\id 2CO - Ese Ejja NT -Bolivia 2012 (DBL -2013) 
\h 2 CONITIO 
\toc1 Paboja Etehue Conito Cuiñajjijo Baꞌe Yasijje Becanejjijji Peaꞌai 
\toc2 2 Conitio 
\toc3 2 Co 
\mt2 PABOJA ETEHUE CONITO CUIÑAJJIJO BAꞌE YASIJJE BECANEJJIJJI PEAꞌAI 
\mt1 2 CORINTIOS 
\c 1  
\s1 Pabohua tecue ca oꞌoyanaje Jesosaja epeejji cuana Conitojo baꞌe yasijje 
\p  
\v 1 Eya Pabo, Jesosa Quitoja huoojeaꞌyo oja sohui huohuijji. Jamaya Eyacuiñajjiya a sa acani. Timoteo esejaya epeejji enijje nequi. Eyaya tehueaña miquiana huasijje. Eꞌe, miquiana Jesosaja epeejji cuana Conito cuiñajjijo baꞌe yasijje, ma Acaya meshijo baꞌe yasijje cuanaya tehueaña eyaya. 
\p  
\v 2 ¡Esejaya Emeshi Mese neiya Jesosa Quitohua, Eyacuiñajjiya, esejaya Chii neiya peaꞌai miquianaya cajaahuana neinei cahua; quea bei cabaꞌe mee cahua peaꞌai! 
\s1 Pabo Eyacuiñajji nijje mimiani quea bihui 
\p  
\v 3 ¡Eyacuiñajji ejjabihuiaqui! Eꞌe, oya esejaya Emeshi Mese nei Jesosa Quitoja Chii, esejaya Chii nei peaꞌai poani. Oya esejo jjashahuabaquiani quea bei. Ohuaya eseya quea bihui nee po mee cani peaꞌai.  
\v 4 Eseya quea nee, quea yeno poanijo, ohuaya quea bihui nee po mee cani. Quea bihui nee po majje eseyaya pea cuana quea bihui nee po meejeꞌyo, yenoꞌama peaꞌai. Jamaya ejjaꞌaqui baꞌa: —Eyacuiñajjiya ecuana jaahuana cani. Oya miquiana jaahuanajji poani peaꞌai. Jamajjeya ¡aꞌa quea yeno pojji! 
\p  
\v 5 Jesosa Quito quea nee poanaje dejja mimishi cuaa napa cajje. Eseya onijje jjapeequianijo, pea cuaa eseya napa caje peaꞌai. Jamatii, eseya quea bihui nee po mee caje Jesosaa. Majoya eseyaya pea cuana quea bihui nee po meesahuaje Jesosa nijje.  
\v 6 Eꞌe eyaya, Timoteohua peaꞌai esohui huohuiaña Jesosajo. Jamajjeya pea cuaa ecuana napa cani. Jamatii, ecuanaja esohui shajjaꞌajja majje miquianaya Jesosa nijje jjapeequiꞌyani. Ohuaya miquianaja mimishi cuana cuijea caꞌyonaje. Jamajjeya miquianaya quea bei nee poani. Eꞌe, Jesosaa ojaya epeejji quea caꞌa nee po mee canijo, miquianaya quea caꞌa nee poaje peaꞌai. Jamajjeya pea cuaa miquiana napa cajje Jesosaja epeejji quea caꞌa nee poaje tii. Onijje jjapee tiitiiquijeꞌyo peaꞌai. Eꞌe, Jesosaa miquianaya ojaya epeejji quea jaꞌa po mee cajeꞌyo ecuana jayojjaya, quea bei.  
\v 7 Jiquio ecuanajaya eba baꞌa: Miquianaya Jesosaja epeejji quea jaꞌa po tiitiijeꞌyo. Eꞌe, miquianaya ecuana jayojja poaje. Jesosa nijje jjapeequianijo, pea cuaa napa caje. Jamatii Jesosaa miquianaya quea bei nee po mee caje ecuana jayojjaya. Jamaya Jesosaa acajeꞌyo miquianajo, ecuanajo peaꞌai. 
\p  
\v 8 Epeejji cuana, jjeya ecuaaya huohuije quea nee ecuana poanaje Asia meshijo nequi miquianajaya ebajji. Jomajo ecuana baꞌenaje quea camaja nee nee, quea mano poanaje. Eꞌe, ecuana jjashahuabaquinaje jama baꞌa: —Eꞌe, ecuanaja quea camaja nee nee Jesosa nijje ejjapeequijji, jiquio meshijo pojjaꞌa mo manojeꞌyo.  
\v 9 Eꞌe, mimishi cuana jjashahuabaquiani ecuana quecuajji. 
\p Eyacuiñajjiya ecuana ba mee canaje jama baꞌa: Dejja cuanaja ecuana ejaahuanajji pojjeama. Oya oe nei ecuana jaahuanajji poani. Ohuaya ohuaye nei emanoꞌyojaa cuana shequi mee ca oꞌoyani. Jamaya eseya ba mee canaje Eyacuiñajjiya. 
\p  
\v 10 Eꞌe, mimishi cuaa napa huichaꞌa huichaꞌa cajje, ecuana quea nee nee poanaje. Beshahua nei manoꞌyonaje quea nee nee poanijo. Jamatii, Eyacuiñajjiya ecuana jaahuana caꞌyonaje; manoꞌyo jjima Asia meshijo nequi. Ecuana jjashahuaba tiitiiquiani jama baꞌa: —Eyacuiñajjiya ohuaye neiya ecuana jaahuana tiitii canijo, manoꞌyo jjima jjeya. 
\p  
\v 11 Eꞌe, miquianaya Eyacuiñajji nijje miminaje ecuana ojaya ejaahuana tiitiijji. Jamajjeya ohuaya miquianaya shajjaꞌajja canaje onijje mimiani. Ecuana jaahuana canaje. Jamajjeya quea huiso Jesosaja epeejji cuaa Eyacuiñajji bihuia caje jama baꞌa: —Eyacuiñajji, miya quea pame nee nee. Miquea epeejji jaahuanaña quea jaꞌa nee. 
