\id RUT Edolo [ETR] 
\h Uludi 
\toc3 Uludi 
\toc2 Uludi 
\toc1 Uludi 
\mt1 Uludi  
\imt1 Ado Dëdëi Dibe Amoïe Neala Olelo Oboba  
\ip Beba gowegi sedalu dibe amoda hedabifalï dialea. Busa dolö amoli nefolalebegi, e awäla besela galai. Uludi eda Moaba udia Isilale fii sosogo afädëma fii. Neasebegi, ea segea Moaba ami salea egoa amo baagoi. Baagosebegi, ea egoame made dïgïla awäla sigi nebegi, Naomi e hïle Yuda fii segea obëgëi. Obëgësebegi eege Naomi bëgëla helegela asi. Uludia Isilaleïe Gode neebe amo hawala sulo. Hobeala e dolö elöma filahilä, gini Debidiïe yaye sulo. Debidi eda Isilale ilile gini dafidilo hedabi afädë nelo.  
\ip Sedalu gowe dia nidela, Uludia hamoi gowe hëdäi nabulömelë. Dafidida, Uludi e asigi afädë negei made sulo, gasoda, Isilaleïe Godemage ïe egoame amomage edefademalä boba hamoi sulo. Mala ea hamolo amoda, Isilaleïe Godea ilima ado säla negei ï amo, ea dofä bëgëla hamolo sulo. Amase, diliage dilile iso asigiage Gode dofä hamesa namialo. Amalahilä, dilile damelë nefolalebe amoli boba hamomalo. Beba gowea ulufala olesalea, udia dolö wagadi made nefolalebe amolia Godeïe galu neala gaulahilä, Godeïe udia dolö nefolalebe amolibalä maala baamolö dialea. Mala amala hamoseda, dolö wagadi made nefolalebe amoli afädëa Isilale fii ilia mala hamolo amo baagila moholömelë.  
\c 1  
\ms1 Naomia yöi melï  
\mr (Uludi 1)  
\s1 Elimelege idiage efegele äudä amolali Moaba asi  
\p
\v 1 Isilale udia dolö beaha aligilo gini maadeia, gudi mogelo amoliamu beaha nebegi, Yuda segea ami sege eso edefademalä maala sïdë i edefade gelola misi. Amala hamosebegida Bedeleheme ami fii dolö afädë sosogoda Yuda, amilahilä gäheo i odoa sege näiadodi Moaba namolö asi. Dolö asi amo ïe udiage ïe dolö malö äudäge ili biyidia asi.   
\p
\v 2 Dolö amoïe ëida Elimelege, ïe udiada Naomi, malö äudä amolele ëida Malonole Gilionole. Ili sosogoda Efalada, Yuda fiiïe gaamu edefade Bedeleheme dibea amilahilä Moaba namolö asi.  
\v 3-5 Ili gäheo i nabülasi afädë gadoi ami nelo. Ami nea Elimelege baagoi. Baagosebegida Naomi, ïe malö äudä amolali, hilido nelo. Hilido nea efegele äudä amolea Moaba udia amogi nii. Dolïsä äudä amolele ëida Obale Uludile. Ele neala ami salea Gilionole Malonole helegela ami baagoi. Egoa efegele äudä amolali baagoibua Naomi hïdo ami sulo.   
\s1 Naomi asi amo gadola Uludia bëgëla Bedeleheme obëgëi  
\p
\v 6 Naomi ami salea nabelebe Dafidilo Geloia ïe udia dolö neala obeägïlasilahilä dafidi esoi dilo amo fisilahilä molö naha dialeala säi nabi. Amo nabalahilä efege idia didalo äudä amola ili Moaba dïgïla moholöla daiai.  
\v 7 Naomila efege idia didalo äudä amolali segea ami sulo amo dïgïlahilä, Yuda segea moholö asi.  
