\id EPH - shell for translator's use
\ide UTF-8
\h Epesus
\toc3 Epe
\toc2 Epesus
\toc1 Pola Epesusnandmo Tiratna Timbiŋ Rapar
\mt1 Pola Epesusnandmo tiratna timbiŋ rapar
\imt Outna kam
\ip Na gan timbiŋ raparna mɨnɨŋ gaind, Raraŋ Aetaniaca reikmo muruŋcamiŋmo Karaisna kaŋgaukca puninande, na anna gan tiacarpaiknanapa tamuŋna auŋnan. Te, Karaisa ma an reik muruŋcamiŋna paŋan ndeacnandet. Na u gan timbiŋ raparna sapta 1 wes 10na inikca wat. Na Raraŋ Aetaniaca ma ndo ŋgoinna meikramtaɨra moa ŋgepca, mina Karaisap gidikca mɨkca iro kabea eacnan.
\ip Na gan timbiŋ raparna outna kamb tɨpmo, Pola Raraŋ Aetaniacna kadmaina kamb wɨt anikca mboprina, na anna meikramtaɨrmo muruŋa moi mina Karaisa rɨpaca, mina tumbunna tɨkca wiwit kabe ndarurina. Na Iesusna aiŋ mbuŋ tik, Raraŋ Aetaniaca meikramtaɨrmo mac nda aŋgɨrina. Na ma minmo Ŋeroŋ Ratta neaŋrina, na anna mana ŋgagatrac, ma minmo baburinanna reik laiŋga monandet. Na u gan timbiŋ raparna sapta 1 wes 14na inikca wat, ma an ndeacrenan. Na anna iŋmbaina timbiŋ raparna kamb tɨpca ma gaindoprinan, Iesusa rɨpacrena laiplacara Karaisap mɨk te, mina iroar inkara kabe ŋgoinna moca, mina Raraŋ Aetaniacna tɨpemb kirarira raŋgairaŋnande.
\ip Na gan timbiŋ rapar mbuŋa Pola kamb rour puŋga meikramtaɨrmo mataua wandacrina, mina Karaisap mɨkrinan, na mina meikramtaɨrta wiwit kabea ndarurina. Na ma gaindoprina, Raraŋ Aetaniacna meikramtaɨr, mina tik umbum kabe, na Karaisa ma an tik umbumna paŋan. Na u gan timbiŋ raparna sapta 4 wes 1 taŋca wes 16na inikca wat, ma an ndeacrena. Na Raraŋ Aetaniacna meikramtaɨra kac ianna kirar toc, na Karaisa ma an kacna wit. Na u gan timbiŋ raparna sapta 2 wes 19 taŋca wes 22na inikca wat, ma anna eacrena. Na Raraŋ Aetaniacna meikramtaɨra mina meac ianna kirar toc, na Karaisa ma an meacna kaŋgaitna kirar toc. Na u gan timbiŋ raparna sapta 5 wes 22 taŋca wes 32na inikca wat te, ma an ndeacrena. Na gan timbiŋ rapar mbuŋa aia matau ŋgoinna watrena, an reik laiŋga Raraŋ Aetaniaca ndona meikramtaɨrmo monande.
\c 1
\ms Karais mbuŋ tik Raraŋ Aetaniaca aimo moca aia meikramtaɨr ŋgaib ndarurina
\mr (1—3)
\p
\v 1 \x - \xo 1.1: \xo*\xt Up 18.19-21, na 19.1, na Ro 1.1, na 1.7, na 1 Ko 1.1, na Kol 1.1\xt*\x*Aku Pol, aku Karais Iesusna up aŋgɨrena ramoot. Na Raraŋ Aetaniaca ma ndona toŋtoŋ mbuŋa aukmo larapacatna, na aku mana up aŋgɨrena ramootta larurina. Na ne Raraŋ Aetaniacna meikramtaɨra Epesus auŋ aniaca eacrenan, ne Karais Iesusmo matau ŋgoinna rɨpacrenanmo, aku gan timbiŋ rapara tirca neaŋga makɨpek. 
\v 2 \x - \xo 1.2: \xo*\xt 2 Ko 1.2, na Gal 1.3, na Kol 1.2, na Ta 1.4\xt*\x*Na aina Aet Raraŋ Aetaniacapa Kacoot Iesus Karaisa, nenmo kadmaica nena iroar inkarmo moi wewettaca laŋ ndeacnandet.
\s Karais mbuŋ tik Raraŋ Aetaniaca aimo tamuŋna auŋna reik laiŋga muruŋa neaŋrina
\p
\v 3 \x - \xo 1.3: \xo*\xt Epe 2.6\xt*\x*Aintik aia Raraŋ Aetaniacna imo aŋgɨ ŋgepraŋ, na ma Raraŋ Aetaniac, na ma aina Kacoot Iesus Karaisna Aet. Na Karais mbuŋ tik, ma aina ŋerŋgaurmo otacna moca, ma aimo tamuŋna auŋna reik laiŋ laiŋga, muruŋcamiŋa neaŋrinan. 
\v 4 \x - \xo 1.4: \xo*\xt In 15.16, na 17.24, na Ro 8.28, na Epe 5.27, na Kol 1.22, na 2 Te 2.13, na 2 Ti 1.9, na Ie 2.5, na 1 Pi 2.20\xt*\x*Na atu ŋgoinna Raraŋ Aetaniaca gan tiacarpaikca mo ŋgocor ndeacri, ma aimo larapaca aia Karaisap mɨkrenan, te, aia rat ndeacnandet, na aia meikramtaɨr wandoik laiŋ ndeaca, mana lamnɨac ŋgoutta mitkar kocor. 
\v 5 \x - \xo 1.5: \xo*\xt In 1.12, na Ro 8.29-30, na 2 Ko 6.18, na Gal 4.5\xt*\x*Na atu ŋgoinna ma aimo mamatŋi ŋgoinap tik, ma aimo larapacatna, na aimo mac nda aŋgɨna aiŋa Iesus Karaisa morinan mbuŋa aia mana mombonik tarunande. Na mana iro toŋtoŋ mbuŋa Raraŋ Aetaniaca ainda moatna. 
\v 6 \x - \xo 1.6: \xo*\xt Mt 3.17, na In 3.35, na Ro 3.24, na 5.15, na Kol 1.13\xt*\x*Na an mooŋnuoca ma matŋirinan ŋgoinna i mbuŋ tik, Raraŋ Aetaniaca ma aimo kakadmai ŋgoin. Aintik aia mana kakadmai aniacna lamŋina moca, aia Raraŋ Aetaniacna i aniacmo aŋgɨ ŋgepraŋ.
\p
\v 7 \x - \xo 1.7: \xo*\xt Up 20.28, na Epe 2.7, na Kol 1.14, na 1.20, na Ib 9.12, na 1 Pi 1.18-19\xt*\x*Na Raraŋ Aetaniacna kakadmaica mɨnna tɨkri. Na Karaisa menacatke, aimo mac nda oikri, na mana racaindpaik mbuŋa Raraŋ Aetaniaca aina tɨpemb ŋgorikta makukarmo muruŋcamiŋa moa kecamariri. 
\v 8 Na ma ndona kakadmai aniacmo, aimo muruŋcamiŋa neaŋgatna, ri, ma aimo kaina iroar laiŋapa landamŋiar laiŋmo ma aimo neaŋrinan. 
\v 9 \x - \xo 1.9: \xo*\xt Ro 16.25, na Epe 3.4, na 3.9-11, na Kol 1.26, na 2 Ti 1.9\xt*\x*Na atua Raraŋ Aetaniaca ma Karaisna aiŋ mbuŋa mona reaca ma lamŋica eacrena. Ainda moca mana an iroa ma iŋgoroca eacrena, na mandeaca ma aimo an iromo wandacrina. 
\v 10 \x - \xo 1.10: \xo*\xt 1 Ko 3.22-23, na Gal 4.4, na Pil 2.9-10, na Kol 1.16, na 1.20, na Ib 1.2, na 1 Pi 1.20\xt*\x*Na an reaca ma monanna anna gaind, ma an reacmo tiŋara moca taŋ, taŋi, ma ndo larapacatna ra laru te, ma gan tiacarpaikapa tamuŋna auŋna reikmo Karaisna kaŋgaukca puninandet. Te, Karaisa an reikmo muruŋcamiŋa ma anna paŋanna wɨtɨkca eacnandet.
\p
\v 11 \x - \xo 1.11: \xo*\xt Ro 8.17, na 8.28-29, na Kol 1.12, na Ta 3.7, na Ie 2.5, na 1 Pi 1.4\xt*\x*Na Raraŋ Aetaniac, ma ndona toŋtoŋapa mana iroa raŋgairenan, na ma reikmo muruŋcamiŋa moca larurena. Na Karais mbuŋ tik, ma atua aimo Iudanandmo larapaca aia manap mɨkca mana wiwitna meikramtaɨr koind tarurinan. 
\v 12 Na aia Iudana wiwitnanna, aia out ŋgoinna Karaisa rɨpaca mana lambirena. Aintik aia Raraŋ Aetaniacna i aniacmo memetmbaca aŋgɨ ŋgepraŋnandet.
\p
\v 13 \x - \xo 1.13: \xo*\xt 2 Ko 1.22, na 6.7, na Epe 4.30, na Kol 1.4-6\xt*\x*Na ne toco Iudana meikramtaɨr wanaiŋmo, ne toco kam gidikmo waracrina. Na anna an kam wembaŋ laŋa, Raraŋ Aetaniaca nenmo mac nda aŋgɨrinan. Aintik ne Karaismo rɨpacrina. Ainda moca ne Karaisap mɨkrina, na ma baburina Ŋeroŋ Ratta, ma anna raŋgaica nenmo neaŋrina. Na an ŋgagatraca nenmo wandacrina, ne mana wiwitna meikramtaɨr koind. 
