\id COL - Ese Ejja NT -Bolivia 2012 (DBL -2013) 
\h CONOSENESE 
\toc1 Paboja Etehueꞌyo Conosa Cuiñajji Yasijje 
\toc2 Conosenese 
\toc3 Col 
\mt2 PABOJA ETEHUEꞌYO CONOSA CUIÑAJJI YASIJJE 
\mt1 COLOSENSES 
\c 1  
\s1 Pabohua Shomajo ejeanobia aniya esohui tehue canaje Jesosaja epeejji cuana Conosa cuiñajjijo baꞌe yasijje 
\p  
\v 1 Eya Pabo, Jesosa Quitoja huoojeaꞌyo ojaya esohui huohuiya. Jamaya Eyacuiñajji sa poanaje.  
\v 2 Timoteohua esejaya epeejji enijje esohui tehue cani miquiana huasijje jama baꞌa: Ma Eyacuiñajjija epeejji cuana huasijjeme Conosa cuiñajjijo baꞌe, ecuanaja epeejji eꞌe jojo nei Jesosa Quito nijje jjapee neineiquiani yasijje. 
\p ¡Esejaya Chii aiya, Eyacuiñajjiya miquianaya cajaahuana cahua quea pame nee, quea bei capo mee cahua peaꞌai! 
\s1 Pabohua Eyacuiñajji bihuia cani 
\p  
\v 3 Eyacuiñajji, esejaya Emeshi Mese nei Jesosa Quitoja Chii eyaya bihuia tiitiiaña onijje miquianajo mimianijo.  
\v 4 Eꞌe, pea cuaa eya huohui cani jama baꞌa: —Jesosaja epeejji cuaa Conosajo baꞌecaa Jesosa Quito shajjaꞌajja cani tii. Ojjaña Eyacuiñajjija epeejji cuana quea jea nee acani peaꞌai. 
\p  
\v 5 Eꞌe, miquianaya esohui eꞌe jojo nei Jesosa Quitoja yahuajo pishana shajjaꞌajja coo majje onijje jjapeequinaje. Jjashahuabaquiani ebaꞌe tiitiiꞌyojji quea pame nee eyajo onijje peaꞌai. Eꞌe jojo nei Eyacuiñajjiya jamaya acajeꞌyo miquianajo.  
\v 6 Jiquio esohui eꞌe jojo nei Jesosa Quitojo ojjaña meshi yasijje huohui cani. Jamajjeya quea huiso dejja baꞌe mee cani quea pame nee, miquiana jayojjaya. Jamaya miquianaaya esohui shajjaꞌajja coo majje jjabahuejjaquiꞌyonaje. Jamajjeya jjabahuejja neineiquiꞌyonaje baꞌa: Eyacuiñajjiya dejja cuana jaahuana cani eꞌe jojo nei.  
\v 7 Dejja Epapasi bajjani ecuanajaya quea jea nee. Ohuaya Jesosa Quitoja esohui huohui caꞌyonaje miquiana que. Oya ecuana jayojjaya Jesosa Quitoja yajjijo chacochacoani. Ecuana sohuihuohui sahuajji quea pame nee peaꞌai.  
\v 8 Ohuaya ecuana huohui canaje jama baꞌa: —Edojjoshahua Pameya Jesosaja epeejji cuana Conosajo baꞌe pea epeejji cuana quea jea nee po mee cani —Epapasi poanaje. 
\s1 Pabo miminaje Eyacuiñajji nijje 
\p  
\v 9 Epapasija esohui quea pame nee miquianajo shajjaꞌajjaꞌyo majje ecuana Eyacuiñajji nijje mimi huichaꞌa huichaꞌani jama baꞌa: —Eyacuiñajji, ¡ecuanajaya epeejji cuana ba neinei meesahuacue ache echacojji shai mijo onajaya poaje! Edojjoshahua Pameya oya cuana miquea esohui caba meesahua cahua quea pame nee, cajjashahuabaqui meesahua cahua quea jaꞌa nee epojji peaꞌai.  
\v 10 Jamajjeya ¡oya cuana Jesosa Quitoja esohui jayojja jama baꞌe tiitii meeꞌyocue! Jamaya poanijo Jesosa Quito quea bihui nee nee poaje onajo. ¡Quea pame nee nee chaco tiitii meecue Jesosa Quitojo peaꞌai! Eꞌe Eyacuiñajji, ¡miquea epeejji mijo jjabahuejja tiitii meequicue peaꞌai!  
\v 11 Miya ca ca oe quea caꞌa nee nee, Eyacuiñajji. Jamajjeya ¡miquea epeejji cuana Conosajo baꞌe jjapeequi meesahuacue quea caꞌa nee nee! Jamajjeya oya cuana miquea esohui pajeaꞌyo ajja tii tii dejja quea mase cuaa napa cajje, yenoꞌama poaje.  
\v 12 Eyacuiñajji, ecue Chii ai, oya cuana quea boejeaꞌyo po meeꞌyonaje miyaya. Jamajjeya quijje oya cuana miquea pea epeejji cuana nijje baꞌe tiitii meejeꞌyo quea jaꞌa nee minijje eyajo. Eꞌe Eyacuiñajji, jamajjeya apoa. 
