\id JHN - Ese Ejja NT -Bolivia 2012 (DBL -2013) 
\h HUANI 
\toc1 Huaniya Esohui Quea Pame Nee Tehue Canaje Jesosa Quitoja 
\toc2 Huani 
\toc3 Jn 
\mt2 HUANIYA ESOHUI QUEA PAME NEE TEHUE CANAJE JESOSA QUITOJA 
\mt1 JUAN 
\c 1  
\s1 Eseya Eyacuiñajji ba meeya Jesosa Quito meshi yasijje poeyanaje ese jayojja yamijji 
\p  
\v 1 Yahuajo nei nei meshi, aquiana cuana, dejja peaꞌai pana jjimahuajo, Jesosa Quito yaña tiiya poa Eyacuiñajji nijje. Eꞌe, oya Eyacuiñajji nei neiya eꞌe jojo nei poa.  
\v 2 Eꞌe, oya Eyacuiñajji nijje yaña poa yahuajo nei nei meshi cuana, ojjaña aquiana cuana pana jjimahuajo.  
\v 3 Eyacuiñajjiya oya pana mee caꞌya poa aquiana, meshi cuanaya, dejja, epona peaꞌai, ojjaña pana caꞌya poa Jesosa Quitohua. Ojjaña aquiana pana jjima jjemo, chamaꞌ pome.  
\v 4 Eꞌe, oya, Jesosa Quito, yaña tiitiia poa. Ohuaya eseya Eyacuiñajji ba mee cani. Jamajjeya ohuaya baꞌe tiitii mee cani eseya cuana. Eyacuiñajjijo quea jaꞌa jjashahuabaqui mee cani peaꞌai.  
\v 5 Jamatii mecajje quea apo nee neejo cuaquijijiya jeajaꞌa cani. Jiquio ecua cuaquijiji mecajje jijinequiani jama jayojja Jesosaa dejja mimishi cuana quea jaꞌa nee jjashahuabaqui mee cani. Eshahuaa Jesosa Quito eseya jaahuana pajea mee sa acani. Chojja. Ohuaya ojaya epeejji cuana jaahuana tiitii cani. Eꞌe, oya cuaquijiji quijjoꞌyo ajja jama. 
\s1 Huani, Sacaniaja bacua ejja 
\p  
\v 6 Oe dejja Jodea meshijo baꞌe Huani bajjani Eyacuiñajjiya huoojea canaje Jesosa Quitojo huohuiya.  
\v 7 Eyacuiñajjiya Huani jama acanaje baꞌa: —¡Poquicue miya! Ojjaña huohuiquicue jama baꞌa: “Eyacuiñajjija huoojeaꞌyo ma cuaquijiji quijjoꞌyo ajja jayojja poeyani ojjaña cuana quea jaꞌa jjashahuabaqui meeya. Jamajjeya ¡onijje jjapeequicue!” 
\p Jamajjeya Eyacuiñajjiya Huani huoojea canaje. 
\p  
\v 8 Oya Huani ma cuaquijiji jayojja jama pojjeama; oya ca ca oma oe poquinaje Jesosa Quitojo huohuiya, ma cuaquijiji jayojjajo huohuiya. 
\p  
\v 9 Eyacuiñajjiya Jesosa huoojea canaje meshi yasijje. Ohuaya ojjaña cuana quea jaꞌa jjashahuabaqui mee caje Eyacuiñajjijo.  
\v 10 Eꞌe, oya ma cuaquijiji jayojjaya poeyanaje dejja cuana nijje baꞌeya. Yahuajo ohuaya meshi cuana, dejja cuana peaꞌai pana caꞌya poa. Jamatii oya dejja cuanaja ba jjima ojjaña cuana panaꞌyojji epo.  
\v 11 Eꞌe, oya poeyanaje Jodea meshi yasijje, ojaya huapa pojjeama cuana huasijje. Jamatii oya cajaa acanaje beca cuaa: —¡Chojja, oya Eyacuiñajji bameejji pojjeama! —poso beca cuaa acanaje. 
\p  
\v 12 Beca cuaa ca ca Jesosa Quitoja esohui shajjaꞌajja canaje. Ojo jama acanaje baꞌa: —Eꞌe jojo nei oya Eyacuiñajji ese bameejji poani —acanaje beca cuaa. 
\p Jamaya jjashahuabaquianijo, Jesosaa oya cuana Eyacuiñajjija bacua cuana po mee canaje jama baꞌa:  
\v 13 Yahuajo eseja ejeajjiya eseya jea ca poa; eseja enaeseya eseya mejo ca poa. Jamajjeya eseya cuayani ese ejjaja bacua, Eyacuiñajjija bacua pojjeama. Eyacuiñajjiya ca ca eseya oja bacua a sa acanijo ohuaya ohuaye nei eseya oja bacua po mee cani. 
\s1 Esohui quea bihui nee Jesosa Quitojo 
\p  
\v 14 Jamajjeya oya Eyacuiñajji ese ba meeya poeyanaje yamijji, ese cuana nijje baꞌeya. Ecuanaa oya banaje quea caꞌa nee nee. Oja Chiiya oya, oja Bacua Ejja oe nei quea caꞌa nee huoojea canaje meshi yasijje ese cuana jaahuana tiitiijji. Ohuaya ojjaña Eyacuiñajjija esohui eꞌe nei huohui canaje ojjaña huasijje peaꞌai. 
\p  
\v 15 Huaniya ojo huohui canaje. Majoya oya ba majje taaanaje jama baꞌa: —¡Bacue! Jjeya nei pea dejja quea pame nee poeje. Yahuajo nei nei e cuaya jjimahuajo oya yaña tiitiia poa Eyacuiñajji nijje. Jamajjeya oya quea caꞌa nee nee; eya quea caꞌa pishana —poanaje Huani. 
\p  
\v 16 Eꞌe, eseya shajjamaꞌ poani. Jamatii ohuaya ojjaña cuana quea jea nee nee atiitii cani quea pame nee nee.  
\v 17 Yahuajo nei nei esohui huohuijji Moisesiya esohui Eyacuiñajjija ehuohuiꞌyo cuana tehue majje ba mee caꞌya poa. Jesosa Quitohua, ma Eyacuiñajjija huoojeaꞌyo ojjaña jaahuanajjiya ca ca ojjaña cuana ba mee canaje Eyacuiñajjiya eseya cuana quea jea nee nee acani, ojaya esohui eꞌe nei ba mee cani peaꞌai.  
\v 18 Eyacuiñajji Echii Ai jjacojja ba meequi ajja tii. Jamatii oja Bacua Ejja oe nei Eyacuiñajji nei peaꞌai, Eyacuiñajji nijje nequi, oja Chii nijje tii. Ohuaya eseya Eyacuiñajji ba mee cani, oja Chii. 
\s1 Huaniya, ma ona besameejji poaniya huohui canaje Jesosa Quitojo 
\r (Mateo 3.11-12; Macoso 1.7-8; Noca 3.15-17) 
\p Huaniya, ma ona besameejji poaniya Betania cuiñajjijo, Jodana cuei ojje mijijje nequi, ojjaña cuana Eyacuiñajjijo besa mee canaje.  
\v 19 Jamajjeya Jenosanena cuiñajjijo baꞌeya Jodio dejja etii cuaa Huani que huoojea canaje Eyacuiñajji nijje emimijji cuana, Eyacuiñajjija equi jaahuanajji cuana peaꞌai. Huani ba majje huohuiꞌajja canaje: —¿Aꞌya cuae mi soꞌo? ¿Aꞌa miya Eyacuiñajjija huoojeaꞌyo ojjaña jaahuanajji? 
\p  
\v 20 —Chojja —sajaꞌame acanaje Huaniya—, chojja, eya Eyacuiñajjija huoojeaꞌyo ojjaña jaahuanajji pojjeama. Eya ca ca iña Quito pojjeama —poanaje. 
\p  
\v 21 —Jamajjeya ¿aꞌya cuae mi oe soꞌo? —huohuiꞌajja canaje—. ¿Aꞌa miya Enia, Eyacuiñajjija esohui huohuijji yahuajo baꞌya poa? 
\p —Chojja —sajaꞌame acanaje Huaniya—. Eya Enia pojjeama. 
\p Jamajjeya huohuiꞌajja ca oꞌoyanaje cuaa jama baꞌa: —Eꞌe. Yahuajo Moisesiya huohui ca poa Eyacuiñajjija pea esohui huohuijji nei poeje. ¿Aꞌa miya ma esohui huohuijji neiya? 
\p —Chojja —Huaniya acanaje. 
\p  
\v 22 Jamajjeya Jodio cuaa Huani huohuiꞌajja ca oꞌoyanaje: —¿Aꞌya cuae mi oe? ¿Aꞌya cuae mi poani soꞌo, de? ¡Huohuicue mo oe! Jodio etii cuaa ecuana huoojea canaje mi baa. ¿Yajja huohuiñaquiꞌyome acuae oe aje o que poqui oꞌoya majje soꞌo? 
\p  
\v 23 Jamajjeya Huaniya sajaꞌa canaje jama baꞌa: —Yahuajo nei nei Eyacuiñajjija esohui huohuijjiya Isaiaa ejo huohui ca poa jama baꞌa: 
\q1 “Quijje esohui huohuijji poeje esohui huohuiya. Meshi quimajo huohui huichaꞌa huichaꞌa caje jama baꞌa: “Emeshi mese nei poeje. ¡Jamajjeya oe apoa pocuajicue! ¡Jamajje o poeyajo, ojaya esohui quea jaꞌa nee shajjaꞌajja neineiꞌyocue!” 
\m Jamaya acaꞌya poa Isaiaa yahuajo —Huani poanaje. 
\p  
\v 24-25 Jamajoya ma Jodio dejja cuanaa Huani huohuiꞌajja ca oꞌoyanaje: —¿Aꞌa eꞌe jojo nei miya Eyacuiñajjija huoojeaꞌyo ojjaña jaahuanajji pojjeama? ¿Aꞌa cuae mi Enia pojjeama, ma Eyacuiñajjija esohui huohuijji yahuajo baꞌya poa pojjeama soꞌo? ¿Aꞌa cuae mi Eyacuiñajjija pea esohui huohuijji nei, ma ecuanaja etiiquiaa ishoaꞌajja caninaje pojjeama soꞌo? ¿Achajjajo acuaeya oe miyaya ecuana, Jodio cuana, besa meeaña Eyacuiñajjijo soꞌo? —poanaje cuana. 
\p  
\v 26 Huaniya jama acanaje baꞌa: —Eyaya miquianaya Eyacuiñajjijo besa meeaña cuei enajo. Pea dejja jiquio tiijo nequi. Jjeya oya miquianajaya ba jjima.  
\v 27 Oya quijje pishana miquianajaya eba poaje Eyacuiñajjija huoojeaꞌyo ojjaña jaahuanajji. Oya ca ca oe nei quea caꞌa nee nee nequi. Eya ca iña quea caꞌa nee pishana. Jamajjeya aje oe eya Jesosa Quito cojja neijo nequi sa po ajja. Eya quea bicho, de. 
\p  
\v 28 Jamaya poanaje Huani Betaniajo, Jodana cuei ojje mijijje nequi, ojjaña cuana Eyacuiñajjijo besa mee canijo. 
\s1 Jesosa Quito Eyacuiñajjija huoojeaꞌyo ojjaña cuanaja mimishijo manoꞌyohua 
\p  
\v 29 Majoya mecahuajje Huaniya ojjaña huasijje esohui huohui ca oꞌoyanijo, Jesosa o que poeyanaje. Huaniya Jesosa ba majje ojjaña cuana huohui neinei canaje jama baꞌa: —¡Bacue oe, oya poeyani Jesosa, Eyacuiñajjija huoojeaꞌyo! Oya manojeꞌyo ojjaña cuanaja mimishi cuijeaꞌyojji. Eꞌe, Eyacuiñajji nijje emimijji cuaa ñajjajja cuia majje Eyacuiñajji yasijje dahua cani oya mimishi cuanajo queneꞌama epo meejji. Ñajjajja jayojja jama poajeꞌyo Jesosa; manojeꞌyo ojjaña cuanaja mimishi cuijea neineiꞌyojji —Huani poanaje—.  
\v 30 Eꞌe, yahuajo pishana eyaya miquianaya huohuinaje ojo jama baꞌa: Jjeya nei pea dejja quea pame nee nee poeje. Yahuajo nei nei e cuaya jjimahuajo oya yaña tiiya poa Eyacuiñajji nijje. Jamajjeya oya quea caꞌa nee nee; eya quea caꞌa pishana —Huani poanaje. 
\p  
\v 31-33 —Eꞌe, yahuajo oya ecuea ba jjima poa. Jamatii Eyacuiñajjiya e huoojea jjimahuajo huohui canaje jama baꞌa: “¡Dejja cuana besa meecue enajje ejo! Besa meeañajo, miyaya baje oe dejja. Ecuea Edojjoshahua Pame huiaꞌ jama ma dejja sapa biajje cuabesa baꞌeje; jjapashineijje baꞌeoquejeꞌyo. Maya ecuea ecue Bacua Ejja, ecue huoojeaꞌyo. Ohuaya ojjaña miquiana que Edojjoshahua Pame dobiqui mee cajeꞌyo, miquiana quea jaꞌa nee nee ejjashahuabaqui meejji” eya acanaje Eyacuiñajjiya —Huani poanaje. 
\p —Eꞌe, eyaya eꞌe jojo nei banaje jama baꞌa: Eya Jesosa besa meeañajo, eyatahuatahua jjacaꞌapejoquinaje. Eyacuiñajjija Edojjoshahua Pame huiaꞌ jama o sapa biajje cuabesa baꞌenaje. Jjapashineijje baꞌeoquenaje. Jamajjeya jjeya oya ecuea eba nei nei, Jesosa. Yahuajo miquianajaya oya ba jjima. Jamajoya eya poeyanaje ojjaña Eyacuiñajjijo besa meeya. Miquianaya oya Eyacuiñajjija huoojeaꞌyo ojjaña jaahuanajji ba meeya eya poeyanaje peaꞌai.  
\v 34 Jamajjeya eyaya miquianaya huohui neineiaña: Eꞌe jojo nei nei eyaya oya banaje. Jesosa ca ca oe eꞌe jojo nei Eyacuiñajjija Bacua Ejja oe nei —poanaje Huani Jodio cuana nijje. 
\s1 Jesosaa iyaa canaje beca dejja onijje eꞌani tiitiijji, o shajjaꞌajjajji 
\p  
\v 35 Majoya mecahuajje Huaniya, ma ona besameejji poaniya jomajo, Jodana cuei sahuajo nequiya esohui huohui canaje oja epeejji nijje, becanejjijji peaꞌai nijje.  
\v 36 Jesosa jjayejjequiani ba majje Huaniya oja epeejji cuana huohui canaje jama baꞌa: —¡Bacue Jesosa! Oya Eyacuiñajjija huoojeaꞌyo. Oya manojeꞌyo ojjaña cuanaja mimishi cuijeaꞌyojji. 
\p  
\v 37 Huanija esohui Jesosajo shajjaꞌajja majje oja epeejji becanejjijji peaꞌai Jesosa nijje poquinaje.  
\v 38 Jesosaa ejiojjijje poquijeya Huanija beca epeejji o quiquishijji poquije bajea canaje. Ba majje huohuiꞌajja canaje: —Epeejji cuana, ¿ajeo miya enijje poeyani? 
\p —Esohui huohuijji —sajaꞌa canaje—, ecuana poeyanaje mi baa; mi shajjaꞌajja sa poani. ¿Achejo baꞌe miya? —poanaje. 
\p  
\v 39 —Eꞌe —Jesosa poanaje—, ¡ocue poeꞌajja! ¡Cuaꞌa, enijje poꞌyocue! 
\p Jamajjeya Jesosa nijje poquinaje equi yasijje, o baꞌe yasijje. Onijje aninaje ma pojjajo, eshequi oquequiajo; o shajjaꞌajjajji poꞌyonaje oya cuana, ma bajjani baꞌa: Anesi oja epeejji nijje peaꞌai.  
\v 40 Eꞌe, Anesi pea dejja nijje Huanija ehuohui shajjaꞌajja majje Jesosa nijje poquinaje. Anesi ca ca Simohuija echahua mese, ma quijje bajjani canaje Penoja echahua mese.  
\v 41 Jamajjeya mecajjeahua nei Anesiya oja oꞌi saꞌajja canaje. Ba majje huohui canaje: —Oꞌi, eyaya Eyacuiñajjija huoojeaꞌyo ese jaahuanajji banaje, Jesosa Quito. 
\p  
\v 42 Majoya Anesiya oja oꞌi Simohui bajjani Jesosa que dojo canaje. Simohui ba majje Jesosaa huohuiꞌajja canaje jama baꞌa: —Epeejji, miya ecuea eba. Miya Huanija bacua ejja, Simohui bajjani. Eyaya miya bajjanijeꞌyo ecuea esohuijo Sepa bajjani —poanaje. Jienoja esohuijo Peno bajjani canaje, Ese Ejjaja esohuijo Mei bajjani. 
\s1 Jesosaa iya canaje pea cuana onijje eꞌani tiitiijji, o shajjaꞌajjajji 
\p  
\v 43 Majoya mecahuajje, mecajjeahua nei Jesosa poquinaje Janinea meshi yasijje, Jodana cuei ojje miji yasijje. Poqui jeahuaa Penipe ba canaje. Ba majje iyaa canaje: —Penipe, ¡ocue poeꞌajja, enijje poꞌyocue; ecuea epeejji poꞌyocue! —Jesosaa acanaje; o que poquiajo ojaya epeejji pojji acaꞌyonaje. 
\p  
\v 44 Penipe, Peno, Anesi peaꞌai ca ca oe Betesaida cuiñajjijo baꞌe.  
\v 45 Jamajjeya Penipeya oja epeejji Natanaeni saꞌajjaqui canaje. Ba majje huohui canaje: —Ecuea epeejji, ecuanaa Eyacuiñajjija huoojeaꞌyo ese jaahuanajji banaje. Ojo Eyacuiñajjija esohui huohuijjiya yahuajo nei nei baꞌya poaa, Moisesiya peaꞌaiya tehue ca poa, ma ojjaña Jodio cuaa ishoaꞌajja caniya. Oya Jesosa bajjani, Joseja bacua ejja, ma Nasanena cuiñajjijo baꞌenaje. Eyaya maya banaje, de —poanaje Penipe. 
\p  
\v 46 —¿Aꞌa oya Nasanenajo baꞌenaje? Jomajo pa jjaja chamaꞌ dejja quea pame —poanaje Natanaeni. 
\p —Chojja —poanaje Penipe—, ¡poecue, oya bahuacue! 
\p  
\v 47 Jamajjeya oya cuana poquinaje Jesosa baa. Majoya Natanaeni poeje ba majje Jesosa onijje miminaje jama baꞌa: —Eꞌe Natanaeni, miya Jodio eꞌe jojo nei. Eyacuiñajji shajjaꞌajjajji poani. Miya ca ca oe siajje po ajja nei nei peaꞌai. 
\p  
\v 48 Ma shajjaꞌajja majje Natanaeni jama poanaje baꞌa: —¿Aꞌa eya miquea eba? ¿Ache shono acuaeya miyaya eya banaje soꞌo? —poanaje. 
\p —Natanaeni, miya ecuea eba yahuajo. Penipeja iyaa jjimahuajo, iquena acui yajjanajo ani eyaya miquea ejjashahuabaquijji banaje —Jesosa poanaje. 
\p  
\v 49 Jamajjeya Natanaeniya acanaje: —Esohui huohuijji, eꞌe jojo nei miya Eyacuiñajjija Bacua Ejja oe nei poani tii. Eꞌe, ¡miya Jodio cuanaja Emeshi Mese nei! 
\p  
\v 50-51 Jesosaa oya huohui canaje: —Eyaya miya huohuinaje jama baꞌa: “Eyaya miya banaje iquena acui yajjanajo ani”. Jamajjeya ecuea esohui shajjaꞌajja majje miya jjashahuabaquinaje jama baꞌa: “Eꞌe jojo nei miya Eyacuiñajjija Bacua Ejja”. Jamajoya miyaya baje Eyacuiñajjiya eya ma dejjaja ba jjima amee cajeꞌyo. Cuanaya Eyacuiñajjija esohuidojojji cuana nequioqueje e jaahuanaa, ojjañaja Edoe Mese jaahuanaa. Jamaya miyaya bajeꞌyo, Natanaeni, enijje jjapeequianijo —Jesosa poanaje. 
\c 2  
\s1 Oe dejja jjahuanaquinaje Cana cuiñajjijo 
\p  
\v 1 Majoya beca cahuime po majje oe dejja jjahuanaquinaje Canajo, Janinea meshijo. Ejjahuanaquijjijo quea huiso cuana iyaa canaje ojee ijjiaꞌijjiaa. Jesosaja enaese Mania iyaa canaje peaꞌai.  
\v 2 Jesosa o shajjaꞌajjajji cuana nijje poeyanaje peaꞌai jjahuanaquije baa, ojee ijjiaꞌijjiaa peaꞌai.  
\v 3 Ojee ijjiaꞌijjia anijo, acuijjajja na ishijeyo canaje cuaa. Jamajjeya Jesosaja enaese onijje miminaje jama baꞌa: —Jesosa, bacue, acuijjajja na ishijeyo canaje cuaa. Oe poanaje. ¿Ae eꞌishiꞌyojji? 
\p  
\v 4 —Ecue nae, ¿yajjajo acuae moya huohuiꞌajjaña acuijjajja najo? ¡Ishoa socue oe! Quijje pishana eyaya oya cuana asahuaje —Jesosa poanaje. 
\p  
\v 5 Jamajjeya ojaya enaeseya echacojji cuana huohui canaje jama baꞌa: —¡Jesosaja esohui jayojjaya nequiaa oe acue! —poanaje Mania. 
\p  
\v 6 Jomajo me oejje oe, 6 meshimisi ena nequijji quea quemo nee nee, quea ao nee nee yani, 60 litros shojji. Ma meshimisijo ena nequia cani eme shacua huichaꞌa huichaꞌajji. Jamaya oya cuaa acanaje ijjiaꞌijjia jjimahuajo.  
\v 7 Jamajjeya Jesosaa echacojji cuana jama acanaje baꞌa: —¡Ena shocue meshimisi ai cuana huasijje! —poanaje. 
\p Echacojji cuana: —Eꞌe —poanaje. 
\p Meshimisi ai cuana huasijje ena sho canaje. Cuatajea mee canaje.  
\v 8 Jamajjeya cuatajea cajo, Jesosaa echacojji cuana jama acanaje baꞌa: —Eꞌe. ¡Jjeya oe pojji dojocue equi mese yasijje! 
\p Jamajjeya oe pojji dojo canaje eꞌishi meeꞌajjajji.  
\v 9 Ma ena ishiꞌajja canaje equi meseya. Jamatii ojaya ba jjima jiquio eteohuejjajo nequi ena Jesosaa acuijjajja na pojji acanaje. Echacojji cuanaja eba ojaye nei Jesosaa eteohuejjajo nequi ena acuijjajja na pojji acaꞌya poa; pea cuanaja ba jjima.  
\v 10 Jamajjeya equi meseya ishi majje joya ejjahuanaquijji iyaa canaje. Huohui canaje jama baꞌa: —Epeejji, jiquio acuijjajja na quea pame nee nee. Pea cuaa acuijjajja na quea pame, quea biquia nee ishi mee cani ebionei. Majoya ojjaña jejje majje acuijjajja na quea biquia pishana quia cani. Miyaya ca ca oe acuijjajja na quea biquia nee, quea pame nee nee quijje nei ishi meeaña —poanaje eꞌequi mese. 
\p  
\v 11 Jamaya acanaje Jesosaa Janinea meshijo, Canajo. Jamaya ohuaya ma dejjaa ajjima acani acoo canaje. Ba majje ojjaña cuana jama poanaje baꞌa: —Eꞌe jojo nei Jesosa quea caꞌa nee nee. Ohuaya ojjaña acani, ma dejjaa ajjima acani peaꞌai. 
\p O shajjaꞌajjajji cuana peaꞌai jama poanaje baꞌa: —Eꞌe jojo nei Jesosa Eyacuiñajjija huoojeaꞌyo ojjaña jaahuanajji, Quito. 
\p  
\v 12 Majoya Jesosa Capenaoma huasijje poquinaje. Oja nae, oja chahua cuana, ojaya epeejji cuana peaꞌai onijje poquinaje. Jomajo aninaje cuana oe pojji cahuime. 
\s1 Eyacuiñajjija equi yasijje poqui majje Jesosaa aquiana quiajji cuana huoojeacuayajea canaje 
\r (Mateo 21.12-13; Macoso 11.15-18; Noca 19.45-46) 
\p  
\v 13 Quijje pishana ojjaña Jodio cuana Jenosanena huasijje poquinaje quea bihui nee ojee ijjiaꞌijjiaa ma shejo baꞌa esohuidojojji cuaa yahuajo Ejito meshijo Jodioja ebacua cuana cuiaꞌyo jjima shejo. Ma epajeaꞌyojji pojjeamajo jjachichaquinaje. Jamajjeya Jesosa peaꞌai poquinaje Jenosanena huasijje. Poe majje Eyacuiñajjija equi yasijje poquinaje.  
\v 14 Dobiqui majje Jesosaa ba canaje quea huiso dejja cuaa aquiana quia cani; anaꞌai yahue cuana, ñajjajja cuana, huiaꞌ cuana peaꞌai quia cani. Bejjo pea bejjo sosejje quia caqui ba canaje peaꞌai.  
\v 15 Ba majje Jesosaa jjono ecuiasejjajeajji iña canaje. Dejja aquiana quiajji cuana, ñajjajja cuana, anaꞌai cuana peaꞌai cuiahuoojeacuayajea canaje esecue yasijje, ojjaña.  
\v 16 Bejjo pea bejjo sosejje quiajji cuanaja bejjo nequijji cuana jeapajjajea canaje; bejjo jjahuojjojeajeaqui canaje. Huiaꞌ quiajji cuana Jesosaa huohui canaje jama baꞌa: —Jiquio equi ca ca ecue Chii nijje emimijji. Aquiana quiajji pojjeama equi. ¡Miquea aquiana cuana dojoꞌyocue esecue yasijje! ¡Aꞌa jja oe Eyacuiñajjija equi aquiana quiajji equi jayojja jama ajji! —Jesosa poanaje. 
\p  
\v 17 Ma ba majje ecuana, Jesosaja epeejji cuana, ojee jjashahuabaquinaje jama baꞌa: —Eꞌe, Eyacuiñajjija esohui huohuijjiya yahuajo nei nei tehue ca poa jama baꞌa: 
\q1 “Ecue chii, eya jjashahuaba neineiquiani miquea equi jaahuanajji. Jamajjeya mimishi cuaa eya niñeba cani”. 
\m Jama tehuemeya aca poa yahuajo nei. Oya cuaa Jesosajo tehue ca poa, de —poanaje Jesosaja epeejji cuana. 
\p  
\v 18 Jamajjeya Jodio cuana Jesosa nijje quea quene poanaje, oya Eyacuiñajjija huoojeaꞌyo pojjeama posojo onijje mimijajinaje jama baꞌa: —¿Aya acuae mi huoojea canaje ecuana Eyacuiñajjija equijo anijo huoojeacuayajeaa? ¿Aꞌa cuae miya Eyacuiñajjija huoojeaꞌyo nei? ¡Cabaꞌajja sahua! !Ma dejjaa ajjima acani aꞌajja socue ecuanaja ebajji, Eyacuiñajjiya eꞌe jojo nei miya aꞌa huoojea canaje ebajji! 
\p  
\v 19 Jesosaa oya cuana sajaꞌa canaje: —¡Bacue! Miquianaa jiquio equi jeabichajeaꞌyajo eyaya jiquio equi iyaje oꞌoya pea beca peejjima cahuime. 
\p  
\v 20 —Chojja, de —Jodio cuana poanaje—. Quea huiso nee nee, 46 shequiajame jiquio equi iya canaje cuaa. ¿Achajja acuae equi jeabichajea majje miyaya iyaje oꞌoya pea beca peejjima cahuime? ¡Chojja, de! —poanaje. 
\p  
\v 21 Jamatii Jesosa Eyacuiñajjija equijo pojjeama miminaje; ojaya eyamijo jjashahuabaquiani.  
\v 22 Eꞌe, quijje Jodio cuaa Jesosa quecuaꞌyo majje, Eyacuiñajjiya oya shequi mee caje oꞌoya pea beca peejjima cahuimejo. Jamajje quijje Jesosa shequi oꞌoyajo, ecuana o shajjaꞌajjajji cuana jiquio esohuijo jjashahuabaquije. Jama poaje baꞌa: —Eꞌe de, Eyacuiñajjija esohui eꞌe nei; Jesosaja ehuohui peaꞌai eꞌe nei —poaje quijje. 
\p  
\v 23 Jamajjeya Jenosanena huasijje Jodio cuana ojee jjachichaquinaje. Quea bihui nee ijjiaꞌijjianaje esohuidojojjiya yahuajo nei Jodioja ebacua cuana cuiaꞌyo jjima shejo, ma pajeaꞌyo jjima yajji. Jesosa peaꞌai Jenosanenajo aninaje. Jomajo Jesosaa quea huiso ma dejjaa ajjima acani acanaje. Ba majje quea huiso cuana poanaje: —¡Eꞌe jojo nei Jesosa Eyacuiñajjija huoojeaꞌyo ojjaña jaahuanajji! —poanaje cuana. 
\p  
\v 24-25 Jamatii Jesosaja eba nei nei ojjaña dejja cuanaja ejjashahuabaquijji. Quea tai, epeejji eꞌe jojo nei pojjeama beca cuana. Jamajjeya ohuaya ojjaña quea jaꞌa nee huohui jjima jama baꞌa: —Eꞌe jojo nei eya ca iña jiquio Eyacuiñajjija Bacua Ejja —jamaya huohui jjima soꞌo Jesosaja. 
\c 3  
\s1 Jesosa miminaje Nicodemo nijje 
\p  
\v 1 Majoya oe dejja Jesosa que poeyanaje, oya Nicodemo bajjani. Oya Jodio etii cuana nijje pea Jodio cuana huoojeajji poani, Paniseo dejja cuana jama jjashahuabaquime poani.  
\v 2 Oya, Nicodemo Jesosa que poeyanaje mecajje quehuajje. Jama acanaje baꞌa: —Esohui huohuijji, Eyacuiñajjiya miya ameesahua cani ma dejjaa ajjima acani. Jamajjeya ecuanaja eba Eyacuiñajjiya miya huoojea canaje ecuana sohuihuohuiya. 
\p  
\v 3 Jesosaa oya huohui canaje Eyacuiñajji nijje ebaꞌe tiitiiꞌyojjijo; jama poanaje baꞌa: —Nicodemo, eyaya miya eꞌe jojo nei huohuiaña: ¡Bacue! Jiquio ecua epona jjamejoqui majje bacua cuayani jayojja jama Eyacuiñajjiya miya cacuaya mee ca oꞌoyahua jiquio ecua eshoꞌi cuayani jama. Jamajjeya Eyacuiñajjiya miya ebacua shoꞌi jayojja jama acajeꞌyo, miya baꞌe tiitii mee cajeꞌyo onijje, ojjañaja Emeshi Mese nei nijje —Jesosa poanaje. 
\p  
\v 4 —Chojja de, ¿aꞌa cuae se dejja etii cuaya oꞌoyame soꞌo? —Nicodemohua acanaje—. ¿Aꞌa cuae eseja enaeseja yone yasijje baꞌedobiqui oꞌoya majje ebacua jama cuaya oꞌoyame soꞌo? Chojja, de —acanaje Nicodemohua. 
\p  
\v 5 Jamajjeya Jesosaa oya huohui ca oꞌoyanaje: —Nicodemo, eꞌe jojo nei ecuea ehuohui jama baꞌa: Jiquio ecua ebacua eshoꞌi cuayani jama Eyacuiñajjiya miya cacuaya mee ca oꞌoyahua. Joya Eyacuiñajji shajjaꞌajjajji poani enajo besa mee majje, Eyacuiñajjija Edojjoshahua Pameya oya quea pame jjashahuaba tiitiiqui mee majje peaꞌai miya pea jjashahuabaquime poajeꞌyo. Oya Eyacuiñajji nijje baꞌe tiitiijeꞌyo. Jamaya po ajjajo ca ca Eyacuiñajji nijje ebaꞌe tiitiiꞌyojji pojjeama eyajo.  
\v 6 Eꞌe Nicodemo, ojjaña cuana enaeseja mejo bacua cuayani yahueja jea, oja chii jayojja yamijji. Joya Eyacuiñajjija Edojjoshahua Pameya pea jjashahuabaquime po mee caꞌyani ca ca Eyacuiñajjija Edojjoshahua Pame onijje nequi —Jesosa poanaje—.  
\v 7 Eyaya miya huohuinaje eꞌe jojo nei ebacua eshoꞌi cuayani jama Eyacuiñajjiya miya cacuaya mee ca oꞌoyahua. Jamatii aꞌa jama jjashahuabaquijji baꞌa: “Chojja de, ¿yajja epojji?”  
\v 8 Miyaya beni shajjaꞌajjaña; beni baña peaꞌai acui iña dojo cani. Jamatii ache huesha beni poeani miquea ba jjima; achacua poquije miquea ba jjima peaꞌai. Jiquio ecua beni achacua poquije ba jjima jayojja jama miquea ba jjima peaꞌai ache shono, achejo pojjaꞌa Eyacuiñajjija Edojjoshahua Pameya dejja pea jjashahuabaquime po mee caꞌyani. Jamaya miquea eba pojjeama. Eꞌe, Eyacuiñajjiya miya cacuaya mee ca oꞌoyahua ebacua eshoꞌi cuayani jayojja jama —Jesosa poanaje. 
\p  
\v 9 —Eꞌe pojjaꞌa. ¿Achajja acuae ebacua eshoꞌi cuayani jayojja jama epojji soꞌo? —huohuiꞌajja canaje Nicodemohua. 
\p  
\v 10 —Nicodemo, miya Jodio esohui huohuijji; Eyacuiñajjija esohui yahuajo nei etehueꞌyo huohuijji. Jamajjeya ¿yajjajo miquea ba jjima ebacua eshoꞌi cuayani jayojja jama epojji ebaꞌejji pea baꞌeme epoꞌyojji? —Jesosa poanaje. 
\p  
\v 11 —Eyaya, Huaniya ma ona besameejji poaniya peaꞌai miya eꞌe jojo nei huohuiaña jama baꞌa: Ma ecuanaja eba poa huohuiaña pea baꞌeme epoꞌyojjijo; ma ecuaa yahuajo banaje peaꞌai huohuiaña. Jamatii miya, pea Jodio esohui huohuijji cuana peaꞌai ecuanaja esohuijo jama poani baꞌa: “Chojja, siajje oya cuana poani”. Eꞌe, miquianaaya ecuana siajjepojji poso aña —Jesosa poanaje—.  
\v 12 Eꞌe, eyaya miya huohuiaña ebacua eshoꞌi cuayani jayojja jama Eyacuiñajjija Edojjoshahua Pameya miya pea jjashahuabaquime po mee cajeꞌyo, Eyacuiñajji nijje ebaꞌe tiitiiꞌyojji. Jamatii ecuea esohui quea quehua miquea. Jamajjeya eyaya miya Eyacuiñajjija ejjashahuabaquiꞌyojji eyajo huohuiajo, ¿aꞌa ecuea esohui quea jaꞌa poaje miquea? Chojja, quea quehua poaje peaꞌai.  
\v 13 ¡Shajjaꞌajjacue ecuea esohui, Nicodemo! Dejja cuana eyahuasijje dobiquiꞌyo majje meshi yasijje epoe oꞌoyajji pojjeama ojjaña eyajo baꞌe huohuiya, Eyacuiñajjija ejjashahuabaquiꞌyojjijo peaꞌai epoe oꞌoyajji pojjeama huohuiya. Eya ma ojjañaja Edoe Mese eyajo baꞌeꞌyonaje. Eya eyajo baꞌe poeyanaje meshi yasijje. Jamajjeya eyaye nei baña ojjaña eyajo, Eyacuiñajjija ejjashahuabaquijji ecuea eba peaꞌai —Jesosa poanaje—.  
\v 14 Cuanaya eya, Eyacuiñajjija huoojeaꞌyo ojjaña jaahuanajji baꞌehuanasohuajea cajeꞌyo cuaa. Eꞌe, yahuajo nei nei meshi jabojo Moisesiya baa peyo jayojja acui aojo baꞌehuanasohua ca poa ojjañaja ebajji; ojjaña joya peyoja ijjia baa peyo jayojja ba cajo, Eyacuiñajjiya huaquia mee caꞌya poa. Jiquio ecua Moisesiya baa peyo jayojja baꞌehuanasohua ca poa jayojja jamaya quijje eya baꞌehuanasohuajea cajeꞌyo cuaa acui ecueataꞌapeejo ojjañaja mimishijo manoꞌyohua, mimishi cuijeaꞌyojji sosejje.  
\v 15 Jamajjeya Eyacuiñajjiya ojjaña baꞌe tiitii mee cajeꞌyo onijje, ca ejo jama jjashahuabaquiajo baꞌa: “Eꞌe jojo nei ohuaya ecuea mimishi cuijea neinei cajeꞌyo”. Eꞌe, enijje jjapeequiajo, Eyacuiñajjija quea nee nee epo meeꞌyojji pojjeama cuaquijo —Jesosa poanaje. 
\p  
\v 16 —Eꞌe Nicodemo —Jesosa poanaje peaꞌai—, Eyacuiñajjiya ojjaña cuana ojjaña meshijo baꞌe quea jea nee nee acani. Jamajjeya eya, oja Bacua Ejja oe nei huoojea canaje ojjañaja mimishijo manoꞌyohua. Jamajjeya ojjaña joya eꞌe jojo nei enijje jjapeequiani Eyacuiñajjiya baꞌe tiitii mee cajeꞌyo onijje eyajo; quea nee nee epo tiitii meeꞌyojji pojjeama.  
\v 17 Ecue Chiija eya huoojea jjima ojjaña tecueaa. Ecuea ejjashahuabaquiꞌyojji jama pojjeama baꞌa: “Ojjaña cuana quea mimishi nee poanijo, quea nee nee po meejeꞌyo; quea nee tii tii”. Chojja, Eyacuiñajjija eya, oja Bacua Ejja oe nei onijje eyajo baꞌya poa meshi yasijje huoojea ca poa. Ojjañaja mimishi cuijeaꞌyo majje enijje baꞌe tiitii meejeꞌyo —Jesosa poanaje—.  
\v 18 Jamajjeya ojjaña joya eꞌe jojo nei enijje jjapeequiani Eyacuiñajjiya huohui caje jama baꞌa: “Miquianaya ecue Bacua Ejjaja epeejji eꞌe jojo nei poanijo, mimishi cuijeajeꞌyo. Quea nee nee epo meeꞌyojji pojjeama cuaquijo” Eyacuiñajjiya acaje —Jesosa poanaje—. Pea cuana enijje jjapeequi ajjajo ca ca Eyacuiñajjiya yahuajo jama acaje baꞌa: “Miquianaya ecue Bacua Ejja oe nei nijje jjapeequi ajjajo cajaa ajeꞌyo, mimishi cuana cuijeaꞌyo jjima ajeꞌyo. Jamajjeya quea nee tii tii poajeꞌyo” Eyacuiñajjiya acaje —Jesosa poanaje—.  
\v 19 Eꞌe, Eyacuiñajjiya eya, oja Bacua Ejja huoojea canaje esohui eꞌe nei huohuiya, ojjaña cuana quea jjashahuabaqui jaꞌa nee po meeya. Eꞌe, eya cuaquijiji jayojja jama poanijo ojjaña quea jjashahuabaqui jaꞌa po meejeꞌyo. Jamatii quea huiso cuana ecuea esohui shajjaꞌajja sa po ajja, mimishi cuana ojaya quea boti neejojo. Quea mimishi nee baꞌe, de. Jamajoya Eyacuiñajjiya oya cuana cajaa acajeꞌyo. Quea nee tii tii poajeꞌyo cuaquijo.  
\v 20 Quea mimishi baꞌeja botiꞌama Eyacuiñajjija esohui eꞌe nei; cajaa acani quea mimishi baꞌyaniya jjejojo. Jamajjeya enijje jjapeequi ajja. Quea mete jjashahuabaquiani jama baꞌa: “¡Jesosaa mo tecuea caje ecue mimishijo!”  
\v 21 Ojjaña joya quea pame nee baꞌeya ca ca Eyacuiñajjija esohui quea boti nee acani. Enijje jjapeequianijo, eyaya oya cuana quea jjashahuabaqui jaꞌa po meeaña. Jamajjeya oya cuana jama poani baꞌa: “Eꞌe, Eyacuiñajjiya eya quea pame baꞌe meesahua cani ojaya esohui jayojja” poani —Jesosaa Nicodemo huohui canaje. Majoya Jesosa Nicodemo nijje mimipajeanaje. 
\s1 Huaniya ma ona besameejji poaniya Jesosajo huohui ca oꞌoyanaje 
\p  
\v 22 Majoya Jesosa Jenosanenajo ani poquinaje o shajjaꞌajjajji cuana nijje Jodea meshi yasijje, pea cuiñajji cuana huasijje. Jomajo nequi cuana Jesosaa sohuihuohui canananaje. O shajjaꞌajjajjiya dejja cuana besa mee canananaje Eyacuiñajjijo.  
\v 23 Huaniya jomajo dejja besa mee canaje peaꞌai Enoni cuiñajjijo, Sanima cuiñajji pejjejo peaꞌai ena quea doejo. Ojjaña pojjajo quea huiso dejja cuana, ponaña peaꞌai Huani que poquinaje. Eyacuiñajjijo enajo besa mee canaje.  
\v 24 Eꞌe, ma pojjajo emeshi mese Enodeja Huani jeanobia jjima poanaje.  
\v 25 Jamajjeya oe Jodio dejjaa Huanija epeejji cuana mimicuiajeanobia canaje. Jama poanaje baꞌa: —¿Ache dejjaa acuae mi Eyacuiñajjijo enajo besa mee majje eseya eꞌe jojo nei quea boejea po mee cajeꞌyo soꞌo? ¿Aꞌa Huaniya pojjaꞌa? ¿Aꞌa cuae peaa besa mee cajji, Jesosa shajjaꞌajjajjiya pojjaꞌa besa mee cajji? —Jodio poanaje. 