\s1 Pabo Conito huasijje poqui jjima poaje 
\p  
\v 12 Ecuanaja ebaꞌejjijo, echacojjijo, ehuohuijjijo peaꞌai ecuanaaya quea bihui nee huohuiaña. Eꞌe, miquiana nijje, ojjaña pea cuana nijje nequinajejo peaꞌai eꞌe jojo nei ecuanaja echaco quea pame nee poanaje. Eyacuiñajjiya ecuana chaco meesahua canaje ojo quea pame nee. Ecuanaja ejjashahuabaquijji quea jaꞌa nee peaꞌai. Dejja cuanaja ejjashahuabaquiꞌyojji jayojja jama baꞌe ajja. Chojja, de. Eyacuiñajjiya ecuana baꞌe meesahua cani ojaya esohui jayojja.  
\v 13 Ecuanaja esohui etehueꞌyo miquiana huasijje quea jaꞌa nee. Esohui quea quehua tehue jjima. Eya jjashahuabaquiani jama baꞌa:  
\v 14 Yahuajo miquianaaya ecuana ba pishana majje ejjabaꞌe bamequiꞌyojji banaje. Quijje quea jaꞌa nee bajeꞌyo ecuana ba neinei majje. Jamajjeya Jesosa, Emeshi Mese nei poe oꞌoyajo, ecuaaya oya huohuijeꞌyo miquiana ojaya epeejji quea pame poanaje. Cuanaya ojaya esohui jayojja baꞌyanijo, miquianaaya quea bihui nee ecuanajo huohuijeꞌyo Jesosa poe oꞌoyajo. 
\p  
\v 15 Eꞌe, ecuea eba miquianaya jjabahuejjaquije eya esohui jayojja quea jaꞌa baꞌyani. Jamajoya jjeyahua nei eya miquiana que poqui oꞌoya sa poanaje miquiana Jesosajo quea jaꞌa nee baꞌe meesahua oꞌoyaa.  
\v 16 Yahuajo eya jjashahuabaquinaje jama baꞌa: —Jesosaja epeejji cuana Masenonia meshijo baꞌe yasijje poquije eya dobiquinanaje Conito cuiñajji yasijje Jesosaja epeejji cuana sohuihuohuiya. Ma ba majjeya eya poquije Jodea meshi yasijje. Jamajjeya Conitojo baꞌeca cuaa eya poqui meesahua caje pojjaꞌa Jodea meshi yasijje —eya jjashahuabaquinaje. 
\p  
\v 17 Jamatii eya poqui jjima miquiana baa. Miquiana baquijji eya jjashahuabaquinaje quea jaꞌa nee. Ecuea epoquijjijo eya jjashahuabaqui ajja pea cuana jayojja jama. Jesosaja epeejji pojjeama cuaa huohui cani jama baꞌa: —Eya poquije. Chojja, eya poqui ajja —jamaya eya jjashahuabaqui ajja. Eyaya ecuea ejjashahuabaquijji jayojja jama ajeꞌyo.  
\v 18 Eyacuiñajji siajje po ajja, ojaya esohui jayojja jama ohuaya acani. Ojaya eba eya o jayojja eꞌe nei poani, siajje po ajja jama baꞌa: —Eꞌe pojjaꞌa, de —jamaya eya siajje po ajja. 
\p  
\v 19 Eyaya Sinasi nijjeya, Timoteo nijjeya peaꞌai Jesosa Quitojo huohuinaje miquiana huasijje. Oya Eyacuiñajjija Bacua Ejja. Ojaya esohui jayojja jama acajeꞌyo eꞌe jojo nei, ohuaya.  
\v 20 Eyacuiñajjija esohui yahuajo quea huiso, quea pame nee nee. Jesosa Quito ese jaahuanaa poeyanaje. Ohuaya ojjaña Eyacuiñajjija esohui yahuajo jayojjaya jama jjeya acajeꞌyo esejo. Jamajjeya Jesosa Quitohua Eyacuiñajjija esohui jayojja jama acanijo, eseyaya Eyacuiñajji bihuiaña jama baꞌa: —Jamaya Eyacuiñajji, miquea esohui quea pame nee nee, quea huiso ecuana nijje. Ojjaña eꞌe jojo nei poani. Miya siajje po ajja nei nei —jama bihuiameya seya aña. 
\p  
\v 21 Eyacuiñajjiya ecuana, miquianaya peaꞌai ojaya epeejji po mee canaje. Ohuaya eseya babaca caꞌyonaje onijje ejjapeequijji.  
\v 22 Jama esejo acanaje baꞌa: —Miquianaya ecuea epeejji cuana poani. Ecuea ejjeshe jayojja jama miquianaya —Eyacuiñajji poanaje. 
\p Eyacuiñajjiya ese que huoojea canaje Edojjoshahua Pame ese jaahuanajji. Edojjoshahua Pameya eseya ba mee cani jama baꞌa: Quijje eseya quea jaꞌa nee Jesosa jayojja baꞌe tiitiijeꞌyo Eyacuiñajji nijje eyajo. 
\p  
\v 23 Eyacuiñajjiya ba cani ecuea ejjashahuabaquijji miquianajo quea pame nee poani. Jama poani eya baꞌa: —Conito huasijje jjeya epoquiya jjemo eyaya onaya tecueajeaꞌyome pojjaꞌa, quea mimishi baꞌyanijo.  
\v 24 Eya miquianajaya emeshi mese pojjeama, miquiana huoojea neineiꞌyojji pojjeama. Eyaya ca ca esohui huohuiaña, Jesosaja esohui, miquiana quea bihui nee po meejji. Eꞌe, Jesosaja esohui jayojja jama añajo, ojaya epeejji quea jaꞌa nee poajeꞌyo miquianaya. 
\c 2  
\p  
\v 1 Jjeya eya jama jjashahuabaquiani baꞌa: —Jjeya Jesosaja epeejji Conitojo baꞌe beca cuana quea mimishi poanijo, eya poqui ajja jocuama o tecueaa. Jjabahuejjaqui oꞌoyajo, quea yeno poaje oꞌoya oya cuana —eya poani. 
\p  
\v 2 Eꞌe, miquianaya eyaya quea yeno po mee majje, ¿ajeo acuae che eya quea bihui poꞌyome?  
