\id 1TI  - Faiwol NT [fai] -Papua New Guinea 1995 (DBL 2014) 
\h 1 Timoti 
\toc1 1 Timoti 
\toc2 1 Timoti 
\toc3 1 Ti 
\mt1 1 Timoti  
\c 1  
\p
\v 1 Faul nalta, Timoti kami sauk kon dabadákami tada. Kale Got nulum Watakayaw so Kadais Yesus nulum mimin dok diyámin kinim so ita weng dew kámin kinim keidako, kale walunamusidiw nata ko.   
\p
\v 2 Timoti atin nalam min makuw kaba, alew num afan kalin bo makuw kala. Kaleyo Natim Got keida, Kadais Yesus nulum Kamok keida imi min dakáyamin, aket dakbudin, aket budunin uyo ilimiyo kal tadebu kale bu kukamin kala.   
\s1 Ibakamin sawa kukumin kinim kauki dufo bomalo kalin sung.  
\p
\v 3 Nam aket Efesis abiw kal teinalo, kaki. Kale be nalam Maseddoniya bakan unom nadi kitid weng bakokam nadile kaba be kanamalo, kakeisi beta ko. Kale Efesis abiw kawák kayak kinim madik imi ibakamin guton sawa kukubiw iyo bakoyamaw kudá nadiwe  
\v 4 watung sung mafak bakamin so ilim awadik kasal win fakan bi kutisiw so uyo kudá audin kala. Watawo kaleyo bá, kanodin kukuw belayo ki wengal fukanin leiw ade kanodin kukuw be Got ami wok fakudawámin leiw bá, kata afan Got ami wok fakudawámin leiw be afan kalin dim wok fakudawámin uta ko.  
\v 5 Kaleyo weng bakodi ami mit ayo ki kanodin kukuw uta dakokamuno, kakanum aket kudawa kudawin, atin aket kidel, fatom banim, atin afan kalin makuw uta ta bom aket kudawa kudawin uyo maek tadebu.  
\v 6 Kale yak kinim madik iyo mew weng bakabuw uyo leiw dabadá nadiwade yak weng mit banim uta kidimábiw kala.  
\v 7 Ika Got guton sawa kukumin keidumo kalanaliw, kata ilim sawa kukubiw bo im kal banim ade ika ufek ufek nulum kal keisuwo, kalbiw, be im kal banim.   
\p
\v 8 Kale nulum kal sawa uyo abál, kata kinim iyo kidela fakudoliw kuw bude ken  
\v 9 ade nulum kal sawa uyo kinim kidel imino, kale kidel kutiyamsiw bá, kata sawa uyo ki, kinim mafak sawa wanin so fakiyol kinim mafak so ban keimin kinim so kinim am Got banim so Got sawa kuásusulin so yak ilim akun alaw amin so kinim amin kinim so  
\v 10 sakadinin kinim so ilim dam kudew tabe sák galam kámin so kinim kisol mo imu nadiwade sák bisok imak wok tem tadeyamin kinim so ibako faltimin kinim so Got ami weng tatun kukumin umi kanamámin kinim so imino kale kidel kusiw.  
\v 11 Kale Got weng tatun kukumin be Got sung kidel ulum atung Got alata kunam kukumalo, nakeisa. Kale sung kidel lamlam so be Got alam idak teinámin mit kayak kalo tasu.   
\s1 Got ta bom Faul min gelemin kukádawin sung.  
\p
\v 12 Naka Kadais Yesus nulum Kamok ken keiyo, akbi ayo ki aka natamomo, naka dudew tabesi kinim. Kale nadale walunamu kitid daunamano ami wok uyo kudew tabesi.  
\v 13 Kale bude afan, naka kamakikiw Got ididlawin kinim ade kinim tal leiw kukumin kinim, keng gam mafak, kata Got ayo aket budunin daunamse watawo kaleyo bá, naka kanamin kukuw bela ki faku bom nadine naka mak kal kei be kukuw mafak kalongin danim ade naka mak Got afan kalongin danim.  
