\id TIT - shell for translator's use
\ide UTF-8
\h Taitus
\toc3 Ta
\toc2 Taitus
\toc1 Pola Taitusmo Tiratna Timbiŋ Rapar
\mt1 Pola Taitusmo tiratna timbiŋ rapar
\imt Outna kam
\ip Taitusa ma Iudana wiwitna ramootta wanaiŋ. Na an mɨnna ma Iesusna rɨtɨpacna ramoot ian ndarurina, na ma Polmo Iesusna up aŋgɨrena ramtaɨrta aiŋa otaca morena. Na Pola ma Taitusmo Kirit muta tɨkcarica eacrina, te, ma anna Iesusna rɨtɨpaikta meikramtaɨrta tumbunmo bubuocna aiŋa mona.
\ip Na outta gan timbiŋ rapara gaindopatna, Kiritnaŋgepta tɨpemb kirarira laiŋ koinda wanaiŋ. Ainda moca ramootta Iesusna rɨtɨpaikta meikramtaɨrta tumbunna ramoot paŋanna laruna mo te, ma tɨpemb kirarir laiŋga matau ŋgoinna raŋgairaŋ. Na iŋmbaia Pola Taitusmo meikramtaɨrta wiwit kabe, kabemo riptina tɨp kirara mboprina, na anna ramtaɨr bagrarapa, meik bagrarapa, ramtaɨr ŋgaibapa, mina tuombta aiŋir kamndera morena meikramtaɨrap.
\ip Na gan timbiŋ raparna mamamaina kambca ma gaind, Taitusa ma meikramtaɨrmo riptica mina iroar inkara kabe ndeacna, na kabena meikramtaɨrmo ndiarna tɨp kirara momonan, na mina kaega mona kambca kai mbop teac, na runduikta kambca kai mbop teac.
\c 1
\ms Taitusa Kirit muta eacrena Iesusna rɨtɨpaikta meikramtaɨrta tumbunna rɨtɨpacapa, tɨpemb kirarirmo, moa wandoŋairina
\mr (1—3)
\p
\v 1 Aku Pol, aku Raraŋ Aetaniacna mbaiŋna ramootapa, Iesus Karaisna up aŋgɨrena ramoot. Na Iesus Karais, ma aukmo mandaca aku taŋga Raraŋ Aetaniaca ma ndo larapacrina meikramtaɨrta rɨtɨpaikca moi gagrana. Na aku minmo otaca mina kam gidikna landamŋi aŋgɨca mana tɨpembta kirarira raŋgaina. 
\v 2 \x - \xo 1.2: \xo*\xt Ro 16.25, na Kol 1.27, na 2 Ti 1.1, na 1.9, na 1 Pi 1.20\xt*\x*Aintik aku minmo otaca mina gagra rɨpac te, Raraŋ Aetaniacmo lambica ma minmo iarwarna eteacna wat neaŋna. Na atu ŋgoinna Raraŋ Aetaniaca reac ianna mo laru ŋgocor ndeacri, ma babuatna, ma an iarwarna eteacna watta ma aimo neaŋnandet. Na ma mba parurena. 
\v 3 \x - \xo 1.3: \xo*\xt Epe 1.9-10, na 1 Te 2.4, na 1 Ti 1.1, na 1.11, na 2.3, na 2 Ti 1.10, na Ta 2.10, na 3.4\xt*\x*Na an mɨnna ma ndo larapacrinanna, ma ramtaɨr ndeidta, iroara moi ŋgepca mina mana kammo wiwitica mbopatna, na an kirar mbuŋa ma ndona kammo moa laruca raekca tɨkatna. Aintik Raraŋ Aetaniac, ma ndo aimo mac nda aŋgɨna Ramoot, na ma ndo mbopatke, aku an wiwitirina aiŋa aŋgɨrina.
\p
\v 4 \x - \xo 1.4: \xo*\xt Ro 1.7, na 2 Ko 8.23, na Gal 2.3, na 2 Ti 1.2, na 4.10\xt*\x*Aintik Taitus, u aukna nuoc ŋgoin tik, aku unmo gan timbiŋ rapara tirca neaŋga makɨpek, na an rɨtɨpaca aia rɨpacrenanna u toco anap. Ainda moca Raraŋ Aetaniacapa, aimo mac nda aŋgɨna Ramoot, Karais Iesus, maniŋa unmo kadmaica una iro inikmo moi wewettaca laŋ ndeacraŋnandet.
