\id 1JN - shell for translator's use
\ide UTF-8
\h 1 Ion
\toc3 1 Io
\toc2 1 Ion
\toc1 Ionna Tiratna Outna Timbiŋ Rapar
\mt1 Ionna tiratna outna timbiŋ rapar
\imt Outna kam
\ip Gan timbiŋ rapara ma iro mbuniŋapna mɨnɨŋap. Na outnanna gade, ma Iesusa rɨpacrena laiplacarmo, otaca mina Raraŋ Aetaniacapa, mana Nuoc Iesus Karaismo iro nikinik kabeap eacna. Na ianna gade, ma toŋgorinanna mina an neaupna wiwitna meikramtaɨrmo, kai watcarica mina minmo paruna, co, minmo wɨŋa mina Raraŋ Aetaniacmo tɨkcarina.
\ip Na an, “Neaupna wiwitna meikramtaɨra,” mina gaindoprena, reikca gan tiacarpaikca eacrenanna, anna reik laiŋ koinda wanaiŋ. Na Iesus, ma Raraŋ Aetaniacna Nuoc, aintik ma ramootna kirara ndaruna towanaiŋ, te, gan tiacarpaikna reikap mɨknan, gan aia morena tɨpna kirar. Na mina gaindoprina, ramootta Raraŋ Aetaniacap laŋ ndeacnanna, ma gan tiacarpaikna reikta moca kai lamŋi teac. Na tɨp kirar wandoŋapa, kabena meikramtaɨrmo matŋirena tɨp kirara, an toco anna gan tiacarpaikna reac. Aintik an tɨpemb kirarirmo, kai raŋgairaŋ teac.
\ip Na Ionna toŋgorinanna, Iesusa rɨpacrena laiplacara an kambmo kourmo kai iki warac teac. Na ma gaindopatna, Iesusa ma ramootna tik toc ŋgoinna ndarurinan, na meikramtaɨra manmo rɨpacrinan, na mina Raraŋ Aetaniacmo matau ŋgoinna matŋiraŋ, na kabena meikramtaɨr motocmo matŋiraŋ.
\c 1
\ms Aia tacna memetacna wɨwɨr mbuŋa taŋraŋ, na aia neaupna wiwitmo kai wattacarica mina aimo paruna
\mr (1.1—3.10)
\s Iarwarna eteacna watca ma raekca larurina
\p
\v 1 \x - \xo 1.1: \xo*\xt In 1.1-4, na 1.14, na 20.27, na 2 Pi 1.16, na 1 Io 2.13-14\xt*\x*Na atu, atu ŋgoinna, gan tiacarpaikca laru ŋgocor ndeacri, an Kamma ma atuna ndeacrena, na an Kamma aia waraca mamaiat, na aia ndorita lamnik puŋga watta mamaiat, na aia ndorita paɨr puŋga manmo mautiŋgat. An Kamma ma iarwarna eteacna watap. 
\v 2 \x - \xo 1.2: \xo*\xt In 1.14, na 21.24, na Up 2.32, na Ro 16.26\xt*\x*Na an iarwarna eteacna watta ma larua raekca tɨkatke, aia ndorita lamnik puŋga watca, aia anna wiwitirena. Na aia nemo an iarwarna eteacna watna kamma anna nininina kam ndoprena. Atua ma Raraŋ Aetaniacap eacrinan, na mandeaca ma larua raek matɨkri, na aia ndori puŋga watta marapacat. 
\v 3 \x - \xo 1.3: \xo*\xt In 17.21, na Up 4.20, na 1 Ko 1.9, na 1 Io 2.24\xt*\x*Ainda moca aia watri, waracrina kamma, aia nen motocmo, an kamma wiwitia mboprena. Nenmo aŋgɨca aia ndoriap aŋgɨri tumbunna tɨkca iro kabea moca Raraŋ Aetaniacapa, mana Nuoc Iesus Karaisap eacna. 
\v 4 \x - \xo 1.4: \xo*\xt In 15.11, na 16.24, na 2 Io 1.12\xt*\x*Na aia an kamma tir te, aina iroar inkara toŋtoŋgar koindap.
\s Aia memetacna wɨwɨr mbuŋa taŋraŋ
\p
\v 5 \x - \xo 1.5: \xo*\xt In 1.9, na 9.5, na 12.35-36, na 1 Ti 6.16, na Ie 1.17, na 1 Io 3.11\xt*\x*Na aia Iesus Karaisa mbopatna kamma, aia waraca nenmo an ndoprena, mana mbopatna kamma gaind, Raraŋ Aetaniaca memetac ŋgoin, mana inikca neaup kocor ŋgoin. 
\v 6 \x - \xo 1.6: \xo*\xt 2 Ko 6.14, na 1 Io 2.4\xt*\x*Na aia ndorimo gaindop te, “Aia manap mɨkrena ramtaɨr,” na aina morena tɨpembca laiŋga wanaiŋ, na an kambca aia mbopapeknanna, aia neaupna inikca taŋrena ramtaɨrta kirarir koind. Anna aia tɨp gidik ŋgoinna mba moapeke. Aia an kammo parurenan. 
\v 7 \x - \xo 1.7: \xo*\xt Ais 2.5, na In 3.21, na Epe 1.7, na Ib 9.14, na 1 Pi 1.19, na KIEK 1.5, na 7.14\xt*\x*Na aia Raraŋ Aetaniacna memetacna inik ŋgoin ndeac taŋraŋ te, aia muruŋa aŋgɨri tumbunna tɨkca iro kabe aŋgɨca, Raraŋ Aetaniacna Nuoc Iesusna racaindpaikca ndo, aina tɨpemb ŋgorikta makukarmo muruŋa tukia kecarirenan. Te, aia meacramoot rat ndarunande.
\p
\v 8 \x - \xo 1.8: \xo*\xt Iop 9.2, na Ŋap 32.5, na ML 28.13, na Ie 3.2, na 1 Io 2.4\xt*\x*Na aia ndorimo aindop te, “Aia tɨpemb ŋgorikta makukar kocor,” na an kam gidikca aina iroar inkara eac ŋgocor, anna aia ndorita iroar inkar puŋga paruapekna. Na kam gidikca aina iroar inkara mba eacreke, wanaiŋ ŋgoin. 
\v 9 \x - \xo 1.9: \xo*\xt Ŋap 51.2, na ML 28.13, na 1 Io 1.7\xt*\x*Na aia ndorita tɨpemb ŋgorikta makukarta kam ndopi laru te, Raraŋ Aetaniaca aina tɨpemb ŋgorikta makukara mo kecari ndoprinanna, ma monandet. Na ma aimo tɨp wandoŋ laŋa moca ma aina tɨpemb ŋgorikta makukara muruŋa aiap eacrenanmo, ma mo kecarica, aimo moi meikramtaɨr rat ndarunandet. 
