\id 2TI - Fasu NT [faa] -Papua New Guinea 2011 (DBL 2014) 
\h 2 Timoti 
\toc1 2 Timoti 
\toc2 2 Timoti 
\toc3 2 Ti 
\mt1 2 Timoti  
\imt1 2 Timoti sawi one mahemakapukusa someane oyapo.  
\ip Poremo Timotiaki sawi meta one kesekea poparaka makesapo. Arirakano Efesase sésea Keresoa paosa aporo hinamoane Timotimo asekea reasamo, Poremo Timotiaki sawi one poparaka makesapo. Arirakano Pore Rome sitia tipura apea makesa reamo sawi one popasapo. Poremo ipi hemakapuraka, Rome aporomo ano rukusa maiya ane makerakanapo, aiyaka hemakapusuapo. Asiamo Poremo Timoti ararehokosakipoko sawi one popasapo.  
\iot 2 Timoti sawia some kepo parakuraka popasane oyapo.  
\io1 \ior 1:1-2\ior* Poremo sawi one kepomarekea popasapo.  
\io1 \ior 1:3–2:26\ior* Makata umisa fasereperakano soko, kotafe hora aporoamo some karakano soko, Timoti ne paroaka reke, kakaro someane some kakanie, aisapo.  
\io1 \ior 3:1-9\ior* Fahokosa maiya ane makeanamo hauaka wo aporo hinamo watikiaka risikiakosapo.  
\io1 \ior 3:10–4:5\ior* Kotimo some popasane kekemaraka himu hakásaraka hemakapukua reke, kakaro koteaka some kakanie.  
\io1 \ior 4:6-22\ior* Poremo ipi hemakapusuane some metakira some kaka faraka, ayaparaka popasapo.  
\c 1  
\s1 Poremo Timotiaki sawi meta keseke poparaka makesane oyapo.  
\p
\v 1 Ano Poreane Yasu Keresomo tarira aporo rekeasimo Kotimo ipi hemakapukua ano murikimasapo. Kotimo someraka, “Yasu Keresoaki kataka marekea rekeno yaiya rekeakosapo.” Aíyaka Kotimo someaka maresane nōmo somehoasimo, ano Poreane murikimasapo.  
\v 2 Asiamo Timoti, néaki nōmo sawi one poparaka makerakanapo. Né Keresoa paosa aporosasamo, né nōmo hokosa asiapo. Né nōmo kára hemakapurakanapo. Ata Kotimo soko, isiapo Unihae Yasu Keresomo soko, néaki kamenakanane soko, auanane soko, makata yaku ararenane soko kakasimo nōmo hemakapurakaripo.   
\s1 Kotiaki suseaka kurikurinane oyapo.  
\p
\v 3 Nōmo makasa kaua kekemamo Kotipoko rakisia ayiáka, nōmo soko epoko rakirakanapo. Nōmo himura makata watikisa mahamekea rerafaraka epoko nōmo rakirakanapo. Rakiraka reke eaki nōmo suserakanapo. Ereamo soko, maíyamo soko, kurikuriraka reke, néane hemakapukua, Kotiaki suseaka kurikurirakanapo.  
\v 4 Ano purakasu maiya amo, nómo anopoko hiripurakasuane pipu nōmo hemakapurakanapo. Nōmo né aseako seseripo. Né asera maiya amo ano kára sesehokosapo.  
\v 5 Nómo Kotiaki himu hakásaraka hemakapukua rekeno nōmo hemakapurakanapo. Nómo ní hakamape Roisemo Kotiaki himu hakásaraka hemakapukua, arirakano nómo ní ama Yunisimo soko, Kotiaki himu hakásaraka hemakapusua ayiáka, nómo soko Kotiaki kakaro himu hakásaraka hemakapurakanapo. Hemakapurakano nōmo asekea seseripo.   
\s1 Ho Kotesamo yaku ararenane Timotiaki kasane oyapo.  
\p
\v 6 Asiamo nōmo hokonomo né sakaisa maiya amo, Kotimo néaki makata yaku ararena wakapuane kasapo. Wakapu kasane metakariakopo. Yaku ararena wakapuane maka maiya suamo rakiraka rekeanie.  
