\id MAT - Ese Ejja NT -Bolivia 2012 (DBL -2013) 
\h MATEO 
\toc1 Mateohua Esohui Quea Pame Nee Tehue Canaje Jesosa Quitoja 
\toc2 Mateo 
\toc3 Mt 
\mt2 MATEOHUA ESOHUI QUEA PAME NEE TEHUE CANAJE JESOSA QUITOJA 
\mt1 MATEO 
\c 1  
\s1 Jesosa Quitoja etiiquiana 
\r (Noca 3.23-38) 
\p  
\v 1 Jiquio esohui etehueꞌyo Jesosa Quitoja etiiquiana. Yahuajo jama poa baꞌa: Dabi Jesosaja etiiquiana poa, Amajama peaꞌai.  
\v 2 Eꞌe, jamaya poa: Amajamaja bacua ejja Isaaca bajjani poa. Isaacaja bacua ejja Jacobo bajjani poa. Jacoboja bacua Joda bajjani poa; echahua mese cuana enequia poa peaꞌai.  
\v 3 Jodaja bacua cuana Panesi bajjani, pea Sana bajjani poa, Tamaja mejo poa. Panesija bacua Esomo bajjani poa. Esomoja bacua Anami bajjani poa.  
\v 4 Anamija bacua Aminanami bajjani poa. Aminanamija bacua Nasoni bajjani poa. Nasonija bacua Sanamo bajjani poa.  
\v 5 Sanamoja bacua Bosi bajjani poa, Shajamija mejo poa. Bosija bacua Obeda bajjani poa, Shotija mejo poa. Obedaja bacua Isaiꞌ bajjani poa.  
\v 6 Isaija bacua emeshi mese Dabi poa. Dabija bacua Sanomoni bajjani poa. Sanomonija enaese eꞌahuemano poa, Oniaja quijjojea, Dabija huanaꞌyo poa.  
\v 7 Sanomonija bacua Shobiami bajjani poa. Shobiamija bacua Abiase bajjani poa. Abiaseja bacua Asa bajjani poa.  
\v 8 Asaja bacua Josapati bajjani poa. Josapatija bacua Jonami bajjani poa. Jonamija bacua Osia bajjani poa.  
\v 9 Osiaja bacua Jotami bajjani poa. Jotamija bacua Acasi bajjani poa. Acasija bacua Esequia bajjani poa.  
\v 10 Esequiaja bacua Manase bajjani poa. Manaseja bacua Amoni bajjani poa. Amonija bacua Josia bajjani poa.  
\v 11 Josiaja bacua Jeconia bajjani poa; echahua mese cuana enequia poa peaꞌai. Jeconia nequinajejo, Babinonia dejja cuaa Isaeni cuana iña majje dojo ca poa oja meshi yasijje sosemaꞌ chaco meeya. 
\p  
\v 12 Majoya Babinonia meshi yasijje dojo majje Jeconiaja bacua Sanati cuaya poa. Sanatija bacua Sonomame bajjani poa.  
\v 13 Sonomameja bacua Amioni bajjani poa. Amionija bacua Eniaqui bajjani poa. Eniaquija bacua Asoni bajjani poa.  
\v 14 Asonija bacua Sanoco bajjani poa. Sanocoja bacua Aquimi bajjani poa. Aquimija bacua Eniodi bajjani poa.  
\v 15 Eniodija bacua Eneasa bajjani poa. Eneasaja bacua Matani bajjani poa. Matanija bacua Jacobo bajjani poa.  
\v 16 Jacoboja bacua Jose bajjani poa. Oya Maniaja yahue poa. Maniaja bacua Jesosa bajjani aca poa, Quito bajjani peaꞌai poa, Eyacuiñajjija huoojeaꞌyo ojjaña cuana jaahuanajji. 
\p  
\v 17 Jamajjeya Amajamaja bacua ejja tii majje jea ca poa pea. Majoya tii majje ohuaya pea jea ca poa. Jamaya aca poquiapoquia poa. Quijje nei etiiquiana Dabi cuaya poa. Etiiquiana Amajamaja jeaja osecua cuana 14 poa Dabi cuaya jjimahuajo. Majoya oya jayojja Dabija bacua ejja tii majje jea ca poa pea. Tii majje ohuaya pea jea ca poa. Quijje nei Dabija osecuaja jeaja osecua cuana 14 po majje, dejja mase cuaa etiiquiana cuana Babinonia meshi yasijje dojo ca poa. Majoya Babinonia meshi yasijje poqui majje oya jayojja aca poquiapoquia poa. Majoya quijje nei Jesosa Quito cuaya poa Joseja tii mee. Ma etiiquinaja jeaja osecua cuana 14 poa Jesosa Quito cuaya jjimahuajo. Eꞌe, jamaya poa. 
\s1 Ebacua Jesosa Quito cuaya poa 
\r (Noca 2.1-7) 
\p  
\v 18 Jesosa Quitoja ecuayaꞌyo jama poa baꞌa: Joseja Mania emese na poa. Mania bii ania poa; dejja cuana ba jjima poa. Jamatii oꞌejji poa. Eyacuiñajjija Edojjoshahua Pameya ebacua baꞌe mee ca poa, Maniaja ebacua.  
\v 19 Jose quea pame nee poa. Jamajjeya Mania oꞌejji poajo jjahuanaqui sa po ajja poa. Jjashahuabaquia poa jama baꞌa: —Eꞌe pojjaꞌa Mania pea cojjojji poanaje. Jamajjeya oya jjamejoquinaje. Eyaya oya cajaa aje. Quehuajje cajaa aje Mania, pea cuanaja ba jjima. Jamajjeya pea cuana Maniajo maimai ajja poaje. 
\p  
\v 20 Jamaya jjashahuabaquianijo Joseya cahuiba ca poa. Oe Eyacuiñajjija esohuidojojji miminaje onijje. Jama poanaje baꞌa: —Jose, ¡aꞌa Mania cajaa ajji! ¡Oya huanacue! Oja bacua Eyacuiñajjija Edojjoshahua Pameja baꞌe mee.  
\v 21 Ojaya ebacua cuayaje. Jamajjeya jiquio ebacua tii majje ojaya epeejji cuanaja mimishi cuijeaꞌyojji poaje. Jamajjeya ojaya ebajjani poaje Jesosa. 
\p  
\v 22 Eꞌe, Eyacuiñajjija esohui huohuijjija esohui yahuajo nei nei jayojjaya jjeya nei jamaya poani. Jamaya yahuajo poa baꞌa: 
\q1  
\v 23 “Epona shoꞌi bii ani jamatii oꞌejji poanaje. Cuayajo oja bacua bajjani acaje Emanuel. Ese Ejjaja esohuijo ca jama baꞌa: Eyacuiñajji ecuana nijje nequi”. Jamaya Joseya cahuiba ca poa. 
\p  
\v 24 Majoya shequiꞌyo majje Eyacuiñajjija esohuidojojjija esohuijo Mania huana canaje, Joseya.  
\v 25 Jamatii ebacua cuaya jjimajo, Joseja Mania napa jjima poa. Ebacua cuayajo Jesosa bajjani acanaje. 
\c 2  
\s1 Dejja cuana majametajo jjashahuaba neineiquiani poeyanaje Jesosa baa 
\p  
\v 1 Jesosa cuayanaje Jodea meshijo, Benena cuiñajjijo. Cuayanajejo dejja Enode bajjani emeshi mese poa. Jamajjeya Jesosa Quito cuayanajejo, pea dejja cuana majametajo jjashahuaba neineiquiani, eshequi poeje mijijje meshijo baꞌe quea huesha nee poeyanaje Jenosanena cuiñajji yasijje.  
\v 2 Majoya oya cuanaa Enode huohuiꞌajja canaje jama baꞌa: —Emeshi mese, ¿achejo jaa ebacua eshoꞌi nei, ma Jodio cuanaja Emeshi Mese poajeꞌyo? Pea meshijo eshequi poeje mijijjejo nequi ojaya majameta ai quea jiji nee nee ecuaa banaje. Majoya ecuana poeyanaje o bihuiaa —poanaje. 
\p  
\v 3 Jama huohuiꞌajjame acajje emeshi mese Enode quea ajjajja nee nee poanaje. Ojjaña dejja cuana Jenosanenajo baꞌe peaꞌai quea ajjajja poanaje.  
\v 4 Jamajjeya Enodeya ojjaña Eyacuiñajji nijje emimijji etii cuana, ojjaña Moisesija esohui etehueꞌyo huohuijji cuana peaꞌai iyaa canaje o que. Jama huohuiꞌajjame acanaje baꞌa: —¿Achejo shai cuayaje ebacua Quito? Oya Eyacuiñajjija huoojeaꞌyo ese jaahuanajji poajeꞌyo —acanaje Enodeya. 
\p  
\v 5 Oya cuanaa huohui canaje jama baꞌa: —Quito Benenajo cuayaje, Jodea meshijo. Yahuajo nei nei huohui canaje Eyacuiñajjija esohui huohuijjiya jama baꞌa: 
\q1  
\v 6 “Cuiñajji sisi Benena bajjani Jodea meshijo yani. Pea cuiñajji cuana quea quemo Jodea meshijo yani peaꞌai. Benena cuiñajji quea biso. Jamatii jomajo cuayaje Isaeni dejja cuanaja Emeshi Mese quea pame nee. Ohuaya Eyacuiñajjija epeejji cuana jaahuana cajeꞌyo”. 
\m Jamaya aca poa esohui huohuijjiya yahuajo nei nei —oya cuana poanaje. 
\p  
\v 7 Emeshi mese Enodeya dejja cuana eshequi poeje mijijje baꞌe iyaa ca oꞌoyanaje o que. Quehuajje huohuiꞌajja canaje ebacuajo. Ma dejja cuaa huohui canaje ache mecajje majameta ai quea jiji nee nee ba coo canaje, ebacua cuayajo pojjaꞌa.  
\v 8 Ebacuajo huohui mee majje Enodeya oya cuana huoojea canaje Benena huasijje ebacua baa. Jama huohui canaje Enodeya: —¡Poquicue miya! ¡Ebacua saꞌajja neineiquicue! ¡Baꞌyo majje poecue! !Eya huohuihuacue achejo ebacua jaa! Jamajjeya eya poquije peaꞌai ebacua bihuiaa —Enode siajje poanaje. 
\p  
\v 9 Emeshi mese Enodeya huoojea cajje ma dejja cuana poquinaje ejiojjijje. Ejiojjijo poquianijo majameta ai quea jiji nee eyajo ba ca oꞌoyanaje ehui dojojji, yahuajo jama. Majameta ai nequi cojja nei poquiꞌyonaje ebacua huasijje. Majameta jijinequinaje tii ebacua jaa cojja nei.  
\v 10 Majameta jijiqui ba majje quea bihui nee nee poanaje oya cuana.  
\v 11 Equi yasijje dobiquinaje. Ebacua Jesosa ba canaje enaese nijje, Mania nijje. Ba majje ebacua bihuia canaje ecuiꞌoshajjajo nequiya. Bashosoco pichojea majje aquiana quea nahue quia canaje ebacuaja. Mei huoꞌo quia canaje, shiyeshiye quea nahue quia canaje, esei quea shiye nee quia canaje peaꞌai.  
\v 12 Majoya ma dejja cuana jjacahuibaquianijo, Eyacuiñajji onijje miminaje jama baꞌa: —¡Aꞌa poqui oꞌoyajji emeshe mese Enode yasijje! 
\m Jamajjeya oya cuana poqui oꞌoyanaje oja meshi yasijje pea ejiojjijje. Enode banaꞌyo jjima aca poa. 
\s1 Ebacua Jesosa quehua dojo canaje Ejito meshi yasijje 
\p  
\v 13 Majameta eba neineiꞌyojji dejja cuana poquiꞌyo majje Eyacuiñajjija esohuidojojji poeyanaje Jose que, Jose ecahuijaajo. Miminaje Jose nijje jama baꞌa: —¡Shequicue oe! ¡Nequisohuacue oe! ¡Ebacua, enaese peaꞌai dojocuajicue jjeyahua nei Ejito meshi yasijje! ¡Jomajo nequicue! Quijje eyaya miya huohuije miquea meshi yasijje epoe oꞌoyajji. Jjeya emeshi mese quea maseya Enode bajjaniya ebacua saꞌajja neinei cani equecuajeaꞌyojji. 
\p  
\v 14 Jose nequisohua majje ebacua, enaese peaꞌai dojocuaji canaje ejiojjijje Ejito meshi yasijje, mecashono.  
\v 15 Ejito meshijo nequiꞌyonaje emeshi mese Enode eshe nequijo. Enode manoꞌyajo Isaenija meshi yasijje poe oꞌoyanaje, Jose. Jamajjeya Eyacuiñajjija esohui huohuijjija esohui yahuajo nei nei jayojja jama poa. Eyacuiñajjija esohui tehue ca poa yahuajo nei nei jama baꞌa: “Ecuea ebacua Ejito meshijo baꞌe eyaya iyaaꞌyonaje”. 
\p  
\v 16 Emeshi mese Enodeya ba canaje dejja majameta eba neineiꞌyojji cuanaa oya dasia ca poa. Jamajjeya oya quea quene nee nee poa. Oja sohuinano cuana huoojea caꞌya poa: —¡Ojjaña ebacua joya tonatona aiꞌai quecuajeaquicue! ¡Benenajo baꞌeja ebacua dejja shoꞌi cuana, Benena pejjejo baꞌeja peaꞌai oe quecuajeaquicue! 
\p Jamajjeya manoꞌyonaje ojjaña ebacua dejja shoꞌi daqui she becanejjijji peaꞌai epo tonatona aiꞌai, eshoꞌi nei peaꞌai. 
\p Eꞌe, majameta eba neineiꞌyojji dejja cuanaja ehuohuiꞌyojo, majameta ai quea jiji nee poanaje, ojjaña ebacua quecua sa poa Enode.  
\v 17 Eyacuiñajjija esohui huohuijji Jenemiaja esohui yahuajo nei nei jayojja jama aca poa Enodeya. Ebacua cuana quecua caꞌya poa jamaya. Jenemiaa aca poa jama baꞌa: 
\p  
\v 18 “Shama cuiñajjijo eyiyo aoꞌao cuiñajjijo quea shajjaquijjo. Ojjaña janobajjima nei nei pa tiitiiꞌyani. Jodio enaese cuana paꞌañani oja bacua cuana manoꞌyajo. Quea yeno nee nee. Papajeaꞌyo ajja”. 
\m Jamaya etehueꞌyo yahuajo nei nei poa. 
\s1 Ebacua Jesosa Ejito meshijo ani poe oꞌoyanaje 
\p  
\v 19 Emeshi mese Enode manoꞌyajo Eyacuiñajjija esohuidojojji poeyanaje Jose que, Jose cahuijaajo, Ejito meshijo baꞌejo.  
\v 20 Huohui canaje jama baꞌa: —¡Nequisohuacue, oe! ¡Ebacua, ojaya enaese peaꞌai dojoꞌyocue Jodio meshi yasijje! Emeshi mese Enode manoꞌyonaje, ma ebacua Jesosa quecuaꞌyojji nisho poanaje. 
\p  
\v 21 Jamajjeya Joseya nequisohua majje ebacua Jesosa, enaese peaꞌai dojo ca oꞌoyanaje oja meshi yasijje, Jodioja meshi yasijje.  
\v 22 Enodeja bacua ejja Aquenao bajjani Jodea meshi mese eyacua poanaje. Jose jama shajjaꞌajja majje quea mete poanaje ma meshijo ebaꞌejji. Eyacuiñajjiya huohui canaje Jose jjacahuibaquianijo: —¡Janinea meshi yasijje poquicue, Jose! 
\p Jamajjeya Jose poquinaje Janinea meshi yasijje baꞌeꞌyohua.  
\v 23 Nasanena cuiñajjijo Jose baꞌenaje. Jamajjeya Eyacuiñajjija esohui huohuijjija esohui yahuajo nei nei jayojja jama poa baꞌa: “Quijje pishana oya Nasanenajo baꞌe dejja bajjani acaje”. 
\c 3  
\s1 Huaniya esohui huohui canaje quima huasijje 
\r (Macoso 1.1-8; Noca 3.1-9, 15-17; Huani 1.19-28) 
\p  
\v 1 Jesosa Nasanenajo baꞌyanijo, Huani, ona besameejji poani poeyanaje Jodea meshi yasijje. Dejja cuana meshi jabojo anica huasijje sohuihuohui huichaꞌa huichaꞌa canaje Huaniya. Jama acanaje baꞌa:  
\v 2 —¡Miquea mimishi cuanajo quea yeno pocue; miquea mimishi cuana pajeaꞌyocue! Jjeya nei Eyacuiñajji poeje ojjañaja Emeshi Mese nei nei —acanaje. 
\p  
\v 3 Isaiaa Eyacuiñajjija esohui huohuijjiya jama huohui ca poa yahuajo nei nei Huanijo baꞌa: 
\q1 “Oe dejja meshi jabojo nequi taaanequije. Jama poaje baꞌa: —Jiquio ecua Emeshi Cuiñajji nei neija ejiojji shabo jea cani jama, quea pojje nee nee acani jayojja jamaya ¡miquea ejjashahuabaquijji tai quea boejea nee nee aꞌyocue! Emeshi Mese nei nei poeje”. 
\m Jamaya Isaiaa yahuajo nei nei tehue ca poa. 
\p  
\v 4 Huaniya huo ña, cameno ña oja sipi huosho canaje. Ejjayicaꞌaquijji ejee iya canaje. Shacui ijjia canaje, huini peaꞌai ishi canaje Huaniya.  
\v 5 Quea huiso dejja cuana Jodea meshijo baꞌe, pea cuana Jenosanenajo baꞌe peaꞌai, pea cuana cuei Jodana sahuajo baꞌe peaꞌai Huani que poeyanaje o shajjaꞌajjaa.  
\v 6 Oya cuana quea mimishi poanijo quea yeno poani. Jamajjeya oja mimishi cuana huohui caꞌyonaje. Mimishi cuana pajea sa poanijo, Huaniya oya cuana Eyacuiñajji nijje epoꞌyojji besa mee canaje Jodana cueijo. 
\p  
\v 7 Jodioja esohui huohuijji Paniseo bajjani cuana, Sanoseo dejja cuana peaꞌai poeyanaje Huani que; Eyacuiñajji nijje ejjapeequiꞌyojji nisho besaꞌyo sa poani peaꞌai. Huaniya oya cuana ba majje tecuea canaje. Jama acanaje baꞌa: —Miya peyo jama, jjadasiaquiani. ¿Aya acuae mi huohui canaje? Jama baꞌa: “¡Eyacuiñajjijo besa meecue! Jamajjeya ojaya miquianaya enapaꞌyojji pojjeama”.  
\v 8 Chojja. ¡Quea pame tii oe baꞌeꞌyocue! ¡Mimishi cuana oe pajeaꞌyocue; aꞌa quea jjashahuabaqui tai po oꞌoyajji! Jamajjeya miya Eyacuiñajjija enapajji pojjeama.  
\v 9 Aꞌa jjashahuabaquijji jama baꞌa: “Amajama ecuanaja etiiquiana. Oya quea pame nee poanaje. Ecuana Amajamaja bacua poanijojo, Eyacuiñajjija enapajji pojjeama”. Chojja de. Miquiana Amajamaja bacua quea mimishi poanijo, Eyacuiñajjiya cajaa mi acajeꞌyo. Eꞌe de, ohuaya pea Amajamaja bacua jayojja epojji pana cajeꞌyo pojjaꞌa mei, meshi pojjaꞌa —Huaniya acanaje. 
\p  
\v 10 —Jama baꞌa: Acui tai sajja jajacajja cajeꞌyo cuaqui cabojjiya. Ejjajja chamajo acui cajaa acajeꞌyo. Jajajeaꞌyo majje dahuajea cajeꞌyo. Dejja mimishi acui tai jayojja jama acajeꞌyo Eyacuiñajjiya; cuaqui yasijje jea cajeꞌyo.  
\v 11 Eyaya miquianaya Eyacuiñajjijo besa meejeꞌyo enajo, ca mique mimishi cuana epajeaꞌyojo. Quijje pishana poeje Quito. Ohuaya mi que Eyacuiñajjija Edojjoshahua Pame dobiqui mee cajeꞌyo. Jamajjeya miya quea pame poajeꞌyo. Mimishi cuana pajea sa poꞌyo ajjajo ca ca jeajea cajeꞌyo cuaqui yasijje. Jamaya peaꞌai baꞌa: Quito oe nei quea caꞌa nee nee nequi. Eya ca iña quea caꞌa pishana nequi. Jamajjeya eya ca iña onijje nequi sa po ajja miquiana que cojja. Quea bicho.  
\v 12 Dejjaa oja tepeya shaa dojo mee majje anoso iya caꞌyani equijo; eshaa dahuajea cani. Jiquio ecua anoso shaa dojo mee cani jama eseya acajeꞌyo Eyacuiñajjiya. Joya quea pame nee baꞌyani jaahuana cajeꞌyo tii. Mimishi cuana ca ca quiyojea canequijeꞌyo tii tii. 
\s1 Huaniya Jesosa Eyacuiñajjijo besa mee canaje 
\r (Macoso 1.9-11; Noca 3.21-22) 
\p  
\v 13 Majoya Jesosa Janinea meshi yobijo ani macua huasijje poꞌoquequinaje Jodana cuei yasijje Huani que. Jesosaa Huani ba majje jama acanaje baꞌa: —Huani, ¡eya besa meecue Eyacuiñajjijo, miyaya! 
\p  
\v 14 —Chojja, Emeshi Mese —Huani poanaje—. ¡Miyaya eya besa meecue Eyacuiñajjijo, miya quea pame nee neejo! ¿Yajjajje miya e que poeꞌyonaje? Eya ca ca iña quea pame pishana, de. 
\p  
\v 15 —¡Eyaya huohuiaña jama miyaya aꞌyocue! ¡Jamajjeya Eyacuiñajjija ehuohuiꞌyo ejo acue! —Jesosa poanaje. 
\p Jamajjeya Huaniya Jesosa besa mee canaje Eyacuiñajjijo.  
\v 16 Huaniya Jesosa besa mee majje jjequicuaya caꞌyajje, ba canaje eyatahuatahua caꞌapejo canaje. Eyacuiñajjija Edojjoshahua Pame huiaꞌ jama o sapa biajje cuabesa baꞌenaje. Ecapashinei baꞌeoquenaje.  
\v 17 Eyacuiñajjiya oja Bacua Ejja jama acanaje baꞌa: —Miya ecue Bacua Ejja quea jea nee nee. Eya mijo quea bihui nee nee poani. 
\c 4  
\s1 Jesosa quea mimishi po mee sa acanaje Edosiquiaa 
\r (Macoso 1.12-13; Noca 4.1-13) 
\p  
\v 1 Jjeyahua nei Edojjoshahua Pameya Jesosa quima huasijje meshi jabo huasijje huoojea canaje. Majoya Edosiquiaa Jesosa quea mimishi po mee sa acanaje.  
\v 2 Jesosa jomajo nequinaje peaja ejiojji cahui huisome, 40 cahuime. Mahuiso epojja, mecajje peaꞌai nequinaje quimajo bobimaꞌ nei nei. Majoya quea shoe poanaje.  
\v 3 Majoya aje Edosiquiana poeyanaje Jesosa que; miminequinaje jama baꞌa: —Miya Eyacuiñajjija Bacua Ejja jjabaqui majje ¡miyaya jiquio mei cuana pahui jayojja acue, miquea eꞌijjiajji! 
\p  
\v 4 —Chojja de. ¡Bacue Eyacuiñajjija esohui etehueꞌyo! Jama poani baꞌa: 
\q1 “Dejja cuana bobijo caꞌa po majje pojjeama baꞌe tiitiijeꞌyo. Ojjaña Eyacuiñajjija esohui jayojja jama añajo ca se ca quea pame nee baꞌe tiitiijeꞌyo”. 
\m Jamaya aca poa —jamaya Jesosa poanaje. 
\p  
\v 5 Majoya Edosiquiaa Jesosa dojo canaje Jenosanena huasijje. Jomajo Eyacuiñajjija equi quea ao nee nee yasijje nequisohuaqui mee canaje; equi jamacoo biajje nequi mee canaje. Jama acanaje baꞌa:  
\v 6 —Miya Eyacuiñajjija Bacua Ejja jjabaqui majje ¡tohuaacue meshi yasijje! Jamajjeya Eyacuiñajjija esohui jama etehueꞌyo jaa baꞌa: 
\q1 “Eyacuiñajjiya esohuidojojji cuana huoojea caje mi yasijje, mi jaahuanaa. Oquequiajo ojaya emeya miya iñajjequisohua cajeꞌyo, ohuaya. Jamajjeya miya ejjajiojji quecuasajaqui jjima poaje meijo”. 
\p  
\v 7 Jesosa onijje miminaje jama baꞌa: —Chojja. Yahuajo jama Eyacuiñajjija esohui etehueꞌyo peaꞌai baꞌa: 
\q1 “Aꞌa jama ajji baꞌa: —¿Aꞌa eꞌe jojo nei Eyacuiñajjiya oja sohui acajeꞌyo pojjaꞌa? ¿Aꞌa eya Eyacuiñajjiya jaahuana nei cajeꞌyo? ¡Cabaꞌajjasahua! —aꞌa pojji”. 
\m Jamaya yahuajo nei Moisesiya tehue ca poa —Jesosaa acanaje. 
\p  
\v 8 Majoya Edosiquiaa Jesosa dojosohuaqui canaje eyiyo ao huasijje. O shajjaꞌajjajji nisho jamaya Edosiquiaa Jesosa huohui canaje: —¡Bacue ojjaña meshi cuana, emeshi mese cuana peaꞌai, cuiñajji cuana, aquiana quea nahue cuana peaꞌai! Ojjaña quea pame nee nee.  
\v 9 Ojjaña jiquio aquiana cuana, dejja cuana peaꞌai miquea poajeꞌyo; miya Emeshi Mese nei nei eyaya po meejeꞌyo jjeya nei ca miyaya eya bihuiaꞌyajo ecuiꞌoshajjajo nequi majje —jama siajje ameya acanaje Edosiquiaa Jesosa. 
\p  
\v 10 Jamajjeya Jesosaa jama huoojeajeame acanaje baꞌa: —¡Chojja Edosiquiana! Eyaya miya bihuia ajja, de. ¡Poquicue miya! Jamaya Eyacuiñajjija esohui etehueꞌyo yahuajo peaꞌai baꞌa: 
\q1 “¡Eyacuiñajji oe nei bihuiacue! Oya oe nei ojjañaja Emeshi Mese nei nequi. ¡Ojaya esohui jama oe acue!” 
\p  
\v 11 Jamajjeya Jesosaa huoojea cajje Edosiquiana, Satanasa poquiꞌyonaje. Majoya Eyacuiñajjija esohuidojojji cuana quea huiso poeyanaje Jesosa jaahuanaa, bobiaa peaꞌai. 
\s1 Jesosaa esohui huohui canaje Janinea meshijo 
\r (Macoso 1.14-15; Noca 4.14-15) 
\p  
\v 12 Quijje pea cuaa Huani, ma ona besameejji poa jeanobiajea canaje. Shajjaꞌajja majje Jesosa posohuaqui oꞌoyanaje oja meshi yasijje, Janinea meshi yasijje.  
\v 13 Oya nequiñaqui jjima Nasanenajo. Pea cuiñajji yasijje, Capenaoma huasijje poquinaje baꞌeya. Janinea bae sahuajo, Samononi meshi, Netani meshi peaꞌai pejjejo baꞌenaje.  
\v 14 Yahuajo nei nei Eyacuiñajjija esohui huohuijjiya Isaiaa huohui ca poa jama baꞌa: 
\q1  
\v 15-16 “Ojjaña cuana quea mimishijo, esohui ba jjimajo quea apo baꞌyani. Eyacuiñajji ba majje oya cuana quea jaꞌa nee baꞌe mee cajeꞌyo. Eyacuiñajji ojaya ba jjimajo quea yeno nee baꞌyani. Jjeya ca ca quea jaji nee baꞌe mee cajeꞌyo. Eꞌe, Samononi meshijo, Netani meshi peaꞌaijo, Janinea bae sahuajo baꞌeca cuana, Cueji Pashi ma Jodana cuei bajjani sahuajo, ojje baꞌeca cuana, Janinea meshijo, pea bajjani Ese Ejja sohuijo baꞌa: Eyacuiñajji ba po jjimaja meshijo baꞌeca cuana peaꞌai quea mimishi poanaje. Jjeya ca ca quea jaꞌa nee baꞌe mee cajeꞌyo”. 
\m Jamaya Isaiaa huohui ca poa yahuajo nei nei Jesosaja epoejjijo. 
\p  
\v 17 Majoya Jesosaa esohui huohui canaje jama baꞌa: —Jjeyahua nei Eyacuiñajji miquea Emeshi Mese nei poeje. Jamajjeya ¡miquea mimishijo quea yeno pocue! ¡Mimishi cuana pajeaꞌyocue miquiaaya! —acanaje. 
\s1 Jesosaa nahuoo cuiashajajji iyaa canaje onijje epoꞌyojji 
\r (Macoso 1.16-20; Noca 5.1-11) 
\p  
\v 18 Majoya Jesosa poquinaje Janinea bae sahua huasijje. Jomajo ohuaya Anesi, Anesija oꞌi Peno bajjani, ma Simohui peaꞌai bajjani ba canaje. Oya cuana nahuoo cuiashajajji nei nei bajio. Nahuoo cuiashaja cani.  
\v 19 Jesosaa oya cuana iyaa canaje: —¡Enijje poꞌyocue! Eyaya miya dejja cuana jjequi meesahuaꞌyojji ajeꞌyo e que. 
\p  
\v 20 Jjeyahua nei nei oya cuana ojaya eshajajji cuana jeanaꞌyo majje onijje poquiꞌyonaje. 
\p  
\v 21 Majoya Jesosaa poqui pishana majje pea cuana ba canaje. Semeneoja bacua ejja Jacobo ba canaje ojaya echahua mese nijje, Huani nijje. Bishe aijo eshajajji jeꞌeꞌyo poꞌani ba canaje. Jjeyahua nei Jesosaa oya cuana iyaa canaje.  
\v 22 Jamajjeya Jesosaa iyaa cajje oja chii Semeneo bishejo ani tii jiña caꞌya poa cuaa Jesosa nijje epoquiꞌyojji. 
\s1 Jesosaa pea esohui huohui canaje emanojaa cuana huaquia mee caꞌyonaje 
\r (Noca 6.17-19) 
\p  
\v 23 Jesosa poquinaje ojjaña cuiñajji cuana huasijje Janinea meshijo. Jodio dejja cuanaja equi ojee ejjachichaquijji yasijje dobiquinaje esohui huohuiya. Jama poanaje baꞌa: —Eya ojjañaja Emeshi Mese poajeꞌyo. 
\p Ohuaya quea huiso emanojaa cuana jjaajaqui mee caꞌyonaje, huaquia mee caꞌyonaje peaꞌai.  
\v 24 Quea huiso Sinia meshijo baꞌeca cuaa Jesosaa huaquia mee caꞌyoqui shajjaꞌajja canaje peaꞌai. Jamajjeya o que jjequi canaje quea huiso emanojaa cuana. Eꞌe, ojjaña cuana quea nee poani, pea cuana niñepoqui cuana, jjequiꞌihuicajaa cuana peaꞌai, jiojjijjajja cuana peaꞌai o que jjequi canaje. Ojjaña cuana huaquia mee caꞌyonaje, jjaaja meequi caꞌyonaje, Jesosaa.  
\v 25 Jamajjeya Jesosa poquianijo, quea huiso nee nee cuana ojee poquinaje onijje. Eꞌe, dejja cuana quea huiso nee, ponaponaña peaꞌai Janinea meshijo baꞌe cuana, Jenosanenajo baꞌe cuana, Jodea meshijo baꞌe cuana, pea Ome miji peaꞌai Cuiñajjijo baꞌe cuana, Cuei Cueji Pashijo Jodana cuei ojje mijijje baꞌe cuana peaꞌai; quea huiso nee nee Jesosa nijje poquinaje. 
\c 5  
\s1 Jesosa eyiyojo aniya esohui huohui canaje 
\r (Noca 6.20-23) 
\p  
\v 1 Dejja quea huiso cuana ba majje Jesosa eyiyo huasijje jaasohua pishanaquinaje.  
\v 2 Jomajo anioque majje ojjaña cuana sohuihuohui canaje jama baꞌa:  
\v 3 —¡Bacue! Beca cuana jjashahuabaquiani jama baꞌa: “Eꞌe, de, eya quea mimishi nee. ¡Eyacuiñajjiya ecuea mimishi cacuijea caꞌyahua!” Jamaya jjashahuabaquianijo Eyacuiñajjiya oya baꞌe tiitii mee cajeꞌyo onijje eyajo. ¡Oya cuana quea bihui nee capoꞌyahua!  
\v 4 Oja epeejji cuana mimishijo quea yeno poanijo, Eyacuiñajjiya quea bihui nee po mee cajeꞌyo mimishi cuijea caꞌyajje.  
\v 5 Ojaya epeejji cuana quea bei poani Eyacuiñajjija quea jea nee; onijje baꞌe tiitii mee cajeꞌyo. ¡Quea bihui nee capoꞌyahua oya cuana! 
\p  
\v 6 —Ojaya epeejji cuana Eyacuiñajjija esohui jayojja jama a sa neinei poanijo, Eyacuiñajjiya oya cuana quea jaji nee nee baꞌe meesahua cajeꞌyo. ¡Quea bihui nee capoꞌyahua oya cuana! 
\p  
\v 7 —Ojaya epeejji cuana pea cuanajo jjashahuabaquiani pea jaahuanajji. Jamaya poanijo pea cuaa, Eyacuiñajjiya peaꞌai oya cuana jaahuana cajeꞌyo. Tecueꞌama poajeꞌyo ona nijje. ¡Eꞌe jojo nei quea bihui nee capoꞌyahua ojaya epeejji cuana!  
\v 8 Ojaya epeejji cuana mimishi cuana aꞌajjajo Eyacuiñajji nijje baꞌe tiitiijeꞌyo. ¡Quea bihui nee capoꞌyahua oya cuana!  
\v 9 Ojaya epeejji cuaa pea cuana quea bei po meesahua canijo, ojjañaja eba oya cuana Eyacuiñajjija bacua cuana eꞌe jojo nei; quea pame nee.  
\v 10 Ojaya epeejji cuana quea jaꞌa nee baꞌyanijo, onaaya oya cuana cuia cajeꞌyo. ¡Jamatii oya cuana quea bihui nee capoꞌyahua! Eꞌe, quijje eyajo oya cuana ojjaña huoojeaꞌyojji enijje poajeꞌyo —Jesosaa huohui canaje. 
\p  
\v 11 Majoya Jesosa Quitohua ojaya epeejji cuana huohui canaje jama baꞌa: —Miquianaya ecuea epeejji poanijo, pea cuana minijje mimijajije; miya napa caje peaꞌai, siajje poaje mijo peaꞌai. Jamatii Eyacuiñajjiya miquianaya quea bihui nee po mee cajeꞌyo. Eyajo onijje baꞌe tiitii mee cajeꞌyo.  
\v 12 Eꞌe, Eyacuiñajjija esohui huohuijji yahuajo nei nei baꞌya poa cuana jamaya aca poa mimishi cuaa; napa ca poa peaꞌai. Jamajjeya ¡ona jayojja jama pocue, quea bei! Eyacuiñajjiya miquianaya ojee baꞌe mee cajeꞌyo tiitii eyajo quea bihui nee nee —Jesosaa huohui canaje. 
\s1 Ae jayojja Eyacuiñajjija epeejji 
\r (Macoso 9.50; Noca 14.34-35) 
\p  
\v 13 —Ecuea esohui jayojja jama añajo, pea cuana mi jayojja jama baꞌeje quea pame nee peaꞌai. Jamajjeya miya sane jama, mei sese jama. Mei seseya shicui cajje bobi ihuiꞌyo ajja poani. Jamatii mei sese seseꞌama poa jojjemo ¿aꞌa quea sese po meeje oꞌoya? Chojja. Seseꞌamajo quea huesha jeajeaꞌaña seya. Jiquio ecua sane seseꞌama jeajeaꞌaña seya jama miya ecuea esohui jama po ajjajo, cajaa achanaꞌ eyaya. 
\p  
\v 14 —Enijje jjapeequianijo miquianaya cuaquijiji jama. Cuiñajji emaco aoꞌaojo nequi ba caje cuaa quea huesha nee mecajje peaꞌai. Jiquio ecua emacojo nequia jama ecuea epeejjiya pea cuana Eyacuiñajji ba meesahua cajeꞌyo enijje jjapeequianiya jjejojo.  
\v 15 Cuaquijiji sisi capaca ajja. Chojja. Cuaquijiji sisi nequia cajji acui biajje, ojjaña equijo ani cuana jeajaꞌajji.  
\v 16 ¡Jiquio ecua cuaquijijiya ojjaña equijo ani jeajaꞌa cani jayojja jama quea pame nee baꞌecue! Jamajjeya miquianaya quea pame ba majje pea cuanaa Eyacuiñajji, esejaya Chii eyajo bihuia cajeꞌyo —Jesosa poanaje. 
\s1 Moisesija esohui etehueꞌyo quea pame nee 
\p  
\v 17 Jesosaa pea esohui huohui canaje jama baꞌa: —Eyaya Moisesija esohui yahuajo etehueꞌyo cajaa aꞌajja. Eyacuiñajjija esohui huohuijji cuanaja esohui yahuajo nei eyaya cajaa aꞌajja peaꞌai. Cho. Eya poeyanaje onajaya esohui jama aꞌyohua. Eꞌe, oya cuaa yahuajo nei nei ejo huohui ca poa. Jjeya eyaya onajaya esohui jayojja jama ajeꞌyo.  
\v 18 Eꞌe jojo nei ojjaña Moisesija esohui cuana cajaa pojjeama poajeꞌyo. Ojaya esohui biso nei peaꞌai cajaa pojjeama poajeꞌyo. Quea pame nee ani tiitiijeꞌyo. Jamajjeya ojjaña ojaya esohui yahuajo nei nei etehueꞌyo jama ajeꞌyo. Ojjaña apoa ajeyoꞌyo majje ecuea echacojji jiquio meshijo apoa poajeꞌyo.  
\v 19 Jamajjeya joya Moisesija esohui etehueꞌyo jama baꞌe sa po ajjajo, oja sohui jama pojjeama huohui cajo, enijje baꞌe meemee ajja quijje eya ojjañaja Emeshi Mese nei poajo. Joya Moisesija etehueꞌyo jama acani, oja sohui jama huohui cani peaꞌai ca ca enijje baꞌejeꞌyo quijje eya ojjañaja Emeshi Mese oe nei poajo.  
\v 20 ¡Bacue! Moisesija etehueꞌyo huohuijji poani, Jodioja esohui huohuijji Paniseo bajjani cuana peaꞌaiya quea pame nee huohui ajja; quea pame baꞌe ajja peaꞌai. Jamajjeya miquiana ona jama baꞌyajo, ona jama huohuiajo peaꞌai miquianaya baꞌe ajja enijje quijje eya ojjañaja Emeshi Mese nei poajo —Jesosa poanaje. 
\s1 Moisesija etehueꞌyo yahuajo nei quea pame pishana Jesosaja ehuohuiꞌyo quea pame nee nee 
\r (Noca 12.57-59) 
\p  
\v 21 —Miquea eba Moisesija etehueꞌyo yahuajo jama baꞌa: “¡Aꞌa pea quecuajji!” Jamajjeya pea quecuajji epo dojo cajeꞌyo cuaa emeshi meseja dejja huoojeajji yasijje.  
\v 22 ¡Jjeya ecuea esohui eyacua shajjaꞌajjacue oe! Ojjaña joya pea nijje quea quene nee nee poani aje oe emeshi mese yasijje poquije. Quea tecue poaje emeshi mese onijje. Joya pea nijje mimijajiajo, “miya cajaa” acajo, cadojo cahua emeshi meseja esohui huohuijji cuana huasijje jjabahuejjaqui meeya. Joya pea nijje panajaji neineiyajo, cajaa nei nei acajo peaꞌai cuaqui yasijje huoojea ca chanaꞌ peaꞌai —Jesosa poanaje. 
\p  
\v 23 —Eꞌe pojjaꞌa miya Eyacuiñajjija equi yasijje poquiani aquiana quiaꞌyohua Eyacuiñajji bihuiajji. Ma aquiana quiaꞌyo jjimahuajo ¡jjashahuabaquicue miquea epeejjijo! ¿Aꞌa miquea epeejji quea yeno poani minijje miya quea tai añajo?  
\v 24 ¡Jamajjeya miquea epeejji yasijje poquicue! ¡Onijje mimiquicue! ¡Quea bei minijje po mee oꞌoyacue! ¡Majoya miquea aquiana quiaquicue Eyacuiñajji bihuiajji! —Jesosa poanaje. 
\p  
\v 25 —¡Pea cuana quea quene minijje poajo o que poquicuajicue! ¡Quea bei po mee oꞌoyacue jjeya nei! Ohuaya miya dojo ca chanaꞌ emeshi mese yasijje, napa meeya. Emeshi meseya miya huoojea ca chanaꞌ sohuinano huasijje. Sohuinanohua miya equi ejjajeanobiaquijji yasijje jeanobia ca chanaꞌ.  
\v 26 Jomajo nequi tiitii mee caje. Ma minijje quea quene nee poanaje sosequiajeyoꞌyo majje miya ejeanobianequi jeacuaya cajeꞌyo, de —Jesosa poanaje—. ¡Jiquio jayojjaya oe pocue! ¡Jamajjeya Eyacuiñajji nijje jjapeequicuajicue manoꞌyo jjimahua, cuaqui yasijje jeajea jjimahua! 
\s1 ¡Aꞌa jjashahuabaquijji pea eponajo! 
\p  
\v 27 —Cuanaya miquea eba Moisesija etehueꞌyo jama baꞌa: “¡Aꞌa pea cojjojji pojji!”  
\v 28 Jjeya ecuea esohui eyacua shajjaꞌajjacue jama baꞌa: Dejja pea eponajo jjashahuabaquianijo oya pea cojjojji epojji jayojja jama poani, ojaya ejjashahuabaquiꞌyojjijo; quea mimishi poani.  
\v 29 Jamajjeya ¡aꞌa quea mimishi pojji! Miya quea mimishi poani epona, aquiana pojjaꞌa baqui majje ¡maya bapajeaꞌyocue! Jea ba majje mimishi po majamajañajo cuaqui yasijje dobiquijeꞌyo tii. Jamajjeya ¡aꞌa jea bajji!  
\v 30 Peaꞌai miya quea mimishi poani aquiana emeya napañajo ¡aꞌa aquiana napajji! Quea mimishi po chanaꞌ; cuaqui yasijje dobiquiꞌyo chanaꞌ. Jamajjeya ¡aꞌa onaja aquiana napajji! Sii chanaya —Jesosa poanaje. 
\s1 Esuohui ehuanase huei canijo 
\r (Mateo 19.9; Macoso 10.11-12; Noca 16.18) 
\p  
\v 31 —Moisesija etehueꞌyo jama poa peaꞌai baꞌa: “Dejjaa ojaya ehuanase cajaa acajo, huei canijo ¡esohui catehue cahua ehueijji!”  
\v 32 ¡Ecuea esohui eyacua shajjaꞌajjacue! ¡Aꞌa miquea ehuanase pea dejjaja sii jjima hueijji! Epona quea pame baꞌe hueiꞌyo majje pea dejja nijje jjahueaquiajo, yahue ebionei eshe nequijo, quea mimishi po mee cani ebionei yahueya. Oya eshe enequijojo oja yahue eyacua quea mimishi poani peaꞌai —Jesosa poanaje. 
\p  
\v 33 —Moisesija etehueꞌyo jama poa peaꞌai baꞌa: 
\q1 “Miyaya huohuiaña jama baꞌa: —Eyacuiñajjiya eya shajjaꞌajja canijo, eꞌe jojo nei eyaya ecuea esohui jama ajeꞌyo. ¡Jamaya mimi majje miquea esohui jama acue; aꞌa pajeaꞌyojji!”  
\v 34 ¡Jjeya ecuea esohui eyacua shajjaꞌajjacue! Jama baꞌa: ¡Aꞌa oe siajje pojji! ¡Pea nijje mimi majje miquea esohui jayojja jama acue! Jamajjeya pea nijje mimianijo aꞌa huohuijji jama baꞌa: “Eyacuiñajji eshe eyajo yanijo, ecuea esohui jama eyaya ajeꞌyo. Ecuea esohui eꞌe nei pojjeama jojjemo eya quea nee po mee caꞌyome”. Cho. Eyajo Eyacuiñajji ejjahuoojeaquijji tii tii.  
\v 35 Jamaya aꞌa mimijji peaꞌai baꞌa: “Meshi yanijo, oe po jjimajo ecuea esohui jama eyaya ajeꞌyo. Ecuea esohui eꞌe nei pojjeama jojjemo meshi jjani yasijje eya mojea caꞌyome”. Cho. Meshi cuana miquea pojjeama; Eyacuiñajji Emeshi Mese oe nei poani. Jamaya aꞌa mimijji peaꞌai baꞌa: “Jenosanena yanijo, oe po jjimajo ecuea esohui jama eyaya ajeꞌyo. Ecuea esohui eꞌe nei pojjeama jojjemo Jenosanena cuiñajji esecue yasijje mo huoojeacuaya caꞌyome”. Cho, Jenosanena miquea pojjeama; Eyacuiñajji Jenosanena Meshi Mese poani.  
\v 36 Jamajjeya aꞌa huohuijji miyaya: “Ecuea esohui eꞌe nei pojjeama jojjemo camano mee caꞌyome”. Chojja.  
\v 37 Jamajjeya huohuicue jama baꞌa: “Eꞌe, eyaya jama ajeꞌyo”. “Chojja eyaya jama aꞌajja” acue —Jesosa poanaje. 
\s1 Esohui dejja quea quenejo 
\r (Noca 6.29-30) 
\p  
\v 38 —Miquea eba Moisesija etehueꞌyo jama peaꞌai baꞌa: “¡Peaa cojja cuiasejjajea cajje jjasosequiaquicue; cojja cuiasejjajea peaꞌaicue! ¡Peaa seꞌ cuiasajajea cajo seꞌ cuiasajajea peaꞌaicue!”  
\v 39 Ecuea esohui eyacua ca ca jama baꞌa: Onaaya miya napa cajje ¡aꞌa jjashahuabaquijji onijje ejjasoseaquijji! ¡Mique shemo ebianei mijijje cuia cajje shemo shani mijijje cuia mee oꞌoyacue!  
\v 40 Peaa miquea daqui sa poanijo miya dojo cani dejja etii bajjani yasijje huohuiya; miquea daqui dojo cajo, jamatii ¡miquea daqui moo quiacue peaꞌai!  
\v 41 Dejja maseya miya iña cajje ojaya aquiana quea huesha pishana dojo mee cajo, ¡quea huesha nee dojocue, jamatii!  
\v 42 Pea Ese Ejja miquea aquiana sa neinei poanijo ¡aꞌa quea dejja tai pojji! ¡Aꞌa quea nishehui pojji! ¡Oya quiacue! Pea cuana miquea aquiana dojo sa poanijo ¡oe pojji cahuime dojo meecue! Minijje mimiajo: “¡Che iña jiquio dojo meecue; quijje aje jje jeahuajeꞌyo!” acajje; “¡Eꞌe, dojocue!” sajaꞌame acue. Jamajjeya ¡ojjaña cuana nijje quea bei baꞌecue! ¡Aꞌa o jayojjaya quea mimishi, quea tai pojji! —Jesosa poanaje. 
\s1 Joya minijje quea quene nee poani quea jea acue 
\r (Noca 6.27-28, 32-36) 
\p  
\v 43 —Miquea eba etehueꞌyo yahuajo nei jama baꞌa: “¡Miquea epeejji quea jea nee acue! Miquea epeejji pojjeama, cho. ¡Onijje quea quene pocue epeejji pojjeama jjejojo!”  
\v 44 Ecuea esohui eyacua ca ca jama baꞌa —Jesosa poanaje—: ¡Miquea epeejji pojjeama quea jea nee acue peaꞌai! Miya Eyacuiñajjija epeejji poanijo, miya napa cajje ¡Eyacuiñajji nijje mimicue maa mi napajji poanijo! Jamajjeya eꞌe pojjaꞌa oya cuana Eyacuiñajji nijje jjapeequijeꞌyo peaꞌai.  
\v 45 Jamaya poanijo miquianaya Eyacuiñajji eseja Chii eyajo anija bacua cuana poani. Eꞌe, Eyacuiñajjiya eshequi quea jaꞌa nee jiji mee cani dejja quea pamejo, dejja quea mimishijo peaꞌai. Ohuaya ena huoojea cani dejja quea pame neeja que shepajji, dejja quea mimishija que shepajji peaꞌai —Jesosa poanaje. 
\p  
\v 46 —Joya mi quea jea nee ajji poani miquea quea jea nee peaꞌai; minijje quea mase ca ca miquea botiꞌama. Eyacuiñajjija epeejji pojjeama cuana aje oe jamaya poani peaꞌai, de. Jamajjeya miya jamaya poanijo ¿aꞌa Eyacuiñajjiya miya bihuia caje? Cho.  
\v 47 Miquianaya aje jja oe miquea epeejji cuana nijje quea bei nee mimiani, pea cuana nijje mimi ajja. ¿Aꞌa jamaya poani ojjaña dejja cuana? Eꞌe. Eyacuiñajjija epeejji pojjeama cuana aje oe jamaya poani peaꞌai, de.  
\v 48 Jamajjeya esejaya Chii eyajo quea pame nee ani. Ojjaña cuana Eyacuiñajjija quea jea nee nee. ¡Eyacuiñajji jayojjaya jama pocue quea bei nee nee! —Jesosa poanaje. 
