\id REV - Ese Ejja NT -Bolivia 2012 (DBL -2013) 
\h APOCANISI 
\toc1 Huaniya Tehue Canaje Ma Jesosa Quitohua Quijje Ohua Acañajeꞌyo 
\toc2 Apocanisi 
\toc3 Ap 
\mt2 HUANIYA TEHUE CANAJE MA JESOSA QUITOHUA QUIJJE OHUA ACAÑAJEꞌYO 
\c 1  
\s1 Eyacuiñajjiya jjajaꞌaqui mee canaje quijje ohua acajeꞌyo 
\p  
\v 1 Eya Huani, Jesosaja epeejji jaahuanajji etii. Jesosa Quitohua eya tehue mee canaje jiquio esohui cuana ojjaña que jama baꞌa: Eyacuiñajjiya jama acanaje baꞌa: —Eyaya ecuea Ebacua Ejja Jesosa Quito ojaya ebajji jjajaꞌaqui meejeꞌyo ma eya quijje aje. Jamajjeya Jesosaa ojjaña ojaya epeejji jaahuanajji cuana ba mee caje ma eya quijje pishana aje —Eyacuiñajji poanaje. 
\p Ba majje Jesosaa esohuidojojji huoojea canaje e que. Esohuidojojjiya ecuea ebajji jjanequipanaqui mee canaje quijje Eyacuiñajjiya acaje.  
\v 2 Esohuidojojjiya ba mee cajo, eyaya tehueꞌyonaje ojjaña ma ohua quijje acaje. Jiquio esohui ecue tehue Eyacuiñajjiya huohui cajje. Jesosa Quitohua ecuea ebajji jjanequipanaqui mee canaje eꞌe jojo nei.  
\v 3 Ojjaña joya jiquio esohui etehueꞌyo eꞌe jojo nei bajji poani quea bihui nee poajeꞌyo. Eꞌe, jiquio ejjanequipanaqui meejji ba majje, jiquio esohui jayojja jama amajje peaꞌai quea bihui nee poajeꞌyo. Ojjaña jiquio etehueꞌyo jayojja quijje pishana apoa poajeꞌyo. Beshahua nei apoa. 
\s1 Esohui etehueꞌyo Jesosaja epeejji cuana huasijje Asia meshijo baꞌe yasijje 
\p  
\v 4-5 Eyaya Huaniya esohui tehueaña Jesosaja epeejji cuana huasijje me oejje beca cuiñajjijo baꞌe yasijje Asia meshi yasijje peaꞌai. Ecuea esohui etehueꞌyo jama baꞌa: Eyacuiñajji yahuajo nei nei nequi tiitiia poa. Jjeya nei yani tii tii. Quijje oya ani tiitiijeꞌyo peaꞌai. Eꞌe, oya poeje oꞌoya. Edojjoshahua Pame nequiani Eyacuiñajji eꞌanioque ani cojja nei. Jesosa Quito jomajo yani peaꞌai. ¡Ohuaya miquianaya cajaahuana cahua quea pame nee; quea bei capo mee cahua peaꞌai! Eꞌe, Jesosa Quitohua eꞌe jojo nei huohui canaje Eyacuiñajjijo. Oya manoꞌyo majje ebionei shequi oꞌoyanaje ebaꞌe tiitiiꞌyojji. Oya ojjaña emeshi mese cuana huoojeajji poani peaꞌai. Jesosa ecuana quea jea nee poanijo manoꞌyonaje acui ecueataꞌapeejo. Eꞌe, oya manoꞌyajo oja enaꞌ cuayaquinaje esejaya mimishi cuana cuijeaꞌyojji.  
\v 6 Oya ojjaña huoojeajji poanijo eseya ojjaña huoojeajji po mee cani onijje. Eseya huoojea cani esohui huohuiya oja Chiija, Eyacuiñajjija. ¡Eꞌe, oya oe nei ojjaña huoojeaꞌyojji quea caꞌa capoꞌyahua tii tii! ¡Ojjañaa oya cabihuia cahua tii tii! Jamaya capoahua. 
\p  
\v 7 ¡Bacue! Oya poeje oꞌoya bo biajje. Ojjañaa oya ba caje. O quecuaꞌyojji epohua peaꞌaiya oya ba caje. Ojjaña dejja mimishi ojjaña meshijo baꞌe o ba majje quea mete nee nee poajeꞌyo. Pa neineijeꞌyo jama baꞌa: —¡Coya aje oe Jesosa poeyani esejaya mimishijo ese napaa! —ojjaña poaje. Eꞌe, jamaya capoahua. 
\p  
\v 8 —Eya yahuajo anitiitiia poa. Jjeya eya yani tii tii; quijje eya poeje oꞌoya peaꞌai. Eyaya ojjaña jamaya aña —Eyacuiñajjiya jamaya acani. Oya ojjaña huoojeaꞌyojji quea caꞌa nee nee poani. 
\s1 Huaniya Jesosa ba caꞌya poa ejjanequipanaqui nequi 
\p  
\v 9 Epeejji cuana, eya miquianajaya edoe mese jayojja jama poani eseya Jesosa nijje jjapeequianijo. Jesosaa eseya huoojea canijo ese nijje anijeꞌyo. Onijje jjapeequianijo, pea cuaa eseya quea nee po mee cani. Eseya quea nee poanijo jamatii Jesosa nijje jjapeequi pajeaꞌyo ajja. Eꞌe, eya iña majje pea cuaa aje iña oe eya nasi Patamoso bajjani yasijje huoojeajea canaje Eyacuiñajjija esohui huohuijjijojo peaꞌai.  
\v 10 Edojjoshahua Pameya eya ba mee canaje Jesosaja epoe oꞌoyajji. Oya jama poanaje baꞌa: E daasajje nequi eyaya shajjaꞌajjanaje Jesosaja esohui.  
\v 11 Esheꞌana janobajjima nei emiajji jayojja jama Jesosaa eya huohui canaje jama baꞌa: —Huani, eyaya miya quea huiso ba meeje. ¡Maya oe tehuecue! ¡Tehue mee majje esohui huoojeacue ecuea epeejji cuana huasijje me oejje beca cuiñajjijo baꞌeca huasijje, Asia meshi yasijje! Ma cuiñajji huiso cuana huasijje baꞌa: Epeso cuiñajji, Esemina cuiñajji, Penamo cuiñajji, Tiatina cuiñajji, Sanisi cuiñajji, Pinanepia cuiñajji, Naonisea cuiñajji peaꞌai yasijje —Jesosa poanaje. 
\p  
\v 12 Majoya ojaya esohui shajjaꞌajja majje eyaya bajeanaje ae enijje mimiani ebajji. Eyaya banaje cuaquijiji me oejje beca huisome cuaquijiji nequijjijo nequi.  
\v 13 Cuaquijiji yiyesamaneijo nequi eyaya banaje Jesosa, ojjañaja Edoe Mese. Oya ca ca oe quea pame nee nee nequi jama baꞌa: Oja daqui quea ao nee nee ojaya ejiojji yasijje yee baꞌe. Mei huoꞌo esipi quea nahuejo ejjayicaꞌaqui dojjojjanijjijje.  
\v 14 Ojaya ehuojja ña quea oshe nee nee bo oshe jayojja. Ojaya ecojja quea jeajahua nee nee cuaqui jijiani jayojja.  
\v 15 Ojaya ejiojji ca ca quea siyo nee nee baa cuaquijo quea quiyo nee nee po majje quiyo huoꞌo huoꞌoani jayojja jama. Ojaya emimiꞌyo janobajjima nei ena quea cuejipashi nee mei pasaca biajje oquequiani jama.  
\v 16 Majameta me oejje beca huisome oja me jjotojo yani, ebianei mejje. Oja enabajje cuayanaje esohui quea jaꞌa nee nee baa quea shejji jayojja; baa se beca jayojja. Ojaya ebose quea jeajahua nee nee eshequi quea jiji nee nee jayojja. 
\p  
\v 17 O ba majje eya quea mete jjejojo jaabichaquinaje oja ejiojji pejjejo, emanoꞌyo jayojja mo jaanaje. Jamajjeya ohuaya eya napaꞌajja canaje ebianei emejje. Jama poanaje baꞌa: —¡Aꞌa quea mete pojji! Eya yahuajo nei nei nequi tiitiia poa. Eya nequi tiitiiani peaꞌai.  
\v 18 Eya manoꞌyo majje shequi oꞌoyanaje. Eya eshe tii tii yani. Eya emanoꞌyo huoojeaꞌyojji. Eyaya oya cuana eshe oꞌoya po meejeꞌyo, yamijji po meejeꞌyo. Ecue esohuijo ojjaña mimishi cuana poquijeꞌyo cuaqui yasijje. Ojjaña quea pame ca ca eyahuasijje poquijeꞌyo.  
\v 19 Huani, eyaya miya ba meeaña ojjaña ma ohua jjeya nei acani, quijje nei ohua acaje peaꞌai. ¡Ba majje maya tehuecue!  
\v 20 Eyaya miya ba meeje majameta me oejje pea beca huisome ecue me jjotojo ani, cuaquijiji nequijji me oejje beca peaꞌai. Maya miquea quea quehua. Jama poani baꞌa: Mei huoꞌo cuaquijiji nequijji quea nahue jayojja oya cuana, ecuea epeejji nei cuana baꞌe ma me oejje beca cuiñajjijo baꞌeca. Majameta cuana esohui huohuijji cuana jayojja, ecuea epeejji jaahuanajji jayojja peaꞌai —Jesosa poanaje enijje. 
\c 2  
\s1 Jesosaja esohui Huaniya tehue canaje Jesosaja epeejji cuana Epesojo baꞌeca huasijje 
\p  
\v 1 Majoya Jesosaa huohui canaje jama baꞌa: —Huani, ¡ecuea esohui tehuecue esohui huohuijji Epesojo baꞌe yasijje! Oya ecuea epeejji jaahuanajji. Jama tehueme acue baꞌa: “Jamaya eyaya miya huohuiaña baꞌa: Eya Jesosa Quito. Eyaya esohui huohuijji cuana majameta me oejje beca huisome jayojja jaahuanaña ecuea eme jjotojo. Eyaya ecuea epeejji ma cuaquijiji nequijji jayojja jaahuanaña peaꞌai. Jamaya eyaya miya huohuiaña baꞌa:  
\v 2 Ecuea eba ojjaña miquianajaya ebaꞌejji. Miquianaaya enijje ojjaña pojjajo chaco neineiaña. Quea camaja. Jamatii enijje chaco pajeaꞌyo ajja. Miquianaya jjapeequi ajja esohui huohuijji nisho cuana nijje. Oya cuana siajje poanaje jama baꞌa: —Jesosaa ecuana huoojea canaje oja sohui huohuiya. 
\p “Jamatii miquianaaya ona shajjaꞌajja nei nei majje huohuinaje jama baꞌa: —Chojja, miquianaya siajje poani. Esohui huohuijji nisho jja mi coma —miquiana poanaje.  
\v 3 Eꞌe, miquianaaya enijje chaco neineiaña, chacochaco pajeaꞌyo ajja. Enijje chacochacoanijo, pea cuaa miquianaya napa canaje quea huiso. Jamatii enijje miquianaya chacochacoani tii.  
\v 4 Jamatii eya miquianajo quea yeno poani. Eꞌe, yahuajo eya miquianajaya quea jea nee nee poanaje. Jjeya ca ca chojja, quea jea pishana. Jamaya quea mimishi.  
\v 5 Jamajjeya ¡jjashahuabaquicue! Yahuajo eya miquianajaya quea jea nee nee poanaje. ¡Eya quea jea nee nee a oꞌoyacue, ma ecua miquiaaya yahuajo anaje jamaya acue! ¡Bacue oe! Miquianaya e shajjaꞌajja sa po ajjajo eya poecuajije miquiana que. Jiquio ecua cuaquijiji quijjoꞌyo majje quea misi poꞌyani jayojja jama eyaya miquianaya ecuea esohui huohui pajea meejeꞌyo, ca miquianaya ma ecua yahuajo miquiaaya eya quea jea nee nee anaje jama mi a oꞌoyajo.  
\v 6 Jamatii pea miquianajaya ejjashahuabaquijji quea jaꞌa ecuea ejjashahuabaquijji jayojja jama poani baꞌa: Dejja Niconasi bajjanija epeejji cuana quea mimishi. Miquianajaya ojaya esohui botiꞌama. Maya ecuea botiꞌama peaꞌai. 
\p  
\v 7 “Jamajjeya ¡shajjaꞌajjacue Edojjoshahua Pameja esohui ojjaña ecuea epeejji cuana Asia meshijo baꞌeca huasijje! ¿Aꞌa miquianaya e shajjaꞌajjajji? ¿Aꞌa shajjaꞌajja sa poani? Ojjaña joya enijje jjapee tiitiiquiani eshahua jeabichajeajji poani. Jamajoya eyaya oya cuana nequi tiitii meejeꞌyo Eyacuiñajji nijje eyajo. Eyaya oya cuana acuijjajja ijjia meeje Ebaꞌe tiitii meeꞌyojji, ma Eyacuiñajjija acui yiyejo nequi”. 
\p —Jamaya eyaya, Jesosaa huoojeaña ecuea esohui etehueꞌyo ecuea epeejji cuana Epesojo baꞌeca huasijje. ¡Jamaya tehuecue, Huani! —Jesosaa eya acanaje. 
\s1 Jesosaja esohui ojaya epeejji cuana Esemina cuiñajjijo baꞌeca huasijje 
\p  
\v 8 Majoya Jesosaa huohui ca oꞌoyanaje jama baꞌa: —Huani, ¡ecuea esohui tehuecue esohui huohuijji Eseminajo baꞌe yasijje! Oya ecuea epeejji nei jaahuanajji. Ejo jama tehuecue baꞌa: “Eya Jesosa Quito. Jamaya eyaya miya huohuiaña: Eya yahuajo nei nei nequi tiitiia poa. Eya nequi tiitiiani peaꞌai. Manoꞌyo majje eya shequi oꞌoyanaje.  
\v 9 Ecuea eba miquianaya enijje jjapeequianijo pea cuaa napa canaje. Jamajjeya miquianaya aemaꞌ. Jamatii ecuea epeejji poanijo miquiana quea aquiana huiso jayojja. Quea bei nee nee poani. Ecuea eba peaꞌai beca cuaa miquianaya niñeba cani. Oya cuana siajje poani jama baꞌa: —Ecuanaya Jodio cuana —poani. 
\p “Chojja, Jodio cuana pojjeama oya, Eyacuiñajjija epeejji pojjeama. Edosiquianaja epeejji cuana poani.  
\v 10 ¡Bacue! Quijje pishana miquianaya napa caje cuaa. Edosiquianaja epeejji cuaa miquianaya iña majje jeanobia caje enijje ejjapeequi pajeaꞌyojji nisho. Oe pojji cahuime miquianaya quea nee po mee caje, 10 cahuime. Jamatii ¡aꞌa quea mete pojji! ¡Aꞌa enijje jjapeequi pajeaꞌyojji jamatii cuia cajje! E pajeaꞌyo ajja tii tii eyaya miquianaya baꞌe tiitii meejeꞌyo eyajo Eyacuiñajji nijje.  
\v 11 Jamajjeya ¡shajjaꞌajjacue Edojjoshahua Pameja esohui ojjaña ecuea epeejji cuana Asia meshijo baꞌeca cuana huasijje! Ojjaña joya enijje jjapee tiitiiquiani cuaqui yasijje epoquiꞌyojji pojjeama”. 
\p —Jamaya eyaya, Jesosaa huoojeaña ecuea esohui etehueꞌyo ecuea epeejji cuana Eseminajo baꞌeca huasijje. ¡Jamaya tehuecue, Huani! —Jesosaa eya acanaje. 
\s1 Jesosaja esohui ojaya epeejji cuana Penamo cuiñajjijo baꞌeca huasijje 
\p  
\v 12 Majoya Jesosaa eya huohui ca oꞌoyanaje jama baꞌa: —Huani, ¡ecuea esohui tehuecue ecuea esohui huohuijji Penamo cuiñajjijo baꞌe yasijje! Eꞌe, esohui tehuecue jama baꞌa: “Eya Jesosa Quito. Eyaya esohui huoojeaje mi que. Baa ose miji peaꞌai isho jama quea shejji nee nee, quea caꞌa nee nee jayojja ecuea esohui.  
\v 13 Ecuea epeejji cuana, miquianaya baꞌyani cuiñajji quea mimishijo. Beshahua nei ojjaña jomajo baꞌe Edosiquiana nei nijje jjapeequiani. Jamatii miquianaaya ecuea esohui jayojja jama atiitiiaña. Ecuea epeejji Anatipa bajjani miquiana nijje baꞌeꞌyonaje. Ohuaya ecuea esohui huohui majamaja canaje quea pame nee. Jamajoya oya pea cuaa quecua caꞌyonaje. Jamatii miquianaya enijje jjapeequi pajeaꞌyo ajja.  
\v 14 Jamatii eya miquianajo quea yeno. Quea mimishi poani miquianaya; Banaamija esohui jama aje oe poani beca cuana Penamojo baꞌeca. Ohuaya, Banaamiya emeshi mese Banaca bajjani yahuajo nei nei ba mee ca poa Isaeni cuana quea mimishi, quea tai epo meeꞌyojji. Miquianaya beca cuaa Isaeni cuana quea mimishi baꞌya poa jayojja jama poani. Eꞌe, jjeya bobi, noe cuanaya eyacuiñajji nisho bihuiajji dahua majje dejja mimishi cuana nijje ojee ijjiaꞌijjiani peaꞌai. Pea epona cuana nijje quea mimishi poani peaꞌai.  
\v 15 Cuanaya miquiana nijje jjapeequiani beca cuana quea mimishi. Dejja Niconasi bajjanija esohui quea tai pajea sa poꞌyo ajja. Quea mimishi nee nee.  
\v 16 Jamajjeya ¡miquianajaya mimishi cuana pajeaꞌyocue! Pajea sa poꞌyo ajjajo eya poecuajije miquiana que. Poe majje eyaya ecuea epeejji quea mimishi poani tecuea neineijeꞌyo. Baa ose miji peaꞌai isho jama quea shejji nee nee quea caꞌa nee nee jayojja ecuea esohui poaje. Quea yeno nee nee po meejeꞌyo. 
\p  
\v 17 “Jamajjeya ¡shajjaꞌajjacue Edojjoshahua Pameja esohui ojjaña ecuea epeejji cuana Asia meshijo baꞌeca huasijje! Ojjaña joya enijje jjapee tiitiiquiani Edosiquiana jeabichajeajji poani. Jamajoya eyaya oya cuana baꞌe meesahuajeꞌyo tii tii. Eꞌe, yahuajo Eyacuiñajjiya ojjaña Moisesi nijje nequi pahui sisi eyajje oque ijjia mee ca poa. Jamaya eyaya aje oꞌoya miquianajaya. Maya ecuea epeejji pojjeamaja ba jjima. Ecuea epeejji cuana huasijje eyaya quiaje mei oshe sisi peaꞌai. Mei oshe biajje bajjani eyacua etehueꞌyo yani, maya onajaya ba jjima. Emei oshe meseja eba ojaye nei”. 
\p —Jamaya eyaya, Jesosaa huoojeaña ecuea esohui etehueꞌyo ecuea epeejji cuana Penamojo baꞌeca huasijje. ¡Jamaya tehuecue, Huani! —eya Jesosaa acanaje. 
\s1 Esohui Jesosaja epeejji cuana huasijje Tiatina cuiñajjijo baꞌeca huasijje 
\p  
\v 18 Majoya Jesosaa pea esohui huohui canaje jama baꞌa: —Huani, ¡ecuea esohui jiquio eya huohuiaña tehuecue esohui huohuijji Tiatina cuiñajjijo baꞌe yasijje! Jamaya tehuecue ejo baꞌa: “Eyaya, Jesosaa, Eyacuiñajjija Bacua Ejjaa miquiana que tehueaña. Ecuea ecojja cuaqui jijiani jayojja quea jaꞌa nee nee. Ecuea ejiojji cuana baa huoꞌo cuaqui quea quiyo nee neejo nequi jayojja quea jiji nee nee poani.  
\v 19 Ecuea epeejji, ojjaña joya miquiaaya aña cuana ecuea eba. Miquianaaya eya quea jea nee nee aña. Enijje jjapeequi pajeaꞌyo ajja nei nei peaꞌai. Quea camajajo jamatii enijje chaco pajeaꞌyo ajja. Jamaya miquianaaya quea pame nee nee aña jjeya, yahuajo jama pojjeama; yahuajo quea pame pishana poa.  
\v 20 Jamatii eya quea yeno miquianajo, de. Eꞌe, miquianaya quea mimishi poani. Epona quea mimishi Jesameni bajjani shajjaꞌajja cani beca cuaa. Oya aje oe siajjepojji jama poani baꞌa: —Eya ca iña Eyacuiñajjija huoojeaꞌyo oja sohui huohuiya —oya poani. 
\p “Chojja, siajje poani oya. Ohuaya aje oe ecuea epeejji cuana dasia cani. Quea mimishi po mee cani. Eꞌe, ojaya esohui quea mimishijo beca cuana bobi, noe cuanaya eyacuiñajji nisho bihuiajji dahua majje ojee ijjia mee cani mimishi cuana nijje. Pea epona cuana nijje quea mimishi poani ojaya esohui quea mimishijo.  
\v 21 Ecuea maya epona napa jjima; ohuaya pojjaꞌa mimishi pajea cajeꞌyo. Jamatii oya quea mimishi caꞌa; pajea sa poꞌyo ajja.  
\v 22 Jamajjeya eyaya oya quea nee nee po meejeꞌyo, ojjaña cuana joya o jayojjaya quea mimishi poani peaꞌai quea nee nee po meejeꞌyo, ca mimishi cuana pajea sa poꞌyo ajjajo.  
\v 23 Ojjaña joya o shajjaꞌajjajji poani eyaya mano meejeꞌyo. Chamaꞌyo tii poajeꞌyo. Jamajoya ma ba majjeya ojjaña ecuea epeejji cuana jjabahuejjaquije eꞌe jojo nei ecuea eba ojjaña cuanaja ejjashahuabaquijji. Quehuajje ejjashahuabaqui meejji pojjeama. Eꞌe, ojjañaja ebaꞌejji ba majje eyaya sosequiajeꞌyo. Quea mimishi poanijo quea nee nee po meejeꞌyo. Quea pame poanijo ca ca quea bihui nee nee po meejeꞌyo. 
\p  
\v 24 “Jamatii miquianaya Tiatinajo baꞌe quea huiso nee ma esohui quea mimishi jayojja jama po ajja. Edosiquianaja esohui quea quehua, quea mimishi cuana jayojja jama po ajja peaꞌai. Ba sa po ajja peaꞌai. Jamajjeya eyaya miquianaya jamaya huohuiaña: ¡Aꞌa ecuea esohui pajeaꞌyojji! Mahuiso.  
\v 25 Miquianaya ecuea epeejji cuana poani. ¡Ishoacue ecuea epoe oꞌoyajji! ¡Aꞌa enijje jjapeequi pajeaꞌyojji!  
\v 26-27 Ecue Chiiya eya ojjaña meshijo ojjaña huoojeaꞌyojji po mee tiitii cani. Jamaya eyaya miquianaya ameejeꞌyo enijje jjapee tiitiiquianijo. Eꞌe, miquianaaya eshahua jeabichajeaña. Ecuea esohui jayojja jama atiitiiañajo, peaa miquianaya cuiajea cajeꞌyo pojjaꞌa. Jamatii eyaya miquianaya enijje ona huoojeaꞌyojji nequi meejeꞌyo tii tii. Ojjaña huoojeaꞌyojji quea caꞌa nee nee poajeꞌyo, ojjaña cuana ojjaña meshijo baꞌeca cuana huoojeaꞌyojji nei nei quijje poajeꞌyo. Jiquio ecua meshimisi jajaajajea cani baaa jamaya shajjamaꞌ cuana ojjaña meshijo baꞌeca jeabichajeajeꞌyo miquianaaya enijje ojjaña huoojeaꞌyojji nequiꞌyo majje.  
\v 28 Eyaya miquianaya quiajeꞌyo peaꞌai aquiana quea pame nee nee yohua jayojja baꞌa: majameta ai, eshequi huiyejji mecajjeahua nei jaasohuani jayojja jama. 
\p  
\v 29 “Jamajjeya ¡shajjaꞌajjacue Edojjoshahua Pameja esohui ojjaña ecuea epeejji cuana Asia meshijo baꞌeca huasijje; jjashahuabaquicue!” 
\p —Jamaya eyaya, Jesosaa huoojeaña ecuea esohui etehueꞌyo ecuea epeejji cuana Tiatinajo baꞌeca huasijje. ¡Jamaya tehuecue, Huani! —eya Jesosaa acanaje. 
