\id ROM - Ese Ejja NT -Bolivia 2012 (DBL -2013) 
\h SHOMANO 
\toc1 Paboja Etehueꞌyo Shomajo Baꞌe Cuana Nuasijje 
\toc2 Shomano 
\toc3 Rom 
\mt2 PABOJA ETEHUEꞌYO SHOMAJO BAꞌE CUANA HUASIJJE 
\mt1 ROMANOS 
\c 1  
\s1 Pabohua esohui tehue canaje Jesosaja epeejji cuana Shoma cuiñajjijo baꞌe yasijje 
\p  
\v 1 Eya Pabo bajjani. Jesosaja epeejji cuana, eyaya jiquio esohui tehueaña miquiana huasijje Shoma cuiñajjijo baꞌeca huasijje. Eya ca ca iña Jesosa Quitoja huoojeaꞌyo ojaya esohui huohuijji. Eyacuiñajjiya eya babaca canaje ojaya esohui huohuijji epojji. Ohuaya eya huoojea canaje quea huiso meshi yasijje ojaya esohui quea pame nee Jesosajo huohuiya. 
\p  
\v 2 Yahuajo nei nei Eyacuiñajjiya ma esohui quea pame Jesosajo ojaya etehueꞌyojo tehue mee ca poa ojjañaja ebajji. Ojaya esohui huohuijji yahuajo nei baꞌe ma esohui huohui neinei mee ca poa peaꞌai.  
\v 3 Jamaya Eyacuiñajjiya eseya ba mee cani oja Bacua Ejja oe nei Jesosa ese jayojjaya yamijji poeyanaje. Cuayanaje Maniaja bacua. Jodio cuanaja emeshi mese quea pame nee Dabi bajjani ojaya etiiquiana, huapa pojjeama yahuajo baꞌya poa.  
\v 4 Oya Jesosa Quito ese jayojjaya yamijji poanaje. Oya Eyacuiñajji nei peaꞌai, oja Chii jayojja nei nei, mimishiꞌama nei nei. Oya manoꞌya poa. Jamatii Eyacuiñajjiya quea caꞌa nee neeya oya emanoꞌyojaa shequi mee ca oꞌoyanaje. Jamaya ohuaya ojjaña ba mee canaje Jesosa eꞌe jojo nei oja Bacua Ejja, esejaya Emeshi Mese nei.  
\v 5 Eya Jesosaja epeejji poanijo Eyacuiñajjiya eya ojjaña meshi yasijje huoojea canaje jama baꞌa: —¡Poquicue miya ojjaña Jodio pojjeama cuana huasijje! ¡Ecuea esohui ba meequicue Jesosajo! ¡Onijje jjapeequi meesahuacue! Jamajjeya onaaya Jesosa bihuia tiitii cajeꞌyo —jamaya Eyacuiñajjiya eya huoojea canaje quea pame nee. 
\p  
\v 6 Eꞌe ecuea epeejji cuana Shomajo baꞌe, Eyacuiñajjiya miquianaya babaca canaje pea cuana nijje Jesosa Quitoja epeejji epojji.  
\v 7 Jamajjeya eyaya miquiana que jiquio esohui tehueaña. Miquianaya Eyacuiñajjija quea jea nee nee. Ohuaya miquianaya babaca canaje ojaya epeejji nei epojji. ¡Eyacuiñajjiya esejaya Chii aiya, Jesosa Quitohua esejaya Emeshi Mese neiya miquianaya cajaahuana cahua; quea bei nee cabaꞌe meesahua cahua peaꞌai! 
\s1 Pabo ojaya epeejji cuana Shomajo baꞌejo Eyacuiñajji nijje mimiani 
\p  
\v 8 Ecuea epeejji cuana Shomajo baꞌe, ojjaña meshijo baꞌe cuana miquianajo mimiani quea bei Jesosaja esohui jayojja jama baꞌyanijo. Ma shajjaꞌajja majje eyaya Jesosa esejaya Chii ai peaꞌai bihuiaña jama baꞌa: —Eyacuiñajji, miya quea pame nee. Ojjañaja eba miyaya miquea epeejji cuana Shomajo baꞌe jaahuanaña —eya poani. 
\p  
\v 9 Eyaya eꞌe jojo nei Eyacuiñajjija esohui quea pame nee oja Bacua Jesosajo huohui tiitiiaña quea bihui nee. Ojaya eba eya onijje mimi majamajani miquianajo.  
\v 10 Eya jama poani baꞌa: —Eyacuiñajji, yahuajo eya poqui sa poanaje Shoma huasijje Jesosaja epeejji cuana baa. Jamatii poqui mee jjima eya miquea. Eyacuiñajji, ¿aꞌa jjeya eya Shoma huasijje huoojea sa aña miyaya? —eya jamaya Eyacuiñajji nijje mimi majamajani. 
\p  
\v 11 Eꞌe, eya miquiana ba neinei sa poani Jesosaja epeejji quea caꞌa nee epo meesahuaꞌyojji. Edojjoshahua Pameya eya ba mee canaje Eyacuiñajjija esohui eyacua quea pame. Ma esohui eyacua shajjaꞌajja majje miquianaya Jesosaja epeejji quea caꞌa nee poaje.  
\v 12 Miquianaaya eya baje Jesosaja epeejji quea jaꞌa nee poani. Cuanaya miquianaya Shomajo baꞌe Jesosaja epeejji quea jaꞌa nee baje eyaya. Jamajjeya Eyacuiñajjiya eseya ojaya epeejji cuana quea jaꞌa nee po meesahua cajeꞌyo. 
\p  
\v 13 Ecuea epeejji cuana, ¡bacue jiquio esohui! Yahuajo eya poqui sa neinei poanaje miquiana baa. Jamatii eya poqui mee jjima, de. Eꞌe, eyaya Jodio pojjeama cuana pea meshi cuanajo baꞌe jjapeequi meesahuanaje Jesosa nijje. Jamaya eyaya miquianaya Jesosa nijje jjapeequi meesahua sa aña peaꞌai.  
\v 14 Eyacuiñajjiya eya huoojea canaje ojaya esohui huohuiya ojjaña cuana huasijje jama baꞌa: Ojjaña joya esejaya esohuijo mimiani yasijje, ojjaña pea esohuijo mimiani yasijje peaꞌai, ojjaña joya papeni ba po jjima huasijje, joya papeni ba epo cuana huasijje peaꞌai, ojjaña huasijje.  
\v 15 Jamajjeya eyaya miquiana Shomajo baꞌe yasijje Eyacuiñajjija esohui huohui sa aña. 
\s1 Jesosa nijje jjapee neineiquianijo mimishi cuijea caꞌyani Eyacuiñajjiya 
\p  
\v 16 ¡Bacue! Eꞌe jojo nei ojjaña joya Jesosa nijje jjapee neineiquiani Eyacuiñajjiya mimishi cuana cuijea neinei cajeꞌyo, joya ojaya esohui shajjaꞌajja majje eꞌe jojo nei acani. Jamaya ecuea eba. Jamajjeya eyaya bichoꞌama ma esohui huohui majamajaña ojjaña cuana huasijje. Eꞌe, Jodio cuaa ma esohui shajjaꞌajja majje, Jodio pojjeama cuaa shajjaꞌajja canaje peaꞌai.  
\v 17 Eyacuiñajjija esohui quea pame Jesosajo shajjaꞌajja majje eseyaya Eyacuiñajjija ejjashahuabaquijji baña jama baꞌa: —Ojjaña Jesosaja epeejji nei nei eyaya mimishi cuana cuijeajeꞌyo eꞌe jojo nei epojji. Jesosaja epeejji pojjeamaja mimishi ecuijeaꞌyojji pojjeama —Eyacuiñajji poani. 
\s1 Ojjaña Jodio cuana, Jodio pojjeama peaꞌai quea mimishi poani 
\p  
\v 18 ¡Bacue ecuea esohui ojjañaja mimishi cuanajo! Eyacuiñajji eyajo baꞌe quea quene nee nee poaje ojjaña coya mimishi po majamajani nijje. Quea nee nee acajeꞌyo. Oya cuana aje oe jama poani baꞌa: Quea mimishi poani tii, Eyacuiñajji bihuia ajja, mimishi pajea sa poꞌyo ajja. Eyacuiñajjija esohui shajjaꞌajja sa po ajja, pea cuana esohui shajjaꞌajja mee ajja peaꞌai shajjamaꞌ cuana nijje ejjapeequijji jjejojo.  
\v 19 Eꞌe, Eyacuiñajjiya ojjaña ba mee ca poa oya quea pame nee, quea caꞌa nee enequi tii tii. Jamajjeya ¡Eyacuiñajji ojjañaa caba cahua, de!  
\v 20 Eꞌe, oya ca ca oe Eyacuiñajji nei quea caꞌa nee nee enequi tii tii. Ohuaya ca ca oe ojjaña pana caꞌya poa. Jamajjeya ojaya epanaꞌyo ba majje ¡oya eꞌe jojo nei Eyacuiñajji bacue, ojjañaa! Jamatii beca cuana siajje poani jama baꞌa: —Esejaya Eyacuiñajji ebajji pojjeama, jjaba meequi ajja, de. ¿Yajja bame yajji eyami ebajjijojo? —poani. ¡Aꞌa jama siajje pomeya pojji! 
\p  
\v 21 Eꞌe de, yahuajo nei ojjañaja eba Eyacuiñajji yani. Jamatii onajaya Eyacuiñajji bihuia jjima jama baꞌa: —Eyacuiñajji, miya oe nei quea caꞌa nee nee enequi tii tii —jamaya ajjima—. Jamaya Eyacuiñajji, miya quea pame nee nee —ajjima. Oya cuana jamaya jjashahuabaqui jjima, de. 
\p Jamajjeya oya cuana quea quehua jjashahuabaquiani, quea mimishi. Jiquio ecua mecajje quea misi poquiani jayojja jama oya cuana quea mimishi baꞌyani, Eyacuiñajji ba pojjimaꞌ.  
\v 22 Ojjaña ba epo poso jjabaquiani. Chojja, ba jjima nei nei quianaja. Quea mimishi nee nee jjashahuabaquiani, ojjaña de.  
\v 23 Onaaya aje oe Eyacuiñajji nisho bihuia cani; dejja nisho, cuichojji nisho, aquiana nisho, peyo nisho peaꞌai ne cani ebihuiajji. Eyacuiñajji nei ca ca bihuia jjima, de. Eyacuiñajji ca ca oe enequi tii tii quea pame nee nee. 
\p  
\v 24 Jamajjeya oya cuana quea mimishi caꞌa nee nee; jjashajjaꞌajjaqui ajja jojoya Eyacuiñajjiya oya cuana cajaa acani jama baꞌa: —Oya cuana shajjamaꞌ nei nei. Jamajjeya quea mimishi cabaꞌyahua jamatii. Eyaya oya cuana mimishi pajea meesahua maja ajja —Eyacuiñajji poani. 
\p Jamajjeya cajaa aꞌyo majje ojjaña ojaya ejjashahuabaquijji tai jayojja jama caꞌatiitii cahua cuaa. Pea cuana nijje aje oe quea mimishi nee capoahua.  
\v 25 ¡Bacue! Eyacuiñajji eꞌe jojo nei oe nei yani. Ohuaya ojjaña pana caꞌya poa. ¡Ojjañaa oya cabihuia tiitii cahua! Jamatii joya quea mimishi neeya Eyacuiñajji bihuia pajea cani eyacuiñajji nisho bihuiajji. Eꞌe, oya cuana quea jjashahuabaqui quehua poani, de.  
\v 26 Jamajoya Eyacuiñajjiya oya cuana cajaa acani jama baꞌa: —Oya cuana shajjamaꞌ nei nei. Jamajjeya jamatii quea mimishi canequiahua bichoꞌama. Ecuea oya emimishi pajea meesahuaꞌyojji pojjeama —Eyacuiñajji poani. 
\p Eꞌe, quea mimishi nee nee baꞌyani bichoꞌama. Eyacuiñajjija esohui jama baꞌe ajja. Epona cuana aje oe pea epona nijje quea mimishi nee poani, ojahue nisho acani, jjaso cojjoquiani. Pea cojjojji peaꞌai poani.  
\v 27 Dejja cuana peaꞌai aje jjaja oe jamaya quea mimishi epona jayojjaya po peaꞌai yani. Ehuanase jea majje epona nijje pojjeama jaani, pea dejja nijje quea mimishi baꞌyani. Onijje dejja nijje jjaseehuejja cojjoquiani. Jamajjeya jjashajjaꞌajjaqui ajja jojoya Eyacuiñajjiya oya cuana cajaa acani. Caꞌaꞌama poani, quea jjashahuabaqui tai poani peaꞌai. 
\p  
\v 28 Eyacuiñajjija epanaꞌyo ojaya eba. Jamatii oya cuana jama poani baꞌa: —Eꞌe pojjaꞌa Eyacuiñajji eꞌe jojo nei yani. Jamatii ¿apiojji acuae oya shajjaꞌajja cajji soꞌo? Cajaa —oya cuana poani. 
\p Jamajjeya Eyacuiñajjiya oya cuana jama acani baꞌa: —Oya cuana ca ca oe quea jjashahuabaqui tai po tiitiiani; quea mimishi baꞌyani tii bichoꞌama jjejojo. Jamatii quea tai cabaꞌyahua —Eyacuiñajji poani. 
\p  
\v 29 Jamajjeya ojjaña cuana quea mimishi nee nee poani tii tii. Eꞌe, quea mimishi baꞌyani, quea dejja tai, quea nishehui, onaja aquiana jea ba cani, pea cuana botiꞌama nei nei poani, ona mimishi po meejji peaꞌai poani.  
\v 30 Pea quecuajji poani, jjamimicuiajea nobiajeaquijji poani, jjadasiaquijji poani, ojaya epeejji iñameejji poani equecua meeꞌyojji, mimijajijji poani, pea cuanajo maimaijji, Eyacuiñajji cajaa acani, pea cuana jeabichajeajji poani, pea nijje mimi ajja peaꞌai. Oya mimiani ojaya ejjashahuabaquijjijo pea cuana quea bihui po meejji nisho, jjashahuaba tiitiiquiani mimishi yaꞌyojjijo. Oja chii, oja nae shajjaꞌajja sa po ajja peaꞌai.  
\v 31 Jjashahuabaqui ajja, mimishi cuana quea pame poso acani, ojaya ehuohui jama aꞌajja peaꞌai. Huapa pojjeama cuana botiꞌama acani, pea cuana quea nee po mee sa acani; pea quea nee, quea yeno po mee majje yenoꞌama poani.  
\v 32 Dejja quea mimishija eba Eyacuiñajjija esohui etehueꞌyo eꞌe nei jama poani baꞌa: “Ojjaña joya quea mimishi poani quea nee nee poajeꞌyo. Manoꞌyo majje cuaqui yasijje poquijeꞌyo. Enijje eyajo enequiꞌyojji pojjeama tii tii” Eyacuiñajji poani. 
\p Maya ojjaña mimishi cuanaja eba. Jamatii shajjamaꞌ poani tii tii. Pea cuana aje oe quea mimishi po mee cani jama baꞌa: —Eꞌe, ocuee. ¡Jamaya aꞌajja! —bihuia nisho cani. 
\c 2  
\s1 Eyacuiñajjiya ca ca oeyaya huohui caje joya mimishiꞌamajo, joya quea mimishijo peaꞌai 
\p  
\v 1 Ecuea epeejji cuana, ¿aꞌa miquianaya jjashahuabaquiani miya ca ca oe quea pame, ma dejja mimishi cuana jama pojjeama? ¡Aꞌa pea cuana jama ajji baꞌa: —Oya cuana quea mimishi nee poani. ¡Quea nee nee capo mee cahua Eyacuiñajjiya! —aꞌa jamaya mimijji! 
\p ¡Dee! Miquianaaya beca cuaa ona jayojja jama quea mimishi aña peaꞌai. Jamajjeya Eyacuiñajjiya miquianaya quea nee nee po mee cajeꞌyo ona jayojjaya.  
\v 2 Ecuanaja eba Eyacuiñajjija ejjashahuabaquijji eꞌe nei, ojjaña ojaya eba. Jamajjeya ojjaña joya quea mimishi baꞌyani ohuaya quea nee nee po mee cajeꞌyo, Jodio cuana, Jodio pojjeama cuana peaꞌai, ojjaña nei nei.  
\v 3 Miya quea mimishi poanijo ¡aꞌa jjashahuabaquijji jama baꞌa: —Eyacuiñajjiya pea cuana quea nee nee po mee cajeꞌyo shajjamaꞌ poani jojoya. Eya ca iña cho, quea nee epo meejji pojjeama —aꞌa jamaya pojji! 
\p ¡Dee! Miya quea mimishi poani ona jayojja. Jamajjeya Eyacuiñajjiya miya quea nee nee po mee cajeꞌyo ona nijje. Miya ojaya eba, de, ejjanequiquehuaquijji pojjeama miya.  
\v 4 Eꞌe pojjaꞌa miya quea quehua jjashahuabaquiani jama baꞌa: —Eyacuiñajji ojjaña nijje quea pame nee poani. Quenequene cuaji ajja. Joya ojaya esohui jama baꞌe ajja jamatii quea nee nee epo meejji pojjeama. Jamajjeya eya quea mimishi po tiitiianijo, jamatii ojaya eya etecueajji pojjeama —poso jjabaquiani miya. 
\p Chojja. Miya aje oe jjashahuabaquiani quea quehua nee. ¿Aꞌa miquea ba jjima? Eyacuiñajji ojjaña nijje quea pame poani, ishoa cani emimishi pajea meesahuaꞌyojji.  
\v 5 Jamajjeya miya quea mimishi nee nee jjejojo, shajjamaꞌ poani tiitiijo, Eyacuiñajjiya miya quea nee nee po mee cajeꞌyo. Eꞌe, quijje ohuaya ojjaña shajjamaꞌ poani tecuea neinei cajeꞌyo.  
\v 6 Eꞌe jojo nei Eyacuiñajjiya ojjaña eseya sosequia cajeꞌyo ma eseya aninaje sosejje. Ojaya epeejji quea pame quea bihui nee po mee cajeꞌyo. Shajjamaꞌ cuana ca ca quea nee nee po mee cajeꞌyo ma o quea mimishi ponequinaje sosejje.  
\v 7 Jamajjeya beca cuana Eyacuiñajjija esohui jama quea pame nee poani Jesosaja ejjashahuabaquijji jayojja epojji, o jayojja jama epojji, onijje ebaꞌe tiitiiꞌyojji. Eyacuiñajji quea bihui nee po mee sa acani. Jamajjeya Eyacuiñajjiya oya cuana bihuia caje jama baꞌa: —Eꞌe, miquianaya ecuea epeejji quea pame nee. Jamajjeya miquianaya enijje baꞌe tiitiijeꞌyo eyajo. 
\p  
\v 8 Pea cuana ca ca Eyacuiñajjija esohui eꞌe nei jama baꞌe sa poꞌyo ajja. Cajaa acani. Shajjamaꞌ poani. Jamajjeya Eyacuiñajji onijje quea quene tii tii poajeꞌyo. Quea nee nee po mee cajeꞌyo.  
\v 9 Eꞌe, Jodio cuana, Jodio pojjeama cuana peaꞌai Eyacuiñajjiya ojjaña quea yeno nee, quea nee nee po mee cajeꞌyo shajjamajojo.  
\v 10 Joya ojaya esohui jayojja jama quea pame poani ca ca Eyacuiñajjiya huohui caje jama baꞌa: —Eꞌe jamaya, miya quea pame poani. ¡Jamajjeya quea pame, quea bei baꞌecue! ¡Enijje baꞌe tiitiicue eyajo! ¡Enijje ojjaña huoojeajji pocue! —oya cuana acaje. 
\p Eꞌe, Jodio cuana jamaya acaje Eyacuiñajjiya, Jodio pojjeama cuana peaꞌai.  
\v 11 Ojjañajo Eyacuiñajji eꞌe jojo nei jjashahuabaquiani. Esejaya ebaꞌejjijo jjashahuabaquiani esosequiaꞌyojji. 
\s1 Eyacuiñajjija ehuohui shajjamaꞌ cuanajo eꞌe nei 
\p  
\v 12 Jodio pojjeama cuanaja ba jjima poa Eyacuiñajjija esohui ma Moisesiya tehue ca poa. Jamatii oya cuana quea nee nee po mee cajeꞌyo Eyacuiñajjiya quea mimishi baꞌyanijo. 
\p Jodio cuaa ca ca Moisesija etehueꞌyo ba canaje. Jamajjeya shajjamaꞌ poanijo, Eyacuiñajjiya oya cuana tecuea caje jama baꞌa: —Miquianaya ca mi ca shajjamaꞌ. Moisesija etehueꞌyo bajji poani, jamatii jamaya aꞌajja. Jamajjeya ma etehueꞌyojo tehue ca poa jayojja jama miquianaya quea nee nee poajeꞌyo —Eyacuiñajji poani. 
\p  
\v 13 Moisesija etehueꞌyo Eyacuiñajjija esohui ba majje jamatii Jodio cuana shajjamaꞌ poani. Jamajjeya ojaya mimishi cuana ecuijeaꞌyojji pojjeama. Ojaya esohui jama acani ca ca oe Eyacuiñajjiya mimishi cuana cuijea cajeꞌyo Jodio cuanaja.  
\v 14 Jodio pojjeama cuanaja ba jjima Eyacuiñajjija esohui Moisesija etehueꞌyo. Jamatii oya cuana ma esohui jayojja jama baꞌyani beca cuana. Eꞌe, quea jaꞌa nee jjashahuabaquiani. Jamaya ojaya eba quea pame ebaꞌejji. Ojaya eba ebaꞌejji quea tai peaꞌai. Eꞌe, Moisesija etehueꞌyo Jodio pojjeama cuanaja ba jjima nei.  
\v 15 Jamatii, Eyacuiñajjiya oya cuana ba meesahua cani ojaya ejjashahuabaquiꞌyojji. Jamajjeya oya cuana oja mimishijo jama poani baꞌa: —Chojja, jamaya Eyacuiñajjija botiꞌama. Eya shajjamaꞌ jayojja poani. 
\p Joya quea pame baꞌyani jama poani baꞌa: —Eꞌe, jamaya quea pame ebaꞌejji. Jamaya Eyacuiñajjija quea boti nee —oya cuana poani. 
\p  
\v 16 Eꞌe, Eyacuiñajjija eba ojjañaja ejjashahuabaquijji cuana. Jamajjeya quijje ohuaya eꞌe jojo nei huohui cajeꞌyo ojjañaja ebaꞌejjijo. Ohuaya Jesosa huoojea caje jama baꞌa: —Jesosa, ¡oya cuana sosequiacue ma ohua meshijo baꞌyahuaa acanaje sosejje! —Eyacuiñajjiya acajeꞌyo. 
\p Jamaya eyaya, Pabohua huohuiaña ojjaña esohui quea pame nee Jesosajo. 
\s1 Jodio cuana Moisesija etehueꞌyo ba majje jamatii shajjamaꞌ poani 
\p  
\v 17 Jodio cuana, miquianaya mimi huichaꞌa huichaꞌani jama baꞌa: —Ecuana ca ca oe Jodio cuana, Eyacuiñajjija babaca ojaya nei epojji. Ohuaya ecuana ojaya esohui ba mee ca poa Moisesija etehueꞌyo. Jamajjeya ohuaya ecuana ba cani mimishiꞌama —miquianaya poani—.  
\v 18 Eꞌe, ecuaaya baña Eyacuiñajjija esohui Moisesija etehueꞌyo. Jamajjeya ecuanajaya eba Eyacuiñajjija ejjashahuabaquiꞌyojji. Jamajjeya ecuana baꞌyani quea pame nee, mimishiꞌama —miquianaya poani. 
\p  
\v 19 Jamajjeya miquianaya jama poani peaꞌai baꞌa: —Jodio pojjeama cuana, Eyacuiñajjija esohui ecuanajaya eba nei nei Jodioja jjejojo. ¡Ecuana jayojjaya oe pocue! —miquianaaya aña—. Ecuaaya Eyacuiñajjija esohui baña Jodiohua jjejojo. Jamajjeya ecuanaya cuaquijiji jayojja jama poani. Jiquio ecua mecajje quea misijo cuaquijijiya ejiojji ba mee cani jayojja jama ecuaaya joya Eyacuiñajji ba pojjimaꞌ cuana quea jaꞌa nee baꞌe meesahuaña.  
\v 20 Eꞌe, joya Eyacuiñajji ba pojjimaꞌ cuana, Eyacuiñajji oe pojji ba epo peaꞌai ecuaaya esohui ba meesahuaña. Eyacuiñajjiya ecuana ojaya esohui etehueꞌyo ba mee ca poa. Ma esohui eꞌe jojo nei —jamaya miquianaaya aña. 
\p  
\v 21 Miquianaaya pea cuana esohui huohui huichaꞌa huichaꞌaña. Jamatii miquea ehuohui jayojja jama baꞌe ajja miquianaya. Eꞌe, jama huohuime aña baꞌa: —¡Aꞌa jja oe sii pojji! 
\p Jamajjeya ¿apiojji acuae jja oe miya sii poani? 
\p  
\v 22 —¡Aꞌa pea cojjojji! —huohui aña miyaya. 
\p Jamajjeya ¿apiojji acuae jja oe miya pea cojjojji poani soꞌo? 
\p —¡Aꞌa eyacuiñajji nisho bihuiajji oe! —huohuime aña. 
\p ¿Apiojji acuae jja nequiaa oe Eyacuiñajji bihuia nishoaña quea aquiana jeaa jjejojo? 
\p  
\v 23 Miquianaya mimi huichaꞌa huichaꞌani Moisesija etehueꞌyojo: —Ecuana ca jja ca oe Eyacuiñajjiya ojaya esohui etehueꞌyo ba mee ca poa —ca jja nequiana ca oe poani. 
\p Jamajjeya apiojji shai miquianaya onijje jjapee nishoquiani, ojaya esohui jayojja jama baꞌe tiitii ajja.  
\v 24 Eꞌe, yahuajo nei Eyacuiñajjija etehueꞌyo jama poa baꞌa: 
\q1 “Jodio cuana, miquianaya ca jja ca oe shajjamaꞌ baꞌyani. Mi ba majje Jodio pojjeama cuaa Eyacuiñajji cajaa acani”. 
\m Jamaya Eyacuiñajjija esohui yahuajo nei etehueꞌyo poa. 
\s1 Cuiishasha biso nei jehuisejjajea majje pojjeama eseya Eyacuiñajjija epeejji nei poani 
\p  
\v 25 Jodio cuana, yahuajo nei esejaya etiiquianaa Moisesiya Eyacuiñajjija esohui tehue ca poa jama baꞌa: —¡Mique bacuaja cuiishasha biso nei jehuisejjajeacue! 