\p  
\v 26 Jamajjeya Huani que poquinaje ojaya epeejji cuana, huohuiꞌajjaa jama baꞌa: —Esohui huohuijji, ma dejja joya yahuajo minijje nequinaje cuei ojje mijijje, ma ojo miyaya jama huohuinaje baꞌa: “Oya Eyacuiñajjija huoojeaꞌyo ojjaña jaahuanajji”, maaya jjeya o shajjaꞌajjajji nijje onaya besa mee cani; ojjaña cuana aje oe jjeya o que poquiani. Jesosaa quea huiso nee nee Eyacuiñajjijo besa mee cani. ¿Apiojji shai? —poanaje Huanija epeejji cuana. 
\p  
\v 27 Huaniya oja epeejji cuana sajaꞌa canaje: —¡Aꞌa quea yeno pojji! Jamaya Eyacuiñajjiya oya pea cuana besa mee cani. Yahuajo quea huiso dejja e que poeyanaje; Eyacuiñajjiya oya cuana huoojea canaje. Jjeya ca ca ojjaña cuana Jesosa que poquiani; Eyacuiñajjiya oya cuana huoojea cani.  
\v 28 Miquiaaya ecue sohui yahuajo shajjaꞌajjanaje. Jama poanaje baꞌa: “Eya Eyacuiñajjija huoojeaꞌyo ojjaña jaahuanajji pojjeama. Eyacuiñajjiya eya huoojea canaje ebionei Jesosajo huohuiya”.  
\v 29 Eꞌe —Huani poanaje—, Jesosajo jama jjashahuabaquicue baꞌa: Ejjahuanaquijjijo, epona yahueja ehuanase poajeꞌyo. Jamatii yahueja epeejjiya poe majje jjahuanaquiequi ba cani. Yahue ojaya ehuanase nijje mimiani shajjaꞌajja majje quea bihui nee poani ojaya epeejji. Jiquio ecua yahueja epeejji o ba majje quea bihui nee poani jayojja jama eya Eyacuiñajjija huoojeaꞌyo ojjaña jaahuanajji Jesosa bajjani ba coo majje quea bihui nee nee poani; eya Jesosaja epeejji.  
\v 30 ¡Ojjaña cuaa oya cashajjaꞌajja tiitii cahua! Quijje ca ca ojjaña cuana e que poepajeajeꞌyo. Jamatii capoahua —poanaje Huani, ma ona besameejji poani. 
\p  
\v 31 ¡Bacue! Eyacuiñajjija huoojeaꞌyo ojjaña jaahuanajji eyajo tii ania poa, meshi yasijje poeyanaje. Jamajjeya oya ojjaña huoojeaꞌyojji poani tii; ohuaya eꞌe jojo nei Eyacuiñajjija ejjashahuabaquijji ba mee cani. Huani ca ca jiquiojo anija mejo, dejjaja jea. Jamajjeya aje oe dejja, oja chii jayojjaya. Dejja jama mimiani. Jamajjeya Eyacuiñajjija esohui oe pojji ba mee cani, Huaniya.  
\v 32 Eyacuiñajjija huoojeaꞌyo ojjaña jaahuanajji ca ca Eyacuiñajji nijje eyajo ania poa. Jamajjeya ohuaya jama huohui cani baꞌa: “Eyacuiñajjija ejjashahuabaquijji ecuea eba nei nei. Maya eyaya miya huohuiaña”. Jamatii ojaya esohui shajjaꞌajja sa po ajja beca cuana.  
\v 33 Ojjaña joya eꞌe jojo nei oya shajjaꞌajja sa poani ca ca jama poani baꞌa: “Eyacuiñajjija esohui eꞌe nei; ¡Cashajjaꞌajjaꞌyahua!”  
\v 34 Eꞌe, Eyacuiñajjija huoojeaꞌyo ojjaña jaahuanajjiya, Jesosaa Eyacuiñajjija esohui huohui cani eꞌe jojo nei. Eyacuiñajjija Edojjoshahua Pameya oya huohui meesahua cani; quea jaꞌa nee ameesahua cani tii tii.  
\v 35 Eyacuiñajjiya oja Bacua Ejja quea jea nee nee acani tii. Jamajjeya oya jama poani Jesosa nijje: —Miya ecuea ecue Bacua Ejja quea jea nee nee. ¡Jamajjeya ojjaña huoojeaꞌyojji pocue tii, meshijo, eyajo peaꞌai! —poani Eyacuiñajji. 
\p  
\v 36 Jamajjeya ojjaña joya eꞌe jojo nei Jesosa nijje jjapeequiani, Eyacuiñajjija Bacua Ejja shajjaꞌajja cani peaꞌai onijje baꞌe tiitii mee cajeꞌyo eyajo. Ojjaña joya o shajjaꞌajja sa po ajja ca ca onijje ebaꞌe meeꞌyojji pojjeama. Eyacuiñajjiya oya cuana cajaa acajeꞌyo; quea nee nee poajeꞌyo tii cuaquijo. 
\c 4  
\s1 Epona Samania meshijo baꞌe jjapeequinaje Jesosa nijje 
\p  
\v 1 Jamajje Jesosa Jodea meshijo ani quea huiso dejja cuana o shajjaꞌajjaa poeyanaje, Eyacuiñajjijo besa meeya peaꞌai. Jesosa nijje jjapeequinaje quea huiso nee nee. Majoya aje oe onaaya Jodio esohui huohuijji cuana, Paniseo cuana peaꞌai huohui canaje jama baꞌa: —Jesosaja epeejji cuana quea huiso nee nee; Huanija epeejji ca ca oe pojji —jamaya poanaje pea cuana. 
\p Ma shajjaꞌajja majje Paniseo cuana quea quene poanaje Jesosa nijje. Jjashahuabaquinaje jama baꞌa: —Ecuana quea huiso epeejji sa poani Jesosaja epeejji huisoajja —poanaje.  
\v 2 (Jamatii Jesosa shajjaꞌajjajji cuaa Eyacuiñajjijo enajo besa mee canaje cuana, Jesosa que poeyajo. Jesosaja ca ca pea cuana Eyacuiñajjijo besa mee jjima.)  
\v 3 Jamajjeya Paniseo cuana onijje quea quene ba majje Jesosa Jodea meshijo ani poqui oꞌoyanaje Janinea meshi yasijje, ecuana nijje poquinaje. 
\p  
\v 4 Janinea meshi yasijje ejiojjijje poquije Samania meshijo aniñaquinaje.  
\v 5 Samania meshijo ani poqui majje Sica cuiñajji pejjejo Jesosa jomishoca aninaje ena eteohuejja quea doe pejjejo. Jomajo yahuajo nei nei Jodio etiiquianaa Jacobohua ma meshijo que quia ca poa oja bacua ejja Jose.  
\v 6 Ma quejo yahuajo nei nei Jacobohua teo mee ca poa ena eteohuejja quea doe nee nee. Jamajjeya Jesosa ma ena eteohuejja huasijje poeyanaje eshequi biacojjajja nequijo. Jesosa hueahuea majje anioquenaje ma ena eteohuejja pejjejo ejomishocajji.  
\v 7-8 Anioque majje Jesosaa ecuana acanaje jama baꞌa: —¡Poquicue miquianaya Sica huasijje bobi jjesheya! 
\p Ecuana poquiajo oe Samania epona poeyanaje ena eteohuejja huasijje ena jjequisohuaa jjonojo. Jesosaa oya huohui canaje jama baꞌa: —Epona, ¡che mo ena quiacue eꞌishijji! —poanaje. 
\p  
\v 9 Jodio cuanaja Samania cuana botiꞌama nei. Samania cuana nijje mimi ajja, ojee ijjiaꞌijjia ajja peaꞌai Jodio pojjeama jjejojo. Jamajjeya ohuaya Jesosa sajaꞌa canaje: —Miya Jodio dejja; eya ca ca Samania pona. Jamajjeya ¿apiojji miya enijje mimiani enajo, ena quiajji? —poanaje Samania pona. 
\p  
\v 10 —Eꞌe —Jesosa poanaje—, eya miquea ba jjima. Eyacuiñajjija ejjashahuabaquiꞌyojji quea pame nee miquea ba jjima peaꞌai. Maya miquea eba jojjemo miya enijje jama mimime pome baꞌa: “¡Che mo oe ena quiacue eꞌishijji!” Miya jama enijje emimi jojjemo eyaya miya quiame ena naba tajaꞌama epoꞌyojji tii tii —Jesosa poanaje. 
\p  
\v 11 —Eꞌe pojjaꞌa —epona poanaje—, ena eteohuejja quea doe nee nee nequi. Miquea chamaꞌ ena ejjequisohuajji. Jamajje ¿achejo acuae ena nequi, ma ena ishi majje eya quea naba taja po maja ajja epojji?  
\v 12 Esejaya etiiquianaa Jacobohua jiquio ena teohuejja mee ca poa yahuajo nei. Ohuaya oja bacua cuana, oja ñajjajja cuana, pea huo cuana peaꞌaiya ishi mee majamaja ca poa jiquio ena. Majoya ojjañaa ecuaaya jiquio ena ishi majamajaña. ¿Aꞌa cuae miquea pea ena eba? ¿Achejo nequi pea ena quea pame nee nee? Jacoboja ba jjima poa. Miya pojjaꞌa quea jjashahuabaqui jaꞌa nee nee. ¿Aꞌa Jacobo quea jjashahuabaqui jaꞌa pishana? —huohuiꞌajja canaje eponaa. 
\p  
\v 13 —Epona —Jesosaa huohui canaje—, ojjaña miquianaya jiquiacua poeyani ena ishiya. Jamatii ishi majje quea naba taja po oꞌoyani.  
\v 14 Eyaya pea ena quiaje ojjañaja eꞌishijji. Ma ena ishi majje quea naba taja po oꞌoya ajja. Eꞌe, jjanijo ena oshe quea pame nee cuayani, huosaꞌyo ajja. Jiquio jayojjaya eyaya quiajeꞌyo. Jamajjeya eyaya miya baꞌe tiitii meejeꞌyo —Jesosa poanaje. 
\p  
\v 15 —¡Che iña maya pea ena quiacue eꞌishijji! —Samania ponaa Jesosa acanaje—. Jamajjeya eya quea naba taja po ajja oꞌoya poaje. Jamajjeya eya jiquio ena eteohuejja huasijje epoe oꞌoyajji pojjeama ena jjehuaa —poanaje. 
\p  
\v 16 —Eꞌe, ¡poquicue! ¡Miqueahue jjequicue! —Jesosa poanaje ma epona nijje. 
\p  
\v 17 —Chamaꞌ ecueahue —sajaꞌame acanaje eponaa. 
\p —Eꞌe jojo nei jjeya miquea yahue chamaꞌ —Jesosa poanaje—.  
\v 18 Ecuea eba jama baꞌa: Yahuajo miquea yahue cuana me oejje huisome poa, ojjaña jja miquea yahue ehuei poanaje. Jjeya miya pea dejjajo baꞌe, miquea yahue pojjeamajo. Jamajjeya miya eꞌe jojo nei poani: “Chama ecueahue” —Jesosaa acanaje Samania pona. 
\p  
\v 19 —Eꞌe jojo nei ojjaña miquea eba. Jamajjeya ecuea eba miya Eyacuiñajjija esohui huohuijji eꞌe jojo nei.  
\v 20 Ecuanaja etiiquianaa Eyacuiñajji bihuia ca poa jiquio Samania meshijo, eyiyo biajje. Miquianaya, Jodio cuana ca ca jama poani baꞌa: “Jenosanenajo ca ca oeya Eyacuiñajji bihuiajji, pea eyiyojo pojjeama” miquianaya poani —poanaje Samania pona. 
\p  
\v 21 —¡Shajjaꞌajjacue mo, epona! —Jesosaa oya acanaje—. Quijje pishana miquianaaya Eyacuiñajji, esejaya Chii bihuiaje, ojjañaa. Jiquio eyiyo huasijje poe jjimaa, Jenosanena huasijje poqui jjimaa peaꞌai oya bihuiaje.  
\v 22 Jjeya ojaya esohui jayojja jama pojjeama aje oe miquianaaya, Samania cuaa Eyacuiñajji bihuiaña. Oya miquianajaya ba jjima. Ecuanaa ca ca Eyacuiñajji bihuiaña ojaya esohui jayojja. Eya oja huoojeaꞌyo ojjaña mimishi cuijeaꞌyojji Jodio dejja. Jamajjeya Eyacuiñajji ecuanaja eba, Jodio cuanaja.  
\v 23 Jamajjeya jjeya nei ojjañaa esejaya Chii, Eyacuiñajji bihuiaje eꞌe jojo nei, ojo quea jaꞌa nee jjashahuabaquije. Eꞌe, Eyacuiñajji jama poani baꞌa: “Jamaya eya cabihuia cahua ojjañaa. Jamaya ecuea quea boti nee” poani.  
\v 24 Eyacuiñajji yani tii tii eshe. Jamatii oya jjaba meequi ajja ecojjaa. Jamajjeya o bihuiajji epohua Eyacuiñajji cabihuia cahua eꞌe jojo nei, ojaya esohui jayojja jama quea jaꞌa nee ojo jjashahuabaquiani —Jesosaa acanaje. 
\p  
\v 25 —Eꞌe —poanaje epona—, ecuea eba quijje Eyacuiñajjija huoojeaꞌyo ojjaña jaahuanajji poeje. Oya Quito bajjani poaje. Poe majje ohuaya ecuana quea jaꞌa nee ba mee caje Eyacuiñajjija esohui. 
\p  
\v 26 —Eya ca ca iña jiquio Eyacuiñajjija huoojeaꞌyoya Quito bajjani. Jjeya nei miya Quito nijje mimiani —Jesosaa acanaje. 
\p  
\v 27 Majoya Jesosa shajjaꞌajjajji cuana bobi jjeshe majje poe oꞌoyanaje Jesosa que. Jesosa ba cañaꞌyonaje Samania pona nijje mimiani. Ba majje jjashahuabaquinaje jama baꞌa: —¿Apiojji shai Jesosa epona nijje mimiani? —jamatii huohuiꞌajja jjima: —Epona, ¿ajeo miya poeyanaje? —ajjima: —¿Jesosa, ajeo miya Samania epona nijje mimiani? —jamaya ecuana mimi jjima Jesosa nijje poanaje. 
\p  
\v 28 Majoya ena jjequijji ohua acani jea canananaje eponaa, poquicuajinaje Sica huasijje huohui pohua.  
\v 29 Ojjaña cuana huohui cañaquinaje jama baꞌa: —¡Poecuajicue oe! Oe dejja ena eteohuejja pejjejo ani; ohuaya ojjaña ecuea ebaꞌejji huohui caꞌyonaje. ¿Aꞌa oya pojjaꞌa Eyacuiñajjija huoojeaꞌyo ojjaña jaahuanajji? ¡Poeꞌajja! ¡Ejjabaꞌajjaquiqui! —poanaje epona. 
\p  
\v 30 Eponaa huohui cajje ojjaña Sicajo baꞌe poqui canaje Jesosa baa. 
\p  
\v 31 Ojjaña cuana poe jjimahuajo, ecuana, o shajjaꞌajjajjiya Jesosa nijje jama poanaje baꞌa: —Esohui huohuijji, ¡bobi oe ijjia socue! 
\p  
\v 32 Jamatii Jesosaa jama acanaje baꞌa: —Ecuea pea bobi yani ecuea eꞌijjiajji, ma miquea ba jjima. 
\p  
\v 33 Jamajjeya ecuana ojee miminaje: —¿Aꞌa pojjeama oya pea cuaa bobia canaje? —poanaje. 
\p  
\v 34 Jesosa ecuanaja esohui shajjaꞌajja majje jama poanaje baꞌa: —Bobi ijjia majje miquianaya quea bei poani. Ecue Chiiya eya huoojea canaje ojjaña jaahuanajji; ojjaña ojaya esohui ajeyoꞌyo majje eya quea bei poaje, bobi ijjia majje jayojjaya —Jesosa poanaje—.  
\v 35 Miquianaya jama poani baꞌa: “Quijje anoso sejjajeꞌyo, ebeca pee peaꞌai baꞌime po majje. Eyaya ca ca miquianaya huohuiaña jama baꞌa: ¡Bacue! Jomajo quea huiso dejja cuana poeani. Anoso ejahua jayojjaya jama oya cuana poeani. Eꞌe, oya cuana Eyacuiñajjijo jjashahuabaquiani. Onijje jjapeequiꞌyo sa poani. ¡Jamajjeya enijje jjapeequi meesahuacue!  
\v 36 Eꞌe, echacojji anoso quecuajji, anoso sejjajji peaꞌai eque meseya sosequia cajji. Jamajje ojjaña quea bihui nee poajeꞌyo —Jesosa poanaje—. Oya jayojjaya Eyacuiñajjiya acaje ojaya echacojji cuana. Joya esohui huohuicoojji cuana sosequia caje; joya pea cuana enijje jjapeequi meesahuajji poani peaꞌai sosequia caje. Enijje jjapeequiajo baꞌe tiitii meejeꞌyo enijje eyajo. Jamajjeya ojjaña cuana quea bihui nee nee poajeꞌyo.  
\v 37 Eꞌe, yahuajo jama poanaje cuana baꞌa: “Oe echacojjiya esoꞌ quecua majje quijje pea echacojjiya chicha cajeꞌyo”. Jjeya jamaya eꞌe jojo nei poani.  
\v 38 Jjeya eyaya miya huoojeaña anoso chichajji jama, ojjaña cuana enijje jjapeequi meesahuaa. Yahuajo Eyacuiñajjija esohui huohuijjiya oya cuana esohui ba mee canaje. Jamatii ojjaña cuana jjabahuejjaqui jjima. Jjeya miquianaaya esohui huohui oꞌoyajo, oya cuana ecuea epeejji eꞌe jojo nei poajeꞌyo —Jesosa poanaje ecuana nijje, o shajjaꞌajjajji cuana nijje. 
\p  
\v 39 Majoya quea huiso nee nee Samania cuana poeyanaje Jesosa que. Oya cuana Samania eponaja esohuijo jjashahuabaquiani. Ohuaya jama acanaje baꞌa: —Jiquio dejjaa ojjaña ecuea ebaꞌejji huohui caꞌyonaje. Eꞌe jojo nei jiquio dejja Eyacuiñajjija huoojeaꞌyo ojjaña jaahuanajji, Quito bajjani —epona poanaje. 
\p  
\v 40 Jamajjeya Jesosa que poe majje Samania dejja cuana jama poanaje baꞌa: —Esohui huohuijji, ¡ecuana nijje che anicue! 
\p —Eꞌe, anije ecuana —Jesosa poanaje. 
\p Jamajje aninaje. Beca cahuime sohuihuohui canaje.  
\v 41 Jamajjeya Jesosaja esohui shajjaꞌajja majje ojjaña cuaa jama acanaje baꞌa: —¡Eꞌe jojo nei oya Quito! —poanaje. 
\p  
\v 42 Epona nijje jama poanaje: —Yahuajo miquea esohuijo ecuana beshahua nei jjashahuabaquinaje oya eꞌe jojo nei Quito. Jjeya ca ca oja sohui shajjaꞌajja majje ecuanaja eba nei nei Jesosa eꞌe jojo nei Eyacuiñajjija huoojeaꞌyo ojjaña jaahuanajji; mimishi cuijea caꞌyajje aje se baꞌe tiitii mee cajeꞌyo eyajo —poanaje Samania dejja cuana. 
\s1 Jesosaa jjaajaqui mee caꞌyonaje onaja bacua ejja beshahua nei poqui jeyoani 
\p  
\v 43 Jamajjeya Samania meshijo beca cahuime ani majje Jesosa poqui oꞌoyanaje Janinea meshi yasijje, Cana huasijje.  
\v 44 Yahuajo Jesosaa ecuana, o shajjaꞌajjajji cuana jama acanaje baꞌa: —Eꞌe jojo nei pea cuaa Eyacuiñajjija esohui huohuijji shajjaꞌajja cani. Jamatii ojaya cuiñajjijo ojaya huapa pojjeama cuana ca ca oe jjashajjaꞌajjaqui sa poꞌyo ajja. 
\p Jamajjeya Jesosa jjeya Nasanena huasijje, ma o eshoꞌyahua baꞌya poa huasijje dobiqui jjima.  
\v 45 Jamatii Janinea meshijo ejiojjijje poquianijo, Janinea dejja cuana oya ba majje jama poanaje baꞌa: —Esohui huohuijji, mi poeꞌyajo ecuana quea bihui nee nee. Yahuajo ecuanaa miya banaje Jenosanena huasijje poqui. Eꞌe, esohuidojojji cuaa yahuajo Jodioja ebacua cuana cuiaꞌyo jjima shejo, Jenosanena huasijje ojee ijjiaꞌijjiaa poqui ecuaaya miya banaje. Miyaya quea huiso cuana jjaajaqui meeꞌyonaje, ma dejjaa ajjima acani anaje quea huiso peaꞌai. Eꞌe, miya Eyacuiñajjija esohui huohuijji nei nei —poanaje cuana. 
\p  
\v 46 Jamajjeya Jesosa poqui oꞌoyanaje Cana huasijje, ma ohua yahuajo ejjahuanaquijjijo ena acuijjajja na pojji acaꞌya poa huasijje. Canajo Jesosa aninaje ecuana nijje, o shajjaꞌajjajji cuana nijje. Jamajjeya oe emeshi mese neija dejja huoojeasahuajjiya Jesosajo shajjaꞌajja canaje: —Jesosa Jodea meshijo yahuajo ani Janinea meshi yasijje poeꞌyonaje. Canajo jjeya nequi. 
\p  
\v 47 Oja bacua ejja quea mano nee nee jaa quea huesha pishana, Capenaomajo jaa. Jamajjeya maya shajjaꞌajja majje Jesosa que poquicuajicuajinaje. Jama acanaje baꞌa: —Jesosa, ¡poecuajicue Capenaoma huasijje! ¡Ecue bacua ejja jjaajaqui meeꞌyocue! Quea mano nee nee jaa, beshahua nei poquijeyo jaa —poanaje. 
\p  
\v 48 Jesosa ojjaña cuana nijje jama poanaje baꞌa: —Miquiana cuana Janinea meshijo baꞌe beshahua nei jjashajjaꞌajjaqui ajja. Eyaya ma dejjaa ajjima acani mi amajamajajo, miquianaya jjashahuabaqui ajja jama baꞌa: “Eꞌe jojo nei Jesosa Eyacuiñajjija huoojeaꞌyo ojjaña jaahuanajji” —Jesosa poanaje. 
\p  
\v 49 —Esohui huohuijji Jesosa, jamatii —ejeajji poanaje—. ¡Poecuajicue oe, ecue bacua ejja epoquijeyo cuahuajo! 
\p  
\v 50 —Epeejji, ¡quea bihui poquicue miquea equi yasijje! Eyaya mique bacua ejja jjaajaqui meeꞌyonaje; apoa poanaje —Jesosaa emanojaaja ejeajji acanaje. 
\p Jesosaja esohui shajjaꞌajja majje ebacuaja ejeajji quea bihui nee poquinaje jjashahuabaquiani jama baꞌa: —Eꞌe jojo nei Jesosa quea sohui poja nee nee; ecue bacua ejja jjaajaqui mee caꞌyonaje. 
\p  
\v 51 Ojaya equi yasijje poquianijo, oja chacojji cuana poeyanaje. O ba majje taaanaje: —¡Miquea ebacua ejja boecaꞌyonaje! Quea pame nee jjeya aniꞌyo. Huaquiaꞌyonaje —poanaje. 
\p  
\v 52 —Eꞌe —ejeajji poanaje—, jamaya quea pame nee. ¿Ache nei eshequi nequijo acuae apoa poanaje soꞌo? 
\p —Yahuajo apoa poanaje, omamecajje tii, eshequi ejjajeapaaquijo oya boecaꞌyonaje —poanaje echacojji cuana. 
\p  
\v 53 —Eꞌe nei —ejeajji jjashahuabaquinaje—, omamecajje tii eshequi ejjajeapaaquijo Jesosaa eya huohui canaje jama baꞌa: “Miquea ebacua ejja jjaajaquiꞌyonaje; apoa poanaje” —ejeajji poanaje. 
\p Jamajje equi yasijje dobiqui majje ojaya huapa pojjeama cuana nijje jama poanaje baꞌa: —Eꞌe, Jesosaa ecue bacua ejja jjaajaqui mee caꞌyonaje, boeca mee caꞌyonaje. ¡Oya ca ca oe Eyacuiñajjija huoojeaꞌyo ojjaña jaahuanajji! —poanaje ebacuaja ejeajji. 
\p Jamajjeya ojjaña jama poanaje baꞌa: —Eꞌe jojo nei oya Jesosa. 
\p  
\v 54 Jamaya Janinea meshi yasijje poe oꞌoya majje Jesosaa Cana cuiñajjijo pea dejjaja ba jjima aca oꞌoyanaje. 
\c 5  
\s1 Jesosaa dejja jeoꞌajja Metena ena sahuajo jaa jeo mee caꞌyonaje 
\p  
\v 1 Majoya quijje ojjaña Jodio dejja cuana poqui oꞌoyanaje Jenosanena huasijje ojee ijjiaꞌijjiaa Eyacuiñajji bihuiaa. Jamajjeya ecuanaya Jesosa nijje, o shajjaꞌajjajji cuana nijje peaꞌai Jenosanena huasijje poqui oꞌoyanaje.  
\v 2 Jenosanena cuiñajji mei jiyojo Ñajjajja Dobiquijji esecue yani. Ma esecue pejjejo yani ena, bae sisi jama, ebesajji, Emeo esohuijo Metena ena bajjani. Ena sahuajo yani me oejje equi sisi.  
\v 3 Jomajo quea huiso emano cuana jaanaje: cojjamaꞌ cuana, jeoꞌajja cuana, jiojjijjajja cuana peaꞌai. Ohuaya esohuidojojji ishoaꞌajja cani; jama jjashahuabaquime poani baꞌa: —Eꞌe, Eyacuiñajjija esohuidojojjiya ena cajeaquejjo cahua. Jamajjeya eya ena huasijje nequidobiquiajo, jjaajaqui mee cajeꞌyo. 
\p  
\v 4 Eꞌe, Jodio cuaa jama acanaje baꞌa: —Esohuidojojjiya quijje nei poe huichaꞌanijo ena jeaquejjo mee cani. Ena jeaquejjo cajo, ojjaña emano cuana ena huasijje canequidobi cuajiquiahua. Joya ebionei besajeꞌyo ca ca jjaajaqui mee cajeꞌyo, huaquia mee cajeꞌyo peaꞌai Eyacuiñajjiya —poanaje Jodio cuana. 
\p  
\v 5 Jamajjeya oe dejja jomajo jeoꞌajja jaanaje. Quea shequiaja huiso nee nee jaa poa, 38 shequiajame.  
\v 6 Jesosaa poe majje ba canaje dejja emanojaa jeoꞌajja. Jesosaja eba ma dejja quea shequiaja huiso nee nee jaa poa. Jamajje oya huohuiꞌajja canaje: —¿Aꞌa miya jjaajaquiꞌyo sa poani? ¿Aꞌa miya jeo sa poani? —Jesosa poanaje. 
\p  
\v 7 —Eꞌe —emanojaaa sajaꞌa canaje—, jamatii chamaꞌ pea dejja e dojojji ena jeaquejjo poani yasijje e besa meeꞌyojji. Jamajjeya eya ebionei ebesaꞌyojji pojjeama. Eya jjapashineijje poquianijo, pea ebionei besacuajiquije —poanaje emanojaa, jeoꞌajja. 
\p  
\v 8 Jesosaa oya jama acanaje baꞌa: —Epeejji, ¡nequisohuaꞌyocue oe! ¡Jeocue! ¡Miquea equi yasijje equipajaajji bebo majje dojoꞌyocue! 
\p  
\v 9 Jjeya nei jeoꞌajja jeocuajiꞌyonaje. Jamajje nequisohuaꞌyonaje; oja equi yasijje equipajaajji bebo majje dojo caꞌyonaje; jeopoquiꞌyonaje. Jesosaa oya jeo mee caꞌyonaje Jodioja epojja ejomishocajjijo.  
\v 10 Jamajjeya ma dejjaa equipajaajji dojo cani ba majje Jodio cuana quea tecue onijje poanaje: —¡De! ¿Apiojji acuae miyaya equipajaajji dojoaña soꞌo? ¡Jjeya epojja ejomishocajji, de! ¡Aquiana jjeya dojoca ajja! Jamaya eseja esohui huohuijji cuaa huohui cani —poanaje. 
\p  
\v 11 Ma dejja ejeoꞌyohua sajaꞌa canaje jama baꞌa: —Jamatii. Oe dejjaa eya jeo meeꞌyo majje jama acanaje baꞌa: “¡Poquicue miya; miquea equipajaajji bebo majje dojocue!” poanaje. 
\p  
\v 12 —Eꞌe pojjaꞌa —Jodio cuana poanaje—. “¡Miquea equipajaajji dojocue!” poanaje. ¿Ae bajjaniya acuae maya miya huohui canaje soꞌo? —huohuiꞌajja canaje. 
\p  
\v 13 —Cuaꞌa, de —sajaꞌame acanaje—. Ache dejjaa shai eya jeo mee caꞌyonaje. E jeo meeꞌyo majje oya pea dejja quea huiso nijje poquinaje —poanaje. (Eꞌe, dejja quea huiso nee nee jomajo ani.) 
\p  
\v 14 Quijje pishana Jesosaa ma dejja oja jeo meeꞌyo ba caꞌyonaje Eyacuiñajjija equijo. Jama huohuime acanaje baꞌa: —Eꞌe epeejji, jjeya miya quea pame nee nequiꞌyo, quea aja nee nequi. Jamajjeya ¡aꞌa quea mimishi po oꞌoyajji! Quea mimishi po oꞌoya majje mi quea mano nee nee po oꞌoya chanaꞌ, quea tai nee nee; yahuajo jeo ajja, quea nee pishana poanaje —Jesosaa acanaje. 
\p  
\v 15 Jesosa shajjaꞌajja majje poquiꞌyonaje Jodio cuana huasijje. Huohuiqui canaje jama baꞌa: —Eꞌe, Jesosa bajjaniya eya jeo mee caꞌyonaje —poanaje. 
\p  
\v 16 Jamajjeya jeoꞌajja poanajeya huohui cajje Jodio cuaa Jesosa niñeba canaje; quecuaꞌyo sa acanaje peaꞌai, Jesosaa jeoꞌajja cuana jeo mee caꞌyonaje epojja ejomishocajjijo. 
\p  
\v 17 —Ecue Chiiya quea pame nee acani tii tii epojja ejomishocajjijo peaꞌai —Jesosaa oya cuana sajaꞌa canaje—. Jamajjeya eyaya peaꞌai ecue Chiiya jayojjaya jama quea pame aña ojjaña pojjajo. 
\p  
\v 18 Jamajoya Jodio etii cuaa Jesosa quecua sa neinei acanaje. Jama huohui canaje baꞌa: —Esejaya etiiquiaa yahuajo esohui tehue ca poa jama baꞌa: “¡Epojja ejomishocajjijo aꞌa chacojji!” aca poa. 
\p Jodio cuaa Jesosa niñeba canaje jama peaꞌai baꞌa: —Oya, Jesosa etiiquianaja etehueꞌyo jama po ajja —poanaje. 
\p Yahuajo Jesosa Jodio nijje jama poanaje peaꞌai baꞌa: —Eyacuiñajji ecue Chii, de. 
\p —Chojja, de, Jesosa siajje poani —niñebame acanaje Jodio cuaa Jesosa. 
\p Jodio cuaa jama acanaje peaꞌai baꞌa: —Jesosa siajje poani jama baꞌa: “Eya Eyacuiñajji jayojjaya poani” siajje, de —jamaya Jodio cuaa acanaje. 
\s1 ¡Eyacuiñajjija Bacua Ejja Jesosa quea caꞌa nee ebaꞌe tiitii meeꞌyojji! 
\p  
\v 19 Jamajjeya Jesosaa ma Jodio etii cuana huohui canaje jama baꞌa: —Eyaya miquianaya eꞌe jojo nei huohuiaña jama baꞌa: Eyacuiñajjiya eya, oja Bacua Ejja oe nei huoojea canaje; eyaya ojaya esohui jayojja jama aña. Eyaya huohuiaña ecue Chiija ejjashahuabaquijji, ecuea ejjashahuabaquijji pojjeama. Ojjaña ecue Chiiya acani ecuea eba. Jamaya ca ca eyaya aña peaꞌai. Eꞌe, ojjaña ecue Chiiya acani eyaya aña peaꞌai, eya oja Bacua Ejjaa jjejojoya.  
\v 20 Eya ecue Chiija quea jea nee nee. Jamajjeya eya ba mee cani ojjaña joya ohua amee sa acani huiso tii. Eyaya ma dejjaa ajjima acani aña ba majje miquianaya jama poaje baꞌa: “Eꞌe nei, yahuajo jamaya ajjima cuanaja poa. Chamaꞌ pea Jesosa jayojja” poaje miquianaya.  
\v 21 Jamaya ecue Chiiya eya amee cajeꞌyo baꞌa: Ecue Chiiya emanoꞌyojaa shequi mee ca oꞌoyani jayojja jama eyaya baꞌe meeje oꞌoya, ojjaña ecue babacaꞌyo cuana peaꞌai —Jesosa poanaje—.  
\v 22 Ecue Chiija ehuohuijji pojjeama joya ojaya epeejji pojjeama, joya quea nee nee poajeꞌyo tii cuaquijo. Joya ojaya epeejji poani baꞌe tiitii mee cajeꞌyo onijje ehuohuijji pojjeama peaꞌai. Chojja, ohuaya jama huohuime acanaje baꞌa: “Ecue Bacua Ejjaa cahuohui cahua ecuea ejjashahuabaquiꞌyojji”.  
\v 23 Jamajjeya ojjaña joya ecue Chii shajjaꞌajjajji poaniya eya oja Bacua Ejja shajjaꞌajja cajeꞌyo peaꞌai. Ojjaña joya eya Eyacuiñajjija Bacua Ejja shajjaꞌajja sa poꞌyo ajja Eyacuiñajji, e huoojeaꞌyojji shajjaꞌajja sa poꞌyo ajja peaꞌai —Jesosa poanaje. 
\p  
\v 24 —Eꞌe jojo nei nei ecuea ehuohui minijje jama baꞌa —Jesosa poanaje—: Ojjañaa joya ecue sohui shajjaꞌajja cani, e huoojeaꞌyojjija sohui eꞌe jojo nei shajjaꞌajjajji poani peaꞌai baꞌe tiitii meejeꞌyo enijje eyajo; cuaqui yasijje epoquiꞌyojji pojjeama. Chojja, oya cuana yahuajo eshahuaja epeejji poanajejo cuaqui yasijje poquiꞌyo quiaye. Jjeya ca ca baꞌe tiitii meejeꞌyo enijje, ecuea epeejji jojoya.  
\v 25 ¡Shajjaꞌajjacue mo! —Jesosa poanaje—. Eꞌe jojo nei ojjaña shajjamaꞌ poani Eyacuiñajjiya ba cani emanoꞌyo jayojja, epoquijeyoꞌyo jayojja. Jamatii ehuohuiꞌyo ejo, Eyacuiñajjija Ebacua Ejjajo shajjaꞌajja cajeꞌyo. Ecuea esohui jayojja jama eꞌe jojo nei atiitii cajo, eyaya baꞌe tiitii meejeꞌyo enijje eyajo.  
\v 26 Eꞌe, Eyacuiñajji ecue Chii yani tii tii, eshe. Jamajjeya ohuaya eya, oja Bacua Ejja huoojea canaje ojjaña joya onijje jjapeequiani baꞌe tiitii meeꞌyohua.  
\v 27 Cuanaya eya ojjañaja Edoe Mese poanijo Eyacuiñajjiya eya huoojea canaje jama baꞌa: “¡Miyaya huohuicue joya minijje jjapeequiani baꞌe tiitii meejeꞌyo minijje! ¡Huohuicue peaꞌai joya miquea epeejji pojjeamajo quea nee tii tii poajeꞌyo cuaquijo!” jamaya Eyacuiñajjiya eya acanaje —Jesosa poanaje—.  
\v 28 Eꞌe, eꞌe jojo nei quijje ojjaña yahuajo emanoꞌyo cuana iyaa majje eyaya oya cuana shequi meeje oꞌoya —Jesosa poanaje—. Ecuea esohuijo ¡aꞌa jjashahuabaquijji jama baꞌa: “¿Yajja yajji? ¿Achajja shai ohuaya emanoꞌyo cuana shequi mee caje oꞌoya?” aꞌa jamaya pojji!  
\v 29 Eꞌe jojo nei oya cuana eshe oꞌoya po mee majje ojjaña ecuea epeejji eyaya baꞌe tiitii meejeꞌyo enijje. Ojjaña shajjamaꞌ cuana ca ca shequi oꞌoya majje quea nee nee poajeꞌyo tii tii cuaquijo.  
\v 30 Eꞌe, Eyacuiñajjiya eya huoojea canaje ojjaña huasijje huohuiya jama baꞌa: “Joya ecuea epeejji cuana poani eyaya baꞌe tiitii meejeꞌyo enijje. Beca cuana ca ca ecuea epeejji pojjeamajo quea nee nee poajeꞌyo tii tii”. Eyacuiñajjiya e huoojea majje jama acanaje baꞌa: “¡Ojjaña ecuea ejjashahuabaquijji ojjaña cuana huohuiquicue!” acanaje. Eyaya ojaya esohui jayojja jama aña, ecuea ejjashahuabaquiꞌyojjijo pojjeama. Jamajoya eyaya Eyacuiñajjija ejjashahuabaquiꞌyojji jayojja jama añajo ecuea esohui ojjaña eꞌe jojo nei —Jesosa poanaje. 
\s1 Jesosa Eyacuiñajjija huoojeaꞌyo ojjaña jaahuanajji, oja Bacua Ejja 
\p  
\v 31 Majoya Jesosaa Jodio cuana huohui canaje jama baꞌa: —Miquianaya ejo jjashahuaba quehuaquiani jama baꞌa: “Jiquio dejjaa jama huohui cani baꞌa: —Eya ca iña iquio Eyacuiñajjija huoojeaꞌyo ojjaña jaahuanajji —acani, de. Jamatii ohuaye neiya jama huohui canijo oya ecuanaja eshajjaꞌajjajji pojjeama” jjashahuaba quehuaquiani miquianaya —Jesosa poanaje—. Jamatii ecuea esohui eꞌe jojo nei.  
\v 32 Eya ee nei pojjeama; eya ecue Chii nijje. Ohuaya ojjaña ba mee cani eya oja huoojeaꞌyo. Ecuea eba ojaya esohui ejo eꞌe jojo nei.  
\v 33 Yahuajo miquianaaya pea cuana huoojeanaje Huani que e huohuiꞌajjaa. Huaniya miquianaya eꞌe nei huohui canaje jama baꞌa: “Jesosa eꞌe jojo nei Eyacuiñajjija huoojeaꞌyo ojjaña jaahuanajji, oja Bacua Ejja oe nei” acanaje Huaniya, ma ona besameejji poaniya —Jesosa poanaje. 
\p  
\v 34 —Eyacuiñajjiya Huani huoojea canaje ejo huohuiya. Eyaya miquianaya huohui oꞌoyaña ma Huaniya ejo huohui canaje. Jamatii miquianajaya ejjashahuabaquiꞌyojji ejo quea jaꞌa pojjeamajojo eyaya miquianaya huohui oꞌoyaña. Miquianaaya Huanija esohui ejo eshajjaꞌajja jojjemo eyaya miquianajaya mimishi cuijeaꞌyome —Jesosa poanaje. 
\p  
\v 35 —Cuaquijiji mecajje jijianiya quea jaꞌa ojjaña ba mee cani jayojja jama Huani poa. Ohuaya miquianaya quea jaꞌa nee ba mee canaje Eyacuiñajjija esohui ejo, ma yahuajo miquea ba jjima poa. Ebionei miquianajaya oja sohui ejo quea boti nee poanaje; jamatii quijje shajjaꞌajja sa poꞌyo ajja poanaje.  
\v 36 Eꞌe —Jesosa poanaje—, Huaniya ejo huohui canaje. Jamatii oya dejja. Pea yani, ecue Chii. Ecue Chiiya miquianaya ba mee cani eya oja huoojeaꞌyo. Eꞌe, ecue Chiiya eya ameesahua cani ma dejjaa ajjima acani. Ma ajeyoꞌyo majje miquianaya ba meeje eꞌe jojo nei eya Eyacuiñajjija huoojeaꞌyo ojjaña jaahuanajji.  
\v 37 Ecue Chiiya miquianaya ba mee cani jama baꞌa: Ohuaya eꞌe jojo nei eya huoojea canaje. Jamatii miquianajaya oya ba jjima ecojjaja. Miquianajaya aje oe oja mimi shajjaꞌajja jjima peaꞌai.  
\v 38 Ojaya esohui miquianajaya shajjaꞌajja jjima. Eya oja huoojeaꞌyo. Jamajjeya miquianaya ecue sohui shajjaꞌajja sa poꞌyo ajja peaꞌai —Jesosa poanaje—.  
\v 39 Eyacuiñajjija esohui yahuajo etehueꞌyo miquianaaya ba huichaꞌa huichaꞌaña, ba majamaja majje miquianaya ebaꞌe tiitiije poso jjabaquiani. Ma esohui etehueꞌyo yahuajo ejo tehue ca poa.  
\v 40 Eyaya ca ca oe eyaye nei miya baꞌe tiitii meejeꞌyo; jamatii miquianaya enijje jjapeequi sa po ajja —Jesosaa Jodio cuana acanaje. 
\p  
\v 41 —Eya dejja mimishi jama jjashahuabaqui ajja jama baꞌa: “Ojjaña dejja cuaa jamatii eya shajjaꞌajja cajeꞌyo” po ajja eya —Jesosa poanaje—.  
\v 42 Chojja, ecuea eba miquianajaya Eyacuiñajji quea jea nee pojjeama.  
\v 43 Eyacuiñajjiya, ecue Chiiya eya huoojea canaje. Jamatii miquianaya e shajjaꞌajja sa po ajja. Pea dejjaa Eyacuiñajjija huoojeaꞌyo nishohua huohui cani jama baꞌa: “Eya quea pame nee”. Ojaya esohui ca ca miquianaaya shajjaꞌajjaje; siajjepojji nijje miquianaya jjapeequije.  