\v 10 \x - \xo 1.10: \xo*\xt 1 Io 1.8\xt*\x*Na aia ndorica aia gaindop te, “Aia tɨp ŋgoreacna makukca mba morenanna.” Te, an kamma ndo Raraŋ Aetaniacna kammo paparu ndopnandet. Na aia ainda mo te, Raraŋ Aetaniacna kam gidikca aina iroar inkara mba eacreke.
\c 2
\s Karaisa aina opotacna ramoot
\p
\v 1 \x - \xo 2.1: \xo*\xt Ro 8.34, na 1 Ti 2.5, na Ib 7.25, na 9.24\xt*\x*Ne aukna mombonik, gan kamma aku nena moca tirrina kam, ne tɨpemb ŋgorikta makukara mba mo taŋraŋitndai. Na ramoot ianna tɨp ŋgoreacna makukca mo te, aimo Otacna Ramootta Raraŋ Aetaniacap maeacreke, ma aina paŋanna wɨtɨkca aimo bubuocraŋnande. An ramoot, ma tɨpemb kirarir wandoik laiŋga morena ramoot. Mana ia Iesus Karais. 
\v 2 \x - \xo 2.2: \xo*\xt In 1.29, na 11.52, na Ro 3.25, na 2 Ko 5.18, na Kol 1.20, na 1 Io 4.10, na 4.14\xt*\x*Ma ndo, ma aina tɨpemb ŋgorikta makukarmo mo kecarina moca ndona watta, an mbuŋa gɨmbamba moatna. Ma an aiŋmo, ma ai niŋgikca mba otacitndai, wanaiŋ. Ma morena aiŋa ma gan tiacarpaikna meikramtaɨrmo muruŋa otacnande.
\s Raraŋ Aetaniacna tɨpemb kirarirmo matau raŋgairaŋ
\p
\v 3 Aia Raraŋ Aetaniacna tɨpembmo matau raŋgai te, aia aind ndamŋinande, aia mamo mataua malamŋireke.
\p
\v 4 \x - \xo 2.4: \xo*\xt 1 Io 1.6-8, na 4.20\xt*\x*Na Ramoot ianna aindop te, “Aku Raraŋ Aetaniacmo mataua lamŋirenan.” Na ma ndona tɨp ianna matau raŋgai ŋgocor te, an ramootta ma paparuna ramoot ŋgoin. Kam gidikca mana iro inikca mba eacreke, wanaiŋ ŋgoin. 
\v 5 \x - \xo 2.5-6: \xo*\xt In 13.15, na 14.21-23, na 15.4-5, na 1 Pi 2.21, na 1 Io 4.12-13, na 4.17, na 5.3\xt*\x*Na ramoot ianna Raraŋ Aetaniacna kambca raŋgairenan, Raraŋ Aetaniacna mamatŋia mana iro inikca mɨn. Ainta, kirara aia aind ndamŋinande, aia Raraŋ Aetaniacnan.
\p
\v 6 Na ramoot ianna aindop te, “Aku Raraŋ Aetaniacnan.” Ma Iesusna tɨpembta kirarir koinda raŋgairaŋ. 
\v 7 \x - \xo 2.7: \xo*\xt 1 Io 2.24, na 3.11, na 2 Io 1.5-6\xt*\x*Aina aikndamtaɨr koind, an Tɨp Wandɨkca aku nenmo tiratnan, an Tɨp Wandɨkna kamma anna kam ŋgamma wanaiŋ. Anna kam bagar. Na an Tɨp Wandɨkna kamma u outta an kamma waraca rɨpacatna mɨnna, an mɨnna, u an Tɨp Wandɨkna kamma u waraca lamŋia rapacatna. 
\v 8 \x - \xo 2.8: \xo*\xt In 1.9, na 8.12, na 13.34, na Ro 13.12, na Epe 5.8, na 1 Te 5.5, na 5.8\xt*\x*Na gade gan kamma, aku tirca nenmo neaŋgeknanna, an toco anna Tɨp Wandɨk ŋgam, anna gidik ŋgoin, Iesusna iarwar ndeteacna wat manan, an wat mananna, an toco anna nenan. Ainda moca memetaca maica larua raekca tɨkna moreke, na neaupa maica taŋga maiŋgorocek.
\p
\v 9 \x - \xo 2.9: \xo*\xt 1 Ko 13.2, na 2 Pi 1.9, na 1 Io 3.10, na 3.14-15, na 4.20\xt*\x*Na ramoot ianna ndomo aindop te, “Aku memetacna inik ndeacrena ramoot.” Na ma Iesusa rɨpacrena laiplacarta ianmo iro ŋgoreaca mo te, ma neaupna inik maeacreke. 
\v 10 \x - \xo 2.10: \xo*\xt In 11.9, na Ro 14.13, na 2 Pi 1.10, na 1 Io 3.14\xt*\x*Na ramootta Iesusa rɨpacrena laiplacarmo matŋica iro laŋa mo te, ma an memetacna inikmo metaca eacnande. Na ma an memetacna inik ndeacraŋ te, reac ianna mamo, mo irikna mɨnna wanaiŋ. 
\v 11 \x - \xo 2.11: \xo*\xt In 11.10, na 12.35\xt*\x*Na ramootta, Iesusa rɨpacrena laiplacarta ianmo iro ŋgoreaca mo te, ma neaupna inikca taŋreke, anna inik maeacreke. Ainda moca mana lamnɨacniŋa neaupa wɨŋga kɨtaca, ma ndo taŋrena taupca lamŋi ŋgocor.
\p
\v 12 \x - \xo 2.12: \xo*\xt Lk 24.47, na Up 4.12, na 13.38, na 1 Ko 6.11, na 1 Io 1.7\xt*\x*Ne aukna mombonik, Karaisna i mbuŋa Raraŋ Aetaniaca nena tɨpemb ŋgorikta makukara mo kecarinandet. Aintik aku nenmo an kamma tiratna.
\p
\v 13 \x - \xo 2.13: \xo*\xt 1 Io 1.1\xt*\x*Ri, ne ater, ne an ramootmo ne matau ŋgoin ndamŋirena, ma atu ŋgoinna ramoot, ma maeacreke. Ainda moca aku nena moca an kamma tirca neaŋgapekna.
\p Na ne ramtaɨr ŋgaibca ne Ramoot Ŋgoreacmo kɨtaca mairikri. Aintik aku nenmo an kamma tirca neaŋgapekna. Na ne mombonik, ne ndorita Aetmo ne mataua lamŋirena, aintik aku nenmo an kamma tirca neaŋgatna.
