\id 2TI - Ese Ejja NT -Bolivia 2012 (DBL -2013) 
\h 2 TIMOTEO 
\toc1 Paboja Etehueꞌyo Timoteo Que Becanejjijji Peaꞌai 
\toc2 2 Timoteo 
\toc3 2 Ti 
\mt2 PABOJA ETEHUEꞌYO TIMOTEO QUE BECANEJJIJJI PEAꞌAI 
\mt1 2 TIMOTEO 
\c 1  
\s1 Pabohua Eyacuiñajjija esohui tehue ca oꞌoyanaje Timoteo que 
\p  
\v 1 Timoteo, eyaya esohui mi que tehueje oꞌoya. Eya Pabo, Jesosa Quitoja esohui huohuijji. Eꞌe, Eyacuiñajjiya eya huoojea canaje ojaya esohui huohuiꞌyohua jama baꞌa: Jesosa Quito nijje eꞌe jojo nei jjapeequianijo, onijje eyajo eseya baꞌe tiitii mee cajeꞌyo Eyacuiñajjiya.  
\v 2 Timoteo, miya ecuea quea jea nee nee, ecuea ebacua ejja jayojja jama Jesosa Quito nijje jjapeequianijo. ¡Eyacuiñajjiya esejaya Chii ai eyajo aniya, Jesosa Quitohua esejaya Emeshi Mese neiya peaꞌaiya miya cajaahuana cahua quea pame nee! ¡Mijo cajjashahuabaquiahua quea pame nee! ¡Miya quea bei nee capo mee cahua peaꞌai! 
\p  
\v 3 Eyacuiñajjijo eya quea bihui nee chacochacoani bichoꞌama nei nei. Jamaya ecuea etiiquiana cuana peaꞌai poa. Timoteo, miya quea jaꞌa nee baꞌyanijo, eyaya Eyacuiñajji janobajjima nei bihuiaña mijo. Eꞌe, mijo peaꞌai eya onijje mimi huichaꞌa huichaꞌani ojjaña mecajje, ojjaña pojjajo peaꞌai.  
\v 4 Miya pa neineinaje e poquiꞌyajo. Maya ecuea pajeaꞌyo jjima. Eya mi ba sa neinei poani quea bihui nee epojji.  
\v 5 Eya jjashahuabaquiani jama baꞌa: Miya Eyacuiñajjijja esohui jayojja jama aña quea bihui nee. Ecuea eba yahuajo miquea yano mese Moina bajjaniya, miquea enaese Enise peaꞌaiya Eyacuiñajjija esohui jayojja jama aca poa quea bihui nee. Eꞌe, jamajjeya o jayojja jama jjeya miya Eyacuiñajji nijje eꞌe jojo nei jjapeequiani. 
\p  
\v 6 Jamajjeya eyaya miya huohui oꞌoyaña jama baꞌa: Yahuajo mijo Eyacuiñajji nijje mimi majje eyaya miya huoojeanaje ojaya echacojji epojji. Eꞌe, sapa napaꞌajjanaje emeya Jesosaja echacojji quea pame epojji. Jamajjeya Eyacuiñajjiya miya Jesosaja epeejji jaahuana sahua cani. ¡Jamaya ojo chaco tiitiicue!  
\v 7 Eꞌe, Edojjoshahua Pameya, Eyacuiñajjija huoojeaꞌyohua eseya meteꞌama po mee cani. Quea jaꞌa nee Eyacuiñajjijo chaco mee caꞌyani. Eseya Eyacuiñajji, pea cuana peaꞌai quea jea nee po meesahua caꞌyani peaꞌai. Quea jaꞌa nee jjashahuabaqui mee cani peaꞌai, Edojjoshahua Pameya. 
\p  
\v 8 Jamajjeya esejaya Emeshi Mese neijo huohuiañajo ¡aꞌa quea bicho pojji, miya! Eya onijje jjapeequianijo, dejja quea mase cuaa eya iña majje jeanobia canaje. Eyacuiñajjija esohui quea pame nee huohuiañajo eya napa cani cuaa. Jamatii ¡aꞌa quea bicho pojji ejo! Chojja. E jayojja jama napa cajo, ¡aꞌa oe quea mete pojji! Eyacuiñajjiya miya quea caꞌa po meesahua canijo, ¡aꞌa ojaya esohui huohui pajeaꞌyojji!  