\v 7 Asiamo Ho Kotesa Kotimo isuaki kasane, himu karekekea namona hoane kasafapo. Ho Kotesane karáka isuaki wakapuane soko kaka, metaki himu tumurumo hemakapurane soko kaka, kaumo hemakapusuane rakirapaka koteaka hemakapurane soko kaka, ayiáka kasapo.   
\p
\v 8 Kasasamo Unihae Yasuane nómo some akara maiya amo karekekea namohokopo. Unihae Yasupoko ano tipura makesakipoko karekekea namohokopo. Nōmo Yasuane some kasakipoko ano mokoatikisa ayiáka, nómo Yasuane some kayane, né soko mokoatikirakano, né himu mahisihokopo. Kotimo ipi wakapuane nómo maka rakinie.  
\v 9 Kotimo makata rakirane rakisimo epo isu mafasisiapo. Mafasisiasamo makata watikisane kikisiraka epo ipi aporo ira risikiasimo isu murikimasapo. Asiamo isiapo isina makata rakisia akipoko epo isu murikimaka pasimosafapo. Epo ipi hemakapukua isu yaku arareraka murikimaka pasimosapo. Asiamo aporo hinamoaki yaku ararenane kakakosakipoko, Kotimo Yasu Keresoane kasapo. Wate fana hauaka wo makata su kepomarekea rakiasiraka rea maiya amo, Kotimo Yasu Keresoane murikimaka kasapo.  
\v 10 Kasasamo Yasu Keresoane hauaka wo pesapo. Pesasamo aporo hinamoane mafasirakanapo. Mafasisiane isuaki tarisiapo. Arirakano kura wakapuane epo rukumosaka tapisiapo. Epo rukumosaka tapikia yaiya rerane kasapo. Asiamo epo some kotesamo isuaki tarisiapo.   
\p
\v 11 Arirakano Yasuane hemakapusimo some kotesane nōmo some kaka, arirakano tisaraka soko tarikia, tarira apororaka soko rakikia, ayiakasimo Kotimo ano murikimarakasupo. Murikimarakano epoko nōmo rakirakanapo.  
\v 12 Rakiraka reakipoko, aporomo ano kawe yumo mokoatikiraka tipura makerakano, Keresoane nōmo some kakako ano karekekea namorakanafapo. Eaki nōmo himumo kataka marekea reke, eane nōmo kakaro hemakapurakanapo. Epo anoaki someraka, “Nōmo someane nómo some kakanie.” Aíyaka epo anoaki makata rakira kasane, epo asekea rekeane siahoasireapo. Yumo soko, keseke maiya fahokosa sere á pauhokosakipoko tipia apuramo soko, epo anoaki makata rakisimo aisane asekea rekeane siahoasireapo. Asiamo ano siaraka rekenapo.   
\p
\v 13 Yasumo ikia kara ereketaeane nómo kekemarape pusimo, kakaro some kepoane, nōmo, Timoti, néaki some kasapo. Some kasane kakimaka yaiya rekeanie. Yasu Keresoaki kataka marekea reke, himu hakásaraka hemakapukua, aporo metakirane soko nómo himu tumurumo hemakapunie.  
\v 14 Arirakano Ho Kotesane isu himua rekerakano, epo ipi yaku ararena wakapu kotesane nómo maka, Kotimo makata rakisimo néaki kasane, nómo koteaka asekea reke rakinie.   
\p
\v 15 Esea hauaka aporo suamo ano metakarikia patera tarikia, aporo yano motosa Fisérusepe soko Hemósenese tetapō soko, ano metakarisiapo. Aporo suamo ano metakarisiane nómo kaisiapo.  
\v 16 Arirakano ano tipura rekeno asekea, aporo meta Onésiforusemo karekekea namonafaraka, maiya káramo epo ano masesehoko pesapo. Asiasamo eane soko epo ipi ape aporo hakāsa risiane soko, Unihae Kotimo kamenakaraka asekea rekeasimo hemakapurakaripo.  