\v 14 \x - \xo 1.14: \xo*\xt Lk 21.28, na Ro 8.23, na 2 Ko 1.22, na 1 Pi 2.9\xt*\x*Ainda moca aia lamŋirinan, aia Ŋeroŋ Ratmo aŋgɨrina. Na iŋmbaia ai toco kabena reik laiŋga, muruŋcamiŋa Raraŋ Aetaniaca ndona meikramtaɨrmo babuca neaŋ ndoprinanna, aia aŋgɨnandet. Na aia an reik aŋgɨna lambirenan, na an mɨnna Raraŋ Aetaniaca aimo mac nda oik te, aia mana mombonik toc ndarunandet. Te, an aiŋir gagrarca ma morinanna, aia an ndamŋica mana i aniacmo aŋgɨ ŋgepnandet.
\s Pola ma Raraŋ Aetaniacmo mbendeica ma Epesusnanmo iro landamŋiar laiŋ neaŋna
\p
\v 15 \x - \xo 1.15: \xo*\xt Kol 1.4\xt*\x*Na aku waracrina kamma ne Kacoot Iesusmo matau ŋgoinna rɨpacrena, ainda moca ne ndorita mamatŋimo, Raraŋ Aetaniacna meikramtaɨrmo muruŋcamiŋa neaŋrena. 
\v 16 \x - \xo 1.16: \xo*\xt Pil 1.3-4, na Kol 1.3, na 1 Te 1.2\xt*\x*Na memetmbaca aku mbendeirenanna, memetmbaca aku nenmo lamŋirenan, na aku Raraŋ Aetaniacmo kam laŋ neaŋrena. 
\v 17 \x - \xo 1.17: \xo*\xt Kol 1.9\xt*\x*Ainda moca aku aina Raraŋ Aetaniacmo mbendeirenan, na ma aina Kacoot Iesus Karaisna Raraŋ Aetaniac. Na ma Aet aniac, na ma gargarapa memetacna tac aniacap eacrenan. Na aku mbendeica mana kamna mɨnɨŋa lamŋina mori, ma nemo iroar laiŋga neaŋnandet. Te, ne manmo matau ŋgoinna lamŋiraŋnandet. 
\v 18 \x - \xo 1.18: \xo*\xt Up 26.18, na Epe 2.12, na 4.4, na Kol 1.12\xt*\x*Na aku toŋgorinanna, ma nena iroarmo tiŋar laiŋga mo, te, ne matau lamŋina, an reikca ma nenmo garacrinanna, ne aŋgɨnandet, na an reikta moca ne anna lambica eacrenan. Ainda moca ne an reik laiŋ laiŋta ndamŋina, na an reikca Raraŋ Aetaniaca morinanna, anna aia mana meikramtaɨrtan. 
\v 19 \x - \xo 1.19: \xo*\xt Epe 3.7, na Kol 1.11, na 1.29, na 2.12\xt*\x*Te, ne gaind ndamŋinandet, an mana gargara ma memetmbaca aia manmo rɨpacrena meikramtaɨrmo otacrenan, na anna bagaraniac ŋgoin. Na mana gargara aia ŋganŋgɨna mɨnna wanaiŋ. Na mana an gargar aniaca aimo aiŋa morenan. 
\v 20 \x - \xo 1.20: \xo*\xt Ŋap 110.1, na 2 Ko 13.4, na Kol 1.16, na 2.10-12, na 3.1, na Ib 1.3\xt*\x*Na ma ndo ŋgaua Karaisap aiŋa morinan. Na Raraŋ Aetaniacna gargar mbuŋa Karaisa menacrinanna, ma manmo moa mac nda ŋgeprinan. Ri, manmo tamuŋna auŋa aŋgɨca taŋga ma mana par umbaia mbiracatna. 
\v 21 \x - \xo 1.21: \xo*\xt Ro 8.38, na Pil 2.9-10, na Kol 2.10, na 2.15, na Ib 1.4\xt*\x*Ainda moca Karaisa ma titocna ŋerŋgaurapa, ramtaɨr paŋaindapa, gan tiacarpaikna ramtaɨr paŋaindapa, an gargarapna reikap, ma minmo muruŋcamiŋmo tamuŋ ŋgoin ndeacrenan. Na mandeacna mɨnapa, iŋmbaiap, an ramtaɨr mina irembapnanmo, ma minmo tamuŋ ŋgoinna eacraŋnandet. 
\v 22 \x - \xo 1.22: \xo*\xt Ŋap 8.6, na Mt 28.18, na Kol 1.18, na Ib 2.7\xt*\x*\x - \xo 1.22-23: \xo*\xt Kol 1.18\xt*\x*Ainda moca Raraŋ Aetaniaca reikmo muruŋcamiŋa Karaisna kaŋgaukca tɨkrinan, na mana reikmo ma muruŋcamiŋa paŋanna wɨtɨkrinan, na an tɨpna kirara ma Iesusna rɨtɨpaikta meikramtaɨrta tumnambta paŋan ndeacrenan. 
\v 23 \x - \xo 1.23: \xo*\xt Ro 12.5, na Epe 4.10, na 4.15, na Kol 2.9, na 3.11\xt*\x*Na Iesusna rɨtɨpaikta meikramtaɨrta tumbuna, anna Karaisna tik. Na ma reikmo muruŋcamiŋna inikca eacrenan, na ma minmo mɨnna tɨkrinan. Na mana Iesusna rɨtɨpaikta meikramtaɨrta tumnambmo, ma mɨn ŋgoinna tɨkrinan.
\c 2
\s Aia menacrina meikramtaɨra Raraŋ Aetaniaca aimo moa aia Karaisap iarwara eacnande
\p
\v 1 \x - \xo 2.1: \xo*\xt Epe 4.18, na Kol 1.21\xt*\x*\x - \xo 2.1: \xo*\xt Kol 2.13\xt*\x*Na ŋgaua ne ainta mitkara moca ne tɨpemb ŋgorikta makukarap, na anna ndo nenmo moca ne menacrina meikramtaɨr toc ndeacrina. 
\v 2 \x - \xo 2.2: \xo*\xt In 12.31, na Epe 5.6, na 6.12, na Kol 1.21, na 3.6-7, na Ta 3.3\xt*\x*Ainda moca an mɨnna ne gan tiacarpaikna tɨpemb ŋgorikca raŋgaica taŋrena. Na ne riac tamuŋna ŋerŋgaur ŋgorikta ramoot paŋanna tɨpemb kirarira raŋgairenan. Na an ŋeroŋna gargara mandeaca ma meikramtaɨra Raraŋ Aetaniacna kammo nda ipuŋrenanmo, mina nikinik iroar inkarmo aiŋa morenan. 
\v 3 \x - \xo 2.3: \xo*\xt Ro 5.12, na Gal 5.16, na Kol 3.6, na Ta 3.3, na 1 Pi 4.3\xt*\x*Na ŋgaua aia muruŋa an wiwitap eacrinan, na aia ndorita nikinik iroar bagrar ŋgorikta toŋtoŋgar tiŋgikca raŋgairenan. Na aia an iroar inkar bagrarapa aina toŋtoŋgarta iroara raŋgairena. Na an mɨnna aia aind ndeacri, an meikramtaɨra muruŋa an tɨpemb kirarira morinanna, mana opoik ŋgoreaca Raraŋ Aetaniaca aŋgɨ kocrorinanna, aia an aŋgɨna mɨn ŋgoin.
\p
\v 4-5 \x - \xo 2.4-5: \xo*\xt Lk 15.24, na 15.32, na Up 15.11, na Ro 5.6-10, na 6.4-5, na 6.13, na 10.12, na Epe 1.7, na 2.1, na 2.7, na Kol 2.12-13\xt*\x*Na anna gidik, aina tɨpemb ŋgorikta makukara aimo mo menaca, aia menacrina. Na aia kocnaia menaca eacrena meikramtaɨr toc. Ainda moca Raraŋ Aetaniacna kakadmaina opotaca mɨnna tɨkca eacri, na ma aimo mamatŋi aniaca neaŋrina. Ri, ma aimo moca aia Karaisap iarwarna eteacna watap eacri. Na anna laŋ, Raraŋ Aetaniacna kakadmaina opotac mbuŋa ma aimo mac nda aŋgɨrina. 
\v 6 \x - \xo 2.6: \xo*\xt Epe 1.20, na Kol 2.12\xt*\x*Ainda moca ma aimo Karais Iesusap moa ŋgeprinan. Ri, ma aimo moca aia Karaisap mana tamuŋna auŋna gagrirta ramoot paŋanna, mbiracrena taupca aia manap mbiracrinan. 
\v 7 \x - \xo 2.7: \xo*\xt Epe 1.7\xt*\x*Na Karais Iesusna aiŋ mbuŋa ma aimo an tɨp kirar laŋa morenan, ainda moca ma ndona kakadmai bagaraniacmo aia meikramtaɨra Iesusmo rɨpacrenanmo, iŋmbaina mɨnmo ma memetmbaca wandacnandet. 
\v 8 \x - \xo 2.8: \xo*\xt In 4.10, na Ro 4.16, na 10.14-17, na Pil 1.29, na 2 Ti 1.9, na Ib 6.4\xt*\x*Na ne Karaisa rɨpacri tik, Raraŋ Aetaniacna kakadmai mbuŋa ma nenmo mac nda aŋgɨrinan. Na nemo mac nda aŋgɨrina aiŋa, ne ndori puŋga mba mori, wanaiŋ. Anna ma nenmo wanaiŋa neaŋrina aiŋ. 
\v 9 \x - \xo 2.9: \xo*\xt Ro 3.20, na 3.27, na 4.2, na 1 Ko 1.29-31, na 2 Ti 1.9\xt*\x*Aintik anna nena aiŋa morena opoikca wanaiŋ. Ainda moca ramoot ianna ma ndona i aŋgɨ ŋgepna mɨnna wanaiŋ. 
