\id PHP  - Faiwol NT [fai] -Papua New Guinea 1995 (DBL 2014) 
\h Filibai 
\toc1 Filibai 
\toc2 Filibai 
\toc3 Fi 
\mt1 Filibai  
\c 1  
\p
\v 1 Kale nuka Faul so Timoti so Yesus Kadais ami wok fakudawin kinim nuta adikum Got ami wanang kinim Filibai abiw bom Yesus Kadais so makuw kei bidiw so Got kinim gu imi gebom gebom so dakáyamin kinim so kimino, kale sauk kon bela goduyamuw ko.  
\v 2 Naka nulum Natim Got so Kamok Yesus Kadais so iyo ilim min gelemin so aket dakbudin so uyo kuyamin kala kale Got gánlabi ko.   
\s1 Faul Got gánlawin sung uta ko.  
\p
\v 3 Naka kim aket uyo atan makuw makuw fukan bom nadile naka nalam Got so ken keiyo, kal bom  
\v 4 naka adikum kimi luk atan makuw makuw uyo kalfalin so Got gánlawábi.  
\v 5 Be watawo kaleyo bá, naka sung kidel bakan ká bidi kiba nam dakánamin leiw uyo wok kidel faku kudewsiw uyo kamakikiw nalam weng mit kei kidisidiw kalo kanam kutamo, tad bi tad kamano so didiw kayo ko.  
\v 6 Kale bo atin nalam kal keidomo, Got aka kilim aket tem kal mit kei wok kidel kuw dekube ayo alam kano kanam sada si, Yesus Kadais tademin atan kal banimokaba ka. Kalbi.  
\v 7 Naka sun kuw kim aket uyo nam aket tem kutiyábi, kayo naka luk bala ken kim sung uyo aket fukanábi, watawo kaleyo bá, kiba nalaso makuw Got alam min gelemin uyo taku maden bom naduwo naka ken kalabus am teinámsi so weng taktakin kinim dim todámsi so uyo naka Got sung kidel tatun umi guew uta dudu kitid kuw tabesi.  
\v 8 Kale bo Got alam kal, naka dam weng bakanábi, naka bako nadi, kiliwso kuw bono, kal bom nadino kayo naka kim aket fikalesi be Yesus Kadais alam aket temo kal matam abesu ulutaw kala.   
\p
\v 9 Naka sun kuw kim Got bakanlaw bidino, kiba afadow aket kudawa kudawa bom keimin uyo kanom kuek tane budule, Got ami aket fukanin uyo makso makso kal kei bom nadiwo au buta kidel buta mafak kale nadiwe  
\v 10 kiba yak kukuw kidel kuw walu nadiwo Yesus tadokaba atan uyo kim aket tem atin kuw baim banim kei nadiwe weng fine banim kei nadiwo  
\v 11 Yesus Kadais dakáyamin tuw kilim kukuw kidel seng kanamin uta Got lamlam so win dukum kufámin so kudawin kala.   
\s1 Biyámin uyo Yesus biyámin taw kalin sung uta ko.  
\p
\v 12 Nalam nikil fikal kiba, nam abin mafak teinámin uta kanonam nadane sung kidel dakomamu atin másalala yak abu maek abu auduno,  
\v 13 bemi mit ata Udom kamok ami am dumo bom un tabuyámin adikum keidiwe, madik kadák keidiw iyo kal keidomo naka sok gei tabe bi ka, kalesidiw uyo watawo kaleyo bá, naka Yesus ami wok fakudawin kinim kayo ko.  
\v 14 Nalam nikil fikal nalaso makuw bidiw, ika makso kitid tabe Kamok aket afan kalin kinim kei bom nadiwo Got weng uyo fingánin banim atin makso so bakanábiw, watawo kaleyo bá, ika nami atud fakadá Kamok alam dim kal kalabus am teinbi uyo natam nadiwo kayo ko.   