\c 3  
\s1 Jesosaja esohui ojaya epeejji cuana huasijje Sanisi cuiñajjijo baꞌeca huasijje 
\p  
\v 1 Majoya Jesosaa eya huohui canaje jama baꞌa: —Huani, ¡ecuea esohui tehuecue esohui huohuijji Sanisi cuiñajjijo baꞌe yasijje, ma ecuea epeejji nei cuana jaahuanajji yasijje! Tehuecue jama baꞌa: “Eya Jesosa Quito. Eyaya Edojjoshahua Pame miquiana huasijje huoojeaña. Eyaya miquianaya huohuiaña: Ecuea epeejji cuana, ojjaña miquianajaya ebaꞌejji cuana eyaya baña. Pea cuaa miquianajo huohui canaje jama baꞌa: —Jesosaja epeejji cuana Sanisijo baꞌecaa Jesosaja esohui jayojja jama acani —poanaje. 
\p “Jamatii eyaya miquianaya baña beshahua nei ecuea esohui jayojja jama baꞌe ajja.  
\v 2 Jamajjeya ¡ecuea esohuijo jjashahuabaquicue quea jaꞌa nee! Quea mimishi poanijo miquianaya jjashahuabaquiani oe pojji. Beshahua nei jjashahuabaqui jaꞌa pajeaꞌyonaje. Jamaya quea mimishi, de. Eyacuiñajjija esohui jayojja jama aꞌajja miquianaaya.  
\v 3 Ecuea esohui huohuijjiya ecuea esohui huohui canaje miquiana huasijje. Jamajjeya ¡ecuea esohui jama acue! ¡Mimishi cuana pajeaꞌyocue! Ejo jjashahuabaqui ajjajo aje oe eya miquiana que quehuajje poecuajije quea nee nee po meeya, siipojji quehuajje poeyani jayojja. Eya ache pojjajo miquiana que poeje oꞌoya miquianajaya ebajji pojjeama. 
\p  
\v 4 “Jamatii beca cuana Sanisijo baꞌe quea boejeaꞌyo baꞌe, mimishiꞌama nei. Oya cuana enijje baꞌe meejeꞌyo. Quea pame nee baꞌe eyaya oya cuana daqui quea oshe nee nee huosho meejeꞌyo enijje ebaꞌe tiitiiꞌyojji.  
\v 5 Eꞌe, ojjaña joya enijje jjapeequi pajeaꞌyo ajja daqui quea oshe nee nee huosho meejeꞌyo. Ojaya ebajjani cuana eyaya tehueꞌyonaje ebaꞌe tiitii meeꞌyojji. Maya ojaya ebajjani eyaya ecuijeaꞌyojji pojjeama. Oya cuanajo ca ca eyaya ecue Chii huohuije jama baꞌa: —Eꞌe, oya cuana ecuea epeejji nei —jamaya eya poaje ojjaña esohuidojojji cojja neijo ani. 
\p  
\v 6 “Jamajjeya ¡shajjaꞌajjacue Edojjoshahua Pameja esohui ojjaña ecuea epeejji cuana Asia meshijo baꞌeca huasijje; jjashahuabaquicue!” 
\p —Jamaya eyaya, Jesosaa huoojeaña ecuea esohui etehueꞌyo ecuea epeejji cuana Sanisijo baꞌeca huasijje. ¡Jamaya tehuecue, Huani! —eya Jesosaa acanaje. 
\s1 Jesosaja esohui ojaya epeejji cuana huasijje, Pinanepia cuiñajjijo baꞌeca huasijje 
\p  
\v 7 Majoya Jesosaa eya huohui canaje: —Huani, ¡ecuea esohui ecuea esohui huohuijji, ecuea epeejji jaahuanajji Pinanepia cuiñajjijo baꞌe yasijje tehuecue peaꞌai! Jama tehueme acue baꞌa: “Ecuea epeejji cuana, eyaya, Jesosa Quitohua quea jaꞌa nee nee aña, mimishiꞌama, eꞌe jojo nei Eyacuiñajji. Yahuajo nei etiiquiana Dabi Jodio cuanaja emeshi mese poanaje. Jjeya eya Eyacuiñajjija cuiñajji eyacua mese. Eyaya esecue caꞌa majje pea edobiqui meejji pojjeama. Caꞌapejo majje pea dobiqui meeje. 
\p  
\v 8 “Ecuea epeejji cuana, miquianajaya ebaꞌejji ecuea eba. Miquianaya oe pojji yani. Jamatii ecuea esohui jayojja jama aña. Enijje jjapeequi pajeaꞌyo jjima. Jamajjeya eyaya miquianaya esohui huohui meeje pea cuana huasijje. Eshahuaja epeejji cuaa miquianaya ehuohui pajea meeꞌyojji pojjeama.  
\v 9 Oya cuana siajje poani jama baꞌa: —Ecuanaya Jodio, eꞌe jojo nei Eyacuiñajjija epeejji —oya cuana poani. 
\p “Jamajjeya eyaya eshahuaja epeejji cuana miquiana que poe meeje ecuiꞌoshajjajo nequiya miquiana bihuiaa jama baꞌa: —Eꞌe, miquianaya Eyacuiñajjija epeejji eꞌe jojo nei, ojaya quea jea nee nee. 
\p  
\v 10 “Pea cuaa miquianaya napa cani. Jamatii miquianaya ecuea esohui jayojja jama enijje jjapee tiitiiquijeꞌyo. Jamajjeya quijje eyaya baje ache cuana ecuea epeejji eꞌe jojo nei. Quijje eshahuaja epeejji ojjaña cuana quea nee nee po meejeꞌyo; eyaya miquianaya jaahuana neineijeꞌyo.  
\v 11 Quijje pishana eya, Jesosa poeje oꞌoya miquiana que. Jamajjeya ¡ecuea esohui jayojja jama po tiitiicue! Jamajjeya pea cuanaja miquianaya edasiajji pojjeama. Majoya Eyacuiñajjija ejjashahuabaquiꞌyojji miquianajo jama acaje baꞌa: Miquianaya baꞌe tiitii mee cajeꞌyo onijje.  
\v 12 ¡Bacue! Ojjaña miquianaya enijje jjapeequi pajeaꞌyo ajjajo eyaya eyajo nequi tiitii meejeꞌyo. Acui caꞌa, equi yamajjana quea quemo, quea caꞌa nequijeꞌyo tii tii jayojja jama ecuea epeejji nei nequi tiitiijeꞌyo eyajo. Eyaya ojjaña cuana ba meeje miquianaya ecuea epeejji eꞌe jojo nei, Eyacuiñajjija peaꞌai. Jiquio ecua eꞌacui meseya acuijo oja bajjani quecuatehue cani jayojja jama eyaya ajeꞌyo; ecuea epeejji nei cuana tehueje. Jamajjeya miquianaya, ojjaña ecuea epeejji peaꞌai ojee enijje eyajo ani meejeꞌyo. Enijje poejeꞌyo; Eyacuiñajjija cuiñajji eyacua, Jenosanena eyacua bajjani jayojja jama poeje. Ecuea bajjani eyacua poaje eya quea caꞌa nequianijo. Maya eyaya ojjaña miquianaya ba meejeꞌyo. 
\p  
\v 13 “Jamajjeya ¡shajjaꞌajjacue Edojjoshahua Pameja esohui ojjaña ecuea epeejji cuana Asia meshijo baꞌeca huasijje; jjashahuabaquicue!” 
\p —Jamaya eyaya, Jesosaa huohuiaña ecuea epeejji cuana Pinanepiajo baꞌeca huasijje. ¡Jamaya tehuecue, Huani! —Jesosaa eya acanaje. 
\s1 Jesosaja esohui ojaya epeejji cuana huasijje Naonisea cuiñajjijo baꞌeca huasijje 
\p  
\v 14 Majoya Jesosaa eya huohui ca oꞌoyanaje peaꞌai jama baꞌa: —Huani, ¡ecuea esohui huohuijji Naonisea cuiñajjijo baꞌe yasijje tehuecue ecuea esohui! Oya ecuea epeejji nei jaahuanajji. Jama oya tehuecue baꞌa: “Ecuea epeejji cuana, eya Jesosa eꞌe jojo nei Eyacuiñajjija huoojeaꞌyo. Eyaya huohuiaña Eyacuiñajjija esohui eꞌe nei. Eyaya Eyacuiñajji nijjeya ojjaña pana cooa poa. Eyaya miquianaya huohuiaña jama baꞌa:  
\v 15-16 Ojjaña miquianajaya ebaꞌejji cuana ecuea eba. Eyaya baña miquianaya enijje jjapee neineiqui sa po ajja. Jamatii e cajaa sa poꞌyo ajja peaꞌai. ¡Aꞌa epeejji nisho pojji! ¡E cajaa a sa amajje jja ca iña oe huohuicue! Eꞌishijji quea quiyo pojjeama jayojja poani miquianaya. Eꞌishijji quea huoe pishana enabajo peajja, ena quea tai jama. Jiquio ecua seya chijjoco ena ishiꞌajja majje ojjajeaꞌyaña jayojja jama eyaya miquianaya cajaa achanaꞌ, ca ecuea esohui miquianaaya mi shajjaꞌajjajo.  
\v 17 Miquianaya aje oe jiquio jama jjashahuaba quehuaquiani baꞌa: —Eya ca iña Eyacuiñajjija epeejji quea pame nee poani —miquianaya jamaya poani. Jamaya peaꞌai poani baꞌa: —Eya dejja quea aquiana huiso jayojja jama poani. 
\p “Chojja. Miquianajaya eba pojjeama Eyacuiñajjiya miquianaya ba cani jama baꞌa: Miquianaya aemaꞌ jayojja, daquimaꞌ jayojja, cojjamaꞌ jayojjaya. Miquianaya quea mimishi baꞌyanijo Eyacuiñajji quea yeno nee nee poani miquianajo.  
\v 18 Jamajjeya eyaya miquianaya huohuiaña: ¡Eya sa neineicue! ¡Ecuea esohui shajjaꞌajja neineicue! Ecuea esohui mei huoꞌo quea nahue jayojja jama poanijo, miquianajaya ebaꞌejji quea jaꞌa nee poaje. Eya miquianajo manoꞌyonaje miquianajaya mimishi cuijeaꞌyojji. ¡Jamaya jjashahuabaquicue! Maya ba majje miquianaya daqui oshe ehuoshoꞌyo baꞌe jayojja jama poaje, quea boejea nee. Jamajoya miquianaya bichoꞌama poaje miquianajaya mimishijo. ¡Edojjoshahua Pame bacue! Oya ecojja shicuijji jayojja; ohuaya miquianaya ecuea esohui ba meesahua cajeꞌyo, quea jjashahuabaqui jaꞌa nee po mee cajeꞌyo.  
\v 19 Ojjaña ecuea epeejji eyaya tanacuaña, tecueaña peaꞌai ejjabahuejjaqui meejji ecuea quea jea nee neejo. Jamajjeya ca oe ¡ecuea esohui jayojja jama acue eꞌe jojo nei! ¡Ecuea epeejji nisho aꞌa po majajji!  
\v 20 ¡Bacue! Esecuejo nequiya iyaa cani edobiquijji, miquiana nijje ejjapeequijji. Oya jayojjaya eya poani. Eyaya miquianaya iyaaña. E shajjaꞌajja majje jama pocue baꞌa: —¡Jesosa, dobicue! —jamaya poajo eya miquiana que dobiquije miquiana jjashahuabaqui meejji. Miquianaya enijje jjapeequije peaꞌai. Jiquio ecua epeejji cuana ojee ijjiaꞌijjiani jama poaje eseya.  
\v 21 Eꞌe, ojjaña joya enijje jjapee tiitiiquiani eshahua jeabichajeajji poani. Jamajjeya quijje eyajo eyaya huohuije jama baꞌa: —¡Enijje nequicue! ¡Enijje ojjaña huoojeaꞌyojji pocue! 
\p “Eꞌe, miquianaya e jayojja jama poaje. Eyaya quea caꞌaa jjejojo Edosiquiana jeabichajeanaje. Jamajjeya ecue Chii nijje eya anioqueani; ojjaña huoojeajji poani tii tii.  
\v 22 Jamajjeya ¡shajjaꞌajjacue Edojjoshahua Pameja esohui; ojjaña ecuea epeejji cuana Asia meshijo baꞌeca cuana jjashahuabaquicue!” 
\p —Jamaya eyaya, Jesosaa huoojeaña ecuea esohui etehueꞌyo ecuea epeejji cuana huasijje Naonisea cuiñajjijo baꞌe yasijje. ¡Jamaya tehuecue, Huani! —eya Jesosaa acanaje. 
\c 4  
\s1 Ojjañaa eyajo baꞌecaa Jesosa bihuia cani 
\p  
\v 1 Majoya esohuidojojjiya jjanequipana meequi canaje jama baꞌa: Eya ba mee canaje esecue ecaꞌapejo nequi jayojja eyajo. Jjanequipana cooqui mee canajejo Jesosa enijje miminaje. Ojaya esohui esheꞌana emiajji jayojja jama janobajjima nei huohui canaje yahuajo pishana. Jjeya ohuaya eya huohui ca oꞌoyanaje jama baꞌa: —Huani, ¡poecue eyahuasijje e que! Eyaya miya ba meeje jiquio eya quijje aje —Jesosa poanaje. 
\p  
\v 2 Jjeyahua nei Edojjoshahua Pameya eya ba mee canaje jama baꞌa: Emeshi Mese nei eꞌanioque ani ojjaña huoojeaꞌyojji.  
\v 3 ¡Oya ache bame nee nee poanaje! Quea jeajahua nee nee mei caꞌa quea siyo jayojja: mei quea nahue jasepe bajjani jayojja, codinania mei bajjani jayojja peaꞌai. Ojaya eꞌanioquejjijo eshijje copocopo jayojja yaninaje quea bame nee nee mei tahuaa esemenana mei bajjaniya jeasiyo cani jayojja jama.  
\v 4 Quea huiso Jesosaja epeejji etii cuana, 24 huisome onijje eꞌanioque ani. Eyacuiñajji ca ca eyiyesama neijo ani. Onajaya daqui quea oshe nee nee. Esapajo iya mei huoꞌo ejaahuojja quea nahue ani emeshi mese epojji.  
\v 5 Eyacuiñajjiya ojaya eꞌanioquejjijo aniya pojjejje po mee cani, beni jjaqueyaqui mee cani, cueji taaa po mee cani peaꞌai. O cojja neijo cuaquijiji me oejje beca huisome nequi. Jiquio cuaquijiji cuana jama baꞌa: Edojjoshahua Pameya acani Jesosaja epeejji cuana nijje ma ecua me oejje beca cuiñajjijo baꞌe jama.  
\v 6 Eyacuiñajji cojja nei eyaya banaje bae quea tahua nee nee jayojja, quea coe nee nee, quea siyo nee nee jayojja. 
\p Eyaya banaje peaꞌai ebeca pee peaꞌai aquiana eshe, quea cojja huiso nee nee Eyacuiñajji eꞌanioque ani pejjejo, cojja beca jayojja, ecojja quipa huejjajje jjabaquiani peaꞌai.  
\v 7 Oe aquiana eshe ibia jayojja. Pea anaꞌai jayojja. Pea aquiana dejja jayojja cojjame, dejja cuichojji jayojja. Pea huipa cuabesabaꞌe jayojja jama.  
\v 8 Ojjaña jiquio aquiana eshe cuichojji cuabesajji de, ojjaña 6 cuichome, me oejje oe cuichome. Ojjaña cuana quea cojja huiso nee nee; ojaya ecuicho quimejjejje peaꞌai ecojja cuana yani. Ojjaña cuana sohuicuayani tii tii Eyacuiñajji bihuiajji; sohuicuaya pajea ajja nei nei mecajje ai quiana. Jamaya poani baꞌa: 
\q1 “Eyacuiñajji, miya ca ca oe quea pame, mimishiꞌama, quea boejea nee nee. Miya ojjañaja Emeshi Mese nei quea caꞌa nee nee. Miya yahuajo nei nei ani tiitiia poa, jjeya ani tiitiiani, quijje ani tiitiijeꞌyo peaꞌai”. 
\m Jamaya oya cuana poani. 
\p  
\v 9 Eꞌe, ma aquiana eshe cuana sohuicuayani Eyacuiñajji bihuiajji. Jama poani baꞌa: “Eyacuiñajji, miya oe nei quea pame nee nee, oe nei nequi tiitiiani, ¡ojjañaa miya cabihuia cahua!” oya cuana jama sohuicuayameya poani. 
\p  
\v 10 Ma shajjaꞌajja majjeya Jesosaja epeejji etii cuaa, ma 24 huisomeya ecuiꞌoshajjajo nequiya Eyacuiñajji bihuia cani. Eꞌe, oya oe nei eꞌanioque ani tii tii bihuia cani. Onajaya mei huoꞌo ejaahuojja quea nahue nee cajjajea majje Eyacuiñajjija ejiojji pejjejo iyaoquea cani. Eꞌe, Eyacuiñajji oe nei quea caꞌa nee nee. Jamajjeya oya bihuia cani cuaa jama baꞌa: 
\q1  
\v 11 “Eyacuiñajji, miya oe nei ecuanaja Emeshi Mese nei. Miya oe nei quea pame nee nee. Jamajjeya ecuaaya miya bihuiaña. Miya oe nei ani tiitiijeꞌyo, oe nei ojjaña huoojeajji. Miyaya ojjaña aquiana cuana pana cooa poa. Eꞌe, ojjaña aquiana miyaya saña. Jamajjeya pana majje nequi tiitii meeaña, miyaya”. 
\m Jamaya Eyacuiñajji bihuia cani ma 24 epeejji etii cuaa eyajo aniya. 
\c 5  
\s1 Ejeejo esohui etehueꞌyo eyaya banaje 
\p  
\v 1 Majoya eyaya, Huaniya Eyacuiñajji eꞌanioquejjijo ani banaje. Ojaya emeꞌ ebianeijje esohui ejeejo tehue eꞌiñabebo nequi eyaya banaje. Jiquio ejeejo quea huiso esohui etehue poanaje, omiji peaꞌai tehuemeꞌya poanaje. Tehuejeyo majje me oejje beca, 7 ijjiabaji meemeꞌya poanaje.  
\v 2 Eyaya esohuidojojji quea caꞌa nee nee banaje peaꞌai. Ohuaya ojjaña cuana janobajjima nei huohuiꞌajja canaje jama baꞌa: —¿Aꞌya cuae quea pame nee nee esohui etehueꞌyo hui isajji esohui etehueꞌyo ebajji? ¡Joya quea pame nee nee Eyacuiñajji cojja nei nei nequicue esohui etehueꞌyo ecueabaji hui isajji! —esohuidojojji jama taaameya poanaje. 
\p  
\v 3 Jamatii eyajo baꞌe, meshijo baꞌe peaꞌai, yahuajo emanoꞌyo peaꞌai chamaꞌ poanaje oe quea pame nee nee esohui cuiabaji hui isajji, ejee jjequijeapiihuijji. Chojja, chamaꞌ nei nei poanaje oe quea pame nee nee ma esohui ba meejji.  
\v 4 Jamajjeya chamaꞌ nei nei ba majje eya quea yeno poanaje. Pa neineinaje.  
\v 5 Majoya Jesosaja epeejji etii, ma Eyacuiñajji bihuia caniya pea 24 huisome cuana nijjeya eya huohui canaje: —¡Aꞌa oe pajji! ¡Bacue! Oe dejja Jesosa bajjani yani, ma Jodaja osecua, emeshi mese Dabija osecua poa. Oya ca ca oeya esohui cueabajijji hui isa majje ejee jjequijeapiihui cajeꞌyo esohui ebajji. Oya quea caꞌa nee nee, ibia naa asha jayojja jama ojjaña huoojeaꞌyojji poani. 
\p  
\v 6 Majoya eyaya banaje oe dejja Eyacuiñajji eꞌanioque ani pejjejo nequi. Oya ebeca pee peaꞌai huisome aquiana eshe cuana yiyesama neijo nequi, Jesosaja epeejji etii quea caꞌa quea huiso cuana yiyesama neijo nequi peaꞌai. Oya ca ca jiquio jama baꞌa, ñajjajja eshoꞌi equecuaꞌyo jayojja ojjañaja mimishi cuijeaꞌyojji. Oya Emeshi Mese nei quea caꞌajo ñajjajja yahue sheꞌanajji jayojja me oejje beca sheꞌaname jayojja eyaya oya banaje. Ojjaña ojaya eba neineijo oya quea cojja huiso nee jayojja banaje eyaya, me oejje beca cojjame jayojja eyaya oya banaje, 7 cojjame. Ecojja cuana Edojjoshahua Pameya acani, ma Edojjoshahua Pameya Jesosaja epeejji cuana ojjaña meshijo baꞌeja yajjijo acani jayojja.  
\v 7 Ma dejjaa ñajjajja equecuaꞌyo jayojjaa Eyacuiñajji que jjanequichipiqui majje jjeshe canaje esohui etehueꞌyo oja ebianei mejje iñanequia nequi.  
\v 8 Jamajjeya aquiana eshe cuaa ebeca pee peaꞌai huisomeya Jesosa bihuia canaje. Jesosaja epeejji etii quea huiso 24 huisome peaꞌaiya Jesosa, ma ñajjajja equecuaꞌyo jayojja bihuia canaje ecuiꞌoshajjajo nequiya. Oya cuanaja eꞌiñaqueyajji yaninaje. Mei huoꞌo caneco madeja pohui jayojja anijji yaninaje peaꞌai. Madeja pohui jayojja huichachanaje. Huichacha quea shiye Eyacuiñajjija epeejjija emimi onijje jayojja.  
\v 9 Jesosaja epeejji etii cuana esohui eyacua sohuicuayanaje Jesosa bihuiajji jama baꞌa: 
\q1 “Jesosa Quito, ¡miya quea pame nee neejo esohui etehueꞌyo jjeshe majje ecueabaji hui isacue! Eꞌe, miya quecua canaje cuaa. Miquea enaꞌ cuayaquiajo manoꞌyonaje ojjaña cuanaja mimishi cuijeaꞌyojji. Ojjaña miquea ejjesheꞌyo jayojja. Jamajjeya Eyacuiñajji nijje jjapeequi meeaña ojjaña cuana ojjaña meshijo baꞌe, ojjaña cuiñajjijo baꞌe, ojjaña pea esohuijo mimiani cuana peaꞌai.  
\v 10 Jesosa, miya ojjaña huoojeaꞌyojji poani. Jamajjeya ecuana huoojeaje minijje ojjaña joya ojjaña meshijo baꞌe huoojeaa, esejaya Chii aija esohui huohuiya peaꞌai”. 
\m Jama sohuicuayameya poanaje Jesosa bihuiajji. 
\p  
\v 11 Majoya eyajo eyaya banaje esohuidojojji quea huiso nee nee. Eyaya onajaya esohuicuayajji shajjaꞌajjanaje peaꞌai. Oya cuana quea huiso nee neejo sicosico ajja. ¡Ache huiso nei nei, de! Oya cuana ejjanequitoquiꞌyo nequinaje aquiana eshe cuana, Jesosaja epeejji etii cuana quea huiso peaꞌai ejjanequitoqui nequiꞌyonaje. Ojjaña yiyesama neijo Eyacuiñajji eꞌanioque ani.  
\v 12 Onaya janobajjima nei sohuicuayanaje; Jesosa bihuia canaje jama baꞌa: 
\q1 “Jesosa, miya quea pame nee nee. Miya ojjañaja mimishijo manoꞌyonaje, ñajjajja shoꞌi equecuaꞌyo jayojja jama poanaje. Miya oe nei ojjaña huoojeajji. Ojjaña aquiana miquea, ojjaña tii. Ojjaña miquea eba. Miyaya quea caꞌa poaniya jjejojo ojjaña aña. Ecuanaaya miya shajjaꞌajjaña; ecuanaaya miya bihuiaña. Ecuanaaya huohuiaña mijo jama baꞌa: —Jamaya quea pame nee miyaya aña —poani”. 
\m Jamaya esohuidojojji cuana poanaje eyajo. 
\p  
\v 13 Majoya eyaya shajjaꞌajjanaje ojjaña Eyacuiñajjija pana cuana, ojjaña eyajo baꞌeca cuana, ojjaña meshijo baꞌeca cuana, ojjaña yahuajo manoꞌyo cuana, ojjaña enajo baꞌeca cuana peaꞌaiya sohuicuayani. Ojjaña cuanaa Eyacuiñajji eꞌanioquejjijo ani bihuia cani. Jesosa ma ñajjajja jayojja jama manoꞌyonaje peaꞌai bihuia cani onaaya jama baꞌa: 
\q1 “Eyacuiñajji, miya ojjaña huoojeajji. Jesosa, miya ecuanajo manoꞌyonaje. Jamaya quea pame nee nee. Jamajjeya ojjaña ecuanaaya miya bihuiaña. Miya shajjaꞌajjaña peaꞌai ecuanaaya. Quea caꞌa nee neeya jjejojo miyaya ojjaña cuana aña. ¡Jamaya capoahua tii tii!” 