\v 9 Ohuaya esejaya mimishi cuijea caꞌyonaje. Jamajjeya cuaqui yasijje epoquiꞌyojji pojjeama. Iyaa caꞌyonaje ojo quea pame nee ebaꞌeꞌyojji, ma ojaya epeejjime epoꞌyojji. ¿Aꞌa eseya quea pame poanijo, ohuaya eseya iyaa caꞌyonaje onijje ejjapeequijji? Chojja. Yahuajo nei nei meshi pana jjimahuajo Eyacuiñajji jjashahuabaquia poa Jesosa Quito huoojeajji esejaya mimishi cuana cuijeaꞌyojji.  
\v 10 Eꞌe, yahuajo esejaya ba jjima poa ojjaña cuana Eyacuiñajjiya quea jea nee nee acani. Jjeya ca ca esejaya eba. Ese jaahuanajji Jesosa Quito poeyanaje. Manoꞌyonaje. Manoꞌyo majje shequi oꞌoyanaje. Eyahuasijje jjequisohua caꞌyonaje. Eseya ohuaya jama acanaje baꞌa: —Manoꞌyo majje miquianaya cuana baꞌe tiitiijeꞌyo Eyacuiñajji nijje —Jesosaa acanaje. 
\p Jamajjeya ohuaya meteꞌama po mee cajeꞌyo eseya manoꞌyanijo. Baꞌe tiitii mee cajeꞌyo ojaya esohui quea pame nee ba mee canijo.  
\v 11 Ma esohui quea pame nee Jesosa Quitoja eyaya huohuiaña. Eyacuiñajjiya eya huoojea caꞌyonaje ojaya esohui huohuiya, ojjaña cuana jjabahuejjaqui meeya peaꞌai.  
\v 12 Ma esohui huohuiañajo, pea cuaa eya napa cani. Quea nee poani eya. Jamatii eya bichoꞌama Jesosa Quitojo. Eyacuiñajji ecuea eba nei nei. Eꞌe jojo nei oya ese jaahuanajji, de. Jamajje ecuea eba ojaya esohui jayojja jama eya ameesahua tiitii cajeꞌyo ohuaya, Jesosa poe oꞌoyajo. 
\p  
\v 13 Ma esohui eꞌe nei Jesosa Quitoja eyaya miya ba meenaje. ¡Ecuea esohui jayojja tii huohuicue! Jamaya poanijo ¡Jesosa Quito shajjaꞌajjacue! ¡Eyacuiñajji quea jea nee acue peaꞌai, jamaya Jesosa Quitohua miya po meesahua canijo!  
\v 14 Ohuaya miya jiquio esohui quea pame neejo jjabahuejjaqui meesahua canaje. ¡Ma esohui jayojja jama po tiitiicue! Edojjoshahua Pameya esejo nequi tiitiianiya miya jamaya asahua cajeꞌyo. 
\p  
\v 15 Quea huiso dejja Asia meshijo baꞌe enijje jjapeequi pajeaꞌyonaje. Pijeno, Emojene peaꞌai jamaya poanaje. Maya miquea eba.  
\v 16 Ecuea Emeshi Mese neiya dejja Onesipono bajjani, ojaya huapa pojjeama peaꞌai cabaꞌe meesahua cahua quea pame nee. Ohuaya eya quea jaji nee po mee canaje. Pea dejja cuaa eya jeanobia canaje. Jamatii oya, Onesipono ejo bichoꞌama poanaje.  
\v 17 Eꞌe, Shoma cuiñajji yasijje poe majje, eya saꞌajja neineiꞌyo majje eya ba caꞌyonaje, Onesiponohua.  
\v 18 Jamajjeya esejaya Emeshi Mese neiya poe oꞌoya majje Onesipono sosequia cajeꞌyo. Jamajjeya ohuaya Onesipono jaahuana tiitii cajeꞌyo quea pame nee. Dejja mimishi ca ca quea nee po mee cajeꞌyo tii tii. Eꞌe, miquea eba eya Epeso cuiñajjijo nequijo, Onesiponohua eya quea pame nee baꞌe meesahua ca poa. 
\c 2  
\s1 ¡Echacojji quea pame jayojja jama pocue Jesosajo! 
\p  
\v 1 Eꞌe Timoteo, miya ecuea ebacua ejja jayojja. Miya quea caꞌa po mee cani Jesosa Quitohua, ese jaahuanajjiya. Jamajjeya ¡quea pame tiitii jjapeequicue onijje!  
\v 2 Miyaya ecuea esohui shajjaꞌajjanaje. Quea huiso dejjaa shajjaꞌajja canaje peaꞌai. ¡Jiquio esohui huohuicue miyaya Jesosaja epeejji eꞌe jojo nei yasijje! Ona jjabahuejjaqui majje ¡ma esohui quea pame che jja oma oe huohui meesahuacue quea pame nee pea cuana huasijje!  