\p Jamaya eseyaya aña, Eyacuiñajjija esohui yahuajo nei jayojjaya aña. Jamajjeya Eyacuiñajjija etehueꞌyo jayojja jama quea pame nee baꞌyanijo cuiishasha ejehuisejjajeaꞌyo quea pame. Jamaya ojjaña ba meeaña eseya, Jodio cuana Eyacuiñajjija babacaꞌyo o peejji epojji. Jamatii Eyacuiñajjija esohui etehueꞌyo jayojja jama baꞌe ajja ca ca ¿apiojji acuae cuiishasha biso nei jehuisejjajeaña soꞌo? Jamatii Eyacuiñajjiya miquianaya ba cani Jodio pojjeama jayojjaya quea mimishi peaꞌaiya.  
\v 26 Jodio pojjeamaa ca ca cuiishasha jehuisejjajea ajja. Jamaya po ajja oya cuana. Jamatii beca cuana Eyacuiñajjija esohui etehueꞌyo quea jaꞌa nee jayojja jama baꞌyani. Jamajjeya Eyacuiñajjiya oya cuana ba cani Jodio jayojjaya, ojaya ebabacaꞌyo, jamatii cuiishasha jehuisejjajea jjima.  
\v 27 Jodio cuana, miquianajaya eba Eyacuiñajjija esohui. Cuiishasha jehuisejjajeaña peaꞌai. Jamatii aje oe Eyacuiñajjija esohui etehueꞌyo jayojja jama baꞌe ajja. Jamajjeya Eyacuiñajjiya miquianaya ba cani shajjamaꞌ. Jodio pojjeamaa ca ca cuiishasha jehuisejjajea ajja. Jamatii Eyacuiñajjija esohui jayojja jama baꞌyanijo, ohuaya oya cuana ba cani mimishiꞌama, quea pame.  
\v 28 Eꞌe, eseya Eyacuiñajjija esohui jayojja jama baꞌyanijo ojaya epeejji nei poani, cuiishasha jehuisejjajea majje pojjeama. ¿Aꞌa miquianaaya cuiishasha jehuisejjajeaña? ¿Aꞌa mimishi pajeaꞌyonaje peaꞌai?  
\v 29 Eyacuiñajjija esohui jayojja jama añajo ca ca miquianaya ojaya epeejji nei poani. Beca cuanaja cuiishasha jehuisejjajea jjima; jamatii Edojjashahua Pameya pea jjashahuabaquime po mee caꞌyani Jesosaja epeejji nei epojji. Jamajjeya miquianaya Jesosaja epeejji eꞌe jojo nei poani. Pea cuaa pojjaꞌa miquianaya Jesosaja epeejji pojjeama poso acani, miquea cuiishasha jehuisejjajea jjimajojo. Jamatii Eyacuiñajjija eba miquianaya ojaya epeejji nei poani. 
\p Jamajjeya ojjaña joya Eyacuiñajjija esohui jayojja jama baꞌyani ojaya epeejji nei poani, Jodio cuana, Jodio pojjeama cuana peaꞌai, ecuiishasha jehuisejjajeaꞌyo cuana, ecuiishasha jehuisejjajeaꞌyo pojjeama cuana peaꞌai. 
\c 3  
\s1 Eyacuiñajji eꞌe jojo nei, quea jaꞌa nee nee poani 
\p  
\v 1 Jodio cuana, ¿aꞌa miquianaya jjashahuabaquiani? Jama baꞌa: —Eyacuiñajjiya Jodio pojjeama cuana ojaya epeejji nei po mee cani ecuana jayojjaya. Jamajjeya ¿apiojji acuae etiiquianaja ehuohuiꞌyo jayojja jama cuiishasha jehuisejjajeaña? ¿Aꞌa Jodio pojjeama epojji quea pame nee nee, Jodio epojji quea pame pishana? —miquianaya pojjaꞌa jamaya poani. 
\p  
\v 2 Quea pame nee Jodio epojji. ¡Bacue! Eyacuiñajjiya eseya Jodio cuana yahuajo nei nei ojaya esohui etehueꞌyo ba mee ca poa, ba majje pea cuana huasijje ehuohuiꞌyojji peaꞌai.  
\v 3 Eꞌe, Eyacuiñajjiya esejaya etiiquiana Amajama bajjani huohui ca poa jama baꞌa: —Eyaya mique osecua cuana quijje nei nei baꞌeje quea pame nee nee ajeꞌyo; ecuea esohui quea pame jayojja jama ajeꞌyo —Eyacuiñajji poa. 
\p —Esejaya etiiquiana Eyacuiñajjija esohuijo shajjamaꞌ poajo, ¿aꞌa Eyacuiñajjiya ojaya esohui pajea cajeꞌyo pojjaꞌa? ¿Aꞌa jamaya yajji pojjeama pojjaꞌa? —miquianaya poani pojjaꞌa. 
\p  
\v 4 ¡Chojja de! Dejja cuana siajje poani, ojjaña. Eyacuiñajji ca ca siajje po ajja nei nei. Ma ecua ohua huohui canaje jayojjaya ohuaya acajeꞌyo. Ojaya esohui yahuajo nei etehueꞌyo jama poa baꞌa: 
\q1 “Eyacuiñajji, miyaya ca ca oe esohui eꞌe nei huohuiaña tii tii. Miquea ejjashahuabaquiꞌyojji ba majje ojjañaa ba caje miya eꞌe jojo nei poani, siajje po ajja nei nei”. 
\m Jamaya Eyacuiñajjija esohui yahuajo nei tehue ca poa. 
\p  
\v 5 Jodio cuana, miquianaya jjashahuabaquiani quea quehua, de; jamaya poso nequiana jjabaquiani baꞌa: —Ecuana quea mimishi poanijo, ojjañaa Eyacuiñajji bihuia caje jama baꞌa: “Eyacuiñajji oe nei quea jaꞌa nee poani, oe nei quea pame”. Jamajjeya ¿apiojji shai Eyacuiñajjiya ecuana quea nee nee po mee cajeꞌyo quea mimishi poanijo? —jamaya miquianaya Eyacuiñajji ba po jjima jayojja jama jjashahuabaquiani, quea quehua. 
\p  
\v 6 Chojja Jodio cuana, jamaya pojjeama. Jamaya eꞌe nei poa jojjemo Eyacuiñajjiya mimishi cuana tecuea jjima acaꞌyome. Eyacuiñajjiya eꞌe nei nei acani tii tii. Eꞌe jojo nei ojjaña shajjamaꞌ cuana ohuaya quea nee nee po mee cajeꞌyo mimishi poani sosejje.  
\v 7 Jamatii miquianaya quea quehua jjashahuabaquiani jama peaꞌai baꞌa: —E siajje poanijo pea cuaa Eyacuiñajji bihuia cani jama baꞌa: “Eyacuiñajji oe nei siajje po ajja nei nei” acaje cuaa. Jamajjeya ¿apiojji shai Eyacuiñajjiya eya quea nee nee po mee cajeꞌyo siajje poanijo? —miquianaya aje jja oe jamaya poani. 
\p  
\v 8 Cho, jamaya pojjeama. Jamaya eꞌe nei poa jojjemo, ca ca e siajje poanijo pea cuaa Eyacuiñajji bihuia cani ecuana siajjepojji pome. Eꞌe, beca cuaa aje oe eya niñeba cani jama baꞌa: —Pabohua aje jja oe jamaya huohui cani baꞌa: “¡Quea mimishi oe pocue pea cuana quea pame nee ebaꞌe meesahuajji!” —onaaya jama eya niñebameya acani. Cho, eya jamaya po ajja. ¡Jamaya niñeba canijo, Eyacuiñajjiya oya cuana quea nee nee capo mee cahua, de! 
\s1 Eyacuiñajjiya ojjaña cuana ba cani shajjamaꞌ jayojja 
\p  
\v 9 Jodio pojjeama cuana shajjamaꞌ nei nei poani. ¿Aꞌa Jodio cuana shajjamaꞌ pishana? Chojja, Jodio cuana Jodio pojjeama cuana jayojjaya jama poani. Ojjaña shajjamaꞌ nei nei peaꞌai poani.  
\v 10 Eyacuiñajjija esohui yahuajo nei nei Dabiya tehue ca poa jama baꞌa: 
\q1 “Ecuea esohui jayojja jama aꞌajja ojjaña cuaa. Chamaꞌ joya quea pame poani.  
\v 11 Ecuea esohui eꞌe nei ba sa po ajjajo ojaya ba jjima ecuea ejjashahuabaquiꞌyojji. Oya cuana e ba sa poꞌyo ajja peaꞌai.  
\v 12 Chojja, oya cuana eshahua nijje poani, enijje jjapeequi ajja quea mimishi jjejojo. Shajjamaꞌ jjejojo quea pame po ajja ojjaña cuana.  
\v 13 Ojjañaa esohui quea tai nee nee acani. Quea tai nee nee ojjañaja esohui, aquiana quea ihui jayojja. Ojjaña siajjepojji peaꞌai, siajje popajeaꞌyo ajja peaꞌai. Ojjaña mimijajijji poani peaꞌai. Quea tai nee nee ojjaña poani. Jiquio ecua peyo se naa quea nee nee po mee cani jayojja jama ojjaña cuaa onaya quea yeno po mee cani.  
\v 14 Ojjaña quea tecue nee nee poani, panajajiani peaꞌai.  
\v 15 Oya cuana quenequene cuaji majje jjaquecuaquiani.  
\v 16 Oya cuana aje oe ona quea mimishi pomeejji poani; ojjaña quea yeno nee nee po mee cani.  
\v 17 Ojjaña quea bei baꞌe ajja tii tii.  
\v 18 Ejo jjashahuabaqui ajja tii tii, jjashajjaꞌajjaqui ajja peaꞌai”. 
\m Jamaya Eyacuiñajjiya yahuajo nei tehue mee ca poa. 
\p  
\v 19 Jamatii esejaya eba Jodio cuana jama siajje poani baꞌa: —Eyacuiñajjija esohui Moisesija etehueꞌyo jayojja jama ecuanaaya aña. 
\p Jamatii Eyacuiñajjiya Jodio cuana jama acani baꞌa: —Miquianaya aje oe ecuea esohui ba majje jama aꞌajja. Shajja huejjamaꞌ jayojja miquianaya poani. 
\p Jamajjeya Eyacuiñajjiya ojjaña cuana quea nee nee po mee cajeꞌyo; Jodio cuana, Jodio pojjeama cuana peaꞌai quea jeca poajeꞌyo, quea mete poajeꞌyo shajjamaꞌ poani jjejojo. 
\p  
\v 20 Eꞌe, Eyacuiñajjija esohui Moisesija etehueꞌyo ba majje ojjaña cuana jama poaje baꞌa: —Eꞌe, eya shajjamaꞌ jayojja jama poani —ojjaña poaje. 
\p Jamajjeya Eyacuiñajji ojjaña nijje mimi ajja jama baꞌa: —Miquianaaya ecuea esohui etehueꞌyo jayojja jama eꞌe jojo nei aña. Jamajjeya miya quea pame nee nee —jamaya mimi ajja Eyacuiñajji. Chojja, ojjaña shajjamaꞌ poani, ojjaña tii. 
\s1 Jesosa nijje eꞌe jojo nei jjapeequianijo Eyacuiñajjiya esejaya mimishi cuijea cajeꞌyo 
\p  
\v 21 Yahuajo nei nei Eyacuiñajjija esohui huohuijjiya, Moisesiya peaꞌai jama sohuihuohuime aca poa baꞌa: “Ojjaña joya eꞌe jojo nei onijje jjapeequiani Eyacuiñajjiya quea boejea po mee cajeꞌyo” yahuajo jama huohuimeya aca poa. Jamatii ojjaña jjashahuabaquinaje Eyacuiñajjiya ojjañaja mimishi cuijea cajeꞌyo Moisesija esohui etehueꞌyo jayojja jama añajo poso.  
\v 22 Eꞌe, Eyacuiñajjiya esejaya mimishi cuana cuijea cani jama huohuime amajje baꞌa: —Ecuea eba Jesosa Quitohua ecuea mimishi cuijea cajeꞌyo. Eya onijje jjapeequijeꞌyo. 
\p Eꞌe, Jodio cuana Jodio pojjeama jayojjaya jama acajeꞌyo Eyacuiñajjiya.  
\v 23 Ojjaña cuana ojjaña meshijo baꞌe quea mimishi nee poani. Jamajjeya Eyacuiñajji ojjaña cuana nijje quea bihui pojjeama, o jayojja jama po ajjajojo.  
\v 24 Jamatii Eyacuiñajji quea pame nee nee. Ojjaña quea jea nee acanijo ojjaña shajjamaꞌ cuanaja mimishi cuijeaꞌyo majje ojjaña ba cani mimishiꞌama. Jamaya Eyacuiñajjiya acani Jesosa Quito ojjaña cuanaja mimishi cuijeaꞌyojji sosejje manoꞌyonajejo.  
\v 25 Eꞌe, Jesosa Quito esejaya mimishijo manoꞌyonaje; ojaya enaꞌ cuayaquinaje. Jamajjeya ojjaña eseya jama mimianijo baꞌa: —Jesosa Quito manoꞌyonaje ecuea mimishijo —jamaya poanijo, Eyacuiñajjiya esejaya mimishi cuijeaꞌyo majje eseya ba cani mimishiꞌama. 
\p Eꞌe, Eyacuiñajjiya Jesosa ba ca poa ñajjajja equecuaꞌyo jayojja, ma ona mimishi cuana nijje quea bei nee epojji. Eyacuiñajjiya oya Jesosa Quito mano mee caꞌya poajo, ojjaña ba mee cani oya eꞌe jojo nei quea pame poani. Eyacuiñajji jama poani baꞌa: —Mimishi cuana sosequiaꞌyojji oe dejja camanoquiꞌyahua. 
\p Yahuajo nei nei Jesosa manoꞌyo jjimahuajo ojjaña cuana shajjamaꞌ poa. Jamatii Eyacuiñajjiya ishoa canaje; mimishi cuijeaꞌyo jjima acanaje Jesosa manoꞌyo jjimahuajo. Jamajjeya Jesosa manoꞌyo jjimahuajo, dejja mimishi cuana jjashahuaba quehuaqui canaje jama baꞌa: —Eyacuiñajjiya pajea caꞌyonaje ecuanajaya mimishi cuana jamatii pojjaꞌa —poanaje. 
\p Jjeya ca ca Jesosa Quito manoꞌyonaje mimishi cuijeaꞌyojji sosejje. Jamajjeya Jesosa manoꞌyajo, Eyacuiñajjiya ojjaña ba mee cani ohuaya jamatii pojjeama etiiquianaja mimishi pajea caꞌyonaje.  
\v 26 Jjeya peaꞌai Eyacuiñajjiya esejaya mimishi cuana cuijea caꞌyani Jesosa nijje jjapeequianijo. Jamajjeya ohuaya ojjaña ba mee cani oya quea pame nee nee poanijo Jesosaja epeejji cuanaja mimishi cuana cuijea caꞌyani. Eyacuiñajji jama poani baꞌa: —Jesosa miquea mimishijo manoꞌyonajejo, eyaya miquianaya baña mimishiꞌama —Eyacuiñajji poani. 
\s1 Jesosa nijje jjapeequianijo ca ca oe Eyacuiñajjiya eseya ba cani emimishi cuijeaꞌyo 
\p  
\v 27 Eseya jama po ajja baꞌa: —Eyaya ca eya Moisesija etehueya jayojja jama añajo, Eyacuiñajjiya eya mimishi cuijea caꞌyonaje —eseya jamaya po ca ajja nei nei.  
\v 28 Jamajjeya esejaya eba jama baꞌa: Jesosaja epeejji nei poanijo ca ca oe Eyacuiñajjiya eseya ba cani emimishi cuijeaꞌyo, quea pame. Jamajjeya Moisesija etehueꞌyo jayojja jama baꞌyanijo pojjeama mimishi cuijea caꞌyani Eyacuiñajjiya. Chojja, shajjamaꞌ ojjaña poani; chamaꞌ joya Moisesija etehueꞌyo jayojja jama baꞌyani tii. 
\p  
\v 29 Jodio cuana, eyaya miquianaya huohuiꞌajjaña jama baꞌa: —¿Aꞌa Eyacuiñajjiya Jodio cuanaja mimishi cuijea cani, Jodio pojjeama cuanaja mimishi cuijea sa po ajja pojjaꞌa? 
\p Chojja. Jamaya pojjeama. Eyacuiñajjiya ojjañaja mimishi cuijea cani Jesosa nijje jjapeequianijo.  
\v 30 Ohuaya ojjaña acani oya jayojjaya Jodio cuana, Jodio pojjeama cuana peaꞌai. Jamajjeya Jesosa nijje jjapeequianijo, Eyacuiñajjiya eseya ba cani emimishi cuijeaꞌyo, Jodio pojjeama cuana peaꞌai, de.  
\v 31 Jamajjeya eseya, Jodio cuana Jesosa nijje jjapeequianijo, ¿aꞌa Eyacuiñajjija esohui etehueꞌyo jayojja jama caꞌapajeaꞌyahua? Chojja de. Jesosaja epeejji poanijo ca ca eseyaya ojaya esohui jayojja jama ejjaꞌaqui o quea bihui nee epo meejji. 
\c 4  
\s1 Onijje jjapeequianijojo Eyacuiñajjiya Amajamaja mimishi cuijea caꞌyonaje 
\p  
\v 1 ¡Jjashahuabaquicue Amajamajo, esejaya etiiquianajo, ma ojjaña Jodio cuanaja etiiquianajo! ¿Yajjajo shai Eyacuiñajjiya oya huohui ca poa soꞌo? Jama baꞌa: —Amajama, eyaya miya baña emimishi cuijeaꞌyo, ecuea epeejji nei. 
\p ¿Aꞌa Eyacuiñajjiya jamaya aca poa Amajama ojaya esohui etehueꞌyo jayojja jama baꞌya poajo?  
\v 2 Chojja. Eyacuiñajjiya Amajamaja mimishi cuijea caꞌya poa ojaya esohui etehueꞌyo jayojja jama baꞌya poajo poso miquiaaya aña. Chojja. Eyacuiñajjiya Amajama jama aca poa ojaya esohui etehuiꞌyo joyajja jama baꞌya poa jojjemo Amajama jama mimime poquiaye baꞌa: —Eya ca ca iña quea pame nee, de. Ojjaña Eyacuiñajjija esohui etehueꞌyo jayojja añajo, ohuaya ecue mimishi cuijea caꞌyonaje —Amajama jama mimimeya poquiaye. 
\p ¡Dee! Beca cuana jamaya jjashahuaba quehuaquiani. Eyacuiñajji ca ca jamaya jjashahuabaqui ajja.  
\v 3 Ojaya esohui yahuajo etehueꞌyo jama poa baꞌa: —Amajama Eyacuiñajji nijje jjapeequia poa. Jamajjeya Eyacuiñajjiya oya jama aca poa baꞌa: “Amajama, eyaya miya baña emimishi cuijeaꞌyo” aca poa —jamaya esohui yahuajo nei etehueꞌyo poa, Eyacuiñajjija. 
\p  
\v 4 ¡Bacue! Dejja chacochacoajo, casosequia cahua echacomeejjiya. Echacomeejjiya sosequia cani jamatii pojjeama, chaco sosejje, de.  
\v 5 Eyacuiñajjiya ca ca esejaya mimishi cuana cuijea cani etehueꞌyo jayojja jama baꞌyanijo sosejje pojjeama. Chojja. Jesosa nijje jjapeequianijo, ohuaya eseya ba cani emimishi cuijeaꞌyo jamatii. Eꞌe, oya shajjamaꞌ nei nei cuana ba cani mimishiꞌama peaꞌai Jesosa nijje mimi jeahuajo, onijje jjapeequi jeahuajo peaꞌai.  
\v 6 Maya esejaya etiiquiana Dabi bajjanija eba poa. Jamajjeya jama jjashahuabaquimeya poa baꞌa: “Eyacuiñajjiya eseya ba cani emimishi cuijeaꞌyo. Ojaya esohui etehueꞌyo jayojja jama baꞌyani sosejje pojjeama Eyacuiñajjiya eseya ba cani emimishi cuijeaꞌyo. Quea bihui nee capoahua mimishi cuijea caꞌyajje”.  
\v 7 Jamaya Dabiya yahuajo nei tehue ca poa baꞌa: 
\q1 “Eyacuiñajjiya oja mimishi cuijea cajo, quea bihui nee capoahua ojjaña shajjamaꞌ cuana. Quea boejeaꞌyo po mee canijo, quea bihui nee nee capoahua.  
\v 8 Shajjamaꞌ cuana quea bihui nee capoꞌyahua Eyacuiñajjiya oya shajjamaꞌ pojjeama ba canijo, de”. 
\m Jamaya esejaya etiiquiaa Dabiya tehue ca poa yahuajo nei. 
\p  
\v 9 ¿Aꞌa ohuaya maya tehue ca poa Jodio ca ca oe mimishi jamatii cuijea cajo quea bihui poaje? Chojja. Jodio pojjeama peaꞌai quea bihui poaje mimishi jamatii cuijea caꞌyajje. Eꞌe, Eyacuiñajjija esohui etehueꞌyo jama poa peaꞌai baꞌa: “Onijje jjapeequianijo, Eyacuiñajjiya Amajama ba ca poa emimishi cuijeaꞌyo” anaje. (Amajama baꞌeya poa Moisesi cuaya jjimahuajo.)  
\v 10 ¿Ache shono acuae Eyacuiñajjiya Amajama ba ca poa emimishi cuijeaꞌyo? ¿Aꞌa cuiishasha biso nei jehuisejjajea cajo pojjaꞌa? ¿Aꞌa jehuisejjajea jjimahuajo pojjaꞌa oya emimishi cuijeaꞌyo ba ca poa, Eyacuiñajjiya?  
\v 11 Cuiishasha jehuisejjajea jjimahuajo ca jja ca oe Eyacuiñajjiya Amajama ba ca poa emimishi cuijeaꞌyo. Jamajjeya ¿yajjajo shai jehuisejjajea mee ca poa? Jama baꞌa: Quijje Amajamaa jamaya aca poa onajaya ebajji oya Eyacuiñajji nijje jjapeequianijo ca ca oe ohuaya oya emimishi cuijeaꞌyo ba caꞌya poa, cuiishasha jehuisejjajea jjimahuajo. Jamajjeya oya jayojjaya Jodio cuana, Jodio pojjeama cuana peaꞌai Jesosa nijje jjapeequianijojo Eyacuiñajjiya eseya ba cani quea boejeaꞌyo, cuiishasha ejehuisejjajeaꞌyo pojjeamajo, de. Jamajjeya Amajama Jodio pojjeama cuanaja etiiquiana jayojja jama esejaya peaꞌai, ca Jesosaja epeejji poanija.  
\v 12 Oya Amajama esejaya, Jodio cuanaja etiiquiana poa. Jamajjeya Amajamaa jayojja jama cuiishasha jehuisejjajeaña eseyaya, Jodio cuaaya. Amajama Eyacuiñajji nijje jjapeequia poa cuiishasha jehuisejjajea jjimahuajo. Jamajjeya Jodio cuana jjeya Amajamaja osecua nei poani Jesosa nijje jjapeequiani jojoya, cuiishasha jehuisejjajea majje pojjeama. 
\s1 Eyacuiñajjiya ojaya esohui jayojja jama acajeꞌyo esejo, onijje jjapeequiajo 
\p  
\v 13 Eꞌe, yahuajo nei onijje jjapeequianijo Eyacuiñajjiya Amajama ba ca poa mimishiꞌama. Ojaya ehuohuiꞌyo jayojja jama po jjimahuajo ca ca Eyacuiñajjiya Amajamaja mimishi cuijea caꞌya poa. Jamajjeya Eyacuiñajjiya Amajama huohui ca poa jama baꞌa: “Amajama, eyaya miya, mique osecua cuana peaꞌai emeshi mese po meeaña ojjaña meshi yasijje” Eyacuiñajjiya jamaya aca poa Amajama onijje jjapeequianijojo.  
\v 14 Jamajjeya ojjaña Moisesija etehueꞌyo ajji poani oe nei eyajo ebaꞌe tiitii meeꞌyojji jojjemo eseya Jesosaja epeejji cuana eyajo baꞌe tiitiiꞌyo jjima pome, Eyacuiñajjiya ma Amajama nijje ohua huohui ca poa jama eꞌajji pojjeama pome peaꞌai.  
\v 15 Eꞌe, Moisesija etehueꞌyo jama aꞌajjajo, Eyacuiñajjiya quea nee nee po mee cajeꞌyo shajjamaꞌ cuana. Jamatii Eyacuiñajjija esohui ba mee jjima jojjemo shajjamaꞌ cuana chamaꞌ pome. Chamaꞌ joya esohui etehueꞌyo jayojja jama baꞌyani. 
\p  
\v 16 Jamajjeya Eyacuiñajjiya quea pame huohui ca poa ojjaña onijje jjapeequianijo. Eseya ojaya quea jea nee nee. Oya siajje po ajja nei nei peaꞌai. Jamajjeya ma ohua Amajama nijje huohui ca poa jayojja jama ohuaya acajeꞌyo eꞌe jojo nei Amajamaja osecua cuana nijje. Eꞌe, ohuaya jamaya acaje ojjaña ese nijje, Jesosa nijje jjapeequianijo; Jodio cuana nijje, Jodio pojjeama cuana nijje peaꞌai. Eꞌe, Jesosa nijje jjapeequianijo eseya Amajama jayojja, Eyacuiñajjija epeejji nei nei ma ecua Amajama poa jamaya eseya. Jamaya Eyacuiñajjiya ojjaña eseya ba cani Amajamaja osecua cuana.  
\v 17 Eyacuiñajjija esohui ma ohua Amajama huohui ca poa ohuaya yahuajo nei tehue mee ca poa jama baꞌa: “Amajama, eyaya miya ojjaña dejja cuanaja, pea jaajjija esohui mimianija etiiquiana po meejeꞌyo, ojjañaja etiiquiana”. Jamaya Eyacuiñajjiya yahuajo nei tehue mee ca poa ojjaña ojaya epeejji cuanaja. Jamajjeya onijje jjapeequianijo, Eyacuiñajjiya eseya Amajamaja osecua cuana po mee cani. Eꞌe, ohuaya quea caꞌa nee nee, ojjaña acani. Emanoꞌyo cuana shequi mee caꞌyani; ojjaña aquiana ma yahuajo chamaꞌ poa ohuaya pana cani, Eyacuiñajjiya. 
