Nug daup uḏat ena heebeb, daup iḵi nug nuhig uḏatnu oo mauhḵunu aaḵuib dab meṯe.  
\v 5 Laa nug, nug eḏiṯaknu qaibaḏ goṯe amu nug qaibaḏ uḵaknu ḏop̱a qaibaḏ goṯe. Am nug ḏop̱a qaibaḏ ii goṯe amu nug eḏiṯaknu keeke ii medaṯeb.  
\v 6 Amu ele, danab nug dad uḏat g̱agaṯag heṯe amu nug meu laala, nug tatam aoḵu am kobol tutuḵu.  
\v 7 Na da aṯem imunu dab mak aop̱p̱e amu Naḏi Nug dab mak nahip matuleb, nai imu oh diig tutuḵu anidḵut.   
\p
\v 8 Na Jesus Kristus, da Nai Ena madiṯem amubia, Nug Dawit buḏubp̱anu doum, Nug ele eḏua hibaiṯom amu, na amunu haen oh dab menan oiye!  
\v 9 Da Nai Ena imu madiṯem amunu danab ag dahilnu, “Danab nau,” anana, ug diigdiig meḏaṯeb. Ao, ag da mani guiṯakp̱a ele meiḏp̱ig amge Kayak nai amu mani guiṯak daaḵunu elele iiṯa.  
\v 10 Amunu amu da ool g̱agaṯag qeṯen, da Kayak Nug danab ah nuhiḵud epeḏiaṯom, amu ehanadḵulnu heinne, ug imu oh maoṯem. Ag ele Kristus Jesus top̱anu eḏua awiḵak aona, haen oh hab aṯan daaglagnu ehanadṯem.  
\v 11 Imu nai genab. “Ig Nug ele mauhmut dayeb amu ig Nug ele oh bau daagnig.  
\v 12 Ig ug maognignu g̱agaṯag daaṯem dayeb amu ig Nug ele keeke oh gumadḵunig. Ig Nug di medap̱ut, Nug ig ele di megaḵu.  
\v 13 Amu ele ig Nug dim lamidḵunignu awota, ihinig nai amu ii dim lamidṯem amu Nug ele anam heḵute? Iiṯa, Nug amu nuhig nai genab dim lamidṯe.”   
\p
\v 14 Na haen oh keeke imu oh nahipad danab ah ag daulagp̱a doḵunu amelagp̱a ap̱e doyeg! Na Naḏi noobp̱a ag amelagp̱a ag nai diigdiig amunu ag nug aib qep̱ig, na g̱agaṯag ap̱e doyeg! Nainu nug qak amuam meu iiṯa, amu nug danab laa ele ii ehanidṯe. Kobol amu nug danab ag nai amu dooṯeb amu nug ag he nauhṯeb aaḵuib.   
\s1 UḎAT DANAB ENA AMU NUG KAYAKNU BINAG AOṮE  
\p
\v 15 Kayak Nug nahipnu enaib dooḵunu amu na uḏat danab, nug nuhig uḏat ena heṯe amunu nug uḏat nuhignu uḏa ii neṯe, nug danab ah Kayak nai tutuḵunab ip̱uanadṯe ele, amubia daaḵutnu na uḏat nahip peheṯakib he!  
\v 16 Na nai nautud diigdiig aib maṯime. Aḏinu? Danab ah ag nai amu maṯinna daaṯeb ele amu, ag Kayak di meṯan, umanab goḵulag.  
\v 17 Danab nai amu madiṯeb ele amu ahilag nai amu ihi nau anig yak oḵai meṯe amubia oḵai meḵu. Haimenias, Pailitas ele a am danab amunu laa aaḵu.  
\v 18 Danab amunu amu ag nai genab apiḏidna, ag inam aṯeb. “Ig mauhaknu eḏut hip̱aidta malamut, baula ii hip̱aidmata,” aon aṯeb. Ag nai amup̱a danab laala ag ahilag oop̱a genab doyak heeg nauhṯe.  
\v 19 Amge Kayak Nug nuhig biidod g̱agaṯag ep̱om daaṯe. Biidod amup̱a am Kayak naip̱a, nai inam daaṯe. “Naḏi Nug nuhiḵud danab ah doyadṯe.” Nai laa ele inam daaṯe. “Ag oh, ag Naḏi onig diiṯeb amu ag kobol tutuḵu iiṯa amu di meṯeg!”   