\m Jamaya sohuicuayani ojjaña cuana. 
\p  
\v 14 Majoya aquiana eshe cuana Eyacuiñajji pejjejo ani jama poanaje baꞌa: —Eꞌe, ¡jamaya ojjañaa miya cabihuia cahua tii tii! 
\p Jesosaja epeejji etii cuaa, ma 24 huisomeya peaꞌai Eyacuiñajji bihuia canaje ecuiꞌoshajjajo nequiya. Oya ca ca oe enequi tii tii. Eꞌe, Jesosa etehueꞌyo ecueabajijji me oejje beca ecueabajimeꞌya hui isajea mee caje, Eyacuiñajjiya. 
\c 6  
\s1 Esohui etehueꞌyo oe ecueabajijjiꞌya isajea canaje Jesosaa 
\p  
\v 1 Majoya eyaya, Huaniya banaje jama baꞌa: Jesosa, ma ñajjajja shoꞌi equecuaꞌyo jayojja yani. Ohuaya oe etehueꞌyo ecueabajijjiꞌya isajea canaje, ebionei. Majoya eyaya shajjaꞌajjanaje oe aquiana eshe eyajo mimiani. Ojaya esohui cueji taaani jayojja. Joya mapichi aija edaasa biajje ani yasijje taaanaje jama baꞌa: —¡Poecue! 
\p  
\v 2 Jjeya nei eyaya banaje mapichi oshe poeyani. Ohuaya mapichija edaasa biajje aniya mai ecohuijji iña canaje. Oya emeshi meseja ejaahuojja quea nahue nee quia canaje cuaa. Oya poquicuajinaje ojjaña jeabichajeaa, emeshi mese quea caꞌa nee nee jayojjaya. 
\p  
\v 3 Majoya Jesosaa pea ecueabajijjiꞌya isa canaje. Eyaya pea aquiana eshe eyajo shajjaꞌajjanaje. Ohuaya jama iyaame acanaje baꞌa: —¡Poecue! 
\p  
\v 4 Jjeya nei eyaya banaje mapichi ai quea huoꞌo nei nei. Dejja mapichija edaasa biajje ani baa ai quia canaje cuaa. Oya jama huohuime acanaje cuaa baꞌa: —¡Poquicue miya! ¡Ojjaña jjaquecuaqui meecue pea cuana nijjeya! —jamaya poanijo ojjaña quea tecue nee nee po mee cani ojjaña pea cuana nijje. 
\p  
\v 5 Majoya Jesosaa pea ecueabajijjiꞌya isajea ca oꞌoyanaje. Pea aquiana esheya iyaa canaje jama baꞌa: —¡Poecue! 
\p Majoya mapichi ai tehue poeyani eyaya banaje. Ohuaya mapichija edaasa biajje aniya eꞌipiaꞌajjajji iña canaje, bobi ipiaꞌajjajji, oe pojji bobi yani jojoya. 
\p  
\v 6 Majoya eyaya shajjaꞌajjanaje pea eyajo mimiani aquiana eshe yiyesamajje nequi. Jama poanaje joya mapichija edaasa biajje ani nijje baꞌa: —¡Echacojji cuana oe pojjajo chacochaco majje oe pojji bobi quiacue chaco sosejje! ¡Anoso oe pojji, oe tepe iye quemo pojjaꞌa quiacue; shijje iye huiso pea beca peejjima tepe pojjaꞌa quiacue jjeyahua nei eꞌijjiajji! ¡Aꞌa huana meejji quijje eꞌijjiaꞌyojji! ¡Acuijjajja sei, acuijjajja na eꞌishijji aꞌa quea nahue ameejji! —oya poanaje. 
\p  
\v 7 Majoya Jesosaa pea ecueabajijjiꞌya isajea cajo eyaya shajjaꞌajjanaje pea aquiana eshe eyajo. Ohuaya jama iyaame acanaje baꞌa: —¡Poecue! 
\p  
\v 8 Jamajjeya jjeya nei eyaya banaje mapichi jahua poeyani. Ohuaya mapichija edaasa biajje aniya quea huiso nee nee mano mee cajeꞌyo. Jamajjeya oya Jjamano meequiꞌyojji bajjani. Mano mee caꞌyajje ojjaña poqui mee cajeꞌyo emanoꞌyo sajaa huasijje. Oya huohui canaje cuaa jama baꞌa: —¡Quea huiso nee nee mano meeꞌyocue ojjaña meshijo baꞌeca! ¡Oe dejja mano meeꞌyocue; beca cuana aꞌa mano meejji! ¡Jamaya amajamajacue ojjaña meshijo baꞌe cuana! ¡Quea huiso mano meeꞌyocue jjaquecuaquianijo; bobi chamajo peaꞌai, emanomeejjijo peaꞌai mano meeꞌyocue! ¡Ijjiacajji quea mase cuaa dejja quea huiso ijjia meeꞌyocue peaꞌai! 
\p  
\v 9 Majoya Jesosaa, ma ñajjajja shoꞌi equecuaꞌyo jayojjaa pea ecueabajijjiꞌya isajea cajo eyaya banaje quea huiso Jesosaja epeejji yahuajo manoꞌyo cuana eyajo nequiꞌyo. Pea cuaa oya cuana quecua caꞌyonaje Eyacuiñajjija esohui jama ajji poanijojo, Jesosaja esohui huohuijjijojo peaꞌai. Eꞌe, oya cuana jiquio jama baꞌa: Jodio cuaa ñajjajjaja ebacua cuana mei eꞌiya biajje cuia cajje naꞌ cuayaquianinaje mimishi cuijeaꞌyojji jayojja jama dejja cuaa Jesosaja epeejji cuana quecua caꞌyajje onajaya enaꞌ cuayaquiꞌya poa.  
\v 10 Jamajjeya oya cuana taaanaje jama baꞌa: —Emeshi Mese nei, miya quea pame nee; ojjaña miyaya aña. Huohui majje jamaya poani. ¡Bacue oe, dejja mimishi cuaa ecuana quecua caꞌyonaje! Jamajoya ¿ache shono shai ojjaña quea mimishi ojjaña meshi cuanajo baꞌe quea nee nee po meejeꞌyo miyaya? —oya cuana poanaje. 
\p  
\v 11 Eyacuiñajjiya oya cuana quia canaje daqui oshe quea ao nee nee. Ona nijje miminaje jama baꞌa: —Pea cuaa miquianaya quecua caꞌyonaje ecuea esohui huohuijji poanijojo. Miquea edoe mese cuana ecuea epeejji cuana enijje chacochacoani pea cuaa quecua cajeꞌyo peaꞌai. Jamajjeya ¡ishoa socue! Quecuajeyo cajo, eyaya dejja mimishi cuana quea nee nee po meejeꞌyo —Eyacuiñajjiya acanaje. 
\p  
\v 12 Majoya Jesosaa pea ecueabajijjiꞌya isajea cajo eyaya banaje jama baꞌa: Meshi huehuahuehuanaje janobajjima nei. Eshequi quea apo nee nee poanaje, daqui tehue nei jayojja poanaje. Baꞌi quea huoꞌo nee, enaꞌ jayojja poanaje.  
\v 13 Majameta cuana jjacajjaqui majje jijijijioquenaje meshi yasijje, beni pajijiya acuijjajja etahua jeahuojojea cani jayojja poanaje.  
\v 14 Eyatahuatahua chamaꞌyo tii poanaje. Jjahuejjajeaqui majje yoquise esipi ejjequijeapiihui nequi jjajjajjaquiꞌyani jayojja poanaje peaꞌai. Eyiyo, nasi cuana peaꞌai jjaajaajeaqui majje jjasheshojeaquinaje meshi huehuahuehuajo.  
\v 15 Jamaya emeshi mese cuana poanaje peaꞌai; jeabichajeaꞌyonaje ojjaña. Eꞌe, jiquio jama poanaje baꞌa: Emeshi mese cuana, dejja huoojeajji cuana, dejja quea aquiana huiso cuana, sohuinano mese cuana, dejja etii cuana, dejja ehuoojeajjimaꞌ cuana, dejja ehuoojeajjijji cuana peaꞌai jjaꞌaniquehuaqui canaje jjani cuana huasijje, eyiyo cuana huasijje peaꞌai.  
\v 16 Ojjaña jiquio dejja mimishi cuana quea mete nee nee poanijo siasianaje jama baꞌa: —Eyacuiñajji ojjaña huoojeajji oya yani. Jesosa ñajjajja shoꞌi equecuaꞌyo jayojja yani peaꞌai. Eseya quea mimishi poanijo, oya cuana quea quene nee nee poani ese nijje. ¡Jamajoya eyiyo cuana, mei ai cuana peaꞌai ecuana biajje caꞌoqueahua, Eyacuiñajjiya eseya eba ca cuahuajje, Jesosaa eseya quea nee nee epo mee ca cuahuajje!  
\v 17 Eꞌe, oya cuana poeyani ojjaña quea mimishi napaa. Ojjaña eseya manojeꞌyo, de —jama siasiameya dejja mimishi cuana poaje. 
\c 7  
\s1 Jesosaja epeejji bahua tehue canaje Jodio cuanaja ojjañaja ebajji 
\p  
\v 1 Majoya eyaya banaje ebeca pee peaꞌai esohuidojojji cuana. Eyacuiñajji onijje miminaje beni cuana ehuoojeajji pojjeamajo. Beni quea quemo dejja cuana napajji meshi cuana huasijje, bae ai cuana huasijje, acui cuana huasijje epoqui poaje jjejojoya iña cani esohuidojojji cuaa.  
\v 2 Majoya eyaya pea esohuidojojji banaje; eshequi poeje mijijje poeyanaje. Ohuaya aquiana etehuejji ye canaje Eyacuiñajjija epeejji cuana bahua tehuejji ojjañaja ebajji. Ma esohuidojojji ebeca pee peaꞌai cuana huasijje taaanaje meshi cuana, bae cuana peaꞌai enapa ca poaje jjejojo. Jama poanaje baꞌa:  
\v 3 —¡Ishoa socue! ¡Meshi, bae ai, acui cuana peaꞌai aꞌa jinapajji soꞌo! ¡Eyaya Eyacuiñajjija epeejji Jodio cuana Eyacuiñajjija bajjani ojjañaja ebajji cabahua tehuesahua! —ma esohuidojojji poanaje. 
\p  
\v 4 ¿Ache huiso tehue canaje ebahuajje Eyacuiñajjija bajjani ojjañaja ebajji? Eyaya shajjaꞌajjanaje jama baꞌa: —Jodio cuana Eyacuiñajjija bajjani quea huiso nee nee tehue canaje ebahuajje, 144.000 huisome. Jodio etiiquianaja Isaenija bacua ejja 12 cuana poa. Ojaya osecua cuana tehue canaje.  
\v 5 Jama tehueme acanaje baꞌa: 
\li1 Jodaja osecua cuana 12.000 huisome; 
\li1 Shobenija osecua cuana 12.000 huisome; 
\li1 Janeja oya jayojjaya 12.000 huisome; 
\li1  
\v 6 Aseneja oya jayojjaya 12.000 huisome; 
\li1 Netanija jamaya peaꞌai 12.000 huisome; 
\li1 Manaseja osecua cuana 12.000 huisome; 
\li1  
\v 7 Simeonija osecua cuana 12.000 huisome; 
\li1 Nemija osecua cuana 12.000 huisome; 
\li1 Isacanija osecua cuana 12.000 huisome; 
\li1  
\v 8 Sabononija oya jayojjaya 12.000 huisome; 
\li1 Joseja oya jayojjaya 12.000 huisome; 
\li1 Bejamija jamaya peaꞌai 12.000 huisome. 
\m Mahuisoya Eyacuiñajjija bajjani tehue mee canaje Jodio cuanaja ebahuajje. 
\s1 Quea huiso nee nee ojee nequi daqui oshe huoshoꞌyo epo 
\p  
\v 9 Majoya eyaya banaje quea huiso nee nee pea cuana, Jodio pojjeama ojee echichaꞌyo nequi, daqui oshe nee nee huoshoꞌyo epo. Quea huiso nee nee poanijojo esicojji pojjeama. Oya cuana ojjaña meshijo baꞌe, ojjaña cuiñajjijo baꞌe peaꞌai poeyani. Dejja tehue cuana, Ese Ejja cuana, dejja nei cuana, ojjaña de, poeyani. Ojjaña pea esohuijo mimiani cuana poeyani peaꞌai. Ojjaña oya cuana Eyacuiñajji cojja nei nequi. Cuanaya Jesosa ñajjajja equecuaꞌyo jayojja cojja nei nequi yasijje poeyani ojjaña. Onajaya daqui ao quea oshe nee nee. Onaaya jjememe iña jeasohua cani Jesosa bihuiajji.  
\v 10 Ojjaña cuana taaanaje jama baꞌa: 
\q1 “Eyacuiñajji, miyaya ojjaña huoojeaña. Jesosa, miya manoꞌyonaje ñajjajja equecuaꞌyo jayojja. Eꞌe, miyaya ecuanaya baꞌe tiitii meeaña”. 
\m Jamaya acanaje cuaa. 
\p  
\v 11 Majoya ojjaña esohuidojojji eyajo cuana Jesosaja epeejji etii pejjejo nequi, ebeca pee peaꞌai aquiana eshe cuana pejjejo nequi peaꞌai, Eyacuiñajji ma ojjaña yiyesama neijje ani yasijje jjanequichipiquinaje. Eyacuiñajji ojjaña huoojeaꞌyojji poani bihuia canaje esohuidojojji cuanaa ecuiꞌoshajjajo nequiya. Jama poanaje baꞌa: 
\q1 “¡Jamaya capoꞌyahua, Eyacuiñajji! Miya quea pame nee nee. Ojjaña miquea eba. Miya shajjaꞌajjaña tii tii ecuanaaya. Miya ojjaña huoojeajji enequi tii tii. Ojjañaa ecuanaaya miya bihuia tiitii aña.  
\v 12 Miya quea caꞌa nee neejo ojjaña miyaya aña tii tii. ¡Eꞌe, jamaya capoꞌyahua tii tii!” 
\m Ojjaña esohuidojojji jamaya sohuicuayanaje. 
\p  
\v 13 Majoya Jesosaja epeejji etiiya eya huohuiꞌajja canaje jama baꞌa: —Huani, ojjaña jiquio echichaꞌyo nequi daqui oshe nei huoshoꞌyo epo ¿aꞌa miquea eba? ¿Achejje shai oya cuana poeyani soꞌo? 
\p  
\v 14 Jamajjeya eyaya oya jama anaje baꞌa: —Chojja, ecuea ba jjima. Miyaya ca ya ca oe baña, de. ¡Che iña oe huohuicue! 
\p Ohuaya eya sajaꞌa canaje jama baꞌa: —Onaya baꞌeꞌyonaje meshijo. Jesosa nijje jjapeequianijo, dejja mimishi cuaa oya cuana napa huichaꞌahuichaꞌa canaje. Jiquio ecua dejjaa daqui oshe tajja cajje quea boejea nee nee poani jayojja jama Jesosaa ojjañaja mimishi cuijea caꞌyajje quea boejea nee nee poani. Eꞌe, Jesosa ñajjajja shoꞌi equecuaꞌyo jayojja poanaje. Ojaya enaꞌ cuayaqui majje ojjañaja mimishi cuijeaꞌyojji poanaje.  
\v 15 Jamajjeya oya cuana nequi mee caꞌyani Eyacuiñajji cojja neijo eyajo. Jomajo onaaya Eyacuiñajji nijje chaco tiitii cani quea bihui nee nee. Eyacuiñajji ojjaña huoojeaꞌyojji poani. Ohuaya ojaya epeejji cuana jaahuana tiitii cani.  
\v 16 Ojaya epeejji cuana quea shoe pojjeama poajeꞌyo. Quea nabataja po ajja peaꞌai. Eshequijo quiyoꞌyo ajja, quea mano poꞌyo ajja peaꞌai.  
\v 17 Eꞌe, Jesosa ñajjajja equecuaꞌyo jayojja Eyacuiñajji pejjejo nequi. Jiquio ecua ñajjajja cuiñajjiya ñajjajja cuana jaahuana cani, ena eteo ishi mee cani jama jayojja Jesosaa ojaya epeejji cuana jaahuana cani. Ojaya eꞌishijji ishi mee majje baꞌe tiitii mee cajeꞌyo onijje peaꞌai eyajo. Eyacuiñajjiya jaahuana canijo, oya cuana quea yeno po ajja. Paꞌyo ajja poajeꞌyo —jamaya Eyacuiñajjija epeejji etii poanaje. 
\c 8  
\s1 Pea ecueabajijjiꞌya isa canaje ma me oejje beca oe poanaje 
\p  
\v 1 Majoya Jesosaa pea ecueabajijjiꞌya isa canaje. Jamajjeya ojjaña ecueabajijjiꞌya me oejje beca huisomeꞌya oeyejje nei isajea caꞌya poa. Jamajjeya oeyejje nei ecueabajijjiꞌya isa caꞌyajo, ojjaña cuana eyajo ani jeca neinei poꞌyonaje.  
\v 2 Quijje pishana eyaya banaje me oejje beca esohuidojojji Eyacuiñajji cojja nei nequi. Oya cuana huasijje esheꞌana ai jayojja me oejje beca quia mee canaje Eyacuiñajjiya emiajji. 
\p  
\v 3 Majoya eyaya banaje pea esohuidojojji. Ohuaya shiyeshiye dahuajji mei huoꞌo quea nahue iñanequia cani mei huoꞌo eꞌiya aquiana dahuajji pejjejo. Oya quia canaje cuaa madeja pohui jayojja quea shiye nee nee edahuajeajji Eyacuiñajji bihuiajji. Maya dahuajea canaje mei huoꞌo eꞌiya biajje, ma Eyacuiñajji anioqueani pejjejo. Jiquio ecua madeja pohui dahuajea cajje huichacha quea shiye baꞌesohuaquiani jayojja jama Eyacuiñajjija epeejji cuanaja emimi onijje eyahuasijje baꞌesohuaquianijo Eyacuiñajjiya shajjaꞌajja cani.  
\v 4 Jamajjeya madeja pohui jayojja quea shiye nee nee esohuidojojjija eme jjotojo ani quiyo nequinaje. Huichacha baꞌesohuaquinaje Eyacuiñajji yasijje. Ma huichacha baꞌesohuaquianijo, Eyacuiñajjiya shajjaꞌajja canaje Jesosaja epeejji cuanaja emimi onijje.  
\v 5 Majoya ma esohuidojojjiya cuaqui cojja sha mei eꞌiya biajje ani iya canaje shiyeshiye dahuajjijo. Majoya eyajo nequiya ohuaya cuaqui cojja sha shiyeshiye dahuajjijo ani jeaoqueajea canaje meshi yasijje. Majoya cueji cuana taaa poanaje janobajjima nei. Pojjejje baa siyoo cuana poanaje. Meshi huehuahuehuanaje peaꞌai. Quea shajjaquijjo peaꞌai poanaje. 
\s1 Emiajji cuana 
\p  
\v 6 Majoya me oejje becaa, 7 esohuidojojji cuaa emiajji cuana iña canaje emiajji.  
\v 7 Ebionei esohuidojojjiya ojaya emiajji anaꞌai sheꞌana jayojja mia canaje aquiana quea huiso meshijo edahuajeajji. Mia cajo, quea huiso meja jjacajjaquinaje oquequinaje meshi yasijje. Pojjejjeya quea huiso meshi dahua canaje. Enaꞌ oquequinaje meshi yasijje peaꞌai. Jamajjeya meshi quea huiso quiyonaje. Oe meshi quiyonaje; beca quiyo jjima poanaje. Pea quiyonaje; beca quiyo jjima poanaje. Jamaya poanaje ojjaña meshijo. Acui cuana jamaya poanaje peaꞌai. Oe acui quiyoꞌyonaje; beca acui quiyo jjima poanaje. Ojjaña huenihueni quiyoꞌyonaje. Chamaꞌyo tii poanaje. 
\p  
\v 8 Me oejje oe pea esohuidojojji cuanaja mia jjima ojaya emiajji cuana. Jamajjeya majoya pea esohuidojojjiya ojaya emiajji anaꞌai sheꞌana jayojja mia canaje. Taaaꞌyo majje ohuaya aquiana eyiyo quea quemo nee, quea jiji nee jayojja jeaoqueajea canaje bae ai cuana huasijje. Quea huiso bae ai quea huoꞌo poanaje enaꞌ jayojja. Enaꞌ jjejojo quea ihui poanaje.  
\v 9 Jamajjeya quea huiso nahuoo manoꞌyonaje. Oe nahuoo manoꞌyonaje; beca manoꞌyo jjima poanaje. Jamaya poanaje ojjaña nahuoo cuana. Quea huiso bishe ai huiꞌiꞌyonaje. Oe bishe huiꞌiꞌyonaje; beca huiꞌiꞌyo jjima poanaje. Jamaya poanaje ojjaña bishe cuana. 
\p  
\v 10 Me oejje huiso esohuidojojji cuanaja emiajji cuana mia jjima soꞌo. Jamajjeya majoya pea esohuidojojjiya ojaya emiajji mia cajo oe majameta eyajo nequi quea jiji nei, cuaquijiji quea quemo jayojjaya oquequinaje quea huiso cuei yasijje.  
\v 11 Maya majameta ma bajjani baꞌa: Quea Pase Nee Nee bajjani. Jamajjeya quea huiso cuei, ena eteo peaꞌai quea tai poanaje. Oe cuei quea pase nee nee; beca cuei paseꞌama poanaje. Jamaya poanaje ojjaña ena. Jamajjeya quea huiso dejja cuana manoꞌyonaje ena quea pasejojo. 
\p Ebeca pee peaꞌai huisomeja esohuidojojji cuanaja emiajji mia jjima soꞌo.  
\v 12 Jamajjeya majoya pea esohuidojojjiya ojaya emiajji mia cajo eshequi jaasohua pishana majje jiji ajja, quea misi poanaje. Mecajje baꞌi jamaya poanaje peaꞌai. Jaasohua pishana majje quea misi poanaje. Majameta cuana quea misi poanaje peaꞌai: Oe majameta jiji ajja; beca cuana jiji canaje. Jamaya poanaje ojjaña majameta. 
\p  
\v 13 Majoya eyaya banaje huipa cuabesani. Oya taaanaje jama baꞌa: —Quea yeno nee nee poaje ojjaña meshijo baꞌeca cuana. Eꞌe, pea beca pee jjimaa esohuidojojji cuaa emiajji esheꞌana jayojja mia caje. Mia cajo, quea nee nee poaje quea huiso dejja cuana —jama taaameya poanaje huipa. Jamaya poani eyaya banaje, Huaniya. 
\c 9  
\p  
\v 1 Majoya pea esohuidojojjiya ojaya emiajji mia canaje. Mia cajo pea majameta jayojja meshi yasijje oquequiani eyaya banaje. Oya majameta jayojja huasijje quia mee canaje Eyacuiñajjiya esecue cojja quecuacaꞌapejo meejji, yave quia canaje jjani ai quea doe nee nee caꞌapejojji.  
\v 2 Jjani ai quea doe nee nee caꞌapejo cajje eyaya banaje huichacha quea quemo baꞌesohuaquinaje que quea quemo nee nee dahuajea cani jayojja, quea jiji nee nee poani jayojja. Eshequi quea misi poanaje huichacha quea quemojo.  
\v 3 Huichacha quea quemojo ani satajje jayojja cuayaquinaje, satajje ejja pojjaꞌa. Quea satajje moo nee nee poanaje. Meshi yasijje poeyanaje. Ma satajjeja ehuaꞌo cuana aji jayojja, quimajji.  
\v 4 Satajje quimajji huohui canaje Eyacuiñajjiya jama baꞌa: —¡Aꞌa huenihueni napajji! ¡Acui sisi, acui quea quemo peaꞌai aꞌa napajji! ¡Aꞌa napajji ecuea epeejji ma ebahuajje ecuea bajjani ecue etehueꞌyo! ¡Ecuea epeejji pojjeama ca ca napacue, ma ebahuajje ecuea bajjani tehue jjima!  
\v 5 ¡Oya cuana aꞌa mano meeꞌyojji! ¡Quea nee nee oe po meecue me oejje baꞌime, 5 baꞌime! —poanaje. 
\p Jamajjeya equimaa quecua majamaja cajje quea nee nee po mee canaje, ajiya quecua cani jayojja.  