\p  
\v 18 Jamajjeya Amajama tii nojinojiꞌya poa bacuamaꞌ tii. Jamatii Eyacuiñajjiya oya huohui ca poa jama baꞌa: “Amajama, miquea osecua cuana quea huiso nee nee poaje. Emeshi mese cuana poajeꞌyo ojjaña meshi cuana huasijje” jamaya Eyacuiñajji poa. Jamajjeya Amajama jjashahuabaquinaje jama baꞌa: —Eꞌe de, eya etii nei nei. Jamatii Eyacuiñajjiya eya eꞌe nei huohui cani. Jamaya caꞌa cahua ohuaya. Eya quea osecua huiso nee nee poaje. 
\p Eꞌe jojo nei jamaya acanaje Eyacuiñajjiya, ma ecua ohuaya huohui canaje jamaya acanaje. Amajama quea osecua huiso nee nee po mee canaje, majameta huisoajja sico meemee ajja, quea huiso nee nee.  
\v 19 Eyacuiñajjija esohui shajjaꞌajja majje Amajama jjashahuabaquia poa jama baꞌa: —Eya etii nei nei, 100 shequiajame etii. Ecuea ehuanase peaꞌai etii nei, bacuamaꞌ peaꞌai. Jamatii eshoꞌyahua jjamejoqui jjima poanaje. Jamatii Eyacuiñajjiya ma ecua eya huohui canaje jamaya ohuaya caꞌa cahua. Ecuea ebacua eꞌe jojo nei cuayaje, dejja —Amajama poanaje.  
\v 20 Jama po majamajanequinaje tii tii baꞌa: —Eyacuiñajjiya eya eꞌe nei huohui canaje. Ohuaya eya jamaya amee caje. Oya ca ca oe siajje po ajja nei nei —jamaya mimi majamajanajejo Amajama Eyacuiñajjija epeejji quea caꞌa nee nee poanaje. Bihuia ca poa jama baꞌa: —Eꞌe Eyacuiñajji, jamaya. Miyaya eya quea pame nee aña tii.  
\v 21 Eꞌe, miyaya quea caꞌa nee nee poanijo, miquea ehuohuiꞌyo jayojja jama ajeꞌyo eꞌe jojo nei. 
\p  
\v 22 Amajama jamaya jjashahuabaquianijo, Eyacuiñajjiya oya huohui caꞌya poa: “Amajama, miya enijje jjapeequianijo, eyaya miya baña mimishiꞌama. Miquea mimishi ecuijeaꞌyo” Eyacuiñajjiya oya aca poa. 
\p  
\v 23 Eꞌe, Eyacuiñajjiya huohui ca poa Amajamaja ebajji jama baꞌa: “Enijje jjapeequianijo eyaya miya baña mimishiꞌama” Eyacuiñajji poanaje.  
\v 24 Eyacuiñajjiya jama tehueme aca poa esejaya ebajji ohuaya Amajama mimishi cuijea caꞌya poa onijje jjapeequianijo. Jamajjeya esejaya eba Amajama jayojjaya onijje jjapeequiajo, Eyacuiñajjiya eseya jama acaje peaꞌai baꞌa: “Eyaya miya baña mimishiꞌama peaꞌai” Eyacuiñajjiya eseya acaje, de. Oya ca ca oe quea caꞌa nee nee, ojjaña ohuaya acani; Jesosa esejaya Emeshi Mese nei emanoꞌyojaa shequi mee ca oꞌoyanaje.  
\v 25 Eꞌe, ojjaña quea mimishi poanijo, Eyacuiñajjiya Jesosa huoojea canaje emanoꞌyojji esejaya mimishi sosequiaꞌyojji. Majoya Eyacuiñajjiya oya shequi mee ca oꞌoyanaje. Shequi oꞌoya majje Jesosa jama poanaje baꞌa: —Ecue Chii, ¡bacue! Ecuea epeejji cuanaja mimishi cuijeaꞌyojji sosejje eya manoꞌyonaje. Oya cuana jjeya mimishiꞌama enijje jjapeequianijo —oya Jesosaa acanaje. 
\c 5  
\s1 Eyacuiñajjiya eseya mimishiꞌama ba cani 
\p  
\v 1 Eꞌe, Jesosa nijje jjapeequianijo, Eyacuiñajjiya eseya ba cani emimishi cuijeaꞌyo. Jamajjeya Jesosa nijje, Emeshi Mese nei nijje jjapeequianijo, ohuaya Eyacuiñajji quea bei po mee cani ese nijje. Yahuajo ca ca quea mimishi poanijo, ese nijje quea quene nee poanaje.  
\v 2 Jesosa nijje jjapeequi majje eseya Eyacuiñajji nijje meteꞌama mimiani. Eseya jama poani baꞌa: —Jesosa ecuanajo manoꞌyonajejo, ecuana Eyacuiñajjijo meteꞌama; oya ecuana nijje quea bei nee po mee canaje Jesosaa. Cuanaya ecuana quea bihui nee jjashahuabaquiani quea jaꞌa nee jama baꞌa: “Eyacuiñajjiya eꞌe jojo nei ecuana baꞌe tiitii mee cajeꞌyo onijje eyajo” —jamaya eseya poani. 
\p  
\v 3 Jesosa nijje jjapeequianijo, pea cuaa eseya napa cani. Quea camaja poani. Jamatii eseya quea bihui nee poani, yenoꞌama. Dejja mimishiya napa cajje eseya Jesosaja epeejji quea caꞌa nee poajeꞌyo.  
\v 4 Eseya quea bihui nee Jesosa nijje jjapeequi pajeaꞌyo ajja jamatii onaa napa cajo, Eyacuiñajjiya eseya huohui cani jama baꞌa: —Eꞌe, jamaya miya quea pame nee poani. 
\p Eyacuiñajjiya eseya quea pame ba canijo, eseya jama poani peaꞌai baꞌa: —Eꞌe jojo nei Eyacuiñajjiya eseya onijje baꞌe tiitii mee cajeꞌyo eyajo. 
\p  
\v 5 Eꞌe, esejaya eba Eyacuiñajjiya ojaya ehuohui jayojjaya acajeꞌyo. Ohuaya Edojjoshahua Pame huoojea canaje ese ba meejji jama baꞌa: —Eꞌe jojo nei Eyacuiñajjiya oja sohui jayojjaya acajeꞌyo; miquianaya onijje baꞌe tiitii mee cajeꞌyo. Miquianaya ojaya quea jea nee nee —jamaya eseya Edojjoshahua Pameya jjashahuabaqui mee cani. 
\p  
\v 6 Eꞌe, Jesosa manoꞌyo jjimahuajo eseyaya Eyacuiñajji queneꞌama epo meejji pojjeama ese nijje, ¿achajja shai queneꞌama epo meeꞌyojji? Yahuajo Eyacuiñajji jjashahuabaquinaje jama baꞌa: —Eyaya ma eshequiajajo, ma pojjajo Jesosa huoojeajeꞌyo shajjamaꞌ cuanajo manoꞌyohua. Ecuea eba epojja Jesosa manojeꞌyo —jamaya Eyacuiñajji poanaje. 
\p Jamajjeya ma pojjajo tii Jesosa manoꞌyonaje eseja mimishi cuijeaꞌyojji sosejje.  
\v 7 ¡Bacue! Beshahua nei eseya manoꞌyo sa po ajja pea manoꞌyo jjima epojji. Eꞌe pojjaꞌa oya quea pame nee nee baꞌyanijo, ojo beca cuana manoꞌyome.  
\v 8 Jamatii eseya Eyacuiñajjija quea jea nee nee poanijo ohuaya jama acanaje baꞌa: Ecuana quea mimishi poanijo tii oya, Jesosa manoꞌyonaje eseja mimishi cuijeaꞌyojji sosejje.  
\v 9 Eꞌe, Jesosa esejo manoꞌyonaje eseya quea mimishi poanijo tii. Ojaya enaꞌ cuayaquinaje eseja mimishi cuijeaꞌyojji. Jamajjeya eseya mimishi cuijeaꞌyo majje Eyacuiñajjiya eseya ba cani mimishiꞌama. Eꞌe jojo nei. Jjeya ca ca oya ese nijje queneꞌama; cuaqui yasijje ehuoojeajji pojjeama, de.  
\v 10 Eꞌe, yahuajo ese nijje Eyacuiñajji quea quene nee poa. Ese shajjamaꞌ poanijo tii Jesosa eseja mimishi cuijeaꞌyojji sosejje manoꞌyajo, Eyacuiñajji ese nijje quea quene popajeanaje. Jamajjeya Eyacuiñajji ese nijje quea bei poanijo, eseyaya baña jama baꞌa: Jesosa shequi mee ca oꞌoyanajejo, eꞌe jojo nei Eyacuiñajjiya eseya baꞌe tiitii mee cajeꞌyo onijje peaꞌai.  
\v 11 Eꞌe, Jesosaa, Emeshi Mese neiya esejaya mimishi cuijea caꞌyonajejo, Eyacuiñajji quea bei nee ese nijje, epeejji nei po mee cani. Jamajjeya eseya quea bihui nee jama poani baꞌa: —Eyacuiñajji, miya quea pame nee; ecuana quea jea nee nee poani. 
\s1 Yahuajo eseya Adana jayojja baꞌya poa; jjeya ca ca eseya Jesosa jayojja baꞌyani 
\p  
\v 12 ¡Bacue! Yahuajo nei nei Adana baꞌya poa. Oya ojjañaja ejeajji poa. Oya Adana ebionei shajjamaꞌ poa. Jamajjeya esejaya ejeajji Adana shajjamaꞌ poajo, Eyacuiñajjiya ojjaña ba cani shajjamaꞌ nei nei, Adana jayojjaya: “Miya shajjamaꞌ poanijo, manojeꞌyo ojjaña” Eyacuiñajjiya Adana huohui ca poa. Jamajjeya Adana manoꞌyonaje. O jayojjaya ojjaña manoꞌyani. Ojjaña shajjamaꞌ poani cuana, de.  
\v 13 Eꞌe, Adana ebionei shajjamaꞌ poa. Moisesiya Eyacuiñajjija esohui tehue jjimahuajo, jamaya ojjaña po poquia poa, quea mimishi. Yahuajo Moisesija esohui tehue jjimahuajo, Eyacuiñajji etiiquiana nijje jama mimi jjima baꞌa: —Ecue sohui jama baꞌe ajjajo miquianaya shajjamaꞌ —jamaya Eyacuiñajji etiiquiana nijje mimi jjima yahuajo, maya tehue jjima poa Eyacuiñajjija esohui. 
\p  
\v 14 Eꞌe, Adana shajjamaꞌ po majje, Moisesija esohui tehue jjimahuajo aje oe ojjaña mano poquipoquiꞌya poa quea tai baꞌyanijo. Onajaya Eyacuiñajjija esohui shajjaꞌajja jjimajo Adana jayojja jama pojjeama. Adana ca ca Eyacuiñajjija esohui shajjaꞌajja majje shajjamaa jjejojo acuijjajja ijjia ca poa, de. Eyacuiñajjiya Adana ebionei pana ca poa. Quijje ohuaya oja Bacua Jesosa huoojea canaje.  
\v 15 ¿Ae poanaje Adana? ¿Aꞌa Adanaa jayojja jama acanaje Jesosaa? Chojja, quea pame nee nee eseya acanaje, Jesosaa. Shajjamaa jjejojo Adanaa ca pa jjaja ca oe ojjaña cuana shajjamaꞌ po mee ca poa. Jamajjeya ojjaña mano jeyojeyo mee caꞌya poa. Manoꞌyo majje cuaqui yasijje poqui caꞌya poa. Jjeya Jesosa Quitojo eseya baꞌe tiitii mee cajeꞌyo Eyacuiñajjiya. Eꞌe, eseya Eyacuiñajjija quea jea nee poanijo Jesosa Quito huoojea canaje ese que. Oya Jesosa ese jayojjaya yamijji poeyanaje eseja mimishijo manoꞌyohua mimishi cuijeaꞌyojji. 
\p  
\v 16 Eꞌe, Eyacuiñajjiya eseya quea jea acanijo Jesosa huoojea canaje manoꞌyohua eseja mimishi cuijeaꞌyojji sosejje. Jamajjeya eseya quea mimishi po huichaꞌa huichaꞌa majje, jamatii Eyacuiñajjiya eseya huohui cani jama baꞌa: —Eyaya miya baña emimishi cuijeaꞌyo. 
\p Adana ca ca shajjamaꞌ po cooa poajo, Eyacuiñajjiya oya huohui caꞌya poa jama baꞌa: “Adana, miya ca mi ca oe shajjamaꞌ. Jamajjeya miya manojeꞌyo; quea nee nee poajeꞌyo. Mique osecua cuana peaꞌai mi jayojjaya manoꞌyomeya poaje; jama manoꞌyomeya popoquijeꞌyo mique osecua cuana” poanaje.  
\v 17 Eꞌe, oe dejja quea mimishi po cooa poajo, Eyacuiñajjiya ojjaña mano mee caꞌyani; quea nee nee po mee ca poquiꞌyani. Jesosa Quitohua ca ca eseya quea pame nee acanaje. Eyacuiñajjija ojjaña quea jea nee nee poanijo oja Bacua Jesosa huoojea canaje ese jayojjaya yamijji. Jesosa ojjaña cuanajo manoꞌyonaje mimishi cuijeaꞌyojji sosejje. Ohuaya eseya baꞌe tiitii mee cajeꞌyo onijje. Jesosa nijje ona huoojeaꞌyojji po mee cajeꞌyo, Eyacuiñajjiya. 
\p  
\v 18 Eꞌe, Adana shajjamaꞌ poa. Oya shajjamaꞌ poajo, Eyacuiñajjiya ojjaña ba cani shajjamaꞌ. Ojjaña quea nee nee po mee cajeꞌyo. Jesosa Quitohua ca ca quea pame acanaje esejo; ese mimishi cuijeaꞌyojji manoꞌyonaje. Jamajjeya Jesosa nijje jjapee neineiquianijo, Eyacuiñajjiya esejaya mimishi cuijea majje mimishiꞌama ba cani. Mimishi cuijeaꞌyo majje eseya baꞌe tiitii mee cani onijje eyajo.  
\v 19 Jama baꞌa: Oe dejja, Adana shajjamaꞌ poa. Jamajjeya ojjaña o jayojja jama shajjamaꞌ poani. Pea dejjaa, Jesosaa ca ca oja Chiija, Eyacuiñajjija esohui jayojja jama aca poa. Jamajjeya eseyaya, ojaya epeejji cuaa Jesosaa jayojjaya aña; Eyacuiñajjija esohui shajjaꞌajjaña. Jamajjeya Eyacuiñajjiya eseya ba cani mimishiꞌama. 
\p  
\v 20 Adana shajjamaꞌ poajojo quijje nei nei Eyacuiñajjiya Moisesi tehue mee ca poa ojaya esohui. Ojaya esohui tehue mee caꞌya poa ojjañaja ebajji oya cuana Eyacuiñajjija esohui jayojja jama aꞌajja tii. Jamatii esohui ba majje ojjaña quea mimishi tii tii poani. Eyacuiñajji ca ca quea pame po tiitiiani ojjaña nijje. Quea mimishi tii poanijo aje oe jamatii ohuaya eseya quea jea nee nee acani tii.  
\v 21 Yahuajo esohui etehueꞌyo ba majje jamatii etiiquiana cuana mimishi pajea sa poꞌyo ajja poa. Jamajjeya oya cuana manoꞌyo majje cuaqui yasijje poquiꞌyonaje. Eyacuiñajjiya ca ca eseya shajjamaꞌ poani tii quea jea nee acanaje. Esejaya Emeshi Mese nei Jesosa Quito huoojea canaje ese mimishi cuijeaꞌyohua ese baꞌe tiitii meeꞌyojji. 
\c 6  
\s1 ¡Mimishi pajeaꞌyocue; Jesosa nijje jjapeequicue! 
\p  
\v 1 Eyacuiñajjiya eseya quea jea nee acani; jamatii quea mimishi poanijo beca cuana jamaya poani pojjaꞌa baꞌa: —¡Dee! Jamajjeya eya quea mimishi capoahua tii. Jamaya Eyacuiñajjiya eseya caba mee cahua eseya ohua quea jea nee acani jamatii —jamaya pojjaꞌa beca cuana poani. 
\p  
\v 2 ¡Chojja! ¡Aꞌa oe jamaya pojji! Jiquio ecua ese ejja manoꞌyo majje shajoshajoꞌyo ajja jama jayojjaya eseya Jesosa nijje jjapeequi majje mimishi sa po majaꞌyo ajja. Cajaa seya aña.  
\v 3 Eꞌe, eseya Jesosajo besa majje, ohuaya eseya ba cani ojaya epeejji mimishi po maja sa poꞌyo ajja. ¿Aꞌa miquea maya ba jjima? 
\p —Eꞌe, eya Jesosa nijje jjapeequiani —eseyaya jamaya huohui majje, onaaya eseya Eyacuiñajjijo besa mee cani. Jamajjeya jiquio ecua emanoꞌyo cuana shajoshajoꞌyo ajja jayojja jama eseya mimishi po maja sa poꞌyo ajja Jesosa nijje jjapeequianijo. ¿Aꞌa miquea maya ba jjima?  
\v 4 Jesosa manoꞌyonaje. Manoꞌyo majje mei jjani ai yasijje huananobia caꞌyonaje. Eyacuiñajji quea caꞌa nee nee. Jesosa shequi mee caꞌyonaje jama jayojjaya ohuaya eseya pea jjashahuabaquime po mee caꞌyani Jesosa nijje jjapeequianijo. Jesosa nijje jjapeequiajo peaꞌai onaaya eseya enajo besa mee cani Eyacuiñajjijo. Jamajjeya Jesosaa eseya ba cani o jayojja eꞌe jojo nei, yahuajo jama pojjeama. Pea jjashahuabaquime poani, de; mimishi po maja sa poꞌyo ajja. 
\p  
\v 5 Jamajjeya eseya jama poani baꞌa: —Jesosa Quito acui ecueataꞌapeejo manoꞌyonaje eseja mimishi cuijeaꞌyojji. Jamajjeya eseya onijje jjapeequi majje mimishi pajea neinei sa poani. Eyacuiñajjiya Jesosa shequi mee ca oꞌoyanaje; baꞌe mee ca oꞌoyanaje. O jayojja jjashahuabaqui meeme po mee caꞌyani.  
\v 6 Jamaya esejaya eba baꞌa: Jesosa Quito acui ecueataꞌapeejo manoꞌyonaje eseya ojaya epeejji quea caꞌa nee epo meejji, mimishi pajea neinei meesahuaꞌyojji. Esejaya ebaꞌe yahuajo, ejjashahuabaquijji yahuajo jayojja jama pajea mee caꞌyonaje, eyacua po mee canaje. Yahuajo jama poanaje baꞌa: Jiquio ecua sosemaꞌ chacochacoani echacomeejjija yajjijo chacochaco pajea mee jjima acani jayojja jama yahuajo eseya mimishi pajeaꞌyo jjima poanaje.  
\v 7 Jama baꞌa: Ese ejjaa manoꞌyo majje mimishi amaja ajja. Oya jayojjaya eshahuaja epeejji emanoꞌyo jayojja jama Jesosaa eseya po mee cani ojaya epeejji nei epojji. 
\p  
\v 8 Jamajjeya onijje jjapeequi majje Jesosa Quito manoꞌyonaje jayojja jama ecuana eshahuaja epeejji poanijo emanoꞌyo jayojja poanaje; Jesosa shequiꞌyonaje jayojjaya eseya o jayojja baꞌyani, yahuajo jama pojjeama. Eꞌe jojo nei eseya onijje baꞌe tiitiijeꞌyo eyajo; o jayojjaya peaꞌai poajeꞌyo.  
\v 9 Eꞌe, Jesosa emanoꞌyojaa Eyacuiñajjiya oya shequi mee ca oꞌoyanaje. Eshe nequiꞌyo, emano becaꞌyojji pojjeama. Pea cuaa oya mano meeꞌyo jjima acajeꞌyo.  
\v 10 Oya manoꞌyonaje; oe nei manoꞌyome poanaje esejaya mimishi cuijeaꞌyojji. Oya Jesosa mano becaꞌyo ajja. Jjeya oya esheꞌyo; Eyacuiñajjija ejjashahuabaquijji jayojja jama atiitii cani.  
\v 11 Jamajjeya ojjaña Jesosaja epeejji cuana, ¡jjashahuabaquicue jama baꞌa: —Eya mimishi pajea neineiꞌyo sa poani —pocue! 
\p Eꞌe, jiquio ecua emanoꞌyo cuana shajoshajoꞌyo ajja jayojja jama Jesosaja epeejji cuana mimishi po maja sa poꞌyo ajja. Pea jjashahuabaquime poꞌyani, de. Jjeya Jesosa nijje jjapee neineiquianijo eseyaya o jayojjaa Eyacuiñajjija ejjashahuabaquijji jayojja jama atiitiiaña. 
\p  
\v 12 Jamajjeya eshahuaa miquianaya shajjamaꞌ po mee sa acanijo, ¡aꞌa shajjamaꞌ pojji! Chojja. ¡Ejjashahuabaquijji yahuajo quea tai, quea mimishi jayojja jama aꞌa pojji!  
\v 13 Eshahuaa miquianaya quea mimishi o jayojja jama po mee sa acani. ¡Aꞌa jjashajjaꞌajjaquijji! Eyacuiñajjiya ca ca miya quea pame, o jayojja jama po mee sa acani. ¡Oya shajjaꞌajjacue! Ohuaya miya pea jjashahuabaquime po mee caꞌyani. Jamajjeya ¡baꞌecue ojaya ejjashahuabaquijji quea pame nee jayojja jama!  
\v 14 Eꞌe, Eyacuiñajjiya huohui canaje jama baꞌa: —¡Mimishi pajea neineiꞌyocue! 
\p Jamatii ojaya esohui etehueꞌyo shajjaꞌajja majje mimishi pajea meemeeꞌyo ajja. Eyacuiñajjiya ca ca oe eseya quea jea nee acani; mimishi pajea meesahua caꞌyani. Jamajjeya ¡eshahuaa miya shajjamaꞌ po mee sa acanijo aꞌa jjashajjaꞌajjaquijji! Jjeya oya, eshahua ese huoojeaꞌyojji pojjeama, de. Eyacuiñajji ca ca esejaya Emeshi Mese nei, ese huoojeaꞌyojji poani. 
\s1 Eyacuiñajjija echacojji quea pame 
\p  
\v 15 Jamajjeya jjeya Eyacuiñajjiya eseya napa ajja esohui etehueꞌyo jayojja jama ajjimajo. Chojja, Eyacuiñajjiya eseya quea jea nee acanijo esejaya mimishi cuijea caꞌyani. Huohui jjima jama baꞌa: —Esohui etehueꞌyo jayojja jama baꞌyanijo, eyaya miquianajaya mimishi cuijeajeꞌyo —jamaya jjeya huohui jjima Eyacuiñajjija. 
\p Jamajjeya ¿ae jjashahuabaquiani eseya? ¿Aꞌa quea mimishi capoahua?  
\v 16 Chojja de. ¡Bacue! Jiquio ecua echacomeejji nijje poquiajo, ohua meeꞌajja cajje miya chacochaco majje miya ojaya echacojji poani, oya mi huoojeajji poani jama jayojjaya eshahuaja esohui jayojja jama añajo miya ojaya epeejji poani, oya mi huoojeajji poani. Miya jamaya po majje quea nee nee poajeꞌyo quijje cuaquijo. ¡Eyacuiñajji mi huoojeajji poanijo ojaya esohui shajjaꞌajjacue! Ohuaya miya quea boejea baꞌe mee caje. Majoya miya baꞌe tiitii mee cajeꞌyo eyajo, Eyacuiñajjiya.  
\v 17 Jamajjeya eyaya Eyacuiñajji bihuiaña ohuaya miquianaya eshahuajo nahue canijo. Eꞌe, yahuajo eshahua mi huoojeajji poanijo shajjamaꞌ poanaje. Jjeya ca ca ecuea esohui shajjaꞌajja majje Eyacuiñajjija esohui eꞌe nei jayojja jama aña quea bihui nee.  
\v 18 Jamajjeya Eyacuiñajjiya miquea eshahua poqui mee caꞌyonaje, mi huoojeajji pojjeama po mee caꞌyonaje. Jjeya Eyacuiñajji mi huoojeajji poani. O jayojja baꞌe mee caꞌyani. Jamajjeya miyaya ojaya esohui jayojjaya jama aña quea bihui nee.  
\v 19 Miquea eba neineijji eyaya quea jaꞌa esohui huohuiaña jama baꞌa: Yahuajo eshahua mi huoojeajji poanaje, miyaya o jayojjaa ojjaña mimishi a sa anaje, quea jaꞌa jjashahuabaqui sa po ajja poanaje. ¡Jjeya ca ca Eyacuiñajji mi huoojeajji nei nei aꞌyocue! ¡Ojaya ejjashahuabaquiꞌyojji jayojja jama atiitiicue quea pame nee ebaꞌeꞌyojji! 
\p  
\v 20 Yahuajo aje oe eshahua mi huoojeajji poanijo, miquianaya quea pame po sa poꞌyo ajja nei nei poanaje.  
\v 21 Eshahua jayojja jama quea mimishi baꞌenajejo ¿aꞌa quea bei po tiitii mee canaje? Cho. Jjeya ma ecua ese baꞌenaje jamajo eseya quea bicho nee nee poani. Jamaya ebaꞌe tiitii jojjemo Eyacuiñajjiya eseya cuaqui yasijje huoojea caꞌyoquiaye.  
\v 22 Eꞌe, yahuajo eshahua mi huoojeajji poanaje. Eyacuiñajjiya miquea eshahua poqui mee caꞌyonaje. Jjeya ca ca Eyacuiñajji mi huoojeajji poani. Oya shajjaꞌajjañajo, ohuaya miya quea boejeaꞌyo po mee cani; baꞌe tiitii mee cajeꞌyo eyajo.  
\v 23 Eyacuiñajjiya shajjamaꞌ cuana huoojea cajeꞌyo cuaqui yasijje eshahua nijje quea mimishi poanaje sosejje. Pea ca ca jama baꞌa: Eseya jamatii quea pame baꞌe meemee ajja. Emeshi Mese nei Jesosa Quito nijje jjapeequianijo, Eyacuiñajjiya eseya o jayojja jjashahuaba meequi caꞌyani; eseya baꞌe tiitii mee cajeꞌyo eyajo onijje. Eꞌe de, eseya jamatii quea pame nee baꞌe neinei ajja. 