\p
\v 20 Ao, Kayaknu tamaniak oop̱a amu danab ah ag lag oḵai laa oop̱a tap̱iḏ laa golp̱a hak, laa silwap̱a hak, laa adp̱a hak, laa wanp̱a hak bia daaṯeb. Tap̱iḏ amu oolagp̱a amu danab ag laalanu ena dooṯeb amge laalanu amu enanag ii dooṯeb. Amubia amu danab ag tamaniak oop̱a daaṯeb ele amu, ag ele anam daaṯeb.  
\v 21 Amunu amubia danab laip̱u laa nug kobol nau oh amu lamiṯe uḵe, nug op̱ia awak daaṯe amu, nug am tap̱iḏ, nuhignu enanag dooṯeb, amubia nug Kayak amegp̱a enanag daaḵu. Anam dayebeb, Naḏi Nug aḏi uḏat medaḵunu dab ma meṯeb amu Nug uḏat ena oh heḵunu elele daaḵu.  
\v 22 Amu nid bau dilag dab mak eheḏ nahip dab makp̱a beeb amu na tabap̱e naḏ! Na kobol tutuḵu, oop̱a genab doyak, oo mauhak kobol, amu maḏoḏ kobol ele, laala ag oolag tutuḵu ele, ag kobol nau uun, kobol ena amu oh aḏan, Kayak onigp̱a eṯeb ele amu, na ag heṯeb amubia he!  
\v 23 Amge na nai kaaka, doyak iiṯa ele amu na amu ele uue! Na dooṯem, maṯiak amu nug he, naip̱a nug qak beṯe.  
\v 24 Kayaknu uḏat danab nug am naip̱a nug qak kobol ii hema. Iiṯa, nug am ohnab noolagp̱a oo mak ele oiḵu. Nug ip̱uniṯak danab ena daaḵunu ehah awa, op̱oḏi bak kobol tap̱eb neeb, ug oh nug mawaḏ!  
\v 25 Nug dagom kobolp̱a, laa ag nai nuhig tap̱aeg neṯe ele amu, ag ib tutuḵu ip̱uanaṯaḏ! Nug anam heḵu amu haen laa Kayak Nug ag oolag eḏuḵunu maṯeb, ag nai genab amu tutuḵu dooglagtai.  
\v 26 Anuḵa Satan ag nug dim lamidḵulagnu nuhig aḏp̱a maaṯom amge Kayak Nug heeb, ag oolag eḏueb, ag nai genab doona, ag kobol ena ele doona amu ag baula nuhig aḏp̱a ii daamna.   
\c 3  
\s1 HAEN GAMAG IMUP̱A AMU KOBOL NAU KUḎUM BEḴU  
\p
\v 1 Amge na doye, gog tak haen imup̱a amu ug naunab beḵu.  
\v 2 Danab ag aḵa aḵa ahilagnuib oolag mauhḵu, ag men doḏonuib oolag mauhḵu. Ag aḵa beḏulag humana, enaen mak kobol henana, laa aon aon aqaglag. Geha ag anilḵad mamelḵad oḏelag tabap̱eg neebeb, ag anen anen ag anilḵad mamelḵad dilag ele, “Ena hen meḏap̱ig,” ii doomna. Ag op̱ia awak ii oimna.  
\v 3 Ag tiilag laip̱u ele layam ena iiṯa, ag op̱oḏi bak kobol ii uumna. Ag dimugnu nai mauhnoak maṯiglag, ag oolagp̱anu hak tutuḵu amu atog ii nomana, daḵuḏ kobol henana, ag kobol enanu kekeḏ daaglag.  
\v 4 Ag kadoi layag kekeḏp̱a mak, ahilag dab mak nau paha dim lamiṯak, ag aḵa aaḵuib danab oḵai dooglag. Geha ag beḏunu gamag ahak diigdiig amunuib oolag mauhaha, Kayaknu amu oolag ii mauhma.  
\v 5 Ag Kayaknu kobol amu gaḏalagp̱aib, danab amelagnuib, heḵulag amge Kayak kobolnu g̱agaṯag amu, ag di meṯaglag. Na danab amu dilagnu qe mena oiye!   
\p
\v 6 Danab amunu laala ag haen oh qinonob ah dab mak tutuḵu iiṯa ele amu, ag laulḵadp̱a tena, ham bup̱ualadna heeg, ah amu ag oop̱a genab doyaknu ibp̱a ii oiṯeb. Ah amu ag beḏunu oo gamag ahak ameg qaknu hip̱uninp̱a daaṯeb. Ahilag dab mak eheḏ eeḏaṯe, ag eheḏp̱anab daaṯeb.  