\v 10 \x - \xo 2.10: \xo*\xt 1 Ko 3.9, na 2 Ko 5.5, na 5.17, na Epe 4.24, na Ta 2.14\xt*\x*Ainda moca Karais Iesus mbuŋa ma aimo moca, aia meikramtaɨr ŋgaib tarurina. Te, aia tɨp kirar laŋna taupca taŋna, na anna ma ŋgaua ainanmo kocroca aia an mbuŋa taŋnandet.
\s Iesusa puŋnaŋgepca morena tɨp kirarmo moa kecarica an tumbunniŋmo aŋgɨa kabe mamori
\p
\v 11 \x - \xo 2.11: \xo*\xt Ro 2.28-29, na 1 Ko 12.2, na Epe 5.8, na Kol 1.21\xt*\x*Ainda moca ne lamŋirenan, Iudana wiwitna ramtaɨra mina ndorita paɨr puŋga ndorita tikemb iŋirmo katacrena. Na mina nenmo gaindoprena, “Ne tikiŋita mba katacrena ramtaɨr.” Na an kambca mina ndorita tikembca morina tɨpemb kirarir. Ainda moca ne matau lamŋi, atua ne Iudana meikramtaɨr wanaiŋ ndeacri, 
\v 12 \x - \xo 2.12: \xo*\xt Ro 9.4, na 9.8, na Gal 4.8, na Epe 4.18, na Kol 1.21, na 1 Te 4.5, na 4.13\xt*\x*aintik an kɨdrɨkca ne Karaismo tawanmbaica eacrina. Na ne Israelna wiwitmo raekmbai ndeacrinan. Na an mɨnna Raraŋ Aetaniaca Israelnanmo kam leaca minmo babuatnanna, ne minmo raekmbai ndeacrena. Na ne gan tiacarpaikca eacri, na ne iŋmbaia lambina reac laŋ ian ŋgocor. Aintik ne Raraŋ Aetaniacmo lamŋi ŋgocor. 
\v 13 \x - \xo 2.13: \xo*\xt Gal 3.28, na Epe 2.17, na Kol 1.20\xt*\x*Ainda moca atua ne tawanmbaica eacrina. Na mandeaca Karaisna racainda nenmo aŋgɨca kɨpca ne Karais Iesusap mɨkri, na ne Raraŋ Aetaniacmo rambuŋ ŋgoinna eacrena. 
\v 14 \x - \xo 2.14: \xo*\xt Ais 9.6, na Mai 5.5, na In 16.33, na Up 10.36, na 1 Ko 12.13, na Kol 1.20, na 2.14\xt*\x*Na Karaisa ndo aimo moca aia nikinik iro wetwetta eaca, mbibirac laiŋga eacrenan. Na ŋgaua Iudanaŋgepca mina kabena wiwitnanmo puŋnaŋgepca morinan, ainda moca an puŋnaŋgepna tɨp kirara, ma wuoca moca, Iudananapa kabena wiwitna meikramtaɨrmo rɨkca wɨtɨkca eacrenan. Na Karaisna tik mbuŋa ma an wuocmo rɨŋga irikca ma an puŋnaŋgepna tɨp kirara moca maiatna. Ri, ma an wiwitniŋmo moca maniŋa wiwit kabe malaruat. 
\v 15 \x - \xo 2.15: \xo*\xt 2 Ko 5.17, na Gal 6.15, na Epe 4.24, na Kol 1.20-22, na 2.14, na 2.20\xt*\x*Na ma ndona tik umbum mbuŋa ma Tɨp Wandɨkapa mana kamb tɨpembapa wandɨk tɨkrena tɨpembca ma mo kecaririna. Na ma ainda morinanna, ma an wiwitniŋmo aŋgɨca tumbunna tɨkca, mina ramoot ŋgam ian toc ndarunandet. Ri, an tɨpna kirar mbuŋa ma aimo moca aia nikinik iro kabea eacnandet. 
\v 16 \x - \xo 2.16: \xo*\xt Sek 9.10, na Ro 6.6, na 8.3, na Kol 1.20, na 2.14\xt*\x*Aintik ma ik nakeraca menacrinanna, ma an wiwitniŋmo aŋgɨca tumbun kabea tɨkca, tik kabea moatna. Na an ikna kekerac mbuŋa ma an atuna puŋnaŋgepna tɨp kirara ma mo menacrinan. 
\v 17 \x - \xo 2.17: \xo*\xt Ais 57.19, na Sek 9.10, na Up 2.39, na Ro 5.1\xt*\x*Na ma kɨpca kam wembaŋ laŋmo gainda wiwitiatna, “Mandeaca ne nikinik iro wetwet kabea eacrenan.” Na an kam wembaŋ laŋa ma nenmo tawanmbaia eacrenanapa, rambuŋa eacrena meikramtaɨrmo, ma wiwitirinan. 
\v 18 \x - \xo 2.18: \xo*\xt Ro 5.2, na 1 Ko 12.13, na Epe 3.12, na Ib 4.16, na 1 Pi 3.18\xt*\x*Na aia iro kabea eacrina, na anna Karais mbuŋa aia tumbun mbuniŋa Ŋeroŋ kabeap, na man mbuŋa ma taup gootca aia Aet ndambuŋa taŋi laruna mɨn.
\s Aia Iesusa rɨpacrena laiplacar aia Raraŋ Aetaniacna Kac gidik
\p
\v 19 \x - \xo 2.19: \xo*\xt Gal 6.10, na Epe 3.6, na Pil 3.20, na Ib 12.22-23\xt*\x*Na mandeaca ne tiacarpaik ŋgocorta meikramtaɨrta kirara mba eacrenanna, wanaiŋ, ne Raraŋ Aetaniacna meikramtaɨr koinda eacrenan. Na ne Raraŋ Aetaniacna wiwitnan. 
\v 20 \x - \xo 2.20: \xo*\xt Mt 16.18, na 1 Ko 3.9-11, na Gal 2.9, na KIEK 21.14\xt*\x*Ainda moca ne Raraŋ Aetaniaca morina kacna kirar. Na ma aimo up aŋgɨrena ramtaɨrapa, rambca morena ramtaɨrmo kacna witir toc aŋgɨa wɨtɨkrina. Na Karais Iesusa ma an kacna rɨkna wit. 
\v 21 \x - \xo 2.21: \xo*\xt 1 Ko 3.16-17, na 2 Ko 6.16, na Epe 4.15-16, na Kol 2.19\xt*\x*Na an kacna gagrira Karais nambatta eacrenan, aintik mina muruŋcamiŋa mataua mɨkca eacrena. Ainda moca Raraŋ Aetaniaca, ma an kaca moca taŋrena, na an kaca ma acnaica taŋrenan, na ma Raraŋ Aetaniacna Kaca eacnandet. 
\v 22 \x - \xo 2.22: \xo*\xt 1 Pi 2.5\xt*\x*Na ne toco, Karaisap mɨkca eacrena, aintik Raraŋ Aetaniaca nenmo aŋgɨca mana meikramtaɨrap mɨkrinan, te, ne mana kac gidik ŋgoin ndarunandet. Te, manapa Ŋeroŋ Ratta an kaca eacnandet.
\c 3
\s Pola kabena wiwitna meikramtaɨrmo kam wembaŋ laŋ wiwitina aiŋap
\p
\v 1 \x - \xo 3.1: \xo*\xt Epe 4.1, na Pil 1.7, na 1.13, na Pm 1.1, 9\xt*\x*Ainda moca Raraŋ Aetaniaca nenmo matau ŋgoinna morena, na aku Pol aku Karais Iesusna aiŋa morena ramoot, na aku nenmo Iudana meikramtaɨr wanaiŋmo otacna aiŋa morenan, aintik aku kac ŋgoreaca eacrenan. 
\v 2 \x - \xo 3.2: \xo*\xt Kol 1.25\xt*\x*Ainda moca aku lamŋirena, ne mawaracat, Raraŋ Aetaniaca ma aukmo kadmaica, aukmo gan aiŋa mona larapacrinan, na aku morena aiŋa Raraŋ Aetaniaca nenmo toca kadmaica, ma aukmo an aiŋa mona nen ŋgotacna neaŋrinan. 
\v 3 \x - \xo 3.3: \xo*\xt Epe 1.9-10, na Kol 1.26\xt*\x*Na Raraŋ Aetaniaca morina reikta kambca, atua ma iŋgoroca eacrenan, na ma ndo aukmo moa polorinan. Ainda moca aku anna ninini emtemma tiratna. 
\v 4 \x - \xo 3.4-6: \xo*\xt Kol 1.26-27\xt*\x*Na ne an kamma wat te, ne gaind ndamŋinandet. An iŋgoroca eacrena kambca, Karaisa mana aiŋa morenanna, aku matau ŋgoinna lamŋirenan. 
\v 5 Na atu ŋgoinna, Raraŋ Aetaniaca an iŋgoroca eacrena kambca, ma meikramtaɨrmo raekca mba wiwitirena. Na mandeaca Ŋeroŋ Rat mbuŋa Raraŋ Aetaniaca aimo up aŋgɨrena ramtaɨrapa, rambca morena ramtaɨrmo raekca wiwitirenan. 
\v 6 \x - \xo 3.6: \xo*\xt Gal 3.14, na 3.28-29, na Epe 2.13-19\xt*\x*Na an kamma gaind, kam wembaŋ laŋ mbuŋa ne Iudana meikramtaɨr wanaiŋa mandeaca ne aiap mɨkri, na aia tik kabe malaruri. Na Raraŋ Aetaniaca aimo muruŋcamiŋa larapacrina reikca, Karais Iesusa aimo neaŋ ndoprenanna, aia muruŋcamiŋa maaŋgɨri. 
