\id HEB - Ese Ejja NT -Bolivia 2012 (DBL -2013) 
\h EMEO 
\toc1 Etehueꞌyo Jesosaja Epeejji Cuana Emeoja Esohuijo Mimiani Yasijje 
\toc2 Emeo 
\toc3 Heb 
\mt2 ETEHUEꞌYO JESOSAJA EPEEJJI CUANA EMEOJA ESOHUIJO MIMIANI YASIJJE 
\mt1 HEBREOS 
\c 1  
\s1 Eyacuiñajjiya oja Bacua Ejja huoojea canaje ona oja esohui ba meeya 
\p  
\v 1 Ecuea epeejji cuana quea huiso meshijo baꞌe, yahuajo nei nei Eyacuiñajjiya ojaya epeejji nei cuana huoojea ca poa esejaya etiiquiana que, Jodio etiiquiana que. Jama poa baꞌa: “¡Huohuiquicue Jodio cuana huasijje ecuea ejjashahuabaquijji ojjañaja ebajji! ¡Huohui majamajacue oe!” Ma huoojea nequime aca poa; pea manoꞌyajo huoojeaꞌyo esohui huohuijji aca nequia poa. Oe esohui huohuijji quea huiso huohui meesahua ca poa Eyacuiñajjiya ojaya ejjashahuabaquijji. Pea esohui huohuijji pea esohui huohui meesahua ca poa ojaya ejjashahuabaquijji peaꞌai. Jamatii huohui jjima poa ojjaña Eyacuiñajjija ejjashahuabaquijji.  
\v 2 Jjeya ca ca Eyacuiñajjiya oja Bacua Ejja Jesosa Quito bajjani huoojea canaje eseya ojjaña ojaya ejjashahuabaquijji ba meeya. Ohuaya Jesosaa oja Chii nijjeya ojjaña pana caꞌya poa, ojjaña aquiana meshijo eꞌanijji, eyatahuatahuajo enequijji peaꞌai pana caꞌya poa. Jamajjeya ojaya nei aquiana. Jesosa ojjaña huoojeaꞌyojji poani tii tii eyajo, meshi cuanajo peaꞌai.  
\v 3 Jesosa oja Chii jayojjaya poa. Quea pame nee nee, quea caꞌa nee nee. Jesosa oja Chii jayojjaya poani tii tii. Oya quea sohui poja nee neeya jjejojo ojjaña nequi mee ca poa. Ma ecua ohuaya yahuajo huohui ca poa jamaya acani ohuaya jjeya ojjaña eyajo nequi, ojjaña meshijo nequi peaꞌai nequi caꞌa tiitii mee cani Jesosaa. Oya ojjañaja mimishi cuijeaꞌyo majje, ma ojjaña ojaya epeejji epojjija mimishi cuijeaꞌyo majje anioquenaje oja Chii pejjejo ebianeijje. Jomajo oya, Jesosa ojjaña huoojeaꞌyojji poani tii tii. Eꞌe, Eyacuiñajji, Jesosa peaꞌai quea caꞌa nee nee po tiitiiani. Pea caꞌaꞌama. 
\s1 Jesosa Eyacuiñajjija Bacua Ejja quea jaꞌa nee nee esohuidojojji cuana quea jaꞌa pishana 
\p  
\v 4 Eyacuiñajjiya Jesosa nequi mee cani quea jaꞌa nee nee. Ojaya esohuidojojji cuana ca ca nequi mee cani quea jaꞌa pishana. Esohuidojojji cuana bajjani canaje quea bajjani pame pishana, Eyacuiñajjija echacojji bajjani. Jesosa ca ca Eyacuiñajjija Ebacua Ejja quea pame nee nee.  
\v 5 “Eyaya miya ojjaña ba meeaña cuana, miya ca ca oe ecue Bacua Ejja. Eya ca ca iña mique Chii”. Jamaya Eyacuiñajjiya Jesosa acanaje. Eyacuiñajjija ca ca esohuidojojji cuana jama huohuime ajjimaya. Eyacuiñajjiya Jesosa jama huohuime aca oꞌoyanaje baꞌa: “¡Eya eꞌe jojo nee mique Chii caba cahua cuaa! Eꞌe, miya ecue Bacua Ejja oe nei”. Jama Jesosa huohuimeya acanaje. Jama huohuimeya esohuidojojji ajjima Eyacuiñajjija. 
\p  
\v 6 Eyacuiñajjiya oja Bacua Ejja oe nei meshi yasijje huoojea jeahua esohuidojojji jama huohuime aca poa baꞌa: “¡Esohuidojojji cuana, ecue Bacua Ejja oe bihuiacue, ojjañaa!” Jamaya Eyacuiñajjiya aca poa Jesosajo. 
\p  
\v 7 Esohuidojojjijo jama aca poa baꞌa: 
\q1 “Eyaya ecuea esohuidojojji huoojeaña quea cuejipashi nee nee pojjejje jama, quea quemo nee nee beni jama”. 
\m Jamaya Eyacuiñajji poa. 
\p  
\v 8 Oja bacua ca ca Eyacuiñajjiya huohui ca poa jama baꞌa: 
\q1 “Miya ca ca oe ecue Bacua Ejja eꞌe jojo nei, e jayojjaya tii tiiya Eyacuiñajjiya ca mi coma. Miya ojjaña huoojeajji poani tii tii ojjaña meshi yasijje. Quea jaꞌa nee nee ojjaña huoojeaña tii tii.  
\v 9 Ojjaña quea jaꞌa nee nee poani; ecuea ejjashahuabaquijji jayojja jama poani miquea quea boti nee nee poani. Mimishi cuana ca ca cajaa aña. Jamajjeya eyaya miya babacaꞌya poa ojjañaja Emeshi Mese nei epojji. Ojjañaa miya shajjaꞌajja caje ojjaña meshijo baꞌeca cuaa. Pea emeshi mese shajjaꞌajja jjima acaje cuaa. Jamajjeya miya quea jaji nee nee poani tii”. 
\m Jamaya yahuajo nei Eyacuiñajjiya tehue mee ca poa Jesosa nijje. 
\p  
\v 10 Eyacuiñajjiya pea esohui tehue mee ca poa oja Bacua Ejja nijje, Jesosa nijje jama baꞌa: 
\q1 “Emeshi Mese nei, miyaya ebionei meshi pana cooa poa ojjaña. Eyatahuatahua pana cooa poa quea huesha nee nee, ojjaña eyajo enequijji peaꞌai.  
\v 11 Ojjaña miquea epanaꞌyo oe poaje, meshi cuana, eyatahuatahua peaꞌai. Miya ca ca nequi tiitiijeꞌyo. Eꞌe, miya ca ca oe nequi tiitiijeꞌyo. Meshi etii poaje, eyatahuatahua peaꞌai. Jiquio ecua daqui eyacua daqui chii poani, daqui chii chiiꞌyajo iñajjajjaꞌyo majje jeajeaña jayojja jama eyaya meshi aje, eyatahuatahua peaꞌai.  
\v 12 Eꞌe, daqui chii jeajeaña eyacua ehuoshojji jayojja jama meshi, eyatahuatahua peaꞌai tiiꞌyajo eyaya cajaa aje eyacua epanaꞌyojji. Miya ca ca jamatii nequi tiitiijeꞌyo quea jaꞌa nee nee”. 
\m Jamaya poanaje Eyacuiñajji oja Bacua Ejja nijje, Jesosa nijje. 
\p  
\v 13 Eꞌe, jamaya Eyacuiñajjiya oja Bacua huohui ca poa esejaya ebajji jama baꞌa: 
\q1 “¡Anioquecue ecuea ebianei mijijje enijje ojjaña huoojeaꞌyojji! ¡Epejjejo ishoaꞌajjacue! Mi quecuajji nisho yani. Eyaya oya cuana caꞌaꞌama po mee majje mi shajjaꞌajjajji po meejeꞌyo”. 
\m Jamaya Eyacuiñajjiya oja Bacua Ejja ca ca oe huohui ca poa. Esohuidojojji nijje ca ca jama mimimeya po jjima. 
\p  
\v 14 Eꞌe, esohuidojojji cuana Eyacuiñajjija huoojeaꞌyo ca ca oe. Oya cuana huoojea cani Jesosaja epeejji cuana jaahuanaa, ma onijje eyajo ebaꞌe tiitiiꞌyojji cuana jaahuanajji. 
\c 2  
\s1 ¡Jesosa shajjaꞌajjacue ojaya epeejji nei epojji! 
\p  
\v 1 Ecuea epeejji cuana, jamajjeya ¡shajjaꞌajja neineicue Jesosaja esohui ojaya epeejji nei nei epojji! Yahuajo pishana maya shajjaꞌajjanaje eseyaya. Esohui pajeaꞌyo majje ca se ca oe bishe jeyo jjima jayojja beniya dojojea cani jayojja jama poaje; poquiquehua chana se esohui pajeaꞌyo majje.  
\v 2 Yahuajo nei nei Eyacuiñajjiya esohuidojojji esejaya etiiquiana huasijje huoojea ca poa. Oja sohui eꞌe nei huohui huichaꞌa huichaꞌa mee ca poa: “¡Shajjaꞌajjacue ecuea esohuidojojjija esohui eꞌe nei!” jamaya Eyacuiñajjiya etiiquiana acaꞌya poa. 
\p Jamajjeya shajjamaꞌ cuana Eyacuiñajjiya quea nee po mee ca poa oja esohui ajjimajojo. Jjashajjaꞌajjaqui ajjajojo quea nee nee po mee caꞌya poa.  
\v 3 Jjeya ca ca Eyacuiñajjiya eseya quea pame nee nee acani. Jesosa nijje jjapeequianijo, ohuaya eseya baꞌe tiitii mee cajeꞌyo eyajo. Jesosa nijje jjapeequi sa poꞌyo ajjajo cho, ebaꞌe tiitii meeꞌyojji pojjeama. Eꞌe, Jesosaa esejaya Emeshi Mese neiya huohui coo ca poa jama baꞌa: —Enijje jjapeequiajo, eyaya miquianaya baꞌe tiitii meejeꞌyo enijje —Jesosa poanaje. 
\p Majoya o shajjaꞌajjajji cuaa eseya huohui canaje jama baꞌa: —Eꞌe jojo nei Jesosaa eseya baꞌe tiitii mee cajeꞌyo eyajo onijje jjapeequianijo. 
\p  
\v 4 Eyacuiñajjiya peaꞌai ba mee canaje ma esohui eꞌe jojo nei. Eꞌe, Eyacuiñajjiya Jesosaja epeejji cuana ma dejjaa ajjima acani ameesahua canaje. Ma dejjaja yahuajo ba jjima poa ba meesahua canaje peaꞌai. Edojjoshahua Pame huoojea canaje peaꞌai ojaya ejjashahuabaquijji jayojja jama ameesahuaa, Eyacuiñajjiya. Jamajjeya eseya ba mee canaje eꞌe jojo nei Jesosaa eseya baꞌe tiitii mee cajeꞌyo eyajo onijje jjapeequianijo. 
\s1 Meshi eyacuajo ojjaña huoojeaꞌyojji poaje Jesosa 
\p  
\v 5 Eꞌe, quijje Eyacuiñajjiya meshi pana cajeꞌyo eyacua. Ma meshi eyacuajo ecuaaya miquianaya huohuiaña jama poaje baꞌa: Eyacuiñajji Jesosaja epeejji cuana nijje jama poanaje baꞌa: —Eꞌe jojo nei meshi eyacuajo miquianaya ona huoojeajji poaje —Eyacuiñajji jamaya poanaje Jesosaja epeejji cuana nijje. Jamaya mimi jjima esohuidojojji nijje, de.  
\v 6 Chojja. Yahuajo nei nei Dabi tehue meesahua ca poa Eyacuiñajjiya jama baꞌa: 
\q1 “Eyacuiñajji, miya jjashahuaba tiitiiquiani meshijo ebaꞌejji cuanajo. Dejja cuana caꞌaꞌama. Quea pame pishana. Jamatii oya cuana miyaya jaahuanaña.  
\v 7 Eꞌe Eyacuiñajji, yahuajo miyaya ojjaña dejja cuana quea pame anaje; esohuidojojji quea pame nee jayojja beshahua nei anaje. Jamaya miyaya oya cuana nequi meenaje iye huiso daqui sheme. Miyaya oya cuana quea jaꞌa nee nee po meenaje.  
\v 8 Quea caꞌa nee nee po meenaje miyaya ojjaña huoojeaꞌyojji epojji”. 
\m Jamaya Eyacuiñajjiya yahuajo nei Dabi tehue mee ca poa. Eꞌe, ma etehueꞌyojo jama poa baꞌa: “Dejja ojjaña huoojeaꞌyojji po mee canaje Eyacuiñajjiya”. Eꞌe, ojjaña huoojeaꞌyojji po mee ca poa, ojjaña aquiana cuana huoojeajji. Jamatii eseyaya baña jjeya dejja cuana ojjaña huoojeajji po jjima poani. 
\p  
\v 9 Jesosa ca ca esejaya eba. Eyacuiñajjiya oya nequi mee ca poa beshahua nei esohuidojojji quea pame jayojja. Jamaya nequi mee ca poa oe pojji daqui sheme. Eseya Eyacuiñajjija quea jea nee poanijo, Jesosa ese jayojja yamijji poa; emanoꞌyojjiya poa. Jamajjeya Jesosa ojjaña nahuejji manoꞌyonaje. Eyacuiñajjiya oya shequi mee ca oꞌoyanaje quea bame nee nee enequi tiitiiꞌyojji. Pea chamaꞌ o jayojja, de. 
\p  
\v 10 Eyacuiñajjiya oja Bacua Ejja nijjeya, Jesosa nijjeya ojjaña pana majje nequi mee cani, ojjaña eyajo nequi, ojjaña meshijo baꞌe peaꞌai. Ojjaña yani de, Eyacuiñajji quea bihui po meejji. Oya ojjañaja Emeshi Mese tii poani; ojjaña Jesosaja epeejji nequi tiitii mee sa poani onijje: —Eꞌe, ecuea Ebacua Ejja quea nee nee po majje oya ojjaña jaahuanajji poaje —jamaya Eyacuiñajji jjashahuabaquinaje—. Jamajjeya jamaya poaje. Ecuea Ebacua Ejja quea nee nee po meeje. Jamaya quea pame. Jamajjeya ohuaya, Jesosaa quea huiso baꞌe tiitii mee cajeꞌyo onijje eyajo —jamaya Eyacuiñajji poanaje. 
\p  
\v 11 Jamajjeya Jesosaa ojjaña eseya quea boejea po mee caꞌyani mimishi cuijeaꞌyo majje. Jamaya ojjaña eseya Eyacuiñajjija bacua po mee cani o jayojja peaꞌaiya. Jamajjeya oya, Jesosa ese nijje quea bihui nee jama poani baꞌa: —Ecue Chii miquianajaya Chii peaꞌai poani. Miquianaya ecuea ecue chahua mese cuana, ecue jjoꞌi cuana —Jesosa poani. 
\p  
\v 12 Eꞌe, Eyacuiñajjija esohui yahuajo nei etehueꞌyojo Jesosa oja Chii nijje jama poa baꞌa: 
\q1 “Eyacuiñajji, eya ecuea huapa pojjeama cuana nijje mimije mijo. Eyaya miya bihuiaje ojjaña ecuea epeejji cuanaja eshajjaꞌajjajji jama baꞌa: —Eyacuiñajji, miya ca ca oe quea caꞌa nee nee nequi —jamajjeya eya sohuicuayaje”. 
\m  
\v 13 Jamaya pea esohui yahuajo nei etehueꞌyojo Jesosaa aca poa baꞌa: 
\q1 “Eyacuiñajji, eya ca ca iña miyaya baña Eyacuiñajji nei nei. Miyaya eya jaahuanaña eꞌe jojo nei”. 
\m Jama peaꞌai poa baꞌa: 
\q1 “Eyacuiñajji, ¡eya bacue ecuea huapa pojjeama cuana nijje, ojjaña joya miyaya enijje jjapeequi meesahuanaje nijje!” 
\m Jamaya yahuajo nei Eyacuiñajjiya Isaia tehue mee ca poa Jesosaja esohui. 
\p  
\v 14 Jesosaja epeejji cuana dejja cuana aje oe yamijji. Jamajjeya oya, Jesosa poeyanaje yamijji, ese jayojjaya manoꞌyome epojji. Manoꞌyonajeya jjejojo ohuaya Edosiquiana nei Satanasa bajjani jeabichajea caꞌyonaje, ma ojjaña manomeeꞌyojji poani jeabichajea caꞌyonaje. Eꞌe, ebaꞌe tiitiiꞌyojji jjejojo meteꞌama eseya poaje emanoꞌyojji.  
\v 15 Yahuajo ojjaña eseya quea mete jjashahuabaqui aninaje jama baꞌa: —Eꞌe de, eya manojeꞌyo. Jamaya quea tai. Quea mete ca iña emanoꞌyojji —eseya poanaje. 
\p Jesosaja epeejji nei ca ca jjashahuabaquiani jama baꞌa: —Eꞌe, eya manojeꞌyo. Jamatii Eyacuiñajjiya eya baꞌe tiitii mee cajeꞌyo onijje eyajo. 
\p  
\v 16 Jamajjeya Jesosa dejja jayojja yamijji poeyanaje. Poeyanaje esohuidojojji jayojja pojjeama, esohuidojojji jaahuanaa pojjeama. Chojja. Jesosa poeyanaje dejja jayojja yamijji ese jaahuanaa, Amajamaja osecua cuana jaahuanaa.  
\v 17 Jamajjeya oya, Jesosa ese jayojjaya poanaje ojjaña ojaya epeejji nei jaahuanajji jama baꞌa: Eyacuiñajji nijje emimijji etii yahuajo baꞌeya Eyacuiñajjija esohui jayojja jama aca poa Eyacuiñajji Jodio cuana nijje quea bei epo meejji nisho. Jjeya ca ca Jesosaa Eyacuiñajjija ejjashahuabaquijji jama eꞌe jojo nei acani quea jaꞌa nee. Eseja mimishi cuijeaꞌyojji manoꞌyonaje. Jamaya Eyacuiñajji ese nijje eꞌe jojo nei quea bei po mee canaje tii tii.  
\v 18 Jiquio meshijo baꞌe Jesosa quea nee nee poa. Cuanaya Edosiquiana neiya, Satanasaa Jesosa quea mimishi epo meejji nisho aca poa. Jamajjeya Satanasaa eseya quea mimishi po mee sa acanijo, Jesosaa eseya quea pame baꞌe mee cani. Jamaya Jesosaa ameesahua cani baꞌa: —Chojja, eya Jesosaja epeejji poani. Ohuaya eya jaahuana canijo, quea mimishi po maja sa po ajja ca iña —jamaya Jesosaa eseya po meesahua cani. 
\c 3  
\s1 Jesosa quea pame nee; Moisesi quea pame pishana poa 
\p  
\v 1 Jamajjeya ecuea epeejji cuana, ¡Jesosajo oe jjashahuabaquicue! Eyacuiñajjiya eseya babaca canaje Jesosaja epeejji epojji, onijje eyajo ebaꞌe tiitiiꞌyojji. Eꞌe, ¡Jesosajo oe jjashahuaba tiitiiquicue! Eyacuiñajjiya oya huoojea canaje ese jaahuanaa: —Miya enijje ma mimi poquime poaje miquea epeejji cuanajo. Quea pame nee nee jamaya poajeꞌyo tii —jamaya Eyacuiñajji poanaje Jesosa nijje. 
\p  
\v 2 Eꞌe, Eyacuiñajjiya yahuajo Jesosa babaca ca poa ojaya epeejji cuana jaahuanajji epojji. Ojaya epeejji cuanajo onijje emimijji quea pame nee nee po mee ca poa. Ma ecua Eyacuiñajjiya huohui canaje jamaya eꞌe jojo nei acanaje Jesosaa. Jesosaa jayojjaya etiiquiana Moisesiya Eyacuiñajjija epeejji cuana jaahuaname aca poa yahuajo nei nei.  
\v 3 Moisesi ca ca quea jaꞌa pishana poa. Jesosa ca ca quea jaꞌa nee nee poanaje. Eꞌe, jiquio ecua se equi iya jjimajo jjashahuabaquiani, jamaya Jesosa jjashahuabaquinaje eseya Eyacuiñajjija epeejji quea jaꞌa nee epo meejji. ¡Quea pame nee nee Jesosa! Moisesi ca ca echacosahuajji jayojja jama poa; Jodio cuana beshahua nei Eyacuiñajji nijje jjapeequi meesahua ca poa.  
\v 4 Eꞌe, ojjaña equi cuana equi iyajji poaniya iya cani. Jiquio ecua equi iyajji poaniya equi iya cani jama panameya Eyacuiñajjiya aca poa. Ojjaña panaꞌyo majje quea jaꞌa nee jjeya nequi mee cani. Jama jayojjaya Jesosaa ojaya epeejji cuana yahuajo nei nei baꞌya poa quea jaꞌa nee onijje jjapeequi meesahua ca poa; ojaya epeejji jjeya nei baꞌyani peaꞌai jjapeequi meesahua cani onijje.  
\v 5 Jamajjeya Moisesi Eyacuiñajjija echacojji poa. Jiquio ecua echacojjiya equijo chaco neinei cani jama jayojja Moisesiya Eyacuiñajjija esohui pea cuana ba mee ca poa; ma Eyacuiñajjiya quijje huohui caje Moisesiya huohui ca poa peaꞌai.  
