\id MRK Edolo [ETR] 
\h Maga 
\toc3 Maga 
\toc2 Maga 
\toc1 Ado Mala Hedabi Magaea Dëdëi 
\mt1 Maga  
\imt1 Ado Dëdëi Dibe Amoïe Neala Olelo Oboba  
\ip Ado mala hedabi Maga bebagi dëdëla negei amea, dafidi mi mi gäwila sähaleada, Godeïe malö Yesu Gelesoïe ado mala hedabila säla dëdëla negei dialea. Nilïa Magaea dëdëi beaseda, Yesuea geloi hïdo elöi gaula nelo amoge, hamoi hamosa nelo amoge ulufala dëdëi. Yesuea mala olelesa nelo amoge, mugabe fedai nesila digisa nelo moge, udia dolöea nafade hamoi hësa nelo amoge, ea amo gadola hamosa neada, ïe geloi amo olesa nelo. Yesuea hï ëida gomalä sälo. Dolöïe malöla sälo. Dolöïe Malö Namolö misi ameada, ïe namolö fisiga gala udia dolö yafie sigi obëgëmolömelëla säi, (10.45)  
\ip Magaea Yesuea hamosa nelo amo sedalu yafie säi. Gasoda, Yesuea udia dolöma ado mala olelesa nelo amolida ea sedalu hedabola made säi. Magaea dafidida Ödägi gelo Yoneïe sedalu sälahilä, Yesu e ödägi gei amoge mugabe Saidania e fedogola melï amoge, obobala dëdëlahilä, Yesuea hamoi geloi hamosa nelo amoge ulufala dëdëi. Amase elöda, Udia dolöea yöi elö elöla gauseda ea boba hamomolö amoïe ilima olelesa nelo.  
\ip Ïe bëgëla aulo amolia, mi gäwilafalï, Yesuea nelebo hamosa nelo amoïe mi fädäla dawa made nelo. Gaso, gelëala bebea awäha nea giso beagolei. Beaseda, udia dolö ilia Yesubalä ado neala yöi yafie ïla säi dië bimolömelë. Ea ado mala hedabi dëdëla wagahalea, Yesu baagola nowela asi amo dëdëla negei dialea.  
\c 1  
\ms1 Yesu misi amoda udia dolöma Godea Beaha Maadela Sigi Neebe amoïe säla ïmolö misi  
\mr (Maga 1.1-3.6)  
\s1 Ödägi gelo Yonea ado säla ïaha nelo  
\r (Madiu 3.1-12, Ulugu 3.1-18, Yone 1.19-28)  
\p
\v 1 Ado Mala Hedabi goda, Godeïe malö Yesu Gelesoea dafidi mi gäwi amo dialea.  
\v 2 Bea sälo Aisaeaïe bebagi ado dafidi dëdëla negei dibe amoda gowe.  
\q1 Godea sähalea, Nabuö! Nïe ado säla ïmolö mosalamalo amomada, dïe idi fodolasimäia, ema dafidimola sämolömelë. \rq Malagai 3.1\rq*   
\q1
\v 3 Sege falai udia dolö aligisia made ami nea afädëa wesalea, Dafidilo Geloi misiäia idi fodomolö amo dadaiaha namialo. Ïe idi amoda mogolafalï fodolasimalola säha neamelëla  
\m säi amo dëdëla negei dialea. \rq Aisaea 40.3\rq*   
\m
\v 4 Amala säla dëdëla negei dibe amo gadola, sege nafade udia dolö aligisia made ami ödägi gelo Yone e misi nelo. Ea sähalea, Dilia nafade hamoi amo Godea hëmäia, dilile iso asigi besulahilä, ödägi gemolö dialeala säla ïaha nelo.  
\v 5 Yudia sege gaamu holöfalï holöfalï dibea amilage, Yalusaleme udia dolö sulubadelage, nefolalo amoli e neebea ami mafusa nelo. Mafula ilia nafade hamoi amo sisiaha maadesebegi, Yonea ili ödä Yodonagi gesa nelo.  
\v 6 Yone eda sugua gamele hilïa fagulo hamoi amo salugalahilä sugua gafodo gadoia malibu negela nelo. Eada galiawage äwi ödäge naha nelo.  
\v 7 Ea ado mala säla ïahalea, Ne dafidi misi neawe. Hobea ne baagia afädë moholö amoda, ne holöfalï neebewe gadoi made, eda ilibia edefade neebe amo moholömelë. Ne hedabi made ameada, na ïe emo usililo ëfë gumusula dialea fisigämolö amo dofea made neawe.  
\v 8 Na dili ödäeamu gesa neawe, eada dili Eleloi Gesamia gemolömelëla sa namolömelëla säla ïaha nelo.   
\s1 Yonea Yesu ödägi gelasi  
\r (Madiu 3.13-17, Ulugu 3.21-22)  
\p
\v 9 Segeyo amogimu Yesu e Disiligi Galiliïe gaamu Nasalesela maasebegi, Yonea Yesu ödä Yodonagi gelasi.  
\v 10 Yesu ödägi gelahilä ödägila fodolo agesua aliga adogoi amole, mu dusuia gase amo melï. Amala dusuia gasebegi, Gesami haea maliabu gadoi amo digalahilä ema fise melï.  
\v 11 Amo gaalu, selesaia mosöala ado afädë säia idogosalea, Dida nïe malö. Na dima edefademalä boba hamoi nea, nïe iso asigia dima obeägïsa neawela säi.   
\s1 Mugabea Yesuea nafade hamomabelela fedogola bimolö misi  
\r (Madiu 3.1-12, Ulugu 3.1-18, Yone 1.19-28)  
\p
\v 12 Ado amo säha maadeia gai amole, Godeïe Gesamia Yesu e sege nafade udia dolö aligisia made ami mosäia fisiga gai.  
\v 13 E fisiga gaia ami segeyo nabülasi biyidia nebegi, mugabe Saidania Yesuea nafade hamomabelela fedogola bimolö misi. Yesu e sugua ilaba elö elöla nefolalebea ami nebegi, selesaia fii ilia e ugila negemolö misi.   
\s1 Yesuea hamoi mi gäwila Galili hamosa nelo  
\r (Madiu 4.12-17, Ulugu 4.14-15)  
\p
\v 14 Yone galabaia negesebegi, Yesu e Galili awälahilä Godea Beaha Maadela Sigi Neebe amoïe Ado Mala Hedabi säla ïaha nelo.  
\v 15 Yesuea sähalea, Segeyo Godea daiala negei dilo amo walio wegi gausiai ameada, Godea Beaha Maadela Sigi Neebe amoda ga madefalï dialeamelë. Dili asigi besulahilä, Ado Mala Hedabi go gaula mogomalola säla ï.   
\s1 Yesuea dolö biyidia seme digisa nebegi wei  
\r (Madiu 4.18-22, Ulugu 5.1-11)  
\p
\v 16 Yesu e oeabo Galili agesu nedaha nea beahamelebe seme digilo dolö äudä, Saimono ïe edoo Ädulule seme digisa neebe melï.  
\v 17 Bealahilä Yesuea elema sähalea, Na alima udia dolö nelo mala oleledelä. Ali ne awäsewe gadola bëgëla misiëla säi.  
\v 18 Amala säsebegi, elea selëgë amo fodolofalï ami negesilahilä e bëgëla asi.  
\v 19 Yesu e holöbö sedade awälahilä beahamelebe, Sebediïe malö Yamese ïe edoo Yonele dudaia ami nea selëgë nuli amo hamogisa neebe melï.  
\v 20 Bealahilä fodolofalï ele wesebegi, elele eedo Sebedige bidi nimolöïe hamoi hamosa nefolalo amolige dudaia amilahilä ele Yesu bëgëla asi.   
\s1 Yesuea dolö afädëma mugabe fedai nesila digi  
\r (Ulugu 4.31-37)  
\p
\v 21 Yesuge udia dolö odoage ili Gabaniama gaamugi afiai. Segeyo Sabada gafe besela galasebegi,\f * \fr 1.21 \ft Segeyo Sabadada Yu udia dolö ilile hele aligilo segeyoge, amase, Godeïe ëi gauia adalo segeyoge dilo. Godea sege föi dibe amo sulubadela segeyo gafeiagi hamosa maadelahilä, segeyo gifalädalügi hï e hele fila sulo. Isilale udia dolö ilia amo gadola hamomäia, ea segeyo Sabada daiai. Segeyo Sabadada Edolo nilïada gafela sälo. Mi Gäwi 2.2-3ge, Sigi Obëgëi 20.8-11ge bimalo.\f* Yesu e gedolo mosöa ami nogila digalahilä, ea udia dolö ilima ado mala olelesa nelo.  
\v 22 Ea säla olelese amo nabalahilä ili fudugisa sefolalo. Mida, Ado säla negei olelelo amolia olelelo amo gadola made, geloi hïdo elöi gaula nea olelese amogi.  
\v 23 Segeyo amo gala dolö mugabe fedai afädë gedolo mosöa ami maala sulo. Dolö amea üalala digila sähalea,  
\v 24 Nasalese fii Yesu-o, nilï neebea wi dia edo hamomolö misi. Nilï nufudadigimolöïe misile. Nada di dawa. Dida dolö hedabi mogoifalï, Gode hï e neebeala misimelëla säi.  
\v 25 Amala säsebegi, Yesuea mugabe amoma nemosalea, Adomabu. Dolö go dïgïlahilä mosöla säi.  
\v 26 Amala säsebegi, mugabe amea dolö amo neala amulämelasilahilä üalala digila doadigila asi.  
\v 27 Amala hamosebegi, udia dolö sefolalo amoli sulubadela, fudugilahilä hilidomu säla didigahalea, Walio hamoi amoda edo gadoidu. Walio dolö goea ado säi amoda ado gähe geloi hïdo elöi gelola säimelë. Ea ado säseda, mugabe ilia nabelo gabula säi.  
\v 28 Yesuea hamoi amo fodolofalï udia dolö Galilimadi nefolalo amoli sulubadelaea nabala didigai.   
\s1 Yesuea udia dolö yafie wahilasisa nelo  
\r (Madiu 8.14-17, Ulugu 4.38-41)  
\p
\v 29 Yesuge Yamese Yonege ïe begela aulo odoa ilige gedolo mosöa amila Saimono Ädululea mosöa asi.  
\v 30 Saimonoïe udia amoïe eme domalo hëgïla oloi, imididaia adi dilo amo, ilia fodolofalï Yesuma säla ï.  
\v 31 Säla ïasebegi, Yesu e udia oloi dibea ami awälahilä, naabogi gaula nowela ifosi. Amala hamosebegi, e hëgïla oloi dilo amo hogosa helela wahisebegi ea ili molö muäia neala ï.  
\v 32 Deadi eso digase gaalu, udia dolö nefolalo amolia oloi difolalo amoli neala gaula, mugabe fedai nefolalo amolige sigi gaula digila Yesu neebea ami gegedoi.  
\v 33 Gaamugi ami udia dolö nefolalo amoli sulubadela idi galo hadai daia amimu gegedoi.  
\v 34 Amala hamosebegi, Yesuea udia dolö yafie olo elö elöla oloi difolalo amoli wahila digi, mugabe fedai yafie nefolalo amoli nesila digila digisa nelo. Amala hamosebegi, mugabe amolia Yesu eda gowe neala dawadigi nefolalebegi, Yesuea mugabe amolima dilia adomabula säi.   
\s1 Yesuea Galilimadi ado mala säla ï  
\r (Ulugu 4.42-44)  
\p
\v 35 Sege yomolö amo gaalu Yesu e nowela segea awäla, udia dolö aligisia made ami awälahilä Godema adosa sulo.  
\v 36 Saimonoge ebalä nefolalo amoliage Yesu hogogola hobeala bëgëi.  
\v 37 Beagolelahilä ilia ema sähalea, udia dolö sulubadelaea di hogosa neamelëla säla ï.  
\v 38 Amala säla ïasebegi, Yesuea säla obëgësalea, Gamelä, Sege gaamu ga made dibea ami ado mala säla ïmolö afiadi. Neda amo hamomolö misimelëla säi.  
\v 39 Amala sälahilä e Galili sege sulubadelamadi nawesa nea gedolo mosö nefolalebeadi amogi awälahilä Yesuea ado mala säla ïadigi, mugabe fedai nefolalo amoli nesila digisa nelo.   
\s1 Yesuea dolö gudubu hamoi afädë wahi  
\r (Madiu 8.1-4, Ulugu 5.12-16)  
\p
\v 40 Amala hamosa nebegi, dolö gudubu hamoi afädë Yesu neebea ami maalahilä emo gumu sasagala fia idogola salea sähalea, Dia ne wahimäia helësëseda, hä dia ne wahilasimolöi nebegola säi.  
\v 41 Amala säsebegi, Yesuea e bobasëlahilä ïe naabo mogodigia gala, dolö amo diigisa nea sähalea, Na amala helësësa, wahimola säi.  
\v 42 Amala säsebegi, gudubu hamoi amo fodolofalï hogosa helela wahi.  
\v 43 Yesuea e fodolofalï mosalolahilä, ema gelola sähalea,  
\v 44 Nabuö! Di wahi go oböla odoama säla ïmabio. Gobela ïlo dolö neebe amea di bimäia olemolö mosalo. Amalahilä, udia dolö ilia bimäia di wahi go olemolöïe, di hëmäia Mosesea säla negei dibe amo gadola nelebo afädë odala ïmalola säla ï.  
\v 45 Amala säla ï amo nabalahilä gaso, dolö amo awäha neada, ema hamoi amo ili sulubadelama säla ïïa awäha nelo. Amala sälebeda, Yesu e ilile siigi gaamu dibea ami made awäla, udia dolö aligisia made gasi gala nelo. Amala gasi gala nebegi, sege sulubadelagi udia dolö nefolalo amoli Yesu neebea ami mafula gegedoi.   
\c 2  
\s1 Yesuea dolö afädë fii si wahilasi  
\r (Madiu 9.1-8, Ulugu 5.17-26)  
\p
\v 1 Ami segeyo odoa nelolahilä Yesu e bu Gabaniama obëgëi. Yesu obëgëla misi neala säi amo udia dolö nefolalo amoli sulubadelaea nabaha maadei.  
\v 2 Nabalahilä udia dolö yafie Yesu neebea ami mafula gegedoi amea mosö isogige idilibage fimolö fu maade negegi dibegi Yesuea ilima ado mala säla ïaha nelo.  
\v 3 Säla ïaha nebegi, dolö afädë fii si sulo amo e neebea ami, dolö biyidiaea iwasala gaula misi.  
\v 4 Udia dolö yafie negegi amea, ilia dolö amo Yesu neebea gaula moholö ulï gabugi, mosö fïgïdaia gaula fedalahilä, Yesu e neebe amo gaalu mosö fïgï dusuia galahilä dolö iwasala gaula misi dafu amo mumusogi salisi.  
\v 5 Ilia asigi afädë negei nea hamosebe amo bealahilä, Yesuea dolö fii si amoma sähalea, Nïe malö, dia nafade hamoi amoli na hësa maadeimelëla säi.   
\p
\v 6 Amala säsebegi, mala dawadigi dolö odoa sefolalo amolia asigiamu helësësalea,  
\v 7 dolö goea ado egoweda abeahäla sähadu. Eada Gode gagadesa nea. Gode eamu udia dolöea nafade hamoi amoli hëmolöi neala helësësa sefolalo.  
\v 8 Ilia amala helësësa sebe amo ea asigia fodolofalï bealahilä, ilima sähalea, Edoïe dilia go helësësa dialea.  
\v 9 Dia nafade hamoi amoli hësa maadeila sämolöle ma, di nowela dïe fëo gaula nawesa namiëla sämolöle. Dolö fii si gowema ado aabeida abodo.  
\v 10 Amaimo, Dolöïe Malöea nagadaiawi nea, udia dolöea nafade hamoi amoli hëla digimolöïe geloi gaula neebe amo dilia helësëmäia olesagomelëla säi. Amala sälahilä ea dolö fii si amoma sähalea,  
\v 11 Na dima sähago. Di nowela dïe fëo neala gaula dihï mosöa mosalola säi.  
\v 12 Amala säsebegi, dolö amo nowelahilä, udia dolö sulubadelaïe sidaia ïe fëo amo neala gaula fodolofalï asi. Amala hamosebegi, ili sefolalo amoli sulubadelaea asigigi fudugilahilä Godeïe ëi gauia adala sähalea, Siiba nelebo gowe gadoi hamose nilïa melëlo mademelëla säla didigai.   
\s1 Yesuea Ilibai wei  
\r (Madiu 9.9-13, Ulugu 5.27-32)  
\p
\v 13 Yesu e oeabo Galili agesu bu elö nedaha nebegi, udia dolö yafie e neebea ami mafula gegedoi. Gegedosebegi Yesuea ilima ado mala säla ïaha nelo.  
\v 14 Säla ïaha nelolahilä awäha nea, Alibiasaïe malö Ilibai e dagisi muni nelo mosöa sebe amo bealahilä, Yesuea ema sähalea, Ne bëgëla misiëla säi. Amala säsebegi, e Yesu bëgëla asi.   
\p
\v 15 Yesu e Ilibaia mosöa molö naha sebegi, dolö dagisi nelo yafiege, dolö mala nafade hamolo yafiege, Yesula ïe bëgëla aulola ilibalä gedola salea molö naha sefolalo. Dolö yafie amo gadoi yafieada Yesu awäse amo gadola bëgëla awähamu nelo.  
\v 16 Ado säla negei olelelo Felesi dolö amolia beahamelebe, Yesu e dagisi muni neloge, mala nafade hamologe, nefolalo amolibalä gedola salea molö naha sebe melï. Bealahilä ilia Yesuïe bëgëla aulo amolima nabahalea, Mala nafade hamologe dagisi muni neloge, nefolalo amolibalä, e gedola salea molö naha sebegoda edoïela nabi.  
\v 17 Amala nabasebegi Yesuea ilima säla obëgësalea, Udia dolö oloi made nefolalebe amolida, alögoda neebea aulo made. Oloi sefolalebe amolimu alögoda neebea aulo. Amo gadola wäla, ne misi weda, udia dolö hedabi nefolalebe amoli wemolö misi made, udia dolö nafade hamolo nefolalebe amoli wemolö misimelëla säla ï.   
\s1 Yesuea molö made naala aligiloïe säi  
\r (Madiu 9.14-17, Ulugu 5.33-39)  
\p
\v 18 Molö nülo made segeyo amogida, ödägi gelo Yoneïe bëgëla aulo amoliage Felesi dolö amoliage molö naala made aiala nefolalo. Udia dolö odoa maalahilä, Yesuma nabahalea, Yoneïe bëgëla aulo amoliage Felesi dolöïe bëgëla aulo amoliage molö made naala aligilo amogi, Dïe bëgëla aulo golia molö naha nebegoda mi edoïela nabi.  
\v 19 Amala nabasebegi, Yesuea ilima säla obëgësalea, Dolö afädëa udia neahalea, udia dolö e damelë molö molö gedoi hï ebalä sefolalebe amolima, dili molö made naala samialola samolöle. Udia nimolö dolö amo ilibalä seëda, ilia molö made naala made samolömelë.  
\v 20 Gaso, hobeala dolö amo odoaea sigi gaula asibua, ili molö made naala namolömelëla säi.   
\p
\v 21 Amala sälahilä Yesuea ado elö sähalea, Afädëa fagulo goofogi fagulo gähea baala asogelo made. Amala hamoseda, fagulo gähe amea goofo amo nulimolömelë. Amalahilä dafidi nuli amo gadola made bu edela nulimolömelë.  
\v 22 Amo gadolamu, dolö afädëa sugua meme gafodoea ödä i hamoi goofo amogida, wani ödä gähe dibe amo söga salelo mademelë. Amala hamoseda, wani ödä amea ödä i sugua meme gafodoea hamoi goofo amo dusulahilä, ödä i amoge wani ödä amoge, hä, nafademolömelë. Amala hamoloea, wani ödä gähe dibe amoda sugua meme gafodoea ödä i hamoi gähegi oselola säi.   
\s1 Yesuea segeyo Sabada gafegi hamoi made hamolo amoïe säi  
\r (Madiu 12.1-8, Ulugu 6.1-5)  
\p
\v 23 Segeyo Sabada gafegi Yesu e, ïe bëgëla aulo amolalibalä eladi gadoi ëi widi sagaido afiaha dilo. Afiaha dialea ïe bëgëla aulo amolia widi amoïe gägä faila nana awäha nelo.  
\v 24 Nana awäha neebe amo Felesi dolö ilia bealahilä Yesuma sähalea, Nilïle mala säla negei dibe ameada segeyo Sabada gafegi hamolo made amo dïe bëgëla aulo golia damula hamosa nebego bimola säi.  
