\id JAS - Ese Ejja NT -Bolivia 2012 (DBL -2013) \h SANTIACO \toc1 Satiacoja Esohui Etehueꞌyo \toc2 Santiaco \toc3 Stg \mt2 SATIACOJA ESOHUI ETEHUEꞌYO \mt1 SANTIAGO \c 1 \s1 Satiacohua esohui quea bihui nee tehue canaje Jesosaja epeejji cuana huasijje \p \v 1 Epeejji cuana, eyaya jiquio esohui quea bihui nee tehueaña miquianajaya ebajji, ma ojjaña Jesosaja epeejji cuana ojjaña meshijo baꞌeja ebajji. Eya Satiaco bajjani. Eyacuiñajjiya, esejaya Emeshi Mese nei Jesosa Quitohua peaꞌaiya eya huoojea canaje ojaya esohui huohuiya. Jamajjeya eyaya quea bihui nee chacoaña onijje. \s1 Eyacuiñajjiya Jesosaja epeejji cuana jjabahuejja meequi cani \p \v 2 Ecuea epeejji cuana, ¡shajjaꞌajjacue mo! Miquianajaya ebaꞌejji quea camaja poanijo, jamatii ¡aꞌa quea yeno pojji! Chojja, quea bihui nee pocue jama baꞌa: —Eꞌe, Eyacuiñajjiya quea pame nee acani. Ohuaya eya jjashahuabaqui mee cani. \p \v 3 Eꞌe, miquianajaya eba jama baꞌa: Ebaꞌejji quea camaja poanijo Eyacuiñajjiya eseya jjashahuabaqui mee cani Jesosa Quito nijje quea pame nee ejjapeequijji. Jamajjeya miquianaya yenoꞌama Jesosa nijje jjapee tiitiiquijeꞌyo quea jaꞌa nee nee. \v 4 ¡Jesosaja epeejji quea jaꞌa nee po tiitiicue! ¡Eꞌe jojo nei pocue! Jamajjeya Jesosajo jjashahuaba tiitiiquianijo Eyacuiñajjiya miquianaya quea jaꞌa nee baꞌe mee caje mimishiꞌama, apoa epo jayojja peaꞌai. \p \v 5 Eꞌe pojjaꞌa miquianajaya ba jjima Eyacuiñajjijo ebaꞌejji. Jamajjeya ¡Eyacuiñajji nijje mimicue ojaya ejjashahuabaquiꞌyojji ebajji! Ojaya miya etecueajji pojjeama. Miya quea jjashahuabaqui jaꞌa po mee caje, o jayojjaya. Joya ecua miyaya huohuiꞌajjaña jama sajaꞌameya aje mi acajeꞌyo quea bihui nee nee ojjaña cuana ojaya quea jea nee neejo. \v 6 Jamatii Eyacuiñajji nijje mimianijo ¡jjashahuabaquicue quea pame nee! Jama baꞌa: —Jiquio ecua eya onijje mimiani jamaya acajeꞌyo eꞌe jojo nei Eyacuiñajjiya. \p Aꞌa jjashahuaba taiquijji jama baꞌa: —Eꞌe pojjaꞌa jiquio ecua eya onijje miminaje jamaya Eyacuiñajjija eꞌajji pojjeama. \p ¡Bacue! Joya quea jjashahuabaqui tai poani enashajo poani jama. Jiquio ecua beniya enashajo dojo cani oe miji yasijje, quijje pea miji yasijje dojo ca oꞌoyani jamaya oya cuana Jesosajo quea jaꞌa jjashahuabaqui jjima. Peapea jjashahuabaquime oya cuana poani. \v 7 Jamaya jjashahuabaquianijo quea tai; Eyacuiñajjiya oya cuana shajjaꞌajja jjima jayojja jama acaje. Jamajjeya jamaya jjashahuabaquianijo ¡aꞌa jama pojji baꞌa: —Eyacuiñajjiya ma e onijje miminaje shajjaꞌajja cani. Eya baꞌe meesahua caje peaꞌai —aꞌa jamaya eꞌa caje poso jjabaquijji! Eyacuiñajjija eshajjaꞌajjajji pojjeama miya. \v 8 Eꞌe, Jesosajo quea quehua jjashahuabaqui majje quea pame ebaꞌejji pojjeama tii tii. \s1 Aemaꞌ cuana joya ecua quea aquiana huiso jama \p \v 9 Jesosaja epeejji aemaꞌ cuana, dejja etii pojjeama peaꞌai quea bihui nee capoahua Eyacuiñajjiya oja mimishi cuana cuijea caꞌyonajejo. Oya ba cani epeejji quea aquiana huiso jayojja, oya jayojjaya ba cani. \v 10 Jesosaja epeejji quea aquiana huiso quea bihui nee capoahua peaꞌai, jamatii ojaya aquiana cuana chamaꞌ poajo. Joya quea aquiana huiso shasha jama. Nequi tiitii ajja. Chamaꞌyo tii poajeꞌyo. \v 11 Eꞌe, jiquio ecua eshequi jaasohuajo quea quiyo nee nee poajo sipone jocaꞌyani, yaaꞌyo majje ojaya shasha jjahuaꞌamaqui yani, majoya aje huojojojeani jama jayojjaya joya aquiana huisohuiso cuana poani. Aquiana cuana chicha majamaja cani tii oya cuana manojeꞌyo, chamaꞌyo tii poajeꞌyo. Jamajjeya ojjaña Jesosaja epeejji cuana quea bihui nee capoahua Eyacuiñajjiya oya ba cani pea cuana jayojjaya. Eꞌe, aemaꞌ cuana Eyacuiñajjiya ba cani pea cuana jayojjaya, joya quea aquiana huiso nee jayojjaya. Joya quea aquiana huiso ca ca ohuaya ba cani aemaꞌ jayojjaya. \s1 Ebaꞌejji quea camaja \p \v 12 Jesosaja epeejji quea pame nee eshahuaa iyaa cajje jjashajjaꞌajjaqui ajja poaje; quea mimishi po sa poꞌyo ajja poaje. Ohuaya Eyacuiñajjija esohui jayojja jama atiitii cani. Jamajjeya ¡oya cuana quea bihui nee nee capoahua! Eꞌe, Eyacuiñajjiya huohui ca poa jama baꞌa: —Eya ojaya quea jea nee nee poanijo, ecuea epeejji cuana ecuea esohui pajeaꞌyo ajjajo eyaya oya cuana baꞌe tiitii meejeꞌyo enijje eyajo. \p \v 13 Mimishi amajje, quea tai jjashahuabaqui majje peaꞌai beca cuana siajje poani jama baꞌa: —Eyacuiñajjiya eya quea mimishi po mee cani —jama ohua acani posoya