\c 7  
\s1 Esohui eba meesahuajji epona ahuejjijo 
\p  
\v 1 Ecuea epeejji cuana, Eyacuiñajjija esohui etehueꞌyo miquianajaya eba. Jamajjeya jama baña baꞌa: Eseya eshe nequijo ca ca oe esohui etehueꞌyo jayojja jama cabaꞌyahua tii, manoꞌyo majje pojjeama.  
\v 2 Miquiana ba meesahuajji eyaya jama huohuiaña baꞌa: Eyacuiñajjiya jama huohui canaje baꞌa: —Ehuanase ojaya yahue nijje cabaꞌyahua tii tii. ¡Yahue manoꞌyo jjimajo, pea nijje aꞌa jjahueaqui meeꞌyojji! ¡O manoꞌyajo ca ca peajo cajjahueaquiꞌyahua!  
\v 3 Ojaya yahue manoꞌyo jjima eshe nequi tiijo, peajo jjahueaqui nishoꞌyanijo, oya ehuanase pea cojjojji poani. Ojaya yahue manoꞌyo majje ca ca oya eꞌahuemano. Oya ahuemaꞌ jayojja peajo cajjahueaquiꞌyahua. Jjahueaqui oꞌoya majje pea cojjojji jayojja jama pojjeama —jamaya huohui canaje yahuajo nei Eyacuiñajjiya. 
\p  
\v 4 Jamajje ecuea epeejji cuana, miquianajaya eba neineijji eyaya jamaya huohuiaña. Jesosa nijje jjapeequianijo epona eꞌahuemano jjahueaquiani jayojja jama poani. Eꞌe, yahuajo Jesosa ba jjimahuajo eseya quea quehua jjashahuabaquinaje jama baꞌa: —Eyacuiñajjija esohui etehueꞌyo jayojjaya jama atiitiiañajo, ohuaya eseya baꞌe tiitii mee cajeꞌyo onijje eyajo —jamaya eseya poꞌajjanaje. 
\p Jjeya ca ca Jesosa esejaya mimishi cuijeaꞌyojji sosejje manoꞌyonajejo yahuajo jama jjashahuabaqui ajja, de. Jjeya ca ca pea jjashahuabaquime poani. Jiquio ecua oja yahue manoꞌyo majje ehuanase peajo jjahueaquiꞌyani jayojja jama jjeya eseya Jesosa nijje jjapeequiꞌyani. Eyacuiñajjiya Jesosa emanoꞌyojaa shequi mee ca oꞌoyanaje jayojja jama eseya pea jjashahuabaquime po mee caꞌyani. Jamajjeya eseya jjashahuabaquiani quea pame nee ebaꞌejji, Eyacuiñajji quea bihui nee epo meejji.  
\v 5 Yahuajo Jesosaja epeejji po jjimahuajo eseya baꞌenaje esejaya ejjashahuabaquijji quea tai jayojjaya. Eyacuiñajjija esohui etehueꞌyo ba majje shajjamaꞌ po sa neinei poanaje jama baꞌa: “¡Aꞌa pea siijji!” ba majjeya eseya pea sii sa neinei poanaje. Jamaya eseyaya Eyacuiñajji quea quene po meenaje. Jamajjeya Eyacuiñajji nijje ebaꞌeꞌyojji tii tii pojjeama.  
\v 6 Yahuajo aje oe eseya mimishi pajea meemee ajja. Jiquio ecua Eyacuiñajjija esohui shajjaꞌajja majje jamatii ameemee ajja. Jjeya ca ca Jesosa esejaya mimishi sosejje manoꞌyonajejo, eseya pea jjashahuabaquime poani. Eseyaya baña esohui etehue jayojja jama añajo pojjeama Eyacuiñajjiya eseya quea pame baꞌe tiitii mee cajeꞌyo. Jesosa nijje jjapeequianijo ca ca eseya pea jjashahuabaquime poani. Edojjoshahua Pameya eseya quea pame nee baꞌe meesahua canijo, Eyacuiñajji quea bihui nee po mee sa aña. 
\s1 Eyacuiñajjija esohui ba neinei majje esejaya eba poa eseya shajjamaꞌ nei poani 
\p  
\v 7 Eyacuiñajjija esohui etehueꞌyo ba majje ca ca esejaya eba poa eseya shajjamaꞌ poani. Jamatii beca cuana jama poani pojjaꞌa baꞌa: —¿Aꞌa esohui etehueꞌyo jayojja jama eꞌaꞌyojji pojjeama? 
\p Chojja, quea pame nee. Etehueꞌyo ba jjima jojjemo esejaya Eyacuiñajji quea quene poani ba jjima pome. Eꞌe, Eyacuiñajjija esohui etehueꞌyo jama poani baꞌa: “¡Aꞌa oe onajaya aquiana jea bajji!” poani. Jamatii Eyacuiñajjija esohui ba jjima jojjemo onajaya aquiana jea bañajo Eyacuiñajji enijje quea quene poani ecuea ba jjima pome.  
\v 8 Ma ba majje ca ca eshahuaa eya onajaya aquiana jea ba neinei mee canaje quea huiso nee. Yahuajo esohui ba jjimajo ca ca ecuea ba jjima poanaje eya shajjamaꞌ poani onajaya aquiana jea ba majje.  
\v 9 Yahuajo esohui etehueꞌyo ba jjimajo eya shajjamaꞌ pojjeama poso jjabaquinaje. Quijje Eyacuiñajjija esohui etehueꞌyo ba majje ca ca eyaya banaje jama baꞌa: —Eꞌe, eya ca iña shajjamaꞌ nei nei poani, de. Eyacuiñajjiya eya quea nee nee po mee cajeꞌyo, de —eya poanaje. 
\p  
\v 10 Jamajjeya Eyacuiñajjija esohui jama ebaꞌe tiitii jojjemo eseya Eyacuiñajji nijje baꞌe tiitii meeꞌyome. Eyaya ojaya esohui jama ajjima tiitiijo ca ca eya Eyacuiñajjiya quea nee nee po mee cajeꞌyo.  
\v 11 Eyaya Eyacuiñajjija esohui etehueꞌyo jayojja jama aꞌajjaꞌyonaje. Chojja, ameemee ajja, de, quea mimishi nee nee. Jamajjeya esohui jayojja jama atiitii jjimajo aje oe Eyacuiñajji enijje quea quene nee nee poaje, eya quea nee nee po mee cajeꞌyo tii tii.  
\v 12 Jamatii Eyacuiñajjija esohui etehueꞌyo quea pame nee eꞌe jojo nei, Eyacuiñajjija ejjashahuabaquijji ese quea bihui baꞌe meesahuajji.  
\v 13 Jamajjeya Eyacuiñajjija esohui quea pame ba neineiꞌyo majje, ¿aꞌa Eyacuiñajjiya eya quea nee nee po mee cajeꞌyo? Chojja, jamaya pojjeama. Eyacuiñajjiya ojaya esohui tehue mee ca poa ojjañaja ebajji shajjamaꞌ nei nei quea tai nee nee poani cuana jjabahuejjaquijji Eyacuiñajjiya quea nee nee po mee cajeꞌyo. Jamajjeya esohui ba jjimajo eya shajjamaꞌ pojjeama poso jjabaquinaje; ba majje ca ca jamatii eya mimishi po majamaja sa neinei poanaje. Eyacuiñajji quea quene po meenaje enijje. Quea pame po sa poani, jamatii quea pame po ajja. Mimishi botiꞌama; jamatii jamaya eyaya aña.  
\v 14 Esejaya eba Eyacuiñajjija esohui quea pame nee nee. Eya ca ca pameꞌama, shajjamaꞌ peaꞌai, de. Jamajjeya eya jamatii quea pame baꞌe meemee ajja ojaya esohui jayojja. Jiquio ecua echacojji ojaya echacomeejjija esohui jayojja chaco sa po ajja, jamatii jamaya chaco caje jama jayojjaya eya quea mimishi po sa poꞌyo ajja, jamatii quea mimishi poani.  
\v 15 Eyacuiñajjija esohui jayojja jama aꞌajja majje eya jjashahuabaquiani jama baꞌa: —¡Dee! ¿Apiojji shai eya quea pame nee po ajja? Eꞌe de, eya quea pame po nishoani. 
\p Eya quea mimishi po majje jjashahuabaquiani jama baꞌa: —¡Dee! ¿Apiojji shai eya quea mimishi poanaje? Jamaya eya po sa poꞌyo ajja —jamaya eya jjashahuabaquiani. 
\p  
\v 16 Eꞌe de, ecuea eba Eyacuiñajjija esohui quea jaꞌa nee. Jamajjeya eya quea yeno poani ma esohui jayojja jama mi amajje.  
\v 17 Jjeya ca ca ecuea pea jjashahuabaquime quea jaꞌa poanijo ma ecua eya yahuajo baꞌyaninaje jama po sa poꞌyo ajja. Jamatii ecuea ejjashahuabaquiꞌyojji quea mimishi; e poaninaje yahuajo pajeapajeaꞌyo ajja. Eꞌe de, ecuea ejjashahuabaquijji quea mimishi yani, de. Cajaa. 
\p  
\v 18 Ecuea eba jama baꞌa: Quea mimishi jjejojo eya jamatii quea jaꞌa nee jjashahuabaqui ajja tii tii. Eya quea jaꞌa nee po sa poꞌyo majje jamaya eyaya ameemee ajja, de. Quea mimishi nee nee iña, de.  
\v 19 Eꞌe de, eya quea pame nee po sa poani. Jamatii quea pame, quea jaꞌa poꞌajjani. Mimishi po sa poꞌyo ajja, de. Jamatii quea mimishi poani.  
\v 20 Mimishi amajje eya quea yeno poani. Mimishi a sa poꞌyo ajja. Jamajjeya mimishi aꞌyo majje ecuea eba ecuea ebaꞌejji ma ecua eya yahuajo baꞌyaninaje jama eyaya atiitiiaña. 
\p  
\v 21 Eꞌe, eya quea pame nee Jesosa jayojja baꞌe sa poani nei nei. Jamatii eya caꞌaꞌamajo quea pame atiitii ajja. Ecuea ejjashahuabaquijji quea mimishi yani, ma e yahuajo baꞌyaninaje quea tai poaninaje. Maya eya pajeapajeaꞌyo ajja.  
\v 22 Eꞌe de, Eyacuiñajjija esohui ecuea quea jea nee nee. Maya eyaya a sa aña.  
\v 23 Jamatii ecuea ejjashahuabaquijji jjeya jiquio jama baꞌa: —Quea pame nee a sa aña Eyacuiñajjija esohui jayojjaya —eya poani. Jamatii jamaya eyaya ameemee ajja. Ecuea ejjashahuabaquijji yahuajo jayojja jama aña, quea mimishi. Eꞌe de, eya quea mimishi nee nee; mimishi cuana pajeaꞌyo ajja. Eya jama poani baꞌa: Onajaya esohui quea mimishi jayojja jama eyaya aña tii tii.  
\v 24 Eꞌe, eya quea yeno poani mimishi amajje. ¿Aya acuae eya mimishi pajea neinei meesahua cajeꞌyo soꞌo?  
\v 25 Esejaya Emeshi Mese nei Jesosa Quito quea caꞌa nee nee poani. Jamajjeya ohuaya eya mimishi pajea meesahua cajeꞌyo, eꞌe jojo nei. Jamajjeya eyaya Eyacuiñajji bihuiaña jama baꞌa: —Ecue Chii, miyaya eya jaahuanaña quea pame nee nee. 
\p Eꞌe, Eyacuiñajjija esohui jayojja jama a sa aña. Jamatii eyaya jamaya pojjeama atiitiiaña. Jesosa Quito ca ca quea caꞌa nee nee poani. Ohuaya eya mimishi pajea meesahua caꞌyani. Jamajjeya Eyacuiñajjija esohui jayojja jama eyaya aña. 
\c 8  
\s1 Edojjoshahua Pameya eseya baꞌe mee cani Jesosa jayojja, yahuajo jama pojjeama 
\p  
\v 1 Jjeya Jesosa Quito nijje jjapeequianijo, Eyacuiñajjiya eseya huohui cani jama baꞌa: —Eyaya jja miquianaya emimishi cuijeaꞌyo baña. Jesosa Quito mique mimishi cuijeaꞌyojji poanaje. Quea boejea poanijo, miquianaya ecuea etecueajji pojjeama —Eyacuiñajji poani. 
\p  
\v 2 Yahuajo Jesosa Quitoja epeejji pojjeama poanaje. Yahuajo eseya quea mimishi po tiitiianijo cuaqui yasijje edobiquijji nisho poanaje. Jjeya ca ca Jesosa Quitoja epeejji poanijo, Edojjoshahua Pameya eseya baꞌe mee cani o jayojja, mimishiꞌama.  
\v 3 Eꞌe, eseya quea mimishi poaniya jjejojo Eyacuiñajjija esohui jayojja jama ameemee ajja. Jamajjeya Eyacuiñajjiya eseya quea boejea pojjeama ba cani. Chojja. Eseya quea mimishi nee nee poanaje. Jamajjeya Eyacuiñajjiya Jesosa, oja Bacua Ejja oe nei huoojea canaje jiquio meshi yasijje. Oya, Jesosa yamijji dejja jayojja poanaje. Eꞌe, Jesosa ese jayojjaya yamijji poa, jamatii oya mimishiꞌama tii. Eꞌe, Jesosa manoꞌyonaje esejaya mimishi cuijeaꞌyojji, esejaya mimishi sosequiaꞌyojji peaꞌai. Jesosaa esejaya mimishi pajea meesahua caꞌyanijo, Eyacuiñajji ese nijje quea bei poani.  
\v 4 Jamaya acanaje Eyacuiñajjiya eseya ojaya esohui etehueꞌyo quea jaꞌa nee jayojja jama ameeya, ojaya ejjashahuabaquijji quea jaꞌa nee jayojja jama epo meejji peaꞌai. Jjeya Edojjoshahua Pameya eseya baꞌe mee cani Eyacuiñajjija esohui jayojjaya. Jjeya eseya Jesosa jayojja baꞌyani, pea jjashahuabaquime poani, yahuajo jayojja jama pojjeama. Yahuajo quea mimishi poanaje, jjeya ca chojja.  
\v 5 Beca cuana quea mimishi baꞌe sa poani, yahuajo baꞌenaje jama. Ojaya ejjashahuabaquijji quea mimishi jama atiitii cani. Mimishi pajea sa poꞌyo ajja tii. Pea cuaa ca ca Edojjoshahua Pame shajjaꞌajja cani. Ojaya ejjashahuabaquijji quea pame jayojja jama jjashahuabaquime poani peaꞌai. Eꞌe, Edojjoshahua Pameya Jesosaja epeejji cuana jjashahuabaqui meesahua cani o jayojjaya.  
\v 6 Ojjaña quea mimishi baꞌyaniya ejjashahuabaquijji quea mimishi jama atiitii cani. Mimishi cuana pajea sa poꞌyo ajja nei nei. Jamajjeya cuaqui yasijje poquijeꞌyo. Quea nee nee poajeꞌyo. Edojjoshahua Pameya eseya Eyacuiñajjija ejjashahuabaquijji jayojja jama po meesahua cani. Jamajjeya eseya baꞌe tiitii mee cajeꞌyo eyajo Jesosa nijje quea bei nee nee.  
\v 7 Ojjaña quea mimishi, quea mimijjequijea jjashahuabaquiani Eyacuiñajjija epeejji pojjeama. Shajjamaꞌ cuana, de. Oya cuana Eyacuiñajjija esohui jayojja jama aꞌajja tii. Mimishi pajeaꞌyo ajja tii tii.  
\v 8 Eꞌe, quea mimishi, quea mimijjequijea poanijo, Eyacuiñajji onijje quea bei pojjeama poani. 
\p  
\v 9 Jesosa Quitoja epeejji Shoma cuiñajjijo baꞌe, miquianaya yahuajo quea mimishi poa. Jjeya ca chojja. Edojjoshahua Pameya miquianaya baꞌe meesahua cani quea pame nee nee, yahuajo jama pojjeama. Eꞌe, Edojjoshahua Pame Jesosaja epeejji cuana huasijje edobiquinequi. O miquiana que dobiqui jjima jojjemo miquianaya Jesosaja epeejji pojjeama pome, miquianajaya mimishi cuijeaꞌyo jjima pome.  
\v 10 Eꞌe jojo nei Jesosa Quito miquiana nijje nequi tiitiiani. Ohuaya miquianajaya edojjoshahua baꞌe tiitii mee cajeꞌyo miquea mimishi ecuijeaꞌyojojo. Eꞌe, miquianaya manoꞌyo majje eyami ihuijeꞌyo quea mimishi poa jjejojo.  
\v 11 Jamatii Eyacuiñajji quea caꞌa nee nee poani; ohuaya Jesosa emanoꞌyojaa shequi mee ca oꞌoyanaje. Jamajjeya Jesosaja epeejji poanijo, ohuaya miquianaya baꞌe mee caje oꞌoya eyami eyacua nei. Emano becaꞌyojji pojjeama. Jamaya poaje Edojjoshahua Pame miquiana huasijje dobiqui majje. 
\p  
\v 12 Jamajjeya ecuea epeejji cuana, ¡miquianaya Jesosaja epeejji poanijo, pea jjashahuabaquime poanijo Eyacuiñajjija esohui jayojja jama acue! ¡Yahuajo jayojja jama aꞌa po oꞌoyajji!  
\v 13 Eꞌe, quea mimishi po tiitiianijo, Eyacuiñajjiya eseya quea nee nee po mee cajeꞌyo. Edojjoshahua Pameya ca ca ojjaña eseya mimishi pajea meesahua cajeꞌyo. Jamajjeya mimishi pajeaꞌyo epo Eyacuiñajjiya eseya baꞌe tiitii mee cajeꞌyo onijje eyajo.  
\v 14 Ojjaña joya Edojjoshahua Pame jayojja jama jjashahuabaquime poani Eyacuiñajjija bacua cuana poani.  
\v 15 Yahuajo, Jesosaja epeejji po jjimahuajo eseya quea mete baꞌenaje. Eshahua jayojja jama jjashahuabaquime eseya poanaje. Jjeya ca ca Edojjoshahua Pameya eseya Eyacuiñajjija bacua po mee cani. Ohuaya eseya mimi meesahua cani Eyacuiñajji nijje jama baꞌa: —Eyacuiñajji, miya ecue Chii eꞌe jojo nei. 
\p  
\v 16 Eꞌe, jjeya Eyacuiñajjiya ba cani eseya oja bacua poani. Edojjoshahua Pameya eseya ba mee cani jama baꞌa: —Miquianaya Eyacuiñajjija bacua cuana poani. 
\p  
\v 17 Jamajjeya Eyacuiñajjija bacua cuana poanijojo ojjaña ojaya aquiana esejaya poaje; eseya ohuaya quia cajeꞌyo. Eꞌe, ojaya esohui yahuajo jayojja jama acajeꞌyo ese nijje jama baꞌa: Ojjaña aquiana Eyacuiñajjiya quia caꞌyonaje Jesosa Quito que. Maya aquiana esejaya poajeꞌyo peaꞌai Jesosa Quito nijje jjapeequianijo. Onijje jjapeequianijo, pea cuaa eseya napa caje, quea nee nee po mee cajeꞌyo. Jamatii. Ecuana quea nee poani Jesosa jayojja. Jamajjeya Eyacuiñajjiya eseya baꞌe tiitii mee cajeꞌyo Jesosa nijje quea jaꞌa nee eyajo. Onijje ona huoojeajji po mee cajeꞌyo. 
\s1 Quijje eseya quea pame nee anijeꞌyo eyajo Jesosa nijje 
\p  
\v 18 Jjeya eseya jiquiojo tii quea yeno poani, quea nee poani Jesosa nijje jjapeequianijo. Jamatii ¡aꞌa quea yeno pojji! Quea pame nee nee eseya baꞌe tiitiijeꞌyo Jesosa nijje eyajo. 
\p  
\v 19 Adana, esejaya ejeajji quea mimishi poa. Adana quea mimishi poanijo, Eyacuiñajjiya ojjaña ojaya epanaꞌyo cajaa acanaje beshahua nei. Eseya Eyacuiñajjija bacua cuana quea jaꞌa nee, quea caꞌa nee Jesosa nijje poanijo, ojjaña aquiana cajaa yaꞌyojji pojjeama po mee cajeꞌyo Eyacuiñajjiya.  
\v 20 Eꞌe, yahuajo nei Eyacuiñajjiya ojjaña quea pame nee pana caꞌya poa. Adana quea mimishi poajo ca ca Eyacuiñajjiya ojjaña cajaa aca poa. Quijje ojjaña aquiana cajaa yaꞌyojji pojjeama poajeꞌyo. Ma Eyacuiñajjiya ebionei pana ca poa jayojja ishoa ca ani, ojjañaa.  
\v 21 Eꞌe, jjeya ojjaña aquiana manoꞌyani, ihuiꞌyani peaꞌai. Quijje, Jesosa poe oꞌoyajo ca ca ojjaña aquiana cuana quea pame nee nee poaje oꞌoya. Adana quea mimishi po jjimahuajo jama jayojjaya poaje oꞌoya. Eyacuiñajjija bacua cuana, ma Jesosa nijje jjapeequiani quea pame nee nee poajeꞌyo Jesosa poe oꞌoyajo. Ma shejo ojjaña aquiana ojjaña Eyacuiñajjija panaꞌyo quea pame nee nee poaje oꞌoya.  
\v 22 Adana quea mimishi poa jojoya ojjaña aquiana quea nee, quea tai, quea camaja nee poa. Jjeya nei peaꞌai jamaya poani, jiquio jama baꞌa: Jesosa poe oꞌoya jjimahuajo ojjaña Eyacuiñajjija pana quea yeno, quea nee nee poani, jiquio ecua epona bacua cuayani jama jayojja quea nee nee poani bacua cuaya jjimahuajo.  
\v 23 Edojjoshahua Pame dobiquiꞌyonaje ese que, Jesosaja epeejji cuana huasijje. Jamatii eseya peaꞌai quea nee, quea mano, quea shoe peaꞌai poani. Edojjoshahua Pameya eseya ba meesahua cani jama baꞌa: Jesosaa poe oꞌoya majje eseya quea pame nee po mee cajeꞌyo eyacua. Eyacua poꞌyo majje manoꞌyo ajja, neeꞌama baꞌe tiitiijeꞌyo eyajo peaꞌai. Eyacuiñajjija esohui ma ecua ohua yahuajo huohui canaje jayojja jama ohuaya eseya, ojaya bacua cuana acajeꞌyo Jesosa poe oꞌoyajo. Jamajjeya eseyaya ishoaña Jesosaja epoe oꞌoyajji. Ebaꞌejji eyacua quea pame nee nee esejaya poaje, de.  
\v 24 Jama poaje baꞌa: Eyacuiñajjiya eseya mimishi cuijeaꞌyo majje baꞌe tiitii mee cani. Esejaya eyami eyacua amee cajeꞌyo peaꞌai, Jesosa poe oꞌoyajo. Jamajjeya eseyaya ishoaña ojaya epoe oꞌoyajji. Jjashahuabaquiani quijje eyacua epojji.  
\v 25 Jamajjeya ishoaña tii tii Jesosa ache shono poeje oꞌoya ebajji. Eyami eyacua yajji eseyaya ishoaña quea bihui nee nee. 
\p  
\v 26 Cuanaya eseya ca ca caꞌaꞌama poanijo, Edojjoshahua Pameya quea jaꞌa nee baꞌe meesahua cani. Ebaꞌejji quea camajajo Eyacuiñajji nijje emimijji esejaya ba jjima. ¿Yajja mimime epojji? Jamajjeya Edojjoshahua Pame esejo mimi neineiani Eyacuiñajji nijje; eseya mimi meesahua cani Eyacuiñajji nijje peaꞌai.  
\v 27 Eꞌe, ojjaña esejaya ejjashahuabaquiꞌyojji mimi meemee ajja quea jaꞌa nee Eyacuiñajji nijje. Jamatii Edojjoshahua Pameya eseya jjashahuabaqui meesahua canijo, ojjaña esejaya ejjashahuabaquijji Eyacuiñajjija eba nei nei poani. Eꞌe, Edojjoshahua Pame jama poani baꞌa: —Eyacuiñajji, Jesosaja epeejji cuana huohuiꞌajja cani ma oya cuana sa poanijo. Jamajjeya ¡jamaya acue! ¡Miquea ejjashahuabaquijji quea pame nee jayojja jama acue Jesosaja epeejji cuanajo! —jamaya esejo mimiani Eyacuiñajji nijje Edojjoshahua Pame. 
\s1 Eyacuiñajjiya eseya Jesosa jayojja jama baꞌe meesahua cani 
\p  
\v 28 Eꞌe, jjeya quea camaja Jesosa nijje ejjapeequijji. Jamatii Eyacuiñajjiya eseya babaca canaje ojaya epeejji epojji. Jamajjeya ohuaya eseya jaahuana cani tii tii. Jamaya acani esejaya oya quea jea nee poanijo.  
\v 29 Eꞌe, yahuajo nei ese pana jjimahuajo Eyacuiñajji esejo jjashahuabaquinaje jama baꞌa: —Ecuea eba aꞌya cuae ecuea epeejji poaje quijje nei nei. Eyaya oya cuana ecuea Ebacua Ejja Jesosa jayojja jama baꞌe meesahuaje quea pame nee —jamaya poanaje Eyacuiñajji. 
\p Jamajjeya eseya Jesosa jayojja jama poanijo, oya esejaya Edoe Mese poaje, eseja Noo.  
\v 30 Eꞌe, yahuajo nei nei ese cuaya jjimahuajo Eyacuiñajjiya babaca ca poa ojaya epeejji epojji. Babaca majje eseya mimishi cuijea caꞌyonaje. Mimishi cuijeaꞌyo majje eseya ba cani mimishiꞌama. Baꞌe tiitii mee cani quea jaꞌa nee, quea caꞌa nee Jesosa nijje eyajo, Eyacuiñajjiya. 
\s1 Quea pame nee nee Eyacuiñajjiya eseya acani 
\p  
\v 31 Eꞌe, eseya Jesosa nijje baꞌe tiitiijeꞌyo quea jaꞌa nee o jayojjaya. Quea pame nee nee poajeꞌyo esejaya ebaꞌejji. Eyacuiñajjiya eseya jaahuana tiitii cani. Oya oe nei quea caꞌa nee nee poani tii. Jamajjeya eseya onaa napa canijo, jamatii Jesosaja eseya epajeaꞌyojji pojjeama.  
