\id MRK - Ese Ejja NT -Bolivia 2012 (DBL -2013) 
\h MACOSO 
\toc1 Macosohua Esohui Quea Pame Nee Tehue Canaje Jesosa Quitoja 
\toc2 Macoso 
\toc3 Mr 
\mt2 MACOSOHUA ESOHUI QUEA PAME NEE TEHUE CANAJE JESOSA QUITOJA 
\mt1 MARCOS 
\c 1  
\s1 Huaniya, ma ona besameejji poaniya esohui huohui canaje Jesosa Quitoja 
\r (Mateo 3.1-12; Noca 3.1-9, 15-17; Huani 1.19-28) 
\p  
\v 1 Eyaya, Macoso bajjaniya esohui quea pame nee tehueaña Jesosa Quitoja, Eyacuiñajjija Bacua Ejjaja, ojjañaja ebajji. Jamaya poanaje baꞌa: 
\p  
\v 2 Yahuajo nei nei ecuanaja etiiquiana Isaia bajjani Eyacuiñajjija esohui huohuijji poa. Eyacuiñajjija Bacua Ejja Jesosa Quitojo Isaiaa tehue ca poa Eyacuiñajjija esohui. Eꞌe, Eyacuiñajjiya oja Bacua Ejja jama aca poa baꞌa: 
\q1 “¡Shajjaꞌajjacue! Eyaya ecuea esohui huohuijji huoojeaje mi huoojea jjimahuajo. Ohuaya miquea ejiojji shabojea caje.  
\v 3 Eꞌe, oya quimajo, meshi jabojo nequi taaanequije. Jama poaje baꞌa: —¡Jiquio ecua emeshi cuiñajji nei neija ejiojji shabojea cani jama, quea pojje nee nee acani jayojja jamaya miquea ejjashahuabaquijji tai quea boejea nee nee aꞌyocue! Emeshi Mese nei poeje. ¡Jamajjeya oe apoa pocuajicue!” 
\m Jamaya Isaiaa yahuajo nei nei tehue ca poa Jesosajo. 
\p  
\v 4 Jamajjeya Isaiaja esohui jayojjaya Huaniya, ma ona besameejji poaniya, meshi quimajo aniya esohui quea bihui nee Jesosajo huohui canaje. Jama acanaje baꞌa: —¡Miquea mimishijo quea yeno pocue! ¡Mimishi jja oe pajeaꞌyocue! Eꞌe, jamaya poajo, Eyacuiñajjiya miquea mimishi cuana cuijea cajeꞌyo. Jamajjeya eyaya miya besa meeje ojjañaja ebajji miya Eyacuiñajjija epeejji poꞌyonaje —acanaje Huaniya. 
\p  
\v 5 Quea huiso nee nee cuana Jenosanena cuiñajjijo baꞌeca, ojjaña Jodea meshijo baꞌeca peaꞌai poquinaje Jodana cuei yasijje Huani baa. Huani shajjaꞌajja majje oya cuana quea yeno nee poanaje ojaya mimishijo. Miminaje Eyacuiñajji nijje. Ojaya mimishi huohui canaje. Majoya Huaniya oya cuana besa mee canaje Jodana enajo, Eyacuiñajjija epeejji epojji. 
\p  
\v 6 Huaniya huo ña, cameno ña oja sipi huosho canaje. Ejjayiicaꞌaquijji ejee iya canaje. Shacui ijjia canaje, huini peaꞌai ishi canaje, Huaniya.  
\v 7 Ohuaya huohui canaje jama baꞌa: —Quijje pishana poeje Jesosa Quito. Oya oe nei quea caꞌa nee nee nequi. Eya ca iña quea caꞌa pishana nequi. Jamajjeya eya ca iña onijje nequi sa po ajja miquiana que cojja. Quea bicho.  
\v 8 Eyaya miquianaya Eyacuiñajjijo besa meeaña enajo. Poe majje ohuaya, Jesosa Quitohua miquiana que Eyacuiñajjija Edojjoshahua Pame dobiqui mee cajeꞌyo. Jamajjeya miquianaya quea pame nee poajeꞌyo —acanaje Huaniya ojjaña. 
\s1 Huaniya Jesosa besa mee canaje Eyacuiñajjija esohui jayojja jama epoꞌyojji 
\r (Mateo 3.13–4.11; Noca 3.21-22) 
\p  
\v 9 Majoya Huaniya Jodana cuei sahuajo sohuihuohui canijo tii, Jesosa Janinea meshijo baꞌenaje, Nasanena cuiñajjijo. Macua huasijje poꞌoquenaje Huani que. Huani jama acanaje baꞌa: —Huani, ¡eya besa meecue Eyacuiñajjijo, miyaya! Jamajjeya Huaniya Jesosa besa mee canaje Eyacuiñajjijo Jodana enajo.  
\v 10 Huaniya Jesosa besa mee majje, jjequicuaya caꞌyajje ba canaje eyatahuatahua caꞌapejo caje. Eyacuiñajjija Edojjoshahua Pame huiaꞌ jama Jesosa sapa biajje cuabesa baꞌenaje. Ecapashi nei baꞌeoquenaje.  
\v 11 Eyacuiñajjiya eyajo aniya oja Bacua Ejja jama acanaje baꞌa: —Miya ecue Bacua Ejja quea jea nee nee. Eya mijo quea bihui nee nee poani. 
\s1 Jesosa mimishi po mee sa acanaje Edosiquiaa 
\r (Mateo 4.1-11; Noca 4.1-13) 
\p  
\v 12 Jjeyahua nei Edojjoshahua Pameya Jesosa quima huasijje, meshi jabo huasijje huoojea canaje.  
\v 13 Jesosa jomajo nequinaje peaja ejiojji huiso cahuime, 40 cahuime. Mahuiso epojja cuana, mecajje cuana peaꞌai aninaje. Oe nei nei aninaje. Ijjiacajji quea mase cuana jomajo nequinaje peaꞌai. Edosiquiana aje Jesosa que poeyanaje. Quea mimishi epo meejji nisho acanaje. Majoya Eyacuiñajjija esohuidojojji cuana quea huiso poeyanaje Jesosa bobiaa. 
\s1 Jesosaa sohuihuohui canaje Janinea meshijo, Eyacuiñajji ba po jjimaja meshijo 
\r (Mateo 4.12-17; Noca 4.14-15) 
\p  
\v 14 Majoya pea cuaa Huani, ma ona besameejji poani iña canaje; equi ejjajeanobiaquijji yasijje jeanobiajea canaje. Jamajjeya Jesosa posohuaquinaje Janinea meshi yasijje. Eyacuiñajjija esohui quea pame nee huohui canaje.  
\v 15 Jama poanaje baꞌa: —Jjeyahua nei Eyacuiñajji miquea Emeshi Mese nei poaje. ¡Jamajjeya miquea mimishijo quea yeno pocue! ¡Mimishi cuana pajeaꞌyocue miquiaaya! ¡Ecuea esohui quea pame shajjaꞌajjacue! Eꞌe, enijje jjapeequiajo, eyaya miya baꞌe tiitii meejeꞌyo enijje —Jesosaa huohui tiitii canaje. 
\s1 Jesosaa nahuoo cuiashajajji iyaa canaje onijje epoꞌyojji 
\r (Mateo 4.18-22; Noca 5.1-11) 
\p  
\v 16 Majoya Jesosa poquinaje Janinea bae ai sahua huasijje. Jomajo ohuaya Anesi, Anesija oꞌi Peno bajjani, Simohui peaꞌai bajjani ba canaje. Oya cuana nahuoo cuiashajajji nei nei bajio. Nahuoo cuiashaja poequi.  
\v 17 Jesosaa oya cuana iyaa canaje: —¡Enijje poꞌyocue! Eyaya miya dejja cuana jjequi meesahuaꞌyojji ajeꞌyo e que. 
\p  
\v 18 Jjeyahua nei nei oya cuana ojaya eshajajji cuana jeanaꞌyo majje onijje poquiꞌyonaje. 
\p  
\v 19 Majoya Jesosaa poqui pishana majje pea cuana ba canaje. Semeneoja bacua ejja Jacobo ba canaje oja chahua mese nijje, Huani nijje bishe aijo eshajajji jeꞌeꞌyo poꞌani oja chii nijje.  
\v 20 Jjeyahua nei Jesosaa oya cuana iyaa canaje. Jamajjeya Jesosaa iyaa cajje oja chii Semeneo bajjani echacojji cuana nijje bishejo ani tii jiña caꞌyonaje cuaa, Jesosa nijje epoquiꞌyojji. 
\s1 Dejja niñepoqui 
\r (Noca 4.31-37) 
\p  
\v 21 Majoya quijje pishana Jesosa o shajjaꞌajjajji nijje posohuaquinaje Capenaoma cuiñajji yasijje. Epojja ejomishocajjijo oya cuana poquinaje Jodio cuanaja equi ojee ejjachichaquijji yasijje. Dobiqui majje Jesosaa ojjaña jomajo ani sohuihuohui canaje.  
\v 22 O shajjaꞌajja majje ojjaña cuana jama poanaje baꞌa: —¡De! Ohuaya Jesosaa esohui huohui cani quea jaꞌa nee. Huohui cani emeshi mese jayojja jamaa quea jaꞌa nee nee. Moisesija esohui etehueꞌyo huohuijjiya quea jaꞌa pishana esohui huohui cani, de. ¡Cashajjaꞌajjaꞌyahua Jesosa! —poanaje ojjaña cuana. 
\p  
\v 23 Jjeyahua nei dejja niñepoqui dobinaje ma equi yasijje.  
\v 24 Jesosa ba majje eshahua o niñepoqui meejji poani siasianaje jama baꞌa: —Jesosa, Nasanenajo baꞌe, ¿apiojji miya poeyanaje ecuana que ecuana quea nee nee po meeya? Ecuanaja eba miya Eyacuiñajjija Bacua Ejja quea pame nee. ¡Aꞌa jjeyahua nei ecuana cuaqui yasijje jeajeajji! Eyacuiñajjiya eshahua cuana cuaqui yasijje huoojeajea cajeꞌyo quijje, jjeya nei pojjeama, de —taaame poanaje eshahua. 
\p  
\v 25 Jamajjeya Jesosaa eshahua, o niñepoqui meejji poani huoojeacuayajea caꞌyonaje: —Eshahua, ¡aꞌa mimijji! ¡Cuayaquiꞌyocue oe, jiquio dejjajo nequi! —Jesosaa acanaje. 
\p  
\v 26 Jesosa mimi jeahuajo, eshahuaa o niñepoqui meejji poaniya dejja jjequiꞌihui mee majje, siasia mee majje cuayaquinananaje. Dejja jea canaꞌyonaje.  
\v 27 Ba majje ojjaña cuana quea mete nee nee poanaje. Ojee miminaje jama baꞌa: —¡De! ¿Yajja shai poani? Jamaya yahuajo ecuanaja ba jjima, de. Jesosaa quea jaꞌa nee huohui cani emeshi mese jamaa, oya quea sohui poja nee nee. Ojaya esohui shajjaꞌajja cani eshahuaa. Oja sohui jayojja jama acani, de —poanaje ojjaña. 
\p  
\v 28 Jjeyahua nei ojjañaa Janinea meshijo baꞌecaa shajjaꞌajja canaje Jesosajo. Jama poanaje baꞌa: —Jesosaa quea jaꞌa nee ojjaña acani. Oya Eyacuiñajjija huoojeaꞌyo ojjaña jaahuanajji eꞌe jojo nei —ojjaña poanaje. 
\s1 Jesosaa Simohuija yano mese huaquia mee caꞌyonaje 
\r (Mateo 8.14-15; Noca 4.38-41) 
\p  
\v 29 Jesosa Jodio cuanaja equi ojee ejjachichaquijjijo nequi cuayaquiꞌyo majje poquinaje Simohuija equi yasijje, Anesija peaꞌai equi yasijje. Dobiquinaje Jacobo nijje, Huani peaꞌai nijje.  
\v 30 Simohuija ano quea quiyo nee jaa. Jamajjeya Jesosa huohui canaje jama baꞌa: —Jesosa, ecue ano, ecue huanaseja enaese quea quiyo nee nee jaa, quea mano, de —Simohui Peno poanaje. 
\p  
\v 31 Jamajjeya Jesosa o que poquinaje. Emanojaa ba canaje. Napaꞌajja canaje emeya. Me napaꞌajja cajje, boe cananaꞌyonaje. Jamajjeya me iña majje jjequisohua canaje Jesosaa. Majoya ohuaya, Simohuija anohua, bobi ojjaña huasijje jjequi canaje. 
\s1 Jesosaa quea huiso emanojaaca cuana jjaajaqui mee caꞌyonaje 
\r (Mateo 8.16-17; Noca 4.40-41) 
\p  
\v 32 Majoya sinecua neijo, eshequi eꞌoquequiajo, dejja cuaa quea huiso emanojaa cuana, niñepoqui cuana peaꞌai Jesosa que jjequi canaje ejjaajaqui meeꞌyojji.  
\v 33 Ojjaña jiquio cuiñajjijo baꞌeca Jesosa que jjachichaquinaje Simohuija equi yasijje.  
\v 34 Jesosaa ojjaña emanojaa jjaajaqui mee caꞌyonaje, huaquia mee caꞌyonaje peaꞌai. Eshahua cuana huoojeacuayajea caꞌyonaje peaꞌai. Eshahua cuana, o ebajo, jama acanaje Jesosaa baꞌa: —Eya miquianajaya ebajo ¡aꞌa mimijji! Eya Eyacuiñajjija huoojeaꞌyo ojjaña jaahuanajji, oja Bacua Ejja ¡aꞌa pea cuana huohuijji! —poanaje Jesosa. 
\s1 Jesosaa esohui huohui ca oꞌoyanaje Janinea meshijo 
\r (Noca 4.42-44) 
\p  
\v 35 Mecajjeahua nei, eshequi jjajaꞌaꞌajjaqui jjimahuajo, Jesosa shequi majje cuiñajji esecue yasijje poquinaje dejjama huasijje. Jocuama oya miminaje Eyacuiñajji nijje, oja chii nijje.  
\v 36 Jamajjeya shequi majje pea cuaa Simohui nijjeya oya saꞌajjaqui canaje.  
\v 37 O ba majje jama poanaje baꞌa: —Jesosa, ojjañaa miya saꞌajja caqui —poanaje. 
\p  
\v 38 Jamajjeya Jesosaa oya cuana jama acanaje baꞌa: —¡Cuaꞌa, enijje poquicue pea cuiñajji cuana huasijje! Eyacuiñajjiya eya huoojea canaje pea cuiñajji yasijje ojaya esohui jocuama huohuiya peaꞌai. 
\p  
\v 39 Jamajojoya Jesosa Janinea meshijo ojjea poquinaje ojjaña cuiñajji cuana huasijje. Ojjaña Jodioja equi ejjachichaquijji yasijje dobiquinaje; esohui huohui canaje. Eshahua cuana huoojeacuayajea caꞌyonaje peaꞌai. 
\s1 Dejja batata epoꞌyo, ma dejjaa shicui jjima acani jjajea meequi caꞌyonaje Jesosaa 
\r (Mateo 8.1-4; Noca 5.12-16) 
\p  
\v 40 Majoya oe dejja quea mano nee batata epoꞌyo poeyanaje Jesosa que. Ecuiꞌoshajjajo nequinaje o bihuiajji. Onijje miminaje jama baꞌa: —Jesosa, ecuea eba miya jjajea meequiꞌyojji nei nei poani. Jamajjeya miyaya jjajeaqui meeꞌyo sa amajje ¡mo che jjajeaqui meeꞌyocue! —poanaje. 
\p  
\v 41 Jesosa ma dejja quea mano ba majje quea yeno poanaje. Oya napaꞌajja canaje emeya. Jama poanaje baꞌa: —Eꞌe, eyaya miya jjajeaqui meejeꞌyo. ¡Jjajeaquiꞌyocue, miya! —Jesosaa acanaje. 
\p  
\v 42 Jjajeaquinanaꞌyonaje jjeya nei. Quea pame nee poꞌyonaje.  
\v 43-44 Jamajjeya Jesosaa oya huohui canaje jama baꞌa: —¡Shajjaꞌajjacue mo! Eyaya miya jjajeaqui meeꞌyonaje. ¡Jamatii aꞌa oe jjeya huohuipojji ecue jjajeaqui meeꞌyo! ¡Poquicuajicue Jenosanena huasijje, Eyacuiñajjija equi yasijje, ma onajo Eyacuiñajji nijje mimiani yasijje! Oya huohuicue jama baꞌa: “Eya jjajeaquiꞌyonaje” acue. ¡Moisesija sohui jayojja jama oe pocue peaꞌai! Miya ehuaquiaꞌyohua jjejojoya ¡Eyacuiñajji nijje mimiani yasijje beca huiaꞌ quiaquicue Eyacuiñajji bihuiajji! Jamajjeya ojjañaa ba caje miya eꞌe jojo nei ejjajeaquiꞌyo —oya acanaje Jesosaa.  
\v 45 Jamatii poqui majje huohui canaje ojjaña huasijje jama baꞌa: —¡Jesosaa eya jjajeaqui mee caꞌyonaje de, huaquia mee caꞌyonaje jjeya nei! 
\p Jamajoya dejja quea huiso nee nee nee o ba sa poanaje, ejjaajaquiꞌyojji. Quea huiso nee nee jjachichaqui majje Jesosa cuiñajji cuana huasijje dobiqui mee jjima acanaje. Oya quimajo nequinaje. Quea huiso nee nee o que poeyanaje, ojjaña huapajje aequiana poeyanaje o baa. 
\c 2  
\s1 Quibojjisha quea mano nee nee jaa jeo mee caꞌyonaje 
\r (Mateo 9.1-8; Noca 5.17-26) 
\p  
\v 1 Majoya quijje pishana Jesosa Capenaoma huasijje poe oꞌoyanaje. Jamajjeya pea cuaa jomajo nequiya huohui canaje jama baꞌa: —Jesosa poeꞌyonaje ojaya equi yasijje. ¡Cuaꞌa, ejjabaquiqui!  
\v 2 Jamajjeya quea huiso nee nee jjachichaquinaje ojaya equi yasijje. Dobiqui mee ajja quea dejja huisojojo. Esecuejo nequinaje; equi shajjaquibojo aequiana nequi canaje peaꞌai. Jesosaa oya cuana Eyacuiñajjija esohui huohui canaje.  
\v 3 Majoya pea dejja cuaa, ebeca pee peaꞌaiya, quibojjisha quea mano nee nee equipajaajjijo jaa sejjaiña majje Jesosa que dojo canaje.  
\v 4 O que poe meemee ajja, quea huiso equijo ejjachichaqui nequijojo. Jamajjeya oya cuanaa equi biajjejje quibojjisha dojosohuaqui canaje. Equi huejja caꞌyonaje. Huejjajje equipajaajji ecapashinei jeaoquea caꞌyonaje jjonojo.  
\v 5 Ma ba majje Jesosa jjashahuabaquinaje jama baꞌa: —Eꞌe, jiquio dejja cuana jjashahuabaquiani eya ejjaajaquimeeꞌyojji nei nei poani. 
\p Jamajjeya quibojjisha nijje jama poanaje baꞌa: —Cha, ¡quea bihui nee pocue! Eyaya miquea mimishi cuana cuijeaꞌyonaje. 
\p  
\v 6 Jesosaja esohui shajjaajja majje Moisesija etehueꞌyo huohuijji poani jomajo ani quenequenenaje. Jesosa Eyacuiñajjija Bacua pojjeama posojo jjashahuaba taiquinaje jama baꞌa:  
\v 7 —¡De! Jiquio oya Eyacuiñajji pojjeama. ¿Apiojji Eyacuiñajji jayojja jama nei nei mimiani, de? Jamaya quea mimishi. ¿Aꞌa acuae ohuaya mimishi cuijea mee cajeꞌyo jjabaquiani? Chojja, Eyacuiñajji oe nei mimishi cuijeaꞌyojji poani —poanaje Jodio etii cuana, Jesosa Eyacuiñajjija Bacua Ejja pojjeama poso acanaje. 
\p  
\v 8 Jamajjeya Jesosa Jodio etiija ejjashahuaba taiquijji ba majje jama poanaje baꞌa: —¿Yajjajje acuae nequiana enijje quea quene poani soꞌo?  
\v 9 ¿Ache shai quibojjishajo quea camaja eyaya ajeꞌyo? ¿Aꞌa ojaya mimishi cuijeaꞌyojji quea camaja? ¿Aꞌa jja eyaya oya nequisohua meejeꞌyo? Baꞌajja —Jesosa poanaje—.  
\v 10 Jamajjeya eyaya ojjañaja Edoe Meseya miquianaya ba meeaña eya ca ca iña Emeshi Mese nei quea caꞌa nee nee nequi. Jamajjeya eyaya mimishi cuijeajeꞌyo nequianaja. 
\p  
\v 11 Majoya Jesosaa quibojjisha acanaje: —¡Nequisohuacue! ¡Miquea equipajaajji bebo majje miquea equi yasijje poquicue! 
\p  
\v 12 Jjeya nei quibojjisha nequisohua majje jeoꞌyonaje. Equipajaajji bebo canaje. Jeojeopoquiꞌyonaje oja equi yasijje. Jamajjeya ba majje ojjaña cuana quea bihui nee nee poanaje. Eyacuiñajji bihuia canaje jama baꞌa: —¡Eꞌe nei, joya quibojjisha jeoꞌyonaje jjeya nei! ¡Eꞌe, e, Eyacuiñajjiya Jesosa quea caꞌa nee po mee cani; emanojaa cuana huaquia mee caꞌyani! ¡Mimishi cuijea mee caꞌyani peaꞌai! 
\s1 Jesosaa Mateo pea bajjani Nemi iyaa canaje onijje epoꞌyojji 
\r (Mateo 9.9-13; Noca 5.27-32) 
\p  
\v 13 Majoya Jesosa poqui oꞌoyanaje meshijaji yasijje, bae sahua huasijje. Quea huiso nee nee o que poeyajo, oya cuana Eyacuiñajjija esohui huohui canaje.  
\v 14 Majoya Jesosaa poquijeya Apeoja bacua ejja Mateo ba canaje, ma Nemi peaꞌai bajjani. Oya yaninaje equi ejjeshejji jaahuanajjijo, ojjañaja emeshi meseja esohuijo jjeshe mee cani dejja cuana ebaꞌejji sosejje. Oya bejjo jjeshejji poani. Ba majje Jesosaa oya iyaa canaje: —Nemi, ¡enijje poꞌyocue! 
\p Jamajje Nemi nequisohua majje Jesosa nijje poquiꞌyonaje.  
\v 15 Majoya Nemiya Jesosa iyaa canaje ojaya equi yasijje ijjiaꞌijjiaa. Jamajjeya Jesosa o shajjaꞌajjajji cuana nijje Nemija equi yasijje poquinaje ijjiaꞌijjiaa. Quea huiso dejja cuana Nemi jama bejjo jjeshejji poani, dejja mimishi cuana peaꞌai poquinaje. Ojee ijjiaꞌijjia aninaje Jesosa nijje, Jesosa shajjaꞌajjajji cuana nijje peaꞌai.  
\v 16 Jesosa ma dejja mimishi cuana nijje ijjiaꞌijjia ani ba majje Jodio esohui huohuijji Paniseo cuana bajjani, Moisesija esohui etehueꞌyo huohuijji cuana peaꞌai quea quene poanaje. Jesosa shajjaꞌajjajji cuana nijje mimijajinaje jama baꞌa: —¿Apiojji miquea esohui huohuijji ijjiaꞌijjiani bejjo jjeshejji cuana nijje, dejja mimishi nijje peaꞌai? ¿Apiojji, de? 
\p  
\v 17 Jesosaa oya cuana shajjaꞌajja canaje. Huohui canaje jama baꞌa: —¿Aꞌa dejja cuana quea mano pojjeama eshicuijji quia sa poani? Quea mano poanijo ca ca eshicuijji quia cajji. Oya jayojja eya dejja quea mimishi nijje jjapeequiani quea jaꞌa nee epo meeꞌyojji. ¡Bacue! Beca cuana jama poani baꞌa: “Eya ca ca iña quea pame nee, mimishiꞌama nei nei” poso jjabaquiani. Jamajjeya ma dejja cuana ecuea eꞌiyaajji pojjeama enijje ejjapeequiꞌyojji. Chojja, eya poeyanaje dejja quea mimishi iyaaa, mimishi pajea meeꞌyojji. 
\s1 Bobi ijjia ajjajo huohuiꞌajja canaje cuaa 
\r (Mateo 9.14-17; Noca 5.33-39) 
\p  
\v 18 Majoya Huani, ma ona besameejji poani, jeanobiajea canaje cuaa. Jamajjeya Jodio etiiquianaja esohui jama poanijo o shajjaꞌajjajji cuanaa bobi ijjia jjima aninaje Eyacuiñajjijo ejjashahuabaquijji, onijje emimijji peaꞌai. Jamaya Paniseo shajjaꞌajjajji cuana poa peaꞌai. Jamajjeya beca cuana Jesosa que poeyanaje. Jama huohuiꞌajjame acanaje baꞌa: —Jesosa, ecuana, Paniseo cuana peaꞌai, Jodio etiiquianaja esohui jama poanijo bobi ijjia ajja Eyacuiñajjijo ejjashahuaba neineiquijji. ¿Apiojji acuae mi shajjaꞌajjajji poani jama po ajja? —poanaje; beshahua nei tecuea canaje. 
\p  
\v 19 Jesosaa oya cuana acanaje jama baꞌa: —Chojja, ¡eya ecuea epeejji cuana nijje yanijo, caꞌijjia cahua! Ma jayojja jama baꞌa: Ejjahuanaquijjijo yahueja epeejji cuana onijje yanijo caꞌijjia cahua quea bihui nee. ¿Aꞌa yahueja epeejji cuana onijje yanijo quea yeno? Chojja, quea bihui nee.  
\v 20 Yahue poquiꞌyajo ca ca oe ojaya epeejji cuana ijjiaꞌijjia sa po ajja poaje. Quea yeno jjejojo jjashahuaba neineiquiani. Eya jiquio ecua yahue jama poani: Quijje eya poquiꞌyajo, ecuea epeejji cuana ijjiaꞌijjia ajja poaje, Eyacuiñajjijo ejjashahuaba neineiquijji, onijje emimi neineijji peaꞌai. 
\p  
\v 21 Majoya Jesosaa huohui canaje pea ejjashahuabaquimeejji: —Eseyaya baacojja eseeꞌyohua bishe eyacuajo caca ajja. Cho. Baacojja etii enajo nequi seeꞌyani, caꞌaꞌama poꞌyani. Jjasajajeaquijeꞌyo. Bishe ihuijeꞌyo. Bishe eyacuajo ca ca baacojja eyacuaa cacaña. 
\p  
\v 22 Pea esohui huohui canaje jama baꞌa: —Ena sese cuatatanijo iya ajja meshimisi etiijo. Ena sese cuatata neineianijo, meshimisi caꞌaꞌama jjaajajeaqui majje ena sese jjashojeajeaquijeꞌyo. Cho, ena sese cuatatanijo meshimisi eyacua quea caꞌajo iya cani cuaa —jamaya Jesosaa huohui canaje ejjashahuaba meequijji onijje jjapeequi majje eyacua cabaꞌyahua, yahuajo jama pojjeama, etiiquianaja esohui jama pojjeama. 
\s1 Esohui epojja ejomishocajjijo 
\r (Mateo 12.1-8; Noca 6.1-6) 
\p  
\v 23 Majoya Jodioja epojja ejomishocajjijo Jesosa o shajjaꞌajjajji cuana nijje ejiojjijje poquinaje. Que yiyejje poquije quea shoe poanaje. Quejo nequi anoso ai sejja canana majje oe pojji ijjia canaje, o shajjaꞌajjajjiya.  
\v 24 Maya Paniseo cuaa ba canaje. Jamajjeya Jesosa nijje mimijajinaje jama baꞌa: —¡Bacue oe! Mi shajjaꞌajjajji poani cuaa chaco cani. Anoso ai sejja cani esejaya epojja ejomishocajjijo. Esejaya etiiquiana Moisesija etehueꞌyo jama poani baꞌa: “¡Aꞌa chacojji epojja ejomishocajjijo!” 
\p  
\v 25 Jesosaa oya cuana acanaje jama baꞌa: —¿Aꞌa miquea ba jjima esohui etehueꞌyo emeshi mese Dabija, ojaya epeejji cuanaja peaꞌai?  
\v 26 Yahuajo nei nei Abiata Eyacuiñajji nijje emimijji etii poanijo, Dabija epeejji cuana quea shoe nee po majje Dabi Eyacuiñajjija equi yasijje dobiquia poa. Ijjia ca poa pahui, maya Eyacuiñajji yasijje quia ca poa cuaa o bihuiajji. Ojaya epeejji cuana ijjia mee ca poa peaꞌai. Jiquio ca oe Eyacuiñajji nijje mimianiya caꞌijjia cahua; pea cuanaja eꞌijjiajji pojjeama. 
\p  
\v 27 Majoya Jesosa ojjaña nijje jama poanaje baꞌa: —Dejja, epona peaꞌai pana majje Eyacuiñajjiya oe epojja ejomishocajji acaꞌyonaje dejja cuana jomishocajji. Aꞌa jjashahuabaquijji jama baꞌa: “Epojja ejomishocajjijo eya jamatii anije”. ¡Cho, quea pame nee acue ma pojjajo! —Jesosa poanaje—.  
\v 28 Eya, ma ojjañaja Edoe Mese Emeshi Mese nei poani. Jamajjeya eyaya eyaye nei huohuije epojja ejomishocajjijo: ¡Quea pame nee nee acue! ¡Pea cuana quea jea nee acue! —Jesosa poanaje. 
\c 3  
\s1 Meshahuamaꞌyo epo jjameshahuanequi mee caꞌyonaje 
\r (Mateo 12.9-14; Noca 6.6-11) 
\p  
\v 1 Majoya Jesosa Jodioja equi ejjachichaquijji yasijje poqui oꞌoya majje dobiquinaje. Jomajo dejja meshahuamaꞌyo epo aninaje.  
\v 2 Jamajjeya Jesosa ba majje Paniseo cuana jama jjashahuabaquinaje baꞌa: —Esejaya etiiquiana jama poani baꞌa: “¡Aꞌa chacojji epojja ejomishocajjijo!” poani. Eꞌe pojjaꞌa Jesosa esejaya etiiquianaja esohui jama poaje, chaco ajja pojjaꞌa jjeya. Eꞌe pojjaꞌa oya chaco caje jjeya, epojja ejomishocajjijo; meshahuamaꞌyo epo pojjaꞌa jjameshahuanequi mee cajeꞌyo. ¡Cabaꞌajja sahua! —poanaje. 
\p Jesosa nijje mimijaji sa poanaje. Jamajjeya oya ba neinei canaje Paniseo cuaa. 
\p  
\v 3 Jamajjeya Jesosaa meshahuamaꞌyo epo iyaa canaje jama baꞌa: —¡Poecue e que! ¡Ojjaña cojja nei nequicue, eyiyesama neijo! 
\p  
\v 4 Majoya oya nequisohuajo, Jesosa esohui jaahuanajji nijje, Paniseo cuana nijje jama poanaje baꞌa: —¿Yajja poani etiiquiana Moisesija esohui etehueꞌyo? ¿Aꞌa epojja ejomishocajjijo pea cuana quea pame acajji pojjaꞌa? ¿Aꞌa quea tai acajji pojjaꞌa? Jamajjeya ¿aꞌa emanojaa huaquia mee caꞌyojji epojja ejomishocajjijo? ¿Aꞌa mano mee cajji pojjaꞌa? —poanaje Jesosa. 
\p Jamatii Jesosa Paniseo cuanaja sajaꞌa jjima quea mimishi neija jjejojo. 
\p  
\v 5 Jamajjeya Jesosa ojjaña bajea majje quea quene nee nee poanaje. Ojjaña shajjamaꞌ poanijo oya quea yeno poanaje. Jamajjeya ohuaya meshahuamaꞌyo epo jama acanaje baꞌa: —¡Epeejji, miquea eme jeapisaꞌajjaꞌyo socue! —acanaje Jesosaa. 