\v 6 Jesosa Quito ca ca Eyacuiñajjija Ebacua Ejja. Oya eꞌequi mese jayojjaya, equi chacojji jayojja pojjeama. Eseya ojaya equi jayojja poani. Eꞌe, eseya Eyacuiñajjija equi jayojja poani ca jama jjashahuabaquianijo tii baꞌa: —Eya Eyacuiñajjija epeejji. Ohuaya eya baꞌe tiitii mee cajeꞌyo onijje eyajo. 
\p Jamajjeya ¡jamaya huohui tiitiicue! ¡Jesosa nijje quea bihui nee jjapee tiitiiquicue! Ohuaya eseya jaahuana cani quea jaꞌa nee nee. 
\s1 Ojaya epeejji cuana jomishoca mee cajeꞌyo Jesosaa 
\p  
\v 7 Yahuajo nei nei Edojjoshahua Pameya esejaya etiiquiana esohui tehue mee ca poa jama baꞌa: 
\q1 “Jjeya nei Eyacuiñajji minijje mimianijo, ¡ojaya esohui shajjaꞌajja neineicue!  
\v 8 ¡Aꞌa shajjamaꞌ pojji! ¡Miquianajaya etiiquiana jayojja jja oe aꞌa pojji! Yahuajo nei Eyacuiñajjija esohui shajjaꞌajja jjima poa meshi jabojo nequija. Meshi quimajo nequi etiiquiana cuana quea mimishi nee nee poa. Jamatii Eyacuiñajji quenequene cuaji ajja poa etiiquiana nijje.  
\v 9 Eꞌe, miquianajaya etiiquiaa yahuajo nei baꞌya poaa Eyacuiñajji baꞌajja ca poa. Jama poa baꞌa: —Eya quea mimishi poanijo jamatii Eyacuiñajjiya eya etecueajji pojjeama —jama posoya jjabaquia poa cuana. Jamajjeya Eyacuiñajjiya jama aca poa baꞌa: —Miquianaya ca jja ca oe quea mimishi nee nee. Quea huiso shequiajame, 40 shequiajame eya miquianajo ishoaꞌajjaña poa miquianajaya mimishi cuana epajeaꞌyojji nisho.  
\v 10 Jamajjeya mimishi pajeaꞌyo ajjajo eya quea tecue miquiana nijje poa: Miquianajaya ejjashahuabaquijji quea quehua, quea tai. Ecuea esohui jayojja jama a sa poꞌyo ajja. Jjabahuejjaquiꞌyo ajja —jamaya Eyacuiñajji poa—.  
\v 11 Jamajjeya quea quene po majje eyaya miquianaya tecueajeanaje jama baꞌa: Shajjamaꞌ poanijo eꞌe jojo nei miquianaya ca mi ca oe edobiquijji pojjeama ecue meshi quea pame yasijje ejomishocajji, quea bei ebaꞌeꞌyojji peaꞌai”. 
\m Jamaya Eyacuiñajjiya etiiquiana cuana Moisesi nijje nequi tecueajea ca poa. Jamaya yahuajo nei esohui etehueꞌyo poa. 
\p  
\v 12 Ecuea epeejji cuana, jamajjeya oe ¡quea jaꞌa nee jjashahuabaquicue! ¡Eyacuiñajjija sohui jama acue! ¡Aꞌa quea quehua jjashahuabaquijji! Shajjamaꞌ po majje Eyacuiñajji nijje miya jjapee pajeaqui chanaꞌ. Tecuea ca chanaꞌ mi. Oya ca ca oe baꞌe tiitiiani, de.  
\v 13 Jesosaja pea epeejji cuana nijje ca ca mimi huichaꞌa huichaꞌacue jama baꞌa: —¡Jjeya nei Jesosa nijje ejjapee neineiqui! 
\p Jamaya poanijo miquianaya mimishi cuanaja edasiajji pojjeama; quea mimishi nee nee epojji pojjeama. 
\p  
\v 14 Eꞌe, Jesosa nijje jjapeequi jeahuajo eseya jjashahuaba neineiquinaje onijje eyajo ebaꞌe tiitiiꞌyojji. ¡Jamaya ejjashahuabaqui poqui! Jamajjeya quijje eseya onijje ona huoojeaꞌyojji poajeꞌyo tii tii eyajo. 
\p  
\v 15 Eꞌe, jamaya yahuajo nei esohui etehueꞌyo poa baꞌa: 
\q1 “Jjeya nei Eyacuiñajji minijje mimianijo ¡ojaya esohui shajjaꞌajja neineicue! ¡Aꞌa shajjamaꞌ pojji! ¡Miquianajaya etiiquiana jayojja jama aꞌa pojji!” 
\m Jamaya yahuajo Dabiya tehue ca poa. 
\p  
\v 16 ¡Bacue! Moisesiya esejaya etiiquiana Ejito meshijo baꞌe poqui meesahua caꞌya poa. Eyacuiñajji ona nijje mimi huichaꞌa huichaꞌa poa. Jamatii beshahua nei ojjaña shajjamaꞌ poa.  
\v 17 Ona nijje Eyacuiñajji quea quene nee poa quea shequiaja huiso nee neejo, 40 shequiajame. Oya cuana ca ca quea mimishi nee nee poa. Jamajjeya mano caꞌya poa, oe mano popoquiꞌya poa meshi jabojo, quimajo.  
\v 18 Shajjamaꞌ tiitii poajojo Eyacuiñajjiya oya cuana tecuea ca poa jama baꞌa: “Eꞌe jojo nei miquianaya ecue meshi yasijje edobiquijji pojjeama quea bei nee ejomishocajji. ¡Quea mimishi nee nee mi coma!” Jamaya Eyacuiñajjiya etiiquiana yahuajo nei nei baꞌya poa tecuea ca poa. 
\p  
\v 19 Jamajjeya eꞌe jojo nei oya cuana meshi quea pame nee yasijje dobiqui jjima poa ejomishocajji Eyacuiñajjija esohui shajjaꞌajja sa po ajja jjejojo, ojaya epeejji nei pojjeama jjejojoya. 
\c 4  
\s1 Etiiquiana jayojja jama eseya ejomishocajji yasijje dobiqui ajja po chanaꞌ 
\p  
\v 1 Jamajjeya Eyacuiñajjiya yahuajo nei etiiquiana huohui ca poa jayojja jama ohuaya jjeya eseya huohui cani jama baꞌa: —¡E que poeꞌyocue ejomishocajji, quea jjashahuabaqui bei nee nee epoꞌyojji! —oya poani. 
\p Jamajjeya ¡quea jaꞌa jjashahuabaquicue! ¡Pea cuana quea jaꞌa jjashahuabaqui meesahuacue! ¡Ojee Jesosaja epeejji nei pocue! Jamajjeya Eyacuiñajjiya eseya o jayojjaya jomishoca mee cajeꞌyo, ojjaña.  
\v 2 Eꞌe, yahuajo nei Eyacuiñajjiya esejaya etiiquiana cuana huohui ca poa esohui quea pame nee nee. Jjeya eseyaya jiquio esohui quea pame nee shajjaꞌajjaña peaꞌai, etiiquiaa jayojjaya. Etiiquiaa cuaa jiquio esohui shajjaꞌajja nisho ca poa. Shajjamaꞌ poaa jjejojo eshajjaꞌajjajeajji shajjaꞌajjajea caꞌya poa. Jamajjeya Eyacuiñajjiya oya cuana jomishoca mee jjima aca poa, etiiquiana cuana.  
\v 3 Eseyaya jjeya Eyacuiñajjija esohui quea pame nee eꞌe jojo nei shajjaꞌajjaña. Ojaya esohui jayojja jama añajo, onijje jomishoca mee cajeꞌyo, eseya. Eꞌe, etiiquiana aje jja oe shajjamaꞌ poajojo Eyacuiñajjiya tecuea ca poa jama baꞌa: 
\q1 “Jamajjeya quea quene po majje eyaya oya cuana tecueajeanaje jama baꞌa: —Shajjamaꞌ poanijo eꞌe jojo nei miquianaya edobiquijji pojjeama ecue meshi quea pame yasijje quea jaji nee ejomishocajji”. 
\m Jamaya Eyacuiñajjiya aca poa. Yahuajo ojjaña cuana panajeyo majje Eyacuiñajji jomishoca poa. Apoa ojjaña amajje Eyacuiñajji jomishoca poa. Jamatii etiiquiana shajjamaꞌ cuana tecuea ca poa jama baꞌa: 
\q1 “Oya cuana aje oe edobiquijji pojjeama ecuea meshi quea pame yasijje quea jaji nee ejomishocajji”. 
\m Jamaya Eyacuiñajji poa. 
\p  
\v 4 Eꞌe jojo nei pea esohui yahuajo nei etehueꞌyo jama poa baꞌa: 
\q1 “Eyacuiñajjiya ojjaña panajeyo ca poa quea cahui huisojo, me oejje oe, 6 cahuime. Majoya ojjaña apoa amajje oya jomisho ca poa cahui oe”.  
\v 5 Eꞌe, etiiquianajo aje oe jama tehueme ya peaꞌai poa baꞌa: “Oya cuana aje oe dobiqui jjima poaje enijje jomishocaa”. 
\p  
\v 6 Jamajjeya etiiquiana cuana yahuajo nei baꞌe yasijje ebionei Eyacuiñajjiya oja esohui quea pame nee huohui ca poa. Shajjamaꞌ poa jjejojo dobiqui jjima poa Eyacuiñajjija meshi quea pame yasijje onijje jomishocaa. Pea cuana ca ca Eyacuiñajji que dobiquije jomishocaa.  
\v 7 Jamajjeya etiiquiana cuana Moisesi nijje nequi jjashajjaꞌajjaqui ajjajojo jomishoca mee jjima aca poa. Jamajjeya Eyacuiñajjiya quijje nei Dabi tehue mee ca poa jama baꞌa etiiquianaja osecua cuana huasijje: “¡Jjeya nei jjashajjaꞌajjaquicue!” Jamaya Eyacuiñajji poanaje esejaya etiiquiana nijje, ma Dabi nijje nequi nijje. Jamajoya eyaya Dabija etehueꞌyo huohuije oꞌoya jama baꞌa: 
\q1 “Jjeya nei Eyacuiñajji minijje mimianijo ¡ojaya esohui shajjaꞌajja neineicue! ¡Aꞌa shajjamaꞌ pojji!” 
\m Jamaya yahuajo nei Dabiya tehue ca poa etiiquianaja onijje baꞌeja ebajji. 
\p  
\v 8 Eꞌe, Eyacuiñajjiya Josoe etiiquiana cuana ojaya meshi quea pame yasijje poqui meesahua ca poa. Jamatii jomishoca jjima poa; quea jjashahuabaqui jaꞌa po jjima. Jamajjeya esejaya eba Eyacuiñajji jjashahuabaquiani jama baꞌa: —Quijje eyaya ojjaña ecuea epeejji nei cuana jomishoca meejeꞌyo —Eyacuiñajji poani. 
\p  
\v 9 Eꞌe, quijje Eyacuiñajjiya ojjaña ojaya epeejji cuana jomishoca tiitii mee cajeꞌyo onijje. Yahuajo nei ohuaya me oejje oe, 6 cahuime ojjaña panajeyo ca poa. Panajeyo majje jomisho ca poa oe cahuime. O jayojjaya Eyacuiñajjiya ojaya epeejji nei cuana jomishoca mee cajeꞌyo.  
\v 10 Jamajjeya Eyacuiñajjiya me oejje oe cahuime chaco majje chaco pajea ca poa; o jomishoca poa jayojjaya eseya Jesosa nijje jjapeequi majje quea bei jjashahuabaquiani. Quijje chacochaco pajeajeꞌyo, jomishoca tiitiijeꞌyo onijje eyajo.  
\v 11 Jamajjeya ¡jjashajjaꞌajjaquicue oe! ¡Quea jaꞌa nei jjashahuabaquicue Jesosaja epeejji nei epojji, eꞌe jojo nei onijje ejomishoca tiitiiꞌyojji! ¡Aꞌa oe esejaya etiiquiana jama pojji! Shajjamaꞌ poani Eyacuiñajji nijje ejomishocajji pojjeama. Cajaa mi acajeꞌyo. 
\p  
\v 12 Eꞌe, Jesosa nijje jjapeequianijo oya ese nijje mimiani, o jayojja ameesahua cani. Ojaya esohui jayojja jama ohuaya eseya eꞌe jojo nei ameesahua cajeꞌyo. Eꞌe, ojaya esohui baa se beca jama. Jiquio ecua baaa shejjishejjiya jehuijaꞌajea majje esaꞌ ba cani jama jayojjaya Eyacuiñajjiya esejaya ejjashahuabaquiꞌyojji cuana ba cani. Eꞌe, Eyacuiñajjija esohui ba neinei majje eseya jjashahuabaquije esejaya ebaꞌejjijo quea jaꞌa pojjaꞌa, quea mimishi pojjaꞌa poani.  
\v 13 Eꞌe jojo nei ojjaña Eyacuiñajjija eba oja panaꞌyo. Chamaꞌ Eyacuiñajjijo ejjanequi quehuaquijji, de. Jamajjeya quijje nei o cojja nei nequi majje eseyaya huohuijeꞌyo quio eseya eshe nequiya anequinaje cuana. 
\s1 Jesosa esejo Eyacuiñajji nijje mimianijo ¡quea jaꞌa nee jjapeequicue! 
\p  
\v 14 Jamajjeya ¡Jesosa nijje jjapeequicue! Jesosa ca ca oe nei Eyacuiñajji nijje mimi neineiani; oya Eyacuiñajji nijje emimijji etii quea pame nee nee. Oya Eyacuiñajjija Ebacua Ejja oe nei. Eyahuasijje poquiꞌyonaje. Oja Chii pejjejo nequi, Eyacuiñajji pejjejo. Onijje mimiani esejo. Jamajjeya ¡Jesosa nijje eꞌe nei jjapeequicue!  
\v 15 Eꞌe, Jesosa Eyacuiñajji nijje mimi neineiani esejo. Oya ese jayojjaya quea nee poanaje. Jamajjeya: —Jesosa, eya quea nee, quea yeno nee ani —eseya poani. 
\p Eseya Jesosa nijje jamaya mimiajo, ohuaya eseya sajaꞌa cani jama baꞌa: —Eꞌe, ecuea eba. Eya quea nee nee, quea yeno nee nee peaꞌai poanaje. Jamajjeya eyaya miya jaahuanaje —jamaya Jesosaa eseya acani. 
\p Satanasaa Jesosa quea mimishi po mee sa aca poa. Jamatii jjadasia meequi ajja poa. Jesosa ca ca oe quea mimishi po ajja nei nei poa. Jamajjeya eseya quea mimishi poajo, ohuaya, Jesosaa eseya jaahuana cani tecueꞌamaa jjejojo.  
\v 16 Jamajjeya ¡Jesosa nijje bichoꞌama emimi! Ohuaya esejaya mimishi cuana cuijea cajeꞌyo. Eseya ojaya quea jea nee poanijo quea pame nee jaahuana cajeꞌyo tii tii. Caꞌaꞌama poajo quea caꞌa po mee cajeꞌyo peaꞌai. 
\c 5  
\p  
\v 1 ¡Bacue! Eyacuiñajjija esohui jama jayojja esejaya etiiquianaa beca dejja onijje nequi babaca ca poa Eyacuiñajji nijje emimijji etii epojji. Babaca majje huoojea ca poa jama baꞌa: —¡Eyacuiñajji nijje mimicue esejo! ¡Aquiana cuana, ijjiacajji cuana ehuoneꞌ nequi peaꞌai dahuacue ecuanaja yajji, Eyacuiñajji ecuanaja mimishijo quea bei epo meejji! —jamaya aca poa etiiquianaa. 
\p  
\v 2 Ojjaña esejaya etiiquiana caꞌaꞌama, Eyacuiñajjija esohui ba neinei po jjima cuana, quea mimishi poa. Ma Eyacuiñajji nijje emimijji etii caꞌaꞌama peaꞌaijo oya pea cuana nijje tecueꞌama poa. Quea bei mimianinaje Eyacuiñajji nijje pea cuanajo.  
\v 3 Jamatii oya caꞌaꞌama jjejojo quea mimishi poani peaꞌai. Jamajjeya ijjiacajji ehuoneꞌ jaja majje onaja mimishijo dahuajea jeahuajo Eyacuiñajji nijje mimia poa jama baꞌa: —Eyacuiñajji, ¡ecuea mimishi cuijeaꞌyocue! —acaninaje ohuaya. Majoya jama poa baꞌa: —Eyacuiñajji, ¡jiquio eꞌaquiana meseja mimishi cuijeaꞌyocue peaꞌai! —huohuime acaninaje Eyacuiñajji nijje mimianijo. 
\p  
\v 4 Quea pame nee Eyacuiñajji nijje emimijji etii epojji. Dejja cuana mimi ajja Eyacuiñajji nijje jama baꞌa: —Eya ca iña jamatii minijje emimijji etii poaje —jamaya mimime epojji pojjeama. Chojja. Eyacuiñajjiya oeyaya iyaa majje onijje emimijji etii po mee ca poa. Jamaya yahuajo nei ohuaya ebionei onijje emimijji etii Anoni bajjani aca poa. 
\p  
\v 5 Jamajjeya jamaya peaꞌai Jesosa Quito Eyacuiñajji nijje emimijji etii jamatii po jjima poa. Oya Eyacuiñajjija ebabaca poa. Eyacuiñajjiya ca ca oe Jesosa onijje emimijji nei po mee ca poa yahuajo nei nei. Jama poa baꞌa: “Eyaya miya ojjaña ba mee aña cuana miya ca ca oe ecue Bacua Ejja. Eya ca ca iña mique Chii” jamaya Eyacuiñajjiya Jesosa acanaje.  
\v 6 Majoya huohui ca poa jama peaꞌai baꞌa: 
\q1 “Miya enijje emimijji poajeꞌyo tii tii Menequisine jama. Oya yahuajo nei nei enijje emimijji nei po tiitiia poa”. 
\m Jamaya yahuajo nei nei Eyacuiñajjiya tehue mee ca poa esohui Jesosajo. 
\p  
\v 7 Eꞌe, yahuajo nei Jesosa ese nijje nequiahua oya Eyacuiñajji nijje mimi huichaꞌa huichaꞌanaje jama baꞌa: —Ecue Chii, ¡nahuecue mo! Onaaya eya quecuajea ca chanaꞌ —jamaya Jesosa mimi neineinaje Eyacuiñajji nijje. Quea yeno nee nee jjejojo panaje. Oya Jesosa quea caꞌa pojjeama jjabaquinaje. Oja Chii quea bihui po mee sa acanaje. Jamajjeya onijje mimiajo Eyacuiñajjiya shajjaꞌajja canaje. Eyacuiñajjiya Jesosa manoꞌyo jjima po mee sa ajjima jojjemo Jesosa manoꞌyo jjima poquiaye. 
\p  
\v 8 Jesosa Eyacuiñajjija Bacua Ejja oe nei. Jamatii oya quea nee nee poa mimishi cuaa quecua caꞌyajje. Eyacuiñajjija ejjashahuabaquiꞌyojji jayojja jama baꞌyanijo, quea nee nee poꞌya poa onaa napa neinei cajje. Eꞌe, ojaya eba ojjaña joya Eyacuiñajjija esohui jayojja jama baꞌe sa poani jjeya meshijo baꞌe quea nee nee poaje onaa napa cajje.  
\v 9 Jamajjeya Eyacuiñajjiya Jesosa yahuajo nei jama aca poa baꞌa: —Miya ca ca oe nei quea pame nee nee mimishi cuijeaꞌyojji epojji. Pea chamaꞌ mimishi cuijeaꞌyojji —aca poa Eyacuiñajjiya. 
\p Jamajjeya Jesosaa esejaya mimishi cuijeaꞌyo majje baꞌe tiitii mee cajeꞌyo, joya o shajjaꞌajjajji poani nei. 
\p  
\v 10 Eꞌe, yahuajo nei Eyacuiñajjiya oya huohui ca poa jama baꞌa: “Eꞌe jojo nei miya ojjaña jaahuanajji poaje. Miya enijje emimijji etii poajeꞌyo tii tii; Menequisine jama, ma yahuajo nei enijje emimijji nei poa jayojja jama miya poajeꞌyo”. 
\s1 ¡Quea jaꞌa nee Jesosa nijje jjapeequicue! 
\p  
\v 11 Ecuea esohui ma Eyacuiñajji nijje emimijji neijo, Menequisine bajjanijo apoa pojjeama. Maya jamatii quea camaja eba meejji. Miquianaya ca ca oe jjashahuabaqui ajjaa jjejojo Eyacuiñajjija esohui oe pojji baña. Jamajjeya jiquio esohui miquianajaya quea quehua poaje.  
\v 12 Eꞌe, miquianaya yahuajo nei Jesosaja epeejji poa. Jamajjeya miquianaaya aje oe epeejji eyacua esohui ehuohuinaje ese. Jamatii onaaya miquianaya casohuihuohui huichaꞌa huichaꞌa cahua epeejji eyacua jayojja jama, de. Jiquio ecua ebacua jjeya cuaya tojjojo baꞌe, bobi ijjia po jjima jayojja jamaya miquianaaya Eyacuiñajjija esohui camajaꞌama nei nei baña de, esohui ebionei camajaꞌama ebajji jama.  