\v 25 Amala säsebegi, Yesuea ilima säla obëgësalea, Siiba Debidia hamoi dëdëla negei dibe amo dilia nidela made neale. Debidige dolö odoa ebalä nefolalo amolige molö maadela sïdëa baagosalea,  
\v 26 Abiada e gobela ïlo Busa Edefade nebegi, Debidi e Godeïe mosöa nogila digalahilä beledi Godegali odala ï dilo amo neala mai. Beledi amoda odoaea nülo made, Gobela ïlo amoliamu nülo negei amo ea nalahilä, odoa ebalä nelo amoli muäia neala gaula awäla ïmelëla säi amo dilia made nidei neale.  
\v 27 Yesuea ilima säla wagala sähalea, Godea segeyo Sabada gafe hamoi amoda, Udia dolö fifii asi sefolalebe amolia segeyo Sabada gafe ugila negemäia hamoi mademelë. Udia dolö fifii asi sefolalebe amoli ugila negemäia hamoimelë.  
\v 28 Amala negei ameada, Dolöïe Malö amoda, segeyo Sabada gafeïe Dafidilo neamelëla säla ï.   
\c 3  
\s1 Segeyo Sabada gafegi Yesuea dolö afädë naabo nafadei wahi  
\r (Madiu 12.9-14, Ulugu 6.6-11)  
\p
\v 1 Yesu e gedolo mosöa bu elö nogila digai. Mosöa amida dolö naabo elö amo balägädöla nafadei afädë sulo.  
\v 2 Udia dolö odoa sefolalo amolia Yesuma dia nafadela hamoila sämolölahilä, segeyo Sabada gafegi Yesuea dolö amo wahisebelela bimolöïe ilia si dadaiaha sefolalo.  
\v 3 Yesuea dolö naabo nafadei amoma sähalea, Di nowela mogogi namolö misiëla säi.  
\v 4 Amala sälahilä ea ilima nabahalea, Nilïa segeyo Sabada gafegi hedabi hamomolö amo dofeale ma, nafade hamomolö amo dofeale. Udia dolö hedabola namiäia damula moholö amo dofeale ma, baagomäia nufulö amo dofealela nabi. Amala nabasebegi, ilia säla obëgëla made sefolalo.  
\v 5 Yesuea udia dolö sefolalo amoli sidawewela beahamelebe, ilile iso asigi geloi dibe amo beala yöi. Yölahilä ea dolö naabo nafadei amoma sähalea, Dïe naabo mogodigia gamola säi. Dolö amea naabo mogodigia gai amole ïe naabo amo wahimolöi wahi melï.  
\v 6 Amala hamosebe amo bealahilä, Felesi dolö sefolalo amoli segea fodolofalï doadigila awäla Heledo sosogo nefolalo amolibalä gegedolahilä, Yesu baagomäia abilia hamomolödula säla didiäha dilo.   
\ms1 Yesuea ïe geloi olei, gaso hïle segea fii amolia asigi afädë made negei  
\mr (Maga 3.7-6.6)  
\s1 Udia dolö yafie oeabo agesua gegedoi  
\p
\v 7-8 Yesula ïe bëgëla aulola ili sege ili neloa amo fisila Galili oeabo dibea ami afiai. Ili afiasebegi udia dolö yafiea ili bëgëla afiai. Sege Yudialage, gaamu Yalusalemelage, sege Idumialage, ödä Yodona dëgëla alämadilage, gaamu Daiamadilage Saidonomadilage sege amoligila udia dolö yafie sämolö asusugai Yesuea hamoi amo nabala e bëgëla afialahilä e neebea ami gegedoi.  
\v 9 Amala gegedosebegi Yesuea ïe bëgëla aulo amolima sähalea, Udia dolö yafie gegedoi amea ne fëdöla dedelei gabugi, ne dudaia fedadelä dilia du afädë gaula maala ne neebe gaalu, ga made negesimola säi.  
\v 10 Ea udia dolö yafie dafidi wahilasi amo gadola, udia dolö oloi sefolalo amoliage ili wahilasimäialahilä, ilia e digimolöïe gegedoi amea dedelei.  
\v 11 Mugabe amolia e bealahilä ïe emo mia gumusula dia digalahilä, üalala digila sähalea, Dida Godeïe malömelëla säi.  
\v 12 Amala säsebegi, ea mugabe amolima gelola sähalea, Odoama ne Godeïe malö neala säla ïmabiola säi.   
\s1 Yesuea abosolo giwilasi memelei  
\r (Madiu 10.1-4, Ulugu 6.12-16)  
\p
\v 13 Yesu e segebidaia fedalahilä, dolö odoa hï hamei amoli misiäia wesebegi, ili e neebea ami misi.  
\v 14-15 Maasebegi ea dolö giwilasi amoli ebalä namolöïe ili memelelahilä, ea ilile ëi abosolo negei. Ilia Godeïe ado mala säla ïmolö mosäiage, mugabe fedai nesila digimolöïe geloi iligali ïmolöïege ea ili memelei.  
\v 16 Giwilasi memelei amolile ëida gowe ili. Saimono, Yesuea ïe ëi elö Fida negei amoge,  
\v 17 Sebediïe malö Yamesege, ïe edoo Yonege, Yesuea elele ëi elö Boaneyisi negei. Nilïle ado sälada sege gudusebeïe malöla säla negei amolege,  
\v 18 Äduluge, Filibige, Badolomiuge, Madiuge, Domasage, Alibiasaïe malö Yamesege, Dadiusige, Selodo sosogo Saimonoge,  
\v 19 Yudasa Isagaliada, Yesu hololölo amoge. Giwilasi amoli Yesuea memelei. Amala memelesa maadelahilä, Yesu e mosöa asi.   
\s1 Yesu e mugabe Belesabulubalä nea hamosa neebela säi  
\r (Madiu 12.22-32, Ulugu 11.14-23, 12.10)  
\p
\v 20 Udia dolö yafie bu gegedoi amea, Yesula ïe bëgëla aulola amolali molö molö fu made melï.  
\v 21 Amala hamoimelëla säi amo nabalahilä, Yesu sosogo nefolalo amolia e bea asi. Mida, odoa ilia e gagaosa neala säi amogi.  
\v 22 Mala dawadigi dolö Yalusalemela digafui amolia sähalea, Mugabe Belesabuluda Yesuma fedai nea.\f * \fr 3.22 \ft Belesabuluïe ëi elöda, Saidani. Madiu 12.22-28 bimalo.\f* Mugabe ilile busaea ema geloi ïasegi, ea mugabe nesila digisa neamelëla säi.  
\v 23 Amala säsebegi, Yesuea ili mofiamolahilä ilima ado besula sähalea, Mugabe Saidani hïmuda abilia nesila digimolöi gabu.  
\v 24 Sege afädëgi fii hilimu mogela nuduseda, fii amoda geloi made bimolömelë.  
\v 25 Mosö afädëgi fii hilimu mogela nuduseda, mosö amoda gelola namolö mademelë.  
\v 26 Mugabe Saidania hïmu ado neala, e sosogo neebe amoli mogeseda, amoda dofä geloi made aligila, hogosa helesa maademolömelë.  
\v 27 Afädëa dolö geloi neebe amoïe mosöa ïe nelegei dibe amo fa nimolö moholöi mademelë. Ea dolö geloi amo dafidi naabo emoge nafodola negesiä ïe mosöa nelegei dibe amo fa nimolö moholöi galë.  
\v 28 Na dilima dofä gelola sähago, Udia dolöea nafade hamoi amoli sulubadelage, gagadela ado nafade elö elöla säi amolige, hëla fisimolöi bimolömelë.  
\v 29 Be afädëa Eleloi Gesami gagadeseda, made hëmolö. Ïe nafade hamoi amoda, walioge hobealage hï ebalä diamolöi diamolömelëla Yesuea säi.  
\v 30 Ilia Yesu e mugabe fedai neala säi amo nabala ea ado amo amala säi.   
\s1 Yesuïe eme edoolalida nowë  
\r (Madiu 12.46-50, Ulugu 8.19-21)  
\p
\v 31 Segeyo amo gala Yesuïe eme edoolali mafula segea ifo baagido nea. Odoa ilima sähalea, Yesu e nilï neebeawi misialasebela sämola säi.  
\v 32 Amala säsebegi, udia dolö yafie Yesu amalela sefolalo amolia ema sähalea, Nabahale. Dïe dieme didoo dialifilali misi segea nea. Ilia di misialala säsebela säi.  
\v 33 Amala säsebegi, ea säla obëgësalea, Nïe neme nedoolalida nowë gabula säi.  
\v 34 Ea e amalela sefolalebe amoli sidawewela bealahilä ilima sähalea, Bimo. Neme nedoolalida sefolalebe gowemelëla säi.  
\v 35 Udiaeage dolöeage, Godea hamese amo gadola hamolo nefolalebe amolida, nedooge nalifige nemege amolimelëla säi.   
\c 4  
\s1 Yesuea ado besula, molö gägä fëfëila säi  
\p
\v 1 Yesuea Galili oeabo agesua nea udia dolöma ado mala bu säla olelesa nelo. Udia dolö yafie gegedoi amea negegisebegi, du ödä daia dilo, amodaia Yesu e fila fedai. Udia dolö yafie gedoi amolida agesua nefolalo.  
\v 2 Yesuea ado besu yafie ilima olelesalea säi amoda gowe.  
\v 3 Nabuö! Dolö afädëa gägä sagaido sadia gogola aligi asi.  
\v 4 Sadia gogola aligi awäha nebegi, gägä odoa idiafa daala negei amo haea maala, neala naha maadei.  
\v 5 Gägä odoa igi naga abelëidaia daala negelahilä, gägä amea naga abelëi amodaia fodolofalï bäui.  
\v 6 Bäui gaso, eso neea hëgïsalea difi moholö asusugala ödölola bausoi.  
\v 7 Amase, gägä odoa äyo gägäi neebea ami digai. Amoda äyo gägäi amobalä gegedola bäui amea widi gägä amo yau hahalea gägä made negei.  
\v 8 Gägä odoa naga hedabi dibea ami daala negei ameada, hedabola bäulahilä gägä negeimelë. Odoaeada gägä nabülasi ohodoa negei. Odoaeada nabülasi gafeia negei. Odoaeada nabülasi emu nabülasi negeimelëla säi.  
\v 9 Amala sälahilä Yesuea säla wagala sähalea, Dili gëhea galea galëda nabuöla säi.   
\s1 Ado besula sämolö mi dibegi säi  
\r (Madiu 13.10-17, Ulugu 8.9-10)  
\p
\v 10 Udia dolö yafie afiaha maadeibua e bëgëla aulo giwilasi amola udia dolö odoa Yesubalä nefolalo amola ilia ea ado besula säi amoïe ema mi nabi.  
\v 11 Amala nabasebegi, Yesuea ilima säla obëgësalea, Godea Beaha Maadela Sigi Neebe amo helësëmolö amoda dafidi ulufadigila made musügä negei dilo amo dilia helësëmäia säla ï amomelë. Be udia dolö segea nefolalebe amolimada ado besulamu säla ïaha neebeweïe  
\v 12 Mida.  
\q1 Ilia siia beahamu nea gaso, dofä gowe gabula made beagolemolömelë. Ilia gëhea nabahamu nea gaso, asigia mi gowe gabula made helësëmolömelë. Ilia beagolela helësësa galebeda, ili asigi besusa maadesegi ilia nafade hamoi amo Godea hësa maadelabiola  
\m säla ï. \rq Aisaea 6.9,10\rq*   
\s1 Ado besula säi amoïe bu awala säi  
\r (Madiu 13.18-23, Ulugu 8.11-15)  
\p
\v 13 Yesuea ïe bëgëla aulo amolima sähalea, Ado besula säi amoïe mi fädäla made helësëi neale. Made helësëi nea galëda, ado odoa besula säse amo sulubadela abilia helësëmolö gabu.  
\v 14 Dolö amea hawa fëfëi amo gadolada ado mala fëfëlo dolö e nea.  
\v 15 Ado mala idiafa digai amo gadoida, udia dolö odoaea ado mala nabasebegi, Godea ilile isogi ado mala sagasi amo, mugabe Saidani maala fodolofalï neala gaula aulo nea.  
\v 16 Amase, udia dolö odoa widi gägä igi naga abelëidaia digai amo gadoi neebe amoliada, ado mala obeägïla nabalahilä fodolofalï neala gaulo.  
\v 17 Amai gaso, ili difi moholö ulïsalea sedade made aligilo. Amalahilä ilia ado mala neala gaui amoïe yöi beasege, odoaea ili neala sëlasisege, ilia fodolofalï dïgïla aulomelë.  
\v 18 Udia dolö odoa giisi äyo gägäi damui fedaha dibea daala negei amo gadoi neebe amoliada ado mala nabalahilä gaso,  
\v 19 ilia nagadaia galu difolalebe amoligi säosäola helësëlahilä, muni edefade negemolöila, nelebo elö elöla gesami awäla helësëse amea, ado mala nabi amo yau hahalea gägä negelo made nea.  
\v 20 Gaso, udia dolö odoa naga hedabia molö gägä daala negei amo gadoi neebe amoliada, ado mala nabala asigi afädë negela neala gaulahilä, ilia gägä nabülasi ohodoa negela digi, nabülasi gafeia negela digi, nabülasi emu nabülasi negela digilo neamelëla säi.   
\s1 Gamaliïe ado säi  
\r (Ulugu 8.16-18)  
\p
\v 21 Amala sälahilä Yesuea ïe bëgëla aulo amolima sähalea, Afädëa gamali yola sagaseda faloea dabelole ma, imidi hawa negelole. Ai amala made hamolo, aulidaia negelomelë.  
\v 22 Nelebo musügä negei dibe amoda hobeala ulufadigisa maadela, udia dolöea nelebo dabela negei difolalebe amolida hobeala yo digai dibea ami ulufadigisa maademolömelë.  
\v 23 Afädëa di gëhe galea galëda, nabualola säi.   
\p
\v 24 Ea aso ilima sähamu neamu sähalea, Ado dilia nabi amoda hedabola helësëmalo. Dilia odoagali mogela ïaseda, Godeage amo gadola wäla diligali mogela ïahalea odoage baala ïmolömelë.  
\v 25 Afädëa nelebo afädë gaula neebe amomada Godea odoa baala ïmolömelë. Afädëa nelebo afädë gaula made neebe amoda, ea holöfalï gaula nea dofe gaula neala neebe amolida, Gode hï fedela nimolömelëla säi.   
\s1 Molö sagai bäulo amoïe ado säi  
\p
\v 26 Yesuea ado aso sähamu nea sähalea, Godea Beaha Maadela Sigi Neebe amoda gowe gadoi dialea. Dolö afädëa sagaido hawa fëfëla aligi awäha nelolahilä,  
\v 27 gasi sulubadelagi dolö amo daiala, yose nowela afu mafusa neë gaalu, hawa fëfëi amo duulu besela galala bäuse amoda gomalä bäusebela dolö amo hïda dawa made aligilo.  
\v 28 Nagaea bäulasila gägä negelomelë. Dafidida bäudale bobagila, hobeala mumusu negelomelë. Hobeafalï hodo hï e gägä negelomelë.  
\v 29 Molö amo nimolö galëda, dolö amo hï damulo. Mida, molö mumului nimolö segeyo besela galai amea.   
\s1 Ado besula masada gägäïe säi  
\r (Madiu 13.31-32,34, Ulugu 13.18-19)  
\p
\v 30 Yesuea aso sähamu nea sähalea, Godea Beaha Maadela Sigi Neebe amo, nilïa abodo gadoila sämolödu. Ado besula nilïa abodo gadoima oodo beala sämolödu.  
\v 31 Amoda masada gägä gadoi. Gägä odoa gadoi made. Gägä amoda holöfalïfalï. Ilia amo sagaia sagalomelë.  
\v 32 Ilia sagai amo fedala edefadela aligiseda dägöala sagai odoa amo baagila awäla bäulomelë. Ïe adomo edefade bafui amogida haea mafula bäu augi hawa ami mosö olelomelëla säi.   
\p
\v 33 Udia dolö amolile asigia helësëseda helësëmäia Yesuea ado mala säla ïahaleada, ado besulamu yafie säla ïaha nelo.  
\v 34 Ea udia dolöma ado mala säla ïahaleada, ulufala made säla ïala, ado besulamu säla ïaha nelo. Ïe bëgëla aulolali hilidomu neada, ea ado besula säla ïlo amoïe mi sulubadela ilima säla ïaha maadei.   
\s1 Yesuea fo ödälebalä adoi  
\r (Madiu 8.23-27, Ulugu 8.22-25)  
\p
\v 35 Segeyo amo gala deadi eso digase gaalu, Yesuea ïe bëgëla aulo amolima sähalea, Oeabo edefade goïe agesu alogodigogi afiadila säi.  
\v 36 Amala sälahilä udia dolö yafie nefolalo amoli amilahilä, ili Yesu sulo du amodaia fila fedalahilä, eege hiligila fila afiai. Du odoage ili awäse amo gadola hobeala bëgëla afiai.  
\v 37 Afiaha dibegi, fo edefade gelola guula maalahilä oeabo bubolela aidagula dudaia häila digala, du nobamolö hamose melï.  
\v 38 Amala hamose amo gaalu, Yesu eda du bidigi busa fugulo negela adi dilo. Amala adi dibegi ilia e didiigisalea sähalea, Säla Olelelo-o, di nowemo. Nilï baagodelä hamosebe gowegi di holöfalï fudugila made dialealela säi.  
\v 39 Amala säsebegi, Yesu e nowelahilä foma nemolahilä ödäma sähalea, Aeala aumamo. Fologomabula säi. Amala säi amole fo gelola misi amo boogelela ödä aidagula fedai amoge aumalasi.  
\v 40 Ea ïe bëgëla aulo ilima nabahalea, Edogi bedäha dialea. Dili Godema asigi afädë negei made nealela nabi.  
\v 41 Amala usila aumase amo beala, ili edefademalä bedälahilä hilidomu sähalea, Fo elea ödä eleada ïe ado nabelo gabu. Dolö weda nowëdula säha difolalo.   
\c 5  
\s1 Yesuea dolö afädëma mugabe fedai nesila digi  
\r (Madiu 8.28-34, Ulugu 8.26-39)  
\p
\v 1 Yesula ïe bëgëla aulola ili oeabo Galili agesu alömodi amogi awäla Gelasa fii mosöa besela galai.  
\v 2 Yesuea ödä du ami negesiä awäha nebegi, dolö mugabe fedai afädë baagoi igi äbägi bausidola maaha nebegi gausiala digai.  
\v 3 Dolö amoda baagoi bausia amimu diaha aligilo. Dolö afädëa ïe naabo emoge igi ëfëa gaula nafodomolöi made nelo.  
\v 4 Segeyo yafiegi ilia ïe naabo emoge igi ëfëa nafodosamu aligilo. Gaso, igi ëfë amo ea hësäla digisamu aligilo nelo. Geloi hïdo elöi amoda dolö afädëa e gaumolöi made nelo.  
\v 5 Dolö amoda gasi esoage baagoi bausiale segebidaialemu nawesa aligilo. Ea üalala gaula nawesamu neada hïle domalo igia dagabosamu aligilo.   
\p
\v 6 Amala hamosamu aligilo amo, Yesu e aso wagadi made maaha neebe amo beala, e baluluia awälahilä Yesuïe emo mia gumusula dia digai.  
\v 7 Gumusula dialea gelola üalala sähalea, Gode Dofä Ilibia Edefade neebe amoïe malö Yesu, dia nema abilia hamomolöïe misi. Na dima Godeïe ëi nabasewegida dia ne së ïmabiola säi.  
\v 8 Ea amala gelola säi amoïe mida, Yesuea ema dida mugabe, dia dolö go dïgïla mosöla säsebegi amala säla obëgëi.  
\v 9 Yesuea ema nabahalea, Dïe ëida nowëla nabi. Ea säla obëgësalea, Nïe ëida Malei. Nilïda holöfalï made, maleimelëla säi.  
\v 10 Amala sälahilä ea Yesuma gelolafalï sähalea, Segeweda dïgïla mosalola sämabiola säi.   
\p
\v 11 Amo gaalu ami sugua yafie gau domala moosa nefolalo.  
\v 12 Mugabe amolia Yesuma gelolafalï sähalea, Nilï sugua nefolalebe gagowelima fedala namolö mosöla sämola säi.  
\v 13 Yesuea amala hamomola säsebegi, dolö amo dïgïla mugabe amoli sugua nefolalo amolima fedai. Amala nogila fedalahilä gau mogobogi amogi baluluia didigafula ödägi nogila digaha maadelahilä, sulubadela ödäea naha maadei. Sugua amoli gedolada dausini äudä gadoi ödäea mai.  
