\id 2PE - Nobonob NT [gaw] -Papua New Guinea 1990 (DBL 2014) 
\h 2 Petrus 
\toc1 Nai 2 Petrus Yom 
\toc2 2 Petrus 
\toc3 2 Pe 
\mt1 NAI 2 PETRUS YOM  
\c 1  
\s1 KAYAK NUG NUḴA NUG KRISTEN DANAB NUHIGNU TITUANAṮOM  
\p
\v 1 Da am Simon Petrus, da am Jesus Kristusnu uḏat danab amu totol danab ele. Da ag danab laa ag ele oop̱a genab doyak ig oop̱a genab doyak aomut amubia aop̱ig daaṯeb ele amu, da ahilagnu dab mein, nai imu ahilagnu yaaṯem. Oop̱a genab doyak imu ig Jesus Kristus nuhig kobol ena amup̱a aoṯem, Nug am ihinig Kayak, ig padal meḵunignu hemut amge Nug nuḵa aaḵuib eḏua awiḵom.  
\v 2 Ag Kayak amu Jesus Kristus, ihinig Naḏi ele, ahilahnu doyak ena aop̱ig amu amup̱a ahilah ehaniṯak oḵai hamu megṯep kuḏum amu ahilah maḏoḏ oḵai ele ahilagp̱a daaglahnu ool daaṯe.   
\p
\v 3 Kayak Nug nuhig g̱agaṯag oḵaip̱a, Nug keeke oh ig nuhig kobol ena oop̱a oignignu, ig bau daagnignu ele meḵom. Nug nuhig ena hak, Nug binag oḵai ele dab maama, ig oninigp̱a eewo, ig Nug dooṯem amu doyak amup̱a Nug keeke amu oh ig meḵom.  
\v 4 Nug nuhig hak ena, Nug binag oḵai ele amup̱a Nug keeke enanag kuḏum oh ig megaḵunu nai qaḵa aum amunu amup̱a ag wan imup̱an kobol nau, ig beḏunig amu heḵunignu eeḏigṯe ele amu, ag amu ele eḏidna, ag Kayak daaṯe bia daaglagnu elele daaṯeb.   
\p
\v 5 Diig amunu amu ag kobol ena heḵulagnu dab menana, wagai mena, kobol ena amu oop̱a genab doyak ahilag ele ou aqateg! Amu ag doyak aon ahilag kobol ena ele ou aqateg!  
\v 6 Amu ag dab mak, ag dab mak amup̱a ag beḏulag nug eheḏ gomananu amu ag nug atog nona autna aoṯeb ele amu, ag dab mak amu aon, doyak ahilag ele ou aqateg! Amu ag ug doonna eḏidḵulagnuib dab meḵulagnu kobol, kobol amu ag beḏulag atog noaknu dab mak ele ou aqateg! Amu ag Kayak binag maknu kobol aon amu ag ug doyaya eḏidkunuib dab mak awak kobol ele ou aqateg!  
\v 7 Amu ag lailḵad ele layam ena daaglagnu kobol amu aona, ag kobol amuam Kayak binag maknu kobol ele ou aqateg! Amu lailḵad dilagnu oo mauhak kobol amu aona, lailḵad ele layam ena dayak kobol amu ele ou aqateg!  
\v 8 Aḏinu? Ag kobol amu heḵulagnu henana, baubau tuḏidna heḵulag dayeb amu kobol amu ag hep̱eg, amu ag Kristen, ag Jesus Kristus, ihinig Naḏi, nuhig kobol doonna, kobol ena ele dim lamidḵulagnu meu anidḵulag.  
\v 9 Amge danab laa nug kobol amu iiṯa ele amu nug keeke uma daaṯe amu ii anidṯe, nug am ameg gaḏuom daaṯe. Nug am hip̱unin anuḵa heum amu Kayak uhuqa meṯom ii dab meṯe.  
\v 10 Amunu, o lailad, Kayak Nug ag onilagp̱a eum, Nug ag nuhiḵudnab doyadṯe amu, diig amunu ag nuhig ewak dim lamidḵulagnu wagai meig! Aḏinu? Ag anam hena amu ag iinab nena qemana.  
\v 11 Aria ag kobol amu heḵulag amu Kayak Nug oo gamag ahebeb, Nug diia, ootuqadḵu. Nug ootuqaṯeb, ag ihinig Naḏi, Nug am ihinig eḏua awiḵak danab ele, Nug am Jesus Kristus, ag nuhig ḏo maḏoḏ hanhannu oop̱a daaglag.   
