\id 2PE - shell for translator's use
\ide UTF-8
\h 2 Pita
\toc3 2 Pi
\toc2 2 Pita
\toc1 Pita Iŋmbaia Mac Tiratna Timbiŋ Rapar
\mt1 Pita iŋmbaia mac tiratna timbiŋ rapar
\imt Outna kam
\ip Gan timbiŋ rapara tirrina mɨnɨŋa gaind, anna ma Iesusna rɨpacrena laiplacarmo, mbopca mina an rɨtɨpaca mo ŋgocraica taŋrena ririptiar ndeidta kambca kai warac teac, anna ma mina rɨtɨpaikapa, mina tɨpemb kirarir laiŋga mo ŋgocrainandet. Te, mina an kambca up aŋgɨrena ramtaɨra minmo neaŋrinanmo utiŋ gagra, na an tɨpna kirar mbuŋa mina Raraŋ Aetaniacapa, Kacoot Iesus Karaismo matau lamŋinandet. Na up aŋgɨrena ramtaɨra Iesusmo ndorita lamnik puŋga watrinan, na ma minmo riptirina kamb toco, mina waracrina.
\ip Na ramtaɨr ndeida gaindopatna, Iesusa ma mba mac nda kɨpitndai. Na gan timbiŋ rapara aindoprina, ma kɨpnandet. Na anna gidik, ma mba tawi kɨprina, na mana mɨnɨŋa gaind, Raraŋ Aetaniaca ma toŋgorinanna, ramoot ianna kai tapreke teac. Na ma toŋgorinanna, meikramtaɨr muruŋcamiŋa iroar inkar uriracna, ainda moca ma meikramtaɨrmo laŋanna morena, na ma lambica eacrena. U sapta 3 wes 9na inikca wat, an kamma eacrena.
\c 1
\ms Aia ndorita eteacna tɨpemb kirarir laiŋga mo gagraca meikramtaɨr ŋgorikta kambmo nda mbop
\mr (1—3)
\p
\v 1 \x - \xo 1.1: \xo*\xt 2 Ko 4.13, na Epe 4.5, na Ta 1.4\xt*\x*Aku Saimon Pita, aku Iesus Karaisna aiŋapa, up aŋgɨrena ramoot manan, na ma aina Raraŋ Aetaniac. Ma aimo mac nda aŋgɨna Ramoot. Na ne rɨtɨpac laŋ ŋgoinna aŋgɨatna meikramtaɨrmo, aku gan kammo tirrina, na Iesus Karaisna tɨp kirar wandoŋa, nena rɨtɨpaca aina rɨtɨpacna kirar toca larurinan. 
\v 2 \x - \xo 1.2: \xo*\xt Iu 1.2\xt*\x*Aintik mandeaca ne Raraŋ Aetaniacapa, aina Kacoot Iesusmo mataua lamŋica garacrina. Te, ma nenmo kadmaica nena iroar inkarmo, moi wewettaca gagraca laiŋ teacnandet.
\s Raraŋ Aetaniaca aimo ndonan ŋgoinna mona larapacrina
\p
\v 3 \x - \xo 1.3: \xo*\xt In 17.3, na 2 Te 2.14, na 2 Ti 1.9, na 1 Pi 2.9\xt*\x*Na Iesus Karaisa ma Raraŋ Aetaniacna gargar mbuŋa ma aimo reikca muruŋa neaŋga aina eteacna watmo, mo gagrana, na aimo otaca Raraŋ Aetaniacna tɨpemb kirarira taŋraŋna. Na ainda mori, Karaisa aimo wattacarica aia manmo mataua lamŋirina. Na mana memetacna tac aniacapa, gargarapa, mana tɨpna kirar laŋ ŋgoin mbuŋa, ma aimo acatna. 
\v 4 \x - \xo 1.4: \xo*\xt 2 Ko 7.1, na Epe 4.24, na 2 Pi 2.18-20, na 1 Io 3.2\xt*\x*Na ma aimo reik anik koindapa, reik laiŋ koindmo muruŋcamiŋa neaŋrinan, na an reikca ma ŋgaua aimo neaŋ ndopca babuatnan. Na nikinik iroa mo ŋgeprena tɨpna kirara ma aimo gan tiacarpaikna meikramtaɨrap eacrenan, na aimo moa ŋgocrairenan ŋgoin. Ainda moca Karaisa aimo an reik laiŋga muruŋa neaŋrinan, na an tɨpna kirar mbuŋa ma nenmo otaca ne an ŋgocraina tɨpna kirarmo mba aŋgɨitndai, na ne Raraŋ Aetaniacna, eteacna wat laŋapa mana tɨpna kirar toc ndarunandet.
