\id ACT - Ese Ejja NT -Bolivia 2012 (DBL -2013) 
\h HECHO 
\toc1 Edojjoshahua Pameya Jesosaja Epeejji Pea Jjashahuabaquime Po Mee Cani 
\toc2 Hecho 
\toc3 Hch 
\mt2 EDOJJOSHAHUA PAMEYA JESOSAJA EPEEJJI PEA JJASHAHUABAQUIME PO MEE CANI 
\mt1 LOS HECHOS 
\c 1  
\s1 ¡Ishoacue Edojjoshahua Pameja epoejji! —Jesosa poanaje 
\p  
\v 1 Ecuea epeejji Teopino, eyaya, Noca bajjaniya jiquio esohui tehueaña miquea ebajji. Yahuajo eyaya miya huohuinaje Jesosajo ma ohua acanaje oja Chiija jjequisohuaꞌyo jjimahuaa. Ojaya ehuohui cuanajo peaꞌai eyaya tehuenaje. Maya eyaya mi que tehuenaje ecuea ebionei esohui etehueꞌyojo.  
\v 2 Eꞌe, eyahuasijje sohuaquiꞌyo jjimahuaa Jesosaa Edojjoshahua Pame nijjeya o shajjaꞌajjajji cuana sohuihuohui canaje. Ma dejja cuana oja babacaꞌyo, oja huoojeaꞌyo cuana ojaya esohui huohuijji epojji.  
\v 3 Eꞌe, Jesosa yahuajo quea nee nee poanaje. Manoꞌyonaje. Manoꞌyo majje shequi oꞌoyanaje. Shequi oꞌoya majje oya poe oꞌoyanaje o shajjaꞌajjajji cuana huasijje. Quea huiso ma dejjaa ajjima acani acanaje Jesosaa quea jaꞌa nee nee, ojjañaja ebajji oya eꞌe jojo nei eshe oꞌoya. Jesosaa oya cuana ba mee canaje Eyacuiñajji eyajo ojjaña huoojeajji poani. Shequi oꞌoya majje Jesosa oya cuana nijje nequi oꞌoyanaje quea huiso cahuime, 40 cahuime.  
\v 4 Ijjiaꞌijjia aniya ohuaya oya cuana huohui canaje jama baꞌa: —¡Jenosanena cuiñajji esecue yasijje aꞌa cuayaquijji! Eyacuiñajjiya ojaya esohui jayojja jama acajeꞌyo; ojaya Edojjoshahua Pame huoojea caje miquiana que dobiquiya. ¡Ishoacue Edojjoshahua Pame! Yahuajo eyaya miquianaya jamaya huohuinaje —Jesosa poanaje—.  
\v 5 Eꞌe, Huaniya yahuajo pishana quea huiso cuana enajo besa mee canaje Eyacuiñajjijo. Quijje pishana ca ca Edojjoshahua Pame miquiana que dobiquijeꞌyo —Jesosa poanaje. 
\s1 Jesosa Eyacuiñajjiya eyahuasijje jjequisohua caꞌyonaje 
\p  
\v 6 Eꞌe, o shajjaꞌajjajji cuaa onijje nequi oꞌoya majje Jesosa huohuiꞌajja canaje jama baꞌa: —Emeshi Mese Jesosa, ¿aꞌa jjeyahua nei miya Isaeni cuanaja Emeshi Mese poajeꞌyo jiquio meshijo? —acanaje cuaa. 
\p  
\v 7 Jesosaa oya cuana sajaꞌa canaje: —Cuaꞌa, Eyacuiñajjija eba ojaye nei, esejaya Chii eyajo anija ojaya eba. Ache shono, ache baꞌijo shai miquianajaya ba jjima.  
\v 8 Jamatii, Edojjoshahua Pame miquiana que dobiqui majje ohuaya miquianaya sohuihuohui meesahua caje quea jaꞌa nee. Miquianaya ecuea esohui huohuijji poajeꞌyo. ¡Jenosanenajo, Jodio meshijo, Samania meshijo, ojjaña meshi quea huesha nee yasijje peaꞌai ecuea esohui huohuiquicue! —Jesosa poanaje. 
\p  
\v 9 Jamaya huohui canijo tii, onaaya ba neinei caqui tii, Eyacuiñajjiya Jesosa jjequisohua caꞌyonaje eyahuasijje. Bo dojjo huasijje dobiquiꞌyajo, oja epeejji cuaa oya ba pajea caꞌyonaje.  
\v 10 Jesosa baꞌesohuaquianijo, ojaya epeejjiya eyahuasijje ba neinei caquijo tii, Eyacuiñajjija esohuidojojji cuana becanejjijji peaꞌai jjanequipanaquinaje ona nijje. Ojaya daqui quea oshe nee nee poanaje.  
\v 11 Oya jama poanaje baꞌa: —Miquianaaya, Janinea meshijo baꞌe cuaa, ¡shajjaꞌajjacue mo! Miquianaaya Jesosa banaje baꞌesohuaquijeꞌyo eyahuasijje. Quiꞌajjaya oya poeje oꞌoya quijje, eꞌe jojo nei —esohuidojojji poanaje. 
\s1 Matia babaca canaje cuaa Jesosaja huoojeaꞌyo esohui huohuijji epojji Jodasa jjoco cuiñaꞌyojji epojji 
\p  
\v 12 Jjeyahua nei Jesosaja epeejji cuana acuijjajja yiyejo, Onimo jjajja yiyejo nequi Jenosanena huasijje poqui oꞌoyanaje; hueshaꞌama poanaje, beshahua nei beca mil metros.  
\v 13 Oya cuanaja ojaya equi yahuajo aninaje yasijje dobiqui oꞌoyanaje. Ejamacoo equecuayijji ai yasijje dobiqui oꞌoyanaje mahuiso baꞌa: Peno, Jacobo, Huani, Anesi, Penipe, Tomasi, Batanomee, Mateo, Simoni Senote, Apeoja bacua ejja Satiaco, oja chahua Jode bajjani peaꞌai; mahuisoya.  
\v 14 Oya cuana epona cuana nijje, Jesosaja enaese Mania peaꞌai, Jesosaja echahua mese cuana peaꞌai Eyacuiñajji nijje mimi majamajanaje, ojjaña. 
\p  
\v 15 Quijje pishana ojjaña jjachichaquinaje quea huiso nee; beshahua nei 120 huisome yaninaje. Majoya Peno nequisohuanaje emimijji.  
\v 16 Jama poanaje baꞌa: —Ecuea epeejji cuana, Eyacuiñajjija esohui yahuajo nei etehueꞌyo jayojja jama jjeyahua nei apoa poanaje. Edojjoshahua Pameya yahuajo Dabi huohui meesahua canaje Jodasajo, ma Jesosa iñameejji poanaje onajaya equecuaꞌyojji.  
\v 17 Yahuajo Jodasa ecuana nijje nequinaje. Jesosaa oya babaca canaje. Jamatii oya esohui huohuijji nisho poanaje.  
\v 18 Jodio etii cuaa aje oe Jodasa ejjeshejji quia canaje Jesosa iña meesahua sosejje. Ma Jesosa sosejje quia bejjo meshi jjeshejji acanaje cuaa. Quijje Jodasa acui aajo jjanaaninequiaqui majje tohuaanaje mishi yasijje; oquequinaje janobajjima nei. Jjajjono sejjaqui majje jjasapa cuiapojojeaquiñaquinaje. Jjamajjii cuiapojojeaquiñaquinaje. See ai cuayaquinananaje peaꞌai.  
\v 19 Ojjaña Jenosanenajo baꞌeja Jodasa eba poanaje jomajo manoꞌyonaje. Jamajjeya oya cuaa ma meshi bajjani canaje Asedama meshi ojaya esohuijo. Ese Ejja esohuijo Enaꞌ Cuayaquinaje Meshi bajjani acanaje cuaa.  
\v 20 Eꞌe, yahuajo nei Dabiya esohuicuayajjijo Salmojo jama tehueme aca poa baꞌa: “Ojaya equi cajiña caꞌyahua tii. ¡Aꞌa equi cuiña meeꞌyojji!” Jama yahuajo nei tehue ca poa ojo peaꞌai baꞌa: “Eyaya oya cajaa anaje. Jamajjeya peaa ecuea esohui cahuohui cahua” jamaya yahuajo nei tehue ca poa Jodasajo. 
\p  
\v 21 —Jamajjeya Jodasa chamajo pea dejja ejjababacaqui ecuana nijje esohui huohuijji. Ejjababacaqui joya Jesosaja esohui shajjaꞌajjajji epo nei, ma Jesosaa dejjaa ajjima acani ba epo nei, joya ese nijje Jesosaja epeejji poanaje.  
\v 22 Eꞌe, joya yahuajo Jesosa Huaniya enajo besa mee caqui ba epo ejjababacaqui; joya Jesosa nijje tii jjapeequinequinaje, eyahuasijje sohuaquijeꞌyo ba epo. Jamajjeya ma dejjaa ecuana nijjeya Jesosa shequiꞌyonaje cahuohui cahua —Peno poanaje. 
\p  
\v 23 Jamajjeya ojjaña cuaa becanejjijji peaꞌai dejja babaca caꞌyonaje. Matia, pea Jose Basaba, ojaya pea bajjani Josoto.  
\v 24-25 Babaca majje oya cuana Emeshi Mese nei nijje eyajo ani nijje miminaje jama baꞌa: —Emeshi Mese nei, miquea eba ojjañaja ejjashahuabaquijji cuana. ¡Ecuana ba meesahuacue ache edejja miquea ebabaca miquea ehuoojeaꞌyo epojji! Eꞌe, Jodasa miquea esohui pajeaꞌyo majje manoꞌyonaje; cuaqui yasijje poquiꞌyonaje. Jamajjeya Jodasa chamajo peaa miquea esohui cahuohui cahua —jamaya Eyacuiñajji nijje miminaje cuana. 
\p  
\v 26 Majoya oya cuana quebanei jayojja poanaje ache dejja esohui huohuijji nequije ebajji. Babaca canaje Matia esohui huohuijji poaje. Jamajjeya Matia pea 11 huisome nijje nequiꞌyonaje Jesosaja huoojeaꞌyo esohui huohuijji epojji. 
\c 2  
\s1 Edojjoshahua Pame Jesosaja epeejji cuana huasijje poeyanaje 
\p  
\v 1 Bobi chichajji shejo, Petecote pojjajo bobi chichajeyo majje Jodio cuana quea bihui nee ojee ijjiaꞌijjia aninaje. Ma pojjajo Jesosa shajjaꞌajjajji cuana, oja huoojeaꞌyo esohui huohuijji cuana peaꞌai, pea epeejji cuana nijje ojee jjachichaquinaje oe equijo.  
\v 2 Jjeyahua nei Edojjoshahua Pame beni quea quemo jjaqueyaquiani jayojja eyajo shajjaꞌajja canaje ojjañaa. Edojjoshahua Pame equi yasijje dobiquinaje.  
\v 3 Majoya cuaqui jiji sisi jayojja ojjañaja esapa biajje nequinaje. Oe cuaqui jiji sisi oe epeejjija esapa biajje jijinequinaje. Jamaya ojjaña poanaje.  
\v 4 Edojjoshahua Pame ojjaña cuana huasijje dobiquiꞌyonaje. Majoya jjeya nei oya cuana pea mimiꞌyome poanaje. Eꞌe, Edojjoshahua Pameya oya cuana pea mimime po meesahua caꞌyonaje. 
\p  
\v 5 Quea huiso Jodio cuaa ojjaña meshijo baꞌyani cuaa Jenosanenajo baꞌecaa Eyacuiñajjija esohui yahuajo nei jayojja bihuiameya acani.  
\v 6 Jamajjeya beni quea quemo eyajo poeyani jayojja shajjaꞌajja majje ojjaña cuajicuajijebenaje Jesosaja epeejji cuana huasijje. Jesosaja epeejji cuana pea mimiꞌyome mimiani shajjaꞌajja majje Jesosaja epeejji pojjeama quea mete nee jama poanaje baꞌa: —¿Yajjajje shai Jesosaja epeejji cuana pea mimiꞌyome poani soꞌo, de? ¿Yajjajje shai joya esejaya esohuijo mimiani, de? 
\p  
\v 7 Jamajjeya quea mete poanaje. Huohuiꞌajja canaje jama baꞌa: —Eꞌe, ojjaña jiquio dejja cuana Janinea meshijo baꞌe.  
\v 8 ¿Yajjajo shai jiquio pea esohuijo mimi cani soꞌo? ¿Ma ecua eseyaya eshoꞌyahuaa shajjaꞌajjanaje jayojjaya seya jjeya shajjaꞌajjaña cuana?  
\v 9 Eꞌe, jiquiojo yani dejja cuana quea huiso meshijo baꞌe: Dejja cuana Patia meshijo baꞌe, Madia meshijo baꞌe, Enami meshijo baꞌe, Mesopotamia meshijo baꞌe, Jodea meshijo baꞌe, Capanosia meshijo baꞌe, Ponito meshijo baꞌe, Asia meshijo baꞌe peaꞌai yani.  
\v 10 Pea cuana Pichia meshijo baꞌe, Panipinia meshijo baꞌe, Ejito meshijo baꞌe, Apica meshijo baꞌe, Sinene meshi ojje mijijje baꞌe peaꞌai yani. Eꞌe, Jodio dejja cuana, Jodioja epeejji cuana Shoma meshijo baꞌe cuana yani. Maaya Jodio pojjeama cuaa Jodioja ehuohuiꞌyo Eyacuiñajjijo shajjaꞌajja cani.  
\v 11 Beca cuana Queta meshijo baꞌe, Anamia meshijo baꞌe yani peaꞌai. Jamatii ojjaña eseyaya esejaya esohuijo Eyacuiñajjiya ma dejjaja ba jjima acanaje cuana quea pame nee shajjaꞌajjaña, ma Jesosaja epeejji cuaa huohui canijo —poanaje ojjaña. 
\p  
\v 12 Jamajjeya quea mete po majje pea cuana nijje mimimiminaje jama baꞌa: —¿Yajja shai poani? 
\p  
\v 13 Pea cuana ca ca Jesosaja epeejji cuanajo soa neineinaje. Jama poanaje baꞌa: —Chojja, de. Oya cuana jja ca quea huiso ishiꞌishinaje. Huooqui —poso acanaje cuaa. 
\s1 Penohua esohui huohui canaje 
\p  
\v 14 Majoya Penohua pea Jesosaja huoojeaꞌyo esohui huohuijji cuana nijje, 11 huisome nijje ojee nequisohua majje janobajjima nei sohuihuohui canaje jama baꞌa: —Dejja cuana Jodio meshijo baꞌeya, ojjañaa Jenosanenajo baꞌeya peaꞌai, ¡jjeyahua nei mo nequiaa shajjaꞌajjacue! Eya Jodio peaꞌai. Jamajjeya eyaya miya jjabahuejjaqui meejeꞌyo.  
\v 15 ¿Aꞌaya ecuana ehuoo poso aña? Jjeya mecajjeahua nei ishiꞌishi ajja cuana.  
\v 16 Chojja. Jamajjeya ¡shajjaꞌajjacue! Yahuajo nei nei Eyacuiñajjija esohui huohuijji Joeni bajjani jama poa baꞌa: 
\q1  
\v 17 “Eyacuiñajji jama poani baꞌa: Quijje jiquio meshi beshahua nei apoa poajo, eyaya Edojjoshahua Pame huoojeajeꞌyo ojjaña huasijje. Edojjoshahua Pameya eshoꞌi, epona shoꞌi cuana peaꞌai huohui meesahua caje ma eyaya quijje nei aje. Ohuaya dejja etii pishana cuana jjacahuibaqui mee caje. Edejja tii cuaa cahuiba majje huohui caje peaꞌai.  
\v 18 Eꞌe, eyaya Edojjoshahua Pame huoojeajeꞌyo ecuea echacojji cuana que, epona, dejja cuana que peaꞌai. Edojjoshahua Pameya ecuea esohui huohui meesahua caje pea cuana huasijje.  
\v 19 Quijje eyaya ma dejjaa ajjima acani aña eyajo ba majje dejja cuana quea mete poaje. Jiquio meshijo ma dejjaa ajjima acani eyaya aje peaꞌai ojjañaja ebajji eya quea caꞌa nee nee. Eꞌe, quea huoꞌo nee enaꞌ jayojja poaje eyajo, meshijo peaꞌai. Cuaqui quea quemo poaje. Huichacha quea quemo nee, quea moo nee nee poaje.  
\v 20 Eshequi quea apo nee poaje. Baꞌi quea huoꞌo nee enaꞌ jayojja poaje. Majoya Emeshi Mese nei poeje oꞌoya. Ma pojjajo ojjañaa ba caje Emeshi Mese nei quea caꞌa nee nee, quea pame nee nee poani. 
\q1  
\v 21 Jamajjeya ojjaña Emeshi Mese nei nijje camimiahua jama baꞌa: —Emeshi Mese nei, ¡eya jaahuanacue! ¡Ecuea mimishi cuijeaꞌyocue! —jamaya onijje mimiꞌyajo, ohuaya oya cuana jaahuana cajeꞌyo; baꞌe tiitii mee cajeꞌyo eyajo, cuaqui yasijje huoojeaꞌyo jjima acaje peaꞌai”. 
\m Jamaya yahuajo nei nei Joeniya tehue ca poa Eyacuiñajjija esohui —Peno poanaje. 
\p  
\v 22 Majoya Peno jama poanaje baꞌa: —Dejja cuana Isaeni meshijo baꞌe, ¡shajjaꞌajja neineicue mo! Jesosa ma Nasanenajo baꞌya poa miquiana nijje nequinaje. Eyacuiñajjiya Jesosaa ma dejjaa ajjima acani ameesahua canaje quea huiso nee nee. Jamaya miquianajaya eba —Penohua acanaje—.  
\v 23 Jamatii Jesosa iña majje miquianaaya oya ona huasijje quianaje. Eꞌe, miquianaaya Jesosa quiaꞌyonaje dejja mase yasijje, acui ecueataꞌapeejo emano meeꞌyojji. Jamatii yahuajo nei jamaya Eyacuiñajjija ejjashahuabaquiꞌyojji poa.  
\v 24 Jamajjeya Eyacuiñajjiya Jesosa shequi mee ca oꞌoyanaje. Eꞌe, Jesosa jjanijo ehuananobia jaa tiitii ajja poa; emanoꞌyo tii po meeꞌyo jjima acanaje.  
\v 25 Yahuajo emeshi mese Dabiya Jesosajo huohui ca poa jama baꞌa: 
\q1 “Ecuea Emeshi Mese nei enijje ani tiitiiꞌya poa. Ohuaya eya jaahuana tiitii canijo, eya meteꞌama poajeꞌyo.  
\v 26 Jamajjeya eyaya quea jaji neeya Eyacuiñajji bihuiaña. Eya jjanijo ehuananobia jaa shequije oꞌoya, yamiña. Ihuiꞌyo ajja poaje. Jamaya ecuea eba.  
\v 27 Miyaya eya jeanaꞌyo ajja pea emanoꞌyo cuana nijje. Jamajjeya eya meteꞌama. Eya miquea quea boti nee. Jamajjeya eya meshijo ihuiꞌyo ajja poajeꞌyo.  
\v 28 Miyaya eya baꞌe meeje oꞌoya quea pame nee. Minijje nequi tiitii meejeꞌyo. Quea bihui nee eya poani”. 
\m Jamaya yahuajo nei Dabiya huohui ca poa Jesosaja esohui —Peno poanaje. 
\p  
\v 29 Penohua huohui canaje jama peaꞌai baꞌa: —Epeejji cuana, eꞌe jojo nei esejaya etiiquiana Dabi yahuajo nei manoꞌya poa. Jjeya oya ehuananobia jaa jjanijo. Jamaya esejaya eba.  
\v 30 Dabi ca ca Eyacuiñajjija esohui huohuijji poa. Eyacuiñajjiya oya huohui ca poa jama baꞌa: “Eꞌe jojo nei miquea osecua quijje nei cuayaje eyaya Emeshi Mese nei po meejeꞌyo”. 
\p  
\v 31 Eꞌe, yahuajo nei Dabija eba poa quijje nei Jesosa, Eyacuiñajjija huoojeaꞌyo ojjaña jaahuanajji shequije oꞌoya. Jamajjeya Dabiya huohui ca poa jama baꞌa: “Miyaya oya jeanaꞌyo ajja pea emanoꞌyo cuana nijje. Oya meshijo ihuiꞌyo ajja poajeꞌyo” jamaya Dabi yahuajo nei poa. 
\p  
\v 32 Penohua ojjaña cuana huohui ca oꞌoyanaje: —Eꞌe jojo nei Eyacuiñajjiya Jesosa shequi mee caꞌyonaje; ecuanaaya Jesosa ba oꞌoyanaje, eshe, de.  
\v 33 Eyacuiñajjiya Jesosa nequi tiitii mee caꞌyonaje eyajo onijje, o ebianei mijijje ojjaña huoojeaꞌyojji. Eyacuiñajjija esohui yahuajo jayojja jama Edojjoshahua Pame Jesosa que dobiquiꞌyonaje. Jesosaa ma Edojjoshahua Pame jjeyahua nei huoojea canaje ecuana que dobiquiya. Jiquia aje jja oya nequiaa banaje. Ojaya epoeꞌyo miyaya shajjaꞌajjanaje peaꞌai.  
\v 34 ¡Bacue, Dabi ca ca oma sohuaqui jjima eyahuasijje yamiña! Ohuaya huohui ca poa jama baꞌa: 
\q1 “Eyacuiñajjiya ecuea Emeshi Mese nei huohui canaje jama baꞌa: ¡E pejjejo anioquecue, ebianei mijijje, enijje ojjaña huoojeaꞌyojji! 
\q1  
\v 35 ¡Jjeyahua nei ojjaña joya minijje jjapeequi ajja eyaya miya huoojea meejeꞌyo!” 
\m Jamaya Dabiya tehue ca poa Jesosajo yahuajo. 
\p  
\v 36 Penohua jama acanaje peaꞌai baꞌa: —Isaeni dejja cuana, ¡shajjaꞌajja neineicue! Miquianaaya ca ca oe Jesosa acui ecueataꞌapeejo baꞌehuanasohuajeanaje; mano meeꞌyonaje. Eyacuiñajjiya ca ca Jesosa ojjañaja Emeshi Mese nei po mee caꞌyonaje. Ohuaya Jesosa Quito ojjaña jaahuanaa huoojea caꞌyonaje peaꞌai —acanaje Penohua. 
\p  
\v 37 Ma shajjaꞌajja majje ojjaña jomajo nequica quea yeno nee nee poanaje. Jamajjeya Peno nijje, ojjaña Jesosaja huoojeaꞌyo esohui huohuijji cuana nijje jama poanaje baꞌa: —Epeejji cuana, ¿yajja acue poaje? Eseja iña meeꞌyo, eseja quecua meeꞌyo ca jja ca oe, de. 
\p  
\v 38 Penohua sajaꞌa canaje jama baꞌa: —¡Miquianajaya mimishi cuana pajeaꞌyocue! ¡Jesosa nijje jjapeequicue! Majoya Eyacuiñajjija esohui huohuijjiya miquianaya besa mee caje Jesosa Quitojo. Jamajjeya ojjañaa ba caje miquianaya Jesosaja epeejji poani. Eꞌe, Jesosa Quitohua miquianajaya mimishi cuana cuijea cajeꞌyo. Ohuaya miquiana que Edojjoshahua Pame huoojea cajeꞌyo peaꞌai.  
\v 39 Eꞌe, Eyacuiñajji Edojjoshahua Pame huoojea sa poani miquiana que, miquea ebacua cuana que peaꞌai, ojaya epeejji cuana ojjaña meshijo baꞌeca huasijje peaꞌai, ojjaña Eyacuiñajjija ebabaca huasijje peaꞌai —Penohua acanaje. 
\p  
\v 40 Penohua quea huiso pea esohui huohui canaje. Jama acanaje baꞌa: —¡Dejja quea mimishi jama aꞌa pojji! ¡Oya cuana nijje aꞌa jjapeequijji! Eyacuiñajjiya mimishi cuana quea nee nee po mee cajeꞌyo, quea nee tii tii. 
\p  
\v 41 Quea huiso cuana Penoja esohui shajjaꞌajja majje Jesosa nijje jjapeequinaje. Jamajjeya Penohua oya cuana besa mee canaje Eyacuiñajjijo enajo. Eꞌe, ma pojjajo tii quea huiso nee nee Jesosaja epeejji poꞌyonaje, 3.000 huisome.  
\v 42 Jamajjeya oya cuaa Jesosaja huoojeaꞌyo esohui huohuijji cuanaja esohui shajjaꞌajja canaje; jamaya acanaje peaꞌai. Ojee jjapeequinaje peaꞌai. Ojee Jesosaja bobi ijjia canaje peaꞌai. Eyacuiñajji nijje mimi majamajanaje, ojjaña. 
\s1 Jesosaja epeejji cuana jamaya baꞌe cooa poa 
\p  
\v 43 Edojjoshahua Pameya Jesosaja huoojeaꞌyo esohui huohuijji cuana ma dejjaa ajjima acani ameesahua canaje quea huiso. Jamajjeya ojjaña cuana jama poanaje baꞌa: —Eꞌe de, jiquio esohui huohuijji cuaa ma dejjaa ajjima acani quea huiso nee nee acanaje —poanaje cuana. 
\p  
\v 44 Jesosaja epeejji cuana ca ca huapa pojjeama cuana jayojja jama poanaje. Ojjaña dejja taiꞌama, nishehuiꞌama peaꞌai poanaje.  
\v 45 Eꞌe, ojaya cuanaja aquiana cuana chicha majje quia canaje Jesosaja epeejji jaahuanajji cuana huasijje. Majoya oya cuaa quia canaje ojjaña Jesosaja epeejji cuana huasijje. Joya aemaꞌ poani quea huiso quia canaje; joya aquianajji ca ca oe pojji quia canaje. Jamaya ojjaña huasijje quia ca poquinaje. Jamajjeya ojjañaja aquiana peaja huisoajjaya poanaje.  
\v 46 Ojjaña pojjajo ojjaña Jesosaja epeejji cuaa Eyacuiñajjija equi epeeyi yasijje jjachichaqui majje esohui huohui canaje. Jesosaja bobi ijjia canaje peaja equi cuana huasijje. Pea equi cuanajo anica ojee ijjiaꞌijjia ca ani ojjaña quea bihui nee nee jjapeequinaje.  
\v 47 Ojee Eyacuiñajji bihuia majamaja canaje ojjaña pojjajo. Pea cuana Jesosaja epeejji cuana nijje quea bei poanaje. Eyacuiñajjiya ojjaña pojjajo pea cuana Jesosa nijje jjapeequi meesahua caꞌyonaje. Jamajjeya Jesosaja epeejji cuana quea huiso nee nee poanaje. 
\c 3  
\s1 Jiojjijjajja jjajiojji jeapiihuiquiꞌyonaje 
\p  
\v 1 Majoya eshequi jjajeapaaquiajo Peno, Huani nijje poquinaje Eyacuiñajjija equi yasijje Eyacuiñajji nijje mimiya. Jamaya ojjaña pojjajo Jodio dejja cuana Eyacuiñajji nijje mimi aninaje eshequi jjajeapaaquiajo.  
\v 2 Oe dejja ejiojji cojjasahuajo aninaje meme aninaje, jiojjijjajja. Oya jamatii cuaya jiojjijjajja tii. Jamajjeya ojjaña pojjajo pea cuaa oya dojo canaje Eyacuiñajjija equi yasijje, Esecue jjani Bame Bame bajjani yasijje. Jomajo ohuaya emeꞌ huo ca aninaje bobijo, ejjeshejjijo peaꞌai. Oya jjashahuabaquinaje jama baꞌa: —Eꞌe pojjaꞌa dejja cuaa Esecue Bame yasijje poe majje eya aquiana quia caje sosemaꞌ. 
\p  
\v 3 Jamajjeya Peno, Huani nijje Eyacuiñajjija equi yasijje dobiquiajo, jiojjijjajjaa o que emeꞌ huo canaje.  
\v 4 Jamajjeya Penohua Huaniya peaꞌai jiojjijjajja ba canaje. Jama acanaje baꞌa: —¡Ecuana bacue! 
\p  
\v 5 Aquiana sosemaꞌ sa poanaje. Jamajjeya Peno bajeasohua canaje, jiojjijjajjaa.  
\v 6 Jamatii Peno jama poa baꞌa: —Ecuea epeejji, ecuea aquiana chamaꞌ. Ecuea ejjeshejji peaꞌai chamaꞌ. Eya Jesosaja epeejji; joya ecue ani aje mi quiaje jama baꞌa: Jesosa Quitohua ma Nasanenajo baꞌya poaa miya jeo meesahua cajeꞌyo. Jamajjeya ¡nequisohuacue! ¡Jeocue oe! —acanaje Penohua. 
\p  
\v 7 Penohua jiojjijjajja ebianei mejje iña majje nequisohua mee canaje. Jjeyahua nei ojaya ejiojji quea pame poanaje, quibojjisha quea pame poanaje peaꞌai.  
\v 8-9 Jamajjeya oya jjeyahua nei nequisohua majje jeonaje. Peno nijje, Huani nijje peaꞌai Eyacuiñajjija equi yasijje dobiquinaje, equecuayijji yasijje ma Sanomoja equi bajjani yasijje. Oya quea jaji nee jeonaje. Tohuaatohuaa poanaje. Eyacuiñajji bihuia canaje peaꞌai. Ojjañaa equijo nequiya oya ba canaje tohuaani, Eyacuiñajji bihuia poequi peaꞌai.  
\v 10 Jiojjijjajja yahuajo ojjañaja eba. Eyacuiñajjija equi pejjejo ani tiitiinaje, Esecue Bamejo. Aquianajo meme ania poa. Ojjaña quea bihui poanaje jiojjijjajja jeojeꞌyo ba majje: —Eꞌe de, oya jiojjijjajja jeonaje jjeya nei —poanaje. 
\s1 Penohua esohui huohui canaje Eyacuiñajjija equijo 
\p  
\v 11 Majoya ma jiojjijjajja poanaje Peno nijje, Huani peaꞌai nijje poꞌyonaje, bihuiabihuiaꞌyo nequinaje. Eyacuiñajjija equijo equecuayijji bajjani Sanomoja equijo quea huiso cuana jjachichaqui canaje o baa. Ojjaña quea bihui poanaje Penojo, Huanijo peaꞌai. Jama poanaje baꞌa: —¡Dee! Penohua, Huaniya peaꞌai oya jiojjijjajja jeo mee canaje. Quea caꞌa nee nee oya, de, Eyacuiñajjija ma dejjaa ajjima acani —poanaje ojjaña. 
\p  
\v 12 Ojjaña jjachichaquije ba majje, ojjañaja esohui shajjaꞌajja majje peaꞌai Penohua huohui canaje jama baꞌa: —Dejja cuana Isaeni meshijo baꞌe, ¡shajjaꞌajjacue mo! ¿Apiojji acuae ecuanaja esohuijo miquianaya quea ajjajja poani soꞌo? ¿Apiojji acuae jjashahuabaquiani jama baꞌa: “Peno, Huani peaꞌai Eyacuiñajjija epeejji quea caꞌa nee nee poani. Jamajjeya jiojjijjajja cuaya ohuaya jeo mee canaje” poani nequiana soꞌo, de? —poanaje Peno—.  
\v 13 Chojja, ecuaaya pojjeamaa jiojjijjajja jeo meenaje. ¡Bacue! Eyacuiñajjiya Amajama, Isaaca, Jacobo, eseja pea etiiquiana cuana peaꞌai jaahuana ca poa. Jjeyahua nei ma Eyacuiñajjiya ojaya Bacua Ejja Jesosa o pejjejo anioque mee caꞌyonaje ojjaña huoojeaꞌyojji. Miquianaaya ca mi ca Jesosa quianaje emeshi mese Pinatoja, equecua meeꞌyojji. Pinatohua Jesosa pichojea sa acajo, miquianaya quea quene taaanaje jama baꞌa: “Jesosa meꞌ cacacue! ¡Acui ecueataꞌapeejo baꞌehuanasohuajeacue!” anaje nequiaa.  
\v 14 Eyacuiñajjija Jesosa quea boti nee nee. Eꞌe, Jesosa quea pame nee nee, mimishiꞌama nei. Jamatii miquianaaya oya cajaa anaje jama baꞌa: “¡Aꞌa Jesosa pichojeajji!” taaajebenaje quianaaya: “¡Mashamaꞌ oe pichojeaꞌyocue!” anaje quianaaya. Mashamaꞌ aje oe ona quecuaꞌyojji epo, de.  
\v 15 Miquianaaya ca ca oe Jesosa mano meeꞌyonaje, ma ojjaña baꞌe tiitii meeꞌyojji epo. Eyacuiñajjiya ca ca Jesosa shequi mee ca oꞌoyanaje. Jamaya ecuanajaya eba. Eꞌe, Jesosa shequi oꞌoyanaje ecuaaya banaje.  
\v 16 Eꞌe, Jesosa quea caꞌa nee nee nequi. Ohuaya ca ca oe jiojjijjajja jeo mee canaje. Ecuana Jesosaja epeejji. Ojo jjashahuabaquiani jama baꞌa: “Eꞌe jojo nei Jesosaa jiojjijjajja jeo mee caje” jamaya Jesosajo eꞌe jojo nei jjashahuabaquianijo, ohuaya quea jaꞌa nee po mee canaje jiquio dejja. Maya miquianaaya jjeya nei baña —Peno poanaje. 
\p  
\v 17 —Epeejji cuana, ecuea eba miquianaaya, Jodio etii cuana nijjeya oya ba jjimajojo Jesosa quianaje onaja equecuaꞌyojji.  
\v 18 Yahuajo nei nei Eyacuiñajjiya ojaya esohui huohuijji cuana tehue mee ca poa Jesosa Quitojo jama baꞌa: “Quijje nei ecue huoojeaꞌyo ojjaña jaahuanajji quea nee nee po mee cajeꞌyo cuaa”. 
\p Ma etehueꞌyo yahuajo nei jayojja jama jjeya miquianaaya anaje —Penohua acanaje—.  
\v 19-20 ¡Jamajjeya Eyacuiñajjija esohui jayojja jama acue! ¡Miquianajaya mimishi pajeaꞌyocue! ¡Jesosa nijje jjapeequicue! Eꞌe, Eyacuiñajjiya ojaya esohui yahuajo nei jayojja jama huoojea caꞌyonaje ojjaña jaahuanajji Jesosa Quito ese jaahuanaa. Jamajjeya ohuaya esejaya mimishi cuana cuijea cajeꞌyo; ese nijje quea bei poajeꞌyo.  
\v 21 Jjeya Jesosa eyajo nequi oja Chii nijje. Jomajo oya aniꞌyo; ojjaña Eyacuiñajjija esohui jayojja jama apoa poajo oya Jesosa poeje oꞌoya. Eꞌe, Eyacuiñajjiya yahuajo nei nei ojaya esohui huohuijji cuana huohui mee ca poa jama baꞌa: “Quijje ojjaña Eyacuiñajjija esohui ma ohua yahuajo nei huohui ca poa apoa poajo, Eyacuiñajjija huoojeaꞌyo ojjaña jaahuanajji poeje oꞌoya ojjaña aquiana jiquio meshijo eyacua po meeꞌyohua”. 
\p  
\v 22 Eꞌe —Penohua acanaje—, Eyacuiñajjija esohui huohuijji Moisesi yahuajo jama poa baꞌa: 
\q1 “¡Bacue! Eyacuiñajjiya eya huoojea canaje ojaya esohui huohuiya. Quijje ohuaya pea esohui huohuijji e jayojja miquiana que huoojea caje, miquiana nijje meshijo baꞌe. ¡Ojjaña ojaya esohui jayojja jama acue!  
\v 23 Ojjaña joya ojaya esohui jayojja jama po ajja aje oe Eyacuiñajjiya cajaa acajeꞌyo; quea nee nee po mee cajeꞌyo”. 
\m Jamaya yahuajo nei Moisesiya tehue ca poa Eyacuiñajjija esohui —Penohua acanaje. 
\p  
\v 24 —Eꞌe, yahuajo nei nei Eyacuiñajjija esohui huohuijjiya Samoeni bajjaniya esohui quea pame nee huohui ca poa Jesosajo, Eyacuiñajjija huoojeaꞌyo ojjaña jaahuanajjijo. Majoya ojjaña Eyacuiñajjija esohui huohuijji cuana Samoenija esohui jayojja jama huohui ca poquiapoquia poa quea huiso neeya.  
\v 25 Eseya Eyacuiñajjija esohui huohuijji yahuajo nei baꞌe cuanaja osecua cuana, etiiquianaja osecua cuana poanijojo Eyacuiñajjija esohui yahuajo esejaya etiiquiana cuana nijje jayojja jama ohuaya eseya acaje jjeya nei peaꞌai. Eꞌe, yahuajo nei Eyacuiñajjiya Amajama huohui ca poa esejaya etiiquiana jama baꞌa: “Quijje nei miquea osecuajo ojjaña cuana ojjaña meshijo baꞌe quea bihui nee nee poaje”  
\v 26 Peno poanaje: —Eꞌe Eyacuiñajjiya oja Bacua Ejja oe nei Jesosa ese yasijje, Jodio cuana huasijje huoojea canaje ebionei, esejaya mimishi cuana pajea meesahuaa. Jamajjeya eseya quea jaꞌa nee po mee cajeꞌyo —Penohua acanaje Huani nijjeya. 
\c 4  
\s1 Peno, Huani peaꞌai iña canaje Jodio etii cuaa 
\p  
\v 1 Majoya Penohua, Huani nijjeya ojjaña cuana huasijje Jesosaja esohui huohui canijo, Eyacuiñajji nijje emimijji cuana, Eyacuiñajjija equi cuiñajji etii peaꞌai, Sanoseo cuana nijje poeyanaje.  
\v 2 Penoja esohui shajjaꞌajja majje jiquio Jodio etii cuana quea quene nee nee poanaje Penohua Jesosa shequi oꞌoyanaje huohuime acajje.  
\v 3 Jamajjeya Peno, Huani peaꞌai iña majje dojo canaje etecueajji. Siniajo mi tecuea canaje. Jeanobiajea canaje mecahuajje emimijji.  
\v 4 Jamatii quea huiso dejja cuana, ponaña peaꞌai Penoja esohui Jesosajo shajjaꞌajja majje Jesosa nijje jjapeequinaje, me oejje mil huisome, 5.000 huisome. 
\p  
\v 5 Mecajjeahua emeshi mese cuana, Jodio dejja etii cuana Moisesija tehueꞌyo huohuijji nijje ojee poanaje Jenosanenajo.  
\v 6 Eyacuiñajji nijje emimijji etii Anasi bajjani, oja huapa pojjeama cuana Caipa, Huani, Anejano peaꞌai ojee poanaje.  
\v 7 Jodio dejja etiiya Peno, Huani, jiojjijjajja peaꞌai iyaa canaje etecueajji. Poeyajo, Peno tecuea canaje jama baꞌa: —¿Anijje acuae nequiaa jiojjijjajja jjajiojji jeapiihuiqui meenaje soꞌo? 
\p  
\v 8 Edojjoshahua Pameya oya huohuisahua canijo, Penohua jama acanaje baꞌa: —Emeshi mese cuana, dejja etii cuana peaꞌai, eꞌe ecuaaya jiojjijjajja jeo meesahuanaje.  
\v 9 Jamajjeya miquianaaya ecuana huohuiꞌajjaña jama baꞌa: “¿Anijje acuae jiojjijjajja jeo meeꞌyonaje?”  
\v 10 Jamajjeya ¡ojjaña dejja cuana Isaeni meshijo baꞌeya, ¡shajjaꞌajjacue mo! Miquiaaya ca ca oe Jesosa Quito, ma Nasanenajo baꞌya poa acui ecueataꞌapeejo baꞌehuanasohuajeanaje; mano meeꞌyonaje. Jamatii Eyacuiñajjiya Jesosa Quito shequi mee ca oꞌoyanaje. Ohuaya, Jesosa Quitohua jiojjijjajja jeo mee canaje. ¡Bacue quea pame nee oya nequi! —Penohua acanaje—.  
\v 11 Eꞌe, yahuajo nei Eyacuiñajjija esohui huohuijji cuaa Jesosajo tehue ca poa jama baꞌa: 
\q1 “Oe equi yamajjana equi iyajji cajaa aca poa cuaa. Jamatii Eyacuiñajjiya ma eyamajjana equi yamajjana quea caꞌa nee aca poa. Jamajoya ojjaña ojaya epeejji cuaa Eyacuiñajji bihuia cani”. 
\m Jesosa Quito ma eyamajjana equi iyajji jayojja. Miquianaya Jesosa sa poꞌyo ajja poanaje. Jamatii jjeyahua nei oya Jesosa quea pame nee nee, quea caꞌa nee nee nequi.  
\v 12 Jesosa Quitohua ohuaye nei mimishi cuana cuijeaꞌyo majje baꞌe tiitii mee cajeꞌyo se. Eꞌe, Eyacuiñajjiya oya huoojea caꞌyonaje ese nahuejji, ese cuaqui yasijje epoquiꞌyo poaje jjejojo. Pea chamaꞌ ese jaahuanajji —acanaje Penohua. 
\p  
\v 13 Ma Jodio etii cuaa Penoja esohui, Huanija esohui peaꞌai shajjaꞌajja majje jama acanaje baꞌa: —¡De! Oya cuana bichoꞌama mimiani ecuana nijje. ¿Yajjajje shai? Yahuajo ebiojo baꞌeꞌya poa oya cuana. Esohui etehueꞌyo quea huiso ojaya ba jjima yahuajo poa. Jamatii quea jaꞌa nee esohui huohui cani. Eꞌe de, Jesosa nijje nequi tiitiinaje. Ohuaya pojjaꞌa quea huiso ba mee canaje —acanaje etii cuaa Penojo, Huanijo peaꞌai. 
\p  
\v 14 Jamajjeya Jodio etii cuaa Peno Jesosajo mimipajea meeꞌyo sa acani. Jamatii joya jiojjijjajja Peno nijje, Huani peaꞌai nijje nequi quea pame nee. Jamajojoya mi tecuea canaje.  
\v 15 Jamajjeya Peno, Huani, Jiojjijjajja peaꞌai esecue yasijje, equi quibo huasijje huoojeacuayajea canaje. O huoojeacuayajea majje mimimiminaje.  
\v 16 Jama poanaje baꞌa: —¿Ae acuae acajji soꞌo? Jesosaja esohui pajeaꞌyo ajja. Ojjaña Jenosanenajo baꞌeya ba canaje Penohua ma dejjaa ajjima acani acanaje; jiojjijjajja jeo mee canaje. Jamajjeya ecuaaya yajja siajje ame yajji Peno jama baꞌa: “Chojja Penoja, Huanija peaꞌai jiojjijjajja jeo meeꞌyo jjima” jama siajje pomeya jjapo meequi ajja, de.  
\v 17 Jamajjeya Peno, Huani peaꞌai ejjatecueaqui jama baꞌa: “¡Aꞌa huohuiꞌyojji Jesosajo!” jamaya ejjahuohuiqui: “¡Aꞌa ojjaña cuana Jesosa shequiꞌyonaje mimime pojji! ¡Aꞌa Jesosaa jiojjijjajja jeo mee canaje mimime pojji peaꞌai!” —poanaje Jodio etii cuana. 
\p  
\v 18 Majoya oya cuaa Peno, Huani iyaa ca oꞌoyanaje. Poe majje huohui canaje jama baꞌa: —¡Bacue! ¡Aꞌa jja oe Jesosajo mimi oꞌoyajji! Chojja. ¡Aꞌa Jesosaa eshe oꞌoyaa jiojjijjajja jeo mee canaje aꞌa huohui majajji! —huohuime acanaje Jodio etii cuaa. 
\p  
\v 19 Jamatii Penohua, Huaniya peaꞌai meteꞌama sajaꞌa canaje jama baꞌa: —¡Jjashahuabaquicue soꞌo! ¿Aꞌa ecuaaya miquianajaya esohui jayojja jama aje? Cho. Eyacuiñajjija esohui jayojja jama pojjeama. Miquianaaya ecuana Jesosaja esohui huohui mee jjima aña. Eyacuiñajjiya ca ca ecuana huoojea canaje Jesosajo huohuiya.  
\v 20 ¡Bacue! Ecuaaya Jesosa banaje eshe oꞌoya. Eyacuiñajjija esohui ecuaaya shajjaꞌajjanaje onijje. ¡Maya ecuaaya cahuohuiahua! 
\p  
\v 21 Jamatii Jodio etii cuaa Peno, Huani peaꞌai cuia sa acanaje. Jamatii cuia jjima poanaje quea meteya jjejojo. Ojjaña cuaa Eyacuiñajji bihuia canaje Jiojjijjajja jeo mee canajejo; Peno, Huani peaꞌai ojjañaja quea nahue ecuia meeꞌyojji poanaje. Jamajjeya mi cuia canaje. Tecuea canaje ca ca oe; majoya tecuea majje huoojea canaje Huani, Peno peaꞌai. 
\p  
\v 22 Eꞌe, Jiojjijjajja jeonaje etii nei, peaja ojiojji miji peaꞌai huiso shequiajame, 40 shequiajame poanaje. Eyacuiñajjiya Peno, Huani peaꞌai oya jeo meesahua caꞌyonaje. 
\s1 Ojjaña Eyacuiñajji nijje miminaje esohui meteꞌama ehuohui meesahuajji 
\p  
\v 23 Jamajjeya Jodio dejja etiiya oya huoojea cajje Peno, Huani nijje poquiꞌyonaje ojaya epeejji cuana que. Ma Jodio etii cuaa tecuea canaje, Eyacuiñajji nijje emimijji mese cuanajo peaꞌai huohui cañaquinaje.  
\v 24 Ma shajjaꞌajja majje ojjaña cuaa ojee Eyacuiñajji bihuia canaje. Onijje miminaje jama baꞌa: —Eyacuiñajji, ecuanaja Chii ai, miya quea pame nee nee. Miyaya ojjaña eyajo panaꞌya poa, meshi cuana panaꞌya poa, bae cuana panaꞌya poa peaꞌai. Ojjaña aquiana cuana eyajo, meshijo, enajo peaꞌai ojjaña mique panaꞌyo.  
\v 25 Yahuajo nei nei miyaya ecuanaja etiiquiana que, miquea epeejji emeshi mese Dabi que huoojeaꞌya poa Edojjoshahua Pame. Edojjoshahua Pameya Dabi huohui meesahua ca poa jama baꞌa: 
\q1 “Joya, ojjaña cuana quea shajjaquijjo, Eyacuiñajji nijje mimipanajajiani. Oya cuana quea tai jjashahuabaquiani Eyacuiñajji jeabichajeajji nisho.  
\v 26 Emeshi mese cuana dejja huoojeajji poani nijje jjachichaquiani; ojee nequianiya Eyacuiñajjija huoojeaꞌyo ojjaña jaahuanajji jeabichajeaꞌyojji nisho”. 
\p  
\v 27 —Eꞌe Eyacuiñajji, miyaya miquea Ebacua Ejja quea pame nee Jesosa huoojeanaje ojjaña jaahuanajji epojji. Jiquio cuiñajjijo baꞌeca cuana quea huiso quea mase Jesosa quecua sa poanaje. Jodioja emeshi mese quea mase Enode, Shomano emeshi mese Ponosio Pinato nijje jjachichaquinaje Jodio pojjeama cuana nijje, Isaeni dejja cuana nijje peaꞌai. Ojee jjashahuabaquinaje Jesosa quecuaꞌyojji.  
\v 28 Eꞌe Eyacuiñajji, miya yahuajo nei nei Jesosajo jjashahuabaquia poa jama baꞌa: “Eyaya Jesosa huoojeaje dejja cuana huasijje. Jamatii onaaya oya iña caje equecuaꞌyojji”. Miquea ejjashahuabaquiꞌyojji yahuajo jayojja jama jjeyahua nei dejja quea mase cuaa acanaje.  
\v 29 Eyacuiñajji, miya ecuanaja Emeshi Mese nei eyajo baꞌe. Miquea eba jjeyahua nei emeshi mese cuana quea mase ecuana nijje mimijajiani Jesosaja esohui ecuaaya ehuohui poaje jjejojo. Jamajjeya ecuana miquea epeejji poanijo, ¡esohui Jesosajo huohui meesahuacue meteꞌama!  
\v 30 ¡Mique Bacua Ejja Jesosa nijje jjapeequianiya pea cuana huaquia meesahuacue! ¡Ma dejjaa ajjima acani ameesahuacue, Eyacuiñajji! —jamaya miminaje Eyacuiñajji nijje ojjaña. 
\p  
\v 31 Eyacuiñajji nijje mimipajeaꞌyajo, Eyacuiñajjiya ma equi jeahuehuahuehua mee canaje. Edojjoshahua Pameya ojjaña huasijje dobiqui majje Eyacuiñajjija esohui huohui mee canaje meteꞌama. 
\s1 Jesosaja epeejji cuana huapa pojjeama jayojja baꞌya poa. 
\p  
\v 32 Jomajo ojjaña Jesosaja epeejji cuana ojee jjapeequinaje quea bei. Oya cuana aquiana nahueꞌama poanaje. Bobi nahueꞌama poanaje. Nishehuiꞌama, dejja taiꞌama ojjaña poanaje. Ojjaña Jesosaja epeejji cuana baꞌe meesahua canaje. Ojjaña aquiana cuana ojjañaja poanaje.  
\v 33 Jamajjeya Eyacuiñajjija huoojeaꞌyo esohui huohuijji cuaa janobajjima nei esohui huohui canequinaje meteꞌama. Jama huohuime acanaje baꞌa: —Esejaya Emeshi Mese nei Jesosa Quito shequi oꞌoyanaje eꞌe jojo nei —acanaje. 
\p Jamajjeya Eyacuiñajjiya oya cuana jaahuana neinei canaje; quea bei nee po mee canaje. 
\p  
\v 34-35 Eꞌe, jamajjeya Jesosaja epeejji cuaa meshi, equi cuana, aquiana pojjaꞌa quia majje, ejjeshejji jjeshe majje quia canaje Jesosaja epeejji jaahuanajji yasijje. Majoya ohuaya ma ejjeshejji quia canaje Jesosaja epeejji aemaꞌ cuana huasijje, aemaꞌ pishana huasijje peaꞌai. Jamajjeya oya huisoajjaya aquiana ojjañaja poanaje. 
\p  
\v 36 Majoya oe Nemita Jose bajjani ma yahuajo Chipe meshijo baꞌe poenequinaje, Jesosaja epeejji. Oya Benabe bajjani acaꞌyonaje, Ese Ejjaja esohuijo Ona Quea Bei pomeejji bajjani acaꞌyonaje Jesosaja huoojeaꞌyo esohui huohuijjiya.  
\v 37 Ma Benabeya que jjinipea quia canaje ejjeshejji sosejje. Majoya ohuaya ejjeshejji ye caꞌyonaje Jesosaja huoojeaꞌyo esohui huohuijji Jesosaja epeejji aemaꞌ cuana huasijje equiajji. Jamajjeya ojjaña quea bihui nee Benabe nijje poanaje. 
\c 5  
\s1 Anania oja huanase Sapina peaꞌai siajjepojji poanaje 
\p  
\v 1 Majoya Ananiaa ojaya ehuanase Sapina nijjeya que jjinipea quia caꞌyonaje ejjeshejji sosejje. Bejjo iñatepe majje equijo iyaquehua canaje. Quea bejjo jea poanaje.  
\v 2 Jamajjeya Ananiaa oe pojji bejjo quia caꞌyonaje Jesosaja huoojeaꞌyo esohui huohuijji yasijje. Oja huanaseja eba poanaje. Jamatii siajje poanaje jama baꞌa: —Maꞌaje bejjo, Peno, ojjaña tii que sosejje ecue jjeshe —anisho canaje Ananiaa; ona quea bihui pojji nisho siajje poanaje. 
\p  
\v 3 Edojjoshahua Pameya Peno huohui meesahua canaje jama baꞌa: —Anania, ¿apiojji acuae mi Edosiquiana jama siajje poani? ¿Apiojji acuae Edojjoshahua Pame siajje aña soꞌo? Miquea ojjaña ejjeshejji que jjinipea sosejje quiaꞌyo jjima; miquea equijo huanaquehuanaje.  