\s Taitusa ramtaɨr paŋaind laiŋmo larapacna
\p
\v 5 Na aku unmo Kirit muta tɨkcaririnanna, u an aiŋir tɨpembmo wandoŋaica korwina. Te, an kirara ŋgaua aku unmo mboprinanna, u an auŋembta Iesusna rɨtɨpaikta meikramtaɨrta tumnambta ramtaɨr paŋaindmo larapacna. Te, an ramtaɨr paŋainda, mina aiŋa Iesusna rɨtɨpaikta meikramtaɨrta tumbunna ŋginaŋa mona ramtaɨr. 
\v 6 \x - \xo 1.6: \xo*\xt 2 Ti 2.24-26\xt*\x*\x - \xo 1.6-9: \xo*\xt 1 Ti 3.2-7\xt*\x*Na u larapacekna ramootta, ma meikramtaɨrta lamnik ŋgoutmo ma makukar kocor, na meac kabe niŋgikap laŋgoca eacrenan. Na an ramootna mombonikca mina Karaisa rɨpacrena, na mina tɨpemb ŋaŋao ŋgorikca kai raŋgai teac, na mina ndorita aemaetmo kai garuru teac. 
\v 7 \x - \xo 1.7: \xo*\xt TN 10.9, na 1 Ko 4.1, na Epe 5.18, na 1 Pi 5.2\xt*\x*Na u lamŋirena, Iesusna rɨtɨpaikta meikramtaɨrta tumbunna ŋginaŋa morena ramoot paŋanna, ma Raraŋ Aetaniacna aiŋna ŋginaŋa morena ramoot. Aintik ma Raraŋ Aetaniacna aiŋa mo te, ma wandoŋ ndeac te, meikramtaɨra manmo wat te, ma makukar kocor. Na ma ndomo gainda kai lamŋi teac, ma iapna ramoot, na ma meikramtaɨrmo paŋanmbaia tɨkraŋna. Na ma mba tawia nikkatrena ramoot. Na ma puk gargarapa wainna pukca kai amca ŋaŋaorena ramoot. Na ma kabena meikramtaɨrmo tamtamma mba ruŋrena ramoot. Na ma kituknduk aniac ŋgoin aŋgɨnake, mba toŋgorena ramoot. Wanaiŋ. 
\v 8 Na meikramtaɨra mana kac nakɨp te, ma minmo actɨkca ma ndiarna tɨpna kirara mo. Na ma tɨpemb kirarir laiŋmo toŋgorena, na ma iroar laiŋ tiŋgikca raŋgairena. Na ma tɨpemb kirarir wandoik laiŋapa, Raraŋ Aetaniacna tɨpemb kirarirmo muruŋcamiŋa raŋgairena. Na ma ndona eteacna watmo ma mataua bubuocrena ramoot. 
\v 9 \x - \xo 1.9: \xo*\xt 1 Ti 1.10, na 1.15, na 2 Ti 1.13, na 2.15, na 4.3, na Ta 2.1\xt*\x*Na an kam gidikca mina manmo riptirenanna, ma anmo utiŋga gagararina. Ainda moca an meikramtaɨrmo ma minmo kam gidikca riptica mina anna rɨpac te, ma mina iroar inkara moi ŋgepca mina an kamma raŋgainande. Na an meikramtaɨra kammo nda mboprenanmo, ma gagraca mbop te, mina ndorita makukarmo wat rapacna.
\s Kirit mutna ramtaɨr wɨtta kabena meikramtaɨr ndeidta rɨtɨpacmo moa ŋgocrairena
\p
\v 10 \x - \xo 1.10: \xo*\xt 1 Ti 1.6, na 4.7\xt*\x*Na Kirit mutna Iesusna rɨtɨpaikta meikramtaɨrta tumbunna wɨtta mina kam gidikmo nda mboprena, na mina an wanaiŋna nininina kamb wɨtmo mbopca meikramtaɨrta iroar inkarmo parurenan. Na an ramtaɨra mina wɨtta Iudana wiwitnan. Na an wiwitta mina tikiŋit kakatacna gagrarena. Aintik u ŋginaŋa mona ramtaɨr paŋaind laiŋmo riaca larapac. 
