\id LUK - Ese Ejja NT -Bolivia 2012 (DBL -2013) 
\h NOCA 
\toc1 Nocaa Tehue Canaje Esohui Quea Bame Nee Jesosa Quitoja 
\toc2 Noca 
\toc3 Lc 
\mt2 NOCAA TEHUE CANAJE ESOHUI QUEA BAME NEE JESOSA QUITOJA 
\mt1 LUCAS 
\c 1  
\p  
\v 1 Eyaya mi que tehuenaje Teopino achajja Jesosa ebajji. Quea dejja huisohua Jesosaja ehuohuiꞌyo cuanajo tehue sa aca cua, huohui mee sa aca cua peaꞌai.  
\v 2 Ojaya epeejji cuaa, ojaya esohui huohuijji cuaa, Jesosa ba neinei ca cua. Ohuaya ecuanaya huohui neinei ca cua.  
\v 3 Jamajjeya eyaya catehueꞌyahua onaa huohui caꞌyoqui Jesosajo. Jjeya eyaya mi que tehuenaje, Teopino. Jiquio esohui eꞌe jojo nei Jesosajo. Eyaya shajjaꞌajja neineinaje onaa huohui caꞌyoqui Jesosajo. Majoya jjashahuaba neineiquinaje jiquio etehuejji, jamajjeya eꞌe jojo nei jiquio esohui.  
\v 4 Tehuenaje eyaya miquea Jesosa eba neineijji. Mi jjashahuaba neineiquijji eyaya tehuenaje, de. Jamajjeya ¡ba neineicue jiquio esohui ecue tehueꞌyo! 
\s1 Oe esohuidojojjiya Sacania huohui ca cua bacuajji cuajo, Huani ona besameejji epojji cuaje 
\p  
\v 5 Yahuajo pishana Jodioja emeshi mese nequia cua. Yohua bajjani cua baꞌa: Enode. Ma eshequiajajo tiiya aje baꞌya cua Eyacuiñajji nijje mimiani yohua bajjani baꞌa: Sacania. Oya chacochacoania cua Eyacuiñajji nijje emimijji cuana nijje, ma dejja yohua bajjani nijje baꞌa: Abiase dejja cuana nijje. Oya cuana Eyacuiñajji nijje mimiania cua. Sacaniaja ehuanase yohua bajjani cua baꞌa: Isameni. Isamenija etiiquiana cuana Eyacuiñajji nijje mimiani peaꞌai cua. Anoni dejja bajjani cua.  
\v 6 Sacania Eyacuiñajjija epeejji nei nei cua, oja huanase o jayojja nei neiya cua. Oya cuaa shajjaꞌajja neinei ca cua Eyacuiñajjija esohui.  
\v 7 Jamatii bacuamaꞌ cua; ojaya ehuanase jjamejoqui ajja neinei cua. Ehuanase epona tii cua; oya edejja tii peaꞌai cua. 
\p  
\v 8-9 Pea pojjajo Sacania jjachichaquia cua Eyacuiñajji nijje emimijji cuana nijje. Pea cuaa oya jama aca cua baꞌa: —Sacania, ¡jjeya jiquio pojjajo Eyacuiñajji nijje mimicue! ¡Jjeyahua nei mee nei dobiquicue Eyacuiñajjija equi yasijje, equi quecuayijji sisi yasijje! ¡Dobiqui majje acui shaa dahua huichachajeacue huichacha shiye epojji! ¡Ma ojjañaa aca cua jayojjaya oe acue! 
\p Dobiqui majje Sacaniaa jamaya aca cua Eyacuiñajjija equijo nequiya.  
\v 10 Beca cuana aje oe esecuejo nequia cua Eyacuiñajji nijje emimijji peaꞌaiya.  
\v 11 Sacaniaa aje oe acui shaa quea shiye dahua huichachajea canequia cua acui shaa edahuajeajji biajje iya ani. Majoya aje oe Eyacuiñajjija esohuidojojji jjanequijaꞌaquia cua, edahuajeajji ebañei mijijje nequia cua.  
\v 12 Sacania esohuidojojji ba majje piopio neineiꞌya cua esohuidojojji ba po jjima jjejojoya.  
\v 13 Majoya aje oe esohuidojojjiya jama aca cua baꞌa: —Sacania, ¡aꞌa piopiojji! Miya Eyacuiñajji nijje mimi majamajanaje ebacua yajjijo. Jamajjeya miya Eyacuiñajjiya shajjaꞌajja canaje miquea esohui ebacua yajjijo. Miquea ehuanase aje oe jjamejoquije. Majoya ¡ebacua cuayajo Huani bajjani acue!  
\v 14 Miya o cuayajo quea bihui nee nee cuaje. Pea dejja cuanaya quea bihui nee nee cuaje ebacua cuayajo.  
\v 15 Oya Eyacuiñajjija epeejji nei nei cuaje, jamajjeya miquianaya quea bihui nee cuaje. Oya acuijjajja na sese ishi ajja cuaje, ecahuishi ishi ajja peaꞌai cuaje. Edojjoshahua Bameya jaahuana cajeꞌyo oya cuayajo.  
\v 16 Ohuaya Eyacuiñajjija esohui huohui bame bame caje. Jamajjeya quea huiso Jodio cuaa shajjaꞌajja caje Eyacuiñajjija esohui. Ohuaya jjapeequi mee cajeꞌyo quea huiso Jodio dejja cuana Eyacuiñajji nijje.  
\v 17 Huaniya ebionei esohui huohui caje, majoya aje Quitohua, Eyacuiñajjija huoojeaꞌyohua esohui huohui caje. Huani Enia jayojja cuaje. Enia ma etiiquiana cua; Eyacuiñajjija esohui huohuijji nei nei cua. Huani Eyacuiñajjija esohui huohui po nequije. Shajjamaꞌ cuana ohuaya sohuihuohui caje. Majoya shajjamaꞌ cuaa ojaya esohui shajjaꞌajja caje; jjapeequije Eyacuiñajji nijje. Ojaya esohui shajjaꞌajja majje Quitoja esohui shajjaꞌajja sa acaje. 
\p  
\v 18 Sacaniaa huohuiꞌajja ca cua esohuidojojji jama baꞌa: —De, ¿achajja acuae po cajji soꞌo? Oya ca iña edejja tii nojinoji aña, ecuea ehuanase epona tii peaꞌai. 
\p  
\v 19 Esohuidojojjiya jama tecueame aca cua baꞌa: —Eya bajjani Jamieni, eya Eyacuiñajjija esohuidojojji nei nei cueyanaje. Ohuaya eya huoojea canaje minijje mimiya. Ecuea esohui quea bame miyaya shajjaꞌajjanaje.  
\v 20 Miya jjashajjaꞌajjaqui ajja cuanaje, jamajjeya miya mimi ajja cuaje. Huani cuayajo ca mi ca oe mimijeꞌyo. Ma ecua miya eyaya huohuinaje jayojjaya cuaje miya —jamaya cua esohuidojojji. 
\p Majoya aje Sacania mimi ajja po mee caꞌya cua. 
\p  
\v 21 Pea cuaa esecuejo nequia ishoaꞌajja ca nequia cua Sacania. Jama huohuiꞌajjame aca cua baꞌa: —¿Yajjajje shai Sacania eyiyedojjo tii nequi? 
\p  
\v 22 Majoya Sacania esecue yasijje cuayaꞌyo majje mimiꞌyo ajja cua. Eme nei ca ca oe huo canequia cua Sacaniaa. Sohuimajojo jama aca cuaa cua baꞌa: —Ohuaya pojjaꞌa ba canaje esohuidojojji nei eyiyedojjo nequi, de. 
\p  
\v 23 Sacania Eyacuiñajjija equijo chacojeyo majje poquia cua oja equi yasijje.  
\v 24 Quijje pishana Sacaniaa ehuanase bacua jea ca cua, oꞌejji po majje. Isameni me oejje baꞌime cuayaquiꞌyo jjima; ania cua oja equijo tii. Oya jjashahuabaquia cua jama baꞌa:  
\v 25 —Eyacuiñajjiya eya jjamejoqui meesahua canaje quea bihui epojji. Jjeya pea cuana mimijajiꞌyo ajja e bacuajjijo —jamaya Isameni cua. 
\s1 Esohuidojojjiya Mania huohui ca cua quijje ojaya ebacua ecuayajjijo 
\p  
\v 26-27 Janinea meshijo oe epona ahuemaꞌani ania cua, Mania bajjani. Oya Nasanena cuiñajjijo ania cua. Isameni Maniaja enene mese cua. Isameni me oejje oe baꞌime oꞌejji anijo Eyacuiñajjiya ma esohuidojojji huoojea ca oꞌoya cua Mania que. Mania jjahuiaqui jjima cua; dejja ba po jjima ania cua. Oya ca jjahuiaqui sa cua dejja yohua bajjanijo baꞌa: Josejo. Joseja baba etiiquiana yohua bajjani cua baꞌa: Dabi. Dabi Jodio dejjaja emeshi mese yahuajo nei nei cua.  
\v 28 Esohuidojojji dobiquia cua Maniaja equi yasijje. Jama mimime cua onijje baꞌa: —Mania, yani eya. Eya Eyacuiñajjiya huoojea canaje mi que mimiya. Miya ca ca oe ohuaya bacaca canaje ejjamejoquijji. Eyacuiñajji miquea Emeshi Mese nei, miya ohuaya jaahuana cani —jamaya cua esohuidojojji. 
\p  
\v 29 Mania quea mete cuanaje esohuidojojjija esohuijo. Majoya oya jama jjashahuabaquime cua baꞌa: —¿Apiojji shai oya jama mimime cuani enijje? 
\p  
\v 30 Esohuidojojjiya jama aca cua baꞌa: —Mania, ¡aꞌa quea mete pojji! Eyacuiñajjiya miya quea jea nee acani.  
\v 31 Jjeyahua nei miya oꞌejji anije, ebacuajje dejja cuaje. ¡Yohua bajjani acue baꞌa: Jesosa!  
\v 32-33 Oya quea bame nee nee baꞌeje. Pea cuaa bajjani caje Eyacuiñajjija Bacua Ejja nei oya. Eyacuiñajjiya oya po mee cajeꞌyo ojjañaja Emeshi Mese nei epojji; Dabi emeshi mese jayojja oya cuaje. Jodio dejjaja Emeshi Mese po tiitiijeꞌyo —jamaya cua esohuidojojji.  
\v 34 Maniaa esohuidojojji huohuiꞌajja ca cua jama baꞌa: —¿Achajja jjamejoquime acuae po cajji soꞌo, ca dejja ba po jjima? 
\p  
\v 35 Esohuidojojjiya jama aca cua baꞌa: —Edojjoshahua Bame nei mi que cueje. Bo jayojja mi que anioqueje. Eyacuiñajjiya miquea ebacua baꞌe mee caje. Jamajjeya miquea ebacua quea bame nee nee cuayaje oya Eyacuiñajjija Bacua jjejojo.  
\v 36 Ecuea esohui eꞌe jojo nei, mique nene Isameni eshoꞌyahua bacuamaꞌ tii cua. Jjeya ca ca oe jjamejoquinaje. Me oejje oe baꞌime ejjamejoqui ani. Jamajjeya ecuea esohui eꞌe jojo cuanaje.  
\v 37 Eꞌe, Eyacuiñajjiya camajaꞌama po mee cajeꞌyo ojjaña —jamaya esohuidojojji cua. 
\p  
\v 38 Jamajjeya Mania jama cua baꞌa: —Eya Eyacuiñajji nijje jjapee neineiqui sa cuani. Miquea esohui jayojja jama caꞌa cahua Eyacuiñajjiya —jamaya cuanaje Mania. 
\p Majoya esohuidojojji poquiꞌyonaje. 
\s1 Mania poquia cua eꞌaꞌi meseja equi yasijje anicuaa 
\p  
\v 39 Quijje pishana Mania poquia cua eꞌaꞌi meseja equi yasijje, Isamenija equi yasijje. Jodea meshi bajjani yasijje poquicuajinaje, eyiyojo baꞌeca huasijje.  
\v 40 Isamenija equi yasijje dobiqui majje Mania jama cua baꞌa: —Eya mi que cueyanaje anicuaa. 
\p  
\v 41 O mimiajo Isamenija bacua teejo baꞌe moquiquia cua. Isameni quea bihui cua; Edojjoshahua Bameya mimi mee ca cua.  
\v 42 Jamajjeya Isameni jjanobajjima nei mimia cua Mania nijje jama baꞌa: —Mania, miya Eyacuiñajjija quea jea nee nee pea epona jayojja jama pojjeama. Jamajjeya miquea ebacua teejo baꞌe ojaya quea jea nee nee peaꞌaiya.  
\v 43 Eꞌe, miya cueyanaje e que anicuaa, jamajjeya eya quea bihui nee cuani miya Eyacuiñajjija Bacua baꞌe meejojo.  
\v 44 Mi ecue equi yasijje dobiajo ecuea ebacua moquiquinaje teejo baꞌe.  
\v 45 Eꞌe, miyaya Eyacuiñajjija esohui shajjaꞌajja neineinaje, jamajjeya jamaya acajeꞌyo —jama mimimeya Isameni cua. 
\p  
\v 46 Majoya aje Mania jama mimime cua baꞌa: —Jjeya eya quea bihui nee nee Eyacuiñajji nijje.  
\v 47 Eyacuiñajji ecuea Emeshi Mese nei cuani. Ohuaya ecuea mimishi cuijea caꞌyonaje.  
\v 48 Jamatii eya epona, ahuemaꞌani. Eya baꞌe sa cuani Eyacuiñajjija yajjijo. ¿Yajjajo shai Eyacuiñajjiya eya bacaca canaje? Jamatii ojjaña cuana aje oe mimi tiitiijeꞌyo ejo jama baꞌa: “Mania quea bihui nee nee. Eyacuiñajjiya oya bacaca canaje”.  
\v 49 Eyacuiñajji quea caꞌa nee nee. Jamajjeya eya ohuaya quea bame acanaje. Oya mimishiꞌama nei nei, quea bame nee nee baꞌe.  
\v 50 Eyacuiñajjiya ojaya epeejji cuana jaahuana cani. Eꞌe, ojjaña joya onijje jjapeequiani Eyacuiñajjiya jaahuana cani etiiquiana yahuajo nei baꞌya cua, eshoꞌiquiana jjeya nei baꞌyani peaꞌai.  
\v 51-52 Beca cuana onijje jjapeequi jjima ohuaya caꞌaꞌama po mee caꞌyani. Dejja mimishi cuana caꞌaꞌama po mee caꞌyani, emeshi mese mimishi cuana ohuaya caꞌaꞌama po mee caꞌyani. Ojaya epeejji ca ca oe ohuaya quea caꞌa po mee caꞌyani.  
\v 53 Ojjaña cuana oja esohuijo jjashajjaꞌajjaqui sa cuanijo ohuaya jjashajjaꞌajjaqui mee cajeꞌyo. Beca cuana ca ca oja esohuijo jjashajjaꞌajjaqui sa po ajjajo ohuaya jjashajjaꞌajjaqui mee jjima acajeꞌyo; jeajea cajeꞌyo cuaqui yasijje jjashajjaꞌajjaqui sa po ajjajojo.  
\v 54 Eyacuiñajjiya Jodio dejja cuana jaahuana caje. Jamajjeya ohuaya oja Bacua Ejja huoojea caje Jodio dejja jaahuanajji epojji. Ohuaya pajeaꞌyo jjima acajeꞌyo.  
\v 55 Jamaya ohuaya esejaya etiiquiana Amajama jaahuana ca cua. Oja bacua cuana peaꞌai jaahuana ca cua. Oja osecua cuana jaahuana tiitii ca cua. Jjeya nei ohuaya eseya jaahuana cani peaꞌai —jama bihuiameya Maniaa Eyacuiñajji aca cua. 
\p  
\v 56 Majoya Mania pea beca peejjima baꞌime ania cua oja nene nijje. Majoya aje Mania poquiꞌya cua oja equi yasijje. 
\s1 Huani cuaya cua ona besameejji epojji 
\p  
\v 57 Quijje Isamenija bacua cuaya cua; yahue cua.  
\v 58 Ojaya huapa pojjeama cuana cueya cua oja bacua baa. Ojjaña Eyacuiñajji nijje quea bihui cua Isamenija ebacua cuayajo.  
\v 59 Me oejje pea beca peejjima cahuime po majje ojjaña cue oꞌoya cua ebacua bajjaniya; oja cuiishasha jehuisejjajeaa peaꞌai. Ojjañaa bajjani sa aca cua ejeajjija bajjani.  
\v 60 Isameniya ca jama aca cua baꞌa: —Chojja, ¡yohua bajjani oe acue baꞌa: Huani! 
\p  
\v 61 Pea cuaa jama aca cua baꞌa: —¿Apiojji acuaeya ma bajjani aje? Chamaꞌ aje jja che pea bajjani Huani. 
\p  
\v 62 Jamajjeya aje jja oe ojjañaa Sacania huohuiꞌajja ca cua: —¿Ae bajjani acuae jja cuaje soꞌo? 
\p  
\v 63 Majoya Sacaniaa mimi ajja jjejojo jama tehueme aca cua baꞌa: —¡Huani bajjani oe acue! 
\p Ojjaña jama cua baꞌa: —Eꞌe, ¿apiojji shai? 
\p  
\v 64 Majoya aje Sacania mimi mee ca oꞌoya cua Eyacuiñajjiya. Jamajjeya ohuaya Eyacuiñajji bihui ca oꞌoya cua.  
\v 65 Ojjaña cuana ca jja ca jama cua baꞌa: —De, Sacania mimiꞌya, de. 
\p Majoya ojjaña cuana poquia cua huohui pohua, ojjaña eyiyojo baꞌeca cuana huohuiya.  
\v 66 Ojjañaa shajjaꞌajja majje huohuiꞌajja ca cua jama baꞌa: —Eyacuiñajjiya jaahuana cani Sacaniaja bacua, Huani. Oya quea caꞌa nee nee cuaje; Eyacuiñajjiya quea bame nee nee baꞌe meesahua caje Huani. 
\s1 Sacania sohuicuaya cua 
\p  
\v 67 Sacania Edojjoshahua Bameya sohuicuaya mee ca cua. Jama sohuicuayame po mee ca cua baꞌa:  
\v 68 —Eseyaya oe Eyacuiñajji ejjabihuiaqui, ojjañaa. Oya esejaya Emeshi Mese nei, Jodio dejjaja Emeshi Mese nei, de. Ohuaya esejaya mimishi cuana cuijea caꞌyani.  
\v 69 Ohuaya Quito huoojea caje ese que. Ma ehuoojeaꞌyo Quito quea sohui poja nee nee cuajeꞌyo. Quitohua eseya quea caꞌa po mee cajeꞌyo. Ojaya etiiquiana Dabi emeshi mese cua yahuajo nei iye caꞌa caꞌa cua, Quito ca ca oe ojjañaja Emeshi Mese cuaje ese jaahuanajji.  
\v 70 Jamaya yahuajo tehue ca cua Eyacuiñajjija esohui huohuijji cuaa. Tehue majamaja ca cua Quitojo.  
\v 71 Jama tehueme aca cua baꞌa: 
\q1 “Yani dejja cuana ecuana nijje mimijaji neineiani. Ecuana botiꞌama cuani, cuiajea sa acani. Jamajjeya aje oe ecuanaya Eyacuiñajjiya jaahuana cani”. 
\m Jamaya esohui etehueꞌyo cuana cua. 
\p  
\v 72-73 —Eyacuiñajji yahuajo mimia cua ecuanaja etiiquiana nijje, Amajama nijje jama baꞌa: “Eyaya Quito huoojeajeꞌyo miquiana ojjaña jaahuanajji”. Jamaya aca cua ohuaya ojaya epajeaꞌyojji pojjeamajojo.  
\v 74-75 Jamajjeya eseyaya Eyacuiñajji ejjabihuiaqui; Quitohua dejja mimishi cuanajo meteꞌama po mee cani. Eseya jaahuana cajeꞌyo. Quea bame baꞌe mee cajeꞌyo mimishiꞌama epoꞌyojji —jama sohuicuayameya Sacania cua. 
\p  
\v 76 Majoya Sacaniaa oja bacua jama aca cua baꞌa: —Miya ecue bacua oe nei. Miya Eyacuiñajjija esohui huohuijji cuajeꞌyo. Ohuaya miya huoojea caje ebionei. Huohuicue jama baꞌa: “¡Oya shajjaꞌajjacue! Oya Quito, Eyacuiñajjija huoojeaꞌyo ojjaña jaahuanajji cueje”.  
\v 77 Huani, miyaya ojjaña cuana huohuicue jiquio esohui jama baꞌa: “Eyacuiñajjiya ojjaña cuanaja mimishi cuijea cajeꞌyo onijje jjapeequianija”.  
\v 78 Jamaya eseya Eyacuiñajjiya quea jea nee nee acajeꞌyo.  
\v 79 Jamajjeya ecuana meteꞌama cuaje onijje jjapeequi majje. Poquije eyahuasijje onijje ebaꞌe tiitiiꞌyojji. Ohuaya eseya quea bihui po mee cajeꞌyo —jamaya Sacania cua. 
\p  
\v 80 Majoya ebacua tii majje quea caꞌa nee nee cua; Eyacuiñajjija epeejji nei nei cua. Oya oe nei baꞌya cua quimajo. Majo tiiya aje Huaniya esohui huohui ca cua Jodio dejja cuana huasijje. 
\c 2  
\s1 Jesosa cuayanaje 
\r (Mateo 1.18-25) 
\p  
\v 1 Huani cuaya cua shejo emeshi mese yohua bajjani cua baꞌa: Agosto Sesa. Emeshi meseya echacojji cuana huohui ca cua jama baꞌa: —¡Sicoquicue ecue meshijo baꞌe cuana! ¿Ache huiso baꞌajjaꞌyo socue? ¡Huohuicue ojjaña dejja cuana jama baꞌa: “¡Poquicue mi cuayacua meshi yasijje mique bajjani tehueya; jamaya emeshi mese cuanaje!” acue! —jamaya Sesaa aca cua. 
\p  
\v 2 Emeshi meseya Sesaa jama sico coome aca cua. Ma shejo tiiya pea emeshi mese Sineño bajjani cua; ojaya meshi Sania bajjani cua.  
\v 3 Jamajjeya aje oe ojjaña poquia cua o cuaya cua meshi yasijje. 
\p  
\v 4-5 Jose, Maniaja ejajiba cua. Jose Nasanenajo baꞌeja jajiba cua, Janinea meshijo. Oja etiiquiana Dabi cua, yahuajo Dabi baꞌya cua Benenajo, Jodea meshijo. Jamajjeya Jose poquia cua Benena huasijje emeshi meseja esohuijo oja bajjani tehue meeya. Jose, oja shiye nijje poquia cua. Quea huesha poquia cua. Mania ebacua cuayajeaꞌyo pana nei poquia cua.  
\v 6 Majoya aje Benena bañaqui majje Maniaja bacua cuayañaquinaje.  
\v 7 Quea dejja huiso ania cua Benenajo jjabajjani tehue meequiya poqui. Jamajjeya chamaꞌ equi ejaachichajji cua. Jamajjeya aje oja bacua cuaya cua anaꞌai jaajji equijo. Ojaya ebacua cojjasobo cuaya cua jomajo. Cuayajo ohuaya bebo ca cua daqui oshejo. 
\s1 Ñajjajja jaahuanajji cuaa esohuidojojji ba ca cua 
\p  
\v 8 Ma mecajje aje Benenajo chipi nei pishana ñajjajja jaahuanajji cuana ñajjajja cuiña po aña cua.  
\v 9 Majoya aje esohuidojojji jjajaꞌaquia cua. Majoya aje oe o chipi nei jeajahuajahua ca cua esohuidojijjiya. Mete neineiꞌya cua ñajjajja jaahuanajji cuana.  
\v 10 Esohuidojojji jama cua baꞌa: —¡Aꞌa quea mete pojji! Eyaya esohui quea bame nee huohuiaña ojjaña dejja cuana quea bihui nee po meejji.  
\v 11 Jjeya nei cuayanaje oe ebacua Dabija meshijo. Ma ebacua Eyacuiñajjija huoojeaꞌyo. Ohuaya miquianajaya mimishi cuijea cajeꞌyo; yohua bajjani cuaje baꞌa: Quito.  
\v 12 ¡Miquianaya poquicue ebacua baa Benena huasijje! Jomajo aje anaꞌai jaajji equijo ebebo jaa oja nae nijjeya, oja chii Jose nijjeya peaꞌai —jamaya cua esohuidojojji. 
\p  
\v 13 Majoya aje quea huiso esohuidojojji cuana jjajaꞌaquia cua. Sohuicuayanaje ojjaña esohuidojojji cuana Eyacuiñajji bihuiajji. Jama sohuicuayame cua baꞌa: 
\q1  
\v 14 “Eyacuiñajji quea caꞌa nee nee. Eyajo baꞌe, quea ao nee nee. Eyacuiñajjiya ojjaña ojaya epeejji cuana ojjaña meshijo baꞌe quea bihui po mee caje”. 
\m  
\v 15 Majoya esohuidojojji baꞌesohuaquiꞌya cua eyahuasijje. Ñajjajja jaahuanajji cuana jama mimime cua baꞌa: —De, cueꞌajjaa Benena huasijje. Ma esohuidojojjiya huohui canaje jayojjaya aje seya aje. 
\p  
\v 16 Majoya poqui cuajicuajia cua ebacua saꞌajjaa. Majoya anaꞌai jaajji equijo jaa ba cañaquia cua ebacua, Mania, Jose peaꞌai.  
\v 17 Majoya ba majje huohuiꞌajja cañaquia cua esohuidojojjija esohuijo ebacuajo. Pea cuana huasijje huohui ca cua peaꞌai.  
\v 18 Beca cuana shajjaꞌajja majje jjashahuabaquia cua ñajjajja jaahuanajji cuanaja esohuijo. Quea bame cua.  
\v 19 Mania jjashahuabaquia cua peaꞌai. Pajeaꞌyo jjima aca cua ñajjajja jaahuanajji cuaa huohui canaje esohui.  
\v 20 Majoya ñajjajja jaahuanajji cuana poquiꞌya cua ñajjajja jaahuanaꞌyohua. Poquijeꞌyohua Eyacuiñajji bihuia nei nei ca poquiꞌya cua. Esohui quea huiso sohuicuaya cua: —Esohuidojojjija esohui eꞌe jojo nei —cuanaje. 
\s1 Ebacua Jesosa dojodobia cooqui ca cua Eyacuiñajjija equi yasijje 
\p  
\v 21 Me oejje pea beca peejjima cahuime cuajo Jesosaja naeya oja chiiya peaꞌai bajjani canaje Jesosa. Ma esohuidojojjija esohui jayojja Mania jjamejoqui jjimahuajo bajjani ca cua. Jesosaja cuiishasha jehuisejjajea ca cua peaꞌai, ojjaña Jodioja ebacua jayojjaya jama aca cua. 
\p  
\v 22 Baꞌi oe cuajo Maniaa Joseya peaꞌai Jesosa dojo ca cua Eyacuiñajjija equi yasijje Jenosanena huasijje. Maniaa Eyacuiñajjija equi yasijje dobiqui jjimahuaa Moisesija etehueꞌyo jayojja aca cua. Majoya Jesosa dojodobiaqui canaje Eyacuiñajjija equi yasijje huohuiya.  
\v 23 Jamaya aca cua Moisesija etehueꞌyojo baꞌa: 
\q1 “¡Ebacua cojjasobo dejja huohuicue Eyacuiñajji yasijje!  
\v 24 ¡Becanejjijji peaꞌai huiaꞌ quiacue Eyacuiñajji nijje mimiani yasijje equiyo jeyojeyoꞌyojji cuaqui pohui pojji epoꞌyojji! Jamaya miya ajo Eyacuiñajjiya mimishi cuijea cajeꞌyo. ¡Jamaya Eyacuiñajji sosequiajji acue!” 
\m Jamaya Moisesija etehueꞌyo cua. 
\p  
\v 25 Oe Jodio etii Simeoni bajjani Jenosanenajo baꞌya cua. Oya Eyacuiñajjija epeejji nei quea bame nee nee cua. Ohuaya Quito ishoaꞌajja ca ania cua Eyacuiñajjija huoojeaꞌyo ojjaña jaahuanajji. Jamatii jjashahuabaquiani Eyacuiñajjijo, jamajjeya Edojjoshahua Bame ojo nequia cua.  
\v 26 Jamaya Edojjoshahua Bame onijje cua baꞌa: —Miya emanoꞌyojji pojjeama Eyacuiñajjija huoojeaꞌyo cue jjimahuajo. 
\p  
\v 27 Jamajjeya Edojjoshahua Bameya Simeoni poqui mee ca cua Eyacuiñajjija equi yasijje. Simeoniya Jose, Mania Jesosa bishamijji nequi ba ca cua Eyacuiñajjija equijo.  
\v 28 Simeoniya ebacua Jesosa aña majje ba ca cua. Eyacuiñajji bihuia ca cua Jesosa ohua ba mee cajje. Jama cua baꞌa:  
\v 29-30 —Eꞌe de, jjeya nei Eyacuiñajjiya huoojea canaje ma ohua huoojeapana ca cua; jamajjeya ohuaya eya ba mee canaje. Jjeya eya poquijeꞌyo Eyacuiñajji yasijje quea jaji nee ebaꞌe tiitiiꞌyojji.  
\v 31 Ojjaña meshijo baꞌe cuaa Jesosa ba caje, Eyacuiñajjija huoojeaꞌyo ojjañaja mimishi cuijeaꞌyojji.  
\v 32 Jesosaa ojjaña dejja cuana quea jjashahuabaqui jaꞌa nee po mee cajeꞌyo Eyacuiñajjija esohuijo. Jesosa Emeshi Mese nei epojjijojo, Jodio dejja cuana quea bihui cuajeꞌyo —jamaya Simeoni cuanaje. 
\p  
\v 33 Majoya Jesosaja chii, enaese peaꞌai jjashahuabaquia cua Simeonija esohuijo jama baꞌa: —Eꞌe de, Simeonija esohui quea bame nee nee Jesosajo. 
\p  
\v 34 Majoya aje Simeoniya Mania, Jose peaꞌai jama aca cua baꞌa: —Miquianaya aje Eyacuiñajjiya quea bame acajeꞌyo. Mique bacua quea caꞌa po mee caje. Jaahuana cajeꞌyo. Mania, miya Jesosaja enaese. Mique bacuaa Jodio cuana jjashahuabaqui mee cajeꞌyo Eyacuiñajjijo quea huiso nee. Beca dejja cuana jjapeequijeꞌyo Eyacuiñajji nijje. Beca cuaa cajaa acaje, jjapeequi sa po ajja Eyacuiñajji nijje.  
\v 35 Mimijajije Jesosa nijje cuana. Oya quecua cajeꞌyo cuaa. Majoya aje oe miquianaya quea yeno cuaje ma cuanajoya —jamaya Simeoni cuanaje. 
\p  
\v 36 Jomajo oe epona tii ania cua; Ana bajjani. Eyacuiñajjija epeejji nei nei cua; Panoaneja bacua piona. Ojaya huapa pojjeama Asene bajjani cua. Yahuajo oya jjahuiaquia cua. Oja yahue nijje baꞌya cua me oejje beca, 7 shequiajame. Majoya aje ojaya yahue manoꞌya cua.  
\v 37 Jamajjeya quea huiso nee nee shequiajame, 84 shequiajame ania cua. Etii nojinoji nei eꞌahuemanoꞌyo ania cua. Eyacuiñajjija equijo jjeya ani, cuayaqui ajja neinei ania cua. Jamatii mimiania cua Eyacuiñajji nijje, bihuiabihuia tiitiiania cua ojjaña pojjajo. 
\p  
\v 38 Anaa ba ca cua Jesosa. Quea bihui nee cua. Jamajje dejja cuana nijje mimia cua joya Eyacuiñajjija huoojeaꞌyo ishoaꞌajja po ani nijje jama baꞌa: —¡Eꞌe ee bacue jiquio ebacua, Jesosa Quito cuayanaje! Ohuaya quea bei baꞌe mee cajeꞌyo Jodio cuana. Ojjaña cuanaja Emeshi Mese nei cuajeꞌyo —jamaya Anaa aca cua cuana. 
\s1 Jose poqui oꞌoya cua oja meshi yasijje Nasanena huasijje 
\p  
\v 39 Ojjaña Moisesija etehueꞌyo acua ajeyoꞌyo majje Jose oja huanase nijje, Jesosa peaꞌai nijje poquia cua. Ma o ebionei baꞌya cua meshi yasijje poqui oꞌoya cua, Nasanena huasijje.  
\v 40 Jomajo Jesosa tiia cua; quea caꞌa nee nee, quea jjashahuabaqui jaꞌa nee cuanaje. Eyacuiñajjiya oya jaahuana ca cua; quea bei nee nee ojo cua. 
\s1 Jesosa etii shacuimaꞌ nequi epo oja naeya oja chiiya peaꞌai dojo ca cua Eyacuiñajjija equi yasijje 
\p  
\v 41 Jesosaja chii oja nae nijje poqui nequia cua Jenosanena huasijje pea Jodio cuana nijje ojjaña shequiajajo. Pascua pohua poquia cua Eyacuiñajji bihuiaa. Yahuajo nei Jodio etiiquianaja bacua cuana esohuidojojjiya cuiaꞌyo jjima aca cua shejo poquia cua ojjaña nijje ijjiaꞌijjiaa.  
\v 42 Jesosa etii shacuimaꞌ nequi po majje, 12 shequiajame po majje poqui peaꞌaiya cua.  
\v 43 Oe semana Jenosanenajo aniya ojjaña cuaa Eyacuiñajji bihuia ca ania cua. Majoya Pascua jjayejjequiajo ojjaña cuana poqui caꞌya cua. Jesosa ca ca poquiꞌyo jjima cua. Jamatii ojaya enaeseja baꞌyo jjima cua, oja chiija peaꞌai. Jesosa pea cuana nijje pojebeꞌyani poso aca cua.  
\v 44 Majoya aje oe cahuime cuajo Jesosaja enaeseya niñeba caꞌya cua: —¿Aecue jiquio Jesosa soꞌo? 
\p  
\v 45 —Chamaꞌ ca ca Jesosa. ¿Achacua shai poquinaje? —jamaya pea cuana cua. 
\p Majoya aje huacuaya poqui oꞌoya cua Jenosanena huasijje Jesosa saꞌajjaꞌyohua.  
\v 46 Majoya pea beca peejjima cahuime epo ba caꞌya cua Jesosa Eyacuiñajjija equijo nequi. Jesosaa Eyacuiñajjija esohui huohuijji cuequi tii cuana huohuiꞌajja ca ania cua; Jesosa jjashajjaꞌajjaqui ania cua peaꞌai.  
\v 47 Ojjaña jjashahuaba neineiquinaje Jesosaja esohuijo: —Eꞌe de, Jesosa quea jaꞌa nee nee jjashahuabaquiani, de —pea cuana cua. 
\p  
\v 48 Joseya Maniaa peaꞌai Jesosa ba majje mimia ca cua jama baꞌa: —¿Aꞌa mi quioya Jesosa? ¿Aꞌya acuae mi po nequinaje soꞌo? Ecuanajaya miya baꞌyo jjima nei nei cuanaje. Jamajjeya eya mijo quea yeno nee nee cuanaje, Jesosa. Jamajjeya ecuanaya saꞌajjasaꞌajjaꞌyoquinaje. 
\p  
\v 49 Jesosaa jama aca cua baꞌa: —¿Apiojji acuae iña saꞌajjaꞌyaña soꞌo? ¿Aꞌa miquea ba jjima eya ecue Chiija equijo enequijji, Eyacuiñajjija equijo? 
\p  
\v 50 Jose Mania peaꞌai oja esohuijo jjabahuejjaqui jjima cua yajja cuani poso aca cua. 
\p  
\v 51 Majoya aje Jesosa oja chii nijje oja nae nijje Nasanena huasijje poqui oꞌoya cua, ma o baꞌe yasijje. Jamatii Jesosaa shajjaꞌajja ca cua Jose, Mania peaꞌai. Quea bihui baꞌya cua. Mania jjashahuabaquia cua Jesosaja esohuijo; pajeaꞌyo jjima aca cua.  
\v 52 Jesosa tiiya cua quea caꞌa nee nee; quea jaꞌa nee nee cua. Eyacuiñajji quea bihui nee cua Jesosajo; dejja cuana quea bihui cua peaꞌai. 
\c 3  
\s1 Huaniya Eyacuiñajjija esohui huohui ca cua 
\r (Mateo 3.1-12; Macoso 1.1-8; Huani 1.19-28) 
\p  
\v 1 Quijje nei mahuiso emeshi mese cuana cua baꞌa: Shomano dejja cuanaja emeshi mese Timeneo bajjani. Quea huiso shequiajame, 15 shequiajame nequijo Jodea meshija emeshi mese Ponisio Pinato bajjani nequinaje. Janinea meshija emeshi mese Enode bajjani cua. Oja doe etii Penipe bajjani cua. Oya Itoneaja emeshi mese cua, Taconiteja emeshi mese peaꞌai cua. Amininiaja emeshi mese Nisania bajjani cua.  
\v 2 Eyacuiñajji nijje mimiani etii Anasi bajjani cua. Pea ca Caipa bajjani cua. 
\p Jiquio emeshi mese cuana nequijo tiiya aje Huani Sacaniaja bacua ejja nequia cua meshi quimajo. Onijje mimi majje Eyacuiñajjiya Huani huoojea ca cua esohui huohuijji epojji.  
\v 3 Jamajjeya Huani poꞌayequie nequia cua Eyacuiñajjija esohui huohuiya Jodana cueijje. Ohuaya pea cuana jama huohuime aca cua baꞌa: —¡Jjashahuabaquicue Eyacuiñajjijo; miquea mimishi pajeaꞌyocue! ¡Miquea mimishijo quea yeno pocue! ¡Aꞌa mimishi maja sa poꞌyojji! Miya mimishi pajeaꞌyajo, aje Eyacuiñajjiya miquea mimishi cuijea cajeꞌyo. Eyaya miya besa meeje enajje pea cuanaja ebajji miya Eyacuiñajjija epeejji nei nei cuanijo. 
\p  
\v 4 Jamaya Isaiaa yahuajo nei Huanijo tehue ca cua. Isaia Eyacuiñajjija epeejji, esohui huohuijji cua. Oya etiiquiana nei nei cua. Jama tehuemeya aje yahuajo aca cua baꞌa: 
\q1 “Oe dejja quimajo nequi taaani jama baꞌa: ¡Acua pocue! ¡Jjashajjaꞌajjaquicue Eyacuiñajjija huoojeaꞌyo ojjaña jaahuanajjijo! 
\q1  
\v 5 Eyacuiñajjiya dejja quea mimishi cuana jeajea caje cuaqui yasijje jjashajjaꞌajjaqui ajjajojo. Ojjañaa joya Eyacuiñajjija esohui ojaya ehuoojeaꞌyo ojjaña jaahuanajjijo shajjaꞌajja cani ca ca quea bame nee cuajeꞌyo. Joya ecua ejiojji quea bame aca yani jama jayojja dejja cuana quea bame acajeꞌyo.  
\v 6 Ojjaña meshijo nequica dejjaa shajjaꞌajja caje Eyacuiñajjija esohui. Joya onijje jjapeequije Eyacuiñajjiya mimishi cuijea cajeꞌyo”. 
\m Jamaya cua Isaiaja etehueꞌyo Huanijo. 
\p  
\v 7 Majoya dejja quea huiso cueya cua Huani que mimishi pajeaꞌyohua nisho, oja besa mee yohua nisho peaꞌaiya. Jamajjeya aje Huaniya jama tecueame aca cua baꞌa: —Miquianaya quea tai cuani. Peyo jayojja cuani. Miquianaaya ca jja ca mimishi pajea nishoꞌyaña. Miquianaya jjashahuaba taiquiani jama baꞌa: “Eyacuiñajjiya eya jeajea jjima acaje cuaqui yasijje Huanija enajje ebesa meejojo”. Jamatii miquianajaya ca jja ca oe mimishi pajeaꞌyo jjima nei nei. ¡Ebionei oe shajjaꞌajjacue Eyacuiñajjija esohui; majoya miquianajaya mimishi pajea neineiꞌyocue! Majoya oe enajje eyaya besa meejeꞌyo Eyacuiñajjija epeejji nei epojji.  
\v 8 Miquianaya Eyacuiñajjija epeejji nei baꞌyanijo, mimishi epo becaꞌyojji pojjeama. ¡Jama jjashahuabaquimeya oe pocue enajje ebesaqui cuahuajje! Aꞌa mimijji jama baꞌa: “Ecuea etiiquiana Amajama cua. Oya Eyacuiñajjija epeejji nei cua, jamajjeya aje oe ecuanaya Eyacuiñajjija epeejji peaꞌai cuani”. Cho, miquianaya ca ca jjapeequi jjima Eyacuiñajji nijje. Miquianaya quea mimishi, de. Eyacuiñajji ojaya epeejji quea huiso sa cuani jojjemo Amajama jayojja epojji, ohuaya mei pana came.  
\v 9 Miquianaya joya acui jjajjamaꞌ jayojja cuani. Jiquio ecua acui jjajjaꞌyo ajja jajajea caꞌyojji jayojja jama Eyacuiñajjiya dejja mimishi acajeꞌyo, jeajea cajeꞌyo cuaqui yasijje. Jamaya aje miquianaya acajeꞌyo mimishi pajeaꞌyo ajjajojo, onijje jjapeequi sa po ajjajojo. Beca cuana ca ca joya acui quea jjajja huiso jayojja cuani. Quea bame nee nee baꞌyani, Eyacuiñajji nijje jjapeequiani jjejojo. Quea bei baꞌyani pea cuana nijje, oya Eyacuiñajjiya quea jea nee nee acani jjejojo. 
\p  
\v 10 Majoya aje dejja cuaa jama huohuiꞌajjame aca cua baꞌa: —¿Yajja acuae oe po cajji soꞌo? 
\p  
\v 11 Huani jama cua baꞌa: —¡Joya miquea beca yanijo daqui quiacue daquimaꞌ cuana huasijje! ¡Miquea bobi yanijo ca bobimaꞌ cuana huasijje quiacue! 
\p  
\v 12 Emeshi meseja bejjo chichajji cuani cuaa jama huohuiꞌajjame aca cua baꞌa: —Esohui huohuijji, ¿yajja acuae pajjaja po cajji soꞌo? 
\p  
\v 13 Huani jama cua baꞌa: —¡Aꞌa quea mimishi pojji! ¡Aꞌa quea sose huiso ajji! ¡Joya emeshi meseja sosehuiso tiiya jjeshecue! —jamaya cua Huani. 
\q1  
\v 14 Majoya aje sohuinanohua jama huohuiꞌajjame aca cua baꞌa: —¿Yajja acuae ecuanaya cuajeꞌyo soꞌo? 
\m Huani jama cua baꞌa: —¡Aꞌa miquiaaya dejja cuana iñajji bejjo esiijji! ¡Aꞌa pea cuana nijje siajje pojji bejjo esiijji! ¡Miquianajaya bejjojo nei jjaja oe quea bihui pocue! —jamaya Huaniya sohuinano aca cua. 
\p  
\v 15 Dejja cuaa Huani Eyacuiñajjija huoojeaꞌyo ojjaña jaahuanajji poso aca cua oja esohui quea bame nee nee cua jojoya.  
\v 16 Huani ca ca Eyacuiñajjija huoojeaꞌyo ojjaña jaahuanajji pojjeama cua. Oya jama cua baꞌa: —Eyaya miquianaya enajje besa meejeꞌyo Eyacuiñajjija epeejji jojoya. Eya ca ca Eyacuiñajjija huoojeaꞌyo ojjaña jaahuanajji pojjeama. Oya ca ca Quito bajjani quijje pishana cueje. Ohuaya miquiana que Eyacuiñajjija Edojjoshahua Bame dobiqui mee cajeꞌyo. Jamajjeya miya quea bame cuajeꞌyo. Mimishi cuana pajea sa poꞌyo ajjajo ca ca, jeajea cajeꞌyo cuaqui yasijje. Jamaya Quito oe nei quea caꞌa nequi. Eya ca ca iña quea caꞌa pishana nequi. Jamajjeya eya ca iña onijje nequi sa po ajja miquiana ani cojja nei. Quea bicho eya, de.  
\v 17 Quito cueje ojaya epeejji nei chichaꞌyohua. Pea cuana ca ca cajaa ajea cajeꞌyo. Eꞌe, jiquio ecua seya anoso shaa jea majje equi yasijje iyaꞌyaña jama ojaya epeejji cuana acajeꞌyo Quitohua. Jiquio ecua seya anoso cuiahuojo majje shaa jeajeaña jayojja jama Quitohua ojaya epeejji pojjeama cuana jeajea cajeꞌyo cuaqui quijjoꞌyo ajja huasijje —jamaya Huaniya aca cua. 
\p  
\v 18 Huanija pea esohui jama cua baꞌa ojjaña cuanajo: —Eyacuiñajji ojjaña nijje jjapeequi sa cuani, jjeya nei. 
\p  
\v 19 Ojaya pea esohui jama cua baꞌa: —Esejaya emeshi mese, Enode bajjani quea mimishi nee nee cuanaje. Oja chahuaja, Penipeja huanase sii canaje oja huanase epoꞌyojji. Ma epona Enodiasi bajjani cuanaje —jamaya cua Huani. 
\p  
\v 20 Jamajjeya Enode ma esohui shajjaꞌajja majje quea quene nee nee cua. Iña mee ca cua Huani ejeanobiajeajji, Enodeya quea mimishi nee neeya jjejojo. 
\s1 Huaniya Jesosa enajje besa mee ca cua 
\r (Mateo 3.13-17; Macoso 1.9-11) 
\p  
\v 21 Huani jeanobiajea jjimahua poquia cua dejja ojjaña cuana nijje Jodana cuei yasijje enajje besa meeya. Jesosa peaꞌai poquia cua o que. Huaniya Jesosa besa mee caꞌya cua. Majoya Jesosa Eyacuiñajji nijje mimianijo, eyatahuatahua capajea ca cua. Edojjoshahua Bame huiaꞌ jama o sapa biajje cuabesa baꞌya cua. Japashineijje baꞌeoquea cua.  
\v 22 Majoya esohui shajjaꞌajja ca cua ojjañaa eyahuasijje. Eyacuiñajji Jesosa nijje jama mimime cua baꞌa: —Miya ecue Bacua Ejja nei, Jesosa. Eyaya miya quea jea nee aña. Eya mijo quea bihui nee nee —jamaya cua Eyacuiñajji. 
\s1 Jesosaja etiiquiana 
\r (Mateo 1.1-17) 
\p  
\v 23 Jesosa Jodio dejja nei cua. Jesosaa 30 shequiajame tii majje esohui huohui coo ca cua.  
\v 24 Ojaya etiiquiana cuana yohua bajjani cua baꞌa: Ebionei Jose nequia cua. Oya Jesosa tii meejji cua; Jesosaja chii jayojja cua. Jose ca Enija bacua ejja cua. Eni ca Mataꞌaja bacua ejja cua. Mataꞌa ca Nemija bacua ejja cua. Nemi ca Mequija bacua ejja cua. Mequi ca Janaja bacua ejja cua. Jana ca Joseja bacua ejja cua. Jose ca Matatija bacua ejja cua.  
\v 25 Matati ca Amosoja bacua ejja cua. Amoso ca Nahuomaja bacua ejja cua. Nahuoma ca Esinija bacua ejja cua. Esini ca Naquiaja bacua ejja cua.  
\v 26 Naquia ca Maataja bacua ejja cua. Maata ca Matatija bacua ejja cua. Matati ca Semeja bacua ejja cua. Seme ca Josequija bacua ejja cua. Josequi ca Jonaja bacua ejja cua. Jona ca Joanaja bacua ejja cua.  
\v 27 Joana ca Shesaja bacua ejja cua. Shesa ca Sonobabeja bacua ejja cua. Sonobabe ca Sanatija bacua ejja cua. Sanati ca Nenija bacua ejja cua.  
\v 28 Neni ca Mequija bacua ejja cua. Mequi ca Adija bacua ejja cua. Adi ca Cosamaja bacua ejja cua. Cosama ca Emanamaja bacua ejja cua. Emanama ca Esheja bacua ejja cua. Eshe ca Jesosaja bacua ejja cua.  
\v 29 Jesosa ca Enieseja bacua ejja cua. Eniese ca Jonimija bacua ejja cua. Jonimi ca Mataꞌaja bacua ejja cua. Mataꞌa ca Nemija bacua ejja cua.  
\v 30 Nemi ca Simeonija bacua ejja cua. Simeoni ca Jodaja bacua ejja cua. Joda ca Joseja bacua ejja cua. Jose ca Jonamija bacua ejja cua. Jonami ca Eniaquimija bacua ejja cua. Eniaquimi ca Meneaja bacua ejja cua.  
\v 31 Menea ca Menaja bacua ejja cua. Mena ca Matataja bacua ejja cua. Matata ca Nataja bacua ejja cua. Nata ca Dabija bacua ejja cua.  
\v 32 Dabi ca Isaija bacua ejja cua. Isaiꞌ ca Obedaja bacua ejja cua. Obeda ca Boosija bacua ejja cua. Boosi ca Sanaja bacua ejja cua. Sana ca Naasonija bacua ejja cua. Naasoni ca Aminidabija bacua ejja cua.  
\v 33 Aminidabi ca Adimija bacua ejja cua. Adimi ca Ashinija bacua ejja cua. Ashini ca Eshaomija bacua ejja cua. Eshaomi ca Panesija bacua ejja cua. Panesi ca Jonaja bacua ejja cua.  
\v 34 Jona ca Jacoboja bacua ejja cua. Jacobo ca Isaacaja bacua ejja cua. Isaaca ca Amajamaja bacua ejja cua. Amajama ca Taneja bacua ejja cua. Tane ca Naconija bacua ejja cua.  
\v 35 Naconi ca Senocaja bacua ejja cua. Senoca Shacaoja bacua ejja cua. Shacao ca Penecaja bacua ejja cua. Peneca ca Emeneja bacua ejja cua. Emene ca Sanaja bacua ejja cua.  
\v 36 Sana ca Cainanija bacua ejja cua. Cainani ca Anajjadaja bacua ejja cua. Anajjada ca Semija bacua ejja cua. Semi ca Noeja bacua ejja cua. Noe ca Nemequeja bacua ejja cua.  
\v 37 Nemeque ca Matosaneja bacua ejja cua. Matosane ca Enoqueja bacua ejja cua. Enoque ca Janedija bacua ejja cua. Janedi ca Majananeenija bacua ejja cua. Majananeeni ca Cainanija bacua ejja cua.  
\v 38 Cainani ca Enosija bacua ejja cua. Enosi ca Setija bacua ejja cua. Seti ca Adanaja bacua ejja cua. Adana ca Eyacuiñajjija pana cua. Oya ebionei dejja cua. 
\c 4  
\s1 Edosiquiana etiiya Jesosa quea mimishi po mee sa aca cua 
\r (Mateo 4.1-11; Macoso 1.12-13) 
\p  
\v 1 Jesosa cueyanaje Jodana cuei yasijje Huanija besa meeya. Jomajo Edojjoshahua Bameya Jesosa dojo canaje quima huasijje. Majoya Edosiquiana etii Jesosa nijje miminaje oja emeshi mese nei epoꞌyojji nisho.  
\v 2 Jomajo nequia cua quea huiso nee cahuime, 40 cahuime ijjiaꞌijjia jjima cua. Majoya quea shoe nee nee jjabaquia cua.  
\v 3 Edosiquiana etiiya Jesosa jama huohuime aca cua baꞌa: —Miya Eyacuiñajjija Bacua jjabaqui majje ca oe ¡jiquio mei pahui pojji acue! ¡Pahui pojji amajje ijjiacue! 
\p  
\v 4 Jesosa jama cua baꞌa: —Chojja de, eya miquea esohui shajjaꞌajja sa po ajja. Bacue, Eyacuiñajjija etehueꞌyo jama cuani baꞌa: “Dejja cuana bobijo caꞌa po majje pojjeama baꞌe tiitiijeꞌyo. Ojjaña Eyacuiñajjija esohui jayojja jama añajo ca se ca oe quea bame nee baꞌe tiitiijeꞌyo” —jamaya Jesosa cua. 
\p  
\v 5 Majoya aje Edosiquiana ettiya Jesosa dojo ca cua eyiyo aoꞌao huasijje. Majoya aje ba mee ca cua ojjaña meshi cuana; Jesosa cahuijo jayojja ba mee ca cua.  