\v 32 Eyacuiñajjiya eseya quea jea nee nee acanijo ohuaya huoojea canaje ojaya Ebacua Ejja Jesosa esejo manoꞌyohua ese mimishi cuijeaꞌyojji. Jamajjeya eseyaya jama baña baꞌa: Eyacuiñajjiya eseya quea jea nee nee atiitii cajeꞌyo; eseya jaahuana tiitii cajeꞌyo peaꞌai. Ohuaya eseya jjapeequi meesahua cajeꞌyo quea jaꞌa nee Jesosa nijje.  
\v 33 Eyacuiñajjiya eseya babaca canaje ojaya epeejji epojji. Jamajjeya pea cuana esejo emimijajijji pojjeama Eyacuiñajji nijje jama baꞌa: —Miquea epeejji quea tai. ¡Cajaa acue! 
\p Chojja. Jamaya emimijajijji pojjeama esejo. Eyacuiñajjiya eseya emimishi cuijeaꞌyo ba cani.  
\v 34 Jesosa Quito manoꞌyonaje eseja mimishi cuijeaꞌyojji. Emanoꞌyojaa Eyacuiñajjiya oya shequi mee ca oꞌoyanaje, nequi mee caꞌyonaje o pejjejo eyajo ojjaña huoojeajji. Jomajo oya Jesosa Quito esejo mimiani jama baꞌa: —Ecuea epeejji cuana quea boejea poani, emimishi cuijeaꞌyo —Jesosa poani. 
\p Jamajjeya pea ese nijje emimijajijji pojjeama jama baꞌa: —Miquianaya shajjamaꞌ nei nei poanijo quea nee nee poaje —jama mimijajimeya epojji pojjeama ese nijje, Jesosaja epeejji cuana nijje. 
\p  
\v 35 Eseya Jesosa Quitoja quea jea nee nee poani eꞌe jojo nei. Jamajjeya pea cuaa eseya napa caje Jesosa nijje jjapeequianijo; jiquio jama poaje baꞌa: Ebaꞌejji quea camaja poaje. Quea nee, quea mete poaje. Eshahuaja epeejji cuaa quea mimishiya eseya napa caje Jesosaja esohui huohuijji poanijojo. Quea shoe nee poaje pojjaꞌa. Quimaꞌ, aemaꞌ poaje pojjaꞌa. Pea cuaa esejaya aquiana sii caje ojjaña pojjaꞌa. Jesosa nijje chacochacoanijo, pea cuaa eseya quecua cajeꞌyo pojjaꞌa. Jamatii esejaya eba eꞌe jojo nei Jesosa Quitoja eseya quea jea nee nee, epajeaꞌyojji pojjeama. Ohuaya eseya jaahuana cani.  
\v 36 Beca cuana yahuajo nei quea mase poa. Jamajjeya ohuaya Jesosaja epeejji cuana quecua caꞌya poa. Jjeya beca cuaa quea mase poaniya eseya quecua sa acani Jesosaja epeejji poanijojo. Yahuajo nei nei Eyacuiñajjija epeejjiya esohui tehue ca poa. Eyacuiñajjija esohui etehueꞌyo jama poani baꞌa: 
\q1 “Eyacuiñajji, ecuana minijje jjapeequianijo pea cuana jjashahuaba majamajaquiani jama baꞌa: —Cacuiajeaꞌyahua —poani. Jiquio ecua ñajjajja iña majje quecua cani jayojja jama onaaya ecuana acani”. 
\m Jamaya yahuajo nei nei Eyacuiñajjija epeejjiya tehue ca poa. 
\p  
\v 37 Dejja mimishi cuana quea huiso nequijo quea camaja nee Jesosa nijje ejjapeequijji. Jamatii pea cuaa eseya ejjapeequi pajea meeꞌyojji pojjeama Jesosa nijje. Chojja. Eseya Jesosaja quea jea nee poanijo eseya ojaya epeejji poani. Ohuaya eseya jaahuana cani.  
\v 38 Cuanaya esejaya eba eꞌe jojo nei Jesosa Quitoja, Emeshi Mese neija epeejji poanijo, Eyacuiñajjija quea jea nee nee poani eseya. Eꞌe, jiquiojo baꞌe, manoꞌyo majje peaꞌai eseya Eyacuiñajjija quea jea nee. Epajeaꞌyojji pojjeama tii tii. Esohuidojojji cuaa, eshahua cuaa peaꞌai Eyacuiñajji ese pajea meeꞌyojji pojjeama. Ojjañaa jjeya nei aniya, ojjañaa quijje nei poajeya peaꞌai Eyacuiñajji ese pajea meeꞌyojji pojjeama tii. Ojjañaa quea taiya quea mimishiya peaꞌai Eyacuiñajji ese pajea meeꞌyojji pojjeama tii. Eseya ojaya quea jea nee nee poajeꞌyo tii tii.  
\v 39 Jesosa Quitoja epeejji poanijo, ojjañaa quea caꞌa eyajo nequiya, ojjañaa quea caꞌa meshijo nequiya, ojjaña Eyacuiñajjija panaa peaꞌai Eyacuiñajji eseya epajea meeꞌyojji pojjeama. Eseya ojaya quea jea tii tii poajeꞌyo. 
\c 9  
\s1 Yahuajo nei Eyacuiñajjiya Isaeni cuana babaca ca poa ojaya epeejji nei epojji 
\p  
\v 1 Eyaya, Pabohua miquiana que, Jodio cuana huasijje tehueaña, ma Shoma cuiñajjijo baꞌe yasijje. Eya Jesosa Quitoja epeejji poanijo ecuea esohui eꞌe nei poani. Eꞌe, Edojjoshahua Pameya eya jjashahuabaqui meesahua cani quea jaꞌa nee.  
\v 2 Eya Jodio dejja peaꞌai. Jamajjeya eya quea yeno po tiitiiani Jodio cuanajo, Jesosa nijje jjapeequi sa po ajjajo.  
\v 3 Jodio cuana Jesosaja epeejji epojji eyaya sa neineiaña. Jjashahuabaquiani Jodio cuanajo, ecue huapa pojjeama cuanajo jama baꞌa: —Eyacuiñajjiya eya cajaa caꞌa cahua Jodio cuana cuaqui yasijje poquiꞌyo jjima epojji. Jamaya Eyacuiñajjija yaꞌyo jojjemo eya quea bihui nee pome —eya poani. 
\p  
\v 4 Yahuajo Eyacuiñajjiya Jodio cuana babaca ca poa ojaya epeejji cuana epojji. Oja bacua cuana po mee caꞌya poa. Eyacuiñajji Jodio cuana nijje nequinajejo, onajaya eba poa Eyacuiñajji ojjaña huoojeaꞌyojji quea caꞌa nee poani tii tii. Jodio cuana nijje mimi majamajanaje jama baꞌa: “Enijje jjapeequianijo miquianajaya ebacua cuana quea huiso nee poaje. Jiquio meshi eyaya quiaje miquianajaya enequijji, miquianajaya osecua cuana nequijji” Eyacuiñajji poanaje. Quijje Eyacuiñajjiya Moisesi tehue mee ca poa ojaya esohui Jodio cuana quea jaꞌa nee baꞌe meesahuajji. Etiiquiana nijje miminaje jama baꞌa: “Miquianaya eꞌe jojo nei e bihuiajji poajo, eya miquiana nijje mimije” Eyacuiñajji poanaje. Cuanaya Eyacuiñajjiya huohui canaje jama baꞌa: “Mique osecua nei quijje poeje; ohuaya miquianaya baꞌe tiitii mee cajeꞌyo onijje” Eyacuiñajjiya jamaya Jodio etiiquiana aca poa. 
\p  
\v 5 Eꞌe, Jodio cuanaja etiiquiana ma bajjani poa baꞌa: Amajama, Amajamaja bacua ejja Isaaca, Isaacaja bacua ejja Jacobo, ma quijje Isaeni bajjani aca poa, Isaenija bacua ejja cuana 12 huisome poa, Jodio cuanaja etiiquiana poa. Jesosa Quito cuaya poa dejja jayojja, yamijji, Jodio ponaja mejo poa. Etiiquianaja osecua poa Jesosa, esejaya etiiquianaja osecua. Jjeya oya ojjaña huoojeajji poani. Jamajjeya ¡oya ejjabihuiaqui tii tii! 
\p  
\v 6 Jodio cuana oe pojji cuana Jesosaja epeejji poanaje. Jamajjeya oe pojji cuanaja mimishi ecuijeaꞌyo poanaje, Jodio cuanaja. Jamatii esejaya eba Eyacuiñajjiya ojaya ehuohuiꞌyo ma etiiquiana cuana nijje ohua huohui ca poa jayojjaya acani Jesosaja epeejji cuana nijje. Jesosaja epeejji cuana ca ca oe Isaeni dejja eꞌe jojo nei poani, Eyacuiñajjija babaca.  
\v 7 Pea cuana ca ca, mimishi cuana ca ca Eyacuiñajjiya Isaenija osecua nisho ba cani. Amajamaja osecua cuana Eyacuiñajjija babacaꞌyo beca cuana poanaje. Yahuajo nei nei Eyacuiñajji Amajama nijje mimia poa jama baꞌa: “Amajama, Sanaja mejo miquea ebacua Isaaca bajjani poaje. Ojaya osecua cuana quea huiso nee nee poaje. Oya cuana ca ca mique osecua cuana eꞌe jojo nei poaje”. Jamaya Eyacuiñajjiya aca poa.  
\v 8 Ma esohui ba majje esejaya eba poa ojjaña Amajamaja osecua cuana Eyacuiñajjiya babaca jeyo jjima poa ojaya epeejji epojji. Amajamaja pea ebacua cuana cuaya poa. Jamatii Eyacuiñajji onajaya osecua cuanajo mimi jjima jama baꞌa: “Miquianajaya osecua cuana ecuea ebabaca ecuea epeejji epojji” jamaya ajjima onaya. Chojja. Oe ebacuajo huohui ca poa Eyacuiñajjiya. Amajamaja ebacua Isaaca bajjanijo ca ca oe jamaya huohui ca poa. Isaaca cuaya jjimahuajo jamaya huohui ca poa Eyacuiñajjiya.  
\v 9 Jama aca poa baꞌa: “Amajama, miquea ehuanase etii, bacuamaꞌ. Jamatii quijje oya oꞌejji poaje. Ecuea eba ache shono miquea ebacua cuayaje, dejja shoi. Apoa poajo eyaya miquea ebacua cuaya meeje”. Jamaya Eyacuiñajjiya aca poa. 
\p  
\v 10 Eyaya, Pabohua miquianaya pea esohui huohuije Isaacaja bacua cuanajo. Jamajjeya miquianaya ba meeje ojjaña Amajamaja osecua cuana Eyacuiñajjiya babacajeyo jjima ojaya epeejji nei epojji. Oe nei babaca ca poa; etiiquiana Isaaca ojaya ebabaca poa. Isaacaja ehuanase Shemeca bajjani poa, oja mejo ebacua becajaa poa, dejja peaꞌai.  
\v 11 Eꞌe, Shemecaja ebacua becajaa cuaya poa. Ma ebacua cuana cuaya jjimahuajo, mimishi ajjimahuajo peaꞌai, Eyacuiñajjiya huohui ca poa oe ebacua ojaya ebabacaꞌyo ojaya epeejji nei epojji, pea cho. Jamajjeya ojjaña ba mee ca poa ohuaya babaca cani coya ohua quea jea ba caje.  
\v 12 Ba majje pojjeama Eyacuiñajjiya ojaya epeejji epojji babaca cani. Joya ohuaya sa caniya babaca cani. Jamajjeya huohui ca poa enaese Shemeca bajjani ojaya ebacua becajaajo jama baꞌa: “Mique bacuaa Esao bajjaniya cashajjaꞌajja cahua oja chahuaja esohui, Jacoboja” Eyacuiñajjiya aca poa Shemeca.  
\v 13 Eyacuiñajjiya esohui huohuijji yahuajo ojaya esohui tehue mee caꞌya poa jama baꞌa: “Ecuea Jacobo quea jea nee nee. Esao ca ca cajaa anaje” Eyacuiñajjiya aca poa. 
\p  
\v 14 —¿Apiojji shai Eyacuiñajjiya ebionei cuaya cajaa acaꞌyonaje, ebacua quijje cuaya babaca ca poa? ¿Apiojji shai? Jamaya eseyaya ajjima aña. Jamaya quea pame pojjeama —beca cuana poani. 
\p Chojja. Eyacuiñajjiya quea pame nee nee tii acani.  
\v 15 Ohuaya Moisesi huohui ca poa jama baꞌa: “Eya beca cuana nijje quea bei poani. Beca cuana eyaya jaahuanaña. Cua eya quea jea aña eyaya babacaña” Eyacuiñajjiya aca poa.  
\v 16 Esejaya ebaꞌejjijo pojjeamajo, esejaya ejjashahuabaquijjijo pojjeamajo peaꞌai ese nijje quea bei poani Eyacuiñajji. Chojja, ojaya quea jea nee nee poanijo ohuaya eseya jaahuana cani, ese nijje quea bei poani peaꞌai.  
\v 17 Cuanaya yahuajo nei Ejito emeshi mese Panao bajjanijo Eyacuiñajjija esohui etehueꞌyo jama poa baꞌa: 
\q1 “Panao, eyaya miya nequi meeaña Ejito emeshi mese epojji. Eyaya ma dejja cuanaja ba jjima aña mi quea mete po meejji ejo. Jamaya ojjaña cuana ojjaña meshijo baꞌe ba meeje eya eꞌe nei quea caꞌa nee nee poani tii”. 
\m Jamaya Panao Eyacuiñajjiya aca poa.  
\v 18 Eꞌe, Eyacuiñajji beca cuana nijje quea bei poani. Ojaya mimishi cuana cuijea cani. Pea cuana nijje ca ca chojja, quea bei pojjeama po tiitiiani shajjamajojo. Mimishi pajea meeꞌyo jjima tii tii acani Eyacuiñajjiya. 
\p  
\v 19 Jamajjeya beca cuaa huohuiꞌajja cani jama baꞌa: —Eyacuiñajjiya ecuana mimishi pajea meesahua ajja. Jamajjeya ¿apiojji ohuaya tecuea cani ecuana quea mimishi poanijo? Ojaya ejjashahuabaquijji jayojja jama acani ohuaya, de —beca cuana poani. 
\p  
\v 20 Eyaya miquianaya sajaꞌaña jama baꞌa: ¡Aꞌa Eyacuiñajji niñebajji! Miquianajaya Eyacuiñajji emimicuiajeanobiajeajji pojjeama. Jama baꞌa: Meshimisi iñacajjiya meshimisi pana majje iñaca cani shajjajji acani. ¿Aꞌa meshimisiya tecuea caje meshimisi iñacajji jama baꞌa: —¿Apiojji acuaeya miyaya eya jamaya anaje soꞌo? —aꞌa jamaya meshimisiya acani? 
\p Cho, jamaya po ajja meshimisi.  
\v 21 Meshimisi iñacajjiya meshi iña majje ojaya ejjashahuabaquijji jayojja jama acani. Eꞌe pojjaꞌa meshimisi quea bame nee nee asa acani, yiye bame nee nee a sa acani pojjaꞌa. Ojaya ejjashahuabaquijji jayojja jama panaꞌyome acani.  
\v 22 Jamaya Eyacuiñajjiya acani peaꞌai, ojaya ejjashahuabaquijji jayojja jama acani. Beca cuana quea mimishi po tiitiianijo, Eyacuiñajjiya oya cuana quea nee nee po mee sa acani. Jamajjeya ojjaña ba mee caje Eyacuiñajji quea caꞌa nee nee poani. Jamatii oya jjeya nei quea tecue nee pocuaji ajja shajjamaꞌ nijje. Chojja, quijje nei quea nee nee po mee cajeꞌyo. Ishoa cani. Eꞌe pojjaꞌa shajjamaꞌ cuana Jesosaja epeejji poaje baꞌajjaꞌ. Jamajjeya Eyacuiñajjiya oya cuana quea nee nee epo meejji pojjeama.  
\v 23 Ese beca cuana nijje ca ca Eyacuiñajji quea bei poani. Jamaya acani eseya ojaya quea jea nee nee poanijo. Eꞌe, Eyacuiñajji quea caꞌa nee nee poani; eseya jjapeequi meesahua cani Jesosa nijje. Jamajjeya ohuaya eseya quea jaꞌa, quea pame nee nee baꞌe mee sa acani eyajo Jesosa nijje.  
\v 24 Eꞌe, Eyacuiñajjiya eseya beca cuana, Jodio cuana, Jodio pojjeama cuana peaꞌai babaca canaje ojaya epeejji epojji. Ojaya ejjashahuabaquijji jayojja jama acani, Eyacuiñajjiya.  
\v 25 Jamajjeya yahuajo nei ojaya esohui huohuijji Osea bajjani tehue mee ca poa jama baꞌa: 
\q1 “Yahuajo nei Jodio pojjeama ecuea ebabaca pojjeama ecuea epeejji epojji. Jjeya ca ca oya cuana ecuea ebabaca ecuea epeejji epojji. Yahuajo oya cuana ecuea quea jea nee pojjeama. Jjeya ca ca oya cuana ecuea quea jea nee nee poani.  
\v 26 Jodio pojjeama quea mimishi poanajejo, pea cuaa huohui ca poa jama baꞌa: —Miquianaya Eyacuiñajjija epeejji pojjeama —poanaje. Jjeya ca ca onaaya huohui caje jama baꞌa: —Miquianaya Eyacuiñajjija ebacua cuana poanaje”. 
\m Jamaya yahuajo Eyacuiñajjiya tehue mee ca poa. 
\p  
\v 27 Cuanaya yahuajo nei Eyacuiñajjija esohui huohuijji Isaiaa esohui tehue ca poa Jodio cuanajo jama baꞌa: 
\q1 “Etiiquiana Isaeni bajjanija osecua cuana quea huiso nee nee poaje. Meshijaji sope huisoajja poaje, sicosico meemee ajja quea huiso nee neejo. Jamatii oe pojji cuanaja mimishi ecuijeaꞌyo poaje. Eyacuiñajjiya oe pojji baꞌe tiitii mee cajeꞌyo onijje quea jaꞌa nee. 
\q1  
\v 28 Ohuaya ojaya esohui jayojja jama acajeꞌyo. Ojjaña shajjamaꞌ cuana quea nee nee po mee jeyojeyo cajeꞌyo onijje jjapeequi sa poꞌyo ajjajojo. Eꞌe jojo nei jamaya Eyacuiñajjiya acuaji caje”. 
\m Jamaya aca poa Isaiaa.  
\v 29 Ohuaya pea esohui tehue ca poa jama baꞌa: 
\q1 “Yahuajo Eyacuiñajjiya quiyo jeyojeyo mee caꞌya poa ojjaña quea mimijjequijea, ojjaña quea mimishi Sonoma cuiñajjijo baꞌe, ojjaña Comosha cuiñajjijo baꞌe peaꞌai. Oya jayojja beshahua nei Isaeni cuana chamaꞌyo tii popoquia poa shajjamaꞌ poanijojo. Eyacuiñajjiya oe pojji Isaenija osecua cuana jaahuana ca poa”. 
\m Jamaya aca poa Isaiaa. 
\s1 Jodio cuana Jesosa nijje jjapeequi jjima; Eyacuiñajjiya oya cuana ba jjima emimishi cuijeaꞌyo 
\p  
\v 30 ¡Jamajjeya bacue jiquio! Eyacuiñajjiya quea huiso Jodio pojjeama ba caje mimishiꞌama. Jodio cuana ca ca oe pojji ba caje mimishiꞌama. Yahuajo Jodio pojjeama cuana jjashahuabaqui jjima poanaje jama baꞌa: —¿Achajja shai ecuana baꞌeje Eyacuiñajjija esohui jayojja jama soꞌo? Jamajjeya ohuaya ecuana ba caje mimishiꞌama —jamaya jjashahuabaqui jjima Jodio pojjeama poanaje. 
\p Jamatii Jesosa nijje jjapeequianijo, Eyacuiñajjiya oya cuana ba cani mimishiꞌama.  
\v 31 Jodio cuana ca ca Eyacuiñajjiya babaca ca poa onijje ejjapeequijji. Jamatii oya cuana jjashahuaba quehuaquinaje jama baꞌa: —Ecuana ojjaña Eyacuiñajjija esohui cuana jayojja jama atiitiiañajo, ohuaya ecuana ba caje mimishiꞌama —Jodio cuana poanaje. 
\p Cho. Eyacuiñajjiya Jodio cuana ba ca poa quea mimishi ojaya esohui cuana jayojja jama mi atiitii cajo.  
\v 32 ¿Yajjajje? ¡Bacue! Eyacuiñajjiya Jodio cuana ba cani mimishiꞌama ca ca Jesosaja epeejji poanijo. Jamatii onaaya aje oe Jesosa cajaa acanaje. Jama poa cuana baꞌa: —Ecuaaya esohui etehueꞌyo jayojja jama atiitiiaña. Jamajjeya Eyacuiñajjiya ecuana mimishiꞌama ba caje —oya cuana poa. Chojja de, ajjima ojaya, de. 
\p  
\v 33 Eꞌe, yahuajo Isaiaa Eyacuiñajjija esohui tehue caꞌya poa jama baꞌa: 
\q1 “Eyaya huoojeaje mimishi cuijeajji Isaeni cuana huasijje. Jamatii Isaeni cuana jjashahuaba quehuaquije; mimishi cuijeajji cajaa acajeꞌyo. Beca cuana onijje jjapeequiajo ca ca quea bihui nee nee poajeꞌyo”. 
\m Jamaya aca poa Isaiaa Isaeni cuanajo, Jodio cuanajo. 
\c 10  
\p  
\v 1 Miquianaya Jodio cuana Shomajo baꞌe Jesosaja epeejji poanijo ecuea epeejji poani peaꞌai. Eya, Pabo Jodio peaꞌai. Eya ojjaña Jodio cuanajo mimi tiitiiani Eyacuiñajji nijje jama baꞌa: —Eyacuiñajji, ¡Jodio cuana jjapeequi meesahuacue Jesosa nijje! Jamajjeya oya cuana cuaqui yasijje epoquiꞌyojji pojjeama —jamaya eyaya atiitiiaña. 
\p  
\v 2 Ecuea eba ojjaña Jodio cuana Eyacuiñajjija epeejji po sa poani. Jamatii onajaya ejjashahuabaquijji quea quehua poanijo Eyacuiñajji nijje jjapeequi meemee ajja.  
\v 3 Jesosa nijje jjapeequiajo, Eyacuiñajjiya Jodio cuana mimishiꞌama ba caje, ma yahuajo shajjamaꞌ poa. Jamaya beshahua nei ojjaña Jodio cuanaja eba pojjeama. Jesosa cajaa acanaje. Ojaya ejjashahuabaquijji quea quehua jama baꞌa: —Quea pame poanijo, Eyacuiñajjiya ecuana ba caje mimishiꞌama —jamaya poso jjabaquinaje. 
\p Cho, Eyacuiñajjiya ojjaña ba cani mimishiꞌama Jesosa nijje jjapeequianijo, quea pame baꞌyanijo pojjeama.  
\v 4 Eꞌe, Jesosa Quito manoꞌyonaje esejo. Jamajjeya ojjaña onijje jjapeequiani Eyacuiñajjiya ba cani mimishiꞌama. Jamatii beshahua nei ojjaña Jodio cuana jjashahuaba quehuaquiani jama baꞌa: —Moisesija etehueꞌyo jayojja jama atiitiiañajo, Eyacuiñajjiya ecuana ba caje mimishiꞌama —jama posoya acani Jodio cuaa. 
\s1 Eyacuiñajjiya ojjañaja mimishi cuijeaꞌyo sa acani 
\p  
\v 5 Yahuajo nei Moisesiya Eyacuiñajjija esohui tehue ca poa jama baꞌa: 
\q1 “Eyacuiñajjiya eseya ba caje mimishiꞌama ojaya esohui atiitiiañajo. Jamajjeya ¡ojaya esohui jayojjaya oe atiitiicue!” 
\m Jamaya esohui tehue caꞌya poa Jodio cuanaja yajji. 
\p  
\v 6 ¡Aꞌa jjashahuaba quehuaquijji jama baꞌa: —Eyacuiñajjiya ecuana ba cani mimishiꞌama oja esohui etehueꞌyo jayojja jama aña tiitiijo —aꞌa jamaya jjabaquijji! Chojja, Jesosa nijje eꞌe jojo nei jjapeequianijo, Eyacuiñajjiya eseya ba cani mimishiꞌama. 
\p Eyacuiñajjiya Moisesi esohui jama tehue meeme aca poa baꞌa: 
\q1 “Aꞌa jjashahuabaquijji jama baꞌa: —Eꞌe pojjaꞌa beca cuana eyahuasijje poqui majje, poe oꞌoya majje huohui caje achajja shai amajje Eyacuiñajjiya ecuana ba caje mimishiꞌama”. 
\m Jama tehuemeya aca poa Moisesiya. 
\p Jjamajjeya ¡jamaya aꞌa jjashahuaba quehuaquijji! Jesosa poeyanaje ese que; manoꞌyonaje Eyacuiñajjija ese mimishiꞌama ebajji.  
\v 7 Moisesiya pea esohui tehue ca poa jama baꞌa: 
\q1 “¡Aꞌa jjashahuaba quehuaquijji jama baꞌa: —Beca cuana emanoꞌyo huasijje poqui majje, poe oꞌoya majje huohui caje achajja shai amajje Eyacuiñajjiya ecuana ba caje mimishiꞌama —jamaya aꞌa jjashahuabaquijji!” 
\m Jamaya Moisesiya tehue ca poa. 
\p Eꞌe, jamaya quea jjashahuabaqui quehua. Jesosa shequi oꞌoyanaje ese mimishi cuijeaꞌyojji epojji.  
\v 8 Jamajjeya Eyacuiñajjiya Moisesi esohui jama tehue meeme aca poa baꞌa: 
\q1 “Eyacuiñajjiya miquianaya ba caje mimishiꞌama ebaꞌe tiitiiꞌyojji. Quea camaja nee nee pojjeama. Eyacuiñajji miquianaya mimishiꞌama ebajji mimi huichaꞌa huichaꞌanaje. Miquianaaya shajjaꞌajja majamajanaje. Majoya jjashahuabaqui majamajanaje miquianaya”. 
\m Jamaya aca poa Moisesiya. Maya ecuaaya huohuiaña miquianajaya eshajjaꞌajjajji, Jesosa nijje ejjapeequijji.  