\p
\v 15 Kale be atin afan kinim madik ika Yesus sung bakam kámsiw be nam abin titiyámin aket so aket kuok keiyamámin so uta keiyam badano, kanamsiw, kata yak madik ita afan aket kidel fukan bom dakoyamumo kale bom kanamsiw.  
\v 16 Kale yak kinim madik ika aket kuyam bom Yesus sung bakam kámsiw bidi ilim kal keidomo, naka Got alata sung kidel umi guew dudámin wok kunamse ka. Kale nadiwo kanamsiw ka,  
\v 17 madik aket mafak fukan bom kanamsiw itane, ika Yesus sung bakam kámsiw bo aket fukanin kidel mak dekudin banim, kei bom nadiwe nulum win uta kufodumo, kale nadiwo alam kano aka kalabus am tein be ki kal idum uyo makso so kukadawumo, nakansiw kala.   
\p
\v 18 Kale yak madik ika aket mafak doku bom kana bidiw madik ita aket kidel doku bom Yesus Kadais ami weng bakanbiw, kata sung babid makuw belayo ki kinim ika Yesus Kadais sung bakanbiw, beta naka atin tam so kalfalbi.  
\v 19 Naka nalam kal keidomo kim Got gánlawin so Yesus Kadais ami Sinik gong dakánamin so dim naka ken kot taktakin kinim dim uyo weng bakodi min talá namadálokaba ka. Kalbi.  
\v 20 Nami aket fukanin dukum wananábu uyo ki nam wok kudew tabe bi uyo naka kot taktakin kinim im dim todokabi, naka kutina nadi fatom keinamoma banim, kata naka fingánin banim ken weng bakanokabi. Kale naka ken namadáliw kaunsin bomi akal ken ade nanbidiw fikalomi akal ken. Kale be kanodino, kinim kan ata nata bidiw ita Yesus Kadais win kufodawin kala.  
\v 21 Kale naka kaunsin bomi bo ulum Kadais alam adik dáw, kata fikalomi uta atin kidel.  
\v 22 Ade bakan dim kano sun kuw bon kalomi, naka ken kukuw kidel makso fakudomi be akal ken kale bo nam kal banim yaknámin uta walulokabine, bakan dim biyámin uta bade nanbidiw fikalanin utane?  
\v 23 Kaleyo naka nalam aket alew wanana bom kúng namadew kal una kal una keibu, kata naka yak Yesus Kadais so wol fewámin uta atin kidel nam aket uyo unono, kalbi.  
\v 24 Kata atin weng miton ayo ki kimi luk beta naka kano kaunsin teinbi kala.  
\v 25 Kale be nalam aket so afan kale nadile kal keidomo, naka teinan bom adikum kiwso alaná bidino, kim afan kalin makso makso kitid kuw tabano, kim aket uyo idak yakso teinokabiw kala.  
\v 26 Kale naka asiki tad itamon kalokabi uyo kiba kilim Yesus Kadais so biyámin dim kalfalnamin seng keimokabiw.   
\p
\v 27 Kale kamano weng amsun mak ayo ki, kibilim biyámin kukuw uyo Kadais ami sung kidel umi leiw ki abodin kala. Kale kiba be kanodokabiw, beta naka yak itamomino, itamongin dakodi, kata kimi sung kidel uta kidilokabi. Kale naka be kidilomo kiba ken aket fukanin makuw kei dek amki bom wok kitid faku nadiwe sung kidel umi luk adut bobiw ka, kalokabi be atin ken ko.  
\v 28 Kale madik kan ita kus so kanayamobiw iyo ita fingánin bá be ilim kanabiw uta bakoyam, Got aka im mafak dádokabano, kalokabu, kata aka kim kál ged moyamokaba.  
\v 29 Got walu imuse, be Yesus afan akin kuw keimino kale nadano bá, kata Yesus ami luk kál funin so kudew tabino kale walu imuse kala.  