\v 13 Eꞌe, ebacua jjeya cuaya tojjojo baꞌe jayojja jama miquianaya Jesosaja epeejji eyacua jama; ojaya epeejji quea jaꞌa po jjima. Jamajjeya ebaꞌejji quea tai ma Eyacuiñajjija botiꞌama miquianajaya ba jjima, ebaꞌejji quea pame ma Eyacuiñajjija quea boti nee miquianajaya ba jjima peaꞌai.  
\v 14 Jiquio ecua etiiya bobi ijjia cani jayojja jama Jesosaja epeejji quea jaꞌa neeya ojjaña ojaya esohui ba cani. Ebaꞌejji quea mimishi amaja ajja, ma Eyacuiñajjija botiꞌama. Quea pame nee acani ohuaya. Jamaya Jesosaja epeejji quea jaꞌaa esohui huohui cani onajaya ebajji. 
\c 6  
\p  
\v 1 Yahuajo Jesosa nijje jjapeequi jeahuaa eseyaya shajjaꞌajjanaje Eyacuiñajjija esohui quehuaꞌama. ¡Jjeya ca ca ojjaña ojaya esohui Jesosaja bacue! ¡Quea jaꞌa nee pocue Jesosaja epeejji etii! Eꞌe, yahuajo jjeya nei jjapeequi jeahuaa Jesosaja esohui quehuaꞌama shajjaꞌajjanaje jama baꞌa: —¡Miquea mimishi pajeaꞌyocue! ¡Jesosaja epeejji nei pocue!  
\v 2 ¡Onaaya miya cabesa mee cahua Jesosa nijje epojji! Onaaya miquianajaya esapajo emeꞌ huana caje Edojjoshahua Pame miquianaa que edobiquijji. Eyacuiñajjiya emanoꞌyo cuana shequi mee caje oꞌoya. Shajjamaꞌ cuana Eyacuiñajjiya quea nee nee po mee cajeꞌyo —jamaya yahuajo Jesosa nijje jjapeequi jeahuaa eseyaya shajjaꞌajjanaje esohui quehuaꞌama. 
\p  
\v 3 ¡Jjeya ca oe Eyacuiñajjija esohuijo ojjaña ejjashajjaꞌajjaqui Jesosaja epeejji quea jaꞌa nee epojji! Eꞌe, jamaya poaje Eyacuiñajji nijje mimianijo jama baꞌa: —Eyacuiñajji, ¡ecuana ba meesahuacue ojjaña miquea esohui! 
\p  
\v 4 Eꞌe, beca cuana aje oe Eyacuiñajjija esohui shajjaꞌajja majje jama poani baꞌa: —Eya ecue mimishijo quea yeno. Mimishi pajea neineijeꞌyo Jesosa nijje ejjapeequijji —poani. 
\p Jamatii quijje shajjamaꞌ nei poaje oꞌoya pojjaꞌa. Jamaya po majje oya cuana mimishi pajea sa poꞌyo ajja, de. Jesosa, eseja mimishi cuijeaꞌyojji pajea neinei caꞌyani, de. Pea chamaꞌ mimishi cuijeaꞌyojji. Jamajjeya chamaꞌ o mimishi cuijeaꞌyojji. Eꞌe, oya cuana aje oe yahuajo jama poa baꞌa: Yahuajo Eyacuiñajjija esohui quea pame eꞌe nei shajjaꞌajja canaje. Eyacuiñajjiya oya cuana quea pame nee acanaje. Ba mee canaje Jesosaa baꞌe tiitii mee cani ojaya epeejji nei onijje eyajo. Ba mee canaje Edojjoshahua Pameya oya cuana jaahuana cajeꞌyo peaꞌai.  
\v 5 Ba canaje peaꞌai Eyacuiñajjija esohui quea pame nee nee jayojja jama baꞌyanijo quea bei nee poajeꞌyo. Eyacuiñajjiya acanaje jayojja ma dejjaa ajjima acani ba canaje peaꞌai. Eꞌe, jamaya ojaya eba poanaje.  
\v 6 Jamatii aje oe shajjamaꞌ po oꞌoyani, de. Jesosa cajaa amajje pea chamaꞌ mimishi cuijeaꞌyojji. Eꞌe, yahuajo dejja mimishiya Eyacuiñajjija Bacua acui ecueataꞌapeejo caca ca poa jayojja jama oya cuana Jesosa quecuaꞌyojji jayojja poani. Jesosa cajaa ajji poani. Jesosa niñeba ca oꞌoyani ojjañaja eshajjaꞌajjajji. Quea tai nee nee ca ca oma. 
\p  
\v 7 Que quea pamejo ena po majamajajo bobi tii cuajiani quea pame nee. Apoa poajo eque meseya bobi chicha cani. Jamaya Eyacuiñajjiya quea pame nee nee po mee cani.  
\v 8 Que quea taijo ca ca bobi tii ajja. Jjono, acuisha, acui pojjaꞌa pohuani. Jamajjeya eque meseya que cajaa acani jama baꞌa: —Jiquio que jehuaꞌyonaje, cajaa —acani. 
\p Jiquio ecua eque meseya que cajaa acani jayojjaya jama acajeꞌyo Eyacuiñajjiya. Quea nee nee po mee cajeꞌyo cuaquijo jiquio Jesosa cajaa ajji nei nei poani cuana. 
\s1 Jesosa cajaa aꞌajja eseya ohuaya eꞌe jojo nei baꞌe tiitii mee cajeꞌyo onijje 
\p  
\v 9 Eꞌe Jesosaja epeejji cuana, jiquio eyaya esohui quea tecue tehueaña miquiana jjashajjaꞌajjaqui ajjajo. Jamatii miquianaya ecuea quea jea nee nee. Miquianajo jjashahuabaquiani jama baꞌa: —Ecuea epeejji cuana, miquianaaya Jesosa cajaa yajji pojjeama. Chojja. Ojaya epeejji poanijo, Jesosaa miquianaya ojaya esohui jama atiitii meesahua cajeꞌyo —jamaya eya poani. 
\p  
\v 10 Eꞌe, yahuajo, jjeya peaꞌai miquianaaya Jesosaja epeejji cuana quea jea nee añajo pea cuana baꞌe meesahuaña tii quea jaꞌa nee. Jamajjeya Jesosaja epeejji cuana quea jea añajo Jesosa quea jea nee aña peaꞌai. Jamaya Eyacuiñajjija eba. Jamajjeya ohuaya quea pame nee nee sosequia cajeꞌyo quea pame nee miquiaaya añajo. Eꞌe, ohuaya quea jaꞌa nee acani tii tii.  
\v 11 Cuanaya eyaya miquianaya huohuiaña jama baꞌa: ¡Jesosaja epoe oꞌoyajjijo ishoacue! ¡Jamaya atiitiicue! ¡Quea jaji nee baꞌe tiitii poquicue ojjaña Jesosaja epeejji cuana nijje! Jamajjeya ecuea eba poaje eꞌe jojo nei miquianaya Jesosaja epeejji nei onijje baꞌe tiitiijeꞌyo.  
\v 12 Eꞌe, yahuajo Eyacuiñajjiya eseya jama acanaje baꞌa: —Eyaya miquianaya baꞌe tiitii meejeꞌyo enijje —oya poanaje. 
\p Jamajjeya ¡aꞌa quea huea pojji! Eyacuiñajjija epeejji nei jama jjashahuabaquime pocue baꞌa: Eyacuiñajjiya eꞌe jojo nei ojjaña ma ecua ohuaya huohui canaje jamaya ajeyojeyo cajeꞌyo. ¡Aꞌa jjashahuabaquijji ohuaya jama ajjima eꞌacaje poso! 
\s1 Eyacuiñajjiya jiquio ecua ohuaya huohui canaje jamaya acani eꞌe jojo nei 
\p  
\v 13-14 Eꞌe, yahuajo nei nei Eyacuiñajji miminaje esejaya etiiquiana nijje, Amajama nijje jama baꞌa: 
\q1 “Eyaya miya quea pame nee aje. Eꞌe jojo nei miquea ebacua cuayaje dejja shoꞌi. Miquea osecua quea huiso nee nee poajeꞌyo. Eya ca ca oe nei quea caꞌa nee nee poanijo jamaya ameejeꞌyo. Chamaꞌ pea e huoojeaꞌyojji poani”. 
\m Jamaya Eyacuiñajjiya aca poa. 
\p  
\v 15 Amajama shajjaꞌajja majje jjashahuabaquia poa jama baꞌa: —Eꞌe jojo nei ma ohuaya huohui canajeya jamaya acaje Eyacuiñajjiya. Jamajjeya ecuea ebacua cuayaje. Ecuea osecua cuana quea huiso nee nee poaje —jamaya Amajama jjashahuabaqui pajea ajja nei nei poa. Jamajjeya Eyacuiñajjiya jamaya acanaje. Quijje nei Amajamaja bacua cuaya poa dejja shoꞌi. 
\p  
\v 16 Eseya ca ca jama poani baꞌa: —Eꞌe jojo nei jiquio ecua eyaya huohuiaña jama neiya eyaya aje. 
\p Jamaya po majje pea huasijje poquiani dejja etii yasijje jama huohuiya baꞌa: —¡Ecuea esohui etehueꞌyojo miquea bajjani tehuecue ojjañaja ebajji eꞌe jojo nei eyaya ecuea esohui aje! Eꞌe, Eyacuiñajjiya ba canijo eyaya ecuea esohui jayojja jama ajeꞌyo —jamaya eseyaya aña. 
\p Jamajjeya dejja etiija bajjani etehueꞌyo ba majje onajaya eniñebaꞌyojji pojjeama jama baꞌa: —Chojja, ojaya esohui jayojja jama eꞌaꞌyojji pojjeama ohuaya. 
\p  
\v 17 Oya jayojja Eyacuiñajjiya ojaya epeejji cuana jama acani baꞌa: —Eꞌe jojo nei ma ecua eyaya miquianaya huohuinaje jamaya eyaya miquianaya eꞌe jojo nei baꞌe tiitii meejeꞌyo enijje. 
\p Jamaya amajje oya jamaya poanaje peaꞌai baꞌa: —Eya eshe tii tii nequi. Jamajjeya ecuea esohui epajeaꞌyojji pojjeama; jamaya eyaya eꞌe jojo nei ajeꞌyo —jamaya ohuaya aca poa ojjañaja ebajji. 
\p  
\v 18 Eꞌe, Eyacuiñajjiya ma ecua ohua huohui ca poa jayojjaya jama acajeꞌyo. Oya siajje po ajja nei nei. Oya eshe tii tii nequi quea caꞌa nee nee. Jamajjeya ojaya esohui epajeaꞌyojji pojjeama. Jamaya eꞌe jojo nei acajeꞌyo. Jamajjeya ¡Jesosa nijje ejjapeequi quea bihui nee nee! Jiquio ecua bishe jaadobiquiajo, onaa jjono jea cajo seya iñacuajiaña ehuiꞌiꞌyo poaniya jjejojo jayojja jama eseya Eyacuiñajji nijje mimiani ese jaahuanajji, ese baꞌe tiitii meeꞌyojji onijje eyajo.  
\v 19 Eꞌe, acui caꞌacaꞌajo bishe ai jeyo cani cuaa edojojea ca poajejje, ehuiꞌiꞌyo poajejje jayojja jama eseya Jesosa nijje jjapeequiani ese jaahuanajji, ese nahuejji, eshahua nijje epoquiquehua poaje jjejojo. Quea caꞌa nee Jesosa, de. Eꞌe, jama poani baꞌa: Jodioja Eyacuiñajji nijje emimijji etii cuana Eyacuiñajjija equi yasijje dobiqui majje equi dojjojo pea equecuayijji sisi yasijje dobiqui majamajanaje daquija secue pene yasijje. Ma equecuayijji sisi yasijje Jodio cuana oe nei dobiquinaje Eyacuiñajji nijje mimiya ojjañaja mimishi cuijeaꞌyojji. Jesosa ca ca eyahuasijje dobiquiꞌyonaje. Jjeya oya Eyacuiñajji pejjejo yani. Onijje mimiani esejo.  
\v 20 Eꞌe, ese eyahuasijje poqui jjimahuajo, Jesosa eyahuasijje poquiꞌyonaje. Huohui canaje jama baꞌa: —Ecuea epeejji cuana quijje eyahuasijje poejeꞌyo enijje ebaꞌe tiitiiꞌyojji —jamaya Jesosa poanaje ese jjabahuejja neineiquijji. 
\p Jamajjeya Jesosa Eyacuiñajji nijje emimijji oe nei quea caꞌa nee nee poani. Jamaya oya po tiitiiꞌyani. Yahuajo nei nequi Eyacuiñajji nijje emimijji Menequisine bajjani jayojja jama poanaje Jesosa. 
\c 7  
\s1 Menequisine Eyacuiñajji nijje emimijji nei poa 
\r (Genesis 14) 
\p  
\v 1 Eꞌe, jiquio Menequisine yahuajo nei nei nequia poa. Oya Sanemi cuiñajji meshi mese poa. Eyacuiñajji nijje emimijji nei peaꞌai poa. Eyacuiñajjiya quea caꞌa nee neeya oya jamaya po mee ca poa. Jamajjeya yahuajo nei etiiquiana Amajama pea emeshi mese quea mimishi cuana quecua jeyojeyoꞌyo majje poeꞌya poa. Ma ba majje Menequisine jama poa baꞌa: —Amajama, miya quea pame nee. ¡Eyacuiñajjiya miya quea caꞌa nee capo mee cahua! —aca poa. 
\p  
\v 2 Amajamaa aquiana cuana quea huiso nee nee ye caꞌya poa, ma emeshi mese mimishi cuanaja sii ye caꞌya poa. Ma aquiana iye huiso quia ca poa Menequisineja epojji; jama aca poa baꞌa: Amajamaja aquiana ome miji peaꞌai huisome, 10 huisome yanijo ohuaya oe quia ca poa Menequisineja epojji. Peapea aquiana cuana ojjaña aquiana jamaya aca poa. Menequisineja bajjani Ese Ejjaja esohuijo jama baꞌa: Emeshi mese quea jaꞌa nee baꞌyani bajjani. Emeshi mese quea bei baꞌyani bajjani peaꞌai oya Sanemi cuiñajji meshi mese poanijo.  
\v 3 Oya cuamejje pojjaꞌa poa; ecuanaja ba jjima Menequisineja chii bajjani, ojaya enaese bajjani ba jjima peaꞌai, ojaya ebacua ecuanajaya bajjani ba jjima peaꞌai. Oya ache shono cuaya poa ba jjima, ache shono manoꞌya poa ba jjima peaꞌai. Chamaꞌ etehueꞌyo poa. Eyacuiñajjiya ca pa ca oe Menequisine huohui ca poa jama baꞌa: —Menequisine, ¡miya enijje emimijji nei pocue! ¡Jamaya po tiitiicue! —aca poa. Oya jayojja Eyacuiñajjiya oja Bacua Ejja huohui ca poa peaꞌai. 
\p  
\v 4 Jamejjeya ¡jjashahuabaquicue Menequisinejo! Dejja etii quea pame nee nee oya poa. Amajama ca ca dejja etii quea pame nee peaꞌai poa. Eꞌe, esejaya etiiquiana Amajamaa oya aquiana quia ca poa ma aquiana emeshi mese mimishi cuanaja sii jjequiꞌyo majje iye huiso quia caꞌya poa Menequisineja epojji.  
\v 5 Amajama manoꞌyajo, quijje nei Moisesiya Amajamaja osecua Nemi bajjani Eyacuiñajjija esohui huohui ca poa, Anonija bacua ejja. Jama aca poa baꞌa: “Nemi miya, miquea ebacua cuana peaꞌai Eyacuiñajji nijje emimijji poajeꞌyo Jodio cuanajo. Jamajjeya Jodio cuaa miya caquia cahua aquiana ebaꞌejji, jama caquia cahua baꞌa: Ojaya ome miji peaꞌai, 10 huisome aquiana yanijo oe caquia cahua. Ojjaña ojaya aquiana cuana jamaya caꞌa cahua” jamaya Eyacuiñajjija esohui etehueꞌyo poani. 
\p Nemi, ojjaña Jodio cuana peaꞌai Amajamaja osecua cuana. Jamatii Jodio cuanaja mahuisoya aquiana cuana jjeshe ca poquia poa Nemija bacua cuaa, oja huapa pojjeama cuanaja aquiana.  
\v 6 Menequisine ca ca yahuajo nei nei baꞌya poa Nemi cuaya jjimahuajo, Nemi Jodio cuanaja Eyacuiñajji nijje emimijji po jjimahuajo. Jamajjeya Nemija bacua pojjeama Menequisine poa. Jamatii Amajamaa oya aquiana quia ca poa. Eꞌe, yahuajo nei Eyacuiñajjiya Amajama huohui ca poa jama baꞌa: “Amajama, jiquio meshi miquea poajeꞌyo. Miquea osecua cuanaja poajeꞌyo tii tii” aca poa Eyacuiñajjiya. “Miquea osecua cuana quea huiso nei nei poajeꞌyo” aca poa peaꞌai. 
\p Jamatii Amajamaa aquiana quia cajje Menequisineya huohui ca poa: —Amajama, miya quea pame. ¡Miya quea caꞌa capo mee cahua Eyacuiñajjiya! —aca poa. 
\p  
\v 7 Eꞌe, Eyacuiñajji nijje emimijji Menequisine bajjani Amajama nijje miminaje Eyacuiñajjiya oya quea caꞌa epo meejji. Jamaya esejaya eba Amajama beshahua nei quea pame nee, Menequisine ca ca quea pame nee nee. Jamajjeya quea pame nee neejo Amajama oya iye huiso aquiana cuana quia ca poa.  
\v 8 Quijje Jodio cuaa aquiana cuana iye huiso quia ca poquia poa Amajamaja osecua Eyacuiñajji nijje emimijji cuana huasijje, Nemi, oja bacua ejja cuana huasijje. Jamatii ma Eyacuiñajji nijje mimiani cuana mano ca poquiꞌya poa. Menequisinejo ca ca Eyacuiñajjija esohui jama poani baꞌa: —Menequisine, ¡miya enijje emimijji nei po tiitiicue! —poani. 
\p  
\v 9-10 Menequisine yahuajo baꞌya poa Amajamaja osecua jea jjimahuajo. Amajamaa iye huiso aquiana Menequisine quia canaje. Jamajjeya Jodio cuaa huohui cani jama baꞌa: —Amajamaa aquiana quia ca poa; Nemiya peaꞌaiya aquiana quia canaje, oya Amajamaja osecuaja cuiisaꞌ dojjojo nequiahuaa —jamaya Jodio poani Nemijo, oja osecua cuanajo peaꞌai. Jamatii quijje nei Nemiya, oja osecua cuaa peaꞌai Eyacuiñajji nijje emimijji poanijo Jodioja aquiana iye huiso jjeshe ca poquia poa ojaya epojji, ojaya osecua cuanaja epojji peaꞌai. 
\p  
\v 11 Eyacuiñajjiya Nemi, oja bacua cuana peaꞌai huoojea ca poa onijje emimijji epojji, ojaya esohui Jodio cuana ba meesahuajji, quea jaꞌa ebaꞌe meesahuajji peaꞌai. Jamatii oya cuana aje oe dejja cuana poa, Eyacuiñajjija epeejji pishana poa. Jamajjeya Eyacuiñajjija esohui jayojja jama baꞌe tiitii jjima poa. Jamajoya Eyacuiñajjiya pea onijje emimijji nei huoojea canaje, Nemija osecua pojjeama, pea. Eꞌe, ohuaya Jesosa Quito huoojea canaje. Jesosa Eyacuiñajji nijje emimijji nei poanaje, Anoni jama pojjeama. Oya Jesosa Eyacuiñajji nijje emimijji nei Menequisine jayojja jama poanaje. Eꞌe, Jesosaa ca ca oeyaya eseya Eyacuiñajjija esohui jayojja jama ameesahua cani.  
\v 12 Eꞌe, Moisesija esohui jayojja jama Anonija osecua cuana Eyacuiñajji nijje emimijji cuana poa. Jjeya ca ca Eyacuiñajjiya pea onijje emimijji po mee canaje, oja Bacua Ejja Jesosa, Anonija osecua pojjeama. Jamajjeya jjeya eseya yahuajo jama baꞌe ajja. Moisesija esohui jayojja jama amaja ajja. Jjeya ca ca eseya baꞌyani Emeshi Mese nei Jesosaja esohui jayojja jama, yahuajo jama pojjeama. Jamajjeya Eyacuiñajjiya eseya ba caꞌyani mimishiꞌamaꞌyo.  
\v 13-14 Eꞌe, yahuajo Eyacuiñajjiya Jesosa jama aca poa baꞌa: —Jamajjeya miya enijje emimijji nei poajeꞌyo ecuea epeejji cuanajo —Eyacuiñajjiya aca poa. 