\p  
\v 13 Yahuajo eseya Edosiquiaa napa caꞌyonaje. Quea mase nee, quea mimishi nee nee. Jjeya ca ca esejaya Chii aiya eseya jjeshe caꞌyonaje. Jamajjeya oja Bacua oe nei esejaya Emeshi Mese nei quea caꞌa poajeꞌyo tii. Oja Bacua Jesosa Quito Eyacuiñajjija quea jea nee nee poani tii tii.  
\v 14 Jama baꞌa: Jesosa Quitohua esejaya mimishi cuana cuijeaꞌyo majje Edosiquiana quea caꞌa nee eseya mesena pajea mee caꞌyonaje. 
\s1 Jesosa Quito esejo manoꞌyonaje 
\p  
\v 15 Dejja cuanaja Eyacuiñajji ecojja bajji pojjeama, jjacojjaba meequi ajja. Jamatii oja Bacua Jesosa Quito Eyacuiñajji jayojja nei neiya, o jayojjaya jama poani peaꞌai. Jamajjeya Jesosa Quito ba majje Eyacuiñajji esejaya eba. Oya, Jesosa Quito ojjaña eꞌaquiana mese. Ojjaña aquiana cuana oja pana poa.  
\v 16 Eꞌe, Eyacuiñajjiya Jesosa Quito nijjeya ojjaña aquiana cuana pana caꞌya poa, jiquio aquiana baꞌa: Ojjaña aquiana ojjaña meshi cuanajo pana caꞌya poa; ojjaña aquiana eyajo pana caꞌya poa peaꞌai. Aquiana cuana ecojjaja ebajji, pea aquiana ecojjaja ebajji pojjeama peaꞌai pana caꞌya poa jiquio baꞌa: Eyacuiñajjija esohuidojojji quea caꞌa nee pana caꞌya poa, eshahua cuana quea huiso, quea mimishi po jjimahuajo, pana caꞌya poa peaꞌai. Eꞌe, Eyacuiñajjiya Jesosa Quito nijjeya ojjaña aquiana, ojjaña tii pana caꞌya poa Jesosa Quitoja yaꞌyojji.  
\v 17 Eꞌe, oya Jesosa Quito baꞌe tiitiiya poa ojjaña aquiana pana jjimahuajo. Ojjaña aquiana nequi tiitii mee cani quea pame nee, Jesosa Quitohua.  
\v 18 Ojjaña ojaya epeejji cuanaja mese poani tii tii peaꞌai. Ohuaya ma epeejji ojaya huapa pojjeama jayojja jama ojee jjapeequi meesahua cani, ojjaña. O jayojja baꞌe meesahua cani. Manoꞌyo majje Jesosa Quito ebionei shequi oꞌoyanaje. Jamajjeya oya oe nei quea caꞌa nee nee poani tii tii.  
\v 19 Eꞌe, oja Bacua Jesosa Quito o jayojja poani tii tiijo, Eyacuiñajji quea bihui nee nee poani.  
\v 20 Yahuajo dejja cuana quea mimishijo Eyacuiñajjiya ojjaña aquiana cajaa acaꞌya poa. Jesosa Quito acui ecueataꞌapeejo baꞌe na cuayaquiꞌyonaje. Manoꞌyonaje. Jamajjeya Eyacuiñajjiya mimishi cuana cuijea cajeꞌyo. Jamajjeya quea bei po oꞌoyanaje ojjaña oja pana cuana nijje eyajo, meshi cuanajo anica cuana nijje peaꞌai. 
\p  
\v 21 Eꞌe, miquianaya yahuajo quea mimishi poanijo, quea jjashahuabaqui tai poanijo peaꞌai Eyacuiñajji nijje jjapeequi ajja. Quea huesha nee poquiquehuani jayojja poanaje.  
\v 22 Jesosa dejja jayojja yamijji nequinaje. Jamajjeya Jesosa Quito esejaya mimishi cuanajo manoꞌyonajejo, Eyacuiñajjiya eseya ojaya epeejji cuana po mee caꞌyonaje. Jamajjeya Jesosa Quitohua eseya Eyacuiñajji yasijje poqui mee cajeꞌyo mimishiꞌama, quea boejea epoꞌyo peaꞌai. Jamajjeya Eyacuiñajji ese nijje quea bei poaje eyajo, ca ojaya esohui jama baꞌe tiitiinajejo, Jesosa Quitoja esohuijo jjashahuaba tiitiiquinajejo peaꞌai.  
\v 23 Jiquio esohui shajjaꞌajja majje ¡aꞌa pajeaꞌyojji peaꞌai! Quea huiso dejjaa quea huiso meshijo baꞌeya jiquio esohui shajjaꞌajja cani eseyaya jayojjaya. 
\s1 Jesosa Quitohua ca oe Pabo huoojea canaje esohui huohuiya 
\p Jesosa Quitoja esohui ojjaña dejjaa shajjaꞌajja canaje ojjaña meshijo. Eya ca ca iña eꞌe jojo nei Eyacuiñajjija esohui huohuijji; Jesosa Quitoja esohui huohuiaña.  