\v 30 Kaleyo kiba kibiliwso tal leiw kukuyabiw uyo nam Filibai abiw kal kiba nata bidiw, nam tal leiw kukunamsiw ade tad kadák ukal alo tal leiw kukunabiw sung uyo kiba kidibidiw ko.   
\c 2  
\s1 Yesus ami fibuyamsa umi sung uta ko.  
\p
\v 1 Kale kim Yesus Kadais so biyámin be kitid dauyamsene? Kilim aket kudawa kudawain be ken ilil dudáyamsene? Kiba Sinik Abem so makuw dek amki bidiwe? Kiba aket budunin so kukuw kidel fakuyámin so be kudusidiwe?  
\v 2 Bo adik kudusiw namti, naka mun dáyamino, kiba atin kanonamiw kalfalono, kali ayo ki num aket fukanin makuw kei, aket daudawa daudawain makuw kei, weng mit makuw kikiw kanamumo, kalin keidum kala.  
\v 3 Kiba ufek ufek mak kanamiw namti, sanung wanin keiyámin so kilim win kufámin so uta imadáliw, im kin moyámin bá. Kale kiba fibu nadiwe madik imi win kufáyamin uta ta bom kibilim win kufámin uyo akamamu nade  
\v 4 makuw makuw kiba kilimi aket kidelámin uta kuw aket fukanin bá, kata yak madik imi aket kidelámin so uta aket fukanin kala.  
\v 5 Kale kiba aket fukanin kukuw uyo Yesus Kadais ami aket fukanin kukuw taw beta keimin kala.   
\q1
\v 6 Kale aka madák bakan tadongin danim be aka Got so kal biyámsa ade aka atin Got alata. Bude afan ilim abin abem makuw teinámin, kata aka alam aket uyo abin abem bo kudálono, kalese.  
\v 7 Kata aka naka kanodin kinim buyo kalese bá, aka alami abin abem kaw tam uyo kadis kudá nada aket tet dau madák kinim nulutaw kei nada wok fakudin kinim kal wakuduse. Wanang kinim ika atamomo, aka sák kinim madik ilitaw ka. Akeisidiw.  
\v 8 Kale aka alam win uyo kufodin banim keidano, Got weng bakodaw, “kaba kudalaw kinim ita kanbidokabiw.” Akane, aka Alaw weng kidilaw nada madák tada kinim ika anew yak as dawing dákamin dim dawti sil biki atin fatom leiw so keidawiw fikalese kala.  
\v 9 Kaleyo Got ayo dakfo dew tam atin abin abem dukum wakudaw nadale win dukum kudawse uyo bakan dim kinim win adikum akayamsa uta takudaw nadale adikum kinim iyo imadew yak Yesus Kadais alam kitid akfak tem imtisa.  
\v 10 Kale beta kanodano ufek ufek adikum kinim so ensel so sinik mafak so abid tikin bidiw so bakan bidiw so kuin dákaw bid bidiw so iyo tad alam akfak tem nadiw alam weng kidilawokabiw ko.  
\v 11 Ade adikum bidi kinim wanang im kin dim kadákal weng fok bako nadiwe, “Yesus Kadais be afan Kamokim dukum kala.” Kal bidiwe, beta tabe win dukum uyo Natim Got kudawokabiw.   
\p
\v 12 Kala kaleyo kamane kiba, Yesus ami aket fukanin uyo utamasidiw, kayo nalam nafadow kasal kiba, nalam kiwso tein bidi nalam weng kidinam bom wok fakusidiw ulutaw be ki naka imadá sikam teinbi, kata kiba ulum kanom weng kidiyamokabiw, beta atin iwkuk kala. Kale kiba ulum kano kail bá takeikuyamámin umi wok uyo adik wakadábiw uyo aket banbinso fingánin so kei bom fakudin kala.  
