\id EPH - Ese Ejja NT -Bolivia 2012 (DBL -2013) \h EPESIO \toc1 Paboja Etehueꞌyo Epeso Cuiñajji Yasijje \toc2 Epesio \toc3 Ef \mt2 PABOJA ETEHUEꞌYO EPESO CUIÑAJJI YASIJJE \mt1 EFESIOS \c 1 \s1 Pabohua tehue canaje Jesosaja epeejji cuanaEpeso cuiñajjijo baꞌe yasijje \p \v 1 Eya bajjani Pabo. Jesosa Quitohua eya huoojea canaje oja sohui huohuiya. Jamaya Eyacuiñajji sa poanaje. Eyaya miquianaya Epeso cuiñajjijo baꞌe yasijje esohui tehueaña. Eꞌe, miquianaya Jesosa Quito nijje jjapeequiani. \v 2 Eyacuiñajji esejaya Chii ai poani. Jesosa Quito esejaya Emeshi Mese nei oe nei. ¡Ohuaya miquianaya quea bei nee cabaꞌe meesahua cahua! ¡Quea boejea capo mee cahua peaꞌai! \s1 Jesosa eyajo baꞌe jayojja jama eseya baꞌe mee cajeꞌyo Eyacuiñajjiya \p \v 3 Eyacuiñajji ca ca oe Jesosa Quitoja Chii poani. Jesosa esejaya Emeshi Mese nei poani. Eyacuiñajji ejjabihuiaqui jama baꞌa: —Eyacuiñajji, miya quea pame nee nee poani. \p Eꞌe, ohuaya Jesosa huoojea canaje esejaya mimishi cuijeaꞌyohua. Cuanaya ohuaya eseya baꞌe tiitii mee cajeꞌyo onijje eyajo. Eꞌe, eseya o jayojjaya jama baꞌe mee cajeꞌyo quea pame nee eyajo. \v 4 Jiquio meshi pana jjimahuajo Eyacuiñajji jjashahuabaquinaje jama baꞌa: —Ojjaña cuana Jesosa nijje jjapeequiani ecue bacua cuana po meejeꞌyo. Quea pame nee poaje. Mimishiꞌama peaꞌai poaje. \p \v 5 Eꞌe, yahuajo nei nei eseya Eyacuiñajjija quea jea nee poanijo oya jjashahuabaquianaje jama baꞌa: —Oya cuana ecue bacua cuana po meejeꞌyo, ebaꞌehuana jayojja ecue Bacua Jesosa Quito nijje jjapeequianijo. \p Eꞌe, jamaya Eyacuiñajji sa poanaje yahuajo nei nei. \v 6 Jamajjeya eseyaya oya bihuiaña jama baꞌa: —Eyacuiñajji, miyaya ecuana jaahuana neineiaña. \p Eꞌe, Eyacuiñajjiya oja Bacua Jesosa quea jea nee nee acani. Eseya quea jea nee nee acanijo peaꞌai Jesosa huoojea canaje manoꞌyohua, eseja mimishi cuijeaꞌyojji. Jamatii, sosemaꞌ huoojea canaje. \v 7 Jamajjeya eseya cuaqui yasijje epoquijji pojjeama. Eꞌe, jamaya poanaje Jesosa manoꞌyajo; enaꞌ ojaya cuayaquinaje eseja mimishi cuana cuijeaꞌyojji. Eꞌe, eseya quea jea nee nee poanijo jamaya amee canaje Eyacuiñajjiya. Quea pame nee nee oya. Pea chamaꞌ o jayojja. \v 8 Quea pame nee nee ojaya ejjashahuabaquiꞌyojji. Ojaya eba ojjaña nei nei. Jamajjeya ohuaya eseya baꞌe tiitii mee cajeꞌyo onijje eyajo. \v 9 Eꞌe, yahuajo nei nei esejaya ba jjima ojaya ejjashahuabaquijji. Jjeya ca ca ohuaya eseya ba meesahua cani ojaya ejjashahuabaquijji cuana Jesosa Quitojo. Jamaya ohuaya acajeꞌyo baꞌa: Jesosa Quitohua esejaya mimishi cuana cuijea caꞌyonajejo, Eyacuiñajjiya eseya baꞌe tiitii mee cajeꞌyo onijje eyajo Jesosa Quito poe oꞌoyajo. \v 10 Eꞌe, quijje Eyacuiñajjiya Jesosa Quito Emeshi Mese nei oe nei po mee cajeꞌyo. Ojjaña meshijo, ojjaña eyajo peaꞌai huoojeajji poajeꞌyo tii tii. Oya ojjaña quea bei po meejji poaje. Jama jjashahuabaquimeya poa Eyacuiñajji. \p \v 11 Eꞌe, yahuajo nei nei Eyacuiñajjiya eseya Jesosaja epeejji cuana babaca caꞌya poa Jesosaja epeejji epoꞌyojji. Cuanaya Eyacuiñajji yahuajo nei nei meshi pana jjimahuajo jjashahuabaquinaje esejo jama baꞌa: —Jesosaja epeejji cuana quijje nei ecuea ejjashahuabaquiꞌyojji jayojja jama poajeꞌyo. \p Jamajjeya Eyacuiñajjiya ojaya epeejji cuana quijje ojaya ejjashahuabaquijji jayojja jama amee cajeꞌyo. \v 12 Jamajjeya ecuaa, Jesosa Quitoja ebionei epeejji cuaa Eyacuiñajji bihuiaje jama baꞌa: —Eyacuiñajji, miya quea pame nee nee poani, ecuana Jesosaja epeejji po meeꞌyonaje. \p \v 13 Yahuajo Eyacuiñajji ecuanajo jjashahuabaquinaje, Jodio cuanajo. Jjeya oya miquianajo, Jodio pojjeama cuanajo jjashahuabaquiani peaꞌai. Eꞌe, eyaya miquiana huasijje Jesosa Quitoja esohui eꞌe nei huohuinaje Jodio pojjeama huasijje. Shajjaꞌajja majje miquianaya Jesosa Quitoja epeejji poanaje. Jamajjeya Eyacuiñajjiya miquianaya ojaya ebacua cuana po mee caꞌyonaje. Eꞌe, miquianaaya shajjaꞌajjanaje Eyacuiñajjija ejjashahuabaquiꞌyojji quea pame nee miquianajo jama baꞌa: —Eyaya Jodio pojjeama cuana baꞌe tiitii mee sa aña Jesosa nijje eyajo Jesosaja epeejji poanijo. \p Cuanaya Eyacuiñajjiya yahuajo nei huohui ca poa jama baꞌa: —Eyaya Edojjoshahua Pame huoojeajeꞌyo Jesosaja epeejji yasijje ona jaahuanaa. Oya cuana Jesosa nijje jjapee tiitiiqui meesahua cajeꞌyo —oya poa. \p Jamajjeya esejaya eba jama baꞌa: —Eꞌe, Eyacuiñajjiya eseya jaahuana canijo ohuaya ojaya ejjashahuabaquiꞌyojji esejo jayojja jama acajeꞌyo eꞌe jojo nei —eseyaya baña. \p \v 14 Eꞌe, Eyacuiñajjiya yahuajo huohui ca poa jama baꞌa: —Jodio pojjeama cuana ecuea epeejji poajeꞌyo beca cuana. \p Eyacuiñajjiya jamaya huohui ca poa. Jamajjeya Jodio pojjeama cuana oja bacua cuana po mee cajeꞌyo. Onijje baꞌe tiitii mee cajeꞌyo. Ojaya ebacua cuana poꞌyo majje ohuaya bihuia caje jama baꞌa: —Eꞌe Eyacuiñajji, miya quea pame nee poani eꞌe jojo nei. \s1 Pabo miminaje Eyacuiñajji nijje Epesojo baꞌe cuana quea pame nee epo meeꞌyojji \p \v 15 Eꞌe, miquianaya Eyacuiñajjija epeejji poanaje. Peaa eya miquianajo huohui canaje jama baꞌa: —Beca cuana Epeso cuiñajjijo baꞌe Jesosaja, esejaya Emeshi Mese neija epeejji poanaje. Onaaya ojjaña Jesosaja epeejji cuana quea jea nee acani —eya acanaje cuaa. \p \v 16 Jamajjeya ohuaya miquianaya oja bacua cuana po mee caꞌyonaje shajjaꞌajja majje eya mimiani Eyacuiñajji nijje miquianajo: —Eyacuiñajji, ¡miquea epeejji cuana Epesojo baꞌe minijje jjapeequi meesahuacue quea pame nee! \p \v 17 Eꞌe, eya mimiani Eyacuiñajji nijje miquianajo jama baꞌa: —Eyacuiñajji, miya Emeshi Mese nei Jesosa Quitoja Chii quea pame