\id 2TH - Ese Ejja NT -Bolivia 2012 (DBL -2013) \h 2 TESANONISESE \toc1 Paboja Etehueꞌyo Tesanonica Cuiñajji Yasijje Becanejjijji Peaꞌai \toc2 2 Tesanonisese \toc3 2 Te \mt2 PABOJA ETEHUEꞌYO TESANONICA CUIÑAJJI YASIJJE BECANEJJIJJI PEAꞌAI \mt1 2 TESALONICENSES \c 1 \s1 Pabohua esohui tehue ca oꞌoyanaje Jesosaja epeejji cuana Tesanonicajo baꞌe yasijje \p \v 1 Eya Pabo. Sinasi, Timoteo peaꞌai enijje nequi. Ecuaaya jiquio esohui tehue oꞌoyaña miquiana huasijje, ma Jesosaja epeejji cuana Tesanonica cuiñajjijo baꞌe yasijje. Miquianaya Eyacuiñajji esejaya Chii ai nijje jjapeequiani; Jesosa Quito esejaya Emeshi Mese nei nijje jjapeequiani peaꞌai. \p \v 2 ¡Esejaya Chii ai Eyacuiñajjiya, esejaya Emeshi Mese nei Jesosa Quitohua peaꞌai miquianaya cajaahuana cahua quea pame nee! ¡Quea bei capo mee cahua peaꞌai! Jesosa Quito poe oꞌoya majje ojjaña huoojeaꞌyojji poajeꞌyo. \p \v 3 Epeejji cuana, ecuanaaya Eyacuiñajji nijje mimianijo oya bihuiaña miquianajo jama baꞌa: —Eyacuiñajji, Jesosaja epeejji cuana Tesanonicajo baꞌeca minijje jjapeequi poquipoquiani cuana quea pame nee nee. Ohuaya Jesosaja pea epeejji cuana quea jea nee nee acani; yahuajo ca ca pea cuana quea jea pishana aca poa —jamaya ecuana Eyacuiñajji nijje mimi huichaꞌa huichaꞌani miquianajo. Jamaya quea pame nee miquianaya Eyacuiñajjija esohui jayojjaya jama po tiitiianijo. \p \v 4 Jamajjeya Eyacuiñajjija epeejji cuana pea meshijo baꞌe cuana nijje ecuana mimiani quea bihui nee miquianajo jama baꞌa: —Jesosaja epeejji cuana Tesanonicajo baꞌeca onijje jjapee tiitiiquiani quea pame nee. Eyacuiñajjija esohui jayojja jama poani. Oya cuana janobajjima nei napa cani cuaa Jesosa nijje jjapeequianijojo. Jamatii Jesosa nijje jjapeequi pajeaꞌyo ajja. \p \v 5 Eꞌe, jjeya pea cuaa miquianaya napa cani Jesosa nijje jjapeequianijojo. Miquianaya onijje jjapeequi pajea ajjajojo Eyacuiñajjiya miquianaya Jesosaja epeejji quea caꞌa po mee cani. Jesosa que, ma ese huoojeaꞌyojji poani yasijje eseya baꞌe tiitii mee cajeꞌyo onijje. Jamajjeya ojjaña cuaa ba caje Eyacuiñajjija ejjashahuabaquijji miquianajo quea pame nee. \v 6 Eyacuiñajjiya quea pame nee nee atiitii cani. Jamajjeya mimishi cuaa miquiana napa canijo, quijje Eyacuiñajjiya oya cuana sosequia cajeꞌyo; quea nee nee po mee cajeꞌyo tii tii. \v 7 Eyacuiñajjiya mimishi cuana eseya, Jesosaja epeejji cuana napa pajea mee cajeꞌyo. Jamaya Eyacuiñajjiya eseya acajeꞌyo Emeshi Mese nei Jesosa poe oꞌoyajo. Eꞌe, Jesosa eyajo ani quea jeajahua nee nee cuaqui jama oya