\p Jamatii Jesosa Nemija osecua pojjeama poa. Pea oya de, etiiquiana Jodaja jeaja osecua. Joda ca ca Eyacuiñajji nijje emimijji nei pojjeama poa. Jamajjeya Jodaja jeaja osecua cuanaja aquiana cuana dahua jjima poa mei eꞌiya sohuajo Eyacuiñajji quea bei mimishi cuana nijje epo meejji. Chojja, jamaya pojjeama Moisesija esohui Jodaja osecua cuanajo. Jamatii Eyacuiñajjiya Jesosa jama aca poa baꞌa: —Miya enijje emimijji nei nei poajeꞌyo ecuea epeejji cuanajo. 
\p  
\v 15 Jamajjeya ecuea esohui Eyacuiñajji nijje emimijjijo jjeya miquianajaya quea jaꞌa poani jama baꞌa: Eyacuiñajji nijje emimijji Jesosa Quito poanaje. Jamatii oya Eyacuiñajji nijje emimijji nei Menequisine jayojjaya, Nemija osecua pojjeama.  
\v 16 Jamajjeya Jesosa ca ca oe Eyacuiñajji nijje emimijji nei poanaje, Eyacuiñajjija huoojeaꞌyo, dejjaja, Moisesija peaꞌai huoojea pojjeama. Oya Jesosa quea caꞌa nee nee, enequi tiitiiꞌyo peaꞌai. Jamajjeya oya Eyacuiñajji nijje emimijji nei poanaje ojaya epeejji cuanajo.  
\v 17 Yahuajo nei Dabiya Eyacuiñajjija esohui tehue ca poa jama baꞌa: “Miya enijje emimijji nei poajeꞌyo ecuea epeejji cuanajo. Jamaya poajeꞌyo tii tii, enijje emimijji nei Menequisine jayojja jama” jamaya Eyacuiñajji poanaje Jesosa Quito nijje. 
\p  
\v 18-19 Etiiquiana Moisesija esohui ajji poani yahuajo quea pame pojjeama baꞌya poa. Mimishiꞌama po mee jjima poa. Jamajjeya etiiquiana Moisesija esohui jayojja jama jjeya apajea caꞌyonaje. Jjeya ca ca eseya Jesosaja epeejji poanijo ojaya esohui jayojja jama baꞌyani, yahuajo jayojja jama pojjeama. Eꞌe, Jesosa Eyacuiñajji nijje mimiani esejo. Eyacuiñajjija bacua cuana eseya po mee cani. Jamajjeya baꞌe tiitii mee cajeꞌyo onijje eyajo. 
\p  
\v 20-21 Eꞌe, Eyacuiñajjiya Jesosa huohui ca poa jama baꞌa: 
\q1 “Eya Eyacuiñajji quea caꞌa nee enequi tii tii quea jaꞌa nee. Ecuea esohui jayojja jama eyaya eꞌe jojo nei ajeꞌyo. Eyaya jama huohuiaña baꞌa: —Miya ecuea cuana epeejjijo mimi tiitiijeꞌyo enijje”. 
\m Jamaya Eyacuiñajjiya aca poa. Eꞌe, Eyacuiñajjiya Jesosa huohui neinei ca poa onijje emimijji, ese baꞌe tiitii meeꞌyojji. Yahuajo nei Nemija osecua cuana onijje emimijji poanijo Eyacuiñajji ojjaña nijje mimi jjima. Jjeya Jesosa Eyacuiñajji nijje mimianijo ca ca Eyacuiñajji ojjaña ese nijje mimiani. 
\p  
\v 22 Jamajjeya esejaya eba eꞌe jojo nei Eyacuiñajjija esohui ma ecua ohuaya Jesosa huohui ca poa jamaya ohuaya eꞌe jojo nei acaje quea pame nee nee. Jamajjeya ohuaya ojjaña ojaya epeejji cuana onijje baꞌe tiitii mee cajeꞌyo. Ma ohua Moisesi huohui ca poa ca ca quea pame pishana: Ojaya esohui jayojja jama baꞌe neineiajo ojaya ebabaca poajeꞌyo, Eyacuiñajjija. 
\p  
\v 23 Nemi nequi tiitii ajja poa Eyacuiñajji nijje pea cuanajo emimijji tii. Dejja tii majje manoꞌya poa. Jamajjeya jamaya ojaya osecua quea huiso nee nee popoquia poa, Eyacuiñajji nijje emimijji etii cuana. Eꞌe, oe manoꞌyo majje oja bacua Eyacuiñajji nijje emimijji etii poa. Jamaya popoquia poa quea huiso nee nee.  
\v 24 Jesosa ca ca eshe, manoꞌyo ajja tii tii. Jamajjeya oya Eyacuiñajji nijje eꞌe jojo nei mimi tiitiiani esejo, oja epeejji cuanajo.  
\v 25 Eꞌe, Jesosa manoꞌyo ajja, eshe tii tii nequiꞌyo Eyacuiñajji nijje esejo emimijji. Jamajjeya Jesosaja epeejji nei poanijo Eyacuiñajjija bacua cuana poani. Ohuaya eseya baꞌe tiitii mee cajeꞌyo onijje eyajo. 
\p  
\v 26 Eseya aje oe quea mimishi jjejojo Eyacuiñajjija esohui jayojjaya jama baꞌe jjima poaje. Jesosaa ca ca esejaya mimishi cuijeaꞌyo majje baꞌe tiitii mee cajeꞌyo onijje. Eꞌe, Jesosa oe nei quea pame nee nee, mimishiꞌama nei nei, quea boejea nee nee, dejja mimishi jayojja jama pojjeama tii tii. Oya eyajo oja Chii pejjejo nequi, ojjaña huoojeaꞌyojji poani tii tii.  
\v 27 Nemija osecua Eyacuiñajji nijje emimijji cuana aje oe Jesosa jayojja jama pojjeama poa. Ohuaya ca ca oe quea mimishiya jjejojo ojjaña pojjajo aquiana cuana dahuajea caninaje Eyacuiñajji quea bei po meejji. Aquiana dahuajea jjimahuajo Eyacuiñajji nijje miminaje jama baꞌa: —Eyacuiñajji, ¡ecuea mimishi cuijeaꞌyocue! —jamaya Eyacuiñajji nijje emimijji etii Nemija osecuaa aca poquia poa. 
\p Majoya oya cuana mimishijo aquiana dahuajea majje Eyacuiñajji nijje miminaje pea cuanajo jama baꞌa: —Eyacuiñajji, ¡miquea epeejji cuanaja mimishi cuana cuijeaꞌyocue! —aca poquia poa Eyacuiñajji nijje emimijji etiiya. 
\p Jesosa ca ca jama pojjeama. Oya manoꞌyonaje ojjañaja mimishi cuijeaꞌyojji sosejje. Oya apoa poꞌyonaje, emano becaꞌyojji pojjeama tii.  
\v 28 Jamajjeya etiiquiana Moisesija esohuijo dejja cuana Eyacuiñajji nijje emimijji po mee ca cuaa poa, Nemija osecua cuana. Oya cuana aje oe Eyacuiñajjija esohui jayojja jama baꞌeꞌyo jjima poa. Jamajjeya Moisesi nijje mimi majje quijje nei Eyacuiñajjiya oja Bacua Ejja Jesosa jama aca poa baꞌa: “Miya oe nei mimishiꞌama nei nei. Jamajjeya miya oe nei enijje emimijji nei poajeꞌyo ecuea epeejji cuanajo” jamaya Eyacuiñajji poanaje. 
\c 8  
\s1 Eyajo Jesosa Quito nequi tiitiiani esejo Eyacuiñajji nijje mimiani tii tii 
\p  
\v 1 Jamajjeya ¡jjashahuabaquicue Jesosa Quitojo! Oya Eyacuiñajji nei nei. Eyajo nequi tiitiiani esejo Eyacuiñajji nijje mimiani tii tii. Eyacuiñajji quea caꞌa nee nee pejjejo nequi, ebianei mijijje; onijje ojjaña huoojeajji poani tii tii.  
\v 2 Jama baꞌa: Yahuajo nei Jodio Eyacuiñajji nijje emimijji etii daqui equi dojjo huasijje, equecuayijji biso nei yasijje dobiquiꞌya poa Eyacuiñajji nijje mimiya, Jodio cuana nijje Eyacuiñajji quea bei epojji. Ma daqui equi Jodio cuanaja soco poa Eyacuiñajjija esohui shajjaꞌajjajji. Jesosa ca ca dobiquiꞌyonaje Eyacuiñajji eꞌanioque ani yasijje tii, daqui equi dejjaja soco huasijje pojjeama. Jomajo oya Eyacuiñajji nijje mimiani esejo.  
\v 3 Jiquio Jodio cuana Eyacuiñajji nijje emimijji etii cuana babaca majje jama poa baꞌa: —¡Miyaya aquiana dahuacue ijjiacajji ehuoneꞌ peaꞌai; Eyacuiñajji ecuana nijje quea bei po meecue! —aca poa Jodio cuaa. 
\p Jamaya ona jayojjaya esejaya Eyacuiñajji nijje emimijji neiya, Jesosaa Eyacuiñajji quea bei po mee canaje ese nijje. Esejaya mimishi cuana cuijea meeꞌyojji sosejje oya manoꞌyonaje.  
\v 4 Jesosa meshijo enequi jojjemo oya Eyacuiñajji nijje emimijji etii pojjeama pome. Eꞌe, Jodioja Eyacuiñajji nijje emimijji etii cuana meshijo yania poa, Nemija osecua cuana. Moisesija etehueꞌyo jayojja jama aquiana dahua ca poquianinaje Eyacuiñajji quea bei po meejji.  
\v 5-6 Jamaya yahuajo poa baꞌa: Moisesi eyiyo huasijje jaasohuaquiajo, Eyacuiñajjiya oya huohui ca poa daqui equijo. Jama aca poa baꞌa: “¡Ecuea esohui jayojjaya nei nei daqui equi acue! ¡Quea bame nee nee oe acue!” ca poa Eyacuiñajjiya. 
\p Jamatii daqui equi iya mee ca poa ona ba meejji ma ohua quijje Jesosaa acajeꞌyo eyajo. Jamajjeya Jodio cuanaja emimijji Eyacuiñajji nijje quea pame pishana poa. Jesosa ca ca quea pame nee nee. Jamaya peaꞌai Eyacuiñajjiya yahuajo nei ojaya esohui huohui ca poa Moisesija etehueꞌyojji. Ma esohui etehueꞌyo quea pame poa. Quijje ca ca Eyacuiñajjiya esohui eyacua Jesosa huohui mee ca poa. Maya esohui quea pame nee nee. Eꞌe, esohui ma ohua jjeya huohui ca poa jayojja jama eseya añajo, Jesosaa eseya baꞌe tiitii mee cajeꞌyo onijje eyajo. Jamaya esejaya eba. Jamajjeya eseya quea jaji nee poani. Yahuajo Jodio cuana quea jaji pishana poa: Onajaya ba jjima poa Jesosaja esohui ebaꞌe tiitiiꞌyojji onijje eyajo. 
\p  
\v 7 Eꞌe, yahuajo nei Eyacuiñajjiya Jodio cuana Moisesi nijje nequi ba mee ca poa ojaya esohui. Jamatii ma esohui jayojja ohuaya acani mimishi pajeaꞌyo jjima poa cuanaja. Ma esohui jayojja jama baꞌyanijo mimishi cuijeaꞌyojji jojjemo Eyacuiñajjija Jesosa huoojea jjima poquiaye esohui eyacua huohuiya.  
\v 8 Jamajjeya Eyacuiñajjiya ojaya epeejji cuana tecuea ca poa. Jama tecueame aca poa baꞌa: 
\q1 “Quijje eyaya esohui eyacua huohuije ojjaña Jodio cuanaja eshajjaꞌajjajji, ma Isaenija osecua cuanaja, Jodaja osecua cuanaja peaꞌai eshajjaꞌajjajji.  
\v 9 Yahuajo nei eyaya miquianajaya etiiquiana Ejito meshijo baꞌe pea meshi yasijje dojo meesahuanaje. Ecuea esohui quea pame nee huohui huichaꞌa huichaꞌa meenaje peaꞌai. Jamatii etiiquiana cuana shajjamaꞌ poa. Ecuea esohui jayojja jama a sa poꞌyo ajja poa. Jamajjeya eyaya oya cuana jaahuana jjima a poa. Jamajoya eyaya pea esohui quea pame nee ajeꞌyo miquiana nijje. Jiquio esohui eyacua poaje, yahuajo jama pojjeama poaje. Eyaya jamaya huohuiaña”. 
\m Jamaya Eyacuiñajji poanaje. 
\p  
\v 10 “Quijje eyaya Isaenija osecua cuana esohui eyacua huohuije jama baꞌa: Jamajjeya miquianaya jjashahuabaqui meesahuaje ecuea ejjashahuabaquijji jayojja. Ecuea esohui jayojja jama eyaya miquianaya ameesahuaje: —Eyacuiñajjiya ecuana jaahuana cani —miquianaaya aje. Eyaya miquianaya sajaꞌajeꞌyo: —Miquianaya cuana ecuea epeejji nei eꞌe jojo nei —eyaya ajeꞌyo.  
\v 11 Miquianaya enijje jjapeequijeꞌyo ojjaña, edejja tii cuana, eshoꞌiquiana peaꞌai. Jamajjeya pea nijje jama epo majajji pojjeama baꞌa: —¡Eyacuiñajji nijje oe jjapeequicue! —eꞌa majajji pojjeama cuana. Chojja, oya jja iña ojjañaja eba poajeꞌyo aña. 
\q1  
\v 12 Jamajjeya eyaya ojjaña cuanaja mimishi cuijea neineijeꞌyo. Majoya eya jjashahuaba majaqui ajja miquianaja mimishijo. Quea bei poaje. Jamaya eyaya Isaenija osecua cuana huohuije”. 
\m Jamaya Eyacuiñajji yahuajo nei nei poa Isaeni nijje. 
\p  
\v 13 Eꞌe, jiquio ecua daqui chii chiiꞌyajo eyacua jjeshe majje daqui echii seya jeajeaña jayojja jama esohui eyacua amajje Eyacuiñajjiya esohui yahuajo nei Moisesi oja tehue meejo jjashahuaba neinei meequiꞌyo jjima aca poa: —¡Ecuea esohui eyacua jayojja jama acue; esohui yahuajo jayojja jama pojjeama! —jamaya Eyacuiñajjiya eseya huohui cani jjeya. 
\c 9  
\s1 Jodio etiiquianaja daqui equi Eyacuiñajjija esohui bajji 
\p  
\v 1 Yahuajo nei Eyacuiñajjiya Moisesi huohui ca poa jama baꞌa: —¡Jamaya oe enijje mimicue! ¡Jamaya eya bihuiacue peaꞌai! —aca poa—. ¡Equi iyacue enijje emimijji! —aca poa peaꞌai. 
\p  
\v 2 Jamajjeya Jodio cuaa daqui equi soco majje iya ca poa Eyacuiñajjija esohui shajjaꞌajjajji, ma Moisesi tehue mee ca poa jayojja jama eꞌajji. Jamajjeya yahuajo nei iya ca poa jama baꞌa: Ebionei equi equecuayijji aiꞌai nequia ca poa. Ma equecuayijji aiꞌaijoya cuaquijiji nequijji nequia ca poa, baa huoꞌo. Majoya acui equecuashiyo, mesa, quecua ca poa. Mesa quecuajeyo majje cuiaꞌasha ca poa baa huoꞌohua. Majoya mesa biajje pahui ojjaña pojjajo iya majamaja ca poa piatojo Eyacuiñajjija ebajji. Ma equecuayijji aiꞌai bajjani ca poa Eyacuiñajji Nijje Ejjapeequijji bajjani.  
\v 3 Majoya biso nei quecuayijjime aca poa daqui equi yiyedojjojo. Majoya daqui moohua secue pene ca poa. Daqui moo quea bame nee baꞌehuana ca poa esecue jjani queyajji. Ma equecuayijji biso nei bajjani ca poa Eyacuiñajji Ese Nijje Emimijji Quea Bame bajjani.  
\v 4 Ma equecuayijji biso neijo nequia ca poa cuaqui cojjasha anijji baa huoꞌo, shiyeshiye dahuajji. Shiyeshiye dahuajea cajje huichacha quea shiye nee nee baꞌesohuaquia poa. Majoya cajohui huana ca poa peaꞌai; baa huoꞌohua cuiaꞌasha ca poa. Maya bajjani ca poa Eyacuiñajjija Esohui Etehueꞌyo Huanajji bajjani. Ma cajohuijo baa huoꞌo tahuoo eꞌiyanobia ania poa. Baa huoꞌo tahuoojo ebio ania poa pahui sisi, ma yahuajo nei nei Eyacuiñajjiya etiiquiana cuana Moisesi nijje ijjia mee ca poa. Anonija tojje acui ejjaquecua caꞌaquijji ma cajohui dojjojo ehuananobia jaa poa, ma tojjejo yahuajo pohua poa acui iña. Beca mei beje peaꞌai cajohui dojjojo ania poa, ma mei bejejo yahuajo nei Moisesija tehueꞌyo Eyacuiñajjija esohui mei beje biajje oja tehueꞌyo, 10 esohui etehueꞌyo jaa poa.  
\v 5 Cajohui biajje ania poa cuichojji nisho esohuidojojji jayojja. Quea bame nee nee, baa huoꞌo peaꞌai. Oja ecuichohua queya ca poa cajohui. Ma esohuidojojji nisho cajohui yasijje cojja nequia poa. Ma ba majje Jodio cuana jjashahuabaquiꞌya poa Eyacuiñajji onijje yani, oja mimishi cuijeaꞌyojji. Jamatii jjeya miya ecuea ehuohuijji pojjeama ojjaña joya daqui equijo nequi aquiana. 
\p  
\v 6 Ojjaña equi apoa poajo, Jodioja Eyacuiñajji nijje emimijji etii dobiquia poa equecuayijji aiꞌai yasijje. Ojjaña pojjajo dobiqui nequia poa Eyacuiñajjija yajjijo chacohua.  
\v 7 Jamatii equecuayijji biso nei yasijje oe nei dobiquianinaje Eyacuiñajji nijje emimijji etii. Pea eshequiaja cuanajo oe dobiaquime poaninaje. Ohuaya ijjiacajji ehuone naꞌ dojodobiaqui caninaje. Majoya Eyacuiñajji nijje mimianinaje jama baꞌa: —¡Eyacuiñajji, ecuea mimishi cuijeaꞌyocue! Eꞌe, jiquio ijjiacajji eyaya ehuoneꞌ cuiaꞌyonaje ecue mimishi cuijeaꞌyojji sosejje —poaninaje oya. 
\p Majoya jama poaninaje peaꞌai baꞌa: —¡Ojjaña miquea epeejjija mimishi cuijeaꞌyocue peaꞌai! Eꞌe, jiquio ijjiacajji ehuoneꞌ eyaya cuiaꞌyonaje ojjañaja mimishi cuijeaꞌyojji sosejje —poaninaje. Jamaya oya po majamaja anijo, ojjañaa oja mimishi cuana pajeaꞌyo jjima acaninaje cuaa. 
\p  
\v 8 Jamajjeya ¡jjashahuabaquicue daqui equijo, Jodio cuanaja iyajo! Jamaya ma daqui equi enequijojoya jjeya Edojjoshahua Pameya eseya ba meesahua cani jama baꞌa: Ma daqui equi eꞌanijo tii ma equecuayijji biso nei yasijje oe nei Eyacuiñajji nijje emimijji etii dobiquianinaje Eyacuiñajji nijje mimiya, ojjaña cuana dobiqui jjima poanaje.  
\v 9 Eꞌe, Eyacuiñajji nijje mimiani etii oe nei nei dobiquianinaje Eyacuiñajji nijje mimiya. Ma shahuaba majjeya esejaya eba ojjaña cuana Eyacuiñajji nijje mimi meemee ajja poa. Jjeya ca ca eseya Eyacuiñajji nijje mimije, ojjaña. Yahuajo nei quea huiso ijjiacajji ehuoneꞌ dahuajea caninaje Eyacuiñajji ona nijje quea bei epojji. Dahuajea majamaja caninaje. Jamatii oya cuana jjashahuabaquianinaje jama baꞌa: —Eꞌe pojjaꞌa eya quea boejea pojjeama. Eꞌe pojjaꞌa ecuea mimishi cuijeaꞌyo jjima —poaninaje cuana. 
\p  
\v 10 Yahuajo nei bobijo tehue ca poa peaꞌai Moisesija etehueꞌyojo jama baꞌa: —¡Beca bobi aꞌa ijjiajji! ¡Beca eꞌishijji peaꞌai aꞌa jja oe ishijji! —jamaya Moisesiya tehue ca poa Jodio cuanaja eꞌajji. 
\p Moisesija etehueꞌyo jayojja jama Jodio etiiquianaa piato, shajjajji cuana peaꞌai shacua caninaje peaꞌai. Ma etehueꞌyo jayojja jama besa majamajaninaje peaꞌai. Jamajjeya etehueꞌyo jayojja jama besa majje quea yami boejea poa, jamatii quea mimishi tii poa, quea jjashahuabaqui tai. Eyacuiñajjiya oya cuana Moisesija etehue jayojja jama amee caninaje Jesosa poe jjimahuajo. Jesosa ca ca oeya ojjaña mimishi cuijeaꞌyojji poani. 