\v 24 Jesosa Quitoja esohui eya huohuiyajo, pea cuaa eya jeyo majje jeanobiajea canaje quea huiso cahuijo; quea nee. Jamatii eya quea bihui nee poani. Yahuajo Jesosa Quito quea nee nee poa. Jjeya eya quea nee pishana poani miquiana Jesosaja esohui jayojja baꞌe meesahuajji. Eꞌe pojjaꞌa quijje Jesosa jayojja eya quea nee nee poaje. Dejja cuaa eya napa cajje eya quea caꞌa poajo, Jesosaja epeejji cuana quea caꞌa poaje peaꞌai.  
\v 25 Eꞌe jojo nei Eyacuiñajjiya eya huoojea caꞌyonaje ojaya esohui huohuiya ojaya epeejji cuana huasijje. Jamaya miquianaya jjapeequi meesahuaña Jesosa Quito nijje. Ojjaña Jesosaja esohui huohuiaña peaꞌai. Jiquio esohui eseya Eyacuiñajjiya ba meesahua cani.  
\v 26 Jiquio esohui dejja cuanaja quea quehua yahuajo nei poa. Ba mee jjima poa. Jjeya ca ca Eyacuiñajjiya ojaya epeejji nei cuana Jesosa Quitoja esohui ba meesahua cani quea jaꞌa nee.  
\v 27 Jamajjeya jjeya Eyacuiñajjiya ojjaña ojaya epeejji cuana, Jodio pojjeama cuana peaꞌai ba mee sa acani ojaya esohui Jesosa Quitojo. Ma esohui quea pame nee nee jama baꞌa: Jesosa Quito esejaya eyami dojjojo nequi tiitiiyani. Jamajjeya eseya jjashahuabaquiani onijje eyajo enequi tiitiiꞌyojji.  
\v 28 Ojjaña Jesosa Quitoja esohui ecuaaya huohuiaña quea jaꞌa nee ojjaña huasijje. Ojjaña nei nei jjabahuejjaqui meeaña ojjaña Jesosa Quitoja epeejji quea caꞌa nee epojji. Eꞌe, jamaya poaje Jesosa Quito poe oꞌoyajo.  
\v 29 Miquianaya Quitoja epeejji quea caꞌa nee epojji eyaya janobajjima nei esohui huohuiaña Jesosa Quitoja. Jesosa Quito ecuea eyami dojjojo quea caꞌa nee nequi. Ohuaya eya esohui ba neinei meesahua cani miquiana huasijje ehuohuijji. 
\c 2  
\p  
\v 1 ¡Bacue jiquio! Eya janobajjima nei jjashahuabaqui majje Eyacuiñajji nijje mimi neineiani miquianajo Conosajo baꞌe yasijje. Mimi neineiani Jesosa Quitoja epeejji cuana Naonisea cuiñajjijo baꞌe yasijje peaꞌai, Jesosa Quitoja epeejji cuana ecuea ba jjima cuana huasijje peaꞌai. Jamatii eya jjashahuabaquiani onajo peaꞌai.  
\v 2 Jamajjeya eyaya ojjaña miquianaya Jesosa Quitoja epeejji cuana quea caꞌa nee po meesahuajeꞌyo. Miquianaya pea cuana nijje jjapeequi meesahuajeꞌyo eꞌe jojo nei peaꞌai, esohui quea pame nee Jesosa Quitojo jjabahuejjaqui meesahuaje. Quea bei nee jjashajjaꞌajjaquije. Eꞌe, jjeya ojjaña cuana esohui Jesosa Quitoja Eyacuiñajjiya ba meesahua cajeꞌyo quea jaꞌa nee. Yahuajo ca maya ba mee jjima poa.  
\v 3 Jesosa Quitoja eba ojaye nei Eyacuiñajjija ejjashahuabaquijji, ojjaña tii. Onijje jjapeequianijo, Eyacuiñajjija ejjashahuabaquiꞌyojji quea jaꞌa nee ba meesahua cani Jesosa Quitohua.  
\v 4 ¡Ecuea esohui etehueꞌyo ba neineicue miquiaaya! Pea dejja cuana siajje poani Eyacuiñajjijo ¡aꞌa shajjaꞌajjajji! Dasia ca chanaꞌ mi.  
\v 5 Eꞌe, eya ejeanobia ani. Jamajjeya miquiana nijje eya enequijji pojjeama. Jamatii eya jjashahuaba tiitiiquiani miquianajo, miquiana nijje nequi jayojjaya. Ecuea eba miquianaya Jesosa Quito nijje jjapee neineiquiani quea pame nee, ojaya esohui jayojja jama poani peaꞌai. Jamajjeya eya quea bihui nee nee poani miquianajo. 
\s1 Jesosaa eseya o jayojja baꞌe meesahua cajeꞌyo 
\p  
\v 6 Jamajjeya miquianaya Jesosa Quito nijje ebionei jjapeequiꞌyonajejo oya miquea Emeshi Mese nei quea pame nee poanaje. Jamajjeya ¡baꞌecue ojaya epeejji nei!  