\c 6  
\s1 ¡Quea jaꞌa nee jjapeequicue Eyacuiñajji nijje! 
\p  
\v 1 Jesosa poanaje peaꞌai: —¿Apiojji miya Eyacuiñajjijo chacochacoani pea cuaa ba canijo? Eꞌe pojjaꞌa jjashahuabaquiani miya bihuia caje cuaa ba majje. Onaja ebajji chacochacoanijo, quijje eyajo miquea echaco ojo Eyacuiñajjiya miya bihuia ajja, esosequiajji pojjeama —Jesosa poanaje. 
\p  
\v 2 —Aquiana aema huasijje quiaꞌyo majje aꞌa mimijji jama baꞌa: “¡Bacue, eya quea pame nee poani!” Chojo. Jamaya poani Eyacuiñajjija epeejji nisho cuana Eyacuiñajjija equijo, ejiojji cuanajo peaꞌai. Onaaya Eyacuiñajjijo chaco cani pea cuanaja ebajji. Jamajjeya quijje eyajo Eyacuiñajjija oya ebihuiajji pojjeama; ojaya echaco esosequiajji pojjeama peaꞌai.  
\v 3 ¡Miyaya aema huasijje aquiana cuana quehuajje quiacue! Jamajjeya ¡miquea epeejji neineija ba jjima quiacue!  
\v 4 Miquea Chiiya eyajo aniya ca ca oe ba caje; ohuaya miya quijje sosequia cajeꞌyo —Jesosa poanaje. 
\s1 Eyacuiñajji nijje jama mimime pocue baꞌa 
\r (Noca 11.2-4) 
\p  
\v 5 Jesosaa o shajjaꞌajjajji cuana huohui canaje pea jama baꞌa: —Eyacuiñajji nijje mimianijo ¡aꞌa joya ecua Eyacuiñajji nijje jjapee nishoquiani jayojja jama mimijji! Oya cuana aje oe Jodioja ojee ejjachichaquijji equijo nequiani, ojjañaja ebajji miminequiani. Esecuejo ojjaña anica cojja nei peaꞌai miminequiani. Eyaya miya eꞌe jojo nei huohuiaña oya cuana miminishonequiani —Jesosa poanaje—. Jamajjeya Eyacuiñajjija epeejji nei poso ojjañaa oya ba cani. Jamajjeya onaaya bihuia canaje sosejje Eyacuiajji nijje miminishoꞌaninajejo quijje eyajo oya cuana enijje enequiꞌyojji pojjeama, Eyacuiñajjija epeejji nisho jjejojo.  
\v 6 ¡Miquianaya ca ca miquea equi quecuayijjijo mee nei mimiꞌanicue Eyacuiñajji nijje, pea cuaa eba ca poani jjejojo! ¡Eseja Chii nijje jomajo mimicue! Ohuaya miya ba cani, shajjaꞌajja cani; mi pejjejo nequiani oya. Esejaya emimi bame bame jayojja jama acajeꞌyo, eseja Chiiya —Jesosa poanaje. 
\p  
\v 7 —Pea cuana Eyacuiñajji ba jjimajo eyacuiñajji nisho nijje mimiani. Oya esohui majamaja acani. Mimi majamajani eyacuiñajji nishohua eshajjaꞌajja caje poso.  
\v 8 ¡Aꞌa o jayojja jama pojji! Eyacuiñajji nijje mimi sa po jjimahuajo, ojaya esejaya ejjashahuabaquijji eba, de, eseja Chiija eyajo anija —Jesosa poanaje. 
\p  
\v 9 —Jamajjeya Eyacuiñajji nijje mimianijo mimicue jama baꞌa: 
\q1 Eyacuiñajji, miya ecuanaja Chii quea bame nee. 
\q1 Miya eyajo quea caꞌa nee ani. 
\q1 ¡Ojjaña cuaa miya cabihuia cahua, oe nei quea jaꞌa nee! 
\q1  
\v 10 Miya ojjaña cuanaja Emeshi Mese poani tii tii. 
\q1 Eyajo miquea ejjashahuabaquiꞌyojji jayojja jama poani ojjaña. 
\q1 ¡Jamaya oe pocue ojjaña meshijo peaꞌai! 
\q1  
\v 11 ¡Jjeya eya baꞌe meesahuacue! 
\q1  
\v 12 Eya queneꞌama pea cuana nijje, joya enijje quea mimishi poani nijje. 
\q1 Jamajjeya ¡ecuea mimishi cuanajo aꞌa quea quene pojji peaꞌai! 
\q1  
\v 13 ¡Aꞌa eya quea mimishi po meejji! 
\q1 ¡Nahue neineicue mo, Eyacuiñajji! 
\q1 ¡Edosiquianaja epeejjijo eya jaahuanacue! 
\q1 Eꞌe Eyacuiñajji, miya ojjañaja Emeshi Mese poani tii tii. 
\q1 Miya oe nei quea caꞌa nee enequi tii tii, quea pame nee. 
\q1 ¡Ojjañaa miya cabihuia cahua tii tii! 
\q1 Eꞌe, jamaya apoa ecuea emimi. 
\m ¡Jamaya Eyacuiñajji nijje mimicue! —Jesosa poanaje. 
\p  
\v 14 —Eꞌe, ¡jiquio ecua eya jama jjashahuabaquime oe pocue! Pea cuana nijje mimicue jama baꞌa: “Miya enijje mimijajinaje quea tai. Jamatii eya miquea mimishijo queneꞌama” jamaya pocue. Jamaya pea nijje mimianijo Eyacuiñajji miquea mimishijo queneꞌama poajeꞌyo peaꞌai.  
\v 15 Pea nijje quea quene tii tii poanijo ca ca Eyacuiñajji eseja Chii miquea mimishijo quea quene tii tii poajeꞌyo peaꞌai; miquea mimishi ecuijeaꞌyojji pojjeama —Jesosa poanaje. 
\s1 Eyacuiñajji nijje eseya bobimaꞌ mimi cajji ijjiaꞌijjia jjima ani majje 
\p  
\v 16 —Eyacuiñajjija epeejji nisho ijjiaꞌijjia jjima mimianijo quea yeno jayojja poani, ecojja topo jjima ojjaña cuanaja ebajji. Jamajjeya ojo jama poani baꞌa: “Eꞌe, oya Eyacuiñajjija epeejji nei nei; ijjiaꞌijjia jjima mimiani Eyacuiñajji nijje, de” poani —Jesosa poanaje—. Chojja, edasiaꞌyojji poani. Eyacuiñajjija epeejji nei poso pea cuaa acani. Jamajjeya ojjañaja ebajji oya mimiani. Quijje oya cuana enijje enequiꞌyojji pojjeama eyajo Eyacuiñajjija epeejji nisho jjejojo —Jesosa poanaje—.  
\v 17 Miquianaya ca ca ecuea epeejji nei. Ijjiaꞌijjia jjima Eyacuiñajji nijje mimianijo ¡aꞌa quea yeno jayojja pojji! ¡Aꞌa jjadasiaquijji jayojja jama pojji! Chojja —Jesosa poanaje—. Ijjiaꞌijjia jjima Eyacuiñajji nijje mimi huichaꞌa huichaꞌanijo ¡jamatii emeꞌ, ecojja peaꞌai shacuacue; ehuojjaña shiyeshiyejo shacue!  
\v 18 ¡Jamajjeya onaja ba jjima Eyacuiñajji nijje mimicue ijjiaꞌijjia jjima ani! Jamajjeya eseja Chiiya ohuaye nei miya ba caje, mi pejjejo nequiya. Miquea emimi bame bame jayojja jama acaje, ohuaya —Jesosa poanaje. 
\s1 Jesosaa eseya quijje eyajo quea huiso sosequia cajeꞌyo, ojo chacochacoani sosejje 
\r (Noca 12.32-34) 
\p  
\v 19 —Jiquio meshijo baꞌyanijo ¡aquiana echichaꞌyo quea huisojo aꞌa quea nahue bajji! —Jesosa poanaje—. Siipojjiya miquea aquiana sii ca chanaꞌ. Mojo ca chanaꞌ. Seeꞌyo chanaꞌ peaꞌai.  
\v 20 Cho. ¡Jjeya Eyacuiñajjijo chacochaco neineicue! Eꞌe jojo nei ohuaya quijje miya sosequia cajeꞌyo quea huiso nee nee eyajo. Esiiꞌyojji pojjeama; miquianajaya poajeꞌyo tii, miquea ebaꞌeꞌyojji eyajo.  
\v 21 Eꞌe, jamaya jjashahuabaquiajo miquianaya quea jaꞌa baꞌejeꞌyo, ecuea ehuohuiꞌyo jayojja jjashahuabaquije eyajo ebaꞌeꞌyojjijo; aquiana quea huiso yanijo ca ca miquianaya jjashahuabaquije meshijo ebaꞌejjijo —Jesosa poanaje. 
\s1 ¡Quea jaꞌa nee baꞌecue! 
\r (Noca 11.34-36) 
\p  
\v 22-23 —Miquea ecojja quea pame nee neejo miya quea jaꞌa nee bajeꞌyo echacojji; quea jaꞌa nee baꞌejeꞌyo peaꞌai. Cojja jamajama ca ca quea jaꞌa ebaꞌejji pojjeama. Quea apo nee nee, de, cojjamaꞌ —Jesosa poanaje—. Jiquio ecua quea cojja pame nee jayojja jama miya quea jjashahuabaqui pame nee neejo quea jaꞌa nee baꞌejeꞌyo Eyacuiñajjija ejjashahuabaquiꞌyojji jayojja. Quea jjashahuabaqui tai poanijo onaja aquiana cuana quea jea ba majje ca ca quea dejja tai baꞌejeꞌyo, quea nishehui. Jamajjeya Eyacuiñajjiya miya tecuea cajeꞌyo jama baꞌa: “Miya ca mi ca oe quea tai nee nee baꞌyani, ejo jjashahuabaqui ajja” acajeꞌyo Eyacuiñajjiya —Jesosa poanaje. 
\s1 ¡Aꞌa quea nahue, quea nishehui baꞌejji! 
\r (Noca 16.13) 
\p  
\v 24 —Cuanaya ¿aꞌa acuae chacochaco cajji beca dejjaa meeꞌajja cajje? Chojja. Oe echacomeejji shajjaꞌajja caje, quea boti acaje peaꞌai. Pea echacomeejji shajjaꞌajja jjima acaje, botiꞌama acaje peaꞌai. Jamaya miquianaya aquiana cuanajo jjashahuaba tiitiiquianijo Eyacuiñajjijo echacojji pojjeama —Jesosa poanaje. 
\s1 Eyacuiñajjiya oja epeejji cuana jaahuana cani 
\r (Noca 12.22-31) 
\p  
\v 25 Jamajjeya Jesosaa huohui canaje pea jama baꞌa: 
\p —Eꞌe jojo nei eyaya miya huohuiaña: ¡Aꞌa quea yeno jjashahuaba tiitiiquijji miquea ebaꞌejjijo! “Eꞌe pojjaꞌa eya bobimajo manojeꞌyo, bobi yasijje poajeꞌyo; eꞌishijji pojjaꞌa chamaꞌ poajeꞌyo, quea naba taja; ecuea daqui huiñaje pojjaꞌa, daquimaꞌ nei nei eya poajeꞌyo”. ¡Aꞌa jamaya jjashahuabaquijji! Eyacuiñajjiya miya eshe pana canaje, yamijji. Jamajjeya ohuaya miya bobi quia meesahua caje, daqui quia meesahua caje peaꞌai.  
\v 26 Eꞌe de, ¡bacue cuichojji cuana! Quea jaji baꞌyani. Oya cuanaa que chaco ajja, bobi chicha ajja, equi yasijje iya ajja quijje eꞌijjiaꞌyojji. Eseja Chiiya oya cuana jaahuana cani. Cuichojji ojaya nahueꞌama; miya ca ca oe ojaya quea nahue nee nee.  
\v 27 ¡Jjashahuabaquicue! ¿Aꞌa miya quea ao nee epoaje poso jjashahuaba neineiquianijo miya tii aojeꞌyo? Chojja. Jamatii. Jamajjeya oya jayojja aquiana chamaꞌ epoaje poso ¡aꞌa quea mete pojji! —Jesosa poanaje. 
\p  
\v 28 —¿Apiojji miya jjashahuabaquiani quea yeno daquijo? ¡Bacue eshasha ebiojo tiiani! Shasha cuana chaco ajja, oja daqui cuana soco ajja.  
\v 29 Jamatii quea bame nee nee nequiani. Jodioja emeshi mese yahuajo nei nequiya Sanomo bajjaniya daqui quea nahue nee nee huosho ca poa; jamatii oja daqui quea bame pishana. Shasha ca ca quea bame nee nee.  
\v 30 Eꞌe —Jesosa poanaje—, Eyacuiñajjiya shasha cuana tii mee cani quea bame nee. Jjeya shasha cuana enequi; mecahuajje yaaꞌyani, jocaꞌyani; dahuajea cani cuaa pojjaꞌa, chamaꞌyo tii poani. Jiquio ecua Eyacuiñajjiya shasha quea bame nee pohua mee cani jamaya ohuaya eꞌe jojo nei miya baꞌe meesahua cajeꞌyo. Miya ojaya quea boti nee nee. Miquianaya jjashahuaba taiquiani jama baꞌa: “Eꞌe pojjaꞌa Eyacuiñajjija eseya jaahuana jjima” jamaya miquianaya poani —Jesosa poanaje. 
\p  
\v 31 —Aꞌa jjashahuaba taiquijji jama baꞌa: “¿Aꞌya cuee che ijjiaje, de? ¿Aꞌya cuee ishije, de, chamaꞌ ena? ¿Aꞌya cuee che huoshoje?”  
\v 32 Eyacuiñajjija epeejji pojjeama cuana ojjaña aquianajo jjashahuabaquiani tii tii. Eyacuiñajjijo jjashahuabaqui ajja. Eꞌe jojo nei esejaya Chii eyajo ani miquea aquiana ebaꞌe meejjijo jjashahuabaquiani. Ohuaya miya jaahuana cajeꞌyo —Jesosa poanaje—.  
\v 33 Jamajjeya jjashahuabaquicue tii tii jama baꞌa: “Quijje Eyacuiñajji ojjañaja Emeshi Mese po majje onijjeya eyaya pea cuana huoojeajeꞌyo eyajo. ¡Ojaya esohui quea jaꞌa jayojja jama caꞌaꞌyahua!” acue —Jesosa poanaje—. Jamaya jjashahuabaquianijo ohuaya miquiana huasijje aquiana ebaꞌe meejji quia meesahua cajeꞌyo peaꞌai —Jesosa poanaje. 
\p  
\v 34 —Jamajjeya aꞌa quea yeno jjashahuabaquijji jama baꞌa: “¿Aya shai ecuana jaahuana caje mecahuajje?” Miya Eyacuiñajjiya jaahuana cajeꞌyo. Quijje quea camaja ebaꞌejji poaje pojjaꞌa. Jamatiiya ohuaya miya baꞌe meesahua cajeꞌyo —Jesosa poanaje. 
\c 7  
\s1 ¡Aꞌa pea cuana niñebajji! 
\r (Noca 6.37-38, 41-42) 
\p  
\v 1 —¡Aꞌa pea niñebajji! —Jesosa poanaje peaꞌai—. Jamaya Eyacuiñajjija botiꞌama.  
\v 2 Miya pea cuana niñebajji poanijo Eyacuiñajjiya miya tecuea cajeꞌyo peaꞌai. Miquiana pea nijje jjabeiquiꞌyajo Eyacuiñajjiya miquianajaya mimishi cuijea cajeꞌyo. Ma ecua miyaya onaya aña, jamaya miya acajeꞌyo Eyacuiñajjiya. 
\p  
\v 3 —¿Apiojji acuae jja oe miquea epeejji tecueaña soꞌo ca mimijajijjiya? ¿Aꞌa miquianaaya mimishi pajeaꞌyonaje pea tecuea jjimahuajo ojaya mimishijo? Chojja, miya ca mi ca oe mimijajipajeaꞌyo jjima peaꞌai. Jamaya miya poani baꞌa: Miyaya baña huenihueni shabo biso nei nei miquea epeejjija ecojjajo nequi. ¿Aꞌa cuae jja oe miyaya miquea ecojja dojjojo nequi huenihueni shabo quea quemo baña soꞌo? ¡Miquea ecojjajo nequi huenihueni shabo quea quemo jja oe huijjeajea meecue!  
\v 4-5 Aꞌa jiquio jama mimijji baꞌa: “Epeejji, huenihueni shabo biso neiya mi cojja dobi canaje. Ache baꞌajja cahuijjeaꞌajjaꞌyo sahua, de shabo biso nei”. Chojja. Shabo quea quemo nee miquea ecojjajo nequi, miya quea cojja shojo poanijo ca jje ca ebajji pojjeama. Miya ca mi ca oe ma shabo miquea ecojjajo nequi ¡ebionei huijjeajea meeꞌyo socue! ¡Majoya shabo biso nei nei miquea epeejjija ecojjajo nequi huijjeajeaꞌyocue! —Jesosa poanaje. 
\p  
\v 6 —Miquea aquiana quea nahue nee nee ¿aꞌa quiaña iñahuehua huasijje, cuichi yasijje peaꞌai? Aquiana nahue quishipasha cajeꞌyo, de. Oya cuana quea mase; ijjia ca chanaꞌ mi. Jamaya poani dejja jjashajjaꞌajjaqui ajja nei nei; quea mase iñahuehua jama, cuichi jama. Jamajjeya ¡ona huasijje Eyacuiñajjija esohui quea pame nee aꞌa huohui tiitiijji! —Jesosaa acanaje. 
\s1 ¡Eyacuiñajji nijje mimi neineicue! Ohuaya miya shajjaꞌajja caje 
\r (Noca 11.9-13; 6.31) 
\p  
\v 7 Jesosa jama poanaje peaꞌai baꞌa: —Jama acue baꞌa: ¡Mimi neineicue Eyacuiñajji nijje! Onijje mimianijo ohuaya miya jaahuana cajeꞌyo. Cuanaya aquiana chamaꞌ ba majje saꞌajja neineiaña ¡jama mimi neineimeya pocue Eyacuiñajji nijje! Ohuaya miya shajjaꞌajja cajeꞌyo. Cuanaya esecuejo nequiya miyaya taaaña miquea epeejji nijje emimijji. Esecuejo nequi taaa tiitii nequiani jayojjaya ¡Eyacuiñajji nijje mimi majamajacue! Ohuaya miquea esohui jayojja jama acajeꞌyo.  
\v 8 Eꞌe jojo nei onijje mimianijo Eyacuiñajjiya jaahuana cajeꞌyo; o sa neinei poanijo ohuaya miya sajaꞌa cajeꞌyo. Esecuejo taaa nequi jayojja jama pocue; ohuaya miya sajaꞌa cajeꞌyo —Jesosa poanaje. 
\p  
\v 9 —Ebacua ejja oja chii nijje jama mimime poajo baꞌa: “Ecue chii, ¡che mo oe pahui quiacue eꞌijjiꞌajji!” acajo, ¿aꞌa oja chiiya mei quia caje? Chojja.  
\v 10 “Ecue chii, ¡che mo oe jai quiacue eꞌijjiꞌajji!” acajo, ¿aꞌa oja chiiya peyo quia cajeꞌyo? Chojja.  
\v 11 Jamajjeya miquianaaya, jamatii quea mimishi jjashahuabaquianiya miquianajaya bacua cuana jaahuanaña. Jamajjeya esejaya Chii eyajo aniya miya jaahuana cajeꞌyo eꞌe jojo nei onijje mimianijo. Oya ca ca oe quea pame nee nee enequi tii tii —Jesosa poanaje. 
\p  
\v 12 —Miya mimiani pea nijje jama baꞌa: “¡Enijje quea pame nee po tiitiiꞌyocue!” Jamajjeya ¡pea cuana nijje quea pame nee po tiitiiꞌyocue! Eꞌe, jamaya yahuajo Moisesija esohui etehueꞌyo poa. Jamaya Eyacuiñajjija esohui huohuijji yahuajo nei baꞌya poa peaꞌai —Jesosa poanaje. 
\s1 Beca ejiojji 
\r (Noca 13.24) 
\p  
\v 13-14 Jesosaa huohui canaje pea jama baꞌa: —¡Esecue biso neijje dobicue! ¡Ejiojji biso neijje poquicue, ma eyahuasijje epoquijji ejiojjijje! Jomajo baꞌe tiitiijeꞌyo eseya. Eyacuiñajjija esohui ejiojji pame jayojja. Eya ejiojji esecue jayojja peaꞌai poani —Jesosa poanaje—. Oe pojji cuana Eyacuiñajjija ejiojjijje poquiani, de. Pea esecue ejiojji aiꞌaijje epoquijji. Ma ejiojji aiꞌaijje poqui majje cuaqui yasijje poquijeꞌyo. Jamajje quea huiso poquiani ejiojji aiꞌaijje, de —Jesosa poanaje. 
\s1 Esohui huohuijji nisho, siajjepojji 
\r (Noca 6.43-44) 
\p  
\v 15 Jesosa jama poanaje peaꞌai baꞌa: —¡Esohui huohuijji nishoja esohui aꞌa shajjaꞌajjajji! Dasia ca chanaꞌ mi. Mi que poeje jjapee nishoquiya. Oya cuana quea bei jayojja poeꞌani. Cho, quea bei pojjeama. Aquiana quea mase jama poani oya cuana.  
\v 16 ¡Quea mimishi poanijo bahuejjacue oya cuana esohui huohuijji nisho! ¿Aꞌa acuae acuisha jjonojo acuijjajja quea pame baꞌyani? Cho. ¿Aꞌa shaponajo acuijjajja quea pame chicha cani? Cho.  
\v 17 Jamaya esejaya eba baꞌa: Acui quea pamejo acuijjajja quea bame. Acui quea taijo ejjajja quea tai poaje.  
\v 18 Acui quea pamejo acuijjajja quea tai pojjeama baꞌyani. Acui quea taijo ejjajja quea bame pojjeama baꞌyani.  
\v 19 Acui taijo ejjajja quea tai poani. Jamajjeya jajajeaña seya, dahuajeaꞌyaña seya.  
\v 20 Acui eseya baje ejjajja ba majje. Acui quea tai ba majje esejaya eba acui quea tai. Jama jayojja esohui huohuijji quea mimishi ba majje eseyaya oya esohui huohuijji nisho bahuejjaje —Jesosa poanaje. 
\s1 Jesosa shajjaꞌajjajji eꞌe jojo nei 
\r (Noca 13.25-27) 
\p  
\v 21 —Quea huiso dejja cuana huohui cani jama baꞌa: “Jesosa Quito, miya ecuanaja Emeshi Mese eꞌe jojo nei”. Chojja, beca cuana siajje poani. Ecue Chii eyajo anija ejjashahuabaquiꞌyojji jayojja jama po ajja. Jamajjeya oya cuana ecue Chii eyajo ani yasijje poquiꞌyo ajja. Pea cuana eꞌe jojo nei ecue Chiija ejjashahuabaquiꞌyojji jama poani. Oya cuana poquijeꞌyo ecue Chii eyajo ani yasijje, ojaya Emeshi Mese nei yasijje.  
\v 22 Quijje e poe oꞌoyajo quea huiso cuana siajje poaje enijje jama baꞌa: “Ecuea Emeshi Mese, Eyacuiñajjiya eya huoojea canaje miquea esohui huohuiya. Ohuaya eya eshahua huoojeacuayajea meesahua caꞌyonaje. Ohuaya eya ameesahua canaje ma dejjaa ajjima acani”. Quijje jiquio jayojja jama acajeꞌyo siajjepojjiya.  
\v 23 Majoya eyaya oya cuana tecuea neineijeꞌyo jama baꞌa: “Chojja. Miquianaya enijje jjapeequiꞌyo jjima. ¡Miña ca oe poquicue quea huesha nee! Quea mimishi, quea mimijjequijea ca miña” ajeꞌyo —Jesosa poanaje. 
\s1 Equi iyajji jama Jesosaja epeejji cuana quea jjashahuabaqui jaꞌa nee 
\r (Macoso 1.22; Noca 6.47-49) 
\p  
\v 24 —Joya beca cuaa ecuea esohui shajjaꞌajja majje jamaya acajeꞌyo. Ojaya ejjashahuabaquiꞌyojji quea pame nee. Jamajjeya jiquio ecua equi quea caꞌa emacojo iyaña jayojja jama jjashahuabaquime oya poani.  
\v 25 Ena quea quemo poajo, jjayehuequiyajo beni quea quemohua equi jeaquena cani. Jamatii equi quea caꞌa emacojo ani; jaabicha jjima acani.  
\v 26 Pea cuaa ecuea esohui shajjaꞌajja ajja. Ecuea esohui jayojja jama aꞌajja peaꞌai. Oya cuana quea jjashahuabaqui quehua jayojja jama poani, equi quea quemo iya cani meshijajijo jama.  
\v 27 Ena quea quemo poajo ohua caje. Beni quea quemohua po majje equi janobajjima nei jeabichajea cajeꞌyo —Jesosa poanaje. 
\p  
\v 28 Jesosaa eyiyo quibojo esohui huohui ca poa. Apoa po majje dejja quea huiso cuana shajjaꞌajja majje jama poanaje baꞌa: —Eꞌe de, Jesosaa esohui quea jaꞌa nee nee huohui cani.  
\v 29 Ohuaya huohui cani emeshi mese jayojja jamaa, Moisesija esohui etehueꞌyo huohuijji jayojja jama pojjeama, de —poanaje ojjaña cuana. 
\c 8  
\s1 Dejja batata epoꞌyo, ma dejjaa shicui jjima acani jjajea meequi caꞌyonaje Jesosaa 
\r (Macoso 1.40-45; Noca 5.12-16) 
\p  
\v 1 Majoya Jesosa eyiyo biajje ani esohui huohuipajea majje jaaoqueꞌyonaje. Quea huiso dejja cuana poquinaje onijje.  
\v 2 Oe dejja quea mano nee, batata epoꞌyo poeyanaje Jesosa que. Ecuiꞌoshajjajo nequinaje o bihuiajji. Jama poanaje baꞌa: —Jesosa, ecuea eba miya ona jjajeaqui meeꞌyojji nei nei poani. Jamajjeya miyaya eya jjajeaqui meeꞌyo sa amajje ¡mo che jjajeaqui meeꞌyocue! 
\p  
\v 3 Jesosaa ma dejja napaꞌajja canaje emeya. Jama miminaje onijje baꞌa: —Eꞌe, eyaya miya jjajeaqui meeꞌyo sa aña. ¡Jjajeaquiꞌyocue miya! 
\p Jjajeaquinanaꞌyonaje jjeya nei.  
\v 4 Jamajjeya Jesosaa oya huohui canaje: —¡Shajjaꞌajjacue mo! Eyaya miya jjajeaqui meeꞌyonaje. Jamatii ¡aꞌa jjeya pea cuana huohuijji! ¡Poquicuajicue Jenosanena huasijje, Eyacuiñajjija equi yasijje, Eyacuiñajji nijje mimiani yasijje! Oya huohuicue miyaya: “Eya huaquiaꞌyonaje, jjajeaquiꞌyonaje mo” acue. ¡Moisesija esohui jayojja jama oe pocue peaꞌai! Miya ehuaquiaꞌyohua jjejojoya ¡Eyacuiñajji nijje mimiani yasijje beca huiaꞌ quiaquicue Eyacuiñajji bihuiajji! Jamajjeya ojjañaa ba caje miya eꞌe jojo nei ejjajeaquiꞌyo —oya acanaje Jesosaa. 
\s1 Jesosaa sohuinano huoojeajji poanija echacojji huaquia mee caꞌyonaje 
\r (Noca 7.1-10) 
\p  
\v 5 Quijje Jesosa Capenaoma huasijje poquiꞌyonaje. Jomajo oe dejja sohuinano quea huiso nee, 100 huoojeajji poani Jesosa que poeyanaje. Oya pea, Jodio dejja pojjeama.  
\v 6 Ohuaya Jesosa huohui neinei canaje jama baꞌa: —Jesosa, ecuea epeejji, ¡shajjaꞌajjacue mo che! Ecuea echacojji poani quea mano nee nee ecuea equijo jaa. Jeoꞌyo ajja poanaje. Quea yami nee nee jaa —poanaje. 
\p  
\v 7 Jesosaa oya sajaꞌa canaje jama baꞌa: —Eꞌe, eya poquije miquea equi yasijje miquea echacojji poani huaquia meeꞌyohua. 
\p  
\v 8 —Chojja, Jesosa —sohuinano huoojeajji poanaje—. Miya Jodio dejja quea pame nee nee poanijo ¿apiojji ecuea equi yasijje dobiquije? Eya Jodio pojjeama; quea pame pojjeama. Miya jjahuaquiameequiꞌyojji nei nei. Jamajjeya ecuea echacojji quea huesha jaa. ¡Miyaya jiquiojo tii nequiya huohuicue! ¡Huaquia meeꞌyocue!  
\v 9 Eꞌe, jamaya poani baꞌa: Pea emeshi mese cuaa eya huoojea cani. Ojaya esohui jama eyaya aña. Peaꞌai eyaya sohuinano cuana huoojeaña. Eya huoojeajje poquije. Eya iyaajje pea sohuinano poeje. Eya huohuiajje ecuea echacojji chacochacoje ejo. Jamajjeya miya huohuiajje ecuea echacojji jjaajaquijeꞌyo, de. 
\p  
\v 10 Shajjaꞌajja majje Jesosa quea bihui nee nee poanaje. Ojjaña cuana huohui canaje: —¡Shajjaꞌajjacue! Jiquio dejja Jodio pojjeama. Jamatii Eyacuiñajji nijje jjapeequiani eꞌe jojo nei. Miya ca mi ca oe, oe pojji jjashahuabaquiani Eyacuiñajjijo.  
\v 11 Eꞌe de, quea huiso dejja cuana Jodio pojjeama ojjaña meshijo baꞌe enijje jjapeequijeꞌyo. Eyajo eya Emeshi Mese oe nei poaje, oya cuana ojee ijjiaꞌijjiaje Jodio etiiquiana cuana nijje, Amajama nijje, Isaaca nijje, Jacobo peaꞌai nijje.  
\v 12 Beca Jodio cuana ca ca jjashajjaꞌajjaqui ajja jjejojo enijje ebaꞌejji pojjeama. Eyacuiñajjiya oya cuana jeacuayajea cajeꞌyo quea misi nee yasijje. Jomajo pa neineijeꞌyo. Quea yenohua jjejojo eseꞌ ijjiayaijea cajeꞌyo —Jesosa poanaje. 
\p  
\v 13 Jamajjeya sohuinano huoojeajji acanaje: —¡Poquicue miya miquea equi yasijje! Miquea eba eya ejjaajaquimeeꞌyojji nei nei. Jamajjeya eyaya miquea echacojji jjaajaqui meejeꞌyo. 
\p Jesosa mimianijo tii sohuinanoja echacojji jjaajacuajiquiꞌyonaje. 
\s1 Quea huiso cuana huaquia mee caꞌyonaje Jesosaa 
\r (Macoso 1.29-34; Noca 4.38-41) 
\p  
\v 14 Majoya Jesosa poquinaje Penoja equi yasijje. Penoja ano ba canaje quea quiyo nee nee jaa.  
\v 15 Emanojaa meꞌ napa cajje jjaajaquiꞌyonaje. Boe cananaꞌyonaje. Jamajjeya anisohuaꞌyo majje Jesosa, pea cuana peaꞌai bobia canaje, Penoja anohua. 
\p  
\v 16 Majoya aje oe sinecua dejja cuaa quea huiso niñepoqui cuana Jesosa que ye canaje. Jesosaa eshahua cuana huoojeacuayajea caꞌyonaje: —¡Cuayaquiꞌyocue, oe! —poanaje. 
\p Jesosa mimi jeahuajo, o niñepoqui po meejji poani cuayaquinananaje. Ojjaña emanojaa cuana jjaajaqui mee caꞌyonaje, huaquia mee caꞌyonaje peaꞌai, Jesosaa.  
\v 17 Jamaya poanijo Jesosa Isaiaja esohui yahuajo nei jayojja jama acaꞌyonaje. Isaia Eyacuiñajjija esohui huohuijji yahuajo nei nei Jesosa Quitojo jama poa baꞌa: 
\q1 “Ohuaya ecuana quea mano poanijo, quea nee peaꞌai poanijo, quea jaji nee po mee caꞌyonaje; huaquia mee caꞌyonaje”. 
\m Isaiaa jamaya aca poa yahuajo nei nei Jesosa Quitojo. 
\s1 Beca cuana Jesosa nijje poqui sa poani 
\r (Noca 9.57-62) 
\p  
\v 18 Pea pojjajo quea huiso dejja cuana Jesosa que jjachichaquinaje. Poqui sa poanijo Jesosaa ojaya epeejji cuana huohui canaje: —Cuaꞌa ¡bae ojje miji yasijje besapoquicue! 
\p  
\v 19 Poqui jjimahuajo oe dejja Jesosa que poeyanaje, Moisesija etehueꞌyo huohuijji poani. Ohuaya Jesosa huohui neinei canaje: —Miya esohui huohuijji quea pame nee. Eya miquea epeejji nei poajeꞌyo. Minijje tii eya poꞌayequi sa poani —poanaje. 
\p  
\v 20 Jesosaa oya sajaꞌa canaje jama baꞌa: —Eꞌe pojjaꞌa, de. Eya ojjaña cuanaja Edoe Mese poani. Jamatii ecuea equi chamaꞌ ejomishocajji, de. Samao ca ca oja jjanijo cahuijaa. Cuichojji cuana peaꞌai oja ejajo cahuiani. Jiquiojo ecuea equi chamaꞌ. 
\p  
\v 21 Majoya Jesosaja pea epeejji poeyanaje o que. Ohuaya Jesosa huohui canaje: —Ecuea esohui huohuijji, eya ecue chii cuiña poaje soꞌo. Oya etii nei nei. Quijje oya manoꞌyajo ohuajeajeꞌyo. Majoya aje mo oe minijje poquijeꞌyo chacochacohua. 
\p  
\v 22 —Chojja —Jesosaa oya sajaꞌa canaje—. Pea cuaa, Eyacuiñajjija epeejji pojjeama cuaa mique chii cacuiña cahua; ohuaya camojea cahua manoꞌyajo. ¡Jjeyahua nei enijje poꞌyocue! 
\s1 Beni pajiji 
\r (Macoso 4.35-41; Noca 8.22-25) 
\p  
\v 23 Majoya Jesosa bishe ai yasijje nequisohuaqui majje ojje besapoquinaje. O shajjaꞌajjajji cuana nijje besapoquinaje.  
\v 24 O besapoquianijo beni quea quemo nee nee poeyanaje. Enashajohua bishe nanejea canaje. Jeasohuajea canaje. Bishe ai yiyedojjojo Jesosa cahuijaanaje.  
\v 25 O shajjaꞌajjajji cuaa Jesosa ishe acanaje. Jama poanaje baꞌa: —Emeshi Mese Jesosa, ¡shequicue oe! ¡Coya aje se huiꞌiꞌya! —taaanaje. 
\p  
\v 26 Shequiꞌyo majje Jesosaa oya cuana sajaꞌa canaje: —¿Apiojji acuae nequiana quea mete nee nee poani? ¿Aꞌa mi ejo eꞌe nei pojjeama poani? 
\p Jamaya mimi majje Jesosa nequisohuanaje. Beni tecuea canaje: —¡Beni, jamaya, nequioquequicue oe! 
\p Majoya bae ena nijje jama poanaje baꞌa: —¡Aꞌa enashajo pojji! ¡Enashajo popajeaꞌyocue! 
\p O jama mimime poajo, enashajo popajeaꞌyonaje. Beni popajeaꞌyonaje.  
\v 27 Jamajjeya bishe aijo anica Jesosajo quea bihui nee nee poanaje. Ojee mimimiminaje jama baꞌa: —¡Ache dejja shai jiquio quea sohui poja nee nee! Beniya, enashajo cuaa peaꞌai oja sohui shajjaꞌajja cani, de. 
\s1 Eshahua ojo nequiajo, dejja quea mase nee Jesosaa niñe poquipajea mee caꞌyonaje 
\r (Macoso 5.1-20; Noca 8.26-39) 
\p  
\v 28 Jesosa bae ojje miji yasijje baꞌeñaquinaje, Jjanana meshi yasijje. Majoya beca dejja Jesosa que poeyanaje. Oya cuana baꞌenaje mei jjanijo, ma emanoꞌyo cuana sajaajo. Eshahuaa oja eyami yasijje dobiquinajejo, quea mase nee nee, niñepoqui poanaje. O ani chipi nei jjayejjequi ca ajja pea cuana.  
\v 29 Niñepoqui cuana Jesosa ba majje taaanaje jama baꞌa: —Miya Eyacuiñajjija Bacua Ejja. ¿Apiojji miya ecuana que poeyanaje? ¿Aꞌa jjeyahua nei ecuana cuaqui yasijje jeajeajeꞌyo? Eyacuiñajjiya eshahua cuana cuaqui yasijje huoojea cajeꞌyo quijje, jjeya nei pojjeama, de —taaame poanaje niñepoqui. 
\p  
\v 30 Quea chipi nee cuichi cuana quea huiso ijjiaꞌijjia nequi.  
\v 31 Eshahua cuaa Jesosa jama huohuime acanaje baꞌa: —Miyaya ecuana dejjajo nequi cuayaqui meeꞌyo majje ¡cuichi cuana huasijje ecuana huoojeaꞌyocue! 
\p  
\v 32 —Eꞌe, ¡poquicue cuichi cuana huasijje! ¡Dobiquicue! —Jesosa poanaje. 
\p Jamajjeya dejja cuana jeananaꞌyo majje eshahua cuana cuichi cuana huasijje dobiquinaje, ojjaña. Dobiqui majje cuichi cuana cuajicuaji jaaoquequinananaje. Bae quea sahua doe nee nee yasijje cuichi cuana huiꞌiꞌyonaje, ojjaña. 
\p  
\v 33 Ba majje cuichi jaahuanajji cuana jjajjasoaquinaje. Cuajicuajipoquinaje cuiñajji yasijje. Ojjaña cuana ma cuiñajjijo baꞌe huohui capoquinaje. Eshahua cuanajo, cuichi cuanajo, dejja cuana niñepoqui jjimaꞌ po mee canaje peaꞌai huohui canaje.  
\v 34 Jamajjeya ojjaña cuana ma cuiñajjijo baꞌe quea mete poeyanaje Jesosa que. Jesosa quea sohui poja nee nee jojoya ojjaña onijje quea mete miminaje jama baꞌa: —¡Poquicue miya pea meshi yasijje! 
\p Ojjaña ojo quea mete poanijo Jesosa ojje besapoqui oꞌoyanaje. 
\c 9  
\s1 Jesosaa pea emanojaa jjaajaqui mee caꞌyonaje, quibojjisha 
\r (Macoso 2.1-12; Noca 5.17-26) 
\p  
\v 1 Jamajjeya Jesosa bishejje besapoqui oꞌoyanaje ojje miji yasijje, Capenaoma huasijje.  
\v 2 Jomajo pea dejja cuaa quibojjisha quea mano nee jaa ye canaje Jesosa que, equipajaajjijo. Ma ba majje Jesosa jjashahuabaquinaje jama baꞌa: —Eꞌe, jiquio dejja cuana jjashahuabaquiani eya ejjaajaqui meeꞌyojji nei nei. 
\p Jamajjeya Jesosaa emanojaa huohui canaje: —Eꞌe ecuea epeejji, ¡quea bihui nee pocue! Eyaya miquea mimishi cuana cuijeaꞌyonaje. 
\p  
\v 3 Jesosaja esohui shajjaꞌajja majje Moisesija etehueꞌyo huohuijji poani cuana quenequenenaje. Jjashahuaba taiquinaje jama baꞌa: —¡De! Jiquio oya Eyacuiñajji pojjeama. ¿Apiojji Eyacuiñajji jayojja jama nei nei mimiani, de? Jamaya quea mimishi. 
\p  
\v 4 Jamajjeya Jesosa ojaya ejjashahuaba taiquijji ba majje jama poanaje: —¿Yajjajje acuae quiana quea quene enijje poani soꞌo?  
\v 5 ¿Ache shai quibojjishajo quea camaja eyaya anaje? ¿Aꞌa ojaya mimishi cuijeaꞌyojji quea camaja? ¿Aꞌa jja oya nequisohua meejeꞌyo eyaya? Baꞌajja —Jesosa poanaje—.  
\v 6 Jamajjeya eyaya ojjañaja Edoe Meseya miquianaya ba meeaña eya ca ca iña Emeshi Cuiñacoojji quea caꞌa nee nee nequi. Jamajjeya eyaya mimishi cuijeajeꞌyo nequianaja. 
\p Majoya Jesosaa quibojjisha acanaje: —¡Nequisohuacue! ¡Miquea equipajaajji bebo majje miquea equi yasijje poquicue! 
\p  
\v 7 Jjeya nei quibojjisha nequisohua majje jeoꞌyonaje. Jeojeopoquinaje ojaya equi yasijje.  
\v 8 Ba majje ojjaña cuana quea bihui nee nee poanaje: —¡Eꞌe nei, joya quibojjisha jeoꞌyonaje jjeya nei! ¡Eꞌe e, Eyacuiñajji nijjeya Jesosaa emanojaa cuana huaquia mee caꞌyani! ¡Mimishi cuijea mee caꞌyani peaꞌai! —poanaje ojjaña. 
\s1 Jesosaa dejja Mateo bajjani iyaa canaje 
\r (Macoso 2.13-17; Noca 5.27-32) 
\p  
\v 9 Majoya Jesosa poquinaje pea cuiñajji cuana huasijje. Poquijeya Mateo ba canaje equi ejjeshejji jaahuanajjijo ani. Mateo ona sose jjeshejji poani, ebaꞌejji sosejje. Ojjañaja emeshi meseja esohuijo jjeshe mee cani, dejja cuana ebaꞌejji sosejje. Ba majje Jesosaa Mateo iyaa canaje: —Mateo, ¡enijje poꞌyocue! 
\p Jamajjeya Mateo nequisohua majje Jesosa nijje poquiꞌyonaje. 
\p  
\v 10 Majoya Mateohua ojaya epeejji cuana iyaa canaje ojaya equi yasijje eꞌijjiaꞌijjiajji Jesosa nijje. Jamajjeya Jesosa o shajjaꞌajjajji cuana nijje Mateoja equi yasijje poquinaje ijjiaꞌijjiaa. Quea huiso dejja cuana Mateo jama ona sose jjeshejji poani, dejja mimishi cuana peaꞌai poquinaje. Ojee ijjiaꞌijjiaꞌaninaje Jesosa nijje, Jesosa shajjaꞌajjajji cuana nijje peaꞌai.  
\v 11 Ba majje Jodio esohui huohuijji Paniseo cuana Jesosa shajjaꞌajjajji cuana nijje mimijajinaje jama baꞌa: —¿Apiojji miquea esohui huohuijji ijjiaꞌijjiani dejja mimishi nijje, ejjeshejji chichajji cuana nijje peaꞌai? ¿Apiojji, de? 
\p  
\v 12 Jesosaa oya cuana shajjaꞌajja canaje. Huohui canaje: —¿Aꞌa dejja cuana quea mano pojjeama eshicuijjiquiajji sa poani? Quea mano poanijo ca ca eshicuijji quia cajji. Jamaya miquianaya joya mimishiꞌama poso jjabaquiani ecuea esohui shajjaꞌajja sa po ajja. Mimishi cuaa ca ca shajjaꞌajja cani. Jamajjeya eya dejja quea mimishi nijje jjapeequiani quea jaꞌa nee epo meejji.  
\v 13 ¡Bacue oe! Siajjepojji jama poani baꞌa: “Eya ca ca iña quea pame nee, mimishiꞌama nei nei”. Jamajjeya joya quea pame poso jjabaquiani ecuea eꞌiyaaꞌyojji pojjeama enijje ejjapeequijji. Chojja. Eya poeyanaje dejja joya quea mimishi nee nee iyaaa, mimishi pajea meeꞌyojji. Jamajjeya esohui etehueꞌyojo jjabahuejjaquicue jama baꞌa: Yahuajo nei nei Eyacuiñajjiya Osea tehue mee ca poa jama baꞌa: 
\q1 “Huo cuana cuia cani. Cuia majje na sho cani e bihuiajji. Jamaya ecuea quea boti pishana. ¡Pea cuana oe baꞌe meecue tii quea bei! Jamaya ecuea quea boti nee nee”. 
\m Jamaya tehue mee ca poa yahuajo —jamaya Jesosaa Paniseo cuana acanaje. 
\s1 Bobi ijjia jjima yajjijo huohuiꞌajja canaje cuaa 
\r (Macoso 2.18-22; Noca 5.33-39) 
\p  
\v 14 Majoya Huani, ma ona besameejji poa ejeanobiajea jaa. Ojaya eshajjaꞌajjajji cuana poeyanaje Jesosa que. Jama huohuiꞌajjame acanaje baꞌa: —Ecuana, Paniseo cuana peaꞌai Jodio etiiquianaja esohui jama poanijo bobi ijjiaꞌijjia jjima ani Eyacuiñajjijo jjashahuaba neineiquianijo, onijje mimi neineianijo. Jesosa, ¿apiojji acuae mi mi shajjaꞌajjajji cuana jama po ajja? —oya cuana poanaje beshahua nei quea tecue. 
\p  
\v 15 Jesosaa oya cuana sajaꞌa canaje: —Chojja, eya ecuea epeejji cuana nijje yanijo caꞌijjia cahua. Ejjahuanaquijjijo yahueja epeejji cuana onijje yanijo caꞌijjiaꞌijjiaquiahua. ¿Aꞌa yahueja epeejji cuana onijje yanijo quea yeno? Chojja. Quea bihui nee. Yahue poquiꞌyajo ca ca oe ojaya epeejji cuana ijjiaꞌijjia sa po ajja poaje, quea yeno jjejojo jjashahuaba neineiquiani. Eya jiquio ecua yahue poquiani jayojjaya jama poaje: Quijje eya poquiꞌyo majje ecuea epeejji cuana Eyacuiñajjijo jjashahuaba neineiquianijo ijjiaꞌijjia ajja poaje. 
\p  
\v 16 Majoya Jesosaa huohui canaje pea esohui ejjashahuabaqui meejji: —Eseyaya baacojja eseeꞌyohua caca ajja bishe eyacuajo. Cho. Baacojja etii enajo nequi seeꞌyani, caꞌaꞌama. Jjasajajeaquijeꞌyo. Bishe ihuicuajicuajije. Bishe eyacuajo ca ca baacojja eyacuaa cacaña. 
\p  
\v 17 —Peaꞌai ena sese cuatatanijo iya ajja meshimisi etiijo. Ena sese cuatata neineianijo, meshimisi caꞌaꞌama jjaajajeaqui majje ena sese jjashojeajeaquijeꞌyo. Cho, ena sese cuatatanijo meshimisi eyacua quea caꞌajo iya cajji. 
\p Jamaya Jesosaa huohui canaje o jjabahuejjaquijji baꞌa: Ojaya esohui eyacua quea jaꞌa jama caꞌa cahua. Jamajjeya Eyacuiñajjiya oya cuana quea boejea nee ba cajeꞌyo. 
\s1 Epona shoꞌi emanoꞌyojaa Pea epona najji poani tii tii 
\r (Macoso 5.21-43; Noca 8.40-56) 
\p  
\v 18 Jesosa jamaya dejja cuana nijje mimianijo, pea Jodio dejja o que poeyanaje, ma Jodioja ojee ejjachichaquijji equi jaahuanajji poani. Ecuiꞌoshajjajo nequinaje o bihuiajji. Jama poanaje baꞌa: —Esohui huohuijji, ecuea ebacua piona manoꞌyonaje jjeya nei. ¡Poecuajicue o napaꞌajjaa emeya! Jamajjeya oya shequije oꞌoya, de. 
\p  
\v 19 Nequisohua majje Jesosa epona shoꞌija chii nijje poquinaje. Jesosa shajjaꞌajjajji cuana onijje poquinaje peaꞌai.  
\v 20 Jesosa poquije oe eponaa ba canaje. Oya quea mano, najji popajeaꞌyo ajja. Ome miji pea beca, 12 eshequiajame na cuayapajeaquiꞌyo ajja poa. Jesosa que quehuajje poeyanaje. Ohuaya oja daqui cuema iña canaje, emeya.  
\v 21 Jjashahuabaquinaje jama baꞌa: —Eya Jesosaja daqui cuema iña majje najji popajeajeꞌyo. 
\p Ohua daqui cuema iña cajje Jesosa jjabajeaquinaje.  
\v 22 Epona namaꞌyo ba canaje. Jama poanaje onijje baꞌa: —She, ¡quea bihui nee pocue! Miya quea jaꞌa jjashahuabaquinaje ejo jama baꞌa: “Eꞌe jojo nei Jesosaa eya najji popajea mee cajeꞌyo”. Jamajjeya eyaya miya najji popajea meeꞌyonaje. 
\p Jamajjeya ma epona najji popajeaꞌyonaje. 
\p  
\v 23 Majoya Jesosa equi jaahuanajjija equi yasijje poquinaje. Dobiquinaje. Ba cañaquinaje quea huiso dejja cuana, ponaña peaꞌai equijo nequi. Epona shoꞌi emanoꞌyojo ojee paꞌani. Ojjaña quea shajjaquijjo poani. Dehue mia cani emojeaꞌyojjijo peaꞌai.  
\v 24 Jesosaa ojjaña cuana huoojeacuayajea canaje: —¡Cuayaquicue nequiana esecue yasijje! Jiquio epona shoꞌi cahuijaa; epoquijeyoꞌyo pojjeama —poanaje. 