\p
\v 5 \x - \xo 1.5: \xo*\xt 1 Pi 3.7, na 2 Pi 3.18\xt*\x*Ainda moca tɨp kirar laŋa mo, na an tɨpna kirara moca gagara ma nena rɨtɨpacna kirar toc ndeacna. Na ne Raraŋ Aetaniacmo lamŋina aiŋa moraŋ, na an landamŋimo moi gagraca, ma nena tɨpemb kirarir laiŋta kirar. 
\v 6 \x - \xo 1.6: \xo*\xt Gal 5.22-23\xt*\x*Na nena tikembta toŋtoŋgarmo ne matau ŋgoinna raupŋiraŋ, na ne an tɨpembta kirarirmo, moi gagraca ma nena iroar laiŋta kirar ndeacna. Na ne wɨtɨk gagraca wɨtɨkna tɨpna kirarirmo aŋgɨca makukarmo mbukraŋ, na an tɨpna kirarmo mo gagraca ma nena tikembmo raupŋinandet. Te, ne Raraŋ Aetaniacna tɨpna kirar mbuŋa taŋraŋ, na an tɨpna kirarmo, mo gagraca ma nemo moi gagraca, ne makukarmo mbukna. 
\v 7 \x - \xo 1.7: \xo*\xt Gal 6.10, na 1 Te 5.15, na 1 Io 4.21\xt*\x*Na ne Raraŋ Aetaniacna kabena meikramtaɨrmo aikora mona tɨpna kirarmo raŋgairaŋ. Na an tɨpna kirarmo mo laruna gagraca, ma nemo moca ne Raraŋ Aetaniacna tɨpna kirar mbuŋa taŋraŋnandet. Na ne kabena meikramtaɨrmo matŋirena tɨpna kirarmo ne aŋgɨ, na an tɨpna kirarmo mo gagra, te, ne aikor gidkar tarunandet.
\p
\v 8 \x - \xo 1.8: \xo*\xt In 15.2, na Ta 3.14\xt*\x*Na ne Iesus Karaismo lamŋirena, ma aina Kacoot. Na ne ainta tɨpembta kirarirmo aŋgɨ te, na mina laruca gagra te, nena an landamŋia ma wanaiŋa mba eacitndai. Wanaiŋ. Ma amna reik wɨtta mo larunandet. 
\v 9 \x - \xo 1.9: \xo*\xt Ib 9.14, na 1 Io 1.7, na 2.9-11\xt*\x*Na ramootta an tɨpna kirar kocortan. Te, ma an tawan ndeacrena reikmo ma mba watitndai, anna ma lamnɨac ŋgoreacna ramootna kirar. Na ma ŋgaua moatna tɨpemb ŋgorikta makukarmo Raraŋ Aetaniaca moa kecaririnan, na manmo moca laŋa moatna. Na anna gidik. Na an ramootta Raraŋ Aetaniaca manmo moatna reacmo, ma iroa mandarekrekerina. 
\v 10 \x - \xo 1.10: \xo*\xt 2 Pi 3.17, na 1 Io 3.19\xt*\x*Na ne Iesusa rɨpacrena laiplacar, Raraŋ Aetaniaca nemo acrinan, na ma nenmo larapaca ne mana meikramtaɨr teacnandet. Aintik ne gagraca mana meikramtaɨr koind taruna aiŋa moraŋ. Na ne ainda mo te, ne mba irikitndai, na mamo mba tɨkcariitndai. 
\v 11 Te, ma nena taupmo kocnai gootca, ne mana iarwara eacrena bubuocmo mbuknandet. Na an bubuoca anna Iesus Karaisnan, na ma aina Kacoot, na ma ai mac nda aŋgɨna Ramoot.
\p
\v 12 \x - \xo 1.12: \xo*\xt Pil 3.1, na 1 Pi 5.12, na 2 Pi 3.1, na 3.17, na 1 Io 2.21, na Iu 1.5\xt*\x*Na anna gidik, ne an reikmo malamŋireke, na ne an kam gidikmo aŋgɨatna, na ne man mbuŋa wɨtɨkca gagrarinan. Aintik aku toŋgorinanna, ne iroara kai ndarekrekke teac, ainda moca memetmbaca aku nenmo mac mbopna morena. 
\v 13 \x - \xo 1.13: \xo*\xt 2 Pi 3.1\xt*\x*Na an kɨdrɨkca aku ndona gan tik ndeacrenanna, aku gaind ndamŋirena anna laŋ, aku nemo mac mbopi warac te, nenmo moi iroar ŋgepca an reikta ndamŋina. 
\v 14 \x - \xo 1.14: \xo*\xt In 21.18-19, na 2 Ko 5.1, na 2 Ti 4.6\xt*\x*Na aku lamŋirenan, kɨdrɨk tekemmotemma aku ndona tikmo tɨkcarinandet. Na aina Kacoot Iesus Karaisa aukmo gaindopatna. 