\v 3 Pea cuaa miya napa cajeꞌyo Jesosa Quito nijje jjapeequianijo; jamatii ¡aꞌa quea mete pojji! ¡Jjapee tiitiiquicue eꞌe jojo nei! ¡Emeshi Mese neija echacojji quea caꞌa pocue!  
\v 4 Jama baꞌa: Dejjaa echacomeejjijo chaco canijo pea nijje chacochaco sa po ajja. Chojo. Ohuaya ojaya echacomeejjija esohui jama chaco cani. ¡Jamaya oe pocue; Jesosa Quito nijje chacochacoanijo aꞌa eshahua nijje pojji!  
\v 5 Jamajjeya jama poani peaꞌai baꞌa: Dejja janobajjima nei cuajicuaji neineiani pea cuana nijje. Joya ebionei cuajicuaji cooani oe aquiana quea pame quia cani sosemaꞌ. Jiquio ecua ohua huohui caje jama mi cuajicuajiajo, shajjamaꞌ poajo, aquiana equiajji pojjeama. ¡Jamaya jjashahuabaquicue Jesosa Quitojo chacoañajo; janobajjima chacocue! ¡Aꞌa shajjamaꞌ jayojja jama pojji!  
\v 6 Dejja quejo janobajjima nei chacoꞌyo majje, que bana majje peaꞌai ohuaya ebionei bobi cachicha cahua ojaya eꞌijjiajji. Jamajjeya ¡aꞌa quea huea pojji Jesosa Quitojo chacochacoani!  
\v 7 ¡Jiquio ecuea esohuijo jjashahuaba neineiquicue, miya! Esejaya Emeshi Mese neiya miya jiquio esohui ba meesahua cajeꞌyo. 
\p  
\v 8 Jamajje ¡jjashahuaba tiitiiquicue Jesosa Quitojo! Eyacuiñajjiya Jesosa Quito shequi mee ca oꞌoya poa. Ojaya Jesosaja etiiquiana yahuajo nei nei baꞌya poa Dabi bajjani etiiquianaja emeshi mese poa.  
\v 9 Jiquio esohui quea pame nee Jesosa Quitojo eyaya huohuiaña. Jamajjeya dejja tai cuaa eya napa canaje, dejja quea mimishi poso eya jeanobia canaje. Jamatii. Dejja tai cuanaja eya Eyacuiñajjija esohui ehuohui pajea meeꞌyojji pojjeama.  
\v 10 Jamajjeya dejja cuaa eya napa cajje jamatii eya quea caꞌa tii tii Jesosajo poani. Jamajjeya eyaya ojjaña Eyacuiñajjija ebabaca cuana quea caꞌa po meesahuajeꞌyo. Jamajjeya Jesosa Quitohua onajaya mimishi cuana cuijea neinei cajeꞌyo. Oya cuana nequi tiitii mee cajeꞌyo eyajo quea jaꞌa nee nee ese jayojja. Eyacuiñajji nijje nequi tiitiijeꞌyo. 
\p  
\v 11 Jiquio esohui eꞌe nei jama baꞌa: 
\q1 “Eseya Jesosaja epeejji jjejojo pea cuaa mano mee caꞌyajje Jesosa nijje eshe tiitii baꞌejeꞌyo eseya eyajo.  
\v 12 Jjeya onijje jjapee tiitiiquianijo quijje Jesosa nijje ona huoojeaꞌyojji poajeꞌyo. Jjeya eseyaya cajaa ajje ohuaya eseya quijje cajaa acajeꞌyo peaꞌai. 
\q1  
\v 13 Eseyaya ojaya esohui atiitii ajjajo, jamatii ohuaya eseya pajeaꞌyo ajja. Ojjaña ojaya esohui jayojjaya jama acajeꞌyo tii, ohuaya. Oya esohui siajje aꞌajja nei nei”. 
\s1 Echacojji quea pame nee 
\p  
\v 14 ¡Jamaya miyaya ecuea ehuohuiꞌyo cuana esohui huohuijji cuana huasijje huohui huichaꞌa huichaꞌacue! Janobajjima nei huohuicue jama baꞌa: —Emeshi Mese neiya miya ba neinei canijo, ¡aꞌa mimicuiajeanobiajeajji! 
\p Jjamimicuiajea nobiajeaquijji ca ca quea tai. Jamaya poanijo mi shajjaꞌajjajji poani cuana poquiquehua chanaꞌ.  