\v 14 Kale numi Kamok ami min gelemin seng kunamse be aket afan kalin so aket kudawa kudawin so be adikum Kadais Yesus so aket makuw keiyámin kinim numi ka.   
\p
\v 15 Kale atin afan dam weng bakakabi, bela atin weng babid, kale be atin afan kalin kala. Kadais Yesus ayo madák bakan kalak tase uyo ban keimin kinim kail bá takeikuyamono, kale tase. Kale nata atin ban keimin dukum uyo atin nata fakusino kate.  
\v 16 Kata kalak umi mit uta utam nadano aka aket budunin nalam dim kal kunam nadale naka ban keimin umi kamok kala kaleyo Kadais Yesus ami fibudin dukum kunamse. Beta kanomin kukuw alataw be ki wanang kinim ikil yanol Yesus aket kudaw nadiwade sun biyámin sinik uyo kudulokabiw kala.  
\v 17 Kale nalam Got Kamokim sun biyámin Got Motabid, bos men kiwámin kaba, Got makuw kawta ki, kale nuka sun kuw win kufáka bom kam lamlam so kano sun kuw bokabuw. Kale afan ko.   
\p
\v 18 Nalam man Timoti kaba, naka kam kanodalo, kakbi sung bela daukamongin keimi ayo alataw kale suwayo lum senin kinim im lum bosiw be kam sung bakosiw kala, kaleyo umi abo nadawe wasi ginanin uyo kidel kuw faka teidal kala.  
\v 19 Kale kalami Got afan kalin yakik faku nadawe kalam aket kidel fukanin ki yakik faku audal kala. Kale yak kinim madik ika ilim aket kidel fukanin uyo yakik fakudongin banim dako nadiwe ilim afan kalin uyo kuw mafak dáyábiw ko.  
\v 20 Kale kinim madik kanabiw imi tem be Aimeneyas so Aleksanda so alow iyo imadáli yak Mafakim sikal ban dim abesidiw. Kale naka be kanoyamino, ikal kal keidomo, Got win be ididlawin bá, be kalin kala, kaleyo kanoyamasi ko.   
\c 2  
\s1 Tada tada bom suksukin kukuw kukuyamin sung uta ko.  
\p
\v 1 Kale kamakikiw belasik bakoyamono, kali ayo ki kamok kamok so kinim kin modin dukum dukum so wanang kinim adikum so imi luk Got gánla bom nadiwe wanang kinim adikum imi ufek ufek waktuwabidiw uyo Got dákadálaw bom nadiwe Got sun kuw wis sánlaw bom nadiwe Got ken keiyo, ak bom kei bidiwo,  
\v 2 adikum nuka alowá, kale kidela dakbu sading kale naduwe Got atam fingán dá dakbu naduwe abem kei biyámum kala.  
\v 3 Kale belami kanamokabuw beta kidel. Kale nulum Got Watakayamin kinim ayo aket kidelawokaba.  
\v 4 Kale aka mew adikum kinim wanang bidi kail bá takeikuyamine, ikil weng tatun uyo kal kei afan kalino, yakba.  
\v 5 Kale Got aka makuw alafin ade Got tada kinim tadiw be iw kinim makuw alafin tanong kon keiyámala be Kadais Yesus ata kuw ka.  
\v 6 Kale ukal ulum kanamin am dánu ta bom ban keimin gu dufo alam dam uyo ban kung fakadulin taw kei nadano adikum wanang kinim bo min talá imadáse. Kale Yesus kanoyamse uyo kukuyam Got alam aket wanang kinim adikum maek alam mit tem tadino, kalba ka.  
\v 7 Kala kaleyo be kalami mit uta Faul naka Got walu namudano, alam weng dew kámin kinim kei nadile Mifiw bidiw imi afano kalin weng kukumin kinim keisi uyo ibakayabi bá, atin afan bakayabi kala.   
\p
\v 8 Kale nam aket kanamino, kalbi uyo ki mew kinim adikum bakan teiniw ika keng keng bom ade wengal fukan bom suksukin bá, kata ika kinim abem kale teng dafo akol falut kale suksukin kuw keimin kala.  