\v 15 Aintik aku toŋgoca nemo aiŋ gagra moca, nemo mac mbopna. Na aku menac te, memetmbaca aku nemo mbopatna gan reikta moca muruŋa ne lamŋiraŋnandet.
\s Up aŋgɨrena ramtaɨra Raraŋ Aetaniacna memetaca Karaisa tɨkca watrina
\p
\v 16 \x - \xo 1.16: \xo*\xt 1 Ko 1.17, na 1 Io 1.1\xt*\x*Na aia nemo aina Kacoot Iesus Karaisna mana nda kɨkɨpna gargarmo nemo mbopatna. Na an mɨnna aia nemo Karaisna an kam ndopatna, aia ninini wanaiŋa ramootna iro mbuŋ ndarurinanna mba raŋgairi. Wanaiŋ. Aia ndorita lamnik puŋga Kacootna gargarapa, memetaca man ndarurinanna watatna, aintik aia mbopatna. 
\v 17 \x - \xo 1.17: \xo*\xt Mt 3.17\xt*\x*\x - \xo 1.17-18: \xo*\xt Mt 17.1-5, na Mk 9.2-7, na Lk 9.28-35\xt*\x*Na Raraŋ Aetaniac Aetta manmo i aniaca neaŋgatnan, na an memetac laŋa man mbuŋa mo larurinan. Na Raraŋ Aetaniaca ndo ŋgoinna an tamuŋna auŋna outna memetaca eacrenan, na ma Iesusna kammo gaindopatna, “Ganna aukna Nuoc ŋgoin, aku manmo mamatŋi ŋgoin, na aku manmo toŋtoŋ ŋgoin.” 
\v 18 Na aia manapmo an Raraŋ Aetaniacna takur ndeacatke, aia an kamma waracatna. 
\v 19 \x - \xo 1.19: \xo*\xt Ŋap 119.105, na In 5.35, na KIEK 2.28\xt*\x*Ainda moca aia rambca morina ramtaɨrta kambca rɨpaca gagraca morenan, aintik ne toco mina kambmo gagraca utiŋ te, anna laŋ. Na mina kambca ma tac wɨwɨrna memetaca neaup ndeacrena kirara taŋga auŋ raruna rambuŋai te, an gui gudamma nena iroar inkara moi ŋgepnandet.\f + \fr 1.19 \fr*\fk Gudam: \fk*\ft Anna auŋ raruna gui, na ma memetac aniacap. Na Iesus Karais ma an gui gudamna kirar. Karaisa Iŋgoroca Eacrena Kambmo Ion Mbuŋa Moa Larurina timbigta kapna sapta 22 wes 16na wat, an ninini toco an ndeacrena.\ft*\f*
\p
\v 20 \x - \xo 1.20: \xo*\xt Ro 12.6\xt*\x*Na reac aniac ianna ne lamŋinanna, anna gaind. Ramoot ianna ndona iro mbuŋa Raraŋ Aetaniacna timbigta kap ndeacrena rambca morena kambta mɨnɨŋ ianna kai urirac teac. 
\v 21 \x - \xo 1.21: \xo*\xt Up 1.16, na 3.18, na 2 Ti 3.16, na 1 Pi 1.11\xt*\x*Na anna mɨnɨŋa gaind, ramma morena kam ianna ramoot wanaiŋna toŋtoŋ mbuŋa mba laruatke. Wanaiŋ. Ŋeroŋ Ratta ndo ramtaɨrmo aoca ŋgepca mina Raraŋ Aetaniaca neaŋrena kambmo wiwitirena.
\c 2
\s Ramtaɨr ŋgorikca Iesusa rɨpacrena laiplacarta iroarmo moi paurirena
\r (Iuda 4-13)
\p
\v 1 \x - \xo 2.1: \xo*\xt Mt 24.11, na Up 20.30, na 1 Ko 6.20, na Epe 1.7, na 1 Ti 4.1, na 2 Ti 3.1-5, na 1 Pi 1.18, na Iu 1.4\xt*\x*Na anna gidik, atua paparuna rambca morena ramtaɨr ndeida Israelnaŋgepta rɨk naŋgeprinan. Na an tɨpna kirar kabe mbuŋa mandeacna mɨnna paparuna ririptia morena meikramtaɨr ndeid toco, ŋgepca meikramtaɨrmo paruca Raraŋ Aetaniacna reikta riptinandet. Na paparuna ririptia morena meikramtaɨra iŋgoroca paparuna kambca moca gan mɨn ndarunandet. Na an kambca nena rɨtɨpaikca moi ŋgocrainandet. Na Kacootta min motoco ma mac nda oikrinan, na mina ndori, manmo iŋ neaŋrena. Na mina ainda mo te, mina ndorimo tawi ŋgoinna mo ŋgocrainandet. 