\v 6 Edosiquiaa huohui ca oꞌoya cua jama baꞌa: —Eyaya miya quiaje jiquio meshi cuana, miya emeshi mese po meejeꞌyo. Eyaya ojjaña aquiana quiajeꞌyo. Ojjaña meshi cuana ecuea, jamajjeya eyaya quia sa cuanijo eyaya aje miquea yajji quiajeꞌyo.  
\v 7 ¡Miyaya eya bihuiacue, shajjaꞌajjacue ecuea esohui! Majoya miya emeshi mese po meejeꞌyo eyaya —jama siajje ameya aca cua Edosiquiaa Jesosa. 
\p  
\v 8 Jesosa jama cua baꞌa: —Chojja, ¡poquicue quea huesha, Edosiquiana! Eyacuiñajjija etehueꞌyo jama cuani baꞌa: 
\q1 “¡Eyacuiñajji oe nei bihuiacue; oya oe nei ojjañaja Emeshi Mese nei nequi! ¡Ojaya ehuohuiꞌyo jama oe acue!” —Jesosaa aca cua. 
\p  
\v 9 Majoya aje Edosiquiaa Jesosa dojo ca cua Jenosanena huasijje. Nequia cañaquia cua Eyacuiñajjija equi biajje. Majoya Edosiquiaa Jesosa jama aca cua baꞌa: —Miya Eyacuiñajjija Bacua Ejja nei jjabaqui majje ¡jiquiojo nequi tohuaaꞌajjaꞌyo socue meshi yasijje!  
\v 10 Eyacuiñajjija etehueꞌyo jama cuani baꞌa: 
\q1 “Eyacuiñajjiya huoojea caje esohuidojojji cuana mi jaahuanaa.  
\v 11 Oquequiajo ohuaya emeya miya iñajjequi cajeꞌyo. Jamajjeya miya ejjajiojji quecuasajaquijji pojjeama meijo”. 
\m Jamaya cuani, de —Edosiquiana cuanaje. 
\p  
\v 12 Jesosaa jama aca cua baꞌa: —Chojja, miya jjashahuaba taiquiani, de. Eyacuiñajjija pea etehueꞌyo jama cuani baꞌa: 
\q1 “Aꞌa jamaya mimijji baꞌa: ¿Aꞌa Eyacuiñajjiya oja esohui eꞌe jojo nei acajeꞌyo? ¿Aꞌa eya jaahuana nei cajeꞌyo? Cabaꞌajjasahua. ¡Aꞌa pojji!” 
\m Jamaya yahuajo nei Moisesiya tehue ca cua —jamaya Jesosa cua. 
\p  
\v 13 Edosiquiana jjashahuabaqui jjima cua; pea esohui chamaꞌ cua Jesosa quea mimishi po meejji nisho. Jamajjeya Edosiquiana poquia cua. Majoya aje quijje cue oꞌoya cua o quea mimishi po meeꞌyohua nisho. 
\s1 Jesosaa huohui coo ca cua Janinea meshi yasijje 
\r (Mateo 4.12-17; Macoso 1.14-15) 
\p  
\v 14 Majoya Jesosa posohuaqui oꞌoya cua oja meshi yasijje, Janinea meshi yasijje. Edojjoshahua Bameya Jesosa quea caꞌa po mee ca cua. Jomajo dejja cuana mimia cua Jesosajo, ojjaña meshi yasijje mimia cua.  
\v 15 Jamatii Jesosa poꞌayequie nequia cua pea cuiñajji cuana huasijje Eyacuiñajjija esohui huohuiya Jodioja equi ejjachichaquijji cuana huasijje. Ojjaña dejja quea bihui cua onijje. Jama cuana cua baꞌa: —Eꞌe, ojaya esohui quea jaꞌa nee, quea bame nee nee. 
\s1 Jesosa poquia cua Nasanena huasijje 
\r (Mateo 13.53-58; Macoso 6.1-6) 
\p  
\v 16 Jesosa poquia cua Nasanena huasijje, oya tiiꞌya cua jomajo tii. Ojjaña epojja ejomishocajjijo Jesosa dobiqui majamajanaje Jodioja equi ejjachichaquijji yasijje esohui huohuiya. Jamajjeya dobiqui majje oya nequisohua cua Eyacuiñajjija etehueꞌyo ajji.  
\v 17 Oe dejjaa, etehueꞌyo jaahuanajjiya Jesosa quia ca cua etehueꞌyo. Yahuajo Isaiaja etehueꞌyo cua. Isaia Eyacuiñajjija epeejji nei, etiiquiana cua; Eyacuiñajjija esohui huohuijji cua. Jamajjeya ojaya etehueꞌyo eꞌe jojo nei cua. Eꞌe de, Jesosaa sheꞌa ca cua ma etehueꞌyo, jama ame aca cua jiquio esohui baꞌa: 
\q1  
\v 18 “Edojjoshahua Bameya eya jjashahuabaqui mee cani. Ohuaya eya huoojea canaje jama baꞌa: —¡Huohuicue ecuea esohui bame dejja aemaꞌ cuana huasijje! ¡Huohuicue dejja ejeanobiajaa cuana huasijje ecuayaqui meeꞌyojji! ¡Huohuicue cojjamaꞌ cuana huasijje ejjacojja jaꞌa meequiꞌyojji! ¡Huohuicue pea dejja quea yeno baꞌe yasijje quea bihui ebaꞌe meejji! 
\q1  
\v 19 Huohuicue jiquio esohui: Emeshi Mese neiya ojjaña cuana quea bihui baꞌe mee sa acani”. 
\m Jamaya Isaiaa tehue ca cua yahuajo nei. 
\p  
\v 20 Majoya Jesosaa etehueꞌyo cami caꞌyonaje; quia ca oꞌoya cua ma dejja huasijje. Jesosa anioquea cua huohui epojji. Ojjañaa oya ba caꞌya cua; ishoaꞌajja ca cua ojaya esohui ehuohuijji.  
\v 21 Ohuaya esohui huohui ca cua jama baꞌa: —Eꞌe, ma etehueꞌyo huohui cani ejo. Eya cueꞌyonaje ma dejja cuana huasijje esohui huohuiya. Eyaya miquianaya huohuiꞌajjaña jama baꞌa: Eyacuiñajjiya quea bihui baꞌe mee cajeꞌyo miquianaya —Jesosaa aca cua. 
\p  
\v 22 Ojjaña Jesosajo quea bame mimia cua. Jjashahuabaquia cua ojjaña ojaya esohuijo. Pea cuana ca ca Jesosajo jama cua baꞌa: —Jesosaja esohui quea jaꞌa de, oya ca ca Joseja bacua nei, Eyacuiñajjija Bacua pojjeama —jamaya pea cuana cua Jesosa Eyacuiñajjija Bacua pojjeamajo poso. 
\p  
\v 23 Jesosaa oya cuana tecuea ca cua jama baꞌa: —Miquianaya jamaya cuaje miquianajaya ejjashahuabaquijjijo baꞌa: “Ejjashicuiquijji, ¿yajjajje acuae jja miyaya mi jjashicuiꞌajjaquiani soꞌo?” ¿Aꞌa nequiana jamaya peaꞌai jjashahuabaquiani? Jama cuani baꞌa: “Ecuanaaya miya shajjaꞌajjanaje, Jesosa. Miyaya jjaajaqui meeꞌyonaje Capenaomajo baꞌe cuana. ¿Yajjajo acuaeya oe miquea meshijo baꞌe cuana jjaajaqui meeꞌyo jjima aña soꞌo?” ¿Aꞌa nequiana jamaya jjashahuabaquime cuani? —Jesosa cua—.  
\v 24 Eꞌe jojo nei ecuea esohui, jamatii miquianaya Eyacuiñajjija esohui huohuijji mimianijo oja meshijo ojaya huapa pojjeama cuana ca ca jjashajjaꞌajjaqui sa po ajja. 
\p  
\v 25 —Miquianajaya eba ma etiiquiana Enia bajjani. Yahuajo nei ohuaya huohui ca cua Eyacuiñajjija esohui. Beshahua nei pea beca peejjima shequiajame ena poꞌyo jjima cua. Bobi tii jjima cua ena chamajojo. Ojjaña quea shoe nee nee cua.  
\v 26 Yahuajo quea huiso Jodio eꞌahuemano ania cua. Jamatii oya cuana ca ca jjashajjaꞌajjaqui sa po ajja Eniaja esohuijo, Eyacuiñajjija ehuohuiꞌyojo. Jamajjeya Eyacuiñajjiya Enia huoojea ca cua pea meshi yasijje Sinono meshi yasijje, Saneta cuiñajji yasijje, Sinono eꞌahuemano que. Jomajo eꞌahuemanohua shajjaꞌajja ca cua Eyacuiñajjija esohui. Jamajjeya Enia bobia ca cua. 
\p  
\v 27 —Miquianajaya eba pea etiiquiana Eyacuiñajjija esohui huohuijji Eniseo bajjani baꞌya cua Enia nijje. Quea huiso Jodio dejja batata epoꞌyo jomajo baꞌya cua. Jamatii Eniseoja esohui shajjaꞌajja sa po ajja. Jamajjeya jjaajaqui meeꞌyo jjima aca cua Eyacuiñajjiya. Pea meshijo baꞌe Sinia meshijo oe dejja Naamani bajjani batata epoꞌyo nequia cua; oya shajjaꞌajja sa cua Eyacuiñajjija esohui. Jamajjeya oya poquia cua Eniseo que, Eniseoja jjaajaqui meeꞌyohua. Ohuaya shajjaꞌajja ca cua ojaya esohui. Jamajjeya jjaajaqui mee caꞌya cua Eyacuiñajjiya. Jamaya miquianaya shajjamaꞌ cuani miquianajaya etiiquiana jayojja. Jjeya nei shajjaꞌajja sa po ajja Eyacuiñajjija esohui, jamajjeya jjaajaqui meeꞌyo jjima acaje Eyacuiñajjiya —Jesosa cuanaje. 
\p  
\v 28 Ojjaña cuana Jodioja equi ejjachichaquijjijo anica Jesosaja esohui shajjaꞌajja majje quenequene neineiꞌya cua Jesosa nijje.  
\v 29 Jesosa iña majje jeacuayajea ca cua esecue yasijje. Majoya poqui mee caꞌya cua eyiyo hui yasijje eꞌiñajeatohuaajeaꞌyojji nisho.  
\v 30 Jamatii Jesosa poquia cua, jjayejjequinana cua ona nequi yiyesamajjeya. 
\s1 Oe dejjaja eshahua nequia cua 
\r (Macoso 1.21-28) 
\p  
\v 31 Pea pojjajo Jesosa poquia cua Capenaoma huasijje, Janinea meshi yasijje. Ejomishocajji pojjajo oya dobiquia cua Jodioja equi ejjachichaquijji yasijje esohui huohuiya.  
\v 32 Ojjaña cuaa jama aca cua baꞌa: —De, Jesosaja esohui quea jaꞌa nee. Eꞌe jojo nei pojjaꞌa Eyacuiñajjiya oya huoojea canaje, de. 
\p Jamajjeya ojaya esohui shajjaꞌajja sa aca cua.  
\v 33 Oe dejja eshahua nijje tii ania cua Eyacuiñajjija equijo. Eshahuaa oya taaa sajasaja mee ca cua Jesosa que jama baꞌa:  
\v 34 —Eꞌe de, ¿apiojji shai miya ecuana que cueyanaje, Jesosa? Miya cueyanaje pojjaꞌa ecuana cuayaqui meeꞌyohua. Ecuanajaya miya eba, Jesosa. Miya Nasanenajo baꞌe, miya Eyacuiñajjija Bacua, miya mimishiꞌama, de —jamaya eshahua cua. 
\p  
\v 35 Jesosaa eshahua tecueajea ca cua jama baꞌa: —¡Aꞌa mimijji; cuayaquiꞌyocue jiquio dejjajo nequi! —Jesosa cua. 
\p Majoya eshahuaa ma dejja jeabichajea mee ca cua pea cuana pejjejo. Eshahua neeꞌama nei nei cuayaquiꞌyome cua ma dejjaja eyamijo nequi.  
\v 36 Ojjaña jjajjasohuaquia cua; mimia cua pea cuana nijje jama baꞌa: —Eꞌe de, Jesosa quea sohui poja nee nee; ojaya esohuijo eshahua cuayaquiꞌyonaje, de. ¿Yajjajje shai quea sohui poja nee nee? —jamaya cua ojjaña Jesosajo.  
\v 37 Jamaya pea cuaa huohui ca cua ojjaña cuiñajjijo baꞌe yasijje. 
\s1 Jesosaa boeca mee caꞌya cua Simohuija ano 
\r (Mateo 8.14-15; Macoso 1.29-31) 
\p  
\v 38 Majoya Jesosa cuayaquia cua Jodioja equi ejjachichaquijjijo ani. Cuayaqui majje poquia cua Simohuija equi yasijje. Dobiqui majje ba ca cua Simohuija ano. Simohuija ano quea mano jaa, quea quiyo nee nee jaa ba ca cua. Simohuiya Jesosa jama huohuiꞌajjame aca cua baꞌa: —Jesosa, ¿aꞌa miyaya boeca meejeꞌyo ecue ano, ecue huanaseja enaese? 
\p  
\v 39 Jesosaa Simohuija ano jama aca cua baꞌa: —Eꞌe, jjeyahua nei mi quiyoquiyo pajeajeꞌyo —Jesosaa aca cua. 
\p Majoya aje epona tii quiyoquiyo pajeaꞌya cua. Boecananaꞌya cua. Majoya boecaꞌyo majje anisohuaꞌya cua. Anisohuaꞌyo majje bobi cuacua meesahua ca cua epona tiiya. 
\s1 Jesosaa quea huiso emanojaa cuana jjaajaqui mee caꞌya cua 
\r (Mateo 8.16-17; Macoso 1.32-34) 
\p  
\v 40 Quijje pishana eshequi oquequiajo ojjaña emanojaa dojo ca cua Jesosa que jjaajaqui meeꞌyohua. Jesosaa emanojaa cuana emeya napa cajje jjaajaquiꞌya cua.  
\v 41 Eshahua cuana peaꞌai cuayaqui mee caꞌya cua. Cuayaquiꞌyo majje eshahua cuana taaa cua jama baꞌa: —Jesosa, miya eꞌe jojo nei Eyacuiñajjija Bacua Ejja. 
\p Jesosa jama cua baꞌa: —¡Aꞌa enijje jama mimijji! Miquea eba eya, Eyacuiñajjija huoojeaꞌyo ojjaña jaahuanajji. Pea cuanaja eya ba jjima, de —jamaya Jesosa cua. 
\s1 Jesosa poꞌayequie nequia cua Eyacuiñajjija esohui huohuiya 
\r (Macoso 1.35-39) 
\p  
\v 42 Jjapojjaqui jeahuajo Jesosa oe nei poquia cua dejjama huasijje. Pea cuanaa saꞌajja ca nequia cua: —¿Aecue Jesosa? 
\p Quijje pishana ca ca ba caꞌya cuaa cua Jesosa. Mimia cua onijje jama baꞌa: —Jesosa, ¡nequicue ecuanaja cuiñajjijo! ¡Aꞌa poquijji pea cuiñajji yasijje! 
\p  
\v 43 Jesosaa jama huohuime aca cua baꞌa: —Chojja, jiquio cuiñajjijo eya nequi ajja. Eyaya Eyacuiñajjija esohui cahuohuiquiahua pea cuiñajjijo baꞌe cuana huasijje. Jamajoya aje oe eya ecue Chiiya huoojea canaje ojaya esohui bame bame huohuijji pea cuana huasijje. Eyaya iyaaje dejja cuana jama baꞌa: “¡Jjashajjaꞌajja quicue oe! Eyacuiñajjiya miya quea jea nee nee acani, oya miquea Emeshi Mese nei po sa cuani; mi jaahuanajji nei nei po sa cuani. Ohuaya miya baꞌe bame mee sa acani. ¡Jamajjeya onijje jjapeequicue!” —jamaya Jesosa cua.  
\v 44 Jamaya ohuaya esohui huohui ca ayequi nequia cua Jodioja equi ejjachichaquijji cuana huasijje, ojjaña meshi cuana huasijje. 
\c 5  
\s1 Jesosaja epeejjiya nahuoo cuiashaja ca cua quea huiso nee nee 
\r (Mateo 4.18-22; Macoso 1.16-20) 
\p  
\v 1 Oe pojjajo Jesosa Jenesane bae sahua meshijajijo ania cua. Pea cuana huasijje Eyacuiñajjija esohui huohui po ania cua. Quea huiso dejjaa ojaya esohui shajjaꞌajja sa aca cua.  
\v 2 Quea dejja huisojojo shajjaꞌajja jjima aca cua pea dejja cuaa. Jamajjeya Jesosaa pea eꞌanijji saꞌajja ca cua ojjañaja eshajjaꞌajjajji. Majoya becanejjijji bishe ai ba ca cua bae sahuajo baꞌe. Ma bishe mese cuana nahuoo cuiashajajji shacuaꞌyo po nequia cua.  
\v 3 Oe bishe mese Simohui bajjani cua. Jesosa nequisohuaquia cua oja bishe yasijje. Jesosaa Simohui huohuiꞌajja ca cua jama baꞌa: —¡Quecuayiyejeacue ena bae pishana huasijje ojjañaja ecuea esohui eshajjaꞌajjajji! 
\p —Eꞌe —Simohui cua. 
\p Majoya bishe quecuayiyejea majje Jesosaa bishejo eꞌanioque aniya tii esohui huohui ca aña cua.  
\v 4 Jesosaa esohui huohuijeyo majje Simohui jama aca cua baꞌa: —Simohui, ¡bishe yocue ena bae yiyesama huasijje! ¡Majoya jeacue nahuoo cuiashajajji! 
\p  
\v 5 Simohuiya jama aca cua baꞌa: —Esohui huohuijji, ecuana mecajje poquinaje nahuoo cuiashajaa nisho. Chamaꞌ de, chamaꞌ nahuoo cuanaje. Eyaya ca ca shajjaꞌajja sa aña miquea esohui, jamajjeya eyaya jeaje ena huasijje nahuoo cuiashajajji —jamaya Simohui cua. 
\p  
\v 6 Majoya yo ca cua ena bae yiyesama huasijje nahuoo cuiashajajji. Jea ca cua nahuoo cuiashajajji; quea huiso nee nee nahuoo dobiquia cua. Quecuaisajeaꞌajja ca cua.  
\v 7 Majoya Simohuiya ojaya epeejji cuana iyaa ca cua: —¡De, yacua oe yecue bishe pea, che nahuoo jjequijeasohuahuacue! 
\p Majoya pea bishe ye ca cua; cuio ca cua beca bishe nahuoohua. Beshahua nei bishe jaadobiquia cua.  
\v 8 Ma ba majjeya aje Simohui ecuiꞌoshajjajo nequia cua Jesosa pejjejo; jama cua baꞌa: —De, ecuea Emeshi Mese, eꞌe jojo nei miquea esohui, eya miquea esohuijo jjashahuaba taiquinaje, de. ¡Quea huesha nequicue Jesosa, eya quea mimishi cuanaje! —jamaya Simohui cuanaje. 
\p  
\v 9 Simohuija epeejji cuana jjajjasohuaquia cua nahuoo quea huiso ohua cuiashaja cajo. O jayojja jjajjasoaquime peaꞌaiya cua, de.  
\v 10 Semeneoja bacua cuana Satiaco, Huani, Simohuija echacosahuajji cuani peaꞌaiya jjajjasohuaquia cua. 
\p Majoya Jesosaa Simohui jama aca cua baꞌa: —¡Aꞌa jjajjasoaquijji! Miquianaaya banaje ecuea esohui eꞌe jojo nei nahuoo cuiashajajjijo. Jjeyahua nei miquianaaya dejja quea huiso jjequije ecuea esohuijo ejjashajjaꞌajjaquijji, ecuea epeejji epojji —jamaya Jesosa cua. 
\p  
\v 11 Majoya cuaa bishe yo caꞌya cua etaja huasijje. Aquiana cuana jeanaꞌyo majje poquia cua Jesosa nijje. 
\s1 Jesosaa dejja jjajea meequi caꞌya cua batata epoꞌyo ma dejjaa shicui jjima acani 
\r (Mateo 8.1-4; Macoso 1.40-45) 
\p  
\v 12 Oe pojjajo Jesosa ania cua pea cuiñajjijo. Cueꞌya cua oe dejja batata epoꞌyo. Ojjañaja oya botiꞌama cua, o jayojja epo cuani jjejojo. Oya Jesosa ba majje ecuiꞌoshajjajo nequia cua o bihuiajji. Jama huohuiꞌajjame aca cua baꞌa: —Emeshi Mese nei, miya sa cuanijo, ¿aꞌa mo che miyaya jjajeaqui meeꞌyome soꞌo? —aca cua ohuaya. 
\p  
\v 13 Majoya Jesosaa napaꞌajja ca cua emeya, quea jeajojo huohui ca cua: —Eꞌe, eyaya miya jjajeaqui meejeꞌyo batata epoꞌyo. Quea boejea po meejeꞌyo. 
\p Jjajeaqui meeꞌyo majje chamaꞌyo cua ojaya batata epoꞌyo. Quea boejea ojaya ejee poꞌyonaje. 
\p  
\v 14 Majoya Jesosaa jama huohuime aca cua baꞌa: —¡Aꞌa oe pea cuana huohuijji! ¡Eyacuiñajjija equi yasijje oe poquicue! ¡Jomajo huohuicue Eyacuiñajjija esohui huohuijji: “Jjajeaquiꞌyonaje mo” acue! ¡Moisesija etehueꞌyo jama oe acue! ¡Quiaquicue beca huiaꞌ, beca ijjiacajji peaꞌai, equiajji Eyacuiñajji bihuiajji, miya ojaya ejjajeaqui meeꞌyohua jjejojo! Majoya esohui huohuijji cuana jjabahuejjaquije miquea batata epoꞌyo chamaꞌyo cuanajejo. Majoya ojjaña jjabahuejjaquije miya quea bojea poꞌyonajejo —Jesosaa aca cua. 
\p  
\v 15 Jamatii quea huiso dejjaa shajjaꞌajja ca cua Jesosaa jjajeaqui mee caꞌyani batata epoꞌyo. Ohuaya jjaajaqui mee caꞌyani emanojaa cuana. Jamajjeya quea dejja huiso nee cueyanaje shajjaꞌajjaa, jjaajaquiꞌyohua peaꞌai.  
\v 16 Jamatii Jesosa poqui nequia cua dejjama huasijje Eyacuiñajji nijje mimiya. 
\s1 Jesosaa jjaajaqui mee caꞌyonaje oe dejja jeoꞌajjajaa 
\r (Mateo 9.1-8; Macoso 2.1-12) 
\p  
\v 17 Oe pojjajo Jesosa poquinaje onaja equi yasijje esohui huohuiya. Paniseo dejja cuana, Moisesija etehueꞌyo huohuijji cuana peaꞌai cueyanaje Eyacuiñajjija esohui shajjaꞌajjaa. Quea dejja huiso pea meshijo baꞌe cuana cueyanaje, Janinea meshijo baꞌe cuana. Jodea meshijo baꞌe cuana, Jenosanenajo baꞌe cuana peaꞌai cueyanaje. Jesosaa Eyacuiñajji nijjeya quea huiso emanojaa jjaajaqui mee caꞌyonaje.  
\v 18 Jamajjeya pea dejjaa oe dejja jeoꞌajjajaa ye ca cua equi yasijje. Dojodobiaqui sa aca cua Jesosa que.  
\v 19 Dobiqui meemee ajja cuana cua quea dejja huisojojo. Jamajjeya aje dojosohua caꞌya cua equi jamacoo huasijje. Huejja ca cua eyiyesama neijje. Jesosa nequi cojja nei jeaꞌoquea ca cua.  
\v 20 Jesosaa ba ca cua dejja jeoꞌajjajaa ojaya epeejji peaꞌai. Jjashahuabaquia cua jama baꞌa: —Eꞌe de, jiquio dejja cuanaja eba eyaya jjaajaqui meejeꞌyo emanojaa cuana. 
\p Jamajjeya jeoꞌajjajaa huohui canaje jama baꞌa: —Eꞌe ecuea epeejji, jjeya miquea mimishi eyaya cuijeajeꞌyo. 
\p  
\v 21 Majoya Paniseo cuana, Moisesija etehueꞌyo huohuijji cuana peaꞌai jjashahuaba taiquia cua; Jesosa Eyacuiñajjija Bacua pojjeama poso aca cua. Jama cua baꞌa: —Jesosa quea tai cuani, de. Oya Eyacuiñajji jama cuani. Oe nei Eyacuiñajjiya mimishi cuijea cajeꞌyo. Jesosaja ca ecuijeaꞌyojji pojjeama —poso aca cua. 
\p  
\v 22 Jesosaja eba ojaya jjashahuabaquijji cuana. Jamajjeya huohui ca cua jama baꞌa: —Miquianaya jjashahuaba taiquiani, de.  
\v 23 ¿Ache esohui camajaꞌama soꞌo? Jiquio pojjaꞌa baꞌa: “¡Eyaya miquea mimishi cuijeajeꞌyo!” Pea esohui pojjaꞌa: “¡Nequisohuacue, poquiꞌajja socue!”  
\v 24 Eꞌe de, eyaya huohuije jiquio dejja jeoꞌajjajaa huasijje jama baꞌa: “¡Nequisohuacue; miquea equipajaajji bebo majje poquiꞌyocue miquea equi yasijje!” 
\p Pea cuana huasijje Jesosa jama cua baꞌa: —¡Pea cuana shajjaꞌajjacue, ejjabahuejjaquijji! Eyaya ojjañaja Emeshi Mese nei cuani. Eyaya miquianajaya mimishi cuijea mee yaña ojjaña meshijo baꞌeja —jamaya Jesosa cua. 
\p  
\v 25 Majoya aje dejja ejjachichaqui nequijo jeoꞌajjajaa nequisohuaꞌya cua, poquiꞌya cua oja equi yasijje. Oya quea bihui cua Eyacuiñajji nijje, Jesosa nijje peaꞌai.  
\v 26 Pea cuaa Eyacuiñajji bihuia ca cua jama baꞌa: —Eꞌe, eseyaya banaje jiquio dejja jeoꞌajjajaa jjeya jeojeoꞌyoqui, mimishi cuijea caꞌyonaje peaꞌai, de. 
\p Ojjaña cuana Jesosa nijje quea bihui nee nee cuanaje jeoꞌajjajaa jjaajaqui mee caꞌyajo. 
\s1 Jesosaa Nemi iyaa ca cua ojaya epeejji epojji 
\r (Mateo 9.9-13; Macoso 2.13-17) 
\p  
\v 27 Majoya Jesosa equijo ani cuayaquia cua. Poquijeya ohuaya ba canaje Nemi ona emeshi meseja esohuijo sosejjeshejji cuani ebaꞌejji sosejje. Oya equi sisi eꞌiyajo ani ejiojji cojja sahuajo. Oya siipojji, de, jamajjeya oya ojjañaja botiꞌama. Jesosaa oya ba majje jama aca cua baꞌa: —Nemi, ¡cueꞌajja; ecuea epeejji poꞌyocue! 
\p  
\v 28 Jamajjeya Nemi nequisohua cua; ojaya aquiana jeajeanana majje poquia cua Jesosa nijje.  
\v 29 Quijje pishana Nemiya iyaa ca cua ojaya epeejji cuana eꞌijjiaꞌijjiajji Jesosa nijje. Iyaa ca cua ona sosejjeshejji cuana, pea dejja cuana peaꞌai.  
\v 30 Paniseo dejja cuana Moisesija etehueꞌyo huohuijji cuana peaꞌaija botiꞌama cua ona sosejjeshejji cuana. Jjashahuaba taiquia cua jama baꞌa: —Quea mimishi Jesosa, o shajjaꞌajjajji cuana peaꞌai. ¿Yajjajje acuae dejja mimishi cuana nijje ijjiaꞌijjiani? Quea mimishi epojji pojjaꞌa. 
\p  
\v 31 Jesosaja eba ojaya ejjashahuabaquijji. Jamajjeya huohui ca cua jama baꞌa: —¿Aꞌa miquianajaya shajjaꞌajja jjima jiquio esohui pojjaꞌa? Jama baꞌa: “Dejja quea aja eshicuijji bajji yasijje poqui sa po ajja. Emanojaa ca eshicuijji bajji yasijje poquiani”. Jamaya miquianaya joya mimishiꞌama poso jjabaquiani. Jamajjeya miquianaya shajjaꞌajja sa po ajja ecuea esohui. Pea cuana ca quea mimishi nee neeya shajjaꞌajja cani ecuea esohui. Jamajjeya eya ijjiaꞌijjiani mimishi cuana nijje.  
\v 32 Eya cueꞌyonaje dejja mimishi iyaaa. Dejja mimishiꞌama cuani poso iyaa sa po ajja iña. Dejja joya quea mimishi nee nee iyaaje mimishi pajea meeꞌyojji. 
\s1 Bobi ijjia jjima yajjijo huohuiꞌajja canaje cuaa 
\r (Mateo 9.14-17; Macoso 2.18-22) 
\p  
\v 33 Paniseo cuaa Moisesija etehueꞌyo huohuijji cuaa Jesosa huohuiꞌajja ca cua jama baꞌa: —Esejaya etiiquiana jamaya huohui cani baꞌa: “¡Aꞌa ijjiaꞌijjiajji jiquio pojjajo! ¡Aꞌa jjashahuabaquijji bobijo; jjashahuabaquicue Eyacuiñajjijo nei! ¡Mimicue onijje, quea yeno pocue!” jamaya esejaya etiiquiaa huohui cani. Huani shajjaꞌajjajji cuaa jamaya acani peaꞌai. Jesosa, mi shajjaꞌajjajji cuana ca ca ijjiaꞌijjiani tii. ¿Yajjajje shai? Quea mimishi cuani pojjaꞌa. 
\p  
\v 34 Jesosaa jama aca cua baꞌa: —E shajjaꞌajjajji cuana enijje ijjiaꞌijjiani. Ecuea eba nei nei Eyacuiñajjija esohui eꞌe jojo nei. Ma esohui huohuijji cuanaja esohui ecuanajaya jjeyahua eꞌajji pojjeama. Ejjahuanaquijji pojjajo ojjaña quea bihui cuani, ijjiaꞌijjiani, quea yeno pojjeama cuani.  
\v 35 O huanajji epo manoꞌyajo ojjaña quea yeno cuaje. Ma pojjajo ijjiaꞌijjia sa po ajja cuaje. Jjashahuabaquijeꞌyo emanoꞌyojo. Eya jiquio ecua yahue manoꞌyani jayojja cuaje. Jjeya ecuanaya quea bihui cuani ijjiaꞌijjiani. Eya quijje pishana manojeꞌyo. Majoya ecuea epeejji cuana quea yeno cuaje; ma pojjajoya bobi ijjia jjima acaje —jamaya Jesosa cua. 
\p  
\v 36 Majoya ohuaya ojaya esohui huohui ca cua ejjashahuabaquijji jama baꞌa: —Daqui eyacua isajea ca ajja daqui chii jacaꞌyojji. Chojja. Miquea daqui eyacua isajeaꞌyo majje daqui chii jacaꞌyojjiꞌyajo, daqui eyacua ehuoshoꞌyojji pojjeama. Daqui chii ejacaꞌyojji poqui ajja cuiñajji yasijje daqui chiijji jjejojo. 
\p  
\v 37 —Ecuea pea esohui jama cuani: Ijjiacajji jee eyacua monsa pojji acajji ena sese nequiajji. Ma ena seseya ejee eyacua shejjee mee cani. Majoya oe huana cani cuaa pea ena sese ejee chiijo cuiapojojea cajeꞌyo shejjee majje.  
\v 38 Jamajjeya huana cani cuaa ena sese monsa eyacuajo cuiapojojea jjima yajji. 
\p  
\v 39 —Jamaya ecue sohui eyacua cuani. ¡Miquianaya ecuea epeejji nei po sa cuanijo shajjaꞌajjacue ojjaña ecue sohui! Beca cuana shajjaꞌajja sa po ajja ecue sohui eyacuajojo. Jjashahuaba taiquiani, de. Etiiquianaja esohui ejee echii jayojja. ¡Jamajjeya ecue sohui oe shajjaꞌajjacue! —jamaya Jesosa cua. 
\c 6  
\s1 Jesosa shajjaꞌajjajji cuaa anoso sejja ca cua ejomishocajji pojjajo 
\r (Mateo 12.1-8; Macoso 2.23-28) 
\p  
\v 1 Oe ejomishocajji pojjajo Jesosa o shajjaꞌajjajji cuana nijje poquia cua anoso ai nequi yiyesamajje. O shajjaꞌajjajji cuaa emeya sejja ca cua anoso eshe tii eꞌijjiajji quea shoeya jjejojo.  
\v 2 Majoya Paniseo cuaa Jesosa o shajjaꞌajjajji cuana ba ca cua. Jesosa nijje mimijajinaje jama baꞌa: —¿Yajjajo acuaeya epojja ejomishocajjijo anoso sejja mee yaña soꞌo? Moisesija etehueꞌyo jamaya cuani baꞌa: “¡Aꞌa chacojji ejomishocajji pojjajo!” 
\p  
\v 3 Jesosaa jama aca cua baꞌa: —Miya quea sohui tai cuanaje; Eyacuiñajjija esohui nei pojjeama aña miquianaaya. Miquianaya jjashahuaba taiquiani, de. ¿Aꞌa miquea ba jjima pojjaꞌa ma etiiquiana, emeshi mese Dabi bajjani? Jama etehueꞌyo yani Dabijo baꞌa: Oya Eyacuiñajjija epeejji nei. Oe pojjajo oya oja epeejji cuana nijje poquije,  
\v 4 dobiquinana cua Eyacuiñajjija equi yasijje bobi saꞌajjaa quea shoe nee neejojo. Ma equijo ani pahui ijjia caꞌyonaje; quia caꞌyonaje ojaya epeejji cuana huasijje peaꞌai. Eyacuiñajjija etehueꞌyo jama cuani baꞌa: “Jiquio pahui Eyacuiñajji nijje mimianija eꞌijjiajjime”. Jamatii Dabi ca mimishiꞌama cuanaje. Oya poquianinaje Eyacuiñajjijo chacochaco neineiya. Jamaya aca cua Dabiya.  
\v 5 Ecuana Dabi jayojja cuani. Eya Eyacuiñajjijo chacochaco neineiani. Jamajjeya ecuaaya jiquio anoso ai sejjaña ejomishocajji pojjajo —Jesosa cua. 
\s1 Oe dejja meshahuamaꞌyo epo Jesosaa jjameshahuanequi mee caꞌya cua 
\r (Mateo 12.9-14; Macoso 3.1-6) 
\p  
\v 6 Pea ejomishocajji pojjajo Jesosa poquia cua Jodioja equi ejjachichaquijji yasijje esohui huohuiya. Oe dejja meshahuamaꞌyo epo ania cua jomajo.  
\v 7 Paniseo dejja cuana, Moisesija etehueꞌyo huohuijji cuana jjashahuaba taiquia cua Jesosajo jama baꞌa: —Jesosa shajjamaꞌ jayojja ecuanaja esohuijo cuani. Ohuaya chaco caje ejomishicajji pojjajo pojjaꞌa; jjameshahuanequi mee cajeꞌyo dejja meshahuamaꞌyo epo. Jesosa jamaya shajjamaꞌ cuajo ecuaaya oya iñajeꞌyo edojojji ejeadobiajeajji. 
\p  
\v 8 Jesosaja onajaya ejjashahuaba taiquijji eba cua. Jamajjeya ohuaya ma dejja meshahuamaꞌyo epo ani huohui ca cua jama baꞌa: —Meshahuamaꞌyo epo, ¡nequisohuacue ojjañaja ebajji! —Jesosaa aca cua. 
\p Jamajjeya oya nequisohua cua.  
\v 9 Jesosaa huohui ca cua pea cuana jama baꞌa: —Eyaya miquianaya huohuiꞌajjaje: ¿Ache quea bame epojji ejomishocajji pojjajo? Quea bame mi baꞌe mee cajji chi. Quea tai mi baꞌe mee cajji chi. Baꞌe mee cajji mi chi. Quecua caꞌyojji mi chi. 
\p  
\v 10 Jamajjeya ohuaya pea cuana huasijje ba majje ma dejja huohui ca cua jama baꞌa: —¡Eme jeapisaꞌajjaꞌyosocue! 
\p Majoya eme jeapisa caꞌya cua.  
\v 11 Beca cuana quea quene nee nee cua. Jama mimimimia cua baꞌa: —Jesosa shajjamaꞌ nei nei cuani ecue esohuijo. Ohuaya jjameshahuanequi mee caꞌyonaje ejomishocajji pojjajo. ¿Yajja acuae seya Jesosa aje jjeyahua nei eꞌiñajji? —jamaya cua Jodio dejja cuana Jesosa iñajji nisho. 
\s1 Jesosaa chicha ca cua o shajjaꞌajjajji cuana 12 huisome 
\r (Mateo 10.1-4; Macoso 3.13-19) 
\p  
\v 12 Oe pojjajo Jesosa poquia cua eyiyo quibo huasijje mimiya Eyacuiñajji nijje. Ojjaña mecajje mimia cua onijje.  
\v 13 Eshequi jaasohuanijo, jjachichaquia cua o shajjaꞌajjajji cuana nijje.  
\v 14 Oya cuana yohua bajjani cua baꞌa: Simohui, quijje Jesosaa oya pea bajjani Peno acaꞌya cua; Simohuija chahua yohua bajjani baꞌa: Anesi; pea o shajjaꞌajjajji ca yohua bajjani cua baꞌa: Jacobo, Huani, Penipe, Manotonome,  
\v 15 Mateo, Tomasi, Apeoja bacua bajjani Satiaco; Simoni, ojaya meshi quea boti nee nee cua,  
\v 16 Jacoboja bacua Jode bajjani. Pea dejja yohua bajjani cua baꞌa: Jodasa Isicaniote, oya Jesosaja epeejji nisho cua. Mahuiso o shajjaꞌajjajji cuana eꞌe jojo nei cua. 
\s1 Jesosaa quea dejja huiso huasijje Eyacuiñajjija esohui huohui ca cua 
\r (Mateo 4.23-25) 
\p  
\v 17 Majoya Jesosa o shajjaꞌajjajji cuana nijje eyiyojo ani jaaoque oꞌoya cua. Jaaoque majje nequiꞌya cua meshi bame bamejo esohui huohuiya. Quea huiso Jesosaja pea e shajjaꞌajjajji cuana jomajo ania cua. Quea dejja huiso cueya cua, Jodea meshijo baꞌe cuana, Jenosanenajo baꞌe cuana, Tinojo baꞌe cuana, Sinonojo baꞌe cuana peaꞌai. Quea huesha baꞌe cuana cueya cua Jesosa shajjaꞌajjaa.  
\v 18 Ojjañaa shajjaꞌajjaꞌyo sa aca cua, jjaajaquiꞌyo sa cua peaꞌai. Pea cuanajo nequi eshahua cuayaqui mee caꞌya cua Jesosaa.  
\v 19 Ojjañaa Jesosa napa sa aca cua pea jjaajaqui meeꞌyojjijojo. Jesosaa emeya napa cajje jjaajaqui caꞌyonaje cuana. 
\s1 Jesosaja esohuiya dejja cuana quea bihui po mee caje beca cuana ca quea yeno po mee caje 
\r (Mateo 5.1-12) 
\p  
\v 20 Majoya Jesosaa ba majje o shajjaꞌajjajji cuana huohui ca cua jama baꞌa: —Beca cuana jjashahuabaquiani jama baꞌa: “Eꞌe de, eya quea mimishi nee. Eyacuiñajjiya ecuea mimishi cacuijea caꞌyahua”. Jamaya jjashahuabaquianijo Eyacuiñajjiya oya baꞌe tiitii mee cajeꞌyo onijje eyajo. ¡Oya cuana quea bihui nee capoꞌyahua! 
\p  
\v 21 —Ojaya epeejji cuana Eyacuiñajjija esohui jayojja jama a sa neinei cuanijo Eyacuiñajjiya oya cuana quea jaji nee nee baꞌe meesahua cajeꞌyo. ¡Quea bihui nee capoꞌyahua oya cuana! 
\p —Oja epeejji cuanaja mimishijo pa neineianijo Eyacuiñajjiya quea bihui nee po mee cajeꞌyo mimishi cuijea caꞌyajje. 
\p  
\v 22 —Eꞌe, ¡miquianaya ecuea epeejji cuana, quea bihui nee nee pocue! Dejja cuana miquiana nijje mimijajije, miquianaya dejja cuaa cuia caje peaꞌai, siajje minijje cuaje peaꞌai. Jamatii, miquianaya ecuea epeejji cuanijo, dejja cuaa mimishi po meeꞌyo sa acani. Eyacuiñajjiya ca ca miquianaya quea bihui nee po mee cajeꞌyo.  
\v 23 Jamajjeya ¡jjeyahua nei quea bihui nee nee pocue! Eyacuiñajjiya miquianaya eyajo quia cajeꞌyo miquianajaya aquiana quea bame nee nee, quea huiso nee nee. Eꞌe, Eyacuiñajjija esohui huohuijji yahuajo nei nei baꞌya cua jamaya aca cua mimishi cuaa; napa ca cua peaꞌai. Jamajjeya ¡ona jayojja jama pocue, quea bei! 
\p  
\v 24 —Joyaya nequiana oe quea aquiana huiso jjejojo, Eyacuiñajjijo jjashahuabaqui jjima. ¡Bacue! ¡Jjeya miquianaya quea bihui nee nee jjabaquicue! Majoya aje mi oe quijje quea yeno nee nee cuajeꞌyo cuaqui yasijje poqui majje manoꞌyo majje. 
\p  
\v 25 —Eꞌe de, ¡joyaya nequiana oe bobijo jjashahuabaquiani jjejojo Eyacuiñajjijo jjashahuabaqui ajja bacue! ¡Jjeya miquianaya quea jejje jjejojo quea bei jjabaquicue! Majoya aje mi oe quijje quea shoe nee nee, quea yeno nee nee cuajeꞌyo. Bobimaꞌ nei cuaje cuaqui yasijje poquiꞌyo majje. 
\p —¡Joyaya mi oe quea bihui jjejojo soa ani jjabaquicue! Eyacuiñajjijo jjashahuabaqui ajja, quijje pa neineijeꞌyo; quea yeno nee nee cuajeꞌyo cuaqui yasijje poquiꞌyo majje. 
\p  
\v 26 —¡Aꞌa oe esohui huohuijji nisho pojji, dejja quea bihui epo meejji nisho pojji! Ma ecua esohui huohuijji nisho etiiquiaa quea bihui po mee ca cua jama. Jama po majjeya aje mi oe quijje cuaqui yasijje poquiꞌyo majje quea yeno nee nee cuajeꞌyo. 
\s1 Quea boti nee aꞌyocue dejja cuana minijje quea quene cuani 
\r (Mateo 5.38-48; 7.12) 
\p  
\v 27 Jesosaa jama aca cua baꞌa: —¡Jjashajjaꞌajjaquicue oe! ¡Aꞌa oe ona botiꞌama pojji!  
\v 28 ¡Quea boti aꞌyocue dejja minijje quea quene cuani! ¡Joya miquiana nijje mimijajianijo mimicue Eyacuiñajji nijje ojo!  
\v 29 ¡Onaa shemo cuia cajje shemo mijipeajje cuia mee oꞌoyacue! ¡Onaa miquianajaya daqui jjequisejjajea cajo dojo meeꞌyocue miquianajaya pea daqui peaꞌai!  
\v 30 Onaa: “¡Aquiana che mo quiacue!” acajje, ¡quiacueya oe! Onaa miquianajaya aquiana sii cajo ¡aꞌa huohuiꞌajjaꞌyojji!  
\v 31 Miquianaya mimiani pea cuana nijje jama baꞌa: “¡Enijje quea bame nee po tiitiiꞌyocue!” ¡Jamajjeya miquianaya pea cuana nijje quea bame nee po tiitiiꞌyocue! 
\p  
\v 32 —Joya miquiana quea jea ajji cuani miquiaaya quea jea nee aña peaꞌai; miquiana nijje quea quene cuani ca ca miquianajaya botiꞌama. Dejja mimishi cuana aje oe jamaya cuani peaꞌai. ¡Aꞌa dejja mimishi jayojjaya pojji! ¡Ojjaña quea jea nee nee acue!  
\v 33 Miquianaaya miquianajaya epeejji quea bame aña, pea cuana caya ca oe botiꞌama aña. Dejja mimishi cuaa aje oe jamaya acani peaꞌai, de. ¡Aꞌa dejja mimishi jayojja pojji; ojjaña quea bame acue!  
\v 34 Miquianaaya joya jjaquiaquiꞌyojji yasijje quiaña. Joya jjaquiaquiꞌyo ajja huasijje quia jjima aña. Dejja mimishi cuana aje oe jamaya cuani peaꞌai. ¡Aꞌa dejja mimishi jayojja pojji! ¡Aꞌa quea dejja tai pojji! ¡Aꞌa quea nishehui pojji!  
\v 35 ¡Miquianaaya miquianajaya epeejji pojjeama cuana quea jea nee aꞌyocue! Jamajjeya quea bame baꞌejeꞌyo. ¡Pea cuana miquianajaya aquiana dojo sa cuanijo oe pojji cahuime dojo meecue! ¡Miquianaya aꞌa jjashahuabaquijji miquianajaya aquianajo, miquianajaya bejjojo! ¡Eyacuiñajjijo oe jjashahuabaquicue! Majoya miquianaya ojaya epeejji nei cuajeꞌyo. Eyacuiñajjiya ojjaña cuanaya quea jea nee nee acani. Ojjaña dejja cuana, ojaya epeejji cuana, ojaya epeejji pojjeama cuanaya quea jea nee acani, de. ¡Jamaya oe pocue!  
\v 36 Eꞌe de, esejaya Chii eyajo quea bame nee ani, ojjaña cuana Eyacuiñajjiya quea jea nee nee acani. ¡Eyacuiñajji jayojjaya jama po tiitiicue! 
\s1 ¡Aꞌa pea cuana niñebajji! 
\r (Mateo 7.1-5) 
\p  
\v 37 Jesosaa jama aca cua baꞌa: —¡Aꞌa pea niñebajji! Jamaya Eyacuiñajjija botiꞌama. Miquianaya pea cuana niñebajji cuanijo, Eyacuiñajjiya miquianaya tecuea cajeꞌyo peaꞌai. Miquianaya pea nijje jjabeiquiꞌyajo Eyacuiñajjiya miquianajaya mimishi cuijea cajeꞌyo.  
\v 38 Miquianaaya pea cuana huasijje quea huiso nee quiajo, jamaya quea huiso nee nee miquianaya Eyacuiñajjiya oya huisoajjaya quia cajeꞌyo peaꞌai. Quea huiso nee nee cuaje, de. Oe pojji quiajo ca ca miquianaya Eyacuiñajjiya oya huisoajjaya quia cajeꞌyo —jamaya Jesosa cua. 
\p  
\v 39 Jesosaa pea esohui ejjashahuabaqui meejji jama aca cua baꞌa: —Eꞌe de, ¿aꞌa acuae oe cojjamaa pea cojjamaꞌ me pejjejea majje dojo caje soꞌo? Cho, eme pejjejeajji pojjeama, o peaꞌai oquejeaquije mei jjani yasijje, de. Cojjamaꞌ jayojja dejja mimishi pea dejja mimishiya dojo cajje cuaqui yasijje poquijeꞌyo onijje tii. ¡Aꞌa cojjamaꞌ jayojja pojji!  
\v 40 Oe esohui huohuijji quea jaꞌa nee nee cuani. Ohua esohui huohui coo canijo, o shajjaꞌajjajji cuana quea jaꞌa pishana cuani. Jamatii ma eshajjaꞌajjajji quea jaꞌa cuaje ojaya esohui huohuijji shajjaꞌajja neinei majje. Jamajjeya ¡ecuea esohui shajjaꞌajja neineicue quea jaꞌa epojji! Jamajjeya miquianaaya quea jaꞌa nee huohuije pea cuana huasijje. 
\p  
\v 41 —Jamajjeya ¡jjashahuaba bamebamequicue; aꞌa pea niñebajji! Jamatii miquianajaya epeejji cuana quea mimishi cuajo, niñebaña. ¡Aꞌa jamaya pojji! ¡Miyaya ebionei miquea mimishi cuana pajeaꞌyocue! ¡Majoya miyaya pea cuana mimishi pajea meesahuaꞌyocue!  
\v 42 Oya jayojja yani miquea epeejjija ecojjajo shabo mimishi jayojja. Jamajjeya miya jjashahuabaquiani miquea epeejjija ecojjajo nequi shabojo cuaya meeꞌyo sa aña jama baꞌa: “Epeejji, shabo biso neiya mi cojja dobi canaje. Ache baꞌajja; cahuijjiaꞌajjaꞌyosahua”. ¿Aꞌa acuae jja oe miya jjabaquiani acui cojjajji soꞌo? ¡Ebionei miquea cojjajo nequi acui huijjiaꞌyo socue! ¡Majoya miquea epeejjija shabo huijjiaꞌyocue! —jamaya Jesosa cua. 
\s1 ¡Acui quea bame nee jayojja jama pocue! 
\r (Mateo 7.17-20; 12.34-35) 
\p  
\v 43 Jesosaa jama aca cua baꞌa: —Oe acui quea bame, ojaya ejjajja quea bame peaꞌai. Pea acui quea tai, jamajjeya ojaya ejjajja quea tai cuani peaꞌai.  
\v 44 Oe acui ejjajja nei cuani, pea jjajjame pojjeama cuani.  
\v 45 ¡Miquianaya oe jjashahuabaquicue, acui quea bame nee jayojja jama pocue! ¡Quea bame nee jjashahuabaquicue Eyacuiñajjijo! Majoya miquianaya quea bame baꞌejeꞌyo. ¡Aꞌa jjashahuaba taiquijji oe acui quea tai jayojja! Miquianaya jjashahuaba taiquiajo miquianajaya esohui quea tai cuajeꞌyo ma acuijjajja quea tai jayojjaya. ¡Jamatii jjashahuabaquicue Eyacuiñajjijo, ojaya esohuijo! ¡Quea bame baꞌe tiitiicue pea dejja cuana nijje! —jamaya Jesosa cua. 
\s1 Oe dejja jjashajjaꞌajja neinei quia cua pea jjashajjaꞌajjaqui ajja cua 
\r (Mateo 7.24-27) 
\p  
\v 46 Jesosaa pea esohui huohui ca cua jama baꞌa: —Miquianaaya eya huohui nishoaña jama baꞌa: “Emeshi Mese, eya shajjaꞌajja sa cuani miquea esohui”. Cho, ecuea esohuijo jjashajjaꞌajjaqui sa po ajja miquianaya —Jesosa cua—.  
\v 47 Eyaya miquianaya huohuije beca dejjajo jama baꞌa: Oe dejjaa equi iya bamebame canaje jayojja jama miquianaya jjashajjaꞌajja neineiquiani ecue esohuijo. Dejjaa equi iya canaje quea bame nee nee.  
\v 48 Ohuaya tio canaje jjani emaco huasijje. Quea doe nee tio canaje. Majoya quea caꞌa nee nee nequinaje equi yamajjana. Jama acanaje ojaya equi. Equi iya majje ena quea quemo cueyanaje, beni quea quemo cueyanaje peaꞌai. Cuei jjayehuequiꞌyajo jaabichaquiꞌyo jjima equi cuanaje. Quea caꞌa iyame jojoya mi jaabichaquiꞌyonaje —Jesosa cua—. Jamaya ecuea esohui shajjaꞌajja majje miquianaya quea caꞌa cuaje ma equi jayojjaya. 
\p  
\v 49 —Beca cuana jjashajjaꞌajjaqui ajja ecuea esohuijo jiquio ecua oe dejjaa iya tai canaje ojaya equi. Cuei sahuajo baꞌeꞌyonaje. Ohuaya tio canaje jjani sisi; doeꞌama. Ena quea quemo cuajo, beni quea quemo cuajo, cuei jjayehuequiꞌyajo ojaya equi jaabichaquiꞌyonaje; caꞌaꞌama equi cuanaje, de. Jamaya miquianaya caꞌaꞌama cuaje, ecuea esohuijo jjashajjaꞌajjaqui ajjajo —jamaya Jesosa cua. 