\v 15 ¡Quea jaꞌa nee nee oe jjashahuabaquicue quea pame nee Eyacuiñajjijo echacojji! Jamajjeya oya mijo quea jaji nee poaje. Eꞌe, ¡miyaya ojaya esohui eꞌe nei huohuicue quea jaꞌa nee! Jamajjeya miya ojaya echacojji quea pame nee poaje, bichoꞌama.  
\v 16 Beca cuanaja Eyacuiñajji botiꞌama, de. Jamajjeya ¡aꞌa shajjaꞌajjajji onajaya mimi quea tai Eyacuiñajjijo! Ma esohui tai shajjaꞌajja canijo pea cuaa Eyacuiñajji ba jjima acaje. Eꞌe, esohui tai shajjaꞌajja majje jjashahuabaqui ajja poaje.  
\v 17 Tajjaja ijjia biso nei anicuayani, quijje ijjia huesha cani. Tajjaja ijjia jayojja jama poani esohui quea tai. Esohui huohuijji taija esohui quea tai shajjaꞌajja majje quijje quea tai nee poajeꞌyo quea huiso cuana. Jjapeequi pajea cajeꞌyo pojjaꞌa. Jamaya esohui huohuijji nisho cuana Pineto bajjani, Imeneo peaꞌai poani.  
\v 18 Ohuaya esohui eꞌe nei pajea caꞌyonaje. Siajje poani jama baꞌa: —Ojaya epeejji manoꞌyajo, Eyacuiñajjiya eyami eyacua aje oe eꞌaꞌyojji pojjeama —acani. 
\p Jamajjeya beca cuana ma esohui taijoya poquiquehua mee cani. Eyacuiñajjija esohui eꞌe nei pajea mee cani peaꞌai, ma esohui huohuijji nishohua.  
\v 19 ¡Aꞌa oya cuana shajjaꞌajjajji! Eseya ca ca Eyacuiñajji nijje jjapeequi pajeaꞌyo ajja. Eyacuiñajjija esohui quea jaꞌa neejo jjashahuabaquiani. Equi yamajjana quea caꞌa nee nee nequi jayojja jama Eyacuiñajjija esohui nequi tiitiijeꞌyo. Eꞌe, yahuajo nei nei esohui tehue mee ca poa jama baꞌa: “Esejaya Emeshi Mese neija ebacua cuana ojaya eba ache ese ejja eꞌe jojo nei poaje”. Pea tehue mee ca poa jama baꞌa: “¡Eyacuiñajjija epeejji neiya mimishi cuana capajea neinei cayahua!” Jama yahuajo nei tehue meemeya aca poa, Eyacuiñajjiya. 
\p  
\v 20 Cuanaya equi tii tiijo quea huiso aquiana cuana yani: ena ishijji cuana, ena nequijji cuana, ena shojji natajee oshe quea nahue siyosiyo yani. Ena nequijji mei huoꞌo quea caꞌa yani aquiana quea nahue iyajji. Acui epejja cuana yani, meshimisi peaꞌai yani, caꞌaꞌama, aquiana nahueꞌama iyajji.  
\v 21 Jiquio ecua ena nequijji caꞌaꞌama jayojja jama eseya poaje mimishijo. Eseya mimishi cuana pajeaꞌyo majje ena nequijji quea nahue jayojja jama poajeꞌyo. Jamajjeya mimishi pajeaꞌyojji chacojeꞌyo Eyacuiñajjijo. Eꞌe, quea pame nee poanijo Eyacuiñajjiya eseya huoojea cajeꞌyo ojo chacohua. Jamaya eseya Eyacuiñajjija tii poajeꞌyo. 
\p  
\v 22 Jamajjeya ¡shacuimaꞌ nequija ejjashahuaba taiquijji jama aꞌa pojji miya! Jiquio jama quea bihui nee po huichaꞌacue baꞌa: ¡Quea jaꞌa baꞌecue! ¡Eyacuiñajjija esohuijo jjabahuejja neineiquicue! ¡Pea cuana quea jea nee acue! ¡Ojjaña nijje quea bei pocue! Beca cuana quea bihui nee Eyacuiñajji nijje mimiani. Quea jaꞌa nee jjashahuabaquiani peaꞌai. ¡O jayojjaya oe pocue!  
\v 23 ¡Esohui quea tai, quea quehua peaꞌai aꞌa shajjaꞌajjajji! Ma esohui shajjaꞌajja majje dejja cuana jjamimicuiajea nobiajeaquije. Jamaya miquea eba.  