\v 9 Kale nam aket wanang ikil ilim lim uyo kidela miki bom nadiwo kala, sák badang misun misun bom kinim aket kufáyamin bá ade gebom kon uyo angudun bi kudá kait kidel kidel kei bi kudá ade bukum sisil kin umudubi kudá tabamin bá ade ilim takak so kisol dukum sánin uyo miki bi kudá tabamin bá.  
\v 10 Kata kukuw kidel kuw dudew tabe nadiwe yak wanang, naka Got amino, kalbu ulum kukuw taw dudew taba bom nadiwo kala.   
\p
\v 11 Kale wanang ika fiyaw sading kale dakbu atin fali falín kukuw uta faku kal keiyámin kala.  
\v 12 Kaleyo naka wanang mak matam kinim kukumin kei nadu kitid kudu kinim imo kadák dáyamino, yakbi bá, ulum kanom sading kale teinámin uta kuw kala.  
\v 13 Watawo kaleyo bá, Addam asik kidel dau nadale Iw uyo yanol kidel kusa kayo kala.  
\v 14 Kaleyo Addam aka ibakanin weng afan kale kidisa bá, kata wanang uta ibakanin weng uyo afan kale kidi nadule uta tabe ban keimin takadusu kayo kala.  
\v 15 Kata wanang ika aket afano kalin uyo kudew faku nadiwe aket kudawa kudawa kei bom Got ami wanang abem kei nadiwe kanodin kukuw kidel ki abo bom man fukámokabiw, beta ika ilim kál bábu takeikudokabiw ko.   
\c 3  
\s1 Got wanang kinim gu imi gebom gebom im sung uta ko.  
\p
\v 1 Bela atin afan dam weng bakakabi yak kan kinim ata mak Got wanang kinim gu imi gebom kinim keidono kala kaí, aka be wok kidel uta dudew tabono, kanama ka.  
\v 2 Got ami wanang kinim gu imi gebom kinim keida kayo am kukuw mafak mak utamongin danim ade aka wanang makuw kudusa kinim kuw ade kidel kuw afetin kinim ade alam kukuw adomamámin kinim ade kinim kidelok ade kotadang im tam am dákamin kinim ade ken kukumin kinim keidomi kala kaleyo kuw ta  
\v 3 ade aka wok mafak seng wanin bá, keng gam bá, kata fibudin kinim, aka weng abál bakamin ade aka kisol aket kumamsa kinim bá kala kaleyo kuw.  
\v 4 Ade aka alam man awtid iyo kidela kin moyába ade alami man iyo kalfal bom alam weng kidi kidela dudew taba bidiw keimin kinim kala kaleyo kuw ko.  
\v 5 Kanamin kinim aka alam kadela, mana, alam kinim am makuw alina iyo kidela kin modin dako be ayo yakno yakno nadano Got ami wanang kinim gu iyo kin modokabane?  
\v 6 Aka mew alokso maek Yesus kinim kei bom babalanba aso dawtimin bá, masi aka buso kano walu namudiw kuwo kale kalfalane, Got tabe Mafakim daw mafak dása kinim alataw keidoma kala.  
\v 7 Aka kinim kidelok kaek teinbu teinbu iyo nulum kanaminimo, kalbiw kinim ade aka fatom fatomin banim kala kaleyo kuw ko, masi aka kanodawiwe, Mafakim ami abil tem dinoma kala.   
\p
\v 8 Kale Got wanang kinim gu dakáyamin kinim, ika Got ami wanang kinim gebom kinim alataw kinim kidelok weng tudon bakanin kala kaleyo kuw ade wok mafak seng abu bi aket dakwayamin bá, sanung wanin bá,  
\v 9 ika aket tem baim banim kei bom nadiw ilim aket afan kalin dukum kudew fakusiw kala kaleyo kuw ko.  