\v 9 Eꞌe jojo nei ejjahuohuiqui jiquio jama baꞌa: —Jesosa ecuea Emeshi Mese nei poani —ejjaꞌaqui. Eꞌe jojo nei ejjashahuabaqui jama baꞌa: —Ecuea eba Eyacuiñajjiya Jesosa shequi mee ca oꞌoyanaje —jamaya poanijo Jesosaa eseya baꞌe tiitii mee cajeꞌyo eyajo onijje. 
\p  
\v 10 Jesosajo eꞌe jojo nei jjashahuabaquianijo, Eyacuiñajjiya eseya ba cani mimishiꞌama. Eseyaya eꞌe jojo nei huohuiaña: —Eya Jesosaja epeejji. 
\p Jamajjeya Jesosaa eseya onijje baꞌe tiitii mee cajeꞌyo.  
\v 11 Yahuajo nei nei Isaiaa esohui tehue ca poa jama baꞌa: 
\q1 “Ojjaña joya jjeya nei Eyacuiñajjija huoojeaꞌyo ojjaña jaahuanajji nijje jjapeequiani Eyacuiñajjiya ba cani mimishiꞌama eꞌe jojo nei”. 
\m Jamaya Isaiaa aca poa. 
\p  
\v 12 Eꞌe, Jesosa esejaya Emeshi Mese nei oe nei, ojjañaja; Jodio cuanaja, Jodio pojjeama cuanaja peaꞌai. Eꞌe, Jodio cuana Jodio pojjeama jayojja nei peaꞌai. Onijje mimianijo, Jesosaa eseya jaahuana cani quea pame nee.  
\v 13 Eꞌe, eseya beca cuana mimije Jesosa nijje jama baꞌa: —Jesosa, ecuea Emeshi Mese nei, ¡ecuea mimishi cuana cuijeaꞌyocue! —jamaya mimianijo, Jesosaa eseja mimishi cuijeaꞌyo majje baꞌe tiitii mee cajeꞌyo eyajo. 
\p  
\v 14 Pea cuanaja Jesosa ba jjima, onijje mimi jjima; emimishi cuijeaꞌyojji pojjeama. Shajjaꞌajja jjima Jesosa manoꞌyonaje ojjañaja mimishi cuijeaꞌyojji. Jesosaja esohui huohuijji poqui jjima ona huasijje esohui quea pame Jesosajo huohuiya. ¿Achajja shai oya cuana Jesosaja epeejji poaje soꞌo?  
\v 15 Eyacuiñajjiya ojaya esohui huohuijji pea cuana huasijje huoojea jjimajo, oya cuana Jesosajo eshajjaꞌajjajji pojjeama. Yahuajo nei Eyacuiñajjija esohui huohuijji Isaiaa esohui tehue ca poa jama baꞌa: 
\q1 “Eyacuiñajjija esohui huohuijji poeyajo esohui quea pame huohuiya, ecuana quea bihui nee nee poaje. Eꞌe jojo nei jamaya poaje”. 
\m Jamaya esohui tehue ca poa. 
\p  
\v 16 Eꞌe, Eyacuiñajjija esohui huohuijji poquinaje Isaeni cuana huasijje. Huohui caꞌya poa ojaya esohui quea pame nee. Jamatii Isaeni cuana aje oe shajjaꞌajja sa poꞌyo ajja poa. Isaiaa yahuajo nei esohui tehue ca poa Isaeni cuanajo jama baꞌa: “Emeshi mese, oe pojji Isaeni cuaa ecuanajaya esohui shajjaꞌajja canaje” jamaya Isaiaa aca poa. 
\p  
\v 17 Eyacuiñajjiya ojaya esohui huohuijji huoojea cani esohui quea pame nee Jesosajo huohuiya. Jamajjeya ma esohui quea pame nee shajjaꞌajja majje Jesosa nijje jjapeequijeꞌyo.  
\v 18 Jamatii beca cuana jjashahuabaquiani jama baꞌa: —Eꞌe pojjaꞌa Isaeni cuanaja shajjaꞌajja jjima esohui quea pame Jesosajo. Jamajjeya Jesosa nijje jjapeequi jjima poanaje. 
\p Chojja. Shajjaꞌajja canaje. Jamatii shajjamaꞌ jayojja poanaje. Yahuajo Eyacuiñajjiya esohui quea pame Jesosajo tehue mee ca poa jama baꞌa: 
\q1 “Ojjaña meshijo baꞌe yasijje Eyacuiñajjiya esohui huohuijji cuana esohui quea pame huohui mee canaje”. 
\m Jamaya yahuajo nei aca poa Dabiya. 
\p  
\v 19 Beca cuana jjashahuaba quehuaquiani jama baꞌa: —Eꞌe pojjaꞌa Isaeni cuanaja Eyacuiñajjija esohui quea pame shajjaꞌajja jjima. Jamajjeya mi jjapeequinaje Eyacuiñajji nijje —jamaya beca cuana poani. 
\p Cho. Onaaya shajjaꞌajja canaje. Yahuajo nei Moisesiya Eyacuiñajjija esohui tehue ca poa jama baꞌa: 
\q1 “Isaeni cuana, miquianaya ebionei ecuea ebabaca coo, eyaya babaca coonaje ecuea epeejji epojji. Miquiaaya ca mo ca oe cajaa anaje. Jamatii eyaya pea cuana babacajeꞌyo ecuea epeejji nei epojji. Jamajjeya miquianaya quea quene poaje ona nijje, Isaeni pojjeama cuana nijje. Jjashahuabaquije jama baꞌa: —Isaeni pojjeama cuana quea pame pojjeama. Ecuana ca ca quea pame nee. Eyacuiñajji eꞌe jojo nei onajaya ba jjima. Ecuanajaya ca ca oya eba. ¿Apiojji shai Eyacuiñajjiya babaca cani Isaeni pojjeama cuana? Oya cuana cajaa —jamaya miquianaya poaje”. 
\m Jamaya Moisesiya aca poa Isaeni cuana.  
\v 20 Majoya Isaiaa Eyacuiñajjija esohui quea jaꞌa nee tehue ca poa jama baꞌa: 
\q1 “Pea cuanaja eya ba jjima. Eyaya oya cuana jjapeequi meesahuajeꞌyo enijje. Oya cuana mimi jjima enijje ojaya mimishi cuijeaꞌyojji. Jamatii oya cuana ecuea esohui ba meesahuajeꞌyo”. 
\m Jamaya Isaia tehue mee ca poa yahuajo nei nei.  
\v 21 Eyacuiñajjiya Isaia pea esohui tehue mee ca poa Isaeni cuanaja jama baꞌa: 
\q1 “Eyaya Isaeni cuana iyaa majamajanaje enijje ejjapeequijji. Jamatii ecuea esohui etehueꞌyo jayojja jama a sa poꞌyo ajja tii tii. Shajjamaꞌ ojjaña cuana, quea mimishi nee nee”. 
\m Jama tecueameya Isaiaa Isaeni cuana aca poa. 
\c 11  
\s1 Eyacuiñajjija Jodio cuana cajaa ajjima 
\p  
\v 1 Beca Jodio cuana jjashahuabaquiani jama baꞌa: —Ecuana Isaeni cuana. Eyacuiñajjija babaca. Jamatii jjeya Eyacuiñajjiya ecuana cajaa acanaje —beca cuana jamaya poani. 
\p Chojja de. ¡Bacue! Eya Isaeni dejja, Jodio dejja. Eya Eyacuiñajjija cajaa ajjima. Amajama ecuea etiiquiana poa. Bejami Amajamaja osecua. Eya Bejamija osecua.  
\v 2 Eꞌe, Eyacuiñajjiya Jodio cuana babaca coo ca poa ojaya epeejji epojji. Yahuajo nei Eyacuiñajjija esohui huohuijji Enia bajjanija esohui etehueꞌyo miquianajaya eba. Enia Jodio cuanajo quea quene mimia poa Eyacuiñajji nijje jama baꞌa: 
\q1  
\v 3 “Eyacuiñajji, Emeshi Mese nei, ¡bacue pea Isaeni cuana! Ohuaya aje oe cuiajea caꞌyonaje miquea esohui huohuijji cuana. Mei eꞌiya ani iñajeaoqueajea caꞌyonaje, ma aquiana dahuajji acani cuaa mi quea bei ecuana nijje epojji iñajeaoqueajea caꞌyonaje. Eya ee nei yani miquea epeejji. Eya cuiajea sa acani peaꞌai Isaeni cuaa”. 
\m Jamaya aca poa Eniaa. 
\p  
\v 4 Eyacuiñajjiya Enia sajaꞌa ca poa jama baꞌa: 
\q1 “Chojja. Quea huiso nee nee Isaeni cuana ecuea epeejji yani. Eꞌe, 7.000 huisome Isaeni cuana eyacuiñajji nisho Baani bajjani bihuiajji pojjeama. Quea huiso Isaeni cuana ecuea esohui jayojja jama baꞌyani”. 
\m Jama sajaꞌameya Eyacuiñajjiya aca poa Enia. 
\p  
\v 5 Jjeya nei cuanaya beca Jodio cuaa Eyacuiñajjija esohui jayojja jama acani. Eyacuiñajjiya oya cuana babaca canaje ojaya epeejji epojji. Oja mimishijo jjashahuabaqui tiitii ajja. Eyacuiñajjiya oya cuana quea jea nee acani. Jamajjeya oya quea bei nee poani ona nijje, Eyacuiñajji.  
\v 6 Eꞌe, Eyacuiñajjiya Jodio cuana quea jea nee acanijo oya cuana babaca canaje ojaya epeejji epojji. Quea bei Jodio cuana nijje poanaje. Onaja mimishi cuanajo jjashahuaba tiitiiqui ajja. Jodio cuana ojaya quea jea nee poanajejo babaca caꞌya poa. Babacaꞌyo jjima ojaya esohui jayojja jama atiitii canajejojo. 
\p  
\v 7 Eꞌe, beca Jodio cuana Eyacuiñajjija epeejji pojjeama poanaje. Quea huiso Eyacuiñajjija esohui jayojja jama anisho canaje. Jamajjeya Eyacuiñajjiya oya cuana ba canaje quea mimishi. Eꞌe, Eyacuiñajjiya Jodio cuana babaca canaje ojaya epeejji epojji. Beca cuana eꞌe nei poanaje. Jamatii pea cuana quea mimishi nee nee poanaje.  
\v 8 Yahuajo nei nei Moisesiya Eyacuiñajjija esohui tehue ca poa jama baꞌa: 
\q1 “Jamajjeya Eyacuiñajjija shajjamaꞌ cuana quea jjashahuabaqui jaꞌa epo meejji pojjeama. Eyacuiñajjija etehueꞌyo eꞌe nei ba majje jamatii ojaya quea quehua poa. Esohui eꞌe nei shajjaꞌajja majje jamatii quea quehua poa peaꞌai. Eꞌe, jamaya Isaeni cuana jjeya peaꞌai shajjamaꞌ po tiitiiani”. 
\m Jamaya Moisesiya tehue ca poa. 
\p  
\v 9 Yahuajo nei nei emeshi meseya Dabiya Jodio shajjamaꞌ cuana tecuea ca poa jama baꞌa: 
\q1 “Esejaya etiiquianaja esohui jayojja jama atiitiiaña miquianaaya. Poquiquehuajeꞌyo, de, edasiaꞌyo poajeꞌyo, de, quea mimishi nee nee. Jamajjeya Eyacuiñajjiya miquianaya quea nee nee capo mee cahua.  
\v 10 Cojjamaja ejiojji ba jjima jayojja jama miquianajaya ba jjima capoahua tii tii Eyacuiñajjija ejjashahuabaquiꞌyojji. Cuanaya aquiana quea biquie abo tiitii cani jayojja jama capoahua miquianajaya mimishi; epajeaꞌyojji pojjeama tii tii capoahua”. 
\m Jamaya Dabiya tehue ca poa yahuajo nei nei Jodio cuanajo. 
\s1 Eyacuiñajjiya Jodio cuana iyaa cani tii ojaya epeejji epojji 
\p  
\v 11 Eꞌe pojjaꞌa beca cuana jama jjashahuabaquime poani baꞌa: —¿Aꞌa Jesosa cajaa acanajejo, Eyacuiñajjiya Jodio cuana cajaa acajeꞌyo tii? 
\p Chojja, jamaya pojjeama. Ecuana, Jodio cuana quea mimishi nee nee poanijo, Eyacuiñajjija esohui aꞌajjajo, ohuaya Jodio pojjeama cuana jjapeequi meesahua cani Jesosa nijje. Onajaya mimishi cuana cuijea caꞌyani. Eyacuiñajji jjashahuabaquiani jama baꞌa: —Eꞌe, Jodio pojjeama cuana Jesosa nijje jjapeequi meesahuaña ba majje eꞌe pojjaꞌa Jodio cuana Jesosa nijje jjapeequijeꞌyo peaꞌai enijje ebaꞌe tiitiiꞌyojji —jamaya Eyacuiñajji jjashahuabaquiani. 
\p  
\v 12 Jodio cuana aje oe jjashajjaꞌajjaqui ajja. Jamajjeya Eyacuiñajjiya Jodio pojjeama cuana Jesosa nijje jjapeequi meesahua caꞌyonaje. Eyacuiñajjiya Jodio pojjeama cuana quea pame acanaje Jodio cuana Jesosa nijje jjapeequi jjima jojoya. Jodio cuana Jesosa nijje jjapee neineiquiajo ca ca Eyacuiñajjiya quea pame nee nee acajeꞌyo ojjaña. 
\p  
\v 13 Jodio pojjeama cuana Shomajo baꞌe, Eyacuiñajjiya eya huoojea canaje miquiana que ojaya esohui huohuiya. Eyaya esohui huohuiaña tii tii miquianaya Jesosaja epeejji epo meesahuajji.  
\v 14 Jamajjeya ma ba majjeya Jodio cuana pojjaꞌa Jesosaja epeejji po sa poajeꞌyo peaꞌai.  
\v 15 Eꞌe, Jodio cuaa Jesosa cajaa aca poajo, Eyacuiñajjiya Jodio pojjeama onijje jjapeequi meesahua canaje. Jamaya quea pame nee. Jamatii quijje Jodio cuana Jesosa nijje jjapeequi meesahua cajeꞌyo peaꞌai. Eꞌe, jjeya Jodio emanoꞌyo jayojjaya poani shajjamaꞌ jjejojo. Jesosa nijje jjapeequiꞌyo majje ca ca eshequiꞌyo jayojja poajeꞌyo, de, quea pame nee nee.  
\v 16 Eꞌe, jjeya oe pojji Jodio cuana Jesosaja epeejji nei poani. Jamajjeya quijje Eyacuiñajjiya quea huiso Jodio cuana ojaya epeejji nei po mee cajeꞌyo. Jama baꞌa: Acui esajja quea pame nee nee poajo, quijje tii majje ejjajja quea pame nee poaje peaꞌai. Oya jayojjaya Amajama Eyacuiñajjija ebabaca poa. Jamajjeya oja osecua cuana Eyacuiñajjija ebabaca poaje peaꞌai. 
\p  
\v 17 Jjashahuabaquicue jama baꞌa: Eꞌacui meseya acui aa enojinoji cobojea majje ejee cojjajji iyanobia cani etiiꞌyojji. Acui sajja quea pamejo pea acui jee cojjajji eꞌiyanobia pohuajeꞌyo. Oya jayojjaya beca Jodio cuana Jesosa cajaa acanajejo quea tai poa, acui aa enojinoji jayojja. Pea ejee cojjajji iyanobia majje pohuaꞌyani jama Jodio pojjeama Jesosaja epeejji cuana poaje. Jiquio ecua ecuicojjone sajjajji jayojja eseya quea pame baꞌe mee cani.  
\v 18 Jamajjeya Jodio pojjeama cuana, ¡aꞌa jjashahuabaquijji miquianaya quea pame nee, Jodio cuana quea pame pishana! Chojja. Eyacuiñajji miquianajaya eba poanaje Jodioja ehuohuijo. Miquianajaya ehuohuijo pojjeama ca ca Eyacuiñajji Jodio cuanaja eba poa. 
\p  
\v 19 Eꞌe pojjaꞌa miquianaya jjashahuabaquiani jama baꞌa: —Jesosa cajaa aca poajo Jodio cuana acui aa ecobojeaꞌyo jayojja jama poanaje. Eseya, Jodio pojjeama ca ca Jesosaja epeejji poanijo ecuicojjonejo pea ecojja posho eꞌiyanobiaꞌyo quea pame pohuaꞌyani jayojja jama —miquianaya poani. 
\p  
\v 20 Eꞌe, jamaya poanaje. Jesosa cajaa amajje Jodio cuana acui aa ecobojeaꞌyo jayojja jama poanaje. Eyacuiñajjiya oya cuana cajaa aca poa. Miquianaya ca ca oe Jesosa nijje jjapeequiꞌyajo, Eyacuiñajjiya ba cani mimishiꞌama. Eꞌe, jjeya Eyacuiñajjiya miquianaya babaca canaje. Jamatii ¡aꞌa jjashahuabaquijji miquianaya quea pame nee Jodio cuana quea pame pishana! Chojja. ¡Miquianaya quea jaꞌa nee Jesosa nijje jjapee tiitiiquicue!  
\v 21 ¡Bacue oe! Eyacuiñajjiya Jodio cuana babaca coo ca poa ojaya epeejji epojji. Majoya Jodio cuana jjashajjaꞌajjaqui sa po ajjajo, ohuaya miquianaya babaca canaje, Jodio pojjeama cuana. Jiquio ecua acui aa nojinoji jehuisejjajeaꞌyo majje eyacua iyanobia caꞌyani jama jayojja Eyacuiñajjiya Jodio shajjamaꞌ cuana cajaa ajeaꞌyo majje miquianaya babaca canaje. Jamajjeya ¡aꞌa shajjamaꞌ pojji! Eyacuiñajjiya miquianaya cajaa aca chanaꞌ.  
\v 22 Eꞌe, Eyacuiñajjiya ojjaña quea jea nee nee acani. Shajjamaꞌ cuana ca ca tecuea neinei cajeꞌyo, de. Eꞌe, ojjaña joya shajjamaꞌ poani ohuaya quea nee nee po mee cajeꞌyo. Miquianaya ca ca ohuaya quea pame nee nee acani ojaya quea jea nee neejojo. Ohuaya miquianaya quea jea nee acajeꞌyo tii tii, ca jjashajjaꞌajja tiitiiquiajo. Shajjamaꞌ poajo ca ca ohuaya miquianaya quea nee nee po mee cajeꞌyo peaꞌai, de.  
\v 23 Eꞌe, Jodio cuana peaꞌai Jesosa nijje jjapeequiajo Eyacuiñajjiya ojaya epeejji nei po mee caje oꞌoya, yahuajo nei nei jayojjaya. Eꞌe nei, jiquio ecua acui aa ejehuisejjajeaꞌyo iyanobia ca oꞌoyani jama jayojja Eyacuiñajjiya oya cuana acajeꞌyo; ojaya epeejji nei po mee caje oꞌoya.  
\v 24 Miquianaya ca ca Jodio pojjeama cuana yahuajo nei Eyacuiñajjija ebabaca pojjeama poa. Jamajjeya miquianaya pea acui aa jayojja, ebiojo nequi acui aa jayojja. Jamatii jiquio ecua ebiojo nequi acui aa acui bame bame yasijje iyanobia cani jayojja jama Eyacuiñajjiya miquianaya babaca canaje ojaya epeejji nei epojji. Jamajjeya Eyacuiñajjiya miquianaya acanaje jayojja jama ohuaya Jodio cuana acajeꞌyo. Eꞌe, ecuea etiiquiana Eyacuiñajjiya babaca coo ca poa. Jamajjeya jiquio ecua acui ebanaꞌyo acui aa ejehuisejjajeaꞌyo oya tii acuijo iyanobia caje oꞌoya jayojja jama Eyacuiñajjiya Jodio cuana acajeꞌyo. Jesosa nijje jjapeequiajo Eyacuiñajjiya huohui caje jama baꞌa: —Eꞌe Jodio cuana, jjeya miquianaya ecuea epeejji nei po oꞌoyanaje, ojjaña —acaje Eyacuiñajjiya. 
\s1 Jodio cuana Jesosaja epeejji quijje poajeꞌyo 
\p  
\v 25 Ecuea epeejji cuana, eyaya miya huohuije ma Eyacuiñajjiya quijje acaje Jodio cuanajo, ma yahuajo ojjañaja ba jjima poa. Jamajjeya ecuea esohui ba majje miquianaya ejjashahuabaquijji pojjeama jama baꞌa: —Ecuanaya nei ca ca oe Eyacuiñajjija ebabaca ojaya epeejji nei epojji —aꞌa oe miquianaya pojji. 
\p Chojja. Jjeya Jodio cuaa Emeshi Mese nei Jesosa cajaa acani beshahua nei ojjañaa. Jamaya epoꞌyojji tii pojjeama. ¿Ache Jodio pojjeama cuana Jesosaja epeejji poaje? Eyacuiñajjija eba. Mahuiso jjapeequiajo, Jodio cuana jjapeequije oꞌoya Jesosa nijje.  
\v 26 Jamajjeya quea huiso nee nee Jodio cuana eyajo baꞌe tiitii mee cajeꞌyo Jesosa nijje jjapeequiajo. Eꞌe, yahuajo nei Eyacuiñajjiya Isaia tehue mee ca poa Isaeni cuanajo, ma Jacoboja osecua cuanajo jama baꞌa: 
\q1 “Eyacuiñajjija huoojeaꞌyo ojjaña jaahuanajji poeje. Oya Jodio dejja poaje. Oya Jacoboja osecua cuana mimishi pajea meesahuaꞌyojji poajeꞌyo.  
\v 27 Ma ecua eyaya Jodio etiiquiana huohuinaje jamaya eyaya ajeꞌyo; ojjañaja mimishi cuijea neineijeꞌyo”. 
\m Jamaya yahuajo nei nei Eyacuiñajjiya aca poa. 
\p  
\v 28 Jamatii jjeya Eyacuiñajjiya Jodio cuana ba cani ojaya epeejji pojjeama Jesosa cajaa ajji poajojo. Jamajjeya Jodio cuaa ma esohui cajaa acajo, Eyacuiñajjiya esohui quea pame nee Jesosajo miquianaya shajjaꞌajja mee canaje, Jodio pojjeama cuana. Jamatii Eyacuiñajjiya Jodio cuana cajaa tiitii ajjima, de. Yahuajo nei ecuana ojaya ebabaca poa. Ohuaya ecuanaja etiiquiana huohui ca poa jama baꞌa: “Miya, miquea osecua cuana peaꞌai ecuea epeejji nei cuana poajeꞌyo tii tii” jamaya ohuaya Amajama, Jacobo, Isaaca peaꞌai huohui ca poa.  
\v 29 Eꞌe jojo nei Eyacuiñajjiya ojaya esohui jayojja jama acajeꞌyo, epajeaꞌyojji pojjeama tii tii. Babacaꞌyo majje cajaa yaꞌyojji pojjeama tii.  
\v 30 Jamajjeya jjeya Jodio cuana Jesosa nijje jjapeequi sa poꞌyo ajja jojoya Eyacuiñajjiya miquianaya, Jodio pojjeama cuana quea bei nee acani. Miquianaja mimishijo jjashahuaba tiitiiqui ajja, jamatii yahuajo shajjamaꞌ nei poa.  
\v 31 Eyacuiñajjiya quijje Jodio cuana jama acajeꞌyo baꞌa: Jjeya ohuaya miquianaya quea bei acani; miquea mimishijo jjashahuabaqui ajja. Oya jayojjaya quijje ohuaya Jodio cuana acajeꞌyo, jamatii jjeya shajjamaꞌ nei poani.  
\v 32 Jamajjeya Eyacuiñajjiya ojjaña cuana ba cani shajjamaꞌ nei nei. Jesosa nijje jjapeequiajo ca ca ojjañaja mimishijo jjashahuaba tiitiiqui ajja poaje. Quea bei ojjaña cuana nijje poajeꞌyo Eyacuiñajji. 
\s1 Eyacuiñajji bihuia cani Pabohua 
\p  
\v 33 Quea pame nee nee Eyacuiñajjiya eseya acani. Ojjaña eseya ojaya eba nei nei; oya esejaya mimishi cuijeaꞌyojji. Eꞌe jojo nei ojjaña ojaya eba nei nei. Quea jaꞌa nee nee ojaya ejjashahuabaquijji. Quea pame nee nee ohuaya acani ojjaña.  
\v 34 Yahuajo nei Eyacuiñajjiya Isaia tehue mee ca poa jama baꞌa: 
\q1 “¿Ajea eba nei nei Eyacuiñajjija ejjashahuabaquijji? ¿Aꞌya shai o ba meesahuajji? Chamaꞌ nei nei. Oya oe nei quea jjashahuabaqui jaꞌa nee nee.  
\v 35 ¿Aya acuae jja mi oe che quia cani aquiana Eyacuiñajjija? Ojjaña aquiana cuana ojaya, de”. 
\m Jamaya Eyacuiñajjija esohui Isaiaa yahuajo nei tehue ca poa. 
\p  
\v 36 Eꞌe, Eyacuiñajjiya ojjaña aquiana pana caꞌya poa. Ojjaña ojaya aquiana. Quea sohui poja nee neeya jjejojo ohuaya ojjaña quea pame amee cani. Jamajjeya ojjañaa ba cani oya quea jaꞌa nee, quea pame nee nee peaꞌai: —Eyacuiñajji, miya quea pame nee. Pea chamaꞌ mi jayojjaya —jamaya ¡oya ejjabihuia tiitiiqui! ¡Jamaya ejjaꞌaqui! 
\c 12  
\s1 ¡Jesosaja epeejji poanijo ojaya esohui jayojja acue! 
\p  
\v 1 Jamajjeya ecuea epeejji cuana, ¡shajjaꞌajjacue mo! Eyacuiñajji ese nijje quea bei poani, mimishijo jjashahuaba tiitiiqui ajja. Jamajjeya ¡ojaya epeejji nei nei baꞌecue! ¡Eyacuiñajji bihuiacue jama baꞌa: —Eyacuiñajji, eya miquea nei nei. Miquea ejjashahuabaquiꞌyojji jayojja jama eyaya ajeꞌyo —jamaya pocue! Eꞌe, ¡Jesosa jayojja jama baꞌe tiitiicue quea pame nee! Eyacuiñajji bihuiacue jama baꞌa: —Eyacuiñajji, miya quea pame nee nee. 