\v 8 Asi amo awälahilä gaso, idiafa amilahilä Naomia efege idia äudä amolema sähalea, Alida hali segea diemebalä samolö obëgëmalo. Alia nemage baagoi amolimage mala hedabi hamosa nelo amo gadola Dafidilo Geloiage alima hedabi hamomolömelë.  
\v 9-10 Dafidilo Geloia ali ugila negemäia. Dolö elöma mosalo. Dafidilo Geloia ali hedabola ugila negemolömelëla säla ïahagola säla ï. Amala säla ïaha nelolahilä, Naomia udia äudä amole helegela neala mimilahilä, ali samialola säla ï. Amala säi amole udia äudä amolea dïisa nea Naomima gelolafalï sähalea, Alïda obëgëmolö made. Di sosogo neebea di awäsego gadola nihïlïgïla moholömelëla säi.   
\p
\v 11 Amala säsebegi, Naomia säla obëgësalea, Nïe nidiwi ali-e, alida dofä wila hali mosöa obëgëmäiala helësësamelë. Nebaläda alida edo nea moholö. Ali nimäia na dolö malö elö sogobamolöi gabule. Alida mosöa bahïla obëgëmalo.  
\v 12-13 Na walio gasigi dolö fila awäla malö äudä sogobalahilä amea ali nimäiale. Neda sesalebe made gabule. Ali hali segea bahïla obëgëmalo. Malö äudä amea ali nimäialahilä beaha samolöle. Ele helësëla ali memalä samolöle. Nïe nidiwi ali-e, Dafidilo Geloia nema edefade baagi ï amo gadola alimage amai amogi bobasësawela säi.  
\v 14 Amo säi amo nabalahilä elea bu elö dïi. Dïisa nelolahilä Obaea egoame Naomi gaula mimilahilä, mosalo, hawiola sälahilä hï segea obëgëi. Uludia egoame sali gaula nea, neda dofä obëgëmolö mademelëla säi.  
\v 15 Amala säsebegi, Naomia ema säla obëgësalea, Dïe disama amoda e hïle sosogo neebeage hïle gode neebeage obëgëi amo dige amo gadola obëgëmalola säi.  
\v 16 Amala säsebegi, Uludia säla obëgësalea, Dia ne bahïla obëgëmalola sämabu. Di awäsego gadola ne moholömelë. Di fisebea amige ne samolömelë. Di sosogo neebe amoge ne sosogo namolömelë. Dïe Geleiyesali Gode neebe amoge nïe Geleiyesali Gode namolömelë.  
\v 17 Di baagosebea amige ne baagomolömelë. Baagosebea amida baumäiamelë. Baagoeamu alï neala hïdo hïdolasimolömelë. Na ado walio säi amo gadola bëgëla made hamoseda, Dafidilo Geloi edefade neebe amea nema yöi ïmäiamelëla säla ï.  
\v 18 Amala säsebegi, Naomia beahamelebe, Uludia ebalä moholöla gelosebegi, ea ado säla made,  
\v 19 amilasilahilä udia äudä amole awäla Bedeleheme besela galai. Besela galasebegi, Bedeleheme udia dolö nefolalo amolia fudugilahilä udiafalï amolia sähalea, E, goda Naomi gabule ma, nowëla säi.  
\v 20 Amala säsebegi, Naomia säla obëgësalea, Nema Naomila sämabu. Nema Malala sämo. Gode Edefade Sulubadelaïe Geloi neebe amea nema gamogai yafie hamola, nihïnege neala gamogalasimelë.\f * \fr 1.20 \ft Naomi nilïle ado sälada obeägïsa. Amase, Malada nilïle ado sälada, Gamogaila sämola säi.\f*  
\v 21 Amo gala ne wila awähaleada ne sosogoma asi gaso, walio Dafidilo Geloia sigi obëgësaleada ne memalä misimelë. Gode Dafidilo Sulubadelaïe Geloi neebe amea yöi amo gadoi ï ameada edoïe nïe ëi Naomila sämolö gabula säla ï.   