\v 3 Jamajjeya yahuajo eyaya miquianaya tehuenaje quea tecue mimishi pajea meeꞌyojji. Eꞌe, miquiana quea mimishi poanijo, eya quea yeno poanaje. Pea chamaꞌ e quea bihui nee po meejji. Eya jjashahuabaquinaje miquianajo jama baꞌa: —Eꞌe jojo nei ohuaya Eyacuiñajjija esohui jayojja jama acajeꞌyo. Majoya eya quea bihui nee poaje. Oya cuana quea bihui nee poaje peaꞌai eꞌe jojo nei baꞌe majje. 
\p  
\v 4 Eꞌe, eyaya quea yeno nee esohui quea tecue tehuenaje miquiana jjabahuejjaqui meeꞌyojji. Quea camaja esohui quea tecue etehuejji. Miquianaya quea yeno po mee sa poꞌyo ajja. Chojja. Eya jjashahuaquinaje jama baꞌa: —Ecuea esohui etehueꞌyo quea tecue mimishi cuanajo ba majje onajaya eba poaje ecuea quea jea nee nee poani —eya poani. Eꞌe, jamaya ecuea ejjashahuabaquijji miquianajo. 
\s1 Jesosaja epeejji quea mimishi tecuea majje ¡aꞌa quea tecue po tiitiijji onijje ohua mimishi pajea cajo! 
\p  
\v 5 Jesosaja epeejji miquiana nijje nequi ca ca oe quea mimishi poanaje. Eya quea yeno nee poanaje ojo. Miquianaya quea yeno poanaje peaꞌai ojo. Jamajjeya eyaya o jjabahuejja meequijji tehuenaje oja mimishi cuana pajea meeꞌyojji.  
\v 6 Beshahua nei miquianaaya, ojjañaa oya jjabahuejjaqui meenaje ojaya mimishi epajeaꞌyojji. Apoa.  
\v 7 Jamajjeya ¡aꞌa oya quea yeno po tiitii meejji! ¡Aꞌa oya tecuea tiitiijji! Chojja. Quea yeno nee nee po tiitii majje oya Jesosa nijje jjapeequi pajeaꞌyo chanaꞌ. Jjabahuejjaquiꞌyajo, ¡onijje jjapeequiꞌyocue quea pame nee!  
\v 8 Eꞌe, oya jama huohuicue baꞌa: —Miya ecuanaja quea boti nee, epeejji —jamaya oya acue. 
\p  
\v 9 Yahuajo eyaya ma esohui tehuenaje miquiana baꞌajjajji soꞌo. Eya ba sa poanaje jama baꞌa: —¿Aꞌa shajjamaꞌ poaje? ¿Aꞌa ecuea esohui jayojja jama poaje? —poanaje. 
\p Jamajjeya eyaya esohui tehuenaje miquiana huasijje ma dejja quea mimishi jjabahuejjaqui meeꞌyojji. Miquianaya ecuea esohui etehueꞌyo jayojja jama poꞌyonaje. Quea pame. Apoa poanaje.  
\v 10 Jamajjeya miquianaya ma dejja quea mimishi poani nijje queneꞌama poajo, eya onijje queneꞌama poajeꞌyo peaꞌai. Eꞌe, ecuea aje ojaya mimishi epajeaꞌyo peaꞌai. Eya Jesosa Quitoja esohui huohuijji poanijo ma dejja mimishi nijje quea tecue poanaje. Jjeya ma dejja nijje tecueꞌama poanaje. Jamajjeya ¡miquianaya peaꞌai quea bei, quea jaꞌa pocue!  
\v 11 Eseya quea bei, quea jaꞌa poanijo, Edosiquiaa eseya edasiajji pojjeama. Eꞌe, esejaya eba Edosiquianaja ejjashahuabaquijji. Oya aje oe edasiajji poani, de, Jesosaja epeejji cuana quea mimishi po mee oꞌoya sa acani. 
\s1 Jesosaja ehuohui eyacua 
\p  
\v 12 Yahuajo pishana eya poquinaje Toasa cuiñajji yasijje esohui quea pame Jesosa Quitojo huohuiya. Jomajo esejaya Emeshi Mese neiya Jesosaa eya huohui meesahua canaje. Beca cuaa shajjaꞌajja canaje quea bihui nee.  
\v 13 Jamatii ecuea epeejji Tito poe jjima Toasa huasijje. Eya quea mete ojo poanaje: —Eꞌe pojjaꞌa oya quea huesha nee quea mano jaa pojjaꞌa, quea nee poani pojjaꞌa —jjashahuabaquinaje. Jamajjeya eya Toasajo baꞌe nijje miminaje jama baꞌa: —Poquia iña Tito saꞌajjaa. 
\p Majoya eya poquinaje Masenonia meshi yasijje. 
\p  
\v 14 Eseyaya Eyacuiñajji bihuiaña. Ohuaya eseya quea jaꞌa nee nequi mee cani. Eꞌe, ohuaya eseya dejja mimishi cuana mimicuiajeanobiajea meesahua cani; eseya Jesosa Quito nijje jjapeequi mee cani quea jaꞌa nee. Ohuaya ecuana huohui meesahua cani ojjaña meshijo Jesosa Quitoja esohui. Ma esohui quea pame nee nee. Jiquio ecua shiyeshiye esejaya quea boti nee aña jama jayojjaya Jesosaja esohui ecuanajaya quea boti nee.  
\v 15 Eꞌe, Eyacuiñajjiya ecuana huoojea caꞌyonaje Jesosa Quitojo huohuiya. Ma esohui quea pame nee nee, ecuanaja quea boti nee nee. Jamajjeya ojjaña Jesosaja epeejji cuaa, ma Eyacuiñajjiya onijje baꞌe tiitii mee cajeꞌyohua, ojjaña quea mimishi poaniya peaꞌai ma quijje quea nee nee po tiitiijeꞌyohua peaꞌai ba cajeꞌyo Eyacuiñajji quea pame nee: —Eꞌe Eyacuiñajji, miya quea pame nee nee. Pea chamaꞌ mi jayojja —oya bihuiaje eseyaya. 
