\id TIT - Ese Ejja NT -Bolivia 2012 (DBL -2013) \h TITO \toc1 Paboja Etehueꞌyo Tito Que \toc2 Tito \toc3 Tit \mt2 PABOJA ETEHUEꞌYO TITO QUE \mt1 TITO \c 1 \s1 Pabohua esohui tehue canaje Tito que \p \v 1 Tito, eyaya jiquio esohui tehueaña mi que miquea ebajji. Eya, Pabo Eyacuiñajjijo chacochacoani oja yajjijo. Jesosa Quitohua eya huoojea canaje ojaya epeejji cuana huasijje ojaya esohui huohuiya. Jamajjeya eyaya Eyacuiñajjija babacaꞌyo cuana onijje jjapeequi meesahuaña eꞌe jojo nei. Oya cuana Eyacuiñajjija esohui eꞌe jojo nei ba meesahuaña peaꞌai. Jamajjeya oya cuana ma esohui jayojja jama baꞌe meeje quea jaꞌa nee. \v 2 Eꞌe, Jesosa nijje eꞌe jojo nei jjapeequianijo, Eyacuiñajjiya ojjaña eseya baꞌe tiitii mee cajeꞌyo onijje eyajo. Jamaya Eyacuiñajjiya huohui caꞌya poa meshi pana jjimahuajo. Oya ca ca oe siajje po ajja nei nei. \v 3 Jjeya nei ca ca Eyacuiñajjiya eseya ojaya esohui quea pame nee Jesosajo ba mee caꞌyonaje. Eꞌe, ohuaya, esejaya ejaahuanajjiya eya huoojea caꞌyonaje jama baꞌa: —¡Poquicue miya; ecuea esohui quea pame nee huohuicue ojjaña dejja cuana huasijje! —jamaya ohuaya eya acanaje. \p \v 4 Tito, eyaya jiquio esohui tehueaña mi que, miya e jayojjaya Jesosa nijje jjapeequianijo. ¡Eyacuiñajji esejaya Chii ai eyajo aniya, Jesosa Quito ese jaahuanajjiya peaꞌai miya cajaahuana cahua quea pame nee! ¡Miya quea bei nee capo mee cahua peaꞌai! \s1 Jesosaja epeejji jaahuanajji cuana quea pame nee cabaꞌyahua \p \v 5 Tito, yahuajo eseya Queta nasijo Eyacuiñajjija esohui huohui nequinaje. Jamatii Eyacuiñajjija esohui huohui jeyojeyo jjima poanaje. Jamajjeya eyaya miya nequi meeꞌyonaje Queta nasijo Jesosaja epeejji jjabahuejja meequijji ojjaña ojaya esohuijo. \v 6 Jamajjeya ¡ojjaña cuiñajji yasijje Jesosaja epeejji etii babacacue Jesosaja epeejji jaahuanajji epojji! Ecuea esohui Jeosaja epeejji jaahuanajjijo huohuicue jama baꞌa: —Jesosaja epeejji jaahuanajji cabaꞌyahua jama baꞌa: ¡Quea jaꞌa nee cabaꞌe tiitiiꞌyahua, mimishiꞌama! Jamajjeya o ba majje onaaya jama acaje baꞌa: “Oya eꞌe jojo nei Eyacuiñajjija esohui jayojja jama baꞌyani”. ¡Shacuijji poaniya ehuanase oe nei cahuana cahua quea jaꞌa nee! ¡Oja bacua cuana Jesosaja epeejji cuana capoꞌyahua, shajjamaꞌ pojjeama capoꞌyahua! Jamajjeya oya cuana ba majjeya onaya mimimimi ajja jama baꞌa: “Oja bacua cuana quea mimishi nee nee, shajjamaꞌ peaꞌai poani”. \v 7 Jesosaja epeejji jaahuanajjiya ¡ojjaña ojaya epeejji cajaahuana cahua, cabaꞌe meesahua cahua peaꞌai! Jamajjeya ¡quea pame nee cabaꞌyahua, mimishiꞌama! Jamajjeya onaaya oya eniñebajji pojjeama. ¡Aꞌa jjashahuaba taiquijji! Jama