nee. Jamajjeya ¡miquea epeejji cuana Epesojo baꞌe quea jaꞌa nee jjashahuabaqui meecue! ¡Oya cuana miquea ejjashahuabaquiꞌyojji, miquea esohui cuana peaꞌai ba meesahuacue! Jamajjeya onajaya eba nei nei miya poaje. \v 18 Eꞌe Eyacuiñajji, ¡oya cuana ba meecue quea jaꞌa nee miquea ejjashahuabaquijji! Eꞌe Eyacuiñajji, miyaya oya cuana babacaꞌyonaje; oya cuana baꞌe tiitii meejeꞌyo Jesosa nijje eyajo. ¡Quea pame nee nee Jesosa nijje ebaꞌejji, de! ¡Maya oya cuana ba meesahuacue quea jaꞌa nee! Eꞌe, jamaya miquea ejjashahuabaquijji miquea epeejji cuanajo. \v 19 Eyacuiñajji, miya quea caꞌa nee nee poani; pea chamaꞌ mi jayojja quea caꞌa nee nee. ¡Eꞌe Eyacuiñajji, miya quea caꞌa nee nee poanaje Jesosa Quito jaahuanajji! ¡Miquea epeejji cuana ba meesahuacue miya quea caꞌa nee nee poani ecuana jaahuanajji peaꞌai! —eya jamaya mimiani Eyacuiñajji nijje miquianajo. \p \v 20 Eꞌe jojo nei Eyacuiñajji quea caꞌa nee nee. Jamajjeya Jesosa Quito dejja mase cuaa quecua caꞌyajje manoꞌyajo, Eyacuiñajjiya shequi mee ca oꞌoya poa. Shequi meeꞌyo majje eyahuasijje dojosohuaqui caꞌya poa. Jomajo Eyacuiñajjiya Jesosa Quito onijje ojjaña huoojeaꞌyojji po mee cani. \v 21 Eꞌe, Jesosa oe nei quea caꞌa nee nee po mee caꞌyonaje. Oya ojjaña huoojeaꞌyojji po mee caꞌyonaje. Emeshi Mese oe nei po mee caꞌyonaje peaꞌai. Eꞌe, Jesosa quea caꞌa nee nee, quea pame nee nee yani jjeya; quijje aje oe oya ma ani tiitiiꞌyome poaje. Oya quea bajjani huiso nee, quea pame nee nee poani Jesosa. \v 22 Eꞌe, Eyacuiñajjiya Jesosa Quito Emeshi Mese quea caꞌa nee nequi mee canaje. Ojjaña aquiana cuana Jesosaja poanaje. Ojjañaja oja epeejji cuanaja Emeshi Mese nei poanaje Jesosa. Eyacuiñajjiya huohui canaje jama baꞌa: —¡Jesosa Quito shajjaꞌajjacue, ojjañaa! \p \v 23 Eꞌe, Jesosaa ojaya epeejji cuana ojaya esohui jayojja jama ameesahua cani. Ojjaña ojaya epeejji cuana nijje nequi majje oya cuana ameesahua cani quea pame nee. Eꞌe, ojaya epeejji cuana Jesosaja eyami jayojja jama poani. \c 2 \s1 Eyacuiñajjiya eseya eyajo baꞌe tiitii mee cajeꞌyo \p \v 1 Yahuajo miquianaya quea mimishi nee nee poa jjejojo Eyacuiñajji nijje jjapeequi jjima poa. \v 2 Eꞌe, yahuajo miquianaya pea cuana quea mimishi jayojja jama Edosiquiana nijje jjapeequinaje, eshahua cuanaja mese nijje. Ohuaya shajjamaꞌ cuana quea mimishi po meesahua cani. \v 3 Eꞌe ecuana, Jodio cuana miquiana jayojjaya poa. Eyacuiñajjijo jjashajjaꞌajjaqui ajja peaꞌai poa. Shajjamaꞌ jayojja jama po sa poanaje eshahuaja epeejji jayojjaya. Eꞌe de, ecuanajaya ejjashahuabaquijji quea mimishi jayojja jama po sa poanaje. Jamajjeya yahuajo pishana ecuana, Jodio cuana, miquianaya Jodio pojjeama cuana peaꞌai eshahuaja epeejji quea mimishi poanijo Eyacuiñajjiya huohui canaje jama baꞌa: —Miquianaya aje oe quea nee nee po meejeꞌyo eyaya, eshahuaja epeejji quea mimishi nee neejojo —Eyacuiñajji poa. \p \v 4 Jamatii Eyacuiñajji eseja mimishijo jjashahuabaqui tiitii sa po ajja eseya ojaya quea jea nee nee poanijo. \p \v 5 Eꞌe, yahuajo pishana eseya Eyacuiñajji nijje jjapeequi jjima poa quea mimishi po sa neinei poanijo. Jamatii Eyacuiñajjiya eseya oja bacua quea pame cuana po mee canaje Jesosaja epeejji poanijo. Eꞌe de, jamaya Eyacuiñajjiya eseya quea jea nee acanijo esejaya mimishi cuana cuijea caꞌyonaje. \v 6 Jamajjeya Jesosa Quitohua eseja mimishi cuana cuijea caꞌyonajejo, Eyacuiñajjiya ecuana, miquianaya peaꞌai ojaya bacua cuana po mee caꞌyonaje ojee eyajo ebaꞌe tiitii meeꞌyojji. Jamajjeya Eyacuiñajjiya ecuanaya, miquianaya peaꞌai baꞌe tiitii mee cani Jesosa Quito nijje eyajo. Jamaya ohuaya huohui ca poa baꞌa: —Jesosaja epeejji poanijo eyaya miquianaya o jayojjaya nequi tiitii meeaña quea caꞌa nee, quea pame nee peaꞌai. \p \v 7 Eꞌe, Eyacuiñajjiya esejaya mimishi cuijeaꞌyo majje ese nijje quea bei poani. Jamajjeya ojjaña cuana esohuicuayajji ba mee cani; quijje peaꞌai ba mee caje jama baꞌa: —Eꞌe nei eseya Jesosa Quitoja epeejji poanijo, Eyacuiñajji ese nijje quea bei poani. Eꞌe, Eyacuiñajji ese nijje quea pame nee nee poani tii. \p \v 8 Eꞌe de, eseya Eyacuiñajjija quea jea nee nee. Jamajjeya miquianaaya huohuiaña jama baꞌa: —Ecuea eba Eyacuiñajjiya ecuea mimishi cuana cuijea caꞌyonaje eya onijje jjapeequi jeahuajo —jamaya poanijo Eyacuiñajjiya miquianaya quea pame nee acani. Eꞌe, ohuaya miquianajaya mimishi cuijea caꞌyonaje onijje mimiyajo. \p ¿Aꞌa miquianaya quea pame nee nee poani sosejje mimishi cuijea caꞌyonaje? Chojja de, ohuaya mimishi cuana cuijea caꞌyonaje sosemaꞌ. \v 9 Eꞌe, ohuaya esejaya mimishi cuijea caꞌyonaje sosemaꞌ. Jamajjeya pea cuana siajje epojji pojjeama jama baꞌa: —Eya quea pame nee poani sosejje Eyacuiñajjiya ecuea mimishi cuijea caꞌyonaje —chojja, jamaya poani siajjepojji cuana. \p \v 10 Eꞌe, esejaya eba Eyacuiñajjiya eseya pea jjashahuabaquime po mee caꞌyonaje. Jamaya ohuaya acaꞌyonaje Jesosaja epeejji cuana poanijo. Eꞌe, ohuaya jamaya acaꞌyonaje. Eseya ojaya ejjashahuabaquijji jayojja jama atiitii mee caꞌyani peaꞌai. Ojaya ejjashahuabaquijji esejo jama baꞌa: —¡Eya miquianajaya quea jea neejo pea cuana quea pame nee atiitiicue! \s1 Eyacuiñajjiya Jodio pojjeama sa cani ojaya epeejji epojji \p \v 11 Miquianaya Epesojo baꞌe Jodio cuana pojjeama. ¡Jamajjeya jjashahuabaquicue! Miquianajaya chii cuana Jodo pojjeama poa. Jamajjeya Jodio cuana miquianajo maimai aninaje jama baꞌa: —Oya cuana ca ca oma Jodio pojjeama; Eyacuiñajjija epeejji pojjeama. \p Eꞌe, Jodio cuana quea quehua jjashahuabaquinaje jama baꞌa: Cuiishasha biso nei