\v 17 Arirakano Onésiforuse Rome apea kimisi pesa maiya amo, epo ano kope perakasupo. Kope pekea ano aseraka, ano tipura rekeno epo karekerafaraka, ano ararerakasupo.  
\v 18 Araresasamo fa ana maiya amo, Unihae Kotimo e kamenakahoasimo nōmo hemakapurakaripo. Arirakano fana Efesase taonea soko epo ano kára ararerakasupo. Araresane nómo soko hemakapurakanapo.   
\c 2  
\s1 “Yasu Keresomo ame aporoane népo.” Aisane oyapo.  
\p
\v 1 Timotio, né nōmo hokosa asiapo. Nómo Yasu Keresoaki kataka marekea reke, Yasu Keresomo né yaku araresasamo, nómo wakapuaka rakiraka rekeanie.  
\v 2 Aporo suamo kaiyisimo, nōmo some kára some kasane, nómo kaisiapo. Some kaisiane, Yasu Keresoaki himu hakásaraka hemakapura aporoaki, nómo tisaraka some kakanie. Someane ipu kaikia, ipu aporo metakiraki some kakasimo, nómo iaki some kakanie, aihoanie.   
\p
\v 3 Yasu Keresomo ame aporo kotesa asiane népo. Makata umisa fasereperakano, ame aporomo rakiraka rera ayiáka, néaki soko makata umisa fasereperakano, Keresopoko paroaka rakiraka rekeanie.  
\v 4 Arirakano aporo amea paorakano ame aporomo rakira ayiáka epo rakirapo. Ame aporoamo yunu aporoaki weraka, ape aporomo makata rakira akiyaki hakāsa sarimaraka rakirafapo. Asiamo ame aporo satinimo sesehoasimo ayiáka amea paoraka rakiraka koteaka rakirapo.   
\p
\v 5 Aina ayiáka aporo fohokosakipoko karoraka risikino someraka, “Enonosa metakarikia fe taku anaka pukupo. Enonosa tipi anaka punie.” Aíyaka somemane motosane aporomo kakipayaraka ipi hemakapukua mokome purakano makata ropo\f + \fr 2:5 \ft Makata ropoane ira ku hahaeraka hatisane karotapirapo. Karotapirakano aporo metakiramo aseraka someraka, “Aporoane aporo kárapo,” airapo.\f* marafapo.  
\v 6 Aina ayiáka aporomo hemo wafororaka tokoraka, hemoa makata maposane tanehekea, parurakano, hemo wafayamo ipi fana mokoa nenapo.  
\v 7 Asiamo some one nōmo some karakano, Timoti, nómo kakimaka hemakapunie. Some one kepoane nómo hemakapusimo, Unihae Kotimo né ararehokosapo.   
\p
\v 8 Asiamo nómo Yasu Keresoane hemakapunie. Kini Tefetemo aporo ira wainepe pesa á Yasu takapesapo. Takapekea reke makata rakiraka nina kusuapo. Kusuane Kotimo maturikia taesapo. Maturikia taerakano Yasu turikia pusuane nōmo some karakanapo.  
\v 9 Arirakano Yasuane nōmo some karakano aporomo ano mokoatikirakasupo. Aporo metamo aporo meta rurakano, anekeapomo hokonoa rukua karona ayiáka, ano rukua karosapo. Ano amano ane rukua karoraka matasosapo. Matasosa ayiáka Kotimo someane ayiáka matasonafapo.  
\v 10 Matasohoanafonosasamo Kotimo aporo hinamo murikimasane mafasiakosakipoko, ano tipura reke ano mokoatikirakano soko hisirakanafapo. Asiasamo Yasu Keresoaki kataka marekea rea aporo hinamoane Kotimo faesa á yaiya risikiakosapo. Kotimo faesa á yaiya risikiasimo, ano mokoatikirakano soko siapo, airakanapo.   
\p
\v 11 Hao, kaisie, kakaro someane oyapo. “Isu Yasuyaki hakāsa kusuasamo eyaki hakāsa yaiya risikiakosapo.  