\v 6 Jamajjeya dejja mimishi cuana manoꞌyo sa poaje ma me oejje baꞌime. Jamatii manoꞌyo jjima poaje. 
\p  
\v 7 Ma satajje ejja cuana jiquio jayojja jama baꞌa: Yamijji mapichi ai ejjaquecuaquijji dojojji jayojja. Dejja jayojja cojjame. Mapichi mei huoꞌo quea nahueja sapa huahuo iya jayojja.  
\v 8 Satajje ejja cuana saojji de, epona jayojja. Ojaya eseꞌ quea ao, ibia jayojjaya.  
\v 9 Eseꞌojje baa daqui quea moo ebaꞌe huana. Oya cuana cuichojji peaꞌai. Ojaya ecuicho cuana quea shajjaquijjo, mapichi quea huiso nee nee cuajicuajijebeani jayojja jama poani, mapichiya pea ejjaquecuaquijji dojo cani pea cuana quecuaa.  
\v 10 Satajje ejja cuanaja ehuaꞌo aji jayojja, quimajji. Dejja cuana quecua caje equimaa. Quea nee nee po mee cajeꞌyo me oejje baꞌime.  
\v 11 Satajje ejja cuanaja ehuoojeajji yani. Oya jjani ai cuiñajji, ma emanoꞌyojaa nequi quea doe nee nee cuiñajji. Jodio cuanaja esohuijo ojaya bajjani Abodono bajjani; Jieno cuanaja esohuijo oya Aponiono bajjani; Ese Ejjaja esohuijo ojaya bajjani Ojjaña Quea Yeno Po Meeꞌyojji bajjani. 
\p  
\v 12 Jamajjeya ebionei epojja cuana quea nee nee poani apoa acanaje. Quijje pishana quea camaja nee nee poaje. Eꞌe, beca esohuidojojji cuanaja emiajji mia jjima. 
\p  
\v 13 Majoya pea esohuidojojjiya ojaya emiajji mia canaje. Mia cajo eyaya pea shajjaꞌajjanaje. Oya mimiani ebeca pee peaꞌai esheꞌana yiyesama neijo nequi. Ma esheꞌana cuana yani mei huoꞌo eꞌiya aa biajje, Eyacuiñajji cojja nei nequi.  
\v 14 Eyacuiñajji jama poanaje baꞌa esohuidojojji nijje, ma jjeya nei mia canaje nijje baꞌa: —Ebeca pee peaꞌai esohuidojojji cuana yani cuei quea quemojo, Eopate cuei yobijo. ¡Maya esohuidojojji cuana jomajo ejeyo nequi pichojeaquiꞌyocue! —Eyacuiñajji poanaje—.  
\v 15 Eꞌe, eyaya ma esohuidojojji cuana nequi meeaña jjeya nei ehuoojeajji jayojja. Jiquio shequiajajo, jiquio baꞌijo, jiquio pojjajo, jiquio eshequi nequi pojjajo peaꞌai ehuoojeajji. Poquije mimishi cuana quea huiso nee nee quecuaa. Jama quecuame acaje baꞌa: Oe dejja quecua caje, becanejjijji peaꞌai quecua jjima acaje. Jamaya acajeꞌyo ojjaña dejja cuana ojjaña meshijo baꞌeca cuana —jamaya Eyacuiñajji poanaje. 
\p Eꞌe, ma esohuidojojji cuana pichojea meeꞌyo majje huoojea caje jjaquecuaquiya.  
\v 16 Dejja mase mapichija edaasa biajje ani huoojea caje quea huiso nee nee. Peaa eya huohui canaje ache huiso dejja mase cuana mapichija edaasa biajje ani. Quea huiso nee nee, dosciento millone, 200.000.000 huisome poaje, de. 
\p  
\v 17 Eꞌe, Jesosaa eya, Huani ecuea ebajji ba mee canaje mapichi cuana, dejja cuana mapichija edaasa biajje ani peaꞌai. Eyaya oya cuana banaje jama baꞌa: Ojaya eseꞌojje baa daqui quea moo baꞌehuana canaje ona equecua caꞌyo poaje jjejojo. Baa daqui quea moo quea siyo, quea tahua nee, quea jahua nee jayojja peaꞌai. Mapichi cuanaja esapa cuana ibia naa asha jayojja. Enabajje cuayani cuaqui jiji jayojja, huichacha, beni quea ihui, quea pase, mei quea ihui jayojja peaꞌaiya.  
\v 18 Oya cuaquijo, huichachajo, beni quea ihuijo peaꞌai quea huiso dejja mimishi cuana manojeꞌyo. Oe dejja mano mee cajeꞌyo; becanejjijji peaꞌai manoꞌyo jjima poaje. Jamaya poaje ojjaña dejja mimishi cuana ojjaña meshijo baꞌeca cuanaya.  
\v 19 Oya mapichi ai cuaa quea huiso nee nee mano mee cajeꞌyo; cuaquijijiya ojaya enabajje cuayaniya mano mee cajeꞌyo. Ojaya ehuaꞌohua peaꞌaiya dejja cuana quea nee nee po mee caje. Mapichi cuanaja ehuaꞌo cuana peyo jayojja, sapame ehuaꞌo icuijo enequi eseꞌ. Maaya dejja mimishi cuana ijjia cajje quea nee nee poajeꞌyo. 
\p  
\v 20 Eꞌe, Eyacuiñajjiya dejja mimishi cuana napa majamaja mee caꞌyonaje. Jamatii, quea huiso ma pojjajo manoꞌyo jjima poanaje cuana. Jamatii onaya mimishi cuana pajea sa poꞌyo ajja. Eshahua cuana bihuia pajeaꞌyo ajja, eyacuiñajji nisho cuana bihuia pajeaꞌyo ajja peaꞌai. Eyacuiñajji nisho acanaje cuaa, mei huoꞌo quea nahue, mei oshe quea nahue, mei jahua quea nahue, mei nahueꞌama, acui peaꞌai eyacuiñajji nisho acanaje. Maya eyacuiñajji nisho cuana shajjamaꞌ, jiojjimaꞌ, cojjamaꞌ peaꞌai.  
\v 21 Eꞌe, maya dejja cuana quea mimishi tii tii poanaje pea quecuajji cuana, jjadasiaquijji cuana, siipojji cuana, pea cuana cojjojji poani cuana. Mimishi cuana pajeaꞌyo ajja; quea mimishi po tiitiiꞌyonaje. 
\c 10  
\s1 Pea esohuidojojji Huaniya ba canaje 
\p  
\v 1 Majoya eyaya, Huaniya banaje eyajo pea esohuidojojji baꞌeoqueani meshi yasijje. Oya bo oshe biajje nequi. Ojaya daqui bo oshe nei nei jayojja. Ojaya sapa biajje eshijje quea bame nee nee jayojja ejjanequitoquiꞌyo nequiani. Ojaya ecojja quea jiji nee nee eshequi jayojjaya poani. Ojaya equise jijiani, equi yamajjana acui caꞌa jijiani jayojja jama poani.  
\v 2 Ohuaya ejee etehueꞌyo iña cani emeya. Ecueabajijjiꞌya oeyejje nei isajea caꞌyajo jjajeapichojjojjoquiꞌyonaje. Oya epii nequi. Ojaya ebianei jiojji bae ai biajje nequi; shani jiojji ca meshi yasijje nequi.  
\v 3 Oya taaanaje janobajjima nei ibia quea quemo nee nee mimiani jayojja. Ojaya esohui me oejje beca huiso cueji jayojja poanaje.  
\v 4 Cueji cuana jayojja shajjaꞌajja majje eyaya ojaya esohui tehueꞌajjanaje. Esohui tehue jjimahuajo pea eyajo nequi enijje miminaje jama baꞌa: —Chojja. ¡Me oejje beca cuejija esohui aꞌa tehuejji! ¡Aꞌa huohuijji ojaya esohui! —poanaje. 
\p  
\v 5 Majoya ma esohuidojojjiya bae ai biajje nequiya, meshijo nequiya peaꞌaiya oja emeꞌ ebianei emeꞌ jeasohua canaje eyahuasijje.  
\v 6 Majoya oya miminaje jama baꞌa: —Eyacuiñajjiya ojaya esohui ma ecua ohuaya yahuajo huohui canaje jamaya eꞌe jojo nei jjeyahua nei acajeꞌyo. Oya quea caꞌa nee nee poani. Eꞌe, oya baꞌe tiitiiani; eya cuana, ojjaña aquiana eyajo nequi peaꞌai pana caꞌya poa; meshi cuana, ojjaña aquiana cuana meshijo nequi peaꞌai pana caꞌya poa. Bae cuana, ojjaña aquiana cuana bajio ani peaꞌai pana caꞌya poa, Eyacuiñajjiya —jamaya esohuidojojji ma ebianei jiojjijje enajo nequi, shani jiojjijje meshijo nequi poanaje; ohuaya huohui canaje jama baꞌa: —Jjeya apoa. Ma ecua ohuaya huohui canaje jamaya jjeyahua nei Eyacuiñajjiya acajeꞌyo.  
\v 7 Yahuajo Eyacuiñajjiya ojaya esohui huohuijji cuana huohui mee ca poa ma ohua quijje nei acaje. Quijje pishana pea esohuidojojjiya quijjeyejje neiya ojaya emiajji mia caje. Eꞌe, ojjaña ba mee caje Eyacuiñajjiya acaje cuana ma yahuajo oja dejja cuana ba mee jjima poa, ma ohua quijje acaje peaꞌai, maya yahuajo nei onajaya quea quehua poanaje —jamaya ma esohuidojojji poanaje. 
\p Me oejje oe esohuidojojji cuaa emiajji cuana mia canaje.  
\v 8 Majoya oya eyajo nequi mimi oꞌoyanaje enijje jama baꞌa: —Huani, ¡ejee etehueꞌyo jjeshecue! ¡Ma esohuidojojji meshijo, ena ojjojo peaꞌai jiojji nequija emejo nequi ejee etehueꞌyo jjeshecue! 
\p  
\v 9 Jamajoya eya poquinaje esohuidojojji yasijje. Eyaya oya huohuinaje jama baꞌa: —¡Quiacue mo ejee etehueꞌyo! 
\p Jamajjeya eya ohuaya huohui canaje jama baꞌa: —Eꞌe Huani, maꞌaje. ¡Ejee etehueꞌyo ijjiacue! Miya ijjiajje quea biquia nee poaje huini jayojja. Jamatii miya ijjiajeajje quea pase nee nee see aijo poaje —ma esohuidojojji poanaje. 
\p  
\v 10 Jamajoya eyaya ejee etehueꞌyo jjeshe majje ijjianaje. Quea biquia huini jayojja poanaje. Jamatii eya ijjiajeajje quea pase nee poanaje see aijo. Jamajjeya eyaya banaje ma esohui etehueꞌyojo quea huiso cuana quea nee nee poajeꞌyo.  
\v 11 Majoya pea eyajo nequiya eya huohui ca oꞌoyanaje jama baꞌa: —Huaniya, ¡quea huiso dejja cuana huasijje, ojjaña meshi cuana huasijje ojjaña pea mimime cuana huasijje, quea huiso emeshi mese yasijje peaꞌai huohuiquicue ma Eyacuiñajjiya quijje acajeꞌyo! —jamaya poanaje eyajo nequi. 
\c 11  
\s1 Beca esohui huohuijjiya esohui huohui canaje 
\p  
\v 1 Majoya Eyacuiñajjiya pea eyajo nequiya eya quia mee canaje acui eꞌipiaꞌajjajji. Ohuaya eya huohui canaje jama baꞌa: —Huani, ¡Eyacuiñajjija equi ipiaꞌajjacue! ¡Mei eꞌiya aa aquiana dahuajji peaꞌai ipiaꞌajjacue! ¡Dejja cuana jomajo nequi Eyacuiñajji bihuiajji peaꞌai sicocue!  
\v 2 ¡Jodio pojjeamaja eꞌanijji Eyacuiñajjija equi pejjejo ani aꞌa ipiaꞌajjajji! Jodio pojjeama cuaa Eyacuiñajjija epeejji cuana napa caje beshahua nei ebeca pee peaꞌai shequiajame, 42 baꞌime. Jodio ojaya epeejji cuana Eyacuiñajjija quea boti nee, ojaya Jenosanena cuiñajji quea boti nee jayojjaya.  
\v 3 Eyaya ecuea becanejjijji peaꞌai esohui huohuijji huoojeaje dejja cuana huasijje ecuea esohui huohuiya. Eyaya oya cuana ecue sohui huohui meeje quea huiso cahuijo, 1.260 cahuime. Ohuaya pea daqui huosho caje, dejja emanoꞌyojo quea yeno nee nee poani jayojjaya. Jamajjeya ojjañaa ba caje ojjaña meshijo baꞌeca cuana quea nee nee poaje.  
\v 4 Ma ecuea becanejjijji peaꞌai esohui huohuijji cuana beca onimo acui cuana jayojja. Oya cuana beca cuaquijiji nequijji Eyacuiñajji cojja nei nequi jayojja peaꞌai. Jamajjeya ojjañaa ba caje Eyacuiñajjiya oya cuana jaahuana cani.  
\v 5 Eꞌe, onaa esohui huohuijji napa cajo cuaqui cuayani ojaya enabajje, o napajji poani quiyojeaje dejja mimishi cuana. Jamaya ojjaña manojeꞌyo, ma beca esohui huohuijji napajji poani.  
\v 6 Eyacuiñajjiya jiquio esohui huohuijji quea caꞌa po mee cani. Jamajjeya ohuaya jama acajeꞌyo baꞌa: Eyacuiñajjija esohui huohuijji poaniya ohuaya ena chamaꞌ po mee cani. Quea jabo po mee cani. Ohuaya sa majje enaꞌ jayojja po mee cani cuei cuana, bae cuana peaꞌai. Ohuaya sa majje ojjaña cuana napa cani peaꞌai. 
\p  
\v 7 Majoya jiquio beca esohui huohuijji cuaa huohui pajea majje, oe aquiana quea mase nee nee ma jjani ai quea doe neejo baꞌe poeje ma esohui huohuijji cuana cuiajeaa. Jeabichajea majje cuiajea cajeꞌyo.  
\v 8 Oya cuana manoꞌyo majje jamatii jaaje ejiojjijo, Jenosanena cuiñajjijo. Ma cuiñajjijo pea cuaa yahuajo Jesosa, ese jaahuanajji acui ecueataꞌapeejo baꞌehuanasohuajea canaje. Dejja cuana Jenosanena cuiñajjijo baꞌeca quea mimishi poaje, ojjaña Sonoma meshijo yahuajo nei baꞌya poa jayojja, Ejito meshijo baꞌeca jayojjaya peaꞌai quea mimishi poaje.  
\v 9 Jamajjeya quea mimishi poaniya jjejojo Eyacuiñajjija esohui huohuijji poani manoꞌyajo emojeajji pojjeama. Ejiojjijo tii oya jamatii jaajeaje pea beca peejjima cahuime. Ojjaña cuiñajjijo baꞌeca cuana, ojjaña pea esohuijo mimiani cuana ojjaña meshijo baꞌe peaꞌai poeje ma esohui huohuijji emanoꞌyojaa baa.  
\v 10 Ojjaña dejja mase cuana quea bihui nee nee poaje ma esohui huohuijji manoꞌyonajejo. Jamajjeya aquiana quia caje onajaya epeejji cuana huasijje sosemaꞌ. Eꞌe, ma esohui huohuijjiya ojjaña quea mimishi poani napa canaje quea huiso cahuime. Jamajjeya o manoꞌyajo quea bihui nee poaje ojjaña mimishi cuana. 
\p  
\v 11 Jamatii pea beca peejjima cahuime poajo Eyacuiñajjiya ma beca esohui huohuijji shequi mee caje oꞌoya. Nequisohua mee caje oꞌoya peaꞌai. Jamajjeya ojjaña dejja mimishi cuana oya cuana eshe oꞌoya ba majje quea mete nee nee poaje.  
\v 12 Majoya ma esohui huohuijjiya shajjaꞌajja caje pea eyajo nequi mimi nequi onijje jama baꞌa: —¡Yacua oe poeꞌyocue! 
\p Jamajjeya oya cuana bo oshe biajje nequi sohuaquijeꞌyo eyahuasijje. Sohuaquijeꞌyo o quecuaꞌyojji epo cuaa ba caje.  
\v 13 Majoya dejja mimishi cuaa ba caquijo tii, Eyacuiñajjiya meshi huehuahuehua mee cajeꞌyo. Quea huiso equi jaabichajea meequi cajeꞌyo. Dejja cuana Jenosanenajo baꞌe manojeꞌyo quea huiso nee nee, 7.000 huisome. Pea cuana manoꞌyo jjima poaje. Oya cuana quea mete nee nee poajeꞌyo. Jama poaje baꞌa: —Eꞌe de, Eyacuiñajji eyajo baꞌe quea pame nee nee, quea caꞌa nee nee —jamaya quea huiso poaje. 
\p  
\v 14 Eꞌe, jamaya ma beca esohuidojojjiya mia majje dejja mimishi napa cajeꞌyo. Quijje pishana pea esohuidojojjiya mia cajo dejja mimishi cuana ojjaña meshi cuanajo baꞌeca cuana napa cajeꞌyo peaꞌai. 
\s1 Pea esohuidojojjiya mia canaje 
\p  
\v 15 Majoya pea esohuidojojjiya ojaya emiajji mia canaje. Mia cajo pea cuana eyajo baꞌe janobajjima nei sohuicuayanaje jama baꞌa: 
\q1 “Eyacuiñajji, miya ojjaña huoojeajji poani, ojjaña meshijo baꞌeca cuana huoojeajji poani. Miyaya huoojeanaje Quito, mique huoojeaꞌyo ojjaña cuana jaahuanajji. ¡Jesosa Quito ojjaña huoojeajji po meecue! ¡Ohuaya ojjaña cuana cahuoojea cahua tii tii!” 
\m Jamaya oya cuana poanaje. 
\p  
\v 16 Majoya quea huiso Jesosaja epeejji etii cuanaa, 24, Eyacuiñajji cojja nei eꞌanioque aniya Eyacuiñajji bihuia canaje ecuiꞌoshajjajo nequiya. Jama poanaje baꞌa: 
\q1  
\v 17 “Eyacuiñajji, miya oe nei quea caꞌa nee nee po tiitiiani, ojjaña huoojeajji poani tii tii peaꞌai. Ecuaaya miya bihuiaña miya quea pame nee nee poanijo. Eꞌe, miya yahuajo nei nei ani tiitiia poa. Jjeya miya ani tiitiiani peaꞌai. Ecuaaya miya bihuiaña miya ojjaña huoojeajjijojo. Eꞌe, miya quea caꞌa nee nee po tiitiianijo miya oe nei ojjaña huoojeajji poani tii tii.  
\v 18 Ojjaña dejja mimishi cuaa miya jeabichajea sa acani. Jamatii miya ona nijje quea quene nee nee poaje jjeya nei; quea nee nee po meejeꞌyo. Eꞌe, jjeya miyaya dejja mimishi cuana quea nee nee po meeje, oya ojjaña meshijo baꞌe napajji poanajejojo. Eꞌe, ojjaña yahuajo nei emanoꞌyo jjeya miyaya huohuije miquea ejjashahuabaquijji onajaya ebaꞌejjijo. Dejja quea mimishi poa quea nee nee po meejeꞌyo. Miquea esohui huohuijji cuaa, Jesosaja epeejji cuaa miquea esohui jayojja jama acanijo ca ca miyaya quea bihui nee po meejeꞌyo. Minijje ani tiitii meejeꞌyo peaꞌai ojjaña miquea epeejji, eshoꞌi cuana, etii cuana peaꞌai”. 
\m Jamaya Jesosaja epeejji etii cuana poaje. 
\p  
\v 19 Majoya eya ba mee canaje Eyacuiñajjija equi eyajo ani. Eyiye dojjo ba mee canaje. Jomajo Eyacuiñajji yani. Jomajo yani acui equecua quea bame nee, Eyacuiñajjija esohui etehueꞌyo huanajji. Ma esohui etehueꞌyo etiiquianaa Moisesi nijjeya tehue ca poa. Ma esohui etehueꞌyo eya bajo, pojjejje quea huiso jeajaꞌa canaje, baa siyoo taaa poanaje, cueji poanaje peaꞌai, meshi huehuahuehuanaje, meja jjacajjajeaquinaje, quea huiso nee oquequinaje peaꞌai. Eꞌe, jamaya eyaya banaje. 
\c 12  
\s1 Epona eshequi jayojja saꞌo huoꞌo jayojjaa napa canaje 
\p  
\v 1 Majoya eyaya banaje aquiana aiꞌai eyajo, ma Eyacuiñajjiya quijje ohua acaje. Jiquio jama poaje baꞌa: Eyaya banaje epona eyajo. Ojaya daqui quea jiji nee eshequi jayojja. Oya nequinaje baꞌi biajje. Ojaya esapa huahuo yani majameta cuana, jiojji miji beca, 12 majameta.  
\v 2 Oya siasianaje ebacua neejo.  
\v 3 Majoya eyaya banaje aquiana aiꞌai eyajo, saꞌo ai jayojja quea huoꞌo, saꞌo ai ejja pojjaꞌa. Oya quea sapa huiso, me oejje beca, 7 sapame. Oya quea sheꞌana huiso peaꞌai, ome miji peaꞌai sheꞌaname, 10 sheꞌaname. Oja sapa cuanajo ejaahuojja jayojja yani peaꞌai, me oejje beca ejaahuojja.  
\v 4 Ohuaya iña canaje quea huiso majameta cuana ehuaꞌohua. Iña majje majameta cuana jeaoqueajea canaje meshi yasijje. Oe majameta iña canaje, beca iña jjima poanaje. Jamaya ojjaña majameta cuana acanaje ma aquiana saꞌo ai jayojjaa. Oya saꞌo ai jayojja epona pejjejo nequinaje oja bacua ijjiajji nisho, cuayajo.  
\v 5 Jamajjeya ma eponaja ebacua cuayanaje dejja shoꞌi. Oya ojjaña huoojeajji quea caꞌa nee nee poajeꞌyo. Ohuaya ojjaña shajjaꞌajja mee cajeꞌyo ojaya esohui. Jamajjeya saꞌo ai jayojjaja oya ijjia jjimahua peaa ma ebacua dojo canaje eyahuasijje Eyacuiñajji eꞌanioque ani yasijje.  
\v 6 Majoya ma epona poquicuajicuajinaje quea huesha, meshi quima huasijje. Jomajo Eyacuiñajjiya eponaja ebaꞌe meejji acanaje. Jomajo Eyacuiñajjiya oya jaahuana canaje quea cahui huiso, 1.260 cahuime. 
\p  
\v 7 Majoya eyajo quea huiso nee nee jjaquecuaquinaje. Jama poanaje baꞌa: Ma saꞌo ai jayojjaa ojaya esohuidojojji quea mimishi, quea huiso nee nee cuana nijjeya jjaquecuaquinaje esohuidojojji pame cuana nijje, Miyeni ojaya esohuidojojji quea pame nee nee quea huiso nee nee nijje.  
\v 8 Miyeni quea caꞌa nee nee, saꞌo ai jayojja quea caꞌa pishana. Jamajjeya Miyeniya saꞌo ai jeabichajea majje jeaoqueajea canaje meshi yasijje. Eꞌe, saꞌo ai, ojaya esohuidojojji cuana peaꞌai nequi tiitii mee jjima acanaje eyajo.  
\v 9 Miyeniya oya cuana jeaoqueajea canaje meshi yasijje. Ma saꞌo aija pea bajjani cuana jama baꞌa: Peyo nei yahuajo nequia poa bajjani, eshahua nei bajjani peaꞌai, Edosiquiana nei bajjani peaꞌai, Satanasa. Ohuaya beshahua nei ojjaña cuana ojjaña meshijo baꞌeca cuana dasia cani, quea mimishi po mee cani. Eꞌe, ma saꞌo ai ojaya esohuidojojji cuana nijje jeaoqueajea canaje meshi yasijje Miyeniya, esohuidojojji quea pameya. 
\p  
\v 10 Majoya pea eyajo nequi enijje miminaje janobajjima nei. Jama poanaje baꞌa: —Jjeya nei Eyacuiñajjiya ecuana baꞌe tiitii mee cani. Ohuaya Edosiquiana nei jeabichajea caꞌyonaje. Jamajjeya oya ojjañaja Emeshi Mese nei poani. Ohuaya, Quitohua ojjaña huoojea cani peaꞌai. Oya Eyacuiñajjija huoojeaꞌyo ojjaña jaahuanajji. Ma saꞌo ai jayojjaa, Edosiquiana neiya ojjaña Jesosaja epeejji cuana niñeba cani tii tii, ohuaya esohui siajje acani Eyacuiñajji yasijje.  