jehuisejjajeañajo ecuana Eyacuiñajjija epeejji quea pame nee poani poso ecuaa anaje, Jodio cuaa. \v 12 Jamajjeya yahuajo Jesosa Eyacuiñajjija huoojeaꞌyo ojjaña jaahuanajji miquianajaya ba jjima poa Jodio pojjeamaja jjejojo. Miquianaya Eyacuiñajji ba po jjima jjejojo Eyacuiñajji ba epo cuana nijje jjapeequi ajja poa. Eꞌe, miquianajaya Eyacuiñajji bihuia jjima Jodio cuana nijje. Yahuajo Eyacuiñajjiya huohui ca poa Jodio cuana jama baꞌa: —Eyaya huoojeaje ojjaña jaahuanajji miquiana huasijje —poanaje. \p Maya miquianajaya ba jjima poa Jodio pojjeamaja jjejojo. Jamajjeya miquianaya jjashahuabaquinaje jama baꞌa: —Eꞌe de, ecuana jaahuanajji quea pame nee chamaꞌ. ¿Aya acuae ecuana jaahuana cajeꞌyo? —poanaje. \p Eꞌe de, miquianajaya Eyacuiñajji ba jjima poanaje. Jamajjeya ¿aya miquianaya jaahuana canaje? Quea camaja ebaꞌejji mee nei jiquio meshijo. \v 13 Jjeya ca ca miquianaya Eyacuiñajjija epeejji cuana poani Jesosa Quito nijje jjapeequianijo. Eꞌe, yahuajo miquianaya Eyacuiñajji bihuia po jjima poanaje. Jjeya ca ca Eyacuiñajjiya miquiana Jodio cuana jayojja jama amee canaje. Eꞌe, jjeya miquianaya Eyacuiñajji bihuiajji. Jesosa Quito miquianajaya mimishi cuijeaꞌyojji manoꞌyonaje, ojaya enaꞌ cuayaquiꞌyonaje. Jamajjeya Eyacuiñajjiya miquianaya oja bacua cuana po mee caꞌyonaje. \s1 Jodio cuana nijje Jodio pojjeama cuana ojee jjapeequije Eyacuiñajji nijje \p \v 14 Eꞌe, Jesosa Quitohua ecuana ojaya epeejji po mee canajejo, beca Jodio cuaa Jodio pojjeamajo huohui cani jama baꞌa: —Eꞌe de, Jodio pojjeama cuaa Eyacuiñajji bihuia cani ecuaa jayojjaya Jesosaja epeejji poaniya jjejojo —poani. \p Eꞌe, Jodio cuana Jodio pojjeama cuana nijje Jesosaja epeejji poani jjejojo huapa pojjeama poani. Jjeya Jesosaja epeejji poani jjejojo Jodio cuanaja ejjashahuabaquijji jayojja jama Jodio pojjeama cuana jjashahuabaquiani. Epeejji nei nei poanaje. Eꞌe de, jamaya poanaje Jesosa Quito ojjañaja mimishi cuijeaꞌyojji acui ecueataꞌapeejo manoꞌyonajejo. \v 15 Ojjañaja mimishi cuijeaꞌyojji poani jjejojo Jesosa ojaya epeejji cuana nijje miminaje jama baꞌa: —¡Jodio etiiquianaja esohui jayojja jama aꞌa ajji ca ecuea epeejji epojji! Chojja, enijje jjapeequianijo Jodio cuana, Jodio pojjeama cuana peaꞌai ecuea epeejji cuana poanaje. Ojjaña cuana huapa pojjeama cuana poanaje. Jamajjeya Jodio cuana Jodio pojjeama cuana nijje ojee jjapeequi meejeꞌyo quea bei —acanaje Jesosa Quitohua. \p \v 16 Jesosaa Jodio cuana, Jodio pojjeama cuana peaꞌai ojaya epeejji cuana po mee caꞌyonaje; oya cuana Eyacuiñajjija epeejji cuana poanaje. Eꞌe, oya cuana Eyacuiñajjija bacua cuana poanijo, ojee nequi mee caje huapa pojjeama jayojja jama, quea bei. Jamaya amee canaje Jesosaa acui ecueataꞌapeejo manoꞌyo majje. \v 17 Cuanaya Jesosa Quito poeyanaje miquiana que, ma Jodio pojjeama huasijje jama huohuiya baꞌa: —Eꞌe de, jjeya miquianaya Eyacuiñajjija epeejji po meeaña. Yahuajo miquianajaya Eyacuiñajji ba jjima Jodio pojjeamaja jjejojo. Jjeya ca ca ojaya epeejji quea bei poani miquianaya —Jesosa poanaje. \p Jesosa ecuana huasijje, ma Jodio cuana huasijje poeyanajeya Eyacuiñajjija esohui bajji yasijje. Ma ecua miquiaaya huohui canaje jayojjaya jama ecuaaya huohui canaje peaꞌai. \v 18 Jamajjeya ecuana, Jodio bajjani cuana Eyacuiñajji nijje mimiani; miquianaya Jodio pojjeama cuana peaꞌai Eyacuiñajji nijje mimijeꞌyo, esejaya Chii ai nijje. Eꞌe, Edojjoshahua Pame oe nei yani ojjaña Jesosaja epeejji cuana nijje. Ohuaya Jesosaja epeejji cuana Eyacuiñajji nijje mimi meesahua cani meteꞌama. \p \v 19 Jamajoya jjeya Eyacuiñajjiya Jodio pojjeama cuana jama acani baꞌa: —Yahuajo miquianaya ecuea epeejji pojjeamajo eyaya miquianaya jaahuana jjima poa. Jjeya ca ca miquianaya ecuea epeejji poani. Ecuea huapa pojjeama poani ecuea pea epeejji cuana nijjeya —acanaje Eyacuiñajjiya. \v 20 Eꞌe, Jesosaja huoojeaꞌyo cuanaja esohui shajjaꞌajjanaje miquianaaya. Cuanaya yahuajo nei Jodio esohui huohuijji cuaa esohui eꞌe nei huohui canaje. Maya jjeya miquianaaya shajjaꞌajjanaje. Jamajjeya miquianaya Jesosaja epeejji poanaje peaꞌai. Jamaya po mee canaje Jesosaa baꞌa: Ojaya epeejji cuana equi jayojja jama nequi. Jesosa Quito ca ca quea caꞌa nee, quea pame nee nee poani, equi yamajjana quea caꞌa jayojja oya. Eꞌe, jiquio ecua eyamajjanajo acui ejeasehuijaajji huana majje acui equecuajeajji huisajo bequiobo baꞌehuana cani jayojja jama Jesosaa ojaya esohui huohuijji cuana quea pame nequi mee cani. Majoya esohui huohuijjiya ojjaña Jesosaja epeejji cuana quea pame baꞌe meesahua cani. Jesosaja huoojeaꞌyo esohui huohuijji cuana, Jodioja esohui huohuijji cuana peaꞌai ma acui ebaꞌehuanasohuajji jayojja jama poani. \v 21 Jjeya miquianaya Jesosaja epeejji po majje acui ejeasehuijji jaajji biajje nequi jayojja jama poani. Jamajjeya jiquio ecua equi yamajjana quea caꞌa nequijo equi quea caꞌa nequia mee cani jayojja jama Jesosaa quea caꞌa poaniya ojaya epeejji cuana ojee quea caꞌa onijje jjapeequi mee cani. Equi quea caꞌa jayojja po mee cani. \v 22 Eꞌe, jjeya miquianaya, Jodio pojjeama Jesosa Quitoja epeejji poanijo Edojjoshahua Pame ojjañajo nequi. Jamajjeya ojaya epeejji Jodio bajjani cuana nijje ojee nequi, equi quea caꞌa jayojja poani. \c 3 \s1 Pabohua esohui huohui majamaja canaje Jodio pojjeama cuanaja ebajji \p \v 1 Eya Pabo, Jesosa Quitoja esohui huohuijji. Eyaya ojaya esohui huohuinaje miquiana huasijje, Jodio pojjeama bajjani yasijje ojaya epeejji nei epo meejji. Jesosaja esohui huohuiañajo pea cuaa eya iña majje jeanobiajea