\v 7 \x - \xo 3.7: \xo*\xt Kol 1.23-25\xt*\x*Na Raraŋ Aetaniaca aukmo moca aku gan kam wembaŋ laŋa wiwitirena aiŋa morena ramoot ndarurina. Na ma aukmo kadmaica ma ndona gargara aukmo neaŋga aku gagraca gan aiŋa monandet. 
\v 8 \x - \xo 3.8: \xo*\xt 1 Ko 15.9-10, na Gal 1.16, na Epe 1.7, na Kol 1.27, na 1 Ti 1.13-15\xt*\x*Na aku Raraŋ Aetaniacna meikramtaɨrmo pɨkɨn kaŋgauk ŋgoinna eacrenan, na ma an nake mba lamŋiri, ma aukmo kadmaica ma an aiŋa aukmo neaŋgatna. Na an aiŋa, aku Iudana meikramtaɨr wanaiŋmo kam wembaŋ laŋmo wiwitina. Ainda moca gan kam wembaŋ laŋa ma Karaisna reik laiŋ, laiŋta kamb ndoprenan, na aia meikramtaɨra anmo nduna mɨnna wanaiŋ, na aia anmo ritrina mɨnna wanaiŋ. 
\v 9 \x - \xo 3.9: \xo*\xt Ro 16.25, na 1 Ko 2.7, na Epe 1.9, na Kol 1.16, na 1.20, na Ib 1.2\xt*\x*Na Raraŋ Aetaniaca ma reikmo muruŋcamiŋa kocnaia morinan. Na atua ma ndomo, mo ndopatna tɨpemb kirarira, ma ndona iroa tɨkca iŋgoroca eacrena. Ainda moca an iroa atu ŋgoinna iŋgoroca eacrenan. Na mandeac ma aukmo aiŋa neaŋga aku mana iromo wiwiti laru raekca tɨkca meikramtaɨra garacna. 
\v 10 \x - \xo 3.10: \xo*\xt Ro 8.38, na 11.33, na Epe 1.21, na 1 Pi 1.12\xt*\x*Na atua ma anmo aŋgɨca iŋgoroca eacrenan. Na mandeaca ma ndona Iesusna rɨtɨpaikta meikramtaɨrta tumbunmo, moca larurina, na an tɨpna kirar mbuŋa, ma titocna iroar laiŋapa landamŋiarmo moi raekca tɨknandet. Te, tamuŋna auŋna mbaiŋna aiŋa morena ŋerŋgaurapa, ŋerŋgaur gargarmo, moa mina Raraŋ Aetaniacna iroara lamŋina. 
\v 11 Na atu ŋgoinna Raraŋ Aetaniaca ma an reikta aiŋa mona iroap. Na aina Kacoot Karais Iesusna aiŋ mbuŋa, ma moca korwirinan. 
\v 12 \x - \xo 3.12: \xo*\xt In 14.6, na Ro 5.2, na Epe 2.18, na Ib 4.16\xt*\x*Ainda moca aia Karaisa rɨpacrenan, na aia mba irik mbiraca nanambirenan. Ri, aia matau ŋgoinna lamŋirena, Karaisa rɨpacrenanna, anna ma aina Raraŋ Aetaniac ndambuŋa taŋga larurena taup. 
\v 13 \x - \xo 3.13: \xo*\xt Kol 1.24\xt*\x*Aintik mandeaca aku nenmo aind mambopek, an gɨrgɨra aku nenmo otacna aŋgɨatnanna, ne an nake kai lamŋi teac, moca nena rɨtɨpaca iriknandet. Kari ŋgoin. Na an reaca larurenanmo ne toŋgo, ma nenmo otaca ne Raraŋ Aetaniacap laŋ ndeacnandet.
\s Pola Epesusnanmo gagaraca eacna mbendeirina
\p
\v 14-15 \x - \xo 3.14-15: \xo*\xt Epe 1.10, na Pil 2.9-11\xt*\x*Ainda moca aina Aetta morina reikta moca, aku an ndamŋireke, aintik aku manmo tutupniŋ rɨmbɨtrena. Na ma tamuŋna auŋapa pitrikna tiacarpaikna wiwit muruŋcamiŋna Aet. Na ma ndo ŋgoinna, an wiwittarmo i neaŋgatna. 
\v 16 \x - \xo 3.16: \xo*\xt Ro 9.23, na 2 Ko 4.16, na Pil 4.19, na Kol 1.11, na 1.27\xt*\x*Na aku gainda mbendeirena, aina Aet, ma reik laiŋ, laiŋga moca nenmo neaŋrena, aintik ma Ŋeroŋ Rat mbuŋa nena iroar inkarmo mbukca mɨnna tikrinan. Te, nenmo moca ne gagaraca eacnandet. 
\v 17 \x - \xo 3.17: \xo*\xt In 14.23, na Epe 2.22, na Kol 1.23, na 2.7\xt*\x*Na nena rɨtɨpaik puŋga Karaisa ma nena nikinik iroar teacnandet. Na kabena meikramtaɨrmo matŋirena tɨpemb kirarira, nena nikinik iroarmo mbuki mɨnna tɨk te, ne gagraca wɨtɨkca eacnandet. Na anna ma gaind, tiacarpaikca ikna iacnduk utiŋa, ikca moa gagaraca wɨtɨkca eacrena kirar toc. 
\v 18-19 \x - \xo 3.18-19: \xo*\xt In 1.16, na Ro 10.3, na 10.11-12, na Epe 1.18, na 1.23, na Kol 2.2, na 2.9-10\xt*\x*Ainda moca nenapa Raraŋ Aetaniacna meikramtaɨra muruŋcamiŋa gargar aŋgɨnandet, te, Karaisna kabena meikramtaɨra mamatŋina tɨpna kirarmo, ne matau ŋgoinna lamŋinandet, mana aniacapa, mana rocotapa, mana tamuŋapa, mana pɨkɨnap. Na anna gidik, Karaisna kabena meikramtaɨrmo matŋirena tɨpna kirara ma landamŋiarmo tamuŋmbai, na ne manmo matau lamŋinandet. Na reik laiŋga Raraŋ Aetaniacmo mɨnna tɨkca eacrenan, na mina nen motoco mɨnna tɨknandet.
\p
\v 20 \x - \xo 3.20: \xo*\xt Ro 16.25, na 1 Ko 2.9, na Kol 1.29\xt*\x*Na Raraŋ Aetaniacna gargara aina nikinik iroarmo aiŋira morenan, ainda moca an gargara aina iroarmo tamuŋmbai ŋgoin. Na an reikca aia manmo mona digirenanna, an reikca mina mana ŋgaŋganŋgɨna mɨnna wanaiŋ ŋgoin. 
\v 21 \x - \xo 3.21: \xo*\xt Ro 11.36, na 16.27, na Ib 13.21\xt*\x*Ainda moca memetmbaca iarwara Iesusna rɨtɨpaikta meikramtaɨrta tumbuna, Raraŋ Aetaniacna i aniacmo Karais Iesusna i mbuŋa aŋgɨ ŋgepca taŋi iŋmbaina mɨnna tɨknandet. Na anna gidik.
\c 4
\ms Aia Karais Iesusna tik toc ndeaca Raraŋ Aetaniacna tɨpemb kirarirmo raŋgairaŋna
\mr (4—6)
\s Aia Iesusna rɨtɨpacna meikramtaɨra aia Karaisna tik toc
\p
\v 1 \x - \xo 4.1: \xo*\xt Epe 3.1, na Pil 1.27, na Kol 1.10, na 1 Te 2.12, na Pm 1.1, 9\xt*\x*Aku Pol, aku Kacootna aiŋa morenan, aintik aku kac ŋgoreaca eacrenan. Na aku nenmo gagraca mambopek, Raraŋ Aetaniaca nena ŋgacrina ataca ne manmo matau ŋgoinna raŋgai, na ma toŋgorena tɨpna kirara, ne wandoŋa taŋraŋ. 
\v 2 \x - \xo 4.2: \xo*\xt Up 20.19, na Gal 5.22-23, na Kol 3.12-13\xt*\x*Na ne kabena rɨtɨpaikta meikramtaɨrmo, ndorita irembmo kai aŋgɨ ŋgep teac, ne mina kaŋgauk ndeac, na minmo kaega kai mo teac, minmo laŋan wetwetta mo, na mina nenmo makukca neaŋ te, ne nikca kai tawi kat teac, na mina nenmo makukca neaŋ te, ne kabe, kabea minmo mamatŋina tɨp kirara moraŋ, na mina nenmo neaŋrina mitkarmo ne mbuk. 
\v 3 \x - \xo 4.3: \xo*\xt Kol 3.14-15\xt*\x*Na nikinik iro kabena eteacna tɨpna kirarapa, nikinik iro wetwetta eacrenan tɨp kirara Ŋeroŋ Ratta aimo neaŋrina, na an tɨpna kirara ma ŋgatɨkna kirara aimo leaca aia wiwit kabe mamoat. Ainda moca ne gagaraca an tɨp kirarmo utiŋ. 
\v 4 \x - \xo 4.4: \xo*\xt Ro 12.5, na 1 Ko 12.4, na 12.11-12, na Epe 1.18, na 2.16-18\xt*\x*Na Ŋeroŋ Rat kabe niŋgikapa, tik umbum kabe niŋgikca eacrenan. Ainda moca Raraŋ Aetaniaca nenmo aca ne reac kabe niŋgikna lambi, na reik laiŋga ma aimo monanna, ma moca mɨnna tɨknandet. 
\v 5 \x - \xo 4.5: \xo*\xt In 10.16, na 1 Ko 1.13, na 2 Ko 11.4, na Gal 3.27-28, na Ib 6.6\xt*\x*Na Kacoot kabe niŋgikca eacrenan, na rɨtɨpacna tɨp kirar kabe niŋgikapa kɨtac puk kabe niŋgikca eacrenan. 