\v 44 Eyacuiñajji oe nei enequi tii tii. Jamatii miquianaaya ojaya esohui jayojja jama a sa poꞌyo ajja, jama jjashahuabaquime po ajja baꞌa: “Eyacuiñajjiya ejo jama cahuohui cahua baꞌa: —Eꞌe, miya ecuea epeejji quea pame nee —cahuohui cahua”. Chojja. Jamaya miquianaya jjashahuabaqui ajja —Jesosa poanaje—. Miquianaya jjashahuaba tiitiiquiani jama baꞌa: “Pea dejja cuana ejo jama camimiquiahua baꞌa: —Eꞌe, miya ca ca oe quea pame nee nee —capoahua onaya”. Jamajjeya miquianaya enijje jama po ajja baꞌa: “Jesosa, miya Quito, Eyacuiñajjija huoojea ojjaña jaahuanajji” enijje po ajja. Jamaya huohui sa po ajja miquianaya —Jesosa poanaje. 
\p  
\v 45 —¡Aꞌa eya ecue Chii ehuohuije poso pojji jama baꞌa: “Oya cuana e shajjaꞌajja sa poꞌyo ajja; quea mimishi nee nee” aꞌa eya ehuohuije poso pojji nequiana! —Jesosa poanaje—. Chojja, ecuea miquianaya ehuohuijji pojjeama. Miquianaya Moisesija etehueꞌyojo jjashahuabaquiani; jamatii ojaya esohui etehueꞌyo ajjimajo, Eyacuiñajjiya miquianaya jama acaje baꞌa: “¿Apiojji acuae quiana Moisesija etehueꞌyojo shajjamaꞌ poani? Miquianaya quea mimishi nee nee” quijje Eyacuiñajjiya nequiana acajeꞌyo —Jesosa poanaje. 
\p  
\v 46 —Eꞌe, Moisesiya ejo tehue ca poa. Jamajjeya miquianaaya oja tehue eꞌe jojo nei eshajjaꞌajja jojjemo enijje jjapeequiꞌyome.  
\v 47 Jamatii miquianaaya Moisesija esohui eshajjaꞌajja jojjemo, ojaya ehuohui etehueꞌyo eba peaꞌai jojjemo ecuea esohui shajjaꞌajjaꞌyome peaꞌai —Jesosa poanaje. 
\c 6  
\s1 Jesosaa bobia canaje quea huiso nee nee dejja, 5.000 dejja 
\r (Mateo 14.13-21; Macoso 6.30-44; Noca 9.10-17) 
\p  
\v 1 Majoya Jodio dejja cuana nijje mimi majje, quijje Jesosa o shajjaꞌajjajji nijje, ecuana nijje Jenosanenajo ani poquinaje Janinea bae yasijje, pea bajjani Timenia bae yasijje. Bishe aijo ojje miji yasijje besapoqui oꞌoyanaje.  
\v 2-3 Baꞌeñaqui majje eyiyo huasijje jaasohuaquinaje. Anioquenaje. Yahuajo Jesosaa quea huiso acanaje ma dejjaa ajjima acani; quea huiso emano cuana jjaajaqui mee caꞌyonaje, jjajeaqui mee caꞌyonaje peaꞌai. Jamajjeya o ba majje quea huiso nee nee poqui canaje jocuama, Jesosa baa.  
\v 4 Jamaya poanaje Jodio cuana Jenosanena huasijje poqui oꞌoyani ojee ijjiaꞌijjiaꞌyohua esohui dojojjiya Jodioja ebacua yahuajo cuiaꞌyo jjima shejo. Ma epajeaꞌyojji pojjeama jjachichaquinaje.  
\v 5-6 Jamajjeya Jesosaa bajea canaje quea huiso nee nee poeje. Ba majje ohuaya Penipe huohuiꞌajja canaje: —Penipe, ¿achacua acuae seya che bobi jjesheje soꞌo dejja cuana quea huiso bobiajji? —Jesosaa acanaje, Penipeya yajja huohuiꞌajjame acaje ejjabaquijji. Jamatii Jesosaja eba poa Eyacuiñajjiya, oja Chiiya bobi pana cajeꞌyo dejja cuana bobiajji. 
\p  
\v 7 Penipeya sajaꞌa canaje jama baꞌa: —¿Yajja yajji? ¿Ajeo ebobiajji? Oya cuana quea huiso nee nee aña, de. 200 esodojjo quea nahue ecuanaja yani jojjemo maya oe pojji bobi jjesheme ojjaña cuanaja ijjiajji —poanaje Penipe. 
\p  
\v 8 Majoya aje oe o shajjaꞌajjajji Anesi, Simohui Penoja chahua jama poanaje baꞌa:  
\v 9 —Oe eshoꞌiya ye canaje me oejje pahui, beca nahuoo sisi peaꞌai. Jamatii maya oe pojji nei nei, de; dejja cuana quea huiso nee nee ani jejje jjima poaje —poanaje Anesi. 
\p  
\v 10 Majoya Jesosaa jama acanaje baꞌa: —¡Ojjaña cuana jama acue baꞌa: “¡Ojjaña anioquecue sipone biajje!” acue! —Jesosaa acanaje. 
\p Jamajje quea huiso sipone yanijo, ojjaña cuana anioque mee canaje sipone biajje. Quea huiso nee nee poanaje, 5.000 dejja; epona, eshoꞌi cuana peaꞌai sico jjima.  
\v 11 Majoya Jesosaa pahui me oejje huiso jjeshe majje Eyacuiñajji bihuia canaje. Eyacuiñajji nijje bobijo mimi majje pahui tepe canaje; ecuana, o shajjaꞌajjajji cuana quia mee canaje dejja cuana eꞌanioquiani yasijje. Jamaya acanaje nahuoo sisi peaꞌai. Quia ca poquije quea huiso nee nee jjapanaqui poquipoquinaje bobi, de. Jamajjeya ojjaña cuaa ijjia neinei canaje.  
\v 12 Ojjaña jejjeajo, Jesosaa ecuana huohui canaje: —¡Chichacue bobi ojjañaja ijjiasejja! ¡Aꞌa jeanaꞌyojji! 
\p  
\v 13 Jamajjeya ecuanaa chichaꞌyonaje pahui ojjañaja ijjiasejja. Jjepai ai yasijje iyaꞌyonaje. Quea huiso poanaje, 12 jjepaime. Jamatii yahuajo me oejje, 5 pahui poanaje. Eꞌe, Eyacuiñajjiya jjapanaqui mee capoquipoquinaje quea huiso bobi, de.  
\v 14 Eꞌe, Jesosaa ma dejjaja ba jjima acanaje; 5.000 dejja cuana bobia canaje. Ma ba majje dejja quea huiso cuana ojee miminaje jama baꞌa: —Eꞌe jojo nei Jesosa Eyacuiñajjija huoojeaꞌyo ojjaña jaahuanajji. Yahuajo Eyacuiñajjiya ojo huohui mee ca poa jama baꞌa: “Quijje eyaya miquiana huasijje huoojeaje Quito, ojjaña jaahuanajji”. ¡Cuaꞌa, oya esejaya emeshi mese epojji ejjanequi meequi! —dejja cuana poanaje. 
\p  
\v 15 Onajaya ejjashahuabaquijji ba majje Jesosaa ojjaña dejja cuana huoojea canaje equi cuana huasijje. Majoya oya quehua poquinaje. Eyiyo huasijje oe nei jaasohuaqui oꞌoyanaje oja Chii nijje mimiya. 
\s1 Jesosa bae ena biajje poquinaje 
\r (Mateo 14.22-27; Macoso 6.45-52) 
\p  
\v 16 Eꞌe, sinecua, eyiyo huasijje poqui jjimahuajo Jesosaa ecuana, o shajjaꞌajjajji cuana huoojea canaje: —¡Bae ojje miji yasijje bishe aijo besapoquicue! Quijje eya poquije miquiana que —Jesosa poanaje. 
\p  
\v 17 Jamajjeya bishe ai yasijje ani majje ecuaa yonaje. Besapoquiꞌajjanaje ojje miji yasijje epoquijji, Capenaoma huasijje. Mecajje quea apo nee poanaje. Jamatii Jesosa ecuana huasijje poe jjima poanaje.  
\v 18 Beni quea quemo nee nee poeyanaje. Enashajo quea quemo anicuayanaje.  
\v 19 Quea huesha nee yoꞌajjanaje enabae yiyesama neijo. Jomajo ecuaaya banaje Jesosa. Eyiyojje ena biajje jeojeojebeje banaje. Jesosa ba majje ecuana quea ajjajja nee nee poanaje, oya eshahua poso anaje.  
\v 20 Jamajjeya Jesosa ecuana nijje jama poanaje baꞌa: —¡Aꞌa quea mete pojji! Eya ca ca iña iquio, eshahua pojjeama —poanaje. 
\p  
\v 21 Jesosa shajjaꞌajja majje quea jaji nee poꞌyonaje ecuana. Bishe ai yasijje ani meeꞌyonaje. Jesosa aniꞌyajo, bishe ai bae ojje miji yasijje baꞌeñaquinaje, Capenaoma huasijje. Jomajo cahuinaje ecuana. 
\s1 Ojjaña cuaa Jesosa saꞌajja canaje 
\p  
\v 22 Mecahuajje ojjaña cuana, ma Jesosaa bobia canaje cuana jjachichaqui oꞌoyanaje bae sahua huasijje. Jama ojee miminaje baꞌa: —¿Achejo shai Jesosa? Oe bishe ejaanaje, de. Jamatii Jesosa o shajjaꞌajjajji cuana nijje besapoqui jjima, de, yaninaje eyiyojo tii —dejja cuaa acanaje. Ojjañaja ba jjima poanaje Jesosa ena biajje jeojeopoquije. 
\p  
\v 23 Majoya pea bishe cuana Timenia cuiñajjijo ani poeyanaje. Baꞌeñaquinaje bae sahuajo, jomajo yahuajo Jesosaa Eyacuiñajji bihuia majje quea huiso cuana bobia canaje.  
\v 24 Jamajjeya ojjaña cuana Jesosa, o shajjaꞌajjajji cuana peaꞌai chamaꞌ ba majje bishe cuana huasijje anisohuaquinaje. Capenaoma huasijje besapoquinaje Jesosa saꞌajjaꞌyohua. 
\s1 Jesosaa esohui huohui canaje pea cahuijo, ebaꞌe tiitii meeꞌyojji 
\p  
\v 25 Ojje miji yasijje baꞌeñaqui majje oya cuaa Jesosa ba canaje. Ba majje huohuiꞌajja canaje: —Esohui huohuijji, ¿ache shono acuae mi jiquiacua poeyanaje soꞌo baꞌa? —poanaje. 
\p  
\v 26 Jesosaa oya cuana sajaꞌa canaje quea yeno jama baꞌa: —Miquianaya ejo jjashahuabaqui ajja jama baꞌa: “Eꞌe, Jesosa ma dejjaja ba jjima acanaje; jamajjeya oya eꞌe jojo nei Eyacuiñajjija huoojeaꞌyo ojjaña jaahuanajji”. Chojja, miquianaya jama ejjashahuaba meequijji pojjeama. Bobijo ca ca miquianaaya eya saꞌajjaña, bobi quea huiso ijjia majje quea jejje poanajeya jjejojo.  
\v 27 ¡Aꞌa jjashahuaba tiitiiquijji bobijo, ebaꞌejjijo! Maya jjeya nei oe poani. Sho caje oꞌoya. ¡Ecuea esohuijo ca ca jjashahuabaquicue oe! —Jesosa poanaje—. Maya eꞌe jojo nei shajjaꞌajjajo, eyaya miya baꞌe tiitii meejeꞌyo enijje eyajo. Ecuea esohui pea bobi jayojja, ebaꞌe tiitii meeꞌyojji. Eꞌe, eyaya ojjañaja Edoe Meseya ma pea bobi ebaꞌe tiitii meeꞌyojji quiaje miquianaya, eya Eyacuiñajjija huoojeaꞌyohua jjejojo. Eyacuiñajjiya ecue Chiiya eya ma dejjaja ba jjima amee cani; pahui jjapana meequi canaje miquiana bobiajji. Jamajoya miquea eba eya oja huoojeaꞌyo ojjaña jaahuanajji —Jesosa poanaje. 
\p  
\v 28 Majoya aje dejja cuaa Jesosa huohuiꞌajja canaje jama baꞌa: —¿Achajja acuae ecuaa Eyacuiñajjija esohui jayojjaya ajeꞌyo soꞌo? ¿Jamajjeya oya ecuana nijje quea bihui nee poajeꞌyo? 
\p  
\v 29 Jesosaa oya cuana sajaꞌa canaje jama baꞌa: —Eꞌe jojo nei jama acue ejo baꞌa: “Eꞌe Jesosa, miya Eyacuiñajjija huoojeaꞌyo ojjaña jaahuanajji” jamaya acue. Jamajjeya Eyacuiñajji quea bihui nee poajeꞌyo miquianajo —Jesosa poanaje. 
\p  
\v 30 —Eꞌe pojjaꞌa —Jodio cuaa huohui canaje—. Jamajjeya ¡miyaya Eyacuiñajjiya jayojja jama acue dejjaa ajjima acani! Jamajjeya ecuanaja eba poaje miya eꞌe jojo nei Eyacuiñajjija huoojeaꞌyo ojjaña jaahuanajji. ¿Ae poaje miya? ¡Eyacuiñajji jayojja jama acue, Moisesiya aca poa jama oe acue!  
\v 31 Eꞌe, yahuajo nei meshi jabojo Eyacuiñajjija esohui huohuijjiya Moisesiya esejaya etiiquiana bobi pahui jayojja quia ca poa ojjaña pojjajo. Yahuajo nei Eyacuiñajjiya Moisesi tehue mee ca poa jama baꞌa: “Eyacuiñajjiya Moisesija bobi pahui sisi jayojja eyajo oque mee ca poa meshi yasijje etiiquianaja eꞌijjiajji” jamaya tehue ca poa —Jodio cuana poanaje. 
\p  
\v 32 —Eyaya miya eꞌe nei huohuiaña —Jesosaa acanaje—, Moisesiya pojjeama etiiquiana quia canaje bobi. Ma eyajo aniya tii bobi oque mee canaje ecue Chiiya. Ohuaya jjeya miquianaya quia cani pea bobi ma eyajo ani meshi yasijje poeyanaje.  
\v 33 Eꞌe, jjeya nei Eyacuiñajjija bobi eyajo aninaje ohuaya huoojea cani ojjaña baꞌe tiitii meeꞌyojji —Jesosa poanaje. 
\p  
\v 34 —Eꞌe, emeshi mese, ¡che ecuana jiquio bobi quiacue ojjaña pojjajo! —poanaje oya cuana. 
\p  
\v 35 —Eya ca ca iña jiquio bobi jayojja tiiya Eyacuiñajjija huoojeaꞌyo —Jesosa poanaje—, Eyacuiñajjija huoojeaꞌyo ojjaña jaahuanajji, ojjaña baꞌe tiitii meeꞌyojji peaꞌai. Jamaya eya poani. Bobi ijjia majje miya quea yeno poaje oꞌoya, quea shoe po oꞌoya majje. Quea naba taja peaꞌai poaje oꞌoya. Enijje ejjapeequi jjemo, e eshajjaꞌajja jojjemo peaꞌai miquiana quea bihui tii poꞌyome, quea jejje tii jayojja nequi meeꞌyome —Jesosa poanaje—.  
\v 36 Eyaya miquianaya huohuiaña jama baꞌa: Miquiaaya ecuea ma dejjaa ajjima acani quea huiso cuana banaje, pahui ecue pana ijjianajejo peaꞌai. Jamatii jjashahuabaquiani jama baꞌa: “Chojja, Jesosa Eyacuiñajjija huoojeaꞌyo ojjaña jaahuanajji pojjeama, ojjaña baꞌe tiitii meeꞌyojji pojjeama peaꞌai” jamaya jjashahuabaquiani miquianaya, eya Quito pojjeama poso aña —Jesosa poanaje—.  
\v 37 Ojjaña joya ecue Chiiya ejo eꞌe nei jjashahuabaqui meesahua cani e que poejeꞌyo, enijje jjapeequijeꞌyo tii. E que poeyajo, ecuea miquianaya cajaa yajji pojjeama.  
\v 38 Eꞌe, eya eyajo ani ecue Chiiya meshi yasijje huoojea canaje. Jamajjeya eyaya ojaya ejjashahuabaquiꞌyojji jayojja jama aña, ecuea ejjashahuabaquiꞌyojji jama pojjeama —Jesosa poanaje—.  
\v 39 Ecue Chiiya eya niñesheꞌa ca poa jama baꞌa: “Ojjaña joya eyaya minijje jjapeequi meesahuaña equiyoꞌyojji pojjeama. ¡Ojjaña oe baꞌe tiitii meeꞌyocue minijje! Quijje miya poe oꞌoya majje joya emanoꞌyo cuana oe shequi mee oꞌoyacue, ebaꞌe tiitiiꞌyojji” jama eya niñesheꞌameya ecue Chiiya aca poa —Jesosa poanaje—.  
\v 40 Eꞌe, ecue Chii jama sa poani baꞌa: Ojjaña joya eya Eyacuiñajjija Bacua ba majje, enijje jjapeequiajo, eyaya oya baꞌe tiitii meejeꞌyo enijje eyajo; joya emanoꞌyo cuana jaa peaꞌai shequi meeje oꞌoya quijje poe oꞌoya majje —Jesosa poanaje. 
\p  
\v 41 Majoya Jodio cuaa Jesosajo niñeba canaje. Eꞌe, Jesosaa yahuajo jama acanaje baꞌa: —Eya Eyacuiñajjija huoojeaꞌyo ojjaña jaahuanajji eyajo yahuajo ania poa. Ohuaya eya huoojea canaje meshi yasijje —acanaje yahuajo.  
\v 42 Jamajjeya Jodio cuaa Jesosa Joseja bacua ejja poso acanaje: —¡De! Oya Joseja bacua ejja pojjaꞌa jja coma. Oja chii, ojaya enaese peaꞌai ecuanaja eba. ¿Yajjajje oya jama poani baꞌa: “Eya yahuajo eyajo ania poa; eyajo ani meshi yasijje huoojea canaje ecue Chiiya”? ¿Yajjajje shai jama poanaje oya? 
\p Jodio cuana quea sapa caꞌa jjejojo, Jesosa Joseja jeajo poso ojaya esohui shajjaꞌajja sa poꞌyo ajja. 
\p  
\v 43 —¡Aꞌa eya niñebajji! —Jesosa poanaje—.  
\v 44 Beca cuana jamatii enijje ejjapeequiꞌyojji pojjeama. Ecue Chiiya eya huoojea canaje. Joya ohuaya beca cuana ejo eꞌe jojo nei jjashahuabaqui meesahua cani enijje ejjapeequijji; oya cuana ca ca oe eyaya baꞌe tiitii meejeꞌyo enijje poe oꞌoya majje.  
\v 45 Eꞌe, Eyacuiñajjija esohui huohuijji cuana yahuajo nei baꞌeya jama tehueme aca poa baꞌa: 
\q1 “Eyacuiñajjiya ojjaña dejja cuana, epona cuana peaꞌai oja sohui ba meesahua cajeꞌyo”. 
\m Jamaya tehueme aca poa. Jamajjeya ojjaña joya ecue Chii shajjaꞌajjajji poaniya, oja sohui jama acajeꞌyo. Jamaya amajje enijje jjapeequijeꞌyo peaꞌai —Jesosa poanaje. 
\p  
\v 46 —Jamatii ojjaña cuanaja Eyacuiñajji ba jjima ecojjaja. Eya Eyacuiñajji nijje, ecue Chii nijje ania poa. Jamajjeya eyaya, eyaye nei, oya baña ecojjaa —Jesosa poanaje—.  
\v 47 Eꞌe jojo nei ojjaña joya ecue Chiiya enijje jjapeequi meeshahua cani eyaya baꞌe tiitii meejeꞌyo enijje.  
\v 48 Miquiaaya bobi ijjiaña ebaꞌejji. Jamajjeya eya bobi jayojjaya. Eyaya ecuea epeejji cuana baꞌe tiitii meejeꞌyo.  
\v 49 ¡Bacue! Yahuajo nei meshi jabojo Moisesiya miquianajaya etiiquiana bobi pahui sisi jayojja quia ca poa ojjaña pojjajo; jamatii manoꞌya poa ojjaña etiiquiana.  
\v 50 Eya miquiana nijje mimiani pea bobijo, ma Eyacuiñajji eyajo aniya huoojea canaje meshi yasijje. Maya ijjia majje ca ca manoꞌyo ajja tii tii poajeꞌyo.  
\v 51 Eya ca ca iña pahui jayojjaya, Eyacuiñajjija huoojeaꞌyo. Eꞌe, eya yahuajo eyajo ani meshi yasijje poeyanaje dejja cuana baꞌe tiitii meeꞌyohua. Jamajjeya jiquio ecua bobi ijjia majje miquianaya baꞌyani jayojja jama eyaya dejja cuana baꞌe tiitii meejeꞌyo. Ojjaña joya enijje eꞌe jojo nei jjapeequiani baꞌe tiitiijeꞌyo enijje eyajo. Eyaya ojjaña cuana enijje baꞌe tiitii meeꞌyo sa aña. Jamajjeya eya manojeꞌyo ojjañaja mimishi cuijea meeꞌyojji. Jamajoya ecuea eyami ma pea pahui jayojja jama poani —Jesosa poanaje. 
\p  
\v 52 —¡Chojja, de! —Jodio cuana ojee jjamimicuiajea nobiajeaquinaje—. ¿Yajja yajji ohuaya aje oe oja yami quia cajeꞌyo bobi jayojja ecuanaja eꞌijjiajji, de? —poanaje. 
\p  
\v 53 —Eyaya miya eꞌe jojo nei huohuiaña —Jesosa poanaje—. ¡Shajjaꞌajjacue! Miquiaaya ecue sohui mi shajjaꞌajjajo, enijje mi jjapeequiajo peaꞌai, enijje ebaꞌe tiitii meeꞌyojji pojjeama. Ecue sohui shajjaꞌajjañajo, ecue yami ijjiaña jama jayojja poani; enijje jjapeequianijo, ecuea enaꞌ ishiaña jama jayojja poani peaꞌai. ¡Jamaya pocue, ecuea epeejji poanijo!  
\v 54 Jamajjeya ecue sohui shajjaꞌajjajji cuana, ecuea epeejji nei nei cuana eyaya baꞌe tiitii meeaña; poe oꞌoya majje joya emanoꞌyo cuana jaa peaꞌai shequi meeje oꞌoya.  
\v 55 —¡Bacue! —Jesosa poanaje—. Miquiaaya bobi ijjiaña quea bihui nee ebaꞌejji. Jamaya eya manojeꞌyo miquiana quea bihui nee ebaꞌe tiitii meeꞌyojji. Miquiaaya ena oshe ishiaña naba tajaꞌama epojji. Jamaya ecuea enaꞌ cuayaquijeꞌyo miquiana quea boejea po meejji, cuaqui yasijje epoquijji pojjeama, enijje jjapee neineiquianijo —Jesosa poanaje. 
\p  
\v 56 —Eꞌe —Jesosa poanaje—, jiquio ecua miquianaya quea jejje po majje quea bei nee poani jama jayojja eya miquiana cuanajo manoꞌyajo, miquianaya quea bei nee poajeꞌyo. Ecuea ecue enaꞌ cuayaquijeꞌyo miquianaja mimishi cuijeaꞌyojji, miquiana quea bei nee po meeꞌyojji. Jiquio ecua enaꞌ ishi majje quea bei poani jayojja jama quea bei nee poaje enijje jjapeequi majje. Jamajjeya joya e shajjaꞌajja neineijji poani enijje jjapeequiani; eya onijje jjapeequiani peaꞌai.  
\v 57 Eꞌe, Eyacuiñajji enequi tii eshe, ecue Chii e huoojeajji epo. Eya ecue Chiija ejjashahuabaquiꞌyojji jayojja jama poanijo, ohuaya eya baꞌe tiitii mee cani. Jamajjeya ojjaña joya enijje eꞌe jojo nei jjapeequiani eyaya baꞌe tiitii meejeꞌyo enijje —Jesosa poanaje—.  
\v 58-59 Etiiquiana yahuajo nei nei bobi Moisesija quia ijjia majje jamatii manoꞌya poa. Eya ca ca iña jiquio pea pahui jayojja; eya eyajo ania poa, ecue Chiiya meshi yasijje huoojea canaje. Jamajjeya ojjaña joya enijje eꞌe jojo nei jjapeequiani eyaya baꞌe tiitii meejeꞌyo enijje eyajo —jamaya Jesosaa Jodio cuana sohuihuohui canaje Capenaomajo, Jodioja equi ojee ejjachichaquijjijo. 
\s1 Jesosaa huohui ca oꞌoyanaje esohui ebaꞌe tiitiiꞌyojji 
\p  
\v 60 Jesosaja esohui Capenaomajo shajjaꞌajja majje quea huiso dejja cuana ojee jjaniñebaquinaje jama baꞌa: —¡De! Jesosaja esohui quea tai nee nee, de; shajjaꞌajja maja sa poꞌyo ajja iña, ohua oja eyami eꞌijjia mee ca —poanaje Jodio cuana. 
\p  
\v 61 Onajaya ejjashahuabaquijji Jesosaja eba poanaje. Jamajjeya quea huiso cuana oja esohuijo jjaniñebaquianijo, Jesosaa huohui canaje jama baꞌa: —Ecuea esohuijo ¿aꞌa miquiana quea tai jjashahuabaquiani? ¿Aꞌa mi enijje jjapeequi pajeajeꞌyo?  
\v 62 Quijje eya ojjañaja Edoe Mese, ma yahuajo eyajo ania poa, jjequisohua caje oꞌoya iña eyahuasijje; jiquio meshijo enequi tiijji pojjeama iña. Jamajjeya aje mi oe ¿yajja jjashahuabaquiꞌyome acuae mi poajeꞌyo e jjequisohua caꞌyajo? —Jesosa poanaje—.  
\v 63 Eyacuiñajjija Edojjoshahua Pameya pea ejjashahuabaquijji ba mee cani yahuajo jama pojjeama. Miquianaya ca ca jjashahuabaquiani bobijo, jiquio meshijo ebaꞌejjijo. Jamajjeya miya baꞌe tiitii mee ajja enijje. Eyaya ca ca huohuiaña Eyacuiñajjija ejjashahuabaquijji. Maaya miquianaya baꞌe tiitii mee cajeꞌyo, Eyacuiñajjija esohuijo jjashajjaꞌajjaquianijo.  
\v 64 Jamatii miquianaya quea huiso ejo jama poani baꞌa: “Mi shajjaꞌajja sa poꞌyo ajja iña; minijje jjapeequi sa poꞌyo ajja iña” miquianaya poani —Jesosa poanaje. 
\p Eꞌe, yahuajo nei Jesosaja eba poa jama baꞌa: “Quijje ecuea epeejji nishohua pea cuana eya iña meesahua cajeꞌyo onaja equecuaꞌyojji. Quijje quea huiso cuana enijje jjapeequi ajja poaje”. Jamaya Jesosaja eba.  
\v 65 Jamajjeya Jesosa jama poanaje peaꞌai baꞌa: —Jamajoya eyaya miquianaya yahuajo huohuinaje jama baꞌa: “Beca cuana jamatii enijje ejjapeequiꞌyojji pojjeama. Beca cuana joya ecue Chiiya ejo eꞌe jojo nei jjashahuabaqui mee cani ca ca oe enijje jjapeequijeꞌyo” eyaya yahuajo miquianaya anaje —Jesosa poanaje. 
\p  
\v 66 Majoya ma esohui shajjaꞌajja majje quea huiso dejja cuana Jesosa nijje poqui pajeaꞌyonaje, o shajjaꞌajjajji nisho cuana.  
\v 67 Jamajjeya Jesosaa ecuana, o shajjaꞌajjajji nei, 12 cuana huohuiꞌajja canaje: —¿Ae poaje miquianaya? ¿Aꞌa miya peaꞌai enijje jjapeequi sa poꞌyo ajja poaje? —Jesosa poanaje. 
\p  
\v 68 —Ecuea Emeshi Mese —Simohui Penohua Jesosa sajaꞌa canaje—, chamaꞌ pea mi jayojja. Miyaya ca ca oe esohui eꞌe jojo nei huohuiaña. Mi shajjaꞌajjajji caya ca oe baꞌe tiitii meejeꞌyo minijje tii.  
\v 69 Ecuana minijje eꞌe jojo nei jjapeequinaje. Ecuanaja eba miya eꞌe jojo nei oya Eyacuiñajjija huoojeaꞌyo ojjaña jaahuanajji quea pame nee nee —poanaje Peno. 
\p  
\v 70 —Eꞌe —Jesosa poanaje—. Eyaya miquianaya, 12 cuana babacaꞌyo majje iyaanaje; jamatii oe dejja minijje nequi ecuea epeejji nisho; oya eshahuaja epeejji poani —Jesosa poanaje. 
\p  
\v 71 Jesosa jjashahuabaquiani Jodasajo, ma Simohui Isicanioteja bacua ejjajo. Eꞌe, Jodasa Jesosa shajjaꞌajjajji 12 cuana nijje nequinaje. Jamatii quijje Jodasaa Jodio etii cuana Jesosa iña meeshahua canaje bejjo sosejje, onaja quecuaꞌyojji. 
\c 7  
\s1 Jesosaja echahua mese cuana o shajjaꞌajjajji pojjeama poanaje 
\p  
\v 1 Majoya Jesosaa esohui huohui canananaje Janinea meshijo, Jodea meshijo pojjeama. Jodea meshijo Jodio etii cuaa equecua ca poaje jjejojoya mi poqui oꞌoyanaje. 
\p  
\v 2 Quijje pishana ojjaña Jodio dejja cuana Jenosanena huasijje poqui oꞌoyanaje equi sisi iyaa, ojee quea bihui nee ijjiaꞌijjiaa bobi cuana chichajji shejo.  
\v 3 Jamajjeya Jesosaja echahua mese cuana onijje jama poanaje baꞌa: —¡Aꞌa jja oe jiquiojo Janinea meshijo tii ani tiitiijji! ¡Ecuana nijje Jodea meshi yasijje poqui oꞌoyacue! ¡Jocuama aje oe miyaya ma dejjaa ajjima acani aquicue, ojjaña mi shajjaꞌajjajji cuanaja ebajji!  
\v 4 ¡Aꞌa quehuajje ajji cuiñajji sisijo! Jamaya po ajja cuana. ¡Jenosanenajo aquicue oe, ojjañaja ebajji! Eꞌe, jjeya jomajo ojjaña dejja cuana jjachichaquiani —poanaje. 
\p  
\v 5 Jamaya huohui canaje oja chahua cuaa, Jesosa baꞌyo jjimahuajo, oya Eyacuiñajjija huoojeaꞌyo ojjaña jaahuanajji pojjeama poso acanaje.  
\v 6 Jamajjeya Jesosaa oja chahua cuana huohui canaje jama baꞌa: —Chojja, eya Jenosanena huasijje poqui oꞌoya jjima soꞌo. Eya jjeya miquiana nijje epoqui jojjemo ojjaña cuaa eya shajjaꞌajja jjima acame. Jamatii, ¡miquianaya poquiꞌyo sa po majje poquiꞌyocue! Jomajo dejja cuana mijo jjashahuabaqui ajja.  
\v 7 Miquianaya ojjaña dejja jayojja jama jjashahuabaquianijo, mi quecua sa po ajja cuana. Eyaya ca ca onaya jama anaje baꞌa: “Miquianaya ojjaña quea mimishi poanijo, Eyacuiñajjija esohui jama po ajja” poanaje. Jamajjeya ojjaña ejo quea quene poani; quecua sa acani.  
\v 8 ¡Jamajjeya miquianaya jjeya Jenosanena huasijje poquicue quea cahui huiso ojee ijjiaꞌijjiaa! Eya ca ca iña jjeya epoquiꞌyojji pojjeama. Eꞌe, jjeya nei miquiana nijje poquiꞌyajo eya shajjaꞌajja jjima acame cuaa —Jesosa poanaje. 
\p  
\v 9 Jamaya huohui majje Jesosa Janinea meshijo aninaje soꞌo. 
\s1 Jesosa Jenosanena huasijje poquinaje bobi chichajji shejo 
\p  
\v 10 Jamatii oja chahua cuana Jenosanena huasijje poquiꞌyajo, quijje pishana Jesosa peaꞌai poquinaje. Ojjaña pea Jodio dejja cuana nijje pojjeama poquinaje; quehuajje Jenosanena huasijje poquinaje oe nei.  
\v 11 Ojee ijjiaꞌijjiaa jjachichaqui majje Jodio etii cuana Jesosaja epoeꞌyojjijo ishoa canaje quea quene. Huohuiꞌajja huichaꞌa huichaꞌa canaje jama baꞌa: —¿Aecue Jesosa? ¿Aꞌa cuae oya poeyanaje soꞌo? —acanaje. 
\p  
\v 12 Ojjaña cuana echichaꞌyo pea echichaꞌyo cuana nijje jjapashineijje maimai aninaje Jesosajo jama baꞌa: —Oya quea pame nee nee Jesosa. Siajjepojji pojjeama —beca cuana poanaje. 
\p —Chojja —pea poanaje—, ojjaña cuana se ca dasia cani Jesosaa. Eꞌe, oya Jesosa siajje poani jama baꞌa: “Eya ca ca iña Eyacuiñajjija huoojeaꞌyo ojjaña jaahuanajji” poani —pea Jodio cuaa acanaje, Jesosaja esohui shajjaꞌajja sa po ajja jjejojo.  
\v 13 Jamatii Jodio etii cuanajo quea mete jjejojo joya Jesosa shajjaꞌajjajji epo mi mimi neineinaje; jjapashineijje ojo maimainaje.  
\v 14 Jenosanenajo Jodio cuana ojee ijjiaꞌijjiani quea bihui nee quea huiso cahuime, 7 cahuime. Ojee ijjiaꞌijjianijo quijje pishana beca cahuime po majje Jesosa Eyacuiñajjija equi yasijje poquinaje. Equi shashajo ojjaña cuana sohuihuohui canaje.  
\v 15 Jesosaja esohui shajjaꞌajja majje Jodio etii cuana jama poanaje baꞌa: —¡De! Ojaya eba quea huiso. ¿Achajja shai? Chamaꞌ ojaya esohui huohuijji poanaje. Eshoꞌyahua oya dobiqui jjima de, esohui baa. 
\p  
\v 16 Jesosaa oya cuana sajaꞌa canaje jama baꞌa: —Eyaya huohuiaña miquianaya ecuea esohui pojjeama. Eyacuiñajjiya eya huoojea canaje. Ohuaya eya huohui meesahua cani ojaya ejjashahuabaquijji.  
\v 17 Ojjañaa joya Eyacuiñajjija ejjashahuabaquijji jayojja jama baꞌeꞌyo sa poaniya ba caje eꞌe jojo nei eyaya huohuiaña Eyacuiñajjija ejjashahuabaquijji, ecuea ejjashahuabaquijji pojjeama.  
\v 18 Joya beca cuaa ojaya ejjashahuabaquijji huohui cani aje oe pea cuana quea bihui po meejji jama baꞌa: “Oya esohui huohuijji nei; ¡oya shajjaꞌajjacue!” Jamaya amee sa acani, pea esohui huohuijji cuaa. Pea jayojja jama pojjeama eya. Eyaya ca ca pea cuana bihuia mee sa aña ca ca, ecue Chii, e huoojeaꞌyojji epo oja sohui eꞌe nei huohuiañajo. Jamajjeya eya edasiajji pojjeama.  
\v 19 ¡Bacue! Yahuajo nei Moisesiya miquianajaya etiiquiana cuana huasijje quia caꞌya poa Eyacuiñajjija esohui etehueꞌyo, miquianajaya ebajji. Jamatii ma esohui etehueꞌyo jama baꞌe ajja miquianaya. Moisesija etehueꞌyo jayojja jama ebaꞌeꞌyo jojjemo e quecuaꞌyo sa po ajja pome —Jesosa poanaje. 
\p  
\v 20 Ojjaña Jodio cuaa echichaꞌyo nequiya huohui canaje jama baꞌa: —¿Aya acuae mi quecuaꞌyo sa acani soꞌo? ¡Chojja, de, miya niñepoquiani pojjaꞌa jja mi coma! Mi quecua sa poꞌyo ajja ecuanaya —siajje poanaje cuana. 
\p  
\v 21 Jesosaa oya cuana sajaꞌa canaje jama baꞌa: —Yahuajo eyaya ma dejjaa ajjima acani anaje miquea epojja ejomishocajjijo; oe dejja jeoꞌajja poa. Eyaya oya jeo meeꞌyonaje. Jamajjeya miquianaya ejo jama poanaje baꞌa: “Ohuaya aje oe epojja ejomishocajjijo acani; equipajaajji dojo mee cani peaꞌai. Jamaya quea tai. Jamaya pojjeama etiiquianaja ehuohuiꞌyo” miquianaya poanaje.  
\v 22 ¡Bacue! Yahuajo nei nei baꞌe etiiquianaa aca poa jayojja jama Moisesiya huohui ca poa jama baꞌa: “¡Mique bacua huoꞌo nei, eshoi nei cuiishasha biso nei jehuisejjajeacue!” aca poa. Jamajjeya miquiaaya ebacua 8 cahuime poajo cuiishasha biso nei jehuisejjajeaña, jamatii epojja ejomishocajjijoya.  
\v 23 Jamajjeya Moisesija etehueꞌyo jama poanijojo miquianajaya ebacua cuiishasha biso nei jehuisejjajeaña epojja ejomishocajjijo. Eꞌe, miquianaaya peaꞌai epojja ejomishocajjijo chacoaña. Jamajoya ¿apiojji acuae quiana enijje quea quene nee nee poani soꞌo dejja jeoꞌajja jeo meeꞌyonajejo epojja ejomishocajjijo?  
\v 24 ¡Aꞌa nequiaa eya niñepoqui poso ajji! Quea jaꞌa nee nee jjashahuabaqui majje miquea ehuohui ejo eꞌe jojo nei poaje, quea pame —Jesosa poanaje Eyacuiñajjija equi pejjejo nequiya sohuihuohui canijo. 
\s1 Jesosa eꞌe jojo nei Eyacuiñajjija huoojeaꞌyo ojjaña jaahuanajji 
\p  
\v 25 Majoya quea huiso dejja cuana Jenosanenajo baꞌeca ojee miminaje jama baꞌa: —Jodio etii cuaa jiquio dejja quecua sa acani. ¿Aꞌa eꞌe?  
\v 26 ¡Bacue oe! Jjeya ohuaya ojjaña cuana sohuihuohui caqui. Jamatii oya iña jjima, mimi pajea mee jjima peaꞌai, de. ¿Eꞌe pojjaꞌa etii cuana jjashahuabaquiani che jama baꞌa: “Eꞌe pojjaꞌa oya Jesosa eꞌe jojo nei Eyacuiñajjija huoojeaꞌyo ojjaña jaahuanajji”. Eꞌe pojjaꞌa, de.  
\v 27 ¡De! Ecuanaja eba jiquio dejjaja baꞌejji; Quito poeyajo ca ca ojaya ebaꞌejji ba jjima poaje cuanaja —poanaje cuana, Jesosa Nasanenajo cuaya poso aca poa. 
\p  
\v 28 Majoya Jesosaa Eyacuiñajjija equi pejjejo sohuihuohui huichaꞌa huichaꞌa canijo, oya cuana janobajjima nei sajaꞌa canaje: —Eꞌe, eya miquiaaya eba poso aña. Ecuea ebaꞌejji miquiaaya eba peaꞌai poso aña. Eya miquiana que jamatii poe jjima. Chojja, ecue Chiiya eya huoojea canaje. Ojaya esohui eꞌe nei. Oya miquianajaya ba jjima, de.  
\v 29 Eya onijje ania poa; ohuaya eya huoojea canaje. Jamajjeya oya ecuea eba nei —Jesosa poanaje. 
\p  
\v 30 Ma shajjaꞌajja majje Jodio etii cuana oya Jesosa Eyacuiñajjija Bacua Ejja pojjeama poso acanijo quea quene nee nee poanaje, iña sa acanaje. Jamatii iña jjima, jjeya iña mee jjima acanaje.  
\v 31 Quea huiso dejja ejjachichaqui nequiꞌyo cuana jjashahuabaquiani jama baꞌa: —Jesosa eꞌe jojo nei Eyacuiñajjija huoojeaꞌyo ojjaña jaahuanaꞌyojji. 
\p Jama poanaje peaꞌai baꞌa: —Eꞌe nei Jesosa Eyacuiñajjija huoojeaꞌyo ojjaña jaahuanajji. Chamaꞌ pea dejja Jesosa jayojja epoe oꞌoyajji; ma dejjaa ajjima acani quea huiso acanaje ohuaye nei —poanaje cuana. 
\s1 Paniseo cuaa sohuinano huoojea canaje Jesosa iñaa nisho 
\p  
\v 32 Paniseohua shajjaꞌajja canaje quea huiso dejja cuana jama poani baꞌa: “Jesosa Eyacuiñajjija huoojeaꞌyo ojjaña jaahuanajji”. Ma shajjaꞌajja majje Paniseo etii cuaa, Eyacuiñajji nijje emimijji etii cuaa peaꞌai Jodio sohuinano cuana huoojea canaje jama baꞌa: —¡Jesosa iñaquicue ejeanobiajji! —acanaje. Ma Jodio sohuinano Eyacuiñajjija equi cuiñajji poani. 
\p  
\v 33 Majoya Jesosaa jama sohuihuohuime acanaje baꞌa: —Eya minijje nequi tiitii ajja. Ecue Chiiya eya huoojea ca poa. Quijje pishana eya poquije oꞌoya o que.  
\v 34 Majoya eya saꞌajjajeꞌyo; jamatii eya miquianajaya ebaꞌyojji pojjeama. Poqui meemee ajja enijje e baꞌe yasijje —Jesosa poanaje. 
\p  
\v 35 —¿Achacua shai oya poquijeꞌyo, jocuama ecuana epoquiꞌyojji pojjeama pojjaꞌa? ¿Aꞌa oya pojjaꞌa poquije Jieno dejja cuana huasijje, Jodio cuana Jieno nijje baꞌe cuana jjabaꞌechejjequiani yasijje poquije pojjaꞌa, ojaya esohui huohuiya? —Jodio cuana ojee mimimiminaje Jesosajo. 