\v 11 \x - \xo 1.11: \xo*\xt Mt 23.14, na In 10.12, na 1 Ti 6.5, na 2 Ti 3.6, na 1 Pi 5.2\xt*\x*Ainda moca an ramtaɨra mina tɨpemb kirarir ŋgorikca mona morenan, na meikramtaɨrta kitukndukarmo wanaiŋ naaŋgɨrena taupna ŋgorerena, aintik mina minmo tɨpemb kirarir ŋgorikca riptirena, na aia an tɨpemb kirarirmo mona mɨnna wanaiŋ. Na an tɨpemb kirarir puŋga mina meikramtaɨr ndeidapa, mina wiwitna meikramtaɨrta rɨtɨpaikca moa ŋgocrairena. Ainda moca u minmo kɨraca mina ainta kambca kai mbopi mo teac. 
\v 12 Na atua Kiritna landamŋina ramoot aniac ianna ma gaindopatna, “Kiritnanda mina paparuna meikramtaɨr koind, na mina raŋna amta ŋgoaebta kirar toc, na mina meikramtaɨr ŋgorik. Na mina gagam niŋgikca ndamŋirena, na mina meikramtaɨr boborar.” 
\v 13 \x - \xo 1.13: \xo*\xt 2 Ti 4.2, na Ta 2.2\xt*\x*Na an kamma anna gidik. Ainda moca u minmo kam gargara neaŋga mina tɨpembmo wandoŋaina, te, mina Iesusmo gidikca rɨpacna. 
\v 14 \x - \xo 1.14: \xo*\xt 1 Ti 4.7, na 2 Ti 4.4\xt*\x*Na mina Iudana titocna paparuna nininiarmo kourmo kai ikca warac teac, na mina kam gidikmo iŋ neaŋrena meikramtaɨrta titoc, titocna paparuna tɨpemb kirarir toco kai warac teac.
\p
\v 15 \x - \xo 1.15: \xo*\xt Mt 15.11, na Lk 11.39-41, na Ro 14.14, na 14.20, na 14.23, na 1 Ko 6.12\xt*\x*Na meikramtaɨra Raraŋ Aetaniacna lamnɨac ŋgoutmo rat ndeac te, titocna kainta reik toco rat ndeacnandet. Na meikramtaɨra Raraŋ Aetaniacna lamnɨac ŋgoutta tɨpemb kirarir ŋgorik rat ŋgocortanna raŋgairenan, mina Karaismo mba rɨpacrenan. Ainda mo te, reac ianna mba ratit, na mina nikinik iroapa, iroara Raraŋ Aetaniacna lamnɨac ŋgoutta kocnaia mba ratitndait. 
\v 16 \x - \xo 1.16: \xo*\xt Ro 1.28, na 2 Ti 3.5, na 3.8, na 1 Io 1.6, na 2.4, na Iu 1.4\xt*\x*Ainda moca mina upemb puŋga gaindoprena, “Aku Raraŋ Aetaniacmo lamŋirena.” Na mina tɨpemb kirarira gainda wandacrena, mina manmo iŋ neaŋrena. Na Raraŋ Aetaniaca minap reikca momoa ma kari ŋgoin. Na kammo nda ipuŋrena ramtaɨra, mina reac laŋ ianna mona mɨnna wanaiŋ ŋgoin.
\c 2
\s Meikramtaɨr bagrara Raraŋ Aetaniaca toŋgorena tɨpemb kirarirmo matau ŋgoinna raŋgairaŋ
\p
\v 1 \x - \xo 2.1: \xo*\xt 1 Ti 1.10, na 6.3, na 2 Ti 1.13, na Ta 1.9\xt*\x*Na u Taitus, u meikramtaɨrmo riptica, mina Raraŋ Aetaniacna tɨpemb kirarir gidkarmo muruŋcamiŋa raŋgaica mona. 