\c 7  
\s1 Jesosaa jjaajaqui mee ca yaꞌcua esohuinano meseja echacojji 
\r (Mateo 8.5-13) 
\p  
\v 1 Jesosa dejja cuana nijje mimijeyo majje poquia cua Capenaoma cuiñajji yasijje. Oe Shomano esohuinano mese jomajo baꞌya cua.  
\v 2 Ojo chacochacoani emanojaa cua. Beshahua nei poquijeyoa cua, de. Ma ojo chacochacoani quea bame chacochaco ania cua. Jamajjeya esohuinano meseya huaquia meeꞌyo sa aca cua.  
\v 3 Ohuaya shajjaꞌajja ca cua Jesosa yani, Jesosaa pea cuana jjaajaqui mee caꞌyani. Jamajjeya esohuinano mese jama jjashahuabaquime cua baꞌa: —¿Aꞌa Jesosaa ejo chacochacoani jjaajaqui mee cajeꞌyo? Cabaꞌajja. 
\p Jamajjeya ohuaya huoojea ca cua Jodio etii cuana Jesosa huohuiꞌajjaa. Oya jama cua baꞌa: —¡Poquicue; Jesosa huohuiꞌajjaquicue jiquiacua ecuejji! “¡Jjaajaqui meehuaꞌyocue ejo chacochacoani!” acue —jamaya cua esohuinano mese. 
\p  
\v 4 Majoya aje Jodio etii cuana poquia cua Jesosa huohuiꞌajjaa. Huohuiꞌajja cañaquia cua esohuinano meseja esohui jama baꞌa: —Jesosa, esohuinano meseya ecuana mi que huoojea canaje, ¡ojo chacochacoani jjaajaqui meequiꞌyocue pa! Esohuinano meseya aje oe quea bame nee nee nequi.  
\v 5 Jodio dejja cuana ohuaya quea bame nee baꞌe meesahua cani. Ojaya ecuanaya quea boti nee nee, de. Ohuaya iya mee canaje equi ejjachichaquijji ecuanaja meshijo, de —jamaya cua Jodio etii cuana. 
\p  
\v 6 Majoya aje Jesosa jama cua baꞌa: —Eꞌe, cuaꞌa. 
\p Majoya aje poquia cua esohuinano meseja equi yasijje. Equi chipi nei cuajo esohuinano meseya huoojea ca cua ojaya epeejji cuana Jesosa huohuiya. Jama aca cua baꞌa: —Jesosa, ¡aꞌa miya cuejji! Miquea esohui quea poja nee nee. Jamajjeya ¡ejo chacochacoani miya miquea esohuijo jjaajaqui meeꞌyocue! Eya esohuinano mese, jamajjeya miya pojjaꞌa dobiqui sa po ajja ecuea equi yasijje. Eya jjashahuabaquiani miya pojjaꞌa enijje mimi sa po ajja.  
\v 7 Jamajjeya eyaya ecuea epeejji huoojeanaje minijje mimiya. Jomajo mimicue miquea esohui nei jama baꞌa: “¡Ojo chacochacoani jjaajaquiꞌyocue!” Majoya jiquiojo ejo chacochacoani jjaajaquijeꞌyo.  
\v 8 Jamaya ecuea emeshi meseya huohui cajje eya poquijeꞌyo. Ecuea sohuinano cuana eya huoojeajje poquije. Pea sohuinano eyaya iyaajje cueje. Ecuea echacojji eyaya chaco meeajje chaco caje, de. Jamaya miya huohuiajje ecuea echacojji jjaajaquijeꞌyo —jamaya esohuinano mese huoojeameya aca cua Jesosa que. 
\p Jamajjeya ma ohua huoojea ca cua poquia cua, huohui cañaquia cua Jesosa esohuinano meseja esohuijo. 
\p  
\v 9 Jesosaa shajjaꞌajja ca cua. Quea bihui cua esohuinano meseja esohuijo. Jesosaa huohui ca cua pea cuana onijje nequi, jama baꞌa: —De, ma esohuinano meseja eba eyaya jiquiojo tii ojo chacochacoani jjaajaqui meejeꞌyo ecuea esohuijo tiiya. Jodio dejja cuana jjashahuabaqui neinei jjima oya jayojja. Oya ca ca oe jjapee neineiquinaje Eyacuiñajji nijje —jamaya Jesosa cua. 
\p  
\v 10 Majoya esohuinano meseja epeejji cuana poquia cua oja equi yasijje. Majoya aje dobiqui majje ejjaajaquiꞌyo ani ba cañaquiꞌya cua, Jesosaja esohuijo jjaajaquiꞌyo ani: —¡Eꞌe de, eꞌe jojo nei ojaya esohui quea poja nee nee, de! —jamaya cuana cua. 
\s1 Jesosaa shequi mee caꞌya cua eꞌahuemanoꞌyoja ebacua ejja emanoꞌyojaa 
\p  
\v 11 Quijje pishana Jesosa poquia cua Naini yasijje. O shajjaꞌajjajji cuana, pea cuana peaꞌai poquia cua onijje. Quea huiso poquia cua, de.  
\v 12 Jesosaa Naini yasijje poquijeya ba ca cua pea dejja cuaa ebacua ejja emanoꞌyo dojo caje ohuajeaa. Enaese pa neinei poquia cua. Oya quea yeno nee nee cua oe nei nei oja bacuajojo, eꞌahuemanoꞌyo jjejojoya. Quea dejja huiso nee onijje cueya cua ebacua ohuajea sahuaa.  
\v 13 Eꞌahuemanoꞌyohua Jesosa quea yeno po mee ca cua, de. 
\p Jesosaa majoya oya jama aca cua baꞌa: —¡Aꞌa pajji! 
\p Ohuaya shequi meeꞌyo sa aca cua oja bacua ejja.  
\v 14 Majoya aje Jesosa poquia cua ebacua ejja emanoꞌyojaa huasijje. Majoya aje ma dejja cuana nequiñaquia cua Jesosa cueje ba majje. Jesosaa emano dojojji napa ca cua. Majoya Jesosaa emanoꞌyojaa jama mimiame aca cua baꞌa: —Eshoꞌi, ¡shequiꞌyocue jjeyahua nei! 
\p  
\v 15 Majoya aje ma emanoꞌyojaa anisohuaꞌya cua. Mimiꞌya cua, de. Jesosaa oya jama huohuime aca cua baꞌa: —¡Poquiꞌyocue mique nae nijje! 
\p  
\v 16 Ojjaña aje majoya jama cua baꞌa: —¡De, eshoꞌi emano neineiꞌyojaa shequiꞌyonaje yaña, de! Eyacuiñajjiya oya shequi mee caꞌyonaje, de. Ohuaya Jesosa huoojea canaje ecuana huasijje. Eꞌe, oya quea sohui poja nee nee, quea bihui nee nee po mee caꞌyonaje ecuanaya. Eꞌe de, eꞌe jojo nei Jesosa, oya cueꞌyonaje ecuana baꞌe meesahuaa —jamaya ojjaña cuana cua. 
\p  
\v 17 Jodea meshijo baꞌe cuana, quea huesha baꞌe cuana, pea meshijo baꞌe cuana peaꞌai Jesosajo huohui cañaquia cuaa cua. 
\s1 Huaniya o shajjaꞌajjajji cuana Jesosa que huoojea ca cua 
\r (Mateo 11.2-19) 
\p  
\v 18 Huani Eyacuiñajjija esohui huohuijjijojo ejeanobiajaa cua. Jamatii Huani ejeanobiajaajo o shajjaꞌajjajji cuaa Jesosaja esohui huohuiqui ca cua Huani que.  
\v 19 Huaniya ma esohui shajjaꞌajja majje beca o shajjaꞌajjajji cuana huoojea ca cua Jesosa huohuiꞌajjaa. Jama huohuime aca cua baꞌa: —Huohuiꞌajjacue Jesosa jama baꞌa: “Jesosa, Eyacuiñajjiya ojjaña jaahuanajji huoojea cajeꞌyo ecuana huasijje. ¿Aꞌa miya ma ecuana jaahuanajji cuaniya? Eꞌe pojjaꞌa, pea pojjaꞌa ecuaaya ishoaꞌajjaje” jamaya acue —Huaniya aca cua. 
\p  
\v 20-21 Jamajjeya Huani shajjaꞌajjajji cuana poquia cua Jesosa huohuiꞌajjaa. Jesosa ba cañaquia cua emanojaa cuana jjaajaqui meeꞌyo cuequi. Eshahua cuana cuaya meequiꞌyo cuequi. Cojjamaꞌ cuana jjacojjajaꞌaqui meeꞌyo cuequi. Majoya oya cuaa huohuiꞌajja ca cua Huanija esohuijo. 
\p  
\v 22 Jesosaa jama sajaꞌa ca cua baꞌa: —Eꞌe, ¡Huani oe huohuiquicue joya miquiaaya shajjaꞌajjanaje, joya miquiaaya banaje peaꞌai! Eꞌe, cojjamaꞌ cuana jjacojjajaꞌaqui meeꞌyonaje; jioꞌajja cuana jeo meeꞌyonaje; dejja batata epoꞌyo cuana jjajeaqui meeꞌyonaje; shajjaqueba jjashajjajaꞌaqui meeꞌyonaje; emanoꞌyo cuana shequi meeꞌyonaje. Esohui quea bame nee huohuinaje ojjaña dejja quea yeno huasijje Eyacuiñajjija epeejji epoꞌyojji.  
\v 23 Jamajjeya ¡huohuiquicue Huani que! Jama huohuiquime acue baꞌa: ¡Jjapee tiitiiquicue Eyacuiñajji nijje, enijje peaꞌai; quea jaꞌa nee baꞌecue! Jama miya ajje quea bihui po tiitiijeꞌyo —jamaya Jesosa cua. 
\p  
\v 24 Majoya aje Huani shajjaꞌajjajji cuana poqui oꞌoyanaje Huani que. Majoya o poquiꞌyajo, Jesosa pea cuana nijje Huanijo mimia cua: —Eꞌe de, yahuajo Huani quimajo aninaje. Miquianaya aje majoya o que poquinaje. ¿Aꞌya acuae jomajo banaje? ¿Aꞌya acuae miquianaya jjashahuabaquinaje Huanijo? ¿Aꞌa jjashahuabaquinaje Huani esohui huohuijji quea jaꞌa pojjeama? Chojja.  
\v 25 Miquianaaya ¿ae banaje Huani que poqui majje? ¿Aꞌa dejjaja daqui quea nahue nee ehuosho baꞌe banaje? Chojja, dejjaa daqui quea nahue nee huosho cani equi quea quemojo baꞌeya.  
\v 26 ¿Achajja acuae Huani baꞌenaje? ¿Aꞌa miya jjashahuabaquinaje Huani Eyacuiñajjija esohui huohuijji nei nei? Eꞌe, de. Jamatii Eyacuiñajjija pea esohui huohuijjiya quea jaꞌa pishana huohui ca cua. Huaniya ca ca quea jaꞌa nee nee huohui canaje.  
\v 27 Yahuajo nei Eyacuiñajjija esohui etehueꞌyo Huanijo jama cua baꞌa: 
\q1 “Jiquio dejja ecuea esohui huohuijji nei cuani. Jamaya eya sa cuani. Eyaya oya huoojeaje ebionei mi hui dojojji. Ohuaya dejja cuana huasijje huohui caje miquea ecuejjijo”. 
\m Jamaya yahuajo nei nei Eyacuiñajjiya ojjaña ba mee canaje Huaniya e cue jjimahuajo, ejo jjabahuejjaqui mee caꞌyonaje cuana.  
\v 28 Ecuea pea ehuohui aꞌa pajeaꞌyojji jama baꞌa: Huani ma ona besameejji cua oe dejjaya quea bame nee nee pea cuana jayojja jama pojjeama. Jamatii quijje eya Emeshi Mese nei cuaje, ojjaña ecuea epeejji Huani jayojja jama cuajeꞌyo quea bame nee nee —jamaya Jesosa cua. 
\p  
\v 29 Ojjaña dejja Huanija besamee Jesosaja esohui shajjaꞌajja majje quea bihui nee nee cua Eyacuiñajji nijje. Ojjaña dejja quea mimishi nee nee cuani cuaaya Eyacuiñajjija esohui shajjaꞌajja majje mimishi pajea caꞌya cua. Jamajjeya oya cuana Huanija ebesamee cua.  
\v 30 Paniseo dejja cuaa Moisesija etehueꞌyo huohuijji cuaa peaꞌai ca ca Huanija esohui shajjaꞌajja jjima aca cua. Eyacuiñajjijo quea bihui pojjeama cua, Eyacuiñajjija epeejji nei po sa po ajja jjejojo. Jamajjeya Huani que enajje pohua poqui jjima cua, mimishi pajeaꞌyo sa po ajja jjejojo. 
\p  
\v 31 Majoya aje Jesosa jama cua baꞌa: —Dejja cuana mimishi pajeaꞌyo sa po ajja ¿aꞌya jayojja cuani?  
\v 32 Joya ecua eshoꞌiquiana quebanei jayojja jama cuani. Eshoꞌi cuana quebanei po majje joya pea que taaani jama cuaje pea nijje jjapeequi sa po ajja jjejojo. Jama jjamimihueꞌequime cuani baꞌa: “Eyaya dehue miaña mi quea bihui epojji nisho. Jamatii miya quea bihui po sa po ajja. Majoya eya pa nishoani, emanoꞌyojo pa ani jayojjaya mi quea bihui epojji nisho. Jamatii miya pa nisho ajja. Jamajjeya ecuea ba jjima eyaya miya achajja quea bihui po meeme aje. Miya niñepoqui jayojja cuani, jamajjeya quebanei po ajja” jamaya eshoꞌiquiana quebanei cuani —Jesosa cua—. Eꞌe de, jamaya dejja mimishi cuana jjeya cuani ma eshoꞌiquiana jayojjaya.  
\v 33 Yahuajo pishana Huani cueꞌyonaje. Eyacuiñajji nijje mimi tiitiianijo bobi ijjia ajja cuanaje. Acuijjajja na sese ishi jjima aca cua. Ojjaña cuaa ca ca huohui canaje Huanijo jama baꞌa: “Huani ca jja ca niñepoqui nei”.  
\v 34 Eya ca jja ca ijjiaꞌijjiani dejja mimishi cuana nijje. Oya cuana nijje mimimimiani. Jamatii beca cuana ejo siajje cuani jama baꞌa: “¡Bacue jiquio dejja Jesosa! Dejja mimishi cuana nijje jjapeequiani; bejjo chichajji cuana nijje peaꞌai jjapeequiani, de”. Jamajjeya beca cuana ca ca jjapeequi sa po ajja enijje, Huani nijje peaꞌai. Ecuea ba jjima achajja oya cuana eyaya quea bihui po meeme aje. Oya cuana eshoꞌiquiana quebanei po ani jayojja cuani, de. Niñepoqui jayojja cuani. Oya cuana mimijajiani Huani nijje, enijje peaꞌai.  
\v 35 Eyacuiñajjija esohui eꞌe jojo nei. Jamaya ojjaña cuana oja esohuijo jjashajjaꞌajjaqui majje quea jaꞌa po mee caje —jamaya Jesosa cua. 
\s1 Oe Paniseo dejjaja equi yasijje Jesosa anicuaa poquia cua 
\p  
\v 36 Oe Paniseo dejja yohua bajjani cua baꞌa: Simoni. Ohuaya Jesosa eꞌijjiaꞌijjiajji iyaa ca cua. Jamajjeya oja equi yasijje poquia cua ijjiaꞌijjiaa.  
\v 37 Jesosa ijjiaꞌijjia anijo oe epona dobiquia cua equi yasijjeya Jesosa baa. Ma epona quea mimishi baꞌya cua. Tahuoojo shiyeshiye ye ca cua, Jesosa ba majje.  
\v 38 Ojaya mimishijo quea yeno nee nee cua. Pa neinei ania cua. Ecojja naa shacua ca aña cua Jesosaja ejiojji. Ojaya esao aoꞌaohua cui ca aña cua. Jesosa quea jeajojo jiojji tojjo ca cua. Jesosaja ejiojji tojjo majje shiyeshiyeya jiojji sha ca cua. 
\p  
\v 39 Ma Simoniya epona ba ca cua; jjashahuaba taiquia cua jama baꞌa: —Jesosa Eyacuiñajjija esohui huohuijji nei pojjeama pojjaꞌa. Jamajjeya jiquio epona quea mimishi nee nee ohuaya mi huoojea cani. Eyacuiñajjija esohui huohuijji nei nijje mimishi cuana jjanequichipiqui ajja —jamaya eꞌacajeꞌyo poso Simoniya aca cua. 
\p  
\v 40 Jesosaja eba Simonija ejjashahuaba taiquijji. Majoya jama huohuime Jesosaa aca cua baꞌa: —Simoni, ecuea esohui mi que ehuohuijji yani. 
\p —¡Ocue mo huohuiꞌajja socue! —Simoni cua. 
\p  
\v 41 Jamajjeya Jesosaa jama huohuime aca cua baꞌa: —Oe dejja quea bejjo huiso nee baꞌenaje. Majoya aje becanejjijji peaꞌai dejja poquinaje o que bejjo sosemaꞌ jjesheya, quijje esosequiaꞌyojji nisho. Oe dejjaa iye huiso jjeshe canaje 500. Pea dejjaa ca jjeshe canaje baꞌa oe pojji nei 50.  
\v 42 Ma dejja cuanaja oya sosequiaꞌyo jjima tii cuanaje. Jamajjeya ma dejja quea bejjo huiso jjapeequi sa cuanaje bejjo jjeshejji cuanaje cuana nijje. Jamajjeya ejjeshejji epo cuanaja ebajjani cuijea caꞌyonaje jamatii bejjo sosequiaꞌyo jjimajo tiiya. Majoya oya cuana quea bihui poꞌyonaje bajjani cuijea caꞌyajje. Eꞌe, ¿ache dejja quea bihui nee nee cuanaje oja bejjo sosemaꞌyo tiijojo? Ma dejja quea huiso, 500 sosequia jjima pojjaꞌa. Pea dejja iye huiso, 50 sosequia jjima pojjaꞌa —jamaya huohuiꞌajja ca cua Jesosaa. 
\p  
\v 43 Simoni jama cua baꞌa: —Ma dejja quea huiso bejjo quia canaje, 500. 
\p Jesosaa jama aca cua baꞌa: —Eꞌe de, eꞌe jojo nei.  
\v 44 Jamaya jiquio epona eya mimishi cuijeaꞌyajje quea bihui nee cuani. Eya dobiquinaje miquea equi yasijje. Miya ca mi ca oe ecuea epeejji pojjeama cuanaje, Simoni. Jamatii beca cuana cueanijo equi meseya ojaya epeejji cuana jiojji topo cani. Jamaya miquea ajjima. Ma eponaa ca ca ecuea ejiojji topo canaje oja ecojja naa. Oja sao aoꞌaohua cui caꞌyonaje.  
\v 45 Eꞌe, miyaya ecuea epeejji pojjeama jjejojo mi shemo tojjonaje. Jiquio eponaa ca mo ca ejiojji tojjo tiitii canaje ojaya quea jea nee neejojo.  
\v 46 Miyaya eya sha jjima anaje shiyeshiyejo ejjapeequijji. Jiquio eponaa ca ca ecue ejiojji sha canaje shiyeshiyeya ecuea epeejji nei sa cuaniya jjejojo.  
\v 47 Eꞌe, jamajjeya eyaya miya huohuiaña jama baꞌa: Ma epona jjapeequi sa cuanaje Eyacuiñajji nijje. Jamajjeya aje oe ohuaya ecuea ejiojji topo canaje, quea shiye po mee canaje peaꞌai. Ma epona quea mimishi nee nee cuanaje. Jamajjeya eyaya, Eyacuiñajjiya peaꞌai oya mimishi cuijeaꞌyonaje quea jea nee neejojo —jamaya Jesosa cua. 
\p  
\v 48 Majoya Jesosaa epona jama huohuime aca cua baꞌa: —Miquea mimishi cuana eyaya cuijeaꞌyonaje jjeya nei. 
\p  
\v 49 Pea dejja cuaa equijo ijjiaꞌijjia aniya Jesosajo jama huohuime aca cua baꞌa: De, ¿aꞌya acuae jja che mimishi cuijeaꞌyojji pome soꞌo? 
\p  
\v 50 Jesosaja eba cuanaje ma dejja cuana mimi caꞌani. Jamajjeya ohuaya epona huohui ca cua jama baꞌa: —¡Miquea mimishi cuijeaꞌyonaje, jamajjeya quea bame baꞌeꞌyocue mimishiꞌama! —jamaya Jesosa cua. 
\c 8  
\s1 Epona cuaa Jesosa yohua sahua ca cua 
\p  
\v 1 Majoya aje Jesosa pea cuiñajji yasijje poquia cua Eyacuiñajjija esohui huohuiya. O shajjaꞌajjajji nei cuana, 12 poquia cua onijje.  
\v 2-3 Quea huiso epona cuana poquia cua Jesosa nijje, ma ohuaya yahuajo jjaajaqui mee caꞌyonaje, edosiquiana cuaya meequi caꞌyonaje peaꞌai. Oe epona Sosana bajjani; pea epona Mania Madanena bajjani cua. Maniaja 7 edosiquiana cuana Jesosaa cuaya meequi caꞌya cua. Pea epona Huana bajjani cua. Oya Cosaja ehuanase cua. Cosa emeshi meseja, Enode Antipaja echacojji cuana jaahuanajji cua. Quea huiso epona cuaa bobi jjeshe ca cua oja bejjojo Jesosa bobiajji, o shajjaꞌajjajji cuani cuana bobiajji peaꞌai. 
\s1 Esoꞌ jeaajajji 
\r (Mateo 13.1-23; Macoso 4.1-20) 
\p  
\v 4 Quea dejja huiso nee nee poquia cua Jesosa shajjaꞌajjaa. Jjachichaquia cua Jesosa pejjejo. Jesosaa huohui ca cua jiquio esohui. Jama huohuime aca cua baꞌa:  
\v 5 —Oe dejja poquinaje que yasijje esoꞌ jeaajaa. Oe pojji esoꞌ jeaaja canaje ejiojji yasijje. Cuichojji cuaa ma esoꞌ ijjia caꞌyonaje.  
\v 6 Pea esoꞌ jeaaja canaje meshi mei biajje ani yasijje. Majoya aje jeaaja cajje pohuaꞌajjaꞌyonaje. Majoya aje pohuaꞌajjaꞌyo majje shocanaꞌyonaje.  
\v 7 Pea eso jeaaja cajje oquequinaje acuisha yiye yasijje. Majoya aje jeaaja cajje pohuaꞌyonaje. Majoya aje pohuaꞌyo majje acuishaa mano mee caꞌyonaje.  
\v 8 Pea esoꞌ ca ca meshi bame bame yasijje jeaaja canaje. Majoya aje jeaaja cajje tiiꞌyonaje. Majoya aje tiiꞌyo majje quea jjajja huiso nee nee cuanaje, de. Eꞌe, mahuiso. ¡Shajjaꞌajjacue jiquio esohui; aꞌa shajjamaꞌ jayojja pojji! —jamaya Jesosa cua. 
\p  
\v 9 Quijje o shajjaꞌajjajji cuana poquia cua Jesosa huohuaꞌajjaa. Jama huohuaꞌajjame aca cua baꞌa: —¿Yajjajje ma esohui quea quehua cuanaje ecuanaja? —jamaya cua. 
\p  
\v 10 Jesosaa jama huohuime aca cua baꞌa: —Miquianaya Eyacuiñajjiya ba meesahua caje ojaya esohui eyacua. Beca cuana shajjamaꞌ cuani ca ca ohuaya eba meesahuajji pojjeama. Esohui eba meesahuajjijo huohuiaña beca cuana shajjamaꞌ cuanijojo.  
\v 11 Jamajjeya eyaya miquianaya huohuije quea jaꞌa epojji. Ma esoꞌ Eyacuiñajjija esohui jama cuani; meshi dejja jayojja cuani.  
\v 12 Meshi ejiojji quea caꞌa huasijje esoꞌ oquequinaje, dejja shajjamaꞌ Eyacuiñajjija esohui shajjaꞌajja sa po ajja jayojja. Eyacuiñajjija esohui jjajaꞌaqui ajja quea sapa caꞌa jjejojo. Cuichojjiya esoꞌ ijjia cani jayojja jama Edosiquiana etiiya Eyacuiñajjija esohui pajea mee caꞌyani, jjajaꞌaqui mee jjima acani. Jamajjeya ohuaya dejja jjapeequi mee jjima acani Eyacuiñajji nijje.  
\v 13 Meshi mei biajje anijo esoꞌ pohuaꞌajjaꞌyani jama jayojjaya dejja cuaa Eyacuiñajjija esohui shajjaꞌajja cani. Ebioneiya aje ca Eyacuiñajji nijje jjapee nishoquianiya. Majoya aje pea cuana onijje mimijajiajo Eyacuiñajjija esohui pajea caꞌyani. Jjapeequi pajeaꞌyani Eyacuiñajji nijje.  
\v 14 Pea dejja meshi acuisha yiyejji jayojja jama. Eyacuiñajjija esohui shajjaꞌajja cani. Ebioneiya aje ca oe shajjaꞌajja caniya Eyacuiñajji nijje jjapee nishoquiani. Majoya aje jjashahuabaquiꞌyani pea aquianajo quea mimishi epoꞌyojji. Jama jjashahuabaquiꞌyomeya cuani Eyacuiñajji epajeaꞌyojji. Eyacuiñajjija esohui ebajji nisho cuani. Ma esoꞌ acuishaa mano mee caꞌyani jayojjaya ejjashahuaba taiquijjiya acaꞌyani Eyacuiñajji nijje epo pajeaꞌyojji.  
\v 15 Pea dejja meshi quea bame nee nee jayojja cuani. Eyacuiñajjija esohui shajjaꞌajja neinei cani. Shajjaꞌajja neinei majje Eyacuiñajjija epeejji tii tii cuani. Ohuaya ojaya esohui ba neinei cani. Jjashahuaba bamebamequiani. Ma dejja cuana ecuea esohui ba neineijji epojji —jamaya Jesosa cua. 
\s1 Esohui ehuohuiꞌyojji cuaquijijijo 
\r (Macoso 4.21-25) 
\p  
\v 16 Jesosaa jiquio esohui jama huohuime aca cua baꞌa: —¿Aꞌa eseya eseja cuaquijijiya jeajaꞌa came eshajajo capa nequiya? Chojja. ¿Aꞌa eseya ejaajji quimejjejje nequiya jeajaꞌa came? Chojja, de. ¡Eseya quea jaꞌa po mee sa añajo ca eyajo nequiasohuacue ojjaña quea jaꞌa epojji!  
\v 17 Jama jayojjaya Eyacuiñajjiya ojjaña ecuea esohui onaaya ba mee cajeꞌyo quijje. Quea jaꞌa nee cuajeꞌyo.  
\v 18 Miya ecuea esohui shajjaꞌajja sa cuanijo Eyacuiñajjiya miya quea jaꞌa nee nee po mee caje. Beca cuana ecuea esohui shajjaꞌajja sa po ajjajo ohuaya quea jaꞌa po mee jjima acaje —jamaya Jesosa cua. 
\s1 Jesosaja nae, oja chahua peaꞌai 
\r (Mateo 12.46-50; Macoso 3.31-35) 
\p  
\v 19 Majoya Jesosaja enaese cueꞌya cua equi yasijje Jesosa baꞌyohua. Baꞌyo jjima cua ojaya, quea dejja huisojojo.  
\v 20 Oe dejjaa Jesosa jama huohuime aca cua baꞌa: —Mique naeya mi saꞌajja caꞌyoqui mique chahuaa peaꞌai. 
\p  
\v 21 Jamaya Jesosa cua baꞌa: —Eꞌe de, ojjaña nei neiya Eyacuiñajjija esohui shajjaꞌajja neineijji cuani ecue nae nei nei cuani, ecue chahua nei nei cuani, Eyacuiñajjija epeejji nei nei cuanijojo —jamaya Jesosa cua. 
\s1 Jesosaa beni nequioque meequi ca cua 
\r (Mateo 8.23-27; Macoso 4.35-41) 
\p  
\v 22 Oe pojjajo Jesosaa o shajjaꞌajjajji cuana jama aca cua baꞌa: —¡Cuaꞌa; bae ojje miji yasijje besa poquicue! 
\p  
\v 23 Jamajjeya bishe ai yasijje ojjaña ania cua. Jesosa onaa dojobesa cajje cahuia cua. Majoya aje quea ichi po majje beni quea quemo nee nee cueya cua. Enashajohua bishe nanejea ca cua.  
\v 24 Oe dejjaa majoya Jesosa jama isheꞌame aca cua baꞌa: —Esohui huohuijji, ¡shequicue oe! Coya aje se huiꞌiꞌya. 
\p Majoya aje Jesosa shequijeanana cua onaa isheꞌa cajje. Majoya aje shequi majje mimia cua beni nijje, ena nijje peaꞌai. Majoya aje o mimiajo beni nequioquequia cua enashajo peaꞌai. Majoya aje enashajo po jjima jayojja poꞌya cua.  
\v 25 O shajjaꞌajjajji jama mimimeya cua baꞌa: —De, Jesosa quea sohui poja nee nee, de. Miminaje beni nijje; beni po jjima jayojja po mee caꞌyonaje, de. 
\p Majoya aje Jesosaa jama aca cua baꞌa: —¿Yajjajje acuae jja nequiana metenaje soꞌo, de? Jjashahuabaqui jjima pojjaꞌa jja nequiana Eyacuiñajjijo, de —Jesosa cua. 
\s1 Dejjaja eyamijo nequi eshahua cuana Jesosaa cuaya meequi caꞌya cua 
\r (Mateo 8.28-34; Macoso 5.1-20) 
\p  
\v 26 Majoya oya cuana baꞌeñaquia cua Jjanana meshi yasijje. Baꞌeñaquia cua pea ojje miji yasijje, Janinea baꞌe cojja nei besa poquia cua.  
\v 27 Jesosa bishejo ani etaja huasijje nequisohuaquiajo, oe dejja cueya cua. Ma dejja quea shahua huiso jjejojo niñepoqui cua. Daquimaꞌ nei nei cua; quimaꞌ peaꞌai. Oya emojeajaaca huasijje baꞌya cua.  
\v 28-29 Jamatii oya quea tai po mee canaje eshahuaa. Jamajjeya oya dejja cuaa jeyo ca cua cadenaa, poqui ajja epojji. Jamatii ca ca cadena jjasejjajeaqui mee ca cua eshahuaa. Poqui mee caꞌya cua ma quima huasijje, de. Ma dejjaa Jesosa ba neinei ca cua. Majoya aje Jesosa nequi cojja nei ecuiꞌoshajjajo nequioqueña cua. Majoya aje Jesosaa jama aca cua baꞌa: —¡Eshahua cuana, cuayaquiꞌyocue! 
\p Majoya ma dejja jama cua baꞌa: —De, miya Jesosa, Eyacuiñajjija Bacua Ejja eꞌe jojo nei. ¡Aꞌa mo miyaya jinapajji soꞌo! —jamaya cua. 
\p  
\v 30 Majoya Jesosa jama cua baꞌa: —¿Ae bajjani acuae miya? 
\p —Eya Quea Shahua Huiso bajjani —jamaya cua ma dejja quea shahua huiso jjejojo. 
\p  
\v 31 Eshahua cuaa Jesosa jama huohuime aca cua baꞌa: —¡Aꞌa ecuana huoojeajji cuaqui yasijje!  
\v 32 ¡Ecuana oe cuichi cuanaja yami yasijje dobiqui meeꞌyocue! 
\p —¡Eꞌe ocuae dobiꞌajjaqui socue! —jamaya aca cua Jesosaa. 
\p  
\v 33 Majoya aje cuayaquiꞌya cua dejjaja eshahua cuana, dobiquiꞌya cua cuichi cuana huasijje. Majoya aje cuichi cuana emacojo nequi cuajicuaji jaaoquequinana cua bae yasijje; huiꞌiꞌya cua ojjaña.  
\v 34 Cuichi huiꞌijeꞌyo ba majje cuichi jaahuanajji cuana poquia cua cuiñajji yasijje ojjaña huohuiya. Jama aca cua baꞌa: —De, Jesosaa eshahua cuana cuaya mee canaje dejja niñepoqui meejji po nequinaje. Dobiqui mee canaje ecuanaja cuichi yasijje, huiꞌiꞌyonaje ojjaña cuichi, de. Cuajicuajinananaje bae yasijje, huiꞌiꞌyonaje. ¡Chamaꞌyo tii, de! 
\p  
\v 35 Majoya ojjaña dejja cueya cua ae Jesosa po ani baa. Onaaya cue majje ba ca cua ma dejja niñepoqui cuanaje Jesosa pejjejo ani. Ma daquimaꞌ cuanaje daquijji aniꞌyo ba caꞌya cua dejja cuaa; quea bei aniꞌyo ba caꞌya cua. Jesosa quea sohui poja nee neejo ojjaña quea mete poꞌya cua.  
\v 36 Ma niñepoqui bajji cuanajeya Jesosajo huohui ca nequiꞌya cua pea meshijo baꞌe yasijje jama baꞌa: —Jesosaa eshahua cuana cuaya meequi caꞌyonaje. 
\p  
\v 37-39 Ojjaña cuana ma meshijo baꞌe quea mete nee nee cua. Quea meteya jjejojo Jesosa huoojeajea caꞌya cua. Ma niñepoqui cuanajeya ca ca Jesosa jama huohuaꞌajjame aca cua baꞌa: —Jesosa, eya minijje poqui sa cuani. 
\p Jesosa jama cua baꞌa: —Chojja, ¡miya poquicue miquea huapa pojjeama cuana huasijje! ¡Huohuiquicue ojjaña ma mi Eyacuiñajjiya jama acanaje! —jamaya Jesosa cua. 
\p Majoya aje ma dejja poquia cua o baꞌe yasijje huohuiya. Huohui caꞌya cua Jesosaa eshahua cuayaqui mee caꞌya cua. 
\s1 Jainoja bacua piona emanoꞌyojaa pea epona najji poani tii tii 
\r (Mateo 9.18-26; Macoso 5.21-43) 
\p  
\v 40 Majoya aje Jesosa besajebeꞌya cua. Baꞌeñaꞌya cua ojaya meshi yasijje. Ojjaña cuanaja Jesosa quea boti nee cua. Ishoaꞌajja ca nequia cuaa cua.  
\v 41 Oe dejja Jaino bajjani Jodioja ejjachichaquijji equi jaahuanajji cua Cesanenajo. Oya cueya cua Jesosa que. O cojja nei ecuiꞌoshajjajo nequioqueña cua. Ohuaya Jesosa huohuaꞌajja ca cua ojaya equi yasijje epoquijji oja bacua piona jjaajaqui meeꞌyojji. Ojaya ebacua piona ahuemaꞌani quea mano nee nee cua.  
\v 42 Oja bacua piona oe nei cua, de. Majoya aje Jesosa onijje poquia cua. Beshahua nei poqui jjima cua quea dejja huisojojo.  
\v 43 Oe pea epona quea mano dejja quea huiso yiyesamajo nequi. Oya quea mano nee nee, ojaya enaꞌ cuayaqui nequia cua 12 shequiajame, de. Oya eshicuijji jjeshejji jjejojo bejjomaꞌyo cua. Eshicuijji quiajjija epona naꞌ cuaya pajea meequiꞌyo jjima cua.  
\v 44 Jesosa poquianijo ohuaya Jesosaja daqui cuesha iña ca cua. Ma daqui cuesha iña cajje aje najji popajea mee caꞌya cua.  
\v 45 Majoya aje Jesosaa jama aca cua baꞌa: —¿Aya acuae mo iña canaje soꞌo? 
\p O shajjaꞌajjajjiya, Penohua jama aca cua baꞌa: —Cuaꞌa, de. Quea dejja huisohua jjejojo mi, ¿aya shai mi iña canaje Jesosa? Napa jjima ca mi ca ecuanaja —jamaya Jesosa aca cua Penohua. 
\p  
\v 46 Jesosa jama cua baꞌa: —Cho, ecuea eba Eyacuiñajjiya aꞌya shai huaquia mee caꞌyonaje e daqui iña cajo. 
\p  
\v 47 Ma epona Jesosaja esohui shajjaꞌajja majje piopio cua. Ojjaña nequijo piopiojea cua. Ecuiꞌoshajjajo nequioqueña cua Jesosa nequi yasijje. Ohuaya Jesosa jama huohuime aca cua baꞌa: —Eꞌe ee, Jesosa, eyaya nei miquea daqui cuesha iñanaje. Jjashahuabaqui majje che mi daqui iña majje enaꞌ huosa meeꞌyojji. Jamajjeya che eyaya jamaya miya anaje —jamaya ma epona cua. 
\p  
\v 48 Majoya Jesosa jama cua baꞌa: —¡Aꞌa quea mete pojji, she! Eyaya miya naꞌ huosa meeꞌyonaje, miya jjashahuaba neineiquinajejojo. ¡Poquicue, quea bihui poꞌyocue! 
\p  
\v 49 Jesosa epona nijje mimianijo tii Jainoja epeejji cueya cua Jaino que. Jama cua baꞌa: —Jaino, miquea ebacua piona manoꞌyonaje. Chamaꞌyo tii, de. ¡Aꞌa poqui meejji ma esohui huohuijji nei! 
\p  
\v 50 Jesosaa ma esohui shajjaꞌajja majje jama huohuime aca cua baꞌa: —¡Aꞌa miya quea mete pojji! ¡Jjashahuaba neineiquicue oe Eyacuiñajjijo! Miquea bacua jjeya shequijeꞌyo. 
\p  
\v 51 Majoya Jainoja equi yasijje poquiña cua. Jesosaa beca cuana dobiqui mee jjima aca cua equi yasijje. Peno, Satiaco, Huani ca ca oe dobiqui mee ca cua. Ma ebacuaja chii enaese peaꞌai dobiqui mee ca cua. Mahuiso dobiquia cua emanoꞌyojaa baa. 
\p  
\v 52 Dobiqui majje oya cuaa ba ca cua ojjaña paꞌani quea yeno nee nee jjejojo, ebacua emanoꞌyojaajo. Jesosaa jama huohuime aca cua baꞌa: —¡Aꞌa pajji! Ma epona shoꞌi manoꞌyo jjima, ecahuijaa. 
\p  
\v 53 Majoya ojjaña soaꞌya cua. Ojjañaa jama aca cua baꞌa: —Chojja, mano neineiꞌyonaje jja coma, de —cuana cua. 
\p  
\v 54 Majoya aje Jesosaa epona shoꞌija eme iña majje janobajjima nei mimia cua jama baꞌa: —¡Eshoꞌi, nequisohuacue! 
\p  
\v 55 Majoya aje shequiꞌya cua, nequisohuaꞌya cua: —¡Quiacue oya bobi! —Jesosa cua. 
\p  
\v 56 Ma eshoꞌija chii quea bihui poꞌya cua oja nae peaꞌai. Jesosa jama cua baꞌa: —¡Aꞌa huohuijji cuana jiquio eya mique bacua shequi meeꞌyonajejo! —jamaya Jesosaa aca cua. 
\c 9  
\s1 Jesosaa o shajjaꞌajjajji cuana 12 huoojea ca cua esohui huohuiya 
\r (Mateo 10.5-15; Macoso 6.7-13) 
\p  
\v 1-2 Jesosa jjachichaquia cua o shajjaꞌajjajji cuana nijje, 12 huisome nijje. Ohuaya jama huohuime aca cua baꞌa: —Eyaya miquianaya huoojeaña pea cuana huasijje esohui huohuiya, pea cuana jjaajaqui meeꞌyohua, eshahua cuayaqui meeꞌyohua peaꞌai. ¡Huohuicue jama pea cuana huasijje baꞌa: “Eyacuiñajji ojjaña huoojeajji cuajeꞌyo” acue!  
\v 3 ¡Aemaꞌ oe poquicue! ¡Aꞌa acui ejjaquecuacaꞌaquijji dojojji; bashosoco peaꞌai aꞌa dojojji! ¡Aꞌa bobi, bejjo peaꞌai dojojji! ¡Ma miquea eyamijo baꞌe nei oe dojocue!  
\v 4 ¡Poꞌayequi nequicue oe pea cuiñajji yasijje! ¡Miquianaya oe pea cuiñajji yasijje poqui majje miquianajaya epeejji epojji saꞌajjacue; ojaya equijo anicue!  
\v 5 Dejja cuaa pea cuiñajjijo baꞌeya miquianajaya esohui cajaa acajeꞌyo pojjaꞌa. ¡Huohuicue jja oe ma dejja cuana jama baꞌa: “Quea mimishi mi coma” acue! “Eyacuiñajjiya jja miya ba cani. Ohuaya jja miya quea nee nee po mee cajeꞌyo” acue. ¡Ma esohui jama huohui majjeya oe cuayaquiꞌyocue cuiñajjijo ani! ¡Majoya cuayaquiꞌyo majje miquianajaya ejiojjijo ani meshi pohui cuiaiyajajeanaꞌyocue oya cuana jjashajjaꞌajjaqui ajja cuanajejojo! ¡Jamajjeya oe pea cuiñajji yasijje poquicue! —jamaya Jesosaa aca cua. 
\p  
\v 6 Jamajje o shajjaꞌajjajji cuana poꞌayequi nequia cua Jesosaja esohui huohuiya. Onaaya huohui ca cua Eyacuiñajjija esohui; jjaajaqui mee caꞌya cua emanojaa cuana. 
\s1 Jesosa emeshi meseya Enode Antipaa Huani poso aca cua 
\r (Mateo 14.1-12; Macoso 6.14-29) 
\p  
\v 7 Emeshi meseya Enode Antipaa shajjaꞌajja ca cua peaja esohui Jesosajo. Pea cuaa Enode siajje aca cua jama baꞌa: —Huani ca jja ca Jesosaya cuanaje. Huani ca jja ca shequiꞌyonaje —pea cuana cua. Enode quea ajjajja nee nee cua Jesosa Huani poso jojoya.  
\v 8 Pea cuaa Enode siajje aca cua jama baꞌa: —Chojja, Jesosa ca jja ca Eniaya, ma etiiquiana shequi oꞌoyanajeya —posoya aca cua. 
\p Pea cuana jama siajje pomeya cua: —Jesosa pojjaꞌa pea etiiquiana shequi oꞌoyanaje. 
\p  
\v 9 Enode majoya jama cua baꞌa: —Eyaya nei ca jjaja ca Huani sapasejjajea meenaje, Huani mano neineiꞌyonaje, ecuea jjaja eba, de. ¿Ajeo shai jjaja ojjaña mimiani? Ache jja eyaya cabaꞌajja sahua Jesosa —jamaya Enode cua. 
\s1 Jesosaa 5.000 dejja cuana bobia ca cua 
\r (Mateo 14.13-21; Macoso 6.30-44; Huani 6.1-14) 
\p  
\v 10 Quijje o shajjaꞌajjajji cuana esohui huohuiya poqui cue oꞌoya cua; Jesosa que huohui poñaꞌya cua. Majoya Jesosa shajjaꞌajja majje oya cuana poquia cua Betesaina huasijje.  
\v 11 Jomajo o ba majje ojjaña jjachichaquia cua Jesosa que. Ojjaña quea bihui cua Jesosaa Eyacuiñajjija esohui huohui caquijo. Jesosaa jama aca cua baꞌa: “Ojjaña joya mimishi pajeaꞌyojji cuani, onijje eꞌe nei jjapeequiani Eyacuiñajjiya jaahuana cajeꞌyo”. Ohuaya emanojaa cuana jjaajaqui mee caꞌya cua peaꞌai.  
\v 12 Jjasinecuaquiajo ojjaña quea shoe nee cua; ye jjima ojaya bobi cua. O shajjaꞌajjajji cuaa Jesosa jama huohuime aca cua baꞌa: —¡Huoojeacue ojjaña, bobi saꞌajjaa, ecahuijji saꞌajjaa peaꞌai! Beshahua nei esejaya bobi jiquiojo chamaꞌ baꞌa, de. 
\p  
\v 13 Jesosa jamaya cua: —Chojja, ¡miquianaaya oe bobi quiacue eꞌijjiajji! 
\p Jamaya oya cuana cua: —De, oe pojji bobi yani. Beca nahuoo sisi yani, me oejje pahui yani. ¿Aꞌa ecuanaya capoquiahua cuiñajji yasijje bobi jjequiya pojjaꞌa, ojjaña dejjaja bobi jjequiya; quea bobi huiso epojji?  
\v 14 Yani quea dejja huiso nee nee, 5.000 yani, de. 
\p Jesosaa jamaya aca cua baꞌa: —Chojja, ¡aꞌa poquijji, ojjaña cuana anioque meecue, jjaanichichaqui meecue pea jjocojo, 50 anioque meecue! 
\p  
\v 15 Majoya aje o shajjaꞌajjajji cuaa dejja cuana jama aca cua baꞌa: —¡Anioquecue oe nequiana! 
\p  
\v 16 Majoya acua po majje Jesosaa ma pahui nahuoo peaꞌai jjeshe ca cua oja emeya. Jjeshe majje eyahuasijje jjabajeasohuaquia cua Eyacuiñajji nijje emimijji. Ohuaya Eyacuiñajji bihuia ca cua bobi eꞌijjiajji. Majoya Jesosaa miji sisisisi ca cua pahui, nahuoo peaꞌai. Majoya ohuaya bobi quia ca cua o shajjaꞌajjajji cuana huasijje. Pea cuana huasijje quia ca cua o shajjaꞌajjajjiya.  
\v 17 Ijjiaꞌijjia majje ojjaña dejja cuana quea jejje cua, de. Ojjaña dejja cuana jejjeajo iya caꞌya cua pea eshajajo tiiya iya ca poquiꞌya cua; 12 shajame bobi eꞌijjiasejjaja ecuatajea cua. 
\s1 Penohua Jesosa shahuaba caꞌya cua oya Quito 
\r (Mateo 16.13-28; Macoso 8.27–9.1) 
\p  
\v 18 Oe pojjajo Jesosa oe nei mimia cua Eyacuiñajji nijje. O shajjaꞌajjajji cuana onijje nequia cua quea huesha pishana. Jesosaa oya cuana huohuiꞌajja ca cua: —¿Yajja mimime dejja cuana ejo cuani? 
\p  
\v 19 Jamajjeya o shajjaꞌajjajji cuana jama cua baꞌa: —De, pea cuana ca jja ca mijo jama mimime cuani baꞌa: Miya ca pajja mi ca pea dejja cuaa Huani poso acani. Pea dejjaa ca pajja mi ca Enia poso acani, ma etiiquiana, de. Pea dejjaa ca pajja mi ca pea etiiquiana shequi oꞌoyanaje poso acani, de. 
\p  
\v 20 —De, ¿miquianaya yajja cuani soꞌo? —cua Jesosa. 
\p Peno ca ca jama cua baꞌa: —Miya ca ca Eyacuiñajjija Bacua Ejja oe nei, oja huoojeaꞌyo ojjaña jaahuanajji epojji. Ecuea Emeshi Mese nei nei, de. Miya Quito bajjani ecuea Emeshi Mese nei nei jjejojo. 
\p  
\v 21 Majoya Jesosaa Peno jama huohuime aca cua baꞌa: —Eꞌe de, eꞌe jojo nei. ¡Aꞌa huohuijji pea cuana, ecuea bajjani Quito, miquea Emeshi Mese nei!  
\v 22 Eya Eyacuiñajjija huoojeaꞌyo. Eya quea nee nee acajeꞌyo cuaa. Beca cuaa eya cajaa acajeꞌyo, Jodio etii cuaa, Eyacuiñajji nijje mimiani etii cuaa, Moisesija etehueꞌyo huohuijjiya peaꞌai. Mano mee cajeꞌyo eya, de. Eya manoꞌyo majje pea beca peejjima cahuime po majje shequije oꞌoya —jamaya Jesosa cua. 
\p  
\v 23 Majoya aje o shajjaꞌajjajji cuana Jesosaa huohui ca cua jama baꞌa: —Ojjaña ca jja ca enijje eꞌe jojo nei jjapeequiꞌyo sa cuani, oya Eyacuiñajjija esohui jayojja cabaꞌyahua. Eꞌe, ¡e jayojjaya pocue; enijje poquiꞌyocue! Jamatii onaa napa cajje aje jja mi oe quea nee nee cuajeꞌyo.  
\v 24 Eꞌe, ojjaña cuana ecuea esohui shajjaꞌajja sa po ajjajo baꞌe tiitii ajja enijje eyajo. Joya ecuea esohui shajjaꞌajjajji cuani ca ca baꞌe tiitiijeꞌyo enijje eyajo.  
\v 25 Eꞌe pojjaꞌa dejjaa quea huiso nee nee aquiana ojaya yajji chicha cani. Jamatii oya cuana cuaqui yasijje jea cajo ojjaña ojaya aquiana cuana edojojji pojjeama. ¿Aꞌa ojjaña ojaya aquiana cuana quea bame cuaje oya cuaqui yasijje poqui majje? Chojja, de. ¿Aꞌa aquiana sosejje cuayaqui mee cajeꞌyo cuaquijo ani? Chojja, de.  
\v 26 Oe dejja pojjaꞌa: “Cajaa” cuani ejo, ecuea esohuijo peaꞌai. Jamajjeya eyaya cue oꞌoya majje oya cajaa ajeꞌyo peaꞌai. Eꞌe jojo nei eya ojjañaja Edoe Mese cueje oꞌoya. Quea jeajahua nee nee, quea caꞌa nee nee cuejeꞌyo. Eya esohuidojojji quea huiso nee nijje cueje oꞌoya, de.  
\v 27 Eꞌe jojo nei miquianaaya jiquiojo nequiya manoꞌyo jjimahuaa Eyacuiñajjija epeejji nei quea huiso nee nee baje —jamaya aca cua Jesosaa. 
\s1 Jesosa quea cojja jiji cua 
\r (Mateo 17.1-8; Macoso 9.2-8) 
\p  
\v 28 Quijje, jiquio esohui huohui majje oe nomico aniꞌyo Jesosa poquia cua eyiyo huasijje. Peno, Satiaco, Huani peaꞌai poquia cua onijje. Poquia cua Eyacuiñajji nijje mimiya.  
\v 29 Eyacuiñajji nijje mimi majje Jesosaja ecojja quea jiji nee nee cua eshequi jayojja. Ojaya daqui peaꞌai quea oshe nee nee, quea siyo nee nee cua.  
\v 30 Beca dejja emanoꞌyo eyajje jjanequijaꞌaquiꞌya cua Jesosa nijje. Oya cuana mimia cua Jesosa nijje. Oe dejja Moisesi etiiquianaya cua. Pea ca Enia etiiquiana cua, ma yahuajo nei nei baꞌya cua.  
\v 31 Quea bame nee nee quea jiji nee nee miminequia cua Jesosa, Enia, Moisesi peaꞌai. Jesosa miminequia cua onaja mimishijo emanoꞌyojji jjejojo Jenosanenajo. Jama mimimea cua Jesosa.  
\v 32 Peno, Satiaco, Huani peaꞌai quea cojja mano cua. Majoya aje shequi neiꞌya cua, ba ca cua Jesosa, Enia, Moisesi peaꞌai; quea jiji nee nee nequi, de.  
\v 33 Moisesi Enia mimijeyo majje poqui oꞌoya cua eyahuasijje. Poquijeꞌyo ba majje Penohua Jesosa jama aca cua baꞌa: —De, Esohui huohuijji, quea bame nee nee ecuanaya jiquiojo ani. Pea beca peejjima equi ejjaꞌiyaqui, oe miquea, oe Moisesija, oe Eniaja —jamaya cua Peno jjashahuaba bamequi jjima jjejojo. 
\p  
\v 34 Peno mimianijo tii bo oshe nee neeya oya cuana quehua ca cua. Bo ba majje quea mete nee nee poꞌya cua.  
\v 35 Majoya Eyacuiñajjiya bo tejjeeya esohui huohui ca cua jama baꞌa: —Jiquio Jesosa ecue Bacua Ejja, ecuea quea jea nee nee, eya ojo quea bihui nee nee. ¡Oya oe oe neiya shajjaꞌajjacue! —jamaya aca cua bo tejjee Eyacuiñajjiya. 
\p  
\v 36 Ohuaya cuana ma esohui shajjaꞌajja majje ba caꞌya cua Jesosa oe nei nequi; pea cuana chamaꞌ. Peno, Huani, Satiaco peaꞌai mimiꞌyo jjima nequia cua. Pea o shajjaꞌajjajji cuana huohui jjima aca cua. Quijje nei nei ca huohui ca cua, de. 