\p Jamajjeya mejjajjaa emeꞌ jeapisa caꞌyonaje; pea mijijje jayojjaya poꞌyonaje.  
\v 6 Jjeya nei Paniseo cuana esecue yasijje cuayaqui majje pea Jodio etii cuana nijje miminaje, emeshi mese Enodeja epeejji cuana nijje peaꞌai. Jama poanaje baꞌa: —¿Yajja amajje Jesosa quecua caꞌyojji soꞌo, de? —poanaje Paniseo cuana. 
\s1 Dejja quea huiso bae sahuajo sohuihuohui canaje Jesosaa 
\r (Mateo 4.24; 12.15-16; Noca 6.17) 
\p  
\v 7 Majoya Jesosa o shajjaꞌajjajji cuana nijje poquinaje. Janinea bae sahua huasijje poe oꞌoyanaje. Quea huiso nee nee onijje poquinaje Janinea meshijo baꞌeca cuana, Jodio meshijo baꞌeca cuana,  
\v 8 Jenosanenajo baꞌeca cuana, Idomea meshijo baꞌeca cuana, Jodana cuei ojje mijijje baꞌeca cuana, Tinojo baꞌeca, Sinonojo baꞌeca cuana peaꞌai. Jesosaa jjaajaqui mee caꞌyoqui shajjaꞌajja majje o que poeyanaje quea huiso nee nee, de.  
\v 9 Jamajjeya Jesosaa o shajjaꞌajjajji cuana huoojea canaje bishe jjequiya. Jama poanaje baꞌa: —¡Bishe jjequicue! Quea huiso nee nee nequicaa quishi ca chanaꞌ cuaa mo. Jamajjeya eyaya bishejo nequi majje ojjaña cuana sohuihuohuije. 
\p  
\v 10 Eꞌe, yahuajo pishana Jesosaa quea huiso jjaajaqui mee caꞌyonaje. Jamajjeya quea huiso emano cuana Jesosa que jjachichaquinaje; mojoiya caꞌyonaje oja daqui napajji. Jama poanaje baꞌa: —Eꞌe, Jesosa daqui cuema napa majje jjaajaquijeꞌyo. 
\p  
\v 11 Jesosa ba majje eshahua cuana siasianaje. Niñepoqui cuana Jesosa cojja nei ecuiꞌoshajajo nequinaje o bihuiajji. Jama poanaje baꞌa: —Jesosa Quito, miya Eyacuiñajjija huoojeaꞌyo ojjaña jaahuanajji, oja Bacua Ejja quea pame nee —poanaje eshahua cuana. 
\p  
\v 12 Jamajjeya Jesosaa eshahua cuana tecueahuoojeacuayajea caꞌyonaje jama baꞌa: —¡Eshahua cuana, esohui oe caꞌacue! ¡Aꞌa ona huohuijji eya Eyacuiñajjija huoojeaꞌyo ojjaña jaahuanajji! —Jesosaa acanaje. 
\s1 Jesosaa o shajjaꞌajjajji cuana iyaa canaje 12 huisome 
\r (Mateo 10.1-4; Noca 6.12-16) 
\p  
\v 13 Majoya Jesosa jaasohuaquinaje eyiyo huasijje. Ojjaña ohua sa cani ohuaya iyaa canaje onijje epoquiꞌyojji. Jiquio dejja cuana o que poeyanaje.  
\v 14 Majoya ohuaya ome miji pea beca huisome, 12 huisome dejja babaca caꞌyonaje ojaya esohui huohuijji nei epojji. Oya cuana huohui canaje jama baꞌa: —Eyaya miquianaya babacanaje enijje eꞌanijji. Miquianaya huoojeaje ojjaña meshi yasijje ecuea esohui huohuiya. 
\p  
\v 15 Jesosaa oya cuana quea caꞌa po mee canaje eshahua cuana huoojeacuayajea meeꞌyojji, ojjaña emanojaa cuana huaquia meeꞌyojji, ejjaajaqui meeꞌyojji peaꞌai. 
\p  
\v 16 Jesosaja huoojeaꞌyo esohui huohuijji ma bajjani baꞌa: Simohui, ma pea bajjani Peno; oja chahua Anesi;  
\v 17 Semeneoja bacua ejja Jacobo, oja chahua Huani peaꞌai Jesosaa pea bajjani acaꞌyonaje Cueji bajjani, oja sohuijo ca ca Boaneje bajjani;  
\v 18 Penipe; Matonome; Tomasi; Mateo, ma bejjo jjeshejji poani; Apeoja bacua ejja Satiaco; Simoni Senote; Taneo;  
\v 19 Jodasa Isicaniote, ma Jesosa iña meesahuajji poanaje dejja mimishija quecuaꞌyojji. Mahuiso Jesosaa babaca canaje ojaya esohui huohuijji epojji. 
\s1 Jesosa niñeba canaje cuaa 
\r (Mateo 12.22-32; Noca 11.14-23; 12.10) 
\p  
\v 20 Majoya Jesosa eyiyojo ani equi yasijje jaaoque oꞌoyanaje o shajjaꞌajjajji nei cuana nijje. Quea huiso nee nee o que jjachichaqui oꞌoyanaje. Quea huiso nee neejo Jesosa, o shajjaꞌajjajji cuana peaꞌai, ijjiaꞌijjia mee jjima acanaje.  
\v 21 Ma shajjaꞌajja majje ojaya enaese poeyanaje oja chahua cuana nijje Jesosa nahueya, Jesosa dojohua peaꞌai. Eꞌe, onaaya Jesosa niñeba canaje jama baꞌa: —Oya Jesosa niñe poquinaje —siajje poanaje cuana. 
\p  
\v 22 Paniseo cuaa peaꞌai Jesosa niñeba canaje: —Eꞌe, Jesosa aje oe eyamiquecua pojjaꞌa. Ohuaya aje jja oe eshahua cuana huoojeacuayajea canaje Edosiquiana etii nijjeya, Satanasa bajjani, pea bajjani Meesemo nijjeya —poso acanaje Paniseo cuaa. 
\p  
\v 23 Paniseo cuanaja ejjashahuabaquiꞌyojji quea tai Jesosaja eba poanaje. Jamajjeya oya cuana tecuea canaje jama baꞌa: —¡Shajjaꞌajjacue oe! ¿Aꞌa acuae jja Edosiquiaa, Satanasaa pea eshahua huoojeacuayajea came?  
\v 24 Chojja. Joya emeshi mese shajjaꞌajja sa po ajjajo, jjacuiaquianijo, dejja cuana ma meshijo baꞌe chamaꞌyo tii poajeꞌyo. Cuiñajjijo baꞌe cuana jamaya po peaꞌaije, chamaꞌyo tii poajeꞌyo peaꞌai.  
\v 25 Huapa pojjeama cuana jjacuiaquianijo chamaꞌyo tii poajeꞌyo peaꞌai.  
\v 26 Jamaya peaꞌai Edosiquianaa, Satanasaa pea eshahua ehuoojeacuayaꞌyo jojjemo, chamaꞌyo tii poꞌyoqueaye —Jesosa poanaje—.  
\v 27 Cuanaya bacue baꞌa: ¿Aꞌa dejja quea caꞌa nee jeyo jjima nequijo oja aquiana sii cajji? Chojja, o jeyo majje ojaya aquiana cuana sii caje cuaa. Jiquio ecua eꞌaquiana mese ebionei jeyo cani jama amajje eyaya eshahua cuana jeacuayajeaña —Jesosa poanaje peaꞌai—.  
\v 28 Jamajjeya eyaya miya eꞌe jojo nei huohuiaña: Eyacuiñajjiya ojjaña mimishi cuana, siajjepojji cuana peaꞌai cuijea cajeꞌyo. Eꞌe, eya ojjañaja Edoe Mese niñeba cajo cuaa, Eyacuiñajjiya ma mimishi cuijea cajeꞌyo peaꞌai, ojjaña mimishi cuana ohuaya cuijea cajeꞌyo.  
\v 29 Jamatii Edojjoshahua Pamejo siajje poajo ca ca, Edojjoshahua Pame niñeba cajo ca ca, Eyacuiñajjija ma mimishi ecuijeaꞌyojji pojjeama tii tii. Jjeya ecuijeaꞌyojji pojjeama; quijje eya ecue Chii nijje eyajo ojjaña huoojeaꞌyojji poaje ecuijeaꞌyojji pojjeama tii tii poaje peaꞌai —Jesosa poanaje. 
\p  
\v 30 Yahuajo Paniseo cuana Edojjoshahua Pamejo siajje poanaje jama baꞌa: —Jesosaa Edosiquiana nijjeya aje oe eshahua cuana dejjajo ani huoojeacuayajea cani —jamaya siajje poanijo, Jesosaa oya cuana tecuea canaje. 
\s1 Jesosaja enaese, echahua mese cuana peaꞌai poeyanaje 
\r (Mateo 12.46-50; Noca 8.19-21) 
\p  
\v 31 Majoya Jesosa mimianijo tii, ojaya enaese, oja chahua cuana peaꞌai poeyanaje. Esecuejo nequinaje. Onaaya Jesosa huohui canaje jama baꞌa:  
\v 32 —Mique nae poeyanaje; esecuejo nequi, minijje emimijji —o pejjejo eꞌanioqueꞌaniya huohui canaje. 
\p  
\v 33 Jesosaa ojjaña ejjachichaquiꞌyo bajea majje jama acanaje baꞌa: —¿Ache acuae ecuea huapa pojjeama cuana soꞌo?  
\v 34 ¡Bacue! Jiquio ecuea epeejji cuana ecuea huapa pojjeama cuana jama ecuea quea jea nee nee, ecuea ecue nae quea jea aña jayojja jama.  
\v 35 Eꞌe, ecue Chii eyajo ani; ojjaña joya ojaya ejjashahuabaquiꞌyojji jayojja jama baꞌyani, ojaya esohuijo jjashajjaꞌajjaquiani peaꞌai ecuea huapa pojjeama, ecue chahua, ecue jjoꞌi, ecuea enaese peaꞌai —Jesosaa acanaje. 
\c 4  
\s1 Esoꞌ jeaajajji 
\r (Mateo 13.1-9; Noca 8.4-8) 
\p  
\v 1 Majoya Jesosa equijo ani cuayaquinaje. Bae sahua huasijje poqui majje anioquenaje. Majoya o que jjachichaquinaje dejja cuana quea huiso nee nee. Jamajjeya bishe yasijje nequisohuaqui majje anioquenaje esohui huohuiya. Dejja cuana ca ca meshijajijo aninaje.  
\v 2 Jesosaa oya cuana sohuihuohui canaje quea huiso nee nee. Pea esohui ebameesahuajji huohui canaje ona jjashahuabaquijji. Jama acanaje baꞌa:  
\v 3 —¡Bacue! Ebanajji poquinaje banaa.  
\v 4 Esoꞌ jeaaja canijo, oe pojji esoꞌ oquequinaje ejiojji yasijje. Poeyanaje cuichojji cuana; ijjia canaje esoꞌ.  
\v 5 Pea esoꞌ oquequinaje mei biajje. Meshi chamajo esoꞌ pohua cuajiꞌajjaꞌyonaje.  
\v 6 Quijje cuayanaje eshequi. Eshequi quea quiyo nee poajo, esoꞌ quiyomanoꞌyonaje. Esajja jocaꞌyajo manoꞌyonaje.  
\v 7 Pea esoꞌ oquequinaje acuisha huasijje. Pohuaꞌyo majje jjonohua bebo caꞌyonaje. Tatajo nequi jjajja ajja poanaje; manoꞌyonaje.  
\v 8 Pea esoꞌ ca ca oquequinaje meshi quea pame yasijje. Pohuaꞌyonaje esoꞌ cuana. Ejjajja quea pame nee nee poanaje. Oe esajo ejjajja iye huiso aninaje; pea esajo ejjajja quea huiso aninaje, pea esajo quea huiso nee nee aninaje. Sejja caꞌyonaje quea huiso nee.  
\v 9 ¡Jamajjeya ecuea esohui shajjaꞌajjacue! ¡Jjashahuabaquicue! —Jesosaa acanaje. 
\s1 Esohui ebameesahuajji Jesosaa sohuihuohui canaje ona jjashahuabaquijji 
\r (Mateo 13.10-17; Noca 8.9-10) 
\p  
\v 10 Quijje pea cuana o shajjaꞌajjajji cuana nijje poeyanaje Jesosa que. Huohuiꞌajja canaje jama baꞌa: —Jesosa, ¿apiojji acuae miyaya esohui ebameesahuajji huohuiaña? Maya ecuanaja quea quehua pishana. ¡Ba meesahua socue! —poanaje. 
\p  
\v 11 Oya cuana sajaꞌa canaje Jesosaa: —Miquianaya ca ca oe Eyacuiñajjiya ba meesahua cani eya ojjañaja Emeshi Mese nei poajeꞌyo. Yahuajo ba mee jjima poa. Pea cuana ca ca ba meesahua ajja. Jamajjeya eyaya esohui ebameesahuajji huohuinaje ona jjashahuabaquijji.  
\v 12 Jamatii ecuea esohui shajjaꞌajja majje oya cuana jjashahuabaqui ajja, jjashajjaꞌajjaqui ajja, de. Eꞌe, Eyacuiñajjija esohui huohuijji Isaia yahuajo nei nei jama poa baꞌa: 
\q1 “Shajjaꞌajja huichaꞌa huichaꞌa majje jamatii jjashajjaꞌajjaqui ajja poaje. Eyacuiñajjiya acani ba huichaꞌa huichaꞌa majje jamatii jjashahuabaqui ajja poaje. Ecuea esohui eba jojjemo, eshajjaꞌajja jojjemo jjabahuejjaquiꞌyome. Peaꞌai enijje ejjapeequiꞌyo jojjemo, eyaya mimishi cuijeaꞌyome”. 
\m Jamaya yahuajo nei nei tehue ca poa etiiquiana Isaiaa shajjamaꞌ cuanajo —Jesosa poanaje. 
\s1 Jesosaa esohui ebanajjijo ba mee canaje 
\r (Mateo 13.18-23; Noca 8.11-15) 
\p  
\v 13 Majoya Jesosaa oya cuana jama acanaje baꞌa: —¿Aꞌa ma esohui ebameesahuajji miquianajaya quea quehua? ¿Jamajjeya achajja acuae oe miquianajaya eba poaje pea esohui ebameesahuajji? ¡Shajjaꞌajjacue! Eyaya miquianaya ba meesahuaje ecuea ehuohuiꞌyo ebanajjijo:  
\v 14 Jiquio ecua ebanajjiya esoꞌ jeaaja cani jayojja jama Eyacuiñajjija esohui huohuijjiya esohui huohui canaje ojjaña huasijje. Beca cuana ejiojji yasijje oquequi esoꞌ cuana cuichojjiya ijjiajeyo caꞌyonaje.  
\v 15 Jamaya peaꞌai beca cuana ecuea esohui eya ojjañaja Emeshi Mese oe nei poaje shajjaꞌajja majje jamatii jjashahuabaqui ajja. Jamajjeya Edosiquiaa o que poe majje ecuea esohui pajea mee cani.  
\v 16 Beca cuana esoꞌ mei biajje oquequinaje jayojja jama ecuea esohui shajjaꞌajja majje quea bihui nee enijje jjapeecuajiꞌajjaquiani.  
\v 17 Jamatii ecuea esohui jayojja jama baꞌe tiitii ajja. Esoꞌ mei biajje pohua esajja jocaꞌyajo manoꞌyani jayojja jama poani; pea cuaa oya napa cajje, Eyacuiñajji nijje jjapeepajeaquiꞌyani.  
\v 18 Beca cuana esoꞌ acuisha nijje pohuani jama poani. Acuishaa bebo cajje jjajja ajja jayojja jamaya ecuea esohui shajjaꞌajja majje jjapee nishoquiani.  
\v 19 Jamatii oya cuana quea bejjo nahue poanijo aquianajo quea huiso jjashahuabaquianijo, quea mete peaꞌai poanijo Eyacuiñajjijo chaco ajja. Esohui pajea cani.  
\v 20 Esoꞌ meshi quea pame neejo pohua majje quea jjajja huiso poanaje jayojja jama ca ca beca cuana; ecue sohui shajjaꞌajja majje jjabahuejjaquiani; ecuea epeejji quea jaꞌa nee nee poani, pea cuana ejo jjabahuejjaqui meesahua cani; iye huiso pojjaꞌa, quea huiso pojjaꞌa, quea huiso nee nee pojjaꞌa —Jesosaa oya cuana acanaje. Mahuiso. 
\s1 Esohui ebameesahuajji cuaquijijijo 
\r (Noca 8.16-18) 
\p  
\v 21 Majoya Jesosaa pea esohui ebameesahuajji huohui canaje cuaquijijijo jama baꞌa: —¡Bacue! Cuaquijiji dedo majje eseyaya nequia ajja tepe quimejjejje. Ejaajji quimejjejje peaꞌai nequia ajja. Chojja, de. Acui ecaca biajje nequiaꞌaña equi jeajaꞌajji.  
\v 22 Jiquio ecua dedo majje cuaquijijiya eyajo nequiya ojjaña jeajaꞌa cani jama jayojja Eyacuiñajjiya ojjaña ecuea esohui onaya ba mee cajeꞌyo quijje. Eꞌe, ojjaña ecuea esohui miquianajaya eba jjeya, Eyacuiñajjiya quijje pea cuana ba mee cajeꞌyo. Quea jaꞌa nee poajeꞌyo.  
\v 23 ¡Jamajjeya miquianaaya quea shajja jaꞌaa shajjaꞌajjacue! ¡Ecuea esohuijo jjashahuabaquicue! 
\p  
\v 24 Majoya Jesosa ojjaña nijje jama poanaje peaꞌai baꞌa: —¡Ecuea esohui shajjaꞌajja majje ecuea esohui shahuaba neineicue; jama acue! Eꞌe jjashahuaba neineiquianijo, Eyacuiñajjiya miquianaya quea huiso nee nee ba meesahua caje. Oe pojji jjashahuabaquianijo ca ca oe pojji ba meesahua caje.  
\v 25 Jamajjeya joya Eyacuiñajjija esohui ba cani quea huiso pishana, quijje quea huiso nee ba mee cajeꞌyo. Joya ojaya esohui ba sa po ajja ca ca pajea cajeꞌyo. Mahuiso —Jesosa poanaje. 
\s1 Esohui ebameesahuajji esoꞌ pohuanijo 
\p  
\v 26 Majoya Jesosaa oya cuana huohui canaje pea esohui ebameesahuajji. Jama poanaje baꞌa: —Eyacuiñajjija esohui ejo ebanajjiya esoꞌ bana canaje jama. Esoꞌ ache bame nee quecua canaje quejo, anoso pojjaꞌa.  
\v 27 Majoya ojjaña echacojji cuana ecahuijaajo, epojjajo poꞌayequiequijo peaꞌai esoꞌ pohuani, tiiani peaꞌai. Jamatii ojaya ba jjima achajja shai esoꞌ tiiani.  
\v 28 Eꞌe, meshi quea pame neejo bana esoꞌ jamatii pohuani, tiiani. Tii majje jjajjani. Majoya jamatii jahuani.  
\v 29 Jahuajo, eque meseya echacojji cuana huoojea cani anoso sejjaꞌyohua. Jiquio ecua esoꞌ tii majje quea jjajja huiso poani jayojja jama ecuea epeejji cuana jjeya oe pojji yani; jamatii quijje quea huiso nee nee poajeꞌyo. Majoya ojjaña jjachichaqui mee cajeꞌyo Eyacuiñajji cojja nei enequijji —jamaya Jesosaa huohui canaje. 
\s1 Esohui acui soꞌ che biso nee neejo, motasa bajjanijo 
\r (Mateo 13.31-32; Noca 13.18-19) 
\p  
\v 30 Majoya Jesosaa pea esohui eba meesahuajji huohui canaje jama baꞌa:  
\v 31 —Eyacuiñajjija esohui ojaya epeejji cuanajo jama peaꞌai baꞌa: Motasa bajjani esoꞌ bana cani equi quibojo. Jiquio esoꞌ che biso nee nee.  
\v 32 Tii majjeya ca ca quea cui quemo nee poaje, apoꞌe cui quemajja. Jamajjeya cuichojji cuana poeyani motasa acui biajje cahuiya —jamaya Jesosaa huohui canaje ojjaña ba meejji quijje Eyacuiñajjija epeejji cuana quea huiso nee, quea caꞌa nee nee po mee cajeꞌyo. 
\p  
\v 33 Quea huiso nee pea esohui ebameejji Jesosaa huohui canaje Eyacuiñajjija esohui eba meesahuajji. Onaya quea jjashahuabaqui jaꞌa pishanajo mi huohui tiitii canaje.  
\v 34 Esohui ebameesahuajjijo ca ca oe ojjaña sohuihuohui canaje Jesosaa. Majoya ona poquiꞌyajo ohuaya o shajjaꞌajjajji nei ba meesahua canaje. 
\s1 Beni quea quemo nee nee 
\r (Mateo 8.23-27; Noca 8.22-25) 
\p  
\v 35 Ma pojjajoya siniajo Jesosaa o shajjaꞌajjajji cuana iyaa canaje; jama acanaje baꞌa: —Cuaꞌa, Janinea bae ojje miji yasijje ebesapoqui —poanaje. 
\p  
\v 36 Jamajjeya ojjaña cuana bae sahuajo ani equi yasijje huoojea majje o shajjaꞌajjajji cuana bishe ai yasijje nequisohuaquinaje Jesosa ani yasijje, ojje besapoquinaje. Pea cuana ca ca bishe sisi cuanajo besapoquinaje Jesosa quishishi.  
\v 37 O besapoquianijo beni quea quemo nee nee poeyanaje. Ena shajohua bishe nane canaje. Jeasohuajea canaje. Cuio canaje enaa.  
\v 38 Bishe ai yiyedojjojo Jesosa cahuijaanaje, ehuojjajaajji biajje jaa. O shajjaꞌajjajji cuaa quea mete po majje Jesosa ishe acanaje. Jama poanaje baꞌa: —Emeshi Mese Jesosa, ¡shequicue oe! ¡Coya aje se huiꞌiꞌya! —taaanaje. 
\p  
\v 39 Shequiꞌyo majje Jesosa nequisohuanaje. Beni tecuea canaje jama baꞌa: —Beni, jamaya, ¡nequioquequicue oe! —majoya bae ena nijje jama poanaje—; ¡aꞌa enashajo pojji! 
\p O jama mimime poajo, enashajo popajeaꞌyonaje. Ena shajomaꞌyo poanaje. Beni popajeaꞌyonaje.  
\v 40 Majoya Jesosaa o shajjaꞌajjajji cuana jama acanaje baꞌa: —¿Apiojji acuae nequiana quea mete nee nee poani? ¿Aꞌa mi ejo eꞌe nei pojjeama poani? Jamajjeya meteani. 
\p  
\v 41 Jamajjeya oya cuana bishe aijo ani Jesosajo quea bihui nee poanaje. Ojee miminaje jama baꞌa: —¡Ache dejja shai jiquio quea sohui poja nee nee! Beniya, enashajo cuaa peaꞌaiya oja sohui shajjaꞌajja cani —ojjaña poanaje. 
\c 5  
\s1 Dejja quea mase nee nee Jesosaa niñe poquipajea mee caꞌyonaje 
\r (Mateo 8.28-34; Noca 8.26-39) 
\p  
\v 1 Jesosa o shajjaꞌajjajji cuana nijje besapoquinaje Janinea bae ojje miji yasijje, Jjanana meshi yasijje, Jenesane dejja cuanaja meshi yasijje. Jesosa bishe aijo ani baꞌeñaqui majje etaja huasijje nequisohuaquinaje.  
\v 2 Ma meshijo dejja niñepoqui quea mase nee nequi. Eshahua quea huisohua oja eyami nequijji acaꞌyajje, ma dejja jjanijo emanoꞌyo saꞌ jaajo nequinaje.  
\v 3 Majo tii oya baꞌeꞌyonaje jjanijo, ma emanoꞌyo huananobia cajjijo tii. Oya quea mase nee nee jjejojo jeyoꞌajja canaje cuaa cadenaa. Jjajeyo meequi ajja, quea caꞌa nee nee poanaje.  
\v 4 Yahuajo onaaya ojaya emeꞌ, ejiojji peaꞌai jeyoꞌajja huichaꞌa huichaꞌa canaje cadenaa, jjonohua peaꞌai. Jamatii ohuaya cadena cuana jjequisejjajea canaje, sejjaquipiquipijea canaje. Onaaya oya jjabahuone meequi ajja, quea mase, quea caꞌa, de.  
\v 5 Mecajje, epojjajo peaꞌai oya eyiyo cuanajo, jjani cuanajo peaꞌai siasiaꞌaniꞌyonaje. Jjajehuijeaquiꞌaninaje meiya.  
\v 6 Jamajjeya oya niñepoqui Jesosa quea huesha nee ba majje o que jaaoquecuajinaje. Quea ajjajja jjejojo ecuiꞌoshajjajo nequinaje Jesosa bihuiajji.  
\v 7-8 Jamajjeya Jesosaa eshahua huoojeacuayajea caꞌyonaje; jama poanaje baꞌa: —¡Eshahua dejjajo nequi, cuayaquiꞌyocue! —Jesosaa acanaje. 
\p Eshahua taaa neineinaje jama baꞌa: —Jesosa, miya Eyacuiñajji quea caꞌa neeja Bacua Ejja. ¡Aꞌa jjeya eya quea nee nee po meejji! Eyacuiñajji huohuicue jama baꞌa: “Jjeya eshahua ecuea enapajji pojjeama” acue —eshahua poanaje. 
\p  
\v 9-10 —¿Ae bajjani miya? —Jesosaa oya acanaje. 
\p —Ecuana quea huiso neejo Quea Shahua Huiso bajjani —sajaꞌa canaje niñepoquiya—. Che mo miyaya ecuana dejjajo nequi cuayaqui meeꞌyo majje ¡aꞌa quea huesha nee huoojeajji! —poanaje eshahua cuana. 
\p  
\v 11 Quea chipi nee cuichi cuana quea huiso ijjiaꞌijjia nequi.  
\v 12 Jamajjeya eshahua cuaa Jesosa jama huohuime acanaje baꞌa: —Che ecuana dejjajo nequi huoojeacuayajea majje ¡cuichi cuana huasijje ecuana huoojeaꞌyocue! 
\p  
\v 13 —Eꞌe, ¡poquicue cuichi cuana huasijje! ¡Dobiquicue! —Jesosa poanaje. 
\p Jamajjeya dejja niñepoqui jeananaꞌyo majje eshahua cuana cuichi cuana huasijje dobiquinaje, ojjaña. Dobiqui majje cuichi cuana cuajicuaji jaaoquequinananaje. Bae quea sahua doe nee nee yasijje cuichi cuana huiꞌiꞌyonaje, ojjaña, beca mil huisome.  
\v 14 Ba majje cuichi jaahuanajji cuana jjajjasoaquinaje. Cuajicuajipoquinaje cuiñajji yasijje huohui pohua. Ojjaña equi yasijje huohui capoquinaje eshahua cuanajo. Cuichi cuanajo, dejja niñepoquiꞌyo jjima po mee canajejo peaꞌai huohui canaje. Jamajjeya ojjaña cuana ma cuiñajjijo baꞌe poeyanaje Jesosa baa; dejja niñepoquiꞌyo jjima baa peaꞌai: —¿Ae shai poanaje, de? —poanaje cuana. 
\p  
\v 15 Jesosa que poe majje ojjañaa dejja niñepoquiꞌyo jjima ba canaje. Jjeya oya quea bei nequi, daquijji, quea pame nee jjashahuabaquiani. Eshahua cuana chamaꞌyo. Jamajjeya ojjaña cuana quea mete poanaje Jesosajo,  
\v 16 eshahua huoojeacuayajea mee caꞌyonajejo, cuichi cuana ehuiꞌiꞌyojojo peaꞌai. Jamajjeya cuichi jaahuanajji cuaa pea cuana huohui majamaja canaje niñepoquijo, Jesosaa eshahua huoojeacuayajea canajejo, cuichi ehuiꞌiꞌyojojo peaꞌai.  
\v 17 Ojjaña quea mete nee poanaje. Huohui canaje jama baꞌa: —¡Jesosa, pea meshi yasijje poqui socue oe! Quea mete ca iña mijo mi quea sohui poja nee nee jojoya —poanaje ojjaña. 
\p  
\v 18 Jamajjeya Jesosa bishe ai yasijje nequisohuaquinaje ojje ebesapoquiꞌyojji. Dejja ma niñepoqui poanaje onijje poqui sa poanaje, onijje eꞌanijji.  
\v 19 Jamatii Jesosaa oya jama acanaje baꞌa: —Chojja, ¡miquea equi yasijje poquicue! ¡Miquea huapa pojjeama cuana huohuicue ejo, Emeshi Mese neijo, ma miya ecuea quea boti neejo quea pame nee anaje huohuicue! —Jesosa poanaje. 
\p  
\v 20 Jamajjeya ojaya equi yasijje poqui majje ohuaya Jesosajo huohui canaje. Ome Miji peaꞌai Cuiñajji yasijje huohui canaje peaꞌai. Ojaya esohui shajjaꞌajja majje ojjaña quea bihui nee poanaje: —¡Ache dejja quea caꞌa nee nee Jesosa! ¡Eshahua cuana huoojeacuayajea caꞌyonaje, de. Eꞌe e, dejja niñepoqui quea pame nee jjeya, de! —poanaje ojjaña. 
\s1 Jainoja ebacua piona emanoꞌyojaa; pea epona najji poani tii tii 
\r (Mateo 9.18-26; Noca 8.40-56) 
\p  
\v 21 Majoya Jesosa o shajjaꞌajjajji cuana nijje bae ojje miji yasijje poqui oꞌoyanaje bishejje. Quea huiso cuana jjachichaqui oꞌoyanaje o que, Janinea bae sahuajo.  
\v 22 Jesosa ojjaña cuana nijje mimianijo, pea Jodio dejja o que poeyanaje Jaino bajjani, ma Jodioja ejjachichaquijji equi jaahuanajji poani. Ecuiꞌoshajjajo nequiya oya bihuia canaje.  
\v 23 Jama poanaje baꞌa: —Esohui huohuijji, ecuea ebacua piona quea mano nee nee jaa, beshahua nee poquijeyonaje. ¡Ecuea equi yasijje poecuajicue o napaꞌajjaa emeya! Jamajjeya oya huaquiajeꞌyo. Quea aja nee poajeꞌyo. 
\p  
\v 24 Nequisohua majje Jesosa o shajjaꞌajjajji cuana nijje poquinaje Jaino nijje. Quea huiso cuana poquinaje onijje peaꞌai, ojjaña Jesosa nijje nequi canaje cuana.  
\v 25 Poquije, oe eponaa Jesosa ba canaje. Oya quea mano, najji popajeaꞌyo ajja. Ome miji pea beca, 12 shequiajame na cuayapajeaquiꞌyo ajja poa.  
\v 26 Quea huiso eshicuijji quiajji cuaa oya na cuayapajeaqui meeꞌyo jjima acanaje. Jamajjeya eshicuijji sosejje ojjaña ojaya ejjeshejji oe poanaje. Jamatii naꞌ huosa jjima tii, quea nee tii. Yahuajo quea mano pishana poanaje; jjeya ca ca quea mano nee nee.  
\v 27 Jesosajo shajjaꞌajja majje, ma Jesosaa ojjaña huaquia mee cani shajjaꞌajja majje oya poeyanaje o que. Quea huiso nequi dejja tejjee poeyanaje epona.  
\v 28 Jamaya oya jjashahuabaquinaje baꞌa: —Eya Jesosa daqui napa majje na huosajeꞌyo —jama jjashahuabaquimeya poanaje epona. 
\p  
\v 29 Jamajjeya Jesosaja daqui quehuajje napa canaje. Jjeyahua nei najji po pajeaꞌyonaje. Ma epona quea bihui nee jjashahuabaquinaje: —Eꞌe e jjeya nei eya na cuayapajeaquiꞌyonaje, apoa poꞌyonaje. 