\p
\v 22 Goweda Naomi efege idia Uludile Moaba sege dïgïla obëgëla misi amoïe ado dialea. Ele Bedeleheme ami besela galasolo amo gala eladi gadoi ëida bali dafidi sagai dilo amo mi gäwila damusa nebegi besela galai.   
\c 2  
\ms1 Uludia Boasaïe sagaia molö hogola asi  
\mr (Uludi 2)  
\s1 Uludi e Boasaïe sagaia hamoi hamosa nelo  
\p
\v 1 Dolö dafidilo ëi sälo afädë ïe ëida Boasa. Eda Naomi ïe egoa Elimelege baagoi amoïe fii afädëgila sosogo gadoi nelo.   
\p
\v 2 Segeyo afädëgi Uludia Naomima nabahalea, Na eladi gadoi ëida bali sagaia damulo neebe amea damula hamoi hamosa neebea ami damui fisigisisi digafui dibe amo misila audulela nabi. Afädëa ïe baagido hobeala misila aligi misialola sämolöla helësësamelëla säi. Amala säsebegi, Naomia säla obëgësalea, Nïe nidiwi-e, dia amamalola säla ï.  
\v 3 Amo nabalahilä Uludi e awäla hamoi hamolo amoli baagido hobeala eladi gadoi bali gägä neala gagaula awäha nelo. Eladi gadoi bali sagai dilo amoda Elimelege sosogo Boasaïe sagai dilo.   
\p
\v 4 Boasa hï e Bedeleheme nelolahilä maala besela galai. E besela galahalea ïe hamoi hamosa nefolalo amolima sähalea, Dafidilo Geloi e dilibalä namiäiamelëla säi. Amala säsebegi, ïe hamoi hamolo nefolalo amolia emage, dige Dafidilo Geloia ugila negemäiamelëla säi.  
\v 5 Boasaea ïe hamoi beaha aligilo nelo amoma nabahalea, Udia dolïsä neebe gagoweda nowëla nabi.  
\v 6 Amala nabasebegi, hamoi beaha aligilo amea säla obëgësalea, Udia dolïsä goda Moaba segeala Naomibalä wi misi amo gabio.  
\v 7 Ea nema nabahalea, Hamoi hamolo dolö nefolalebego baagido eladi gadoi bali gägä digafui dibego misila aligi hobeala mudulela nabasio. E yosefalï maalahilä hamoi hamosamu nelo amo gaso, holöfalï hele fila awälahilä hamoi hamosa neagola säi.  
\v 8 Amala säsebegi, Boasaea sähalea, Udia dolïsä-o, sagai odoagi nofe dabiala auloeo. Gui udia hamoi hamolo nefolalebe go ilibalä eladi gadoi bali gägä gomu misisa namialo.  
\v 9 Dolö ilia hamoi hamosebego abidi hamosebelela fädäla bealahilä udiafalïbalä gegedola hamoi hahamola awäha namialo. Dolö wi nefolalebe golima, ilia dima nafade hamoloeola säimelë. Di ödä molö haläseda, ilia ödä iigi usi dië bimolömelë amogi mualola säla ï.  
\v 10 Boasaea ado amo säsebegi, Uludia nagadaia gumusula dia idogolahilä Boasama sähalea, Dia nema mala hedabi go hamosegoda mi edoïe amaha. Neda sege wagadi made fii udia misi saleawela säi.  
\v 11 Amala säsebegi, Boasaea säla obëgësalea, Dïe digua baagolahilä salea mala hedabi, diguamema hamoila säi amo nabimelë. Dia dïe dieme diadoge dïe segege dïgïla udia dolö dia dawa made beahage melëlo madebalä namolö misila säi amo nabimelë.  
\v 12 Dia mala hedabi hamoi amoïe Godea dimage amo gadola hamomäia. Isilaleïe Dafidilo Geloi Godea dige amo gadola sigi namiäia. Ïe augia hawa musügä namolö misi goïege bidi edefade nimäiamelëla säla ï.  