jjapashineijje nequioqueje. Eyacuiñajjija esohuidojojji quea caꞌa cuana onijje nequioqueje. \v 8 Nequioque majje ohuaya, Jesosaa ojjaña ojaya epeejji pojjeama cuana quea nee nee po mee cajeꞌyo Eyacuiñajjija esohui shajjaꞌajja sa poꞌyo ajja poajojo, esohui quea pame nee nee Emeshi Mese nei Jesosaja jayojja jama a sa po ajja poa jojoya. \v 9 Jamajjeya oya cuana quea yeno poajeꞌyo tii tii. Eyacuiñajjiya oya cuana huoojea cajeꞌyo cuaqui yasijje quea nee nee epo tiitii nequiꞌyojji. Esejaya Emeshi Mese nei quea pame nee nee, quea caꞌa nee nee nijje eyajo ebaꞌeꞌyojji pojjeama oya cuana. \v 10 Ojjaña ojaya epeejji cuana ca ca, ma ohua mimishi cuijea caꞌyajje quea pame nee po mee caꞌyonaje ca ca Jesosaa baꞌe mee cajeꞌyo quea pame nee nee poe oꞌoya majje. Eseyaya Jesosa bihuia neineijeꞌyo ba majje. Epeejji cuana, miquianaaya ecuanaja esohui Jesosajo quea bihui nee shajjaꞌajjanaje. Jamajjeya miquianaaya ojaya pea epeejji cuana nijjeya Jesosa bihuia neineijeꞌyo. \p \v 11 Jamajjeya ecuana Eyacuiñajji nijje mimi huichaꞌa huichaꞌani miquiana huasijje jama baꞌa: —Eyacuiñajji, miyaya miquea epeejji cuana iyaanaje quea pame nee minijje ejjapeequiꞌyojji. Jamajjeya ¡oya cuana quea pame nee baꞌe meesahuacue mi jayojjaya! Eꞌe Eyacuiñajji, miquea epeejji cuana quea pame nee po sa poani. Miya quea caꞌa nee nee poani tii. Jamajjeya ¡oya cuana quea pame nee po meesahuacue! ¡Miquea esohui jayojja jama ameesahua tiitiicue quea pame nee, Jesosa nijje jjapeequianijo! —jamaya eya mimiani Eyacuiñajji nijje. \p \v 12 Jamajjeya Eyacuiñajjiya miquianaya baꞌe meesahua canijo, miquiaaya Jesosa bihuiaje jama baꞌa: —Emeshi Mese nei Jesosa, ¡miya quea pame nee nee poani tii tii! \p Jesosaa miquianaya peaꞌai bihuia caje jama baꞌa: —Miquianaya ecuea epeejji quea pame nee. \p Eꞌe, jamaya poaje Eyacuiñajjiya, esejaya Emeshi Mese nei Jesosa Quitohua peaꞌai miquianaya jaahuana cani quea pame nee neejo. \c 2 \s1 Jesosa poe jjimahuajo Edosiquiana neija epeejji quea mimishi nee nee poejeꞌyo \p \v 1 Ecuea epeejji cuana, eꞌe jojo nei esejaya Emeshi Mese nei poeje oꞌoya. Eseya, ojjaña ojaya epeejji cuana ojee jjequisohua cajeꞌyo onijje epoꞌyojji tii tii. \v 2 Jamajjeya ¡quea jjashahuabaqui jaꞌa nee pocue! ¡Aꞌa quea mete pojji Jesosa Quito poe oꞌoyanajejo poso! Onaya siajje poani jama baꞌa: —Emeshi Mese nei Jesosa poe oꞌoyanaje yahuajo. Jamaya Pabo poanaje —jama siajje pomeya poani cuana. \p ¡Aꞌa quea mete pojji pea cuanaja esohui eꞌe nei pojjeamajo! Chojja, Jesosa poe oꞌoya jjima. Eꞌe