\v 7 Jamajjeya ¡Jesosa Quitoja epeejji quea caꞌa nee oe pocue! ¡Ojaya esohui ba tiitiicue! ¡Ojaya esohui eꞌe jojo neijo jjashahuaba tiitiiquicue peaꞌai! Eꞌe, jamaya pea dejjaa miquianaya huohui canaje. Eyacuiñajji nijje jamaya mimi tiitiicue: —Eꞌe Eyacuiñajji, jamaya miquea esohui quea pame nee nee. 
\p  
\v 8 Dejja cuaa esohui eꞌe nei pojjeama huohui cani miquianaya. Quea quehua nee, etiiquiana cuanaja esohui. Jesosa Quitoja esohui jayojja jama pojjeama, quea jaꞌa nee pojjeama. ¡Aꞌa shajjaꞌajjajji! Dasia cajeꞌyo cuaa mi. 
\p  
\v 9 Jamajjeya ¡bacue jiquio! Oya Jesosa Quito eseya jayojja yamijji poa. Jamatii oya Eyacuiñajji nei poa.  
\v 10 Jesosa Quito nijje jjapeequianijo, Eyacuiñajjiya eseya baꞌe tiitii mee cajeꞌyo Jesosa Quito jayojja epoꞌyojji. Eꞌe, Jesosa Quito Emeshi Mese nei oe nei quea caꞌa nee nee. Ojjaña eshahua cuanaja mese, Eyacuiñajjija esohuidojojji cuanaja mese peaꞌai quea caꞌa pishana, de. 
\p  
\v 11 Ojaya etiiquianaja esohui jama Jodio dejja cuaa cuiishasha jehuisejjajea cani. Jamaya huohui jjima acani Jesosa Quitohua. Onijje jjapeequianijo, ohuaya miquianajaya mimishi pajea mee caꞌyani, miquianajaya ejjashahuabaquiꞌyojji quea mimishi chamaꞌyo po mee caꞌyani.  
\v 12 Jesosa Quito manoꞌyajo dejja cuaa ohuajea ca poa. Eyacuiñajjiya oya shequi mee ca oꞌoyanaje. Jesosa Quito ohuajea ca poa jayojja jamaya peaa miquianaya enajo besa mee canaje Eyacuiñajjijo. Jamajjeya Eyacuiñajjiya Jesosa Quito shequi mee ca oꞌoyanaje jayojja jamaya ohuaya miquianaya baꞌe meesahua cajeꞌyo Jesosa Quito jama epoꞌyojji, ojaya esohuijo jjashajjaꞌajjaquianijo.  
\v 13 Yahuajo Jodio pojjeamaja Eyacuiñajjija esohui miquianajaya ba jjima. Quea mimishi nee nee poanijo miquea edojjoshahua cuaqui yasijje dobiquiꞌyo quiaye poanaje. Jjeya ca ca Eyacuiñajjiya miquianaya baꞌe tiitii mee cajeꞌyo Jesosa Quito nijje mimishi cuana ojjaña tii cuijea caꞌyonajejo.  
\v 14 Eseya aje oe Moisesija esohui etehuejo jjashajjaꞌajjaqui ajjajo, Eyacuiñajjiya tehue mee canaje jama baꞌa: “Ojjaña quea mimishi nee nee” poanaje. Jamatii jojoya Jesosa Quito esejaya mimishijo manoꞌyonaje acui ecueataꞌapeejo. Jamajjeya Eyacuiñajjiya eꞌe jojo nei esejaya mimishi cuana cuijea neinei caꞌyonaje.  
\v 15 Eꞌe, Jesosa Quito acui ecueataꞌapeejo manoꞌyonaje. Jamajjeya eshahua cuana caꞌaꞌama po mee caꞌya poa, Eyacuiñajjiya. Jamaya ojjaña eshahua mese cuana jeabichajea caꞌya poa. Eyacuiñajjiya ojjaña ba mee canaje eyajo anica. 
\s1 ¡Aꞌa esohui eꞌe nei pojjeama shajjaꞌajjajji! 
\p  
\v 16 Jamajjeya ¡bacue oe! Pea cuaa miquianaya tecuea cani ojjaña bobi miquiaa ijjiañajo, pea eꞌishijji ishiañajo peaꞌai. ¡Aꞌa oya cuana shajjaꞌajjajji! Jodio cuanaja esohui jama baꞌa: Ojee eꞌijjiajji pojjajo, epojja chacochaco mee ajja peaꞌaijo huohui cani; ¡aꞌa oya cuana shajjaꞌajjajji!  
\v 17 Yahuajo ma esohui cuanajo dejja cuana jjashahuaba meequi caꞌyonaje ma Jesosa Quitohua quijje poe majje acañaje. ¡Jjeya nei Jesosa Quitojo jjashahuabaquicue! Oya ca ca oe nei quea pame nee.  