\s1 Eshoꞌi niñepoqui Jesosaa eshahua huoojea caꞌyajo niñepoqui pajea mee caꞌya cua 
\r (Mateo 17.14-21; Macoso 9.14-29) 
\p  
\v 37 Mecahuajje jjapojjaquiajo Jesosa eyiyojo nequi jaaoqueꞌya cua. Quea dejja huiso nee neeya Jesosa ishoaꞌajja ca nequia cua.  
\v 38 Oe dejjaa janobajjima nei jama huohuime aca cua baꞌa: —¡Esohui huohuijji, bahuacue ecue bacua! Ecuea ebacua oe nei, de.  
\v 39 Eshahuaa napa cajje, taaani jeabichajea canaje meshi yasijje; huapani peaꞌai. Eshahuaa manojea meeꞌyo sa acani. Jamatii oya cuani, de.  
\v 40 Eyaya huohuiꞌajjanaje miquea eshajjaꞌajjajji cuana eshahua cuayaqui meeꞌyojji. Eshahua cuaya meequiꞌyo jjima acanaje mi shajjaꞌajjajji cuaa —jamaya aca cua niñepoquija ejeajjiya. 
\p  
\v 41 Jesosaa ojjaña cuana jama aca cua baꞌa: —De; ¿ache shono acuae jja nequiana ejo jjashahuabaquije eꞌe jojo nei? ¡Quea sapa caꞌa mi coma! ¿Ache cahui huiso minijje nequi majje miyaya eya bajeꞌyo Eyacuiñajjija huoojeaꞌyo ojjaña jaahuanajji quea caꞌa nee nee? —jama tecueameya Jesosaa aca cua. 
\p Majoya ma dejja Jesosaa huohui ca cua jama baꞌa: —¡Miquea ebacua jjequicue! 
\p  
\v 42 Majoya eshoꞌi jjequi ca cua Jesosa que. Ye cajo eshahuaa eshoꞌi jeabichajea ca cua; niñepoquia cua. Jesosaa eshahua eshoꞌijo nequi cuaya meequi caꞌya cua. Eshoꞌi niñepoqui pajeaꞌya cua. Majoya aje Jesosaa ejeajji nijje eshoꞌi poqui mee caꞌya cua.  
\v 43 Ojjañaa ba majje jama aca cua baꞌa: —De, quea sohui poja nee Jesosa cuanaje. Eyacuiñajjiya Jesosa quea sohui poja nee po mee canaje. 
\s1 Jesosaa huohui ca oꞌoya cua o manojeꞌyojo 
\r (Mateo 17.22-23; Macoso 9.30-32) 
\p Ma eshoꞌi niñepoqui pajea meeꞌyo majje ojjañaa bihuia ca cua Jesosa, Eyacuiñajji peaꞌai. Ohua bihuia cajje Jesosaa o shajjaꞌajjajji cuana jama aca cua baꞌa:  
\v 44 —¡Shajjaꞌajjacue jiquio esohui! ¡Aꞌa pajeaꞌyojji! Quijje dejja cuaa eya iña caje emano meeꞌyojji —jamaya cua Jesosa. 
\p  
\v 45 O shajjaꞌajjajji cuanaja ca quea quehua cua Jesosaja esohui. Eyacuiñajjiya quea quehua po mee caꞌya cua. Jamatii oya cuana quea mete cua ehuohuiꞌajjajji. 
\s1 ¿Ache dejja quea bame eyajo cuajeꞌyo? 
\r (Mateo 18.1-5; Macoso 9.33-37) 
\p  
\v 46 Jesosa shajjaꞌajjajji cuana jjaniñebaqui ania cua. Jama cua baꞌa: —¿Ache oja eshajjaꞌajjajji acuae eyajo quea bame nee nee nequije soꞌo? Eya nei emeshi mese cuaje eyajo, pojjaꞌa, miya pojjeama. 
\p Pea aje oe jama cua baꞌa: —Chojja, eya, de. 
\p  
\v 47 Jesosaa jama tecueame aca cua baꞌa: —Miquianaya jjashahuaba taiquiani. ¡Shajjaꞌajjacue oe!  
\v 48 ¡Bacue jiquio eshoꞌi cuana, emeshi mese po sa po ajja! ¡Aꞌa emeshi mese po sa pojji! ¡Jamaya miquianaya pocue eshoꞌi jayojjaya! ¡Jjapeequicue jiquio ecua eshoꞌi cuana jayojja oe pocue, dejja quea bame nee nee epojji! Miquianaya ecuea epeejji nijje jjapeequi majje miya ecuea epeejji cuani, Eyacuiñajjija epeejji peaꞌai. Jamajjeya miquianaya eshoꞌi quea bame jayojja cuani, majoya miquianaya quea bame nee nee nequijeꞌyo eyajo —Jesosa cua. 
\s1 Oe dejja Edosiquianaja epeejji pojjeama cuani jamajjeya oya Jesosaja epeejji nei cuani 
\r (Macoso 9.38-40) 
\p  
\v 49 Majoya Huaniya Jesosa jama aca cua baꞌa: —Esohui huohuijji, ecuaa banaje oe dejja; ohuaya pea cuanaja eshahua cuana cuaya meequi caꞌyonaje miyaya jayojjaya. Miquea epeejji cuani pojjaꞌa, oya ca ca cue ajja tii ecuana nijje. Jamajjeya ecuaa oya jama huohuinaje baꞌa: “¡Aꞌa cuayaqui meeꞌyojji eshahua; miya ecuana nijje poqui ajja!” 
\p  
\v 50 Jesosa jama cua baꞌa: —Cho, ¡aꞌa jama pojji! Oya ecuea epeejji nei cuani. Oya Edosiquianaja epeejji pojjeama cuani, jamajjeya oya ecuea epeejji cuani. Eꞌe, ma dejja quea bame cuani, oya quea tai pojjeama. Jamajjeya oya ecuanajaya epeejji cuani peaꞌai —jamaya cua Jesosa. 
\s1 Jesosaa Satiaco Huani peaꞌai tecuea ca cua 
\p  
\v 51 Beshahua nei acua cua Jesosa emanoꞌyojji, eyahuasijje epoquiꞌyojji peaꞌai Eyacuiñajjija esohui jayojja yajji. Jamajjeya jjashahuabaqui majje oya poquia cua Jenosanena huasijje o shajjaꞌajjajji cuana nijje.  
\v 52 Poquijeya Jesosaa beca o shajjaꞌajjajji cuana huoojea ca cua Samania meshi yasijje ecahuijji saꞌajjaa.  
\v 53 Jomajo Samania dejja jama cua baꞌa: —Chojja, ¡aꞌa miquianaya jiquiacua cuejji! Cajaa, miquianaya Jodio dejja jojoya, ecuanaja ca mi ca botiꞌama Jodio dejja cuana Jenosanena huasijje poqui majamajajjijojo Eyacuiñajji bihuiaa. 
\p  
\v 54 Majoya ma esohui shajjaꞌajja majje Satiaco, Huani peaꞌai poquia cua Jesosa que huohui pohua. Oya cuana jama cua baꞌa: —Jesosa, Emeshi Mese nei, ecuaaya cuaqui oque mee sa aña ma esohui quea tai miminaje yasijje. ¿Aꞌa acuae quea bame jama epojji soꞌo, Jesosa? 
\p  
\v 55 Jesosaa jama tecueame aca cua baꞌa: —Chojja, ¡aꞌa miquianaya jama jjashahuabaquime pojji! 
\p  
\v 56 Majoya aje poquia cua pea cuiñajji yasijje cahuiya. 
\s1 Jesosa nijje jjapeequi majje quea camaja cuaje 
\r (Mateo 8.19-22) 
\p  
\v 57 Ejiojjijje poquijeya, dejjaa Jesosa jama huohuime aca cua baꞌa: —Jesosa, Emeshi Mese nei, eya minijje jjapeequi sa cuani. Jamajjeya eya minijje eꞌe jojo nei poꞌayequi sa cuani. 
\p  
\v 58 Majoya aje Jesosa jama cua baꞌa: —Eꞌe pojjaꞌa de, quea camaja cuaje. Eya ojjañaja Edoe Mese cuani. Jamatii ecuea equi chamaꞌ ejomishocajji. Samao ca ca jjanijo cahuijaa, cuichojji cuana ejajo cahuiani. Eya ca ca iña quimaꞌ ecahuijji. Jamatii beca cuanaja equi quea nahue cuani e botiꞌamajojo —jamaya Jesosa cua. 
\p  
\v 59 Pea pojjajo pea dejja Jesosaa jama huohuime aca cua baꞌa: —¡Jjeyahua nei enijje cuecue ecuea epeejji epojji! 
\p Ma dejja jama cua baꞌa: —Emeshi Mese, quijje pishana poquije minijje. Jjeya ecue chii etii nojinoji, manojeꞌyo pojjaꞌa. Eyaya camojea sahua manoꞌyajo. 
\p  
\v 60 Jesosa jama cua baꞌa: —Chojja, pea cuaa Eyacuiñajjija epeejji pojjeama cuaa oe cacuiña cahua. Ohuaya cuaa camojea cahua manoꞌyajo. ¡Cuecue jjeyahua nei; enijje ejjahuohuiquiqui Eyacuiñajjija esohui pea cuana huasijje! 
\p  
\v 61 Pea dejjaa Jesosa jama huohuime aca cua baꞌa: —Emeshi Mese, eya poꞌayequi sa cuani minijje. Ebionei oe ecuea huapa pojjeama cuana cahuohuiquiꞌyo sahua jama baꞌa: “Poquia iña Jesosa nijje”. 
\p  
\v 62 Jesosa jama cua baꞌa: —Chojja, ¡jjeya nei cuecue enijje! ¡Miya enijje jjapeequi sa cuanijo cuecue jjeyahua nei enijje! Miya cue sa po ajjajje miya bameꞌama cuaje Eyacuiñajjija epeejji epojji. 
\c 10  
\s1 Jesosaa dejja quea huiso huoojea ca cua 72 huisome 
\p  
\v 1 Majoya Jesosaa dejja quea huiso jjequi tepe ca cua, 72 huisome. Ohuaya becanejjijji peaꞌai huoojea ca cua ojjaña meshi cuana huasijje joya o poqui sa cuani yasijjeya.  
\v 2 Ohuaya jama huohuime aca cua baꞌa: —Dejja cuana anoso quejo jahua jayojja jama, quea huiso nee nee. Ojjaña cuana ecuea esohui shajjaꞌajja sa cuani, oe pojji ca ca Eyacuiñajjija esohui huohuijji yani. Jamajjeya ¡mimicue Eyacuiñajji nijje quea huiso esohui huohuijji epojji, quea huiso anoso sejjaꞌyojji cuana jayojja epojji!  
\v 3 ¡Poquicue miquianaya ma dejja cuana quea mimishi nee nee nequi yasijje esohui huohuiya! Ma dejja cuanaya pojjaꞌa mimijajije minijje; baꞌajja.  
\v 4 ¡Aꞌa bashosoco dojojji; bejjo, ejiojji shejee peaꞌai aꞌa dojojji! ¡Aꞌa pea nijje mimipoquijji; quea cueiji pashi nee oe poquicue! Quea huiso Eyaciñajjija esohui shajjaꞌajja sa cuani.  
\v 5 Equi yasijje dobiqui majje jja ca oe equi mese huohuicue jama baꞌa: “Eyacuiñajjiya miya quea bei po mee caje”.  
\v 6 Ma equi mese quea bei po sa cuanijo, Eyacuiñajjiya oya quea bei po mee caje. Pea equi meseya miya cajaa acanijo, Eyacuiñajjiya oya quea bei pojjeama acaje.  
\v 7 ¡Miquianaja epeejji epojji saꞌajjacue; ojaya equijo tiiya anicue! ¡Ojaya bobi ijjia anicue ma cuiñajjijo ani majje! Equi meseya miya cabobia cahua Eyacuiñajjija esohui huohuiaña sosejje, ojaya echacojji jayojja cuani jojoya.  
\v 8 Pea cuiñajji yasijje poquiajo dejja cuaa miquianajaya esohui shajjaꞌajja sa cuanijo ohuaya miya bobia caje. ¡Jamajjeya ijjiaꞌijjiacue onijje!  
\v 9 ¡Jjaajaqui meeꞌyocue emanojaa cuana! ¡Huohuicue oe oya Eyacuiñajjija esohui jama baꞌa: “Jjeya nei Eyacuiñajjiya miya oja epeejji po mee sa acani” acue!  
\v 10 Pea cuiñajji yasijje poquiajo dejja cuana ca ca miquea esohui shajjaꞌajja sa po ajja pojjaꞌa cuaje. ¡Ma dejjaya jja oe jama huohuime acue baꞌa:  
\v 11 “Miquianaaya cajaa aña Eyacuiñajjija esohui, jamajjeya ecuanaya pea dejja cuana huasijje poquije esohui huohuiya miquianaya shajjamaꞌ jojoya. Ecuana quea yeno cuani miquianaaya Eyacuiñajjija esohui cajaa anaje jojoya. Eꞌe de, ohuaya miquianaya huoojea cajeꞌyo cuaqui yasijje.  
\v 12 Yahuajo Eyacuiñajjiya Sonoma cuiñajjijo baꞌe cuana aca cua jayojjaya miquianaya acajeꞌyo, quea nee nee po mee cajeꞌyo” jama huohuimeya acue! —jamaya Jesosa cua. 
\s1 Beca cuiñajjijo baꞌe cuana shajjamaꞌ cua 
\r (Mateo 11.20-24) 
\p  
\v 13 Majoya aje Jesosa tecuetecuea cua dejja shajjamaꞌ cuana nijje. Jama huohuime aca cua baꞌa: —Coya nequianaya quiyoꞌyo chanaꞌ, Conasijo baꞌe cuana, Betesainajo baꞌe cuana peaꞌai. Miquianaaya eya banaje, ecuea esohui shajjaꞌajjanaje peaꞌai. Jamatii miquianaya ca mi ca oe shajjamaꞌ nei nei cuani, de. Yahuajo Eyacuiñajjiya Tinojo baꞌe cuana Sinonojo baꞌe cuana peaꞌai quiyojea mee caꞌya cua quea mimishi nee neejojo. Ojaya cuanaja ca ca eya shahuaba jjima nei nei cua, de. Ohuaya eya eshahuaba jojjemo ecuea esohui eshajjaꞌajja jojjemo quea yeno nee nee poquiꞌaye ojaya mimishijo. Conasijo baꞌeja ca jjaja ca iña oe eshahuaba cuanaje, jamatii jjejojoya ca nequiana ca oe shajjamaꞌ nei nei cuanaje ecuea esohuijo, de. Betesainajo baꞌe jayojja ca mi ca oe cuanaje.  
\v 14 Jamajjeya Eyacuiñajjiya miquianaya huoojea cajeꞌyo cuaqui yasijje, quea nee nee nee cuajeꞌyo miquianaya.  
\v 15 Capenaomajo baꞌe cuana, miquianaya shajjamaꞌ neiya cuani peaꞌai. Jamajjeya aje jja miquianaya quiyojea peaꞌaijeꞌyoya. Miquianaya jama jjashahuabaquiani baꞌa: “Ecuana ca ca eyahuasijje poquijeꞌyo”. Cho, miquianaya poquije cuaqui yasijje ecue sohuijo shajjamaꞌ cuanijojo —jamaya Jesosa cua. 
\p  
\v 16 Majoya aje Jesosaa o shajjaꞌajjajji cuana jama huohuime aca cua baꞌa: —Eꞌe de, miquianaya ecuea esohui huohuijji cuani. Miquianaaya ecuea esohui nei huohuiaña. Jamajjeya dejja cuaa miquianajaya esohui shajjaꞌajja canijo ecuea epeejji cuaje. Pea dejja cuana ca ca oe shajjaꞌajja sa po ajjajo ecuea epeejji pojjeama cuaje, Eyacuiñajjija epeejji pojjeama peaꞌai cuaje. Eꞌe de, mahuiso ecuea esohui —jamaya aca cua Jesosaa. 
\p Majoya aje ma dejja cuana iye huiso huoojea ca cua esohui huohuiya. 
\s1 Ma dejja cuana, 72 huisome cue oꞌoya cua Jesosa que 
\p  
\v 17 Majoya ma dejja cuana 72 huisome esohui huohui majje Jesosa que cue oꞌoya cua; quea bihui nee cua. Oya cuana jama cua baꞌa: —Jesosa, ecuea Emeshi Mese nei, ecuanaya quea sohui poja nee cuanaje; mi jayojja cuanaje. Ecuaaya miquea bajjanijo eshahua huoojeacuayaꞌyonaje. 
\p  
\v 18 Jesosa jama cua baꞌa: —Eꞌe de, ecuea eba. Eyaya Edosiquiana banaje oquequinaje eyajo nequi pojjejje jayojja, de.  
\v 19 Eyaya miquianaya quea caꞌa po meenaje epoquijji. Peyohua, ajiya peaꞌai ijjia cajje miquianaya manoꞌyo jjima po meejeꞌyo eyaya. Edosiquiana miya quecua jjima ameejeꞌyo eyaya.  
\v 20 Miquiaaya eshahua cuayaqui meeꞌyaña. ¡Aꞌa quea bihui nee pojji miquianaya quea sohui poja nee cuani! ¡Miquianaya ca oe quea bihui pocue miquianajaya bajjani tehue canaje Eyacuiñajjiya eyajo edobiqui meejji! Miquianaya poquije eyahuasijje Eyacuiñajji nijje baꞌeꞌyohua. ¡Jamajjeya ma esohuijoya quea bihui pocue! —jamaya Jesosa cua. 
\s1 Jesosa quea bihui cua 
\r (Mateo 11.25-27; 13.16-17) 
\p  
\v 21 Majoya aje Edojjoshahua Bameya Jesosa quea bihui po mee ca cua. Jesosaa Eyacuiñajji jama huohuime aca cua baꞌa: —De, eya quea bihui nee cuani minijje. Eyacuiñajji, miya ecue Chii nei, miya Emeshi Mese nei cuani, ojjaña meshi cuanajo eyajo peaꞌai, de. Eꞌe, beca cuana jjashahuaba taiquiani jama baꞌa: “Ecuea quea jaꞌa nee esohui, jamajjeya eya Eyacuiñajjija esohui shajjaꞌajja sa po ajja”. Miyaya, Eyacuiñajjiya, oya cuana ba meesahua ajja oya cuana jjashahuaba taiquianijojo. Pea cuana ca ca miquea esohuijo eshoꞌiquiana jayojja jjabahuejjaqui sa cuani. Jamajjeya miyaya oya cuana quea jaꞌa po meejeꞌyo. Eꞌe ecue Chii, miyaya jamaya aña miquea ejjashahuabaquijji jama —Jesosa cua. 
\p  
\v 22 Majoya Jesosaa pea cuana jama huohuime aca cua baꞌa: —Eyacuiñajji ecue Chii e huoojeaꞌyojji epo. Eya ojaya esohui huohuijji cuani. Ecue Chiija eyajo anija ecuea ejjashahuabaquijji ojaya eba nei nei, ojaye nei. Ecue Chiija ejjashahuabaquijji ecuea eba nei nei peaꞌai, ecuea nei. Eyaya ecuea epeejji ba meesahuaña quea jaꞌa nee ecue Chiija ejjashahuabaquijji —jamaya Jesosa cua. 
\p  
\v 23 Majoya aje o shajjaꞌajjajji cuana Jesosaa jama huohuime aca cua baꞌa: —¡Quea bihui pocue, miquianaaya Eyacuiñajjija ejjashahuabaquiꞌyojji bañajo!  
\v 24 Eꞌe jojo nei eyaya miquianaya huohuiaña jama baꞌa: Yahuajo quea huiso Eyacuiñajjija esohui huohuijji cuana, emeshi mese cuana peaꞌai Eyacuiñajjija ejjashahuabaquiꞌyojji ba nei nei sa cua. Ecuea esohui shajjaꞌajja nei nei sa cua peaꞌai. Jamatii onajaya eya ba jjima cua, shajjaꞌajja jjima cua ecuea esohui. Eꞌe, oya cuana shajjaꞌajja sa cua jiquio miquianaaya jjeya shajjaꞌajjaña —jamaya Jesosa cua. 
\s1 Esohui oe Samania dejja quea bame cuajo 
\p  
\v 25 Oe Jodio dejja Moisesija etehueꞌyo huohuijji poquia cua Jesosa dasiaa nisho. Huohuiꞌajja ca cua jama baꞌa: —Jesosa, miya esohui huohuijji cuani, ¿yajja acuae po cajji Eyacuiñajji nijje ebaꞌe tiitiiꞌyojji soꞌo? 
\p  
\v 26 Jesosa jama cua baꞌa: —¿Aꞌya acuae Moisesiya tehue ca cua? ¿Aꞌa pojjaꞌa miquea ma esohui ba jjima? 
\p  
\v 27 —De, ecuea eba, eya Moisesija etehueꞌyo huohuijji nei nei cuani. Ojaya esohui jama cuani baꞌa: “¡Miyaya Eyacuiañajji quea jea nee nee acue! ¡Ojo nei oe jjashahuabaquicue; oya oe bihuiacue ojjaña pojjajo!” Pea etehueꞌyo jamaya cua baꞌa: “Eseya jjajaahuanaquiani. ¡Jama jaahuanameya oe acue mique doe cuana!” jama cua Moisesija etehueꞌyo yahuajo —jamaya cua ma esohui huohuijji. 
\p  
\v 28 Jesosa jama cua baꞌa: —Eꞌe de, quea bame nee miquea esohui. ¡Ma esohui jayojjaya oe miyaya acue! Majoya aje miya Eyacuiñajji nijje eyajo baꞌe tiitiijeꞌyo. 
\p  
\v 29 Ma esohui huohuijji Eyacuiñajji nijje, pea cuana nijje peaꞌai quea bihui nisho cua. Ojaya pea cuana botiꞌama cua. Jamajjeya ohuaya Jesosa edasiaꞌyojji nisho jama huohuiꞌajjame aca cua baꞌa: —¿Aꞌya acuae ecue doe cuana? —ojaya ba jjima nisho cua. 
\p  
\v 30 Jamajjeya Jesosaa esohui jama huohuime aca cua baꞌa: —Oe Jodio dejja baꞌenaje Jenosanenajo, poquinaje ejiojjijje Jenico huasijje. Ejiojjijje poquianijo siipojji cuana nequinaje ejiojjijo sii epojji. Siipojji cuaa dejja eshemaꞌ nei cuiahuejjajeame acanaje eꞌaquiana jjesheꞌyojji. Ojaya daqui sii caꞌyonaje, de. Siipojji cuaa ma dejja jea canaꞌyonaje, beshahua nei emanoꞌyo.  
\v 31 Majoya oe Jodio dejjaa, Eyacuiñajji nijje mimiani dejjaa ma dejja ecuiajeajaajje yejje canananaje. Bajea canananajeya aje jja ca oe. Jjequi sohuasohuaꞌyo ajja jjaja cua. Poquia jjaja oe cua.  
\v 32 Quijje pea Jodio dejjaa yejje canananaje bajea canajeya aje jja ca oe peaꞌai. Oya Eyacuiñajjija equi jaahuanajji cua. Jjequi sohuasohuaꞌyo ajja jjaja cuanaje. Poquia jjaja oe cua.  
\v 33 Quijje aje jjaja oe Samania dejja cueyanaje. Samania cuanaja Jodio cuana botiꞌama. Jamatii jiquio Samania dejjaa Jodio dejja ecuiajeajaa ba canaje.  
\v 34 Ohuaya ba majje shicui canaje. Majoya aje iyasohua caꞌyonaje mona biajje, dojo canaje ejaachichajji equi yasijje. Majoya aje jaahuana canaje sosemaꞌ tii.  
\v 35 Pea cahuijo Samania dejjaa bejjo quia canaje equi mese yasijje, o cahuinaje sosejje. Jama huohuime aca cua baꞌa: “Eya poquije chacohua. Ma ecuiajeajaa dejja ca anije, ¡miyaya oya jaahuanacue! Maꞌaje bejjo o jaahuana sosejje. Quijje eya cueje oꞌoya mi sosequia oꞌoyaa” jamaya cuanaje Samania dejja —Jesosa cua. 
\p  
\v 36 Majoya Jesosaa Moisesija etehueꞌyo huohuijji jama huohuime aca cua baꞌa: —Pea beca peejjima dejjaa ecuiajeajaa dejja ba canananaje. ¿Ache dejja acuae oja doe jayojja cuanaje? 
\p  
\v 37 —Ma o jjequisohuaꞌyojji cuanaje, Samania dejja ojaya doe jayojja cuanaje —jamaya oya cua. 
\p —Eꞌe de, eꞌe jojo nei. ¡Miyaya jamaya acue, pea cuana jama jaahuana meeya acue, mique doe jayojja acue! —jamaya Jesosa cua. 
\s1 Jesosa, Manta, Mania nijje peaꞌai anicuanana cua 
\p  
\v 38 Jesosa o shajjaꞌajjajji cuana nijje Jenosanena huasijje poquije Mantaja equi yasijje dobiquinana cua ijjiaꞌijjiaa.  
\v 39 Mantaja shehue, Mania Jesosaja esohui shajjaꞌajja sa cua. Jamajjeya Jesosa chipi nei ania cua oja esohui shajjaꞌajja neineijji.  
\v 40 Mantaja cuacuacuacuaquija jjejojo Jesosaja esohui shajjaꞌajja jjima cua. Oya quea quene cua oja shehue nijje. Mantaa Jesosa jama huohuime aca cua baꞌa: —Jesosa, eya ecue shehueja cuacuasahua jjima. ¡Huoojeacue oya e cuacuasahuaa! 
\p  
\v 41 Jesosa ca oe jama cua baꞌa: —Chojja, Manta, miquea ecuacuajjijo ca ca miña jjashahuabaquiani. Jamajjeya miya ecue esohuijo jjashahuabaqui jjima cuani.  
\v 42 Mania ca ca oe quea bame cuani, ohuaya ecuea esohui shajjaꞌajja neinei cani. ¡Mique shehue jayojja jama pocue! —jamaya Jesosa cua. 
\c 11  
\s1 ¡Eyacuiñajji nijje jama mimime pocue! 
\r (Mateo 6.9-15; 7.7-11) 
\p  
\v 1 Jesosa pea pojjajo mimia cua Eyacuiñajji nijje. Majoya aje cojjacahuijeyo majje o shajjaꞌajjajjiya Jesosa jama huohuiꞌajjame aca cua baꞌa: —Emeshi Mese nei, ¡huohuicue iña miyaya achajja mimime acuae po cajji soꞌo! Yahuajo Huaniya ona besameejji cuanajeya o shajjaꞌajjajji cuana huohui ca cua achajja mimime epojji Eyacuiñajji nijje. ¡Jamaya huohuicue ecuanaya! 
\q1  
\v 2 Majoya aje Jesosaa jama aca cua baꞌa: —Jama mimimeya oe pocue Eyacuiñajji nijje baꞌa: Eyacuiñajji, miya ecue Chii nei nei. Miya oe nei nei ani, pea mi jayojja chamaꞌ. Ecuea eba nei nei miya mimishiꞌama nei nei. Miya ojjaña cuanaja Emeshi Mese nei cuani; ojjaña jaahuanajji cuani. Jamajjeya ojjaña cajjapeequiahua minijje. 
\q1  
\v 3 ¡Quiacue mo ecuea bobi ebaꞌejji! 
\q1  
\v 4 ¡Ecuanajaya mimishi cuana cuijeaꞌyocue! 
\q1 Eya queneꞌama pea cuana nijje; joya enijje quea mimishi cuani nijje. 
\q1 Jamajjeya ecuea mimishi cuanajo ¡aꞌa quene pojji peaꞌai! 
\q1 ¡Aꞌa ecuana quea mimishi po meejji! Acua. ¡Jamaya mimicue Eyacuiñajji nijje! —jamaya Jesosa cua. 
\p  
\v 5 Majoya Jesosaa o shajjaꞌajjajji cuana pea esohui ejjashahuabaqui meejji jama huohuime aca cua baꞌa: —Miquianaya pojjaꞌa mee nei poquije miquea epeejjija equi yasijje mecashono nei. Miyaya huohuiñaquije jama baꞌa: “Jjeya nei ecuea epeejji cueꞌyonaje.  
\v 6 Chamaꞌ bobi ecuea equijo, oya ca ca quea shoe, de. ¡Che mo bobi quiacue ecuea epeejji nijje ebobiajji!” jamaya cuaje miya pojjaꞌa.  
\v 7 Majoya oya jamaya cuaje baꞌa: “Chojja, de. Equiajji pojjeama mi, cahuijaa soꞌo ca ca iña, de. Caꞌaꞌyonaje oya aña ecuea esecuejjani ca mi quiajji”.  
\v 8 Miyaya huohuiꞌajja majamajajje ca mi ca oe quia caje. Ojaya epeejjijojo pojjeama ca mi ca oe quia cani miya mi cahuime yajje —jamaya Jesosa cua—.  
\v 9 Eꞌe de, eyaya huohuinaje maya esohui miquea ebajji achajja mimime Eyacuiñajji nijje epojji. ¡Miquianaaya huohui majamajacue esecuejo nequia jayojjaa! Majoya Eyacuiñajjiya miquianaya quia caje. ¡Aꞌa Eyacuiñajji nijje mimi pajeaꞌyojji ohuaya miya sajaꞌa cajeꞌyo!  
\v 10 Eꞌe, ojjaña cuaa Eyacuiñajji huohuiꞌajja canijo, Eyacuiñajjiya oya cuana quia cajeꞌyo. Jamaya ma esohui epeejjijo, de. Oya poquinaje bobi saꞌajjaa, huohuiꞌajja majamaja canequinaje. Majoya aje bobi quia canaje. Jamaya aje Eyacuiñajjiya acaje miquianaa huohuiꞌajja majamajajje.  
\v 11 Miquianaja bacuaa nahuoojo huohuiꞌajja cajje, ¿ae quiaje? Peyo pojjaꞌa. Chojja, miquianajaya equiajji pojjeama peyo, de.  
\v 12 Miquianaja bacuaa cachinajjajo huohuiꞌajja cajje, ¿ae quiaje? Aji pojjaꞌa. Chojja, miquianajaya equiajji pojjeama, de.  
\v 13 Miquianaya quea mimishi baꞌyani. Jamatii miquianaja bacua nijje quea bame cuani, Eyacuiñajji ca ca mimishiꞌama nei nei cuani. Ohuaya quea bame nee nee quia cani miquiaa huohuiꞌajjajje. Ohuaya miquiana huasijje Edojjoshahua Bame nei huoojea caje miquiaa huohuiꞌajjajje —jamaya Jesosa cua. 
\s1 Jesosa Edosiquiana etiiya quea sohui poja po mee cani poso —aca cuaa cua 
\r (Mateo 12.22-30; Macoso 3.20-27) 
\p  
\v 14 Oe dejja mimiꞌajja nequia cua eshahua oja yamijo nequi jojo. Oya poquia cua Jesosa que. Jesosaa eshahua cuayaqui mee caꞌya cua. Ma dejja eshahua cuayaquiꞌyajo mimicooꞌya cua, de. Majoya aje ojjaña cuana jama cua baꞌa: —De, Jesosa quea sohui poja nee nee yaña. 
\p  
\v 15 Pea dejja cuanaya jama siajje pomeya cua baꞌa: —Edosiquiana etii nijjeya jjejojo, Jesosaa eshahua cuaya meequi caꞌyonaje, Edosiquiana etii Meesemo nijjeya. 
\p  
\v 16 Pea cuana jjashahuaba taiquia cua Jesosaja epeejji nisho epojji. Jesosa jama aca cuaa cua baꞌa: —Ecuanaa ajjima aña Eyacuiñajjiya miya ca ca ameesahua caje pojjaꞌa. ¡Jamajjeya ameeꞌajja socue oe! Majoya jama miya ajo, ecuanaa baje eꞌe jojo nei Eyacuiñajjiya miya huoojea canaje ecuana huasijje. Majoya aje oe ecuanaya jjapeequije minijje —jamaya cuana cua Jesosa Eyacuiñajjija huoojeaꞌyo pojjeama posojo. 
\p  
\v 17 Jesosaja eba onajaya ejjashahuaba taiquijji. Jamajoya aje Jesosaa jama tecueame oya cuana aca cua baꞌa: —¡Jjashajjaꞌajjaquicue oe! Joya emeshi mese ojo chacochacoani cuaa shajjaꞌajja sa po ajjajo, ojee jjaquecuaqui majje jjaquecua iyaiyaquijeꞌyo dejja cuana ma meshijo baꞌe; chamaꞌyo tii cuajeꞌyo. Huapa pojjeama cuana nijje jjacuiaquiajo chamaꞌ epeejji cuana cuajeꞌyo.  
\v 18 Jamaya peaꞌai Edosiquiana etiiya Satanasaa pea eshahua ehuoojeacuayaꞌyo jojjemo, dejja huoojeaꞌyojji pojjeama poꞌyoquiaye. Chojja, jama pojjeama ca coma.  
\v 19 ¿Aꞌaya eyaya Edosiquiana nijjeya niñe cuana, pea eshahua cuana peaꞌai huoojeacuayajeaña poso aña? Jamajjeya miquea epeejji cuanaa ¿ae nijje eshahua huoojeacuayajea cani? Eyacuiñajjiya asahua canijo, jamajjeya ojaya eba miquianaya ejo siajje cuani.  
\v 20 Eꞌe, Eyacuiñajji nijjeya eyaya eshahua huoojeacuayajea yaña. ¡Jamajjeya bacue eya eꞌe jojo nei Eyacuiñajji, Emeshi Mese oe nei jjeya cuani tii!  
\v 21 ¡Bacue! ¿Aꞌa dejja quea caꞌa neeja equi yasijje dobiquijji oja aquiana siiya o jeyo jjima nequijo? Chojja, o jeyo majje ojaya aquiana cuana sii caje cuaa.  
\v 22 Jiquio ecua eꞌaquiana mese ebionei jeyo cani jama amajje eyaya eshahua cuana jeacuayajeaña.  
\v 23 Miquianaya shajjaꞌajja sa po ajja ecuea esohui, jamajjeya ecuea epeejji nei pojjeama miquianaya cuani. Miquianaaya ecuea esohui pea cuana huasijje huohui sa po ajjajo, jamajjeya miquianaaya pea cuana quea mimishi po mee sa aña, de —jamaya Jesosa cua. 
\s1 Eshahua dejjaja yami yasijje cue oꞌoyani 
\r (Mateo 12.43-45) 
\p  
\v 24 Jesosaa esohui ejjashahuabaqui meejji huohui ca cua jama baꞌa: —Eshahua dejjaja yamijo nequi cuayajeaquiꞌyo majje quea huesha poquinaje. Saꞌajja caꞌyonaje pea enequiꞌyojji. Jamatii baꞌyo jjima cuanaje. Eshahua poꞌayequiequinaje o nequijji saꞌajjaꞌyohua. Jamajjeya oya jjashahuabaquinaje jama baꞌa: “Eya poquije oꞌoya huacuaya ma e cuayaquinaje yasijjeya, ma ecuea equi jayojja huasijjeya”.  
\v 25 Jamajjeya oya dejja huasijjeya cue oꞌoyanaje. Ojaya yami yasijje dobiquiꞌyonaje Eyacuiñajjija epeejji pojjeama jojoya, ojaya eyami equi ecuiashaba jayojja jama, ehuana bamebame jayojja equi se ejjamaꞌ.  
\v 26 Jamajjeya ma eshahua poquinaje pea eshahua cuana jjequiya onijje enequiꞌyojji ma dejjaja yamijo. Oya cuana quea mase nee nee cuanaje. Oe nei yahua ca ca quea mase pishana cuanaje. Majoya aje ojjaña dobiquiajo ma dejja quea yeno nee nee cuanaje. Yahuajo oe eshahua nequiahuajo ca ca quea yeno pishana cuanaje. 
\s1 ¿Yajja acuae po cajji quea bihui epojji? 
\p  
\v 27 Jesosa mimianijo oe epona ojjaña yiyesama neijo nequi sohuicuaya cua jama baꞌa: —Jesosa, Eyacuiñajjiya miquea enaese quea bihui capo mee caꞌyahua, ohuaya miya cuayajo tii mee canajejo. 
\p  
\v 28 Majoya aje Jesosa jama cua baꞌa: —Eꞌe, quea bame pishana. Eyacuiñajjija esohui shajjaꞌajja nei nei majje ca ca oe quea bihui nee nee capoꞌyahua. Joya Eyacuiñajji nijje jjapeequi neinei majje quea bihui nee nee capoꞌyahua. ¡Jamaya pocue quea bihui nee nee epojji! —jamaya Jesosa cua. 
\s1 Dejja mimishi cuaa Jesosa huohuiꞌajja ca cua 
\r (Mateo 12.38-42; Macoso 8.12) 
\p  
\v 29 Quea dejja huiso nee nee ejjachichaqui nequia cua Jesosa nijje. Majoya Jesosaa esohui jama huohuime aca cua baꞌa: —Miquiaaya Eyacuiñajjija esohui cajaa anaje. Jamatii miquianaya ba oꞌoya sa cuani eyaya yahuajo anaje jayojja. Ecuea jamaya eꞌabecaꞌyojji pojjeama miquea ebajji eya Eyacuiñajjija huoojeaꞌyo. ¡Jjashahuabaquicue yahuajo nei Eyacuiñajjiya Jjona jaahuana ca cua jai aiꞌaija sei aijo baꞌe!  
\v 30 Jjona emanoꞌyo jayojja cua. Majoya shequi oꞌoyanaje jayojja cua pea beca peejjima cahuime po majje jaiya ojjajea caꞌya cua. Majoya dejja cuana Ninebe cuiñajjijo baꞌe yasijje poquia cua. Oya jjashahuabaquiꞌyo aña cua Jjona eshequi oꞌoya jayojjajo. Jjashahuaba bame nequia cua eꞌe jojo nei Eyacuiñajjiya Jjona huoojea ca cua oja esohui huohuiya. Eya Jjona jayojjaya cuaje, eya manoꞌyo majje mei jjanijo jaa shequije oꞌoya pea beca peejjima cahuime po majje, miquiana jjashahuabaquijji Eyacuiñajjiya eya huoojea canaje miquiana huasijje.  
\v 31-32 Eꞌe, yahuajo Ninebejo baꞌe cuaa Jjonaja esohui shajjaꞌajja majje mimishi pajea caꞌya cua. Jjapeequia cua Eyacuiñajji nijje. Jjonaa esohui quea bame huohui ca cua. Jjeya eyaya miquianaya huohui bamebame yaña, de. Jamatii miquianaya ecuea esohui shajjaꞌajja sa po ajja. Jamajjeya Eyacuiñajjiya miquianaya jeajea cajeꞌyo cuaqui yasijje shajjamaꞌ jojoya. 
\p —Eꞌe, jamaya yahuajo cua baꞌa: Eeno cuejjijje emeshi mese pona cua. Oya quea huesha nee nee cueya cua Sanomoja esohui shajjaꞌajjaa. Sanomo quea jjashahuabaqui jaꞌa pishana cua. Eya ca iña quea jjashahuabaqui jaꞌa nee nee cuani. Jamatii miquianaya ecuea esohui shajjaꞌajja sa poꞌyo ajja. ¿Yajjajo acuae miquianaya ma epona jayojja mi poꞌajjani soꞌo? Jamajjeya Eyacuiñajjiya miquianaya jeajea cajeꞌyo cuaqui yasijje shajjamaꞌ jojoya, de —jamaya Jesosa cua. 
\s1 Esohui ecojja cuaquijiji jayojjajo 
\r (Mateo 5.15; 6.22-23) 
\p  
\v 33 Jesosa jama cua baꞌa: —¿Aꞌa miquianaya cuaquijiji dedo majje capanequiaña eshajaa? Chojja. ¿Aꞌa miquianaya enequia quehua nequiya jeajaꞌa came? Chojja. Eꞌe, eyajo nequiya jeajaꞌa cani.  
\v 34 Miquianajaya ecojja cuaquijiji jama, de. Miquianajaya ecojja quea jaꞌa cuanijo miquianaya poqui bameje. Miquianajaya ecojja jaꞌaꞌama cuanijo epoqui bamejji pojjeama. Jamaya miquianajaya ejjashahuabaquijjiya quea jaꞌa cuanijo, baꞌe bameje. Miquianaya jjashahuaba taiquianijo, miquianaya cuaquijiji enequia quehua jayojja cuaje.  
\v 35-36 ¡Jamajjeya ma cuaquijiji eyajo nequiasohua nequi jayojja jama jjashahuaba bamebamequimeya oe pocue! —jamaya Jesosa cua. 
\s1 Jesosaa Paniseo dejja cuana Moisesija etehueꞌyo huohuijji tecuea ca cua 
\r (Mateo 23.1-36; Macoso 12.38-40; Noca 20.45-47) 
\p  
\v 37 Jesosa mimipajeaꞌyajo oe Paniseo dejjaa Jesosa iyaa ca cua ijjiaꞌijjiaa ojaya equi yasijje. Jesosa dobiqui majje eꞌanijjijo anioquea cua. Oya jjametopo neineiqui jjima cua, Jodio etiiquiaa acani jayojja ajjima aca cua.  
\v 38 Jamajjeya Paniseo dejjaa Jesosa ba majje jjashahuaba taiquia cua jama baꞌa: —Eꞌe de, Jesosa quea tai cuani, eme topo neinei ajja, etiiquiaa jayojja jama ajjima acani, de. 
\p  
\v 39 Jesosaja eba onajaya ejjashahuabaquijji; jamajjeya jama tecueame aca cua baꞌa: —De, miquianaya, Paniseo dejja cuana jamatii esohui huohuijji nisho cuani, quea tai, de. Miquianaya joya caneco yiye topo jjimajo jayojja cuani. Jamaya miquianaaya dejja cuana jjashahuabaqui meeaña, miquianaya Eyacuiñajjija epeejji cuani poso acani dejja cuaa. Miquianaya ca mi ca ojaya epeejji pojjeama, ojaya miquianaya eba, de. Ojjañaa miquianaya quea bame cuani poso acani. Miquianaya ca ca quea tai nee nee cuani; jjashahuaba quehuaquiani, de.  
\v 40-41 Miquianaya Eyacuiñajjijo jjashahuaba nishoquiani, ojaya epeejji nisho cuani. Jamajjeya beca cuaa miquianaya quea bame baꞌe poso acani. Eyacuiñajjiya miquianaya quea bame nee jjashahuabaqui mee sa acani. Jamajjeya jja oe ¡onijje jjapeequicue eꞌe jojo nei epojji! Majoya aje miquianaya quea bame cuajeꞌyo. 
\p  
\v 42 —Eꞌe de, miquianaya Paniseo dejja cuana jjashahuaba taiquiani, de. ¡Aꞌa quea dejja tai pojji! Shajjaꞌajjaña ajeya ca oe Eyacuiñajjija esohui, ojjaña ojaya esohui aje jje oe shajjaꞌajja jjima cuani, eꞌe nei. ¡Miquianaaya ojjaña Eyacuiñajjija esohui shajjaꞌajja jeyojeyocue! ¡Huapa pojjeama cuana quea jea acue, Eyacuiñajjiya ojjaña cuana quea jea acani jayojja oe acue! Eꞌe de, ¡aꞌa pajeaꞌyojji quea jea ajji! Jamajjeya miquianaya quea bame cuaje. 
\p  
\v 43 —Eꞌe de, miquianaya ca jja ca oe quea tai cuani, Paniseo dejja cuana. Jamatii miquianajaya equi ejjachichaquijjijo eꞌanijji quea bame saꞌajjaña. Pea nijjeya aje jja mi ca oe quea bame jayojjaya cuani, majoya aje jja mi oe pea cuaa quea bame poso acani. Miquianaya ca jja mi ca siajjepojji, de. Eꞌe, ejiojjijje peaꞌai miquianaya poꞌayequiequijo dejja cuanaja esohui shajjaꞌajja sa cuani jama baꞌa: “Paniseo dejja cuana ca jja ca quea bame nee nee, de”. Ma esohui ca jja ca eꞌe jojo nei pojjeama acani. 
\p  
\v 44 —Eꞌe miquianaya quea tai po majamajani. Miquianaya dejja equehua mojeaꞌyojaa jayojja, ma onajaya ba jjimajojo quishi cani jayojjaya cuani. Pea cuana jjashahuabaquiani ma meshi joya quea bame poso acani. Jamaya miquiana ma emojeaꞌyojaa jama cuani. Pea cuana jjashahuabaquiani miquiana quea bame, onajaya miquianaya ba jjima quea tai nee nee cuani. Miquianaya jjashahuabatai tiitiiquiani; quea bame pojjeama cuani —jamaya Jesosa cua. 
\p  
\v 45 Oe Moisesija etehueꞌyo huohuijji cuani jama cua baꞌa: —Jesosa, miya pojjaꞌa ecuana nijjeya peaꞌai tecuetecueani. 
\p  
\v 46 Jesosaa oya jama huohuime aca cua baꞌa: —Eꞌe jojo nei eyaya miquianaya tecueaña. Miquianaya Moisesija etehueꞌyo huohuijji nisho cuani peaꞌai, de. Miquiaaya pea cuana huasijje esohui quea camaja huohui nishoaña. Jamatii miquianaya ma esohui jayojja baꞌe ajja; ona asahua ajja. 
\p  
\v 47-48 —Eꞌe, miquianaya quea tai nee nee cuani, miquianaja etiiquiana jayojja, de. Miquianaja etiiquiaa Eyacuiñajjija esohui huohuijji quecua caꞌya cua jjashajjaꞌajjaqui ajjaa jjejojo. Jamatii miquianaaya cuiaꞌasha poquia tiitiiaña etiiquiaa quecua caꞌya cua shahuaba poquia tiitiijji, equecuaꞌyo sajaa quea pame epojji epajeaꞌyo cuani jjejojo. Jamajjeya miquianajaya etiiquiana jayojja jama jjashahuabaquime cuani.  
\v 49 Eꞌe, Eyacuiñajjija eba, jamajjeya ohuaya jama huohuime aca cua yahuajo baꞌa: “Eyaya ecuea esohui huohuijji cuana, e shajjaꞌajjajji cuana huoojeaje pea cuana huasijje. Ecuea ehuoojeaꞌyo cuana beca cuaa quecua cajeꞌyo nei nei. Beca ca mimi panajajije onijje” jamaya Eyacuiñajji cua.  
\v 50-51 Eꞌe, miquianajaya etiiquiana huasijje huoojea ca cua Eyacuiñajjija huoojeaꞌyo cuana. Eꞌe, yahuajo miquianajaya etiiquiaa quecua caꞌya cua Eyacuiñajjija huoojeaꞌyo cuana, de. Yahuajo Eyacuiñajjija esohuijo tehue ca cua Abenijo. Miquianajaya etiiquiaa Cainiya Abeni cuiahuejjajea caꞌya cua. Majoya oya jayojjaya quea huiso cuiahuejjajea caꞌya cua Eyacuiñajjija esohui huohuijji cuana. Quijje yejje nei Eyacuiñajjija etehueꞌyojo tehue ca cua ojaya pea esohui huohuijjijo, Sacaniajo. Oya Eyacuiñajji nijje mimiani cuiahuejjajea caꞌya cua cuaa Eyacuiñajjija equijo, aquiana dahuajeajji pejjejo, de. Jamajjeya eyaya miya eꞌe jojo nei huohuiaña jama baꞌa: Jjeya nei Eyacuiñajjiya miquianaya quea nee nee po mee cajeꞌyo ojjaña etiiquianaja mimishi cuanajo, miquianaya etiiquiana jayojja cuani jojoya.  
\v 52 Eꞌe jojo nei miquianaya, Moisesija etehueꞌyo huohuijji cuana quea tai nee cuani. Jamatii miquianaya ca mi ca oe esohui huohuijji nisho, siajjepojji. Eꞌe, miquianaya Eyacuiñajji nijje jjapeequi ajja nei. Pea cuana Eyacuiñajji nijje jjapeequi sa cuani, miquianaaya jjapeequi pajea meeyaña, de. Jamajoya miquianaya quea nee nee po mee cajeꞌyo quijje, de, quea nee tii tii cuajeꞌyo —jamaya Jesosa cua. 
\p  
\v 53-54 Jesosa mimipajeaꞌyajo Paniseo dejja cuana, Moisesija etehueꞌyo huohuijji cuana quea quene nee nee cua Jesosaja esohuijo. Oya cuana jjashahuaba taiquia cua. Ohuaya cuana Jesosa huohuiꞌajja neinei ca cua esohui quea tai ojaya yajji nisho, ejjajeanobiaquijji yasijje edojojji nisho. 
\c 12  
\s1 Jesosaa esohui huohui ca cua ona jjashahuaba taiquianijo 
\r (Mateo 10.26-27) 
\p  
\v 1 Quea dejja huiso nee nee ejjachichaqui nequia cua Jesosa shajjaꞌajjajji. Jjiojji quishi canequia cuaa cua quea dejja huisohua jjejojo. Jesosaa o shajjaꞌajjajji cuana jama huohuime aca cua baꞌa: —Paniseo dejja cuana jjashahuabatai majamajaquiani. Jamajjeya aje esohui huohuijji nisho cuani, Eyacuiñajjija epeejji nisho cuani, de. Coya mi o jayojja po chanaꞌ.  
\v 2-3 Eyacuiñajjiya oya cuana ba cani ojaya epeejji nisho cuani. Ojaya ojjaña eba o jjashahuabaquiꞌyojji cuani cuana. Eyacuiñajjija eba ojjaña, de. Jamajjeya joya Eyacuiñajjiya quea jaꞌa po mee caje huiso tiiya, quehuaꞌama cuajeꞌyo tii ojjañaja ebajji. 
\s1 ¡Aꞌa quea mete pojji dejja cuanajo! 
\r (Mateo 10.28-31) 
\p  
\v 4 Eꞌe ecuea epeejji nei, ¡aꞌa quea mete pojji ojjaña cuanajo, eshahua cuanajo peaꞌai! Oya cuaa miquianaya quecua cajeꞌyo pojjaꞌa. Jamatii miquianajaya edojjoshahua mano jjima cuaje.  
\v 5 ¡Miquianaya jja oe jjashahuabaquicue Eyacuiñajjijo, de! Shajjamaꞌ cuajo ohuaya miquianaya mano meeꞌyo majje cuaqui yasijje jeajea cajeꞌyo miquea edojjoshahua. 
\p  
\v 6 —Eꞌe de, quea anohuii huiso nee nee yani. Anohuii beshahua nei sosemaꞌ quea huisojojo. Eyacuiñajjiya oya cuana pajeaꞌyo jjima acani. Ojaya eba ojjaña.  
\v 7 Ohuaya anohuii jaahuana cani, jamajjeya ohuaya miquianaya jaahuana neinei cani peaꞌaiya, de. Ojaya esico miquianajaya ehuojjaña. Jamajjeya ¡aꞌa pajeaꞌyojji miquianaya ohuaya nahue cani! Anohuii ohuaya nahue cani pishana —jamaya Jesosa cua. 
\s1 ¡Aꞌa quea bicho pojji Jesosa nijje jjapeequi majje! 
\r (Mateo 10.32-33; 12.32; 10.19-20) 
\p  
\v 8 Jesosa jama cua baꞌa: —Ecuea epeejji cuaa ejo huohui cani jama baꞌa: “Eꞌe, eya ca iña bichoꞌama Jesosajo. Eya ojaya epeejji nei nei, eꞌe jojo nei”. Jamajjeya eyaya Eyacuiñajjija esohuidojojji cuana o que huohuije jama baꞌa: “Eꞌe, oya cuana ecuea epeejji nei, eꞌe jojo nei”.  
\v 9 Pea cuana ca jja ca quea bicho cuani ejo. Jamajjeya oya cuaa huohui caje jama baꞌa: “Cho, eya Jesosaja epeejji pojjeama”. Jamajjeya eyaya Eyacuiñajjija esohuidojojji cuana huohuije jama baꞌa: “Cho, oya cuana ecuea epeejji pojjeama, cajaa” eyaya aje —Jesosa jamaya cua—.  
\v 10 Beca cuaa eya niñeba cani; Eyacuiñajjiya maya mimishi cuijea sa acani. Peaa pojjaꞌa Edojjoshahua Bame niñeba cani, Eyacuiñajjija ca ca maya emimishi cuijeaꞌyojji pojjeama. Ma mimishi ani tiitiijeꞌyo. 
\p  
\v 11 —Pea cuaa miquianaya dojo caje esohuinano mese ani yasijje, Jodio dejja etii ani yasijje ecuea epeejjijojo. Miquianaya pojjaꞌa quea mete nee nee cuaje. Miquianaya jama jjashahuabaquije pojjaꞌa baꞌa: “¿Achajja shai huohuime acajji? ¿Achajja shai sajaꞌame aje?” ¡Aꞌa jamaya jjashahuabaquijji! ¡Meteꞌama nei onijje mimicue!  