\v 10 Kale ika kamakikiw imkukudiw imi mafak mak keidongin banim kala kaleyo beta imadáliw matam Got wanang kinim gu dakáyamin kinim keidoliw ko.  
\v 11 Alam leiw makuw be ki ilimi kadelal ikil wanang kidelok kala kale ade gimgimin weng bakamin banim kinim ade afetin wanang, mew ufek ufek bo ken kudew tabesu wanang imi kimakal ita kuw imtimin ko.  
\v 12 Got wanang kinim gu dakáyamin kinim aka wanang makuw kudusa kinim ade aka alam mana, kadela am bidiw iyo kidela kin moyámin kinim ata kuw ko.  
\v 13 Kale Got wanang kinim gu dakáyamin ika kanodin wok bo kidela kudew tabesiw namti, ika win so kei nadiwade ika atud kuw fakadá ilimi Kadais Yesus aket afano, akin weng uta ken bakamokabiw ko.  
\v 14 Naka mewso tadono kanabi, kata sauk kon weng belata godukamino, abo sadawo kala,  
\v 15 kale masi naka kanamom nalam tadono kanabi uyo am faktowudomi kala kaleyo sauk kon bela godkamino, beta kabal utam kal keidomane, Got Motabid ami wanang kinim iyo yakno yakno tada tada gei dau bom aket daudawa daudawain kala kaleyo kanodin kukuw belata Got ami wanang kinim gu makuw keiyámin ade afino kalin ami mit namti, kal teinba ka, kalal kala.  
\v 16 Kale yak kinim wanang madik ika Got num aket tem be ayo ika kidela atin kal keidoliw banim.  
\q1 Kale aka kinim misun dam so misuna nadale Sinik Abem ata tabe daw misun tei afan kukuyamase ade ensel ita tabe atamsidiw, ade ami weng uyo mew bakan kuw tabodu iyo sung bakayamsiw ade bakan dim kasel ika afan akei aket kudawiwe, Got ayo dew tam nadale win dukum kuw kufodawse ko.   
\c 4  
\s1 Timoti makso sawa sawalawin sung uta ko.  
\p
\v 1 Got Sinik ayo tudun weng bakoyam nadale afung am dán tad budune kabadák wanang kinim madik ika Yesus aket afano, akin uyo ibik wakudaw nadiwade ibakanin sinik so sinik mafak so imi kukumin weng kidi im yán abodokabiw kala.  
\v 2 Kaleyo kanomin belami kukumin uyo ibakamin kinim imiyo kal tadebu, kayo ufek ufek kidel so mafak so kalin bo im kal banim, watawo kaleyo bá, im aket tetin uyo dabima kál weing kain tabin taw keisu kayo ko.  
\v 3 Kanodin kinim imi kuku bom weng bako nadiwe wanang kuduyámin báyo kalin so wanin wanin madik bo wanin báyo kal bom keimaliw, kata Got aka imin bo kidel ku adik wanino, kalesa. Kale Yesus aket kukádawin kinim ika weng tatun uyo kal keisiw, ika ulum Got bakodaw ken keiyo kale nadiwe wanin bo ken luk bala kudu wanaliw kala.  
\v 4 Kale be atin afan kayo mew ufek ufek adikum Got kidel kuse uyo kidel ki kale nuka Got ken keiyo kale kuduloluw uyo im mafak dádomu banim kayo mew ufek ufek bo mak utam sunin so teinbu bá.  
\v 5 Watawo kaleyo bá, Got ami weng so nulum Got wis sánlawin so umi dim kal kideluno, nuka ken kuduloluw ka.   
\p
\v 6 Kaba weng bakakabi bela kafadow kasal kukuyamokabaw, beta kana bom nadawade kukumin kidel so afan kalin weng so kidisaw uyo abobadaw ka. Kale kaba be kanamokabaw, beta kaba matam kitida nadaw Kadais Yesus ami wok fakudin kinim kidel keidokabaw ko.  
\v 7 Kaba wanang kinim Got im kal banim im dil kukuw sung uyo kidiyamámin bá kala, kata kaba kukuw kidel uyo kitakamom nadawo beta Got mewso biyamokabaw.  