\p  
\v 30 Jesosa epona nahuosa meeꞌyo jeahuajo jjashahuabaquinaje jama baꞌa: —Eꞌe nei, jjeyahua nei Eyacuiñajjiya aꞌya shai huaquia mee caꞌyonaje e daqui napaꞌajja cajo. 
\p Jjeyahua nei Jesosa jjabajeaquinaje. Ojjaña cuana ejjachichaqui nequi huohuiꞌajja canaje jama baꞌa: —¿Aya acuae ecuea daqui napaꞌajja canaje soꞌo? 
\p  
\v 31 O shajjaꞌajjajji cuana onijje jama poanaje baꞌa: —Jesosa, quea huiso nee nee ejjachichaqui nequi minijje. Jamajjeya ¿yajjajje shai miyaya huohuiꞌajjaña jama baꞌa: “¿Aya shai ecue daqui napaꞌajja canaje?” 
\p  
\v 32 Jesosaa ca ca bajea neinei canaje epona ena huosaꞌyo ebajji.  
\v 33 Jamajjeya ma epona ojaya emanomeejji chamaꞌyo ba majje Jesosa que poquiꞌyonaje; Jesosa yajjajo piopionaje. Ecuiꞌoshajjajo nequiya Jesosa huohui canaje ohua naꞌ huosa mee caꞌyajje. Ojjaña huohui canaje eponaa.  
\v 34 Majoya Jesosaa oya acanaje jama baꞌa: —¡She, quea bihui nee pocue! Miya quea jaꞌa jjashahuabaquinaje jama baꞌa: “Eꞌe jojo nei Jesosaa eya huaquia mee cajeꞌyo”. Jamajjeya eyaya miya huaquia meeꞌyonaje. ¡Quea quijijji jaji oe poꞌyocue! ¡Aꞌa manoshishi oꞌoyajji! —Jesosaa acanaje. 
\s1 Epona shoꞌi eshe po mee ca oꞌoyanaje 
\r (Mateo 9.23-26; Noca 8.49-56) 
\p  
\v 35 Majoya Jesosa epona nijje mimianijo tii, Jainoja epeejji poeyanaje. Jama poanaje baꞌa: —Jaino, miquea ebacuase manoꞌyonaje. Chamaꞌyo tii poꞌyonaje. ¡Jamajjeya esohui huohuijji aꞌa iyaajji equi yasijje o baa! —poanaje. 
\p  
\v 36 Jiquio esohui shajjaꞌajja majje Jesosaa Jaino jama acanaje baꞌa: —¡Aꞌa quea yeno pojji! Jamaya jjashahuabaquicue baꞌa: “Jesosa quea caꞌa nee nee. Ohuaya ecuea ebacuase shequi mee cajeꞌyo eꞌe jojo nei” acue. 
\p  
\v 37 Majoya Jesosaa pea cuana huoojea canaje jama baꞌa: —¡Aꞌa enijje poquijji! —poanaje. 
\p Jamajjeya Jesosa, Peno, Satiaco, oja chahua Huani ca ca oe Jaino nijje poquinaje oja equi yasijje, oja bacua baa.  
\v 38 Jainoja equi yasijje poqui majje ba cañaquinaje quea huiso dejja cuana, ponaña peaꞌai equijo nequi. Epona shoꞌi emanoꞌyojo ojee paꞌani. Ojjaña quea shajjaquijjo poani. Dehue mia cani emojeaꞌyojjijo peaꞌai.  
\v 39 Equi yasijje dobiqui majje Jesosa jama poanaje baꞌa: —¿Yajjajje acuae pa neineiani, quea shajjaquijjo nee poani nequiana? Jiquio epona shoꞌi epoquijeyoꞌyo pojjeama. Oya cahuijaa. 
\p  
\v 40 —Chojja de, oya manoꞌyonaje, de; shequiꞌyo ajja —poanaje cuana. 
\p Ojjaña cuana esecue yasijje huoojeacuayajea majje Jesosa o shajjaꞌajjajji cuana nijje, ejeajji nijje, enaese nijje cuanaya epona shoꞌi jaa huasijje dobiquinaje pea equecuayijji yasijje.  
\v 41 Meꞌ iña majje epona shoꞌi oja sohuijo huohui canaje: —¡Tanitacomi! 
\p Ese Ejja esohuijo ca jama poanijje baꞌa: —¡Epona shoꞌi, nequisohuacue! —Jesosaa acanaje. 
\p  
\v 42 Meꞌ iña majje epona shoꞌi shequi mee caꞌyonaje. Jjeyahua nei oya nequisohua majje jeoꞌyonaje. Eꞌe, oya etii pishana, ahuemaꞌ ani, 12 shequiajame. 
\p Jamajjeya epona shoꞌi shequi mee caꞌyonaje ba majje ojjaña cuana jjajjasoaquinaje; jama poanaje baꞌa: —¡Eꞌe jojo nei Jesosa jjashequimeequiꞌyojji, de! Jiquio epona shoꞌi emanoꞌyojaa jjeya nei shequi mee caꞌyonaje, de —poanaje. 
\p  
\v 43 Jesosaa ojjaña huohui canaje jama baꞌa: —Eꞌe, ¡jamatii aꞌa jjeya pea cuana huohuijji jiquio eya mique bacua shequi meeꞌyonajejo! 
\p Majoya Jesosa jama poanaje enaese nijje, ejeajji peaꞌai nijje baꞌa: —¡Miquea ebacua piona bobiacue! —poanaje. 
\c 6  
\s1 Jesosa Nasanena meshi yasijje poquiꞌyonaje 
\r (Mateo 13.53-58; Noca 4.16-30) 
\p  
\v 1 Majoya Jesosa jomajo ani poqui oꞌoyanaje ojaya cuiñajji yasijje, Nasanena huasijje. O shajjaꞌajjajji cuana nijje poquinaje.  
\v 2 Epojja ejomishocajjijo Jodioja equi ejjachichaquijji yasijje poqui majje dobiquinaje. Esohui huohui canaje. Ojaya esohui shajjaꞌajja majje ojjaña cuana quea tecue nee poanaje, Nasanenajo baꞌeca cuana. Oya Jesosa Joseja jea poso acanaje cuaa. 
\p —¡De! ¿Yajjajje shai jiquio dejjaa Jesosaa esohui quea jaꞌa nee nee huohui cani? ¿Eyacuiñajji jayojjaya jjaajaqui mee caꞌyani emanojaa quea huiso nee, de?  
\v 3 Oya aje oe acui cacajjija bacua ejja pojjaꞌa. Oja nae Mania bajjani, oja chahua cuana Jacobo, Jose, Simohui, Jonasa peaꞌai bajjani. Oja jjoꞌi cuana peaꞌai jiquiojo baꞌe. 
\p Jamajjeya quea quene poanaje Jesosa nijje; Joseja jea poso cajaa acanaje cuaa.  
\v 4 Jamajjeya Jesosaa oya cuana jama acanaje baꞌa: —Eꞌe de, pea cuaa Eyacuiñajjija esohui huohuijji shajjaꞌajja cani. Jamatii ojaya cuiñajjijo ojaya huapa pojjeama cuana ca ca oe o shajjaꞌajja sa poꞌyo ajja. Oya jayojjaya miquianaya e shajjaꞌajja sa poꞌyo ajja. 
\p  
\v 5 Jamajjeya oya cuana shajjaꞌajja sa poꞌyo ajjajo, oya Eyacuiñajjija Bacua pojjeama posojo, Jesosaa oe pojji napaꞌajja cajje jjaajaqui mee caꞌyonaje. Ma dejjaa ajjima acani oe pojji nei acanaje Nasanenajo.  
\v 6 Jamajjeya Jesosa jjashahuabaquinaje jama baꞌa: —¿Yajjajje shai Nasanenajo baꞌeca cuana quea sapa caꞌa poani? Ejo eꞌe nei jjashahuabaqui ajja —poanaje. 
\p Jamajoya Jesosa o shajjaꞌajjajji cuana nijje poquinaje quea huiso cuiñajji sisi cuana huasijje esohui huohuiya. 
\s1 Jesosaa o shajjaꞌajjajji huoojea canaje esohui huohuiya 
\r (Mateo 10.5-15; Noca 9.1-6) 
\p  
\v 7 Majoya Jesosaa o shajjaꞌajjajji 12 huisome iyaa canaje o que. Oya cuana quea caꞌa po mee canaje eshahua cuana huoojeacuayajeaꞌyojji, ojjaña emanojaa cuana huaquia meeꞌyojji, ejjaajaqui meeꞌyojji peaꞌai. Oya cuana becanejjijji peaꞌai huoojea canaje ojaya esohui shajjaꞌajjajji cuana pea cuiñajji cuana huasijje ojaya esohui huohuiya.  
\v 8 Huohui canaje jama baꞌa: —¡Jjeya aꞌa aquiana dojojji! ¡Oe acui ejjaquecuacaꞌaquijji dojocue, beca pojjeama! ¡Bashosoco bobi dojojji aꞌa dojojji! ¡Ejjeshejji, bobi peaꞌai aꞌa dojojji!  
\v 9 ¡Ejiojji shejee oe huoshoꞌyocue! ¡Daqui oe nei, ma miquea eyamijo baꞌe nei oe dojocue, beca pojjeama!  
\v 10 ¡Pea cuiñajji yasijje poqui majje saꞌajjacue oe dejja miquea epeejji epojji, joya bei bei! ¡Ojaya equijo anicue ma cuiñajjijo nequi majje!  
\v 11 Eꞌe pojjaꞌa beca equijo, beca cuiñajjijo miquea esohui shajjaꞌajja sa poꞌyo ajjajo, niñeba canijo peaꞌai, ¡oya cuana jeajeanaꞌyocue! Poquijeꞌyohua jama acue baꞌa: “Eyaya miquianaya cajaa ajeꞌyo, quea mimishi mi coma. Eyacuiñajjiya miya ba cani quea mimishi nee nee. Ohuaya miya quea nee nee po mee cajeꞌyo” acue —Jesosa poanaje. 
\p  
\v 12 Jamajjeya Jesosa shajjaꞌajjajji cuana poquinaje. Ojjaña cuiñajji cuana huasijje esohui huohui canaje. Jama poanaje baꞌa: —¡Miquea mimishi cuanajo quea yeno pocue! ¡Mimishi pajeaꞌyocue Eyacuiñajjija epeejji epoꞌyojji! —acanaje cuaa. 
\p  
\v 13 Quea huiso eshahua cuana dejja cuanajo nequi huoojeacuayajea caꞌyonaje. Quea huiso emanojaa cuana acuijjajja seiyiya shicui majje jjaajaqui mee caꞌyonaje, huaquia mee caꞌyonaje peaꞌai, Jesosa shajjaꞌajjajji cuaa. 
\s1 Enode Antipaa Huani sapa jajasejjajea mee canaje 
\r (Mateo 14.1-12; Noca 9.7-9) 
\p  
\v 14 Jesosa Janinea meshijo anijo, Janinea meshi meseya Enode Antipa bajjaniya shajjaꞌajja canaje onaja ehuohuiꞌyo ojo. Beca cuana Jesosa Huani shequi oꞌoyanaje poso acanaje jama baꞌa: —Eꞌe nei jiquio dejja aje oe Huani, ma ona besameejji poa. Eꞌe pojjaꞌa oya manoꞌyo majje shequi oꞌoyanaje. Jamajjeya ohuaya Eyacuiñajjiya jayojjaya acani, ma dejjaa ajjima acani —poanaje beca cuana. 
\p  
\v 15 Pea cuana ca ca jama poanaje baꞌa: —Chojja, oya etiiquiana Enia, ma yahuajo nei Eyacuiñajjija esohui huohuijji poanaje poe oꞌoyanaje. 
\p Pea cuana ca ca jama poanaje baꞌa: —Oya ca ca oe Eyacuiñajjija esohui huohuijji eyacua, yahuajo nei nei baꞌe Eyacuiñajjija esohui huohuijji jayojja jama. 
\p  
\v 16 Enode Antipa ca ca onajaya ehuohuiꞌyo Jesosajo shajjaꞌajja majje quea mete nee jama poanaje baꞌa: —Eꞌe de, yahuajo ecuea esohuijo Huani sapa jajasejja ca poa. Oya shequi oꞌoyanaje eꞌe jojo nei. Jamajjeya Eyacuiñajjiya jayojjaya acani ma dejjaa ajjima acani; quea huiso huaquia mee cani —poanaje Enode. 
\p  
\v 17 Eꞌe, yahuajo emeshi mese Enode Antipaja edoe mese Penipeja ehuanase Enodiasi bajjani Huani nijje quea quene nee nee poa. Jamajjeya Enode Antipaya Huani iña mee ca poa; jeanobiajea mee ca poa. Enodiasiya aje oe oja yahue huei ca poa Enode nijje ebaꞌejji, ojaya esha mese nijje ebaꞌejji.  
\v 18 Jamajjeya Huaniya yahuajo Enode Antipa jama tecueame aca poa baꞌa: —¡Miyaya aje oe mique doeja, Penipeja ehuanase Enodiasi aꞌa huanaꞌyojji! Jamaya quea mimishi —Huaniya aca poa. 
\p  
\v 19 Jamajjeya ohua tecuea cajje quenequenea poa Enodiasi Huani nijje. Quecua sa aca poa. Jamatii quecua jjima;  
\v 20 oya Enode quea mete poanaje. Oya jjashahuabaquinaje Huani Eyacuiñajjija esohui huohuijji nei neijojo, ojaya epeejji nei poanaje. Jamajjeya nahue canaje Enodiasiya equecua ca poaje jjejojo. Huanija esohui shajjaꞌajja sa poa Enode Antipa, jamatii ojaya quea quehua. Huani equi ejjajeanobiaquijjijo jaa iyaa huichaꞌa huichaꞌa canaje esohui huohuiya.  
\v 21 Jamatii quijje Enodiasiya Huani sapa jajasejja mee canaje. Jiquio jama poanaje baꞌa: Enodeya o cuaya poa pojjajo ojjaña ojaya epeejji cuana iyaa canaje ojee ijjiaꞌijjiaa, majamajaqui baa peaꞌai. Ojaya echaco meesahuajji, dejja etii cuana, sohuinano huoojeajji poani cuana peaꞌai, Janinea meshijo baꞌe dejja etii cuana peaꞌai quea huiso nee nee iyaa canaje.  
\v 22 Ojjaña ijjiaꞌijjiaꞌanijo, Enodiasija bacuase peaꞌai oe nei majamaja nequinaje ojjañaja ebajji, quea bihui nee epo meejji. Enode Antipa quea bihui nee nee poa epona shoꞌijo. Jamajje onijje miminaje jama baꞌa: —¿Ae shai sa miya poani? ¡Huohuicue mo! Eyaya joya miya sañaya quiaje eꞌe jojo nei, she —acanaje Enodeya—.  
\v 23 Eꞌe jojo nei she coya miya saje aje mi quiaje; miya huohuiañaya ca mi ca quiaje, ecue meshi sejja aje mi quiaje miquea epojji —huohui neinei canaje Enodeya. 
\p  
\v 24 Jamajjeya epona shoꞌi poquinaje ojaya enaese Enodiasi huohuiꞌajjaa. 
\p —Eꞌe —oja nae poanaje—, eꞌe, ¡Huani sapa jajasejjajea meequicue she! 
\p  
\v 25 Epona shoꞌi poe oꞌoyanaje Enode que. Huohui canaje jama baꞌa: —Huani, ma ona besameejji poani ejeanobiajaa. ¡Ojaya esapa jajasejjajeaꞌyo majje piatojo jjequicue jjeyahua nei! Maya eya sa poani. 
\p  
\v 26 Ma shajjaꞌajja majje emeshi mese Enode quea ajjajja nee nee poanaje. Jamatii ojaya esohui epona shoꞌi nijje ojjaña ojaya epeejji cuanaa shajjaꞌajja canaje. Jamajjeya ojaya esohui pajea ajja, Enodeja.  
\v 27 Jamajjeya ohuaya sohuinano cuana huoojea canaje: —¡Epona shoꞌija esohui jayojja jama acue! ¡Huani ma ejeanobiajaa oe sapa jajasejjajeaquicue! ¡Jjequicue jjeyahua nei! —poanaje. 
\p  
\v 28 Jjeyahua nei sohuinano cuana poquinaje Huani que. Huani sapajajasejjajea caꞌyonaje. Esapa jjequi canaje piatojo. Epona shoꞌi quia canaje. Majoya ohuaya Huanija esapa oja nae yasijje quia cañaquiꞌyonaje, epona shoꞌiya.  
\v 29 Majoya aje oe Huani shajjaꞌajjajji poani huohui canaje cuaa. Jamajjeya oya cuana poeyanaje o dojoꞌyohua, emojeaꞌyojji. Mojeaꞌyo majje papoquiꞌyonaje Jesosa huohuiya. 
\s1 Jesosaa 5.000 dejja cuana bobia canaje 
\r (Mateo 14.13-21; Noca 9.10-17; Huani 6.1-14) 
\p  
\v 30 Majoya quijje pishana Jesosaja huoojeaꞌyo cuana ojjaña cuiñajji yasijje esohui huohuiya poqui huacuaya poe oꞌoyanaje o que. Oya cuana huohui poñaquinaje ojjaña ohua acanaje, ojjaña ojaya esohui ma ohua huohui canaje peaꞌai huohui canaje Jesosa huasijje.  
\v 31 Quea huiso nee nee dejja poe majamajanijo ijjiaꞌijjia meemee ajja. Jamajjeya Jesosaa oya cuana acanaje: —¡Cuaꞌa, dejjama huasijje ejomishocaqui! Quea huiso nee nee ejjachichaqui nequi cuaa se ijjiaꞌijjia mee jjima acaje —Jesosaa acanaje. 
\p  
\v 32 Jamajjeya Jesosa o shajjaꞌajjajji nijje nequisohuaquinaje bishe ai yasijje. Besapoquinaje quima huasijje.  
\v 33 Jamatii Jesosa besapoquije ba majje quea huiso dejja cuana cuiñajji cuanajo baꞌe ejiojjijje poqui canaje Jesosa baa. Poquicuajinaje ma Jesosa besapoquije yasijje. Ebionei jjaja onaya aniñaquinaje, Jesosa hui que añaquiya.  
\v 34 Quijje pishana Jesosa o shajjaꞌajjajji cuana nijje baꞌeñaquinaje. Bishe aijo ani nequisohuaquinaje etaja huasijje. Quea huiso nee nee cuana ba cañaquinaje. Onajo Jesosa quea yeno jjashahuabaquinaje. Eꞌe, oya cuana quea yeno, quea mano nee ñajjajja jaahuana jjima jayojjaya. Jamajjeya oya cuana sohuihuohui canaje quea huiso nee nee Jesosaa.  
\v 35 Siniajo Jesosa que poe majje o shajjaꞌajjajji cuaa huohui canaje jama baꞌa: —Jesosa, sinia coma, de. Chamaꞌ jiquiojo bobi, equi peaꞌai.  
\v 36 ¡Dejja cuana huoojeacue cuiñajji sisi cuana huasijje oja bobi jjesheya! 
\p  
\v 37 —Chojja. Caꞌaniahua cuana. ¡Bobiacue oe miquiaaya! —Jesosaa acanaje. 
\p —¿Yajja yajji? Ecuanaa bobi quea huiso nee nee jjeshe ajja. Quea nahue nee nee, de, 200 epojja echacojji sosejje. Eꞌe, quea huiso pojjajo chaco majje sosejje, pahui jjeshe cajji, ca ojjaña bobiajji. 
\p  
\v 38 Jamajjeya Jesosaa jama acanaje baꞌa: —¿Ache huiso pahui yani esejaya? ¡Pahui baquicue! 
\p Ba majje oya cuana jama poanaje baꞌa: —Jesosa, esejaya bobi oe pojji yani. Me oejje pahui, beca nahuoo sisi yani peaꞌai —poanaje o shajjaꞌajjajji cuana. 
\p  
\v 39 Jesosa jama poanaje baꞌa: —Ojjaña cuana jama acue baꞌa: “¡Ojjaña anioquecue sipone biajje!” acue —Jesosaa acanaje—. ¡Ojee jjaꞌanichicha meequicue! ¡Anijji becabeca anioque meeme acue! 
\p  
\v 40 Jamajjeya quea huiso sipone yanijo, ojjaña cuana anioque mee canaje sipone biajje. Jomajo iye huiso anioquenaje, 50; quea huesha pishana iye huiso anioquenaje, 100. Jamaya anioque bamebamenaje cuana ojjaña, de. 
\p  
\v 41 Majoya Jesosaa me oejje huiso pahui, nahuoo sisi becanejjijji peaꞌai jjeshe majje eyahuasijje jjabajeasohuaquinaje Eyacuiñajji nijje emimijji. Bobijo mimi majje pahui miji canaje. O shajjaꞌajjajji cuana quia mee canaje dejja cuana eꞌanioqueani yasijje. Nahuoo sisi peaꞌai miji majje quia mee canaje ojjaña huasijje. Quia capoquijeya quea huiso nee nee jjapanaqui poquipoquinaje bobi, de.  
\v 42 Jamajjeya ojjañaa ijjia neinei canaje. Quea jejje poanaje.  
\v 43 Ojjaña jejje majje eshajjaꞌajjajji cuaa chicha caꞌyonaje bobi ojjañaja ijjiasejja. Jjepai ai yasijje iya caꞌyonaje. Quea huiso nee poanaje, 12 jjepai huisome quea cuata poanaje bobi eꞌijjiasejja.  
\v 44 Eꞌe, Jesosaa quea huiso nee nee bobia canaje, de, 5.000 dejja. 
\s1 Jesosa bae ena biajje poquinaje 
\r (Mateo 14.22-27; Huani 6.16-21) 
\p  
\v 45 Jjeyahua nei siniajo Jesosaa o shajjaꞌajjajji cuana huoojea canaje. Jama acanaje baꞌa: —¡Bishe ai yasijje nequisohuaquicue! ¡Bae ojje miji yasijje besapoquicue Betesaida cuiñajji yasijje! Quijje eya poquije mi que, pea cuana huoojeaꞌyo majje —poanaje. 
\p  
\v 46 Majoya dejja cuana quea huiso cuana huoojeaꞌyo majje Jesosa eyiyo huasijje jaasohuaquinaje oe nei oja Chii nijje mimiya.  
\v 47 Mecajje Jesosa oe nei jomajo aninaje, eyiyojo. O shajjaꞌajjajji cuaa ca ca bishe ai quea huesha nee yo canaje, bae yiyesama huasijje.  
\v 48 Jomajo ani Jesosaa oya cuana ba canaje, janobajjima nei yoyoꞌajja baꞌe. Eꞌe, beni quea quemo nee poeyanaje. Bishe cuiajea caꞌyonaje huacuaya. Enashajohua bishe janobajjima nei nane canaje, cuio canaje enaa. Mecashono quea apo nee nee poanaje. Jamatii Jesosa eyiyojo ani o que poquinaje ena biajje.  
\v 49 Jesosa ena biajje jeojeojebeje ba majje o shajjaꞌajjajji cuana quea mete nee nee poanaje. Quea metejo taaanaje jama baꞌa: —¡Coya ae shai poeje baꞌa! —siasianaje—. ¡Coya eshahua, de! 
\p  
\v 50 Jamajjeya Jesosaa oya cuana huohui canaje jama baꞌa: —¡Aꞌa quea mete pojji! Eya jja iña jiquio, eshahua pojjeama. ¡Quea jaji nee pocue! 
\p  
\v 51 Majoya Jesosa bishe ai yasijje aniajo, beni nequioquequiꞌyonaje. Jamajjeya ojjaña cuana bishe aijo aniya jjajjasoaquinaje. Quea jaji nee poꞌyonaje: —Eꞌe pojjaꞌa, eꞌe jojo nei, de —poanaje. 
\p  
\v 52 Eꞌe, Jesosaa ma dejjaja ba jjima acanaje; 5.000 dejja cuana bobia canaje me oejje pahuijo. Jamatii oya cuanaja eba pojjeama Jesosa quea caꞌa nee nee, ojjaña acani. Oya cuana ca ca quea jjashahuabaqui jaꞌa po jjima. 
\s1 Cuichi cuana huiꞌiꞌya poa meshi yasijje Jenesaneꞌ meshi yasijje besapoqui oꞌoyanaje 
\r (Mateo 14.34-36) 
\p  
\v 53 Quijje pishana bae ojje miji yasijje, Jenesaneꞌ meshi yasijje besapoqui oꞌoyanaje Jesosa. Baꞌeñaquinaje o shajjaꞌajjajji cuana nijje.  
\v 54 Bishejo ani nequisohuaquinaje etaja huasijje. Dejja cuaa jomajo baꞌeya Jesosa ba canaje yahuajo.  
\v 55 Jamajjeya o ba oꞌoya majje ojjaña iyaaqui canaje Jesosa que epoecuajijji. Ojjaña emanojaaca cuana equipajaajjijo jaa Jesosa que ye canaje.  
\v 56 Jamajjeya Jesosa cuiñajji quea quemo huasijje, pea cuiñajji sisi cuana huasijje peaꞌai, equi cuana huasijje peaꞌai dobiqui yajo, dejja cuaa emanojaa cuana jjequi canaje o que, jjaajaqui meeꞌyohua. Huohui canaje cuaa jama baꞌa: —Jesosa, ojjaña emanojaaca cuana mique daqui che napaꞌajja meecue ehuaquiaꞌyojji, ejjaajaquiꞌyojji —acanaje. 
\p Ojjaña Jesosaja daqui napaꞌajja majje jjaajananaquiꞌyonaje, huaquiaꞌyonaje peaꞌai, de. 
\c 7  
\s1 Quea jjashahuabaqui tai poanijo quea tai poani 
\r (Mateo 15.1-9) 
\p  
\v 1 Majoya Paniseo cuana, Jodio esohui huohuijji cuana peaꞌai Jenosanenajo baꞌe Jesosa que poeyanaje.  
\v 2 Poe majje o shajjaꞌajjajji cuana ba canaje ijjiaꞌijjiaꞌani emeꞌ shacua neinei jjimajo. Jamajjeya Jesosa tecuea canaje Jodio etii cuaa. Jama poanaje baꞌa: —Esohui huohuijji, ¿apiojji acuae mi mi shajjaꞌajjajji cuana emeꞌ shacua neinei jjimajo ijjiaꞌijjiani? —acanaje Jodio etii cuaa. 
\p  
\v 3 Eꞌe, ojjaña Jodio cuaa aje oe ijjia jjimahuajo emeꞌ shacua neinei cani; quea huiso shacuame acani, 7 huisome, ojaya etiiquiana cuanaja esohui jama.  
\v 4 Equi aquiana jjeshejji yasijje bobi jjeshe majje emeꞌ shacua neinei cani ijjia jjimahuajo peaꞌai Jodio cuanaja etiiquianaja esohui jayojja jama. Quea huiso etiiquianaja esohui jayojja jama acani peaꞌai: piato cuana, oña cuana, caneco cuana jamaya topo neinei cani peaꞌai; meshimisi caꞌa quea quemo cuana, eꞌanioquejji cuana jamaya topo neinei cani peaꞌai.  
\v 5 Jamajjeya Paniseo cuana, Jodio etii cuana Jesosa nijje mimijajinaje: —Jesosa, ¿apiojji acuae mi mi shajjaꞌajjajji poanija esejaya etiiquianaja esohui jama po ajja? ¿Apiojji acuae ijjiaꞌijjia jjimahuajo emeꞌ shacua neinei ajja, de? —poanaje. 
\p  
\v 6 Jesosaa oya cuana quea tecue sajaꞌa canaje jama baꞌa: —¡Miquianaya ca mi ca oe jjadasiaquijji nei nei! Eyacuiñajjija esohui huohuijji Isaiaja esohui miquianajo eꞌe jojo nei poa. Eꞌe, yahuajo nei Eyacuiñajjiya Isaia tehue mee ca poa jama baꞌa: 
\q1 “Jiquio dejja cuaa eya bihuia nisho cani. Jamatii jjashajjaꞌajjaqui ajja.  
\v 7 Jamajjeya ecuea equi yasijje jjachichaquiani ejjachichajeaquijji. Ohuaya ojaya ejjashahuabaquiꞌyojji huohui cani, ecuea esohui pojjeama”. 
\m Jamaya Isaiaa yahuajo tehue ca poa miquianajo —Jesosa poanaje—.  
\v 8 De, ¡yajja acuae nequiana poani soꞌo? ¿Apiojji acuaeya Eyacuiñajjija esohui pajeaꞌyaña etiiquianaja esohuijo?  
\v 9 Eꞌe, miquianaya jama poani baꞌa:  
\v 10 Yahuajo nei Eyacuiñajjiya Moisesi tehue mee ca poa oja sohui jama baꞌa: “¡Mique chii, miquea enaese etii peaꞌai jaahuanacue! Joya oja chii, oja nae peaꞌai cajaa acajo ¡cajajahuejjajea caꞌyahua cuaa, meiya!” Jamaya tehue mee caꞌya poa yahuajo nei.  
\v 11 Miquianaaya ca ca huohui tai yaña jama baꞌa: “Dejja oja chii etii nijje, oja nae etii nijje pojjaꞌa camimiyahua jama baꞌa: “Eyaya miya ebaꞌe meesahuajji pojjeama. Chojja, eyaya ecuea aquiana Eyacuiñajji yasijje quiaña o bihuiajji”. Jamaya huohui taiyaña miquianaaya.  
\v 12 Jamajjeya oja chii etii, oja nae etii peaꞌai pajea meeyaña, miquianaaya.  
\v 13 Eyacuiñajjija pea esohui quea huiso nee pajea meeꞌyo saꞌaña etiiquianaja esohui yajji nisho —Jesosaa Jodio etii acanaje. 
\p  
\v 14 Jamajjeya Jesosaa ojjaña cuana iyaa majje huohui canaje jama baꞌa: —¡Shajjaꞌajjacue mo, jjabahuejja neineiquicue oe!  
\v 15 Bobi cuanajo, ojjaña aquiana enabajje dobiquianijo pojjeama miquianaya quea mimishi poani. Chojja. Quea jjashahuabaqui taijo, esohui quea tai miquea enabajje cuayaquianijo ca ca quea mimishi poani. Eyacuiñajjiya maya ba cani quea mimishi —Jesosaa acanaje. 
\p  
\v 16 —Eꞌe, ¡miquianaaya quea shajja jaꞌaa ecuea esohui shajjaꞌajja majje jama acue! ¡Jjashahuabaquicue oe! 
\p  
\v 17 Majoya Jesosaa ojjaña cuana jeanana majje equi yasijje dobiquinaje o shajjaꞌajjajji cuana nijje. Dobiqui majje o shajjaꞌajjajji cuaa huohuiajja canaje: —Jesosa, ecuanajaya ca ca esohui quea quehua miquea. ¡Che mo oe ba meesahuacue! —poanaje. 
\p  
\v 18 —¿Aꞌa ecuea esohui miquianajaya ba jjima peaꞌai? —Jesosa poanaje—. ¿Aꞌa miquea eba pojjeama? Emeꞌ shacua neinei jjimajo pojjeama miquianaya Eyacuiñajjiya quea mimishi ba cani.  
\v 19 ¡Bacue! Ojjaña bobi, pea aquiana peaꞌai enabajje ijjiajea majje see ai yasijje dobiquiani. Quijje jamatii seejeajeꞌyo.  
\v 20 Joya quea tai jjashahuabaquianiya ca ca esohui tai jeacuaya cani. Maaya oya quea tai po mee cani: Quea mimishi Eyacuiñajjiya oya ba cani.  
\v 21 Eꞌe, ejjashahuabaquiꞌyojji quea taijo pea eponajo baꞌe sa poani, peaja yahuejo baꞌe sa poani, sii cani, siajje poani, pea quecua cani peaꞌai,  
\v 22 quehuajje cojjo cani, quea dejja tai poani, quea nishehui poani, ojjaña mimishi acani, ona dasiajji poani, quea mimishi pea nijje baꞌyani, pea jayojja baꞌe sa poani, mimijajiani peaꞌai. Jama poani baꞌa: “Eya oe nee quea pame nee” poani, eshoꞌi jayojja mimi naanaani, Eyacuiñajji niñeba cani peaꞌai.  