\p  
\v 16 Eꞌe, Jesosa Quitoja esohui shajjaꞌajja majje ojjaña mimishi cuana jjabaquije oya cuana cajaaꞌyaꞌyo, quea nee nee poajeꞌyo cuaquijo. Ma esohui shajjaꞌajja majje Jesosaja epeejji cuana ca ca jjabaquije oya cuana baꞌe tiitiijeꞌyo quea jaꞌa nee eyajo Eyacuiñajji nijje.  
\v 17 ¿Aya acuae maya esohui eyacua Jesosajo huohui caje pea cuana huasijje, de? Ma esohui quea pame Jesosa Quitojo ecuana huoojea majje sohuihuohui meesahua caje quea jaꞌa nee, ohuaya. Pea cuaa Eyacuiñajjija esohui huohui cani bejjo sosejje. Ecuana, chojja. Ecuaaya, Jesosaja epeejji poaniya quea bihui nee huohuiaña eꞌe jojo nei. Ecuanaja eba jama baꞌa: Eꞌe jojo nei Eyacuiñajjiya ecuana huoojea caꞌyonaje ojaya esohui huohuiya. 
\c 3  
\s1 Jesosa nijje chaco cani esohui eyacuajo 
\p  
\v 1 Eꞌe, Eyacuiñajjiya ecuana huoojea caꞌyonaje miquiana huasijje ojaya esohui huohuiya. Pea cuaa miquiana que quia caꞌyonaje esohui peaja tehueꞌyo jama baꞌa: “¡Jiquio dejja Jesosaja epeejji eꞌe jojo nei! ¡Jamajjeya oya cuana shajjaꞌajjacue!” Ecuanaja ca ca peaja tehueꞌyo equiajji pojjeama miquiana que jama baꞌa: “¡Pabo quea pame nee; oya shajjaꞌajjacue!” Chojja. Ecuana miquianajaya eba Eyacuiñajjija huoojeaꞌyo.  
\v 2 Ecuana jama jjashahuabaquiani baꞌa: —Ojjañaa ba cani ecuanajaya esohui shajjaꞌajja majje Jesosaja epeejji quea pame nee poanaje miquianaya, Conitojo baꞌe cuana. 
\p Jamajjeya ecuana eꞌe jojo nei Eyacuiñajjija huoojeaꞌyo ojaya esohui huohuijji ojjañaja eba, de. Jamajjeya esohui mi tehue mee cani jama baꞌa: “Pabo quea pame nee, Eyacuiñajjija huoojeaꞌyo”. 
\p  
\v 3 Eꞌe, ojjañaa ba cani miquianaya Jesosaja epeejji cuana poanaje ecuanaja esohui shajjaꞌajja majje. Edojjoshahua Pameya miquianaya Jesosa nijje jjapeequi meesahua caꞌyonaje. Yahuajo nei Eyacuiñajjiya esohui mei beje biajje tehue majje ojjaña ba mee ca poa etiiquiana Moisesi oja huoojeaꞌyo. Jjeya ca ca Eyacuiñajjiya Edojjoshahua Pameya miquianaya Jesosa Quito nijje jjapeequi meesahua caꞌyonaje ecuea esohui miquiana shajjaꞌajjajo. Jamaya ohuaya ojjaña ba mee canaje eya oja huoojeaꞌyo, ojaya esohui huohuijji. 
\p  
\v 4 Ecuanajaya eba Eyacuiñajjiya ecuana Jesosaja epeejji quea jaꞌa nee po mee majje huoojea canaje miquiana huasijje esohui huohuiya.  
\v 5 Jamajjeya jama jjashahuabaquiani ecuana baꞌa: —¿Aꞌa ecuana quea pame nee poanijo, quea sapa jaꞌa poanijo esohui huohuije quea jaꞌa nee? Chojja. Eyacuiñajjiya ecuana esohui huohui meesahua canijo ca ca quea jaꞌa nee poani ecuanaja esohui —jamaya ecuana jjashahuabaquiani. 
\p  
\v 6 Eꞌe, Eyacuiñajjiya ecuana huohui meesahua cani ojaya esohui eyacua Jesosajo. Etiiquianaja esohui jayojja jama pojjeama ecuanajaya esohui; eyacua. Ecuanajaya etiiquiana Moisesija esohui yahuajo nei etehueꞌyojo ojjañaa ba ca poa jama baꞌa: —Eꞌe jojo nei mimishi poajo, Eyacuiñajjiya ojjaña quea nee nee po mee cajeꞌyo tii tii; Eyacuiñajji nijje ebaꞌeꞌyojji pojjeama. 
\p Jjeya ca ca ecuaaya huohuiaña jama baꞌa: —Manoꞌyajo, Edojjoshahua Pameya Jesosaja epeejji cuana baꞌe tiitii mee cajeꞌyo —ecuana poani. 
\p  
\v 7 Eꞌe, yahuajo nei Moisesiya ojjaña jama tehueme aca poa baꞌa: “Eseya quea mimishi poajo, Eyacuiñajjiya quea nee nee po mee cajeꞌyo tii tii cuaquijo”. Jamatii Moisesiya Eyacuiñajjija esohui quea tecue mei biajje tehue majje ojaya ecojja quea jiji nee nee cuaquijiji jayojja poa esohui quea pamejojo. Jamajjeya Isaeni cuaa Moisesija ecojja ba jjima aca poa quea siyo nee neejojo. Jamatii ojaya ecojja quea jiji nee po tiitii jjima poa. Quijje pishana quea jiji pojjeama poꞌya poa.  
\v 8 ¿Ajea esohui quea pame nee nee po tiitiije? ¿Aꞌa Moisesija pojjaꞌa? ¿Aꞌa Edojjoshahua Pameja? Edojjoshahua Pameya eseya baꞌe tiitii mee canijo quea pame nee; eꞌe, Moisesija iye bame bame.  
\v 9 ¡Bacue! Moisesija esohui etehueꞌyo quea pame pishana ojjaña cuaa ba canaje jama baꞌa: Eseya quea mimishi poajo, Eyacuiñajjiya quea nee nee po mee cajeꞌyo tii tii. 