jjabaquiani. \p Chojja, de. Ma miyame tii ca mi ca quea mimishi. Eyacuiñajjiya ca ca mimishi aꞌajja nei nei. Jamajjeya ohuaya eseya quea mimishi epo meejji pojjeama nei nei. \v 14 Ojjaña aje oe quea mimishi po sa poanijo quea mimishi poani ojaya ejjashahuabaquiꞌyojjijo. Joya ecua oya jjashahuabaquiani jama quea mimishi po meeya poani. \v 15 Jamajjeya quea mimishi jjashahuabaqui majje mimishi acajeꞌyo. Mimishi amajje manojeꞌyo. Majoya Eyacuiñajjiya mimishi cuana quea nee nee po mee cajeꞌyo tii tii quea mimishi poanaje jojoya. \p \v 16 Ecuea epeejji cuana, ¡shajjaꞌajjacue mo oe! ¡Aꞌa quea quehua jjashahuabaquijji Eyacuiñajjijo! Ohuaya ca ca oe eseya quea jaꞌa nee po meesahua cani. \v 17 Ohuaya, eseja Chii aiya yahuajo nei nei ojjaña aquiana eyajo nequi pana ca poa: eshequi, baꞌi, majameta cuana peaꞌai pana ca poa. Oya cuana quijje quea misi poajeꞌyo. Eyacuiñajji ca ca oe, chojja. Jiquio ecua oya jjeya nei nequi jama tii tiiya nequi tiitii poquije. Ohuaya eseya quea pame nee nee acani. Jamajjeya ohuaya eseya ojjaña aquiana pame quia cani eꞌe jojo nei. \v 18 Eꞌe, Eyacuiñajjiya ojjaña eseya babaca canaje ojaya epeejji nei epojji. Ohuaya esohui eꞌe nei huoojea canaje esejaya ebajji. Jamajjeya eseya Jesosa nijje jjapeequi meesahua cani. Eseya ca ca ojaya quea boti nee nee poani; pea aquiana cuana oja pana ojaya iye botiboti poani. \s1 ¡Eyacuiñajjija esohui shajjaꞌajjacue eꞌe jojo nei! \p \v 19 Ecuea epeejji cuana, ¡shajjaꞌajjacue mo oe! ¡Ojjaña pojjajo Eyacuiñajjija esohuijo jjashajjaꞌajjaquicue! ¡Mimi jjimahuajo quea jaꞌa nee jjashahuabaquicue peaꞌai! ¡Aꞌa quea quene pojji; pea cuana nijje aꞌa quenequene cuajijji! \v 20 Quea quene poanijo Eyacuiñajjija ejjashahuabaquijji quea jaꞌa nee jayojja jama yajji pojjeama. \v 21 Jamajjeya ¡aꞌa quea quene pojji! ¡Ojjaña ejjashahuabaquijji quea tai epojji, quea mimishi pajeaꞌyocue! ¡Aꞌa pea cuana jama baꞌejji! Eyacuiñajjiya eseya ojaya esohui ba meesahua cani. ¡Ojaya esohui shajjaꞌajjacue; jamaya baꞌecue quea bihui nee! Jamajjeya ohuaya eseya baꞌe tiitii mee cajeꞌyo onijje eyajo. \v 22 Eyacuiñajjija esohui shajjaꞌajja majje jamaya po ajjajo miquianaya quea tai jjashahuabaquiani, quea quehua poani. ¡Eyacuiñajjija esohui shajjaꞌajja majje ca oe shajjaꞌajja tiitiicueya! \p \v 23 Eꞌe, beca cuana Eyacuiñajjija esohui shajjaꞌajja majje jamatii jjashajjaꞌajjaqui ajja poani. Jiquio ecua se ecojjabajjijo jjacojjabaquiani jama poani: \v 24 Eseya ecojja ba majje poquiani. Quijje pishana seya ecojja pajeacuaji yaña: —¿Achajja shai ecuea ecojja poanaje? —se poani. \p Eꞌe, ecojja ba majje pajeacuaji yaña jama jayojjaya beca cuana poani. Eyacuiñajjija esohui quea pame nee shajjaꞌajja cani. Jamatii shajjaꞌajja majje pajeacuaji caꞌyani. Esohui jayojja jama baꞌe ajja. \v 25 Pea cuana ca ca esohui shajjaꞌajja majje jjashahuaba neineiquiani. Pajeapajeaꞌyo ajja poani. Jamajjeya ojjaña pojjajo esohui ba neinei cani; pajeapajeaꞌyo ajjajo ma esohui jayojja jama po tiitiiani. Eyacuiñajjiya oya cuana mimishi pajea meesahua caꞌyani. Quea jaꞌa nee nee baꞌe meesahua cani, quea bihui nee po mee cani peaꞌai joya ojaya esohui jayojja jama baꞌyanijo. \v 26 Beca cuana aje oe jjashahuabaquiani jama baꞌa: —Eya Jesosa Quitoja epeejji poani —jama posoya jjabaquiani. Jamatii quea mimishi, quea mimijjequijea mimi tiitiianijo oya cuana Jesosa Quitoja epeejji pojjeama. Chojja, epeejji nisho poani. \p \v 27 Eyacuiñajji esejaya Chii ai jama poanaje baꞌa: —¡Ecuea epeejji eꞌe nei cuaa eꞌe jojo nei enijje jjapeequianiya quea pame nee caꞌa cahua! Jama baꞌa: ¡Eshoꞌi echii manoꞌyo catii mee cahua quea pame nee! ¡Epona eꞌahuemano quea yeno poani cabaꞌe meesahua cahua quea pame nee peaꞌai! ¡Eshahuaja epeejji quea mimishi jayojja jama aꞌa pojji! —acanaje eseja Chii aiya. \c 2 \s1 ¡Ojjaña cuana quea boti nee acue! \p \v 1 Ecuea epeejji cuana, ¡shajjaꞌajjacue mo oe! Esejaya Emeshi Mese nei Jesosa Quito quea pame nee nee poani, quea caꞌa nee nee poani peaꞌai. Miquianaya onijje jjapeequianijo, jamaya pocue baꞌa: ¡Ojjaña Jesosaja epeejji cuana pea jayojjaya acue! Jamajjeya ¡quea pame jjashahuabaquicue ojjañajo, aquianajjijo, aquianamaꞌ cuanajo peaꞌai! \v 2 Jama baꞌa: Eꞌe pojjaꞌa Jesosaja epeejji aquianajji Eyacuiñajjija equi yasijje dobiquiani. Ojaya emeꞌ bajji mei huoꞌo quea nahue, ojaya daqui quea nahue ehuosho baꞌe peaꞌai