\v 23 Eꞌe jojo nei ojjaña joya jama acani Eyacuiñajjiya ba cani quea mimishi, quea mimijjequijea; bobi ijjia cani emeꞌ topo neinei jjimajo pojjeama quea mimishi poani —jamaya Jesosaa o shajjaꞌajjajji cuana sajaꞌame acanaje. 
\s1 Cananea epona Jesosa que poeyanaje 
\r (Mateo 15.21-28) 
\p  
\v 24 Majoya Jesosa ma equijo ani poquinaje pea meshi yasijje. Tino pejjejo, Sinono peaꞌai pejjejo aninaje. Jjeya Jesosa mimi sa po ajja ojjaña cuana nijje. Jamajoya equi yasijje quehua dobiquinaje o shajjaꞌajjajji cuana nijje. Jamatii oya quehuajje ani meemee ajja; jjanequiquehuaqui meemee ajja.  
\v 25-26 Eꞌe, jjeyahua nei oe eponaa shajjaꞌajja canaje Jesosa jomajo ani. Jamajjeya o que poeyanaje. Oya pea, Jodio epona pojjeama, Jieno pona pea meshijo baꞌe, Sinia meshijo, Penisiajo baꞌe. Ojaya ebacua piona huasijje eshahua yahuajo dobiquia poa. Jamajjeya enaese Jesosa que poe majje ecuiꞌoshajjajo nequinaje o bihuiajji, onijje emimi neineijji. Jama poanaje baꞌa: —Emeshi Mese nei, ¡ecuea ebacua piona jjaajaqui meeꞌyocue, quea mano nee nee jaa, quea niñe nee nee jaa! —enaese poanaje. 
\p  
\v 27 Ma enaese Jodio pojjeamajo, huapa jayojja. Jesosaa oya sajaꞌa canaje jama baꞌa: —¿Aꞌa cuae ecue bacuaja bobi jeajeaje iñahuehuaja eꞌijjiajji? ¿Aꞌa cuae jamaya quea pame? —Jesosa poanaje. 
\p  
\v 28 Epona quea shoe jama jjejojo jama poanaje baꞌa: —Eꞌe, Emeshi Mese nei. ¡Jamatii o huonejjiya bobi ijjia canijo, eshaa oquequianijo ijjia cani iñahuehuaa! —acanaje enaeseya. 
\p  
\v 29 Jamajjeya Jesosa quea bihui nee poanaje: —Epona, miya ca ca oe quea jaꞌa nee, quea pame nee ejo jjashahuabaquiani. Jamajjeya eyaya miquea esohui jayojja jama jjeya nei ajeꞌyo. Miquea ebacua piona jjaajaqui meeꞌyonaje. Eyaya eshahua ojo nequi huoojeacuayajeaꞌyonaje. ¡Quea bihui poquicue miquea equi yasijje! —Jesosa poanaje. 
\p  
\v 30 Jamajjeya jjeya nei ma epona poquicuajiꞌyonaje oja equi yasijje. Ba cañaquiꞌyonaje oja bacua piona quea pame nee, eshahuamaꞌyo, ejaajji biajje quea bei aniꞌyo. 
\s1 Jesosaa shajjaqueba jjashajjajaꞌaqui mee caꞌyonaje mimi mee caꞌyonaje peaꞌai 
\p  
\v 31 Jjeyahua nei Jesosa Tino pejjejo ani poquinaje. Sinono yejjenana majje Ome Miji peaꞌai Cuiñajji cuana yejjenana majje, Janinea bae yasijje poe oꞌoyanaje, ma Dejjaja Eyacuiñajji ba po jjimaja bae bajjani yasijje.  
\v 32 Majoya pea cuaa dejja shajjaqueba, mimiꞌajja peaꞌai ye canaje o que. Jama poanaje baꞌa: —Jesosa, jiquio dejja shajjaqueba, mimiꞌajja peaꞌai. ¡Oya che napaꞌajjacue emeya quea jaꞌa nee epojji! 
\p  
\v 33 —Eꞌe, —Jesosa poanaje. Jamajjeya ma dejja oe nei dojo canaje hueshaꞌama onijje mimiya, o huaquia meeꞌyohua. Ojaya eme sisi shajjaquebaja eshajja huejja huasijje jeanobia canaje. Majoya jjamecuichoqui majje ana napa canaje emeya.  
\v 34 Eyahuasijje jjabajeasohuaquinaje Eyacuiñajji nijje emimijji. Jjajjeanajeaquinaje jama baꞌa: —¡Quea jaꞌa pocue! —poanaje shajjaqueba nijje. Jesosaja mimijo: —¡Epata! —poanaje. 
\p  
\v 35 Jesosa mimi jeahuajo, ma dejjaa quea jaꞌa nee nee shajjaꞌajja caꞌyonaje. Miminaje quea jaꞌa nee.  
\v 36 Majoya Jesosaa ojjaña cuana huohui canaje jama baꞌa: —Eꞌe, eyaya shajjaqueba jjashajjajaꞌaqui meeꞌyonaje, mimi meeꞌyonaje. ¡Jamatii pea cuana aꞌa jihuohuijji soꞌo! —Jesosaa jamaya ojjaña cuana huohui canaje. 
\p Jamatii oya cuaa huohui majamaja canaje ojjaña huasijje.  
\v 37 Shajjaꞌajja majje ojjaña quea bihui nee jama poanaje baꞌa: —Eꞌe e, Jesosaa ojjaña acani quea pame nee nee. Eꞌe e, shajjaqueba jjashajjajaꞌaqui mee caꞌyonaje jjeya nei. Mimiꞌajja peaꞌai quea jaꞌa nee mimi mee caꞌyonaje —jamaya ojjañaa Jesosa bihuia canaje. 
\c 8  
\s1 Jesosaa quea huiso cuana bobia canaje, 4.000 dejja 
\r (Mateo 15.32-39) 
\p  
\v 1 Majoya quijje pishana quea huiso nee nee cuana poeyanaje. Jesosa que jjachichaqui oꞌoyanaje. Onijje ani tiitii canaje esohui shajjaꞌajjaa. Bobimaꞌ poanaje. Jamajjeya Jesosaa o shajjaꞌajjajji cuana iyaa canaje.  
\v 2 O que poeyajo, huohui canaje jama baꞌa: —Jiquio dejja cuana enijje nequi pea beca peejjima cahuime. Ojaya bobi oe poanaje. Jamajjeya eya ojo quea yeno jjashahuabaquiani, bobimajo.  
\v 3 Oja equi yasijje huoojea sa poꞌyo ajja, quea shoe nee nee; ejiojjijje poquianijo bobi yasijje po chanaꞌ. 
\p  
\v 4 O shajjaꞌajjajji cuanaa Jesosa sajaꞌa canaje: —Eꞌe. Jiquiojo chamaꞌ bobi, dejjamaꞌ. ¿Yajja yajji? Oya cuana quea huiso nee nee ebobiajji. ¿Achacua pahui ejjeshejji ojjaña bobiajji? —acanaje cuaa. 
\p  
\v 5 —¿Ache huiso pahui miquea yani? —Jesosaa huohuiꞌajja canaje. 
\p —Me oejje becanejjijji peaꞌai, 7 pahui yani —poanaje. 
\p  
\v 6 Jamajjeya Jesosaa ojjaña ejjaꞌanichichaquiꞌyo ani cuana jama acanaje baꞌa: —¡Meshijo anioquecue! —acanaje. 
\p Majoya Jesosa ma 7 pahui jjeshe majje Eyacuiñajji oja Chii bihuia canaje bobijo. Majoya pahui miji canaje. O shajjaꞌajjajji cuana quia canaje. Majoya oya cuanaa dejja cuana huasijje quia canaje. Quia capoquije quea huiso nee nee jjapanaquipoquinaje, bobi.  
\v 7 Ojaya oe pojji nahuo sisi yaninaje peaꞌai. Oya jayojja Jesosaa nahuo sisi miji majje quia canaje o shajjaꞌajjajji cuana que ojjaña cuana huasijje equiajji.  
\v 8 Jamajjeya ojjaña cuaa ijjia canaje; quea jejje poanaje.  
\v 9 Ijjia majje, mi ijjiajeyo majje bio caꞌyonaje jjepai ai yasijje, o shajjaꞌajjajji cuaa. Mepe caꞌyo majje quea huiso poanaje, 7 jjepaime. Jamatii quea huiso nee nee dejja cuana bobia canaje, 4.000 dejja.  
\v 10 Majoya Jesosaa ojjaña cuana huoojea canaje oja equi cuana huasijje. Jesosa ca ca bishe ai yasijje nequisohuaquinaje o shajjaꞌajjajji cuana nijje. Besapoquinaje ojje, pea meshi yasijje Majadana meshi yasijje, pea bajjani Namanota meshi yasijje, ma Ena Taꞌa Huoi bajjani yasijje. 
\s1 Jodio etiiya Jesosaa pana canijo huohuiꞌajja canaje 
\r (Mateo 16.1-4; Noca 12.54-56) 
\p  
\v 11 Majoya Paniseo cuana poeyanaje Jesosa que. Onijje mimicuiajeanobiajea sa poanijo jama anisho canaje baꞌa: —Esohui huohuijji Jesosa, ¿Aꞌa miya Eyacuiñajjija huoojeaꞌyo nei ojjaña jaahuanajji pojjaꞌa? ¡Ejjabaꞌajjaqui soꞌo! ¡Eyacuiñajjiya jayojja jama paname aꞌajjaꞌ eyajo ecuanaja ebajji! —huohui nisho canaje. 
\p Jamatii oya cuaa Jesosa Eyacuiñajjija huoojeaꞌyo pojjeama poso acanaje pea Paniseo cuana: —Chojja, Jesosa Eyacuiñajjija huoojeaꞌyo pojjeama. Jamajjeya Eyacuiñajjiya jayojja jama mi pana cajo, pajea cajeꞌyo cuaa. 
\p  
\v 12 Paniseoja ejjashahuaba taiquijji Jesosaja eba poanaje. Jamajjeya quea yeno poanaje jama baꞌa: —Chojja. ¿Apiojji miquianaya Eyacuiñajjiya pana cani ba majamaja sa poani? Miquianaaya Eyacuiñajjija esohui cajaa aña. Jamajjeya miquea ba jjima ache shono ojaya ehuoojeaꞌyo ojjaña jaahuanajji poeyanaje. Jamajjeya Eyacuiñajjiya eya pea epana meeꞌyojji pojjeama miquea ebajji eya ojaya ehuoojeaꞌyo —Jesosaa acanaje. 
\p  
\v 13 Paniseo cuana shajjamaꞌ poanijo, Jesosaa oya cuana jea canaꞌyonaje, jjabahuejjaqui ajjajojo. Besapoqui oꞌoyanaje ojje miji yasijje bishejje o shajjaꞌajjajji cuana nijje. 
\s1 Paniseoja esohuitai pahui shejjee meejji jayojja 
\r (Mateo 16.5-12) 
\p  
\v 14 Majoya bae ojje miji yasijje besapoquije Jesosa shajjaꞌajjajji poani cuana jjashahuabaquinaje. Jama poanaje baꞌa: —Eꞌe de, ecuanaa bobi pajeaꞌyonaje. 
\p  
\v 15 Majoya Jesosaa, Paniseoja ehuohui taijo jjashahuabaquianijo oya cuana huohui canaje: —¡Quea jaꞌa nee jjashahuabaquicue! Paniseoja, Enodeja epeejjija esohui pahui shejjee meejji jayojjajo miya quea tai po chanaꞌ. 
\p  
\v 16 Oya cuana bobijo jjashahuabaquianijo Jesosaja esohui ejjashahuabaquimeejji onajaya quea quehua poanaje. Jamajjeya ojee mimimiminaje jama baꞌa: —Eꞌe pojjaꞌa Jesosa jama poanaje ecuanaja bobi ye jjimajo. 
\p  
\v 17 Ojaya esohui Jesosaja eba poanaje. Jamajjeya oya cuana jama acanaje baꞌa: —¿Apiojji acuae jja nequiana ojee mimimimiani bobijo? ¿Aꞌa jja eya miquianajaya ba jjima quea caꞌa nee nee?  
\v 18 ¿Aꞌa jja nequiana ejo jjashahuabaqui jjima tii? ¿Aꞌa jja nequiaa pajeaꞌyonaje soꞌo?  
\v 19 Eyaya me oejje pahui miji majje quea huiso dejja bobianaje, 5.000 dejja. Ijjiaꞌijjiajeyo majje acuae jjaya ¿ache jjepai huiso chichaꞌyonaje pahui? ¿Aꞌa ya pajeaꞌyonaje? —Jesosaa acanaje. 
\p —Quea huiso nee, 12 jjepaime —poanaje. 
\p  
\v 20 —Eꞌe. Oya jayojjaya me oejje beca pahui, 7 pahui, miji majje quea huiso dejja bobianaje, 4.000 dejja. ¿Majoya ojjañaa ijjiaꞌijjiajeyo majje miquianaaya ache jjepai huiso pahui chichaꞌyonaje soꞌo? 
\p —Quea huiso nee peaꞌai, 7 jjepaime quea cuio chichaꞌyonaje ecuaaya —sajaꞌame acanaje. 
\p  
\v 21 —Eꞌe —Jesosa poanaje—. ¿Aꞌa jamatii miquianajaya ba jjima eya quea caꞌa nee nee mi bobiajji? ¿Aꞌa mi jjabahuejjaqui jjima? —Jesosa poanaje. 
\s1 Betesaidajo nequi Jesosaa cojjamaꞌ jjacojjapojjaqui mee caꞌyonaje 
\p  
\v 22 Majoya Jesosa o shajjaꞌajjajji cuana nijje Betesaida huasijje baꞌeñaqui oꞌoyanaje, Jai Jaajji cuiñajji yasijje. Jomajo pea cuanaa cojjamaꞌ ye canaje Jesosa que. Jesosa huohui neinei canaje jama baꞌa: —Jesosa, jiquio dejja cojjamaꞌ. ¡Che jja oma quea cojja jaꞌa po meeꞌyocue! 
\p  
\v 23 Jesosaa cojjamaꞌ me iña majje me pejjejea canaje cuiñajji esecue yasijje. Jomajo Jesosaa emeꞌ cuicho majje cojja iñapepa canaje cuichohua. Oya napaꞌajja canaje emeya peaꞌai. Jama poanaje baꞌa: —¿Achajja acuaeya miyaya baña soꞌo, cha? —Jesosa poanaje. 
\p  
\v 24 Bajea majje cojjamaꞌ jama poanaje baꞌa: —Eyaya dejja cuana jeojeoqui baña, acui jayojja de, quea jama pishana, de —acanaje. 
\p  
\v 25 Majoya Jesosaa ma dejja cojja napaꞌajja ca oꞌoyanaje emeya. Jesosaa cojja napaꞌajja ca oꞌoyajje, cojjamaa jjeyahua nei ba neinei canaje. Quea cojja jaꞌa nee nee poꞌyonaje.  
\v 26 Majoya Jesosaa oya huoojea canaje oja equi yasijje. Jama poanaje baꞌa: —¡Epeejji, quea jaji nee poquiꞌyocue miquea equi yasijje! ¡Aꞌa jjeya cuiñajji yasijje poqui oꞌoyajji! ¡Eyaya miya quea cojja jaꞌa po meeꞌyonaje aꞌa jocuama huohuijji! —Jesosaa acanaje. 
\s1 Penoja esohui quea pame Jesosajo 
\r (Mateo 16.13-20; Noca 9.18-21) 
\p  
\v 27 Majoya Jesosa o shajjaꞌajjajji cuana nijje Pinipo meshi yasijje poqui canaje. Sesanea huasijje poquijeya o shajjaꞌajjajji huohuiꞌajja canaje Jesosaa: —¿Dejja cuana acuae jja yajja poani ejo? —Jesosaa acanaje. 
\p  
\v 28 —Miya Huani, ma ona besameejji poa, shequi oꞌoyanaje poso ca jja mi ca acani beca cuaa. Pea cuana aje jja poani miya Enia, Eyacuiñajjija esohui huohuijji yahuajo nei nequia poa. Pea poani baꞌa miya pojjaꞌa pea esohui huohuijji yahuajo nei nequia poa pojjaꞌa. Oya cuana yahuajo nei manoꞌya poa shequi oꞌoyanaje poso ca jja mi ca acani cuaa —poanaje o shajjaꞌajjajji. 
\p  
\v 29 —¿Miya acuae yajja poani ejo? ¿Aꞌya cuae iña? —Jesosa poanaje. 
\p —Miya ca ca Eyacuiñajjija huoojeaꞌyo ojjaña jaahuanajji Quito bajjani —Simohuiya Jesosa sajaꞌa canaje. 
\p  
\v 30 Jamajjeya Jesosaa oya cuana jama acanaje baꞌa: —Eꞌe, eya Eyacuiñajjija huoojeaꞌyo ojjaña jaahuanajji. Jamatii ¡aꞌa jja oe jjeya huohuijji cuana! —Jesosa poanaje. 
\s1 O manoꞌyojjijo Jesosa miminaje 
\r (Mateo 16.21-28; Noca 9.22-27) 
\p  
\v 31 Majoya Jesosaa o shajjaꞌajjajji cuana huohui coo canaje ojaya emanoꞌyojjijo: —Eya ojjañaja Edoe Mese quijje Jenosanena huasijje poquije. Jomajo Moisesija etehueꞌyo huohuijji cuaa, Jodio etii cuaa peaꞌai, Eyacuiñajji nijje emimijji etii cuaa peaꞌai eya quea huiso cuia cajeꞌyo. Quea nee nee poajeꞌyo eya. Quijje ya mo manojeꞌyo ohua meꞌ caca mee cajje. Jamatii pea beca peejjima cahuime po majje mo shequi mee caje oꞌoya ecue Chiiya —acanaje. 
\p  
\v 32 Jamajjeya Jesosaa jama huohui neineime acajje Peno quea yeno nee poanaje. Oya oe nei iyaa canaje, Penohua. Jama poanaje baꞌa: —Chojja, ecuea Emeshi Mese Jesosa, miya Eyacuiñajjiya jaahuana cajeꞌyo. Peaja aje mi oe ecuiajji pojjeama, peaja equecuaꞌyojji pojjeama jja mi, de. 
\p  
\v 33 Jamajjeya aje jja oe Jesosaa ojjaña o shajjaꞌajjajji cuana cojja ba neinei majje jama Peno tecueame acanaje baꞌa: —Peno, ¡aꞌa jamaya mimijji! Miya e dasiajji nisho epo jama mimiani. Miya Edosiquiana Satanasa jama mimiani. Jjashahuabaquiani quea tai, dejja jama; Eyacuiñajjija ejjashahuabaquiꞌyojji jama pojjeama —Jesosa poanaje. 
\p  
\v 34 Jamajjeya Jesosaa ojjaña o shajjaꞌajjajji, ojjaña pea cuana jomajo nequi peaꞌai iyaa canaje. Jama poanaje baꞌa: —¡Ojjaña joya enijje eꞌe jojo nei jjapeequiꞌyo sa poani Eyacuiñajjija ejjashahuabaquijji jayojja jama baꞌecue! E jayojjaya jja enijje capoquiahua, jamatii onaa napa cajje aje jja oe quea nee poajeꞌyo pojjaꞌa.  
\v 35 Eꞌe, ojjaña joya Eyacuiñajjija ejjashahuabaquijji jayojja jama baꞌeꞌyo sa po ajja baꞌe tiitii ajja enijje eyajo. Joya ecuea ejjashahuabaquijji jayojja jama baꞌeꞌyo sa poani ca ca baꞌe tiitiijeꞌyo enijje eyajo.  
\v 36 Eꞌe pojjaꞌa dejja cuaa quea huiso nee nee aquiana ojaya yajji chicha caje. Jamatii oya cuana cuaqui yasijje jeajea cajo ojjaña ojaya aquiana cuana edojojji pojjeama. ¿Aꞌa ojjaña ojaya aquiana cuana Eyacuiñajji yasijje quia cajo o cuaquijo ani cuayaqui mee cajeꞌyo? ¿Aꞌa Eyacuiñajjiya oya cuana onijje eyajo baꞌe mee cajeꞌyo ma aquiana quea huiso nee nee sosejje? Chojja.  
\v 37 Eyacuiñajji cajaa amajje eyajo ebaꞌejji pojjeama. Chojja, ejjeshejji pojjeama nequianajaya, aquiana quea huiso sosejje pojjeama, bejjo sosejje pojjeama ebaꞌe tiitiiꞌyojji.  
\v 38 Eꞌe jojo nei jjeya ojjaña cuana Eyacuiñajji nijje jjapeequi ajja, ojjaña quea mimishi poani peaꞌai. Ecuea esohuijo quea bicho poanijo jama acani cuaa baꞌa: “Cho, eya Jesosa Quitoja epeejji pojjeama”. Jamajjeya eya ojjañaja Edoe Mese esohuidojojji pame cuana nijje poe oꞌoya majje ecue Chii jayojja quea pame nee nee ojjaña huoojeaꞌyojji poajeꞌyo. Jamajjeya eyaya ecue Chii eyajo ani huohuije jama baꞌa: “Cho, oya cuana ecuea epeejji pojjeama. Cajaa” eyaya aje —Jesosa poanaje—. Eꞌe, jjeya ejo quea bicho poanijo quijje eya quea bicho poajeꞌyo ojo, de. 
\c 9  
\p  
\v 1 Majoya Jesosaa o shajjaꞌajjajji cuana jama acanaje baꞌa: —Eꞌe jojo nei beca cuaa jiquiojo nequiya jjaa mo ecojjaa ba caje ojjaña huoojeajji quea caꞌa nee nee. Jamaya mo ba caje manoꞌyo jjimahuaa. Beca cuanaja jjaja mo ba jjima poaje ojjaña huoojeajji; manojeꞌyo —Jesosaa acanaje. 
\s1 Jesosa quea cojja jiji poanaje oja Chii nijje mimianijo 
\r (Mateo 17.1-13; Noca 9.28-36) 
\p  
\v 2 Quijje pishana me oejje pea emejje oe cahuime po majje Jesosa poquinaje o shajjaꞌajjajji nijje, pea beca peejjima dejja nijje, Peno nijje, Satiaco, oja chahua Huani nijje peaꞌai. Mahuiso dejja nijje poquinaje eyiyo huasijje quea huesha nee. Jocuama nequi oya Jesosa jjahuapaquiꞌyonaje. Jjahuapaqui majje quea cojja jiji nee poanaje eshequi jayojja poanaje, quea jeajahua nee nee.  
\v 3 Oja daqui quea oshe nee nee poanaje, quea jeajahua nee bo oshe jayojja. Daqui tajjajji jiquio meshijo aniya daqui tajja osheꞌyo ajja ojaya daqui jayojja.  
\v 4 Jamaya ojaya epeejjiya Jesosa ba canaje. Moisesi, Enia peaꞌai ma yahuajo nei baꞌya poa Jesosa nijje mimimimi nequi ba canaje peaꞌai. Miminequinaje Jesosa onaja mimishijo emanoꞌyojji jjejojo.  
\v 5 Jamajjeya Peno jjashahuabaqui jjimajo Jesosa nijje jama poanaje: —Eꞌe, Emeshi Mese Jesosa, jiquiojo ecuana canequiahua, quea pame nee. Pea beca peejjima equi sisi ecuaaya caꞌiyahua miquea, Moisesija, Eniaja peaꞌai ebaꞌejji. 
\p  
\v 6 Peno quea ajjajja jjejojo jama poanaje, jjashahuaba bamequi jjima jjejojo. Eꞌe, ojjaña quea ajjajja jjejojo yajja mimime epojji.  
\v 7 Peno mimianijo tii bo quea oshe nee nee nequioquenaje. Queya canaje huoja. Shajjaꞌajja canaje Eyacuiñajji jama poani baꞌa: —Jiquio ecuea ecue Bacua Ejja quea jea nee nee. ¡Oya oe shajjaꞌajjacue! 
\p  
\v 8 O shajjaꞌajja majje quea mete nee nee poanaje Peno, Satiaco, Huani peaꞌai. Majoya bajea canaje Jesosa oe nei nequi; Enia, Moisesi peaꞌai chamaꞌ. 
\p  
\v 9 Eyiyojo nequi jaaoquequijeꞌyo mimimimi jaaoqueꞌyonaje. Jesosaa ma ojjañaja Edoe Meseya jama acanaje baꞌa: —¡Ma miyaya eyiyojo banaje pea cuana aꞌa huohuijji jjeya! ¡Quijje eya emanoꞌyo jaa shequi oꞌoyajo oe pea cuana huohuicue! 
\p  
\v 10 Oya cuanaa Jesosa shajjaꞌajja canaje. Huohui jjima nei nei poanaje. Jamatii ojee mimimiminaje jama baꞌa: —¿Yajjajje shai oya Jesosa jama poanaje baꞌa: “Eya emanoꞌyo jaa shequije oꞌoya”? Maya ecuanaja quea quehua —poanaje o shajjaꞌajjajji cuana. 
\p  
\v 11 Jamajjeya Jesosa huohuiꞌajja canaje: —Jesosa, Moisesija etehueꞌyo huohuijji poaniya jama acani baꞌa: “Enia oe ebionei meshi yasijje capoeꞌyahua Eyacuiñajjija huoojeaꞌyo ojjaña jaahuanajji poe jjimahuajo”. ¿Yajjajje acuae jamaya acani oya cuaa? —poanaje Huani, Satiaco, Peno peaꞌai. 
\p  
\v 12 Jesosaa jama acanaje baꞌa: —Eꞌe jojo nei Enia jayojja jama oe dejja ebionei epoejji ojjaña cuana ejo eꞌe jojo nei ejjashahuabaqui meesahuajji. Eꞌe, Eyacuiñajjija esohui huohuijji yahuajo nei baꞌeya jama ejo tehue ca poa peaꞌai baꞌa: “Ojjañaja Edoe Mese quea nee nee po mee cajeꞌyo cuaa. Jodio cuanaja oya ba jjima poaje. Pea poso acaje. Jamajjeya cuia cajeꞌyo. Cajaa acajeꞌyo” jamaya yahuajo nei tehue ca poa ejo —Jesosa poanaje—.  
\v 13 Eꞌe, Enia jama ca ca oe yahuajo pishana poeyanaje. Jamatii Jodio cuanaja oya ba jjima poanaje. Jamajjeya cuia caꞌyonaje. Jamaya yahuajo nei Eyacuiñajjija esohui huohuijji cuaa ojo tehue ca poa. Ma jayojja jama acanaje cuaa —jamaya Jesosaa Peno, Satiaco, Huani peaꞌai acanaje eyiyojo nequi jaaoquejeꞌyohua. 
\s1 Eshoꞌi niñepoquimaꞌyo po mee caꞌyonaje Jesosaa 
\r (Mateo 17.14-21; Noca 9.37-43) 
\p  
\v 14 Eyiyojo nequi jaaoqueꞌyo majje Jesosa shajjaꞌajjajji yasijje poeꞌyonaje. Ba cañaquinaje quea huiso cuana ejjachichaqui nequica. Moisesija etehueꞌyo huohuijji cuaa Jesosa shajjaꞌajjajji cuana mimicuiajeanobiajea cani.  
\v 15 Ojjaña ejjachichaquinequi Jesosa ba majje quea quijijji jaji nee poanaje. Cuajicuajinaje Jesosa bihuiaa jama baꞌa: —Jesosa, miya Eyacuiñajjija huoojeaꞌyo ojjaña jaahuanajji. 
\p  
\v 16 Majoya Jesosaa huohuiꞌajja canaje: —¿Ajeo acuae quiana jjamimicuiajea nobiajeaquiani? ¿Yajja poani soꞌo? 
\p  
\v 17 Oe dejja Jesosa que poeyanaje. Huohui canaje jama baꞌa: —Emeshi Mese Jesosa, eyaya ecue bacua ejja yenaje mi que. Oya quea mano nee nee, quea niñe jjejojo mimi ajja peaꞌai.  
\v 18 Eshahuaa ojo nequiya oya naba huapa mee cani, jjaami yayequi mee cani peaꞌai. Niñepoqui jaabichajeaquiani meshi yasijje eseꞌ ijjiayai cani peaꞌai. Eyaya mi shajjaꞌajjajji cuana huasijje yenaje mi chamajo. Jamatii niñe poquipajea ajja —ejeajji poanaje. 
\p  
\v 19 Jesosaa ojjaña cuana jama acanaje baꞌa: —¡De! ¿Ache shono acuae jja nequiana ejo jjashahuabaquije eꞌe jojo nei? ¡Quea sapa caꞌa mi coma! ¿Ache cahui huiso minijje nequi majje miyaya eya bajeꞌyo Eyacuiñajjija huoojeaꞌyo ojjaña jaahuanajji quea caꞌa nee nee? ¡Eshoꞌi e que jjequicue! —Jesosa poanaje. 
\p  
\v 20 Jamajjeya eshoꞌi jjequi canaje Jesosa que. Jesosa ba majje eshahuaa eshoꞌi janobajjima nei cacacaca mee canaje. Meshi yasijje jea majje oya jeacapoquipoquinaje. Naba huapanaje.  
\v 21 Jesosaa ejeajji huohuiꞌajja canaje: —¿Ache shequiaja huisome jama poanaje oya? 
\p  
\v 22 —Jesosa, oya eshoꞌyahua jama po —poanaje ejeajji—. Eshahuaa oya dahuajea majamajaꞌajja canaje cuaqui yasijje, ena huasijje huiꞌi meeꞌajja caꞌyonaje cuanaya, o mano meeꞌyojji nisho. Jamatii ¡ecuanajo jjashahuabaquicue quea pame; ecuana jaahuanacue! ¿Aꞌa miyaya ecue bacua jjaajaqui meejeꞌyo pojjaꞌa? 
\p  
\v 23 Jesosaa ejeajji sajaꞌa canaje: —Aꞌa huohuijji jama baꞌa: “¿Aꞌa pojjaꞌa miyaya oya jjaajaqui meejeꞌyo?” Eꞌe jojo nei jjashahuabaquicue jama baꞌa: “Eꞌe jojo nei Jesosa quea caꞌa nee nee; ojjaña acani. Ohuaya ecue bacua ejja jjaajaqui meejeꞌyo peaꞌai”. Jamaya jjashahuabaquianijo eꞌe jojo nei eyaya miquea ejjashahuabaquiꞌyojji jayojja jama ajeꞌyo. Miquea ebacua ejja jjaajaqui meejeꞌyo peaꞌai —Jesosa poanaje. 
\p  
\v 24 Jamajjeya jjeyahua nei ejeajji jama poanaje baꞌa: —Esohui huohuijji Jesosa, eya mijo eꞌe jojo nei jjashahuabaquiani miya ejjaajaquimeeꞌyojji. ¡Miyaya eya jjabahuejja neineiqui meesahuacue! 
\p  
\v 25 Ojjaña cuana o que jjachicha cuajicuajiquiani ba majje Jesosaa o niñepoquimeejji poani huoojeacuayajea canaje: —¡Eshahua, o queba po meejji poani, mimiꞌajja po meeꞌyojji poani peaꞌai, cuayaquiꞌyocue oja yamijo nequi! ¡Aꞌa dobiqui oꞌoyajji! —Jesosa poanaje. 
\p  
\v 26 Jesosaa huoojeajea cajeahua, eshahua siasia nananaje; eshoꞌi jjequiꞌihui mee majje cuayaquiꞌyonaje. Eshoꞌi emanoꞌyo jayojja jaa ba majje ojjaña jama poanaje baꞌa: —Oya manoꞌyonaje, poquijeyonaje, de. 
\p  
\v 27 Jesosaa meꞌ iña cajje eshoꞌi nequisohuaꞌyonaje. Nequisohua majje quea aja nee poꞌyonaje. 
\p  
\v 28 Quijje ojjaña cuana poqui majje Jesosa equi yasijje dobiquinaje o shajjaꞌajjajji cuana nijje. Oeya Jesosa huohuiꞌajja canaje: —Jesosa, ¿yajjajo acuae ecuaaya eshahua mi huoojeacuayajeaꞌajjaña? 