\v 24 Miya Eyacuiñajjija echacojji poanijo ca ¡aꞌa jjamimicuiajea nobiajeaquijji! Chojo. ¡Ojjaña nijje maseꞌama pocue! ¡Jesosa Quitoja esohui cuana oe huohuicue quea pame nee! ¡Aꞌa tecuea cuajijji peaꞌai!  
\v 25 Pea cuana esohui eꞌe neijo maimaianijo, ¡quea bei esohui huohui oꞌoyacue! Jamajjeya eꞌe pojjaꞌa Eyacuiñajjiya ojaya esohui eꞌe neijo jjabahuejjaqui meesahua cajeꞌyo oya cuana; jjashahuaba taiqui pajea mee cajeꞌyo.  
\v 26 Jamajjeya oya cuana quea jaꞌa nee jjashahuabaquije oꞌoya pojjaꞌa, Eyacuiñajji nijje jjapeequijeꞌyo. Joya esohuijo mimijajiani aje oe poquiquehuaꞌyonaje de, Edosiquiana nijje. Ohuaya oya cuana dasia caꞌyonaje o jayojja epoꞌyojji. ¡Oya cuana Eyacuiñajji nijje cajjapeequiahua! Eꞌe, dejjaa ibia meꞌ ijjia mee cani. Ibia emeꞌ ijjia meeani, emeꞌ jjequihuijjiajea majje poquiani. Emeꞌ ijjia meeꞌajja jjabahuejjaquiani. Jiquio ecua ibia emeꞌ ijjia meeꞌajja poe becaꞌyo ajja jayojja jama eshahuaja epeejjiya dasia cajje eshajjaꞌajja becaquiꞌyojji pojjeama; jjabahuejjaquiani oya pojjaꞌa. 
\c 3  
\s1 Epojja apoa epojjijo 
\p  
\v 1 Timoteo, jiquio ba neineicue peaꞌai baꞌa: Epojja cuana beshahua nei oe poajo, Jesosa Quito poe oꞌoya jjimahuajo, ebaꞌejji quea camaja nee nee poaje ojjaña cuanaja dejja quea mimishi nee nee poanijo.  
\v 2 Eꞌe, dejja cuana ojaya aquiana cuanajo, ojaya ebaꞌejjijo, ejjeshejjijo peaꞌai quea nahue poajeꞌyo. Quea dejja tai poajeꞌyo, quea nishehui poajeꞌyo epona cuana peaꞌai. Bichoꞌama jjejojo quea miminaa ojaya ejjashahuabaquijjijo poajeꞌyo tii tii. Eyacuiñajjija esohui huohuijji shajjaꞌajja sa po ajja poajeꞌyo. Mimijajijji cuana peaꞌai poajeꞌyo. Oja chiija, enaese peaꞌaija esohuijo shajjamaꞌ poajeꞌyo oya cuana. Ejeajji etii cuana, enaese etii peaꞌai botiꞌama acajeꞌyo: —Ecuea miya ebobiajji pojjeama —acajeꞌyo. 
\p Eyacuiñajjija esohui jama a sa poꞌyo ajja poajeꞌyo.  
\v 3 Ojaya huapa pojjeama cuana botiꞌama acajeꞌyo peaꞌai. Quea sapa caꞌa jjejojo jjashahuabaqui ajja peaꞌai. Pea cuanajo siajje poajeꞌyo. Mimishi cuana epajea meeꞌyojji pojjeama. Quea mase ibia jama poajeꞌyo. Mimipanajea panajeajeꞌyo pea nijje. Dejja quea pame nee botiꞌama acajeꞌyo, cajaa acajeꞌyo peaꞌai.  
\v 4 Pea nijje jjapee nishoquijeꞌyo. Jjabahuejjaqui jjima tii tii poajeꞌyo. Jama siajje pome poaje baꞌa: —Eya ca ca oe che oeya quea pame nee —nisho poaje. 
\p Quea mimijjequiya jjejojo Eyacuiñajji botiꞌama poajeꞌyo.  
\v 5 Eyacuiñajji nijje jjapee nishoquijeꞌyo. Jamatii ojaya esohui jayojja jama oya po ajja poaje. Timoteo, ¡aꞌa onijje jjapeequijji!  
\v 6 Jjeya nei esohui huohuijji tai cuana equi cuana huasijje poqui majamaja majje siajje poani. Epona jjabahuejjaqui jaꞌa jjima cuana dasia cani. Jiquio epona cuana aje oe quea mimijjequijea nee nee; quea jaꞌa jjashahuabaquiꞌyo ajja, de. Ma dejja tai cuanaja esohui tai shajjaꞌajja sa poani.  