caꞌyonaje eya esohui ehuohui poaje jjejojo. \v 2 Jamatii. Pea cuaa miquiana huasijje huohuiqui canaje ejo jama baꞌa: —Eyacuiñajjiya Pabo huoojea canaje ojaya esohui Jesosajo huohuiya Jodio pojjeama cuana huasijje —acanaje. \p \v 3 Yahuajo miquianajaya ba jjima Eyacuiñajjija ejjashahuabaquijji jama baꞌa: —Jesosa Quitohua ojjaña ojaya epeejji cuana, Jodio cuana, Jodio pojjeama cuana peaꞌai baꞌe tiitii mee cajeꞌyo onijje eyajo. \p Maya Eyacuiñajjiya eya ojaya epeejjijojo ba mee canaje. Jamaya ecuea esohui etehueꞌyo miquiana huasijje yahuajo huohuia poa. \v 4 Eꞌe, maya miquianaaya banaje. Jamajjeya jama jjashahuabaquime poanaje baꞌa: —Eꞌe jojo nei Eyacuiñajjiya Pabo ba mee canaje ojaya ejjashahuabaquijji jama baꞌa: Jesosa Quitohua ojjaña ojaya epeejji cuana, Jodio cuana, Jodio pojjeama cuana peaꞌai baꞌe tiitii mee cajeꞌyo onijje eyajo —jamaya miquianajaya eba poanaje. \p \v 5 Yahuajo nei ca ca Eyacuiñajjiya pea cuana huasijje huohui jjima ojaya ejjashahuabaquijji Jesosa Quitojo, ma Jodio pojjeama cuana ojaya epeejji po mee majje o jaahuanajji poajeꞌyo peaꞌai. Jjeya ca ca Eyacuiñajjiya Edojjoshahua Pame huoojea canaje ojaya epeejji cuana huasijje. Ojaya epeejji beca cuana huoojea canaje ojaya ejjashahuabaquijji jayojja jama huohuiya. Edojjoshahua Pameya ma esohui huohuijji cuana ba mee canaje Eyacuiñajjija ejjashahuabaquijji Jodio pojjeamajo peaꞌai. \v 6 Eyacuiñajji jjashahuabaquinaje Jodio pojjeama cuanajo jama baꞌa: —Jodio pojjeama cuana ecuea epeejji po majje ecuea huapa pojjeama cuana poaje. Oya cuana baꞌe tiitii meejeꞌyo eyajo Jesosa nijje. Eꞌe nei, eyaya huohuinaje ecuea epeejji cuana Jodio bajjani cuana huasijje jayojja jamaya eyaya ajeꞌyo ecuea epeejji Jodio pojjeama cuana huasijje peaꞌai. Jamaya eyaya aje, oya cuana Jesosaja epeejji poanijo. Eꞌe, Jodio pojjeama cuaa shajjaꞌajja canaje ecuea esohui Jesosa Quitojo —Eyacuiñajji poanaje. \p \v 7 Eꞌe jojo nei Eyacuiñajjiya eya huoojea canaje ojaya esohui quea pame nee Jesosajo huohuiya. Eya ojaya quea jea poanajejo, ohuaya eya ojaya epeejji po mee caꞌyonaje, eya ojaya esohui huohuijji po mee canaje peaꞌai. \v 8 Jamajjeya Jesosaja pea epeejji cuana quea pame nee nee; eya ca ca quea pame pishana yahuajo Jesosaja epeejji cuana cuia meeꞌyojji poa jjejojo. Jamatii Jesosa nijje jjapeequiyajo, Eyacuiñajjiya eya huoojea canaje ojaya esohui huohuiya. Eꞌe de, eya ojaya esohui huohuijji poanaje, esohui quea pame nee Jesosa Quitojo ehuohuijji Jodio pojjeama cuana huasijje. Jamajjeya oya cuana ba meeje ache pame nee nee Eyacuiñajjija ejjashahuabaquijji onajo. Eꞌe, jjeya oya cuana baꞌe tiitii mee cajeꞌyo eyajo Jesosaja epeejji poani jojoya. \v 9 Eyacuiñajjiya eya huoojea canaje ojjaña ojaya ejjashahuabaquijji ba meesahuaa, ma yahuajo ojjañaja ba jjima poa. Ecuea esohui shajjaꞌajja majje ojjañaa ba caje jama baꞌa: Ojjaña Jesosaja epeejji ojee baꞌe tiitii mee cajeꞌyo eyajo onijje eꞌe jojo nei jjapeequianijo, Jodio cuana, Jodio pojjeama cuana peaꞌai. Eꞌe, Eyacuiñajji quea caꞌa nee nee. Oja panaꞌyo ojjaña, de. Yahuajo nei oya jjashahuabaquia poa ojjaña jaahuanajji. Jamatii ecuanajaya etiiquiana maya ejjashahuabaquijji ba mee jjima poa Eyacuiñajjija. \v 10 Eꞌe, Eyacuiñajjiya eya huoojea canaje ojaya ejjashahuabaquijji huohuiya. Jamajoya ojjaña esohuidojojji mese cuaa, ojjaña pea cuana eyajo nequiya cahuohui cahua jama baꞌa: —¡Bacue oe! Eyacuiñajji jjashahuabaquiani quea pame nee, quea jaꞌa nee nee. Eꞌe, ohuaya ojjaña ojaya epeejji cuana onijje nequi tiitii mee cani eyajo —ojjanaa caꞌa cahua. \p \v 11 Jamaya Eyacuiñajji jjashahuabaquia poa yahuajo nei nei, jiquio meshi pana jjimahuajo. Ojaya ejjashahuabaquijji quea jaꞌa nee jayojja jama poanaje Jesosa Quito, esejaya Emeshi Mese nei. \v 12 Jamajjeya jjeya eseya mimijeꞌyo Eyacuiñajji nijje meteꞌama Jesosa Quitoja epeejji po majje. \v 13 Jamajjeya eyaya miquianaya huohuiaña jama baꞌa: —Miquiana huasijje Jesosaja esohui huohuiañajo, pea cuaa eya jeanobiajea canaje eya miquiana huasijje esohui ehuohui poaje jjejojo. Jamatii ¡aꞌa quea yeno pojji! Quea camaja ejeanobia ejaajji, de. Jamatii ecuea esohuijo miquianaya Jesosaja epeejji poanaje. \s1 Jesosa Quitohua eseya quea jea nee nee acani \p \v 14 Jamajjeya miquianaya, Jodio pojjeama Jesosaja huapa pojjeama poanijo, eya Eyacuiñajji nijje mimiani miquianajo. Eꞌe, Eyacuiñajji esejaya Chii ai quea pame nee nijje eya mimiani jama baꞌa: —Eyacuiñajji, miya quea pame nee nee —eya poani. \p \v 15 Eꞌe, Eyacuiñajjiya pana ca poa ojjaña. Jesosaja epeejji jjeya eyajo nequi, ojjaña ojaya epeejji jiquiojo nequi peaꞌai Eyacuiñajjija bacua cuana poani. Etiiquiana ojaya epeejji cuana peaꞌai Eyacuiñajjija bacua cuana poa. \v 16 Jamajjeya eya onijje jama mimiani miquianajo baꞌa: —Eyacuiñajji, miya quea pame nee yani tii tii quea caꞌa nee nee. Miyaya Edojjoshahua Pame huoojeanaje miquea epeejji cuana Epesojo baꞌe yasijje quea caꞌa po meeya. ¡Edojjoshahua Pameya miquea epeejji cuana cabaꞌe meesahua cahua quea jaꞌa nee miquea esohui jayojja jama! \v 17 Eꞌe Eyacuiñajji, miquea epeejji cuaa huohui cani jama baꞌa: “Jesosa nijje ecuana jjapee tiitiiquiani”. Jamajjeya ¡oya cuana Jesosa Quitoja ejjashahuabaquiꞌyojji jayojja jama jjashahuabaqui meesahuacue quea jaꞌa nee! ¡Jamaya acue Eyacuiñajji, miya quea caꞌa nee poanijo! Eꞌe, miquea ejjashahuabaquijji jama baꞌa: “Ecuea epeejji cuana quea jea nee poani. Eyaya oya cuana quea jaꞌa nee baꞌe meesahuaje ecuea ejjashahuabaquijji quea jaꞌa nee jayojja jama”. Eꞌe Eyacuiñajji, quea