miquianaaya baña. Majoya pea epeejji aemaꞌ, daqui chiijji Eyacuiñajjija equi yasijje dobiquiani. \v 3 Miquianaya quea mimishi jjashahuabaquiani. Jamajjeya joya quea aquiana huiso nee quea boti aña jama baꞌa: —Maꞌaje, jiquio eꞌanioquejji quea pame nee. ¡Jiquiojo anioquecue! —aña. \p Aemaꞌ nijje ca ca miquianaya jama poani baꞌa: —¡Comajo tii ca miña nequicue! ¡Quea huesha anioquecue pojjaꞌa! —jamaya miquiaa ajje aemaꞌ cuana quea bicho poani. Jamaya quea tai. \p \v 4 Miquianaya peaja aquianajo jjashahuabaquiani; jjaniñebaquiani jama baꞌa: —Joya quea aquiana huiso quea pame poani. Aemaꞌ ca ca quea tai, cajaa —jamaya miquianaya quea tai jjashahuabaquiani. \p \v 5 Ecuea epeejji cuana, ¡shajjaꞌajjacue mo oe! Eyacuiñajjiya Jesosaja epeejji cuana aemaꞌ cuana babaca canaje Jesosaja epeejji nei cuana epojji. Ohuaya huohui canaje jama baꞌa: —Ojjaña joya ecuea esohui jayojja jama acani enijje nequi meeje eya ojjaña huoojeajji poaje —jamaya Eyacuiñajjiya huohui ca poa ojjaña joya Jesosa quea boti nee ajji poani. \p \v 6 Jamatii miquiaaya aje oe aemaꞌ cuana quea bicho po meeaña. ¿Ache dejja cuaa shai sohuinano huoojea cani mi dojohua emeshi meseja etecueajji? ¿Aꞌa aemaꞌ cuaa? Chojja. Bejjojjiya ca mi ca miquianaya napa mee cani. \v 7 Ohuaya Jesosa Quito niñeba cani peaꞌai. Eꞌe, oya Jesosa Quito quea pame nee nee Eyacuiñajjiya huoojea canaje ese jaahuanaa. Jamatii mimishi cuaa oya niñeba cani. \p \v 8 ¡Miquianaaya Eyacuiñajjija esohui jayojja jama acue! Yahuajo ohuaya huohui ca poa jama baꞌa: —Miya quea bihui nee baꞌe sa poani. Jamajjeya ¡pea cuana quea bihui nee baꞌe meesahuacue quea pame nee peaꞌai! Jamajjeya ¡ojjaña cuana quea boti nee acue! \p Jamaya eꞌe jojo nei añajo miquianaya quea pame nee poani. \v 9 Jamatii miquianaaya aje oe dejja quea aquiana huiso nee cuana quea jea aña. Aemaꞌ cuana ca ca quea bicho po meeaña. Jamaya quea mimishi, Eyacuiñajjija esohui jayojja jama pojjeama. Jamajjeya ohuaya miquianaya tecuea cajeꞌyo ojaya esohui jayojja mi añajo, ma etiiquiana Moisesiya tehue ca poa jayojja jama miya mi ajo. \v 10 Moisesija etehueꞌyo quea huiso nee poa. Ojaya esohui etehueꞌyo oe nei ajjimajo miya shajjamaꞌ poani, ojjaña ojaya esohui etehueꞌyo ajjima amajje. \v 11 Eꞌe, Eyacuiñajjiya Moisesi tehue mee ca poa jama baꞌa: “¡Aꞌa pea cojjojji pojji!” Ohuaya tehue mee ca poa jama peaꞌai baꞌa: “¡Aꞌa pea quecuaꞌyojji!” Jamajjeya joya pea quecuaꞌyojji poani quea tai nee nee poani, jamatii pea cojjojji pojjeama poani. Eyacuiñajjija esohui etehueꞌyo pajea caꞌyani. \p \v 12 Jamatii Jesosaja esohui jayojja jama añajo ca ca eseya mimishiꞌama poani. Ma esohui jayojja jama añajo Eyacuiñajjiya eseya etecueajji pojjeama. Jamajjeya ¡Jesosaja esohui jayojja jama atiitiicue quea pame nee! \v 13 Quijje Eyacuiñajjiya ojjaña cuana sosequia cajeꞌyo ma ecua oya jiquio meshijo baꞌenaje jama sosequiaꞌyomeya acajeꞌyo. Ojjaña joya pea cuana nijje quea bei poanaje Eyacuiñajji onijje quea bei poaje peaꞌai. Joya pea cuana nijje quea bei pojjeama poanaje ca ca Eyacuiñajjiya tecuea cajeꞌyo. Jamatii Eyacuiñajji quea mase pojjeama. Ohuaya ojjaña mimishi cuana pajea meeꞌyo sa acani, quea nee nee ese po mee sa poꞌyo ajja. \s1 ¡Jesosaja epeejji cuana quea pame cabaꞌe caꞌyahua! \p \v 14 Ecuea epeejji cuana, ¡shajjaꞌajjacue mo oe! Beca cuana jama poani baꞌa: —Eya quea pame nee nee, eya Jesosaja esohui jayojja jama poani —poso jjabaquiani. \p Jamatii oya cuana Jesosaja epeejji pojjeama jayojja jama baꞌyani, quea pame pojjeama. Jamajjeya ¿aꞌa Eyacuiñajjiya ojaya mimishi cuijea cajeꞌyo? ¿Aꞌa onijje baꞌe tiitii mee cajeꞌyo eyajo? Chojja de, ¡quea pame caꞌa cahua peaꞌai! Quea pame pojjeama baꞌyanijo ca se ca oe emimijeajji eseya mimijeani jama baꞌa: —Eya Jesosaja epeejji poani. \p \v 15 Jamajjeya jama jjashahuabaquime pocue baꞌa: Yani pojjaꞌa Jesosaja epeejji cuana beshahua nei daquimaꞌ, quea shoe peaꞌai pojjaꞌa. \v 16 Joya aemaꞌ cuana pojjaꞌa miquianaaya huohuiaña jama baꞌa: —¡Quea bihui nee pocue! ¡Huoeꞌama, quea jejje pocue! —jamaya pojjaꞌa miquianaaya oya aña. Jamatii quea dejja taiya jjejojo miyaya bobi, daqui peaꞌai mi quiaña. Jamaya po ajjajo ehuohuijeajji miquianaaya aemaꞌ huohuiaña jama baꞌa: —¡Quea bihui, quea jejje pocue; huoeꞌama pocue peaꞌai! \p \v 17 Oya jayojjaya beca cuana poani: —Eya Jesosaja epeejji poani. \p Jamatii Jesosaja esohui