\v 12 Isu mokoatikirakano soko, e metakarianafonoraka, eyaki hakasa unihaeaka risikiakosapo. Isiapo e aserafapo, airakano, epo soko isuaki, re nōmo aserafapo, aihokosapo.  
\v 13 Aíyaka epo some kasane, isiapo metakarirakano, epo someane epo metakariakosafapo. Makata ayiakakosaposane kakaro su yanapo. Epo ainane kotafe horafapo. Epo ayiakakosapo, aíyaka somesane metakarikia some meta somerafapo.” Aíyaka popahoareapo. Popasane kakaro somepo.   
\s1 “Kotafe tisa aporomo someane nómo kakimarafaraka né uyáka rekeanie,” aisane oyapo.  
\p
\v 14 Nōmo some sawia popana one, aporo suamo hemakapusimo, some kakanie. Kotimo aserakano nenakamaka someane tafatafaraka somehokopo, aihoanie. Nena some tafatafaraka somesane, aporo metamo kairakano, aporoane aporo tafatafaraka somesa amo ararehokosare? Wae. Ararehokosafapo. Aporo metamo kairakano eane tafatafaraka somenamo mokoatikinapo.  
\v 15 Timoti, né, Kotimo makata rakira aporo reasasamo nómo wakapuaka koteaka rakinie. Koteaka rakirakano Kotimo néaki sesehokosapo. Asiamo nómo makata rakiakosane karekekea rerafaraka, Kotimo kakaro some kotesane ereketae susu some karakano ane, Koti hikumisia né kaíyahokosafapo.   
\p
\v 16 Aporo metakiramo Koti metakarikia, namina hemakapusua me rukua someraka risikino, nómo metakarikia koaraka punie. Koti metakarikia me rukua somerakano, someane aporo metamo kakimarakanone, Kotimo ikia kara purafaraka Kotiane koaraka ikia kara meta pukusapo.  
\v 17 Ipu namina hemakapusua me rukua somerakano, someane aporo metamo kakimarakano, aporoane siwaomo nekea mokoatikina ayiáka, someamo aporo kaisiane ayiáka, mokoatikirakanapo. Arirakano tafatafaraka nenakamaka somera tisa aporo tetāne, meta yano motosa Himeneuse, meta Firetuse tetāpo.  
\v 18 Tetapō kakaro ereketae somerane metakarikia, kotafe someraka, “Isu maturikia taesa maiya ane fasapo.” Aíyaka somerakano, someane Keresoa paosa aporo hinamo metakiramo kakimaraka, mahimeteraka risike, Kotiaki himu hakásaraka hemakapurakanafapo.   
\p
\v 19 Arirakano Kotimo kakaro someane yaiya rekenapo. Kotimo kakaro someane ira kesa parosa maposane hohohoanafonoraka wakapuaka area ayiáka paroaka rekenapo. Ira kesa á poparaka, “Unihae Koti ipia paosa aporo hinamoane ipi aseraka hemakapurapo.” Aíyaka popasapo. Arirakano makata meta soko popasane oyapo. “Ano Unihae Yasuane patera aserakanapo. Aisa aporo hinamo repo watikisane metakarinie.” Aíyaka popasapo.  
\v 20 Ape kára kakarua tisi soko, meraki soko, kapo soko, yakai tokenapo. Metane siufa maka meraki rakikia, meta koróto maka meraki rakikia, meta ira maka ira sorakae rakikia, meta ororo maka meraki rakikia, ayiáka rakikia taenapo. Meraki kapo taenane, metakira siufa soko, koróto soko, kakaro kotesane kikisiraka hakua taeraka, aporo kimisi apera maiya amo, meraki kotesane maka makata nakosa taeraka nenapo. Metakira kakaro kotehoanafonosane ira sorakaea soko ororo merakia soko, maiya suamo makata taeraka nenapo.  
\v 21 Aina ayiáka aporomo ipi watikiaka rakisiane rukupateraka himuane kosoraka rekeno, eaki “Makata kára kotesa rakira rakinie.” Aíyaka Unihae Kotimo mareakosapo. Meraki kotesane kikisiraka hakua taena ayiáka, aporo kotesane Unihae Kotimo kikisiraka hakua murikia “Makata kára kotesane rakinie.” Aíyaka murirapo. Arirakano makata kára kotesa rakiako hemakapura aporoamo ipi watikisane kakaro metakarikia, ipi Unihae Kotimo makata rakirane koteaka rakiako hemakapurapo.   