\v 11 Cuanaya Jesosa Quitohua, ma ñajjajja shoꞌi equecuaꞌyo jayojjaa ojaya epeejji cuana quea boejea po mee cani oya naꞌ cuayaquia poaa jjejojo, poquijeyonajeya jjejojo. Ohuaya ojaya epeejji cuana Edosiquiana nei jeabichajea meesahua cani. Ojaya epeejji cuaa Jesosaja esohui huohui canaje. Edosiquiana jeabichajea mee canaje peaꞌai. Mimishi cuaa oya cuana quecua canaje Jesosaja esohui huohuijji poanijojo. Jamatii ohuaya meteꞌama, yenoꞌama peaꞌai esohui huohui tiitii canaje.  
\v 12 Jamajjeya ojjaña eyajo nequi, ¡quea bihui nee pocue! Ojjaña meshi cuanajo baꞌe, miquianaya quea nee nee poajeꞌyo Edosiquiana miquiana que jeaoqueajea caꞌyonaje jojoya. Oya quea mase nee nee poani. Ojaya eba jama poaje baꞌa: Quijje pishana Eyacuiñajjiya oya jeajea cajeꞌyo cuaqui yasijje. Jamajjeya oya ojjaña meshijo baꞌe nijje quea mase nee nee poaje —jamaya peaa eyajo baꞌeya eya huohui canaje. 
\p  
\v 13 Ma saꞌo ai jayojja meshi yasijje oquequiꞌyo majje quea quene nee nee poanaje. Jamajjeya ohuaya epona, ma bacuajji poanaje enaese ocuecuaji canaje eshajomano meejeaꞌyojji nisho.  
\v 14 Eyacuiñajjiya ma epona quia canaje beca ecuicho, huipa jayojja cuichomeya ecuabesajji. Jamajjeya oya cuabesanaje quea huesha, meshi quima huasijje. Jomajo Eyacuiñajjiya oya jaahuana canaje ma saꞌo ai jayojjaa enapa ca poaje jjejojo. Eyacuiñajjiya oya jaahuana canaje quea huiso nee nee cahuime, beshahua nei ebeca pee peaꞌai shequiajame.  
\v 15 Majoya saꞌo ai jayojjaa enabajje ena quea quemo ojjajea canaje cuei quea quemo jayojja epona huiꞌi meeꞌyojji nisho.  
\v 16 Jamatii Eyacuiñajjiya epona jaahuana canaje. Eꞌe, meshi jjaajjejjequi mee majje ma ena quea quemo meshi yasijje shajadobiqui mee canaje. Oya epona jjaꞌaniquehuaquiñaquinaje quea huesha.  
\v 17-18 Jamajoya aje oe saꞌo ai jayojja quea quene nee nee po majje poquinaje ma eponaja pea ebacua cuana nijje jjaquecuaquiya. Ojjaña joya Eyacuiñajjija esohui jayojja jama baꞌyani, Jesosaja esohui eꞌe jojo nei huohui tiitiijji poani peaꞌai quecua sa acanaje ma saꞌo ai jayojjaa. Jamaya eyaya, Huaniya banaje. 
\c 13  
\s1 Aquiana mase bae aiꞌaijo ani etaja huasijje nequisohuaquinaje 
\p  
\v 1 Majoya eya jjacahuibaquinaje bae aiꞌai sahuajo nequi. Jomajo eyaya banaje saꞌo ai jayojjaa ishoa cani pea aquiana mase shanei ai jayojja, shanei ejja pojjaꞌa. Oya bae aiꞌaijo ani cojja cuaya majje nequisohuanaje etaja huasijje. Oya quea sapa huiso, me oejje beca, 7 sapame. Ojaya esheꞌana quea huiso yani peaꞌai, ome miji peaꞌai, 10 sheꞌaname. Ojjaña esheꞌanajo yani ejaahuojja jayojja. Ojjaña esapajo yani etehueꞌyo quea tai peaꞌai, Eyacuiñajji niñebajji tehueꞌyo.  
\v 2 Ma shanei ai ejja jiquio jama baꞌa: Oya ibia ecojjopiaꞌyo ai jayojja, ibia chehue ai jayojja jiojjime. Oya ibia naa asha seꞌ quemoajja, quea seꞌ quemo nee nee. Eꞌe, oya quea mase nee. Edosiquiana neiya, Satanasaa, saꞌo ai jayojjaa peaꞌaiya ma shanei ai ejja quea mase o jayojjaya po mee canaje, Edosiquiana nei jayojjaya poanaje. Jamajjeya oya quea caꞌa nee poani, quea huiso huoojeajji poani.  
\v 3 Oya equecuaꞌajjaꞌyo jayojja sapame poanaje, ma shanei ai ejjaja esapa. Jamatii jjajeaqui mee caꞌyonaje. Jamajoya quea huiso dejja cuaa meshi cuanajo baꞌeya ma shanei ai ejjajo quea meteya jjejojo ojaya esohui jayojja jama acanaje.  
\v 4 Eꞌe, saꞌo ai jayojjaa shanei ai ejja ojjaña huoojeajji po mee canaje. Jamajjeya ojjañaa saꞌo ai jayojja bihuia caꞌyonaje ecuiꞌoshajjajo nequiya. Shanei ai ejja quea caꞌa nee nee poso bihuia canaje cuaa peaꞌai jama baꞌa: —Pea o jayojja chamaꞌ. Chamaꞌ o jeabichajeaꞌyojji epo, de —acanaje cuaa. 
\p  
\v 5 Shanei ai ejja ojjaña meshijo baꞌe huoojeajji poaje quea huiso baꞌijo, 42 baꞌime. Quea mimi tai nee nee poanaje. Jamajjeya Eyacuiñajji onijje quea quene nee nee poanaje.  
\v 6 Ohuaya Eyacuiñajji eyajo ani ojjaña huoojeajji poani niñeba canaje. Ojjaña Eyacuiñajji nijje nequi niñeba canaje peaꞌai, shanei ai ejjaa.  
\v 7 Jamatii Eyacuiñajjiya oya jeabichajea jjima. Jamajjeya ohuaya Jesosaja epeejji cuana nijje jjapee nishoqui majje jeabichajea canaje. Jamajjeya ojjañaa ojaya esohui jayojja jama acanaje.  
\v 8 Eꞌe, ojjaña meshijo baꞌecaa oya bihuia canaje. Jesosaja epeejji cuanaja ca ca oya shanei ai jayojja bihuia jjima. Eꞌe, meshi pana jjimahuajo tii Jesosaa, ma ñajjajja shoꞌi equecuaꞌyo jayojjaa ojjaña ojaya epeejjija bajjani tehue canaje ebaꞌe tiitii meeꞌyojji. Jamajjeya ohuaya shanei ai jayojja bihuia jjima acani. 
\p  
\v 9 ¡Shajjaꞌajjacue oe; jjashahuabaquicue oe!  
\v 10 Joya jjaꞌiñaquiani ejeanobiajji quijje onaa oya iña majje jeanobia cajeꞌyo peaꞌai. Ojjaña joya jjajajaquiani manojeꞌyo; yacua peaꞌai cajeꞌyo cuaa. Jamajjeya ojjaña Jesosaja epeejji cuana quea nee poanijo jamatii meteꞌama cajjapee tiitiiquiahua onijje. 
\p  
\v 11 Majoya eyaya, Huaniya banaje pea aquiana quea mase peaꞌai shaijjami ai quea mase nee jayojja, shaijjami ejja. Oya meshi quipajo ani cuayanaje. Ojaya esheꞌana becanejjijji peaꞌai ñajjajja yahue jayojja. Jamatii ojaya esohui saꞌo ai jayojja quea ajjajja epo meejji.  
\v 12 Ebionei shanei ai ejjaa jiquio jjeya meshi quipajo ani cuayanaje shaijjami ai ejja o jayojja ojjaña huoojeajji po mee caꞌyonaje. Jamajjeya pea shaijjami ejjaa ma meshi quipajo ani cuayaa ojjaña huoojea canaje ma shanei ai ejja esapa jajaꞌajja bihuiaa.  
\v 13 Ohuaya, ma meshi quipajo ani cuayaa ma dejjaa ajjima acani acanaje quea huiso nee. Eꞌe, ojjaña dejjaja ebajji ohuaya cuaqui oque mee canaje meshi yasijje.  
\v 14 Ohuaya jamaya acanaje ojjaña ma ebionei shanei ai bihuia meejji. Ma dejjaa ajjima acani amajjeya ohuaya ojjaña cuana dasia canaje. Eꞌe, ohuaya dejja cuana ebionei shanei ai nisho pana mee canaje epanaꞌyo, ma shanei ai esapa jajaꞌajja jjajeaquiꞌyonaje nisho pana mee canaje.  
\v 15 Majoya ma meshi quipajje cuaya poa shaijjami ai ejjaa shanei ai nisho epanaꞌyo eshe jayojja mimi meeme po mee canaje. Jamajjeya ohuaya jama acanaje baꞌa: —¡Ojjaña joya e bihuia ajja iñacue, quecuajeaꞌyocue, oe! —poanaje shanei ai nisho epanaꞌyo. 
\p  
\v 16 Majoya shanei aiya huohui canaje jama baꞌa: —¡Ojjaña cuana, ojjaña tii tehuecue ebahuajje, ebianei emejje pojjaꞌa ecuea bajjani! ¡Ojjaña eshoꞌi, ojjaña etii peaꞌai, ojjaña echacojji cuana, ojjaña echacomeejji cuana, ojjaña quea aquiana huiso poani cuana, ojjaña aemaꞌ cuana peaꞌai jamaya tehuecue ecuea bajjani, ecuea ebajji!  
\v 17 Ojjaña joya jjatehue meequi jjima aje oe ¡aꞌa aquiana cuana jjeshe meejji! ¡Aꞌa aquiana quia meejji peaꞌai! —oya poanaje. 
\p  
\v 18 ¡Bacue oe! ¡Ojjaña quea jjashahuabaqui jaꞌa, shanei aija ebajjani etehueꞌyo bacue! Ojaya etehueꞌyo ojaya bajjani jama baꞌa: 666. 
\c 14  
\s1 Quea huiso nee ojaya epeejji nei Jesosa nijje jjajaꞌa meequi canaje, 144.000 huisome 
\p  
\v 1 Majoya Eyacuiñajjiya eya eyahuasijje ba mee canaje Jesosa Sioni eyiyo biajje nequi. Eya ba mee canaje ojaya epeejji cuana quea huiso nee nee Jesosa nijje nequi, 144.000 huisome. Onaya ebahuajje etehueꞌyo Jesosaja ebajji, Echii aija ebajji peaꞌai ojaya jojoya.  
\v 2 Majoya eyaya shajjaꞌajjanaje eyajo ojjaña ma epeejji cuana sohuicuayani, Jesosa bihuia poani. Eyaya oya cuana shajjaꞌajjanaje ena tii tii poani jayojja, cueji baa siyoo poani jayojja, quea huiso eꞌiñaqueyajji cuana iñaqueya cani cuaa jayojja.  
\v 3 Ojjaña Jesosaja epeejji cuana quea huiso nee nee sohuicuayanaje Eyacuiñajji cojja nei nequi, ebeca pee peaꞌai aquiana eshe cojja nei nequi, Jesosaja epeejji etii 24 huisome cojja nei nequi peaꞌai. Jomajo ojee nequi Jesosaja epeejji quea huiso nee nee cuana sohuicuayanaje, esohuicuayajji eyacua. Ma esohuicuayajji eyacua pea cuanaja eyajo baꞌe cuanaja ebajji pojjeama. Ma esohui esohuicuayajji Jesosaja epeejji yahuajo meshijo baꞌyahua mimishi cuijeaꞌyo cuana ca ca oe sohuicuayani.  
\v 4-5 Quea boejeaꞌyo baꞌenaje, epanaꞌyo bihuia jjima poanaje onajaya. Siajje po ajja nei nei peaꞌai, mimishiꞌama nei nei peaꞌai. Oya cuana Jesosa nijje jjapee neineiquinaje, ma ñajjajja shoꞌi equecuaꞌyo jayojja nijje. Onijje tii poquiani. Jesosa acui ecueataꞌapeejo manoꞌyonaje onaja mimishi cuana sosequiaꞌyojji. Jiquio ecua ebana coojji jjajjani quea pame nee jama jayojja oya cuana quea pame nee. Eꞌe, jiquio ecua ebana coojji ebionei jjajjani quea pame nee poani Jodio cuaa Eyacuiñajji yasijje quia cani ojaya epojji jama jayojjaya oya cuana Eyacuiñajji nijje baꞌe tiitiijeꞌyo Jesosa nijje peaꞌai jiquio 144.000 Jodio cuana. Jamaya eya, Huani cahuibanaje. 
\s1 Pea esohuidojojjiya huohui canaje Jesosa poe oꞌoyajjijo 
\p  
\v 6 Majoya eyaya banaje pea esohuidojojji eyajo cuabesani. Eyacuiñajjiya oya huoojea canaje ojjaña cuana huasijje Jesosa ojjaña cuana baꞌe tiitii mee canijo huohuiya. Eꞌe, ohuaya Jesosajo huohui cani ojjaña cuana ojjaña esohuijo mimiani yasijje.  
\v 7 Ohuaya jama acanaje baꞌa: —¡Eyacuiñajji shajjaꞌajjacue! Oya jama acue baꞌa: “Eyacuiñajji, miya quea pame nee nee”. ¡Oya bihuiacue! Ohuaya ojjaña eyajo baꞌe pana canaje; meshi, bae aiꞌai cuana, cuei cuana peaꞌai pana canaje. Eꞌe, ¡jamaya acue oya; jjeyahua nei ohuaya ojjaña mimishi cuana quea nee nee po mee caje! —esohuidojojjiya ojjaña acanaje. 
\p  
\v 8 Ma ebionei esohuidojojji huohui cajo, pea esohuidojojji poeyanaje. Huohui canaje jama baꞌa: —Ojjaña ma cuiñajji quea quemojo baꞌe quea mimishi poanijo quea nee nee po mee caje, Babinonia cuiñajji bajjanijo baꞌe cuana. Jiquio ecua oe epona quea mimishiya quea huiso dejja cuana quea mimishi po mee cani jama jayojja dejja cuana jomajo baꞌeya pea cuana pea cuiñajji cuanajo baꞌe quea mimishi po mee caꞌyonaje —jamaya ma esohuidojojji poanaje. 
\p  
\v 9 Majoya pea esohuidojojji poeyanaje. Huohui canaje jama baꞌa: —Ojjaña joya shanei ai jayojja bihuijji poani shanei nishoꞌya peaꞌai bihuiajji poani, shanei aija bajjani jayojja ebahuajje, emejje pojjaꞌa jjatehue meequi peaꞌai quea nee nee po mee cajeꞌyo Eyacuiñajjiya.  
\v 10 Eꞌe, jamaya acajo Eyacuiñajjiya ona nijje quea quene nee nee poajeꞌyo. Cuaquijo, huichacha quea ihui nee neejo quea nee nee po tiitiijeꞌyo. Ojjaña esohuidojojji quea pame neeya ba caje, Jesosaa ma ñajjajja equecuaꞌyo jayojja peaꞌaiya oya cuana ba cajeꞌyo cuaquijo nequi.  
\v 11 Eꞌe, oya cuana quea nee nee poajeꞌyo tii tii; cuaqui huichacha baꞌesohuaquijeꞌyo tii tii. Ojjaña joya shanei ai jayojja bihuiajji poani, shanei nisho bihuiajji poani peaꞌai, shaneija bajjani jayojja ebahuajje jjatehue meequi peaꞌai quea nee nee poajeꞌyo tii tii, quea nee po pajeaꞌyo ajja tii epojjajo, mecajje peaꞌai —jamaya poanaje esohuidojojji. 
\p  
\v 12 Jamajjeya ojjaña Jesosaja epeejji cuana dejja mimishiya napa cajo jamatii meteꞌama cajjapee tiitiiquiahua, ma Jesosa nijje jjapeequi pajeaꞌyo ajja, ojjaña Eyacuiñajjija esohui jayojja jama acani peaꞌai. 
\p  
\v 13 Majoya eyaya, Huaniya shajjaꞌajjanaje pea eyajo mimiani jama baꞌa: —Huani, ¡jiquio ecuea esohui tehuecue! Eyacuiñajjiya jjeya nei, quijje peaꞌai quea bihui nee nee po mee cajeꞌyo ojjaña Jesosaja esohui huohuijji ma esohui huohuijjijojo dejja mimishiya quecua caje —poanaje. 
\p Majoya Edojjoshahua Pameya jama acanaje baꞌa: —Eꞌe jojo nei Jesosaja epeejji cuana ojaya esohui huohuijjijojo manoꞌyajo baꞌe tiitii mee cajeꞌyo Eyacuiñajjiya, jomishoca mee cajeꞌyo; oya cuana sosequia cajeꞌyo esohui huohui canaje sosejje. 
\p Jamaya eya, Huani Jesosaa cahui ba mee canaje. 
\s1 Eyacuiñajjiya dejja mimishi cuana napa neinei mee canaje 
\p  
\v 14 Majoya eyaya, Huaniya eyahuasijje banaje pea jama baꞌa: Oe Dejjaja Bacua Ejja jayojjaya bo oshe biajje anioqueani. Ejaahuojja mei huoꞌo quea nahue esapajo ani yeꞌoquea canaje, baa ai shehuihui baa quea shejji iña canaje ebianei mejje.  
\v 15 Majoya eyajo pea esohuidojojji Eyacuiñajjija equijo ani cuayanaje. Cuaya majje taaanaje joya bo oshe biajje ani yasijje. Jama poanaje baꞌa: —Dejja mimishi cuana meshijo ani anoso ai yiye ejahua nee nee jayojja. Jamajjeya ¡anoso ai jahuajo jajasejja caꞌyani baa ai shehuihuiya echichaꞌyojji jayojja jama jjeya nei dejja mimishi cuana acue! ¡Oya cuana chichacue, oe! —jama taaameya poanaje. 
\p  
\v 16 Jamajjeya ohuaya bo oshe biajje aniya ojjaña mimishi cuana meshijo baꞌeca jaja caꞌyonaje; chicha canaje ojjaña. Apoa acaꞌyonaje. 
\p  
\v 17 Majoya eyaya, Huaniya banaje pea esohuidojojji eyajo Eyacuiñajjija equijo ani cuayanaje. Ojaya baa ai shehuihui yani peaꞌai.  
\v 18 Majoya pea esohuidojojji mei eꞌiya pejjejo ani, ma cuaqui jijiani pejjejo ani poeyanaje. Oya taaanaje esohuidojojji baa aijji ani yasijje. Jama poanaje baꞌa: —Ojjaña mimishi cuana meshijo baꞌe acui jjajja ejahua nee nee jayojja jama. ¡Jamajjeya ejjajja jahuajo sejja cani jayojja jjeya nei dejja mimishi cuana acue! ¡Quea mimishi poanijo quea nee nee po meecue! —ma esohuidojojji poanaje. 
\p  
\v 19 Jamajjeya meshi yasijje poe majje ma esohuidojojjiya ojjaña mimishi cuana meshijo baꞌeca cuana jaja majje chicha canaje quea nee nee epo meeꞌyojji. Eꞌe, Eyacuiñajji quea quene poaje mimishi cuanajo. Eca ijjia pashajji yasijje nequia cani jayojja jama acajeꞌyo dejja mimishi cuana. 
\p  
\v 20 Jiquio ecua eca jajasejja majje cuiñajji pejjejo ijjiapasha mee cajje eca na cuayaquiani jayojja jama ojjaña quea mimishi poani acajeꞌyo cuaa. Eyacuiñajji ba sa poꞌyo ajjajo quea huiso nee nee manoꞌyonaje; jjaquecuaquiꞌyo majje enaꞌ cuayaquinaje cuei quea quemo jayojja jama, de. 
\c 15  
\s1 Esohuidojojji cuaa ye canaje me oejje beca mimishi cuana napajji 
\p  
\v 1 Majoya Eyacuiñajjiya ecuea ebajji jjajaꞌaqui mee canaje ma quijjeyejje nei ohua acaje. Eyaya banaje pea aquiana aiꞌai eyajo nequi. Ba majje quea ajjajja nee nee poanaje. Ma aquiana aiꞌai jama baꞌa: Me oejje beca esohuidojojji eyaya banaje, Eyacuiñajjija huoojea cuana ojjaña meshijo baꞌeca cuana quea nee nee po meejji. Ojjaña napajji me oejje beca huisome eyaya banaje. Ona napa majje chamaꞌ pea enapajji poaje. Eꞌe, Eyacuiñajjija ejjashahuabaquijji ojjaña napajji apoa poajeꞌyo.  
\v 2 Majoya eyaya banaje bae ai quea siyo tahuoo quea siyo jayojja cuaquijiji quea jeajahua tejjee. Ma bae ai sahuajo nequi ojjaña Jesosaja epeejji cuana. Maaya shanei ai ejja jeabichajea caꞌyonaje, shanei ai nisho jeabichajea caꞌyonaje peaꞌai. Jesosaja epeejji cuaa shanei aija bajjani tehue mee jjima acanaje onajaya ebahuajje. Onijje jjapeequiꞌyo ajja peaꞌai. Jamajjeya Eyacuiñajjiya Jesosaja epeejji cuana huasijje quia canaje eꞌiñaqueyajji cuana esohuicuayajji.  
\v 3 Jamajoya Jesosaja epeejji cuana sohuicuayanaje Jesosa bihuiajji, Eyacuiñajji bihuiajji peaꞌai. Eꞌe, Moisesi, Eyacuiñajjija esohui huohuijji sohuicuaya poa jayojja jamaya sohuicuayame poanaje Jesosaja epeejji cuana, Jesosaa quea pame nee acanajejo. Jesosa bihuia canaje jama baꞌa: 
\q1 “Eyacuiñajji, miya oe nei quea caꞌa nee nee poani tii tii. Ecuana quea boejea nee po meeꞌyonaje. Jamaya quea pame nee. Eꞌe, miya quea pame nee nee poani, eꞌe jojo nei peaꞌai. Miya ojjaña huoojeajji po tiitiiani. 
\q1  
\v 4 Ecuanaja Emeshi Mese Jesosa, ojjañaa miquea esohui cashajjaꞌajja tiitii cahua, camimi cahua jama baꞌa: —Jesosa, miya quea caꞌa nee nee po tiitiiani —capoahua. Eꞌe, ojjañaa miya bihuia cajeꞌyo. Eꞌe Jesosa, miya oe nei quea pame nee nee poani tiitiijo Eyacuiñajjija miya quea boti nee. Eyacuiñajjiya ojjaña miquea ebaꞌejji quea pame ba mee canajejo, ¡ojjaña meshijo baꞌeca cuaa miya cabihuia cahua, mi pejjejo nequiya!” 
\m Jamaya poanaje ojjaña Jesosaja epeejji cuana. 
\p  
\v 5 Majoya eyaya eyajo banaje Eyacuiñajjija equi. Eyacuiñajjija equi equecuayijji biso nei esecue ecaꞌapejo nequi banaje. Jomajo yani Eyacuiñajjija esohui etehueꞌyo.  
\v 6 Eyaya banaje me oejje beca esohuidojojji Eyacuiñajjija equijo nequi cuayanaje. Ojaya emejo yani dejja mimishi napajji, ojjaña meshijo baꞌeca cuana napajji. Ojaya daqui quea oshe nee nee quea jeajahua nee. Eseꞌojje baa daqui ehuosho baꞌe mei huoꞌo quea nahue nee.  
\v 7 Majoya eyaya banaje eyajo ma ebeca pee peaꞌai aquiana eshe cuana Eyacuiñajji pejjejo ani. Oe aquiana esheya caneco cuana quia canaje ma esohuidojojji cuana. Me oejje beca caneco cuana quia canaje. Ma caneco cuanajo yani aquiana dejja mimishi cuana quea nee nee epo meejji. Eyacuiñajji enequi tii tii quea quene nee nee poani ojjaña quea mimishi poani nijje.  
\v 8 Jamajjeya Eyacuiñajjija equijo aninaje huichacha quea quemo nee nee; Eyacuiñajji quea caꞌa, quea jeajahua, quea jiji nee nee peaꞌai jayojja jomajo nequinaje. Jamajjeya ojjaña cuana Eyacuiñajjija equi yasijje dobiqui mee jjima poanaje. Quijje me oejje beca esohuidojojjiya me oejje beca aquiana dejja mimishi cuana quea nee epo meejji apoa amajje pea cuana Eyacuiñajjija equi yasijje eyajo dobiqui mee cajeꞌyo. 