\v 7 Ah amu ag haen oh ip̱uniṯak nai dooglagnu heṯeb amge ag nai genab aoglagnu elele iiṯa.  
\v 8 Anuḵa Janis Jambris ele a Moses kekeḏ medapiḏ bia, danab amu heṯeb ele, ag am nai genabnu kekeḏ daaṯeb. Dab mak ahilag aaḵu nauhom, ahilag oop̱a genab doyak amu ham bup̱uakib.  
\v 9 Am ahilag kobol amu ele oḵai ii mema. Ahilag dab mak, anuḵa danab ag Janis Jambris ele dilah kobol kaaka amu miag atiak anidp̱ig amubia dab mak nau amu danab oh noolagp̱a miag atiak daaḵu.   
\s1 TIMOTIUS NUG KAYAKNU NAI, OOP̱A AḎAḴUNU NAI  
\p
\v 10 Amge na da ele oiḏa, da danab amelagp̱a nai imu maṯiyi, oh doon malame. Na dahil oiyak doome, dahil kobolnu diig ele doome. Da Kayaknu oolp̱a genab g̱agaṯag dooṯem, amu da haen oh ool g̱agaṯag qedeṯe uḏat hein, da oo mauhak doyen, ug ele mawewe, g̱agaṯag daami amu na amu ele dooṯem.  
\v 11 Amu danab ag Antiok, Aikoniam, Listra ap̱a dahilp̱a kobol nau kuḏum hena, guiṯak meḏan, geḏilna lamiḏp̱ig, keeke amu ohnu amu na doome. Amge na dooṯem, ug amu ohp̱a Naḏi Nug da ehaniḏe, iiṯa meum.  
\v 12 Amu aun laa oh ag Kristus Jesus ele ou qena, Kayaknu kobol meup̱a oiglagnu oolag daaṯe ele amu, ag ug kuḏum aoglag.  
\v 13 Amge danab nau, ham bup̱uak aḏi ele, ag kobol nau henana, tuḏidna naunab henana, ag laa ham bup̱ualaṯegeg, laa amu ag ele ag ham bup̱ualadḵulag.  
\v 14-15 Amge nahipnu amu na Kayak nai, nai amuam na doyak ena ip̱uniṯa heeb, na Jesusnu ootp̱a genab dooḵutnu elele daaṯe, na nai amu nid nakok daanna, dig men doona, na aun aḏi ag nai diig tutuḵu ele ip̱uniṯeg, na amunu ootp̱a g̱agaṯag genab dooṯem, ag ele doyadṯem amunu na amu dab menan, aḏi keeke ip̱unidp̱ig ele, nai amu aḏan oiye!  
\v 16 Kayak Nug he, nuhig nai aaḵu beum amu nai amu oh ig ehanigṯe. Aṯemun ehanigṯe? Ig amup̱a doyak aoṯem. Ig hip̱unin heḵunig dayeb amu ig daug batak megaṯe. Ig ena ii oignig dayeb amu ib tutuḵu ip̱unigṯe amu ig Kayak noobp̱a ena daagnignu ib ele ip̱unigṯe.  
\v 17 Diig amup̱a ig Kayaknu danab amu ig uḏat ena oh heḵunignu aaḵu elele daaṯem.   
\c 4  
\p
\v 1 Jesus Kristus Nug eḏua uḏiḵu, nuhig ḏo maḏoḏ ele daaḵu amunu Nug bau dayak aḏi amu mauhak aḏi ele epeḏiadḵu, amu da Nug amu Kayak ele, a noolahp̱a na uḏat imu heḵutnu g̱agaṯag na amenp̱a aṯem.  
\v 2 Na amunu dab mak aonna, nai nuhig mehuqe! Danab ag nahip nai dooglagtai o iiṯa iitai doomna amge na haen oh Kristusnu nai mehuqe! Haen oh ag Kayaknu kobol dim lamidḵulagnu ag oolag yaan, daulag batan, g̱agaṯag ele aqe! Na amu henana amu, na bahin aib yom, ip̱uniṯak ele peheṯaknab he!  
\v 3 Aḏinu? Dimp̱a haen laa amu danab ag ip̱uniṯak tutuḵu, meu ele, uuglag. Ag ahilag dab mak dim lamidna, ip̱uniṯak danab ham bup̱uak kuḏum diiglag. Diip̱eg, ip̱uniṯak danab amu ag nai laala, danab ag dooglagnu oolag niiṯe ele, amuib ap̱eg dooglag.  