\p  
\v 2 ¡Aꞌa Eyacuiñajjija epeejji pojjeama jayojja pojji! ¡Eyacuiñajjiya eseya ojaya esohui jayojja jama capo mee cahua! Cajjashahuabaqui mee cahua o jayojja. Majoya ojaya ejjashahuabaquijji eseya ba mee cajeꞌyo. Ma ese ohua amee cajeꞌyo ojo ohuaya eseya ba mee cajeꞌyo. Ojaya ejjashahuabaquijji quea pame nee nee, quea jaꞌa nee nee enequi tiitiijji peaꞌai. 
\p  
\v 3 Eyacuiñajjiya eya huoojea canaje ojaya esohui huohuiya. Jamajjeya eyaya miquianaya ba meesahuaña quea pame nee ebaꞌejji. Eꞌe, Eyacuiñajjiya eseya baꞌe meesahua cani ojaya epeejji epojji. Jamajjeya ¡aꞌa jjashahuabaquijji jama baꞌa: —Eya quea pame nee nee —aꞌa jamaya pojji! Chojja, ¡quea bei nee jjashahuabaquicue! ¡Jama acue baꞌa: —Eyacuiñajjiya eya chaco meesahua cani jayojja jama eyaya onijje chacoje —jamaya pocue! 
\p  
\v 4 ¡Bacue! Esejaya eyami oe. Jamatii esejaya eyamijo yani emeꞌ, ejiojji, ecojja, equise peaꞌai. Emeꞌ ca ca ecojja jama pojjeama; pea. Jamatii ojee chaco cani oe eyamiya.  
\v 5 Oya jayojjaya eseya Jesosaja epeejji cuana quea huiso nee. Oe epeejji pea jayojja chacochaco ajja. Jamatii eseyaya ojee chacoaña Jesosa nijje.  
\v 6 Jesosa nijje jjapeequianijo, Eyacuiñajjiya eseya chaco meesahua cani quea pame ojaya echacojjijo. Eꞌe, ohuaya beca cuana chaco meesahua cani oe echacojjijo. Pea epeejji chaco meesahua cani pea echacojjijo, de. Jamajjeya ¡ohuaya chaco mee cani jayojja jama ejjaꞌaqui! Jamajjeya ¡quea jaꞌa nee ejjasohuihuohuiqui, ohua huohui mee cani jayojja jama ejjaꞌaqui!  
\v 7 Beca cuana ca ca ona baꞌe meesahuajji po mee cani ohuaya. Jamajjeya ¡quea bihui nee ojjaña cabaꞌe meesahua cahua! Jesosaja epeejji sohui bameejji ohuaya po mee canijo, ¡ojjaña esohui caba meesahua cahua, hueaꞌama capoahua!  
\v 8 Ona jjabahuejjaquijji po mee canijo, pea epeejji cajjabahuejjaqui mee cahua quea jaꞌa nee: —Eyacuiñajjiya miya quea bihui po mee caje mimishiꞌama baꞌyanijo —cahuohui cahua cuana. 
\p Eyacuiñajjiya Jesosaja epeejji beca cuana quea aquiana huiso po meesahua cani peaꞌai. Jamajjeya quea bihui nee capoahua, nishehuiꞌama, dejja taiꞌama. Beca cuana pea epeejji jaahuanajji po mee cani. Jamajjeya eꞌe jojo nei quea jaꞌa nee nee cajjashahuabaquiahua. Pea epeejji ca ca aemaꞌ cuana, emanojaa cuana jaahuanajji po mee cani. Jamajjeya quea jea nee cajaahuana cahua Jesosaja epeejji cuana. 
\s1 ¡Jesosaja epeejjiya pea epeejji cuana quea jea nee acue! 
\p  
\v 9 ¡Eꞌe jojo nei ojjaña cuana quea jea nee nee acue! Jamajjeya ¡aꞌa pea cuana quea tai ajji! Chojja, ¡ojjaña cuana quea pame nee nee acue!  
\v 10 Eꞌe, ¡ojjaña Jesosaja epeejji quea jea nee acue! ¡Miquea huapa pojjeama jayojja jama quea jea nee neeya acue!  
\v 11 Jamajjeya ¡quea jaꞌa chacocue hueaꞌama! ¡Jesosajo, Emeshi Mese neijo quea bihui nee acue ojaya yajjijo!  
\v 12 Eyacuiñajjija esohui ese nijje jayojja jama ohuaya acajeꞌyo eꞌe jojo nei. ¡Jamajjeya quea bei pocue! Quea yeno dejja mimishiya mimia cajje ¡aꞌa oe Jesosa pajeaꞌyojji quea yeno po majje! ¡Eyacuiñajji nijje mimi tiitiicue jama baꞌa: —Eyacuiñajji, ¡eya jaahuanacue! ¡Eya baꞌe meesahuacue quea jaꞌa nee! —jamaya pocue Eyacuiñajji nijje! 
\p  
\v 13 ¡Jesosaja epeejji aemaꞌ poanijo ebaꞌe meesahuajji quiacue! Pea cuana miquea cuiñajjijo nequiñaquiꞌyajo, ¡iyaacue bobi ijjiajji, ecahuijji peaꞌai!  
\v 14 Jesosaja epeejji, dejja mimishiya miya mimia cajje ¡aꞌa panajajijji! ¡Eyacuiñajji nijje mimicue jama baꞌa: —Ecue Chii, ¡e cuiajji epo mique Bacua Ejja Jesosa nijje jjapeequi meesahuacue! —acue! 
\p  
\v 15 ¡Joya quea bihui nee poani onijje quea bihui pocue! Quea yeno poanijo, paꞌanijo ca ca ¡onijje mimicue; yenoꞌama tii tii po meecue!  
\v 16 ¡Mi jayojjaya Jesosaja epeejji cuana quea pame nee baꞌe meesahuacue! ¡Aꞌa jama jjashahuabaquijji baꞌa: —Onajaya aquiana quea pame nee nee. Eya o jayojjaya poaje —aꞌa jama jjashahuabaquimeya pojji! 
\p ¡Aemaꞌ cuana aꞌa cajaa ajji! Chojja. ¡Jjapeequicue onijje! ¡Aꞌa jjashahuabaquijji miya quea pame nee nee, pea cuana quea pame pishana!  
\v 17 Onaa miya quea mimishi acajje ¡aꞌa onijje quea mimishi pojji! ¡Quea pame nee po tiitiicue ojjañaja ebajji miya eꞌe jojo nei Jesosaja epeejji poani!  
\v 18 Quea camaja ebaꞌejji pojjaꞌa. Jamatii ¡ojjaña nijje quea bei nee baꞌecue!  
\v 19 Onaa napa cajje ¡aꞌa jjashahuabaquijji jama baꞌa: —Ohua e acanaje jayojjaya eyaya oya aje, de —aꞌa jamaya pojji! 
\p Chojja. Eyacuiñajjiya casosequia caꞌyahua. Jamaya Eyacuiñajjija esohui etehueꞌyo poa baꞌa: 
\q1 “Ecuea epeejji napajji poani eyaya eyaye nei sosequiajeꞌyo; quea nee nee po meejeꞌyo. Eyaya, Emeshi Mese neiya jamaya huohuiaña”. 
\m Yahuajo nei jamaya Eyacuiñajjiya tehue mee ca poa.  
\v 20 Pea tehue mee ca poa jama baꞌa: 
\q1 “Mi napajji poani cuana quea shoe poajo, ¡bobiacue oe! ¡Quea naba taja poajo, ena quiacue! Miya jamaya ajje oya quea bicho nee nee poaje. Miya napa pajea cajeꞌyo pojjaꞌa, miquea epeejji poaje”. 
\m Jamaya yahuajo tehue ca poa Eyacuiñajjija esohui. 
\p  
\v 21 ¡Aꞌa jjashahuabaquijji jama baꞌa: —Ojjaña joya ecuana nijje quea mimishi poani eya o jayojjaya poaje peaꞌai, de —aꞌa jamaya pojji! 
\p Chojja. Miya napa cajje ¡jamatii oya cuana quea pame nee acue! 
\c 13  
\s1 Jesosaja epeejji cuaa emeshi mese cuana cashajjaꞌajja cahua 
\p  
\v 1 Emeshi meseya huoojea canijo, ¡jjashajjaꞌajjaquicue! Emeshi mese cuana Eyacuiñajjiya huoojea canaje ojjaña cuana quea jaꞌa baꞌe meesahuaa. Jamajjeya emeshi mese cuana Eyacuiñajjiya quea caꞌa po mee cani ese huoojeajji.  
\v 2 Jamajjeya jjashajjaꞌajjaqui ajjajo ca mi ca oe Eyacuiñajjiya miquianaya ba cani shajjamaꞌ ojaya ehuoojeaꞌyoja esohui shajjaꞌajja sa po ajjajo. Shajjamaꞌ cuana aje oe quea nee po mee cajeꞌyo.  
\v 3 Eyacuiñajjija emeshi mese cuana huoojea jjima quea pame baꞌyani cuana quea mete po meeya. Quea mimishi baꞌyani cuana ca ca quea mete capo mee cahua. ¿Aꞌa miya emeshi mese cuanajo meteꞌama baꞌe sa poani? ¡Quea pame acue, ojaya esohui jayojja! Jamajjeya oya minijje quea bihui nee poaje pojjaꞌa: —Eꞌe, ¡jamaya quea pame nee acue! —oya poaje. 
\p  
\v 4 Eꞌe, Eyacuiñajjiya emeshi mese cuana huoojea canaje ese quea jaꞌa baꞌe meesahuaa. Jamajjeya ¡quea mimishi po majje quea mete pocue ojo! Ohuaya miya jjabahuejjaqui mee caje. Jamaya Eyacuiñajjiya oya cuana huoojea cani shajjamaꞌ cuana jjabahuejjaqui meejji.  
\v 5 Jamajjeya ¡emeshi mese cuana shajjaꞌajjacue meteꞌama ebaꞌejji, Jesosaja epeejji quea pame nee epojji peaꞌai!  
\v 6 ¡Jamaya peaꞌai oya cuana sosequiacue! Ojjaña quea pame baꞌe mee cani sosejje emeshi mese sosequia cani cuaa, Eyacuiñajjija huoojea.  
\v 7 Jamajjeya: —¡Sosequiacue mo! —ohua acajje ¡jamaya quiacue emeshi meseja ebaꞌe meejji ohua chaco cani sosejje, mahuiso tiiya! ¡Miya jaahuana canijo, miquea meshi cuiña canijo peaꞌai, sosequiacue! ¡Eꞌe, emeshi mese cuana shajjaꞌajjacue! ¡Oya cuana sosequiacue peaꞌai! ¡Jama acue peaꞌai baꞌa: —Emeshi mese, miya quea pame nee ecuana baꞌe meesahuaña —acue! Jamaya quea pame nee. 
\s1 ¡Jesosaja epeejji cuana quea jea acue; pea cuana nijje quea bei pocue! 
\p  
\v 8 Jamajjeya ¡aquiana jjeshe majje sosequiacue! Eꞌe, ¡miyaya yahuajo huohuiꞌyonaje jayojjaya sosequiacue! Eyacuiñajjiya eseya quea jea nee nee acani. Jamajjeya ¡pea cuana quea jea nee acue, ojjaña! Pea cuana quea jea nee añajo Eyacuiñajjija esohui jayojja aña.  
\v 9 Eꞌe, Eyacuiñajjija esohui Moisesiya tehue ca poa jama baꞌa: 
\q1 “¡Aꞌa onajaya ehuanase jea bajji! ¡Aꞌa pea quecuajji! ¡Aꞌa sii pojji! ¡Aꞌa onajaya aquiana jea bajji!” 
\m Quijje Eyacuiñajjiya huohui canaje jama baꞌa: 
\q1 “¡Minijje baꞌe quea jea nee acue! ¡Miya quea pame baꞌyani jayojja jama baꞌe meesahuacue!” 
\m Jamajjeya ¡pea cuana quea jea nee añajo baꞌe meesahuacue! ¡Ojjaña Eyacuiñajjija esohui jayojjaya jama acue!  
\v 10 Eꞌe, onaya miquea quea jea nee poanijo oya cuana quea yeno, quea nee po mee sa poꞌyo ajja. Jamajjeya onaya quea jea nee poanijo ojjaña Eyacuiñajjija esohui jayojjaya aña. 
\p  
\v 11 Eꞌe, ¡jamaya Eyacuiñajjija esohui jayojja jama acue! ¡Bacue jiquio! Jesosa esejaya Emeshi Mese nei jjeya nei pojjaꞌa poeje oꞌoya. Jamajjeya ¡quea jaꞌa nee baꞌecue Eyacuiñajjija esohui jayojja! ¡Aꞌa quea huea pojji! ¡Ojaya esohui bacue! Yahuajo pishana eseya Jesosaja epeejji poanaje. Ohuaya esejaya mimishi cuijea caꞌyonaje. Poe oꞌoya majje eseya baꞌe tiitii mee cajeꞌyo eyajo onijje, Jesosaa.  
\v 12 Jjeya eseya jiquiojo baꞌyani quea camaja poani, mecajje quea misi quea poqui camaja jayojja. Jesosa poe oꞌoyajo ca ca quea pame nee nee poajeꞌyo. Epojja jayojja jama poajeꞌyo. Ojaya epoe oꞌoyajji beshahua nei apoa. Jjapojjaqui majje jaꞌaꞌajaꞌaꞌa poani jayojja poaje. Jamajjeya ¡aꞌa quea mimishi pojji! ¡Pea jjashahuabaquime poꞌyocue! ¡Jesosaa eseya baꞌe meesahua canijo, ojjaña mimishi pajea neineiꞌyocue!  
\v 13 Eꞌe, ¡quea jaꞌa nee nee baꞌecue bichoꞌama epojji onaa ba canijo! Jamajjeya ¡aꞌa huoojji! ¡Aꞌa ona ishiꞌishiqui yasijje poquijji! ¡Aꞌa pea epona cuana jea bajji! Epona, ¡aꞌa onaja yahue, shacuimaꞌ nequi cuana peaꞌai siijji! ¡Aꞌa quea mimishi baꞌejji! ¡Aꞌa quea quene pojji! ¡Aꞌa jjamimicuiajea nobiajeaquijji peaꞌai!  
\v 14 Chojja. ¡Jesosa nijje mimicue ojaya ejjashahuabaquijji jayojja jama ebaꞌe meesahuajji! Jamajjeya miquea ejjashahuabaquijji yahuajo nei jayojja jama eshahuaja miya ebaꞌe meeꞌyojji pojjeama. 
\c 14  
\s1 ¡Aꞌa Jesosaja epeejji cuana nijje mimijajijji! 
\p  
\v 1 Jesosaja epeejji cuana, miquianaaya pojjaꞌa Eyacuiñajjija esohui quea jaꞌa nee baña. Jesosaja epeejji beca cuana ca ca quea jjashahuabaqui jaꞌa pishana. ¡Jamatii onijje jjapeequicue quea bei! ¡Aꞌa mimicuiajeanobiajeajji ojaya esohui quea quehuajo!  
\v 2 Eꞌe, miquianaya beca cuana jjashahuabaquiani jama baꞌa: —Ojjaña noe cuana caꞌijjiahua, jamatii onaaya baꞌehuana canaje ecuiquiaja eꞌijjiajji nisho. Ecuaaya ijjiaꞌyajo Eyacuiñajji ecuana nijje quea quene pojjeama poaje —jamaya beca cuana poani. Jamajjeya noe ijjiaña, ojjaña. 
\p Beca cuana ca ca jama poani baꞌa: —Chojja, ¡noe ma onaaya ecuiquiaja eꞌijjiaꞌyojji nisho baꞌehuana canaje aꞌa ijjiajji! Ma eseya ijjiajo Eyacuiñajji quea quene poaje ese nijje —jama posoya acani. Jamajjeya acuijjajja cuana, bobi ebanaꞌyo peaꞌai ijjia cani; noe ijjiaꞌyo jjima acani quea meteya jjejojo. 
\p  
\v 3 Noe ijjiajji cuana, ¡aꞌa jama pojji pea cuana nijje baꞌa: —¿Apiojji acuae miquianaaya acuijjajja, ebanaꞌyo oopana ijjiaña, noe ijjia ajja soꞌo? Chojja. ¡Aꞌa quea mete pojji! —aꞌa jamaya ajji! 
\p Oya jayojja noe ijjia ajja cuana, ¡aꞌa pea cuana nijje jama pojji baꞌa: —Miquianaaya aje oe noe ijjiaña. ¿Apiojji? Eyacuiñajji quea quene po chanaꞌ, de —aꞌa jamaya ajji! 
\p ¡Bacue! Eyacuiñajjiya noe ijjiajji cuana peaꞌai ojaya bacua cuana po mee canaje. Jamajjeya ¡aꞌa jamaya pea cuana nijje mimijji!  
\v 4 Eꞌe, miquianaya noe ijjia ajja jjejojo mimimimiani. Eyaya miquianaya huohuiaña jama baꞌa: Eyacuiñajji ona huoojeajji poani, miquianaya pojjeama. Jamajjeya ¡aꞌa mimijajijji! Eyacuiñajji ona huoojeajji poanijo ohuaya ohuaye nei jama acaje baꞌa: —Eꞌe, miquianaya quea pame nee baꞌyani —Eyacuiñajjiya acaje. 
\p Quea jaꞌa baꞌe ajjajo ca ca: —Chojja, ¡aꞌa jamaya ajji! Quea tai —Eyacuiñajjiya acaje. Eyacuiñajji ese huoojeajji quea caꞌa poanijo, ohuaya eseya quea caꞌa po mee cani ojaya ejjashahuabaquijji jayojja jama ebaꞌejji. 
\p  
\v 5 Cuanaya beca cuana jama poani baꞌa: —Beca epojja cuana Eyacuiñajji bihuiajji. ¡Ma epojja cuanajo aꞌa chacojji! 
\p Pea cuana ca ca jama poani baꞌa: —Ojjaña epojja oya jayojjaya, pea epojja jayojjaya. ¡Eyacuiñajji bihuiacue ojjaña pojjajo! —oya cuana poani. 
\p Jamajjeya ¡aꞌa pea nijje mimijji ache epojjajo chaco cajji! ¡Miquea ejjashahuabaquiꞌyojji epojja cuanajo jayojja jama acue! Pea cuana ojaya ejjashahuabaquijji jayojja jama caꞌa cahua peaꞌai epojja cuanajo.  
\v 6 Eꞌe, Emeshi Mese neija esohui jayojja jama baꞌe sa poani miquianaya, ojjaña. Beca cuana quea huiso epojja cuanajo chacochaco ajja Eyacuiñajji bihuia poani jjejojo. Pea cuana ca ca oe pea epojjajo jayojjaya jama acani, oya jayojjaya. Noe ijjiajji cuaa esejaya Emeshi Mese nei bihuia cani. Ijjiaꞌijjia jjimahua Eyacuiñajji nijje mimiani jama baꞌa: —Eyacuiñajji, ecue Chii ai, eyaya miya bihuiaña noejo. 
\p Noe ijjia pojjimaꞌ cuaa esejaya Emeshi Mese nei bihuia cani peaꞌai jama baꞌa: —Eyacuiñajji, ecue Chii ai, eyaya miya bihuiaña jiquio bobijo, acuijjajjajo, esoꞌ cuanajo, ebanoꞌyojo cuanaya. Eꞌe, miyaya ojjaña tii meesahuaꞌyonaje —jamaya acani ohuaya. 
\p  
\v 7 Jamajjeya ¡aꞌa esejaya ebaꞌejjijo, eseya sañajo jjashahuaba tiitiiquijji! Eseya eshe nequijo ca ca Jesosaja esohui jayojja jama cabaꞌyahua. Manoꞌyajo peaꞌai eseya Jesosaa jaahuana cajeꞌyo. Eseya ojaya tii poajeꞌyo.  
\v 8 Eꞌe, eshe nequiya eseyaya Emeshi Mese nei Jesosaja esohui jayojja aña. Manoꞌyo majje onijje baꞌe tiitiijeꞌyo. Jamajjeya eshe nequi, manoꞌyajo peaꞌai ohuaya eseya jaahuana cani; ese huoojeajji poani tii tii oya.  
\v 9 Jesosa manoꞌyo majje shequi oꞌoyanaje ese jaahuanajji epojji. Jamajjeya ese eshe nequi, manoꞌyajo peaꞌai oya, Jesosa esejaya Emeshi Mese nei poani tii tii.  
\v 10 Jesosaja epeejji poani ojjaña eseya. Jamajoya ¿apiojji acuaeya Jesosaja epeejji quea jaꞌa nee nijje jjamimicuiajea nobiajeaquiani soꞌo? Cuanaya epeejji quea jaꞌa nee poaniya, ¿apiojji miquianaaya Jesosaja epeejji cuana niñebaña soꞌo? Oya Jesosaja epeejji peaꞌai. ¡Aꞌa pajeaꞌyojji quijje eseya ojjaña nequije Eyacuiñajji nequi cojja nei! Ohuaya huohui caje jama baꞌa: —Eꞌe jamaya, miyaya quea pame anaje —acajeꞌyo. Quea pame pojjeama añajo ca ca pea nijje jama poaje baꞌa: —Chojja, miya quea mimishi poanaje —acajeꞌyo Eyacuiñajjiya. 
\p  
\v 11 Eyacuiñajjija esohui etehueꞌyo jama poani baꞌa: 
\q1 “Eya Eyacuiñajji eshe tii tii nequi. Jamajjeya eꞌe jojo nei ojjañaa e cojja nei nequi majje, ecuiꞌoshajjajo nequioque majje eya bihuia caje jama baꞌa: —Miya ca ca oe Eyacuiñajji quea caꞌa nee, quea pame nee enequi tii tii —ojjaña poaje”. 
\m Jamaya esohui etehueꞌyo poani.  
\v 12 Jamajjeya eꞌe jojo nei o cojja nei nequiajo, Eyacuiñajjiya eseya ojjaña huohuiꞌajja caje esejaya ebaꞌeꞌyojjijo. Quea jaꞌa baꞌenajeya eseyaya oya sajaꞌajeꞌyo quea bihui. Quea jaꞌa pojjeama baꞌenajeya ca ca quea mete sajaꞌajeꞌyo. 
\s1 ¡Ona quea mimishi po meejji aꞌa pojji! 
\p  
\v 13 Eꞌe, Eyacuiñajjijo quea pame nee chacoañajo ¡ojaya pea epeejji cuana aꞌa niñebajji! Chojja, ¡jama acue baꞌa: —Jesosaja epeejji quea jjashahuabaqui jaꞌa po jjima ecuea ebaꞌejji ba majje quea mimishi po chanaꞌ. Jamajjeya eyaya maya eꞌamajajji pojjeama oya quea mimishi, quea mete nee epo meejji pojjeama —jamaya pocue! 
\p  
\v 14 Esejaya Emeshi Mese neiya eya ba meesahua canaje jama baꞌa: Noe ma onaja baꞌehuanaqui ecuiquiaja eꞌijjiajji nisho eseya ijjiajo, Eyacuiñajji ese nijje quea quene pojjeama poani. Pea bobi eseya ijjiajo, jamaya peaꞌai poani. Jamatii Jesosaja epeejji beca cuana quea jjashahuabaqui jaꞌa pishana jama poani baꞌa: —Ma noe, bobi peaꞌai eseya ijjiajo, Eyacuiñajji quea quene poaje ese nijje —jama posoya acanijo, ohuaya maya ijjia jjima caꞌa cahua. Eꞌe, jamaya jjashahuabaquianijo ijjia majje oya quea mimishi poani. 
\p  
\v 15 Miquianaya, noe ijjiajji cuana, ¡jjashahuabaquicue Jesosaja pea epeejji cuanajo, ma acuijjajja oopana ijjiajjijo! Jamajjeya miya noe ijjiajji ba majje ohuaya ijjia peaꞌai ca chanaꞌ, mi jayojjaya poaje. Jamatii oya cuana quea mete jjashahuabaquije jama baꞌa: —¡Dee! Eyaya eshahuaja bobi ijjianaje. Eyacuiñajji enijje quea quene poaje —jamaya jjashahuabaqui majje Jesosaja epeejji quea mimishi po chanaꞌ. 
\p Jamajoya jama acue baꞌa: ¡Jesosaja pea epeejji cuana quea jea acue! Oya caꞌaꞌama; quea mimishi po oꞌoya mee chanaꞌ. Jesosa onajo manoꞌyonaje peaꞌai. Jamajjeya ¡oya cuana jaahuanacue!  
\v 16 Miquianaya jjashahuabaquiani pojjaꞌa jama baꞌa: —Eyaya jamaya aña, quea jaꞌa nee aña. 
\p Jesosaja epeejji quea jaꞌa pojjeama jjashahuabaquiani mi ba majje jama poani baꞌa: —Chojja, jamaya quea mimishi, quea tai —poso acani. 
\p Jamajjeya ohua jamaya huohui canijo, ¡aꞌa oe jamaya amajajji, jamatii miquianaya quea jaꞌa jjashahuabaquiani!  
\v 17 Bobijo, eꞌishijji peaꞌaijo jjashahuabaquianijo pojjeama eseya Eyacuiñajji yasijje, ojjaña huoojeaꞌyojji poani yasijje poquijeꞌyo. Chojja. Quea jaꞌa nee, quea bihui nee, quea bei nee peaꞌai cabaꞌyahua Edojjoshahua Pameya eseya baꞌe meesahua canijo.  
\v 18 Eꞌe, jamaya Jesosa Quito nijje baꞌyanijo Eyacuiñajjiya eseya huohui caje jama baꞌa: —Eꞌe, jamaya quea pame. 
\p Cuanaya ojjañaa mijo huohui caje jama baꞌa: —Oya Jesosa Quitoja epeejji quea jaꞌa nee nee poani —acaje. 
\p  
\v 19 Jamajjeya ¡jjashahuaba tiitiiquicue ojjaña Jesosaja epeejji cuana nijje quea bei nee ebaꞌejji! ¡Pea Jesosaja epeejji cuana quea jaꞌa po meesahuacue peaꞌai!  
\v 20 ¡Aꞌa noe ijjiajji ecuiquiaja eꞌijjiajji nisho onaja baꞌehuana baꞌe! Quea mete oya cuana poaje. Eyacuiñajji onijje quea quene poani posojo ma bobijo onaya quea mete poanijo, ¡aꞌa ijjia majajji! Jamatii Eyacuiñajjija pana ojjaña bobi quea pame. Jamatii ma bobi miya ijjiajo onaya quea mete po mee chanaꞌ, quea mimishi po oꞌoya mee chanaꞌ.  
\v 21 Eꞌe, eꞌe pojjaꞌa Jesosaja pea epeejji quea mimishi poaje miyaya ma bobi ijjiaña, acuijjajja na biso nei pojjaꞌa ishiaña ba majje. Eꞌe pojjaꞌa mi ba majjeya ohuaya quea mimishi acaje oꞌoya. Jamajjeya ¡aꞌa jamaya amajajji! Oya quea mimishi po oꞌoya chanaꞌ.  