\p
\v 12 Ag keeke amu oh dooṯeb, nai genab amu aop̱ig amu ag amup̱a g̱agaṯag hip̱aidna daaṯeb amge da amunu hanhan dab mak ahilag maḏ edaḵulnu heṯem.  
\v 13 Kobol amunu amu da ena dooṯem. Yo, da bau daaṯem haen imup̱a, da baubau ag amelagp̱a, dab mak ahilag maḏ edaḵulnu amu madiḵulnu amu da ena dooṯem.  
\v 14 Aḏinu? Da ihinig Naḏi Jesus Kristus, Nug da amelp̱a aum bia, haen elab iiṯa amu da beḏul imu uuidḵulnu dooṯem.  
\v 15 Amunu da ag ib ena ip̱uanadḵulnu wagai meṯem. Aria da anam hein, dimp̱a da mauhe gop̱i, dimp̱a amu ag nai imu hanhan dab meḵulagnu elele daaglag.   
\s1 KAYAKNU AMAHLAK KRISTUS NUHIGP̱A DAAṮE  
\p
\v 16 Ig kaya oonigp̱anu aot, ihinig Naḏi Jesus Kristus, Nug wanp̱a uḏiom, Nug am g̱agaṯag ele, amunu ag amelagp̱a ii maṯimut. Iiṯa, ig amenigp̱anab Nug amu genab danab naḏi, binag ele anidmut. Nug beḏu qaukop̱a eḏuom anidmut. Ig Nug amu Nug beḏu eḏuak ele anidmut amu ig amunu ag amelagp̱a maṯimut.  
\v 17 Haen Mame Kayak Nug Jesus binag huma, onig oḵai ele hab aṯannu meṯom amu ig doomut. Kayak Nug inam aum. “Imu nid dahilnab, da nuhignu ool mauhṯe, nuhig hakp̱a ele da oolp̱a enaib dooṯem.”  
\v 18 Ig Nug ele qauko gunp̱a daamut amunu ig baag amu hab aṯannu neene doomut.   
\p
\v 19 Amunu ig propet ag nai ap̱ig ele amu, ig genabnab miagib oonig unuqagp̱a ele dooṯem. Danab ag hul, nug gatatu abenp̱a amahlala daye uḵe uḵe, wagḵaḏeḏe boitinan amahalṯe amubia ag propet dilag nai imu dab mep̱eg uḵeb uḵeb, Jesus Nug eḏua na amahalḵu batak.  
\v 20 Keeke laa amu ag anuqak doyeg! Laa nug nuḵa dab mak nuhigp̱a propet nai ap̱ig ele amu awa, diig madiḵunu elele iiṯanab.  
\v 21 Aḏinu? Danab laa nug nuḵa nuhig dab makp̱a propet nai ii aum. Iiṯa, Kayak Ouḏi Nug dab mak medeṯe, ag nai Kayak top̱anu uḏiom amu ag madip̱ig.   
\c 2  
\s1 PROPET HAM BUP̱UAK DILAG KOBOL NAU  
\p
\v 1 Propet ham bup̱uak ag anuḵa danab oolagp̱a oidp̱ig amubianab ip̱uniṯak danab ham bup̱uak ag geha ag gemu daaṯeb, ag oolagp̱a bena oiglag. Amu ag geha loḵumakp̱a ham bup̱ualadp̱eg, kobol adeḵu dim lamidḵulagnu amu dab meḵulag. Ham bup̱uak kobol amu ag keeke heeg nauhṯe. Amu ele, danab amu ag Naḏi ebehi ele, Nug ag ib eheḏp̱anu eḏua diie, ib enap̱a dop̱ig ele amu ag Nug guhuḏidḵulag amunu danab amu ag aaḵu aḵa padal meḵulagnu heṯeb.  
\v 2 Am ele, geha danab laa kuḏum ag danab amu, ahilag kobol nau aon dim lamidḵulag amunu danab kuḏum laa ag nai genabnu nai nau aḵulag.  
\v 3 Ip̱uniṯak danab ham bup̱uak amu ag men doḏo huanak aoglagnu dab menan, ag geha ip̱uniṯak kobol genab iiṯa, ahilag dab makp̱anu aaḵuib ag ip̱uanadnana heḵulag amge Kayak Nug ameg amuhe ii niiṯe. Iiṯa, Nug ag nob nau madaḵunu meum daaṯe, ag ii eḏidmana.   
\p
\v 4 Kayak Nug engel hip̱unin hep̱ig ele amu he, iite padal mep̱ig? Yo, Nug geḏaṯe, aben eheḏp̱a nop̱ig. Nug aben gatatu amup̱a qaḵalaṯom daaṯeb. Amu ag epeḏiak haen ameg men daaṯeb.  