jea nee nee miquea epeejji cuana. ¡Maya miyaya oya cuana ba meesahuacue! Jamajjeya oya cuana mijo jama poani baꞌa: “Eyacuiñajjija ecuana quea jea nee nee poani. Ecuana jaahuana cani quea pame nee nee” oya cuana poani. \v 18 Eꞌe Eyacuiñajji, ¡jamajjeya miquea epeejji cuana Epesojo baꞌe, ojjaña miquea pea epeejji cuana peaꞌai ba meesahuacue miquea ejjashahuabaquijji quea pame nee nee onajo poani! Jamaya miyaya ojjaña quea jea nee nee aña. \v 19 Eꞌe, oya cuana Jesosa Quitoja quea jea nee nee poanaje. Ojaya epeejji cuana po meesahua caꞌyonaje. ¡Jamaya oya cuana ba meesahuacue, Eyacuiñajji! Quea jea nee nee miquea ojjaña. Ecuanaya ba meemee ajja. Jamatii jjashahuabaqui meemee ajja. Eꞌe Eyacuiñajji, ¡miquea epeejji cuana ba meesahuacue miquea ejjashahuabaquijji quea jaꞌa nee onajo peaꞌai! Quea huiso nee, de. Jamajjeya joya ecua miyaya huohuiaña jamaya acajeꞌyo cuaa quea pame nee. Onajaya ejjashahuabaquijji miquea jayojja jama poajeꞌyo. \p \v 20 —Eꞌe Eyacuiñajji, ecuaaya miya bihuiaña. Miya quea caꞌa nee nee oe nei poani quea pame nee nee. Jamajjeya miquea ejjashahuabaquijji quea jaꞌa nee nee ecuanajo aña, miyaya. Eꞌe, quea pame nee nee ecuana jaahuanaña, miyaya. Quea pame nee nee miyaya aña, Eyacuiñajji. Eꞌe, ecuana jjapeequi meesahuaña minijje miya quea caꞌa nee nee poanijo. Jamaya apoa —jamaya eya mimiani Eyacuiñajji nijje miquianajo. \p \v 21 Jamajjeya ¡eseyaya ojjaña Jesosaja epeejji cuaa Eyacuiñajji ejjabihuia tiitiiquiꞌyo! Oya quea pame nee nee. \c 4 \s1 ¡Ojee ejjachacoqui ojjaña quea bihui baꞌyaniya! \p \v 1 Eꞌe, eyaya, Pabohua Emeshi Mese neija esohui huohuiañajo, pea cuaa eya jeanobiajea canaje eya esohui ehuohui poaje jjejojo. Jamajjeya ¡ecuea esohui shajjaꞌajjacue! Jjeya miquianajaya eba Eyacuiñajjija ejjashahuabaquijji miquianajo; ohuaya miquianaya babaca canaje onijje quea jaꞌa nee nee ejjapeequijji. Jamajjeya ¡jamaya baꞌecue ojaya epeejji nei! \v 2 ¡Jesosaja epeejji cuana quea bei pocue! ¡Aꞌa quea mase pojji pea cuana nijje! ¡Aꞌa tecueacuajijji! Minijje quea mimishi poajo, ¡jamatii oya cuana quea jea nee acue! \v 3 Eꞌe, Edojjoshahua Pameya Jesosaja epeejji cuana ojee jjapeequi meesahua cani quea bei. Jamajjeya ¡miquianaaya ojjaña jamaya atiitiicue peaꞌai! \v 4 ¡Bacue! Ojjaña eseya Jesosaja epeejji cuana Jesosaja eyami jayojja jama poani, oe eyami jayojja poani. ¡Bacue! Edojjoshahua Pame oe nei esejo yani, ojjaña Jesosaja epeejji cuanajo. Eyacuiñajjiya eseya babaca cajje ojaya oe nei ejjashahuabaquijji ojjañajo jjashahuabaqui mee canaje jama baꞌa: —Ecuea epeejji cuana baꞌe tiitii meejeꞌyo Jesosa nijje eyajo —poanaje. \p \v 5 Esejaya Emeshi Mese nei oe nei yani. Jesosaja esohui eꞌe nei nei oe nei yani, pea chamaꞌ. Onaaya eseya besa mee canaje enajo ojjañaja ebajji eseya Jesosa Quito oe nei nijje jjapeequiani. \v 6 Oe Eyacuiñajji yani tii tii; pea chamaꞌ. Oya oe nei ojjañaja Chii ai. Oya ca ca oe ojjaña huoojeajji. Ojjaña ameesahua cani de, ojjaña nijje nequi peaꞌai. Jamajjeya ¡Jesosaja epeejji cuana nijjeya oe quea bei nee jjapeequicue miquianaya! \p \v 7 Eꞌe. Jamajjeya Eyacuiñajjiya ojjaña Jesosaja epeejji cuana chaco meesahua cani onijje. Oe epeejji chaco meesahua cani iye huiso; pea chaco meesahua cani quea huiso, esohui huohuijji pojjaꞌa, pea echacojjijo pojjaꞌa. \v 8 Jamajjeya Eyacuiñajjiya yahuajo nei jama tehueme aca poa Jesosajo baꞌa: \q1 “Eyahuasijje sohuaquiꞌyo majje ohuaya quea huiso dejja cuana onijje jjapeequi meesahua cajeꞌyo. Ohuaya ojaya epeejji cuana onijje chaco meesahua caje peaꞌai”. \m Jamaya tehue mee ca poa yahuajo nei nei Jesosa Quitojo. \p \v 9 ¿Yajjajje acuae yahuajo nei tehue ca poa? Jama baꞌa: “Eyahuasijje sohuaquiꞌyonaje”. Jama poanijo baꞌa: Ebionei Jesosa eyajo ani meshi yasijje poeyanaje. \v 10 Meshi yasijje poe majje eyahuasijje poqui oꞌoyanaje. Jomajo oya quea caꞌa nee nee nequi tiitiijeꞌyo, ojjaña huoojeaꞌyojji epojji tii tii, Emeshi Mese nei epoꞌyojji. \v 11 Jesosaa ojaya epeejji cuana onijje chaco meesahua cani jama baꞌa: Beca cuana ohuaya huoojea canaje ojaya esohui huohuiya. Beca cuana huohui meesahua cani ma ohua quijje acajeꞌyo. Pea cuana huohui meesahua cani ojaya esohui quea jaꞌa nee nee. Pea cuana ca ojaya epeejji jaahuanajji po mee cani. Pea ca esohui huohuijji po meesahua cani ojaya epeejji cuana quea huiso ojaya esohui eba meesahuajji. \v 12 Jamaya Jesosaa ameesahua cani ojjaña ojaya echacojji quea pame nee epojji. Jamajjeya ojjaña ojaya epeejji cuana quea jaꞌa nee nee ebaꞌe poquijji. \p \v 13 Jamajjeya eseya Eyacuiñajjija Bacua Jesosaja epeejji cuana ojee jjapeequije ojaya esohui jayojja jama. Ojjañaa eseyaya oya ba neineijeꞌyo peaꞌai. Jamaya eseya ojaya epeejji cuana quea jaꞌa nee poaje. O jayojja jjashahuabaquime poaje, epeejji etii jayojja poaje. \v 14 Jjeya nei jjapeequiani jayojja jama pojjeama eseya poaje. Eꞌe, jiquio ecua beniya enashajo dojo cani pea mijijje jayojja jama esohui huohuijji nisho cuaa joya jjeya nei Jesosa nijje jjapeequiani dasia majje poquiquehua mee cani. Oya cuana jjashahuaba majamajaquiani ese dasiajji. \v 15 Eseyaya ca ca pea cuana quea jea poanijo esohui eꞌe jojo nei huohuiaña Jesosa, esejaya Emeshi Mese nei jayojja jjashahuabaquime epojji. \v 16 ¡Bacue! Dejjaja eyami: emeꞌ, equise, ojjaña ojaya ejjashahuabaquijji jayojja jama ojee quea pame poanijo quea jaꞌa nee nequi dejja. Jiquio ecua dejjaja eyami jayojja jama Jesosaja epeejji cuaa ojee chaco cani quea pame nee, Jesosaja ejjashahuabaquijji jama. Eꞌe, ohuaya ojjaña ojaya epeejji