jayojja jama mi acanijo oya Jesosaja epeejji nei pojjeama. \p \v 18 Onaya jjamimicuiajea nobiajeaquiani jama baꞌa: —Eya Jesosaja epeejji. Eyacuiñajjija esohui ecuea eba. \p Pea ca ca jama poani baꞌa: —Eyaya Eyacuiñajjija esohui jayojja jama atiitiiaña. \p Eyaya ca ca huohuiaña jama baꞌa: —Eyacuiñajjija esohui jayojja jama aꞌajjajo eyaya miquianaya baña Jesosaja epeejji pojjeama. Quea pame nee nee Eyacuiñajjija esohui jayojja jama añajo ca ca ojjañaja eba eseya Jesosaja epeejji nei poani —jamaya eyaya aña. \p \v 19 Miquianajaya eba Eyacuiñajji oe nei yani tii tii. Jamaya quea pame nee, eꞌe jojo nei poani. Jamaya eshahua cuanaja eba peaꞌai, ma Eyacuiñajji oe nei yani tii tii. Jamajjeya oya cuana quea mete tii tii poani, Eyacuiñajjiya oya cuana quea nee nee po mee cajeꞌyo. \p \v 20 Miquianaya jjashahuabaquiani quea quehua jama baꞌa: —Eya Jesosaja epeejji poani. \p Jamatii Jesosaja esohui quea pame jayojja jama aꞌajja. Jamaya quea tai baꞌyanijo miya Jesosaja epeejji pojjeama. Jamajjeya miquianajaya ejjashahuabaquijji eyaya jiquio esohui tehueaña esejaya etiiquiana Amajamajo. \v 21 Yahuajo nei nei esejaya etiiquiana Amajamaa Eyacuiñajjija esohui jayojja jama aca poa. Jamajjeya Eyacuiñajjiya oja mimishi cuana cuijea caꞌya poa. Eꞌe, Amajamaa ojaya esohui aꞌa shajjaꞌajja caje ebajji Eyacuiñajjiya oya huohui ca poa jama baꞌa: “Amajama, ¡miquea ebacua mei eꞌiya biajje jeyo majje yacuajeacue, eya quiacue!” Amajamaa Eyacuiñajji shajjaꞌajja ca poa. Oja bacua ejja oe nei mei biajje jeyo majje Eyacuiñajji yasijje quia ca poa. Beshahua nei yacua caꞌya poa. Jamaya ojaya esohui ma ecua Eyacuiñajjiya huohui canaje jayojjaya Amajamaa aca poajo, Eyacuiñajjiya oya jama aca poa baꞌa: “Amajama, miyaya ecuea esohui shajjaꞌajjañajo ecuea eba miya ecuea epeejji nei. Eyaya miquea mimishi cuana cuijeajeꞌyo”. Jamaya Eyacuiñajjiya aca poa. \p \v 22 ¿Aꞌa miquianaya jjashahuabaquinaje Amajama Eyacuiñajjija epeejji eꞌe jojo nei? Eꞌe. Ohuaya huohui ca poa jama baꞌa: —Eya Eyacuiñajjija epeejji —aca poa. \p Majoya ohuaya Eyacuiñajji shajjaꞌajja ca poa; Eyacuiñajjija esohui jayojja jama aca poa. Jamajjeya oya eꞌe jojo nei Eyacuiñajjija epeejji quea pame nee nee poa. \v 23 Jamajjeya Eyacuiñajjija esohui yahuajo nei jama poa baꞌa: —Amajamaa huohui ca poa jama baꞌa: “Eya Eyacuiñajjija epeejji” aca poa Amajamaa. Majoya ohuaya Eyacuiñajjija esohui jayojja jama aca poa peaꞌai. Jamajjeya Eyacuiñajji Amajama nijje jama poa baꞌa: “Miya ecuea epeejji eꞌe jojo nei. Jamajjeya eyaya miquea mimishi cuana cuijeajeꞌyo” —jamaya Eyacuiñajji poanaje. \p \v 24 Jamajjeya eseya Eyacuiñajji nijje mimianijo, ojaya esohui jama añajo peaꞌai, Eyacuiñajjiya esejaya mimishi cuana cuijea caꞌyani. Jamaya eyaya miquianaya ba mee yaña. \p \v 25 Oya jayojjaya yahuajo nei nei Shajami poa, Amajama jayojjaya poa. Eꞌe, yahuajo nei nei oe epona Shajami yaña poa. Shajami Jodio pojjeama poa. Oya quea mimishi pea cojjojji nei nei poa. Jamatii ohuaya Eyacuiñajjija epeejji quea pame nee aca poa. Nahue ca poa sohuinano cuaa equecuacaꞌyo poanijje. Jamajjeya Eyacuiñajjiya oja mimishi cuana cuijea caꞌya poa. Eꞌe, Shajamiya Eyacuiñajjija epeejji becanejjijji peaꞌai quehuajje bobia ca poa, Jodio cuanaja esohui huohuijji cuana. Majoya oya cuana quehuajje poqui meesahua ca poa pea ejiojjijje, onaa equecua ca poaje jjejojoya. Eꞌe, Shajamija ejjashahuabaquijji Eyacuiñajjijo quea pame nee poa. \p \v 26 Jamajjeya esejaya eba jama baꞌa: Esejaya edojjoshahua poquiꞌyo majje esejaya eyami ihuijeꞌyo, cajaa. Oya jayojjaya ojjaña joya Eyacuiñajjija esohui shajjaꞌajja majje jjashajjaꞌajjaqui ajja poani maya Jesosaja epeejji pojjeama, cajaa peaꞌai. Ehuohuijeajjiya huohui cani jama baꞌa: —Eya Jesosaja epeejji poani. \c 3 \p \v 1 Ecuea epeejji cuana, ¡shajjaꞌajjacue mo oe! Eseya quea mimishi poajo, Eyacuiñajjiya tecuea cajeꞌyo. Jamaya miquea eba. Eyacuiñajjija esohui huohuijji cuana quea mimishi poajo ca ca Eyacuiñajjiya oya cuana tecuea neinei cañajeꞌyo janobajjima nei. Jamajjeya oe ¡aꞌa eseya quea huiso Eyacuiñajjija esohui huohuijji po sa pojji! \s1 Beca cuanaja chamaꞌ esohui jjochijji \p \v 2 Ojjaña pojjajo eseya quea mimishi pishana poani. Joya esohui quea mimishi mimi ajja tii tii, mimijjequijjequiꞌyo ajja poani ca ca ojaya ejjashahuabaquijji quea jaꞌa nee poani tii. Jamajjeya oya quea pame tii