\v 7 Oya cuana ojjaña esohui quea quehua shajjaꞌajjajji jjejojo Jesosa Quitoja esohui eꞌe neijo jjabahuejjaquiꞌyo ajja.  
\v 8 Jamaya yahuajo nei nei ejiojjicuiajji cuana Janese, pea Jamese cuanaya nequia poa. Moisesija esohui shajjaꞌajja sa po ajja poa. Jjeyahua nei esohui huohuijji quea mimishi Janese, Jamese peaꞌai jayojja jamaya yani. Oya cuana esohui eꞌe nei Jesosa Quitoja shajjaꞌajja sa po ajja peaꞌai. Quea jjashahuabaqui tai nee nee poani peaꞌai. Jamajjeya Eyacuiñajjiya oya cuana cajaa acajeꞌyo, Jesosa Quito nijje jjapeequi sa po ajjajo.  
\v 9 Quijje pishana quea huiso dejjaa jama acajeꞌyo baꞌa: —Eꞌe, joya esohui huohuijji tai cuana jjadasiaquiꞌyojji, ejiojjicuiajji Janese, Jamese peaꞌai jayojja poani —acaje cuaa. Jamajjeya jjadasia mee majamajaqui ajja poaje. 
\s1 Paboja esohui apoa epojji nei Timoteo huasijje 
\p  
\v 10 Timoteo, miya enijje nequinajejo eya ca ca miquea eba nei nei poanaje. Ojjaña ecuea ehuohuiꞌyo miquea eba peaꞌai. Ojjaña ecuea ebaꞌeꞌyojji miquea eba peaꞌai. Ecuea ejjashahuabaquiꞌyojji quea pame nee. Miquea eba eya Eyacuiñajjija epeejji nei poani. Pea cuaa eya napa cajje ona nijje quenequene ajja poa. Ecuea pea cuana quea jea nee. Eyaya meteꞌama Eyacuiñajjijo chaco tiitiiꞌyonaje. Jamaya miquea eba peaꞌai.  
\v 11 Eꞌe, miquea eba ecuea ehuohuijo pea cuaa janobajjima nei eya napa caꞌyonaje Atioquiajo baꞌe cuaa, Iconiojo baꞌe cuaa, Nisatajo baꞌe cuaa peaꞌai. Napa majamaja cajje eya quea nee nee poanaje. Jamatii ecuea Jesosa Quitoja esohui pajeaꞌyo jjima. Emeshi Mese neiya eya jaahuana tiitii caꞌyonaje. Jamaya miquea eba, Timoteo.  
\v 12 Eꞌe de, ojjaña joya Jesosa Quito nijje jjapee neineiquiani pea cuaa napa caje.  
\v 13 Edasiajji cuana jjeyahua nei quea tai. Quijje ca ca quea tai nee nee poaje. Eshahua ma dejja tai cuana nijje siajje poanaje. Jamajjeya ma edasiaꞌyojji cuaa pea cuana dasia cajeꞌyo peaꞌai.  
\v 14 Timoteo, miquea eba miquea esohui huohuijji cuanaja ehuohuiꞌyo eꞌe nei. Ma ehuohuiꞌyo cuanajo miya jjabahuejjaquiꞌyonaje. Jamajjeya ¡maya esohui shahuaba tiitiicue; aꞌa pajeaꞌyojji! ¡Jamaya oe acue!  
\v 15 Miyaya eshoꞌyahuaa Eyacuiñajjija esohui quea pame nee ba neineiꞌyonaje. Ojaya esohui etehueꞌyo miquea eba. Eꞌe, ma etehueꞌyojo miyaya bajeꞌyo jama baꞌa: Eyacuiñajjiya miya jaahuana cajeꞌyo miya Jesosa Quito nijje jjapeequianijo. 
\p  
\v 16 Eyacuiñajjiya dejja pame cuana ojjaña ojaya esohui tehue mee caꞌya poa. Eseyaya jiquio esohui huohuiajje pea cuana Jesosa Quitojo jjabahuejjaquijeꞌyo, ojaya mimishijo quea yeno poajeꞌyo peaꞌai, ojjañaa ba cajeꞌyo ache esohui eꞌe nei pojjeama peaꞌai. Eꞌe, ma esohui huohui majje ojjaña quea boejea nee baꞌe meesahuajeꞌyo. Ebaꞌejji quea pame ba meesahuajeꞌyo peaꞌai.  