\p  
\v 36 —¿Ajeo shai Jesosa jama jjashahuabaquiani? —poanaje Jodio cuana—. “Miquiaaya eya saꞌajjajeꞌyo; jamatii miquianajaya eya ebaꞌyojji pojjeama. Poqui meemee ajja ma e baꞌe yasijje enijje” Jesosa poanaje, de —Jodio cuana poanaje. 
\p  
\v 37 Jenosanenajo Jodio cuana ojee ijjiaꞌijjianaje quea huiso cahuime, 7 cahuime bobi chichajji shejo. Ma pojja cuanajo quea bihui nee poanaje, yahuajo ijjiaꞌijjia jjimahuajo quea bihui pishana poa. Beshahua nei ijjiapajea caꞌyanijo, quea bihui nee nee poa. Jamajjeya beshahua nei ojee ijjiaꞌijjia pajeaꞌyanijo Eyacuiñajjija equi pejjejo Jesosa que jjachichaqui oꞌoyanaje. Jesosa taaanaje ojjaña huasijje jama baꞌa: —¡Ojjaña miquianaya quea naba taja jayojja poanijo, poecue e que, ecuea eꞌishijji ishiya! Enijje jjapeequi sa neinei poanijo quea naba taja jayojja jama poani; jamajjeya eyaya miquianaya baꞌe tiitii meejeꞌyo ecuea esohui eꞌe jojo nei shajjaꞌajjañajo.  
\v 38 Jiquio ecua ena eteohuejja cuayani tii tii jayojjaya, ojjaña ishi majje naba tajaꞌama poani jayojja jama ojjaña joya enijje jjapeequiani eyaya baꞌe tiitii meejeꞌyo. Majoya oya cuaa pea cuana enijje jjapeequi meesahua cajeꞌyo peaꞌai —Jesosa poanaje. 
\p  
\v 39 Jesosa jjashahuabaquiani jama baꞌa: —Edojjoshahua Pame poejeꞌyo. Dobiquijeꞌyo ecuea epeejji cuana huasijje. Enijje jjapeequi meesahua cajeꞌyo quea pame nee; jiquio ecua enaa caneco cuatajea cani jama jayojja quea cuata poaje Edojjoshahua Pame dobiquiajo. 
\p Jesosa jamaya poanaje Edojjoshahua Pame ojaya epeejji cuana huasijje dobiqui jjimahuajo. Quijje Jesosa emanoꞌyojaa shequi oꞌoya majje eyahuasijje jjequisohua caꞌyajo, ohuaya Edojjoshahua Pame huoojea caje ojaya epeejji cuana huasijje. 
\p  
\v 40 Jesosaja esohui shajjaꞌajja majje quea huiso cuana jama poanaje baꞌa: —Eꞌe jojo nei Jesosa Eyacuiñajjija esohui huohuijji nei. Yahuajo nei Moisesiya tehue ca poa jama baꞌa: “Oya poeje Eyacuiñajjija huoojeaꞌyo ojjaña jaahuanajji poe jjimahuajo” tehue ca poa —poanaje cuana; Jesosa esohui huohuijji poso acanaje, Eyacuiñajjija huoojeaꞌyo ojjaña jaahuanajji pojjeama poso acanaje beca cuaa. 
\p  
\v 41 Pea cuana ca ca jama poanaje baꞌa: —Chojja. ¡Oya ca ca oe Eyacuiñajjija huoojeaꞌyo ojjaña jaahuanajji eꞌe jojo nei, de! 
\p Jamatii pea cuana poanaje: —Chojja, Jesosa Janinea meshijo baꞌe. Eyacuiñajjija huoojeaꞌyo ojjaña jaahuanajji ca ca Janinea meshijo pojjeama cuayaje —acanaje cuaa, Jesosa Janinea meshijo Nasanenajo cuaya poso. 
\p  
\v 42 —Eyacuiñajjija esohui etehueꞌyo yahuajo jama poani baꞌa: “Dabi emeshi mese yahuajo baꞌya poa Eyacuiñajjija huoojeaꞌyo ojjaña jaahuanajji emeshi mese ojaya osecua poaje. Jamajjeya Dabija meshijo cuayaje, Benenajo, Jodea meshijo” —poanaje beca cuana. 
\p  
\v 43 Jamaya ojjaña Jodio dejja cuaa mimicuiajeanobia canaje Jesosajo.  
\v 44 Beca cuaa Jesosa iña mee sa acanaje; jamatii jjaꞌiña meequi jjima poanaje. 
\p  
\v 45 Jamajjeya sohuinano cuana, Eyacuiñajjija equi cuiñajji, ma Paniseohua yahuajo huoojea canaje Jesosa iñaa nisho Jesosa esohui huohui poequi baqui majje huacuaya poquiꞌyonaje Eyacuiñajji nijje emimijji etii yasijje, Paniseo cuana peaꞌai yasijje. Poeyajo, Sohuinano cuana tecuea canaje Jodio cuaa: —¿Apiojji acuae quianaja Jesosa iña jjima soꞌo? Ye jjima, de —poanaje. 
\p  
\v 46 —Chamaꞌ pea dejja Jesosa jayojja jama mimime. Pea dejja o jayojja mimi jjima; ojaya esohui quea pame nee nee, de —sohuinanohua sajaꞌame acanaje. 
\p  
\v 47 —¡De! Ohuaya aje mi oe dasia canaje peaꞌai —sohuinano tecueame acanaje Paniseo cuaa—.  
\v 48 ¿Aꞌa Jodio etii cuana, ecuana peaꞌai onijje jjapeequiani? ¿Aꞌa oya shajjaꞌajjaña peaꞌai ecuaa? Chojja, de —Paniseo cuaa acanaje—.  
\v 49 Ojjaña jiquio dejja echichaꞌyo nequi ca ca Moisesija etehueꞌyo ba jjimajo, oya cuana Eyacuiñajjiya quea nee nee po mee cajeꞌyo cuaquijo —acanaje Paniseo cuaa, jjashahuaba taiquianiya jjejojo. 
\p  
\v 50 Nicodemo, ma yahuajo Jesosa nijje miminaje mecajje Paniseo cuana nijje peaꞌai nequinaje. Jamajjeya ohuaya pea Paniseo cuana jama huohuiꞌajjame acanaje baꞌa:  
\v 51 —¡Bacue! Moisesija esohui etehueꞌyo yahuajo jiquio jama poanaje baꞌa: “¡Oe dejja niñeba jjimahuajo, oya iyaacue! Ohuaya huohui cajje, majoya miquianaaya bajeꞌyo oya quea mimishi pojjaꞌa, oya mimishiꞌama pojjaꞌa”. ¿Aꞌa eꞌe? —poanaje Nicodemo. 
\p  
\v 52 Paniseo cuaa jja oya sajaꞌa canaje. Quea mimi tecue poanaje jama baꞌa: —¿Aꞌa miya peaꞌai Janinea dejja, Janinea meshijo baꞌe peaꞌai? ¡Eyacuiñajjija esohui ba neineicue! Chamaꞌ poaje Eyacuiñajjija esohui huohuijji Janinea meshijo baꞌecaja, pa —poanaje Paniseo cuana. 
\p  
\v 53 Majoya, siniajo ijjiaꞌijjia pajea majje ojjaña cuana poquinaje equi cuana huasijje cahuiya. 
\c 8  
\p  
\v 1 Jesosa ca ca eyiyo bajjani Onimo eyiyo huasijje poquinaje. Jomajo aninaje jiquio mecajje. 
\s1 Jodio cuaa epona quea mimishi Jesosa que ye canaje 
\p  
\v 2 Mecajjeahua Jesosa poe oꞌoyanaje Eyacuiñajjija equi yasijje. Quea huiso nee nee cuana o que jjachichaqui oꞌoyanaje. Eyacuiñajjija equi pejjejo anioque majje Jesosaa sohuihuohui ca oꞌoyanaje ojjaña cuana huasijje.  
\v 3 Majoya Paniseo cuaa, Moisesija etehueꞌyo huohuijji cuaa peaꞌai epona quea mimishi ye canaje. Pea cuaa oya ba canaje pea dejja oja yahue pojjeama nijje jaa, pa. Jamajjeya Paniseo cuaa huohui canaje epona jama baꞌa: —¡Jesosa nequi cojja nei nequicue! 
\p  
\v 4 Majoya Paniseo cuaa Jesosa huohui canaje jama baꞌa: —Esohui huohuijji, jiquio epona quea mimishi nee poanaje. Pea dejja oja yahue pojjeama nijje jaanaje —acanaje cuaa—.  
\v 5 Moisesiya yahuajo nei jama tehueme aca poa baꞌa: “¡Epona pea dejja oja yahue pojjeama nijje jaajo, jajahuejjajeacue meiya!” tehueme aca poa yahuajo nei. Jamajjeya, Jesosa, ¿yajja acuae miyaya epona aje soꞌo? —poanaje Paniseo cuana Moisesija etehueꞌyo jayojja ohua mi sajaꞌa cajje Jesosa eꞌiñaꞌyojji nisho jjashahuabaquinaje.  
\v 6 Eꞌe, jjashahuabaquinaje jama baꞌa: —Eꞌe pojjaꞌa Jesosa Moisesija etehueꞌyo jayojja jama pojjeama mimije. Jamajjeya ecuana jama poaje: “Oya Jesosa ca ca oma siajjepojji; Moisesija esohui jayojja jama po ajja”. 
\p Jamatii Jesosaa oya cuana sajaꞌa jjima acanaje. Meshi pohuijo tehue canaje eme sisiya.  
\v 7 Paniseo cuaa eponajo huohui majamajaꞌajja canaje. Jamajjeya Jesosaa Paniseo cuana cojja ba jeyojeyo neinei majje sajaꞌa canaje jama baꞌa: —¡Miquianaaya joya mimishiꞌama nei neiya ebionei mei jea coocue, jajahuejjajeacue pona! —poanaje. 
\p  
\v 8 Mimi majje Jesosaa meshi pohuijo tehue ca oꞌoyanaje.  
\v 9 Jesosaja esohui shajjaꞌajja majje Jodio dejja cuana oe cuayaqui, oe cuayaquiꞌyonaje esecue yasijje. Ebionei edejja tii ehui dojojji cuayaquiꞌya poa; o quishishijji joya etii pishana cuayaquinaje peaꞌai. Quea bicho ojjaña poanaje quea mimishi jjejojo. Epona jeana caꞌyonaje Jesosa cojja neijo nequi.  
\v 10 Jamajjeya Jesosaa nequisohua majje bajea canaje epona nequi; chamaꞌ Jodio etii cuana. Epona nijje jama poanaje baꞌa: —Epona, ¿ae acuae ma mi tecueajji epo? ¿Aꞌa mi mique mimishijo jajahuejjajeaꞌajja caꞌyonaje cuaa? —ba majje acanaje Jesosaa. 
\p  
\v 11 —Esohui huohuijji, jajaꞌyo jjima mo Jodio etii cuanaja. Poquinaje oya cuana ojjaña —poanaje epona. 
\p —Eꞌe epona, ecuea miya ejajahuejjajeajji pojjeama peaꞌai. ¡Poquicue miya; mimishi pajeaꞌyocue! —Jesosa poanaje epona nijje. 
\p Majoya epona poquinaje quea bihui nee. 
\s1 Jesosaa ojjaña cuana Eyacuiñajji ba mee caje 
\p  
\v 12 Majoya epona nijje mimi majje Jesosaa sohuihuohui ca oꞌoyanaje ojjaña ejjachichaqui anica huasijje. Jama poanaje baꞌa: —Jamatii quea apo nee neeya, cuaquijijiya jeajaꞌa cani mecajje. Oya jayojjaya eya poani. Eyaya dejja cuana jamatii quea mimishi nee nee poa quea jaꞌa nee jjashahuabaqui meeaña Eyacuiñajjijo. Ojjaña joya ejo eꞌe jojo nei jjashahuabaquiani aje oe quea mimishi, quea apo peaꞌai baꞌe maja ajja. Eyaya oya cuana baꞌe tiitii meejeꞌyo enijje —Jesosa poanaje. 
\p  
\v 13 Jamajjeya pea Paniseo cuana Jesosa nijje mimijajinaje jama baꞌa: —¡De! Miyaya neiya huohuiaña jama baꞌa: “Eyaya dejja cuana baꞌe tiitii meejeꞌyo” poani. Miyaye nei jama huohuiañajo, ecuanaja miya eshajjaꞌajjajji pojjeama. Chojja, de. Moisesiya yahuajo nei jama huohui ca poa baꞌa: “¡Aꞌa oe dejjaja ehuohui shajjaꞌajjajji! ¡Becanejjijji peaꞌaiya huohui canijo oe shajjaꞌajjacue!” poa —poanaje Paniseo cuana. 
\p  
\v 14 Jesosaa oya cuana acanaje jama baꞌa: —Eꞌe, eya neiya poanaje eyaya ecuea epeejji cuana baꞌe tiitii meeaña. Jamaya eꞌe jojo nei eyaya aña. Ecuea eba ecue Chii e huoojeajji epo. ¿Achacua eya poquije oꞌoya? Ecuea eba, de. Jamatii miquianajaya maya ba jjima. Jamajjeya ¡ecuea ehuohui ejo shajjaꞌajjacue! ¡Jamatii eyaye nei huohuiañajo shajjaꞌajjacue!  
\v 15 Dejja mimishi cuanaja ejjashahuabaquijji jama miquianaya ejo jjashahuabaquiani, quea quehua. Eya ca ca mi jayojja jama pojjeama.  
\v 16 Jamatii eyaya dejja cuanaja ebaꞌejji huohuiañajo, ecuea ehuohuiꞌyo eꞌe nei poani. Eꞌe, ecue Chiiya eya huoojea canaje. Ojaya ehuohui jayojja jama eyaya aña, ecuea ejjashahuabaquijjijo pojjeama. Eya ecue Chii nijje beca. Jamajjeya ecuanaja ehuohuiꞌyo dejja cuanajo eꞌe nei nei poani.  
\v 17 Miquianajaya etiiquianaja Moisesija etehueꞌyo jama yahuajo poa baꞌa: “Becanejjijji peaꞌaiya oya jayojjaya huohui cajo ¡shajjaꞌajjacue, miquianaaya!” jamaya tehue ca poa.  
\v 18 Eyaya miya huohuiaña jama baꞌa: Eyaya Eyacuiñajjija huoojeaꞌyo ojjaña jaahuanajjiya ecuea epeejji cuana baꞌe tiitii meejeꞌyo. Ecue Chiiya peaꞌai jama miya ba meesahua cani baꞌa: “Jesosa ecue huoojeaꞌyo” ecue Chii poani —Jesosa poanaje. 
\p  
\v 19 Jamajjeya Paniseo cuaa Jesosa huohuiꞌajja canaje jama baꞌa: —¿Achejo acuae mique Chii ani soꞌo? 
\p Jesosaa sajaꞌa canaje jama baꞌa: —Miquianajaya eya baꞌyo jjima; ecue Chii miquianajaya baꞌyo jjima peaꞌai. Eꞌe, eya miquianajaya eba jojjemo ecue Chii peaꞌai bame. 
\p  
\v 20 Jamaya Jesosaa sohuihuohui canaje Eyacuiñajjija equi pejjejo nequiya, Jodio etii cuana ojee chacochacoani pejjejo. Jamatii Jodio etii cuana Jesosaja esohui shajjaꞌajja majje iña jjima poanaje jjaꞌiña meequi ajjajojo. 
\s1 Jesosaa Jodio shajjamaꞌ cuana tecuea canaje 
\p  
\v 21 Majoya Jesosaa ojjaña cuana huohui canaje jama baꞌa: —Eya minijje nequi tii ajja; quijje pishana eya poquije oꞌoya. Quijje miquianaaya eya saꞌajja neineijeꞌyo miquea mimishi cuijeaꞌyojji, mi jaahuanajji peaꞌai. Jamatii miquianaya quea mimishi tii manojeꞌyojo, quea nee nee poajeꞌyo cuaquijo. Ma e poqui yani yasijje miquianaya epoquijji pojjeama —Jesosa poanaje. 
\p  
\v 22 Jamajjeya Jodio etii cuana ojee huohuiꞌajja canaje jama baꞌa: —¿Yajjajje oya poquije? ¿Aꞌa oya jjayacuaquiꞌyo majje manoꞌyo sa poani pojjaꞌa? ¿Aꞌa jamajoya ohuaya jama acanaje baꞌa: “Ma e poqui yani yasijje miquianaya epoquijji pojjeama?” —acanaje Jodio etii cuaa. 
\p  
\v 23 Jesosa jama poanaje baꞌa: —Miquianaya meshijo baꞌe. Jamajjeya Edosiquiana jayojja jjashahuabaquime poani, quea tai. Eya ca ca iña eyajo baꞌe, Eyacuiñajji jayojja jama eya jjashahuabaquiani.  
\v 24 Jamajoya eyaya miya huohuinaje jama baꞌa: “Miquianaya quea mimishi tii manojeꞌyojo, quea nee nee tii poajeꞌyo cuaquijo”. Eyaya miquianaya huohuinaje eya Eyacuiñajjija huoojeaꞌyo ojjaña jaahuanajji. Jamatii miquianaya jjashajjaꞌajjaqui ajja. Jamajjeya miquianaya eꞌe jojo nei manojeꞌyo mimishi cuijeaꞌyo jjima tii. Quea nee nee poajeꞌyo tii tii cuaquijo —Jesosa poanaje. 
\p  
\v 25 —Eꞌe pojjaꞌa —Jodio etii cuana poanaje. ¿Aya acuae mi huoojea canaje soꞌo ecuana que? ¿Ajeo miya poeyanaje jiquiacua? —Jodio cuana poanaje. 
\p —¡De! Aje jja mi huohui huichaꞌa huichaꞌaꞌajjanaje yahuajo ehuohui coojji —Jesosa poanaje—.  
\v 26 Miquianaya ecuea eba quea jjashahuabaqui tai, quea mimishi poani —Jesosaa Jodio cuana acanaje—. Jamajjeya eyaya miquianaya tecueaña. Miquianaaya niñebaña ecuea ehuohuiꞌyojo. Jamatii ecue Chiiya eya huoojea canaje; ojaya eba ojjaña; ojaya esohui eꞌe nei. Maya eyaya ojjaña cuana huasijje huohuiaña —Jesosa poanaje. 
\p  
\v 27 Jesosaja esohui oja Chiijo Jodio etii cuana ba sa po ajja. Oya cuana jjashahuabaquiani quea tai jama baꞌa: —Chojja, Jesosa Eyacuiñajjija huoojeaꞌyo pojjeama —poso acanaje Jodio etii cuaa. 
\p  
\v 28 Jamajjeya Jesosaa huohui canaje jama baꞌa: —¡Bacue! Quijje eya, ojjañaja Edoe Mese miquianaaya baꞌehuanasohuajeajeꞌyo acui ecueataꞌapeejo. Majoya miquianajaya eba poaje jama baꞌa: “Jesosa eꞌe jojo nei Eyacuiñajjija huoojeaꞌyo ojjaña jaahuanajji”. Eꞌe, ojaya esohui eyaya huohuiaña, ecue Chiija. Ecuea ejjashahuabaquiꞌyojji ca ca eyaya huohui jjima aña.  
\v 29 Ecue Chiiya eya huoojea canaje. Eyaya oya quea bihui po mee sa aña tii. Jamajjeya oya enijje yani tii tii, ohuaya eya jeananaꞌyo ajja —Jesosa poanaje. 
\p  
\v 30 Quea huiso Jodio cuana Jesosa shajjaꞌajja majje jama poanaje baꞌa: —Eꞌe jojo nei nei Jesosa Eyacuiñajjija huoojeaꞌyo ojjaña jaahuanajji. Oja sohui eꞌe jojo nei —poanaje. 
\s1 Eyacuiñajjija bacua cuana eshahuaa napa ajja 
\p  
\v 31 Jamajjeya quea huiso Jodio cuana Jesosa nijje jjapeequinaje. Oya cuana Jesosaa jama acanaje baꞌa: —Eꞌe, ecuea esohui jama baꞌyani tiijo miquianaya e shajjaꞌajjajji eꞌe jojo nei poani.  
\v 32 Jama poanijo ecuea esohui miquianajaya quea jaꞌa nee poajeꞌyo. Ecuea esohui eꞌe jojo nei poani, siajje pojjeama. Jamajjeya ecuea esohui ba neineiyajo, miquianajaya mimishi cuana pajea meejeꞌyo, Edosiquianaja yajjijo chaco meepajeajeꞌyo peaꞌai —Jesosa poanaje. 
\p  
\v 33 Majoya pea Jodio cuana Jesosa nijje jjapeequi ajjajo quea tecue jama poanaje baꞌa: —Chojja. Amajama ecuanaja etiiquiana, de. Jamajjeya pea cuanaja ecuana ehuoojeaꞌyojji pojjeama peaja yajjijo chacochacohua sosemaꞌ —siajje poanaje oya cuana—. ¿Yajjajje miya jama poanaje baꞌa: “Eyaya miquianaya chacochaco pajea meejeꞌyo peaja yajjijo?” —poanaje Jodio cuana. 
\p  
\v 34 Jesosaa oya sajaꞌa canaje: —Eꞌe jojo nei ojjaña joya quea mimishi poani ca ca o huoojeaꞌyojji Edosiquiana bajjani jayojja jama poani tii, quea mimishi. Ojaya yajjijo chacopajea meemee ajja jama jayojjaya aña miquianaya, miquianajaya mimishi pajeaꞌyo ajjajo.  
\v 35 ¡Bacue! Echacojji baꞌe tiitii ajja echacojji meseja equijo. Oja bacua ca ca oe onijje baꞌe tiitiijeꞌyo. Miquiana huoojeaꞌyojji Edosiquiana bajjani quea mimishi; ojaya yajjijo miquianaya sosemaꞌ chacochacoani. Jamajoya miquianaya baꞌe tiitii mee ajja Eyacuiñajji nijje. E shajjaꞌajjajji poani ca ca Eyacuiñajji nijje baꞌe tiitiijeꞌyo oja bacua jjejojoya.  
\v 36 Jamajoya eyaya, Eyacuiñajjija Bacua Ejjaa miquianaya mimishi pajea meesahuajeꞌyo. Jamajjeya miquianaya eꞌe jojo nei Edosiquianaja huoojeaꞌyo pojjeama poajeꞌyo.  
\v 37 Eꞌe, ecuea eba Amajama miquianajaya etiiquiana poa. Jamatii miquianaya ecuea esohui shajjaꞌajja sa poꞌyo ajja nei nei. Jamajjeya miquiaaya eya quecua sa aña.  
\v 38 Miquianaaya mi huoojeajji jayojja jama atiitiiaña quea tai. Oya Edosiquiana huoojeajji poani, Satanasa bajjaniya. Eyaya ca ca huohuiaña ojjaña ecue Chiija ejjashahuabaquijji quea pame —Jesosa poanaje. 
\p  
\v 39 —Chojja —Jodio cuana po nishonaje—, Amajama ecuanaja etiiquiana. Ohuaya jayojja jama aña ecuanaa quea pame —poanaje. 
\p —Chojja —Jesosaa Jodio etii cuana sajaꞌame acanaje—. Amajama quea pame, miquianajaya etiiquiana mese poa; jamatii miquianaya o jayojja quea pame poꞌyo ajja. ¿Yajjajo acuae miquianaya o jayojja mi poꞌyani?  
\v 40 Eyaya Eyacuiñajjija esohui eꞌe nei huohuinajejo, miquianaya shajjaꞌajja sa po ajja. Jamajjeya eya miquianaaya quecua sa aña. Amajama ca ca jama poꞌyo ajja; quea pame nee oya.  
\v 41 Miquianaaya aje oe mi huoojeajjija ehuohui quea tai jayojja jama atiitiiaña, Edosiquianaja ehuohui jama —Jesosa poanaje. 
\p Jamatii Jodio etii cuana quenequenenaje. Jama poanaje baꞌa: —Chojja, Eyacuiñajji eꞌe jojo nei ecuanaja Chii. Ecuana ojaya ebacua cuana quea pame poani, de —poanaje Jodio etii cuana. 
\p  
\v 42 Jesosaa oya cuana huohui canaje jama baꞌa: —Eya Eyacuiñajji nijje ani poeyanaje jiquiacua, jiquio meshi yasijje. Eyacuiñajji miquianaja Chii pojjeamajo eya miquianaaya botiꞌama aña. Eꞌe, Eyacuiñajjiya eya huoojea canaje; eya jamatii poeꞌyo jjima. Chojja, ohuaya eya huoojea canaje.  
\v 43 ¿Apiojji acuae miquianaya ejo jjabahuejjaqui jjima? Miya ca mi ca oe e shajjaꞌajja sa poꞌyo ajja tii nequi.  
\v 44 Eꞌe, Edosiquiana huoojeajji poani mi huoojeajji poani; ojaya ejjashahuabaquijji jama atiitiiꞌyo sa poani miquianaya. Yahuajo nei nei oya ona quecua cooꞌyojji poa. Eyacuiñajjija esohui eꞌe nei jayojja jama ojaya ajjima peaꞌai poa; esohui ojaya botiꞌama nei nei poa. Oya siajje poani tii tii, siajjepojji nei nei. Oya ca ca oma siajje po coonaje; siajjepojji cuana huoojeajji poani. Ojjaña siajjepojji cuana ojaya epeejji cuana, Edosiquianaja epeejji.  
\v 45 Eyaya miquianaya Eyacuiñajjija esohui eꞌe nei huohuiaña. Jamatii miquianaaya eya shajjaꞌajja jjima aña. Edosiquiana jayojja miquianaya jjashahuabaquiani.  
\v 46 Miquianaya ejo jama po ajja baꞌa: “Jesosa quea mimishi”. Chojja de. Jamajjeya eya esohui eꞌe nei huohuiañajo, ¿apiojji acuae ecue huohui shajjaꞌajja jjima tii aña soꞌo? —Jesosa poanaje—.  
\v 47 ¡Bacue! Ojjaña Eyacuiñajjija epeejjiya oja sohui shajjaꞌajja cani tii. Miquianaya ca ca Eyacuiñajjija epeejji pojjeama jjejojo ojaya esohui shajjaꞌajja sa poꞌyo ajja tii —Jesosa poanaje. 
\p  
\v 48 Majoya Jodio etii cuaa quenequene majje jama acanaje baꞌa: —¡Miya ca mi ca oe Samania dejja tai, niñepoqui! 
\p  
\v 49 —Chojja —Jesosaa acanaje—, eya niñepoqui pojjeama. Ecue huohui ecue Chiijo eꞌe nei. Eyaya oya bihuiaña quea jaꞌa nee. Miquianaaya ca ca eya niñebaña —Jesosaa Jodio etii cuana acanaje—.  
\v 50 Eya onaya ejo mimi mee sa poꞌyo ajja jama baꞌa: “Jesosa quea pame nee, ¡oya bihuiacue!” Chojja, eyaya dejja jamaya epo meeꞌyojji pojjeama ejo. Ecue Chii ca ca ejo jjashahuabaquiani quea pame nee; eꞌe jojo nei ejo huohui cani ohuaya —Jesosa poanaje—.  
\v 51 Eyaya miquianaya eꞌe jojo nei huohuiaña jama baꞌa: Ojjaña joya e shajjaꞌajja neineijji poani baꞌe tiitii meejeꞌyo, oya cuana ca ca emanoꞌyojjijo meteꞌama poajeꞌyo peaꞌai —Jesosa poanaje. 
\p  
\v 52 Maya shajjaꞌajja majje Jodio cuaa Jesosa jama acanaje baꞌa: —Miquea ehuohui emanoꞌyojjijo ecuanaja eba miya eꞌe jojo nei niñepoqui poani eshahuaa napa canijo. ¡Bacue! Yahuajo ecuanaja etiiquiana Amajama manoꞌya poa. Eyacuiñajjija esohui huohuijji cuana yahuajo baꞌe manoꞌya poa peaꞌai. Jamatii jjeya miyaya huohuiaña jama baꞌa: “Ecuea esohui jayojja jama baꞌyanijo emanoꞌyojji pojjeama miquianaya cuana poaje”. ¡Dee!  
\v 53 Ecuanaja etiiquiana Amajama quea pame nee, quea caꞌa nee poa; jamatii oya manoꞌya poa. ¿Aꞌa miyaya ma Amajamaja ajjima ajeꞌyo? Jesosa, ¿aꞌa miyaya emanoꞌyo cuana shequi meejeꞌyo? Eyacuiñajjija esohui huohuijji cuana yahuajo nei baꞌe poquijeyoꞌya poa peaꞌai, de. ¿Aꞌa miya pea dejja jayojja jama pojjeama? ¿Aꞌa miyaya ojjaña baña quea jaꞌa nee? Chojja, siajje miya poani —Jodio cuana mimijaji majamajanaje Jesosa nijje. 
\p  
\v 54 Jamajjeyaya Jesosaa ojjaña cuana huohui canaje jama baꞌa: —Eya onaya ejo mimi mee sa poꞌyo ajja jama baꞌa: “Jesosa quea pame nee, ¡oya bihuiacue!” Chojja de, Eyacuiñajjiya, ecue Chiiya ca ca oe eya quea jea acani. Jamaya eyaya saña. Eꞌe, ecue Chiiya ejo jama huohui cani baꞌa: “Jiquio ecuea Ebacua Ejja quea pame nee nee, quea caꞌa nee nee; ¡oya shajjaꞌajjacue!” poani ecue Chii. Ecue Chiijo miquianaya jama siajje poani baꞌa: “Ecuana Eyacuiñajjija epeejji, oya ecuanaja eba”.  
\v 55 Chojja de. Oya miquianajaya ba jjima, de. Miquianaya siajje poani. Eya ca ca siajje po ajja. Oya ecuea eba nei nei; eya siajjepojji pojjeama. Eyaya oya baña; ojaya esohui shajjaꞌajjaña; ojaya esohui jayojja jama poani tii tii.  
\v 56 Yahuajo nei miquianajaya etiiquiana Amajama quea bihui nee nee jjashahuabaquinaje ecuea epoeꞌyojjijo quijje nei. Eꞌe, Eyacuiñajjiya yahuajo Amajama ba mee ca poa jama baꞌa: Eya, Eyacuiñajjija huoojeaꞌyo ojjaña jaahuanajji quijje meshi yasijje poejeꞌyo. Ma ba majje quea bihui nee nee Amajama poa —Jesosa poanaje. 
\p  
\v 57 Majoya Jodio cuaa Jesosa jama acanaje baꞌa: —Chojja de, miya siajje poani, de. Miya eshoꞌi, 50 cuiꞌao sheme po jjima miya de. Amajama ca ca yahuajo nei nei baꞌya poa. Oya miquea ba jjima, de —poanaje Jodio cuana. 
\p  
\v 58 —¡Shajjaꞌajjacue! —Jesosaa sajaꞌa canaje—. Eyaya miya eꞌe jojo nei huohuiaña: Amajama cuaya jjimahuajo tii eya yaña tiia poa. Eya ca iña Eyacuiñajji nei —Jesosa poanaje. 
\p  
\v 59 Ma shajjaꞌajja majje Jesosa siajje poani poso Jodio cuaa mei iña canaje o jajahuejjajeajji nisho. Jamatii Jesosa chamaꞌ poanaje. Jesosa quea huiso dejja tejjee nequijje quehua cuayaquinaje Eyacuiñajjija equi esecue jjani yasijje. Poquinaje. 
\c 9  
\s1 Cojjamaꞌ cuaya jjabapojjaqui mee canaje Jesosaa 
\p  
\v 1 Quijje pea pojjajo, ejomishocajji pojjajo Jesosa ecuana nijje, o shajjaꞌajjajji cuana nijje ejiojjijje poquijeya ohuaya ba canaje oe dejja cojjamaꞌ cuaya.  
\v 2 Ba majje ecuanaa Jesosa huohuiꞌajjanaje jama baꞌa: —Esohui huohuijji, ¿yajjajje acuae jiquio cojjamaꞌ cuayanaje soꞌo? ¿Aꞌa ojaya mimishijo pojjaꞌa? ¿Aꞌa oja chiija, oja naeja mimishijo pojjaꞌa? —poanaje. 
\p  
\v 3 —Chojja —Jesosaa ecuana sajaꞌa canaje—, oya cojjamaꞌ cuaya poa ojaya mimishijo pojjeama, oja chii, oja nae cuanaja mimishijo pojjeama peaꞌai. Oya jamatii cojjamaꞌ cuaya mee ca poa. Jamajjeya eyaya oya jjabapojjaqui meejeꞌyo. Ba majje ojjaña cuaa bihuia caje: “Eꞌe, Eyacuiñajjiya Jesosa jjabapojjaqui mee canaje cojjamaꞌ; quea caꞌa nee oya, quea pame nee nee” acaje —Jesosa poanaje—.  
\v 4 Eyacuiñajjiya eya huoojea canaje o chacojji. Jamajjeya jjeya eya miquiana nijje nequianijo Eyacuiñajjijo chacoaña. Quijje eya miquiana nijje nequi ajja jiquiojo. Eyacuiñajjijo chaco majamaja majje eya manojeꞌyo.  
\v 5 Meshijo nequiya eyaya ojjaña cuana Eyacuiñajjija esohui ba meeaña. Eya cuaquijiji jayojja jama poani. Jiquio ecua cuaquijijiya jeajaꞌa canijo dejja cuana poquiquehua ajja mecajje quea apojo jama jayojja eyaya ojjaña cuana Eyacuiñajjijo quea jaꞌa jjashahuabaqui meeaña. 
\p  
\v 6 Jamaya mimi majje Jesosaa cuichojea canaje meshi pohui yasijje. Cojjamaja ecojja iñapepa canaje meshi choeya.  
\v 7 Majoya cojjamaꞌ huohui canaje: —¡Poquicue miya; ecojja shacuaquicue ena eteohuejja huasijje, Sinoeꞌ bajjani yasijje! —poanaje. (Ma ena eteohuejja Ese Ejjaja esohuijo: Eyacuiñajjija huoojeaꞌyo ena bajjani.) 
\p Jamajjeya cojjamaꞌ poquinaje ena eteohuejja huasijje ecojja shacuaa. Ecojja shacua majje jjabapojjaquinaje. Equi yasijje poe oꞌoyanaje cojjajji.  
\v 8 Jamajjeya dejja cuaa o pejjejo baꞌecaa, pea cuaa yahuajo oya meme ani ba canajeya peaꞌai oya cojjajji ba caꞌyonaje. Baꞌyo majje ojee mimimiminaje jama baꞌa: —Jiquio dejja yahuajo cojjamaꞌ eꞌanioque ani meme ani eseyaya banaje. ¿Aꞌa eꞌe? —poanaje. 
\p —Eꞌe, oyaya jja coma —beca cuana poanaje. 
\p —Chojja, pea coma; cojjamaꞌ jayojja coma —pea cuana poanaje. 
\p  
\v 9 Oya yahuajo cojjamaꞌ jama poanaje baꞌa: —Eꞌe, eya iquio ma yahuajo cojjamaꞌ cuaya poaya. Jjeya eya cojjajji —cojjamaꞌ poanaje. 
\p  
\v 10 —Eꞌe nei. ¿Yajjajje acuae mi cojjajjiꞌyo? ¿Yajja acuae mi poꞌyonaje? Jjeya miya cojjajjiꞌyo —jama huohuiꞌajja neineimeya acanaje cuaa. 
\p  
\v 11 Ohuaya sajaꞌa canaje: —Jesosa bajjaniya mo cuichojea canaje meshi pohui tejjee. Ecuea ecojja iñapepa canaje meshi choeya. Majoya eya huoojea canaje Sinoeꞌ ena eteohuejja huasijje ecojja shacuaa. Jamajjeya eya poquinaje. Ecojja shacuaqui majje eya jjabapojjaquinaje —acanaje. 
\p  
\v 12 —¿Aꞌa eꞌe? —ojjaña cuana poanaje—. ¿Achacua acuae ani oya Jesosa jjeya soꞌo? —poanaje. 
\p —Cuaꞌa de, ecuea oya ba jjima ecojjaja —poanaje. 
\s1 Paniseo cuaa dejja yahuajo cojjamaꞌ cuaya ba canaje 
\p  
\v 13 Jamajjeya pea mecahuajje o pejjejo baꞌe cuaa ma dejja yahuajo cojjamaꞌ cuaya poa jjequi canaje Paniseo cuanaja ebajji.  
\v 14 Jesosaa meshi pohui ecuichojea ecojja huasijje iñapepa cajje jjabapojjaqui mee canaje epojja ejomishocajjijo.  
\v 15 Jamajjeya Paniseo cuaa ma ba majje huohuiꞌajja ca oꞌoyanaje jama baꞌa: —¿Yajjajje acuae mi cojjajjiꞌyo? ¿Yajja acuae mi poanaje soꞌo? —poanaje Paniseo cuana. 
\p —Jesosaa ecuea ecojja iñapepa canaje meshi choeya. Majoya ecojja shacuaqui majje eya jjabapojjaquinaje —poanaje ma dejja. 
\p  
\v 16 Jamatii beca Paniseo cuaa huohui canaje jama baꞌa: —Ma dejja Jesosa bajjaniya ca ca oe epojja ejomishocajjijo chaco cani, de —poanaje Paneseo cuana. Jamajjeya Jesosa Eyacuiñajjija huoojeaꞌyo pojjeama poso jjashahuabaquime poanaje. 
\p Pea Paniseohua jama acanaje baꞌa: —Chojja de, ohuaya cojjamaꞌ cuaya jjabapojjaqui mee canaje, pa. Jamaya pea cuana poanaje. Jamajjeya oya mimishiꞌama. Dejja mimishiya jamaya po meemeeꞌyo ajja —poanaje. 
\p Jamajjeya Jesosajo ojee jjamimicuiajea nobiajeaquinaje Paniseo cuana.  
\v 17 Jamajjeya oya cuaa ma dejja yahuajo cojjamaꞌ cuaya huohuiꞌajja ca oꞌoyanaje: —¿Yajja acuae mijo poanaje Jesosa soꞌo? Jesosaa miya jjabapojjaqui mee canaje, pa cuana poani. Jamajjeya ¿yajja acuae miya poani Jesosajo soꞌo? ¿Aꞌya cuae oya? —poanaje Paniseo cuana. 
\p —Jesosa Eyacuiñajjija esohui huohuijji eꞌe jojo nei —sajaꞌame acanaje cojjamaꞌ cuayaa. 
\p  
\v 18 Jamatii Jodio etii cuana jjashahuabaqui sa poꞌyo ajja jama baꞌa: —Oya cojjamaꞌ cuaya poa, jjabapojjaqui mee canaje Jesosaa. 
\p  
\v 19 Jamajjeya oja chii, ojaya enaese peaꞌai iyaa canaje. Poeyajo, huohuiꞌajja canaje: —¿Aꞌa jiquio miquea ebacua ejja cojjamaꞌ cuaya poa? ¿Yajjajje acuae oya jjeya cojjajji? ¡Huohuicue ecuana! —poanaje. 
\p  
\v 20 Echii mese jama poanaje baꞌa: —Eꞌe, jiquio ecuanaja ebacua ejja. Yahuajo oya cuaya poa cojjamaꞌ nei.  
\v 21 ¿Yajjajje shai oya cojjajjiꞌyo jjeya? Ecuanajaya ba jjima. ¿Aya acuae oya jjabapojjaqui mee canaje soꞌo? Ecuanaja ba jjima. ¿Apiojji acuae iñaya nequiaa huohuiꞌajjaña? Oya oe huohuiꞌajja socue; oya etii, eshoꞌi pojjeama. ¡Ohuaya oe huohui cacue! —poanaje echii mese, enaese peaꞌai. 
\p  
\v 22 Jamaya poanaje oya cuana, Jodio etii cuanajo quea mete jjejojoya. Eꞌe, Jodio etii yahuajo jama poanaje baꞌa: “Jesosa Eyacuiñajjija huoojeaꞌyo ojjaña jaahuanajji, ¡aꞌa jama huohuime ajji! Jama mimime poajo jja oe ecuaaya miquianaya Jodioja equi ojee ejjachichaquijjijo esecue yasijje huoojeacuayajeajeꞌyo” poanaje Jodio etii cuana.  
\v 23 Quea mete poanaje oja chii, ojaya enaese cuana peaꞌai. Jamajoya oja chiiya, ojaya enaeseya Jodio etii cuana huohui canaje jama baꞌa: —¡Oya oe huohuiꞌajjacue! Oya eshoꞌi pojjeama, etii nojinoji. 
\p  
\v 24 Jamajjeya Jodio etii cuaa ma dejja cojjamaꞌ cuaya poa iyaa ca oꞌoyanaje ehuohuijji jama baꞌa: —¡Bacue! Ecuanaja eba jiquio dejja Jesosa quea mimishi. Jamajjeya Eyacuiñajji oe nei bihuiacue jama baꞌa: “Eyacuiñajji quea pame nee nee; jamajjeya eya ohuaya jjabapojjaqui mee canaje ohuaye nei” —Jodio etii cuaa acanaje. 
\p  
\v 25 Cojjamaꞌ cuayaa sajaꞌa canaje jama baꞌa: —Miquianaya: “Jesosa quea mimishi” poani. Oya quea mimishi poani jojjemo eya jjabaqui ajja tii pome. Ecuea eba nei nei eya cojjamaꞌ cuaya poa; eya jjeya cojjajjiꞌyo, oja jjabapojjaqui meeꞌyo —poanaje cojjamaꞌ. 
\p  
\v 26 Majoya oya huohuiꞌajja ca oꞌoyanaje Jodio etii cuaa jama baꞌa: —¿Yajja acuae mijo poanaje Jesosa? ¿Yajja acuae mi cojja acaꞌyonaje soꞌo? —poanaje cuana. 
\p  
\v 27 —Eꞌe, eyaya miquianaya yahuajo huohuinaje Jesosa. Jamatii miquianaya jjashajjaꞌajjaqui ajja —oya poanaje—. ¿Apiojji acuaeya shajjaꞌajja oꞌoya sa aña soꞌo? ¿Eꞌe pojjaꞌa miquianaya o shajjaꞌajjajji poajeꞌyo? —poanaje cojjamaꞌ cuaya etii cuana nijje. 
\p  
\v 28 Majoya Jodio etii cuana onijje mimijajinaje jama baꞌa: —Miya ca mi ca oe Jesosaja epeejji. Ecuana ca ca oe Moisesija esohui shajjaꞌajjajji poani.  
\v 29 Ecuanaja eba eꞌe jojo nei Eyacuiñajji yahuajo nei Moisesi nijje mimia poa. ¿Jesosa shai ajea huoojea jiquiacua? Cuaꞌa de. Ba jjima ecuanaja —mimitecuetecueame poanaje Jodio etii. 