baꞌyani. \v 3 Eseyaya baacui sisi mapichija enaba huasijje huananobiaña ehui jjequijea poquiajji. Majoya eseyaya mapichi poqui meeaña cua ese poqui sa poaje yasijje. Jamatii baacui enabajo che biso nei baꞌyani. \p \v 4 Oya jayojjaya bishe quea quemo quea cuejipashi nei poquiani. Jamatii ebishe meseya bishe quiijo aniya bishe dojo cani cua o poqui sa poaje yasijje, quii caꞌa cani, jamatii equiicaꞌajji biso neiya. \p \v 5 Jiquio ecua bishe quiicaꞌajjiya bishe ai huijea cani jama jamatii che biso neiya jayojja jama esejaya enaba quea biso, jamatii beca cuana quea huiso esohui quea tecue mimiani. Quea miminaa poani bichoꞌama. \p ¡Jjashahuabaquicue cuaquijo peaꞌai! Cuaqui cojjasha sisiya quijjoꞌyo jjimaa ebio quea jabo dahuajea cani, ebio quea quemo. \v 6 Ma jayojjaya beca cuanaja eꞌana quea mimishi mimimimianijo yana cuaqui jayojja jama poani. Jamajjeya jiquio ecua cuaquiya ebio dahua tehuejea cani, acui cuana quea tehue po mee cani jama jayojjaya esohui quea mimishi mimianijo ejjashahuabaquijji quea tai po mee cani. Eꞌe, eshoꞌiquiana quea tai mimiani; tii majje quea tai mimiani peaꞌai, quea mimishi. Eꞌe, eshahua cuaa eseya quea tai nee nee mimi mee cani. Jamajjeya Eyacuiñajjiya ojjaña joya quea mimishi mimiani quea nee nee po mee cajeꞌyo. \v 7 ¡Bacue! Eseyaya ojjaña ijjiacajji cuanaja ebacua huoniaña. Ijjiacajji mase cuanaja bacua cuana, cuichojjija bacua cuana huoniaña; shaneija bacua cuanaya huoniaña, nahuoo jai besijji cuana peaꞌai. Jjabahuonequi meeaña. \v 8 Jamatii esejaya esohui quea tai, quea tecue ca ca quea mimipanajea epojji chamaꞌ esohui jjochijji, ca pea nijje emimijaji pajeaꞌyojji. Jiquio ecua peyoja ese na jama quea nee nee poani jama esohui quea taijoya pea epeejji cuana quea yeno nee nee po mee cani. \v 9 Eseyaya aje oe Eyacuiñajji, esejaya Chii ai bihuiaña esejaya enabaa. Jamatii majoya eseya pea cuana nijje mimijajiani, ma Eyacuiñajjiya pana ca poa o jayojja epojji nijjeya eseya mimijajiani. Jamaya quea tai. \v 10 Eꞌe, esohui quea bei, quea pame mimi majje quijje pishana esohui quea tecue nee nee, quea mimishi nee mimiani peaꞌai. Ecuea epeejji cuana, ¡aꞌa oe jamaya pojji! \v 11 ¡Jjashahuabaquicue! Ena teohuejja cajje ena ihuiꞌama cuayani, seseꞌama. Ena sese ena quea pame tejjee teohuejja cajje cuaya ajja. Jiquio ecua ena quea pame cuaya majje ena sese cuaya ajja jayojja jama pojjeama esejaya enaba. Esohui quea pame mimi majje esohui quea mimishi mimiani, ena sese jama cuayani esohui. \v 12 Epeejji cuana, miquea eba jememe acuijo chamaꞌ esiye. Jememejo tii ajja esiye. Jjono cuanajo tii ajja acuijjajja, shihuijjajja peaꞌai. Oya jayojja meshi eteohuejjajje ena quea pame cuayani; ena sese cuaya ajja. Jamajjeya esohui quea pame mimi majje ¿apiojji acuae nequiana esohui quea mimishi mimiani, pea cuana niñebaña peaꞌai? Jamaya se quea pame pojjeama nee nee. \s1 Eyacuiñajjiya eseya quea jaꞌa jjashahuabaqui mee cani \p \v 13 ¿Aꞌa miquianaya quea jaꞌa jjashahuabaquiani? ¿Aꞌa jjabahuejjaquinaje quea pame nee ebaꞌejji? Jamajjeya ¡quea pame nee atiitiicue! ¡Tecueꞌama pocue! Quea pame nee añajo pea cuaa ba caje miquianajaya ejjashahuabaquijji quea pame nee poani. \v 14 Pea cuanajo quea quene nee nee jjashahuabaquianijo, quea nishehui, quea dejja tai nee nee poanijo peaꞌai ¡quea yeno pocue miquianaja mimishijo! ¡Aꞌa siajje pojji Eyacuiñajji nijje jama baꞌa: —Eya quea pame nee baꞌyani —aꞌa jama siajje pomeya pojji! Chojja. \p \v 15 Ojjaña joya quea tecue nee nee, quea nishehui peaꞌai poani Eyacuiñajjija Edojjoshahua Pame jayojja jama jjashahuabaqui ajja. Chojja. Oya cuana eshahuaja ejjashahuabaquijji jayojja jama poani quea mimijjequijea, quea mimishi. Mimishi cuana Eyacuiñajjija esohui jayojja jama po ajja tii tii, Eyacuiñajjija epeejji pojjeama. \v 16 Quea tecue po tiitiianijo, quea nahue po tiitiianijo peaꞌai ojjaña peapea mimishi cuana acani tii tii peaꞌai. Quea jaꞌa baꞌe ajja. \v 17 Eyacuiñajjija ejjashahuabaquijji quea pame nee nee. Ojaya ejjashahuabaquijji jayojja jama jjashahuabaquianijo eseya mimishiꞌama poaje: Queneꞌama. Nishehuiꞌama, dejja taiꞌama. Shajjamaꞌ pojjeama. Quea bei poaje. Quea pame nee poajeꞌyo tii tii peaꞌai. ¡Aꞌa oe nei dejja quea jea ajji; ojjaña cuana oe quea jea acue! ¡Jesosaja epeejji eꞌe jojo nei pocue peaꞌai, epeejji nisho pojjeama! \v 18 Jamajjeya ¡quea bei nee baꞌecue! ¡Pea