\p  
\v 29 —Eꞌe —Jesosa poanaje—, jiquio eshahua quea huoojeacuayajea camaja. Eyacuiñajji nijje mimi huichaꞌa huichaꞌa majje ojo jjashahuabaquiani ijjiaꞌijjia jjima po majje peaꞌai ca ca oe huoojeacuayajea meejeꞌyo miyaya —Jesosa poanaje. 
\s1 —Quijje eya manojeꞌyo —Jesosa poanaje 
\r (Mateo 17.22-23; Noca 9.43-45) 
\p  
\v 30 Oya cuana ma meshijo ani ojee poquinaje ojjaña Janinea meshi yasijje. Poquijeya Jesosaa o shajjaꞌajjajji ca ca oe sohuihuohui capoquinaje. Pea cuana sohuihuohui pajea canaje.  
\v 31 Jamajjeya Jesosaa o shajjaꞌajjajji cuana huohui canaje jama baꞌa: —Eꞌe, quijje eya iña meesahuaje onaja equecuaꞌyojji. Quecua cajeꞌyo cuaa. Jamatii beca cahuime po majje mo shequi mee cajeꞌyo Eyacuiñajjiya. 
\p  
\v 32 O shajjaꞌajja majje quea yeno nee nee poanaje. Jamatii oya cuana quea mete poanaje ehuohuiꞌajjajji: —¿Yajjajo shai Jesosa manoꞌyome ca oya Eyacuiñajjija huoojeaꞌyo ojjaña jaahuanajji? —oya cuana poanaje. 
\s1 ¿Aꞌya ona huoojeajji jayojja nequije eyajo? 
\r (Mateo 18.1-5; Noca 9.46-48) 
\p  
\v 33 Majoya oya cuana Capenaoma huasijje poeꞌyonaje. Equi yasijje dobiquiꞌyo majje Jesosaa o shajjaꞌajjajji huohuiꞌajja canaje jama baꞌa: —Eseya ejiojjijje poejeꞌyo ¿ajeo acuae nequiana jjamimicuiajea nobiajeaquijebenaje soꞌo? 
\p  
\v 34 Jamatii oya cuanaja Jesosa sajaꞌa jjima. Quea bicho. Oya cuana poeje jjamimicuiajea nobiajeaquijebenaje jama baꞌa: —Jesosa quijje ona huoojeaꞌyojji poaje, eseya o jayojjaya poaje onijje ona huoojeaꞌyojji. ¿Aꞌya o pejjejo nequije, joya oja quea jea nee neeya? 
\p  
\v 35 Jamajjeya Jesosaa anioque majje o shajjaꞌajjajji 12 huisome iyaa canaje o que. Jama acanaje baꞌa: —¡Bacue! Miya e jayojja ona huoojeaꞌyojji po sa poanijo jama jjashahuabaquicue baꞌa: “Ojjaña ecuea quea boti nee. Cajaahuanaꞌyahua”. Jamaya poaje Eyacuiñajjiya miya ba caje quea pame nee ona huoojeaꞌyojji epojji. 
\p  
\v 36 Majoya Jesosaa oe eshoꞌi nei iyaa majje ojjaña cojja nei nequia canaje.  
\v 37 Bishami majje jama poanaje baꞌa: —¡Bacue! Ojjañaa joya enijje jjapeequianiya jiquio eshoꞌi quea jea ajji poaniya, eya peaꞌai quea jea acani. Oya jayojja ojjaña cuaa ecuea epeejji quea jea acani, ohuaya eya peaꞌai quea jea acani. Jamajje ecue Chii, e huoojeaꞌyojji quea jea acani peaꞌai. 
\s1 ¿Aꞌya Jesosaja epeejji poani? 
\r (Mateo 10.42; Noca 9.49-50) 
\p  
\v 38 Jamajjeya Huaniya Jesosa huohui canaje jama baꞌa: —Esohui huohuijji Jesosa, ecuaaya pea dejja banaje eshahua cuana huoojeacuayajea cani. Ma dejja poanaje jama baꞌa: “Eyaya eshahua huoojeacuayajeaña Jesosa nijjeya, ojaya epeejji poaniya”. Ma dejja ese nijje poqui ajjajo, oya tecueanaje jama baꞌa: “¿Apiojji? Chojja, miya ecuana nijje poqui ajja; ¡aꞌa eshahua huoojeacuayajeajji!” ecuaaya oya anaje —Huani poanaje. 
\p  
\v 39 Jamajjeya Jesosa jama poanaje baꞌa: —¡Aꞌa oya tecueajji! Ohuaya enijjeya acani ma dejjaa ajjima acani. Jamajjeya, ohuaya eya niñeba jjima acaje.  
\v 40 Ojjaña joya ese niñeba ajja esejaya epeejji nei poani.  
\v 41 Eꞌe jojo nei ojjañaa joya e shajjaꞌajjajji poani baꞌe meesahua cani, ena quia cani pojjaꞌa eya ojaya quea boti neejo, Eyacuiñajjiya quijje oya sosequia cajeꞌyo oya quea pame nee poanijo —Jesosaa o shajjaꞌajjajji cuana huohui canaje—.  
\v 42 Ecuea epeejji eyacua eshoꞌi nei jama. Joya o mimishi po meejji poani ca ca Eyacuiñajjiya quea nee nee po mee cajeꞌyo, de, quea nee tii tii. ¡Jamajjeya quea mimishi epo mee ca cuahuajje oe manoꞌyocue! Eꞌe, onaya mei enaajo yiipeca mee majje ¡bae quea doe yasijje jjajeaꞌoqueajea meequiꞌyocue!  
\v 43 ¡Jamajjeya aꞌa quea mimishi po meejji cuana! Jamajjeya miya emejo quea mimishi po sa po majje ¡emeꞌ ejajasejjajea jayojja jama acue mimishiꞌama epojji! Emeꞌ chamajo eyahuasijje poquiyajo Eyacuiñajji nijje ebaꞌe tiitiiꞌyojji quea pame nee nee poajeꞌyo. Miquea beca emeꞌ yanijo pojjaꞌa quea mimishi tii poani ca ca cuaqui yasijje poquijeꞌyo.  
\v 44 Quea tai nee nee, quea nee nee poajeꞌyo. Jomajo cuaqui jiji tiitiijeꞌyo; quijjoꞌyo ajja tii tii, de. Jamajjeya ¡mimishi pajeaꞌyocue!  
\v 45 Oya jayojjaya miya ejiojjiya quea mimishi po mee canijo, ¡ejiojji ejajasejjajea jayojja jama acue! Ejiojji chamajo eyahuasijje poquiyajo Eyacuiñajji nijje ebaꞌe tiitiiꞌyojji quea pame nee nee poajeꞌyo. Miquea beca ejiojji yanijo pojjaꞌa quea mimishi tii poani ca ca cuaqui yasijje poquiyajo quea tai nee nee, quea nee nee poajeꞌyo.  
\v 46 Cuaqui jiji tiitiijeꞌyo; quijjoꞌyo ajja tii tii. Jama tii tii poajeꞌyo.  
\v 47 Cuanaya ecojjajo jjabaqui majje miya quea mimishi poani pojjaꞌa. ¡Jamajjeya ecojja ecajjajea jayojja jama acue! Cojjamaꞌ, mimishiꞌama miya eyahuasijje poquiyajo Eyacuiñajji nijje ebaꞌe tiitiiꞌyojji quea pame nee nee poajeꞌyo. Cojjajji quea mimishi tii poani miya cuaqui yasijje poquijeꞌyo ca ca quea tai nee nee, quea nee nee poajeꞌyo tii tii. ¡Jamajjeya mimishi pajeaꞌyocue!  
\v 48 Cuaqui quijjoꞌyo ajja tii tii, de —Jesosa poanaje. 
\p  
\v 49 —Ojjaña ecuea epeejji poanija ebaꞌejji quea camaja poaje onaa tecuea cajje. Jamaya ecuea epeejji quea pame, quea caꞌa pocue jama baꞌa:  
\v 50 Jiquio ecua mei seseya, sane quea pame neeꞌya bobi shicuiajo ihuiꞌyo ajja jayojja jama ecuea epeejji quea pame nee baꞌeꞌyanijo, pea cuana o jayojja jama baꞌeje quea pame nee peaꞌai. Jamatii sane seseꞌama poajo, ¿aꞌa quea sese po meeje oꞌoya? Chojja, seseꞌamajo jeajeaꞌaña seya. ¡Jamajjeya mei sese quea pame jama pocue, sane jama! ¡Pea cuana quea pame nee baꞌe meesahuacue, ecue sohui jama! ¡Pea cuana nijje quea pame nee jjapeequicue! ¡Quea bei pocue peaꞌai! —jamaya Jesosaa o shajjaꞌajjajji cuana huohui canaje. 
\c 10  
\s1 Jesosaa esohui huohui canaje ehueijjijo 
\r (Mateo 19.1-12; Noca 16.18) 
\p  
\v 1 Majoya esohui huohui majje Jesosa Capenaomajo ani poꞌoquequinaje Jodea meshi yasijje, Jodana cuei ojje miji yasijje. Jomajo quea huiso nee nee o que jjachichaqui oꞌoyanaje. Jesosaa ojjaña cuana sohuihuohui canaje, ohuaya ojjaña meshi yasijje esohui huohui majamaja canaje jayojjaya.  
\v 2 Paniseo cuana ca ca o que poeyanaje jjadasiaquiya nisho. Jjashahuabaquinaje jama baꞌa: —Eꞌe pojjaꞌa Jesosa Moisesija etehueꞌyo jayojja jama pojjeama mimije. Jamajjeya ecuaaya oya tecueaje —poanaje. 
\p Poe majje Jesosa huohuiꞌajja canaje cuaa jama baꞌa: —Esohui huohuijji, ¿aꞌa cuae ehuanase huei cajji? ¿Yajjajo acuae ehuanase huei cajji soꞌo? ¿Achajja tehuemeya acuae oe Jodioja etiiquianaa aca poa? 
\p  
\v 3 Sajaꞌa canaje Jesosaa: —¿Yajja acuae Moisesija esohui etehueꞌyo poani soꞌo? 
\p  
\v 4 —Moisesiya jama tehueme aca poa baꞌa: “Hueiꞌyo majje yahueya ehueijeajji papeni etehueꞌyo caquia cahua oja huanase que. Majoya cahuoojea cahua” —poanaje Paniseo cuana. 
\p  
\v 5 —Eꞌe —Jesosa poanaje—, etiiquiana quea mimishi nee neeya jjejojoya Moisesiya huei meeꞌajja canaje. Quijje nei Moisesiya jamaya tehue ca poa; jamatii Eyacuiñajjiya jama pojjeama pana coo ca poa.  
\v 6 Yahuajo nei nei Eyacuiñajjiya pana coo ca poa yahue, epona peaꞌai.  
\v 7 Huohui ca poa ohuaya: “Jamajjeya yahue cajjabaꞌeshiñaquiahua ojaya ehuanase nijje ebaꞌejji”.  
\v 8 Oya cuana beca; jamatii oe nei jayojja Eyacuiñajjiya oya ba cani; becanejjijji peaꞌai pojjeama; oe nei jayojjaya. Cuanaya Eyacuiñajjiya oe jayojja aca poa.  
\v 9 ¡Jamajjeya aꞌa oe jea meejji! ¡Aꞌa hueijji nequiaa! ¡Jama tii tii oe nei oe acue! Jamaya Moisesiya yahuajo nei tehue ca poa peaꞌai —Jesosaa acanaje. 
\p  
\v 10 Majoya o shajjaꞌajjajji cuanaa Jesosa nijje equi yasijje dobiqui majje ojaya esohuijo huohuiꞌajja canaje.  
\v 11 Jamajjeya Jesosaa oya cuana jama acanaje baꞌa: —Eyaya miya huohuiaña eꞌe jojo nei ehuanase pea dejjaja sii jjima huei ca ajja. Dejja ehuanase hueijji epo pea epona ehuanaꞌyojji quea mimishi nee, epona siijji epo jama. Eyacuiñajjiya oya ba cani quea mimishi, pea cojjojji.  
\v 12 Oya jayojja epona ojaya yahue ¡aꞌa huei meejji! Yahue hueiꞌyo majje pea dejjajo ejjahueaquijji quea mimishi nee poani, yahue siijji epo jama. Eyacuiñajjiya oya ba cani quea mimishi, pea cojjojji —Jesosaa acanaje. 
\s1 Eshoꞌiquianajo Eyacuiñajji nijje miminaje Jesosa 
\r (Mateo 19.13-15; Noca 18.15-17) 
\p  
\v 13 Majoya Jesosa que eshoꞌi nei cuana jjequi canaje cuaa. Huohui canaje: —Jesosa, ¡jiquio eshoꞌi nei sapa napaꞌajja majje Eyacuiñajji nijje mimicue ojaya ejaahuanajji! —poanaje. 
\p Jesosa shajjaꞌajjajji cuaa ca ca oya cuana tecuea canaje: —¡Aꞌa jja oe Jesosa que jjequi majajji eshoꞌiquiana! ¡Esohui oe cahuohui cahua! —acanaje. 
\p  
\v 14 Ma ba majje Jesosa quea yeno nee poanaje. Etii cuana tecuea canaje jama baꞌa: —¡Eshoꞌiquiana e que capoeꞌyahua! ¡Aꞌa quea huesha nequi meejji! Eꞌe, ojjaña eshoꞌiquiana Eyacuiñajji nijje jjapeequi sa poani. Jamaya ecuea epeejji eshoꞌi jayojja eyaya jaahuana sa aña peaꞌai. Jamajjeya e que poquijeꞌyo; eya eyajo ojjaña huoojeaꞌyojji poaje.  
\v 15 Jamajjeya eꞌe jojo nei eshoꞌi nei jayojja mi poꞌyajo ca ca enijje ebaꞌeꞌyojji pojjeama quijje eya ojjaña huoojeaꞌyojji poaje —Jesosa poanaje. 
\p  
\v 16 Majoya eshoꞌi nei cuana bishami majje, sapa biajje emeꞌ huana majje Jesosa Eyacuiñajji nijje miminaje jiquio eshoꞌiquiana jaahuanajji. 
\s1 Edejja shoꞌi pishana quea aquiana huiso 
\r (Mateo 19.16-30; Noca 18.18-30) 
\p  
\v 17 Majoya Jesosa o shajjaꞌajjajji cuana nijje poqui oꞌoyanaje Jodea meshi yasijje. Oe dejja o que cuajicuajijebenaje. Ecuiꞌoshajjajo nequi oya Jesosa nijje jama poanaje baꞌa: —Esohui huohuijji, miya ca ca oe quea pame nee nee. Eya huohuicue ¿achajja a mo eya poquijeꞌyo eyahuasijje ebaꞌe tiitiiꞌyojji Eyacuiñajji nijje? ¿Ae quea pame amajje eyahuasijje poqui caꞌyojji? —poanaje. 
\p  
\v 18 O jjabahuejjaquijji Jesosaa huohui canaje: —Eꞌe, miyaya eya anaje jama baꞌa: “Miya ca ca oe quea pame nee”. Eyacuiñajji ca oe nei quea pame nee. Pea chamaꞌ o jayojja quea pame nee nee. ¡Jamajjeya eya shajjaꞌajja neineicue!  
\v 19 ¡Eyacuiñajji nijje baꞌe tiitiiꞌyo sa po majje ojaya etehueꞌyo jayojjaya jama oe baꞌecue tii tii! Ojaya esohui ma Moisesiya tehue ca poa miquea eba jama baꞌa: 
\q1 “¡Aꞌa pea quecuajji! 
\q1 ¡Aꞌa pea siijji! 
\q1 ¡Aꞌa sii pojji! 
\q1 ¡Aꞌa siajje pojji! 
\q1 ¡Aꞌa onaya dasiajji! 
\q1 ¡Mique chii, miquea enaese peaꞌai oe shajjaꞌajjacue!” 
\m —Jesosa poanaje. 
\p  
\v 20 —Eꞌe, eyaya jamaya aña, jama tii tii eshoꞌyahuaa. ¿Pea acuae yajja po cajji eyajo ebaꞌe tiitiiꞌyojji? —jiquio dejjaa Jesosa huohuiꞌajja canaje. 
\p  
\v 21 Jesosaa oya ba neinei canaje, oya quea boti nee nee poanaje. Jamajjeya jama acanaje baꞌa: —Eꞌe, epeejji, miya quea pame nee nee Eyacuiñajji jayojja po sa po majje ¡poquicue; miquea aquiana cuana quiaquicue ejjeshejji sosejje! ¡Majoya ejjeshejji quiaꞌyocue aemaꞌ cuana huasijje! ¡Majoya poecue enijje epoꞌyojji! Jamajjeya eyajo Eyacuiñajjiya miya aquiana quea pame nee nee quea huiso nee quia cajeꞌyo quijje. 
\p  
\v 22 Jesosaja esohui shajjaꞌajja majje ma dejja eshoꞌi pishana quea yeno poanaje; ojaya aquiana quea huiso nee nee yani jojoya quia sa poꞌyo ajja. Jamajjeya poquiꞌyonaje quea aquiana yeno jjejojo. 
\p  
\v 23 Jamajjeya Jesosaa ojjaña bajea majje o shajjaꞌajjajji cuana huohui canaje jama baꞌa: —Eꞌe, quea mimishiya jjejojoya aquiana quea huiso, meshi quea quemo pojjaꞌa nahue canijo beca cuana beshahua nei e que poqui ajja quijje, eya eyajo ojjaña huoojeaꞌyojji poajeꞌyo. 
\p  
\v 24 O shajjaꞌajja majje jjashahuaba neineiquinaje oya cuana. Ojee miminaje. 
\p Jamajjeya Jesosaa jama acanaje baꞌa: —Ecuea epeejji cuana, eyaya eꞌe jojo nei huohuiaña jama peaꞌai baꞌa:  
\v 25 Ahuoja quii huejjajje ino jeanobiaña jama ¿aꞌa mapichi jeanobia cajji ahuoja quii huejjajje? Cho. Quea camaja coma. Jiquio ecua mapichi ahuoja quii huejjajje jeanobia cajji jojjemo dejja quea aquiana huiso nee nee dobiquiꞌyome eyahuasijje. 
\p  
\v 26 —¡De! Jamajjeya ¿aꞌya shai eyahuasijje dobiqui mee cajeꞌyo Eyacuiñajjiya? —oya cuana ojee mimimiminaje. 
\p  
\v 27 Cojja ba neinei canaje Jesosaa. Huohui ca oꞌoyanaje: —Dejjaa jama amee ajja tii. Eyacuiñajjiya oe nei ojjaña acani. (Eyahuasijje dobi meequi cani joya quea aquiana huiso nee peaꞌai) —Jesosaa acanaje. 
\p  
\v 28 Jamajjeya Peno jjashahuabaquinaje ma dejja quea aquiana huiso nee nee jeanaꞌyo sa po ajjajo. Huohuiꞌajja canaje: —Jesosa, ecuaaya ojjaña aquiana jeanaꞌyonaje minijje epoquiꞌyojji. Jamajjeya ¿aꞌa cuee ecuana eyahuasijje poquijeꞌyo? ¿Ae acuae ecuana quiaje soꞌo, de? —acanaje Penohua. 
\p  
\v 29 —Eꞌe jojo nei beca cuaa ecuea esohui jama asa poanijo aquiana cuana jiña cani. Ojaya equi, oja huapa pojjeama, oja chii, oja nae pojjaꞌa, oja bacua cuana pojjaꞌa jiña cani enijje jjapee neineiquiꞌyohua, ecuea esohui quea pame nee quea huesha huohuiya peaꞌai.  
\v 30 Jamajjeya eꞌe jojo nei Eyacuiñajjiya oya cuana quea huiso nee nee o jayojja quia cajeꞌyo equi, huapa pojjeama jayojja, echii mese jayojja cuana, enaese jayojja cuana, ebacua cuana jayojja jama peaꞌai. Mimishi cuaa ca ca oya cuana napa caje peaꞌai. Jamatii quijje oya cuana quea bihui nee nee baꞌe tiitii mee cajeꞌyo peaꞌai eyajo onijje.  
\v 31 Jamatii beca cuana jjeya ona huoojeajji poani eyajo ona huoojeaꞌyojji pojjeama poajeꞌyo. Joya jjeya ona huoojeajji pojjeama ca ca eyajo ona huoojeajji nei nei poajeꞌyo e jayojja —Jesosaa Peno acanaje. 
\s1 —Quijje eya manojeꞌyo —Jesosa po oꞌoyanaje 
\r (Mateo 20.17-19; Noca 18.31-34) 
\p  
\v 32 Majoya Jenosanena huasijje poqui oꞌoyanaje. Jesosa ehui dojojji poquinaje. O shajjaꞌajjajji cuana, pea cuana o quishishijji poquiani peaꞌai quea mete jjashahuabaquinaje jama baꞌa: —Jenosanena huasijje poquiyajo, ¿yajja Jesosa acaje Jodio etii cuaa? ¡Quecua ca chanaꞌ, de! 
\p Jamajjeya Jesosaa o shajjaꞌajjajji cuana dojo canaje ejiojji sahua huasijje esohui huohuijji. Jama poanaje baꞌa:  
\v 33 —¡Shajjaꞌajja neineicue mo! Eya jiquio ojjañaja Edoe Mese. Eseya Jenosanena huasijje poquije. Jomajo mo Jodio etii cuana iña meesahuaje equecua meeꞌyojji. Eꞌe, Moisesija etehueꞌyo huohuijji, Eyacuiñajji nijje emimijji etii cuana peaꞌaiya eya iña mee caje. Taaa neineije cuana: “¡Oya quecuajeacue!” poaje. Jodio pojjeama cuana huasijje mo huoojea caje equecua meeꞌyojji.  
\v 34 Ejo soa neineije cuana; cuia cajeꞌyo mo cuaa huaca jee ejeapashajjajjaa; acui ecueataꞌapeejo me cacajea majje mo baꞌehuanasohuajea cajeꞌyo cuaa emanoꞌyojji. Jamatii mo beca cahuime po majje Eyacuiñajjiya shequi mee cajeꞌyo —Jesosaa huohui canaje. 
\s1 Semeneoja bacua ejja Jesosa nijje miminaje o pejjejo enequi meeꞌyojji eyajo 
\r (Mateo 20.20-28) 
\p  
\v 35 Majoya Semeneoja bacua ejja Jacobo, Huani peaꞌai Jesosa que poeyanaje. Jama poanaje baꞌa: —Esohui huohuijji Jesosa, ¡che ecuanaja esohui mi nijje jama acue ecuanajo! —poanaje. 
\p  
\v 36 Jesosa onijje jama poanaje baꞌa: —Ecuea epeejji cuana, ¿ae sa poani miquianaya? 
\p  
\v 37 —Jesosa, ecuana mi pejjejo canequiꞌyahua quijje miya ojjaña huoojeaꞌyojji quea caꞌa nee nee poaje. Oe shani mijijje, pea ebianei mijijje canequiꞌyahua minijje ona huoojeaꞌyojji epojji. ¡Jamaya oe acue! —poanaje Jacobo. 
\p  
\v 38 —Chojja, miquianajaya ba jjima eya quea nee nee po mee cajeꞌyo cuaa. ¿Aꞌa miquiana e jayojja quea nee nee po majje quea caꞌa poajeꞌyo? Eya quecua cajeꞌyo peaꞌai cuaa. Enijje jjapee neineiquianijo miquianaya quecua cajeꞌyo peaꞌai pojjaꞌa cuaa. ¿Aꞌa jamatii miquianaya quea caꞌa poajeꞌyo? —Jesosa poanaje. 
\p  
\v 39 —Eꞌe —sajaꞌa canaje Jacobo, Huani peaꞌaiya—. Quea caꞌa poaje mi jayojja, jamatii quea nee nee po mee cajeꞌyo, jamatii quecua cajeꞌyo cuaa. 
\p —Eꞌe —Jesosa poanaje—, jamajjeya eꞌe jojo nei miquiana e jayojja quea nee nee po mee cajeꞌyo cuaa; e jayojja quea caꞌa nee nee poajeꞌyo onaa mano mee caꞌyajje.  
\v 40 Jamatii e ebianei mijijje, e shani mijijje peaꞌai eyajo eyaya miquianaya enequi meeꞌyojji pojjeama, enijje ona huoojeaꞌyojji poaje. Chojja, ecue Chii eyajo aniya yahuajo nei pea cuana babaca ca poa. Ohuaye nei nequia mee cajeꞌyo e ebianei mijijje, e shani mijijje peaꞌai eyajo quijje, eya ojjaña huoojeaꞌyojji poaje —Jesosa poanaje. 
\p  
\v 41 Jesosa pejjejo nequi sa peaꞌai poanijo onijje ona huoojeaꞌyojji epojji, Jacobo, Huani nijje peaꞌai quea quene poanaje pea shajjaꞌajjajji cuana, ome mijijje peaꞌai.  
\v 42 Jamajoya aje oe Jesosaa oya cuana iyaa canaje. Huohui canaje: —¡Aꞌa onijje quea quene pojji! Miquianajaya eba dejja cuana, Eyacuiñajjija epeejji pojjeama. Onajaya emeshi mese cuana, ona huoojeajji cuana peaꞌaiya pea cuana huoojea neinei cani; quea tecue nee nee poani, quea mase.  
\v 43 ¡Aꞌa jamaya pojji miquianaya, ecuea epeejji cuana! ¡E jayojjaya po sa poanijo pea cuana baꞌe meesahuacue! ¡Jaahuanacue peaꞌai!  
\v 44 Joya ona huoojeaꞌyojji po sa poani ca ca echacojji sosemaꞌ jayojja capoahua.  
\v 45 Eꞌe, ¡e jayojja jama pocue! Eya ojjañaja Emeshi Mese nei. Jamatii eya ca ca iña ojjañaja Edoe Mese eyajo ani poeyanaje ojjaña baꞌe meesahuaa; ojjañaja eya ebaꞌe meesahuajji pojjeama. Ojjañaja mimishi sosequiaꞌyojji mo manojeꞌyo, ojjaña cuaqui yasijje epoquiꞌyo poaje jjejojoya —Jesosa poanaje. 
\s1 Batimeo, Timoteoja bacua quea cojja jaꞌa po mee caꞌyonaje 
\r (Mateo 20.29-34; Noca 18.35-43) 
\p  
\v 46 Jenosanena huasijje poquije Jesosa o shajjaꞌajjajji cuana nijje dobiquinananaje Jenico huasijje. Majoya quijje pishana poqui oꞌoyanaje ejiojjijje. Quea huiso nee nee poquinaje onijje cuana. Batimeohua, Timoteoja bacua ejjaa ejiojji sahuajje eꞌanioqueaniya shajjaꞌajja canaje Jesosa poeje. Oya cojjamaꞌ.  
\v 47 Jamajjeya taaa neineinaje jama baꞌa: —Jesosa, miya emeshi mese Dabija osecua, ¡ejo jjashahuabaquicue quea yeno! —taaanaje. 
\p  
\v 48 —¡Aꞌa oe taaa majajji! ¡Esohui oe caꞌacue! —acanaje cuaa. 
\p Jamatii taaa neineinaje cojjamaꞌ: —Jesosa, miya Eyacuiñajjija esohui jayojja jama poeyanaje, emeshi mese Dabija osecua. ¡Ejo jjashahuabaquicue! 
\p  
\v 49 Jamajjeya o shajjaꞌajja majje Jesosa nequiñaquinaje. Cojjamaꞌ iyaa mee canaje: —¡Oya cojjamaꞌ iyaacue! —poanaje. 
\p Jamajjeya cojjamaꞌ iyaa canaje cuaa: —¡Cojjamaꞌ, poecuajicue oe! Jesosaa miya iyaa cani. ¡Quea bihui nee oe pocue! —poanaje. 
\p  
\v 50 Jamajjeya Batimeo nequisohua majje daqui nei jea canananaje, Jesosa que poquicuajinaje.  
\v 51 Poeyajo Jesosaa oya huohuiꞌajja canaje: —¿Aꞌya soꞌo, Batimeo? ¿Ae sa poani miya? 
\p —Esohui huohuijji, ¡miyaya iña jjacojjabapojjaqui meeꞌyocue, ecuea ecojja quea jaꞌa epoꞌyojji! —poanaje Batimeo. 
\p  
\v 52 —Eꞌe, Batimeo —Jesosa poanaje—, miyaya eꞌe jojo nei ejo jjashahuabaquinaje eyaya miya jjacojjajaꞌaqui meejeꞌyo. Jamajjeya ¡quea bihui nee pocue! Jjeyahua nei Eyacuiñajjiya miya quea cojja jaꞌa po mee cajeꞌyo —Jesosa poanaje. 
\p Jjeya nei oya jjacojjabapojjaquiꞌyonaje. Jesosajo quea bihui nee nee poanaje jjacojjajaꞌaqui mee caꞌyajje. Jamajjeya Jesosa nijje poquiꞌyonaje, Batimeo. 
\c 11  
\s1 Jesosa Jenosanena huasijje poquinaje 
\r (Mateo 21.1-11; Huani 12.12-19) 
\p  
\v 1 Majoya Jesosa Jenosanena huasijje poquije pea cuiñajjijo nequiñaquinaje Mepajejo, ma Betania pejjejo, acui yiyejo, Onimo eyiyo pejjejo. Nequiñaqui majje o shajjaꞌajjajji becanejjijji peaꞌai huoojea canaje Jesosaa jama baꞌa:  
\v 2 —¡Poquicue miya Mepaje yasijje! ¡Dobiqui majje miyaya mapichi sisija bacua eshoꞌi ai ejeyo nequia nequi bañaquicue! Dejjaja o daasa biajje yahuajo eꞌanijji ajjima poa. ¡Ba majje pichocue; yecue e que!  
\v 3 Onaa: “¿Apiojji miyaya mapichi sisija bacua pichoaña soꞌo?” acajje: “Ecuanaja Emeshi Mese sa poani. Ohuaya huacuaya huoojea caje oꞌoya jiquiacua” sajaꞌame acue. Jamajje: “Eꞌe, ocuae dojoꞌajja joya mapichija bacua” acaje dejjaa Mepajejo baꞌeya —Jesosa poanaje. 
\p  
\v 4 Jamajjeya oya cuana Jesosa shajjaꞌajjajji poquinaje Mepaje yasijje. Mapichi sisija bacua ejeyo nequia nequi ba cañaquinaje equi secue pejjejo. Ohuaya picho canaje.  
\v 5 Pea cuana jomajo nequi jama poanaje baꞌa: —¿Ae poani miya? ¿Apiojji mapichija bacua pichoaña soꞌo? 
\p  
\v 6 Jamajje Jesosa shajjaꞌajjajji cuaa sajaꞌa canaje: —Ecuea Emeshi Mese sa poani. 
\p —Eꞌe, ocuae dojoꞌajja joya mapichija bacua —acanaje Mepajejo baꞌe dejjaa. 
\p  
\v 7 Jamajjeya mapichi sisija bacua dojo canaje Jesosa que. Onajaya daqui ao cuana mapichi sisija edaasa biajje iya canaje Jesosa anisohuaquijji. Jesosa anisohuaquinaje ma mapichi eshoꞌi aija daasa biajje. Anioquenaje. Ejiojjijje poquinaje.  
\v 8 Ojjaña cuana ejjachichaqui nequica cuaa ojaya daqui ao cuana ejiojjijo jeapiihui canaje Jesosa jjayejjequijji. Pea cuaa acui iña jajasejja canaje. Huana yiyoyiyo canaje ejiojjijo peaꞌai quea huiso nee neeya. Jamaya yahuajo Jodio cuaa emeshi mese jaꞌajjequi canaje, cuiñajji yasijje poeyajo.  
\v 9 Ojjaña ehui dojojji poquiani, Jesosa quiquishijji peaꞌai taaa capoquinaje quea bihui nee nee: —¡Mi poeyajo ecuana quea bihui nee! Quea pame nee nee miya, Jesosa. ¡Eyacuiñajji eyajo aniya miya cajaahuana cahua!  