huoojeajji poaniya ojee chaco mee cani onijje. ¡Jamajjeya ojjaña quea jea nee acue cuana! ¡Onaya jjapeequi meesahuacue! \s1 Pea baꞌeꞌyome epojji Jesosa Quito nijje \p \v 17 Eya, Pabo Jesosaa huoojea caꞌyonaje miquiana huasijje esohui huohuiya. Jamajjeya ¡ecuea esohui shajjaꞌajjacue! ¡Jesosaja epeejji pojjeama cuana quea mimishi jama aꞌa pojji! Ojaya ejjashahuabaquijji cuana cajaa. \v 18 Eꞌe, oya cuana quea mimishi jjashahuabaquiani. Pea ebaꞌejjijo jjabahuejjaqui ajja. Jjapeequi ajja Jesosa nijje. Shajjamaꞌ de, mimishi quea boti nee ojaya. \v 19 Mimishi cuanajo bichoꞌama. Quea tai nee nee atiitii cani. Quea mimishi tii tii po sa neinei poani, de. \v 20 Miquianaaya ca ca Jesosaja esohui shajjaꞌajjanaje. Jamajjeya ¡baꞌecue quea pame nee! \v 21 ¿Aꞌa miquianaaya Jesosaja esohui shajjaꞌajjanaje? Eꞌe. ¿Aꞌa jjabahuejjaquinaje? Eꞌe. Ojaya esohui ca ca oe eꞌe jojo nei poani. \v 22 Jama poanaje baꞌa: \p —¡Ma mi baꞌya poa quea tai Jesosa Quito ba jjimahuajo pajea neineiꞌyocue! ¡Cajaa acue! Quea mimishi jjashahuaba tiitiiqui aninajejo beshahua nei miya poquinaje cuaqui yasijje. \v 23 ¡Eyacuiñajjiya miquianaya quea pame nee cajjashahuabaqui mee cahua Jesosaja ejjashahuabaquijjijo! \v 24 Eyacuiñajjiya miquianaya baꞌe mee caje o jayojja. Jamaya eꞌe jojo nei quea pame nee ebaꞌejji. Jamajjeya ¡baꞌecue Eyacuiñajjija ejjashahuabaquijji jayojja jama! \p \v 25 Eseya Jesosa nijje jjapeequi majje huapa pojjeama cuana poani. Jamajjeya ¡aꞌa onaya siajje ajji! ¡Ojjaña Jesosaja epeejji cuana nijje eꞌe nei mimicue! \v 26 ¡Miquianaya onaja mimishijo aꞌa quea quene po tiitiijji! ¡Jjeyahua nei oe quea bei nee po oꞌoyacue! \v 27 Quea quene po tiitiianijo, Edosiquiaa miquianaya dasia ca chanaꞌ. Quea mimishi, quea mimijjequijea po mee ca oꞌoya chanaꞌ, de. \v 28 Jamajjeya miya siipojji ¡sii popajeaꞌyocue! ¡Quea pame oe chaco neineicue! Jamaya ebaꞌejji quea pame poaje miquea quea huiso, aemaꞌ baꞌe meesahuajji peaꞌai. \p \v 29 ¡Aꞌa quea mimishi mimijji peaꞌai! ¡Esohui quea pame nee mimi tiitiicue pea cuana jjapeequi meesahuajji! Jamajjeya pea cuana miquea esohui shajjaꞌajja majje quea pame poaje. \v 30 Cuanaya Jesosaja epeejji quea mimishi po oꞌoyajo, Edojjoshahua Pame quea yeno poani. ¡Aꞌa oya quea yeno po meejji! Eꞌe, Eyacuiñajjiya ese quea boejea po meeꞌyo majje Edojjoshahua Pame huoojea canaje ese nijje nequiya. Jamajjeya Jesosa Quito poe oꞌoyajo Edojjoshahua Pameya huohui caje esejo jama baꞌa: —Oya cuana Jesosaja epeejji nei —poaje. \p \v 31 Jamajjeya ¡aꞌa mimijajijji! ¡Aꞌa quea quene pojji! ¡Aꞌa quea tecue pojji! ¡Aꞌa jjaniñebaquijji! ¡Aꞌa jjamimicuiajea nobiajeaquijji peaꞌai! Chojja, ¡ojjaña mimishi cuana pajea neineiꞌyocue! \v 32 ¡Pea cuana oe baꞌe sahuacue quea pame nee! ¡Quea jea nee acue! Pea cuaa miya niñeba canijo, napa canijo peaꞌai ¡onijje quea bei pocue! Eꞌe, Jesosa Quito miquea mimishijo manoꞌyajo, Eyacuiñajjiya miquea mimishi cuana cuijea caꞌyonaje, quea quene po tiitii ajja mimishijo. ¡Jamaya acue miquianaaya, ojjañaa! \c 5 \s1 Jesosaja epeejji, ¡ojaya esohui jayojja jama acue! \p \v 1 Eyacuiñajjiya miquianaya quea jea nee acani, oja bacua cuana. Jamajjeya ¡o jayojja jama pocue miquiana ojaya epeejji cuana poanijo! \v 2 Jesosa Quito ese cuanajo manoꞌyonaje oya quea ese jea nee poanijo. Eyacuiñajji quea bihui nee poanaje oja Bacua Ejja esejo manoꞌyajo. Eꞌe, yahuajo nei Jodio cuaa huichacha quea shiye nee nee baꞌesohuaqui mee ca poa Eyacuiñajji bihuiajji. Ma jayojjaya Jesosa manoꞌyonaje esejaya mimishijo. Jamajjeya ¡pea cuana quea jea nee acue miquianaaya, Jesosa Quitohua jayojja jama acue! \v 3 Jamajjeya miquianaya ojaya epeejji poanijo ¡Jesosa jama pocue! ¡Aꞌa quea mimishi jjashahuabaquijji! ¡Mimishijo oe aꞌa mimijji peaꞌai! ¡Quea mimishi aꞌa pojji! Eꞌe, ¡aꞌa shacuimaꞌ nequi, ahuemaꞌani peaꞌai, onajaya yahue, ehuanase peaꞌai aꞌa siijji! ¡Aꞌa quea dejja tai pojji! ¡Aꞌa quea nishehui pojji peaꞌai! \v 4 ¡Esohui quea tai aꞌa mimijji peaꞌai! ¡Shajjamaꞌ jayojja aꞌa mimijji! ¡Quea mimishi, quea mimijjequijea aꞌa mimijji! Jamaya quea tai. ¡Quea bihui nee ca ca Eyacuiñajji nijje mimicue! \v 5 ¡Bacue oe! Pea cojjojji, dejja quea tai peaꞌai, quea aquiana nahuejo epanaꞌyo bihuiajji jayojja poani peaꞌai eyahuasijje edobiquijji pojjeama. Jesosa Quito nijje, Eyacuiñajji nijje peaꞌai ebaꞌejji pojjeama eyajo, Jesosa ojjaña huoojeajji poanijo. Chamaꞌ dejja mimishija ebaꞌejji yajji eyajo. \v 6 Siajjepojji cuaa miya baꞌe mee ca chanaꞌ quea mimishi. ¡Oya cuana aꞌa shajjaꞌajjajji! Mimishi acanijo, shajjamaꞌ poanijo peaꞌai Eyacuiñajjiya quea nee tii tii po mee cajeꞌyo eꞌe jojo nei. \v 7 Jamajjeya ¡aꞌa mimishi cuana nijje jjapeequijji! \p \v 8 Yahuajo miquianaya quea mimishi baꞌya poa peaꞌai. Jjeya ca ca miya Jesosaja epeejji cuana poanijo ejiojji quea jaꞌajje onijje poquiani. Jamajjeya ¡Jesosaja esohui jayojja jama quea jaꞌa nee acue! \v 9 Eꞌe, Jesosa nijje jjapeequianijo ojjaña quea pame nee eseyaya aña. Jjashahuabaquiani quea jaꞌa nee peaꞌai. Esohui eꞌe nei jayojja jama baꞌyani peaꞌai. \v 10 Quea pame nee eseya añajo, Eyacuiñajji quea bihui nee poani. Jamajjeya ¡jjashahuabaquicue Eyacuiñajji quea bihui nee epo meejji! \v 11 Jamajjeya shajjamaꞌ cuana quea mimishi poanijo, ¡onijje aꞌa quea mimishi pojji! ¡Oya cuana tecueacue jama baꞌa: —Jamaya quea tai. ¡Aꞌa quea mimishi pojji! —acue! \p \v 12 Ohuaya quehuajje mimishi quea tai nee nee acani. ¡Aꞌa mimishi cuanajo mimimimijji! ¡Cajaa acue! \v 13 Jesosaa shajjamaꞌ cuana jjabahuejjaqui meesahua cani; jama