\s1 Jesosaja enaꞌ cuayaquia poa eseja mimishi cuijeaꞌyojji 
\p  
\v 11 Jamajjeya jjeya Eyacuiñajjija huoojeaꞌyo ese jaahuanajji Jesosa Quito bajjani poeyanaje ese que. Oya Eyacuiñajji nijje emimijji nei eyacua. Ohuaya eseya quea pame nee nee acanaje. Quijje ohuaya eseya baꞌe tiitii mee cajeꞌyo onijje, mimishi cuijeaꞌyo majje. 
\p Daqui equi eyiye equecuayijji biso nei yasijje dejja cuanaja iya huasijje dobiqui jjima Jesosa Eyacuiñajji nijje esejo mimiya. Cho. Oya eyahuasijje dobiquinaje Eyacuiñajji eꞌanioque ani yasijje, eyiye biso nei quea pame nee nee jayojja huasijje. Oya Jesosa Eyacuiñajji nijje mimiani esejo.  
\v 12 Jesosaa chivo naꞌ, anaꞌai naꞌ dojodobiaqui jjima eyahuasijje, de. Cho. Oya acui ecueataꞌapeejo manoꞌyonaje esejaya mimishi cuijeaꞌyojji sosejje. Jamajjeya ohuaya eseya baꞌe tiitii mee cajeꞌyo onijje. 
\p  
\v 13 Eꞌe, yahuajo nei Moisesija etehueꞌyo jayojja jama acaninaje cuaa. Jamajjeya Eyacuiñajji nijje emimijji cuaa anaꞌai naꞌ, chivo naꞌ peaꞌai tepe jayojja huasijje sho majje ojjaña Jodio cuana jeasijijea majamaja caninaje. Majoya anaꞌaija bacua dahuajeaꞌyo majje oja yami equiyojeyojea pohui ena tejjee nane majje ojjaña Jodio cuana jeasijijea majamaja caninaje. Jeasijijea cajo, pea Jodio cuaa ona ba caninaje quea boejea jayojja. Jamatii eyami nei quea boejea jayojja poaninaje. Mimishi ca ca ecuijeaꞌyo pojjeama.  
\v 14 Eꞌe, anaꞌai naꞌ, chivo naꞌ peaꞌai jeasijijea cajo, eyami ca ca oe quea boejea jayojja poaninaje. Jesosa Quito ca ca quea pame nee nee ese mimishi cuijeaꞌyojji, de. Edojjoshahua Pame enequi tii tii. Ohuaya Jesosa ameesahua canaje Eyacuiñajjija ejjashahuabaquiꞌyojji jayojjaya. Oya Jesosa mimishiꞌama nei nei, mimishiꞌama tii tii poanaje. Eꞌe, oya acui ecueataꞌapeejo manoꞌyo majje ojaya enaꞌ cuayaquinaje. Jamajjeya ohuaya esejaya mimishi cuijea cajeꞌyo onijje jjapeequiyajo: —Ecue Chii, ecue naꞌ cuayaquinajejo eyaya ecuea epeejjija mimishi cuana cuijea neineijeꞌyo —Jesosaa aca poa. 
\p Jamajjeya Jesosaja epeejji nei poajo, Eyacuiñajjiya eseya quea boejea nee nee po mee cani ojaya ejjashahuabaquijji jayojja jama ebaꞌeꞌyojji, etiiquianaja esohui jayojja jama pojjeama. Eꞌe, jamaya Eyacuiñajjiya acani ohuaya enequi tiitiiya jjejojo. 
\p  
\v 15 Ojjaña joya etiiquianaja Moisesija esohui jayojja jama ajji nisho poaninaje quea mimishi nee nee poa. Jamatii Jesosa Quito manoꞌyonaje onajaya mimishi cuijeaꞌyojji sosejje. Jamajjeya eseya Jesosaa huohui cani jama baꞌa: —Eyacuiñajjiya miquianaya ojaya esohui huohui ca oꞌoyani esohui eyacua jama baꞌa: “Eyaya miquianaya quea pame nee nee ajeꞌyo. Ojjaña ecue babacaꞌyo enijje baꞌe tiitii meejeꞌyo eyajo” jamaya Eyacuiñajji poani —Jesosaa aca poa. 
\p  
\v 16-17 Jama poani baꞌa: Manoꞌyo jjimahuajo dejja jiquiojo baꞌeya ojaya huapa pojjeama acani jama baꞌa: —E manoꞌyajo ecuea aquiana cuana miquea poajeꞌyo, cha —acani cuaa. 
\p Jamajjeya ma dejja manoꞌyo majje ojaya aquiana cuana oja huapa pojjeamaja poajeꞌyo. Eshe nequija ca mi ca equiaꞌyojji pojjeama. O manoꞌyajo ca ca oe jjeshe caꞌyojji.  
\v 18 Oya jayojja yahuajo nei Eyacuiñajjiya oja sohui tehue mee majje Moisesi aquiana quecua mee ca poa. Moisesi jama aca poa baꞌa: —¡Aquiana ehuoneꞌ quecuajeaꞌyocue! Oja naꞌ cuayaquiajo eyaya baje miquianaaya eꞌe jojo nei ecuea esohui jayojja jama aña ecuea epeejji nei epojji —Eyacuiñajjiya aca poa. 
\p  
\v 19 Jamajjeya Moisesiya ojjaña Eyacuiñajjija esohui etehueꞌyo huohui caninaje ojjañaja eshajjaꞌajjajji. Majoya ijjiacajji ehuoneꞌ, anaꞌai, chivo peaꞌai cuia caninaje. Aquiana naꞌ tepejo sho caninaje ena tejjee. Majoya ñajjajja ña huoꞌo acui aa quea shiyejo cuiabebo caninaje. Majoya ena tejjee nane majje esohui etehueꞌyo jeasiji caninaje, ojjaña Jodio cuana jeasijijea caninaje peaꞌai aquiana naa.  
\v 20 Majoya Moisesiya oya cuana jama aca poa baꞌa: —Eyacuiñajjiya eseya ba mee ca poa ojaya esohui eꞌe jojo nei. Ojaya esohui jayojja jama ohuaya acajeꞌyo tii. Jamajjeya eyaya miquianaya jeasijijeaña ijjiacajji naa. ¡Eya enaꞌ jeasijijeajje jama pocue baꞌa: “Eꞌe, eseyaya ojjaña Eyacuiñajjija esohui jayojja jama ajeꞌyo tii” acue! —Moisesiya aca poa. 
\p  
\v 21 Jamaya peaꞌai Moisesiya daqui equi acaninaje, ojjaña daqui equijo nequi aquiana peaꞌai jeasijijea caninaje ijjiacajji naa, ojjaña.  
\v 22 Jamaya acaninaje ojjaña Jodio etiiquiaa beshahua nei ojjaña aquiana cuana, Eyacuiñajjija quea boejeaꞌyo jayojja ebajji. Aquiana naꞌ shojea caninaje Eyacuiñajji oya cuana quea boejeaꞌyo jayojja epo meejji peaꞌai. Jamaya Moisesija sohui etehueꞌyo poa. Eꞌe, Eyacuiñajjiya jama aca poa baꞌa: —Ijjiacajji ehuoneꞌ quecua cajo oja naꞌ cuayaquiyajo, eyaya miquianajaya mimishi cuijeajeꞌyo —aca poa. 
\p Jamajjeya enaꞌ cuayaqui ajjajo aje oe mimishi ecuijeaꞌyojji pojjeama. 
\s1 Jesosa Quito manoꞌyonaje mimishi cuijea neinei caꞌyonaje 
\p  
\v 23 Jamajjeya ijjiacajji naꞌ jeasijijea cajje ojjaña daqui equijo nequi aquiana quea boejeaꞌyo jayojja po mee ca poa Jodio etiiquiaa. Jamaya acajo Eyacuiñajjiya ma aquiana ba ca poa quea boejeaꞌyo jayojja. Jamaya Eyacuiñajjiya eseya ba mee cani. Jesosa Quito manoꞌyajo oja naꞌ cuayaquinaje; mimishi cuijea neinei caꞌyonaje esejaya. Quea boejeaꞌyo po mee canaje. Jamajjeya eseya Eyacuiñajji cojja neijo nequi mee cajeꞌyo eyajo. Eꞌe, aquiana naa jeasijijea cajje pojjeama eseya, Jesosaja epeejji cuana quea boejea nee poajeꞌyo.  
\v 24 Oya jayojjaya Jodioja Eyacuiñajji nijje emimijji etii equecuayijji sisi yasijje dobiquia poa Jodio cuanajo Eyacuiñajji nijje mimiya oya Jodio cuana nijje quea bei epojji. Jamaya Eyacuiñajjiya eseya ba mee cani Jesosa Quito eyahuasijje dobiquiꞌyonaje Eyacuiñajji nijje esejo mimiya. Jesosa ca ca daqui equi yasijje pojjeama dobiquiꞌyonaje. Cho. Eyahuasijje dobiquiꞌyonaje. Jjeya nei oya, Jesosa Quito Eyacuiñajji cojja neijo nequi, onijje esejo mimiani de, Eyacuiñajji ese nijje quea bei epojji.  
\v 25 Yahuajo nei jamaya poa peaꞌai baꞌa: Jodio Eyacuiñajji nijje mimiani etii equecuayijji biso nei yasijje dobi majamaja quianinaje. Pea shequiajajo dobiaqui poaninaje, pea shequiajajo dobiqui poaninaje. Oe dobiquime poaninaje oe shequiajajo. Pea enaꞌ dojodobiaqui caninaje, aquiana ehuone naꞌ. Aquiana naꞌ jeasijijea majje jama acaninaje baꞌa: —Eyacuiñajji, ¡ecuanaja mimishi cuana cuijeaꞌyocue! —poaninaje. 
\p Jesosa Quito ca ca ojjaña shequiajajo pojjeama manoꞌya poa. Manoꞌyonaje oe nei manoꞌyome poa. Ojaya enaꞌ cuayaquinaje esejaya mimishi cuijeaꞌyojji sosejje.  
\v 26 Jesosaja enaꞌ aquiana naꞌ jayojja jama poa jojjemo oya mano majamaja quiaye. Eꞌe, dejja panaꞌyo majje mano majamaja quiaye quea huiso nee nee, de. Jamatii Jesosa manoꞌyonaje oe manoꞌyome poanaje, quea huiso pojjeama. Jamajjeya jjeya nei ojjaña Eyacuiñajjija esohui beshahua nei apoa poanijo, Jesosa manoꞌyonaje. Ojaya enaꞌ cuayaquinaje mimishi cuijeaꞌyojji.  
\v 27 Eseya aje oe manojeꞌyo peaꞌai; oe nei manoꞌyome poajeꞌyo. Manoꞌyo majje Eyacuiñajji cojja neijo nequijeꞌyo. Ohuaya huohui caje quio ese baꞌya poa sosejje. Eseyaya quea pame baꞌyaninajejo baꞌe tiitii mee cajeꞌyo onijje eyajo. Quea mimishi baꞌyaninajejo ca ca quea nee nee po tiitii mee cajeꞌyo.  
\v 28 Jamajjeya Jesosa Quito manoꞌyonaje, oe manoꞌyome poanaje peaꞌai. Oya manoꞌyonaje mimishi cuijeaꞌyojji ojjañaja. Eꞌe, yahuajo Jesosa Quito manoꞌya poa. Quijje oya poeje oꞌoya mimishi cuijeaꞌyohua pojjeama. Poejeꞌyo ojaya epeejji baꞌe tiitii meeꞌyohua, ojjaña joya ojo jjaꞌishoaꞌajjaquiani jjehuaꞌyohua. 
\c 10  
\s1 Ijjiacajji ehuone naa jeasijijea cajo mimishi ecuijeaꞌyo pojjeama 
\p  
\v 1 Jodio Eyacuiñajji nijje mimiani cuaa Moisesija etehueꞌyo jayojja jama amajamaja caninaje. Onajaya ba jjima pishana ma Eyacuiñajjiya quijje eseya quea pame nee nee acajeꞌyo. Onajaya quea jaꞌa pojjeama. Eyacuiñajji nijje mimiani cuaa quea huiso aquiana biajje enaꞌ jeasijijea cajje Eyacuiñajjiya ma aquiana cuana ba ca poa quea boejea jayojja. Ojjaña shequiajajo ijjiacajji ehuoneꞌ quecua majamaja majje jama poaninaje baꞌa: —Eyacuiñajji, ¡miquea epeejji cuanaja mimishi cuijeaꞌyocue ojjaña! —acaninaje Jodio cuaa. 
\p Jamatii Eyacuiñajjiya etiiquianaja mimishi cuijea neineiꞌyo jjima aquiana ehuoneꞌ cuia caꞌyajo.  
\v 2 Jamajjeya aquiana ehuoneꞌ cuia caꞌyajo etiiquiana quea boejea nee nee epo mee jojjemo aquiana cuia majamaja jjima aca quiaye. Eꞌe, oya cuana quea boejea nee nee epo mee jojjemo mimishijo yenoꞌama poquiaye.  
\v 3 Jamatii ijjiacajji ehuoneꞌ ojjaña shequiajajo cuia majamaja caninaje. Jama poaninaje baꞌa: —Eyacuiñajji, ¡miquea epeejji cuanaja mimishi cuijeaꞌyocue! —acaninaje. 
\p Cuia majje jama po ajja poaninaje baꞌa: —Jjeya ca ca ecuanajaya mimishi chamaꞌyo poaje —ajjima acaninaje. Cho. Jama poaninaje baꞌa: —Ecuana quea mimishi, de —Jodio etiiquiana cuana poaninaje. 
\p  
\v 4 Chojja, anaꞌai naꞌ, chivo naꞌ peaꞌai jeasijijea majje mimishi cuana ecuijeaꞌyojji pojjeama.  
\v 5 Jamajjeya Jesosa Quitohua poe jeahuaa oja Chii jama aca poa baꞌa: 
\q1 “Ecue Chii, miquea epeejji cuana aquiana ehuoneꞌ nequi cuia mee sa poꞌyo ajja, miya. Aquiana ehuoneꞌ dahuajea mee sa poꞌyo ajja peaꞌai miya. Cho. Miyaya eya dejja cuana huasijje huoojeaña yamijji.  
\v 6 Eꞌe, miquea epeejji cuaa aquiana ehuoneꞌ cuia cani mimishi cuijeaꞌyojji nisho mi quea bihui nee po meejji nisho. Ma ohua dahuajea cajoya miya quea bihui nee pojjeama poani.  
\v 7 Jamajjeya eyaya miya jama anaje baꞌa: —Ecue Chii, eya meshi yasijje poeyanaje. Miquea ejjashahuabaquiꞌyojji jayojjaya jama eyaya ajeꞌyo. Jamaya yaya ajeꞌyo mi quea bihui nee po meejji”. 
\m Jamaya yahuajo oja Chii Eyacuiñajji Jesosa Quitohua acanaje.  
\v 8 Eꞌe, Jesosaa oja Chii jama acanaje baꞌa: 
\q1 “Ecue Chii, miquea epeejji cuaa ijjiacajji ehuoneꞌ nequi cuia mee sa poꞌyo ajja, dahuajea mee sa poꞌyo ajja peaꞌai miya. Ijjiacajji ehuoneꞌ cuia cani cuaa mimishi cuijeaꞌyojji nishojo aje oe miya quea bihui nee pojjeama poani. Maya dahuajea canijo peaꞌai miya quea bihui nee pojjeama”. 
\m Jamaya acanaje Jesosaa, jamatii yahuajo Moisesija esohui etehuiꞌyo jayojja jama Jodio cuanaa aca poquianinaje, ehuoneꞌ cuia majamaja ca poquianinaje.  
\v 9 Jamajjeya majoya Jesosaa jama acanaje baꞌa: “Ecue Chii, eyaya miquea ejjashahuabaquiꞌyojji jayojja jama ajeꞌyo mi quea bihui nee po meejji”. Jamaya acanaje. 
\p Jamajjeya Jesosa Quito poeyanajejo ca ca oe Eyacuiñajjiya eseya jama acani baꞌa: —¡Jesosa Quito jayojja jama pocue, oe! ¡Ecuea ejjashahuabaquiꞌyojji jayojja jama oe atiitiicue! Jjeya ohuaya eseya huohui maja ajja jama baꞌa: —¡Jodio etiiquiana yahuajo nei nei baꞌya poa jayojja jama acue! ¡Ehuoneꞌ cuiaꞌyo majje dahuajeaꞌyocue miquea mimishi ecuijea meeꞌyojji! —Cho. Jamaya Eyacuiñajjiya eseya amaja ajja.  
\v 10 Jamajjeya Jesosa Quitohua Eyacuiñajjija ejjashahuabaquiꞌyojji jayojja jama acanaje. Manoꞌyonaje; oe manoꞌyome poanaje eseja mimishi cuijeaꞌyojji. Jamajjeya Eyacuiñajjiya eseya mimishi cuijeaꞌyo majje quea boejea po mee caꞌyani Jesosaja epeejji nei cuana. 
\p  
\v 11 Yahuajo nei Jodio Eyacuiñajji nijje mimiani etii ojjaña pojjajo daqui equijo chachochaconaje. Ehuoneꞌ cuia majamaja caninaje mimishi cuijea meeꞌyojji nisho. Ecuiajeaꞌyojji cuiajea caꞌyaninaje de, mimishi cuijeaꞌyo jjima poa.  
\v 12 Jesosa Quito ca ca Eyacuiñajji nijje emimijji nei. Oya ca ca oe manoꞌyonaje; oe manoꞌyome poanaje. Aquiana ehuoneꞌ manoꞌyani jayojja jama pojjeama poanaje oya. Manoꞌyonaje mimishi cuijeaꞌyojji. Apoa. Mano becaꞌyo ajja. Eyahuasijje sohuaquiꞌyonaje. Eyacuiñajji pejjejo anioqueꞌyonaje, ebianei mijijje. Eyacuiñajji nijjeya ojjaña huoojeaꞌyojji poani oya, Jesosa.  
\v 13 Majoya jjeya ohuaya ishoa ca ani Eyacuiñajjiya eshahua cuana, ojjaña ojaya epeejji pojjeama, shajjamaꞌ cuana peaꞌai jeabichajeaꞌyo majje quea nee nee po mee cajeꞌyo tii tii.  
\v 14 Eꞌe, Jesosa acui ecueataꞌapeejo manoꞌyonaje; ojaya epeejji mimishiꞌama po mee ca poa. Jamajjeya eseya Eyacuiñajjija esohui jayojja jama ameesahua cani. 
\p  
\v 15 Edojjoshahua Pameya peaꞌai eseya ba meesahua cani Eyacuiñajjija esohui ma ohua yahuajo tehue mee ca poa ojaya epeejjija ebajji. Ebionei jama poa baꞌa: 
\q1  
\v 16 “Quijje eyaya miquianaya esohui eyacua huohuije. Jamajjeya miquianaya jjashahuabaqui meesahuaje ecuea ejjashahuabaquijji jayojja. Ecuea esohui jayojja jama eyaya miquianaya ameesahuaje”. 
\m  
\v 17 Majoya ohuaya jiquio esohui tehue mee ca poa: 
\q1 “Jamajjeya eyaya ojjaña cuanaja mimishi cuijea neineijeꞌyo. Majoya eya jjashahuaba majamajaqui ajja miquianaja mimishijo. Quea bei poaje”. 
\m Eyacuiñajjiya jama tehue meemeya aca poa.  
\v 18 Jamajjeya Jesosa Quito esejaya mimishijo manoꞌyo majje mimishi cuijea caꞌyonaje. Apoa poanaje. Jamajjeya oya mano becaꞌyo ajja. Eꞌe, aquiana ehuoneꞌ quecua maja ajja peaꞌai, ¿ajeo equecuaꞌyojji? Jesosa mimishi cuijeaꞌyojji quea pame nee poanaje. 
\s1 ¡Jesosa chipi nei ejjapeequi! 
\p  
\v 19 Yahuajo Jodio Eyacuiñajji nijje mimiani cuana quea mete dobiquia poa daqui equecuayijji biso nei yasijje. Dobiquia poa Eyacuiñajji nijje mimiya. Eꞌe, Jesosa Quitohua manoꞌyonaje; ojaya enaꞌ cuayaquinaje ese quea boejea po meeꞌyojji. Jamajjeya Jesosaja epeejji cuana, jjeya Eyacuiñajji nijje emimi meteꞌama nei.  
\v 20 Yahuajo nei Eyacuiñajji nijje emimijji etii oe nei daqui esecuejje equecuayijji biso nei yasijje dobiquianinaje Eyacuiñajji nijje mimiya. Jjeya eseya Eyacuiñajji nijje mimiani, ojjaña. Jesosa esejo manoꞌyonaje. Jjeya oya eshe, enequi tii tii. Jamajjeya eseya mimi majamajani Eyacuiñajji nijje.  
\v 21 Oya, Jesosa Eyacuiñajji nijje emimijji nei esejo peaꞌai. Eseya jaahuana tiitii cani, ojaya epeejji nei.  
\v 22 Jamajjeya eseya ojaya epeejji eꞌe jojo nei poanijo Eyacuiñajji nijje emimi. Eꞌe jojo nei emimi tii tii onijje. ¡Aꞌa jama pojji baꞌa: —¡Dee! Eya quea mimishi Eyacuiñajji nijje emimijji —aꞌa jamaya pojji! Cho, esejaya mimishi cuana cuijea caꞌyonajejo eseya quea boejea neeꞌyo. 