\v 6 \x - \xo 4.6: \xo*\xt Ro 11.36, na 1 Ko 12.6\xt*\x*Na Raraŋ Aetaniac kabe niŋgikca eacrenan, na ma aina muruŋcamiŋna Aet kabe. Ainda moca ma meikramtaɨrmo muruŋcamiŋa tamuŋmbai, na ma meikramtaɨrmo muruŋcamiŋna rɨkca aiŋa morenan. Na meikramtaɨrmo, ma muruŋcamiŋa mina inkar teacrenan.
\p
\v 7 \x - \xo 4.7: \xo*\xt Ro 12.3, na 12.6, na 1 Ko 12.11\xt*\x*Na Karaisa aimo kabe, kabemo reac aniac laŋ ŋgoinna wanaiŋa neaŋrinan, aintik Raraŋ Aetaniaca aimo kabe, kabemo kakadmai aniac ŋgoin neaŋrina. 
\v 8 \x - \xo 4.8: \xo*\xt Ŋap 68.18, na Kol 2.15\xt*\x*Ainda moca Raraŋ Aetaniacna timbigta kapca gaindoprinan,
\b
\q1 “Ma tamuŋ ŋgoin nagarinan,
\q2 na ma tuombnaŋgepta meikramtaɨrap
\q2 aŋgɨca manap mataŋgat.
\q1 Na meikramtaɨrmo
\q2 ma reik laiŋga wanaiŋa neaŋrinan.”
\b
\m
\v 9 \x - \xo 4.9: \xo*\xt In 3.13\xt*\x*Na gan kamma, “Ma tamuŋa gacatna” mana mɨnɨŋa gaind, ma aimo Karaisa tamuŋa gaga niŋgikca mba wandacrina. Wanaiŋ. Outta Karaisa tamuŋna auŋ ndeacri, na ma gan tiacarpaik mairikat. Na iŋmbaia ma tamuŋ mac nda gacnandet. 
\v 10 \x - \xo 4.10: \xo*\xt Ib 4.14, na 9.24\xt*\x*Na gan ramoot, ma ŋgaua gan tiacarpaikca irikatnanna, ma toco ma tamuŋa gacnandet. Na ma tamuŋna riacapa guiarmo kunda tamuŋna auŋmo gacatna, te, ma reikmo moca mɨnna tɨknandet. 
\v 11 \x - \xo 4.11: \xo*\xt Ro 12.7, na 1 Ko 12.28, na 2 Ti 4.5\xt*\x*Na ma ndo an reik laiŋga meikramtaɨrmo wanaiŋa neaŋrinan, ndeidmo ma up aŋgɨrena ramtaɨrta aiŋira neaŋrina, na ndeidmo rambca morena ramtaɨrta aiŋira neaŋrina, na ndeidmo ma kam wembaŋ laŋa wiwitia auŋembca taŋna aiŋira neaŋrina, na ndeidmo ma rɨtɨpacna tumbunna ŋginaŋna aiŋa monanapa, ririptina aiŋira neaŋrina. 
\v 12 \x - \xo 4.12: \xo*\xt 1 Ko 12.7, na Epe 1.23, na 2 Ti 3.17\xt*\x*Na Karaisa aimo Raraŋ Aetaniacna meikramtaɨrmo, an aiŋir laiŋga ma wanaiŋa neaŋrinan, na aimo otaca aia mana aiŋmo laŋa monan. Te, Karaisna tikca ma gagaraca laŋ ndeacnande. 
\v 13 \x - \xo 4.13: \xo*\xt 1 Ko 14.20, na Kol 1.28, na 2.2\xt*\x*Na an aiŋa ma aimo moca taŋi aina rɨtɨpaikca gidik ŋgoin ndarunandet, te, aia nikinik iro kabe ŋgoinna eacnandet, na aia muruŋcamiŋa Raraŋ Aetaniacna Nuocmo matau ŋgoinna lamŋinandet. Na aina rɨtɨpaikca ma meikramtaɨr anik toc ndaruca, aimo moi gagranandet, te, Karaisa ndo aŋgɨrina tɨpna kirar laŋa aia aŋgɨnandet. 
\v 14 \x - \xo 4.14: \xo*\xt Ais 28.9, na 1 Ko 14.20, na 2 Ko 2.17, na Ib 13.9\xt*\x*Na aia mombonik tekernoikca, mba mac eacitndai, na an wai aoca meikramtaɨrmo matau ŋgoinna paparuna kam mbuŋa mboprena ramootna kamma, ma watapa macaitta kormo rukria taŋrena kirara mba rukri taŋitndai. Na kora tamtamca utia, mana tataŋna taupca wandoŋa mba taŋitndai. Na aia ainda mba eacitndait. 
\v 15 \x - \xo 4.15: \xo*\xt Epe 1.22, na 4.25, na Kol 1.18, na 1 Io 3.18\xt*\x*Ainda moca ainta kamb ŋgorikmo, aia ndorita kourmo kai tɨki warac teac. Kari ŋgoin ndacari. Na aia kabena meikramtaɨrmo, mamatŋina tɨpna kirarmo raŋgairaŋ, na minmo kamb gidkar tiŋgikca mbopraŋ. Te, aia meikramtaɨr gagrarca laruca aia Karaismo matau mɨkna, na ma aina paŋan. 
\v 16 \x - \xo 4.16: \xo*\xt Kol 2.19\xt*\x*Na aina kabe, kabena tikemb umbumbura ma moca, mina mɨkca aiŋira morenan. Na aina tikca gagrirapa budira utiŋga gagaraca eacrenan. Ainda moca aina tik umbumbura ndorimo, kabe kabea ndorita aiŋira morena, na an tɨpna kirara aina tikca ma gagaraca acnairenan, na kabena meikramtaɨra mamatŋina tɨpna kirara ma raŋgairena.
\s Rɨtɨpacna meikramtaɨra Karaisna tɨp kirar ŋgammo raŋgairaŋ
\p
\v 17 \x - \xo 4.17: \xo*\xt Ro 1.21, na 1 Pi 1.14\xt*\x*Ainda moca aku nenmo kam gargar mbuŋa Kacootna i mbuŋa mambopek, ne an Iudana meikramtaɨr wanaiŋa rɨpac ŋgocorta tɨpemb kirarira kai raŋgaica taŋ teac. Mina iroara rorerina. 
\v 18 \x - \xo 4.18: \xo*\xt Up 26.18, na Gal 4.8, na Epe 2.12, na 1 Te 4.5\xt*\x*Na mina iroara ŋgorik, na mina neaup maeacreke. Na mina iroar laiŋ kocor, aintik mina iroar inkara mboraca mina Raraŋ Aetaniacna eteacna watmo raekmbaia eacrenan. 
\v 19 \x - \xo 4.19: \xo*\xt Kol 3.5\xt*\x*Na mina morena tɨpembta kirarira mina numbira mba morenan. Na mina an tɨpemb kirarir ŋgorikta inikca mbukca, mina iroar inkara ŋgepca, mina ainta tɨpemb ŋgadudukar ŋgorikmo, memetmbaca mona iroarap.
\p
\v 20-21 Na aku lamŋirena, ne Karaisna kammo ne waracrina, na mina nenmo Iesusna kam gidikca riptirinan. Na aku lamŋirena, mina nenmo an tɨpemb kirarir ŋgorikca, an rɨpac ŋgocorta meikramtaɨra morenan mbuŋa, mba riptirena. 
\v 22 \x - \xo 4.22: \xo*\xt Ro 6.6, na 8.13, na Epe 2.2-3, na 4.17, na Kol 3.9, na Ib 12.1, na 1 Pi 4.3\xt*\x*Na ŋgaua ne toco, an nena nikinik iroar bagrar puŋga taŋrinan, na mana tɨpemb kirarira, paparurenan, na nikinik iro ŋgoreaca ŋgepca tɨp kirar ŋgoreaca monandet, na an tɨp kirara ndo unmo taup ŋgoreaca warkica taŋca ŋgocrairena. Aintik mandeaca ne an tɨpemb kirarir bagrarmo, mo kecari. 
\v 23 \x - \xo 4.23: \xo*\xt Ro 12.2, na Kol 3.10\xt*\x*Na ne Raraŋ Aetaniacmo wattacarica, ma nena iroarmo moi ŋgaib tarunandet. 
\v 24 \x - \xo 4.24: \xo*\xt RL 1.26, na Ro 6.4, na Epe 2.10, na Kol 3.10\xt*\x*Te, ne meikramtaɨr ŋgaib laiŋ ndarunandet. Na meikramtaɨra Raraŋ Aetaniaca riacrinanna, mina meikramtaɨr ŋgaib ndaruca mina Raraŋ Aetaniacna kirar toc ndeacnandet. Na an tɨpna kirar mbuŋa mina tɨpemb kirarira wandoik koind, na rat ŋgoin.
\p
\v 25 \x - \xo 4.25: \xo*\xt Sek 8.16, na Ro 12.5, na Kol 3.8-9\xt*\x*Ainda moca ne paparuna tɨpemb kirarirmo tɨkcari. Na aia muruŋcamiŋa tik kabena tɨp kirar ndeacrenan, aintik ne muruŋcamiŋa kabena rɨtɨpacna meikramtaɨrmo kam gidik niŋgikca mbopraŋ. 
\v 26 \x - \xo 4.26: \xo*\xt Ŋap 4.4, na Ie 1.19-20\xt*\x*Na ne nikkat te, ne ndorimo wat. Moca ne tɨpemb ŋgorikta makukara mo nari. Na moca nena nikkakatta eaca ra irik nari. 