baꞌa: “Eya ca iña quea pame nee; pea cuana quea pame pojjeama”. ¡Aꞌa quenequene cuajijji! ¡Aꞌa ishiꞌishijji! ¡Aꞌa pea nijje jjacuiaquijji! ¡Aꞌa quea dejja tai pojji peaꞌai! \v 8 Eꞌe, Jesosaja epeejji jaahuanajjiya ¡pea cuana nijje cajjapeequiahua; ojaya equijo cabaꞌe mee cahua joya oja cuiñajji yasijje poeyajo! ¡Ohuaya pea cuana quea jea nee caꞌa cahua! ¡Oya quea jaꞌa nee cajjashahuabaquiahua quea pame nee ebaꞌejji! ¡Ohuaya emeshi meseja esohui jayojja jama caꞌa cahua! ¡Eyacuiñajjija esohui jayojja jama cabaꞌyahua tii! ¡Cajjashahuaba tiitiiquiahua mimishiꞌama ebaꞌejji! \v 9 Eꞌe, ¡Jesosaja epeejji jaahuanajji cuana esejaya esohui jayojja jama cabaꞌyahua tii! Jamajjeya ojaya epeejji cuana Jesosajo eꞌe jojo nei huohui majje Jesosa nijje jjapee neineiqui mee cajeꞌyo. Onaya esohui eꞌe nei Jesosajo siajje poani. Oya cuanaa jjabahuejjaquiꞌyo majje siajje poani pajea cajeꞌyo peaꞌai. Jamaya eyaya, Pabohua huohuiaña Jesosaja epeejji jaahuanajji cuanajo. ¡Jamaya cabaꞌyahua oya cuana! \s1 ¡Shajjamaꞌ cuana siajje poani pajea meeꞌyocue! \p \v 10 Eꞌe Tito, ¡Jesosaja epeejji jaahuanajji huoojeacue esohui eꞌe nei huohuiya! Quea huiso Jodio cuana Jesosa nijje jjapeequinaje. Jamatii oya cuana esohui huohuijji nisho poani. Oya cuana shajjamaꞌ poani, pea cuana dasia cani, siajje poani jama baꞌa: —¡Ojjaña Jesosaja epeejji cuana Moisesija esohui etehueꞌyo jayojja jama cabaꞌyahua! ¡Cuiishasha biso nei cajehuisejjajea cahua! Majoya aje oe Eyacuiñajjiya oya cuana ba caje emimishi cuijeaꞌyo —jamaya onaaya pea cuana dasia caꞌyani. \p \v 11 Tito, miyaya Jesosaja epeejji jaahuanajji huoojea majje ¡oya cuana ma esohui huohuijji nisho cuana huohui pajea meeꞌyocue! Eꞌe, esohui huohuijji nisho cuaa beca Jesosaja epeejji cuana siajje po majje jjashahuabaqui quehua mee cani Jesosajo. Oya cuana siajje poani Jesosaja epeejji cuana nijje bejjo jjeshejji. \p \v 12 Eꞌe Tito, ojjaña Queta nasijo baꞌeca cuana quea mimishi nee nee. Jamajjeya oe esohui huohuijjiya Queta nasijo baꞌeya huohui canaje jama baꞌa: —Ojjaña dejja cuana Queta meshijo baꞌe siajjepojji nei nei poani. Quea mase ijjiacajji jayojja jama poani. Quea huea nee poani, jejje ajja nei nei poani peaꞌai —jamaya acanaje Queta dejjaa. \p \v 13 Jamaya eꞌe jojo nei. Jamajjeya ¡Jesosaja epeejji cuana niñesheꞌa neineicue! ¡Jjabahuejja meequicue esohui eꞌe neijo Jesosa Quitojo! \v 14 Jamajjeya onaaya Jesosaja esohui eꞌe jojo nei jayojja jama acajeꞌyo. Jodio etiiquiana cuanaja esohui eꞌe nei pojjeamajo jjashajjaꞌajjaqui ajja, esohui huohuijji nishoja esohui pajea cajeꞌyo peaꞌai. \v 15 Jesosaja epeejji cuana