\id 2TH - Nobonob NT [gaw] -Papua New Guinea 1990 (DBL 2014) 
\h 2 Tesalonika 
\toc1 Tesalonika Dilag Nai 2 Paulus Yom 
\toc2 2 Tesalonika 
\toc3 2 Te 
\mt1 TESALONIKA DILAG NAI 2 PAULUS YOM  
\c 1  
\s1 KAYAK AMEGP̱A UNUQIṮAKNU NAI  
\p
\v 1 Paulus, Silas, Timotius ele ig nai imu Tesalonika tamaniak ahilagnu iiḵu yaaṯem. Ag Kayak, ig Mamenig, amu ihinig Naḏi Jesus Kristus ele dilah danab ah daaṯeb.  
\v 2 Kayak, ig Mamenig, amu Naḏi Jesus Kristus ele, ahilah ehaniṯak oḵai a hamu megṯep amu ahilah maḏoḏ ele ahilagp̱a daaglahnu oonig daaṯe.   
\p
\v 3 O lainḵad, ig haen oh Kayak amegp̱a, “Ena heme,” aot aḵunignab. Aḏinu? Ahilag oop̱a genab doyak amu oḵainab meṯe amu ag oo mauhak doona, ag aḵa aḵa nug ehaniṯak uḏat ele tuḏidna huanak heṯeb.  
\v 4 Amunu ig ahilag kekeḏ ag ahilagp̱a kobol nau kuḏum heegeg, ag amunu ug diigdiig dooṯeb amge ag g̱agaṯag daanna, ag ahilag oop̱a genab doyak ele ii paḏaṯeb doota amu ig amunu Kayaknu kristen tamaniak ohp̱a ag binalag meṯem.   
\p
\v 5 Kayak Nug ag ehanaṯe, ag g̱agaṯag daan, ug maon oiṯeb amunu ig amup̱a Kayak Nug danab ah tutuḵu epeḏiadṯe anidṯem. Nug anam heṯe amunu Nug ag nuhig ḏo maḏoḏ oop̱a daaglagnu amu Nug amunu elele doyadḵu. Ag Nug ele nuhig ḏo maḏoḏ oop̱a daaglagnu heṯeb amunu ag aaḵu guiṯak aoṯeb.  
\v 6 Kayak Nug kobol tutuḵuib heṯe amu Nug inam heḵu. Aun ag ug madaṯeb amu Kayak Nug amunu nob maṯa,  
\v 7 Nug ag ug dooṯeb ele amu, haen ena maṯa, Nug ig ele haen ena megaḵu. Jesus eḏua, ab aḏu amu engel g̱agaṯag nuhiḵud ele ag hab aṯannu miag atiak neḵulag, haen amup̱a Kayak Nug kobol amu heḵu.  
\v 8 Nug danab ag Kayak ii dooṯeb amu ag Naḏi Jesusnu nai ele dim ii lamidṯeb amu, Nug ag nob nau tutuḵu madaḵu.  
\v 9-10 Nug Kayaknu danab oh ag Nug onig humaglagnu, danab ag oolagp̱a genab dooṯeb ele amu, ag nuhignu oolag gamag ahaḵunu uḏiḵu. Amu Nug deḏ amup̱aib Nug danab ag Kayak ii dooṯeb, ag Naḏi Jesusnu nai ele dim ii lamidṯeb amu Nug ag nob nau, padal mak hanhannu, Kayak top̱anu amu nuhig g̱agaṯagp̱anu ele uḏiṯe amu madaḵu. Amge ag Tesalonika danab ag am Kayaknu danab, ag am danab ag oolagp̱a genab dooṯeb ele amu, ag danab amu ele oolagp̱a daaglag.   
\p
\v 11 Ig amunu haen oh dab metata, Kayak amegp̱a Nug ag ehanadḵunu unuqidṯem. Ig Kayak Nug heeb, nuhig ewak baag ag anuḵa doop̱ig amu, ag kobol Nug ewak amup̱a ag heḵulagnu ahilagp̱a eum ele amu, ag elelenab heḵulagnu ele unuqidṯem. Laa ele Kayak Nug ag g̱agaṯag maṯeb, ag kobol ena oh heḵulagnu heṯeb ele amu henana, ag uḏat oh Kristusnu oolagp̱a genab doon heṯeb, amu ele genab heḵulagnu ig unuqidṯem.  
\v 12 Ib amup̱a amu ag Jesus Kristus, ihinig Naḏi, Nug onig oḵainab humaglag amu ag Kayak, ig Mamenig, amu Naḏi Jesus Kristus ele, ahilah ehaniṯak oḵai hamu megṯep amup̱a ag ele onilag aoglag.   
\c 2  
\s1 ḎO TAPE NAK DANABNU NAI  
\p
\v 1 Aria Jesus Kristus, ihinig Naḏi, Nug eḏua uḏiḵunu amu, ig oh Nug noobp̱a qag meta, Nug ele daagnignu, o lainḵad, ag keeke amunu dab meḵulagnu iiḵu aṯem.  