\v 13 Watawo kaleyo bá, Got aka kilim kidin tem wok faku bom nada kitid dauyamano, kiba Got alam aket kanodino, yakba uyo aket tet dau nadiwo beta ufek ufek uyo kidel kuw kanamokabiw.  
\v 14 Kale kiba ufek ufek adikum uyo kus kusin so wengal so kei bom kanamin banim keidokabiw,  
\v 15 beta itamomane, kiba kinim kidelok kim weng fine banim, yakokabiw. Kale kiba Got ami man kidel kei bom wanang kinim kamane tein bom nadiw kukuw mafak leiw abo eibiw imi iwyak tem ken bom sun biyámin weng dawkáyabiw be kiwta im iwyak tem abid kayakin midilin tem lánin taw keidokabiw kala.  
\v 16 Kale kiba kanamokabiw kaí, naka Yesus tademin atan kawák naka kalfalyamokabi. Watawo kaleyo bá, buta kuku nadule nami wok adikum fakusi so nam mámin dákamusi so uyo ituwa tabongin banim kayo ko.  
\v 17 Kilim afan kalin uta kanoyamuno, kilim biyámin uyo Got kudaw wane ilulawin taw kei bom wok fakudabidiw. Kayo naka nanbidum, kaliw nam kaim fudálokabu, kim Got wane ilkádabiw so makuw keidokabu, kata bo kanonamum kalokabiw be naka atin kibiliwso kalfalokabi.  
\v 18 Kale bemi leiw taw be ki kiba nam fikali kaí, be kiba kibiliwso kalfal bom nadiwe naso idak teinin kala.   
\p
\v 19 Kale naka atin Timoti ayo mewso dabadáyami tadako, kalbi kale Kamok am aket keno, nakokaba. Naka kanodokabi. Aka yak itam nadano alo kim sung uyo kudew tad bakonamokaba, naka nalaso idak teinokabi kala.  
\v 20 Naka kinim bidi Timoti alataw aket dauyam dakoyamono kalin kinim sono masi mak dabadáyami tadokaba bá.  
\v 21 Adikum kinim bidi ilim luk uta ki dudu bom nadiwade Yesus Kadais ami luk uta mak dudulongin banim keiyábiw.  
\v 22 Kata kiba Timoti am atin Got ami wok kidel faku be uyo kilim kal bute, watawo kaleyo bá, man alam alaw so wok fakanin taw, aka naso Got sung kidel uyo bakan kábuw kayo ko.  
\v 23 Kaleyo naka weng mit tufimin kinim iyo, wataw wataw nakiw kal keidi ka. Kale nadino nalam aket aka mewso wabising dabadáli tadako kanabi.  
\v 24 Ade naka nalami ata yanol kal tad itamokabi uyo nalam kal, be watawo kaleyo bá, Kamok am aket uyo, keno, nakokaba kayo ko.   
\p
\v 25 Kata nalam nakanum Ibafadoddaitus nalaso wok faku bom sung kidel umi guew duduyámin kinim ade kilim kinim weng dew kámin kinim, kilim nam ufek ufek waktuwi dakonamumo, kale dabadáliw tase be naka dabadáyami tadako kanabi.  
\v 26 Kata am aket uyo adikum kiliwso kuw teinono, kal bom nadano alam aket uyo kim itamono, kalba. Be watawo kaleyo bá, kiba am asansa sung uyo kidisidiw kayo am aket masi aket luklakodiwo, kale nadano ko.  
\v 27 Ade bude atin afan aka asanom nada mewso fikalongin taw keiba, kata Got aka aket budunin daudaw kidel dauba. Kale be ata kuw bá, kata nakal nalaso kinkino, nakeiba. Watawo kaleyo bá, aka alam aket uyo kal keidomo, Ibafadoddaitas aka fikaleba nam, nam aket uyo fidinin dukum kuw keinaba kalongino ka. Kale nadano kayo alam aket uyo, kam fidinin dukum banim keidako, nakeiba kala.  
