\id 2TH  
\h Tesalonika Ɗiɗaɓol 
\toc1 Ɗerewol ɗiɗaɓol ŋol Pol winnani ɓe Tesalonika 
\toc2 Tesalonika Ɗiɗaɓol 
\mt2 Ɗerewol ɗiɗaɓol ŋol Pol winnani ɓe  
\mt1 Tesalonika  
\is1 Haala Puɗɗirka  
\ip Pol, e Silaasi, e Timote nun hawti winnani ɓe Tesalonika ɗerewol ŋol. Siire Korintu ɓe goni, diga ton nun ɓe binni ŋol. Pol yettii goonɗinɓe Tesalonika puy, sabbu goonɗinki maɓɓe e no ɓe tinnorii baa der tooraaji maɓɓe. O moƴƴinii boofol dow no ɓe keɗorii wittoygo Joomiraawo.  
\ip Sabbu tooraaji ɗi ɓe tooretee, ɓe Tesalonika e miili nyalaane darŋal nun yottii. Pol batii ɓe no nyalaane nen warataa to neɗɗo kalluɗo artay wari. To o warii, o haɓidan ko wi'etee Alla fu, e ko teddintee dow laawol diina fu.  
\ip Der hoore 3, ɓaawo no Pol eeli ɓe du'anoo ɗum, o eelii ɓe ɓe boɗɗodoo e himɓe ɓe yiɗaa gollaago, gam ɓee miila no der wakkati cakitiiki nun ɓe gonii. O batii ɓe o wi'i: «Mo gollaaki haanay nyaama».  
\iot Tokkontirki haalaaji  
\io1 1. Haala puɗɗirka, 1.1-2  
\io1 2. Pol manii himɓe Tesalonika, du' anii ɓe, 1.3-12  
\io1 3. Ekkitinol dow wittoyki Almasiihu, 2.1-17  
\io1 4. No haani goonɗinɓe yahira, 3.1-15  
\io1 5. Haalaaji cakitiiɗi e cannooje, 3.16-18.  
\c 1  
\s1 Sannoore  
\p
\v 1 Ɗerewol ŋol ƴiwii diga e Pol, e Silaasi, e Timote. Emen canna eklesiya Tesalonika, kawtuka e Alla Baaba meeɗen, e Joomiraawo meeɗen Yeesu Almasiihu.  
\v 2 Alla Baaba, e Yeesu Almasiihu Joomiraawo, hokka on moƴƴere e jam!   
\s1 Goonɗinki ɓe Tesalonika  
\p
\v 3 Banniraaɓe, e haani men jetta Alla wakkati fu gam mooɗon. Eɗum fotti, gam goonɗinki mooɗon e ɓeydoo yeeso yeeso, kade bo yidde ne goodontirɗon hakkune mooɗon e ɓeydoo der moy mooɗon.  
\v 4 Kanjum acci emen juroro on der eklesiyaaji Alla. Emen juroro munyal mooɗon, e goonɗinki mooɗon, der tooraaji ɗi tooreteɗon, e ɓillaaje ɗe munyanton.   
\p
\v 5 Tooraaji ɗin laati nun ko hollitinta kiita Alla poonnitiika, gam laatoɗon fotuɓe naatugo der Laamaare Alla, ne gam mum tooreteɗon.  
\v 6 Gam eɗum foonnitii yeeso Alla, o yoɓa tooranɓe on, toora.  
\v 7 Onon toorootooɓe, o hokkan on siwtaare e amen. Ɗum laatoto to Joomiraawo meeɗen Yeesu gonuɗo dow kammu suppitoyke e malaykaaɓe mum ɓe baawɗe.  
\v 8 Nyalaane majjum, o suppitinto der ɗenŋal yiite, gam o fooɗa noppi ɓe annaa Alla, e ɓe ɗowtanaaki linjiila Joomiraawo men Yeesu.  
\v 9 Pooɗol maɓɓe noppi e foonnitii, halkere tabitiine nun, ɓe boɗɗodinto e Joomiraawo e tedduŋal baawɗe mum.  
\v 10 Ɗum laatoto der nyalaane ne o wittoyta. Den himɓe makko teddinan mo, goonɗinɓe mo fu haaynee gam makko. Onon bo, on gonoto caka maɓɓe, gam on goonɗinii waaji men baajii on.   
\p
\v 11 Gam majjum emen du'anoo on wakkati fu. Emen eela Alla meeɗen laatina on fotuɓe noddoore ne o noddi on. Baawɗe makko hokka on semme hebbingo golle booɗuɗe ɗe jiɗuɗon waɗugo fu, gam on goonɗinii mo.  
\v 12 Hande nun inne Joomiraawo meeɗen Yeesu teddinirtee der mooɗon, onon bo, teddineɗon gam makko. Ɗum fu, gam moƴƴere Alla meeɗen, e Yeesu Almasiihu Joomiraawo.   
\c 2  
\s1 Nyalaane Joomiraawo  
\p
\v 1 Banniraaɓe, dow garki Joomiraawo meeɗen Yeesu Almasiihu, e no kawritirteɗen e makko, nani ɗo ko men eelata on:  
\v 2 To on accee hakkillo mooɗon jiɓoo law. To on accee bo goɗɗo huunna on der annabaaku mum, ɗum bo der haala mum, ɗum bo goɗɗo wi'a, men binnii ka der ɗerewol amen no nyalaane Joomiraawo warii ko.  
\v 3 To on accee goɗɗo ƴoyra on baa dow laawol ŋole. Gam nyalaane nen warataa to hinaa himɓe ɗuuɓɓe yeddi Alla, neɗɗo kalluɗo, laatiiɗo ɓii halkere suppitoo.  