\v 13 Uludia säla obëgësalea, Dolö edefade-e, dïe hamoi hamolo udia sefolalebe amolibalä afädëdi made sulo amo dia ado hedabi nebalä säi ameada ne neala gelolasimelë. Amalahilä dia nema mala hedabi hamomäiala säla ï.   
\p
\v 14 Molö molö nea Boasaea Uludima bu sähalea, Wahalo gadoi beledi difolalebe gowegi gelebi ëfë gägä ödäbalä gela molö guwi samolö misiëla säi. Amala säsebegi, Uludi e hamoi hamolo amolibalä maala sebegi, Boasaea eladi gadoi bali gobei odoa amogi Uludi muäia neala ï amo naala bolesalea odoa fea digai.  
\v 15 Uludi e molö naha maadelahilä awäla eladi gadoi bali amo bu misila aligi awäha nelo. Uludi awäse gaalu, Boasaea ïe hamoi hamolo dolö amolima sähalea, Uludia eladi gadoi bali doboi dibeadi gogi nelea maaseda, ema nemomabio.  
\v 16 Doboi dibea ami eladi gadoi bali gogi damusaleada odoa e neala gaumäia damula gui guila mosalo. Amo neala gausegida dilia ema nimabula säloeola säi.   
\p
\v 17 Uludia eladi bali amo neala misisa nebegimu eso digala deadi. Ea amo misila neaha maadelahilä, eladi gadoi bali amo molö mogela hedefala negei. Molö hedefala negei amoïe yöida gilo nabülasi gadoi.  
\v 18 Uludia eladi gadoi bali amo ägüla awäla mosöa egoamema olei. Esoa helesalea molö nahalea fea digai ägüi amoge egoamegali muäia neala ï.  
\v 19 Amo gadola hamoi amo bealahilä Naomia Uludima nabahalea, Dia walio eladi gadoi bali neala misila hamoi hahamola awäha nelogoda dolö nowëa sagaia hamosa nelola nabi. Dolö dima hedabi hamolo gomada Geleiyesali Godeïe obeägïlasiloea eege obeägïlasimäiamelëla säi. Amala sälebe Uludia säla obëgësalea, Na eladi gadoi bali sagaia hamoi hamosa nelo amoda dolö afädë Boasaea sagaia hamosolomelëla säla ï.  
\v 20 Uludia ado amo säla ïasebegi, Naomia sähalea, Dafidilo Geloi neebe ameada baagoi amolibaläge sebe welibaläge hamomolömelëla säla negei amoda asialo made neebe ameada Boasa eege neala obeägïlasimäiala sähawela säi. Naomia bu sähalea, Boasa goda dofä nilï sosogofalï fii afädë neamelë. Alï fidila negemolöge beaha namolöge mala dibe amo gadola dolö goea hamomolömelëla säla ï.  
\v 21 Amala säsebegi, Uludia sähalea, Eage nema ado afädë gomalä säsio. Neda ïe hamoi hamolo udia amolibalä hamoi hahamola awäha nea eladi gadoi bali misila modoala agusolo amo gala fisimalaimelëla säla ï.  
\v 22 Amala sälebe, Naomia Uludima sähalea, Nidiwi-e, go säi go gadolafalï Boasaïe hamoi hamolo udia nefolalebegobalä gedola ïe eladi gadoi bali sagaia guimu hamosa namialo. Dolö elöïe eladi gadoi bali sagaido nofe dabiala awäseda, di neala nafadelasimolö dië bimolömelëla säla ï.   
\p
\v 23 Uludia Boasaïe hamoi hamolo nefolalo amolibalä eladi gadoi bali gägäge widi gägäge modoala dobola nelegela awäha nelo amo gadola hamola wagalahilä wagala afiase amo gadola modoala wagala asi. Mosö midilöda hïle egoame salibalä diahamu nea hamola afufusa nelo.   