\v 10 Eꞌe Jesosa, emeshi mese Dabi yahuajo baꞌe miquea etiiquiana. Miya ojjañaja Emeshi Mese nei poeyanaje. ¡Eyacuiñajji mi jaahuanajji cabihuia cahua ojjañaa! —taaame poa quea bihui nee nee jjejojo. 
\p  
\v 11 Majoya Jesosa Jenosanena huasijje dobiquinaje ojjaña cuana nijje. Eyacuiñajjija equi yasijje poquinaje. Dobiqui majje ohuaya bajea canaje ojjaña. Majoya siniajo oya Betania huasijje poquinaje cahuiya; ome miji pea beca, 12 huisome o shajjaꞌajjajji poani nijje poquinaje. 
\s1 Acui etona jjajja jayojja iquena bajjani sajjai mee caꞌyonaje Jesosaa 
\r (Mateo 21.18-19) 
\p  
\v 12 Mecajjeahua oya cuana Betaniajo ani Jenosanena huasijje poe oꞌoyaje quea shoe poanaje Jesosa.  
\v 13 Ba canaje ejiojji sahuajo nequi acui etona jjajja jayojja. Acuijjajja baꞌajjaqui canaje. Chamaꞌ poanaje ejjajja. Eña oo pana nequiꞌyo, acuijjajja she pojjeama jiquio baꞌijo.  
\v 14 Jamajjeya Jesosaa huohui canaje: —¡Jamajje jamatii jjajjamaꞌ tii capoꞌyahua acui! Jamajjeya onajaya ejjajja eꞌijjiajji pojjeama tii. 
\p Jesosa shajjaꞌajjajji cuaa Jesosaja emimi shajjaꞌajja canaje peaꞌai. Jesosaa jama acanaje ojjaña jjabahuejjaqui meejji jama baꞌa: Jiquio acui jjajjamaꞌ jojoya Jesosaa tecuea canaje jayojja jama Eyacuiñajjiya Jodio cuana tecuea cajeꞌyo jjashajjaꞌajjaqui ajja jojoya. 
\s1 Aquiana quiajji poani Eyacuiñajjija equijo nequi cuana huoojeacuayajea canaje Jesosaa 
\r (Mateo 21.12-17; Noca 19.45-48; Huani 2.13-22) 
\p  
\v 15 Majoya Jenosanena huasijje poe oꞌoya majje Jesosa ojaya epeejji cuana nijje Eyacuiñajjija equi yasijje poqui oꞌoyanaje. Dobiquinaje. Ba cañaquinaje quea huiso enequi, Eyacuiñajji nijje mimiani pojjeama. Chojja. Aquiana quia cani cuaa. Jamajjeya Jesosaa aquiana quiajji poani Eyacuiñajjija equijo nequi cuana huoojeacuayajea canaje; aquiana jjeshe poequi peaꞌai huoojeacuayajea canaje. Aquiana cuana huojjojeajea canaje; bejjo, pea bejjo sosejje quia cani cuanaja bejjo nequijji cuana jeapajjajea canaje; huiaꞌ quiajji peaꞌaija huiaꞌ nequijji cuana jeabichajea canaje.  
\v 16 Ojjaña joya aquiana abojji huohui canaje: —¡Aꞌa jja oe aquiana yedobiajji jiquiacua! Eyacuiñajjija equi pejjejo ojjaña jjachichaquiani esohui shajjaꞌajjaa —tecueame acanaje. 
\p  
\v 17 Jomajo Jesosaa jama acanaje peaꞌai baꞌa: —¡Aꞌa Eyacuiñajjija equijo aquiana quiajji! Eyacuiñajjija esohui jama poani baꞌa: “Ecuea equi ojjaña cuana ojjaña meshijo baꞌe Eyacuiñajji nijje emimijji equi”. Miquianaaya ca ca siipojji nequijji jayojja amee aña Eyacuiñajjija equi. 
\p  
\v 18 Ma shajjaꞌajja majje Eyacuiñajji nijje emimijji etii cuana, Moisesija etehueꞌyo huohuijji poani peaꞌai Jesosa nijje quea quene poanaje; oya Eyacuiñajjija huoojeaꞌyo pojjeama posojo o quecua sa acanaje. Jamatii Jesosa iña jjima poa, quea meteya jjejojo. Quea huiso cuana Jesosaja esohuijo quea bihui nee nee poanaje. Jamajjeya Jesosa ojjañaja quea nahue nee nee poanaje equecuaꞌyojji. 
\p  
\v 19 Quijje siniajo Jesosa o shajjaꞌajjajji cuana nijje Jenosanenajo ani poqui oꞌoyanaje Betania huasijje cahuiya. 
\s1 Acui etona jjajja jayojja esajjaiꞌyo ba canaje 
\r (Mateo 21.20-22) 
\p  
\v 20 Mecajjeahua nei Jenosanena huasijje poe oꞌoyanaje. Jesosa shajjaꞌajjajji poani cuaa ba canaje acui esajjaiꞌyo, ma Jesosaa tecuea canaje acui.  
\v 21 Ba majje Penohua niñeba caꞌyonaje. Jama poanaje baꞌa: —¡Esohui huohuijji Jesosa, bacue! ¡Miya tecueajje jjeya nei sajjaiꞌyonaje acui! 
\p  
\v 22 —Eꞌe —Jesosa poanaje—. ¡Miya Eyacuiñajjijo quea jaꞌa nee jjashahuabaquicue! Aꞌa jjashahuabaquijji jama baꞌa: “Eꞌe pojjaꞌa Eyacuiñajjija eya shajjaꞌajja jjima”.  
\v 23-24 Chojja, jjashahuabaquicue jama baꞌa: “Eyacuiñajjiya eꞌe jojo nei nei ecuea ehuohui onijje jama acajeꞌyo”. Jamaya miya jjashahuabaquiajo Eyacuiñajjiya miya sajaꞌa cajeꞌyo. Eꞌe, Eyacuiñajjiya miya e jayojja jama ameesahua cajeꞌyo peaꞌai ma dejjaa ajjima acani —Jesosa poanaje—.  
\v 25 Cuanaya miya Eyacuiñajji nijje mimianijo jiquiajja jjashahuabaquime pocue baꞌa: “Onaya enijje mimijajinaje quea tai. Jamatii eya ojaya mimishijo queneꞌama” jamaya pocue —Jesosa poanaje—. Jamaya jjashahuabaquianijo Eyacuiñajji miquea mimishijo queneꞌama poaje peaꞌai.  
\v 26 Pea nijje quea quene tii tii poanijo ca ca Eyacuiñajjija eseja Chiija miquea mimishi ecuijeaꞌyojji pojjeama —Jesosa poanaje. 
\s1 Eyacuiñajji Jesosa huoojeaꞌyojji poa 
\r (Mateo 21.23-27; Noca 20.1-8) 
\p  
\v 27 Majoya oya cuana Jenosanena huasijje poe oꞌoya majje Eyacuiñajjija equi yasijje dobiqui oꞌoyanaje. Jesosaa esohui huohui canijo Jodio etii cuana, Eyacuiñajji nijje emimijji etii cuana, Moisesija etehueꞌyo huohuijji cuana peaꞌai o que poeyanaje.  
\v 28 Jesosa ojaya ba jjimajo huohuiꞌajja canaje: —¿Aya miya huoojea canaje jiquiacua? ¿Apiojji acuaeya esohui huohuiaña soꞌo? ¿Apiojji acuaeya aquiana quiajji poani huoojeacuayajeanaje oma mecajje? —onijje mimijajinaje. 
\p  
\v 29 Jesosaa oya cuana acanaje: —Eꞌe, eyaya miya ebionei huohuiꞌajjaje.  
\v 30 ¿Aya Huani huoojea canaje enajje ona besa meeya? ¿Aꞌa Eyacuiñajjiya? ¿Aꞌa dejja cuaa pojjaꞌa? ¡Huohuicue mo! Eyaya majoya huohuije e huoojeaꞌyojji epo. 
\p  
\v 31-32 Shajjaꞌajja majje Jodio cuana ojee mimimiminaje: —¿Yajja sajaꞌame yajji esejaya? Quea mete ojjaña dejja cuanajo. Ojjañaa ba cani Huani Eyacuiñajjiya huoojea canaje esohui huohuiya. Jamajjeya: “Dejja cuaa Huani huoojea canaje” eseya aje se cuia ca chanaꞌ. “Eyacuiñajjiya Huani huoojea canaje” eseya aje se oe jama acaje baꞌa: “Jamajjeya ¿apiojji miyaya Huani shajjaꞌajja jjima aña?” Jesosaa acaje —jamaya Jodio cuana miminage. 
\p  
\v 33 Jamajjeya jjashahuabaqui majje Jesosa huohui canaje Jodio cuaa: —Cuaꞌa, de. Ecuanaja ba jjima Huani huoojeaꞌyojji epo —anisho canaje. 
\p —Jamajjeya ecuea miya ehuohuijji pojjeama e huoojeaꞌyojji epo —Jesosaa acanaje ma Jodio etii cuana. 
\c 12  
\s1 Esohui ejjashahuabaquijji echacojji taijo 
\r (Mateo 21.33-46; Noca 20.9-19) 
\p  
\v 1 Jesosaa ma Jodio etii cuana jama acanaje peaꞌai baꞌa: —¡Jiquio shajjaꞌajjacue esohui ejjashahuabaquijji! Jama poanaje baꞌa: Oe dejjaa emeshi meseya que quea quemo nee neejo bana canaje jjonojjajja oo pana, uva. Que peeyi canaje meija peeyi. Majoya que yiyesamajo mei cueehue iñaca canaje jjonojjajja na quishipashajji. Majoya mei iyasohua aoꞌao majje peehuana canaje. Iya canaje que jaahuanajji, quea huesha nee ojaya ebajji. Pea echacojji cuana iyaa canaje. Huohui canaje eque meseya: “¡Ecuea que jaahuanacue! Jaahuana sosejje quiajeꞌyo oya jjonojjajja quea huiso nee” poanaje. Majoya eque mese quea huesha poquinaje.  
\v 2 Quijje jjonojjajja jahuajo, eque meseya o chacojji huoojea canaje que jaahuanajji que jjonojjajja jjequiya. Que jaahuanajji bañaqui majje huohui canaje jama baꞌa: “¡Che mo jjonojjajja joya eque meseja pa cadojoꞌyahua, de!” poanaje. 
\p  
\v 3 —Que jaahuanajji cuaa quea mimishi jjejojo, jjonojjajja, uva quiaꞌyo jjima acanaje, joya eque meseja iyatepe mee. Jamajjeya o chacosahuajji poani iña canaje, cuia canaje. Huoojea caꞌyonaje jamatii, emejjee tii.  
\v 4 Eque meseya pea huoojea ca oꞌoyanaje o chacosahuajji. Jamatii yahuajo jama acanaje que jaahuanajji cuaa. Sapa cuiahuejjajeaꞌajja canaje, quea mimishi acanaje peaꞌai.  
\v 5 Quijje eque meseya pea huoojea, pea huoojea aꞌajja canaje. Jamatii que jaahuanajjiya jjonojjajja quia sa poꞌyo ajjaa jjejojo oya cuana iña canaje, cuiajea canaje, pea quecua canaje, pea sapa jajahuejjajea canaje meiya.  
\v 6 Quijje yejje nei oja bacua ejja oe nei huoojea canaje que jaahuanajji baa: “¡Eꞌe, oya cuanaa ecue bacua ejja shajjaꞌajja caje!” poanaje eque mese. 
\p  
\v 7 —Cho, oja bacua ejja poeje ba majje jama poanaje baꞌa: “Joya eque meseja bacua ejja poeje. Jjonojjajja yiye quijje ojaya poaje, ejeajji manoꞌyajo. ¡Cuaꞌa, ejjaquecuajeaqui oe! Jamajjeya que esejaya poajeꞌyo, de” poanaje que jaahuanajji cuana. 
\p  
\v 8 —Jamajjeya aje oe ebacua ejja iña canaje, quecuajeaꞌyo majje jeajeaqui canaje quea huesha nee ma que jaahuanajji mimishi cuaa; eque mese botiꞌama acanaje cuaa. Mahuiso esohui —Jesosa poanaje—.  
\v 9 Jamajjeya joya eque meseya poe oꞌoya majje ¿yajja acajeꞌyo acuae jiquio que jaahuanajji quea mimishi cuana? Oya quea quene nee poajeꞌyo. Ma que jaahuanajji cuana quecuajea cajeꞌyo, de. Que quia cajeꞌyo pea cuana —Jesosaa acanaje. 
\p  
\v 10 —Eꞌe —Jesosa poanaje peaꞌai—, ¿aꞌa miquea eba Eyacuiñajjija esohui etehueꞌyo yahuajo nei? Jama ejo poa baꞌa: 
\q1 “Oe equi yamajjana equi iyajji cajaa aca poa cuaa. Jamatii Eyacuiñajjiya ma eyamajjana equi yamajjana quea caꞌa nee nequi mee ca poa. 
\q1  
\v 11 Jamajoya ojjaña ojaya epeejji cuanaa Eyacuiñajji bihuia cani”. 
\m Jamaya yahuajo nei aca poa ejo; eya ma eyamajjana equi iyajji jayojja jama quea caꞌa nee nee nequi —Jesosaa acanaje. 
\p  
\v 12 Jesosaja esohui shajjaꞌajja majje Jodio cuana quea quene nee poanaje: —¡De! Ecuanajo oya mimiani, equi yamajjanajo pojjeama. Eseya que jaahuanajji quea mimishi jama peaꞌai ohuaya acani —poanaje Jodio cuana. 
\p Jamajjeya Jesosa iña sa acanaje ejeanobiajeajji. Jamatii iña jjima; quea mete poanaje. Ojjaña dejja echichaꞌyo nequicaꞌyo cuaa Jesosa Eyacuiñajjija esohui huohuijji nei nei ba cani. Ojjaña cuanaja quea nahue nee nee Jesosa eꞌiñajji. Jamajjeya Jodio etii cuanaja Jesosa iña jjima, poquinaje. 
\s1 Bejjo oe pojji quia cajji baꞌe sosejje emeshi mese yasijje 
\r (Mateo 2.15-22; Noca 20.20-26) 
\p  
\v 13 Eꞌe, Jesosa mimije shajjaꞌajja majje Jodio edejja tii cuana quea quene nee poanaje. Jamajjeya Paniseo cuana, pea cuana Enodeja ehuohuiꞌyo quea boti nee poanaje peaꞌai huoojea canaje Jesosa que. Jama huohuime acanaje baꞌa: —¡Poquicue Jesosa dasiaa! ¡Esohui quea camaja nee huohuiꞌajjaquicue, ojaya yajja sajaꞌame yaꞌyojji! Jamajje Moisesija etehueꞌyo jayojja jama mi sajaꞌa cajo jeanobiajeajeꞌyo ecuaaya —poanaje Jodio etii cuana. 
\p  
\v 14 Jamajjeya Paniseo cuana poquinaje Enodeja epeejji cuana nijje Jesosa baa. Ba majje huohuiꞌajja nisho canaje jama baꞌa: —Esohui huohuijji, miyaya eꞌe jojo nei huohuiaña Eyacuiñajjija ejjashahuabaquijji. Miya edejja tii cuanajo jjashahuabaqui ajja, emeshi mese cuanajo peaꞌai meteꞌama. Jamajjeya quea jaꞌa nee huohuiaña. Jamajje mo che huohuicue: ¿Aꞌa bejjo quia cajji Shomano meshi mese Sesa bajjani yasijje? ¿Aꞌa cuaeya seya sosequiaje soꞌo Sesaja meshijo baꞌe sosejje; equiajji pojjeama pojjaꞌa esejaya? —acanaje cuaa. 
\p  
\v 15 Ma Jodio cuanaja ejjashahuabaquijji quea jaꞌa pojjeama Jesosaja eba poanaje. Jamajjeya: —¡Miquiana ca mi ca oe e dasiajji nisho cuana, epeejji nisho quea tai nee nee! ¿Apiojji eya dasia sa aña? ¡Jamatii oe bejjo esodojjo jjequicue ecuea ebajji! —Jesosa poanaje. 
\p  
\v 16 Jjequi canaje cuaa. Esodojjo ba majje Jesosaa huohuiꞌajja canaje: —¿Ae ecajjaꞌyo jiquio? ¿Ae bajjani etehueꞌyo? 
\p —Emeshi mese ecajjaꞌyo, Sesa —poanaje—. Ojaya bajjani etehueꞌyo yani peaꞌai. 
\p  
\v 17 —Eꞌe —poanaje Jesosa—. ¡Jamajjeya Sesaja bejjo quiaquicue ohua sa cajo! ¡Eyacuiñajji aꞌa pajeaꞌyojji; oya bihuiacue, shajjaꞌajjacue peaꞌai! 
\p Jesosa shajjaꞌajja majje ojjaña cuana quea mete nee poanaje: —Quea jjashahuabaqui jaꞌa nee nee oya Jesosa. Jjadasia meequi ajja —poanaje. 
\p Jamajjeya Jodio etii cuana poquinaje, Jesosa jea canaꞌyonaje. 
\s1 ¿Aꞌa eꞌe jojo nei manoꞌyo majje eshe oꞌoya quijje poajeꞌyo? 
\r (Mateo 22.23-33; Noca 20.27-40) 
\p  
\v 18 Ma pojjajo tii beca Sanoseo cuana poeyanaje Jesosa baa. Sanoseo cuana aje oe jama poani baꞌa: —Manoꞌyo majje jama tii tii eshequi oꞌoyajji pojjeama quijje. 
\p Jesosa ca ca jama po ajja. Jamajjeya Jesosa dasia sa acanajejo jama anisho canaje baꞌa:  
\v 19 —Esohui huohuijji, Moisesiya jama tehue ca poa yahuajo nei nei baꞌa: “Dejja ejjahuanaqui bacuamaꞌ manoꞌyajo, oja chahuaa ehuanase equijjojea ani cahuana caꞌyahua oja oꞌija bacua jea jayojja jama epojji”. ¿Aꞌa eꞌe?  
\v 20 Jamajjeya jama poso baꞌa: Quea huiso edoe mese, me oejje pea beca, nequinaje. Edoe mese ebionei jjahuanaquinaje eponajo. Manoꞌyonaje bacuamaꞌ tii.  
\v 21 Oja chahuaa ehuanase equijjojea ani huana caꞌyonaje, bacuamaꞌ tii ani. Oya jayojja manoꞌyonaje bacuamaꞌ tii. Jamajjeya peaa echahua meseya huana ca oꞌoyanaje. Manoꞌyonaje bacuamaꞌ peaꞌai.  
\v 22 Jamaya ojjaña edoe mese cuana manojeyoꞌyonaje bacuamaꞌ tii. Quijje ehuanase peaꞌai manoꞌyonaje.  
\v 23 Jamajjeya eshe oꞌoya po majje eyajo, ¿ajea ehuanase epona poaje, ache edoe meseja? Ojjaña echahua mese jjahueaꞌajjaꞌyo epo —Sanoseo cuaa acanaje Jesosa dasiajji nisho. 
\p  
\v 24 Jesosaa jama acanaje baꞌa: —Chojja. Jamaya pojjeama. Miquea ba jjima Eyacuiñajjija esohui; oya quea caꞌa nee nee miquea ba jjima peaꞌai.  
\v 25 Eꞌe, shequi oꞌoya majje jjahuanaquiꞌyo ajja. Esohuidojojji eyajo ani jama poaje.  
\v 26 Eꞌe, yahuajo nei nei Eyacuiñajjiya Moisesi tehue mee ca poa miquea ebajji eꞌe jojo nei emanoꞌyo cuana eshe nequije oꞌoya eyajo. Eꞌe, Moisesi acui quepe jijiqui pejjejo nequi, Eyacuiñajjiya oya huohui ca poa jama baꞌa: “Eya ca ca iña Amajama jaahuanajji, Isaaca, Jacobo peaꞌai jaahuanajji”. Jamaya yahuajo nei nei Eyacuiñajjiya aca poa.  
\v 27 ¿Aꞌa Eyacuiñajjiya emanoꞌyo cuana meshijo emojeaꞌyojaa jaahuana cani? Cho. Ojaya epeejji cuana eshe nequi, manoꞌyo majje poquiꞌyo cuana peaꞌai jaahuana cani Eyacuiñajjiya, eshe oꞌoya epoꞌyo edojjoshahua jiquio ese mimianinaje. Jamajjeya eꞌe jojo nei emanoꞌyo cuana shequije oꞌoya, de. Miquianaya ca mi ca oe quea quehua jjashahuabaquiani —Jesosaa Sanoseo cuana acanaje. 
\s1 ¡Eyacuiñajji quea jea nee acue mi pejjejo nequi cuana peaꞌai! 
\r (Mateo 22.34-40; Noca 10.25-28) 
\p  
\v 28 Moisesija etehueꞌyo huohuijji jomajo nequi Jesosa shajjaꞌajja canaje quea jjashahuabaqui jaꞌa nee; Sanoseo cuana jjadasia meequi ajja. Jamajjeya Jesosa huohuiꞌajja canaje jama baꞌa: —Esohui huohuijji, yahuajo Moisesiya tehue ca poa Eyacuiñajjija esohui. ¿Ache esohui quea pame nee nee eꞌajji? 
\p  
\v 29 Jesosaa oya acanaje: —Eꞌe, jiquio esohui quea pame nee jayojja jama acue baꞌa: 
\q1 “¡Isaeni cuana shajjaꞌajjacue! Eyacuiñajji ca ca oe Emeshi Mese nei. Oya oe nei enequi tii. Pea chamaꞌ Eyacuiñajji.  
\v 30 Jamajjeya ¡Eyacuiñajji miquianajaya Emeshi Mese quea jea nee nee acue! ¡Eꞌe, miquea huapa pojjeama cuana quea jea nee acue! ¡Quea jea nee neeya oe acue Eyacuiñajji! ¡Jamajje ojo jjashahuaba tiitiiquicue! ¡Oya shajjaꞌajja tiitiicue! ¡Ojaya epeejji quea jaꞌa nee nee acue peaꞌai!” 
\m  
\v 31 Jiquio esohui quea pame nee. Pea oya jayojja quea pame nee jama baꞌa: 
\q1 “¡Miquea huapa pojjeama jama quea jea neeya oe acue! ¡Ojjaña pea cuana quea jea nee nee acue peaꞌai!” 
\m Jamaya quea pame nee nee eꞌajji —Jesosa poanaje—. Pea chamaꞌ esohui jiquio jayojja quea pame nee nee. 
\p  
\v 32 Jesosaja esohui shajjaꞌajja majjeya Moisesija etehueꞌyo huohuijji onijje jama poanaje baꞌa: —Esohui huohuijji Jesosa, miquea esohui eꞌe jojo nei. Eꞌe jojo nei Eyacuiñajji Emeshi Mese nei. Oya oe nei enequi tii, pea chamaꞌ Eyacuiñajji.  
\v 33 Jamajjeya Eyacuiñajji Emeshi Mese nei quea jea nee nee caꞌa cahua, ojo cajjashahuaba tiitiiquiahua, cashajjaꞌajja tiitii cahua, ojaya epeejji quea jaꞌa nee nee capoahua peaꞌai ojjaña. Oya jayojja pea cuana quea jea nee nee caꞌa cahua. Jamaya poanijo quea pame nee nee poani. Jodio etiiquiana cuana jayojja jama po majje ca ca quea pame pishana poani. Eꞌe, etiiquiana cuaa ca ca huo cuana, pea aquiana peaꞌai mei eꞌiyaꞌyo biajje dahua caninaje Eyacuiñajji quea bei po meejji mimishijo —poanaje Moisesija etehueꞌyo huohuijji. 
\p  
\v 34 Ojaya esohui quea jaꞌa nee shajjaꞌajja majje Jesosaa oya huohui canaje jama baꞌa: —Eꞌe, miya beshahua nei Eyacuiñajji sa neinei poani miquea Emeshi Mese nei epojji —acanaje. 
\p Jesosa quea jjashahuabaqui jaꞌa nee neejo jjadasia meequi ajja ba majje ojjaña Jodio etii cuana quea mete poanaje. Esohui quea camaja, yajja sohui esajaꞌame yajjijojo huohuiꞌajja pajea canaje o dasiajji nisho. 
\s1 Jesosa Eyacuiñajjija huoojeaꞌyo ojjaña jaahuanajji Quito 
\r (Mateo 22.41-46; Noca 20.41-44) 
\p  
\v 35 Jamajjeya ojjaña cuana ejjachichaqui nequi huohuiꞌajja canaje Jesosaa: —¿Yajja poani miquianaya Eyacuiñajjija huoojeaꞌyo ojjaña jaahuanajji Quitojo? ¿Ache etiiquianaja osecua oya, ajea bacua? ¿Yajjajje acuae Moisesija etehueꞌyo huohuijji cuaa huohui cani? Jama baꞌa: “Quito emeshi mese Dabija osecua, ma yahuajo baꞌya poaja” acani cuaa —Jesosa poanaje—.  
\v 36 Yahuajo nei Edojjoshahua Pameya emeshi mese Dabi tehue mee ca poa jama baꞌa: 
\q1 “Eyacuiñajjiya ecuea Emeshi Mese Quito jama aca poa: —¡Enijje anioquecue ebianei mijijje, ojjaña cuana huoojeaꞌyojji! Eyaya mi quecuajji nisho epo cuana jeabichajea jeyojeyojeꞌyo”. 
\m Jamaya huohui ca poa yahuajo Dabiya ejo.  
\v 37 Eꞌe, Dabiya Eyacuiñajjija huoojeaꞌyo Quito aca poa: “Ecuea Emeshi Mese nei”. Jamajjeya Quito Dabija Emeshi Mese nei poani. Jamatii oya Dabija osecua peaꞌai —Jesosaa acanaje. 
\p Ojjaña cuaa ejjachichaqui nequiya Jesosaja esohui shajjaꞌajja canaje. Quea bihui nee poanaje. 
\s1 —¡Aꞌa Jodioja esohui huohuijji jama baꞌejji! —Jesosa poanaje 
\r (Mateo 23.1-36; Noca 11.37-54, 20.45-47) 
\p  
\v 38 Majoya Jesosaa ojjaña cuana huohui canaje jama baꞌa: —¡Jodio esohui huohuijji cuana jayojja jama aꞌa baꞌejji! Oya cuanaa daqui quea pame nee nee, quea ao nee huosho cani onajaya ebajji. Ejiojjijje poquiani ojjañaa aquiana quia cani yasijje anicuaa; pea cuaa jama bihuia cani baꞌa: “¡Esohui huohuijji, miya quea pame nee nee!” Jamaya aje oe ojaya quea boti nee, jiquio Jodio etii cuanaja, esohui huohuijji quea pame nee poso jjabaquiani —Jesosa poanaje—.  
\v 39 Jodioja equi ejjachichaquijjijo ebionei anioque sa poani, Eyacuiñajjija esohui huohuijji pejjejo, ojjaña nijje emimijji. “Eꞌe, oya cuana Eyacuiñajjija esohui huohuijji nei jayojja quea pame nee” epo meejji acani. Ojee ijjiaꞌijjianijo emeshi mese pejjejo anioqueani, ebionei eꞌijjiaꞌijjiajji.  
\v 40 Jamatii oya cuana aje oe siipojji; eꞌahuemanoja equi cuana sii cani. Majoya Eyacuiñajji nijje mimi nishoani quea huiso nee. Jamajoya Eyacuiñajjiya oya cuana cajaa acajeꞌyo. Quijje quea nee nee po mee cajeꞌyo, quea nee tii tii poajeꞌyo. Pea cuana ca ca quea nee po mee cajeꞌyo. Jamajjeya ¡aꞌa oya cuana jayojja jama ajji! —Jesosaa ojjaña cuana huohui canaje. 
\s1 Eꞌahuemanohua ejjeshejji quia canaje 
\r (Noca 21.1-4) 
\p  
\v 41 Majoya Jesosa Eyacuiñajjija equijo ejjeshejji iyajji pejjejo anioquenaje. Ba canaje dejjaa quea huiso poe majje ejjeshejji iyanobia cani ma acui ecaca huasijje Eyacuiñajji yasijje equiaꞌyojji. Joya quea aquiana huiso neeya iyanobia canaje quea huiso nee ejjeshejji.  
\v 42 Majoya eꞌahuemano aemaꞌ poeyanaje. Ojaya ca ca esodojjo beca iyanobia canaje, sosemaꞌ pishana.  
\v 43 Jamatii oya ba majje Jesosaa o shajjaꞌajjajji cuana iyaa canaje. Jama poanaje baꞌa: —¡Bacue! Eꞌe jojo nei jiquio eꞌahuemanohua quea huiso nee nee jayojja quia caꞌyonaje. Pea cuaa oe pojji jayojja quia caꞌyonaje. Jamaya Eyacuiñajjiya oya ba cani.  
\v 44 Eꞌe, pea cuana quea aquiana huiso nee nee. Oe pojji ojaya aquiana cuana quia canaje. Eꞌahuemano ca ca aemaꞌ nei nei. Ohuaya ojjaña ojaya ejjeshejji quia canaje; bobi jjeshejji yajji nisho quia canaje peaꞌai —Jesosa poanaje. 
\c 13  
\s1 Eyacuiñajjija mei equi cajjajeajea cajeꞌyo cuaa 
\r (Mateo 24.1-2; Noca 21.5-6) 
\p  
\v 1 Majoya Jesosa Eyacuiñajjija equijo ani poquinaje. Poquianijo, o shajjaꞌajjajji cuaa oya huohui canaje jama baꞌa: —¡Bacue Eyacuiñajjija equi! Quea quemo, quea pame mei cuana —poanaje. 
\p  
\v 2 —Eꞌe, ¿aꞌa jiquio equi quea pame nee baña? Eꞌe jojo nei quijje mei cuana cajjajeajea cajeꞌyo cuaa. Chamaꞌyo tii acajeꞌyo —Jesosa poanaje. 
\s1 Jiquio ojjaña aquiana oe poajeꞌyo 
\r (Mateo 24.3-28; Noca 21.7-19) 
\p  
\v 3 Majoya Jesosa poquinaje quea huesha pishana, enataꞌa ojje miji yasijje. Eyiyo Onimo acui yiye yasijje jaasohuaquinaje. Anioquenaje. Jamajje o shajjaꞌajjajji cuaa, Penohua, Anesiya, Huaniya, Jacobohua peaꞌai oya huohuiꞌajja canaje jama baꞌa:  
\v 4 —Jesosa, ¿ache shono acuae mei cuana cajjajeajea cajeꞌyo cuaa soꞌo? ¿Aꞌya ba majje acuae ecuana jjabahuejjaquije soꞌo ojjaña jiquio meshi chamaꞌyo tii epojjijo? 
\p  
\v 5 Jesosaa sajaꞌa canaje: —¡Jjashahuaba neineiquicue onajaya miya edasiajji pojjeama!  
\v 6 Quea huiso siajjepojji cuana poeje, ecuea ehuoojeaꞌyo pojjeama: “Eyacuiñajjiya eya huoojea canaje, eya ca ca iña ojjaña jaahuanajji” jamaya siajje poaje. Quea huiso dasia cajeꞌyo.  
\v 7 “Ojjaña jjaquecuaquiani, ojjaña meshi yasijje peaꞌai” huohui caje peaaya peaꞌai. ¡Jamatii aꞌa quea mete pojji! Jamaya poaje. Jamatii apoa pojjeama, oe po ajja jjima poaje soꞌo —Jesosa poanaje—.  
\v 8 Eꞌe, jjaquecuaqui cajeꞌyo cuana ojjaña meshi yasijje, ojjaña cuiñajji yasijje peaꞌai. Quea huiso emanomeejjiya mano mee cajeꞌyo; bobi yasijje po majje manojeꞌyo quea huiso; meshi huehuahuehuaje ojjaña meshi yasijje peaꞌai —Jesosa poanaje—. Eꞌe, jiquio ecua epona bacua neeani jama ebionei japashineijje neeani; quijje quea nee nee. Jamaya poaje e poe oꞌoya jjimahuajo. Quea nee pishana po majje quea nee nee poaje ojjaña cuana —Jesosa poanaje. 