\p —Chojja de. Oya manoꞌyonaje, de; shequiꞌyo ajja —poanaje cuana. 
\p  
\v 25 Ojjaña cuana esecue yasijje cuayaquiꞌyajo, Jesosa epona shoꞌi jaa huasijje dobiquinaje, pea equecuayijji yasijje. Meꞌ iña majje epona shoꞌi shequi mee caꞌyonaje.  
\v 26 Jamajjeya ojjaña ma meshijo baꞌe yasijje huohuiqui canaje cuaa: —¡Jesosa jjashequi meequiꞌyojji, de! ¡Jiquio epona shoꞌi ma emanoꞌyo poanaje shequiꞌyonaje! —poanaje. 
\s1 Jesosaa beca dejja cojjamaꞌ quea cojja jaꞌa po mee caꞌyonaje 
\p  
\v 27 Quijje pishana Jesosa ma equijo ani cuayaquiꞌyonaje. Ejiojjijje poquianijo beca dejja o quiquishijji poquinaje, cojjamaꞌ cuana. Taaanaje jama baꞌa: —Jesosa, miya emeshi mese Dabija bacua. ¡Ecuanajo jjashahuabaquicue! ¡Cojjajji mo po meeꞌyocue! 
\p  
\v 28 Jesosa pea equi yasijje dobiquiajo cojjamaꞌ cuana o que poeyanaje. Jesosaa oya cuana huohuiꞌajja canaje: —Miquianaya ejo jjashahuabaquiani jama baꞌa: “Eꞌe, Jesosa ca ca quea cojja jaꞌa jjapo meequiꞌyojji, de”. 
\p —Eꞌe, Jesosa, miya quea cojja jaꞌa jjapo meequiꞌyojji —poanaje cojjamaꞌ. 
\p  
\v 29 Jamajjeya Jesosaa ojaya ecojja napaꞌajja canaje emeya. Huohui canaje jama baꞌa: —Eꞌe, miquianajaya ejjashahuabaquijji ejo quea jaꞌa nee nee. Jamajjeya eyaya cojjajji po meejeꞌyo nequiana. 
\p  
\v 30 Jjeya nei quea cojja jaꞌa nee nee poꞌyonaje. Jesosaa huohui neinei canaje peaꞌai: —Eꞌe, eyaya miquianaya quea cojja jaꞌa po meeꞌyonaje. Jamatii ¡aꞌa jihuohuijji soꞌo! —acanaje. 
\p  
\v 31 Jamatii poqui majje huohui poanaje ojjaña huasijje: —¡Jesosaa ecuana quea cojja jaꞌa nee nee po mee caꞌyonaje, de! —jamaya poanaje. 
\s1 Dejja mimiꞌajja mimi mee caꞌyonaje Jesosaa 
\p  
\v 32 Majoya ma cojjamaꞌ poanaje cuana poquiꞌyajo, pea cuaa dejja mimiꞌajja jjequi canaje Jesosa que. Eshahuaa oja yami yasijje dobiqui majje mimiꞌajja po mee canaje.  
\v 33 Jesosaa eshahua huoojeacuayajeaꞌyo majje dejja mimiꞌajja quea jaꞌa nee mimi oꞌoyanaje. Ba majje ojjaña cuana quea bihui nee nee poanaje. Miminaje jama baꞌa: —¡Chamaꞌ beca dejja Jesosa jama, de! Ohuaye nei eshahua huoojeacuayajea caꞌyani, mimiꞌajja mimi mee caꞌyonaje, de —poanaje. 
\p  
\v 34 Jamatii Paniseo cuanaa Jesosa quehua niñeba canaje. Jama acanaje baꞌa: —Chojja de, Jesosa eyamiquecua pojjaꞌa. Pea eshahua huoojeacuayajea mee cani Edosiquiana nijjeya —siajje pome poanaje. 
\s1 Jesosa Quito ojjaña cuanajo jjashahuabaquinaje quea yeno 
\p  
\v 35 Jamajojoya Jesosa poquinaje ojjaña cuiñajji quea quemo huasijje, ojjaña cuiñajji sisi cuana huasijje peaꞌai. Jodioja equi ojee ejjachichaquijji cuana huasijje dobiquinaje esohui huohuiya. 
\p —Eya quijje eyajo ojjañaja Emeshi Mese oe nei poajeꞌyo —Jesosaa acanaje. 
\p Ojjaña quea mano jaa jjaajaqui mee caꞌyonaje, huaquia mee caꞌyonaje peaꞌai.  
\v 36 Dejja cuana quea huiso nee nee jjachichaquinaje o que. Jesosaa oya cuana ba canaje ñajjajja jama. Ejaahuanajji quea pame chamajo ñajjajja nequi mee ajja quea pame nee. Jamaya ojjaña cuana quea yeno poani; ebaꞌejji quea camaja baꞌyani, ejaahuanajji quea pame chamaꞌ peaꞌai, de. Jamajjeya Jesosa ojjañajo quea yeno poanaje.  
\v 37 O shajjaꞌajjajji cuana nijje miminaje dejja cuanajo. Jama poanaje Jesosa baꞌa: —Anoso quejo jahua majje echacojji cuanaa cachicha cahua. Dejja cuana anoso jahuajahua jayojja jama, quea huiso nee nee. Eꞌe de, jjeya ojjaña cuana jjashahuabaquiani eꞌe jojo nei epojji; shajjaꞌajja caje eya Emeshi Mese nei poeyanaje o jaahuanaa. Jamatii oe pojji Eyacuiñajjijo chaco sa poani. ¿Aya acuae oya cuana jjabahuejjaqui mee cajeꞌyo Eyacuiñajjijo?  
\v 38 Jamajjeya ¡Eyacuiñajji nijje mimicue! Jama acue baꞌa: “Eyacuiñajji, ¡huoojeacue oe miquea echacojji cuana esohui huohuiya, pea cuana minijje ejjapeequi meeꞌyojji!” —Jesosa poanaje. 
\c 10  
\s1 Jesosaa iyaa canaje o shajjaꞌajjajji cuana 12 huisome 
\r (Macoso 3.13-19; Noca 6.12-16) 
\p  
\v 1 Jamajjeya Jesosaa o que iyaa canaje o shajjaꞌajjajji cuana. Oya cuana quea caꞌa po mee canaje eshahua cuana huoojeacuayajea meeꞌyojji, ojjaña emanojaa cuana huaquia meeꞌyojji, ejjaajaqui meeꞌyojji peaꞌai. 
\p  
\v 2 Jesosa shajjaꞌajjajji nei 12 poa, yohua bajjani baꞌa: Simohui ojaya pea bajjani Peno, oja chahua Anesi; Semeneoja bacua ejja Jacobo, oja chahua Huani;  
\v 3 Penipe, Matonome, Tomasi, Mateo ma bejjo chichajji emeshi mesejo poa; Apeoja bacua ejja Satiaco;  
\v 4 Simoni Senote; Nemeo ojaya pea bajjani Taneo; Jodasa Isicaniote, ma Jesosa iña meesahuajji poanaje dejja mimishija quecuaꞌyojji. Mahuiso Jesosaa babaca caꞌyonaje ojaya esohui huohuijji epojji. 
\s1 Jesosaa o shajjaꞌajjajji huoojea canaje esohui huohuiya 
\r (Macoso 6.7-13; Noca 9.1-6) 
\p  
\v 5 Jamajjeya Jesosaa jiquio 12 huoojea canaje onijje chacohua. Jamaya huohui canaje: —¡Aꞌa poquijji Jodio dejja pojjeama cuanaja meshi yasijje! ¡Dejja cuana Samania meshijo baꞌe cuana huasijje peaꞌai aꞌa poquijji jjeya!  
\v 6 Chojja, ¡jjeya poquicue Jodio cuana huasijje! Oya cuana poquiquehuanaje; Eyacuiñajji nijje jjapeepajeaquinaje ñajjajja epoquiquehua jayojja jama, de.  
\v 7 Ojjaña cuana huohuicue jama baꞌa: “Jjeya Jesosa ojjaña huoojeajji poani” acue.  
\v 8 ¡Emanojaa cuana jjaajaqui meeꞌyocue! ¡Emanoꞌyo cuana shequi mee oꞌoyacue! ¡Dejja batata epoꞌyo cuana jjajeaqui meeꞌyocue peaꞌai! ¡Eshahua cuana dejja cuana huasijje dobiquiajo huoojeacuayajeaꞌyocue peaꞌai! Eyaya miquianaya huaquia meesahuaña pea dejja cuana sosemaꞌ. Jamajjeya ¡pea cuana quea bihui nee oe huaquia meeꞌyocue sosemaꞌ!  
\v 9 Jjeya ¡ejjeshejji, mei huoꞌo peaꞌai, bejjo peaꞌai aꞌa dojojji!  
\v 10 ¡Bashosoco bobi dojojji aꞌa dojojji! ¡Aꞌa beca daqui dojojji! ¡Miquea ejiojjijo nequi ejiojji shejee dojocue! ¡Oe acui ejjaquecuacaꞌaquijji dojocue, beca pojjeama! Miquea esohui shajjaꞌajja majje pea cuaa miya cabobia cahua. Eꞌe, miyaya esohui huohuiañajo, bobi caquia cahua.  
\v 11 Miquianaaya pea cuiñajji yasijje poqui majje ¡saꞌajjacue oe dejja miquea epeejji epojji, joya bei bei! ¡Ojaya equijo anicue ma cuiñajjijo ani majje!  
\v 12 Ojaya equi yasijje dobiqui majje huohuicue jama baꞌa: “¡Eyacuiñajjiya miquianaya cajaahuana cahua!”  
\v 13 Ojjaña ma equijo baꞌeya miya quea pame nee acajo, Eyacuiñajjiya miquea esohui jayojja jama oya cuana jaahuana caje. Miya quea pame nee mi baꞌe mee cajo, cho; Eyacuiñajjiya oya cuana ejaahuanajji pojjeama.  
\v 14 Eꞌe pojjaꞌa beca equijo, beca cuiñajjijo miquea esohui shajjaꞌajja sa poꞌyo ajjajo, niñeba cani peaꞌaijo, ¡oya cuana jeajeanaꞌyocue! Poquijeꞌyohua jama acue baꞌa: “Eyaya miquianaya cajaa ajeꞌyo, ¡quea mimishi mi coma. Eyacuiñajjiya miya ba cani quea mimishi nee nee. Ohuaya miya quea nee nee po mee cajeꞌyo” acue —Jesosa poanaje—.  
\v 15 Eyaya miya eꞌe jojo nei huohuiaña jama baꞌa: Quijje Emeshi Mese nei poeje oꞌoya, ojjaña quea mimishi poani quea nee nee po meejeꞌyo. Yahuajo nei nei dejja cuana Sonomajo baꞌe, Jomoshajo baꞌe peaꞌai quea mimishi nee baꞌyanijo, Eyacuiñajjiya quea nee po mee caꞌya poa, yahuajo. Ma dejja shajjamaꞌ cuana ca ca Eyacuiñajjiya quea nee nee po tiitii mee cajeꞌyo, de. Sonomajo baꞌe cuana ca ca quea nee pishana po tiitii mee cajeꞌyo. 
\s1 Quijje dejja cuana quea mase nee poaje 
\p  
\v 16 Jesosaa o shajjaꞌajjajji cuana huohui canaje peaꞌai: —Eyaya miya huoojeaña dejja quea mase ibia jama huasijje. Miquianaya quea beijo ohuaya mi napa ca chanaꞌ. Jamajjeya ¡quea jjashahuabaqui jaꞌa pocue! ¡Quea bei pocue; mimishiꞌama peaꞌai!  
\v 17 ¡Aꞌa pajeaꞌyojji dejja cuana quea mase poajeꞌyo minijje! Miya iña majje dojo caje Jodio etii ani yasijje jeanobiaa. Janobajjima nei cuia caje Jodioja equi ojee ejjachichaquijjijo.  
\v 18 Miya cuana enijje jjapeequianijo dojo caje cuaa pea emeshi mese cuana huasijje, ona huoojeajji nei nei yasijje peaꞌai. ¡Jamajjeya miquianaaya esohui quea pame nee ejo huohuicue ona huasijje, Jodio pojjeama cuanaja ejjahuoojeaquijji nei nei yasijje peaꞌai!  
\v 19 Dojo majje huohuiꞌajja caje jama baꞌa: “¿Ae poani miquianaya?” Jamaya acajje ¡aꞌa quea mete pojji! Aꞌa jjashahuabaquijji jama baꞌa: “¿Ae shai eyaya huohuije?”  
\v 20 Eꞌe nei Eyacuiñajjiya miya mimi meesahua caje. Ohuaya huoojea caje Edojjoshahua Pame mi que. Edojjoshahua Pameya miquianaya huohui meesahua caje —Jesosa poanaje. 
\p  
\v 21 —Eꞌe, quijje pishana dejja cuana, ponaña peaꞌai quea mase nee poaje ecuea epeejji cuana nijje. Jamajjeya eꞌoꞌi mese oja chahua iña meesahua cajeꞌyo onajaya equecuaꞌyojji. Ejeajji cuaa jamaya acajeꞌyo oja bacua. Ebacua cuana shajjamaꞌ poaje. Dejja mase oja chii, oja enaese pojjaꞌa iña mee cajeꞌyo equecuaꞌyojji.  
\v 22 Miquiana enijje jjapeequianijo, quea huiso cuana quea quene nee nee poajeꞌyo minijje. Jamatii enijje jjapeequi pajeaꞌyo ajjajo nequi tiitii meejeꞌyo enijje eyajo, eya ojjañaja Emeshi Mese oe nei, ejjahuoojeaquijji nei nei poaje.  
\v 23 Dejja cuaa oe cuiñajjijo baꞌeya miquianaya janobajjima napa cajo, ¡poquicue pea cuiñajji yasijje! Eyaya miya eꞌe jojo nei huohuiaña: Ojjaña Jodio dejja cuanaja cuiñajji cuana huasijje poqui jjimahuajo, ojjaña cuana huasijje ecue sohui huohui jjimahuajo peaꞌai eya, ojjañaja Edoe Mese poeje oꞌoya —Jesosa poanaje. 
\p  
\v 24 —Ojjaña cuana enijje quea mase poani. Jamajjeya minijje quea mase poaje peaꞌai e shajjaꞌajjajji poani jojoya.  
\v 25 Echacojji poani o chacomeejji nijje chacochacoanijo, pea cuaa echacomeejji napa cajo, echacojji poani peaꞌai napa caje cuaa. ¿Aꞌa eꞌe? Dejja mimishi cuana ejo siajje poanaje jama baꞌa: “Miya Edosiquiana Meesemo bajjani”. Jamaya enijje quea tai mimijajianijo quijje quea tai nee nee mimijajije minijje ecuea epeejji poani jojoya. Jamajjeya miya e jayojjaya acajeꞌyo; ¡jamatii quea bihui nee pocue! —Jesosa poanaje. 
\s1 ¡Aꞌa quea mete pojji dejja cuanajo! 
\r (Noca 12.2-7) 
\p  
\v 26 —Jamajjeya dejja mimishi cuanajo ¡aꞌa quea mete pojji! Ojjaña esohui quehuajje acani, pea cuanaja shajjaꞌajja jjima, quijje shajjaꞌajja caje. Ojjaña quehuajje amajje quijje ojjaña ba mee cajeꞌyo. 
\p  
\v 27 —Jjeya eyaya esohui huohuiaña miquiana huasijje, ma pea cuanaja shajjaꞌajja jjima. Quijje pishana miquianaaya ojjaña huasijje huohuiquije ecuea esohui. ¡Quea jaꞌa nee huohuicue!  
\v 28 Ojjaña cuanajo, eshahua cuanajo peaꞌai ¡aꞌa quea mete pojji! Oya cuanaa miya quecua cajeꞌyo pojjaꞌa. Jamatii, miquea edojjoshahua mano meemee ajja. ¡Eyacuiñajji oe neijo jjashahuabaquicue! Shajjamaꞌ poajo ohuaya miya mano meeꞌyo majje cuaqui yasijje jea cajeꞌyo miquea edojjoshahua —Jesosa poanaje. 
\p  
\v 29 —Eꞌe —Jesosa poanaje—, beca anohuii jjeshe cajji beshahua nei sosemaꞌ. Nahueꞌama nei cuichojji cuana. Jamatii Eyacuiñajjiya, esejaya Chiiya cuichojji cuana ba cani, bobi ijjia mee cani.  
\v 30 Peaꞌai ¿ache huiso ehuojjaña miquea esapajo baꞌe? Eyacuiñajjija eba. Ojjaña ojaya ehuojjaña esico, de.  
\v 31 Jamajjeya ¡aꞌa quea mete pojji! Cuichojji cuana Eyacuiñajjija nahueꞌama; miya ca ca ojaya quea nahue nee nee —Jesosa poanaje. 
\s1 ¡Aꞌa quea bicho pojji Jesosa nijje jjapeequiani! 
\r (Noca 12.8-9) 
\p  
\v 32 —Beca cuaa bichoꞌama huohui cani: “Eꞌe, eya ca iña bichoꞌama Jesosaja epeejji eꞌe jojo nei”. Jamajjeya eyaya ecue Chii eyajo ani huohuije bichoꞌama jama baꞌa: “Eꞌe, oya cuana ecuea epeejji eꞌe jojo nei”.  
\v 33 Pea cuana quea bicho poani: “Cho, eya Jesosa Quitoja epeejji pojjeama”. Jamajjeya eyaya ecue Chii eyajo ani huohuije jama baꞌa: “Cho, oya cuana ecuea epeejji pojjeama. Cajaa” eyaya aje —Jesosa poanaje. 
\s1 Ojjaña dejja Jesosajo ojee baꞌe meemee ajja quea bei 
\r (Noca 12.51-53; 14.26-27) 
\p  
\v 34 —¡Aꞌa jjashahuabaquijji eya poeyanaje ojjaña cuana ojjaña meshijo ojee quea bei baꞌe meeya! Chojja, de. Pea cuana quea mase poaje ecuea epeejji cuana nijje.  
\v 35 Eꞌe, ecuea esohui ohua shajjaꞌajja canijo, oja chii nijje oja bacua ejja cuana quea quene poaje. Ecuea esohui jayojja jama ohua acanijo, oja enaese nijje ojaya ebacua piona quea quene poaje peaꞌai. Enijje jjapeequianijo, oja ano nijje oja bacua ejjaja huanase quea quene poaje peaꞌai.  
\v 36 Jamajjeya ecuea epeejjija huapa pojjeama cuana quea quene poaje onijje ecuea epeejji pojjeama jjejojo; pea cuana quea quene pishana poaje onijje —Jesosa poanaje. 
\p  
\v 37 —Ojjañaa joya oja chii, ojaya enaese pojjaꞌa quea jea nee nee acanijo eya quea jea pishana acani ecuea epeejji pojjeama, de. Peaꞌai ojjañaa joya oja bacua ejja, oja bacua piona pojjaꞌa quea jea nee nee acanijo eya quea jea pishana acani enijje jjapeequi meemee ajja. Cajaa.  
\v 38 Eyaya Eyacuiñajjija esohui huohuiañajo, pea cuana enijje quea quene poajeꞌyo. Dejja mimishiya enapa ca poani jjejojo enijje mi jjapeequiani. Ojjaña joya e jayojjaya baꞌe sa po ajja ecuea epeejji pojjeama. Eꞌe, jiquio ecua acui ecueataꞌapee quea camaja eꞌabojji jama jayojja enijje jjapeequiyajo quea camaja poaje.  
\v 39 Dejja mimishi cuaa ecuea epeejji quecua ca chanaꞌ. Jamajjeya quea mete nee neejo enijje jjapeequi sa po ajja. Cuaqui yasijje dobiquijeꞌyo tiitii. Joya enijje jjapeequiani ca ca dejja mimishi cuaa quecua cajeꞌyo pojjaꞌa. Jamatii. Manoꞌyo majje enijje baꞌe tiitiijeꞌyo quea pame nee eyajo —Jesosa poanaje. 
\s1 Ojjaña joya quea pame poani sosequia cajeꞌyo quijje Eyacuiñajjiya 
\r (Macoso 9.41) 
\p  
\v 40 —Eꞌe —Jesosa poanaje peaꞌai—, beca cuana minijje jjapeequijeꞌyo miya ecue sohui huohuiañajo. Jamajjeya oya ecuea epeejji poani peaꞌai. Eyacuiñajji e huoojeajji poani; ojjaña joya enijje jjapeequiani Eyacuiñajjija epeejji poani peaꞌai.  
\v 41 Quijje Eyacuiñajjiya ojaya esohui huohuijji sosequia cajeꞌyo ojaya esohui huohui cani sosejje. Pea cuana ojaya esohui huohuijji nijje jjapee neineiquianijo, sosequia cajeꞌyo esohui huohuijji jayojja jama. Ojjaña joya Eyacuiñajjija epeejji nijje eꞌe jojo nei jjapeequiani Eyacuiñajjiya sosequia cajeꞌyo quea pame nee oya quea pame nee poanijo.  
\v 42 Eꞌe jojo nei ojjaña joya ecuea eshajjaꞌajjajji poani baꞌe meesahua cani, ena eꞌishijji quia cani pojjaꞌa eya ojaya quea boti neejo, Eyacuiñajjiya oya quijje sosequia cajeꞌyo oya quea pame nee poanijo —Jesosaa o shajjaꞌajjajji cuana huohui canaje mahuiso huoojea jjimahuajo. 
\c 11  
\s1 Huaniya Jesosa que huoojea canaje o shajjaꞌajjajji cuana 
\r (Noca 7.18-35) 
\p  
\v 1 Majoya Jesosaa ojaya ome miji becanejjijji peaꞌai, 12 eshajjaꞌajjajji cuana huasijje esohui huohui majje pea cuiñajji quea chipi nee yasijje poquinaje esohui huohuiya. 
\p  
\v 2 Yahuajo pea dejja cuaa Huani iña ca poa, ma ona besameejji poa. Dejja maseja equi ejjajeanobiaquijji yasijje jeanobiajea ca poa, emeꞌ jeyoꞌyo. Ejeanobiajaaa Huaniya shajjaꞌajja canaje onaja ehuohuiꞌyo Jesosajo. Jamajjeya o shajjaꞌajjajji cuana huoojea canaje Jesosa que.  
\v 3 Oya cuana Jesosa huohuiꞌajjaña meequi canaje jama baꞌa: —Jesosa, yahuajo Huaniya huohui canaje jama baꞌa: “Eyacuiñajjiya Emeshi Mese nei ojjaña jaahuanajji huoojea cajeꞌyo ecuana huasijje”. ¿Aꞌa miya ma Emeshi Mese nei? Eꞌe pojjaꞌa ecuaa pea ishoaje. ¡Jamajjeya huohuicue miyaya! ¿Yajja shai ecuaa Huani ajeꞌyo soꞌo? —Huanija eshajjaꞌajjajji cuana poanaje. 
\p  
\v 4 Jesosaa oya cuana sajaꞌa canaje: —¡Poqui oꞌoyacue Huani que! ¡Ecuea esohui miquianaaya shajjaꞌajjaña, jiquio miya eya banajeya peaꞌai oe Huani huohuiquicue! Jama acue baꞌa:  
\v 5 “Huani, Jesosaa cojjamaꞌ cuana quea cojja jaꞌa po mee caꞌyani. Jiojjijjajja jeo mee caꞌyani. Dejja batata epoꞌyo cuana jjajeaqui mee caꞌyani. Shajjaqueba peaꞌai quea shajja jaꞌa po mee caꞌyani. Emanoꞌyo cuana shequi mee caꞌyani peaꞌai. Esohui quea pame nee huohui caꞌyani ojjaña dejja quea yeno huasijje”.  
\v 6 Eꞌe, eya Eyacuiñajjija huoojeaꞌyo ojjaña jaahuanajji. Quea bihui nee capoꞌyahua ojjaña joya ejo jjashahuabaquiani jama baꞌa: “Eꞌe jojo nei Jesosa Eyacuiñajjija huoojeaꞌyo ojjaña jaahuanajji”. ¡Aꞌa jjashahuaba quehuaquijji! —Jesosa poanaje. 
\p  
\v 7 Jamajjeya Huanija epeejji cuana poqui oꞌoyanaje Huani que. Majoya poquiꞌyajo Jesosa miminaje pea cuana nijje: —Yahuajo Huani meshi jabojo, quimajo aninaje. Miquianaya o que poquinaje. ¿Ae shai banaje miyaya? ¿Ae jjashahuabaquinaje Huanijo? ¿Aꞌa jjashahuabaquinaje Huani esohui huohuijji quea jaꞌa pojjeama? Chojja.  
\v 8 Miquianaya Huani que poquinaje ¿ae baa? ¿Aꞌa dejjaja daqui quea nahue nee ehuosho baꞌe banaje? Chojja. Dejjaa daqui quea nahue nee huosho cani equi quea quemojo baꞌeya.  
\v 9 ¿Achajja Huani baꞌya poa? ¿Aꞌa miya jjashahuabaquinaje Huani Eyacuiñajjija esohui huohuijji nei nei? Eꞌe, de. Jamatii Eyacuiñajjija esohui huohuijjiya ba cani oe pojji. Huanija eba quea huiso nee.  
\v 10 Yahuajo nei Eyacuiñajjija esohui etehueꞌyo Huanijo jama poa baꞌa: 
\q1 “Jiquio dejja ecuea esohui huohuijji nei poani. Jamaya eya sa poani. Eyaya oya huoojeaje ebionei, mi hui dojojji. Ohuaya dejja cuana huasijje huohui caje miquea epoejjijo”. 
\m Jamaya yahuajo nei nei Eyacuiñajjiya ojjaña ba mee ca poa Huaniya poe majje ejo jjabahuejjaqui mee caje cuana.  
\v 11 Ecuea pea esohui aꞌa pajeaꞌyojji jama baꞌa: Ojjaña pea cuana quea pame. Huani ma ona besameejji poa quea pame nee nee. Jjeya pea chamaꞌ Huani jayojja jama. Jamatii quijje eya Emeshi Mese nei poaje, ojjaña ecuea epeejji cuana Huani jayojja jama poajeꞌyo, quea pame nee nee.  
\v 12 Eya poeyanajejo Huaniya ojjaña pojjajo ejo huohui canaje jama baꞌa: “Jjeya nei Emeshi Mese nei Quito poeje”. Jamatii dejja mase cuaa Huani napa cani ojjaña pojjajo. Eya, Emeshi Mese nei jeabichajea sa acani cuaa peaꞌai. Oya cuana emeshi mese jayojja jama huohui sa poani —Jesosa poanaje. 
\p  
\v 13 —Yahuajo nei Eyacuiñajjija esohui huohuijji cuaa huohui ca poa, Moisesija esohui etehueꞌyojo jama poa peaꞌai baꞌa: “Quijje Eyacuiñajjija huoojeaꞌyo ojjaña jaahuanajji Emeshi Mese oe nei poeje”. Jamaya Huani miminaje. Jamaya pea cuana miminaje Huani poe jjimahuajo peaꞌai.  
\v 14 Eꞌe, yahuajo nei Eyacuiñajjija esohui huohuijjiya tehue ca poa jama baꞌa: 
\q1 “Ecuea ehuoojeaꞌyo ojjaña jaahuanajji poe jjimahuajo, eyaya Enia huoojeaje ebionei, ehui dojojji”. 
\p —Huaniya Enia jayojja jama huohui canaje, ma Eyacuiñajjija esohui huohuijji yahuajo nei nequia poa jama.  
\v 15 Jamajjeya ¡bacue; aꞌa shajjamaꞌ pojji, ca miquiana ba sa poanijo!  
\v 16 Ojjaña cuana jjeya nei baꞌe ecuea eba. Oya cuana eshoꞌiquiana quebanei poani jayojja jama. Quebanei poanijo jama poani: Eshoꞌi cuaa pea eshoꞌi taaa cani.  
\v 17 Jjamimihueꞌequiani jama baꞌa: “Ecuaa dehue miaña epona ejjahueaquijjijo jama. Jamatii miquianaya majamaja ajja. Peaꞌai e pa nishoanijo, emanoꞌyojo paꞌani jayojjayajo, miquianaya pa nisho ajja. Jamajjeya miquianaya quebanei po ajja ecuana nijje” poani eshoꞌiquiana —Jesosa poanaje—. Jamaya miquianaya jjeya poani, de.  
\v 18 Eꞌe, yahuajo pishana Huani poeyanaje. Eyacuiñajji nijje mimi tiitiianijo bobi ijjiaꞌijjia ajja. Ecahuishi ishi jjima peaꞌai. Jamajjeya ojjaña cuaa huohui canaje ojo jama baꞌa: “Huani jja ca niñepoqui jama”.  
\v 19 Eya ojjaña cuanaja Edoe Mese poeyanaje. Eya ca jja ca ijjiaꞌijjiani; ojjaña nijje mimimimiani. Jamajjeya miquianaya ejo siajje poani jama baꞌa: “¡Bacue jiquio dejja Jesosa! Oya jejje ajja tii. Dejja mimishi nijje jjapeequiani, bejjo chichajji cuana nijje peaꞌai, de”. Jiquio ecua eshoꞌiquiana pea nijje jjapeequi sa po ajja jama jayojja miquianaya ecuana nijje jjapeequi sa po ajja. Miquianaya jjashahuaba quehuaquiani Huanijo, ejo peaꞌai. Jamatii ecuanaa Eyacuiñajjija ejjashahuabaquijjijo quea jaꞌa nee jayojja jama añajo ecuanaa quea pame nee aña —Jesosa poanaje. 
\s1 Beca cuiñajjijo baꞌe cuana shajjamaꞌ poanaje 
\r (Noca 10.13-15) 
\p  
\v 20 Quea huiso cuiñajjijo Jesosaa ma dejja cuaa ajjima acani ahuichaꞌa huichaꞌa canaje. Jamatii quea huiso cuana mimishi pajea sa poꞌyo ajja. Jamajjeya Jesosaa oya cuana tecuea canaje.  
\v 21 Jama poanaje baꞌa: —Miquianaya quea mimishi nee nee. ¡Quea yeno nee nee miquianaya poaje Conasijo baꞌe, Betesainajo baꞌe peaꞌai! Ma dejjaa ajjima acani eyaya ahuichaꞌa huichaꞌanaje miquianaja cuiñajji cuanajo miquea ebajji nisho. Yahuajo nei nei pea dejja cuana Tinojo, Sinonojo peaꞌai baꞌeja ojaya ba jjima eyaya ma dejja cuaa ajjima aña. Eba jojjemo oya cuanaa mimishi cuana pajea caꞌyo queaye mimishijo quea yeno po majje.  
\v 22 ¡Bacue oe! Quijje Eyacuiñajjiya ojjaña cuana sosequia cajeꞌyo ojaya ebaꞌeꞌyojji sosejji. Ohuaya yahuajo nei nei Tinojo baꞌe cuana, Sinonojo baꞌe cuana peaꞌai quea nee po mee cajeꞌyo mimishijo. Miquianaya Conasijo baꞌe, Betesainajo baꞌe peaꞌai ca ca quea nee nee po mee cajeꞌyo ecuea esohui miquiaaya mi shajjaꞌajjajo.  
\v 23 Miquianaya Capenaomajo baꞌe quea pame poso jjabaquiani, jjashahuabaquiani jama baꞌa: “Ecuana quea pame nee nee; pea meshijo baꞌe cuana quea pame pishana”. Chojja, de. Siajje miya poani. Quijje Eyacuiñajjiya janobajjima nei napa cajje miquianaya quea yeno poaje. Eyaya ma dejjaa ajjima acani aña miquianajaya cuiñajjijo quea huiso. Jamatii miquea mimishi cuana pajea sa poꞌyo ajja. Yahuajo nei nei pea cuiñajji Sodoma bajjani yania poa. Eyacuiñajjiya ma dejjaja ba jjima acani eba jojjemo oya cuana quiyo jeyojeyoꞌyo jjima poqueaye. Jamatii jjeya Sodoma chamaꞌyo tii.  
\v 24 ¡Bacue oe! Quijje aje Eyacuiñajjiya ojjaña cuana sosequia cajeꞌyo ma ecua oya po nequia poa jama. Ma pojjajo ohuaya dejja cuana yahuajo nei Sodomajo baꞌe quea nee po mee cajeꞌyo quea mimishijo. Miquianaya Capenaomajo baꞌe ca ca quea nee nee po mee cajeꞌyo ecuea esohui miquiaaya mi shajjaꞌajjajo —Jesosa poanaje. 
\s1 Jesosa Quitohua eseya jomishoca mee caje 
\r (Noca 10.21-22) 
\p  
\v 25 Jamaya dejja cuana tecuea majje Jesosa eseja Chii ai nijje miminaje jama baꞌa: —Ecuea Chii, miya eyajo Emeshi Mese nei poani. Ojjaña meshi cuana miquea poani peaꞌai. Eyaya miya bihuiaña. Eꞌe, beca cuana jjashahuabaquiani jama baꞌa: “Ecuea eba quea huiso esohui, quea huiso aquiana peaꞌai”. Jamajjeya miyaya oya cuana ba meesahua ajja. Jamajjeya oya cuanaja ba jjima eya Emeshi Mese oe nei poani. Pea cuana eshoꞌi cuana jama ca ca miyaya jjashahuabaqui meesahuaña quea jaꞌa nee eya Emeshi Mese nei poani. Jamajjeya eyaya miya bihuiaña.  
\v 26 Eꞌe ecue Chii, jamaya miyaya aña miquea ejjashahuabaquijji. Apoa —jamaya Jesosa miminaje eseja Chii ai nijje. 
\p  
\v 27 Majoya Jesosa jama poanaje baꞌa: —Eyacuiñajji ecue Chii e huoojeajji epo. Eya ojaya esohui huohuijji poani. Ecue Chiija eyajo anija ecuea ejjashahuabaquijji ojaya eba nei nei, ojaye nei. Ecue Chiija ejjashahuabaquijji ecuea eba nei nei peaꞌai, ecuee nei. Eyaya ecuea epeejji ba meesahuaña quea jaꞌa nee ecue Chiija ejjashahuabaquijji —Jesosa poanaje. 
\p  
\v 28 —¡Enijje jjapeequicue quea bei! Mique mimishi cuanajo miya quea yeno. Miquea echaco quea camajajo miya quea yeno poani peaꞌai. ¡Enijje jjapeequicue! Eyaya miya jomishoca meejeꞌyo camajaꞌama ebaꞌeꞌyojji.  
\v 29 Eyaya quiana ca ca oe miquianaya jama pojjeamaa jjejojo quea jea aña; tecueꞌama; quea bei peaꞌai. Ecuea epeejji po majje miquianaya quea bei poajeꞌyo. Baꞌe tiitii meejeꞌyo enijje eyajo peaꞌai. Jamajjeya ¡ecuea esohui jayojja jama acue! ¡Jjashajjaꞌajjaquicue quea jaꞌa nee ecuea esohuijo!  
\v 30 Camajaꞌama ecuea esohui jama ebaꞌeꞌyojji. Ecuea esohui aquiana pejapeja eꞌabojji jayojja poani —Jesosa poanaje. 
\c 12  
\s1 Esohui epojja ejomishocajjijo 
\r (Macoso 2.23-28; Noca 6.1-5) 
\p  
\v 1 Majoya epojja ejomishocajjijo Jesosa o shajjaꞌajjajji cuana nijje ejiojjijje poquinaje. Que yiyejje poquije quea shoe poanaje; quejo nequi anoso ai sejja canananaje eshe tii eꞌijjiajji, o shajjaꞌajjajjiya.  
\v 2 Maya Paniseo cuaa ba canaje. Jamajjeya Jesosa nijje mimijajinaje jama baꞌa: —¡Bacue oe! Mi shajjaꞌajjajji poani cuaa chaco cani. Anoso ai sejja cani epojja ejomishocajjijo. Moisesija etehueꞌyo jama poani baꞌa: “¡Aꞌa chacojji epojja ejomishocajjijo!” 
\p  
\v 3 Jesosaa oya cuana sajaꞌa canaje jama baꞌa: —¿Aꞌa miquea ba jjima esohui etehueꞌyo emeshi mese Dabija?  
\v 4 Yahuajo nei nei ojaya epeejji cuana quea shoe po majje ojee Eyacuiñajjija equi yasijje dobiquinananaje. Ijjia ca poa ejji ecabeje, maya Eyacuiñajji yasijje quia ca poa cuaa ojaya ebajji. Jiquio ca oe Eyacuiñajji nijje mimianiya caꞌijjia cahua; pea cuanaja eꞌijjiajji pojjeama.  
\v 5 ¿Aꞌa miquea ba jjima Moisesija esohui etehueꞌyo? Jama poa baꞌa: Ojjaña epojja ejomishocajjijo Eyacuiñajji nijje mimiani cuaa ca oe Eyacuiñajjija equijo cachaco cahua. Jamatii mimishiꞌama, mimijaji ajja, de; ojaya yajjijo cachaco cahua. 
\p  
\v 6 —Eꞌe, eyaya miya eꞌe jojo nei huohuiaña jama baꞌa: Moisesija esohui Eyacuiñajjija equijo quea jaꞌa pishana yahuajo nei poa. Ecuea esohui ca ca quea jaꞌa nee nee —Jesosaa acanaje—.  
\v 7 Eꞌe, miquianajaya Eyacuiñajjija esohui etehueꞌyo eba neineiꞌyo jojjemo dejja cuana mimishiꞌama jjaniñebaqui ajja pome. Jamaya quea tai. Yahuajo Eyacuiñajjija esohui etehueꞌyo jama poa baꞌa: 
\q1 “Huo cuana cuia cani. Cuia majje na sho cani e bihuiajji. Jamaya ecuea quea boti pishana. ¡Pea cuana oe baꞌe meecue tii quea bei! Jamaya ecuea quea boti nee nee”. 
\m Jamaya tehue ca poa yahuajo. 
\p  
\v 8 —Jamajjeya eya ojjañaja Edoe Mese Emeshi Mese nei poani. Eyaye nei huohuije epojja ejomishocajjijo; ¡quea pame nee nee acue! ¡Pea cuana quea jea nee acue! —Jesosa poanaje. 
\s1 Meshahuamaꞌyo epo jjameshahuanequi mee caꞌyonaje 
\r (Macoso 3.1-6; Noca 6.6-11) 
\p  
\v 9 Majoya Jesosa poquinaje pea huasijje. Equi ojee ejjachichaquijji yasijje dobiquinaje.  
\v 10 Jomajo dejja meshahuamaꞌyo epo aninaje. Jamajjeya Jesosa ba majje Paniseo cuana jama jjashahuabaquinaje baꞌa: —Eꞌe pojjaꞌa Jesosaa chaco caje epojja ejomishocajjijo; eꞌe pojjaꞌa emeꞌ jeapisa mee cajeꞌyo epojja ejomishocajjijo. Cabaꞌajja sahua —poanaje Paniseo. 
\p Jesosa nijje mimijaji sa poanaje. Jamajjeya oya huohuiꞌajja canaje Paniseo cuaa: —Jesosa, ¿aꞌa dejja quea mano jaa miyaya huaquia meeꞌyome epojja ejomishocajjijo? 
\p  
\v 11 —Epeejji cuana, eꞌe pojjaꞌa miquea ñajjajja jjani quea doe yasijje oquequije epojja ejomishocajjijo. ¿Aꞌa miyaya ñajjajja iña majje ma pojjajo jjequisohuajeꞌyo? Eꞌe, de.  
\v 12 ¡Bacue oe! —Jesosa poanaje—, dejja Eyacuiñajjija quea boti nee; ñajjajja ca ca quea boti pishana. Jamajjeya eꞌe, pea cuana caꞌa meesahuaꞌyahua epojja ejomishocajjijo. Jamaya Moisesija esohui etehueꞌyojo poani peaꞌai —Jesosa poanaje. 
\p  
\v 13 Ma mimi majje Jesosaa meshahuamaꞌyo epo jama acanaje baꞌa: —Epeejji, ¡miquea emeꞌ jeapisaꞌajjaꞌyo socue! 
\p Jamajjeya emeꞌ jeapiihui majje emeꞌ jeapisa caꞌyonaje; pea mijijje jayojjaya poꞌyonaje.  
\v 14 Majoya Paniseo cuana esecue yasijje cuayaqui majje ojee miminaje: —¿Yajja amajje Jesosa quecua caꞌyojji soꞌo, de? —jamaya poanaje Paniseo cuana. 
\s1 Jesosa Eyacuiñajjija echacojji ojaya yajjijo 
\p  
\v 15 Eꞌe, Paniseo cuaa oya quecuapana canaje. Ma shajjaꞌajja majje Jesosa poquinaje pea meshi yasijje. Quea huiso dejja cuana onijje poquinaje. Ojjaña cuana huaquia mee caꞌyonaje, jjaajaqui mee caꞌyonaje, Jesosaa.  
\v 16 Jama poanaje baꞌa: —Eꞌe, eyaya miya huaquia meeꞌyonaje. ¡Jamatii aꞌa jihuohuijji soꞌo! 
\p  
\v 17 Eꞌe, Jesosaa ojjaña cuana huaquia mee caꞌyonaje, sohuihuohui canaje peaꞌai. Jamaya Isaiaja esohui etehueꞌyo ojo yahuajo nei nei jayojja jama poa. Eyacuiñajjiya Isaia yahuajo nei nei tehue mee ca poa Jesosajo jama baꞌa: 
\q1  
\v 18 “¡Bacue! Jiquio dejja ecuea echacojji ecuea yajjijo. Eyaya oya huoojeajeꞌyo. Oya ecuea quea jea nee nee. Ojo eya quea bihui nee nee. Ecuea Edojjoshahua Pame o que eyaya huoojeajeꞌyo; ohuaya ojjaña Jodio pojjeama cuana huasijje huohui caje jama baꞌa: —¡Ojjaña cuana ecuea esohui eꞌe jojo neijo jjabahuejjaquiꞌyajo Eyacuiñajjiya quea boejea po mee cajeꞌyo!  
\v 19 Oya ecuea echacojji jjamimicuiajea nobiajeaqui ajja. Quea bei nee mimijeꞌyo. Ejiojjijje poquiani quea shajjaquijjo poꞌyo ajja.  
\v 20 Joya quea mimishi nee nee aje jja oe ohua mimishi cuana cuijea caꞌyajje quea boejea poajeꞌyo. Cuanaya jiquio ecua cuaquijiji quijjoꞌyo jjimahuajo esei sho oꞌoyaña jama jayojja ecuea epeejji quea mimishi po oꞌoya chanajo ohuaya quea jaꞌa nee nee po mee caje oꞌoya, de. Eꞌe, ohuaya ejo chaco tiitii cajeꞌyo; quea huiso nee nee baꞌe mee cajeꞌyo quea jaꞌa nee nee.  
\v 21 Jodio pojjeama quea huiso nee nee ojjaña meshijo baꞌe cuanaya eꞌe jojo nei onijje jjapeequijeꞌyo peaꞌai”. 
\m Jamaya Eyacuiñajjiya Isaia tehue mee ca poa yahuajo nei nei Jesosa Quitojo. 
\s1 Jesosa niñeba canaje cuaa 
\r (Macoso 3.20-30; Noca 11.14-23; 12.10) 
\p  
\v 22 Majoya Jesosa que jjequi canaje cuaa dejja niñepoqui. Oya cojjamaꞌ, mimiꞌajja peaꞌai. Jesosaa eshahua huoojeacuayajea caꞌyonaje. Jamajjeya oya quea cojja jaꞌa poanaje, emimijji peaꞌai.  
\v 23 Ba majje ojjaña cuana quea bihui nee poanaje. Jama acanaje baꞌa: —Eꞌe de, aꞌya shai de, ¿aꞌa pojjaꞌa Jesosa Eyacuiñajjija huoojeaꞌyo Quito? 
\p  
\v 24 Ma shajjaꞌajja majje Paniseo cuaa Jesosa niñeba canaje. Jama poanaje baꞌa: —Chojja, de. Jesosa aje oe eyamiquecua pojjaꞌa. Ohuaya aje jja oe eshahua cuana huoojeacuayajea canaje Edosiquiana etii nijjeya, Satanasa bajjani, pea bajjani Meesemo nijjeya —poso acanaje Paniseo cuaa. 
\p  
\v 25 Paniseo cuanaja ejjashahuabaquiꞌyojji quea tai Jesosaja eba poanaje. Jamajjeya oya cuana tecuea canaje jama baꞌa: —¡Shajjaꞌajjacue oe! Joya emeshi mese shajjaꞌajja sa po ajjajo ojee jjaquecuaqui majje jjaquecua iyaiyaquijeꞌyo; dejja cuana ma meshijo baꞌe chamaꞌyo tii poajeꞌyo. Cuiñajjijo baꞌe cuana jamaya po peaꞌaije, chamaꞌyo tii poaje emeshi meseje echacojji cuana. Huapa pojjeama cuana jjacuiaquiajo chamaꞌ epeejji cuana poajeꞌyo peaꞌai.  
\v 26 Jamaya peaꞌai Edosiquianaa, Satanasaa pea eshahua ehuoojeacuayaꞌyo jojjemo dejja huoojeaꞌyojji pojjeama poꞌyoqueaye —Jesosa poanaje.  
\v 27 —¿Aꞌa ya eya Edosiquiana nijjeya niñe, pea eshahua cuana peaꞌai huoojeacuayajeaña poso aña? Jamajjeya miquea epeejji cuanaa ¿ae nijje eshahua huoojeacuayajea cani? Eyacuiñajjiya asahua canijo. Jamajjeya ojaya eba miquianaya ejo siajje poani.  
\v 28 Eꞌe, Eyacuiñajji nijjeya eyaya eshahua huoojeacuayajeaꞌyaña. Jamajjeya bacue eya eꞌe jojo nei Eyacuiñajji, Emeshi Mese oe nei jjeya poani tii.  
\v 29 Cuanaya ¡bacue! ¿Aꞌa dejja quea caꞌa neeja equi yasijje dobiquiani oja aquiana siiya o jeyo jjima nequijo? Chojja. O jeyo majje ojaya aquiana cuana sii caje cuaa. Jiquio ecua eꞌaquiana mese ebionei jeyo cani jama amajje eyaya eshahua cuana jeacuayajeaña —Jesosa poanaje peaꞌai. 
\p  
\v 30 —Cuanaya ojjaña joya enijje jjapeequi ajja aje oe e quecuapanajji poani, ojjaña enijje chaco ajja ecuea epeejji pojjeama aje oe e ejeabichajeajji nisho poani —poanaje. 
\p  
\v 31 —Jamajjeya eyaya miya eꞌe jojo nei huohuiaña: Eyacuiñajjiya ojjaña mimishi cuana, siajjepojji cuana peaꞌai cuijea cajeꞌyo. Jamatii joya Edojjoshahua Pame niñeba cani tii ca ca Eyacuiñajjija maya emimishi cuijeaꞌyojji pojjeama tii tii.  
\v 32 Eꞌe —Jesosa poanaje—, eya niñeba cajo Eyacuiñajjiya ma mimishi cuijea cajeꞌyo. Joya Edojjoshahua Pame niñeba cani tii ca ca Eyacuiñajjija maya emimishi cuijeaꞌyojji pojjeama tii tii. Jjeya ecuijeaꞌyojji pojjeama; quijje ecuijeaꞌyojji pojjeama tii tii poajeꞌyo, eya ecue Chii nijje eyajo ojjaña huoojeaꞌyojji poaje —Jesosa poanaje. 
\s1 Dejja mimishi acui tai jjajja ajja jayojja 
\r (Noca 6.43-45) 
\p  
\v 33 Jesosaa Paniseo tecuea canaje peaꞌai jama baꞌa: —Acui quea pame jjajjani. Acui quea tai jjajja ajja, quea jjajja biso. Jamajjeya miyaya baña dejja mimishi acui tai jayojjaya; ohuaya quea tai acani. ¿Aꞌa miyaya eya baña quea pame nee? Jamajjeya eya quea pame acui quea pame jayojja.  
\v 34 Miquianaya aje oe peyo quea se nee nee jama, quea mase. Miquianaya quea tai poanijo quea pame mimi ajja. Eꞌe, quea jjashahuabaqui tai po tiitiianijo quea tai mimiani —Paniseo cuana acanaje Jesosaa—.  
\v 35 Eꞌe, joya quea jjashahuabaqui jaꞌa nee poanijo quea jaꞌa nee baꞌyani. Quea jjashahuabaqui taijo ca ca quea tai baꞌyani.  
\v 36 Jamajjeya eyaya miya huohuije e epoe oꞌoyajjijo ojjaña mimishi tecueaa, ojjaña joya jjaniñebaquiani, mimijajiani, siajje poani peaꞌai quea nee nee po tiitii meejeꞌyo.  
\v 37 Eꞌe, miquea esohui quea jaꞌa nee poanijo, Eyacuiñajjiya miya etecueajji pojjeama. Quea shoꞌi taijo ca mi ca Eyacuiñajjiya quea nee nee po tiitii mee cajeꞌyo —Jesosa poanaje. 
\s1 Paniseo cuana Jesosaa acani ba oꞌoya sa poanaje 
\r (Macoso 8.12; Noca 11.29-32) 
\p  
\v 38 Majoya beca Paniseo cuaa, Moisesija tehue huohuijjiya peaꞌai Jesosa huohui canaje jama baꞌa: —Esohui huohuijji Jesosa, ¡quea pame acue! ¡Ma dejjaa ajjima acani aꞌoꞌoyacue soꞌo, Eyacuiñajjiya miya huoojea canaje ecuanaja ebajji! —poanaje. 
\p  
\v 39 —Chojja. Miquianaaya Eyacuiñajjija esohui cajaa anaje. Jamajjeya miya peapea ba sa poani. Jamatii Eyacuiñajjiya yahuajo nei Jjonajo aca poa jayojja jama ohuaya jjeya acaje oꞌoya miquianaja ebajji.  