\v 14 Amala hamoi amo bealahilä, sugua sigi aligilo amoli fisäla awälahilä, gaamu dibea amige mosö gägäwila asi dibea amige säsäla awäha nelo. Säi amo nabalahilä udia dolö nefolalo amolia abilia gelola hamoi walebelela fädäla bea asi.  
\v 15 Ili Yesu neebea awälahilä beahamelebe, dolö dafidi mugabe yafie fedai nelo amo fagulo salugalahilä, e asigi hedabi negei sebe amo beala ili bedäi.  
\v 16 Udia dolö Yesuea hamose melëlo amolia, udia dolö misi nefolalebe amea nabuäia dolö amoma mugabe yafie fedai nesila digi amoge sugua ödäea mai amoge ilima säla ïaha maadei.  
\v 17 Amala säla ïasebegi, ilia Yesuma gelolafalï sähalea, Dida nilïle segea wi namolö mademelë. Näiadodi namolö mosalola säi.  
\v 18 Amala säsebegi Yesu e dudaia fimolö awäha nebegi, dolö mugabe yafie fedai dafidi nesila digi amea, Yesuma nabahalea, Di awäsebe go gadola ne mudulela nabi.  
\v 19 Amala nabasebegi, Yesuea dolö amoma säla obëgësalea, Nebalä moholö made. Dafidilo Geloia dima hamoi amoïege bobasëi amoïege dïe sosogoma säla ïmolö dihï mosöa mosalola säi.  
\v 20 Amala säsebegi, dolö amea Gaamu nabülasi difolalebe amo sulubadelagi awälahilä, Yesuea ema hamoi amo udia dolö nefolalo amolima säla ïasebegi, ilile asigigi fudugisa nefolalo.   
\s1 Yalusiïe idiwige, udia Yesuïe fagulogi diigisebegi wahi amoge  
\r (Madiu 9.18-26, Ulugu 8.40-56)  
\p
\v 21 Yesu e dudaia fila Galili oeabo amo dëgëla obëgëla awäla agesua nebegi, udia dolö yafie mafula ea ado säse amo nabulö gegedoi.  
\v 22 Amase amo gaalu, gedolo mosö beaha aligilo afädë misi amoïe ëida Yalusi. Ea Yesu beagolelahilä ïe emo mia gumusula dia idogolahilä  
\v 23 Yesuma gelola sähalea, Nïe nidiwi holöböda baagomolö ga madefalï dialea. Dia dofä naaboea diigisegi made baagola wahimäia awähadula säi.  
\v 24 Amala säsebegi, ebalä asi.  
\p Udia dolö yafie nefolalo amoliage e bëgëla afiahalea negegila dedelela aligi afiaha dilo.  
\v 25 Afiase amo gadola udia afädë gäheo i nabülasi afädëïe odoai äudä heale olo olosamu aligilo amoge asi.  
\v 26 Udia ameada e wahimäiala alögoda yafie neebea ami awähamu aligilo gaso, Ea së edefade melï. Amase, ea alögoda iligali muni ïahamu aligilo gaso, e olo amo made wahila neala edesa aligilo.  
\v 27 Amala hamoi salea, ea Yesuea hamolo sedalu säi amo nabalahilä, udia dolö Yesu bëgëla afiasebe amolibalä awälahilä e baagido maala ïe fagulogi diigi.  
\v 28 Ea hïdo asigiamu helësësalea, na ïe fagulogi diigiseda, neda wahimolöla helësëi.  
\v 29 Ea Yesuïe fagulogi diigi amole, heale olo oloi amo hogosa helela e fodolofalï wahi gabula helësëi.  
\v 30 Yesuea ïe wahilo geloi awäse amo helësëlahilä, besula nea nabahalea, Nïe fagulogi diigi amo nowëala nabi.  
\v 31 Amala nabasebegi, ïe bëgëla aulo amolia ema sähalea, Dibalä udia dolö yafie dedelela aligi afiaha dibewe dia beasegoda, ne nowëa diigila edoïe nabahala säi.  
\v 32 Amala säse amo gaalu, e nowëa digisa walebelela sidawewela hogoi.  
\v 33 Udia amea ema hamoi amo helësëlahilä emo gigisëla bedälahilä, Yesu mia ga madela gumusula dia idogolahilä, Ema hamoi amo sulubadela säla ïaha maadei.  
\v 34 Yesuea ema sähalea, Nïe nidiwi-e, dia nema asigi afädë negei amea di wahigomelë. Olo amea dima bu elö made baamolö, dalulo gaula mosalola säi.  
\v 35 Yesuea säha nebegimu dolö odoa gedolo mosö beaha aligilo Yalusiïe mosöala misi. Maalahilä ilia ema sähalea, Dïe didiwi hä hame doala asi amoda. Olelelo dolö goma yöi ïase go edoïela säi.  
\v 36 Ilia amala säsebegi, Yesuea auaulahilä gedolo mosö beaha aligilo amoma sähalea, Dia bedämabu. Godema asigi afädë negemalola säi.  
\v 37 Amala sälahilä udia dolö odoa nefolalo amolima dili misiabiola sälahilä, Fida Yamese ïe edoo Yonela ohodoa ilimu ebalä asi.  
\v 38 Gedolo mosö beaha aligilo amoïe mosöa malïgahamelebe, udia dolö yafie gegedolahilä didigaosalea goba fedaha dibe melï.  
\v 39 Beala e mumusogi nogila digalahilä ea ilima sähalea, Dilia edogi didigaola goba fedaha dialea. Udia malö goda baagoi made, süwia adi dialeamelëla säi.  
\v 40 Amala säsebegi, ilia Yesubalä ösa sefolalo. Amasebegi, ea ili sulubadela segea nesila digilahilä, udia malö amoïe eedo emelela ïe bëgëla aulo ohodoa amolali udia malö dusugala negei hogoli amogi nogila digai.  
\v 41 Yesuea udia malö amoïe naabogi gaula nabeleia wesalea, Dalida gumi. Nilïle ado adolada, Udia malö holöbö, na dima säha. Di nowemola säi.  
\v 42 Amala säi amole udia malö amo fodolofalï nowela asi. Amala hamose amo beala udia dolö nefolalo amoli edefademalä fudugila bedäi. Udia malö amoïe gäheo ida nabülasi afädëïe odoai äudä.  
\v 43 Yesuea ilima gelolafalï sähalea, Na walio hamoi amoda udia dolö odoama säla ïmabiola säi. Amala sälahilä, Ea ilima udia malö holöbö go molö muäia ïmola säi.   
\c 6  
\s1 Nasalese udia dolöea Yesu hamei made nelo  
\r (Madiu 13.53-58, Ulugu 4.16-30)  
\p
\v 1 Yesuea sege amo dïgïla ïe bëgëla aulolali hï e ëdëla aligi segea ami bu obëgëi.  
\v 2 Segeyo Sabada gafegi Yesu e gedolo mosöa ami awälahilä, udia dolöma ado mala olelesa nelo. Udia dolö yafie ea ado mala säse nabaha sefolalo amoli asigigi fudugilahilä sähalea. Ado goweda, dolö goea abidi niidu. Ema dawa edefade dibe goweda, dawa edo gadoidu. Ea melëlo made gadoige hamomolöi made gadoige hamose weda edodu.  
\v 3 Eda mosö olelo dolö, Meliïe malö madele. Eda Yamese Yosese Yudasa Saimonola ilile edoo madele. Ïe elefila ilida nilïbalä wi sebe amoda. Ilia amala sälahilä, ema bimolö habobala hamei made nelo.  
\v 4 Amasebegi, Yesuea ilima sähalea, udia dolö fifii asi sulubadelada, bea säloïe ado nabaha. Gaso, hïle segeafalï fii amoliage sosogo iliage hïle mosöa fii amoliage ïe ëi maademelëla säi.  
\v 5 Dolöea hamomolöi made gadoige melëlo made gadoige segea ami hamomolöi made gabugi ea hamola made nelo. Ea udia dolö oloi afädë afädëlamu naaboea diigila wahisa nelo.  
\v 6 Amala hamose amo beala ilia ema asigi afädë made negesebegi Yesu e fudugisa nelo. Amasebegi, ea Nasalese sege fisila udia dolö fii odoa ilima ado mala olelela aligi nawesa nelo.  
\ms1 Yesuea ïe bëgëla aulo amolima ïe geloi olei, gaso, ilia e dawadigi made nelo.  
\mr (Maga 6.6-8.21)  
\s1 Bëgëla aulo giwilasi amolima Yesuea hamoi ï  
\r (Madiu 10.5-15, Ulugu 9.1-6)  
\p Amalahilä eda udia dolö nefolalebeadi ado mala olelela aligi nawesa nelo.  
\v 7 Yesuea ïe bëgëla aulo giwilasi amoli wela gegedosebegi. Ea ili äudä äudäla afufumalola sälahilä, udia dolö mugabe fedai nefolalebe amoli nesila digamäia ea ilima geloi ï.  
\v 8 Ea ilima sähalea, Dili afiahaleada galiamomu gaula mosalo. Nelegei odoa gaula mosabio. Molöge aduge muni salelogi salala gaula mosabio.  
\v 9 Emo usililo salugamalo. Fagulo äudä salugamabiola säi.  
\v 10 Ea ilima aso sähamu nea sähalea, Dili awäla sege afädëgi besela galala mosö afädëgi nogila digaseda, mosö amogimu nelolahilä dilia sege amo dïgïla awäsolo amo gala giso mosö amo hä fisimalo.  
\v 11 Amase, sege odoagi besela galasegi, ami fii amolia mosö fu made ïala, dilia säse amoge made nabaseda, sege amo hä dïgïla mosalo. Dïgïla awähaleada, dilile emogi dao baai amo fëfëla salalahilä mosalo. Amala hamoseda, ilia helësësalea, nilïa asiala hamoi amea amala hamosebela helësëmolömelëla säi.  
\v 12 Amala säi amo nabala ili afialahilä, udia dolö ilima sähalea, dili asigi besumalola säla ï.  
\v 13 Ilia amala säla ïalahilä, udia dolö yafie mugabe fedai nefolalo amoli nesila digila digi. Udia dolö oloi yafie difolalo amolige ilia weli söga negesebegi, wahisa maadei.   
\s1 Ödägi gelo Yone baagoi  
\r (Madiu 14.1-12, Ulugu 9.7-9)  
\p
\v 14 Udia dolöea Yesuïe ëi säsäi asi ameada beaha aligilo Gini Heledoea nabi. Odoaea sähalea, Ödägi gelo Yone dafidi baagoi amo bu nowelahilä obëgëla misi nea, geloi melëlo made gadoi hamosa neamelëla säha dilo.  
\v 15 Odoaea sähaleada, Eda Elaia gabu. Amase, odoaea sähalea, Eda bea sälo siiba nelo amo gadoi gabula säi.  
\v 16 Heledoea ado amo nabalahilä sähalea, Yoneda na muugi damui amo bu obëgëla maala neebe gadoi gabula säi.  
\v 17-18 Helodiasa eda dafidi Heledoïe edoo Filibiïe udia sulo amo hobeala Heledoea fedela nii. Amala hamosebegi, Yonea Heledoma sähalea, Dia didooïe udia fedela neala dibalä sebego dofea made hamoimelëla säi. Amala säsebegi, Heledoea ami dolö nefolalo amolima sähalea, Yone gaumolö mosalola säi. Amalebe ilia e igi ëfëa nafodolahilä galabaia mosöa negei. Heledoea ïe udia Helodiasa obeägïmäia amala hamoi.  
\v 19 Ïe udia Helodiasaea Yonema habobalahilä e baagomäia abilia nufulödula helësësa sulo. Gaso, nufulö fu made melï.  
\v 20 Mida, Heledo eada Yone eda dolö hedabi, Godeïe siigi asigi mogoi neala helësëla bedälahilä, eada Yone idihë nelo. Ea Yonea ado säse nabala obeägïlo ameada e asigi säosäola helësësa nelo.  
\v 21 Heledo e ägüla misi segeyo beala galasebegi, gamane sigi aligilo nefolalo amolimage, ami sigi aligilo nefolalo amolimage, Galili segeïe dafidilo nefolalo amolimage ea sähalea, Molö molö gegedomalola säi. Molö giasolo amo galada Helodiasaea Yone nufulö fu beagolei.  
\v 22 Segeyo amo gala ili molö naha dibegi udia malö Helodiasaïe idiwi maalahilä sigoi. Heledoeage dolö odoa ebalä molö naha sefolalo amoliage, ea sigoi amogi hïdo elöla obeägï. Hïdo elöla obeägïsebegi, ginia dolïsä amoma sähalea, Sigosegoïe nelebo afädë ïmose amo gadoi ïmolömelëla säi.  
\v 23 Ea naabo migalïa diigila dolïsä amoma sähalea, Nelebo afädë ïmoseda, na sege edefade beaha neebe amogi mogogi nofela ïmolömelëla säi.  
\v 24 Amala säsebegi, dolïsä amo segea doadigila awälahilä emema nabahalea, Ne edo ïmola sämolödula nabi. Amala nabasebegi, emea sähalea, Ödägi gelo Yoneïe busa damula ïmola sämalola säi.  
\v 25 Amala säsebegi, dolïsä amo fodolofalï baluluia obëgëla awälahilä Ginima sähalea, Ödägi gelo Yoneïe busa damula falodaia gaula maala walio ïmäia hamesamelëla säi.  
\v 26 Amala säi amo nabalahilä ginia edefademalä bobasëi. Gaso, dolö molö naha sefolalo amoli sidaia migalïa diigila ado gelola säi ameada, fisimola sämolö ulï gabula helësëi.  
\v 27 Amala helësëlahilä ea fodolofalï ami afädëma sähalea, Yoneïe busa damula gaula obëgëmolö mosöla säi. Amala säsebegi, ea galabaia mosöa awälahilä Yoneïe busa damui.  
\v 28 Damulahilä falodaia negela gaula maalahilä dolïsä amoma ï. Ïasebegi, dolïsä ameada emema ï.  
\v 29 Amala hamoimelëla säi amo nabalahilä ïe bëgëla aulo amolia ïe domalo neala gaula awäla igi äbägi bausi.   
\s1 Udia dolö yafiea molö mai  
\r (Madiu 14.13-21, Ulugu 9.10-17, Yone 6-14)  
\p
\v 30 Abosolo dolö amoli Yesu neebea obëgëla maalahilä, ilia hamoi amoge mala olelei amoge sulubadela ema säla ïaha maadei.  
\v 31 Udia dolö afu mafusalea ili molö molö fu made beasebegi, Yesuea ilima sähalea, Nilï udia dolö madeido hele fimolö afiadila säi.  
\v 32 Amala sälahilä ili hilido ödä dudaia fifigila udia dolö madeido afiai.  
\v 33 Ili afiaha dibegi, udia dolö yafiea bealahilä ili awäha gabula helësëi. Amala helësëlahilä ili gaamu elögi elögila nagadabodo baluluia afialahilä ili moholö awäsebea ami dafidi ilidale awäla besela galai.  
\v 34 Ili awäla ödä agesua besela galahamelebe, udia dolö yafie nefolalebe melï. Bealahilä ea ili edefademalä bobasëi. Mida, Ili sugua sibi sigi aligilo maadesalea, hilido aligilo amo gadoi neebe amo beala. Amalebe ea ilima ado mala yafie säla olelesa nelo.  
\v 35 Segeyo amo gala deadisebegi, ïe bëgëla aulo amolia e neebea maalahilä ema sähalea, Sege udia dolö maadeia wimu nebegi hä deadisebegi.  
\v 36 Dia udia dolö nefolalebe gowe ili mosalala sämo. Afialahilä hili molö bidia nimolö sagaia mosö dibea amige gaamu holöfalï dibea amige hogogola mosäiamelëla säi.  
\v 37 Amala säsebegi, ea ïe bëgëla aulo ilima säla obëgësalea, Ili molö muäia dilia ïmalola säi. Amala säsebegi, ilia ema säla obëgësalea, Muni gina hädali äudäea ili beledi muäia neala ïmolö afiadulela nabi.  
\v 38 Ea ilima nabahalea, Dilia beledi aboläia ägüi walebelela bimolö mosalola säi. Beala maalahilä ilia ema sähalea, Nilïada beledi bia seme äudä amolemu ägülubela säi.  
\v 39 Amala säsebegi, ea ilima sähalea, Udia dolö sulubadela nudulu hamola giisi hedabidaia, gegedola fifigimalamalola säi.  
\v 40 Amala säsebe amo gadola säsebegi, odoada hädali afädë, odoada nabülasi bia gadoi dimu hamola fifigi.  
\v 41 Amala fifigi dibegi ea beledi bia amoge seme äudä amoge naaboea gaula nea, Ea selesaia mosöa sida adogola nea Godema nesegelahilä, ïe bëgëla aulo amolia udia dolö iligali sogomäia beledi dagabodasila ï. Amalahilä ea seme äudä amoge dagabodasilahilä, ili sulubadelagali sogomalai.  
\v 42 Amala sogoi amo, ili sefolalo amoli dofea nahalea,  
\v 43 beledige semege odoa fea digai amo bëgëla aulo amolia gegedola, adu giwilasi salala nobai.  
\v 44 Beledi seme naha sefolalo amoli dolömuda dausini bia sulo.   
\s1 Yesu ödädabodo asi  
\r (Madiu 14.22-23, Yone 6.15-21)  
\p
\v 45 Yesuea ïe bëgëla aulo amoli fodolofalï mosalolahilä sähalea, Dilidale dafidi ödä dudaia fila oeabo go dëgëla alogodi sege ëi Bedesaida mosalola säi. Amala sälahilä udia dolö gegedoi amolima sähalea, Dilige dihili mosöa dusula afiamalola säi.  
\v 46 Ili sulubadela hawio afiamalolahilä, eda Godema adomolöïe segebidaia fedai.  
\v 47 Ïe bëgëla aulo amoli dudaia fila asi amo oeabo mogogi gasise amo gaalu, segea amida Yesu e hïdo nelo.  
\v 48 Yesu e ami nea beahamelebe, du busamadila fo gelola maase amea ödä adelo i amea ilia gelola adimolö ïliawasebe amo melï. Haea gämolö amo gaalu, Yesu e ödädabodo ili neebea ami moholö asi. Ea ili baagila moholö awäse  
\v 49 amo gaalu, ilia e ödädabodo maase amo beala, mugabeledula helësëlahilä üalai.  
\v 50 Ili sulubadelaea bealahilä edefademalä bedäsebe amo bealahilä, Ea ilima fodolofalï sähalea, Asigi hä gelomalo. Weda nemelë. Bedämabiola säi.  
\v 51 E maala ilibalä dudaia fii amole fo maala made boogelei. Amala hamosebegi, ilile asigigi edefademalä fudugi.  
\v 52 Iliada ea udia dolöea muäia beledi ï amoïe mida fädäla made helësëi nelo. Ilile iso asigi gai nelo.   
\s1 Yesuea Genesaledi ami udia dolö oloi yafie wahi  
\r (Madiu 14.34-36)  
\p
\v 53 Yesula ïe bëgëla aulola ili oeabo amo dëgëla alämadi sege ëi Genesaledi besela galalahilä ödä du amo ëfëa begela agesua ami negesi.  
\v 54 Du negesiä maaha neebe amo udia dolö nefolalo amolia fodolofalï bealahilä, Yesu gabula helësëi.  
\v 55 Amala helësëlahilä fodolofalï ili sege dibe amo sulubadelagi baluluia afufulahilä udia dolöma säla ïaha maadei. Udia dolö Yesu misi neala säi nabi amoliada, oloi difolalo amoli iwasala gaula Yesu neebea ami misi.  
\v 56 Sege dibe sulubadelagige gaamu dibe sulubadelagige, mosö dibe sulubadelagige Yesu e awäla besela galasebea amida, udia dolö nefolalo amolia oloi difolalo amo gaula mafula magaia gaamugi negesisi. Negesiä ilia Yesuma gelola sähalea, Oloi gowe ilia dïe fagulo bidigimu diigimäiamelëla säi. Oloi amoli sulubadelaea amala diigisebegi, wahisa maadei.   
\c 7  
\s1 Godeïe Ado säla negei amea mäu ilile ado baagi  
\r (Madiu 15.1-9)  
\p
\v 1 Felesi dolöge ado säla negei olelelo dolö odoa Yalusalemela misi amolige gegedolahilä ili Yesu neebea afiai.  
\v 2 Ilia beahamelebe ïe bëgëla aulo odoaea naabo nigime hëla made molö naha sefolalebe amo melï.  
\v 3 Felesi dolö iliage Yu udia dolö sulubadelaeage mäu ilia aialo mala negei amo helësëlahilä naabo nigime hëla madeda molö nülo made nelo.  