\p  
\v 9 —Majoya esohui huohuijji nisho cuaa miquianaya iña majje jeanobiajea cajeꞌyo. Cuiasejjajea caje equi ojee ejjachichaquijjijo peaꞌai. Enijje jjapeequianijo, pea cuaa miquianaya iña majje emeshi mese cuana huasijje dojo caje, ona huoojeajji cuana huasijje peaꞌai. Jamaya poajo, ¡ecuea esohui huohuicue ojaya eshajjaꞌajjajji, emeshi mese cuanaja eshajjaꞌajjajji!  
\v 10 Eꞌe jojo nei e poe oꞌoya jjimahuajo, ojjaña meshi cuana huasijje ecuea esohui quea pame nee cahuohuiqui cahua, ojjañaja eshajjaꞌajjajji. Majoya e poe oꞌoyajo, ojjaña oe poaje —Jesosa poanaje.  
\v 11 Jamajjeya miquianaya iña cajo emeshi mese yasijje edojojji, ¡aꞌa quea mete pojji! Aꞌa jjashahuabaquijji jama baꞌa: “¿Ae shai eyaya emeshi mese huohuije?” Edojjoshahua Pameya miquianaya sohuihuohui meesahua caje. Jamajjeya Edojjoshahua Pame mijo yaniya ohuaya esohui huohui caje ecuea ejjashahuabaquijji.  
\v 12 Majoya pea cuana botiꞌama acajeꞌyo cuanaja. Jamajjeya eꞌoꞌi meseya oja chahua iña meesahua caje onaja equecuaꞌyojji; ejeajjiya oja bacua iña meesahua caje onajaya equecuaꞌyojji peaꞌai. Eshoꞌiquiana shajjamaꞌ po majje oja chii, ojaya enaese peaꞌai iña meesahua caje onajaya equecuaꞌyojji peaꞌai.  
\v 13 Enijje jjapeequianijo miquianaya botiꞌama nei acaje ojjaña meshijo baꞌeca cuaa. Jamatii e poe oꞌoya jjimahuajo, enijje jjapeequipajeaꞌyo ajja tii ca ca Eyacuiñajji nijje baꞌe tiitii meejeꞌyo, enijje peaꞌai —Jesosa poanaje. 
\s1 Aquiana quea tai nee ojjaña quea mete nee nee epo meejji 
\r (Mateo 24.15-28; Noca 21.20-24, 17.22-24) 
\p  
\v 14 —Eyacuiñajjija esohui huohuijjiya yahuajo nei nei jama aca poa baꞌa: 
\q1 “Quijje Eyacuiñajjija equijo nequije aquiana quea tai nee nee, ojjaña quea mete nee nee epo meejji”. 
\m Jamajjeya ma ba majje ma pojjajo tii ojjaña Jodio meshijo baꞌeca capoquicuajiahua eyiyo cuana huasijje. (¡Jiquio esohuijo jjashahuabaquicue quea jaꞌa epojji!)  
\v 15 Joya equi huisa biajje chacochacoani ¡aꞌa equi yasijje dobiquinanajji aquiana cuana biohua edojojji!  
\v 16 Joya quejo chacochacoqui peaꞌai ¡aꞌa equi yasijje poquinanajji daqui moojo! Eyiyo huasijje poquicuaji ajjajo manoꞌyo chanaꞌ.  
\v 17 Epona cuana oꞌejji, bacua shoꞌijji peaꞌai quea yeno poaje; quea camaja equehua poquicuajijji poaje.  
\v 18 Jamajjeya Eyacuiñajji nijje mimicue jama baꞌa: “Eyacuiñajji, ¡eenojo pojjeama capoahua ecuanaja epoquijji eyiyo cuana huasijje!” acue —Jesosa poanaje—.  
\v 19 Eꞌe, ma pojja cuanajo ojjaña quea mete nee nee, quea yeno nee nee poaje. Jamaya pojjeama yahuajo, meshi pana majje, jjeya nei peaꞌai, quijje peaꞌai; quea mete pishana, quea yeno pishana. Ma pojja quea camaja cuanajo ca ca quea yeno nee poaje ojjaña cuana —Jesosa poanaje—.  
\v 20 Eyacuiñajjiya oe pojji cahuijo quea camaja po mee cajeꞌyo; quea cahui huiso epoꞌyo jojjemo, ojjaña cuana manoꞌyome. Ojaya epeejji jaahuana canijo, ojaya quea nahue nee emano jeyojeyoꞌyojji, Eyacuiñajjiya oe pojji cahuijo quea camaja amee cajeꞌyo, quea cahui huiso pojjeama —Jesosa poanaje. 
\p  
\v 21 —Ma pojja cuanajo aꞌa shajjaꞌajjajji ona siajje poajo jama baꞌa: “¡Bacue oe, Eyacuiñajjija huoojeaꞌyo Quito jiquiacua poeꞌyonaje!” Jama poso, ¡aꞌa shajjaꞌajjajji! “¡Bacue oe, Quito jocuama pa poeyanaje!” jama onaa acajje ¡aꞌa shajjaꞌajjajji; aꞌa poquijji!  
\v 22 Eꞌe, Eyacuiñajjija huoojeaꞌyo ojjaña jaahuanajji e jayojja nisho, Eyacuiñajjija esohui huohuijji nisho peaꞌai poeje quea huiso nee nee. Oya cuanaa ma pea dejjaa ajjima acani acajeꞌyo Eyacuiñajjija epeejji cuana dasiaꞌyojji nisho. Dasia cajeꞌyo quea huiso nee; ecuea epeejji nei peaꞌai beshahua nei eya pajea mee cajeꞌyo o jayojja epojji; cho, jjadasia meequi ajja.  
\v 23 Ecuea epeejji cuana, eyaya miya huohuinaje, quijje oya poeje ejjadasiaquijji. Jamajjeya ¡aꞌa oya cuana shajjaꞌajjajji! —Jesosa poanaje. 
\s1 Jesosa ojjañaja Edoe Mese poeje oꞌoya 
\r (Mateo 24.29-31; Noca 21.25-28) 
\p  
\v 24 —Eꞌe—Jesosa poanaje—, quijje quea camaja nee nee po majje majoya eshequi quea apo poajeꞌyo. Baꞌi jijiꞌyo ajja poajeꞌyo.  
\v 25 Majameta cuana jjacajjaquiꞌyo majje jijioquejeꞌyo ojjaña peaꞌai. Majameta nequijji cuana huehuahuehuajeꞌyo janobajjima nei peaꞌai; yahuajo jayojja pojjeama poaje.  
\v 26 Majoya ojjañaa eya ba caje eyajo. Ba majje huohui caje jama baꞌa: “¡Bacue! Eꞌe jojo nei Jesosa ojjañaja Edoe Mese poejeꞌyo bo cuana biajje. Oya oe nei quea caꞌa nee nee, quea jeajahua nee nee peaꞌai” acaje cuaa —Jesosa poanaje—.  
\v 27 Majoya eyaya esohuidojojji cuana huoojeajeꞌyo biacua, macua huasijje peaꞌai ojjaña meshi yasijje peaꞌai ecuea epeejji cuana jjequiya —Jesosa poanaje. 
\s1 Esohui acuijo, iquena bajjanijo, huohui canaje Jesosaa 
\r (Mateo 24.32-35; Noca 21.29-33) 
\p  
\v 28 Jesosaa huohui canaje pea jama baꞌa: —Eꞌe, eyaya miquianaya esohui ejjashahuabaquimeejji huohuije iquena acuijo. Eseja meshijo acui iñaꞌyani ba majje eseya poani: “Eꞌe nei, nayaja poꞌyonaje. Jjeya eshequiaja popajeaꞌyonaje”. 
\p  
\v 29 —Ma jayojja jama eshequi, baꞌi quea misi, majameta eyajo jijijijioqueani ba majje jjashahuabaquicue jama baꞌa: “Eꞌe, jjeya nei apoa poaje. Jjeyahua nei esejaya Emeshi Mese nei Jesosa Quito poeje oꞌoya”. 
\p  
\v 30 —Eꞌe jojo nei ojjaña ma pojja cuanajo baꞌeca cuana mano jeyojeyoꞌyo jjimahuajo ojjaña apoa poajeꞌyo; eya ojjañaja Emeshi Mese nequijeꞌyo.  
\v 31 Eꞌe, aquiana eyajo nequi chamaꞌ poajeꞌyo; ojjaña meshi chamaꞌyo tii poajeꞌyo peaꞌai. Jamatii ecuea esohui oe epoꞌyojji pojjeama; eꞌe jojo nei eyaya jamaya ajeꞌyo tii tii —Jesosa poanaje—.  
\v 32 ¿Ache shono shai jamaya poaje, ojjaña apoa poajeꞌyo? Dejja cuanaja ba jjima; esohuidojojji cuanaja ba jjima peaꞌai; ecuea ehuohuijji pojjeama. Ecue Chiija eba ojaye nei. Ohuaye nei huohui cajeꞌyo ojjaña apoa epoꞌyojji —Jesosa poanaje. 
\p  
\v 33 —Jamajjeya ¡jjashahuabaqui tiitii anicue! Ache pojjajo eya ojjañaja Emeshi Mese nei poeje oꞌoya miquea eba pojjeama.  
\v 34 Jiquio jama poaje baꞌa: Eꞌequi mese poqui jjimahuajo echacojji cuana iyaa canaje. Huoojea canaje jama baꞌa: “¡Ecuea equi cuiñacue, miquianaaya! ¡Ecuea ehuohui mi yasijje jama chacocue peaꞌai! Quijje eya poeje oꞌoya” eꞌequi mese poanaje —Jesosa poanaje—.  
\v 35 Jamajjeya ¡jjaꞌishoaꞌajjaqui ani tiitiicue! Eya miquianajaya eꞌequi mese jayojja; ache nei eshequi nequijo poeje oꞌoya miquianajaya ebajo ese. ¡Sinecua, mecashono, mecajjeahua cuana jjaꞌishoaꞌajjaqui anicue!  
\v 36 Apoa pojjeama, ecahuijaa ba majje tecueañaje poe majje —Jesosa poanaje—.  
\v 37 Jamaya eyaya ojjaña ecuea epeejji cuana huohuiaña peaꞌai: ¡Apoa epo anicue quiana! —jamaya Jesosaa sohuihuohui canaje Jenosanenajo, Onimo yiyejo. 
\c 14  
\s1 Jodio etii cuana jjashahuaba taiquinaje Jesosa quecuaꞌyojjijo 
\r (Mateo 26.1-5; Noca 22.1-2; Huani 11.45-53) 
\p  
\v 1 Eꞌe, ojjaña Jodio cuana ojee jjachichaqui oꞌoyanaje Jenosanena huasijje ojee ijjiaꞌijjiaa, quea bihui nee epojji, yahuajo nei esohuidojojjiya Ejito meshijo Jodioja bacua cuana cuiaꞌyo jjima aca poa niñebaꞌyojji. Beca cahuime ojee ijjia jjimahuajo, noe, pahui eshejjeemeejjimaꞌ ijjia jjimahuajo, Eyacuiñajji nijje emimijji etii cuana, Moisesija etehueꞌyo huohuijji cuana peaꞌai jjashahuabaquinaje Jesosa quecuaꞌyojji.  
\v 2 Ojee mimimiminaje jama baꞌa: —¡Jesosa quehua neijje iñacue, ojjaña Jodio cuana jjachichaqui jjimahuajo! ¡Oya iñacue jjeyahua nei, de! Quijje pishana ojjaña ojee ijjiaꞌijjianijo, ecuanajaya Jesosa eꞌiñajji pojjeama. Chojja, ojjaña Jodio cuana quea quene nee nee ecuana nijje po chanaꞌ —poanaje Jodio edejja tii cuana. 
\s1 Eponaa Jesosa sapa sha canaje shiyeshiyeya 
\r (Mateo 26.6-13; Huani 12.1-8) 
\p  
\v 3 Jesosa Betaniajo ani poquinaje Simonija equi yasijje. Poquinaje ijjiaꞌijjiaa. Yahuajo nei Simoni quea mano nee nee batata epoꞌyo quea tai poa, ma dejja cuaa jjajea meequiꞌyo jjima acani. Jesosaa oya yahuajo jjajeaqui mee caꞌyonaje batata epoꞌyo. Simonija equijo ojee ijjiaꞌijjianijo, oe epona Jesosa que poeyanaje. Tahuoo quea nahue nee neejo shiyeshiye ye canaje. Tahuoo naba capa majje Jesosa huojja sha canaje shiyeshiyeya, nardo bajjaniya.  
\v 4 Ma ba majje beca cuana quea quene poanaje; epona tecuea canaje jama baꞌa: —¿Apiojji acuae miyaya jiquio shiyeshiyeya Jesosa sapa quehua shaña soꞌo?  
\v 5 ¡Quea nahue nee nee eshojeajeajji, oe shequiaja echacome jama sosejjeme, de! ¿Sha jjima yajjijo poso ca mi ca oe shiyeshiye dojo meenaje esodojjo quea huiso sosejje? Eꞌe, aemaꞌ cuana huasijje esodojjo equiajji poso —epona acanaje cuaa. 
\p  
\v 6 Jesosaa ca ca oya shajjaꞌajja majje jama acanaje baꞌa: —¿Apiojji acuaeya epona tecueaña soꞌo? ¡Aꞌa oya tecueajji! Eꞌe, eya ohuaya huojja sha canaje. Jamaya quea pame nee.  
\v 7 Eꞌe, aemaꞌ cuana minijje po tiitiijeꞌyo. ¡Oya cuana jaahuanaꞌyocue quijje peaꞌai! Eya ca ca enequi tiitiijji pojjeama minijje.  
\v 8 Epona e huojja sha jjimahuajo jjashahuabaquinaje jama baꞌa: “Eꞌe e, Jesosa manojeꞌyo. Mano jjimahuajo, eyaya oya huojja shaña shiyeshiyeya; onaja mojea jjimahua shaña poanaje epona” —Jesosaa acanaje. 
\p  
\v 9 —Jamajjeya quijje ojjaña meshijo ecuea esohui huohui majje jiquio eponajo huohui capoquipoquije peaꞌai jama baꞌa: “Oe eponaa Jesosa huojja sha canaje shiyeshiyeya, quea jea nee neejojo”. Jiquio eponajo huohui tiitii caje, eꞌe jojo nei —jamaya Jesosaa acanaje. 
\s1 Jodasaa onaya iña meesahua canaje Jesosa 
\r (Mateo 26.14-16; Noca 22.3-6) 
\p  
\v 10 Yaninaje quea huiso Jesosa shajjaꞌajjajji cuana, 12. Oe nei Jodasa Isicaniote bajjani poquinaje Eyacuiñajji nijje emimijji etii cuana huasijje. Jama poanaje baꞌa: —Eyaya miya Jesosa iña meesahuaje. ¿Ache sose huiso acuae mo ya oe sosequiaje soꞌo Jesosa iña meesahua sosejje? —poanaje Jodasa. 
\p  
\v 11 Oya cuanaa Jodasa sajaꞌa canaje quea bihui nee jama baꞌa: —Eꞌe, Jesosa iña meesahua sosejje miya sosequiajeꞌyo quea huiso —poanaje Jodio etii. 
\p Jamajjeya Jodasa jjashahuaba neineiqui aninaje: —¿Achajja iña meeme aje soꞌo? Cabaꞌajjaquisahua —poanaje. 
\s1 Jesosaa o shajjaꞌajjajji cuana bobi ijjia mee canaje 
\r (Mateo 26.17-29; Noca 22.7-23; Huani 13.21-30; 1 Conitio 11.23-26) 
\p  
\v 12 Jodio cuana quea bihui ojee ijjiaꞌijjianinaje yohua shejo baꞌa esohuidojojjija yahuajo nei etiiquianaja bacua cuana cuiaꞌyo jjima ñajjajja naꞌ esecuejo eꞌiñapepa ba majje. Jamajjeya ebionei epojjajo eꞌijjiaꞌijjiajjijo, pahui quea caꞌa ijjia canijo, ñajjajja cuia cajjijo, Jesosa que poe majje o shajjaꞌajjajji cuaa huohuiꞌajja canaje jama baꞌa: —Jesosa, ¿ache equijo acuae seya pahui eshejjee meejjijo hua jjima ijjiaje soꞌo? ¡Ecuana huoojeacue aquiana iyajeaa, mi ishoajji! 
\p  
\v 13 Jamajjeya Jesosaa beca shajjaꞌajjajji huoojea canaje: —¡Poquicue Jenosanena huasijje! ¡Jomajo ecuea epeejji baquicue ena abo cani! ¡Onijje poquicue!  
\v 14 Oya equi yasijje dobiquiyajo, ma equi mese nijje mimicue jama baꞌa: “Ecuana sohui huohuijji jama poanaje baꞌa: “Miquea equijo eyaya e shajjaꞌajjajji cuana nijjeya pahui caꞌa ijjiaje esohuidojojjiya etiiquianaja bacua ejja cuana cuiaꞌyo jjima poa shejo. ¿Ache equi quecuayijjijo ijjiaje soꞌo?” jamaya acue —Jesosaa acanaje—.  
\v 15 Majoya equi meseya miya dojo caje eyahuasijje equi quecuayijji ai yasijje. Jomajo ojjaña aquiana apoa, ehuana bamebameꞌyo. ¡Jomajo bobi iyacue esejaya ojee eꞌijjiajji! —Jesosa poanaje. 
\p  
\v 16 O shajjaꞌajjajji beca poquinaje Jenosanena huasijje. Jomajo Jesosaja esohui jayojja jama ojjaña ba cañaquinaje. Bobi iyajea canaje pahui caꞌa ijjiajji. 
\p  
\v 17 Majoya sinecua neijo Jesosa o shajjaꞌajjajji cuana nijje, 12 huisome nijje ma equi yasijje poquinaje. Dobiqui majje jaasohuaquinaje equi quecuayijji ai yasijje, equi jamacoo huasijje. Majoya ojjaña cuana anioquenaje bobi ijjiajji pejjejo ijjiaꞌijjiaa.  
\v 18 Ojee ijjiaꞌijjia anijo Jesosa jama poanaje baꞌa: —Eꞌe jojo nei jiquiojo aniya oe epeejji nisho enijje ijjiaꞌijjia ani. Ohuaya onaya cuana eya iña meesahua cajeꞌyo equecuaꞌyojji. 
\p  
\v 19 Ma shajjaꞌajja majje ojjaña cuana quea yeno nee nee poanaje. Pea mimiajo, pea poanaje jama baꞌa: —Ecuea Emeshi Mese, eya ca ca o jayojja pojjeama, eꞌe jojo nei —jamaya ojjaña miminaje. 
\p  
\v 20 Majoya Jesosa onijje jama poanaje baꞌa: —Eꞌe, miquianaya e shajjaꞌajjajjiya 12 huisome enijje yani; oe aje epeejji nisho, de. Eꞌe, maaya pahui shapeshipeshiani enijje; ohuaya eya onaya cuana iña meesahua cajeꞌyo onajaya equecuaꞌyojji.  
\v 21 Eꞌe, yahuajo nei Eyacuiñajjija esohui tehuejji cuaa esohui tehue ca poa jama baꞌa: 
\q1 “Quijje oe dejjaa Eyacuiñajjija huoojeaꞌyo ojjaña jaahuanajji onaya cuana iña meesahua cajeꞌyo equecuaꞌyojji”. 
\m Ma etehueꞌyo jama capoahua. Jamatii ma dejja, e iña meesahuajji epo quijje quea yeno nee poajeꞌyo. Jjashahuabaquije jama baꞌa: “¿Apiojji shai eya ecue naeya mejo ca poa? Eya ca ca nequi sa po ajja. Ecuea ejjashahuaba taiquijjijo manoꞌyo sa poani” oya poaje. Quijje oya quea nee nee po tiitiijeꞌyo —Jesosa poanaje. 
\p  
\v 22 Majoya ojee ijjiaꞌijjia anijo tii Jesosaa pahui caꞌa jjeshe canaje. Eyacuiñajji bihuia majje, pahui mijisisi majje quia canaje o shajjaꞌajjajji cuana. Jama poanaje baꞌa: —¡Ijjiacue! Jiquio ecuea eyami —poanaje. 
\p  
\v 23 Pahui ijjia majje caneco jjeshe canaje Jesosaa. Eyacuiñajji bihuia majje quia canaje ojjaña o shajjaꞌajjajji cuana.  
\v 24 —¡Ishicue! Jiquio ecuea enaꞌ. Ecuea enaꞌ cuayaquiajo, eya manojeꞌyo. Jamajoya eyaya ojjañaja mimishi cuana cuijeajeꞌyo enijje jjapeequiajo, Eyacuiñajjija esohui eyacua jayojja jama ajeꞌyo.  
\v 25 Jjeya eyaya jiquio jjonojjajja na, uva na, eꞌishi oꞌoyajji pojjeama miquiana nijje; eya manojeꞌyo. Quijje nei poe oꞌoya majje eyaya jiquio ishije oꞌoya miquiana nijje. Eꞌe, eya poe oꞌoyajo, ecue Chiiya eya ojjaña huoojeaꞌyojji pomee cajeꞌyo, ojjañaa shajjaꞌajja caje —jamaya Jesosaa acanaje. 
\s1 Penohua Jesosa ba jjima nisho acajeꞌyo pa 
\r (Mateo 26.30-35; Noca 22.31-34; Huani 13.36-38) 
\p  
\v 26 Majoya ojee sohuicuaya majje poquinaje eyiyo huasijje, Onimo jjajja meshi yasijje. 
\p  
\v 27 Ejiojjijje poquije Jesosaa o shajjaꞌajjajji cuana acanaje jama baꞌa: —Jiquio mecajje ojjaña miquianaya enijje jjapeequipajeajeꞌyo. Eꞌe, yahuajo Eyacuiñajjija esohui tehuejji cuaa ejo tehue ca poa jayojja jama poaje jama baꞌa: 
\q1 “Quijje eyaya ñajjajja cuiñajji jaahuana neinei ajja. Jamajjeya onaaya oya cuia cajeꞌyo. Ñajjajja cuiñajji chamajo, ñajjajja cuana jjajeaajajeaquinanajeꞌyo”. 
\m Jamaya yahuajo nei nei tehue ca poa ejo —Jesosaa acanaje—. Eꞌe, eya ñajjajja cuiñajji jayojja jama poaje. Eya manoꞌyo majje ecuea epeejji cuana ñajjajja cuana jayojja jama poaje; jjajeaajaquinanajeꞌyo. 
\p  
\v 28 —Jamatii Eyacuiñajjiya eya shequi mee ca oꞌoyajje eya poquije Janinea meshi yasijje. Jomajo aje mi poeyajo ishoañaquije —Jesosa poanaje. 
\p  
\v 29 Penohua Jesosa jama acanaje baꞌa: —Eꞌe pojjaꞌa pea cuana minijje jjapee tiitiiquiꞌyo ajja. Eya ca ca pea jayojja jama pojjeama. Eya jjapee tiitiiquijeꞌyo minijje —poanaje Peno. 
\p  
\v 30 Jesosaa Peno jama acanaje baꞌa: —Eyaya miya eꞌe jojo nei huohuiaña, Peno, jiquio mecajje tii cachina yahue beca taaame po jjimahuajo, pea beca peejjima huohuiꞌajjame acajje, miya ejo po huichaꞌa huichaꞌaje jama baꞌa: “Chojja de, ecuea Jesosa ba jjima nei nei” miyaya sajaꞌame aje quea meteya jjejojo —Jesosaa acanaje. 
\p  
\v 31 Jamatii Penohua Jesosa acanaje: —Chojja, Jesosa. Eꞌe pojjaꞌa eya minijje jjapeequianijo, pea cuaa eya cuiajea cajeꞌyo. ¡Jamatii ecuea ca mi ca epajeaꞌyojji pojjeama! 
\p Oya jayojja pea cuaa acanaje peaꞌai: —Eꞌe, Jesosa, ecuanajaya ca mi ca epajeaꞌyojji pojjeama tii, jamatii onaa cuiajea cajeꞌyo pojjaꞌa. 
\s1 Quea yeno nee nee Jesosa oja Chii nijje miminaje Jetesemani quejo 
\r (Mateo 26.36-46; Noca 22.39-46) 
\p  
\v 32 Majoya Jesosa o shajjaꞌajjajji cuana nijje Jetesemani que yasijje poquinaje. Jesosa onijje miminaje jama baꞌa: —¡Anioquecue jiquiojo tii! Jocuama eya poquije ecue Chii nijje mimiya. 
\p  
\v 33 Jamajjeya Jesosaa Peno, Huani, Satiaco peaꞌai dojo canaje jocuama. Oya Jesosa jjashahuabaquinaje quea yeno nee nee.  
\v 34 Jamajjeya ojaya epeejji nijje jama poanaje baꞌa: —Quea yeno nee nee iña; manojeꞌyo iña, de. ¡Anioquecue enijje; aꞌa cahuijji! —Jesosa poanaje. 
\p  
\v 35 Majoya Jesosa cuama pishana poqui majje ecuiꞌoshajjajo nequinaje. Oja Chii nijje miminaje quea yeno nee jama baꞌa:  
\v 36 —Ecue Chii, miquea ejjashahuabaquiꞌyojji jayojja jama eyaya ajeꞌyo. Miyaya eya huoojeanaje ojjañaja mimishijo manoꞌyohua. Quea camaja nee nee ejo. ¿Aꞌa ya iña miyaya che onaaya quecua meeꞌyo jjima ajeꞌyo? ¿Aꞌa ya iña che iña meeꞌyo jjima ajeꞌyo? ¡Jamatii miquea ejjashahuabaquiꞌyojji jayojjaya jama acue! ¡Ecuea ejjashahuabaquiꞌyojji jayojja jama aꞌa ajji! —Jesosa jamaya miminaje oja Chii nijje. 
\p  
\v 37 Majoya oya poqui oꞌoyanaje o shajjaꞌajjajji cuana huasijje. Ba cañaquiꞌyonaje ecahuijaa. Tecueꞌama Peno nijje jama poanaje baꞌa: —¿Aꞌa mi cahuijaa? ¿Aꞌa mi enijje cahui jjima che nequi jjima? 
\p  
\v 38 Majoya Jesosaa ojjaña cuana acanaje: —¡Aꞌa cahuijji! ¡Eyacuiñajji nijje mimi majamajacue! Jamajoya pea cuaa miya quea mimishi epo meeꞌyojji pojjeama. Eꞌe, miquianaya enijje jjapeequi sa poani eꞌe jojo nei. Jamatii miya caꞌaꞌama; quea mimishi poaje oꞌoya pojjaꞌa —Jesosa poanaje. 
\p  
\v 39 Majoya Jesosa poqui oꞌoyanaje jocuama pishana oja Chii nijje mimi oꞌoyaa. Yahuajo jayojja mimi oꞌoyame poanaje. 
\p  
\v 40 Oja Chii nijje mimi oꞌoya majje Jesosa poqui oꞌoyanaje o shajjaꞌajjajji cuana huasijje. Ba caña oꞌoyanaje quea cojja jee mano poanajejojo cahui oꞌoyanaje. Jesosa ba majje oya cuana quea bicho poanaje onijje emimijji.  
\v 41 Jamajjeya oya cuana jea canana oꞌoyanaje, Jesosaa. Cuama pishana poqui oꞌoyanaje. Oja Chii nijje mimi oꞌoyanaje. Mimi oꞌoya majje poe oꞌoyanaje o shajjaꞌajjajji cuana que. Isheꞌacanaje: —¿Aꞌa miquianaya cahuijaa tii? ¿Aꞌa mi jomishocajaa? Apoa aje, de. Jjeyahua nei eya, ojjañaja Edoe Mese, mimishi cua iña meesahua cajeꞌyo cuaa.  
\v 42 ¡Nequisohuacue! ¡Cuaꞌa, jjeya nei ecuea epeejji nisho poeje! ¡Joya aje Jodasa poeje baꞌa! —Jesosa poanaje. 
\s1 Jesosa iña canaje cuaa 
\r (Mateo 26.47-56; Noca 22.47-53; Huani 18.2-11) 
\p  
\v 43 Jesosa mimianijo tii, Jodasa o que poeyanaje. Oya aje oe Jesosaja epeejji peaꞌai poanaje; pea 11 nijje nequinaje tii. Quea huiso nee nee dejja nijje Jodasa poeyanaje; yohuajji poeyanaje acuijji, baajji, mejejji peaꞌai poeyanaje. Jodio etii cuaa, Jodioja esohui huohuijjiya, Eyacuiñajji nijje emimijji etiiya peaꞌai ojjaña huoojea canaje Jesosa iñaa.  
\v 44 Jodasaa, Jesosa eꞌiña meejjiya, yahuajo jama huohuime acanaje baꞌa: —¡Bacue oe! Eyaya oe dejja ba majje cuiapashi nishoje. ¡Majoya oe miquianaaya iñacue; dojoꞌyocue! —Jodasaa yahuajo acanaje dejja cuana. 
\p  
\v 45 Jamajjeya Jodasa Jesosa que jjanequichipiquinaje: —Jesosa, ¡aꞌa mi ecuea Emeshi Mese nei jiquio! —amajje cuiapashi nisho canaje. 
\p  
\v 46 Ma ba majje pea dejja cuaa Jesosa que poe majje iña canaje edojojji.  
\v 47 Jesosa iña cajo oja epeejjiya onijje nequiya, Penohua, baa iña canaje. Onaja sapa jajapojojeajji nisho shajja jajasejjajea caꞌyonaje, Eyacuiñajji nijje emimijji etiija echacojji poanija eshajja. 
\p  
\v 48 Jesosaa ojjaña dejja ejjachichaquiꞌyo nequi huohui canaje: —¿Apiojji miya poeyanaje baajji, acuijji, mejejji e iñaa? ¿Aꞌa cuae jja iña siipojji soꞌo?  
\v 49 Ojjaña pojjajo eya ojjaña cuana nijje nequinaje esohui huohuijji Eyacuiñajjija equijo. Jamatii eya miquianajaya iña jjima poanaje. ¿Apiojji mecajje poeyanaje e iñaa? Jamatii jamaya nequiana poani. Miquianaaya ca mi ca oe Eyacuiñajjija esohui huohuijjija etehueꞌyo yahuajo nei nei mijo jayojja jama quea tai aña. 
\p  
\v 50 Majoya o shajjaꞌajjajji cuana mete majje cuajicuajinananaje; Jesosa jea canananaje. 
\p  
\v 51 Eya ca ca iña Macoso bajjani. Jesosa ocuenaje o pajea sa poꞌyo ajjaa jjejojo. Eya daquimaꞌ poanaje; oe daqui ao ejjacueabeboquijji poanaje. Majoya dejja mase cuaa eya iñaꞌajja canaje.  
\v 52 Ohua iña cajje eyaya daqui ao jeajeanananaje, cuajicuajipoquinaje daquimaꞌ quea mete jjejojo. 
\s1 Jodio etiiya Jesosa niñeba canaje 
\r (Mateo 26.57-68; Noca 22.54-55, 63-71; Huani 18.12-14, 19-24) 
\p  
\v 53 Jamajjeya joya Jesosa iñajji cuaa oya dojo canaje Eyacuiñajji nijje emimijji etiija equi yasijje, Caipaja equi yasijje. Jocuama ojjaña Jodio cuana jjachichaquinaje, Jodio etii cuana, Moisesija etehueꞌyo huohuijji poani peaꞌai.  
\v 54 Penohua ca ca equijje aca poquinaje Jesosa. Caipaja equi yasijje nequiñaquinaje. Dobiquinaje epeeyi dojjo huasijje. Jomajo Peno equi cuiñajji nijje cuaqui pejjejo jjayoqui nequinaje yajja Jesosa acaje cuaa ebajji. 
\p  
\v 55 Eyacuiñajji nijje emimijji etii, ojjaña Jodio etii cuana, Jodio esohui huohuijji poani peaꞌaiya ojee mimimiminaje Jesosajo, ojjaña ejjachichaqui nequiya, o quecuajeaꞌyo sa acani. Jamajjeya saꞌajja canaje dejja cuana Jesosa huohuijji nisho epo; Shomano meshi mese Pinato bajjani yasijje dojo majje Jesosa huohuijji nisho. Jamatii Jesosa huohuijji epo chamaꞌ poanaje.  