\v 27 \x - \xo 4.27: \xo*\xt 2 Ko 2.10-11, na Ie 4.7, na 1 Pi 5.9\xt*\x*Na moca ne Paparuna Ramootmo taup tɨk nari. 
\v 28 \x - \xo 4.28: \xo*\xt 1 Te 4.11, na 2 Te 3.8, na 3.11-12\xt*\x*Ainda moca reik macmakɨmna meikramtaɨra, mina reikca kai makɨm teac, kari ŋgoin. Na mandeaca mina aiŋira moraŋ. Aintik mina aiŋirmo ndorita par mbuŋa moraŋ te, mina reik wɨt laiŋ aŋgɨnandet. Na an reik matpirina meikramtaɨrmo, mina minmo otacna mɨn. 
\v 29 \x - \xo 4.29: \xo*\xt Epe 5.4, na Kol 3.8, na 3.16, na 4.6, na 1 Te 5.11\xt*\x*Na nena upembta kambca, kamb ŋgorik koinda kai mbop teac. Kari ŋgoin ndacari. Na ne kamb laiŋ tiŋgik topraŋ te, ne kabena meikramtaɨrmo moi gagranandet. Na ainta kambca, ma Raraŋ Aetaniacna kakadmaimo, meikramtaɨra mana kamb mbaracrenanmo aŋgɨca taŋrena. 
\v 30 \x - \xo 4.30: \xo*\xt Ais 63.10, na Ro 8.23, na Epe 1.13-14, na 1 Te 5.19\xt*\x*Na ne Raraŋ Aetaniacna Ŋeroŋ Ratmo, kakadmaina makukca kai neaŋ teac. Na Raraŋ Aetaniac, ma nenmo Ŋeroŋ Ratta neaŋrinanna, anna ne mana larapacatna meikramtaɨr koinda wandacrena, na an ra ma nenmo mac nda aŋgɨna kɨp te, ne mitkar kocor koinda wanaiŋa eacnandet. 
\v 31 \x - \xo 4.31: \xo*\xt Kol 3.8, na 3.18-19, na Ta 3.2-3, na 1 Pi 2.1\xt*\x*Na ne nikinik iro ŋgoreacapa, nikkakatapa, tɨpemb ŋgorikmo muruŋcamiŋmo, mo kecari, na runduŋapa, nikkatca kam aniaca kerenanapa, peperena kam ŋgoreac tocmo, mo kecari. 
\v 32 \x - \xo 4.32: \xo*\xt Mt 6.14, na 18.22-35, na Mk 11.25, na 2 Ko 2.10, na Kol 3.13\xt*\x*Aintik ne kabena rɨtɨpacna meikramtaɨrmo, tɨpemb kirarir laiŋga mo, na mimo iroar nikinikar wetwet laiŋga mo. Na ne mina tɨpemb ŋgorikta makukarmo, mo kecari. Na an tɨpna kirara Raraŋ Aetaniaca nena tɨpemb ŋgorikta makukarmo Iesusna i mbuŋa moca kecaririnan, ainda moca ne toco, mina tɨpemb ŋgorikta makukarmo, mo kecari.
\c 5
\s Aia memetacna memetac mbuŋa taŋraŋ
\p
\v 1 \x - \xo 5.1: \xo*\xt Mt 5.48, na Lk 6.36\xt*\x*Aintik Raraŋ Aetaniaca ma nena moca mamatŋi ŋgoin, na ne mana mombonik teacrena. Ainda moca ne an mana morena tɨpemb kirarirmo raŋgairaŋ. 
\v 2 \x - \xo 5.2: \xo*\xt NA 29.18, na TN 1.9, na Ŋap 40.6, na In 13.34, na Ro 14.15, na 2 Ko 2.15, na Gal 2.20, na Ib 7.27, na 10.10, na 1 Io 3.11, na 3.23\xt*\x*Aintik ne kabena meikramtaɨrmo mamatŋirena tɨpemb kirarirap taŋraŋ, na an tɨpna kirara, Karaisa aimo matŋirenan. Na ma ndona eteacna watnan neaŋga aimo otacatna. Na ma Raraŋ Aetaniacmo ndona eteacna watta neaŋrinanna, ma an gɨmbambara iŋpai tarar laŋapna kirar toca neaŋrinan.
\p
\v 3 \x - \xo 5.3: \xo*\xt Ro 6.13, na 1 Ko 5.1, na 2 Ko 12.21, na Kol 3.5, na 1 Te 4.3\xt*\x*Ainda moca meacramootna kaŋtertaapna tɨpemb kirarir ŋgorikca kai mo teac, na kaina tɨpemb ŋgadudukar ŋgorikmo, muruŋcamiŋa kai mo teac, na reik laiŋ, laiŋga aŋgɨca wɨtta mona iromo kai aŋgɨ teac. Na an reikta kamna tɨp emtemma nena rɨkca kai laru teac. Na aia Raraŋ Aetaniacna meikramtaɨra ainta kambta kirarira ndopna mɨnna wanaiŋ. 
\v 4 \x - \xo 5.4: \xo*\xt Mt 12.35, na Ro 1.28, na Epe 4.29\xt*\x*Na ne kamb ŋgadudukapa, ŋaŋaona kambapa, taŋbugainna kamb ŋgorikca kai mbop teac. Na ainta tɨpna kirara aia mona mɨnna wanaiŋ. Na aia Raraŋ Aetaniacmo kam laŋ neaŋ te, anna laŋ. 
\v 5 \x - \xo 5.5: \xo*\xt 1 Ko 6.9-10, na Gal 5.19-21, na Kol 3.5\xt*\x*Na ne gainda matau lamŋirena, meacramootna kaŋtertaapna tɨpemb kirarirapa, kaina tɨpemb ŋgadudukar ŋgorikcapa, reik laiŋ, laiŋga aŋgɨca wɨtta mona iroarmo kai aŋgɨ teac, ainta meikramtaɨrta tɨpemb kirarira anna mina mɨrpembraraiŋta dawara mbendeirena kirar, na ainta meikramtaɨra mina Karaisapa Raraŋ Aetaniacna bubuoca mba mbukitndai.
\p
\v 6 \x - \xo 5.6: \xo*\xt Ro 1.18, na Kol 2.4, na 2.8, na 2 Te 2.3\xt*\x*Na ne ndoritake, matau wat, moca ne paparuna meikramtaɨrta kamb kamndera raŋgaica, anna ndo nenmo wɨŋa, ne an tɨpemb kirarir ŋgorikca raŋgai nari. Na ainta tɨpembta kirarir koindta moca, Raraŋ Aetaniaca ndona kambmo nda mboprena meikramtaɨrmo nikkatrena. 
\v 7 Ainda moca ne ainta meikramtaɨrmo kai pitkumi taŋ teac. 
\v 8 \x - \xo 5.8: \xo*\xt In 12.36, na Up 26.18, na Ro 1.21, na 2 Ko 3.18, na Epe 2.11-13, na Kol 1.13, na 1 Pi 2.9, na 1 Io 2.9\xt*\x*Na ne ŋgaua neaupna inik ndeacrina, na mandeaca Kacootta nenmo memetaca tɨkrinan. Aintik nena tɨpembta kirarira an memetaca eacrina meikramtaɨrta kirar toc ndeacraŋ. 
\v 9 \x - \xo 5.9: \xo*\xt Gal 5.22\xt*\x*Na memetaca ma reik laiŋta tɨpemb kirarirapa, tɨpemb kirarir wandoikapa, kamb gidkara mbopi laruna reac laŋ. 
\v 10 \x - \xo 5.10: \xo*\xt Ro 12.2, na Pil 1.10, na 1 Te 5.21, na 1 Ti 2.3\xt*\x*Ainda moca ne towaica Kacootta toŋgorena landamŋina tɨpemb kirarirmo ne aŋgɨ. 
\v 11 \x - \xo 5.11: \xo*\xt Ro 6.21, na 1 Ko 5.9-11, na Gal 6.8, na 2 Te 3.6, na 3.14, na 2 Io 1.10-11\xt*\x*Na ne kai neaupa raŋgaica tɨpemb ŋgorikca morena meikramtaɨrap kai pitkumi taŋ teac. Ainta tɨpna kirara ma gagam laŋa mba mo larurenan. Wanaiŋ. Na ne ainta tɨpna kirara meikramtaɨrmo gainda wandac, anna laŋa wanaiŋ. 
\v 12 Na an tɨpemb kirarira mina iŋgoroca morenanna, aku mba mac mbopi laruitndai. Wanaiŋ. Na aku an reikta kamb ndondopca numbira morenan. 
\v 13 \x - \xo 5.13: \xo*\xt In 3.20-21, na Ib 4.13\xt*\x*Na memetaca ma iŋgoroca eacrena tɨpemb kirarirmo, moi laruca mina muruŋa raekca waekekeca eacnandet. 
\v 14 \x - \xo 5.14: \xo*\xt Ais 26.19, na 60.1, na Ro 13.11\xt*\x*Na an mɨnna memetaca reac ianna moca raek waekekeca laru te, an reac toco, ma memetac toc ndarurenan. Ainda moca kam tɨp ianna eacrenan, na ma aindoprina,
\b
\q1 “U mandaia mandeaca ŋgorenanna,
\q2 u ŋgepnandet.
\q1 Te, u muk ndiŋ mac nda ŋgepnandet.
\q2 Na Karaisa unmo memetaca neaŋnandet.”
\b
\p
\v 15 Ainda moca ne ndorita tɨpemb kirarirta moca matau wat. Na ne ramootta landamŋi kocorta kirara kai taŋ teac, wanaiŋ. Ne an ramootta landamŋiap taŋrena ramootna kirar toca taŋraŋ. 