\p
\v 22 Timotio, hokosa rauamo ipi kaumo hemakapusuane kaikia rakira ayiáka nómo rakiakopo. Kaumo hemakapusuane metakarikia, ereketaeraka reke, Kotiaki himu hakásaraka hemakapukua, aporo metane himu tumurumo hemakapukua reke, weako hisiraka, ayiáka rekeako hemakapukua rekeanie. Ayiáka reke aporo himu koteaka hemakapukua Kotiaki wáraka risira aporo akiyaki kikinaraka rekeanie.  
\v 23 Nómo hemakapuraka tafatafaraka risiane, keseke aporoamo saperaka weakosapo. Asiamo aporomo koteaka hemakapurafaraka, nenakamaka tafatafaraka somerakano, aporoane metakarikia koaraka punie.   
\p
\v 24 Unihae Kotimo aporo raipamo saperaka tafatafaraka risikiane siahoasifareapo. Kotimo aporo raipamo aporo suaki koteaka hemakapukua ararenapo. Tau koteaka tisaraka tarikia some karápo.  
\v 25 Some kayane ipu kaiyako hisiraka waerakano asekea, Kotimo aporo raipamo tau auaraka maroponapo. Maroporaka ipu makata watikisane rakiako hisiraka hemakapurane soko, kakaro someane kakimako hemakapurane soko, Kotimo iaki kakasimoripo, aíyaka nómo hemakapunie.  
\v 26 Kakaro someane kakimako hemakapurane Kotimo iaki karakano, i pokoa he fesa kesaka risia tonotaeana ayiáka, i Satanemo pasimosane Kotimo tonotaehoasimoripo, aíyaka hemakapunie. Arirakano fana Satanemo iane pasimokoa epo ipi hemakapusuane iaki kasapo. Kasasamo ipu kakimaka himu mahimeteraka risiapo.   
\c 3  
\s1 Fahoko ana maiya amo makata faserepeakosane oyapo.  
\p
\v 1 Makata one hemakapunie. Fahoko ana maiya amo makata umisa watikisane kára faserepeakosapo. Makata umisa faserepeakosane oyapo.  
\v 2 Asiamo fahoko ana maiya amo aporo hinamomo soko, hokosamo soko, suamo watikiaka rakiakosapo. Asiamo aporomo makata suane, “Nōmo nīmenapo,” aíyaka taeraka umuraka, aporo metaki kakakosafapo. Arirakano “Makata su nōmo nī mokoaripi,” aíyaka hemakapukusapo. Arirakano e ipi yano motosane rupiraka makárahokosapo. Arirakano aporo metane asekea makefehokosapo. Arirakano aporo metaki mainamareakosapo. Arirakano ipi ata ama tetapō someane koaretaehokosapo. Arirakano suseaka somehokosafapo. Arirakano Kotiane soko metakariakosapo.  
\v 3 Arirakano aporo metakiraki himu tumurumo hemakapukusafapo. Arirakano aporo suaki himu mahisiraka sapesane fahokosakipoko api karakano asekea, makosafapo, sapesane soko fahokosafapo, yaiya rekeakosapo, aihokosapo. Arirakano aporo metane hokomako hemakapurane soko, weako hemakapurane soko, fahokosafapo. Ayiáka iriraraka rekeakosapo. Arirakano makata kotesane asekea hisihokosapo.  
\v 4 Arirakano ipu namina aporo táke nine parakehokosapo. Arirakano ipu namina hemakapusua hákasa aeyaka rakiakosapo. Arirakano ipu namina yano motosane makárahokosapo. Arirakano nenakamaka mokome enaraka koraka tokoako seseraka Kotiane hemakapukusafapo.  