\v 4 Ili magaia gaamugi awäla obëgëla maalahilä nigime made hëla molö nülo made nelo. Ödä ige faloge gaabo ige aiala nigime hëlo negei amo gadola aiala hamolo odoa yafie negei.  
\v 5 Felesi dolö amoliage mala dawadigi dolö amoliage ema nabahalea, Dïe bëgëla aulo golia mäu ilile aialo mala dibe amo damula naabo nigime hëla made buludola molö nase goda edoïela nabi.  
\v 6 Amala nabasebegi, ea ilima säla obëgësalea, Siiba Aisaeaea asigi fea negelo dilile hedabola bea säla negeimelë. Ea bea säla dëdëla negei amoda gowe,  
\q1 Udia dolö ilile iso asigi wagadi made negesiä adoeamu nïe ëi gauia adalo nea.  
\v 7 Ilia dolöfäea mala säla negei amomu olelesaleada, Godeïe adoda amomelëla sälo nea. Amaimo, ilia nïe ëi memalä gauia adalo nebegola  
\m säla dëdëla negei dialeala Yesuea säi. \rq Aisaea 29.13\rq*   
\m
\v 8 Dilia Godeïe mala säla negei dibe amo fisilahilä dolöïe aialo mala dibe amomu gelola hamosa nebegola säla ï.  
\v 9 Yesuea ilima aso sähamu nea sähalea, Dilile aiala hamolo mala amo hamosalea. Dilia Godeïe mala säla negei dibe amo fisi gabu.  
\v 10 Amoïe Mosesea ado säla negesalea, dïe diado diemele hawa nea elele ado nabala bëgëla hamomalola sälahilä sähalea, Afädëa ïe eedo emele gadiaboseda, baagomäia nufulö dialeala säla negei dialea.  
\v 11-12 Amai gaso, dilia gomalä sälomelë. Afädëa nelebo amoligi Gobana säseda eada eedo emele ugila negemolö mademelëla sähalea sälo, Gobana nilïle ado sälada Godegali odala ï neawe.  
\v 13 Amalo ameada, dilia mäu ilia aiala hamolo mala olelei amomu hamosa neada, dilia Godeïe ado fisilahilä mala amo gadoi yafie hamosamu aligilomelëla säi.   
\s1 Yesuea udia dolö neala nafadelo amoïe säi  
\r (Madiu 15.10-20)  
\p
\v 14 Yesuea udia dolö nefolalo amoli bu misialolahilä ilima sähalea, Dili sulubadelaea na säsebewe nabala hedabola helësëmalo.  
\v 15-16 Nelebo segea dilo dolö isogi digase ameada udia dolö neala nafadelo mademelë. Nelebo isogi dilo segea doadigila awäse amea udia dolö neala nafadelomelëla säi.  
\v 17 Amala sälahilä udia dolö amoli amilahilä e mumuso isogi digala sebegi, ïe bëgëla aulo amolia ema nabahalea, Ado besula säi amoïe mida edodula nabi.  
\v 18 Amala nabasebegi, ea ilima sähalea, Dilige aso asigi made gäwi neale. Nelebo sulubadela segea dilo isogi digase ameada, udia dolö Godeïe siigi nigime baalo made amo, dilia dawa made neale.  
\v 19 Molö nase amoda asigigi aulo mademelë. Gaisagi digalahilä segea doadigila aulomelëla säi. Ado amoïeda Yesuea gomalä sähalea säi. Molö sulubadela nase ameada Godeïe siigi nigime baalo mademelëla säi.  
\v 20 Ea sähamu nea sähalea, udia dolöïe iso asigigi besela galasebe ameada, udia dolö Godeïe siigi nigime baalomelë.  
\v 21 Udia dolö ilile iso asigigila besela galalo amoda gowe. Asigi nafadege, nelegei fa nimolöge, udia dolö baagomäia nufulöge, udia dolö susugu hamomolöge, hilimu nafade odoa hamomolöge,  
\v 22 Udia nii susugu hamomolöge, gesami moholöge, mala nafade elö elöla hamomolöge, wäfalï sämolöge, nafade memelela made sulubadela hamomolöge, mudiamolöge, wäfalï säsäla hololömolöge, gugusämäia hamomolöge, asigi maade gadoia hamolo wäla hamomolöge.  
\v 23 Nafade amoli sulubadela asigigila besela galasebe amea udia dolö Godeïe siigi nigime baalomelëla säi.   
\s1 Fonisia fii udia afädëa Yesuma asigi afädë dofä negei  
\r (Madiu 15.21-28)  
\p
\v 24 Yesu e sege amo dïgïla gaamu Daiamadi asi. Awälahilä e mosö afädë neebea amoïe mumusogi digai. Udia dolö nefolalebe amolia e neala made helësëmäia nelo gaso, e musügä fimolöi made nelo.  
\v 25 Amala nebegi, udia afädëïe idiwi holöböma mugabe fedai sulo. Amoïe emea Yesu neala säi amo nabalahilä, e fodolofalï maalahilä Yesuïe emo mia gumusula adi.  
\v 26 Udia ameada Giligi ado adolo. Eda Silia Fonisia fii udia. Ea Yesuma gelola sähalea, Nïe nidiwi holöböma mugabe fedai sebe amo dia nesila digamäia helësësamelëla säla ï.  
\v 27 Amala säsebegi, ea udia amoma sähalea, Molö nahalea dafidi malö ilidale ïmolö galea. Malöïe molö dibe amogida ügüloea muäia sadia gala ïmolöi made galeala säi.  
\v 28 Amala säsebegi udia amea säla obëgësalea, Dafidilo-o, dofä gaso, malësäea molö nahalea iso dusula fisia digaida ügüloea neala nülo madelela säi.  
\v 29 Amala säsebegi Yesuea udia amoma sähalea, Dia ado säi ameada dïe didiwima mugabe fedai amo hä asimelë. Di hä mosöa obëgëmalola säi.  
\v 30 Udia amo hï mosöa obëgëlahilä beahamelebe, ïe malöma mugabe fedai amo doadigila asi, diasia dofea dibe melï.   
\s1 Dolö afädë gëhe gaala ado dadabi wahi  
\p
\v 31 Yesu e Daiamadila obëgëla awäla gaamu Saidono awälahilä Gaamu Nabülasimadi nawesa nelolahilä Galili oeabo edefade dibea ami awäla besela galai.  
\v 32 Udia dolö nefolalo amolia dolö afädë gëhe gaala ado dadabi nelo amo e neebea ami sigi maalahilä, Yesuea e naaboea diigimäiamelëla säla ï.  
\v 33 Amala säsebegi, ea udia dolö nefolalo amoli amilahilä dolö amole heledo aliga galahilä, ïe naabo sögöea dolö amoïe gëhe helegelagi diigilahilä, hïle naabo sögögi gofedela galalahilä, dolö amoïe elïgi diigilahilä  
\v 34 selesaia mosöa sida adogola nea hame hëia fedalahilä sähalea, Efadala säi. Nilïle ado adolada, Gëhe gai dugimo.  
\v 35 Amala hamosebegi, dolö amoïe gëhe doga negela, ïe elï fodolofalï hedabolasilahilä ado hedabola säi.  
\v 36 Yesuea udia dolö nefolalo amolima gelola sähalea, Walio melï amo udia dolö odoama säla ïmabiola säi. Sämabiola säla ïahamu neebe amo nabalahilä gaso, ilia auaula säla ïahamu nelo.  
\v 37 Udia dolö amolia ado amo nabala ili asigigi edefademalä fudugilahilä sähalea, Ea hamosebego sulubadela hedabola hamosebe. Gëhe gai nelo amo doga negela digi, adolo made nelo amo hedabola adomäia hedabolasilo neala säha nelo.   
\c 8  
\s1 Yesuea udia dolö dausini biyidiagali molö ï  
\r (Madiu 15.32-39)  
\p
\v 1 Segeyo amo gala udia dolö yafie bu gegedoi amoli molö molö made gabugi, Yesuea ïe bëgëla aulo amoli mofiamolahilä ilima sähalea,  
\v 2 Udia dolö gegedoi gowe ili nebalä segeyo ohodoa nelo amea hä molö molö maade gabugi asigisebemelë.  
\v 3 Na ili sïdëa baagoi amola wäla hili mosöa mosalaseda, ili idiafa si dädäbëlela digamolö gabumelë. Odoada sege wagadi madela mofiai gabula säi.  
\v 4 Ïe bëgëla aulo amolia ema nabahalea, Nilï sege nafadeia neebe ameada, udia dolö nefolalebewe ili muäia, nilïa molö abidi nea awäla nimolödula nabi.  
\v 5 Amala nabasebegi, Yesuea ilima nabahalea, Dilia Beledi aboläia galebela nabi. Ilia ema säla obëgësalea, Nilïa gifalädalïa galebela säi.  
\v 6 Amala säsebegi, Yesuea udia dolö nefolalo amoli nagadaia fifigimalola säi. Amala sälahilä ea beledi gifalädalïa amo gaula nea, Godema nesegelahilä, dagabodasila ïe bëgëla aulo amolima sogomäia ïasebegi, ilia udia dolö sefolalo amoligali neala sogoi.  
\v 7 Ilia seme nelësa naabo safo ägüi amoge, ea nesegelahilä udia dolö iligali sogomäia ï.  
\v 8 Udia dolö sefolalo amoli sulubadela dofea naala, bolesalea fea digai amo ilia adu gifalädalïa salala nobai.  
\v 9 Udia dolö amolida dausini biyidia gadoi nelo.  
\v 10 Yesuea udia dolö amoli hä afiamalola sälahilä, ïe bëgëla aulola ilida fodolofalï ödä dudaia fila Dalamanuda segeamadi asi.   
\s1 Ilia Yesuma dolöea hamomolöi made gadoi hamomola säi  
\r (Madiu 16.1-4)  
\p
\v 11 Felesi dolö odoa Yesu neebea maalahilä ebalä gëgësalea. Dolöea hamomolöi made gadoi nofe elöi afädë selesaia mosöala misi dia hamomola säi. Ilia e amala fedogola beasebegi,  
\v 12 Yesuïe iso asigigi yöla hame hëia fedalahilä sähalea, Udia dolö walio nefolalebe welia dolöea hamomolöi made gadoi nofe elöi hamosebe amo bimolöïe hogosa nebegoïe mida edo! Na dilima dofä gelola sähago. Udia dolö walio nefolalebe welima, dolöea hamomolöi made, nofe elöi afädë dofä made hamomolömelëla säi.  
\v 13 Amala sälahilä, ili ami dïgïla e dudaia bu fila, oeabo edefade amo näiado alömodi amogi asi.   
\s1 Ado besula Heledo Felesilele yidila säi  
\r (Madiu 16.5-12)  
\p
\v 14 Ïe bëgëla aulo amolia beledi ägüla made elabola asi. Dudaia amida, ilile beledi afädëfalïmu dilo.  
\v 15 Yesuea ilima gelola sähalea. Felesi dolöïege Heledoïege beledi edelo yidi dibe amo helësëlahilä, hedabola idihë namialola säi.  
\v 16 Amala säi amo nabalahilä ilia hilidomu sähalea, Ea säse egoweda, nilïa beledi ägüla made misi amoïe säsebemelëla säha dilo.  
\v 17 Ilia säi amo ea helësëlahilä ilima sähalea, Nilïa beledi made ägüi amoïe säsebegola säha dibegoda edoïe! Dilia fädäla helësëla made nelo amomu nea, dawa made neale! Ma, dilile iso asigi gai, aso, neagole!  
\v 18 Dilile si galea gaso, dilia made beasebele. Gëhe galea gaso, dilia made nabahale. Dilia elaboile!  
\v 19 Amo gala beledi bia ameamu dolö dausini biaea muäia, dagabodasi amo nalahilä, fea digai amo dilia neala, adu aboläia nobala salila nabi. Amala nabasebegi ilia ema säla obëgësalea, Adu Giwilasila säi.  
\v 20 Ilia amala säsebegi ea ilima sähalea, Udia dolö dausini biyidiaea muäia beledi gifalädalïa dagabodasi amo nalahilä, fea digai amo adu aboläia nobala salila nabi. Ilia ema säla obëgësalea, Gifalädalïala säi.  
\v 21 Amala säsebegi, ea ilima sähalea, Dilia fädäla made helësëla nelo amomu aso neagolela säi.   
\ms1 Yesuea ïe bëgëla aulo amoli olelesa nelo  
\mr (Maga 8.22-10.52)  
\s1 Bedesaida dolö afädë si golai wahi  
\p
\v 22 Yesula ïe bëgëla aulolali afiala Bedesaida segea besela galai. Dolö odoaea dolö afädë si golai nelo amo e neebea sigi maalahilä ema sähalea, Dolö gowe dia naaboea diigimäiamelëla säi.  
\v 23 Amala säsebegi, Yesuea dolö si golai amo naaboea gaula mosö dibea amila segea sigi awälahilä, Ea dolö si golai amoïe sihidoa gofedela galala ïe naaboea diigilahilä dolö amoma nabahalea, Nelebo beasebelela nabi.  
\v 24 Amala nabasebegi, dolö amea busa fädägägïa adogola bealahilä sähalea, Dolö nawese dibe beaha gaso, i gadoi nawese beasebemelëla säi.  
\v 25 Amala säsebegi, Yesuea dolö amoïe siigi bu elö diigisebegi, dolö amea si gadaea gala beasebegi ïe si wahilahilä nelebo sulubadela beaha maadei.  
\v 26 Amala hamolahilä Yesuea dolö amoma sähalea, Mosö yafie dibeadi amogida mosabio. Dihï mosöa mosalola säi.   
\s1 Fidaea afädë Memelei amo dofä dimelëla säi  
\r (Madiu 16.13-20, Ulugu 9.18-21)  
\p
\v 27 Yesula ïe bëgëla aulolali Sisalia Filibai gaamumadi sege odoa dibeadi amogi afiai. Idiafa awäha difolalea ea ïe bëgëla aulo amolima nabahalea, Udia dolö nefolalebe amoliada neda nowë neala säha difolalebela nabi.  
\v 28 Amala nabasebegi, ilia ema säla obëgësalea, Udia dolö odoaeada, ödägi gelo Yone neala säla digi, odoaeada, Elaia neala säla digi, odoaeada, bea sälo dolö afädë neala säla digisa neamelëla säla ï.  
\v 29 Amala säla ïasebegi, ea ilima nabahalea, Diliada ne nowë neala säha neala nabi. Fidaea ema säla obëgësalea, Afädë Memelei amoda dofä dimelëla säi.  
\v 30 Amala säsebegi, Yesuea ilima gelola sähalea, Neda amomelë, odoama säla ïmabiola säi.   
\s1 Yesu e baagola nowemolömelëla säi  
\r (Madiu 16.21-28, Ulugu 9.22-27)  
\p
\v 31 Yesuea ïe bëgëla aulo amolima mi gäwila säla olelesalea, Dolöïe Malö amoda së edefade molömelë. Dolö asigi gäwi dafidilo neebe amoliage, gobela ïlo busa neebe amoliage, mala dawadigi neebe amoliage, ema habobalahilä ilia e baagomäia nufulömelë. Segeyo osodagi hï bu nowela galamolömelëla säla ï.  
\v 32 Ea ilima ado amo mogola säla ï gaso, Fidaea Yesu sigi aliga galahilä, amala made sämalola nemoi.  
\v 33 Amala säsebegi, Yesu besula, ïe bëgëla aulo amolima siila nea, Fidama nemosalea, Saidani, ne neebeawi namolö made. Mosö! Diada Godea helësëlo amo gadola made, dolöfäea helësëlo amo gadola helësësebela säi.  
\v 34 Amala sälahilä, ea udia dolö nefolalo amolige, ïe bëgëla aulo amolige mofiamolahilä ilima sähalea, Afädëa ne bëgëla moholö helësëseda, hï hamea hamela helësëlo amo fisila, hïle i fügäi gaula, ne bëgëla moholö dialea.  
\v 35 Afädëa hïle namolö amo gaula fëdöla aligiseda, ïe namolö amo hogosa helemolömelë. Amai gaso, afädëa nege, nïe Ado Mala Hedabige helësëla hïle namolö amo fisiseda, eada ïe namolö amo gaula namolömelë.  
\v 36 Afädëa nagadaia nelebo dibe amoli sulubadela gaula neëgi hï e baagoseda, nagadaia nelebo amea, hï e abeahäla ugila negemolödu.  
\v 37 Afädëa bidi edo ïalahilä, hïle namolö amo hï bu nea obëgëmolödu.  
\v 38 Udia dolö Godeïe mala made nabelo nefolalebe amolige nafade hamolo nefolalebe amolige bealahilä, afädëa nemage, nïe ado malamage hewaseda, Dolöïe Malö amo Eedoïe yo digalo hïdo elöibalä, selesaia fii hedabifalï amolibalä obëgësolo amo gala, eage dolö amobalä hewamolömelëla säla ï.   
\c 9  
\m
\v 1 Ea ilima sähalea, Na dilima dofä sähago. Dili walio nebego odoa baagola made neëgi, Godea Beaha Maadela Sigi Neebe amoïe, geloi edefademalä maase amo bimolömelëla säla ï.   
\s1 Yesuïe domalo bedefala elöi neebe melï  
\r (Madiu 17.1-13)  
\p
\v 2 Segeyo gafeia nelolahilä, Yesu Fida Yamese Yonelali hilidofalï segebidaia fedala nefolalo. Ilia beahamelebe Yesuïe domalo neala bedefalahilä elöi neebe melï.  
\v 3 Ïe fagulo gäi amo yo digalahilä faleifalï, sege fifii asi dibe amea fagulo falei amo gadoi hamomolöi made, neebe melï.  
\v 4 Ilia beahamelebe Elaia Mosesele maala ulufadigilahilä, Yesubalä adosa neebe melï.  
\v 5 Amo bealahilä Fidaea Yesuma sähalea, Säla Olelelo. Nilï wi nefolalebewe hedabi gabugi, nilïa sege mosö ohodoa olahadio. Elöda dïe, elöda Moseseïe, elöda Elaiaïela säi.  
\v 6 Ili edefademalä bedälahilä, ea edo sämolödula asusugahalea, ea ado amo amala säi.  
\v 7 Amala säse amo gaalu gelë häu afädë maala ili hagulahilä, gelëgi amila ado afädë säia idogosalea, Egoweda nïe malö, na boba hamoi neamelë. Dilia ïe ado nabualola säi.  
\v 8 Amo nabalahilä ilia fodolofalï sidawewela beahamelebe ilibalä dolö odoa made, Yesu emu neebe melï.   
\p
\v 9 Ili segebidaia amila digahalea, Yesuea ilima gelola sähalea, Dilia nelebo melï amo odoama säla ïla made nelolahilä, Dolöïe Malö bauiala nowela neëgi giso, säla ïmalola säla ï.  
\v 10 Ado säi amo ilia odoama made säla musügä negelahilä, hilidomu didiähalea, Bauiala nowelasisegida säi amoda edodula didiäi.   
\p
\v 11 Ilia ema nabahalea, Mala dawadigi neebe amolia sähalea, Elaia e dafidi moholömelëla säha neebe amoda edoïela nabi.  
\v 12 Yesuea ilima säla obëgësalea, Dofä. Nelebo sulubadela hamogimolöïe Elaia e dafidi moholö. Gaso, Dolöïe Malö e së edefade naala, odoaea ema bimolö habobamolömelëla säla dëdëla negei dibe amoda abeahäladu.  
\v 13 Na hä dilima säla ïahago, Elaia eda hä misi. Gaso, ado säla dëdëla negei dibe amo gadola odoa nefolalo amolia ema hamomolö helësëi amo gadoi hamoimelëla säi.   
\s1 Yesuea maalïbu afädëma mugabe fedai nesi  
\r (Madiu 17.14-21, Ulugu 9.37-43)  
\p
\v 14 Ili awäla ïe bëgëla aulo odoa neebea ami besela galai. Ilia beahamelebe udia dolö yafie gegedoi amolia ili amalela digilahilä, mala dawadigi dolö amolia ilibalä gëgësa dibe melï.  
\v 15 Udia dolö yafie nefolalo amolia Yesu maasebe amo beala ili fodolofalï fudugilahilä e neebea baluluia afialahilä ilia e säla olela gausiai.  
\v 16 Amasebegi, ea ilima nabahalea, Dilia ilibalä edogi gëgësa dialeala nabi.  
\v 17 Udia dolö gegedoi amoligi dolö afädëa ema säla obëgësalea, Säla Olelelo-o, nïe nafegema mugabe fedai amea made ado adosebegi di neebea sigi misimelë.  