\p  
\v 30 —Eꞌe pojjaꞌa, de, —cojjamaꞌ cuayaa oya cuana acanaje—; ¿apiojji shai oya miquianajaya eba pojjeama soꞌo de? ¿Aꞌa miquianajaya ba jjima Jesosa huoojeajji epo? ¡Bacue oe! Eya ohuaya jjabapojjaqui mee canaje.  
\v 31 Eyacuiñajjiya ca ca dejja quea mimishija esohui eshajjaꞌajjajji pojjeama onijje mimianijo. Ohuaya dejja quea pameja esohui shajjaꞌajja cani, oja sohui jayojja jama poanijo.  
\v 32 Yahuajo nei, jjeya nei peaꞌai chamaꞌ pea dejja Jesosa jayojja. Eꞌe, eya yahuajo cojjamaꞌ cuaya poa. Jjeya eya ohuaya cojjajji po mee canaje. Yahuajo nei nei meshi pana cajeahuajo chamaꞌ dejja poa Jesosa jayojja. Jjeya nei peaꞌai chamaꞌ pea dejja Jesosa jama. Pea cuaa ohuaya jayojja jama aꞌajja.  
\v 33 Jesosa Eyacuiñajjija huoojea jjima poa jojjemo ohuaya ma dejjaa ajjima acani ajjima aca quiaye, eya jamatii anijea quiaye —poanaje cojjamaꞌ Jodio etii cuana nijje. 
\p  
\v 34 Oja sohui quea pame shajjaꞌajja sa po ajjajojo Jodio etii cuana quea quene nee nee poanaje. Tecuea canaje jama baꞌa: —¡De! Miya quea mimishi nee nee jjejojo cojjamaꞌ cuaya poa; miya Eyacuiñajjija cajaa. ¿Aꞌa ecuaaya miya shajjaꞌajjaje? Chojja. ¡Poquicue miya! ¡Aꞌa jiquicua poe oꞌoyajji! ¡Ecuanaja ojee ejjachichaquijji equi yasijje aꞌa poe oꞌoya tiitiijji! —jamaya Jodio etii cuaa oya huoojeacuayajea canaje. 
\s1 Joya Eyacuiñajji ba po jjima cuana cojjamaꞌ jayojja 
\p  
\v 35 Majoya pea cuaa Jesosa huohuiqui canaje jama baꞌa: —Jodio etii cuaa cojjamaꞌ cajaa acanaje; Jodioja equi ojee ejjachichaquijji esecue yasijje huoojeacuayajea canaje, pa —poanaje. 
\p Jamajjeya Jesosaa oya saꞌajja canaje. Baꞌyo majje huohuiꞌajja canaje jama baꞌa: —¿Aꞌa miquea eba Eyacuiñajjija Bacua Ejja, Eyacuiñajjija huoojeaꞌyo ojjaña jaahuanajji? —acanaje. 
\p  
\v 36 —Esohui huohuijji, oya ecuea ba jjima. ¡Oya mo ba meecue! Onijje iña jjapeequiꞌyo sa poani —poanaje. 
\p  
\v 37 —Eya jja iña iquio, de —Jesosa poanaje—, ma Eyacuiñajjija huoojeaꞌyo ojjaña jaahuanajji poani. Miya jjeyahua nei Eyacuiñajjija Bacua Ejja nijje mimiani. Eya jja iña iquio, de —Jesosaa acanaje. 
\p  
\v 38 Majoya ohuaya Jesosa bihuia canaje ecuiꞌoshajjajo nequi majje. Jama poanaje baꞌa: —Ecuea Emeshi Mese, ¡eya miquea epeejji nei nei! —poanaje dejja cojjamaꞌ oja jjabapojjaqui meeꞌyo. 
\p  
\v 39 —Eꞌe nei —Jesosa poanaje—, ecue Chiiya eya meshi yasijje huoojea canaje; huohui canaje jama baꞌa: “¡Baquicue! ¿Achajja shai ojjaña cuana jjashahuabaquiani mijo? ¡Baꞌajjaqui socue!” Eyacuiñajjiya aca poa eya. Jiquio ecua cojjamaꞌ jjabapojjaqui meeꞌyaña jayojjaya eyaya ojjaña joya yahuajo Eyacuiñajjija esohui ba po jjima ba meesahuajeꞌyo. Ojjaña joya Eyacuiñajjija esohui ba nisho epo ecuea Eyacuiñajjija esohui eba meejji pojjeama. Jamajjeya oya cuana cojjamaꞌ jayojja tii poaje —Jesosa poanaje. 
\p  
\v 40 Paniseo cuana jomajo nequi Jesosaja esohui shajjaꞌajja majje jama onijje poanaje baꞌa: —¿Aꞌa miya jjashahuabaquiani ecuanajo; Eyacuiñajjija esohui eba pojjeama ecuanajaya, jamajjeya cojjamaꞌ jayojja poani? —poanaje Jodio etii cuana. 
\p  
\v 41 —Eꞌe —Jesosaa sajaꞌa canaje—, miquianajaya Eyacuiñajjija esohui ba jjima nei nei jojjemo eyaya miquianaya ba meeꞌyome. Cojjamaꞌ jjabapojjaqui meenaje jama eyaya miquianaya ameeꞌyome. Eꞌe, eyaya miquianaya Eyacuiñajjija esohui ba meeꞌyome quea jaꞌa nee. Jamatii miquianaaya Eyacuiñajjija esohui ba neinei nishoañajo, Eyacuiñajjiya miquianaya tecuea cajeꞌyo; quea nee nee po mee cajeꞌyo cuaquijo —Jesosa poanaje. 
\c 10  
\s1 Ñajjajja cuiñajji jayojja jama Jesosa ojaya epeejji jaahuanajji 
\p  
\v 1 Majoya Jesosa ojjaña nijje jama poanaje peaꞌai baꞌa: —Ecuea esohui ejjashahuabaqui meejji ñajjajja cuiñajjijo jama baꞌa: Ñajjajja jaahuanajjiya ñajjajja cuana jiyojo cahui mee cani, ijjiacajji mase cuaa eꞌijjia ca poajejje. Ejaahuanajji jiyo esecue jjanijo jaani, esecue jjani queya cani. Siipojji cuana ca ca ñajjajja jiyojje nequisohua majje quehua dobiquiani. Oya cuana siipojji jjejojo esecuejje dobiqui ajja.  
\v 2 Ñajjajja jaahuanajji ca ca esecuejje dobiquiani, de.  
\v 3 Jiyo esecue cuiñajjiya esecue caꞌapejo cani ñajjajja cuiñajji dobiquijji. Dobiqui majje ejaahuanajjiya ojaya ñajjajja iyaa cani. Iyaa cajje o que poeyani. Ñajjajja jaahuanajji ehui dojojji poquiani esecue yasijje.  
\v 4 Cuayaqui majje ñajjajja cuana o quiquishijji poquiani. Eꞌe, ejaahuanajjija esohui ojaya ñajjajjaja eba, eshajjaꞌajjajji. Jamajjeya o quiquishijji poquiani.  
\v 5 Peaa iyaa cajje ñajjajjaa shajjaꞌajja jjima acani; poe ajja. Jamajjeya oya ñajjajja poqui ajja pea nijje; ba jjimajo cuajicuajiquehuajeananani —Jesosa poanaje. 
\p  
\v 6 Jesosaja sohui ejjashahuabaqui meejji ohuaya huohui canaje Jodio cuana huasijje. Jamatii ojaya, Jodio cuanaja quea quehua; jama acanaje baꞌa: —¿Ajeo acuae ca oya mimiani ecuana nijje? —poanaje. 
\p  
\v 7 Jamajjeya Jesosaa oya cuana huohui ca oꞌoyanaje: —¡Bacue, oe! Eya, Jesosa esecue jjani jayojja jama poani. Ecuea epeejji dobiqui meesahuaña.  
\v 8 Ojjaña ejaahuanajji nisho cuana ca ca sii sa poani. Jiquio ecua ñajjajjaa peaja esohui ba jjimajo pea nijje poquiquehua ajja jama jayojja ecuea epeejji nei nei esohui huohuijji nishojo jjashajjaꞌajjaqui ajja —Jesosa poanaje—.  
\v 9 Eꞌe, eya esecue jjani jayojja poani; ojjañaa eya shajjaꞌajja canijo, enijje jjapeequianijo peaꞌai, eyaya oya cuana baꞌe tiitii meejeꞌyo enijje. Jiquio ecua ñajjajja jaahuanajjiya ojaya ñajjajja esecuejje dojocuayaqui cani bobi ijjiaa, jiyo huasijje jaahuana cani peaꞌai jayojja jama eyaya ecuea epeejji baꞌe meesahuaña quea pame nee, Eyacuiñajjija esohui jama —Jesosa poanaje—.  
\v 10 Siipojji poeyani ñajjajja siiya, cuaquisho meeya peaꞌai, quecuaa peaꞌai. Jamaya esohui huohuijji nisho cuana siajje poani, sii cani, ecuea epeejji cuana poquiquehua mee cani eshahua nijje, de. Eya ca ca poeyanaje quea jaꞌa nee nee baꞌe meeya, pea ejjashahuabaquijjijo baꞌe meeya. 
\p  
\v 11 —Eꞌe, eya ñajjajja cuiñajji quea pame nee jayojja jama poani. Ñajjajja cuiñajjiya ojaya ñajjajja nahue neinei cani ijjiacajji maseya eꞌijjia ca poaje jjejojo. Oya jayojja eya manojeꞌyo ecuea epeejji cuana baꞌe tiitii meeꞌyojji.  
\v 12 Echacojji ca ca eñajjajja mese pojjeama jjejojo ijjiacajji mase ba majje cuajicuajinanani; ñajjajja jeajea cananani. Jamajje ijjiacajji maseya ñajjajja cuana ijjia cani; poquiquehuajeanana mee cani peaꞌai.  
\v 13 Ñajjajja cuana ojaya nahueꞌama. Echacojji cuajicuajijeananani, ojaya pojjeamajojo mi nahue cani —Jesosa poanaje. 
\p  
\v 14 —Eya ca ca ñajjajja cuiñajji quea pame nee jayojja jama poani. Ecue Chiiya eya quea jea nee acani; oya ecuea quea jea nee peaꞌai. Oya jayojjaya eyaya ecuea epeejji cuana quea jea nee nee aña; eya ecuea epeejjija quea jea nee peaꞌai.  
\v 15 Jamajjeya eyaya oya cuana nahue neineiaña, ecuea epeejji cuana. Jamajjeya ojaya mimishi cuijeaꞌyojji eya manojeꞌyo ona baꞌe tiitii meeꞌyojji —Jesosa poanaje—.  
\v 16 Pea cuana yani peaꞌai, Jodio cuana pojjeama. Ohuaya peaꞌai ecuea esohui shajjaꞌajja cajeꞌyo. Ecuea epeejji poajeꞌyo peaꞌai. Eyaya oya cuana jjapeequi meesahuajeꞌyo peaꞌai. Jamajjeya ojjaña cuana ojee cajjapeequiahua; eya ca ca oe o jaahuanajji poajeꞌyo —Jesosa poanaje. 
\p  
\v 17 —Ecue Chiiya eya huoojea canaje ojjaña jaahuanaa. Jamajjeya ecuea epeejji baꞌe tiitii meeꞌyojji eya manojeꞌyo, ona nahuejo. Eꞌe, e quecuaꞌyojji yani. Jamatii eya quecua caꞌyajje shequije oꞌoya mo. Jamajjeya eya ecue Chiija quea jea nee nee.  
\v 18 Eya quea caꞌa nee nee poani. Jamajjeya ecuea epeejjijo manoꞌyo sa poꞌyo ajja jojjemo pea cuaa eya equecuaꞌyojji pojjeama pome. Jamatii eya manojeꞌyo jama poani baꞌa: “Eꞌe, ecuea epeejjija mimishi cuijeaꞌyojji manoꞌyo sa poanijo eya manojeꞌyo”. Manoꞌyo majje eya shequije oꞌoya. Ecue Chiiya eya jamaya huoojeame aca poa —Jesosa poanaje Jodio cuana nijje. 
\p  
\v 19 Jesosaja esohui shajjaꞌajja majje Jodio cuana ojee jjamimicuiajea nobiajeaquinaje jama baꞌa:  
\v 20 —¡Oya Jesosa niñepoqui, de! ¡Oya quea jjashahuabaqui tai mimime poani! ¡Aꞌa oya shajjaꞌajjajji! —poanaje beca cuana. 
\p  
\v 21 —Chojja, de oya niñepoqui pojjeama. Esohui quea pame nee nee huohui cani. Ohuaya ca ca oe cojjamaꞌ cuaya jjabapojjaqui mee caꞌyonaje. Jamaya po ajja niñepoqui cuana —poanaje pea cuana. 
\s1 Jodio cuana ojee jjachichaquiꞌyajo, Jesosaa huohui ca oꞌoyanaje jama baꞌa: —Eya Eyacuiñajjija Bacua Ejja eꞌe jojo nei 
\p  
\v 22 Quijje eeno shejo ojjaña Jodio cuana Jenosanena huasijje ojee jjachichaqui oꞌoyanaje. Quea bihui nee poanaje ma shejo. Eꞌe, ma shejo yahuajo nei Eyacuiñajjija equi pea iya ca oꞌoya poa quea bame nee. Jamajjeya ma shejoya ma shahuaba tiitii capoquiani Eyacuiñajji bihuia capoqui tiitiiani. Cuaquijiji sisi dedo cani quea cahui huiso.  
\v 23 Ma shejo Jesosa Eyacuiñajjija equi yasijje poqui oꞌoyanaje.  
\v 24 Equi quibojo jeojeonequinaje. Jodio dejja cuana o que jjachichaquinaje. Jama huohuiꞌajjame acanaje baꞌa: —Jesosa, ¿apiojji miyaya ecuana huohui jjima? ¿Aꞌa miya Eyacuiñajjija huoojeaꞌyo ojjaña jaahuanajji? ¡Ecuana eꞌe nei huohuicue quea jaꞌa nee! —poanaje Jodio cuana. 
\p  
\v 25 Jesosaa oya cuana jama acanaje baꞌa: —Eꞌe, eyaya miquianaya huohui huichaꞌa huichaꞌanaje yahuajo. Jamatii jjashajjaꞌajjaqui ajja. Ecue Chiiya eya ma dejjaa ajjima acani ameesahua cani miquianajaya ebajji nisho eya oja huoojeaꞌyo ojjaña jaahuanajji.  
\v 26 Jamatii miquianaya jjashajjaꞌajjaqui sa po ajja ecuea epeejji pojjeama jjejojoya. Jamaya eyaya miquianaya huohuinaje baꞌa: “Ejaahuanajjija emimi ojaya ñajjajjaja eba; jamajjeya onijje poquiani”.  
\v 27 Jama jayojjaya ecuea epeejji cuaa ecue sohui shajjaꞌajja cani, enijje poquiani tii peaꞌaiya. Eꞌe, ecuea epeejji cuana ecuea eba.  
\v 28 Eyaya oya cuana baꞌe tiitii meeaña. Jamajjeya oya cuana quea nee nee epo meeꞌyojji pojjeama cuaquijo, Eyacuiñajjiya. Eyaya ecuea epeejji cuana jaahuanañajo pea cuaa oya ecuaquisho meejji pojjeama eshahua nijje.  
\v 29 Ecue Chiiya, Eyacuiñajjiya ecuea epeejji cuana enijje jjapee meequi cani. Oya oe nei quea caꞌa nee nee; pea cuana caꞌaꞌama. Ohuaya oya cuana jaahuana canijo cuaquisho meemee ajja eshahua nijje.  
\v 30 Eꞌe jojo nei eya ecue Chii jayojjaya poani tii —Jesosa poanaje. 
\p  
\v 31 Ma shajjaꞌajja majje Jodio etii cuaa mei iña ca oꞌoyanaje Jesosa jajahuejjajeajji nisho.  
\v 32 Jamajjeya Jesosaa oya cuana acanaje: —Ecue Chiiya eya quea pame nee ma dejjaa ajjima acani amee cani. Jamajjeya ¿apiojji acuae iña jajahuejjajea sa aña soꞌo meiya? —huohuiꞌajjame acanaje Jesosaa. 
\p  
\v 33 —Chojja, mi jajahuejjajea sa po ajja ca ca ecuana miyaya ma dejjaa ajjima acani quea pame añajo. Miya siajje poanijo ca mi ca oe jajahuejjajeame. Miya aje mi dejja; jamajjeya ¿apiojji acuae oe miyaya jama huohuime aña baꞌa: “Eya Eyacuiñajji jayojja tiiya” poani? —Jodio etii cuaa Jesosa Eyacuiñajjija Bacua pojjeama poso tii acanaje. 
\p  
\v 34 Majoya Jesosaa oya cuana jama acanaje baꞌa: —Miquianajaya eba Eyacuiñajjiya yahuajo nei nei tehue mee ca poa Jodio jaahuanajji cuanajo jama baꞌa: “Miquianaya Eyacuiñajji jayojja poani”. Jama tehuemeya aca poa yahuajo.  
\v 35 Jamajjeya ¡Eyacuiñajjija etehueꞌyo eꞌe nei shajjaꞌajja tiitiicue! Ma etehueꞌyojo ohuaya huohui ca poa Jodio esohui huohuijji Eyacuiñajji jayojjaya poa.  
\v 36 Jamajjeya eya ca ca oe ecue Chiiya babaca ca poa ojjaña jaahuanajji; eya eyajo ani huoojea ca poa meshi yasijje. Jamatii: “Eya Eyacuiñajjija Bacua Ejja” anajejo, miquianaaya eya tecueaña. Jama poani baꞌa: “Miya siajje poani Eyacuiñajji jayojja miame” poani miquianaya. ¿Apiojji jamaya poani? —Jesosa poanaje—.  
\v 37 ¡Bacue! Eyaya ecue Chiiya acani jayojja aꞌajja jojjemo ¡aꞌa eya shajjaꞌajjame soꞌo!  
\v 38 Miquianaya ecue esohui shajjaꞌajja sa po ajja; jamatii ecue Chiiya acani jayojja quea pame nee eya añajo, jjashahuabaquicue jama baꞌa: “Jesosa Eyacuiñajjija huoojeaꞌyo poani”. ¡Jamajoya jjabahuejjaquicue eꞌe jojo nei eya ecue Chii jayojjaya, de; oya e jayojjaya peaꞌai poani! —Jesosa poanaje. 
\p  
\v 39 Jamatii Jodio cuaa Jesosa siajje poani poso acanaje. Jamajjeya ojee jama poanaje baꞌa: —¡Cuaꞌa, oya ejjaꞌiñaquiqui ejeanobiajji! —taaame poanaje. 
\p Jamatii Jesosa quea huiso nee nee dejja nequi tejjee quehuajje poquinaje, jjaꞌiña meequi jjima. 
\p  
\v 40 Majoya Jesosa poqui oꞌoyanaje cuei Jodana ojje miji yasijje, ma yahuajo Huaniya ona besa mee ca poa huasijje. 
\p  
\v 41 Jomajo o anijo quea huiso dejja cuana o baa poeyanaje. Jjachichaqui majje jama ojee miminaje baꞌa: —Eꞌe, yahuajo Huaniya ajjima aca poa ma dejjaa ajjima acani; jamatii ojjaña ojaya ehuohuiꞌyo Jesosajo eꞌe nei poanaje —acanaje cuaa. 
\p  
\v 42 Jamajjeya ojjaña jomajo Jesosajo jama poanaje baꞌa: —Eꞌe jojo nei Jesosa Eyacuiñajjija huoojeaꞌyo ojjaña jaahuanajji. 
\c 11  
\s1 Nasano manoꞌyonaje 
\p  
\v 1-2 Pea cuiñajjijo Betania bajjanijo 
\p Jesosaja epeejji cuana baꞌenaje: Nasano, oja jjoꞌi cuana Manta, Mania peaꞌai. Maniaa Jesosa ojaya quea jea neejo quijje oya jiojji sha canaje shiyeshiyeya. Sha majje ejiojji cui caꞌyonaje ojaya esaohua, Maniaa. Jesosa Jodana cuei ojje mijijje anijo, Maniaja eno mese Nasano quea mano nee nee poanaje.  
\v 3 Jamajjeya ejjoꞌi mese cuaa pea huoojea canaje Jesosa que: —Nasano quea mano jaa. Jesosa ba majje jama huohuime acue baꞌa: “Emeshi Mese Jesosa, miquea epeejji Nasano quea mano nee nee jaa, poquijeyoje pojjaꞌa” acue. 
\p  
\v 4 Jamajjeya ma dejja poquinaje Jesosa que. Huohui cañaquinaje. Nasanojo shajjaꞌajja majje Jesosa jama poanaje baꞌa: —Eꞌe, oya manoꞌyo majje jamatii emanoꞌyo tii tii pojjeama poaje. Eꞌe, quijje ojo ojjaña cuaa Eyacuiñajji bihuia cajeꞌyo; ejo peaꞌai jama huohuime acaje cuaa baꞌa: “Eꞌe, miya Eyacuiñajjija Bacua Ejja quea pame nee nee, quea caꞌa nee peaꞌai; ojjaña miyaya aña” acaje cuaa —Jesosa poanaje. 
\p  
\v 5 Jesosaja quea jea nee nee Manta, Mania peaꞌai, oja jjoꞌi jayojja, oja oꞌi jayojja Nasano poani peaꞌai.  
\v 6 Jamatii Nasano quea mano nee nee jaa ba majje Jesosa jomajo tii aninaje becanejjijji peaꞌai cahuime, poqui jjima poanaje. 
\p  
\v 7 Majoya ecuana huohui canaje Jesosaa: —Cuaꞌa, ¡Jodea meshi yasijje epoqui oꞌoya! —poanaje. 
\p  
\v 8 —Chojja, Jesosa —sajaꞌame anaje ecuaaya—, yahuajo pishana Jodio cuaa jomajo baꞌeya miya jajahuejjajea sa acanaje meiya. ¿Aꞌa jamatii miya poqui oꞌoya sa poani jocuama? —anaje. 
\p  
\v 9 —Eꞌe —Jesosa poanaje—, eya poquije. ¡Bacue! ¿Aꞌa eshequi jaasohua jjimahuajo ejiojjijje poquije? Quea apo. Eshequiya jeajaꞌa canijo ejjaquecuasajaquijji pojjeama ejiojjijo. Eꞌe, eshequiya jeajaꞌa canijo, ejiojji baje quea jaꞌa nee.  
\v 10 Mecajje quea misi poanijo ca ca dejja oque chanaꞌ ejiojjijje poquianijo. Oya jayojja eyaya ecue Chii nijje chacoañajo, ohuaya eya jaahuana cani, onaya eya quecuaꞌyo jjima amee cani. Ojaya eba nei epojja e manoꞌyojjijo. 
\p  
\v 11 Jamaya ecuana huohui majje Jesosaa jama acanaje baꞌa: —Eseja epeejji Nasano cahuiꞌyonaje. Jamatii eya poquije o isheꞌaꞌyohua. 
\p  
\v 12 Jesosa jamaya poanijo, Nasano manoꞌyo jjima poso ecuaa jama anaje baꞌa: —Jesosa, Nasano cacahuiquiahua. Cahui majje oya jjaajaquijeꞌyo. 
\p  
\v 13 Jesosaja eba Nasano emanoꞌyo, epoquijeyoꞌyo jaa. Ecuana ca ca jjashahuabaquiani jama baꞌa: “Nasano jamatii cahuijaa” poso anaje ecuaaya. Eꞌe, Jesosaja esohui ecuanaja quea quehua poanaje. 
\p  
\v 14 Jamajjeya Jesosaa huohui ca oꞌoyanaje jama baꞌa: —Epeejji cuana, Nasano epoquijeyo. Chamaꞌyo tii jaa.  
\v 15 Eya Nasano nijje ani jjima poanajejojo oya manoꞌyonaje. Jamatii jamaya miquianajo quea pame nee poajeꞌyo. Eꞌe, eyaya Nasano shequi meeje oꞌoya ba majje miquianaya jjabahuejjaquijeꞌyo eya eꞌe jojo nei Eyacuiñajjija huoojeaꞌyo ojjaña jaahuanajji. ¡Cuaꞌa, Nasano ejjabaꞌajjaquiqui! —Jesosa poanaje. 
\p  
\v 16 Jesosa shajjaꞌajjajji Tomasi, ma Becajaa bajjani miminaje pea shajjaꞌajjajji cuana nijje, ecuana nijje jama baꞌa: —¡Cuaꞌa, Jesosa nijje epoqui! Jodio etii cuaa o cuia caꞌyajo ecuana ojee Jesosa nijje tii manojeꞌyo peaꞌai. 
\s1 Jesosaa Manta, Mania peaꞌai yenoꞌama po mee sa acani 
\p  
\v 17 Quijje Jesosa poeyanaje Nasanoja equi yasijje. Ba cañaꞌyonaje Nasano epoquijeyoꞌyo poanaje. Eꞌe, ebeca pee peaꞌai cahuime yahuajo oya ehuananobia jaanaje mei jjani yasijje, enaba capa jaanaje. 
\p  
\v 18 Betania cuiñajji Jenosanena chipi nei ani.  
\v 19 Jamajjeya quea huiso Jodio cuana poeyanaje Manta, oja shehue Mania pa sahuaa, oja noo Nasano emanoꞌyojo. 
\p  
\v 20 Jamajjeya Jesosa ejiojjijje poeyani shajjaꞌajja majje Manta cuayaquinaje Jesosa baa. Mania ca ca equijo aninaje, poqui jjima ca oma poanaje.  
\v 21 Jamajjeya Mantaa Jesosa ba majje huohui cañaquinaje jama baꞌa: —Jesosa, ecue noo manoꞌyo jjimahuajo, miya jiquiacua epoe jojjemo oya manoꞌyo jjima poquiaye.  
\v 22 Jamatii ecuea eba jjeya nei peaꞌai miya Eyacuiñajji nijje mimianijo, ohuaya miquea esohui jama acajeꞌyo —poanaje Manta. 
\p  
\v 23 —Manta, mique noo shequije oꞌoya, she —poanaje Jesosa. 
\p  
\v 24 —Eꞌe —Manta poanaje—, jamaya ecuea eba oya shequije oꞌoya quijje nei, Eyacuiñajjiya ojjaña emanoꞌyo cuana shequi mee ca oꞌoyajo, meshi oe poajo. 
\p  
\v 25 Jesosa poanaje: —Manta, eya ca ca iña ojjaña shequimeeꞌyojji nei. Eyaya oya shequi meeje oꞌoya Eyacuiñajji nijje ebaꞌe tiitiiꞌyojji. Jamajjeya ojjaña joya eꞌe jojo nei enijje jjapeequiani baꞌe tiitiijeꞌyo eyajo. Eyaya oya cuana baꞌe tiitii meejeꞌyo jamatii yahuajo emanoꞌyo cuana.  
\v 26 Ojjaña ecuea epeejji jjeya nei eshe nequi peaꞌai eyaya baꞌe tiitii meejeꞌyo, meteꞌama poajeꞌyo emanoꞌyojji. ¿Aꞌa jamaya miyaya baña? —Jesosa poanaje. 
\p  
\v 27 —Eꞌe Jesosa, ecuea eba miya Eyacuiñajjija huoojeaꞌyo ojjaña jaahuanajji, Eyacuiñajjija Bacua Ejja. Miquea epoeꞌyojjijo yahuajo nei Eyacuiñajjija esohui huohuijjiya tehue ca poa —Manta poanaje. 
\p  
\v 28 Majoya Manta poqui oꞌoyanaje Mania que. Ba majje oya quehuajje huohui canaje jama baꞌa: —Mania, Jesosa poeyanaje. Ohuaya miya iyaa cani —poanaje. 
\p  
\v 29 Mantaja esohui shajjaꞌajja majje Mania nequisohuanaje. Poquicuajinaje Jesosa baa.  
\v 30 Jesosa Betania huasijje dobiqui jjima; ohuaya Mania ishoa ca aninaje jomajo, ma o Manta nijje mimimimi aninajejo tiiya.  
\v 31 Jodio cuaa Mania nijje equijo pa aniya oya ba canaje poquicuajije. Jamajje onijje poquinaje; jama poanaje baꞌa: —Mania papoquinaje oja noo ehuananobiajaa huasijje quea yeno nee nee jjejojo. 
\p  
\v 32 Maniaa poe majje Jesosa ba cañanaje. Ecuiꞌoshajjajo nequiya huohui canaje: —Jesosa, miya jiquiacua epoe jojjemo ecue noo manoꞌyo jjima poquiaye —Mania poanaje. 
\p  
\v 33 Jesosaa Mania paꞌani ba majje, Jodio cuana Mania nijje pani ba majje peaꞌai quea yeno poanaje. Quea yeno jjashahuabaquinaje Jesosa onajo. Jamajjeya huohuiꞌajja canaje jama baꞌa:  
\v 34 —¿Achacua acuae nequiaa Nasano huananobianaje soꞌo, she? —Jesosaa acanaje. 
\p —Esohui huohuijji, ¡poecue; bahuacue! —poanaje cuana. 
\p  
\v 35 Jesosa cojjana cuayaquinaje onajo quea yeno po majje. Poquinaje onijje. 
\p  
\v 36 Jamajjeya Jodio cuana jama poanaje baꞌa: —¡Bacue! Jesosa peaꞌai pani. Nasano ojaya quea yeno nee nee ojaya epeejjijojo, de —poanaje Jodio cuana. 
\p  
\v 37 —Eꞌe pojjaꞌa —beca cuana poanaje—. Yahuajo Jesosa dejja cojjamaꞌ cuaya jjabapojjaqui mee ca poa. ¿Apiojji shai oya yahuajo poecuaji jjima Nasano jjaajaqui meeꞌyohua? Jamajjeya oya manoꞌyo jjima poquiaye. 
\p  
\v 38 Onajaya esohuijo Jesosa quea yeno nee nee poquinaje jjani ai yasijje. Mei copo enequi jjani secue capajji.  
\v 39 Jamajjeya Jesosaa jama acanaje baꞌa: —¡Esecue jjani capajjiꞌya mei jeacajjajjajeaꞌyocue! —poanaje. 
\p —Chojja, ecuea Emeshi Mese —Nasanoja jjoꞌi Manta poanaje—. Oya yahuajo huananobia canaje, ebeca pee peaꞌai cahuime. Jjeya quea ihui nee nee —Manta poanaje. 
\p  
\v 40 —Manta, eyaya miya huohuinaje: Eya Eyacuiñajjija huoojeaꞌyo ojjaña jaahuanajji ba majje miya jjabahuejjaquijeꞌyo Eyacuiñajji quea caꞌa nee nee, quea pame nee nee; ohuaya eya ojjaña amee cani ma dejjaa ajjima nei nei acani peaꞌai —Jesosa poanaje. 
\p  
\v 41 Majoya secue jjani capajjiꞌya mei jeacajjajjajea canaje cuaa. Jesosa eyahuasijje jjabajeasohuaquinaje Eyacuiñajji nijje emimijji. Nasanojo jama miminaje baꞌa: —Ecue Chii, eyaya miya bihuiaña. Ecuea esohui miyaya shajjaꞌajjaña Nasano shequi meeꞌyojji.  
\v 42 Ecuea eba miyaya eya shajjaꞌajja neineiaña minijje mimianijo. Jamaya eya poani, ojjaña jiquiojo nequi jjabahuejjaquijji miyaya eꞌe jojo nei eya huoojeanaje. Eꞌe ecue Chii, apoa —Jesosa poanaje. 
\p  
\v 43 Eyacuiñajji nijje mimi majje Jesosa taaanaje jama baꞌa: —Nasano, ¡shequiꞌyocue, oe; cuayaꞌyocue! —poanaje. 
\p  
\v 44 Jamajjeya Nasano shequiꞌyo majje cuayaꞌyonaje. Oya daqui osheja bebo tii, oja ejiojji, oja eme cuana peaꞌai. Oja sapa ebebo peaꞌai poanaje pea daqui osheja. 
\p Jamajjeya Jesosaa huohui canaje jama baꞌa: —Eꞌe, ¡oya ebebojjiꞌya pichojeajeaꞌyocue! ¡Daqui oshe huijjiajeaꞌyocue! Oya capoquiꞌyahua equi yasijje —poanaje. 
\p Jamajjeya Nasano poquiꞌyonaje. 
\p  
\v 45 Jamajjeya quea huiso Jodio cuaa Mania baa poeya ba canaje Jesosaa Nasano emanoꞌyojaa shequi mee caꞌyonaje. Ba majje Jesosajo jama poanaje baꞌa: —Eꞌe jojo nei oya Eyacuiñajjija huoojeaꞌyo ojjaña jaahuanajji; ¡onijje ejjapeequiꞌyojji! 
\p  
\v 46 Beca cuana ca ca Jenosanena huasijje poqui oꞌoyanaje Paniseo cuana huohuiya: —Jesosaa Nasano emanoꞌyojaa shequi mee caꞌyonaje, de —poanaje cuana. 
\p  
\v 47-48 Jamajjeya Eyacuiñajji nijje emimijji etii cuaa, Paniseo cuaa peaꞌaiya ojjaña Jodio etii ojee iyaa canaje Jesosajo emimimimijji. 
\p —¿Yajja acuae seya Jesosa aje soꞌo, de? Ohuaya ma dejjaa ba jjima acani quea huiso. ¡Cuaꞌa ejjaꞌiñaquiqui oya! ¡Oya esohui ejjahuohui pajea meequi! Ojjaña aje oe onijje jjapeequijeꞌyo, de. Majoya Shomano meshi mese cuana ojo quea mete poaje, ejjajjequiquije poso. Jamajjeya ese nijje jjacuiaqui majje jeabichajea cajeꞌyo. Jiquio Eyacuiñajjija equi jajacajjajea cajeꞌyo peaꞌai, Shomano cuaa —poanaje Jodio etii cuana. 
\p  
\v 49 Ma shequiajajo dejja Caipa bajjani Eyacuiñajji nijje emimijji etii poanaje Jodioja. Ohuaya pea cuana huohui canaje jama baꞌa: —Ae po cajji Jesosajo ecuea ohuejaya eba. ¿Aꞌa miquea ba jjima?  
\v 50 ¡Eya shajjaꞌajjacue! Eꞌe, Shomano cuaa Jesosajo quea mete po majje eseya quecua jeyojeyo caꞌyo chanaꞌ. Jamajjeya oe dejja, Jesosa camanoquiꞌyahua ojjaña cuanajo. Jamaya esejaya quea pame poajeꞌyo. Jamajjeya ojjaña cuana mano jeyojeyoꞌyo ajja poaje —poanaje Caipa. 
\p Jamatii ohuaya ojaya ejjashahuabaquijjijo pojjeama huohui canaje.  
\v 51 Oya, Caipa Eyacuiñajji nijje emimijji etii ma shequiajajo. Jamajjeya Eyacuiñajjiya oya huohui meesahua canaje Jesosajo jama baꞌa: —Jesosa quijje pishana ojjaña Jodio cuanajo manojeꞌyo. 
\p  
\v 52 Eꞌe, ojjaña quea huesha baꞌe cuanajo peaꞌai, joya Eyacuiñajjija epeejji quijje poaje ojjaña meshijo baꞌe cuanajo peaꞌai manojeꞌyo Jesosa. Jamajjeya ojjaña meshijo baꞌeca cuana ojee jjapeequi mee cajeꞌyo, Eyacuiñajji bihuiajji cuana. 
\p  
\v 53 Jamajjeya Caipaja esohui shajjaꞌajja majje Jodio etii cuana ojee jjashahuabaquinaje Jesosa quecuajji: —¡Jesosa ejjaquecuaquiꞌyo! —poanaje. 
\p  
\v 54 Jamajjeya majoya Jesosa poꞌayequi jjima poanaje Jodioja meshijo Jodio cuana nijje. Oya quehuajje poquinaje Epaini cuiñajji sisi yasijje, quimaꞌ meshi pejjejo. Jomajo baꞌenaje o shajjaꞌajjajji cuana nijje. 
\p  
\v 55 Quijje pishana ojjaña Jodio dejja cuana ojjaña meshijo baꞌe poqui oꞌoyanaje Jenosanena huasijje. Jamajjeya ma shejo baꞌa: Esohuidojojji cuaa yahuajo nei nei Ejito meshijo Jodioja bacua cuana cuiaꞌyo jjima shejo Jenosanena huasijje jjachichaqui canaje. Majoya Jodio etiiquianaja ehuohuiꞌyo jayojja jama quea huiso besa majamaja canaje cuana ojee quea bihui nee ijjiaꞌijjia jjimahuajo.  
\v 56 Jenosanena huasijje poe majje ojjaña Jodio cuaa Jesosa saꞌajja canaje. Eyacuiñajjija equijo jjachichaqui majje ojee mimimiminaje Jesosajo: —¿Ae jjashahuabaquiani miquianaya? ¿Aꞌa Jesosa poeje jiquiacua Jenosanena huasijje ojee ijjiaꞌijjiaa? ¿Aꞌa poe ajja pojjaꞌa? —poanaje. 
\p  
\v 57 Jamaya miminaje Jodio etiija esohuijo. Paniseo cuaa, Eyacuiñajji nijje emimijji etii cuaa peaꞌaiya jama huoojea canaje baꞌa: —Jesosa ba majje ¡ecuana huohuicuajihuacue eꞌiña meejji! —acanaje etii cuaa—. Miquiaa mi huohuiajje quea quene nee nee poaje ecuan a. 
\c 12  
\s1 Maniaa Jesosaja ejiojji shacua canaje shiyeshiyeya 
\r (Mateo 26.6-13; Macoso 14.3-9; Noca 7.36-50) 
\p  
\v 1 Majoya Jesosa Epainijo nequi Betania huasijje poeyanaje me oejje oe cahuime Jodio cuana ojee ijjiaꞌijjia jjimahuajo. Jomajo baꞌenaje Nasano, ma ohua emanoꞌyojaa shequi mee caꞌyonaje.  
\v 2 Jomajo Mantaa Jesosajo quea bihui poanijo bobi quea huiso cuacua mee canaje. Quea huiso iyaa canaje Jesosa nijje eꞌijjiaꞌijjiajji. Nasano peaꞌai onijje ijjiaꞌijjianaje.  
\v 3 Majoya Jesosa ojaya quea jea neejo Maniaa shiyeshiyeya quea nahue nee neeya Jesosaja ejiojji sha canaje. Quea huiso sha canaje, oe tahuoo shiyeshiye oe acanaje. Sha majje Jesosaja ejiojji cui caꞌyonaje oja esao aohua, Maniaa. Equi quea shiye nee nee poanaje shiyeshiyeya sha cajje. 
\p  
\v 4 Jamajjeya Jesosa shajjaꞌajjajji Jodasa Isicanioteya, ma quijje Jesosa iña meesahuaꞌyojji epojjiya Mania ba canaje. Ba majje Jodasa quea tecue jama poanaje baꞌa:  
\v 5 —¡Dee! ¿Apiojji acuaeya shiyeshiyeya shanaje soꞌo? Ma shiyeshiye quea nahue nee nee baña cuaa, shequiaja oe chaco majje sose huisoajja jiquio shiyeshiye, de. Quea huiso bejjo sosejje oya equia jojjemo bejjo quea huiso iña caquiaye, majoya bejjo sosejje cuana jja oe aemaꞌ cuana bobia quiayeya —poanaje Jodasa. 
\p  
\v 6 Jamatii oya Jodasa aemajo pojjeama jjashahuabaquinaje. Chojja, oya ca ca oma siipojji. Ojjaña Jesosa shajjaꞌajjajji cuanaja ejjeshejji cuiña nisho cani bashosoco sisijo. Ma sii poquiame beca cuana bejjo, Jodasaa acanaje. 
\p  
\v 7 Jesosaa Jodasa tecuea canaje jama baꞌa: —Jodasa, ¡aꞌa jiquio epona tecueajji! Ojaya eba eya quijje pishana manojeꞌyo. Jamajjeya eya sha canaje shiyeshiyeya, e manoꞌyojji jojoya.  
\v 8 Eꞌe, eya miquiana nijje eꞌani tiitiijji pojjeama. Aemaꞌ cuana ca ca miquiana nijje yani tii tii, de. 
\p  
\v 9 Quea huiso Jodio cuaa shajjaꞌajja canaje Jesosa Betania huasijje poeꞌyonaje. Quea huiso cuana poeyanaje Jesosa baa, Nasano peaꞌai baa. Onajaya eba Jesosaa Nasano shequi mee caꞌyonaje. Jamajjeya Nasano ba sa poanaje peaꞌai.  
\v 10-11 Nasano shequi mee caꞌyonajejo quea huiso nee nee huohui canaje jama baꞌa: —¡Eꞌe jojo nei Jesosa Eyacuiñajjija huoojeaꞌyo ojjaña jaahuanajji! 
\p Eꞌe, Nasano shequi mee caꞌyonajejo Jodio etii cuanaja esohui shajjaꞌajja pajea canaje cuaa. 
\p Jamajoya Eyacuiñajji nijje emimijji etii cuana jjashahuabaquinaje jama baꞌa: —¡De, Nasano peaꞌai caquecuajeaꞌyahua Jesosa nijje tii! 
\s1 Jesosa Jenosanena huasijje dobiquinaje mapichi sisija edaasa biajje 
\r (Mateo 21.1-11; Macoso 11.1-11; Noca 19.28-40) 
\p  
\v 12 Jamajjeya mecajjeahua ojjaña Jodio cuaa ma ojee ijjiaꞌijjiaa poeꞌya shajjaꞌajja canaje jama baꞌa: —Jesosa ejiojjijje poeyani Jenosanena huasijje. 
\p  
\v 13 Jamajjeya ojjaña cuana jememe iña jaja majje poquinaje Jesosa baa. Poquijeya jememe iña cuana jeasohua canaje. Jamaya Jodio cuaa acanaje pea bihuiajji, emeshi mese jaꞌajjequijji cuiñajji yasijje. Jesosa bihuia canaje peaꞌai. Taaanaje jama baꞌa: —Jesosa, ¡miya ojjaña jaahuanajji poeyanaje! ¡Eyacuiñajjiya miya huoojea canaje! ¡Ohuaya miya cajaahuana cahua! Eꞌe de, miya ecuanajaya, Isaeni cuanajaya Emeshi Mese oe nei —taaame poanaje ojjaña cuana. 