\p Edojjoshahua Pameya ca ca eseya Eyacuiñajjija epeejji mimishiꞌama po mee cani. Quea pame nee nee Edojjoshahua Pameya eseya acani.  
\v 10 Yahuajo nei Moisesija etehueꞌyojo ojjaña jjashahuabaquinaje ojaya esohui etehueꞌyo quea pameya poa. Jjeya pea ejjashahuabaquijji yani. Jjeya ca ca esohui quea pame nee ebaꞌe tiitiijji ecuanajaya eba. Quea pame nee nee esohui eyacua poani.  
\v 11 Eꞌe, yahuajo nei ojaya esohui etehueꞌyo quea pame neejo Moisesi ma esohui tehue majje quea cojja jiji poa, quea cojja jiji nee epo tiitiijji pojjeama. Jjeya ca ca esohui eyacua quea jaꞌa capo tiitiiꞌyahua. Eꞌe, ecuana baꞌe tiitii mee cajeꞌyo quea pame nee nee epo tiitiijji. 
\p  
\v 12 Eꞌe, ecuanajaya eba Edojjoshahua Pameya ecuana baꞌe tiitii mee cajeꞌyo. Jamajoya ma esohui eyacua huohui tiitiiaña bichoꞌama.  
\v 13 Moisesi esohui tehue majje quea cojja jiji nee poa. Jamajjeya ojjaña cuana ojo quea mete poanijo, Moisesi jjacojja dodoquiꞌya poa Isaeni cuana meteꞌama epojji. Ecuanaya ca ca Moisesi jama pojjeama. Esohui eyacua ebaꞌe tiitiijji nahue ajja; huohui majamajaña ojjañaja ebajji.  
\v 14 Eꞌe, yahuajo Isaeni cuaa Moisesija esohui etehueꞌyo shajjaꞌajja majje jamatii ebaꞌe tiitiiꞌyojji ba meemee ajja poa. Esohui eyacua onajaya quea quehua poa. Ejjacojja dodoqui jayojja oya poa. Jesosa Quitoja epeejji nei poanijo ca ca ohuaya esohui eyacua ebaꞌe tiitiiꞌyojji ba mee cani.  
\v 15 Jjeya nei peaꞌai Isaeni cuaa Moisesija esohui etehueꞌyo shajjaꞌajja canijo esohui eyacua ebaꞌe tiitiiꞌyojji onajaya quea quehua.  
\v 16 Jamatii ojjaña joya Jesosa Quito nijje jjapeequiani ohuaya esohui eyacua ba mee cajeꞌyo quea jaꞌa nee.  
\v 17 Eꞌe, jamaya poaje Edojjoshahua Pameya, Jesosa Quitohua peaꞌai eseya ba mee caje quea jaꞌa nee Eyacuiñajjija ejjashahuabaquijji. Ma ba majje esohui eyacua esejaya quea jaꞌa nee poaje. Jamajjeya Jesosa nijje jjapeequiꞌyajo, ohuaya eseya baꞌe tiitii mee cajeꞌyo onijje, Moisesija esohui amajje pojjeama.  
\v 18 Jesosaja epeejji cuana poanijo eseya jjacojja paaqui jjima jayojja jama. Eꞌe, ojjaña ba meeje Eyacuiñajjiya eseya Jesosa jayojja jama atiitii meesahua cani. Jamajjeya Edojjoshahua Pameya eseja eyamijo aniya quea jaꞌa nee jjashahuabaqui mee cani. Jesosa jayojjaya popoqui mee cani eseya. 
\c 4  
\s1 Pabohua esohui huohui cani quea jaꞌa nee ebaꞌe meesahuajji 
\p  
\v 1 Eyacuiñajji ecuana nijje quea quene nee nee po tiitii ajja ecuanaja mimishi yahuajo poanaje cuanajo. Ecuana quea jea nee poanijo huoojea caꞌyonaje ojaya esohui eyacua Jesosajo huohuiya. Jamajjeya ecuaaya quea jaꞌa nee huohuiaña yenoꞌama, meteꞌama.  
\v 2 Eꞌe, ma esohui Jesosajo huohuiañajo quea mimishi baꞌeꞌyo ajja. Quea mimishi jjashahuabaqui ajja peaꞌai. Edasiajji cuana pojjeama. Ecuanaja esohui Jesosajo eꞌe jojo nei poani. Jamaya Eyacuiñajjija eba. Jamajjeya ecuanaja esohui eꞌe jojo nei poanijo, ojjaña jjashahuabaquije jama baꞌa: —Eꞌe, jiquio esohui huohuijji cuanaja esohui eꞌe jojo nei poanijo, eyaya shajjaꞌajjaje. Oya cuana edasiajji cuana pojjeama. 
\p  
\v 3 Ecuaaya Eyacuiñajjija esohui eꞌe nei huohui tiitiiaña. Jamatii beca cuanaja, Edosiquiana nijje jjapeequianija Jesosaja esohui quea quehua. Oya cuana aje oe quea nee nee poajeꞌyo tii tii.  
\v 4 Quea pame nee nee Jesosa Quito. Oya Eyacuiñajji Echii ai jama poani tii. Jamaya esejaya eba. Jamatii dejja mimishi cuana onijje jjapeequi sa po ajja. Oya cuana aje oe cojjamaꞌ jayojja, de. Jamajjeya Edosiquiana neiya, ma ojjaña dasiajji poaniya oya cuana dasia cani esohui quea pame nee nee Jesosajo ojaya ebajji pojjeama.  
\v 5 Joya ecuaaya sohuihuohuiaña miquianajaya e bihuiajji pojjeama. Chojja. Ecuaaya huohuiaña jama baꞌa: —Ecuana miquiana ba meesahuajji poani. Jesosa Quito ca ca Emeshi Mese nei poani. Jamajjeya ¡Jesosa bihuiacue miquianaaya! —ecuanaya miquiana niñesheꞌajji poani. 