\v 5 Amu Kayak Nug he, Noanu haenp̱an danab ohnab iite padal mep̱ig? Yo, Kayak noobp̱a danab tutuḵu, Noa, nug am tutuḵu oiyaknu mehuqak danab amu, nug baeḵudp̱a eblaih aḏit ele ag aḵa aaḵuib atog noaṯeṯe, danab laa oh, Kayak noobp̱a tutuḵu ii oip̱ig ele amu, le hiḏ naḏip̱a padal mep̱ig.  
\v 6 Amu Kayak Nug he, ab oḵai aḏit, Sodom Gomora ele, a iite padal mepiḏ? Yo, Nug he, ab naḏi ewatom. Kobol amu danab laa oh ag ab oḵai aḏit nauhpiḏ, amu dilah haen dimp̱a daanna, Kayak noobp̱anu tutuḵu iiṯa ele oiglag amu, ag Sodom Gomora danab padal mak aop̱ig anam aaḵu ahilagp̱a uḏiḵu, ig amu anidta dab meḵunignu heum.  
\v 7 Kayak Nug haen amup̱a Lot, nug am danab tutuḵu, am danab tutuḵu amu nug dubuṯid danab amu ahilag kobol eheḏnab amunu ameg bahi yoom ele amu nug nauhmanu ehaniṯom.  
\v 8 Danab tutuḵu amu nug ag oolagp̱a dayom amu nug deḏ deḏ kobol nau ahilag amu amegp̱a anṯa, daugp̱a ele doyom amu, nug oop̱a amu ena iinab doyaya, guiṯak ele doyom.   
\p
\v 9 Aria Kayak Nug amu oh ahilagnu anam heum amunu Nug danab ag Nug noobp̱a kobol tutuḵuib heṯeb ele amu, Nug ag ug oh, ahilagp̱a beṯeb amu amup̱anu diia atog noadḵunu doya auta awawa, Nug danab ag Nug noobp̱a danab tutuḵu iiṯa ele amu, Nug ag diia, nob nau awaknu heṯoḏiak haen ameg mena daaglagnu maadḵunu ele doya auta aoṯe.  
\v 10 Kayaknu kobol amuam, nug genab danab laa ag ahilag hak nauib dim lamidnana, Kayak onig ele dap̱idṯeb amu ag tonadḵu. Ip̱uniṯak danab ham bup̱uak amu ag aḵa ahilagnu ag am g̱agaṯag doonna, ag laanu dab ii menana, ag engel dilag ii baḏanna, ag aḵa wagai mena, nai nau ahilagnu aṯeb.  
\v 11 Anam aaḵu amge engel ag ahilag g̱agaṯag oḵainab, ebehi ele, ag ham bup̱uak ip̱uniṯak danab imu eḏaṯak amge ag Naḏi noobp̱a danab nau amu ahilagnu nai eheḏ laa iinab aṯeb.  
\v 12 Amge ham bup̱uak ip̱uniṯak danab ag am keeke ii dooṯebnu nai nau madiṯeb. Ag am doḏ dab mak iiṯa ele daaṯeb bia daaṯeb. Ag am doḏ daḵuḏ ag aḏi aḏi heḵulagnu daaṯeb amu ag dab menan ii heṯeb, iiṯa ag hakib heṯeb amubia ip̱uniṯak danab ham bup̱uak imu ag anam heṯeb. Ag am doḏ aḏaladta, aqadḵunignuib menuaṯak bia daaṯeb. Ag geha doḏ daḵuḏ bia padal meḵulag.   
\p
\v 13 Ag am eheḏ hep̱ig amunu nob eheḏ aoglag. Amu ag amunp̱a miag atiakp̱a kobol nau ohnu mauhnoak heḵulagnu oolag ahak ele oiṯeb. Danab nau amu ag hobul, ag kristen heṯeb ele amu, hobul amup̱a wana, oo gamag ahak nau ele ag oolagp̱a daaṯeb. Ag anam daanna amu ag am gaḏanigp̱a ah lanak o gakanenig daaṯe amubia daanna, ag oolagp̱a e lanan daaṯeb.  
\v 14 Ham bup̱uak danab amu ag gap̱ai heḵulagnu ah oh neeḵadnana daaṯeb, ag hip̱unin heḵulagnu oolag ahakib daaṯe. Ag kobol amu henana, danab laa ag kobol tutuḵu dim lamiṯaknu bodo eṯak amu eeḏadṯeb. Ag keeke huanaknab aoglagnu wagainab mena, ib amu iinab uuṯeb. Ag am nob nau aoglagnu daanna oiṯeb.  