\v 2 Te, u ramtaɨr bagrarmo mbopca mina ndorita eteacna watna ŋginaŋa matau mo. Na mina tɨpemb kirarira laiŋ tiŋgikca moraŋ, te, meikramtaɨra minmo torinandet, na mina iroar laiŋ tiŋgikca raŋgairaŋ. Na mina Raraŋ Aetaniacna kam gidikmo matau rɨpac, na kabena meikramtaɨra matŋirena tɨpemb kirarira mo, na mina wɨtɨk gagrana tɨpemb kirarirapa, makukara muruŋcamiŋa mbuknan motocmo mo.
\p
\v 3 \x - \xo 2.3: \xo*\xt 1 Ti 3.11, na 1 Pi 3.3-4\xt*\x*Na u meik bagrar motocmo, mbopca mina Raraŋ Aetaniaca toŋgorena tɨpemb ratarmo, anna raŋgaica taŋraŋ. Na mina kabena meikramtaɨrmo ndoŋndoŋa kai rapac teac, na mina wain pukmo kai watcarica ma mina iroarmo ŋginaŋa mona, na kabena meikmo mina minmo tɨpemb kirarir laiŋ tiŋgikca riptiraŋ. 
\v 4 Te, meik bagrara meik ŋgaibmo riptica mina ndorita kaŋterapa mombonikmo matau ŋgoinna matŋirena tɨpemb kirarira matau lamŋinandet. 
\v 5 \x - \xo 2.5: \xo*\xt Epe 5.22, na Kol 3.18, na 1 Ti 2.11, na 6.1, na 1 Pi 3.1, na 3.5\xt*\x*Na meik ŋgaibca ndorita iroara matau raupŋi te, mina Raraŋ Aetaniacna lamnɨac ŋgoutmo rat ŋgoin ndeacnandet. Te, mina ndorita kaiknimbta ŋginiŋmo matau raupŋi watna landamŋiap, na mina kaŋterapa mombonikmo tɨpemb kirarir laiŋga mona, na mina ndorita kaŋterta kaŋgauk ndeacraŋ. Na mina an tɨpemb kirarira mo te, meikramtaɨra Raraŋ Aetaniacna kammo, peperena kamb ŋgorikca mba mbopitndai.
\s Taitusa tɨpemb kirarir laiŋga moca ramtaɨr ŋgaibca anna raŋgaina
\p
\v 6 Ainda moca an tɨp kirar kabemo u ramtaɨr ŋgaibmo mo ŋgepca, mitoco ndorita tɨpemb kirarirmo matau raupŋina. 
\v 7 \x - \xo 2.7: \xo*\xt 1 Ti 4.12, na 1 Pi 5.3\xt*\x*Na reikca u muruŋcamiŋa morenanna, u ndo tɨpemb kirarir laiŋga mo te, meikramtaɨra an tɨpemb kirarirmo watca anna raŋgaina. Na una meikramtaɨra riptina aiŋ, u minmo kai paru teac, na u taŋbugainna kai mo teac. Wanaiŋ, u memetmbaca tɨp kirar gidikca matau lamŋiraŋ, te, u kammo wandoŋa wiwiti. 
\v 8 \x - \xo 2.8: \xo*\xt 1 Ti 6.3, na 2 Ti 3.14, na 1 Pi 2.12, na 2.15\xt*\x*Na u kamb wandoik tiŋgikca top te, meikramtaɨra una tɨp ŋgoreaca mba ore watitndai. Ainda moca puŋnaŋgepca aimo kam ŋgorikca mba mbopitndai. Na mina ndorita iroar ŋgorikta moca numbira monandet.