\v 8 Kale kitakamom matam kinim kitid keidono, kalokaba bude dakádawin kuw keidu matam kinim kitid keidokaba, kata kinim kitakamom matam Got ami kinim abem keidono kalokaba utane dakodawu ulum kanom si fikalokaba ukul dakodawo ulum kanom sun bokaba.   
\p
\v 9 Bela atin afan dam weng bakakabi, kale atin kidela yakik fakudal kala.  
\v 10 Kale nuka Got weng wok uyo kidela kudew faku naduwade atin kitid tabe tabuduwo, beta kinim wanang ika weng afan kalino, watawo kaleyo bá, num mimin dok diyámin uyo kudew yak Got Motabid didawokabuw, aka kinim adikum watakayaw, kata atin yak kinim alam aket kukádawiw, ita atin kail bá takuyamába ko.   
\p
\v 11 Kanamin weng bela yak nikil fikil iyo kukuya bom kanamin kanamin yakanal kala.  
\v 12 Timoti kaba kama man, kale kanamom imadálaw kinim ita anik anik aukamodiw kauk ki uta bomo kala. Kata kaba Yesus aket kukádawin kinim wanang imi kukuyamon kalaw uyo kukuw kidel deku bom weng yáw baka bom, aket kuyam nadawe aket afano kal bom ade atin aket ban keimin banim kei bom biyámin ko.  
\v 13 Kaba kalam kano kitid kuw tabe bom wanang kinim gu tem kadákal Got weng ki baka bom kukuya bom keim sadawo sin naka tadon kala.  
\v 14 Kaba dil lum senin kinim weng bakamiwe, Got wanang kinim gu kin modin kinim gebom gebom iyo teng takadew yak gebom teikamsidiw kal Got ami Sinik Abem ta bom kami min gelemin wok kukamase uyo kaba leiw anwádawin bá.  
\v 15 Kaba kalam wok uyo atin aket kumamawo, beta adikum wanang kinim ika kam kit ayo atamomane, ken kanam taba ka. Kakin kala.  
\v 16 Kalam biyámin kukuw uyo kidela uta bom nadawe kalam afan kalin uyo kidela faku audal kala. Watawo kaleyo bá, kanamokabaw beta kinim ika yak kam weng kidikamokabiw ade kabalami so dakokamokabu ko.   
\c 5  
\s1 Got wanang kinim gu kin moyámin kinim imi wok dudew tabamin sung uta ko.  
\p
\v 1 Kaba yak kinim fasel keiba ayo kitid weng ngadák fuko dawkanin bá, kata finang ata akol weng kalam kalaw kanadabaw taw kei bom nadawe yak kama man ikil kalam nikil im kinkin nábaw taw keiyamal kala.  
\v 2 Kale wanang fasel ikil kakun taw keiyam nadawe wanang mát ikil kabalam wanangal taw keiyam atin adikum kukuw kidel kuw fakuyamal kala.   
\p
\v 3 Kale wanang kadun ika duw ifin banim namti, kaba dakbu ita bom nadawo kala.  
\v 4 Kata wanang kadun uka ulum mane muduw kasale so mew teinbidiw namti, ika kamakikiw Got kukuw usik kudew tabe abo nadiwe um kinkin bom nadiwo ilim aulal so awok kasal so awadik kasal so iyo kidelya bom nadiwo ilim man katiw bidiw isik kidelyabisiw umi idum uyo yán kidiwo, beta Got ayo kalfalyamak kala.  
\v 5 Kale yak wanang kadun ulufin kidel kale biyámin, uka mimin dew yak Got dok didaw bom midiliw so táw so Got suksuk bom nadule Got dakonamo kal bom dákadámokabu.  
\v 6 Kata wanang kadun kan uta ká bom nadule ulum aket kidelmamámin kukuw mafak mafak so keimábu namti, uka kaunsin bu, kata sinik bo fikalesu kala.  