pojjaꞌa pea cuana siajje poanaje jama baꞌa: —Eyacuiñajjiya ecuana ma ohua quijje acajeꞌyo huohui meesahua cani. Ohuaya ecuana ba mee canaje Jesosa Quito poe oꞌoyanaje —jamaya poani beca cuana. \p Onaya siajje poani jama baꞌa: —Pabohua, ojaya epeejji cuaa peaꞌai tehue canaje Jesosa poe oꞌoyanaje yahuajo pishana —jamaya poani cuana. \p Chojja, oya poe oꞌoya jjima. \v 3 ¡Ma siajjepojji cuana aꞌa shajjaꞌajjajji! Onaaya miquianaya jjashahuabaqui quehua mee ca chanaꞌ. Jamajjeya eyaya miquianaya huohuije Jesosa Quitoja epoe oꞌoyajjijo: Ebionei, Jesosa Quito poe jjimahuajo, quea huiso cuana onijje jjapeequi pajea cajeꞌyo, Eyacuiñajjija esohui shajjaꞌajja sa poꞌyo ajja poaje peaꞌai. Majoya Edosiquiana neija epeejji quea mimishi nee nee poeje. Oya Eyacuiñajjiya quea nee nee po mee cajeꞌyo cuaquijo. \v 4 Ma dejja quea mimishiya jama acaje baꞌa: Ohuaya Eyacuiñajji eꞌe nei, ojjaña eyacuiñajji nisho cuana peaꞌai jeabichajea mee sa acaje. Ojjaña cuana jjashahuabaqui quehua mee sa acaje jama baꞌa: —Oya oe nee quea pame nee nee poani. ¡Ojjañaa oya cabihuia cahua! —poaje cuana. \p Oya Jenosanena huasijje poqui majje Eyacuiñajjija equi quea quemo huasijje dobiquije. Anioque majje siajje poaje jama baꞌa: —Eya ca iña Eyacuiñajji eꞌe jojo nei —jama siajje pomeya poaje. \p \v 5 Epeejji cuana, yahuajo eyaya miquiana nijje nequiya jamaya huohuinaje. ¿Aꞌa ecuea esohui pajeaꞌyonaje? \v 6 ¿Apiojji ma dejja quea mimishi nee nee poe jjima? Miquianajaya eba. Eyacuiñajjija poe mee jjima jjejojo mi poeyani. Jamajjeya quijje ojaya epoejji apoa poajo ma dejja, Edosiquiana neija epeejji quea mimishi nee nee poani poeje. \v 7 Jjeya Edosiquia huoojeajji poaniya dejja cuana quea mimishi quehuajje po mee cani. Jamatii jjeya Eyacuiñajjiya Edosiquiana neija epeejji quea mimishi nee nee poe mee jjima acani. Quijje ca ca oya poeje ojjaña Jesosa nijje jjapeequi mee pajeaꞌyohua nisho. \v 8 Majoya ojjañaa oya ba caje ecojjaa. Jamatii esejaya Emeshi Mese neiya, Jesosaa oya tecueajea cajeꞌyo, mano mee cajeꞌyo. Ma ohua acaninaje chamaꞌyo tii po mee cajeꞌyo. Jamaya Jesosaa quea caꞌa nee nee, quea jeajahua nee nee poeꞌyo majje acajeꞌyo, ojjaña huoojeaꞌyojjiya. \v 9 Edosiquiana huoojeajji poaniya, Satanasa bajjaniya ma dejja quea mimishi huoojea caje. Jamajjeya ohuaya oya ma pea dejjaa ajjima acani ameesahua caje ojjaña dasiajji nisho. Ba majje ojjaña quea ajjajja nee nee poaje, quea mete nee nee poaje cuana. \v 10 Ma dejjaa quea mimishi nee neeya quea huiso cuana dasia cajeꞌyo. Jesosaja