\id 1PE  - Faiwol NT [fai] -Papua New Guinea 1995 (DBL 2014) 
\h 1 Bita 
\toc1 1 Bita 
\toc2 1 Bita 
\toc3 1 Bi 
\mt1 1 Bita  
\c 1  
\p
\v 1 Naka Bita Yesus Kadais alam weng dew kámin kinim, nata sauk kon bela Got wanang kinim walu imuda kilim abiw uyo fotabiw, kudá sakun dá yak Bantas bakan so Galesia bakan so Kabaddosiya bakan so Eisa bakan so Bitinia bakan so adik yak aba maek aba unsidiw kimino, kale goduyami ko.  
\v 2 Kale Got aka alam weng gudul kutisa ki abo bom yak alam kinim wanang iyo abem kei imudono, kalba. Kale aka belami kanaba ayo ki alam Sinik Abem kilim kidin tem bom wok faku be ami dim kanaba ade Yesus Kadais kaim uyo num aket tem kideluyaba, kayo kiba Yesus Kadais weng uyo kidiyámin kala. Kale aka beta kale nadano walu imuse ko.  
\p Naka Got gánlaw bidino ami min gelemin so aket dakbudin so uyo kiba kuduliwe, atin weina imudak kala.   
\s1 Atin afan Got alam kanoyamokaba umi mimin dok diyámin sung uta ko  
\p
\v 3 Kaleyo nuka nulum Kamok Yesus Kadais ami Alaw Got ayo ken keiyo, ak bom naduwo kala. Kale be watawo kaleyo bá, aka num kinkino, yakin seng uyo kuyamase. Kale atin afan Got alam kanoyamokaba umi mimin dok diyámin be nulum alokso biyámin kukuw kuyamase kal kudubuw kala. Kaleyo alokso biyámin kukuw be nulumi, watawo kaleyo bá, alo Yesus Kadais ayo fikala dafose, kayo Got ami kanose beta atam naduwo kal keidomo nulum mimin dok diyámin uyo banimomu banim kala, kalum kala.  
\v 4 Kaleyo nuka Got ufek ufek kidel adikum alam kinim wanang imino, kale kutiyama bu umi kayak keisuduw. Kale num ufek ufek kidel be abid tikin kal kutiyama bu, beyo ki fomomu banim, baim teinomu banim ade banimomu banim uta kudulumo, kale mimin dok dibuduw ka.  
\v 5 Kale belami mimin dok diyámin uyo ki yak kilim afan kalin umi tudow dim Got kitid tuw kál ged moyama, si am afung am dim kal kano kail bá takeikuyamokaba uyo kuw misun teidono, kale faskoba kala.  
\v 6 Kaleyo kiba kidela idak tein bom nadiwo kala. Kale kiba kál funin so idum so seng kudew bom ilil so kei bidiw, kata ulum kano kalfal bom nadiwo kala.  
\v 7 Kale kanodin idum kudew tabe bidiw mit uyo yak kinim madik kukuyam kim afan kalin uyo atin afan kalino, kaleyo be bakan dim kinim im tum gol weing kufu atin tum gole báye, kalanábiw taw. Kale atin tum gol bo kanom sun bomu banim, kata kim afan kalin bo atin afan ade bo atin ulum kano sun sun bokabu ade Got ayo Yesus Kadais daw misun teidokaba, kal kalfalyam bom weng kidel bakaya bom ade win kufoyamokaba kala.  
\v 8 Kaleyo kiba kim kin mak atamongin banim, kata kiba aket kudawsiw ade aka afan Yesus Kadais, akbiw. Ade kim aket tem kalfalin lamlam so uyo atin weina weng utaw so kaloliw banim keibiw kayo kala.  
\v 9 Kale kim afan kalin uyo mit so kale, umi mit uyo ki kilim dam so sinik so uyo kail bá takeikuyamokaba uta ko. Ade um dam kaí, kamane kiba ban keimin umi kail ude bá takeikumaba ka.   
\p
\v 10 Kale suwayo lum senin kinim ika Got min gelemin dim kail bá takeikuyamokaba umi sung uyo bakayamsiw ade ika umi mit uyo leiw seng seng fen bom nadiwe utam kal keimsiw.  
\v 11 Kale ika be leiw fen bom utaw atan kal tadokabu ade yakno yakno tadokabu kal bidiwo, Kadais ami Sinik Abem ilim kidin tem be ata kukuyama utamomo, yanol Yesus ayo kál funin kudu nadane talá tabe alam wasi im tam mo akayam nadane kalfalin amsun kudulokaba ka, kalesiw.  