\v 7 Kaleyo sawa sawayamin weng bela wanang kinim gu bakoyamawo, beta ika kidi kukuw kidel faku bidiwo, beta yak wanang kinim kaek bidiw iyo weng fine so mak bakoyamodiw banim keidin kala.  
\v 8 Kale yak kan ata alam aulal sone, atin alam duwal kama kaim fedabu so iyo mak kidela kin modongin dako be namti, alam aket afano kalin uyo kuwádokaba. Kale aka ami kanaba ayo ki Yesus aket kudawongin banim imi kanamábiw ulutaw bá, atin ata mafak dukum tam so keiba ko.   
\p
\v 9 Kaba wanang kadun ilim duw mak kin modongin banim im win uyo mak godu kutidon kalaw namti, yak wanang kadun itol deng alew ade bako bokuw (60) kal banimu ade uka kinim makuw dabuduyámsu ka, kaleyo kuw.  
\v 10 Ade wanang kinim um kukuw kidel dudew budu adikum iyo ilim kal, man kin moyámin wanang ade sák kotadang dew matam am dá wanin akiwin wanang ade Got ami kinim tadebidiw yán wok boyamin wanang ade yak madik iyo mafak kuduliw dakáyamin wanang ade uka fan mosu wanang ade mew ufek ufek lung adikum bo dudew tabeyámsu kala kaleyo kuw win dok dákamin ko.  
\v 11 Kata alo wanang kadun mining bidiw imi win so godin bá, watawo kaleyo bá, ika masi kanamom kinim mam keiyamune kinim kudu nadiwade ilim weng bako Yesus ami wok ki fakudokabuwo kalesidiw uyo luko daudoliw kala,  
\v 12 kaleyo kanodom nadiwe im fatom gei imudune kamakikiw ilim weng abem bako Yesus wok fakudokabuwo kalesiw uyo lukelodiw kala.  
\v 13 Alo umi wol fun wakadu mak ayo ki am dánámin ituw bom nadiwade yak amak maek amak keim ká bom nadiwade yak kinim mak imi kanabiw uyo mimin lukelya bom imako dekoin weng bakanábiw ade ika mak imi weng mit uyo sák bakanábiw kala.  
\v 14 Kaleyo nam aket wanang kadun mining so bidiw iyo tam kinim kudu nadiwade man low tei bome, ilim am kidela kin moyá bom nadiwade kukuw dudew tabiwo, beta Got afan kalin num wasi iyo imako dekoyodiw banim keidin kala.  
\v 15 Yak kadun madik ide kama kal Yesus ibik wakudaw nadiwade Mafakim yán abosiw.   
\p
\v 16 Kata yak kan wanang gut so alimal Got so afan kalbiw ika, wanang kadun mak iliso bu namti, ikil tabe kin moyámin kala, masi Got wanang kinim gu ita kuki modino yakinba kala. Kaleyo Got wanang kinim gu adikum ikil yak wanang kadun sák ibonbiw ita kuw gong dakáyamin kala.  
\v 17 Kale gebom gebom yak kan ita ken kitid tabe Got wanang kinim gu kin mo bom nadiwade Got weng baka bom nadiwe kukuya bom keimaliw namti, imi wok faku bidiw kisol uyo leiw alew mo kuduyámin kala.  
\v 18 Kale be watawo kaleyo bá, Got godin weng uyo bako nadule, “iniman akis, wit kes budung takelin uyo wok leiw imin leiw bon tem so atimin bá.” ade “wok fakudin kinim aka alam wok faku be yán kisol uyo kudamako.” Kalesu.  
\v 19 Kale kinim mak Got wanang kinim gu gebom ami weng fine mak kudew tad dákama namti, weng be kidilawin bá, kata afan kinim alewo alewbino tad nadiwe weng fine makuw be ki bakokam afano kaliwo beta kidiyamin ko.  
\v 20 Yak gebom gebom kan ita ban keidiw namti, miso tem kadákal ngadák fuko imtidawo, yak gebom gebom adikum iyo utam nadiwo masi am kanodawa be nuso kanoyamano, kale fingán bom nadiwo kala.   