\v 5 Kotiane kaumo kekemaraka rakiraka, eaki akai susumo yaiya wáraka reke, Kotimo wakapuaka rakirane ipu asekea yia someraka, “Kotimo wakapu rekenafapo,” aihokosapo. Aíyaka Kotiane kaumo kekerehokosapo. Timotio, aporo ayiáka rakiraka risikino asekea, aporoane koaraka metakarikia punie.   
\p
\v 6 Arirakano aporo metakira ayiáka risiane kema ape meta á yorokoa pukua, some kaka, ayiáka kema ape meta á soko yorokoa pukua, some kaka, ayiáka some kasane hinamo mahimeteraka toamo kakimakasimo, some kakako yorokoa purapo. Ipu hemakapusuane hinamoamo kekemahoasimo yorokoa some karápo. Some karakano hinamoamo himu mahimeteraka koteaka takekea hemakapunafonoraka toke ipu watikisane makata fato ayiáka ripape hiakosakipoko hemakapuraka, aporo metamo somerakano á kekemarakano, aporo metamo somerakano soko á kekemarakano, ayiáka mokome hemakapukua torapo.   
\p
\v 7 Hinamo ayiáka toamo makata kaweane enomako seserakanapo. Aisa nine kakaro someane ipu takekea hemakapurafapo. Hemakapunafonorakano ipu kema apea aporo watikisa yorokoa some kakako purapo.  
\v 8 Ayiáka aporo tetá yano motosa meta Yánese, meta Yámipirisi,\f + \fr 3:8 \ft Wate fana Yu aporo sisimamo uyáka somesapo. Iyipi aporo tetā, meta Yánese, meta Yámipirisi, tetā, ho kamuna aporopo.\f* tetapō koaretaeraka Moseseaki yunuraka risia ayiáka, aporo watikisa risiamo kakaro someaki yunuraka risikinapo. Yunuraka risike, ipu himumo makata watikisa susu hemakapuraka risike, Kotiaki himu hakásaraka hemakapurane metakarisiapo.  
\v 9 Arirakano aporoamo kotafe rakirane, aporo suamo aseraka “Masuarareapo.” Aihokosapo. Airakano ipu rakirane rakikia rosaka taehokosafapo. Aina ayiáka wate fana Yánesepe Yámipirisi tetapō makata rakisiane aporo suamo asekea hemakapuraka, “Tetapō ainane kotafehoareapo. Tetapō kotafe rakirane masuarareapo,” airakano makata rakirane kakaro rosaka taesafapo.   
\s1 Poremo Timotiaki someaka maresane oyapo.  
\p
\v 10 Kotimo someane nōmo tisaraka some kasane, Timoti, nómo kaisiapo. Nōmo ainane soko, nómo asesapo. Nōmo Kotiane kekemaraka rekeako hemakapusuane soko, nómo hemakapurakanapo. Nōmo Kotiaki himu hakásaraka hemakapurane soko, iriraraka somehoanafonoraka tau auaraka hemakapurane soko, aporo metaki kamenakaraka hemakapurane soko, makata umisa fasereperakano nōmo yaiya rakiraka rerane soko,  
\v 11 ano mokoatikirakano soko, ano kau tesane soko, anoaki makata waforona maresane soko, nómo hemakapurakanapo. Anitioke taonea soko, Aikoniame taonea soko Risitara taonea soko, ape á aporomo ano kakaro watikiaka mokoatikisane, Timoti, nómo hemakapurakanapo. Aporomo ano mokoatikirakano yia, Kotimo ano mafasisiane nómo hemakapurakanapo.   
\p
\v 12 Arirakano Yasu Keresoaki kataka marekea risia aporo hinamoane, aporo metakiramo mokoatikihokosapo. Makata ane hemakapunie.  
\v 13 Arirakano mokoatikiana aporoamo soko, kotafe somera aporoamo soko, fana wakasema watikiaka rakiakosapo. Amo tipiyia wakasema káraraka watikiaka rakiakosapo. Amo keseke namo kakaro kára watikiaka rakipe pukusapo. Metakiramo mahimeteraka, ikia kara watikisa á pusimo kotafe some karaka, i namina nine soko mahimeteraka, ikia kara watikisa á purakanapo.   