\v 18 Pea dejja cuaa jjacahuibaqui majje miquianaya Eyacuiñajjija esohuidojojji bihuia mee sa acani bobimaꞌ ani tii. Ma dejja cuana ojaya ejjashahuabaquijji quea taijo mimi huichaꞌa huichaꞌani. Jama siajje pome poani baꞌa: —Ecuea ejjashahuabaquijji quea jaꞌa nee; onajaya quea jaꞌa pojjeama —poani. 
\p Tecuea canijo ca oe ¡aꞌa jjashajjaꞌajjaquijji! Eyacuiñajji nijje mi poqui pajea mee ca chanaꞌ.  
\v 19 Ma dejja cuana aje oe Jesosa Quito nijje, esejaya Emeshi Mese nei nijje jjapeequi pajeaꞌyonaje. Esejaya Emeshi Mese neiya Jesosa Quitohua ojjaña ojaya epeejji cuana jjabahuejjaqui mee cani ojee. Jama baꞌa: Jesosa Quito ojjaña ojaya epeejji cuana nijje ese ejja jayojja poani. Ojjaña ojaya epeejji cuana Jesosa Quitoja eyami jayojja poani. Esapa jayojja esejaya Emeshi Mese nei Jesosa Quito poani. Jiquio ecua esapaa eyami poqui mee cani jayojja jama Jesosa Quitohua ojjaña ojaya epeejji cuana huoojea cani, jjabahuejja meequi cani ojee ejjapeequijji. Jamaya Eyacuiñajjija quea boti nee. Jamaya Eyacuiñajjiya ojjaña ojaya epeejji quea caꞌa nee po mee sa acani. Esejaya Emeshi Mese neiya Jesosa Quitohua ojjaña ojaya epeejji cuana ojee onijje jjabahuejja meequi cani; jamaya Eyacuiñajjiya ojjaña ojaya epeejji cuana quea caꞌa nee po mee cani. Jamajjeya ojjaña ojee jjapeequi mee cani Jesosa nijje. 
\p  
\v 20 Miquianaya Jesosa Quito jayojja jama poanijo Jesosa Quitoja epeejji pojjeama cuanaja esohui quea quehua ¡aꞌa shajjaꞌajjajji! ¿Apiojji acuae jjeya maya esohui quea quehua shajjaꞌajja sa poani? Jesosa Quito nijje jjapeequianijo eshahuaja epeejji pojjeama poani.  
\v 21 Esohui quea quehua jiquio jama baꞌa: —Jiquio aquiana ¡aꞌa napajji! ¡Aꞌa pea bobi cuana ijjiajji! ¡Pea eꞌishijji aꞌa ishijji! —jamaya dejja cuaa huohui nisho cani. 
\p  
\v 22 Jama pojjeama ca ca Eyacuiñajjija esohui. Bobi cuana ijjiajeyo majje chamaꞌyo tii poani. Joya miquiaa napaña aquiana chamaꞌyo tii poaje peaꞌai.  
\v 23 Eꞌe, jiquio dejja cuaa pea cuana dasia cani; ojaya esohui quea quehua quea jaꞌa poso acani cuaa. Jamajjeya pea cuana jjashahuaba quehuaqui majje oe pojji bobi ijjia jjima acani. Peaꞌai Jesosaja esohui jama baꞌe sa poꞌyo ajja. Cho, quea jaꞌa pojjeama baꞌyani. Jamaya poanijo dejja cuana quea mimishi jjashahuabaqui pajea ajja. 
\c 3  
\s1 Yahuajo quea tai baꞌya poa ebaꞌejji Jesosa Quito nijje quea pame 
\p  
\v 1 Eyacuiñajjiya Jesosa Quito baꞌe mee ca oꞌoyanaje. Jamajjeya ohuaya miquianaya baꞌe mee cajeꞌyo Jesosa Quito jayojja. Jamajjeya ¡jjashahuaba tiitiiquicue Jesosa Quitojo eyajo ebaꞌejji! Jama baꞌa: Eyacuiñajjiya Jesosa Quito ojjaña huoojeaꞌyojji quea caꞌa nee nee po mee caꞌyonaje. Oya Eyacuiñajjija ebianei mijijje ani.  
\v 2 Eꞌe, ¡jjashahuaba tiitiiquicue oe Jesosa Quitojo! ¡Aquiana taijo oe aꞌa jjashahuabaquijji!  
\v 3 Jama baꞌa: Dejja emanoꞌyojaa mimishi poꞌyo ajja. Jamaya miquianaya jjeya emanoꞌyo jayojjaya mimishi po sa poꞌyo ajja. Jesosa Quito Eyacuiñajji nijje nequi tiitiiani. Ohuaya miquianaya jaahuana cani quea pame nee.  
\v 4 Jesosa Quito poe oꞌoyajo, eseya onijje nequi tiitiijeꞌyo quea jaꞌa nee nee; o jayojjaya poajeꞌyo onijje jjapee tiitiiquianijo. Jamajjeya oe ¡jjashahuaba tiitiiquicue Jesosa Quitojo! 