\c 16  
\s1 Me oejje beca aquiana cuana dejja mimishi napajji 
\p  
\v 1 Majoya eyaya Eyacuiñajji shajjaꞌajjanaje ojaya equijo mimiani. Ohuaya me oejje beca esohuidojojji cuana huohui canaje jama baꞌa: —¡Aquiana miquianajaya canecojo ani shojeacue ojjaña meshijo baꞌe yasijje ojjaña quea nee nee po meejji! 
\p Eꞌe, Eyacuiñajjiya ona nijje quea quene neejo quea nee nee po mee cajeꞌyo.  
\v 2 Jamajjeya majoya ebionei esohuidojojjiya ma aquiana ojaya canecojo ani shojea canaje ojjaña meshijo baꞌe yasijje. Jamajjeya ojjaña cuana ma shanei aija bajjani jayojja ebahuajje tehueꞌyo chiji po mee canaje quea nee nee. Quea nee nee po mee caꞌyonaje ohua shanei ai jayojja bihuia canajejo, shanei ai nisho epanaꞌyo bihuia canajejo peaꞌai. 
\p Me oejje oe pea esohuidojojjija pea aquiana caneco cuanajo ani shojea jjima soꞌo.  
\v 3 Majoya pea esohuidojojjiya aquiana ojaya canecojo ani shojea canaje bae ai yasijje. Jamajjeya bae ena quea huoꞌo nee equecuaꞌyo naꞌ cuayaquiani jayojja poꞌyonaje, quea ihui poꞌyonaje ojjaña aquiana enajo nequica manoꞌyojji. 
\p Me oejje esohuidojojjija aquiana caneco cuanajo ani; shojea jjima soꞌo.  
\v 4 Majoya pea esohuidojojjiya aquiana ojaya canecojo ani shojea canaje cuei quea quemo cuana huasijje, cuei sisi cuana huasijje peaꞌai. Jamajjeya ojjaña ena quea huoꞌo, quea ihui poꞌyonaje nahuoo cuana manoꞌyojji.  
\v 5 Majoya esohuidojojjiya, ena jaahuanajji poaniya huohui canaje jama baꞌa: —Jesosa, miquea ejjashahuabaquijji cuana, miquea esohui cuana ojjaña mimishi cuanajo quea pame nee, eꞌe jojo nei peaꞌai. Eꞌe, miya quea pame nee poani jojoya miya Eyacuiñajjija quea jea nee nee. Miya yahuajo nei nei yania poa; jjeya nei miya yani tii tii peaꞌai. Jamajjeya ojjaña mimishi cuanajo miquea esohui quea jaꞌa nee.  
\v 6 Eꞌe Jesosa, ojjaña dejja mimishi cuaa miquea epeejji cuana, miquea esohui huohuijji cuana peaꞌai quecua caꞌyajje enaꞌ cuayaquinaje, jjashojeajeaquinaje. Jamajjeya miyaya mimishi cuana enaꞌ, equecuaꞌyo cuanaja enaꞌ cuayaquiani jayojja ishi meeaña quea ihui o manojeaꞌyojji. ¡Jamaya capoꞌyahua! —poanaje. 
\p  
\v 7 Majoya eyaya shajjaꞌajjanaje pea eyajo mei eꞌiya pejjejo nequi. Oya jama poanaje baꞌa: —Eꞌe Eyacuiñajji, miya quea caꞌa nee, ojjaña huoojeaña. Miquea ejjashahuabaquijji cuana eꞌe jojo nei quea pame nee. ¡Pea quea mimishi poanijo napacue! ¡Jamaya capoahua! 
\p  
\v 8 Ebeca pee peaꞌai esohuidojojjija aquiana ojaya canecojo ani shojea jjima soꞌo. Majoya pea esohuidojojjiya aquiana ojaya canecojo ani shojea canaje eshequi yasijje. Jamajjeya eshequi quea quiyo nee nee poꞌyonaje. Quea quiyo nee nee po majjeya ojjaña meshijo baꞌe dahua canaje.  
\v 9 Eyacuiñajjiya ojaya esohuidojojji cuana huoojea canaje dejja mimishi cuana quea nee nee po meeya. Jamajjeya eshequiya dahua cajje Eyacuiñajji niñeba canaje cuaa. Jamatii dejja mimishi cuaa ojaya mimishi pajeaꞌyo ajja quea mimishi nee nee jjejojo. Eyacuiñajji bihuiaꞌyo ajja peaꞌai. 
\p Pea beca peejjima esohuidojojjija aquiana ojaya caneco cuanajo shojea jjima ani soꞌo.  
\v 10 Jamajjeya majoya pea esohuidojojjiya aquiana ojaya canecojo ani shojea canaje shanei ai jayojja que, ma ojaya epeejji cuana meshijo baꞌe huoojeajji poani que. Jamajjeya quea misi nee nee poanaje. Ojjaña quea nee nee poanaje. Quea nee neejo jjaꞌana ijjiaajjejeaqui canaje.  
\v 11 Quea nee poanijo, chiji poanijo peaꞌai ojjaña cuaa Eyacuiñajji eyajo baꞌe niñeba canaje. Jamatii ma shanei ai ejja, ojaya epeejji cuana pea aiya mimishi cuana pajeaꞌyo ajja poanaje. 
\p Beca esohuidojojjija aquiana ojaya caneco cuanajo ani shojea jjima soꞌo.  
\v 12 Jamajjeya majoya pea esohuidojojjiya aquiana ojaya canecojo ani shojea canaje cuei ai yasijje, Eopate cuei yasijje. Esohuidojojjiya ma cuei huosa mee caꞌyonaje. Huosaꞌyajo emeshi mese cuana meshi eshequi poejji mijijje baꞌeca poeje sohuinano quea huiso nee nee cuana nijje jjaquecuaquiya. 
\p  
\v 13 Majoya eyaya banaje pea beca peejjima eshahua cuana, shona hui jayojja. Oya cuana cuayanaje ma saꞌo aija enabajje, shanei ai ejjaja enabajje, esohui huohuijji nisho esiajje pojjija enabajje peaꞌai cuayanaje.  
\v 14 Jiquio eshahua cuaa ma dejjaa ajjima acani quea huiso acanaje. Oya cuana poquije ojjaña meshi yasijje ojjaña emeshi mese chichaa Eyacuiñajji nijje ejjaquecuaquijji. Majoya Jesosa poejeꞌyo saꞌo ai jayojja jeabichajeaa. 
\p  
\v 15 Majoya eyaya shajjaꞌajjanaje Jesosa mimiani jama baꞌa: —¡Shajjaꞌajjacue mo! Beca cuana ejo ishoa ajja. Jamatii eya poecuajije siipojji poecuajicuajiani jayojja. Joya ejo ishoaꞌishoaꞌajja ani tii tii quea bihui nee nee poaje. Eꞌe, eyaya oya cuana quea boejea po meejeꞌyo. Oya cuana daquijji jayojja jama poaje e poe oꞌoyajo. Jamajjeya oya cuana bichoꞌama poaje e poe oꞌoyajo. 
\p  
\v 16 Majoya ma eshahua cuaa ojjaña emeshi mese cuana jjachichaqui mee canaje oe meshi yasijje eyiyo Majeno bajjani yasijje, ma Jodioja esohuijo Amayeno meshi bajjani yasijje. 
\p  
\v 17 Oe esohuidojojjija aquiana ojaya canecojo ani shojea jjima soꞌo. Majoya ohuaya ma aquiana ojaya canecojo ani shojea canaje beni yasijje. Shojea cajo eyaya shajjaꞌajjanaje pea eyajo Eyacuiñajjija equijo nequi janobajjima nei taaanaje jama baꞌa: —Apoa. Eyacuiñajjiya dejja quea mimishi cuana quea nee nee po mee caꞌyonaje. 
\p  
\v 18 Majoya pojjejje baa siyoo po majamajanaje, taaanaje, cueji po majamajanaje peaꞌai. Meshi huehuahuehuanaje janobajjima nei nei peaꞌai; yahuajo nei meshi huehuahuehuanaje oe pojji.  
\v 19 Jamajjeya Babinonia cuiñajji quea quemojo meshi jjamijisisi jeaquinaje, pea beca peejjima jjamijisisi jeaquime poanaje. Ojjaña pea cuiñajji cuana ojjaña meshijo jaabichajeaquinaje peaꞌai. Eyacuiñajjiya Babinonia cuiñajji quea quemojo jjashahuabaqui majje ojjaña dejja jomajo baꞌe quea nee nee po mee caꞌyonaje. Ojjañaja mimishijo quea quene nee nee poanaje Eyacuiñajji.  
\v 20 Huehuahuehua majje ojjaña nasi ai cuana chamaꞌyo tii poanaje. Ojjaña eyiyo cuana chamaꞌyo tii poanaje peaꞌai. Jamajjeya dejja cuaa eyiyo baꞌyo jjima acaje.  
\v 21 Meja na ejjajjacajjaqui cuana quea quemo nee nee, 50 quinome biquieme oquenaje dejja cuana biajje. Jamajjeya dejja mimishi cuaa quea nee nee po majje Eyacuiñajji niñeba neinei canaje. 
\c 17  
\s1 Epona quea mimishi 
\p  
\v 1 Majoya oe esohuidojojji e que poeyanaje, ma aquiana canecojo ani shojea canaje. Oya enijje miminaje jama baꞌa: —¡Cuaꞌa! Eyaya miya ba meeje ache nee nee poaje baꞌa ojjaña ma cuiñajji quea mimishijo baꞌe. Ojjaña cuana epona pea cojjojji jayojja nei nei poani. Oya quea huiso bae biajje anioqueani jayojja jama quea huiso nee nee quea mimishi po mee cani.  
\v 2 Ohuaya quea huiso emeshi mese cuana quea mimishi po mee cani onijje, bejjo sosejje. Ojjaña meshijo baꞌe cuana quea mimishi jjashahuabaqui mee cani, ojjaña cuana onijje quea mimishi po tiitii mee cani. Eꞌe, oya cuana ehuoo nei jayojja jama poani. Jiquio ecua dejja huoo majje quea cachasa sei nee jayojja jama oya cuana quea mimishi tii tii po sa poani. 
\p  
\v 3 Majoya ma esohuidojojjiya eya dojo canaje meshi quima huasijje. Edojjoshahua Pameya eya jjashahuabaqui mee canaje. Jamajjeya eyaya jomajo pea epona banaje. Oya shadaa ai huoꞌo jayojjaja edaasa biajje aninaje. Ma shadaa ai jayojjaja edaasajo yani bajjani cuana etehueꞌyo, Eyacuiñajjija bajjani cuana jayojja. Jamaya Eyacuiñajjija botiꞌama, de. Ma shadaa ai jayojja, shadaa ai ejja pojjaꞌa quea sapa huiso, me oejje beca sapame, 7 sapame. Oya sheꞌanajji peaꞌai, quea huiso sheꞌaname ome miji peaꞌai, 10 sheꞌaname.  
\v 4 Ma eponaja daqui quea huoꞌo nee nee. Ojaya eyiijji quea huiso nee nee, mei huoꞌo cuana, mei oshe quea nahue cuana, ojjaña mei nahue cuana peaꞌai. Oja me cuanajo yani oe caneco quea nahue, mei huoꞌo caneco. Ma mei huoꞌo canecojo ani aquiana quea tai. Maya ojjaña ojaya ejjashahuabaquijji quea mimishi cuana jayojja, quea huiso dejja cuana nijje quea tai poanaje peaꞌai jayojja.  
\v 5 Ebahuajje ojaya bajjani etehueꞌyo poanaje ma ojjaña dejja cuanaja quea quehua. Ese ejjaja esohuijo jama bajjani baꞌa: “Babinonia cuiñajji quea quemo ojjaña mimishi cuana baꞌejji” bajjani. Jama tehuemeꞌyaya ojaya ebahuajo jaa.  
\v 6 Majoya eyaya oya banaje quea mimishi nee nee. Ohuaya quea huiso Jesosaja epeejji cuana quecua caꞌyonaje Jesosaja esohui huohuijjijojo. Jamajjeya ma epona ehuoo jayojja quea bihui nee poani Jesosaja epeejji quecua caꞌyajo. Ma epona quea mimishi ba majje eya quea ajjajja nei poanaje.  
\v 7 Majoya ma esohuidojojjiya eya huohui canaje jama baꞌa: —Huani, ¿apiojji acuae miya quea ajjajja nee epona quea mimishijo? ¿Ae jayojja jama ma epona quea mimishi nee, ma shadaa ai jayojja peaꞌai? Eyaya miya huohuije: Jjeya miquea eba pojjeama ma shadaa ai quea sapa huiso, me oejje beca sapame, quea sheꞌana huiso peaꞌai, ome miji peaꞌai, 10 sheꞌaname.  
\v 8 ¡Bacue! Oya shadaa ai jayojja yahuajo nei nei nequia poa meshijo. Jamatii jjeya oya chamaꞌ meshijo. Quijje oya quea huesha nee jaa poeje oꞌoya, jjani aijo ma mimishi cuana manoꞌyo majje poquiꞌyanijje jaa poeje oꞌoya. Majoya Eyacuiñajjiya oya quea nee nee po mee cajeꞌyo. Jamajjeya Jesosaja epeejji pojjeama quea huiso meshijo baꞌe, ma Eyacuiñajjiya yahuajo nei nei meshi pana coo jeahuajo onajaya bajjani cuana tehue jjima ojaya etehueꞌyo ebaꞌe tiitiiꞌyojjijo, maya cuana ma shadaa ai jayojja ba majje quea ajjajja nee nee poaje. Eꞌe, ma shadaa ai jayojja yahuajo nei nei nequia poa; jjeya ca chamaꞌ meshijo; jamatii quijje quea huesha nee jaa poeje oꞌoya Jesosa jeabichajeaa nisho —esohuidojojji poanaje. 
\p  
\v 9 Majoya esohuidojojjiya eya huohui canaje jama baꞌa: —¡Quea jaꞌa nee jjashahuabaquicue shadaa aija sapa quea huiso, epona quea mimishi peaꞌai ebajji! ¡Bacue! Shadaa aija me oejje beca sapa eyiyo cuana jayojja poani. Jiquio eyiyo cuana biajje anioqueani epona quea mimishi. Jiquio eyiyo cuana jayojjaya me oejje beca emeshi mese cuana poani.  
\v 10 Me oejje emeshi mese cuana chamaꞌyo tii poanaje. Oe emeshi mese jjeya nei enequi. Pea emeshi mese quijje pishana poeje. Poe majje oya nequije oe pojji cahuime.  
\v 11 Ma shadaa ai jayojja, shadaa ai ejja yahuajo nei nequia poa meshijo. Jjeya oya chamaꞌ. Quijje oya poeje oꞌoya; emeshi mese quijjeyejje nei nequi poaje me oejje beca emeshi mese cuana apoa poajo. Oya poe jjimahuajo me oejje beca emeshi mese cuana eyiyo cuana jayojja nequinaje. Ona nijje shadaa ai ejja jayojjaya emeshi mese nequinaje peaꞌai. Majoya Eyacuiñajjiya oya chamaꞌyo tii po mee cajeꞌyo.  
\v 12 Huani —Esohuidojojjiya eya acanaje—, miyaya banaje ome miji peaꞌai huiso esheꞌana, shadaa ai ejjaja esheꞌana. Ma esheꞌana cuana ome miji peaꞌai emeshi mese cuana jayojja. Oya cuana quijje emeshi mese cuana poaje. Shadaa ai ejja nijjeya ojjaña cuana huoojea cajeꞌyo oe pojji cahuime cuana.  
\v 13 Ojjaña emeshi mese pea emeshi mese cuana jayojjaya jama jjashahuabaquije Jesosa jeabichajeajji. Eꞌe, ojjaña emeshi mese quea mimishi cuaa shadaa ai ejja shajjaꞌajja cajeꞌyo. Dejja mase cuana huoojea caje shadaa ai ejja nijjeya Jesosa nijje jjaquecuaquiya.  
\v 14 Eꞌe, ojjaña quea mimishi cuana ojee poquije Jesosa quecuaa nisho. Eꞌe, Jesosa quecua sa acaje cuaa. Jamatii Jesosa quea caꞌa nee nee. Ojjaña huoojea cajeꞌyo. Ojjaña emeshi mese cuana huoojeajji oe nei Emeshi Mese nei poajeꞌyo Jesosa. Jamajjeya Jesosaa ojaya epeejji cuana nijjeya ojjaña quea mimishi poani quecuadehuejea cajeꞌyo. Eꞌe, Jesosa nijje ani ojjaña ojaya epeejji cuana. Jesosaa oya cuana babacaꞌyo majje iyaa canaje ojaya epeejji epojji —esohuidojojjiya eya acanaje. 
\p  
\v 15 Majoya ma esohuidojojjiya eya huohui canaje jama baꞌa: —Huani, miyaya banaje bae jayojja quea huiso, quea quemo cuana. Ma bae cuana biajje anioquenaje epona pea cojjojji nei nei. Ma bae jayojja cuana dejja quea huiso nee nee jayojja, ojjaña meshijo baꞌeca cuana, ojjaña pea esohuijo mimiani cuana peaꞌai. Quea huiso nee nee, de —esohuidojojji poanaje—.  
\v 16 Huani, miyaya banaje shadaa ai ejja quea sheꞌana huiso, ome miji peaꞌai sheꞌaname, 10 sheꞌaname. Maya ome miji peaꞌai, 10 emeshi mese jayojja, de. Maya onajaya ma epona pea cojjojji jayojja botiꞌama nei nei poaje. Jamajjeya ma epona jeabichajea cajeꞌyo. Jeabichajea majje jeajea cajeꞌyo epona quea mimishi daquimaꞌ jayojja; dahuajea cajeꞌyo. Jiquio ecua ijjiacajjiya aquiana iña majje ijjia cani jayojja jama epona mimishi chamaꞌyo tii acajeꞌyo ma emeshi mese cuaa.  
\v 17 Eꞌe, Eyacuiñajjiya ma emeshi mese cuana ojaya esohui jayojja jama amee cajeꞌyo. Jjashahuabaqui mee cajeꞌyo jama baꞌa: “Ecuaaya ma shadaa ai ejja huasijje huoojeajeꞌyo ecuanaja dejja mase cuana quea huiso nee nee oya quea caꞌa nee epo meejji”. Jamajjeya ojjaña dejja mase cuana huoojea cajeꞌyo cuaa shadaa ai ejja quea caꞌa nee nee epojji. Jamaya Eyacuiñajjiya huohui canaje ma ohua quijje nei acaje —esohuidojojjiya eya jamaya acanaje—.  
\v 18 Huani, miyaya banaje ma epona pea cojjojji jayojja. Ma epona cuiñajji quea quemo nee ojjaña quea mimishi baꞌejji jayojja. Maaya ojjaña pea emeshi mese cuana huoojea cani —jamaya esohuidojojjiya eya acanaje. 
\c 18  
\s1 Eyacuiñajjiya ojjaña Babinonia cuiñajjijo baꞌe quea nee nee po mee cajeꞌyo 
\p  
\v 1 Majoya eyaya, Huaniya banaje pea esohuidojojji. Oya eyajo nequi nequioquenaje dejja cuana huasijje. Eyacuiñajjiya oya quea caꞌa po mee canaje. Jamajjeya esohuidojojjiya ojjaña huoojea canaje. Quea jeajahua nee nee poaniya jjejojo meshi cuana jeajaꞌajea canaje.  
\v 2 Jama taaame poanaje baꞌa: —Ojjaña quea mimishi Babinoniajo baꞌe Eyacuiñajjiya quea nee nee po mee cajeꞌyo, chamaꞌyo tii po mee cajeꞌyo. Jamajjeya ma cuiñajjijo baꞌequijeꞌyo edosiquiana cuana, eshahua cuana peaꞌai, ojjaña cuichojji quea tai ijjia ca ajja peaꞌai jomajo baꞌequijeꞌyo.  
\v 3 Ojjaña cuana quea mimishi nee nee ma cuiñajjijo baꞌe. Jamajjeya ojjaña dejja cuana pea cuiñajji cuanajo baꞌe quea mimishi po mee caꞌyonaje. Eꞌe, dejja cuana quea mimishi baꞌe ehuoo nei jayojja quea jjashahuabaqui tai poani. Jamaya dejja cuana ma cuiñajji quea quemojo baꞌeya pea cuana ehuoo nei jayojja jama po mee cani. Ojjaña pea emeshi mese cuana quea mimishi poani dejja cuana ma cuiñajji quea quemojo baꞌe jayojjaya. Ma cuiñajji quea mimishi, quea quemojo yani quea huiso aquiana. Jamajjeya dejja quea aquiana huiso cuana peapea aquiana quea huiso nee jjeshe cani jomajo —jamaya ohuaya eya acanaje. 
\p  
\v 4 Majoya eyaya, Huaniya shajjaꞌajjanaje pea eyajo aniya Jesosaja epeejji cuana iyaa cani jama baꞌa: —Ecuea epeejji cuana, ¡aꞌa anijji ma cuiñajji quea mimishijo! Ona jayojja quea mimishi mi po chanaꞌ. ¡Aꞌa jomajo baꞌe majajji; miquianaya quea nee nee po chanaꞌ, onaya jayojjaya! Eꞌe, Eyacuiñajjiya ojjaña cuana jomajo baꞌe quea nee nee po mee cajeꞌyo quea mimishi poanijojo.  
\v 5 Eyacuiñajjiya ba canaje onajaya mimishi cuana quea huiso nee nee. Jamajjeya oya jjashahuabaquiani ona napajji quea mimishi nee nee poanijo.  
\v 6 Ojjañaa jomajo baꞌeya miquianaya napa canaje ecuea epeejji poanijo. Jama napaꞌyomeya Eyacuiñajjiya oya cuana acajeꞌyo. Onaaya miquianaya quea nee nee po mee canaje enijje jjapeequianijo. Jamajjeya Eyacuiñajjiya oya cuana quea nee nee po tiitii mee cajeꞌyo. Oya cuana miquianaya quea yeno po mee canaje. Jamajoya Eyacuiñajjiya oya cuana quea yeno po tiitii mee cajeꞌyo.  
\v 7 Ojjañaa ma cuiñajji quea mimishijo baꞌeya jjeshe canaje aquiana cuana quea huiso nee nee. Eꞌe, onajaya aquiana quea huiso nee nee. Ma aquiana oja jjeshe huisoajjaya Eyacuiñajjiya oya cuana quea nee nee po mee cajeꞌyo, quea yeno po mee cajeꞌyo peaꞌai. Eꞌe, ojjaña jomajo baꞌeya huohui canaje jama baꞌa: “Ecuanajaya cuiñajji quea pame emeshi meseja epona jayojja jama poani, quea huiso aquiana quea nahue yani. Eꞌahuemano jayojja jama pojjeama. Quea jaji nee nee. Ojjaña jiquiojo baꞌeca quea yeno po ajja tii tii” poanaje cuiñajji quea mimishijo baꞌeca cuana —jamaya poanaje pea eyajo ani enijje.  
\v 8 —Jamatii quijje Eyacuiñajjiya ojjaña ma cuiñajjijo baꞌeca quea nee nee po mee cajeꞌyo. Quea yeno po mee cajeꞌyo. Quea shoe po mee cajeꞌyo peaꞌai. Ojjaña quiyo jeyojeyo mee cajeꞌyo peaꞌai. Eꞌe, Eyacuiñajji quea caꞌa nee nee ma dejja quea mimishi cuanajo jjashahuabaquije quea nee nee epo meejji —poanaje pea eyajo ani. 
\p  
\v 9 Emeshi mese cuana dejja mimishi cuana ma cuiñajjijo baꞌe nijje quea mimishi nee nee poanaje. Jamajjeya ma cuiñajji jijianijo huichacha ba majje emeshi mese cuana pajeꞌyo jama baꞌa: —Ecuanaja epeejji cuana ma cuiñajjijo baꞌe quiyoꞌyoqui. Onajaya aquiana quea huiso ecuanajaya quea boti nee nee. Quiyoꞌyo majje aquiana quea nahue, quea pame chamaꞌyo tii poaje, de —jamaya emeshi mese quea mimishi paje quea yeno jjejojo. 
\p  
\v 10 Cuiñajji quea quemo quiyoꞌyanijo emeshi mese cuana quea huesha nee nequijeꞌyo quea mete jjejojo. Quea yeno poaje peaꞌai. Quea yeno po majje janobajjima nei paje jama baꞌa: —¡Bacue oe! Babinonia cuiñajji etii quea quemo nee nee quiyoꞌyoqui. Ecuanajaya epeejji cuana jomajo baꞌe quea nee nee poꞌyoqui. Jjeya nei ojjaña jomajo baꞌe mano cuajiꞌyonaje. Chamaꞌyo tii poajeꞌyo —emeshi mese mimishi pajeꞌyo. 