\v 4 ¡Bacue, Anania! Que jjinipea quia jjimahuajo miquea tii poanaje. Quiaꞌyo majje ejjeshejji miquea tii poanaje. Jamajjeya ¿apiojji acuae mi siajje poani ojjaña bejjo miquea que sosejje quiaꞌyaña nisho poani? Miyaya ecuanaya pojjeama dasiaña; miyaya Eyacuiñajji dasia sa aña, de —poanaje Peno. 
\p  
\v 5 Penoja esohui shajjaꞌajja majje Anania bichaquinananaje; poquijeyonananaje. Chamaꞌyo tii poanaje. Anania manoꞌyonaje ba majje ojjaña quea mete nee nee poanaje.  
\v 6 Majoya dejja etii pishana cuaa Anania daqui oshejo bebo majje dojo canaje mojeaa. 
\p  
\v 7 Quijje pishana eshequi jaasohua pishanajo, Ananiaja ehuanase Sapina poeyanaje Peno que. Oja ba jjima ojahue manoꞌya poa.  
\v 8 Penohua oya huohuiꞌajja canaje jama baꞌa: —Sapina, ¿ache sose huiso que jjinipea quinaje miquiaaya? 
\p Oya epona siajje poanaje peaꞌai: —Eꞌe Peno, ma sose huiso tii quianaje ecuaaya —poanaje epona. 
\p  
\v 9 Majoya Penohua epona tecuea canaje: —¿Apiojji miya miqueahue jayojja jama siajje poani? ¿Apiojji miyaya Edojjoshahua Pame dasia sa aña peaꞌai? ¡Bacue! Miqueahue mojeajji epo poeꞌyonaje. Ohuaya miya mojea peaꞌai cajeꞌyo —acanaje Penohua. 
\p  
\v 10 Siajjepojji jjejojo jjeyahua nei epona mano bichajeaquinananaje Peno pejjejo tii. Jamajjeya dejja etii pishanaa ma Anania mojeaꞌyojji epohua Peno que poe oꞌoya majje epona emanoꞌyojaa ba cañaquinaje. Epona dojo canaje mojeaa, ojahue pejjejo. 
\p  
\v 11 Ma ba majje ojjaña Jesosaja epeejji cuana quea mete nee poanaje Eyacuiñajji dasiajji nisho. Ojjaña pea cuana ma shajjaꞌajja majje quea mete nee nee poanaje peaꞌai. 
\s1 Jesosaja huoojeaꞌyo cuaa acanaje quea huiso ma dejjaa ajjima acani 
\p  
\v 12 Majoya Eyacuiñajjiya Jesosaja huoojeaꞌyo esohui huohuijji cuana ma dejjaa ajjima acani ameesahua canaje quea huiso nee ojjaña cuanajo. Ojjaña Jesosaja epeejji cuana jjachichaqui nequinaje Eyacuiñajjija equi yasijje, equi equecuayijji Sanomoja equi bajjani yasijje Eyacuiñajji bihuiaa.  
\v 13 Pea cuana Jesosaja epeejji cuana nijje quea bei nee poanaje jama baꞌa: —Jesosaja epeejji cuana quea pame nee —poanaje. Onijje mimijaji ajja nei poanaje, quea mete. 
\p Jesosaja epeejji cuana nijje jjachichaqui jjima poanaje Jesosaja epeejji pojjeama.  
\v 14 Ojjaña pojjajo quea huiso nee Jesosa nijje jjapeequinaje dejja cuana, epona peaꞌai.  
\v 15 Jesosaja huoojeaꞌyo esohui huohuijji cuaa ma dejjaa ajjima acani acanaje: emanojaaca cuana huaquia meesahua caꞌyonaje, jjajeaqui meesahua caꞌyonaje. Jamajjeya ojjaña emanojaa cuana ejiojji cojja sahuajje dojo canaje cuaa, equipajaajjijo jaa. Ejiojji sahuajo huana yiyoyiyo canaje. Jama poanaje baꞌa: —Peno ejiojjijje poquijeya oja yajjanaa emanojaa cuana biajje yejje cananaje pojjaꞌa, jjaajaquijeꞌyo pojjaꞌa —poanaje cuana. 
\p  
\v 16 Quea huiso dejja cuana cuiñajji sisi cuanajo baꞌe, Jenosanena chipi neejo baꞌe poeyanaje Jenosanena huasijje. Emanojaa cuana ye canaje quea huiso nee nee; niñepoqui cuana eshahuajo niñepoquiani cuana ye canaje peaꞌai. Ojjaña cuana huaquiaꞌyonaje, jjaajaquiꞌyonaje, niñepoqui pajeaꞌyonaje peaꞌai. Jesosaja epeejji cuaa jjaaja meesahuaqui caꞌyonaje. 
\s1 Jesosaja epeejji jeanobia canaje cuaa Jesosaja esohui huohuijjijojo 
\p  
\v 17 Majoya Eyacuiñajji nijje emimijji etii, Jodio dejja etii cuana, Sanoseo cuana peaꞌai quea quene poanaje Jesosaja huoojeaꞌyo esohui huohuijji cuana nijje. Mimimiminaje jama baꞌa: —¡Dee! “¡Aꞌa Jesosajo huohui majajji!” aje oma aꞌajjanaje yahuajo. Jamatii esohui huohuipajea ajja. Ecuana shajjaꞌajja jjima acani. Ojjaña cuana Jesosa nijje jjapeequi mee cani, ecuanaja esohui pajea mee cani —poanaje Jodio etii cuana. 
\p  
\v 18 Jamajjeya Jodio etii cuaa Jesosaja huoojeaꞌyo esohui huohuijji cuana iña canaje. Dojo canaje ejjajeanobiaquijji equi yasijje, dejja mimishi cuana nijje peaꞌaiya.  
\v 19 Jamatii mecashono Eyacuiñajjija esohuidojojji poeyanaje ejjajeanobiaquijji equi yasijje. Esecue jjani caꞌapejo cañanaje. Jesosaja huoojeaꞌyo esohui huohuijji cuana dojocuayaqui caꞌyonaje esecue yasijje. Huohui canaje jama baꞌa:  
\v 20 —¡Poqui oꞌoyacue Eyacuiñajjija equi yasijje! ¡Ojjaña cuana huohuiquicue Jesosaja esohui onijje ebaꞌe quea pame neejo, ma Jesosaa huohui canaje shequi oꞌoya majje! —poanaje esohuidojojji. 
\p  
\v 21 Jamajjeya mecajjeahua oya cuana poqui oꞌoyanaje Eyacuiñajjija equi yasijje. Jesosaja esohui huohui ca oꞌoyanaje ojjañaja eshajjaꞌajjajji. 
\p Ohua esohui huohui canijo tii, Eyacuiñajji nijje emimijji etii cuana, ojjaña Jodio etii cuana peaꞌai jjachichaquinaje pea equijo. Jjachichaqui majje sohuinano cuana huoojea canaje equi ejjajeanobiaquijji yasijje Jesosaja huoojeaꞌyo esohui huohuijji jjequiya nisho.  
\v 22 Jamatii sohuinano cuana equi ejjajeanobiaquijji yasijje poqui majje ba cañaquinaje Jesosaja huoojeaꞌyo esohui huohuijji chamaꞌ. Baꞌajja cañaquinaje; saꞌajja cañaquinaje. Chamaꞌ equi ejjajeanobiaquijjijo. Jamajjeya esohuinano mese cuana poqui oꞌoyanaje Jodio etii cuana huohuiꞌyohua.  
\v 23 Jama poanaje baꞌa: —Esecue jaahuanajji poani nequinaje esecue jjani pejjejo. Esecue jjani ecaꞌa tii nequinaje. Jamatii esecue jjani caꞌapejoꞌyo majje chamaꞌ ba canaje Jesosaja epeejji cuana. 
\p  
\v 24 Eyacuiñajjija equi jaahuanajji, Eyacuiñajji nijje emimijji mese cuana peaꞌai ma esohui shajjaꞌajja majje quea mete poanaje: —¿Yajja po majje shai cuayaquiꞌyonaje, de? ¿Achacua shai poquiꞌyonaje ma dejja cuana? —poanaje. 
\p  
\v 25 Majoya pea dejja poeyanaje. Jama huohuime acanaje baꞌa: —Dejja cuana ma miquianaja jeanobiaꞌajja poanaje jjeya nei Eyacuiñajjija equijo nequi oꞌoya, Jesosaja esohui huohui oꞌoya ca ca poequi ojjaña cuanaja eshajjaꞌajjajji. 
\p  
\v 26 Jamajjeya sohuinano huoojeajji poani echacosahuajji nijje poquinaje Jesosaja esohui huohuijji cuana jjequi oꞌoyaa. Jamajjeya quea huiso cuanaja Jesosaja esohui huohuijji cuana quea jea nee poanaje, quea nahue nee poanaje etecueajji. Tecuea jjima nei jjequime acanaje. Eꞌe, dejja mase quea mete jama poanaje baꞌa: —E sapa jajahuejjajea ca meiya —poanaje. 
\p  
\v 27 Jamajjeya jjequi majje nequi mee canaje Jodio etii cuana ani cojja nei. Majoya Jodio etii cuaa jama tecueame acanaje baꞌa:  
\v 28 —Peno, “¡aꞌa Jesosajo huohui majajji!” aje mi yahuajo aꞌajjanaje. Jamajjeya ¿apiojji acuae Jesosajo huohuipajeaꞌyo jjima aña ojjaña dejja cuana huasijje, ojjaña Jenosanenajo baꞌe yasijje soꞌo? Miquianaaya ca ca oe ecuanaya niñebaña jama baꞌa: “Jodio etii cuana ca ca oe Jesosa quecuaꞌyojji epo, quea mimishi jjejojo”. ¿Apiojji acuaeya jama sohuihuohuime aña tii soꞌo? —poanaje Jodio etii cuana. 
\p  
\v 29 Jesosaja huoojeaꞌyo esohui huohuijji cuaa, Penohua peaꞌai jama sajaꞌame acanaje baꞌa: —Ecuaaya Eyacuiñajjija esohui jayojja nei nei ajeꞌyo, miquianaja sohui jama pojjeama.  
\v 30 Eꞌe, yahuajo esejaya etiiquiana cuana Eyacuiñajji nijje jjapeequiꞌyonaje. Miquianaaya ca ca oe Jesosa acui ecueataꞌapeejo baꞌehuanasohuajea meenaje emanoꞌyojji. Jamatii Eyacuiñajjiya oya shequi mee ca oꞌoyanaje.  
\v 31 Eꞌe, Eyacuiñajjiya Jesosa ojjaña jaahuanajji, mimishi cuijeaꞌyojji peaꞌai po mee caꞌyonaje. Ojaya ebianei mijijje nequi mee caꞌyonaje eyajo ojjaña huoojeaꞌyojji epojji. Jamajjeya Jesosaa Jodio cuanaja mimishi cuana cuijea caꞌyani. Mimishi cuana pajea meesahua caꞌyani peaꞌai onijje jjapeequianijo.  
\v 32 Jamaya ecuanajaya eba. Edojjoshahua Pameja eba peaꞌai. Eyacuiñajjiya Edojjoshahua Pame huoojea cani ojaya epeejji cuana que dobiquiya, ojaya ehuohuiꞌyo jayojja jama acanijo —Penohua acanaje. 
\p  
\v 33 Penoja esohui shajjaꞌajja majje Jodio etii cuana quea quene nee nee poanaje. Ojjaña Jesosaja huoojeaꞌyo esohui huohuijji quecua sa acanaje.  
\v 34 Jamatii oe dejja ona nijje nequi Jjamani bajjani nequisohuanaje emimijji. Oya Paniseo dejja peaꞌai, Moisesija etehueꞌyo huohuijji, dejja etii quea pame. Jamajjeya ojjañaa oya shajjaꞌajja canaje. Jamajjeya Jjamani jama poanaje baꞌa: —¡Jiquio dejja, Jesosaja esohui huohuijji dojocuayaquicue esecue yasijje! —poanaje. Ojaya esohui shajjaꞌajja mee sa po ajja. 
\p  
\v 35 Majoya cuayaquinaje. Jjamaniya sohuihuohui canaje jama baꞌa: —Isaeni dejja etii cuana, ma dejja cuana quecua jjimahuaa, ¡ecue sohui shajjaꞌajja neineicue!  
\v 36 ¡Niñebaꞌyocue! Yahuajo pishana oe dejja Teodasi bajjani emeshi mese jayojja quea caꞌa poꞌajjanaje. Huohui canaje jama baꞌa: “Eya quea pame nee, quea caꞌa nee nee. Quea huiso nee nee ecuea eba. ¡Eya shajjaꞌajjacue!” 
\p Jamajjeya quea huiso nee nee, beshahua nei 400 huisome dejja cuana onijje jjapeequiꞌyonaje. Jamatii peaa Todasi quecua caꞌyonaje. Todasi quecua caꞌyajo, ojaya epeejji cuana ojaya esohui pajea caꞌyonaje.  
\v 37 Quijje pishana pea shequiajajo, emeshi meseya ojjaña cuana bajjani cuana tehue mee canaje esicojji. Ma shequiajajo pea dejja Jodasa bajjani emeshi mese jayojja poꞌajjanaje. Jodasaja esohui shajjaꞌajja canaje quea huiso dejja cuaa. Jodasa nijjeya emeshi mese jeabichajeaꞌyo sa acanaje. Jamatii Jodasa quecua caꞌyajo, ojaya epeejji cuaa oja sohui pajea caꞌyonaje. Poquiꞌyonaje.  
\v 38 Jamajjeya ¡aꞌa Jesosaja epeejji cuana napajji! ¡Aꞌa iña majajji! Eyacuiñajjiya oya cuana huohui meesahua ajjajo, quijje ojjañaa Jesosaja esohui pajea cajeꞌyo peaꞌai.  
\v 39 Eyacuiñajjiya ca ca oya cuana huohui meesahua cani pojjaꞌa. Jamajjeya ohuaya esohui mi huohuipajea cani. Eꞌe, eseyaya Eyacuiñajji niñeba chanaꞌ pojjaꞌa. Jama a sa poꞌyo ajja eseya —acanaje Jjamaniya. 
\p  
\v 40 Ojjaña Jodio etii cuaa oja sohui shajjaꞌajja canaje. Jamaya acanaje. Jamajjeya Jesosaja huoojeaꞌyo esohui huohuijji cuana iyaa canaje. Cuiasejjajea canaje acui sisiya. Tecuea ca oꞌoyanaje jama baꞌa: —¡Aꞌa jja oe Jesosajo huohui majajji! —jamaya amajje oya cuana huoojeacuayajea caꞌyonaje. 
\p  
\v 41 Jamajjeya Jodio etii cuana jeanaꞌyo majje Jesosaja huoojeaꞌyo esohui huohuijji cuana poquinaje. Eyacuiñajji bihuia canaje jama baꞌa: —Eꞌe Eyacuiñajji, ecuana Jesosa nijje jjapeequianijo, Jodio etii cuaa Jesosa aca poa jayojja ecuana acani peaꞌai. Jamaya capoahua —miminaje ojjaña. 
\p  
\v 42 Jamajjeya ojjaña pojjajo Eyacuiñajjija equijo, pea equi cuanajo peaꞌai oya cuana huohuihuohui pajeaꞌyo ajja poanaje esohui quea pame nee Jesosajo. Jama huohuime acaninaje baꞌa: —Jesosa Quito Eyacuiñajjija huoojeaꞌyo ojjaña jaahuanajji eꞌe jojo nei. 
\c 6  
\s1 Me oejje beca, 7 dejja babaca ca poa Jesosaja epeejji aemaꞌ jaahuanajji 
\p  
\v 1 Jamajjeya Jesosaja epeejji cuana quea huiso nee nee poanaje. Majoya pea cuana nijje quea bei pojjeama poanaje. Jomajo ani Jodio cuana Jieno meshijo baꞌyahua mimijajinaje pea Jodio cuana nijje, Emeoja esohuijo mimiani cuana nijje. Jama poanaje baꞌa: —Ojjaña pojjajo bobi quiañajo miquianaaya quiaña quea huiso aquiana miquea eꞌahuemano cuana. Ecuanaja eꞌahuemano huasijje ca ca oe pojji quiaña, de —poanaje Jodio cuana ma Jieno meshijo baꞌyahua. 
\p  
\v 2 Jamajjeya ma shajjaꞌajja majje Jesosaja huoojeaꞌyo esohui huohuijji cuaa ma ome miji beca, 12 huisomeya ojjaña Jesosaja epeejji cuana iyaa canaje. Quea huiso ojee poeyajo, huohui canaje jama baꞌa: —Epeejji cuana, ¡bacue! Ecuaaya Eyacuiñajjija esohui cahuohuiyahua. Ojjaña pojjajo bobi equiajji pojjeama ona huasijje.  
\v 3 Jamajjeya ¡miquianaaya me oejje beca, 7 dejja quea pame cuana babacacue bobi quiajji! Eꞌe, ¡joya Edojjoshahua Pame shajjaꞌajja cani, quea jjashahuabaqui jaꞌa nee nee poani babacacue! Majoya ecuanaaya ma dejja cuana huoojeaje bobi quiajji, pea aquiana cuana peaꞌai quiajji ojjaña huasijje, eꞌahuemano cuana huasijje peaꞌai.  
\v 4 Jamajjeya ecuanaya Eyacuiñajji nijje mimi majamajaje, ojaya esohui huohui tiitiije peaꞌai. 
\p  
\v 5 Jiquio ehuohuiꞌyo jayojja jama a sa poanaje ojjaña Jesosaja epeejji cuana. Jamajjeya Estema babaca canaje Jesosaja epeejji eꞌahuemano jaahuanajji. Ohuaya, Estemaa Edojjoshahua Pame shajjaꞌajja neinei canaje. Eyacuiñajjija esohui jayojja jama atiitii canaje peaꞌai. Majoya pea dejja cuana babaca canaje peaꞌai: Penipe, Pocono, Nicaino, Timono, Pamenase, Niconasi peaꞌai. Oya Niconasi Jodio pojjeama; oya yahuajo Atioquia cuiñajjijo baꞌya poa. Jodio cuanaja ehuohuiꞌyo jayojja Eyacuiñajji bihuia ca poa, jjeya ca ca Jesosa nijje jjapeequiani.  
\v 6 Majoya jiquio 7 epeejji cuana babaca majje Jesosaja huoojeaꞌyo esohui huohuijji cuana huasijje jjequi canaje cuaa. Poeyajo ma dejja cuana sapa biajje Jesosaja huoojeaꞌyo esohui huohuijji cuaa emeꞌ huana canaje. Eyacuiñajji nijje miminaje onajo, o chaco meesahuajji. Jamajjeya ojjañaja eba poanaje ma dejja cuana eꞌahuemano cuana huasijje aquiana quiajji epojji. 
\p  
\v 7 Majoya Jenosnenajo quea huiso nee neeya Eyacuiñajjija esohui shajjaꞌajja canaje. Quea huiso nee nee Jesosa nijje jjepeequinaje. Eꞌe, Jodio etii cuana, Eyacuiñajji nijje emimijji cuana peaꞌai Jesosaja epeejji poanaje, ojaya esohui jayojja jama acanaje. 
\s1 Estema iña majje tecuea canaje Jodio etii cuaa 
\p  
\v 8 Estema Eyacuiñajjija quea jea nee neejo oya quea caꞌa nee po mee canaje; quea huiso ma dejjaa ajjima acani ameesahua canaje ojjaña cuanajo. Jamaya ojjaña ba mee canaje oya Jesosaja epeejji nei.  
\v 9 Jamatii pea Jodio cuana Sinene cuiñajjijo baꞌe, Anejania cuiñajjijo baꞌe, Sinisia meshijo baꞌe, pea cuana Asia meshijo baꞌe peaꞌaiya Estema emimicuiajeanobiajeajji nisho acanaje. Eꞌe, Jodio cuaa equi bajjani Echacojji epichojeaꞌyoja equi ojee eꞌanijjijo jjachichaquiani cuaa Estema emimicuiajeanobiajeajji nisho acanaje.  
\v 10 Edojjoshahua Pameya ca ca Estema quea jjashahuabaqui jaꞌa nee po mee canaje; oya mimi meesahua canaje peaꞌai. Jamajjeya ma Jodio cuana Estema nijje jjamimicuiajeanobiajea pajeaquinaje, yajja sajaꞌame yajji.  
\v 11 Oya cuana Estema nijje quea quene nee poanaje. Jamajjeya quecuaꞌyo sa acanaje. Siajjepojji cuana bejjo quia canaje Estema siajje ajji. Jama siajje ame aje acanaje baꞌa: —Ecuaaya Estema shajjaꞌajjanaje. Ohuaya ca jja ca oe Eyacuiñajji niñeba cani quea tai. Esejaya etiiquiana Moisesi niñeba cani peaꞌai —poanaje ma siajjepojji cuana, bejjo sosejje. 
\p  
\v 12 Jamajjeya ma shajjaꞌajja majje ojjaña Jodio cuana Estema nijje quea quene nee nee poanaje. Eꞌe, Jodio etii cuana, Moisesija etehueꞌyo huohuijji cuana peaꞌai quea quene nee poanaje Estema nijje. Jamajjeya Estema que cuajicuajijebenaje; iña canaje. Dojo canaje Jodio etii cuana ojee ani yasijje. O cojja nei nequi mee canaje.  
\v 13 Majoya pea siajjepojji cuana jjequi canaje Estemajo siajje ajji. Jama siajje pome poanaje baꞌa: —Estemaya ca ca Moisesija etehueꞌyojo quea tai mimiani, Eyacuiñajjija equijo peaꞌai.  
\v 14 Eꞌe, ecuaaya oya shajjaꞌajjanaje; jama poanaje Estema baꞌa: “Jesosaa ma Nasanenajo baꞌyahuaa jiquio equi, Eyacuiñajjija equi jeabichajea cajeꞌyo. Jesosaa eseya Moisesija etehueꞌyo pajea mee cajeꞌyo ojaya ehuohuiꞌyo jayojja jama ebaꞌejji” —jama siajje pomeya poanaje Estemajo. 
\p  
\v 15 Majoya ojjaña Jodio etii cuaa jomajo aniya Estema ba neinei canaje. Ba canaje ojaya ecojja esohuidojojji jayojja cojjame, quea cojja bei nee nee, quea cojja jaꞌa nee nee. 
\c 7  
\s1 Estemaa sohuihuohui canaje Jodio etii cuanaja eshajjaꞌajjajji nisho 
\p  
\v 1 Majoya Eyacuiñajji nijje emimijji etiiya Estema huohuiꞌajja canaje jama baꞌa: —¿Aꞌa jiquio esohui eꞌe nei? ¿Aꞌa cuae miyaya jamaya aña? 
\p  
\v 2 Estemaa sajaꞌa canaje jama baꞌa: —Ecuea epeejji cuana, dejja etii cuana peaꞌai, ¡shajjaꞌajjacue mo! Yahuajo nei nei Eyacuiñajji quea pame nee esejaya etiiquiana Amajama que jjanequipanaquia poa. Jamaya poa Amajama Mesopotamia meshijo baꞌyahua, Janani meshi yasijje poe jjimahuajo.  
\v 3 Eyacuiñajjiya Amajama huohui ca poa jama baꞌa: “¡Mesopotamia meshijo aꞌa baꞌe majajji! ¡Jiñaꞌyocue oe! ¡Pea meshi yasijje poquicue! ¡Miquea huapa pojjeama cuana jiñaꞌyocue! Eyaya miya pea meshi ba meeje. Jomajo miya baꞌe meejeꞌyo” aca poa Eyacuiñajjiya. 
\p  
\v 4 —Jamajjeya Amajamaa Canea meshijo baꞌe poquia poa Janani meshi yasijje. Jomajo nequia poa. Oja chii manoꞌya poa. Oja chii manoꞌyajo, Eyacuiñajjiya Amajama huoojea caꞌya poa jiquio meshi yasijje, ma ese jjeyahua nei baꞌyani yasijje.  
\v 5 Jamatii Eyacuiñajjiya oya jiquio meshi quia jjima poa ojaya epojji. Que biso nei ojaya nahue mee jjima poa. Eyacuiñajjiya oya huohui ca poa jama baꞌa: “Amajama, jiquio meshi miquea poajeꞌyo quijje; mique osecua cuanaja quijje nei poajeꞌyo peaꞌai” oya aca poa Eyacuiñajjiya, jamatii Amajama edejja tii nojinoji poa, bacuamaꞌ tii poa. 
\p  
\v 6 —Eꞌe, Eyacuiñajjiya Amajama huohui ca poa jama baꞌa: “Eꞌe jojo nei miquea osecua cuana jiquio meshijo baꞌejeꞌyo quijje nei. Jamatii jjeya jiquio meshi onajaya. Jamajjeya miquea osecua cuana jiquio meshijo nequi poqui caje quea huesha nee pea meshi yasijje. Joma meshijo baꞌe dejja cuaa miquea osecua cuana quea huiso napa caje. Chaco tiitii mee cajeꞌyo sosemaꞌ quea huiso nee nee shequiajame, 400 shequiajame.  
\v 7 Quea mase poaje miquea osecua cuana nijje. Majoya eyaya ma dejja quea mase cuana tecueajeꞌyo, quea nee nee po meejeꞌyo peaꞌai. Jamajjeya miquea osecua cuana ma meshijo baꞌe poqui mee cajeꞌyo jiquio meshi yasijje epoe oꞌoyajji. Jiquio meshijo tii eya bihuia caje oꞌoya cuaa. Ecue sohui jayojja jama baꞌe caje cuana peaꞌai”. Jamaya yahuajo nei nei Eyacuiñajjiya Amajama aca poa. 
\p  
\v 8 —Majoya Eyacuiñajjiya pea esohui huohui ca poa ojjaña ba meejji oya eꞌe jojo nei Amajama nijje miminaje. Jama poa baꞌa: “Amajama, jehuisejjajeacue cuiishasha biso nei miquea, mique bacua cuanaja, ojjañaja. Jamajjeya ojjaña cuaa ba caje eya eꞌe jojo nei minijje miminaje, miya, mique osecua quea huiso nee nee cuana jiquio meshi quiaña miquea epoꞌyojji tii tii” aca poa. 
\p —Jamajjeya Amajamaa Eyacuiñajji shajjaꞌajja ca poa. Quijje oja bacua Isaaca cuaya poa. Ebacua jjeya cuaya me oejje pea beca peejjima cahuime poajo, Amajamaa oya cuiishasha biso nei jehuisejjajea ca poa. Majoya tii majje Isaacaja bacua Jacobo cuaya poa. Isaacaa oya cuiishasha biso nei jehuisejjajea ca poa. Quijje tii majje Jacoboja bacua cuana cuaya poa quea huiso nee; 12 huisome dejja poa, epona oe nei poa. Jacobohua oya jayojjaya aca poa, ejeajjiya aca poa jayojjaya. Jacoboja bacua ejja cuana tiinaje ojjaña Isaeni cuanaja etiiquiana, esejaya, de.  
\v 9 Ma edoe mese cuana aje echahua mesejo quea quene nee poa, Josejo. Quia caꞌya poa dejja cuana Ejito meshijo baꞌe yasijje ejjeshejji sosejje. Echacojji sosemaꞌ Jose poa. Jamatii Eyacuiñajjiya Jose pajeaꞌyo jjima poa; jaahuana ca poa.  
\v 10 Eꞌe, jamatii pea cuaa oya quea mimishi acanaje, Eyacuiñajjiya Jose jaahuana ca poa. Ejito emeshi mese Panaohua Jose quea jea nee aca poa. Jamajjeya Panaohua Jose ojjaña huoojeaꞌyojji po mee ca poa Ejito meshijo. Panaoja equi jaahuanajji po mee ca poa Jose.  
\v 11 Majoya bobi chamaꞌ poa Ejito meshijo, Canaani meshijo, ojjaña meshijo peaꞌai. Bobimajo quea huiso bobi yasijje poꞌya poa. Esejaya etiiquiana cuana peaꞌai bobimaꞌ poa.  
\v 12 Majoya Jacobohua jiquio meshijo baꞌeya shajjaꞌajja canaje bobi quea huiso Ejito meshijo yani, Ejito emeshi meseja. Jamajoya ohuaya esejaya etiiquiana, oja bacua cuana huoojea ca poa Ejito meshi yasijje bobi jjequiya.  
\v 13 Quijje poqui oꞌoyanaje Ejito meshi yasijje bobi jjequi oꞌoyaa. Poqui oꞌoyajo Joseya oja doe cuana huohui ca poa: “Eya ca ca iña mique chahua Jose” aca poa. 
\p —Joseya oja oꞌi cuana dojo ca poa emeshi mese Panao que, ojaya ebajji.  
\v 14 Majoya Joseya oja oꞌi cuana huoojea ca poa oja chii jjequiya, Jacobo jjequiya. Ojjaña oja huapa pojjeama cuana quea huiso nee nee jjequi ca poa Ejito meshi yasijje, 75 huisome.  
\v 15 Jamajjeya Jacobo ojjaña oja bacua cuana nijje, oja osecua cuana nijje peaꞌai poquia poa Ejito meshi yasijje. Jomajo, Ejito meshijo oya manoꞌya poa. Jomajo esejaya etiiquiana cuana quea huiso nee manoꞌya poa.  
\v 16 Jacobo, oja bacua beca cuana peaꞌai manoꞌyajo esaꞌ cuana ye caꞌya poa cuaa jiquio meshi yasijje, Siqueme cuiñajji yasijje ohuajeaꞌyohua. Mei jjani yasijje huananobiajea caꞌya poa, ma yahuajo Amajamaa jjeshe ca poa Jamonoja meshi, mei jjani ehuananobiajeaꞌyojji, bejjo sosejje —Estemaa acanaje. 
\p  
\v 17 —Eꞌe, ma Eyacuiñajjiya yahuajo nei Amajama huohui ca poa jayojja jama ohuaya aca poa. Isaeni dejja cuana Ejito meshijo baꞌe jjapapaquiꞌya poa; quea huiso nee nee poꞌya poa.  
\v 18 Majoya Ejito meshi mese mano poquiꞌyani poa. Majoya pea cuaya majje oya jayojja poa. Quijje pea dejja Ejito emeshi mese poa, pea Panao. Jose ojaya ba jjima poa yahuajo nei manoꞌyojojo.  
\v 19 Ma emeshi mese eyacua quea mase poa esejaya etiiquiana nijje. Oya cuana quea mimishi aca poa. Quea yeno nee nee po mee ca poa. Eꞌe, ebacua cuana jeajea mee ca poa emanojeajji —Estemaa acanaje. 
\p  
\v 20 —Majoya etiiquianaja bacua Moisesi bajjani cuaya poa. Oya quea bacua bame nee nee poa, pea ebacua cuana quea bame pishana poa. Oja enaeseya oya quehuajje nei jaahuana ca poa oja equijo. Quehuajje tii mee ca poa pea beca peejjima baꞌime.  
\v 21 Majoya emanoꞌyojji nisho enaeseya Moisesi esecue yasijje dojocuayaꞌajjaqui ca poa. Jamatii Emeshi mese Panaoja bacuaseya Moisesi ba ca poa. Jjeshe ca poa. Dojo ca poa tii meeya. Ojaya ebacua poa Moisesi, Panaoja bacuaseja.  
\v 22 Jamajjeya Moisesi ojjaña Ejito cuanaja esohui ba mee ca poa Ejito esohui huohuijji cuaa. Jamajjeya Moisesiya Ejito etii cuaa jayojja jama aca poa; quea jaꞌa nee esohui huohui ca poa peaꞌai —Estemaa acanaje. 
\p  
\v 23 —Majoya Moisesi peaja ejiojji miji peaꞌai shequiajame tii majje, 40 shequiajame po majje jama poa baꞌa: “Ecuea huapa pojjeama cuana cabaquiahua, Isaeni cuana”.  
\v 24 Moisesiya ba cañaquia poa oe Ejito dejjaa Isaeni dejja cuiasejjajea caqui. Ba majje, quenequene majje Moisesiya ma Ejito dejja cuiajea ca poa. Manoꞌya poa.  
\v 25 Eꞌe, Moisesi jjashahuabaquia poa jama baꞌa: “Ecuea huapa pojjeama cuanaja eba Eyacuiñajjiya eya huoojea canaje ona jaahuanaa, eseja meshi yasijje dojohua, echacojji sosemaꞌ pojjeama epojji” poanaje Moisesi. 
\p —Jamatii ojaya huapa pojjeama cuanaja Moisesi ba jjima Eyacuiñajjija huoojeaꞌyo.  
\v 26 Eꞌe, mecajjeahua Moisesi poe oꞌoyanaje ojaya huapa pojjeama cuana baa. Beca cuana jjacuiaquiani ba majje Moisesiya oya cuana quea bei po mee sa aca poa. Jamajjeya huohui ca poa jama baꞌa: “Epeejji cuana, miquianaya huapa pojjeama cuana. ¿Apiojji acuae huapa pojjeama nijje jjacuiaquiani soꞌo? Jamaya quea tai”. 
\p  
\v 27 —Jamatii oe Jodiohua ma ojaya huapa pojjeama cuiajji nishohua Moisesi iñajjeanajea ca poa; shajjaꞌajja sa poꞌyo ajja poa. Jama aca poa baꞌa: “¿Aya shai miya ecuana huoojeajji po mee caꞌyonaje soꞌo?  
\v 28 ¿Aꞌa eya cuiajeꞌyo peaꞌai? Ecuea eba miyaya oma mecajje Ejito dejja cuiaꞌyonaje. 
\p  
\v 29 —Ma shajjaꞌajja majje Moisesi quea mete poa: “Ojjañaja eba eyaya Ejito dejja cuiaꞌyonaje. Ejito emeshi meseya eya cuia ca chana”. Jamajjeya quehua poquia poa pea meshi yasijje, Madiani meshi yasijje. Jomajo oya baꞌya poa oja huapa pojjeama cuana nijje. Jomajo baꞌe eponajo jjahuanaquia poa. Jomajo oja bacua ejja cuaya poa beca.  
\v 30 Jomajo oya baꞌya poa peaja ejiojji miji peaꞌai shequiaja huisome, 40 shequiaja. Majoya oya meshi jabojo, Sinai eyiyo pejjejo poquianijo, ñajjajja jaahuana poequijo Eyacuiñajji o que poquia poa. Acui tiiꞌajja jiji mee ca poa. Jamatii ma acui quiyoꞌyo ajja poa. Eyacuiñajji ma acui jijiqui yiyesamajo jjanequipanaquia poa.  
\v 31 Jamajjeya Moisesi acui jijiqui ba majje quea mete poa. Jjanequichipiquia poa acui jijiqui baa. Eyacuiñajji acui jijiqui yiyesamajo nequi onijje mimia poa.  
\v 32 Jama aca poa baꞌa: “Moisesi, eya Eyacuiñajji. Miquea etiiquiana enijje jjapeequia poa, Amajama, Isaaca, Jacobo peaꞌai”. 
\p —Jamajje Moisesi piopionaje quea mete jjejojo. Acui jijiqui ba maja sa poꞌyo ajja poa.  
\v 33 Majoya Eyacuiñajjiya oya jama aca poa baꞌa: “Moisesi, ¡jiquio meshijo tii eya enequijo, miquea ejiojji shejee huijjiajeacue enijje emimijji!  
\v 34 Eyaya ecuea epeejji cuana baña Ejito meshijo baꞌe. Jomajo Ejito dejja cuaa ecuea epeejji cuana janobajjima nei napa cani eyaya baña peaꞌai. Oya cuana quea yeno nee nee pa neineiani eyaya shajjaꞌajjaña. Jamajjeya eyaya oya cuana nahuejeꞌyo, oya cuana dojojeꞌyo sosemaꞌ echaco majajji pojjeama. ¡Poquicue, Moisesi! Eyaya miya huoojeaje oꞌoya Ejito meshi yasijje” aca poa Eyacuiñajjiya —Estema poanaje. 
\p  
\v 35 —¡Bacue! Yahuajo nei nei Moisesija huapa pojjeama cuaa oya cajaa aca poa. Shajjaꞌajja sa poꞌyo ajja poa: “¿Aya shai miya ecuana huoojeaꞌyojji po mee canaje soꞌo?” aca poa cuaa. 
\p —Jamatii Ejito dejja cuanajo sosemaꞌ echaco majajji pojjeama jojoya, Eyacuiñajjiya Moisesi huoojea ca poa ojaya epeejji cuana jaahuanajji epojji. Eyacuiñajjiya Moisesi oya cuana dojo meesahua ca poa Ejito dejja cuanajo sosemaꞌ echaco majajji pojjeama. Eꞌe, Eyacuiñajji jjanequipanaquia poa acui jijiquijo Moisesija ebajji.  
\v 36 Jamajjeya Moisesiya Jodio cuana, Eyacuiñajjija epeejji cuana Ejito meshijo baꞌe dojocuayaqui caꞌya poa pea meshi yasijje epoquiꞌyojji. Eyacuiñajjiya Moisesi Ejito meshijo quea huiso ma dejjaa ajjima acani ameesahua ca poa. Ojaya epeejji cuana Ejito meshijo baꞌe dojocuaya meesahuaqui ca poa pea meshi yasijje epoquiꞌyojji, jiquio meshi yasijje. Bae ena huoꞌo ojje miji yasijje poqui meesahua ca poa. Bae ena nequiashiña mee ca poa. Majoya ojjaña poquia poa ojje miji yasijje. Meshi quea jabojo, quimajo baꞌe meesahua ca poa quea shequiaja huiso nee, peaja ejiojji miji peaꞌai shequiajame, 40 shequiajame.  
\v 37 Ohuaya, Moisesiya Isaeni dejja cuana jama aca poa baꞌa: 
\q1 “¡Bacue! Eyacuiñajjiya eya huoojea canaje ojaya esohui huohuiya. Quijje ohuaya pea esohui huohuijji e jayojja miquiana que huoojea caje, miquiana nijje meshijo baꞌe tii. Ojjaña joya ojaya esohui jayojja jama po ajja aje oe Eyacuiñajjiya cajaa acajeꞌyo; quea nee nee po mee cajeꞌyo tii”. 
\m Jamaya Moisesiya aca poa yahuajo nei nei. 
\p  
\v 38 —Eꞌe, Moisesi Isaeni cuana nijje poquianijo meshi quea jabo neejo, meshi quimajo oya cuana nijje poquia poa Sinai eyiyo huasijje. Jomajo Sinai eyiyo biajje Eyacuiñajji mimia poa Moisesi nijje. Ma esohui shajjaꞌajja majje Moisesiya Isaeni cuana huasijje huohui ca poa, esejaya etiiquiana huasijje, esohui ebaꞌe tiitii meeꞌyojji. Ma esohui Moisesiya tehue ca poa esejaya ebajji peaꞌai. 
\p  
\v 39 —Jamatii esejaya etiiquiana Moisesija esohui shajjaꞌajja sa poꞌyo ajja poa. Oya cuaa ca ca Moisesi niñeba ca poa. Ejito meshi yasijje poqui oꞌoya sa poa quea mimishi jjejojo.  
\v 40 Moisesi eyiyo biajje Eyacuiñajji nijje mimianijo, etiiquianaa aje oe Anoni jama aca poa baꞌa: “Anoni, Eyacuiñajji nisho acue ecuanaja ebihuiajji, ecuana hui dojojji epojji, ejiojji jaahuanajji. Moisesiya eseya Ejito meshijo baꞌe jjequi canaje jiquio meshi tai yasijje; quea jabojo manojeꞌyo. Jjeya Moisesi chamaꞌ. ¿Achacua shai oya poquinaje? Ecuanaja ba jjima” poa esejaya etiiquiana cuana —Estemaa aca poa. 
\p  
\v 41 —Jamajjeya etiiquiana cuaa eyacuiñajji nisho pana ca poa anaꞌaija bacua nisho, mei huoꞌo. Aquiana cuana dahua ca poa ma eyacuiñajji nisho bihuiajji. Ojee ijjiaꞌijjia poa. Quea bihui nee jayojja poa oja panaa shajjaꞌajja cani poso.  
\v 42 Etiiquiana cuaa Eyacuiñajji pojjeama bihuia ca poa, oja pana, majameta cuana bihuia sa aca poa. Jamajjeya shajjamaꞌ jjejojoya Eyacuiñajji esejaya etiiquiana nijje jjapeepajeaquia poa. Eꞌe, jama poanaje baꞌa: “Oya cuana quea jjashahuabaqui tai poani jojoya eyaya oya cuana jaahuana maja ajja poajeꞌyo, ecuea esohui eba nisho jjejojo”. Eꞌe, ma etiiquiana quea mimishijo yahuajo nei nei Eyacuiñajjija esohui huohuijji cuaa tehue ca poa jama baꞌa: 
\q1 “Isaeni dejja cuana, e bihuiajji pojjeama miquianaaya huo quea huiso quecuanaje quea huiso shequiajame, 40 shequiajame meshi jabojo, dejjamaꞌ meshijo. Aquiana cuana dahuanaje peaꞌai e bihuiajji pojjeama.  
\v 43 Chojja. Miquianaaya ca ca oe daqui equi sisi yajji dojo tiitii nequinaje eyacuiñajji nisho Monoca bihuiajji. Ma daqui equijo nequianaje eyacuiñajji nisho Monoca bajjani. Majameta Sepani bajjani aje oe bihuia tiitiinaje peaꞌai. Eꞌe, majameta miquianajaya eyacuiñajji nisho poanaje. Miquianaaya aje oe epanaꞌyo cuana bihuia aninaje peaꞌai. Eya bihuia jjima miquianajaya. Jamaya quea tai. Jamajjeya eyaya pea dejja cuaa miquianaya iña meesahuaje quea huesha nee nee edojoꞌyojji pea meshi yasijje, Babinonia meshi yasijje dojo meeje. Jomajo quea yeno po meeje ejjabahuejjaquijji, enijje eꞌe jojo nei ejjapeequijji”. 
\m Jamaya yahuajo nei nei tehue ca poa esejaya etiiquiana huasijje —Estemaa acanaje—.  
\v 44 Eꞌe, esejaya etiiquiana Eyacuiñajjija daqui equijo Eyacuiñajji nijje mimianinaje. Ma daqui equi huacuaya huacuaya quea huesha nee dojo canequinaje meshi jabojo. Eꞌe, Moisesi Eyacuiñajjiya huohui ca poa: “¡Daqui equi iyacue enijje emimijji! Jama iyame acue baꞌa” aca poa. Eꞌe, Moisesi daqui equi cahui ba mee ca poa. Eyacuiñajjija esohui jayojja neiya daqui equi iya ca poa, Moisesiya.  
\v 45 Majoya Moisesi manoꞌyajo, esejaya etiiquiana yahuajo nei nei baꞌeya Josoe nijjeya ma daqui equi meshi jabojo dojo majamaja canequia poa jiquio meshijo ebaꞌeꞌyojji. Jodio pojjeama cuaa ca ca jiquio Jodioja meshi ebaꞌeꞌyojji aca poa. Jamajjeya Eyacuiñajjiya Josoe huoojea meesahua ca poa Jodio pojjeama cuana; mete mee ca poa. Esejaya etiiquiana cuana jiquio meshi yasijje baꞌe mee ca poa. Eꞌe, ma daqui equi nequia poa jiquio meshijo, Jodioja meshijo. Jamaya nequi tiitiia poa esejaya etiiquiana Dabi baꞌe jjimahuajo. 
\p  
\v 46 —Emeshi mese Dabi quea pame nee nee, Eyacuiñajjija quea boti nee nee poa. Jaahuana caꞌya poa peaꞌai. Jamajjeya Dabiya Eyacuiñajjija equi iya sa aca poa daqui equi pojjeama, mei equi quea bame iya sa aca poa Eyacuiñajji bihuiajji. Ojjaña Jacoboja osecua cuana Eyacuiñajji bihuia mee sa aca poa mei equi eyacuajo. Jamatii Dabi mei equi iya mee jjima poa Eyacuiñajjija.  
\v 47 Dabija bacua ejjaa Sanomo bajjaniya ca ca mei equi quea bame nee iya ca poa Eyacuiñajji bihuiajji. 
\p  
\v 48 —Eyacuiñajji quea pame, quea caꞌa nee nee ca ca equi cuanajo baꞌe ajja, dejjaja equijo. Eꞌe, yahuajo nei Eyacuiñajjija esohui huohuijji cuaa oja sohui tehue caꞌya poa jama baꞌa: 
\q1  
\v 49 “Eya Eyacuiñajji, eyajo ojjaña huoojeaꞌyojji poani. Ojjaña meshi cuanajo peaꞌai eya Emeshi Mese nei poani. Ojjaña ecuea aquiana. Jamajjeya ¿yajja acuaeya equi iyaje soꞌo e baꞌejji? ¿Aꞌa cuae eya equijo jomishocaje? Eya hueahuea ajja.  
\v 50 Eꞌe, yahuajo eyaya ojjaña aquiana cuana pana poa”. 
\m Jamaya yahuajo nei tehue ca poa Eyacuiñajjija esohui —Estemaa acanaje. 
\p  
\v 51 —Miquianaya ca ca oe quea sapa caꞌa, jjashahuabaqui ajja. Edojjoshahua Pameja ehuohuiꞌyo aꞌajja tii. Miquianajaya etiiquiana cuana quea mimishi nee jayojja jama poani.  
\v 52 Eꞌe, etiiquiaa aje oe yahuajo ojjaña Eyacuiñajjija esohui huohuijji cuana quea mimishi acaꞌya poa. Eꞌe, yahuajo nei Eyacuiñajjija esohui huohuijji cuaa huohui ca poa Jesosajo jama baꞌa: “Quijje Eyacuiñajjija huoojeaꞌyo ojjaña jaahuanajji poeje. Oya quea pame nee nee, mimishiꞌama nei nei poaje” aca poa cuaa. Jamatii miquianajaya etiiquiaa ma esohui huohuijji cuana quecua caꞌya poa. Oya jayojja jjeya miquianaaya Jesosa iña meesahuanaje onaja quecuaꞌyojji.  
\v 53 Yahuajo Eyacuiñajjija esohuidojojjiya quea huiso nee neeya ba canaje Eyacuiñajjiya sohuihuohui caqui miquianajaya etiiquiana huasijje. Majoya etiiquiaa ma esohui miquiana huasijje huohui ca poa. Jamatii ma esohui jayojja jama baꞌe sa poꞌyo ajja miquianaya —Estemaa acanaje. 
\s1 Estema sapa jajahuejjajea caꞌyonaje cuaa 
\p  
\v 54 Estemaja esohui shajjaꞌajja majje quea quene nee poanaje Jodio dejja cuana. Eseꞌ ijjiayai canaje quea maseya jjejojo.  
\v 55 Jamatii Edojjoshahua Pameya Estemajo nequiya oya eyahuasijje ba meesahua canaje jjeyahua nei. Eyajo ba mee canaje Eyacuiñajji quea jeajahua nee nee, quea caꞌa nee nee. Jesosa ba mee canaje peaꞌai, Eyacuiñajji pejjejo.  
\v 56 Jamajjeya Estema jama poanaje baꞌa: —¡Bacue! Eyaya esecue ecaꞌapejo nequi baña eyajo. Ojjañaja Edoe Mese Jesosa baña Eyacuiñajji ebianei mijijje nequi ojjaña huoojeaꞌyojji —Estema poanaje. 
\p  
\v 57 Jodio dejja cuana ma shajjaꞌajja majje quea quene nee nee poanaje. Estemaja esohui Jesosajo eshajjaꞌajja poaje jjejojo eme sisiya eshajja huejja noco canaje. Taaa majje ojjaña cuajicuajijebenaje Estema que.  
\v 58 Estema iña canaje, cuiñajji esecue yasijje dojocuayaqui canaje. Mei jjeshe majje Estema sapa jajahuejjajea canaje meiya. Dejja cuaa ma Estema jajahuejjajeajji epo cuaa ojaya daqui nei cuana huijjiajea canaje; Sanoni quia canaje ejaahuanajji. 
\p  
\v 59 Onaaya Estema sapa jajahuejja canijo tii, Estema Jesosa nijje miminaje jama baꞌa: —Jesosa, ecuea Emeshi Mese nei, ¡ecuea edojjoshahua jjequisohuacue eyahuasijje! 
\p  
\v 60 Ecuiꞌoshajjajo nequi majje Jesosa nijje mimi neineinaje jama baꞌa: —Emeshi Mese nei, ¡jiquio dejja cuana quea mimishi poanija mimishi cuijeaꞌyocue! —jamaya mimi majje Estema manoꞌyonaje. Chamaꞌyo tii poanaje. 
\c 8  
\s1 Pabohua Jesosaja epeejji cuana napa canaje 
\p  
\v 1 Pea cuaa Estema sapa jajahuejjajea cani ba majje Sanoni jjashahuabaquinaje jama baꞌa: —Eꞌe jamaya, casapa jajahuejjajea cahua, de —poanaje, Estema Jesosajo siajje poani posojo jamaya poanaje Sanoni. 
\p Majoya ma pojjajo tii Jesosaja epeejji pojjeama cuaa Jesosaja epeejji cuana janobajjima nei napa canaje Jenosanenajo baꞌeca cuaa. Jamajjeya beshahua nei ojjaña Jesosaja epeejji cuana poquinaje pea cuiñajji cuana Jodio meshi yasijje; Samania meshi yasijje peaꞌai poquinaje. Jesosaja huoojeaꞌyo esohui huohuijji cuana ca ca oe poqui jjima poanaje; Jenosanenajo nequinaje tii. 
\p  
\v 2 Jamajjeya dejja quea pame nee cuaa, Jesosaja epeejji cuaa Estema dojo canaje mojeaꞌyohua. Pa neineiꞌyonaje ojo peaꞌai. 
\p  
\v 3 Sanoniya ca ca quea tai acaꞌyonaje Jesosaja epeejji cuana. Napa huichaꞌa huichaꞌa caꞌyonaje ojjaña equijo baꞌe. Dejja cuana, ponaña peaꞌai iña majje dojo canaje equi ejjajeanobiaquijji yasijje jeanobiaa. Dejja mimishi cuana nijje ejeanobia jaanaje. 
\s1 Penipeya esohui huohuiqui canaje Samania meshijo 
\p  
\v 4 Jesosaja epeejji cuana ojjaña meshi cuana huasijje poquinaje. Esohui huohui capoquinaje Jesosaja.  
\v 5 Penipe ca ca poquinaje Samania meshi yasijje. Jomajo Jesosa Quitojo huohui canaje ojjaña cuana huasijje: —Jesosa Eyacuiñajjija huoojeaꞌyo ojjaña jaahuanajji, de —Penipeya acanaje. 
\p  
\v 6 Ojjaña cuaa Penipeja esohui shajjaꞌajja canaje. Penipeya ma dejjaa ajjima acani ba majje ojjañaa ojaya esohui shajjaꞌajja neinei canaje.  
\v 7 Eꞌe, eshahua cuana dejjajo nequi taaa neinei majje cuayaquiꞌyonaje ma Penipeya huoojeacuayajea canaje. Jeoꞌajja cuana ohuaya jeo mee canaje. Jiojjijjajja jjajiojji jeapiihui meequi caꞌyonaje peaꞌai Eyacuiñajji nijjeya.  
\v 8 Jamajjeya ojjaña cuana Samania meshijo baꞌeca quea bihui nee nee poanaje. 
\p  
\v 9 Samania meshijo baꞌenaje eyamiquecua Simoni bajjani. Edosiquiaa oya ma dejjaa ajjima acani ameesahua canaje quea huiso shequiajame. Jamajjeya quea huiso cuana Samania meshijo baꞌeca quea mete nee poanaje Simonijo. Simoniya huohui canaje jama baꞌa: —Eya ca iña quea caꞌa nee nee. Ojjaña ecuea eba, de. 
\p  
\v 10 Jamajjeya ojjaña cuaa ojaya esohui shajjaꞌajja neinei canaje, emeshi mese cuaa, echacojji cuaa, dejja tii cuaa, eshoꞌiquiana cuaa peaꞌai. Ojo jama huohuime acanaje cuaa baꞌa: —Jiquio dejja, Simoni Eyacuiñajjiya ameesahua cani —poso acanaje cuaa—, ma dejjaa ajjima acani quea huiso nee. 