\v 4 Ganyo on mawnitinto dow huune fu ko saafetee e noddee Alla, o yahan faa o jooɗoo der suudu Alla, o wi'a hoore makko, kanko woni Alla.   
\p
\v 5 Mi batiino on ka wakkati gonnoomi to mooɗon, on ciwtoray na?  
\v 6 Jooni kan oon anni ko faddii mo warugo. Amma o hollitinto to wakkati makko waɗii.  
\v 7 Gam baawɗe hakke cuuɗiiɗe e golloo ko diga jooni. Amma paddiiɗo ɗe na'on taw. To o yawtii, den  
\v 8 neɗɗo kalluɗo on suppitinto. Amma Yeesu Joomiraawo waran mo e foofaaŋo hunnuko mum, halka mo e jayŋol garki mum.  
\v 9 Neɗɗo kalluɗo on waridan e baawɗe Seyɗan, o waɗan kaayeefiiji, e maaneeji, e kaayeefiiji fewrekuuji.  
\v 10 O eytan halkooɓe e hakkeeji ɗiye fu. Ɓe majjan, gam ɓe jiɗay gooŋa kaa ɗo hisinta ɓe.  
\v 11 Gam majjum Alla lildanoyta ɓe baawɗe majjinooje, heɓa ɓe goonɗina fewre.  
\v 12 O waɗan ɗum gam o hiitoo ɓe goonɗinay gooŋa, go ɓee ceyoroo ko foonnitaaki.   
\s1 Semmiɗingo der goonɗinki  
\p
\v 13 Banniraaɓe, yiɗaaɓe Joomiraawo, menen, doole men jetta Alla wakkati fu gam mooɗon. Alla suɓii on diga fuɗɗoode, gam kison diga e Ruuhu Ceniiɗo laaɓinɗo on, gam on goonɗinii gooŋa.  
\v 14 Kanjum Alla noddani on diga e linjiila ka men baajii on, gam keɓon tedduŋal Joomiraawo meeɗen Yeesu Almasiihu.  
\v 15 Gam majjum banniraaɓe, tabitee wakkati fu, jogee ko men ekkitini on e haala, ɗum bo e ɗereeji amen.   
\p
\v 16 Joomiraawo meeɗen Yeesu Almasiihu e hoore mum, e Alla Baaba meeɗen, jiɗuɗo en, hokkii en moƴƴere mum e jam tabitiiɗo, e tammuwe wooɗune.  
\v 17 Ɓe deƴƴitina ɓerɗe mooɗon, ɓe tiiɗina on waɗugo, e batugo ko wooɗi.   
\c 3  
\s1 Du'anee men  
\p
\v 1 Banniraaɓe, ko horii woni, du'anoɗon men gam haala Joomiraawo sankitoo law, ka teddinee bo hande to mooɗon.  
\v 2 Du'ee gam men daɗa himɓe ɓe walaa ko'e, bonɓe. Gam himɓe fu bane goonɗini.   
\p
\v 3 Amma Joomiraawo e laatii koolaaɗo, o semmiɗinan on, o reena on e ganyo.  
\v 4 Gam daliila Joomiraawo, emen koolii on, oon tokki umurooje ɗe men umuri on, on tokkoto ɗe bo yaago.   
\p
\v 5 Joomiraawo acca ɓerɗe mooɗon yiɗa Alla, munyon hande no Almasiihu munyiri!   
\s1 Moy fu golloo  
\p
\v 6 Banniraaɓe, emen eela on e inne Joomiraawo meeɗen Yeesu Almasiihu, boɗɗodee banniraaɓe ɓe walaa gaɗaaŋal, ɓe tokkay ko men ekkitini on.  
\v 7 Onon e ko'e mooɗon, oon anni no haani yemminiron men, gam men gonday e mooɗon der dullere gaɗaaŋal.  
\v 8 Walaa mo men nyaami nafa mum baanji. Jemma e nyalooma fu, men gollike e comuri, gam to men laatano goɗɗo mon doongal.  
\v 9 Men baawanno ko eeli on nyaamdu, amma men gaɗay ɗum. Men gollike e ko'e amen gam men laatanoo on misaalu, gam yemmenen men.  
\v 10 Gam wakkati men gonunoo to mooɗon, men batiino on, men bi'i: «Mo yiɗaa gollaago fu, to nyaamu bo.»   
\p
\v 11 Gam men nani woɓɓe caka mon yiɗaa gaɗaaŋal, sey naatugo haalaaji ɗi yaalay ɗum.  
\v 12 Emen eela iri himɓe ɓen, emen bata ɓe e inne Joomiraawo meeɗen Yeesu Almasiihu, ɓe golloo e jam, gam ɓe nyaanna ko'e maɓɓe.   
\p
\v 13 Amma onon banniraaɓe, to on comee waɗugo ko wooɗi.  
\v 14 To goɗɗo salike ko ɗowtanii ko men binni der ɗerewol ŋol, maanee joomum, boɗɗoɗon mo, gam o senta.  
\v 15 Amma, to on daaree mo hande ganyo, bagginee mo hande banniraawo.   
\s1 Cannooje  
\p
\v 16 Joomiraawo mo jam e hoore mum hokka on jam wakkati fu, e der noy fu. Joomiraawo wonda e mooɗon, on fu.   
\p
\v 17 Min Pol winni e junŋo am sannoore ne, hande non boowirmi wattirgo ɗereeji am fu junŋo.   
\p
\v 18 Moƴƴere Joomiraawo meeɗen Yeesu Almasiihu wonda e mooɗon, on fu!