\p  
\v 6 ¡Bacue! Yahuajo nei meshi pana jjimahuajo Eyacuiñajjiya jama huohuime aca poa baꞌa: “Quea misi, ¡quea jaꞌa nee oe poꞌyocue!” aca poa; jjajaꞌaqui mee caꞌya poa. Jjeya ohuaya tiiya eseya Jesosajo jjashahuabaqui meesahua cani quea jaꞌa nee. Jamajjeya oya esejaya eba quea pame nee nee Jesosa, quea jaꞌa nee nee poani tii. Eꞌe, Jesosa Quito Eyacuiñajji jayojjaya nei nei. Oya esejaya eba poanijo Eyacuiñajji quea pame, quea jaꞌa nee nee poani tii tii esejaya eba peaꞌai. 
\s1 Ona Jesosa nijje jjapee meesahuaquiañajo baꞌe tiitiijeꞌyo 
\p  
\v 7 Eyacuiñajjiya ecuana babaca canaje esohui quea pame nee huohuijji. Jamaya quea pame nee, de. Jamatii jiquio ecua meshimisi caꞌaꞌama jayojja jama eseya caꞌaꞌama. Jamatii Eyacuiñajjiya eseya ojaya epeejji quea caꞌa nee acanijo, ojjañaa ba cani jama baꞌa: —Eꞌe de, Eyacuiñajjiya quea caꞌa neeya Jesosaja epeejji cuana quea caꞌa nee o jayojja jama po mee cani. Ojjaña huasijje esohui quea pame nee huohui meesahua cani. 
\p  
\v 8 Mimishi cuaa ecuana napa cani. Jamatii ecuana ejeabichajeaꞌyojji pojjeama. Pea cuana quea mimishi poanijo, quea camaja tii ecuanaja ebaꞌejji. Jamatii quea yeno nee nee pojjeama ecuana poani.  
\v 9 Mimishi cuaa napa cani Jesosaja esohui ehuohui poaje jjejojo. Jamatii Eyacuiñajjiya ecuana ejeanaꞌyojji pojjeama. Pea cuaa cuiajea cajo, jamatii ecuana manoꞌyo ajja.  
\v 10 Jesosa quea nee nee poanaje mimishi cuaa napa majamaja caꞌyajje. Oya mano mee caꞌyonaje, de. Jamaya ecuana acajeꞌyo peaꞌai pojjaꞌa Jesosa nijje jjapeequianijo. Jamajjeya ojjañaa jama acaje baꞌa: —Eꞌe jojo nei Jesosaa jiquio dejja cuana ojaya epeejji nei po tiitii mee cani. Mimishi cuaa napa cajje jamatii esohui huohui pajea jjima acani. 
\p  
\v 11 Eꞌe, pea cuaa ecuana napa majamaja cani Jesosa nijje jjapeequianijo. Ecuana quecua sa acani peaꞌai. Jamatii ecuana quea jaꞌa nee po tiitiianijo, ojjañaa ba caje Jesosa ecuana jaahuanajji quea jaꞌa nee. Oya eshe, de.  
\v 12 Eꞌe, mimishi cuaa ecuana quea nee nee po mee cani esohui Jesosaja huohuiañajo. Jamatii ecuanaja esohui shajjaꞌajja majje miquianaya Jesosaja epeejji poanaje. Jamajjeya ohuaya miquianajaya mimishi cuana cuijeaꞌyo majje baꞌe tiitii mee cajeꞌyo. 
\p  
\v 13 Yahuajo Eyacuiñajjija esohui huohuijjiya Dabiya huohui ca poa jama baꞌa: “Ecuea eba eꞌe jojo nei Eyacuiñajji e jaahuanajji poani. Jamajjeya jamaya eyaya huohuiaña” Dabiya aca poa. Jjeya ecuana Dabi jayojja Eyacuiñajji nijje jjapeequiani. Ecuanaja eba eꞌe jojo nei Eyacuiñajjiya ecuana jaahuana cani. Jamajjeya ecuaaya esohui huohui tiitiiaña jamatii mimishi cuaa napa cani tiiya. Jama poani baꞌa:  
\v 14 —Emeshi Mese nei Jesosa manoꞌyajo, Eyacuiñajjiya oya shequi mee caꞌyonaje. Jamaya ecuana manoꞌyajo, eꞌe jojo nei Eyacuiñajjiya ecuana shequi mee cajeꞌyo. Ohuaya ecuanaya, miquianaya peaꞌai nequi tiitii mee cajeꞌyo Jesosa nijje eyajo —ecuaaya aña. 
\p  
\v 15 Eꞌe, quea camaja poani ecuana Jesosaja esohui huohuiañajo. Jamatii ecuanaja esohui ba majje miquianaya Jesosa nijje jjapeequinaje. Jamajjeya Eyacuiñajjiya miquianaya baꞌe tiitii mee cani. Pea cuana quea huiso Jesosa nijje jjapeequiꞌyajo, Eyacuiñajjiya oya cuana baꞌe tiitii mee cajeꞌyo. Jamajjeya oya bihuia caje jama baꞌa: —Eyacuiñajji quea pame nee nee poani. Quea caꞌa nee nee poani peaꞌai —acaje ojjañaa. 
\p  
\v 16 Jamajjeya ecuaaya maya esohui Jesosajo huohui pajeaꞌyo ajja. Chojja. Onaa napa cajje ecuana quea nee nee poani. Edejja tii cuana jayojja jama caꞌaꞌama poaje. Jamatii Eyacuiñajjiya ecuanaja edojjoshahua cuana quea jaꞌa po tiitii mee cani.  
\v 17 Jjeya onaa napa cajje ecuana quea nee poani Jesosa nijje jjapeequianijo. Quea nee po tiitiiꞌyo ajja. Eꞌe, jjeya quea nee poani. Jamatii Jesosa nijje jjapeequianijo, quijje ohuaya ecuana baꞌe tiitii mee cajeꞌyo quea pame nee nee eyajo onijje. Quea nee popajeajeꞌyo. Jamaya quea pame nee nee.  
\v 18 Jjeya nei ecuaaya Jesosa ba jjima aña ecojjaa. Jamatii ecuana jjashahuabaquiani Jesosa nijje eyajo ebaꞌeꞌyojji. Jiquio meshijo ebaꞌejji ecuana jjashahuabaqui ajja. Jiquiojo baꞌe tiitii ajja. Eyajo Jesosa nijje ca ca oe baꞌe tiitiijeꞌyo. 