\v 40 Ma ecua yahuajo Eyacuiñajjija esohui huohuijji Jjona jai aiꞌaija seejo baꞌya poa pea beca peejjima cahuime jama jayojjaya aje eya ojjañaja Edoe Mese bajjani quijje pishana manoꞌyo majje mei jjanijo ehuananobia jaa shequije oꞌoya —Jesosa poanaje. 
\p  
\v 41 —Yahuajo nei nei dejja cuana Ninebejo baꞌeya Jjonaja esohui shajjaꞌajja majje mimishi cuana pajea caꞌya poa. Jjona quea caꞌa pishana poa; eya ca iña quea caꞌa nee nee. Jamatii miquianaya ecuea esohui shajjaꞌajja sa po ajja. Jamajjeya quijje eya poe oꞌoya majje mimishi cuana tecueajeaje. Ninebe dejja cuaa miya tecuea caje jama baꞌa: “Miquianaya ca ca oe quea mimishi nee nee poanaje”.  
\v 42 Jama peaꞌai poaje baꞌa: Yahuajo nei nei Sama mese epona quea huesha nee poeya poa Jodioja emeshi mese Sanomoja esohui shajjaꞌajjaa. Sanomo quea jjashahuabaqui jaꞌa pishana poa; eya ca quea jjashahuabaqui jaꞌa nee nee. Jamatii miquianaya ecuea esohui shajjaꞌajja sa poꞌyo ajja. Jamajjeya quijje eya poe oꞌoyaje mimishi cuana tecuejeaa, eeno poejjijje emeshi mese ponaa, Sama meseya jama miquianaya tecueame acaje peaꞌai baꞌa: “Miquianaya ca ca oe quea mimishi nee nee poanaje” acaje nequiana —Jesosa poanaje. 
\s1 Eshahua dejjaja yami yasijje poe oꞌoyanaje 
\r (Noca 11.24-26) 
\p  
\v 43 Jesosaa esohui ejjabahuejjaqui meejji huohui canaje peaꞌai jama baꞌa: —Eshahua dejjaja yamijo nequi cuayaquiꞌyo majje quea huesha poquinaje. Saꞌajja canaje pea huasijje enequijji. Jamatii baꞌyo jjima. Oya poꞌayequiequi tii.  
\v 44 Jamajjeya oya jjashahuabaquiani jama baꞌa: “Eya poquije oꞌoya huacuaya oyaꞌ dejja huasijjeya, ma e cuayaquinaje yasijjeya, ma ecuea equi jayojja huasijjeya”. Jamajjeya oyaꞌ dejja huasijje poe oꞌoya majje ba cañaquiꞌyani chamaꞌ enahuejji Eyacuiñajjija epeejji nei pojjeama jjejojo. Ojaya eyami equi ecuiashaba jayojja jama, ehuana bame bame jayojja, equi se ejjamaꞌ jayojja.  
\v 45 Jamajjeya oya poquije pea eshahua cuana saꞌajjaa. Ba caje quea huiso, me mijijje beca onijje enequijji. Oya cuana quea mase nee nee; pea quea mase pishana. Majoya ojjaña dobiquiajo ma dejja quea yeno nee nee poani. Yahuajo oe eshahua nequia huajo quea yeno pishana poanaje. 
\p Jamaya poanaje Jesosa shajjamaꞌ cuana nijje, oya cuana onijje jjapeequi sa po ajjajo. 
\p —Ma dejja jayojjaya miya poaje, quea mimishi nee nee tii tii poaje —Jesosa poanaje. 
\s1 Jesosaja huapa pojjeama poeyanaje 
\r (Macoso 3.31-35; Noca 8.19-21) 
\p  
\v 46 Jesosa mimianijo ojaya enaese, oja chahua cuana peaꞌai o que poeyanaje. Esecuejo nequinaje.  
\v 47 Majoya Jesosa huohui canaje cuaa: —Miquea enaese, mique chahua cuana esecuejo nequi. Minijje mimi sa poani. 
\p  
\v 48-49 Jesosaa sajaꞌa canaje: —¿Ache shai ecuea huapa pojjeama cuana? ¡Bacue! Jiquio ecuea shajjaꞌajjajji cuana ecuea huapa pojjeama cuana, ecuea quea jea nee nee ecuea ecue nae quea jea aña jayojja jama.  
\v 50 Eꞌe, ecue Chii eyajo ani; ojjaña jjashajjaꞌajjaquiani ojaya esohuijo ecuea huapa pojjeama, ecue chahua, ecue jjoꞌi, ecuea enaese peaꞌai —Jesosaa acanaje. 
\c 13  
\s1 Esoꞌ jeaajajji 
\r (Macoso 4.1-9; Noca 8.4-8) 
\p  
\v 1 Majoya Jesosa equijo ani cuayaquinaje. Bae sahua huasijje poqui majje anioquenaje.  
\v 2 Majoya o que jjachichaquinaje dejja cuana quea huiso nee nee. Jamajje bishe yasijje nequisohuaqui majje anioquenaje esohui huohuiya. Dejja cuana meshijajijo aninaje.  
\v 3 Bishe quecuayiyejea cajo, Jesosaa oya sohuihuohui canaje quea huiso nee nee. Pea esohui ona jjashahuabaquijji huohui canaje o ba meesahuajji. Jama acanaje baꞌa:  
\v 4 —Ebanajji cuana poquinaje banaa. Esoꞌ jeaaja canijo, oe pojji esoꞌ oquequinaje ejiojji yasijje. Poeyanaje cuichojji cuana; ijjia caꞌyonaje esoꞌ.  
\v 5 Pea esoꞌ oquequinaje mei biajje. Meshi chamajo esoꞌ pohuaꞌajjaꞌyonaje.  
\v 6 Quijje cuayanaje eshequi. Quiyoꞌyonaje, esajja jocaꞌyonaje, manoꞌyonaje.  
\v 7 Pea esoꞌ oquequinaje acuisha huasijje. Pohuaꞌyo majje jjonohua bebo caꞌyonaje. Tatajo nequi jjajja ajja poanaje. Manoꞌyonaje.  
\v 8 Pea esoꞌ oquequinaje meshi quea pame yasijje. Pohuaꞌyonaje esoꞌ cuana. Ejjajja quea pame nee nee poanaje. Oe esajo ejjajja iye huiso aninaje; pea esajo ejjajja quea huiso, pea esajo quea huiso nee nee aninaje. Sejja canaje quea huiso nee.  
\v 9 ¡Miya jjashajjaꞌajjaquicue! ¡Aꞌa shajjamaꞌ pojji! —Jesosa poanaje. 
\s1 Esohui eba meesahuajji Jesosaa sohuihuohui canaje ona jjashahabaqui meejji 
\r (Macoso 4.10-12; Noca 8.9-10) 
\p  
\v 10 Quijje o shajjaꞌajjajji cuana poeyanaje Jesosa que. Huohuiꞌajja canaje: —Jesosa, ¿apiojji miyaya esohui eba meesahuajji quea quehua huohuiaña jiquio dejja cuana huasijje? 
\p  
\v 11 Oya cuana sajaꞌa canaje Jesosaa: —Miya ca ca oe Eyacuiñajjiya ba meesahua cani eya ojjañaja Emeshi Mese nei poajeꞌyo. Yahuajo ba mee jjima poa. Pea cuana ca ca eba meesahuajji pojjeama.  
\v 12 Jamajjeya joya Eyacuiñajjija esohui ba cani quea huiso pishana quijje quea huiso ba mee cajeꞌyo. Joya ojaya esohui ba sa po ajjaa ca ca pajea cajeꞌyo.  
\v 13 Jamajjeya eyaya peapea esohui eba meesahuajji huohuinaje o ba meesahuajji. Jamatii ecuea esohui shajjaꞌajja majje oya cuana jjashahuabaqui ajja, de, shajjaꞌajja jjima jama acani, de.  
\v 14 Eꞌe, oya cuana quea sapa caꞌa nee poani. Jamajjeya Eyacuiñajjiya Isaia tehue mee ca poa yahuajo nei nei jama baꞌa: 
\q1 “Shajjaꞌajja huichaꞌa huichaꞌa majje jamatii jjashajjaꞌajjaqui ajja poaje. Eyacuiñajjiya acani ba huichaꞌa huichaꞌa majje jamatii jjashahuabaqui ajja poaje.  
\v 15 Quea sapa caꞌa nee nee poani, shajja dojjomaꞌ jama, cojjamaꞌ jama peaꞌai. Ecuea esohui eba jojjemo, eshajjaꞌajja jojjemo jjabahuejjaquiꞌyome. Peaꞌai enijje ejjapeequiꞌyo jjemo eyaya mimishi cuijeaꞌyome”. 
\m Jamaya yahuajo nei nei tehue ca poa etiiquiana Isaiaa —Jesosaa acanaje. 
\p  
\v 16 Jamajjeya Jesosaa o shajjaꞌajjajji cuana jama acanaje peaꞌai baꞌa: —Miquianaya ca ca quea cojja jaꞌa, quea shajja jaꞌa peaꞌai. ¡Jamajjeya quea bihui nee pocue!  
\v 17 Eꞌe jojo nei eyaya miya huohuiaña jama baꞌa: Quea huiso Eyacuiñajjija esohui huohuijji yahuajo, ojaya epeejji nei yahuajo baꞌe peaꞌai e ba sa neinei poa. Ecue huohui shajjaꞌajja sa neinei poa peaꞌai. Jamatii ojaya eya ba jjima poa. Ecue huohui shajjaꞌajja jjima peaꞌai poa. Eꞌe jojo nei eya Eyacuiñajjija huoojeaꞌyo ojjaña jaahuanajji. Ma ba sa poa Eyacuiñajjija esohui huohuijji yahuajo nei nei. 
\s1 Jesosaa esohui ebanajjijo ba mee canaje 
\r (Macoso 4.13-20; Noca 8.11-15) 
\p  
\v 18 Majoya ojjaña cuana acanaje Jesosaa: —Jamajjeya eyaya miquianaya ba meesahuaje ecuea esohui ebanajjijo.  
\v 19 Maya: Beca cuana ejiojji yasijje oquequi esoꞌ cuana cuichojjiya ijjiajeyo caꞌyonaje. Jamaya beca cuana ecuea esohui eya ojjañaja Emeshi Mese oe nei poaje shajjaꞌajja majje jamatii jjashahuabaqui ajja. Jamajjeya Edosiquiaa o que poe majje ecuea esohui pajea mee cani.  
\v 20 Beca cuana esoꞌ mei biajje oquequinaje jayojja jama ecuea esohui shajjaꞌajja majje quea bihui nee enijje jjapeecuajiꞌajjaquiani. Jamatii ecuea esohui jayojja jama baꞌe tiitii ajja.  
\v 21 Esoꞌ mei biajje pohua esajja jocaꞌyajo manoꞌyani jayojja jama poani; pea cuaa oya napa cajje Eyacuiñajji nijje jjapeequipajeani.  
\v 22 Beca cuana esoꞌ acuisha nijje pohuani jama poani. Acuishaa bebo cajje jjajja ajja jayojja jamaya ecuea esohui shajjaꞌajja majje jjapee nishoquiani. Jamatii oya cuana quea bejjo nahue poanijo, aquianajo quea huiso jjashahuabaquianijo, quea mete peaꞌai poanijo Eyacuiñajjijo chaco ajja.  
\v 23 Esoꞌ meshi quea pame neejo pohua majje quea jjajja huiso poanaje jayojja jama beca cuana; ecuea esohui shajjaꞌajja majje jjabahuejjaquiani; ecuea epeejji quea jaꞌa nee nee poani, pea cuana ejo jjabahuejjaqui meesahua cani iye huiso pojjaꞌa, quea huiso pojjaꞌa, quea huiso nee nee pojjaꞌa —Jesosaa mahuisoya oya cuana acanaje. 
\s1 Esohui acuisha cuanajo 
\p  
\v 24 Majoya Jesosaa oya cuana huohui canaje pea esohui eba meesahuajji. Jama poanaje baꞌa: —Eyacuiñajjija esohui ejo ebanajjiya esoꞌ bana canaje jama. Esoꞌ ache bame nei quecua canaje quejo, anoso.  
\v 25 Majoya ojjaña echacojji cuana ecahuijaajo, dejja quea mimishi, o jeabichajeajji epo poeyanaje. Sipone soꞌ quea huiso quehuajje nei jeaajaqui canaje quejo.  
\v 26 Anoso pohuaꞌyo majje jjajjanaje. Sipone pohuanaje anoso tejjee, jjajjanaje peaꞌai.  
\v 27 Quijje pishana eque meseja echacojji cuana o que poeyanaje. Jama poanaje baꞌa: “Emeshi mese, ¿aꞌa miquea anoso sipone tejjee quecua pojjeama poanaje?” huohuiꞌajja canaje. 
\p  
\v 28 —Echacojji meseya sajaꞌa canaje: “Eꞌe, quea pame poanaje. Dejja quea mimishiya quehuajje jeaajaqui canaje sipone soꞌ ecuea quejo, de” poanaje. 
\p —Echacojji cuaa huohuiꞌajja canaje: “¿Aꞌa sipone chiyojeajeꞌyo?” 
\p  
\v 29 —“Chojja” poanaje eque mese. “Anosoya miyaya chiyojea chanaꞌ. Jamatii.  
\v 30 Ojee sipone nijje catiiquiahua. Eꞌe, majoya anoso jahuajo eyaya huoojeaje anoso sejjaꞌyojji cuana anoso sejjaa. Sejjajeyo majje anoso chichaje. Ecuea equi yasijje iyanobiaje anoso, ecuea ejaahuanajji. Sipone ca oe caquiyojeaquiꞌyahua pasiꞌyo majje” poanaje eque mese. 
\p —Eꞌe, jiquio eque meseya sipone dahuajea cani jama dejja mimishi Eyacuiñajjiya acajeꞌyo. Anoso sejjajeyo majje equijo huana cani jamaya ecuea epeejji ajeꞌyo —Jesosa poanaje. 
\s1 Esohui acui soꞌ che biso nei neijo motasa bajjanijo 
\r (Macoso 4.30-32; Noca 13.18-19) 
\p  
\v 31 Majoya Jesosaa pea esohui eba meesahuajji huohui canaje jama baꞌa: —Eyacuiñajjija ehuohui ojaya epeejji cuanajo jama peaꞌai baꞌa: Pea esoꞌ motasa che biso nei esoꞌ bana cani equi quibojo.  
\v 32 Jiquio esoꞌ che biso nei nei; tii majjeya quea cui quemo nee poaje apoꞌe cui quemajja. Jamajjeya cuichojji cuana poeyani motasa acui biajje cahuiya —jamaya Jesosaa huohui canaje ojjaña ba meejji quijje Eyacuiñajjija epeejji cuana quea huiso nee, quea caꞌa nee poajeꞌyo. 
\s1 Esohui eba meesahuajji eshejjee meejjijo 
\r (Noca 13.20-21) 
\p  
\v 33 Pea esohui eba meesahuajji huohui canaje Jesosaa jama baꞌa: —Eponaa pahui dahuajjiya quea huiso nee pohuipohui tejjee oe pojji nei nei eshejjee meejji iñahuahuo neinei cani, ojjaña eshejjee meejji. Jiquio eshejjee meejjiya ojjaña pohuipohui shejjee mee cani jamaya poaje ecuea epeejji cuana. Jama baꞌa: Jjeya beca cuana jjashajjaꞌajjaquiani. Majoya aje quea huiso nee ojjaña pojjaꞌa jjashajjaꞌajjaqui mee cajeꞌyo Eyacuiñajjijo —Jesosa poanaje. 
\s1 Esohui eba meeꞌyojji 
\r (Macoso 4.33-34) 
\p  
\v 34 Eꞌe, jiquio esohui ehuohuiꞌyo cuana Jesosaa ma bishejo nequiya huohui canaje. Esohui eba meesahuajjijo ca ca oe huohui canaje.  
\v 35 Jamaya poanijo ohuaya Eyacuiñajjija esohui huohuijjija esohui yahuajo nei nei jama acanaje. Jamaya aje yahuajo nei nei Eyacuiñajjiya ojaya esohui huohuijji huohui mee ca poa Jesosajo baꞌa: 
\q1 “Eyaya aje jja esohui huohuije esohui eba meejji. Yahuajo jiquio meshi panajeyo majje ecuea dejja cuana ba meesahua jjima poanaje ecuea ejjashahuabaquiꞌyojji. Jjeyahua ca ca ecuea ejjashahuabaquiꞌyojji ba meejeꞌyo, eyaya”. 
\s1 Ehuohuiꞌyo siponejo ba mee canaje Jesosaa 
\p  
\v 36 Majoya Jesosaa —Poquia iña —acanaje dejja cuana. Bishejo ani cuayaquiꞌyo majje poquinaje equi yasijje. Dobiqui majje o shajjaꞌajjajji cuana o que poeyanaje. Huohuiꞌajja canaje: —Jesosa, ¡ba meesahuacue ehuohuiꞌyo siponejo! Maya ecuanaja quea quehua. 
\p  
\v 37 Jamajjeya Jesosaa oya cuana huohui canaje: —Eꞌe, eya ojjañaja Edoe Mese anoso banajji nei nei jama.  
\v 38 Que quea pame jayojja ojjaña dejja ojjaña meshijo baꞌe cuana. Esoꞌ quea pame nee Eyacuiñajjija epeejji nei jayojja jama. Sipone soꞌ quea tai jayojja eshahuaja epeejji cuana.  
\v 39 Joya dejja sipone soꞌ jeaajajji epo jayojja jama dejja mimishi, e cuiajji nisho epo, Edosiquiana, de, Satanasa. Jiquio ecua epojja anoso jahuajo sejjajeyo caꞌyonaje jama meshi oe poaje. Joya anoso sejjaꞌyojji ca ca Eyacuiñajjija esohuidojojji cuana jama.  
\v 40 Jamajjeya jiquio ecua sipone pasiꞌyo majje dahuajea canaje jayojja jamaya poaje dejja mimishi meshi oe poajo. 
\p  
\v 41 —Eꞌe, eyaya ojjañaja Edoe Meseya esohuidojojji cuana huoojeaje dejja mimishi cuana iñaa, ona mimishi po meejji poani peaꞌai iñaa.  
\v 42 Iña majje jeajea cajeꞌyo cuaqui quea quiyo nee nee yasijje. Jomajo pa neineijeꞌyo; eseꞌ ijjiayaijea cajeꞌyo cuaqui quea quiyo nee neejo.  
\v 43 Ecuea epeejji ca ca ecuea esohui jama acanijo baꞌe tiitiijeꞌyo eyajo eseja Chii nijje quea jaꞌa nee nee, eshequi jaꞌajja, de —Jesosa poanaje. 
\s1 Aquiana quea nahue ehuanaquehuaꞌyo 
\p  
\v 44 Majoya Jesosaa huohui canaje pea esohui eba meesahuajji jama baꞌa: —Eyacuiñajjija esohui cuana ojaya epeejji cuanajo jama peaꞌai baꞌa: Quejo aquiana pame quea nahue nee nee ba majje dejja jjataqui canaje jomajo tii. Majoya oya quea bihui nee poquinaje. Ojjaña ojaya aquiana cuana dojo canaje; quia canaje que sosejje. Jiquio ecua aquiana quea nahue nee nee jjeshe canaje jama jayojja dejja Eyacuiñajji nijje jjapeequiani —Jesosa poanaje. 
\s1 Pea esohui aquiana quea nahue nee neejo 
\p  
\v 45 —Eyacuiñajjija esohui ojaya epeejji cuanajo jama peaꞌai baꞌa: Dejja aquiana nahuejjiya saꞌajja tiitii canaje mei sisi siyosiyo copocopo quea nahue nee.  
\v 46 Oe mei sisi siyosiyo copocopo quea nahue nee nee ba majje ojjaña ojaya aquiana quiaa dojo canaje mei siyosiyo quea pame nee nee jjeshejji. Eya ca ca iña mei quea nahue nee nee quea pame nee nee jama, ojjaña jaahuanajji —Jesosa poanaje. 
\s1 Esohui nahuoo cuiashajajjijo 
\p  
\v 47 —Eꞌe jojo nei pea baꞌeme epojji jamaya peaꞌai baꞌa: Nahuoo cuiashajajji jea cani cuaa bae yasijje. Nahuoo cuiashaja cajje dobiquiani. Peapea nahuoo cuiashaja cani.  
\v 48 Quea huiso yanijo nahuoo cuiashajajji cuaa meshijaji sahua huasijje jjequisohua cani. Majoya pejo majje nahuoo cuana ba cani. Ojjaña nahuoo quea pame nee bio cani jjepai yasijje; peajja ijjia ca ajja jojoya ca ca jeajea cani.  
\v 49 Jamaya poaje e poe oꞌoyajo. Esohuidojojji cuana poeje; Eyacuiñajjija epeejji cuana ojjaña quea pame baꞌe chicha cajeꞌyo. Dejja mimishi cuana ca ca jeajea cajeꞌyo cajaajojo.  
\v 50 Cuaqui quea quiyo nee nee yasijje dobiquijeꞌyo tii tii. Jomajo siasiaꞌyoquije tii; eseꞌ ijjiayaijea cajeꞌyo quea nee poanijo —Jesosa poanaje. 
\s1 Esohui eyacua 
\p  
\v 51 Majoya Jesosaa oya cuana huohuiꞌajja canaje: —¿Aꞌa ecuea esohui quea jaꞌa nee? ¿Aꞌa jjabahuejjaquinaje? 
\p —Eꞌe, quea jaꞌa nee. 
\p  
\v 52 Jamajjeya Jesosaa o shajjaꞌajjajji cuana acanaje: —Eꞌaquiana meseya ojaya aquiana cuana etii, aquiana eyacua peaꞌai ojjaña cuana huohuiꞌajja cani. Jiquio ecua pea huohuiꞌajja pea huohuiꞌajja acani jayojja jama esohui huohuijji poani, jjabahuejjaqui majje, Jodio esohui huohuijjiya Eyacuiñajjija esohui yahuajo etehueꞌyo, ecuea esohui eyacua peaꞌai pea cuana ba meesahua cani —poanaje. 
\s1 Jesosa Nasanena meshi yasijje poquinaje 
\r (Macoso 6.1-6; Noca 4.16-30) 
\p  
\v 53 Majoya esohui huohuipajea majje Jesosa jomajo ani poqui oꞌoyanaje ojaya cuiñajji yasijje, Nasanena huasijje.  
\v 54 Jodioja equi ojee ejjachichaquijji yasijje dobiquinaje. Esohui huohui canaje. Ojaya esohui shajjaꞌajja majje Nasanenajo baꞌeca cuana quea tecue poanaje. Oya Jesosa Joseja jea poso acanaje cuaa: —¿Yajjajje shai jiquio dejjaa Jesosaa esohui quea jaꞌa nee nee huohui cani, de? ¿Eyacuiñajji jayojjaya jjaajaqui mee cani emanojaa quea huiso nee, de?  
\v 55 Oya aje oe acui cacajji nei neija bacua ejja pojjaꞌa, oja nae Mania bajjani, oja chahua cuana Jacobo, Jose, Simohui, Jonasa peaꞌai bajjani.  
\v 56 Oja jjoꞌi cuana peaꞌai jiquiojo baꞌe, de. Jamajje ¿achejo joya Jesosaa ojjaña jiquio esohui ba canaje soꞌo? —jamajjeya quea quene poanaje Jesosa nijje. Joseja jea poso cajaa acanaje. 
\p  
\v 57 Jamajjeya Jesosaa oya cuana jama acanaje baꞌa: —Eꞌe de, pea cuaa Eyacuiñajjija esohui huohuijji shajjaꞌajja cani. Jamatii oja meshijo baꞌe cuana ojaya huapa pojjeama cuana ca ca oe jjashajjaꞌajjaqui sa poꞌyo ajja. 
\p  
\v 58 Jamajjeya oya cuana jjashajjaꞌajjaqui sa po ajja. Jesosa Eyacuiñajjija bacua pojjeama posojo, ohuaya emanojaa cuana oe pojji jjaajaqui mee caꞌyonaje, ma dejjaa ajjima acani oe pojji nei acanaje Nasanenajo, Jesosaa. 
\c 14  
\s1 Enodeya Huani sapa jajasejjajea mee canaje 
\r (Macoso 6.14-29; Noca 9.7-9) 
\p  
\v 1-2 Jesosa Janinea meshijo anijo, Janinea meshi mese Enode bajjaniya shajjaꞌajja canaje onaja ehuohuiꞌyo Jesosajo. Ma Enode pea emeshi mese, Enode peaꞌai bajjani. Oya emeshi mese Enodeja bacua ejja; oya Enode Antipa bajjani peaꞌai poanaje. Shajjaꞌajja majje ma Enodeya Huani shequi oꞌoya posoya acanaje: —Eꞌe de, jiquio dejja aje oe Huani, ma ona besameejji poa. Eꞌe pojjaꞌa oya manoꞌyo majje shequi oꞌoyanaje. Jamajjeya ohuaya Eyacuiñajjiya jayojjaya acani —jamaya ohuaya ojo chacochacoani acanaje. 
\p Yahuajo nei Jesosajo shajjaꞌajja jjimahuajo ma Enodeya Huani sapa jajasejjajea mee canaje.  
\v 3 Eꞌe, yahuajo ma emeshi mese Enodeja edoe mese Penipeja ehuanase Enodiasi bajjani Huani nijje quea quene poa. Jamajjeya ma Enodeya Huani iña mee canaje; jeanobiajea mee canaje.  
\v 4 Eꞌe, Huaniya yahuajo ma Enode jama tecueame aca poa baꞌa: —¡Miyaya aje oe mique doeja Penipeja ehuanase Enodiasi aꞌa huanaꞌyojji! Jamaya pojjeama Jodioja etehueꞌyo; quea mimishi. 
\p  
\v 5 Jamajjeya ohua tecuea cajje quenequenenaje Huani nijje. Quecua sa aca poa. Jamatii quecua jjima; quea mete poanaje pea Jodio cuanajo. Eꞌe, quea huiso Jodio cuana jjashahuabaquinaje Huani Eyacuiñajjija esohui huohuijji nei nei poanaje.  
\v 6 Jamatii ma Enodeya o cuaya poa pojjajo ojjaña ojaya epeejji cuana iyaa canaje ojee ijjiaꞌijjiaa, majamajaqui baa peaꞌai. Enodiasija bacuase peaꞌai oe nei majamaja nequinaje ojjañaja ebajji, quea bihui nee epo meejji. Enode Antipa quea bihui nee nee poanaje epona shoꞌijo.  
\v 7 Jamajjeya onijje miminaje jama baꞌa: —¿Ae shai sa poani miya? ¡Huohuicue mo! Eyaya miya quiaje. Eꞌe jojo nei nei she, coya miya sañaya aje mi quiaje —acanaje Enodeya. 
\p  
\v 8 Jamajjeya epona shoꞌi poquinaje ojaya enaese Enodiasi huohuiya. 
\p —Eꞌe —oja nae poanaje—, eꞌe ¡Huani sapa jajasejjajea meequicue, she! 
\p Epona shoꞌi poe oꞌoyanaje Enode que. Huohui canaje jama baꞌa: —Huani, ma ona besameejji poani ejeanobia jaa. ¡Ojaya esapa jajasejjajeaꞌyo majje piatojo jjequicue jjeyahua nei! Maya eya sa poani. 
\p  
\v 9 Shajjaꞌajja majje emeshi mese Enode quea ajjajja nee nee poanaje. Jamatii ojaya esohui epona shoꞌi nijje ojjaña ojaya epeejji cuanaa shajjaꞌajja canaje. Jamajjeya ojaya esohui pajea ajja, Enodeja. Jamajjeya ohuaya sohuinano cuana huoojea canaje: —¡Epona shoꞌija esohui jayojja jama acue!  
\v 10 ¡Huani ma ejeanobia jaa oe sapa jajasejjajeaquicue! —poanaje. 
\p  
\v 11 Jjeya nei sohuinano cuana poquinaje Huani que. Huani sapa jajasejjajea caꞌyonaje. Esapa jjequi canaje piatojo. Epona shoꞌi quia canaje. Majoya ohuaya Huanija esapa oja nae yasijje quia cañaquiꞌyonaje, epona shoꞌiya. 
\p  
\v 12 Majoya Huani shajjaꞌajjajji cuana poeꞌyonaje o dojoꞌyohua emojeaꞌyojji. Mojeaꞌyo majje papoquiꞌyonaje Jesosa huohuiya. 
\s1 Jesosaa 5.000 dejja cuana bobia canaje 
\r (Macoso 6.30-44; Noca 9.10-17; Huani 6.1-14) 
\p  
\v 13 Jesosa Huani emanoꞌyo shajjaꞌajja majje o shajjaꞌajjajji cuana nijje sohuaquinaje bishe aijo quima huasijje. 
\p Jamatii ma ba majje quea huiso dejja cuana cuiñajji cuanajo baꞌe ejiojjijje poquinaje Jesosa baa. Poquicuajinaje ma Jesosa besapoquije yasijje. Onaya jjaja ebionei aniñaquinaje Jesosa hui que añaquiya.  
\v 14 Quijje pishana Jesosa o shajjaꞌajjajji cuana nijje baꞌeñaquinaje. Bishe aijo ani nequisohuaquinaje etaja huasijje. Quea huiso nee nee dejja cuana ba cañaquinaje. Onajo quea yeno jjashahuabaquinaje, quea huiso emanojaajo, quea nee jaajo peaꞌai. Jamajjeya ojjaña huaquia mee caꞌyonaje, jjaajaqui mee caꞌyonaje, Jesosaa. 
\p  
\v 15 Siniajo Jesosa que poe majje o shajjaꞌajjajji cuaa huohui canaje jama baꞌa: —Jesosa, sinia coma, de. Jiquiojo chamaꞌ equi, chamaꞌ bobi peaꞌai. ¡Dejja cuana huoojeacue cuiñajji sisi cuana huasijje oja bobi jjesheya! 
\p  
\v 16 —Chojja. Caꞌaniahua cuana. ¡Bobiacue oe miquiaaya! —Jesosaa acanaje. 
\p  
\v 17 —¿Yajja yajji? Oya cuana quea huiso nee nee aña ebobiajji. Ecuanaja bobi oe pojji yani. Me oejje pahui, beca nahuoo sisi peaꞌai yani —poanaje cuana. 
\p  
\v 18 —¡Comaya jjajja oe yacua yecue! —Jesosa poanaje—.  
\v 19 Ojjaña cuana jama acue peaꞌai baꞌa: “¡Ojjaña anioquecue sipone biajje!” acue. 
\p Anioque mee canaje sipone biajje. Majoya pahui me oejje huiso, nahuoo sisi becanejjijji peaꞌai jjeshe majje Jesosaa eyahuasijje jjabajeasohuaquinaje. Eyacuiñajji bihuia canaje. Eyacuiñajji nijje bobijo mimi majje pahui miji canaje, nahuoo sisi peaꞌai. O shajjaꞌajjajji que quia canaje, Jesosaa. Majoya ohuaya bobi quia canaje dejja cuana huasijje. Quia ca poquije quea huiso nee nee jjapanaqui poquipoquinaje bobi, de.  
\v 20 Ojjaña jejje majje eshajjaꞌajjajji cuaa chicha caꞌyonaje bobi ojjañaja ijjiasejja. Jjepai ai yasijje iya caꞌyonaje. Quea huiso nee poanaje; 12 jjepai huisome bobi eꞌijjiasejjaja ecuatajea poanaje.  
\v 21 Quea huiso nee nee bobi ijjia mee canaje, de, 5.000 dejja. Epona cuana, eshoꞌi cuana peaꞌaiya quea huiso nee nee ijjia canaje. 
\s1 Jesosa bae ena biajje poquinaje 
\r (Macoso 6.45-52; Huani 6.16-21) 
\p  
\v 22 Majoya siniajo Jesosaa o shajjaꞌajjajji cuana huoojea canaje. Jama acanaje baꞌa: —¡Bishe ai yasijje nequisohuaquicue! ¡Bae ojje miji yasijje besapoquicue! Quijje eya poquije mi que pea dejja cuana quea huiso nee nee cuana huoojeaꞌyo majje —poanaje. 
\p  
\v 23 Majoya dejja cuana quea huiso cuana huoojeaꞌyo majje eyiyo huasijje jaasohuaquinaje oe nei oja Chii nijje mimiya. Mecajje Jesosa oe nei aninaje eyiyojo.  
\v 24 Jesosa eyiyojo anijo o shajjaꞌajjajji cuaa bishe ai quea huesha nee dojo canaje. Bae yiyesamajo o epojo beni quea quemo poeyanaje. Enashajohua bishe ai janobajjima nei nane canaje, cuio canaje enaa.  
\v 25 Mecashono Jesosa eyiyojo ani o que poquinaje ena biajje.  
\v 26 O shajjaꞌajjajji cuaa Jesosa quea huesha pishana ena biajje jeojeojebeje ba majje quea ajjajja nee nee poanaje. Quea metejo taaanaje; jama poanaje baꞌa: —¡Coya ae shai poeje baꞌa! —siasianaje—. ¡Coya eshahua, de! 
\p  
\v 27 Jamajjeya Jesosa onijje miminaje. Jama poanaje baꞌa: —¡Aꞌa quea mete pojji! Eya jja iña iquio, eshahua pojjeama. ¡Quea jaji nee pocue! 
\p  
\v 28 Jamajjeya Penohua jama huohuime acanaje baꞌa: —Ecuea Emeshi mese, miya enequiya jjejojoya, ¡eya mi que poqui meecue ena biajje! 
\p  
\v 29 —Eꞌe Peno, ¡poecue! —oya acanaje Jesosaa. 
\p Jamajjeya Peno bishe aijo ani nequioquequinaje. Ena biajje Jesosa que poquinaje.  
\v 30 Jamatii poqui pishana majje beni tii tii, enashajo quea quemo nee nee ba majje metenaje, de. Mete majje jaadobiꞌajjaquinaje Peno. Taaanaje: —Jesosa, ¡eya huiꞌijeꞌyo! ¡Iñacue mo, oe! —poanaje. 
\p  
\v 31 Jesosaa meꞌ iñacuaji canaje. Peno jama acanaje baꞌa: —¿Apiojji acuae mi meteani soꞌo? ¿Aꞌa eya quea caꞌa nee nee miquea ba jjima? 
\p  
\v 32 Majoya Jesosa Peno nijje bishe ai yasijje anisohuaquiꞌyajo beni nequioquequinaje.  
\v 33 Jamajjeya ojjaña cuana bishe aijo aniya Jesosa bihuia canaje. Jama poanaje baꞌa: —¡Eꞌe jojo nei miya Eyacuiñajjija Bacua Ejja oe nei! 
\s1 Cuichi cuana huiꞌi ca ya poa meshi yasijje Jenesaneꞌ meshi yasijje besapoqui oꞌoyanaje 
\r (Macoso 6.53-56) 
\p  
\v 34 Majoya bae ai ojje miji yasijje Jenesaneꞌ meshi yasijje besapoqui oꞌoyanaje Jesosa. Baꞌeñaquinaje.  
\v 35 Dejja cuanaja jomajo baꞌeja Jesosa eba poanaje yahuajo. Jamajjeya oya ba oꞌoya majje ojjaña cuana iyaa meequi canaje Jesosa que. Jamajjeya ojjaña emanojaaca cuana Jesosa que ye canaje.  
\v 36 Jama huohuiꞌajjame acanaje cuaa baꞌa: —Jesosa, ¡ojjaña emanojaaca cuana che mique daqui iñaꞌajja meecue ehuaquiaꞌyojji! —acanaje. 
\p Ojjaña oja daqui cuema iñaꞌajja majje jjaajacuajiquiꞌyonaje, huaquiaꞌyonaje peaꞌai, de. 
\c 15  
\s1 Dejja quea jjashahuabaqui tai po majje quea tai poani 
\r (Macoso 7.1-23) 
\p  
\v 1 Majoya Paniseo cuana Jodio esohui huohuijji cuana peaꞌai Jenosanenajo baꞌe Jesosa que poeyanaje. Oya huohuiꞌajja canaje: —Esohui huohuijji, ¿apiojji acuae mi mi shajjaꞌajjajji cuana etiiquianaja ehuohuiꞌyo jama po ajja?  
\v 2 Eꞌe, ijjiaꞌijjia jjimahuajo emeꞌ topo neinei ajja, de. 
\p  
\v 3 Jesosaa sajaꞌa canaje jama baꞌa: —Miquianaya acuae ¿ae poani peaꞌai? ¿Apiojji acuae miquianaaya Eyacuiñajjija esohui pajeaꞌyaña etiiquianaja ehuohuiꞌyo yajji nisho?  
\v 4 Eꞌe, Eyacuiñajjija esohui jama poani baꞌa: “¡Mique chii, miquea enaese etii peaꞌai jaahuanacue! ¡Joya oja chii, oja nae peaꞌai cajaa acajo cajajahuejjajea caꞌyahua cuaa, meiya!”  
\v 5 Miyaya ca ca jama huohui taime yaña baꞌa: “Dejja oja chii etii nijje, oja nae etii nijje pojjaꞌa mimije jama baꞌa: “Eyaya miya ebaꞌe meesahuajji pojjeama. Chojja, eyaya ecuea aquiana Eyacuiñajji yasijje quiaña o bihuiajji”.  
\v 6 Jamajjeya oja chii etii, ojaya enaese etii peaꞌai pajea meeaña. Peaꞌai Eyacuiñajjija esohui pajea meeꞌyo sa aña etiiquianaja ehuohuiꞌyo yajji nisho.  
\v 7 ¡Miya ca mi ca oe jjadasiaquijji nei nei! Eyacuiñajjija esohui huohuijji Isaiaja esohui mijo eꞌe jojo nei yahuajo nei poa. Eꞌe, yahuajo nei Eyacuiñajjiya Isaia tehue mee ca poa jama baꞌa: 
\q1  
\v 8 “Jiquio dejja cuanaa eya bihuia nisho cani. Jamatii jjashajjaꞌajjaqui ajja. 
\q1  
\v 9 Jamajjeya ecuea equi yasijje jjachichaquiani ejjachichajeaquijji. Ohuaya ojaya ejjashahuabaquiꞌyojji huohui cani, ecuea esohui pojjeama”. 
\m Jamaya Isaiaa yahuajo nei tehue ca poa miquianajo —Jesosa poanaje. 
\p  
\v 10 Jamajjeya Jesosaa pea cuana huasijje jama huohuime acanaje baꞌa: —¡Shajjaꞌajjacue, jjabahuejja neineiquicue oe!  
\v 11 Bobi cuana, ojjaña aquiana enabajje dobiquianijo pojjeama miquianaya quea mimishi poani. Chojja. Quea jjashahuabaqui tai po majje esohui quea tai enabajje cuayaquianijo ca ca quea mimishi poani. Eyacuiñajjiya miquianaya ba cani quea mimishi —Jesosaa acanaje. 
\p  
\v 12 Quijje o shajjaꞌajjajji cuaa Jesosa huohui canaje jama baꞌa: —Jesosa, miquea esohuijo Paniseo cuana quea quene poani minijje —poanaje. 
\p  
\v 13 Jesosaa oya cuana sajaꞌa canaje jama baꞌa: —Ojjaña acui ecue Chiija eyajo anija bana pojjeama ohuaya chiyojea cajeꞌyo jiquio ecua ohuaya ojaya epeejji nisho acajeꞌyo jama.  
\v 14 Jamajjeya ¡aꞌa Paniseo cuanajo quea mete pojji! Oya cuaa aje oe esohui huohui cani quea tai, quea jaꞌa pojjeama. Cojjamaꞌ jayojja jama poani, de. Cojjamaa pea cojjamaꞌ mepejjejea cani jayojja o peaꞌai oquejeaquijeꞌyo jjani yasijje. Cojjamaꞌ jayojja dejja mimishi pea dejja mimishiya dojo cajje cuaqui yasijje poquijeꞌyo onijje tii —jamaya Jesosaa acanaje. 
\p  
\v 15 Penohua Jesosa huohuiꞌajja canaje: —Jesosa, ecuanajaya ca ca esohui quea quehua miquea. ¡Ba meesahuacue mo! 
\p  
\v 16 —¿Aꞌa ecuea esohui miquianajaya ba jjima peaꞌai? —Jesosa poanaje—. ¿Aꞌa miquea eba pojjeama?  
\v 17 Ojjaña bobi, pea aquiana peaꞌai enabajje ijjiajea see ai yasijje dobiquiani. Quijje jamatii seejea cajeꞌyo.  
\v 18 Joya quea tai jjashahuabaquianiya ca ca esohui tai jeacuaya cani. Maaya oya quea tai po mee caꞌyani; quea mimishi Eyacuiñajjiya oya ba cani.  
\v 19 Eꞌe, jjashahuaba taiqui majje pea quecua cani, onaja eponajo baꞌe sa poani, peaja yahuejo baꞌe sa poani, quehuajje cojjo cani, sii cani, siajje poani, mimijajiani peaꞌai.  
\v 20 Eꞌe, joya jama acanijo Eyacuiñajjiya ba cani quea mimishi; bobi ijjia cani emeꞌ shacua neinei jjimajo pojjeama quea mimishi poani. 
\s1 Cananea epona Jesosa que poeyanaje 
\r (Macoso 7.24-30) 
\p  
\v 21 Majoya Jesosa Jenesaneꞌ meshijo ani poquinaje Sinono meshi yasijje, Tino meshi yasijje peaꞌai.  
\v 22 Jomajo poquiani oe Cananea epona ma meshijo baꞌe o que poeyanaje. Oya Jodio pojjeama. Jamatii ejiojjijje poquije taaa majamaja poquinaje: —Emeshi Mese nei, Dabija osecua, ¡ejo jjashahuabaquicue! Ecue bacua piona quea sapa niñe jaa. Quea nee nee poani, quea mano. 
\p  
\v 23 Jamatii Jesosaja oya sajaꞌa jjima. Jamajjeya ojaya eshajjaꞌajjajji cuana Jesosa nijje miminaje: —Jesosa, ¡epona huoojeacue! Joya ese nijje taaajebeje. 
\p  
\v 24 Jamajjeya oya cuana sajaꞌa canaje Jesosaa: —Oya Jodio pojjeama. Eyacuiñajjiya eya huoojea canaje Jodio cuana saꞌajjaꞌyohua. Oya cuana ñajjajja ecuaquishoꞌyo jayojja jama poquiquehuani Eyacuiñajjijo. 
\p  
\v 25 Jamatii epona Jesosa que poe majje ecuiꞌoshajjajo nequiñanaje; jama poanaje baꞌa: —Emeshi Mese nei, ¡ecuea ebacua piona jjaajaqui meeꞌyocue, quea mano nee nee jaa! 
\p  
\v 26 Ma epona Jodio pojjeamajo huapa jayojja sajaꞌame acanaje Jesosaa: —¿Aꞌa acuae ecue bacuaja bobi jeaje iñahuehua que? ¿Aꞌa cuae jamaya quea pame? —poanaje. 
\p  
\v 27 Epona quea shoe jama jjejojo jama poanaje baꞌa: —Eꞌe, Emeshi Mese. Jamatii o huonejjiya ijjia canijo, iñahuehuaa ehuonejjija ijjiasejja caꞌijjia cahua —poanaje. 
\p  
\v 28 —Epona, miya ca mi ca oe quea jaꞌa nee, quea pame nee ejo jjashahuabaquiani. Jamajjeya eyaya miquea esohui jayojja jama ajeꞌyo. Jjeya nei miquea ebacua piona jjaajaqui meejeꞌyo —Jesosaa acanaje. 
\p Jamajjeya jjeya nei oja bacua piona jjaajaquiꞌyonaje; quea aja nee poꞌyonaje. 
\s1 Jesosaa quea huiso emanojaaca huaquia mee caꞌyonaje 
\p  
\v 29 Majoya Jesosa jomajo ani ejiojjijje poqui oꞌoyanaje Janinea bae sahuajje. Eyiyo huasijje jaasohuaqui majje anioquenaje.  
\v 30 Quea huiso nee nee poeyanaje; o que jjachichaquinaje. Jjequi canaje emanojaaca cuana: quibojjisha cuana, cojjamaꞌ cuana, jiojjijjajja cuana, mimiꞌajja cuana peaꞌai, peapea epoꞌyo cuana peaꞌai huanaoquea canaje cuaa Jesosa pejjejo ejjaajaquiꞌyojji. Ojjaña cuana jjaajaqui mee caꞌyonaje, huaquia mee caꞌyonaje, de, Jesosaa.  
\v 31 Ba majje ojjaña cuana quea bihui nee nee poanaje. Eyacuiñajji bihuia neinei canaje: —Eꞌe, e, mimiꞌajja cuana quea jaꞌa mimi mee caꞌyonaje; jiojjijjajja jeo mee caꞌyonaje; quibojjisha jjaquibopiqui mee caꞌyonaje; cojjamaꞌ quea cojja jaꞌa po mee caꞌyonaje, jjabaqui mee caꞌyonaje peaꞌai. Ma ecua ohuaya jjajaꞌaqui jjimahua Isaeni cuana nijje acaninaje, jamaya aje jja oe jjeya acani, Jesosaa —acanaje cuaa. 
\s1 Jesosaa quea huiso cuana bobia canaje, 4.000 
\r (Macoso 8.1-10) 
\p  
\v 32 Majoya Jesosaa o shajjaꞌajjajji iyaa canaje. O que poeyajo huohui canaje jama baꞌa: —Jiquio dejja cuana enijje poani beca cahuime. Ojaya bobi oe poanaje. Jamajjeya ojo eya quea yeno jjashahuabaquiani bobimajo. Oja equi yasijje huoojea sa poꞌyo ajja. Quea shoe nee nee; ejiojjijo bobi yasijje po chanaꞌ. 
\p  
\v 33 O shajjaꞌajjajji cuaa Jesosa sajaꞌa canaje: —Jiquiojo chamaꞌ bobi, dejjamaꞌ. ¿Yajja yajji? Oya cuana quea huiso nee nee ebobiajji. ¿Achacua pahui ejjeshejji ojjaña bobiajji? 
\p  
\v 34 —¿Ache huiso pahui miquea yani? —Jesosaa huohuiꞌajja canaje. 
\p —Me oejje beca peaꞌai, 7 pahui yani. Nahuoo sisi oe pojji yani peaꞌai —acanaje cuaa. 
\p  
\v 35 Jamajjeya Jesosaa ojjaña ejjachichaquiani cuana jama acanaje baꞌa: —¡Meshijo anioquecue! —acanaje. 
\p  
\v 36 Majoya ma 7 pahui, nahuoo sisi peaꞌai jjeshe majje Eyacuiñajji nijje, oja Chii nijje miminaje bobijo. Pahui, nahuoo peaꞌai miji canaje, Jesosaa. O shajjaꞌajjajji que quia canaje. Majoya ohuiya dejja cuana huasijje quia canaje. Quia ca poquije quea huiso nee nee jjapanaqui poquipoquinaje, bobi.  
\v 37 Jamajjeya ojjaña cuaa ijjia canaje, quea jejje poanaje, de. Ijjia majje o shajjaꞌajjajji cuaa bobi eꞌijjiasejja jjepai aijo chicha caꞌyonaje. Quea huiso poanaje, 7 jjepaime.  
\v 38 Eꞌe, dejjaa quea huiso nee neeya bobi ijjia canaje, 4.000 dejjaa. Quea huiso nee epona cuana, eshoꞌi cuana peaꞌaiya ijjia canaje.  
\v 39 Majoya Jesosaa ojjaña cuana huoojea canaje ojaya equi yasijje. Majoya Jesosa o shajjaꞌajjajji cuana nijje bishe ai yasijje nequisohuaquinaje. Besapoquinaje ojje, pea meshi yasijje, Majadana meshi yasijje. 
\c 16  
\s1 Jodio etiiya Jesosaa acani quea pame ba sa acanaje 
\r (Macoso 8.11-13; Noca 12.54-56) 
\p  
\v 1 Majoya Paniseo cuana, Sanoseo cuana peaꞌai poeyanaje Jesosa que. Oya cuaa Jesosa Eyacuiñajjija huoojeaꞌyo pojjeama poso acanaje. Jamajjeya jama anisho canaje baꞌa: —Esohui huohuijji Jesosa, ¿aꞌa miya Eyacuiñajjija huoojeaꞌyo nei ojjaña jaahuanajji pojjaꞌa? ¡Ejjabaꞌajjaqui soꞌo! ¡Eyacuiñajjiya jayojja jama acue ecuanaja ebajji! ¡Eyajo oe panacue! —acanaje Paniseo cuaa. 
\p Jamatii Paniseo cuaa Jesosa Eyacuiñajjija huoojeaꞌyo pojjeama poso acanaje. Jamajjeya pea Paniseo cuana nijje jama poanaje baꞌa: —Chojja, Jesosa Eyacuiñajjija huoojea pojjeama. Jamajjeya Eyacuiñajjiya jama pojjeama mi pana cajo, capajea caꞌyahua. 
\p  
\v 2 Jesosaa oya cuana sajaꞌa canaje: —Eshequi oquequiajo bo huoꞌohuoꞌo poanijo miquianaaya huohuiaña: “Eꞌe, de, mecahuajje quea jea poaje eshequi, ena epojji pojjeama”.  
\v 3 Mecajjeahua ca ca quea apo nee nee poanijo miquianaya jama poani baꞌa: “Eꞌe de, quea apo; jjeya ena poaje”. Eꞌe —Jesosa poanaje—, eyahuasijje bo ba majje miquianaaya huohuiaña ena chamaꞌ pojjaꞌa, ena poaje pojjaꞌa. Jamatii Eyacuiñajjija esohuijo miquianajaya ba jjima ache shono ojjaña jaahuanajji poeje. ¿Apiojji miquea ba jjima?  
\v 4 Miquianaaya Eyacuiñajjija esohui pajea yaña. Jamajjeya Eyacuiñajjiya pana cani ba majamaja sa poani. Jamatii Eyacuiñajjiya Jjona yahuajo nei nei aca poa jayojja jama ohuaya jjeyahua acaje miquea ebajji. 