\v 28 Kaleyo naka atin nam aket, aka dabadáyami tadako, kanabi. Kale aka tad itamokaba, kiba idak teinokabiw ka. Natane, am aket seng fukanin banim keidokabi.  
\v 29 Kale kiba aket idak teinin dukum dim kal, ken tadawako? Akei bakodaw, “nuka kam Kamok wok fakudin uyo aket kalfalukamuwo.” Akino. Ade kiba kanodin kinim beta win uyo kufodawámin kuw kala.  
\v 30 Watawo kaleyo bá, aka Yesus Kadais alam wok fakudaw alom mewso fikalongin taw keiba kala. Kale aka alami uyo kudew yak kail tem kuek tade nam dakonamono, kale nadano kanoba, be watawo kaleyo kiba ken kano dakonamodiw banim kayo ka.   
\c 3  
\s1 Kadais ata kuw atin iwkuk ko.  
\p
\v 1 Kale nalam nikil fikal kiba, nam adik adik weng be kiba atin ulum kano Kamok dim idak tein bom nadiwo kala. Kale nam weng makuw be ki sawil godayami, be kakan keinamoma banim ade uta ta bom dakoyamuno, kiba makso kidela faskodokabiw.   
\p
\v 2 Kale kiba kinim kukuw mafak fakudin bidi kidela ita bom nadiwo kala. Ika atin kinim mafak mafak kinim angadámin mayan atud taw ko. Ika kitid kuw tabe ibakan bom nadiw bako, “kiba yak Got ami muduw keidon kalin uyo kál wakelin ban uta bo nadiwo kuwo.” Yakanokabiw ko.  
\v 3 Kata atin kál wakelin ban tatun bosuw ade nuta ka. Watawo kaleyo bá, nuka Sinik Abem dim Got suksuklabuw kayo, nuka Yesus Kadais ami dim buduw be idak teina buduw ade nuka yaknámin ban bomin kukuw kukuw uta mak aket kumamuwo, Got aka keniwo, yakoma banim.  
\v 4 Kale bo kudew yak ban bomin kukuw dibu nam, atin nata umi kukuw bo dákadá kudusino kalongino ka. Kinim mak am aket fukanin kudew yak ban bomin uta dibe kaí, nata atin kinim be akadawasi kalongino ko.  
\v 5 Watawo kaleyo bá, naka nalam nangin uyo namadu si am fet kal keidi nade matam luwan dim kawákal Yu Kayak kinim bowál ita kál wakelin ban uyo bonamsiw ka. Natim so nangin so ika Isadael kayako, Got aka walu imusa. Kale nam kinim mit be Bensamin ami kinim mito tasi. Adikum nam awadik kasal ika atin kinim mit Ibidu kale ika alam Ibidu wanang ki budumábiw ko. Naka kinim mit Fedasi, kalbiw imi so kal kei nadi fasu matam abe nadine sun kuw ban bomin sawa uyo ilim kanamábiw taw kana bidino, Got am aket, keno, nakokaba kaí, kale kanamamsi.  
\v 6 Kale naka nalam aket bude kidel kaí, kale Got am wanang kinim gu iyo ulum kanom kuek tane bom im tal dákamsi kala. Kale kinim so mak nam Mosus am sawa abobi be mafak so mak atamodiw banim.   
\p
\v 7 Nam aket, bula afano, kale nadine aket fukan dádumo naka ufek ufek kanamábi uta tabe Got am aket kidelawábuno, kalanábi, kata kamane nalam kal, bo uta tabe dákanabu bá, kali. Watawo kaleyo bá, uka dakonamu Yesus Kadais am yán abodomi banim, kayo Yesus ami luk naka kanodin kukuw aboyámin bo kudási.  