\p  
\v 14 Jesosa mapichi sisi ba majje o daasa biajje anisohuaquinaje. Eꞌe, Jesosajo Eyacuiñajjija esohui yahuajo nei etehueꞌyo jayojja jama poanaje jama baꞌa: 
\q1  
\v 15 “Ojjaña Jenosanenajo baꞌe cuana huohuicue jama baꞌa: —¡Quea bei pocue! ¡Bacue oe! Miquiana huoojeaꞌyojji nei poeyani. Oya quea bei nee. Jamajjeya mapichi sisija edaasa biajje poeyani —huohuicue cuana”. 
\m aya yahuajo tehue ca poa Jesosajo. 
\p  
\v 16 Ma etehueꞌyojo jjashahuabaqui jjimahuaa ecuaaya jama anaje baꞌa: —¿Yajjajje shai quea huiso nee nee jjachichaquiani Jesosa que, o bihuiaa soꞌo? 
\p Quijje ca ca Eyacuiñajjiya Jesosa emanoꞌyojaa shequi mee caje oꞌoya; majoya ecuanaa niñebajeꞌyo jama baꞌa: —Eꞌe de, esohui huohuijji cuana yahuajo baꞌeja etehueꞌyo jama acanaje Jesosajo —quijje jamaya niñebajeꞌyo ecuanaa Jesosa shequi oꞌoyajo. 
\p  
\v 17 Yahuajo Jesosaa Nasano shequi mee caꞌyajo, quea huiso dejja cuaa ba ca poa Jesosa. Ma dejja cuaa ojjaña huasijje huohui huichaꞌa huichaꞌa ca poquia poa jama baꞌa: —Nasano manoꞌyo majje jjanijo ehuananobia jaanaje. Jesosaa iyaa cajje oya shequi oꞌoyanaje, de —acanaje cuaa Jesosajo. 
\p  
\v 18 Jamajoya Jesosaa acani ma dejjaa ajjima acanijo quea huiso cuana poquinaje o baa, ejiojjijje poeje baa.  
\v 19 Jamajjeya Jesosa poeyanaje Jenosanena huasijje. Majoya Paniseo cuana quea quene ojee mimimiminaje jama baꞌa: —¡Bacue! Ecuanaaya pea dejja cuana Jesosa nijje jjapeequi pajea mee ajja. Chojja, de. ¡Bacue oe! Ojjaña tii Jesosa nijje jjapeequiani. Ecuanaja esohui shajjaꞌajja sa poꞌyo ajja. Jesosa iña meesahua ajja peaꞌai, de —poanaje Paniseo cuana. 
\s1 Jesosaa huohui canaje ojaya epoquiꞌyojji eyahuasijje eꞌaniꞌyojji 
\p  
\v 20 Beca Jodio cuana quea huesha Jieno meshijo baꞌe peaꞌai ma shejo poeyanaje Jenosanena huasijje ojjaña nijje ijjiaꞌijjiaa, Eyacuiñajji bihuiaa.  
\v 21 Oya cuana poeyanaje Penipe que, ma Betesaidajo baꞌe que. Onijje jama poanaje baꞌa: —Penipe, ecuanaya Jesosa ba sa neinei poani —poanaje. 
\p  
\v 22 Jamajjeya Penipe ojaya epeejji Anesi que poqui majje pea cuanaja esohui huohui canaje. Majoya ojee poquinaje Jesosa huohuiya. 
\p  
\v 23 Shajjaꞌajja majje Jesosaa oya cuana jama acanaje ojjañaja eshajjaꞌajjajji baꞌa: —Eꞌe, eyaya Eyacuiñajjija esohui oe aꞌyonaje. Apoa aꞌyonaje. Jjeya nei eya, ojjañaja Edoe Mese manojeꞌyo. Eyacuiñajjiya eya manoꞌyajo dojosohuaqui cajeꞌyo eyahuasijje. Onijje quea caꞌa nee nee ani mee cajeꞌyo.  
\v 24 Eyaya eꞌe jojo nei huohuiaña jama baꞌa: Esoꞌ quecua majje pohuani. Jamajjeya jjajja majje quea huiso esoꞌ poajeꞌyo. Esoꞌ quecua jjima ani jjapapaqui ajja. Jiquio ecua esoꞌ quecua cajje quijje jjajjani jayojja jama poaje ejo. Onaa quecua cajje eya manojeꞌyo ojjañaja mimishi cuijeaꞌyojji sosejje. Jamajjeya eyaya quea huiso baꞌe tiitii meejeꞌyo enijje eyajo.  
\v 25 Jamaya peaꞌai joya enijje jjapeequiani dejja mimishi cuaa quecua cajeꞌyo pojjaꞌa. Jamatii enijje jjapeequianijo, manoꞌyo majje eyajo baꞌejeꞌyo tii tii quea pame nee. Quea mete nee nee jjejojo enijje jjapeequiꞌyo ajjajo ca ca manoꞌyo majje cuaqui yasijje dobiquijeꞌyo tii tii, quea nee nee poajeꞌyo.  
\v 26 Ojjañaa joya enijje chaco sa poaniya ¡eya cashajjaꞌajja cahua! Ecuea echacojji cuana quijje enijje baꞌe tiitiijeꞌyo. Ecue Chiiya oya cuana jama huohuime acaje baꞌa: “Eꞌe, jamaya. Miya Jesosaja echacojji quea pame nee” acaje Eyacuiñajjiya —Jesosa poanaje—.  
\v 27 Jjeya eya quea yeno. ¿Ajeo mimi cajji ecue Chii nijje soꞌo? ¿Aꞌa jama mimi cajji pojjaꞌa baꞌa: “Ecue Chii, ¡aꞌa dejja cuana eya napa meejji! ¡Aꞌa eya quea nee nee po meejji!”? Chojja. Jamaya eya mimi ajja ecue Chii nijje. Ohuaya eya huoojea canaje ojjaña cuanaja mimishijo manoꞌyohua.  
\v 28 Jamajjeya eya jama poaje baꞌa: “Ecue Chii, ¡ojjaña cuana mijo quea bihui po meecue!” —Jesosaa acanaje. 
\p Majoya Eyacuiñajji eyajo ani miminaje jama baꞌa: —Eyaya miya ameeꞌyonaje ma dejjaa ajjima acani. Jamajjeya quea huisohua eya bihuia caꞌyonaje. Jjeya ojjañaa eya jjabihuia meequije oꞌoya —poanaje Eyacuiñajji eyajo ani. 
\p  
\v 29 Ojjaña Jesosa que ejjachichaquiꞌyo nequi cuaa shajjaꞌajja canaje Eyacuiñajji eyajo janobajjima nei mimiani. Jamajjeya oya cuana miminaje jama baꞌa: —¡De! Cueji pojjaꞌa poanaje. 
\p Beca cuaa jama acanaje baꞌa: —¡Chojja! Esohuidojojji eyajo Jesosa nijje miminaje —poanaje cuana. 
\p  
\v 30 Jesosa ojjaña nijje miminaje jama baꞌa: —Ecue Chii eyajo miminaje miquiana jjabahuejja meequijji jama baꞌa: Ohuaya eya shajjaꞌajja canaje onijje mimianijo —Jesosa poanaje—.  
\v 31 Jjeya Eyacuiñajjiya ojjaña joya enijje jjapeequi ajja quea nee nee po mee cajeꞌyo. Eyaya ojjaña jeabichajeajeꞌyo; Edosiquiana nei Satanasa bajjani, ma ojjaña dejja mimishi huoojeajji poani jeabichajeajeꞌyo. Quijje oya cuaqui yasijje dobiquijeꞌyo tii tii.  
\v 32 Cuanaya eya ojjañaja Edoe Mese acui ecueataꞌapeejo baꞌehuanasohuajea cajo, quea huiso nee nee ojjaña meshijo baꞌe enijje jjapeequi meejeꞌyo —Jesosaa acanaje. 
\p  
\v 33 Jamaya Jesosaa ojjaña ba mee canaje oya acui ecueataꞌapeejo manojeꞌyo.  
\v 34 Jodio cuana jomajo ejjachichaqui nequiya huohui canaje jama baꞌa: —Ecuana esohui huohuijji cuana jama poani baꞌa: “Eyacuiñajjija huoojeaꞌyo ojjaña jaahuanajji Quito bajjani baꞌe tiitiijeꞌyo. Manoꞌyo ajja poaje”. Jamajjeya ¿apiojji miyaya huohuinaje ojjañaja Edoe Mese manojeꞌyo acui ecueataꞌapeejo baꞌehuanasohuajea cajje? ¿Aꞌa miya Eyacuiñajjija huoojeaꞌyo? ¿Aꞌa miya ojjañaja Edoe Mese ma Quito bajjaniya? —onaaya huohuiꞌajja canaje. 
\p  
\v 35 Jesosaa oya cuana sajaꞌa canaje jama baꞌa: —Eyaya miquiana huasijje esohui huohuije oe pojji cahuime. Ecuea esohui cuaquijiji sisi jayojja. ¡Jjeya nei ecuea esohui jayojja jama acue! Jamajjeya miya poquiquehua ajja. Pea cuana ecuea esohui shajjaꞌajja sa po ajjajo poquiquehua tiitiijeꞌyo. Jiquio ecua mecajje quea misijo cuaquisho chanaꞌ epoquijji jayojja jama ojjaña joya ecue sohui jayojja jama aꞌajja, quea mimishi baꞌyani.  
\v 36 Eꞌe, ecue sohui cuaquijiji quea jaꞌa jayojja jama. Jamajjeya eya minijje nequijo, ¡ecuea esohui jayojja jama acue! Jamaya miquianaya ecuea epeejji quea jaꞌa nee poajeꞌyo. Poquiquehua ajja dejja mimishi jayojja jama epojji pojjeama —poanaje Jesosa. 
\p Majoya esohui huohui majje Jesosa poquinaje. Jjaꞌaniquehuaquinaje. 
\s1 Jodio cuana Jesosa nijje jjapeequi ajja tii 
\p  
\v 37 Eꞌe, Jesosaa quea huiso ma dejjaa ajjima acani acanaje. Ojjañaa ba canaje. Jamatii Jodio cuaa huohui canaje jama baꞌa: —Chojja, Jesosa Eyacuiñajjija huoojeaꞌyo ojjaña jaahuanajji pojjeama —poanaje jjashajjaꞌajjaqui ajja jjejojo. 
\p  
\v 38 Yahuajo nei Eyacuiñajjija esohui huohuijji Isaia bajjaniya tehue ca poa Jodio cuanajo jama baꞌa: 
\q1 “Eyacuiñajji, Jodio cuana ecuanaja esohui shajjaꞌajja sa poꞌyo ajja. Miyaya ma dejjaja ba jjima aña. Ba huichaꞌa huichaꞌa majje jamatii oya cuana jjashahuabaqui sa po ajja”. 
\m  
\v 39 Jamajoya Isaiaa yahuajo nei nei oya cuanajo tehue ca poa jama peaꞌai baꞌa: 
\q1  
\v 40 “Jodio cuana cojjamaꞌ jayojja jama poanijo, miyaya ma dejjaja ba jjima aña ba majje jjabahuejjaqui mee jjima mijo. Quea sapa caꞌa jjejojo miquea ejjashahuabaquijjijo jjabahuejjaqui mee jjima. Jamajjeya minijje jjapeequi ajjajo Jodio cuanaja mimishi cuana ecuijeaꞌyojji pojjeama”. 
\m Jamaya Isaiaa yahuajo tehue ca poa Jodio cuanajo.  
\v 41 Eꞌe, Eyacuiñajjiya yahuajo nei nei Isaia Jesosa ba mee majje ojo tehue mee ca poa jama baꞌa: “Oya quea caꞌa nee nee poani. Oya Eyacuiñajjija huoojeaꞌyo ojjaña jaahuanajji”. 
\p  
\v 42 Jamatii quea huiso Jodio etii cuaa quehuajje Jesosajo jama acanaje baꞌa: —Eꞌe jojo nei oya Jesosa Eyacuiñajjija huoojeaꞌyo ojjaña jaahuanajji —quehuajje poanaje Jodio etii cuana, Paniseo cuana yajjajo. 
\p Eꞌe, Paniseo cuana yahuajo jama poanaje baꞌa: —Jesosa nijje jjapeequiajo aje oe ecuanaja equi ojee ejjachichaquijji yasijje edobiqui meejji pojjeama; ¡huoojeacuayajeajeꞌyo mi! —poanaje Paniseo cuana. 
\p Jamajjeya beca Jodio etii cuana quea ajjajja poanaje ehuoojeacuayajea ca poanijje.  
\v 43 Eꞌe, Jodio cuana jjashahuabaqui ajja Eyacuiñajji quea bei epo meeꞌyojji. Chojja, oya cuana aje oe jjashahuabaquinaje pea Jodio cuana quea bei epo meeꞌyojji onijje. 
\s1 Jesosaa quijje ojjaña huohui cajeꞌyo joya ojaya epeejji nei 
\p  
\v 44 Jamajjeya Jesosaa ojjaña ejjachichaqui nequi janobajjima nei, quea jaꞌa nee huohui canaje jama peaꞌai baꞌa: —Ecue Chiiya, Eyacuiñajjiya eya huoojea canaje. Jamajjeya ojjaña joya enijje eꞌe jojo nei jjapeequiani ecue Chii nijje peaꞌai jjapeequiani.  
\v 45 Beca cuana mimiani jama baꞌa: “Eꞌe, Jesosa Eyacuiñajjija huoojeaꞌyo ojjaña jaahuanajji”. Joya e bajji poaniya Eyacuiñajji ba cani peaꞌai, eya ecue Chii jayojjaya poani tii.  
\v 46 ¡Bacue! Cuaquijijiya jeajaꞌa canijo, dejja cuana poquiquehua ajja mecajje quea apojo. Eyaya cuaquijiji jayojja jamaa ojjaña quea jaꞌa jjashahuabaqui meesahuaña. Jamajjeya ojjaña joya enijje jjapeequiani mimishi cuana pajea meejeꞌyo. Jamajoya Eyacuiñajjiya eya huoojea canaje ojjaña cuana mimishi pajea meeꞌyohua.  
\v 47 Ecuea esohui shajjaꞌajja majje beca cuana jamaya baꞌe sa poꞌyo ajja. Jamatii eyaya oya cuana tecuea jjima aña. Eya ca iña poeyanaje ojjaña meshijo baꞌeca cuanaja mimishi cuijeaꞌyohua, enijje baꞌe tiitii meeꞌyohua; quea mimishi nee poanijo, quea nee nee po mee sa poꞌyo ajja. Ecuea ejjashahuabaquiꞌyojji jama pojjeama baꞌa: “Ojjaña quea mimishi nee poani quea nee nee po meejeꞌyo”. Chojja, eya ca iña poeyanaje ojjaña meshijo baꞌeca cuanaja mimishi cuijeaꞌyohua, enijje ebaꞌe tiitiiꞌyojji.  
\v 48 Ojjañaa joya e cajaa ajji epo quijje quea nee nee poajeꞌyo cuaquijo ecue huohui jayojja jama ajjimajojo. Jjeya nei eyaya esohui huohuiaña. Quijje eya poe oꞌoya majje ojjaña shajjamaꞌ cuana nijje mimije jama baꞌa: “Ecuea esohui shajjaꞌajja jjimajo miquianaya cajaa ajeꞌyo”.  
\v 49 Eꞌe, ecue Chiiya, e huoojeaꞌyojji poaniya eya huohui meesahua cani ojaya ejjashahuabaquiꞌyojji.  
\v 50 Ecuea eba ojjaña joya ojaya esohui jama poani Eyacuiñajjiya pea jjashahuabaquime po mee cajeꞌyo. Baꞌe tiitii mee cajeꞌyo onijje peaꞌai. Jamajjeya, eꞌe nei ojjaña Eyacuiñajjiya huohui canajeya eyaya huohuiaña —Jesosa poanaj e. 
\c 13  
\s1 Jesosaja epeejji cuanaa ojaya pea epeejji cuana cajaahuana cahua, cabaꞌe meesahua cahua 
\p  
\v 1 Eꞌe, Jodio cuana ojee jjachichaqui oꞌoyanaje Jenosanena huasijje ojee ijjiaꞌijjiaa quea bihui nee epojji, eniñebaꞌyojji esohuidojojjiya yahuajo nei Ejito meshijo Jodioja bacua cuana cuiaꞌyo jjima epajeaꞌyojji pojjeama. Jamajjeya oe cahuime ojee ijjiaꞌijjia jjimahuajo, Jesosa jjashahuabaquinaje jama baꞌa: —Eꞌe, jiquio shejo eya poquije oꞌoya eyahuasijje ecue Chii que. Eya ca iña nequi ajja jiquio meshijo. 
\p Jesosaa ojaya epeejji cuana jiquio meshijo baꞌe quea jea nee nee acanaje. ¡Quea jea nee nee Jesosaja ojaya epeejji cuana! Poqui jjimahuaa ohuaya oya cuana jjabahuejjaqui mee canaje. 
\p  
\v 2-4 Edosiquiana neiya Jodasa Isicaniote, Simonija bacua ejja quea tai jjashahuabaqui mee canaje. Jamajjeya Jodasa jjashahuabaquinaje Jesosa iña meesahuajji, onajaya equecuaꞌyojji. Jamatii Jesosaja eba poanaje jama baꞌa: Eyacuiñajjiya, oja Chiiya oya eyajo ani huoojea ca poa meshi yasijje. Jamajjeya oya oja Chii que poquije oꞌoya. Oja Chiiya oya ojjaña huoojeaꞌyojji po mee ca poa peaꞌai. Jamajjeya sinecua ecuana nijje, o shajjaꞌajjajji cuana nijje ojee ijjiaꞌijjianijo Jesosa nequisohuanaje. Oja daqui ao huijjiajea majje pea daqui ejjacomayijjiquijji ai jayojjajo jjajeyocaꞌaquinaje. Ma daqui jjajeyocaꞌaqui majje ohuaya ena sho canaje tepe ai jayojja huasijje.  
\v 5 Majoya ecuana jiojji topo canaje. Topo majje jiojji cui caꞌyonaje ma daquiya, ejjacomayijjiquijji ai jayojjaa, Jesosaa. Jamaya poanaje ecuana jjabahuejja meequijji jama baꞌa: Pea cuana quea jea nee aña, ¡baꞌe meesahuacue! Jama jjashahuabaquime epo meejji jiojji topo canaje.  
\v 6 Jamajoya quijje Jesosaa Peno jiojji topoꞌajja ca poa. 
\p —Jesosa, miya ecuea Emeshi Mese nei. ¿Aꞌa jjaya iña jiojji topoje peaꞌai? —Peno poanaje. 
\p  
\v 7 Jamajjeya Jesosaa oya sajaꞌa canaje jama baꞌa: —Eꞌe, Peno, jjeya miya jjashahuabaquiani: “¿Yajjajo shai Jesosaa ecuana jiojji topo cani soꞌo?” miquea ba jjima; yajjajo eya jama aña poso jjabaquiani. Jamatii quijje pishana miquea eba poaje —Jesosa poanaje. 
\p  
\v 8 —Chojja, Jesosa, miquea eya ejiojji topojji pojjeama, de, miya ecuea Emeshi Mese nei poanijo —Peno poanaje. 
\p Jamajjeya Jesosaa oya acanaje: —Peno, miya ecuea epeejji nei pojjeama poaje, ca eyaya miquea ejiojji mi topoajo —Jesosaa oya acanaje. 
\p  
\v 9 —¿Aꞌa eꞌe? Jamajjeya ¡ecuea ejiojji topocue, ecuea emeꞌ cuana, ecuea ecojja peaꞌai, ojjaña topocue! —poanaje Peno, Jesosa nijje jjapee neineiqui sa poanijo. 
\p  
\v 10 —Peno, miquianaya besanaje. Jamajjeya miya quea boejea. Jamatii jjeya ejiojji nei catopoahua. Jamajjeya miquianajaya mimishi cuijeaꞌyo majje quea boejea aꞌyonaje. Oe nei nei yani quea boejea pojjeama —Jesosa poanaje. 
\p  
\v 11 Oya jjashahuabaquiani Jodasajo. Ojaya eba Jodasa o iña meejji epojji. Jamajjeya: “Oe nei yani quea boejea pojjeama” Jesosa poanaje. 
\p  
\v 12 Majoya ecuana jiojji topo majje Jesosaa oja daqui ao huosho ca oꞌoyanaje. Anioque oꞌoyanaje ecuana nijje. Jama poanaje baꞌa: —¿Aꞌa miquea eba yajjajo miquianaya eyaya jiojji toponaje? ¿Aꞌa jjabahuejjaqui jjima pojjaꞌa?  
\v 13 ¡Bacue! Miquianaaya eya jama aña baꞌa: “Miya ecuea esohui huohuijji”, “Ecuea Emeshi Mese” aña. Eꞌe, jamaya miquianaaya quea pame aña. Eya ca ca iña jiquio, miquianajaya esohui huohuijji, miquianajaya Emeshi Mese peaꞌai.  
\v 14 Eꞌe, ¡bacue! Eyaya miquea esohui huohuijjiya, miquea Emeshi Meseya miquianaya jiojji toponaje. Jamajjeya ¡e jayojja jama pocue! ¡Pea cuana jiojji topojji jayojja jama pocue!  
\v 15 Eꞌe, eyaya miquianaya jjabahuejjaqui meeaña: ¡Eyaya miquianaya anaje jayojjaya pea cuana acue!  
\v 16 Eyaya eꞌe jojo nei miquianaya ba meeaña jama baꞌa: ¿Aꞌa echacojjiya ojaya echacomeejji huoojea cani? Chojja. Emeshi meseya ca ca oe echacojji huoojea cani. Eya quea caꞌa nee nee; miya ecuea echacojji quea caꞌa pishana. Jamajjeya ¡ecue sohui jayojja jama acue! Eꞌe, ¡pea cuana baꞌe meesahuacue oe!  
\v 17 Jjeya ecuea esohuijo jjabahuejjaquinaje. Jamajoya miya quea bihui nee poajeꞌyo ca ecue sohui jayojja jama baꞌyajo —Jesosa poanaje. 
\s1 Jesosaa huohui canaje Jodasa o iña meejji epojji 
\p  
\v 18 Majoya Jesosaa jama acanaje baꞌa: —Jamatii eya ojjaña miquianajo pojjeama mimiani. Miquianaya ecuea ebabaca; ecuea eba ojjaña. Oe dejja ese nijje nequi ecuea epeejji nisho; Eyacuiñajjija esohui etehueꞌyo ojo yahuajo nei jama poa baꞌa: 
\q1 “Oya enijje ijjiaꞌijjia anije. Jamatii aje oe ecuea epeejji nisho oya poaje, e quecua meeꞌyojji epojji”. 
\m Ecuea eba jiquio etehueꞌyo jamaya poaje eꞌe jojo nei.  
\v 19 Eꞌe, eyaya miquianaya jjeyahua nei huohuiaña jama po jjimahuajo. Jamajjeya quijje pea cuaa eya quecua cajo miquianaya jama ejo jjashahuabaquije baꞌa: “Eꞌe jojo nei oya Jesosa Eyacuiñajjija huoojeaꞌyo ojjaña jaahuanajji. Jamajjeya ohuaya eseya huohui canaje yahuajo” jamaya poaje miquianaya quijje.  
\v 20 Eꞌe jojo nei —Jesosa poanaje peaꞌai—, ojjaña joya ecuea echacojji nijje jjapeequiani ecuea esohui huohuijji poanijo, enijje jjapeequiani peaꞌai. Eyacuiñajji e huoojeaꞌyojji poanijo, ojjaña joya enijje jjapeequiani Eyacuiñajjija epeejji poani peaꞌai oya cuana. 
\s1 Jesosa miminaje Jodasajo 
\r (Mateo 26.20-25; Macoso 14.17-21; Noca 22.21-23) 
\p  
\v 21 Majoya Jesosa quea yeno nee nee poanaje Jodasaja ejjashahuabaquijji quea tai ba majje. O shajjaꞌajjajji cuana jama huohuime acanaje baꞌa: —Eyaya miquianaya eꞌe jojo nei huohuiaña. Oe dejja jiquiojo enijje ijjiaꞌijjia ani e iña meesahuajji epojji onajaya equecuaꞌyojji —Jesosa poanaje. 
\p  
\v 22 Jamajjeya o shajjaꞌajjajji cuana quea metejo pea nijje ecapashe nei jama poanaje baꞌa: —De, ¿ache shai o iña meesahuajji poaje soꞌo? —jjashahuabaquime poanaje. 
\p  
\v 23 Eya jiquio esohui tehuejji, Huani bajjani Jesosa pejjejo aninaje, eya ojaya quea jea nee nee.  
\v 24 Jamajjeya Penohua eya Jesosa huohuiꞌajja mee canaje: —¿Ache shai o iña meesahuajji poaje? 
\p  
\v 25 Majoya eyaya ecapashe nei Jesosa huohuiꞌajjanaje jama baꞌa: —Jesosa, ¿aya acuae mi quecua meeꞌyo sa acani soꞌo? 
\p  
\v 26 Jesosaa acanaje: —Pahui noe najo peshepeshe mee majje eyaya maya quiaje, ma e iña meejji epojji. 
\p Majoya Jesosaa pahui noe najo peshepeshe mee majje quia canaje Jodasa, Simonija bacua ejja: —Maꞌaje, Jodasa —poanaje. 
\p —Ocuee, Jesosa —acanaje Jodasaa. 
\p  
\v 27 Pahui ijjia anijo Edosiquiana neiya Jodasa quea tai jjashahuabaqui mee canaje jama baꞌa: “¡Onaya eyaya Jesosa iña meesahuaje!” 
\p Majoya aje Jesosaa jama acanaje baꞌa: —¡Poquicue, Jodasa! ¡Miquea ejjashahuabaquiꞌyojji jayojja jama acuajicue jjeyahua nei! —Jesosa poanaje. 
\p  
\v 28 Pea shajjaꞌajjajji cuana jama poanaje baꞌa: —¿Yajja poanaje Jesosa? ¿Ajeo Jesosaa Jodasa huoojea canaje soꞌo?  
\v 29 Jodasaa bashosoco sisi esejaya ejjeshejji biojji dojo canaje. Eꞌe pojjaꞌa huoojea canaje bobi jjequiya, quijje ojee eꞌijjiajji pojjaꞌa —poanaje. 
\p Beca eshajjaꞌajjajji cuana jama poanaje baꞌa: —Eꞌe pojjaꞌa Jesosaa Jodasa huoojea canaje bejjo quiaa aemaꞌ cuana huasijje —poso acanaje cuaa. 
\p  
\v 30 Eꞌe, Jesosaa huoojea cajje Jodasa pahui ijjia majje poquinaje esecue yasijje. Jjasinecuaquiajo poquinaje. 
\s1 Jesosaja esohui eyacua 
\p  
\v 31 Majoya Jodasa poquiꞌyajo, Jesosa ecuana nijje jama poanaje baꞌa: —Eya ojjañaja Edoe Mese. Eyacuiñajjiya jjeyahua nei ojjaña ba mee caje eya quea caꞌa nee nee poani. Ma ba cajo, eyaya ojjaña jjabahuejjaqui meeje Eyacuiñajji quea caꞌa nee nee, quea pame nee nee.  
\v 32 Eꞌe, Eyacuiñajjiya eya ma dejjaa ajjima acani amee canajejo ojjaña jjabahuejjaqui meenaje oya quea caꞌa nee nee. Jamajjeya Eyacuiñajjiya jjeyahua nei ojjaña jjabahuejjaqui mee caje eya quea pame nee nee poani. Eꞌe, Eyacuiñajjiya eya shequi meeꞌyo majje jjequisohua cajeꞌyo eyahuasijje —Jesosa poanaje. 
\p  
\v 33 Majoya Jesosaa ecuana huohui canaje jama baꞌa: —¡Miquianaya ecue bacua cuana jayojja, shajjaꞌajjacue mo! Eya minijje nequije oe pojji cahuime. E poquiꞌyajo, miquianaaya eya saꞌajjajeꞌyo. Jamatii jjeya nei poqui meemee ajja e poquiani yasijje. Jamaya yahuajo eyaya pea Jodio cuana huohuinaje peaꞌai.  
\v 34 Jamajjeya esohui eyacua eyaya huohuiaña jama baꞌa: ¡Pea cuana quea jea nee nee atiitiicue! ¡Eyaya miquianaya quea jea nee nee aña jayojja jamaya pea cuana quea jea nee nee acue!  
\v 35 Pea cuana quea jea nee nee añajo, onaya miquianajo jama poaje baꞌa: “Eꞌe jojo nei miquianaya Jesosaja epeejji poani” —Jesosa poanaje. 
\p  
\v 36 Peno Simohuiya Jesosa huohuiꞌajja canaje jama baꞌa: —Emeshi Mese Jesosa, ¿achacua acuae shai mi poquijeꞌyo? —acanaje. 
\p —Peno, jjeyahua nei miya epoquijji pojjeama e nequi yasijje. Quijje poe meeje e ani yasijje —Jesosa poanaje. 
\p  
\v 37 Penohua huohuiꞌajja canaje: —¿Yajjajo acuae jjeya eya minijje mi poqui meeaña? Miya ecuea quea jea nee neejo eyaya jaahuanajeꞌyo. Manojeꞌyo mi jaahuanajji. 
\p  
\v 38 Jesosaa quea yenohua Peno jama acanaje baꞌa: —¿Aꞌa miya manojeꞌyo e jaahuanajji? Chojja Peno, eꞌe jojo nei jiquio mecajje cachina yahue taaa jjimahuajo, miya ejo jama po huichaꞌa huichaꞌaje baꞌa: “¡Chojja, Jesosa ecuea ba jjima nei nei!” miya quea mete po majje pea beca peejjima huohuimeya aje —Jesosa po anaj e. 
\c 14  
\s1 Jesosaa ojaya epeejji quea bihui nee po mee canaje 
\p  
\v 1 Jesosaja esohui shajjaꞌajja majje ecuana quea yeno, quea mete poanaje. Jamajje Jesosa ecuana nijje miminaje jama baꞌa: —¡Aꞌa quea mete pojji! ¡Jiquio jama jjashahuabaquicue baꞌa: “Eyacuiñajjiya eya jaahuana cajeꞌyo tii” pocue! ¡Ejo jama jjashahuabaquicue peaꞌai baꞌa: “Jesosaa eya jaahuana cani tii” pocue!  
\v 2 Ecue Chii Eyacuiñajji eyajo ani. Jocuama ojaya ebaꞌejji quea huiso nee yani. Ecuea esohui eꞌe jojo nei, siajje pojjeama. Eya poquije ecue Chii que miquianajaya ebaꞌejji iyaa, apoa yajji.  
\v 3 Eꞌe, eyaya miquianajaya ebaꞌejji iyaje. Jamajjeya eꞌe jojo nei eya poeje oꞌoya. Poe oꞌoya majje eyaya miquianaya dojoje enijje ebaꞌe tiitiiꞌyojji.  
\v 4 Miquianajaya eya eba ecue Chii que poquije. Miquianajaya eba peaꞌai ecue Chii que epoquijji —Jesosa poanaje. 
\p  
\v 5 Majoya Tomasi Jesosa nijje jama poanaje baꞌa: —Jesosa, ¿achacua miya poquijeꞌyo? Joya mi poquije yasijje ecuanajaya ejiojji ba jjima, de. Jamajjeya ecuanaja eba pojjeama ejiojji ma mi poquiani yasijje epoquijji —acanaje Tomasiya. 
\p  
\v 6 —Tomasi, ojjaña ecue sohui eꞌe jojo nei. Eya ejiojji eyahuasijje epoquijji jayojja. Eꞌe, ecuea esohui jayojja jama poanijo, miya ecue Chii baꞌyani yasijje poqui meejeꞌyo. Ojjaña enijje jjapeequiani eyaya baꞌe tiitii meejeꞌyo ecue Chii nijje tii. Ojjaña joya enijje jjapeequi ajja ca ca ecue Chii nijje ebaꞌe tiitiiꞌyojji pojjeama.  
\v 7 Eya miquianajaya eba jojjemo miquianaaya ecue Chii bame peaꞌai poaje. Jjeya nei oya miquianajaya eba poaje. Jamajjeya eya ecue Chii yasijje poquiꞌyajo, oya quea caꞌa nee nee ani miquianaaya baje —Jesosa poanaje. 
\p  
\v 8 Majoya Penipe jama poanaje baꞌa: —Jesosa, ¡eseja Chii ai ecuanaya ba meecue! Jamajjeya ecuana quea bihui nee nee poajeꞌyo —poanaje Penipe. 
\p  
\v 9 Jesosaa Penipe acanaje: —Penipe, ¿aꞌa miquianaya jjabahuejjaqui jjima? Eya miquiana nijje baꞌenaje quea shequiaja huiso. ¿Aꞌa jjeya miquianajaya eya ba jjima? ¡Bacue oe! E ba majje esejaya Chii eyajo miquianajaya eba peaꞌai. Jamajjeya ¿apiojji acuae miya jama poani soꞌo baꞌa: “¡Esejaya Chii ai ecuanaya ba mee socue!” poani miya? —Jesosa poanaje—.  
\v 10 Eꞌe jojo nei eya ecue Chii jayojjaya, de. Oya e jayojjaya peaꞌai. ¿Aꞌa miquianaya jamaya jjashahuabaqui jjima? Ecue Chii nijjeya eyaya ohuaya jayojja aña, ma dejjaa ajjima acani aña. Ecue Chiija ejjashahuabquiꞌyojji eyaya huohuiaña peaꞌai, ecuea ejjashahuabaquiꞌyojji pojjeama.  
\v 11 Eꞌe jojo nei eya ecue Chii jayojjaya, de. Oya e jayojjaya peaꞌai. ¡Jamaya jjashahuabaquicue, oe! Ecuea esohuijo miquianaya jjabahuejjaqui jjima, ¡jamajjeya jjashahuabaquicue eyaya ma dejjaa ajjima añajo! ¡Jama acue baꞌa: “Eꞌe, Jesosa Eyacuiñajji jayojjaya” acue miyaya! —Jesosa poanaje—.  
\v 12 Eyaya huohuiaña eꞌe jojo nei jama baꞌa: Ojjaña enijje eꞌe jojo nei jjapeequianiya eyaya aña jayojja jama acajeꞌyo. Eyaya quea huiso pishana jjapeequi meeꞌyonaje Eyacuiñajji nijje. Eya ecue Chii que poquiꞌyajo, ecuea epeejji cuaa quea huiso nee nee pea cuana jjapeequi meesahua cajeꞌyo onijje, Eyacuiñajji nijje.  
\v 13 Jiquio ecua miquianaya enijje mimijea jamaya eyaya ajeꞌyo, ca ejo jama jjashahuabaquianijo baꞌa: “Eꞌe jojo nei Jesosaa ma ecua eya onijje mimiani jamaya acajeꞌyo”. Jamajoya ba majje ojjañaa ecue Chii bihuia caje jama baꞌa: “Eyacuiñajji, ecuanaja Chii ai, miya quea caꞌa nee nee eyajo ani”.  
\v 14 Enijje mimicue jama baꞌa: “¡Jesosa, jiquio ecua eya mimiani minijje jamaya miyaya acue!” Jamajjeya miya enijje poanijo eyaya joya ecua miya enijje mimiani jamaya ajeꞌyo —Jesosaa ecuana huohui canaje. 
\s1 Jesosaa huohui canaje Edojjoshahua Pameja epoejjijo 
\p  
\v 15 Majoya Jesosaa ecuana, o shajjaꞌajjajji cuana huohui canaje jama baꞌa: —Eya miquianajaya quea jea nee poanijo, ¡ecuea esohui jayojja jama acue!  
\v 16 Jamajjeya eya eseja Chii nijje mimije jama baꞌa: “Ecue Chii, ¡Edojjoshahua Pame huoojeacue ecuea epeejji cuana jjabahuejjaqui meeꞌyohua! Oya ecuea epeejji cuana nijje ani tiitiijeꞌyo”.  
\v 17 Eꞌe, Edojjoshahua Pameya miquianaya esohui eꞌe neijo jjashahuabaqui mee cajeꞌyo. Ecuea epeejji pojjeama ca ca Edojjoshahua Pame nijje ejjapeequi meejji pojjeama. Oya miquianajaya eba. Pea cuanaja oya ba jjima. Oya miquiana nijje enequi tii tii. Miquiana que dobiquijeꞌyo, Edojjoshahua Pame —Jesosa poanaje. 
\p  
\v 18 —Ecuea epeejji, eya poquijeꞌyo, miquianaya jeanajeꞌyo jiquiojo tii. Jamatii ecuea miquianaya jaahuana jjima jayojja jeanaꞌyome ajjima. Chojja. Eya miquiana huasijje huoojeajeꞌyo Edojjoshahua Pame miquiana nijje jjapeequi tiitiiya, miquiana jaahuana tiitiiꞌyojji.  
\v 19 Quijje pishana ecuea epeejji pojjeama cuaa eya ba maja ajja. Miquianaaya ca ca eya baje oꞌoya. Eya baꞌe tiitiijeꞌyo, miquianaya peaꞌai baꞌe tiitiijeꞌyo —Jesosa poanaje—.  
\v 20 Edojjoshahua Pame poeyajo, miquianaya jjabahuejjaquije jama baꞌa: Eya ecue Chii jayojjaya tii poani. Eya miquiana nijje nequi, miquianaya enijje nequi peaꞌai —Jesosa poanaje—.  
\v 21 Ojjaña joya quea e jea nee nee poani ecuea esohui shajjaꞌajja majje jamaya poani. Eya ojaya quea jea nee nee poanijo, oya ecue Chiija quea jea nee nee peaꞌai, ecuea quea jea nee nee peaꞌai. Eyaya oya ba meeje jama baꞌa: Eya eꞌe jojo nei onijje ani tii tii —Jesosa poanaje. 
\p  
\v 22 Majoya pea Jodasa, ma Jodasa Isicaniote pojjeama, Jesosa nijje jama poanaje baꞌa: —¿Yajjajo acuae miquea epeejji pojjeama mi jjaba meemajaquije soꞌo? Ecuanaa ca ca miya baje oꞌoya —huohuiꞌajja canaje pea Jodasaa. 
\p  
\v 23 Jesosaa oya jama acanaje baꞌa: —Ojjañaa joya quea e jea nee poaniya ecuea esohui jayojja jama acajeꞌyo tii. Jamajjeya ecue Chiiya oya cuana quea jea nee acajeꞌyo. Eya, ecue Chii peaꞌai onijje jjapeequijeꞌyo.  
\v 24 Pea cuana ca ca ecuea esohui shajjaꞌajja sa po ajja, e botiꞌama jjejojo. Miquianaaya shajjaꞌajjaña. Ecue Chiiya eya huoojea canaje. Ojaya ejjashahuabaquijji eyaya miquianaya huohuiaña, ecuea ejjashahuabaquijji pojjeama.  
\v 25 Jamaya eyaya huohuiaña, miquiana nijje nequiya.  
\v 26 Ecue Chiija eba miquianaya ecuea epeejji poani. Jamajjeya ohuaya Edojjoshahua Pame huoojea caje miquiana huasijje, miquiana jaahuanaa, miquiana enijje ejjapeequijji peaꞌai. Poe majje ohuaya miquianaya ba meesahua cajeꞌyo Eyacuiñajjija ejjashahuabaquijji cuana. Ojjaña ecuea esohuijo ohuaya miquianaya jjashahuabaqui mee cajeꞌyo tii tii peaꞌai —Jesosa poanaje. 
\p  
\v 27 —Eya quea bei nee nee. Eyaya miquianaya quea bei po meeaña —Jesosa poanaje—. ¡Jamajoya quea bei pocue, e jayojja! ¡Meteꞌama, yenoꞌama peaꞌai pocue! Ecuea epeejji pojjeama cuanaja aje oe miquianaya quea bei nee epo meeꞌyojji pojjeama, de.  
\v 28 Eyaya huohuinaje jama baꞌa: Eya ecue Chii que poquijeꞌyo. Poqui majje quijje eya poeje oꞌoya miquiana que. Eꞌe, eyaya miquianaya huohuinaje jama baꞌa: Eya poquijeꞌyo ecue Chii que. Ecue Chiiya eyajo aniya ma dejjaja ba jjima quea huiso nee nee acani. Eyaya jiquiojo ma dejjaa ajjima acani oe pojji aña —Jesosa poanaje—. Jamajjeya miquianaya quea e jea nee poanijo, ¡quea bihui nee pocue ejo, eya ecue Chii que poquianijo peaꞌai!  
\v 29 Eꞌe, eyaya miquianaya jjeyahua nei huohuiaña, eya ecue Chii que poqui jjimahuajo. Jamajjeya e poquiꞌyajo miquianaya jama poaje baꞌa: “Eꞌe jojo nei Jesosaa poqui jjimahuaa eseya huohui canaje. Oya Eyacuiñajjija Bacua Ejja poeje oꞌoya” aje quiana oe poaje —Jesosa poanaje—.  
\v 30 Eya miquiana nijje jjeya nei mimi majamaja ajja. Edosiquiana nei poeyani e napaa. Eꞌe, Edosiquiana nei, ma ojjaña meshijo dejja mimishi huoojeaꞌyojji poani e napaa poeje. Ojaya eya ejeabichajeajji pojjeama.  
\v 31 Jamatii eya quea nee nee poaje. Quea nee nee poaniya ojjaña ba meeje jama baꞌa: “Jesosaja oja Chii quea jea nee nee. Oja Chiija ehuohui jayojja jama poani peaꞌai” acaje cuaa. Mahuiso —Jesosa poanaje—. Eꞌe. ¡Jjeya nequisohuacue! ¡Cuaꞌa, esecue yasijje cuayaquicue! —Jesosa poanaje. 
\p Jamajjeya equi quecuayijji eyajo ani ijjiaꞌijjia ani cuayaquinaje esecue yasijje acui yiye yasijje epoquijji. 
\c 15  
\s1 Esohui eba meesahuajji uvajo bashococo ai jayojjayajo 
\p  
\v 1 Majoya ejiojjijje poquijeya Jesosaa ecuana huohui canaje: —Eyaya esohui mi ba meesahuajji huohuije uvajo, bashococo ai jayojjajo. Eya bashococo ai emaijje quea pame jayojja jama poani. Ecue Chii bashococo ai cuiñajji jayojja jama.  
\v 2 Bashococo ai cuiñajjiya yaa sisi nojinojiꞌyajo tetojea caꞌyani jjajja ajjajojo. Eña ba chii tetojea caꞌyani peaꞌai, jjono quea jjajja huiso epojji. Jiquio ecua jjono bashococo ai cuiñajjiya yaa enojinoji tetojea caꞌyani jayojja jama ecue Chiiya ecuea epeejji nisho cuana cajaa acani. Jiquio ecua eña ba chii tetojea caꞌyani jayojja jama epeejji eꞌe jojo nei cuana mimishi pajea mee cani, quea pame nee nee epojji.  