\p Jamajjeya Jesosaa oya cuana jea canaꞌyonaje jjabahuejjaqui ajjajojo. 
\s1 Paniseoja esohui tai pahui shejjee meejji jayojja 
\r (Macoso 8.14-21) 
\p  
\v 5 Majoya bae ojje miji yasijje besapoquianijo Jesosa shajjaꞌajjajji cuana jjashahuabaquinaje. Jama poanaje baꞌa: —Eꞌe de, ecuanaa bobi pajeaꞌyonaje. 
\p  
\v 6 Jamajjeya Jesosaa oya cuana huohui canaje: —¡Quea jaꞌa nee jjashahuabaquicue! Paniseo cuana, Sanoseo cuana peaꞌaija pahui shejjee meejjijo miya quea tai poaje. 
\p  
\v 7 Jamajjeya o shajjaꞌajjajji cuana ojee mimimiminaje: —Eꞌe pojjaꞌa oya jama poanaje ecuanaja pahui ye jjimajo. 
\p  
\v 8 Ojaya ejjashahuabaquiꞌyojji Jesosaja eba poanaje. Jamajjeya oya cuana acanaje: —¿Apiojji acuae jja nequiana ojee mimimimiani pahuijo? ¿Aꞌa jja nequianajaya eya ba jjima quea caꞌa nee nee?  
\v 9 ¿Aꞌa jja quiana ejo jjashahuabaqui jjima tii? Eyaya me oejje pahui miji majje quea huiso dejja bobianaje, 5.000 dejja. ¿Aꞌa jja miyaya maya pajeaꞌyonaje? Ijjiaꞌijjiajeyo majje acuae jjaya ¿ache jjepai huiso chichaꞌyonaje pahui?  
\v 10 Oya jayojjaya me oejje beca pahui, 7 pahui miji majje quea huiso dejja bobianaje, 4.000 dejja. Majoya miyaya pahui ¿ache jjepai huiso chichaꞌyonaje soꞌo? ¿Aꞌa ya pajeaꞌyonaje?  
\v 11 Eyaya miquianaya huohuinaje jama baꞌa: “Paniseo, Sanoseo peaꞌaija pahui shejjee meejjijo quea tai miya poaje” —Jesosa poanaje. 
\p  
\v 12 Jamajjeya o shajjaꞌajjajji cuana jjabahuejjaquinaje Jesosaa huohui cajje: —Eꞌe, Paniseo, Sanoseo peaꞌaija ehuohui taijo se quea tai poaje; pahui shejjee meejjijo pojjeama Jesosaa huohui canaje —poanaje. 
\s1 Penoja esohui quea pame Jesosajo 
\r (Macoso 8.27-30; Noca 9.18-21) 
\p  
\v 13 Majoya Jesosa Pinipo meshi yasijje poquinaje. Sesanea huasijje poquijeya o shajjaꞌajjajji huohuiꞌajja canaje Jesosaa: —Dejja cuana acuae jja ¿yajja poani ejo, ojjañaja Edoe Mesejo? ¿Aꞌya cuae eya? 
\p  
\v 14 Oya cuaa sajaꞌa canaje: —Beca cuana jja jama poani baꞌa: Miya Huani, ma ona besameejji poa shequi oꞌoyanaje poso ca jja mi ca acani. Pea cuana aje jja oe jama poani: Miya Enia, Eyacuiñajjija esohui huohuijji yahuajo nei nequia poa. Pea poani jama baꞌa: Miya Jenemia pojjaꞌa pea esohui huohuijji yahuajo nei nequia poa pojjaꞌa. Oya cuana yahuajo nei manoꞌya poa shequi oꞌoyanaje poso ca jja mi ca acani cuaa —poanaje o shajjaꞌajjajji. 
\p  
\v 15 Jamajjeya Jesosaa oya cuana huohuiꞌajja canaje: —¿Miya acuae yajja poani ejo? ¿Aꞌya cuae eya? 
\p  
\v 16 —¡Miya ca ca Eyacuiñajjija Bacua Ejja oe nei, oja huoojeaꞌyo ojjaña jaahuanajji! —Simohuiya Jesosa sajaꞌa canaje. 
\p  
\v 17 Jamajjeya Jesosaa oya jama acanaje baꞌa: —Simohui, Jjonaja bacua, ¡quea bihui nee pocue! Ecue Chii eyajo aniya miya ba meesahua cani eya oja huoojeaꞌyo ojjaña jaahuanajji. Dejjaa pojjeama miya ba meesahua cani, de.  
\v 18 Jamajjeya eyaya miya huohuiaña miya bajjani aje Peno, esejaya esohuijo Mei bajjani. Eyacuiñajjija esohui eꞌe jojo nei ejo eyaya miya huohui meesahuajeꞌyo ecuea epeejji cuana quea caꞌa nee epoꞌyojji. Equi mei jiyo nei jayojja jama quea caꞌa nee nequi tii jayojja jama ecuea epeejji cuana quea caꞌa nee nequi tiitiijeꞌyo; ejeabichajeaꞌyojji pojjeama Edosiquianaja, eshahua cuanaja peaꞌai. 
\p  
\v 19 —Eya Emeshi Mese nei jiquio meshijo poajeꞌyo. Jamajjeya aje miya huoojeaña ecue sohui huohuiya. Ecuea esohui esecue caꞌapejojji jayojja jama eyahuasijje edobiqui meeꞌyojji. Jamajjeya ecuea esohui ba majje miyaya huohuije ache ebaꞌejji quea mimishi Eyacuiñajjija botiꞌama. Miyaya huohuije peaꞌai ache ebaꞌejji quea pame nee Eyacuiñajjija eyajo anija quea boti nee. 
\p  
\v 20 Majoya Jesosaa o shajjaꞌajjajji cuana huohui neinei canaje jama baꞌa: —Eꞌe, eya Eyacuiñajjija huoojeaꞌyo ojjaña jaahuanajji. Jamatii ¡aꞌa oe jihuohuijji soꞌo! —poanaje. 
\s1 Ojaya emanoꞌyojjijo Jesosa miminaje 
\r (Macoso 8.31–9.1; Noca 9.22-27) 
\p  
\v 21 Majoya Jesosaa o shajjaꞌajjajji cuana huohui coo canaje ojaya emanoꞌyojjijo: —Eya quijje Jenosanena huasijje poquije. Jomajo Moisesija etehueꞌyo huohuijji cuaa, Jodio etii bajjani cuaa peaꞌai, Eyacuiñajji nijje emimijji etii cuaa peaꞌai eya quea huiso cuia cajeꞌyo. Quea nee nee poajeꞌyo eya. Quijje ya mo manojeꞌyo ohua me caca mee cajje. Jamatii beca cahuime po majje mo shequi mee caje oꞌoya ecue Chiiya —acanaje. 
\p  
\v 22 Jamajjeya Peno quea yeno nee poanaje Jesosajo. Oya oe nei iyaa canaje, Penohua. Jama poanaje baꞌa: —Chojja, ecuea Emeshi Mese, miya Eyacuiñajjiya jaahuana cajeꞌyo. Peaa aje oe miya enapajji pojjeama, equecuaꞌyojji pojjeama jja mi, de. 
\p  
\v 23 Jamajjeya aje jja oe Jesosaa oya Peno cojja ba neinei cani jama tecueame acanaje baꞌa: —Peno, ¡aꞌa jamaya mimijji! Miya e dasiajji nisho epo jayojja mimiani. Miya Edosiquiana Satanasa jama mimiani. Jjashahuabaquiani quea tai, dejja jama; Eyacuiñajjija ejjashahuabaquiꞌyojji jama pojjeama —poanaje. 
\p  
\v 24 Jamajjeya Jesosa ojjaña o shajjaꞌajjajji nijje jama miminaje baꞌa: —¡Ojjaña joya enijje eꞌe jojo nei jjapeequiꞌyo sa poani Eyacuiñajjija esohui jayojja jama baꞌecue! Eꞌe, e jayojjaya jja enijje capoquiahua, jamatii onaa napa cajje aje jja oe quea nee poajeꞌyo pojjaꞌa.  
\v 25 Eꞌe, ojjaña joya Eyacuiñajjija esohui jayojja jama baꞌe sa po ajja aje oe baꞌe tiitii ajja enijje. Joya ecuea esohui jayojja jama baꞌe sa poani ca ca baꞌe tiitiijeꞌyo enijje eyajo.  
\v 26 Eꞌe pojjaꞌa dejjaa quea huiso nee nee aquiana ojaya yajji chicha caje. Jamatii oya cuana cuaqui yasijje jeajea cajo, ojjaña ojaya aquiana cuana edojojji pojjeama. ¿Aꞌa ojjaña ojaya aquiana cuana Eyacuiñajji yasijje quia cajo, oya cuana cuaquijo ani cuayaqui mee cajeꞌyo? ¿Aꞌa Eyacuiñajjiya oya cuana onijje eyajo baꞌe mee cajeꞌyo ma aquiana quea huiso nee nee sosejje? Chojja.  
\v 27 Eꞌe jojo nei eya ojjañaja Edoe Mese poeje oꞌoya. Quea jeajahua nee nee, quea caꞌa nee nee poejeꞌyo. Eya esohuidojojji quea huiso nee nijje poejeꞌyo. Poe majje eyaya ojjaña cuana sosequiajeꞌyo. Ojjaña baꞌenaje jayojja eyaya sosequiajeꞌyo.  
\v 28 Eꞌe jojo nei eya ojjañaja Edoe Mese ojjaña huoojeaꞌyojji quea caꞌa nee nee poajeꞌyo. Beca cuaa jiquiojo nequiya jjaja mo jamaya ba caje manoꞌyo jjimahuaa —Jesosaa o shajjaꞌajjajji cuana acanaje. 
\c 17  
\s1 Jesosa quea cojja jiji poanaje oja Chii nijje mimianijo 
\r (Macoso 9.2-13; Noca 9.28-36) 
\p  
\v 1 Quijje pishana me oejje pea emejje oe cahuime po majje Jesosa poquinaje o shajjaꞌajjajji nijje pea beca peejjima dejja nijje, Peno nijje, Satiaco, oja doe Huani nijje peaꞌai. Mahuiso dejja nijje poquinaje eyiyo huasijje quea huesha nee.  
\v 2 Jocuama nequi oya Jesosa jjahuapaquiꞌyonaje; quea cojja jiji nee poanaje, eshequi jayojja poanaje, quea jeajahua nee nee. Oja daqui quea oshe nee nee, bo oshe jayojja poanaje.  
\v 3 Moisesi, Enia peaꞌai ma yahuajo nei baꞌya poa Jesosa nijje mimimiminequi ba canaje o shajjaꞌajjajji cuaa. Moisesi, Enia peaꞌai Jesosa nijje mimimiminequinaje Jesosa onaja mimishijo emanoꞌyojji jjejojoya.  
\v 4 Jamajjeya Peno Jesosa nijje jama poanaje baꞌa: —Eꞌe Emeshi Mese, jiquiojo ecuana canequiquiahua, quea pame nee. Pea beca peejjima equi sisi ecuaaya caꞌiyaahua miquea, Moisesija, Eniaja peaꞌai ebaꞌejji. 
\p  
\v 5 Peno mimianijo tii bo quea oshe nee nee nequioquenaje. Queya canaje huojaa. Shajjaꞌajja canaje Eyacuiñajji jama poani baꞌa:  
\v 6 —Jiquio ecuea ecue Bacua Ejja quea jea nee nee. Eya ojo quea bihui nee nee. ¡Oya oe shajjaꞌajjacue! 
\p O shajjaꞌajja majje quea mete nee nee poanaje Peno, Satiaco, Huani peaꞌai. Meshi yasijje hui oquequinaje. Ecuiꞌoshajjajo nequinaje.  
\v 7 Jamajjeya o que poeyanaje Jesosa. Napa canaje emeya. 
\p —¡Nequisohuacue! ¡Aꞌa quea mete pojji! —Jesosa poanaje. 
\p  
\v 8 Jamajjeya oya cuana nequisohuanaje. Jesosa oe nei nequi bajea canaje. 
\p  
\v 9 Eyiyojo jaaoquequijeꞌyo mimimimi jaaoqueꞌyonaje. Jesosaa ma ojjañaja Edoe Meseya acanaje jama baꞌa: —¡Ma miya eyiyojo banaje aꞌa jihuohuijji! ¡Quijje eya emanoꞌyojaa shequi oꞌoyajo mo oe pea cuana huohuicue! —Jesosaa acanaje. 
\p  
\v 10 Jamajjeya oya cuaa huohuiꞌajja canaje: —Jesosa, Moisesija etehueꞌyo huohuijji poaniya jama acani baꞌa: “Enia oe ebionei capoeꞌyahua Eyacuiñajjija huoojeaꞌyo ojjaña jaahuanajji poe jjimahuajo”. ¿Yajjajje acuae Moisesija esohui huohuijji cuaa jama acani? —poanaje Peno, Satiaco, Huani peaꞌai. 
\p  
\v 11 Jesosaa sajaꞌa canaje jama baꞌa: —Eꞌe jojo nei Enia jayojja jama oe dejja ebionei epoejji, ojjaña cuana ejo eꞌe jojo nei ejjashahuabaqui meesahuajji.  
\v 12 Eꞌe, Enia jama ca ca oe yahuajo pishana poeyanaje. Jamatii Jodio cuanaja oya ba jjima poa. Pea poso acanaje. Jamajjeya cuia caꞌya poa. Jamaya peaꞌai eya acajeꞌyo cuaa. Eya ojjañaja Edoe Mese quea nee nee po mee cajeꞌyo cuaa —poanaje Jesosa. 
\p  
\v 13 Jamajjeya o shajjaꞌajjajji cuana jjashahuabaqui nequinaje. Jama poanaje: —Eꞌe de, oya Huanijo mimiani, ma ona besameejji poajo. Eniaa jama sohui huohuime acanaje Huaniya, de —poanaje Peno Satiaco nijje Huani peaꞌai nijje. 
\s1 Eshoꞌi niñepoquipajea mee caꞌyonaje Jesosaa 
\r (Macoso 9.14-29; Noca 9.37-43) 
\p  
\v 14 Eyiyojo nequi jaaoqueꞌyo majje Jesosaa, o shajjaꞌajjajjiya peaꞌai ba cañaquinaje quea huiso cuana ejjachichaqui nequica. Oe dejja Jesosa que poeyanaje. Ecuiꞌoshajjajo nequiya huohuiꞌajja canaje:  
\v 15 —Emeshi Mese Jesosa, ¡ecuea ebacua ejjajo quea yeno jjashahuabaquicue! Oya quea mano nee nee, niñepoqui poani. Niñepoqui majje ena huasijje jea cani, cuaqui yasijje peaꞌai jea cani.  
\v 16 Eyaya oya yenaje mi shajjaꞌajjajji cuana huasijje. Jamatii niñepoquipajea ajja. 
\p  
\v 17 Jesosaa ojjaña cuana acanaje: —¡De! ¿Ache shono acuae jja nequiana ejo jjashahuabaquije eꞌe jojo nei? Quea sapa caꞌa mi coma. ¿Ache cahui huiso minijje nequi majje miyaya eya bajeꞌyo Eyacuiñajjija huoojeaꞌyo ojjaña jaahuanajji quea caꞌa nee nee? ¡Miquea ebacua ejja e que jjequicue! 
\p  
\v 18 Jjequi canaje Jesosa que. Jesosaa o niñepoquimeejji poani huoojeacuayajea caꞌyonaje: —Eshahua, ¡cuayaquiꞌyocue, eshoꞌi niñepoquimeejji poani! —Jesosa poanaje. 
\p Cuayaquiꞌyonaje. Jamajjeya oja bacua ejja niñepoquipajeaꞌyonaje, quea aja nee poꞌyonaje. 
\p  
\v 19 Quijje ojjaña cuana poqui majje Jesosa que poeyanaje o shajjaꞌajjajji cuana. Huohuiꞌajja canaje: —¿Yajjajo acuae ecuaaya eshahua mi huoojeacuayajea meeꞌajjaꞌyonaje? 
\p  
\v 20 Jesosaa sajaꞌa canaje: —Miquianaya jja ejo jjashahuabaqui jaꞌa jjima. Jjashahuabaquiani jama baꞌa: “Eꞌe pojjaꞌa Jesosaa ecuanaja eshahua huoojeacuayajea mee ajja”. Jamajjeya mi huoojeacuayajeaña. ¡Bacue oe! Ejo jjashahuabaquicue jama baꞌa: “Jesosaa eꞌe nei ohuaya jayojja jama ecuana ameesahua cajeꞌyo”. Miya jama jjashahuabaquiajo, Eyacuiñajjiya miya amee cajeꞌyo ojjaña eyaya aña jayojja jama, ma dejjaa ajjima acani amee cajeꞌyo peaꞌai.  
\v 21 Eꞌe, jamatii jiquio eshahua jayojja quea huoojeacuayajea camaja. Eyacuiñajji nijje mimi huichaꞌa huichaꞌa majje, ojo jjashahuabaquianijo ijjiaꞌijjia jjima po majje peaꞌai huoojeacuayajeajeꞌyo miyaya —Jesosa poanaje. 
\s1 —Quijje eya manojeꞌyo —Jesosa poanaje 
\r (Macoso 9.30-32; Noca 9.43-45) 
\p  
\v 22-23 Majoya Janinea meshijo ojee poquijeya Jesosaa o shajjaꞌajjajji cuana huohui canaje: —Eꞌe, quijje eya iña meesahuaje onaja equecuaꞌyojji. Quecua cajeꞌyo cuaa. Jamatii beca cahuime po majje mo shequi mee cajeꞌyo Eyacuiñajjiya. 
\p O shajjaꞌajja majje o shajjaꞌajjajji cuana quea yeno nee nee poanaje. Quea mete peaꞌai poanaje. 
\s1 Eyacuiñajjija equi iya bameꞌyojji bejjo chicha canaje bejjo chichajji poaniya 
\p  
\v 24 Majoya Capenaoma huasijje poeyajo, bejjo chichajji poani Peno que poeyanaje; huohuiꞌajja canaje jama baꞌa: —¿Aꞌa acuae mi mi sohui huohuijjiya bejjo quia cani, ma Eyacuiñajjija equi iya bameꞌyojji? 
\p  
\v 25 —Eꞌe de, quia cani —Peno poanaje. 
\p Majoya Simohui Peno equi yasijje dobiquiajo, Jesosaa oya huohuiꞌajja canaje: —Simohui, ¿yajjajje acuae mi jjashahuabaquiani? ¿Emeshi mese neiya ajea bejjo sosequia mee cani? ¿Aꞌa quea huesha baꞌeja? ¿Aꞌa oja meshijo baꞌeja pojjaꞌa? 
\p —Quea huesha baꞌeya poe majje sosequia cajeꞌyo —poanaje Peno. 
\p  
\v 26 —Eꞌe —Jesosa poanaje—. Jamajjeya emeshi mese neija echacojji cuana esosequiaꞌyojji pojjeama.  
\v 27 Jamatii oya queneꞌama epojji ejjasosequiaquijji. ¡Poquicue miya bae yasijje! ¡Joya ebionei ijjia caje oe jjequiquiayacue! ¡Oja nabajo baꞌe oe bacue ejjeshejji quea sose huiso nee nee, ejo, mijo peaꞌai esosequiaꞌyojji! ¡Dojocue! ¡Bejjo chichajji poani yasijje quiacue! “Maꞌaje esohui huohuijjija, ecuea peaꞌai” acue —Jesosa poanaje. 
\c 18  
\s1 ¿Aꞌya ona huoojeajji jayojja nequije eyajo? 
\r (Macoso 9.33-37; Noca 9.46-48) 
\p  
\v 1 Majoya ojjaña o shajjaꞌajjajji cuaa Jesosa que poe majje huohuiꞌajja canaje: —Jesosa, quijje miya ojjaña huoojeajji poaje. ¿Aꞌya cuae mi jayojja jama poaje minijje ona huoojeajji? ¿Aꞌa ecuanaya pojjaꞌa? 
\p  
\v 2 Jamajjeya Jesosaa oe eshoꞌi nei o que iyaa canaje. O cojja nei nequinaje.  
\v 3 O shajjaꞌajjajji cuana huohui canaje Jesosaa: —¡Bacue oe! ¡Jiquio eshoꞌi nei jama pocue! ¡Jjashajjaꞌajjaquicue oe! Eshoꞌi nei pojji mi poꞌyajo ca ca enijje ebaꞌeꞌyojji pojjeama quijje eya ojjaña huoojeaꞌyojji poaje.  
\v 4 Jamajjeya joya eshoꞌi jama quea bei jjashajjaꞌajjaquiani e que poquijeꞌyo, e jayojja ona huoojeaꞌyojji eyajo poaje.  
\v 5 Eꞌe, ecuea epeejji eshoꞌi quea pame jama jjashajjaꞌajjaquiani. Ojjañaa joya ecuea epeejji quea jea acani eya peaꞌai quea jea acani —Jesosa poanaje. 
\s1 Quea mimishi mi po oꞌoya chanaꞌ 
\r (Macoso 9.42-48; Noca 17.1-2) 
\p  
\v 6 —Ecuea epeejji jjeya nei jjapeequi caꞌaꞌama ¡aꞌa quea mimishi po meejji cuana! Joya o mimishi pomeejji poani Eyacuiñajjiya quea nee nee po mee cajeꞌyo, de. Jamajjeya ¡quea mimishi epo mee cuahuajje oe manoꞌyocue! ¡Jjanaayiipecaqui majje mei quea quemo nee jeyocue; bae quea doe yasijje oe tohuaacue!  
\v 7 Mimishi pomeejji cuanajo quea yeno nee nee ojjaña poani. Jamatii mimishi pomeejji yani, de. Quea yeno ca ca oe mimishi pomeejji poaje, quea nee nee po mee cajeꞌyo tii Eyacuiñajjiya —Jesosa poanaje. 
\p  
\v 8 —Jamajjeya miya quea mimishi po mee cani emeya, ejiojjiya pojjaꞌa. ¡Ejiojji, emeꞌ pojjaꞌa ejajasejjajea jayojja jama acue mimishiꞌama epojji! Emeꞌ, ejiojji peaꞌai chamajo eyahuasijje poquiꞌyajo Eyacuiñajji nijje ebaꞌe tiitiiꞌyojji quea pame nee nee. Miquea beca emeꞌ, ejiojji peaꞌai yanijo pojjaꞌa quea mimishi tii poani ca ca cuaqui yasijje poquijeꞌyo. Quea tai nee nee, quea nee nee; cuaqui jijipajeaꞌyo ajja, de.  
\v 9 Ecojjajo jjabaqui majje miya quea mimishi poani pojjaꞌa. Jamajjeya ¡ecojja ecajjajea jayojja jama acue! Cojjamaꞌ, mimishiꞌama miya eyahuasijje poquijeꞌyo quea pame nee nee poajeꞌyo. Cojjajji, quea mimishi tii poani miya cuaqui yasijje poquijeꞌyo ca ca quea tai nee nee, quea nee nee poajeꞌyo tii tii. Eꞌe, ¡quea jjashahuabaqui jaꞌa oe pocue! ¡Mimishi cuana oe pajeaꞌyocue! —Jesosa poanaje. 
\p  
\v 10 —Jamajjeya ¡ecuea epeejji eyacua aꞌa botiꞌama ajji! Eꞌe jojo nei eyaya miya huohuiaña eyajo esohuidojojjiya, o jaahuanajjiya ecue Chii yasijje huohuiqui cani.  
\v 11 Eya ca iña ojjañaja Edoe Mese poeyanaje mimishi cuana cuijeaꞌyohua cuaqui yasijje miquianaya epoqui poani jjejojo —Jesosaa o shajjaꞌajjajji huohui canaje. 
\s1 Esohui eba meesahuajji ñajjajja epoquiquehuajo 
\r (Noca 15.3-7) 
\p  
\v 12 —Jamajjeya eyaya miquianaya huohuije esohui ejjashahuabaquijji —Jesosa poanaje—. Oe dejjaja quea huiso ñajjajja yaninaje, 100 huisome. Oe nei poquiquehuaꞌya poa, ¿ae poanaje oya? ¿Aꞌa saꞌajja canaje? Eꞌe. Pea cuana, 99 huisome ñajjajja ojee ijjiaꞌijjiaqui jeanana canaje epoquiquehua saꞌajjaꞌyohua.  
\v 13 Baꞌyo majje quea bihui nee poꞌyonaje. Pea ñajjajja poquiquehua jjimajo quea bihui pishana poanaje: “¡Jiquioya ecuea ñajjajjaja bacua, de!” poanaje eñajjajja mese.  
\v 14 Ñajjajja jaahuanajji ñajjajja baꞌyo majje quea bihui nee nee poa. Jamaya poaje ecue Chii: Ecuea epeejji eyacua quea mimishi jjejojo epoquiquehuaꞌyo jayojja jama ojo jjashahuabaqui oꞌoyajo, Eyacuiñajji quea bihui nee poajeꞌyo —Jesosa poanaje. 
\s1 ¡Miquea epeejji minijje quea mimishi poajo oja mimishi pajeaꞌyocue, quea bei po oꞌoyacue onijje! 
\r (Noca 17.3) 
\p  
\v 15 —Ecuea epeejji minijje quea mimishi poanijo, ¡onijje mimiquicue! ¡Ojaya mimishijo jjashahuabaqui meesahuacue! Jjashahuabaqui majje mimishi capajea caꞌyahua. Jamajjeya minijje jjapeequije oꞌoya.  
\v 16 O mi jjashajjaꞌajjaquiajo ¡pea iyaacue, beca pojjaꞌa, ecuea epeejji peaꞌai! ¡Ojee poquicue onijje mimiya! Jamajjeya oya cuaa miya ba caje eꞌe jojo nei miquea epeejji nijje jjapeequi oꞌoya sa poani.  
\v 17 Ohuaya oya cuana mi jjashajjaꞌajjaquiajo ¡ojjaña Eyacuiñajjija epeejji cuana huasijje iyaacue emimijji, ojaya mimishi epajeaꞌyojji! Ojjañaa niñesheꞌajja cajo mi jjashajjaꞌajjaquiajo, Eyacuiñajjija epeejji jama pojjeama oya. Jamatii jjadasiaquijji jama, de —Jesosa poanaje. 
\p  
\v 18 —Jamajjeya ojjaña ecuea epeejji cuana miquianaaya huohui meeje ache ebaꞌejji quea mimishi, ma Eyacuiñajjija eyajo anija botiꞌama peaꞌai. Huohui meeje peaꞌai ache ebaꞌejji quea pame nee, ma Eyacuiñajjija eyajo anija quea boti nee peaꞌai —Jesosa poanaje. 
\p  
\v 19 —Eꞌe jojo nei miquianaya meshijo baꞌe ojee mimiajo, Eyacuiñajjiya, ecue Chiiya eyajo aniya miquianajaya esohui sajaꞌa cani.  
\v 20 Beca cuana enijje jjapeequiani ejjachichaquianijo, eya o pejjejo nequiani —Jesosa poanaje. 
\s1 Esohui ejjashahuabaqui meejji oe dejja onaja mimishijo quea quene tii tii poani 
\p  
\v 21 Majoya Penohua Jesosa huohuiꞌajja canaje: —Emeshi Mese Jesosa, ecuea epeejjiya quea mimishi ahuichaꞌa huichaꞌa cajo, ¿aꞌa eyaya oja mimishi capajea huichaꞌa huichaꞌaꞌyahua? ¿Ache huiso huohuiꞌyome amajje jjabeiqui caꞌyojji? ¿Aꞌa quea huiso pojjaꞌa, me oejje pea beca, 7 pojjaꞌa? 
\p  
\v 22 Jesosaa sajaꞌa canaje: —Chojja, Peno, me oejje pea beca, 7 pojjeama. Quea huiso nee nee huohuiꞌyome amajje jjabei neineiqui caꞌyojji, jama tii tii epoꞌyojji —Jesosaa acanaje. 
\p  
\v 23 Jamajjeya Jesosaa pea esohui ejjashahuabaqui meejji huohui canaje jama poani baꞌa: —Eyacuiñajji ojjaña huoojeaꞌyojji poaje. Jamaya poaje baꞌa: Emeshi meseya aquiana oja quia sosequia mee caꞌyani echacojji cuana.  
\v 24 Sosequia mee canijo o que jjequi canaje oe echacojji poani. Aquiana quea huiso nee nee oja jjeshe poanaje. Jamajjeya sosequia ajjaꞌajja jjima, ojaya.  
\v 25 Ma echacojji sosequiaquia ajja; yajja sosequiaꞌyome yajji jojoya mi sosequiajeyo caꞌyonaje. Jamajjeya emeshi meseya quea quene huohui canaje: “¡Oya oe quiacue ejjeshejji sosejje! Sosemaꞌ cachaco cahua. ¡Ojaya ehuanase, oja bacua cuanaya quiacue peaꞌai, ojaya aquiana cuana peaꞌai quiaꞌyocue e sosequiaꞌyojji!” 
\p  
\v 26 —O shajjaꞌajja majje echacojji o que poquinaje. Ecuiꞌoshajjajo nequi oya mimi nequinaje: “Ecuea emeshi mese, ¡aꞌa ecuana dojojji equiaꞌyojji bejjo sosejje! ¡Ishoaꞌajjacue! Eyaya ojjaña sosequia jeyojeyojeꞌyo miya”. 
\p  
\v 27 —Emeshi mese ojo jjashahuabaquinaje. Quea aquiana huiso nee nee nee sosequia jjima. Jamatii oja bajjani cuijea caꞌyonaje, sosequia jjima tii. Poqui mee caꞌyonaje, de. 
\p  
\v 28 —Majoya echacojji poquinaje quea bihui nee nee. Jamatii poqui majje ma echacojjiya pea echacojji onijje nequi saꞌajja canaje. Ba majje iñasibijea canaje. Jama poanaje baꞌa: “¡Jjeya nei mo sosequiacue mique jjeshe cuana!” oya poanaje. Ojaya oe pojji nei sosequia jjima poanaje.  
\v 29 Ecuiꞌoshajjajo nequi mimi nequinaje jiquio pea echacojji: “Epeejji, ¡ejo jjashahuabaquicue! ¡Ishoaꞌajja socue! Ojjaña aje mi sosequia jeyojeyojeꞌyo de”. 
\p  
\v 30 —“¡Chojja! ¡Ishoa sa po ajja iña!” poanaje. Jeanobiaa dojo canaje; ohua sosequiajeyo caꞌyajje huoojea caꞌyonaje. 
\p  
\v 31 —Pea echacojji cuaa ba canaje. O dojo cajo quea yeno jjashahuabaquinaje. Poquinaje emeshi mese huohuiꞌyohua.  
\v 32 Ma shajjaꞌajja majje emeshi meseya huoojea canaje ojaya echacojji jjequiꞌyohua. Poeyajo tecuea canaje emeshi meseya: “Miya ca mi ca oe quea mimishi nee. Miquea aquiana quea huiso nee nee sosequia jjima. Jamatii enijje mimiꞌyajo eyaya miquea bajjani cuijeaꞌyonaje, sosequia jjima tii.  
\v 33 Jamajjeya ¿yajjajo miquea epeejjijo mi jjashahuabaquinaje miya? ¡E jayojja oe miya mi poanaje!” emeshi mese poanaje.  
\v 34 Quenequene neineiꞌyonaje emeshi mese. Ejeanobiajji huoojea caꞌyonaje quea nee nee po meeya ohua sosequiajeyo caꞌyajje —jamaya Jesosa poanaje. 
\p  
\v 35 —Jamajjeya jiquio ecua emeshi meseya acani jayojjaya jamaya miquianaya acajeꞌyo ecue Chiiya, ca onaja mimishi miya mi pajea neineiꞌyajo. Miquea mimishi cuana pajeaꞌyo ajja, cuijeaꞌyo ajja peaꞌai —Jesosaa acanaje. 
\c 19  
\s1 Esohui huohui canaje ehueijjijo, Jesosaa 
\r (Macoso 10.1-12; Noca 16.18) 
\p  
\v 1 Majoya esohui huohui majje Jesosa Janinea meshijo ani poꞌoquequinaje Jodea meshi yasijje, Jodana cuei ojje miji yasijje.  
\v 2 Jomajo quea huiso dejja cuana onijje poquinaje. Ohuaya ojjaña jjaajaqui mee caꞌyonaje, huaquia mee caꞌyonaje.  
\v 3 Paniseo cuana ca ca o que poeyanaje jjadasiaquiya nisho. Jamaya jjashahuabaquinaje baꞌa: —Eꞌe pojjaꞌa Jesosa Moisesija etehueꞌyo jayojja jama pojjeama mimije. Jamajjeya ecuaaya oya tecueaje. 
\p Jamajjeya Jesosa huohuiꞌajja canaje cuaa jama baꞌa: —Esohui huohuijji, ¿aꞌa acuae ehuanase huei cajji? ¿Yajjajo acuae ehuanase hueijea cajji soꞌo? ¿Achajja tehuemeya acuae oe Moisesiya aca poa? 
\p  
\v 4 Sajaꞌa canaje Jesosaa: —¿Aꞌa miquea Moisesija etehueꞌyo ba jjima esohui? Yahuajo nei nei tehue ca poa Moisesiya jama baꞌa: 
\q1 “Yahuajo Eyacuiñajjiya pana coo ca poa yahue, epona peaꞌai.  
\v 5 Huohui ca poa ohuaya: —Jamajjeya yahueya oja chii, ojaya enaese peaꞌai cajiñayiya caꞌyahua oja huanase nijje ebaꞌejji”. 
\m  
\v 6 Oya cuana beca. Jamatii oe nei jayojja Eyacuiñajjiya oya ba cani, becanejjijji peaꞌai pojjeama, oe nei jayojjaya. Cuanaya Eyacuiñajjiya oe jayojja aca poa. Jamajjeya ¡aꞌa oe jea meejji! ¡Jama tii tii oe nei oe acue! —Jesosaa acanaje. 
\p  
\v 7 Huohuiꞌajja oꞌoya canaje Paniseo cuaa: —Jamajjeya ¿yajjajo acuae Moisesiya tehueme aca poa? Jama baꞌa: 
\q1 “Hueiꞌyo majje yahueya ehueijeajji papeni etehueꞌyo caquia cahua oja huanase. Majoya cahuoojea cahua”. 
\p  
\v 8 Sajaꞌa canaje Jesosaa: —Miquea etiiquiana quea mimishi nei jjejojoya Moisesiya huei meeꞌajja canaje. Quijje nei Moisesiya jamaya tehue ca poa; jamatii Eyacuiñajjiya jamaya pojjeama pana coo ca poa.  
\v 9 Jamajjeya eyaya miya huohuiaña eꞌe jojo nei ehuanase pea dejjaja sii jjima huei ca ajja. Joya ehuanase hueijji epo pea epona ehuanaꞌyojji quea mimishi nee, epona siijji epo jama. Eyacuiñajjiya oya ba cani quea mimishi. Joya ma eponajo jjahuanaquiajo quea mimishi peaꞌai poani; onaja ehuanase nijje poani —Jesosa poanaje. 
\p  
\v 10 —¡De! Jamajojoya eseya jjahuanaqui ca ajja. Jamatii shacuimaꞌ nequi cajji ojjaña eseya cuana. —o shajjaꞌajjajji poanaje. 
\p  
\v 11 —Cho, ojjaña pojjeama shacuimaꞌ nequi cajji —Jesosa poanaje—. Beca cuana Eyacuiñajjiya huoojea cajeꞌyo shacuimaꞌ tii enequijji.  
\v 12 Beca cuana jjahuanaqui ajja, jamatii ejjahuanaquijji pojjeama. (Jamaya joya quibojjisha nei, biñajjajjamaꞌ cuana peaꞌai.) Beca cuana jjahuanaqui ajja jamatii yajjajje shai jjahuanaqui sa poꞌyo ajjajo. Beca cuana Eyacuiñajjija esohui ehuohui aiquijji, ojo echaco neinei cajji Eyacuiñajjiya huoojea canaje jjahuanaqui jjima tii tii enequijji. Jamatii Eyacuiñajjiya ojjaña huoojeaꞌyo ajja shacuimaꞌ tii enequijji. Jamajjeya ¡ojaya ejjashahuabaquiꞌyojji mijo jamaya acue, miyaya! —Jesosa poanaje. 
\s1 Eshoꞌiquianajo Eyacuiñajji nijje miminaje Jesosa 
\r (Macoso 10.13-16; Noca 18.15-17) 
\p  
\v 13 Majoya Jesosa que eshoꞌi nei cuana jjequi canaje cuaa. Huohui canaje: —Jesosa, jiquio eshoꞌi nei sapa napaꞌajja majje ¡Eyacuiñajji nijje mimicue ojaya ejaahuanajji! —poanaje. 
\p Jesosa shajjaꞌajjajji cuaa oya cuana tecuea canaje: —¡Aꞌa jja oe Jesosa que jjequi majajji eshoꞌiquiana! ¡Esohui oe cahuohui cahua! 
\p  
\v 14 Ma ba majje Jesosa poanaje: —¡Eshoꞌiquiana e que capoeꞌyahua! ¡Aꞌa quea huesha nequi meejji! Eꞌe, eshoꞌiquiana jjashahuabacuajiquiani; enijje jjapeecuajiquiani. Jamaya ecuea epeejji eshoꞌi jayojja eyaya jaahuana mee sa aña peaꞌai. Jamajjeya e que poquijeꞌyo, eya eyajo ojjaña huoojeaꞌyojji poaje —poanaje. 
\p  
\v 15 Jamajjeya eshoꞌi cuana biajje emeꞌ huana majje Jesosa poquinaje. 
\s1 Edejja etii pishana quea aquiana huiso Jesosa nijje miminaje 
\r (Macoso 10.17-31; Noca 18.18-30) 
\p  
\v 16 Majoya oe dejja Jesosa que poeyanaje. Huohuiꞌajja canaje jama baꞌa: —Emeshi Mese, ¿achajja po majje acuae mo eyahuasijje poqui caꞌyojji Eyacuiñajji nijje ebaꞌe tiitiiꞌyojji? ¿Achajja acuae baꞌe cajji quea pame nee epojji? 
\p  
\v 17 —¿Apiojji miyaya eya huohuiꞌajjaña: “¿Ae quea pame nee epoꞌyojji?” Eyacuiñajji ca oe nei quea pame nee. Jamajjeya onijje baꞌe tiitiiꞌyo sa po majje ca oe ¡oya shajjaꞌajjacue! ¡Ojaya esohui etehueꞌyo jayojja jama oe baꞌecue! —Jesosa poanaje. 
\p  
\v 18 —¿Ache esohui etehueꞌyo? —huohuiꞌajja canaje. 
\p  
\v 19 Jesosaa sajaꞌa canaje: —Eyacuiñajjija esohui etehueꞌyo jama poani baꞌa: 
\q1 “¡Aꞌa pea quecuajji! 
\q1 ¡Aꞌa sii pojji! 
\q1 ¡Aꞌa siajje pojji! 
\q1 ¡Aꞌa pea siijji! 
\q1 ¡Mique chii, mique nae peaꞌai oe shajjaꞌajjacue! 
\q1 ¡Pea cuana mi pejjejo baꞌe mique huapa pojjeama jayojja quea jea oe acue!” 
\p  
\v 20 —Eꞌe, eyaya jamaya aña, eshoꞌyahuaa jama tii tii sohuaqui eya. ¿Pea acuae yajja po cajji eyajo ebaꞌe tiitiiꞌyojji? —jiquio dejjaa Jesosa huohuiꞌajja canaje. 
\p  
\v 21 —Eꞌe, miya quea pame nee nee Eyacuiñajji jayojjaya po sa po majje ¡poquicue, miquea aquiana cuana quiaquicue ejjeshejji sosejje! ¡Ejjeshejji quiaꞌyocue aemaꞌ cuana huasijje! ¡Majoya poecue, enijje epoꞌyojji! Jamajjeya eyajo Eyacuiñajjiya miya aquiana quea pame nee quea huiso quia cajeꞌyo quijje. 
\p  
\v 22 Jesosaja esohui shajjaꞌajja majje dejja etii pishana quea dejja tai jjejojo quea yeno poquinaje; ojaya aquiana quea huiso nee nee yani jojoya quia sa poꞌyo ajja. 
\p  
\v 23 Jamajjeya Jesosaa o shajjaꞌajjajji cuana huohui canaje: —Eꞌe, dejjaa quea mimishiya jjejojoya aquiana quea huiso, meshi quea quemo pojjaꞌa nahue canijo beshahua nei e que poqui ajja, eya eyajo ojjaña huoojeaꞌyojji poajeꞌyo. 
\p  
\v 24 —Eꞌe, eyaya huohuiaña peaꞌai jama baꞌa: Ahuoja quii huejjajje ino jeanobiaña jamaya, ¿aꞌa mapichi jeanobia cajji ahuoja quii huejjajje? Quea camaja coma. Jiquio ecua mapichi ahuoja quii huejjajje jeanobia cajji pome jamaya dejja quea aquiana huiso nee nee nahue cani eyahuasijje edobiquijji pojjeama. 
\p  
\v 25 O shajjaꞌajja majje jjashahuaba neineiquinaje o shajjaꞌajjajji. Ojee mimimiminaje: —Jamajjeya ¿aꞌya shai eyahuasijje dobiqui mee cajeꞌyo? 
\p  
\v 26 Cojja ba neinei canaje Jesosaa. Huohui canaje: —Dejjaa jamaya amee ajja tii. Eyacuiñajjiya oe neiya ojjaña acani. (Eyahuasijje dobiqui mee cani peaꞌai joya quea aquiana huiso nee) —Jesosa poanaje. 
\p  
\v 27 Jamajjeya Peno jjashahuabaquinaje ma dejja aquiana quea huiso nee nee jeanaꞌyo sa po ajjajo. Huohuiꞌajja canaje: —Jesosa, ecuaaya ojjaña aquiana jeanaꞌyonaje minijje epoquiꞌyojji. Jamajjeya ¿ae acuae ecuana quiaje soꞌo, de? 
\p  
\v 28 Jesosaa sajaꞌa canaje: —Eꞌe jojo nei quijje Eyacuiñajjiya ojjaña eyacua pana caꞌyajo eya eyajo nequijeꞌyo ojjaña huoojeaꞌyojji nei. Miquianaya, 12, e shajjaꞌajjajji poani enijje nequijeꞌyo, enijje ona huoojeaꞌyojji poajeꞌyo. Eꞌe, miquianaaya Jodio cuana, ecuea pea epeejji cuana peaꞌai huoojeajeꞌyo tii.  
\v 29 Eꞌe nei beca cuana ecuea esohui jama a sa poanijo aquiana cuana jeana caꞌyani: Ojaya equi, oja huapa pojjeama, oja chii, oja nae pojjaꞌa, oja bacua cuana pojjaꞌa, oja huanase pojjaꞌa jeana caꞌyani. Jamajjeya eꞌe jojo nei quijje Eyacuiñajjiya oya cuana quea huiso nee nee o jayojja quia cajeꞌyo; quea bihui nee nee baꞌe tiitii mee cajeꞌyo peaꞌai eyajo onijje.  
\v 30 Jamatii beca cuana jjeya ona huoojeajji poani eyajo ona huoojeaꞌyojji pojjeama poajeꞌyo. Joya jjeya ona huoojeaꞌyojji pojjeama ca ca eyajo ona huoojeaꞌyojji nei nei poajeꞌyo e jayojja —Jesosa poanaje. 
\c 20  
\s1 Esohui ese jjashahuabaqui meejji huohui canaje Jesosaa eꞌacuijjajja mesejo 
\p  
\v 1 —Eꞌe —Jesosa poanaje—, quijje eya ojjaña huoojeaꞌyojji poaje, ojjaña sosequiajeꞌyo jjeya enijje chaco canaje sosejje. Jamaya poaje baꞌa: Oe dejja, eꞌacuijjajja mese mecajjeahua poquinaje. Echacojji cuana iyaa canaje. Huohuiꞌajja canaje:  
\v 2 “¿Aꞌya cuae jjeya poquije acuijjajja huojohua? Ojjaña miya eyaya sosequiaje oe esodojjo quea sose huiso nee nee sosejje”. “Eꞌe” poanaje, “chacoje ecuaaya oe esodojjo quea nahue nee sosejje”. Majoya huoojea canaje chacohua. 
\p  
\v 3 —Quijje pishana eshequi jaasohua pishana majje ona ijjiaꞌijjiaꞌani yasijje poquinaje eꞌacuijjajja yiye mese. Beca dejja chacochaco jjima ani ba canaje.  
\v 4 Huohuiꞌajja canaje: “¿Aꞌa miyaya acuijjajja yiyejo chacoje peaꞌai? Miya eyaya sosequiaje quea sose huiso peaꞌai”. “Eꞌe, chacoje” poanaje. Poquinaje chacohua. 
\p  
\v 5 —Quijje eshequi biacojjajja nequijo, sinecua nei peaꞌai oya poqui majamajanaje pea cuana iyaa echacojji.  
\v 6 Eshequi ejjajeapaaquijo peaꞌai poqui oꞌoyanaje. Dejja cuana chacochaco jjima ani ba canaje. “¿Apiojji acuae mi chacochaco jjima ani?” acanaje eꞌacuijjajja meseya.  
\v 7 “Chama oya ecuea echacomeejji aña, de; ajea esosequiaꞌyojji” sajaꞌame acanaje cuaa. “Eꞌe. ¡Ecuea acuijjajja yiyejo chacoquicue peaꞌai!” poanaje. 
\p  
\v 8 —Meca nei eꞌacuijjajja meseya ona chacomeejji huohui canaje: “¡Echacojji cuana iyaacue! ¡Sosequiacue! ¡Joya quijjeyejje nei dobiquinaje ebionei sosequiacue! ¡Joya ebionei dobiquinaje quijje yejje nei sosequiacue!” 
\p  
\v 9 —Majoya echacomeejjiya joya eshequi ejjajeapaaquijo dobiqui cuana sosequia canaje oe esodojjo quea nahue.  
\v 10-11 Jamajje quijje joya mecajjeahua dobiqui cuana poeyanaje. Sosequia canaje oe esodojjo quea nahue peaꞌai. Ba majje quea yeno poanaje, quea huiso nee nee esosequia caje poso. Jamatii oya sose huisoajja peaꞌai sosequia canaje. Eꞌacuijjajja mese nijje quenequenenaje.  
\v 12 Mimijajinaje jama baꞌa: “Joya eshequi ejjajeapaaquijo poeyanajeya aje oe oe pojji chaco canaje. Ecuanaaya ca chaco neineinaje eshequi quea quiyojo. Jamatii miyaya oya sose huisoajja peaꞌai sosequianaje. ¿Apiojji acuae jja ecuana jayojja peaꞌai sosequianaje soꞌo?” poanaje.  
\v 13 “Eꞌe epeejji cuana, eyaya miya sosequianaje quea pame nee” poanaje. “Mi poeyajo jama poanaje baꞌa: —Eꞌe, chacoje oe esodojjo quea nahue sosejje —poanaje. ¿Aꞌa eꞌe? Jamajjeya eyaya jamaya miya quia meenaje. Jamajjeya ¡aꞌa quea quene pojji!  
\v 14 Eyaya jiquio dejja quijjeyejje nei cuana oe esodojjo quea nahue nee quia sa poani mi jayojjaya. Jamaya quea pame.  
\v 15 Mi jayojjaya quea huiso sosequianaje. ¡Aꞌa jja oe miya quea quene pojji! Bejjo ecuea jojoya eyaya quia sa amajje eyaya quiaña” eꞌacuijjajja mese poanaje —Jesosa poanaje. 
\p  
\v 16 —Eꞌe, eꞌacuijjajja meseya ojjaña sosequia canaje ojaya ejjashahuabaquiꞌyojji jayojja jama. Jamaya Eyacuiñajjiya acajeꞌyo. Joya quijje nei jjapeequijeꞌyo quea bihui nee baꞌe tiitii mee cajeꞌyo eyajo onijje peaꞌai. Ojjaña ojaya ejjashahuabaquijji jayojjaya jama sosequia cajeꞌyo peaꞌai. Eyacuiñajjiya quea huiso iyaa caje onijje ebaꞌe tiitiiꞌyojji. Jamatii oe pojji babaca cajeꞌyo oja epeejji huoojeaꞌyojji epojji —Jesosa poanaje. 
\s1 —Quijje eya manojeꞌyo —Jesosa po oꞌoyanaje 
\r (Macoso 10.32-34; Noca 18.31-34) 
\p  
\v 17 Majoya Jenosanena huasijje poquinaje. Jesosaa o shajjaꞌajjajji cuana dojo canaje ejiojji sahua huasijje esohui huohuijji:  
\v 18 —¡Bacue oe! Eya jiquio ojjañaja Edoe Mese. Eseya Jenosanena huasijje poquije. Jomajo mo iña meesahuaje eya Jodio cuanaja equecua meeꞌyojji. Eꞌe, Moisesija etehueꞌyo huohuijjiya, Eyacuiñajji nijje emimijji etii cuaa peaꞌai eya iña mee caje. Taaa neineije cuana: “¡Oya quecuajeacue!” poaje.  
\v 19 Jodio pojjeama cuana huasijje mo huoojea caje. Ejo soa neineije cuana; cuia cajeꞌyo mo cuaa huaca jee ejeapashajjajjaa; acui ecueataꞌapeejo me cacajea majje mo baꞌehuanasohuajea caje cuaa emanoꞌyojji. Jamatii mo beca cahuime po majje Eyacuiñajjiya shequi mee cajeꞌyo —Jesosaa huohui canaje. 
\s1 Semeneoja ehuanase Jesosa nijje miminaje oja bacua ejjajo 
\r (Macoso 10.35-45) 
\p  
\v 20 Majoya Jacobo, Huani peaꞌai enaese nijje Jesosa que poeyanaje. Ecuiꞌoshajjajo nequiñanaje onijje emimijji. 