\v 22 Jamajjeya ¡aꞌa Jesosaja pea epeejji cuana nijje jjamimicuiajea nobiajeaquijji bobi cuanajo, ebaꞌe meejji cuanajo peaꞌai! ¡Jjashahuaba neineiqui majje quea pame nee nee acue! ¡Jesosaja epeejji cuana quea pame ameesahuacue peaꞌai! Jamaya poanijo ojjaña Jesosaja epeejji quea bihui nee capoahua. Jesosaja epeejji quea mimishi po mee cani o ba majje ca ca cajjashahuabaquiahua jama baꞌa: —Chojja, eya ona mimishi pomeejji poani. Jamaya eya quea tai poani. 
\p  
\v 23 Eꞌe pojjaꞌa Jesosaja epeejji jjashahuabaquiani jama baꞌa: —Eꞌe pojjaꞌa jiquio bobi eya ijjiañajo, Eyacuiñajji enijje quea quene poaje —poani. Jamajjeya jamatii ijjia cajo, Eyacuiñajji onijje quea quene poaje. 
\p Eꞌe, ¡jjashahuaba neineiquicue Eyacuiñajjija esohui jayojja jama yajji! Ebaꞌe quea mimishi miquea eba. Jamajjeya ¡aꞌa jamaya ajji! ¡Eꞌe jojo nei quea pame nee pocue! 
\c 15  
\s1 ¡Jesosaja epeejji cuana quea jjashahuabaqui jaꞌa ejjapo meequi! 
\p  
\v 1 Eꞌe, ecuana quea jjashahuabaqui jaꞌa, Eyacuiñajjija esohui ba neineiaña. Beca cuana cho, quea jjashahuabaqui jaꞌa pishana. Ona nijje ¡aꞌa quea quene pojji! ¡Aꞌa jjashahuabaquijji jama baꞌa: —Eyaya ca eya ojjaña bobi ijjiaje, jamatii onaaya eya quea mimishi poani poso acani —aꞌa jamaya pojji! 
\p  
\v 2 Chojja, ¡Jesosaja epeejji caꞌaꞌama nijje aꞌa jjamimicuiajea nobiajeaquijji bobijo! ¡Oya cuana quea bei po meesahuacue miquea ojjaña bobi ijjia jjimahuajo! Eꞌe, ¡Jesosa nijje jjapee neinei sahuameequicue!  
\v 3 Jamajjeya ¡Jesosa jama baꞌecue, miquea ejjashahuabaquijji jayojja jama pojjeama! Ohuaya oja chii jama acanaje baꞌa: —Ecuea ejjashahuabaquijji jayojja jama a sa po ajja. Chojja ecue chii, eyaya miquea ejjashahuabaquijji ejo jama a sa aña. 
\p Yahuajo nei onaaya Jesosaja esohui tehue ca poa jama baꞌa: 
\q1 “Ecue Chii, eya miquea ejjashahuabaquijji jayojja jama poanijo, dejja cuaa miya niñeba cani, eya peaꞌai niñeba cani quea tai nee”. 
\m Jamaya esohui yahuajo nei etehueꞌyo poa. 
\p  
\v 4 Eyacuiñajjiya ojjaña ojaya esohui yahuajo tehue mee ca poa eseya ojaya epeejji quea jaꞌa epo meesahuajji. Ma esohui etehueꞌyojo eseyaya baña onaa napa cajje ona nijje mimijaji ajja, eseya. Ma esohuijo peaꞌai eseyaya baña Jesosa nijje jjapee neineiquianijo quijje baꞌe tiitiijeꞌyo onijje eyajo.  
\v 5 Eꞌe, Eyacuiñajjiya eseya baꞌe meesahua cani ojaya epeejji nei. Onaa napa cajje jjapeequi pajeaꞌyo ajja. Jamajjeya eya onijje mimiani miquianajo jama baꞌa: —Ecue Chii, ¡miquea epeejji cuana Shomajo baꞌe ojee jjapeequi meesahuacue; Jesosaja esohui jama ameesahuacue! —eya poani. 
\p  
\v 6 Jesosa nijje ojee jjapeequianijo miquianaaya ojee Eyacuiñajji bihuiaña sohuicuayanijo, esejaya Emeshi Mese nei Jesosa Quitoja Chii miquianaaya bihuiaña jama baꞌa: —Eyacuiñajji, miya ca ca oe quea pame nee, quea caꞌa nee. Pea chamaꞌ mi jayojja —jamaya miquianaya poajeꞌyo tii tii. 
\s1 ¡Pea cuana nijje quea jaꞌa jjapeequicue! 
\p  
\v 7 Jamajjeya ¡Jesosa Quitohua miquianaya quea jea acani jayojja jama ojaya epeejji cuana quea jea nee acue! Jamajoya pea cuaa jama acaje baꞌa: —Eꞌe, Eyacuiñajji quea pame nee nee. Ojaya epeejji cuaa onaya quea jea nee acani. 
\p  
\v 8 Yahuajo nei Eyacuiñajjiya ecuanaja etiiquiana huohui ca poa jama baꞌa: “Eyaya miquiana huasijje huoojeaje ojjaña jaahuanajji” poa. Jamajjeya Jesosa Quito huoojea nei canaje ojaya yahuajo ehuoojeapana poa jojoya. Jamajjeya eseya ba mee canaje Eyacuiñajjiya ohua aca poa esohui jayojjaya eꞌe jojo nei acani.  
\v 9 Oya Jesosa poeyanaje Jodio pojjeama cuana Eyacuiñajji bihuia meeya peaꞌai, jama po meeya peaꞌai baꞌa: 
\q1 “Eyacuiñajji, miya quea pame nee nee, quea caꞌa nee nee. Ecuanaja mimishi cuanajo jjashahuaba tiitiiqui ajja. Cuijeaꞌyo majje quea bei ecuana nijje poani”. 
\m Yahuajo nei Eyacuiñajjiya Dabi tehue mee ca poa oja sohui jama baꞌa: 
\q1 “Jamajjeya eyaya Jodio pojjeama cuana nijjeya miya bihuiaje. Sohuicuaya majje miya bihuiaje”. 
\m Jamaya yahuajo nei nei poa.  
\v 10 Yahuajo nei tehue mee ca poa jama peaꞌai baꞌa: 
\q1 “Jodio pojjeama cuana, ¡Jodio cuana nijjeya Eyacuiñajji bihuiacue! ¡Quea bihui nee nee pocue!” 
\m  
\v 11 Jamaya tehue mee ca poa peaꞌai baꞌa: 
\q1 “Jodio pojjeama cuana, ¡Eyacuiñajji bihuiacue! Eꞌe, ¡ojjaña cuaa Eyacuiñajji bihuiacue, sohuicuayacue jama baꞌa: —Eyacuiñajji, miya quea pame nee —jamaya acue!” 
\m Jamaya aca poa.  
\v 12 Eyacuiñajjiya Isaia tehue mee ca poa jama baꞌa: 
\q1 “Quijje nei nei Isaija osecua cuayaje. Oya ona huoojeaꞌyojji poajeꞌyo. Ohuaya Jodio pojjeama peaꞌai mimishi cuijeaꞌyo majje ba mee cajeꞌyo, onijje baꞌe tiitii mee cajeꞌyo”. 
\m Eꞌe, jamaya yahuajo nei Isaia tehue mee ca poa Jesosajo.  
\v 13 Jamajjeya Eyacuiñajjiya eseya ba meesahua cani jama baꞌa: Quijje ohuaya eseya baꞌe tiitii mee cajeꞌyo eyajo onijje. Eya Eyacuiñajji nijje mimi majamajani miquianajo jama baꞌa: —Eyacuiñajji, ¡miquea epeejji cuana Shomajo baꞌe quea bihui nee po meecue! ¡Minijje jjapeequianijo quea jaꞌa nee jjashahuabaqui meesahuacue! —eyaya aña. 
\p Edojjoshahua Pame miquiana nijje nequi. Oya quea caꞌa nee nee. Miya ba meesahua cani miquiana quijje Eyacuiñajji nijje baꞌe tiitiijeꞌyo eyajo. 
\s1 Pabohua Shomano cuana Jodio pojjeama cuana baqui sa acani 
\p  
\v 14 Eꞌe ecuea epeejji cuana, eya ca ca iña miquianajo jjashahuabaquiani jama baꞌa: Miquianaya Jesosaja epeejji quea pame nee. Miquianajaya eba nei nei Eyacuiñajjija esohui eꞌe nei Jesosajo. Ma esohui huohui huichaꞌa huichaꞌaña. Pea cuana quea jaꞌa nee jjapeequi meesahuaña Jesosa nijje, miquianaaya.  
\v 15 Jamatii Eyacuiñajjiya eya huohui canaje jayojja jama eyaya miquiana huasijje oja sohui tehuenaje. Beca ejjashahuabaquijji quea jaꞌa nee nee tehuenaje mi jjabahuejjaqui meejji, miquianajaya epajeaꞌyojji pojjeama.  
\v 16 Eꞌe, Eyacuiñajjiya eya huoojea canaje Jodio pojjeama huasijje ojaya esohui huohuiya, Jesosajo ehuohuijji. Jiquio ecua yahuajo nei Eyacuiñajji nijje emimijji Jodio huasijje Eyacuiñajjija esohui aca poa jayojja jama eyaya ojaya esohui Jesosajo cahuohuiahua miquiana que, Jodio pojjeama huasijje Jesosa nijje ejjapeequi meesahuajji. Jesosa nijje jjapeequianijo, Eyacuiñajji miquiana nijje quea bihui nee poani, Edojjoshahua Pameya pea jjashahuabaquime po mee caꞌyanijo. 
\p  
\v 17 Jamajjeya eya quea bihui nee poani. Jesosa Quitohua eya Jodio pojjeama cuana huasijje Eyacuiñajjija esohui huohui meesahua cajje ojaya epeejji cuana poanaje.  
\v 18 Jiquio ca ca oe eyaya miquianaya quea bihui huohuiaña jama baꞌa: Jesosa Quitohua Jodio pojjeama quea pame baꞌe meesahua cani Eyacuiñajjija esohui jama ojaya epeejji nei epojji. Ohuaya jamaya acanaje eya ojaya esohui huohuijji poanijojo. Eꞌe, Jesosaa eya ameesahua canaje, huohui meesahua canaje peaꞌai jama baꞌa:  
\v 19 Eya Edojjoshahua Pameya ma dejjaa ajjima acani ameesahua canaje. Jamaya eya esohui huohui meesahua canaje quea jaꞌa nee Jenosanena huasijje, quea huesha nee peaꞌai, johuaam Ininico huasijje peaꞌai eyaya ojjaña Eyacuiñajjija esohui quea pame nee Jesosajo huohui neinei poquia poa.  
\v 20 Jamaya eyaya esohui huohui sa aña pea cuana huasijje, onaja sohuihuohuiqui jjima huasijje. Eꞌe, jiquio esohui quea pame Jesosajo shajjaꞌajja jjima cuana huasijje eyaya ma esohui huohui sa aña.  
\v 21 Eꞌe, yahuajo nei Eyacuiñajjija esohui etehueꞌyo jama aca poa baꞌa: 
\q1 “Ojjañaja yahuajo shajjaꞌajja jjimaa Eyacuiñajjija huoojeaꞌyo ojjaña jaahuanajjijo shajjaꞌajja caje. Ojjañaa joya o ba pojjimaa oya ba caje”. 
\m Eꞌe, jamaya eyaya a sa aña, Eyacuiñajjija esohui etehueꞌyo yahuajo jama. 
\s1 Pabo Shoma huasijje poqui sa poani Jesosaja epeejji cuana baa 
\p  
\v 22 Yahuajo eya quea huiso poqui sa poa Shoma huasijje miquiana baa. Jjeya peaꞌai eya poqui sa poani. Quea huiso pea cuana huasijje esohui huohui poequi jjejojo mi poquinaje.  
\v 23 Jjeya ca ca eya apoa. Ojjaña cuiñajji yasijje jiquiojo esohui huohuijeyonaje. Jamajjeya ma ecua eya yahuajo jjashahuabaquinaje jamaya eyaya jjeyahua nei aje.  
\v 24 Eya poqui sa poani España meshi yasijje esohui huohuiya. Jamajjeya España meshi yasijje poquijeya eyaya miquianaya bananaje. Shomajo anije beca cahuime pojjaꞌa. Quea bihui nee nee eya poaje miquiana nijje nequinana majje. Miquiana nijje mimi majje eya poquije España meshi yasijje. Eꞌe pojjaꞌa miquianaaya eya aquiana quiaje epoqui meesahuajji pojjaꞌa.  
\v 25 Miquiana huasijje poqui jjimahua eya poquije soꞌo Jenosanena huasijje Jesosaja epeejji aema huasijje ejjeshejji quiaa, Jodio cuana huasijje.  
\v 26 Ma ejjeshejji Jesosaja epeejji cuana Masenonia meshijo baꞌeya, Asia meshijo baꞌeya peaꞌaiya chicha canaje Jesosaja epeejji aemaꞌ baꞌe meesahuajji. Jamaya oya cuana a sa poanaje. Oya Jodio pojjeama poani.  
\v 27 Jamatii quea bihui nee quia canaje. Eꞌe, ohuaya ejjeshejji caquia cahua Jesosaja epeejji Jodio cuana baꞌe meesahuajji. Eꞌe, Eyacuiñajjiya Jodio cuana iyaa coo ca poa ojaya epeejji epojji. Majoya Jodio cuaa Eyacuiñajjija esohui quea pame nee Jesosajo Jodio pojjeama cuana huohui cajje Jesosa nijje jjapeequinaje. Jamajjeya Jodio pojjeama cuaa Jodio cuana huasijje ebaꞌe meejji cahuoojea cahua, Jesosaja epeejji cuaa.  
\v 28 Jamajjeya Jenosanena huasijje poqui majje, ma ejjeshejji quia majje eya poquije España meshi yasijje. Poquijeya eyaya miquianaya bananaje.  
\v 29 Miquianaya banana majje quea bihui nee nee poaje. Ojee jjapeequianijo, Jesosaja esohuijo eseya quea bihui nee poajeꞌyo. 
\p  
\v 30 Epeejji cuana, esejaya Emeshi Mese nei Jesosa nijje jjapeequianijo, Edojjoshahua Pameya eya miquianajaya quea jea ameesahua canijo, ¡Eyacuiñajji nijje mimicue ejo! ¡Jama acue baꞌa: —Eyacuiñajji, Pabo miquea esohui huohui canijo quea camaja nee nee. ¡Oya jaahuana neineicue!  
\v 31 Jamajjeya ¡Jesosaja epeejji pojjeama cuaa Jenosanenajo baꞌeya oya enapajji pojjeama! ¡Miquea epeejji jomajo baꞌe quea bihui nee ejjeshejji jjeshe meesahuacue ma Pabohua ye cani! —jama oe miquianaaya acue Eyacuiñajji nijje mimi majje! 
\p  
\v 32 Eꞌe pojjaꞌa Eyacuiñajjiya eya miquiana que huoojea caje. Ohuaya eseya quea bihui nee jjapeequi meesahua caje quea pame nee. 
\p  
\v 33 Eyacuiñajjiya eseya quea bei baꞌe meesahua cani. ¡Ohuaya miquianaya cajaahuana cahua! ¡Jamaya capoahua! 
\c 16  
\s1 Pabohua Jesosaja epeejji cuana huasijje tehue canaje quea bihui o pojji 
\p  
\v 1 Ecuanaja epeejji epona Peme bajjani Jesosa nijje chacochacoani Senesea cuiñajjijo. Oya Jesosaja epeejji quea pame nee. Jesosaja pea epeejji cuana jaahuana cani.  
\v 2 Miquiana que poquiyajo, ¡oya huohuicue jama baꞌa: —Mi poeyajo ecuana quea bihui nee —acue! 
\p Ohuaya eya baꞌe meesahua cani, pea Jesosaja epeejji cuana peaꞌai baꞌe meesahua cani quea huiso nee. Jamajjeya miquianaya Jesosaja epeejji poani peaꞌaijo ¡oya jaꞌajjequicue! ¡Oya aquiana quiacue ebaꞌejji!  
\v 3 Pisina peaꞌai, oja yahue Aquiana peaꞌai miquiana nijje baꞌe. Oya huohuiꞌajjacue jama baꞌa: —¿Achajja acuae quiana soꞌo? —ecuea ebajji. 
\p Oya cuana enijje chacochaconaje. Jesosaja esohui huohui sahua canaje.  
\v 4 Eꞌe, eyaya Jesosaja esohui huohuiañajo, pea cuaa cuiaꞌajja canaje. Pisina, Aquina peaꞌai ca ca e nahuejo beshahua nei cuia canaje cuaa. Jamajjeya eyaya, Pabohua Jesosaja epeejji Jodio pojjeama cuana nijjeya oya huohuiaña jama baꞌa: —Eꞌe, jamaya miquianaya quea pame nee nee poanaje —ecuaaya anaje. 
\p  
\v 5 Ojjaña Jesosaja epeejji cuana ma Pisinaja equijo jjachichaquiani eyaya huohuiꞌajjaña jama baꞌa: —¿Achajja acuae quiana ani soꞌo? —ecuanaja ebajji. 
\p Jamaya acue peaꞌai ecuea epeejji Epeneto bajjani. Asia meshijo baꞌya poa oya. Ecuea esohui Jesosajo shajjaꞌajja majje oya ebionei Jesosaja epeejji poanaje jomajo Asia meshijo baꞌyahua.  
\v 6 Mania peaꞌai quea huiso chacochaconaje miquiana nijje. ¡Oya ecuea esohui huohuicue quea bihui nee o pojji!  
\v 7 ¡Oya jayojjaya mimicue Anidonico nijje, Jonia peaꞌai nijje! Oya Jodio cuana, ecuea huapa pojjeama cuana. Oya enijje ejeanobia jaanaje. Jesosaja epeejji quea pame nee oya poa, Jesosaja huoojeaꞌyo esohui huohuijji. E Jesosa nijje jjapeequi jjimahuajo oya cuana jjapeequia poa.  
\v 8 ¡Oya jayojjaya mimicue Amepia nijje peaꞌai! Oya Emeshi Mese nei Jesosaja epeejji nei. Jamajjeya: —¿Achajja ami ani soꞌo, ecuea epeejji? —acue oya, ecuea ebajji. 
\p  
\v 9 ¡Oya jayojja mimicue Omano nijje, ma ecuana nijje Jesosa Quito nijje chacochaconaje! ¡Etaqui peaꞌai,  
\v 10 Apene peaꞌai jama acue! Oya Emeshi Mese nei nijje chacochacoanijo quea nee poanaje quea huiso. Ecuanaja eba oya Jesosaja epeejji quea caꞌa nee. ¡Ojjaña Anisitomoja huapa pojjeama cuana ecuea esohui huohuicue peaꞌai quea bihui nee o pojji!  
\v 11 ¡Jodio dejja Jenonio bajjani jama acue! Oya huapa pojjeama peaꞌai poani. ¡Oya Nasiso, Nasisoja huapa pojjeama ecuea esohui huohuicue peaꞌai, Jesosa nijje jjapeequianijo!  
\v 12 ¡Tipena, Tiposa oya jayojjaya huohuicue! Ma epona cuana Emeshi Mese neijo, Jesosajo quea huiso chacochaconaje. Epona Pesina bajjani peaꞌai Emeshi Mese neijo janobajjima nei chacochaconaje. ¡Oya peaꞌai ecuea esohui huohuicue, ecuea epeejji nei oya!  
\v 13 ¡Jamaya mimicue Shopo nijje, ojaya enaese nijje peaꞌai! Ojjañaja eba Jesosaa, Emeshi Mese neiya Shopo babaca canaje ojaya esohui huohuijji. Ojaya enaeseya eya jaahuana canaje ecuea enaeseya jayojjaya.  
\v 14 Jamajjeya oya jayojjaya huohuicue ejo Jesosaja pea epeejji cuana nijje peaꞌai, ma bajjani cuana nijje baꞌa: Asinisito, Peconete, Jemesi, Patomasi, Jemase peaꞌai. ¡Ojjaña Jesosaja epeejji onijje nequica peaꞌai jamaya acue!  
\v 15 ¡Ecuea esohui quea bihui nee o pojji huohuicue Pinonoco, Joña, Neneo, oja jjoꞌi peaꞌai, Onipa peaꞌai ojjaña Jesosaja epeejji cuana onijje nequica peaꞌai huohuicue! 
\p  
\v 16 Eꞌe, miquianaya jjachichaqui majje ¡pea cuana nijje quea bihui nee mimicue jama baꞌa: —¿Achajja ami ani soꞌo, epeejji? —acue! 
\p Eꞌe, ojjaña Jesosaja epeejji cuaa jiquiojo enijje nequiya miquianaya Shomajo baꞌe quea bihui nee acani jama baꞌa: —¿Achajja acuae quiana ani soꞌo? —acani ojaya ebajji. 
\p Mahuiso. 
\s1 Pabohua pea esohui quea jaꞌa nee ebaꞌe meejji huohui cani 
\p  
\v 17 Ecuea epeejji cuana, eyaya miquiana cuana pea esohui tehueaña jama baꞌa: Beca cuaa miquiana nijje nequiya Jesosaja epeejji cuana pea epeejji cuana nijje jjamimicuiajea nobiajea meequi cani. Pea esohui eꞌe nei pojjeama Jesosa Quitojo huohui cani peaꞌai, ecuanaja esohui jayojja jama pojjeama. Ecuaaya ca ca eꞌe nei esohui huohuiaña. ¡Aꞌa oya cuana shajjaꞌajjajji! ¡Aꞌa jja oe onijje jjapeequijji!  
\v 18 Ma siajjepojji cuana esejaya Emeshi Mese neijo Jesosajo chaco ajja. Chojja. Oya cuana esohui huohuijji nisho. Ojaya ejjashahuabaquijji quea quehua jayojja jama acani. Mimiani esohui quea pame jayojja. Jamatii quea tai. Siajje poani. Jama poani baꞌa: —Eꞌe, eya miquianajaya epeejji; miquianaya quea pame nee nee ecuea epeejji —anisho cani. Jamaya Jesosaja epeejji quea jjashahuabaqui jaꞌa pishana dasia cani. 
\p  
\v 19 Ojjaña Jesosaja epeejji cuaa shajjaꞌajja canaje miquianaya Shomajo baꞌe Eyacuiñajjija esohui jayojjaya baꞌyani. Jamajjeya eya miquianajo quea bihui nee. ¡Quea jaꞌa nee jjashahuabaquicue quea pame nee ebaꞌejji! ¡Ma esohui huohuijji nishoja esohui eꞌe nei pojjeama aꞌa shajjaꞌajjajji! ¡Aꞌa jamaya pojji!  
\v 20 Eꞌe, Eyacuiñajjiya eseya quea bei baꞌe meesahua cani, quea jaꞌa jjashahuabaqui meesahua cani jjeya nei. Ohuaya miquianaya Edosiquianaja epeejji mimicuiajeanobiajea meesahua cajeꞌyo. Miquianaya ojaya edasiaꞌyojji pojjeama. Eꞌe, ¡Jesosa Quitohua esejaya Emeshi Mese neiya miquianaya cajaahuana cahua! 
\p  
\v 21 Timoteo enijje chacochacoani Jesosa Quito nijje. Ohuaya peaꞌai miquianaya jama huohuiꞌajjame acani baꞌa: —¿Achajja acuae quiana soꞌo? —acani. 
\p Ecuea huapa pojjeama Jodio dejja cuana Nosio, Jasoni, Sosipate peaꞌaiya jama huohuiꞌajjame acani baꞌa: —¿Achajja acuae quiana ani soꞌo? —acani peaꞌai. 
\p  
\v 22-24 Cayo peaꞌai oya jayojjaya miquiana nijje mimiani. Eya oja equijo baꞌe. Ojaya equijo Jesosaja epeejji cuana ojee jjachichaquiani Eyacuiñajjija esohui baa. Enasitohua, pea epeejji Cuanito bajjaniya peaꞌaiya huohuiꞌajja mee cani jama baꞌa: —Epeejji cuana, ¿achajja acuae quiana ani soꞌo? —acani. Oya Enasito ejjeshejji cuiñajji poani, ma Conitio dejja etiiya chicha mee cani ejjeshejji. 
\p Eya ca iña Jesosaja epeejji Tesio bajjani. Eyaya Paboja esohui miquiana que tehueaña ojo. Eyaya miquianaya huohuiaña jama baꞌa: —Miquianaya Jesosa Quitoja epeejji, esejaya Emeshi Mese neija epeejji poanijo, ohuaya miquianaya quea pame nee cajaahuana cahua. Eꞌe, jamaya capoahua —jamaya Pabohua eya tehue mee cani. 
\s1 Eyacuiñajji bihuia cani Pabohua 
\p  
\v 25 Eyacuiñajji ejjabihuiaqui jama baꞌa: —Eyacuiñajji, miya quea pame nee, quea caꞌa nee nee. Miquea esohui jayojja jama baꞌe meeaña ecuanaya. Eyacuiñajji, miyaya eya huohui meesahuaña esohui quea pame nee Jesosa Quitojo. Ba meesahuaña Jesosa Quito ca ca oe mimishi cuijeaꞌyojji poani ojjañaja. Maya yahuajo ecuanaja etiiquianaja ba jjima poa.  
\v 26 Jodio esohui huohuijji yahuajo nei baꞌya poaa Jesosajo huohui ca poa quea jaꞌa pishana, ojaya ba jjima pishanajo. Jjeya ca ca ma esohui eꞌe nei miyaya ba meesahuaña quea jaꞌa nee. 
\p —Eꞌe Eyacuiñajji, miya baꞌe tiitiiani. Miya ca ca oeya ojjaña cuana ojjaña meshijo baꞌe ba meesahuaña esohui eꞌe nei Jesosaja. Ma esohui quea pame jayojja jama ameesahuaña peaꞌai. Jamaya ojjañaja eba poaje. 
\p  
\v 27 —Eꞌe Eyacuiñajji, miya oe nei Eyacuiñajji, pea chamaꞌ. Ojjaña ca ca oe miquea eba, miquea nei. Ecuana Jesosaja epeejji poanijo ecuanajaya eba miya quea pame nee nee, quea caꞌa nee poani tii tii. Jamaya capoahua —jamaya ejjabihuiaqui Eyacuiñajji. 
\p Eya Pabo bajjani. Mahuiso ecuea esohui miquiana Shoma cuiñajjijo baꞌe yasijje tehue meeaña. Apoa.