\v 3 Ecuea esohui shajjaꞌajjanajejo miquianaya quea jaꞌa poanaje. Jamajjeya miquianaya bashococo ai jjono quea pame jayojja jama poanaje.  
\v 4 ¡Enijje jjapee tiitiiquicue! Jamajjeya eya miquiana nijje jjapee tiitiiquijeꞌyo. Jamajjeya miquianaya ma dejjaa ajjima acani ameejeꞌyo. ¿Aꞌa jjono emaijje jjasejjaqui majje jjajjaje soꞌo? Chojja. Jamaya miquianaya enijje jjapee pajeaquiꞌyo majje quea pame po ajja. Emaijje jjasejjaquiꞌyo jjima jjono jjajjani —Jesosa poanaje. 
\p  
\v 5-6 Eya jjono emaijje quea pame nee jayojja. Miquianaya jjono emaijo pohuani jayojja. Jjono emaijje jjasejjaquiꞌyo majje nojinojije. Jocaꞌyajo chichaꞌyo majje dahuajea caꞌyani cuaa. Oya jayojjaya ojjaña enijje jjapee pajeaquiꞌyani cajaa acani. Joya enijje jjapee tiitiiquiani ca ca eya jjapee tiitiiquijeꞌyo onijje peaꞌai. Jamajjeya oya cuana ma dejjaa ajjima acani quea huiso ameejeꞌyo.  
\v 7 Eꞌe, miquianaya enijje jjapee tiitiiquianijo, ecue sohui jayojja jama atiitiiañajo peaꞌai, Eyacuiñajjiya joya ecua miquianaaya huohuinaje jamaya acaje onijje mimiyajo.  
\v 8 Miquianaya ma dejjaa ajjima amee cani ba majje pea cuaa huohui caje jama baꞌa: “Eꞌe, Eyacuiñajji quea caꞌa nee. Jiquio dejja cuana eꞌe jojo nei Jesosa shajjaꞌajjajji cuana” acaje cuaa. 
\p  
\v 9 —Ecue Chiiya eya quea jea nee nee acani jayojja jama miya ecuea quea jea nee nee. Jamajjeya ¡eya miquianaaya quea jea nee nee peaꞌai acue!  
\v 10 Eꞌe, eya ecue Chiija quea jea nee nee poani, eyaya ojaya esohui jayojja jama atiitiiañajo. Jamaya ecuea esohui jayojja jama poanijojo, miquianaya ecuea quea jea nee nee poani peaꞌai —Jesosa poanaje. 
\p  
\v 11 —Eyaya jiquio esohui huohuiaña miquiana quea bihui po meejji. Eꞌe, eyaya miquianaya quea bihui nee nee po mee sa aña.  
\v 12 Eyaya miquianaya huohuinaꞌyaña jama baꞌa: ¡Pea cuana quea jea nee nee acue! ¡Jiquio ecua eyaya miquianaya quea jea nee nee aña jamaya acue cuana!  
\v 13 Ojaya epeejji quea jea nee nee acani oe dejja manojeꞌyo ojaya epeejji nahuejo. Jamajjeya ¡ojaya oja epeejji quea jea nee nee poanijo nahue cani!  
\v 14 Miquianaya ecuea quea jea nee nee; ecuea esohui jayojja jama poanijo ecuea epeejji eꞌe jojo nei poani. Jamajjeya eya miquiana nahuejo manojeꞌyo.  
\v 15 Echacojjija ba jjima ojaya echacomeejjija ejjashahuabaquiꞌyojji. Ojaya epeejji ca ca ba mee cani. Jamajjeya jjeya eya jama po ajja baꞌa: “Miquianaya ecuea echacojji poani”. Chojja. Jjeya eya jama poani baꞌa: “Miquianaya ecuea epeejji poani”. Eꞌe, ojjaña joya ecue Chiiya huohui canaje eyaya miquianaya ba meenaje ecuea epeejji poanijojo —Jesosa poanaje—.  
\v 16 ¡Bacue, oe! Eya miquianajaya ebabaca pojjeama. Eyaya ca ca miquianaya babacaꞌyonaje ecuea epeejji epojji. Eyaya miquianaya huoojeaña ecue Chii nijje quea pame nee chacohua. Jamajjeya ¡pea cuana enijje jjapeequi meesahuacue! Jamajjeya enijje jjapeequianijo miquianaya cojjacahuianijo. Eyacuiñajji nijje emimijji ohuaya miquianaya sajaꞌa acaje —Jesosa poanaje—.  
\v 17 Jamajjeya eyaya miquianaya huohuinaꞌyaña jama baꞌa: ¡Pea cuana quea jea nee nee acue! —Jesosa poanaje. 
\s1 Eshahuaja epeejji cuanaja botiꞌama nei nei poaje miquianaya 
\p  
\v 18 —¡Aꞌa quea yeno pojji dejja mimishi cuana miquiana nijje quea quene poanijo! Dejja mimishi cuana miquiana nijje quea quene nee nee po jjimahuajo enijje quea quene nee nee poanaje.  
\v 19 Miquianaya dejja mimishi jayojja baꞌe jojjemo ojaya quea jea pome miya ojaya pea epeejji quea jea jayojja. Jjeyahua nei miquianaya ona jayojja pojjeama, eyaya miquianaya babacaꞌyonajejo. Jamajjeya miquiana nijje quea quene nee nee poani dejja mimishi cuana.  
\v 20 ¿Aꞌa ecuea ehuohuiꞌyo baña? Jama baꞌa: Echacomeejji quea sohui caꞌa; echacojji ca ca caꞌaꞌama. Jamajjeya eya napa caje cuaa jayojja jama miquiana napa caje peaꞌai. Ecuea esohui shajjaꞌajja canajejo, miquianajaya esohui shajjaꞌajja cajeꞌyo peaꞌai, onaaya.  
\v 21 Eꞌe, e acajeꞌyo jayojja jama miquianaya acajeꞌyo cuaa enijje jjapeequianijo. Eꞌe, oya cuaa jamaya acajeꞌyo, Eyacuiñajji, e huoojeaꞌyojji epo ba jjimajojo.  
\v 22 E meshi yasijje, dejja mimishi cuana huasijje poe jjima jojjemo, esohui huohui jjima jojjemo peaꞌai Eyacuiñajjiya shajjamaꞌ cuana quea nee nee po meeꞌyo ajja acame. Jamatii jjeya eyaya ojjaña huasijje esohui eꞌe nei huohuinajejo, jama po mee ajja baꞌa: “Ecuea mimishi chamaꞌ. Ecuea shajjaꞌajja jjima”. Chojja. Oya cuana quea mimishi tii —Jesosa poanaje—.  
\v 23 Joya e botiꞌama ajji poaniya ecue Chii botiꞌama peaꞌai acani.  
\v 24 Eyaya dejja mimishi nijje nequiya ma dejjaa ajjima acani aꞌyonaje. Ma dejjaa ajjima acani ecuea ajjima jojjemo Eyacuiñajjiya oya cuana tecuea jjima acame. Eꞌe, onaaya ba canaje eyaya ma dejjaa ajjima acani aña. Jamatii eya ecue Chii peaꞌai botiꞌama nei nei onajaya.  
\v 25 Yahuajo nei nei Eyacuiñajjija esohui huohuijjiya esohui tehue ca poa ejo jama baꞌa: “Eya quea pame nee poani. Jamatii dejja mimishi cuanaja eya botiꞌama nei nei” —Jesosa poanaje—. Jjeya jamaya dejja mimishi cuana poanaje enijje, esohui huohuijjija etehueꞌyo jama —Jesosa poanaje. 
\p  
\v 26-27 —Miquianaya enijje aninaje ma eya dejja cuana huasijje esohui huohui coonajejo. Jamajjeya ¡miquianaaya esohui eꞌe jojo nei ejo huohuicue ojjaña cuana huasijje! —Jesosa poanaje—. E poquiꞌyajo Edojjoshahua Pame poeje miquiana quea bihui nee po meeꞌyohua. Jjeya oya ecue Chii nijje yani. Eyaya oya huoojeaje miquiana que miquiana jaahuanaa. Ohuaya Eyacuiñajjija esohui eꞌe jojo nei ejo miquianaya ba meesahua cajeꞌyo. Jamajjeya miquianaya jjashahuabaquije ejo —Jesosa poanaje. 
\c 16  
\p  
\v 1 —Eyaya miquianaya jamaya huohuiaña jjeya. Jamajjeya ecuea esohuijo quijje miquianaya enijje ejjapee pajeaquiꞌyojji pojjeama onaa napa cajje.  
\v 2 Jodio cuana miquiana nijje quea quene poaje. Jamajjeya quijje, Jodioja equi ojee ejjachichaquijji yasijje dobiquiyajo miquianaya huoojeacuaya cajeꞌyo esecue yasijje Jodio cuaa. Eꞌe, quijje miquianaya quecuaꞌyo majje oya cuana jjashahuaba quehuaquije jama baꞌa: “Ecuaaya oya cuana quecuaꞌyonaje. Jamaya Eyacuiñajjija quea boti” jama posoya acaje cuaa. 
\p  
\v 3 —Jamaya acaje cuaa Eyacuiñajji ba jjimajojo, eya peaꞌai ba jjimajojo.  
\v 4 Jjeya eyaya miquianaya huohuiaña. Jamajjeya quijje onaa napa cajje miquianaya jama poaje baꞌa: “Jesosaja esohui yahuajo jayojja jama jjeyahua nei acani cuaa. Ecuana napa cani, onaaya” jamaya poaje —Jesosa poanaje—. Yahuajo miquiana nijje mimi coo majje eyaya miquianaya huohui jjima. Miquiana nijje enequiya jjejojo mi huohuinaje —Jesosa poanaje. 
\s1 Edojjoshahua Pame poeje 
\p  
\v 5 —Yahuajo eya eyajo ani ecue Chiiya huoojea ca poa jiquiacua. Jjeyahua nei eya o que poquije oꞌoya. Jamatii eya miquianajaya huohuiꞌajja jjima jama baꞌa: “¿Achacua miya poquijeꞌyo?” ajjima.  
\v 6 Eyaya miquianaya huohuinaje jama baꞌa: “Eya poquijeꞌyo”. Jamajjeya miquianaya quea yeno nee poani.  
\v 7 Jamatii eyaya miquianaya eꞌe jojo nei huohuiña: Poquiꞌyo majje eyaya miquianaya quea bihui nee po meejeꞌyo. Eꞌe, ecue Chii que poquiꞌyo majje eyaya Edojjoshahua Pame huoojeaje miquiana que. E poquiꞌyo ajja jojjemo ca ca oya poe jjima pome.  
\v 8 Ecuea epeejji pojjeamaja ejjashahuabaquijji quea quehua. Jamajjeya poe majje Edojjoshahua Pameya oya cuana jjabahuejjaqui mee caje. Oya cuana quea mimishi poani, quea mimijjequijea poani. Edojjoshahua Pameya oya cuana quea jaꞌa nee ba mee cajeꞌyo peaꞌai. Eyacuiñajjiya ojjaña joya quea mimishi poani tii quea nee nee po mee cajeꞌyo tii tii peaꞌai. Jamaya ojjaña ba mee cajeꞌyo, Edojjoshahua Pameya.  
\v 9 Eꞌe, Edojjoshahua Pameya ojjaña jjabahuejjaqui mee caje jama baꞌa: Enijje jjapeequi sa poꞌyo ajja jojoya aje oe ojjaña quea mimishi poani.  
\v 10 Ecue Chiiya eya shequi oꞌoya mee majje o que jjequisohua caꞌyajo, Edojjoshahua Pameya ojjaña ba mee caje eya quea pame nee nee. Jamajjeya eyaya ojjaña quea jaꞌa nee baꞌe meejeꞌyo. Jjeyahua nei ojjaña ecuea epeejji pojjeamaja eba majajji pojjeama tii.  
\v 11 Dejja mimishi huoojeajjijo, Edosiquianajo Eyacuiñajji miminaje jama baꞌa: “Eyaya Edosiquiana nei quea nee nee po meejeꞌyo tii tii. Jamajjeya ojjaña quea mimishi poani quea nee nee po meejeꞌyo peaꞌai”. Jamaya Edojjoshahua Pameya ojjaña jjashahuabaqui mee caje, poe majje —Jesosa poanaje. 
\p  
\v 12 —Ecuea pea ejjashahuabaquijji yani quea huiso, miquianaya huohui jjima ecuea. Jamatii jjeya miquianajo quea quehua poaje; jamajjeya jjeyahua eba meejji pojjeama.  
\v 13 Jamajjeya Edojjoshahua Pameya poe majje miquianaya ojjaña esohui eꞌe nei ba meesahua cajeꞌyo ejo. Ojaya ejjashahuabaquijji pojjeama ohuaya miquianaya ba meesahua cajeꞌyo. Chojja, ecue Chiija esohui ba meesahua cajeꞌyo. Edojjoshahua Pameya miquianaya ba meesahua cajeꞌyo ojjaña ma Eyacuiñajjiya quijje acaje.  
\v 14 Jamajjeya ecuea esohui ba meesahua cajo, miquianaaya eya bihuiajeꞌyo jama baꞌa: “Eꞌe de, Jesosa quea pame nee nee, quea caꞌa nee nee poani” miquianaya poaje.  
\v 15 Ecuea ejjashahuabaquijji ecue Chiija ejjashahuabaquijji jayojjaya tii tii poani. Jamajoya eyaya huohuiaña jama baꞌa: Ecuea esohui ba meesahua cajeꞌyo Edojjoshahua Pameya —Jesosa poanaje. 
\s1 Jesosa manoꞌyo majje shequije oꞌoya 
\p  
\v 16 —Eꞌe, jjeya nei eya miquianajaya ba jjima poaje. Majoya quijje pishana baje oꞌoya. Majoya ecue Chiiya eya jjequisohua cajeꞌyo o que —Jesosa poanaje. 
\p  
\v 17 Jamajjeya ecuana, Jesosa shajjaꞌajjajji cuana ojee mimimiminaje jama baꞌa: —¿Yajjajje shai Jesosa jama poani baꞌa: “Jjeya nei miquianajaya eya ba jjima poaje. Majoya quijje pishana baje oꞌoya. Majoya ecue Chiiya eya jjequisohua cajeꞌyo o que” poani? —poanaje ecuana.  
\v 18 Ojee mimi majamajanaje jama baꞌa: —¿Ajeo oya mimiani jama baꞌa: “Jjeya nei?” Ecuanaja quea quehua ojaya esohui —poanaje ecuana. 
\p  
\v 19 Ecuanaja ejjashahuabaquijji Jesosaja eba poanaje. Jamajjeya ohuaya ecuana huohuiꞌajja canaje: —Eya jama poanaje baꞌa: “Jjeya nei miquianajaya eya ba jjima poaje. Majoya quijje pishana baje oꞌoya” poanaje. Jamajjeya: “¿Ajeo shai oya Jesosa mimiani soꞌo?” miquianaaya huohuiꞌajjaña. ¿Aꞌa eꞌe?  
\v 20 Eꞌe jojo nei jjeya nei miquianaya quea yeno nee nee poaje. Ecuea epeejji pojjeama ca ca quea bihui nee nee poaje. Eꞌe, miquianaya pa neineije. Jamatii quijje pishana quea bihui nee nee poaje oꞌoya, miquianaya.  
\v 21 Eꞌe, epona bacua nee majje quea yeno poani, quea bacua nee nee jjejojo. Jamatii bacua cuaya majje quea bihui nee poani. Ebacua ba majje enaese jjashahuabaqui maja ajja ebacua neejo.  
\v 22 Jiquio ecua bacua nee majje epona quea yeno nee poani jayojja jama miya jjeya quea yeno nee nee poajeꞌyo. Jamatii eya ba oꞌoya majje quea bihui nee nee poajeꞌyo. Quea bihui nee nee epo pajea meeꞌyojji pojjeama cuanaja mi —Jesosa poanaje. 
\p  
\v 23 —Jamajjeya eya ecue Chii que poquiꞌyajo, miquianajaya e ehuohuiꞌajja majajji pojjeama; enijje mimi ajja aquiana sa poanijo peaꞌai. Eꞌe jojo nei, ecue Chii nijje mimianijo, ¡aquiana sa poanijo oya huohuicue! Ohuaya miya shajjaꞌajja caje. Miquianaya enijje jjapeequianijo quia caje joya miquiaa saña —Jesosa poanaje. 
\p  
\v 24 —Yahuajo miquianajaya jamaya ajjima. Ma miquiaa saña ecue Chii huohui jjima enijje jjapeequianijo. Jamajjeya ¡Eyacuiñajji nijje mimicue! Joya ecua miquianaaya oya huohuiaña jamaya ohuaya acaje, ecuea epeejji poanijo. Ohuaya joya miquiaa huohuiꞌajjajeya quia caje. Jamajjeya miquianaya quea bihui nee po tiitiijeꞌyo, eꞌe jojo nei —Jesosa poanaje. 
\p  
\v 25 —Jjeya eyaya miquianaya ecuea ejjashahuabaquijjijo sohuihuohuinaje, esohui ebamee sahuajjijo ca ca oe huohuinaje. Quijje ca ca eyaya miquianaya ecue Chiijo huohui neineije esohui quea jaꞌa neejo, esohui eba meesahuajjijo pojjeama —Jesosa poanaje—.  
\v 26 Eꞌe, quijje pishana eya ecue Chii que poqui oꞌoyajo, miquianaya ecue Chii nijje mimije, enijje pojjeama. ¡Aquiana sa poanijo ca oe oya huohuicue! Ecuea epeejji poanijojo ohuaya miquianaya shajjaꞌajja caje —Jesosa poanaje—.  
\v 27 Eꞌe, miquianaya ecue Chiija quea jea nee nee, eya miquianaja quea jea nee poanijojo, miquiana ejo quea jaꞌa jjashahuabaquianijo peaꞌai. Eꞌe, miquianajaya ejjashahuabaquijji ejo jama baꞌa: “Eyacuiñajjiya Jesosa huoojea canaje eꞌe jojo nei”.  
\v 28 Eꞌe jojo nei eya eyajo ani ecue Chiiya huoojea canaje meshi yasijje. Jjeyahua nei eya meshijo nequi jjima poaje. O que poquije oꞌoya —Jesosa poanaje. 
\p  
\v 29 Jamajjeya ecuana jama poanaje baꞌa: —Eꞌe Jesosa, jjeya miyaya quea jaꞌa nee huohuiaña, esohui eba meesahuajjijo pojjeama. Maya ecuanaja quea quehua poanaje.  
\v 30 Ecuanaja eba miyaya ojjaña baña eꞌe jojo nei. Minijje mimi jjimahuajo, ecuanaja ejjashahuabaquiꞌyojji miquea eba. Jamajoya jjeya ecuana jama poani baꞌa: Eꞌe jojo nei oya Jesosa Eyacuiñajjija huoojeaꞌyo —poanaje ecuana. 
\p  
\v 31 Majoya Jesosaa ecuana jama acanaje baꞌa: —Eꞌe, Eyacuiñajjiya, ecue Chiiya eya huoojea canaje. ¿Aꞌa jjeya jamaya miquianajaya eba eꞌe jojo nei? —Jesosa poanaje—.  
\v 32 ¡Bacue! Jjeya nei miquianaaya eya quea mete po majje jeananajeꞌyo. Poquicuajije miquianajaya equi yasijje. Jamatii eya ee nei enequijji pojjeama. Chojo, ecue Chii enijje enequi tii —Jesosa poanaje—.  
\v 33 Eyaya jamaya huohuiaña. Jamajjeya miquianaya ecuea epeejji nei poanijo quea bei poajeꞌyo, meteꞌama. Jiquiacua baꞌyanijo, onaa napa cajje quea nee poaje. ¡Jamatii yenoꞌama pocue! Eꞌe, Edosiquiana nei, ojjaña joya ecuea epeejji pojjeama peaꞌai eyaya jeabichajeaꞌyonaje. Oya cuana quea nee nee po meejeꞌyo tii —Jesosa poanaje. 
\c 17  
\s1 Jesosa miminaje oja Chii nijje ojaya epeejji cuanajo 
\p  
\v 1 Majoya ecuana nijje, o shajjaꞌajjajji nijje mimi majje Jesosa oja Chii nijje miminaje. Eyahuasijje jjabajeasohuaqui majje jama poanaje baꞌa: —Ecue Chii, jjeya nei eya manojeꞌyo. ¡Miquea ejjashahuabaquiꞌyojji ejo yahuajo, e huoojeanajejo jama acue jjeya, miyaya! ¡Ojjaña ba meecue eya miquea Ebacua Ejja quea caꞌa nee nee! Jamajjeya ba majje ojjañaa miya bihuia caje.  
\v 2 Eꞌe, miyaya eya ojjañaja Emeshi Mese nei po meeꞌyonaje, ojjaña huoojeajji. Jamajjeya ojjaña joya miya enijje jjapeequi meesahuaña baꞌe tiitii meejeꞌyo, eyaya.  
\v 3 Ecue Chii, miya ca ca oe Eyacuiñajji nei eꞌe jojo nei. Pea chamaꞌ. Eya mique huoojeaꞌyo ojjaña jaahuanajji, Jesosa Quito bajjani. Ojjaña minijje jjapeequianijo, enijje jjapeequianijo peaꞌai, baꞌe tiitiijeꞌyo eyajo.  
\v 4 Eyaya ojjaña cuana ba meenaje miya quea caꞌa nee nee poani. Eꞌe ecue Chii, miyaya eya huoojeanaje miquea echacojji. Ojjaña miquea ehuohui eyaya ajeyojeyoꞌyonaje. Apoa anaje.  
\v 5 Ecue Chii, yahuajo nei nei meshi pana jjimahuajo, eya minijje quea caꞌa nee nequia poa. Jamajjeya jjeya eya mi que poquijeꞌyo; ¡quea caꞌa nee nee nequi meeꞌyocue mo, minijje ojjaña huoojeajji! —jamaya Jesosa miminaje oja Chii nijje. 
\p  
\v 6 —Ecue Chii, eya minijje mimiani e shajjaꞌajjajji cuanajo. Oya cuana yahuajo miquea epeejji pojjeama poa. Miyaya oya cuana enijje jjapeequi meesahuanaje. Jamajjeya eyaya oya cuana mijo jjabahuejjaqui meenaje. Miquea esohui jayojja jama acanaje. Jjashajjaꞌajjaquinaje.  
\v 7 Jamajjeya jjeya ojjañaja eba ojjaña joya miya e ameesahuanaje eyaya aña.  
\v 8 Ecue Chii, miyaya eya huoojeanaje miquea esohui huohuiya esejaya epeejji cuana huasijje. Miquea esohuijo oya cuana jjashahuabaquinaje. Shajjaꞌajja majje jama acani baꞌa: “Eꞌe, Jesosa yahuajo Eyacuiñajji nijje nequi tiitiia poa. Eyacuiñajjiya oya huoojea canaje” poani —Jesosa poanaje. 
\p  
\v 9 —Ecue Chii, eya minijje mimiani esejaya epeejji jaahuanajji. Ecuea epeejji pojjeamajo, eshahuaja epeejjijo eya mimi ajja. Miyaya esejaya epeejji cuana enijje jjapeequi meesahuanaje. Jamajjeya eya minijje mimiani esejaya epeejji cuanajo, ecuea epeejji miquea epeejji peaꞌai poani jojoya.  
\v 10 Eꞌe, ojjaña joya enijje jjapeequiani miquea epeejji poani peaꞌai. Ojjaña joya minijje jjapeequiani ecuea epeejji poani peaꞌai. Ojjañaa eya bihuia cani jama baꞌa: “Eꞌe, Jesosa Eyacuiñajjija huoojeaꞌyo”.  
\v 11 Ecue Chii, miya quea pame nee nee, quea caꞌa nee nee. Jjeya eya mi que poquijeꞌyo, meshijo enequi majajji pojjeama. Esejaya epeejji cuana ca ca jiquiojo nequije. ¡Oya cuana mimishiꞌama po meesahuacue! ¡Miquea esohui jayojja jama atiitii meecue! Jamajjeya ¡ojjaña ojee jjashahuabaqui meecue quea jaꞌa nee! ¡Eya mi jayojjaya jama ojee jjashahuabaquiani! ¡Jamaya oya cuana ojee jjashahuabaqui meecue!  
\v 12 Onijje nequiya eyaya ojjaña joya miya enijje jjapeequi meesahuanaje jaahuananaje mijo. Jamajjeya Edosiquiana nei oya cuana dasia mee jjima anaje, mi quea caꞌa nee nee poanijojo. Ojjaña eshahua nijje poquiquehua mee jjima anaje peaꞌai. Oe nei enijje jjapee pajeaquiꞌyonaje, poquiquehuanaje. Eꞌe, yahuajo nei esohui huohuijjiya ojo tehue ca poa jama baꞌa: “Oya epeejji nisho po majje quea nee nee poajeꞌyo cuaquijo” ojo tehue ca poa yahuajo nei nei —jamaya Jesosa miminaje Jodasajo. 
\p  
\v 13 —Ecue Chii, jjeya eya mi que poquije oꞌoya. Jiquiojo aniya eyaya ecuea epeejji cuana huohuiaña jama baꞌa: “Ecue Chii que eya poquije oꞌoya”. Ma esohuijo oya cuana quea bihui nee nee poaje. Eꞌe, ¡eya quea bihui nee nee poani jayojja jama capoahua oya cuana!  
\v 14 Eyaya ecuea epeejji miquea esohui huohuiañajo, onaaya shajjaꞌajja canaje. Ecuea epeejji pojjeama cuanaja ecuea epeejji cuana botiꞌama. Eya oya cuanaja botiꞌama peaꞌai, o jayojja po ajjajojo.  
\v 15 Ecue Chii, ecuea emimi minijje ecuea epeejji cuanajo jama baꞌa: ¡Aꞌa jjeya nei oya cuana dojosohuaquijji mi que! Chojja, oya cuana ca ca jiquiojo baꞌyanijo ¡jaahuanacue quea pame nee! ¡Aꞌa Edosiquiana neiya oya cuana dasia meejji!  
\v 16 Eyaya miquea epeejji pojjeama cuanaja ejjashahuabaquijji jayojja jama jjashahuabaqui ajja. Ecuea epeejji cuana e jayojja jama poani, pea cuanaja ejjashahuabaquijji jayojja jama pojjeama peaꞌai.  
\v 17 Jamajjeya miquea esohui eꞌe nei. ¡Esohui jayojja jama poanijo, esejaya epeejji cuana quea jaꞌa nee nee baꞌe meesahuacue, miquea ejjashahuabaquijji jayojjaya!  
\v 18 Ecue Chii, miyaya eya huoojeanaje ojjaña cuana huasijje miquea esohui huohuiya. Jamaya eyaya ecuea epeejji huoojeaña peaꞌai esohui eꞌe nei huohuiya ojjaña huasijje.  
\v 19 Miquea ejjashahuabaquijji ejo jayojja jama aña eyaya, oya cuana ecuea quea jea nee nee poanijo. Eꞌe, jamaya eyaya aña oya cuana miquea ejjashahuabaquijji jayojja jama epo meesahuajji. Jamaya onaaya acajeꞌyo miquea esohui bajji poaniya jjejojo —Jesosa poanaje. 
\s1 Jesosa ojjaña joya ojaya epeejji quijje poajejo miminaje oja Chii nijje 
\p  
\v 20 —Ecue Chii, eya minijje mimiani jiquio epeejji cuanajo —Jesosa poanaje—. Oya cuaa miquea esohui huohui caje pea cuana huasijje. Shajjaꞌajja majje pea cuana esejaya epeejji poajeꞌyo peaꞌai. Ojjañajo eya minijje mimiani, ojjaña jaahuanajji.  
\v 21 ¡Ojjaña ecuea epeejji cuana jjashahuabaqui meecue miquea ejjashahuabaquijji jayojja, ecuea epeejji pojjeamaja ejjashahuabaquijji jama pojjeama! Ecue Chii, eya mi jayojjaya poani. Miya e jayojjaya poani. ¡Esejaya epeejji cuana ese jayojjaya ameecue peaꞌai! Jamajjeya ojjañaa ba caje miya e huoojeajji epo.  
\v 22 Eꞌe, miyaya eya huoojeanaje miyaya jayojja yajji. Jamaya eyaya oya cuana huoojeaña ese jayojja epojji peaꞌai. Jamajjeya oya cuana ese jayojjaya jama ameeaña, ojjaña.  
\v 23 Eꞌe ecue Chii, eya ona nijje jjapeequiani. Miya enijje jjapeequiani peaꞌai. Jamajjeya oya cuana cajjashahuabaquiahua ese jayojja, ojjaña. Jamajjeya esejaya epeejji pojjeama cajjabahuejjaquiahua esejo jama baꞌa: Miyaya eya huoojeaꞌyonaje. Miyaya eya quea jea nee nee aña jayojjaya esejaya epeejji cuana quea jea nee nee aña peaꞌai —Jesosa poanaje. 
\p  
\v 24 —Ecue Chii, yahuajo nei nei, meshi pana jjimahuajo tii, eya miquea quea jea nee nee poa; minijje ojjaña huoojeaꞌyojji poa. Jamajjeya ojjaña ecuea epeejji, ma miyaya enijje jjapeequi meeꞌyonaje ¡enijje baꞌe tiitii meeꞌyocue eyajo! Jomajo oya cuaa ba cajeꞌyo tii tii miyaya eya ojjaña huoojeajji po mee tiitiiaña —Jesosa poanaje. 
\p  
\v 25 —Ecue Chii, miya quea pame nee nee, quea jaꞌa nee nee nequi. Esejaya epeejji pojjeama cuanaja aje oe miya ba jjima. Eyaya ca ca miya baña. Esejaya epeejji cuanaja eba eya mique huoojeaꞌyo.  
\v 26 Eyaya oya cuana miya ba meesahuaꞌyonaje. Jamaya po tiitiijeꞌyo. Jamajjeya miyaya eya quea jea nee nee aña jayojjaya jama pea cuana onaaya quea jea nee nee acaje. Eyaya oya cuana esejaya esohui jayojja jama atiitii meesahuajeꞌyo peaꞌai —Jesosa poanaje oja Chii nijje. Mahuiso ojaya emimi oja C hii ni jje. 
\c 18  
\s1 Pea cuaa Jesosa iña caꞌyonaje 
\r (Mateo 26.47-56; Macoso 14.43-50; Noca 22.47-53) 
\p  
\v 1 Majoya oja Chii nijje mimi majje Jesosa ecuana nijje poquinaje. Etaꞌa namaꞌ Senono bajjani ojje miji yasijje poqui majje onimo acui yiye yasijje poquinaje.  
\v 2 Yahuajo Jesosa ma acui yiye yasijje poqui majamajanaje ecuana nijje. Jamajjeya jiquio acui yiye Jodasaja eba neinei poanaje, ma Jesosa iña meesahuajji epojjija eba neinei poanaje.  
\v 3 Jamajjeya mecajje onimo yiye yasijje Jodasa poeyanaje Jesosa que, sohuinano cuana nijje. Jodio etii cuaa, Paniseo cuaa peaꞌai sohuinano cuana, Eyacuiñajjija equi cuiñajji cuana peaꞌai huoojea canaje Jodasa nijje, Jesosa iñaa. Ojjaña poeyanaje baajji, cuaquijijijji peaꞌai. 
\p  
\v 4 Jesosaja ojjañaja ejjashahuabaquijji cuana ojaya eba poanaje. Jamatii oya cuana que poqui majje huohuiꞌajja canaje jama baꞌa: —¿Ajeo a nequiana ca poeyanaje? ¿Ae saꞌajjaꞌyohua? 
\p  
\v 5 —Jesosa ma Nasanenajo baꞌenaje saꞌajjaña ecuaaya —poanaje cuana. 
\p —Eꞌe, eya jiquio Jesosa bajjani —Jesosa poanaje. 
\p Jodasa aje oe sohuinano cuana nijje nequinaje, Jesosa iña meeya poe.  
\v 6 Jesosaja esohui shajjaꞌajja majje sohuinano cuana, Eyacuiñajjija equi cuiñajji cuana peaꞌai edaasajje tii jaabichaquinaje, oquequinaje meshi yasijje mete majje.  
\v 7 Jamajjeya Jesosaa oya cuana huohuiꞌajja ca oꞌoyanaje: —¿Ae saꞌajjaña? 
\p —Ecuaaya Jesosa saꞌajjaña, ma Nasanenajo baꞌenaje —poanaje. 
\p  
\v 8 —Eꞌe, eya jiquio Jesosa bajjani —Jesosa poanaje—. Miquianaaya eya oe nei saꞌajjañajo, ¡ecuea epeejji enijje nequi capoquiahua! —Jesosa jamaya poanaje ojaya epeejji cuana nahuejji. 
\p  
\v 9 Eꞌe, yahuajo Jesosa oja Chii nijje jama poanaje baꞌa: “Ojjaña joya miya enijje jjapeequi meesahuanaje eyaya jaahuananaje” jamaya poanaje Jesosa oja Chii nijje yahuajo. 
\p  
\v 10 Eyacuiñajji nijje emimijji etiija echacojji Manico bajjani sohuinano nijje nequinaje. Majoya Simohui Penohua baa iña majje Manico shajja jajasejjajea caꞌyonaje; esapa jajapojojeajji nisho acanaje. Eshajja ebianei mijijje jajasejjajea caꞌyonaje, Manicoja. 
\p  
\v 11 —Peno, ¡miquea baa jja oe ejee yasijje nequiaꞌyocue! ¡Ecue Chiija ejjashahuabaquijji ejo jayojja jama capoahua eya, jamatii quea nee nee poaje! —Jesosa poanaje. 
\s1 Jesosa iña majje dojo canaje Anasi que 
\r (Mateo 26.57-58; Macoso 14.53-54; Noca 22.54) 
\p  
\v 12 Majoya esohuinano huoojeajjiya ojaya sohuinano cuana nijjeya, Jodio etii cuanaja huoojeaꞌyo sohuinano cuana nijjeya peaꞌaiya Jesosa iña caꞌyonaje. Me jeyo majje dojo canaje.  
\v 13 Anasija equi yasijje ebionei dojo canaje, ma Caipaja babaja equi yasijje.  
\v 14 Caipa aje oe ma shequiajajo Eyacuiñajji nijje emimijji etii poanaje. Ohuaya yahuajo pishana Jodio etii cuana huohui canaje jama baꞌa: —¡Oe dejja camanoquiꞌyahua ojjaña cuanajo! Jamaya quea pame nee poajeꞌyo esejo —poanaje. 
\s1 Peno siajje poanaje Jesosajo 
\r (Mateo 26.69-70; Macoso 14.66-68; Noca 22.55-57) 
\p  
\v 15 Jesosa dojo canaje cuaa, Peno enijje quea huesha pishana ocuenaje achajja Jesosa onaa acaje baa. Eya jiquio esohui tehuejji Huani bajjani. Eya Anasija eba. Jamajjeya eya dobiqui mee canaje ojaya equi yasijje, ma ojjaña Eyacuiñajji nijje emimijji cuana ojee mimiani yasijje.  
\v 16 Peno ca ca esecuejo nequinaje, dobiqui mee jjima jjejojo. Jamajjeya eya Anasija eba neineijo cuayaqui oꞌoyanaje. Esecue jaahuanajji nijje epona nijje e mimiajo, ohuaya Peno dobiqui mee canaje.  
\v 17 Ma eponaa esecue jaahuanajjiya Peno huohuiꞌajja canaje: —¿Aꞌa miya peaꞌai Jesosa nijje poani, o shajjaꞌajjajji? 
\p —Chojja. Jesosa shajjaꞌajjajji pojjeama ca ca iña —siajje poanaje Peno quea mete jjejojo. 
\p  
\v 18 Quea huoejo echacojji cuana, esohuinano mese cuana peaꞌai cuaqui pejje nei yasijje poeyanaje. Cuaqui pejjejo jjayoqui nequinaje. Jamajjeya Peno jjanequichipiqui majje cuaquijo ejjayoquijji nequinaje ona nijje. 
\s1 Anasiya Jesosa huohuiꞌajja canaje ojaya esohuijo 
\r (Mateo 26.59-66; Macoso 14.55-64; Noca 22.66-71) 
\p  
\v 19 Majoya Anasiya Jesosa huohuiꞌajja canaje ojaya esohuijo, o shajjaꞌajjajji cuana peaꞌaijo. 
\p  
\v 20 Jesosaa sajaꞌa canaje: —Eyaya esohui huohuinaje ojjaña cuana huasijje. Esohui huohuinaje Eyacuiñajjija equijo, equi ojee ejjachichaquijjijo peaꞌai ojjaña Jodio cuanaja eshajjaꞌajjajji. Quehuajje esohui huohui jjima.  
\v 21 Jamajjeya ¿apiojji acuae jja oe miyaya eya huohuiꞌajjaña ecuea ehuohui cuanajo soꞌo? Ojjañaa eya shajjaꞌajja canaje. ¡Jamajjeya oya cuana huohuiꞌajja socue! —Jesosa poanaje. 
\p  
\v 22 Jesosa shajjaꞌajja majje sohuinanohua oya shemo cuiasejjajea canaje emeya. Huohui canaje: —¡Aꞌa jamaya mimijji Eyacuiñajji nijje emimijji etii nijje! —tecuea canaje. 
\p  
\v 23 —¿Aꞌa jjaya eya esohui quea tai aña? ¡Eyaya esohui quea tai añajoya jja ca iña oe huohuicue! Ecuea siajje ajjima cuana. Jamajjeya ¿apiojji acuae iña emeya cuiaña? —Jesosa poanaje. 
\p  
\v 24 Majoya Anasiya Jesosa huoojea canaje Caipaja equi yasijje. Eme jeyo tii, pichojea jjima. Ma Caipa ca ca oe Eyacuiñajji nijje emimijji etii ma shequiajajo poa. 
\s1 Peno siajje po oꞌoyanaje 
\r (Mateo 26.71-75; Macoso 14.69-72; Noca 22.58-62) 
\p  
\v 25 Peno aje oe cuaqui pejjejo tii nequinaje ejjayoquijji. Jamajjeya pea cuaa oya huohui canaje: —Eꞌe, miya eꞌe jojo nei Jesosa shajjaꞌajjajji poani peaꞌai —poanaje. 
\p —Chojja. Eya ojaya epeejji pojjeama —Peno siajje poanaje. 
\p  
\v 26 Jamajjeya Peno nijje nequinaje Eyacuiñajji nijje emimijjija echacojji Manicoja huapa pojjeama, ma Penohua shajja jajasejjajea canajeja huapa pojjeama. Ohuaya Peno jama acanaje baꞌa: —Eyaya miya banaje Jesosa nijje Onimo yiyejo, de —poanaje. 
\p  
\v 27 —Chojja, de, Jesosa ecuea ba jjima —nisho po oꞌoyanaje quea mete jjejojo. Peno mimianijo tii cachina yahue taaanaje. Eꞌe, ma ecua Jesosaa oya huohui canaje jamaya Penohua acanaje. 
\s1 Shomano emeshi mese Pinato bajjani yasijje Jesosa dojo canaje cuaa 
\r (Mateo 27.1-2, 11-14; Macoso 15.1-5; Noca 23.1-5) 
\p  
\v 28 Majoya mecajjeahua nei onaaya Caipaja equijo nequi Jesosa huoojea canaje Shomano emeshi mese Pinato bajjani yasijje. Jomajo Pinatohua ojjaña huoojea cani equi yasijje Jesosa dojodobiaqui canaje sohuinano cuaa. Pinato ca ca Jodio pojjeama, Shomano dejja. Jamajjeya Jodio etii cuana ojaya equi yasijje dobiqui sa po ajja. Eꞌe, Jodioja etiiquianaja etehueꞌyo jama poani baꞌa: “Jodio pojjeamaja equi yasijje dobiquiajo, esohuidojojjiya Jodioja bacua cuana cuia ajja shejo ojee ijjia meemee ajja pea Jodio cuana nijje Eyacuiñajji bihuiajji”.  
\v 29 Jamajjeya Pinato Jesosa ba majje esecue yasijje cuayaquinaje Jodio etii nijje mimiya. Cuayaqui majje huohuiꞌajja canaje Pinatohua: —¿Ajeo shai miquianaaya jiquio dejja tecueaña soꞌo? ¿Yajja acuae oya poanaje? ¡Huohuicue mo! 
\p  
\v 30 —Oya aje oe quea tai pojjeama jojjemo ye jjima pome mi que —Jodio etii cuana Jesosajo siajje poanaje. 
\p  
\v 31 —¡Miquianaaya jja oe oya dojoꞌyocue! ¡Miquea etiiquianaja etehueꞌyo jayojja jama oya acue! —Pinato poanaje. 
\p —Chojja Pinato, Shomano emeshi mese neiya Sesaa ecuana dejja mimishi caca meeꞌyo jjima acani acui ecueataꞌapeejo. ¡Miquea esohuijo oe mano meeꞌyocue! —poanaje Jodio etii cuana. 
\p  
\v 32 Eꞌe, jamaya Jodio etii cuaa acanaje ma ecua Jesosaa huohui canaje jayojjaya yajji. Eꞌe, yahuajo Jesosa jama poanaje baꞌa: “Quijje eya baꞌehuanasohuajea cajeꞌyo cuaa acui ecueataꞌapeejo” poanaje. 
\p  
\v 33 Majoya Pinato equi yasijje dobiqui oꞌoyanaje Jesosa nijje mimiya. Sohuinano huohui canaje: —¡Jesosa e que jjequicue! 
\p Sohuinano cuaa Jesosa jjequi cajo, Pinatohua huohuiꞌajja canaje: —Jesosa, ¿aꞌa miya eꞌe jojo nei Jodioja Emeshi Mese? ¡Huohuicue mo oe! —poanaje. 
\p  
\v 34 —Pinato, ¿aꞌa miya jamatii jjashahuabaquiani eya Emeshi Mese poani? ¿Aꞌa pea cuaa miya ejo jamaya huohui canaje pojjaꞌa? —Jesosa poanaje. 
\p  
\v 35 —Eya ca ca iña Jodio pojjeama. Jamajjeya miya ecuea eba pojjeama, de. Miya Jodio. Jodio etii cuaa, Jodio Eyacuiñajji nijje emimijji etii cuaaya miya iña majje jjequi canaje e que. Jamajjeya ¡huohuicue mo! ¿Ae poanaje miya? ¿Yajjajje acuae minijje quea quene nee nee poani cuana? —Pinatohua huohuiꞌajja canaje. 