\p  
\v 21 —She, ¿ajeo ami poeyanaje? —Jesosa poanaje. 
\p —Jesosa, ecuea ebacua ejja cuana mi pejjejo canequiꞌyahua quijje miya ojjaña huoojeaꞌyojji poaje. Oe shani mijijje, pea ebianei mijijje canequiꞌyahua minijje, ona huoojeaꞌyojji. ¡Jamaya oe acue! —poanaje enaese. 
\p  
\v 22 —Chojja. Miquianajaya ba jjima —Jesosaa oya cuana acanaje—. Eya quea nee nee po mee cajeꞌyo cuaa. ¿Aꞌa miquianaya e jayojja quea nee nee poajo quea caꞌa poaje? Eya quecua cajeꞌyo peaꞌai cuaa. Enijje jjapeequianijo miquiana quecua cajeꞌyo peaꞌai pojjaꞌa cuaa. ¿Aꞌa jamatii miquianaya quea caꞌa poaje? 
\p —Eꞌe —sajaꞌa canaje Jacobohua, Huaniya peaꞌai—. Quea caꞌa poaje mi jayojja onaa quea nee nee po mee caꞌyajje. ¡Jamaya capoahua, jamatii caquecua cahua cuaa mo! 
\p  
\v 23 —Eꞌe —poanaje Jesosa—, jamajjeya eꞌe jojo nei miquiana e jayojja quea nee nee po mee cajeꞌyo cuaa; e jayojja quea caꞌa nee nee poaje, onaa mano mee caꞌyajje. Jamatii, e pejjejo eyajo eyaya miya enequi meeꞌyojji pojjeama enijje ona huoojeaꞌyojji. Chojja, ecue Chiiya eyajo aniya yahuajo nei pea cuana babaca caꞌyonaje. Ohuaye nei nequi mee cajeꞌyo e pejjejo quijje, eya ojjaña huoojeaꞌyojji poajo —Jesosa poanaje. 
\p  
\v 24 Jesosa pejjejo nequi sa peaꞌai poanijo onijje ona huoojeaꞌyojji epojji, Jacobo, Huani nijje peaꞌai quea quene poanaje pea shajjaꞌajjajji cuana, ome mijijje peaꞌai.  
\v 25 Jamajoya aje oe Jesosaa oya cuana iyaa canaje. Jama huohuime acanaje baꞌa: —¡Aꞌa onijje quea quene pojji! Miquea eba dejja cuana, Eyacuiñajjija epeejji pojjeama. Onajaya emeshi mese cuaa, ona huoojeajji cuanaa peaꞌaiya pea cuana huoojea neinei cani; quea quene nee nee poani, quea mase.  
\v 26 Jamaya pojjeama miquianaya poaje, ecuea epeejji cuana. ¡E jayojjaya po sa poanijo pea cuana baꞌe meesahuacue!  
\v 27 Joya ona huoojeaꞌyojji po sa poani ca ca echacojji sosemaꞌ jayojja capoahua.  
\v 28 Eꞌe, ¡e jayojja jama pocue! Eya ca ca iña ojjañaja Edoe Mese poeyanaje ojjaña cuana baꞌe meesahuaa; ojjañaja eya ebaꞌe meesahuajji pojjeama. Ojjañaja mimishi sosequiaꞌyojji mo manojeꞌyo, ojjaña cuaqui yasijje epoquiꞌyo poani jjejojoya —Jesosa poanaje. 
\s1 Cojjamaꞌ cuana quea cojja jaꞌa po mee caꞌyonaje Jesosaa 
\r (Macoso 10.46-52; Noca 18.35-43) 
\p  
\v 29 Jenosanena huasijje poquije Jesosa dobiquinananaje Jenico huasijje. Majoya dobinana majje poquinaje Jenosanena huasijje. Quea huiso nee nee cuana onijje poquinaje.  
\v 30 Becanejjijji peaꞌai cojjamaꞌ ejiojji sahuajo eꞌanioque ani. Jesosa shajjaꞌajja canaje poeje. Taaa neineinaje cuana: —Jesosa, miya emeshi mese Dabija osecua. ¡Ejo jjashahuabaquicue quea yeno! —taaanaje. 
\p  
\v 31 —¡Aꞌa oe taaa majajji! ¡Esohui oe caꞌacue! —acanaje cuaa. 
\p Jamatii taaa neineinaje cojjamaꞌ cuana: —Jesosa, Dabija osecua, ¡ejo jjashahuabaquicue! 
\p  
\v 32 Jamajjeya o shajjaꞌajja majje Jesosa nequiñaquinaje. Cojjamaꞌ cuana iyaa canaje: —Eꞌe, ¡poecue! ¿Aꞌya soꞌo? —poanaje. 
\p  
\v 33 —Emeshi Mese, ¡miyaya iña jjacojjapojjaqui meeꞌyocue! —poanaje. 
\p  
\v 34 Jamajjeya Jesosa cojjamaꞌ cuanajo jjashahuabaquinaje. Cojja napa canaje. Cojja napa cajje ecojja jjabapojjaquiꞌyonaje. Quea bihui nee nee poꞌyonaje jjacojjajaꞌaqui mee caꞌyajje. Jamajjeya Jesosa nijje poquinaje. 
\c 21  
\s1 Jenosanenajo Jesosa nequiñaquinaje 
\r (Macoso 11.1-11; Noca 19.28-40; Huani 12.12-19) 
\p  
\v 1 Majoya Jesosa Mepajejo nequiñaquinananaje Jenosanena pejjejo, acui tiiꞌajja yiyejo, Onimo bajjani eyiyo pejjejo peaꞌai. Nequiñaquinana majje o shajjaꞌajjajji becanejjijji peaꞌai huoojea canaje Jesosaa.  
\v 2 Jama poanaje baꞌa: —¡Poquicue Mepaje yasijje! ¡Dobiqui majje mapichi sisi, ebacua shoꞌi ai nijje ejeyo nequia nequi bañaquicue! ¡Ba majje, picho majje yecue e que!  
\v 3 Onaa: “¿Apiojji acuaeya ecua mapichi sisi pichojeaña soꞌo?” acajje, “Ecuea Emeshi Mese sa poani” sajaꞌame acue. Jamajjeya: “Ee, ocue dojoꞌajja joya mapichi” acaje dejjaa Mepajejo baꞌeya —Jesosa poanaje. 
\p  
\v 4 Eꞌe, jamaya acanaje Jesosaa, Eyacuiñajjija esohui huohuijji yahuajo nei nei ojo tehue ca poa jama baꞌa: 
\q1  
\v 5 “Ojjaña Jenosanenajo baꞌe huohuicue jama baꞌa: —¡Bacue oe! Mi huoojeaꞌyojji nei poeyani; oya quea bei nee. Jamajjeya mapichi sisija daasa biajje poeyani, mapichi sisija ebacuaja daasa biajje”. 
\m Jamaya yahuajo nei nei Jesosajo tehue ca poa Eyacuiñajjija esohui huohuijjiya. 
\p  
\v 6 Jamajjeya Jesosaa huoojea cajje o shajjaꞌajjajji poquinaje.  
\v 7 Mapichi sisi bacuajji dojo canaje. Daqui ao cuana mapichi sisija bacuaja daasaꞌ biajje iya canaje. Jesosa anisohuaquinaje mapichija bacua shoꞌi aija daasaꞌ biajje.  
\v 8 Ojjaña cuana ejjachichaqui nequi canaje, quea huiso nee nee. Ojaya daqui ao cuana ejiojjijo jeapiihui canaje Jesosa jaꞌajjequijji. Pea cuaa acui iña jajasejja canaje. Huana yiyoyiyo canaje ejiojjijo. Jama yahuajo nei Jodio cuaa emeshi mese cuana jaꞌajjequi caninaje cuiñajji yasijje, jama jaꞌajjequimeya acaninaje ohua ba cahuajje.  
\v 9 Ojjaña ehui dojojji poquije, Jesosa quishishijji poquije peaꞌai taaaca poquinaje quea bihui nee nee: —Eꞌe Jesosa, emeshi mese Dabi yahuajo baꞌe miquea etiiquiana. Mi poeyajo ecuana quea bihui nee nee. Quea pame nee nee miya, Jesosa. ¡Eyacuiñajji eyajo aniya miya cajaahuana cahua! ¡Eyacuiñajji cabihuia cahua, ojjañaa! 
\p  
\v 10 Jamajjeya Jesosa Jenosanena huasijje dobiquianijo, ojjaña cuana jomajo baꞌe cuajicuajijebenaje jjachichaquiya, ojjaña. Huohuiꞌajja canaje: —¿Aꞌya shai poeje? —poanaje. 
\p  
\v 11 —Jesosa poeje, Eyacuiñajjija esohui huohuijji nei, ma Nasanenajo baꞌenaje —sajaꞌame acanaje cuaa. 
\s1 Aquiana quiajji poani Eyacuiñajjija equijo nequi cuana huoojeacuayajea canaje Jesosaa 
\r (Macoso 11.15-19; Noca 19.45-48; Huani 2.13-22) 
\p  
\v 12 Quijje pishana Jesosa ojjaña cuana nijje Eyacuiñajjija equi yasijje poqui oꞌoyanaje. Dobiquinaje. Aquiana quiajji poani Eyacuiñajjija equijo nequi cuana huoojeacuayajea canaje Jesosaa, aquiana jjeshe poequi peaꞌai. Aquiana cuana jjahuojjojeajeaqui canaje; bejjo, pea bejjo sosejje quia cani cuanaja bejjo nequijji cuana jeapajjajea canaje; huiaꞌ quiajji peaꞌaija huiaꞌ nequijji cuana jeabichajea canaje:  
\v 13 —¡Aꞌa jja oe Eyacuiñajjija equijo aquiana quiajji! —tecueame acanaje Jesosaa—. Eyacuiñajjija esohui jama poani baꞌa: “Ecuea equi ojjaña cuana enijje emimijji”. Miquianaaya ca ca siipojji nequijji jayojja amee aña Eyacuiñajjija equi. 
\p  
\v 14 Majo tii aniya cojjamaꞌ cuana, jeoꞌajja cuana peaꞌai Jesosa que poeyanaje. Ojjaña cuana Jesosaa quea pame nee po mee caꞌyonaje.  
\v 15 Jesosaja jjaajaqui meeꞌyo cuana quea pame nee ba canaje; eshoꞌiquiana majo tii ani sohuicuayanaje shajjaꞌajja canaje peaꞌai. Jamatii Jodio etii cuana aje oe Jesosa nijje quea quene poanaje. Jesosa Eyacuiñajjija Bacua Ejja pojjeama poso tecuea canaje Moisesija etehueꞌyo huohuijji poaniya, Eyacuiñajji nijje emimijji etii cuaa. Jama poanaje baꞌa:  
\v 16 —¿Apiojji acuae jiquio eshoꞌiquiana sohuicuaya meeaña mi bihuiajji? ¿Aꞌa shajjaꞌajja jjima? 
\p —Eꞌe, shajjaꞌajjaña —Jesosa poanaje—. ¿Aꞌa miquea ba jjima Eyacuiñajjija esohui etehueꞌyo ejo? Jama poani baꞌa: 
\q1 “Joya eshoꞌi aiꞌai, eshoꞌi jjonajjona ai peaꞌai quea pame nee esohui cuaya meeꞌyojji mi bihuiaꞌyojji”. 
\m Jamaya Eyacuiñajjija esohui yahuajo nei ejo etehueꞌyo poani —Jesosa poanaje. 
\p  
\v 17 Mimi majje Jesosa poquinaje. Jea canaꞌyonaje. Jenosanenajo ani poquinaje Betania huasijje cahuiya. 
\s1 Acui etona jjajja jayojja, iquena bajjani sajjai mee caꞌyonaje Jesosaa 
\r (Macoso 11.12-14, 20-26) 
\p  
\v 18 Mecajjeahua Jenosanena huasijje poe oꞌoyanaje; quea shoe poanaje Jesosa.  
\v 19 Ba canaje ejiojji sahuajo nequi acui etona jjajja jayojja. Acuijjajja baꞌajjaqui canaje. Chamaꞌ poanaje ejjajja. Eña oo pana nequiꞌyo. Jamajjeya oya Jesosaa huohui canaje: —¡Jamajjeya jjajjamaꞌ tii capoꞌyahua acui! —Jesosaa jama acajje jjeya nei sajjainanaꞌyonaje acui. 
\p  
\v 20 Quijje pishana acui esajjaiꞌyo ba majje o shajjaꞌajjajji cuana jjajjasoaquinaje: —¡De! ¡Jjeya nei ca ca sajjaiꞌyonaje! —poanaje. 
\p  
\v 21-22 —Eꞌe —Jesosa poanaje—. ¡Miya Eyacuiñajjijo quea jaꞌa nee jjashahuabaquicue! Aꞌa jjashahuabaquijji jama baꞌa: “Eꞌe pojjaꞌa Eyacuiñajjija eya shajjaꞌajjaꞌyo jjima”. Cho, jama jjashahuabaquicue baꞌa: “Eyacuiñajjiya eꞌe jojo nei nei eya sajaꞌa cajeꞌyo”. Jamaya miya jjashahuabaquiajo, Eyacuiñajjiya miquea esohui sajaꞌa caje. Eꞌe, Eyacuiñajjiya e jayojja jama ameesahua cajeꞌyo peaꞌai, ma dejjaa ajjima acani. 
\s1 ¿Aya acuae Jesosa huoojea canaje esohui huohuiya? 
\r (Macoso 11.27-33; Noca 20.1-8) 
\p  
\v 23 Majoya Jesosa Eyacuiñajjija equi yasijje dobiqui oꞌoyanaje. Esohui huohui canijo, Jodio etii cuana, Eyacuiñajji nijje emimijji etii cuana peaꞌai o que poeyanaje. Jesosa ojaya ba jjimajo huohuiꞌajja canaje: —¿Aya acuae mi huoojea canaje? ¿Apiojji acuaeya esohui huohuiaña soꞌo? ¿Apiojji acuaeya aquiana quiajji poani huoojeacuayajeanaje oma mecajje? —acanaje Jodio etii cuaa. 
\p  
\v 24-25 Jesosaa oya cuana sajaꞌa canaje: —Eꞌe, eyaya miya ebionei huohuiꞌajjaje. ¿Aya Huani huoojea canaje ona besa meeya? ¿Aꞌa Eyacuiñajjiya? ¿Aꞌa dejja cuaa pojjaꞌa? ¡Huohuicue mo! Eyaya majoya huohuije e huoojeaꞌyojji epo. 
\p  
\v 26 Shajjaꞌajja majje Jodio cuana ojee mimimiminaje: —¿Yajja sajaꞌame shai eseya aje soꞌo, de? Quea mete ojjaña dejja cuanajo. Ojjañaa ba cani Huani Eyacuiñajjiya huoojea canaje esohui huohuiya. Jamajjeya: “Dejjaa Huani huoojea canaje” eseya ajje se jajahuejjajea ca chanaꞌ meiya. “Eyacuiñajjiya Huani huoojea canaje” eseya ajje aje se oe jama acaje baꞌa: “Jamajje, ¿apiojji miyaya Huani shajjaꞌajja jjima aña?” Jesosaa acaje. 
\p  
\v 27 Jamajjeya jjashahuabaqui majje Jesosa huohui canaje Jodio cuaa: —Cuaꞌa, de. Ecuanaja ba jjima —anisho canaje. 
\p —Jamajjeya ecuea miya ehuohuijji pojjeama e huoojeaꞌyojji epo —Jesosaa acanaje Jodio esohui huohuijji cuana, etii cuana peaꞌai. 
\s1 Esohui ejjashahuabaqui meejji beca ebacua ejjajo 
\p  
\v 28 Jesosaa oya Jodio cuana huohui canaje peaꞌai jama baꞌa: —Shajjaꞌajjacue oe ecue sohui ejjashahuabaqui meejji jama baꞌa: Oe dejjaja becanejjijji peaꞌai ebacua ejja yaninaje, shacuimaꞌ nequi cuana. Ejeajjiya oja bacua ejja etii huohui canaje: “Cha, ¡che oe jjeya que chacoquicue!”  
\v 29 “Cho, cajaa. Mijo chaco sa poꞌyo ajja ca iña” poanaje. Jamatii, jjashahuabaqui majje “Cachacoquiahua” poanaje. Poquinaje que yasijje. 
\p  
\v 30 —Ejeajjiya oja pea ebacua ejja, echahua mese huohui canaje peaꞌai: “Cha, ¡che oe que chacoquicue jjeya!” poanaje. “Eꞌe ecue Chii, jaaya chacoquije aje ca eya” poanaje. Jamatii poqui jjima poanaje, de. 
\p  
\v 31 —Jamajjeya ¿ache eshoꞌi oja chiija ehuohui jama poanaje? ¿Achajja acuae miña jjashahuabaquiani? 
\p —Eꞌoꞌi mese —acanaje cuaa. 
\p —Eꞌe —Jesosa poanaje—. Eyaya miya eꞌe nei huohuiaña jama baꞌa: Jiquio ecua eꞌoꞌi mese jjashahuabaqui majje oja chiiya huohui canaje jayojja jama acanaje jama jayojja dejja mimishi cuana, epona pea cojjojji poani peaꞌai. Eyacuiñajji nijje jjapeecuajiquiani oja ejaahuanajji. Miquiana ca mi ca oe, cho. Eyacuiñajji nijje jjapeequi jjima.  
\v 32 Eꞌe, Huani, ma ona besameejji poa yahuajo nei poeya poa miquiana ba meesahuaa. Huohui ca poa jama baꞌa: “¡Miquea mimishijo quea yeno pocue! ¡Mimishi cuana pajeaꞌyocue Eyacuiñajjija esohui jama ebaꞌejji, onijje ejjapeequijji!” Huani poa. Miquianaya aje oe Huani shajjaꞌajja sa po ajja poanaje. Dejja mimishi cuana, epona quea mimishi cuanaya ca ca shajjaꞌajja majje: “Eꞌe, ¡Eyacuiñajji nijje ejjapeequi, mimishi cuana ejjapajeaquiꞌyo!” poanaje. Ma ba majje jamatii miquianaya jjashahuabaqui jjima, Eyacuiñajjija esohui jama a sa po ajja tii poanaje —Jesosaa acanaje Jodio etii cuana. 
\s1 Pea esohui ejjashahuabaqui meejji jjonojjajja yiyejo 
\r (Macoso 12.1-12; Noca 20.9-19) 
\p  
\v 33 —¡Jiquio shajjaꞌajjacue pea esohui ejjashahuabaqui meejji! —Jesosa poanaje—. Oe dejjaa emeshi meseya que quea quemo nee neejo bana canaje jjonojjajja oo pana, uva. Que peeyi canaje meija peeyi. Majoya que yiyesamajo equishipashajji iya canaje, mei cueehue iñaca canaje jjonojjajja na quishipashajeajji. Majoya mei iyasohua aoꞌao majje peehuana canaje que jaahuanajji quea huesha nee ojaya ebajji. Pea echacojji cuana iyaa canaje. Huohui canaje emeshi meseya: “¡Ecuea que jaahuanacue! Jaahuana sosejje quiajeꞌyo oya jjonojjajja quea huiso nee” poanaje. Majoya emeshi mese quea huesha poquinaje.  
\v 34 Quijje jjonojjajja jahuajo emeshi meseya pea o chacosahuajji poani beca huoojea canaje que jaahuanajji que, jjonojjajja jjequiya. Que jaahuanajji bañaqui majje huohui canaje jama baꞌa: “¡Che mo jjonojjajja joya ecuea emeshi meseya pa cadojoꞌyahua, de!” poanaje. 
\p  
\v 35 —Que jaahuanajji cuana quea mimishi poanaje. Jjonojjajja quia sa po ajja, joya emeshi meseja iya tepe mee. Jamajjeya o chacosahuajji cuana iña canaje, cuiajea canaje, pea quecua canaje, pea jajahuejjajea canaje meiya.  
\v 36 Emeshi meseya pea huoojea ca oꞌoyanaje huacuaya o chacosahuajji poani quea huiso pishana. Jamatii yahuajo jama acanaje que jaahuanajji cuaa. Cuiajea ca oꞌoyanaje peaꞌai.  
\v 37 Quijje yejje nei oja bacua ejja oe nei huoojea canaje que jaahuanajji baa: “Eꞌe, ohuaya ecuea ebacua ejja shajjaꞌajja caje” poanaje emeshi mese.  
\v 38 Cho, oja bacua ejja poeje ba majje jama poanaje baꞌa: “Joya emeshi meseja bacua ejja poeje. Jiquio meshi quijje ojaya poaje, ejeajji manoꞌyajo. ¡Cuaꞌa, ejjaquecuajeaqui oya eque mesenaꞌyojji! Jamajjeya meshi esejaya tii poajeꞌyo, de” poanaje que jaahuanajji quea mimishi cuana. 
\p  
\v 39 —Jamajjeya aje oe ebacua ejja iña canaje, quecuajea canaje, jeaqui canaje quea huesha nee, que jaahuanajji cuaa. Mahuiso esohui. 
\p  
\v 40 —Jamajjeya emeshi meseya poe oꞌoya majje ¿yajja acuae acajeꞌyo jiquio que jaahuanajji quea mimishi cuana? —Jesosaa huohuiꞌajja canaje Jodio cuana. 
\p  
\v 41 —Oya quea quene nee nee poajeꞌyo. Ma que jaahuanajji quea mimishi cuana quecuajea cajeꞌyo, de. Que cuiña meequi cajeꞌyo pea cuana, joya ojjaña jjonojjajja shejo jjasosequiaquijji cuana —acanaje Jodio cuaa. 
\p  
\v 42 —Eꞌe —Jesosa poanaje—. ¿Aꞌa miquea eba Eyacuiñajjija esohui etehueꞌyo yahuajo nei? jama baꞌa: 
\q1 “Oe equi yamajjana equi iyajji cajaa aca poa cuaa. Jamatii Eyacuiñajjiya ma eyamajjana equi yamajjana quea caꞌa nee nequi mee ca poa. Jamajoya ojjaña ojaya epeejji cuanaa Eyacuiñajji bihuia cani”. 
\m Jamaya yahuajo nei tehue ca poa ejo; eya ma eyamajjana equi iyajji jayojja jama quea caꞌa nee nee nequi —Jesosaa acanaje. 
\p  
\v 43 —Eꞌe, jiquio esohui eba meesahuajji jayojja jama Eyacuiñajjiya acajeꞌyo —Jesosa poanaje—. Ohuaya yahuajo nei miquianaya babaca caꞌya poa ojo echacoꞌyojji, onijje ebaꞌe tiitiiꞌyojji. Jjeya ca ca Eyacuiñajjiya miquianaya, Jodio cuana, cajaa acajeꞌyo shajjamaꞌ jojoya. Pea cuana babaca cajeꞌyo ojo echacojji, onijje ebaꞌe tiitiiꞌyojji peaꞌai, joya eꞌe jojo nei ojo jjashahuabaquiani. 
\p  
\v 44 —Jiquio ecua eyamajjana cajaa aca poa cuaa jjeya quea caꞌa nee nequi jama eya miquianaaya cajaaya anaje; jjeya ca ca iña quea caꞌa nee eya nequiꞌyo. Ojjaña joya e ba jjima e cajaa amajje quea yeno poaje, de. E cajaa tiitii amajje ca ca quea nee nee po tiitiijeꞌyo —Jesosa poanaje. 
\p  
\v 45 Jesosaja esohui shajjaꞌajja majje Moisesija etehueꞌyo huohuijji cuana, Eyacuiñajji nijje emimijji etii cuana peaꞌai quea quene nee poanaje: —¡De! Ecuanajo oya mimiani, equi yamajjanajo pojjeama. Eseya que jaahuanajji quea mimishi jayojja peaꞌai ohuaya acani —poanaje Jodio cuana. 
\p  
\v 46 Jamajjeya Jesosa iña sa acanaje ejeanobiajeajji. Jamatii iña jjima; quea mete poanaje. Ojjaña dejja echichaꞌyo nequicaꞌyo cuaa Jesosa Eyacuiñajjija esohui huohuijji nei nei ba cani. Onajaya quea nahue nee nee Jesosa eꞌiñajji. 
\c 22  
\s1 Ebacua ejjaja ejjahuanaquijjijo ojjaña ijjia meeꞌajja ca poa ejeajjiya 
\r (Noca 14.15-24) 
\p  
\v 1 Jamajjeya Jesosaa o poe oꞌoyajjijo pea esohui ejjashahuabaquijji huohui canaje Jodio cuana huasijje jama baꞌa:  
\v 2 —Eyacuiñajjiya ojjaña cuana huoojeaꞌyojji poajo jamaya poaje: Oe emeshi meseya oja bacua ejjaja ejjahuanaquijjijo bobi quea huiso dahua mee canaje ojaya epeejjija eꞌijjiajji nisho.  
\v 3 Ojjaña apoa poajo, o chacosahuajji huoojea canaje epeejji cuana iyaaa, bobi ijjiajji. Cho, poe sa po ajja poanaje.  
\v 4 Jamajjeya emeshi meseya pea chacosahuajji cuana huoojea canaje. “¡Jamaya acue!” poanaje: “Epeejji, ¡poecuajicue oe! Ojjaña apoa. Anaꞌai quea sei quecua meenaje. Bobi cuana apoa, ojjaña. ¡Poecue ecue ebacua ejjaja ejjahuanaquijjijo quea bihui nee epojji! acue” emeshi mese poanaje. 
\p  
\v 5 —Jamatii jjashajjaꞌajjaqui ajja poanaje cuana. Poe ajja. Beca cuana que yasijje poquinaje; peaa aquiana quiaa poquinaje;  
\v 6 pea cuaa emeshi meseja echacosahuajji iña majje cuia canaje, quecua caꞌyonaje.  
\v 7 Ma shajjaꞌajja majje emeshi mese quea quene poanaje. Sohuinano cuana huoojea canaje dejja shajjamaꞌ iñaa. Quecuajeyo caꞌyonaje; equi cuana dahuajea canaje, sohuinano cuaa.  
\v 8 Majoya emeshi meseya o chacosahuajji iyaa canaje pea cuana: “Ojjaña apoa eꞌijjiajji ejjahuanaquijjijo. Pea cuana epeejji nisho poanaje, jamajjeya epoejji pojjeama. Cajaa.  
\v 9 ¡Poquicue! Quea huesha baꞌe cuana iyaaquicue: —¡Poecue emeshi meseja bacua ejjaja ejjahuanaquijji yasijje! ¡Bobi quea huiso ijjiahuacue! —acue” emeshi mese poanaje. 
\p  
\v 10 —Jamajjeya poquinaje. Ojjaña cuana iyaa canaje; dejja quea pame, dejja quea mimishi cuanaya. Quea huiso poeyanaje. Dobiquinaje. Equi cuio canaje. Chamaꞌ pea eꞌanijji poanaje.  
\v 11 Majoya emeshi meseya ojjaña cuana baa poeyanaje, ojjaña cuana nijje mimiya. Ba canaje oe dejja daqui jehuejji.  
\v 12 “Epeejji, ¿apiojji acuae miya poeyanaje daqui quea jehuejji? ¡Jamaya pojjeama ecue bacua ejjaja ejjahuanaquijji yasijje epoejji!” poanaje. Sajaꞌa jjima ma dejjaja.  
\v 13 Jamajjeya emeshi mese quea tecue poanaje. Iyaa canaje o chacosahuajji: “¡Oya jeyo majje jeaquicue quea misi nee yasijje! Jomajo pa neineijeꞌyo, eseꞌ ijjiayaijea cajeꞌyo quea nee neejo” poanaje. Mahuiso ecuea esohui —Jesosa poanaje. 
\p  
\v 14 —Eꞌe, ojjaña cuana iyaaꞌajja caje Eyacuiñajjiya. Jamatii oe pojji dobiquijeꞌyo onijje ebaꞌe tiitiiꞌyojji —Jesosaa ojjaña cuana acanaje. (Eꞌe, Eyacuiñajjiya Jodio cuana iyaa coo canaje onijje ebaꞌeꞌyojji quea bihui nee. Jamatii shajjamaꞌ poanaje. Ojaya huoojeaꞌyo quecuajea canaje. Jamajjeya Eyacuiñajjiya Jodio pojjeama iyaa canaje. Quea huiso poeyanaje. Ma dejja daqui jehue jayojja jama beca cuanaja mimishi cuijeaꞌyo jjima. Jamajoya jeacuayajea cajeꞌyo quea nee nee epoꞌyojji.) 
\s1 Bejjo oe pojji quia cajji baꞌe sosejje emeshi meseja yajji 
\r (Macoso 12.13-17; Noca 20.20-26) 
\p  
\v 15 Jesosa mimije shajjaꞌajja majje Paniseo cuana quea quene poanaje: —Oya Jesosa jjashahuabaquiani eseya epeejji nisho jayojja jama, de —poanaje. 
\p Poqui majje ojee mimimiminaje: —Cuaꞌa, Jesosa ejjadasiaquiqui; esohui quea camaja nee ejjahuohuiꞌajjaquiqui, ojaya yajja sajaꞌame yaꞌyojji. Jamajjeya Moisesija etehueꞌyo jayojja jama mi sajaꞌa cajo, cacuiajea meequiꞌyahua. 
\p  
\v 16 Jamajjeya Paniseo cuaa o shajjaꞌajjajji cuana, joya Enodeja esohui quea boti nee poani peaꞌai huoojea canaje Jesosa que. Huohuiꞌajja mee canaje jama baꞌa: —Esohui huohuijji, miyaya eꞌe jojo nei huohuiaña Eyacuiñajjija ejjashahuabaquiꞌyojji jama. Miya etii cuanajo jjashahuabaqui ajja; emeshi mese cuanajo peaꞌai meteꞌama. Jamajjeya quea jaꞌa nee huohuiaña.  
\v 17 Eꞌe. Jamajjeya mo oe che huohuicue: ¿Aꞌa bejjo quia cajji Shomano meshi mese Sesa bajjanija yajji? ¿Aꞌa equiajji pojjeama esejaya pojjaꞌa? ¿Aꞌa cuae jja ma Sesaja meshijo baꞌe sosejje quia cajji soꞌo? —acanaje cuaa. 
\p  
\v 18 Ma Jodio cuanaja ejjashahuabaquijji Jesosaja eba poanaje. Jamajjeya: —¡Miquianaya ca mi ca oe e dasiajji nisho cuana, epeejji nisho quea tai nee nee! ¿Apiojji nequiaa eya dasia sa aña?  
\v 19 ¡Bejjo mo huohuiꞌajjacue esodojjo! —poanaje. 
\p  
\v 20 Jjequi canaje cuaa. Esodojjo ba majje huohuiꞌajja canaje Jesosaa: —¿Ae ecajjaꞌyo jiquio? ¿Ae bajjani tehuemeꞌya? 
\p  
\v 21 —Emeshi mese ecajjaꞌyo, Sesa bajjani —acanaje Jodio cuaa. 
\p —Eꞌe —poanaje Jesosa—. Jamajjeya ¡Sesaja bejjo quiaquicue ohua sa cajo! ¡Eyacuiñajji aꞌa pajeaꞌyojji; oya bihuiacue, shajjaꞌajjacue peaꞌai! 
\p  
\v 22 Jesosa shajjaꞌajja majje ojjaña cuana quea mete nee poanaje: —¡Quea jjashahuabaqui jaꞌa nee nee oya Jesosa! ¡Jjadasia meequi ajja! 
\p Jamajjeya poquinaje, jeana caꞌyonaje Paniseo cuaa. 
\s1 ¿Aꞌa eꞌe jojo nei manoꞌyo majje shequije oꞌoya quijje? —huohuiꞌajja canaje cuaa Jesosa 
\r (Macoso 12.18-27; Noca 20.27-40) 
\p  
\v 23 Ma pojjajo tii beca Sanoseo cuana poeyanaje Jesosa huohuiꞌajjaa. Sanoseo cuana aje oe jama poani baꞌa: —Manoꞌyo majje jama tii tii; eshequi oꞌoyajji pojjeama quijje. 
\p Jesosaja ca ca jama sohuihuohuime ajjima. Jamajjeya Jesosa huohuiꞌajja canaje Sanoseo cuaa; edasiajji nisho jama acanaje baꞌa:  
\v 24 —Esohui huohuijji, Moisesiya jama tehue ca poa yahuajo nei nei baꞌa: “Dejja ejjahuanaqui, bacuamaꞌ manoꞌyajo, oja chahuaa ehuanase equijjojea ani cahuana caꞌyahua, oja oꞌija bacua jea jayojja jama epojji”. ¿Aꞌa eꞌe?  
\v 25 Jamajjeya jama poso baꞌa: Quea huiso edoe mese, me oejje pea beca nequia poa. Eꞌoꞌi mese ebionei jjahuanaquia poa eponajo. Manoꞌyonaje bacuamaꞌ tii. Oja chahuaa epona equijjojea ani huana ca oꞌoyanaje, bacuamaꞌ tii ani.  
\v 26 Oya jayojja manoꞌyonaje bacuamaꞌ tii. Jamajjeya peaa echahua meseya huana ca oꞌoyanaje. Manoꞌyonaje bacuamaꞌ peaꞌai. Jamaya ojjaña manojeyoꞌyonaje.  
\v 27 Quijje ehuanase peaꞌai manoꞌyonaje.  
\v 28 Jamajjeya shequi oꞌoya majje eyajo, ¿ajea ehuanase epona poaje, ache edoe meseja? Ojjaña echahua cuana hueaꞌajjaꞌyo epo —Sanoseo cuaa acanaje. 
\p  
\v 29 Jesosaa sajaꞌa canaje jama baꞌa: —Chojja. Jamaya pojjeama. Miquea ba jjima Eyacuiñajjija esohui; oya quea caꞌa nee nee miquea ba jjima peaꞌai.  
\v 30 Eꞌe, shequi oꞌoya majje ejjahuanaquiꞌyojji pojjeama. Esohuidojojji eyajo ani jama poaje.  
\v 31 Cuanaya ¿aꞌa miquea ba jjima dejja cuana ojjaña manoꞌyo majje shequije oꞌoya? Jamajjeya Eyacuiñajjiya yahuajo nei esohui tehue mee ca poa miquiana jjabahuejjaquijji. Jamaya poa baꞌa:  
\v 32 “Eya ca ca iña Amajama jaahuanajji, Isaaca, Jacobo peaꞌai jaahuanajji”. ¿Aꞌa Eyacuiñajjiya emanoꞌyo cuana meshijo eꞌohuajea jaa jaahuana cani? Cho. Ojaya epeejji cuana eshe nequi, manoꞌyo majje shequiꞌyo peaꞌai jaahuana cani Eyacuiñajjiya —Jesosaa acanaje. 
\p  
\v 33 Jesosaja esohuijo ojjaña cuana quea bihui nee poanaje: —¡Quea pame nee ohuaya Jesosaa huohui cani! —poanaje cuana. 
\s1 ¡Eyacuiñajji quea jea nee acue, mi pejjejo nequi cuana peaꞌai! 
\r (Macoso 12.28-34) 
\p  
\v 34 Majoya Paniseo cuaa shajjaꞌajja canaje Jesosa quea jjashahuabaqui jaꞌa nee; Sanoseo cuana jjadasia meequi ajja. Jamajjeya jjachichaqui majje ojee jjashahuabaqui oꞌoyanaje Jesosa dasiaquijji, esohui quea camaja nee ehuohuiꞌajjaquijji.  
\v 35 Majoya Jesosa que poe oꞌoyanaje Paniseo cuana. Dasiaꞌyohua nisho Moisesija etehueꞌyo huohuijjiya huohuiꞌajja canaje jama baꞌa:  
\v 36 —Esohui huohuijji, yahuajo Moisesiya tehue ca poa Eyacuiñajjija esohui. ¿Ache esohui quea pame nee nee eꞌajji? 
\p  
\v 37 Jesosaa acanaje: —Eꞌe, jamaya quea pame nee acue baꞌa: 
\q1 “¡Eyacuiñajji miquea Emeshi Mese nei quea jea nee nee acue! Miquea huapa pojjeama cuana miquea quea jea; ¡quea jea nee neeya oe acue Eyacuiñajji! Jamajjeya ¡ojo jjashahuaba tiitiiquicue!” 
\m  
\v 38-39 Jiquio ehuohuiꞌyo quea pame nee. Pea oya jayojja quea pame nee jama baꞌa: 
\q1 “¡Ojjaña pea cuana quea jea nee acue, miquea huapa pojjeama jama quea jea neeya oe acue!” 
\m  
\v 40 Jamaya miya poajo miya Moisesija etehueꞌyo jama baꞌe; Eyacuiñajjija esohui huohuijji yahuajo nei baꞌeja esohui jama baꞌe peaꞌai —Jesosa poanaje. 
\s1 Eyacuiñajjija huoojeaꞌyo dejja jaahuanajji Quito 
\r (Macoso 12.35-37; Noca 20.41-44) 
\p  
\v 41 Jamajjeya ojjaña Paniseo cuana jjachichaquiajo oya cuana huohuiꞌajja canaje Jesosaa:  
\v 42 —¿Yajja huohuime acuae nequiaa aña Eyacuiñajjija huoojeaꞌyo dejja jaahuanajjijo Quitojo? ¿Ache etiiquianaja osecua oya? 
\p —Quito emeshi mese Dabija osecua, ma yahuajo baꞌya poaja —acanaje Paniseo cuaa. 
\p  
\v 43 —Jamajjeya ¿yajjajje acuae Eyacuiñajjija Edojjoshahua Pameya emeshi mese Dabi jama amee ca poa yahuajo baꞌa: “Eyacuiñajjija huoojeaꞌyo ojjaña jaahuanajji Quito ecuea Emeshi Mese nei”? Yahuajo nei Dabiya jama huohui ca poa peaꞌai baꞌa: 
\q1  
\v 44 “Eyacuiñajjiya ecuea Emeshi Mese Quito jama aca poa: —¡Enijje anioquecue ebianei mijijje ojjaña cuana huoojeaꞌyojji! Eyaya mi quecuajji nisho epo jeabichajea jeyojeyojeꞌyo”. 
\m Jamaya huohui ca poa yahuajo Dabiya ejo.  
\v 45 Eꞌe, Dabiya Eyacuiñajjija huoojeaꞌyo Quito aca poa “Ecuea Emeshi Mese”. Jamajjeya Quito Dabija Emeshi Mese nei poani. Jamatii oya Dabija osecua peaꞌai, de —Jesosaa acanaje—. Eya, Eyacuiñajjija huoojeaꞌyo, dejjaja jea pojjeama; Eyacuiñajjija Bacua Ejja. Jamajjeya eya ojjañaja Emeshi Mese nei. 
\p  
\v 46 Jesosa mimije shajjaꞌajja majje Paniseo cuana quea mete poanaje. Jeca poanaje, mimimaꞌyo aninaje; huohuiꞌajja becaꞌyo jjima tii acanaje. 
\c 23  
\s1 —¡Aꞌa Jodio esohui huohuijji jama baꞌejji! —Jesosa poanaje 
\r (Macoso 12.38-40; Noca 11.37-54, 20.45-47) 
\p  
\v 1 Majoya Jesosaa ojjaña cuana, o shajjaꞌajjajji cuana peaꞌai huohui canaje jama baꞌa:  
\v 2 —Moisesija etehueꞌyo huohuijji, Paniseo cuana peaꞌai miquea esohui huohuijji.  
\v 3 Jamajjeya ¡oya cuana shajjaꞌajjacue! ¡Ojaya esohui jayojja jama acue ojjaña! Jamatii oya cuana aje oe esohui jama baꞌe ajja; quea mimishi. Jamajjeya ¡aꞌa o jayojja baꞌejji! —poanaje—.  
\v 4 Eꞌe, jamaya poani baꞌa: Dejjaa aquiana quea biquie abo mee cani pea dejja. Jamatii huanasohua sahua ajja, de, quea mimishiya jjejojo. O jayojja Jodio esohui huohuijjiya pea cuana baꞌe meesahua ajja Eyacuiñajjija etehueꞌyo jama —Jesosa poanaje. 
\p  
\v 5 —Quea pame poso oya jjabaquiani onaja ebihuiajji: “Eꞌe de, oya esohui huohuijji quea pame nee” epo meejji acani. Jamajjeya esohui etehueꞌyo quea quemo jjasapahuahuo iyaquiani, aa huahuo peaꞌai ojjañaja ebajji. Daqui quea pame nee nee, quea ao nee huosho cani ojjañaja ebajji peaꞌai.  
\v 6 Ojee ijjiaꞌijjianijo, emeshi mese pejjejo anioqueani ebionei ijjia sa poanijo. Jodioja equi ojee ejjachichaquijjijo peaꞌai ebionei anioque sa poani Eyacuiñajjija esohui huohuijji pejjejo, ojjaña nijje emimimimijji. “Eꞌe, oya cuana Eyacuiñajjija esohui huohuijji nei quea pame nee” epo meejji acani.  
\v 7 Ejiojjijje poquiani ojjañaa aquiana quia cani yasijje anicuaa, pea cuaa jama bihuia cani baꞌa: “Esohui huohuijji, miya quea pame nee nee.” Jamaya aje oe ojaya quea boti nee, jiquio Jodio etii cuanaja, esohui huohuijji quea pame nee poso jjabaquiani —Jesosa poanaje. 
\p  
\v 8 Jamajjeya o shajjaꞌajjajji cuana Jesosaa acanaje peaꞌai jama baꞌa: —¡Aꞌa miquianaya o jayojja jama pojji! Pea cuana aꞌa jjabihuia meequijji: “¡Miya esohui huohuijji quea pame nee nee!” aꞌa jjapo meequijji cuana. Cho. Miquea Esohui Huohuijji quea pame nee oe nei yani, miquea Emeshi Mese nei. Miquianaya ecuea epeejji cuana ca ca Eyacuiñajjiya ba cani pea epeejji jayojjaya.  
\v 9 Oe nei eyajo ani eseja Chii. Jamajjeya ¡esohui huohuijji oya jayojja “Esejaya Chii” aꞌa ajji!  
\v 10 Cuanaya Eyacuiñajjija huoojeaꞌyo ojjaña jaahuanajji, Quito miquiana huoojeaꞌyojji nei nei. Jamajjeya pea cuana “ese huoojeaꞌyojji nei” aꞌa jjapo meequijji.  
\v 11 Eꞌe, ¡emeshi mese jayojja jama nequi sa poani ca ca pea cuana chacosahuacue!  
\v 12 Jamajjeya joya emeshi mese poso jjabaquiani Eyacuiñajjiya emeshi mese pojjeama acajeꞌyo. Echacosahuajji jjabaquiani ca ca Eyacuiñajjiya emeshi mese jayojja po mee cajeꞌyo —jamaya acanaje Jesosaa o shajjaꞌajjajji cuana. 
\s1 Jesosaa Jodio etii cuana tecuea canaje 
\p  
\v 13 Majoya Jesosaa Paniseo cuana, Moisesija etehueꞌyo huohuijji poani peaꞌai jama tecueame acanaje baꞌa: —Miquianaaya aje oe Moisesija etehueꞌyo huohuiaña, Jodioja esohui huohuijji poaniya peaꞌai. Jamatii miya ca mi ca oe esohui huohuijji nisho, siajjepojji. Eꞌe, miquianaya Eyacuiñajji nijje jjapeequi ajja. Pea cuana Eyacuiñajji nijje jjapeequi sa poani miyaya jjapeequipajea meeyaña, de. Eꞌe, jiquio ecua esecue caꞌa cani cuaa ona edobiqui poani jjejojo jama jayojja miquiaaya pea cuana dobiqui mee ajja eyahuasijje Eyacuiñajji nijje ebaꞌe tiitiiꞌyojji. Jamajoya miquianaya quea nee nee po mee cajeꞌyo quijje, quea nee nee tii tii, de —Jesosa poanaje. 
\p  
\v 14 —Eꞌe, miquianaya ca ca oe eꞌahuemanoja equi cuana jjesheaña sosemaꞌ. Majoya Eyacuiñajji nijje mimi nishoani quea huiso nee. Jamajoya Eyacuiñajjiya miquianaya cajaa acajeꞌyo. Quea nee nee po mee cajeꞌyo tii tii —Jesosa poanaje. 
\p  
\v 15 —Jodioja esohui huohuijji cuana, Moisesija etehueꞌyo huohuijji cuana peaꞌai, miquianaya aje oe esohui huohuijji nisho, peajja. Miquianaaya chaco neineiaña; quea huesha poquiani peaꞌai pea cuana Moisesija etehueꞌyo shajjaꞌajja meeya. Jamatii mi shajjaꞌajjajji cuana mi jayojja quea mimishi nee nee. Jamajoya oya cuana eꞌe jojo nei quea nee nee po mee cajeꞌyo, mi jayojjaya —Jesosa poanaje. 
\p  
\v 16 —Eꞌe, miquianajaya ehuohui quea quehuajo cojjamaꞌ jama poani. Cojjamaꞌ cuana pea cojjamaꞌ cuaa me iña majje mepejjejea cani jayojja. Ojjaña poquiquehuajeꞌyo —Jesosa poanaje—. Miquea ehuohui jama baꞌa: “Eyacuiñajjija equi nequianijo, ecuea ehuohui jama eyaya eꞌe jojo nei aje”. Pea cuana jama poani baꞌa: “Chojja, jamaya mimi majje miquea ehuohui jama eꞌajji pojjeama”. Jamaya huohui cani cuaa peaꞌai baꞌa: “Ma mei huoꞌo Eyacuiñajjija equijo anijo, ecuea ehuohuiꞌyo jayojja jama eyaya aje”. “Eꞌe, ¡jamaya mimi majje miquea ehuohui jayojja jama eꞌe jojo nei acue!” pea cuana poani. Jamaya mimi quehuani miquianaya —Jesosa poanaje. 
\p  
\v 17 Oya cuana tecuea canaje jama peaꞌai baꞌa: —Chojja, de. Miquianaya jjashahuaba quehuaquiani. Mei huoꞌo Eyacuiñajjija equijo quea pame ani; Eyacuiñajjija equi quea pame nee peaꞌai.  
\v 18 Miquianajaya pea ehuohui quea quehua peaꞌai jama baꞌa: “Mei ehuana huichaꞌa huichaꞌa pea mei biajje yani Eyacuiñajjija equijo aquiana dahuajji, Eyacuiñajji bihuiajji. Ma mei eꞌiya cuana nequianijo, eyaya ecuea ehuohui jayojja jama eꞌe jojo nei aje” amajje, dejja ojaya ehuohui jama eꞌajji pojjeama, miquianaya poani. Jiquio jama poani baꞌa: Aquiana mei eꞌiya biajje huana cani cuaa. Majoya jama mimiani baꞌa: “Ma aquiana mei eꞌiya biajje yanijo, ecuea ehuohui jayojja jama eyaya aje”. “Eꞌe, ¡jamaya mimi majje ca ca miquea ehuohui jayojja jama eꞌe jojo nei acue!” ¡Miquianaya jamaya mimi quehuaꞌani cuana!  
\v 19 ¡Ma ehuohuiꞌyo cajaa! —Jesosa poanaje—. Mei eꞌiya quea pame nee; aquiana mei eꞌiya biajje ani quea pame peaꞌai. Pea jayojjaya.  
\v 20 Jamajjeya dejja mei eꞌiyajo mimianijo oya ojjaña aquiana mei eꞌiya biajjejo mimiani peaꞌai. Pea jayojjaya poani. ¡Jamaya aꞌa mimijji ma aquiana cuanajo! —Jesosa poanaje.  
\v 21 —Miquianaya Eyacuiñajjija equi yasijje mimiani cuana jama baꞌa: “Eyaya ecuea ehuohuiꞌyo jayojja jama eꞌe jojo nei aje Eyacuiñajjija equi yanijo”. Jamaya aje oe miya mimiani Eyacuiñajjijo, ma equijo baꞌyanijo peaꞌai. Jamajjeya ¡Eyacuiñajjija equi yasijje aꞌa jama mimijji!  
\v 22 Pea cuana mimianijo eyahuasijje jama poani baꞌa: “Eyajo Eyacuiñajjija ebaꞌejji yanijo eyaya ecuea ehuohuiꞌyo jayojja jama eꞌe jojo nei aje. Ecuea esohui eꞌe nei pojjeama jojjemo eya quea nee capoahua”. Jamaya amajje miya Eyacuiñajjija ebaꞌejjijo mimiani; “Eyacuiñajji eyajo aniya eya ba canijo, eyaya ecuea ehuohuiꞌyo jayojja jama eꞌe jojo nei aje”. “Ecuea ehuohuiꞌyo jayojja jama ajjima jojjemo eya quea nee po mee caꞌyome” beshahua nei aña; oya jayojjaya. Jamajjeya ¡aꞌa jamaya mimijji Eyacuiñajjijo; quea tai! —Jesosa poanaje. 
\p  
\v 23 Majoya Jesosaa Moisesija etehueꞌyo huohuijji cuana, Paniseo cuana peaꞌai jama tecueame acanaje baꞌa: —Miquea aquiana bobi quea johua eꞌajji equi pejjejo pohuani. Tiiyajo quiaña iye huiso Eyacuiñajjija epojji, ojaya ehuohuiꞌyo jayojja jama poani: 
\q1 “Miquianajaya aquiana ipiacue; ome miji peaꞌai, 10 oya jayojjaya, oe Eyacuiñajjija epojji, pea me oejje ebeca pee peaꞌai, 9 miquea epojji”. 
\m Eyacuiñajji yahuajo nei jamaya poa. Jamaya miya poani. Quea pame. Jamatii de, Moisesija etehueꞌyojo quea jaꞌa jjashahuaba tiitiiqui ajja. Jamaya quea tai aña baꞌa: Miya eꞌe jojo nei jjashahuabaqui jjima, siajje poani, jjashahuabaqui ajja aemaꞌ cuana baꞌe meesahuajji. Eyacuiñajjija esohui jayojja jama po tiitii ajja. Jamajjeya ¡Eyacuiñajjija etehueꞌyo jama baꞌecue! ¡Majoya Eyacuiñajji yasijje iye huiso quiacue ojjaña miquea aquiana peaꞌai! —Jesosa poanaje. 