\p
\v 21 Naka Got so Kadais Yesus so ensel abem abem so im kin dim kadákal weng bela bakabi kale weng sawa sawayabi adikum bela faku nadawade kinim adikum wak gelelawal kala, masi kaba sákmin ita kanaya bom nadawade kalam duw ita imadámin bá kala.   
\p
\v 22 Kaba wabising mam mam bom kinim mak waluli Got wok fakudako, kalin bá, masi walulawe, aka ulum kanom ban keimin mak keidokaba namti, kalawso am ban keida uyo kalawso falak gitikamomu kala. Kale kam aket atin ban keimin banim kei bom nadawo kala.   
\p
\v 23 Kaba sun kuw asanábaw, kayo wok kuw wanin bá, kabalam mat uyo mafakabu, kale wok wain uyo katiw mak kudu wananámal kala.   
\p
\v 24 Yak kinim madik im ban keibiw bo kaím kalám gu kayo, ika kal kei taktaka imu sok geidokabiwo, yakanábiw ka, yak wanang kinim madik kalo iwál ban keibiw itane yanol taktakin am dánokabu kal matam misunokabu.  
\v 25 Ulum leiw makuw be ki kukuw kidel ukul misun laklakinokabu ade yak kukuw madik ken utamodiw banim ukul kano wánomu banim keidokabu.   
\c 6  
\s1 Wok fakudin kinim imi sung.  
\p
\v 1 Kale adikum sok gei tabamin kinim taw imi Yesus aket kudawsiw, ika ilim tabalasewal imi dakbu akfak tem bom nadiwe ilim mit tem tadiwo kinim so mak Got win so num kukubuw so uyo weng fine bakomamodiw banim keidin kala.  
\v 2 Kale sok gei tabamin kinim taw imi tabalasew ayo Got aket kudawsa kinim namti, ika bako, nulum muksidon buyo kale am wok iyo balut balutin bá, afan ika aket fukan dá, au aka Got aket kudawsa kinim kale bako, naka aket kudawsi, kale naka am wok uyo kidela fakudaw bidino ufek ufek kidel uyo maek tade muk. Kale wok kidel ki fakámin kala.  
\v 3 Kale Nulum Kamok Yesus Kadais ayo Got kukuw kidel uyo kukuyam bom sawa kidel bakayamsa uyo kanamom kinim mak tad ibako kukuw makik makik kukuya bom  
\v 4 alam win kufá bom keiba, kata alam kal keimin uta atin banim. Kale kanaba kinim am aket fukanin bo mafak ki, kayo Yesus weng mit uyo ilel bom wengal fukan bom kawákal titiyámin so yakanáleng kalin so kinim atafimin so weng falak tei dok didawámin so umi kukuw uyo matam tademala.  
\v 5 Kale kanamin kukuw fakudin kinim aka am aket fukanin uyo kidel so mak keidomu banim ade afan weng uyo am kidin tem bomu banim, kale am aket Got yán aboyámin kukuw bude kana bomo matam kisol kayakim keiyámin kaí, kale kanamala.   
\p
\v 6 Kale bo afan Got yán aboyámin kukuw bo ken kinim be dakodawa matam kisol kayak keiyámin, kata alam ufek ufek faku be uyo alam aket keno kalom nadano kuw ko.  
\v 7 Nuka nulum neiniw mat temo mitabesuduw ayo wataw so mak dew tasuwe? Atin bá. Ade bakan kadák teinámin uyo kudálum kalokabuw ukal wataw so mak kudew unokabuwe? Atin bá.  
\v 8 Kata nuka wanin wanin so ilim kál so mak fakubuduw namti, buta kuw faku keno, kalin ko.  
\v 9 Kata yak kan kinim im aket nuka kisol yak so kudulumo, kalbiw, ika uta ta bom aket tako imadew yak abil sangadet im tam gidokaba ade ufek ufek mafak aket wananbudu um aket ki aket lulelule audokabiw. Kale kal atin im mafak dádokabu.  