\v 4 Amu ag nai genab meu ele amu di meṯana, kaya hamu amunuib daulag human dooglag.  
\v 5 Amge nahipnu amu na haen oh dab mak amahlak ele daye! Ug haenp̱a na g̱agaṯag daanna oiye! Kayak nai mehuqak uḏat am na he! Na Kayaknu mehuqak danab daaḵutnu amu na aḏi uḏat heḵutnu daaṯe amu na he!   
\p
\v 6 Dahilnu amu danab ag da iup̱eg mauhḵulnu haen miag do, da goḵulnu aaḵu haen malom. Danab ag doḏ main Kayak medaṯeb amu da amubia daaṯem.  
\v 7 Da Jesusnu uḏat ena hein malen, da aḏi uḏat heḵulnu dayom amu hein, gogp̱a tein amu da dahil oop̱a genab doyak ele atog nomi  
\v 8 amu gemu nob ena da aoḵulnu amu Kayak Nug aaḵu meum daaṯe. Nob ena amu Naḏi, Nug danab ah tutuḵuib epeḏiadṯe ele amu, Nug eḏua hibaiṯaknu deḏp̱a da meḏaḵu. Amge daḵaib iiṯa, aun laa oh ag Nug eḏua uḏiḵunu tap̱aḏidna daaṯeb ele amu ag ele madaḵu.   
\s1 PAULUSNU UḎAT MALAḴUNU HEṮE  
\p
\v 9-10 Dimas nug haen gemu imunuib dab mak awawa, da uuiḏa Tesalonika uḵom. Keresens nug Galata uḵom, Titus nug Dalmesia uḵom amunu na wagai mena, paha da gumiḏna uḏie!  
\v 11 Lukas nuḵaib da ele daaṯep amu na uḏiḵutnu amu na Makus, nug da ehaniḏḵunu ena amu, na nug aop̱e, a oh uḏieḏ!  
\v 12 Da Tikikas mei, Epesus uḵom.  
\v 13 Na uḏinna amu lamen dahil Troas ap̱a Kapas laugp̱a ap̱a uumi daaṯe amu na aon uḏie! Buk oh ele aḵan uḏiḵutnu ool daaṯe amge buk laa, ag buk amu keeke laa onig pasment, amup̱a hep̱ig ele amu, na amu aon uḏiḵutnunab ool daaṯe.   
\p
\v 14 Aleksanda, nug am keeke brasp̱a hak doyak danab amu, nug da eheḏnab heiḏom. Dimp̱a Naḏi Nug kobol nug heum ele, amunu elelep̱a nob medaḵu.  
\v 15 Na ele nuhignu dab mena autna awe! Aḏinu? Nug ihinig nai tap̱eb na autanab aoḵunu dab ma heum.   
\p
\v 16 Tatam da heṯoḏiakp̱a meiḏp̱ig amu laip̱u laa da ii ehaniḏom, ohnab da uuiḏna malap̱ig amge da ab ag qaḏelagp̱a ii nemanu Kayak unuqidṯem.  
\v 17 Ag anam hep̱ig amge Naḏi Nug da ehaniḏom, g̱agaṯag ele meḏom amunu da nai aṯem madiḵulnu amu doomi. Iiṯa aḏi, ag heṯoḏiak abenp̱a daap̱ig ele amu, ag ele da oḏel doop̱ig amu Kayak Nug da laion oḏep̱anu behiḏom.  
\v 18 Ao, Naḏi Nug hak nau oh oop̱anu, nuhig abenp̱a daaḵulnu eḏua awiḏḵu. Ig Nug binag haen oh metu! Genab.   
\p
\v 19 Na Prisila, Akwila amu Onesiporas baeḵudp̱a ele humiṯak dahil imu ap̱e doyeg!  
\v 20 Erastas nug am Korint daaṯe amu Tropimus nug am oḏe ele amunu da nug Mailitas ap̱a uuidmi daaṯe.  
\v 21 Na haen gamag imup̱a, oug haen iiṯa imup̱a, wagai mena, paha gumiḏna uḏie! Eubilus, Pyudens, Lainas, Klodia amu ig lainḵad ele oh na humidṯeb.   
\p
\v 22 Naḏi Nug amu nuhig ehaniṯak oḵai hamu megṯe ele amu nahipp̱a dayeḏ!