\v 2 Na meikramtaɨr wɨtta ndorita numbira morena tɨpemb kirarir ŋgorikca raŋgainandet, na taup gidikna kambmo nda peperena kamb ŋgorik ndopraŋnande. 
\v 3 \x - \xo 2.3: \xo*\xt Ro 16.18, na 2 Ko 12.17-18, na 1 Te 2.5, na 1 Ti 6.5, na Ta 1.11, na 2 Pi 1.16\xt*\x*Na an ramtaɨra mina kabena ramootna reikmo lamnik puŋga watca wanaiŋa toŋgorena, ainda moca mina nenmo paparuna kamb ndopraŋ te, nena kitukndukarapa, reikmo paruca aŋgɨnandet. Na an ramtaɨra Raraŋ Aetaniaca atua minmo ritri waparaca mona ramo larapacrinan, na ma gaindopatna mina topnandet. Aintik an ŋgogocraia minmo laruna moreke, ma mba ŋgoreke, wanaiŋ. Ma lambica eacrenan.
\p
\v 4 \x - \xo 2.4: \xo*\xt Lk 8.31, na In 8.44, na 1 Io 3.8, na Iu 1.6, na KIEK 20.2-3\xt*\x*Na ne lamŋirena, atua mbaiŋna aiŋa morina ŋerŋgaur ndeida tɨpemb ŋgorikta makukara moatnanna, Raraŋ Aetaniaca minmo mba wattacariatke. Wanaiŋ. Ma minmo mbitrem kocorta auna kac ŋgoreacna neaup diriŋa lawirta ŋgatɨk mbuŋa leaca anna tɨkrina. Te, mina an kac ŋgoreac ndeaca, mana ritri waparaca momona rana lambiraŋnande. 
\v 5 \x - \xo 2.5: \xo*\xt RL 6.1—7.24, na 8.18, na Ib 11.7, na 1 Pi 3.20, na 2 Pi 3.6\xt*\x*Na an kirar kabea atuna meikramtaɨr toco, mina Raraŋ Aetaniacmo iŋ neaŋgatnanna, ma minmo mba wattacariatke. Wanaiŋ. Ma minmo laemb aniaca moca mina menaca topatna. Na ma an tɨp kirar wandoŋna kam wiwitia mboprina ramoot Noaapa, meikramtaɨr parmbaiapa mbut mbuniŋna mɨnmo, raupŋia mina mba ŋgocraiatke. 
\v 6 \x - \xo 2.6: \xo*\xt RL 19.24, na Ndu 26.10, na Iu 1.7\xt*\x*Na an kirar mbuŋa Raraŋ Aetaniaca mbopatke, Sodomapa Gomora toco maŋgocraiat. Na an auŋ aniacniŋmo, ma tac mbuŋa rotaca wɨracarica kapɨr kamndera ndori maeacreke. Na Raraŋ Aetaniaca ainda moatke, iŋmbai nakɨprena meikramtaɨra Sodomapa Gomoramo larurina reac mbatca anna ndamŋinandet. Te, mitoco lamŋi garacna, mina Raraŋ Aetaniacmo raŋgai ŋgocor te, kaina reaca minmo larunande. 
\v 7 \x - \xo 2.7: \xo*\xt RL 19.1-16\xt*\x*Na an ramoot wandoŋ laŋ Lot, ma Sodom auŋ ndeacri, ma ramtaɨr ŋgorikca morina ainta tɨpemb kirarir ŋgadudukar mbatca, mana nikinik iroa, moa ŋgocrairina. Aintik an kirar kabea Raraŋ Aetaniaca moatnanna, ma Lotmo aŋgɨca ma mba ŋgocraiatke. 
\v 8 Na anna gidik, an ramoot wandoŋa ma Sodomnaŋgepta rɨk ndeaca ma mina tɨpemb ŋgorik mbatrenan, na ra ra katuca ma mina kamb ŋgorik mbaracrenan. Na mana nikinik iroa wandoŋ ndeacrina, na ma watrinanna tɨp laŋmo mina ndarenan, ainda moca mana nikinik iroa gɨgɨracaririna. 
\v 9 \x - \xo 2.9: \xo*\xt Ŋap 34.17-19, na 1 Ko 10.13, na Iu 1.6\xt*\x*Na Kacootta moatna reikmo, aia lamŋiraŋ te, aia lamŋinande, totowaiarmo Raraŋ Aetaniaca raŋgairena meikramtaɨrmo laru te, Kacootta minmo an totowaiara tɨkca mac nda aŋgɨna taupca ma lamŋirenan. Na Kacootta meikramtaɨr ŋgorikta tɨpemb kirarira ma lamŋirenan, na ma mina tɨpemb ŋgorikta opoikmo nda rutina taupca ma lamŋirenan, taŋi Raraŋ Aetaniacna ritri waparacna ra aniac laru te. 