\v 18 Mugabe ema fedala nagadaia nidala awälahilä, ïe nafiadi dibu besigala, bese nalëgëlahilä, ïe domalo gelola sosolahamelëla säla ï. Dïe bëgëla aulo ilia mugabe fedai amo nesila digamalai gaso, nesimolö ulïsio.  
\v 19 Amala säsebegi, Yesuea udia dolö amolima sähalea, Udia dolö walio nefolalebego dili asigi afädë negei made nebegoeada. Segeyo aboläia ne dilibalä namolödu. Na dilile yöi gaula segeyo aboläia namolödu. Malö go nema sigi misiëla säi.  
\v 20 Amala säsebegi, ilia malö amo ema sigi misi. Sigi maasebegi, mugabe amea Yesu beala fodolofalï malö amo gelola amulämelahilä, nagadaia nidala awäla fefede fefedelahilä, nafiadi dibu besigalasi.  
\v 21 Amala hamosebegi, Yesuea malö amoïe eedo amoma nabahalea, Gowe gadola abodo gala mi gäwila hamosiola nabi. Eedoea säla obëgësalea, Holöfalïgila amaila säi.  
\v 22 Mugabea malö go baagomäia segeyo yafiegi nulo gobeiage ödägige digalasisamu nelomelë. Dia hamomolöi galëda, nilï bobasëla ugila negemola säi.  
\v 23 Yesuea ema sähalea, Dia hamomolöi galëdala säi amo edoïe. Dolö asigi afädë negei neebe amea nelebo sulubadela hamosa maademolöi neamelëla säi.  
\v 24 Amala säsebegi, malö amoïe eedo amea fodolofalï üalala digila sähalea, Na asigi afädë negei. Amai gaso, na asigi afädë negemolöïe dia ne ugila negemola säi.  
\v 25 Ili neebea ami udia dolö yafie baluluia mafula gegedosebe amo bealahilä, Yesuea mugabe amoma nemosalea, gëhe galaloge made adologe, dida mugabe. Dima gelola sähago. Malö go dïgïla mosö, ema bu elö fedamabiola säi.  
\v 26 Amala säsebegi, mugabe amea üalala, gelola amulämelasilahilä doadigila awähalea, malö amo hame doala asi gadoi negesi. Udia dolö yafiea amo bealahilä sähalea, hame doala asi gabula säi.  
\v 27 Amala hamosebegi, Yesuea malö amo naabogi nabelela nowelahilä nowela ifosi.  
\v 28 Amala hamolahilä Yesu e mosöa nogila digala ïe bëgëla aulo amolali hilidomu salea ema nabahalea, Nilïa mugabe nesimolö ulï amo abisalea amaidula nabi.  
\v 29 Amala nabasebegi, Yesuea säla obëgësalea, Godema adose ameamu mugabe nesimolömelë, idi elöda mademelëla säi.   
\s1 Yesu e baagola nowemolömelëla bu elö säi  
\r (Madiu 17.22-23, Ulugu 9.43-45)  
\p
\v 30 Yesula ïe bëgëla aulolali sege amo dïgïla Galili segeamadi awäla moholö awäha nelo. Yesueada afädëa e neala made helësëmäia helësëi.  
\v 31 Mida, Ea ïe bëgëla aulo amolima säla olelemolö amo helësëla. Ea ilima sähalea, Dolöïe Malö amo dolö odoama hololöla gausiseda, ilia e baagomäia nufulömelë. Baagomäia nufudaseda, segeyo osodagi hï nowela galamolömelëla säla ïaha nelo.  
\v 32 Säi amo nabalahilä ilia helësëi made nea, ema mi nabulö amo bedäi nelo.   
\s1 Baagila asi neebe amo nowëla didiäi  
\r (Madiu 18.1-5, Ulugu 9.46-48)  
\p
\v 33 Ili awäla Gabaniama segea besela galala mosö isogi nogila digalahilä, Yesuea ïe bëgëla aulo amolima nabahalea, Idiafa maahalea dilia ado edo didiäla aligi misila nabi.  
\v 34 Amala nabasebegi, ili maahalea nilïgi baagila asi neebe amo nowëla säla didiäla aligi misi amo helësëlahilä, ema säla obëgëla made nefolalo.  
\v 35 E fia idogola salea giwilasi amoli mofiamolahilä sähalea, Afädë dafidilo namolöila helësëseda, dafidi hïdale made, udia dolö odoadale ugila negemolöi galeala säi.  
\v 36 Amala sälahilä ea malö holöbö afädë nabelela gaula maalahilä ili mogogi ifosilahilä, sogobala gaula nea ilima sähalea,  
\v 37 Afädëa ne helësëla malö holöbö gowe gadoi amoma obëbëla obeägïseda, nema obeägïsamelë. Afädëa nema obeägïseda, nema obeägïsa maademelë, ne digamalala sälo amoma obeägïsamelëla säi.   
\s1 Nilïbalä ado nii made neebe amoda nilï damelë neala säi  
\r (Ulugu 9.49-50)  
\p
\v 38 Yonea Yesuma sähalea, Säla Olelelo-o, nilïa beahamelebe, dolö afädëa dïe ëi säla mugabe fedai nesila digisa nebegi nilïa ema amamabiola säimelë. Mida, dolö amoda nilïbalä nawelo made amea hamosebegi amala säimelëla säi.  
\v 39 Amala säsebegi, Yesuea säla obëgësalea, Amamabula sämabio. Afädëa nïe ëi säla dolöea hamomolöi made gadoi afädë hamoseda, hobea ne aabela made gagademolömelë.  
\v 40 Dolö nilïbalä ado nii made neebe amoda nilï damelë neamelë.  
\v 41 Na dilima dofä gelola sähago. Dilia nïe ëi gaula neëgi, afädëa diligali ödä muäia osala ïaseda, udia dolö amoda dofä bidi nimolömelëla säi.   
\s1 Asigi afädë negei nafadeloïe ado säi  
\r (Madiu 18.6-9, Ulugu 17.1-2)  
\p
\v 42 Yesuea aso säha neamu sähalea, Afädëa malö holöbö gowe gadoia nema asigi afädë negei neebe amo nafade hamomäia digalasiseda, igi edefade ëfëa ïe muugia neegilahilä, ödä nudugawa sadia idogola baagomolö amoda ïe hedabida amomelë.  
\v 43-44 Dïe naabo elö goea asiala hamola digalasiseda, naabo elö go damula fisimalo. Naabo afädëamu nea namolöi namolö dibea ami moholö hedabi dialea, naabo äudälada heli segea nulo usilo made dibea ami auloea.  
\v 45-46 Dïe emo elö goea di neala digalasiseda, emo elö go damula fisimalo. Emo afädëamu nea namolöi namolö dibea ami moholö hedabi dialea, emo äudälada heli segea sogobala sadia idogoloea.  
\v 47 Dïe si elö goea asiala hamola digalasiseda, si elö go beselala fisimalo. Si afädëamu nea Godea Beaha Maadela Sigi Neebea ami moholö hedabi dialea, si äudälada heli segea sogobala sadia idogoloea.  
\v 48 Amida  
\q1 domalo hehea nase amo baagolo madege, nulo usilo madege, dialeamelë. \rq Aisaea 66.24\rq*   
\m
\v 49 Nulo söaea udia dolö sulubadelama molögi ëbï baalo amo gadola baamolömelë.  
\v 50 Ëbï hedabi dialea. Ëbïïe hëdälo amo made galëda, dilia edoea neala hëdälasimolö gabu. Dilile isogi ëbï baalahilä udia dolöbalä aeaha namialola säi.   
\c 10  
\s1 Udia nii fisimabiola säi  
\r (Madiu 19.1-12, Ulugu 16.18)  
\p
\v 1 Yesuea amala säha nelolahilä, sege amo dïgïla awäla Yudia segea besela galala ödä Yodona dëgëla alömodi asi. Udia dolö yafie e neebea ami mafula bu gegedosebegi, hï hamolo amo gadola ilima ado mala säla olelesa nelo.  
\v 2 Amala olelesa nebegi, Felesi dolö odoa e neebea ami maalahilä, Yesuma fedogola nabahalea. Mala säla negei dibe ameada dolö afädëa udia nii fisimolöi galeala säla negeida dialealela nabi.  
\v 3 Amala nabasebegi, ea ilima säla obëgësalea, Moseseada dilima edo hamomalola säla negei dialeala nabi.  
\v 4 Ilia säla obëgësalea, Mosesea säla negesaleada, Dolöea udia fisisaleada, beba dëdëla ïalahilä, fisimolöi galeala säla negei dialeala säla obëgëi.  
\v 5 Yesuea ilima säla obëgësalea, Moseseada dilile iso asigi geloi dibe amo bealahilä dilima amala säla dëdëla negeimelë.  
\v 6 Godea siiba nelebo sulubadela mi gäwila hamosolo amo gala, udia dolöle hamoi.  
\v 7 Amala hamoi ameada, dolöea ïe eedole emele dïgïla, ïe udiabalä gedola nea,  
\v 8 eleda domalo afädëfalï namolömelë. Amo gadola ele äudä nelo amo fisila afädëfalï nea.  
\v 9 Godea gedolasi amoda dolöea mogemabiola säi.   
\p
\v 10 Hobeala ïe bëgëla aulolali mosöa obëgëla awäla sefolalea, ïe bëgëla aulo amolia ado säi amoïe ema mi fädäla nabi.  
\v 11 Amala nabasebegi, ea ilima säla obëgësalea, Dolö afädëa hïle udia fisila udia elö neaseda, ea udia amo fa susugu hamomolömelë.  
\v 12 Udia afädëa ïe dolö fisila dolö elöma fiseda, dolö amo ea fa susugu hamomolömelëla säi.   
\s1 Yesuea malësäma obeägïsa nelo  
\r (Madiu 19.13-15, Ulugu 18.15-17)  
\p
\v 13 Udia dolö odoa nefolalo amolia, ilile malö Yesuïe naaboea diigimäia e neebea sigi maasebegi, ïe bëgëla aulo amolia ilima nemoi.  
\v 14 Amala hamosebe amo bealahilä Yesuea ilima habobalahilä sähalea, Malësä ne neebea maase goli misiäia, nemola dofogamabu. Godea Beaha Maadela Sigi Neebea amida malësä go gadoi nefolalebe amolile dialea.  
\v 15 Na dilima dofä gelola sähago. Godea Beaha Maadela Sigi Neebea ami malësä go ili gadoia moholöila helësëi neebe amo gadola, afädë ne moholöila made helësëi neebe amoda dofä made nogila digamolömelëla säi.  
\v 16 Amala sälahilä ea malësä amoli sogobala gaula nea naaboea diigisalea, Gode dia ugila negemalola säla fisiga idodogosa nelo.   
\s1 Dolö nelegei yafie negelo afädëa Yesuma nabi  
\r (Madiu 19.16-30, Ulugu 18.18-30)  
\p
\v 17 Yesu e moholö awäha nebegi, dolö afädë baluluia maala, ïe emo mia gumusula dia idogolahilä sähalea, Säla Olelelo hedabi-e, ne namolöi namolö neala gaumolöïe abilia hamomolödula nabi.  
\v 18 Amala nabasebegi, Yesuea ema säla obëgësalea, Dia nema hedabila säi amoda edoïe. Afädë hedabi maademelë, Gode emu hedabi nea.  
\v 19 Ado säla negei dibe amolida dia dawadigi. Baagomäia nufuabio, udia fa nimabio, nelegei fa nimabio, wäfalï säsäla gudimabio, dahila neala elöïe nelegei dibe amo nimabio, dïe diado diemelele ado nabala hamomalola säla negei dialeala säla ï.  
\v 20 Amala säsebegi, ea Yesuma säla obëgësalea, Säla Olelelo-o, ado amolida ne malësägila hamosa maadeimelëla säi.  
\v 21 Amala säsebegi, Yesuea dolö amo boba hamolahilä, ema siila nea sähalea, Afädëmu dofea made nebego. Dïe nelegei dibe amo bidi neaha maademolö mosö. Amalahilä muni nease amoda nelegei made negelo busadäoi neebe amoligali ïmalo. Amala hamoseda, selesaia mosöa bidi edefade nimolömelë. Amalahilä ne bëgëla misialola säi.  
\v 22 Dolö amea ea säi amo nabala yöla ïe odagi augia idalahilä asi. Mida, ïe nelegei yafie dilo amogi.   
\p
\v 23 Amasebegi Yesuea ïe bëgëla aulo nefolalebeadi sidawewela bealahilä sähalea, Udia dolö nelegei yafie negelo nefolalebe amolida Godea Beaha Maadela Sigi Neebea ami moholö häuai bimolömelëla säi.  
\v 24 Ea amala säsebegi ïe bëgëla aulo amolia fudugi. Yesuea ilima aso bu elö sähalea, Nïe malöla dili-e! Godea Beaha Maadela Sigi Neebea ami moholöda häuai galeamelë.  
\v 25 Sugua gameleda nusi galabagi nogila moholö ulï amo gadola, nelegei yafie negelo dafidilo dolö nefolalebe amolida, Godea Beaha Maadela Sigi Neebea ami moholö häuai bimolömelëla säla ï.  
\v 26 Amala säsebegi, ïe bëgëla aulo amolia edefademalä fudugilahilä hilidomu didiähalea, Namolöi namolö nowëa neala gaumolödula säi.  
\v 27 Amala säsebegi, Yesuea ilima siila nea sähalea, Udia dolöea hamomolöi made amoda. Godea hamomolöi madeda maade, ea sulubadela hamosa maademolöi neamelëla säi.   
\p
\v 28 Amala säsebegi, Fidaea ema säla obëgësalea, Hä bimo. Nilïada nelebo sulubadela fisisa maadelahilä di bëgëla misimelëla säi.  
\v 29 Amala säsebegi Yesuea ilima sähalea, Na dilima dofä gelola sähago. Afädëa nemage, Ado Mala Hedabimage helësëlahilä, mosöge, edooge, elefige, emege, eedoge, malöge, segege, fisisa maadelahilä,  
\v 30 hädali afädë nimolömelë. Ili nagadaiawi nebegi Godea nelebo yafie dafidi ï amo baagila awäla ïmolömelë. Mosö yafiege, edoo yafiege, elefi yafiege, eme yafiege, sagai yafiege, segege, ilia yafie nimolömelë. Amase odoaeage e neala sëlasimolömelë. Hobeala segeyo afädë besela galasolo amo gala ea namolöi namolö gaula namolömelë.  
\v 31 Yafie dafidila nefolalebe amolida neala hobeahalea, hobeala nefolalebe amolida neala dafidimolömelëla säla ï.   
\s1 Yesu e baagola nowemolömelëla bu osoda säi  
\r (Madiu 20.17-19, Ulugu 18.31-34)  
\p
\v 32 Yesula ïe bëgëla aulolali Yalusaleme aulo idigi awähalea, Yesu e, edale dafidi awäsebegi ïe bëgëla aulo amoli hobeala awähalea fudugila aligila aligi asi. Udia dolö odoa hobeafalï awäha nelo amoliage bedäla aligi asi. Yesuea ïe bëgëla aulo giwilasi amoli bu sigi aliga galahilä ema hobea hamomolö amoïe ado  
\v 33 säla ïahalea, Nabualo. Walio nilï Yalusaleme awähamelë. Dolöïe Malö amo gobela ïlo busa amolimage, ado säla negei dawadigi amolimage ilia e gaula ïmolömelë. Ilia ebalä gudila baagomäia nufulömelëla didiäla daialahilä, fii odoagali gaula ïmolömelë.  
\v 34 Dolö amolia ema gofedela galala digi, ëfë damuia nufudalahilä baagomäia nufulömelë. Amala hamoseda, segeyo osodagi hï nowela moholömelëla säla ï.   
\s1 Yamese Yonelea dafidilo namolöïe hogoi  
\r (Madiu 20.20-28)  
\p
\v 35 Sebediïe malö Yamese Yonele Yesu neebea maalahilä elea ema sähalea, Säla Olelelo-o, alïa helësësewe gadoi dia alïma hamomäia hamesamelëla säla ï.  
\v 36 Amala säsebegi, ea elema säla obëgësalea, Na alima edo hamomäia helësësebela nabi.  
\v 37 Amala nabasebegi, elea ema säla obëgësalea, Dïe yo digalo hïdo elöibalä fisolo amo gala elöda dïe naabo dafädimadi, elöda dïe naabo fefeädimadi fimalola sämäia helësësamelëla säla ï.  
\v 38 Amala säsebegi, Yesuea elema sähalea, Ado säi amoda alia helësëla made nea säimelë. Na ödä iigi usi naha neebewegi alia molöi gabule. Ma, ne ödägi gesa neebewegi ali gemolöi gabulela nabi.  
\v 39 Amala nabasebegi, elea ema säla obëgësalea, Alïa amala hamomolöi neawela säi. Amala säsebegi, Yesuea elema sähalea, Na ödä iigi usi nasewe gadola aliage molömelë. Ne ödägi gesewe gadola alige gemolömelë.  
\v 40 Gaso, ali elö di nïe naabo dafädimadi, elö di nïe naabo fefeädimadila samiäia memelemolöda nïe mademelë. Godea fimäiala daiai amolilemelëla säla ï.  
\v 41 Bëgëla aulo nabülasi odoa amolia elea ado säi amo nabalahilä elema habobaha nelo.  
\v 42 Amasebegi, Yesuea ili mofiamolahilä ilima sähalea, Fii odoa beaha aligilo gadoi neebe amoliada, udia dolö gelola beaha aligilo nea, amase, ilile ëi sälo neebe amoliada udia dolö bobasëla made, ilia säse amo gadola hamomäia gelola sigi aligilo amoda dilia dawa.  
\v 43 Ilia amala hamolo amo gadola, dili nebegogi afädëa amala hamomolöi mademelë. Dili nebegogi afädëa ëi sälo namolöila helësëseda, odoa neebe amoligalimu hamoi hamolasilo namolöi dialea.  
\v 44 Afädëa e dafidilo namolöila helësëseda, ea udia dolö sulubadelaïe galabaia hamoi gadoi hamolasilo namolöi galea.  
\v 45 Mida, Udia dolöea Dolöïe Malö misi amo egali hamoi hamolasimäia made misi. Ea ilile hamoi hamolasimäiage, ïe namolö amo udia dolö yafiegali fisiga gala, ili sigi obëgëmolöge misimelëla säi.   
\s1 Yesuea Badimasa si golai wahi  
\r (Madiu 20.29-34, Ulugu 18.35-43)  
\p
\v 46 Yesula ïe bëgëla aulolali afiala Yaligo gaamugi besela galai. Besela galala ïe bëgëla auloge udia dolö yafie odoage ebalä Yaligo baagila awäha dilo. Dolö si golai afädë idi agesua ami sulo. Eada muni ïmola ëdëgësa filo. Dolö amoda Dimasaïe malö Badimasa.  
\v 47 E amala salea Nasalese dolö Yesu maahala säi amo nabalahilä, ea uuala sähalea, Debidiïe malö Yesu-o, ne bobasëmola säi.  
\v 48 Amala säsebegi, udia dolö yafiea ema nemosalea, Dia adomabula säi gaso, ea bu gelola uuala nea sähalea, Debidiïe malö-o, ne bobasëmola sähamu nelo.  
\v 49 Ea Amala säsebegi, Yesu ea beaha nea sähalea, E misialamola säi. Amala säsebegi, ilia dolö si golai amoma sähalea, Ea di wesebego, asigia gelola nowemola säi.  
\v 50 Ea fagulo afädë salugala sulo amo gila sadia galahilä fodolofalï nowela Yesu neebea misi.  
\v 51 Maasebegi, Yesuea ema nabahalea, Na dima edo hamomäia helësësebela nabi. Amala nabasebegi, dolö si golai amea ema säla obëgësalea. Säla Olelelo-o, na bimolö helësësebela säi.  
\v 52 Amala säsebegi, Yesuea ema sähalea, Dihï asigi afädë negei amea dïe si wahigomelë. Hä mosalola säi. Amala säsebegi, dolö amo fodolofalï wahila siia fädäla bealahilä, Yesu bëgëla asi.   
\c 11  
\ms1 Yesu e së nalä baagoi  
\mr (Maga 11-16)  
\s1 Yesu e beaha aligilo gini gadoi hamola Yalusaleme besela galai  
\r (Madiu 21.1-11, Ulugu 19.28-40, Yone 12.12-19)  
\p
\v 1 Yesula ïe bëgëla aulolali Yalusaleme besela galamolö ga madela nea, sege Bedefagige Bedanige Olibe biage ili awäla besela galai. Besela galala ami nea, Yesuea ïe bëgëla aulo amoligi, äudä dafidila mosalolahilä,  
\v 2 elema sähalea, Segea ami awäla besela galala beahamelële, sugua dögi üdïli afädë dolöea fila aulo made, ga madefalï gui gide begela negei neë bimolömelë. Dögi amo fisigälahilä wi sigi misialo.  