\p  
\v 11 Ojjaña dejja quea aquiana huiso ojjaña meshijo baꞌe quea yeno poaje Babinonia quiyoꞌyajo. Oya cuana paje jama baꞌa: —Ojjaña Babinoniajo baꞌe chamaꞌyo poanaje. Yahuajo ecuanajaya ohuaya aquiana quea huiso nee jjeshe canaje. Jjeya ejjeshe majaꞌyojji pojjeama.  
\v 12 Eꞌe, yahuajo aquiana jjeshe canaje jama baꞌa: Mei huoꞌo quea nahue, mei oshe quea nahue, mei sisi quea nahue cuana, mei oshe sisi quea copo pena bajjani cuana jjeshe canaje, daqui quea huiso quea nahue, daqui huoꞌo quea bame, daqui beje nei quea nahue, daqui huoꞌohuoꞌo quea nahue cuana jjeshe canaje; ojjaña acui equecuashiyo quea shiye cuana quea nahue, ojjaña aquiana bame peaꞌai jjeshe canaje yahuajo; acui ejehui quea nahue cuana, ijjiacajji cuanaja eseꞌ aiꞌai, mei jahua edahua, baa edahua cuana, mei ejaja bame cuana peaꞌai yahuajo jjeshe canaje ma cuiñajji etiijo baꞌeca cuaa.  
\v 13 Bobi quea shiye, quea johua po meejji cuana jjeshe canaje peaꞌai ma bajjani baꞌa: canela, eña quea shiye cuana, madeja jayojja pohui quea shiye cuana, pea shiyeshiye pohui, jjonojjajja na sese, acuijjajja sei, anoso pohui jayojja, bobi anoso jayojja peaꞌai jjeshe canaje. Anaꞌai quea huiso cuana, ñajjajja quea huiso cuana, mapichi quea huiso cuana, mapichija aquiana edojojji quea huiso cuana, echacojji sosemaꞌ cuana, ojjaña chaco tiitii mee cani peaꞌai jjeshe canaje cuaa ma cuiñajji etiijo baꞌeya —jama pa animeya ojjaña dejja cuana poaje Babinonia quiyoqui ba majje. 
\p  
\v 14 Majoya esohuidojojji eyajo nequi ojjaña Babinoniajo baꞌe nijje miminaje jama baꞌa: —Yahuajo miquianaya ojjaña aquiana cuana jomajo ani jjeshe sa poanaje. Jjeya chamaꞌ. Ojjaña miquianajaya aquiana chamaꞌyo tii tii poanaje. Ebaꞌejji quea pame chaco jjima chamaꞌ poanaje. Miquianajaya aquiana quea huiso nee nee ejjeshe oꞌoyajji pojjeama —esohuidojojji poanaje. 
\p  
\v 15 Majoya eya ohuaya huohui canaje jama baꞌa: —Huani, Babinonia dejja cuaa aquiana quea huiso nee nee yahuajo jjeshe canaje. Jamajjeya dejja aquiana quiajji cuaa quea huiso nee nee aquiana Babinonia dejja huasijje quia huichaꞌa huichaꞌa canaje quea huiso nee nee bejjo sosejje. Jjeya Babinonia dejja cuana quiyoꞌyonaje, quea nee nee poꞌyonaje. Jamajjeya aquiana quiajji cuana quea huesha nee nequije quea mete jjejojo. Quea yeno poaje peaꞌai.  
\v 16 Pa neineije jama baꞌa: “¡Oya bacue oe! ¡Babinonia cuiñajji etii quiyoꞌyonaje! Ecuanaja epeejji cuana jomajo baꞌe quiyo jeyojeyoꞌyonaje. Ojjaña jomajo baꞌe daqui quea nahue, daqui huoꞌo quea nahue, emeshi meseja daqui huoꞌohuoꞌo jayojja quea nahue peaꞌai huosho canaje. Eyiijji mei huoꞌo quea nahue, mei sisi quea siyo, quea nahue, mei oshe sisi quea copo pena bajjani peaꞌai daquijo baꞌehuana canaje.  
\v 17 Jjeya nei ojjaña jomajo baꞌe manocuajiꞌyonaje. Chamaꞌyo tii poꞌyonaje” dejja quea aquiana huiso pa ani, achacua ojaya aquiana equiaꞌyojji pojjeamajojo. Cuanaya ojjaña bishe ai mese cuana, ojjaña bishe aijo poquiani peaꞌai, ojjaña echacojji bishe aijo chaco cani, ojjaña jai jjequicuayajji poani cuana peaꞌai quea huesha nee nequije.  
\v 18 Onaaya huichacha quea quemo ba caje ma cuiñajji etii quiyoꞌyanijo. Huichacha ba majje huohui caje jama baꞌa: “Babinonia quea pame nee, de. Pea cuiñajji quea pame pishana. ¡Chamaꞌ pea cuiñajji Babinonia jayojja!” pa neineije. 
\p  
\v 19 Babinonia quiyoꞌyani ba majje dejja cuana quea yeno nee poaje. Jamajjeya oya cuana quea yeno jjejojo meshi pohuiya jjasapa natajeaquije. Janobajjima nei pa neineijeꞌyo peaꞌai jama baꞌa: —¡Oya bacue oe! ¡Babinonia cuiñajji etii quiyoꞌya! Ojjaña dejja cuana bishe ai cuanajo chacochacoani quea bejjo huiso poanaje; quea huiso nee nee aquiana cuana jjeshe canaje Babinonia dejja cuaa bejjo sosejje —jamaya ojjaña bishe ai cuanajo nequi paje. 
\p  
\v 20 Majoya esohuidojojji miminaje jama baꞌa: —Ojjaña eyajo ani, ¡quea bihui nee nee pocue! Eꞌe, Babinonia cuiñajji quea mimishi nee nee quiyoꞌyonaje. ¡Ojjaña Jesosaja epeejji cuana, o shajjaꞌajjajji cuana peaꞌai, ojjaña Eyacuiñajjija esohui huohuijji cuana, Jesosaja huoojeaꞌyo esohui huohuiya peaꞌai quea bihui nee pocue! Eyacuiñajjiya Babinonia quiyojea mee caꞌya, ojjaña jomajo baꞌe peaꞌai quiyojea mee caꞌyonaje, miquianaya ohua napa canaje sosejje. 
\p  
\v 21 Majoya esohuidojojjiya quea caꞌa nee neeya mei quea quemo nee nee, shijje cuiapojomeejji mei quea quemo jayojja jeaoqueajea canaje bae ai yasijje. Mei chamaꞌyo tii poanaje. Mei jeaoqueajea majje huohui canaje jama baꞌa: —Eyaya mei janobajjima nei jeaoqueajeaꞌyonaje. Jamaya eyaya Babinonia chamaꞌyo tii po meejeꞌyo; janobajjima nei napajeꞌyo. Eꞌiya oꞌoyajji pojjeama tii tii poajeꞌyo.  
\v 22 Yahuajo quea huiso jomajo baꞌeya eꞌiñaqueyajji cuana iñaqueya canaje esohui cuayajji, dehue mia canaje, emiajji esheꞌana jayojja mia canaje peaꞌai. Jamaya oya cuana yahuajo poanaje. Quijje ca chojja, jamaya epo oꞌoyajji pojjeama. Chamaꞌyo tii poajeꞌyo. Quea huiso jomajo baꞌe yahuajo chacochaconaje. Jjeya chamaꞌyo tii echacojji cuana poajeꞌyo. Quea huiso anoso ai cuana cuiapasha canaje cuaa yahuajo, meiya. Jjeya anoso ai cuiapashajji chamaꞌyo tii poajeꞌyo quiyoꞌyo majje.  
\v 23 Jomajo cuaquijiji ejiji oꞌoyajji pojjeama tii tii, quea misi po tiitiijeꞌyo. Jomajo jjahueaqui ajja tiitii poajeꞌyo. Chamaꞌ poajeꞌyo yahue eshoꞌi oja huanase eshoꞌi nijje emimijji quea bihui nee. Chamaꞌyo tii tii. Yahuajo ojjaña jomajo baꞌe quea aquiana huiso nee nee poanaje; pea cuiñajji cuanajo quea aquiana huiso pishana poanaje. Yahuajo Babinonia dejja cuaa quea huiso pea cuana dasia caꞌyonaje.  
\v 24 Quea huiso Jesosaja esohui huohuijji cuana quecua caꞌyonaje cuaa peaꞌai esohui huohuijji jojoya. Quea huiso pea cuana jomajo baꞌe quecua caꞌyonaje peaꞌai, Babinonia dejja cuaa quea maseya jjejojo, de —ma esohuidojojji quea caꞌa nee jamaya poanaje. 
\c 19  
\s1 Eyajo ojjañaa Eyacuiñajji bihuia canaje 
\p  
\v 1 Majoya eyaya shajjaꞌajjanaje quea huiso nee nee eyajo baꞌe. Oya cuana janobajjima nei sohuicuayani jama baꞌa: 
\q1 “Eyacuiñajji quea pame nee nee poani. Ohuaya ojaya epeejji cuana baꞌe tiitii mee cani eyajo. Oya oe nei baꞌe tiitiiani. Oya oe nei quea caꞌa nee nee nequi tiitiiani.  
\v 2 Eꞌe, ojaya ejjashahuabaquiꞌyojji dejja mimishi cuanajo eꞌe nei poani. Ma epona pea cojjojji nei nei quea nee nee po mee caꞌyonaje. Maaya quea huiso meshi cuanajo baꞌe cuana quea mimishi nee po mee canaje. Jamajjeya Eyacuiñajjiya oya quea nee nee po mee caꞌyonaje. Cuanaya ma epona taiya Jesosaja epeejji cuana quea huiso quecua caꞌyonajejo Eyacuiñajjiya oya quea nee nee po mee caꞌyonaje”. 
\m  
\v 3 Majoya ojjaña eyajo baꞌe janobajjima nei taaa oꞌoyanaje jama baꞌa: —Eyacuiñajji quea pame nee nee poani. Ohuaya ojjaña quea mimishi ma cuiñajji aijo baꞌeca quiyo tiitii mee cajeꞌyo. 
\p  
\v 4 Majoya eyajo Jesosaja epeejji etiiya quea huiso cuaa, ma 24 huisomeya, aquiana eshe cuaa ma ebeca pee peaꞌai huisomeya ecuiꞌoshajjajo nequiya Eyacuiñajji bihuia caꞌyonaje. Jama taaame poanaje baꞌa: —Eyacuiñajji, miya quea pame nee nee. ¡Ojjañaa miya cabihuia cahua! ¡Jamaya capoꞌyahua! —jamaya onaaya Eyacuiñajji eꞌanioque ani bihuia canaje. 
\p  
\v 5 Majoya pea eyajo Eyacuiñajji pejjejo nequi taaanaje jama baꞌa: 
\q1 “Ojjaña Eyacuiñajjija epeejji cuanaa, ojjaña Eyacuiñajjija esohui shajjaꞌajjajji poaniya, ojjaña etiiya, ojjaña eshoꞌi cuaa peaꞌai, ¡Eyacuiñajji bihuiacue!” 
\m Jamaya pea eyajo nequi taaanaje. 
\p  
\v 6 Majoya eyaya shajjaꞌajjanaje pea cuana quea shajjaquijjo. Quea huiso cueji taaani jayojja, cuei quea quemo, quea cuejipashi nee mei pasaca biajje oqueani jayojja. Eꞌe, ojjañaa Eyacuiñajji janobajjima nei bihuia canaje jama baꞌa: 
\q1 “Eyacuiñajji quea pame nee nee. Eyacuiñajji quea caꞌa nee nee ani tiitiijeꞌyo. Ohuaya ojjaña huoojea tiitii cani.  
\v 7 ¡Eseya ojo quea bihui nee capoꞌyahua! ¡Eseya ojo quea bihui nee camimiꞌyahua peaꞌai! Jama baꞌa: Eyacuiñajjijo ecuana quea bihui nee nee. Oya oe nei quea caꞌa nee po tiitiiani. Oya oe nei yani tii tii. Jesosa, ma ñajjajja equecuaꞌyo jayojja quea pame nee. Jjeya oya quea pame nee nequi yahue ejjahuanaquijjijo jayojja. Ojjaña ojaya epeejji cuana epona ejjahueaquijjijo apoa jayojja jama quea boejea nee. Eꞌe, Jesosa poeje oꞌoya ojaya epeejji cuana jaahuanaa.  
\v 8 Ojjaña ojaya epeejji cuana daqui oshe quea pame, quea boejea, quea jeajahua huosho majje enequi. Jiquio ecua eponaja daqui oshe quea boejea ejjahueaquijji jayojja jama Jesosaja epeejji cuana quea pame quea boejeaꞌyo peaꞌai baꞌe”. 
\m Jamaya pea cuaa eyajo nequiya Eyacuiñajji bihuia canaje. 
\p  
\v 9 Majoya esohuidojojji eyajo nequiya eya huohui canaje jama baꞌa: —Huani, esohui tehuecue jama baꞌa: “¡Jesosa ejjahuanaquijjijoya ojjaña ojaya epeejji cuana ojee caꞌijjiaꞌijjia mee cahua onijje! ¡Ojjaña onijje ojee ijjiaꞌijjia ani quea bihui nee capoꞌyahua!” Eꞌe, jiquio ecuea esohui eꞌe nei nei poani. Jamaya Eyacuiñajji poani —eya jamaya acanaje esohuidojojjiya. 
\p  
\v 10 Majoya ojaya esohui shajjaꞌajja majje eya esohuidojojji pejjejo ecuiꞌoshajjajo nequinaje o bihuiajji. Jamatii oya enijje miminaje jama baꞌa: —Chojja, Huani. ¡Aꞌa eya bihuiajji! Eya Jesosaja echacojji poani mi jayojjaya, miquea epeejji cuana jayojjaya peaꞌai. Eꞌe, miquianaaya Jesosaja esohui jayojja jama aña peaꞌai. Edojjoshahua Pameya ojjaña Jesosaja epeejji cuana Jesosaja esohui ba mee cani quea jaꞌa nee, Huani. Jamajjeya ¡Eyacuiñajji oe nei bihuiacue! —ohuaya eya acanaje. 
\s1 Huaniya Jesosa ba canaje mapichi osheja edaasa biajje ani 
\p  
\v 11 Majoya eyaya, Huaniya ojjaña eyajo ba neineiꞌyonaje. E cojja neijo mapichi oshe nequi. Oya mapichija edaasa biajje ani quea pame nee nee. Ojaya esohui eꞌe nei. Ojaya esohui pea cuanaja ebaꞌejjijo eꞌe nei peaꞌai. Ohuaya ojjaña quea mimishi poani quecua cani, oya cuana quea nee nee po mee cani quea mimishi poanijo.  
\v 12 Eꞌe, oya mapichija edaasa biajje ani quea cojja jiji nee, cuaquijiji jayojja cojjame; ojaya ejaahuojja yani peaꞌai. Ohuaya quea huiso emeshi mese cuana huoojea cani. Quea huiso cuaa oya shajjaꞌajja cani. Ojaya bajjani etehueꞌyo yani. Jamatii pea cuanaja maya ebajjani quea quehua. Ojaya eba ojaye nei ojaya bajjani.  
\v 13 Ojaya daqui ao quea huoꞌo nee nee, enaꞌ jayojja jama enajo iyanobiajea jayojjaya. Oya ca ca oe Eyacuiñajjija esohui bameejji.  
\v 14 Quea huiso eyajo baꞌe o quishishijji poquije jjaquecuaquiya. Ojjaña quea huiso nee nee cuana mapichi osheja edaasa biajje poquije. Ojjañaja daqui oshe quea pame nee, quea nahue, quea boejea nee, de.  
\v 15 Ojaya enabajje yani esohui quea jaꞌa nee baa quea caꞌa, quea shejji nee jayojjaya. Ma esohui huohui majje ojjaña dejja cuana ojjaña meshi cuanajo jeabichajea cajeꞌyo. Quea caꞌa nee nee poanijo ohuaya ojjaña dejja ojaya esohui jayojja jama amee cajeꞌyo. Ojjaña shajjaꞌajja mee cajeꞌyo peaꞌai. Eꞌe, Eyacuiñajji ojjaña dejja mimishi ojjaña meshijo baꞌe nijje quea quene nee nee poanijo ohuaya, ma mapichi osheja edaasa biajje aniya quea tecue ojjaña huoojea cajeꞌyo. Jiquio ecua acuijjajja quecuapasha cani cuaa jayojja jama Jesosa Quitohua ojjaña dejja cuana acajeꞌyo; mete mee majje shajjaꞌajja mee cajeꞌyo.  
\v 16 Ojaya daqui aojo, ojaya huachinequi quea quemojo peaꞌai yani ebajjani tehueꞌyo jama baꞌa: 
\q1 “Ojjaña emeshi mese cuana huoojeajji; ojjaña cuana huoojeaꞌyojji poani”. 
\p  
\v 17 Majoya eyaya, Huaniya pea esohuidojojji banaje eshequijo nequi. Ohuaya janobajjima nei iyaa canaje ojjaña beꞌo cuabesa baꞌe; jama acanaje baꞌa: —¡Beꞌo cuana! ¡Miquianaya poecue! ¡Ojee ijjiaꞌijjiahuacue! Eyacuiñajjiya dejja mimishi quea huiso quecua mee cajeꞌyo.  
\v 18 Eꞌe, ¡jjeyahua nei emeshi mese cuana ijjiahuacue, dejja mase cuanaja mese cuana, dejja caꞌa cuana, mapichi cuana, mapichija edaasa biajje ani cuana, dejja mimishi quea huiso, echacojji sosemaꞌ cuana, echacojji bejjo sosejje chaco cani cuana, eshoꞌi cuana, etii cuana peaꞌai ojjaña ijjiahuacue! —ohuaya acanaje beꞌo cuana. 
\p  
\v 19 Majoya eyaya banaje ma shanei ai ejja quea huiso emeshi mese nijje, quea huiso dejja mase nijje peaꞌai ojee poquiani Jesosa quecuaa nisho, ma mapichi osheja edaasa biajje ani quecuaa nisho, quea huiso cuana Jesosa nijje nequi quecuaa nisho peaꞌai. Ojjaña poquinaje Jamayeno meshi yasijje jjaquecuaquiya.  
\v 20 Majoya Jesosaa shanei ejja, esohui huohuijji nisho peaꞌai iña canaje. Eꞌe, ohuaya iña canaje esohui huohuijji nisho, ma shanei ejja nijje tiiya quea huiso ma dejjaa ajjima acanaje ojjaña cuana dasiaꞌyojji, shanei ejja bihuia meeꞌyojji, ma shanei ejja nisho oja aꞌyo bihuiajji dasiaꞌyojji, ojjaña joya shanei ejjaja dasiaꞌyo majje oja bahua tehue peaꞌai iña canaje. Jamajjeya ma shanei ejja, ma esohui huohuijji nisho peaꞌai iñaꞌyo majje Jesosaa oya cuana jeajea caꞌyonaje bae ai jijiani yasijje, bae quea ihui yasijje. Jomajo tii quea nee nee po tiitiijeꞌyo.  
\v 21 Majoya Jesosaa mapichi oshejo eꞌanioque aniya ojjaña ejjaquecuaquijji cuana quea mimishi quecua jeyojeyo caꞌyonaje baa jayojjaa, oja esohuiꞌya. Eꞌe, ojaya enabajo baa jayojja yani, ojaya esohui. Majoya ojjaña dejja mimishi cuana manoꞌyajo, beꞌo cuana poeyanaje quea huiso nee nee. Emanoꞌyo cuana ijjia neinei caꞌyonaje. Quea jejje nee nee poanaje beꞌo cuana ojjaña equecuaꞌyo cuana ijjiaꞌyo majje. Jamaya eya, Huani cahuiba mee canaje. 
\c 20  
\s1 Edosiquiana nei jeyo canaje quea shequiaja huiso nee nee 1.000 shequiajame 
\p  
\v 1 Majoya eyaya banaje pea esohuidojojji. Oya eyajo nequi meshi yasijje poeyani. Ohuaya jjani ai ma emanoꞌyo cuana nequi quea doe nee nee nequi cuana cojja yahuejeajji ye cani emejo, aquiana quea caꞌa cadena quea quemo jayojja peaꞌai ye cani.  
\v 2 Ohuaya iña cañaquinaje, jeabichajea canaje Edosiquiana nei, saꞌo ai quea mase nee Satanasa bajjani, ma yahuajo nei nei peaꞌai esejaya etiiquiana pana coo ca jeahua dasiajji poa. Iña majje ma esohuidojojjiya Edosiquiana jeyo canaje cadena quea quemohua quea shequiaja huiso nee nee, 1.000 shequiajame ejeanobiajeajji.  
\v 3 Jeyo majje oya jeajea canaje jjani ai yasijje, ma emano cuana nequi yasijje quea doe nee nee yasijje. Capa canaje. Capa majje caꞌa canaje. Caꞌa majje cojjaahuejea canaje. Enaba capajjiꞌyajo tehue canaje jama baꞌa: “Edosiquiana nei ecuayaquiꞌyojji pojjeama quea shequiaja huiso nee nee, 1.000 shequiajame nequijeꞌyo ojjaña meshijo baꞌeca cuana dasiaꞌyo jjima yaꞌyojji”. Jamaya tehue canaje esohuidojojjiya. Jamatii quijje nei ma shequiaja huiso nee nee apoa po majjeya Edosiquiana nei ma emano cuana huasijje, jjani ai quea doe nee nee yasijje ejeyo nequi cacuayaquiꞌyahua beca baꞌi cuanajo dejja mimishi cuana dasia oꞌoyajji. 
\s1 Ebionei eshequi mee oꞌoyajji 
\p  
\v 4 Majoya quijje pishana eyaya banaje ona huoojeajji cuana eꞌanioque ani. Eyacuiñajjiya oya cuana huoojea canaje ojaya epeejji cuana huoojeaa Jesosa nijjeya. Eyaya banaje peaꞌai quea huiso nee nee Jesosaja esohui huohuijji cuana ma onaa sapa jajasejjajea ca poa. Mano mee caꞌya poa dejja mimishi cuaa Jesosaja esohui huohuijji poanijojo, Eyacuiñajjija esohui cuana huohuijji poanijojo peaꞌai. Jesosaja epeejji cuaa yahuajo pishana shanei ejja quea mase pishana bihuia jjima, shanei ejja quea mase pishana nisho, meshi epanaꞌyo peaꞌai bihuia jjima. Ojaya ebahuajje, emejje peaꞌai etehueꞌyo chamaꞌ shanei ejjaja ebaꞌyojji, ma 666 jayojja tehuemeꞌya chamaꞌ. Eyaya oya cuana banaje shequije oꞌoya. Shequi oꞌoya mee majje Eyacuiñajjiya oya cuana Jesosa Quito nijje ojjaña huoojeajji po mee cajeꞌyo quea huiso nee nee shequiajame. Eꞌe, 1.000 shequiajame Jesosa Quito nijje anijeꞌyo.  
\v 5 Pea emanoꞌyo cuana ma quea mimishi manoꞌyo cuana shequi oꞌoya jjima; 1.000 shequiajame apoa po jjimahuajo oya cuana shequi oꞌoya jjima. Joya shequi oꞌoyani 1.000 shequiajame po jjimahuajo bajjani ebionei eshequi meeꞌyojji.  
\v 6 Joya ebionei shequi mee caje oꞌoya quea bihui nee nee, quea pame nee nee poani. Oya cuana neeꞌama poajeꞌyo. Epoquiꞌyojji pojjeama cuaqui yasijje. Joya ecua pea cuana quea mimishi poani jayojja jama epoꞌyojji pojjeama Jesosaja epeejji cuana. Chojja, oya cuana Eyacuiñajji nijje emimijji poajeꞌyo. Oya cuana ojjaña huoojeajji poajeꞌyo Jesosa Quito nijje peaꞌai quea shequiaja huiso nee nee, 1.000 shequiajame. 
\s1 Edosiquiana nei jeajea cajeꞌyo cuaqui yasijje 
\p  
\v 7 Quijje nei ma 1.000 shequiajame po majje Eyacuiñajjiya Edosiquiana nei pichojea mee cajeꞌyo. Jamajjeya oya poquijeꞌyo.  
\v 8 Eꞌe, Edosiquiana nei poquijeꞌyo ojjaña meshijo baꞌeca dasiaa. Ohuaya ojjaña Co meshijo baꞌe, Maco meshijo baꞌe peaꞌai dasiaqui cajeꞌyo. Ohuaya oya cuana ojee epojji iyaa caje Eyacuiñajji quecuajji nisho. Ojjaña oja dasiaꞌyo cuana Edosiquiana nei nijje nequijeꞌyo. Oya cuana quea huiso nee nee poaje ojjaña meshijaji sope huisoajja.  