\p
\v 14 \x - \xo 2.14: \xo*\xt Epe 6.10\xt*\x*Na ne atera ne atu ŋgoinna ne an ramootmo ne lamŋirina, an ramootta ma maeacreke. Aintik aku nenmo an kamma tirca neaŋgatna.
\p Na ne ramtaɨr ŋgaibca, Raraŋ Aetaniacna kamma nenap eacreke, na ne gargara mɨn.
\p Na ne ramtaɨr ŋgaibca ne gargarap eacrenan. Aintik ne Ramoot Ŋgoreacna gargarmo kɨtac irikna mɨn. Ainda moca aku nenmo an kamma tirca neaŋgatna.
\s Aia gan tiacarpaikna tɨpemb kirarirta reikta toŋtoŋgara kai mo teac
\p
\v 15 \x - \xo 2.15: \xo*\xt Mt 6.24, na Ro 8.7, na 12.2, na Gal 1.10\xt*\x*Na ne gan tiacarpaikapa mana tɨpemb kirarirtake, kai lamŋi teac. Na ramoot ianna an reikta tamŋi te, kai toŋgoca matŋi teac, na kai lamŋi teac, ma Raraŋ Aetaniacmo, ma mba mataua matŋirenanna. 
\v 16 \x - \xo 2.16: \xo*\xt Ro 13.14, na Ie 4.16, na 1 Pi 2.11\xt*\x*Aintik aia gan tiacarpaikna meikramtaɨra morena tɨpembta kirarira aia lamŋirena. Anna gan tɨpemb, tik ŋgepreke, na lamnɨacniŋ mbuŋa reaca watca matŋireke, na kam mbarac ŋgocora karwacarena. Ainta tɨpembca anna Raraŋ Aetaniacnanna wanaiŋ, anna gan tiacarpaikna tɨpemb. 
\v 17 \x - \xo 2.17: \xo*\xt Mt 7.21, na 1 Ko 7.31, na Ie 1.10, na 1 Pi 1.24\xt*\x*Na gan tiacarpaikapa, mana tɨpemb kirarirapa, lamnɨacniŋ mbuŋa matŋireke, na kam mbarac ŋgocora karwacarena, an tɨpembca tiacarpaik mai te, mitoca manap mainande. Ramootta Raraŋ Aetaniacna kam mbaraca raŋgairenan, ma iarwar ndeacraŋnande.
\s Iesusna puŋndamootta ande larua raekca tɨkrina
\p
\v 18 \x - \xo 2.18: \xo*\xt Mt 24.5, na 24.24, na 2 Te 2.3, na 1 Ti 4.1, na Ib 1.2, na 1 Pi 4.7, na 2 Pi 2.1, na 2 Io 1.7\xt*\x*Aintik aukna mombonik, ne mandeaca gan tiacarpaikna mamaina mɨn malaruca. Na ŋgaua ne Iesusna puŋndamoot aniacna lataruna kam mbaracatnanna, mandeaca mana puŋnaŋgepca wɨt tarua mamairi. Aintik aia lamŋirina, aia tiacarpaikna mamaina mɨn malaruri. 
\v 19 \x - \xo 2.19: \xo*\xt Mt 24.24, na In 6.37, na Up 20.30, na 1 Ko 11.19\xt*\x*Na outmbaica an ramtaɨra aiap eacatna, na iŋmbaia mina aimo tɨkcarica mataŋgat, na mina aina tumbun ŋgoinnanna wanaiŋ. Mina aina tumbunnan co, mina aiap eacraŋ mbe. Na mina ai narica kɨpcarica taŋrenanna, aia aind ndamŋi, anna mina ainanna wanaiŋ.
\p
\v 20 \x - \xo 2.20: \xo*\xt In 10.4, na Up 3.14, na 1 Ko 2.15, na 2 Ko 1.21, na Ib 1.9, na 1 Io 2.27\xt*\x*Ne Ŋeroŋ Ratmo ne aŋgɨra maica ne muruŋa malamŋireke. 
\v 21 Ainda moca aku nenmo gan kam tiratnan, aku gainda mba lamŋica tiratke. Ne Raraŋ Aetaniacna kam gidikca mba lamŋireke, wanaiŋ. Na aku tiratna mɨnɨŋa gaind, ne Raraŋ Aetaniacna kam gidikmo ne lamŋirena, ma paparuna kam ndopna mɨnna wanaiŋ. 
\v 22 \x - \xo 2.22: \xo*\xt 1 Io 4.3, na 2 Io 1.7\xt*\x*Na paparuna ramootta ma titocna ramoot? Mana kirara gaind. Ma aindoprena, “Iesusa Raraŋ Aetaniaca babuca mbagɨrica kɨpca aimo mac nda aŋgɨna ramootta wanaiŋ.” Na ramootta ainta kam ndop te, ma Raraŋ Aetaniacapa mana Nuocmo mba toritndai. Ma Karaisna puŋndamoot. 
\v 23 \x - \xo 2.23: \xo*\xt In 5.23, na 14.7-10, na 15.23, na 1 Io 4.15, na 5.1, na 2 Io 1.9\xt*\x*Na ramootta Raraŋ Aetaniacna Nuocmo iŋ neaŋ te, ma Raraŋ Aetaniac motocmo, ma iŋ neaŋgapekna. Na ramootta Nuocmo rɨpac te, ma Raraŋ Aetaniac motocmo ma rɨpacnande.
\s Ŋeroŋ Ratta aimo kam gidikna riptia neaŋrena
\p
\v 24 \x - \xo 2.24: \xo*\xt In 14.23, na 1 Io 1.3, na 2 Io 1.6\xt*\x*Na an kambca ŋgaua ne waracatnanna, ne matau utiŋi gagra. Na ne an ŋgauna kamma ne waracatnanmo matau utiŋi gagra te, Aetapa mana Nuoca nenapmo memetmbac ndeacraŋnandet. 
\v 25 \x - \xo 2.25: \xo*\xt In 3.15, na 6.40, na 17.3, na 1 Io 1.2, na 5.11\xt*\x*Na Karais ma aimo ainda babuatna, ma aimo an iarwarna eteacna watmo neaŋnande.
\p
\v 26 Aintik aku nemo an paparuna ramtaɨra nenmo towai paruna kirarirta kambca an tiratna. 
\v 27 \x - \xo 2.27: \xo*\xt In 14.26, na 16.13, na Ib 8.10-11, na 1 Io 2.20\xt*\x*Na ne Iesus ndambuŋna Ŋeroŋ Ratta maaŋgɨat, na ma nenap maeacreke, aintik ne landamŋiartake matpi ŋgocor, te, aku nemo an ripti mac neaŋna. Wanaiŋ. An Ŋeroŋ Ratta ndo nenmo reac, reacna landamŋi neaŋrena. Na ma mba parurenanna. Ma kam gidik ŋgoin ndoprena. Aintik Ŋeroŋ Ratta nenmo riptirina kirara ne Iesus ndambuŋa taŋi mɨk.