\v 3 Afädëa alima dögi go abïdä fisigähala nabaseda, alia ema gomalä sämalo. Dafidilo Geloia webalä hamoi hamomolömelë. Amalahilä, ea fodolofalï sigi obëgëmalamolömelëla sämalola säi.  
\v 4 Amala säi amo nabalahilä, ele awäla besela galala beahamelebe, sugua dögi üdïli afädë mosöa nogila digalo, ifo baagido idiliba ami, gide begela negei neebe amo bealahilä, fisigäi.  
\v 5 Fisigäsebegi, udia dolö ami nefolalo amolia elema nabahalea, Abilia hamodelä, sugua dögi üdïli go fisigähala nabi.  
\v 6 Elea Yesuea sämalola säi amo gadola säsebegi, ilia hä, sigi mosalola säi.  
\v 7 Elea sugua dögi üdïli amo Yesu neebea sigi gaula awälahilä, elea sugua dögi amodaia fagulo daia salugalo gila fösisebegi, Yesu e amodaia fedala sulo.  
\v 8 Amala hamosebegi, udia dolö yafiea ilile fagulo gäi amo gilahilä idiafa föla digi, odoaea idi agesua fasela bäu gadoi dagabola gaula mafula föföla aligi awäha nelo.  
\v 9 Udia dolö nefolalo amoli Yesu awäse amo gadola, dafidila awäha nelo amoliage, hobeala maaha nelo amoliage, uuala säsäla awähalea, Agua. Nesege. Godeïe ëi gauia adadi.  
\q1 Afädë Dafidilo Geloiïe ëigila maahago, Godea ema obeägïmäia.  
\v 10 Nilïle naado Debidia beaha maadela sigi nelo amo gadola namolö neebe amoma obeägïdi. \rq Gë Udälo 118.25,26\rq*  
\m Selesaia fiia Godeïe ëi gauia adala nesegemola uuala säsäla awäha nelo.  
\v 11 Yesu e Yalusaleme besela galala, Godeïe mosö amoïe yala isogi nogila digalahilä, ami nelebo difolalebe amo sulubadela beaha maadei. Hä deadisebegi, ïe bëgëla aulo giwilasi amolali Bedani obëgëi.   
\s1 Yesuea äfäeoma säi  
\r (Madiu 21.18-19)  
\p
\v 12 Diala aiyo amogi ili Bedanilahilä obëgësalea Yesu e sïdëa baagoi.  
\v 13 Sïdëa baagosebegi holöbö wagadi madela sida gahamelebe äfäeo bäu bealahilä, gägä negei walebelela bea asi. Bea awähamelebe gägä negei made, bäumu neebe melï. Mida, äfäeo gägä negelo segeyogi made amea bäumu melï.  
\v 14 Amo bealahilä ea äfäeo amoma sähalea, Dïe gägäda udia dolöea hobea made molömelëla säi. Amala säse amo ïe bëgëla aulo amolia nabi.   
\s1 Yesuea Godeïe mosöa magaia negei hai  
\r (Madiu 21.12-19, Ulugu 19.45-48, Yone 2.13-22)  
\p
\v 15 Yesula ïe bëgëla aulolali awäla Yalusaleme besela galai. Yesu e Godeïe mosö yala isogi nogila digalahilä beahamelebe, bidi neadigi, bidi nimolöïe negela digisa difolalo amoli nesila digilahilä, Muni bedefalo auli amoge, haea maliabu gadoi bidi neaha aligilo amolile filo auli amoge, besigala hësögudusa maadei.  
\v 16 Dilia Godeïe mosö yala isogi nelebo gaula, nogila digafu fedafumabiola säla ï.  
\v 17 Amala sälahilä ea ilima säla olelesalea sähalea, Ado bebagi säla dëdëla negei dibe amoda gomalä madele. Nïe mosöda fifii asi sulubadelaea Godema adolo mosö neamelëla sämolömelëla dëdëla negei gaso, dilia fa nelo musügä aligilo igi äbä gadoi hamoi gabula säi.   
\p
\v 18 Amala hamoila säi amo nabalahilä, gobela ïlo busa amoliage, ado säla negei dawadigi dolö amoliage, Yesu abeahäla nufulödula fu hogosa nelo. E nufulö helësëi amoïe mida, ebalä bedähalea. Ebalä bedäi amoïe mida, udia dolö nefolalo amoli sulubadelaea ea mala olelei amo nabalahilä, fudugisebegi.  
\v 19 Säha nea së gäsebegi, Yesula ïe bëgëla aulo amolali Yalusaleme dïgïla afiai.   
\s1 Äfäeo i bausoi amoïe ado säi  
\r (Madiu 21.20-22)  
\p
\v 20 Ili diala yose awähalea beahamelebe, äfäeo amo bäuge difige bausosa maadei neebe melï.  
\v 21 Bealahilä Yesuea säi amo helësëlahilä Fidaea ema sähalea, Säla Olelelo-o, bimo. Dia aiyo äfäeoma habobala säi amoda bausoi gabuwela säi.  
\v 22 Amala säsebegi, Yesuea ilima säla obëgësalea, Godema asigi afädë negemalo.  
\v 23 Na dilima dofä gelola sähago, Dolö afädëa asigi äudä negela made, segebi gowema dihï dagabola duhuludaia digamola, ea säse amo dofä amamolöla helësëseda, ea säi amo gadola amamolömelë.  
\v 24 Amaimo, na dilima säla ïahago. Dilia Godema adola nelebo afädë dofä nimolö wedala helësëla ema nabaseda, Dilia säi amo gadoi nimolömelë.   
\p
\v 25-26 Dilia nowela nea Godema adosalea, dolö afädëa dilima asiala hamoi amo helësëseda, dolö amea asiala hamoi amo fisimalo. Amala hamoseda, dilile Diado selesaia mosöa neebe amea, dilia asiala hamoi amoge fisimolömelëla säi.   
\s1 Yesu dia geloi gaula neebe go nowëa ïla nabi  
\r (Madiu 21.23-27, Ulugu 20.1-8)  
\p
\v 27 Yesula ïe bëgëla aulolali Yalusaleme bu obëgëlahilä, Yesu e Godeïe mosöa nogila digaha nebegi, gobela ïlo busa amolige, Ado säla negei dawadigi dolö amolige, asigi gäwi dafidilo dolö amolige, e neebea ami maalahilä,  
\v 28 ema nabahalea, Nelebo dia hamosa neebe goli hamomäia, nowëa hamomalai hamosa. Nilïa nabedelä, dia säla ïmo. Go hamomäia, geloi go nowëa ïasiola nabi.  
\v 29 Amala nabasebegi, Yesuea ilima säla obëgësalea, Nage dilima afädë nabahago, Na dilima nabase amo dilia säla obëgëseda, na nelebo hamosa neebewe hamomäia geloi ï amoda gowea ïmelëla na dilima säla ïmolömelë.  
\v 30 Yonea ödägi gesa nelo amoda Godeïe galueale ma, dolöïe galueale. Dilia nema säla ïmola säi.  
\v 31 Amala säsebegi, ilia hilido didiähalea, Nilïa selesaia galueala säseda, dilia ema asigi afädë negela made nelo goda edoïela sämolö gabu,  
\v 32 Amase nilïa dolöïe galueala sämolö gaso, amoge dofea made gabula säi. Ilia amala säi amoïe mida, Udia dolö sulubadelaea Yoneda Godeïe bea sälo afädë neala helësëi neebe amo helësëla ili udia dolöbalä bedäi.  
\v 33 Amalahilä ilia Yesuma säla obëgësalea, Nilïada dawa mademelëla säi. Amala säsebegi, Yesuea ilima sähalea, Amai galëda, na nelebo hamosebeweda gowea hamomalai hamosa neamelëla, nage dilima made säla ïmolömelëla säla ï.   
\c 12  
\s1 Ado besula dolö afädëa gelebi sagai beaha neloïe säi  
\r (Madiu 21.33-46, Ulugu 20.9-19)  
\p
\v 1 Yuda ilile busa dolö nefolalo amolima, Yesuea ado besula säla ïahalea. Dolö afädëa yalala agulahilä, ëfë gägä negelo ëi gelebi sagai. Gelebi sagai amo emesala fësëla salimolöïe uli dögöi. Amalahilä sagai amo idihë namiäia mosö afädë holöbö ilibia ola negesi. Amalahilä, ea dolö odoama sähalea. Sagai amo beaha nea bisinesi hamosa namialola säsilahilä, hï eda sege wagadi made namolö asi.  
\v 2 Hä, gelebi gägä amo faimolö segeyo besela galasebegi, sagai eedo amea ïe hamoi hamolasilo afädëma sähalea. Nïe sagai beaha aligilo nefolalebe amolima, gelebi gägä odoa faila ïmola sämolö mosalola säi.  
\v 3 Faila ïmola samolö asi gaso, sagai beaha aligilo nefolalo amolia e gaula nufudala ïalalelahilä, memalä e hodomu fisiga gaimelë.  
\v 4 Amala hamoi galebe, sagai eedo amea ïe hamoi hamolasilo elöma bu mosaloi. Awäsebegi, ilia busagia afisila nufudalahilä e gagadela gadiaboi.  
\v 5 Amala hamosebegi, sagai eedo amea ïe hamoi hamolasilo osoda bu mosaloi. Awäsebegi, ilia dolö amo nufudala baagoi. Amalamu hamosebegi ea dolö yafie oböla bu mosalai. Amolige odoa nufudala ïalalelahilä, odoa baagomäia nufi.  
\v 6 Hä dolö afädëfalïmu nelo. Dolö amoda hïle efege hï boba hamoi nelo. Hobeafalï eedoea ïe malö amoma ili neebea mosalalahilä sähalea, Iliada nïe malöïe ado nabala mogola hamomolöla helësësamelëla säi.  
\v 7 Gaso, sagai oodola beaha aligilo nefolalo amolia hilidomu säla didiähalea, Sagai eedo amoïe malö amoda hä go gabugo. Eedoïe nalä ea nimolö gabugi, nilïgali bedefala nedelä, e baagomäia nufidedila sälahilä,  
\v 8 ilia malö amo nufudalahilä ïe domalo amo sagai yala baagido sadia gaimelë.   
\p
\v 9 Amala hamoi amoïe sagai eedoeada abilia hamomolödu. E maalahilä sagai beaha nefolalo amoli baagomäia nufudaha maadelahilä, sagai amo odoaea beaha namiäia ïmolömelë.  
\v 10 Bebagi ado säla dëdëla negei dibe amo dilia made melï neale.  
\q1 Mosö olelo ilia igi amo galone hamomolöi made gabula memelela fisi. Gaso, walioda galone geloi gelola dialeamelë. \rq Gë Udälo 118.22-23\rq*  
\v 11 Amoda Dafidilo Geloi hï hamogi amo nilïa siia bealahilä fudugisa neamelëla  
\m säla dëdëla negei dialeala säi. \rq Gë Udälo 118.22,23\rq*   
\m
\v 12 Dolö busa nefolalo amolia Yesuea ilile ado besula säsebe amo bealahilä ilia e gaudelä hamoi gaso, udia dolö yafie nefolalebe amoli beala ili bedähalea dïgïla asi.   
\s1 Dagisi muni ïmolö dialeale ma, madelela nabi  
\r (Madiu 22.15-22, Ulugu 20.20-26)  
\p
\v 13 Busa dolö amolia, Felesi dolö odoage, Heledoïe damelë odoage, Yesu neebea mosaloi. Mida, Yesuea ado asiala säseda, e gaumolöïe Yesu fedogola adomolö mosaloi.  
\v 14 Ili Yesu neebea afialahilä, Yesuma sähalea. Säla Olelelo-o, nilïada, dia mala säla olelese amoda mogola olelesala helësësamelë. Amalahilä dolö odoa ëi sälo geloi nefolalebe amolibalä bedäla madege, odoa nefolalebe amolia di beala säse amogige dia helësëla made neada, Godea hamese amoïe mala udia dolöma säla olelelo amoda mogola säla olelelomelë. Amalo gabugi dima afädë nabaha. Nilïle mala säla negei dibe amo helësëlahilä, Beaha Aligilo Sisa neebe amoma dagisi muni ïmolö dialeale ma, madele.  
\v 15 Nilïa ema dagisi muni ïmäiale ma made ïmäialela nabi. Ilia e fedogola wäfalï säsebe amo dawadigilahilä, ea ilima säla obëgësalea. Edoïe ne fedogola beaha. Na melëdelä muni giwi afädë gaula misiëla säi.  
\v 16 Ilia muni giwi afädë gaula maasebegi, ea ilima nabahalea, Muni giwi egowegi dolö busa dibe gowege, ëi dëdëi dibe gowege nowëïe gabula nabi. Amala nabasebegi, ilia ema säla obëgësalea, Beaha Aligilo Sisaïela säi.  
\v 17 Yesuea ilima säla obëgësalea, Nelebo Sisaïe dibe amoda Sisa hïma ïmalo. Godeïe dibe amoda Gode hïma ïmalola säi. Amala säi amo nabalahilä ili fudugi.   
\s1 Sadiusi ilia Yesuma baagoi abilia nowemolöla nabi  
\r (Madiu 22.23-33, Ulugu 20.27-40)  
\p
\v 18 Sadiusi dolö udia dolö baagoi made nowela galamolöla sälo amoli Yesu neebea maalahilä sähalea.  
\v 19 Säla Olelelo-o, Mosesea, nilïa hamomäia ado afädë dëdëla negei dibe amoda gowe. Dolö afädëïe edoo malö maade nea baagoseda, udia didalo amo sulolahilä, dolö baagoi amo sosogo namiäia, ïe ëigila malö sogobamolöïe, edoo elö amohï udia amo nimäiala säla dëdëla negei dialea.  
\v 20 Amaimo, edoolali gifalädalïa salea, abulümi amea udia afädë neala nea, malö made sogobala baagoi.  
\v 21 Baagoibua, abulümi baagia amea udia didalo amo bedefala nealahilä, eage malö made sogobala baagoi. Amala bu baagoibua, edoo osoda ameage amala hamolahilä,  
\v 22 edoolali gifalädalïa amoli malö made sogobala baagosa maadei. Amalahilä udia amo hobea wagala baagoi.  
\v 23 Amala hamoi amo dolö gifalädalïa amolia udia afädë amomu nii amea, hobea baagoi amoli nowela galasolo amo gala udia amo nowëïe udia samolödula nabi.   
\p
\v 24 Amala nabasebegi, Yesuea ilima säla obëgësalea, Bebagi ado säla dëdëla negei dibe amoge, Godeïe geloi dibe amoge, dilia dawa made amea dilia asiala säsebego.  
\v 25 Udia dolö baagoi amoli nowela galasolo amo galada, dolöea udia nimolö mademelë. Amase, udiage dolö fimolö mademelë. Ilida selesaia fii neebe amo gadoi namolö madele.  
\v 26 Amase, udia dolö baagoi amoli nowela galamolö amoïe ado afädë sähago. I afädëgi nulo söa fedaila säla Mosesea dëdëla negei dibe amo dilia made melïle. Amila Godea Mosesema sähalea, Neda Abalahamaïege, Aisagaïege, Yeigabaïege Gode neamelëla säila säla dëdëla negei dialea.  
\v 27 Eda udia dolö baagoi amolile Gode mademelë. Eda udia dolö sebe amolilemelë. Dilia asiala helësëi gabumelëla säi.   
\s1 Godea Ado säla negei dibe amogi geloi dafidilo gelola säla negei dibe amoda gowe  
\r (Madiu 22.34-40, Ulugu 10.25-28)  
\p
\v 28 Ado säla negei dawadigi afädë nelo amo maalahilä, Sadiusi dolö amolia Yesubalä gëgëla ado säsebegi, ea ilima hedabola säla obëgësebe amo nabalahilä, ea Yesuma nabahalea. Godea Ado säla negei dibe amogi geloi dafidilo gelolada abododula nabi.  
\v 29 Amala nabasebegi, Yesuea ema säla obëgësalea, Ado säla negei dibe amogi geloi dafidilo gelolada gowemelëla sähago. Isilale udia dolö-o, dilia nabualo. Dafidilo Geloi eda nilïle Gode. Emu Dafidilo Geloi neamelë.  
\v 30 Dafidilo Geloi dïe Gode neebe amo dïe bobaeage, gesamiage, asigiage, geloiage boba hamomalola säla negei.  
\v 31 Amo baagia elöda gowe. Dihïdi boba hamolo amo gadola, odoa dibalä nefolalebe amoli boba hamomalola säla negei. Mala geloi dafidilo gelolada äudä amolemu säla negei dialea. Odoa mademelëla säi.  
\v 32 Amala säsebegi, ado säla negei dawadigi amea ema säla obëgësalea, Säla Olelelo-o, dia Gode afädëfalï emu neala säi amoda, dia dofä säi. Elöda maademelë.  
\v 33 Ema bobaeage, dawaeage, geloiage hamelahilä, dihïdi boba hamolo amo gadola odoa dibalä nefolalebe amoli boba hamomalo. Äudä amoleada Godegali gobela ïlo amoge, odala ïlo amoge baagila asimelëla säi.  
\v 34 Yesuea dolö amea hedabola helësëla säsebe amo bealahilä, ema sähalea, Godea Beaha Maadela Sigi Neebea ami di ga made nebegola säi. Amala säsebegi, udia dolö odoa ilia Yesuma nelebo odoa nabulö bedäi.   
\s1 Yesuea udia dolöma Godea Afädë Memeleiïe nabi  
\r (Madiu 21.41-46, Ulugu 20.41-44)  
\p
\v 35 Yesuea Godeïe mosöa säla olelesa nea sähalea, Ado säla negei dawadigi nefolalebe amolia, Afädë Memelei moholömelëla säi amo e Debidiïe malöla sälo amoda abeahäla sälodu.  
\v 36 Eleloi Gesamia Debidima helësëlasisebegi, Debidia sähalea,  
\q1 Dafidilo Geloia nïe Dafidilo Geloima sähalea, Na dïe ado nii nefolalebe amoli di hawala ifosimäia, dida nïe naabo dafädimadi awäla salea, beaha samialola  
\m säimelë. \rq Gë Udälo 110.1\rq*   
\m
\v 37 Amase, Debidia hï ema Dafidilo Geloila säi amoda, Dafidilo Geloi e Debidiïe malöda abeahäladula nabi. Udia dolö yafie gegedoi amolia ea säse amogi obeägïla nabi.   
\s1 Yesuea mala dawadigi nefolalebe amoli helësëla idihë namialola säi  
\r (Madiu 23.1-36, Ulugu 20.45-47)  
\p
\v 38 Yesuea ilima ado mala olelesalea sähalea, Dilia Ado säla negei olelelo nefolalebe amoli hedabola idihë namialo. Ilia fagulo sedademu salugala magaia gaamugi awälahilä, udia dolöea ili beala gugusäla gausiamäiala helësëlo nea.  
\v 39 Amase, gedolo mosöage iliada dolö dafidilo filo dibea amimu fimolöila helësëloge, udia dolö yafie gegedola molö nasebea ami molö gialo eedo amobalä dafila salea, ua gagaula hamomolöila helësëlo nea.  
\v 40 Ilia udia didalo sebe amoli dahila neala, ilile mosöa nelebo dibe amo fa neala gaula aulo nea. Ilile asigi musügä negesilahilä, adoeamu Godema sedadela adolo nea. Amala hamosebe amoïe ili së edefade muäia baala ïmolö dialeala säi.   
\s1 Udia didalo afädëa muni negei  
\r (Ulugu 21.1-4)  
\p
\v 41 Godeïe muni negelo dibea ami Yesu e ga madela salea, udia dolö yafie misi amolia muni negelo amogi muni negese amo siila sulo. Nelegei yafie negelo dafidilo udia dolö yafie amoliada muni yafie negei.  
\v 42 Udia didalo busadäoi afädë maalahilä muni giwi äudä, doea afädë gadoi, negei.  
\v 43 Amala negesebegi, Yesuea ïe bëgëla aulo amoli misiëlahilä ilima sähalea, Na dilima dofä gelola sähago. Udia didalo busadäoi gowea negei amea udia dolö sulubadelaea Godeïe muni negelo amogi muni negei amo baagila asimelë.  
\v 44 Ilia muni yafie negei dilo amogi odoa mogela hilile negesalea mogela negei gaso, udia goweada afädë gaula made, ea molö nimolö gaui amo sulubadela negesa maadeimelëla säi.   