\v 16 \x - \xo 5.16: \xo*\xt Gal 6.10, na Kol 4.5\xt*\x*Na mandeaca ne Raraŋ Aetaniacna tɨpna kirara mona ŋgaŋganŋgɨap. Na mandeacna mɨnna aia eacrenanna, anna kɨdrɨk ŋgoreac, aintik ne ndoritake, matau wat, na ne reik laiŋga moraŋ, moca an kɨdrɨkca wanaiŋa taŋ nari. 
\v 17 \x - \xo 5.17: \xo*\xt Ro 12.2, na Kol 1.9, na 1 Te 4.3, na 5.18\xt*\x*Na ne ŋaŋaona tɨpemb kirarira kai mo teac. Wanaiŋ. Ne Kacootna toŋtoŋna tɨpna kirarmo, ne matau lamŋiraŋ.
\p
\v 18 \x - \xo 5.18: \xo*\xt ML 20.1, na Ais 5.11, na 5.22, na Lk 21.34\xt*\x*Na ne wain pukca kai amca rore teac. Ainta tɨpna kirara nenmo mo ŋgocrairenan. Na ne Raraŋ Aetaniacna Ŋeroŋmo watcarica, ma nenmo mbuki mɨnna tɨk. 
\v 19 \x - \xo 5.19: \xo*\xt Ŋap 33.2-3, na Up 16.25, na 1 Ko 14.26\xt*\x*\x - \xo 5.19-20: \xo*\xt Kol 3.16-17\xt*\x*Na an mɨnna ne Raraŋ Aetaniacna meikramtaɨrap kamb ndop te, ne an ŋaparta timbigta kapca eacrena ŋaparmo umb, na Raraŋ Aetaniacna i aŋgɨ ŋgeprena ŋapar motocmo umb, na Ŋeroŋ Ratta nena nikinik iroara tɨkrina ŋaparmo umb. Na ne an ŋaparmo ndorita upapa, nikinik iroar puŋga Kacootmo umb. 
\v 20 \x - \xo 5.20: \xo*\xt Ŋap 34.1, na Ais 63.7, na Ib 13.15, na 1 Pi 2.5\xt*\x*Na memetmbaca ne reik muruŋna moca, ne aina Kacoot Iesus Karaisna i mbuŋa, ne Raraŋ Aetaniac Aetmo kam laŋa neaŋraŋ.
\s Meikramtaɨr laŋtaŋgoarta kambca Pola an ndoprinan
\p
\v 21 \x - \xo 5.21: \xo*\xt Pil 2.3, na 1 Pi 5.5\xt*\x*Na ne meacramoot kabe, kabea Karaismo toriraŋ, na ne Raraŋ Aetaniacna meikramtaɨrmo kabe, kabena kaŋgaukca eacraŋ.
\p
\v 22 \x - \xo 5.22: \xo*\xt RL 3.16, na Epe 6.5, na Kol 3.18, na 1 Pi 3.1\xt*\x*Na ne meikpitikca, ne ndorita kaŋterta kaŋgaukca eacraŋ, an tɨpna kirara ne Kacootna kaŋgaukca eacrenan. 
\v 23 \x - \xo 5.23: \xo*\xt 1 Ko 11.3, na Epe 1.22-23, na Kol 1.18\xt*\x*Na anna gaind, ramootta ma ndona meacmo paŋanmbai ndeacrena, na an kirara Karaisa ma Iesusna rɨtɨpaikta meikramtaɨrta tumnambta paŋanmbai ndeacrena. Na Iesusna rɨtɨpaikta meikramtaɨrta tumnambca mina Karaisna tik, na Karaisa manmo mac nda aŋgɨrinan. 
\v 24 Na Iesusna rɨtɨpaikta meikramtaɨrta tumnambca Karaisna kaŋgaukca eacrenan. Aintik ne meikpitik toco, ne memetmbaca ne ndorita kaŋterta kaŋgaukca eacraŋ.
\p
\v 25 \x - \xo 5.25: \xo*\xt Gal 1.4, na Kol 3.19, na 1 Pi 3.7\xt*\x*Na ne ramtaɨr, ne ndorita meikmo mataui matŋiraŋ, na an tɨpna kirara Karaisa Iesusna rɨtɨpaikta meikramtaɨrta tumnambmo matŋirena, ma ndona eteacna wat neaŋga Iesusna rɨtɨpaikta meikramtaɨrta tumnambmo otacatna. 
\v 26 \x - \xo 5.26: \xo*\xt In 15.3, na 17.17, na Ta 3.5, na Ib 10.10, na 10.22, na 1 Io 5.6\xt*\x*Aintik ma pukapa, mana kamb puŋga, ma Iesusna rɨtɨpaikta meikramtaɨrta tumnambmo ruca, ma minmo moca mina Raraŋ Aetaniacna lamnɨacmo rat ndarurinan. Na an tɨpna kirar mbuŋa Karaisa Iesusna rɨtɨpaikta meikramtaɨrta tumnambmo moca, mina manan ŋgoin ndarurinan. 
\v 27 \x - \xo 5.27: \xo*\xt 2 Ko 11.2, na Epe 1.4, na Kol 1.22\xt*\x*Na ma an Iesusna rɨtɨpaikta meikramtaɨrta tumnambmo, moa mina mana lamnɨacmo taror laŋ ŋgoin ndaruna mori, te, an Iesusna rɨtɨpaikta meikramtaɨrta tumnambmo, mina patiŋapa, rirapa ainta reik kocor. Wanaiŋ. Na an Iesusna rɨtɨpaikta meikramtaɨrta tumnambca, mina ratarapa makukar kocor ndeacraŋna. 
\v 28 Ainda moca an tɨpna kirar mbuŋa, ne ramtaɨr, ne ndorita meikmo matau matŋiraŋ, na an tɨpna kirar motocmo ne ndorita tikembmo matŋirena. Na ramootta ma ndona meacmo mataua matŋirenanna, ma ndo ŋgoinmo ma matŋirenan. 
\v 29 Na aia lamŋirena, ramoot ianna ma ndona tikmo puŋnaŋgepca mba morenan. Wanaiŋ. Ma manmo amna reaca neaŋrenanna, na ma manmo matau raupŋirenan, na an tɨpna kirara Karaisa Iesusna rɨtɨpaikta meikramtaɨrta tumnambmo ainda morenan, 
\v 30 \x - \xo 5.30: \xo*\xt Ro 12.5, na 1 Ko 6.15, na 12.27, na Epe 1.22-23\xt*\x*na an tɨpna kirara aia Karaisna tikna umbumburta kirar toc. 
\v 31 \x - \xo 5.31: \xo*\xt RL 2.24, na Mt 19.5, na Mk 10.7-8, na 1 Ko 6.16\xt*\x*Na Raraŋ Aetaniacna timbigta kapca gaindoprena, “Ainda moca ramootta ma ndona aemaetmo tɨkcarica ndona meacap mɨkrenan, na maniŋa tik kabe ndarurena.” 
\v 32 \x - \xo 5.32-33: \xo*\xt Kol 3.19, na 1 Pi 3.6, na KIEK 19.7\xt*\x*Na an kam roora, ma ndona iro aniacap. Na aku ndo mbuŋa, Karaisapa mana Iesusna rɨtɨpaikta meikramtaɨrta tumnambta, kam ndoprena. 
\v 33 Na an kamma aku mboprenanna, anna ramoot kabe, kabemo aindoprenan, ne ndorita meikmo matau ŋgoinna matŋiraŋ, na an tɨpna kirara ne ndorimo matŋirena kirar. Ainda moca meikpitikca mina ndorita kaŋtermo toriraŋ.
\c 6
\s Pola mombonikapa aemeraeterta kamb ndoprina
\p
\v 1 \x - \xo 6.1: \xo*\xt ML 23.22, na Kol 3.20\xt*\x*Na ne mombonikca, ne ndorita aemaetna kambca raŋgairaŋ. Na ne muruŋa Kacootmo mɨkca eacrenan, na an tɨpna kirara anna tɨp wandoŋa, ne anna raŋgaia morenan. 
\v 2 \x - \xo 6.2: \xo*\xt Mt 15.4\xt*\x*\x - \xo 6.2-3: \xo*\xt NA 20.12, na TW 5.16\xt*\x*Na Raraŋ Aetaniacna timbigta kapca aindoprina, “U ndona aemaetna kaŋgaukca eaca mina kamb mbaraca raŋgairaŋ.” Na anna Mosesna outna tɨpca, ma bababuna kammap eacrenan. 
\v 3 Na an baburina kamma ma gaindoprina, “U ainda mo te, an aiŋira u muruŋa morenanna, mina laiŋga larunandet. Te, u gan tiacarpaikmo kɨdrɨk, rocotta eacnandet.”
\p
\v 4 \x - \xo 6.4: \xo*\xt TW 4.9, na 6.7, na 6.20-25, na Ŋap 78.4, na ML 19.18, na 22.6, na Kol 3.21\xt*\x*Aintik ne aetera, ne ndorita mombonikta nikinik iroarmo kai mo ŋgocrai teac, na minmo moa mina nenmo nikkat nari. Na ne Kacootna lamnɨac ŋgoutmo ne tɨpemb kirarir laiŋga matau mo te, nena mombonikmo mataui wandoŋairaŋ. Na minmo Kacootna kambmo ripti neaŋraŋ.
\s Pola tuombta aiŋir kamndera morena ramtaɨrapa mina ramtaɨr paŋaindta kamb toprina
\p
\v 5 \x - \xo 6.5: \xo*\xt 2 Ko 7.15, na Pil 2.12, na Ta 2.9-10, na 1 Pi 2.18\xt*\x*\x - \xo 6.5-8: \xo*\xt Kol 3.22-25\xt*\x*Na ne tuombta aiŋir kamndera morena meikramtaɨr, ne ndorita gan tiacarpaikna ramtaɨr paŋaindta kaŋgaukca eacraŋ. Na ne minmo rugutta moraŋ, moca ne mina lamnik ŋgoutta, tɨpemb kirarir wandoik laiŋga mba moitndaiit. Na memetmbaca ne iroara moa gargara ne aiŋ laiŋ niŋgikca moraŋ. Na an tɨpna kirar kabe mbuŋa, ne Karaisna aiŋa morenan. 