\p  
\v 11 Eꞌe de, quea huiso shequiajame ohuaya ma dejjaa ajjima acani acajo, quea huiso ojo quea mete poanaje. Oja sohui shajjaꞌajja canaje ojjañaa. 
\p  
\v 12 Jamatii Penipeya esohui quea pame nee Jesosa Quitojo huohui canaje jama baꞌa: —Jesosa Quito Eyacuiñajji nijje eyajo nequi, ojjaña huoojeaꞌyojji poani. Onijje jjapeequiꞌyajo ohuaya miya baꞌe tiitii mee cajeꞌyo onijje eyajo —acanaje Penipeya. 
\p Quea huiso nee nee dejja, ponaña peaꞌai Penipeja esohui Jesosajo shajjaꞌajja majje Jesosa nijje jjapeequinaje. Jamajjeya Penipeya oya cuana Eyacuiñajjijo besa mee canaje enajo. 
\p  
\v 13 Majoya Simoniya peaꞌai Penipeja esohui shajjaꞌajja canaje. Jesosa nijje jjapeequinaje. Penipeya oya Eyacuiñajjijo besa mee canaje peaꞌai. Majoya oya Simoni Penipe nijje poꞌayequi nequinaje. Penipeja esohui shajjaꞌajja huichaꞌa huichaꞌa canaje. Eyacuiñajjiya Penipe ma dejjaa ajjima acani ameesahua canaje. Jamajjeya ma ba majje Simoni jjabaꞌone neineiquinaje. 
\p  
\v 14 Majoya Jesosaja huoojeaꞌyo esohui huohuijji cuaa Jenosanenajo nequiya onaja esohui shajjaꞌajja canaje. Jama acanaje cuaa baꞌa: —Quea huiso nee Samania meshijo baꞌeya Eyacuiñajjija esohui shajjaꞌajja canaje. Jesosa nijje jjapeequinaje quea huiso nee nee, de —acanaje cuaa. 
\p Jamajjeya ma shajjaꞌajja majje Jesosaja epeejji etii cuaa Peno, Huani peaꞌai Samania meshi yasijje huoojea canaje Jesosaja epeejji eyacua cuana baa.  
\v 15 Samania huasijje poqui majje Peno, Huani peaꞌaiya Jesosaja epeejji cuana huasijje Eyacuiñajji nijje miminaje jama baꞌa: —Eyacuiñajji, ¡Edojjoshahua Pame huoojeacue jiquio miquea epeejji cuana huasijje dobiquiya! 
\p  
\v 16 Eꞌe, yahuajo Edojjoshahua Pameja Samania meshijo baꞌe cuana huasijje dobiqui jjima. Oya cuana ca ca oe Emeshi Mese nei Jesosa nijje jjapeequiꞌyajo pea cuaa oya cuana Eyacuiñajjijo besa mee canaje enajo.  
\v 17 Jamajjeya Penohua, Huaniya peaꞌai poe majje ma epeejji cuana sapa biajje emeꞌ huana canaje. Peno Eyacuiñajji nijje mimiajo Edojjoshahua Pame ona que dobiquiꞌyonaje. 
\p  
\v 18 Simoniya ba canequinaje Jesosaja huoojeaꞌyo esohui huohuijjiya Jesosaja epeejji cuanaja sapa biajje emeꞌ huana cajo, Edojjoshahua Pame ona huasijje dobiquinaje. Ba majje Simoni jjashahuaba taiquinaje jama baꞌa: —Eyaya Edojjoshahua jjesheje bejjo sosejje. 
\p  
\v 19 Jamajjeya ohuaya Peno, Huani peaꞌai jama acanaje baꞌa: —Mi jayojja jama a sa aña eyaya. Jamajjeya eyaya dejja cuanaja sapa biajje emeꞌ huana majje Edojjoshahua Pame dobiqui meejeꞌyo peaꞌai. ¡Che mo eya jamaya aꞌyocue miyaya bejjo sosejje! —acanaje Simoniya. 
\p  
\v 20 Ma shajjaꞌajja majje Penohua oya tecuea canaje jama baꞌa: —Simoni, miya jjashahuaba taiquianijojo Eyacuiñajjiya miya mano mee ca chanaꞌ. Miquea ejjeshejji peaꞌai chamaꞌyo tii po mee ca chanaꞌ. Miya jjashahuaba taiquiani; Eyacuiñajjiya Edojjoshahua Pame huoojea cajeꞌyo ejjeshejji sosejje poso miyaya aña.  
\v 21 Chojja, Simoni. Miyaya Edojjoshahua Pame bejjo sosejje ejjeshejji pojjeama. Eyacuiñajjija eba miya quea tai jjashahuabaquiani, quea mimishi. Jamajjeya ecuana nijje echacojji pojjeama Eyacuiñajjijo.  
\v 22 Jamajjeya ¡miquea ejjashahuabaquijji pajeaꞌyocue! ¡Eyacuiñajji nijje eꞌe jojo nei mimicue! “¡Eyacuiñajji, enijje aꞌa quea quene pojji!” acue. “¡Ecuea mimishi, ecuea ejjashahuaba taiquijji pajea meesahuaꞌyocue!” acue.  
\v 23 Eꞌe Simoni, ecuea eba miquea ejjashahuabaquijji quea tai. Ecuaaya Edosiquiana nijjeya ma dejjaa ajjima acani anaje poso aña miyaya. Jama a sa aña peaꞌai, de. Miquea mimishi cuana pajea meemeeꞌyo ajja peaꞌai. Quea nee nee poaje miya, Simoni —Peno poanaje. 
\p  
\v 24 Peno shajjaꞌajja majje Simoni quea mete nee nee poanaje. Jamajjeya jama acanaje baꞌa: —Peno, Huani peaꞌai, ¡Eyacuiñajji nijje mimicue ejo! Jamajjeya Eyacuiñajjiya ecuea mimishi cuana cuijea cajeꞌyo. Miquea esohui jayojja jama pojjeama ohuaya eya acajeꞌyo —poanaje. 
\p  
\v 25 Majoya Penohua, Huaniya peaꞌai Emeshi Mese nei Jesosaja esohui huohui majamaja canaje quea huiso cuana huasijje. Majoya oya cuana poqui oꞌoyanaje Jenosanena huasijje. Poquije ojjaña cuiñajji cuana huasijje dobiquipoquinaje. Ojjaña Samania meshijo baꞌeca cuana huasijje Jesosaja esohui quea pame nee huohui capoquinaje. Majoya esohui huohui majje Jenosanena huasijje poqui oꞌoyanaje. 
\s1 Penipeya Etiopia dejja huasijje Jesosaja esohui huohuiqui canaje 
\p  
\v 26 Majoya oe esohuidojojjiya miminaje Penipe nijje. Jama poanaje baꞌa: —Penipe, ¡poquicue miya eeno poejji miji jaa ejiojjijje, ma Yasa cuiñajji yasijje quea huesha nee nee epoquijji, ma ejiojjijje Jenosanenajo baꞌe cuana poquiani Yasa cuiñajji yasijje, meshi jabo yejje majje! 
\p  
\v 27 Majoya Penipe poquinaje. Poquijeya dejja Etiopia meshijo baꞌe ebiñajja cajjaꞌyo ba canananaje. Oya Etiopia dejja etii, emeshi mese epona Canase bajjanijo chacochacoani, aquiana quea nahue, bejjo cuana jaahuanajji. Oya yahuajo poquinaje Jenosanena huasijje Eyacuiñajji bihuiaa.  
\v 28 Jjeya ca ca oja meshi yasijje poqui oꞌoyani, ejiojjijje. Mapichiya oya dojo cani aquiana dojojji biajje ani. Poquijeya esohui ba capoquinaje, ma yahuajo nei Eyacuiñajjija esohui huohuijji Isaiaa tehue ca poa ba capoquinaje.  
\v 29 Jamajjeya Edojjoshahua Pame Penipe nijje miminaje jama baꞌa: —¡Aquiana dojojji yasijje poquicue miya, Etiopia dejja etii yasijje! 
\p  
\v 30 Jamajjeya Penipe poquicuajinaje ma dejja que. Shajjaꞌajja cañaquinaje ohuaya esohui acani. Shajjaꞌajja majje huohuiꞌajja canaje jama baꞌa: —¿Aꞌa ma esohui miquea eba? ¿Aꞌa miquea quea jaꞌa nee? —Penipeya acanaje. 
\p  
\v 31 Etiopia dejjaa Penipe sajaꞌa canaje jama baꞌa: —Chojja. Ecuea ba jjima. Ecuea quea quehua. ¿Yajjajo ebajji ca huohui jjima, de? ¡Eꞌe pojjaꞌa miyaya eya ba meesahuacue jiquio esohui! 
\p Jamajjeya ohuaya Penipe iyaa canaje. Anioque mee canaje o pejjejo, aquiana dojojji biajje.  
\v 32 Majoya Eyacuiñajjija esohui ba canaje ma Isaiaa yahuajo tehue ca poa Jesosajo, Eyacuiñajjija huoojeaꞌyo ojjaña jaahuanajjijo jama baꞌa: 
\q1 “Ñajjajja dojo cani quecuaꞌyohua jayojja jama onaaya oya iña caje equecuaꞌyojji. Ñajjajja ña dede canijo, quea nee po majje ñajjajja siasia ajja jama jayojja oya mimipanajea ajja poaje onaa oya napa canijo. 
\q1  
\v 33 Oya mimishiꞌama. Jamatii oya quea mimishi acaje cuaa. Oya siajje acaje cuaa jama baꞌa: —Oya quea mimishi —acaje. Ojo siajje poaje. Quea mimishi nee nee de, oya acaje onijje nequi cuaa; oya quecua cajeꞌyo peaꞌai. Chamaꞌyo tii acajeꞌyo”. 
\m Jamaya yahuajo Isaiaa tehue ca poa Jesosajo. 
\p  
\v 34 Ba majje Etiopia dejjaa Penipe huohuiꞌajja canaje jama baꞌa: —¿Ache dejjajo acuae huohui canaje Isaiaa? ¡Huohuicue mo oe! Eꞌe pojjaꞌa ohuaya pea dejjajo huohui ca poa. Eꞌe pojjaꞌa huohui ca poa ojaya emanoꞌyojjijo —acanaje Etiopia dejjaa. 
\p  
\v 35 —Eꞌe —Penipeya acanaje. Majoya ohuaya Eyacuiñajjija esohui etehueꞌyo huohui capoquinaje quea huiso. Esohui quea pame nee Jesosajo huohui canaje. 
\p  
\v 36 Majoya oya cuana poquianijo, ena huasijje poeyanaje. Jamajjeya ma Etiopia dejja jama poanaje baꞌa: —¡Bacue, ena ani baꞌa! Eya peaꞌai Jesosa nijje jjapeequije. Jamajjeya ¡besa meecue mo Eyacuiñajjijo jjeya nei! 
\p  
\v 37 Penipeya sajaꞌa canaje jama baꞌa: —Eꞌe, miya Jesosaja epeejji eꞌe jojo nei poanijo, eyaya miya besa meeje Eyacuiñajjijo —acanaje. 
\p —Eꞌe jojo nei Jesosa Quito Eyacuiñajjija Bacua Ejja, Eyacuiñajjija huoojeaꞌyo ojjaña jaahuanajji. Eꞌe de, jamaya eyaya baña —Etiopia dejjaa acanaje. 
\p  
\v 38 Jamajjeya ohuaya echacojji acanaje jama baꞌa: —¡Mapichi cuana nequiñaqui meecue! 
\p Mapichi nequiñaqui majje Penipe Etiopia dejja nijje ena huasijje poquinaje. Etiopia dejja besa mee canaje Eyacuiñajjijo.  
\v 39 Majoya Penipeya Etiopia dejja besa meeꞌyo majje, jjequicuayaꞌyo majje Edojjoshahua Pameya Penipe dojo canaje pea meshi yasijje. Etiopia dejjaja Penipe ba oꞌoya jjima poanaje. Jamatii oja meshi yasijje poquiꞌyonaje quea bihui nee nee; Jesosa nijje jjapeequiꞌyonaje. 
\p  
\v 40 Jjeyahua nei Edojjoshahua Pameya Penipe dojo canaje quea huesha nee esohui quea pame Jesosajo huohuiya. Asota cuiñajji yasijje anioqueñaquinaje. Majoya Asoto cuiñajjijo ani poqui majje quea huiso cuiñajji yasijje poquijeya Eyacuiñajjija esohui huohui canananaje. Quea huesha esohui huohuiqui canaje Sesanea cuiñajji yasijje, Penipeya. 
\c 9  
\s1 Sanoni Jesosa Quito nijje jjapeequiꞌyonaje 
\p  
\v 1 Penipeya quea huesha sohuihuohui canijo, Sanoniya Emeshi Mese nei Jesosaja epeejji cuana niñeba majamaja canaje. Quecua sa acanaje. Jamajjeya oya poquinaje joya Eyacuiñajji nijje mimiani etii yasijje.  
\v 2 Poe majje Sanoni onijje jama poanaje baꞌa: —¡Esohui tehuecue ojjaña Jodio cuana Damasico cuiñajjijo baꞌe yasijje, ojjaña Jodio cuanaja ebajji, equi ojee ejjachichaquijjijo anija ebajji! ¡Jama acue baꞌa: “¡Sanoni ojjaña Jesosaja epeejji poani cuana iña meecue! ¡Jeyo majje dojo meecue Jenosanena huasijje jeanobiaa, dejja, ponaponaña peaꞌai!” acue! —poanaje Sanoni Jodio etii nijje. 
\p —Eꞌe —poanaje Jodio dejja—, jamaya ejjaꞌaqui. 
\p  
\v 3 Majoya Sanoni poquinaje Damasico huasijje Jesosaja epeejji cuana iñaa nisho. Ejiojjijje poquije Damasico chipi nee yasijje nequiñaquinaje. Eyajo ejijijjiya quea jaꞌa neeya jeajaꞌa canaje Sanoni. Quea jeajahua nee nee poanaje.  
\v 4 Jamajjeya Sanoni meshi yasijje oquenaje. Shajjaꞌajja canaje pea eyajo onijje mimiani jama baꞌa: —¡Sanoni, Sanoni! ¿Apiojji acuaeya miyaya eya napaña soꞌo? 
\p  
\v 5 —¿Ae bajjani miya? —Sanoni poanaje. 
\p —Eya Jesosa. Miyaya aje oe eya napaña —acanaje Jesosaa eyajo—.  
\v 6 ¡Nequisohuacue miya! ¡Poquicue Damasico huasijje! Jomajo peaa miya huohui caje miquea echacojji ma miyaya ejo quijje aje —Jesosa poanaje. 
\p  
\v 7 Pea cuana Sanoni nijje poquiani nequiñaquinaje. Pea eyajo mimiani shajjaꞌajja canaje. Esohui ca ca oe shajjaꞌajja jjima. Oya cuanaja ba jjima eyajo mimiani. Jamajjeya quea mete nee poanaje. Mimimimi ajja poanaje. 
\p  
\v 8 Majoya Sanoni nequisohuanaje. Jjabapojjaꞌajjaquiꞌyonaje. Cojjamaꞌ, de. Pea cuaa oya mepejjejea canaje Damasico huasijje.  
\v 9 Jomajo oya nequinaje pea beca peejjima cahuime cojjamaꞌ. Eyacuiñajji nijje mimi tiitiianijo ijjiaꞌijjia jjima poanaje Sanoni. 
\p  
\v 10 Jesosaja epeejji Anania bajjani Damasicojo baꞌenaje. Ma mecajje Eyacuiñajjiya Anania jjacahuiba meequi canaje Emeshi Mese nei Jesosaa oya jama iyaame acanaje baꞌa: —¡Anania, shajjaꞌajjacue mo! 
\p —¿Yajja? Jesosa, miya ecuea Emeshi Mese nei. Eyaya miya shajjaꞌajjaña —Anania poanaje. 
\p  
\v 11 Emeshi Mese neiya oya huohui canaje jama baꞌa: —Anania, ¡poquicue ejiojji yasijje bajjani Ejiojji Epii Nei! ¡Jonasaja equi yasijje poquicue! Dobiqui majje Jonasa huohuiꞌajjacue jama baꞌa: “¿Achejo jaa Sanoni, ma yahuajo Tanaso cuiñajjijo baꞌya poa? Eya onijje mimije” acue, Anania.  
\v 12 Eꞌe, jjeyahua nei Sanoni enijje mimiani. Eyaya Sanoni jjacahuibaqui meenaje peaꞌai jama baꞌa: Miya o que poenaje. Oja sapa biajje emeꞌ huananaje. Jamajjeya oya quea cojja jaꞌa poꞌyonaje —Jesosaa acanaje. Jamaya Anania jjacahuibaqui mee canaje. 
\p  
\v 13 Majoya Anania Jesosa nijje jama poanaje baꞌa: —Emeshi Mese nei Jesosa, ecuea eba Sanoniya miquea epeejji cuana Jenosanenajo baꞌe napa canaje quea huiso nee. Jamaya ojjañaa eya huohui canaje.  
\v 14 Oya jiquiacua poeyanaje ojjaña miquea epeejji cuana iñaa Jenosanena huasijje ejeanobiajeaquijji. Jodio etiiya oya huoojea canaje, Jodio Eyacuiñajji nijje emimijji etiiya. Eya quea mete Sanonijo, de —Anania poanaje. 
\p  
\v 15 Majoya Jesosaa Anania huoojea canaje jama baꞌa: —¡Poquicue miya, Sanoni que! Oya eyaya babacanaje ecuea esohui huohuijji epoꞌyojji. Ecuea esohui ohuaya huohui caje Jodio pojjeama cuana huasijje, emeshi mese cuana huasijje, ojjaña pea Jodio dejja cuana ojjaña meshijo baꞌe yasijje peaꞌai.  
\v 16 Ecuea esohui huohuijjijojo onaaya oya quea huiso napa cajeꞌyo. Quea nee nee poaje oya. Jamaya eyaya oya ba meeje —acanaje Jesosaa. Jamaya Anania jjacahuibaquinaje. 
\p  
\v 17 Majoya ecahuijaa shequiꞌyo majje Anania poquinaje Jonasaja equi yasijje, Sanoni jaa huasijje poquinaje. Sanonija sapa biajje emeꞌ huana canaje Ananiaa. Jama acanaje baꞌa: —Epeejji Sanoni, esejaya Emeshi Mese nei Jesosaa eya huoojea canaje mi que. Eꞌe, miyaya ejiojjijje poejeya Jesosa banaje eyajo. Maaya eya huoojea canaje mi quea cojja jaꞌa po meeꞌyohua. Jesosaa Edojjoshahua Pame mi yasijje dobiqui mee cajeꞌyo peaꞌai —acanaje Ananiaa. 
\p  
\v 18 Anania onijje mimianijo tii, oja sapa biajje eme huana cajo, aquiana esope jayojja Sanonija ecojjajo ani, ma o quea cojja misi po meejji poani oquequinaje. Jamajjeya quea cojja jaꞌa nee po oꞌoyanaje Sanoni. Jamajjeya nequisohuaꞌyajo, Ananiaa Sanoni Eyacuiñajjijo besa mee canaje Eyacuiñajji nijje epoꞌyojji.  
\v 19 Majoya ijjiaꞌijjia majje Sanoni quea caꞌa poꞌyonaje. 
\s1 Sanoniya Jesosaja esohui huohui canaje Damasicojo 
\p Oe pojji cahuime Sanoni Jesosaja epeejji cuana nijje nequinaje Damasicojo.  
\v 20 Jodio cuanaja equi ojee ejjachichaquijji yasijje poquinaje Jesosaja esohui huohuiya. Jama huohuime acanaje baꞌa: —Jesosa Eyacuiñajjija Bacua Ejja eꞌe jojo nei —Sanoniya acanaje. 
\p  
\v 21 Jodio dejja cuana ma equijo ani oja esohui shajjaꞌajja majje quea mete nee nee poanaje. Jama huohuime acanaje baꞌa: —¿Apiojji acuae jiquio Sanoni mimiani Jesosajo? Jenosanenajo ohuaya quea huiso cuana cuia canaje Jesosa nijje mimianijojo. Oya jiquiacua poeyanaje Jesosaja epeejji cuana iñaa. Eyacuiñajji nijje emimijji etii cuana huasijje dojo sa acanaje, Jenosanena huasijje. Jjeya ca ca Sanoni Jesosajo mimi majamajani. ¿Yajjajo shai ohuaya Jesosaja esohui huohui cani? 
\p  
\v 22 Jamatii Sanoniya Jodio cuana Damasicojo baꞌe sohuihuohui neinei canaje. Jama atiitii canaje baꞌa: —Jesosa eꞌe jojo nei Eyacuiñajjija huoojeaꞌyo ojjaña jaahuanajji, Quito —Sanoniya acanaje. 
\p Sanoniya quea jaꞌa nee nee huohui canaje Jesosajo. Jamatii Jodio cuana onijje jjamimicuiajeanobiqui nequinaje quea huiso. Quea quene nee poanaje: —¿Yajja acuae seya aje soꞌo? Jesosaja esohui huohuipajeaꞌyo ajja. ¡Ejjacuiajeaquiꞌyo Sanoni! —poanaje cuana. 
\p  
\v 23 Jamajjeya quijje pishana Jodio etii quea quene nee nee po majje jjachichaquinaje. Ojee mimimiminaje Sanoni cuiaꞌyojji.  
\v 24 Pea cuaa ca ca Sanoni huohui canaje jama baꞌa: —Jodio dejja cuaa miya quecua sa acani. Ojjaña pojjajo, mecajje peaꞌai ohuaya cuiñajji esecue jjani pejjejo miya ishoaꞌajja ca ani ecuiaꞌyojji —acanaje. 
\p  
\v 25 Jamajjeya oe mecajje oja epeejji cuaa Sanoni quehua poqui mee caꞌyonaje. Eꞌe, cuiñajji mei jiyo aoꞌao biajje oya cuana jaasohuaquinaje. Jomajo Sanoni jjepai aijo jjabioquinaje. Majoya oja epeejji cuaa oya jjapashineijje jeaoquea caꞌyonaje meshi yasijje, cuiñajji secue yasijje. Majoya Sanoni Jenosanena huasijje poquiꞌyonaje. 
\p  
\v 26 Jamajjeya Jenosanena huasijje poquiꞌyo majje Sanoni Jesosaja epeejji cuana nijje jjapeequi sa poanaje. Jamatii Sanoni Jesosaja epeejji pojjeama poso acanaje cuaa. Ojo quea mete nee nee poanaje: “Eya iña ca chanaꞌ” poanaje cuana.  
\v 27 Majoya Jesosaja epeejjiya Benabeya Sanoni dojo canaje Jesosaja huoojeaꞌyo esohui huohuijji cuana huasijje. Oya cuana huohui canaje jama baꞌa: —Epeejji cuana, ¡aꞌa quea mete pojji Sanonijo! Eꞌe, jiquio Sanoniya ejiojjijje poquijeya Emeshi Mese nei Jesosa ba canaje. Jesosa onijje miminaje peaꞌai. Majoya ohuaya Jesosaja esohui huohui neinei canaje Damasicojo nequiya —acanaje Benabeya. 
\p  
\v 28 Jamajjeya Sanoni Jesosaja huoojeaꞌyo esohui huohuijji cuana nijje baꞌenaje. Ohuaya onijjeya Jenosanenajo meteꞌama huohui mee canananaje Jesosaja esohui.  
\v 29 Jomajo yaninaje Jodio cuana Jienoja esohuijo mimiani. Sanoni ona nijje mimiquinaje quea huiso. Jesosaja esohui huohui canaje. Maaya mimicuiajeanobiajea sa acanaje Sanoni. Sanoni nijje quea quene nee nee po majje oya cuiajea sa acanaje Jesosaja esohui huohui cajo.  
\v 30 Maya ba majje Sanonija epeejji cuaa oya dojo canaje Sesanea cuiñajji yasijje. Majoya oya huoojea canaje quea huesha nee, oja cuiñajji yasijje, Tanaso huasijje bishejo. 
\p  
\v 31 Majoya Jodea meshijo, Janinea meshijo, Samania meshijo peaꞌai pea cuana Jesosaja epeejji cuana nijje quea bei poanaje. Napa pajea canaje. Jamajjeya quea huiso nee nee Jesosa nijje jjapeequiꞌyonaje. Edojjoshahua Pameya oya cuana baꞌe meesahua canaje. Ojjaña cuana Emeshi Mese Jesosaja esohui jayojja jama baꞌenaje quea jaꞌa nee nee. 
\s1 Peno poquinaje Nida cuiñajji yasijje, Jope cuiñajji yasijje peaꞌai 
\p  
\v 32 Majoya Peno ojjaña cuiñajji yasijje poquinaje Jesosaja epeejji cuana baa. Nida huasijje poquinaje Jesosaja epeejji cuana nijje jjapeequiya, esohui huohuiya peaꞌai.  
\v 33 Jomajo Penohua pea dejja ba canaje, Eneasi bajjani. Eneasi aje oe jeoꞌajja. Oya ejaa jaanaje me oejje pea beca peejjima shequiajame, 8 shequiajame.  
\v 34 Jamajjeya oya ba majje Penohua huohui canaje jama baꞌa: —Eneasi, Jesosaa miya jeo mee cajeꞌyo. ¡Nequisohuacue! ¡Miquea ejaajji bebocue! 
\p Jjeyahua nei Eneasi nequisohuanaje. Quea jaꞌa nee nee poanaje, de.  
\v 35 Ojjaña cuaa Nidajo baꞌeya, Sanohuijo baꞌeya peaꞌai Eneasi ba canaje jeojeoꞌyonaje. Jamajjeya quea huiso nee Jesosa nijje jjapeequiꞌyonaje. 
\s1 Tabita manoꞌyo majje shequi oꞌoyanaje 
\p  
\v 36 Jope cuiñajjijo epona tii Tabita bajjani baꞌya poa, Ese Ejja esohuijo ca ca oya Docuei bajjani. Oya Jesosaja epeejji nei. Tabitaa quea pame nee atiitii canaje. Aemaꞌ cuana baꞌe meesahua canaje peaꞌai.  
\v 37 Tabita aje quea mano poanaje. Manoꞌyonaje. Epeejji cuaa oya shacua caꞌyonaje. Majoya jaahuana canaje eyajo jaa equecuayijji yasijje.  
\v 38 Jope, Nida quea chipi nee, hueshaꞌama. Jamajjeya Jesosaja epeejji cuana Jopejo baꞌeya shajjaꞌajja canaje Peno Nidajo nequi. Jamajjeya beca dejja huoojea canaje Peno que. Jama huohuime acanaje baꞌa: —Peno, ¡poecuajicue ecuana nijje Jope yasijje! 
\p  
\v 39 Jamajjeya shajjaꞌajja majje Penohua ojaya aquiana bio canaje. Ona nijje poquinaje Jope yasijje. Jope yasijje poeꞌyajo ojjaña cuana nijje oya sohuaquinaje eya equecuayijji yasijje Tabita baa. Ojjaña eꞌahuemano cuaa pa neineianiya Peno ocuee canaje. Tabitaja soco ba mee canaje. Ojo jama huohuime acanaje baꞌa: —¡Bacue, Peno! Eshe anijo Tabitaa ecuanaja daqui eyami, daqui nei peaꞌai quea huiso soco canaje. ¡Bacue ojaya esipiꞌyo ecuanajaya peaꞌai! —acanaje cuaa. 
\p  
\v 40 Majoya Penohua ojjaña cuana huoojeacuayajea canaje esecue yasijje. Ecuiꞌoshajjajo nequi majje Eyacuiñajji nijje miminaje. Eyacuiñajji nijje mimi majje epona emanoꞌyojaa nijje miminaje jama baꞌa: —¡Tabita, shequiꞌyocue! ¡Nequisohuaꞌyocue miya! 
\p Shequiꞌyo majje Tabita jjabapojjaquiꞌyonaje. Peno ba majje anisohuanaje.  
\v 41 Majoya Penohua Tabita me iña majje nequisohua meesahua caꞌyonaje. Tabita nequisohua meesahuaꞌyo majje Penohua Jesosaja epeejji cuana, eꞌahuemano cuana peaꞌai esecuejo nequi iyaa canaje Tabita bajji. Jama acanaje baꞌa: —¡Dobicue! ¡Miquea epeejji Docuei bahuacue! Shequiꞌyonaje, Jesosaa oya shequi mee caꞌyonaje. 
\p  
\v 42 Ma shajjaꞌajja majje quea huiso nee Jopejo baꞌe Jesosa nijje jjapeequiꞌyonaje.  
\v 43 Jamajjeya Peno Jopejo nequinaje quea cahui huiso. Dejja Simono bajjani nijje baꞌenaje, ijjiacajji jee chacojji nijje. 
\c 10  
\s1 Penohua Jodio pojjeama huasijje esohui huohui canaje, Conenio huasijje 
\p  
\v 1 Eꞌe Teopino, eyaya, Nocaa jiquio pea esohui tehueaña miquea ebajji. Esohui eꞌe nei Jesosaja epeejji cuanajo tehueaña jama baꞌa: Oe dejja Conenio bajjani Sesanea cuiñajjijo baꞌenaje. Oya Jodio pojjeama, Shomano dejja, quea huiso nee sohuinano huoojeajji poani, ma bajjani baꞌa: Itaniano sohuinano cuana.  
\v 2 Jamatii Conenio quea pame nee. Ojaya huapa pojjeama cuana nijje Eyacuiñajjija esohui jayojja jama baꞌe sa poani. Eꞌe, ohuaya aemaꞌ cuana baꞌe meesahua canaje; quea huiso aquiana quia canaje sosemaꞌ. Eyacuiñajji nijje mimi majamajanaje peaꞌai.  
\v 3 Oe pojjajo eshequi jjanequijeapaaquiajo Eyacuiñajjiya Conenio jjacahuibaqui mee canaje jama baꞌa: Cahuiba canaje Eyacuiñajjija esohuidojojji o que poe majje onijje miminaje jama baꞌa: —¡Conenio, shajjaꞌajjacue mo! 
\p  
\v 4 Esohuidojojji ba majje Conenio quea ajjajja nee jama poanaje baꞌa: —¿Yajja? ¿Ae sa poani miya? ¡Huohuicue mo! 
\p Esohuidojojjiya oya jama acanaje baꞌa: —Eyacuiñajjiya miquea emimi cuana onijje shajjaꞌajja canaje. Miya aemaꞌ cuana huasijje aquiana quiaña sosemaꞌ ojaya eba peaꞌai. Jamajjeya minijje quea bihui nee poani.  
\v 5 Jamajjeya ¡jjeya nei beca dejja huoojeacue Jope yasijje! Jomajo oe dejja Simohui Peno bajjani enequi. ¡Peno jjequi meecue!  
\v 6 Oya Peno Simonoja equijo baꞌyani, ijjiacajji jee chacojji poanija equijo. Ojaya equi bae ai sahuajo ani —acanaje Eyacuiñajjija esohuidojojjiya. Jamaya Conenio jjacahuibaquinaje. 
\p  
\v 7 Majoya esohuidojojji poquiꞌyonaje. Conenio shequiꞌyonaje. Shequiꞌyo majje ojaya echacosahuajji beca iyaa canaje. Oe Sohuinano ojaya epeejji quea pame nee iyaa canaje, ma Eyacuiñajji nijje mimiani peaꞌai.  
\v 8 Eyacuiñajjija esohuidojojjija esohui onijje Coneniohua huohui canaje. Majoya oya cuana huoojea canaje Jope yasijje. 
\s1 Penohua cahuiba canaje 
\p  
\v 9 Jamajjeya Conenioja epeejji cuana Jope yasijje poquinaje. Pea pojjajo eshequi biacojjajja nequijo Jope ba cañaquinaje quea chipi nee. 
\p Peno ca ca Jopejo Simonoja equijo nequi equi jamacoo huasijje jaasohuaquinaje Eyacuiñajji nijje mimiya.  
\v 10 Eshequi biacojjajja nequijo Peno quea shoe nee poanaje. Bobi ijjia sa poanaje. Onaa Penoja bobi cuacua canijo, Penohua ishoaꞌajja ca aninaje bobi. Majoya equi jamacoojo jaa cahuinaje. Eyacuiñajjiya oya jjacahuibaqui mee canaje jama baꞌa:  
\v 11 Esecue quea quemo jayojja ba canaje eyajo. Esecue ecaꞌapejo nequi. Aquiana equipajaajji quea quemo jayojja ba canaje, jjapashineijje jeaoquea canaje o que, jjono eyichijjo jayojjajo.  
\v 12 Ma equipajaajjijo ojjaña ijjiacajji cuana, peyo cuana, ojjaña cuichojji cuana peaꞌai ba canaje, eshe, de. Jamaya jjacahuibaqui mee canaje peaꞌai baꞌa:  
\v 13 Eyajo Jesosa Peno nijje miminaje jama baꞌa: —Peno, ¡nequisohuacue! ¡Ijjiacajji cuana, peyo cuana, cuichojji cuana peaꞌai quecuacue eꞌijjiajji! —poanaje. 
\p  
\v 14 Penohua ca ca jama acanaje baꞌa: —Emeshi Mese Jesosa, chojja. Eya ijjia sa poꞌyo ajja ma aquiana cuana. Peajja, de. Yahuajo ecuanaja etiiquiana cuanaja esohui jayojja jama poanijo ma aquiana cuana ecuea ijjia jjima. Eya coma ijjia sa poꞌyo ajja nei nei —poanaje Peno. 
\p  
\v 15 Eyajo Jesosaa Peno huohui ca oꞌoyanaje jama baꞌa: —Eyacuiñajjiya ojjaña bobi quea pame po mee caꞌyonaje. Jamajjeya ¡aꞌa jama pojji baꞌa: “Jiquio bobi peajja, coma ijjia ajja ca iña” aꞌa pojji, Peno! —Jesosa poanaje. 
\p  
\v 16 Jamaya Jesosaa Peno pea beca peejjima huohuiꞌyome acanaje, oya jayojja huohuiꞌajja oꞌoyame acanaje Peno ecahuijaa. Majoya equipajaajji jjequisohua caꞌyonaje eyahuasijje. 
\p Jamaya jjacahuibaquime meeya Peno Jesosaa acanaje ejjabahuejjaqui meejji jama baꞌa: Jodio pojjeama cuana Jodio cuana jayojjaya Eyacuiñajjija quea jea nee. Oya cuana peaꞌai Jesosa nijje jjapeequi meesahua cajeꞌyo, mimishi cuijea cajeꞌyo peaꞌai. 
\p  
\v 17 Jamajjeya shequiꞌyo majje Peno jjashahuabaqui aninaje jama baꞌa: —¿Ajeo shai iña Jesosaa jjacahuibaqui mee canaje? ¿Ae shai ohuaya eya ba mee sa acani? 
\p Peno jamaya jjashahuabaquianijo, Conenioja echacojji cuana poeyanaje Jope yasijje. Simonoja equi saꞌajja canaje.  
\v 18 Ba majje esecue yasijje poeyanaje. Secuejo nequi taaanaje jama baꞌa: —¿Aꞌa Simohui Peno yani jiquiojo? 
\p  
\v 19-20 Peno ma ohua cahuiba canajejo jjashahuabaquianijo, Edojjoshahua Pameya oya huoojea canaje jama baꞌa: —Peno, ¡shajjaꞌajjacue! Pea beca peejjima dejja poeyanaje mi baa. ¡Jamajjeya nequisohuacue; jaaoquequicue; oya cuana baquicue esecue jjanijo nequi! ¡Onijje poquicue, Peno! ¡Aꞌa quea mete pojji! Eyaya oya cuana huoojeanaje mi dojohua. 
\p  
\v 21 Jamajjeya Peno jaaoquequinaje ma dejja cuana baa. Huohuiꞌajja cañaquinaje jama baꞌa: —Eꞌe. ¿Aꞌa miyaya eya saꞌajjaña? Quioya iña. ¿Apiojji acuaeya iña saꞌajjaña? ¿Ajeo acuae mi poeyanaje soꞌo? 
\p  
\v 22 Onaaya Peno huohui canaje jama baꞌa: —Coneniohua, ma sohuinano cuana huoojeajji poaniya Sesaneajo baꞌeya ecuana huoojea canaje. Ohuaya quea pame nee acani, Eyacuiñajjija esohui jayojja jama acani. Oya ojjaña Jodio cuanaja quea boti nee. Eyacuiñajjija esohuidojojji onijje miminaje jama baꞌa: “¡Dejja cuana huoojeacue Jope yasijje Peno jjequiya! ¡Peno miquea equi yasijje jjequicue! ¡Penoja esohui shajjaꞌajja neineicue miquianaaya o poeyajo!” poanaje esohuidojojji —Conenioja epeejjiya Peno acanaje. 
\p  
\v 23 Jamajjeya Penohua oya cuana iyaa canaje esecuejo nequi: —Eꞌe, ¡dobicue! ¡Jiquiacua cahuicue ecuana nijje! —poanaje. Jomajo oya cahui oe poanaje. 
\s1 Peno Conenioja equi yasijje poquinaje esohui huohuiya 
\p Mecajjeahua nei shequi majje Peno poquinaje Conenioja epeejji cuana nijje Sesanea huasijje. Pea Jesosaja epeejji Jopejo baꞌe poquinaje peaꞌai.  
\v 24 Sesaneajo ca ca Coneniohua oya cuana ishoaꞌajja ca aninaje. Ojjaña ojaya huapa pojjeama cuana, ojaya epeejji cuana peaꞌai iyaa canaje ojaya equi yasijje Peno ishoaꞌajjajji. Jamajjeya beca cahuime po majje Penohua Sesanea ba cañaquinaje.  
\v 25 Conenioja equi yasijje poeyajo, Conenio equijo ani cuayaquinaje o baa. Ecuiꞌoshajjajo nequi majje Peno bihuia canaje, ohuaya.  
\v 26 Penohua ca ca oya jama acanaje baꞌa: —¡Dee! ¡Nequisohuacue oe, miya! Eya aje dejja peaꞌaiya, mi jayojjaya. ¡Aꞌa jja oe eya bihuiajji! —Peno poanaje. 
\p  
\v 27 Conenio nijje mimimimiqui tii Peno dobiquinaje equi yiyedojjo huasijje. Eyiye dojjojo quea huiso ejjachichaqui nequi ba cañaquinaje.  
\v 28 Majoya ojjaña ba majje Penohua huohui canaje jama baꞌa: —¡Bacue! Yahuajo Jodio cuaa huohui ca poa jama baꞌa: “Jodio cuana, ¡aꞌa dobiquijji Jodio pojjeamaja equi yasijje! ¡Aꞌa ona nijje ijjiaꞌijjiajji!” Jamaya yahuajo nei Jodio cuana poa. Maya miquianajaya eba. Jamatii Eyacuiñajjiya eya ba mee canaje jama baꞌa: “¡Aꞌa Jodio pojjeama quea tai poso ajji!” jamaya eya acanaje Eyacuiñajjiya —Peno poanaje. 
\p  
\v 29 —Jamajjeya miquianaaya eya iyaanajejo eya quea bihui nee poeyanaje miquiana baa. Eꞌe. Jamajjeya ¿ae sa poani miya? ¿Apiojji acuae iña iyaanaje soꞌo? —Peno poanaje. 
\p  
\v 30 Coneniohua Peno jama acanaje baꞌa: —Peno, yahuajo Eyacuiñajjija esohuidojojji enijje miminaje. Eꞌe, ebeca pee peaꞌai cahuime yahuajo eshequi oya jayojja nequijo eya Eyacuiñajji nijje mimi nequinaje tii tii equijo. Eshequi jjanequijeapaaquianijo oe dejja jjanequipanaquinaje. Oja daqui quea jeajahua nee nee poanaje.  
\v 31 Oya enijje miminaje: “Conenio, Eyacuiñajjiya miquea emimi shajjaꞌajja canaje. Miya aemaꞌ cuana bobiaña ba canaje peaꞌai. Miya ojaya quea boti nee.  
\v 32 Jamajjeya ¡beca dejja huoojeacue Jope yasijje! ¡Dejja Simohui Peno bajjani iyaa meecue! Oya Peno pea dejja bajjani Simono nijje nequi, ijjiacajji jee chacojji poani nijje nequi, bae ai sahuajo baꞌe nijje nequi” jamaya eya acanaje esohuidojojjiya.  
\v 33 Jamajjeya ma shajjaꞌajja majje jjeyahua nei eyaya beca dejja huoojeanaje mi jjequiya. Mi poeyajo eya quea bihui nee poanaje. Eyacuiñajjija eba ecuana quea huiso jjachichaquinaje miquea esohui shajjaꞌajjaa. Eꞌe, ecuaaya Eyacuiñajjija esohui shajjaꞌajja sa aña. Jamajjeya ¡ojjaña Eyacuiñajjija esohui ecuana huohuicue jjeya nei, ma ohua mi huohui canaje ecuana huohuijji! —Conenio poanaje. 
\s1 Penohua esohui huohui canaje Conenioja equijo 
\p  
\v 34 Jamajjeya Penohua huohui canaje jama baꞌa: —Eꞌe de. Jjeya ecuea eba Eyacuiñajjiya ojjaña cuana quea jea nee acani. Jodio pojjeama Jodio cuana jayojjaya jama acani eꞌe jojo nei, Eyacuiñajjiya.  
\v 35 Eꞌe, ojjaña joya quea pame baꞌyani, Eyacuiñajjija esohui jayojja jama poani peaꞌai ohuaya jaahuana cani, ojjaña cuana ojjaña meshijo baꞌe, ojjaña pea mimime poani peaꞌai —Penohua acanaje. 
\p  
\v 36 —Conenio, miquea eba Eyacuiñajjiya Isaeni dejja cuana huasijje ojaya esohui quea pame nee Jesosa Quitoja huohui ca poa jama baꞌa: “Emeshi Mese nei Jesosa Quito nijje jjapeequianijo, Eyacuiñajji ojjaña nijje quea bei poajeꞌyo, mimishi cuijeaꞌyo majje”. Jamaya aca poa cuaa yahuajo nei —Peno poanaje—.  
\v 37 Eꞌe Conenio, miquea eba peaꞌai Huaniya, ma Eyacuiñajjijo ebesameejji poaniya huohui canaje jama baꞌa: “¡Miquea mimishi pajeaꞌyocue! ¡Eyacuiñajjijo besacue!” acanaje Huaniya. Ohuaya Jesosa besa mee canaje peaꞌai. Majoya Jesosaa Janinea meshijo, ojjaña cuiñajjijo Jodioja meshijo sohuihuohui canaje; quea pame nee acanaje peaꞌai.  
\v 38 Jama poanaje baꞌa: Eyacuiñajjiya Jesosa Nasanenajo baꞌe que Edojjoshahua Pame huoojea canaje, dobiqui mee caꞌyonaje. Jesosa quea caꞌa nee nee po mee canaje. Ma dejjaa ajjima acani quea huiso nee quea pame nee nee ameesahua canaje. Jesosaa poquijeya quea huiso nee nee emanojaa cuana huaquia mee caꞌyonaje. Eshahua cuana dejjajo nequi huoojeacuayajea mee caꞌyonaje Jesosaa Eyacuiñajji nijjeya —Penohua acanaje—.  
\v 39 Eꞌe Conenio, Jesosaa quea pame nee acani ecuaaya, ojaya epeejji cuaa banaje. Onijje poquinaje ojjaña Jodio meshi yasijje, Jenosanena huasijje peaꞌai. Jamatii pea cuaa Jesosa quea mimishi acaꞌyonaje. Acui ecueataꞌapeejo baꞌehuanasohuajea caꞌyonaje emanoꞌyojji.  
\v 40 Jamatii Jesosa manoꞌyajo, pea beca peejjima cahuime epo jaa Eyacuiñajjiya oya shequi mee ca oꞌoyanaje. Majoya Eyacuiñajjiya oya ecuana huasijje huoojea ca oꞌoyanaje. Eꞌe, ecuaaya oya banaje eshe oꞌoya.  
\v 41 Ojjaña dejja cuanaja oya ba oꞌoya jjima. Ecuanaaya, ma Eyacuiñajjiya yahuajo babaca ca poaa oja esohui huohuijji poaniya ca ca oe ecuanaaya Jesosa ba oꞌoyanaje. Shequi oꞌoya majje oya ecuana nijje ijjiaꞌijjianaje, ena ishi canaje peaꞌai.  
\v 42 Majoya ohuaya ecuana huoojea canaje ojaya esohui huohuiya ojjaña cuana huasijje. Jama huohuime aña baꞌa: “Quijje Eyacuiñajjiya Jesosa huoojea caje oꞌoya. Jesosaa poe oꞌoya majje ojjaña sosequia cajeꞌyo ma eseya manoꞌyo jjimahua aninaje poa sosejje. Eꞌe, ojjaña eshe nequi cuana, ojjaña yahuajo nei manoꞌyo peaꞌai ohuaya sosequia cajeꞌyo ma eseya manoꞌyo jjimahua aninaje poa sosejje. Ojjaña joya quea pame baꞌya poa quea bihui nee baꞌe tiitii mee cajeꞌyo eyajo onijje. Mimishi cuana ca ca quea nee nee po mee cajeꞌyo tii tii.  
\v 43 Eꞌe Conenio, yahuajo nei nei Jesosa poe jjimahuajo Eyacuiñajjija esohui huohuijji cuaa Jesosajo huohui ca poa jama baꞌa: 
\q1 “Oya quea pame nee nee, quea caꞌa nee nee poanijo, ojjaña joya onijje jjapeequiani Eyacuiñajjiya mimishi cuijea cajeꞌyo. Jamajjeya oya cuana cuaqui yasijje poquiꞌyo ajja manoꞌyo majje”. 
\m Jamaya yahuajo nei Jesosajo tehue ca poa cuaa —jamaya Penohua esohui huohui canaje. Ojjaña cuaa Conenioja equijo nequiya shajjaꞌajja canaje. 
\s1 Edojjoshahua Pame Jodio pojjeama huasijje dobiquiꞌyonaje 
\p  
\v 44 Penohua sohuihuohui canijo tii, Edojjoshahua Pame Conenio que, ojaya epeejji cuana que peaꞌai dobiquiꞌyonaje, ma Penohua sohuihuohui cani yasijje.  
\v 45 Eꞌe, Eyacuiñajjiya Edojjoshahua Pame huoojea caꞌyonaje Jodio pojjeama cuana huasijje. Ma ba majje Jodio cuana Peno nijje nequi jjajjasoaquinaje: —Eꞌe de, Eyacuiñajjiya Edojjoshahua Pame huoojea caꞌyonaje Jodio pojjeama huasijje peaꞌai —poanaje Jodio cuana ma Peno nijje poquinaje. 
\p  
\v 46 Eꞌe, Jodio cuaa Conenio shajjaꞌajja canaje Eyacuiñajji bihuia cani, de, pea mimiꞌyome poanaje peaꞌai.  
\v 47 Jamajjeya Penohua jama acanaje baꞌa: —Yahuajo Eyacuiñajjiya Edojjoshahua Pame ecuana huasijje huoojea canaje jayojja jama jjeya ohuaya Edojjoshahua Pame jiquio dejja cuana huasijje huoojea canaje peaꞌai. Jamajjeya ecuanaaya oya cuana Eyacuiñajjijo cabesa meeꞌyahua ena huasijje, ¿aꞌa eꞌe? —Penohua acanaje. 
\p  
\v 48 Jamajjeya Penohua pea cuana huoojea canaje Jesosa Quitoja epeejji ma jjeya nei onijje jjapeequinaje besa meeya Eyacuiñajjijo. Majoya Conenio, oja epeejji cuana peaꞌai miminaje Peno nijje. Jama poanaje baꞌa: —Peno, ¡che ecuana nijje nequicue, esohui ba meesahuacue! —acanaje. 
\p Jamajjeya Peno onijje nequinaje. Majoya quijje pishana Peno poquiꞌyonaje Jenosanena huasijje. 
\c 11  
\s1 Penohua Jesosaja epeejji cuana Jenosanenajo baꞌe huohui canaje Coneniojo, Jodio pojjeamajo 
\p  
\v 1 Jamajjeya Jesosaja huoojeaꞌyo esohui huohuijji cuaa, ojjaña Jesosaja epeejji cuaa Jodea meshijo baꞌeya peaꞌai shajjaꞌajja canaje Coneniojo. Ojjañaa jama acanaje baꞌa: —Jodio pojjeama cuaa peaꞌai Eyacuiñajjija esohui shajjaꞌajja caꞌyonaje; jamaya acaꞌyonaje quea bihui nee, de —acanaje cuaa. 
\p  
\v 2-3 Jamajjeya Peno Jenosanena huasijje poqui oꞌoyajo, beca Jodio cuana onijje mimijajinaje jama baꞌa: —Peno, ¿apiojji miya Jodio pojjeama cuanaja equi yasijje dobiquinaje soꞌo? Eꞌe, miya ca ca oe Jodio pojjeama cuana nijje ijjiaꞌijjianaje peaꞌai. ¿Apiojji? Jamaya pojjeama esejaya etiiquianaja esohui. Oya cuanaja cuiishasha biso nei ejehuisejjajeaꞌyo pojjeamajo oya peajja, de —poanaje Jodio cuana. 
\p  
\v 4 Jamajjeya Penohua oya cuana huohui canaje ojjaña joya Eyacuiñajjiya Jodio pojjeama cuanajo acanaje.  
\v 5 Jama acanaje baꞌa: —Ecuea epeejji cuana, eya Jopejo nequi Eyacuiñajji nijje mimi aninaje. Eyacuiñajiiya eya jjacahuibaqui mee canaje jama baꞌa: Ijjiacajji cuana aquiana cuana quibi jayojjajo iya majje jeaoquea canaje e que, jjonojo.  
\v 6 Ma quibi dojjojo eyaya banaje ojjaña ijjiacajji cuana, peyo cuana, ojjaña cuichojji cuana peaꞌai.  
\v 7 Eya jjacahuibaqui mee canaje jama baꞌa: Eyajo Jesosa enijje miminaje jama baꞌa: “Peno, ¡nequisohuacue! ¡Ijjiacajji cuana, peyo cuana, cuichojji cuana peaꞌai quecuacue eꞌijjiajji!” acanaje.  
\v 8 Jamatii eyaya sajaꞌanaje jama baꞌa: “Jesosa, chojja, eya ijjia sa po ajja ma aquiana cuana. Peajja, de. Yahuajo ecuanaja etiiquiana cuanaja esohui jayojja jama poanijo ma aquiana cuana ecuea ijjia jjima” eya poanaje.  
\v 9 Majoya Jesosa enijje mimi oꞌoyanaje: “Eyacuiñajjiya ojjaña aquiana cuana quea pame nee po mee caꞌyonaje. Jamajjeya ¡aꞌa miya jama pojji baꞌa: —¡Jiquio aquiana cuana peajja, coma ijjia ajja ca iña! —aꞌa pojji, Peno!” acanaje Jesosaa eya ecahuijaa.  
\v 10 Jamaya eya huohui huichaꞌa huichaꞌa canaje, pea beca peejjima huohuime acanaje. Majoya ojjaña jjequisohua caꞌyonaje eyahuasijje. 
\p  
\v 11 —Majoya pea beca peejjima dejja ecuea equi yasijje poeyanaje. Oya cuana Sesaneajo baꞌe o chacomeejjiya huoojea canaje e dojohua.  
\v 12 Edojjoshahua Pame enijje miminaje jama baꞌa: “¡Ona nijje poquicue meteꞌama!” Jamajjeya eya poquinaje Sesanea huasijje. Jiquio Jesosaja epeejji me oejje oe huisome enijje nequi poquinaje peaꞌai enijje. Ecuana Conenioja equi yasijje dobiquinaje.  
\v 13 Majoya Coneniohua ecuana huohui canaje jama baꞌa: “Eyacuiñajjija esohuidojojji ecuea equijo jjanequipanaquinaje. Enijje miminaje. Jama poanaje baꞌa: —¡Beca dejja huoojeacue Jope yasijje Simohui Peno jjequiya!  