jjabahuejjaquiꞌyo majje, quea jaꞌa jjashahuabaqui majje quea jaꞌa nee baꞌyani. Beca cuana ca ca quea mimishi jjashahuabaquianijo Eyacuiñajjija esohui jayojja jama aꞌajja. Jamajjeya oya cuana quea mimishi baꞌyani tii. Jjashahuaba tiitiiquiani mimishi epojji. Mimishi po majje quea yeno pojjeama, quea bicho pojjeama poani. \v 16 Oya cuana, esohui huohuijji nisho cuana siajje poani jama baꞌa: —Ecuana Eyacuiñajjija epeejji poani. \p Chojja de. Siajje poani. Oya cuana Eyacuiñajjija esohui jayojja jama aꞌajja. Eyacuiñajji ojaya ba jjima. Eyacuiñajjija mimishi botiꞌama. Jamatii oya cuana quea mimishi baꞌyani. Shajjamaꞌ poani. Mimishi cuana pajeaꞌyo ajja. \c 2 \s1 ¡Esohui eꞌe nei huohuicue ojjaña quea pame nee baꞌe meejji! \p \v 1 Tito, ¡miyaya oe ojjaña quea pame nee ebaꞌe meeꞌyojji huohuicue Eyacuiñajjija esohui eꞌe nei ojjaña cuana huasijje, quea pame nee nee ona baꞌejji! \v 2 ¡Edejja tii cuana huohuicue jama baꞌa: —¡Aꞌa jja oe huoojji! ¡Quea jaꞌa nee jjashahuabaquicue quea pame nee ebaꞌejji! ¡Eyacuiñajjija esohui jayojja jama baꞌecue! ¡Pea cuana quea jea nee acue! Jesosa nijje jjapeequianijo, pea cuaa miya napa caje. Jamatii ¡aꞌa Jesosa nijje jjapeequi pajeaꞌyojji! —acue! \p \v 3 Epona tii cuana huohuicue jama baꞌa: —¡Jesosaja epeejji quea pame nee jayojjaya baꞌecue! ¡Aꞌa pea cuana niñebajji! ¡Aꞌa ishiꞌishijji! ¡Eyacuiñajjija esohui quea pame neejo pea cuana jjabahuejja meequicue peaꞌai quea pame nee ebaꞌejji! \p \v 4 Eꞌe, epona cuana niñesheꞌacue jama baꞌa: —¡Quea bei pocue! ¡Miqueahue, mique bacua cuana peaꞌai quea jea nee acue! \v 5 ¡Quea jaꞌa nee jjashahuabaquicue! ¡Aꞌa quea mimijjequijea jjashahuabaquijji! ¡Miquea equijo chacocue quea pame nee, hueaꞌama! ¡Pea cuana quea jea nee acue! ¡Miqueahueja esohui shajjaꞌajjacue peaꞌai! Jamajjeya mi ba majje pea cuaa huohui caje jama baꞌa: “¡Bacue! Jesosaja epeejji cuana quea pame nee poani. Jamajjeya Jesosaja esohui eꞌe nei, quea pame nee”. \p \v 6 Tito, ¡oya jayojjaya shacuimaꞌ nequi cuana huohuicue peaꞌai! ¡Jama acue baꞌa: —Shacuimaꞌ nequi cuana, ¡quea jaꞌa nee jjashahuabaquicue Jesosa nijje ejjapee neineiquijji mimishiꞌama! —jamaya shacuimaꞌ nequi cuana niñesheꞌa neineicue! \p \v 7 Tito, ¡miya peaꞌai baꞌecue quea jaꞌa nee nee! Jamajjeya miya onaaya ba majje jama acaje baꞌa: —Eꞌe, Tito baꞌyani quea jaꞌa nee. Jamajjeya ¡o jayojjaya ebaꞌe! \p Eꞌe Tito, jjabahuejjaqui majje jama acue baꞌa: ¡Esohui eꞌe nei huohuicue! ¡Quea jaꞌa nee oe huohuicue! \v 8 Jamajjeya pea cuaa miquea esohui shajjaꞌajja cajeꞌyo. Miquea esohui eꞌe jojo nei poanijo, onajaya miya eniñebajji pojjeama. Jamajjeya