\v 2 Ag, “Naḏi uḏiḵunu deḏ aaḵu malom,” nai amu doop̱ignu amu laa nug nai mehuqa, nai amu maṯie doop̱igtai, o iiṯa danab laa nug nuhig dab makp̱aib anam maṯie doop̱igtai, o iiṯa laa nug ig nai amunu ahilagp̱a uḏug yaat meut uḵomnu maṯie doop̱igtai amge nai amunu amu ag oolagp̱a genab aib doop̱ig, dab mak ele ootot aib dayom.  
\v 3 Ag hep̱eg, laip̱u laa nug ib laalap̱a aib bup̱ualaṯom. Deḏ amu tatam iinab uḏima. Tatam Kayak di meṯak kobol oḵai beeb amu ḏo tap̱e nak danab nau, danab amu nug padal meḵu ele amu, nug ele miag atiḵu.  
\v 4 Danab amu nug danab laa oh ag keeke oh dilagnu, “Imuam Kayak,” aṯeb, keeke amu noolagp̱a ag gatelag qaun oṯeb ele amu, nug amu oh tap̱eb neeb, nug onigib humeb, aṯan teḵu. Nugib Kayak laug, op̱ia awak ele, ap̱a nug nuḵa agup̱a daaḵunu ta dayaya, nuhignu, “Da iiḵuib am Kayak,” awa aḵu.   
\p
\v 5 Da ag ele daamut haenp̱a da nai imu ag amelagp̱a maṯimi amu daulagp̱a daaṯete?  
\v 6 Ag keeke laa gemu danab amu nug nuhig haen iiṯap̱a nemanu, nuhig ib oo neum daaṯe amu ag dooṯeb. Kayak Nug deḏ nuhig tituanomp̱a amu danab amu nug deḏ amup̱a miag atiḵu.  
\v 7 Ḏo ii dim lamiṯak kobol amu gemu uḏia loḵumak haaha daaṯe amge ḏo ii dim lamiṯak kobol oḵai memanu, laa nug ib oo neṯe ele amu, nug anam heebeb uḵeb, laa nug heeb, ib oo nak amu iiṯa meeb amu ḏo tap̱e nak kobol am oḵai meḵu.  
\v 8 Haen amup̱a ḏo ii dim lamiṯak danab nug miag atieb, dimp̱a Naḏi Jesus, Nug geha Nug oḏep̱a ouḏi iwaleb, qeeb mauhḵu. Yo, Naḏi Nug nuhig amahlak naḏi ele miag atia, amahlak amup̱aib ḏo tap̱e nak danab amu heeb nauhḵu.  
\v 9 Amge ii nauhak haenp̱a ḏo ii dim lamiṯak danab amu nug Satannu g̱agaṯag ele uḏia, ham bup̱uak ep̱onak keeke, danab heḵunu elele iiṯa diigdiig haaha,  
\v 10 nug danab ah, ag padal meḵulagnu oiṯeb ele amu, ib diigdiigp̱a ag ham bup̱ualadḵu. Danab amu ag nai genab doop̱ig amge ag uup̱ig. Ag ii uulob amu Kayak Nug eḏua diilo amge iiṯa amunu ag padal meḵulag.  
\v 11-12 Danab amu ag nai genab dooglagnu uup̱ig amunu Kayak Nug ag ham bup̱uak nai oolagp̱a genab dooglagnu, Nug danab amu, ag nai genab oolagp̱a genab ii doona, kobol tutuḵu iiṯa amunuib oolag heṯe ele amu, Nug ag oh epeḏiaṯa, geḏadḵunu amu Nug heeb, ham bup̱uak oḵai ahilagp̱a beḵu.   
\s1 G̱AGATAG DAYAKNU NAI  
\p
\v 13 Amge ig lainḵad, Kayak Nug ahilagnu oo huana mauhṯe ele amu, ig ahilagnu hanhan Kayak amegp̱a, “Ena heme,” aot aḵunignab. Aḏinu? Kayak Nug nuhig Ouḏi Nug heeb, ag op̱ia awak daaglag, ag nai genabnu oolagp̱a genab dooglag, diig aḏit amunu Kayak Nug dig makp̱anu ag eḏua diiḵunu tituanaṯom.  
\v 14 Kayak Nug Nai Enanu mehuqak ihinigp̱a, ag anam daaglagnu ag onilagp̱a eum  
\v 15 amunu o lainḵad, ig oḏenigp̱ate o iiṯa ig yakp̱ate nai ip̱uanadmut amu amup̱a ag g̱agaṯag daana, peheṯan aḏan dim lamiṯeg!   
\p
\v 16 Aria ihinig Naḏi Jesus Kristus, Nugnab amu ig Mamenig Kayak, Nug ihinignu oo mauhṯe, Nug nuhig ehaniṯak oḵai hamu megṯe ele, amup̱a Nug he, ig g̱agaṯag hanhan daagnignu dab mak aot, ig Nug ameg meḵunignu, maḏoḏ ele aomut amu, aḏit amu a hepeḏ,  
\v 17 ag maḏoḏ daanna, ag oiyak ahilag ohp̱a enaib oiglagnu g̱agaṯag aoglag.   