\p  
\v 24 —Miquianaya cojjamaꞌ jama; jjashahuabaqui ajja peaꞌai. ¿Aꞌa huashapa bobijo anidobiquiajo jeajeaꞌaña, jamatii aquiana quea quemo anidobiquiajo ijjiajeaña? Jamaya miya poani; ojjaña miquea aquiana quea biso peaꞌai ipiaꞌajja majje iye huiso quiaña Eyacuiñajjija epojji. Jamatii pea cuana baꞌe meesahua ajja, de. Jamajoya Eyacuiñajjiya miquianaya cajaa acajeꞌyo; quea nee nee po mee cajeꞌyo —Jesosa poanaje. 
\p  
\v 25 —Eꞌe Paniseo cuana, miquianaya Moisesija etehueꞌyo huohuijji peaꞌai. Jamatii miquianaya ca ca oe esohui huohuijji nisho de, quea tai. ¿Aꞌa caneco cueehue topo cani cuaa ena ishi jjimahuajo, jamatii eyiyedojjojje quea ihui shacua jjima? Jamaya miya. Jjabaquiani quea pame jayojja. Jamatii quea jjashahuabaqui tai nee; sii poani; epona, onaja aquiana jea baña peaꞌai.  
\v 26 Paniseo cuana, miquianaya aje oe quea jjashahuabaqui quehua. Jamajjeya Eyacuiñajjiya miquianaya cajaa acajeꞌyo; quea nee nee po mee cajeꞌyo, de. ¿Aꞌa caneco yiyedojjojje ebionei topo cani cuaa? Jamajjeya eꞌe jojo nei quea pame nee. ¡Caneco topo cani jayojja jama acue miquiaaya; ebionei jjashahuabaqui tai pajeaꞌyocue eꞌe jojo nei quea pame epojji! —Jesosa poanaje. 
\p  
\v 27 —Paniseo cuana, Moisesija etehueꞌyo huohuijji peaꞌai, miquianaya esohui huohuijji nisho de, quea mimishi. Emano mojeaꞌyojji cuiaꞌasha cani cuaa quea pame jayojja. Jamatii eyiyedojjojje quea ihui, emanoꞌyo sajaajji.  
\v 28 Emanoꞌyo mojeaꞌyojji jayojja jama miquianaya cuana; quea pame jayojja ojjañaa ba cani; jamatii quea jjashahuabaqui tai. Shajjamaꞌ, quea pame po nishoani peaꞌai. Jamajoya Eyacuiñajjiya miquianaya cajaa acajeꞌyo; quea nee nee po mee cajeꞌyo —Jesosa poanaje. 
\p  
\v 29 —Moisesija etehueꞌyo huohuijji, Paniseo cuana peaꞌai, miquianaya aje oe esohui huohuijji nisho, quea mase. Jamajjeya Eyacuiñajjiya miquianaya quea nee nee po mee cajeꞌyo. Eꞌe, miquianaya emano sajaajji moꞌyaña, quea pame aꞌyaña ma Eyacuiñajjija esohui huohuijji yahuajo mojea jaa. Esajaajji cuiaꞌashaꞌaña quea pame nee Eyacuiñajjija epeejji nei yahuajo emanoꞌyo bihuiaꞌyojji —Jesosa poanaje—.  
\v 30 Siajje miya poani jama baꞌa: “Yahuajo ecuanaja etiiquiana cuana nijje ebaꞌeꞌyo jojjemo ecuanaja ca ca oe Eyacuiñajjija esohui huohuijji cuana ecuiajeaꞌyojji pojjeama poqueaye. Chamaꞌ ecuanaja ejjashahuabaquijji etiiquiana jama; ecuanaja ca ca pea” miquianaya poani —Jesosa poanaje—.  
\v 31 Chojja. Jamaya miquianaya po nishoani. Jamatii miquianajaya etiiquiana jama Eyacuiñajjija esohui huohuijji quecuajji nei nei peaꞌai.  
\v 32 Jamajjeya o jayojja jama poani quiana; Eyacuiñajjija huoojeaꞌyo cuana cuiajea jeyojeyojeꞌyo, de —Jesosa poanaje—.  
\v 33 Miquianaya peyo quea se nee nee jama de, quea mase nee nee, esohui huohuijji quecuajji, miquea etiiquiana cuana jama. Jamajjeya ¿aꞌa acuae nequiana Eyacuiñajjijo jjanequiquehuaquijji? Chojja. Eꞌe jojo nei ohuaya miya huohui cajeꞌyo: “¡Poquicue nequiana! ¡Cuaqui yasijje dobiquicue! ¡Quea mase nee nee aje oe nequiana!” —Jesosa poanaje. 
\p  
\v 34 —Jamajjeya eyaya miquiana huasijje huoojeaña Eyacuiñajjija esohui huohuijji, esohui bameesahuajji, dejja quea jjashahuabaqui jaꞌa nee peaꞌai. Jamatii beca cuana cuiajeajeꞌyo; pea cuana acui ecueataꞌapeejo me cacajeajeꞌyo; pea cuana cuiasejjajeajeꞌyo miquea equi ojee ejjachichaquijji yasijje; pea cuana ocuenajeꞌyo ojjaña cuiñajji yasijje equecuaꞌyojji, miquianaaya —Jesosa poanaje—.  
\v 35 Eꞌe Jodio cuana, miquea etiiquiana cuaa dejja mimishiꞌama quecuajea caꞌyonaje quea huiso. Eyacuiñajjija etehueꞌyo ebionei tehue ca poa jama baꞌa: Abeni cuiahuejjajea ca poa miquea etiiquiana Cainiya. Oya jayojja quea huiso cuiajea ca poa cuaa. Quijje nei Eyacuiñajjija etehueꞌyo quijje yejje nei tehue ca poa oja sohui huohuijji Sacania, Benequiaja bacua ejja cuiahuejjajea ca poa cuaa Eyacuiñajjija equijo, aquiana dahuajeajji pejjejo —Jesosa poanaje—.  
\v 36 Jamajjeya eyaya miya eꞌe jojo nei huohuiaña: Jjeya nei apoa poaje; Eyacuiñajjiya miquiana cuana quea nee nee po mee cajeꞌyo ojjaña miquea etiiquianaja mimishi cuanajo, o jayojja jama miquianaya poani jojoya. 
\p Jamaya Jesosaa Jodio cuana tecuea canaje quea mimishi nee jojoya. 
\s1 Jesosa quea yeno poanaje ojjaña Jenosanenajo baꞌe cuanajo 
\r (Noca 13.34-35) 
\p  
\v 37 Majoya Jesosa quea yeno nee nee ojjaña cuana Jenosanenajo baꞌe cuanajo jama poanaje baꞌa: —Jodio cuana Jenosanenajo baꞌe, miquiana cuana ecuea quea jea nee nee. Jamajjeya eya miquianajo quea yeno poani. Eꞌe, miquianaaya aje oe Eyacuiñajjija esohui huohuijji quecuajeaꞌya poa; ojaya huoojeaꞌyo jajahuejjajeaꞌya poa meiya peaꞌai. ¡Bacue oe! Cachina enaeseya ebacua huojje cani ejaahuanajji jama jayojja eyaya miquiana iyaa sa neineiaña e que, ejaahuanajji. Jamatii enijje jjapeequi sa po ajja. Cajaa aña jama baꞌa: “Chojja, Eyacuiñajjija miya huoojea jjima ojjaña jaahuanajji”.  
\v 38 Jamajjeya ¡bacue! —Jesosa poanaje—, Eyacuiñajjiya miquianaya cajaa acajeꞌyo. Jeajea cajeꞌyo ejaahuana majajji pojjeama.  
\v 39 Eꞌe, eya jiquiojo tii nequi tii ajja. Jamajjeya eya miquianajaya ba oꞌoya jjima poaje e poe oꞌoya jjimahuajo. Quijje e poe oꞌoyajo ca nequiana ca oe jama poaje baꞌa: “Jesosa miya Eyacuiñajjija huoojeaꞌyo ojjaña jaahuanajji. ¡Eyacuiñajjiya miya cajaahuana cahua quea pame!” poaje miquianaya quijje —Jesosa poanaje Jenosanenajo baꞌe cuana nijje. 
\c 24  
\s1 —Eyacuiñajjija equi cajjajeajea cajeꞌyo cuaa mei cuana —Jesosa poanaje 
\r (Macoso 13.1-2; Noca 21.5-6) 
\p  
\v 1 Jesosa Eyacuiñajjija equijo ani poquinaje. Poquijeya o shajjaꞌajjajji cuaa oya huohui canaje: —¡Bacue Eyacuiñajjija equi! Quea quemo, quea pame mei cuana. 
\p  
\v 2 —Eꞌe. ¿Aꞌa jiquio equi quea pame nee baña? Eꞌe jojo nei quijje mei cuana cajjajeajea cajeꞌyo cuaa. Chamaꞌyo tii acajeꞌyo —Jesosa poanaje. 
\s1 Dejja cuana quea mase nee poaje quijje 
\r (Macoso 13.3-13; Noca 21.7-19) 
\p  
\v 3 Quijje Jesosa eyiyo huasijje Onimo acui yiye yasijje jaasohuaquinaje o shajjaꞌajjajji cuana nijje. Anioquenaje. Pea dejja poqui jjima. Jamajjeya o shajjaꞌajjajji cuaa huohuiꞌajja canaje: —Jesosa, ¿ache shono acuae mei cuana cajjajeajea cajeꞌyo cuaa soꞌo? ¿Ae acuae poaje mi epoe oꞌoya cuahuajje? ¿Aꞌya ba majje ecuanaja eba poaje miya poeje oꞌoya, meshi chamaꞌyo tii epojjijo? 
\p  
\v 4 Jesosaa sajaꞌa canaje: —¡Jjashahuaba neineiquicue onajaya miya edasiajji pojjeama!  
\v 5 Quea huiso siajjepojji poeje, ecuea ehuoojeaꞌyo pojjeama: “Eyacuiñajjiya eya huoojea canaje, eya ca ca iña ojjaña jaahuanajji” siajje poaje. Quea huiso dasia cajeꞌyo.  
\v 6 “Ojjaña jjaquecuaquiani ojjaña meshi yasijje” huohui caje peaaya peaꞌai. Jamatii ¡aꞌa quea mete pojji! Jamaya poaje. Jamatii apoa pojjeama, oe po ajja jjima poaje soꞌo —Jesosa poanaje—.  
\v 7 Eꞌe, jjaquecuaqui cajeꞌyo cuana ojjaña meshi yasijje, ojjaña cuiñajji yasijje peaꞌai. Quea huiso emanomeejjiya mano mee cajeꞌyo; bobi yasijje po majje manojeꞌyo quea huiso; meshi huehuahuehuaje ojjaña meshi yasijje peaꞌai —Jesosa poanaje—.  
\v 8 Eꞌe, jiquio ecua epona bacua cuayaje ebionei jjapashineijje neeꞌani; quijje quea nee nee. Jamaya poaje e poe oꞌoya jjimahuajo. Quea nee pishana po majje quea nee nee poaje ojjaña cuana —Jesosa poanaje. 
\p  
\v 9 —Majoya pea cuaa miquianaya iña majje jeanobiajea cajeꞌyo ecuiasejjajeajji, equecuaꞌyojji peaꞌai. Enijje jjapeequianijo miquianaya botiꞌama nei poaje ojjaña meshijo baꞌe cuanaja.  
\v 10 Jamajoya quea huiso enijje jjapeepajeaquiꞌyo majje mimishi aje oꞌoya. Peaja epeejjija botiꞌama poajeꞌyo —Jesosa poanaje—. Jamajoya dejja mase iña mee cajeꞌyo equecuaꞌyojji.  
\v 11 Quea huiso pea cuana poeje: “Eya Eyacuiñajjija esohui huohuijji” siajje poaje. Cho, Eyacuiñajjija pojjeama. Jamatii, ecuea epeejji dasia cajeꞌyo quea huiso. Poquiquehua mee cajeꞌyo eshahua nijje.  
\v 12 Dejja cuana shajjamaꞌ jayojja po majje emeshi mese cuana shajjaꞌajja sa po ajja poajeꞌyo. Jamajjeya pea cuana botiꞌama poajeꞌyo.  
\v 13 Jamatii e poe oꞌoya jjimahuajo, enijje jjapeequi pajeaꞌyo ajja tii ca ca Eyacuiñajji nijje baꞌe tiitiijeꞌyo, enijje peaꞌai —Jesosa poanaje. 
\p  
\v 14 —Eya poeje oꞌoya. Eyacuiñajji nijje ojjaña cuanaja Emeshi Mese nei poajeꞌyo. Ma ehuohuiꞌyo quea pame nee ojjaña meshi cuana huasijje huohui caje, ojjaña dejja cuana huasijje peaꞌai ojjañaja eshajjaꞌajjajji. Majoya e poe oꞌoyajo ojjaña oe poaje —Jesosa poanaje. 
\s1 Aquiana quea tai nee ojjaña quea mete nee nee epo meejji 
\r (Macoso 13.14-23; Noca 21.20-24, 17.22-24) 
\p  
\v 15 —Eyacuiñajjija esohui huohuijji Dañeniya yahuajo nei huohui ca poa jama baꞌa: 
\q1 “Quijje Eyacuiñajjija equijo nequije aquiana quea tai nee nee, ojjaña quea mete nee nee epo meejji”. 
\m  
\v 16 Jamajjeya ma ba majje ca ca, ma pojjajo tii ojjaña Jodio meshijo baꞌe capoquicuajiahua eyiyo cuana huasijje. (Jiquio ehuohuiꞌyojo cajjashahuabaquiahua quea jaꞌa epojji.)  
\v 17 ¡Joya equi huisa biajje chacochacoani aꞌa equi yasijje dobiquinanajji aquiana cuana biohua edojojji!  
\v 18 ¡Joya quejo chacochacoqui peaꞌai aꞌa equi yasijje poquinanajji daqui moojo! Eyiyo huasijje poquicuaji ajja aje oe manoꞌyo chanaꞌ.  
\v 19 Epona cuana oꞌejji, bacua shoꞌijji peaꞌai quea yeno poaje; quea camaja equehua poquicuajijji poaje.  
\v 20 Jamajjeya Eyacuiñajji nijje mimicue jama baꞌa: “Eyacuiñajji, ¡eenojo pojjeama capoahua, epojja ejomishocajjijo pojjeama peaꞌai ecuanaja epoquijji eyiyo cuana huasijje!” acue —Jesosa poanaje—.  
\v 21 Eꞌe, ma pojja cuanajo ojjaña quea mete nee nee, quea yeno nee nee poaje. Jamaya pojjeama yahuajo, meshi pana majje, jjeya nei peaꞌai, quijje peaꞌai; quea mete pishana, quea yeno pishana. Ma pojja cuanajo ca ca quea nee nee poaje dejja cuana —Jesosa poanaje. 
\p  
\v 22 —Eyacuiñajjiya oe pojji cahuime quea camaja po mee cajeꞌyo; oe pojji cahuime epoꞌyo jojjemo ojjaña cuana manoꞌyome. Ojaya epeejji jaahuana canijo, ojaya quea nahue nee emano jeyojeyoꞌyojji, Eyacuiñajjiya oe pojji cahuijo quea camaja po mee cajeꞌyo, quea cahui huiso pojjeama —Jesosa poanaje. 
\p  
\v 23 —Ma pojja cuanajo aꞌa jjashajjaꞌajjaquijji ona siajje poajo jama baꞌa: “¡Bacue oe, Eyacuiñajjija huoojeaꞌyo Quito jiquiacua poeꞌyonaje!” jama poso, ¡aꞌa shajjaꞌajjajji! “¡Bacue oe, Quito jocuama pa poeꞌyonaje!” Jama onaa acajje ¡aꞌa jjashajjaꞌajjaquijji, aꞌa poquijji!  
\v 24 Eꞌe, Eyacuiñajjija huoojeaꞌyo ojjaña jaahuanajji e jayojja nisho, Eyacuiñajjija esohui huohuijji nisho peaꞌai poeje quea huiso nee nee. Ohuaya ma pea dejjaa ajjima acani acajeꞌyo Eyacuiñajjija epeejji cuana dasiaꞌyojji nisho. Dasia cajeꞌyo quea huiso nee; ecuea epeejji nei peaꞌai beshahua nei eya pajea mee cajeꞌyo o jayojja epojji; chojja, jjadasia meequi ajja.  
\v 25 E shajjaꞌajjajji cuana, eyaya miya huohuinaje quijje oya poeje ejjadasiaquiꞌyojji. ¡Aꞌa oya cuana shajjaꞌajjajji! —Jesosa poanaje. 
\p  
\v 26 —Jamajjeya aꞌa jjashajjaꞌajjaquijji onaa miya siajje acajje jama baꞌa: “¡Baquicue oe, Quito jocuama huenihueni aijo nequi!” Jama acajje ¡aꞌa baquijji! “¡Bacue oe, Quito equi equecuayijji dojjojo ejjaꞌaniquehuaqui ani!” acajje ¡aꞌa jjashajjaꞌajjaquijji; aꞌa o que dobiquijji!  
\v 27-28 Cho, shajjaꞌajjacue ecue sohui: ¿Aꞌa joya eꞌihuijaa huasijje beꞌo cuana cuabesajebeje? Eꞌe jojo nei miquianaaya eya baje joya ecua beꞌo eꞌihui yasijje oqueani jama. Cuanaya pojjejje nei nei poajo jeajaꞌa cani eyajo; ojjañaa ba caje quea huesha nee. Jamaya eya ojjañaja Edoe Mese poeje oꞌoya, pojjejje jama. Jeajaꞌajeajebeje. Eya ojjañaa ba cajeꞌyo. Quehuajje pojjeama eya poejeꞌyo —Jesosa poanaje. 
\s1 Jesosa ojjañaja Edoe Mese poeje oꞌoya 
\r (Macoso 13.24-37; Noca 21.25-28) 
\p  
\v 29 —Eꞌe, quea camaja nee nee po majje majoya eshequi quea apo poajeꞌyo. Baꞌi jijiꞌyo ajja poajeꞌyo. Majameta cuana jjacajjaquiꞌyo majje jijijijioquejeꞌyo ojjaña peaꞌai. Majameta nequijji cuana huehuahuehuajeꞌyo janobajjima nei peaꞌai. 
\p  
\v 30 —Majoya miquianaaya baje aquiana eyajo. Ma ba majje huohuije jama baꞌa: “¡Eꞌe jojo nei Jesosa Quito ojjañaja Edoe Mese jjeyahua nei poeje oꞌoya, de!” poaje. 
\p —Jamajjeya ojjaña cuana ojjaña meshijo baꞌe quea mete nee nee poajeꞌyo. Ecuea epeejji pojjeama siasiaje jama baꞌa: “Coya aje oe ¿ae shai poeje baꞌa? ¡Bacue, ojjañaja Edoe Mese Jesosa Quito poeje oꞌoya bo biajje! Oya oe nei quea caꞌa nee nee, quea sohui poja nee nee. Quea jeajahua nee nee peaꞌai. Esohuidojojji quea caꞌa nee onijje poeje quea huiso nee nee” poaje cuana —Jesosa poanaje—.  
\v 31 Esohuidojojji quea caꞌaa aquiana esheꞌana ai jayojja mia cajo, eyaya esohuidojojji cuana huoojeajeꞌyo biacua, macua huasijje peaꞌai ojjaña ecuea epeejji cuana jjequiya —Jesosa poanaje. 
\s1 Esohui acuijo, iquenajo, huohui canaje Jesosaa 
\r (Macoso 13.18; Noca 21.29-33) 
\p  
\v 32 Jesosaa huohui canaje pea esohui jama baꞌa: —Eꞌe, eyaya miquianaya esohui ejjashahuabaqui meejji huohuije iquena acuijo. Esejaya meshijo acui iñaꞌyani ba majje eseya jama poani baꞌa: “Eꞌe nei, nayaja poꞌyonaje. Jjeya eshequiaja po pajeaꞌyonaje”.  
\v 33 —Jamaya eshequi, baꞌi quea misi, majameta eyajo jijijijioqueꞌani ba majje peaꞌai quea bihui jjashahuabaquicue jama baꞌa: “Eꞌe, jjeya nei apoa poaje. ¡Jjeyahua nei esejaya Emeshi Mese nei Jesosa Quito poeje oꞌoya!” 
\p  
\v 34 —Eꞌe jojo nei ojjaña ma pojja cuanajo baꞌe cuana mano jeyojeyoꞌyo jjimahuajo ojjaña apoa poajeꞌyo; eya ojjañaja Emeshi Mese oe nequijeꞌyo.  
\v 35 Eꞌe, aquiana eyajo nequi chamaꞌ poajeꞌyo; ojjaña meshi chamaꞌyo tii poajeꞌyo peaꞌai. Jamatii ecuea esohui oe epoꞌyojji pojjeama; shajjaꞌajja tiitii cajeꞌyo cuaa —Jesosa poanaje—.  
\v 36 ¿Ache shono shai jamaya poaje, ojjaña apoa poajeꞌyo? Dejja cuanaja ba jjima; esohuidojojji cuanaja ba jjima peaꞌai; ecuea ehuohuijji pojjeama. Ecue Chiija eba ojaye nei. Ohuaye nei huohui cajeꞌyo ojjaña apoa epoꞌyojji —Jesosa poanaje. 
\s1 ¡Jesosa poe oꞌoyajjijo jjaꞌishoaꞌajjaqui anicue! 
\r (Noca 17.26-30, 34-36) 
\p  
\v 37 —Yahuajo nei nei dejja Noe bajjani nequia poa. Noe enequiahuajo ojjaña cuana quea mimishi poa. Quijje eya ojjañaja Edoe Mese poe oꞌoyajo, ojjaña cuana quea mimishi poaje oꞌoya, yahuajo nei nei jayojjaya poaje oꞌoya.  
\v 38 Yahuajo ojjaña meshi ohua jjimahuajo jamatii dejja cuana ijjiaꞌijjia ania poa. Ishiꞌishi nequia poa peaꞌai. Jjahuanaqui nequia poa. Jamaya poanaje Noe bishe ai yasijje dobiqui jjimahuajo.  
\v 39 Ona ojjaña jjashahuabaqui jjima anijo ena quea quemo poa. Jjayehuequia poa; johui oquea poa; huiꞌi caꞌya poa. Jamaya poaje oꞌoya eya ojjañaja Edoe Mese epoe oꞌoya cuahuajo: jjashahuabaquije cuana jama baꞌa: “Jamatii ecuana quea pame nequi”. Ojjañaja ba jjima meshi ojjaña tii chamaꞌyo tii poajeꞌyo.  
\v 40 Eꞌe, e poe oꞌoyajo beca dejja nequije quejo. Oe dojosohuaqui cajeꞌyo; pea jea canajeꞌyo.  
\v 41 Beca epona quecuapasha pashaqui, oe dojosohuaqui cajeꞌyo; pea jea canajeꞌyo, Eyacuiñajjiya —Jesosa poanaje—.  
\v 42 ¡Jamajjeya jjashahuabaqui tiitii anicue! Ache pojjajo Emeshi Meseja epoe oꞌoyajji miquea ebajji pojjeama.  
\v 43 Jiquio jama poaje baꞌa: Equi mese siipojji ache shono poeje poso jjabaquiani. Ojaya eba jojjemo ohuaya ishoa caꞌanime, equi jaahuanajjiya.  
\v 44 Eya miquianajaya Edoe Mese ache pojjajo miquiana que poeje oꞌoya ebajo ese. Jamajjeya ¡jjaꞌishoaꞌajjaqui anicue! —Jesosa poanaje. 
\s1 Pea echacomeejji quea pame nee poanaje 
\r (Noca 12.41-48) 
\p  
\v 45 —Ecuea esohui shajjaꞌajjacue echacomeejji cuanajo jama baꞌa: Equi ai meseya poqui jjimahuaa echacomeejji iyaa canaje. Huoojea canaje: “¡Ecuea equi cuiñacue, miyaya! ¡Ecuea pea echacojji cuana oe bobiacue peaꞌai! Quijje eya poeje oꞌoya”. 
\p  
\v 46 —Equi mese poeꞌyo majje ojjaña quea pame nee ba cañaꞌya poa; quea bihui nee poñaꞌya poa. Jamajjeya echacomeejji quea bihui nee poanaje.  
\v 47 Jamajoya equi meseya echacomeejji quea pame huoojea cajeꞌyo ojjaña ojaya aquiana cuiñaa.  
\v 48 Pea echacomeejji siipojji ca ca jjashahuaba taiquiani jama baꞌa: “Equi mese poquinaje quea huesha nee. Quijje nei nei poejeꞌyo”.  
\v 49 Quea tecueya jjejojo ohuaya echacojji cuana cuia cani. Pea cuana nijje ishiꞌishiani, huooani. Apoa pojjeama nequi.  
\v 50 Equi mese ache pojjajo epoejeꞌyo poso acani. Jamajjeya equi mese quehua poejeꞌyo.  
\v 51 Ojaya equi cuiñajji poani ehuoo jaa bañaꞌyo majje tecuea cañajeꞌyo. Jeacuayajea cañajeꞌyo ojjaña quea mimishi poani nijje. Jomajo quea nee nee poajeꞌyo tii tii; eseꞌ ijjiayaijea cajeꞌyo quea neejo —Jesosa poanaje—. Jiquio ecua equi meseya ojaya equi cuiñajji shajjamaꞌ tecueajea majje jeacuayajea cañaꞌyonaje jayojja jamaya eyaya ajeꞌyo ojjaña ejo ishoaꞌajja, poe oꞌoya majje —Jesosa poanaje. 
\c 25  
\s1 Epona shoꞌi cuana poquinaje pea epona shoꞌi jjahueaquiequi baa 
\p  
\v 1 —¡Pea esohui shajjaꞌajjacue Eyacuiñajji ojjañaja Emeshi Mese oe nei poajejo! Jiquio jayojja jama poaje baꞌa: Epona shoꞌi ahuemaꞌani ome miji peaꞌai huisome, 10 poa. Ma jjahueaquiequi baa cuaquijiji dojo canaje.  
\v 2 Me oejje epona jjashahuabaquinaje. Pea me oejje jjashahuabaqui jjima.  
\v 3 Joya jjashahuabaqui jjimaa cuaquijiji dojo canaje; jamatii esei dojo jjima ejijijji, de.  
\v 4 Peaa jjashahuabaqui majje cuaquijiji dojo canaje eseijji. Tahuoojo dojo canaje peaꞌai ejijijji. 
\p  
\v 5 —Epona shoꞌi cuana quea cojja jee mano po majje cahuinaje. Shacuimaꞌ nequi mecashono poeyanaje.  
\v 6 Jamajjeya mecashono pea equi yasijje poeꞌyo majje taaanaje; “Shacuimaꞌ nequi aje poeꞌyonaje. ¡Cuaꞌa, baquicue!” 
\p  
\v 7 —Taaaje shajjaꞌajja majje ojjaña epona shoꞌi cuana shequinaje. Ejijijji hui jeacuaya canaje.  
\v 8 Epona shoꞌi jjashahuabaqui jjima cuaa ma ejjashahuabaqui cuana huohuiꞌajja canaje jama baꞌa: “¡Esei mo quiacue! Esei ecuanaja oe poanaje. Cuaquijiji ecuanaja jijiꞌyo ajja”. 
\p  
\v 9 —Epona shoꞌi ojaya ejjashahuabaquiꞌyo cuaa sajaꞌa canaje: “Miquea esei chamaꞌ eshojji. Ecuea ca ca jiquio che oe pojji. ¡Poquicue miya ma esei quia caqui yasijje; jocuama jjequicue!” 
\p  
\v 10 —Jocuama o poquiahuajo, shacuimaꞌ nequi poeyanaje. Ojjaña dobiquiꞌyonaje, joya apoa epo, o jjahueaquijji equi yasijje. Dobiqui majje esecue caꞌa canaje.  
\v 11 Joya esei jjequiya poquiya cuana poeꞌyo majje esecue ecaꞌa nequi ba cañaꞌyonaje. Taaa aninaje: “¡Che esecue caꞌapejocue!” 
\p  
\v 12 —Shacuimaa eyiye dojjojo nequiya sajaꞌa canaje: “Chojja, ecuea miya ba jjima” acanaje. Jamaya poanaje —Jesosa poanaje. 
\p  
\v 13 —Eꞌe —Jesosa poanaje oja epeejji cuana nijje—, ¡jamajjeya jjaꞌishoaꞌajjaqui ani tiitiicue peaꞌai! Ecuea epoe oꞌoyajji miquea ebajji pojjeama. 
\s1 Esohui ejjeshejjijo 
\r (Noca 19.11-27) 
\p  
\v 14 Jesosaa pea esohui eba meesahuajji huohui canaje: —Jjeya eyaya pea esohui huohuije, eya ojjañaja Emeshi Mese poe oꞌoyajo —Jesosa poanaje—. Jama poaje baꞌa: Oe dejjaa, emeshi meseya quea huesha poqui jjimahuajo iyaa canaje ojaya echacojji cuana, ojjaña ojaya aquiana jaahuana meejji.  
\v 15 Majoya ohuaya oe echacojji quea jjashahuabaqui jaꞌa huasijje esodojjo me oejje, 5 huisome quea nahue nee nee quia canaje aquiana jjeshejji, quea huiso bejjo chichajji. Pea echacojji quea jjashahuabaqui jaꞌa pishana huasijje beca esodojjo quea nahue nee nee quia canaje aquiana jjeshejji, quea huiso bejjo chichajji. Pea echacojji beshahua nei jjashahuabaqui ajja huasijje oe esodojjo quea nahue nee nee quia canaje bejjo chichajji nisho. Esodojjo quia majje emeshi mese poquinaje. 
\p  
\v 16 —Echacojji quea jjashahuabaqui jaꞌaa ojaya esodojjo me oejje huisome quea nahue quia canaje aquiana jjeshejji. Majoya chicha canaje ome peaꞌai huisome.  
\v 17 Oya jayojjaya pea echacojjiya ojaya beca esodojjo quea nahue quia canaje aquiana jjeshejji. Majoya ohuaya chicha canaje ebeca pee peaꞌai huisome esodojjo.  
\v 18 Pea echacojji aje oe jjashahuabaqui ajja poanaje. Ojaya emeshi meseja esodojjo oe nei quehuajje nei ohua canaje. 
\p  
\v 19 —Quijje nei emeshi mese poe oꞌoyanaje ojaya echacojji cuana huasijje. Jjashahuabaquinaje jama baꞌa: “¿Ae shai poani soꞌo echacojji cuana ecuea esodojjojo?” Jamajjeya echacojji cuana iyaa majje huohuiꞌajja canaje: “¿Ache huiso esodojjo yani soꞌo jjeya?” 
\p  
\v 20 —Echacojji esodojjo me oejje huisome jaahuanajji ojaya emeshi mese nijje jama poanaje baꞌa: “Yahuajo nei miyaya me oejje esodojjo quiaꞌyonaje eya. Maꞌaje miquea. Pea me oejje huisomeya miquea poanaje. Maꞌaje pea me oejje ecue chicha” poanaje echacojji. 
\p  
\v 21 —Ojaya emeshi mese onijje quea bihui nee poanaje jama baꞌa: “Eꞌe de, miya echacojji quea pame nee. Yahuajo eyaya miya quianaje me oejje esodojjo. Miyaya maya quea pame nee chichanaje. Jamajjeya jjeya eyaya miya ecuea aquiana quea huiso jaahuana meejeꞌyo. Cuaꞌa, ¡enijje anicue quea bihui nee!” emeshi mese poanaje quea bei nee. 
\p  
\v 22 —Majoya pea echacojji poeyanaje, ma beca esodojjo yahuajo quia canaje. Ma echacojji jama poanaje baꞌa: “Emeshi mese, yahuajo nei miquea esodojjo becanejjijji peaꞌai quiaꞌyonaje eya. Maꞌaje miquea beca esodojjo. Pea esodojjo becanejjijji peaꞌai ecue chicha yenaje. Maꞌaje ecue chicha esodojjo peaꞌai” echacojji poanaje. 
\p  
\v 23 —Emeshi mese onijje quea bei miminaje jama baꞌa: “Eꞌe, de, miya echacojji quea pame nee. Yahuajo eyaya miya quianaje esodojjo becanejjijji peaꞌai. Miyaya pea chichanaje quea pame nee. Jamajjeya jjeya eyaya miya ecuea aquiana quea huiso jaahuana meejeꞌyo. Cuaꞌa, ¡enijje anicue quea bihui nee!” emeshi mese poanaje. 
\p  
\v 24 —Majoya pea echacojji poeyanaje, ma esodojjo oe nei quia canaje. Emeshi mese huohui canaje ohuaya jama baꞌa: “Emeshi mese, ecuea eba miya quenequene cuajiani. Miyaya miquea echacojji chaco meeaña sosemaꞌ. Quea dejja taija jjejojo miquea aquiana quea huiso yani” jama posoya acanaje echacojjiya.  
\v 25 “Jamajjeya eya quea mete poanaje. Miquea esodojjo emoquehua aninaje onaa esii ca poani jjejojo. Maꞌaje miquea bejjo, ma miyaya quianaje huisome tiiya” echacojji poanaje. 
\p  
\v 26 —Ojaya emeshi meseya oya acanaje: “Miya echacojji quea mimishi, quea huea. Miya quea jjashahuabaqui tai poanaje jama baꞌa: —Ecuea echaco sosemaꞌ poanaje. Ecuea emeshi mese quea dejja tai. Jamajjeya quea huiso ojaya aquiana yani —miya poanaje. Siajje miya poani. Miquea ejjashahuaba taiquijji jayojja jama eyaya miya aje.  
\v 27 ¿Apiojji acuae miyaya ecuea ejjeshejji mi quianaje bejjo jaajji yasijje? Quijje pishana ohuaya eya quea huiso quia caꞌyo queaye”. 
\p  
\v 28 —Emeshi mese ma echacojji nijje quea tecue poanijo pea cuana huoojea canaje jama baꞌa: “Echacojji quea hueaa jjejojo ecuea esodojjo mi chicha canaje. ¡Maya esodojjo oe nei jjeshe majje quiaꞌyocue pea echacojji hueaꞌama huasijje, maya ecuea esodojjo me oejje ecue quia poanaje yasijje quiacue!  
\v 29 Eꞌe, joya hueaꞌama poani aquiana cuana quia caje cuaa. Dejja aemaꞌ quea hueaja aquiana ojjaña jjesheꞌyo majje dojo cajeꞌyo cuaa.  
\v 30 Jiquio echacojji cajaa ajeajeꞌyo; quea huea coma. Enijje oya enequijji pojjeama. Huoojeacuayajeajeꞌyo. Oya quea yeno nee nee poajeꞌyo. Quea nee nee peaꞌai poajeꞌyo” emeshi mese poanaje —jamaya Jesosaa acanaje. 
\p Eꞌe, jiquio Jesosaja ejjashahuabaquiꞌyojji jama baꞌa: Poe oꞌoya majje Jesosaa ojaya epeejji quea jjashahuabaqui jaꞌa quea pame baꞌe mee cajeꞌyo onijje eyajo. Onijje ona huoojeaꞌyojji po mee cajeꞌyo. Pea echacojji quea huea ba majje ca ca cajaa acajeꞌyo. Quea nee nee poajeꞌyo oya cuana. 
\s1 Esohui Jesosa Quitoja ojjañaja Edoe Meseja epoe oꞌoyajjijo 
\p  
\v 31 Jesosaa huohui canaje peaꞌai: —Eya poe oꞌoya majje quea caꞌa poajeꞌyo. Ojjaña huoojeaꞌyojji poajeꞌyo. Ojjaña esohuidojojji cuana enijje poejeꞌyo. Majoya eya baꞌesohuaquiꞌyo majje eyahuasijje, jocuama eya nequijeꞌyo, Emeshi Mese nei.  
\v 32 Ojjaña cuana e que jjachichaqui meejeꞌyo. Majoya eyaya ñajjajja cuiñajji jayojja jama aje jama baꞌa: Ñajjajja cuiñajjiya ñajjajja cuana, chivo cuana nequiashiña cani.  
\v 33 Ñajjajja oo pana nequiashiña cani ebianeijje. Chivo ca ca huapa nequia acani, shanijje.  
\v 34 Ñajjajja cuiñajji jayojja jama eyaya, ojjañaja Emeshi Meseya ojjaña dejja cuana nequishiñajeꞌyo. Ecuea epeejji quea pame nee ebianeijje nequiajeꞌyo. Oya cuana ajeꞌyo jama baꞌa: “Miquianaya ecue Chiija bacua cuana eꞌe jojo nei poanaje, ojaya huapa pojjeama. Jamajjeya onijje nequi tiitiijeꞌyo. Eyacuiñajji jamaya jjashahuabaquiꞌya poa yahuajo nei nei, meshi pana jjimahuajo.  
\v 35 Jamaya poajeꞌyo jjeya miquianajo, miya quea pame nee nee poanajejo. Eꞌe, yahuajo eya quea shoe poajo, eya bobi quianaje miyaya. Eya quea naba taja poajo, ena quianaje miyaya. Eya miquianajaya ba jjima poanaje. Jamatii miquea equi yasijje dobiqui meenaje.  
\v 36 Eya daquimaꞌ poajo, miquianaaya daqui huosho meenaje. E emanojaajo, ejeanobiajaajo peaꞌai, miquianaya poeyanaje enijje jjapeequiya” jamaya eyaya ajeꞌyo —Jesosa poanaje. 
\p  
\v 37 —Majoya dejja pame cuaa eya huohuiꞌajja caje jama baꞌa: “¿Ache shono acuae ecuaaya miya bobianaje, miya quea shoe poanajejo? ¿Ache shono ena quianaje miya quea naba taja poanajejo?  
\v 38 ¿Aꞌa miya ecuanaja equi yasijje dobi meenaje? ¿Aꞌa daqui huosho meenaje miya daquimajo? ¿Ache shono shai ecuaaya jamaya anaje?  
\v 39 Mi emanojaajo, ejeanobiajaajo peaꞌai, ¿aꞌa ecuana mi que poeyanaje? ¿Ache shono acuae jja jama ecuaaya mi anaje soꞌo?” Jamaya dejja pame cuaa quijje huohuiꞌajja caje eya eyajo. 
\p  
\v 40 —Jamajjeya eyaya, Emeshi Mese neiya sajaꞌajeꞌyo quijje eyajo jama baꞌa: “Miyaya ecuea huapa pojjeama aemaꞌ yahuajo jaahuananajejo, eya jaahuananaje. Jamajjeya ecuea eba miquianaya ecuea epeejji eꞌe jojo nei poanaje. Ecuea ejjashahuabaquiꞌyojji jayojja jama ca ca miyaya aꞌyonaje”. 
\p  
\v 41 —Mayoja eyaya, Emeshi Mese neiya dejja tai cuana shanijje nequi tecueajeꞌyo jama baꞌa: “¡Poquicue miya! Cajaaꞌyo ca mi ca ecua. Edosiquiana etii Satanasa, eshahua cuana peaꞌai cuaqui yasijje poquijeꞌyo. Miya cuana peaꞌai anijeꞌyo cuaquijo tii.  
\v 42 Yahuajo eya quea shoe, bobia jjima poanaje miquea. Eya quea naba taja, ena quia jjima poanaje.  
\v 43 Eya miquea eba pojjeama, miquea equi yasijje dobi mee jjima poanaje. Eya daquimaꞌ, daqui huosho mee jjima poanaje miquea. E emanojaajo, ejeanobiajaajo peaꞌai miya poe jjima poanaje e jaahuanaa” jamaya eyaya aje dejja mimishi cuana —Jesosa poanaje. 
\p  
\v 44 —Majoya dejja mimishi cuaa eya huohuiꞌajja caje jama baꞌa: “¿Ache shono acuae miya bobia jjima apoa? ¿Ena cuana quia jjima apoa? ¿Aꞌa ecuanaya miya ecuanaja equi yasijje dobi mee jjima apoa? ¿Aꞌa daquimajo, ecuanaya daqui huosho mee jjima apoa? ¿Aꞌa mi emanojaajo, ejeanobiajaajo peaꞌai, aꞌa miya ecuanaja jaahuana jjima apoa? ¿Ache shono shai, de?” dejja mimishi cuaa huohuiꞌajja caje —Jesosa poanaje—.  
\v 45 Majoya eyaya, Emeshi Mese neiya sajaꞌajeꞌyo jama baꞌa: “Ecuea huapa pojjeama cuanajje jaahuana jjima. Jamajjeya miquianaaya eya cajaa aꞌyonaje peaꞌai”. 
\p  
\v 46 —Majoya eyaya, Emeshi Mese neiya dejja quea mimishi cuana quea huesha nee huoojeajeꞌyo cuaqui yasijje edobiquiꞌyojji. Quea nee nee po tiitiijeꞌyo. Dejja pame cuana ebianeijje nequi ca ca baꞌe tiitii meejeꞌyo Eyacuiñajji nijje —jamaya huohui canaje Jesosaa. 
\c 26  
\s1 Jodio etii cuana jjashahuabaquinaje Jesosa quecuaꞌyojjijo 
\r (Macoso 14.1-2; Noca 22.1-2; Huani 11.45-53) 
\p  
\v 1 Majoya Jesosaa o shajjaꞌajjajji cuana jjabahuejjaqui mee canaje. Pea esohui huohui canaje jama baꞌa:  
\v 2 —Quijje pishana, becanejjijji peaꞌai cahuime po majje, Jodio cuana jjashahuabaquije oꞌoya etiiquianaja bacua cuana yahuajo Ejitojo manoꞌyo jjima poajo. Jamajjeya ojee ijjiaꞌijjiaje oꞌoya quea bei nee. Eꞌe, yahuajo nei nei Ejito meshijo ani Jodioja ebacua ejja cuiaꞌyo jjima aca poa esohuidojojjiya. Ma shejo ijjia jjimahuajo Jodio cuaa eya iña majje dejja quea mase yasijje quia cajeꞌyo equecuaꞌyojji. Acui ecueataꞌapeejo me caca majje baꞌehuanasohuajea cajeꞌyo —Jesosa poanaje. 
\p  
\v 3 Majoya Eyacuiñajji nijje emimijji etii cuana, Jodio dejja jaahuanajji cuana peaꞌai ojee jjachichaquinaje Eyacuiñajji nijje emimijji etiija equi aijo, Caipa bajjanija equijo.  
\v 4 Caipa jjashahuaba taiquinaje pea cuana huoojeajji Jesosa iñajji, quijje equecuaꞌyojji.  
\v 5 Jodio etii cuana ojee miminaje jama baꞌa: —¡Jesosa quehua neijje iñacue ojjaña Jodio cuana jjachichaqui jjimahuajo, ojee ijjiaꞌijjia jjimahuajo! ¡Oya iñacue jjeyahua nei, de! Quijje pishana ojjaña ojee ijjiaꞌijjia anijo, ecuanajaya Jesosa eꞌiñajji pojjeama. Chojja. Ojjaña Jodio cuana quea quene nee nee ecuana nijje po chanaꞌ, Jesosa onajaya quea nahue nee equecua meeꞌyojji. Quea shajjaquijjo po chanaꞌ peaꞌai —jamaya acanaje Jodio etii cuaa. 
\s1 Jesosa Betaniajo ani sapa sha canaje shiyeshiyeya eponaa 
\r (Macoso 14.3-9; Huani 12.1-8) 
\p  
\v 6 Jesosa Betaniajo aninaje dejja Simoni bajjanija equijo. Yahuajo nei Simoni quea mano nee nee batata epoꞌyo poa, ma dejja cuaa jjajeaqui meeꞌyo jjima acani. Jesosaa oya yahuajo huaquia mee caꞌyonaje, jjajeaqui mee caꞌyonaje. Simonija equijo Jesosa eꞌanioque aninaje. Ijjiaꞌijjia aninaje bobi ijjiajji pejjejo.  
\v 7 Jesosa ijjiaꞌijjia anijo, oe epona poeꞌyonaje o que. Ohuaya tahuoo quea nahue neejo shiyeshiye ye canaje Jesosa huojja shajji. Huojja sha canaje.  
\v 8 Ba majje Jesosa shajjaꞌajjajji cuaa epona tecuea canaje: —¿Apiojji acuae miyaya shiyeshiyeya shaña soꞌo?  
\v 9 ¿Sha jjima yajjijo poso ca mi ca oe shiyeshiye dojo meenaje esodojjo quea huiso sosejje? Eꞌe, aemaꞌ cuana huasijje esodojjo equiajji poso —Jesosa shajjaꞌajjajji cuana poanaje. 
\p  
\v 10 Jesosaa oya cuana shajjaꞌajja majje huohui canaje: —¿Apiojji acuaeya epona tecueaña soꞌo? Eꞌe, eya ohuaya huojja sha canaje. Jamaya quea pame nee.  
\v 11 Aemaꞌ cuana minijje po tiitiijeꞌyo. ¡Oya cuana jaahuanaꞌyocue quijje peaꞌai! Eya ca ca nequi tiitii ajja minijje.  
\v 12 Eya huojja sha cajo epona jjashahuabaquinaje jama baꞌa: “Jesosa manoꞌyo jjimahuajo eyaya oya huojja shaña shiyeshiyeya, onaja mojea jjimahua shaña” poanaje epona —Jesosaa acanaje—.  
\v 13 Jamajjeya quijje ojjaña meshijo ecuea esohui huohui caje. Jiquio eponajo huohui caje peaꞌai jama baꞌa: “Oe eponaa Jesosa huojja sha ca poa shiyeshiyeya, quea jeajojo”. Jiquio epona pajeaꞌyo ajja tii tii, eꞌe jojo nei —jamaya Jesosaa acanaje. 
\s1 Jodasaa onaya iña meesahua canaje Jesosa 
\r (Macoso 14.10-11; Noca 22.3-6) 
\p  
\v 14 Yaninaje quea huiso Jesosa shajjaꞌajjajji cuana, 12. Oe nei Jodasa Isicaniote bajjani poquinaje Eyacuiñajji nijje emimijji etii cuana huasijje.  
\v 15 Miminaje jama baꞌa: —Eyaya miya Jesosa iña mee sahuaje. ¿Ache sose huiso acuae mo ya oe sosequiajeꞌyo soꞌo? 
\p  
\v 16 Onaaya sajaꞌa canaje jama baꞌa: —Quea huiso, 30 esodojjo quea nahue nee sosequiajeꞌyo miya. 
\p Jamajjeya Jodasa jjashahuaba neineiqui aninaje achajja iña meeme aje soꞌo cuana: —Cabaꞌajjaquisahua —poanaje. 
\s1 Jesosaa o shajjaꞌajjajji cuana bobi ijjia mee canaje 
\r (Macoso 14.12-25; Noca 22.7-23; Huani 13.21-30; 1 Conitio 11.23-25) 
\p  
\v 17 Jodio cuana quea bihui ojee ijjiaꞌijjianaje yohua shejo baꞌa esohuidojojjija yahuajo nei etiiquianaja bacua cuana cuiaꞌyo jjima ñajjajja naꞌ esecuejo ecuiapepa ba majje shejo. Pahui quea caꞌa eshejjee meejji chamaꞌ ijjia ca poa. Ebionei epojja eꞌijjiaꞌijjiajjijo, Jesosa que poe majje o shajjaꞌajjajji cuaa huohuiꞌajja canaje jama baꞌa: —Jesosa, ¿ache equijo acuae seya pahui caꞌa ijjiaje soꞌo? ¡Ecuana huoojeacue aquiana iyajea, miquiana ishoajji! 
\p  
\v 18 Jesosaa huohui canaje jama baꞌa: —¡Poquicue miya cuiñajji yasijje! ¡Jomajo ecuea epeejji baquicue! Onijje mimicue jama baꞌa: “Ecuana sohui huohuijji jama poanaje baꞌa: —E manoꞌyajo aje apoa poaje. Miquea equijo eyaya e shajjaꞌajjajji cuana nijjeya pahui caꞌa ijjiajeꞌyo, esohuidojojjiya etiiquianaja bacua ejja cuana cuiaꞌyo jjima poa shejo” acue —Jesosaa huohui canaje. 
\p  
\v 19 Jamajjeya o shajjaꞌajjajji cuana ojaya ehuoojeaꞌyo jayojjaya jama poanaje. Bobi iyajea canaje pahui caꞌa ijjiajji. 
\p  
\v 20 Majoya sinecua neijo Jesosa o shajjaꞌajjajji cuana nijje anioquenaje bobi ijjiajji pejjejo ijjiaꞌijjiaa.  
\v 21 Ojee ijjiaꞌijjiaꞌanijo Jesosa jama poanaje baꞌa: —Eꞌe jojo nei jiquiojo ani oe dejja poquije ona jjequiya e iñaꞌyojji. Ohuaya eya huohui caje cuana. 
\p  
\v 22 Eshajjaꞌajjajji cuana quea yeno nee nee poanaje. Pea mimiajo pea poanaje jama baꞌa: —Ecuea Emeshi Mese, eya ca ca o jayojja pojjeama, eꞌe jojo nei. 
\p Jamaya ojjaña miminaje.  
\v 23 Majoya Jesosa onijje miminaje jama baꞌa: —Oe dejjaa e shajjaꞌajjajjiya joya enijje pahui shapeshi poꞌaniya eya onaya cuana iña mee cajeꞌyo.  
\v 24 Eꞌe, yahuajo nei Eyacuiñajjija esohui tehuejji cuaa esohui tehue ca poa jama baꞌa: “Quijje oe dejjaa Eyacuiñajjija huoojeaꞌyo ojjaña jaahuanajji onaya cuana iña meesahua cajeꞌyo equecuaꞌyojji”. Jamajjeya ma dejja quijje quea yeno poaje. Jjashahuabaquije jama baꞌa: “¿Apiojji shai eya ecue naeya mejo ca poa? Eya ca ca nequi sa po ajja. Ecuea ejjashahuaba taiquijjijo manoꞌyo sa poani” oya poaje. Quijje oya quea nee nee po tiitiijeꞌyo —Jesosa poanaje. 