poani baꞌa: —Coma ca quea tai; ¡aꞌa jamaya pojji! ¡Quea pame nee acue! \p \v 14 Jiquio ecua cuaquijijiya mecajje ojjaña jeajaꞌa cani jayojja jama Jesosa Quitohua shajjamaꞌ cuana mimishi pajea meeꞌyo majje quea jaꞌa baꞌe meesahua cani. Jamajjeya yahuajo nei nei jama sohuicuayame poa cuana baꞌa: \q1 “Shajjamaꞌ cuana, ¡jjashajjaꞌajjaquicue! ¡Eshahua nijje popajeaꞌyocue! Quitohua miya quea jaꞌa nee baꞌe meesahua cajeꞌyo”. \m Jamaya aca poa yahuajo nei nei. \p \v 15 Jamajjeya ¡jjashahuaba neineiquicue quea jaꞌa nee ebaꞌejji! ¡Shajjamaꞌ cuana jayojja jama aꞌa baꞌejji! ¡Jesosaja esohui jayojja jama baꞌecue! \v 16 Eꞌe, ¡jjeya janobajjima nei chacochaco tiitiicue quea jaꞌa nee Jesosa Quitojo! Jjeya aje oe quea camaja, quea huiso cuana quea mimishi poani. \v 17 Jamajjeya ¡aꞌa shajjamaꞌ pojji! Eyacuiñajjiya miya sa cani ojaya echacojji epojji. Jamajjeya oya huohuiꞌajjacue jama baꞌa: —Eyacuiñajji, ¿aꞌya cuae eya miyaya chaco meeje soꞌo? \p \v 18 ¡Aꞌa jja oe huoojji! Chojja, ishiꞌishianijo miquianaya quea tai nee poajeꞌyo. ¡Edojjoshahua Pameja esohui miquiana nijje jama acue! \v 19 ¡Jamaya esohui quea pame nee Eyacuiñajjijo mimicue! Jama acue baꞌa: —Cuaꞌa. ¡Eyacuiñajji nijje esohuicuaya! \p Eꞌe, Edojjoshahua Pameya sohuicuaya mee caniya ¡quea bihui nee Eyacuiñajji bihuiacue sohuicuayanijo! \v 20 Cuanaya Jesosa Quito esejaya Emeshi Mese nei poanijo, ¡Eyacuiñajji, esejaya Chii ai bihuiacue jama baꞌa: —Eꞌe Eyacuiñajji, jamaya. Miyaya quea pame nee atiitiiaña —acue! \s1 Ehuohuijji yahue cuana huasijje, ehuanase cuana huasijje peaꞌai \p \v 21 ¡Jiquio pea esohui bacue! Jama baꞌa: Jesosa Quitoja esohui shajjaꞌajjajji poanijo ¡baꞌecue quea bei nee miquea huapa pojjeama cuana nijje! \p \v 22 Ehuanase cuana, ¡shajjaꞌajjacue mo! Miquiana Jesosaja epeejji poanijo ¡miquea yahue shajjaꞌajjacue oe! \v 23 Eꞌe, Jesosa Quito Emeshi Mese nei oe nei poanijo, ojaya esohui shajjaꞌajja cani ojaya epeejji cuaa. Jamaya miquea yahue mi huoojeajji poani peaꞌai. ¡Oya shajjaꞌajjacue! Cuanaya Jesosaa ojaya epeejji cuana jaahuana cani quea pame nee. Jesosaa jayojjaya yahue cuaa ehuanase cajaahuana cahua peaꞌai. \v 24 Jesosa Quitoja epeejji eꞌe jojo nei cuaa ojaya esohui jayojja jama atiitii cani. Jamaya ehuanase cuaa, ¡miquea yahue shajjaꞌajja tiitiicue! \p \v 25 Yahue cuana, ¡shajjaꞌajjacue mo peaꞌai! Jesosa Quito ojaya epeejji cuana quea jea nee poanijo manoꞌyonaje onaja mimishi cuijeaꞌyojji. Jamaya yahue cuaa, ¡miquea ehuanase quea jea nee acue! ¡Quea jaꞌa nee jaahuanacue! \v 26 Eꞌe, Jesosa Quito ojaya epeejji cuana mimishi cuijeaꞌyo majje Eyacuiñajji nijje miminaje jama baꞌa: —Jiquio cuaa ecuea esohui shajjaꞌajja canaje. Peaa oya cuana besa mee canaje mijo peaꞌai —poanaje. \p \v 27 Jamaya poanaje Jesosa, ojaya epeejji eꞌe jojo nei cuana quea pame nee nee epo meejji baꞌa: mimishiꞌama, quea tai pojjeama, quea jaꞌa nee nee epo meejji. \v 28 Jamajoya yahue cuaa, ¡miquea ehuanase baꞌe meesahuacue! Eꞌe, miya quea pame baꞌe sa poanijo ¡miquea ehuanase baꞌe meesahuacue quea pame! Ehuanase baꞌe meesahuañajo miya quea pame baꞌeje peaꞌai. \v 29 Eꞌe, dejja cuana quea nee nee nequi sa po ajja. Chojja. Bobi, daqui peaꞌai saꞌajja cani quea pame ebaꞌejji. Quiajjaya Jesosaa jaahuana cani ojaya epeejji cuana. \v 30 Jamaya oya poani eseya ojaya eyami jayojja nei nei poanijo. \v 31 Jamajjeya Eyacuiñajjija esohui yahuajo nei etehueꞌyo jama poa baꞌa: \q1 “Joya. Yahue ojaya ehuanase nijje baꞌyanijo oya cuana oe nei poani, beca pojjeama. Jamaya oya cuana ba cani Eyacuiñajjiya. Jamajjeya yahueya ojaya ehuanase oe nei cajaahuana cahua quea pame nee. Quea jea nee nee caꞌa cahua; oja chii, oja enaese quea jea pishana caꞌa cahua”. \m Jamaya yahuajo nei Eyacuiñajjiya tehue mee ca poa. \p \v 32 Eyacuiñajjija esohui quea pame nee nee yani Quitojo, ojaya epeejji cuanajo peaꞌai jama baꞌa: Jesosa Quito ojaya epeejji cuana nijje oe nei jayojja poani, quea huiso pojjeama, oya jayojja jjashahuabaquime poani peaꞌai. Jamaya Eyacuiñajjiya oya cuana ba cani oe nei jayojja. \v 33 Oya jayojjaya yahueya, miya quea pame nee baꞌe sa poanijo ¡miquea ehuanase quea jea nee nee acue! ¡Baꞌe meesahuacue quea pame nee! Ehuanaseya, ¡miquea yahue shajjaꞌajjacue oe! \c 6 \s1 Ehuohuijji eshoꞌi cuana huasijje echii mese cuana huasijje peaꞌai \p \v 1 Eshoꞌi cuana, miya Emeshi Mese neija, Jesosaja epeejji poanijo ¡shajjaꞌajjacue mique chii, miquea enaese peaꞌai! Jamaya quea pame. Eꞌe, Eyacuiñajjiya jama aca poa baꞌa: \q1 \v 2 “¡Mique chiiya, miquea enaeseya peaꞌai huohui cani jayojja jama acue! \v 3 Jamajjeya eyaya miquianaya baꞌe meeje quea bihui nee, quea pame nee. Quea huiso shequiaja baꞌe meeje”. \m Jamaya Eyacuiñajjiya huohui ca poa. \p \v 4 Echii meseya, enaeseya peaꞌai, ¡miquea ebacua cuana jaahuanacue quea pame nee! ¡Aꞌa onijje quea tecue nee pojji! ¡Aꞌa quea quene nee po meejji! ¡Oya cuana huohuicue Emeshi Mese neija, Jesosaja esohui! ¡Miquea esohui shajjaꞌajja meecue! \s1 Ehuohuijji echacojji cuana huasijje echaco meejji cuana huasijje peaꞌai \p \v 5 Echacojji cuana, ¡miquea echacomeejjija esohui jayojja jama pocue! ¡Chacocue quea pame nee ojaya! Jamajjeya Jesosa miquianajo quea bihui nee poaje. \v 6 Miya chacochacoani quea pame nee miquea echaco meejjiya ba canijo o quea bihui po meejji. ¡Ojaya ba jjimajo aꞌa quea huea pojji! ¡Chacocue quea pame nee Jesosa Quitohua miya ba canijo! Jesosa miquea echacomeejji poani. \v 7 Eꞌe, ¡miquea echacomeejjijo chacocue quea bihui nee! Pea cuanaja yajjijo quea pame