\c 3  
\s1 PAULUS TESALONIKA AG NUHIGNU UNUQIDḴULAGNU AUM  
\p
\v 1 O lainḵad, ig nai laip̱u imuib ele iiḵu ag amelagp̱a aṯem. Ag ihinignu dab menana, ag Naḏi Nug ig ehaniḵeb, nuhig nai atu oh tuala uḵeb, danab ah ag wan atu amup̱a daaṯeb amu, ag Tesalonika danab ag nai amunu ena doop̱ig bia ag nai amunu ena dooglagnu, ag ig uḏat elele heḵunignu, ihinignu unuqiṯeg!  
\v 2 Danab kuḏum ag Jesusnu oolagp̱a genab ii doonna, ag uḏat ihinig hep̱eg nauhḵunu heṯeb amunu ag Kayak, Nug ig danab nau amu ag ep̱elagp̱anu uhuqigḵunu ele unuqiṯeg!  
\v 3 Amge Kayak, Nug aḏi heḵunu aṯe amu Nug aaḵu heṯe ele, Nug g̱agaṯag aqeb, Satan nug ag keeke eheḏp̱a ii eeḏadma.  
\v 4 Am Naḏi Nug ihinig dab mak maḏ eṯe, ig ahilagnu inam dab meṯem. Kobol oh ig ag heḵulagnu amelagp̱a maṯimut amu ag henana daaṯeb amu dimp̱a ele ag anam heḵulag.  
\v 5 Naḏi Nug ag oolagnu ulum aḏebeb, ag Kayaknu oo mauhak amu Jesusnu ug mawa oiyaknu kobol ele doon autna aoglagnu oonig daaṯe.   
\s1 DANAB OH AG UḎAT HEḴULAG  
\p
\v 6 Da Naḏi Jesus Kristus onigp̱a nai g̱agaṯag ag amelagp̱a inam aṯem. Ag lailḵad laa bahilag iiṯa, ag kobol ena, ig tatam ip̱uanadmut, ag amu ii dim lamidṯeb amu, ag danab amu ele aib ou qep̱ig.  
\v 7 Ag aḵa, haen ig ag ele daatta, ig uḏat heutut aniḵegeg, hamu ii daamut ana dooṯeb amu ag kobol amu dim lamidḵulag am ena.  
\v 8 Ag ihinignu oolag ug qemanu amu ig amun tuqan ele e aognignu uḏat g̱agaṯag hetata, ig danab laanu e hamu ii laṯamut. Iiṯa. Ig daden meta lamut.  
\v 9 Ig anam hemutnu diig amu, ag ihinigp̱a anidna oolag maiṯeb, ag ele bau daaglagnu uḏat heḵulag. Ig totol danab amunu ig ag oolagp̱a daatta, ag ep̱elagp̱a e aolom am eheḏ iiṯa amge ig anam ii hemut.  
\v 10 Haen ig ag ele daatta, ig ḏo imu ag maṯamut. “Laa nug uḏat ii heḵu amu nug e ii lama,” aot amut.   
\p
\v 11 Ig nai imu yaaṯemnu diig amu ig gemu laala ag uḏat hak kobol uuna, hamu oina, ag aḵa kobol ena ii henana, ag laa dilagnu dab mak kaboliḵulagnu heṯebnu nai daunigp̱a dooṯem amunu ig nai imu yaaṯem.  
\v 12 Amu Jesus Kristus onigp̱a ig nai g̱agaṯag, danab kobol ena ii heṯeb ele, ahilagnu aṯem. “Ag toḏoḏugna daanna, ag aḵa e awaknu uḏat henana, amup̱a ag e aon laig!”  
\v 13 Amge o lailad, ahilagnu amu ag uḏat ena hak kobolnu aib oolag bahi yeeb uup̱ig.   
\p
\v 14 Am laip̱u laa nug nai ig uḏug imup̱a yaamut imu dim ii lamiṯeb amu ag nug anidna, nug uuidna, piḏe dayeg! Ag anam hep̱eg, geha nug nuhig kobol eheḏ amunu uḏa neḵu.  
\v 15 Amge nuhignu kekeḏ bia aib anidp̱ig. Iiṯa, ag nuhignu ag lailag doonna, dab mak enaib ele nug meṯeg!   
\s1 BAG QAK NAI  
\p
\v 16 Naḏi Nug maḏoḏ kobolnu diig, Nug nuḵa ag hanhan, keeke ohp̱a, maḏoḏ madaḵunu, Naḏi Nug ag oh ele daaglagnu oonig daaṯe.  
\v 17 Da Paulus, da humiṯak nai imu, da haen oh anamib yaaṯem ele amu, da ep̱elp̱a iiḵu eḏue yaaṯem. Amuam da uḏug yaaladṯem amu ohp̱a, dahil ep̱onak keeke, da anamib aaḵu yaaṯem.  
\v 18 Naḏi Jesus Kristusnu ehaniṯak oḵai Nug hamu megṯe amu, ag oh ahilagp̱a dayaḏ!