\v 12 Got ami lum senin kinim kukuyamsa im wok uyo sák mada ilim luk bá, kata be kim luk uta kanamsiw. Kale ika kim wok fakuyámsiw uyo ki Got sung kidel umi sung bakayamsiw ude kamane ukul Got sung kidel bakayamin kinim iyo ki bakaya bidiw kidibiw. Ika Got Sinik Abem abid tikin kalo dabadála tase ami kitid dim bakayabiw. Kale weng kidiliw be Got ensel kata ika iliso fen dá kal keidumo, kalsiw ko.   
\s1 Abem kei biyámin sung uta ko.  
\p
\v 13 Kaleyo Got be kanaba, kayo kaba kalam aket tem uyo fukan dá yakno yakno nadino faskodokabi, kal bom aket tetal kala. Kale kidela kin gadel tabe nadawe Yesus wanang kinim dim misunokaba atan kal Got ami ufek ufek kidel kukayamokaba, umi mimin uyo kidela dok didal kala.  
\v 14 Got weng kidilawin uyo sun kuw abo bom nadiwo kala. Kale be watawo kaleyo bá, kiba alam muduw kayo kilim aket mafak fukanin so aboyámin bá, bo kamakikiw Got kal keidongin dako bom kanamámsiw ki kala.  
\v 15 Kata Got gán dáyamase kinim aka Kinim Abem, kayo kabal kinim abe kei kukuw adikum kanabaw uyo kana bom nadawo kala.  
\v 16 Kale Got ami godin weng uyo bako, “kaba kinim abem kei bom nadawo kala, kale be watawo kaleyo bá, naka abem make.” Kalesu.   
\p
\v 17 Kale kiba Got gánlaw bom Natim Goto kalanaliw, kale aka wanang kinim adikum im kukuw fakuyábiw adik utamába ade wanang kinim kikiw kuw taktakokaba be alam nulum kukuw ki abo taktak imkanokaba kala. Kaleyo kiba bakan dim kilim kukuw kana bom biyámin uyo fingánin so alam akfak tem bomo kala.  
\v 18 Kilim fasel kukuw kana bom bino, yakeisiw bo dakoyamoma banim. Sák bude atin ban keimin ta bom gei imusa ade bo kilim kal, bo yaknámin uta ta bom dil kukuw uyo mo imu min talá imuse? Kale bo kikiláw ufek ufek tum silwa tuw bá ade tum gol tuw bá kale bo banimokabu,  
\v 19 kata Kadais ami kaim mo imuse bo atin kisol afalik adikum akayamsa kala. Kaleyo Yesus alam asiki gi dause uyo iniman siwsiw atin kidelok taw kei Got wane ilulawase.  
\v 20 Kale be kamakikiw bakan kidel kudongin banim kal Got ayo walu dau kanodokaba, akeisa. Kale kamane am afung am dána tadba, be Got ayo kilimi luk uta daw misun teise kala.  
\v 21 Kale am win dim Got afan, akbiw be Got alata fikala dafo bá kuw win dukum kudaw audano, kayo kiba Got be afan kale nadiwe alam weng takadá kanoyamokabi, yakeisa uyo mimin dok di bidiw kala.   
\p
\v 22 Kale kamane kiba tatun weng uyo kidiyábiw, kayo umi tudow dim kim aket tem uyo ifiw banim atin kidelasidiw. Kale kiba kilim kafadow kasel Got afan kalin iyo atin kidela aket kuyam bom atin im aket uyo fikale bom nadiwo kala.  
\v 23 Kale be watawo kaleyo bá, Got ami sun biyámin weng uyo madák kinim kei biyámsa am tudow dim ulum kano alokso sun biyámin sinik so uyo kudusidiw. Kale kiba ulum kano ilim tuwa ulum kano biyámin man keisidiw, kale kiba fikalanin umi muduw bá kala.   
\p
\v 24 Kale Got godin weng uyo bako,  
\q1 “adikum wanang kinim iyo ki badasal taw ade im lukluk uyo ki as wok abudin taw, kale badasal bu bito dok asal teidaw bo alinámin ade as wok bo abu kadis kale kalein.  
\v 25 Kata Got weng bu ulum kano sun sun biyámin ka.”  
\m Kale weng bela Got sung kidel bakayamin kinim imi bakayamábiw uta ko.   
\c 2  
\s1 Yesus be sinik so biyámin tumo, kalin sung uta ko.  