pea cuana minijje mimijaji majje quea bicho poaje. Eꞌe, miya onaaya ba caje quea pame nee poani; miquea ebaꞌejji, miquea esohui quea jaꞌa nee peaꞌai. \p \v 9 Tito, ¡echacojji cuana joya ojaya echaco meejjija yajjijo sosemaꞌ chacochacoani huohuicue jama baꞌa: —¡Mi huoojeajji poani shajjaꞌajjacue! ¡Ojaya esohui jayojja jama chacocue! ¡Aꞌa mimijajijji onijje! Jamajjeya oya minijje quea bei poaje. \v 10 ¡Ojaya aquiana aꞌa sii poquiajji! Chojja, ¡quea pame oe baꞌecue! Jamajjeya mi huoojeajji poani jjashahuabaquije miyaya ojaya aquiana jaahuanajeꞌyo quea pame nee. Eꞌe echacojji cuana, miquianaya jamaya quea pame nee baꞌyanijo pea cuaa Eyacuiñajjija esohui shajjaꞌajja caje, esejaya Emeshi Mese neija. Jama acaje cuaa baꞌa: “Jiquio echacojji Jesosaja epeejji poani. Oya quea pame nee, mimishiꞌama baꞌyani. Jamajjeya Eyacuiñajjija esohui quea pame nee. Jamaya cabaꞌyahua” acaje cuaa —jamaya echacojji cuana acue, Tito! \s1 Eyacuiñajjiya eseya ba mee canaje ojaya ejjashahuabaquijji quea bei ojjañajo poani \p \v 11 Eꞌe Tito, ojjaña Eyacuiñajjija quea jea nee neejo ohuaya ojjaña ba mee cani jama baꞌa: Ohuaya ojjaña cuana baꞌe meesahua cani. Jesosaja epeejji cuana mimishi cuijeaꞌyo majje baꞌe tiitii mee cajeꞌyo eyajo onijje. \v 12 Jamajojoya ohuaya eseya jama acani baꞌa: —¡Ecuea esohui jayojja jama acue! Jamajjeya eya quea bei poaje miquiana nijje. ¡Ejjashahuabaquijji quea mimishi pajeaꞌyocue! Eꞌe, ¡jiquio meshijo baꞌyanijo jjashahuabaquicue quea pame nee! ¡E jayojja poaniya pea cuana quea jea nee acue! ¡Ecuea esohui jayojja jama atiitiicue quea pame nee peaꞌai! —jamaya Eyacuiñajji poani. \p \v 13 ¡Jamaya ejjaꞌaqui Jesosaja epoe oꞌoyajjijo ishoañajo! Esejaya eba oya eꞌe jojo nei poeje oꞌoya. Quea caꞌa nee nee, quea jeajahua nee nee poejeꞌyo. Oya, Jesosa Quito ese jaahuanajji, oe nei quea jaꞌa nee nee. Eyacuiñajji nei oya. \v 14 Yahuajo Jesosa esejo manoꞌyonaje. Onaaya oya iña canaje equecuaꞌyojji. Jamatii Jesosa mimi jjima jama baꞌa: —¡Aꞌa eya quecuaꞌyojji! —chojja, jamaya Jesosa mimi jjima. \p Ohuaya esejaya mimishijo manoꞌyonajejo, Eyacuiñajjiya eseya ba cani emimishi cuijeaꞌyo. Jamaya ohuaya eseya ma ojaya epeejjime po mee caꞌyonaje. Jamajoya ohuaya eseya baꞌe mee cani ojaya ejjashahuabaquijji jayojjaya quea boejeaꞌyo, mimishiꞌama. Jamajjeya ¡quea pame nee nee ebaꞌe tii tii! \p \v 15 Eꞌe Tito, ¡jiquio esohui huohuicue! ¡Jesosaja epeejji cuana baꞌe meesahuacue quea jaꞌa nee! ¡Shajjamaꞌ cuana jjabahuejja meequicue! Jama acue baꞌa: —Eyacuiñajjiya eya huoojea canaje oja esohui huohuiya. ¡Jamajjeya shajjaꞌajjacue mo! \c 3 \s1 Jesosaja epeejji