\v 10 \x - \xo 2.10: \xo*\xt Iu 1.4-10, 16\xt*\x*Ainta meikramtaɨr ndeida mina ndorita tɨpemb ŋgorikta makukar anikta opoikca mina aŋgɨnandet. Na anna an meikramtaɨra tɨpemb ŋgadudukar koindta iroar nikinik ŋgorikca ŋgepca morinan, na mina gainda lamŋireke, gan tiacarpaikna ramtaɨr paŋaindapa, Raraŋ Aetaniac Kacootna kambca anna reac wanaiŋ.
\p Na an paparuna ririptica morena meikramtaɨra mina nena rɨkca ŋgeprinan, mina garurureke, na mina ndorita iroarta toŋtoŋgara raŋgairenan. Ainda moca paparuna ririptica morena ramtaɨra tamuŋna auŋna outta taŋrena mbaiŋna aiŋa morena ŋerŋgaurmo peperena kamb ŋgorik ndondopca, mina mba nanambirenan. 
\v 11 \x - \xo 2.11: \xo*\xt Iu 1.9\xt*\x*Na an mbaiŋna aiŋa morena ŋerŋgaura mina an ramtaɨrmo kunda tamuŋmbai, na mina gargar aniacap. Na mina an kabena mbaiŋna aiŋa morena ŋerŋgaurmo peperena kamb ŋgorikca mba mboprenanna, na minmo Raraŋ Aetaniacna lamnɨac ŋgoutta tɨkca ritri waparaca minmo mba mori.
\p
\v 12 \x - \xo 2.12: \xo*\xt Iu 1.10\xt*\x*Na an ramtaɨra mina amta ŋgoaebta kirarir toc, mina paŋainda iroar laiŋ kocor, aintik mina ndorita tikembta toŋtoŋgara raŋgairenan. Na mina an raŋa eacrena amta ŋgoaebta kirarir toc, te, meikramtaɨra minmo aŋgɨca mo menacnan niŋgik. Aintik reik Ratta mina lamŋi garac ŋgocor, mina anmo peperena kam ŋgoreac ndoprena. Na an raŋna amta ŋgoaebca ŋgocrairena kirara, mitoco ainda ŋgocrainandet. 
\v 13 \x - \xo 2.13: \xo*\xt Ro 13.13, na 1 Ko 11.20-21, na Pil 3.19, na Iu 1.12\xt*\x*Na mina ainta tɨpemb ŋgorikca morenan, na Raraŋ Aetaniaca mina tɨpemb ŋgorikmo nda rutinandet. Na mina gainda lamŋirenan, amtiammo raita kɨdrɨkca morenanna, anna tɨp kirar laŋna toŋtoŋ. Na mina nenap ambrenan, na mina nenmo tɨpemb kirarir ŋgorikca morenan, na nena irembmo mo ŋgocrairena. Ri, an paparuna tɨpemb kirarira mina morinanna, mina toŋtoŋ ŋgoin. 
\v 14 Na memetmbaca mina meikpitikmo, tik tɨkrenan, na minmo meacramootna kaŋtertaapna tɨpemb kirarir ŋgadudukara momona iroarap lamŋirenan. Na mina tɨpemb kirarira, tɨp ŋgoreacna makukca momoa mina mɨnna mba tɨkrenanna. Na an meikramtaɨra mina rɨtɨpaik gagrar kocortanmo, paparuna ririptina ramtaɨra minmo wai aoca minmo tɨpemb kirarirta tɨpemb ŋgorikta makukara morena. Aintik mina kabena meacramootna reikmo wanaiŋa aŋgɨna matŋirena ririptia mina maaŋgɨat, ainda moca Raraŋ Aetaniaca minmo makukara neaŋrena. 
\v 15 \x - \xo 2.15: \xo*\xt Iu 1.11, na KIEK 2.14\xt*\x*\x - \xo 2.15-16: \xo*\xt Ndu 22.4-35\xt*\x*Na mina taup laŋmo iŋ neaŋga, mina ŋaŋaoca taŋrenan. Na mina Beorna nuoc Balamna taupca maraŋgairi. Ma tɨp ŋgoreacna makukca mori, ma ndona tɨp ŋgoreacna opoik aŋgɨna toŋtoŋ aniacap. 