\s Tuombta aiŋir kamndera morena ramtaɨrta kamb
\p
\v 9 \x - \xo 2.9: \xo*\xt 1 Ti 6.1-2\xt*\x*Na u tuombta aiŋir kamndera morena ramtaɨrmo mbop, mina ndorita ramtaɨr paŋaindta kaŋgauk ndeac, na mina ainta aiŋira mo te, mina ramtaɨr paŋainda minmo toŋgonandet. Na mina ndorita ramtaɨr paŋaindmo kam ŋgorikca kai ruti mbop teac, 
\v 10 \x - \xo 2.10: \xo*\xt Mt 5.16, na Pil 2.15, na Ta 1.3\xt*\x*na mina ndorita ramtaɨr paŋaindta reikca kai makɨm teac. Kari ŋgoin. Mina ndorita ramtaɨr paŋaindta kambca matau raŋgaia, mina tɨpemb kirarir laiŋga mo te, mina ramtaɨr paŋainda minmo toŋtoŋ ŋgoinna monandet. Ainda moca kainta reikca mina morenanna, mina meikramtaɨrta iroar inkara moi ŋgepca aia riptirena kammo i aniaca neaŋnande, na anna Raraŋ Aetaniacna kam gidik. Aintik Raraŋ Aetaniac, ma aimo mac nda aŋgɨna Ramoot, ma aimo aŋgɨnandet.
\s Aia Raraŋ Aetaniacna tɨp kirara raŋgaica Karaisna Rana lambiraŋ
\p
\v 11 \x - \xo 2.11: \xo*\xt In 1.9, na Ro 5.15, na 1 Pi 5.12\xt*\x*Na aia lamŋirena Raraŋ Aetaniacna kakadmaica larua raekca tɨkri, na ma meikramtaɨrmo muruŋcamiŋa nda aŋgɨna mɨn. 
\v 12 \x - \xo 2.12: \xo*\xt Ro 6.19, na Epe 1.4, na Kol 1.22, na 1 Te 4.7, na 1 Io 2.16\xt*\x*Na mana an kakadmaica ma aimo riptica aia Raraŋ Aetaniacmo iŋ neaŋrena tɨpemb kirarirmo tɨkcarina, na gan tiacarpaikna toŋtoŋgar ŋgorikca muruŋcamiŋa tɨkcarina, na ma aimo iroar laiŋga riptica aia wandoŋa taŋna. Na anna gidik, aia gan tiacarpaikna meikramtaɨrta rɨk ndeacrenan, na Raraŋ Aetaniacna kakadmaica ma aimo riptica aia mana tɨpemb kirarira raŋgainande, 
\v 13 \x - \xo 2.13: \xo*\xt 1 Ko 1.7, na Pil 3.20, na Kol 3.4, na Ib 9.28, na 1 Io 3.2\xt*\x*na aia rɨpaca gagraca an reac laŋa aia watna toŋtoŋ ŋgoinna lambirena. Na aia Iesus Karaisna lambirena, na ma Raraŋ Aetaniac, na ma gargarap, na ma aimo mac nda aŋgɨna Ramoot, na ma ndona memetacna tac aniacapa, Raraŋ Aetaniacna gargarap raekca larunandet. 
\v 14 \x - \xo 2.14: \xo*\xt NA 19.5, na TW 4.20, na 7.6, na 14.2, na Ŋap 130.8, na Esi 37.23, na Gal 1.4, na 1 Pi 2.9\xt*\x*Na Karaisa ma ndona eteacna watnan kecarica, ma aimo mac nda oikrina, na ma aina tɨpemb ŋgorikmo muruŋcamiŋa mo kecaririnan. Te, aia rat ŋgoin ndeacna, aia mana wiwitna meikramtaɨr tarunande, na aia gagraca aiŋa moca, ainta tɨpemb kirarir laiŋga aia monandet.
\p
\v 15 \x - \xo 2.15: \xo*\xt 1 Ti 4.12, na 2 Ti 4.2\xt*\x*Na memetmbaca u meikramtaɨrmo an kammo neaŋ. Na u mina iroarmo mo ŋgepca mina an kamma raŋgai, na an kammo nda mboprena meikramtaɨrmo, u minmo kam gargar neaŋga mina ndorita tɨpemb kirarirmo wandoŋaina. Na u minmo kai watcarica mina una kammo pepere teac.