\v 12 Edojjoshahua Bameya miquianaya mimi bame meesahua caje esohuinano mese nijje. Quea bame cuaje miquianaya —jamaya Jesosa cua. 
\s1 ¡Aꞌa bejjojo jjashahuaba majamajaquijji! 
\p  
\v 13 Oe dejjaa Jesosa jama huohuime aca cua baꞌa: —Esohui huohuijji, ecuanaja chii manoꞌyonaje. Ecue oꞌija che eya bejjo esejja quiaꞌyo jjima ecue chiija quijjojea. Jamajjeya jama huohuiꞌajjame acue ecue oꞌi baꞌa: “Che pa ¡chahua bejjo esejja quiaꞌyocue!” acue —jamaya cuanaje oja chahua bejjo sa cuanijo. 
\p  
\v 14 Jesosaa jama huohuime aca cua baꞌa: —Chojja de, ¿yajjajo acuae moya jama huohuiꞌajjame aña? Eya ca iña mique chiija quijjojea bejjo quiaꞌyohua cue pojjeama. Maya ecuea echacojji pojjeama, de.  
\v 15 Ojjaña dejja manojeꞌyo quea bejjo huiso cuana, aemaꞌ cuana peaꞌai. Miquea aquianaa miquea bejjohua miya baꞌe meesahua jjima acajeꞌyo, de. Jamajjeya ¡aꞌa aquiana bejjo peaꞌai sa majamajajji! —jamaya Jesosa cua. 
\p  
\v 16 Majoya Jesosaa jiquio esohui ebajji huohui ca cua jama baꞌa: —Oe dejja quea bejjo huiso nee baꞌenaje. Anoso que quea huiso nee nee cuanaje. Sejjajeyoꞌyo majje quea huiso nee nee cuanaje.  
\v 17 Oya jama jjashahuabaquinaje baꞌa: “De, eya quea bihui nee, quea bejjo huiso nee nee cuaje. ¿Achejo shai eyaya anoso quea huiso nequiaje?  
\v 18 Eyaya pojjaꞌa cajjajeajeajeꞌyo anoso nequijji, equi quea quemo nee nee iyajeꞌyo anoso quea huiso nee nee nequiajji, de.  
\v 19 Majoya anoso iyajeyoꞌyo majje eya quea bihui cuaje, ecuea bejjo quea huiso nee nee cuaje. Quea shequija huiso nee nee eya chacochacoꞌyo jjima cuaje quea huiso jjejojo. Eyaya bobi quea huiso nee nee ijjiaje quea bihui epojji” jamaya cuanaje ma dejja.  
\v 20 Majoya aje Eyacuiñajjiya ma mecajje huohui canaje jama baꞌa: “De, miya ca ca niñepoqui cuanaje. Miya jjeya nei manojeꞌyo. ¿Ajea acuae cuajeꞌyo miquea aquiana jiquio miya jaahuaña? Poquijeyojeꞌyo miya jiquio mecajje. Chamaꞌyo tii cuaje. Miquea aquiana, anoso, bejjo peaꞌai dojoꞌyo jjima cuaje. Miya aemaꞌ poquijeꞌyo cuaqui yasijje enijje jjapeequi jjima jjejojo” cuanaje Eyacuiñajji. Majoya aje manoꞌyonaje ma dejja; chamaꞌyo tii cuanaje —jamaya Jesosa cua—.  
\v 21 Eꞌe de, ma dejja jayojjaya miquianaya cuaje miya bejjojo jjashahuaba majamajaquianijo. Oe dejja jjashahuaba majamajaquiani ojaya bejjojo Eyacuiñajjijo oya jjashahuabaqui jjima cuani —jamaya Jesosa cua. 
\s1 Eyacuiñajjiya ojaya epeejji cuana jaahuana cani 
\r (Mateo 6.25-34) 
\p  
\v 22 Majoya Jesosaa o shajjaꞌajjajji cuana jama huohuime aca cua baꞌa: —Eꞌe jojo nei eyaya miquianaya huohuiaña: ¡Aꞌa quea yeno jjashahuaba tiitiiquijji miquianajaya ebaꞌejjijo! Jama baꞌa: “Eꞌe pojjaꞌa eya bobimajo manojeꞌyo; bobi yasijje cuajeꞌyo. Ecuea daqui pojjaꞌa huiñajeꞌyo, daquimaꞌ nei nei eya cuajeꞌyo”. ¡Aꞌa jamaya jjashahuaba tiitiiquijji!  
\v 23-24 Eꞌe de, cuichojji cuana ca ca quea jaji nee baꞌe. Oya cuana ca ca chacochaco ajja, bobi chicha ajja equi yasijje quijje eꞌijjiaꞌyojji. Eseja Chiiya jja oya cuana jaahuana cani, de. Miquianaya ca ca oe ohuaya jaahuana neinei cani. ¡Jama jjashahuabaquimeya jja oe pocue ca quea bame ebaꞌejji, daquijo, bobijo!  
\v 25 ¿Aꞌa miya quea ao cuajeꞌyo jjashahuabaquime cuani? Chojja, jamatiiya cuajeꞌyo.  
\v 26 Jamajjeya oe ¡aꞌa aquianajo jjashahuaba tiitiiquijji! —Jesosa cua—. ¿Apiojji miquianaya jjashahuaba tiitiiquiani miquianajaya daquijo?  
\v 27 ¡Bacue shasha tiiani! Shasha cuana chacochaco ajja; oja daqui cuana soco ajja. Jamatii quea bame nee nee nequiani. Jamaya Eyacuiñajjiya shasha pohua mee cani. Jodioja emeshi mese yahuajo nei nequia cua Sanomo bajjani. Ohuaya daqui quea nahue nee nee huosho ca cua. Jamatii oja daqui quea bame pishana cua, shasha ca ca oe quea bame nee nee cuani.  
\v 28 Eꞌe, Eyacuiñajjiya shasha cuana pohua mee cani quea bame nee. Jjeya shasha cuana enequi; mecahuajje yaaꞌyani, jocaꞌyani; dahuajea cani cuaa pojjaꞌa, chamaꞌyo tii cuani. Jiquio ecua Eyacuiñajjiya shasha quea bame nee pohua mee cani jamaya ohuaya eꞌe jojo nei miquianaya baꞌe meesahua cajeꞌyo quea bame nee nee. Miquianaya ojaya quea boti nee nee cuani. Miquianaya jjashahuaba taiquiani jama baꞌa: “Eꞌe pojjaꞌa eseya jaahuana jjima Eyacuiñajjija”. Cho, ¡aꞌa jamaya jjashahuabaquijji! —jamaya Jesosa cua. 
\p  
\v 29 —Eꞌe, aꞌa jama peaꞌai jjashahuabaquime pojji baꞌa: “¿Aꞌya shai che ijjiaje? ¿Aꞌya shai che ishije; chama ena? ¿Aꞌya shai che ecuaa huoshoje?”  
\v 30 Ojjaña cuana Eyacuiñajjija epeejji pojjeama cuana aquianajo jjashahuabaquiani tii tii. Eyacuiñajjijo jjashahuabaqui ajja. Eꞌe jojo nei esejaya Chii eyajo ani miquianajaya aquianajo, ebaꞌejjijo jjashahuabaquiani. Ojaya eba ojjaña, de. Jamajjeya ohuaya miya jaahuana cani.  
\v 31 ¡Aꞌa pea cuana jayojja pojji! ¡Jjashahuabaquicue oe Eyacuiñajjijo! ¡Onijje oe jjapee tiitiiquicue! ¡Ojaya esohuijo jjashajjaꞌajja tiitiiquicue! Jamaya jjashahuabaquianijo ohuaya miquiana huasijje aquiana ebaꞌe meejji quia cajeꞌyo —jamaya Jesosa cua. 
\s1 Jesosaa eseya ojo chacochaco ani quijje eyajo quea huiso sosequia cajeꞌyo 
\r (Mateo 6.19-21) 
\p  
\v 32 —Eꞌe ecuea epeejji cuana, ¡aꞌa quea mete pojji Eyacuiñajji nijje jjapeequi majje! Ohuaya miquianaya quea bihui po mee caje. Ohuaya miquianaya baꞌe tiitii mee cajeꞌyo eyajo.  
\v 33 ¡Quiacue miquianaaya aquiana aemaꞌ cuana huasijje! Miquianaaya quia jjima ajje miquianajaya aquiana sii ca chanaꞌ; nojjo caꞌyo majje huiñajeꞌyo. ¡Jjeya Eyacuiñajjijo chacochaco neineicue! Eꞌe jojo nei ohuaya quijje miquianaya sosequia cajeꞌyo quea huiso nee nee eyajo. Miquianajaya esiijji pojjeama, miquianajaya epoꞌyo tii tii.  
\v 34 Eꞌe jojo nei miquianajaya aquiana equijo jaahuanaña, jamatii jjashahuabaquiani miquianajaya equijo. Miquianajaya aquiana ca ca eyajo jaahuanaña, jamatii jjashahuabaquiani eyajo ebaꞌeꞌyojjijo —jamaya Jesosa cua. 
\s1 ¡Acua epo oe anicue! 
\p  
\v 35-36 Jesosaa jama huohuime aca cua baꞌa: —Shajjaꞌajjacue jiquio esohui ehuohuiꞌyojo: Oe emeshi mese poquinaje cuiñajji yasijje. Ojo chacochacoani cuaa emeshi mese ishoaꞌajja canaje. Echacojjija ba jjima ache shono shai ojaya emeshi mese cueje oꞌoya. Jamajjeya daqui bame huosho canaje, cuaquijiji jijinequinaje peaꞌai. Cahui jjima cuanaje ishoaꞌishoanequi jjejojo. Emeshi mese cueꞌyajo, ojo chacochacoani cuaa dobiqui mee caꞌyonaje ojaya equi yasijje. Emeshi mese quea bihui cuanaje ohua ishoaꞌajja caꞌaninaje jjejojo.  
\v 37 Jamajjeya ojjaña ojee anioquenaje eꞌijjiaꞌijjiajji. Majoya aje ojee ijjiaꞌijjia majje ojaya echacojji cuana quea bihui nee nee cuanaje.  
\v 38 Jamaya oya cuana quea bame cuanaje ishoaꞌajja neinei canequinajejo. Mecajje, mecashono, epojjajo peaꞌai ishoaꞌajja canequinaje, de. ¡Jamaya miquianaya pocue! ¡Ejo jjaꞌishoaꞌajjaqui anicue!  
\v 39 Eꞌe, jiquio jama cuaje baꞌa: Equi meseya siipojji ache shono cueje poso acani. Ojaya eba jojjemo, ohuaya ishoaꞌajja ca anime equi jaahuanajjiya.  
\v 40 Eya miquianajaya Edoe Mese, ¿ache nei eshequi nequijo eya miquiana que cueje oꞌoya ebajo ese? ¡Jamajjeya jjaꞌishoaꞌajjaqui anicue! —jamaya Jesosa cua. 
\s1 Ojo chacochacoani quea bame nee nee cua 
\r (Mateo 24.45-51) 
\p  
\v 41 Penohua Jesosa jama huohuiꞌajjame aca cua baꞌa: —Esohui huohuijji, ¿aꞌa jiquio esohui ecuanajaye nei ebajji? Ojjañaja ebajji pojjaꞌa ca coma. 
\p  
\v 42 Jesosa jama cua baꞌa: —Eyaya huohuinaje jiquio esohui onaa shajjaꞌajja caje huiso tiija ejjashahuabaquijji. Shajjaꞌajjacue jama baꞌa: Oe emeshi mese poquinaje pea cuiñajji yasijje. Poqui jjimahuaa ojo chacochacoani huohui canaje pea ojaya echacojji bobiajji. Ojo chacochacoaniya emeshi meseja sohui shajjaꞌajja nei canaje.  
\v 43-44 Emeshi mese cueꞌyo majje quea bihui cuanaje ojo chacochacoani quea bame nee nee chacochaconajejojo. Jamajjeya emeshi meseya oya jama huohuime acanaje baꞌa: “¡Miyaya jjeya ojjaña ecuea aquiana cuana jaahuacue, miyaya ecuea esohui shajjaꞌajja neineinajejojo!” Jamajjeya ojo chacochacoani quea bihui cuanaje.  
\v 45 Pea ojo chacochacoani jjashahuabaqui jjima cuanaje. Jama jjashahuaba taiquime cuanaje baꞌa: “Ecuea emeshi mese quijje nei cuejeꞌyo, jamajjeya eya pea echacojji cuana huasijje bobi quia sa po ajja. Poquije ca iña ishiꞌishiya”. Majoya oya ojaya pea echacojji cuana nijje jjacuia majamajaqui nequinaje, huoo majamajanequi jjejojo. Oya chacochaco jjima cuanaje.  
\v 46 Majoya aje oe ojaya emeshi mese cueꞌyonaje. Emeshi meseya ba cañaꞌyonaje ojo chacochacoani ehuoojaa. Majoya aje quea quene nee nee poñaꞌyo majje quecua cañaꞌyonaje shajjamaꞌjojo. Ohuaya jeajea canaje quea huesha. Jamaya Eyacuiñajjiya ojjaña mimishi cuana acajeꞌyo, huoojeajea cajeꞌyo cuaqui yasijje —jamaya Jesosa cua. 
\p  
\v 47 —Eꞌe de, echacomeejjija eba emeshi meseja esohui, oya ca ca shajjamaꞌ nei nei cuanaje. Jamajjeya aje oe emeshi meseya echacomeejji cuia cañaꞌyonaje.  
\v 48 Pea echacomeejjija ca ca ba jjima nei emeshi meseja esohui cuanaje. Jamajjeya emeshi meseya echacomeejji oe pojji cuia meeme acanaje oja ba jjimajojo. Jamaya Eyacuiñajjija esohui eba nei nei epo cajjashajjaꞌajjaquiahua ojaya epeejji nei nei epojji. Shajjamaꞌ jojoya ca Eyacuiñajjiya cuaqui yasijje jeajea cajeꞌyo —jamaya aca cua Jesosaa. 
\s1 Beca cuana Jesosaja epeejji nei cuaje beca cuaa ca ca cajaa acaje 
\r (Mateo 10.34-36) 
\p  
\v 49 Jamaya Jesosa cua baꞌa: —Eya cueyanaje ojjaña nijje jjapeequiya, beca cuana jjapeequije enijje, beca cuana ca ca enijje ejjapeequijji pojjeama. Jama huoojeameya eya acanaje Eyacuiñajjiya.  
\v 50 Eya quea nee nee cuajeꞌyo, mano mee cajeꞌyo cuaa. Eya manocuajiꞌyo sa cuani ojjañaja mimishi cuana cuijeaꞌyojji sosejje. Quea camaja eya cuajeꞌyo, de. Manoꞌyo majje ca eya camajaꞌama cuajeꞌyo.  
\v 51 ¡Aꞌa jjashahuabaquijji eya cueyanaje ojjaña cuana ojjaña meshijo ojee quea bei baꞌe meeꞌyohua! Chojja, de. Pea cuana quea mase cuaje ecuea epeejji cuana nijje.  
\v 52 Eꞌe, jamaya cuaje. Oe equijo baꞌe beca cuana ecuea epeejji nei, beca cuana ca ca ecuea epeejji pojjeama, Eyacuiñajjija epeejji nijje baꞌe sa po ajja oya.  
\v 53 Ebacua ejja esohui ba epo ejeajji nijje baꞌe sa po ajja ohua quea mimishi eꞌaca cuani jjejojo. Enaeseya oja bacua piona tecuea cani, ecuea epeejjijojo. Jamajjeya oja bacua piona onijje baꞌe sa po ajja. Yano mese osecuajana nijje mimijajiani o esohui ba epo jojoya. Jamajjeya osecuajana onijje baꞌe sa po ajja. Eꞌe, jamaya miquianajaya equijo cuaje —jamaya Jesosaa aca cua. 
\s1 Ojjañaja eba ena cuaje jamatii Jesosa ba jjima cua 
\r (Mateo 16.1-4) 
\p  
\v 54 Majoya Jesosa jama cua baꞌa: —Mecajjeahua quea ichi nee nequijo, miquianaya jama cuani baꞌa: “Eꞌe de, quea ichi nequi, ena cuaje, de”. Eꞌe jojo nei ena cuani.  
\v 55 Eꞌe de, jamaya peaꞌai miquianaya cuani baꞌa: “Eꞌe de, eeno jjayejjequiajo quiyo dobiꞌyani”. Eꞌe jojo nei quiyo dobiꞌyani.  
\v 56 Miquianajaya eba ena cuanijo, quiyo dobi yanijo peaꞌai. Jamatii beshahua nei miquianaya ca jja ca oe jjashahuabaqui jjima e cueyanajejo. ¡Miquianaya jja oe jjashahuabaquicue Eyacuiñajjija esohuijo! Jamajjeya eya miquianaaya baje —jamaya Jesosa cua. 
\s1 Pea esohui ejjashahuabaqui jaꞌajjijo 
\r (Mateo 5.25-26) 
\p  
\v 57 —¿Aꞌa miquianajaya eba quea bame ebaꞌejji? Eꞌe pojjaꞌa, jamajjeya jjashahuabaquicue jiquio esohuijo jama baꞌa:  
\v 58 Miquiana nijje oe dejja quea quene nee nee cuajo miquianajaya aquiana sosequia jjimajojo, ohuaya miquianaya dojo caje sohuinano huasijje. Jamajjeya ¡dojo jjimahuaa aquiana miquianaaya sosequiaꞌyocue! Miquiaa mi sosequiaꞌyajje ohuaya miquianaya dojo caje sohuinano huasijje ejeadobia meejji. Majoya miquianaya sohuinanohua jeadobia caje.  
\v 59 Eꞌe jojo nei ejeadobia tii jaaje. Ejeacuayaꞌyojji pojjeama miquiaa mi sosequiajje. Miquianaya sosequiajeyoꞌyajje ca mi ca oe jeacuaya cajeꞌyo. ¡Jiquio jayojjaya oe pocue! Jamajjeya ¡jjeya Eyacuiñajji nijje jjapeequicue miquianaya manoꞌyo jjimahua, cuaqui yasijje jea jjimahua peaꞌai! Jamajjeya miya cuaqui yasijje ejeadobiajji pojjeama —jamaya Jesosa cua. 
\c 13  
\s1 ¡Jjapeequicue Eyacuiñajji nijje! 
\p  
\v 1 Majoya pea cuana poquia cua Jesosa baa. Beca cuaa jama huohuiꞌajjame aca cua baꞌa: —De, jjeya nei Pinatohua, emeshi meseya Jodio dejja cuana quecua mee caꞌyonaje. Ma dejja cuana Janinea meshijo baꞌe poquinaje Jenosanena huasijje Eyacuiñajji bihuiaa. Eyacuiñajjija equi yasijje dobiqui majje ijjiacajji ehuoneꞌ cuana quecua canaje edahuajji. Eyacuiñajjija equijo nequi sohuinano cuaa dobiqui majje quecuajea caꞌyonaje. Hua canaje equecuaꞌyo cuanaja enaꞌ ijjiacajjija enajo, de. Quea mimishi nee nee cuanaje emeshi mese Pinato, de. ¿Aꞌa ma Jodio dejja cuana quecua caꞌyonaje quea mimishijojo? —jamaya poso aca cua. 
\p  
\v 2 Jesosa jama cua baꞌa: —Chojja, de. Miquianaya jjashahuaba taiquiani. Jodio dejja cuana quea mimishi cuani quecuaꞌyo jjima. ¿Yajja ajjaja oe pea cuana Jenosanenajo baꞌe mi manoꞌyonaje oya jayojjaya peaꞌai ca jja coma?  
\v 3 Jamajjeya miquianaya manoꞌyo majje peaꞌai Eyacuiñajji nijje jjapeequi jjima jjejojo cuaqui yasijje poquijeꞌyo.  
\v 4 Eꞌe, Sinoe cuiñajjijo pea dejja cuana manoꞌyonaje. Equi quea ao nee nee iya canaje meshi edahua caꞌa. Meshi caꞌa jjaajajeaquiꞌyo majje dejja cuiamoꞌijea caꞌyonaje meshiya. Quea huiso nee nee, 18 dejja cuana manoꞌyonaje, de. ¿Aꞌa oya cuana quea mimishi nee neejo manoꞌyonaje poso aña? Chojja, de. ¿Yajja ajjaja oe pea cuana Jenosanenajo baꞌe mi manoꞌyonaje oya jayojjaya peaꞌai ca jja coma? Quea mimishi nee nee cuani; oya cuana eshe, de, manoꞌyo jjima.  
\v 5 Eyaya huohuije oꞌoya, miquianaya Eyacuiñajji nijje jjapeequi jjima po majje cuaqui yasijje poquijeꞌyo, de —jamaya Jesosa cua. 
\s1 Esohui acui jjajjamaꞌ cuajo 
\p  
\v 6 Jesosaa jiquio ehuohuiꞌyo jama huohuime aca cua baꞌa: —Oe dejja acuijjajja banajji epo poquinaje que yasijje. Acui tii majje jjajjamaꞌ cuanaje, de.  
\v 7 Ma dejjaa ojaya echacojji jama huohuime acanaje baꞌa: “De, pea beca peejjima shequiajame ca cuanaje ma acui. Jjajja ajja cuanaje. ¡Jajajeaꞌyocue; pea acui banaꞌyocue!”  
\v 8 Ojaya echacojjiya jama huohuime acanaje baꞌa: “Emeshi mese, ¡ishoaꞌajjacue oe eshequiajame! Eyaya jaahuana neineije soꞌo. Meshi tio majje anaꞌaija see meshi tejjee huanaje soꞌo.  
\v 9 Acui eya jaahuana neineiajje quea jjajja huiso nee nee cuaje pojjaꞌa. Jjajjamaꞌ po oꞌoyajo oe cajajajeaꞌyahua” jamaya ojaya echacojji cuanaje —jamaya Jesosa cua—. Eꞌe, ma acui jjajjamaꞌ jayojja oe dejja jjapeequi jjima Eyacuiñajji nijje. Ma echacojjiya jjajja meesahua cani jama jayojja eyaya aña, dejja cuana jjapeequi meesahuaña Eyacuiñajji nijje —jamaya Jesosa cua. 
\s1 Jesosaa oe epona moꞌaa jjapiqui meequi caꞌya cua 
\p  
\v 10 Ejomishocajji pojjajo Jesosa poquia cua Jodioja ejjachichaquijji equi yasijje esohui huohuiya.  
\v 11 Oe epona moꞌaa ania cua jomajo. Edosiquianaja jjamoꞌaaqui meeꞌyo cua yahuajo. Quea huiso nee nee, 18 eshequiajame epona ejjamoꞌaaquiꞌyo ania cua.  
\v 12 Jesosaa oya ba majje jama huohuiꞌajjame aca cua baꞌa: —¡Epona, cuecue! Eyaya miya jjadaasapiqui meejeꞌyo. 
\p  
\v 13 Majoya Jesosa que cueajo Jesosaa emeya napa cajje epi nei nequiꞌya cua. Ma eponaa Eyacuiñajji bihuia ca cua.  
\v 14 Jesosaa ma epona jjadaasapi meequi caꞌya cua ejomishocajji pojjajo. Majoya aje Jodioja ejjachichaquijji equi jaahuanajji Jesosa nijje quenequenea cua. Dejja cuana jama huohuime aca cua baꞌa: —Me oejje oe cahuime echacojji yani. ¡Ma pojja cuanajo cuecue ejjaajaquiꞌyojji! ¡Aꞌa ejomishocajji pojjajo Jesosaja jjaajaqui meeꞌyohua cuejji! 
\p  
\v 15 Jesosaa ma esohui shajjaꞌajja majje jama tecueame aca cua baꞌa: —Chojja, ¡aꞌa jamaya mimijji! Miquianaya jama cuanaje baꞌa: “¡Aꞌa chacojji ejomishocajji pojjajo!” Miquianaya ca ca jiquio pojjajo chacochacoqui. Miquea anaꞌai ejomishocajji pojjajo ijjiaꞌijjia mee aña. Miyaya miquea anaꞌai ejeyo nequi pichojeaña ena ishi meequijji.  
\v 16 Eꞌe, jiquio epona mi jayojja, oe Jodio epona. Quea huiso nee nee, 18 eshequiajame Edosiquianaa jjamoꞌaaqui mee caꞌya cua, de. ¿Yajjajo acuaeya mi cuayajea meeꞌajjaquiꞌyaña soꞌo ejomishocajji pojjajo? ¿Aꞌa mi o jjapiqui meeꞌyo ajja jjejojo jama cuani? ¿Aꞌa miya jjashahuaba taiquiani jjejojo jama cuani? —jamaya cua Jesosa. 
\p  
\v 17 Jesosaja esohui shajjaꞌajja majje o ñiñebajji cuana quea bicho poꞌya cua. Beca cuana ca quea bihui cua Jesosa nijje, ma epona jjapiqui mee caꞌyajo. Eꞌe de, Eyacuiñajjiya Jesosa quea sohui poja po mee caꞌya cua. 
\s1 Esohui acui soꞌ che biso neijo motasa sojo 
\r (Mateo 13.31-32; Macoso 4.30-32) 
\p  
\v 18 Majoya Jesosaa jama huohuime aca cua baꞌa: —Ebionei Eyacuiñajji oe pojji dejjaja Emeshi Mese nei cuaje, quijje ca ca Eyacuiñajji ojjañaja Emeshi Mese nei cuaje, oya quea epeejji huiso cuaje.  
\v 19 Eꞌe, oe motasa soꞌ biso nei tii majje acui quea quemo jayojja cuani, huapeje cui quemajja. Cuichojji motasa acuijo jaani. Ma esoꞌ biso nei jayojjaya Eyacuiñajjija epeejji cuani oe pojji jayojjaya cuani ebionei. Majoya quea huiso nee nee ojaya epeejji cuaje motasa acui jayojjaya —jamaya Jesosa cua. 
\s1 Esohui ehuohuiꞌyojji pahui shejjee meejjijo 
\r (Mateo 13.33) 
\p  
\v 20-21 Pea esohui ehuohuiꞌyo Jesosaa jama huohuime aca cua baꞌa: —Eyacuiñajji ojjañaja Emeshi Mese nei cuaje pahui shejjee yani jayojjaya. Jamaya oe epona pahui dahuajje cuanaje. Oe pojji nei eshejjee meejji iya canaje. Majoya aje ohuaya jeahuahuo canaje quea huiso pohuipohui pahui yajji. Majoya aje ojjaña shejjeeꞌyonaje pohuipohui. Majoya aje quea huiso pahui cuanaje. Jamaya Eyacuiñajjija epeejji pahui shejjee meejji jayojjaya cuani. Ebionei oe pojji epeejji cuana cuani, majoya aje pea cuana jjashahuabaqui mee cani Eyacuiñajjija epeejji epojji. Quea huiso nee nee po mee cani —jamaya Jesosa cua. 
\s1 Esohui ehuohuiꞌyojji esecuejjani biso neijo 
\r (Mateo 7.13-14, 21-23) 
\p  
\v 22 Majoya aje Jenosanena huasijje poquije, Jesosa pea cuiñajji cuana huasijje dobiqui poquia cua sohui huohuiya.  
\v 23 Jesosa aniñaqui jjimahuajo pea cuiñajjijo baꞌeya oya jama huohuiꞌajjame aca cua baꞌa: —¿Aꞌa oe pojji Eyacuiñajjija epeejji cuana poquijeꞌyo eyahuasijje onijje baꞌeꞌyohua? 
\p Jesosa aje majoya jama cua baꞌa:  
\v 24 —Eꞌe de, yani oe esecuejjani biso nei edobiquijji eyahuasijje. Joya jjapeequi sa cuani enijje ma esecuejjani biso neijje dobiqui majje poquije eyahuasijje. Beca cuana ca ca poqui ajja eyahuasijje, enijje jjapeequi ajja jjejojo.  
\v 25 Eꞌe, eya oe equi mese jayojja. Equi meseya esecuejjani caꞌa caꞌyonaje, beca cuana edobiqui cuajejje. Majoya esecuejo tii nequijeaje. Oya cuana jama poꞌajja nequinaje baꞌa: “Equi mese, ¡caꞌapejocue ecuana edobiquijji!” Equi mese jama cuanaje baꞌa: “Chojja, ecuea miquianaya ba jjima, de”.  
\v 26 Majoya oya cuana jama poꞌajja nequinaje baꞌa: “De, ecuanajaya miya eba, minijje ijjiaꞌijjianaje. Miyaya esohui huohuinaje ecuanaja meshijo”.  
\v 27 Majoya aje oya jama cuanaje baꞌa: “Chojja, ecuea miquianaya ba jjima. ¡Poquicue quea huesha, quea mimishi nee nee mi ca cuanaje! Miquianaya ecuea epeejji cuana pojjeamajojo, dobiqui mee jjima aña”. 
\p  
\v 28 Eꞌe de, miquianaya ma dejja cuana esecuejo nequi tii tii jayojja cuani. Miquianaya dobiqui sajo pa neineijeꞌyo; miquianaya quea yeno nee nee cuajeꞌyo. Jamaya aje nequiana esecuejo nequi cuaje baꞌa: “Ecuea etiiquiana ca dobiquia cua, eꞌe jojo nei oya cuana Eyacuiñajjija epeejji cua. Oya bajjani cua baꞌa: Amajama, Isaaca, Jacobo, Eyacuiñajjija esohui huohuijji nei cuana peaꞌai. Jjeya Eyacuiñajji nijje nequi. Ecuana capoquiꞌyahua eyahuasijje”. Cho, miquianaya poqui ajja; quea yeno nee nee cuajeꞌyo. Shajjaꞌajja sa po ajja cuanaje ecuea esohui, Eyacuiñajjija esohui peaꞌai.  
\v 29 Ojjaña dejja joya enijje jjapeequi jjima dobiqui ajja tii eyahuasijje. Ojjaña meshijo baꞌe Eyacuiñajji nijje jjapeequiani eyahuasijje poquijeꞌyo. Jomajo onijje ijjiaꞌijjiaje quea bihui epojji.  
\v 30 Eꞌe, jjashahuabaquicue jiquio esohuijo jama baꞌa: Beca cuana jjeya ona huoojeaꞌyojji cuani eyajo ona huoojeaꞌyojji pojjeama cuajeꞌyo. Joya jjeya ona huoojeaꞌyojji pojjeama ca ca eyajo ona huoojeaꞌyojji nei nei cuajeꞌyo e jayojja —jamaya Jesosa cua. 
\s1 Jesosa quea yeno cua Jenosanenajo baꞌeca cuanajo 
\r (Mateo 23.37-39) 
\p  
\v 31 Majoya aje Paniseo dejja cuana Jesosa que cueya cua onijje mimiya. Majoya aje oya cuana jama cua baꞌa: —¡Poquicuajicue oe, miya emeshi meseya, Enodeya, quecua sa acani! 
\p  
\v 32 Majoya aje Jesosaa jama aca cua baꞌa: —Cho, ¡miquianaya jja ca oe poquicuajicue emeshi mese yasijje, Enode yasijje; oya dejja quea mase nee nee! Jjeya jiquio pojjajo, mecahuajje peaꞌai eyaya eshahua quea mase cuayaqui meeꞌyaña, emano cuana jaa jjaajaqui meeꞌyaña. Ma mecahuajje acua cuajeꞌyo ecuea echacojji; ¡jamaya Enode aquicue!  
\v 33 Eꞌe jjeya ca iña poquijeꞌyo Jenosanena huasijje. Jomajo eya manojeꞌyo ma ecua Eyacuiñajjija esohui huohuijji cuana mano caꞌya cua huasijjeya. 
\p  
\v 34 Majoya Jesosa quea yeno nee nee cua Jenosanenajo baꞌe cuanajo. Oya jama cua baꞌa: —Jodio cuana Jenosanenajo baꞌe, miquianaya ecuea quea jea nee nee. Jamajjeya eya miquianajo quea yeno cuani. Eꞌe, miquianaaya aje oe Eyacuiñajjija esohui huohuijji quecuaꞌya cua; ojaya ehuoojeaꞌyo cuana jajahuejjajeaꞌya cua meiya peaꞌai. ¡Bacue! Oe cachina enaeseya ebacua ejaahuanajji huojje cani. Jama jayojjaya eyaya miquianaya iyaa sa neineiaña e que ejaahuanajji. Jamatii miquianaya enijje jjapeequi sa po ajja.  
\v 35 Jamajjeya eya quea yeno nee nee miquianajo cuani. Miquianaaya Eyacuiñajji eya peaꞌai cajaa anaje. Jamajjeya ohuaya jaahuana ajja miquianajaya cuiñajji Jenosanena. Jamatii miquianaaya nei jaahuanaje; baꞌajja, quea camaja cuaje. Miquianaaya eya cajaa anaje, jamajjeya eba becaꞌyojji pojjeama mo nequianajaya. Miquiaaya eya cue oꞌoyajo jama aje baꞌa: “Miya Eyacuiñajjija huoojeaꞌyo ojjaña jaahuanajji. Eyacuiñajjiya miya cajaahuana cahua quea bame” jamaya miquianaya cuaje quijje —jamaya Jesosa cua Jenosanenajo baꞌe cuana nijje. 
\c 14  
\s1 Jesosaa oe dejja eshejjee tii tii nequi shacuashacua mee caꞌya cua 
\p  
\v 1 Oe ejomishocajji pojjajo Paniseo dejja etiiya Jesosa iyaa ca cua ijjiaꞌijjiaa. Jamajjeya Jesosa poquia cua oja equi yasijje. Pea Paniseo dejja cuana Moisesija etehueꞌyo huohuijji cuana peaꞌai poquia cua oja equi yasijje ijjiaꞌijjiaa. Oya cuana Jesosajo jama jjashahuaba taiquime cua baꞌa: —Jesosaa pojjaꞌa oe jjaajaqui mee cajeꞌyo ejomishocajji pojjajo; baꞌajja. 
\p  
\v 2 Jesosa pejjejo oe dejja quea mano nee, eshejjee tii tii nequia cua.  
\v 3 Jesosaa oya cuana jama huohuiꞌajjame aca cua baꞌa: —¿Aꞌa ya che jjaajaqui meeꞌyome jiquio ejomishocajji pojjajo? Eꞌe pojjaꞌa, chojja pojjaꞌa. ¿Aꞌya acuae miquianaya jjashahuabaquiani soꞌo? 
\p  
\v 4 Oya cuana mimi jjima nequia cua Jesosa bahuejjajji nisho. Majoya aje Jesosaa ma dejja eshejjee tii nequi napa ca cua emeya. Ma dejja shacuashacua mee caꞌya cua. Jesosaa oya jama huohuime aca cua baꞌa: —¡Poquicue miquea equi yasijje! 
\p  
\v 5 Majoya Jesosaa Paniseo dejja cuana jama huohuime aca cua baꞌa: —Miquianaya chacochacoani ejomishocajji pojjajo. Bacue miquea ebacua, anaꞌai pojjaꞌa ejomishocajji pojjajo jjani quea doe yasijje oquequiajo, miquianaaya jjequisohuajeꞌyo. Jamaya miya chacochacoani ¿aꞌa eꞌe? Eꞌe jojo nei. Jama jayojjaya shacuashacua meeꞌyomeya eyaya anaje —jamaya Jesosa cua. 
\p  
\v 6 Paniseo dejja cuana jjashahuabaquiequi jjejojo, mimi jjima nequia cua. 
\s1 Eꞌijjiaꞌijjiajji equi yasijje iyaa ca cua 
\p  
\v 7 Majoya Jesosaa Paniseo dejja cuana nijje ijjiaꞌijjiaa cueaniya ba ca cua Paniseo dejja cuana eꞌanijji bame bame saꞌajja cuequi. Ba majje jama huohuime aca cua baꞌa:  
\v 8 —Oe equi meseya miquianaya pojjaꞌa iyaa caje ijjiaꞌijjiaa. ¡Aꞌa eꞌanijji quea bame saꞌajjajji!  
\v 9 Equi meseja epeejji nei cueje, caꞌaniꞌyahua ma eꞌanijji bame bamejo o pejjejo. Jamaya miquianaya nijje mimije baꞌa: “¡Nequisohuacue miya; poquicue pea eꞌanijji yasijje! Ecuea epeejji ca jiquiojo caꞌaniꞌyahua”. Quijjeyejjenei nequi eꞌanijjijo anioqueꞌyo majje quea bicho miya cuaje ojjañaa ba cajeꞌyo jjejojo.  
\v 10 Eꞌe de, jamajjeya miquianaya iyaa cajje ijjiaꞌijjiaa, ¡anioquecue pea cuana nijje quijjeyejjenei nequi eꞌanijjijo! Majoya ma equi mese cueje mi que pojjaꞌa, jama huohuime acaje baꞌa: “¡Miya cuecue eꞌanijji bame yasijje e pejjejo!” Majoya pea cuaa ba caje miya anijji bamejo ani. Jamajjeya miquianaya quea bihui nee cuaje.  
\v 11 Jamaya cuaje miquianaya. Eyacuiñajjija eba ojjaña jama cuani. Miquianaya jama jjashahuaba taiquime cuani baꞌa: “Eya che oe ese ejja quea bame nee nee cuani”. Cho, Eyacuiñajjija eba miya. Miquianaya jja oe jjashahuaba bamebamequicue jama baꞌa: “Eya ca iña pea cuana baꞌe meesahua sa cuani oya cuana quea bame epojji”. Majoya aje Eyacuiñajjiya miquianaya quea bame baꞌe meesahua caje. Majoya miquianaya dejja quea bame nee nee cuaje —jamaya Jesosa cua. 
\p  
\v 12 Majoya Jesosaa Paniseo dejja etii jama huohuime aca cua baꞌa: —Jamatii miquea bobi quea huiso anijo, miquea huapa pojjeama, miquea epeejji nei peaꞌai miyaya iyaaña ijjiaꞌijjiaa.  
\v 13 Jamajjeya miya ohuaya iyaa caje esosejjeya. ¡Aꞌa jama amajamajajji! ¡Iyaacue aemaꞌ cuana, jeoꞌajja cuana, poquideja cuana, cojjamaꞌ cuana iyaacue bobi ijjiaa peaꞌai!  
\v 14 Ohuaya nequiana ca ca sosequia jjima miya acaje. Majoya miyaya ma jayojja ajo Eyacuiñajjiya miya quea bihui nee po mee caje. Quijje miya eyajo baꞌejeꞌyo Eyacuiñajji nijje. Majoya aje Eyacuiñajjiya miya eyajo sosequia cajeꞌyo quea huiso nee —jamaya aca cua Jesosaa. 
\s1 Esohui ehuohuiꞌyo ojee eꞌijjiaꞌijjiajjijo 
\r (Mateo 22.1-10) 
\p  
\v 15 Oe dejjaa Jesosaja esohui shajjaꞌajja majje Jesosa jama huohuime aca cua baꞌa: —Ojjaña quea bihui cuaje eyajo ojee ijjiaꞌijjiani Eyacuiñajji nijje oja epeejji cuana nijje peaꞌai. 
\p  
\v 16 Jesosaa jama huohuime aca cua baꞌa: —Eꞌe jojo nei, ca joya eyahuasijje poquijeꞌyo quea bihui nee cuaje. Jiquio esohui ehuohuiꞌyojo ca jama jjashahuabaquime pocue baꞌa: Oe emeshi meseja bobi quea huiso aninaje. Iyaa canaje dejja cuana quea huiso nee nee.  
\v 17 Bobi acua cuajo, huoojea canaje ojaya echacojji ona iyaaa. Iyaa canaje ojaya epeejji cuana.  
\v 18 Oe epeejji jama cuanaje baꞌa: “De, eya poqui sa po ajja, jjeya jjeshenaje meshi, eya poquije ca iña meshi baa”.  
\v 19 Pea epeejji jama cuanaje baꞌa: “De, eya poqui sa po ajja peaꞌai, eyaya jjeshenaje me oejje huisome anaꞌai acuijo sheꞌanayijaca. Poquije ca iña anaꞌai jaahuanaa”.  
\v 20 Pea epeejji jama cuanaje baꞌa: “De, poqui sa po ajja ca iña; oya ca iña jjeya nei jjahuanaquiaña”.  
\v 21 Echacojjiya oja meshi mese yasijje cueꞌyo majje huohui canaje ojjañaja esohui ma cue ajja cuanaje cuanaja. Majoya emeshi mese huohui cajje quea quene nee cuanaje. Huoojea ca oꞌoyanaje ojaya echacojji pea iyaaa. Jama cuanaje baꞌa: “¡Jjequicue jjeyahua nei pea cuana! ¡Iyaaquicue aemaꞌ cuana, jeoꞌajja cuana, poquideja cuana, cojjamaꞌ cuana peaꞌai ecuea equi yasijje bobi ijjiaa”.  
\v 22 Majoya echacojji poquinaje pea jjequiya. Jjequi majje echacojjiya emeshi mese jama huohuime acanaje baꞌa: “Emeshi mese, eyaya pea cuana jjequinaje, eꞌanijji cuiñajeyo jjima cuanaje. Quea dejja huiso cue jjima, de”.  
\v 23 Jamajjeya emeshi mese jama cuanaje oꞌoya baꞌa: “¡Poqui oꞌoyacue quea huesha nee nee; pea cuana baꞌe yasijje iyaaquicue! ¡Cue meecue pea cuana: “Ecuea eꞌanijji cuiñajeyo jjima” acue! Ecuea equi cuio mee sa aña dejjaa.  
\v 24 Ecue epeejji cuana ca ca eyaya ebionei iyaaꞌajjanaje, jamatii enijje ijjiaꞌijjia jjima cuani” jamaya cuanaje emeshi mese —jamaya aca cua Jesosaa. Jamaya Eyacuiñajjiya dejja cuana quea huiso nee nee iyaaꞌajja cani, jamatii oe pojji poquiani onijje ijjiaꞌijjiaa. 
\s1 Quea camaja Jesosaja epeejji epojji 
\r (Mateo 10.37-38) 
\p  
\v 25 Ojjañaa Jesosa equijje aca poquia cua. Majoya Jesosa jjabajeaquiꞌya cua. Ohuaya jama huohuime aca cua baꞌa:  
\v 26 —¡Miquianaya enijje jjapee neineiqui sa cuani, eya oe quea jea nee nee acue! ¡Miquea huapa pojjeama oe pojji quea jea acue! Miquea enaese, mique chii cuana, mique huanase cuana, mique bacua cuana, mique doe, mique jjoꞌi jama, ¡quea jea nee ameya mo oe acue!  
\v 27 Miquianaya enijje jjapeequiajo pea cuana miquiana nijje mimijajije. Eꞌe, jiquio ecua acui ecueataꞌapee quea camaja eꞌabojji jama jayojja enijje jjapeequiajo quea camaja cuaje. Eꞌe de, pea cuaa miquianaya cuia sa acaje, quecua sa acaje pojjaꞌa enijje jjapeepajeaquiꞌyo ajjajojo. Miquianaya ecuea epeejji nei po tiitiianijo jamajjeya eꞌe jojo nei miquianaya ecuea epeejji nei nei cuani.  
\v 28 ¡Ejo jjashahuaba neineiquicue enijje jjapeequi jjimahua, quea camaja epo cuahuajje! Miya quea nee, quea yeno pojjaꞌa cuaje enijje jjapeequi majje. Eꞌe jojo nei oe dejja equi iya jjimahuajo jjashahuabaquiani ma equi eꞌiyajji nishojo.  
\v 29 Majoya ohuaya cajaa acanaje mi iya majje. Beca cuaa niñeba canaje jama baꞌa:  
\v 30 “Eꞌe de, ma dejjaa iyaꞌajja canaje, jjashahuaba neineiqui jjima jjejojo mi iyajeyo canaje”. Eꞌe, jamaya enijje jjapeequi jjimahuajo ¡jjashahuaba neineiquicue ejjapee tiitiiquijji enijje! 
\p  
\v 31 —Eꞌe de, oe emeshi meseya pea emeshi mese nijje jjaquecuaqui mee sa acanaje. Ebionei ohuaya sico canaje ojaya sohuinano cuana. Ojaya yani 10 mil sohuinano cuana, quea huiso pishana. Pea emeshi meseja ca ca sohuinano 20 mil cuanaje, quea huiso nee nee, de. Jamajjeya ma emeshi mese oe pojji pishana sohuinanojo jjaquecuaqui mee jjimahua jjashahuaba neineiquinaje.  
\v 32 Oya jama cuanaje baꞌa: “De, quea camaja, ecuea oe pojji sohuinano yani”. Jamajjeya emeshi meseya pea emeshi mese yasijje oe sohuinano huohui pohua huoojea canaje jjaquecuaqui mee sa po ajjaa jjejojo. Onijje jjapeequi sa cuanaje. 
\p  
\v 33 Eꞌe, jamaya miquianaya jjapeequi sa cuani enijje pojjaꞌa. ¡Jjashahuaba neineiquicue ejo jjapeequi jjimahua! Quea camaja cuaje enijje jjapeequi majje —jamaya Jesosa cua. 
\s1 Ehuohuiꞌyo sanejo 
\r (Mateo 5.13; Macoso 9.50) 
\p  
\v 34 Jesosaa pea esohui jama huohuime aca cua baꞌa: —Sane quea bame nee nee. Jamatii sane seseꞌama cua jjemo jeajea cajji.  
\v 35 ¿Achacua jeajea cajji? Quea huesha nee nee. Eꞌe, quea huesha jea jjima ca ca meshi quea tai sane tejjee cuaje, saneya acui tii mee jjima acaje. Jamaya miquianaya enijje jjapeequiani, majoya jjapeepajeaquijeꞌyo pojjaꞌa. Miquianaaya eya pajeaꞌyo majje eyaya miquianaya jeajeajeꞌyo quea huesha nee nee sane jayojjaya. Jamajjeya ¡jjashahuaba neineiquicue enijje jjapeequi jjimahua! —jamaya Jesosaa aca cua. 
\c 15  
\s1 Ehuohuiꞌyo ñajjajja epoquiquehua baꞌyojjijo 
\r (Mateo 18.10-14) 
\p  
\v 1 Dejja cuana emeshi meseja bejjo jjeshejji cuani poquia cua Jesosa que oja esohui shajjaꞌajjaa. Oya cuana jamatii quea mimishi nee nee cua. Pea dejja cuana quea mimishi nee nee poqui peaꞌaiya cua Jesosaja esohui shajjaꞌajjaa.  
\v 2 Paniseo dejja cuana, Moisesija etehueꞌyo huohuijji cuana jjaniñebaqui aña cua pea cuana nijje jama Jesosajo po aña cua baꞌa: —De, Jesosa jjapeequiani dejja quea mimishi nee nee cuana nijje, ijjiaꞌijjia ani ona nijje, de. 
\p  
\v 3 Ma esohui shajjaꞌajja majje Jesosaa esohui ejjashabaqui meejji jama aca cua baꞌa:  
\v 4 —Oe dejja yaninaje, ojaya ñajjajja cuana quea huiso nee, 100 huisome. Oe ñajjajja poquiquehuanaje. Dejja poquinaje ñajjajja saꞌajjaꞌyohua. Pea ñajjajja 99 huisome ojee ijjiaꞌijjiaqui jea canananaje. Saꞌajja neinei caꞌyoquinaje, de.  
\v 5 Majoya aje baꞌyo majje abo caꞌyonaje. Abo majje dojo caꞌyonaje o nequijji yasijje, quea jaji nee nee poꞌyonaje.  
\v 6 Ñajjajja meseya ojaya epeejji jama huohuime acanaje baꞌa: “Baꞌyonaje eyaya ecuea oe ñajjajja, de. Jjeya nei enequiꞌyo, eꞌe de, jjeya eseya quea bihui epoꞌyo”. 
\p  
\v 7 —Eꞌe, ñajjajja epoquiquehua oe dejja quea mimishi nee nee jama jayojja cuani. Eyacuiñajji ma ñajjajja mese jayojja cuani. Jamatii Eyacuiñajjiya dejja mimishi cuana sa cani ojaya epeejji epojji. Ohuaya dojo sa cuani ma dejja eyahuasijje. Eyacuiñajji quea bihui cuaje oe dejja mimishiya ojaya mimishi pajea caꞌyajo, Eyacuiñajji nijje jjapeequiajo. Ojjaña eyajo baꞌeca cuana quea bihui cuajeꞌyo ma dejja mimishi Eyacuiñajji nijje jjapeequiajo —jamaya Jesosa cua. 
\s1 Esohui ehuohuiꞌyo eponaa bejjo ba caꞌya cuajo 
\p  
\v 8 Jesosaa pea esohui jama huohuime aca cua baꞌa: —Oe eponaja bejjo ome miji peaꞌai aninaje. Oe bejjo oquequehuajeaquinaje meshi yasijje equi yiyedojjojo tiiya. Jamatii saꞌajja neinei caꞌyoquinaje eponaa. Cuaquijijiya bejjo jeajaꞌaꞌajja caꞌyonequinaje. Majoya aje cuiashabaꞌajja caꞌyonaje. Majoya aje cuiashabaꞌyo majje ba caꞌyonaje bejjo.  
\v 9 Majoya aje quea bihui poꞌyonaje bejjo ba majje ojaya epeejji cuana huohui caꞌyonaje jama baꞌa: “Eꞌe ee, eseya jjeya quea bihui epoꞌyo. Eyaya baꞌyonaje bejjo ma oquequehuajeaqui cuanaje” epona cuanaje.  
\v 10 Eꞌe, ma bejjo oe dejja jayojja cuani. Oya quea mimishi nee nee jjapeequi sa cuani Eyacuiñajji nijje; ojaya mimishi pajeaꞌyo sa cuani. Jiquio ecua epona bejjo ba majje quea bihui nee nee cuani jayojja Eyacuiñajji quea bihui cuani dejja mimishi onijje jjapeequiajo. Eyacuiñajjija esohuidojojji cuana eyajo baꞌe quea bihui nee nee cuaje oe dejja Eyacuiñajji nijje jjapeequiajo —jamaya Jesosa cua. 
\s1 Esohui ehuohuiꞌyo oja chiiya oja bacua nijje jjabeiquiꞌya cuajo 
\p  
\v 11 Pea esohui Jesosaa jama huohuime aca cua baꞌa: —Oe emeshi meseja becanejjijji peaꞌai ebacua ejja nequinaje.  
\v 12 Ebacua ejja shacuimaꞌ nequi epohua oja chii jama huohuiꞌajjame acanaje baꞌa: “Ecue chii, ¡bejjo mo quiaꞌyocue ecuea yajji; miya manoꞌyo jjimahua oe mo quiaꞌyocue!” Jamajjeya oja chii jama cuanaje baꞌa: “Eꞌe maꞌaje”. Ma echahua mesejame oja iya poquia quia caꞌyonaje echahua mese que.  
\v 13 Majoya aje quijje pishana echahua meseya ojaya aquiana, meshi peaꞌai quia canaje bejjo sosejje. Ma bejjo sosejjeya poquinaje pea meshi yasijje quea huesha nee nee. Jomajo quea mimishi nee nee baꞌenaje, de. Ohuaya bejjo quia jeyojeyo caꞌyonaje huoo majamajajjiya jjejojo.  
\v 14 Chamaꞌyo tii ojaya bejjo poꞌyonaje, quea shoe nee nee poꞌyonaje peaꞌai. Ma meshijo bobi chamaꞌyo tii cuanaje ejjeshejji, de.  
\v 15 Ohuaya oe dejjaja echacojji saꞌajja canaje. Oe dejjaa oya huoojea canaje cuichi nequi yasijje cuichi cuiñajji epojji. Majoya ohuaya cuichi cuiñaqui canaje. Chamaꞌyo tii ojaya bobi poꞌyonaje, de.  
\v 16 Jamajjeya aje cuichija bobi ijjia sa cuanaje quea shoe nee nee jjejojo, bobi peaja quia jjima nei nei cuanaje jjejojo. 
\p  
\v 17 —Majoya aje jama jjashahuaba neineiquiꞌyome cuanaje baꞌa: “Eꞌe de, ecue chiija echacojji jomajo yani, bobi quea huiso yani jomajo, de. ¿Yajjajje shai eya jiquiojo quea shoe nee nee poꞌyo ani, de?  
\v 18 Eya capoquiꞌyahua ecue chiija equi yasijje. Eyaya oya jama huohuiñaquiꞌyome aje baꞌa: —Ecue chii, eya quea mimishi cuanaje minijje, Eyacuiñajji nijje peaꞌai —eyaya añaquijeꞌyo ecue chii.  