\v 14 Ohuaya miquianaya sohuihuohui caje. ¡Ojaya esohui jama acue! Jamajoya Eyacuiñajjiya miquianajaya mimishi cuana cuijea cajeꞌyo; onijje baꞌe tiitii mee cajeꞌyo eyajo miya, miquea huapa pojjeama cuana peaꞌai —eya acanaje esohuidojojjiya” jamaya Coneniohua eya huohui canaje —Peno poanaje—.  
\v 15 Eya Conenio sohuihuohuiꞌanijo tii Edojjoshahua Pame ojjaña cuana huasijje dobiquiꞌyonaje. Eꞌe, ma ecua eseya yahuajo acanaje jayojja jama oya cuana acaꞌyonaje.  
\v 16 Majoya eyaya niñebaꞌyonaje esejaya Emeshi Mese nei Jesosaja esohui yahuajo jama baꞌa: “Ena huasijje ca ca oe Huaniya miquianaya besa mee canaje Eyacuiñajjijo. Quijje ca ca eyaya miquiana que Edojjoshahua Pame dobiqui meejeꞌyo Eyacuiñajji nijje epoꞌyojji tii tii” poanaje Jesosa yahuajo —Penohua acanaje—.  
\v 17 Eꞌe, Jesosa Quito nijje jjapeequianijo, Eyacuiñajjiya Edojjoshahua Pame huoojea canaje ese que. Oya jayojjaya jjeya Jesosa Quito nijje jjapeequianijo, Eyacuiñajjiya Jodio pojjeama cuana huasijje Edojjoshahua Pame huoojea caꞌyonaje peaꞌai. Eyacuiñajjiya quea pame nee nee acani tii tii. Jamajjeya eya ca iña Eyacuiñajji huoojeaꞌyojji pojjeama. Eyaya oya huohuiꞌyo ajja jama baꞌa: “¡Aꞌa Jodio pojjeama huasijje Edojjoshahua Pame huoojeaꞌyojji!” Chojja, jamaya eyaya Eyacuiñajji huohui ajja, de. Eya Eyacuiñajjija echacojji, de, ojaya esohui jayojja jama aña eyaya —Peno poanaje. 
\p  
\v 18 Jamajjeya Penoja esohui shajjaꞌajja majje Jodio cuana Peno nijje mimijaji pajeaꞌyonaje; Eyacuiñajji bihuia caꞌyonaje jama baꞌa: —Eꞌe, jamajjeya Eyacuiñajjiya Jodio pojjeama cuana mimishi pajea meesahua cani. Jesosa nijje jjapeequi meesahua cani peaꞌai. Jodio pojjeama cuanaja mimishi cuana cuijeaꞌyo majje oya cuana baꞌe tiitii mee cajeꞌyo eyajo onijje peaꞌai —poanaje ojjaña cuana. 
\s1 Jesosaja epeejji cuana Atioquia cuiñajjijo baꞌe 
\p  
\v 19 Eꞌe, yahuajo Jodio etii cuaa Jesosaja epeejji Estema sapa jajahuejjajeaꞌyo majje ojjaña Jesosaja epeejji cuana napa majamaja canaje peaꞌai. Jamajjeya ojjaña Jesosaja epeejji cuana quea huiso meshi yasijje quehua poquinaje quea mete jjejojo. Beca cuana quea huesha nee poquinaje Penisia meshi yasijje, Atioquia cuiñajji yasijje peaꞌai. Pea cuana Chipe nasi yasijje besapoquinaje bishejo. Poquijeya Eyacuiñajjija esohui huohui capoquinaje Jodio cuana huasijje. Jodio pojjeama cuana huasijje ca ca Jesosaja esohui huohui jjima acapoquinaje.  
\v 20 Majoya Jesosaja epeejji Chipe nasijo baꞌe, Sinene meshijo baꞌe peaꞌai poquinaje Atioquia cuiñajji yasijje. Jomajo ohuaya Jodio pojjeama cuana huasijje peaꞌai Eyacuiñajjija esohui quea pame nee Jesosajo huohui canaje.  
\v 21 Emeshi Mese nei Jesosaa oya cuana esohui huohui meesahua canaje. Jamajjeya quea huiso cuana Jesosaja esohui shajjaꞌajja majje onijje jjapeequiꞌyonaje, quea huiso nee nee.  
\v 22 Ma shajjaꞌajja majje Jesosaja epeejji Jenosanenajo baꞌeya Jesosaja epeejji etii Benabe bajjani huoojea canaje Atioquia huasijje Jesosaja epeejji cuana baa.  
\v 23 Atioquia huasijje poe majje Benabeya ba cañaquinaje Eyacuiñajjiya Jodio pojjeama quea jea nee acanaje eꞌe jojo nei. Jamajjeya Benabe quea bihui nee poanaje. Jesosaja epeejji eyacua cuana jama huohuime acanaje baꞌa: —Eꞌe, jamaya. ¡Eyacuiñajjija esohui jayojja jama atiitiicue! ¡Aꞌa oya pajeaꞌyojji! ¡Onijje jjapee tiitiiquicue! 
\p  
\v 24 Benabe Jesosaja epeejji quea pame nee. Edojjoshahua Pameja ejjashahuabaquijji jayojja jama acanaje tii. Jesosaja esohui jayojja jama atiitii canaje. Jamajjeya quea huiso cuana Emeshi Mese nei Jesosaja epeejji poanaje Benabeja esohui shajjaꞌajja majje. 
\p  
\v 25 Majoya Benabe poquiꞌyonaje Tanaso cuiñajji yasijje Sanoni saꞌajjaꞌyohua.  
\v 26 Ba majje ohuaya Sanoni jjequi canaje Atioquia huasijje onijje esohui huohuijji. Jomajo Atioquiajo oya cuana nequiꞌyonaje Jesosaja epeejji cuana nijje oe shequiajame. Quea huiso nee nee Jesosaja esohui huohui majamaja canaje jomajo. Majoya Atioquiajo pea cuaa Jesosaja epeejji cuana bajjani canaje Quitoja epeejji, Quitiano cuana bajjani acanaje. 
\p  
\v 27 Majoya pea Jesosaja esohui huohuijji cuana Jenosanenajo baꞌe poquinaje Atioquia huasijje.  
\v 28 Majoya ojjaña Jesosaja esohui shajjaꞌajjaa jjachichaquinaje. Oe esohui huohuijji Ajamo bajjani nequisohuanaje. Eyacuiñajjija Edojjoshahua Pameya oya huohui meesahua canaje. Jamajjeya Ajamohua huohui canaje jama baꞌa: —Quijje pishana ojjaña meshijo ojjaña cuana quea shoe nee nee poajeꞌyo. Bobi chamaꞌ poajeꞌyo —jamaya ojjaña acanaje, Ajamohua. (Quijje pishana pea shequiaja po majje eꞌe jojo nei jamaya poanaje. Bobi chamaꞌ poanaje. Quea huiso nee quea shoe nee nee poanaje Shomano dejja Canio bajjani emeshi mese nequijo.) 
\p  
\v 29 Jamajjeya Ajamoja esohui shajjaꞌajja majje Jesosaja epeejji cuaa huohui canaje jama baꞌa: —Eꞌe, ecuaaya Jesosaja epeejji cuana huasijje Jodea meshijo baꞌe yasijje bejjo huoojeaje o baꞌesahuajji —poanaje. 
\p Jamajjeya aquiana cuana, bejjo peaꞌai chicha canaje. Beca cuaa oe pojji quia canaje. Pea cuaa joya quea aquiana huiso neeya quea huiso bejjo quia canaje.  
\v 30 Jamajjeya quijje quea huiso bejjo chicha majje huoojea canaje Benabe nijje, Sanoni peaꞌai nijje. Eꞌe, ohuaya bejjo dojo canaje Eyacuiñajjija epeejji etii yasijje equiaꞌyojji ojjaña Jesosaja epeejji cuana huasijje. 
\c 12  
\s1 Jacobo jaja caꞌyonaje 
\p  
\v 1 Ecuea epeejji Teopino, eyaya, Nocaa pea esohui tehueaña Jesosaja epeejji cuanajo jama baꞌa: Pea Enode emeshi mese nequinaje. Ohuaya Jesosaja epeejji cuana napa caꞌyonaje quea huiso.  
\v 2 Huanija echahua mese Jacobo sapa jajasejjajea mee caꞌyonaje baa aiya, de Enodeya.  
\v 3 Jodio etii cuana quea bihui nee poanaje Jacobo quecua caꞌyajo. Ma ba majjeya Enodeya huohui cajo Peno iña canaje peaꞌai. Dojo canaje jeanobiaa, quijje equecuaꞌyojji. Jamaya poanaje ojjaña Jodio cuana jjachichaquinaje pahui shejjee mee jjima eꞌijjiajji, quea bihui epojji.  
\v 4 Eꞌe, ma shejo Enodeya Peno equi ejjajeanobiaquijji yasijje jeanobia canaje. Sohuinano quea huisohua Peno jaahuana mee canaje. Enodeya Peno jaja mee sa acanaje quijje, ojjaña Jodio cuana pahui shejjee jjima ijjia majje.  
\v 5 Jamajjeya Sohuinano cuaa Peno jaahuana neinei canaje ejeyoꞌyo jaa. Jamatii Jesosaja epeejji cuana Eyacuiñajji nijje mimi tiitiinaje Penojo: —Eyacuiñajji, ¡Peno jaahuanacue! ¡Aꞌa quecua meeꞌyojji! —amajamaja canaje epojjajo, mecajje peaꞌai. 
\s1 Peno ejeanobia jaa esecue yasijje dojocuayaqui caꞌyonaje esohuidojojjiya 
\p  
\v 6 Majoya Enodeya Peno ejjequicuayaquiꞌyojji nisho acanaje mecahuajje ejajajeaꞌyojji nisho. Peno ca ca cahuijaanaje beca sohuinano yiyesama neijo. Baa jjonoja jeyo jaanaje. Pea sohuinano cuaa ejjajeanobiaquijji esecuejo nequiya oya jaahuana neineiꞌajja canaje.  
\v 7 Mecashono Eyacuiñajjija esohuidojojji poquinaje Peno que. Ma equecuayijji jeajaꞌa cañaquinaje. Ohuaya Peno cuiapashi cañaquinaje eshequijji. Jama acanaje baꞌa: —¡Peno, shequicue! ¡Nequisohua cuajicue, miya! 
\p Jamajjeya baa jjono emejo baꞌe jjapichoqui mee caꞌyonaje, oquequi mee caꞌyonaje meshi yasijje.  
\v 8 Majoya esohuidojojjiya Peno jama acanaje baꞌa: —¡Daqui huoshocue! ¡Ejiojji shejee huoshocue peaꞌai! —jamaya Peno acanaje esohuidojojjiya. Jamaya poanaje Peno. Majoya ohuaya Peno huohui ca oꞌoyanaje: —¡Miquea equipajaajji bebocue! ¡E quishishijji poecue! —poanaje. 
\p  
\v 9 Jamajjeya Peno Eyacuiñajjija esohuidojojji quishishi poquinaje. Jamatii jjacahuibaquiani poso Peno poanaje baꞌa: —Eꞌe de, eya jjacahuibaquiani. Eꞌe pojjaꞌa esohuidojojji chamaꞌ, de —Peno poanaje. 
\p  
\v 10 Jamatii Penohua esohuidojojji quishishijji cuayaquijeya ebionei sohuinano epi nequi yejje canananaje. Jamatii ojaya Peno, esohuidojojji peaꞌai ba jjima poanaje. Mama pishana nequi pea ba canana oꞌoyanaje sohuinano. Yejje canana oꞌoyanaje. Ba jjima poanaje Peno, esohuidojojji peaꞌai sohuinanoja. Poquinaje baa cui esecue quea quemo huasijje. O poeꞌyajo jamatii jjacaꞌapejoquinaje. Esecue jjani yasijje cuayaquiꞌyonaje. Cuama pishana dojo majje esohuidojojjiya Peno jea canaꞌyonaje, ejiojjijo.  
\v 11 Majoya Peno jjashahuabaquinaje: ¿Aꞌa mo eshe, aꞌa mo jjacahuibaquiani pojjeama, de? Jjeya ecuea eba Emeshi Mese nei Jesosaa huoojea canaje ojaya esohuidojojji e dojocuayaquiꞌyohua. Mecahuajje Enodeya eya jaja caꞌyo queaye poanaje. Jodio dejja cuaa e quecuaꞌyojji nisho ishoaꞌajja canaje peaꞌai —Peno poanaje. 
\p  
\v 12 Majoya ma shahuaba majje Peno poquiꞌyonaje Maniaja equi yasijje, Huani Macosoja enaeseja equi yasijje. Joma equijo quea huiso Jesosaja epeejji cuana jjachichaqui majje mimi aninaje Eyacuiñajji nijje, Peno jaahuana meejji.  
\v 13 Penohua esecue jjani cuiaqueya cañaquinaje, epeeyijji esecue jjani. Oe epona ahuemaꞌ ani Shona bajjani poeyanaje aya esecue jjani cuiaqueya cani baa.  
\v 14 Ohuaya Penoja esohui shajjaꞌajja canaje. Jjashahuabaquinaje: —Eꞌe ee, Peno cuayaquiꞌyonaje. 
\p Bihui majje esecue jjani pajea canananaje. Peno esecuejo tii nequi jea canananaje epona shoꞌiya, de. Cuajicuajinananaje equijo ani cuana huohuiya.  
\v 15 Jamatii equijo ani cuaa Shona jama sajaꞌame acanaje baꞌa: —Chojja, Shona. ¿Aꞌa jja mi niñepoquiani? 
\p —Eꞌe jojo nei ca ca iña poani —poanaje Shona. 
\p Jamajjeya ojjañaa jama sajaꞌame acanaje baꞌa: —Eꞌe pojjaꞌa esohuidojojji Peno jaahuanajji ca ca coma poeyanaje. 
\p  
\v 16 Penohua ca ca esecue cuiaqueya canequinaje, iyaaꞌiyaa nequinaje. Equijo nequi cuaa esecue caꞌapejoꞌyo majje ba canaje Peno nequi. Quea bihui nee nee poꞌyo majje soa neineiꞌyonaje.  
\v 17 Jamajjeya Penohua emeꞌ sisi ecuasajo huana canaje: —¡Aꞌa pa jjaja oe mimijji! —poanaje. 
\p Ojjaña mimimaꞌyo nequi caꞌyonaje. Majoya Penohua oya cuana huohui canaje: —Emeshi Mese neiya Jesosaa eya ejeanobia jaa esecue yasijje jjequiquiaya meequi caꞌyonaje esohuidojojjiya. 
\p Majoya huohui canaje peaꞌai Penohua: —¡Ojjaña Jesosaja epeejji cuana huohuiquicue! ¡Satiaco Apeoja bacua ejja peaꞌai huohuiquicue! 
\p Majoya Peno quehua poquicuajinaje pea meshi yasijje.  
\v 18 Mecajjeahua sohuinano cuaa chamaꞌ Peno ba canaje ejjajeanobiaquijjijo. Ejjoco oe jaa ba canaje. Chamaꞌ. Ba majje oya cuana quea mete nee nee poꞌyonaje. Miminaanaa nequiꞌyonaje.  
\v 19 Emeshi Mese Enodeya pea huoojea canaje Peno jjequiya nisho ejajajeaꞌyojji nisho. Peno chamaꞌ ba majje Enode quea mase nee nee poanaje. Sohuinano cuana ma Peno jaahuanajji cuana ꞌya canaje. Huohuiꞌajja canaje: —¿Aꞌa mi oe cahuijaanaje? —cahuijaa poso Enodeya acanaje. 
\p Majoya Enodeya huoojea canaje ma sohuinano cuana quecuajeaꞌyohua. Chamaꞌyo tii acanaje. 
\p Majoya Enode Jodea meshijo nequi Sesanea huasijje poquinaje. Jomajo nequi tiitiiꞌyonaje. 
\s1 Enode, Jesosaja epeejji cuiaꞌyojji epo manoꞌyonaje 
\p  
\v 20 Majoya emeshi mese Enode quea quene nee nee poanaje Tino cuiñajjijo baꞌe cuana nijje, Sinono cuiñajjijo baꞌe cuana nijje peaꞌai. Jamajjeya oya cuana Enode nijje jjapeequi oꞌoya sa poanaje. Ojee poquinaje Enode baa. Ebionei Basito ba cañaquinaje, Enodeja echacojji, oja aquiana cuana jaahuanajji. Bejjo quia cajje Basito quea bihui poanaje ona nijje. Majoya pea bejjo sosejje Basito Enode nijje miminaje: —Dejja cuana Tinojo baꞌe, Sinonojo baꞌe peaꞌai minijje jjapeequi oꞌoya sa poani. ¡Che oe onijje mimicue! —acanaje Basitohua. 
\p Tinojo, Sinono meshijo peaꞌai chamaꞌ bobi. Jamajjeya Enodeja bobi sa poanaje quea huiso. Jamajoya Enode quea bihui po mee sa acanaje onijje. 
\p  
\v 21 Majoya Enodeya ojjaña dejja cuana iyaa canaje oja sohui shajjaꞌajjajji. Ojjaña nijje mimi jjimahuajo Enodeya daqui quea nahue nee huosho canaje, emeshi meseja ehuoshojji. Ojaya eꞌanioquejji quea quemojo anioquenaje. Majoya Enodeya ojjaña cuana quea huiso huohui canaje.  
\v 22 Ojjaña jomajo nequi oja sohui shajjaꞌajja majje oya bihuia canaje jama baꞌa: —Emeshi mese Enode, miya Eyacuiñajji. Miya dejja jayojja jama mimime pojjeama poani —jamajoya Enode bihuia canaje ojjañaa. 
\p —Eꞌe, jamaya —Enode poanaje, de. 
\p  
\v 23 Jamajjeya jjeyahua nei Eyacuiñajjija esohuidojojjiya Enode quea mano nee nee po mee cajeꞌyo pea cuana Eyacuiñajji bihuia mee jjima jojoya, jama ajjima jojoya Enodeja baꞌa: —¡Eyacuiñajjiya oe bihuiacue! ¡Aꞌa eya bihuiajji! —po jjima jojoya oya sosohua ijjia caꞌyajje quea mano nee poꞌyonaje. Manoꞌyonaje Enode, de. 
\p  
\v 24 Majoya Jesosaja epeejji cuaa esohui quea pame nee Jesosaja huohui canaje quea huiso meshi yasijje. Quea huiso cuaa shajjaꞌajja canaje. Jesosa nijje jjapeequinaje quea bihui nee. 
\p  
\v 25 Majoya Benabe, Sanoni peaꞌai Jenosanena huasijje poeyanaje. Jesosaja epeejji cuana Jenosanenajo baꞌe cuana bejjo quia canaje, ma Jesosaja epeejji cuana Atioquiajo baꞌeya huoojea canaje. Bejjo quiaꞌyo majje Benabe Sanoni nijje huacuaya poqui oꞌoyanaje Atioquia huasijje. Ohuaya Huani Macoso dojo canaje onijje. 
\c 13  
\s1 Benabe, Sanoni peaꞌai huoojea canaje pea meshi cuana huasijje Jesosaja esohui huohuiya 
\p  
\v 1 Jesosaja epeejji cuana quea huiso nee nee poanaje Atioquiajo. Jomajo Eyacuiñajjija esohui huohuijji, Eyacuiñajjija esohui ba meesahuajji peaꞌai yaninaje: Benabe, Sanoni, Simoni Ese Ejjaja esohuijo Dejja Tehue bajjani, Nosio ma Sinene cuiñajjijo baꞌya poa, emeshi mese Enodeja edoe mese Manaeni peaꞌai. Mahuiso.  
\v 2 Oya cuana Eyacuiñajji bihuia poꞌaninaje. Eyacuiñajji bihuia canijo bobi ijjia ajja aninaje. Jama poanijo Edojjoshahua Pameya oya cuana huohui canaje jama baꞌa: —Eyaya Benabe, Sanoni peaꞌai babacanaje ecuea esohui huohuijji epojji. Jamajjeya ¡oya cuana huoojeacue ecue esohui huohuiya! 
\p  
\v 3 Majoya oya cuanaa ijjiaꞌijjia ajja po majje, Eyacuiñajji nijje mimi majje peaꞌai emeꞌ huana canaje Sanoni sapa biajje, Benabe sapa biajje peaꞌai. Jama acanaje baꞌa: —Ecuaaya miquianaya huoojeaña pea meshi cuana huasijje Eyacuiñajjija esohui huohuiya —acanaje. 
\s1 Chipe nasijo Jesosaja esohui huohui canaje 
\p  
\v 4 Majoya Edojjoshahua Pameya Benabe, Sanoni peaꞌai huoojea canaje esohui huohuiya. Senesia huasijje poqui majje bishe ai yasijje nequisohuaquinaje Chipe nasi ai yasijje ebesapoquijji.  
\v 5 Majoya oya cuana Sanamina cuiñajji yasijje baꞌeñaquinaje Chipe nasi yasijje. Eyacuiñajjija esohui huohui canananaje Jodio cuana huasijje, Jodioja equi ojee ejjachichaquijji cuanajo nequiya. Huani Macosohua oya cuana chacosahua canaje. 
\p  
\v 6 Majoya Chipe nasi ojje miji yasijje poquinaje ejiojjijje Paposa cuiñajji yasijje. Jomajo Jodio dejja ba canaje Banajesosa bajjani. Oya Eyacuiñajjija esohui huohuijji nisho, eyamiquecua poanaje oya. Jamajjeya Enimase bajjani acanaje cuaa.  
\v 7 Oya emeshi mese Senio Paono nijje jjapeequinaje. Emeshi mese Senio Paono quea jjashahuabaqui jaꞌa nee nee, quea huiso nee ojaya eba. Oya Eyacuiñajjija sohui shajjaꞌajja sa poanaje. Jamajjeya Benabe Sanoni peaꞌai iyaa canaje.  
\v 8 Jamatii eyamiquecua jjamimicuiajea nobiajeaquinaje Sanoni nijje, Benabe nijje peaꞌai. Emeshi mese Senio Paono Eyacuiñajjija esohui shajjaꞌajja mee jjima canaje: —¡Aꞌa shajjaꞌajjajji Paboja esohui Jesosajo! Dasia cani mi coma —eyamiquecuaa acanaje. 
\p  
\v 9 Pea esohuijo Sanonija bajjani Pabo. Edojjoshahua Pame onijje nequi tiitiinaje. Jamajjeya Pabohua meteꞌama eyamiquecua cojja ba neinei canaje.  
\v 10 Jama tecueame acanaje baꞌa: —Eyamiquecua, miya ca mi ca oe edosiquianaja bacua. Ojjaña quea pame nee baꞌe miquea botiꞌama. ¡Aꞌa mimishoꞌi pojji Jesosajo miya! Ejjadasiaquijji miya de, quea mimishi. Eyacuiñajjija esohui quea quehua po mee sa aña tii miyaya —Pabohua acanaje—.  
\v 11 Jamajjeya jjeyahua nei Eyacuiñajjiya miya cojjamaꞌ po mee cajeꞌyo quea huiso cahuime —Pabohua acanaje. 
\p Jjeyahua nei eyamiquecua cojjamaꞌ poajeꞌyo. Quea cojja misi nee nee. Taaanaje jama baꞌa: —Cojjamaꞌ mo po mee caꞌyonaje Jesosaa. ¡Emejo mo che dojocue quiaa! ¡Me pejjejeacue mo oe! —poanaje eyamiquecua. 
\p  
\v 12 Ma ba majje emeshi mese Senio Paono quea mete poanaje. Jesosaja esohui shajjaꞌajja canaje. Jesosa nijje jjapeequiꞌyonaje, emeshi mese Senio Paono, de. 
\s1 Pabohua Benabe nijjeya Atioquia huasijje Pisinia meshi yasijje esohui huohuiqui canaje 
\p  
\v 13 Majoya Pabo ojaya epeejji cuana nijje bishe ai yasijje nequisohuaqui oꞌoyanaje. Panipinia meshi yasijje besapoquinaje, Pene cuiñajji yasijje. Baꞌeñaqui majje Huani Macosohua Pabo, Benabe peaꞌai jiña caꞌyonaje. Poquiꞌyonaje Jenosanena huasijje oe nei. 
\p  
\v 14 Majoya Pabo Benabe nijje poquinaje Atioquia huasijje, pea Atioquia Pisinia meshijo nequi. Epojja ejomishocajjijo Jodioja equi ojee ejjachichaquijji yasijje poquinaje. Dobiqui majje anioquenaje.  
\v 15 Jodioja equi ojee ejjachichaquijji mese cuaa Moisesija esohui etehueꞌyo huohui canaje. Eyacuiñajjija esohui huohuijjija esohui yahuajo nei nei etehueꞌyo huohui canaje peaꞌai. Majoya oya cuaa Pabo, Benabe peaꞌai huohuiꞌajja canaje jama baꞌa: —Epeejji cuana, eꞌe pojjaꞌa miquea esohui yani ojjaña quea pame nee ebaꞌe meesahuajji. ¡Jjeyahua nei huohuicue! —acanaje. 
\p  
\v 16 Jamajjeya Pabohua nequisohua majje emeꞌ jeasohua canaje. Jama acanaje baꞌa: —Jodio cuana, Jodio pojjeama cuana peaꞌai miquianaya Eyacuiñajjija esohui shajjaꞌajjajji poani. ¡Jamajjeya shajjaꞌajjacue mo!  
\v 17 Yahuajo nei Eyacuiñajjiya esejaya etiiquiana babaca ca poa ojaya epeejji epojji. Majoya Ejito meshijo baꞌe oya cuana jaahuana ca poa. Quea huiso, quea caꞌa peaꞌai po mee caꞌya poa. Oya cuana Ejito meshijo baꞌe dojocuayaqui ca poa pea meshi yasijje epoquiꞌyojji. Quea huiso ma dejjaja ba jjima aca poa.  
\v 18 Meshi jabojo, dejjamajo Eyacuiñajjiya oya cuana jaahuana ca poa quea huiso shequiajame, 40 shequiajame. Oya cuana quea mimishi, shajjamaꞌ poa. Jamatii ojaya oya cuana cajaa ajjima poa.  
\v 19 Majoya ohuaya pea emeshi mese cuana me oejje beca huisome, 7 huisome, pea emimiꞌyo cuana Canaani meshijo baꞌe jeabichajea caꞌya poa. Eꞌe, Eyacuiñajjiya ojjaña ma dejja pea esohuijo mimiani cuana chamaꞌyo tii po mee caꞌya poa quea mimishijojo. Jiquio Canaani meshi Eyacuiñajjiya quia ca poa esejaya etiiquiana cuana baꞌejji.  
\v 20 Canaani meshijo esejaya etiiquiana cuana baꞌya poa quea huiso nee nee shequiajame, 450 shequiajame. Majoya Eyacuiñajjiya Jodio dejja huoojeajji pea nequi mee, pea nequi mee aca poquia poa Jodio cuana quea pame nee baꞌe meeꞌyojji. Jamaya poanaje Eyacuiñajjija esohui huohuijji Samoeni baꞌe jjimahuajo. Majoya Samoeni manoꞌyajo, chamaꞌ pea Jodio dejja huoojeajji poa.  
\v 21 Majoya esejaya etiiquiana cuana emeshi mese sa poa. Eyacuiñajji nijje mimi ca poa jama baꞌa: “¡Emeshi mese nequi meecue ecuanajaya!” aca poa. 
\p —Jamajjeya aje Eyacuiñajjiya Sisija bacua ejja Sao nequi mee ca poa Jodioja emeshi mese. Saoja etiiquiana Bejamiꞌ bajjani poa. Sao quea huiso shequiajame nequia poa Jodio cuanaja emeshi mese, 40 shequiajame.  
\v 22 Majoya emeshi mese Sao quea mimishi po majje manoꞌya poa. Majoya Eyacuiñajjiya Dabi emeshi mese po mee caꞌya poa. Dabijo mimia poa jama baꞌa: 
\q1 “Isaija bacua Dabi ecuea eba. Oya quea pame nee nee. Ecuea ehuohuiꞌyo jayojja jama acani. Ecuea ejjashahuabaquiꞌyojji jayojja jama jjashahuabaquiani peaꞌai, Dabi”. 
\m Jamaya yahuajo nei nei Dabijo mimia poa. 
\p  
\v 23 —Dabi Jesosaja etiiquiana poa. Yahuajo Eyacuiñajjiya Jesosajo huohui ca poa jama baꞌa: 
\q1 “Eyaya ojjaña jaahuanajji Quito huoojeaje. Ohuaya Isaeni cuanaja mimishi cuijeaꞌyo majje baꞌe tiitii mee cajeꞌyo eyajo onijje”. 
\m Jamaya huohuime aca poa Eyacuiñajjiya Jesosajo. 
\p  
\v 24 —Jesosa poe jjimahuajo Huaniya ma ona besameejji poaniya ojjaña cuana huohui canaje jama baꞌa: “¡Miquea mimishi cuana pajeaꞌyocue! ¡Eyacuiñajjijo oe besacue, enajo!” jamaya Huaniya ojjaña Jodio cuana huohui canaje.  
\v 25 Eꞌe, Huanija echaco Eyacuiñajjijo beshahua nei apoa po majje ohuaya huohui canaje jama baꞌa: “¿Achajja miya jjashahuabaquiani? ¿Ae acuae jja iña? Eya ca jja ca iña Eyacuiñajjija huoojeaꞌyo ojjaña jaahuanajji Quito pojjeama. Oya quijje pishana poeje. Oya ca ca oe quea caꞌa nee nee, quea pame nee nee. Eya ca iña quea pame pishana. Jamajjeya aje oe eya Jesosa Quito cojja nei nequi sa po ajja, quea bicho, de” acanaje Huaniya. 
\p  
\v 26 —Ecuea epeejji cuana, etiiquiana Amajamaja osecua cuana, ¡shajjaꞌajjacue mo! ¡Eyacuiñajjija epeejji cuana Jodio pojjeama cuana, shajjaꞌajjacue mo peaꞌai! Eyacuiñajjiya jiquio esohui huohui canaje esejaya eshajjaꞌajjajji jama baꞌa: Eyacuiñajjiya Jesosa huoojea canaje ese jaahuanaa, eseja mimishi cuijeaꞌyohua peaꞌai.  
\v 27 Jamatii dejja cuana Jenosanenajo baꞌeja, Jodio etii cuanaja peaꞌai ba jjima Jesosa Eyacuiñajjija huoojeaꞌyo ojjaña jaahuanajji. Oya cuanaa Eyacuiñajjija esohui huohuijjija esohui shajjaꞌajja canaje ojjaña ejomishocajji pojjajo; ma esohui Jodio cuanaja quea quehua. Jamatii Jesosa quecua caꞌyonaje; ma esohui yahuajo nei nei etehueꞌyo jayojja jama acanaje Jodio cuaa.  
\v 28 Jesosa mimishiꞌama nei nei ba canaje Jodio cuaa. Jamajjeya ¿yajjajo shai quecua mee caꞌyonaje oya? Jamatii oya cuaa emeshi mese Pinato jama acanaje baꞌa: “¡Jesosa acui ecueataꞌapeejo baꞌehuanasohuajeacue emanoꞌyojji!” taaa neineime ponaje. 
\p  
\v 29 —Ojjaña Eyacuiñajjija esohui yahuajo nei nei etehueꞌyo jayojja jama aca poa Jesosa, Jodio etii cuaa. Majoya Jesosa acui ecueataꞌapeejo baꞌe jjequioqueaꞌyo majje ojaya epeejji cuaa oya mei jjani ai yasijje huananobiaqui canaje.  
\v 30 Jamatii Eyacuiñajjiya oya shequi mee ca oꞌoyanaje.  
\v 31 Manoꞌyo jjimahua Jesosa Janinea meshijo nequi Jenosanena huasijje poquinaje oja epeejji cuana nijje. Quijje shequi oꞌoya majje Jesosa oja epeejji cuana nijje jjapeequi oꞌoyanaje quea huiso cahuime. Ojaya epeejji cuana jjeyahua nei Jesosajo mimiani. Ojjaña Jodio cuana huohui cani jama baꞌa: “Jesosa shequi oꞌoyanaje” acani.  
\v 32 Jjeyahua nei ecuanaa Eyacuiñajjija esohui quea pame nee miquiana huasijje huohuije jama baꞌa:  
\v 33 Esejaya etiiquiana nijje Eyacuiñajji yahuajo nei mimia poa. Eseya ma etiiquianaja osecuaya. Jamajjeya Eyacuiñajjija esohui esejaya etiiquiana huasijje jayojja jama jjeyahua nei ohuaya acani esejo. Ojaya esohui jayojja jama ohuaya Jesosa shequi mee ca oꞌoyanaje. Yahuajo nei nei Dabiya Eyacuiñajjija esohui Jesosajo tehue ca poa jama baꞌa: “Miya ecue Bacua Ejja. Maya eyaya ojjaña ba mee aña” jamaya yahuajo nei nei Dabiya Eyacuiñajjija esohui Jesosajo tehue ca poa esohuicuayajjijo, Salmojo —Pabohua acanaje. 
\p  
\v 34 —Eyacuiñajjiya Jesosa shequi mee ca oꞌoyanaje emano becaꞌyojji pojjeama, eꞌihuiꞌyojji pojjeama. Eyacuiñajjiya yahuajo nei jama aca poa Jesosa baꞌa: 
\q1 “Ecuea esohui quea pame nee Dabi nijje jayojja jama eyaya miya ajeꞌyo. Eꞌe, eyaya miya quea pame nee nee ajeꞌyo”. 
\m  
\v 35 Pea esohui cuayajjijo Dabiya tehue ca poa jama baꞌa: 
\q1 “Miyaya eya, mique Bacua Ejja oe nei quea pame nee jaahuanañajo, eya eꞌihuiꞌyojji pojjeama tii tii poajeꞌyo”. 
\m Jamaya yahuajo nei Eyacuiñajjiya tehue mee ca poa Jesosajo. 
\p  
\v 36 —Yahuajo Eyacuiñajjiya esejaya etiiquiana Dabi emeshi mese po mee ca poa. Jamatii dejja tii majje Dabi manoꞌya poa. Oya etiiquiana nijje emanoꞌyo jaa. Oya ihuiꞌya poa peaꞌai.  
\v 37 Jesosa Quito ca ca ihuiꞌyo jjima poanaje. Eyacuiñajjiya oya emanoꞌyo jaa shequi mee ca oꞌoyanaje.  
\v 38 Ecuea epeejji cuana, eyaya miquianaya huohuiaña Jesosajo. Oya Jesosa eshe oꞌoya. Jamajjeya ohuaya mimishi cuana pajea meesahua cajeꞌyo miquianajaya. Mimishi cuijea cajeꞌyo peaꞌai.  
\v 39 Moisesija etehueꞌyo jayojja jama añajo pojjeama mimishi cuana cuijea caꞌyani Eyacuiñajjiya. Jesosa eshe oꞌoya, de. Onijje jjapeequianijo ca ca oe ohuaya miquianaya mimishi cuana cuijea caꞌyani. Majoya Eyacuiñajjiya miquianaya ba cani emimishi cuijeaꞌyo.  
\v 40 ¡Jamajjeya Eyacuiñajjija esohui ba neineicue! miya ojaya etecueaꞌyojji pojjeama. Eꞌe, yahuajo nei Eyacuiñajjiya esohui tehue mee ca poa jama baꞌa: 
\q1  
\v 41 “¡Shajjaꞌajjacue mo! Eya miquianaaya niñebaña. ¡Quea mete pocue! Eyaya miya chamaꞌyo tii po meejeꞌyo. Eyaya ma dejjaa ajjima acani ajeꞌyo miquianajaya ebajji. Jamatii ba majje miquianaya jjashahuabaqui ajja. Onaa huohui cajo, miquianajaya shajjaꞌajja jjima poaje”. 
\m Jamaya yahuajo nei Eyacuiñajji poa —jamaya Pabohua esohui huohui canaje Atioquiajo, Jodioja equi ojee ejjachichaquijjijo. 
\p  
\v 42 Majoya esohui huohui majje Pabo, Benabe nijje esecue yasijje cuayaquinaje. Majoya beca cuana onijje miminaje jama baꞌa: —Pabo, miquea esohui ecuana shajjaꞌajja sa oꞌoya poani. ¡Pea ejomishocajji pojjajo poe oꞌoyacue miquianaya! 
\p  
\v 43 Jodioja equi ojee ejjachichaquijjijo nequi esecue yasijje cuayaqui majje quea huiso Jodio cuana, Jodio pojjeama cuana ma Jodioja esohui jayojja jama Eyacuiñajji bihuia cani peaꞌai Pabo nijje jjapeequinaje, Benabe nijje peaꞌai. Jamajjeya Pabo, Benabe peaꞌai ona nijje jama poanaje baꞌa: —¡Jesosa nijje jjapee neineiquicue! ¡Eyacuiñajjija esohui aꞌa pajeaꞌyojji peaꞌai! Ohuaya miya jaahuana tiitii cani. 
\p  
\v 44 Majoya pea epojja ejomishocajjijo beshahua nei ojjaña cuana ma cuiñajjijo baꞌeca jjachichaquinaje Eyacuiñajjija esohui shajjaꞌajjaa, Emeshi Mese neija esohui.  
\v 45 Eꞌe, quea huiso nee nee poeyanaje Paboja esohui shajjaꞌajjaa. Ma ba majje Jodio etii cuana quea quene poanaje. Jamajjeya Pabohua esohui huohui canijo mimicuiajeanobiajea canaje cuaa Pabo. Oya cuana Jesosajo mimishoꞌi poanaje peaꞌai.  
\v 46 Jamajjeya Pabohua, Benabeya peaꞌai meteꞌama Jodio etii cuana tecuea canaje jama baꞌa: —¡Bacue! Eyacuiñajjiya ecuana huoojea canaje Jodio cuana huasijje ebionei Jesosaja esohui huohui coohua, ebaꞌe tiitii meeꞌyojji onijje. Miquianaya ca ca oe jjashajjaꞌajjaqui sa po ajja. Shajjaꞌajja sa poꞌyo ajjajo cuaqui yasijje poquijeꞌyo, eyahuasijje ebaꞌe tiitiiꞌyojji pojjeama, miquianaya. Jamajjeya ecuana poquije Jodio pojjeama cuana sohuihuohuiya.  
\v 47 Eꞌe, Emeshi Mese neiya, Eyacuiñajjiya ecuana huohui canaje jama baꞌa: 
\q1 “Eyaya miya huoojeaje Jodio pojjeama cuana huasijje. ¡Ecuea esohui quea jaꞌa nee ba meecue! ¡Ojjaña cuana ojjaña meshijo baꞌeca cuana enijje jjapeequi meesahuacue! Eyaya ojjañaja mimishi cuana cuijeajeꞌyo, enijje eyajo ebaꞌeꞌyojji”. 
\m Jamaya yahuajo Eyacuiñajji ecuana nijje poanaje —Pabohua acanaje. 
\p  
\v 48 Paboja esohui shajjaꞌajja majje Jodio pojjeama cuana quea bihui nee nee poanaje. Oya cuaa Eyacuiñajji bihuia canaje ojaya esohui quea pame nee Jesosajo ba mee canajejojo. Ojjaña joya Eyacuiñajjiya babaca canaje onijje ebaꞌe tiitiiꞌyojji Jesosa nijje jjapeequiꞌyonaje, coya oja babacaꞌyo huiso tiiya. 
\p  
\v 49 Majoya ojjaña Atioquia chipi neijo baꞌeya Jesosaja esohui shajjaꞌajja canaje.  
\v 50 Jamatii Jodio etii cuaa epona cuana quea quene po mee canaje Pabo nijje. Ma epona cuanaja yahuajo nei Eyacuiñajji quea jea nee poanaje. Oya cuana Jodio etii cuanaja Atioquiajo baꞌe cuanaja ehuanase cuana poanaje. Jodio etii cuaa jama acanaje baꞌa: —¡Aꞌa shajjaꞌajjajji Jesosaja esohui! 
\p Jodio etii cuaa ojjaña quea quene nee nee po mee caꞌyonaje Pabo nijje, Benabe nijje peaꞌai. Iña majje oya cuaa Pabo Benabe peaꞌai huoojea caꞌyonaje.  
\v 51 Majoya Pabohua Benabeya peaꞌai ma shajjamaꞌ cuana tecueajea majje jiñajea caꞌyonaje. Ojjaña ma cuiñajjijo baꞌe ba mee canaje oya cuana shajjamaꞌ poanaje, quea mimishi. Majoya Pabo Benabe nijje poquinaje ejiojjijje pea cuiñajji yasijje, Iconio huasijje. 
\p  
\v 52 Edojjoshahua Pame o que dobiquiꞌyajo, ojjaña Jesosaja epeejji Atioquiajo baꞌeca cuana quea bihui nee nee poanaje. 
\c 14  
\s1 Iconio huasijje esohui huohui canaje Pabohua, Benabeya peaꞌai 
\p  
\v 1 Majoya Pabo, Benabe nijje Iconio huasijje baꞌeñaquinaje. Atioquiajo acanaje jayojja jama aca oꞌoyanaje Iconiojo peaꞌai. Eꞌe, Jodioja equi ojee ejjachichaquijji yasijje dobiquinaje. Eyacuiñajjija esohui quea pame nee Jesosajo huohui canaje quea jaꞌa nee. Jamajjeya quea huiso Jodio cuana, Jodio pojjeama peaꞌai Jesosa nijje jjapeequinaje.  
\v 2 Jamatii beca Jodio cuana shajjaꞌajja sa poꞌyo ajja poanaje. Maaya Jodio pojjeama cuana jama acanaje baꞌa: —¡Aꞌa jjapeequijji Jesosaja epeejji cuana nijje! ¡Aꞌa Jesosaja esohui shajjaꞌajjajji! —jama niñebameya acanaje Pabo cuaa. 
\p Jamajjeya quea huiso cuana Jesosaja epeejji cuana nijje jjapeequiꞌyo ajja poanaje.  
\v 3 Jamatii Pabo, Benabe nijje quea cahui huiso Iconiojo nequinaje. Meteꞌamaa Jesosajo huohui majamaja canaje, Emeshi Mese neijo jama baꞌa: —Emeshi Mese neiya Jesosaa eseya quea jea nee acani, eseya jaahuana cani peaꞌai —poanaje. 
\p Jesosaa Pabo, Benabe peaꞌai ma dejjaa ajjima acani ameesahua canaje. Ma ba majjeya ojjañaa ba canaje Paboja esohui Jesosajo eꞌe nei, Benabeja peaꞌai.  
\v 4 Jamajjeya Iconiojo quea huiso cuana shajjaꞌajja sa poanaje Jesosaja huoojeaꞌyo cuanaja esohui. Pea cuana ca ca Jodioja esohui jayojja jama a sa poanaje. Shajjaꞌajja sa poꞌyo ajja poanaje Jesosaja esohui. 
\p  
\v 5 Majoya beca Jodio pojjeama Jodio cuana nijje, ojaya emeshi mese cuana nijje jjachichaqui majje mimimiminaje. Jama poanaje baꞌa: —¡Cuaꞌa! ¡Pabo, Benabe peaꞌai ejjacuiajeaquiqui, ejjasapa jajahuejjajeaquiqui oe meiya! —poanaje. 
\p  
\v 6-7 Jamatii Pabohua, Benabeya peaꞌai maya shajjaꞌajja canaje. Shajjaꞌajja majje quehua poquinaje Nicaonia meshi yasijje. Debe cuiñajji yasijje, Nisata cuiñajji yasijje peaꞌai esohui quea pame nee Jesosajo huohui capoquinaje baꞌe chejje cuana huasijje, cuiñajji sisi cuana huasijje peaꞌai. 
\s1 Nisatajo Pabo iña canaje cuaa 
\p  
\v 8 Nisata cuiñajjijo dejja jiojjijjajja baꞌeꞌyonaje, jeo ajja. Oya jamatii cuaya, jiojjijjajja tii.  
\v 9 Pabohua esohui huohui canijo, jiojjijjajjaa shajjaꞌajja neinei caꞌaninaje. Majoya Pabohua jiojjijjajja ba neinei canaje. Jjashahuabaquinaje jama baꞌa: —Jiojjijjajja Jesosajo quea pame jjashahuabaquiani jama baꞌa: “Jesosaa eya jeo mee cajeꞌyo”. Jamajjeya eyaya oya jjajiojji jeapiihuiqui meejeꞌyo —Pabo poanaje. 
\p  
\v 10 Jamajjeya Pabohua oya jama acanaje baꞌa: —Jiojjijjajja, ¡nequisohuacue! ¡Jeocue! —acanaje. 
\p Jiojjijjajja nequisohua cuajinaje. Jeojeonaje. Eꞌe, jiojjijjajja jjajiojji jeapiihuiquinaje.  
\v 11 Ma ba majjeya quea huiso cuaa Pabo bihuia canaje. Onajaya emimijo, Nicaoniaja esohuijo jama poanaje baꞌa: —Eꞌe de. ¡Bacue Pabo, Benabe peaꞌai! Eyacuiñajji cuana ecuana que jaaoqueꞌyonaje dejja jayojja, de —acanaje. Pabo, Benabe peaꞌai eyacuiñajji poso acanaje cuaa. 
\p  
\v 12 Jamajjeya Benabe eyacuiñajji nisho bajjani acanaje Jopite bajjani. Pabo mimi huichaꞌa huichaꞌanijo, oya pea eyacuiñajji nisho bajjani acanaje Meconio bajjani.  
\v 13 Epanaꞌyo huohuijji, epanaꞌyo jaahuanajji ma epanaꞌyo Jopite nequijji equijo nequinaje Nisata pejjejo. Ohuaya anaꞌai yahue cuana, eshasha quea huiso cuana peaꞌai jjequi canaje cuiñajji esecue yasijje, Pabo que. Ohuaya pea cuana nijjeya anaꞌai cuana, eshasha cuana peaꞌai dahuajea sa acanaje Pabo bihuiajji, Benabe peaꞌai bihuiajji; eyacuiñajji poso bihuia sa acanaje. 
\p  
\v 14 Benabe, Pabo peaꞌai ma ba majje quea mete poanaje. Poquicuajinaje dejja cuana jjachichaquiani yasijje.  
\v 15 Jama taaame poanaje baꞌa: —¿Apiojji acuaeya miquianaaya jama aña soꞌo? Ecuana aje dejja cuana miquiana jayojjaya. ¡Aꞌa ecuana bihuiajji! Ecuanaa esohui quea pame Jesosajo huohuiaña. Jamajjeya ¡aꞌa eyacuiñajji nisho cuana bihuia majajji! ¡Pajeaꞌyocue! Eyacuiñajji oe nei eꞌe jojo nei eshe tii nequi. ¡Oya oe nei bihuiacue! Ohuaya eyatahuatahua pana caꞌya poa. Meshi cuana, bae cuana peaꞌai pana caꞌya poa. Ojjaña aquiana meshijo, eyajo, enajo peaꞌai pana caꞌya poa ohuaya, Eyacuiñajjiya.  
\v 16 Yahuajo nei nei ojjaña cuaa ojjaña meshijo baꞌeya quea mimishi nee aca poa. Jamatii Eyacuiñajjija oya cuana mimishi cuana pajea meeꞌyo jjima poa.  
\v 17 Jamatii Eyacuiñajjiya yahuajo ojjaña cuana quea pame aca poa. Ojjaña ba mee ca poa oya eshe nequi. Jjeya ohuaya miquianaya quea pame nee acani peaꞌai. Nayaja po mee caꞌyani, eshequiaja po mee caꞌyani, bobi tii mee caꞌyani peaꞌai. Jamaya ohuaya miquianaya quea bihui nee baꞌe meesahua cani peaꞌai —Pabohua acanaje. 
\p  
\v 18 Jamaya Pabohua, Benabeya peaꞌai huohui canaje. Jamatii ma dejja cuaa beshahua nei oya bihuia canaje. Anaꞌai beshahua nei dahuajea canaje o bihuiajji. Dahuajea jjima; beshahua nei, de. 
\p  
\v 19 Majoya Jodio cuana Atioquiajo baꞌe, Iconiojo baꞌe peaꞌai poeyanaje Nisata huasijje. Oya cuaa Nisata dejja cuana siajje acanaje Pabojo. Siajje acajje quea quene nee nee poanaje Pabo nijje. Majoya oya cuaa Pabo iña canaje; sapa jaja canaje meiya, dojocuayaqui canaje cuiñajji esecue yasijje. Pabo emanoꞌyo poso jeajea canaje cuaa jomajo tii.  
\v 20 Jamatii quijje pishana Jesosaja epeejji cuana poeyanaje Pabo baa. Ojjaña o que jjachichaquiajo, Pabo shequiꞌyonaje. Shequiꞌyo majje huacuaya Nisata huasijje poe oꞌoyanaje. Majoya mecajjeahua nei oya Benabe nijje poquinaje pea cuiñajji yasijje, Debe yasijje. 
\s1 Pabo, Benabe nijje huacuaya poqui oꞌoyanaje, Atioquia huasijje 
\p  
\v 21 Debe yasijje poqui majje Pabohua, Benabeya peaꞌai Eyacuiñajjija esohui quea pame nee Jesosajo huohui cañaquinaje. Quea huiso cuaa shajjaꞌajja canaje. Jesosa nijje jjapeequinaje. Majoya, Pabo Benabe nijje huacuaya poqui oꞌoyanaje Nisata huasijje. Iconio huasijje peaꞌai poqui oꞌoyanaje. Majoya Pisinia meshi yasijje Atioquia huasijje poqui oꞌoyanaje ojjaña Jesosaja epeejji eyacua cuana baa.  
\v 22 Eꞌe, Pabohua, Benabeya peaꞌai Jesosaja epeejji cuana ma cuiñajji cuanajo baꞌeca cuana esohui huohui ca oꞌoyanaje jama baꞌa: —¡Jesosa nijje jjapee neineiquicue! ¡Aꞌa oya pajeaꞌyojji! Eyajo Eyacuiñajji ojjaña huoojeajji poani. Eseya onijje baꞌe tiitii sa poanijo, onaaya, mimishi cuaa eseya napa caje quea huiso. Quea camaja esejo poaje. Quea nee poaje peaꞌai —Pabohua acanaje. 
\p  
\v 23 Majoya Pabohua, Benabeya peaꞌai ma cuiñajji cuanajo Jesosaja epeejji quea pame babaca canaje Jesosaja epeejji cuana jaahuanajji epojji. Majoya ijjiaꞌijjia jjima nequi Eyacuiñajji nijje mimi majamajanaje Jesosaja epeejji jaahuanajji cuanajo jama baꞌa: —Emeshi Mese nei Jesosa, miya quea pame nee nee. Jiquio dejja cuana miquea epeejji nei cuana ecuanaaya babacanaje miquea epeejji cuana jaahuanajji epojji. Jamajjeya ¡oya cuana miquea epeejji cuana jaahuana meesahuacue quea pame nee! —poanaje. 
\p  
\v 24 Jamajjeya Pabohua, Benabeya peaꞌai Pisinia meshijo esohui huohuinana oꞌoya majje Panipinia meshi yasijje poqui oꞌoyanaje.  
\v 25 Majoya Eyacuiñajjija esohui quea pame nee Jesosajo huohui canana oꞌoyanaje Pene cuiñajji yasijje. Majoya oya cuana poquinaje Atania cuiñajji yasijje.  
\v 26 Jomajo Ataniajo bishe ai yasijje nequisohuaquinaje. Besapoqui oꞌoyanaje Atioquia huasijje. Jomajo yahuajo pishana Jesosaja epeejji cuana Eyacuiñajji nijje mimi majje oya cuana huoojea canaje esohui huohuiya. Eyacuiñajji nijje miminaje peaꞌai o jaahuanajji, esohui quea pame Jesosajo huohui canijo. 
\p  
\v 27 Jamajjeya Atioquia huasijje poeꞌyo majje Pabohua, Benabeya peaꞌai ojjaña Jesosaja epeejji cuana iyaa canaje. Jjachichaquiꞌyajo Pabohua, Benabeya peaꞌai quio o poquinaje huohui canaje. Majoya jama acanaje baꞌa: —Ojaya esohui quea pame nee Jesosajo huohuinanañajo, Eyacuiñajjiya ecuana quea pame nee acanaje. Eyacuiñajjiya quea huiso Jodio pojjeama cuana oja sohui ba meesahua canaje peaꞌai —jamaya acanaje Pabohua, Benabeya peaꞌai. 