\v 10 Kala kaleyo kisol umi aket wananyamin umi mit ayo mew adikum kukuw mafak mit, kale kinim madik iyo kisol aket wananyam budu ta bom nadiwade ilim aket afano kalin uyo kuwo mul tei nadiwade ilim aket fau bom nadiwade amanin seng keim unbiw kala.   
\p
\v 11 Kata kaba Got ami kinim kale kanamin kukuw bula atin ibik wakumam uyak kaek abe nadawe kinim kidelok keibaw kuw, atin Got taw kinim abem kei nadawade aket afano kale nadawade aket kudawa kudawin uyo faku nadawade idum tade bu uyo kuek di kufi une kufi une bom nadawade fibu bom kanodin kukuw kidel uyo kudew tabal kala.  
\v 12 Kale kidela gadel tabe kinim biyaku tow win keidono, kanaba taw kabal kidela Yesus yán abo ta bom nadawo tow sun biyámin uyo win kei kudulal kala. Kale dil Got gán dákam sun biyámin uyo kudulalo, kaka, kalam afan kalin uyo wanang so kinim so kin dim kal kuw misun teisaw make.  
\v 13 Got mew ufek ufek adikum umi sinik mit kayak so Kadais Yesus Bantias Bailet alew im kin dim kadák kin walamin weng kidel bakose so im kin dim kadákal naka kitid weng bakakabi.  
\v 14 Kale kaba sawa bela atin ulum kano abo nadawade um weng fákam banim dew faku nadiwade asadawo Kamok Yesus Kadais ami am dánámin misunuk kala, Kale am misunokaba uyo  
\v 15 Got alam am dánámin ulum atan keibudune, kal misunokabano kalbu. Kale Got ata ki kin modin kinim ade ata ki kamok kamok imi Kamokim ade ata ki gebom gebom imi Gebom.  
\v 16 Kale alafin ata kuw Motabid Got ade aka atan eidin dukum kinim yak mewso unodiw banim taw kal biyába ade aka kinim so mak atamsiw bá ade kinim so mak atamodiw banim. Kale Got alafin ata kuw win dukum. Kale kaba win dukum kufádábadaw ade ami kitid ayo ulum kanom sun kuw bu kala. Kale afan ko.   
\p
\v 17 Kaleyo yak kinim bakan kadák kisol kayak keibidiw iyo kitid weng bakoyamaw, nuta kayo, kale ilim win kufámin uyo kudá nadiwe ilim mimin dok kisol win tabin diyámin uyo bokabu bá, kata mimin dok Got ata didawin kala. Kale Got ata kuw yaknámin ufek ufek iwabidiw uyo kikiw keiyam im isom dakáyamin kinim kale aka kanodin ufek ufek bula kuyam kano kalfal bom fakámino, yakeisa.  
\v 18 Kale kaba weng sawa dauyamaw kukuw kidel kuw faku bom nadiwe sun kuw kukuw kidel kuw kudew tabe nadiwade kinim isom kei gelemámin kala.  
\v 19 Kale ika kanamin kukuw be kanamokabiw namti, ika abid tikin kal kisol kayak keidumo, kale ilim kisol ifebiw, be abid tikin abin abák kitid keidokabu. Kale be kano nadiwo ilim sun biyámin uyo kudulokabiw, kale be atin biyámin tatun uta ka.   
\p
\v 20 Timoti kaba, Got ufek ufek bamadá kudákama yak kalamal abesu uyo kidela kin mo nadawe kinim imi weng tatun kanamá bom weng mit banim Got amiyo tadebu bá, umi kalan wengal kalbiw uyo kaba yakso unemin bá. Kale ika ufek ufek kukum uta bako, “bo kal keimino,” kalbiw, kata bo atin afan kal keimin bá uta ko.  
\v 21 Kaleyo ika bako nadiw, “nuka kal keimin fakubuduwo,” kalesiw uta kanamon nadiwe ilim aket afano kalin uyo ituwa kudásidiw ko.  
\p Got ami min gelemin uyo kabalawso badano kala.