\s Mandeaca aia Raraŋ Aetaniacna mombonik maeacreke
\p
\v 28 \x - \xo 2.28: \xo*\xt 1 Io 3.2, na 4.17\xt*\x*Na aukna mombonik, ne Iesus Karaismo ŋaŋari mɨk, na ma larui raekca tɨk te, aia mana lamnɨac ŋgoutta wɨtɨkna numbira mba moitndai, aia manap wɨtɨki gagranandet. 
\v 29 \x - \xo 2.29: \xo*\xt Up 22.14, na 1 Io 3.7, na 3.10\xt*\x*Ne gaind ndamŋi te, Iesusna tɨp kirara wandoŋ gidik ŋgoin, na ne toco gaind ndamŋi, meikramtaɨra tɨpemb kirarir wandoik laiŋga morenanna, mina Raraŋ Aetaniacna mombonik koind malaruat.
\c 3
\p
\v 1 \x - \xo 3.1: \xo*\xt In 1.12, na 3.16, na 16.3, na Ro 8.16, na 1 Io 4.10\xt*\x*Na ne wat! Aina tamuŋna Aetta ma aimo matŋica ma ndona nikinik iro laŋmo aimo neaŋrina. Na aimo Raraŋ Aetaniacna mombonik ŋgacrena. Na anna gidik ŋgoin, aia mana mombonik. Na gan tiacarpaikna meikramtaɨra mina Raraŋ Aetaniacmo mba lamŋireke, aintik mina ai motocmo mba lamŋirenan. 
\v 2 \x - \xo 3.2: \xo*\xt Ro 8.18, na 8.29, na 1 Ko 15.49, na 2 Ko 3.18, na Pil 3.21, na Kol 3.4, na 2 Pi 1.4\xt*\x*Na aukna aikndamtaɨr koind, mandeaca aia Raraŋ Aetaniacna mombonik teacrena. Na iŋmbaia aia titoc ndeacit, anna aia mba garacreke. Na aia lamŋirenan, oit ianna Karaisa kɨpnandet, te, aia manmo matau watnandet. Na aia man toc ndarunandet. 
\v 3 Na an meikramtaɨra muruŋa mana lambirenanna, mina ndorimo Raraŋ Aetaniacna lamnɨac ŋgoutmo, moa rat ndaruca eacrena. Na an kirara Karaisa rat ndeacrenan, mitoco aind ndeacnandet.
\p
\v 4 \x - \xo 3.4: \xo*\xt Ro 4.15, na 1 Io 5.17\xt*\x*Na ramootta tɨp ŋgoreacna makukca morenanna, ma tɨp wandɨkmo ndarenan. Na tɨp ŋgoreacna makukna tɨpna kirara ma tɨp wandɨkmo ndarena. 
\v 5 \x - \xo 3.5: \xo*\xt Ais 53.5-6, na 53.11, na In 1.29, na 2 Ko 5.21, na 1 Ti 1.15, na Ib 4.15, na 1 Pi 2.22-24, na 1 Io 2.2\xt*\x*Na ne lamŋirenan, Karaisa ma kɨprinanna, ma tɨp ŋgoreacna makukca mo kecarina kɨprina, na tɨp ŋgoreacna makukca manapa mba eacrenanna. 
\v 6 \x - \xo 3.6: \xo*\xt Ro 6.1-2, na 6.14, na 1 Io 2.4, na 3.9, na 4.8, na 3 Io 1.11\xt*\x*Na ramootta Karaisap mɨk te, ma tɨp ŋgoreacna makukca mba raŋgaiitndai. Na ramoot ianna tɨp ŋgoreacna makukca raŋgai te, aia lamŋinandet, ma Karaismo mba watreke, na ma manmo mba lamŋireke.
\p
\v 7 \x - \xo 3.7: \xo*\xt Ro 2.13, na 1 Io 2.26, na 2.29\xt*\x*Na aukna nuik, ne ndoritake matau wat, moca ramoot ianna nenmo paru nari. Na ramootta tɨp kirar wandoŋ laŋa morena ramoot, ma ramoot wandoŋ, na an tɨpna kirara Karaisa ramoot wandoŋ. 
\v 8 \x - \xo 3.8: \xo*\xt RL 3.15, na Lk 10.18, na In 8.44, na 16.11, na Ib 2.14\xt*\x*Ainda moca ramootta tɨp ŋgoreacna makukca morenan, ma Paparuna Ramootna ramoot. Aintik atu ŋgoinna tɨkca kɨprinan, Paparuna Ramootta tɨp ŋgoreacna makukca memetmbaca morena. Ri, Raraŋ Aetaniacna Nuoca, ma Paparuna Ramootna aiŋmo, mo ŋgocrainanapa mo kecarinanna moca, aintik ma raek ndaruatna. 
\v 9 \x - \xo 3.9: \xo*\xt 1 Pi 1.23, na 1 Io 5.18\xt*\x*Na ramoot ianna Raraŋ Aetaniacna nuoc ndaru te, ma tɨp ŋgoreacna makukna tɨpna kirara mba raŋgairenanna. Aintik Raraŋ Aetaniacna watta an ramootap eacrenan, ainda moca ma tɨp ŋgoreacna makukna tɨpna kirara mba raŋgaiitndai. Na ma Raraŋ Aetaniacna nuoc ndeacraŋnandet. 
\v 10 \x - \xo 3.10: \xo*\xt 1 Io 2.29, na 4.8\xt*\x*Na aia lamŋi garacnande, mandaia Raraŋ Aetaniacna nuoc, na mandaia Paparuna Ramootna nuoc, te, aia gaind ndamŋina, ramootta tɨp kirar wandoŋa mo ŋgocor, ma Raraŋ Aetaniacnanna wanaiŋ. Na ramootta ndona laiplacarta ianmo matŋi ŋgocor, ma toco ma Raraŋ Aetaniacnanna wanaiŋ.
\ms Aia kabe kabea aia kabena meikramtaɨrmo toŋgoca matŋiraŋ
\mr (3.11—5.21)
\s Aia kabena meikramtaɨrmo matŋiraŋ
\p
\v 11 \x - \xo 3.11: \xo*\xt In 13.34, na 15.12, na 1 Io 1.5, na 4.7, na 4.21\xt*\x*Na ŋgau ŋgoinna ne an kambmo ne waracrinan, aia kabe, kabea kabena meacramootmo toŋgoca matŋiraŋ. 