\p  
\v 28 Oya cuana Atioquiajo nequiꞌyonaje Jesosaja epeejji cuana nijje quea huiso cahuime. 
\c 15  
\s1 Jesosaja epeejji cuana ojee miminaje Jenosanenajo 
\p  
\v 1 Majoya beca dejja cuana poeyanaje Atioquia huasijje. Oya cuana Jodio dejja, Jodea meshijo baꞌe. Jamajjeya poe majje ohuaya Jesosa Quitoja epeejji cuana jama sohuihuohuime acanaje baꞌa: —¡Etiiquiana Moisesija esohui etehueꞌyo jayojja jama acue! ¡Cuiishasha biso nei jehuisejjajeacue! Jamaya ajjimajo Eyacuiñajjija miya emimishi cuijeaꞌyojji pojjeama —acanaje. 
\p  
\v 2 Shajjaꞌajja majje Pabo, Benabe peaꞌai jjamimicuiajea nobiajeaquinaje janobajjima nei, ma Jodio dejja cuana nijje quea huiso miminaje peaꞌai. Majoya Jesosaja epeejji cuaa jama acanaje baꞌa: —Benabe, Pabo, pea Jesosaja epeejji cuana nijje capoquiahua Jenosanena huasijje. Jomajo Jesosaja huoojeaꞌyo cuana nijje, Jesosaja epeejji etii cuana nijje peaꞌai camimiahua Moisesija etehueꞌyojo, Jesosaja esohuijo peaꞌai —poanaje. 
\p  
\v 3 Majoya Jesosaja epeejji cuaa Atioquiajo baꞌeya oya cuana huoojea canaje. Jenosanena huasijje poquijeya oya cuana Penisia meshijo, Samania meshijo peaꞌai cuiñajji cuana yejje ca poquipoquinaje. Jesosaja epeejji cuana sohuihuohui capoquinaje jama baꞌa: —Jodio pojjeama quea huiso cuana Jesosa nijje jjapeequiani —poanaje. 
\p Ma esohui shajjaꞌajja majje ojjaña Jesosaja epeejji cuana quea bihui nee nee poanaje. 
\p  
\v 4 Majoya oya cuana Jenosanena huasijje poeꞌyonaje. Jomajo ojjaña Jesosaja huoojeaꞌyo cuana, Jesosaja epeejji etii cuana peaꞌai quea bihui nee miminaje Pabo nijje, Benabe nijje peaꞌai. Majoya Pabohua, Benabeya peaꞌai huohui canaje ojjaña Eyacuiñajjiya oya cuana ameesahua canaje Jodio pojjeama cuanajo, pea meshi cuana huasijje. 
\p  
\v 5 Jamatii beca Paniseo cuana ma Moisesija etehueꞌyo jaahuanajji poani nequisohua majje jama poanaje baꞌa: —Chojja. ¡Jodio pojjeama cuana Jesosa nijje jjapeequi majje cuiishasha biso nei cajehuisejjajea cahua! Ojjaña Moisesija etehueꞌyo cuana jayojja jama caꞌa cahua peaꞌai —poanaje Paniseo cuana, Jesosaja epeejji cuana. 
\p  
\v 6 Jamajjeya Jesosaja huoojeaꞌyo, Jesosaja epeejji etii cuana peaꞌai jjachichaquinaje Paniseoja esohuijo mimiya.  
\v 7 Ma esohuijo quea huiso mimimiminaje. Ojjaña cuana mimiꞌyajo, Penohua nequisohua majje ojjaña jama acanaje baꞌa: —Epeejji cuana, yahuajo Eyacuiñajjiya eya huoojea canaje esohui quea pame nee Jesosajo huohuiya Jodio pojjeama cuana huasijje. Shajjaꞌajja cajo, Eyacuiñajjiya oya cuana Jesosa nijje jjapeequi meesahua canaje. Edojjoshahua Pame huoojea canaje ona huasijje dobiquiya. Jamaya miquianajaya eba.  
\v 8 Eyacuiñajjija eba ojjañaja ejjashahuabaquijji. Ohuaya Jodio pojjeama cuana quea pame nee acanaje. Eꞌe, yahuajo Eyacuiñajjiya eseya, Jodio cuana, quea pame aca poa jayojja jama jjeya ohuaya oya cuana acanaje peaꞌai. Eꞌe, Jodio pojjeama cuana que peaꞌai ohuaya Edojjoshahua Pame huoojea canaje ona huasijje dobiquiya.  
\v 9 Eꞌe, Eyacuiñajji jjashahuabaquinaje jama baꞌa: “Jodio pojjeama cuana Jodio cuana jayojjaya” poanaje. Jamajjeya Jesosa nijje jjapeequianijo, ohuaya Jodio pojjeama cuanaja mimishi cuana cuijea caꞌyonaje peaꞌai.  
\v 10 ¿Yajjajo acuae mi Eyacuiñajji jayojja jjashahuabaquime mi poani soꞌo? Miquianaaya jama aña baꞌa: “Jesosaja epeejji cuaa Moisesija etehueꞌyo jayojja jama caꞌa cahua”. Chojja, quea camaja ca coma, de. Esejaya etiiquiana cuanaja, esejaya peaꞌai Moisesija esohui etehueꞌyo cuana jayojja jama aꞌyo jjima poanaje. Quea camaja.  
\v 11 ¡Chojja! Eseyaya ca ca Jesosaja esohui jayojja jama aña. Jamajjeya Emeshi Mese neiya Jesosaa eseya quea jea nee acani. Onijje jjapeequianijo, esejaya mimishi cuana cuijeaꞌyo majje onijje baꞌe tiitii mee cajeꞌyo eyajo. Oya jayojjaya ohuaya acani Jodio pojjeama cuanajo, Jesosa nijje jjapeequianijo peaꞌai —Penohua acanaje. 
\p  
\v 12 Peno mimiꞌyajo ojjaña cuana mimiꞌyo ajja poanaje. Shajjaꞌajja canaje. Majoya Pabohua, Benabeya peaꞌai huohui canaje jama baꞌa: —Jodio pojjeama huasijje ojaya esohui huohuiquiꞌyajo, Eyacuiñajjiya ecuana ma dejjaa ajjima acani ameesahua canaje quea huiso —acanaje. Majoya Pabohua, Benabeya peaꞌai huohui canaje quea huiso. 
\p  
\v 13 Majoya Pabo, Benabe peaꞌai mimi pajeaꞌyajo Satiaco jama poanaje baꞌa: —Epeejji cuana, ¡shajjaꞌajjacue mo!  
\v 14 Penohua jjeyahua nei eseya huohui canaje Eyacuiñajjiya Jodio pojjeama cuana quea jea nee acanaje peaꞌai. Jamajjeya oya cuana Jesosa nijje jjapeequi meesahua caꞌyonaje. Jamaya poanaje Peno.  
\v 15 Eꞌe, jamaya Eyacuiñajjija esohui huohuijjiya yahuajo nei nei huohui ca poa peaꞌai. Jama tehueme aca poa baꞌa: 
\q1  
\v 16 “Quijje eyaya Dabija osecua Emeshi Mese nei po meejeꞌyo. Equi e bihuiajji epajeaꞌyo poa. Poe majje eyaya oya cuana bihuia meesahuaje oꞌoya.  
\v 17 Jamajjeya pea cuana, Jodio pojjeama cuana, ojjaña meshijo baꞌeca enijje jjapeequi sa poaje. Eya ojjañaja Emeshi Mese nei quea pame nee poajeꞌyo.  
\v 18 Jamaya Emeshi Mese nei quea pame neeya huohui ca poa yahuajo nei. Ma esohui yahuajo ohuaya pea cuana ba meesahua ca poa”. 
\m Jamaya yahuajo nei Eyacuiñajjija esohui poa. 
\p  
\v 19 —Jamajjeya eya jjashahuabaquiani jama baꞌa: Jodio pojjeama cuana Jesosa nijje jjapeequianijo ¡aꞌa Moisesija etehueꞌyo jayojja jama ameejji! Chojja, maya quea camaja nee nee.  
\v 20 Jamajjeya Jodio pojjeama cuana huasijje esohui tehuecue jama baꞌa: “Jesosaja epeejji cuana, ¡noe eyacuiñajji nisho bihuiajji onaja dahua aꞌa ijjiajji! ¡Aꞌa pea cojjojji pojji peaꞌai! ¡Noe naꞌ cuaya meequi jjima aꞌa ijjiajji! ¡Ijjiacajji naꞌ aꞌa ishijji! Jamaya miquiaa ajo Jodio cuana miquiana nijje quea quene nee nee poaje”. ¡Jamaya tehuecue Jesosaja epeejji eyacuaja ebajji! —Satiacohua acanaje—.  
\v 21 Eꞌe ojjaña cuiñajjijo Jodio dejja cuanaja esohui huohuijji cuaa Moisesija etehueꞌyo huohui cani Jodioja equi ejjachichaquijjijo. Yahuajo nei huohui ca poa. Jjeya nei huohui cani peaꞌai ojjaña epojja ejomishocajjijo. Jamajjeya ¡aꞌa Moisesija etehueꞌyo jayojja jama ameejji! —acanaje Satiacohua. 
\s1 Jesosaja epeejji etii cuaa esohui tehue canaje Jodio pojjeama cuanaja ebajji, Jesosaja epeejji eyacua cuanaja 
\p  
\v 22 Majoya Jesosaja huoojeaꞌyo cuaa, esohui huohuijji cuaa, Jesosaja epeejji etii cuaa, ojjaña Jesosaja epeejji cuana jomajo nequiya peaꞌai Pabo nijje, Benabe nijje huoojea sa acanaje becanejjijji peaꞌai epeejji cuana Atioquia huasijje. Jamajjeya huoojea canaje Basabaja bacua ejja Joda. Onijje huoojea canaje pea dejja Sinasi bajjani. Oya cuana Jesosaja epeejji cuanaja huoojeaꞌyo poanaje, quea pame nee nee.  
\v 23 Sinasi nijje, Joda nijje peaꞌai esohui etehueꞌyo huoojea canaje Jesosaja epeejji cuanaja ebajji. Ma esohui etehueꞌyo jama poanaje baꞌa: 
\q1 “Epeejji cuana Atioquiajo baꞌe, Sinia meshijo baꞌe, Sinisia meshijo baꞌe peaꞌai, ecuaaya, Jesosaja huoojeaꞌyo cuaa esohui huohuijjiya, Jesosaja epeejji etii cuaa peaꞌai jiquio esohui etehueꞌyo huoojeaña miquiana huasijje, Jesosaja epeejji cuana Jodio pojjeama cuana huasijje. Eꞌe, ecuaaya quea bihui nee tehuenaje miquiana huasijje.  
\v 24 ¿Achajja a quiana ani, ecuanaja epeejji cuana? ¡Bacue! Miquiana huasijje beca dejja jiquiojo nequi tii cuaa Moisesija esohui huohui canaje. Moisesija esohui jayojja jama miquianaya baꞌe meemee ajja. Quea camaja, de. Jamajjeya miquianaya quea yeno poanaje. Ecuanaja ma dejja cuana huoojea jjima miquiana que esohui huohuiya. ¡Aꞌa shajjaꞌajjajji cuana!  
\v 25 Miquianaya quea yeno poanaje. Jamajjeya ecuana jiquiojo tii quea huiso nee ojee jjashahuabaqui majje jama poanaje baꞌa: Ecuaaya miquiana que pea dejja cuana huoojeaña Benabe nijje, Pabo nijje peaꞌai. Eꞌe, Pabo, Benabe peaꞌai ecuanaja epeejji cuana. 
\q1  
\v 26 Oya cuana Emeshi Mese nei Jesosa Quitojo chacochaconaje meteꞌama. Onaaya oya cuana beshahua nei jajahuejjajea caꞌyonaje, Jesosa nijje jjapeequianijojo.  
\v 27 Jamajjeya ecuaaya dejja quea pame becanejjijji peaꞌai huoojeaña miquiana que, Joda, Sinasi peaꞌai. Oya cuaa ecuanaja etehueꞌyo huohui cajeꞌyo miquianaja eshajjaꞌajjajji.  
\v 28 Eꞌe, Edojjoshahua Pameya ecuana jjashahuabaqui mee cani jama baꞌa: Ecuaaya miquianaya huohui ajja Moisesija esohui etehueꞌyo jayojja jama yajji. Chojja, jamaya miquianaaya ameemee ajja. Quea camaja. Jiquio jama acue miquianaaya baꞌa:  
\v 29 ¡Noe ma eyacuiñajji nisho bihuiajji onaja dahua aꞌa ijjiajji! ¡Aꞌa pea cojjojji pojji! ¡Noe naꞌ cuaya meequi jjima aꞌa ijjiajji! ¡Ijjiacajji naꞌ aꞌa ishijji peaꞌai! Jamaya miquiaa ajo Jodio cuana miquiana nijje quea quene nee nee poaje. Mahuiso ecuanaja esohui etehueꞌyo miquiana que. Jamajjeya jamaya añajo miquianaya quea pame nee baꞌeje. Apoa.” 
\m Jamaya Jesosaja huoojeaꞌyo esohui huohuijji cuaa, Jesosaja epeejji etii cuaa peaꞌai tehue canaje Jesosaja epeejji eyacua cuanaja ebajji. 
\p  
\v 30 Jamajjeya Pabo, Benabe nijje, becanejjijji peaꞌai dejja nijje poqui oꞌoyanaje Atioquia huasijje. Jomajo nequiñaqui majje ojjaña Jesosaja epeejji iyaa canaje. Ojee jjachichaquiꞌyajo, etehueꞌyo ba mee canaje.  
\v 31 Ma esohui etehueꞌyo ba majje ojjaña Jesosaja epeejji eyacua cuana quea bihui nee nee poanaje. 
\p  
\v 32 Joda, Sinasi peaꞌai Jesosaja esohui huohuijji poanaje. Jamajjeya oya cuaa Jesosaja epeejji cuana sohuihuohui canaje quea huiso nee. Quea huiso Jesosa nijje jjapeequi meesahua canaje quea jaꞌa nee.  
\v 33 Quea cahui huiso Atioquiajo esohui huohui canaje. Majoya Jesosaja epeejji cuaa Atioquiajo baꞌeya oya cuana huoojea caꞌyonaje Jenosanena huasijje, Jesosaja huoojeaꞌyo esohui huohuijji cuana huasijje. Quea bei nee poquiꞌyonaje.  
\v 34 Sinasi ca ca nequinaje Atioquiajo tii. Poqui sa poꞌyo ajja poanaje.  
\v 35 Pabo, Benabe peaꞌai Atioquiajo nequinaje. Quea huiso pea cuana nijjeya Emeshi Mese nei Jesosaja esohui huohui tiitii canaje. Ojjaña Jesosaja epeejji eyacua cuana esohui ba neinei meesahua canaje. 
\s1 Pabo Benabe nijje poqui pajeaꞌyonaje 
\p  
\v 36 Majoya Pabo Benabe nijje jama poanaje baꞌa: —Cuaꞌa, Jesosaja epeejji cuana ojjaña cuiñajji yasijje ejjabaquiqui oꞌoya, ma yahuajo eseya Jesosaja esohui huohuiquinaje yasijje. Eꞌe pojjaꞌa esejaya esohui pajea caꞌyonaje. Eꞌe pojjaꞌa pajeaꞌyo jjima; baꞌajja —poanaje Pabo. 
\p  
\v 37 —Eꞌe —poanaje Benabe—. Jamaya quea pame. Huani Macoso ese nijje ejjadojoqui peaꞌai, ma yahuajo ese nijje poquiꞌajjanaje. 
\p  
\v 38 —Chojja —acanaje Pabohua—. Yahuajo Panipinia meshijo Huani Macosohua eseya jiña caꞌyonaje. Chacochaco jjima ese nijje. Huacuaya poquiꞌyonaje Jenosanena huasijje. Eya o dojo sa poꞌyo ajja. 
\p  
\v 39 Jamajjeya Pabo, Benabe nijje jjamimicuiajea nobiajeaquinaje. Ojee poqui pajeanaje. Majoya Benabe besapoquinaje Chipe nasi ai yasijje. Huani Macoso dojo canaje onijje echacojji.  
\v 40 Pabohua ca ca Sinasi babaca canaje onijje epoquijji Jesosaja esohui huohuisahuajji. Jamajjeya Jesosaja epeejji cuana ojee Eyacuiñajji nijje miminaje Pabojo, Sinasijo peaꞌai jama baꞌa: —Eyacuiñajji, ¡Pabo, Sinasi peaꞌai poqui meesahuacue miquea esohui huohuiya! ¡Oya cuana jaahuanacue! —poanaje. 
\p  
\v 41 Majoya Pabo Sinasi nijje poqui oꞌoyanaje Sinia meshi yasijje, Sinisia meshi yasijje peaꞌai. Jesosaja esohui huohui capoqui oꞌoyanaje. Ojjaña Jesosaja epeejji cuana Jesosa nijje jjapeequi meesahua canaje quea jaꞌa nee. 
\c 16  
\s1 Timoteo poquinaje Pabo nijje, Sinasi peaꞌa nijje 
\p  
\v 1 Majoya Pabo Sinasi nijje poqui oꞌoyanaje Debe yasijje, Nisata huasijje peaꞌai. Jomajo ohuaya Jesosaja epeejji shacuimaꞌ nequi ba canaje Timoteo bajjani. Timoteoja enaese Jodio pona poanaje, Jesosaja epeejji peaꞌai. Ojaya ejeajji ca ca Jieno dejja poanaje.  
\v 2 Ojjaña Jesosaja epeejji cuaa Nisatajo baꞌeya, Iconiojo baꞌeya peaꞌai Timoteojo quea bihui nee huohui canaje jama baꞌa: —Timoteo quea pame nee, Jesosaja epeejji quea caꞌa nee oya, de —poanaje. 
\p  
\v 3 Jamajjeya Pabohua Timoteo dojo sa acanaje onijje esohui huohuiya. Quea huiso Jodio cuana ma meshijo baꞌenaje; ojjañaja eba Timoteoja ejeajji Jodio pojjeama, Jieno dejja. Jamajjeya ebacua ejja Timoteo Jieno cuana jayojja jama tiiꞌyonaje; Moisesija etehueꞌyo jayojja jama cuiishasha biso nei jehuisejjajea jjima poanaje. Jamajjeya Jodio cuana tecueꞌama onijje epojji Pabohua Timoteo cuiishasha biso nei jehuisejjajea mee canaje. 
\p  
\v 4 Majoya oya cuana poquinaje ojjaña cuiñajji cuana huasijje. Ojjaña Jesosaja epeejji cuana huohui capoquinaje esohui etehueꞌyo ma Jesosaja huoojeaꞌyo esohui huohuijji cuaa, Jesosaja epeejji etii cuaa Jenosanenajo tehue canaje. Ojjaña ma etehueꞌyo ba mee canaje: —Eꞌe, ¡ma etehueꞌyo jayojja jama acue miquianaaya! —acanaje Pabohua, Sinasiya peaꞌai.  
\v 5 Jamajjeya Jesosaja epeejji cuana Jesosaja esohui jayojja jama baꞌe meesahua canaje. Yahuajo oya cuana quea jaꞌa pishana baꞌenaje. Jjeyahua nei ca ca Jesosaja epeejji quea jaꞌa nee baꞌenaje Jesosajo. Quea huiso cuana Jesosa nijje jjapeequi poquipoquinaje peaꞌai. 
\s1 Pabo jjacahuibaquinaje Eyacuiñajji onijje miminaje 
\p  
\v 6 Jamatii Edojjoshahua Pameya oya cuana Asia meshi yasijje poqui mee jjima acanaje. Jomajo esohui huohui mee jjima acanaje. Jamajjeya oya cuana Pichia meshi yasijje poquinaje, Janata meshi yasijje peaꞌai poquinaje.  
\v 7 Majoya oya cuana poeyanaje Misia meshi yasijje. Jomajo oya cuana jjashahuabaquinaje Bitinia meshi yasijje epoquijji. Jamatii Edojjoshahua Pameya oya cuana ma meshi yasijje poqui mee jjima acanaje.  
\v 8 Jamajjeya oya cuana Misia meshije jjayejjequinaje. Toasa cuiñajji yasijje poquinaje, bae ai sahua huasijje.  
\v 9 Jomajo Eyacuiñajjiya Pabo jjacahuibaqui mee canaje jama baꞌa: Jjacahuibaquianijo Pabohua oe dejja cahuiba canaje Masenonia meshijo baꞌe. Oya Pabo nijje miminaje jama baꞌa: —Pabo, ¡poecue Masenonia meshi yasijje, ecuanaja meshi yasijje! ¡Ecuana Jesosaja esohui huohuihuacue! —jamaya acanaje Masenonia dejjaa. 
\p Majoya Pabo shequiꞌyonaje.  
\v 10 Jamajjeya shequiꞌyo majje Pabo Masenonia meshi yasijje ecuana nijje besapoqui sa poanaje. Jama jjashahuabaquime poanaje baꞌa: —Eyacuiñajjiya eseya huoojea cani Masenonia meshi yasijje esohui quea pame nee Jesosajo huohuiya, ojjaña Masenonia meshijo baꞌe sohuihuohuiya. 
\p Jamajjeya ecuana aquiana cuana chicha majje besapoquinaje. 
\s1 Pabo, Sinasi peaꞌai Pinipo cuiñajji yasijje besapoquinaje 
\p  
\v 11 Eꞌe Teopino, eyaya, Nocaa pea esohui Jesosaja epeejji cuanaja, ma eyaya banaje eyaya tehueaña miquea ebajji jama baꞌa: Majoya Toasa huasijje poe majje ecuana bishe ai yasijje nequisohuaquinaje. Besapoquinaje Samatasia nasi yasijje. Majoya pea mecahuajje besapoquinaje Neaponi cuiñajji yasijje, bishe aijo.  
\v 12 Majoya Neaponijo nequi ecuana poquinaje quea huesha nee, Pinipo cuiñajji yasijje ejiojjijje Masenonia meshi ebio dojjojo. Pinipojo Shomano dejja cuana baꞌyani quea quemo cuiñajjijo. Jamajjeya quea huiso dejja Pinipo huasijje poeyani anicuaa. Jamajjeya ecuana Pinipojo nequinaje quea cahui huiso.  
\v 13 Majoya Jodioja epojja ejomishocajjijo ecuana cuiñajji esecue yasijje poquinaje cuei sahua huasijje. Jama jjashahuabaquime poanaje baꞌa: —Jomajo Jodio cuana Eyacuiñajji nijje mimiani baꞌajja. 
\p Jomajo quea huiso epona ejjachichaqui ani banaje. Jamajjeya Pabo, ojaya epeejji cuana peaꞌai anioquenaje. Esohui huohui canaje epona cuanaja eshajjaꞌajjajji.  
\v 14 Oe eponaa Ninia bajjaniya quea jaꞌa nee shajjaꞌajja canaje. Oya Tiatina pona, Tiatina cuiñajjijo baꞌe, daqui huoꞌo quiajji peaꞌai, daqui huoꞌo quea pame nee nee quiajji. Oya Ninia Eyacuiñajjija epeejji yahuajo poanaje. Jamajjeya Emeshi Mese neiya oya shajjaꞌajja meesahua canaje Paboja esohui quea pame nee Jesosaja.  
\v 15 Jamajjeya Ninia, oja huapa pojjeama cuana peaꞌai Jesosa nijje jjapeequiꞌyonaje. Onaaya oya Eyacuiñajjijo besa mee canaje enajo. Majoya Niniaa Pabo jama acanaje baꞌa: —Miquea eba eya Emeshi Mese nei Jesosaja epeejji nei, ojaya esohui jayojja jama aña. Jamajjeya ¡ecuea equijo baꞌecue! —poanaje Ninia. 
\p Jamajjeya ecuana Niniaa jaꞌa cajjequinaje ojaya equijo ebaꞌejji. 
\s1 Pabo, Sinasi peaꞌai jeanobiajea canaje cuaa 
\p  
\v 16 Quijje ecuana poqui oꞌoyanaje cuei yasijje Eyacuiñajji nijje mimiya. Poquijeya ecuaaya banaje oe epona ahuemaꞌ ani. Ohuaya chaco cani sosemaꞌ niñepoqui yajjejojo. Jamajjeya eshahuaa esapajo nequiya epona huohui meesahua canaje ohuaye nei ma quijje onaa acaje. Maya huohui capoquinaje quea huiso bejjo sosejje. O chacomeejji poaniya quea huiso bejjo jjeshe canaje epona niñepoquiya huohui cani sosejje.  
\v 17 Ma epona niñepoqui Pabo quishishijji poquinaje. Taaa poquinaje jama baꞌa: —Jiquio dejja cuana Eyacuiñajji quea caꞌa neeja echacojji poani. Onaaya miquianaya huohui cani esohui quea pame nee Jesosajo, ma ohuaya mimishi cuana cuijeaꞌyo majje miquianaya baꞌe tiitii mee cajeꞌyo eyajo —jama taaa nishomeya poanaje ecuana quishishijji poquije. 
\p  
\v 18 Jama taaa majamaja nishomeya epona popoquinaje quea huiso cahuijo. Quijje Pabo quea quene po majje, jjanojjaquicuaji majje eshahua eponajo nequi huoojeacuayajea caꞌyonaje jama baꞌa: —¡Eshahua eponajo nequi cuayaquiꞌyocue! ¡Aꞌa dobiqui oꞌoyajji! Jesosa Quito nijjeya eyaya miya huoojeacuayajeaꞌyaña —Pabohua acanaje. 
\p Jjeyahua nei eshahua eponaja yamijo nequi cuayaquiꞌyonaje. 
\p  
\v 19 Ma ba majje eponaja echacomeejji poani quea quene nee nee poanaje Pabo nijje, Sinasi nijje peaꞌai. Jama poanaje baꞌa: —¡De! Jjeya epona shahuamaꞌyo. Jamajjeya ojaya baꞌyo jjima poaje ojaye nei ma onaa quijje nei acaje. Onajaya ecuana esosequiaꞌyojji pojjeama ma eponaa huohui cani sosejje —poanaje epona chacomeejji poani. 
\p Jamajjeya epona chacomeejji poaniya Pabo, Sinasi peaꞌai iña canaje. Dojo canaje ojjañaa aquiana quiajji equi yasijje. Jomajo Pinipo emeshi mese nijje miminaje, etii cuana nijje.  
\v 20 Shomano emeshi mese huohuiꞌajja cañaquinaje jama baꞌa: —¡Bacue! Jiquio Jodio dejja cuaa, Pabohua, Sinasiya peaꞌai ojjaña cuana ecuanaja cuiñajjijo baꞌe quea quene nee nee po mee cani.  
\v 21 Eꞌe, oya cuaa pea ejjashahuabaquiꞌyojji huohui canaje. Pea ebaꞌejjijo huohui canaje. Jamaya pojjeama ecuanaja emeshi meseja esohui. Jamaya pojjeama Shomano dejja cuanaja esohui peaꞌai. Ecuana Shomano dejja cuana, jamajjeya Paboja esohui jayojja jama yajji, ¿yajja eꞌajji? 
\p  
\v 22 Majoya ojjaña dejja cuana cuajicuaji jebejenaje Pabo que. Quea quene nee ojjaña poanaje Pabo nijje, Sinasi peaꞌai nijje. Emeshi mese cuana peaꞌai quea quene po majje Paboja daqui Sinasija daqui peaꞌai oja ehuosho baꞌe iñaꞌisajea canaje. Huohui canaje jama baꞌa: —¡Pabo, Sinasi peaꞌai cuiasejja neineicue acui sisiya! ¡Majoya oe jeanobiajea meequicue ejjajeanobiaquijji equi yasijje! —acanaje Pinipo emeshi mese cuaa. 
\p  
\v 23 Jamajjeya Pabo, Sinasi peaꞌai janobajjima nei cuiasejja huichaꞌa huichaꞌa canaje cuaa. Majoya oya cuana dojo canaje ejjajeanobiaquijji equi yasijje jeanobiajeaa. Ejjajeanobiaquijji equi cuiñajji jama acanaje baꞌa: —¡Jiquio dejja cuana jaahuana neineicue! ¡Aꞌa cuayaqui meeꞌyojji! Poquiquehuajo aje mi oe cuiajea cajeꞌyo emeshi mese cuaa —acanaje. 
\p  
\v 24 Jamajjeya ejjajeanobiaquijji equi cuiñajjiya ma esohui shajjaꞌajja majje quea mete poanaje. Pabo, Sinasi peaꞌai ejjajeanobiaquijji equi dojjo nei yasijje jeanobiajea canaje; quibo jeyochicha canaje acui tejjee. 
\p  
\v 25 Jamatii mecashono Pabo, Sinasi peaꞌai Eyacuiñajji nijje mimi jaanaje. Sohuicuaya jaanaje peaꞌai. Ojjaña cuaa ejeanobia jaaa shajjaꞌajja canaje sohuicuaya jaa.  
\v 26 Majoya meshi huehuahuehuanaje janobajjima nei. Mei jiyo cuana huehuahuehua neineinaje peaꞌai. Esecue cuana jamatii nequi jjacaꞌapejojeaquinaje. Ojjaña dejja cuana ejeanobia jaa jjapichojeaquiꞌyonaje baa jjono cuana, de.  
\v 27 Oja ejeanobia cuiña poꞌani aje oe shequiꞌyonaje. Shequiꞌyo majje ba canaje ojjaña esecue cuana ejjacaꞌapejoquiꞌyo nequi. Ojjaña dejja ejeyojaa poquiꞌyonajejo poso metejeanaje. Baa iña canaje ejjaacuaquiꞌyojji nisho.  
\v 28 Jamatii Pabo jama taaame poanaje baꞌa: —¡Aꞌa oe jjaacuaquiꞌyojji! Ecuana yani ojjaña tii; poquiꞌyo jjima —Pabo poanaje. 
\p  
\v 29 Paboja esohui shajjaꞌajja majje equi ejjanobiaquijji cuiñajji taaanaje jama baꞌa: —¡Cuaquijiji oe yecue! —poanaje. 
\p Cuaquijiji iña majje ejjajeanobiaquijji dojjo huasijje cuajicuajipoquinaje Pabo baa. Pabo ba majje ecuiꞌoshajjajo nequinaje. Quea mete jjejojo piopionequinaje. Ojaya eba Pabo, Sinasi peaꞌai Eyacuiñajjija epeejji cuana. Jamajjeya oya cuanajo quea mete nee poanaje.  
\v 30 Majoya ohuaya Pabo, Sinasi peaꞌai ejjajeanobiaquijji dojjojo nequi dojocuayaqui caꞌyanaje. Oja equi yasijje dojo canaje. Huohuiꞌajja cañaquinaje jama baꞌa: —Epeejji cuana, ¿aya acuae ecuea mimishi cuana cuijea cajeꞌyo soꞌo? ¿Yajja po majje acuae mo poquijeꞌyo eyahuasijje? ¿Yajja acuae po cajji cuaqui yasijje poquiꞌyo jjima epojji? —acanaje ejjajeanobiaquijji cuiñajji poaniya. 
\p  
\v 31 —Eꞌe —Pabo poanaje—, Emeshi Mese nei quea pame Jesosa Eyacuiñajjija huoojeaꞌyo ojjaña jaahuanajji. ¡Onijje mimicue, onijje jjapee neineiquicue! ¡Ojaya esohui jayojja jama baꞌecue! Jamajjeya ohuaya miquea mimishi cuana cuijea cajeꞌyo. Ojjaña miquea huapa pojjeama cuaa miquea equijo baꞌeya jamaya caꞌa cahua peaꞌai. Jamajjeya mimishi cuijeaꞌyo majje Jesosaa miquianaya baꞌe tiitii mee cajeꞌyo eyajo onijje —Pabohua acanaje. 
\p  
\v 32 Majoya Pabohua, Sinasi nijjeya esohui quea pame nee Jesosajo, Emeshi Mese neijo huohui canaje ojjaña ma equijo baꞌeca cuanaja eshajjaꞌajjajji.  
\v 33 Shajjaꞌajja majje ejjajeanobiaquijji cuiñajjiya ecuia sii Paboja edaasa, Sinasija edaasa peaꞌai shacua canaje. Shacua majje shicui canaje mechashono nei. Majoya oya, ojjaña ojaya huapa pojjeama cuana nijje peaꞌai Jesosa nijje jjapeequinaje. Majoya oya, ojaya huapa pojjeama cuana peaꞌai Eyacuiñajjijo besa mee canaje enajo.  
\v 34 Majoya ohuaya Pabo, Sinasi peaꞌai oja equi yasijje dojodobiaqui majje oya cuana bobia canaje. Oya, ojaya huapa pojjeama cuana peaꞌai quea bihui nee nee poanaje Jesosa nijje jjapeequi majje, Eyacuiñajji nijje peaꞌai. 
\p  
\v 35 Majoya mecajjeahua nei Shomano emeshi mese cuaa sohuinano cuana huoojea canaje ejjajeanobiaquijji equi yasijje jama huohuime yajji baꞌa: —¡Pabo, Sinasi peaꞌai pichojeaꞌyocue! 
\p  
\v 36 Jamajjeya ejjajeanobiaquijji cuiñajjiya Pabo huohui canaje jama baꞌa: —Pabo, Shomano emeshi mese cuaa miquianaya pichojea mee caꞌyonaje. ¡Jjeyahua nei esecue yasijje cuayaquiꞌyocue! ¡Quea bei nee poquicue, Pabo, Sinasi! —acanaje ejjajeanobiaquijji cuiñajjiya. 
\p  
\v 37 —Chojja —Pabo poanaje—. Ecuana mimishiꞌama. Jamatii Pinipo emeshi meseya ecuana iña mee canaje. Jeanobiajea mee canaje peaꞌai. Ojjañaa ba caquinaje onaa janobajjima nei cuiasejja caqui. Ecuana ca ca Shomano dejja peaꞌai. Jamajjeya jjeyahua nei ecuana quehuajje nei huoojea sa acani. Chojja, de. Oya cuana capoeꞌyahua, oya tii. Shomano emeshi meseya ecuana capichojea caꞌyahua, ecuana cadojocuayaqui caꞌyahua esecue yasijje ojjañaja ebajji —Pabo poanaje. 
\p  
\v 38 Jamajjeya sohuinano cuana poquinaje. Shomano emeshi mese cuana huohui cañaquinaje Paboja esohui. Shajjaꞌajja majje Shomano emeshi mese cuana quea mete nee nee poanaje: —Eꞌe de, Pabo, Sinasi peaꞌai Shomano dejja cuana, de. Jamaya ecuanaja ba jjima. Shomano emeshi mese etiiya ecuana tecuea ca chanaꞌ —poanaje Pinipo emeshi mese cuana. 
\p  
\v 39 Jamajjeya Pinipo emeshi mese cuana ma Pabo cuiasejja meejji epo poquinaje Pabo baa, Sinasi baa peaꞌai. Quea bei nee nee huohui canaje jama baꞌa: —Pabo, Sinasi, ecuana quea yeno nee nee miquiana cuiasejja mee epojjijojo. ¡Aꞌa che ecuana nijje quea quene nee pojji! ¡Jjeya quea bei cuayaquiꞌyocue! ¡Aꞌa jiquio cuiñajjijo esohui huohui oꞌoyajji! —acanaje Pinipo emeshi mese cuaa. 
\p Majoya oya cuaa Pabo, Sinasi peaꞌai pichojea caꞌyonaje. Jama acanaje baꞌa: —Eꞌe pojjaꞌa miya pea meshi yasijje poquije esohui huohuiya —jama amajjeya huoojea canaje quea beiya. 
\p  
\v 40 Jamajjeya Pabo, Sinasi peaꞌai ejjajeanobiaquijji equijo nequi poqui oꞌoyanaje Niniaja equi yasijje. Ojjaña Jesosaja epeejji cuana ba oꞌoya majje ojjaña nijje miminaje; poquinaje. —Eꞌe, poquia iña. ¡Jesosa nijje quea pame nee jjapeequicue meteꞌama! —Pabo poanaje, Sinasi peaꞌai. 
\c 17  
\s1 Pabo Tesanonica cuiñajji yasijje poquinaje 
\p  
\v 1 Jamajjeya Pabo, Sinasi peaꞌai Pinipojo ani poquinaje Tesanonica cuiñajji yasijje. Poquijeya Apiponi cuiñajji yejje canananaje, majoya Apononia peaꞌai yejje canananaje. Tesanonica huasijje poqui majje aniñaquinaje. Jomajo Jodioja equi ojee ejjachichaquijji yani.  
\v 2-3 Ma equi yasijje Pabo poquinaje Sinasi nijje. Ojjaña ejomishocajji pojjajo Jesosaja esohui huohui huichaꞌa huichaꞌa canaje. Jodio cuana nijje jjamimicuiajea nobiajeaquinaje peaꞌai. Beshahua nei oe baꞌime Eyacuiñajjija esohui huohuijji yahuajo nei baꞌeja esohuijo ohuaya Tesanonica dejja cuana jjabahuejjaqui mee canaje. Jama acanaje baꞌa: —Eyacuiñajjija huoojeaꞌyo ojjaña jaahuanajji esejo quea nee poanaje. Manoꞌyonaje eseja mimishi cuijeaꞌyojji. Manoꞌyo majje shequi oꞌoyanaje. Eyacuiñajjija huoojeaꞌyo ojjaña jaahuanajjijo, Jesosajo, eyaya huohuiaña miquianajaya eshajjaꞌajjajji —Pabohua acanaje. 
\p  
\v 4 Paboja esohui shajjaꞌajja canaje quea huiso Jodio cuaa. Jjapeequiꞌyonaje Jesosa nijje. Pabo nijje, Sinasi nijje peaꞌai jjapeequinaje. Quea huiso Jieno cuana ma yahuajo nei Eyacuiñajjija epeejji epo cuana Pabo nijje jjapeequinaje, Sinasi nijje peaꞌai. Etii cuanaja ehuanase cuana Jesosa nijje jjapeequiꞌyonaje peaꞌai.  
\v 5 Jamajjeya quea huiso nee Pabo nijje jjapeequiani ba majje Jodio etii cuana quea quene poanaje. Quea huiso dejja mimishi cuana iyaa canaje. Quea huiso jjachichaqui mee canaje. Ojjaña quea quene, quea shajjaquijjo nee nee po mee canaje. Majoya ojjaña cuana Jasonija equi yasijje cuajicuajijebenaje Pabo, Sinasi peaꞌai cuiaa nisho.  
\v 6 Eꞌe, oya cuaa Pabo, Sinasi peaꞌai saꞌajja canaje. Chamaꞌ ba majje equi mese Jasoni bajjani iña canaje. Jesosaja epeejji cuana iña canaje peaꞌai. Dojo canaje dejja etii cuana huasijje tecueaa. Janobajjima nei taaa majamajanaje jama baꞌa: —Pabohua, Sinasiya peaꞌai quea huiso cuana pea esohui huohui canaje. Oya cuana jiquiacua poeyanaje peaꞌai esohui huohuiya.  
\v 7 Jasoniya ca ca oma oya cuana oja equijo baꞌe mee canaje. Oya cuana ecuanaja emeshi mese etiija, Sesa bajjanija esohui shajjaꞌajja sa poꞌyo ajja. Oya cuaa ca ca huohui canaje pea emeshi mese nei yani, Jesosa bajjani —jama siajje ameya acanaje Jodio cuaa Tesanonicajo baꞌe cuaa. 
\p  
\v 8 Ojjaña Tesanonicajo baꞌe, cuiñajji mese cuana peaꞌai quea mete nee nee poanaje ma esohui shajjaꞌajja majje.  
\v 9 Jamajjeya Tesanonica mese cuaa Jasoni, oja epeejji cuana peaꞌai tecuea canaje jama baꞌa: —¡Pabo, Jesosaja epeejji cuana peaꞌai aꞌa miquea equi yasijje dobi mee oꞌoyajji! ¡Huoojeacue oe! 
\p Majoya Jasoni, ojaya epeejji cuana peaꞌai bejjo sose quia mee canaje ejeacuayaꞌyojji. Ma sosequia majje Jasoni ojaya epeejji cuana nijje poquiꞌyonaje. 
\s1 Pabo, Sinasi peaꞌai Benea meshi yasijje poquinaje 
\p  
\v 10 Jamajjeya ma mecajje tii Tesanonicajo baꞌecaa, Jesosaja epeejji cuaa Pabo, Sinasi peaꞌai huoojea canaje Benea meshi yasijje. Benea cuiñajji yasijje poqui majje Pabo, oja epeejji cuana nijje poquinaje Jodioja equi ejjachichaquijji yasijje. Esohui huohui ca oꞌoyanaje.  
\v 11 Jodio cuana Beneajo baꞌe quea pame nee, Jodio cuana Tesanonicajo baꞌe jayojja jama pojjeama. Oya cuaa ca ca oe Paboja esohui quea bihui nee nee shajjaꞌajja canaje, Sinasija esohui peaꞌai. Majoya Eyacuiñajjija esohui yahuajo nei tehue ba neinei canaje. Jama poanaje baꞌa: —Eꞌe, Paboja esohui eꞌe nei. Jamaya Eyacuiñajjija esohui yahuajo nei tehue poani eꞌe jojo nei —poanaje cuana. 
\p  
\v 12 Jamajjeya quea huiso nei Beneajo baꞌeca Jesosa nijje jjapeequiꞌyonaje. Quea huiso Jieno cuana jomajo baꞌe peaꞌai Jesosaja epeejji cuana poanaje. Jieno epona cuana quea huiso peaꞌai Jesosa nijje jjapeequiꞌyonaje, epona quea pame nee cuana, etii cuanaja ehuanase cuana. 
\p  
\v 13 Jamatii Jodio dejja cuana Tesanonicajo baꞌe onaaya huohui canaje jama baꞌa: —Pabohua Jesosaja esohui huohui cani Beneajo peaꞌai. 
\p Ma shajjaꞌajja majje oya cuana poeyanaje Benea huasijje; Pabo ocuena canaje ecuiajji nisho.  
\v 14 Ma ba majje ca ca Jesosaja epeejji cuaa Beneajo baꞌeya Pabo quehuadojo canaje bae ai yasijje. Sinasi ca ca Beneajo tii nequiꞌyonaje Timoteo nijje.  
\v 15 Jamajjeya Jesosaja epeejji cuaa Pabo dojo canaje, Atena cuiñajji yasijje besapoquinaje. Majoya Pabohua oya cuana huohui canaje jama baꞌa: —¡Ecuea epeejji Sinasi, Timoteo peaꞌai huoojeacue jiquiacua jjeyahua nei! Oya poeyajo eyaya ishoaje jiquiojo —Pabo poanaje. 
\p —Eꞌe, huohuiñaquijeꞌyo aje ecuaaya. Poquiꞌya iña —amajje oya cuana poqui oꞌoyanaje Benea huasijje. 
\s1 Atenajo Pabohua esohui huohuiqui canaje 
\p  
\v 16 Jamajjeya Pabohua Atenajo aniya ojaya epeejji ishoaꞌajja canaje, Sinasi, Timoteo peaꞌai. Atenajo aniya Pabohua ba canaje quea huiso nee nee eyacuiñajji nisho, epanaꞌyo cuana bihuia cani. Eꞌe, ojjaña ma cuiñajjijo baꞌeca cuaa pea epanaꞌyo bihuia caqui ba majje Pabo quea quene nee nee poanaje.  
\v 17 Jamajjeya Jodioja equi ejjachichaquijji yasijje Pabohua esohui huohui huichaꞌa huichaꞌa canaje. Quea huiso miminaje Jodio cuana nijje, Jodio pojjeama nijje peaꞌai joya Eyacuiñajjija esohui bajji cuana nijje. Ojjaña pojjajo aquiana quiajji equi yasijje poqui majje Pabohua esohui huohui canaje ojjaña cuana huasijje.  
\v 18 Majoya pea cuana Epiconeoja esohui shajjaꞌajjajji, Esitoicoja esohui huohuijji peaꞌai onijje miminaje quea huiso. Jjamimicuiajea nobiajeaquinaje. Pabo nijje mimi majje beca cuana jama poanaje baꞌa: —Jiquio dejjaa Pabo bajjaniya pea esohui huohui cani, de. ¿Ajeo shai oya mimiani soꞌo? Ecuanajaya Paboja esohui shajjaꞌajja jjima. Quea quehua, de. 
\p Pea cuaa ca ca jama acanaje baꞌa: —Ohuaya pea eyacuiñajji cuanajo huohui cani pojjaꞌa, ma eyacuiñajji ecuanaja ba jjimajo —acanaje cuaa. 
\p Pabohua Jesosajo huohui canaje jama baꞌa: —Eyacuiñajjiya Jesosa emanoꞌyojaa shequi mee ca oꞌoyanaje. Jamajjeya ohuaya dejja cuana shequi mee cajeꞌyo —Pabohua acanaje. 
\p Ma esohui Atena cuanaja quea quehua, yahuajo shajjaꞌajja jjimajojo.  
\v 19 Jamajjeya ohuaya Pabo dojo canaje Aneopaco eyiyo huasijje esohui huohui meeya. Eꞌe, ma eyiyo huasijje ojjaña cuana jjachichaquinaje ojjañaa huohui caje esohui shajjaꞌajjaa. Jamajjeya Pabo poeyajo, jama acanaje cuaa baꞌa: —Eꞌe, ecuana miquea esohui shajjaꞌajja sa poani.  
\v 20 Ma ehuohuiꞌyo eyacua pojjaꞌa. ¡Ojjaña huasijje huohui neineicue! —acanaje cuaa—. Eꞌe, quiꞌajjaya ecuanaja esohui ba jjima yahuajo. ¡Ba meecue mo oe! —poanaje. 
\p  
\v 21 (Eꞌe, ojjaña Atenajo baꞌeca cuana, ojjaña joya Atena huasijje poeyani anicuaa peaꞌaiya ehuohuiꞌyo eyacua shajjaꞌajja sa acanaje ojjaña pojjajo. Esohui eyacua huohui canequinaje quea huiso neeya. Jamatii mimimiminequinaje ojjaña cuana, chacochaco jjima poanaje.) 
\p  
\v 22 Jamajjeya Pabohua Aneopaco eyiyojo nequiya ojjaña huohui canaje jama baꞌa: —Dejja cuana Atenajo baꞌe cuaa, ¡shajjaꞌajjacue jiquio eya huohuije, miquianaaya! Miquianaya quea huiso nee jjashahuabaquiani eyacuiñajji cuanajo. Jamaya ecuea eba.  
\v 23 Eꞌe, eya poꞌayequiequinaje. Eyaya banaje quea huiso epanaꞌyo cuana, ma miquianaa bihuiaña. Majoya eyaya banaje peaꞌai mei eꞌiyasohua ao ani peaꞌai eyacuiñajji bihuiajji; ma miquianaaya “Bajjani ba jjima” tehuenaje. Miquianaaya maya Eyacuiñajji bihuiaña, jamatii miquianajaya oya ba jjima. Ma Eyacuiñajji neijo eyaya esohui huohuiaña miquianajaya ebajji.  
\v 24 Eꞌe, yahuajo nei nei Eyacuiñajjiya jiquio meshi pana ca poa. Ojjaña aquiana cuana oja pana peaꞌai, de, ojjaña tii. Oya ca ca oe Emeshi Mese nei, ojjaña huoojeaꞌyojji, ojjaña eyajo ani, ojjaña meshi cuanajo nequi huoojeaꞌyojji peaꞌai. Jamajjeya Eyacuiñajji equijo baꞌe ajja, eseja iya equijo baꞌe ajja oya.  
\v 25 Eseyaya oya jaahuana ajja, de; oya esejaya ebaꞌesahuajji pojjeama peaꞌai. Chojja, ohuaya ca ca oe eseya ojjaña cuana eshe po mee caꞌyani; baꞌe meesahua cani. Ojjaña aquiana cuana, bobi peaꞌai ohuaya quia cani eseya.  
\v 26 Yahuajo nei nei Eyacuiñajjiya oe dejja pana ca poa. Ma dejja ojjaña jeajji poa; ojjaña cuana ojjaña meshi cuanajo baꞌeca cuanaja baba. Tehuetehue cuanaja baba, pea dejja cuanaja baba, ojjaña ese ejja cuanaja baba peaꞌai poanaje Adana. Eyacuiñajjiya ojjaña cuana jjabaꞌechejjequi mee ca poa ojjaña meshi cuana huasijje. Eꞌe, yahuajo nei Eyacuiñajjiya huohui ca poa jama baꞌa: “Ma dejja cuana baꞌe caje ma meshijo, pea jomajo. Ma shequiaja huisome tii pea meshi cuanajo baꞌe caje cuana” aca poa Eyacuiñajjiya.  
\v 27 Jamaya Eyacuiñajjiya amee canaje ojjaña cuana ojo ejjashahuabaquijji, onijje ejjapeequijji. Jamaya Eyacuiñajjiya eseya sa cani ojaya epeejji pojji. Jamatii oya hueshaꞌama, quea chipi nee ani tii tii, ojjaña ese chipi nei ani.  
\v 28 Eꞌe, yahuajo miquianajaya esohui tehuejjiya tehue ca poa jama baꞌa: 
\q1 “Eyacuiñajji yanijo eseya eshe nequi. Ohuaya eseya baꞌe meesahua cani, chaco meesahua cani peaꞌai. Oja pana jjima jjemo eseya chamaꞌ pome. Ojjaña eseya Eyacuiñajjija bacua cuana, oja pana peaꞌai”. 
\m Jamaya yahuajo nei tehue ca poa —Pabo poanaje. 
\p  
\v 29 —Jamajjeya eseya oja bacua cuana poaniya, oja pana poaniya ¿apiojji acuae oya miquianaaya ba jjima aña soꞌo? ¿Apiojji acuaeya Eyacuiñajji mei huoꞌo epanaꞌyo, mei oshe epanaꞌyo, mei caꞌa epanaꞌyo jayojja jama poso aña soꞌo miquianaaya? Chojja, Eyacuiñajji miquianajaya epanaꞌyo jayojja jama pojjeama. ¡Meshi epanaꞌyo nequi jayojja jama poso aꞌa ajji, de!  
\v 30 Yahuajo nei dejja cuanaja Eyacuiñajji ba jjima poa. Jamatii Eyacuiñajjija oya cuana napa jeyojeyo jjima poa oja mimishi cuanajo. Jjeya ca ca ohuaya ojjaña cuana huohui canaje jama baꞌa: “¡Miquea mimishi cuana pajeaꞌyocue! ¡Enijje jjapeequicue!  
\v 31 Eꞌe, quijje eyaya ecue huoojeaꞌyo ojjaña jaahuanajji Jesosa huoojeaje. Ojjaña ojaya eba quea jaꞌa nee. Jamajjeya ohuaya ojjaña sosequia caje ma oya cuaa acanaje sosejje. Joya quea pame nee baꞌenaje ohuaya quea bihui nee baꞌe tiitii mee cajeꞌyo. Mimishi cuana ca ca oe quea nee nee tii tii poajeꞌyo” aca poa Eyacuiñajjiya —Pabo poanaje. 
\p —Jamajjeya Jesosa manoꞌyajo Eyacuiñajjiya oya shequi mee ca oꞌoyanaje. Jamaya ohuaya ojjaña cuana ba mee canaje jiquio esohui Jesosajo eꞌe nei —Pabo poanaje. 
\p  
\v 32 Eyacuiñajjiya dejja cuana shequi mee ca oꞌoyanaje Pabo poajo shajjaꞌajja majje quea huiso dejja cuana soa neineinaje shajjaꞌajja sa po ajja jjejojo. Pea cuaa ca ca Pabo huohui canaje jama baꞌa: —Quijje ecuaaya miquea esohui shajjaꞌajjaje oꞌoya —acanaje cuaa. 
\p  
\v 33 Majoya Pabo esohui huohuinaꞌyo majje poquiꞌyonaje.  
\v 34 Beca cuana Pabo nijje poquinaje. Ojaya esohui shajjaꞌajja majje Jesosa nijje jjapeequiꞌyonaje. Eꞌe, Aneopaco meshi cuiñajji Dionisio bajjani, oe epona Damanisi bajjani, pea cuana peaꞌai Jesosa nijje jjapeequiꞌyonaje. 
\c 18  
\s1 Pabo Conitio huasijje poquinaje 
\p  
\v 1 Majoya Pabo Atenajo nequi poquinaje Conitio cuiñajji yasijje ejiojjijje.  