cuana quea bei baꞌe meesahuacue peaꞌai! Eꞌe, eseye nei quea bei poanijo, quea pame nee poanijo peaꞌai, pea cuana quea pame nee poaje ese jayojjaya. \c 4 \s1 ¡Jesosaja epeejji pojjeama jayojja jama aꞌa baꞌejji! \p \v 1 ¿Apiojji acuae quiana esohui quea tai nee nee mimiani soꞌo Jesosaja pea epeejji cuana nijje? ¿Apiojji acuae quiana jjamimicuiajea nobiajeaquiani peaꞌai? Ecuea eba. Miquianaya quea huiso aquiana jea bañajo quea tecue nee nee poani, quea dejja tai poani peaꞌai. \v 2 Miquianaya ca ca oe quea aquiana huiso po sa poani. Jamatii ejjeshejji chamajojo ca ya ca oe mi jjesheaña. Jamajjeya ajeo ejjeshejji pojjeamajojo ca ya ca oe pea quecua sa aña eꞌaquiana mejoꞌyojji. Onajaya aquiana jea ba majje miquianaya jjamimicuiajea nobiajeaquiani; jjacuiaquiani peaꞌai. Jamatii miquianaya Eyacuiñajji nijje mimi ajja jama baꞌa: —Eyacuiñajji, ¡che mo ma aquiana jjeshe meesahuacue! —jamaya Eyacuiñajji nijje mimi jjimajojo ca mi ca mi jjeshe meesahua cani aquiana cuana. \p \v 3 Beca cuana aje oe Eyacuiñajji nijje mimiani aquiana sa poanijo. Jamatii ma aquianajo quea nahue nee poanijo ojaya miquianaya ma aquiana equia meejji pojjeama. Aquiana miquea miqueya nei epojjijo quea tai jjashahuabaquiani. Eyacuiñajjija ejjashahuabaquijji jayojja jama aꞌajjajo ojaya miya eshajjaꞌajjajji pojjeama. \v 4 ¡Bacue! Jiquio ecua ehuanase ojaya yahue botiꞌama amajje pea dejja nijje poani jama jayojjaya miquianaya Eyacuiñajji nijje jjapeepajeaquiꞌyani mimishi cuana nijje ejjapeequiꞌyojji. Jamajjeya miquianaya Jesosaja epeejji pojjeama cuana nijje jjapee neineiquianijo miquianaaya Eyacuiñajji botiꞌama aña. Quea mimishi baꞌe sa poanijo Eyacuiñajji quecuaꞌyojji jayojja poani. \v 5 Eyacuiñajjija esohui yahuajo nei nei tehue ca poa cuaa jama baꞌa: \q1 “Eyacuiñajjiya ojaya Edojjoshahua Pame ojaya epeejji cuana huasijje huoojea caꞌyonaje ojaya eyami yasijje dobiquiya. Edojjoshahua Pameya ojaya epeejji cuana nahue tiitii cani mimishiꞌama epojji”. \m Jamaya yahuajo nee tehue ca poa. ¿Aꞌa Eyacuiñajjiya ma esohui etehuejeajji tehue mee ca poa posoya aña miquiaaya? \p \v 6 Eyacuiñajjiya eseya jaahuana cani quea jaꞌa nee. Ohuaya eseya baꞌe meesahua cani quea pame nee. Eꞌe, ojaya esohui yahuajo nei tehue mee ca poa jama baꞌa: \q1 “Eyacuiñajjiya ojjaña joya mimishijo bichoꞌama poani, quea quene poani peaꞌai jeabichajea cani. Quea yeno nee nee po mee cani peaꞌai. Ojjaña quea bei poani, queneꞌama poani peaꞌai ohuaya baꞌe meesahua cani quea pame nee”. \m Jamaya yahuajo nei tehue mee ca poa. \p \v 7 Jamajjeya oe ¡Eyacuiñajjija esohui jayojja jama pocue! ¡Edosiquiana nei nijje aꞌa jjapeequijji! ¡Aꞌa oya shajjaꞌajjajji! ¡Oya huoojeacue! Jamajjeya miquianaya Jesosaja epeejji poanijo Edosiquiana miquiana huoojeajji pojjeama poani. Chojja, jjanequishiñaqui majje oya poquije quea huesha nee. \v 8 ¡Jesosa nijje jjapee neineiquicue! Jamajjeya ohuaya miquianaya jaahuana tiitii cajeꞌyo. ¡Miquea mimishi cuana pajea neiꞌyocue! ¡Jesosaja epeejji nisho aꞌa pojji! ¡Ojaya epeejji nei nei oe pocue Eyacuiñajjija esohui etehueꞌyo jayojja jama! ¡Quea boejea baꞌe neineiꞌyocue! \v 9 ¡Miquea mimishijo quea yeno nee pocue! ¡Pa neineicue! ¡Mimishi cuanajo quea bihui jayojja aꞌa soajji! ¡Mimishi cuana amajje aꞌa quea bei jayojja pojji! Chojja. \v 10 Quea tai po majje quea bicho nee nee mimicue Eyacuiñajji nijje jama baꞌa: —Eyacuiñajji, ¡eya mimishi pajea meesahuaꞌyocue! Eꞌe, eya caꞌaꞌama. ¡Jaahuana neineicue mo oe, quea bei enijje pocue! \p Jamaya onijje mimianijo Eyacuiñajjiya miquianaya shajjaꞌajja caje. Miquianajaya emimi onijje jayojja jama ohuaya acaje. \s1 ¡Aꞌa pea cuanajo maimaijji! \p \v 11 Ecuea epeejji cuana, miquianaya Jesosaja epeejji cuana poani. Jamajjeya ¡Jesosaja pea epeejji cuana aꞌa niñebajji! Jesosaja epeejji cuaa, beca cuaa pea epeejji niñeba cani jama baꞌa: —Oya Jesosaja epeejji quea pame pojjeama —jamaya acani Eyacuiñajjija esohui jayojja jama a sa poꞌyo ajjaa jjejojo. \p Jamajjeya ohuaya Eyacuiñajjija esohui niñeba cani jama baꞌa: —Eyacuiñajjija esohui quea pame pojjeama poani. \p Ohuaya Eyacuiñajjija esohui jayojja jama aꞌajja botiꞌama jojoya. Jamajjeya oya cuana Eyacuiñajjija esohui niñebajji poani. \v 12 ¡Bacue! Eyacuiñajji oe nei ojjaña huoojeajji poani quea pame nee. Oya oe nei quea jaꞌa nee nee jjashahuabaquiani ojaya epeejji cuanajo. Ohuaya