\p
\v 1 Kale kilim kidin tem aket mafak fukanin uyo atin adik gadow dádiw sakaba nade ibakamin kukuw uyo adik gadow dádiw sakaba nade kasen kei kudáli kaí, kalin bá ade yak mak imi wok abin uyo nalata kuw fakudono, kalin bá ade mak imi ufek ufek uyo aket kukámamin bá ade mak imi win uyo kuw mafak dákamin bá kala.  
\v 2 Kale kiba man unak muk tew keidaba taw, kiba kilim aket fukanin uyo adikum Got weng ami tew ki keiyam badano, Got weng wan bom kilim alokso biyámin kukuw uyo matam kitida dudew tabiwo Got ayo ban keimin kail uyo bá takeikuyamak kala.  
\v 3 Got godin weng uyo bako, “kaba Kamok ami kukuw kidel kuw kidelkaba uyo utam kalam kal keisaw.” Kalesu kala.   
\p
\v 4 Kaleyo kiba maek Kamok Yesus sun sinik so biyámin kinim mit tem tadin kala. Got aka Yol am gina bom nada tum mak kidel kuti kudew yak Yol am be ginedono, kalba, kale tum be Yesus ata ka. Kata am ginamin kinim madik imi aket fukanin bu, nuta Got am Yol am ginabuwo kale tum be aket kudawongin banim, kata Got ayo tum be walu dauda atin kinim kidelok takak soim keisa ka.  
\v 5 Kale kiba, tum Yol am ginamumo, kale kidel imtibiw taw kale kiba sák bisok ding banim tum taw bá. Kale kiba dudaw áliwo imadew yak Got ami Yol am uyo gu makuw ginedak kala. Kale ginedano, kiba kiliwta Got wanang kinim abem kei bom nadiwo Yesus win dim Got ufek ufek wane ilkáda bidiw alam aket kidela mak kala. Kale be Got Sinik Abem alata sawa dawkáya bom, bo kanamino, yakba.  
\v 6 Kale Got godin weng uyo bako,  
\q1 “naka tum kidelok babid makuw walu abin abak amgu Sayon tikin kal dawtidi ade kan ata aket kudaw afan kala kaí, aka atin aket idum mak keidoma banim.”  
\m Kalesu.  
\v 7 Kale tum bela kisol dukum kidelok fakudin taw, kata wanang kinim ilifin afan akbiw, kata yak wanang kinim kan ata Got afan kalongin banim itane Got godin weng uyo bakoyam, “yak tum am ginamin ika bako, ‘num aket fukanin tum be mafako,’ akbuw, aka yanol matam tum abem iwkuk kei mew tum adikum akayamokabano.” Kalesu.  
\v 8 Ade alo yak Got godin weng mak utane bakoyam, “tum belata wanang kinim iyo umi dim di diki bom gidin si imadák kámodokabano, yakbu ko.” Kale im di diki bom gidinbiw, be watawo kaleyo bá, ika Got sung kidel uyo afan kalongin danim, kayo kale be Got alata be kanodino, yakba kayo ko.  
\v 9 Kata kiba Got ayo walu imu kinim mit makuw kei imuse ade Kamok ami kinim abem kei imuse ade kinim abem mit makuw dák mak dá imuse ade atin Got wanang kinim adik dáw keiyam nadane midilin tem kalo gán dáyama yak alam lánin lamlam tem unsidiw kala. Kale be Got aka walu imu alam kukuw kidel kanamsa, umi sung bakamin kinim kei imuse kayo ko.  
\v 10 Kamakikiw kiba Got ami kinim keiyámsiw bá, kata kamane kiba Got alam kinim keibiw ka. Kamakikiw kiba Got am aket budunin bo kim kal banim keiyámsiw, kata kamane kiba Got aket budunin uyo kudabiw kala.  
\v 11 Kale nalam duw ifin kiba naka dam bakayabi. Kale be atin kidela kidilin kala. Bakan dim budák kiba kotadang kei bidiw ade kim abiw banim kei bidiw kala, kaleyo kiba dam umi kidelnamalo, kalbu uyo kidimamongin dakodiwo kilim aket uyo kuw mafak dádongin banim keiduk kala. Kale kiba sun kuw kilim dam kidelnamalo, kalbu uyo kitid tabe ilelmam bom nadiwo kala.  
\v 12 Kale kiba kukuw kidel faku bom tein bidiw, Got im kal banim, ika kim iwyak tem tem bidiw imi weng bakaya bom “kim kukuw kanabiw bo mafak kanabiwo,” yakbiw. Kata kiba kibilim kukuw uyo kidel kuw deku bidiwo yanol Yesus tadokaba uyo ika kal kei Got win kufo bakodaw, “ika kukuw kidel kuw fakusiwo.” Yakin kala.   