\v 6 Na moca ne mina wai aocna landamŋiap, na mina nenap rambuŋa eac te, ne minmo aiŋir laiŋga moraŋna. Wanaiŋ. Na ne gaind ndamŋiraŋ, ne Karaisna tuombta aiŋir kamnderta aiŋa morena meikramtaɨra eacrenan. Te, nena iroar inkara Raraŋ Aetaniaca raŋgaina toŋtoŋap. 
\v 7 Ainda moca ne iroar laiŋ aŋgɨca aiŋira moraŋ. Na ne ramootna aiŋa mba morenanna. Wanaiŋ. Ne Kacootna aiŋ ŋgoinna morenan. 
\v 8 \x - \xo 6.8: \xo*\xt 2 Ko 5.10, na Gal 3.28, na Kol 3.11\xt*\x*Na ne lamŋirena, ramoot ianna ma aiŋmo mataui laŋa mo te, Kacootta manmo opoik laŋa neaŋnandet. Na anna ma titocna ramoot, ma tuomna aiŋ kamaindna aiŋa morena ramoot, co, ma tuomna aiŋ kamaindna aiŋa mo ŋgocorta ramoot.
\p
\v 9 \x - \xo 6.9: \xo*\xt TW 10.17, na Ro 2.11, na Kol 3.25, na 4.1\xt*\x*Na ne ramtaɨr paŋaind, ne toco tuombta aiŋir kamndera morena ramtaɨrmo, tɨpemb kirarir laiŋga moraŋ. Na ne minmo moa nanambia rugut morena tɨpemb kirarirmo minmo kai mo teac. Na Kacootta ma tamuŋna auŋ ndeacrenan. Ma nena Kacootapa minan toc, na ma meikramtaɨrta tɨpemb kirarirmo ma iro kabe mbuŋa ritri waparaca morenan.
\s Iesusa rɨpacrena laiplacara lapoca ruŋrena ramtaɨr toc ndeacna
\p
\v 10 \x - \xo 6.10: \xo*\xt 1 Ko 16.13, na Epe 1.19, na 3.16, na Kol 1.11\xt*\x*Ainda moca mandeaca aku ndona kambmo gainda mamaina mamoek, na ne Kacootmo mamɨkri. Aintik ne mana gargar aniacna ndamŋiraŋ te, ne gagaraca wɨtɨknande. 
\v 11 \x - \xo 6.11: \xo*\xt Ro 13.12, na 2 Ko 6.7, na 10.4, na Epe 4.14, na 1 Te 5.8\xt*\x*Na Raraŋ Aetaniaca nenmo neaŋrina runduikta lamboirmo muruŋa aoc te, ne gagara wɨtɨkca Paparuna Ramootna paparuna tɨpemb kirarir muruŋmo, ma iŋgoroca ma morenanmo ne ndanandet. 
\v 12 \x - \xo 6.12: \xo*\xt In 12.31, na 14.30, na Ro 8.38, na 1 Ko 15.50, na Kol 2.15, na 1 Pi 5.8-9\xt*\x*Na ne matau lamŋi. Aia meikramtaɨrap mba ruŋrenan. Wanaiŋ. Aia gan tiacarpaikna ŋerŋgaur ŋgorikca gargarapnanapa, gan tiacarpaikna bubuocrena ŋerŋgaurapa, kainta reik ŋgorikca gargarapnanna, aia minmo gan neaupdiriŋ aniaca tɨkca ruŋrenan. Na an riac tamuŋna ŋerŋgaur ŋgorikcap tocmo ruŋrenan. 
\v 13 \x - \xo 6.13: \xo*\xt 2 Ko 10.4, na Epe 5.16\xt*\x*Ainda moca ne an Raraŋ Aetaniaca nenmo neaŋrena runduikta lamboirmo muruŋa aŋgɨ aoc, na kɨdrɨk ŋgoreacna mɨnna, ne gagara wɨtɨkca ruŋnandet. Na runduŋa mai te, ne gagaraca wɨtɨkca eacraŋnandet.\fig Ne runduikta lamboirmo muruŋa aŋgɨca aoc|alt="You must get all your fighting clothes." src="Gw205.tif" size="col" copy="Wade" ref="6.13"\fig*
\p
\v 14 \x - \xo 6.14: \xo*\xt Ais 11.5, na 59.17, na 2 Ko 6.7, na 1 Te 5.8\xt*\x*Na ne wɨtɨk gagarana mo te, ne kam gidikmo weaond tocmo ndorita rɨktacniŋa leac, na tɨp kirar wandoŋ laŋmo nena rugut paŋanna wawarana reac toc aoca leac. 
\v 15 \x - \xo 6.15: \xo*\xt Ais 40.9, na 52.7, na Nau 1.15, na Ro 10.15\xt*\x*Na ne Raraŋ Aetaniacna kam wembaŋ laŋmo wiwitina kocro, ma meikramtaɨrmo nikinik iro wetwet kabeap morenan, na an tɨpemb kirarirmo ne ndorita our ŋgapoik toca moca aoc. 
\v 16 \x - \xo 6.16: \xo*\xt 1 Io 5.4\xt*\x*Na ne an runduikta reikmo muruŋa aŋgɨ, na rɨtɨpacna tɨp kirar motocmo ne aŋgɨ, te, Ramoot Ŋgoreaca nenmo tacapna ondaik puŋga rɨŋ te, ne an mbuŋa ram aoca utiŋ gagraca ndorimo wawarana reaca mona. 
\v 17 \x - \xo 6.17: \xo*\xt Ais 49.2, na 59.17, na 1 Te 5.8, na Ib 4.12, na KIEK 19.15\xt*\x*Na ne Raraŋ Aetaniacmo gaind ndamŋi, ma nenmo mac nda aŋgɨrinan, na an landamŋia nena paŋanna wawarana reac toc. Te, ne Ŋeroŋ Ratna bugrimmo utiŋ, anna ma Raraŋ Aetaniacna kam. 
\v 18 \x - \xo 6.18: \xo*\xt Mt 26.41, na Lk 18.1, na Ro 12.12, na Kol 4.2, na 1 Te 5.17, na 1 Ti 2.1\xt*\x*Na Ŋeroŋ Ratna gargar mbuŋa ne memetmbaca mbendeiraŋ. Na ne gagraca kaina mbendeia moraŋ te, ne Raraŋ Aetaniacmo opotacna digiraŋ. Na memetmbaca ne ndorita moca matau watraŋ, te, ne an tɨpna kirara mba tɨkcariitndai. Na ne wɨkca kai aŋgɨ teac. Na memetmbaca ne mbendeiraŋ, na Raraŋ Aetaniacmo digica, ma ndona meikramtaɨrmo otacna. 
\v 19 \x - \xo 6.19: \xo*\xt Up 4.29, na 2 Ko 3.12, na Kol 4.3-4, na 2 Te 3.1\xt*\x*Na ne Raraŋ Aetaniacmo digica ma auk motocmo otacna. Na aku toŋgorenanna, ne gainda mbendei, te, Raraŋ Aetaniac aukna upmo kam tɨkna. Te, aku ndona namnaimbca mo iriknan, na iŋgoroca eacrena kam wembaŋ laŋmo aku gidikca wiwiti larunandet. 
\v 20 \x - \xo 6.20: \xo*\xt 2 Ko 5.20, na Pil 1.20, na Pm 1.9-10\xt*\x*Na Raraŋ Aetaniac, ma ndo aukmo mbagɨrica taŋga, aku gan kam wembaŋ laŋmo wiwitirenan. Na anna mɨnɨŋna moca aku kac ŋgoreac ndeacrena. Na Raraŋ Aetaniaca ma aukmo kam wembaŋ laŋmo wiwitina aiŋa neaŋrinan, ainda moca ne Raraŋ Aetaniacmo mbendeia ma aukmo mo gagranan. Te, aku ndona namnaimbca mo irikca meikramtaɨrmo gagraca wiwitina.
\s Pola Raraŋ Aetaniacmo digica ma minmo laŋa mona
\p
\v 21 \x - \xo 6.21: \xo*\xt Up 20.4, na Kol 4.7-8, na 2 Ti 4.12, na Ta 3.12\xt*\x*\x - \xo 6.21-22: \xo*\xt Kol 4.7-8\xt*\x*Ainda moca Tikikusa ma nenmo auk morena aiŋna kammo, nemo mbopi waracnandet. Na Tikikusa ma aina Iesusa rɨpacrena laiplacarta ramoot ian ŋgoin, na ma Kacootna aiŋa mona ramoot laŋ. 
\v 22 Na aku manmo mandaca ma kɨp te, ne lamŋinandet, aia titoc ndeacrenan. Te, ma nena iroar inkara moi gagrana.
\p
\v 23 Ainda moca Raraŋ Aetaniacapa Kacoot Iesus Karaisa, ne Iesusa rɨpacrena laiplacar muruŋmo nena iroar inkara moi wewettaca laŋ ndeacnandet. Te, ma nenmo moca ne gagraca rɨpacnan, na kabena meikramtaɨrmo matŋina. 
\v 24 \x - \xo 6.24: \xo*\xt 1 Pi 1.8\xt*\x*Te, Raraŋ Aetaniaca ma an kakadmaina tɨpna kirara, meikramtaɨra muruŋcamiŋa aina Kacoot Iesus Karaismo matŋirenanmo, memetmbaca manmo matŋiraŋnandet. Te, Raraŋ Aetaniaca ma nenmo muruŋcamiŋa ndona kakadmaica neaŋnandet.