\v 16 Na amta ŋgoaeb doŋkiara mina kamma mba mboprenan, na ianna ma kam ndopca, Balammo kaega moatnan. Na an tɨpna kirar mbuŋa ma an ramma morina ramootna iro ŋgoreacapna landamŋi ŋgoreacmo, mo ŋgetrikirenan.
\p
\v 17 \x - \xo 2.17: \xo*\xt Iu 1.12-13\xt*\x*Aintik an paparuna meikramtaɨra mina aurembca puikca, puik kocorta kirarapa dimira watta wica taŋrena kirar toc. Ainda moca Raraŋ Aetaniaca mina neaupdiriŋ ŋgoinna taupca kocroca maeacreke. 
\v 18 \x - \xo 2.18: \xo*\xt Up 2.40, na 2 Pi 1.4, na 2.20, na Iu 1.16\xt*\x*Na ainta ramtaɨra ndorimo aindopna moca kambmo tamtamma keca, garururena. Te, mina meikramtaɨrmo moa tik ŋgepca mina tɨp ŋgaduduk ŋgoreacapa, tikna iro ŋgoreac mona iroara mona. Na an tɨpembta kirarira mina an mandebca ŋgepca kambmo raŋgairena tɨp ŋgoreac tɨkcarina meikramtaɨrmo moca, mina iroarmo mo pauriri, mina an kam mbarac kocorta meikramtaɨrta kamma mac raŋgaiek. 
\v 19 \x - \xo 2.19: \xo*\xt In 8.34, na Ro 6.16, na 1 Pi 2.16\xt*\x*Na an ramtaɨr ŋgorikca aindoprena, “Ne aimo raŋgai te, ne makukar kocora wanaiŋ ndeacnandet. Na ne ndorita toŋtoŋgarta reikca moraŋnandet.” Na an ramtaɨra mina tɨp ŋgoreacna tuombta aiŋir kamndera morena ramtaɨr teacrenan. Aintik ramootta reac ianna watcarica, ma mana raupŋia eac te, ma an reacmo watcarica ma manmo tuomna aiŋ kamainda monandet. 
\v 20 \x - \xo 2.20: \xo*\xt Mt 12.45, na Lk 11.26, na Ib 6.4, na 2 Pi 1.2-4\xt*\x*Na anna gidik, an paparuna ririptica morena meikramtaɨra Iesus Karais ndambuŋmo landamŋi aŋgɨrinan, na ma aina Kacoot, na ma ai mac nda aŋgɨna Ramoot. Na an landamŋia otaca minmo gan tiacarpaikna makukar ŋgorik ŋgadudukar koindmo, mina anna iukairenan. Na mina an ŋgadudukarta makukar mac mɨk te, na ma minmo kac ŋgoreaca tɨk te, mina ŋgoreac ŋgoin ndeacnandet. Outta mina ŋgoreaca eacri, na mandeaca an ŋgadudukarta makukara minmo leaca mina ŋgoreac ŋgoin ndeacraŋnandet. 
\v 21 \x - \xo 2.21: \xo*\xt Lk 12.47-48, na In 9.41\xt*\x*Na mina taup wandoŋna tɨp kirar laŋmo lamŋi ŋgocor te, anna laŋ. Na mandeac mina an taupca malamŋiri, na mina Raraŋ Aetaniacna tɨp kirara maaŋgɨat. Aintik mandeaca mina manmo iŋ neaŋrinan. Na mina anna lamŋi ŋgocor te, anna laŋ ŋgoin, ainda moca mandeaca mina kocnai maŋgocrairi. 
\v 22 \x - \xo 2.22: \xo*\xt ML 26.11\xt*\x*Ainda moca an reaca minmo larurinanna, anna kam gidik ianna kamna kirara ma aindoprena, “Piraŋa mbabɨnpaikca mbɨn irikca, iŋmbaia ma mac nda taŋga ndona mbabɨn mac amnandet.” Na kabena kam tɨp toco gaind, “Ramootta markɨmmo ma puk mbuŋa ru mai te, ma mac taŋca tuoŋtuoŋ mac irikca runande.”
\c 3
\s Kacootta ma gidik ŋgoin nakɨpnandet
\p
\v 1 \x - \xo 3.1: \xo*\xt 2 Pi 1.13\xt*\x*Aukna aikndamtaɨr koind, gan aukna iŋmbaina timbiŋ rapara aku mandeaca nenmo tirca neaŋga makɨpek. Na an outnanapa iŋmbaina timbiŋ rapar, aku nenmo kam neaŋga nenmo moi iroar ŋgepca ne an reik tamŋiraŋ te, nena iroara wandoikca mac eacraŋnandet. 