\v 12 \x - \xo 3.12: \xo*\xt RL 4.8, na Ib 11.4, na Iu 1.11\xt*\x*Na aia Keinna kirara kai eac teac. Ma Ramoot Ŋgoreacna ramoot, aintik ma ndona lapmo, mo menacrinan. Na kaina moca ma ndona lapa mo menacrina? Ma manmo, mo menacrinanna, mana tɨpna kirara laŋa wanaiŋ, na mana lapna tɨpna kirara wandoŋ.
\p
\v 13 \x - \xo 3.13: \xo*\xt Mt 5.11-12, na In 15.18-19, na 17.14, na 2 Ti 3.12\xt*\x*Na Iesusa rɨpacrena laiplacar, gan tiacarpaikna meikramtaɨra nenmo puŋnaŋgepca mo te, ne anna moca kai ŋgep ŋgoreac naŋgep teac. 
\v 14 \x - \xo 3.14: \xo*\xt In 5.24, na 1 Io 2.9-11\xt*\x*Na aia kabena meikramtaɨrmo matŋiraŋ, ainda moca aia lamŋirena, aia memenacna tɨpna kirara aia tɨkcamacariri, na aia iarwarna eteacna watna tɨpna kirar ndeacrena. Na ramootta Iesusa rɨpacrena laiplacarmo matŋi ŋgocor, ma memenacna tɨpna kirara maeacreke. 
\v 15 \x - \xo 3.15: \xo*\xt Mt 5.21-22, na Gal 5.21, na KIEK 21.8\xt*\x*Na ramootta ma ndona laiplacarmo matŋi ŋgocor, na minmo nikinik iro ŋgoreacap, anna ma ramootta mo menacna tɨpna kirarap. Na ne lamŋirena, ramootta kabena ramootmo, mo menac te, anna ma iarwarna eteacna watmo ma mba aŋgɨritndait. 
\v 16 \x - \xo 3.16: \xo*\xt In 3.16, na 13.1, na 15.13, na Ro 5.8, na Gal 1.4, na Epe 5.2, na 5.25, na 1 Te 2.8\xt*\x*Ainda moca Iesusa ndona watnan kecarica, menaca aimo otacna morina, na mana an tɨpna kirara ma aimo wandacrinanna, kabena meikramtaɨrmo matŋirena tɨpna kirara aind. Na ai toco aia ndorita wat kecaria Iesusa rɨpacrena laiplacarmo otacna. 
\v 17 \x - \xo 3.17: \xo*\xt TW 15.7, na Lk 3.11, na 1 Io 4.20\xt*\x*Na ramoot ianna gan tiacarpaikna reikap te, na ma wat te, kabena laiplacara reikca matpi te, na ma manmo kakadmai kocor, te, aia lamŋinandet, Raraŋ Aetaniacna kabena meikramtaɨrmo matŋirena tɨpna kirara an ramoot ndambuŋa kamaind. 
\v 18 \x - \xo 3.18: \xo*\xt Ro 12.9, na Ie 2.15-16, na 1 Pi 1.22\xt*\x*Na aukna nuik, aia laiplacarmo kambapa up mbuŋa kai matŋiraŋ teac. Wanaiŋ. Aia minmo mamatŋi gidikca neaŋ, na minmo tɨpemb kirarir laiŋga moraŋ.
\s Iesusa rɨpacrena laiplacara Raraŋ Aetaniacna lamnɨac ŋgoutmo gagraca wɨtɨk
\p
\v 19-20 \x - \xo 3.19-20: \xo*\xt In 18.37, na 1 Io 1.8\xt*\x*Na aia kabena meikramtaɨrmo gidikca toŋgorenan te, aia lamŋinandet, anna aia kam gidikca raŋgairena. Na mindacniŋ aina nikinik iroa reac ianna ritri waparaca mo te, aia Raraŋ Aetaniacna lamnɨac ŋgoutmo nikinik iro wetwet ndeacraŋna. Na anna gaind, Raraŋ Aetaniaca ma reikmo muruŋ ndamŋirenan, na mana landamŋia ma aina nikinik iroarmo kunda tamuŋmbai. 
\v 21 \x - \xo 3.21: \xo*\xt Ib 4.16, na 10.22, na 1 Io 2.28, na 4.17\xt*\x*Na aukna aikndamtaɨr koind, aina iroar inkara aimo ritri waparaca mo ŋgocor te, aia Raraŋ Aetaniacna lamnɨac ŋgoutmo aia gagraca wɨtɨknandet. 
\v 22 \x - \xo 3.22: \xo*\xt Ŋap 34.15, na Ier 29.12, na Mt 7.8, na 21.22, na In 9.31, na 14.13\xt*\x*Na aia mbendeia reac ianna digi te, ma aimo neaŋnandet, an kɨdrɨkca aia mana kamma raŋgairenan, na man toŋgorena kamma aia morena. 
\v 23 \x - \xo 3.23: \xo*\xt In 6.29, na 13.34, na 15.12, na 15.17, na 17.3, na 1 Te 4.9, na 1 Pi 4.8, na 1 Io 2.8-10\xt*\x*Na mana kamma gaind. Aia mana Nuoc Iesus Karaisna i mbuŋa rɨpacraŋ, na kabe, kabea kabena meikramtaɨrmo matŋiraŋ, na an kirara ma aimo mbopatna. 
\v 24 \x - \xo 3.24: \xo*\xt In 14.23, na 15.10, na 17.21, na Ro 8.9, na 1 Io 4.12-13\xt*\x*Na ramoot ianna Raraŋ Aetaniacna kamma raŋgai te, ma Raraŋ Aetaniacap mɨkrinan, na Raraŋ Aetaniaca manap mɨkrinan. Na Raraŋ Aetaniaca aimo Ŋeroŋ Ratta neaŋrinan, na an Ŋeroŋa aimo gainda wandacrinan, Raraŋ Aetaniaca aiap eacrena.
\c 4
\s Ne ŋerŋgaurmo towai, mina Raraŋ Aetaniac ndambuŋnan kɨprinan, co wanaiŋ
\p
\v 1 \x - \xo 4.1: \xo*\xt Mt 7.15, na 24.4-5, na 24.24, na 1 Te 5.21, na 2 Pi 2.1, na 1 Io 2.18, na 2 Io 1.7, na KIEK 2.2\xt*\x*Na aukna aikndamtaɨr koind, paparuna rambca morena ramtaɨra gan tiacarpaik ndaruca tamtam mataŋgat. Ainda moca nen ndambuŋ nakɨprena ramtaɨra aindop te, “Raraŋ Aetaniacna Ŋeroŋa aukmo kam neaŋrinan,” anna ne kai rɨpac teac. Ainda moca ne ŋerŋgaurmo muruŋa towai te, ne lamŋinandet, mina Raraŋ Aetaniac ndambuŋnan kɨprinan, co wanaiŋ. 