\v 56 Quea huiso dejjaa siajje acanaje. Jamatii oe siajjepojjija esohui pea siajjepojjija esohui jama pojjeama Jesosa mano meeꞌyojji. Chamaꞌ beca oya jayojja mimime epojji.  
\v 57 Quijje yejje nei beca cuana poe majje Jesosa niñeba canaje jama baꞌa:  
\v 58 —Eyaya oya shajjaꞌajjanaje. Jama poanaje Jesosa baꞌa: “Jiquio Eyacuiñajjija equi jeabichajea cajo, eyaya pea equi iyajeꞌyo pea beca peejjima cahuime. Jiquio equi dejjaja iya poanaje; pea ca ca dejjaa pojjeama iya cajeꞌyo” Jesosa poanaje —acanaje beca cuaa. 
\p  
\v 59 Jamatii oya cuanaja esohui pea jayojja jama pojjeama poanaje. 
\p  
\v 60 Majoya Eyacuiñajji nijje emimijji etii ojjaña cojja nei nequisohua majje Jesosa huohuiꞌajja canaje: —¿Aꞌa pa miya jama poanaje baꞌa? ¿Jesosa, aꞌa cuae miyaya sajaꞌajeꞌyo soꞌo? 
\p  
\v 61 Jamatii Jesosa mimishiꞌama jjejojo mimipanajaji jjima poanaje. Jamajjeya Eyacuiñajji nijje emimijji etiiya oya huohui neinei canaje: —Jesosa, ¿aꞌa cuae mi Eyacuiñajjija Bacua Ejja nei, oja huoojeaꞌyo ojjaña jaahuanajji? ¡Huohuicue mo! 
\p  
\v 62 Jamajjeya Jesosaa acanaje: —Eꞌe, joya ecua miyaya aña jayojjaya eya, Eyacuiñajjija huoojeaꞌyo ojjaña jaahuanajji. Cuanaya eyaya miya eꞌe nei huohuiaña: Quijje miyaya eya baje ecue Chii nijje ebianeijje ani. Oya quea caꞌa nee nee enequi tii. Eya miquianaaya baje bo biajje poeje oꞌoya —Jesosa poanaje. 
\p  
\v 63 Ma shajjajja majje Jodioja Eyacuiñajji nijje emimijji etii quea quene nee nee poanaje. Quea quene nee po majje ma dejja tiiya ojaya daqui, oja huosho baꞌe isajea canaje. Jodio dejja jamaya oja daqui isajea cani quea quene po majje. Ojjaña cuana huohui canaje: —¡De! ¡Aꞌa pea dejja iyaajji Jesosa huohuijji! Jamatii.  
\v 64 Oya Jesosa miminaje jama baꞌa: “Eya Eyacuiñajjija Bacua Ejja”. Chojja. Siajjepojji. ¿Aꞌa cuae nequiaa shajjaꞌajjanaje oja sohui? ¿Jamajje yajja acuae seya aje soꞌo, Jesosa, de? —acanaje Jodio etiiya. 
\p —¡Oya oe manojea meeꞌyocue; quea tai ca esohui acani! —acanaje Jodio edejja tii cuaa, Jesosa Eyacuiñajjija Bacua Ejja pojjeama posojo. 
\p  
\v 65 Majoya aje oe Jodio etiiya Jesosa cojja cuichojea ca poa. Cojja dodo majje ejjachichaquinequiya cuia canaje peaꞌai emeya. Cuia majje huohuiꞌajja canaje: —¡Miya Eyacuiñajjija huoojea nei jjabaqui majje jja ca oe huohui pocue! ¿Aya acue mi cuia cani soꞌo? ¡Jjashahuabaꞌajjaqui! —acanaje equi cuiñajji cuaa. 
\s1 Penohua siajje acanaje Jesosa oja ba jjima nisho 
\r (Mateo 26.69-75; Noca 22.56-62; Huani 18.15-18, 25-27) 
\p  
\v 66 Ojjaña cuaa Jesosa napa caqui Penohua ba canaje esecuejo nequiya. Oe epona echacojji ahuemaꞌ ani poeyanaje.  
\v 67 Peno cuaqui pejjejo jjayoqui nequi ba canaje. Ba neinei majje huohui canaje jama baꞌa: —Eꞌe jojo nei miya Jesosa nijje aninaje, ma Nasanenajo baꞌe nijje —poanaje epona. 
\p  
\v 68 —¡Chojja, ecuea oya ba jjima! ¿Ajeo acuae mi mimiani? —Peno siajje poanaje. 
\p Majoya Peno epeeyijo nequi cuayaquiꞌyonaje, quea mete jjejojo. Jjeyahua nei cachina yahua taaanaje.  
\v 69 Peno esecuejo enequiꞌyojo, epona shoꞌiya echacojjiya oya ba ca oꞌoyanaje. Ojjaña cuana huohui canaje: —Oya ca ca oma Jesosa nijje aninaje eꞌe jojo nei —acanaje. 
\p  
\v 70 —Chojja, ecuea oya ba jjima nei nei. Eya ojaya epeejji pojjeama —nisho po oꞌoyanaje quea mete jjejojo. 
\p Quijje pishana beca cuana Peno que ojee nequi jjanequichipiqui majje jama poanaje baꞌa: —Eꞌe jojo nei miya Jesosaja epeejji peaꞌai; pea cuana nijje nequinaje. Jamaya miquea emimi, Janinea meshijo baꞌe jayojja jama miya mimiani, de —poanaje. 
\p  
\v 71 Ojaya esohui shajjaꞌajja majje Peno quea mete nee poanaje; onijje mimipanajajinaje: —¡Siajje miya poani! Jiquio dejja ecuea ba jjima. Eya eꞌe jojo nei pojjeama poani jojjemo, Eyacuiñajjiya eya mano mee caꞌyome —Peno poanaje. Jamatii oya siajje poanaje. 
\p  
\v 72 Peno jamaya poajo chachina yahue taaa oꞌoyanaje. Cachina taaajo Peno jjashahuabaquiꞌyonaje ma Jesosaa yahuajo huohui canaje jama baꞌa: —Peno, cachina yahue beca taaame poajo miyaya eya ba jjima nisho aje; pea beca peejjima huohuime ajeꞌyo —yahuajo jamaya Jesosaa Peno acanaje. Ma shahuabaꞌyo majje Peno quea yeno nee nee poanaje. Pa neinei poquiꞌyonaje. 
\c 15  
\s1 Emeshi mese Pinato huasijje Jesosa dojo canaje 
\r (Mateo 27.1-2, 11-14; Noca 23.1-2; Huani 18.28-32) 
\p  
\v 1 Majoya mecajjeahua nei Eyacuiñajji nijje emimijji etii cuana, Jodioja edejja tii cuana, Moisesija etehueꞌyo huohuijji poani, pea Jodio etii ejjachichaqui nequi cuana peaꞌai, 71 huisome jjachichaquinaje. Ojee jjachichaqui majje miminaje Jesosa quecuaꞌyojji: —¿Achajja amajje acuae seya Jesosa quecua meejeꞌyo soꞌo? —acanaje oya cuaa. 
\p Jamajjeya Jesosa me jeyo majje dojo canaje Shomano meshi mese Pinato bajjani yasijje.  
\v 2 Jesosa ba majje Pinatohua huohuiꞌajja canaje jama baꞌa: —¿Aꞌya cuae mi soꞌo? ¿Aꞌa miya Jodioja Emeshi Mese nei poajeꞌyo? 
\p —Eꞌe, joya ecua miyaya aña jamaya epoꞌyojji eya —Jesosaa sajaꞌa canaje. 
\p  
\v 3 Eyacuiñajji nijje emimijji etii cuaa quea huiso siajje acanaje Pinato Jesosajo. Jamatii Jesosaa sajaꞌa jjima acanaje.  
\v 4 Jamajjeya Pinatohua oya huohuiꞌajja canaje: —¿Yajjajje acuae mi mi jjasajaꞌaquiani soꞌo? ¿Aꞌa jje shajjaꞌajja jjima ojaya esohui mijo? Quea huiso nee miya niñeba cani Jodio etii cuaa. 
\p  
\v 5 Jesosa mimishiꞌama. Jamajjeya siajjepojji cuana o niñebajji sajaꞌa jjima acanaje. Jjasajaꞌaqui ajja nei nei ba majje Pinatohua niñeba caꞌyonaje: —¿Yajjajje acuae Jesosa mi jjasajaꞌaquiani soꞌo, de? —poanaje Pinato. 
\p  
\v 6 Majoya Pinatohua niñeba caꞌyonaje jama baꞌa: —Jjeya nei Jodio cuana ojee ijjiaꞌijjiani esohuidojojjiya yahuajo nei ojaya etiiquianaja bacua cuana cuiaꞌyo jjima shejo. Ojjaña shequiaja jiquio shejo eyaya oe Jodio dejja ejeanobiajaa huoojeacuayajeajeꞌyo, ma Jodio cuaa sa cani, Jodio quea bihui epojji. Jamajjeya jiquio shejo eꞌe pojjaꞌa eyaya Jesosa pichojea meejeꞌyo, jjeyahua nei.  
\v 7 Pea yani, Mashamaꞌ bajjani, Shomano meshi mese quecua panajji epo. Oya dejja tai, ejeanobiajaa ona quecuaꞌyojji cuana nijje. Eꞌe pojjaꞌa eyaya Mashamaꞌ huoojeacuayajea meejeꞌyo —jamaya Pinato jjashahuabaquinaje. 
\p  
\v 8 Jjeyahua nei Jodio dejja cuana Pinato que poeyanaje. Huohui canaje jama baꞌa: —Emeshi mese Pinato, ¡jjeyahua nei huoojeacuayajeaꞌyocue oe Jodio dejja, ecuana quea bihui nee epojji! —poanaje. 
\p  
\v 9 Pinato jama poanaje baꞌa: —Eꞌe, jjeyahua nei eyaya pichojeajeꞌyo oe Jodio dejja. ¿Ache acuae jja oe pichojeajeꞌyo soꞌo? Eꞌe pojjaꞌa eyaya Jodio cuanaja Emeshi Mese nei Jesosa bajjani pichojeajeꞌyo. ¿Aꞌa eꞌe? —poanaje Pinato. 
\p  
\v 10 Pinatoja eba poanaje Jodio etii quea quene nee poani pea cuaa Jesosa nijje jjapeequi majje Jodio etiiquianaja esohui pajea cani. Jamajjeya Jesosa iña mee canaje equecuajeaꞌyojji, Jodio etiiquiaa. Jamajjeya Pinatohua Jesosa pichojea mee sa acanaje.  
\v 11 Jamatii Eyacuiñajji nijje emimijji etiiya ojjaña Jodio ejjachichaqui nequi taaa mee canaje: —¡Mashamaꞌ oe huoojeacuayajeaꞌyocue! ¡Jesosa aꞌa pichojeaꞌyojji! —taaame poanaje. 
\p  
\v 12 —Jamajjeya ¿yajja acuae oe eyaya Jesosa Quito aje soꞌo, Jodio cuanaja Emeshi Mese nei ca pa coma? —Pinatohua huohuiꞌajja canaje. 
\p  
\v 13 Jama taaame poanaje baꞌa: —¡Oya me cacajea meecue oe, acui ecueataꞌapeejo! ¡Acui cueataꞌapeejo baꞌehuanasohuajea meecue oe emanoꞌyojji! —taaa neineinaje cuana. 
\p  
\v 14 —¿Yajjajo acuae oya quecuajeꞌyo soꞌo? Oya mimishiꞌama. ¿Apiojji acuaeya jjaya quecuaꞌyo sa aña Jesosa? —Pinatohua huohuiꞌajja canaje. 
\p Jamatii taaa majamaja canaje Jodio cuana: —¡Jesosa oe me cacajea meecue oe; acui ecueataꞌapeejo baꞌehuanasohuajea meecue Jesosa, de! —jama taaameya poa Jodio etii cuana. 
\p  
\v 15 Jamajjeya Pinatohua ohua sa cajo Mashamaꞌ huoojeacuayajea mee caꞌyonaje. Jesosa ca ca huoojea canaje cuiasejjajea majje me cacajeaa emanoꞌyojji. 
\s1 Sohuinano cuana soa neineinaje Jesosajo 
\r (Mateo 27.27-31; Huani 19.2-3) 
\p  
\v 16 Jamajoya emeshi meseja sohuinano cuaa Jesosa dojo canaje emeshi mese chacochacoañani equi dojjo huasijje. Ojjaña sohuinano Jesosa que jjachichaquinaje.  
\v 17 Jesosaja daqui oshe huijjiajea mee majje daqui huoꞌo nei huosho mee canaje emeshi mese nisho epojji. Acuisha sipi majje sapahuahuo iya canaje, emeshi mese jayojja nisho epojji.  
\v 18 Majoya ecuiꞌoshajjajo nequinaje ojjaña, Jesosa bihuiajji nisho. Jama bihuia nishome acanaje baꞌa: —¡Miya Jodioja emeshi mese quea caꞌa nee! ¡Baꞌe tiitiiꞌyocue! —sajea nisho canaje cuaa Jesosa.  
\v 19 Majoya oya sapa cuiapeꞌejea canaje acuiya. Cuia huichaꞌa huichaꞌa canaje. Jesosa cuichojea huichaꞌa huichaꞌa canaje oja yami yasijje. Ecuiꞌoshajjajo nequiya bihuia nisho canaje cuaa.  
\v 20 Ojo soa neineiꞌyo majje daqui huoꞌo nei huijjiajeajea canaje; ojaya daqui quia ca oꞌoyanaje. Majoya Jesosa quea huesha dojo canaje me cacajeaa, baꞌehuanasohuajeaa peaꞌai, sohuinano cuaa. 
\s1 Jesosa acui ecueataꞌapeejo baꞌehuanasohuajea canaje 
\r (Mateo 27.32-38; Noca 23.26-43; Huani 19.17-27) 
\p  
\v 21 Jenosanenajo aniya sohuinanohua Jesosa dojo caje, ba cajjequinaje pea dejja Simoni bajjani, Simoni Sinene meshijo baꞌe poeꞌyo; oya Anejanoja ejeajji, oja chahua Shopoja ejeajji. Jamajjeya sohuinano cuaa Simoni acui ecueataꞌapee quea biquie dojo mee canaje Jesosa baꞌehuanasohuajeajji.  
\v 22 Jamaya oya poquinaje eyiyo bajjani Jonijota eyiyo huasijje, Ese Ejjaja esohuijo Esapa Jjii anijji bajjani yasijje.  
\v 23 Esapa Jjii anijji eyiyo huasijje jaasohuaquinaje cuana. Bañaqui majje Jesosa ishi meeꞌajja canaje cuaa acuijjajja na quea sese, pasejo ꞌia jayojja. Ishi meeꞌajja canaje quecua caꞌyajje neeꞌama epojji. Sio majje ishi jjima acanaje Jesosaa.  
\v 24 Majoya me cacajea caꞌyonaje; baꞌehuansohuajea caꞌyonaje daquimaꞌ. Baꞌehuanasohuajeyo majje oja daqui cuana chicha caꞌyonaje sohuinano cuaa. Iyachichaꞌyo majje, onaaya hueꞌe nisho majje daqui majjo caꞌyonaje ojaya pojji epoꞌyojji. 
\p  
\v 25 Eshequi poe pishanajo, onaaya Jesosa acui ecueataꞌapeejo baꞌehuanasohuajea canaje.  
\v 26 Etehueꞌyo o baꞌe sapa biajje oja bajjani caca canaje, Jesosa bajjani, oya apiojji me cacajea caꞌyonaje huohui epoꞌyojji. Etehueꞌyo jama poa baꞌa: \sc OYA JESOSA JODIOJA EMESHI MESE EPOꞌYOJJI\sc* 
\p  
\v 27 Jesosa baꞌe pejjejo beca siipojji pea acui ecueataꞌapee cuanajo baꞌe huanasohuajea peaꞌai caꞌyonaje, Jesosaja ebianei mijijje, pea shani mijijje.  
\v 28 Eꞌe, Eyacuiñajjija esohui huohuijjija etehueꞌyo yahuajo nei nei jayojja jama, jamaya acanaje baꞌa: “Ojjaña cuana jjashahuabaquije jamaya: —Oya dejja mimishi nijje nequinaje”. Yahuajo nei nei jamaya poa. 
\p  
\v 29 Pea dejja cuana ejiojjijje poquianiya Jesosa ba majje esapa jeacajjacajja canaje, soa huisahuisa nequinaje. Jama mimijajime poanaje baꞌa: —¿Aꞌa cuae oe miyaya Eyacuiñajjija mei equi iñajeabichajeaꞌyo majje pea equi iyaje oꞌoya soꞌo, pea beca peejjima cahuime? ¡Baꞌajja socue!  
\v 30 Ache baꞌajja; miya Eyacuiñajjija Bacua Ejja nei jjabaqui majje ca oe ¡acui ecueataꞌapeejo baꞌe nequioqueꞌajjaꞌyo socue, emanoꞌyojji pojjeama! —poanaje cuana. 
\p  
\v 31 Moisesija etehueꞌyo huohuijji, Eyacuiñajji nijje emimijji etii peaꞌai ojo soa neineinaje. Ojee mimimiminaje jama baꞌa: —¿Aꞌa Jesosa ojjaña jaahuanajji epoꞌyojji? Chojja, ona nahuejji pojjeama. Oya ca ca oma nequioqueꞌyo ajja, de —poanaje. 
\p  
\v 32 Jesosa niñeba canaje peaꞌai: —¿Aꞌa cuae jja oe miya Jodioja Emeshi Mese nei poajeꞌyo? ¡Jjabaꞌajjaqui socue! Miya Eyacuiñajjija huoojeaꞌyo ojjaña jaahuanajji jjabaqui majje ¡acui ecueataꞌapeejo baꞌe ca oe nequioqueꞌajjaꞌyo socue jjeyahua nei, ecuanaja ebajji! Ba majje ecuaaya: “Miya eꞌe jojo nei Eyacuiñajjija Bacua Ejja poanaje” ajeꞌyo. 
\p Siipojji cuaa ma o pejjejo ebaꞌehuanasohuajea baꞌeya peaꞌai Jesosa jamaya niñebame acanaje quea huiso nee. 
\s1 Jesosa manoꞌyonaje 
\r (Mateo 27.45-56; Noca 23.44-49; Huani 19.28-30) 
\p  
\v 33 Majoya eshequi biacojjajja nequijo shequimaꞌ jayojja poanaje; quea misi nee poanaje ojjaña meshi yasijje. Quijje sinecua eshequi jjajeapaaquiꞌyo majje jiji oꞌoyanaje.  
\v 34 Sinecua, quea misi poajo, Jesosa quea yeno neineijo taaa neineinaje: —¿Eli, eli, lama sabactani? —taaame poanaje—; ecue Chii, ecue Chii, ¿yajjajo acuae mo ya jeanaꞌyonaje soꞌo? —Jesosa poanaje Jodioja esohuijo. 
\p  
\v 35 Shajjaꞌajja majje joya quea chipi nee nee nequi jama poanaje baꞌa: —¡Bacue oe! ¡Ohuaya etiiquiana Enia iyaa cani pojjaꞌa, ma yahuajo nei baꞌya poa Enia iyaa cani chi, de! —jama posoya acanaje cuaa. 
\p  
\v 36 Jamajjeya oe dejja poquicuajinaje acuijjajja na sese jjequiya. Jjequi majje shajashaja iyanobia canaje ena ejjequi yasijje. Majoya bequiobo sajo quecuahuosho majje Jesosaja enaba huasijje huoo canaje, ojaya eꞌishijji nisho: —¡Ishoa socue! ¡Enia pojjaꞌa poeje o nahueya, o jjequioqueaꞌyohua! —poanaje. 
\p  
\v 37 Jamatii, taaa neinei oꞌoya majje Jesosa manoꞌyonaje. Chamaꞌyo tii poanaje.  
\v 38 Jesosa manoꞌyajo tii, Eyacuiñajjija equijo daqui quea moo ebaꞌehuana baꞌe Eyacuiñajjiya eyajje jjaisajea meequi caꞌyonaje; biacuajje ebionei jjaisajeaqui meecoo canaje. 
\p  
\v 39 Ojjaña ba majje, Jesosa taaa neinei majje, manoꞌyonaje ba majje peaꞌai sohuinano huoojeajji poani, ma Jesosa nahuejji poani quea mete nee poanaje: —¡Eꞌe jojo nei de, oya Jesosa Eyacuiñajjija Bacua Ejja poanaje! —sohuinano poanaje. 
\p  
\v 40-41 Quea huesha nequiya epona cuaa peaꞌai Jesosa ebaꞌehuanasohuajea baꞌe ba cani. Oya cuana yahuajo Jesosa nijje Janinea meshijo ania poa. Onijje Jenosanena huasijje poeyanaje, oja bobi cuacua meesahuaa. Oya cuana ma bajjani baꞌa: Mania Madanena; Satiaco, oja chahua Jose peaꞌaija enaese Mania bajjani; Semeneoja ehuanase Sanome bajjani peaꞌai; pea epona cuana quea huiso peaꞌaiya ba canaje. 
\s1 Jesosa mei jjani yasijje huananobia caꞌyonaje 
\r (Mateo 27.57-61; Noca 23.50-56; Huani 19.38-42) 
\p  
\v 42 Majoya sinenaje. Mecahuajje epojja ejomishocajji, quea bihui nee ojee eꞌijjiaꞌijjiajji peaꞌai. Jamajjeya acui ecueataꞌapeejo ebaꞌehuanasohua baꞌe meemee ajja. 
\p  
\v 43 Jamajjeya sinecua nei dejja Jose bajjani poeyanaje, pea Jose, Amatea meshijo baꞌe. Oya Jodio etii ejjachichaqui nequi cuana nijje nequi. Oya ojjañaja quea boti nee. Ohuaya Eyacuiñajji ojjaña huoojeaꞌyojji poaje ishoaꞌajja cani. Oya Jesosaja epeejji peaꞌai yahuajo. Jamajjeya oya meteꞌama po majje Pinato huasijje poquinaje Jesosajo huohuiya. Poeꞌyo majje ohuaya Pinato huohui cañaꞌyonaje: —Emeshi mese Pinato, Jesosa manoꞌyonaje. Eyaya oya jjequioqueajeꞌyo jjani yasijje ehuananobiaquiꞌyojji —poanaje Jose. 
\p  
\v 44 Joseja esohui shajjaꞌajja majje Pinato jama poanaje baꞌa: —¡De! ¿Aꞌa oya Jesosa manocuajiꞌyonaje? 
\p Jamajjeya Pinatohua sohuinano huoojeajji poani, ma Jesosa me cacajeajji epo iyaa canaje. O poeyajo huohuiꞌajja canaje jama baꞌa: —¿Aꞌa eꞌe jojo nei Jesosa manocuajiꞌyonaje? —poanaje. 
\p  
\v 45 —Eꞌe, oya manoꞌyonaje —poanaje. 
\p Jamajoya Pinatohua Jose huoojea canaje jama baꞌa: —Eꞌe, ¡Jesosa dojocue! ¡Mei jjani yasijje huananobiaquicue! 
\p  
\v 46 Jamajjeya daqui oshe quea ao nee jjeshe majje Jose poquinaje Jesosa acui ecueataꞌapeejo emanoꞌyo baꞌe yasijje. Jesosa emanoꞌyo baꞌe jjequioquea caꞌyonaje. Daqui oshe eyacua neijo bebo canaje. Dojo canaje mei jjani yasijje, ma oja jjeya nei tio huasijje. Huananobia caꞌyonaje. Majoya mei quea quemo nee jeacajjajjajea canaje mei jjani naba capaꞌyojji. Jesosa mei jjani dojjojo jaa capaꞌyo majje poquinaje Jose pea cuana nijje.  
\v 47 Mania Madanena, Joseja enaese Mania bajjani peaꞌai mei jjani yasijje poeyanaje peaꞌai. Jomajo Jesosa jjani yasijje ehuananobiajaa ba canaje, epona cuaa. 
\c 16  
\s1 Jesosa shequi oꞌoyanaje 
\r (Mateo 28.1-10; Noca 24.1-12; Huani 20.1-10) 
\p  
\v 1 Jodioja epojja ejomishocajji jjayejjequiajo, sinecua Mania Madanena, Jacoboja enaese Mania bajjaniya, Sanomeya peaꞌai shiyeshiye iña jjeshe canaje Jesosa shicuijji nisho.  
\v 2 Jamajjeya mecajjeahua nei jjajaꞌaꞌajjaqui jjimahuajo ebionei epojjajo, nomico pojjajo, oya cuana poquinaje jjani yasijje.  
\v 3 Bañaqui jjimahuajo mimimiminaje jama baꞌa: —¿Aya shai mei quea quemo jeacajjajjajea cajeꞌyo ese dobiquijji? Quea quemo nee nee mei. 
\p  
\v 4 Epona cuana jjani yasijje poe majje ba cañaquinaje jjani huejja ecapajeaꞌyo nequi.  
\v 5 Jamajjeya jjani ai yasijje dobiquinaje. Dobiqui majje epona cuaa eshoꞌi ai ba canaje. Oja daqui quea oshe nee nee, quea ao nee. Jesosaja equipajaajji biajje ani ba canaje esohuidojojji ebianei mijijje ani. Jjeya ca ca Jesosa chamaꞌ. Ba majje epona cuana quea mete poanaje. 
\p  
\v 6 Jamaya oya epona cuana nijje poanaje baꞌa: —¡Aꞌa quea mete pojji! Miya ecuea eba. Eꞌe, miyaya Jesosa ma Nasanenajo baꞌya poa saꞌajjaꞌyo poequi, ma acui ecueataꞌapeejo manoꞌyonaje. Chamaꞌ oya jjeya jiquiojo. Shequi oꞌoyanaje ca jja coma. ¡Eꞌe, quiaꞌo jiquio baꞌajjahuaꞌyo socue! Jiquiojo jaanaje.  
\v 7 Jamajjeya ¡jjeyahua nei poquicuajicue oja epeejji huohuiya! ¡Jama huohuime acue baꞌa: “Jesosa pa shequiꞌyonaje” acue! “Oya jjeya nei Janinea meshi yasijje poquije miquiana poqui jjimahuajo” o shajjaꞌajjajji cuana huohuiquicue. ¡Peno oe huohuiñaquicue Jesosaja esohui ma ohuaya huohui canaje oe aꞌa pajeaꞌyojji! ¡Oya oe jocuama baquicue! —esohuidojojjiya epona cuana acanaje. 
\p  
\v 8 Jamajjeya epona cuana jjani esecue yasijje cuayaquiꞌyo majje poquicuajicuajinaje. Quea mete neejo oya cuana piopionaje. Pea nijje mimi jjima Jesosajo. Cuajicuajinaje Jesosa shajjaꞌajjajji cuana esohuidojojjija esohui huohuiya. 
\p  
\v 9 Eꞌe, ebionei epojjajo, nomico pojjajo, Jesosa shequi oꞌoya majje, jjanequijaꞌaquiꞌyo majje peaꞌai, Mania Madanenaa ebionei oya ba caꞌyonaje. Oya Maniaja yahuajo eshahua quea huiso dobiquiyajo, Jesosaa eshahua cuana huoojeacuayajea caꞌyonaje me oejje pea beca huisome.  
\v 10 Majoya Jesosa ba majje Maniaa o shajjaꞌajjajji cuana huasijje poquicuajinaje huohuiya. Jesosa emanoꞌyo tii jaa posojo, oya cuana pa neinei aninaje quea yeno.  
\v 11 Jamajjeya Maniyaa oya cuana huohui cañaquinaje Jesosa eshe oꞌoya: —Eyaya oya banaje eꞌe jojo nei —acanaje Maniaa. 
\p Jamatii Maniaja esohui shajjaꞌajja majje oya cuana jama poanaje baꞌa: —Eꞌe pojjaꞌa. Chojja, siajje miya poani, Mania —acanaje cuaa, Jesosa shequi oꞌoya ajja poso acanaje. 
\p  
\v 12 Majoya Jesosaja epeejji becanejjijji peaꞌai ejiojjijje poquijejo, Jesosa pea jayojjaya jjanequijaꞌaquinaje onijje. Jesosa ba jjima poanaje cuanaja.  
\v 13 Quijje yejje nei oya eꞌe jojo nei Jesosa ba majje oya cuana poquinaje pea eshajjaꞌajjajji cuana huohuiya. Jamatii ojjaña jama poanaje baꞌa: —Eꞌe pojjaꞌa, de. Chojja de, oya manoꞌyo tii —ojjaña cuana poanaje, Jesosa shequi oꞌoya ajja poso acanaje. 
\s1 Jesosa ba canaje o shajjaꞌajjajji cuaa 
\r (Mateo 28.16-20; Noca 24.36-49; Huani 20.19-23; Hecho 1.6-8) 
\p  
\v 14 Quijje Jesosa shajjaꞌajjajji cuana 11 huisome oe equijo ojee ijjiaꞌijjia anijo Jesosa onijje jjanequijaꞌaquiꞌyonaje. Oya cuana tecuea canaje jama baꞌa: —¿Apiojji acuae quiana quea sapa caꞌa poani? ¿Apiojji shajjaꞌajja jjima onajaya ehuohuiꞌyo eya eshe oꞌoya ba majje? ¡Bacue eya eꞌe jojo nei eshequiꞌyo, jjabahuejjaquicue! —Jesosaa acanaje. 
\p  
\v 15 Majoya Jesosaa oya cuana jama acanaje baꞌa: —¡Poquicue ojjaña cuana huasijje, ma ojjaña meshijo baꞌe yasijje! ¡Ecuea esohui quea pame nee ebaꞌe tiitiiꞌyojjijo ba meequicue! ¡Enijje jjapeequi meequicue! ¡Enijje jjapeequiyajo enajo besa meecue!  
\v 16 Ojjaña joya enijje jjapeequiani Eyacuiñajjiya baꞌe tiitii mee cajeꞌyo. Enijje jjapeequiyajo, ¡ojjañaja ebajji onaaya oya cuana besa meequicue! Ojjaña joya enijje jjapeequiꞌyo ajja ca ca Eyacuiñajjiya quea nee nee po mee cajeꞌyo, quea mimishi poanajejojo. Jamajjeya Eyacuiñajjiya oya cuanaja mimishi cuanajo quea yeno po mee cajeꞌyo. 
\p  
\v 17 —Ecuea epeejji cuana eyaya ameejeꞌyo ma dejjaa ajjima acani. Oya cuana eyaya quea caꞌa nee po meejeꞌyo, eshahua cuana dejjajo nequi huoojeacuayajea meejeꞌyo. Pea esohui ojaya cuanaja ba jjima mimi meeje peaꞌai.  
\v 18 Peyo se najji ba jjima iña majje manoꞌyo jjima po meejeꞌyo eyaya. Ena pase nei nei paseꞌama poso ishijea majje, manoꞌyo jjima po meeje eyaya. Ecuea epeejji neiya emano biajje eme huana majje jiquio quea aja poaje; eyaya jjaajaqui meejeꞌyo, huaquia meejeꞌyo peaꞌai —Jesosaa o shajjaꞌajjajji cuana huohui canaje. 
\s1 Jesosa jjequisohua caꞌyonaje eyahuasijje 
\r (Noca 24.50-53) 
\p  
\v 19 Majoya Emeshi Mese nei Jesosa pea cuana nijje mimiajo, oja Chiiya, Eyacuiñajjiya jjequisohua caꞌyonaje eyahuasijje. Jomajo oya Jesosa anioquenaje oja Chii ebianei mijijje onijje ojjaña huoojeaꞌyojji epojji.  
\v 20 Majoya o shajjaꞌajjajji cuaa Jesosaja esohui huohuiqui canaje ojjaña cuana huasijje. Ojaya esohui jayojja jama Emeshi Mese nei Jesosaa oya cuana ameesahua canaje ma dejjaa ajjima acani ojjañaja ebajji ojaya esohui cuana eꞌe nei nei. Jamaya ojjaña ba mee canaje Jesosaa oya cuana huoojea canaje ojaya esohui huohuiya. 
\p Jesosaa eya Macoso bajjani jiquio esohui tehue mee canaje. Mahuiso. Apoa.