\c 5  
\s1 Ebaꞌejji quea pame nee eyajo 
\p  
\v 1 Ecuaaya jama baña baꞌa: Eseya manoꞌyajo Eyacuiñajjiya eyacua pana cajeꞌyo esejaya eyami. Eyami eyacua ani tiitiijeꞌyo eyajo. Eꞌe, eseya jiquio meshijo baꞌyanijo caꞌaꞌama. Eyajo baꞌeꞌyo majje quea caꞌa nee eseya poajeꞌyo tii tii.  
\v 2 Eseyaya jjeya nei ishoaña eyami eyacua. Cuanaya eseya jiquio meshijo baꞌyanijo quea nee nee poani. Jamajjeya jjashahuabaquiani jama baꞌa: —Eya poqui sa poani eyahuasijje. Jomajo ecuea eyami eyacua poajeꞌyo. 
\p  
\v 3 Jesosa poe oꞌoyajo, jiquio eyami eyacua poaje. Jiquio ecua jjapipi eyacua poani jama jayojja esejaya eyami eyacua poajeꞌyo. Eꞌe, eseya jjashahuabaquiani eyami eyacuajo. Quea pame nee poaje.  
\v 4 Jiquio meshijo baꞌyanijo eseya quea nee nee poani. Quea camaja nee jiquiojo ebaꞌejji. Esejaya eyami caꞌaꞌama, jjapipi jjacocoqui jjima jama. Jjacocoqui sa poani. Eꞌe, eseya poqui sa poani eyahuasijje. Jomajo eyami eyacua sa poani. Jiquiojo manojeꞌyo. Eyacua po majje ca ca eseya ani tiitiijeꞌyo eyajo. 
\p  
\v 5 Eyacuiñajjiya eseya baꞌe tiitii mee cani; esejaya eyami eyacua acaꞌyani peaꞌai. Ohuaya Edojjoshahua Pame huoojea canaje ese que ese jaahuanajji. Edojjoshahua Pameya eseya ba mee cani jama baꞌa: Eꞌe jojo nei Jesosaja epeejji poanijo ohuaya ecuana eyami eyacua quia cajeꞌyo; ani tiitii mee cajeꞌyo onijje eyajo. 
\p  
\v 6-7 Jamajjeya jjashahuabaquiani jama baꞌa: —Eꞌe, Eyacuiñajjiya eseya baꞌe tiitii mee cajeꞌyo onijje. Eseya jiquio meshijo baꞌyanijo Jesosa cojja neijo ani ajja. Esejaya eyami eyacua po majje Jesosa nijje ani tiitiijeꞌyo. Jjeya Jesosa esejaya ecojjaja ba jjima; jjaba meequi ajja. Jamatii eseya jjashahuabaqui mee cani onijje enequi tiitiiꞌyojji. Jiquio meshijo aquiana cuana quea huiso baña ecojjaa. Jamatii ma aquiana cuanajo jjashahuaba neineiqui ajja.  
\v 8 Eꞌe jojo nei baña Eyacuiñajjiya eseya baꞌe tiitii mee cajeꞌyo. Jamajjeya meteꞌama, quea bei nee poani. Poqui sa poani Jesosa nijje ebaꞌe tiitiiꞌyojji, Emeshi Mese nei nijje. Ishoaña esejaya eyami eyacua.  
\v 9 Jamajjeya jjeya nei eseya Jesosaja esohui jayojja jama atiitii sa poani jiquio meshijo baꞌyanijo. Quijje peaꞌai eyajo onijje ani tiitiijeꞌyo. Jamaya sa poani.  
\v 10 Eꞌe, eseja eba jama baꞌa: Jesosa Quitohua eyajo ojjaña huoojeajji poanijo ojjaña meshijo baꞌya poa nequi mee caje o cojja neijo. Ojjaña quea mimishi poanaje ohuaya quea nee nee po tiitii mee cajeꞌyo. Ojjaña quea pame poanaje ca ca quea bihui nee nee po tiitii mee cajeꞌyo. Jamaya eseyaya baña. 
\s1 Jesosaa ecuana sohuihuohui mee cani ona onijje ejjapeequijji 
\p  
\v 11 Eꞌe, Jesosaa, Emeshi Mese neiya ojjaña quea mimishi poani quea nee nee po mee cajeꞌyo tii tii. Quea tecue nee nee poaje ojjaña quea mimishi poani nijje. Jamajjeya ecuaaya ojjaña dejja cuana huohuiaña jama baꞌa: —¡Jesosaja epeejji pocue! ¡Miquea mimishi cuana pajeaꞌyocue! 
\p Eyacuiñajjija eba ecuana ojaya epeejji poani. Ecuanaja esohui eꞌe jojo nei poani, siajje pojjeama. Jamaya ojaya eba peaꞌai. 
\p Ecuana jjashahuabaquiani jama baꞌa: —Ojjaña Conitojo baꞌeja eba esohui eꞌe nei ecuaaya huohuiaña. 
\p  
\v 12 Jamajjeya ecuana miquiana nijje jama po ajja baꞌa: —¡Ecuana bihuiacue quea pame poanijo! —chojja, jamaya ecuana po ajja. Jiquio jama ecuana a sa poani baꞌa: Ecuaaya huohui tiitiiaña eyacua ebaꞌeꞌyojji Jesosa nijje eyajo. 
\p Jamajjeya miquianaaya esohui huohuijji nisho huohuicue quea jaꞌa nee jama baꞌa: —Miquianaaya ca ca oe niñebaña Pabo, esohui huohuijji nei. Miya janobajjima nei mimianijo quea pame esohui huohuijji poso jjabaquiani. Jamatii quea jaꞌa baꞌe ajja. ¡Jesosa Quitojo oe quea jaꞌa nee jjashahuabaquicue! ¡Quea pame aꞌyocue! —jamaya esohui huohuijji nisho acue. 
\p  
\v 13 Ecuanaja esohui quea pame Jesosajo, ebaꞌeꞌyojji eyacuajo peaꞌai shajjaꞌajja majje beca cuana siajje poani jama baꞌa: —Pabo niñepoqui, de, ojaya epeejji cuana peaꞌai niñepoqui —siajje poani. 