\v 2 \x - \xo 4.2: \xo*\xt 1 Ko 12.3, na 1 Io 5.1\xt*\x*Na nena tɨpna kirara ma Raraŋ Aetaniacna Ŋeroŋmo lamŋinandet, ma aintan. Na ramootta aindop te, “Iesus Karaisa ma ramootna kirar toc ndaruca taŋrena,” te, Raraŋ Aetaniacna Ŋeroŋa an ramootap eacrenan. 
\v 3 \x - \xo 4.3: \xo*\xt 2 Te 2.7, na 1 Io 2.18, na 2.22, na 2 Io 1.7\xt*\x*Na ramootta Iesusmo ainta kambca mbop ŋgocor te, an ramootta ma kabena ŋeroŋap eacrena, na anna Raraŋ Aetaniacnanna wanaiŋ. Na anna ma Karaisna puŋndamootna ŋeroŋ, na ŋgaua ma kɨp ndoprina kambca ne waracrinan. Na mandeaca ma laruca gan tiacarpaik ndeacrena.
\p
\v 4 \x - \xo 4.4: \xo*\xt Mt 12.29, na In 16.33, na 1 Ko 2.12, na Epe 2.2, na 6.12, na 1 Io 5.4-5\xt*\x*Na aukna nuik teker, ne Raraŋ Aetaniacnan, na ne an paparuna rambca morena ramtaɨrmo, moa irikrinan. Na an Ŋeroŋa nenap eacrenanna, ma an ŋeroŋa gan tiacarpaik inikna ramtaɨrap eacrenanmo kundrinan. 
\v 5 \x - \xo 4.5: \xo*\xt In 3.31, na 15.19, na 17.14\xt*\x*Na an ramtaɨra mina gan tiacarpaikna meikramtaɨr. Aintik mina kambca ma gan tiacarpaiknan niŋgik, na gan tiacarpaikna meikramtaɨra mina ndori tiŋgikca, mina kambmo waracrena. 
\v 6 \x - \xo 4.6: \xo*\xt In 8.47, na 10.27, na 14.17, na 1 Ko 14.37, na 2 Ko 10.7\xt*\x*Na aia Raraŋ Aetaniacnan, na meikramtaɨra Raraŋ Aetaniacmo lamŋirenan, mina aina kammo waracrena. Na ramootta Raraŋ Aetaniacnanna wanaiŋ, ma aina kammo mba waracitndai. Na an tɨpna kirara mbuŋa aia kam gidikna Ŋeroŋmo lamŋinandet, na paparuna ŋeroŋ motocmo lamŋinandet.
\s Na ramootta Raraŋ Aetaniacnanmo gidikca toŋgorenan ma kabenan motocmo toŋgo
\p
\v 7 \x - \xo 4.7: \xo*\xt 1 Io 2.29, na 3.10-11, na 3.23\xt*\x*Na aukna aikndamtaɨr koind, aia kabe, kabea kabena meikramtaɨrmo matŋiraŋ. Na an kabenanna matŋina tɨpna kirara, anna Raraŋ Aetaniacna tɨpna kirar. Na ramootta kabena meikramtaɨrmo matŋirenan, ma Raraŋ Aetaniacna nuoc, na ma Raraŋ Aetaniacmo matau ŋgoinna lamŋirenan. 
\v 8 \x - \xo 4.8: \xo*\xt 1 Io 2.4, na 3.6, na 4.16\xt*\x*Na Raraŋ Aetaniac ma an mamatŋina tɨpna kirarna mɨnɨŋ. Aintik ramootta kabena meikramtaɨrmo mba matŋirenan, ma Raraŋ Aetaniacmo mba lamŋirenanna. 
\v 9 \x - \xo 4.9: \xo*\xt In 3.16, na Ro 5.8, na 8.32, na 1 Io 5.11\xt*\x*Na Raraŋ Aetaniaca ma Nuoc kabe niŋgik ŋgoinap, na ma an Nuocmo gan tiacarpaikca mbagɨrica kɨprinan, te, aia iarwarna eteacna watta man ndambuŋnan aŋgɨnandet. Na an tɨpna kirar mbuŋa Raraŋ Aetaniaca aimo wandacrina, ma aimo mamatŋi ŋgoin. 
\v 10 \x - \xo 4.10: \xo*\xt In 15.16, na Ro 5.8-10, na Ta 3.4, na 1 Io 2.2\xt*\x*Na kabena meikramtaɨrmo matŋirena tɨpna kirara, anna Raraŋ Aetaniacna tɨpna kirar. Ainda moca aia gainda kai lamŋi teac, aia Raraŋ Aetaniacmo outta matŋirinan, wanaiŋ ŋgoin, ma ndo aimo outta matŋirina. Aintik ma ndona Nuocmo mbagɨrica gan tiacarpaik nakɨpca, aina tɨpemb ŋgorikta makukara mo kecarinan.
\p
\v 11 \x - \xo 4.11: \xo*\xt Mt 18.33, na In 15.12-13, na 1 Io 3.16\xt*\x*Ainda moca aukna aikndamtaɨr koind, Raraŋ Aetaniacna an tɨpna kirar mbuŋa ma aimo wandacrinan, ma aimo mamatŋi ŋgoin. Aintik aia kabe, kabea kabena meikramtaɨrmo matŋiraŋ. 
\v 12 \x - \xo 4.12: \xo*\xt In 1.18, na 1 Ti 6.16, na 1 Io 2.5-6, na 4.18-20\xt*\x*Na ramoot ianna Raraŋ Aetaniacmo mba watreke. Na aia kabena meikramtaɨra matŋi te, Raraŋ Aetaniaca ma aiap mɨkraŋnandet, na mana an kabenanmo matŋirina tɨpna kirara, ma aina eteacna watna inikca laruca wandoŋ niŋgik.
\p
\v 13 \x - \xo 4.13: \xo*\xt In 14.20, na 2 Ko 1.22, na 1 Io 3.24\xt*\x*Na aia lamŋirinan, aia manap mɨkrenan, na ma aiap mɨkrenan, aintik ma aimo ndona Ŋeroŋ neaŋrina. 
\v 14 \x - \xo 4.14: \xo*\xt In 1.14, na 3.17, na 1 Io 1.1-2\xt*\x*Na Aetta ma aindoprina, reaca aia mawatri. Ainda moca ma ndona Nuocmo mbagɨrica gan tiacarpaik nakɨpca meikramtaɨrmo muruŋa mac nda aŋgɨna, na aia an reacna kambmo wiwitirena. 
\v 15 \x - \xo 4.15: \xo*\xt Ro 10.9, na 1 Io 5.1, na 5.5\xt*\x*Na ramoot ianna gaindop laru te, “Iesusa ma Raraŋ Aetaniacna Nuoc,” te, Raraŋ Aetaniaca an ramootap mɨkrinan, na ma manap mɨkrina. 