\p  
\v 23 Eyacuiñajjiya ojaya esohui jayojja jama acajeꞌyo. Siajje po ajja oya. Eꞌe jojo nei eseya baꞌe tiitii mee cajeꞌyo onijje eyajo. Jamaya esejaya eba. Jamajjeya ¡ejjapeequi onijje nei!  
\v 24 ¡Jesosaja epeejji cuana quea jea nee ejjaꞌaqui! Eꞌe, ¡ejjashahuabaqui pea epeejji cuanajo, o baꞌe meesahuajji, Jesosajo echaco sahuajji peaꞌai!  
\v 25 Beca epeejji cuana aje oe jjachicha pajeaquinaje; ojee Eyacuiñajji bihuia ajja poꞌyonaje. ¡Aꞌa oya cuana jayojja jama pojji! ¡Ojee ejjachichaqui! Jesosaja epeejji cuana nijje emimi jama baꞌa: —¡Quea bihui pocue! ¡Jesosa nijje jjapeequicue ecuana nijje! —ejjaꞌaqui. 
\p Eꞌe, Jesosa Quito esejaya Emeshi Mese nei poejeꞌyo. Jamajjeya oe jamaya epo tiitii. 
\s1 ¡Jesosa Quito aꞌa cajaa ajji! 
\p  
\v 26 Beca cuana aje oe Eyacuiñajjija esohui eꞌe nei ba majje jamatii quea mimishi po tiitii sa poani. Jamajjeya ojaya mimishi ecuijeaꞌyojji pojjeama. Eꞌe, Jesosa ca ca oe mimishi cuijeaꞌyojji. Pea chamaꞌ.  
\v 27 Jamajjeya Eyacuiñajjiya ojjaña shajjamaꞌ cuana jeajea cajeꞌyo cuaqui yasijje onijje mi jjapeequiꞌyajo. Quea nee nee po tiitii mee cajeꞌyo.  
\v 28 Yahuajo nei Jodio etiiquiaa Moisesija etehueꞌyo jayojja jama mi atiitii cajo, cuiajea caꞌyaninaje, dejja etii cuaa. Beca dejja cuaa oya jayojja huohuime acajoya jama baꞌa: “Oya ca ca oma shajjamaꞌ, Moisesija esohui jayojja jama a sa po ajja. ¡Cacuiajea caꞌyahua cuaa ca oma!” jama huohuime acajoya cuiajea caꞌyaninaje dejja etiiya. Chamaꞌyo tii acaꞌyaninaje cuana.  
\v 29 Oya jayojjaya jjeya beca cuana Eyacuiñajjija Bacua Ejjajo, Jesosajo mimipanajeapanajeani. Cajaa acani quea mimishi nee neeya jjejojo. Eyacuiñajjiya esohui quea pame nee ojjaña ba mee canaje jama baꞌa: —Jesosa manoꞌyonaje miquianajaya mimishi cuijeaꞌyojji —jamaya ba mee canaje. 
\p Jamatii beca cuana siajje poani jama baꞌa: —Jesosa dejja mimishi jayojja jama manoꞌyonaje, jamatii. 
\p Edojjoshahua Pameya ojjaña quea pame jaahuana sa acani. Jamatii beca cuana Edojjoshahua Pame shajjaꞌajja sa poꞌyo ajja. Cajaa acani. Oya cuana quea tai nee nee poani. Jamajjeya oya cuana quea nee nee po mee cajeꞌyo tii tii Eyacuiñajjiya. Yahuajo nei Moisesija etehueꞌyojo shajjamaꞌ poanijo ca ca quea tai pishana. Jamatii quecuajea caꞌyaninaje cuaa.  
\v 30 Eꞌe, esejaya eba Eyacuiñajjiya yahuajo tehue mee ca poa jama baꞌa: 
\q1 “Eyaya eyaye nei dejja mimishi quea nee nee po meejeꞌyo. Ojjaña joya pea cuana quea nee poani eyaya quea nee nee po meejeꞌyo”. 
\m Jamaya Eyacuiñajji poa peaꞌai baꞌa: “Ecuea epeejji quea mimishi poajo, eyaya oya cuana ejjabahuejjaquijji quea nee po meeje”. Jamaya Eyacuiñajji poa peaꞌai. 
\p  
\v 31 Jamajjeya ¡quea mete nee nee capoahua ojjaña joya Jesosa Quito cajaa ajji poani, de! Eyacuiñajjiya oya cuana quea nee nee po mee cajeꞌyo. Oya ca ca oe nei eshe nequi tii tii, quea caꞌa nee nee. 
\s1 Jesosa nijje jjapeequi majje ¡quea jaꞌa nee po tiitiicue! 
\p  
\v 32 Ecuea epeejji cuana, ¡jjashahuabaquicue! Yahuajo Jesosa nijje jjapeequi jeahuajo miquianaya ojaya epeejji quea jaꞌa nee poanaje. Eꞌe, Eyacuiñajjija esohui shajjaꞌajja majje miquianaya onijje jjapeequinaje. Edojjoshahua Pame miquiana que dobiquinaje peaꞌai. Jamajjeya Jesosaja epeejji pojjeama cuaa miquianaya napa canaje quea huiso. Miquianaya quea nee poanaje. Jamatii Jesosa nijje jjapeequi pajea ajja poanaje, jjapee neineiquinaje.  
\v 33 Eꞌe, Jesosaja epeejji pojjeama miquiana nijje mimijajinaje quea huiso ojjañaja eshajjaꞌajjajji. Miquianaya napa canaje peaꞌai. Quea nee po mee canaje. Jamatii miquianaya meteꞌama poanaje. Onaa Jesosaja epeejji napa canijo, miquianaya onijje jjapeequinaje, Jesosaja epeejji cuana nijje.  
\v 34 Ejeanobia jaa huasijje peaꞌai miquianaya poquinaje meteꞌama Jesosaja epeejji cuana baa, ona bobiaa. Miquianaya ejeanobia jaajo aquiana siijea caꞌyonaje cuaa. Jamatii miquianaya yenoꞌama poanaje. Quea bihui miminaje jama baꞌa: —Ecuanaya Jesosaja epeejji poanijo ohuaya ecuana quea pame nee nee acajeꞌyo quijje. Ecuanaya baꞌe tiitii mee cajeꞌyo onijje eyajo —poanaje miquianaya. 
\p  
\v 35 Jamajjeya ¡aꞌa jja oe Jesosa nijje jjapeepajeaquiꞌyojji! Onijje jjapee neineiquianijo, ohuaya miya quea pame nee acajeꞌyo. Eyajo miya quea huiso sosequia cajeꞌyo peaꞌai.  
\v 36 Eꞌe, ¡quea bihui nee atiitiicue Eyacuiñajjija esohui jama! ¡Aꞌa hueahueajji! Jamaya miquiaaya atiitiiyajo, ohuaya miquianaya quea pame nee nee acajeꞌyo. Ojaya esohui yahuajo ohua huohui ca poa jamaya ohuaya acajeꞌyo. Miquianaya baꞌe tiitii mee cajeꞌyo onijje eyajo.  
\v 37 Eꞌe, Eyacuiñajjija esohui yahuajo nei etehuiꞌyo jama poa baꞌa: 
\q1 “¡Ishoa socue ojaya epoejji! Jjeya nei pojjaꞌa oya poejeꞌyo, quijje nei pojjeama. 
\q1  
\v 38 Ojjaña joya enijje jjapee tiitiiquiani eyaya baña mimishiꞌama, quea boejeaꞌyo. Enijje jjapeepajeaquiajo ca ca ecuea botiꞌama; quea nee po meejeꞌyo”. 
\m Jamaya esohui etehuiꞌyo poa. 
\p  
\v 39 Ecuanaya ca ca jamaya pojjeama. Jesosa nijje jjapeepajeaquiꞌyo ajja tii. Jamajjeya Eyacuiñajjiya ecuana quea nee nee epo meeꞌyojji pojjeama. Cho. Ecuana Jesosa nijje jjapee tiitiiquianijo ohuaya baꞌe tiitii mee cajeꞌyo onijje eyajo. 
\c 11  
\s1 Beca etiiquiana Eyacuiñajjija epeejji nei poa 
\p  
\v 1 Ecuea epeejji cuana, esejaya eba nei nei jama baꞌa: Jesosaja epeejji poanijo eꞌe jojo nei Eyacuiñajjiya ojaya esohui jayojja jama eseya acajeꞌyo. Jamajjeya eseya jama poani baꞌa: —Eꞌe jojo nei Jesosa quea huiso esohui huohui canaje; jjeya beca cuana esejaya quea quehua. Jamatii quijje eseyaya bajeꞌyo. 
\p  
\v 2-3 Jamajjeya Jesosaja epeejji poanijo eseyaya baña Eyacuiñajjiya ojjaña tii pana ca poa. Eꞌe, oya jama poa baꞌa: —Meshi cuana, ¡jjapanaquicue! —jamaya acajje meshi jjapanaquia poa. Eꞌe, yahuajo nei ojjaña chamaꞌ nei nei poa. Jamatii Eyacuiñajjiya ojjaña pana caꞌya poa. 
\p Eꞌe, etiiquiana peaꞌai Eyacuiñajji nijje jjapeequianijo, ojaya esohui jayojja jama acanijo peaꞌai, Eyacuiñajji ona nijje jama poa baꞌa: —Miquianaya ecuea epeejji poanijo eyaya miya baña quea pame nee poani —aca poa. 
\s1 Etiiquiana Abeni bajjani Eyacuiñajjija epeejji nei poa 
\p  
\v 4 Abeni Eyacuiñajjija epeejji poanajejo ojaya esohui jayojja jama aca poa quea pame nee. Jamajjeya ijjiacajji ehuoneꞌ dahuajea cajo Eyacuiñajji bihuiajji, Eyacuiñajji onijje miminaje jama baꞌa: —Abeni, miya quea jaꞌa nee anaje. Jamaya ecuea quea boti nee. Jamajjeya eyaya miya baña mimishiꞌama —Eyacuiñajji poa. 
\p Abenija oꞌiya Cainiya Eyacuiñajjija esohui jayojja jama pojjeama aca poa. Quea pame pojjeama aquiana quia ca poa Eyacuiñajji bihuiajji. Jamajjeya Cainija quiaꞌyo Eyacuiñajjija botiꞌama poa. Jamajoya Caini jjashahuabaquinaje jama baꞌa: —Eyacuiñajjija Abeni quea jea nee poani. Ojaya eya botiꞌama. Jamajjeya eyaya Abeni cuijeajeꞌyo —aca poa Cainiya. Jamatii ecuanaja eba Abeniya Eyacuiñajjija esohui jayojja jama aca poajo ojaya epeejji nei poa. Abeniya quea pame aca poajo eseya jjashahuabaqui majje Eyacuiñajji nijje jjapeequije quea pame nee. 
\s1 Etiiquiana Enoca bajjani Eyacuiñajjija epeejji nei poa 
\p  
\v 5 Enoca Eyacuiñajjija epeejji nei nei poa peaꞌai. Jamajjeya oya manoꞌyo jjima. Eyacuiñajjiya oya jjequisohua caꞌya poa eyahuasijje eshe tii. Onijje nequi dejja cuaa oya saꞌajja caꞌya poa. Chamaꞌ ba caꞌya cuaa poa. Eyacuiñajjija esohui yahuajo nei nei tehue ca poa Enocajo jama baꞌa: “Eyacuiñajjija esohui jayojja jama aca poajo Eyacuiñajji quea bihui nee poa Enocajo” jamaya tehue ca poa. 
\p  
\v 6 Eꞌe, Eyacuiñajji nijje jjapeequi ajjajo, ojaya esohui jayojja jama aꞌajjajo, Eyacuiñajji ojjaña ese nijje quea bihui nee pojjeama poaje. Ojjaña joya Eyacuiñajji nijje jjapeequi sa poani cahuohui cahua jama baꞌa: —Ecuea eba Eyacuiñajji enequi tii tii, eshe. Ojjaña joya oya sa poani ohuaya eꞌe jojo nei quea pame nee acani —cahuohui cahua. 
\s1 Etiiquiana Noe bajjani Eyacuiñajjija epeejji nei poa 
\p  
\v 7 Noe Eyacuiñajjija epeejji nei peaꞌai poa. Jamajjeya Eyacuiñajjiya oya huohui ca poa jama baꞌa: —Ojjaña meshijo baꞌe cuana huiꞌijeajeꞌyo ena jjayehuequiajo. Ohuajea caje ojjaña tii —Eyacuiñajjiya aca poa. 
\p Noeja ba jjima poa ena quea quemo nee poaje. Jamatii ohuaya Eyacuiñajjija esohui shajjaꞌajja ca poa. Bishe, nacha quea quemo nee nee iya ca poa ojaya, oja bacua cuanaja edobiquijji, huiꞌiꞌyo jjima epojji. Jamajjeya Eyacuiñajji onijje mimia poa jama baꞌa: —Noe, miya ecuea epeejji poani. Ecuea esohui jayojja jama aña. Jamajjeya eyaya miya baña mimishiꞌama —aca poa. 
\p Noeya Eyacuiñajji shajjaꞌajja ca poajo, eseyaya baña pea cuana aje oe shajjamaꞌ nei nei poa. 
\s1 Etiiquiana Amajama bajjani Eyacuiñajjija epeejji nei poa 
\p  
\v 8 Amajama Eyacuiñajjija epeejji nei poa. Jamajjeya Amajamaa shajjaꞌajja ca poa Eyacuiñajji onijje mimiajo. Jama poa baꞌa: —Amajama, ¡miquea meshijo nequi cuayaquiꞌyocue! ¡Poquicue pea meshi yasijje, ma miquea ba jjima huasijje! Eyaya ma meshiya miya quiaje. Miquea ebaꞌejji poajeꞌyo, miquea osecua cuanaja peaꞌai poajeꞌyo —Eyacuiñajjiya aca poa. 
\p Jamajjeya Amajamaa Eyacuiñajji shajjaꞌajja ca poa. Poquia poa jamatii oja ba jjima meshi yasijje.  
\v 9 Jamajjeya Eyacuiñajjija esohui jayojja jama poanijo oya baꞌequiꞌya poa pea meshi yasijje, ma Eyacuiñajjiya o huohui ca poa huasijje. Ma meshijo baꞌe dejja pea poa. Jamajjeya Amajamaja equi iya jjima poa; daqui equijo baꞌya poa. Jamaya peaꞌai poa oja bacua Isaaca, ojaya osecua Jacobo peaꞌai. 
\p —Jiquio meshi eyaya miya quiaje miquea ebaꞌejji —jamaya Eyacuiñajjiya huohui ca poa Amajama, oja bacua Isaaca, ojaya osecua Jacobo peaꞌai. 
\p  
\v 10 Eꞌe, Amajama jjashahuabaquinaje pea cuiñajjijo, cuiñajji eyacuajo, ma Eyacuiñajjiya eyajo iya canijo. Amajama jama poa baꞌa: —Quijje eya Eyacuiñajjija cuiñajji eyacuajo baꞌeje. 
\s1 Etiiquiana epona Sana bajjani Eyacuiñajjija epeejji poa 
\p  
\v 11 Sana Eyacuiñajjija epeejji nei poa peaꞌai. Jamajjeya Sana pona tii nojinoji majje jjamejoquia poa, jamatii eshoꞌyahua jjamejoqui jjima poa. Eyacuiñajjiya oya jjamejoqui meesahua ca poa ojaya epeejji nei poanijo. Sana jjashahuabaquia poa jama baꞌa: —Eyacuiñajjiya huohui canaje Amajama ecuanaja ebacuajo eꞌe nei. Jamajjeya ma ecua ecuanaya ohuaya huohui canaje jamaya acajeꞌyo eꞌe jojo nei —Sana poanaje. 
\p  
\v 12 Amajama Eyacuiñajji nijje jjapeequinaje peaꞌai, oja sohuijo eꞌe nei jjabahuejjaquinaje. Jamajjeya dejja tii nojinoji majje, 100 shequiajame tii majje ebacua jea ca poa. Ehuanase etii nojinoji jjamejoquia poa, jamatii yahuajo nei bacuamaꞌ nei nei poa. Jamajjeya ojaya osecua quea huiso nee nee quijje jjapapaquiꞌya poa. Majameta huisoajja poa, sico meemee ajja quea huiso nee nee. Meshijajijo ani mei sisi huisoajja poa. 
\s1 Etiiquiana cuiñajji eyacuajo eyajo jjashahuabaquianinaje 
\p  
\v 13 Jiquio etiiquiana Eyacuiñajji nijje jjapee tiitiiquianinaje. Dejja tii majje manoꞌya poa Eyacuiñajjija epeejji tiiya. Eꞌe, Eyacuiñajjiya oya cuana huohui ca poa jama baꞌa: —Eyaya miya jiquio meshi quiajeꞌyo miquea epojji, miquea osecua cuanaja epojji peaꞌai. 
\p Jamatii maya meshi ojaya pojjeama, mesena jjima poa: —Eyacuiñajjija esohui eꞌe nei, ohuaya meshi quea pame nee quijje quia cajeꞌyo ecuanaja osecua cuanaja epojji —etiiquiana jjashahuabaquianinaje. Jamajjeya oya cuana quea bei nee poꞌayequianinaje: —Ecuana jiquio meshijo anije soꞌo —poaninaje etiiquiana—. Meshijo ca jja ca oe ecuana ebaꞌe tiitiijji pojjeama. Eyajo ca ca oe ecuana baꞌe tiitiijeꞌyo Eyacuiñajjija cuiñajji eyacuajo —jamaya poaninaje Amajama, Isaaca, Jacobo cuana. 
\p  
\v 14 Eꞌe, oya jamaya poaninaje pea ebaꞌejjijo jjashahuabaquianijo. Ebaꞌejji eꞌe jojo neijo jjashahuabaquianinaje ojaya epojji tii tiijo.  
\v 15 Oya cuana jjashahuaba majaqui ajja poa meshijo, ma yahuajo oja jiñaꞌyojo. Jjashahuabaquianinaje jama baꞌa: —Ma e baꞌya poa meshi yasijje ca iña poqui sa poꞌyo ajja. ¿Ajeo epoqui oꞌoyajji, de? —poanaje oya cuana. 
\p  
\v 16 Chojja. Oya cuana pea ebaꞌejjijo jjashahuabaquianinaje, ebaꞌejji eyacua quea pame nee neejo eyajo Eyacuiñajji nijje. Jamajjeya Amajama jama poa baꞌa: —Eyacuiñajji, eya miquea epeejji. 
\p Amajama jama poajo Eyacuiñajji etiiquiana nijje miminaje jama baꞌa: “Miquianaya ecuea epeejji nei; eya quea bei nee miquianajo” aca poa. Jamajjeya Eyacuiñajjiya oya cuana ojaya cuiñajji eyacua quea pame nee yasijje baꞌe mee cajeꞌyo, ma ohua yahuajo eyajo pana caꞌya poa huasijje. 
\p  
\v 17-18 Eꞌe, Amajama Eyacuiñajjija epeejji nei poa. Yahuajo Eyacuiñajjiya oya huohui ca poa: “Amajama, miquea ebacua cuayaje” aca poa. Majoya Amajamaa ebacua cuayajo Isaaca bajjani aca poa. Majoya Eyacuiñajjiya Amajama jama aca poa baꞌa: “Isaacaja bacua ca ca oe eyaya baña miquea osecua eꞌe nei, pea cuana ca chojja” aca poa. Jamatii quijje Eyacuiñajjiya Amajama jama aca poa baꞌa: “Amajama, ¡miquea ebacua ejja oe nei Isaaca bajjani mei biajje huana majje yacuaꞌyocue, dahuajeaꞌyocue!” Jamaya Eyacuiñajjiya Amajama huohuime aca poa aꞌa eꞌe jojo nei ohuaya shajjaꞌajja caje ebajji: “Eya eꞌe jojo nei Amajamaja quea jea neejo, ohuaya ecuea esohui shajjaꞌajja caje” poanaje. 
\p  
\v 19 Majoya Eyacuiñajjija esohui shajjaꞌajja majje Amajamaa oja bacua ejja dojo ca poa eyacuaꞌyojji nisho: —Eꞌe, eyaya Eyacuiñajjija esohui jayojja jama ajeꞌyo; ecue bacua oe nei yacuajeajeꞌyo —Amajama poanaje—. Eꞌe, eya Isaaca yacuaꞌyajo, Eyacuiñajjiya oya emanoꞌyojaa shequi mee caje oꞌoya —Amajama poanaje. 
\p Jamajjeya Isaaca yacua jjimahuajo Eyacuiñajjiya Amajama huohui canaje jama baꞌa: “Amajama, ¡aꞌa miquea ebacua Isaaca yacuaꞌyojji!” aca poa. 
\p Jamajjeya Amajamaa Isaaca equi yasijje dojo ca oꞌoya poa, eshe. Beshahua nei Isaaca yacua caꞌyonaje. Jamajjeya eyacuaꞌyojaa shequi oꞌoya jayojja Isaaca poa. 
\s1 Etiiquiana Isaaca, Jacobo, Jose peaꞌai Eyacuiñajjija epeejji poa 
\p  
\v 20 Isaaca Eyacuiñajjija epeejji nei peaꞌai poa. Jamajjeya ojaya ebacua ejja Jacobo, Esao peaꞌai huohui ca poa jama baꞌa: —Jacobo, Esao peaꞌai, ¡shajjaꞌajjacue mo! Ma ecua eya ohua huohui ca poa jayojja jama Eyacuiñajjiya acajeꞌyo miquiana nijje. Ohuaya miquiana nijje quea pame nee acajeꞌyo. Eꞌe, jiquio meshi miquea osecua cuanaja poajeꞌyo —aca poa Isaacaa. 