\v 2 \x - \xo 3.2: \xo*\xt Iu 1.17\xt*\x*Na aku toŋgorinanna, ne an iŋmbaia laruna kamna reacmo mac lamŋiraŋ, na an reikca Raraŋ Aetaniacna rambca morina ramtaɨra wiwitiatna. Ainda moca ne Kacootna kam gargarna lamŋiraŋ, ma ai mac nda aŋgɨna Ramoot. Na an kam gargara up aŋgɨrena ramtaɨra nen ndambuŋa kɨpatna ramtaɨrta up mbuŋa waracatna.
\p
\v 3 \x - \xo 3.3: \xo*\xt 1 Ti 4.1, na 2 Ti 3.1, na 2 Pi 2.10, na Iu 1.18\xt*\x*Na reac aniac ianna ne lamŋiraŋ, anna ma gaind. Na gan tiacarpaikna mamaina raipaikca, peperena ramtaɨra kɨpnandet, na mina ndorita iroar inkar ŋgorikca raŋgairaŋnandet. 
\v 4 \x - \xo 3.4: \xo*\xt Ais 5.19, na Ier 17.15, na Esi 12.22, na 12.27, na Mt 24.48, na Lk 12.45\xt*\x*Te, paparuna ririptica morena meikramtaɨra aindopnandet, “Ma mac nda kɨp ndoprinan ki, a? Na ma ten ndeacrenan? Ma mba kɨpitndai. Na an mɨnna aina nicar ŋgamrira menacri, kɨp, kɨpca gan mandeacna mɨn mbuŋa gan tiacarpaik ndarurina reikca an kirara maeacreke, mina ŋgetriki ŋgocor.” 
\v 5 \x - \xo 3.5: \xo*\xt RL 1.6-9, na Ŋap 33.6, na Kol 1.17, na Ib 11.3\xt*\x*Na mina an reikta moca mba mataua lamŋica iroar laiŋ aŋgɨri. An atu ŋgoinna Raraŋ Aetaniaca mbopca riaca tamuŋ malaruat. Ri, ma puk aŋgɨca ma pukna inikna rɨkca pitrikmo moa laruatna. 
\v 6 \x - \xo 3.6: \xo*\xt RL 7.11, na 7.21, na 2 Pi 2.5\xt*\x*Na iŋmbaia ma mbopatke, pukca mac laruca laemb aniaca gan tiacarpaikmo kɨtacatke, ma kocnaia ŋgocraiatna. 
\v 7 \x - \xo 3.7: \xo*\xt Mt 25.41, na 2 Te 1.8, na 2 Pi 3.10\xt*\x*Na mandeaca mana an kamna kirar kabe ŋgoin mbuŋa, gan tiacarpaikapa riaca eacreke, tacna lambirenan, ma kɨp te, maniŋmo moi topnandet. Na maniŋa ritri waparacna ra aniacna ndabirena, na an meikramtaɨra Raraŋ Aetaniacmo iŋ neaŋrinanmo, mina kocnai topnandet.
\p
\v 8 \x - \xo 3.8: \xo*\xt Ŋap 90.4\xt*\x*Na aukna aikndamtaɨr koind, ne an reac kabemo kai ndarekrekke teac. Na Kacootna iro mbuŋa ra kabea anna ma 1,000na iarna kirar, na 1,000na iara ma ra kabena kirar. 
\v 9 \x - \xo 3.9: \xo*\xt Ais 30.18, na Aba 2.3, na Ro 2.4, na 1 Ti 2.4, na Ib 10.37, na 1 Pi 3.20\xt*\x*Na Kacootta ma reaca mona babua mo te, ma laŋan, laŋanna mba morenanna, an meikramtaɨr ndeid lamŋirena kirara, wanaiŋ. Na ma toŋgorinanna meac, co, ramoot ianna kai tapreke teac. Na ma toŋgorinanna, meikramtaɨra muruŋa mina iroar inkar ŋgetrikina, aintik ma nena moca laŋanna lambia eacrena.
\s Gan tiacarpaikapa riaca mainandet
\p
\v 10 \x - \xo 3.10: \xo*\xt Mt 24.29, na 24.35, na 24.43, na Mk 13.31, na Lk 12.39, na 1 Te 5.2, na Ib 1.11, na KIEK 16.15, na 20.11\xt*\x*Na Kacootna Ra ma tawi ŋgoin nakɨpnandet, an macmakɨmna ramtaɨr kɨprena kirar toc nakɨpnandet. Na an Ra mbuŋa, riaca wapatuk aniaca moca ma mainandet. Na reik tekernoikca Raraŋ Aetaniaca gan tiacarpaik mbuŋa morinanna, taca minmo wɨra mina kocnai mainandet. Aintik gan tiacarpaikapa an reikca meikramtaɨra min mbuŋa morinanna, mina mba mac eacitndai. 