\p  
\v 5 Eꞌe, Jesosa Quito nijje jjapeequi majje jamaya ebionei acue baꞌa: ¡Ojjaña mimishi cuana oe pajea neineiꞌyocue! ¡Aꞌa pea cojjojji pojji! ¡Aꞌa jama jjashahuabaquimeya pojji! ¡Aꞌa quea tai jjashahuabaquijji! ¡Aꞌa quea mimishi baꞌe sa pojji! Onajaya aquiana ¡aꞌa quea jea bajji peaꞌai! Quea dejja tai poanijo aje oe miquianaya eyacuiñajji nisho bihuiajji jayojja poani, de.  
\v 6 Jiquio mimishi cuana jama atiitii canijo, Eyacuiñajjiya shajjamaꞌ cuana quea nee nee po mee cajeꞌyo.  
\v 7 Jamaya aje oe miquiaaya yahuajo mimishi ahuichaꞌa huichaꞌaꞌyonaje peaꞌai onaaya acani jayojjaya.  
\v 8 ¡Jjeya ca ca pajea neineiꞌyocue ojjaña mimishi cuana! Jamajjeya ¡aꞌa quea tecue nee nee pojji! ¡Aꞌa quea quene nee nee pojji! ¡Aꞌa quea mase nee nee pojji! ¡Aꞌa pea nijje mimijajijji! ¡Aꞌa quea tai mimijji!  
\v 9 Eꞌe, miquianajaya ebaꞌejji quea mimishi yahuajo jama apajeaꞌyonajejo ¡aꞌa siajje pojji!  
\v 10 Jjeya miquianajaya ebaꞌejji quea pame nee poꞌyonaje. Eyacuiñajjiya miquianaya baꞌe meesahua cani quea boejea, o jayojja epojji, o ba neineijji epojji. Jamajjeya ¡aꞌa quea mimishi poꞌyojji! 
\p  
\v 11 Jamajjeya Jesosa Quito nijje jjapeequianijo ojjaña ojaya epeejji cuana cajjapeequiahua pea nijje; pea jayojja oe capoahua. Jodio cuana ca ca Jodio pojjeama jayojjaya caꞌaꞌama; dejja ecuiishasha jehuisejjaꞌyo ca ca cuiishasha jehuisejja jjima jayojja peaꞌai, Jieno dejja pojjeama cuana, Sitinia dejja cuana peaꞌai; echacojji sosemaꞌ ca ca dejja echacomeejjimaꞌ jayojja, caꞌaꞌama ojjaña. Jesosa Quito ca ca oe nei quea caꞌa nee nee nequi tii tii.  
\v 12 Eꞌe, Eyacuiñajjiya miquianaya babaca caꞌya poa ma ojaya epeejjime epojji. Ohuaya miquianaya quea jea nee nee acanaje peaꞌai, Eyacuiñajjiya. Jamajjeya quea pame baꞌecue jiquio jama baꞌa: ¡Aemaꞌ cuana baꞌe meesahuacue! ¡Pea cuana nijje jjapeequicue! ¡Maseꞌama oe pocue! ¡Quea bei oe pocue! ¡Tecueꞌama peaꞌai oe pocue!  
\v 13 ¡Ona nijje tecueꞌama pocue! Eꞌe pojjaꞌa pea cuaa miquianaya quea mimishi acaje. ¡Jamatii ojaya mimishi pajeaꞌyocue; ohuaya miquea mimishi capajea caꞌyahua peaꞌai! Eꞌe, Jesosa Quitohua miquianajaya mimishi cuana cuijea caꞌyonaje; jamajjeya ¡miquianaaya oe pea cuanaja mimishi pajeaꞌyocue!  
\v 14 Eꞌe jojo nei ¡pea cuana quea jea nee acue! Jamaya poanijo miquianaya ojee quea jaꞌa nee nee baꞌeje.  
\v 15 ¡Miquianaya oe quea bei nee nee baꞌecue Jesosa Quitohua miquianaya quea bei nee baꞌe meesahua canijo! Miquianaya ca ca oe Jesosa Quitoja epeejji poani. Jamajoya eseya jjapeequi mee cajeꞌyo quea cojja bei epojji. Majoya miquianaya iyaa caꞌyonaje Eyacuiñajjiya. ¡Eyacuiñajji bihuiacue peaꞌai! 
\p  
\v 16 ¡Ojjaña Jesosa Quitoja esohui cuana shajjaꞌajja tiitiicue! ¡Quea jaꞌa nee esohui esejaya epeejji cuana huasijje huohuicue; shajjaꞌajjacue peaꞌai! ¡Ojee jjabahuejjaqui meecue quea jaꞌa nee peaꞌai! Eyacuiñajji bihuiañajo jama pocue baꞌa: ¡Sohuicuayacue quea bihui nee Jesosa Quitojo! ¡Miquianaaya Eyacuiñajji bihuiacue sohuicuayaniya peaꞌai! ¡Quea quijijji bei nee peaꞌai pocue Eyacuiñajjijo! Eꞌe, ¡o jayojjaya jama baꞌecue!  