\v 15 Amu ham bup̱uak ip̱uniṯak danab amu ag ib tutuḵu eṯan, ib eheḏp̱a goṯeb. Amu ag Beo beḵa Belam, nug ib dim lamiṯom ele amu dim lamidṯeb. Belam nug am men doḏonu oo mauhe, kobol eheḏ haaha, men doḏo aoḵunu dab meum.  
\v 16 Amge Belam nug kobol nau amu uuḵunu, doḏ laa onig donki, doḏ amu nai ele ii madiṯeb, nug danab baag awa amegp̱a nai maṯia, daug batom.   
\p
\v 17 Aria danab ham bup̱uak amu ag am lenag qaḏa edap̱ig bia, ag am lombig ulah iwalaṯe goṯeb bia ele amunu Kayak Nug gatatu aben naunab ahilagnu babaiṯom daaṯe.  
\v 18 Danab amu ag aḵa keeke oḵai hep̱ignu ham bup̱un madiṯeb amge nai amu gaḏaib. Ag beḏulagp̱an kobol naunu maṯiegeg, danab laa kobol tutuḵu dig mena dim lamidṯeb ele amu, ag kobol nau amunu iṯag aqebeb, dim lamidḵulagnu heṯeb.  
\v 19 Ham bup̱uak danab amu ag danab laala ag uhuqak aoglagnu ib ip̱uanadḵulagnu aṯeb amge ag aaḵu hip̱uninnu begbeg daaṯeb. Ag hip̱uninnu begbeg daaṯebnu diig am aḏi keeke danab laa eḏiṯom daaṯe, danab amu nug keeke amu waap̱a daaṯe ele amu, danab nug keeke amunu begbeg daaṯe.  
\v 20 Amu danab ag ihinig Naḏi Jesus Kristus, Nug danab eheḏp̱anu eḏua diiṯe amu, ag Nug doon, amup̱a ag wanp̱an kobol nau uuṯeb amge ag eḏun kobol nau amunu baula heḵulagnu waṯeb dayeb amu danab amu ag aaḵu qagaiṯak tatam nakok bia aoglagnu daap̱ig amge gemu amu ag qagaiṯak naḏinab aoglagnu daaṯeb.  
\v 21 Anam daaṯe amunu ag kobol tutuḵunu ib amu ag ii doolob amuam nau amge ag ib ena doona, eḏun ib eheḏ oina, ag ḏo nai gun ele di meṯalob, amuam naunab nau.  
\v 22 Amu danab ag amunu nai laa inam aṯeb amu ag genab heṯeb. Nai amuam inam. “Qai laa nug e lana bahowa, nug aaḵu eḏua bahom ele laṯe.” Amu laa ele, “Bo laa nug beḏu lep̱a ihak amge eḏua hiḵoḏ laaṯe.” Nai amu ahilagnu aṯe.   
\c 3  
\s1 GENABNAB GENAB, GEHA NAḎI NUG UḎIḴU  
\p
\v 1 O lailad, imu am ad uḏug aḏit batak ahilagnu yaami. Uḏug aḏit ohp̱a nai yaami amu ag tatam doop̱ig amge da dab mak ahilagp̱a keeke amu oh genabnab dooglagnu maḏ aṯak nai aaḵu yaami.  
\v 2 Amu da ag Kayaknu propet ag nai ap̱ig, amu ag daulagp̱a doḵunu, Naḏi Nug eheḏp̱anu eḏua awigṯe ele amu, nuhiḵud totol danab ag Nug oḏep̱anu ḏo nai aon madip̱ig amu, da nai aḏit amu oh ag daulagp̱a dob, ehanadḵunu ool daye yaami.  
\v 3 Amu ag tatam inam dooglagnu, daulagp̱a doḵunu ele amelagp̱a aṯem. Gog tak haen imup̱a eheḏ hak danab laa aḵa miag atin beḵulag. Amu ag beḏulagnu kobol eheḏ ohnu henana, kobol ena genab amu aon aon qeṯana imidḵulag.  
\v 4 Ag ihaklel henana, “Jesus uḏiḵunu nai qaḵa aum amu adeḵu?” aḵulag. Laa ele ag, “Ig mamenḵad ag Nug eḏua uḏiḵunu ameg men daaegeg uḵe mauhp̱ig amge dig makp̱an uḏie gemu ele wanp̱anu keeke bep̱ig daaṯeb bianab gemu ele daaṯeb!” aon aḵulag.  
\v 5 Dig makp̱a Kayak Nug oḏep̱a nai aawo, hab wan ele bepiḏ. Amu wan qaḏa eṯa beebe, le nug ameg laa dayom amu ag amunu doonna daulag atiṯe.  