\p  
\v 21 Jacobo peaꞌai Eyacuiñajjija epeejji nei poa. Jacobohua dejja tii majje oja bacua ejja Jose bajjanija bacua cuana huohui ca poa jama baꞌa: —Ecuea osecua, Eyacuiñajjiya miquianaya quea pame nee caꞌa cahua eꞌe jojo nei —Jacobohua aca poa ojaya osecua cuana, Joseja bacua ejja cuana. 
\p Majoya Jacobohua Eyacuiñajji bihuia ca poa. Oya dejja tii nojinoji majje ojaya acui ejjaquecua caꞌaquijjijo nequisohuanaje Eyacuiñajji bihuiajji. Jama aca poa baꞌa: —Eyacuiñajji, miya oe nei quea pame nee nee. Eyaya miya bihuiaña —aca poa Jacobohua. 
\p  
\v 22 Jose peaꞌai Eyacuiñajjija epeejji nei poa. Jamajjeya tii nojinojiꞌyo majje manoꞌyo jjimahuaa Joseya oja bacua ejja huohui ca poa jama baꞌa: —Eꞌe jojo nei Eyacuiñajjiya eseya ojjaña Amajamaja pea osecua cuana nijje Ejito meshijo nequi cuayaqui meesahua cajeꞌyo pea meshi yasijje epoquiꞌyojji, eseja meshi yasijje. Jamajjeya ¡e manoꞌyajo ecuea esaꞌ cuana dojoꞌyocue ecue meshi yasijje! ¡Jjani ai yasijje huanadobiañaquiꞌyocue! —huohuime aca poa Joseya. 
\s1 Etiiquiana Moisesi bajjani Eyacuiñajjija epeejji nei poa 
\p  
\v 23 Moisesija chii, ojaya enaese peaꞌai Eyacuiñajjija epeejji nei nei poa. Jamajjeya Ejito meshi meseya Panao bajjaniya ojjaña Ejito meshijo baꞌe cuana Jodio cuana jama aca poa baꞌa: —¡Jodio cuana, miquea ebacua cuaya jeahuajo cuei yasijje jeaoqueajeacue! —aca poa. 
\p Jamatii Moisesija chiiya, oja naeya peaꞌai Panao shajjaꞌajja jjima aca poa. Meteꞌama poa. Panaoja esohui jayojja jama ajjima aca poa; Moisesi jeaoqueajea jjima aca poa. Ba majje jama aca poa baꞌa: —Jiquio ebacua quea pame nee, quea jaꞌa nee nee —aca poa ejeajjiya. 
\p Jamajjeya equijo huanaquehua ca poa pea beca peejjima baꞌime onaa ejaja caꞌyo poajejje.  
\v 24 Panaoja bacua pionaa Moisesi ba majje tii mee ca poa. Jamatii tii majje Moisesi Eyacuiñajjija epeejji nei poa. Jodio cuana nijje baꞌeꞌyo sa poa, oja huapa pojjeama nijje. Moisesiya Ejito dejja jama aca poa baꞌa: —¡Aꞌa eya nequiaa jama ajji baꞌa: “Miya Panaoja bacuaseja bacua” aꞌa eya ajji! —Moisesiya aca poa. 
\p  
\v 25 Ejito dejjaa aje oe Jodio cuana sosemaꞌ chaco mee ca poa, cuiasejjajea ca poa quea huiso nee, Eyacuiñajjija epeejji cuana. Quea nee poa. Jamatii Moisesi Jodio cuana nijje baꞌe sa poa. Oya Ejito cuana nijje baꞌe sa po ajja neinei poa oya cuana quea mimishi poanijojo. Oya ca ca Eyacuiñajji nijje jjapeequi sa poa jamatii quea nee.  
\v 26 Jjashahuabaquia poa jama baꞌa: —Eyacuiñajjija huoojeaꞌyo ojjaña jaahuanajji quea tai nee acajeꞌyo mimishi cuaa. Eya quea nee capoahua peaꞌai o jayojjaya. Jamatii, jamaya quea pame nee. Ejito dejjaja aquiana quea nahue ecuea yani. Jamatii cajaa eyaya ajeaje —Moisesi poa. Ojaya eba poa Eyacuiñajjiya oya quea pame acajeꞌyo quijje onijje jjapeequianijo. 
\p  
\v 27 Moisesi Eyacuiñajjija epeejji nei nei poa. Panaohua ca ca Eyacuiñajjija epeejji Jodio cuana nahue sa aca poa ojaya echacojji sosemaꞌ epojji; quea tai, quea mase oya poa. Jamatii Moisesi Panaojo meteꞌama poa: —Eyaya ca iña Eyacuiñajjija epeejji Ejito meshijo ani cuayaqui meesahuajeꞌyo ecuanaja meshi yasijje epoquiꞌyojji —jamaya Moisesiya Panao aca poa meteꞌamaa nei. Eꞌe, Eyacuiñajji Moisesija eba poa, jamatii Eyacuiñajji jjaba meequi ajjajojo ojaya ecojjaja ba jjima poa. 
\p  
\v 28 Moisesiya Eyacuiñajjija epeejji nei poaniya jjejojo Eyacuiñajjija esohui jayojja huohuime aca poa Jodio cuana jama baꞌa: —¡Ñajjajja cuiacue! Majoya cuiaꞌyo majje ¡jeasijijeacue oja naa miquea esecue jjanijo esohuidojojjiya miquea ebacua ejja ecuiajeajji pojjeamajo, cojjasobo! Jamajjeya poeje shajjamaja bacua ejja cuiajeaa —Moisesiya aca poa. 
\p Jamajjeya Moisesiya esohuidojojjiya Jodio cuanaja ebacua ejja cuia jjima amee ca poa. Majoya jamaya Jodio cuaa ojjaña shequiaja ojee ijjia ca poa ebacua cuiaꞌyo jjima aca poa shejo, epajeaꞌyojji pojjeama jojoya. 
\p  
\v 29 Jodio cuana Isaenija osecua cuana Eyacuiñajjija epeejji poa yahuajo nei Moisesi Jodio cuana jaahuana coojji poa. Jamajjeya Eyacuiñajjiya oya cuana bae huoꞌo ojje miji yasijje poqui mee ca poa ejiojji jabojje. Ba majje Ejito dejja jama poa baꞌa: —¡Cuaꞌa! ¡Poquicue ma ecua Jodio dejja poquia bacue! —poa. Jamatii Ejito dejja epoquijji nisho poꞌajja poa. Huiꞌi jeyojeyoꞌya poa ojjaña. Enaa oya cuana jepajea ca poa. 
\p  
\v 30 Isaenija osecua cuana Eyacuiñajjija epeejji poa Josoe o huoojeaꞌyojji poanijo peaꞌai. Jamajjeya Eyacuiñajjija esohui jayojja jama Jenico cuiñajji sahuajje jjajeacohuiqui nequiꞌya poa. Quea huiso cahuime dobiqui jjima, me oejje pea beca cahuime, 7 cahuime aca poa. Eyacuiñajjiya mei peeyi jaabichajea meequi ca poa meshi yasijje. Jamaya aca poa Isaeni dejja cuaa. Ojjaña mimishi cuana jomajo baꞌe quecua jeyojeyo meesahua ca poa, Eyacuiñajjiya. 
\p  
\v 31 Epona Shajami bajjani, ma pea cojjojji yahuajo poa Eyacuiñajjija epeejji poꞌyonaje. Jamajjeya Josoeja huoojea beca dejja Jenico cuiñajji quehua baa dobiqui Shajamiya oja equi yasijje iyaaquehua ca poa onaa equecua ca poajejje. Jamajjeya Josoeja sohuinano cuaa dejja mimishi quecuajeaꞌyo majje Shajami quecuaꞌyo jjima poa. Josoeya huohui ca poa jama baꞌa: —¡Aꞌa Shajamija huapa pojjeama quecuajji! —aca poa. 
\s1 Jodio etiiquiana quea huiso Eyacuiñajjija epeejji poa 
\p  
\v 32 Pea etiiquiana quea huiso Eyacuiñajjija epeejji nei poa. Beca cuana ma bajjani poa baꞌa: Jjeneoni bajjani, Banaca bajjani, pea Sanisohui bajjani, pea Jepete bajjani, pea Dabi bajjani, pea Samoeni bajjani. Quea huiso Eyacuiñajjija esohui huohuijji Jodio etiiquiana poa. Jjeya ca ca eyaya ojaya cuanaja ebaꞌejjijo ehuohui jeyojeyojji pojjeama quea huisojojo.  
\v 33 Oya cuana Eyacuiñajjija epeejji nei poaninajejo oya cuana ameesahua canaje joya ecua peaa ajjima acani jama. Jamajjeya beca cuaa emeshi mese quea mimishi cuana jeabichajea ca poa. Pea cuana ona huoojeajji quea jaꞌa nee poa. Pea cuana quea caꞌa poa, quea jaꞌa nee baꞌeꞌya poa. Ojaya esohui yahuajo jayojja ma ecua ohuaya yahuajo esohui huohui ca poa jamaya aca poa onajo, Eyacuiñajjiya. Pea cuana neonija, ibia naa ashaja ijjia jjima poa Eyacuiñajjiya oya jjanaba cami meequi ca poa ojaya epeejji cuana eꞌijjia caꞌyo poaje jjejojoya.  
\v 34 Pea cuana Eyacuiñajjiya jaahuana canajejo quiyoꞌyo jjima poa. Cuaqui jiji neijo nequi quiyoꞌyo jjima poa. Pea cuana quehuajje poquicuaji meesahua ca poa dejja maseya equecua ca poaje jjejojoya. Pea epeejji cuana caꞌaꞌama. Jamatii Eyacuiñajjiya quea caꞌa po mee ca poa; dejja mase quea huiso cuana jeabichajea ca poa, Eyacuiñajjija epeejji pojjeama mete mee ca poa.  
\v 35 Epona cuana quea yeno nee nee ebacua manoꞌyajo poa. Jamatii Eyacuiñajjiya ebacua cuana emanoꞌyojaa shequi mee ca oꞌoya poa. Quea bihui nee po mee ca poa. Pea cuana ca ca dejja mimishiya quea nee nee po mee caꞌya poa. Quea nee neejo manoꞌya poa. Oya cuana huohui ca poa dejja mimishiya: —¡Eyacuiñajji nijje jjapeequi pajeaꞌyocue! ¡Cajaa acue! Majoya miya quecuaꞌyo jjima poaje —poanaje cuana. 
\p —Chojja. Eya Eyacuiñajjija epeejji nei. Oya cajaa aꞌajja tii ecuea. Eya ca ca iña meteꞌama emanoꞌyojji —sajaꞌame aca poa Eyacuiñajjija epeejji cuaa. 
\p Jamajjeya aje oe quecua caꞌya cuaa poa. Ma epeejji nei jjashahuabaquianinaje jama baꞌa: —Eyacuiñajjiya eꞌe jojo nei eya quea pame nee baꞌe tiitii mee cajeꞌyo onijje eyajo quijje —poa mano jjimahua. 
\p  
\v 36 Dejja mimishi cuana Eyacuiñajjija epeejji cuanajo soa neineinaje ojjañaa ba canijo peaꞌai. Napa canaje, cuiasejjajea canaje jjonohua, jeyo canaje cadenaa, jeanobiajea canaje.  
\v 37 Jajahuejjajea canaje meiya peaꞌai. Eꞌe, acui ijjiasejjameejjiya oya cuana ijjiasejjajea mee caninaje, esapa jajasejjajea ca poa baaa Eyacuiñajji aꞌa cajaa acajeꞌyo ebajji. Aemaꞌ poa; daquimajo ijjiacajji jee daqui huosho ca poa. Bobi yasijje poꞌya poa. Quea naba taja nee nee peaꞌai poa. Eꞌe, ojjañaa ba canaje dejja mimishi cuaa oya cuana quea tai nee nee aca poa, cajaa aca poa. Jama aca poa: —¡Dee! Jiquio dejja cuana quea tai, cajaa. ¡Ejjacuiajeaquiꞌyo! —aca cuaa poa. 
\p  
\v 38 Jamajjeya oya cuana dejja masejo quea mete jjejojo quehuajje poquinaje. Cuajicuaji poquinaje meshi quima huasijje, eyiyo huasijje, jjani yasijje peaꞌai. Equi chamajo jjanijo baꞌya poa. 
\p  
\v 39 Jiquio Jodio etiiquiana Eyacuiñajjija epeejji poa, quea pame nee. Eyacuiñajji jama poa ona nijje baꞌa: —Miya ecuea epeejji nei quea pame nee nee, ecuea ehuohui jayojja jama aña. 
\p Jamatii Eyacuiñajjija ejjashahuabaquijji quea pame nee ajjima poa ona nijje jiquio meshijo baꞌyanijo.  
\v 40 Jamajjeya Eyacuiñajjiya oya cuana ishoa mee ca poa. Eꞌe, Eyacuiñajji jjashahuabaquinaje ojjaña cuana quea boejeaꞌyo epo meeꞌyojji; ojjaña yahuajo nei cuana baꞌya poa, eseya jjeya nei baꞌe peaꞌai quea boejeaꞌyo epo meeꞌyojji. Jamajjeya ojjaña eseya ojee baꞌe tiitiijeꞌyo quea boejea Eyacuiñajji nijje eyajo, ojjaña tii. 
\c 12  
\s1 ¡Eyacuiñajjija epeejji yahuajo baꞌya poa jayojja baꞌecue Jesosaja epeejji nei! 
\p  
\v 1 Jamajjeya ojjaña Eyacuiñajjija epeejji yahuajo baꞌya poaa jjeya nei ecuana huohui cani jama baꞌa: —¡Bacue! Ecuana Eyacuiñajjija epeejji nei poa. ¡Ecuana jayojja pocue! —poani. 
\p Ecuana Jesosaja epeejji dejja cuajicuajiani jama. Mimishi ca ca aquiana quea biquie ebaꞌo baꞌe jayojja. Jamatii ecuaaya caꞌaꞌamaa jjejojo mimishi acuajiaña. Jiquio ecua dejja aquiana abo po jjima cuajicuajiani jayojja jama eseyaya mimishi ejjapajea neineiquiꞌyo Jesosaja epeejji nei epoꞌyojji. Oya, Jesosa esejaya ecuajicuaji meesahuajji jayojja. Jamajjeya ojaya ejjashahuabaquijji jayojja jama ejjaꞌa tiitiiquiꞌyo.  
\v 2 Jamajjeya ¡Jesosajo jjashahuabaquicue! Ohuaya yahuajo eseya onijje jjapeequi mee canaje. Jjeya ohuaya eseya onijje jjapee tiitiiqui meesahua cani. Jesosa jama jjashahuabaqui ajja baꞌa: —Chojja de, eya acui ecueataꞌapeejo emanoꞌyojji pojjeama —jamaya po jjima poa. 
\p Chojja. Jesosa jama poanaje baꞌa: —Eꞌe, ojjaña enijje quea mimishi nee nee poaje. Jamatii eya ecue Chiiya huohui ca poa jayojja jama manoꞌyome poaje acui ecueataꞌapeejo. Jamajjeya quijje eya ecue Chii nijje anioqueje quea bihui nee ojaya esohui jayojja jama amajje —jamaya Jesosa poanaje. 
\p Jamajjeya Jesosa manoꞌyo majje Eyacuiñajji pejjejo anioquenaje ebianei mijijje ojjaña huoojeaꞌyojji. 
\p  
\v 3 Eꞌe, ¡jjashahuabaquicue Jesosajo! Yahuajo nei mimishi cuaa onijje quea quene nee nee po majje quea nee nee po mee canaje. Jamajjeya Jesosajo jjashahuabaquianijo miquianaya quea yeno epojji pojjeama onaa napa cajje. Onijje jjapeequi pajeaꞌyo ajja poaje.  
\v 4 Yahuajo miquianaya ojee jjapeequianijo Jesosaja epeejji quea jaꞌa poꞌyonaje. Shajjamaꞌ po jjima. ¡Bacue! Jesosaa oja Chiija ehuohui jayojja ohua huohui cajo, mimishi cuaa quecua caꞌya poa. Miquianaya ca ca mimishi cuaa cuiaꞌyo jjima Jesosa nijje jjapeequianijo.  
\v 5 ¡Aꞌa pajeaꞌyojji Eyacuiñajjija esohui etehueꞌyo! Ejeajjiya oja bacua cuana tecuea cani ejjashajjaꞌajjaquijji jayojja jama Eyacuiñajji ese nijje miminaje: 
\q1  
\v 6 “Ecuea ebacua cuana, ¡eyaya miquianaya jjabahuejjaqui meeañajo shajjaꞌajjacue mo! Eyaya miquianaya miquea mimishijo tecueañajo ¡aꞌa quea yeno pojji! Eꞌe, ojjaña joya ecuea quea jea nee nee eyaya jjabahuejjaqui meeaña. Ecuea ebacua cuana eyaya tecueaña mimishiꞌama epojji”. 
\m Jamaya Eyacuiñajjiya, eseja Chii aiya eseya aca poa. 
\p  
\v 7 Jamajjeya Eyacuiñajjiya miquianaya jjabahuejjaqui mee canijo, ¡aꞌa quea yeno pojji! ¡Onijje mimicue jama baꞌa: —Eyacuiñajji, miya ecue Chii ai. Miyaya eya quea nee po meeaña eya miquea esohuijo ejjabahuejjaqui meejji —jamaya onijje mimicue! 
\p Eꞌe, jiquio ecua seya esejaya ebacua cuana tecueaña jamaya Eyacuiñajjiya eseya acani. Eseja bacua cuana eseyaya tecueaña ejjabahuejjaquijji.  
\v 8 Ojjaña ejeajji cuaa oja bacua cuana niñesheꞌa cani. Ejeajjiya oja bacua tecuea jjima acani shajjamaꞌ poanijo onaya mimije jama baꞌa: —¡Dee! Oja bacua pojjeama pojjaꞌa, jamajjeya mi jjabahuejjaqui mee cani. Jea jjima jama, de —acaje cuaa. 
\p Oya jayojjaya Eyacuiñajjiya ojjaña ojaya ebacua cuana jjabahuejjaqui mee cani shajjamaꞌ epojji pojjeama. Ohuaya miquianaya jjabahuejjaqui mee jjima acani ca ca miquianaya oja bacua pojjeama, peaja bacua pojjaꞌa. 
\p  
\v 9 Eꞌe, ejeajji cuaa eseya niñesheꞌa cani eshoꞌyahua ejjashajjaꞌajjaquijji. Jamajjeya oya jayojjaya esejaya Chii ai ejjashajjaꞌajja neineiqui; ohuaya eseya baꞌe tiitii mee cani.  
\v 10 Eyacuiñajjiya eseja Chii aiya ca ca eseya tecuea cani quea jaꞌa nee ebaꞌejji. Jjabahuejjaqui mee cani o jayojja quea pame nee nee, quea boejeaꞌyo nee epo tiitii meejji. Esejaya ejeajjiya ca ca ojaya ejjashahuabaquijji jayojja jama eseya tecuea ca poa eshoꞌyahua.  
\v 11 Jjeya Eyacuiñajjiya quea nee po mee cani ejjabahuejjaqui meejji eseya quea bihui pojjeama, quea yeno poani. Jamatii quijje jjabahuejja neineiqui majje eseya quea jjashahuabaqui jaꞌa nee poaje, quea bei nee nee poaje. 
\p  
\v 12 Jamajjeya ¡aꞌa quea yeno pojji jamatii quea camaja poanijo! ¡Quea jaꞌa nee oe jjapeequicue Eyacuiñajji nijje!  
\v 13 Jamajjeya ¡ejiojji epi jaji neijje poquiani jayojja jama pocue! ¡Quea jaꞌa nee jjapeequicue Jesosa nijje! ¡Pea cuana jjapee neineiqui meesahuacue peaꞌai Jesosa jayojja epojji! 
\s1 ¡Jesosa nijje aꞌa jjapee pajeaquiꞌyojji! 
\p  
\v 14 Ecuea epeejji cuana, ¡quea bei baꞌecue ojjaña nijje! ¡Quea boejeaꞌyo baꞌecue peaꞌai! Quea boejeaꞌyo baꞌeꞌyo ajja aje oe Eyacuiñajji nijje ebaꞌe tiitiiꞌyojji pojjeama.  
\v 15 ¡Ba neineicue! ¡Ojjaña Eyacuiñajji nijje jjapee neineiqui meesahuacue onijje ebaꞌe tiitiiꞌyojji! Aꞌa jja oe jama pojji baꞌa: Acui iña quea cuaja nee nee pejjejo nequi majje manoꞌyo chanaꞌ. Oya jayojja dejja tecueya ojjaña o pejjejo baꞌe quea tecue po mee cani. Quea tecue po tiitiiani, quea huiso quea quene po mee cani. Quea huiso quea mimishi po mee cani peaꞌai. Jamajjeya ¡aꞌa quea tecue po majajji! Quea tecue po majjeya Eyacuiñajji pajeaꞌyo chanaꞌ.  