\v 9 Jamajjeya oya cuana quea mase nee nee poaje. Poquijeꞌyo ojjaña meshi cuana huasijje ojjaña jeabichajeaa. Eyacuiñajjija epeejji queya cajeꞌyo equecuajji. Eꞌe, Jenosanena queya cajeꞌyo Eyacuiñajjija epeejji cuana jomajo nequi quecuajji nisho. Jamatii Eyacuiñajjiya eyajo aniya dejja mimishi cuana ba majje cuaqui jeaoqueajea caje ona biajje. Oya cuana Jesosaja epeejji queyaꞌyo epo tii nequi manodehuejeajeꞌyo, ojjaña. Ojjaña quiyo jeyojeyo cajeꞌyo. Chamaꞌyo tii poajeꞌyo.  
\v 10 Majoya Eyacuiñajjiya Edosiquiana nei jeajea cajeꞌyo bae quea jiji nee jayojja huasijje, bae quea ihui, quea pase yasijje. Ma oja dasiaꞌyo cuana peaꞌai jeajea cajeꞌyo bae jijiani yasijje, Eyacuiñajjiya. Pea shanei ejja nijje, pea Eyacuiñajjija esohui huohuijji nisho quea mimishi peaꞌai nijje oya cuana quea nee nee po tiitiijeꞌyo bae jijiani yasijje. 
\s1 Ojjaña quea mimishi cuaqui yasijje jea cajeꞌyo ecuayaquiꞌyojji pojjeama 
\p  
\v 11 Majoya eyaya banaje jama baꞌa: Epojja oe poajo Eyacuiñajjiya ojjaña huoojea cajeꞌyo enapaꞌyojji. Oya Eyacuiñajji quea jeajahua nee, quea oshe nee nee bo oshe quea jeajahua nee jayojja. Ojjañaja Emeshi Mese nei oya. Ojjaña meshijo nequi, ojjaña eyajo nequi peaꞌai quea ajjajja nee poani ojo. Jamatii oya cuana quehuajje poqui meemee ajja, achacua epoquijji.  
\v 12 Majoya eyaya banaje ojjaña dejja cuana ma yahuajo manoꞌyo cuana, jjeya nei manoꞌyo peaꞌai; ojjaña etiiquiana cuana, ojjaña eshoꞌi cuana peaꞌai. Ojjaña nequinaje Eyacuiñajji cojja nei. Eyacuiñajjiya esohui etehueꞌyo cuana sheꞌa canaje. Pea esohui etehueꞌyo sheꞌa canaje peaꞌai. Maya o baꞌe tiitii meeꞌyojji oja tehue. Ma esohui etehueꞌyo ba majje Eyacuiñajjiya huohui canaje ojaya ejjashahuabaquiꞌyojji ojjaña baꞌya poa cuanajo. Eꞌe, ma esohui etehueꞌyo ba majje ojjaña huoojea cajeꞌyo. Ojaya epeejji cuana, ojjaña joya quea boejea poani cuana quea bihui nee nee po mee cajeꞌyo. Ojjaña joya quea mimishi po nequia poa cuana ca ca quea nee nee po mee cajeꞌyo.  
\v 13 Ojjaña ma yahuajo bae aiꞌaijo huiꞌiꞌyo cuana shequije oꞌoya. Ojjaña ma yahuajo mojea ca poa cuana, ojjaña emanoꞌyojaa cuana peaꞌai shequije oꞌoya. Ojjaña joya quea boejea poa cuana quea bihui nee po mee cajeꞌyo Eyacuiñajjiya. Ojjaña joya quea mimishi poa cuana ca ca quea nee nee po mee caꞌyoquije tii tii.  
\v 14 Majoya apoa. Ojjaña mimishi cuana bae ai jayojja jijiani yasijje jeajea cajeꞌyo ecuayaquiꞌyojji tii tii pojjeama. Ma bae jijiani bajjani Emano Becaꞌyojji, quea nee nee nee epo nequiꞌyojji.  
\v 15 Eꞌe, ojjaña joya ebajjani tehueꞌyo pojjeama Eyacuiñajjija etehueꞌyojo o baꞌe tiitii meeꞌyojjijo aje oe jeajea cajeꞌyo cuaqui jijiani yasijje, bae ai jayojja quea jiji nee nee yasijje, de. 
\c 21  
\s1 Eyacuiñajjiya Huani ba mee canaje meshi cuana, eyatahuatahua peaꞌai eyacua 
\p  
\v 1 Majoya Eyacuiñajjiya eya, Huani ba mee canaje eyatahuatahua, meshi cuana peaꞌai eyacua. Eyatahuatahua, meshi cuana peaꞌai yahuajo jama pojjeama. Bae aiꞌai cuana chamaꞌyo tii poanaje.  
\v 2 Eyaya Jesosaja epeejji cuana quea pame nee nee, quea boejea nee banaje. Eꞌe, Jenosanena cuiñajji eyacua jayojja poanaje. Oya cuana eyajo Eyacuiñajji nijje nequi ojee nequioquenaje. ¡Oya cuana ache bame nee nee! Epona ejjahueaquijji jayojja, daqui eyacua quea pame nee huosho cani jayojja, ojaya ejjahuojja quecuacaꞌaquijji jayojja. ¡Jamaya Eyacuiñajjija cuiñajji eyacua, ache bame nee nee!  
\v 3 Eyaya shajjaꞌajjanaje pea Eyacuiñajji pejjejo nequi enijje janobajjima nei mimiani jama baꞌa: —Huani, ¡bacue oe! Meshi eyacuajo Eyacuiñajji dejja cuana nijje baꞌe tiitiiani. Oya cuana Eyacuiñajjiya jama acaje baꞌa: “Jiquio dejja cuana ecuea epeejji cuana poani. Eya ona nijje ani tiitiijeꞌyo”.  
\v 4 Eꞌe. Jamajjeya Jesosaja epeejji cuana quea yeno po ajja tii tii, mano becaꞌyo ajja, pa ajja, shoeꞌama, neeꞌama poajeꞌyo tii tii. Yahuajo jama pojjeama poajeꞌyo —poanaje pea eyajo nequi. 
\p  
\v 5 Majoya Eyacuiñajjiya ojjaña huoojeajjiya eya huohui canaje jama baꞌa: —Eyaya ojjaña eyacua ameeaña. Ecuea esohui eꞌe jojo nei. Jamaya eyaya aje, Huani. Jamajjeya ¡ecuea esohui tehuecue! —poanaje. 
\p  
\v 6 Majoya Eyacuiñajjiya eya jama acanaje baꞌa: —Eya yahuajo nei nei ani tiitiia poa. Quijje nei eya ani tiitiijeꞌyo peaꞌai. ¡Ojjaña joya quea naba taja jayojja poani poecue e que! Eyaya eꞌishijji ishi meeje sosemaꞌ. Enijje jjapeequi sa neinei poanijo quea naba taja jayojja jama poani. Jamajjeya eyaya oya baꞌe tiitii meejeꞌyo.  
\v 7 Ojjaña joya enijje jjapee tiitiiquiani Edosiquiana nei jeabichajeajji poani. Jamajjeya eyaya oya cuana ecuea ebacua cuana po meejeꞌyo. Eꞌe eya, Eyacuiñajji ona nijje ani tiitiijeꞌyo.  
\v 8 Pea cuana, chojja. Ojjaña quea mete jjejojo enijje jjapee pajeaquiꞌyani, eshahuaja epeejji cuana, ojjaña quea mimishi baꞌe cuana, pea quecuajji cuana, pea cojjojji cuana, eyamiquecua cuana, ojjañaa quea tai acani, eyacuiñajji nisho bihuiajji cuana, ojjaña siajjepojji cuana, edasiajji cuana peaꞌai poquijeꞌyo cuaqui yasijje, bae ai jayojja jijiani yasijje poquijeꞌyo. Maya bajjani Emano Becaꞌyojji quea nee nee epo nequiꞌyojji —Eyacuiñajjiya eya jamaya acanaje. 
\s1 Huaniya ba canaje Jenosanena cuiñajji eyacua 
\p  
\v 9 Majoya oe esohuidojojji enijje mimiya poeyanaje. Yahuajo pishana oya me oejje oe esohuidojojji cuana nijjeya me oejje beca caneco iñajji poanaje. Maaya dejja cuana me oejje beca napame acanaje. E que poe majje ma esohuidojojji jama poanaje baꞌa: —Huani, ¡poecue enijje! Ojjaña Jesosaja epeejji cuana epona ejjahueaquijjijo jayojja eyaya miya ba meeje —ohuaya eya acanaje Jesosajo, ma ñajjajja shoꞌi equecuaꞌyo jayojjajo. 
\p  
\v 10 Majoya Edojjoshahua Pameya eya dojo canaje eyiyo aoꞌao daasa huasijje. Ohuaya eya ba mee canaje cuiñajji eyacua ojaya quea jea nee Jenosanena eyacua bajjani. Ma cuiñajji eyajo ani Eyacuiñajji anijo anioqueani Jenosanena eyacua.  
\v 11 Eyacuiñajji ma cuiñajjijo nequi quea jeajaꞌa nee nee poani. Jasipe mei bajjani jayojja poani quea jeajaꞌa nee, tahuoo oshe eshequiya jeajaꞌa cani jayojja.  
\v 12 Ma cuiñajji peeyi quea ao nee nee, quea quemo nee nee. Yani quea huiso esecue cuana, oe ejiojji beca, 12 secueme. Esohuidojojjiya oe ejiojji beca huisome esecue cuana cuiña cani. Esecue cuanajo Isaenija bacua ejja cuanaja bajjani etehueꞌyo yani, oe ejiojji beca, 12 bajjanime.  
\v 13 Eshequi poeje mijijje pea beca peejjima esecue jaa; eeno poeje mijijje pea beca peejjima esecue cuana jaa; ena poeje mijijje pea beca peejjima esecue cuana jaa; eshequi dobiquije mijijje peaꞌai pea beca peejjima esecue cuana jaa.  
\v 14 Ma cuiñajji quibo iya 12 meija quibo iya. Ma mei biajje etehueꞌyo yani, Jesosaja huoojeaꞌyoja, 12 huisome cuanaja bajjani. 
\s1 Jenosanena eyacua ipiaꞌajja canaje esohuidojojjiya 
\p  
\v 15 Esohuidojojjiya ma enijje miminajeya ma cuiñajji ipiaꞌajja canaje mei huoꞌo baacuiya. Esecue cuana ipiaꞌajja canaje peaꞌai. Jiyo ipiaꞌajja canaje peaꞌai.  
\v 16 Jamaya poanaje baꞌa: Ojjaña cuiñajjija ejjapeequijjiꞌya oya quemajja peaꞌai. Ipiaꞌajja majje ba canaje ache quemo nee nee poanaje baꞌa: Quea quemo nee nee 2.200 kilometro quemome. Oya aohuajja peaꞌai, 2.200 kilometro aome.  
\v 17 Ejjapeequijjiꞌya quea moo nee nee, 64 metro moome. Ohuaya ipiaꞌajja canaje esejaya eꞌipiaꞌajjajji jayojjaa.  
\v 18 Ejjapeequijjiꞌya jasipe mei quea caꞌa, quea jeajaꞌa. Cuiñajji mei huoꞌo oopana quea nahue nee nee, quea jaꞌa, tahuoo quea jaꞌa jayojja. Quea bame nee nee.  
\v 19 Ejjapeequijjiꞌya quibojo yani quea huiso mei eꞌiya quea bame nee nee epojji, peapea mei cuana quea nahue nee nee jama baꞌa: Jasipe mei cuana, sapino mei quea tahua jiji, asata mei cuana, esemeana mei cuana quea tahua jiji,  
\v 20 onise cuana quea huoꞌo siii oshe, caneniani cuana quea huoꞌo jiji, quesonite cuana quea jahua siyo, benio cuana quea jeajahua, topasio cuana jahuajahua jijijiji, quisopasa cuana iye tahuatahua. Jasine mei cuana peaꞌai, ameta mei cuana iye huoꞌohuoꞌo peaꞌai. Mahuiso mei cuana ejjapeequijjiꞌya quibojo eꞌiya ani. Quea pame nee nee, sho acui iñajo ani eshequiya jeajaꞌa cajje jahua, huoꞌo, tahua poani jayojjaya.  
\v 21 Oe ejiojji beca, 12 esecue jjani cuana ejaa. Ma esecue jjani cuana mei copo oshe pena ai bajjani cuana jayojja, quea nahue nee nee. Ejiojji cuana cuiñajjijo jaa mei huoꞌo oopana quea nahue, tahuoo oshe quea jaꞌa jayojjaya. 
\s1 Huaniya cuiñajji eyacua quea jeajahua nee ba canaje 
\p  
\v 22 Ma cuiñajjijo ecuea ba jjima equi Eyacuiñajji bihuiajji jayojja. Eꞌe, Eyacuiñajji quea caꞌa nee nee ma cuiñajjijo baꞌyani, Jesosa ma ñajjajja equecuaꞌyo jayojja jomajo baꞌyani peaꞌai. Jamajjeya jamatii oya cuana bihuia cani, ojjañaa.  
\v 23 Jomajo Eyacuiñajjiya ojjaña jeajaꞌa cani. Jesosaa ma ñajjajja equecuaꞌyo jayojjaa ejijijjiya jeajiji cani jayojjaya. Jamajjeya quea jaꞌa nee nee poanijo eshequi, baꞌi peaꞌai chamaꞌ poani.  
\v 24 Jesosaa ojaya epeejji cuana quea bame nee nee po mee canajejo oya cuana baꞌe mee cajeꞌyo quea jaꞌa nee. Emeshi mese cuana ojjaña meshijo baꞌeca cuaa Eyacuiñajji bihuia cajeꞌyo jama baꞌa: —Ojjaña aquiana quea pame miquea poani. 
\p  
\v 25 Cuiñajji esecue cuana ecaꞌapejo tii nequijeꞌyo sineꞌyo ajja jojoya.  
\v 26 Ojjaña cuana cuiñajji eyacua huasijje dobiquije Eyacuiñajji bihuiaa jama baꞌa: —Eyacuiñajji, miya quea pame nee nee. 
\p  
\v 27 Jomajo ca ca ojjaña cuana quea mimishi cuana, quea tai cuana peaꞌai, jjadasiaquijji cuana peaꞌai edobiquijji pojjeama nei nei. Joya ebajjani tehueꞌyo cuana ca ca oe dobiqui mee cajeꞌyo, Eyacuiñajjiya. Jesosaa, ma ñajjajja equecuaꞌyo jayojjaa tehue canaje ojjaña ojaya epeejji cuanaja bajjani ebaꞌe tiitiiꞌyojji oja tehue. 
\c 22  
\s1 Ena oshe ebaꞌe tiitii meeꞌyojji 
\p  
\v 1 Majoya pea esohuidojojjiya eya cuei quea tahua, quea pame nee eyajo ba mee canaje. Ma cuei Eyacuiñajji eꞌanioque ani pejjejo yobi nequi. Jesosa nequi pejjejo cuei shaja cuayaqui peaꞌai. Ojjaña joya ma ena ishi cani baꞌe tiitii mee cani Jesosaa, Eyacuiñajjiya peaꞌai.  
\v 2 Eyacuiñajjija cuiñajji eyacuajo ejaa ejiojji quea quemo. Ma ejiojjijo tii ma cuei quea pame jaa. Cuei sahuajo, beca mijijje yani acui bajjani Ebaꞌe tiitiiꞌyojji. Ojjaña baꞌijo jjajja huichaꞌa huichaꞌani. Ma acui iña cuana ijjia majje ojjaña jomajo baꞌe quea jaꞌa nee baꞌe tiitiijeꞌyo.  
\v 3 Yahuajo ojjaña quea mimishi poanijo Eyacuiñajjiya quea camaja po mee canaje ojjaña meshi cuanajo baꞌeca. Eyajo ebaꞌejji camajaꞌama poaje mimishi cuana chamaꞌyo poanijo. Eyacuiñajji eyajo ma cuiñajji quea pamejo anioqueani. Jesosa, ma ñajjajja equecuaꞌyo jayojja, jomajo yani peaꞌai. Jomajo Jesosaja epeejji cuaa oya bihuia tiitii cajeꞌyo.  
\v 4 Jesosaja epeejji cuaa oya ba cajeꞌyo ecojjaa. Ojaya etehueꞌyo ebahuajje tehue canaje ojjañaja ebajji ojjaña ojaya epeejji cuana.  
\v 5 Cuanaya Eyacuiñajji quea cojja jaꞌa nee, quea jeajahua nee poanijo ma cuiñajji quea jaꞌa nee po tiitiijeꞌyo, misiꞌama tii tii. Jamajjeya jomajo chamaꞌ cuaquijiji. Chamaꞌ eshequi peaꞌai. Ojjaña ojaya epeejji cuana onijje nequi tiitiijeꞌyo emeshi mese jayojja quea pame nee, ojjaña huoojeajji jayojja. 
\p  
\v 6 Majoya ma esohuidojojji enijje miminaje jama baꞌa: —Eꞌe, ecuea esohui eꞌe jojo nei. Jamajjeya ¡shajjaꞌajjacue! Emeshi Mese neiya Eyacuiñajjiya yahuajo Edojjoshahua Pame huoojea canaje ojaya esohui huohuijji huohui meesahuaa. Eyacuiñajjiya eya, ojaya esohuidojojji huoojea canaje mi que, ma ohua quijje pishana acajeꞌyo ejjanequipana meequiꞌyojji —jamaya eya acanaje esohuidojojjiya. 
\p  
\v 7 Majoya Jesosa enijje miminaje jama baꞌa: —Huani, eya, Jesosa Quito poeje oꞌoya quijje pishana. Ojjaña jiquio esohui etehueꞌyo ma eya quijje ajeꞌyo eyaya miya ba meeaña eꞌe nei. Ojjaña joya jiquio esohui eꞌe jojo nei jama ajji poani quea bihui nee nee capoahua —Jesosa Quitohua eya acanaje. 
\p  
\v 8 Eꞌe, eya, Huani ma esohuidojojji shajjaꞌajja majje ecuea ebajji ohua jjanequipana meequi cajo peaꞌai, eya o pejjejo ecuiꞌoshajjajo nequinaje o bihuiajji.  
\v 9 Jamatii ohuaya eya jama acanaje baꞌa: —¡Aꞌa eya bihuiajji! Chojja. Eya Jesosaja echacojji poani mi jayojjaya, miquea epeejji cuana ma Eyacuiñajjija esohui huohuijji cuana jayojjaya, ojjaña ojaya epeejji cuana jayojjaya jama poani peaꞌai, eya. Eꞌe, oya cuana jiquio esohui etehueꞌyo jayojja jama acani eꞌe jojo nei. Jamajjeya ¡Eyacuiñajji oe bihuiacue eꞌe jojo nei! —ohuaya eya acanaje. 
\p  
\v 10 Majoya ma esohuidojojji miminaje enijje jama baꞌa: —Huani, quijje pishana ojjaña jiquio esohui jayojja jama acajeꞌyo Eyacuiñajjiya. Jamajjeya tehue majje ejeejo ¡esohui etehueꞌyo aꞌa jjajjajji! ¡Aꞌa esohui cuiabajijji! ¡Ojjaña ba meecue Eyacuiñajjiya ma ohua quijje pishana acajeꞌyo!  
\v 11 Ojjaña joya quea mimishi poani Eyacuiñajjiya huohui caje jama baꞌa: “Ojjaña quea mimishi poani jamatii quea mimishiya capo tiitiiquiahua. Ojjaña quea tai jjashahuabaquiani jamatii quea taiya cajjashahuabaqui nequiahua tii tii. Jesosaja epeejji cuana ca ca quea jaꞌa nee canequi tiitiiꞌyahua. Ojjaña Jesosaja epeejji quea pame nee canequi tiitiiꞌyahua quea pame nee” poani Eyacuiñajji —jamaya ma esohuidojojji poanaje. 
\s1 Jesosaja esohui ecuanajaya eshajjaꞌajjajji 
\p  
\v 12 Majoya Jesosa enijje mimi oꞌoyanaje jama baꞌa: —¡Bacue oe! Quijje pishana eya meshi yasijje poeje oꞌoya. Poe majje eyaya ojjaña sosequiajeꞌyo, onajaya ebaꞌejji sosejje. Ojjaña quea mimishi poani aje oe quea nee nee po meejeꞌyo. Ojjaña quea pame baꞌenaje ca ca quea bihui nee nee po meejeꞌyo, eyaya.  
\v 13 Yahuajo nei ojjaña pana jjimahuajo eya yania tii tiia poa. Quijje ojjaña meshijo chamaꞌyo tii poajo eya ani tiitiijeꞌyo.  
\v 14 Ojjaña ecuea epeejji cuana quea boejea, daqui quea boejea jayojja quea bihui nee poaje. Oya cuana acuijjajja ebaꞌe tiitii meeꞌyojji ijjia meeje. Eyacuiñajjija cuiñajji eyacua huasijje dobiqui meejeꞌyo esecuejje.  
\v 15 Ojjaña joya quea mimishi poani epoquijji pojjeama eyahuasijje Eyacuiñajji ani yasijje. Oya cuana iñahuehua jayojja jama quea tai, quea mase; jjajiojji cuiaquijji cuana, pea cojjojji cuana, jjaquecuaquijji cuana peaꞌai, eshahuaja epeejji cuana peaꞌai, siajjepojji cuana pea ai, siajje po majje quea bihui nee poani cuana peaꞌai —Jesosa poanaje. 
\p  
\v 16 —Eyaya, Jesosaa huoojeanaje ecuea esohuidojojji miquiana que ecuea esohui huohuiya. Eꞌe, ohuaya miquiana nijjeya huohui caje ecuea esohui ecuea esohui huohuijji cuana huasijje Asia meshijo baꞌeca huasijje. Jodio cuanaja etiiquiana Dabi yahuajo nei Jodio cuanaja emeshi mese poa. Eya ca ca iña Dabija osecua poani. Eꞌe, eya, Jesosa oe nei quea jaꞌa nee nee nequi, eshequi huiyejji majameta jayojja —Jesosa poanaje. 
\p  
\v 17 Eꞌe, eya, Huani jama poani baꞌa: —Edojjoshahua Pameya ojjaña iyaa cani Jesosa nijje ejjapeequiꞌyojji. Jesosaja epeejji cuana ojjaña nijje mimiani jama baꞌa: “¡Poecue ojjaña, Jesosa nijje jjapeequicue!” 
\p Jamajjeya shajjaꞌajja majje ojjaña huohuicue jama baꞌa: “¡Ojjaña poecue, Jesosa nijje jjapeequicue!” 
\p ¡Ojjaña quea naba taja nee nee jayojja poecue Jesosa que! Eꞌe, baꞌe tii tii sa poanijo ¡poecue Jesosa que! ¡Ena ebaꞌe tiitiiꞌyojji ishihuacue sosemaꞌ! Jesosaja esohui cuana ena ebaꞌe tiitiijji jayojjaya. 
\p  
\v 18 Eyaya, Huaniya miquianaya esohui huohuiaña jama baꞌa: Jiquio Jesosaja esohui shajjaꞌajja majje jama acue baꞌa: ¡Pea esohui eꞌe nei pojjeama aꞌa huohuijji! Pea esohui eꞌe nei pojjeama miya huohuiajo Eyacuiñajjiya quea nee nee tii tii po mee cajeꞌyo. Eꞌe, esohuidojojji cuanaja aquiana quea nee nee epo meejjiya miquianaya quea nee nee po mee cajeꞌyo.  
\v 19 Jiquio Jesosaja esohui jayojja jama huohui sa po ajja shajjamaꞌ poanijo Eyacuiñajjiya ma shajjamaꞌ cuana cajaa acajeꞌyo. Jamajoya shajjamaꞌ cuana ebaꞌe tiitii meeꞌyojji pojjeama Jesosa nijje. Eꞌe, ma acuijjajja ebaꞌe tiitii meeꞌyojji ijjia mee jjima acajeꞌyo. Eyacuiñajjija cuiñajji quea pame nee yasijje dobi meequi jjima acajeꞌyo. Jiquio esohui esohuidojojjiya huohui cajo eyaya tehueꞌyonaje. 
\p  
\v 20 Eꞌe, Jesosa Quitohua ojjaña jiquio esohui etehueꞌyo cuana huohui canaje. Ohuaya huohui cani jama baꞌa: —¡Eꞌe jojo nei eya quijje pishana poeje oꞌoya! 
\p  
\v 21 Eꞌe, ¡jamaya capoeꞌyahua! ¡Jesosaa ojjaña Eyacuiñajjija epeejji cuana cajaahuana cahua quea pame nee! 
\p Mahuiso Jesosaa jjanequipana meequi canaje ecuea ebajji ojjaña ohua acaje quijje. Eya, Huani jiquio esohui tehuenaje. Apoa.