\s1 Gawman gebom gebom imi akfak tem unemin sung uta ko.  
\p
\v 13 Kale Kamok Yesus ami luk kanadawin ayo ki, kiba adikum bakan dim kilim kamok kamok imi akfak tem bom nadiwo kala. Kale beyo ki gawman Badaim Minista  
\v 14 ade alam gawman kamok kamok ilim akfak tem bidi, Badai Minista kitid dauyam alata gawman kamok kamok walu imu yak kan ata kukuw mafak fákanba, iyo sok gei imka bom nadiwe yak kan ata kukuw kidel kanabiw iyo keno, yakanin kala. Kale yakeisa.  
\v 15 Kaleyo Got am aket ayo yak kim kukuw kidel faku bidiw, uta ta bom wanang kinim kidela kal keidongin dako bom weng mafak bakayabiw, imi bon tem uyo atiyamak kala.  
\v 16 Kim biyámin uyo min luk bala bom kukuw kidel kuw kana bom nadiwo luk bala yak kukuw mafak uyo kanamodiw banim keidin kala. Kale yak Got alam bakoyam, “beta kuw kanamino,” yakba ki kana bom nadiwo  
\v 17 yak wanang kinim adikum iyo fibu ita bom kalam Got afan kalin duw ifin iyo aket kuyam nadawe Got ata fingon dá, gawman Badai Minista akfak tem bom nadawo kala.   
\p
\v 18 Yak wok fakudin wanang kinim kiba, kilim kin modin iyo imi akfak tem tein bom nadiwo kala. Kale be yak kilim kin modin ita kuw kidel itamámin bá, kata yak kilim wok fakudin kamok mafak so kidelya bom nadiwo ko.  
\v 19 Kiba ban mak keidongin dakodiw, sák sok gei imudiw kál funin kudu bidiw kaí, kiba bo fukan dádomo, bo Got aka bo kano kudew tabino, yakba ka, kalin kala. Kale be atin kim teinámin kidel ude kalbu ka.  
\v 20 Kiba ban kei bidiwo, ulum yán ki ken sok gei imkanbiw, bo wataw kim uta win kufoyamokabane? Kata kiba kukuw kidel umi tudow dim sok gei kál funin kudabiw ade kiba dakbu bidiw namti, Got aka aket kalfalin kukáyaba ko.  
\v 21 Kaleyo, Got ayo kano gán dáyam maek kanodin kál funin bo kano kudewino yakeise. Kale be Kadais alami ayo kanoyam kim luk kál funin kudu nada kim kukuyam kanodin kál funin bo kudew nalam yán abodino yakeise kala.   
\q1
\v 22 “Aka ban so keisa bá ade aka kasen keimin weng so mak bakosa bá.”   
\m
\v 23 Kale kinim wanang im weng mafak bakadawsiw uyo mak akal weng fakadu yán kisa bá. Wanang kinim imi kál funin kukadaw bom keimsiw uyo aka mak yán ki bakoyam, “nakal kanoyami kibil kál funin kudokabiw so yakeise bá, kata aka Got taktakin kukuw kidel alam kal kayo bo Got alam sano.” Yakeisa.  
\v 24 Num ban keimin uyo kudew yak Yesus alam kal bino nada as dawing dákamin dim fikalese, kayo nuka ban keimin akfak tem biyámin uyo ken min talá gulbal kei bom naduwe nuka Got alam kana bom bino, yakba ki kana bom bum kala. Kale be Yesus alam kál wako dau sidiw kal kiba tá kidel imuse ko.  
\v 25 Kiba iniman siwsiw yon sák leiw mafak unin taw keiyámsiw, kata iniman siwsiw Ifemin Kinim tad nada bakadu imadew maek leiw dá nalam yán abodino yakeise kale be aka alata kim aket tem kin moyama be ko.   
\c 3  
\s1 Wanang dikin kinim dikin imi sung uta ko.  
\p
\v 1 Kale wok fakudin kinim ika ilim kin modin kinim weng ki kidilawábiw taw, kinim kadelal, kiba kidela kimakal akfak tem une bom nadiwo kala. Kale yak kan kimak ata Got mak afan kalongin banim kaí, kilim biyámin kukuw uta kidel kuw kanamiwo, kimakal iyo kim kukuw beta atam nadiwo kiba kimakal weng bakoyamongin banim, ikil maek Got afan kalokabiw.  