ohuaye nei mimishi cuana cuijea caꞌyani. Jamajjeya ohuaya ohuaye nei mimishi cuana quea nee nee po mee cajeꞌyo tii tii. Jamajjeya ¡aꞌa pea epeejji cuana niñebajji! Miya ca ca Eyacuiñajji jayojja jama pojjeama. \s1 ¡Eyacuiñajjija ejjashahuabaquijji jayojja jama acue! \p \v 13 Beca cuana mimiani jama baꞌa: —Mecahuajje pojjaꞌa eya poquije pea cuiñajji yasijje. Jocuama eya nequije oe shequiajame. Chacochaco majje ejjeshejji quea huiso jjesheje —poani. \p \v 14 ¡Eya shajjaꞌajjacue! ¿Ae shai poaje mecahuajje? Miquianajaya eba pojjeama. ¿Ache shono manojeꞌyo eseya? Esejaya ba jjima. ¡Bacue! Eseya huoja jama. Jiquio ecua eshequi jaasohua pishanajo huoja jjachamaquiꞌyani, poquiani jama jayojja miquianaya jiquio meshijo enequi tiitiijji pojjeama; caꞌaꞌama. \v 15 Jamajjeya jama pocue baꞌa: —Eyacuiñajjiya ecuana baꞌe meesahua canijo, ecuana baꞌeje quea pame nee. Ohuaya ecuana chaco sahua canijo, ecuaaya chacoje ma echacojji. \p \v 16 Jamatii miquianaya bichoꞌama mimiani jama baꞌa: —Eya jamatii quea pame chacochacoani. Quea pame baꞌyani jamatii. \p Chojja. Miquianaya emimijeajji mimijeani. Jjashahuabaquiani quea quehua nee nee. \p \v 17 Eyacuiñajjiya ojjaña quea pame nee ameesahua sa acani. Ma ba majje jamatii beca cuana quea pame po sa poꞌyo ajja. Jamaya poani jjejojoya quea mimishi nee nee poani. \c 5 \s1 Dejja quea aquiana huiso niñesheꞌajji \p \v 1 Quea dejja tai jjejojo ona dasiajji poani, ¡shajjaꞌajjacue mo oe! Jjeya miquianaya quea aquiana huiso poani. ¡Jamatii quea yeno nee nee pocue, pa neineicue peaꞌai! Quijje aje oe quea yeno nee nee poaje, quea camaja nee poajeꞌyo. Quea nee nee poajeꞌyo miquianaya. \v 2 Miquianajaya aquiana quea nahue cuana shaashaajeaje quea huiso. Mojojea caje. Miquea daqui quea nahue cuana huiñajeajeꞌyo, machichi aiya ijjiahuiñajea cajeꞌyo quiiteteya peaꞌai. \v 3 Miquea aquiana mei huoꞌo quea nahue cuana, mei oshe quea nahue cuana, bejjo cuana peaꞌai seejeajeꞌyo. Miquea aquiana cuana eseeꞌyo, ehuiñajeaꞌyo ba majje onaaya miya jama acaje baꞌa: —Oya quea dejja tai; oya quea nishehui poanaje. Quea aquiana jeaa jjejojo aquiana quea huiso nee nee nahue tiitii canaje. \p Miquea ejjeshejji chamaꞌyo tii poajeꞌyo. Jiquio ecua cuaquijo quiyoꞌyo majje eseya quea nee nee poani jama jayojja miquea aquiana cuana chamaꞌyo tii poajo miya quea yeno nee nee poajeꞌyo. Majoya Eyacuiñajjiya miya tecuea caje quea dejja tai poanaje jojoya, aquiana cuana quea huiso nee chicha majje nahuejje poanaje jojoya. \v 4 Eꞌe, echacojji cuana mique que cuanajo chacochacoꞌyonaje miquea sosequiaꞌyo jjima. Ma echacojji cuana Eyacuiñajji nijje mimiani mijo; huohui cani, sosemaꞌ miya chaco mee canaje jjejojo. Onaaya mique que cuanajo bobi sosemaꞌ chicha caꞌyonaje peaꞌai. Majoya oya cuana taaani Eyacuiñajji yasijje mimi majje miquea sosequiaꞌyo jjima jjejojo. Eyacuiñajji quea caꞌa nee nee, ojjaña huoojeaꞌyojji nei nei oya poani. Ohuaya echacojji cuana pa ani shajjaꞌajja canaje. Jamajjeya ohuaya miya tecuea cani quea dejja taijojo. \v 5 Eꞌe, miyaya aje oe aquiana quea huiso jiquio meshijo chichanaje; miquea yajjijo quea huiso aquiana pame, quea nahue nee peaꞌai chichanaje, siinaje peaꞌai. Quea aquiana jea nee nee poanaje. Quea bobi huiso nee nee miya poanaje. Jamatii jejje ajja tii tii poanaje. Quea dejja tai poanaje; quea nishehui poanaje epona. Jamajjeya Eyacuiñajjiya miquianaya quea nee nee po mee cajeꞌyo. \v 6 Miyaya aje oe aemaꞌ cuana, joya mimishiꞌama quea pame nee poani peaꞌai tecueanaje. Oya cuana quecuajeanaje peaꞌai. Jamatii oya cuana minijje jjasoseaquiꞌyo ajja, jeabichajea sa poꞌyo ajja peaꞌai. Eyacuiñajjiya ca ca oe miya quea nee nee po mee cajeꞌyo tii tii ona miya mi sosequiajo. Jamaya eyaya miquianaya aña, edejja tai cuana. Mahuiso. \s1 ¡Eyacuiñajji nijje mimicue ebaꞌe meesahuajji! \p \v 7 Jamajjeya ecuea epeejji cuana, ¡Jesosaja epoe oꞌoyajjijo jjaꞌishoaꞌajjaqui nequicue quea bei! Onaaya miquianaya quea mimishi acanijo, ¡jamatii Jesosa nijje jjapee tiitiiquicue yenoꞌama! Eseyaya shijje quecua majje ishoaꞌajjaña shijje tiiꞌyajo esoꞌ yajji. Jiquio ecua seya ena ishoaꞌajjaña shijje pohuaꞌyojji jama ¡ishoaꞌajjameya acue Jesosaja epoe oꞌoyajjijo! \v 8 Eꞌe, quijje pishana esejaya Emeshi Mese nei Jesosa poeje oꞌoya. Jamajjeya oe ¡jjeya quea pame nee onijje jjapee neinei tiitiiquicue eꞌe jojo nei! \p \v 9 Ecuea