\v 16 \x - \xo 4.16: \xo*\xt 1 Io 3.24, na 4.8, na 4.12\xt*\x*Ainda moca aia lamŋirena, na aia ainda gagraca rɨpacrina. Na Raraŋ Aetaniaca ma aimo matŋirenan ŋgoin, na mana an tɨpna kirara ma aina eteacna watap eacrenan.
\p Na ma ndo ŋgoinna ma kabena meikramtaɨrmo mamatŋina mɨnɨŋ. Na ramootta kabena meikramtaɨrmo mamatŋirenan, ma Raraŋ Aetaniacap mɨkrinan, na ma manap mɨkrina. 
\v 17 \x - \xo 4.17: \xo*\xt Ie 2.13, na 1 Io 2.28, na 3.3, na 3.19-21\xt*\x*Na aia aind ndeacraŋ te, an kabena meikramtaɨrmo mamatŋina tɨpna kirara ma aina eteacna watna inikca ma gagrarinan. Na mana ritri waparacna ra aniaca aia nanambia rugdara mba moitndaiit. Na anna gidik, aia gan tiacarpaik ndeacrenan, aia Karaisa ndo eacrena kirar ndeacrenan, aintik aia kai nanambi teac. 
\v 18 Na ramootta kabena meikramtaɨrmo matŋirenanna, ma mba nanambirenan. Na kabena meikramtaɨrmo matŋirena tɨpna kirara, ramoot ianna eteacna watta gagra te, anna ndo nanambina tɨpna kirara moa kecarirenan. Na nanambina mɨnɨŋa gaind. Ramootta ma lamŋirena, ma opoik ŋgoreaca aŋgɨnandet, na anna ndo manmo moa nanambirenan. Na ma nanambi te, aia lamŋinandet, kabena meikramtaɨrmo mamatŋina tɨpna kirara mana eteacna watmo mba gagrareke.
\p
\v 19 Ainda moca aia kabena meikramtaɨrmo matŋirenanna, anna gaind, out ŋgoinna Raraŋ Aetaniaca aimo matŋirina. 
\v 20 \x - \xo 4.20: \xo*\xt 1 Io 2.4, na 3.17, na 4.12\xt*\x*Na ramoot ianna aindop te, “Aku Raraŋ Aetaniacmo mamatŋi ŋgoin,” na ma ndona laiplacarmo mba matŋirenanna, te, an ramootta ma paparuna ramoot. Na ramoot ianna Raraŋ Aetaniacmo mba watatke. Ainda moca ramootta an meikramtaɨrmo ma minmo watrinanna, na ma minmo matŋi ŋgocor, te, an Raraŋ Aetaniaca ma wat ŋgocortanmo, ma manmo mba matŋiitndai. 
\v 21 \x - \xo 4.21: \xo*\xt Mt 5.44-45, na Mk 12.29-31, na In 13.34, na 15.12, na 1 Io 3.23\xt*\x*Na an tɨpca aia Karais ndambuŋnan aŋgɨrinanna ma gaind. Na ramootta Raraŋ Aetaniacmo mamatŋi ŋgoinna morenan, ma ndona laiplacarmo mamatŋi ŋgoinna monande.
\c 5
\s Iesusa rɨpacrena laiplacara gan tiacarpaikna gargarmo kunda eacrena
\p
\v 1 \x - \xo 5.1: \xo*\xt In 1.12-13, na 15.23, na 1 Io 2.22-23, na 4.15\xt*\x* Na meikramtaɨra muruŋa Iesusmo rɨpacrenan, na ma an ramootta Raraŋ Aetaniaca babuca mbagɨrica kɨpca aimo mac nda aŋgɨna ramoot, aintik mina Raraŋ Aetaniacna mombonik tarurina. Ainda moca meikramtaɨra muruŋa aet kabea matŋirenan, mina muruŋa mana mombonik motoco matŋirena. 
\v 2 Te, aia Raraŋ Aetaniacmo matŋica mana tɨpemb wandikmo mataui raŋgai te, an kirarir puŋga, aia ndorimo lamŋi rapacnande, aia Raraŋ Aetaniacna mombonikmo mataua matŋica maraupŋireke. 
\v 3 \x - \xo 5.3: \xo*\xt Mai 6.8, na Mt 11.30, na In 14.15, na 14.21-24, na 2 Io 1.6\xt*\x*Na aia Raraŋ Aetaniaca matŋi te, aia mana tɨpembta kirarirmo, mataui raŋgaina. Na mana an tɨpembca, aimo makukara neaŋna mɨnna wanaiŋ. 
\v 4 \x - \xo 5.4: \xo*\xt In 16.33, na 1 Io 3.9, na 4.4\xt*\x*Aintik meikramtaɨra muruŋa Raraŋ Aetaniacna mombonik tarurenan, mina gan tiacarpaikna gargarmo kɨtac iriknande. Ainda moca aia Raraŋ Aetaniac niŋgikca rɨpac, an taup mbuŋa aia gan tiacarpaikna gagrarmo ruŋi kɨtaci irikca, kunda tamuŋ ŋgoin ndeacnande.
\s Raraŋ Aetaniaca ndona Nuocna kammo mboprina
\p
\v 5 \x - \xo 5.5: \xo*\xt Ro 8.37, na 1 Ko 15.57, na 1 Io 4.4, na 4.15\xt*\x*Na mandaia gan tiacarpaikna gargarmo kɨtac irikna mɨn? Na ramootta Raraŋ Aetaniacna Nuoc Iesusa rɨpac te, ma gan tiacarpaikna gagrarmo ma kɨtac irikna mɨn. 
\v 6-8 \x - \xo 5.6-8: \xo*\xt In 1.1, na 1.29, na 1.34, na 10.30, na 14.17, na 15.26, na 16.13, na 19.34, na 1 Ti 3.16, na 1 Io 1.7, na KIEK 19.13\xt*\x*Na an ramoot Iesus Karais, ma gan kirar mbuŋa kɨpatna, kɨtac puk aŋtaŋgɨna kirarap, ik nakeraca ndona racaindpaiknanna kactaca irikatna kirar mbuŋ nakɨpatna. Na ma puk mbuŋna kɨtac pukna kirar niŋgik ndiŋa mba kɨpatke, wanaiŋ ŋgoin. Ma pukna kɨtac pukapa racaindpaikapna, kirar mbuŋ nakɨpatna. Na Ŋeroŋ Rat, ma ndo kam gidikna mɨnɨŋ, na ma ndo Iesusna morena kirarirta kam wiwitirena. An reik, mbonkaca mina ndori, mana kirarirta kam wiwitia wandacrena. An reikca ianna Ŋeroŋ Rat, na ianna puk, na ianna mana racaindpaik. Na mina ndori kam iro kabe niŋgikna kam leacrena.