\v 19 Ecue chii enijje quea quene cuaje eya quea mimishi cuanajejojo. Ohuaya eya oja bacua pojjeama jayojja acaje. Jamajjeya mo eya ojaya echacojji capoꞌyahua. Eya quea shoe nee nee, aemaꞌ peaꞌai. Quea yeno nee nee eya cuani ecue mimishijo. Eꞌe de, jjeya nei eya poquijeꞌyo ecue chiija equi yasijje” jamaya jjashahuabaquinaje ma ebacua ejja. 
\p  
\v 20 —Majoya aje poqui oꞌoyanaje oja chiija equi yasijje. Majoya oja chiiya oja bacua ejja ejiojjijje quea huesha cuejeꞌyo ba canaje. Jama cuanaje baꞌa: “Ecue bacua ejja pojjaꞌa joma cuejeꞌyo”. Oya majoya quea jaji nee nee poꞌyonaje oja bacua ejiojjijje cuejeꞌyo ba majje. Majoya aje oja bacua que poquinaje; emeya cuiapashi cajjequiꞌyonaje; shemo tojjo cajjequiꞌyonaje quea jeajojo. 
\p  
\v 21 —Majoya aje ebacua ejjaa oja chii jama huohuime acanaje baꞌa: “Miya ecue chii nei nei, eya quea mimishi nee nee cuanaje minijje, Eyacuiñajji nijje peaꞌai, de. Miyaya pojjaꞌa eya niñebaña, jamajjeya pojjaꞌa eya miquea echacojji capoꞌyahua miquea ebacua pojjeama jayojja”. 
\p  
\v 22 —Oja chii jama cuanaje baꞌa: “Chojja, miya ecuea ebacua ejja nei, echacojji pojjeama”. Oja chiiya echacojji cuana jama huohuime acanaje baꞌa: “¡Yecue ecue bacua ejjaja daqui eyacua nei nei, oe emehuao peaꞌai, ejiojji shejee peaꞌaiya oe yecue!  
\v 23 ¡Quecuacue oe anaꞌai esei esejaya ojee eꞌijjiajji! Jjeya eseya ojee ijjiaꞌijjiaje ecue bacua ejja cueꞌyonajejo.  
\v 24 Eya jjeya quea bihui ecue bacua ejjajo; oya emanoꞌyo jayojja cuanaje, chamaꞌyo tii, jjeya ca cueꞌyonaje ecue bacua ejja, eshe de. Oya ca ca ecuaquishoꞌyo cuanaje, jiquio pojjajo ca eyaya baꞌyonaje ecue bacua ejja”. Majoya aje bobi acua amajje ojjaña ijjiaꞌijjianaje. 
\p  
\v 25 —Edoe mese chacochaco aninaje quejo; oja ba jjima echahua mese cueꞌyonaje. Quijje oya cueꞌyonaje oja equi yasijje. Shajjaꞌajja cañaꞌyonaje quea shajjaquijjo cuani ojjaña ijjiaꞌijjiani ojee.  
\v 26 Ohuaya oe eshoꞌi huohuiꞌajja canaje: “¿Aꞌya acuae po ca ani soꞌo?”  
\v 27 Jama eshoꞌiya acanaje baꞌa: “Mique chahua cueꞌyonaje quea aja nee nee, de. Mique chii quea bihui poꞌyonaje, de. Jamajjeya ojjaña ijjiaꞌijjia mee cani ojee quea bihuiꞌyohua jjejojo”. 
\p  
\v 28 —Majoya aje oja doe quea quene nee nee cuanaje, pea cuana nijje ijjiaꞌijjia sa po ajja cuanaje. Majoya oja chii cuayaquinaje edoe mese jjequidobiaa nisho. Dobiqui ajja cuanaje oja bacua ejja equenequene neineiꞌyo jjejojo.  
\v 29 Majoya edoe mese oja chii nijje miminaje: “Eya chacochaco neiꞌyonaje ee nei, de. Quea shequiaja huiso nee nee. Eya mimishiꞌama nei cuanaje minijje; jamatii eyaya miquea esohui shajjaꞌajjanaje, de. Miyaya che ecue chivo shoꞌi cuia jjima anaje ecuea epeejji nijje ojee eꞌijjiajji. Miquea quea nahue cuanaje ejo, de.  
\v 30 Mique bacua ejja shoꞌi shajjamaꞌ cueꞌyajo ca jjaya ca oe che anaꞌai quecuaꞌyonaje. Oya quea mimishi nee nee cuanaje; pea epona cuana nijje jjacojjojeaqui nequiꞌyonaje miquea bejjo sosejje, de” jama cuanaje edoe mese. 
\p  
\v 31 —Majoya oja chii jama cuanaje baꞌa: “Miya ecue bacua ejja quea bame nee, miya eyaya jaahuana neineiaña. Ojjaña aquiana ecuea, miquea epoꞌyojji.  
\v 32 Mique chahua cueꞌyajo ecuanaya quea bihui poꞌyonaje. Oya ca ca emanoꞌyo jayojja cuanaje. Oya cueꞌyonaje jjeya, eshe de. Oya ecuaquishoꞌyo jayojja cuanaje; jjeya nei ca ca eyaya oya baꞌyonaje” jamaya oja chiiya oja bacua ejja etii acanaje. Eꞌe de, mahuiso —jamaya Jesosa cua. Jamaya Eyacuiñajjiya quea jea ameya acaje dejja mimishi cuaa oja mimishi pajea caꞌyajo, onijje jjapeequiajo peaꞌai. 
\c 16  
\s1 Esohui ehuohuiꞌyo echacomeejji jjadasiaquia cuajo 
\p  
\v 1 Jesosaa o shajjaꞌajjajji cuana jama huohuime aca cua baꞌa: —Oe emeshi mese quea bejjo huiso nee aninaje. Ohuaya shajjaꞌajja canaje ojaya echacomeejjiya sii cani ojaya aquiana.  
\v 2 Jamajjeya huohuiꞌajja canaje ojaya echacomeejji jama baꞌa: “Pea cuaa eya huohui canaje miya siipojji cuani. ¿Aꞌa cuae jja miya siipojji nei soꞌo? ¡Huohui poꞌajja socue! Jamajjeya miya ecuea echacomeejji nei pojjeama. ¡Yecue ma papenijo etehueꞌyo jaa ebajjani cuana! 
\p  
\v 3 —Majoya aje echacomeejji jjashahuabaquinaje jama baꞌa: “De, chamaꞌyo tii ca ecua echacojji cuajeꞌyo, ecuea emeshi meseya eya cajaa acaꞌyonaje, de. Eya jjeya quea aa mano echacochacojji, de. Eya ca iña eme huo sa po ajja quea bicho jjejojo.  
\v 4 Eꞌe de, jjeya nei ca iña jjashahuabaquinaje pea dejja cuanaja sosequiaꞌyo jjimajo. Eyaya oe pojji sosejjeshejeꞌyo. Majoya eya ecuea emeshi meseya huoojea cajo pea cuaa baꞌe meesahua caje, enijje quea bihui cuaje. Eꞌe de, eyaya tehueje oꞌoya ojjaña echacojji cuanaja emeshi mese sosequia jjima; oe pojji ajeꞌyo” jamaya echacomeejji jjashahuabaquinaje.  
\v 5 Jamajjeya ohuaya pea dejja cuana iyaa canaje emimijji, ache huiso onajaya sosequiaꞌyo jjima ebajji. Ohuaya jama huohuiꞌajjame acanaje baꞌa: ¿Ache sose huiso acuae miquea sosequiaꞌyo jjima soꞌo?  
\v 6 Oe dejjaa jama sajaꞌame acanaje baꞌa: “Ecuea sosequiaꞌyo jjima mahuiso baꞌa: ecuea esei 100 natame, quea huiso nee nee eyaya jjeshenaje, de”. Majoya echacomeejji jama cuanaje baꞌa: “Eꞌe de, eꞌe jojo nei miquea papeni yani ecue tehue. Jjeya ca ca miquea sosequiaꞌyo jjima nequi 50 natame, jamaya eyaya tehueje oꞌoya pea papenijo oe pojji esosequiaꞌyojji”.  
\v 7 Majoya ohuaya pea dejja acanaje jama baꞌa: “¿Ache huiso acuae miquea sosequiaꞌyo jjima soꞌo?” Oya jama cuanaje baꞌa: “Quea huiso nee nee, 100 natame anoso ai, de”. Echacomeejji jama cuanaje baꞌa: “Eꞌe de, jjeya ca ca papenijo tehueje oꞌoya 80 natame esosequiaꞌyojji” jamaya cuanaje echacomeejji dejja cuana nijje, onijje quea bei epojji. 
\p  
\v 8 —Eꞌe de, quijje pishana emeshi meseya ojaya echacomeejji ae po ani shai ba canaje. Ba majje jama cuanaje baꞌa: “Eꞌe de, ohuaya eya dasia canaje. Jamatii oya jjashahuaba neineiquiꞌyonaje. Oya quea epeejji huiso nee nee po sa cuanaje o baꞌe meesahuajji epojji”. Mahuisoya jiquio esohui —Jesosa cua—.  
\v 9 ¡Miquianaya ca ca jjashahuaba neineiquicue quea bame epojji pea cuana nijje! Jamajjeya miya Eyacuiñajjiya baꞌe meesahua caje. Majoya miquianaya manoꞌyajo, ohuaya dobiqui mee cajeꞌyo eyahuasijje ebaꞌe tiitiiꞌyojji. 
\p  
\v 10 —Miquianaaya jjeya oe pojji aquiana jaahuana neineiaña, miquianaya quea bame po majje quijje eyajo miquianaya quea huiso jaahuana neineijeꞌyo. Miquianaya oe pojji jjadasiaquiani quijje miquianaya jjadasiaquijji nei nei cuaje.  
\v 11 Miquianaya oe pojji aquiana jiquiojo jaahuana jjima aña, Eyacuiñajjiya miquianaya aquiana quia jjima acajeꞌyo eyajo.  
\v 12 Eꞌe de, miquianaya pea cuanaja aquiana jaahuana jjima añajo Eyacuiñajjiya miquianajaya aquiana quia jjima acajeꞌyo eyajo —jamaya Jesosa cua. 
\p  
\v 13 —Eꞌe de, ¡miquianaya jja ca oe Eyacuiñajjijo jjashahuaba majamajaquicue! ¡Oe nei neijo oe jjashahuabaquicue, aquianajo pojjeama! Jamaya oe Eyacuiñajji nijje jjapeequi sa cuanijo, ¡aꞌa aquianajo jjashahuabaqui majamajajji! —jamaya cua Jesosa. 
\p  
\v 14 Paniseo dejja cuana ma esohui shajjaꞌajja majje mimijajia cua Jesosa nijje bejjo quea huiso sa cuanijo.  
\v 15 Jamajjeya aje Jesosaa jama tecueame aca cua baꞌa: —Miquianaya jjashahuaba taiquiani miquianaya oe dejjaya quea bame baꞌyani poso cuani. Dejja cuaa ca ca oe miquianaya quea bame poso acani. Miquianaaya dejja cuana dasiaña. Miquianaaya ca ca oe Eyacuiñajji dasia jjima aña, ojaya miquianaya eba nei nei, de. Miquianaya jama cuani botiꞌama. Eꞌe, joya miquianaaya quea bame poso aña Eyacuiñajjija botiꞌama —jamaya Jesosa cua. 
\s1 Eyacuiñajjija esohui ma ani tiitiiꞌyome cuaje 
\p  
\v 16 —Yahuajo nei nei Eyacuiñajjija esohui huohuijji cuaa huohui ca cua Moisesija etehueꞌyojo. Jama cua baꞌa: “Quijje Eyacuiñajjija huoojeaꞌyo ojjaña jaahuanajji Emeshi Mese oe nei cueje”. Jjeya nei ca ca Huaniya enajo ona besameejji cuanaje huohui canaje Eyacuiñajjija pea esohui jama baꞌa: “Quito ojjañaja Emeshi Mese cueje jjeya nei”. Jamajjeya quea huiso nee nee dejja cuana jjapeequi sa cuani Eyacuiñajji nijje.  
\v 17 Jamatii Eyacuiñajjija esohui eꞌe jojo nei cuani, quea bame cuani. Quijje ojjaña meshi cuana majameta cuana chamaꞌyo tii cuaje, de. Eyacuiñajjija esohui ca ca ma ani tiitiiꞌyome cuaje —jamaya Jesosa cua. 
\s1 Esohui ejjahueiquijjijo 
\r (Mateo 19.1-12; Macoso 10.1-12) 
\p  
\v 18 Jesosaa esohui jama huohuime aca cua baꞌa: —Oe dejjaja ehuanase huei cuani pea ehuanaꞌyojji jamaya pea cojjojji cuani. Oe dejja oe epona ehuei huanaꞌyo majje pea cojjojji cuani peaꞌai. Epona yahue hueijji cuani pea cojjojji peaꞌai cuani. Jamajjeya dejja cuaa ¡aꞌa ehuanase hueijji, eponaa peaꞌai aꞌa miquea yahue hueijji! —jamaya Jesosa cua. 
\s1 Ehuohuiꞌyo oe dejja quea aquiana huiso nee neejo Nasanojo peaꞌai 
\p  
\v 19 Jesosaa pea esohui jama huohuime aca cua baꞌa: —Oe dejja quea bejjo huiso nee nee cuanaje. Ojaya daqui quea bame nee; quea nahue nee nee oja jjeshe huosho caninaje. Bobi quea huiso aninaje ojaya equijo; ijjiaꞌijjia majamajanaje.  
\v 20 Pea dejja ca aemaꞌ cuanaje Nasano bajjani. Oya chiji nei nei poꞌyonaje; oya quea mano cuanaje. Jamatii Nasano dejja quea bejjo huisoja esecuejjani pejjejo aniñaquinequinaje.  
\v 21 Jamatii ojaya chiji iñahuehuaa sio canaje. Oya jama poꞌajja aninaje baꞌa: “¡Chemo bobi quiacue joya miquea ijjia shaa ani!” jamaya Nasano poꞌajja aninaje.  
\v 22 Nasano Eyacuiñajjija epeejji cuanaje, jamajjeya manoꞌyo majje Eyacuiñajji ani yasijje poquiꞌyonaje. Nasano aniꞌyonaje Amajama pejjejo, Jodioja etiiquiana pejjejo. Majoya aje ma dejja quea aquiana huiso manoꞌyonaje peaꞌai. Ohuajea canaje cuaa.  
\v 23 Oya Eyacuiñajjija epeejji pojjeama, jamajjeya emanoꞌyo ojjaña eshahuaja epeejji cuana poqui caquijje poquinaje cuaqui yasijje. Jomajo oya quea nee nee poꞌyoqui. Jomajo ohuaya Nasano, Amajama peaꞌai ba canaje eyajo quea huesha nee nee.  
\v 24 Oya jama taaame cuanaje baꞌa: “Amajama ecuea etiiquiana, ¡che oe ejo jjashahuabaquicue! Eya quea quiyo nee nee poꞌyoqui jiquiojo, de. ¡Che jjo yana chopeshihuacue! ¡Huoojeacue Nasano ecue yana chopeshiya eya quea naba taja nee nee acue!” jamaya ma dejja quea aquiana huiso cuaquijo nequi cuanaje Amajama nijje. Nasano ca oe poqui jjima cuanaje. 
\p  
\v 25 —Amajamaa eyajo jama huohuime acanaje baꞌa: “De, miyaya pajeaꞌyonaje pojjaꞌa. Miya esheahua quea aquiana huiso baꞌenaje meshijo. Jamatii Eyacuiñajji nijje jjapeequi jjima cuanaje. Nasano ca ca aemaꞌ quea mano poꞌyonaje peaꞌai. Oya ca ca Eyacuiñajjija epeejji cuanaje. Jamajjeya Eyacuiñajjiya oya quea jaji nee nequi mee caꞌyani. Miya ca mi ca oe quea yeno nequiꞌyo, quea quiyo nequiꞌyo.  
\v 26 Eyacuiñajjiya miya cue mee jjima acani ecuana nequi yasijje ojaya epeejji pojjeama cuanajejojo. Ecuana mi que poqui mee jjima acani peaꞌai” jamaya cuanaje Amajama. 
\p  
\v 27 —Ma dejjaya cuaqui dojjojo nequi jama taaame po nequinaje baꞌa: “¡Che jjo oe ecue huapa pojjeama meshijo baꞌe jjashahuabaqui meecue Eyacuiñajjijo! ¡Huoojeacue Nasano ecue chiija equi yasijje huohuiya!  
\v 28 ¡Ecue chahua me oejje huiso tiiya jjashahuabaqui meecue Eyacuiñajjijo acue! Eyacuiñajji nijje cajjapeequiahua cuaqui yasijje mi cuejeꞌyo acue”. 
\p  
\v 29 —Majoya aje Amajama jama huohuime aca oꞌoyanaje baꞌa: “Yani aje jja ca Eyacuiñajjija esohui etehueꞌyo, Moisesiya tehue ca cua yahuajo nei nei. Pea cuaa tehue ca cua peaꞌai yahuajo nei nei, de. Ma esohui oya cuaa cashajjaꞌajja cahua. Esohui shajjaꞌajja majje poquiꞌyo ajja cuaqui yasijje, mi jayojja epoꞌyojji pojjeama” jamaya cuanaje Amajama. 
\p  
\v 30 —Majoya aje ma dejja cuaquijo nequi jama cua baꞌa: “Chojja de, oya cuana jjashajjaꞌajjaqui ajja. Ma esohui etehueꞌyojo jjashahuabaqui ajja. ¡Huoojeacue oe emanoꞌyojaa shequi oꞌoya esohui huohuiya! Majoya quea bame cuaje, de. Onaaya emanoꞌyojaa shequi oꞌoyajo ba majje jjashahuaba neineiquije Eyacuiñajjija esohuijo. Jjapeequijeꞌyo Eyacuiñajji nijje, de” cuanaje ma dejja cuaquijo nequi. 
\p  
\v 31 —Majoya aje Amajama jama cuanaje baꞌa: “Chojja de, jjashajjaꞌajjaqui ajja Moisesija etehueꞌyojo, Eyacuiñajjija esohuijo, jamaya ohuaya shajjaꞌajja jjima acaje emanoꞌyojaa shequi oꞌoya ca Eyacuiñajjija epeejji epojji. Chojja, eyaya oya emanoꞌyojaa huoojeaꞌyojji pojjeama esohui huohuiya” jamaya cuanaje Amajama eyajo nequi. Eꞌe de, mahuiso —jamaya Jesosa cua. 
\c 17  
\s1 Quea mimishi mi po oꞌoya chanaꞌ 
\r (Mateo 18.6-7, 21-22; Macoso 9.42) 
\p  
\v 1 Jesosaa o shajjaꞌajjajji cuana jama huohuime aca cua baꞌa: —Jamatii pea cuaa ecuea epeejji eyacua quea mimishi po mee oꞌoya sa acani. Jamaya o cuajo Eyacuiñajji quea quene nee nee cuaje onijje. Ohuaya oya jeajea cajeꞌyo cuaqui yasijje, de.  
\v 2 Jamajjeya ¡ecuea epeejji quea mimishi epo mee cuahuajje oe manoꞌyocue! Eꞌe, ¡onaaya mei enaajo yiipeca mee majje bae quea doe yasijje jjajeaoquejea meequiꞌyocue! Jamajjeya ¡aꞌa quea mimishi po meeꞌyojji cuana! 
\p  
\v 3 —Eꞌe de, coya mi quea mimishi po oꞌoya chanaꞌ. Miquea epeejji quea mimishi po oꞌoyajo, ca oe jama huohuiquime acue baꞌa: “Miya quea mimishi cuanaje. ¡Aꞌa quea mimishi po oꞌoyajji!” Majoya oya pojjaꞌa jama cuaje baꞌa: “Eꞌe de, eya quea mimishi cuanaje, jjeya ca ca eya quea mimishi epoꞌyojji pojjeama minijje”. Jamajjeya ¡miquianaaya ma mimishijo aꞌa jjashahuaba majamajaquijji! ¡Jjapeequi oꞌoyacue onijje!  
\v 4 Eꞌe pojjaꞌa ca ca oya mimijaji majamajaje minijje, majoya oya quea yeno nee nee cuaje ojaya mimishijo. Jamajjeya ¡jamatii miquianaya oja mimishijo aꞌa jjashahuaba majamajaquijji! ¡Jjabeiqui oꞌoyacue onijje! —jamaya Jesosa cua. 
\s1 Jesosaa o shajjaꞌajjajji cuana jjabahuejjaqui mee ca cua 
\p  
\v 5 O shajjaꞌajjajji cuaa Jesosa jama huohuime aca cua baꞌa: —¡Ecuanaya jjabahuejjaqui mee neineicue mijo eꞌe jojo nei ejjashahuabaquijji, mi jayojja ebaꞌejji! 
\p  
\v 6 Jesosa jama cua baꞌa: —De, miquianajaya eya eba, eya miquea epeejji nei cuani. Eyaya miquianaya jjabahuejjaqui meenaje yahuajo. Miquianaya pojjaꞌa ca mi ca oe jjashajjaꞌajjaqui pishananaje. Miquianaya ejo eꞌe jojo nei jjashahuabaqui pishana majje Eyacuiñajjiya miquianaya amee cajeꞌyo ojjaña eyaya aña jayojja jama, ma dejjaa ajjima acani amee cajeꞌyo peaꞌai. Eꞌe, miquianaaya acui jama yajjemo baꞌa: ¡Acui, nequisohuacue; ena huasijje poquicue! Majoya acui nequisohua majje ena huasijje poquiꞌyome. Jamajjeya ¡miquianaya ejo eꞌe jojo nei jjashahuabaquicue! —jamaya Jesosa cua. 
\s1 Oe echacojji emeshi meshija esohuijo cajjashajjaꞌajjaquiahua 
\p  
\v 7-8 Jesosaa pea esohui jama huohuime aca cua baꞌa: —Oe echacojji chacojeyo majje cueꞌyonaje oja emeshi meseja equi yasijje. Jamatii hueahueanaje, oya ijjiaꞌijjia sa cuanaje, jomishocaꞌyo sa cuanaje. Oya jomishocaꞌyo jjima cuanaje; ijjiaꞌijjia jjima peaꞌai cuanaje. Ma emeshi meseya oya jama huohuime acanaje baꞌa: “¡Besaquicue, pea daqui huoshocue, ecuea bobi cuacuacue! ¡Majoya ecuea bobi yecue! ¡Eya ijjiajeyoajo majoya miquea yaꞌyojjiya cuacuaꞌyocue!”  
\v 9 ¿Aꞌa ma emeshi meseya oja echacojji huohui caje oya quea bame cuanaje? Chojja, ma echacojjiya jamatii shajjaꞌajja cani emeshi meseja esohui.  
\v 10 Jamaya miquianaya Eyacuiñajjija esohui shajjaꞌajja majje ¡aꞌa miquianaya quea bame cuani poso jjabaquijji! ¡Aꞌa jamaya jjashahuabaquijji nequiana! ¡Jamatii miquianaya jjashajjaꞌajjaquicue oja esohuijo, ma echacojjiya jamatii shajjaꞌajja canequinaje, emeshi meseja esohui jayojja jama acanaje! —jamaya Jesosa cua. 
\s1 Jesosaa jjajeaqui mee caꞌya cua ome miji peaꞌai dejja batata epoꞌyo 
\p  
\v 11 Majoya Jesosaa Jenosanena huasijje poquijeya Janinea meshi yejje ca cua. Samania meshi sahuajje jjayejjequia cua.  
\v 12 Majoya aje oe cuiñajji yasijje Jesosa dobiqui jjimahuajo, dejja batata epoꞌyo ome miji peaꞌai mimi sa cua Jesosa nijje. Jamatii nequinaje quea cuiñajji huesha pishana onaja jeajea batata epoꞌyojojo. Jamajjeya oya cuana nequia cua quea huesha.  
\v 13 Onaaya Jesosa jama taaame aca cua baꞌa: —Jesosa, miya ecuanaja Emeshi Mese, ¡ecuanaya che batata epoꞌyo jjajeaqui meeꞌyocue! 
\p  
\v 14 Jesosaa oya cuana bajea majje jama huohuime aca cua baꞌa: —Eyaya miquiana jjajeaqui meejeꞌyo, ¡poquicue Eyacuiñajjija equi yasijje! Jama huohuime acue esohui huohuijji baꞌa: “De, bacue, yahuajo pishana ecuana batata epoꞌyo cua, jjeya ca ecuana quea yami bame nee neeꞌyo”. 
\p Majoya aje Jesosaa oya cuana jjajeaqui mee caꞌya cua. Majoya aje oya cuana poquije jjayamibamequiꞌya cua, quea bihui nee nee cua.  
\v 15 Oe dejja ca ca jjashahuabaquia cua Jesosa bihuiajji ojaya eyami ejjajeaqui meeꞌyojojo. Majoya aje quea bihui poꞌyo majje jjanojjaquia cua; Jesosa que cue oꞌoya cua. Jjanobajjima nei Eyacuiñajji bihuia ca cua.  
\v 16 Ecuiꞌoshajjajo nequia cua Jesosa cojja nei; oya jama cua baꞌa: —Eꞌde, Jesosa, miyaya eya jjajeaqui meeꞌyonaje, eya quea yami bame po meeꞌyonaje. Miya quea sohui poja nee nee —jamaya ma batata epoꞌyo cua. Oya Samania dejja cua, Samania meshijo baꞌe, Jodio dejja pojjeama. 
\p  
\v 17 Majoya aje Jesosaa ona nijje nequi jama huohuime aca cua baꞌa: —¿Aꞌa cuae ome miji peaꞌai jjajeaqui meeꞌyonaje? ¿Aecue beca cuana soꞌo? Oe nei ca ca oe cueꞌyonaje e bihuiaa, Eyacuiñajji bihuiaa peaꞌai.  
\v 18 Ma dejja Jodio dejja pojjeama, Samania meshijo baꞌe; beshahua nei Eyacuiñajji ojaya ba jjima. Jodio dejja cuana Eyacuiñajjija epeejji nisho. Oya cuana quea yami bame nee poꞌyo sa cuanaje Eyacuiñajji bihuiajji pojjeama. 
\p  
\v 19 Majoya Jesosaa ma dejja jama aca cua baꞌa: —¡Nequisohuacue; poquicue! Miyaya eya quea yami bame epoꞌyojji huohuiꞌajjanaje. Miya ejo eꞌe jojo nei jjashahuabaquinaje ecuea ejjajeaqui meeꞌyojji. Jamajjeya eyaya miya jjajeaqui meeꞌyonaje. Eꞌe jojo nei miya jjapeequinaje Eyacuiñajji nijje. 
\s1 Achajja Jesosa Emeshi Mese nei epojji cueje 
\r (Mateo 24.23-28, 36-41) 
\p  
\v 20 Paniseo dejja cuaa Jesosa jama huohuiꞌajjame aca cua baꞌa: —¿Ache shono Eyacuiñajjija huoojeaꞌyo ecuea Emeshi Mese nei epojji cueje? ¿Aꞌa ohuaya ojjaña emeshi mese cuana jeajea cajeꞌyo? 
\p Jesosa jama cua baꞌa: —Chojja, ma jayojja pojjeama, de. Ojaya emeshi mese cuana ejeabichajeajji pojjeama.  
\v 21 Pea cuana pojjaꞌa jama mimime cuaje baꞌa: “Eyacuiñajjija huoojeaꞌyo cueyanaje pea meshi yasijje”. Siajje ca cuani, Eyacuiñajjija huoojeaꞌyo yani jjeyahua nei, jaahuana cani ojaya epeejji cuana ojjaña Eyacuiñajji nijje jjapeequiajo. Oya Emeshi Mese cuani, de. 
\p  
\v 22-25 Majoya Jesosa o shajjaꞌajjajji cuana nijje jama mimime cua baꞌa: —Ecuea epeejji nei, jjeya Jodio dejja cuaa eya quecua sa acani. Majoya aje eyahuasijje eya poquijeꞌyo. Jiquio tii eya miquiana nijje nequi ajja. Miquianaaya ca ca eya nequi mee sa ajeꞌyo minijje. Cho, nequi ajja. Beca cuaa miquianaya jama acaje baꞌa: “Cueꞌyonaje aje Jesosa jiquiacua”. Pea ca jama cuaje baꞌa: “Jesosa yani jomajo”. ¡Aꞌa eya saꞌajjajji onaa siajje acajje! Eya jocuama poqui jjima. E cue oꞌoyajo pojjejje jayojja cuaje, jeajaꞌajeaje ojjaña meshi cuana. Majoya aje ojjaña meshijo baꞌe cuaa eya ba neinei cajeꞌyo. Eya meshi yasijje cueje oꞌoya ojjañaja Doe Mese epojji.  
\v 26-27 Yahuajo Noe baꞌya cua. Oya dobiqui jjimahuajo bishe ai yasijje, pea dejja quea mimishi nee nee cua, jjashajjaꞌajjaqui sa po ajja Eyacuiñajjija esohuijo. Jamatii oya cuana ijjiaꞌijjia ania cua; ishiꞌishi nequia cua; jjahuanaqui nequia cua. Majoya aje Noe dobiquia cua bishe ai yasijje. Ma dejja cuana ca ca jamatii jjashahuabaqui sa po ajja Eyacuiñajjijo. Oya cuana jama jjashahuabaquime pojeaꞌajja aña cua baꞌa: “Eyacuiñajjiya eseya huiꞌi meeꞌyo jjima acaje”. Cho, majoya aje Eyacuiñajjiya ena quea quemo huoojea caꞌya cua; huiꞌi mee caꞌya cua ojjaña dejja cuana, de. Ma jayojjaya e cueyajo, dejja cuana jama cuaje. Quea mimishi tii tii po nequije. 
\p  
\v 28 —Eꞌe de, jamaya yahuajo Noti baꞌya cua tii. Dejja cuana quea mimishi nee nee cua. Jamatii ijjiaꞌijjia ania cua, ishiꞌishi nequia cua, jjeshejjeshe nequia cuanaya cua, quiaquia nequia cuanaya cua, banabana nequia cuanaya cua, equi iya cuanaya po nequia cua. Eꞌe de, Eyacuiñajjijo jjashahuabaqui sa po ajja nei nei cua.  
\v 29 Ma pojjajo Noti Sonoma cuiñajjijo baꞌe cuayaquiajo Eyacuiñajjiya ena cuani jayojja cuaqui oque mee ca cua Sonomajo. Ojjaña quiyo jeyojeyoꞌya cua; chamaꞌyo tii cuanaje. 
\p  
\v 30 —Jamaya ojjaña cuana Eyacuiñajjijo jjashahuabaqui jjima anijo, eya cueje oꞌoya.  
\v 31 Jamajjeya miquianaya pojjaꞌa quejo chacochacoqui e cue oꞌoyanijo, ¡aꞌa miquianajaya equi yasijje poquijji aquiana jjequiꞌyohua! ¡Aꞌa jjashahuabaquijji miquianajaya aquiana cuanajo!  
\v 32 ¡Aꞌa pajeaꞌyojji Notija ehuanase oja aquianajo jjashahuabaquia cua! Jamajjeya oya sane pojji po mee caꞌya cua Eyacuiñajjiya ojaya aquianajo jjashahuabaquiqui jojoya. Chamaꞌyo tii oya poꞌya cua.  
\v 33 Jamaya miquianajaya aquianajo jjashahuabaqui majamaja anijo miquianaya Eyacuiñajjijo jjashahuabaqui jjima cuaje, de. Jamajjeya miquianaya chamaꞌyo tii cuajeꞌyo. Eꞌe de, miquianaya ca ca jjashahuabaqui majamaja ani Eyacuiñajjijo ojaya epeejji cuaje; baꞌe tiitiijeꞌyo onijje. 
\p  
\v 34 —E cue oꞌoyajo becanejjijji peaꞌai cahuijaa, oe dojosohuaqui cajeꞌyo, pea ca jeajea canajeꞌyo.  
\v 35 Beca epona quecuapasha cuequi oe dojosohuaqui cajeꞌyo, pea jeajea canajeꞌyo.  
\v 36 Beca dejja quejo chacochaco nequi oe dojosohuaqui cajeꞌyo, pea ca jeajea canajeꞌyo Eyacuiñajjija esohuidojojjiya —jamaya Jesosa cua. 
\p  
\v 37 Jesosa o shajjaꞌajjajjiya jama huohuiꞌajjame aca cua baꞌa: —¿Achacua acuae maya cuaje soꞌo, Jesosa? 
\p Jesosa jama cua baꞌa: —Miquianaya eya baje joya ecua beꞌo eꞌihui yasijje oqueani jama —jamaya Jesosa cua. 
\c 18  
\s1 Jesosaja esohui ehuohuiꞌyo oe epona eꞌahuemanojo 
\p  
\v 1 Jesosaa o shajjaꞌajjajji cuana huohui ca cua emimi majamajajji Eyacuiñajji nijje. Ohuaya jama huohuime aca cua baꞌa:  
\v 2 —Oe cuiñajjijo oe sohuinano aninaje. Oya jjapeequi sa po ajja pea dejja nijje, Eyacuiñajji nijje peaꞌai.  
\v 3 Oya cuiñajjijo tiiya oe eꞌahuemano aninaje. Ma eꞌahuemanoja aquiana peaa sii caꞌyonaje. Jamajjeya oya poqui majamajanaje sohuinano huasijje. Jamajjeya ohuaya jama huohuiꞌajjame acanaje baꞌa: “¡Che iña yohua sahuacue ma aquiana onaa sii caꞌyonajejo!” Poqui majamajanaje sohuinano huasijje huohuiꞌajjaa.  
\v 4 Jamatii sohuinanohua sajaꞌa jjima acanaje, de. Eꞌahuemano pajeapajeaꞌyo ajja nei nei cuanaje huohui epo tiitiinequijji jjejojo. Sohuinano jama jjashahuabaquime cuanaje baꞌa: “Eꞌe de, ma eꞌahuemano pajeapajeaꞌyo ajja nei nei, cue majamajani ca coma. Ojaya esohui shajjaꞌajja sa po ajja nei nei ca iña.  
\v 5 Eyaya aje ca oya yohua sahuajeya ma ca oe oya cueꞌyo jjima tii epojji”.  
\v 6 Jamajojoya aje oe yohua sahua canaje —jamaya Jesosa cua. 
\p —Sohuinano yohua sahua sa po ajja cuanaje. Jamatii ohua huohuiꞌajja majamaja cajje, ohuaya epona yohua sahua canaje.  
\v 7 Eꞌe de, Eyacuiñajjiya sohuinano jayojja pojjeama. Jamatii oya shajjaꞌajja sa cuani miquianajaya emimi. Majoya ohuaya miquianaya yohua sahua bamebame caje. Miquianaya ojjaña pojjajo mimi tiitiianijo, ohuaya miya shajjaꞌajja cajeꞌyo.  
\v 8 Ohuaya miya yohua sahua cajeꞌyo. Eꞌe jojo nei ecuea esohui. Jamatii e cue oꞌoyajo, ¿ae cuaje dejja cuana? ¿Aꞌa oya cuana mimi majamaja nequije Eyacuiñajji nijje? Eꞌe pojjaꞌa. ¿Aꞌa jjapeequi tiitiinequije Eyacuiñajji nijje? Eꞌe pojjaꞌa, baꞌajja —jamaya Jesosa cua. 
\s1 Ehuohuiꞌyo beca dejjajo oe quea bame pea bameꞌama cuani 
\p  
\v 9 Jesosaa pea dejja cuana huohui ca cua ejjabahuejjaqui meejjijo. Ma dejja cuana jjashahuaba taiquia cua jama baꞌa: —Ecuanaya ca quea bame nee cuani, beca cuana ca ca bameꞌama baꞌyani. 
\p Jamajjeya ma dejja cuana Jesosaa jama huohuime aca cua baꞌa:  
\v 10 —Yaninaje beca dejja. Oe dejja Moisesija etehueꞌyo huohuijji nisho cua, oya Paniseo dejja cuanaje. Pea dejja emeshi meseja bejjo chichajji cuanaje. Oya cuana poquinaje Eyacuiñajjija equi yasijje bihuiaa, mimiya Eyacuiñajji nijje.  
\v 11 Paniseo dejja dobiqui majje nequiñaquinaje ojjañaja ebajji. Oya jjabajeasohuaqui majje Eyacuiñajji nijje mimi nishonaje ojjañaja eshajjaꞌajjajji jama baꞌa: “Eꞌe de, yani eya jiquiojo, eya quea bame nee nee cuani. Eya mimishiꞌama nei, siipojji pojjeama, eya pea cojjojji pojjeama, beca cuana ca quea mimishi nee cuani.  
\v 12 Eꞌe de, eya miquea esohui shajjaꞌajja majje quea bame cuani; miquea esohui jayojja baꞌyani. Ecuea 10 bejjo yanijo, eyaya mi yasijje oe quiaña. Jamatii eyaya aña; quea bejjo huiso nee nee eyaya quiaña mi yasijje, Eyacuiñajji. Eya ma dejja bejjo chichajji jomajo nequi jayojja pojjeama, eya ca mimishiꞌama nei, oya ca ca quea mimishi nee nee, de. Eꞌe de, mahuiso Eyacuiñajji ecuea esohui” jama mimi nisho nequinaje onaja ebajji Paniseo dejja. 
\p  
\v 13 —Majoya ca ma dejja bejjo chichajji cuani jjashahuabaqui majje miminaje Eyacuiñajji nijje. Oya quea yeno cuanaje ojaya mimishijo. Ohuaya Eyacuiñajji mimishi cuana cuijea meeꞌyo sa acanaje. Jamajjeya jama mimime cuanaje baꞌa: “Eꞌe de Eyacuiñajji, eya yani, eya quea mimishi nee nee cuanaje. Jjeya eya quea mimishi po maja sa poꞌyo ajja. ¡Jjapeequi sa cuani minijje, jamajjeya cuijeaꞌyocue ecuea mimishi cuana! Eꞌe de, mahuiso ecuea esohui, Eyacuiñajji, acua” jamaya cuanaje ma dejja. 
\p —Eyacuiñajji nijje mimijeyo majje Paniseo dejja, bejjo chichajji cuani peaꞌai poquinaje.  
\v 14 Paniseo dejjaja mimishi cuana cuijeaꞌyo jjima cuanaje quea bame nisho baꞌejajojo. Eyacuiñajjiya bejjo chichajji cuanija mimishi cuijea caꞌyonaje, o quea mimishi po maja sa po ajjajojo. Eꞌe de, miquianaya Paniseo dejja jayojja po chanaꞌ. ¡Miquianaya ca oe pea dejja jayojjaya pocue! Majoya aje mi jjapee tiitiiquijeꞌyo Eyacuiñajji nijje —jamaya Jesosa cua. 
\s1 Esohui Jesosaa eshoꞌiquiana ohua quea jea nee nee aca cuajo 
\r (Mateo 19.13-15; Macoso 10.13-16) 
\p  
\v 15 Dejja cuaa eshoꞌi cuana dojo ca cua Jesosa que. Jama huohuime aca cua baꞌa: —Jesosa, ¡miyaya ecuanajaya ebacua cuana napacue emeya! ¡Miyaya Eyacuiñajji huohuicue ecuanaja bacua jaahuanajji! —jamaya cua ejeajji cuana, enaese cuana peaꞌai. 
\p Jesosa shajjaꞌajjajji cuana quea quene cuanaje ma dejja cuana nijje. Jama cua baꞌa: —¡Aꞌa ye majamajajji miquianaja bacua Jesosa que! —jamaya cua o shajjaꞌajjajji cuana. 
\p  
\v 16 Jesosaa ca ejeajji cuana enaese cuana peaꞌai jama huohuime aca cua baꞌa: —¡Yacua oe miquianajaya bacua cuana yecue! Eyacuiñajjija quea jea nee nee ebacua cuana, ecuea peaꞌai. Oya cuana quea bame cuani, ojaya epeejji nei cuani. Jamajjeya ¡ebacua cuana aꞌa poqui meejji! ¡Ebacua cuana e que cacueꞌyahua, de!  
\v 17 ¡Miquianaya Eyacuiñajjijo jjashahuaba cuajiquicue jiquio ecua eshoꞌiquiana cuani jama! Jamajje e que poquijeꞌyo eya eyajo ojjaña huoojeaꞌyojji cuaje —jamaya Jesosa cua. 
\s1 Oe dejja quea aquiana huiso Jesosa nijje mimia cua 
\r (Mateo 19.16-30; Macoso 10.17-31) 
\p  
\v 18 Pea pojjajo oe dejja quea aquiana huiso poquia cua Jesosa huohuiꞌajjaa. Oya jama cua baꞌa: —Jesosa, miya quea bame cuani, ¿achajja acuae po cajji Eyacuiñajji nijje ebaꞌe tiitiiꞌyojji soꞌo? 
\p  
\v 19 Jesosa jama cua baꞌa: —¿Yajjajo acuae moya quea bame aña soꞌo? Oe neiya ca jja ca oe Eyacuiñajji quea bame nee cuani.  
\v 20 Miquea eba ojaya esohui. Jamajjeya miya baꞌe tii tii sa cuani onijje, jama shajjaꞌajjame ojaya esohui acue baꞌa: 
\q1 ¡Aꞌa pea cojjojji pojji! 
\q1 ¡Aꞌa dejja quecuajji! 
\q1 ¡Aꞌa sii pojji; aꞌa siajje pojji! 
\q1 ¡Miquea chii, miquea enaese peaꞌai shajjaꞌajjacue! 
\m —jamaya Jesosa cua. 
\p  
\v 21 Ma dejja quea aquiana huiso jama cua baꞌa: —Eꞌe de, jamaya eyaya anaje eshoꞌyahuaa, jama tii tii sohuaqui ca ca iña. Eya oe dejja quea bame nee, de. 
\p  
\v 22 Jesosaa ojaya esohui shajjaꞌajja majje jama huohuime aca cua baꞌa: —Aꞌyo sahua oe pea yohuaꞌajja jjima soꞌo. ¡Ojjaña miquea aquiana cuana quia jeyojeyoꞌyocue! ¡Aquiana quiajeyoꞌyo majje miquea aquiana sosejje jjeshenaje bejjo quiacue joya aemaꞌ cuana huasijje! Majoya miya Eyacuiñajji nijje jjashahuaba neineiquije, ohuaya miya baꞌe tiitii mee cajeꞌyo eyajo. Miyaya bejjo aemaꞌ cuana huasijje quiajeyoꞌyo majje majoya miquea aquiana cuanajo jjashahuabaquiꞌyo ajja cuaje, Eyacuiñajjijo ca ca jjashahuabaquije. Majoya eyahuasijje poquiꞌyo majje aquiana quea bame nee nee cuaje miquea epojji. Eꞌe, ¡jamaya acue majoya cue oꞌoyacue enijje jjapeequiya! —jamaya Jesosa cua. 
\p  
\v 23 Ma esohui shajjaꞌajja majje dejja quea aquiana huiso quea yeno poꞌya cua. Oya quia sa poꞌyo ajja cua quea bejjo huiso jjejojo, quea aquiana huiso nee nee jjejojo. Poquiꞌya cua; aquiana quiaꞌyo jjima aca cua. Jjapeequi jjima Eyacuiñajji nijje, de.  
\v 24 Jesosa quea yeno cua ma dejja quea aquiana huiso poquije ba majje; jama cua baꞌa: —Oe dejja quea bejjo huiso anijo, quea camaja ejjapeequijji Eyacuiñajji nijje. Jamatii jjashahuabaquiani ojaya aquianajo; Eyacuiñajjijo ca ca jjashahuabaqui ajja.  
\v 25 Oya cameno, mona aiꞌai jama, jjayejjequi jjima cuaje ahuoja quii huejjajje jayojja. Jamaya dejja quea aquiana huiso beshahua nei poqui jjima eyahuasijje cuaje —jamaya Jesosa cua. 
\p  
\v 26 Pea cuaa ojaya esohui shajjaꞌajja majje Jesosa jama huohuiꞌajjame aca cua baꞌa: —Ojjaña cuana quea bejjo huiso sa cuani, de. ¿Ae shai che poquijeꞌyo eyahuasijje Eyacuiñajji nijje baꞌeꞌyohua? 
\p  
\v 27 —Eꞌe de, oe dejjaa oya eyahuasijje epoqui meejji pojjeama. Eyacuiñajjiya ca mi ca oe poqui mee cajeꞌyo eyahuasijje onijje ebaꞌe tiitiiꞌyojji —jamaya Jesosa cua. 
\p  
\v 28 Majoya aje Peno jama cua baꞌa: —De, ecuana poqui sa cuani eyahuasijje, jeajeanaꞌyonaje ecuea aquiana jiquio meshijo minijje epoquiꞌyojji. 
\p  
\v 29-30 Jesosa jama cua baꞌa: —Eꞌe, ecuea eba. Miquianaaya ojjaña aquiana cuana jeajeanaꞌyonaje epoquijji enijje. Jamajjeya miquianaya manoꞌyajo, Eyacuiñajjiya miquianaya poqui mee cajeꞌyo eyahuasijje onijje ebaꞌe tiitiiꞌyojji. Eꞌe de, miquianaaya equi jeajeanaꞌyonaje, jamajjeya Eyacuiñajjiya miquianaya sosequia caje quea huiso nee nee. Quijje miquianaya manoꞌyajo Eyacuiñajjiya quea huiso nee nee eyajo quia cajeꞌyo. Miquianaaya jeanananaje miquianajaya huanase, ebacua, miquianajaya oꞌi, miquianajaya chii peaꞌai. Eyacuiñajjiya miquianaya huapa pojjeama jayojja quiame acaje mi jaahuanajji. Eyajo peaꞌai miquianaya jama quiameya acaje quea huiso nee nee. Jamaya acaje ohuaya joya ojaya aquiana jeanaꞌyojji cuani enijje chacochacohua —jamaya Jesosa cua. 
\s1 Jesosaa huohui ca oꞌoya cua o manoꞌyojjijo 
\r (Mateo 20.17-19; Macoso 10.32-34) 
\p  
\v 31 Jesosaa oja 12 shajjaꞌajjajji nei cuana jjachichaqui mee caꞌya cua. Ohuaya jama huohuime aca cua baꞌa: —Eꞌe de, jjeya eseya poquije Jenosanena huasijje. Miquianajaya eba Eyacuiñajjija esohui yahuajo nei nei pea cuaa ejo tehue ca cua. Joya ecua onaja tehue jaa jamaya eya acajeꞌyo cuaa. Eya mano mee cajeꞌyo ojjañaja Edoe Mese cuanijojo. Jamajjeya eya Jenosanena huasijje poqui majje manojeꞌyo.  
\v 32 Eya pea cuaa iña majje dojo caje Jodio pojjeama huasijje. Oya cuanaja ba jjima Eyacuiñajji, de. Oya cuana mimijajije enijje; ejo soaje; cojja cuichojea caje cuaa mo.  
\v 33 Cuia caje mo emeya cuaa, de. Majoya aje mo mano mee cajeꞌyo peaꞌai cuaa. Eya mano neineijeꞌyo. Majoya pea beca peejjima cahuime po majje, eya ca iña shequije oꞌoya, de —jamaya Jesosa cua. 
\p  
\v 34 O shajjaꞌajjajji cuana ca ca jjashahuabaqui jjima cua Jesosaja esohuijo. Oya cuana ba jjima, yajjajo ohua o manoꞌyojji huohui cani poso jjabaquia cua. 
\s1 Jesosaa cojjamaꞌ quea cojja jaꞌa po mee caꞌya cua 
\r (Mateo 20.29-34; Macoso 10.46-52) 
\p  
\v 35 Jesosa Jenico cuiñajji chipi nei poquia cua. Oe dejja cojjamaꞌ chemo po aña cua ejiojji cojja sahuajo.  
\v 36 Cojjamaa shajjaꞌajja ca cua dejja quea huiso cueje, jamajjeya huohuiꞌajja ca cua: —¿Aꞌya mi soꞌo? 
\p  
\v 37 Pea cuana jama cua baꞌa: —Jesosa iquio cueje, de. 
\p  
\v 38 Majoya aje jama taaame cua baꞌa: —Jesosa, miya Eyacuiñajjija huoojeaꞌyo cuani. Miya ma etiiquiana emeshi mese, Dabi jayojja cuani. Eya ca iña oe che cojjamaꞌ, de. ¡Che iña jjacojjajaꞌaqui meeꞌyocue! 
\p  
\v 39 Ehui dojojji pea cuana poquije jama cua baꞌa: —De, ¡quea shajjaquijjo pajjaja coma aꞌa taaajji! 
\p Oya ca ca taaa oꞌoya cua; jama cua baꞌa: —Jesosa, ¡che iña yohua sahuacue, miya Eyacuiñajjija huoojeaꞌyo! 
\p  
\v 40 Jesosa poquije tii nequiñaquia cua. Majoya aje oya jama cua baꞌa: —¡Cojjamaꞌ e que jjequicue! 
\p Yechipi cajo Jesosaa cojjamaꞌ jama huohuiꞌajjame aca cua baꞌa:  
\v 41 —¿Apiojji eya miyaya taaaña, cojjamaꞌ? 
\p —Jesosa, miya ecuea Emeshi Mese nei, mi que e jjacojjajaꞌaqui meeꞌyojji mi taaanaje —jamaya cua cojjamaꞌ. 
\p  
\v 42 —Eꞌe de, ¡jjeya miya quea cojja jaꞌa poꞌyocue! Eyaya miya jjabapojjaqui meeꞌyonaje ejo eꞌe jojo nei jjashahuaba bamebamequinajejojo —jamaya Jesosa cua. 
\p  
\v 43 Majoya aje quea cojja jaꞌa nee nee poꞌya cua. Oya Jesosa nijje poquia cua. Oya jama cua baꞌa: —Eꞌe de, Eyacuiñajji quea bame nee nee, de. Jesosaa ecuea ecojja quea jaꞌa po mee caꞌyonaje, de. 
\p Pea cuaa ma ba majjeya Eyacuiñajji bihuia ca cua. 
\c 19  
\s1 Jesosaa Saqueo ba ca cua 
\p  
\v 1 Jesosaa Jenico yejje canana cua; quea dejja huiso jjachichaquia cua Jesosa bajji.  
\v 2 Oe dejja Saqueo bajjani cua. Ojjañaja eba Saqueo quea bejjo huiso nee nee cua. Oya bejjo chichajji cua emeshi meseja yajji. Oya ca jjadasiaquijji cua.  
\v 3 Ohuaya ca ca Jesosa ba sa aca cua. Jamajjeya Saqueo poquia cua Jesosa baa pea cuana ejjachichaqui nequi yasijje. Quea chiꞌaa jjejojoya ca ca oe ojaya beshahua nei Jesosa ba jjima cua.  
\v 4 Jamajjeya Saqueo cuajicuaji poquia cua, ejiojji cojja sahuajo nequi acui yasijje sohuaquiñaquia cua.  
\v 5 Jesosa jjayejjeꞌajjaquia cua acui aa biajje Saqueo anijje. Majoya aje ohuaya bajeasohua majje jama aca cua baꞌa: —Saqueo, ¡oqueꞌyocue! Jjeyahua nei iña poquije miquea equi yasijje aniya! 
\p  
\v 6 Majoya aje oya nequioqueꞌya cua. Majoya aje nequioqueꞌyo majje poquia cua ojaya equi yasijje Jesosa nijje. Oya quea bihui cua.  
\v 7 Pea cuaa ca ca niñeba ca cua Jesosa poquije ba majje; jama mimijajime cua baꞌa: —De, Jesosa Saqueo nijje poquinaje anicuaa, Saqueo quea mimishi nee nee, de. 
\p  
\v 8 Majoya aje dobiquia cua Jesosa Saqueoja equi yasijje. Quijje pishana ijjiaꞌijjiajeyo majje Saqueo nequisohuaꞌya cua. Ohuaya Jesosa jama huohuime aca cua baꞌa: —Eꞌe de, jjeyahua eyaya aemaꞌ cuana huasijje bejjo quiaje esejja. Eya siipojji nei cuanaje, de. Jjeya ca iña siipo sa poꞌyo ajja. Jamaya eyaya aje baꞌa: Eyaya oe bejjo siinaje, eyaya quiajeꞌyo ebeca pee peaꞌai bejjo. Eya mimishi po sa poꞌyo ajja. Eꞌe jojo nei ecuea esohui jjeya. Siajje pojjeama cuani —jamaya Saqueo cua. 
\p  
\v 9 Jesosaa oya jama huohuime aca cua baꞌa: —Eꞌe de, miya Jodio dejja nei, jamatii miya Eyacuiñajji nijje jjapeequi jjima cuanaje. Jjeya ca ca miya eꞌe jojo nei jjapeequi sa cuani Eyacuiñajji nijje.  