\v 8 Naka utami, au bo dakonamomu banim kaleyábi uta kuw bá, kata kamane Yesus ami luk uta naka ibik wakumam nadine kaek fen ufek ufek utam nadi aket bakel dau au bidi mafak kei fomsiw, bo kaleyábi uyo naka Kamok Yesus Kadais kal keibi uta atin dukum utam nadine bemi leiw ata naka kitid kuw tabe Yesus Kadais ata kuw faku nadino  
\v 9 beta ken adikum yak alaso keidokabi ka. Naka dil nam aket uyo bako nadi nalam gadel ki tabe Yu Kayak im sawa uyo naka ken abo bom nadine belami leiw ata Got aka natam, keno, nakeiyába kaí, kaleyamsi, kata kamane naka bemi aket taw kanamomi banim, bumi kanamin bo kudá nadine nam ban keidi Yesus Kadais nalam Watakayaw am aket ki afan kaline, Got aka keno, nakokaba ko.  
\v 10 Naka nam aket Yesus Kadais ayo kal kei nadine kitid tabe alam kitid dukum fikale talá tabe nada kuduse uyo kudono, kalbi. Am kadák teinámsa uyo atin tal leiw seng kuw kanadawsiw. Kale naka alam aket keno, kalin uta wok fakudawábi kale naka nalaso ken tal leiw kanonamino, kalbi ade kinim ika alam anbisidiw leiw makuw be ki naka kanonam nanbidoliw be atin keno, kalbi.  
\v 11 Kale belami leiw ata Yesus Kadais kal kei nadine utamomo fikalokabi yanol kawák Got aka alo nafoda fikalanin uyo kudá matam abokabi ka. Kalbi.   
\p
\v 12 Kale naka tad Yesus Kadais ami adikum kal keibi ami leiw leiw uta bakanbi bá ka. Ade be Got alataw keiyámin uyo kanodalo, nakin kaí, adikum kanonaba bá, kata Yesus Kadais am walunamu aket kuw adikum kidel namuyámin uta bakanbi kayo naka adikum ufek ufek kanabi uyo kanamom alam leiw ki abo sidi si aka adikum kanonama atin kidelokabi ko.  
\v 13 Kale atin nalam nikil fikal kiba, kal keidi uyo naka atin kidela adikum kene bá, nalam kanamábi ade bela biyaku kámin kinim aka biyaku kámon kalokaba ayo aka tod dumade au akayam sikam tadbi kalokaba bá, ulum kano biyaku tadbi abak dim tadokaba, alataw am mak dánokaba naka adik wakadálokabi kala.  
\v 14 Kaleyo naka biyaku kámin kinim taw kei nadi kitid kuw tabe ulum kano kuektane biyaku abák finang kal abe adikum kena nadino ken Got kisol abid tikin kutinama be uyo kudulono, kanabi, watawo kaleyo bá, naka Yesus Kadais so keisi kayo ko.   
\p
\v 15 Kale adikum nuka kuákeiku naduw Got afan kalesuw kaí, nuka belami aket fukanin leiw makuw beta ki atam naduwo kala. Kale madik kiba yak bulami aket kukum fukaniw namti, Got akal kukuyama kidela kal keidokabiw.  
\v 16 Kata nuka ulum kano weng tatun kudusuduw ki kidela aboyámum kala.   
\p
\v 17 Nam nikal fikal kiba, nam kukuw be ki abo nadiwo yak kilim abiw wanang kinim madik nam yán abo bidiw iso makuw kei, num kukuyam suduw be ki abodin kala.  
\v 18 Watawo kale bá, madik ika kukuw mafak dukum ki abo bom nadiw keno, kal bom nadiw ika afan weng Yesus Kadais as dim fikale nulum kail bá takeikuyamase uyo mit banim keimamumo, kalbiw kayo naka im sung uyo suwayo katow kal bakoyamasi ade kamano ukul asawil bakabi uyo nam aket idum keinam nadu nam kin wok so keinamu amanbi ko.  