\v 16 ¡Aꞌa pea cojjojji pojji peaꞌai! ¡Aꞌa etiiquiana Esao bajjani jayojja jama pojji peaꞌai! Ojaya, Esaoja, yahuajo nei Eyacuiñajjija esohui botiꞌama poa. Ojaya ejjashahuabaquijji jayojja jama poa jama baꞌa: Oya cojjasobo poa. Jamajjeya oja chii manoꞌyajo, ojjaña ojaya aquiana equijjojea cajo Esaoja poajeꞌyo, cojjasoboja. Jamatii oja chahua huohui ca poa jama baꞌa: —Cha, ¡che mo bobi quiacue! Quea shoe mo coma. Miya bobiaje sosejje aje mi sosequiajeꞌyo; ma cacaa quijjojea cajo eyaya miya quiajeꞌyo; ecuea pojjeama poajeꞌyo, miquea poajeꞌyo —aca poa oja chahua Esaohua, jjashahuabaqui jjima jayojja poa. 
\p  
\v 17 Cojjasobojo Jodioja ejeajji cuana jama poaninaje baꞌa: —Eyacuiñajji, ¡ecuea ecue bacua cojjasobo jaahuanacue, quea aquiana huiso po meecue! —poaninaje Jodio etiiquiana. 
\p Jamajjeya quijje Esao oja chii nijje miminaje jama baꞌa: —Ecue chii, ¡Eyacuiñajji nijje mimicue e jaahuanajji! —poa—. ¡Jama acue baꞌa: “Eyacuiñajji, ¡ecuea ebacua cojjasobo Esao bajjani jaahuanacue!” acue! —jamaya Esaohua oja chii aca poa. 
\p —Chojja, Esao. Yahuajo eya jamaya miminaje Eyacuiñajji nijje mique chahuajo, mijo pojjeama. Apoa —oja chiiya jama sajaꞌameya aca poa. 
\p Jamajjeya Esao cajaa aca poa cojjasobo jayojja jama epojji pojjeama. 
\p Jamajjeya Esao pa neineinaje, quea yeno nee nee poanaje oya chiija aquiana mesenaꞌyo sajo. Jamatii oja chii ma ohua yahuajo esohui huohui ca poajo pajeapajeaꞌyo ajja poa pea esohui ehuohui oꞌoyajji. Esejaya eba Esaoja esohui oja chahua nijje, oja chiija aquiana quia ca poa bobi sosejje. Jamajjeya oja chiiya oya cojjasobo jayojja pojjeama acaꞌya poa. 
\p  
\v 18 Yahuajo nei nei peaꞌai Eyacuiñajjiya eyiyo Sinai bajjanijo nequiya esohui huohui ca poa; Jodio etiiquiana Moisesi nijje nequi quea mete nee nee poa. Eꞌe, yahuajo Jodio cuana eyiyo huasijje poe majje Sinai eyiyojo nequiñaquia poa. Eyiyo ba cañaquia poa jiji neineiqui. Quea bo moo eyiyo biajje nequia poa. Quea huichacha moo, quea misi poa. Quea beni quemo peaꞌai poa eyiyo biajje. Pojjejje baa siyoo peaꞌai po nequia poa.  
\v 19 Taaa po neinei nequia poa, huaca sheꞌana quea quemo mia cani jayojja jama shajjaꞌajja ca poa Eyacuiñajjija emimi. Ma shajjaꞌajja majje quea mete nee nee poa etiiquiana cuana Eyacuiñajjijo. Jama taaame aca poa baꞌa: —¡Ecuana nijje aꞌa mimi oꞌoyajji! —taaa ca poa cuana quea ajjajja nee nee jjejojo. 
\p  
\v 20 “¡Aꞌa eyiyo huasijje jaasohuajji!” Eyacuiñajjiya aca poa. “¡Aꞌa aquiana ehuoneꞌ jaasohua meejji peaꞌai! ¡Jaasohuajo ca jajahuejjajeacue meiya!” Eyacuiñajjiya aca poa. 
\p  
\v 21 Jamajjeya ojjaña tii quea mete nee nee poa. Ba majje etiiquiana Moisesi peaꞌai quea ajjajja nee nee poa: —Eya quea mete nee nee jjejojo piopioani —Moisesi poa. 
\p  
\v 22 Jjeya ca ca yahuajo jama pojjeama. Miquianaya ca ca Eyacuiñajjiya oja sohui ba mee canijo ¡aꞌa quea mete pojji! Miquianaya Eyacuiñajji baꞌe yasijje poeyanaje. Ma ebaꞌejji eyiyo Sioni bajjani jayojja, ma Jenosanena eyacuajo nequi jayojja. Maya Eyacuiñajjija cuiñajji eyacua eyajo. Jomajo Eyacuiñajji baꞌe tiitiiani, eshe. Ma cuiñajjijo Eyacuiñajjija esohuidojojji ejjanequichichaqui; quea bihui nee nee, quea huiso nee nee nequi, de. Sicosico meemee ajja, yajja sicome yajji quea huiso nee nee oya aña.  
\v 23 Jomajo Eyacuiñajjija epeejji cuana quea bihui nee nee Eyacuiñajji pejjejo yani peaꞌai ma yahuajo nei nei onijje jjapeequia poa. Eyacuiñajjiya oja bajjani cuana oja esohui etehueꞌyojo tehue ca poa eyajo. Eꞌe, miquianaya Eyacuiñajji nijje jjapeequiani. Ohuaya ojjaña cuana meshijo baꞌe sosequia caje ojjaña ma onaa acanaje sosejje. Jomajo, eyajo Eyacuiñajjija epeejji emanoꞌyo cuanaja edojjoshahua cuana yani, ma yahuajo mimishi cuijea caꞌya poa cuana.  
\v 24 Eꞌe, miquianaya Jesosa nijje jjapeequiani. Ohuaya ca ca oe eseya esohui eyacua huohui canaje ebaꞌe tiitii meeꞌyojji. Esejo manoꞌyonaje peaꞌai. Ojaya enaꞌ cuayaquia poa esejaya mimishi cuijeaꞌyojji sosejje. Oya Jesosa Adanaja bacua ejja Abeni bajjani jayojja jama pojjeama. Abenija enaꞌ cuayaquiajo oja oꞌi Eyacuiñajjiya tecuea neinei ca poa echahua mese cuia caꞌyajo. 
\p  
\v 25 ¡Jamajjeya Eyacuiñajjija esohui shajjaꞌajjacue! ¡Aꞌa shajjamaꞌ pojji! Yahuajo eyiyo Sinai pejjejo Moisesiya Eyacuiñajjija esohui huohui majamaja ca poa etiiquianaja eshajjaꞌajjajji nisho. Jamatii aje oe shajjamaꞌ poa. Jamajjeya Eyacuiñajjiya oya cuana quea nee po mee ca poa. Jjeya Eyacuiñajjiya eyajo nequiya eseya huohui cani oja sohui eyacua, ma esejaya yahuajo shajjaꞌajja jjima. Shajjamaꞌ poajo eꞌe jojo nei ohuaya eseya quea nee nee po mee cajeꞌyo, de.  
\v 26 Eꞌe, yahuajo nei Eyacuiñajjiya eyiyo Sinai biajje sohuihuohui ca poajo, meshi huehuahuehua mee ca poa janobajjima nei. Jjeya oya jama poanaje baꞌa: “Eyaya eꞌe jojo nei meshi, eyatahuatahua peaꞌai huehuahuehua meejeꞌyo janobajjima nei nei” jamaya Eyacuiñajji poanaje. 
\p  
\v 27 Jamajjeya Eyacuiñajjiya jama acajo baꞌa: “Meshi, eyatahuatahua peaꞌai huehuahuehua meejeꞌyo” acajo, esejaya eba ohuaya ojjaña oja pana huehuahuehua meeꞌyo majje chamaꞌyo tii poajeꞌyo ojjaña aquiana yahuajo oja panaꞌyo. Ojjaña aquiana eyacua ehuehuahuehuaꞌyojji pojjema anijeꞌyo tii tii. 
\p  
\v 28 Eyacuiñajji ojjaña huoojeaꞌyojji poani tii tii. Chamaꞌ o jeabichajeaꞌyojji epojji. Ese huoojeaꞌyojji poani tii tii oya. Jamajjeya Eyacuiñajji ejjabihuiaqui jama baꞌa: —Jamaya Eyacuiñajji, miya quea pame nee nee poani tii. Miya ecuana huoojeaꞌyojji quea caꞌa nee nee. 
\p Eꞌe, ¡Eyacuiñajjija esohui jayojja jama ebaꞌe tii tii! ¡Oya ejjashajjaꞌajja tiitiiqui! ¡Quea mete epo tii tii; shajjamaꞌ pojjeama epo!  
\v 29 ¡Ojo ejjashahuabaqui! Jiquio ecua cuaquijo quiyo jeajea jeyojeyo yani jayojja jama Eyacuiñajjiya shajjamaꞌ cuana quea nee nee po mee cajeꞌyo, de. 
\c 13  
\s1 ¡Jesosaja epeejji poanijo baꞌecue quea pame Eyacuiñajjija quea boti nee eꞌajji! 
\p  
\v 1 Ecuea epeejji cuana, ¡pea cuana Jesosaja epeejji peaꞌai poanijo quea jea nee nee atiitiicue huapa pojjeama jama!  
\v 2 ¡Pea cuana miquianajaya ba jjima quea jea acue! ¡Equi yasijje poeyajo quea pame nee acue peaꞌai! ¡Miquianajaya equi yasijje iyaacue! Yahuajo beca cuana jama poanijo esohuidojojji jaahuana ca poa, jamatii oya ojaya cuana ba jjima esohuidojojji poa. Jjashahuabaquia poa jama baꞌa: —Eꞌe, jiquio dejja cuana ecuea ba jjima eyaya bobiaje —esohuidojojji pojjeama poso aca poa. 
\p  
\v 3 ¡Cuanaya baquicue Jesosaja epeejji joya ejeanobiajea jaa cuana! ¡Aꞌa oya cuana pajeaꞌyojji! ¡Jjashahuabaquicue jama baꞌa: —Eya ona jayojja jama ejeanobiajea jaa jjemo quea shoe, quea yeno pome. Jamajjeya eyaya oya cuana baquije, bobi quiaje, onijje jjapeequije —pocue! 
\p ¡Aꞌa pajeaꞌyojji Jesosaja epeejji quea nee poani onaa napa cajo peaꞌai! ¡Jjashahuabaquicue jama baꞌa: —Onaa napa cajje eya quea nee pome, eya quea yeno pome. Jamajjeya eyaya oya cuana baquije quea bihui epojji. Ona nijje jjapeequije. Eyacuiñajji nijje mimije onajo peaꞌai —pocue! ¡Jamajjeya oya cuana baquicue, ona nijje jjapeequicue! 
\p  
\v 4 Jjashahuabaquicue jama baꞌa: ¡Aꞌa jjacojjoquijji! Yahueya, ¡miquea ehuanase oe nei jaahuanacue! ¡Onijje tii jaacue! Ojjañaja eba jamaya quea pame nee. Jamajjeya ¡aꞌa quea mimishi pojji! ¡Aꞌa pea cojjojji pojji yahue, ehuanase peaꞌai! Jama poajoya Eyacuiñajjiya eꞌe jojo nei miquianaya tecuea neinei majje quea nee nee po mee cajeꞌyo. 
\p  
\v 5 ¡Aꞌa quea aquiana jea pojji! Eyacuiñajjiya eseya jama acanaje baꞌa: “Eyaya miya epajeaꞌyojji pojjeama nei nei. Eyaya miya ejeanaꞌyojji pojjeama” poanaje. 
\p  
\v 6 Jamajjeya miquea aquiana ebaꞌe meejji yanijo ¡quea bei pocue! Esohui yahuajo etehueꞌyo jayojja jama mimicue jama baꞌa: 
\q1 “Eyacuiñajjiya, Emeshi Mese neiya eya jaahuana cani tii tii. Jamajjeya eya meteꞌama poani. Dejja mimishi cuaa eya ejeabichajeaꞌyojji pojjeama. Eyacuiñajjija eya ejaahuana pajeaꞌyojji pojjeama”. 
\m ¡Jamaya mimi majamajacue! 
\s1 ¡Jjapee tiitiiquicue Jesosa nijje! 
\p  
\v 7 ¡Aꞌa pajeaꞌyojji Eyacuiñajjija esohui huohuijji, yahuajo miquiana sohui huohuijji poa! ¡Jjashahuabaquicue oya cuana quea jaꞌa nee baꞌenaje Jesosa nijje jjapeequianijo! Manoꞌya poa Jesosaja epeejji nei. ¡O jayojjaya Jesosa nijje jjapee neineiquicue!  
\v 8 Eꞌe, Jesosa Quito oja sohui jayojja jama poani, pajeaꞌyo ajja tii tii. Ojaya ejjashahuabaquijji yahuajo nei jayojjaya nei acani tii. Quijje nei jamaya atiitii cajeꞌyo peaꞌai.  
\v 9 Jamajjeya ¡peapea ehuohuiꞌyo Jesosaja esohui eꞌe nei jayojja jama pojjeama aꞌa shajjaꞌajjajji! Pea ehuohuiꞌyo shajjaꞌajja majje o jayojja mimishi mi poꞌyo chanaꞌ. Eyacuiñajjiya eseya quea jea nee nee acanijo esohui eꞌe nei ba meesahua cani Jesosaja epeejji quea caꞌa nee epojji. Pea cuaa ca ca shajjaꞌajjacani esohui quea quehua bobijo jama baꞌa: —¡Beca bobi aꞌa ijjiajji Jesosaja epeejji nei epojji! —acani Jodio etii cuaa. 
\p Ma esohui shajjaꞌajja cani cuaa eshajjaꞌajjajeajji, de. Bobijo pojjeama Jesosaja epeejji nei poaje; ojaya esohui ba neinei majje. 
\p  
\v 10 Ecuea epeejji cuana, yahuajo nei nei Jodio etiiquianaja Eyacuiñajji nijje emimijji cuaa, ma Eyacuiñajjija daqui equijo chacochacoaninajeya aquiana ehuoneꞌ dahua majje ijjia ca poa. Jamatii Eyacuiñajjija esohui eyacua ba mee jjima poa. Eyacuiñajjija esohui eyacua bobi jayojja. Ojaya epeejji poanijo, ohuaya eseya oja esohui jayojja jama po mee cani, ma esohui bobi eꞌijjiajji jayojja ba meesahua cani. 
\p  
\v 11 Yahuajo nei Eyacuiñajji nijje emimijji etiiya aquiana naꞌ dojodobiaqui caninaje Eyacuiñajjija equi yasijje, equecuayijji biso nei yasijje. Ojjaña shequiajajo oe dojodobiaquime acaninaje ijjiacajji ehuone naꞌ. Dojodobiaqui majje jeasijijea caninaje Eyacuiñajjija ebajji. Jeasijijea caninaje Eyacuiñajjija etiiquianaja mimishi ecuijeaꞌyojji sosejje. Ma aquiana etiiquianaja ijjia jjima poa. Chojja. Dojocuayaqui caninaje cuiñajji esecue yasijje edahuajeaꞌyojji.  
\v 12 Oya jayojja Jesosa manoꞌyajo ojaya enaꞌ cuayaquia poa esejaya mimishi cuijeaꞌyojji sosejje, mimishiꞌama nei nei epo meeꞌyojji. Dejja mimishi cuaa oya dojocuayaqui ca poa cuiñajji esecue yasijje equecuaꞌyojji.  
\v 13 Eꞌe, dejja mimishi cuaa oya quea tai aca poa. Jamatii Jesosa jjashahuabaqui jjima jama baꞌa: —Chojja, eya acui ecueataꞌapeejo mano sa poꞌyo ajja —jama po jjimaya Jesosa. Jama poanaje baꞌa: —Eya manojeꞌyo acui ecueataꞌapeejo mimishi sosequiaꞌyojji —Jesosa poanaje. 
\p Jamajjeya Jesosa jayojja jama epo tiitiijji. Jesosa nijje jjapeequianijo, mimishi cuaa eseya quea tai acajje jamatii Jesosa nijje ejjapee tiitiiqui.  
\v 14 Esejaya eba jiquio meshijo ebaꞌe tiitiijji pojjeama. Meshi esejaya ebaꞌe tiijji yajji pojjeama. Quijje ca ca eseya baꞌe tiitiijeꞌyo ebaꞌejji eyacuajo Jesosa nijje. Ma ebaꞌejji eyacuajo eseya jjashahuabaquiani.  
\v 15 Jamajjeya Jesosaja epeejji poanijo ¡Eyacuiñajji ejjabihuia tiitiiqui! Jama baꞌa: —Eyacuiñajji, miya quea pame nee nee. Pea chamaꞌ mi jayojja —ejjaꞌa tiitiiqui. 
\p Jesosa Eyacuiñajji nijje mimiani ese cuanajo. Jamajjeya eseyaya oya bihuiaña jama baꞌa: —Jesosa, miya ecuanaja Emeshi Mese nei quea pame nee —oya bihuiaña. 
\p  
\v 16 ¡Pea cuana quea pame nee atiitiicue peaꞌai! ¡Nishehuiꞌama pocue, dejja taiꞌama pocue! ¡Aꞌa pajeaꞌyojji! Jamaya poanijo Eyacuiñajji quea bihui nee poaje miquiana nijje. 
\p  
\v 17 ¡Jesosaja epeejji jaahuanajji cuanaja esohui jayojja jama acue! ¡Shajjaꞌajjacue, miquianaaya! Quijje Eyacuiñajji cojja nei nequiya emeshi meseya, mi jaahuanajjiya huohui caje achajja miquianaya jaahuana canaje. Jamajjeya miquianaya jaahuana cani quea pame nee, Jesosa nijje ejjapee pajeaquiꞌyojji pojjeama. Miquiaa shajjaꞌajjajje ohuaya miya quea bihui nee baꞌe meesahua cajeꞌyo. Shajjamaꞌ poajo ca ca quea yeno nee poaje. Miquianaya quea yeno nee nee poaje peaꞌai. 
\p  
\v 18 Epeejji cuana, ¡Eyacuiñajji nijje mimicue ecuanajo! Eyacuiñajjija eba ecuana quea jaꞌa nee baꞌe sa poani tii tii ojo. Ecuanaya jjabaquiani quea jaꞌa nee baꞌyani ojaya esohui jama.  
\v 19 Jamajjeya ¡ecuanajo mimicue Eyacuiñajji nijje jama baꞌa: —Eyacuiñajji, ¡Pabo poe meesahua oꞌoyacue ecuana baa! ¡Jjeya nei oe poe meesahuacue! —acue! 
\s1 Esohui quijjeyejje nei tehueꞌyo 
\p  
\v 20 Ecuea epeejji cuana, esejaya Emeshi Mese nei Jesosa oja epeejji cuana jaahuanajji poani, ñajjajja jaahuanajji nei nei jayojja oya poani. Manoꞌyajo, Eyacuiñajjiya Jesosa shequi mee ca oꞌoyanaje. Jamajjeya Jesosa shequi meeꞌyo majje Eyacuiñajji jama poanaje baꞌa: —Ecuea Ebacua Ejja miquianajo manoꞌyonajejo, ojaya enaꞌ cuayaquinajejo, ¡jjeya ecuea esohui eyacua jayojja jama atiitiicue! Jamajjeya miquianaya baꞌe tiitii meejeꞌyo enijje eyajo —Eyacuiñajji poanaje. 
\p  
\v 21 Miquianajo eya Eyacuiñajji nijje mimiani jama baꞌa: —Eyacuiñajji, ¡miquea epeejji cuana ejjabaꞌechejjequi baꞌeca cuana quea bei baꞌe meesahuacue! ¡Chaco meesahuacue mijo quea pame nee nee! ¡Miquea ejjashahuabaquijji jayojja jama ameesahuacue peaꞌai! Miquea Ebacua Ejja Jesosa Quito nijje jjapeequianijo, ¡jamaya ameesahuacue Jesosa quea bihui nee epojji! ¡Oya quea caꞌa nee nee quea pame nee cabaꞌe tiitiiꞌyahua! Jamaya Eyacuiñajji —eya poani. 
\p  
\v 22 Ecuea epeejji cuana, eyaya jiquio esohui tehueaña miquiana quea bihui pojji. Eyaya oe pojji esohui tehueaña. Jamajjeya ¡ecuea esohui shajjaꞌajja neineicue quea bihui nee!  
\v 23 Esejaya epeejji Timoteo ejeanobia jaa poa. Cuayaqui mee caꞌyonaje. Quijje pishana oya e que poeꞌyo majje enijje poquije miquiana baa. 
\p  
\v 24 Jamajjeya epeejji cuana, miquianajaya esohui huohuijji cuana ojjaña Eyacuiñajjija epeejji cuana miquiana nijje baꞌe peaꞌai ¡ecuanaja esohui huohuicue jama baꞌa: —¿Achajja acuae nequiana ani soꞌo? —acue ecuanaja ebajji! 
\p Ojjaña Eyacuiñajjija epeejji cuana Itania meshijje poe miquianajo jjashahuabaquiani: —¿Achajja ami ani soꞌo? —huohuiꞌajjame acani ojaya ebajji. 
\p  
\v 25 ¡Eyacuiñajjiya, esejaya Chii aiya miquianaya cajaahuana cahua quea pame nee! 
\p Mahuiso ecuea esohui. Eyaya Pabo bajjaniya esohui tehuejeyonaje. Apoa.