\c 13  
\s1 Yesuea Godeïe mosö mugulula digamolömelëla säi  
\r (Madiu 24.1-2, Ulugu 21.5-6)  
\p
\v 1 Yesu e Godeïe mosöa amila doadigila awäha nebegi, ïe bëgëla aulo afädëa ema sähalea, Säla Olelelo-o, igi boboga hedabi hïdo elöia mosö hedabi hïdo elöi olola fedai neebe gowe bimola säi.  
\v 2 Amala säsebegi, Yesuea ema säla obëgësalea, Dia mosö hedabi beahago gasoda, igi dadagulula olola fedai neebe goda igi afädë daia negela made, Goda sulubadela mugulula digaha maademolömelëla säi.   
\s1 Yöi elö elöla bimolömelëla säi  
\r (Madiu 24.3-14, Ulugu 21.7-19)  
\p
\v 3 Yesu e Olibe bi daia fedalahilä Godeïe mosö sida idogola sebegi, Fida Yamese Yone Ädululali hilidomu nea ema nabahalea,  
\v 4 Dia nilïma säla ïmo. Segeyo abodo gala dia säi amo besela galamolö. Dafidi nelebo edodale besela galasegi, nilïa amo bealahilä dia säi amo besela galamolö amoda ga made gabula helësëmolömelëla nabi.  
\v 5 Amala nabasebegi, Yesuea ilima säla obëgësalea, Odoaea dili dahila neloea, idihë namialo.  
\v 6 Dolö yafie maalahilä nïe ëi säla sähalea, Neda dolö amo misi neawela sälahilä, udia dolö yafie dahila nimolö moholömelë.  
\v 7 Ga made nudusalea ado goba nabase amogige, sege wagadi made nudusalea wabula säse amo nabalage, dilia bedäla fudugimabio. Nelebo amala hamose ameada, aligila wagamolöïe amamolö mademelë.  
\v 8 Fii elöle elöle nudula digi, gamane elöle elöle nudula digisa namolömelë. Amase, sege föi odoagi fogolige maala, sïdë ige moholömelë. Nelebo amoli hamomolö amoda, udiaea malö ägümolö salea mi gäwila sëlo amo gadoi bimolömelë.   
\p
\v 9 Dilia hedabola idihë namialo. Ilia dili nafodola gaula galïsolö neebea sigi moholömelë. Gedolo mosöa amige dili nufudala ïalalemolömelë. Nïe ëi gaula mogoi ameada gamane dolöïe siigige, gini dolöïe siigige gaula awäla ifosimolömelë. Amala hamoseda nïe Ado Mala Hedabi nabuäia säla ïaha namialo.  
\v 10 Amo hamola made neebewegi wäla, fifii asi sefolalebe amoli sulubadelaea nïe Ado Mala Hedabi nabaha maademäia dafidi säla ïmalo.  
\v 11 Ilia dili nafodolahilä gudimolöïe sigi gaula awäseda, ado abodo sämolödula asigia säosäola helësëmabio. Gudisolo amo gala Godea ado säla ïasebe amo säla ïmalo. Ado säla ïmolö amoda dihili sämolö mademelë. Eleloi Gesamia sämolömelë.  
\v 12 Dolöea ïe edoo nufudala baagomäia gaula ïmolömelë. Malö eedoea hïle malöge amo gadola wäla hamomolömelë. Amase, malöeage ïe eedo emelebalä habobalahilä nufudala baagomäia gaula ïmolömelë.  
\v 13 Nïe ëigi nefolalebego beala, sulubadelaea dilima bimolö habobamolömelë. Amai gaso, afädëa aso maadela, hamola wagamäialahilä gelola aligise amo eda damula moholömelëla säi.   
\s1 Nelebo yöi hehealei bimolömelëla säi  
\r (Madiu 24.15-28, Ulugu 21.20-24)  
\p
\v 14 Yesuea ilima sähalea, Hehealela bedälasimolö maala negemolöi made dibea ami maala negei dië bimolömelëla säla ï. (Ado gowe nidese ameada hedabola helësëmalo.) Yesuea amala sälahilä sähalea, Amo siia beaseda, Yudia segea sefolalebe amolida segebi dibea ami fisäla baluluia afufumalo.  
\v 15 Amo gala, afädë mosö fïgïdaia sulo amea digalahilä, ïe nelegei nea mumusogi digamabio.  
\v 16 Dolö sagaia nelo amea hï mosöa fagulo nea obëgëmabio.  
\v 17 Segeyo amo gala udia fagulo hagui sefolalebe amolige, malö dubo dodo ïaha sefolalebe amolige, edefademalä asigiimolö dialea.  
\v 18 Amo hamomolö amoda, i bäu gisalea gögï mulo amo gadola muloea, Godema adosa namialo.  
\v 19 Mida, segeyo amo gala yöi yafie elö elöla maala negei dië bimolömelë. Godea nelebo mi gäwila hamoia amila yöi amo gadoi made melï. Amase, hobeage bu elö made bimolömelë.  
\v 20 Amaimo, Dafidilo Geloia segeyo amo neala obobagilasimolö made helësëi galebeda, udia dolö sulubadela namolö amo fu made bealabio. Udia dolö hï memelei amoli helësëlahilä, segeyo amo neala obobagilasimolö helësëi.  
\v 21 Amaimo, afädëa dilima sähalea, Afädë Memelei amo misi neebe gowe bimola säsege, e neebe gagowe bimola säsege, dofä gabula helësëmabio.  
\v 22 Dolö odoaea wäfalï säsäla sähalea, Afädë Memelei amo ne misi neawela sämolö moholömelë. Odoaea wäfalï säsäla sähalea, Neda Godeïe bea sälo misi neawela sämolö moholömelë. Amala maalahilä, ilia udia dolö Godea memelei nefolalebe amoli dahila neala hamomolöi walebelela bimolöïe, dolöea hamomolöi made gadoige, hïdo elöige hamosa namolömelë.  
\v 23 Dili idihë namialo. Nelebo amoli hamola made neebe amo gaalu, na dilima dafidi säla ïahagomelëla säla ï.   
\s1 Hobeala Dolöïe Malö bu obëgëmolö  
\r (Madiu 24.29-31, Ulugu 21.25-28)  
\p
\v 24 Yesuea aso, sähamu nea sähalea, Yöi yafie elö elöla hamosa maadeibua  
\q1 eso usilahilä, aube made neëla,  
\v 25 gasumilï mudaiala besela didigafula, mudaia geloi hïdo elöi amo neala fogolasimolömelë. \rq Aisaea 13.10, 34.4\rq*   
\m
\v 26 Amala hamose amo gaalu, Dolöïe Malö amoda geloile, yo digalo hïdo elöilebalä mu baidilidaia maala neë udia dolöea bimolömelë.  
\v 27 Bease amo gaalu, ea ïe selesaia fii amolima mosalolahilä, udia dolö hï memelei sege föi sulubadelagi, agesu näiado nefolalebe amolige, näiado nefolalebe amolige, sege afädëgi neala gedolasimolö mosalola sämolömelëla säi.   
\s1 I bäu bobagiloïe ado säi  
\r (Madiu 24.32-35, Ulugu 21.29-33)  
\p
\v 28 Yesuea aso, sähamu nea sähalea, Diliada äfäeoïe mala amogi helësëmäia sähago. Äfäeo fësëgësisila, bäu gähe bobagiseda, dilia helësësalea, sege esomolöda ga made gabula helësëlomelë.  
\v 29 Amo gadola wäla, dilia nelebo säi amo gadoi hamose beaseda, Dolöïe Malö amo hä moholö suägïsa gabula helësëmalo.  
\v 30 Na dilima dofä gelola sähago. Udia dolö walio nefolalebego made baagola nefolalegi wäla, nelebo säi amoli sulubadela hamosa maademolömelë.  
\v 31 Mu giwige naga föige hogosa helemolö gaso, nïe ado mala dofä made hogosa helemolömelëla säi.   
\s1 Nelebo gowe gala hamomolö gabula sulubadelaea dawa madela Yesuea säi  
\r (Madiu 24.36-44)  
\p
\v 32 Yesuea aso, sähamu nea sähalea, Amala hamomolö amoda segeyoge, aoage afädëa dawa mademelë. Selesaia fii iliage, malöeage dawa mademelë. Naadoea hïdo dawadigi neamelë.  
\v 33 Nelebo amoli hamomolö amoda gowe gala hamomolö gabula dilia dawa made ameada, dilia hedabola idihë namialo.  
\v 34 Amoda gowe gadoimelë. Dolö afädëa, ïe mosö dïgïla, sege wagadi made aulo amo gadola awähalea, ïe hamoi hamolasiloma, ïe hamoi beaha namialola säla, hïdo hïdolama hamoi sogolahilä, idiliba beaha aligilo amoma sähalea, Hedabola beaha namialola säsila aulomelë.  
\v 35-36 Mosö eedo amoda së gäse gaalu obëgëmolöledu ma, gasi mogogi obëgëmolöledu ma, haea gäse gaalu obëgëmolöledu ma, yose obëgëmolöledula dilia dawa made neebe ameada, dili oböla adi elaboi diëgi fodolofalï muloea, idihë namialo.  
\v 37 Na dilima ado säla ïasewe gadola udia dolö sulubadelamage, dili idihë namialola säla ïahadiola säi.   
\c 14  
\s1 Busa dolö ilia Yesu nufulöïe didiäha dilo  
\r (Madiu 26.1-5, Ulugu 22.1-2, Yone 11.45-53)  
\p
\v 1 Segeyo äudä nelolahilä, osodagi Baagila Asi Segeyo amoïe molö molö amoda, Beledi Yidila Made Gobei Segeyo amoïe molö gabula helësëi. Amala helësëlahilä gobela ïlo busa nefolalo amolaliage, mala dawadigi nefolalo amolaliage didiähalea, Yesuma wäfalï abeahäla sälahilä, e gaula nufulödula säla didiäha difolalo.  
\v 2 Ilia sähalea. Segeyo Edefadegi gedola molö nasolo amo galada, amala made hamodelä, udia dolöea nilïbalä nuduloeala säi.   
\s1 Udia afädëa Yesuïe busagia susu gadoi weli söga negei  
\r (Madiu 26.6-15, Yone 12.1-8)  
\p
\v 3 Yesu eda sege Bedani ami Saimonoea mosöa molö naha sulo. Saimono eda dafidi gudubu hamoi nelo. Ea mosöa ami sebegi, udia afädëa weli hedabi gafisigäi hïdo elöi, amoïe ëida nada. Weli amoda muni edefadea nelo ödä i igia hamoigi osala negei dilo. Amo gaula maala dusulahilä, Yesuïe busagia söga negei.  
\v 4 Amala hamosebegi, udia dolö odoa sefolalo amolia habobalahilä, hilidomu sähalea. Weli gafisigäi we memalä edoïe waeasesadu.  
\v 5 Weli gafisigäi egoweda gina hädali ohodoa (300) nimolöi. Amala nii galebeda dolö busadäoi nefolalebe amoligali neala ïalabio gabula säla, ilia udia amoma habobala baagido säha dilo.  
\v 6 Amala säsebegi, Yesuea ilima sähalea, Beasimo. Edoïe ema habobala baagido säha. Udia gowea nema hamoi amoda, hedabi hïdo elöi hamoimelë.  
\v 7 Udia dolö busadäoi nefolalebe amolida dilibalä namolöi namolömelë. Dilia ili abodo gala ugila negemolöila helësëseda, amoda dilia ugila negemolö dofea. Gaso, neda dihilibalä namolöi namolö mademelë.  
\v 8 Udia gowea hamomolöi beala hamoimelë. Ea nïe domalogi nada hëi amoda, hobea nïe domalo baumolö amoïe, dafidi daiala hëimelë.  
\v 9 Na dilima dofä gelola sähago. Ado Mala Hedabi sege föi sulubadelagi säla olelesaleada, e helësëla, ea walio nema hamoi amo säla ïmolömelëla säi.   
\s1 Yudasaea Yesu hololömolö asi  
\r (Madiu 26.14-16, Ulugu 22.3-6)  
\p
\v 10 Amalahilä bëgëla aulo giwilasi amoligi Yudasa Isagaliadaea gobela ïlo busa neebea ami awälahilä, ilia Yesu nufuäia hololömolö asi.  
\v 11 Ea säi amo nabala ilia obeägïlahilä, egali muni ïmolömelëla säla ï. Amalebe ea Yesu hololöla gaula ïmolöïe fu hogosa nelo.   
\s1 Yesula ïe bëgëla aulolali Baagila Asi Segeyo amoïe molö mai  
\r (Madiu 26.17-25, Ulugu 22.7-14,21,23, Yone 13.21-30)  
\p
\v 12 Segeyo agegi Beledi Yidila Made Gobei Segeyo amo besela galaseda, Isilale iliada Baagila Asi Segeyo amoïe sugua sibi malö nufidelo. Segeyo amo gala, ïe bëgëla aulo amolia Yesuma nabahalea, Baagila Asi Segeyoïe molö molö amoïe nilïa abidi daiamäia hamesebela nabi.  
\v 13 Amala nabasebegi, ea ïe bëgëla aulo äudä mosalalahilä, elema sähalea. Ali awäla gaamugi besela galahamelë, dolö afädëa ödä iigi usi gaui maaha neëgi, gausiamolömelë. Alige dolö amo bëgëla mosalo.  
\v 14 Alia beahamelële, dolö amo mosöa nogila digaseda, alia mosö eedo amoma gomalä sämalo. Säla Olelelo neebe amea dima nabahalea, nïe bëgëla aulola nilï Baagila Asi Segeyo amoïe molö molöïe nïe mosö hogoli abidi dialeala nabimelëla sämalo.  
\v 15 Amala säseda, ea filo aulige molö negelo aulige daiala negesa maadei hogoli edefade daia dilo amo olemolömelë. Ami nilï molö molö daiamalola säi.  
\v 16 Amala säi amo nabalahilä, ïe bëgëla aulo äudä amole awäla, Yalusaleme besela galalahilä beahamelebe, ea säi amo gadola sulubadela gausiala digaha maadesebegi, elea Baagila Asi Segeyo amoïe molö molö daiai.   
\p
\v 17 Deadi Yesula ïe bëgëla aulo giwilasi amolibalä misi.  
\v 18 Maalahilä ili molö naha sefolalea Yesuea sähalea, Na dilima dofä gelola sähago. Dili sebegogi afädëa ne hololömolömelë. Dolö amoda nebalä molö naha saleala säi.  
\v 19 Amala säsebegi, ilia asigia yölahilä, ema hïdo hïdolaea dafidi hobeala säla didigahalea, Nale ma, nalela säla didigai.  
\v 20 Amala säla didigasebegi, Yesuea ilima säla obëgësalea, Dili giwilasi sebegogi afädëa nebalä falo afädëdaia beledi ua negela naha sebe ameamelë.  
\v 21 Dolöïe Malö amoda bebagi ïe dëdëla negei dibe amo gadola baagomolö. Gaso, Dolöïe Malö e hololöla odoaïe naabogi gausise dolö amo, asigiisebemelë. E emea made neegela ägüi galebeda, e hedabi aligilabiomelëla säi.   
\s1 Yesuea beledile wani ödäle ïe bëgëla aulo amoligali ï  
\r (Madiu 26.26-30, Ulugu 22.14-20, Age Golïdi 11.23-25)  
\p
\v 22 Ili molö naha sefolalea, Yesuea beledi afädë neala gaula nea, Godema nesegelahilä, beledi amo dagabodasila ïe bëgëla aulo amoligali ïa gogosalea sähalea, Nimo. Nïe domalo gomelëla säla ï.  
\v 23 Amalahilä, ea wani ödä usi amo neala gaula nea, Godema nesegelahilä iligali ïasebegi, ili sulubadelaea nea mai.  
\v 24 Ea ilima sähalea, Goda nïe healemelë. Asialo made ado säla negei amoïe mida nïe heale gogi dialeamelë. Amoda udia dolö sulubadelagali besigahawe.  
\v 25 Na dilima dofä gelola sähago. Ne wani ödä bu elö made naala nelolahilä, Godea Beaha Maadela Sigi Neebea ami nea, bu gähe elö molömelëla säi.  
\v 26 Amala sälahilä, ilia gë afädë udälahilä, ili Olibe bi daia fedafiai.   
\s1 Fida, dia ne dawa madela sämolömelëla säi  
\r (Madiu 26.31-35, Ulugu 22.31-34, Yone 13.36-38)  
\p
\v 27 Yesuea ilima sähalea, Dili sulubadelaea ne dïgïla fisäla awäha maademolömelë. Bebagi ado säla dëdëla negei dibe amea sähaleada,  
\q1 Na sugua sibi sigi aligilo neebe amo nufulömelë. Amaseda sugua sibi nefolalebe amoli fisäla dusudasila afufumolömelëla  
\m säla dëdëla negei dialea. \rq Segelaea 13.7\rq*   
\m
\v 28 Amaimo, Godea ne nowelasisegida, dili baagila nedale dafidi Galili moholömelëla säi.  
\v 29 Amala säsebegi, Fidaea säla obëgësalea, Ili sulubadela fisäla awäseda, neda made fisäla moholömelëla säi.  
\v 30 Amala säsebegi, Yesuea ema säla obëgësalea, Dima na dofä gelola sähago. Walio gasigi haea gagalugo gawalia nafi bu äudä made gäla neëgi, dia ne dawa madela nafi bu ohodoala sämolömelëla säla ï.  
\v 31 Amala säsebegi, ea gelolafalï säla obëgësalea, Neda dibalä baagomolö nea galëda, na di dawa madela dofä made sämolömelëla säi. Ili sulubadelaea amo gadolamu säi.   
\s1 Yesu e Gesemani awälahilä Godebalä adosa sulo  
\r (Madiu 26.36-46, Ulugu 22.39-46)  
\p
\v 32 Yesula, ïe bëgëla aulolali sege ëi Gesemani dibea ami afialahilä, ea ïe bëgëla aulo amolima sähalea, Ne Godema adomolö awäsewe gaalu, dili wi sefolamialola säi.  
\v 33 Amala sälahilä, ea Fida Yamese Yonela ilimu sigi awälahilä, ïe asigigi fudugila yöla säosäomolö mi gäwila besela galai.  
\v 34 Ea ilima sähalea, Nïe iso asigigi edefademalä yösalea, ne baagomolö gabumelë. Dili gui salea idihë namialola säi.  
\v 35 Amala sälahilä e holöbö aliga gala nagadaia gumusula dia idogolahilä sähalea, Asiamolö fu galëda, nema walio hamomolö amo asiamalola säi.  
\v 36 Ea sähalea, Aba, Naado, dia nelebo sulubadela hamosa maademolöi nebego. Nema ödä iigi usi dibe amo dia nea nimalo. Amai gaso, na helësësewe gadola made, dia helësëse amo gadola hamomalola säi.  
\v 37 Amala sälahilä obëgësamelebe, ili süwia adidi dibe amo bealahilä ea Fidama sähalea, Saimono, adi dialeale. Dia damo afädë idihë namolö ulïsebele.  
\v 38 Nafadea dili digalasiloea, idihë nea Godema adosa namialo. Asigia hamomolö helësësa neago gaso, domalo wäbëai nebegola säi.  
\v 39 Amala säsila e bu awälahilä, dafidi säi amo gadola säha sulo.  
\v 40 Amala sälahilä e bu obëgësamelebe, ili adidimu dibe melï. Mida, süwiaea si gafodo gadugisalea amai. Ilia ema edo säla obëgëmolödula asusugai.  
\v 41 E bu osoda obëgëlahilä ilima sähalea, Dili hele salea adidi dialealedu. Amo dofea. Fu hä besela galai gabu. Bimo. Dolöïe Malö amoda nafade hamolo amolima gaula ïasebego.  
\v 42 Nowemo. Nilïa gausiala afiadi. Ne gaumäia hololölo amoda ga made misi nebego bimola säi.   
\s1 Yesu gaui  
\r (Madiu 26.47-56, Ulugu 22.47-53)  
\p
\v 43 Yesuea ado aso säha nebegi, ïe bëgëla aulo giwilasi amoligi Yudasa e dolö maleibalä fodolofalï misi. Ilia helebe baialage gagaula ebalä misi. Gobela ïlo busa amoliage, mala dawadigi amoliage, asigi gäwi dafidilo amoliage ili mosalola fisiga wesebegi misi.  
\v 44 Yesu gaumäia hololölo amea ilima dafidi daiala sähalea, Na gomalä hamoseda, amo gabula helësëmalo. Dolö na mimila nödöseda, amo gaula hedabola sigi mosalola säla ï.  
\v 45 E besela galala, Yesu neebea fodolofalï maala aligilahilä sähalea, Säla Olelelola sälahilä, Yesu mimila nödöi.  
\v 46 Mimila nödösebegi, ilia hä e fëdöla gaui.  
\v 47 Amala hamosebe amo gaalu, dolö afädë ami nelo amea helebe besela nealahilä, gobela ïlo Busa Edefade amoïe hamoi hamolasilo neebe amoïe gëhe dagala salisi.  