\v 17 Eꞌe, ma esohui etehueꞌyo quea jaꞌa nee ba majje Eyacuiñajjija echacojji quea jaꞌa nee poajeꞌyo. Ojjaña quea pame nee poajeꞌyo peaꞌai Eyacuiñajji nijje, esohui ba neinei majje. 
\c 4  
\s1 Pabo Eyacuiñajjiya sosequia cajeꞌyo 
\p  
\v 1 Eyacuiñajjija, Jesosa Quitoja peaꞌai ecuea esohui eba. Jesosa Quito poe oꞌoya majje ojjaña huoojeaꞌyojji poajeꞌyo. Yahuajo manoꞌyo cuana, jjeya eshe nequi cuana peaꞌai sosequia cajeꞌyo. Ojjaña ojaya epeejji cuana quea pame poani baꞌe tiitii mee cajeꞌyo onijje eyajo, Eyacuiñajjiya. Mimishi cuana ca ca quea nee nee po mee cajeꞌyo cuaquijo.  
\v 2 Jamajjeya eyaya miya huoojeaña jama baꞌa: ¡Eyacuiñajjija esohui oe huohui tiitiicue jjeya, miyaya! Dejja cuana jjashajjaꞌajjaqui sa po ajjajo ¡jamatiiya huohuicue! Mimishi cuana acanijo ¡tecueajeaña jayojja acue! Jama acue baꞌa: “¡Aꞌa quea tai pojji! ¡Aꞌa quea mimijjequijea pojji!” Pea cuana quea pame poanijo jama acue baꞌa: “Eꞌe, ¡jamaya Eyacuiñajjijo baꞌecue!” ¡Quea pame, quea mimi bei nee huohui tiitiicue ojjaña Eyacuiñajjija esohui!  
\v 3 Quijje ca ca dejja cuana esohui eꞌe nei shajjaꞌajja sa po ajja poaje. Quea mimishi baꞌe sa poanijo oya cuana quea huiso esohui huohuijji tai iyaa caje ojaya ejjashahuabaquiꞌyojjijo huohuiya.  
\v 4 Eyacuiñajjija esohui eꞌe nei shajjaꞌajja sa poꞌyo ajja poaje. Etiiquianaja ehuohuiꞌyo quea quehua cuana shajjaꞌajja cajeꞌyo.  
\v 5 Timoteo, ¡miya ca oe quea jaꞌa nee nee jjashahuabaquicue ojjaña pojjajo! Peaa miya napa cajje ¡jamatii quea caꞌa, meteꞌama peaꞌai pocue! ¡Eyacuiñajjija esohui Jesosa Quitoja huohui tiitiicue! ¡Eꞌe jojo nei ojjaña ma ecua eyaya miya huohuinaje jamaya acue! 
\p  
\v 6 Eꞌe, ecuea echacojji Eyacuiñajjija esohuijo jjeya beshahua nei apoa poanijo, dejja mimishi cuaa eya mano mee cajeꞌyo. Ijjiacajji jayojjaya mano meeꞌyome acajeꞌyo cuaa. Quijje pishana, jjeyahua nei pojjaꞌa eya poquijeꞌyo eyahuasijje Jesosa Quito que baꞌeꞌyohua.  
\v 7 Eya janobajjima nei chacochacoꞌyonaje Eyacuiñajji nijje. Ecuea echacojji Jesosa Quitoja apoa. Eyacuiñajjija esohui jayojja jama aꞌyonaje eꞌe jojo nei eyaya. Jamajjeya eya onijje quea jaꞌa nee baꞌyanijo, eya sosequia cajeꞌyo eyajo.  
\v 8 Esejaya Emeshi mese nei nijje quea pame nee chacochaconajejo, eya quea huiso sosequia cajeꞌyo poe oꞌoya majje. Ohuaya eya huohui cajeꞌyo jama baꞌa: —Miya ecuea echacojji quea jaꞌa nee poanaje. 
\p Eꞌe, ojjaña ojaya epeejji cuaa ma ojaya epoe oꞌoyajjijo quea bihui neeya ishoaꞌajja caꞌani Jesosa Quitohua sosequia cajeꞌyo quea huiso peaꞌai. 
\s1 Pea esohui Timoteo que 
\p  
\v 9 Eya ee nei ani. Jamajjeya ¡jjeyahua nei poecuajicue ee nei anijo!  