\v 11 Na ne matau lamŋiraŋ. Na an reiki mina an tɨpna kirar mbuŋa mai te, ne tit ndamŋirenan, ne titocna tɨpna kirara raŋgaiit? Ainda moca ne ndorita eteacna watmo Raraŋ Aetaniacmo neaŋ, na ne ratna tɨpna kirara raŋgai, na mana tɨpemb kirarirmo muruŋa raŋgairaŋ. 
\v 12 \x - \xo 3.12: \xo*\xt Ais 34.4, na Mai 1.4, na 1 Ko 1.7, na Ta 2.13, na 2 Pi 3.10\xt*\x*Na an tɨpna kirar mbuŋa ne Raraŋ Aetaniacna Rana kɨkɨpna lambiraŋ, na ne an Rana moca gagra aiŋa mo te, ma tawi larunandet. Na an Ra mbuŋa riacmo taca wɨrca, ma topnandet. Na tacna owowaia gargar ŋgoin mbuŋa gan tiacarpaikna reikca Raraŋ Aetaniaca morinanna, mina kocnai wɨrnandet, te, mina pukna kirar toc ndarunandet, na mina topnandet. 
\v 13 \x - \xo 3.13: \xo*\xt Ais 65.17, na 66.22, na KIEK 21.1, na 21.27\xt*\x*Na Raraŋ Aetaniaca ma baburinanna ma kabena tiacarpaik ŋgamapa riac ŋgamma mo larunandet, na tɨp kirar wandoŋ laŋ niŋgikca an ndeacnandet. Na aia an reac niŋgikna moca lambirena.
\s Aia ndorimo matau raupŋia Kacootna lambina
\p
\v 14 \x - \xo 3.14: \xo*\xt 1 Ko 15.58, na Pil 1.10, na 1 Te 3.13\xt*\x*Na aukna aikndamtaɨr koind, ne an reikmo lataruna lambirena. Ainda moca ne Raraŋ Aetaniacna lamnɨaca, ndorimo ratta mona gagraca mo te, ne reac ianna makukar kocor. Na Kacootna Ra, Raraŋ Aetaniaca ma nena an tɨpemb kirarir laiŋmo watnandet. 
\v 15 \x - \xo 3.15: \xo*\xt Ro 2.4, na 1 Pi 3.20, na 2 Pi 3.9\xt*\x*Na Kacootta aina moca laŋanna lambia eacrena. Na ne lamŋirena, ma an tɨpna kirara morenanna, ma aimo mac nda aŋgɨna moreke. Na aina matŋirena kaka gidik Polmo, Raraŋ Aetaniaca manmo iro landamŋi laŋmo neaŋgatna, na ma toco nenmo ainta kam tɨpmo tirrina. 
\v 16 \x - \xo 3.16: \xo*\xt Ro 10.3, na 1 Ko 15.51, na 1 Te 4.15\xt*\x*Na mana timbiŋ raprirmo, ma an reacna kamb ndoprenan. Na anna gidik, kamb ndeida an timbiŋ raprir ndeacrenanna, ne mba garacit. Aintik aia mana mɨnɨŋ nagaracna moca owai ŋgoin. Ainda moca meikramtaɨr ndeida mina iroara, landamŋiar kocor tik, mina rɨtɨpaikca gagrara wanaiŋ. Na mina an Polna kammo mba gɨwaca lamŋirenanapa, Raraŋ Aetaniacna Timbigta Kapna kambca an ndeacrenan motocmo, mina mba gɨwaca lamŋirenan. Aintik mina ŋgocraica topnandet.
\p
\v 17 \x - \xo 3.17: \xo*\xt Mk 13.5, na 13.23, na 13.33, na 1 Ko 10.12, na Epe 4.14, na 2 Pi 1.10-12\xt*\x*Na aukna aikndamtaɨr koind, ne an reacmo iŋmbaia larunanna, ne malamŋireke. Aintik ne ndoritake, matau wat. Na tɨp wandɨk laŋmo tɨp kirara ndarena paparuna ramtaɨra, mina nenmo paruca wɨŋga nena rɨtɨpaikmo moca mba gagraca wɨtɨkitndai. 
\v 18 \x - \xo 3.18: \xo*\xt Epe 4.15, na 2 Ti 4.18, na 1 Pi 2.2, na Iu 1.25, na KIEK 1.6\xt*\x*Aintik Iesus Karais, ma aina Kacoot, ma ai mac nda aŋgɨna Ramoot, na ma nena moca kadmairenan, na ne manmo mataua lamŋirenan. Na ne Karaisna kakadmaimo wattacarica, ma nenmo moi gagra te, ne man ndambuŋa iroar wɨt aŋgɨnandet. Na ma i aniac ŋgoinap, na mana imo aia mandeacapa iarwara aŋgɨ ŋgepraŋnandet. Na anna gidik.