\v 19 Bidimi kinim wanang ika ilim dam umi kanodono, kalbu uyo ilim got keimam nadiwe ulutaw be ki imin seng kuw wananá bom nadiwe sakadinin kukuw mafak kana bom nadiwe ilim kukuw mafak kanamin fatom umi tok baka bom nadiwe aket afan kalongin banim, imi kanamábiw taw im aket ukul bakan dim kadák umi ufek ufek uyo kanamábiw. Kale imi kukuw kanamábiw leiw be alam dew un bi yak as kainin abiw ki dibu.  
\v 20 Kata nuka bakan dim kadák umi afan kalongin banim im teinámin kukuw taw biyámin bá, watawo kaleyo bá nuka atin afan abid tikin wanang kinim make. Yesus nulum Watakayaw aka nulum finang dá atin tadba, kale mimin dok dibuduw kayo tein bom kalfal suduwo kala.  
\v 21 Aka kitid dukum soim kayo aka ken mew adikum ufek ufek kin bakang kalu uyo fakoda tad alam kin umak dimama be akfak tem tadokabu. Alam kitid makuw bemi tuw ki wanang kinim ilim kál aumanbu uyo alam sun biyámin kál lamlam wakak kiwokabiw ko.   
\c 4  
\p
\v 1 Kaleyo atin nalam nikil fikal adikum bula aket fukan dá nadiwo bulami leiw leiw uta kana bom nadiwo Kamok ayo dew fakudin kala. Atin nalam nakanum kasal kiba, nalam aket kukáyamin so nam kim aket waktiyámin so uyo kiba ayo asawil itamono, kalbi bute. Naka kim iwyak tem nam wok faku kámin uyo mak ituwudongin banim, kayo nam aket dukum uyo keno, yaki ko.  
\v 2 Kamane Yoddiya so Sintike so kiba naka dok diyam sidi alew kim wengal kalin uyo kudá aket makuw kei fukanin makuw kei au nadiwo maek Kamok muduw keidino, kale kanabi ko.  
\v 3 Au, Sisikas kaba nalaso wok kidel fakudin kinim. Kale naka dakádakamino, kaba mew wanang bidi so wok gong dakáyamalo. Kakbi. Kale ika iliso makuw naso wok kitid kuw fakuyámsiw. Kale kaba Kalemen so nalam wok makuw fakuyámin kinim madik so ika iliso dakáyamal kala. Kale im win be Got tabe dew yak sun biyámin buk tem kal goduyamsa ko.   
\p
\v 4 Kiba sun kuw asawil asawil kalfalin kala, watawo kaleyo bá, kiba Kamok so makuw teinbidiw kayo, kale naka makso asawil bakoyamon, kiba atin kidela idak teinino!  
\v 5 Kale kiba kilim fibuyámin kukuw uyo wanang kinim adikum fibu itamámin kala. Kale Kamok ami tademin uyo mewso keibu ka.  
\v 6 Kiba ufek ufek adikum umi aket so luklakin bá, kata kilim ufek ufek kudulumo kalbiw uyo Got gán dá dákadála bom ken keiyo, akanin kala.  
\v 7 Kale belata kanamiwo, Got aka aket dakbuyámin uyo kuyamokaba. Kale ami dakbuyámin afalik be kinim nuka ken kufo kal keidoluw banim. Kale dakbuyámin uta kimi Yesus so makuw keimin aket uyo kin modokabu.   
\p
\v 8 Bela nam adik adik weng katiw dauyamongin keimi ayo ki, nalam nikil fikal kiba, weng mit kidel ade win kidel kufámin fakuyámin so ufek ufek kidel, tatun so aket baim banim keiyámin so takak keiyámin so akfak tem unemin kukuw so umi aket uta fukanin kala.  
\v 9 Kiba nam dim kal kukuw kal kei sidiw so kukuw kukuyamasi so kana bidi utamsidiw so uyo ulum kano kitaka bidiwo, fibuyámin Got aka kiliwso badano kala.   