epeejji pojjeama cuana dasia neinei cajeꞌyo, ojjaña joya cuaqui yasijje poquijeꞌyo. Onaya aje oe Jesosaja esohui eꞌe nei shajjaꞌajja sa po ajjajojo Jesosaa ojaya mimishi ecuijeaꞌyojji pojjeama. Jamajjeya cuaqui yasijje poquijeꞌyo. \v 11 Shajjamaꞌ poani jojoya Eyacuiñajjiya oya cuana jjashahuabaqui meesahua ajja. Jamajjeya onaaya Edosiquiana neija epeejjiya siajje acani eꞌe jojo nei poso acaje cuaa. \v 12 Jamajjeya oya cuana, ojjaña joya Jesosaja esohui shajjaꞌajja sa poꞌyo ajja, ojjaña joya mimishi quea boti nee nee ajji poani Eyacuiñajjiya huoojea cajeꞌyo cuaqui yasijje. \s1 Eyacuiñajjiya ojaya epeejji cuana baꞌe tiitii mee cajeꞌyo \p \v 13 Jesosaja epeejji cuana, ecuana Eyacuiñajji nijje mimi majamajani miquianajo jama baꞌa: —Eyacuiñajji, ecuaaya miya bihuiaña. Miyaya miquea epeejji cuana Tesanonicajo baꞌe Jesosa nijje jjapeequi meesahuaꞌyonaje quea pame nee —jamaya ecuana mimiani Eyacuiñajji nijje miquianajo. \p Eꞌe epeejji cuana, miquianaya esejaya Emeshi Mese neija quea boti nee nee. Yahuajo nei nei, meshi pana jjimahuajo Eyacuiñajjiya miquianaya babaca caꞌya poa Jesosaja epeejji epojji, onijje ebaꞌe tiitiiꞌyojji. Ohuaya Edojjoshahua Pame huoojea caꞌyonaje miquiana Jesosa nijje jjapeequi meesahuaꞌyojji. Jamaya miquianaya Eyacuiñajjiya acani ojaya esohui jayojja jama añajo. \v 14 Eyacuiñajjiya ecuana huoojea canaje miquiana huasijje ojaya esohui huohuiya. Jjashajjaꞌajjaquiajo Eyacuiñajjiya miquianaya Jesosa nijje jjapeequi meesahua caꞌyonaje. Jamajjeya miquianaya esejaya Emeshi Mese nei nijje, Jesosa Quito nijje quea jaꞌa nee baꞌe tiitii mee cajeꞌyo eyajo peaꞌai. \p \v 15 Jamajjeya epeejji cuana, ¡esohui eꞌe nei pojjeama aꞌa shajjaꞌajjajji! ¡Ecuanaja ehuohuiꞌyo, esohui etehueꞌyo cuana peaꞌai aꞌa pajeaꞌyojji! \v 16 Jamajjeya ecuana Eyacuiñajji nijje, Jesosa Quito nijje peaꞌai mimi neineiani jama baꞌa: —Jesosa Quito, miya ecuanaja Emeshi Mese nei. Eyacuiñajji, miya ecuanaja Chii ai eyajo ani. Miya quea pame nee nee. Miyaya ecuana quea jea nee aña. Jamajjeya Edojjoshahua Pame huoojeanaje ecuana quea bihui nee po tiitii meeya. Miyaya ecuana baꞌe tiitii meejeꞌyo eyajo peaꞌai. \v 17 Jamajjeya ¡miquea epeejji cuana Tesanonicajo baꞌe quea bihui nee, meteꞌama po meecue! ¡Oya cuana baꞌe meesahuacue tii quea pame nee! ¡Miquea esohui quea pame nee jayojja jama atiitii meesahuacue peaꞌai! —jamaya ecuana mimiani Eyacuiñajji nijje miquianajo. \c 3 \s1 ¡Eyacuiñajji nijje mimicue ecuanajo! \p \v 1 Epeejji cuana, jjeyahua nei ecuaaya pea esohui