\v 6 Amu lep̱a ele Kayak Nug he, hiḏ ba, wan atu tatamnu awe padal meum.  
\v 7 Amubia Kayak oḏep̱a hab wan ele gemu daaṯe amu geha ab eweb, iiṯa meḵunu aum daaṯe. Wan atu gemu daaṯeb amu daap̱eg uḵeb, deḏ laa Kayak Nug hip̱unin danab epeḏiaṯeb, padal meḵulag, deḏ amup̱a wan atu gemu daaṯeb amu iiṯa meḵulag.   
\p
\v 8 Amge keeke laip̱u imu amu ag aib daulag atiom. O lailad, Naḏi amegp̱a amu deḏ laip̱u amu maḏ 1000 ele otiak laala ii daaṯe. Iiṯa, Nug amegp̱a haen aḏit amu laip̱uib bia dooṯe. Maḏ 1000 amu deḏ laip̱u bia daaṯe amu deḏ laip̱u amu maḏ 1000 bia daaṯe.  
\v 9 Danab laala ag, “Naḏi Nug eḏua uḏiḵunu nai qaḵa aum amu paha eḏua ii uḏia heṯe,” dab meṯeb amge anam iiṯa. Iiṯa. Nug am ahilagnu oo maḏoḏ ele daaṯe. Nug danab laip̱u laa padal meḵunu oo ii daaṯe. Iiṯa, Nug danab oh ag oolag eḏuḵunu oo oḵai daaṯe amunu haen madaṯe.   
\p
\v 10 Naḏi Nug eḏua uḏiḵunu haen amu yabhoi danab uḏiak bia uḏiḵu. Deḏ amu geha oqoṯi naḏinab oobob, hab iiṯa meebeb, keeke naunau am eon iiṯa mebep̱eg, wan amu keeke oh wanp̱a daaṯeb ele, amu ele oh geha eon iiṯa meḵulag.  
\v 11 Keeke oh kobol anamp̱a padal meḵulag amunu ag am aṯem daaglag? Ag danab ena op̱ia awak ele, Kayaknu danab tutuḵu daanna,  
\v 12 amu ag Kayaknu deḏ, deḏ amup̱a habp̱anu keeke amu keeke naunau oh ele abnu gaḵaḏakp̱a eon iiṯa meḵulag ele, deḏ amu ag tap̱aḏidnana oiyeg!  
\v 13 Amge Kayak Nug hab bau amu wan bau ele megaḵunu aum amunu ig neegṯem. Aben amup̱a tutuḵu danab ag daaglag.   
\p
\v 14 Amunu o lailad, ag keeke amu ameg mena daaṯeb amunu ag uhuqak ena aon daaglagnu amu ag Kayak noobp̱a eheḏ hak danab ii daaglagnu amu Nug ele maḏoḏ daaglagnu, ag wagai menana dayeg!  
\v 15 Kayak Nug ahilagnu maḏoḏ dooṯe ele amu, Nug amup̱a ag ena bena daaglagnu haen madaṯe, ag amunu dab menan anṯeg! Amu ig lainignab Paulus, Kayak Nug nug ele dab mak ena meṯe, uḏug ahilagnu yom amu, nai imu amup̱a ele anam daaṯe.  
\v 16 Paulus nug uḏug laala ele yaalaṯom, amup̱a keeke amunu ele yom. Nuhig yakp̱a keeke laala doya oo maiṯaknu amu ug ele amu danab laala ag eb qeeg, oolag ii maiṯeṯe, mehuqak augigiak, nai yak laalanu mehuqak augigiak heṯeb bia henana, danab heeg, ootot aqaṯe. Amu ag aḵa ag nob nau aoglagnu aaḵu ib bap̱aidṯeb.   
\p
\v 17 Amunu o lailad, ag keeke amunu amu doop̱ig daaṯeb amunu ag aḵa gup̱iḏ ahilag ep̱elagp̱a aḏan, kaboliaṯak danab, ag nai tap̱aeg neṯe ele amu, ag ag eeḏadp̱eg, ahilag eheḏ hak ib amup̱a ii wamananu, ag Kristus ep̱egp̱anu, ag agup̱a enanag daaṯeb amu, ap̱anu nena qemananu, g̱agaṯag dayeg!  
\v 18 Amge ihinig Naḏi Jesus Kristus, Nug ig eḏua awigṯe ele amu, ag nuhig ehaniṯak oḵai hamu megṯe amu nuhig doyak ena ele, amu waap̱a ena daanna, amup̱a oḵai meḵulagnu uḏat heig! Ig Nug binag naḏi gemu, haen oh ele metu! Genab.