\v 48 Yesuea ilima sähalea, Fa nelo gaumolöïe mulo amo gadola, helebe baialage gagaulahilä ne gaumolö misile.  
\v 49 Segeyo yafiegi ne dilibalä nea Godeïe mosöa ado mala olelesa nelo amogi ne dilia made gaui amoda. Amai gaso, bebagi ado säla dëdëla negei dibe amo gadola hamomäiamelëla säi.  
\v 50 Amasebegi, ïe bëgëla amoli sulubadela e dïgïla fisäla awäha maadei.   
\s1 Malö malïsä afädë fisäla asi  
\p
\v 51 Malö malïsä afädë fagulo bulula gäi Yesu bëgëla awäha nebegi, dolö amolia e gaui.  
\v 52 Gaso, fagulo bulula gäi amo ilima gila amilahilä e dudugïmu fisäla asimelë.   
\s1 Yesu e galïsolö dolö amolibalä gudimolöïe sigi asi  
\r (Madiu 26.57-68, Ulugu 22.54-55,63, Yone 18.13-14,19-24)  
\p
\v 53 Ilia Yesu e sigi gaula gobela ïlo Busa Edefade sebea ami asi. Gobela ïlo busa amolige, asigi gäwi dafidilo amolige, mala dawadigi amolige gedola ami sulo.  
\v 54 Fida e Yesu bëbëgëla asi. Gaso, eda holöbö hobeala awäha nelolahilä, gobela ïlo Busa Edefade amoïe mosö yala isogi nogila digalahilä, idihë aligilo amolibalä nulo gobeia ami hëgï hausa sulo.  
\v 55 Gobela ïlo busa amoliage, Galïsolö dolö amoli sulubadelaeage, dolö odoaea Yesuea asiala hamose melëlo amoli misialolahilä, ilia fädäla sämalai. Ilia e nufuäia ea asiala hamoi walebelela hogosamelebe, afädë made melï.  
\v 56 Ilima dolö yafiea ea made hamoi amo babala säi gaso, ado afädëdi made melï.  
\v 57 Odoaea nowela nea ea made hamoi amo babala sähalea,  
\v 58 Nilïada ea gomalä säse nabimelë. Godeïe mosö dolöïe naaboea hamoi amo, ea haila digila, segeyo ohodoagi ea bu ulimolö amoda, dolöïe naaboea olelo amo gadola made, ulimolömelëla säimelëla säi.  
\v 59 Ilia ado amala säi amoge aso afädëdi made melï.  
\v 60 Amala säsebegi, gobela ïlo Busa Edefade amea dolö sefolalebe amoïe mogogi nowela aligilahilä Yesuma nabahalea, Dia ado afädë made säla obëgëmolöle. Ilia dia asiala hamoila säi amo edo hamoila nabi.  
\v 61 Yesuea nafi daga made säla obëgësebegi, gobela ïlo Busa Edefade amea ema bu elö nabahalea, Dida Afädë Memelei Gode hedabi hïdo elöi neebe amoïe malöda dilela nabi.  
\v 62 Amala nabasebegi, Yesuea säla obëgësalea, Ä, neda amomelë. Dolöïe Malö e Geloi Edefade Neebe amoïe naabo dafädimadi fila, mu baidilidaia maala neëda, dilile siia bimolömelëla säi.  
\v 63 Amala säsebe amo nabala gobela ïlo Busa Edefade amea mihaläla hïle fagulo nulilahilä sähalea, Ea hamoi amo sämäia odoa misialola nalï made sämalo.  
\v 64 Ea Gode gagadese nabi amo. Dilia abilia helësësebela nabi. Amala nabasebegi, ili sulubadelaea sähalea, Ea asiala hamoi amoïeda e baagomäia nufulö dialeala säla didigai.  
\v 65 Amala sälahilä odoaea e gofedela galala, ïe si usulala naabo gafea nufudalahilä sähalea, di dolö gowea nufila olemola säi. Amase, idihë aligilo amoliage elea nufudala fisiga gala eleäha nelo.   
\s1 Fidaea, na Yesu dawa madela säi  
\r (Madiu 26.69-75, Ulugu 22.56-62, Yone 18.15-18,25-27)  
\p
\v 66 Fida e yala isogi nogila digala sebegi, gobela ïlo Busa Edefade amoïe hamoi hamolasilo dolïsä afädë maalahilä  
\v 67 beahamelebe, Fida e hëgï hausa sebe amo fädäla bealahilä sähalea, Dige Nasalese dolö Yesubalä nawesa aligilo amo gabula säi.  
\v 68 Amala säsebegi, Fidaea ne mademelëla sälahilä sähalea, dia ado säsebegoda, na dofä dawa mademelëla säi. Amala sälahilä e mosö amoïe idi galo baagido awäha nebegi haea Gagalugoea gäi.  
\v 69 Hamoi hamolo dolïsä amea e bealahilä, dolö nefolalo amolima bu sähalea, Dolö goda amoligimelëla säi.  
\v 70 Amala säsebegi, ea bu elö sähalea, ne mademelëla säi. Holöfalï nelolahilä dolö nefolalo amolia Fidama bu elö sähalea, Dofä. Dida amoligi. Dige Galili dolömelëla säi.  
\v 71 Amala säsebegi, Fidaea gelolafalï säla gabulo amo gadola migalïa diigila sähalea, na we wäfalï säseda, Godea ne dofä së ïmäiamelëla sälahilä, Dilia dolö ëi säse goda na dofä dawa mademelëla säi.  
\v 72 Ea amala säia gai amole haea gagalugo gawalia nafi bu äudä gäi. Fidaea amo nabalahilä dafidi Yesuea, haea gagalugo gawalia nafi bu äudä made gäla neëgi, dia ne dawa madela nafi bu ohodoala sämolömelëla säi amo helësëla obëgëi. Amo helësëlahilä dïisa nelo.   
\c 15  
\s1 Yesu Bailadi neebea sigi asi  
\r (Madiu 27.1-2,11-14, Ulugu 23.1-5, Yone 18.28-38)  
\p
\v 1 Yosefalï gobela ïlo busa amolige, asigi gäwi dafidilo amolige, mala dawadigi amolige, Galïsolö dolö amoli sulubadelage gegedolahilä ilia hamomolö amoïe ado didiäha dilo. Didiäha dilolahilä ilia Yesu e igi ëfëa nafodolahilä Bailadi neebea sigi gaula asi.  
\v 2 Sigi gaula maasebegi, Bailadia Yesuma nabahalea, Yu udia dolöïe beaha aligilo ginida dilela nabi. Amala nabasebegi, ea säla obëgësalea, Dia säse gomelëla säi.  
\v 3 Gobela ïlo busa amolia sähalea, Eada nafade yafie hamoimelëla säi.  
\v 4 Ilia Amala säsebegi, Bailadia ema bu elö nabahalea, Dia ado afädë made säla obëgëmolöle. Ilia dia nafade yafie hamoila säi amo nabilela nabi.  
\v 5 Amala nabi amogi Yesuea ado elö made säla obëgësebegi Bailadi e fudugisa nelo.   
\s1 Bailadia Yesu e i fügäigi baala negemalola säi  
\r (Madiu 27.15-26, Ulugu 23.13-25, Yone 18.39-19.16)  
\p
\v 6 Gäheo i sulubadelagi Segeyo Ede amoïe molö nase segeyo amo galada, udia dolöea galabaia negei amoligi ëi säla gowe fisigämola säsegi Bailadia fisigähamu aligilo.  
\v 7 Segeyo amo gaaluda, dolö odoaea gamanebalä nudusalea dolö odoa nufudasebegi, ilia ili galabaia negei. Amogi dolö afädë galabaia negei nelo amoïe ëida, Balabasa.  
\v 8 Udia dolö gegedoi amolia Bailadi neebea maalahilä, ema sähalea. Dia nilïma gäheo i sulubadelagi hamolo amo gadola walio hamomäiamelëla säi.  
\v 9 Ea ilima säla obëgësalea, Na Yu udia dolöïe beaha aligilo gini dihilima fisigämäiala helësësebelela nabi.  
\v 10 Amala säi amoïe mida, gobela ïlo busa amolia Yesuma mudiala mihalälahilä e sigi gaula misi gabula helësëla, Bailadia amala säi.  
\v 11 Gaso, gobela ïlo busa ilia, udia dolö gegedoi amolia Bailadima, Balabasa hilima fisigämäiala gelola sämäiala si nigilasi.  
\v 12 Bailadia ilima bu elö nabahalea, Dilia Yu udia dolöïe ginila sälo neebe gowema na abilia hamomäia helësësebela nabi.  
\v 13 Amala nabasebegi, ilia bu uuala sähalea, Eda i fügäigi baala negemalola säi.  
\v 14 Amala säsebegi, Bailadia ilima sähalea, Mi edogi. Ea edo nafade hamoi gabiola nabi. Amala nabasebegi, ilia gelolafalï sähalea, I fügäigi baala negemalola säi.  
\v 15 Amala säsebegi, Bailadia, udia dolö gegedoi amolia obeägïmäia, Balabasa hilima fisigälahilä, ea ami dolö ilia Yesu fëgämalolahilä, ilia i fügäigi baala negemolö sigi mosalai.   
\s1 Ami dolö ilia Yesu gadiaboi  
\r (Madiu 27.27-31, Yone 19.2-3)  
\p
\v 16 Ami dolö amolia Yesu sigi gaula gamane sigi aligiloïe mosö yala isogi nogila digai. (Mosö amoïe ëida Beledoliama.) Ilia ami dolö odoage misialosebegi gegedoi.  
\v 17 Gedolahilä ilia fagulo sedade bëi gadoi Yesuma salugasilahilä, ëfë äyo gägäi amalela nasigïla giniïe habuga gadoi hamolahilä ïe busagia salugasi.  
\v 18 Amalahilä ilia naabo sögödigila sähalea, Yu udia dolöïe beaha aligilo gini, namolöi namiäiamelëla säi.  
\v 19 Amala sälahilä, ilia ïe busagia buudi damuia nufudalahilä, gofedela gagalai. Amalahilä ilia ïe ëi gauia adogose gadoi hamola emo gumu sasagala dia digafui.  
\v 20 Ilia ema gagadela hamomolö amo gadoi hamosa maadelahilä, fagulo bëi sedade gäsi amo gilahilä hïle fagulo amo salugasi. Salugasilahilä ilia e i fügäigi baala negemolöïe segea sigi asi.   
\s1 Yesu i fügäigi baala negei  
\r (Madiu 27.32-44, Ulugu 23.26-43, Yone 19.17-27)  
\p
\v 21 Ili idiafa afiaha dibegi Sailini fii dolö afädë ïe ëida Saimono. Alegisäda Ulufasalele eedo amo, sagaiala maaha nebegi gausiala digalahilä, ami dolö amolia ema Yesuïe i fügäi gaumalala eegei.  
\v 22 Ilia Yesu sigi gaula sege ëi Gologoda asi. (Gologoda nilïle ado adolada Busa Giwi Sege.)  
\v 23 Ilia wani ödäge i afädëïe ödä muwege gegoalahilä egali muäia ï gaso, ea made mai.  
\v 24 Amalahilä, ilia e i fügäigi baala negei. Ilia ïe fagulo amo nowëa nimabelela, ilia sadu dahilahilä, ïe fagulo amo amala mogei.  
\v 25 Yose eso neëla udigisa nebegi, e i fügäigi baala negei.  
\v 26 Ea nafade hamoila sälo amolia dëdësaleada, Yu udia dolöïe beaha aligilo ginila säla dëdëla negei.  
\v 27-28 Amase, Yesu baala negei amo gaalu, fa nelo dolö äudä, elö ïe naabo dafädimadi, elö ïe naabo fefeädimadila, i fügäigi baala negei.  
\v 29 Udia dolö e dibeadi baagila afu mafusaleada, Yesu gagadiabola busa dugagila sähalea, Ëhehe, Godeïe mosö haila digilahilä, segeyo ohodoagi ulimolöeai amo,  
\v 30 dihïmu damula awäla i fügäia adogoila digamola säla baagila nelo.  
\v 31 Amo gadola wäla gobela ïlo busa amoliage, mala dawadigi amoliage Yesu gagadiabola säla didigahalea, Eada udia dolö odoa ugila negela wahilo amo gadola, e hïmu ugila negemolöi made gabugi dialealedu.  
\v 32 Nilïa ema asigi afädë negedeläïe Afädë Memelei, Isilale udia dolöïe gini ameada, e i fügäia adogoilahilä digamäia. Nilïa amo bealahilä, asigi afädë negedeläla säi. E i fügäigi baala negei gaalu, i fügäigi baala negei äudä amoleage e gadiabola amo gadolamu säi.   
\s1 Yesu hame doala asi  
\r (Madiu 27.45-56, Ulugu 23.44-49, Yone 19.28-30)  
\p
\v 33 Eso mogogila eso bëgise gaaluge, sege sulubadela gasilasimu dilo.  
\v 34 Eso bëgise gaalu, Yesuea gelolafalï säia adahalea, Elöi, Elöi, lama sabagadanila säi. Nilïle ado adolada, Nïe Gode, nïe Gode, abisigi ne dïgïla asila säi.  
\v 35 Amala säi amo nabalahilä, udia dolö odoa ami nefolalo amolia sähalea, Nabuö. Ea Elaia wesebegola säi.  
\v 36 Afädë baluluia awälahilä, nelebo afädë dahudu gadoi wani ödä gamogai dibea ami gelahilä, i bidigi yaala, egali muäia ïalahilä sähalea, Aso. Elaiaea e i fügäigi dibea adogoi fisigämolö maasebelela beaha aligidila säi.  
\v 37 Yesuea gelola uualahilä hame doala asi.  
\v 38 Amasebegi, gobela ïlo mosöa fagulo edefade negei dilo amo, gadogola gadelala digalahilä, elö eamu eamula negesi.  
\v 39 Ami dolö hädali afädë beaha aligilo dolö amea sida adogola beahamelebe, Yesu amala hame doala asi amo bealahilä sähalea, Dolö goda dofä Godeïe malö gabula säi.  
\v 40 Amo gaalu, udiafalï holöbö wagadi madela nea, sida gala nefolalo amoligi Magadala udia Melige, Yosese ïe ëo Yameselele eme Melige, Salomege nelo.  
\v 41 Dafidi Yesu e Galili neëgida, ilia e awäse amo gadola awälahilä, e ugila negesa filo. Udia odoa yafie ebalä Yalusaleme misi amolige nefolalo.   
\s1 Yesu baui  
\r (Madiu 27.57-61, Ulugu 23.50-56, Yone 19.38-42)  
\p
\v 42 Segeyo amoda nelebo daialo segeyo. Deadise gaalu, segeyo Sabada aiyo namolö gabula helësëlahilä,  
\v 43 Alimadia dolö Yosebe Bailadi neebea awälahilä, bedälo made mumulasi amea, Yesuïe domalo nimolö audulela nabi. Dolö amoda Galïsolö amoligi asigi hedabi negei nea, Godea Beaha Maadela Sigi Neebe amo beaha nelo.  
\v 44 Amala nabasebegi, Bailadia e aabela baagoi gabula fudugilahilä, ami dolö hädali afädë beaha aligilo amo welahilä e hä baagoilela nabi.  
\v 45 Amala nabasebegi, Bailadima ami beaha aligilo amea e hä baagoimelëla säi amo nabalahilä, Yosebema ïe domalo nimolö dofeala säi.  
\v 46 Amala sälebegi Yosebea fagulo falei hedabi afädë nealahilä, ïe domalo i fügäidaia dibe amo neala gaula digalahilä, fagulo amea usulala gaulahilä, igi äbä dafidi hamola negei diloa ami baumolö gaula asi. Bausilahilä, igi edefademalä afädë bebugula gaula maalahilä amea idi gasi.  
\v 47 Amala bausi dibe amo Magadala udia Meli Yoseseïe eme Melilea melï.   
\c 16  
\s1 Yesu nowela asi  
\r (Madiu 28.1-8, Ulugu 24.1-12, Yone 20.1-10)  
\p
\v 1 Segeyo Sabada gafe maadeibua, Magadala udia Melige Yameseïe eme Melige Salomege ilia Yesuïe domalogi hëla moholöïe, weli gafisigäi hïdo elöi amo bidia nii.  
\v 2 Segeyo gifalädalügi yosefalï ili äbägi bauia ami afiai.  
\v 3 Hilido afiaha dialea sähalea, Bausalea igi edefadea gai amo nowëa ugila negela doga negesimolödula säsäla afiai.  
\v 4 Afiaha dialea igi edefadea gai dilo amo sida gala beahamelebe, igi edefade amo bebugula fisiga galahilä doga negei dibe melï.  
\v 5 Ili äbä isogi bauia ami nogila digalahilä beahamelebe, malö malibu afädë fagulo falei sedade gäi ilile naabo dafädimadi sebe amo bealahilä, ili fudugi.  
\v 6 Malö malibu amea ilima sähalea, Dilia fudugimabu. Dilia Nasalese fii Yesu, ilia i fügäigi baala negei amo hogola misi goda, eda nowela asimelë. Eda wi maade. Ilia e negei diloa amo bimo.  
\v 7 Hä dili afiala Fidamage ïe bëgëla aulo odoa amolimage säla ïahaleada, Ilia e Galili bimolömelëla dafidi säla ï amo gadola, eda edale Galili moholö awäha neamelëla säla ïmalola säla ï.  
\v 8 Amala säi amo nabalahilä ili igi äbägi amila fodolofalï doadigila awähalea emo gigisëla fudugila aligi afiai. Udia dolö odoabaläge made adoi. Mida, ili bedähalea.  
\m __________________  
\s1 Magadala udia Melia Yesu melï  
\r (Madiu 28.9-10, Yone 20.11-18)  
\p [  
\v 9 Segeyo gifalädalügi yosefalï Yesu e nowelahilä, Magadala udia Melia bimäia e sebeadale Yesu e ulufala besela galai. Dafidi udia amoma mugabe gifalädalïa fedai sebegi Yesuea nesila digi.  
\v 10 Besela galai amo bealahilä, Yesubalä dafidi nawesa aligilo amolia asigiila dïisa dibea ami säla ïmolö asi.  
\v 11 Awälahilä Melia ilima sähalea, Yesu hï nowela asi amo na melïmelëla säi. Ilia nabi gasoda dofä gabula made helësëi.   
\s1 Bëgëla aulo äudäea Yesu melï  
\r (Ulugu 23.13-35)  
\p
\v 12 Hobeala ïe bëgëla aulo äudä ididila awäha nebegi, Yesu e domalo elölahilä elea e bimäia besela galai.  
\v 13 Amo bealahilä ele obëgëla awäla bëgëla aulo odoa amolima säi gaso, ilia dofä gabula made helësëi.   
\s1 Yesuea ïe bëgëla aulo amolima Ado Mala Hedabi säla ïmalola säi  
\r (Madiu 28.16-20, Ulugu 24.36-49, Yone 20.19-23, Abosolo 1.6-8)  
\p
\v 14 Amalahilä hobeafalï gïdälasi amoli molö naha dibea ami Yesu e besela galai. Besela galalahilä ilia asigi afädë made negei amogige, iso asigi geloi neebe amogige, odoaea e hï nowela neebe melïla säi amo nabalahilä dofä gabula made helësëi amogige nemoi.  
\v 15 Amalahilä ea ilima sähalea, Dili sege föi sulubadelagi afufulahilä, udia dolö sulubadelama Ado Mala Hedabi säla ïmalo.  
\v 16 Afädëa asigi afädë negeseda, ödägi gelahilä damula aulo neala gaumolömelë. Be afädëa asigi afädë made negeseda amobalä gudimolömelë.  
\v 17 Asigi afädë negei neebe amoliada dolöea hamomolöi made gowe gadoi hamomolömelë. Nïe ëigi nea mugabe fedai nesila digimolöge, udia dolö odoaïe ado adomolöge,  
\v 18 baagolo nuba gausege baagolo ödä nasege made baagomolömelë. Oloi difolalebe amoli ilia naaboea diigiseda wahimolömelëla säi.   
\s1 Yesu selesaia mosöa fedai  
\r (Ulugu 24.50-53, Abosolo 1.9-11)  
\p
\v 19 Dafidilo Geloi Yesuea ilima ado amo säla ïalahilä, selesaia mosöa fedalahilä Godeïe naabo dafädimadi sulo.  
\v 20 Amala asibua ili afufulahilä, sege sulubadelagi ado mala säla ïaha nebegi, Dafidilo Geloia ilibalä hamoi hamola, ilia dofä säsebela helësëmäia dolöea hamomolöi made gadoi hamolasi.]  
\m __________________