\v 2 Watawo kaleyo bá, kilim kimakal weng kidiyam akfak tem unom, kukuw kidel kana bidiwo, beta atam nadiwo kayo ko.  
\v 3 Wanang kilim takak so tabamin beyo ki, ilim kidel mikibi tabamin uta bá, gebom kon angudun bi kuda tabamin uta bá ade kál dim dim kait keibi kuda tabamin uta bá.  
\v 4 Kata kilim takak so tabamin uyo ki kilim aket tem dakbuyámin so fiw buyámin so uta ko. Bemi takak uyo banimomu banim. Kale Got ata kuw kaek fen itam am aket atin kidel keidawámin kukuw uta ko.  
\v 5 Kale kamakikiw Got wanang abem keiyámsiw, ika mimin dok Got ki didaw bom ilim kimakal akfak tem unom ilim weng ki kidiyamá bom kei bom nadiwo takak so wanang keiyámsiw.  
\v 6 Kale wanang Seda kanamámsu taw, uka kimak Ebadakkam bakodaw, “nalam Kamoko,” akanámsu. Kale kamane kibil kukuw kidel faku, fingánin banim, kimakal iyo luk bala bakoyam, “nulum kamoko,” yakaniw namti, beta afan kiba Seda muduw kasal ko.   
\p
\v 7 Ulutaw ki kimakal kibil kilim kadelal so biyámin uyo kidel kuw bom nadiwe aket dauyam bom ilim ufek ufek waktuwa bidiw uyo kukaya bom nadiwo kala. Kale be watawo kaleyo bá, wanang imi kitid uyo kinim im kitid taw bá, iki iliso kiliwso makuw, Got ami kukuw kidel faku biyámin umi yán uyo min kuyamokaba kala. Kale kiba kanamokabiw ayo ki yaknámin mak ta bom kim Got suksukin uyo leiw atiyamoma banim.   
\p
\v 8 Nam weng adik adik ayo bakoyam kim bokabiw ayo kiba aket fukanin makuw kei bom nadiwe kal keida keida kilim muk wakon taw aket daudawa daudawa bom ade akfak tem une, daw kidel bada daw kidel bada keimin kala.  
\v 9 Kiba kinim wanang kukuw mafak kanayabiw uyo kibil yán ki kukuw mafak kanayamin bá ade ika kim gán abubiw uyo kibil yán ki gán abumin bá. Kata ita kukuw mafak kanayamiw kaí, kiwta kukuw kidel kuw kanaya bom nadiwo kala, kale be watawo kaleyo bá, alo Got ayo gán dáyam nadane weng takadá kukuw kidel kuw kanayamokabi, yakeisa make.  
\v 10 Alo Got godin weng uyo bako,  
\q1 “kinim kan ata alam teinámin uyo atin kidel kuw bom atan kidel dána bada utamanba taw kei bom bono kala kaí, weng mafak so bakamin bá ade ibakamin weng so bakamin bá.  
\v 11 Kukuw mafak fákanin uyo ibik dumam nadiwade kukuw kidel kuw kana bom abino kalin dakbuyámin kukuw uyo yakik fakudin kala.  
\v 12 Watawo kaleyo bá, Kamok ayo yak wanang kinim kukuw kidel faku bidiw iyo im kin mo nadane im suksukin uyo kidiyamába, kata yak ban keimin kukuw mafak fákanin ika bu kus kuw itam kanayamába kala.”  
\m Kalesu.   
\p
\v 13 Kale kiba kukuw kidel ki aket kumamokabiw, be kan ata kál funin kuyamokaba?  
\v 14 Kata kiba kukuw kidel faku bidiwe sák ika ding banim kál funin dawkáya bom im mafak dákabiw kaí, kiba Got ami kukuw kidel kanayamokaba bán ade kal tein bidiw ka. Kale kiba sák wanang kinim iyo ita fingánin bá ade be so kanoyamokabiw kuw kalin bá.  
\v 15 Kata kin dok Yesus Kadais didaw bom kilim aket tem uyo alam win kufádaw bom aka nam Kamoko, akanin kala. Kale kiba sun kuw kinim madik iyo kim aket mimin dok di bidiw umi mit bakoyamino kale dákadálokabiw ki kano yán kidokabuw kale fasko bom nadiwo kala.  