cuana quea pame nee cabaꞌyahua jama baꞌa: \p \v 1 Tito, Jesosaja epeejji cuana huohui oꞌoyacue jama baꞌa: —¡Miquea emeshi meseja esohui jayojja jama acue! ¡Mi huoojeajji poanija esohui jayojja jama acue peaꞌai! Eꞌe, ¡miquianaaya Jesosaja epeejji cuana poaniya quea pame nee atiitiicue hueaꞌama! \v 2 ¡Aꞌa pea cuana niñebajji! ¡Aꞌa jjamimicuiajea nobiajeaquijji pea cuana nijje! ¡Ojjaña nijje quea bihui pocue; baꞌe meesahuacue quea bihui nee! \v 3 ¡Ojjaña nijje quea bei nee pocue! ¡Aꞌa quenequene cuajijji! Eꞌe, yahuajo Jesosa nijje jjapeequi jjimahuajo eseya quea mimishi poanaje peaꞌai ona jayojjaya. Jjeya ca chojja. Yahuajo eseya jjashahuaba taiquinaje. Shajjamaꞌ peaꞌai poanaje. Esohui huohuijji nisho cuaa eseya dasia caꞌyonaje. Yahuajo eseya mimishi pajeaꞌyo sa poanaje. Jamatii pajeaꞌyo jjima poanaje. Jamaya Jesosaja epeejji pojjeama jayojja jama poanaje, quea mimishi boti nee. Eꞌe, yahuajo Jesosa nijje jjapeequi jjimahuajo eseya jjashahuaba tiitiiquinaje quea mimishi epojji. Quea dejja tai poanaje; onajaya aquiana jea banaje. Pea cuana botiꞌama nei nei poanaje. Eseya onajaya botiꞌama nei nei poanaje peaꞌai. Jjasoseaquijji ponequinaje. Jamaya aje oe eseya yahuajo baꞌya poa. \v 4 Eꞌe, yahuajo eseya quea mimishi ponequinaje. Jamatii ese jaahuanajjiya, Eyacuiñajjiya eseya ba mee canaje ojjaña ojaya quea boti nee nee. Jamajjeya ohuaya ojjaña quea jea nee nee acani. \v 5 Eꞌe, Eyacuiñajjiya esejaya mimishi cuijea caꞌyajje eseya baꞌe tiitiijeꞌyo eyajo. Eseya quea pame poanijo pojjeama ohuaya esejaya mimishi cuijea caꞌyonaje. Chojja, chamaꞌ joya quea pame nee mimishiꞌama baꞌyani. Jamatii Jesosa eseja mimishijo manoꞌyonajejo, Eyacuiñajjiya esejaya mimishi cuijea caꞌyonaje. Eꞌe, Eyacuiñajji quea quene tii tii pojjeama ese nijje poanaje; eseya ojaya quea jea nee nee poanaje. Jamajjeya ohuaya esejaya mimishi cuijeaꞌyo majje Edojjoshahua Pame ese que dobiqui mee caꞌyonaje eseya quea bihui nee epojji. Ohuaya eseya baꞌe meesahua cani Eyacuiñajjija esohui jayojja, yahuajo jama pojjeama. \v 6 Eꞌe, Jesosa Quito esejaya mimishijo manoꞌyonaje ese baꞌe tiitii meeꞌyojji. Majoya Eyacuiñajjiya Edojjoshahua Pame huoojea caꞌyonaje ese que dobiquiya, ese quea pame nee baꞌe meesahuaa. \v 7 Jamajjeya eseya ojaya bacua cuana poanijojo ohuaya eseya baꞌe tiitii mee cajeꞌyo onijje eyajo. Eꞌe, eseya Eyacuiñajjiya quea jea nee acanaje; ohuaya huohui canaje jama baꞌa: —Jesosaja epeejji cuana eyaya baña mimishiꞌama, emimishi cuijeaꞌyo. \p \v 8 Tito, jiquio esohui ecue etehueꞌyo eꞌe nei. Jamajjeya ¡jiquio esohui huohui neineicue ojjaña Jesosaja epeejji cuana