epeejji cuana, ¡aꞌa Jesosaja pea epeejji cuana niñebajji Eyacuiñajjija miquianaya etecueajji pojjeama! Poe majje Jesosaa huohui cañajeꞌyo joya quea pame poanaje; joya quea mimishi poanaje huohui cañajeꞌyo peaꞌai. Jjeyahua nei esejaya Emeshi Mese nei Jesosa chipi nei nequi. Jjeyahua nei pojjaꞌa oya poeje oꞌoya. \p \v 10 Epeejji cuana, ¡shahuabacue Eyacuiñajjija esohui huohuijji cuana ma yahuajo nei nei baꞌya poa! Ohuaya esejaya Emeshi Mese neijo huohui ca poa. ¡O jayojjaya jama quea bei pocue! Eꞌe, yahuajo onaaya oya cuana cuia ca poa peaꞌai. Jamatii Eyacuiñajji nijje jjapee tiitiiqui nequia poa. \v 11 Eꞌe, oya cuana napa ca poa cuaa quea huiso. Jamatii Eyacuiñajji nijje jjapeequi pajeaꞌyo jjima poa. Jamajjeya eseya jama poani baꞌa: —Oya cuana Eyacuiñajjija epeejji quea bihui neeya poa, ma etiiquiana cuana. \p Eꞌe, ¡niñebaꞌyocue Eyacuiñajjija epeejji yahuajo nei nei nequia poa etiiquiana! Jobi bojojeaꞌajjaꞌya poa; quea nee nee poa. Jamatii Eyacuiñajji nijje jjapeepajeaquiꞌyo jjima poa. Jamajjeya Eyacuiñajjiya oya quea pame nee aca poa. Jjajea meequi caꞌya poa. Jamaya miquea eba. Eyacuiñajjija eseya quea jea nee poanijo quea pame nee nee acani, quea bei peaꞌai. \p \v 12 ¡Jiquio ecuea pea esohui ba neineicue, epeejji cuana! ¡Aꞌa oe siajje pojji! ¡Aꞌa oe jama pojji baꞌa: —Eyacuiñajjiya eya ba canijo, eyaya eꞌe nei huohuiaña. Ecuea esohui eꞌe nei pojjeama jojjemo eya Eyacuiñajjiya quea nee po mee caꞌyome. Ojjaña eyajo baꞌe cuaa eya ba cani, ojjaña meshijo baꞌe cuaa eya ba cani peaꞌai eyaya eꞌe nei huohuiaña. Ecuea esohui eꞌe nei pojjeama jojjemo Edosiquiaa eya quea mano po mee caꞌyome —aꞌa jamaya pojji! \p Chojja, ¡esohui eꞌe nei huohuicue jama tii tii! Jamajjeya ¡chaco sa poanijo jama acue baꞌa: —Eꞌe, eyaya chaco sa aña —acue! Chacochaco sa po ajjajo ¡huohuicue jama baꞌa: —Chojja, eya chacochaco sa poꞌyo ajja —acue! ¡Eꞌe jojo nei oe huohui poquiacue! ¡Eꞌe jojo nei jayojja mimianijo Eyacuiñajjiya miya tecuea caꞌyo chanaꞌ! \s1 ¡Eyacuiñajji nijje mimicue emanojaa oja ehuaquia meeꞌyojji! \p \v 13 ¿Aꞌa beca cuana quea yeno nee nee yani? Quea yeno po majje ¡Eyacuiñajji nijje camimiahua! ¿Aꞌa pea cuana quea bihui nee poani? Quea bihui nee po majje ¡Eyacuiñajji cabihuia cahua sohuicuayanijo! \v 14 ¿Aꞌa emanojaa yani? ¡Eyacuiñajjija epeejji etii cuana caꞌiyaa cahua! Oya cuana poe majje Eyacuiñajji nijje mimije emanojaa huaquia meeꞌyojji. Jamajjeya emanojaa bahua shicui caje acuijjajja seiya Jesosaja epeejji poanijo. Majoya Eyacuiñajji nijje mimije emanojaa huaquiaꞌyojji, ejjaajaquiꞌyojji peaꞌai. \v 15 Eyacuiñajji nijje mimianijo cajjashahuabaquiahua jama baꞌa: —Ecuana Eyacuiñajji nijje mimiani emanojaa oja ehuaquia meeꞌyojji. Ohuaya eꞌe jojo nei ecuana shajjaꞌajja caje; emanojaa huaquia mee cajeꞌyo —jamaya capoahua. \p Jamaya jjashahuabaquianijo, Eyacuiñajjiya eseya onijje mimiajo shajjaꞌajja caje; jamaya acajeꞌyo eꞌe jojo nei. Emanojaa quea mano poani oja mimishijo, Eyacuiñajjiya oja mimishi cuana cuijea cajeꞌyo peaꞌai. \v 16 Jamajjeya mimishi amajje ¡quea yeno nee mimicue pea cuana nijje! ¡Miquea mimishi huohuicue! Jamajjeya Jesosaja pea epeejji cuaa miquiana mimishi apajea meesahua cajeꞌyo. Majoya ¡mimicue Eyacuiñajji nijje pea cuanajo! Eyacuiñajjiya miquianaya huaquia mee cajeꞌyo. Eꞌe, Jesosaja epeejji mimishiꞌama Eyacuiñajji nijje mimi neineiyajo Eyacuiñajjiya oya shajjaꞌajja caje; jamaya acaje ojo. \p \v 17 Yahuajo nei nei esejaya etiiquiana Enia bajjani baꞌya poa. Oya ese jayojjaya poa. Jamatii oya miminequia poa Eyacuiñajji nijje ena chamaꞌ epo meeꞌyojji. Jamajjeya ena chamaꞌ poa beshahua nei ebeca pea peaꞌai shequiajame. \v 18 Meshi quea jabo nee nee poajo, Enia Eyacuiñajji nijje mimi oꞌoya poa ena epoꞌyojji. Eyacuiñajjiya Enia onijje mimiajo shajjaꞌajja ca poa; ena quea quemo po mee caꞌya poa. Esoꞌ cuana equecua ani pohua mee caꞌya poa. \p \v 19 Ecuea epeejji cuana, ¡bacue! Jesosaja epeejjiya Eyacuiñajjija esohui etehueꞌyo jayojja jama baꞌe pajeaꞌyajo, ¡oya quea pame nee baꞌe meesahua oꞌoyacue miquianaaya! Jamajjeya Eyacuiñajjija esohui jayojja jama acaje oꞌoya ohuaya. \v 20 Jamajjeya Jesosa nijje jjapeequi meesahua oꞌoyañajo, oya cuana cuaqui yasijje epoquiꞌyojji pojjeama. Eyacuiñajjiya ojaya mimishi quea huiso cuana cuijea cajeꞌyo. \p Mahuiso ecuea esohui. Eyaya, Satiacohua esohui tehuenaje. Apoa.