\v 10 Ecuea epeejji Quesete poquinaje Janata meshi yasijje. Tito peaꞌai poquinaje Damasia meshi yasijje. Dejja Nema bajjani aje oe ojaya aquiana cuana quea boti neejo Eyacuiñajjijo jjashahuabaqui ajja. E pajeaꞌyo majje e que nequiꞌyo ajja. Oya poquiꞌyonaje Tesanonica huasijje.  
\v 11-12 Tiquico eyaya huoojeaꞌyonaje Epeso huasijje. Noca ca ca oe enijje nequi. Jamajjeya miya e que poe oꞌoya majje ¡ecuea epeejji Macoso jjequicue peaꞌai! Ohuaya eya chacosahua cajeꞌyo.  
\v 13 Ecuea daqui moo quea ao eyaya jeanaꞌyonaje Toasajo, Capoja equijo. ¡Maya jjequiꞌyocue! ¡Esohui etehueꞌyo cuana peaꞌai yeꞌyocue! ¡Esohui ejeejo tehueꞌyo cuana peaꞌaiya oe yeꞌyocue jjo! 
\p  
\v 14 Timoteo, Anejano ma baa huoꞌo chacojji poani janobajjima nei mimijajinaje enijje quea mimishi, de. Ojaya mimishijo Jesosa Quitohua oya napa cajeꞌyo quijje.  
\v 15 Eseyaya Jesosa Quitoja esohui huohuiañajo oya janobajjima nei mimijajinaje peaꞌai. ¡Jamajjeya oya ba neineicue! Oya quea tai, de. 
\p  
\v 16 Dejja etii cuaa eya jeanobiaꞌyo majje iyaa ca oꞌoyanaje ehuohuiꞌajjajji ecuea esohuijo. Eya huohuiꞌajja coo canajejo, ecuea epeejji cuana enijje nequi ajja. E ejeanobiajojo oya cuana quea mete nee nee poanaje. Poquinaje. Eya jea canaꞌyonaje: —Paboja esohui Jesosa Quitojo eꞌe nei nei —jamaya huohuime ajjima ecuea epeejjija quea meteja jjejojo. Eya nahue jjima onajaya. Eya Eyacuiñajji nijje miminaje ona cuanajo. Jamajjeya eꞌe pojjaꞌa Eyacuiñajjija oya cuana etecueajeajji pojjeama quea mete poanijo.  
\v 17 Jamatii Jesosa Quito ecuea Emeshi Mese nei ca ca enijje nequiꞌyonaje. Ohuaya eya quea caꞌa po mee caꞌyonaje. Ojjaña ojaya esohui janobajjima nei huohuiañajo quea huiso cuana Jodio pojjeama shajjaꞌajja meeꞌyonaje. Pea cuana ibia jama quea mase e quecua sa poanijo, Eyacuiñajjiya eya jaahuana caꞌyonaje peaꞌai.  
\v 18 Eꞌe, ojjaña ma dejja mase cuanajo ecuea Emeshi Mese neiya, Jesosa Quitohua eya jaahuana cajeꞌyo. Ohuaya eya eyahuasijje dojosohuaqui cajeꞌyo onijje baꞌeꞌyohua. Jomajo oya ojjaña huoojeaꞌyojji ca ca oe quea caꞌa nee nee. ¡Oya ojjaña dejja cuaa cabihuia tiitii cahua! ¡Jamaya capoꞌyahua! 
\s1 ¡Ojjaña nijje mimicue quea bihui nee ejo! 
\p  
\v 19 Aquina, ojaya ehuanase Pisina peaꞌai, Onesipono, ojaya huapa pojjeama cuana peaꞌai jama huohuicue miyaya baꞌa: —¿Achajja acuae nequiana soꞌo? 
\p  
\v 20 Dejja Enasito bajjani nequinaje Conitojo. Topimo eyaya jeanaꞌyonaje Mineto cuiñajjijo emano jaa. 
\p  
\v 21 ¡Poecuajicue e que, eeno po jjimahuajo! 
\p Dejja Eomono bajjani, Ponete peaꞌai, Nino peaꞌai, Caonia peaꞌai, ojjaña Eyacuiñajjija epeejji cuana peaꞌaiya miya huohuiꞌajja cani jama baꞌa: —¿Achajja acuae mi ani soꞌo, de? —ojaya ebajji nequiana. 
\p  
\v 22 ¡Emeshi Mese neiya Jesosa Quitohua miya quea jaꞌa capo mee cahua! ¡Ohuaya ojjaña miquianaya cajaahuana cahua quea pame nee! ¡Jamaya capoꞌyahua! 
\p Mahuiso. Eyaya Pabohua esohui tehueꞌyonaje. Apoa.