\p
\v 14 Asiamo Timotio, kakaro someane néaki tisaraka some kasane nómo kakimaka enomasapo. Enomasane yaiya hemakapuraka rekeanie. Nómo tisamo\f + \fr 3:14 \ft Timotimo kaīyia soko, ipi hakamape soko, Pore soko, i Timotimo tisane ayapo.\f* ainane nómo hemakapurakanapo.  
\v 15 Né hokosa rea maiya amo Kotimo sawia popasane néaki some kasapo. Asiamo aporo hinamomo Yasu Keresoaki himu hakásaraka hemakapurakano Kotimo mafasiasimo, Kotimo sawiamo tarirapo. Aporo hinamomo koteaka hemakapusimo Kotimo sawiamo tarirapo.   
\p
\v 16 Kotimo sawi sua popasane Kotimo ipi somerakano kaisia aporomo popasapo. Kotimo sawia popasane aporo hinamo suamo kakaro someane enomakasimo popasapo. Arirakano, “Makatane watikisapo. Ayiakakopo.” Aíyaka tariraka makata watikisane metakarisimo, Kotimo someane sawia popasapo. Arirakano hasakasane maropohoasimo popasapo. Arirakano koteaka ereketae susu rerane Kotimo someamo hokotakeasimo popasapo.  
\v 17 Asiamo Kotipoko rakira aporo hinamomo siaraka wakapuaka hemakapukua, Kotipoko koteaka rakira susuane rakisimo Kotimo sawia popasane menoraka kekemaraka rakinie.   
\c 4  
\s1 “Timoti né uyáka rekeanie.” Aisane oyapo.  
\p
\v 1 Yasu pariperaka unihaeraka area maiya amo aporo su kukua kesane soko, aporo hitafe risiane soko, epo takekea parakuhokosapo. Ayiakakosasamo nōmo some akara one kakimakanie. Kotipe Yasu Kereso tetapō isu aserakano, nōmo néaki paroaka someaka marerakanapo.  
\v 2 Aporo hinamomo Yasuane hemakapusimo Kotimo someane nómo uyáka some kakanie. Aporo hinamomo kaikia seserakano soko, hisirakano soko, nómo yaiya some kakanie. Arirakano watikiaka rakira aporoaki, “Ayiakakopo,” aihoanie. aporo hinamomo watikiaka rakirakano nómo maropohoanie. Arirakano aporo hinamo koteaka risikiasimo, nómo some kaka ararehoanie. Arirakano aporo hinamomo makata kotesane enomakasimo tau auaraka tisaraka some kakanie.   
\p
\v 3 Arirakano keseke kakaro someane tisaraka some karakano, aporo hinamomo kaikia hisihokosapo. Ipu namina hemakapusuane kekemaraka tisa metaki soko, “Isu tariako peanie.” Aíyaka tisa metaki soko, “Isu tariako peanie.” Airakano tisa aporo yakaimo iane maseseraka some kakakosapo.  
\v 4 Arirakano aporo hinamomo kakaro someane kaikia kakipayaraka metakarikia, aporo sisimamo wate asiapakae, aíyaka some kepo rakupe pesane\f + \fr 4:4 \ft Terakaiya matoa kesaka reamo some rakupe pesa asiapo.\f* kaikia kekemahokosapo.  
\v 5 Asiamo Timotio, né maiya suamo ikia kara kotesa á punie. Né mokoatikirakano, himu he kekea namoraka rekeakopo. Yasuane aporo hinamomo hemakapusimo some kotesane some kakanie. Aporo raipamo arakira ayiáka nómo soko Kotipoko ayiáka rakikia makanie.   
\p
\v 6 Maiya omo ano hauaka wo reane metakarikia kukusapo. Ano kukusa maiya ane makepo. Fana pirisiti aporomo saro ponomakau rukua, yapiane masakurikia Kotiaki kasa ayiáka, aporomo ano rurakano ano yapiane nōmo Kotiaki kakakosapo.   