\v 17 Esejaya Emeshi Mese nei Jesosa. Ojaya epeejji poanijo ¡ojjaña miquea esohui ojaya yajji acue! ¡Ojjaña miquea echaco ojaya epojji chacocue peaꞌai! Jesosa Quitohua miquianaya jamaya ameesahua canijo, ¡Eyacuiñajji, esejaya Chii ai oe bihuiacue! 
\s1 Eyacuiñajji esejaya eyamijo quea pame nequi 
\p  
\v 18 Jamajjeya ehuanase cuaaya, Jesosaja epeejjiya, ¡yahue shajjaꞌajjacue! Jamaya miquianaya quea pame nee poaje.  
\v 19 Yahueya, ¡miquea ehuanase quea jea nee acue! ¡Aꞌa oe onijje quea tecue nee pojji! 
\p  
\v 20 Eshoꞌi cuaa, Jesosaja epeejji poaniya, ¡shajjaꞌajja tiitiicue mique chii, miquea enaese peaꞌai! Jamaya miquianaya poanijo, Jesosa Quito quea bihui nee poaje.  
\v 21 Echii cuaa, enaeseya peaꞌai, ¡aꞌa jamatii tecuea huichaꞌajji mique bacua cuana! Oya cuana quea yeno nee poaje miquiaa tecuea tiitiiꞌyajje. 
\s1 ¡Echacojji cuana, echacomeejji cuana peaꞌai quea pame oe pocue! 
\p  
\v 22 Miquianaaya echacomeejjijo chacochacoani ojaya yajjijo ¡miquianaja echacomeejjija esohui jama chacomeya oe acue, ojjaña tii! ¡O ba majje aꞌa chaco nishojji! Cho. ¡Eꞌe jojo nei quea bihui nee oe chacocue ojaya! ¡Jamaya oe acue miquianaaya! ¡Jesosa Quito oe quea jea nee ejjaꞌaqui!  
\v 23 Miquianaaya echacomeejjijo chacoañajo Eyacuiñajjijo chacoaña peaꞌai. Jamajjeya ¡chaco neineicue Eyacuiñajjijo quea bihui nee epojji!  
\v 24 Eꞌe, miquianajaya eba jama baꞌa: Quijje eyajo esejaya Emeshi Mese neiya miquea echaco quea pame nee cuana sosequia cajeꞌyo, ma ecua ohuaya huohui ca poa jayojjaya acajeꞌyo. Eꞌe, miquianaya chacochacoani Jesosa Quitojo, esejaya Emeshi Mese neijo.  
\v 25 ¡Bacue oe! Eyacuiñajjiya ojjaña shajjamaꞌ cuana napa cajeꞌyo quea mimishi poani sosejje. Ohuaya ojjañaja mimishi ba cani. Jamajjeya joya quea mimishi nee nee poani janobajjima nei napa cajeꞌyo; joya quea mimishi pishana poani oe pojji napa cajeꞌyo. 
\c 4  
\p  
\v 1 Ojjaña echacomeejji cuaa, ¡shajjaꞌajjacue mo oe! Miquea echacojji cuana miquea yajjijo chacochacoani ¡sosequiacue oya huiso tii! ¡Oya cuana oe jaahuanacue quea pame nee epojji! ¡Aꞌa pajeaꞌyojji miquea Emeshi Mese neiya eyajo aniya miya ba tiitii cani! 
\s1 Pea cuana Pabohua niñesheꞌa cani 
\p  
\v 2 Epeejji cuana, ¡mimi majamajacue Eyacuiñajji nijje ojjaña pojjajo! ¡Hueaꞌama mimicue! ¡Oya oe bihuiacue onijje mimianijo!  
\v 3 ¡Eyacuiñajji nijje oe ojee mimicue ecuanajoya peaꞌai! Jamajjeya ohuaya ecuana huohui meesahua tiitii cajeꞌyo esohui pame nee Jesosa Quitoja, ma onajaya yahuajo ba jjima. Ma esohui eya huohuiajoya, dejja mimishi cuaa eya iña majje jeanobiajea caꞌyonaje.  
\v 4 Jamatii miquianaya ejo Eyacuiñajji nijje mimianijo, ohuaya eya Jesosa Quitoja esohui huohui meesahua cajeꞌyo quea jaꞌa nee. 
\p  
\v 5 Jesosa Quitoja epeejji pojjeama cuana nijje mimianijo ¡jjashahuaba neineiquicue quea jaꞌa nee! ¡Quea pame nee oe ona nijje po tiitiicue peaꞌai!  
\v 6 ¡Quea bei, quea jaꞌa nee peaꞌai mimicue Jesosa Quitoja epeejji pojjeama cuana nijje! ¡Jjashahuaba neineiquicue onijje mimi jjimahuajo! Jamajjeya onaya Jesosa Quito ba meesahuajeꞌyo. 
\s1 Pabohua quea bihui nee esohui tehue canaje pea cuana huasijje 
\p  
\v 7 Dejja Tiquico bajjani Jesosaja epeejji, e jayojjaya Jesosajo chacochacoani, ecuanajaya quea jea nee nee. Ohuaya eya chacosahua caꞌyonaje Jesosa Quitojo quea pame nee peaꞌai. Ohuaya miquianaya huohui cañaquije jiquiojo e baꞌyanijo.  