\v 10 Eꞌe, eya cueyanaje ojjaña jjapeequi meeya Eyacuiñajji nijje. Eyaya mi jayojja pea cuana ba sa aña —jamaya Jesosa cua. 
\s1 Esohui ehuohuiꞌyo bejjojo 
\r (Mateo 25.14-30) 
\p  
\v 11 Jesosaja esohui shajjaꞌajja majje pea cuaa jama aca cua baꞌa: —Jesosa, Jenosanena huasijje poqui majje miya ojjañaja Emeshi Mese cuaje, jjeya nei pojjaꞌa. Ecuana jamajjeya mijo quea bihui nee nee cuajeꞌyo —jamaya poso aca cua dejja cuaa. 
\p  
\v 12 Jamajjeya Jesosaa oe esohui ejjashahuaba quimeejjijo jama huohuime aca cua baꞌa: —Oe dejja emeshi mese epoꞌyojji pea meshi yasijje poquinaje. Majoya oya emeshi mese epojji bajjani caꞌyajje huacuaya cueꞌyonaje o nequinaje meshi yasijje.  
\v 13 Poqui jjimahuaa ohuaya iyaa canaje ojaya ome miji peaꞌai echacojji cuana bejjo equiajji. Ojjaña oe ebashosocojo bejjo quea huiso quia canaje. Jama huohuime acanaje baꞌa: “Eꞌe de, jiquio bejjo eyaya miquianaya quiaña, aquiana jjeshejji. ¡Esose quea huisojo bejjo jjahuisoqui meecue! Eya cueꞌyo majje quea huiso bejjo bañajeꞌyo. Eya majoya quea bihui cuaje” jamaya cua ma emeshi mese poqui jjimahua. 
\p  
\v 14 —Majoya aje emeshi mese poquinaje pea meshi yasijje emeshi mese epojji ohua bajjani caꞌyajje. Oja meshijo nequi dejja cuanaja botiꞌama cua. Jamajjeya dejja cuaa oe dejja huohui pohua ma meshi yasijje huoojea ca cua. Jama huohuime aca cua baꞌa: “Ecuanajaya ma dejja emeshi mese cuajo botiꞌama cuaje”. 
\p  
\v 15 —Oya ca ca bajjani caꞌyajje emeshi mese cuanaje. Jamajjeya ma dejja huacuaya cue oꞌoya cua oja meshi yasijje. Cue oꞌoya majje iyaa mee ca cua ojaya echacojji cuana ehuohuiꞌajjajji, ache huiso bejjo chicha canaje ebajji.  
\v 16 Ebionei oe echacojji poquinaje o que. Jama cua baꞌa: “Emeshi mese, miquea bejjo quea huiso nee nee chichanaje. Miyaya eya oe bashosoco bejjo quianaje, jjeya ca ca yani ome miji peaꞌai bashosocome bejjo. Eyaya chaco neineinaje, de”.  
\v 17 Emeshi meseya jama acanaje baꞌa: “Eꞌe de, miya oe echacojji quea bame nee cuanaje. Jjeyahua nei miya emeshi mese jayojja aje, ¡ome miji peaꞌai cuiñajji jaahuanacue, miyaya quea bame cuanajeya jjejojo!” 
\p  
\v 18 —Pea echacojji poquinaje emeshi mese que. Jama huohuime acanaje baꞌa: “Emeshi mese, miyaya bejjo oe bashosoco quianaje. Jjeya ca ca eyaya iyehuiso chichanaje me oejje bashosocome bejjo. Eꞌe de, eyaya chaco neineinaje peaꞌai”.  
\v 19 Jamajjeya emeshi mese jama cuanaje baꞌa: “Eꞌe de, miya quea bame cuanaje. Miya emeshi mese jayojja aje, ¡me oejje cuiñajji jaahuanacue!” 
\p  
\v 20 —Pea echacojji poquinaje o que. Oya jama cuanaje baꞌa: “Emeshi mese, maꞌaje miquea oe bashosoco bejjo. Quia jjimajje bejjo cuanaje. Eja sisijo bebo majje jaahuana neineinaje.  
\v 21 Eꞌe de, miya etecueaje poso ca ca mi quianaje. Ecuea miya eba dejja quenequene cuajijji nei nei. Quea dejja taija jjejojo miquea aquiana quea huiso yani. Jamajjeya eya quea mete cuanaje miquea bejjo quiajji. Jamajjeya jaahuananaje miquea bejjo nei”.  
\v 22 Majoya aje emeshi meseya oya tecuea canaje. Oya jama cuanaje baꞌa: “Siajje miya, de. Miquea ejjashahuaba taiquijji jayojja jama eyaya miya aje. Miya shajjamaꞌ cuanaje; jjahuisoqui mee jjimaya ecua bejjo anaje.  
\v 23 ¡Bacue, ecue bejjo oya huiso tii miyaya jaahuananaje! ¿Apiojji miyaya bejjo ejjeshejji jaajji equi yasijje mi iyaquinaje, ejjahuisoquijji? Miyaya chacochaco jjima cuanaje, de”. 
\p  
\v 24 —Emeshi mese oya cuana jomajo nequi jama huohuime acanaje baꞌa: “Eꞌe de, ¡jjequisejajeaꞌyocue ecue quia bejjo ma echacojji shajjamaꞌ cuanajeja! ¡Quiaꞌyocue ma ebionei echacojji cuanaje yasijje, ma quea huiso bejjo chichajji cuanaje yasijje!” jamaya emeshi meseya acanaje. 
\p  
\v 25 —Oya cuana jama cuanaje baꞌa: “Emeshi mese, miquea ebionei echacojji ca ca quea bejjo huiso cuani. Yani ojaya ome miji peaꞌai huisome, de”.  
\v 26 Majoya aje emeshi meseya jama acanaje baꞌa: “¡Shajjaꞌajjacue ecuea esohui eꞌe jojo nei! Oe dejja chacochaco ani quea bame, shajjaꞌajja cani ecuea esohui, eyaya quiaje quea huiso nee nee. Oe dejja ca ca chacochaco ajja, shajjamaꞌ cuani, eyaya quia jjima aje. Iñajeꞌyo ojjaña ojaya aquiana o shajjamaꞌ jojoya.  
\v 27 Eꞌe de, pea dejja cuanaja eya botiꞌama. Oya cuana eya emeshi mese epojji sa po ajja ca ca oya. ¡Ma dejja cuana yecue eque! E cojja nei nequia majje ¡quecuajeacue ojjañaja ebajji!” cuanaje ma emeshi mese, de —jamaya aca cua Jesosaa. 
\p Oya huohui ca cua ma esohui ojjañaja ebajji eseya cachacochacoꞌyahua Jesosaja yajjijo quea bame nee, eseya cajjashajjaꞌajjaquiꞌyahua ojaya esohuijo peaꞌai. Eseyaya quea huiso onijje cajjapeequi meeꞌyahua. Majoya Jesosa cue oꞌoya majje ojaya epeejji quea huiso cuaje. Majoya oya jama cuaje baꞌa: “Miquianaya quea bame cuanaje; jjapeequi meenaje quea huiso nee ecuea epeejji epojji. ¡Jamajjeya poquicue enijje eyahuasijje! Beca cuana ca ca jeajeaje cuaqui yasijje shajjamajojo, de”. 
\s1 Jesosa nequiñaquia cua Jenosanenajo 
\r (Mateo 21.1-11; Macoso 11.1-11; Huani 12.12-19) 
\p  
\v 28 Majoya Jesosa mimijeyo majje poquia cua Jenosanena huasijje.  
\v 29 Poquijeya ba cañaquia cua beca cuiñajji Mepaje, Betania peaꞌai. Ma cuiñajji cuana chipi neijo eyiyo nequi yohua bajjani baꞌa: Onimo. Majoya Jesosaa becanejjijji peaꞌai o shajjaꞌajjajji cuana huoojea ca cua. Jesosaa oya cuana jama huohuime aca cua baꞌa:  
\v 30 —¡Poquicue jocuama ma cuiñajjijo chipi nei! ¡Bañaqui majje bacue mapichi eshoꞌi ai ejeyonequia nequi! ¡Ba majjeya oe pichocue! ¡Picho majje yecue! ¡Joya onaja eꞌanisohuaquijji ajjima nei nei oe yecue!  
\v 31 Onaa: “¿Apiojji acuae ecuea mapichi pichojeaña soꞌo?” acajje, oe jama huohuime acue baꞌa: “¡Mapichi jjequicue!” Jesosa cuanaje. Oya pa mapichi sa cuani, de, acue. 
\p  
\v 32 Majoya aje oya cuana poquia cua; bacañaquia cua mapichi. Majoya aje bañaqui majje pichojea ca cua ma ecua Jesosaa huohui ca cua jama pichojeameya aca cua.  
\v 33 Majoya aje emapichi mese cuaa ba ca cua, mapichi picho cuequi. Majoya aje ba majje emapichi meseya Jesosaja eshajjaꞌajjajji cuana jama huohuiꞌajjame aca cua baꞌa: —¿Apiojji acuaeya ecua mapichi pichojeaña soꞌo? 
\p  
\v 34 Oya cuana jama cua baꞌa: —Jesosaa sa canijojo ca ca ecuaaya pichojeaña. 
\p  
\v 35 Majoya aje dojo ca cua Jesosa que. Daqui iya ca cua mapichija edaasa biajje. Majoya Jesosa anisohuaquia cua mapichija edaasa biajje; poquia cua Jenosanena huasijje.  
\v 36 Jesosa poquianijo jjachichaquia cua ojjaña dejja cuana ejiojji sahuajo. Onaaya daqui ao jjequi jeapiihui ca cua ejiojjijo Jesosa jaꞌajjequijji. Emeshi mese jama jaꞌajjequimeya acaninaje cuaa ohua ba cahuajje.  
\v 37 Eyiyo Onimojo ani jaaoque majje ojjaña Jesosaja epeejji cuana quea bihui nee nee cua. Sohuicuayaña cua jama baꞌa:  
\v 38 —Eyacuiñajji, miya quea bame nee nee. Miyaya Jesosa huoojeanaje ecuea Emeshi Mese epojji jjeya nei. Ecuana quea bihui nee nee. Ojjaña meshijo baꞌe cuana, eyajo baꞌe cuana peaꞌai quea bei cuani —jama sohuicuayameya cua cuana. 
\p  
\v 39 Majoya Paniseo dejja cuaa quea dejja huiso pejjejo nequiya sohuicuayaqui shajjaꞌajja majje quea quene nee nee cua. Jamajjeya oya cuaa Jesosa jama huohuiꞌajjame aca cua baꞌa: —Jesosa, ¡miquea epeejji cuana huohuicue: “¡Aꞌa sohuicuayajji!” acue! —jamaya cua Paniseo dejja cuana. 
\p  
\v 40 Majoya aje Jesosaa jama sajaꞌame aca cua baꞌa: —Chojja de, eyaya ecuea epeejji cuana: “¡Aꞌa sohuicuayajji!” ajo, mei sohuicuayaje, de. Ojjañaa jja ca oe jjeya cabihuia cahua Eyacuiñajji —jamaya Jesosa cua. 
\p  
\v 41 Quijje pishana Jenosanena bañaqui majje Jesosa pa neineiya cua Jenosanenajo baꞌe cuana ojaya esohuijo shajjamajojo.  
\v 42 Oya jama mimimeya cua baꞌa: —Eya quea yeno nee nee jiquio cuiñajjijo baꞌeca cuanajo, oya cuana quea mimishi nee nee jojoya. Oya cuana mimishi cuana pajeaꞌyo sa po ajja nei nei, de. Jamajjeya aje jja oe quea nee nee cuajeꞌyo, ecuea epeejji po sa po ajja cuanajejojo.  
\v 43 Sohuinano cuana cueje o quecuaꞌyohua. Sohuinano cuana jjanequitoquijeꞌyo jiquio cuiñajjijo. Majoya oya cuana cuayaqui ajja nei nei cuaje.  
\v 44 Majoya aje oya cuana quecua jeyojeyo cajeꞌyo, chamaꞌyo tii acajeꞌyo. Equi cuana dahuajea jeyojeyo cajeꞌyo chamaꞌyo epoꞌyojji. Jamaya cuaje oya cuana ecuea esohuijo shajjamaꞌ cuanajejojo, eya Eyacuiñajjija huoojeaꞌyo ojjaña jaahuanajji cajaa acanajejojo —jamaya cua Jesosa Jenosanenajo baꞌe cuana nijje. 
\s1 Eyacuiñajjija equi aquiana quiajji pojjeama coma ca equi Eyacuiñajji nijje emimijji 
\r (Mateo 21.12-17; Macoso 11.15-19; Huani 2.13-22) 
\p  
\v 45 Majoya Jesosa dobiquia cua Eyacuiñajjija equi yasijje. Dobiqui majje Jesosaa beca cuana aquiana quia cuequi ba ca cua. Ma ba majjeya quea quene nee nee cua. Majoya aje Jesosaa ma aquiana quia cuequi jeacuayajea ca cua.  
\v 46 Ohuaya jama tecueame aca cua baꞌa: —Eyacuiñajjija etehueꞌyo jama cuani baꞌa: “Eyacuiñajjija equi onijje emimijji”. Aquiana quiajji pojjeama, ona siajje ajji pojjeama peaꞌai —jama tecuetecuemeya Jesosa cua. 
\p  
\v 47 Ojjaña pojjajo Jesosaa esohui huohui ca nequia cua Eyacuiñajjija equijo. Jamatii Eyacuiñajji nijje mimiani etii cuaa, Moisesija etehueꞌyo huohuijji cuaa, emeshi meseya peaꞌaiya Jesosa saꞌajja ca cua equecuaꞌyojji.  
\v 48 Jamajjeya esohui huohuijji cuana jama jjashahuabaquimeya cua baꞌa: —Quea camaja ca eꞌiñajji Jesosa equecuaꞌyojji, oya quea epeejji huiso nee nee aña. Shajjaꞌajja neinei cani ojaya esohui cuaa, de. 
\c 20  
\s1 ¿Aya acuae Jesosa huoojea ca cua esohui huohuiya? 
\r (Mateo 21.23-27; Macoso 11.27-33) 
\p  
\v 1 Oe pojjajo Jesosaa esohui huohui ca cua Eyacuiñajjija equijo. Jesosa que cueya cua Eyacuiñajji nijje mimiani etii cuana, Moisesija etehueꞌyo huohuijji etii cuana Jodio etiiquiana peaꞌai.  
\v 2 Oya cuaa Jesosa jama huohuiꞌajjame aca cua baꞌa: —¿Aya acuae mi huoojea canaje esohui huohuiya soꞌo? —jamaya aca cuaa cua. 
\p  
\v 3 Jesosa jama cua baꞌa: —Eyaya peaꞌai miquianaya huohuiꞌajjaje.  
\v 4 ¿Aya acuae Huani ma ona besameejji cuanaje huoojea canaje soꞌo? ¿Aꞌa Eyacuiñajjiya pojjaꞌa? ¿Aꞌa dejja cuaa pojjaꞌa? ¡Huohuiꞌajja socue mo! Majoya eyaya miquianaya huohuije ajea huoojea acuae eya. 
\p  
\v 5 Oya cuana mimipanajajia cua. Majoya aje jama aca cua baꞌa: —¿Yajja sajaꞌame seya aje soꞌo? Eseya quea mete ojjaña dejja cuanajo, de. Eseya sajaꞌajje jama cuaje baꞌa: “Eyacuiñajjiya Huani huoojea canaje”. Majoya pojjaꞌa Jesosaa jama sajaꞌame acaje baꞌa: “¿Yajjajo miquiaaya cajaa Huanija esohui anaje soꞌo?”  
\v 6 Eseya jama ajje baꞌa: “Dejja cuaa Huani huoojea canaje”. Ojjaña dejja cuaa se jaja caꞌyo chanaꞌ meiya, ojjaña dejja jjashahuabaquiani Eyacuiñajjiya Huani huoojea canajejojo. 
\p  
\v 7 Jamajjeya jjashahuabaqui majje Jodio cuaa Jesosa jama sajaꞌame aca cua baꞌa: —Cuaꞌa de. Ecuanajaya ba jjima nei. ¿Aya shai Huani huoojea canaje? —anisho ca cua quea meteya jjejojo. 
\p  
\v 8 Majoya Jesosa jama cua baꞌa: —Eꞌe de, jamajjeya ecuea miquianaya ehuohuijji pojjeama e huoojeajji epo —jamaya Jesosaa Jodio dejja cuana aca cua. 
\s1 Pea esohui ehuohuiꞌyo ejjashahuabaquijji jjonojjajja quejo 
\r (Mateo 21.33-44; Macoso 12.1-11) 
\p  
\v 9 Jesosaa dejja cuana jama huohuime aca cua baꞌa: —¡Jiquio ejjashahuabaquiꞌyojji shajjaꞌajjacue! Oe eque meseya jjonojjajja bana canaje. Ojaya que quea quemo nee nee cuanaje; oopana jjono bana canaje. Ma jjono yohua bajjani cuanaje baꞌa: uva. Ma jjono cuana bana majje ohuaya echacojji cuana cuiña mee canaje. Ohuaya ejjajja cuiñajji cuana jama huohuime aca cua baꞌa: “Jjonojjajja jahuajeyajo miquianajaya yajji esejja acue. Pea esejja ca ca ecuea cuaje”. Majoya ojaya que cuiña mee majje quea huesha poquinaje quijje nei nei cueꞌyohua.  
\v 10 Quijje jjonojjajja jahuajo ohuaya ma pea meshijo baꞌe ojaya pea echacojji huoojea canaje jjonojjajja cuiñajji cuana huasijje. Ma echacojji jjonojjajja cuiñajji cuana huasijje poqui majje jama huohuiꞌajjame acañaquinaje baꞌa: “Eya eque meseya miquiana que huoojea canaje jjonojjajja esejja jjehuaꞌyohua. ¿Ache acuae pa eque meseja iya tepe mee?” Majoya ejjajja cuiñajji cuana quea dejja ta jjejojo quea quene cuanaje eque meseja huoojeajji nijje. Jama cuanaje baꞌa: “Cho, quia sa po ajja iña. Chamaꞌ ca jjaja ca oja, ecuea ca jjaja ca oe”. Majoya ejjajja cuiñajji cuaa echacojji cuiajea canaje. Cuiajea majje huoojeajea caꞌyonaje eque mese yasijje; jamatii poquiꞌyonaje.  
\v 11 Majoya eque meseya pea echacojji huoojea ca oꞌoyanaje huacuayaya. Huohuiꞌajja cañaqui oꞌoyanaje jama baꞌa: “¿Ache acuae eque meseja jjonojjajja soꞌo?” Majoya quia sa po ajjaa jjejojo cuiajea ca oꞌoyanaje. Poqui oꞌoyanaje jamatiiya, de.  
\v 12 Eque meseya pea echacojji huoojea ca oꞌoyanaje huacuayaya. Eꞌe de, ma pea poqui majje jama huohuiꞌajjame acañaqui oꞌoyanaje baꞌa: “¿Ache acuae pajjaja eque meseja jjonojjajja soꞌo? Eyaya cadojoꞌyahua o que”. Majoya jjonojjajja cuiñajji cuana quenequene neineinaje onijje. Quecuajeaꞌajja canaje jjonojjajja cuiñajji cuaa. Poquiꞌyonaje echacojji jamatii eque mese yasijje. 
\p  
\v 13 —Majoya eque mese jjashahuabaquiꞌyonaje oja quejo. Oya jama cuanaje baꞌa: “¿Yajja acuae eyaya ajeꞌyo soꞌo? Ecue bacua ejja pojjaꞌa cahuoojeahua. Eꞌe, oya poqui majje ma jjonojjajja cuiñajji cuaa oya ba caje. O ba majje pojjaꞌa jjashajjaꞌajjaquije. Baꞌajja”. Majoya aje oja bacua ejja huoojea canaje jjonojjajja cuiñajji cuana huasijje. Jjonojjajja jjequiꞌyohua nisho huoojeaꞌajja canaje.  
\v 14 Majoya aje onaaya ebacua ba canaje. Jama cuanaje baꞌa: “Bacue, eque meseja ebacua ejja cueyanaje, de. Cuaꞌa ejjaquecuajeaqui oe eque mesenaꞌyojji” jama jjashahuaba taiquimeya cuanaje cuana.  
\v 15 Jamajjeya jjonojjajja cuiñajji cuaa eque meseja bacua ejja quecua caꞌyonaje. Majoya aje quea huesha nee nee jeajea canaje —jamaya Jesosa cua—. ¿Yajja acuae eque meseya acajeꞌyo jjonojjajja cuiñajji cuana?  
\v 16 Eque mese poquije jjonojjajja cuiñajji cuana quecuajeaa oja bacua ejja quecuaꞌyo epo jojoya. Majoya aje pea dejja que cuiña meequi cajeꞌyo —jamaya Jesosa cua. 
\p Dejja cuana jama cua baꞌa: —De, jjonojjajja cuiñajji cuana quea mimishi nee nee, de. Chamaꞌ ca jjaja ca dejja cuajjama mimishi. 
\p  
\v 17 Jesosaa cojja ba oneone ca cua ma dejja cuana. Majoya aje oya jama cua baꞌa: —Eꞌe de, yani jjaja, de. ¿Aꞌa jjaja miquianajaya ba jjima Eyacuiñajjija etehueꞌyo pojjaꞌa? Ba jjima pojjaꞌa jjajajje, jamajjeya aje mi eyaya jama huohuime aje baꞌa: Jamatii dejja cuaa oe equi iyajji, equi yamajjana quea caꞌa nee nee saꞌajja cani. Beca cuaa jeajea cani acui caꞌa quea bame pojjeama posojojo. Pea dejjaja eba nei nei acui yamajjana equi iyajji. Jama cuaje ma acui caꞌajo baꞌa: “Jiquio aje jja oe acui quea caꞌa nee nee baꞌa, de. Jamajjeya aje jja oe eyaya dojojeꞌyo quea bame nee nee jojoya”. Jamaya Eyacuiñajjiya eya babaca canaje Emeshi Mese nei quea bame nee nee epojji acui quea bame jayojja.  
\v 18 Eꞌe de, miquianaaya ca ca eya cajaa aje, ma acui cajaa onaa acanaje jayojja. Ojjaña joya eya Emeshi Mese epojji cajaa acajo Eyacuiñajjiya jeajea cajeꞌyo cuaqui yasijje —jamaya Jesosa cua. 
\p  
\v 19 Jesosaja esohui shajjaꞌajja majje Eyacuiñajji nijje mimiani etii cuana, Moisesija etehueꞌyo huohuijji cuana peaꞌai quea quene nee nee cua. Oya cuana jjajaꞌaqui majje jama mimimimime ojee cua baꞌa: —¡De! Aꞌa jja ca eseya jama acani, de. Oya mimiani eseya jjonojjajja cuiñajji cuana jayojja, de. Pea cuaa Jesosa cajaa acanaje jayojja eseyaya cajaa aje peaꞌai pa —jamaya ma Jodio dejja cuana cua. 
\p Jamajjeya Jodio dejja cuaa Jesosa iña sa aca cua ejeanobiajji nisho. Ojaya epeejji cuana quea huisojojo, Jesosa mi iña ca cuaa cua. Jama cua baꞌa: —De, eseya o iñajo dejja cuana quea quene nee nee cuaje ese nijje —jamaya cua Jodio dejja cuana; Jesosa iña jjima cua. 
\s1 Esohui ehuohuiꞌyo emeshi mese yasijje bejjo quiajjijo 
\r (Mateo 22.15-22; Macoso 12.13-17) 
\p  
\v 20 Majoya Eyacuiñajjija esohui huohuijji cuaa pea dejja cuana Jesosa iñajji nisho bejjo quia ca cua. Ma dejja cuana poquia cua Jesosa baa; dejja quea bame nisho cua. Huohuiꞌajja ca cua Jesosa ojaya yajja sajaꞌame yaꞌyojji nisho. Jamajjeya Moisesija etehueꞌyo jayojja jama mi sajaꞌa cajo dojo ca quiaye sohuinano huasijje jeanobiaa.  
\v 21 Ma dejja quea bame nisho cuaa Jesosa jama huohuiꞌajjame aca cua baꞌa: —Jesosa, ecuanaja eba miyaya eꞌe jojo nei huohuiaña Eyacuiñajjija esohui nei. Miyaya baña dejja cuana oya jayojjaya cuani.  
\v 22 ¡Jamajjeya mo oe che huohuicue! ¿Aꞌa jamajjeya Eyacuiñajjija epeejji cuaa bejjo quia cajji emeshi meseja yajji? Quia ca ajja pojjaꞌa. 
\p  
\v 23 Jesosaja eba cuanaje Jodio cuanaja ejjashahuabaquijji. Jamajjeya ohuaya jama huohuiꞌajjame aca cua baꞌa: —¿Apiojji acuae nequiaa iña dasia sa aña soꞌo? Miquianaya ca ca ecuea epeejji nisho cuani, de.  
\v 24 ¡Jjequicue bejjo esodojjo ebajji, emeshi meseja epanaꞌyojji! 
\p Majoya oya cuaa oe bejjo jjequi ca cua. Jjequi cajo, Jesosaa jama huohuiꞌajjame aca cua baꞌa: —¿Bejjojo ae ecajjaꞌyo ani? ¿Ae bajjani tehuemeꞌya bejjo? —jamaya Jesosa cua. 
\p —Emeshi mese oja cajjaꞌyo, Sesa bajjani. 
\p  
\v 25 Majoya aje Jesosa jama cua baꞌa: —Jamajjeya ¡Sesaja bejjo quiaquicue ohua sa cajo! ¡Eyacuiñajji aꞌa pajeaꞌyojji; oya bihuiacue; shajjaꞌajjacue peaꞌai! 
\p  
\v 26 Ma epeejji nisho cuana quea mete nee nee cua Jesosaja ojaya ejjashahuabaquijji ebajojo. Jamajjeya jama cuana cua baꞌa: —Quea jjashahuabaqui jaꞌa nee oya, Jesosa. Jjadasia meequi ajja, de —jamaya cua ma epeejji nisho cuana. Jamajjeya mimi oꞌoya sa po ajja Jesosa nijje. Jamajjeya Jesosa iña jjima cuanaja cua. 
\s1 Manoꞌyo majje eshequi oꞌoyajji 
\r (Mateo 22.23-33; Macoso 12.18-27) 
\p  
\v 27 Ma pojjajo tii Sanoseo dejja cuana poquia cua Jesosa huohuiꞌajjaa. Sanoseo dejja cuana jamatii jjashahuabaquia cua pea cuana manoꞌyo majje eshequi oꞌoyajji pojjeama. 
\p Jesosaja ca ca jama sohui huohuime ajjima cua. Jamajjeya Sanoseo dejja cuaa oya edasiajji nisho aca cua. Majoya aje jama huohuiꞌajjame aca cuaa cua baꞌa:  
\v 28 —Esohui huohuijji, Moisesiya jama tehueme aca cua yahuajo nei nei baꞌa: 
\q1 “Oe dejja jjahuanaquinaje. Majoya aje manoꞌya cua bacuamahua. Ojaya ehuanase quijjojea ca cua. Ahuemaꞌ aniꞌya cua jjamejoqui jjimahua quijjojea. Majoya aje ahuemanoꞌyajo oja chahuaa cahuana caꞌyahua, oja doeja bacua jea jayojja nei epojji”. 
\p  
\v 29 Jamajjeya jama cuaje pojjaꞌa baꞌa: Oe dejja quea doe huiso cua, me oejje pea becanejjijji peaꞌai nequia cua. Ma dejjaa epona huana ca cua. Majoya manoꞌya cua; bacuamahua quijjojea ca cua.  
\v 30 Ma dejjaja quijjojea ani echahua meseya huana ca oꞌoyanaje. Bacua jea jjimahua quijjojea ca oꞌoyanaje.  
\v 31 Majoya pea echahua meseya huana ca oꞌoyanaje. Majoya pea echahua meseya huanaꞌajja ca poquiapoquia cua.  
\v 32 Majoya aje oya epona manoꞌyonaje yahueja quijjojea ani tiiya. Jjamejoqui ajja cuanaje, bacuamaꞌ nei nei tii pona cuanaje, de.  
\v 33 Jamajjeya miquea esohui jama cuani eyajo shequi oꞌoya majje ¿ajea ehuanase jiquio cuaje eyajo; ache oja doeja? O huanacoojji epoja pojjaꞌa, pea echahua meseja pojjaꞌa; oja chahua cuana ahuiaꞌajjaꞌyo epo —jamaya cua Sanoseo dejja cuana. 
\p  
\v 34 Jesosaa jama aca cua baꞌa: —De, miquianajaya ba jjima. Jiquio meshijo dejja cuana jjahuanaquiani; epona cuana jjahuiaquiani.  
\v 35 Jamajjeya jiquio meshijo Eyacuiñajjija epeejji manoꞌyo majje eyahuasijje poquijeꞌyo. Ejjahuanaquiꞌyojji pojjeama cuajeꞌyo eyajo; epona cuana peaꞌai ejjahuiaquiꞌyojji pojjeama cuajeꞌyo eyajo. Jjamejoqui ajja peaꞌai cuajeꞌyo eyajo.  
\v 36 Manoꞌyo ajja cuaje jomajo; esohuidojojji jayojja jama cuajeꞌyo. Eyajo ojjaña Eyacuiñajjija ebacua cuajeꞌyo, eshequiꞌyo jjejojo.  
\v 37 ¿Aꞌa miquea ba jjima dejja cuana ojjaña manoꞌyo majje shequije oꞌoya? Jamajjeya Eyacuiñajjiya yahuajo nei esohui tehue mee ca cua miquiana jjabahuejjaquijji. Moisesiya tehue ca cua yahuajo nei nei ma acui jijiqui ba majje. Eyacuiñajji mimia cua onijje jama baꞌa: 
\q1 “Eyaya miquea etiiquiana cuana jaahuanaña, Amajama, Isaaca, Jacobo peaꞌai ecuea epeejjijojo. Oya cuana enijje enequi tii tii”. 
\p  
\v 38 Eyacuiñajji emanoꞌyo cuana meshijo eꞌohuajeajaa jaahuanajji pojjeama cuani. Eshe nequi cuana, emanoꞌyo shequiꞌyo cuana peaꞌai eyajo ohuaya jaahuana cani ojaya epeejjijojo —jamaya aca cua Jesosaa. 
\p  
\v 39 Pea Moisesija etehueꞌyo huohuijji cuaa jama huohuime aca cua baꞌa: —Eꞌe de, quea jaꞌa nee nee miquea esohui, Jesosa. Quea bame nee nee, de. 
\p  
\v 40 Majoya huohuiꞌajja becaꞌyo jjima tii aca cuaa cua quea meteya jjejojo, jjadasia meequi ajjajojo. 
\s1 ¿Aya Jesosa huoojea ca cua dejja jaahuanajji pojji? 
\r (Mateo 22.41-46; Macoso 12.35-37) 
\p  
\v 41 Jesosaa oya cuana jama aca cua baꞌa: —Miquianaya jama jjashahuaba taiquime cuani baꞌa: “Jesosa Dabija osecua poso nequiaa aña. Jamajjeya oya Eyacuiñajjija Bacua pojjeama poso nequiaa aña” jamaya jjashahuaba taiquimeya nequiana cuani. Dabi emeshi mese yahuajo nei nei baꞌya cua. Eya ojaya eba nei nei, de. Ojaya eya eba dejjaja bacua ejja pojjeama, Eyacuiñajjija Bacua Ejja.  
\v 42 Jamajjeya ohuaya esohuicuayajji tehue ca cua Salmojo; jama cua baꞌa: 
\q1 “Eyacuiñajjiya ecuea Emeshi Mese Quito jama huohuime acanaje baꞌa: —¡Enijje anioquecue ebañei mijijje ojjañaja Emeshi Mese epojji! 
\q1  
\v 43 Eyaya mi quecuaꞌyojji epo jeabichajea jeyojeyojeꞌyo. Majoya aje miyaya oya cuana jeajeajeꞌyo cuaqui yasijje cajaajojo —jamaya aca cua Eyacuiñajjiya”. 
\m Jamaya Dabiya ejo tehue ca cua yahuajo nei nei.  
\v 44 Jamajjeya Dabiya Quito oja Emeshi Mesejojo bajjani ca cua. Jamajjeya Quito Dabija osecua cua, ojaya Emeshi Mese nei. Eya jja iña iquio Quito, de, dejjaja bacua pojjeama; Eyacuiñajjija Bacua Ejja, jamajjeya eya ojjañaja Emeshi Mese nei —jamaya Jesosa cua. 
\s1 Jesosaa Moisesija etehueꞌyo huohuijji cuana tecueajea ca cua 
\r (Mateo 23.1-36; Macoso 12.38-40; Noca 11.37-54) 
\p  
\v 45-46 Ojjañaa Jesosaja esohui shajjaꞌajja canijo, Jesosaa o shajjaꞌajjajji cuana jama aca cua baꞌa: —Coya mi oe Moisesija etehueꞌyo huohuijji jayojja po chanaꞌ. Oya cuana poꞌayequiequi daqui aojji ojjañaja quea bame ebajji nishoya. Oya cuana quea bihui cuani shajjaꞌajja majje ojjañaja esohui jama cuani baꞌa: “Ma esohui huohuijji quea bame cuani, oja daqui quea bame, oja esohui quea jaꞌa nee” jamaya shajjaꞌajja saya cuani ma esohui huohuijji cuana. ¡Eꞌe jojo nei pojjeama! Jodioja equi ejjachichajji yasijje dobiqui majje ebionei anioque sa cuani Eyacuiñajjija esohui huohuijji pejjejo. Eꞌijjiaꞌijjiajjijo peaꞌai anioque sa cuani equi mese pejjejo. Beca cuaa quea bame poso acani.  
\v 47 Eꞌahuemanoja aquiana sii cani o chaco sahuajji nisho po majje. Majoya oya cuana mimi nisho ani Eyacuiñajji nijje. Oya quea mimishi nee nee. Eyacuiñajjiya oya cuana jeajea cajeꞌyo cuaqui yasijje, onijje mimi nishojjijojo —jamaya cuana Jesosaa aca cua. 
\c 21  
\s1 Eꞌahuemano aemaa bejjo quia ca cua Eyacuiñajjija equijo 
\r (Macoso 12.41-44) 
\p  
\v 1 Eyacuiñajjija equijo, Jesosaa dejja cuana quea aquiana huiso nequi ba ca cua. Ma dejja cuaa bejjo iya ca cua ejjeshejji iyajji yasijje.  
\v 2 Majoya eꞌahuemano aemaꞌ nei neiya bejjo iya ca cua. Becanejjijji peaꞌai bejjo ojaya cua, oe pojji nei nei cua, de. Chamaꞌyo cua ojaya bejjo ohua iya cajje bejjo iyajji yasijje.  
\v 3 Majoya Jesosa jama cua baꞌa: —Eꞌe, jiquio eꞌahuemano quea bame cuanaje. Ohuaya ojjaña tii bejjo iya caꞌyonaje. Jamajjeya Eyacuiñajji quea bihui cuanaje onijje.  
\v 4 Quea aquiana huiso nee nee cuaa ca ca oja quiabishi iya canaje. Quea bame pojjeama ca ca oya cuana. Ma eꞌahuemanohua iya canaje ojaya bejjo bobi jjeshejji nisho, de. Chamaꞌyo ojaya bejjo poꞌyonaje. Jamajjeya quea aquiana huiso nee nee cuana quea bame pojjeama cuanaje —jamaya Jesosa cua. 
\s1 Pea cuaa Eyacuiñajjija equi cajjajeajea mee cajeꞌyo 
\r (Mateo 24.1-2; Macoso 13.1-2) 
\p  
\v 5 Beca cuana mimia cua Eyacuiñajjija equijo jama baꞌa: —¡De, bacue mei quea bame, aquiana quea bame ani Eyacuiñajjija equijo! Aquiana quea bame sosemaꞌ quia Eyacuiñajjija equi quea bame epojji. 
\p Majoya aje Jesosaa jama aca cua baꞌa:  
\v 6 —Eꞌe de, quijje pishana jiquio equi, aquiana peaꞌai chamaꞌyo tii acajeꞌyo, de. Ma mei bame cuana pea biajje eꞌiya sohuaꞌyojji pojjeama. Pea cuaa ma equi cajjajeajea cajeꞌyo —jamaya cua Jesosa Eyacuiñajjija equijo. 
\s1 Dejja cuana quea mase nee cuaje quijje 
\r (Mateo 24.3-28; Macoso 13.3-23) 
\p  
\v 7 Majoya o shajjaꞌajjajji cuaa jama huohuiꞌajjame aca cua baꞌa: —Jesosa ecuea esohui huohuijji, ¿ache shono acuae shai pea cuaa Eyacuiñajjija equi mei cuana cajjajeajea mee cajeꞌyo? ¿Yajja acuae acaje soꞌo? 
\p  
\v 8 Jesosa jama cua baꞌa: —Ma Eyacuiñajjija equi quea bame cajjajeajeaꞌyo jjimahuajo, jamaya cuaje baꞌa: Quea huiso nee nee cueje e bajjani nisho po majje. Jama mimi nishome cuaje baꞌa: “Eya Jesosa Quito bajjani, de”. Pea jama cuaje baꞌa: “Eya jjeyahua nei cue oꞌoyanaje, eya Quito, Eyacuiñajjija huoojeaꞌyo”. ¡Aꞌa ojaya esohui shajjaꞌajjajji! Siajje ca cuaje.  
\v 9 Miquiaaya shajjaꞌajjaje pea meshijo baꞌe cuana jjaquecuaquiequi pea meshijo baꞌe cuana nijje. ¡Aꞌa miquianaya quea mete pojji! Jamatii acua pojjeama oe po ajja jjima cuaje soꞌo —Jesosa cua—.  
\v 10 Dejja cuana jjaquecuaquijeꞌyo ojjaña meshijo baꞌe cuana, cuiñajjijo baꞌe cuana peaꞌai.  
\v 11 Quea huiso emano meejjiya mano mee cajeꞌyo. Ojjaña quea mete nee nee cuaje, de. Bobimaꞌ cuaje, manojeꞌyo quea dejja huiso cuana bobimajo. Meshi huehuahuehuaje ojjaña meshi yasijje peaꞌai, de. Ojjaña quea mete nee nee cuajeꞌyo eyatahuatahua huehuahuehuajo meshi huehuahuehuajo peaꞌai, de —jamaya Jesosa cua. 
\p  
\v 12 —Jiquio jama po jjimahuajo beca cuaa miquianaya quea nee po mee cajeꞌyo ecuea epeejji cuanijojo. Oya cuanaja botiꞌama nee nee cuaje, de. Miquianaya iña majje dojo caje jeanobiajeaa Jodioja equi ejjachichaquijji cuana huasijje. Dojo caje miquianaya emeshi mese nequi cojja nei yasijje. Majoya ohuaya jama huohuiꞌajjame acaje baꞌa: “¿Aꞌa miquianaya Jesosaja epeejji nei?” Eꞌe jojo neijojo, miquianaya jeanobiajea caje.  
\v 13 Jama po majjeya ¡aꞌa quea mete pojji! Miquianaya ejo huohuije ma emeshi mese yasijje. Jamajjeya quea huiso emeshi mese cuaa shajjaꞌajja caje ecuea esohui Eyacuiñajjija esohui peaꞌai —jamaya Jesosa cua—.  
\v 14 Eꞌe, ¡aꞌa quea mete pojji ache esohui miquianaaya huohuijeꞌyo!  
\v 15 Eyaya nei miquianaya quea jaꞌa nee po meeje. Eyaya esohui huohui sahuaje ehuohuijji ejo. Ma pojjajo pea cuanaja miya esajaꞌajji pojjeama miquianajaya esohui quea jaꞌajojo. Miquianajaya esohui eꞌe jojo nei cuaje, de.  
\v 16 Miquianajaya huapa pojjeama cuaa, miquianajaya epeejji cuaa peaꞌaiya dojo caje ejjajeanobiajeaquijji equi yasijje miquianaya ecuea epeejjijojo. Ohuaya miquianaya quecua mee cajeꞌyo, de.  
\v 17 Ojjañaa miquianaya cajaa acajeꞌyo ecuea epeejji cuanijojo.  
\v 18 Onaa cajaa acajje aꞌa jjashahuaba taiquijji jama baꞌa: “Eyacuiñajjiya ecuana pajea caꞌyonaje, de”. Cho, Eyacuiñajjiya miquianaya pajeaꞌyo jjima acajeꞌyo. Ohuaya ca ca miquianaya jaahuana cajeꞌyo ojaya epeejji cuanijojo.  
\v 19 Ojjaña jiquio jayojja cuajo, ¡aꞌa miquianaaya eya pajeaꞌyojji! Miquianaya jjapeequipajeaꞌyo ajjajo Eyacuiñajjiya miquianaya baꞌe tiitii mee cajeꞌyo eyajo. 
\p  
\v 20 —Miquianaaya sohuinano cuana Jenosanenajo ejjanequitoquiꞌyo nequi ba majje miquianajaya eba ma cuiñajjijo ani cajjajeajea cuajicuaji cajeꞌyo.  
\v 21 Ojjaña Jodea meshijo baꞌe cuana capoquiꞌyahua eyiyo huasijje. Ojjaña Jenosanenajo baꞌe cuana cacuayaquiꞌyahua. Quea huesha baꞌe cuana, ¡aꞌa cueꞌyoquijji Jenosanena huasijje! Capoquiꞌyahua quea huesha nee, ma sohuinano cuaa equecua ca cuaje jjejojo.  
\v 22 Eꞌe de, jamaya quea nee nee cuaje, Eyacuiñajjija esohui yahuajo tehue ca cua jama jayojjaya cuaje.  
\v 23 Epona cuana oꞌejji, bacua shoꞌijji peaꞌai quea yeno nee nee cuaje; quea camaja epoquicuajijji cuaje, de. Eyacuiñajjiya quea nee nee nee po mee caje Jenosanenajo baꞌe cuana.  
\v 24 Sohuinanohua beca Jodio dejja cuana yacua cajeꞌyo. Beca cuana ca ca iña majje jeyo caje. Jeyo majje dojo caje pea meshi quea huesha nee yasijje. Quea yeno nee nee cuaje, de. Sohuinano cuaa, Jodio dejja pojjeama cuaa Jenosanenajo equi ani cajjajeajeaꞌyo majje pea equi iya cajeꞌyo ebaꞌeꞌyojji. Majotiiya oya cuana baꞌejeꞌyo jiquio ecua Eyacuiñajjiya baꞌe mee cajeꞌyo. Ma shonoya aje oya cuana poquijeꞌyo —jamaya Jesosa cua. 
\s1 ¿Achajja acuae cuaje Jesosa cue oꞌoyajo? 
\r (Mateo 24.29-35, 42-44; Macoso 13.24-37) 
\p  
\v 25 Majoya aje Jesosaa jama aca cua cuana baꞌa: —E cue oꞌoya jjimahuajo ojjaña quea mete cuaje eshequi, baꞌi peaꞌai quea apo cuajo. Jijiꞌyo ajja cuaje, de. Majameta cuana jjacajjaquiꞌyo majje jijijijioqueje. Ba majje dejja cuana quea mete nee nee cuaje; piopio cajeꞌyo, de. Ena cuana quea shajjaquijjo cuaje enashajo quea quemo nee neejojo.  
\v 26 Mete cajeꞌyo majameta huehuahuehuajo. Dejja cuana shacamano cajeꞌyo meteꞌyo majje. Oya cuaa jama huohuiꞌajjame acaje baꞌa: “¿Yajja shai cuani soꞌo?”  
\v 27 Ojjaña cuaa eya ba caje. Eya ojjañaja Edoe Mese cuani cuejeꞌyo bo biajje. Quea caꞌa nee nee; quea sohui poja nee nee cuaje, de. Eꞌe, quea bame cuaje ma pojjajoya.  
\v 28 ¡Miquianaaya jiquio ba majje nequisohuacue! ¡Jjabajeasohuaquicue! Eya cueje oꞌoya miquiana dojohua eyahuasijje ebaꞌeꞌyojji tii tii. Jamajjeya ¡quea bihui pocue! —jamaya Jesosa cua. 
\p  
\v 29 Jesosaa pea esohui jama huohuime aca cua cuana baꞌa: —Eꞌe de, ¡bacue ma acui, iquena bajjani! ¡Ojjaña acui cuana bacue!  
\v 30 Esejaya meshijo acui iña yani ba majje eseya jama cuani baꞌa: “Eꞌe jojo nei nayaja poꞌyonaje”.  
\v 31 ¡Jiquio ecua acui iña yani ba majje acuijjajjajo jjashahuabaquiani jayojja jama eyatahuatahua huehuahuehuani ba majje bacue eya cueje oꞌoya! 
\p  
\v 32 Eꞌe jojo nei ojjaña ma pojja cuanajo baꞌe cuana mano jeyojeyoꞌyo jjimahuajo ojjaña acua cuajeꞌyo eya ojjañaja Emeshi Mese oe nequijeꞌyo.  
\v 33 Eyatahuatahua, meshi peaꞌai chamaꞌyo cuajeꞌyo. Ecuea esohui ca ca ma ani tiitiime cuajeꞌyo. 
\p  
\v 34 —¡Ishoaꞌajja anicue iña oe nequiaa! ¡Aꞌa jjashahuaba majamajaquianijji miquianajaya ebaꞌejjijo! ¡Miquianaya oe che jjashahuabaquicue e ecue oꞌoyajjijo!  
\v 35 Ibia ijjiameejji esheꞌaꞌani jjacamicuajiquiꞌyani jayojjaya jama cuecuajimeya eya cuaje. Eꞌe, ojjañaja eya ba jjima cuecuajije.  
\v 36 Jamajjeya oe ¡shajjaꞌajjacue ecuea esohui! ¡Aꞌa pajeaꞌyojji, quea camaja cuaje, de! Ojjaña cuana quea mete nee nee, quea nee nee peaꞌai cuaje, de. Jamajjeya ¡jjaꞌishoaꞌajja aniqui tiitiicue! ¡Miquianaya ecuea epeejji po tiitiicue! ¡Eyacuiñajji nijje mimiani tiitiicue quea caꞌa epojji! Eya cue oꞌoyajo miquianaya ecojja nei nequiñaquije. Eya miquianajaya Edoe Mese cuaje, jamajje miquianaya quea bihui cuaje, meteꞌama cuaje —jamaya Jesosa cua. 
\p  
\v 37 Ojjaña pojjajo Jesosaa esohui huohui canequia cua Eyacuiñajjija equijo. Mecajje poqui nequia cua eyiyo Onimo huasijje cahuiya.  
\v 38 Mecajjeahua Jesosa cue oꞌoya nequia cua Eyacuiñajjija equi yasijje. Ojjaña dejja cue nequia cua oja esohui shajjaꞌajjaa. 
\c 22  
\s1 Jodio dejja etii cuana jjashahuabaquia cua Jesosa quecuaꞌyojjijo 
\r (Mateo 26.1-5, 14-16; Macoso 14.1-2, 10-11; Huani 11.45-53) 
\p  
\v 1 Majoya aje quijje pishana ojjaña Jodio dejja cuana jjachichaquia cua Jenosanena huasijje ejjashahuabaquijji yahuajo nei esohuidojojjiya cuia jjima oja bacua cuana aca cuajo. Ijjiaꞌijjia ca cua ojee pahui hua jjimajo, Jodio etiiquianaa jayojjaya.  
\v 2 Ma epojja cue jjimahuajo, Eyacuiñajji nijje mimiani etii cuana, Moisesija etehueꞌyo huohuijji etii cuana peaꞌai jjashahuaba taiqui nequia cua jama baꞌa: —¿Achajja iñame shai seya Jesosa aje? Eseya jjeya Jesosa iñajo ojjaña ejjachichaqui nequi cuana quea quene cuaje ese nijje —jamaya cua quea mete jjejojo Jesosaja epeejji cuanajo. Jamatii ca ca iña mee sa aca cua Jesosa equecuaꞌyojji. 
\p  
\v 3 Jodasa Jesosa shajjaꞌajjajji nisho cua. Ojaya pea bajjani cua baꞌa: Isicaniote. Beca cuanaja Jesosa iña jjimajojo, Edosiquiaa Jodasa jjashahuaba taiqui mee ca cua Jesosa iña meesahuajji.  
\v 4 Jamajjeya Jodasa poquia cua Eyacuiñajji nijje mimiani etii cuana que, Eyacuiñajjija equi jaahuanajji cuana peaꞌai ani yasijje huohui pohua. Jama huohuiñaquime aca cua baꞌa: —Ecuea eba Jesosa ma o oe nei poquiani yasijje. Eyaya miquianaya huohuijeꞌyo. 
\p  
\v 5 Majoya oya cuana quea bihui cua Jodasaja esohui shajjaꞌajja majje. Jamajjeya jama cua baꞌa: —Eꞌe de, ecuana miyaya ba meecue ma Jesosa oe nei poquiani yasijje. Majoya aje ecuanaaya miya sosequiaje, de. 
\p  
\v 6 —Eꞌe de, eyaya aje mi iñasahua meejeꞌyo —Jodasa cua. Majoya ohuaya saꞌajja ca cua eꞌiña meeꞌyojji Jesosa dejjama huasijje poqui. 
\s1 Jesosaa o shajjaꞌajjajji cuana nijje bobi ijjia ca cua 
\r (Mateo 26.17-29; Macoso 14.12-25; Huani 13.21-30; 1 Conitio 11.23-26) 
\p  
\v 7 Majoya ma epojjajo Jodio cuana ijjiaꞌijjianijo Eyacuiñajji nijje mimianiya oe ñajjajja yahue shoꞌi quea bame nee nee quecua caꞌya cua Eyacuiñajji bihuiajji. Jodio dejja cuaa pahui hua jjima ijjia ca ania cua.  
\v 8 Jamajjeya aje Jesosaa Peno, Huani peaꞌai huoojea ca cua oe equi yasijje bobi jjequiya. 
\p  
\v 9 O shajjaꞌajjajji cuaa jama huohuiꞌajjame aca cua baꞌa: —Jesosa, ¿ache equijo acuae seya pahui hua jjima ijjiaje soꞌo? 
\p  
\v 10 Jesosa jama cua baꞌa: —¡Jenosanena huasijje oe poquicue! Majoya aje miquiaaya baje oe dejja meshimisijo ena dojo caje. ¡O ba majje o cuaje jja nei nei poquicue o dobiquijeꞌyo huasijjeya!  
\v 11 Majoya ma equi mese jama huohuiꞌajjame acue baꞌa: “Ecuea esohui huohuijji jama cuanaje baꞌa: —¿Ache equecuayijjijo acuae ecuana ijjiaꞌijjiaje e shajjaꞌajjajji cuana nijje soꞌo? Ecuana ijjia sa cuani pahui hua jjima, Eyacuiñajji bihuiajji”.  
\v 12 Majoya aje mi huohui caje equi meseya equecuayijji quea quemo. ¡Majoya aquiana iyajeacue; bobi cuacuacue! —jamaya Jesosa cua. 
\p  
\v 13 Majoya aje oya cuana poquia cua; ba ca cua Jesosaja esohui jayojjaya. Majoya iya ca cua. 
\p  
\v 14 Majoya siñajo Jesosa o shajjaꞌajjajji cuana cueya cua ma equi yasijje. Dobiqui majje anioquea cua eꞌijjiaꞌijjiajji. 
\p  
\v 15 Majoya Jesosa jama cua baꞌa: —Eya miquiana nijje oe yejje nei ijjiaꞌijjiajeꞌyo, onaa e quecua caꞌyo cuahuajje.  
\v 16 Eꞌe de, eya eꞌijjiaꞌijjia becaꞌyojji pojjeama miquiana nijje manoꞌyo majje. Jamajjeya quijje eyaya cue oꞌoya majje jiquio pahui ijjiaje oꞌoya ojjaña cuanaja Emeshi Mese neiya jjejojo —jamaya Jesosa cua. 
\p  
\v 17 Majoya ohuaya caneco jjeshe ca cua. Emejo iñanequia majje mimia cua Eyacuiñajji nijje. Majoya aje ohuaya o shajjaꞌajjajji cuana aca cua jama baꞌa: —Maꞌaje, ¡jiquio jjonojjajja na ishicue; ishijeyocue oe!  
\v 18 Eꞌe de, eyaya ishi becaꞌyo jjima jjonojjajja na aje, Ecue Chiiya eya ojjaña huoojeaꞌyojji po mee cajeꞌyo; ojjañaa eya shajjaꞌajja cajeꞌyo —jamaya Jesosa cua. 