\v 16 Kata be afan mak kanamiw kayo, akol dakbu ade fiyaw weng ata bakayamodiw ko. Kiba kilim aket kidel taktak bom fukanin uyo kidela tatun yakik faku nadiwo kiba fatom so mak gei imudoma banim kei bidiwo, kibi kilim kukuw kidel ki faku Yesus yán aboyámin uyo kinim weng mafak bakaya bom itam liwodiw umi fatom uyo asiki ilim bakodiw uyo ilimi gei imudak kala.  
\v 17 Bo yakodin leiw uta kidel ade yakodin leiw uta mafak? Kiba kukuw mafak fákanin umi tudow dim kál funin uta kidel bade Got alam aket fukanin kukuw kidel tudow dim kál funin kudamin uta kidel? Kukuw kidel umi tudow dim kál funin kudamin uta atin kidel ka.  
\v 18 Kaleyo, Yesus aka bid makuw ki mo adikum ban keimin wanang kinim imi fikaleyamase ade aka alo sawil fikaleyamoma banim, aka ban keimin wanang kinim imi luk duduyámin kinim kidel. Aka beta kano nadane tudo imadew yak Got mit tem unemin keise. Kale ika am dam bo anbisidiw, kata Sinik Abem ta bom tá dau dafose.  
\v 19 Sinik Abem alam kitid dim aka dák kuin bid suwayo Nowa dim alanámsiw imi Got weng kidilawongin banim alom fikalesiw, imi sinik kuin bid sok gei imtisiw iyo dák Got weng bakayamsa.  
\v 20 Kale im kanabisiw atan be, Got aka Nowa bakadawa, siw gina badane, Got akal wanang kinim aket mak daunam maek tadokabiwo kale fen bomo wanang kinim katiw ita kuw weng kidinamiw ka. Kale im tam siw tem dása, kale bidi wanang kinim luwan kal ita kuw Got dakoyama wok fákaliw modongin dakosa.  
\v 21 Ade imi wok fukadála taba kanabisiw be wok ban bomin umi kit. Kale nuka wok ban bo bom dák wok kumun tem unuw kaí, bo kuku Got ami Yesus tá dafose dim nuka fikalanin uyo kail bá takeikuyamase kalanaluw ko. Kale be wok kumun tem dák unuw baim ginguyamába uta bá, kata be kilim aket tem taktaku kidel kei nadiwade Got bakodaw, “nuka ban keimin ibik dumam kudáluwo,” kaleyábiw uta ko.  
\v 22 Yanol Got ayo Yesus talá dauda tam abid tikin nadane Got abin iwkuk uyo kudu adikum ensel so kinim gebom gebom so kitid soim kinim so bidi ata kin mo be ko.   
\c 4  
\s1 Got alami kinim adik dáw kei biyámin sung uta ko.  
\p
\v 1 Kaleyo Yesus ayo kál funin seng kuduse kayo kibil kano kim aket fukanin uyo kidela fasko Yesus alam kanose taw kibil kanodin kala. Watawo kaleyo bá, kinim kan ata kano kál funin kudew be kaí, aka ban keimin umi kitid akfak tem be bá.  
\v 2 Kayo kamane alam tein be so yanol tein unokaba so uyo alam bakan dim kana bom biyámin uyo Got ami kanamalo, akba ki kidi umi akfak tem bom nadane alam dam kuw kidelnamuko kalin aket fukanin bo kudálak kala.  
\v 3 Kale kiba, kamakikiw atan seng seng uyo dil ban keimin kinim imi kanamumo kalin ki kanamusiw. Kale bo fatom keimin kukuw uta aket kumam kanamusiw. Kale be aket seng sakadinin kukuw kukámamin so bakan dim ufek ufek kayakim keiyámin so liwliw wan bom wok mafak wanin so ibakamin got suksukin so uta kanamámsiw ko.  
\v 4 Kale ban keimin wanang kinim ika itamomo, kiba yak imi kukuw mafak aket fukan dádongin banim sák luk bala sakadinin kukuw kanabiw uyo kiba kiliwso kanamongin banim, kayo ika aket diking dakung bom nadiwade itam libiw ko.  
\v 5 Kata ika fikalesiw so kaunsin bidiw so taktakin Got ayo dákadáyam bako, “kiba watawo itam liwusiwako,” yakokaba kala.  
\v 6 Beta kaleyo Yesus ayo wanang kinim fikalesiw iliso Got weng bakayamsa. Ade imi fikalesiw be kanom wanang kinim adikum fikalino kalesa, be watawo kaleyo bá, dam uyo fikale fomuko kalesa make. Kata Yesus ayo Got weng bakoyamino im sinik uyo Got alam biyámin taw bino, yakeisa.   