tehueje miquianajaya ebajji. ¡Eyacuiñajji nijje mimicue ecuanajo! Jama acue baꞌa: —Eyacuiñajji, ecuanaja Chii, ¡miyaya Pabo, ojaya epeejji cuana peaꞌai jaahuanacue! ¡Jesosaja esohui huohuicuaji meesahuacue ojjaña cuana huasijje! Esohui shajjaꞌajja cajo ¡quea huiso minijje jjapeequi meesahuaꞌyocue! Jamajjeya ¡ecuana jayojjaya pea cuana jjeyahua nei Jesosaja epeejji po meesahuacue! ¡Ojaya esohuijo jjashajjaꞌajja meesahuaꞌyocue peaꞌai! \v 2 Eꞌe Eyacuiñajji, ¡Pabo, ojaya epeejji cuana peaꞌai jaahuanacue dejja mase cuanajo, mimishi cuanajo peaꞌai! ¡Aꞌa Pabo napa meejji cuana esohui huohui canijo! —jamaya mimicue Eyacuiñajji nijje ecuanajo. Eꞌe, quea huiso cuana Jesosa nijje jjapeequi sa poꞌyo ajja. \p \v 3 Eseya Emeshi Mese nei Jesosaa pajeaꞌyo jjima acaje. Ma ohua yahuajo huohui ca poa jayojja jama ohuaya eꞌe jojo nei acajeꞌyo. Jamajjeya miquianaya onijje jjapeequi meesahua cajeꞌyo tii tii quea jaꞌa nee, ohuaya. Edosiquiaa miya napa cajo, quea mimishi po mee sa acajo, ohuaya miquianaya jaahuana tiitii cajeꞌyo; quea pame nee baꞌe meesahua cajeꞌyo. \v 4 Ecuanajaya eba esejaya Emeshi Mese neiya, Jesosaa miquianaya jaahuana cani. Jamajjeya miquianaaya ecuanaja esohui pajeaꞌyo jjima aje; atiitiijeꞌyo peaꞌai. Eꞌe, jamaya ecuanajaya eba. \v 5 Ecuanaya Eyacuiñajji nijje mimiani miquianajo jama baꞌa: —Eyacuiñajji, ecuanaja Chii, miyaya Jesosaja epeejji cuana Tesanonicajo baꞌe quea jea nee aña. ¡Maya oya cuana ba meesahuacue! Ecuanaja Emeshi Mese nei Jesosa meshijo baꞌyahua quea nee nee poanaje mimishi cuaa napa cajje. Jamatii ohuaya miya pajeaꞌyo ajja tii tii poanaje, quea quene nee nee po jjima peaꞌai. ¡Jesosa Quito jayojja jama ojaya epeejji cuana po meecue! Jamajjeya mimishi cuaa napa cajo Jesosa nijje jjapee tiitiiquijeꞌyo. ¡Jamaya oe ameesahuacue cuana, Eyacuiñajji! —jamaya ecuana Eyacuiñajji nijje mimiani. \s1 Ojjañaa cachaco cahua \p \v 6 Epeejji cuana, ¡jjeya ecuanaja pea esohui shajjaꞌajjacue! Esejaya Emeshi Mese nei Jesosa Quitohua ecuana huohui meesahua cani jama baꞌa: —¡Jesosaja epeejji quea huea cuana nijje aꞌa jjapeequijji! Ma epeejji quea huea cuana chacochaco ajja, ecuanaja esohui jayojja jama baꞌe sa poꞌyo ajja, jjashajjaꞌajjaqui ajja peaꞌai. \v 7 Miquianaaya ecuana banaje miquiana nijje nequiya chaco tiitiinaje, hueaꞌama poanaje. ¡Ecuana jayojjaya jama pocue; hueaꞌama chaco tiitiicue! \v 8 Eꞌe, ecuaaya miquianajaya aquiana ebaꞌejji jjeshe majje sosequianaje; sosemaꞌ pojjeama jjeshenaje. Mecajje, epojjajo peaꞌai chaco tiitiinaje