\p
\v 7 Aporomo marokehoko foaka wafororaka apura ayiáka, nōmo Kotipoko koteaka rakiraka wafororaka rakipe pusuapo. Rakipe pukua enonoa naosapo. Asiamo nōmo Kotiaki fana himu hakásaraka hemakapusuane, yumo soko yaiya hemakapuraka rekenapo.  
\v 8 Ano ereketae susuraka reasasamo anopoko makata ropo murikimaka motosapo. Motosane Unihae Yasu ipi pariapera maiya amo anoaki makakosapo. Kepo hemakapukua maropona aporoane Yasu ipipo. Epo kakaro ereketaeraka susu maroponapo. Anoaki soko aporo hinamo e perakarihoamo seseraka kau risiaki soko isu suaki makata ropo kakakosapo.   
\s1 Poremo Timotiaki ayapasane oyapo.  
\p
\v 9 Ano area wo foaka peanie.  
\v 10 Arirakano Témasemo hauaka wo makatane kára hemakapuraka ano metakarisiapo. Metakarikia Tesaronaeka taonea pusuapo. Arirakano aporo meta yano motosa Kerésenese ipi Karésia hauaka á pusuapo. Arirakano aporo meta yano motosa Taetase ipi Taomésia hauaka pusuapo.  
\v 11 Arirakano Rukiane anoyaki hákasa rekenapo. Makamo ano arareraka rakisimo pasimaka peanie.  
\v 12 Aporo meta yano motosa Tíkikaseane nōmo Efesase taonea pusiesapo.  
\v 13 Arirakano nōmo inu pasu Toróase taonea aporo Kapasemo apea motokoa meraruraka pesane, né apera maiya amo nōmo inu pasuane soko, nōmo sawiane soko maka peanie. Arirakano nōmo saro sipi kau sawiane soko maka peanie.   
\p
\v 14 Arirakano Arekesáta ipi makata auri rakira aporo, epo ano kára mokoatikisapo. Epo ipi rakisia yaiya Kotimo soko ipiaki ayiakakosapo.  
\v 15 Asiamo isiapo some kasane, epo rukumosaka tapisiasamo e area pukupo.   
\p
\v 16 Fana hukurusua maiya amo ano tipura makerapaka tafáraka somerakano, aporo suamo ano patera asesafapo. Aporo suamo ano metakarisiapo. Metakarisia akipoko Kotimo hemakapukua rerapaka Kotiaki kurikurirakanapo.  
\v 17 Asiāne hukurusua maiya amo, Unihae Kotimo ano metakarisiafapo. Anoaki epo wakapu karakano, Yu aporohoanafonosamo kaiyisimo Kotimo some suane nōmo siaraka some kasapo. Saro raeonemo akaimo ano rukunenapaka, Kotimo ano mafasisiapo.  
\v 18 Arirakano makata watikisa suamo ano marapaka, Kotimo ano yaiya mafasiakosapo. Mafasikia e hepene yapura unihaeaka area á ano pasimaka karikia hiakosapo. Akipoko maiya suamo nōmo eane makáraraka kekereraka someraka, “Né faesa kárapo,” airakanapo. Kakaroripo.   
\p
\v 19 Pirisírape Akuwíra tetāki ayaparakasapo, aihoanie. Onésiforuse soko ipi ape hakasa aporo hinamo hokosa su risiaki ayaparakasapo, aihoanie.  
\v 20 Aporo yano motosa Erásataseane Korini apea parisapo. Arirakano Mairítase taonea aporo meta yano motosa Torófimase ipi makata takamasane, nōmo metakarikia pesapo.   
\p
\v 21 Asiamo né foaka peanie. Yakaru kára apera maiya amo né peane siahoasifareapo. Yakaru kára peasiraka maiya yumo né peanie. Yúpuruse anoyaki reke, reaki ayaparakanapo. Pútenesemo soko, Raínasemo soko, Korótiamo soko, kakimara aporo hinamo metakiramo soko, ipu suamo reaki ayaparakanapo.  
\v 22 Timoti, ne hoane Unihae Kotimo asekea rekeasimo hemakapurakaripo. Re su Kotimo yaku arareraka makotehoasimo nōmo hemakapurakaripo. Timoti, né, ayapa. Ano Porepo.