\v 2 Conitiojo ohuaya Jodio dejja Aquina bajjani ba canaje. Aquina aje Jodio dejja, Ponito meshijo cuaya. Yahuajo Ponito meshijo baꞌe oya poquinaje Itania meshi yasijje. Shoma cuiñajjijo baꞌenaje. Majoya Itania meshi meseya Canio bajjaniya ojjaña Jodio cuana Shomajo baꞌe huoojea canaje pea cuiñajji cuana huasijje: —Jodio cuana, Shomajo ¡aꞌa baꞌejji! ¡Poquicue miquianaya ojjaña! —acanaje Shoma meshi mese Caniohua. 
\p Jamajjeya Aquina oja huanase Pisina nijje poeyanaje Conitio huasijje baꞌeya. Jamajjeya Pabo Conitio huasijje poe majje poquinaje Aquina baa.  
\v 3 Pabo daqui moo equi socojji poanaje; Aquina peaꞌai daqui moo equi socojji. Jamajjeya Pabohua Aquina nijjeya daqui equi cuana soco canaje ojaya equijo, Aquinaja equijo.  
\v 4 Ojjaña epojja ejomishocajjijo Pabo Jodioja equi ejjachichaquijji yasijje poquinaje esohui huohuiya. Eyacuiñajjija esohui Jesosajo huohui canaje Jodio cuana huasijje, Jodio pojjeama cuana huasijje peaꞌai. Jama acanaje baꞌa: —Jesosa Eyacuiñajjija huoojeaꞌyo ojjaña jaahuanajji eꞌe jojo nei —Pabohua acanaje. 
\p  
\v 5 Majoya Paboja epeejji Sinasi, Timoteo nijje Masenonia meshijo nequi Benea cuiñajjijo esohui huohui ponequinaje, poeyanaje Conitio huasijje Pabo baa. Timoteo, Sinasi peaꞌai poeyajo, Pabohua Eyacuiñajjija esohui Jesosajo huohui majamaja canaje Jodio oo pana huasijje: —Jodio cuana, ¡bacue! Jesosa eꞌe jojo nei Eyacuiñajjija huoojeaꞌyo ojjaña jaahuanajji —Pabohua huohui tiitii canaje. 
\p  
\v 6 Jamatii Jodio dejja cuana Pabo nijje jjamimicuiajea nobiajeaquinaje ma esohuijo. Pabo nijje mimijajinaje peaꞌai. Jamajjeya quea tecue po majje Pabohua oja daqui ao jjequiꞌiyaja canaje. Jamaya ohuaya ojjaña ba mee canaje ma Jodio dejja cuana quea mimishi nee nee, shajjamaꞌ nei nei. Majoya Pabohua jama acanaje baꞌa: —Shajjamaꞌ nei nei ca mi coma. ¡Shajjamaꞌ poanijo Eyacuiñajjiya miquianaya canapa cahua! Eyaya miquianaya ojjaña Eyacuiñajjija esohui eꞌe nei Jesosajo huohuinaje. Jamajjeya mi jjashajjaꞌajjaquiajo eyaya miquianaya jeajeanajeꞌyo. Jjeyahua nei eya poquijeꞌyo Jodio pojjeama cuana sohuihuohuiya —Pabohua acanaje. 
\p  
\v 7 Jamajjeya Jodioja equijo nequi cuayaquiꞌyo majje Pabo poquinaje Tito Jositoja equi yasijje. Tito Eyacuiñajjija epeejji Jodio pojjjeama. Ojaya equi Jodioja equi ojee ejjachichaquijji pejjejo nequi che chipi nei.  
\v 8 Jodioja equi ejjachichaquijji cuiñajji Quisipo ca ca Emeshi Mese nei Jesosa nijje jjapeequiꞌyonaje. Oja huapa pojjeama cuana oja equijo baꞌe cuana peaꞌai Jesosa nijje jjapeequiꞌyonaje. Quea huiso cuana Conitiojo baꞌe peaꞌai Paboja esohui shajjaꞌajja majje Jesosa nijje jjapeequiꞌyonaje. Jamajjeya pea cuaa oya cuana besa mee canaje Eyacuiñajjijo enajo. 
\p  
\v 9 Majoya oe mecajje Pabo cahuijaajo, Emeshi Mese neiya Jesosaa oya jjacahuibaqui mee canaje jama baꞌa: —Pabo, ¡aꞌa quea mete pojji! ¡Ecuea esohui aꞌa huohui pajeaꞌyojji! ¡Huohui tiitiicue!  
\v 10 Eya minijje nequianijo, pea cuaa miya enapajji pojjeama. Esapa jajahuejjajeajji pojjeama. Eꞌe, jiquio cuiñajjijo ecuea epeejji quea huiso yani —jamaya Jesosaa Pabo jjacahuibaqui mee canaje. 
\p  
\v 11 Jamajjeya Pabo Conitiojo nequinaje; beshahua nei becanejjijji peaꞌai daqui sheme epo nequinaje. Eyacuiñajjija esohui Jesosajo huohui canaje quea huiso cuana jomajo baꞌeja eshajjaꞌajjajji. 
\p  
\v 12 Majoya dejja Canio bajjani Acaya meshi mese poanaje, Shomano emeshi meseja echacojji. Ma pojjajo Jodio cuana quea huiso mimijaji sa poanaje Pabo nijje. Jjachichaqui majje Pabo iña canaje; dojo canaje emeshi mese Canioja equi yasijje Canioja enapa meejji nisho. Esohui huohuijjijojo Pabo niñeba canaje cuaa jama baꞌa:  
\v 13 —Jiquio dejjaja Pabo bajjanija esohui eyacua. Ecuanaja etiiquiana Moisesija esohui jayojja jama pojjeama ohuaya ojjaña cuana Eyacuiñajji bihuia mee sa acani. Moisesija esohui pajea mee sa acani peaꞌai —acanaje Jodio etii cuaa. 
\p  
\v 14 Pabohua beshahua nei sajaꞌa canijo emeshi mese Caniohua Jodio cuana tecuea canaje jama baꞌa: —Jodio cuana, ¡shajjaꞌajjacue mo! Jiquio dejja Pabo quea mimishi poani jojjemo eyaya miquianaya shajjaꞌajjaꞌyome.  
\v 15 Jamatii oya mimishi ajjimaꞌ; eya onijje quea quene pojjeama. Miquianaya ca ca oe quea quene poani oja esohuijo. Miquea etiiquianaja esohui cuanajo ca ca oe miquianaya mimipanajajiani onijje. Jamajjeya ¡poquicue! Eyaya ehuohuijji pojjeama Pabojo. Miquea esohui o tecueajji shajjaꞌajja sa poꞌyo ajja. ¡Miquianajaya ejjashahuabaquiꞌyojji jayojja jama acue Pabojo! —acanaje emeshi mese Caniohua. 
\p  
\v 16 Caniohua quea tecue nee po majje Jodio cuana huoojeacuayajea caꞌyonaje esecue yasijje.  
\v 17 Esecue yasijje cuayaquiꞌyajo Jodio pojjeamaa Jodioja equi ejjachichaquijji cuiñajji Sosetene iña canaje. Cuiasejja neinei canaje Canio cojja nei. Jamatii emeshi mese Canio mimijajiqui bajea sa po ajja poanaje: —Jamatii —poanaje oya. 
\s1 Pabo Antioquia huasijje poqui oꞌoyanaje 
\p  
\v 18 Jamajjeya Pabo oja epeejji cuana nijje Conitiojo esohui huohui ponequinaje quea cahui huiso nee. Majoya ohuaya Aquina nijjeya, Pisina peaꞌai nijjeya ojjaña Jesosaja epeejji cuana Conitiojo baꞌe jiña caꞌyonaje: —Poquia iña —amajje oya cuana poquinaje bae sahua huasijje. Ebishe mese sosequia canaje Sinia meshi yasijje ebesapoquiꞌyojji, quea huesha nee. Bishe ai yasijje ani jjimahuaa Pabohua ehuojja dedejea mee canaje. Eꞌe, ohuaya yahuajo huohui canaje jama baꞌa: —Eyaya esapa dedepojjijeaje ojjañaja ebajji eyaya ma ecua eya yahuajo Eyacuiñajji nijje miminaje jayojja jama ajeyoꞌyonaje —Pabohua acanaje. Jamaya yahuajo nei Jodio cuaa acaninaje. 
\p  
\v 19 Majoya Pabo, Aquina nijje, Pisina peaꞌai nijje Epeso cuiñajji yasijje besapoquinaje bishejje. Paboja epeejji cuana Aquina, Pisina peaꞌai nequinaje Epesojo. Pabo Jodioja equi ejjachichaquijji yasijje poqui majje dobiquinaje Jodio dejja cuana esohui quea pame nee Jesosajo huohuiya.  
\v 20 Shajjaꞌajja majje Jodio cuana onijje jama poanaje baꞌa: —Pabo, ¡jiquiojo ecuana nijje nequicue! ¡Ecuana sohuihuohuicue quea cahui huiso nee! —poanaje ma Jodio cuana. 
\p Jamatii Pabo nequi jjima poanaje.  
\v 21 Poqui jjimahuaa oya cuana huohui canaje jama baꞌa: —Eyacuiñajjiya huoojea cajje eya poeje oꞌoya miquiana baa. Quijje poeje oꞌoya —acanaje Pabohua. 
\p Majoya bishe ai yasijje ani oꞌoya majje Pabo Epesojo esohui huohui poequi besapoquinaje Jodea meshi yasijje. 
\p  
\v 22 Sesanea huasijje baꞌeñaqui majje Pabo etaja huasijje nequisohuaquinaje. Majoya poquinaje Jenosanena huasijje. Jenosanena bañaqui majje Jesosaja epeejji cuana ba canaje. Pabohua oya cuana huohui canaje quea bei neeya: —Eꞌe, ¿achajja a nequiana ani soꞌo? —poanaje Pabo. 
\p Majoya ma ba majje oya Jenosanenajje jjayejjequinananaje. Poquiꞌyonaje Atioquia huasijje ejiojjijje.  
\v 23 Quea cahui huiso nequinaje Atioquiajo. Majoya oya poqui oꞌoyanaje Janata meshi yasijje, Pichia meshi yasijje peaꞌai. Ma meshi cuanajo Jesosaja epeejji cuana esohui huohui oꞌoya majje ojjaña quea jaꞌa nee jjapeequi meesahua canaje Jesosa nijje. 
\s1 Aponohua esohui huohui canaje Epesojo 
\p  
\v 24 Pea Jodio dejja Apono bajjani poeyanaje Epeso cuiñajji yasijje. Yahuajo Apono Anejania cuiñajjijo baꞌe. Oya esohui huohuijji quea pame nee; Eyacuiñajjija esohui etehueꞌyo ojaya eba nei nei.  
\v 25 Yahuajo onaaya oya huohui canaje esohui quea pame nee Emeshi Mese neijo, Jesosajo. Majoya ohuaya bichoꞌama esohui huohui canaje eꞌe jojo nei Jesosajo. Jamatii Huanija, ma ona besameejji poanija esohui ca ca oe ojaya eba, Aponoja.  
\v 26 Ohuaya esohui huohui canaje Jodioja equi ejjachichaquijjijo quea huiso nee. Oja esohui shajjaꞌajja majje Paboja epeejji Aquinaa, oja huanaseya peaꞌai Apono dojo canaje equi yasijje. Majoya ohuaya Apono ojjaña Eyacuiñajjija esohui Jesosaja epoeꞌyojjijo huohui canaje. Yahuajo Aponoja ba jjima poanaje ojjaña Jesosaja esohui.  
\v 27 Quijje pishana Apono Acaya meshi yasijje poqui sa poanaje. Jesosaja epeejji cuaa Atioquiajo baꞌeya oya poqui meesahua canaje. Esohui quea pame nee ojo tehue canaje Jesosaja epeejji cuana Acaya meshijo baꞌeja ebajji. Majoya Acaya meshi yasijje poqui majje Aponohua Jesosaja epeejji cuana Jesosaja esohuijo jjashahuabaqui mee canaje. Ojjañaa joya Eyacuiñajjiya Jesosa nijje jjapeequi meesahua canajeya, ojaya quea jea nee neeya shajjaꞌajja canaje.  
\v 28 Jamajjeya pea cuaa ba canijo, Aponohua quea jaꞌa nee Jodio dejja cuana huohui canaje Jesosajo. Apono quea mimi jaꞌa nee poanaje. Jamajjeya ohuaya Jodio cuana mimicuiajeanobiajea caꞌyonaje. Aponohua Eyacuiñajjija etehueꞌyo huohui neinei majje ojjaña ba mee canaje Jesosa eꞌe jojo nei Eyacuiñajjija huoojeaꞌyo ojjaña jaahuanajji poani. 
\c 19  
\s1 Pabo Epeso huasijje poqui oꞌoyanaje 
\p  
\v 1 Apono Conitiojo nequijo Pabo eyiyo huasijje poquinaje, pea cuiñajji cuana huasijje. Esohui huohui capoquinaje. Majoya oya Epeso huasijje poqui oꞌoyanaje. Epesojo Pabohua Jesosaja epeejji cuana ma jjeya nei onijje jjapeequinaje ba cañaquinaje.  
\v 2 Ba majje Pabohua oya cuana huohuiꞌajja canaje jama baꞌa: —Epeejji cuana, ¿aꞌa Edojjoshahua Pame miquiana que dobiquiꞌyonaje Jesosa nijje jjapeequianijo? 
\p —Chojja —sajaꞌame acanaje cuaa—, onajaya ecuana huohui jjima Edojjoshahua Pamejo. 
\p  
\v 3 Jamajjeya Pabohua huohuiꞌajja ca oꞌoyanaje: —Eꞌe. ¿Ajea ehuohui jayojja jama po majje onaaya miquianaya Eyacuiñajjijo besa mee canaje enajo? 
\p Onaaya jama acanaje baꞌa: —Huanija esohuijo onaaya ecuana Eyacuiñajjijo besa mee canaje —acanaje cuaa. 
\p  
\v 4 Majoya Pabohua jama acanaje baꞌa: —Yahuajo mimishi cuana pajea caꞌyajo, Huaniya pea cuana Eyacuiñajjijo besa mee canaje enajo. Jamaya ohuaya acanaje ojjañaja ebajji enajo ebesa cuaa mimishi pajea caꞌyonaje. Huaniya ojjaña cuana huohui canaje jama baꞌa: “Quijje eya esohui huohuijeyoꞌyajo, pea dejja poeje. Oya Eyacuiñajjija huoojeaꞌyo ojjaña jaahuanajji, Jesosa. ¡Onijje jjapeequicue!” jamaya Huaniya huohui canaje Jesosajo —Pabohua acanaje. 
\p  
\v 5 Paboja esohui shajjaꞌajja canaje dejja cuaa. Shajjaꞌajja majje peaa oya cuana Eyacuiñajjijo besa mee canaje enajo Jesosa nijje jjapeequianijojo.  
\v 6 Majoya Pabohua onaja esapa biajje eme huana majje Eyacuiñajji nijje miminaje Edojjoshahua Pame ojjaña que edobiquijji. Dobiqui majje Edojjoshahua Pameya oya cuana pea esohui mimi mee canaje. Eyacuiñajjija esohui huohui mee canaje peaꞌai.  
\v 7 Ma dejja cuana, Jesosaja epeejji cuana, ma jjeya nei onijje jjapeequinaje ome miji becanejjijji peaꞌai huisome poanaje, 12 huisome. 
\p  
\v 8 Majoya Pabo poquinaje Jodio cuanaja equi ejjachichaquijji yasijje. Dobiqui majje ohuaya Eyacuiñajjija esohui quea pame nee Jesosajo huohui canaje quea jaꞌa nee, meteꞌama. Pea beca peejjima baꞌime ohuaya huohui huichaꞌa huichaꞌa canaje jama baꞌa: —Eyacuiñajjija huoojeaꞌyo ojjaña jaahuanajji poeyanaje. Oya, Jesosa ojjaña huoojeaꞌyojji quijje poaje Eyacuiñajji nijje. 
\p  
\v 9 Quea huiso Jodio cuana quea sapa caꞌa poanaje; shajjaꞌajja sa poꞌyo ajja. Oya cuana quea mimishi poanaje. Jesosa niñeba canaje ojjaña dejja cuana ma equijo nequija eshajjaꞌajjajji. Jamajjeya Pabohua ma dejja cuana jeajeanaꞌyo majje Jesosaja epeejji cuana dojo canaje pea equi yasijje, esohui huohuijji Tinano bajjanija equi yasijje. Jomajo oya cuana sohuihuohui neinei canaje ojjaña pojjajo, Pabohua.  
\v 10 Jamaya Pabo poanaje becanejjijji peaꞌai shequiajame. Jamajjeya quea huiso cuaa Asia meshijo baꞌeya Emeshi Mese nei Jesosaja esohui shajjaꞌajja canaje. Quea huiso Jodio cuaa, quea huiso Jodio pojjeama cuaa peaꞌai shajjaꞌajja canaje. 
\s1 Esemaja ebacua ejja cuana eshahua huoojeacuayajeajji nisho poanaje 
\p  
\v 11 Eyacuiñajjiya ohuaye nei ma dejja cuanaja ba jjima Pabo ameesahua canaje quea huiso.  
\v 12 Eꞌe, Pabo emanojaa cuana huaquia meesahua caꞌyonaje, jjaajaqui meesahua caꞌyonaje. Eshahua dejjajo nequi huoojeacuayajea mee caꞌyonaje peaꞌai. Eꞌe, pea cuaa Paboja eja sisi cuana, pañoeno dojo canaje emanojaa cuana huasijje. Maya emanojaa cuana biajje huana canaje cuaa ehuaquia meeꞌyojji. Quea aja nee poꞌyonaje ojjaña cuana. Eshahua cuana, o niñepoqui meejji poani peaꞌai Jesosaa Pabo huoojeacuayajea mee canaje Paboja eja sisi niñepoqui biajje iya cajo.  
\v 13 Jamajjeya Jodio cuaa peaꞌai poquinananiya eshahua cuana dejja niñepoqui meejji poani ecuaya meequiꞌyojji nisho acanaje. Oya cuana ca ca Jesosa nijje jjapeequi jjima. Jamajjeya eshahua cuana ohuaya jama huohuime acanaje baꞌa: —Eshahua cuana, ecuanaaya Pabo jayojja jamaa miya huohuiaña. Emeshi Mese neiya Jesosaa miquianaya huoojeacuayajea mee cani. ¡Jjeyahua nei cuayaquiꞌyocue! —acanaje Jodio cuaa. 
\p  
\v 14 Eꞌe, Jodio Eyacuiñajji nijje emimijji etii Esema bajjanija bacua ejja cuaa, me oejje beca cuaa eshahua cuana jamaya ehuoojeacuayajea meejji nisho acanaje.  
\v 15 Eshahuaa ca ca Esemaja bacua ejja cuana jama acanaje baꞌa: —Jesosa ecuea eba quea caꞌa nee nee, Jesosaja epeejji Pabo ecuea eba peaꞌai. Ecuea miya eba caꞌaꞌama, jamatii —acanaje eshahuaa. 
\p  
\v 16 Majoya jiquio eshahuaa dejja niñepoqui Esemaja bacua ejja cuana iña mee canaje, cuiajeabichajea mee caꞌyonaje, onajaya daqui isajea caꞌyonaje peaꞌai. Jamajjeya Esemaja bacua ejja cuana esecue yasijje cuayaquinananaje daquimaꞌ, quea nee peaꞌai. 
\p  
\v 17 Ma shajjaꞌajja majje ojjaña Jodio cuana, Jodio pojjeama cuana peaꞌai Epesojo baꞌe quea ajjajja nee nee poanaje jama baꞌa: —Eꞌe, ee. Jesosaa ohuaye nei eshahua cuana huoojeacuayajea cani. Oya quea caꞌa nee nee poani. Ohuaya ojaya epeejji nei Pabo eshahua cuana huoojeacuayajea meesahua cani —jamaya Emeshi Mese nei Jesosa bihuia canaje quea huiso cuaa. 
\p  
\v 18 Majoya Jesosaja epeejji cuana quea bicho nee poanaje oja mimishi cuanajo, eshahua cuana nijje jjapeequianijo peaꞌai. Jesosaja epeejji cuana jjachichaquiꞌyo majje mimishi cuana huohui canaje; quea bicho poanaje ojjaña: —¡Ecuana mimishi cuana pajea meesahuaꞌyocue! —acanaje cuaa. 
\p  
\v 19 Joya yahuajo edasiajji poanajeya, eyamiquecua cuaa peaꞌaiya ojaya esohui etehueꞌyo ejjadasiaquijji cuana, eshahua nijje acanijo peaꞌai chichaꞌyo majje dahuajea caꞌyonaje. Ojjaña pea cuaa ba canaje. Ma papeni etehueꞌyo cuana quea nahue nee nee, quea sose huiso nee nee poanaje. (Eꞌe, quea sose huiso nee, quea huiso nee nee huaca sosejje jayojja poanaje, 100 huaca yahue sosejje jayojja poanaje.)  
\v 20 Eꞌe, quea huiso cuaa, quea huiso meshijo baꞌeca cuaa Eyacuiñajjija esohui Jesosajo shajjaꞌajja canaje. Quea huiso nee Emeshi Mese nei Jesosaja epeejji poanaje. 
\s1 Epesojo baꞌe cuana Pabo nijje quea quene poanaje 
\p  
\v 21 Majoya Pabohua jjashahuabaqui majje jama poanaje baꞌa: —Eꞌe, Masenonia meshi yasijje eya poquije oꞌoya, Acaya meshi yasijje peaꞌai ojjaña Jesosaja epeejji cuana baa. Majoya eya Jenosanena huasijje poqui oꞌoya sa poani peaꞌai. Jenosanena huasijje poqui majje eya poqui sa poani Shoma cuiñajji yasijje peaꞌai, eꞌe jojo nei —Pabo poanaje. 
\p  
\v 22 Jamajjeya Pabohua ojaya echacosahuajji cuana Timoteo, Enasato peaꞌai huoojea canaje Masenonia meshi yasijje. Pabo ca ca nequinaje Epesojo, Asia meshijo.  
\v 23 Pabo oe nei nequijo oja huohuiꞌyo Jesosajo quea huiso cuana Epesojo baꞌe quea quene nee nee poanaje onijje.  
\v 24 Eꞌe, jama poanaje baꞌa: oe dejja Demetio bajjani mei oshe pana nejji Epesojo baꞌenaje. Ohuaya o chacosahuajji cuana nijjeya quea huiso epanaꞌyo sisi cuana Diana nisho bajjani ne canaje. Maya Epesojo baꞌe cuaa bihuia canaje, eyacuiñajji poso acanaje cuaa. Demetiohua, o chacosahuajji cuaa peaꞌai Diana nisho quea huiso ne canaje. Ne majje quea huiso ejjeshejji jjeshe canaje Diana nisho sosejje.  
\v 25 Jamajjeya Demetiohua o chacosahuajji cuana iyaa canaje o que. Pea cuana o jayojja jama epanaꞌyo nejji epo iyaa canaje pea ai. Jjachichaquiyajo Demetiohua oya cuana huohui canaje jama baꞌa: —Epeejji cuana, ¡shajjaꞌajjacue mo! Ecuanaaya epanaꞌyo sisi ne majje quea huiso bejjo jjesheaña epanaꞌyo cuana sosejje. Jamaya miquianajaya eba.  
\v 26 Miquea eba Paboja esohui peaꞌai. Ohuaya jama acani baꞌa: “Epanaꞌyo cuana dejjaja pana, Eyacuiñajji pojjeama. ¡Aꞌa epanaꞌyo cuana bihuiajji! ¡Eyacuiñajji oe nei bihuiacue!” Pabohua acani. Paboja esohui shajjaꞌajja majje quea huiso cuana Epesojo baꞌe, Asia meshijo baꞌe peaꞌai epanaꞌyo cuana jjeshe maja sa poꞌyo ajja poanaje.  
\v 27 Eꞌe pojjaꞌa ojjaña eseja nejo mimijaji caje. Epanaꞌyo cuana bihuia pajea cajeꞌyo pojjaꞌa. Epanaꞌyo quea quemo nee Diana bajjani bihuia pajea cajeꞌyo, oja equi yasijje poqui pajeaje. Jjeya ojjaña cuaa Asia meshijo baꞌeya, ojjaña meshijo baꞌeca cuaa peaꞌai epanaꞌyo Diana bihuia cani, eyacuiñajji poso acani Diana —jamaya huohui canaje Demetiohua. Jamatii ojaya esohui siajje, de. 
\p  
\v 28 Demetioja esohui shajjaꞌajja majje ojjaña cuana quea quene nee nee poanaje. Jama taaame poanaje baꞌa: —Diana eyacuiñajji jayojja quea pame nee. Epesojo enequi oya —jamaya taaa neinei nequinaje ojjaña. 
\p  
\v 29 Jamajjeya ojjaña cuana Epesojo baꞌe cuajicuajijebenaje taaaqui baa. Ojjaña quea shajjaquijjo nee nee, quea mase nee nee poanaje. Paboja epeejji iña majje dojocuajijea caꞌyonaje equi esohui huohui cani yasijje. Ma epeejji cuana Jayo bajjani, pea Anitaco. Oya cuana Masenonia meshijo baꞌe.  
\v 30 Shajjaꞌajja majje Pabo poqui sa poanaje dejja quea quene yasijje mimiya. Jesosaja epeejji cuaa ca ca oya nahue canaje. Jama poanaje baꞌa: —Chojja, Pabo, ¡aꞌa poquijji jocuama! Miya shajjaꞌajja jjima acaje cuaa. Cuia ca chanaꞌ cuaa mi —acanaje. 
\p  
\v 31 Pea cuana emeshi meseja meshi cuiñasahuajji cuana Asia meshijo baꞌe Paboja epeejji cuana poanaje. Ohuaya esohui tehue majje huoojea canaje Pabo que jama baꞌa: —¡Aꞌa poquijji miya esohui huohui cani yasijje! —jamaya tehue canaje Paboja epeejjiya, emeshi meseja echacojji cuaa. 
\p  
\v 32 Dejja cuana ma equijo ejjachichaqui nequi quea shajjaquijjo nee nee taaa canaje. Quea huiso cuana oe esohui taaa canaje. Pea cuana ca ca pea esohui taaa canaje. Quea huiso cuana jamatii jjachichaquinaje. Jama poanaje baꞌa: —¿Ajeo acuae ojjaña taaani? ¿Ajeo jjachichaquinaje eseya soꞌo? —acanaje. 
\p  
\v 33 Majoya Jodio cuaa Anejano huoojea canaje; ojjaña ejjatanacuaquijji ehui dojojji nequinaje. Onaa Anejano taaa canaje; huohui canaje ojjaña ehuohuijji. Jamajjeya Anejanohua tanacua canaje; emeꞌ jeasohua majje jama acanaje baꞌa: —¡Quea bei pocue! ¡Jayo, Anitaco peaꞌai jja oe pichojeaꞌyocue jja oe, de! ¡Aꞌa jja cuiajji! —acanaje Anejanohua. 
\p  
\v 34 Jamatii oya Jodio peaꞌai ba majje ojjaña cuana taaa oꞌoyanaje. Taaa tiitii nequinaje jama baꞌa: —¡Diana eyacuiñajji jayojja quea pame nee Epesojo nequi. ¡Oya bihuiacue! —Jodio cuana epanaꞌyo bihuia ajja neinei jjejojo jamaya taaa canaje Epeso dejja cuana. 
\p  
\v 35 Quijje nei Epeso cuiñajji meseya ojjaña tanacua canaje. Majoya jama acanaje baꞌa: —Dejja cuana Epesojo baꞌe, ¡shajjaꞌajjacue mo! Ojjaña cuanaja eba eseyaya Epesojo baꞌeya epanaꞌyo Dianaja equi quea quemo jaahuanaña. Ojjañaja eba yahuajo nei oe mei eyajo nequi oquea poa jiquio meshi yasijje. Ma mei ecuanajaya eyacuiñajji Diana pojji aca poa, ma mei eyajje oque.  
\v 36 Jamajjeya ¡aꞌa quea quene pojji, quea shajjaquijjo aꞌa pojji! ¡Aꞌa quea mimishi pojji!  
\v 37 Eꞌe, miquianaaya jiquio dejja cuana iñanaje; jiquiacua jjequinaje. ¿Apiojji acuaeya jiquiacua yenaje soꞌo? ¿Aꞌa cuae jja oe siipojji soꞌo? Chojja, oya cuanaja aquiana Dianaja equijo sii jjima. Epanaꞌyo Dianajo jjaniñebaqui jjima peaꞌai.  
\v 38 Jamajjeya Demetiohua, o chacosahuajji cuaa peaꞌai jiquio dejja cuana niñeba sa acanijo, emeshi mese yasijje cadojo cahua. Emeshi mese chaco canijo cahuohuiqui cahua. Majo tii cajjaniñebaquiahua cuana.  
\v 39 Jamajjeya miquianaya jiquio dejja cuana nijje mimi oꞌoya sa poanijo ¡emeshi meseja equi yasijje mimiqui oꞌoyacue quijje! ¡Emeshi meseja esohui jayojja jama pocue! ¡Aꞌa quea shajjaquijjo pojji! ¡Aꞌa quea quene nee pojji!  
\v 40 Eꞌe, onaaya Shomano emeshi mese etii huohui ca chanaꞌ. Onaa oya huohui cajo, emeshi mese etii ecuana nijje quea quene po chanaꞌ: “¿Apiojji quea shajjaquijjo poani soꞌo? ¿Apiojji ecuea esohui jayojja jama ajjimaꞌ, e que poe jjimaa?” ohuaya eseya aca chanaꞌ. Jamaya Shomano emeshi meseya acajo, ¿yajja sohui sajaꞌame aje soꞌo? —acanaje Epeso cuiñajji meseya. 
\p  
\v 41 Jamajjeya jama huohui majje ohuaya ojjaña huoojea canaje equi cuana huasijje. Majoya dejja eꞌiña nequi pichojea caꞌyonaje. 
\c 20  
\s1 Pabo poqui oꞌoyanaje Masenonia meshi yasijje, Acaya meshi peaꞌai yasijje 
\p  
\v 1 Majoya ojjaña cuana equi yasijje poquiꞌyo majje, quea shajjaquijjo popajeaꞌyo majje Pabohua Jesosaja epeejji cuana iyaa canaje. Poeyanaje. Pabohua oya cuana quea bei huohui canaje jama baꞌa: —Eꞌe, eya poquije oꞌoya Masenonia meshi yasijje esohui huohui oꞌoyaa. Jamatii Jesosa miquiana nijje nequi, miquiana jaahuanajji. ¡Aꞌa quea mete pojji! Poquia iña —amajje Pabo poqui oꞌoyanaje Masenonia meshi yasijje. 
\p  
\v 2 Masenonia meshijo poquijeya quea huiso esohui Jesosajo huohui canananaje ojjaña Jesosaja epeejji cuana huasijje. Ojjaña quea bihui nee po meesahua canaje. Jomajo esohui huohuiꞌyo majje Pabo Acaya meshi yasijje poqui oꞌoyanaje.  
\v 3 Acaya meshijo oya nequinaje pea beca peejjima baꞌime. Majoya oya jjashahuabaquinaje Sinia meshi yasijje ebesapoquijji bishe aijo. Sinia meshi yasijje ebesapoquijji nisho poaniya Pabohua shajjaꞌajja canaje Jodio dejja cuaa oya ishoaꞌajja cani equecuaꞌyojji. Jamajjeya huacuaya poqui oꞌoyanaje Masenonia meshi yasijje, ejiojjijje.  
\v 4 Jesosaja epeejji quea huiso cuana Pabo nijje poquinaje. Oya cuana ma bajjani baꞌa: Pinisija bacua ejja Sopatene, ma Beneajo baꞌe, Anitaco, Seconino peaꞌai, ma Tesanonicajo baꞌe; pea Jayo ma Debejo baꞌe; pea Timoteo; pea Tiquico, Topimo peaꞌai ma Asia meshijo baꞌe. Mahuiso poquinaje Pabo nijje Masenonia meshi yasijje.  
\v 5 Majoya beca cuana besapoquinaje Toasa huasijje. Toasajo onaaya Pabo, ecuanaya peaꞌai ishoa canaje.  
\v 6 Ecuana Pabo nijje ejiojjijje poqui oꞌoyanaje Pinipo cuiñajji yasijje. Pinipojo nequinaje. Majoya Jodio cuana jjachichaqui majje ojee ijjiaꞌijjianaje quea bihui nee epojji. Pahui shejjee mee jjima ijjianaje ecuaaya. Ojee pahui caꞌa ijjia majje ecuana Pinipojo ani bishe ai yasijje aniꞌyo majje besapoquinaje. Me oejje cahuime po majje ecuana baꞌeñaquinaje Toasajo. Toasajo nequinaje me oejje becanejjijji peaꞌai cahuime, 7 cahuime. 
\s1 Toasajo nequiya Pabohua eshoꞌi shequi mee caꞌyonaje 
\p  
\v 7 Ebionei epojja ejomishocajjijo, nomicojo, sinecua Pabo Jesosaja epeejji cuana nijje jjachichaquinaje Jesosaja bobi ijjiajji. Mecajjeahua nei poqui sa poanaje. Pabo quea huiso sohuihuohui poequi tii jjamecashonoquinaje.  
\v 8 Ecuana jjachichaquinaje equi ejama coo eya equecuayijjijo. Quea misi nee poanijo, cuaquijiji quea huiso cuana dedonaje ecuaaya.  
\v 9 Jomajo oe eshoꞌi Eotico bajjani equi jiyo huejjajo anioquenaje. Pabohua esohui huohui majamaja caquijo, eshoꞌi quea cojja cahui nee nee poanaje. Jiyo huejjajo cahuiꞌyo majje quea ao oquequiꞌyonaje meshi yasijje. Oya baqui majje: —Eꞌe, ee, manoꞌyonaje chahua, chamaꞌyo tii —taaanaje. 
\p Onaaya oya dojo canaje equi yiye dojjo huasijje emanoꞌyojaa.  
\v 10 Jamajjeya Pabo jaaoquequinaje eshoꞌi baa. Eshoꞌi huojje canaje Pabohua. Jama acanaje baꞌa: —¡Aꞌa quea yeno pojji! ¡Oya eshe, emanoꞌyo pojjeama! —Pabohua acanaje. 
\p  
\v 11 Majoya Pabo jaasohuaqui oꞌoyanaje equecuayijji yasijje. Ojjaña ecuaaya Emeshi Mese nei Jesosaja bobi ojee ijjianaje. Majoya Pabo pea cuana nijje mimi oꞌoyanaje. Jamatii esohui huohui poequi tii jjapojjaquinaje. Mecajjeahua nei eshequi jaasohua pishanajo Pabo poquinaje. 
\p  
\v 12 Majoya eshoꞌija epeejji cuaa oya dojo canaje equi yasijje. Oya eshe oꞌoyajo, quea aja nee neejo ojjaña quea bihui nee poanaje. 
\s1 Pabo besapoquinaje Mineto huasijje 
\p  
\v 13 Majoya Pabohua ecuana huoojea canaje Asoni cuiñajji yasijje: —Eꞌe, ¡miquianaya bishe oe dojo huiocue Asoni yasijje! ¡Jomajo ishoañaquicue iña! Eya jjeya nei poquije ejiojjijje Asoni yasijje. Majoya mo bishe yasijje aniquije —poanaje. 
\p  
\v 14 Jamajjeya Pabo Jesosaja epeejji cuana nijje ejiojjijje poquinaje Asoni yasijje. Nequiñaqui majje oya bishe ai yasijje aninaje ecuana nijje. Majoya ecuana poquinaje Mitinene cuiñajji yasijje cahuiya.  
\v 15 Mitinenejo cahui majje mecajjeahua nei ecuana bishejje besapoqui oꞌoyanaje. Oe cahuime po majje ecuana baꞌeñaquinaje Quio nasi chipi nei yasijje. Jomajo cahuiñaquinaje Samosi nasijo. Pea cahuijo baꞌeñaquinaje Mineto huasijje.  
\v 16 Majoya Pabohua Epeso yejje canaje, Asia meshijo quea cahui huiso nequi sa po ajja poanaje. Oya poquicuajicuaji sa poanaje Jenosanena huasijje. Baꞌeñaqui sa poanaje Jodioja bobi chichajji shejo, Petecote shejo. Ojjaña Jodio cuana ma pojja cuanajo quea bihui nee ojee ijjiaꞌijjiani ojjaña bobi chichaꞌyo majje. Ma pojjajoya Pabohua Jenosanenajo Eyacuiñajji bihui sa acanaje. 
\s1 Pabohua pea esohui esohui huohuijji Epesojo baꞌe huohui canequinaje. 
\p  
\v 17 Jamajjeya Minetojo baꞌeñaqui majje Pabohua Jesosaja esohui huohuijji cuana Epesojo baꞌe iyaa canaje.  
\v 18 Poeyajo Pabohua oya cuana jama huohuime acanaje baꞌa: —Epeejji cuana, eya Asia meshi yasijje poeyajo, miquianaaya eya banaje quea pame nee chacochaconaje; ecuea esohui miquianaaya shajjaꞌajjanaje peaꞌai.  
\v 19 Miquea eba eya Emeshi Mese nei Jesosa Quitoja echacojji poani. Jesosajo eya miminaje quea pame nee. Eya quea miminaa pojjeama. Miquea eba eya pa neineinaje Jesosaja epeejji quea mimishi baꞌyanijo. Miquea eba peaꞌai Jodio etii cuaa eya quecua sa acanijo ejo quea camaja poanaje.  
\v 20 Eꞌe, eyaya ojjaña Jesosaja esohui meteꞌama huohui majamajanaje equi cuana huasijje, ojjaña jjachichaquiajo peaꞌai. Ojjaña ba meesahuanaje. Maya miquea eba.  
\v 21 Eꞌe, eyaya ojjaña huasijje esohui huohui neineinaje Jodio cuana, Jodio pojjeama cuana huasijje peaꞌai. Ojjaña jama anaje baꞌa: “¡Miquea mimishi cuana pajeaꞌyocue! ¡Eyacuiñajjija esohui shajjaꞌajjacue! ¡Jesosa nijje jjapeequicue eꞌe jojo nei! Oya Emeshi Mese nei” eyaya anaje.  
\v 22 Jjeyahua eya Edojjoshahua Pameya huoojea caje Jenosanena huasijje. ¿Yajja shai Jodio cuaa eya acaje soꞌo? Ecuea ba jjima.  
\v 23 Jamatii Edojjoshahua Pameya eya ba mee cani jama baꞌa: “Pea cuaa miya iña caje oꞌoya. Ejjajeanobiaquijji yasijje miya jeanobia cajeꞌyo. Mijo quea camaja poaje. Miya quea nee nee poaje” jamaya ojjaña cuiñajji yasijje poqui majanijo Edojjoshahua Pameya eya ba mee cani —Pabohua acanaje—.  
\v 24 Eꞌe, onaaya eya sapa jajahuejjajea ca chanaꞌ. Jamatii eya meteꞌama. Emeshi Mese nei, Jesosa e huoojeaꞌyojji poani. Ojjaña ojaya ehuohui jayojja jama eya a sa poani. Ohuaya eya huoojea canaje esohui quea pame nee Jesosaja huohuiya jama baꞌa: “Eyacuiñajjiya ojjaña cuana quea jea nee acani. Ojjaña Jesosaja epeejji cuanaja mimishi cuana cuijea caꞌyani. Oya cuana baꞌe tiitii mee cajeꞌyo eyajo. Pabo, ¡jamaya huohuime acue!” eya acanaje Jesosaa.  
\v 25 Jamajjeya eyaya ojjaña miquianaya huohuinananaje Jesosajo: “Jesosa Eyacuiñajji nijje ojjaña huoojeajji oe nei poajeꞌyo” eyaya anaje. Jjeyahua nei ca ca eya poquijeꞌyo. Ecuea eba miquianajaya eya eba oꞌoyajji pojjeama.  
\v 26 Jamajjeya jjeyahua nei eyaya miquianaya eꞌe jojo nei huohuiaña jama baꞌa: Eꞌe pojjaꞌa beca cuana miquiana nijje nequi shajjaꞌajja sa poꞌyo ajjajo cuaqui yasijje poquijeꞌyo; cuaquijo nequi tiitiijeꞌyo manoꞌyo majje. Jamatii eyaya esohui huohuinaje ojjaña cuana huasijje. Onaya mimimimi mee ajja jama baꞌa: “Ecuea Jesosaja esohui shajjaꞌajja jjima poanaje. Paboja eya huohui jjima”. Chojja, ehuohui poanaje. 
\p  
\v 27 —Eꞌe, eyaya ojjaña Eyacuiñajjija esohui huohui neineinaje miquianajaya eshajjaꞌajjajji.  
\v 28 Jamajjeya ¡miquianaya oe jjajaahuanaquicue! ¡Jesosaja epeejji cuana jaahuanacue quea pame nee peaꞌai! Eꞌe, Edojjoshahua Pameya mi huoojeajji poaniya miquianaya Jesosaja epeejji jaahuanajji po mee canaje. Jamajjeya ¡oya cuana jaahuana neineicue! Eyacuiñajjiya oja Bacua Ejja oe nei huoojea canaje oja epeejji epojjijo manoꞌyohua. Eyacuiñajjiya ojaya epeejji cuanaja mimishi cuijea caꞌyonaje. Jesosaja epeejji cuanaja mimishi cuana cuijea caꞌyajje oja bacua cuana po mee canaje, Eyacuiñajjiya.  
\v 29 Jamatii ecuea eba eya poquiꞌyajo beca cuana, eshahuaja epeejji cuana quea mimishi poaje. Jesosaja epeejji cuana poquiquehua mee sa acaje. Jesosaja esohui pajea mee sa acaje peaꞌai. Eꞌe, jiquio ecua ibia quea maseya ñajjajja poquiquehuajeanana mee cani, chamaꞌyo tii po mee cani jayojja jama eshahuaja epeejji cuaa Jesosaja epeejji cuana aca chanaꞌ.  
\v 30 Jjeya beca cuana miquiana nijje nequi minijje jjapee nishoquije. Quijje ohuaya Jesosaja epeejji cuana siajje acaje; Eyacuiñajjija esohui eꞌe nei huohui ajja. Jesosaja epeejji cuana oe pojji poquiquehuaje ma siajjepojji cuana nijje.  
\v 31 Jamajjeya ¡jjashahuabaquicue oe! ¡Ecuea esohui aꞌa pajeaꞌyojji miquianaaya! Eꞌe, pea beca peejjima shequiajame eyaya miquianaya esohui huohui neineinaje epojjajo, mecajje peaꞌai huohui majamajanaje eyaya. Huohuipoquia majje eyaya niñesheꞌapoquianaje. Miquianajo eya quea yeno popoquinaje —Pabo poanaje. 
\p  
\v 32 —Jjeya eya poquijeꞌyo. Eyacuiñajji nijje miquianajo mimije jama baꞌa: “Eyacuiñajji, ¡Jesosaja epeejji cuana jaahuanacue! ¡Miquea esohui aꞌa pajea meeꞌyojji! Miquea esohuijo oya cuana miquea epeejji quea jaꞌa nee poajeꞌyo. Jamajjeya miquea epeejji quea caꞌa nee poaje. ¡Oya cuana quea pame nee acue! Jamaya miyaya aña ojjaña Jesosaja epeejji cuanajo. Eyajo minijje baꞌe tiitii meejeꞌyo peaꞌai. Jamaya ecuea eba”. Eꞌe, jamaya eya Eyacuiñajji nijje mimiani miquianajo. 
\p  
\v 33 —Eꞌe, miquianajaya eba peaꞌai onajaya daqui cuana, onajaya bejjo peaꞌai ecuea jea ba jjima.  
\v 34 Chojja, ecuea bobijo, ojjaña ecuea ebaꞌejjijo peaꞌai eya chacochaco nequinaje. Ecuea epeejji cuana enijje poquiani eyaya bobianaje peaꞌai. Maya miquianajaya eba.  
\v 35 ¡Jamaya eyaya miquianaya ba meenaje ojjañaa quea pame nee chacocue! ¡Aemaꞌ baꞌe meesahuacue peaꞌai! Jamajjeya ¡jamaya acue miquianaaya! ¡Emeshi Mese nei Jesosaja esohui peaꞌai aꞌa pajeaꞌyojji! Jama baꞌa: “Pea cuana aquiana quia majje miya quea bihui poaje. Joya miya aquiana quiaña quea bihui pishana poaje” jamaya Jesosa poanaje —Pabohua acanaje. 
\p  
\v 36 Majoya Pabo, ojaya epeejji cuana peaꞌai Eyacuiñajji nijje ojee miminaje ecuiꞌoshajjajo nequi majje.  
\v 37 Paboja epoquiꞌyojjijo ojjaña ojaya epeejji cuana pa canaje. Pabo cuiapashi caꞌyonaje, poquijeꞌyo ba canaje.  
\v 38 Quea yeno poanaje Paboja esohuijo: —Eꞌe de, ecuanaja Pabo eba oꞌoyajji pojjeama pa jiquio meshijo —oya cuana poanaje. 
\p Jamajjeya ojaya epeejji cuana quea yeno poanaje. Ojjaña cuana onijje bishe yasijje poquinaje. Besapoquijeꞌyo ba canequinaje. 
\c 21  
\s1 Pabo Jenosanena huasijje poqui oꞌoyanaje 
\p  
\v 1 Jamajjeya bishe ai yasijje ani majje ecuanaja epeejji cuana jeanaꞌyonaje. Epi nei besapoquinaje Cosi nasi yasijje cahuiya. Mecajjeahua nei besapoquiꞌyonaje Shona nasi yasijje. Majoya besapoquinaje Patana cuiñajji yasijje.  
\v 2 Patanajo ecuaaya pea bishe ai saꞌajjanaje Penisia meshi yasijje ebesapoquijji. Bishe ai jaa ba majje ecuana nequisohuaquinaje bishejo aninaje. Majoya besapoqui oꞌoyanaje.  
\v 3 Besapoquijeya, Chipe nasi chipi nei besapoquijeya meshi banaje. Chipe nasi ai ebianei mijijje yejjenaje Sinia meshi yasijje besapoquijeya. Tino cuiñajji bañaqui majje baꞌeñaquinananaje. Ebishe ai meseya aquiana quea huiso nee bishejo ani jeasohuaqui canaje etaja huasijje. Pabo ecuana nijje etaja huasijje nequisohuaquinaje.  
\v 4 Tino huasijje poquinaje Jesosaja epeejji cuana baa. Ba majje ona nijje nequinaje me oejje becanejjijji peaꞌai cahuime, 7 cahuime. Edojjoshahua Pameya oya cuana Pabo huohui meesahua canaje jama baꞌa: —¡Jenosanena huasijje poquiajo Jodio cuaa miya iña ca chanaꞌ! Jamajjeya ¡aꞌa jocuama poquijji, Pabo! —acanaje cuaa. 
\p  
\v 5 Jamatii bishe ai apoa poajo Pabo ecuana nijje poquinaje bishe yasijje. Jesosaja epeejji cuana, yahue cuana, ehuanase cuana, eshoꞌiquiana peaꞌaiya bishe ai yasijje poquinaje ecuana nijje Pabo poquijeꞌyo baa. Meshijajijo, bae sahuajo Eyacuiñajji nijje ojee miminaje ecuiꞌoshajjajo nequi majje.  
\v 6 Majoya ecuana: —Eꞌe, besapoquia iña —amajje bishe aijo ani oꞌoyanaje ebesapoquijji Ojjaña Jesosaja epeejji cuaa Pabo poquijeꞌyo ba canequinaje. Majoya oya cuana equi cuana huasijje poqui oꞌoyanaje. 
\p  
\v 7 Jamajjeya Tino cuiñajji jeanaꞌyo majje ecuana besapoquinaje Tonemaina cuiñajji yasijje. Baꞌeñaqui majje Jesosaja epeejji cuana jomajo baꞌe baquinaje. Ojjaña nijje miminaje quea bihui nee. Ona nijje nequinaje oe cahuime.  
\v 8 Majoya mecajjeahua nei ecuana poqui oꞌoyanaje bishe yasijje. Besapoqui oꞌoyanaje Sesanea huasijje. Baꞌeñaqui majje esohui huohuijji Penipe bajjanija equi yasijje jaasohuaquinaje; onijje baꞌenaje. Oya Penipe yahuajo nei Jesosaja epeejji cuaa Jenosanenajo baꞌeya babaca canaje me oejje becanejjijji peaꞌai, 7 pea cuana nijje Eyacuiñajjija echacojji epojji, eꞌahuemano bobi quiajji.  
\v 9 Penipeja ebeca pee peaꞌai ebacuase ahuemaꞌani, bii ani oja equijo baꞌe. Oya cuana Eyacuiñajjija esohui huohuijji peaꞌai poanaje.  
\v 10 Pabo, Penipeja equijo oe pojji cahuime nequiyajo, Eyacuiñajjija esohui huohuijji poeyanaje Acabo bajjani, ma Jodea meshijo baꞌe.  
\v 11 Pabo que poe majje Acabohua Paboja ejjacomayijjiquijji jjeshe majje jjajiojji jeyoquiꞌyonaje, emeꞌ cuana peaꞌai. Majoya Pabo huohui canaje jama baꞌa: —Edojjoshahua Pame enijje jama poanaje baꞌa: “Jiquio ejjacomayijjiquijji mese Jenosanena huasijje poquiꞌyajo jamaya Jodio cuaa oya jeyo cajeꞌyo. Jeyo majje oya quia caje Jodio pojjeama huasijje; quea nee nee poaje” poanaje —Acabohua acanaje. 
\p  
\v 12 Acaboja esohui shajjaꞌajja majje ecuaaya, pea epeejji cuaa jomajo baꞌeya peaꞌai Pabo paꞌaniya tii huohuinaje jama baꞌa: —Pabo ¡aꞌa oe poquiꞌyojji Jenosanena huasijje! Jodio cuaa miya iña ca chanaꞌ —poanaje. 
\p  
\v 13 Jamatii Pabohua ecuana jama acanaje baꞌa: —¿Apiojji acuae quiana pani soꞌo? ¡Aꞌa eya quea yeno po meejji! Jodio cuaa Jenosanenajo baꞌeya jeyo cajje mo meteꞌama poaje. Emeshi Mese nei Jesosa nijje jjapeequianijojo onaa quecua caꞌyajje, jamatii eya meteꞌama —Pabohua acanaje. 
\p  
\v 14 Eꞌe, ecuaaya Pabo nahueꞌajjanaje: —¡Aꞌa poqui oꞌoyajji! —amajamajaꞌajjanaje. 
\p Jamatii Pabo jama poanaje baꞌa: —Chojja, eya jocuama capoquiahua. Jamaya yahuajo Edojjoshahua Pameya eya acanaje. 
\p Jamajjeya ecuana jama poanaje baꞌa: —Eꞌe Pabo, ¡Eyacuiñajjija ejjashahuabaquijji jayojja jama acue! —ecuana poanaje. 
\p  
\v 15 Jamajjeya quea cahui huiso pishana Penipeja equijo ani majje ecuanaja aquiana cuana bio majje: —Epeejji cuana, poquiꞌya iña —po majje ecuana Jenosanena huasijje poquiꞌyonaje ejiojjijje.  
\v 16 Jesosaja epeejji cuana Sesaneajo baꞌe ecuana nijje poquinaje. Jenosanenajo nequiñaquiꞌyajo ohuaya ecuana dojo canaje Masonija equi yasijje baꞌeya. Yahuajo Masoni Chipe nasijo baꞌenaje. Oya Jesosaja epeejji poanaje yahuajo nei. 
\s1 Pabo poquinaje Satiaco baa oꞌoya 
\p  
\v 17 Ecuana Jenosanena huasijje poeꞌyajo, Jesosaja epeejji cuana ecuana ba majje quea bihui nee poanaje.  
\v 18 Mecahuajje Pabo ecuana nijje poquinaje Satiaco baa. Jomajo ojjaña Jesosaja epeejji etii cuana, esohui huohuijji cuana peaꞌai jjachichaquinaje.  