\c 3  
\ms1 Boasaea Uludima mala hedabi hamoi amo  
\mr (Uludi 3)  
\s1 Naomia Uludiïe dolö hogosamelëla säi  
\p
\v 1 Segeyo afädëgi Naomia Uludima sähalea, Di nimäia. Na dïe dolö afädë hogosamelë. Dolöbalä hedabola filo amo gadola di segegi hedabola fodögïla fimäiamelëla säla ï.  
\v 2 Dia helësësebele. Eladi gadoi bali sagaia ïe hamoi hamolo udiabalä dilia hamoi hamolasilo dolö amoda Boasamelë. Dolö amoda nilï sosogofalïmelë. E walio gasigi awäla eladi gadoi bali gägä amo dobisa namolömelë.  
\v 3 Dïe domalo nigime hëmalo. Nigime hëlahilä weli gafisigäi negemalo. Negelahilä fagulo hedabifalï salugamalo. Amalahilä eladi gadoi bali amo gägä dobisa neebea ami awälahilä Boasaea di melëloea musügä awäla namialo. Ea hamoi hamosa maadelahilä molö ödäle muäia fu ïala namialo.  
\v 4 Naha maadelahilä diasebegoda abododi diasebelela fädäla bimalo. Fädäla bealahilä ïe fagulo fïgï gauia adala emo sëgëa ami midialo. Amala hamosegida gomalä hamomalola hï fädäla säla ïmolömelëla säla ï.  
\v 5 Amala säsebegi, Uludia säla obëgësalea, Dia säsego gadola na hamomolömelëla säi.  
\v 6 Amala sälahilä, Uludia egoame salia hamomalola säi amo gadola hamosa maadelahilä, eladi gadoi bali gägä dobisa neebea ami asi.   
\p
\v 7 Boasa e hamoi hamosa nelolahilä molö ödä mai. Naala asigi dusugala awäla süwiasebegi, eladi gadoi bali hedefala dobi nelegela fedai dilo amo agesugi adi. Amala adi dibegi, Uludi e geleä geleäla awäla Boasaïe fagulo fïgï dibe amo geleä bidi gauia adala ïe emo sëgëa ami adi.  
\v 8 Gasi mogogi Boasa e fudugila adi besusalea beahamelebe, udia afädë ïe emo sëgëa ami maala adi dibe melï.  
\v 9 Bealahilä ea nabahalea, Di nowëla nabi. Amo nabalahilä, Uludia säla obëgësalea, Neda Uludi, dïe hamoi hamolo udia amomelë. Dïe fagulo bidia ne gesumäiamelë. Amoïe mida, dida Elimelegeïe sosogofalï gabugi, dia ne sigi aligila ugila negemäiamelëla säi.  
\v 10 Boasaea amo nabalahilä Uludima sähalea, Nidiwi, Dafidilo Geloia dima hedabi hamomäia. Dia walio hamoi ameada dafidi hamosa nelo amo baagila awäla hïdo elöi hedabi hamoimelë. Malïsä yafie nea, odoa nelegei yafie negelo, odoa busadäoi, amoli afädëa di nimäiala made helësëi gabu.  
\v 11 Nidiwi-e, asigi säosäomabu. Udia dolö wi nefolalebe sulubadelaeada dida udia hedabifalï saleala säha. Dia nema hamomäiala säsebe amoda na hamosa maademolömelë.  
\v 12 Dia säi amoda dofä. Neda digua baagoi amoïe sosogo. Na di beaha namolö gaso, dolö afädë di beaha namolöi neamelë. Amomadale dafidi fädäla nabulömelë.  
\v 13 Walioda gui wäla midialo. Diala aiyo yosefalï ne awäla dolö amea abilia säsebelela fädäla nabulömelë. Ea di sigi namolöla säseda, amo dofea. Ea haboimelëla säseda, Dafidilo Geloiïe ëigi nea sähawe sosogoea beaha aligilo mala dibe amo gadola hamomolöda nïe dibe amo gadola hamomolömelë. Walioda sege yomäia beahalea gui midialola säla ï.  