huasijje! Shajjaꞌajja majje onaaya quea pame nee atiitii cajeꞌyo. Eꞌe, jiquio esohui quea pame nee. Shajjaꞌajja neinei majje ojjaña cuana quea pame nee baꞌejeꞌyo. \v 9 Jamatii beca cuana ecue sohui jayojja jama baꞌe ajja, quea pame baꞌe ajja. Oya cuana aje oe jjamimicuiajea nobiajeaquiani onajaya esohui quea quehuajo, Jodio etiiquiana cuanajo, Moisesija esohui etehueꞌyojo peaꞌai. Eꞌe, jamaya quea tai. ¡Aꞌa ona jayojja jama pojji, Tito! Jamaya po majje miquea pea cuana quea pame nee ejjapeequi meesahuajji pojjeama Jesosa nijje. \v 10 Esohui huohuijji nisho Jesosaja epeejji cuana ojaya esohuijo jjashahuabaqui pajea mee sa poani. Peaja esohui shajjaꞌajja mee sa poani. ¡Esohui huohuijji nisho huohuicue jama baꞌa: —¡Miquea esohui quea tai huohui pajeaꞌyocue! —acue! \p Oya cuana shajjamaꞌ poanijo, ¡oya huohui oꞌoyacue ojaya esohui quea tai ehuohui pajeaꞌyojji; beca huohuiꞌyome acue! ¡Majoya oya cuana shajjamaꞌ po tiitiiajo, oya cuana cajaa aꞌyocue! ¡Aꞌa onijje jjapeequi oꞌoyajji! \v 11 Mi shajjaꞌajja sa poꞌyo ajjajo miquea eba ma esohui huohuijji nisho cuana shajjamaꞌ nei nei. Oya cuana quea pame po sa poꞌyo ajja nei nei. Eyacuiñajjija esohui jayojja jama a sa poꞌyo ajja. Jamajjeya quea mimishi poanijo, Eyacuiñajjiya oya cuana tecuea cajeꞌyo. Quea nee nee po mee cajeꞌyo peaꞌai. \s1 ¡Poecue e que Nicoponi yasijje! \p \v 12 Tito, quijje eyaya Jesosaja epeejji mi que, Queta nasi yasijje huoojeaje; Atema, Tiquico pojjaꞌa huoojeaje. Mi que baꞌeñaquiajo ¡poecue e que Nicoponi yasijje! Jomajo eyaya miya ishoaje. Majoya eseya eeno shejo Nicoponijo baꞌeje. \p \v 13 Emeshi meseja esohui bajji Sena bajjani, Jesosaja esohui huohuijji Apono bajjani peaꞌai Queta meshijo nequi ajja. Jjeya nei pea meshi yasijje poquije. Jamajjeya ¡oya cuana poqui meesahuacue! ¡Bobi cuana, ebaꞌejji cuana peaꞌai quiacue! \p \v 14 Tito, jamajjeya ¡Jesosaja epeejji cuana huohuicue jama baꞌa: —¡Quea pame nee ebaꞌe, hueaꞌama! ¡Jesosaja esohui huohuijji cuana, aemaꞌ cuana peaꞌai ejjaquiaqui aquiana cuana; onaya ejjabaꞌe meesahuaqui! —jamaya acue Jesosaja epeejji cuana ona jaahuanajji epojji! \p \v 15 Ojjaña Jesosaja epeejji cuana enijje nequiya eya huohuiꞌajja mee cani jama baꞌa: —Tito, ¿achajja ami ani soꞌo ecuanajaya ebajji? \p Ojjaña Jesosaja epeejji cuana Quetajo baꞌe huohuicue jama baꞌa: —Pabohua, ojjaña onijje nequiya peaꞌai jama acani baꞌa: “¿Achajja acuae quiana ani soꞌo?” ecuanajaya ebajji. Ecuanaya ojjañaja quea boti nee. \p Miquianaya Eyacuiñajjija quea jea nee nee. ¡Ohuaya miquianaya cajaahuana cahua! Mahuiso eyaya, Pabohua mi que tehuenaje, Tito. Apoa.