\v 19 Pabo ojjaña nijje esohui quea bei nee miminaje. Ohua chaco canajejo huohui canaje jama baꞌa: —Eyacuiñajjiya eya esohui quea pame nee Jesosajo Jodio pojjeama cuana huasijje huohui meesahua canaje. Eyacuiñajjiya ohuaye nei ma dejjaa ajjima acani eya ameesahua canaje Jesosaja esohui huohuiañajo —Pabohua acanaje. 
\p  
\v 20 Jesosaja epeejji etii cuaa Paboja esohui shajjaꞌajja majje Eyacuiñajji bihuia canaje. Pabo jama acanaje baꞌa: —Jamaya quea pame nee, epeejji. ¡Bacue! Jjeyahua nei quea huiso nee nee, quea huiso mil Jodio cuana Jesosa nijje jjapeequiani. Jamatii Jodio cuaa ojjaña Jesosaja epeejji cuana huohui cani jama baꞌa: “Moisesija etehueꞌyo jayojja jama acue!” acani.  
\v 21 Pea cuaa oya cuana quea huiso siajje acani mijo. Jama acani baꞌa: “Pabohua Jodio cuana Jodio pojjeamaja meshijo baꞌe huohui cani jama baꞌa: —¡Moisesija etehueꞌyo jayojja jama aꞌa ajji! ¡Jodio cuanaja etiiquianaja ehuohuiꞌyo jayojja jama aꞌa pojji! ¡Miquianajaya bacua aꞌa cuiishasha jehuisejjajea meejji peaꞌai! —acani Pabohua”. Jamaya onaaya mijo siajje acani, Pabo. Jamajjeya Jodio cuana jiquiojo baꞌe minijje quea quene.  
\v 22 Eꞌe jojo nei onaaya oya cuana huohui caje jama baꞌa: “Pabo pa jjaja poeꞌyonaje Jenosanena huasijje”. Jamaya acajoya ojjaña cuana jjachichaquije. Majoya ¿yajja shai miya acaje, de?  
\v 23 Jamajjeya ¡ecuanaja esohui jayojja jama acue, Pabo! —poanaje Satiaco—. Jiquiojo yani ebeca pee peaꞌai Jodio dejja Eyacuiñajji nijje miminaje. Ma ecua oya yahuajo Eyacuiñajji nijje miminaje jama amajje huojjaña dedejea mee caje.  
\v 24 Jamajjeya ¡onijje poquicue Eyacuiñajjija equi quea quemo huasijje! ¡Esejaya etiiquiana Moisesija etehueꞌyo jayojja jama acue quea boejeaꞌyo jayojja epojji, ona nijje! ¡Ojjañaja huojja dedejea jjimahuajo sosequiacue! ¡Miyaya onajaya huo cuana jjeshecue! ¡Jjeshe majje dahua meecue Eyacuiñajji bihuiajji! Jamajjeya ojjaña Jodio dejja cuaa ba caje miya pea Jodio cuana jayojja jama poani. Moisesija etehueꞌyo jayojja jama poani peaꞌai. ¡Jamaya ojjaña ba meecue pea cuaa mijo siajje acanaje! —poanaje—.  
\v 25 ¡Jodio pojjeama Jesosaja epeejji poani ca ca Moisesija etehueꞌyo jayojja jama aꞌa ameejji! Chojja. Yahuajo eseyaya Jodio pojjeama huasijje esohui tehuenaje jama baꞌa: “¡Noe ma onaa dahua canaje eyacuiñajji nisho bihuiajjiꞌya aꞌa ijjiajji! ¡Noe naꞌ cuaya meequi jjima aꞌa ijjiajji! ¡Ijjiacajji naꞌ aꞌa ishijji peaꞌai! ¡Aꞌa pea cojjojji pojji!” jamaya yahuajo eseyaya Jodio pojjeama cuana huasijje tehuenaje, mahuiso —jamaya acanaje Satiacohua. 
\p  
\v 26 Jamajjeya mecajjeahua nei Pabohua ma Jodio dejja cuana nijje poquinaje Eyacuiñajjija equi quea quemo huasijje. Ejiojji cuana, eme cuana peaꞌai topo neinei canaje. Majoya oya cuana Eyacuiñajjija equi quea quemo huasijje dobiquinaje. Eyacuiñajji nijje emimijji huohui canaje jama baꞌa: —Oe pojji cahui po majje, ecuana quea boejea nee nee po majje eyaya huo jjesheje ecuea, ecue epeejji cuanaja peaꞌai. Jiquiacua yeje, dahua meeje Eyacuiñajji bihuiajji —Pabo poanaje. 
\s1 Pabo iña canaje cuaa Eyacuiñajjija equijo nequi 
\p  
\v 27 Me oejje becanejjijji peaꞌai, 7 cahui po majje Pabo oja epeejji cuana nijje poqui oꞌoyanaje Eyacuiñajjija equi quea quemo huasijje. Moisesija etehueꞌyo jayojja jama ponequinaje. Pabo Eyacuiñajjija equijo nequi Jodio dejja cuaa Asia meshijo baꞌeya oya ba canaje. Oya cuana Pabo nijje quea quene nee poanaje. Ojjaña cuana Pabo nijje quea quene nee po mee canaje. Pabo iña mee canaje cuaa.  
\v 28 Oya cuana taaanaje. Jama siajje pome poanaje Pabojo baꞌa: —Isaeni dejja cuana, ¡poecue! ¡Jiquio dejja mo iñasahua meecue! Ohuaya ojjaña meshi yasijje poquijeya huohui canananaje jama baꞌa: “¡Aꞌa Moisesija etehueꞌyo jama pojji!” Ohuaya Eyacuiñajjija equi niñeba cani. Isaeni cuana niñeba cani peaꞌai. Jjeyahua nei ohuaya Jodio dejja pojjeama dojodobiaqui canaje Eyacuiñajjija equi yasijje. Jamaya ohuaya jiquio equi quea jehue jayojja po mee cani —jamaya Pabojo siajje poanaje Jodio cuana. Jama mimime po majjeya Pabo iña canaje. 
\p  
\v 29 Eꞌe, yahuajo onaaya Topimo ba canaje Pabo nijje Jenosanenajo nequi. Topimo aje oe Jodio pojjeama, Epesojo baꞌe. Oya Eyacuiñajjija equi quea quemo huasijje dobiqui jjima. Jamatii Jodio cuaa Pabohua Jodio pojjeama Topimo bajjani Eyacuiñajjija equi quea quemo huasijje dojodobiaqui canaje poso acanaje. Jamajjeya quea quene nee nee poanaje.  
\v 30 Jamajjeya quea huiso Jodio cuana Jenosanenajo baꞌe cuajicuajijebenaje Pabo que. Miminaanaa majje Pabo iña canaje. Dojocuayaqui canaje Eyacuiñajjija equi secue jjani yasijje. Pabo dojocuayaqui cajo, esecue caꞌa canaje.  
\v 31 Oya cuana quea quene nee nee, quea mase nee nee poanaje. Pabo sapa jajahuejjajea sa acanaje meiya. Onaaya ca ca Shomano emeshi meseja sohuinano huoojeajji poani que cuajicuajipoquinaje; huohuiqui canaje jama baꞌa: —¡Bacue oe! Ojjaña Jenosanenajo baꞌeca quea shajjaquijjo nee nee poani, cuajicuaji canaje jjachichaquiequi baa —poanaje. 
\p  
\v 32 Jamajjeya sohuinano huoojeajjiya pea sohuinano huoojeajji cuana, sohuinano cuana peaꞌai iyaa majje dojocuajicuaji canaje Jodio cuana quea quene jjachichaquiequi yasijje baa. Sohuinano cuana, sohuinano huoojeajji nijje poeje ba majje Jodio cuaa Pabo cuia pajea canaje.  
\v 33 Sohuinano huoojeajjiya Pabo que poe majje oya iña mee canaje. Jeyo mee canaje baa jjono becaa. Majoya Jodio cuana huohuiꞌajja canaje: —¿Ae bajjani oya? ¿Yajja acuae jja soꞌo? ¿Yajjajo acuae jjaya cuiaña? 
\p  
\v 34 Beca Jodio cuaa oe esohui huohui canaje. Pea cuaa pea esohui huohui canaje. Ojjaña quea shajjaquijjo poanijo, sohuinano huoojeajjiya shajjaꞌajja meemee ajja ae shai Pabohua acanaje. Jamajjeya ohuaya sohuinano cuana huoojea canaje Pabo dojohua sohuinano cuanaja equi quea quemo huasijje.  
\v 35 Sohuinanoja equi ejiojji ejaasohuaquijji yasijje poeyajo, Jodio cuaa Pabo iña sa acanaje. Jamajjeya sohuinano cuaa oya jjequisohua majje dojo canaje equi yasijje.  
\v 36 Jodio cuana sohuinano huoojeajji quiquishijji poeje taaajebenaje jama baꞌa: —¡Quecuajeacue oe! ¡Quecuajeacue oe! ¡Camanoꞌyahua oya! —taaame pojebenaje. 
\s1 Pabohua Jodio equenequene cuana sajaꞌa canaje 
\p  
\v 37 Sohuinano cuaa oya equi quea quemo huasijje beshahua nei ohua dojodobiaqui caniya Pabohua sohuinano huoojeajji jama acanaje baꞌa: —Eya minijje mimi sa poani. 
\p Ohuaya Pabo sajaꞌa canaje jama baꞌa: —¿Aꞌa miquea Jieno cuanaja esohui eba?  
\v 38 Jamajjeya miya Ejito dejja quea mimishi pojjeama, ma yahuajo emeshi mese quecuapanajji epo pojjeama. Ohuaya quea huiso nee nee, ebeca pee peaꞌai mil dejja emeje dojojji cuana quehua dojo canaje meshi quima huasijje. Ojo onaya ojjaña quea mete poanaje. ¿Aꞌa miya oya pojjeama? —acanaje sohuinano huoojeajjiya. 
\p  
\v 39 Pabohua jama acanaje baꞌa: —Chojja. Eya Jodio, Sinisia meshijo baꞌe. Eya Tanasojo cuaya. Jomajo tiinaje. Ma cuiñajji quea quemo, ojjañaja eba. ¡Che mo jjeya eya mimi meecue Jodio cuana nijje! —Pabohua acanaje. 
\p  
\v 40 Jamajjeya sohuinano huoojeajjiya Pabo sajaꞌa canaje jama baꞌa: —¡Eꞌe, mimicue! —acanaje. 
\p Majoya Pabo nequinaje ejiojji ejaasohuaquijjijo. Eme jeasohua canaje. Ojjaña cuana tanacua canaje. Tanacuaꞌyo majje Pabo miminaje Jodio cuana nijje ojaya esohuijo, Emeoja esohuijo. 
\c 22  
\p  
\v 1 Pabohua jama acanaje baꞌa: —Ecuea epeejji cuana, etii cuana peaꞌai, ¡shajjaꞌajjacue mo! Eyaya miquianaya huohuije —acanaje. 
\p  
\v 2 Pabo onajaya esohuijo, Emeoja esohuijo mimiani shajjaꞌajja majje ojjaña Jodio cuaa jecaje canaje. Jamajjeya Pabo miminaje jama baꞌa:  
\v 3 —Eya Jodio miquiana jayojjaya. Tanasojo eya cuayanaje, Sinisia meshijo. Majoya Jenosanena huasijje poeyanaje esohui huohuijji Jamanie bajjanija esohui baa. Ohuaya eya sohuihuohui canaje. Jiquiojo eya tiinaje. Jamanieya Eyacuiñajjija esohui esejaya etiiquianaja eya sohuihuohui canaje. Eya Eyacuiñajjija epeejji poanaje. Joya ecua miquianaaya jjeya bihuiaña jayojja jama eyaya Eyacuiñajji bihuianaje.  
\v 4 Eꞌe, yahuajo eyaya Jesosaja epeejji cuana iñanaje Jesosaja esohui ehuohui ca poani jjejojo. Ejjajeanobiaquijji yasijje jeanobiajeanaje dejja cuana, epona cuana peaꞌai. Oya cuana mano meeꞌyo sa anaje eyaya.  
\v 5 Jodio etii cuanaja, joya Eyacuiñajji nijje miminequianija eba ecuea esohui eꞌe nei. Eꞌe, ohuaya eya esohui etehueꞌyo quia canaje Jodio dejja Damasicojo baꞌe yasijje equiajji jama baꞌa: “¡Pabo Jesosaja epeejji cuana iña meesahuacue! ¡Jeyo meesahuacue cadenaa Jenosanena huasijje edojojji, ejeanobiajeajji Jesosaja esohui huohuijjijojo!” jamaya Jodio etiiya tehue canaje —Pabo poanaje. 
\p  
\v 6 —Majoya Damasico chipi nei nequiñaqui majje eshequi biacojjajja nequijo eyajo ejijijji quea jaꞌa neeya eya jeajaꞌa canaje.  
\v 7 Eya quea ajjajja jjejojo oquequinaje meshi yasijje. Majoya eyaya shajjaꞌajjanaje eyajo enijje mimije jama baꞌa: “Sanoni, Sanoni, ¿apiojji acuae miyaya eya napaña soꞌo?” eyajo aniya eya acanaje.  
\v 8 “¿Ae bajjani miya?” eyaya anaje. “Eya Jesosa, ma Nasanenajo baꞌenaje. Miyaya aje oe eya napaña” acanaje Jesosaa eyajo aniya. 
\p  
\v 9 —Dejja cuaa enijje poquianiya ejeajijijji quea jaꞌa nee ba canaje. Onajaya ca ca Jesosaja esohui enijje shajjaꞌajja jjima, ojaya quea quehua.  
\v 10 Majoya eyaya huohuiꞌajjanaje: “Emeshi Mese nei, ¿ae sa poani miya?” Ohuaya eya sajaꞌa canaje jama baꞌa: “¡Nequisohuacue! ¡Damasico huasijje poquicue! Jomajo peaa miya huohui caje miquea echacojji ma miyaya ejo quijje aje. ¡Ma esohui jayojja jama acue ejo!” eya acanaje. 
\p  
\v 11 —Majoya eya nequisohuaꞌyonaje; cojjamaꞌ. Jesosaa jeajaꞌa cajje cojja quijjoꞌyonaje. Jamajjeya ecuea epeejji cuaa eya mepejjejea canaje Damasico huasijje. 
\p  
\v 12 —Jomajo oe dejja Anania baꞌenaje. Ohuaya Moisesija etehueꞌyo jayojja jama atiitii canaje. Oya ojjaña Jodio cuanaja quea boti nee poanaje, Damasicojo baꞌeja.  
\v 13 Ohuaya e jaa huasijje poe majje eya huohui canaje jama baꞌa: “Ecuea epeejji Sanoni, ¡quea cojja jaꞌa po oꞌoyacue!” Ohua huohui cajje jjeyahua nei eya quea cojja jaꞌa po oꞌoyanaje. Anania banaje eyaya.  
\v 14 Majoya ohuaya eya jama acanaje baꞌa: “Eꞌe, Eyacuiñajji esejaya etiiquianaa bihuia ca poa. Ohuaya miya babaca ca poa oja huoojeaꞌyo ojjaña jaahuanajji quea pame nee nee baa. Jjeyahua nei miyaya oya, Jesosa shajjaꞌajjanaje; minijje miminaje. Eyacuiñajjiya miya ba mee caje ojaya ejjashahuabaquiꞌyojji peaꞌai.  
\v 15 Ma miya jjeya banaje, ma miya shajjaꞌajjanaje peaꞌai miya huohui meesahua caje Eyacuiñajjiya ojjaña cuana ojjaña meshijo baꞌe yasijje.  
\v 16 Jamajjeya ¡aꞌa ishoa majajji! ¡Jjeya nei Eyacuiñajji nijje mimicue miquea mimishijo! ¡Jesosa nijje jjapeequiꞌyocue! Ohuaya miquea mimishi cuana cuijea cajeꞌyo. Majoya eyaya miya besa meeje Eyacuiñajjijo” eya acanaje Ananiaa. 
\p  
\v 17 —Majoya eya poe oꞌoyanaje Jenosanena huasijje. Poe majje eya poquinaje Eyacuiñajjija equi quea quemo huasijje onijje mimiya. Eyacuiñajji nijje mimianijo, Jesosaa eya jjacahuibaqui mee canaje.  
\v 18 Ohuaya eya jama huohuime acanaje baꞌa: “¡Jenosanena esecue yasijje poquicue jjeyahua nei! Jiquiojo baꞌe cuaa miquea esohui ejo shajjaꞌajja jjima acaje” eya acanaje.  
\v 19 “Jesosa” eyaya oya sajaꞌanaje, “miquea eba yahuajo eyaya Jodio cuanaja equi ejjachichaquijji yasijje dobiqui majje, miquea epeejji iña majje jeyonaje baa jjonohua. Cuiasejjajeanaje.  
\v 20 Yahuajo pea cuaa miquea esohui huohuijji Estema sapa jajahuejjajea canajejo, eyaya chipi nei nequiya banequinaje. Eꞌe, oya cuana Estema nijje quea mase poanijo eya quea bihui nee poanaje peaꞌai. Dejja cuaa oya sapa jajahuejjajea canijo, eyaya onajaya daqui ao jaahuananaje, Estema sapa jajahuejjajeajji epo cuanaja daqui” jama sajaꞌameya eyaya Jesosa anaje.  
\v 21 Majoya Jesosaa eya huoojea canaje jama baꞌa: “¡Poquicue, Pabo! Eyaya miya huoojeaje quea huesha nee Jodio pojjeama cuana huasijje esohui huohuiya ejo” eya acanaje Jesosaa —Pabo poanaje. 
\s1 Sohuinano huoojeajjiya Pabo nahue canaje 
\p  
\v 22 Jodio cuaa Paboja esohui shajjaꞌajja canaje. Ojaya esohui Jodio pojjeamajo oya cuana shajjaꞌajja sa po ajja. Quea quene nee poanaje. Janobajjima nei taaa oꞌoyanaje jama baꞌa: —¡Oya dojoꞌyocue! ¡Oya quecuajeacue oe! ¡Oya quea taijo quecuajeacue! —taaame poanaje Jodio cuana. 
\p  
\v 23 Jodio cuaa quea queneya jjejojo daqui jeasohuajea canaje eyahuasijje. Meshi pohui jeasohuajea canaje peaꞌai. Taaa neineinaje.  
\v 24 Jamajjeya sohuinano huoojeajjiya sohuinano cuana huoojea canaje jama baꞌa: —¡Pabo eyiye dojjo huasijje dojocue! ¡Oya janobajjima nei cuiacue! ¡Achajja oya baꞌe baꞌajja socue! ¡Yajjajo Jodio cuaa oya niñeba cani baꞌajja socue! ¿Ajeo quea quene nee nee taaani? ¡Baꞌajja socue! —acanaje sohuinano huoojeajjiya. 
\p Eꞌe, oya jjashahuabaquinaje jama baꞌa: —Pabo siajje poani. Eya cuiajje oya siajje popajeaje —poso acanaje sohuinano huoojeajjiya. 
\p  
\v 25 Jamajjeya sohuinano cuaa Pabo jeyo canaje ecuiasejjajeajji. Jeyo cajo Pabohua sohuinano huoojeajji quea chipi nee nequi jama acanaje baꞌa: —Eya miquea ba jjima. Eya Shomano dejja peaꞌai. Jamajjeya emeshi meseya miquianaya eya cuia mee ajja quea mimishi po jjimajojo, achajja eya baꞌe ba jjimajojo. Jamaya emeshi meseja esohui —Pabohua acanaje. 
\p  
\v 26 Ma shajjaꞌajja majje ma sohuinano huoojeajji quea mete poanaje. Poquicuajinaje sohuinano huoojeajji etii huohuiya. Jama huohuiñaquime acanaje baꞌa: —¡Bacue! ¿Apiojji acuae miyaya jiquio dejja Pabo napa meeaña soꞌo? Oya ca jja ca oma Shomano dejja, de —acanaje. 
\p  
\v 27 Jamajjeya sohuinano huoojeajji etiiya ma shajjaꞌajja majje metenaje, Pabo que poquicuajinaje. Oya huohuiꞌajja canaje jama baꞌa: —¿Aꞌa miya Shomano dejja eꞌe jojo nei? ¡Huohuicue mo oe! 
\p —Eꞌe —Pabohua oya sajaꞌa canaje—, eya Shomano dejja, de. 
\p  
\v 28 Majoya sohuinano huoojeajji etiiya jama acanaje baꞌa: —Eꞌe pojjaꞌa, de. ¡Bacue! Eyaya quea huiso bejjo quia majje Shomano dejja poꞌyonaje. Sosequianaje quea huiso nee nee, de —acanaje ohuaya; oja chii Shomano dejja pojjeamajojo oya pea. 
\p Jamajjeya Pabohua jama acanaje baꞌa: —Ecuea ca ca ecue chii Shomano dejja poanaje. Jamajjeya eya ca ca Shomano dejja cuayanaje —acanaje Pabohua. 
\p  
\v 29 Eꞌe de, sohuinano cuaa beshahua nei Pabo cuiasejja canaje. Ma shajjaꞌajja majje ca ca ohuaya Pabo pichojea caꞌyonaje. Oya Pabo Shomano dejja ba majje sohuinano huoojeajji quea mete nee poanaje ecuiajji. Jamajjeya ojaya esohuijo pea cuaa Pabo jeyo canaje baa jjonohua. Jamaya Shomano dejja ameemee ajja achajja oya baꞌe ba jjimahuajo. 
\s1 Pabo Jodio etii cuana nijje mimi oꞌoyanaje 
\p  
\v 30 Majoya mecajjeahua sohuinano huoojeajji ba sa poanaje jama baꞌa: —¿Ajeo shai Pabo nijje Jodio cuana quea quene nee nee poanaje? 
\p Jamajjeya mecajjeahua ohuaya Pabo pichojea mee canaje ma ejeanobiajaa ejeyo nequi. Majoya ohuaya Jodio cuana Moisesija esohui etehueꞌyo huohuijji poani, Eyacuiñajji nijje emimijji cuana peaꞌai iyaa canaje. Jjachichaquiꞌyajo, sohuinano huoojeajji etiiya Pabo dojo canaje esecue yasijje Jodio cuana nijje mimiya. Pabo meteꞌama nequinaje. Dejja cuana cojja ba canaje meteꞌamaa jjejojo. 
\c 23  
\p  
\v 1 Pabohua Jodio etii quea huiso cuana cojja ba majje jama acanaje baꞌa: —Epeejji cuana, ¡shajjaꞌajjacue mo! Eyacuiñajjija eba eya mimishiꞌama baꞌenaje yahuajo, jjeya peaꞌai. Jamajjeya eya bichoꞌama. 
\p  
\v 2 Ma shajjaꞌajja majje Eyacuiñajji nijje mimiani etiiya Ananiaa pea Pabo chipi nei nequi jama acanaje baꞌa: —¡Joya Pabo naba cuiasejjajeacue miyaya! 
\p  
\v 3 Jamajjeya Pabo onijje jama poanaje baꞌa: —Eyacuiñajjiya miya cuia caje peaꞌai. Miya ejjadasiaquijji. ¿Apiojji acuae miya Moisesija etehueꞌyo jayojja jama po ajja? Miyaya eya pea cuia meeaña. Jamaya pojjeama Moisesija etehueꞌyo —Pabo poanaje. 
\p  
\v 4 Pea Pabo chipi nei nequiya oya jama acanaje baꞌa: —¡Aꞌa jja oe Eyacuiñajji nijje mimiani etii nijje mimijajijji, de! 
\p  
\v 5 Pabohua majoya ojjaña sajaꞌa canaje jama baꞌa: —Epeejji cuana, ecuea ba jjima oya Eyacuiñajji nijje mimiani etii. Eꞌe, Eyacuiñajjija esohui etehueꞌyo jama poani baꞌa: “¡Miquea emeshi mese nijje aꞌa mimijajijji!” —Pabohua acanaje. 
\p  
\v 6 Paboja eba quea huiso Jodio cuana jomajo nequi Sanoseo cuana poanaje. Pea cuana ca ca Paniseo cuana. Jamajjeya Pabohua etii cuana jama acanaje baꞌa: —Epeejji cuana, eya Paniseo. Ecue chii Paniseo poa. Paniseoja esohui jayojja jama eyaya huohuiaña jama baꞌa: “Quijje Eyacuiñajjiya emanoꞌyo cuana shequi mee caje oꞌoya. Ojjaña cuana eshe oꞌoya poaje”. Jama ehuohui poaje jjejojo eya pea cuaa iña canaje —Pabohua acanaje. 
\p  
\v 7 Paboja esohui shajjaꞌajja majje Paniseo cuana jjamimicuiajeanobiajea neineiquinaje Sanoseo cuana nijje.  
\v 8 Paniseo jayojja jama pojjeama Sanoseo cuana aje oe jama poani baꞌa: “Dejja cuana manoꞌyo majje eshequi oꞌoyajji pojjeama tii. Chamaꞌ Eyacuiñajjija esohuidojojji cuana”. Oya cuana poani: “Eshahua cuana chamaꞌ peaꞌai” jamaya Sanoseo cuaa huohui cani. Paniseo cuaa ca ca jama acani baꞌa: “Eꞌe jojo nei ojjaña eseya shequi mee caje oꞌoya. Eyacuiñajjija esohuidojojji cuana enequi, de. Eshahua cuana enequi peaꞌai” jamaya eꞌe jojo nei huohui cani Paniseo cuaa.  
\v 9 Jamajjeya Jodio etii cuaa quea shajjaquijjo nee nee mimicuiajeanobiajea canaje. Majoya Moisesija etehueꞌyo huohuijji cuaa, Paniseo cuaa nequisohua majje jama taaame acanaje baꞌa: —Jiquio dejja Pabo mimishiꞌama. Eꞌe pojjaꞌa Eyacuiñajjija esohuidojojji onijje miminaje eꞌe jojo nei. ¡Aꞌa oya napajji! —taaame poanaje. 
\p  
\v 10 Majoya ojjaña Jodio etii cuana janobajjima nei jjamimicuiajea nobiajeaquianijo, esohuinano mese quea mete poanaje. Pabo nahue canaje; sohuinano cuana huoojea canaje Pabo dojohua sohuinano cuanaja equi quea quemo huasijje: —Eꞌe de, Jodio cuaa Pabo jajahuejjajea ca chanaꞌ, de, meiya —sohuinano cuana poanaje. 
\p  
\v 11 Mecajje Emeshi Mese nei Jesosa eyajo nequi nequioquenaje Pabo que. Oya miminaje Pabo nijje jama baꞌa: —Pabo, ¡aꞌa quea mete pojji! Jenosanenajo miya ecuea esohui huohuijji poanaje. Quijje miyaya ecuea esohui huohuiquije quea huesha nee, Shoma cuiñajji yasijje —acanaje Jesosaa. 
\s1 Jodio cuana ojee jjashahuabaquinaje Pabo quecuajji 
\p  
\v 12 Majoya mecajjeahua nei Jodio dejja cuana jjachichaquinaje. Ojee jjashahuabaquinaje Pabo quecuajji. Quea huiso cuaa jama acanaje baꞌa: —Eꞌe jojo nei Pabo cuiajea jjimahuajo ecuaaya ena eꞌishijji pojjeama, bobi cuana eꞌijjiajji pojjeama, Pabo cuiajeaꞌyo majje ecuana ijjiaꞌijjiajeꞌyo. Siajje poani jjemoya aje ca iña oe Eyacuiñajjiya ecuana mano mee caꞌyome —acanaje cuaa jjashahuaba taiqui majje. 
\p  
\v 13 Eꞌe, quea huiso nee nee dejja cuaa jamaya acanaje, 40 huisomeya. Eꞌe pojjaꞌa pea cuaa jamaya acanaje peaꞌai, ecuea ba jjima.  
\v 14 Majoya Eyacuiñajji nijje mimiani etii que, Jodio etii cuana que peaꞌai poqui majje huohui cañaquinaje jama baꞌa: —Eꞌe, ecuaaya ena ishi jjimahuajo, ijjiaꞌijjia jjimahuajo peaꞌai Pabo cuiajea neineijeꞌyo. Pabo cuiajea jjima yajji jojjemo aje ca iña oe Eyacuiñajjiya mano mee caꞌyomeya.  
\v 15 Jamajjeya ¡miquianaaya, etii cuaa peaꞌai esohuinano mese dasiacue! Jama nisho acue baꞌa: “¡Pabo jjequi oꞌoyacue! Ecuaaya oya ba oꞌoya sa aña, oja sohui eshajjaꞌajjajji” nisho acue. Majoya oya jjequi cajo, ecuaaya Pabo cuiajeaje, sapa jajahuejjajeaje meiya jiquiacua poe jjimahua —acanaje dejja mimishi cuaa. 
\p  
\v 16 Paboja jjoꞌyaseja ebacua ejjaa, oja boeya ca ca shajjaꞌajja canaje Jodio cuaa Pabo sapa jajahuejjajea cajeꞌyo. Jamajjeya Paboja boeya sohuinano cuanaja equi quea quemo huasijje dobiqui majje Pabo huohuiqui canaje Jodio cuanaja esohui.  
\v 17 Majoya Pabohua sohuinano huoojeajji iyaa majje huohui canaje jama baꞌa: —¡Jiquio eshoꞌi ecue boe dojocue sohuinano etii que! Oya eshoꞌi onijje mimi sa poani. 
\p  
\v 18 Majoya sohuinano huoojeajjiya eshoꞌi dojo canaje esohuinano mese que. Poe majje jama acanaje baꞌa: —Pabohua eya iyaa canaje. Ohuaya jiquio eshoꞌi huoojea canaje mi que. Oya minijje mimi sa poani. 
\p  
\v 19 Esohuinano meseya eshoꞌi mepejjejea canaje dejja chama huasijje. Majoya oya jjapashineijje huohuiꞌajja canaje jama baꞌa: —Eꞌe, ¿ae shai miyaya eya huohui sa aña? —acanaje. 
\p  
\v 20 Eshoꞌiya jama acanaje baꞌa: —Jodio dejja cuana ojee miminequinaje. Mecahuajje pa miya dasia caje pa. Miya pa jama anisho caje baꞌa: “¡Pabo jjequi oꞌoyacue Jodio etii cuana huasijje! Ecuanaaya oya ba oꞌoya sa aña” jamaya miya siajje acaje pa.  
\v 21 Jamajjeya ¡aꞌa oya cuana shajjaꞌajjajji! Quea huiso nee nee, 40 huisome ejjaꞌaniquehuaqui ani ejiojji sahuajo Pabo cuiajeaꞌyojji. Eꞌe, oya jama poanaje baꞌa: “Ena ishi jjima amajje ijjiaꞌijjia jjima po majje peaꞌai ecuaaya Pabo cuiajeajeꞌyo. ¡Pabo cuiajea jjima yajji jojjemo Eyacuiñajjiya ecuana napa caꞌyome!” jama mimimeya poanaje. Jjeya nei miya ishoꞌajja cani cuaa. Jama poani baꞌa: “Eꞌe, jjeyahua nei esohuinano meseya Pabo jjequi caje baꞌajja” poani oya cuana —jamaya eshoꞌi poanaje. 
\p  
\v 22 Majoya esohuinano mese jama poanaje baꞌa: —Eꞌe, jamajjeya ecuea eba pea cuaa eya edasiajji nisho acaje ma e miya huohuinaje. ¡Aꞌa oe huohuijji cuana! 
\p Jamaya huohui majje ohuaya eshoꞌi quehuajje huoojea canaje equi yasijje. 
\s1 Pabo huoojea canaje Shomano emeshi meseja huoojea Peni ani yasijje 
\p  
\v 23 Majoya esohuinano meseya iyaa canaje beca sohuinano huoojeajji. Poeyajo jama huohuime acanaje baꞌa: —¡Miquea aquiana cuana, sohuinano cuanaja aquiana peaꞌai chichacue epoquijji! ¡Mecajje quea misi nee poajo, poquicue Sesanea cuiñajji yasijje! ¡Quea huiso nee nee, 200 huisome sohuinano cuana ejiojjijje dojocue! ¡Pea sohuinano quea huiso nee mejejji dojocue peaꞌai! ¡Pea sohuinano cuana mapichi aija edaasa biajje ani dojocue minijje peaꞌai, 70 huisome!  
\v 24 ¡Pabo dojocue peaꞌai pea mapichi aija edaasa biajje ani! ¡Oya Pabo dojocue emeshi meseja huoojea que, Peni que! ¡Pabo jaahuana neineicue! ¡Aꞌa Jodio cuana oya napa meejji! —acanaje esohuinano meseya, Canio Nisia bajjaniya. 
\p  
\v 25 Majoya esohuinano meseya esohui tehue canaje Penija ebajji jama baꞌa: 
\q1  
\v 26 “Emeshi meseja meshi cuiñajji Peni: Ecuea epeejji Peni, mijo eya quea bihui nee. Eyaya, Canio Nisiaa jiquio esohui tehuenaje miquea ebajji jiquio dejjajo, Pabojo. Jama poa baꞌa:  
\v 27 Jodio cuaa jiquio dejja Pabo bajjani iña canaje. Beshahua nei oya cuiajea caꞌyonaje cuaa. Oya Shomano dejja ba majje eyaya oya nahuenaje; sohuinano cuana huoojeanaje o nahuejji.  
\v 28 Eya ba sa poanaje apiojji Jodio cuana onijje quea quene nee nee poanaje. Jamajjeya eyaya oya dojonaje Jodio etii cuana que.  
\v 29 Jodio etii cuanaja esohui shajjaꞌajja majje eyaya banaje Pabo mimishiꞌama, de. Mimishi po jjimajo Jodio cuana oya sapa jajahuejjajea mee jjima anaje meiya; jeyo mee jjima anaje ejeanobiajeajji. Oya Shomano dejja. Paboja ehuohuijo ca ca oe Jodio cuana onijje quea quene nee nee poanaje. Onijje mimijajinaje Jodio cuanaja etiiquianaja ehuohuiꞌyojo, ma ohua huohui canijo.  
\v 30 Majoya Jodio cuaa eya dasia majje Pabo quehuajje sapa jajahuejjajea sa acanaje. Ma ba majje eyaya oya huoojeanaje mi que. Jodio dejja cuana, Pabo huohuijji epo, eyaya huoojeaje mi que peaꞌai. ¡Miyaya oe huohui neineicue ache acue oe quea mimishi poani! Mahuiso ecuea esohui, epeejji Peni. Eyaya, Canio Nisiaa ecue sohui tehuenaje miquea ebajji. Apoa”. 
\m Jamaya tehue canaje.  
\v 31 Tehue majje esohuinano meseya Caniohua oja tehue huoojea canaje emeshi mese Peni que. 
\p Jamajjeya sohuinano cuaa Canioja ehuohuiꞌyo jayojja jama acanaje; Pabo dojo canaje mecajje Atipati cuiñajji yasijje cahuiya.  
\v 32 Majoya mecajjeahua nei sohuinano mapichimaꞌ huacuaya poe oꞌoyanaje Jenosanena huasijje, sohuinano cuanaja equi quea quemo huasijje. Joya mapichijjiya ca ca oe Pabo dojo canaje Sesanea huasijje.  
\v 33 Sesanea huasijje poe majje Shomano emeshi meseja huoojeaja equi yasijje, Penija equi yasijje nequiñaquinaje. Majoya sohuinano cuaa Pabo quia canaje Peni que. Esohuinano mese Canioja esohui etehueꞌyo peaꞌai quia canaje. Majoya oya cuana poquiꞌyonaje.  
\v 34 Canioja esohui etehueꞌyo ba neinei majje Peniya Pabo huohuiꞌajja canaje jama baꞌa: —Pabo, ¿ache meshijo ami baꞌe, ache mijijje? 
\p —Eya ca iña Sinisia meshijo baꞌe —sajaꞌame acanaje Pabohua. 
\p  
\v 35 —Eꞌe. Jamajjeya Jodio cuana ma mi huohuijji epo poeyajo, eyaya miquea esohui shajjaꞌajjaje —poanaje Peni. 
\p Majoya Peniya pea sohuinano cuana iyaa canaje. Poeyajo jama huohuime acanaje baꞌa: —¡Bacue! Jiquio dejja Pabo bajjani. ¡Oya emeshi mese Enodeja equi quea quemo neejo jaahuana neineicue! ¡Nahuecue oe! —acanaje. 
\c 24  
\s1 Jodio cuaa emeshi mese Peni siajje acanaje Pabojo 
\p  
\v 1 Majoya me oejje cahuime po majje Jodio Eyacuiñajji nijje mimiani etii Anania poquinaje Sesanea huasijje Pabo niñebaa, Pabo huohuiya. Jodio etii quea huiso pishana Anania nijje poquinaje. Pea dejja, emeshi meseja etehue bajji poani Tetono bajjani onijje poquinaje peaꞌai. Sesaneajo nequiñaqui majje oya cuana emeshi meseja huoojea Peni ba cañaquinaje. Majoya oya cuana Pabojo mimimiminaje.  
\v 2 Majoya Peniya Pabo iyaa canaje. Poeyajo Tetonohua huohui canaje jama baꞌa: —Emeshi mese Peni, miya quea caꞌa, quea pame nee, ecuea epeejji peaꞌai. Miya ecuana huoojeajji quea pame nee. Quea huiso shequiaja miquea esohuijo ojjaña quea bei po meenaje jiquio meshijo. Quea huiso dejja mimishi miyaya jjabahuejjaqui meenaje. Jamajjeya ecuana jiquio meshijo quea pame nee baꞌyani.  
\v 3 Eꞌe, miyaya quea pame añajo, ecuana quea bihui nee poani, ojjaña cuiñajjijo baꞌeca cuana peaꞌai. Miya ecuanaja quea boti nee.  
\v 4 Miquea pea echacojji quea huiso yanijo eyaya oe pojji esohui huohuije. Jamajjeya ¡ecuea esohui che shajjaꞌajja socue! —poanaje Tetono—.  
\v 5 Jiquio dejja Pabo quea mimishi nee po tiitiiani. Jodio cuana ojjaña meshijo baꞌe quea quene nee nee po mee cani. Ohuaya Jesosaja ma Nasanenajo baꞌya poaja esohui huohui majamaja cani. Eꞌe, oya Jesosaja epeejji cuana huoojeajji poani.  
\v 6 Ohuaya ca ca Eyacuiñajjija equi quea quemo quea jehue jayojja acanijo, ecuanaaya oya iñanaje. Jodio cuanaja etiiquianaja tehue jayojja jama oya amee sa anaje; ohua huohui tai canijo oya sapa jajahuejjajea sa anaje.  
\v 7 Jamatii esohuinano mese Canio Nisia cuajicuajijebenaje Pabo nahueya; Pabo dojo canananaje. Oya quea quene nee nee poanaje ecuana nijje, de.  
\v 8 Majoya Canio Nisiaa ecuana mi que huoojea canaje Pabo huohuiya. Eꞌe, Pabo nijje mimi majje miyaya baje ecuanaja esohui eꞌe nei —acanaje Tetonohua. 
\p  
\v 9 Majoya pea Jodio dejja cuaa Peni siajje aca oꞌoyanaje Pabojo jama baꞌa: —Eꞌe jojo nei Tetonoja esohui Pabojo eꞌe nei. Pabo quea mimishi nee nee poanaje —Peni acanaje cuaa. 
\s1 Pabohua emeshi mese Peni huohui caꞌyonaje ojaya ebaꞌejjijo 
\p  
\v 10 Majoya Peniya Pabo jama acanaje baꞌa: —Eꞌe pojjaꞌa. ¿Pabo, yajjajje acuae minijje quea quene poani cuana soꞌo? ¡Huohuicue mo oe! 
\p Jamajjeya Pabohua jama acanaje baꞌa: —Emeshi mese Peni, ecuea eba miya jiquio meshijo ona huoojeajji poani quea shequiaja huiso. Jamajjeya ojjaña miquea eba. Jamajjeya ecuea ebaꞌejjijo eyaya meteꞌama huohuije.  
\v 11 Miquea eba ecuea esohui eꞌe nei. Jjeya nei eya Jenosanena huasijje nequiñaqui oꞌoyanaje Eyacuiñajji bihuiaa ome miji peaꞌai beca cahuime poanaje.  
\v 12 Jodio dejja cuaa eya ba canaje Eyacuiñajjija equijo nequi. Eya ca ca iña dejja nijje jjamimicuiajea nobiajeaqui ajja. Ecuea Jodio cuana quea quene po mee jjima Jodioja equi ejjachichaquijjijo ani, ejiojji cuanajo nequi peaꞌai, equi cuanajo ani peaꞌai. Jama ajjima Jenosanenajo ecuea cuana.  
\v 13 Ojjañaja eba Jodio cuana ejo siajje poani. Eya mimishiꞌama.  
\v 14 Jodio cuanaja etiiquiaa cuaa Eyacuiñajji bihuia ca poa. Eyaya Eyacuiñajji bihuiaña peaꞌai. Jamatii eyaya Jesosaja esohui jayojja jama aña peaꞌai. Jiquio Jodio cuana ca ca siajje poani jama baꞌa: “Jesosaja esohui etiiquianaja esohui jama pojjeama” jama poso acani. Chojja, ecuanaja etiiquiana Moisesija etehueꞌyo jayojja jama aña; Eyacuiñajjija esohui huohuijji yahuajo nei baꞌe cuanaja esohui etehueꞌyo jayojja jama aña peaꞌai eyaya. Ohuaya jayojjaya eyaya jama huohuime aña baꞌa:  
\v 15 Ojjaña eseya manoꞌyajo quijje Eyacuiñajjiya shequi mee caje oꞌoya; mimishi cuana, dejja quea pame poani cuana peaꞌai eshe poaje oꞌoya. Ecuea eba, jiquio Jodio cuanaja eba peaꞌai Eyacuiñajjiya jamaya acajeꞌyo.  
\v 16 Jamajjeya eya quea pame nee baꞌe sa tii poani. Eyacuiñajjija eba eya mimishiꞌama. Jiquio Jodio cuanaja eba peaꞌai eya bichoꞌama, mimishiꞌama —Pabo poanaje. 
\p  
\v 17 —Eya pea meshi cuana huasijje poquinaje esohui huohuiya. Quea huiso shequiaja po majje jjeya eya quea huesha nequi Jenosanena huasijje poe oꞌoyanaje. Eꞌe, Jesosaja epeejji cuana pea meshijo baꞌeca cuaa ejjeshejji huoojea canaje Jodio aemaꞌ cuana bobiaa. Eꞌe, eyaya maya ejjeshejji ye majje Jodio cuana quianaje. Eyaya huo dahua meenaje peaꞌai Eyacuiñajji bihuiajji.  
\v 18 Jamajjeya eya Eyacuiñajjija equi quea quemo huasijje poquinaje. Jomajo nequiya eyaya eme shacua neineinaje quea boejea jayojja epojji. Jamaya poanijo, Jodio cuaa Asia meshijo baꞌe cuaa eya ba canaje Eyacuiñajjija equijo oe nei nequi. Quea huiso dejja cuana enijje nequi jjima poanaje. Quea shajjaquijjo pojjeama eya poanaje.  
\v 19 Ma Jodio cuana Asia meshijo baꞌe poe jjima jiquiacua. E huohui sa poanijo oya cuana capoeꞌyahua minijje mimiya.  
\v 20 Esohuinano meseya Canio Nisiaa eya nequi mee canaje Jodio etii cuana cojja nei. Jiquio Jodio cuaa ecuea esohui Jodio etii nijje shajjaꞌajja canaje peaꞌai. Jodio etiiya eya quea mimishi eba jojjemo jjeyahua nei huohui caꞌyome ecue mimishi.  
\v 21 Eꞌe, jomajo eyaya etii cuana huohuinaje jama baꞌa: “Quijje Eyacuiñajjiya emanoꞌyo cuana shequi mee caje oꞌoya. Ojjaña eseya shequi mee caje oꞌoya. Eya jamaya ehuohui poaje jjejojo pea cuaa eya iña canaje” jamaya eyaya etii anaje. Eꞌe, ma esohuijo jiquio Jodio cuaa eya niñeba cani, huohui cani peaꞌai. Mahuiso ecuea esohui, emeshi mese Peni. Apoa —Pabohua acanaje. 
\p  
\v 22 Emeshi mese Penija eba Jesosaja epeejji cuanaja ehuohuiꞌyo. Jamajjeya ohuaya jama acanaje baꞌa: —Eꞌe, quijje esohuinano mese Canio Nisia poeꞌyajo eyaya huohuije ecuea ejjashahuabaquijji Pabojo. Mahuiso. Apoa —poanaje Peni. 
\p Majoya Jodio cuana esecue yasijje huoojeacuayajea majje Peniya sohuinano huoojeajji huohui canaje jama baꞌa:  
\v 23 —¡Sohuinano cuana huoojeacue Pabo nijje! ¡Oya jaahuana neineicue! ¡Ojaya epeejji cuaa aquiana, bobi peaꞌai o que caye cahua! ¡O que caꞌanicuahua peaꞌai! —acanaje emeshi meseya Peniya. 
\s1 Pabohua Peni, oya huanase Nosiya peaꞌai sohuihuohuime acanaje 
\p  
\v 24 Majoya quijje pishana Peni oja huanase nijje, Nosiya nijje poe oꞌoyanaje Pabo baa. Nosiya aje oe Jodio epona poanaje. Jamajjeya ohuaya Pabo iyaa mee majje jama acanaje baꞌa: —Pabo, ¡Jesosa Quitoja esohui mo huohuicue Jesosa Quito nijje jjapeequianijo! Eyaya shajjaꞌajja sa aña. 
\p  
\v 25 Jamajjeya Pabohua Jesosaja esohui huohui canaje jama baꞌa: —¡Eyacuiñajjija esohui jayojja jama baꞌecue quea pame nee! ¡Jjashahuabaquicue! ¡Aꞌa quea mimishi tii pojji! Quijje poe oꞌoya majje Jesosaa ojjaña cuana sosequia cajeꞌyo, ma eseya eshe nequiahuaa anequinaje sosejje. Mimishi cuana quea nee nee po tiitii mee cajeꞌyo, quea mimishi baꞌenaje sosejje. Ojaya epeejji quea pame cuana ca ca ohuaya quea bihui nee baꞌe tiitii mee cajeꞌyo onijje eyajo Eyacuiñajjiya —jama huohuimeya Pabohua acanaje cuana. 
\p Paboja esohui shajjaꞌajja majje Peni quea mete nee nee poanaje. Jama acanaje baꞌa: —Eꞌe, mahuisoya jjeya. Quijje eyaya miya iyaaje oꞌoya, ecuea pea echacojji chamaꞌ poajo. 
\p  
\v 26 Peni jjashahuaba taiquinaje jama baꞌa: —Eyaya Pabo iyaaje oꞌoya enijje emimijji. Eꞌe pojjaꞌa ohuaya eya sosequia caje o pichojea meeꞌyo sosejje. 
\p  
\v 27 Jamatii Pabo emeshi mese Enodeja ejjajeanobiaquijji equijo nequinaje beca shequiajame. Majoya Shomano emeshi meseya pea dejja Posio Pesito bajjani huoojea canaje meshi cuiñasahuajji epojji. Oya Pesito emeshi mese Enodeja equijo baꞌenaje. Jamajjeya Peni oja huanase Nosiya nijje poquinaje. Jamatii Penija Jodio etii cuana onijje quea bihui nee epojji Pabo pichojea meeꞌyo jjima poanaje. Jamatii ejjajeanobiaquijjijo nequi tii Pabo jiña caꞌyonaje. 
\c 25  
\s1 Pabohua emeshi mese eyacua Pesito sohuihuohui canaje 
\p  
\v 1 Jamajjeya Shomano emeshi cuiñasahuajji eyacua Pesito Sesanea cuiñajjijo nequinaje. Pea beca peejjima cahuime po majje oya poquinaje Jenosanena huasijje.  
\v 2 Jomajo Eyacuiñajji nijje mimiani etii cuaa, Jodio etii cuaa peaꞌai Pabo niñeba canaje emeshi cuiñasahuajji Pesitoja eshajjaꞌajjajji.  
\v 3 Pesito nijje mimi huichaꞌa huichaꞌanaje jama baꞌa: —Emeshi mese Pesito, ¡che oe Pabo huoojeacue Jenosanena huasijje ecuana nijje mimiya! —nisho acanaje Jodio cuaa. Oya cuana aje oe jjashahuaba taiquinaje Pabo cuiajeaꞌyojji ejiojjijje poquianijo. 
\p  
\v 4 Pesitohua Jodio cuana sajaꞌa canaje jama baꞌa: —Chojja. Pabo jiquiacua epoejji pojjeama. Eyaya oya cuiñaña Sesaneajo mei equi ejjajeanobiaquijjijo. Quijje pishana eya poquije oꞌoya Sesanea huasijje.  
\v 5 ¡Pabojo mimi sa poanijo miquianajaya etii cuana huoojeacue enijje Sesanea huasijje! Jocuama ohuaya Paboja mimishi cahuohui cahua. Eꞌe pojjaꞌa oya mimishiꞌama, cabaꞌajja —poanaje Pesito. 
\p  
\v 6 Majoya Pesito nequinaje Jodio cuana nijje Jenosanenajo me oejje pea beca peejjima, 8 cahuime. Majoya oya poqui oꞌoyanaje Sesanea huasijje. Oe cahuime po majje oya anioquenaje pea equijo, etii ojee chacochacoani equijo. Majoya ohuaya pea dejja huoojea canaje Pabo jjequiya.  
\v 7 Pabo poeꞌyajo Jodio etii cuana ma Jenosanenajo baꞌe cuana o que jjanequichipiquinaje; oya panajajinaje. Pabojo quea huiso siajje poanaje, de. 
\p  
\v 8 Majoya Pabohua huohui canaje jama baꞌa: —Eya quea mimishi pojjeama poani. Jodio etiiquiana cuanaja esohui etehueꞌyo pajeaꞌyo jjima ecuea. Eyacuiñajjija equi quea jehue jayojja po mee jjima. Shomano emeshi mese ecuea niñeba jjima peaꞌai —poanaje. 
\p  
\v 9 Majoya Pesitohua Jodio cuana quea bihui nee po mee sa acanijo huohuiꞌajja canaje jama baꞌa: —Pabo, ¿aꞌa miya Jenosanena huasijje poqui sa poani? Jomajo Jodio etii cuanaja esohui mijo eyaya shajjaꞌajjaje, miquea esohui shajjaꞌajjaje peaꞌai. Ojjaña shajjaꞌajja majje eyaya mijo jjashahuabaqui majje huohuije ecuea ejjashahuabaquijjijo —poanaje Pesito. 
\p  
\v 10 —Chojja —sajaꞌame acanaje Pabohua—, eya jiquiojo tii yani, Shomano etiija equijo. ¡Jiquio Shomano etiiya, miyaya peaꞌai onaja esohui ejo shajjaꞌajja majje huohuicue miquea ejjashahuabaquijjijo! Eya Shomano dejja. Jamajjeya Jodio cuanaja eya ecuiajeaꞌyojji pojjeama. Ecuea Jodio cuana quea mimishi ajjima, de. Jamaya miquea eba.  
\v 11 Ecuea emeshi meseja etehueꞌyo jama ajjima jojjemo, mimishi ya peaꞌai jojjemo eya mano meeꞌyomeya. Ecuea mimishi ajjima jojoya ca ca miyaya e equia meejji pojjeama mimishi cuanaja ecuiajeaꞌyojji. Jamaya emeshi mese etiija esohui poani. Eya ca ca iña Shomano emeshi mese etii nijje mimi sa poani, Sesa nijje. Ecue sohui shajjaꞌajja majje ohuaya cahuohui cahua ojaya ejjashahuabaquijji ejo —Pabohua acanaje. 
\p  
\v 12 Majoya Pesito o chacosahuajji nijje ojee mimi majje Pabo huohui canaje jama baꞌa: —Eꞌe, eyaya miquea esohui jayojja jama aje: Miya huoojeaje Shomano emeshi mese etii yasijje, Sesa que. Miya shajjaꞌajja majje ohuaya huohui caje ojaya ejjashahuabaquijji mijo —jamaya po majje Pesitohua ojjaña huoojeacuaya caꞌyonaje. 