ejjeshejji sosejje, bobi jjeshejji. Jamajjeya miquianajaya bobi cuana jjeshe jjima sosemaꞌ. \v 9 Jesosaa ecuana huoojea canaje ojaya esohui huohuiya. Jamajjeya esohui huohuiaña sosejje ecuaaya miquianaya cahuohuiahua jama baꞌa: “¡Ecuana ebaꞌejji quiacue sosemaꞌ, esohui huohuiaña sosejje!” \p Jamatii ecuaaya miquianaya jamaya ajjima nei nei. Chojja, ecuaaya chaconaje aquiana jjeshejji. Jamaya quea pame nee. ¡Ecuana jayojjaya jama pocue! ¡Miquianaaya chacocue! \v 10 Miquiana nijje baꞌyahuaa ecuaaya huohuinaje jama baꞌa: —Ojjaña joya quea huea poani, chacochaco sa poꞌyo ajja aje oe ¡aꞌa bobiajji! \p \v 11 Epeejji cuana, onaaya ecuana huohui canaje jama baꞌa: —Jesosaja epeejji cuana Tesanonicajo baꞌe quea huea poani beca cuana. Pea cuanajo maimaiani, quea miminaa poani, chacochaco sa poꞌyo ajja tii peaꞌai. Jamaya quea pame pojjeama poani. \p \v 12 Jamajjeya esejaya Emeshi Mese neiya, Jesosa Quitohua ecuana huohui meesahua cani ojjaña quea huea poani yasijje jama baꞌa: —¡Eyacuiñajjija esohui jayojja jama baꞌecue! ¡Quea bei pocue! ¡Chacocue oe! ¡Bobi miquea tii ijjiacue! —jama huohuimeya ecuaaya aña joya quea huea poanijo. \p \v 13 Ecuea epeejji cuana, miquianaaya pea cuana quea pame nee aña. ¡Jamaya quea pame nee atiitiicue! ¡Aꞌa quea huea pojji! \p \v 14 Beca cuana jiquio esohui etehueꞌyo jayojja jama a sa poꞌyo ajja pojjaꞌa. ¡Shajjamaꞌ cuana ba neineicue! ¡Ona nijje aꞌa jjapeequijji! Jamajjeya shajjamaꞌ cuana quea bicho poaje ojaya mimishi cuanajo. Quea bicho po majje jjashajjaꞌajjaquije pojjaꞌa. \v 15 Jesosaja epeejji cuana quea mimishi poanijo, shajjamaꞌ poanijo ¡jamatii aꞌa quea quene nee nee pojji onijje! Chojja. Oya cuana miquea epeejji. ¡Huapa pojjeama jayojja jama oya cuana niñesheꞌacue! \s1 Pabohua esohui quea bihui nee huohui canaje \p \v 16 Ecuea epeejji cuana, ¡bacue ecuea pea esohui! Eya Eyacuiñajji nijje mimiani miquianajo jama baꞌa: —Eyacuiñajji, ecuanaja Emeshi Mese nei, miyaya ecuana quea bei po mee tiitiiaña. Jamajjeya ¡miquea epeejji cuana Tesanonicajo baꞌe quea bei nee nee po meecue, quea bei tii tii! ¡Oya cuana jaahuanacue, quea pame nee baꞌe meesahuacue! —jamaya eya poani. \p \v 17 Eya Pabo. Eyaya ca eya jiquio esohui quea bihui nee tehueꞌyonaje miquiana huasijje. Jamaya eyaya ecuea bajjani tehueaña ojjaña ecuea esohui etehueꞌyojo. Jamajjeya ¡miquianaaya bacue jiquio esohui ecue tehueꞌyo! \p \v 18 ¡Esejaya Emeshi Mese neiya Jesosa Quitohua miquianaya quea pame nee cajaahuana cahua! \p Mahuiso ecuea esohui. Apoa.