\v 14 Amala säsebegi, Uludi e Boasa dibea ami adi amo udia dolöea siia melëloeala helësëlahilä Boasaea musügä fodolofalï nowela yosefalï mosalola säi amo gadola aabela nowei. Boasaeada udia dolöea Uludi e, e adi dibea ami diala asi gabula made helësëmäia amala säi.  
\v 15 Nowesebegi, Boasaea ema sähalea, Dia fagulo go idogoi fösimola säi. Amo gadola Uludia fösisebegi, Boasaea eladi gadoi bali gägä amogi adu äudä ï, amoïe yöida gilo nabülasi äudä gadoi amo ägümalai. Uludia bali gägä amo ägümäia Boasaea nigila ägüsi. Uludi e amo ägüla asi baagido Boasa e Bedeleheme gaamugi asi.   
\p
\v 16 Obëgëla awäla egoame sali mosöa sebea ami besela galasebegi, egoame sali amea nabahalea, Nidiwi, gelola abilia hamoila nabi. Amala nabasebegi, Uludia Boasaea säi amoge hamoi amoge hulu sulubadela säla ïaha maadei.  
\v 17 Ea säla wagahalea sähalea, Boasaea di sebea obëgësalea memalä ne badumu obëgëmäiala made beasila, eladi gadoi bali gägä adu äudä ï ägüi amo gomelëla säi.  
\v 18 Amala säsebegi, Naomia Uludima sähalea, Nafege udia, di holöfalï beaha samialo. Walio Boasaea hamosebego abilia hamola dafogäsebelela bimolömelë. Boasaea abilia hamogimolöi walebelela bimolöïe idi hogosamu nea. Beagolese amo gadolada e hele samolömelëla säi.   
\c 4  
\ms1 Dafidilo Geloia Naomi ugila negei amo  
\mr (Uludi 4)  
\s1 Boasaea Uludi nii  
\p
\v 1 Boasa e awäla udia dolö gedolo segea nogila digalo idiafa ami sulo. E fii heleia made Elimelegeïe sosogo elö säi amo maasebe melï. Boasaea dolö amoma sähalea, Ae, nedoo, gui samolö misië. Na dima ado holöfalï sädeläla säi. Amala säsebegi, dolö amo maala sulo.  
\v 2 Amala maala sebegi, Boasaea segea ami dolö beaha aligilo nabülasi nefolalo amoli maala fifigimalola säla ï. Amala säsebegi, ili maala sefolalo.  
\v 3 Ea ïe sosogo amoma sähalea, Naomida Moaba asi nelo amo bahïla misi saleamelë. Eada alïle sosogo Elimelegeïe sege nalä amo dolö afädëa nimäiala helësësaleamelë.  
\v 4 Amaimo, dia helësëmäia säla ïahago. Dia sege amo nimolö helësëseda, beaha aligilo nabülasi sefolalebe gowe ilile siigi sämo. Neda di baagia gabugi sege amo dia nimäia. Made nimolö galëda, haboila sämola säi. Amala säla ïasebegi, dolö amea säla obëgësalea, Sege amo na nimolömelëla säi.  
\v 5 Amalebe Boasaea ema sähalea, Dia Naomiïe sege nimolö galëda, Moaba udia Malonoïe udia didalo Uludige digali nimalo. Amalahilä sege amoda baagoi amoïe sosogoïe ëigi diamiäiala säi.  
\v 6 Ado amala sälebe dolö amea sähalea, Sege amo na nimolö gaso, na neaseda, nihïne nelegei negelo made gadoi busadäoi namolö gabugi. Ne haboi. Na made nimolömelë. Dihï helësëse amo gadola hamomalola säi.  
\v 7 (Siiba Isilale udia dolö ilile mala gowe gadola hamolo negei. Udia didaloïe ado sähaleage, amase, sege nalä nimolöïe ado sähaleage amogi bidigi sämolö made säla wagahagola sähaleada emo usililo gila bidi nelo dolö amogali ïlo negei.)  