\p
\v 7 Kale ufek ufek adikum uyo mewso kamkam wakadám tadbu kala. Kaleyo kibil fiyaw fukan dákanin kinim ade lábino ken Got suksuklawin wanang kinim keidokabiw ko.  
\v 8 Mew kukuw kidel adikum bo kanamom nadiwo atin kidela akanum aket kudawa kudawain ki atin kidela, yakik fakudin kala. Kale be watawo kaleyo bá, akanum aket kudawa kudawain uta kanam unom nadiwo kakanum ban keimin seng seng uyo lukuwá kudálawa kudálawain kayo ko.  
\v 9 Kiba, wanang kinim iyo adik tad num am bo tademino, kala kala bom nadiwe aket kus so keimin bá kala.  
\v 10 Kale kinim wanang adikum kiba, Got aka wanang kinim makuw makuw kukuw mak ken kanamino, kale dauyamsa, be Got alam min gelemin kukuw kayo aka geleyamsa kala. Kaleyo kin mo ken taktak bom yak kinim wanang madik iyo kidelya bom nadiwo ko.  
\v 11 Kale be alataw, kan ata aka Got weng bakanal, akeisa kaí, aka alam Got weng tatun kuw bakanak, kan ata wanang kinim dakáyamal, akeisa kaí, aka Got alam kitid dim dakáyam badano, Yesus win tudow dim adikum sun sun Got win kufádawin, adikum kitid so lamlam so uyo atin Got sun sun alami. Kale afan ko.   
\s1 Got afan kalin kei bom kál funin kudew tabamin umi sung uta ko.  
\p
\v 12 Atin nalam lonal kiba, kamane kál funin ufek ufek kudubidiw uyo amon bom diking dakungin bá. Kale be kilim afan kalin umi imkukubu. Kale be alam kano sun kanamokabu kala.  
\v 13 Kata kiba, Yesus alam kál funin kuduse ade kilim kál funin kudabiw uyo makuw be ki kanayabiw uyo kalfal bom nadiwo kala. Kale be kiba yanol wanang kinim iyo Yesus atamiw win dukum lamlam so kei tada kiba kawákal kalfalin afalik dukum uyo kudokabiw kala.  
\v 14 Kale kiba Yesus yán abo bidiwo wanang kinim iyo itam libiw kaí, atin be kim abin teinámin kidel ka. Kale bumi mit uyo ki Sinik Abem lamlam kayakim ayo atin kilim dim fewa badayo be kano kanoyábiw.  
\v 15 Kata kiba kinim anbidiw fikalanámin so abem lukelin so yak mak imi ufek ufek uyo yak kin mo bom taktakin so yakot wanin so keimiw namti, kiba umi yán uyo kano kál funin kudu nadiwe fatom keiyamuk kala.  
\v 16 Kata kim kál funin uyo kiba Kadais ami kinim, kayo kanayabiw namti, kiba fatom keiyamámin bá, kata Kadais ken keiyo, nuka Got afan kalino, yakbiwo kalanin kala.  
\v 17 Kale Got ayo mewso mit kei wanang kinim taktakongin keima. Kale kamakikiw alam kinim isik taktaka imudokaba. Kale Got ami nusik mit kei taktakyamono, kalokaba uyo yak Got weng afan kalongin banim iyo yakoyamokaba? Aka kail bá takeikuyamoma banim keidokaba ko.  
\v 18 Kale be Got godin weng uyo bako, “Got ami wanang kinim kidel kail bá takeikuyamono, kalokaba bo atin fitin namti, yak ban keimin wanang kinim Got aket kudawongin banim iyo yakodokabiwako?” Kalesu kala.  
\v 19 Kaleyo Got alam aket bu kano kál funin kudámino, yak bada kanabiw kaí, ika alam kanom kukuw kidel uyo kana bom nadiwe ilim aket uyo ilim kidel imusa Got kukádawin kala. Kale aka alam ulum kanoyamokabi kalesa uyo atin afan kanoyamokaba ko.   
\c 5  
\s1 Wanang kinim gebom gebom so mining man so imi sung uta ko.  
\p
\v 1 Nakal nalaso Got wanang kinim gu imi gebomo, naka yak gebom gebom madik Got kinim wanang gu adikum imi iwyak tem bidiw, kiba weng makuw bakoyamono, kali. Kale naka Yesus kál funin kuduse uyo kin walasi ade Got alam lamlam falal dausa uyo kuw misun teida tad nalamal so eidokaba ka.  