\p  
\v 25 Majoya Jodasa Jesosa nijje miminaje jama baꞌa: —Emeshi Mese, eya ca ca o jayojja pojjeama. Eyaya miya onaya eꞌiña meesahuajji pojjeama —poanaje. 
\p Jesosa onijje miminaje: —Eꞌe, Jodasa, miya jama quea tai poaje, eꞌe jojo nei —Jesosa poanaje. 
\p  
\v 26 Majoya ojee ijjiaꞌijjiaꞌanijo tii Jesosaa pahui caꞌa jjeshe canaje. Eyacuiñajji bihuia majje, pahui mijisisi majje quia canaje o shajjaꞌajjajji cuana. Jama huohuime acanaje Jesosaa baꞌa: —¡Ijjiacue! Jiquio ecuea eyami —poanaje. 
\p  
\v 27 Pahui ijjia majje caneco jjeshe canaje, Jesosaa. Eyacuiñajji bihuia majje quia canaje ojjaña o shajjaꞌajjajji cuana. —¡Ishicue! Jiquio ecuea enaꞌ.  
\v 28 Ecuea enaꞌ cuayaquiajo eya manojeꞌyo. Jamajoya eyaya Eyacuiñajjija esohui eyacua jayojjaya aje. Eꞌe, ojjaña ecuea epeejjija mimishi cuana cuijeajeꞌyo.  
\v 29 Jjeya eyaya jiquio jjonojjajja na, uva na eꞌishi oꞌoyajji pojjeama miquiana nijje; eya manojeꞌyo. Quijje nei poe oꞌoya majje eyaya jiquio ishije oꞌoya miquiana nijje. Eꞌe, eya poe oꞌoyajo ecue Chiiya eya ojjaña huoojeaꞌyojji po mee cajeꞌyo. Ojjañaa eya shajjaꞌajja cajeꞌyo —jamaya Jesosaa acanaje. 
\s1 Jesosa miminaje Peno nijje 
\r (Macoso 14.26-31; Noca 22.31-34; Huani 13.36-38) 
\p  
\v 30 Majoya ojee sohuicuaya majje poquinaje eyiyo huasijje Onimo yiye yasijje. 
\p  
\v 31 Majoya Jesosa o shajjaꞌajjajji cuana nijje miminaje jama baꞌa: —Jiquio mecajje ojjaña miquianaya enijje jjapeequi pajeajeꞌyo. Eꞌe, yahuajo Eyacuiñajjija esohui tehuejji cuaa tehue ca poa ejo: Eya ñajjajja cuiñajji jayojja jama poaje. E manoꞌyajo ecuea epeejji cuana ñajjajja cuana jayojja jama poaje; jjajeaajajeaquinanajeꞌyo. Etehueꞌyo yahuajo nei nei jama poa baꞌa: 
\q1 “Quijje eyaya ñajjajja cuiñajji jaahuana neinei ajja. Jamajjeya onaaya oya cuia cajeꞌyo. Ñajjajja cuiñajji chamajo, ñajjajja cuana jjajeaajajeaquinanajeꞌyo”. Jamaya aca poa yahuajo nei nei —Jesosa poanaje—.  
\v 32 Jamatii, shequi oꞌoya majje eya poquije Janinea meshi yasijje. Jomajo aje mi poeyajo ishoañaquije —Jesosa poanaje. 
\p  
\v 33 Penohua Jesosa jama acanaje baꞌa: —Eꞌe pojjaꞌa pea cuana minijje jjapee tiitiiquiꞌyo ajja. Eya ca ca pea jayojja jama pojjeama. Eya jjapee tiitiiquijeꞌyo minijje —Peno poanaje. 
\p  
\v 34 Jesosaa Peno jama acanaje baꞌa: —Eyaya eꞌe jojo nei miya huohuiaña Peno, jiquio mecajje tii cachina yahue pea beca peejjima taaame po jjimahuajo, pea beca peejjima huohuiꞌajjame amajje miya ejo poaje jama baꞌa: “Chojja, ¡ecuea Jesosa ba jjima nei nei!” miyaya sajaꞌame aje quea meteya jjejojo —Jesosaa Peno acanaje. 
\p  
\v 35 —Chojja, Jesosa —Peno poanaje—. Eꞌe pojjaꞌa eya minijje jjapeequianijo, pea cuaa eya cuiajea cajeꞌyo. Jamatii ¡ecuea ca mi ca epajeaꞌyojji pojjeama! 
\p Oya jayojja pea cuaa jama acanaje peaꞌai baꞌa: —Eꞌe Jesosa, ¡ecuanajaya ca mi ca epajeaꞌyojji pojjeama tii! 
\s1 Jetesemani quejo Jesosa miminaje oja Chii nijje 
\r (Macoso 14.32-42; Noca 22.39-46) 
\p  
\v 36 Majoya Jesosa o shajjaꞌajjajji cuana nijje Jetesemani que yasijje poquinaje. Jesosa jama poanaje baꞌa: —¡Anioquecue jiquiojo tii! Jocuama eya poquije ecue Chii nijje mimiya. 
\p  
\v 37 Jesosaa Peno, Huani, Satiaco peaꞌai dojo canaje jocuama, ma Semeneoja bacua ejja cuana bajjani Huani, Satiaco peaꞌai. Jesosa jjashahuabaquinaje quea yeno nee nee.  
\v 38 Jamajjeya onijje jama poanaje baꞌa: —Eya quea yeno nee nee, emano caꞌyojji jayojja. ¡Anioquecue enijje; aꞌa cahuijji! —Jesosa poanaje. 
\p  
\v 39 Jesosa cuama pishana ani poqui majje ecuiꞌoshajjajo nequinaje. Oja Chii nijje miminaje jama baꞌa: —Ecue Chii, miquea ejjashahuabaquiꞌyojji jayojja jama ajeꞌyo eyaya. Miyaya eya huoojeanaje dejjaja mimishi cuanajo manoꞌyohua. Quea camaja nee nee ejo. ¿Aꞌa miyaya che onaaya eya quecua meeꞌyo jjima aje soꞌo? ¿Aꞌa onaaya eya iña meeꞌyo jjima ajeꞌyo? Jamatii ¡miquea ejjashahuabaquiꞌyojji jayojja jama acue! ¡Ecuea ejjashahuabaquiꞌyojji jayojja jama aꞌa ajji! —Jesosa jamaya poanaje. 
\p  
\v 40 Majoya oya poqui oꞌoyanaje o shajjaꞌajjajji cuana que. Ba cañaquiꞌyonaje cahuijaa. Tecueꞌama Peno nijje miminaje jama baꞌa: —¿Aꞌa mi cahuijaa? ¿Aꞌa che enijje cahui jjima nequi jjima soꞌo?  
\v 41 ¡Aꞌa cahuijji! ¡Eyacuiñajji nijje mimi majamajacue! Jamajoya pea cuaa miya quea mimishi epo meeꞌyojji pojjeama. Eꞌe, miquianaya enijje jjapeequi sa poani eꞌe jojo nei. Jamatii miya caꞌaꞌama; quea mimishi poaje oꞌoya pojjaꞌa —Jesosa poanaje. 
\p  
\v 42 Majoya Jesosa poqui oꞌoyanaje jocuama pishana oja Chii nijje mimi oꞌoyaa. Mimi oꞌoyanaje jama baꞌa: —Ecue Chii, eya ojjañaja mimishijo manoꞌyo ajjajo, ¿aꞌa onajaya mimishi ecuijeaꞌyojji pojjeama poajeꞌyo? Jamajjeya ¡miquea ejjashahuabaquiꞌyojji jayojja jama acue! —Jesosa poanaje. 
\p  
\v 43 Oja Chii nijje mimiꞌyo majje Jesosa poqui oꞌoyanaje o shajjaꞌajjajji cuana que. Oya cuana quea cojja jee mano poanaje; cahui oꞌoyanaje. Jamatii Jesosaa onijje mimi jjima; shequi meeꞌyo jjima acanaje.  
\v 44 Ona jeana oꞌoya majje jocuama pishana poqui oꞌoyanaje Jesosa, oja Chii nijje mimi oꞌoyaa. Oya jayojja mimi oꞌoyame poanaje.  
\v 45 Mimi oꞌoya majje poe oꞌoyanaje o shajjaꞌajjajji cuana que. Onijje mimi oꞌoyanaje: —¿Aꞌa mi cahuijaa tii? ¿Jomishocajaa pojjaꞌa ca mi ca oe? Jjeyahua nei dejjaa eya onaya iña meesahua cajeꞌyo.  
\v 46 ¡Cuaꞌa, jjeya nei ecuea epeejji nisho poejeꞌyo! Joya aje poeje baꞌa. 
\s1 Jesosa iña canaje 
\r (Macoso 14.43-50; Noca 22.47-53; Huani 18.2-11) 
\p  
\v 47 Jesosa mimianijo tii, Jodasa o que poeyanaje, ma eshajjaꞌajjajji cuana sohuihuohui poequi yasijje. Oya aje oe Jesosaja epeejji peaꞌai poanaje; pea 11 nijje nequinaje tii. Quea huiso nee nee dejja nijje Jodasa poeyanaje; yohuajji poeyanaje acuijji, baajji, mejejji peaꞌai poeyanaje. Jodio etii cuaa, Eyacuiñajji nijje emimijji etiiya peaꞌai ojjaña huoojea canaje Jesosa iñaa.  
\v 48 Jodasaa, Jesosa eꞌiña meejjiya yahuajo jama huohuime aca poa baꞌa: —¡Bacue oe! Eyaya oe dejja ba majje cuiapashi nishoje. ¡Majoya oe miquianaaya iñacue! 
\p  
\v 49 Jamajjeya Jodasa Jesosa que jjanequichipiquinaje: —¡Aꞌa mi ecuea Emeshi Mese nei jiquio! —amajje cuiapashi nisho canaje. 
\p  
\v 50 Jesosaa acanaje: —Ecuea epeejji Jodasa, ¿ajeo ami poeyanaje? —Jesosa poanaje. 
\p Pea dejja cuaa ba majje, Jesosa que poe majje iña canaje edojojji.  
\v 51 Jesosa iña cajo, oja epeejjiya onijje nequiya baa iña canaje. Onaja sapa jajapojojeajji nisho shajja jajasejja canaje, Eyacuiñajji nijje emimijji etiija echacojji poanija eshajja. 
\p  
\v 52 —Chojja. ¡Aꞌa jja oe jajajji! —Jesosaa oya huohui canaje—. ¡Baa oe ejee yasijje nequianobiaꞌyocue! Ojjaña jjajajaquiani manojeꞌyo yacua caꞌyajje.  
\v 53 ¿Aꞌa miquea eba pojjeama eyaya ecue Chii ehuohui jojjemo ohuaya esohuidojojji ache huiso nei nei huoojea came jjeyahua nei, e jaahuanaa?  
\v 54 Jamatii eya jama po ajja. Eꞌe, yahuajo nei Eyacuiñajjija esohui etehueꞌyo jama tehueme ejo aca poa baꞌa: “Onaaya iña mee majje dojo caje emano meeꞌyojji”. Jamaya ejo yahuajo nei tehue ca poa. Jamaya eya acajeꞌyo cuaa jjeya —Jesosa poanaje. 
\p  
\v 55 Jamajjeya Jesosaa ojjaña dejja ejjachichaquiꞌyo nequi yasijje huohui canaje: —¿Apiojji miya poeyanaje baajji, acuijji, mejejji peaꞌai e iñaa? ¿Aꞌa cuae jja iña siipojji soꞌo? Ojjaña pojjajo eya ojjaña nijje esohui huohuijji po nequinaje Eyacuiñajjija equijo. Jamatii eya miquianajaya iña jjima poanaje. ¿Apiojji miquianaya mecajje poeyanaje e iñaa?  
\v 56 Jamatii jamaya nequiana poani. Miquianaaya ca mi ca oe Eyacuiñajjija esohui huohuijjija etehueꞌyo yahuajo nei nei miquianajo jayojja jama quea tai aña. 
\p Majoya o shajjaꞌajjajji cuana cuajicuajinananaje; Jesosa jeajea canananaje. 
\s1 Jodio etiiya Jesosa cuia mee canaje 
\r (Macoso 14.53-65; Noca 22.54-55, 63-71; Huani 18.12-14, 19-24) 
\p  
\v 57 Jamajjeya joya Jesosa iñajji cuaa oya dojo canaje Eyacuiñajji nijje emimijji etiija equi yasijje, Caipaja equi yasijje. Jocuama Jodio cuana jjachichaquinaje, Jodio etii cuana, Moisesija etehueꞌyo huohuijji poani peaꞌai.  
\v 58 Penohua ca ca equijje aca poquinaje Jesosa onaa dojo caje. Caipaja equi yasijje Peno nequiñaquinaje. Dobiquinaje epeeyi nequi yasijje, sohuinana cuana nijje anioquenaje ae onaa Jesosa acaje ebajji. 
\p  
\v 59 Eyacuiñajji nijje emimijji etii, ojjaña Jodio etii cuana, Jodio esohui huohuijji poani peaꞌaiya ojee mimimiminaje Jesosajo, ojjaña ejjachichaqui nequiya o quecuaꞌyo sa acani. Jamajjeya saꞌajja canaje dejja cuana Jesosa huohuijji nisho, Shomano emeshi mese Pinato bajjani yasijje dojo majje Jesosa huohuijji nisho: —Jesosa ca ca jama acanaje baꞌa —siajje yajji. 
\p  
\v 60 Quea huiso dejjaa Jesosa siajje acanaje. Jamatii peaa siajjeꞌa, peaa siajjeꞌa acanaje Jesosajo. Chamaꞌ beca oya jayojja mimime epojji Jesosa mano meeꞌyojji.  
\v 61 Quijje yejje nei beca dejja poeyanaje eꞌe jojo nei jayojja emimijji. Jama poanaje baꞌa: —Eyaya oya shajjaꞌajjanaje. Jama poanaje Jesosa baꞌa: “Eyaya Eyacuiñajjija equi jeabichajeajeꞌyo. Jeabichajeaꞌyo majje pea equi iyajeꞌyo pea beca peejjima cahuime”. 
\p  
\v 62 Ma shajjaꞌajja majje Eyacuiñajji nijje emimijji etiiya nequisohua majje Jesosa huohuiꞌajja canaje: —¿Aꞌa pa miya jama poanaje? ¿Jesosa, aꞌa acuaeya dejja cuana miyaya sajaꞌajeꞌyo soꞌo? 
\p Jamatii Jesosa jjamimisajaꞌaqui ajja poanaje. 
\p  
\v 63 Jamajjeya Eyacuiñajji nijje emimijji etiiya huohui neinei canaje: —¡Eyacuiñajji eshe nequi tiiya eseya ba canijo, ecuana huohuicue eꞌe nei! ¿Aꞌa acuae miya Eyacuiñajjija Bacua Ejja nei, oja huoojeaꞌyo ojjaña jaahuanajji? ¡Huohuicue mo oe! 
\p  
\v 64 Jamajjeya Jesosaa huohui canaje: —Eꞌe, joya ecua miya mimiani jayojjaya eya. Cuanaya eyaya miya eꞌe nei huohuiaña: Quijje miyaya eya bajeꞌyo ecue Chii nijje ebianeijje ani. Oya quea caꞌa nee nee enequi tii tii. Eya miquianaaya baje peaꞌai poeje oꞌoya; bo biajje poejeꞌyo —Jesosa poanaje. 
\p  
\v 65 Shajjaꞌajja majje Jodio etii quea quene nee nee poanaje. Quea quene nee nee po majje ojaya daqui, oja huosho baꞌe daqui isajea canaje. Jodio dejjaa jamaya oja daqui isajea cani quea quene po majje. Ojjaña cuana huohui canaje jama baꞌa: —De, ¡pea dejja aꞌa iyaajji Jesosa huohuijji! Jamatii. ¡Oya Jesosa mimiqui Eyacuiñajjija Bacua Ejja miame! ¿Aꞌa acuae miquiaaya shajjaꞌajjanaje oja sohui? Jamajjeya ¿yajja acuae seya aje soꞌo, de, Jesosa? 
\p  
\v 66 —¡Oya oe manojea meeꞌyocue; quea tai ca esohui acanaje! —jamaya acanaje Jodio dejja cuaa, Jesosa Eyacuiñajjija Bacua Ejja pojjeama posojo. 
\p  
\v 67 Majoya aje oe Jodio dejjaa Jesosa cojja cuichojea canaje. Ejjachichaqui nequiya cuia canaje peaꞌai emeya.  
\v 68 Cuia majje huohuiꞌajja canaje: —¡Miya Eyacuiñajjija huoojea nei jjabaqui majje jja ca oe huohui pocue! ¿Aya acuae mi cuia canaje soꞌo? —acanaje cuaa. 
\s1 Penohua siajje acanaje Jesosa oja ba jjima nisho acanaje 
\r (Macoso 14.66-72; Noca 22.56-62; Huani 18.15-18, 25-27) 
\p  
\v 69 Ojjaña cuaa napa caqui Penohua ba canaje Jesosa; esecuejo sohuinano pejjejo eꞌanioque aniya ba caꞌaninaje. Oe echacojjiya ahuemaꞌaniya Peno ba majje huohuiꞌajja canaje: —¡Miya ca jja mi ca oe Jesosa nijje aninaje Janinea meshijo! 
\p Eponaa huohui cajje ojjaña cuaa Peno bajea canaje. Jamajje Peno metenaje. Jama sajaꞌame acanaje baꞌa:  
\v 70 —¡Chojja, ecuea oya ba jjima! ¿Ajeo acuae mi mimiani? —Peno siajje poanaje.  
\v 71 Majoya Peno epeeyijo nequi cuayaquinaje quea mete jjejojo. Pea epona echacojjiya Peno ba canaje esecuejo nequi. Ohuaya ojjaña dejja cuana huohui canaje: —Eꞌe jojo nei oya Jesosa nijje aninaje, ma Nasanenajo baꞌe nijje —poanaje. 
\p  
\v 72 —Chojja, ecuea oya ba jjima nei nei. Eyacuiñajjija eba eya eꞌe jojo nei mimiani —Penohua sajaꞌa canaje. 
\p  
\v 73 Quijje pishana beca cuana Peno que ojee nequi jjanequichipiquinaje. Jama poanaje baꞌa: —Eꞌe nei miya Jesosaja epeejji peaꞌai pea cuana nijje. Jamaya miquea emimi, pea Janinea meshijo baꞌe jayojja jama miya mimiani, de —poanaje. 
\p  
\v 74 Ojaya esohui shajjaꞌajja majje Peno quea mete nee nee poanaje; ona nijje mimijajinaje: —¡Siajje miya poani! Jiquio dejja ecuea ba jjima. Eya eꞌe jojo nei pojjeama poani jojjemo Eyacuiñajjiya eya mano mee caꞌyome —Peno poanaje. Jamatii Peno siajje poanaje. 
\p Peno jamaya poajo, cachina yahue taaanaje.  
\v 75 Cachina taaajo Penohua shahuaba caꞌyonaje ma Jesosaa oma mecajje o jama acanaje jama baꞌa: —Peno, cachina yahue taaa jjimahuajo miyaya eya ba jjima nei nei nisho ajeꞌyo, ebeca pee peejjima huohuime ajeꞌyo —jamaya Jesosaa Peno acanaje. 
\p Jamajjeya jjashahuabaqui majje Peno quea yeno nee nee poanaje; pa neinei poquiꞌyonaje Jesosa ba jjima nisho epo jjejojo. 
\c 27  
\s1 Jesosa emeshi mese Pinato huasijje dojo canaje 
\r (Macoso 15.1; Noca 23.1-2; Huani 18.28-32) 
\p  
\v 1 Mecajjeahua ojjaña Jodio etii cuana, Eyacuiñajji nijje emimijji etii cuana ojee miminaje Jesosajo: —¿Achajja amajje acuae seya Jesosa quecua meejeꞌyo soꞌo? Cuaꞌa, ¡ejjaquecua meequiqui! —poanaje. 
\p  
\v 2 Jamajjeya Jesosa me jeyo majje dojo canaje Shomano emeshi mese Pinato bajjani yasijje. 
\s1 Jodasa jjanaayisibijeaquiꞌyonaje Jesosa quecua meeꞌyo majje quea yeno jjejojo 
\r (Hecho 1.18-19) 
\p  
\v 3 Jamajjeya Jodasa, ma Jesosa iña meesahuajji epo Jesosa quecua cajeꞌyo ba majje quea yeno nee nee poanaje. Poquicuajinaje Jodio etii yasijje, Eyacuiñajji nijje emimijji etii yasijje peaꞌai.  
\v 4 Huohui cañaquinaje: —Eya Jesosa iña mee majje quea mimishi poanaje; oya ca ca Jesosa maseꞌama nei nei poanaje, mimishiꞌama nei. ¡Maꞌaje miquea esodojjo, 30, ma miyaya eya quianaje Jesosa iña meesahua sosejje! 
\p —Eꞌe pojjaꞌa, de. Eꞌe jamatii, Jesosa caquecuajea cahua —Jodio etiiya sajaꞌa canaje—. Miquea mimishijo ca jja mi ca jjashahuabaquiani, de —poanaje. 
\p  
\v 5 Jamajjeya Jodasaa esodojjo meshi yasijje huojjojeajea canaje. Pa poquinaje ebio huasijje jjanaayisibijeaquiꞌyohua. Manoꞌyonaje. Chamaꞌyo tii Jodasa poꞌyonaje. 
\p  
\v 6 Jodio cuaa aje oe esodojjo meshijo ani chicha canaje: —¿Yajja acuae jja seya jiquio esodojjo aje soꞌo? Jesosa sosequiaꞌyojji ya ca coma, de. Eyacuiñajjija equi yasijje iya sa po ajja. Jamaya pojjeama eseyaya aña —poanaje. 
\p  
\v 7 Jamajjeya mimimimi majje meshimisi iñabajijjija meshi, Apaneno meshi jjeshe canaje emano ohuajeajji, Jodio pojjeama ohuajeajji, ma 30 esodojjo sosejje jjeshe canaje.  
\v 8 Jjeya ca ca yohua bajjani baꞌa ma enaꞌ cuayaquinaje meshi bajjaniꞌyo, Jesosaja enaꞌ cuayaquinajejo. 
\p  
\v 9-10 Eꞌe, yahuajo nei nei Eyacuiñajjija esohui huohuijji Jenemiaa tehue ca poa jama baꞌa: 
\q1 “Ecuea Emeshi Meseya eya huohui canaje: —¡Ma 30 esodojjo sosejje meshi jjeshequicue! —aca poa—, ma bajjanija baꞌa meshimisi iñabajijji poanija meshi. Mahuiso esodojjo quia canaje Jodio cuaa Eyacuiñajjija huoojeaꞌyo Quito iña meesahuajji, equecuaꞌyojji”. 
\m Jamaya Jenemia poa yahuajo nei nei. 
\s1 Emeshi mese Pinatohua Jesosa ba canaje 
\r (Macoso 15.2-5; Noca 23.3-5; Huani 18.33-38) 
\p  
\v 11 Jamajjeya Jesosa emeshi mese Pinato huasijje dojo canaje, eme jeyo. Pinatohua ba majje huohuiꞌajja canaje: —¿Aꞌya acuae mi soꞌo? ¿Aꞌa miya Jodioja Emeshi Mese poajeꞌyo? 
\p —Eꞌe, joya ecua miyaya huohuiaña jamaya epoꞌyojji eya —Jesosaa sajaꞌa canaje. 
\p  
\v 12 Jodio etii cuaa, Eyacuiñajji nijje emimijji etiiya peaꞌai siajje acanaje Pinato Jesosajo. Jamatii Jesosaa sajaꞌa jjima acanaje.  
\v 13 Jamajjeya Pinatohua huohuiꞌajja canaje: —¿Yajjajje acuae mi mi jjasajaꞌaquiani soꞌo? ¿Aꞌa jje shajjaꞌajja jjima? 
\p  
\v 14 Chojja, Jesosa jjasajaꞌaqui ajja nei nei. Ba majje Pinato jjashahuaba neineiquinaje: —¿Yajjajje shai Jesosa jjasajaꞌaqui ajja, de? 
\p  
\v 15-16 Jamajjeya Pinatohua niñeba caꞌyonaje jama baꞌa: —Ojjaña eshequiaja eyaya oe Jodio dejja jeacuayaꞌyaña Jodio quea bihui nee poanijo. Eꞌe, ojjaña Jodio cuana jjashahuabaquiani jama baꞌa: Yahuajo Ejito meshijo Jodio etiiquianaja bacua ejja cuiaꞌyo jjima aca poa esohuidojojjiya, enaꞌ ecuiapepa jojoya —Pinato poanaje. 
\p Jiquio shejoya Pinatohua oe Jodio dejja ejeanobia nequi huoojeacuayajea mee caꞌyaninaje. Jamajjeya oya Pinato jjashahuabaquinaje: —Eꞌe, eyaya oe Jodio huoojeacuayajea meejeꞌyo jjeyahua nei. Jesosa pojjaꞌa pichojea meejeꞌyo. Pea yani Mashama bajjani, ojjañaja eba nei. Oya ejeanobia nequi quea masejojo. ¿Ache dejja shai Jodio cuaa sa cani soꞌo? Cabaꞌajja sahua —jamaya Pinato jjashahuabaquinaje. 
\p  
\v 17 Jamajjeya Pinatohua ojjaña Jodio cuana ehuohuiꞌajjajji iyaa canaje. Jjachichaquiajo huohuiꞌajja canaje: —Jjeyahua nei eyaya jeacuayajeajeꞌyo oe Jodio dejja. ¿Ache acuae jja oe jeacuayajeajeꞌyo soꞌo? ¿Aꞌa Mashama? ¿Aꞌa Jesosa Quito pichojeajeꞌyo? —poanaje. 
\p  
\v 18 Pinatoja eba poanaje Jodio etiiya quea quene nee poani ojjaña cuana Jesosa nijje jjapeequianijo. Jamajjeya Jesosa iña mee canaje equecuajeaꞌyojji, Jodio etiiquiaa. 
\p  
\v 19 Emeshi mese chacochacoañani yasijje Pinato Jesosa nijje mimimiminequianijo, oja huanaseya pea echacojji huoojea canaje Pinato huohuiya. Jama huohuime acanaje baꞌa: —Huee, mecajje eyaya cahuibanaje Jesosa mimishiꞌama nei nei. ¡Aꞌa oya quecua meeꞌyojji! Eya quea mete ani ojo. Eꞌe, jjacahuibaqui majje piopionaje quea mete jjejojo —Pinatoja huanaseya echacojji huohui mee canaje. 
\p  
\v 20 Oja huanase quea mete poanijo, Pinatohua Jesosa pichojeaꞌyo sa acanaje. Jamatii Jodio etii cuaa, Eyacuiñajji nijje emimijji etiiya peaꞌai ojjaña ejjachichaqui nequi taaa mee canaje: —¡Mashama oe huoojeacuayajeaꞌyocue! ¡Jesosa aꞌa pichojeajji! ¡Quecuajeaꞌyocue ca oma oe! 
\p  
\v 21 Jamajjeya Pinatohua: —¿Ache acuae jja oe pichojeajeꞌyo? 
\p Jamaya acajje, taaa neinei canaje cuana: —Mashama, ¡Mashama jeacuayajeaꞌyocue! —poanaje cuana. 
\p  
\v 22 —Jamajje ¿yajja acuae oe eyaya Jesosa Quito aje soꞌo? Eyacuiñajjija huoojeaꞌyo ojjaña jaahuanajji ca pa coma —Pinatohua huohuiꞌajja canaje. 
\p —¡Me cacajeacue oe acui ecueataꞌapeejo! —acanaje cuaa. 
\p  
\v 23 —¿Yajja acuae jja soꞌo? ¿Yajjajo acuae jjaya quecuaꞌyo sa aña Jesosa? —Pinatohua huohuiꞌajja canaje. 
\p Jamatii taaa majamajanaje Jodio cuana: —¡Me cacajeacue oe; me cacajeacue oe Jesosa! —jama taaameya Jodio cuana poanaje. 
\p  
\v 24 Eꞌe, Jesosa pichojea mee jjima acanaje cuaa; quea quene nee neejo janobajjima nei siasianaje; taaa nequinaje Jodio. Taaa majamajajo Pinatohua huoojea canaje ena eme shacuajji jjequiya. Majoya ojjaña cuanaja ebajji Pinatohua eme topo canaje: —¡Eyaya pojjeama me cacaje Jesosa emanoꞌyojji! ¡Jamaya pojjeama ecuea esohui! ¡Miyaya ca jja ca oe jamaya aña! —Pinatohua acanaje. 
\p  
\v 25 Taaajebenaje ojjaña Jodio etii cuana: —Eꞌe, ¡ecuaaya oya mano meejeꞌyo Jesosa; quea tai coma! ¡Oya mimishiꞌama jojoya, ecuanajaya ebacua, osecua cuana peaꞌai cacuia caꞌyahua, Eyacuiñajjiya! —Jesosa quea mimishi poso acanaje cuaa. 
\p  
\v 26 Jamajjeya Pinatohua ohua sa canijo Mashama jeacuayajea mee caꞌyonaje; Jesosa ca ca huoojea canaje cuiasejjajea majje me cacajeaa, emanoꞌyojji. 
\s1 Sohuinano soa neineinaje Jesosajo 
\r (Macoso 15.16-20; Huani 19.2-3) 
\p  
\v 27 Majoya emeshi meseja sohuinano cuaa Jesosa dojo canaje emeshi mese chacochacoañani equi dojjo huasijje. Ojjaña sohuinano o que jjachichaquinaje.  
\v 28 Oja daqui huijjiajea mee majje daqui huoꞌo nei huosho mee canaje emeshi mese nishoꞌyajji.  
\v 29 Acuisha sipi majje sapahuahuo iya canaje emeshi mese jayojja nisho epojji. Emeshi meseja acui ejehuijjajja iñanequia mee canaje ebianei mejje. Majoya ecuiꞌoshajjajo nequianaje ojjaña, Jesosa bihuiajji nisho. Jama bihuia nishome acanaje cuaa baꞌa: —¡Miya Jodioja Emeshi Mese quea caꞌa nee! ¡Baꞌe tiitiiꞌyocue! —jama sajeameya anisho canaje cuaa Jesosa. 
\p  
\v 30 Majoya cuichojea canaje oja yami yasijje; acui ejehuijjajja jjequisejjajea caꞌyonaje oja emejo nequi. Jjequisejjajeaꞌyo majje sapa cuiapeꞌejea canaje.  
\v 31 Ojo soa neineiꞌyo majje daqui huoꞌo nei huijjeajeajea caꞌyonaje; ojaya daqui quia ca oꞌoyanaje. Majoya Jesosa dojo canaje me cacajeaa, baꞌehuanasohuajeaa peaꞌai, sohuinano cuaa. 
\s1 Jesosa acui ecueataꞌapeejo me cacajea canaje sohuinano cuaa 
\r (Macoso 15.21-32; Noca 23.26-43; Huani 19.17-27) 
\p  
\v 32 Jenosanenajo aniya Jesosa dojo caje, ba cajjequinaje pea dejja Simoni bajjani, Sinene meshijo baꞌe poeꞌyo. Sohuinano cuaa Simoni acui ecueataꞌapee dojo mee canaje Jesosa quishishijji, Jesosa baꞌehuanasohuajeajji.  
\v 33 Jamaya oya poquinaje Jonijota eyiyo huasijje, Ese Ejjaja esohuijo Esapa Jjii anijji bajjani yasijje.  
\v 34 Nequiñaquiajo Jesosa ishi meeꞌajja canaje cuaa acuijjajja na quea sese, quea pase. Ishi meeꞌajja canaje quecua caꞌyajje neeꞌama epojji. Sio majje ishi jjima acanaje Jesosaa. Majoya me cacajea caꞌyonaje. Me caca majje nequiasohuajea canaje. Majoya oja daqui cuana chicha caꞌyonaje, sohuinano cuaa. Iyachichaꞌyo majje, hueꞌe nisho majje daqui majjo caꞌyonaje, ojaya pojji epoꞌyojji.  
\v 35-38 Etehueꞌyo o baꞌe sapa biajje oja bajjani caca canaje, Jesosa bajjani, oya apiojji me cacajea caꞌyonaje huohui epoꞌyojji. Etehueꞌyo jama poa baꞌa: \sc OYA JESOSA JODIOJA EMESHI MESE EPOꞌYOJJI\sc* 
\p Jesosa baꞌe pejjejo beca siipojji pea acui ecueataꞌapee cuanajo baꞌehuanasohuajea peaꞌai caꞌyonaje, Jesosaja ebianei mijijje, pea shani mijijje. Majoya eꞌanioque aniya ojjaña cuaa ba neinei ca aninaje oja epeejjiya ebaꞌehuanaoquea caꞌyo poajejje. 
\s1 Ejiojjijje poquije Jesosa nijje mimijajinaje cuana 
\r (Salmos 22.7; 109.25; Mateo 26.61) 
\p  
\v 39 Pea dejja cuaa ejiojjijje poquianiya Jesosa que poe majje esapa jeacajjacajja canaje, soa huisahuisa nequinaje. Jama mimijajime poanaje baꞌa:  
\v 40 —¿Aꞌa acuae oe miyaya Eyacuiñajjija mei equi iñajeabichajeaꞌyo majje pea equi iyaje oꞌoya soꞌo pea beca peejjima cahuime? ¡Baꞌajja socue! Ache baꞌajja; miya Eyacuiñajjija Bacua Ejja nei jjabaqui majje ca oe ¡acui ecueataꞌapeejo baꞌe nequioqueꞌajjaꞌyo socue emanoꞌyojji pojjeama! —poanaje cuana. 
\p  
\v 41 Jamaya peaꞌai Jodio etii bajjani cuaa, Moisesija etehueꞌyo huohuijji cuaa, Eyacuiñajji nijje emimijji etii cuaa peaꞌaiya Jesosa niñeba canaje:  
\v 42 —¿Aꞌa Jesosa ojjaña jaahuanajji epoꞌyojji? Oya ona nahuejji pojjeama. Oya ca ca oma nequioqueꞌyo jjima poani, de. ¿Aꞌa acuae jja oe oya Jodioja Emeshi Mese poajeꞌyo? ¡Jjabaꞌajjaqui socue! Jodioja Emeshi Mese nei epoꞌyojji jjabaqui majje ¡acui ecueataꞌapeejo baꞌe jja ca oe canequioqueahua jjeyahua neiya ecuanaja ebajji! Ba majje ecuaaya: “Jesosa eꞌe jojo nei Eyacuiñajjija Bacua Ejja poanaje” ajeꞌyo.  
\v 43 Ohuaya: “Eꞌe, eya ca ca iña Eyacuiñajjija Bacua Ejja; ohuaya eya jaahuana cani” acanaje yahuajo. Jamajjeya oya Jesosa Eyacuiñajjija quea boti nee neejo, ¡Eyacuiñajjiya oya canahue cahua jjeyahua nei! —Jodio cuana poanaje. 
\p  
\v 44 Siipojji cuaa ma o pejjejo ebaꞌehuanasohuajea baꞌeya peaꞌai Jesosa jamaya niñebame acanaje, quea huiso nee. 
\s1 Jesosa manoꞌyonaje 
\r (Macoso 15.33-41; Noca 23.44-49; Huani 19.28-30) 
\p  
\v 45 Majoya eshequi biacojjajja nequijo shequimaꞌ jayojja poanaje; quea misi nee poanaje ojjaña meshi yasijje. Quijje eshequi jjajeapaaquiꞌyo majje jiji oꞌoyanaje.  
\v 46 Sinecua, quea misi poajo Jesosa quea yeno nee neejo taaa neineinaje: —¿Eli, Eli, lama sabactani? —taaame poanaje—; ecue Chii, ecue Chii, ¿yajjajo acuae moya jeanaꞌyonaje soꞌo? —Jesosa poanaje Jodioja esohuijo. 
\p  
\v 47 Shajjaꞌajja majje joya quea chipi nee nee nequi jama poanaje baꞌa: —¡Bacue oe! ¡Ohuaya etiiquiana Enia iyaa cani pojjaꞌa! 
\p  
\v 48 Jamajjeya oe dejja poquicuajinaje acuijjajja na sese jjequiya. Jjequi majje shajashaja iyanobia canaje ena ejjequi yasijje. Majoya bequiobo sajo quecuahuosho majje Jesosaja enaba huasijje huoo canaje ojaya eꞌishijji nisho. 
\p  
\v 49 —Chojja, ¡ishoa socue! ¡Enia pojjaꞌa poeje o nahueya! ¡Baꞌajja socue! —Jodio cuana poanaje. 
\p  
\v 50 Jamatii taaa neinei oꞌoya majje Jesosa manoꞌyonaje. Chamaꞌyo tii poanaje.  
\v 51 Jesosa manoꞌyajo tii, Eyacuiñajjija equijo daqui quea moo ebaꞌehuana baꞌe Eyacuiñajjiya eyajje jjaꞌisajea meequi canaje; biacuajje ebionei jjaꞌisajeaquinaje. Meshi janobajjima nei huehuahuehuanaje peaꞌai. Mei quea quemo cuana jjayajjejeaquinaje peaꞌai.  
\v 52 Mei jjani, esajaajji cuana peaꞌai jjayajjejeaquinaje.  
\v 53 Quijje Jesosa eshe oꞌoya poajo, Eyacuiñajjija epeejji yahuajo emanoꞌyo ma jjani cuanajo jaa cuayaquiꞌyonaje, quea huiso Jenosanena huasijje poquinaje cuana; quea huiso dejjaa ba canaje ma emanoꞌyo cuana. 
\p  
\v 54 Ojjaña ba majje, meshi huehuahuehuani ba majje peaꞌai sohuinano quea huiso nee, 100, huoojeajji poaniya pea sohuinano cuana nijjeya, ma Jesosa nahuejji poani, quea mete nee nee poanaje. 
\p —¡Eꞌe jojo nei, de, oya Jesosa Eyacuiñajjija Bacua Ejja nei poanaje! —sohuinano poanaje. 
\p  
\v 55 Quea huesha nequiya epona cuaa peaꞌai Jesosa ebaꞌehuanasohuajea baꞌe ba canaje. Oya cuana yahuajo Jesosa nijje Janinea meshijo ania poa. Onijje Jenosanena huasijje poeyanaje oja bobi cuacua meesahuaa.  
\v 56 Oya cuana ma bajjani baꞌa: Mania Madanena; Satiaco, oja chahua Jose peaꞌaija enaese Mania bajjani; Semeneoja ehuanase peaꞌai; Jesosaja enaese peaꞌai. 
\s1 Jesosa mei jjani yasijje huananobia caꞌyonaje 
\r (Macoso 15.42-47; Noca 23.50-56; Huani 19.38-42) 
\p  
\v 57 Jamajjeya sinecua nei Jesosa manoꞌyajo, dejja quea aquiana huiso nee Jose bajjani poeyanaje, pea Jose, Amatea meshijo baꞌe. Oya Jesosa nijje jjapee tiitiiquia poa yahuajo nei.  
\v 58 Jamajjeya poe majje oya Pinato baa poquinaje. Huohui cañaquinaje: —Emeshi mese Pinato, Jesosa manoꞌyonaje. Eyaya oya cadojoꞌyahua ecuea mei jjani yasijje ehuananobiaquiꞌyojji —poanaje. 
\p Pinatohua huoojea canaje: —Eꞌe, ¡dojocue! Eyaya sohuinano cuana jamaya huohuime aje —poanaje. 
\p  
\v 59 Jamajjeya Joseya Jesosa acui ecueataꞌapeejo emanoꞌyo baꞌe jjequioqueaꞌyo majje dojo caꞌyonaje.  
\v 60 Daqui oshe eyacua neijo bebo majje huananobia caꞌyonaje ojaya mei jjani yasijje, ma oja jjeya nei tio huasijje. Majoya mei quea quemo jeacajjajja canaje mei jjani naba capaꞌyojji. Jesosa mei jjani dojjojo jaa capajea canaje. Capaꞌyo majje poquinaje Jose pea cuana nijje.  
\v 61 Mania Madanena, pea epona Mania bajjani peaꞌai mei jjani yasijje poeyanaje peaꞌai Jesosa jjanijo ehuananobia jaa baa. Jomajo eꞌanioque aniya ba canaje, epona cuaa. 
\s1 Sohuinano cuaa mei jjani nahue canaje 
\p  
\v 62 Jamajjeya mecahuajje epojja ejomishocajji jjayejjequiajo Paniseo cuana, Eyacuiñajji nijje emimijji etii peaꞌai poqui oꞌoyanaje Pinato que.  
\v 63 Huohui cañaꞌyonaje: —Emeshi mese, ecuana jjashahuabaquiani yahuajo Jesosa manoꞌyo jjimahua siajje poanaje jama baꞌa: “Beca cahuime po majje eya emanoꞌyojaa shequijeꞌyo” —Jodio poanaje, Jesosa siajje poanajejo poso—.  
\v 64 Jamajjeya ¡jjeyahua nei sohuinano huoojeacue jjani baa, beca cahuime pohua, Jesosaja epeejjiya oe equehua dojoꞌyo bacue! Jamaya po majje ojjaña cuana dasia ca chanaꞌ jama baꞌa: “¡Bacue oe! ¡Jesosa ca jja ca emanoꞌyojaa shequi oꞌoyanaje!” huohui ca chanaꞌ oja epeejjiya. Ojjaña cuana siajje nei nei acaꞌyo chanaꞌ —Jodio cuana jamaya poanaje, Jesosa eshequi oꞌoyajji pojjeamajo poso. 
\p  
\v 65 Jamajjeya Pinatohua huoojea canaje: —¡Maꞌaje sohuinano cuana! ¡Dojoꞌyocue mei jjani yasijje, ma Jesosa ehuananobia jaa huasijje! ¡Aꞌa acuae jjani caꞌajeꞌyo baꞌajja socue! —poanaje Pinato. 
\p  
\v 66 Jamajjeya poquinaje Jodio cuana sohuinano cuana nijje mei jjani yasijje. Jjani capajji ijjia caꞌa meequi caꞌyonaje baacuiya. Majoya esecue jjanijo emeshi mese nisho iya canaje ona edobiqui poaje jjejojo. Etehue iya canaje, emeshi mese nisho. Majoya Jodio cuana poquinaje. Sohuinano ca ca enequinaje tii, esecue jaahuanajjiya. 
\c 28  
\s1 Jesosa shequiꞌyonaje 
\r (Macoso 16.1-10; Noca 24.1-12; Huani 20.1-10) 
\p  
\v 1 Jamajjeya epojja ejomishocajji jjayejjequiajo mecajjeahua nei nei, ebionei jjapojjaquiajo, nomico pojjajo, Mania Madanena, pea Mania nijje poquinaje mei jjani yasijje.  
\v 2 Epona cuana jjani pejje yasijje poeyajo, meshi huehuahuehuanaje janobajjima nei. Eyacuiñajjija esohuidojojji eyajo ani nequioquenaje. Mei jeacajjajjajea canaje. Majoya esohuidojojji mei biajje anioquenaje.  
\v 3 Oya quea jiji nee nee poanaje pojjejje jayojja; ojaya daqui quea oshe nee nee, bo oshe nee nee jayojja ani ba canaje epona cuaa.  
\v 4 Sohuinano cuana quea mete nee nee poanaje. Piopio neineinaje; meshi yasijje jaabichajeaquinaje, emanoꞌyo jayojja jama jaanaje esohuidojojji yajjajo.  
\v 5 Majoya esohuidojojjiya epona cuana jama huohuime acanaje baꞌa: —¡Aꞌa quea mete pojji! Ecuea miya eba. ¿Aꞌa Jesosa, ma acui ecueataꞌapeejo manoꞌyonaje saꞌajjaꞌyo poequi?  
\v 6 Chamaꞌ oya jjeya jiquiojo. Shequiꞌyonaje ca jja coma; ma ecua ohuaya huohui canaje jamaya eꞌe jojo nei poꞌyonaje; oya shequiꞌyonaje jjeya. Eꞌe, ¡quiaꞌo jiquio baꞌajjahuaꞌyo! Jiquiojo jaanaje.  
\v 7 ¡Jjeyahua nei poquicuajicue oja epeejji cuana huohuiya! ¡Jama huohuime acue baꞌa: “Jesosa pa shequiꞌyonaje” acue! “Oya jjeya nei Janinea meshi yasijje poquije miquiana poqui jjimahuajo. ¡Oya oe jocuama baquicue!” jamaya o shajjaꞌajjajji cuana huohuiquicue! ¡Ecue sohui ma eya huohuinaje oe aꞌa pajeaꞌyojji; pea huasijje huohui neiquicue! —esohuidojojji jamaya poanaje. 
\p  
\v 8 Jamajjeya epona cuana poqui cuajicuajinaje. Quea mete, quea bei nee nee poanaje. Cuajicuajinananaje Jesosa shajjaꞌajjajji cuana esohuidojojjija esohui huohuiya. 
\p  
\v 9 Ejiojjijje poquijejo Jesosa jjanequipanaquinaje. Ehui dojojji nequinaje. Huohui canaje: —Jjoꞌi, ¡ejo quea bei pocue! Eya poeyanaje —Jesosa poanaje. 
\p O que poe majje o que jjanequichipiquinaje. Ecuiꞌoshajjajo nequinaje; jiojji napa canaje. Quea bihui nee nee yajji epona cuaa oya bihuia canaje.  
\v 10 Jamajjeya Jesosaa oya cuana huohui canaje: —¡Aꞌa quea mete pojji! ¡Poquicue; ecuea epeejji cuana huohuiquicue, miyaya! ¡Jama oe acue baꞌa: “¡Jjeyahua nei oe Janinea meshi yasijje poquicue! ¡Jocuama oe Jesosa baquicue, Janinea meshi yasijje!” acue! —Jesosa poanaje. 
\s1 Sohuinano cuana Jesosajo siajje poanaje 
\p  
\v 11 Epona cuana poquiꞌyajo sohuinano cuana meshijo jaa nequisohuaꞌyonaje. Jenosanena huasijje poquinaje Jodio etii baa. Eyacuiñajji nijje emimijji etii huohui cañaꞌyonaje ojjaña ohua jama acanaje, sohuinano cuaa.  
\v 12 Huohui poñaꞌyonaje. Sohuinanoja esohui shajjaꞌajja majje Jodio etii cuana jjachichaquinaje emimimimijji. Majoya sohuinano cuana quea huiso bejjo quia canaje o siajje poani sosejje.  
\v 13 Jama huohuime acanaje baꞌa: —¡Miyaya ojjaña cuana jama huohuime acue baꞌa: “Mecajje ecuana ecahuijaajo Jesosa sii caꞌyonaje jjanijo jaa, o shajjaꞌajjajjiya” acue!  
\v 14 Emeshi mese Pinato miquea ehuohui shajjaꞌajja cajo ecuana onijje mimije, eꞌe jojo nei, miya ojaya enapaꞌyojji pojjeama. Pinato quea bei po meejeꞌyo ecuanaa —Jodio cuana poanaje. 
\p  
\v 15 Jamajjeya Jodio etii cuaa sohuinano bejjo quia canaje. Bejjo jjeshe majje sohuinano cuana poquinaje ojjaña huasijje huohui pohua. Jodio etiija esohui jayojja jama acanaje. Jamajjeya quea huiso Jodio cuana sohuinanoja esohui shajjaꞌajja majje eꞌe jojo nei poani posojo jjashajjaꞌajjaquinaje. Jjeya jiquio pojjajo cuanaya jamaya Jodio cuaa huohui cani tii: —¡Jesosa ca jja ca ojaya epeejjiya quehuadojo caꞌyonaje; shequi oꞌoya ajja! —sohuinano siajje poanaje jayojja jama poani tii, Jodio cuana. 
\s1 Jesosa ba canaje o shajjaꞌajjajji cuaa 
\r (Macoso 16.14-18; Noca 24.36-49; Huani 20.19-23; Hecho 1.6-8) 
\p  
\v 16 Jamajjeya Jesosa shajjaꞌajjajji cuana 11 huisome poquinaje Janinea meshi yasijje Jesosa baa. Poquinaje eyiyo huasijje ma Jesosa huohui poequi baa.  
\v 17 Poqui majje, Jesosa ba majje bihuia canaje cuaa. Jamatii beca cuana ca ca jama poanaje baꞌa: —Eꞌe pojjaꞌa. Edojjoshahua pojjaꞌa coma, Jesosa pojjeama —jjashahuabaquinaje. 
\p  
\v 18 Jamajjeya Jesosa o que jjanequichipichipiqui majje jama huohuime acanaje baꞌa: —Eyacuiñajjiya eya Emeshi Mese nei epojji acaꞌyonaje eyajo, meshijo peaꞌai.  
\v 19 Jamajjeya ¡poquicue ojjaña dejja cuana huasijje! ¡Ojjaña pea esohui mimiani yasijje ecuea esohui ba meequicue peaꞌai! ¡Enijje jjapeequi meequicue! Enijje jjapeequiyajo, ¡ena huasijje besa meecue, eseja Chii nijje epojji, enijje epojji, Edojjoshahua Pame nijje peaꞌai epojji!  
\v 20 ¡Ojjaña cuana ecue sohui ba meesahuacue oe! ¡Ojjaña oe jjashajjaꞌajja meequicue quea bame nee nee ebaꞌejji, mimishiꞌama ebaꞌejji! ¡Bacue oe! Eya eꞌe jojo nei minijje nequi tiitiijeꞌyo ojjaña pojjajo, jiquio meshi oe epojji jiquio epojja huisome tii —Jesosa poanaje. 
\p Mahuiso ecuea esohui etehueꞌyo. Eyaya Mateo bajjaniya tehuejeyonaje. Apoa.