\s1 Pabo miminaje Jodio meshi mese Anipa nijje Anipaja jjoꞌyase Menise nijje peaꞌai 
\p  
\v 13 Quijje pishana Jodioja emeshi mese etii Enodeja osecua Anipa bajjani oja jjoꞌyase Menise nijje poeyanaje Sesanea huasijje Pesito baa, emeshi cuiñasahuajji eyacua baa. Pesito nijje quea bihui nee mimimiminaje jama baꞌa: —Eꞌe Pesito, miya emeshi cuiñasahuajji eyacua Sesaneajo. Jamaya quea pame nee. ¡Quea bihui nee pocue! —ohuaya Pesito acanaje. 
\p  
\v 14 Majoya Anipa Pesito nijje nequinaje oe pojji cahuime. Pesitohua Anipa huohui canaje Pabojo jama baꞌa: —Emeshi mese Anipa, yahuajo e poe jjimahuajo pea emeshi cuiñasahuajjiya Peniya Jodio dejja Pabo bajjani jiña canaje ejjajeanobiaquijjijo jaa, jiquio ejjajeanobiaquijjijo jaa.  
\v 15 Eya Jenosanena huasijje poquiyajo, Jodio Eyacuiñajji nijje mimiani etii cuaa, Jodio etii cuaa peaꞌai Pabo niñeba neinei canaje. Jama amajamaja canaje baꞌa: “¡Pabo quea mimishi nee nee po tiitiiani! ¡Oya oe cuiajeaꞌyocue!” acanaje cuaa.  
\v 16 Eyaya Jodio cuana jama anaje baꞌa: “Ecuana ca ca pea, Shomano dejja cuana. Miquianajaya ehuohui ca ca oe shajjaꞌajja majje eyaya oya equiajji pojjeama miquea ecuiaꞌyojji. Chojja. Pabohua miquiana cojja nei nequi majje cahuohui cahua peaꞌai. Eꞌe, Shomano emeshi meseja etehueꞌyo jama baꞌa: “Dejjaa peaja ehuohui ojo shajjaꞌajja majje ohuaya cahuohui peaꞌai cahua, ona cojja nei nequiya”. Eꞌe pojjaꞌa miquianaya Pabojo siajje poani” jamaya eya poanaje.  
\v 17 Jamajjeya Jodio etii cuana jiquiacua poe majje, oe cahuime po majje eya anioquenaje etii cuana nijje. Majoya eyaya Pabo iyaa meenaje huohui pohua.  
\v 18 Majoya Pabo poeyajo Jodio etii cuana nequinaje huohui epojji. Jamatii oya cuanaja Pabo quea mimishi nei poanaje huohui jjima. Ecuea ejjashahuabaquijji jama huohui jjima, Jodio etii cuanaja.  
\v 19 Jodio etiiquianaja etehueꞌyojo ca ca janobajjima nei Pabo mimicuiajeanobiajea canaje. Jesosajo, ma yahuajo manoꞌya poajo peaꞌai mimicuiajeanobiajea canaje. Pabohua pa huohui canaje Jesosa shequi oꞌoya poa.  
\v 20 Ma esohui Jesosajo ecuea ba jjima. Jiquiojo ba meemee ajja. Jamajjeya eyaya Pabo huohuiꞌajjanaje jama baꞌa: “Pabo, ¿aꞌa miya Jenosanena huasijje poqui sa poani? Jomajo eyaya huohuije ecuea ejjashahuabaquijji mijo, Jodio etii cuana shajjaꞌajja majje” eyaya aꞌajjanaje.  
\v 21 Jamatii Pabo Jenosanena huasijje poqui sa po ajja. Ohuaya eya huohui canaje jama baꞌa: “Eya ca iña emeshi mese etii nijje mimi sa poani, Sesa nijje. Ohuaya ecuea esohui shajjaꞌajja majje cahuohui cahua ojaya ejjashahuabaquijji ejo” jamaya eya acanaje. Jamajjeya eya jama poanaje baꞌa: “Eꞌe, quijje eyaya miya huoojeaje emeshi mese etii que, Sesa huasijje” eyaya oya anaje —jamaya Pesitohua Jodio emeshi mese Anipa acanaje. 
\p  
\v 22 Majoya Anipaa jama acanaje baꞌa: —Eꞌe Pesito, eya Pabo shajjaꞌajja sa poani. 
\p —Eꞌe, emeshi mese —poanaje Pesito—, ¡mecahuajje miyaya Pabo shajjaꞌajjacue! 
\p  
\v 23 Jamajjeya mecajjeahua Anipa oja jjoꞌyase Menise nijje poeyanaje daqui quea nahue nee nee, emeshi meseja daqui huosho majje. Ojjaña cuaa oya cuana bihuia canaje, quea shajjaquijjo sajeame acanaje. Equi quea quemo huasijje, ma etii cuana chacochacoani yasijje dobiquinaje Pabo shajjaꞌajjaa. Sohuinano huoojeajji, etii cuana, Sesanea cuiñajji mese nijje ma equi yasijje dobiquinaje peaꞌai. Ojjaña anioque majje Pesitohua pea dejja huoojea canaje Pabo iyaa.  
\v 24 Pabo poeꞌyajo Pesito jama poanaje baꞌa: —Emeshi mese Anipa, ojjaña etii jiquiojo nequi peaꞌai, ¡shajjaꞌajjacue mo! Ojjaña Jodio cuaa jiquio cuiñajjijo baꞌeya, Jenosanenajo baꞌeya peaꞌai jiquio dejja Pabo niñeba cani. Oya cuana taaa majamajani jama baꞌa: “¡Pabo cuiajeaꞌyocue! Oya quea mimishi nee nee po tiitiiani”.  
\v 25 Jamatii Pabo shajjaꞌajja majje eyaya banaje oya mimishiꞌama. Jamajjeya eyaya pea cuana oya cuia mee jjima anaje. ¿Yajjajo jja ecuiaꞌyojji? Oya mimishiꞌama. Majoya Pabohua eya jama acanaje baꞌa: “Eya Shomano emeshi mese etii nijje, Sesa nijje mimi sa poani. Ecuea esohui shajjaꞌajja majje ohuaya cahuohui cahua ojaya ejjashahubaquijji ejo” jamaya Pabohua eya acanaje. 
\p —Jamajjeya eyaya oya huoojeaje Shomano emeshi mese etii yasijje huohuiya.  
\v 26 Jamatii oya mimishi po jjimajo, ¿yajja tehueme shai eyaya Shomano emeshi meseja ebajji aje? Jamajjeya eyaya oya ye meenaje miquiana que. ¡Oya shajjaꞌajja majje eya huohuicue miquea ejjashahuabaquijji ojo! Emeshi mese Anipa, Jodio cuanaja ehuohuiꞌyo miquea eba nei nei. Jamajjeya miquea ehuohui Pabojo eyaya tehueje Shomano emeshi mese etii yasijje, ojaya ebajji.  
\v 27 Eya ca iña jjashahuabaquiani jama baꞌa: Ecuea Pabo ehuoojeajji pojjeama ojaya mimishi cuana tehueꞌyo jjimajo. Chojja, jama po ajja ca iña —poanaje Pesito. 
\c 26  
\s1 Pabo emeshi mese Anipa nijje miminaje 
\p  
\v 1 Majoya Anipa Pabo nijje miminaje jama baꞌa: —Eꞌe Pabo, ¡mimicue! ¡Miquea mimishi chamajo ecuanaya huohuicue ecuanaja ebajji! —acanaje Anipaa. 
\p Jamajjeya Pabohua eme jeasohua majje ojaya ebaꞌejjijo huohui canaje jama baꞌa:  
\v 2 —Emeshi mese Anipa, ojjaña miquea eba. Jodio etii cuanaja esohui ejo miyaya shajjaꞌajjanaje. Jamajjeya ecue sohui shajjaꞌajjañajo, eya quea bihui nee.  
\v 3 Eꞌe, Jodio etiiquianaja etehueꞌyo, ehuohuiꞌyo cuana peaꞌai miquea eba, ojjaña. Miquea eba peaꞌai jjeyahua nei Jodio cuana jjamimicuiajea nobiajeaquiani esohui quea pame nee Jeosajo. Jamajjeya ¡ecuea esohui quea bei shajjaꞌajja socue!  
\v 4 Ecuea ebaꞌejji eya eshoꞌyahua ojjaña Jodio cuanaja eba. Eꞌe, ecuea cuiñajjijo baꞌyahua, Jenosanenajo baꞌe peaꞌai eya ojjaña Jodio cuanaja eba.  
\v 5 Yahuajo eya Paniseo jayojja baꞌenaje eꞌe jojo nei. Jamaya ojjañaja eba. Jamaya cahuohui cahua, ca ohuaya huohuiꞌyo sa amajje —Pabo poanaje. 
\p  
\v 6 —Yahuajo nei nei Eyacuiñajjiya esejaya etiiquiana huohui ca poa jama baꞌa: “Ojjaña emanoꞌyojaa cuana eyaya shequi meeje oꞌoya quijje” poa. Jamaya eseya sa poani. Ma esohui huohuiañajo, Jodio etii cuaa eya iña canaje. Jiquiacua eya jjequi canaje cuaa minijje emimijji. 
\p  
\v 7 —Ecuanaja, Jodio cuanaja 12 etiiquiaa maya ehuohuiꞌyo shajjaꞌajja ca poa yahuajo nei nei. “Eꞌe jojo nei ojjaña eseya manoꞌyo majje shequije oꞌoya. Jamaya amee caje oꞌoya Eyacuiñajjiya” Jodio etiiquiaa aca poa. Jamajjeya ecuaaya, Jodio cuaa Eyacuiñajji bihuia tiitiiaña ojjaña pojjajo, mecajje peaꞌai. Jamatii eyaya maya huohuiñajo Jodio cuaa aje oe eya niñeba cani jjeya, tecuea cani peaꞌai.  
\v 8 Emeshi mese Anipa, miya Jodio dejja peaꞌai. ¿Apiojji acuae miquianaaya, Jodio cuaa jjabahuejjaqui ajja Eyacuiñajjiya emanoꞌyo cuana shequi mee caje oꞌoya? —Pabohua acanaje. 
\p  
\v 9 —Eꞌe Anipa, yahuajo nei eyaya peaꞌai Jesosaja epeejji cuana napa majamajanaje quea huiso, ma Nasanenajo baꞌya poaja epeejji cuana. Eya jjashahuaba taiquinaje jama baꞌa: “Jesosaja epeejji napajji cuana quea pame poani”.  
\v 10 Jamajjeya eyaya Jesosaja epeejji Jenosanenajo baꞌe napanaje quea huiso. Eꞌe, Eycuiñajji nijje mimiani etii cuaa eya esohui etehueꞌyo quia canaje Jesosaja epeejji cuana jeanobiajea meejji. Majoya eyaya Jesosaja epeejji cuana iñanaje, jeanobiajeanaje ejjajeanobiaquijji yasijje peaꞌai. Onaaya Jesosaja epeejji cuiajea canajejo, eyaya jama anaje baꞌa: “Eꞌe, ¡cuiajeaꞌyocue!” anaje eyaya.  
\v 11 Eꞌe, yahuajo eya poqui majamajanaje ojjaña Jodioja equi ejjachichaquijji cuana huasijje Jesosaja epeejji cuana cuiajeaa, Jesosa nijje ejjapeequi pajeaꞌyojji nisho. Eya quea quene nee nee ona nijje po majje poquinaje pea cuiñajji cuana huasijje, pea meshi yasijje Jesosaja epeejji cuana napaa. 
\p  
\v 12 —Majoya Eyacuiñajji nijje mimiani etii cuaa eya huoojea canaje Damasico huasijje Jesosaja epeejji napaa. Eya quia canaje esohui etehueꞌyo jama baꞌa: “Pabo Jesosaja epeejji cuana iña meesahuacue”. Majoya eya poquinaje Damasico huasijje.  
\v 13 Emeshi mese Anipa, Damasico huasijje ejiojjijje poquijeya, eshequi biacojjajja nequijo eyaya eyajo banaje ejeajijijji quea jiji nee nee, eshequi jayojja jama pojjeama, quea jiji jaꞌa nee nee. Dejja cuana enijje poquiani jeajaꞌa neinei canaje peaꞌai.  
\v 14 Jamajjeya ecuana meshi yasijje oquequinaje quea mete nee nee jjejojo. Majoya eyaya pea eyajo enijje mimiani shajjaꞌajjanaje. Enijje miminaje Emeo esohuijo jama baꞌa: “Sanoni, Sanoni, ¿apiojji acuae miyaya eya napaña? Quea bicho nee nee poaje ecuea epeejji cuana napa majje. ¡Aꞌa quea sapa caꞌa pojji!” poanaje.  
\v 15 Majoya eyaya jama anaje baꞌa: “Emeshi Mese, ¿ae bajjani acuae miya?” Jesosaa eyajo aniya eya jama sajaꞌame acanaje baꞌa: “Eya Jesosa. Miyaya eya napaña, ecuea epeejji cuana peaꞌai.  
\v 16 ¡Jamajjeya nequisohuacue jjeyahua nei! Eya mi que jjanequipanaquinaje mi jjabahuejjaqui meejji. Miya enijje chacochacoje, ecue sohui huohuijji poaje. Ecuea esohui jjeyahua nei miyaya shajjaꞌajjanaje, eya banaje peaꞌai. Quijje pishana eyaya miya quea huiso ba meeje ejo. Maya miyaya huohuije ojjaña huasijje.  
\v 17 Jodio cuaa napa cajo eyaya miya jaahuanaje. Eyaya miya huoojeaje Jodio pojjeama cuana huasijje. Onaa mi napa cajo, eya mi jaahuanajji poaje.  
\v 18 Eꞌe, eyaya miya Jodio pojjeama cuana huasijje huoojeaje. ¡Miyaya oya cuana ecuea ejiojji ba meecue eyahuasijje epoquiꞌyojji! ¡Miyaya oya cuana enijje jjapeequi meesahuacue quea jaꞌa nee nee ebaꞌejji, Edosiquiana nijje, Satanasa nijje epoqui majajji pojjeama! ¡Maya oya cuana pajea meeꞌyocue Eyacuiñajjija esohui jayojja jama ebaꞌejji! ¡Enijje jjapeequi meesahuacue! Jamajjeya eyaya ojaya mimishi cuana cuijeajeꞌyo. Oya cuana baꞌe tiitii meejeꞌyo eyajo ojjaña ecuea epeejji cuana nijje peaꞌai” jamaya Jesosaa eya huohui canaje —Pabo poanaje. 
\p  
\v 19 —Emeshi mese Anipa, eyaya Jesosaja esohui shajjaꞌajjanaje. Ohua huohui canaje jayojjaya eyaya anaje.  
\v 20 Ebionei eyaya Jesosaja esohui quea pame nee huohuinaje Damasicojo baꞌeca cuanaja eshajjaꞌajjajji. Majoya Jenosanena huasije poe oꞌoya majje eyaya ojjaña cuana sohuihuohuinaje. Majoya eya poquinaje ojjaña cuiñajji yasijje Jodea meshijo. Esohui quea pame nee Jesosajo huohui poquianaje. Jodio pojjeama cuana peaꞌai eyaya sohuihuohui poquianaje jama baꞌa: “¡Miquea mimishi cuana pajeaꞌyocue! ¡Jesosa nijje jjapeequicue! ¡Quea pame nee baꞌecue! Jamaya onaaya ba caje miya eꞌe jojo nei Jesosaja epeejji poani, eshahuaja pojjeama” jamaya eyaya ojjaña cuana huohui poquianaje —Pabo poanaje—.  
\v 21 Eya jamaya ehuohui poaje jjejojo Jodio etii cuaa eya iña canaje Eyacuiñajjija equi quea quemojo nequi. Eya cuiajeaꞌyo sa acanaje cuaa.  
\v 22 Jamatii Eyacuiñajjiya eya jaahuana canaje. Jamajjeya ojjaña pojjajo yahuajo, jjeya peaꞌai eyaya ojjaña huasijje esohui quea pame nee Jesosajo huohui tiitiiaña. Eꞌe, ojjaña emeshi mese cuana huasijje, ojjaña etii cuana huasijje, ojjaña pea cuana huasijje peaꞌai eyaya esohui huohuiaña peaꞌai. Emeshi mese Anipa, yahuajo nei Moisesiya, Eyacuiñajjija pea esohui huohuijjiya yahuajo nei baꞌe cuaa peaꞌai esohui huohui ca poa jayojja jama eyaya esohui huohuiaña jama baꞌa:  
\v 23 “Eyacuiñajjija huoojeaꞌyo ojjaña jaahuanajji Quito quea mimishi acajeꞌyo cuaa. Oya quea nee nee po mee cajeꞌyo, baꞌehuanasohuajea cajeꞌyo emanoꞌyojji. Jamatii oya emanoꞌyojaa Eyacuiñajjiya oya shequi mee cajeꞌyo, oja Chiiya. Ojaya ebionei eyami eyacua poajeꞌyo. Ohuaya Jodio cuana huasijje, Jodio pojjeama cuana huasijje peaꞌai esohui huohui caje: Mimishi cuana cuijea meeꞌyo majje baꞌe tiitii mee cajeꞌyo onijje eyajo” jamaya peaꞌai eyaya huohuiaña, de —jamaya Pabohua emeshi mese Anipa, ojjaña cuana onijje ani peaꞌai huohui canaje. 
\p  
\v 24 Pabohua jamaya huohui cajo, Pesitohua oya jama acanaje baꞌa: —Pabo, quea huiso esohui etehueꞌyo ba majamaja majje eniñepoquiꞌyo jayojja jama poani miya —acanaje Pesitohua. 
\p  
\v 25 —Chojja emeshi mese Pesito, eya quea jjashahuabaqui quehua poani pojjeama, eniñepoqui jayojja pojjeama poani. Ecuea esohui eꞌe jojo nei, quea jaꞌa nee peaꞌai.  
\v 26 Jamaya emeshi meseja Anipaja eba. Eꞌe emeshi mese Anipa, ojjaña Jodio cuanaja esohui etehueꞌyo miquea eba. Jamajjeya eya minijje mimiani bichoꞌama. Ecuea esohui, Jodio etii cuanaja esohui peaꞌai quehuajje huohui jjima. Jamajjeya ojjaña ma esohui cuanajo miya quea jaꞌa nee jjashahuabaquinaje —Pabo poanaje—.  
\v 27 Ecuea emeshi mese Anipa, ¿aꞌa miyaya Eyacuiñajjija esohui huohuijjija esohui cuana shajjaꞌajjaña? Ecuea eba miya; jiquio esohui miyaya quea jaꞌa nee shajjaꞌajjaña —Pabohua Anipa acanaje. 
\p  
\v 28 Majoya emeshi mese Anipaa Pabo jama acanaje baꞌa: —Pabo, miquea emimi oe pojji poanaje. Jamatii miyaya eya Jesosaja epeejji po mee sa aña jjeya nei —poanaje Anipa. 
\p  
\v 29 —Eꞌe emeshi mese Anipa, eya miquianajo mimiani Eyacuiñajji nijje, miquiana Jesosaja epeejji epojji jjeyahua nei, quijje pishana pojjaꞌa. Eꞌe, ojjaña miquianaya jiquiojo nequi Jesosaja epeejji eyaya po mee sa aña e jayojja epojji, jamatii jiquio ecua eya baa jjonojji jama epojji pojjeama miquianaya —Pabohua acanaje. 
\p  
\v 30 Majoya emeshi mese Anipa nequisohua majje ojaya emeshi cuiñasahuajji Pesito nijje, Pesitoja jjoꞌyase Menise nijje, ojjaña etii onijje ani peaꞌai poquinaje pea equecuayijji yasijje Pabojo mimiya.  
\v 31 Pea equecuayijji yasijje anioque majje ojee mimimiminaje; jama poanaje baꞌa: —Jiquio dejja Pabo quea mimishi pojjeama. Jamajjeya oya ecuiajeaꞌyojji pojjeama, ejeanobiajeaꞌyojji pojjeama tii.  
\v 32 Anipaa Pesito huohui canaje jama baꞌa: —Pabo emeshi mese Sesa nijje mimi sa poꞌyo ajja jojjemo ecuaaya oya pichojeaꞌyome. Jamatii ohuaya yahuajo huohui canaje jama baꞌa: “Eya Shomano emeshi mese etii nijje, Sesa nijje mimi sa poani. Ecuea esohui shajjaꞌajja majje ohuaya cahuohui cahua ojaya ejjashahuabaquijjijo ejo”. Jamaya poanajejo ecuanajaya oya epichojeaꞌyojji pojjeama —poanaje Anipa. 
\c 27  
\s1 Pabo besapoquinaje Shoma huasijje, Itania meshi yasijje 
\p  
\v 1 Ecuea epeejji Teopino, eyaya Nocaa jiquio banaje ecuea ecojjaa. Eꞌe, eya Pabo nijje poquinaje. Jamajjeya ¡ecue tehue ba neineicue! Jama poanaje baꞌa: Emeshi mese Anipa pea cuana nijje mimi majje jama huohui canaje baꞌa: —Eꞌe, jjeyahua nei ecuaaya Pabo huoojeaje Itania meshi yasijje Shomano emeshi mese etii baa, Sesa baa —acanaje. 
\p Jamajjeya jama amajje ohuaya Pabo, pea cuana eme jeyoꞌyo peaꞌai quia canaje sohuinano huoojeajji Joño bajjani yasijje, Itania meshi yasijje edojojji. Joño Shomano dejja cuanaja meshijo baꞌe, Itania meshijo. Oya emeshi mese etiija sohuinano cuana huoojeajji poanaje, Sesaja.  
\v 2 Majoya Joñohua Pabo, pea cuana peaꞌai ani mee canaje bishe ai yasijje ecuana nijje. Ma bishe ai mese Anamitio cuiñajjijo baꞌe poqui sa poanaje pea cuiñajji cuana huasijje, Asia meshi yasijje. Ojjaña apoa poajo, ebishe mese besapoquinaje. Ecuana Anitaco nijje besapoquinaje Pabo nijje. Anitaco yahuajo Tesanonica cuiñajjijo baꞌenaje, Masenonia meshijo. Oya Pabo chacosahuajji poanaje.  
\v 3 Majoya quea huesha nee besapoqui majje ecuana Sinono cuiñajji yasijje baꞌeñaquinaje. Baꞌeñaqui majje Joñohua Pabo quea pame nee acanaje; oya poqui mee canaje ecuana nijje Jesosaja epeejji cuana baa, bobi ijjiaa, aquiana chichaa peaꞌai ebesapoquijji.  
\v 4 Majoya bishe aijo ani oꞌoya majje ecuana Sinonojo baꞌe besapoqui oꞌoyanaje. Beni quea quemohua bishe hui cuiasehuijea cajje enashajohua nane canaje. Jamajjeya ebishe mese besapoquinaje Chipe nasi yasijje. Chipe nasi shanijje, beni chama huasijje besapoquinaje, enashajo ai chama huasijje.  
\v 5 Majoya Chipe nasi yejje majje ecuana bae ojje miji yasijje, ena poejji miji yasijje besapoquinaje, Sinisia meshi chipi nei, Panipinia meshi peaꞌai yejjenaje quea chipi nee. Majoya besapoquinaje Nisia meshi yasijje. Miña cuiñajji yasijje baꞌeñaquinaje. 
\p  
\v 6 Miña cuiñajjijo baꞌeñaqui majje ecuanaja aquiana cuana jeasohuaquinaje etaja huasijje. Majoya Joñohua pea bishe ai saꞌajja canaje Itania meshi yasijje ebesapoquijji. Bishe ai Anejania cuiñajjijo baꞌe Itania meshi yasijje besapoquiani ba majje Joñohua ojjaña dejja cuana eme jeyoꞌyo ma bishe aijo ani mee canaje. Majoya ecuana besapoquinaje.  
\v 7 Jamatii quea cahui huiso ecuana jjapashineijje besapoquinaje. Beni pajijjiya enashajo quea ꞌaa nee nee aniya bishe ai nane canaje, hui cuiajjoti canaje peaꞌai. Ebesapoquijji quea camaja poanajejojo, quijje pishana ecuana poeyanaje Nido cuiñajji yasijje. Beni quea quemojojo bishe beni poejji miji yasijje besapoqui meemee ajja poanaje. Jamajjeya beniya ecuana dojojea canaje eeno poejji miji yasijje. Nasi quea quemo Queta nasi bajjani yasijje dojojea canaje. Queta nasi shanijje, benima huasijje besapoquinaje. Nasi huijje jjayejjequinaje Sanomo meshi bajjani huijje. Majoya beniya ecuana dojojea canaje Queta nasi pea miji yasijje.  
\v 8 Nasi sahuajje quea besapoqui camaja poanaje. Jamajjeya ecuana Enashajomaꞌ cuiñajji yasijje baꞌeñaquinaje, Nasea cuiñajji chipi nei. 
\p  
\v 9 Ebesapoquiꞌyo quea cahui huiso nee nee poanaje. Jamajjeya jjohuee she poanaje. Jjohuee shejo quea beni quemojo, enashajo quea quemo nee nee poanijo bishe huiꞌiꞌyo chanaꞌ. Jamajjeya Pabohua ojjaña cuana bishejo nequi jama acanaje baꞌa:  
\v 10 —Epeejji cuana, ¡shajjaꞌajjacue mo! Ecuea eba ecuana jjeyahua nei besapoquiajo quea camaja nee nee poaje. Bishe huiꞌijeꞌyo, aquiana cuana bishejo ani huiꞌijeꞌyo peaꞌai. Eseya peaꞌai huiꞌiꞌyo chanaꞌ —Pabohua acanaje. 
\p  
\v 11 Jamatii sohuinano huoojeajji Joñoja Pabo shajjaꞌajja jjima. Ebishe meseja esohui, bishe huijeajjija esohui peaꞌai ca ca shajjaꞌajja canaje. Onaaya huohui canaje jama baꞌa: —Ecuana jjeyahua nei bishe aijo besapoquije. Ehuiꞌiꞌyojji pojjeama, de.  
\v 12 Enashajomaꞌ cuiñajji quea tai poaje eeno shejo. Jiquiojo baꞌe mee ajja; quea huoe nee nee poaje —acanaje cuaa. 
\p Jamajjeya beshahua nei ojjaña dejja cuana jomajo nequi sa poꞌyo ajja poanaje. Besapoqui sa poanaje quea huesha Penise cuiñajji yasijje. Jama poanaje baꞌa: —Eꞌe pojjaꞌa eseya dojo caje Penise yasijje, beni chama pishana huasijje. Jomajo nequije eeno shejo —poanaje cuana. 
\p Enashajomaꞌ cuiñajji beni poejji mijijje nequi; Penise ca ca pea ojje mijijje nequi. 
\s1 Benipajiji quea quemohua bishe nane canaje 
\p  
\v 13 Jamajjeya beni biso nei eeno poꞌyajo, dejja cuana ma bishejo nequi quea bihui nee jama poanaje baꞌa: —Eꞌe, jjeya quea pame nee ebesapoquijji beni sisijo. Cuaꞌa, ebesapoqui —poanaje ojjaña. 
\p Jamajjeya bishe picho canaje, besapoquinaje Queta nasi sahuajje quea chipi nee.  
\v 14 Jamatii quijje pishana beni quea quemo nee ena poejji mijijje poeyanaje.  
\v 15 Benipajijiya janobajjima nei bishe nane canaje. Beniya bishe huijea canaje. Ebishe meseya beni poejejje bishe poqui meemee ajja poanaje. Quea camaja nee neejojo ojjaña hueahueanaje. Jamajjeya beniya bishe jamatii dojo canaje.  
\v 16 Caona nasi sisi chipi nei yasijje bishe dojo canaje beniya. Caona nasi shanijje jjayejjequianijo beni nequioque pishanaquinaje. Jamajjeya bishe sisi quea pame jeyojacaꞌajja canaje bishe ai pejjejo. Quea camaja poanaje bishe ejeyojacajji beni yejje.  
\v 17 Jamajjeya bishe sisi bishe ai biajje jjequisohua majje jeyo canaje. Bishe ai jeyo caꞌa canaje peaꞌai jjono quea quemohua. Ebishe ai meseya jama acanaje baꞌa: —Beniya bishe ai dojo ca chanaꞌ meshijaji yasijje, Sinite meshijaji quea chipi nee yasijje. Daqui quea quemo equecuaquini eyajo baꞌeya beniya bishe dojocuaji ca chanaꞌ —acanaje. 
\p Jamajjeya ma daqui cuana bebo caꞌyonaje cuaa beni quea quemojo. Majoya bishe jamatii dojo canaje beniya.  
\v 18 Beni quea quemo po tiitiianijo mecajjeahua ecuaaya aquiana cuana bishejo ani jeaoqueajeanaje ena huasijje, bishe quea peja epojji nisho.  
\v 19 Pea pojjajo aquiana cuana quea biquie, bishe chacojji cuana jeaoqueajeanaje ena huasijje peaꞌai. Jjono cuana quea quemo quea huiso peaꞌai jeaoqueajeanaje ena huasijje bishe quea peja epojji nisho.  
\v 20 Quea huiso cahuime benipajiji po tiitii nequinaje. Quea misi nee poanaje. Eshequi chamaꞌ poanaje, majameta cuana peaꞌai. Ojjaña cuana quea mete nee jjashahuabaquinaje jama baꞌa: —Eꞌe de, huiꞌijeꞌyo se, de. 
\p  
\v 21 Quea mete jjejojoya ojjaña cuana ijjiaꞌijjia jjima nequinaje quea huiso cahuime. Majoya Pabo ojjaña cojja nei nequinaje. Huohui canaje jama baꞌa: —Epeejji cuana, yahuajo eseya Queta nasijo nequi eyaya miquianaya huohuiꞌajjanaje eseya poqui majje huiꞌiꞌyo chanaꞌ. Jamatii miquianaya jjashajjaꞌajjaqui sa po ajja poanaje. Yahuajo ecuea esohui miquiaaya eshajjaꞌajjanaje jojjemo aquiana quea huiso ena huasijje jeaoqueajeaꞌyo jjima poquiaye. Jiquio bishe peaꞌai huiꞌiꞌyo jjima pome.  
\v 22 Jamatii ¡aꞌa quea mete pojji! Ecuea eba jama baꞌa: Jiquio bishe huiꞌijeꞌyo. Jamatii eseya huiꞌiꞌyo ajja poaje.  
\v 23 Eꞌe, eya Eyacuiñajjija epeejji, ojaya esohui huohuijji. Eyacuiñajjiya eya jaahuana cani. Mecajje ojaya esohuidojojji huoojea canaje enijje mimiya.  
\v 24 Jama poanaje baꞌa: “Pabo, ¡aꞌa quea mete pojji! Eyacuiñajjiya miya huoojea caje Shomano emeshi mese yasijje esohui huohuiya. Jamajjeya Eyacuiñajjiya miya jaahuana caje, miya quea pame nee acaje. Jamajjeya ojjaña cuana minijje besapoquiani peaꞌai ohuaya jaahuana cajeꞌyo, ehuiꞌiꞌyojji pojjeama” eya acanaje esohuidojojjiya.  
\v 25 ¡Jamajjeya quea bihui nee pocue! Eyacuiñajjija esohui jayojja jama ohuaya acaje eꞌe jojo nei. Jamaya ecuea eba.  
\v 26 Jamatii beniya bishe dojo caje nasi yasijje; cuiayiyejea caje. Jaañaqui majje cuiapojojea caje meshijajijo enashajo quea quemohua —Pabohua acanaje. 
\p  
\v 27 Majoya quea cahui huiso nee nee, 14 cahuime bishe jamatii dojo canaje beniya. Bishe dojo canaje bae sahua huasijje, Adia ena huasijje. Mecashono bishe chacojji cuaa jama acanaje baꞌa: —Eꞌe pojjaꞌa eseya meshi chipi nei dojo cani beniya. 
\p  
\v 28 Majoya ohuaya aquiana quea biquie jeyo canaje quea jjono aojo. Jeaoquea canaje ena huasijje. Ipiaꞌajja canaje ache doe ebajji. Jjono quea aojo ba canaje ena quea doe nee nee, 36 metro doeme. Majoya quijje pishana ipiaꞌajja ca oꞌoyanaje. Ba canaje ena quea doe pishana, 26 metro doemeya.  
\v 29 Jamajjeya quea ajjajja nee nee poanaje jama baꞌa: —Beniya bishe dojo caje, cuiayiyejea capoquije bajjoo ani yasijje. Bishe jjacuiapojojeaquiñaquije nei nei, de, bajjoojo pojjaꞌa, de —taaame poanaje. 
\p Jamajjeya bishe chacojji cuaa ebeca pee peaꞌai ejjashehuaquijji iyanobia canaje ena huasijje beniya edojo capoani jjejojo. Jeyo caꞌa majje epojja ishoaꞌajja po baꞌenaje quea mete nee nee.  
\v 30 Bishe chacojji poani aje oe jjashahuaba taiquinaje ebesapoquijji etaja huasijje, enequisohuaquijji nisho epoquiquehuajji. Mecashono bishe sisi ecapashineijje jeaoqueajea canaje ena huasijje. Siajje poanaje jama baꞌa: —Ecuana poquije bishe hui jeyohua. Eꞌe, bishe hui ejjashehuaquijji ena huasijje jeaoqueajeaa poquije ecuana —jama siajje pomeya poanaje. 
\p  
\v 31 Pabohua ca ca sohuinano cuana, sohuinano huoojeajji Joño peaꞌai huohui canaje jama baꞌa: —Chojja. Bishe chacojji cuana bishe aijo mi nequiajo Eyacuiñajjiya eseya ejaahuanajji pojjeama —acanaje. 
\p  
\v 32 Jamajjeya Paboja sohui shajjaꞌajja canaje sohuinano cuaa. Jjono cuana bishe sisi ejeyojjiꞌya jajasejjajea canaje. Jajasejjajea cajje bishe sisi jamatii dojojea canaje seꞌejjamaꞌ. 
\p  
\v 33 Beshahua nei jjapojjaquianijo, Pabohua ojjaña ecuana bobi ijjia mee canaje. Huohui canaje jama baꞌa: —Miquianaya quea huiso nee nee cahuime, 14 cahuime ijjiaꞌijjia jjima nequi, cahui jjima nei nequi beni yajjajo, enashajo yajjajo, ehuiꞌijeꞌyo poso jjejojo.  
\v 34 Jamajjeya ¡ijjiaꞌijjia socue! ¡Bobi ijjiacue! Oꞌo mi oe shocuishocuije soꞌo eꞌijjiaꞌijjia jjejojo, manoꞌama poaje eshocuishocui besapoquijji. Huiꞌiꞌyo ajja se poaje bishe huiꞌiꞌyajo. Ojjaña eseya jamatii quea pame poaje —Pabohua acanaje. 
\p  
\v 35 Jamaya huohui majje Pabohua pahui iñanequia majje bihuia canaje Eyacuiñajji ojjañaja ecuanaja ebajji. Pahui mijisisi majje ijjia canequinaje.  
\v 36 Pabo ba majje ecuana quea bihui nee poanaje. Jamajjeya bobi ijjia peaꞌainaje ecuaaya.  
\v 37 Eꞌe, eseya jiquio bishejo ani dejja mahuiso baꞌa: quea huiso nee nee, 276 huisome se poanaje.  
\v 38 Jamajjeya aje oe ojjaña cuana jejje canaje. Jejje majje quea huiso anoso ai, pahui pohui peaꞌai jeaoqueajea canaje ena huasijje bishe quea peja epojji, ebaꞌecuayaꞌyojji peaꞌai. 
\s1 Bishe ai huiꞌiꞌyonaje 
\p  
\v 39 Jjapojjaquiajo mecajjeahua nei bishe chacojji cuaa meshi quea chipi nee ani ba canaje. Onaja ma meshi ba jjima, ache meshi shai. Hueshaꞌama meshijaji enashajomaꞌ pishana, quea coe pishana ba canaje. Jamajjeya echacojji cuana poqui sa poanaje bae sahua huasijje, ena coe yasijje bishe baꞌehuanañaquiya nisho. Jomajo enashajo quea quemo pishana yani.  
\v 40 Majoya ejjashehuaquijji cuana jajasejjajea canaje, dojojea canaje, ejehuibeje bishe quii caꞌajji ejeyo baꞌe jjono jajasejja acanaje bishe epii nei edojo cajji. Majoya daqui quea quemo quecuaquini majje nequiasohua canaje, beniya bishe huijje dojobesa canaje meshijaji yasijje.  
\v 41 Eꞌe, beniya bishe ai hui dojobesa canaje. Meshijaji biajje huanasohuajea capoquinaje. Bishe jaañaquinaje. Bishe chacojji cuaa bishe meshijajijo hui jaañaquiajo quecuayiyejeaꞌajja caꞌyo nequinaje. Enashajo quea quemohua, quea cuejipashi neeya bishe quiijje nane amajje bishe cuiapojojea canaje.  
\v 42 Sohuinano cuana jama poanaje baꞌa: —Bishe huiꞌiꞌyajo, dejja cuana ejeyo nequi meshi yasijje shocuishocui majje poquiquehua chanaꞌ. Jamajjeya eseyaya ojjaña joya eme ejeyo ani quecuajea jeyojeyojeꞌyo —poanaje sohuinano. 
\p  
\v 43 Jamatii sohuinano huoojeajjiya Joñohua Pabo nahue sa acanijo huohui canaje jama baꞌa: —Dejja cuana eme jeyo ani ¡aꞌa quecuaꞌyojji! ¡Pichojeaꞌyocue oe! ¡Joya shocuishocuiani tohuaa meecue ena huasijje! ¡Meshi yasijje cashocuishocui besapoquiahua!  
\v 44 ¡Pea cuana joya shocuishocui ajja ca ca huepee biajje, bishe ecuiapojojea biajje cuanaya cabesapoquiahua meshi yasijje! —acanaje Joñohua. 
\p Jamajjeya ojjaña cuana meshi yasijje besapoquinaje. Huiꞌiꞌyo jjima nei nei cuana. Nequisohuaquinaje etaja huasijje, ojjaña ecuanaya. 
\c 28  
\s1 Pabo Manita nasijo nequinaje 
\p  
\v 1 Jamajjeya ojjaña ecuanaya meshi yasijje besapoquiꞌyonaje. Etaja huasijje nequisohuaqui majje dejja cuana jomajo baꞌe ecuaaya banaje. Ohuaya ecuana huohui canaje: —Jiquio meshi Manita nasi bajjani. Quea quemo nasi —acanaje. 
\p  
\v 2 Ese ejja cuana jomajo baꞌe maseꞌama, quea pame nee nee. Miminaje ojjaña cuana nijje. Enapajiji quea huoejo cuaqui quea huiso chicha majje dahuahuojje canaje. Jama acanaje baꞌa: —¡Poecue cuaqui yasijje; ojjaña nequiana jjayoquihuacue! ¡Quea pame nee ecuana nijje baꞌecue! —acanaje. 
\p  
\v 3 Majoya Pabohua acui sisi cuana chicha canaje cuaqui. Ma acui sisi cuana cuaqui quea jiji nee, quea quiyo nee yasijje jeajea canijo, peyo se najjiya Pabo me ijjia neinei caꞌyonaje.  
\v 4 Nasi aijo baꞌe dejja cuaa peyohua me ijjia caje Pabo ba canaje. Jamajjeya oya cuana ojee mimimiminaje jama baꞌa: —Eꞌe jojo nei jiquio dejja pea quecuajji. Jamajjeya oja mimishijo peyohua oya ijjia canaje. Oya huiꞌiꞌyo jjima bae aijo. Jamatii jjeyahua nei oya manojeꞌyo oja mimishijo —jama posoya acanaje cuaa. 
\p  
\v 5 Jamatii Pabohua peyo jeajea canaje cuaqui yasijje. Neeꞌama, mano jjima oya poanaje, shejjee jjima peaꞌai.  
\v 6 Ojjaña cuaa Pabo ba neinei ca aninaje. Jjashahuabaquinaje jama baꞌa: —Jjeyahua nei oya shejjeeje baꞌajja. Jjeya nei pojjaꞌa oya manojeꞌyo —poanaje. 
\p Chojja, Pabo manoꞌama nei nei poanaje. Quijje pishana Pabo quea jaꞌa nee nee, quea mano pojjeama ba majje ma dejja cuaa oya jama acanaje baꞌa: —Oya emanoꞌyojji pojjeama —cuana poanaje. 
\p Jamajjeya onaaya huohui canaje jama baꞌa: —Oya dejja pojjeama. Oya pea eyacuiñajji dejja jayojja poeyanaje, de —poso acanaje cuaa ojjañaa. 
\p  
\v 7 Manito nasi emeshi mese Pomino bajjani poanaje. Ojaya que cuana hueshaꞌama nequi. Ohuaya ecuana iyaa canaje ojaya equi cuana huasijje. Ecuana nijje miminaje quea pame nee nee. Ojaya equi cuanajo ecuana baꞌe mee canaje pea beca peejjima cahuime, Pominohua.  
\v 8 Emeshi mese Pominoja chii ca ca quea mano nee jaa, seeseejo; quea quiyo nee nee peaꞌai. Jamajjeya Pabo oja equi quecuayijji yasijje dobiquinaje o baa, emanojaa baa. Ba majje Pabohua ma emanojaaja eyami biajje ojaya eme huana canaje Eyacuiñajji nijje emimijji o jjaajaqui meeꞌyojji. Quea pame nee, quea aja nee Pominoja ejeajji poꞌyonaje.  
\v 9 Jamajjeya Pominoja chii huaquiaꞌyonaje ba majje ojjaña emanojaa cuana nasi aijo baꞌe poeyanaje Pabo que. Jesosaa Pabo ojjaña huaquia meesahua caꞌyonaje.  
\v 10 Majoya ma dejja cuana quea bihui nee nee poanaje. Aquiana quea huiso ecuana quia canaje sosemaꞌ. Quijje ecuana pea bishe ai yasijje anisohuaquiꞌyonaje. Majoya nasi aijo baꞌe cuaa quea huiso pea aquiana cuana ebaꞌejji ecuana quia canaje sosemaꞌ. 
\s1 Pabo Shoma cuiñajji yasijje besapoquinaje 
\p  
\v 11 Jamajjeya ecuana Manita nasijo baꞌenaje pea beca peejjima baꞌime, 3 baꞌime. Majoya ecuaaya pea bishe ai banaje eyacuiñajji beca jaa bajjani, Casito Pono bajjani. Ma bishe ai Anejania cuiñajjijo jaa poe majje eeno shejo Manita nasijo aniñaquinaje; majoya besapoquinaje Shoma meshi yasijje ebaꞌeñaquijji. Jamajjeya sohuinano huoojeajji Joñohua ecuana ma bishe aijo ani mee canaje.  
\v 12 Majoya besapoquiꞌyo majje ecuana pea nasi yasijje poeyanaje, Sinacosa cuiñajji yasijje baꞌeñaquinaje. Jomajo ecuana nequinaje pea beca peejjima cahuime.  
\v 13 Majoya Sinacosajo ani ecuana besapoqui oꞌoyanaje. Itania meshi yasijje poeyanaje. Shejio cuiñajji yasijje baꞌeñaquinaje. Majoya mecajjeahua eeno beni sisi poanaje. Jamajjeya beniya bishe dojo canaje quea pame nee. Beca cahuime po majje ecuana Poteoni cuiñajji yasijje baꞌeñaquinaje, Itania meshi yasijje.  
\v 14 Poteoni cuiñajjijo Jesosaja epeejji quea huiso cuana baꞌenaje. Ohuaya ecuana iyaa canaje oja equi yasijje eꞌanijji. Jamajjeya ecuana ma cuiñajjijo nequinaje me oejje beca cahuime, 7 cahuime Jesosaja epeejji cuana nijje. Majoya ecuana poquinaje Shoma cuiñajji quea quemo huasijje ejiojjijje.  
\v 15 Jesosaja epeejji cuaa Shomajo baꞌeya shajjaꞌajja canaje Pabo poeyani. Jamajjeya oya cuana Pabo ishoa sa po ajja Shomajo. Poeyanaje Apio cuiñajji yasijje, pea cuiñajji yasijje yohua bajjani yasijje baꞌa: Pea Beca Peejjima Equi cuana huasijje peaꞌai Pabo baa. Jamajjeya Jesosaja epeejji cuana jomajo tii ba majje Pabo quea bihui nee nee poanaje. Eyacuiñajji bihuia canaje, Pabohua. 
\s1 Pabo Shomajo baꞌenaje 
\p  
\v 16 Majoya ecuana Shoma huasijje poquinaje. Shomajo nequiñaqui majje sohuinano huoojeajji Joñohua Pabo huohui canaje jama baꞌa: —Pabo, ¡miya mee nei baꞌecue jiquio equiojo! —acanaje. 
\p Jamajjeya oe sohuinano Pabo jaahuanajji nequinaje ma equijo peaꞌaiya. 
\p  
\v 17 Majoya pea beca peejjima cahuime po majje Pabohua Jodio etii cuana iyaa canaje. Ojee jjachichaquiajo Pabohua oya cuana huohui canaje jama baꞌa: —Epeejji cuana, ¡shajjaꞌajjacue mo oe! Ecuea Jodio cuana quea mimishi ajjima poanaje. Esejaya etiiquiana cuanaja esohui pajeaꞌyo jjima ecuea peaꞌai. Jamatii eya Jenosanenajo nequi Jodio etii cuaa eya iña canaje. Eya quia canaje Shomano dejja cuana huasijje.  
\v 18 Shomano etii cuaa eya huohuiꞌajja canaje. Jamatii ecuea esohui shajjaꞌajja majje onaaya eya ba canaje quea mimishi pojjeamajojo ecuiajeaꞌyojji pojjeama onajaya, ejeanobiajeaꞌyojji tii pojjeama peaꞌai. Onaaya eya pichojea sa acanaje.  
\v 19 Jamatii Shomano cuaa eya pichojea sa acanijo, Jodio etii cuana quea mase nee, quea quene nee nee poanaje. Jamajjeya eyaya jama anaje baꞌa: “Shomano emeshi mese etii nijje, Sesa nijje eya mimi sa poani. Ecuea esohui shajjaꞌajja majje ohuaya cahuohui cahua ojaya ejjashahuabaquijji ejo” eyaya anaje. Jamatii ecuea Jodio cuana niñeba jjima poanaje, o niñeba sa po ajja eya. Chojja, Jodio cuana ecuea huapa pojjeama cuana.  
\v 20 Jamajjeya eya miquiana nijje mimi sa poani. Eꞌe, ojjaña Isaeni cuaa ishoaꞌajja canaje Eyacuiñajjija huoojeaꞌyo ojjaña jaahuanajji Quito. Quitohua ojjaña cuana baꞌe mee caje oꞌoya eyajo onijje. Eyaya ojo huohuiañajo, Jodio etii cuaa eya jeyo mee canaje baa jjonohua. ¡Bacue jiquio baa jjono baꞌa! —Pabohua acanaje. 
\p  
\v 21 Jodio cuaa Pabo sajaꞌa canaje jama baꞌa: —Pabo, Jodio cuana Jodea meshijo baꞌeja ecuana huasijje esohui etehueꞌyo mijo huoojea jjima. Ecuanaja epeejji Jodea meshijo baꞌeja poe jjima mi huohuijji peaꞌai. Oya cuana poe jjima mi niñebajji epo peaꞌai.  
\v 22 Eꞌe, ecuanaya miquea esohui shajjaꞌajja sa poani. Ecuanajaya eba ojjaña meshijo pea cuaa Jesosaja epeejji cuana niñeba cani. Jamajjeya shajjaꞌajja neinei sa poani ecuanaya —acanaje Jodio cuaa.  
\v 23 Majoya Pabo huohui canaje jama baꞌa: —Eꞌe, ecuanajaya epeejji cuana huohui majje ojjaña poeje miquea esohui shajjaꞌajjaa. 
\p Jamajjeya quijje pishana pea pojjajo quea huiso Jodio cuana mecajjeahua poeyanaje Pabo shajjaꞌajjaa. Pabohua esohui huohui canaje quea huiso nee nee. Meca cuanajje oya mimi tiitii nequinaje Eyacuiñajji ojjaña huoojeajji poajejojo. Jodio cuana ba mee sa acanaje Jesosa Eyacuiñajjija huoojeaꞌyo ojjaña jaahuanajji, Quito. Pabohua Moisesija etehueꞌyo cuanajo, Eyacuiñajjija esohui huohuijji yahuajo nei baꞌeja esohui etehueꞌyo peaꞌaijo Jodio cuana ba mee sa acanaje Jesosa eꞌe jojo nei Eyacuiñajjija huoojeaꞌyo ojjaña jaahuanajji, Quito.  
\v 24 Quea huiso Jodio cuaa ojaya esohui shajjaꞌajja majje huohui canaje jama baꞌa: —Eꞌe de, ojaya esohui eꞌe nei —acanaje. 
\p Pea cuana ca ca ojaya esohui shajjaꞌajja sa po maja ajja. Jesosa Eyacuiñajjija huoojeaꞌyo ojjaña jaahuanajji pojjeamajo poso quea quene nee poanaje cuana Pabohua jama huohuime acajje.  
\v 25 Jamajjeya ojee cuana anica jjamimicuiajea nobiajeaqui poquinaje. Ojjaña cuayaquianijo Pabohua jama acanaje baꞌa: —Edojjoshahua Pameya Eyacuiñajjija esohui huohuijji Isaia yahuajo nei nei esohui huohui meesahua canaje miquianajaya etiiquiana cuana huasijje. Eꞌe, ¡miquianaya quea sapa caꞌa poanijo shajjaꞌajjacue ojaya esohui etehueꞌyo! Jama aca poa Isaiaa yahuajo nei baꞌa: 
\q1  
\v 26 “Jodio cuana huasijje poquiꞌyo majje huohuicue jama baꞌa: —Shajjaꞌajja majamaja majje jamatii ecuea esohui quea quehua poaje miquianajaya. Ba majamaja majje jamatii jjabahuejjaqui ajja poaje.  
\v 27 Jiquio Jodio cuana quea jjashahuabaqui quehua poani tii tii. Quea sapa caꞌa. Jjashajjaꞌajjaqui sa poꞌyo ajja. Ba sa poꞌyo ajja peaꞌai. Ba sa pojji jojjemo ohuaya ba caꞌyome. Jjashajjaꞌajjaqui sa pojjiya jojjemo jjashajjaꞌajjaquiꞌyome. Quea jjashahuabaqui jaꞌa po sa pojji jjemo quea jjashahuabaqui jaꞌa poꞌyome. Jamajjeya oya cuana ecuea epeejji cuana poꞌyome. Eyaya ojaya mimishi cuana cuijeaꞌyome peaꞌai”. 
\m Jamaya Eyacuiñajjiya Isaia huohui mee ca poa. 
\p  
\v 28 Majoya Pabohua jama acanaje baꞌa: —Jamajjeya ¡bacue! Eyacuiñajjiya ojjaña jaahuanajji Jesosa huoojea canaje manoꞌyohua, mimishi cuana cuijeaꞌyojji, mimishi sosequiaꞌyojji peaꞌai. Ohuaya ojjaña ojaya epeejji cuana baꞌe tiitii mee cajeꞌyo onijje eyajo. Jodio cuana shajjamaꞌ poanijo, Eyacuiñajjiya eya huoojea canaje Jodio pojjeama cuana huasijje ojaya esohui huohuiya. Jodio pojjeama cuaa ca ca shajjaꞌajja caje, de —Pabohua acanaje. 
\p  
\v 29 Majoya Pabohua esohui huohuijeyo cajo, Jodio cuaa oya jiñajea caꞌyonaje. Majoya oya cuana janobajjima nei ojee jjamimicuiajea nobiajeaquinaje. 
\p  
\v 30 Jamajjeya beca shequiajame Pabo oe nei baꞌenaje oe equijo, ejjeshejji sosejje. Ojjaña cuana o que poeyajo, ojjaña cuana nijje quea bihui nee miminaje, quea bei nee poanaje.  
\v 31 Ohuaya huohui canaje Jesosa ojjaña huoojeajji poaje. Emeshi Mese nei Jesosa Quitojo huohui majamaja canaje meteꞌama. Pea cuanaja oya huohui pajea mee jjima poanaje, jamatii oya sohuinano cuanaja nahue poanaje. Jamaya poanaje. 
\p Oeya ecuea esohui. Eya Noca bajjani esohui tehuejji. Apoa.