\v 8 Eyaya oya huoojeaje miquiana huasijje e huohuiya. Ojaya esohui ecuanajo shajjaꞌajja majje ¡quea bihui nee pocue!  
\v 9 Tiquico nijje Onesimo poquije. Oya ecuana jayojjaya Jesosaja epeejji quea pame nee peaꞌai. Yahuajo oya miquianajaya cuiñajjijo baꞌya poa. Ojjaña jiquiojo onaa acani huohui caje miquiana huasijje, Onesimohua.  
\v 10 Anitaco enijje ejeyoꞌyo nequi ejjajeanobiaquijji equijo. Ohuaya miquianaya huohuiꞌajja cani jama baꞌa: —¿Achajja acuae quiana soꞌo? —ojaya ebajji. 
\p Macosohua peaꞌai huohuiꞌajja cani: —¿Achajja acuae quiana soꞌo, de, ecuanajaya ebajji? 
\p Oya Macoso Benabeja jjoꞌyaseja bacua ejja. Miquiana que poquiyajo, ¡oya jaahuanacue quea pame nee! Jamaya eyaya miquianaya huohuinaje yahuajo.  
\v 11 Jesosa Josoto yani peaꞌai. Ohuaya huohuiꞌajja cani peaꞌaiya: —¿Achajja acuae nequiana soꞌo, ecuanajaya ebajji? 
\p Jiquiojo pea beca peejjima Jodio cuana Jesosaja epeejji yani. Ohuaya eya chaco meesahua cani quea pame nee Eyacuiñajjija yajjijo, esejaya Emeshi Mese neija yajjijo. Pea Jodio cuanaja enijje chaco jjima, de.  
\v 12 Epapasi cuanaya yani enijje. Ohuaya peaꞌai esohui quea bihui nee huohui cani miquiana que. Yahuajo oya miquiana nijje baꞌya poa peaꞌai. Jesosa Quitoja yajjijo chaco cani ohuaya. Janobajjima nei mimi tiitiiani Eyacuiñajji nijje miquianajo jama baꞌa: —Eyacuiñajji, ¡miyaya ojjaña Conosajo baꞌe cuana Jesosa Quito nijje jjapeequi meesahuacue quea jaꞌa nee! ¡Miquea esohuijo eꞌe jojo nei oya cuana jjabahuejjaqui meesahuacue! ¡Miquea esohui jama baꞌe tiitii meesahuacue, Eyacuiñajji! —jamaya Epapasi mimiani Eyacuiñajji nijje miquianajo. 
\p  
\v 13 Eꞌe, Epapasi mimi tiitiiani Eyacuiñajji nijje miquiana jaahuanajji. Quea huesha cuiñajji yasijje Jesosaja epeejji cuana Naonisea cuiñajjijo baꞌe yasijje, Jienaponi cuiñajjijo baꞌe peaꞌai yasijje Eyacuiñajji nijje mimi tiitiiani, Epapasi. Jamaya eyaya oya baña.  
\v 14 Ecuanajaya epeejji quea pame nee Noca bajjani yani jiquiojo. Oya eshicuijjiquiajji, de. Dejja Demasi bajjani yani peaꞌai. Ohuaya esohui quea bihui nee huoojea cani miquiana huasijje. 
\p  
\v 15 ¡Ecuanajaya esohui quea bihui nee huohuiquicue Jesosaja epeejji nei cuana huasijje Naoniseajo baꞌe yasijje! ¡Epona Nema bajjani oe huohuicue! ¡Ojaya epeejji cuanaya peaꞌai huohuicue, joya oja equi yasijje jjachachaquiani Eyacuiñajjija esohui baa!  
\v 16 Eꞌe, jiquio ecuea esohui etehueꞌyo ba neinei majje ¡huohuiquicue Jesosaja epeejji cuana huasijje Naoniseajo baꞌe yasijje! Majoya ohuaya miquianaya quia caje oꞌoya pea esohui etehueꞌyo, ma eyaya ebionei tehuenaje o que. ¡Ma esohui shajjaꞌajjacue, ojjañaa miquiaaya!  
\v 17 Pea dejja Aquipo bajjani huohuicue ecuea esohui jama baꞌa: —Eyacuiñajjiya miya huoojea caꞌyonaje ojo chacohua. Jamajjeya ¡chacocue quea pame nee ojo! ¡Ojjaña joya ecua ohuaya huohui cani jamaya oe acue! 
\p  
\v 18 Eyaya ca eya jiquio esohui quea bihui nee tehueꞌyonaje. Dejja cuanaja eya pichojeaꞌyo jjima; eya ejeyoꞌyo tii nequi. ¡Aꞌa eya pajeaꞌyojji! ¡Eyacuiñajjiya miquianaya cajaahuana tiitii cahua quea pame nee! 
\p Mahuiso. Eya Pabo bajjani esohui tehuejji. Apoa.