chacochacoanijo Jesosa quea bihui nee po mee aña miyaya. \v 8 Eꞌe, ¡jiquio esohui shajjaꞌajjacue! Beca cuaa chaco cani ojaya echacomeejjijo. Pea cuanaja echacomeejji chamaꞌ. Quea pame nee chacochacoanijo Emeshi Mese neiya, Jesosaa ojjaña sosequia cajeꞌyo quijje eyajo. \p \v 9 Echacomeejji cuaa, ¡sosequiacue miquea echacojji cuana ma ona chacochaconaje sosejje! ¡Aꞌa quea mete po meejji! ¡Aꞌa tecuea neineijji! Echaco meejjija Emeshi Mese nei yani eyajo. Echacojjija Emeshi Mese nei yani eyajo peaꞌai, Jesosa bajjani. Eyacuiñajji mijo jjashahuabaquiani jayojja jama ojjaña cuanajo jjashahuabaquiani peaꞌai. Quea pame nee chacoañajo, ojjaña sosequia cajeꞌyo quijje eyajo, echacojji, echacomeejji peaꞌai. \s1 Eyacuiñajjiya eseya quea caꞌa nee po mee cani \p \v 10 ¡Pea esohui shajjaꞌajjacue! ¡Jjapee neineiquicue Jesosa nijje! Jamajjeya ohuaya miquianaya ojaya epeejji quea caꞌa po mee cajeꞌyo. Oya quea caꞌa nee nee poanijo miquianaya quea caꞌa po mee cajeꞌyo peaꞌai. \v 11 Eyacuiñajji nijje mimicue peaꞌai jama baꞌa: —Eyacuiñajji, ¡eya miquea ejjashahuabaquijji jayojja jama ameesahuacue quea jaꞌa nee! \p Jamajjeya ohuaya miquianaya Edosiquiana nei, Satanasa bajjani jeabichajea mee cajeꞌyo, ohua dasia sa acanijo. \v 12 Pea cuaa quea mase cuaa ecuana Jesosa nijje jjapeequi pajea meeꞌyo sa acani. Oya cuana dejja pojjeama, Edosiquiana, eshahua cuana peaꞌai. Jjeya quea camaja eshahuaja epeejji cuanaa quea tai acanijo. Eꞌe, eshahua cuaa huoojea cani ojaya epeejji cuana, ojjaña quea mimishi poani peaꞌai ecuana dasiaa nisho, ecuana jeabichajeaa nisho peaꞌai. \v 13 Jamajjeya ¡Eyacuiñajji nijje mimicue jama baꞌa: —Eyacuiñajji, ¡eya miquea ejjashahuabaquijji cuana jayojja jama ameesahuacue! —jamaya acue! \p Jamajjeya eshahuaa jeabichajea sa acanijo, miquianaya quea caꞌa poaje; eshahua jeabichajeajeꞌyo Eyacuiñajjiya miya asahua canijo. Eꞌe, Eyacuiñajjiya miquianaya ojaya epeejji quea caꞌa po mee cajeꞌyo. \v 14 ¡Quea jaꞌa nee jjashahuabaquicue! ¡Esohui eꞌe nei ba neineicue! Jiquio ecua Shomano sohuinanohua ejjacomayijjiquijji yii cani ejjaquecuaquijji jama jayojja ¡esohui eꞌe nei ba neineicue quea jaꞌa nee epojji! Cuanaya sohuinanohua baa daqui quea moo eseꞌojje huosho cani onaa equecuaꞌyo poani jjejojo jama jayojja ¡quea jaꞌa nee, mimishiꞌama baꞌecue eshahuaa napa cajje miya ejjadasia meequijji pojjeama! \v 15 Jiquio ecua ejiojji shejee, sapato, sohuinanohua huosho cani acuishajo meteꞌama epojji jayojja jama ¡Eyacuiñajjija esohui ba neineicue meteꞌama esohui huohuijji! \v 16 ¡Eyacuiñajjija esohui jayojja jama atiitiicue peaꞌai! Jiquio ecua sohuinanohua copocopo baa emejo huosho cani ejjaqueyaquijji, iña cani ejjaquecuaquijji, emeje edahua huoꞌohuoꞌo icui nequiñajji jayojja jama ¡Eyacuiñajjija esohui jayojja jama atiitiicue Edosiquianaja miya edasiajji pojjeama! \v 17 Cuanaya jiquio ecua sohuinanohua ejaahuojja caꞌa, baajee sapa iya cani jama onaja sapa jaja jjima yajji jayojja jama ¡esohui esapajo huanacue miquianaya quea tai ejjashahuabaqui meejji pojjeama eshahuaja, Jesosaja epeejji nei poanijo! Jamaya peaꞌai jiquio ecua sohuinanohua baa se beca iña cani pea jajajeabichajeajji jama jayojjaya ¡Eyacuiñajjija esohui mimicue eshahua mimicuiajeanobiajeajji, Edojjoshahua Pameya ameesahua canijo! \v 18 Jamajjeya ¡Eyacuiñajji nijje mimicue jama baꞌa: —Eyacuiñajji, ¡eya miquea epeejji quea caꞌa nee mo po meecue eshahua cuana, eshahuaja epeejji cuana peaꞌai mimicuiajeanobiajeajji! ¡Edojjoshahua Pame huoojeacue minijje emimi tiitii meesahuajji! —jamaya oe acue! \p Jamajjeya ¡jjashahuaba neineiquicue quea jaꞌa nee! ¡Aꞌa Jesosa nijje jjapeequi pajeaꞌyojji! ¡Ojjaña Jesosaja epeejji cuanajo mimi huichaꞌahuichaꞌacue jama baꞌa: —Eyacuiñajji, ¡ojjaña Jesosaja epeejji cuana jaahuanacue! ¡Quea jaꞌa nee po meecue! —jamaya acue! \p \v 19 Jamajjeya Eyacuiñajji nijje mimicue ejo jama baꞌa: —Eyacuiñajji, Pabo miquea esohui huohui canijo ¡huohui meesahuacue meteꞌama! Oya huohui meesahuacue, Eyacuiñajji, jama baꞌa: “Jesosaa Jodio pojjeama cuana ojaya epeejji po mee cani onijje ebaꞌe tiitiiꞌyojji eyajo. Maya yahuajo onajaya ba jjima” —jamaya mimicue Eyacuiñajji nijje ejo. \p \v 20 Eꞌe, Eyacuiñajjiya eya huoojea canaje Jesosaja esohui huohuiya. Ma esohui quea pame nee huohuiañajo, dejja quea mase cuaa eya iña majje jeanobiajea canaje. Jamajjeya ¡Eyacuiñajji nijje mimicue ejo esohui quea pame nee Jesosajo meteꞌama ehuohui meesahuajji! \s1 Pabo mimiani Eyacuiñajji nijje ojjaña Epesojo baꞌe jaahuanajji \p \v 21 ¡Pea esohui bacue! Dejja bajjani Tiquico yani ecuana nijje. Oya ecuanaja quea jea nee nee, ecuea epeejji nei nei. Ohuaya ecuana Jesosaja esohui huohui sahua cani. Miquiana huasijje poqui majje ohuaya huohui caje ejo, ma eya aña jayojjaya huohui cajeꞌyo peaꞌai. \v 22 Eꞌe, eyaya oya huoojeaña miquiana huasijje ecuanajo huohuiya. Oya shajjaꞌajja majje miquianaya yenoꞌama poaje ecuanajo. \p \v 23 Eya quea huiso mimiani Eyacuiñajji nijje miquianajo jama baꞌa: —Eyacuiñajji, miya ecuanaja Chii ai. Jesosa Quito, miya ecuanaja Emeshi Mese nei. ¡Ojjaña miquea epeejji cuana Epesojo baꞌe quea bei nee po meecue! ¡Oya cuana ojjaña miquea epeejji cuana quea jea nee po meesahuacue! ¡Oya cuana miquea esohui jayojja jama baꞌe meesahuacue quea jaꞌa nee peaꞌai! —jamaya eya poani. \p \v 24 Jamajjeya esejaya Emeshi Mese nei Jesosa Quito quea jea tii tii poanijo, ¡Eyacuiñajjiya miquianaya cabaꞌe meesahua cahua! \p Mahuiso ecuea esohui. Eyaya Pabo bajjaniya esohui tehuejeyonaje. Apoa.