\c 3
\s Raraŋ Aetaniaca aimo matau ŋgoinna morinanna aia tɨpemb kirarir laiŋga mo
\p
\v 1 \x - \xo 3.1: \xo*\xt Ro 13.1-7, na Kol 1.10, na Ib 13.21, na 1 Pi 2.13-14\xt*\x*Ainda moca u meikramtaɨrmo mbopca mina ndorita gagrirta ramtaɨr paŋaindapa, gan tiacarpaikna ramtaɨr paŋaindta kaŋgauk ndeaca mina kambca waraca raŋgairaŋ. Na memetmbaca mina kocroca mina kaina aiŋir laiŋga muruŋcamiŋa mona. 
\v 2 \x - \xo 3.2: \xo*\xt Epe 4.2, na 4.31, na Pil 4.5, na Kol 3.12, na 2 Ti 2.24-25\xt*\x*Na mina ramoot ianmo peperena kam ŋgoreaca kai mbop teac, na mina kai ipuŋ teac. Na memetmbaca mina laŋan ndeac, na meikramtaɨrmo muruŋcamiŋa tɨpemb kirarir laiŋga moraŋ.
\p
\v 3 \x - \xo 3.3: \xo*\xt 1 Ko 6.11, na Epe 2.1-2, na 5.8, na Kol 1.21, na 1 Pi 4.3\xt*\x*Ainda moca u lamŋirena, ŋgaua ai toco landamŋiar laiŋ kocor tik, aia kammo nda ipuŋrena. Aintik Ramoot Mbɨkca aimo paruca aia Raraŋ Aetaniacna taupca mba raŋgairi. Na aia ndorita nikinik iroara moa ŋgeprena, na ainta tɨpemb kirarirapa, aina meacramootna tikca mo ŋgepna ainta toŋtoŋap, aintik aia tuombta aiŋir kamnderta meikramtaɨrta kirarir toc ndeacrena. Ainda moca aia ŋgaua kaega mona iroapna tɨpemb kirarirap taŋrenan, na aia kabena meikramtaɨrta reikmo ndorimo aetta mona morenan, na kabena meikramtaɨrmo nikkakatap taŋrena. Na meikramtaɨra aimo puŋnaŋgepca moca taŋrenan, na aia kabe, kabea kabena meikramtaɨrmo puŋnaŋgepca moca taŋrena.
\p
\v 4 \x - \xo 3.4: \xo*\xt 1 Ti 2.3, na Ta 1.3, na 2.11\xt*\x*Na Raraŋ Aetaniac ma aimo mac nda aŋgɨatna Ramoot, na ma aina mamatŋi ŋgoin, na ma aimo kadmaica ma aimo tɨpemb kirarir laiŋga morenan. Na mana an tɨpemb kirarira raek ndarurinan, 
\v 5 \x - \xo 3.5: \xo*\xt In 3.3-5, na Ro 11.6, na Epe 5.26, na 2 Ti 1.9, na 1 Pi 3.21\xt*\x*na ma aimo mac nda aŋgɨatna. Na aina morina tɨpemb kirarir wandoik laiŋta moca, ma anna ke, mba lamŋirenanna, na aimo mac nda aŋgɨrina. Wanaiŋ. Ma ndona kakadmaina opotac mbuŋa aimo mac nda aŋgɨatna. Na ma aimo ruca aia meikramtaɨr ŋgaib tarurina, ri, Ŋeroŋ Ratta aimo eteacna wat ŋgam maneaŋgat. 
\v 6 \x - \xo 3.6: \xo*\xt Iol 2.28, na Up 2.17-18, na 2.33, na Ro 5.5\xt*\x*Na aimo mac nda aŋgɨna Ramoot Iesus Karaisna aiŋ mbuŋ tik, Raraŋ Aetaniaca aimo Ŋeroŋ Ratna gargarmo ruŋkica kundrina. 
\v 7 \x - \xo 3.7: \xo*\xt Ro 3.24, na 8.23-24, na Gal 2.16, na Ta 2.11\xt*\x*Ainda moca Karaisa aimo kadmaica aimo Raraŋ Aetaniacna lamnɨacmo meikramtaɨr wandoikca morinan, te, an tɨpna kirara Raraŋ Aetaniaca aimo larapaca aia iarwarna eteacna wat aŋgɨnande, na an iarwarna eteacna watta aia anna lambica eacrena. 