\p
\v 10 Naka kamok so bom nadi kalfalbi. Watawo kaleyo bá, kiba nam luk dudubidiw. Kale kiba atan seng makso kuku nadiw nuka ami luk ki dudubuduw, kalbiw. Bemi mit be kim nam luk duduyámin be kanam tow kudásidiw bá, kata kiba atan sono masi bu makso kukudoliw banim.  
\v 11 Nam kanamin weng bakabi bela ufek ufek uta iwa bom nadino kanam kalbi bá. Kale naka ufek ufek katiw keidomuno, dukum keidomu, kata naka bo keno, kalin kukuw uyo kal keisi.  
\v 12 Kale nalam kal bo yaknámin uta iwámin kale nadine alo yaknámin uta ufek ufek seng so keiyámin kaleyábi. Kata naka yaknámin abin mak teinbi naka be keno kaleyábi. Kale atan mak be imin tew keinaba ayo atan mak be imin kidel waneyábi, ayo atan mak be nam ufek ufek waktuwábi ayo atan mak be ufek ufek seng fakuyábi, kata nam aket dakbuyámin uyo namadálomu banim keiyábu ko.  
\v 13 Kale naka ken sák kanodin kukuw kidel so mafak so abin teinámin uyo ken aket dakbuyámin dim utamomi, watawo kaleyo bá, Yesus Kadais ta bom kitid dawkanaba kayo ko.   
\p
\v 14 Kale kiba nami idum adikum fakuyábi uyo kibiliwso makuw nikil taku madenokabuw beta ken ka.  
\v 15 Filibai abiw kiba, nalam kamakikiw sung kidel bakayamsi bo kilim kal keibidiw. Kale naka Maseddoniya bakan uyo kudá tabine, Got wanang kinim gu kawák bidiw kiwta kuw nam ufek ufek waktuwábi so ufek ufek seng fakubi so uyo nikil taku madensuw kala.  
\v 16 Kale bid wataw kal memak moyane, naka Tesalonaikka abiw kal bom ufek ufek iwa bom dakonamino, kal bidi ta bom kiwta sawil dakonam dakonam keimsiw.  
\v 17 Be kim dim kal min kisol mak kudulono, kale nadino bula bakanbi bá, kata nam aket ude ufek ufek kidel uyo atin makso kudew yak kilim isom kei bidiw yanol Got tabe umi yán kuyamokaba kukuw uta utamono, kalbi.  
\v 18 Kale nam aket kiba be kal keidino, yakbi. Adikum kilim ufek ufek kudánamiw Ibafadoddaitas dim tasu uyo kudu nadine nalam ufek ufek iwabi uyo atin akamam tam so kikiw wakadábi. Kale kimi min gelemin be Got wane ilkádawin fiw kidel kim kádawin taw keibiw. Kale Got aka be keno, kale nadane kalfalba ko.   
\p
\v 19 Kale nalam Got aka ufek ufek kayakim. Kale aka kim ufek ufek iwa bidiw uyo kuyama aket kuw madiw kalokabaw, watawo kaleyo bá, kiba Yesus Kadais so keibidiw kayo ko.  
\v 20 Kale nuka nulum Natim Got win kufádaw kalfal bom sun kuw bokabuw ko. Afan.   
\p
\v 21 Nam keno kalin ayo adikum Got wanang kinim kawák kimi Yesus Kadais so keisidiw kimi dauyami ade adikum nalam nafadow kasal nalaso bidiw iliso ken sidiwano, yakiw ade  
\v 22 alo adikum Got wanang kinim abem kadák bidiw iliso sidiwano, yakiw be atin kanam kanam Sisa ami bungtan ita atin sidiwano, yakiw ko.   
\p
\v 23 Naka Got gán dádawino, nulum Kamok Yesus Kadais am min gelemin uyo ulum kanom adikum kiwso badano kala.