\v 2 Kaleyo naka Got ami wanang kinim gu gebom gebom kiba, mun dáyam kiba kidela akol dakbu, kilim Got kinim wanang gu adikum iyo kinim iniman siwsiw gimin kinim imi iniman siwsiw kano kin moyábiw taw kano kin mo bom nadiwo kala. Kale be Got alata kano be kanamino kale wok dauyamase kala. Kale kiba kinim imi weng dim kanamino, yak bidiwo uta bo kanamin bá, kata kiba kilim aket uta ulum kanamumo, kal bom nadiwo uta kanamin. Kale kanodin leiw beta Got am aket kanamino, yakba ade kimi wok fákanin uyo kisol uta kuámumo, kale nadiwo kanamin bá. Kata kinim wanang ita min dakáyamono kalin umi aket uta tein buduno kanamin kala.  
\v 3 Kiba Got kinim wanang gu iyo kiwta kin modino, yakeisidiw iyo bakan dim kamok imi kukuw taw kitid weng kuw bakaya bom yak kanodin maek kanodin yakin bá, kata kilim kukuw kidel fakuyámin uta kit kukuya bidiwo ikil kilim kukuw alataw ki ikil be kanamodiw ko.  
\v 4 Ade iniman siwsiw Ifemin Kinim Gebom misunane, kimi Got wanang kinim gu kin mo bom wok fakusiw umi kisol yán kudokabiw uyo ki atin lamlam kidel ade bo ulum kano sun sun bokabu.   
\p
\v 5 Alo naka weng mak mining kinim kiba, be kanamino, yaki ayo ki, kiba yak dil fikal kinim imi akfak tem bom nadiwo yak akanum dakodawa dakodawa keimin uyo akol dakbu kanamin kala. Kale Got godin weng uyo bako,  
\q1 “Got aka yak wanang kinim ilim win kufábiw iyo win dawayam bá kuw yak wanang kinim dakbu tein bidiw, ita kuw dakáyamin kidel uyo min geleyamokabano.”  
\m Kalesu.  
\v 6 Kaleyo kiba dakbu kilim win uyo kuwá nadiwe Got alam teng kitid soim akfak tem unokabiw, beta yanol alam kanoyamokabino, kalesa, atan kal kim win uyo kufoyamak kala.  
\v 7 Kaleyo kilim aket luklakin uyo kudew yak alam dim kutidin kala. Kale be watawo kaleyo bá, aka kál ged moyam kin diyama, be kayo.  
\v 8 kidela labino kilim wasi Mafakim ayo fotabe bom nadiwo kala. Kale aka kinim wanin sew busi layon mafak taw kinim mak fenom atam atin fubiyak dau wanono, kale ínwod kába kala.  
\v 9 Kale kilim afan kalin ki kidela yakik faku nadiwe Mafakim be fal kalomo bom nadiwo kala. Kale be watawo kaleyo bá, adikum anang bakan kuw tabodu Got afan kalin iyo kilim kál funin kudew tabe bidiw taw ikil be kanabiw ko.   
\p
\v 10 Au, beta kaleyo kim kál funin bo mada kikiláw. Kata Got gadel dauyamokaba, aka kiba ibu nadane imadála kutinodiw banim kei nadane aka asiki imadew maek audokaba. Ade aka Got alata ki min dakáyamin kinim, aka gán dáyama yak Yesus so makuw kei alam lamlam uyo makuw kikiw budá imudane, bumi lamlam uyo ulum kano sun kuw bokabu ko.  
\v 11 Nulum kal Got aka adikum kitid bo alata kin moyamak kala. Kale be afan ko.   
\s1 Adik adik weng sidiwano kalin sung uta ko.  
\p
\v 12 Kale nuka sauk kon mewtanong bela Sailas Got afan kalin dudew tabesa kinim, duw ata dakonamano, sauk kon be goduyami. Kale naka weng kitid ade num sauk kon weng adikum bakoyami be kin walamin, kale Got alam min dakáyamin bemi luk uta kidela yakik fakudino, kale goduyami kala.   
\p
\v 13 Kale Babilon kayak Got ami gu iliso waluse. Kale ika weng umuyamiw ade nalam man Mák alaso sidiwano, yaka ko.  
\v 14 Akanum weng umudawa umudawain uyo kidela Kadais ami kukuw abo dawtad miki, aket daudaw weng umudawa umudawain kala. Kale naka Got gánlaw bom bako, “Kadais wanang kinim kiba aket dakbudin uyo kiwso badano,” yaki ko.