\v 8 \x - \xo 3.8: \xo*\xt 1 Ti 1.14-15, na Ta 2.14\xt*\x*Na gan kamma aku mbopeknanna, anna kam gidik ŋgoin.
\p Na aku toŋgorinanna, u an reacmo minmo gagraca mbop te, meikramtaɨra Raraŋ Aetaniacmo rɨpacrenanna, mina gagraca aiŋa moi tɨpemb kirarir laiŋga mo. Na ainta tɨpemb kirarira ma meikramtaɨrmo otacrena, na anna ma reac gidik. 
\v 9 \x - \xo 3.9: \xo*\xt 1 Ti 1.4, na 2 Ti 2.14-16, na 2.23, na Ta 1.14\xt*\x*Na meikramtaɨra iptipuŋga toŋgorenan, na up kam mbuŋa kambrenanapa, mina nicar ŋgamrirta imo ninirenan, na Tɨpemb Wandikta mɨnɨŋna moca ipuŋrenan, u an kamb ŋaŋaoarmo koar kai tɨki warac teac. Na aia lamŋirena an kambca aimo mba otaca aia tɨpemb kirarir laiŋga mba raŋgaiitndai.
\p
\v 10 \x - \xo 3.10: \xo*\xt Mt 18.15-17, na 2 Ko 13.2, na 2 Te 3.6, na 3.14, na 2 Ti 3.5, na 2 Io 1.10\xt*\x*Ainda moca ramoot ianna Iesusna rɨtɨpaikta meikramtaɨrta tumbun titacna tɨp kirara mo te, u manmo mbopca mana iroa wandoŋai. Na u kɨdrɨk kabe, co, mbuniŋa ainda mo, na ma una kammo warac ŋgocor ndacari te, u manmo watcarica mamo iŋa kocnai neaŋ. 
\v 11 \x - \xo 3.11: \xo*\xt Up 13.46, na 1 Ti 6.3-5\xt*\x*Na u lamŋirena ainta ramootta ma taupmo kecamacariri, na ma tɨp ŋgoreacna makukca momona ramoot ndarurina. Na mana tɨpemb ŋgorikta makukara ndo manmo Raraŋ Aetaniaca wandacrina.
\s Pola toŋgorinanna Taitusa taŋca manmo watna
\p
\v 12 \x - \xo 3.12: \xo*\xt Up 20.4, na Epe 6.21-22, na Kol 4.7-8, na 2 Ti 4.12\xt*\x*An kɨdrɨkca aku Artemas, co, Tikikusmo mandaca un ndambuŋ nakɨp te, u gagraca aukmo Nikopolis auŋ aniac nakɨpi wat. Na laemb aniacna kɨdrɨkca aku ndomo an auŋ aniac ndeacna iroa morina. 
\v 13 \x - \xo 3.13: \xo*\xt Up 18.24, na 1 Ko 3.5-6, na 16.12\xt*\x*Na u tɨpemb wandik tamŋirena ramoot Senasmo, matau ŋgoinna raupŋi, na Apolos motocmo u raupŋi. Na maniŋna tataŋna reikca u maniŋmo otac, te, maniŋa taup ndiŋa taŋ te, maniŋa reac ianna mba matpiitndai.
\p
\v 14 \x - \xo 3.14: \xo*\xt Mt 7.19, na Epe 4.28, na Pil 1.11, na Kol 1.10, na Ta 2.14\xt*\x*Na aina meikramtaɨra mina tɨpemb kirarir laiŋga mona landamŋi laiŋ aŋgɨca an meikramtaɨra reik matpirenanna minmo otac. Moca Iesusa rɨpacrena laiplacara, mina wanaiŋ ndeac nari, na mina Raraŋ Aetaniacna tɨpemb kirarirmo mba raŋgaiitndai, na kabena meikramtaɨrmo mba otacitndai.
\p
\v 15 Na meikramtaɨra aukap eacrenanna, mina unmo ra laŋ neaŋrina. Na u aina ra laŋmo aimo matŋia Iesusa rɨpacrena meikramtaɨrmo neaŋ.
\p Na aku mbendeia Raraŋ Aetaniacna kakadmaica nenap muruŋ ndeacnande.