\p  
\v 19 Majoya aje pahui jjeshe ca cua. Pahui jjeshe majje oya mimia cua Eyacuiñajji nijje. Mimi majje pahui miji ca cua. Majoya aje miji majje quia ca cuana cua. Jama huohuime aca cua baꞌa: —Jiquio pahui ecuea eyami. Jjeya nei pishana eya manojeꞌyo, Eyacuiñajjija esohui jayojja cuaje miquianaja mimishi cuijeaꞌyojji. ¡Jamajjeya miquianaaya jiquio pahui ijjiacue; jamatii apoquiapoquiacue! Jiquiajja ijjia majje ¡miquianaya jjashahuabaquicue e manoꞌya cuajo! 
\p  
\v 20 Majoya ijjiaꞌijjiajeyo majje Jesosaa caneco jjeshe ca oꞌoya cua. Jjeshe majje jama huohuime aca cua baꞌa: —Jiquio jjonojjajja na ecuea enaꞌ, de. Ecuea enaꞌ cuayaquiꞌyajo eya manojeꞌyo. Jamajjeya Eyacuiñajjiya cuijea cajeꞌyo tii ojjañaja mimishi cuana. Eyacuiñajjiya esohui eyacua quia cajeꞌyo baꞌa: “Ojaya epeejji cuanaja mimishi cuana cuijea mee cajeꞌyo tii ecuea enaꞌ cuayaquijeya”. 
\p  
\v 21 Majoya aje Jesosa jama cua baꞌa: —Yani oe ese nijje e shajjaꞌajjajji nisho cuani; ijjiaꞌijjiani ese nijje, de. Maaya eya sohuinano cuana iña mee cajeꞌyo.  
\v 22 Eya manojeꞌyo, Eyacuiñajjija esohui jama cuanaje jojoya. Eꞌe de, ma e shajjaꞌajjajji nisho Eyacuiñajjiya quea nee nee po mee cajeꞌyo. Ohuaya ma e shajjaꞌajjajji jeajea cajeꞌyo cuaqui yasijje e ohua sohuinano cuana iña mee cajeꞌyojojo —jamaya aca cua Jesosaa. 
\p  
\v 23 Majoya aje o shajjaꞌajjajji cuana mimia cua jama baꞌa: —De, ¿aya shai jama acaje? —jama mimime o shajjaꞌajjajji cuana cua. 
\s1 ¿Ache o shajjaꞌajjajji quea bame nee nee cuaje eyajo? 
\p  
\v 24 O shajjaꞌajjajji cuana mimipanajaji nequia cua. Oya cuana jama cua baꞌa: —¿Ache o shajjaꞌajjajji quea bame nee nee cuaje eyajo? 
\p  
\v 25 Jesosaa jama huohuime aca cua baꞌa: —Miquianaya mimiani ecuea epeejji pojjeama jayojja, de. ¡Aꞌa jama jjashahuabaquijji! Jamatii miquianajaya eba emeshi mese cuana quea mase cuani ojaya echacojji cuana nijje. Jamatii ma echacojji cuaa shajjaꞌajja cani ojaya emeshi meseja esohui jayojja oya quea mase cuanijojo. Ojaya echacojji cuana quea bihui nisho cuani.  
\v 26-27 ¡Miquianaya ma emeshi mese jayojja jama aꞌa pojji! ¡Eyajo emeshi mese jayojja quea bame nee nequi sa cuanijo pea cuana jjeya nei baꞌe meesahuacue! ¿Ache shai quea bame nee nee soꞌo? Emeshi mese, ojaya echacojji pojjaꞌa. Emeshi mese, de. Jamaya Eyacuiñajjija epeejji pojjeama jjashahuabaquiani. Ecuea epeejji cuana ca e jayojja cabaꞌyahua. Eyaya miquianaya baꞌe bame meesahuaña. Eya maseꞌama cuani miquiana nijje; miquiana chacosahuajji cuani eya, de. ¡Jamaya pocue e jayojjaya! Majoya quea bame cuaje —jamaya Jesosa cua. 
\p  
\v 28 Majoya Jesosaa o shajjaꞌajjajji cuana jama huohuime aca cua baꞌa: —Miquianaya jamatii poꞌayequiequinaje enijje. Jjapeequi tiitiinequinaje enijje, jamatii beca cuaa eseya cajaa acanaje.  
\v 29-30 Jamajojoya aje oe miquianaya Eyacuiñajjiya quea bame quia cani, e ohua acanaje jayojjaya. Eꞌe, ohuaya eya ojjaña dejja cuanaja Emeshi Mese nei po mee caꞌyonaje; jamaya eyaya miquianaya Jodio dejja cuanaja emeshi mese jayojja po meejeꞌyo eyajo. Jomajo eseya baꞌe tiitiijeꞌyo; quea bihui cuaje —jamaya aca cua Jesosaa o shajjaꞌajjajji cuana. 
\s1 Jesosa Peno nijje mimia cua 
\r (Mateo 26.31-35; Macoso 14.27-31; Huani 13.36-38) 
\p  
\v 31 Majoya Jesosa mimia cua Peno nijje. Penoja pea bajjani cua baꞌa: Simohui. Jama Jesosa cua baꞌa: —Simohui, shajjaꞌajjacue jiquio esohui baꞌa: Edosiquiaa miquianaya eya pajea meeꞌyo sa acani. Ohuaya miquianaya mimishi po meeꞌyo sa acani.  
\v 32 Simohui, eya miminaje mijo Eyacuiñajji nijje. Miyaya eya cajaa jayojja aje. Majoya miya enijje jjapeequi neineije oꞌoya. Jamajjeya enijje jjapeequi oꞌoya majje ¡pea e shajjaꞌajjajji cuana jjapee tiitiiqui meesahuacue enijje! 
\p  
\v 33 Simohui jama cua baꞌa: —Ecuea Emeshi Mese nei, Jesosa, eya aje minijje tiiya poquije mi jeanobia caje yasijje mi jayojja peaꞌai manoꞌyome poꞌyohua. Ecuea aje mi epajeaꞌyojji pojjeama. 
\p  
\v 34 Jesosaa Peno jama aca cua baꞌa: —Peno, mecahuajje cachina yahue taaa jjimahuajo, miya jama siajje pome cuaje baꞌa: “Chojja, ecuea Jesosa ba jjima”. Pea beca peejjima siajje ameya aje miyaya —jamaya Jesosa cua. 
\s1 Beshahua nei acua Jesosa eꞌiñajji 
\p  
\v 35 Majoya aje Jesosaa o shajjaꞌajjajji cuana jama huohuiꞌajjame aca cua baꞌa: —Yahuajo pishana eyaya miquianaya huoojeanaje esohui huohuiya. Eyaya miquianaya huoojeanaje aemaꞌ jamatii bejjomaꞌ, bashosocomaꞌ, miquea ejiojjijo nei nequi dojonaje. Eyaya miquianaya jaahuananaje. ¿Aꞌa miquianaya quea shoe cuanaje? Chojja. 
\p Oya cuana jama cua baꞌa: —Eꞌe jojo nei, jaahuana neinajeya aje jja ca miyaya ecuana, de. 
\p  
\v 36 Majoya aje Jesosa jama cua baꞌa: —Eꞌe de, jjeya ca ca beca cuaa eya quecua cajeꞌyo. Eya miquiana nijje nequi tii ajja jiquio meshijo, eya manoꞌyo majje. ¡Jamajjeya ca oe miquea bejjo dojocue; miquea bashosocojo biyocuatajeacue quea huesha epoquijji! ¡Jjequicue miquea equecuajji! Chamajo jjeshecue miquea daqui moo sosejje.  
\v 37 Eꞌe de, yahuajo Eyacuiñajjija etehueꞌyo ejo jama cua baꞌa: “Dejja mase cuanaja botiꞌama Eyacuiñajjija huoojeaꞌyo cuaje. Dejja mimishi jayojja acajeꞌyo. Jamajjeya quecua cajeꞌyo cuaa” jamaya acaje jjeyahua nei, de —jamaya Jesosa cua. 
\p  
\v 38 O shajjaꞌajjajji cuana jama cua baꞌa: —Bacue, yani ecuanaja beca equecuajji. Ecuanaa sohuinano cuana quecuajeꞌyo, de. 
\p Jesosa jama cua baꞌa: —Miquianajaya ba jjima ecuea esohui, de. Mahuiso ecuea esohui —jamaya Jesosa cua. 
\s1 Jetesemani quejo Jesosa mimia cua Eyacuiñajji nijje 
\r (Mateo 26.36-46; Macoso 14.32-42) 
\p  
\v 39 Majoya Jesosa poquia cua Onimo eyiyo huasijje mimiya oja Chii nijje. Cuamaya oya poqui majamaja nequia cua mimiya Eyacuiñajji nijje. Onijje o shajjaꞌajjajji cuana poquia cua peaꞌai.  
\v 40 Majoya aje Jesosaa jama aca cua baꞌa: —¡Mimi majamajacue oe Eyacuiñajji nijje mimishiꞌama epojji! 
\p  
\v 41 Majoya Jesosa poquia cua quea huesha pishana mimiya Eyacuiñajji nijje oe nei. Majoya oya ecuiꞌoshajjajo nequi majje mimia cua jama baꞌa:  
\v 42 —Eꞌe de, Eyacuiñajji, eya beshahua nei poqui sa po ajja acui ecueataꞌapee yasijje. Eya quea mete nee nee ojjañaja mimishi cuanajo, de. Ecue Chii, ecuea eba miyaya eya acui ecueataꞌapee yasijje poqui mee sa aña emanoꞌyojji ojjañaja mimishijo. Jamajjeya ¡quea caꞌa po meecue eya miquea ejjashahuabaquiꞌyojji jayojja jama eꞌajji! —jama mimimeya Jesosa cua. 
\p  
\v 43-44 Jesosa quea mano jjabaquia cua emanoꞌyojji jjejojo. Majoya mimi oꞌoya cua oja Chii nijje jjanobajjima nei. O janobajjima nei mimianijo, shishi majje enaꞌ jayojja oquequia cua meshi yasijje, de. Majoya aje esohuidojojji eyajje nequioquea cua Jesosa meteꞌama po meeya. Ohuaya majoya Jesosa quea nee caꞌa po mee ca cua; jama cua baꞌa: —¡Mique Chiija esohui jayojja jama acue! —jamaya aca cua. 
\p  
\v 45 Majoya Jesosa oja Chii nijje mimipajeaꞌyo majje oya poquia cua o shajjaꞌajjajji cuana huasijje. Ba ca cua oya cuana ecahuijaa quea yeno nee nee jjejojo, de.  
\v 46 Ohuaya oya cuana jama aca cua baꞌa: —¿Apiojji acuae miquianaya ecahuijaa soꞌo? ¡Anisohuacue jja oe; mimi majamajacue miquianaya Eyacuiñajji nijje! Jamajoya pea cuaa quea mimishi epo meeꞌyojji pojjeama —jamaya Jesosa cua. 
\s1 Jesosa iña ca cuaa cua 
\r (Mateo 26.47-56; Macoso 14.43-50; Huani 18.2-11) 
\p  
\v 47 Jesosa mimianijo tii Jodio etii cuana, sohuinano cuana, Eyacuiñajji nijje mimiani etii cuana peaꞌai cueya cua. Jodasa, Jesosa shajjaꞌajjajji nisho cueya cua o que. Oya ehui dojojji nei cueya cua. O eꞌiñajji jjanequichipiquia cua Jesosa nequi yasijje. Jjanequichipiqui majje shemo tojjo nisho ca cua.  
\v 48 Majoya aje Jesosaa jama aca cua baꞌa: —Jodasa, miyaya eya shemo tojjo nisho majje sohuinano cuana iña meeꞌyonaje. ¿Yajjajo Jodasa? —jamaya Jesosa cua. 
\p  
\v 49 Majoya o shajjaꞌajjajji cuaa ba majje Jesosa jama huohuiꞌajjame aca cua baꞌa: —Jesosa, ¿aꞌa ecuaaya sohuinano cuana jajajeaje? 
\p  
\v 50 Majoya aje oe oja eshajjaꞌajjajjiya dejja esapa jajapojojeajji nisho eshajja jajasejjajea ca cua ebañei shajjajje. Eyacuiñajji nijje mimiani etiija echacojji cuanija eshajja, de. 
\p  
\v 51 —Chojja, ¡aꞌa jja oe jajajji! —Jesosa cua. 
\p Majoya Jesosaa ma dejjaja eshajja ejajasejjajea emeya nequia caꞌya cua. Shajja jaja jjima jayojja shajja panaꞌyome aca cua.  
\v 52 Majoya Jesosaa dejja cuana jama huohuiꞌajjame aca cua baꞌa: —¿Apiojji miquianaya cueyanaje baajji, acuijji eꞌiñaa? ¿Aꞌa cuae jja iña siipojji soꞌo?  
\v 53 Eꞌe de, ojjaña pojjajo eya esohui huohui po nequinaje Eyacuiñajjija equijo. Miquianajaya eya iña jjima cuanaje ma equijo quea meteya jjejojo dejja cuanajo. Jjeya ca ca Edosiquiaa miquianaya iña mee canaje jiquio quejo dejjamajo. 
\s1 Peno Jesosaja epeejji nisho jayojja cua 
\r (Mateo 26.57-58, 69-75; Macoso 14.53-54, 66-72; Huani 18.12-18, 25-27) 
\p  
\v 54 Majoya sohuinano cuaa Jesosa iñaꞌyo majje dojo ca cua Eyacuiñajji nijje mimiani etiija equi yasijje. Penohua ca ca quea huesha pishana quiquishi ca poquia cua.  
\v 55 Majoya pea sohuinano cuaa cuaqui dahuahuojje ca cua equi epeeyi dojjojo. Majoya anioquea cua cuaqui pejjejo ejjayoquijji. Peno peaꞌai anioquea cua ona nijje yajja Jesosa onaa acaje ebajji.  
\v 56 Echacojji ahuemaꞌaniya Peno jjayoquiani ba majje cojja ba neinei ca cua. Ba majje pea cuana jama huohuime aca cua baꞌa: —Eꞌe, joya Jesosaja epeejji ani baꞌa —jamaya cua ahuemaꞌani. 
\p  
\v 57 Peno jama cua baꞌa: —Ecuea Jesosa ba jjima nei nei. 
\p  
\v 58 Quijje pishana pea dejjaa Peno ba ca oꞌoya cua. Jama cua baꞌa: —Miya jja Jesosaja epeejji, o shajjaꞌajjajji cuani. 
\p —Chojja, ecuea Jesosa ba jjima nei nei —jamaya aca cua Penohua. 
\p  
\v 59 Majoya quijje pishana peaa oya ba ca oꞌoya cua: —Eꞌe, oya jja Jesosaja epeejji nei nei. Oya jja Janinea meshijo baꞌe Jesosa jayojjaya. 
\p  
\v 60 Majoya aje Peno jama cua baꞌa: —Chojja de, ¿ajeo ajja mi ca mimiani soꞌo? 
\p Peno miminequijo tii, oe cachina yahue taaa cua.  
\v 61 Ma cachina taaajo Jesosa jjanequijea pajjaquia cua Peno bajji. Majoya aje Peno jjashahuabaquia cua Jesosaja ehuohuijo jama baꞌa: “Cachina yahue taaa jjimahuajo, pea beca peejjima siajje ameya aje miyaya, eya ba jjima nisho aje”.  
\v 62 Majoya Peno cuayaquia cua. Pa neineiꞌya cua Jesosa ba jjima nisho epo jjejojo; quea yeno nee neeꞌya cua. 
\s1 Jesosa Jodio dejja cuaa niñeba ca cua 
\r (Mateo 26.67-68; Macoso 14.65) 
\p  
\v 63 Sohuinano cuaa Jesosa jaahuana ca nequia cua, cuaya meequiꞌyo jjima yajji. Majoya Jesosa niñeba ca cuaa cua, majoya Jesosa cuia ca cua.  
\v 64 Majoya cuia majje cojja japa ca cua. Cojja japa majje shemo cuiasejjajea ca cua. Shemo cuiasejjajea majje ohuaya cuaa Jesosa jama huohuiꞌajjame aca cua baꞌa: —¿Aya acuae mi cuia canaje soꞌo? ¡Jjashahuabaꞌajjaqui! 
\p  
\v 65 Majoya sohuinano cuaa Jesosa niñebajea neinei caꞌya cua, mimijaji neineiꞌya cua onijje. 
\s1 Pea cuaa Jesosa dojo ca cua Jodio etii cuana huasijje huohuiꞌajjaa 
\r (Mateo 26.59-66; Macoso 14.55-64; Huani 18.19-24) 
\p  
\v 66 Jjapojjaquiajo Jodio etii cuana jjachichaquia cua. Ojjaña Jodio etii, Eyacuiñajji nijje mimiani etii, Moisesija etehueꞌyo huohuijji etii cuana, ojjaña ojee mimia cua Jesosajo. Majoya sohuinano cuaa Jesosa dojo ca cua Jodio etii cuana huasijje. Majoya aje etii cuaa Jesosa jama huohuiꞌajjame aca cua baꞌa:  
\v 67 —¡Huohuicue ecuanaya miquea ebajjani! ¿Aꞌa miquea ebajjani Quito, Eyacuiñajjija huoojeaꞌyo, pojjaꞌa? 
\p Jesosaa jama sajaꞌame aca cua baꞌa: —Eya “eꞌe” cuajo miquianaya jjashajjaꞌajjaqui ajja, de.  
\v 68 Miquianaya eyaya huohuiꞌajjajje sajaꞌa jjima ajeꞌyo eya. Jamaya eya sajaꞌajje miquianajaya eya epichojeaꞌyojji pojjeama.  
\v 69 Eꞌe, eya poquijeꞌyo jjeya nei pishana eyahuasijje Eyacuiñajji nijje ebañeijje aniꞌyohua. Jomajo ecue Chii quea sohui poja nee nee enequi tii tii —jamaya Jesosa cua. 
\p  
\v 70 Majoya aje Jesosa ojjañaa jama huohuiꞌajjame aca cua baꞌa: —¿Aꞌa miya Eyacuiñajjija Bacua Ejja nei soꞌo? 
\p Jesosaa jama sajaꞌame aca cua baꞌa: —Eꞌe jojo nei miquiaaya esohui ejo aña. 
\p  
\v 71 Majoya aje oya cuana jama mimijajime cua baꞌa: —¡De, pea dejja aꞌa iyaajji Jesosa huohuijji! Ecuana jjeya nei shajjaꞌajjanaje ojaya esohui. Ohuaya Eyacuiñajji niñeba canaje Eyacuiñajjija Bacua Ejjaa miame —jama mimijajimeya cua Jesosa nijje. 
\c 23  
\s1 Jesosa emeshi mese Pinato huasijje dojo ca cua 
\r (Mateo 27.1-2, 11-14; Macoso 15.1-5; Huani 18.28-38) 
\p  
\v 1 Majoya ojjaña nequisohua majje poquia cua emeshi mese Pinato huasijje Jesosa dojohua. Pinato esohuinano mese cua, ojjaña emeshi mese cuanaja emeshi mese peaꞌai cua.  
\v 2 Jesosa dojo majje Pinato cojja nei nequia ca cua Jodio etii cuaa. Onaaya Jesosa jama niñebame aca cua baꞌa: —Ecuaa jiquio dejja banaje. Mimitecuetecuequi ecuanaja meshijo. Oya jama cuanaje baꞌa: “¡Aꞌa bejjo quiajji emeshi mese sosequiajji!” Oya pa Eyacuiñajjija huoojeaꞌyo cuani; oya pa Jodioja emishi mese posa cuani, de —jamaya oya cuana siajje cua Jesosajo. 
\p  
\v 3 Majoya Pinatohua Jesosa jama huohuiꞌajjame aca cua baꞌa: —¿Aꞌa miya Jodioja emeshi mese cuani? 
\p Jesosaa jama sajaꞌame aca cua baꞌa: —Miyaya huohuiaña jayojjaya cuani eya. 
\p  
\v 4 Majoya Pinatohua etii cuana jama huohuime aca cua baꞌa: —De, jiquio dejja jjashahuaba taiqui ajja, capichojeaꞌyahua jja, de. 
\p  
\v 5 Oya cuana quea quene nee nee cua. Mimia cua janobajjima nei nei. Jama tecuetecueme cua baꞌa: —Oya ca ca jjashahuaba taiquinaje, de. Ohuaya esohui huohui ca ayequiequinaje ojjaña cuiñajji yasijje. Ebionei Janinea meshijo hohui canaje, jjeya Jodea meshijo huohui canaje jiquio cuiñajji cuana huasijje, jjeya nei peaꞌasi, de. Ojjaña quea quene nee nee, quea shajjaquijjo nee nee ohuaya po mee canaje cuana —jama siajje ameya aca cua Jodio etii cuaa. 
\s1 Jesosa dojo ca cua pea emeshi mese que, Enode que 
\p  
\v 6 Pinatohua ona shajjaꞌajja majje jama huohuiꞌajjame aca cua baꞌa: —¿Aꞌa jiquio dejja Janineajo baꞌe? 
\p  
\v 7 —Eꞌe —oya cuana cua. 
\p Pinatohua ma shajjaꞌajja majje Jesosa huojea ca cua Enode que, Janinea ameshi mese que. Enode Jenosanenajo ania cua anicuaa poqui. Jamajjeya Pinatohua Jesosa, Jodio etii cuana peaꞌai huoojea ca cua Enode que. 
\p  
\v 8 Enode Jesosa ba majje jama cua baꞌa: —Eꞌe de, jjeya nei eyaya baña jiquio dejja Jesosa. Eyaya oya ba sa anaje ojaya esohui eshajjaꞌajjajji; emanoꞌyo cuana eshequi mee cajeꞌyo ba sa anaje peaꞌai —jamaya cua Enode. Oya ca ca Jesosaja epeejji po sa po ajja nei. 
\p  
\v 9 Majoya Enodeya huohuiꞌajja majamaja ca nequia cua. Jesosaja oya Enode sohui sajaꞌa jjima cua.  
\v 10 Jodio etii cuaa Jesosa niñeba neinei ca aña cua.  
\v 11 Majoya Enodeya, oja sohuinano cuaa Jesosa hueꞌe ca cua esoadojojji. Daqui quea sose huiso emeshi meseja jayojja Jesosa huosho mee ca cua emeshi mese nisho yajji. Majoya aje daqui huosho mee majje bihuia nisho ca cua. Majoya aje Jesosa huoojea ca oꞌoya cua cuaa Pinato que.  
\v 12 Ma pojjajo Jesosa nijje mimijaji majje Enode Pinato nijje jjapeequinaje. Yahuajo Pinato Enodeja epeejji pojjeama cua. 
\s1 Jesosa Pinatohua mano mee caꞌya cua 
\r (Mateo 27.15-26; Macoso 15.6-15; Huani 18.39–19.16) 
\p  
\v 13 Majoya aje Pinato jjachichaquia cua Jodio etii cuana nijje, Jenosanena emeshi mese cuana nijje, pea dejja cuana nijje peaꞌai.  
\v 14 Jama huohuime aca cua baꞌa: —Miquianaya ¿apoijji Jesosa yenaje soꞌo? Miquianaya jama cuanaje baꞌa: “Ohuaya ojjaña dejja cuana quea quene, quea shajjaquijjo po mee cani” poso anaje. Cho oya ca ca quea mimishi pojjeama cuani. E que miquiaaya yajo aje jja, eyaya Jesosa huohuiꞌajjanaje. Jjeya nei ecuea eba Jesosa, oya jjashahuaba taiqui ajja. Oya quea mimishi pojjeama. Joya ecua miquiaaya huohui yaña jama pojjeama.  
\v 15 Enode jama cuanaje baꞌa: “Oya ca jja ca quea mimishi pojjeama, de”. Jamajjeya ohuaya Jesosa huoojea ca oꞌoyanaje e que. ¡Bacue! Eyaya Jesosa mano meeꞌyo jjima aje, capichojeaꞌyahua jja Jesosa, de.  
\v 16 Jamajjeya eyaya oya cuia meeje. Majoya aje cuia mee majje pichojea meejeꞌyo —jamaya cua Pinato. 
\p  
\v 17 Ojjaña eshequiaja Pascuajo Pinatohua oe ejeanobia nequi huoojeacuaya caꞌyaninaje, Jodio cuana quea bei epojji. Jamajjeya Pinato jama cua baꞌa: —Jesosa eyaya huoojeacuaya meejoꞌyo jiquio shejo. 
\p  
\v 18 Ma esohui shajjaꞌajja majje ojjaña Jodio cuana quenequene neineiꞌya cua; taaa cua jama baꞌa: —Chojja, ¡Mashama ca oe huoojeacuayaꞌyocue! ¡Quecua meeꞌyocue Jesosa! 
\p  
\v 19 Mashama jeanobia ca cua yahuajo pishana, oya quea mase nee nee cua. Oya Shomano emeshi mese quecuapanajji epo; ona quecuaꞌyojji epo peaꞌai. Oya quea mimishi nee nee cua. 
\p  
\v 20 Pinatohua ca ca Jesosa huoojeacuayaꞌyo sa aca cua, jamajjeya jama mimome po oꞌoya cua baꞌa: —Cho, Jesosa ca ca oe huoojeacuaya meeꞌyo sa aña. 
\p  
\v 21 Ojaya esohui shajjaꞌajja majje ojjaña cuana janobajjima nei nei jama taaame cua baꞌa: —Chojja de, ¡Jesosa ca oe quecua meeꞌyocue jjeya nei! ¡Acui ecueataꞌapeejo oe baꞌehuanasohuajeacue! 
\p  
\v 22 Pinatohua jama huohuime aca oꞌoya cua baꞌa: —¿Apiojji shai miquianaaya oya mano meeꞌyo sa aña soꞌo? Oya ca jja ca quea mimishi pojjeama cuani. Eyaya oya cuia neinei meeꞌyo majje huoojeacuaya meejeꞌyo.  
\v 23 Majoya aje ojjaña cuana taaa oꞌoya cua jama baꞌa: —¡Baꞌehuanasohuajeacue oe acui ecueataꞌapeejo Jesosa! 
\p Ojjaña cuana taaa majamaja cua. Quenequene neineiya cua Pinato nijje.  
\v 24 Jamajjeya pinato jama jjashahuabaquime cua baꞌa: —Eꞌe de, eyaya Jesosa caquecua meejeaꞌyahua, dejja cuana enijje quea quene cuequijojo. Eyaya ca oe Mashama cahuoojeacuaya meeꞌyahua. 
\p  
\v 25 Majoya aje pinatohua ma ecua ojjaña taaanaje jama jayojjaya aca cua. Jamajjeya ohuaya Mashama huoojeacuaya mee caꞌya cua; Jesosa ca ca oe huoojea ca cua acui ecuetaꞌapeejo emeꞌ cacajeajji emanoꞌyojji. 
\s1 Jesosa baꞌehuanasohuajea ca cua acui ecueataꞌapeejo 
\r (Mateo 27.32-44; Macoso 15.21-32; Huani 19.17-27) 
\p  
\v 26 Majoya sohuinano cuaa Jesosa acui ecueataꞌapeejji dojo mee ca cua o baꞌehuanasohuajeajji. Jesosa saja ca cua acui quea biquieya jjejojo. Jamajjeya sohuinano cuaa oe dejja ma acui dojo mee ca cua. Oya Simoni bajjani cua; Sinene meshijo baꞌe cue cua. Jamajjeya Simoniya Jesosa quiquishijji dojo ca cua acui ecueataꞌapee abojji.  
\v 27 Ojjaña dejja cuana epona cuana peaꞌai pa poquia cua Jesosajo quea yeno jjejojo.  
\v 28 Jesosaa epona cuana ba majje jama aca cua baꞌa: —Jenosanenajo baꞌe epona cuana, ¡aꞌa oe ejo pajji! ¡Miquianaja pa sa cuanijo pacue miquianajo miquianaja bacuajo peaꞌai!  
\v 29 Quijje pishana quea camaja cuaje miquianajo. Miquianaaya jama huohuije baꞌa: “Oe epona bacuamaꞌ camajaꞌama baꞌyani”. Sohuinano cuana cueje jiquio cuiñajji yasijje miquiana quecuaa, chamaꞌyo tii cuaje miquianajaya bobi. Jamajjeya miquianajaya ebacua yanijo quea yeno nee nee cuaje. Ebacua cuana pa neineijeꞌyo bobimajo.  
\v 30 Dejja cuana quea yeno nee nee cuaje peaꞌai. Joya ecua atii manoꞌyo sa cuani jama miquianaya cuaje. Majoya miquianaya jjashahuabaquije jama baꞌa: “Eyiyo, ¡ecuana biajje oe jaabicha cuajicue ecuana cuia cuajiꞌyojji” jamaya miquianaya cuaje. Eꞌe epona cuana, miquianaya ani sa po ajja cuaje quea camaja baꞌe jjejojo. Jamajjeya ma pojjajo quea nee nee cuaje.  
\v 31 Jjeya nei sohuinano cuaa eya quecua cajeꞌyo. Maya ca ca oe quea tai pishana. Quijje ojjaña sohuinano cuaa miquianaya quecua jeyojeyo cajeꞌyo, maya quea tai nee nee cuajeꞌyo. Jamajjeya ¡aꞌa pajji ejo; miquianajoya jja oe pa neineicue! —jamaya Jesosaa aca cua. 
\p  
\v 32 Majoya sohuinano cuaa beca siipojji dojo ca cua Jesosa nijje ebaꞌehuanasohuajeajji.  
\v 33 Majoya oya cuana poquia cua eyiyo Sapa Jjii bajjani yasijje. Bañaqui majje Jesosaja emeꞌ caca ca cua acui ecueataꞌapeejo; ejiojjijje peaꞌai caca ca cua. Cacajeyo majje nequiasohuajea ca cua. Ma becanejjijji peaꞌai siipojji pea acui ecuetaꞌapee cuanajo nequiasohuajea ca cua Jesosa pejjejo oe ebañei mijijje, pea shani mijijje.  
\v 34 Acui ecueataꞌapeejo baꞌehuanasohuajea cajje Jesosa mimia cua Eyacuiñajji nijje ojjaña nequijo jama baꞌa: —Ecue Chii, ecue Chii jiquio dejja cuanaja ba jjima eꞌe jojo nei eya miquea Ebacua Ejja cuani. Jamajjeya ¡jiquio mimishi cuijeaꞌyocue! 
\p Majoya aje sohuinano cuaa Jesosaja daqui huijjiajeaꞌyo majje hueꞌe ca cua oja daqui yaꞌyojjiya.  
\v 35 Ojjaña dejjaa Jesosa ba ca nequia cua, Jodio etii cuaa peaꞌai. Niñeba ca cua Jesosa jama baꞌa: —Dee, ¿aꞌa Jesosa ojjaña jaahuanajji pojjeama cuanaje? Oya ona nahuejji pojjeama. Jamajjeya mi nequioqueꞌyani acui ecuetaꞌapeejo baꞌe. Oya Eyacuiñajjija Bacua Ejja jjabaqui majje jja ca oe jjeyahua neiya canequioqueꞌyahua —jama niñebameya Jodio etii cuaa aca cua. 
\p  
\v 36 Sohuinano cuana mimijajia cua peaꞌai. Jesosa majoya quiaꞌajja ca cua jjonojjajja na sese eꞌishijji nisho.  
\v 37 Jama mimijajime cua baꞌa: —¡Miya Jodioja emeshi mese nei jjabaqui majje mee nei nequioqueꞌyocue acui ecuetaꞌapeejo baꞌe jjeyahua nei! 
\p  
\v 38 Jesosa baꞌe sapa biajje oja bajjani etehueꞌyo caca ca cua jama baꞌa: 
\s1 Oya Jesosa, Jodioja emeshi mese epoꞌyojji 
\p  
\v 39 Oe siipojji pea acui ecueataꞌapeejo baꞌe mimijajia cua Jesosa nijje jama baꞌa: —¡Aꞌa cuae miya Eyacuiñajjija Bacua Ejja nei jjabaꞌajjaqui socue! ¡Ache oe nequioqueꞌajjaquiꞌyo socue; ecuanaya peaꞌai pajjaja oe che nequioque meequiꞌyoque! 
\p  
\v 40 Pea siipojjiya pea acui ecueataꞌapeejo baꞌeya ca ca ma esohui shajjaꞌajja majje tanacua ca cua jama baꞌa: —¡Aꞌa jjashahuaba taiquijji, de! ¿Aꞌa miya Eyacuiñajjijo jjashahuabaqui ajja nei nei? Jjeya se manojeꞌyo.  
\v 41 Eseya mano mee caꞌyani sohuinano cuaa quea mimishi nee neejojo. Jesosa ca ca mimishiꞌama, de. 
\p  
\v 42 Majoya aje ohuaya Jesosa jama aca cua baꞌa: —Jesosa, ¡miya eyahuasijje poquiꞌyo majje ejo che jjashahuaba bamequicue! 
\p  
\v 43 Majoya Jesosaa jama aca cua baꞌa: —Eꞌe, jiquio pojjajo miya enijje eyahuasijje baꞌesohuaquijeꞌyo manoꞌyo majje. 
\s1 Jesosa manoꞌya cua 
\r (Mateo 27.45-46; Macoso 15.33-41; Huani 19.28-30) 
\p  
\v 44 Majoya esheque biacojjajja nequijo, shequimaꞌpo mee caꞌya cua. Quea apo nee nee po mee caꞌya cua ojjaña meshi yasijje. Quijje nei jjapojjaqui mee caꞌya cua eshequi ejjanequijeapaaquijo.  
\v 45 Eshequi quea apo nee nee poꞌyajo, Eyacuiñajjija equijo baꞌehuana baꞌe daqui moo nei jjaꞌisajeaquia cua eyiyesama neijje.  
\v 46 Majoya aje Jesosa jjanobajjima nei taaa cua jama baꞌa: —Ecue Chii, ecue Chii eyaya mi que ecue dojjoshahua huoojeajeꞌyo. Jjeyahua mo poquijeyoje. 
\p Jama po majjeya poquijeya cua. 
\p  
\v 47 Sohuinano huoojeajji cuani meseya Jesosa manoꞌyajo, ba ca cua. Majoya jama cua baꞌa: —Eꞌe de, eꞌe jojo nei Jesosa mimishiꞌama nei nei cuanaje; oya Eyacuiñajjija Bacua Ejja cuanaje, de. 
\p  
\v 48 Ojjaña dejja o ba cuequi poquiꞌya cua. Eseꞌo cuiaqueyajea ca poquiꞌya cua quea yeno nee neeya jjejojo sapa cuana cuiapashijea ca poquia cua.  
\v 49 Ojjaña Jesosaja epeejji cuana ca ca quea huesha nequia cua. Epona cuaa peaꞌai quea huesha aniya ba ca cua Jesosa onaa cuia caꞌyoqui acui ecueataꞌapeejo baꞌe. Ma epona cuana yahuajo nei jjapeequia cua Jesosa nijje, Janinea meshijo baꞌe. 
\s1 Jesosa mei jjani yasijje huananobia ca cua 
\r (Mateo 27.57-61; Macoso 15.42-47; Huani 19.38-42) 
\p  
\v 50-51 Oe dejja Jose bajjani quea aquiana huiso cua. Oya pea Jose, Amatea cuiñajjijo baꞌe. Oya jjapee tiitiiquia cua Jesosa nijje. Oya Jodio etii cua. Jesosa manoꞌyo jjimahuajo, oya Jodio etti cuana nijje jjachichaquia cua. Ohuaya beca etii cuana jama huohuime aca cua baꞌa: —Chojja de, eya ca iña Jesosa mano mee sa poꞌyo ajja. 
\p  
\v 52 Jamajjeya Jesosa manoꞌyajo Jose poquia cua Pinato que Jesosa epoquijeyo baꞌe huohuiꞌajjaa; jama aca cua baꞌa: —Eꞌe de, ¡Jesosa mo quiaꞌyoque! Oya ca ca mano neineiꞌyonaje. Eyaya oya dojojeꞌyo ecuea mei jjani yasijje ehuananobiaquiꞌyojji. 
\p  
\v 53 Majoya aje ohuaya Jesosa manoꞌyo baꞌe jjequioquea caꞌya cua acui ecuetaꞌapeejo baꞌe. Jjequioqueaꞌyo majje bebo caꞌya cua daqui oshe quea bojea nee neeya. Bebo majje mei jjani ai yasijje huananobiaa dojo ca cua manoꞌyo tii cuanaja ejaajji ajjima huasijje.  
\v 54 Sinecua nei, ejomishocajji epojja po jjimahuajo Jesosa huananobiaa dojo ca cua Joseya. 
\p  
\v 55 Janinea meshijo baꞌe epona cuana Jose quishishi poquia cua mei jjani yasijje Jesosa emanoꞌyo baa. Jesosa mei jjanijo huana ca cua Joseya. Epona cuaa Jesosa emano neiꞌyojaa baqui ca cua shiyeshiyejo eshaquijji nisho. Majoya Joseya mei quea quemo jeacajjajja ca cua mei jjani naba capaꞌyojji.  
\v 56 Majoya epona cuaa Jesosa jjanijo ehuananobia jaa ba majje shiyeshiyejo shaqui jjima aca cua. Jamajjeya poquiꞌya cua ocuayaya equi yasijjeya. Majoya acui shiye pohuipohui shiyeshiye acua aca cua Jesosaja eyami shaquijji nisho. Shaqui jjima aca cua ejomishocajji pojja jojoya. Jamatii Jodio dejja cuana ma pojjajoya chacochaco ajja cua. 
\c 24  
\s1 Jesosa shequiꞌya cua 
\r (Mateo 28.1-10; Macoso 16.1-8; Huani 20.1-10) 
\p  
\v 1 Mecajjeahua nei nei nomico pojjajo, epona cuana poqui oꞌoya cua Jesosa ba oꞌoyaa. Shiyeshiye acuaꞌya dojo ca cua jjani jaa huasijje, Jesosaja eyami shaa nisho ihui jjima epojji.  
\v 2 Epona cuaa ba cañaquia cua mei jjani ecaꞌapejoꞌyo cua.  
\v 3 Oya cuana dobiquia cua ma mei jjani dojjo huasijje Jesosa baa nisho. Dobiqui majje Jesosa chamaꞌ ba caꞌya cua.  
\v 4 Majoya quea mete nee nee poꞌya cua Jesosa chamaꞌ ba majje. Ma meteꞌyoquiya aje eponaa beca esohuidojojji dejja jayojja ba ca cua o pejjejo nequi. Ojaya daqui quea oshe nee nee, quea siyo nee nee cua.  
\v 5 Epona cuana quea mete nee nee cua; ecojja cahui cua quea cojja sajaja jjejojo. Majoya aje esohuidojojjiya jama huohuime aca cua baꞌa: —¿Yajjajo acuaeya miquianaya saꞌajjaña Jesosa jiquiojo soꞌo? ¿Aꞌa emanoꞌyo poso? Chojja, oya shequiꞌyonaje. ¡Chamaꞌyo ca jja ca jiquiojo! ¡Oya ca jja ca eshe nequiꞌyo!  
\v 6 ¿Aꞌa jja miquianaaya Jesosaja esohui pajeaꞌyonaje ma ohua yahuajo huohui ca cua Janinea meshijo nequiahuaa?  
\v 7 Jesosa yahuajo pishana, manoꞌyo jjimahua, jama cua baꞌa: “Mimishi cuaa eya mano mee cajeꞌyo acui ecueataꞌapeejo. Pea beca peejjima cahuime po majje shequijeꞌyo” jamaya cua Jesosa manoꞌyo jjimahua. Jamajjeya ¡aꞌa quea mete pojji! —jamaya aca cua esohuidojojjiya. 
\p  
\v 8 Ma esohui shajjaꞌajja majje epona cuaa Jesosaja esohui shahuaba caꞌya cua.  
\v 9 Majoya aje poqui cuajicuajiꞌya cua pea cuana huohuiꞌyohua. Huohui cañaquia cua o shajjaꞌajjajji cuana, ojjaña cuana peaꞌai Jesosa shequiꞌyonajejo.  
\v 10 Mania Madanena, pea Mania Jacoboja nae, Huana, pea epona cuana peaꞌai poquia cua huohui poꞌyohua.  
\v 11 O shajjaꞌajjajji cuaa epona cuana ohua huohui cajje, jama aca cua baꞌa: —Epona cuana, siajje mi ca cuani Jesosa eshequiꞌyojo miame. Miquianajaya esohui shajjaꞌajja sa po ajja ca iña —jamaya cuaa aca cua. 
\p  
\v 12 Peno ca ca quea cuejipashi nei poquia cua mei jjani yasijje baꞌajjaꞌyohua. Bañaqui majje mei jjani yeꞌeꞌajja cañaquia cua ma Jesosa jaa cuajo. Ba ca cua o bebojji oe ani, oja jeajeanaꞌyo jja oe ania cua. 
\p —De, chamaꞌyo Jesosa yaña, de —jamaya Peno cua. Jamaya po majje poqui oꞌoya cua equi yasijje. Poquianijo oya jjashahuabaquia cua Jesosajo. Ojaya ba jjima; jamajjeya jama cua baꞌa: ¿Yajja shai poꞌyonaje Jesosa? —jamaya cua Peno. 
\s1 Becanejjijji peaꞌai o shajjaꞌajjajjiya Jesosa ba ca cua Emao jiojjijje poquijeya 
\r (Macoso 16.12-13) 
\p  
\v 13 Oya pojjajo tii, becanejjijji peaꞌai o shajjaꞌajjajji cuana poquia cua Emao cuiñajji yasijje. Quea huesha pishana cua Jenosanena ebañaquijji.  
\v 14 Jesosa emanoꞌyo niñeba ca poquia cua.  
\v 15 O mimi poquijejo Jesosa jjanequichipiquia cua onijje. Jjanequichipiqui majje onijje poquia cua.  
\v 16 Jesosa ba majje ba tai caꞌyonaje, pea dejja posoya aca cuaa cua.  
\v 17 Majoya aje Jesosaa jama huohuiꞌajjame aca cua baꞌa: —¿Aꞌya cuae nequiaa ca niñeba poquiaje soꞌo? 
\p  
\v 18 Majoya Quiopasiya jama sajaꞌame aca cua baꞌa: —¿Aꞌa miquea eba ma onaa acanaje Jenosanenajo? 
\p  
\v 19 Majoya aje jjaja Jesosa jama cua baꞌa: —¡Huohuiꞌajja socue mo yajja acuae mi cuanaje! 
\p Oya jama aca cuaa cua baꞌa: —Jesosa Nasanenajo baꞌe. Oya quea sohui poja nee nee cuanaje. Ohuaya Eyacuiñajjija esohui huohui canaje, de. Ojjaña dejja jjashahuabaquinaje ojaya esohuijo.  
\v 20 Majoya Jodio etii cuaa, emeshi mese cuaa, Jesosa iña mee caꞌyonaje, acui ecueataꞌapeejo quecua mee caꞌyonaje.  
\v 21 Ecuana jjashahuabaquinaje Jesosa Jodio dejja cuanaja emeshi mese epojjijo Eyacuiñajjija huoojeaꞌyo peaꞌaijo. Oya ca ca chamaꞌyo tii poꞌyonaje, de. Pea beca peejjima cahuime oya emanoꞌyojaa.  
\v 22 Jiquio pojjajo mecajjeahua nei nei epona cuana poquinaje mei jjani yasijje Jesosa shaa nisho. Jjajjasoaquinaje Jesosa chamaꞌyojojo.  
\v 23 Jesosa emanoꞌyojaa baꞌyo jjima cuanaje, jamajjeya cue oꞌoyanaje huohui poꞌyohua. Majoya aje pa ponaa ohuaya esohuidojojji ani ba canaje jjani dojjojo ani. Jama huohuimeya aje pa pona majoya acanaje baꞌa: “Jesosa ca ca emanoꞌyo tii pojjeama jaa, shequiꞌyonaje ca coma” jamaya pa pona acanaje.  
\v 24 Majoya epona cuaa huohui cajje poquinaje beca cuana mei jjani yasijje. Mei jjani bañaqui majje chamaꞌ Jesosa ba canaje. Ma ecua epona cuaa esohui acanaje jayojjaya cuanaje. Onajaya Jesosa eshequiꞌyo baꞌyo jjima tii cuanaje, de —jamaya mimia cua o shajjaꞌajjajji cuana. 
\p  
\v 25 Majoya aje Jesosaa jama huohuime aca cua baꞌa: —Miquianaya jjashahuabaqui ajja Eyacuiñajjija esohuijo.  
\v 26 ¿Aꞌa miquianajaya ba jjima Eyacuiñajjija huoojeaꞌyo ebionei camanoquiꞌyahua? Majoya shequiꞌyo majje, eyahuasijje poqui majje Eyacuiñajji ebañeijje anioquejeꞌyo tii tii ojjañaja Emeshi Mese epoꞌyojji tii tii. Jamaya yahuajo tehue ca cua Eyacuiñajjija esohuijo. ¿Aꞌa miquiaaya pajeaꞌyonaje pojjaꞌa? —jamaya Jesosaa aca cuana cua. 
\p  
\v 27 Majoya poquijeya Jesosaa oya cuana huohui ca poquia cua ojjaña Eyacuiñajjija esohui ojo. Ohuaya huohui coo ca cua Moisesija ojo oja tehue majoya pea esohui huohuijji cuanaja ojo oja tehue huohui ca cua. 
\p  
\v 28 Majoya Emao ba cañaquia cua. Majoya aje bañaqui majje Jesosa ca jjayejjeꞌajjaquinana cua.  
\v 29 Majoya aje o shajjaꞌajjajji cuaa Jesosa jama aca cua baꞌa: —Siña coma, jjaapoquia coma. ¡Ecuana nijje oe cahui chichacue! —jamaya cuaa aca cua. 
\p Majoya Jesosa onijje dobiquia cua oe equi yasijje.  
\v 30 Majoya aje anioquea cua eꞌijjiaꞌijjiajji. Majoya aje anioque majje Jesosaa pahui jjeshe ca cua. Pahui jjeshe majje Eyacuiñajji nijje mimia cua. Eyacuiñajji nijje mimi majje pahui miji ca cua. Majoya aje miji majje quia ca cuana cua.  
\v 31 Pahui quia cajje Jesosa bahuejja caꞌya cuaa cua. Jama cua baꞌa: —Eꞌe de, aꞌa jja mi Jesosa, de. Eꞌe jojo nei miya shequiꞌyonaje, de —jamaya o shajjaꞌajjajji cuaa aca cua. 
\p Majoya aje Jesosa jjachamaquiꞌya cua, de.  
\v 32 Majoya aje cuana jama mimime po ania cua baꞌa: —Eꞌe de, eꞌe jojo nei mi eyaya anaje yaña, de. Ecuea equijijji peyaanaje o shajjaꞌajja majje. Quea bihui nee eseya cuanaje Eyacuiñajjija esohui shajjaꞌajja majje. 
\p  
\v 33 Majoya aje o shajjaꞌajjajji cuana ocuayaya cueꞌya cua Jenosanena huasijjeya mecajje tiiya. Bañaqui majje ba ca cua pea Jesosaja shajjaꞌajjajji cuana, 11 ejjachichaqui ani pea epeejji cuana nijje.  
\v 34 Pea cuaa majoya jama aca jjequia cua baꞌa: —Eꞌe jojo nei, de. Jesosa shequiꞌyonaje. Simohuija eba nei nei oya cuanaje. 
\p  
\v 35 Majoya aje Emao huasijje poqui cuaa jama huohuime aca cua baꞌa: —Ecuana poquianijo Emao huasijje, oe dejja poquinaje ecuana nijje. Oya miminaje ecuana nijje, de. Majoya ecuana ijjiaꞌijjianaje ojee. Ohua pahui miji cajo ecuaaya oya bahuejjanaje Jesosa cuanaje, de. Oya ca ca shequiꞌyonaje, eꞌe jojo nei, de. 
\s1 Jesosa ba ca cua o shajjaꞌajjajji cuaa 
\r (Mateo 28.16-20; Macoso 16.14-18; Huani 20.19-23) 
\p  
\v 36 Jesosa jjapanaquia cua ona mimiani yiyesamajo. Jesosa jama cua baꞌa: —¡Yani eya, de! ¡Quea bei oe pocue nequiana! 
\p  
\v 37 Jesosa ba majje quea mete nee nee cua o shajjaꞌajjajji cuana eshahuajo poso.  
\v 38 Jesosa majoya jama cua baꞌa: —¿Yajjajje acuae nequiana quea mete cuani soꞌo? ¿Apiojji miquianaya jjashahuaba quehuaquiani?  
\v 39 ¡Bacue mo oe! Ecuea eme jjoto huejja namoja quecua huejja yani, ejiojjijje peaꞌai, de. Eyami nei jja iña iquio, eshahua pojjeama. Eshahua ca jja ca yamimaꞌ, samaꞌ peaꞌai, de. ¡Napaꞌajja socue mo, ecuea eyami; ba neineiꞌajja socue mo! 
\p  
\v 40 Majoya Jesosaa ojaya eme jaꞌa ca cua, ejiojji peaꞌai.  
\v 41 Onaaya ca Jesosa pojjeama poso aca cua quea bihui jjejojo. Jjashahuabajeaqui jjima cua. Jamajjeya Jesosaa oya cuana huohuiꞌajja ca cua ejjashahuaba meequijji jama baꞌa: —¡Bacue eya, eyami nei; che mo bobi quiacue nequiaa! Eya ca ca eshahua pojjeama, eshahua cuana ca ca ijjiaꞌijjia ajja. 
\p  
\v 42 Majoya aje onaaya Jesosa nahuoo cuaquijo dahua quia ca cua.  
\v 43 Jesosaa nahuoo ijjia ca cua, ona cojja nei aniya.  
\v 44 Majoya ohuaya jama aca cua baꞌa: —Eyaya manoꞌyo jjimahuaa miquianaya huohuinaje pea cuaa eya quecua mee cajeꞌyo. Majoya eya shequije oꞌoya. Jamaya Moisesija etehueꞌyojo, cua, Salmo etehueꞌyojo peaꞌai huohui ca cua ejo. Ojjaña Eyacuiñajjija esohui huohuijji cuaa ejo tehue ca cua peaꞌai —jamaya Jesosa cua. 
\p  
\v 45 Majoya Jesosaa huohui ca cua Eyacuiñajjija etehueꞌyo ona jjabahuejjaquijji.  
\v 46 Ohuaya jama aca cua baꞌa: —Jama tehuemeꞌya cua baꞌa: “Eyacuiñajjija huoojeaꞌyo ojjaña jaahuanajji manojeꞌyo. Manoꞌyo majje shequijeꞌyo pea beca peejjima cahuime po majje.  
\v 47 Ojjaña cuaa ojjaña meshi yasijje cahuohui caꞌyahua Eyacuiñajjija esohui, ojaya epeejji epojji. Ebionei Jenosanenajo cahuohui coo caꞌyahua. Eyacuiñajji nijje cajjapeequiꞌyahua, mimishi cuana capajea caꞌyahua. Majoya pea cuiñajji cuana huasijje capoquiahua ojaya esohui huohuiya”.  
\v 48 Jjeya nei miquianaaya eya banaje, shajjaꞌajjanaje jiquio esohui. Jamajjeya ¡aꞌa pajeaꞌyojji; huohui tiitiicue!  
\v 49 ¡Bacue oe, eyaya Edojjoshahua Bame huoojeaje miquiana huasijje, miquiana quea bame baꞌe meejji! Ecue Chiiya yahuajo huohui canajeya jjejojo Edojjoshahua Bame huoojeajeꞌyo eyaya. Jamajjeya ¡jiquiojo tii anicue! ¡Jenosanenajo tii ishoaꞌajjacue Edojjoshahua Bame nei cueje eyajo ani! Ohuaya miquianaya quea jjashahuabaqui jaꞌa po mee cajeꞌyo —jamaya Jesosa cua. 
\s1 Jesosa poquiꞌya cua eyahuasijje 
\r (Macoso 16.19-20) 
\p  
\v 50 Majoya aje Jesosaa o shajjaꞌajjajjii cuana dojo ca cua Betania huasijje. Bañaqui majje Jesosaa eme jeasohua ca cua, jama mimime cua baꞌa: —¡Enijje jjapee neineiquicue! ¡Jjashahuabaquicue Eyacuiñajjijo miquianaya quea caꞌa epojji! 
\p  
\v 51 Majoya aje Jesosa eyahuasijje poquiꞌya cua.  
\v 52 Oya cuana Jesosajo quea bihui nee nee poꞌya cua. Majoya aje huacuayaya cueꞌya cua Jenosanena huasijje quea bihui nee nee.  
\v 53 Majoya aje poqui majamaja nequia cua Eyacuiñajjija equi yasijje Eyacuiñajji bihuiaa. 
\p Eꞌe de, acua. Eyaya, Nocaa tehuejeyonaje. Mahuisoya.