\p
\v 9 \x - \xo 5.9: \xo*\xt Mt 3.16-17, na 17.5, na In 5.32-37, na 8.17-18\xt*\x*Na aia meikramtaɨr mboprena kambca waraca rɨpacrena, na Raraŋ Aetaniacna mbopatna kamb, an meikramtaɨrta kambmo kundrina. Na mana Nuocna kamma anna ma atuna wiwitia mbopatna. 
\v 10 \x - \xo 5.10: \xo*\xt In 3.33, na 5.38, na Ro 8.16, na Gal 4.6\xt*\x*Na ramootta Raraŋ Aetaniacna Nuoca rɨpacrenan, ma Raraŋ Aetaniacna wiwitiatna an kambca ma aŋgɨra mana iro inik maeacreke. Na ramootta Raraŋ Aetaniacna kambca rɨpac ŋgocor, ma Raraŋ Aetaniacna kammo ma paparu ndopnande. Aintik Raraŋ Aetaniaca ndona Nuocna tɨpemb kirarirta kambca an topatnanna, ma waraca mba rɨpacri. 
\v 11 \x - \xo 5.11: \xo*\xt In 3.36\xt*\x*Mana kambca gidkar koind, an kirarir puŋga, ma aimo anna wandacrina. Ainda moca Raraŋ Aetaniaca aimo iarwarna eteacna wat neaŋgatna. Na mana Nuoca ma an iarwarna eteacna wat ŋgam, na man niŋgikca ma ndo anna mɨnɨŋ. 
\v 12 \x - \xo 5.12: \xo*\xt In 3.36, na 5.24\xt*\x*Na ramootta Raraŋ Aetaniacna Nuocmo taŋi mɨk te, ma iarwarna eteacna watap. Na ramootta Raraŋ Aetaniacna Nuocmo taŋi mɨk ŋgocor, an iarwarna eteacna watta manap mba eacitndai.
\s Ionna mamamaina kam
\p
\v 13 \x - \xo 5.13: \xo*\xt In 20.31, na 1 Io 1.1-2\xt*\x*Na ne Raraŋ Aetaniacna Nuocna i mbuŋa rɨpaca utiŋrena meikramtaɨra, aku gan kamma nena moca tirrina, nemo anna wati rapacna moca, na an iarwarna eteacna watta ne maaŋgɨri. 
\v 14 \x - \xo 5.14: \xo*\xt In 14.13, na 16.23, na 1 Io 3.21-22\xt*\x*Na aia Raraŋ Aetaniacna toŋtoŋ niŋgik ŋgoinna raŋgairaŋ te, na aia mana toŋgorena kirar ndiŋa mbendeica digi te, ma aina mbendeiekna kamma, ma waracnandet. Ainda moca aia man narica mba nanambirenanna, wanaiŋ ŋgoin. Aia mana kɨtɨmma taŋrena. 
\v 15 Aintik aia lamŋirena, aia mamo mbendeica digirena kambca, ma waracrena. Ainda moca aia manmo ndorimo reac ian neaŋna moca digirenanna. Aia rɨpaca lamŋirina, an reaca, ma aimo gidik ŋgoinna neaŋnande.
\p
\v 16 \x - \xo 5.16: \xo*\xt Mt 12.31-32, na Lk 12.10, na Ib 6.4-6, na Ie 5.14-15\xt*\x*Na ramootta, u Iesusa rɨpacrena laiplacarta ianna tɨp ŋgoreacna makukca moeknanna wat te, mana morina tɨp ŋgoreacna makukca, mamo mo menacna mɨnna wanaiŋ, te, u Raraŋ Aetaniacmo mbendei digica, ma mamo otaca, mamo wat manan mac nda neaŋna. Na aku mboprena tɨp ŋgoreacna makukna kamma, aku an tɨp ŋgoreacna makuk ianna meikramtaɨrmo mba moa menacrenanna, an tɨp ŋgoreacna makukna kamma aku an ndoprena. Na tɨp ŋgoreacna makuk ianna, anna meikramtaɨrta, ŋerŋgaurmo mo menacna mɨn, na aku nemo meikramtaɨra an tɨp ŋgoreacna makukca morenanna, mbendei nake mba mbopri. 
\v 17 Na tɨpemb kirarira muruŋa laiŋga wanaiŋ, mina maeacreke. An tɨpemb kirarir, anna tɨpemb ŋgorikta makukar. Na tɨp ŋgoreacna makuk ianna, ma meacramootna ŋeroŋmo mba mo menacitndai.
\p
\v 18 \x - \xo 5.18: \xo*\xt In 17.15, na Ie 1.27, na 1 Pi 1.23, na 1 Io 3.9\xt*\x*Na meikramtaɨra Raraŋ Aetaniacna mombonik teacrenan, aia minmo lamŋirena mina mba tɨp ŋgoreacna makukca mba moraŋitndai. Wanaiŋ ŋgoin. Raraŋ Aetaniaca minmo aŋgɨra raupŋia ndona bubuocna kaŋgaukca tɨkca, mina mana mombonik teacrena. Na Ramoot Ŋgoreaca minmo reac ianna mona mɨnna wanaiŋ. 
\v 19 \x - \xo 5.19: \xo*\xt Ro 8.10, na 8.23, na Gal 1.4, na 1 Io 4.6\xt*\x*Na gan tiacarpaikca Ramoot Ŋgoreacna gargarna kaŋgauk ndeacrena. Aintik aia lamŋirena, aia wanaiŋ, aia Raraŋ Aetaniacna mombonik.
\p
\v 20 \x - \xo 5.20: \xo*\xt Ais 9.6, na Mt 25.46, na In 17.3, na 1 Ti 3.16, na Ib 1.8\xt*\x*Na aia lamŋirina, Raraŋ Aetaniacna Nuoca kɨpca eacreke, ainda moca ma aimo iro landamŋi neaŋrena, aimo Raraŋ Aetaniaca watirapaca, manapa mana Nuoc Iesus Karaisap, maniŋmo taŋi mɨkna moca. Aintik Iesus, ma Raraŋ Aetaniac, ma ndo iarwarna eteacna watna mɨnɨŋ.
\p
\v 21 \x - \xo 5.21: \xo*\xt 1 Ko 10.14\xt*\x*Ainda moca aukna mombonik, ne gan tiacarpaikna mɨrpembraraiŋ tarica, iukaia tawan ndeac.\fig Ne gan tiacarpaikna mɨrpembraraiŋ tarica iukaica tawan ndeacraŋ|alt="You must avoid this worlds false god and stay faraway." src="MB false gods.tif" size="col" copy="Enoch Magum Abba" ref="5.21"\fig*