\v 8 Dolö amea Boasama sähalea, Dia bidia nimalola säi. Amala sälahilä ïe emo usililo amo dugala Boasagali ï.  
\v 9 Amala ïasebegi, Boasaea mala gaui busa nabülasi sefolalo amolimage udia dolö odoa maala sefolalo amolimage sähalea, Dili sulubadela sebegoïe sidaia sähago. Dafidida Elimelegeïe segege nelegei dilo amoge malö äudä Malonole Gilionolele segege nelegei dilo amoge Naomia beaha nelo nelebo amoda na neahawe.  
\v 10 Amase, Moaba udia Uludida Malono baagoi amoïe udia didalo sulo amoge na neahawe. Amala hamosebeweada baagosalea sege nalä dibe amoda Malono hïle ëigimu ïe sosogoïe diamiäia. Baagoi amoïe sosogo afädë sebe amoliada ïe ëi amo helësësa namiäiamelë. Na walio säi amoda diliage nabala siiage melï amomelëla säla ï.  
\v 11 Amala sälahilä dolö nabülasi amoliage udia dolö bea misi sefolalo amoliage sähalea, Ä, nilïage beaha. Udia go dïe mosöa awäseda, Dafidilo Edefadea ugila negesegi nilïle Isilaleïe naye mäu Eleselole Eleale gadoi samiäiamelë. Elea malö malei ägüi amo gadola udia goweage malö malei ägümäiamelë. Amase, dihïdida Efalada sosogo amoïe ëi sälo nea, Bedeleheme udia dolö beaha aligilo dafidilo namolömelë.  
\v 12 Dafidilo Geloia dolïsä go alima aligila malö ägüsebe ameada Yuda Damalalea malö sogobai nilïle mäu Felese sosogo gadoi di sosogo namiäiamelëla säi.  
\v 13 Segeyo amo gala Uludi nealahilä Boasaïe udia salea. Dafidilo Edefadea ele neala obeägïlasilahilä Uludi e fagulo hagui sebe melï. Amalahilä ea dolö malö afädë neegela ägüimelë.  
\v 14 Udia sefolalo amolia Naomima säla ïahalea, Dafidilo Edefadeïe ëi gauia adadi. Ea di dihïdo samiäiala fisigisila made. Dïe diaye afädë di beaha namiäia ï gabumelë. Malö goeada Isilale udia dolö beaha aligilo dafidilo namolömelë.  
\v 15 Diefege idiaea dima boba hamosebegoeada dia dolö malö gifalädalïa gadoi sogobai amai galebeda, amolima boba hamolabio amoda nagadaialahilä dïe diefege idiaea dima boba hamoi gabugo. Amaimo, ea malö walio ägüi goeada di gelolasila sigi aligila beaha aliligi awäha nea, di udia sali hamomolömelëla säla ï.   
\s1 Boasage ïe mäu nelo amoge  
\p
\v 16 Naomia dolö malö dubo amo sogobala gaula nea obëbësa nelo. Amala hamolahiläda dubo amo Naomia beaha nelo.  
\v 17 Udia ga made sefolalo amolia malö amoïe ëi Obedi negei. Ëi amo negelahilä ilia säla sogosalea sähalea, Naomigali dolö malö afädë sogobala ï gabuwela säi.  
\p Hobealada Obediïe malöda Yesi. Yesiïe malöda Debidi.   
\p
\v 18-22 Goweda Felese sosogo awäha nea Debidi besela galai amo dialea. Feleseïe malöda Hesolono. Hesolonoïe malöda Alama. Alamaïe malöda Aminadaba. Aminadabaïe malöda Nasono. Nasonoïe malöda Salomono. Salomonoïe malöda Boasa. Boasaïe malöda Obedi. Obediïe malöda Yesi. Yesiïe malöda Debidi. Amala fifii misi dialea. Hä amo.