\p  
\v 36 Jesosaa oya sajaꞌa canaje jama baꞌa: —Eꞌe, eya Emeshi Mese. Jamatii pea emeshi mese jama pojjeama eya. Jiquio meshi cuanajo dejja cuana huoojeaꞌyojji pojjeama. Eya jiquiojo emeshi mese poani jojjemo ecuea echacojjiya Jodio etii nijje jjaquecuaquime, Jodio etii cuaa e iña mee cajo —Jesosa poanaje. 
\p  
\v 37 —Jamajjeya miya emeshi mese poani, Jesosa. ¿Aꞌa eꞌe? —Pinato poanaje. 
\p —Eꞌe, eya Emeshi Mese poani, miyaya eya eꞌe jojo nei aña —Jesosa poanaje—. Eya eyajo ani meshi yasijje poeyanaje. Cuayanaje ojjaña cuana Eyacuiñajjija esohui eꞌe nei ba meeya. Ojjaña joya esohui eꞌe nei jayojja jama a sa poaniya ecuea esohui shajjaꞌajja cani —Jesosa poanaje. 
\p  
\v 38 —¡Dee! Esohui eꞌe nei chamaꞌ pojjaꞌa —Pinato poanaje. Majoya oya esecue yasijje cuayaqui oꞌoyanaje Jodio etii cuana nijje mimi oꞌoyaa. Jama poanaje baꞌa: —Eyaya Jesosaja esohui shajjaꞌajjanaje. Oya ca ca quea tai pojjeama, mimishiꞌama, de —Pinato poanaje—.  
\v 39 Jamajjeya jjeya miquianaya ojee ijjiaꞌijjiaje esohuidojojjiya yahuajo nei etiiquianaja ebacua cuana cuiaꞌyo jjima acaꞌya poa shejo. Ojjaña shequiaja jiquio shejo eyaya oe Jodio dejja ejeanobiajaa huoojeacuayajeaꞌyaña miquianaya quea bihui nee epojji. Jamajjeya ¿eꞌe pojjaꞌa eyaya Jodio cuanaja Emeshi Mese Jesosa bajjani pichojeaꞌyajo, Jodio cuana quea bihui nee nee poaje? —Pinato poanaje. 
\p  
\v 40 Jodio etii cuaa Pinato sajaꞌa canaje quea tecueya: —¡Chojja! ¡Aꞌa jja oe Jesosa pichojeaꞌyojji! ¡Mashamaꞌ jja oe pichojeaꞌyocue! —janobajjima nei taaanaje Jodio etii cuana. Mashamaꞌ aje oe siipojji quea mas e poan aje. 
\c 19  
\s1 Jesosa manoꞌyo sa poanaje acui ecueataꞌapeejo 
\r (Mateo 27.15-31; Macoso 15.6-20; Noca 23.13-25) 
\p  
\v 1 Jamajoya Pinatohua sohuinano cuana huoojea canaje Jesosa cuiasejjajeaa, jjonohua.  
\v 2 Majoya Jesosa cuiasejjajea majje sohuinano cuaa sapahuahuo nisho acuisha sipi majje oja sapajo iñapeꞌejea canaje. Eꞌe, Jesosa emeshi mese nisho poso acanijo ojo soa neineinaje. Oja daqui huijjiajea mee majje daqui huoꞌo quea ao, emeshi meseja daqui jayojja huosho mee canaje.  
\v 3 Majoya aje oe oya bihuia nisho canaje: —Miya Jodio cuanaja emeshi mese quea pame nee —nisho amajje oya shemo cuiasejjajea canaje emeya. Jamaya ahuichaꞌa huichaꞌa canaje sohuinano cuaa. 
\p  
\v 4 Majoya Pinatohua Jesosa pichojea sa acanaje; esecue yasijje cuayaqui oꞌoyanaje Jodio etii cuana nijje mimiya. Jama poanaje baꞌa: —¡Bacue! Jesosa nijje mimi majje eyaya baña oya mimishiꞌama nei nei. Eyaya oya ejeanobia meejji pojjeama. Jamajjeya jjeya eyaya miquianaya ba meeaña oya Jesosa mimishiꞌama nei nei —Pinato poanaje. 
\p Jamajjeya Jesosa esecue yasijje cuayanaje.  
\v 5 Ojjañaa oya ba canaje sapahuahuo nisho acuisha eꞌiñapeꞌejea, daqui huoꞌo quea ao ehuosho baꞌe peaꞌai. 
\p —Jiquio aje ca Jesosa baꞌa. ¿Apiojji onijje quea quene nee nee poani? —Pinato poanaje. 
\p  
\v 6 Jamatii Jesosa ba majje Jodio sohuinano cuana, joya Eyacuiñajji nijje mimiani cuana peaꞌai taaanaje jama baꞌa: —¡Oya acui ecueataꞌapeejo baꞌehuanasohuajeacue! Eꞌe, ¡acui ecueataꞌapeejo baꞌehuanasohuajeacue ca coma! —ojjaña janobajjima nei taaanaje. 
\p —¡Miquiaaya jja oe oya dojoꞌyo majje acui ecueataꞌapeejo baꞌehuanasohuajeacue! Eyaya ca ca oya baña mimishiꞌama nei nei —Pinato poanaje. 
\p  
\v 7 Jodio etii cuaa Pinato sajaꞌa canaje jama baꞌa: —Jesosa jama poanaje baꞌa: “Eya Eyacuiñajjija Bacua Ejja”. ¡Jamajjeya oya cacuiajeaꞌyahua! Jamaya ecuanaja etiiquianaja etehueꞌyo poani —jamaya poanaje jiquio Jodio etii cuaa; Jesosa Eyacuiñajjija Bacua Ejja pojjeama poso acanaje. 
\p  
\v 8 Jamajjeya “Jesosa Eyacuiñajjija Bacua Ejja” Jodio etii cuaa acajo, shajjaꞌajja majje Pinato quea mete nee nee poanaje.  
\v 9 Equi yasijje dobiqui oꞌoya majje Jesosa huohuiꞌajja ca oꞌoyanaje Pinatohua jama baꞌa: —Jesosa, ¿achejo ani acuae miya poeyanaje soꞌo? —poanaje. 
\p Jamatii oya Jesosaa sajaꞌa jjima acanaje. Mimi jjima.  
\v 10 Jesosaja oya sajaꞌa jjimajojo Shomano emeshi mese Pinatohua oya huohui canaje: —¡Dee! Miya enijje mimi ajja. ¡Bacue! Ecuea esohuijo pea cuaa miya pichojea caje pojjaꞌa; ecuea esohuijo pea cuaa miya acui ecueataꞌapeejo me cacajea caje pojjaꞌa. ¿Aꞌa miquea ba jjima eya Jodio huoojeaꞌyojji poani jiquiojo? —Pinato poanaje. 
\p  
\v 11 Majoya Jesosa onijje miminaje jama baꞌa: —Eyacuiñajjiya miya ejo huohui mee cani. Miyaya miyaye nei jamatii ejo huohui mee ajja. Jamajjeya joya e iña meejji epo cuana quea mimishi nee nee poani. Miya o jayojja quea mimishi nee nee pojjeama —Jesosa poanaje. 
\p  
\v 12 Jamajjeya Pinatohua Jesosa pichojea sa neinei acanaje. Jamatii jiquio Jodio etii cuana taaa majamajanaje. Janobajjima nei poanaje: —¡Aꞌa oya pichojeaꞌyojji! Oya miya pichojeaꞌyojo aje oe miya Shomano huoojeaꞌyojji nei Sesa bajjanija epeejji pojjeama poaje, de. Ojjaña joya emeshi mese nei po sa poani ca ca Sesa jeacuayajeajji epo, de —poanaje. 
\p  
\v 13 Majoya Jodio cuanaja esohui shajjaꞌajja majje Jesosa Pinatohua dojo capoquinaje ma ohua ona huoojea cani yasijje. Jomajo anioquenaje yohua bajjanijo baꞌa: Mei Eꞌiya nequijo, Jodioja esohuijo ca ca Jabata bajjanijo.  
\v 14 Jomajo ojjaña Jodio cuana cojja nei anioque majje Jodio etii cuaa huohui canaje: —¡Bacue oe Jesosa, miquianajaya Emeshi Mese! —Pinato poanaje. 
\p Ojjaña jiquio Jodio etii cuana taaa neineinaje.  
\v 15 Jama poanaje baꞌa: —Chojja, de. ¡Oya quecuaꞌyocue! ¡Acui ecueataꞌapeejo baꞌehuanasohuajeacue! 
\p —¿Aꞌa eya miquianajaya Emeshi Mese nei me caca meeaña acui ecueataꞌapeejo emanoꞌyojji? —Pinatohua acanaje. 
\p —Ecuanaja emeshi mese yani, oya Shomano emeshi mese Sesa bajjani. Pea chamaꞌ —taaame acanaje Eyacuiñajji nijje emimijji etii cuaa. 
\p  
\v 16 Jamajjeya aje oe Jodio cuaa a sa acani jayojja jama Pinatohua amee canaje. Jesosa dojo mee canaje me caca meeya acui ecueataꞌapeejo ebaꞌehuanasohuajeajji. Jamaya poanaje epojja ejomishocajjijo eshequi biacojjajja nequijo, Jodio cuaa bobi chicha cani pojjajo, yahuajo nei esohuidojojjiya Jodio etiiquianaja bacua cuana cuiaꞌyo jjima aca poa shejo. Eꞌe, Jodio cuaa Jesosa manocuaji meeꞌyo sa acanaje emojeaꞌyojji ojee ijjiaꞌijjia jjimahuajo. 
\s1 Jesosa acui ecueataꞌapeejo baꞌehuanasohuajea canaje cuaa 
\r (Mateo 27.32-44; Macoso 15.21-32; Noca 23.26-43) 
\p  
\v 17 Jamajjeya Pinatohua Jesosa Jodio etii cuana huasijje quia caꞌyonaje. Sohuinanohua Jesosa iña majje acui ecueataꞌapee quea biquie nee bao mee majje dojo mee canaje. Dojo mee canaje eyiyo sisi yasijje, Sapa Jjii anijji bajjani meshi yasijje, Jodioja esohuijo ca ca Jonijota eyiyo huasijje.  
\v 18 Sapa Jjii bajjani eyiyo huasijje jaasohuaqui majje majo tii acui ecueataꞌapeejo Jesosa me cacajea canaje sohuianano cuaa. Me caca majje baꞌehuanasohuajea canaje. Beca dejja mimishi pea acui ecueataꞌapee cuanajo me jeyo canaje peaꞌai. Baꞌehuanasohuajea canaje Jesosa pejjejo, oe shanijje, pea ebianeijje. Jesosa ca ca eyiyesamaneijje baꞌehuanasohuajea canaje. 
\p  
\v 19 Pinatohua acuijo esohui tehue mee canaje Jesosajo. Etehueꞌyo acui ecueataꞌapeejo Jesosa baꞌe sapa biacua caca mee canaje. Etehueꞌyo jama baꞌa: \sc OYA JESOSA NASANENAJO BAꞌE JODIOJA EMESHI MESE NEI\sc* 
\p  
\v 20 Jonijota ma Sapa Jjii eyiyo bajjani Jenosanena pejjejo nequi. Hueshaꞌama. Jamajjeya Jodio cuaa quea huisohua Pinatoja etehueꞌyo ba canaje. Ma etehueꞌyo Jodioja esohuijo tehue mee canaje, Shomano dejjaja esohuijo peaꞌai, Jienoja esohuijo peaꞌai tehue mee canaje, Pinatohua.  
\v 21 Jamajjeya Jodioja Eyacuiñajji nijje emimijji etii cuana Pinatoja etehueꞌyo Jesosajo ba majje Pinato que poqui oꞌoyanaje. Huohui cañaquinaje jama baꞌa: —¿Apiojji acuae miyaya tehue meenaje Jesosajo maya? Chojja, aꞌa jama tehuejji baꞌa: “Jesosa Jodio cuanaja Emeshi Mese nei”. Jama tehueme acue baꞌa: “Oya aje ca jja oe jama pojeaꞌajja nequinaje baꞌa: —Eya Jodio cuanaja Emeshi Mese —poso poanaje”. Oya Jesosa ecuanaja Emeshi Mese nei pojjeama, de —Jodio etii cuana poanaje. 
\p  
\v 22 —Chojja. Jamatii. Apoa ecuea etehue meeꞌyo —Pinatohua oya cuana acanaje. 
\p  
\v 23 Majoya Jesosa baꞌehuanasohuajeyoꞌyo majje ebeca pee peaꞌai sohuinano cuaa oja daqui cuana chicha caꞌyonaje. Iyachichaꞌyo majje peaa jjesheꞌyo, peaa jjesheꞌyo acanaje cuaa.  
\v 24 Majoya oja daqui nei esipi bame iña canaje. Esipi aojo, esoco pojjeamajo jama poanaje baꞌa: —¡Aꞌa isajeajji! —poanaje. 
\p Jamajjeya sohuinano cuaa quebanei po majje daqui nei majjo caꞌyonaje ojaya pojji epoꞌyojji. Eꞌe, joya ecua Eyacuiñajjija esohui huohuijjiya yahuajo nei nei tehue ca poa jayojja jama acanaje sohuinano cuaa. Ma etehueꞌyo jama poa baꞌa: 
\q1 “Ecuea daqui iña caje. Ojjañaa jjeshe caje pea jayojjaa. Ecuea daqui ao iña majje, quebanei po majje daqui majjo cajeꞌyo ojaya epoꞌyojji”. 
\m Yahuajo nei nei tehue ca poa. Jamaya Jesosaja daqui acanaje, sohuinano cuaa. 
\p  
\v 25 Jesosa acui ecueataꞌapeejo baꞌe pejjejo nequinaje ojaya enaese Mania oja shehue nijje, Queopaja ehuanase Mania bajjani nijje, pea Mania Madanena cuiñajjijo baꞌe nijje peaꞌai.  
\v 26 Jamajjeya Jesosaa enaese ba canaje enijje nequi. Eya aje oe Huani bajjani, Jesosaja quea jea nee nee. Jamajjeya Jesosa ojaya enaese nijje jama poanaje baꞌa: —Ecue nae, Huani miquea ebacua ejja jayojja poajeꞌyo, mi jaahuanajji. 
\p  
\v 27 Majoya eya acanaje: —Huani, ecue nae miquea enaese poaje. ¡Oya jaahuanacue! —Jesosaa acanaje. 
\p Jamajjeya eyaya Jesosaja enaese Mania ecuea equi yasijje dojoꞌyonaje enijje ebaꞌeꞌyojji. 
\s1 Jesosa manoꞌyonaje 
\r (Mateo 27.45-56; Macoso 15.33-42; Noca 23.44-49) 
\p  
\v 28 Jesosaja eba poanaje ojaya ojjaña oja Chiija esohui jayojja ajeyo canaje. Apoa poanaje. Jamajjeya Eyacuiñajjija esohui yahuajo nei nei jayojja jama poanijo Jesosa taaanaje jama baꞌa: —Eya quea naba taja nee nee. 
\p  
\v 29 Jomajo oe meshimisijo nequinaje acuijjajja na sese. Jamajjeya shajashaja iyanobia canaje ena ejjequi yasijje. Majoya bequiobo sajo quecuahuosho majje Jesosaja enaba huasijje huo canaje ojaya eꞌishijji.  
\v 30 Jjequibibi majje ishi canaje, Jesosaa. Ishi majje jama poanaje baꞌa: —Apoa. Ojjaña Eyacuiñajjija ehuohuiꞌyo jayojja jama eyaya ajeyoꞌyonaje —poanaje. Jama mimime po majje Jesosa manoꞌyonaje, poquijeyoꞌyonaje. 
\s1 Jesosa mape quecua canaje sohuinano cuaa 
\p  
\v 31 Majoya Jodio etii cuana Pinato que poqui oꞌoyanaje. Ba majje jama poanaje baꞌa: —Emeshi mese Pinato, ¡dejja cuana ebaꞌehuanasohua baꞌeja equise saꞌ cuiasajajea meecue! Jamajjeya mano cuajije. Manoꞌyajo ¡jjequioquea meecue meshi yasijje emojeajji! —Jodio etii cuana poanaje. 
\p Jamaya jjashahuabaquime poanaje baꞌa: —Mecahuajje epojja ejomishocajji, ojee eꞌijjiaꞌijjiajji quea bihui nee peaꞌai. Jamajjeya ¡oya cuana jjeya nei camano mee cahua! ¡Aꞌa mecahuajje baꞌe meejji acui ecueataꞌapeejo! —jjashahuabaquinaje Jodio etii cuana. 
\p  
\v 32 Jamajjeya Pinatohua sohuinano cuana huoojea canaje. Poe majje sohuinano cuaa dejja mimishi cuana quise saꞌ cuiasajajea canaje, ma Jesosa pejjejo acui ecueataꞌapee cuanajo baꞌe.  
\v 33 Majoya Jesosa ba canaje emanoꞌyo. Jamajjeya oya quise saꞌ cuiasajajea jjima acanaje.  
\v 34 Jamatii oe sohuinanohua Jesosa emapejje quecua canaje emeje aohua. Quecua cajje ena huoꞌo, ena oshe tejjee peaꞌai cuayaquinaje.  
\v 35 Eyaya, Huani bajjaniya, banaje ecuea ecojjaa. Jamaya poanaje baꞌa: Sohuinano cuaa Jesosa baꞌehuanasohuajea majje oya emanoꞌyo baꞌe quecua canaje peaꞌai. Oya quise saꞌ cuiasaja jjima acanaje. Jjeya eyaya jamaya tehueaña. Jamajjeya ojjaña cuana ba meeje ecuea ehuohui Jesosajo eꞌe jojo nei. Eya siajjepojji pojjeama.  
\v 36 Eꞌe, Eyacuiñajjija esohui etehueꞌyo yahuajo nei Jesosajo jama poanaje baꞌa: “Ojaya esaꞌ cuana pea cuanaja ecuiasajaꞌyojji pojjeama”. Ma ecua Eyacuiñajjiya esohui tehue mee caꞌya poa jamaya Jesosa acanaje cuaa. 
\p  
\v 37 Pea Jodio etiiquianaja etehueꞌyo yahuajo nei jama poa baꞌa: “Oya quecua cajo, ojjaña cuaa oya ba cajeꞌyo ecojjaa”. Jamaya tehue caꞌya poa yahuajo nei nei Jesosajo. 
\s1 Jesosa mei jjani ai yasijje huananobia canaje 
\r (Mateo 27.57-61; Macoso 15.42-47; Noca 23.50-56) 
\p  
\v 38 Majoya Jesosa manoꞌyo majje ojaya epeejji Jose bajjani poeyanaje, pea Jose, Amatea meshijo baꞌe. Oya Jodio cuanajo quea metejo quehuajje jjapeequiꞌyonaje Jesosa nijje yahuajo. Poe majje Jose Pinato huasijje poquinaje. Pinato ba majje huohuiꞌajja canaje Joseya: —Emeshi mese Pinato, Jesosa manoꞌyonaje. ¡Eyaya oya jjani yasijje cadojoꞌyahua ehuananobiaꞌyojji! —poanaje. 
\p —Eꞌe, ¡dojocue! Eyaya sohuinano cuana jamaya huohuime aje —huoojea canaje Pinatohua. 
\p Jamajoya Jesosaja epeejji cuaa oya emanoꞌyo acui ecueataꞌapeejo baꞌe jjequioqueaꞌyo majje dojo canaje jjani yasijje huananobiaa.  
\v 39 Nicodemo, ma yahuajo Jesosa nijje miminaje mecajje, Jose nijje poquinaje Jesosa dojohua. Nicodemohua shiyeshiye pohuipohui, acui shiye sajja pohui quea shiye quea nahue peaꞌai dojo canaje Jesosa shicuijji. Quea huiso nee nee dojo canaje 50 quinome.  
\v 40 Jamajjeya Jesosa dojo majje shiyeshiye pohuipohuiya shicui canaje. Majoya daqui oshe eyacua neijo bebo canaje. Eꞌe, jamaya Jodio cuaa acani emanoꞌyo cuana ehuananobiajji mei jjani yasijje.  
\v 41 Jamajjeya Jesosa eyiyo Sapa Jjii bajjanijo acui ecueataꞌapeejo ebaꞌehuanasohua baꞌe jjequioqueaꞌyo majje shiyeshiyeya shicui canaje. Shicui majje dojo canaje que quea chipi nee yasijje, mei jjani jjeya nei teo huasijje.  
\v 42 Ma mei jjani quea chipi nee poanijo, ojaya epeejji cuaa Jesosa jomajo huananobia caꞌyonaje sinecua nei. Jodio cuanaja epojja ejomishocajji poanijo Jesosa huananobia cuaji canaje. Mei copo quea quemohua esecue jjani jaja caꞌajeanaꞌyo majje p oquiꞌy onaje. 
\c 20  
\s1 Jesosa shequi oꞌoyanaje 
\r (Mateo 28.1-10; Macoso 16.1-8; Noca 24.1-12) 
\p  
\v 1 Majoya mecajjeahua nei nei jjajaꞌaꞌajjaqui jjimahuajo ebionei jjapojjaquiajo, nomico pojjajo Mania, pea Mania Madanenajo baꞌe poquinaje mei jjani yasijje. Ba cañaquinaje mei copo quea quemo jjani capajjiꞌya ejeacajjajjajea.  
\v 2 Ba majje Mania cuajicuajipoquinaje Simohui Peno huohuiya, e huohuiya peaꞌai. Eꞌe, eya Jesosaja epeejji, ojaya quea jea nee nee. Jamajjeya poe majje Maniaa huohui cañaquinaje jama baꞌa: —Jesosa dojo canaje cuaa. Jesosa aje oe mei jjanijo chamaꞌ nei nei. ¿Achacua shai dojo canaje cuaa? Ecuea ba jjima —poanaje Mania, jjashahuabaqui jjima. 
\p  
\v 3 Jamajjeya Peno enijje poquicuajinaje mei jjani yasijje.  
\v 4 Ecuana ojee cuajicuajinaje. Eyaya cuajicuaji neinei majje ebionei mei jjani bañaquinaje. Peno ca ca quijje pishana poeyanaje.  
\v 5 Poe majje, eya jjacueanohuequi majje yeꞌeꞌajjanaje. Daqui oshe banaje eꞌiyacocaꞌyo ani.  
\v 6 Majoya Simohui Peno e quiquishijji poeyanaje. Oya mei jjani ai yasijje dobiquinaje. Daqui oshe ba canaje meijo eꞌiyacocaꞌyo ani.  
\v 7 Pea daqui oshe Jesosa sapa bebojjiꞌya o sapa jaanajejo tii eꞌiyacocaꞌyo ani ba canaje peaꞌai.  
\v 8 Eꞌe, eya ebionei mei jjani yasijje poeyanaje. Jamatii Peno dobiquiyajo, eya dobiquinaje peaꞌai. Banaje eꞌe jojo nei Jesosa chamaꞌ. Daqui eꞌiyacocaꞌyo ani ba majje eya jjashahuabaquinaje jama baꞌa: —¡Eꞌe de! Eꞌe jojo nei Jesosa emanoꞌyo tii jaa shequiꞌyonaje. Ma ecua yahuajo ohuaya huohui canaje jamaya oya poꞌyonaje. 
\p  
\v 9 Eyacuiñajjija esohui etehueꞌyo Jesosajo jama poa baꞌa: “Quito manoꞌyo majje shequijeꞌyo”. Jamatii yahuajo ma etehueꞌyo ecuanaja quea quehua poanaje. 
\p  
\v 10 Majoya jjani aijo Jesosa chamaꞌ ba majje eya Peno nijje equi yasijje poqui oꞌoyanaje. 
\s1 Mania Madanenaa Jesosa ba ca oꞌoyanaje 
\r (Mateo 28.9-10; Macoso 16.9-11) 
\p  
\v 11 Eꞌe, eya, Huani, Peno nijje equi yasijje poqui oꞌoyanaje. Jamatii Mania equi yasijje poquiꞌyo jjima. Mei jjani pejjejo pa aninaje. Oya peaꞌai jjacueanohuequinaje eyeꞌeꞌajjajji.  
\v 12 Ba canaje beca esohuidojojji. Ojaya daqui quea oshe nee nee, bo oshe nee nee jayojja poanaje. Shequi oꞌoya jjimahuajo Jesosa mei jjani dojjojo jaanaje pea mei biajje. Jjeya ca ca beca esohuidojojji cuana anioquenaje Jesosa jaanaje mei biajje. Jesosa sapa jaanajejo oe esohuidojojji aninaje. O jiojji jaanajejo pea aninaje.  
\v 13 Esohuidojojji cuaa Mania jama acanaje baꞌa: —Epona, ¿yajjajje acuae mi pani soꞌo? 
\p —Ecuea Emeshi Mese Jesosa dojocuayaqui canaje cuaa. ¿Achacua shai dojo canaje? Ecuea ba jjima —Mania poanaje. 
\p  
\v 14 Jamaya mimi majje Maniaa Jesosa bajea canaje. Jamatii oya Jesosa eque mese poso acanaje, Jesosa pojjeama poso acanaje. 
\p  
\v 15 Jamajjeya Jesosaa oya jama acanaje baꞌa: —Epona, ¿apiojji acuae mi pani? ¿Aꞌya cuae miyaya saꞌajjaña soꞌo? —Jesosa poanaje. 
\p —¿Aꞌa miya eque mese? ¿Aꞌa miyaya oya dojonaje pojjaꞌa? ¡Che mo oe huohuicue achacua oya dojonaje! Eyaya oya dojojeꞌyo shiyeshiye shicuiya —Mania poanaje. 
\p  
\v 16 —¡Mania! —Jesosa poanaje. 
\p Jesosa mimije shajjaꞌajja majje Maniaa oya ba canaje Jesosa. Jamajjeya Maniaa oya jama acanaje baꞌa: —¡Ecuea esohui huohuijji miya! —poanaje Mania, Jodioja esohuijo—. ¡Raboni! —poanaje. 
\p  
\v 17 —Mania, ¡aꞌa eya iña neineijji! ¡Eya capoquiahua ecue Chii ani yasijje! ¡Jjeya poquicue; ecuea epeejji cuana huohuiquicue miyaya! Jama oe acue baꞌa: “Jesosa jama poanaje baꞌa: —Jjeya eya poquijeꞌyo ecue Chii eyajo ani yasijje, mique Chii eyajo ani yasijje peaꞌai. Eꞌe, eya poquijeꞌyo Eyacuiñajji ani yasijje. Oya Eyacuiñajji miquianajaya Chii peaꞌai” jamaya aquicue ecuea epeejji cuana —Jesosa poanaje. 
\p  
\v 18 Majoya Mania Madanena poquinaje Jesosaja epeejji cuana ani yasijje. Ecuana nijje jama poanaje baꞌa: —¡Shajjaꞌajjacue oe! Eyaya Jesosa baꞌyonaje; eꞌe jojo nei eshe ca coma. 
\p Jamaya huohui majje Mania Madanenaa ma Jesosaa huohui canajeya ecuana huohui canaje. 
\s1 Jesosa ojaya epeejji cuana huasijje poeꞌyonaje 
\r (Mateo 28.16-20; Macoso 16.14-18; Noca 24.36-49) 
\p  
\v 19 Quijje nomico pojjajo sinecuajo ecuana Jesosaja epeejji ojee aninaje equijo. Jodio yajjajo esecue ecaꞌa nequinaje. Jamatii Jesosa equijo ecuana nijje jjajaꞌaquiꞌyonaje. Ecuana nijje miminaje jama baꞌa: —¡Quea bei nee pocue miquianaya! —poanaje. 
\p  
\v 20 Majoya Jesosaa ecuana ba mee canaje onaja quecuahuejjajea oja eme jjoto, ojaya emape onaja quecua peaꞌai ba mee canaje. Jesosa ba majje ecuana quea bihui nee nee poanaje.  
\v 21 Jesosaa ecuana huohui ca oꞌoyanaje jama baꞌa: —¡Quea bei nee nee pocue! Yahuajo ecue Chiiya eya huoojea canaje ojaya echacojji. Jamaya jjeya eyaya miquianaya huoojeaña ecuea esohui huohuiya —Jesosa poanaje. 
\p  
\v 22 Majoya Jesosaa ecuana huasijje sipojea majje huohui canaje jama baꞌa: —¡Edojjoshahua Pame miquiana huasijje cadobiquiahua!  
\v 23 Eꞌe, ¡miquianaya ecuea esohui huohuijji pocue! Jamajjeya ojjaña joya oja mimishi pajea sa poani miquianaaya huohuicue ejo jama baꞌa: “Eꞌe, Eyacuiñajjiya miquea mimishi cuijea caꞌyonaje”. Mimishi pajea sa po ajjajo ca ca huohuicue jama baꞌa: “Eyacuiñajjiya miquea mimishi ecuijeaꞌyojji pojjeama” —Jesosa poanaje. 
\s1 Jesosa Tomasi nijje miminaje 
\p  
\v 24 Jesosa ecuana nijje, o shajjaꞌajjajji cuana nijje jjajaꞌaquiꞌyonajejo, Tomasi, Beca Jaa bajjani chamaꞌ poanaje.  
\v 25 Jamajjeya ecuaaya Tomasi huohui majamajanaje jama baꞌa: —Eꞌe jojo nei ecuaaya Jesosa baꞌyonaje. ¡Eshe ca coma! —ecuanaa anaje. 
\p Jamatii Tomasiya sajaꞌa canaje jama baꞌa: —Eꞌe pojjaꞌa. Chojja, de. Equecuahuejja ojaya eme jjoto huejja cuana ba majje, napaꞌajja majje, ojaya emapejje esiꞌ napaꞌajja majje peaꞌai ecuea eba poaje Jesosa eꞌe jojo nei eshe —poanaje Tomasi; Jesosa shequiꞌyo ajja poso acanaje. 
\p  
\v 26 Quijje me oejje pea beca cahuime, 7 po majje ecuana ma equijo ojee ani oꞌoyanaje Tomasi nijje peaꞌai. Esecue ecaꞌa nequinaje peaꞌai. Jamatii Jesosa ecuana nijje jjajaꞌaqui oꞌoyanaje. Ecuana nijje mimi oꞌoyanaje jama baꞌa: —¡Quea bei nee nee pocue! —poanaje. 
\p  
\v 27 Majoya ohuaya Tomasi huohui canaje: —Tomasi, ¡ecuea eme bacue! ¡Eme jjoto equecuahuejja napaꞌajjacue eme sisiya! ¡Emapejje esiꞌ peaꞌai napaꞌajjacue! ¡Bacue eya eshequiꞌyo eꞌe jojo nei! ¡Aꞌa eya edojjoshahua poso ajji! —Jesosa poanaje. 
\p  
\v 28 —Jesosa, miya ecuea Emeshi Mese nei, Eyacuiñajji —Tomasiya oya bihuia canaje. 
\p  
\v 29 —Tomasi, miya e ba majje jjabahuejjaquinaje eya eꞌe jojo nei eshequiꞌyo. Pea cuanaja ba jjima ecuea eme jjoto huejja, emape siꞌ peaꞌai. Jamatii oya cuana jjabahuejjaquije ejo, eya eshequiꞌyo. Jamajjeya ¡oya cuana eꞌe jojo nei quea bihui nee capoahua! —Jesosa poanaje. 
\s1 ¡Huanija etehueꞌyojo jjabahuejjaquicue! 
\p  
\v 30 Jesosaa quea huiso pea ma dejjaa ajjima acani acanaje. Maya ecuanaa, o shajjaꞌajjajji cuaa banaje. Jamatii eyaya, Huani bajjaniya maya tehue jjima jiquio etehueꞌyojo.  
\v 31 Jiquio ecuea etehueꞌyo eyaya tehuenaje miquiana jjabahuejjaquijji. Jamajjeya jiquio etehueꞌyo ba majje miquianaya jjabahuejjaquije Jesosa eꞌe jojo nei Eyacuiñajjija huoojeaꞌyo ojjaña jaahuanajji. Oya Eyacuiñajjija Bacua Ejja nei. Eꞌe, miquianaya majoya eꞌe jojo nei jjabahuejjaquiajo, Jesosaa miquianaya baꞌe tiitii mee cajeꞌyo onijj e eyajo. 
\c 21  
\s1 Jesosa ba ca oꞌoyanaje ojaya epeejji cuaa me oejje beca huisomeya 
\p  
\v 1 Quijje ecuana Janinea bae yasijje poqui oꞌoyanaje. Jomajo Jesosa ecuana nijje, ojaya epeejji cuana nijje jjajaꞌaqui oꞌoyanaje. Jama poanaje baꞌa:  
\v 2 Simohui Peno, Tomasi Beca Jaa bajjani nijje, Natanaeni ma Canajo, Janinea meshijo baꞌe nijje, ecuanaya Semeneoja bacua ejja eya, ecue oꞌi Jacobo nijje, pea beca dejja nijje peaꞌai bae sahuajo aninaje. Mahuisoya ecuana ojee aninaje.  
\v 3 Peno ecuana nijje jama poanaje baꞌa: —Eya ca iña poquijeꞌyo nahuoo cuiashajaa. 
\p —Eꞌe, ecuana minijje poquijeꞌyo —sajaꞌame anaje ecuaa. 
\p Jamajjeya ecuana poquiꞌyonaje bae sahuajje. Bishe ai yasijje aninaje. Mecajje ecuanaa nahuoo cuiashajaꞌajja nequinaje tii tii. Jamatii mecajjeahua jjajaꞌaqui jjimahuajo nahuoo cuiashaja jjima; chamaꞌ poanaje.  
\v 4 Mecajjeahua nei Jesosa bae sahuajo nequinaje. Jamatii ecuanaja bishejo nequija oya ba jjima poanaje Jesosa.  
\v 5 Jesosa ecuana huasijje taaanaje jama baꞌa: —Epeejji cuana, ¿aꞌa nahuoo cuiashajanaje miquianaaya? —huohuiꞌajja acanaje. 
\p —¡Chojja, chamaꞌ! —sajaꞌame ecuaa anaje. 
\p  
\v 6 —¡Eshajajji jeacue ena huasijje pea mijijje, bishe ebianei mijijje! Jomajo ani nahuoo cuana —Jesosa poanaje. 
\p Jamajjeya ecuaaya eshajajji ebianei mijijje jea majje quea huiso nahuoo cuiashajanaje. Quea biquie nee neejo nahuoo cuana jjequisohua jjima anaje bishe yasijje.  
\v 7 Jamajjeya eya Peno nijje jama poanaje baꞌa: —Peno, maya Jesosa nequi, eꞌe nei —eya poanaje. 
\p E shajjaꞌajja majje Simohui Penohua oja daqui huosho caꞌyonaje. (Eꞌe, chacochacoanijo oja daqui ao huijjiajea canaje.) Daqui ao huoshoꞌyo majje tohuaanaje ena huasijje Jesosa que besapoquiya.  
\v 8 Eyaya ca ca pea cuana nijje bishe yonaje meshijaji sahua huasijje. Nahuoo dojobesanaje eshajajjijo, enajo baꞌe. Meshijaji hueshaꞌama, iye huesha nei, beshahua nei quea huesha 100 metros huesha nei.  
\v 9 Baꞌeñaqui majje ecuanaa banaje Jesosaja nahuoo jiñaqui cuaquijo. Pahui yani equemijji peaꞌai.  
\v 10 Majoya Jesosa ecuana nijje jama poanaje baꞌa: —¡Nahuoo cuana miquianaja cuiashajaꞌyo jja oe jjequicue edahuajji! 
\p  
\v 11 Jamajjeya Simohui Peno bishe yasijje ani oꞌoya majje nahuoo cuiashajajji meshijaji yasijje jjequisohua sahua canaje. Majoya pejo majje nahuoo banaje quea huiso nee nee, 153 huisome. Ojjaña quea quemo nee, de. Quea biquie nee. Jamatii eshajajji quecuasejjajea jjima poanaje. 
\p  
\v 12 Majoya Jesosaa ecuana jama acanaje baꞌa: —Eꞌe, ¡poecue! ¡Nahuoo ijjiahuacue! —poanaje. 
\p —¡Ocuae! ¡Caꞌijjiahua! —ecuana poanaje. Ecuanaja eba oya Jesosa. Jamajjeya oya huohuiꞌajja jjima jama baꞌa: —¿Ae bajjani acuae mi soꞌo? —ajjima ecuanajaya. 
\p  
\v 13 Majoya Jesosaa pahui cuaqui pejjejo ani jjeshe majje ecuana quia caꞌyonaje eꞌijjiajji, nahuoo peaꞌai. 
\p  
\v 14 Eꞌe, Jesosa manoꞌyo majje shequi oꞌoyanaje. Oya ecuana huasijje poeꞌyonaje. Jjeya pea beca peejjima jjajaꞌaquiꞌyome poꞌyonaje. 
\s1 Jesosa miminaje Peno nijje 
\p  
\v 15 Majoya ecuana ijjiaꞌijjia majje Jesosa miminaje Peno nijje. Jama poanaje baꞌa: —Peno, Huanija bacua ejja, ¿aꞌa miyaya eya quea jea nee nee aña? ¿Aꞌa jiquio pea cuanaja eya quea jea pishana, miquea eya quea jea nee nee? —Jesosaa oya huohuiꞌajja canaje. 
\p —Eꞌe Emeshi Mese, eyaya miya quea jea nee nee aña. Jamaya miquea eba —Peno poanaje. 
\p —Jamajjeya ¡ecuea epeejji enijje jjeya nei jjapeequiani huasijje ecuea esohui huohuicue! Oya cuana ñajjajjaja ebacua cuana jayojja jama; jamatii ani poquiquehua chanaꞌ. 
\p  
\v 16 Majoya Jesosaa oya huohuiꞌajja ca oꞌoyanaje jama baꞌa: —Simohui, Huanija bacua ejja, ¿aꞌa miyaya eya quea jea nee nee aña? —poanaje. 
\p —Eꞌe, Emeshi Mese, eyaya miya quea jea nee nee aña. Jamaya miquea eba —Peno po oꞌoyanaje. 
\p —Jamajjeya ¡ecuea epeejji enijje jjeya nei jjapeequiani jaahuanacue! Oya cuana ñajjajjaja ebacua jayojja jama; caꞌaꞌama —Jesosa poanaje. 
\p  
\v 17 Jesosaa pea beca peejjima huohuiꞌajjame acanaje Peno jama baꞌa: —Simohui, Huanija bacua ejja, ¿aꞌa miyaya eya quea jea nee nee aña? —po majamajanaje. 
\p Peno quea yeno poanaje Jesosaja pea beca peejjima huohuiꞌajjame acajje. Jamajjeya Penohua Jesosa sajaꞌa canaje jama baꞌa: —Emeshi Mese, miquea eba ojjaña. Jamajjeya miquea eba eyaya miya quea jea nee nee aña —Peno poanaje. 
\p —¡Ecuea epeejji jjeya nei enijje jjapeequiani jaahuanacue! —Jesosaa oya aca oꞌoyanaje—.  
\v 18 Peno, eꞌe jojo nei eyaya miya huohuiaña jama poaje baꞌa: Miya eshoꞌyahuajo miquea daqui huosho majje cua mi poqui sa poani yasijje miya poquinaje. Quijje ca ca miya tiiꞌyajo, me jeyo majje dojo caje cuaa. Ojaya ejjashahuabaquiꞌyojji jayojja jama miya acajeꞌyo cuaa —jamaya Jesosa poanaje. 
\p  
\v 19 Ojaya ehuohuijo Peno ba mee canaje quijje nei oya manojeꞌyo eme jeyo. Cuanaya quijje nei Peno manoꞌyajo, ojjaña ba mee cajeꞌyo Eyacuiñajji quea pame nee nee quea caꞌa nee nee poani tii tii. Majoya Jesosaa Peno huohui canaje jama baꞌa: —Peno, ¡enijje jjapee neineiquicue! —Jesosa poanaje. 
\p  
\v 20 Majoya Penohua bajea canaje. Eya, Huani ba canaje o quiquishi poeyani. Yahuajo eya Jesosa pejjejo ijjiaꞌijjianaje, eya ojaya quea jea nee neejo. Ijjiaꞌijjianijo eyaya Jesosa huohuiꞌajjanaje jama baꞌa: “Jesosa, ¿aꞌya cuae mi iña meesahuajji epojji?” eyaya anaje.  
\v 21 Penohua e ba majje Jesosa huohuiꞌajja canaje: —¿Jesosa, yajja acuae Huani acaje cuaa soꞌo? —poanaje Peno. 
\p  
\v 22 Jesosaa Peno sajaꞌa canaje jama baꞌa: —Peno, ¿apiojji shai miyaya Huanijo huohuiꞌajjaña soꞌo? Eꞌe pojjaꞌa eyaya Huani ecuea epoe oꞌoyajjijo baꞌe mee sa aña. Jamatii. ¡Miya jja oe enijje jjapee neineiquicue! —Jesosa poanaje. 
\p  
\v 23 Jesosaja esohui shajjaꞌajja majje ojjaña Jesosaja epeejji cuana huasijje huohuiqui canaje cuaa jama baꞌa: —Huani ca pa jjaja ca oe manoꞌyo ajja poaje, de —poso acanaje cuaa. 
\p Jamatii Jesosaja huohui jjima jama baꞌa: “Huani emanoꞌyojji pojjeama”. Chojja. Ohuaya jama huohui canaje ejo baꞌa: “Peno, ¿apiojji acuae miyaya Huanijo huohuiꞌajjaña soꞌo? Eꞌe pojjaꞌa eyaya Huani baꞌe mee sa aña ecuea epoe oꞌoyajjijo, jamatii. ¡Aꞌa peajo jjashahuaba majaquijji! ¡Enijje oe jjapee neineiquicue, miya!” poanaje Jesosa Peno nijje. 
\p  
\v 24 Eya aje oe Huani bajjani Jesosa shajjaꞌajjajji poani. Ojjaña ecuea etehueꞌyo Jesosajo eꞌe jojo nei. Eyaya aje jja oe banaje ojjaña Jesosaa acaninaje cuana. Jamajjeya miquianajaya eba ecuea esohui Jesosajo eꞌe jojo nei.  
\v 25 Jesosaa pea ma dejjaa ajjima acani quea huiso nee nee acaninaje cuana. Ojjaña ohuaya acaninaje cuana etehue poquia jojjemo quea huiso nee nee pome. Chamaꞌ pome papeni etehueꞌyo huanajji ojjaña meshijo, ca ojjaña Jesosaja esohui etehue poquia jojjemo. 
\p Mahuiso ecuea esohui etehueꞌyo. Eyaya Huani bajjaniya esohui tehuejeyonaje. Apoa.