\p Eyacuiñajji nijje chaco tiitiiañajo, onaaya ecuana niñepoqui poso acani. Jamatii ecuaaya chaco tiitiiaña Jesosaja esohui quea jaꞌa nee miquianajaya ebajji.  
\v 14 Jesosa Quito ecuanajaya quea jea nee poanijo esohui eꞌe nei huohuiaña. Eꞌe jojo nei ojjaña mimishi acanijo mano tiitiijeꞌyo. Jesosa manoꞌyonaje ojjañaja mimishi cuijeaꞌyojji, ojjaña cuaqui yasijje epoquijji pojjeamajo. Jamaya ecuanaja eba nei nei.  
\v 15 Eꞌe, Jesosa manoꞌyonaje ojaya epeejjija mimishi cuijeaꞌyojji. Manoꞌyajo, Eyacuiñajjiya oya shequi mee ca oꞌoyanaje. Jamajjeya ¡ojaya esohui jayojjaya caꞌa cahua! ¡Yahuajo ejjashahuabaquijji capajea caꞌyahua!  
\v 16 Jesosaja epeejji cuana po jjimahua ecuana pea cuanajo jjashahuabaquinaje quea tai dejja mimishi jama. Jjeya, cho. Jjeya ecuanaja ejjashahuabaquijji pea cuanajo Jesosaja ejjashahuabaquijji jayojja jama quea jaꞌa nee poani. Ojaya epeejji cuana po jjimahua ecuana Jesosa Quitojo jjashahuabaquinaje quea tai dejja mimishi jama. Jjeya, cho.  
\v 17 Jamajjeya Jesosa Quito nijje jjapeequianijo, ohuaya eseya pea jjashahuabaquime po mee cani. Esejaya ejjashahuabaquijji eyacua quea jaꞌa nee po mee cani. Jesosa Quito ba jjimahuajo baꞌya poa jayojja poꞌyo ajja. Jjeya eseya pea jjashahuabaquiꞌyome poani Jesosa jayojja. 
\p  
\v 18 Eyacuiñajjiya Jesosa Quito huoojea canaje esejo manoꞌyohua. Jesosa manoꞌyajo, Eyacuiñajji ese nijje quea quene po tiitii ajja. Ese nijje quea bei poꞌyo majje ohuaya eseya huoojea canaje ojjaña huasijje ojaya esohui huohuiya jama baꞌa: —Eyacuiñajjiya Jesosa huoojea canaje eseja mimishijo manoꞌyohua. Jamajjeya Eyacuiñajji ese nijje quea quene po tiitii ajja. ¡Jesosa nijje jjapeequicue!  
\v 19 Eꞌe, ohuaya Jesosa Quito huoojea canaje ojjañaja mimishijo manoꞌyohua. Jamajjeya Eyacuiñajji ojjaña ese nijje quea bei poani. Quea quene jjashahuaba tiitiiqui ajja esejaya mimishi cuanajo —jamaya Eyacuiñajjiya eseya huohui meesahua cani. 
\p Eꞌe, jjeya Eyacuiñajjiya ecuana huoojea canaje jama huohuime aa baꞌa: —Jesosa esejaya mimishi cuijeaꞌyojji manoꞌyonaje Eyacuiñajji ese nijje queneꞌama epoꞌyojji. ¡Ojaya epeejji cuana pocue! 
\p  
\v 20 Eꞌe, ecuana Jesosa Quitoja esohui huohuijji poani. Ohuaya ecuana huoojea canaje onijje chacohua. Eꞌe, Eyacuiñajjiya ecuana huoojea canaje ojaya esohui huohuiya miquiana huasijje. Jamajjeya ecuaaya esohui huohuiaña miquianaya Jesosaja epeejji epo meejji. Jama aña baꞌa: —¡Jesosa esejaya mimishi cuijeaꞌyojji manoꞌyonaje Eyacuiñajji ese nijje queneꞌama epoꞌyojji. ¡Jesosaja epeejji pocue, Eyacuiñajjija peaꞌai! —ecuana poani. 
\p  
\v 21 Jesosa Quito quea pame po tiitiinaje mimishiꞌama nei. Jamatii Eyacuiñajjiya jama acanaje baꞌa: —Ojjañaja mimishi cuana Jesosa Quitoja poaje. Jiquio ecua miquianaaya aquiana aboaña jama ohuaya mimishi abo caje. Jamajjeya eyaya oya quea nee nee po meeꞌyo majje ojjaña mimishi cuana enapa tiitiiꞌyojji pojjeama ca onijje jjapeequiꞌyajo —Eyacuiñajji poanaje. Jamajjeya Eyacuiñajjiya huohui canaje jama peaꞌai baꞌa: —Ojjaña Jesosa nijje jjapeequiani eyaya baña ecuea epeejji, shajjamaꞌ pojjeama —Eyacuiñajji poanaje. 
\c 6  
\p  
\v 1 Eꞌe, ecuaaya Eyacuiñajji nijjeya ojjaña huasijje esohui quea pame nee Jesosajo huohuiaña. Jamajjeya ecuaaya miquiana huohui neineiaña jama baꞌa: —¡Eyacuiñajjija esohui shajjaꞌajja majje jamaya pocue! ¡Aꞌa shajjamaꞌ pojji! Shajjamaꞌ cuana ebaꞌe meejji pojjeama eyajo Jesosa nijje. 
\p  
\v 2 ¡Eyacuiñajjija esohui shajjaꞌajjacue! Yahuajo nei nei ohuaya tehue mee ca poa jama baꞌa: 
\q1 “Jjeya nei miquianaya enijje mimiani miquiana mimishi cuijeaꞌyojji. Eyaya miquianaya shajjaꞌajjanaje. Enijje mimianijo, eyaya miquianaya baꞌe tiitii meejeꞌyo peaꞌai”. 
\m Jamaya Eyacuiñajjija esohui yahuajo nei etehueꞌyo poa. 
\p ¡Bacue oe! Jjeyahua nei Eyacuiñajji miquiana shajjaꞌajja sa poani. Jjeya nei ohuaya miquianaya baꞌe tiitii mee sa acani ojaya epeejji nei nei epojji. 
\s1 Pabo quea nee nee poanaje 
\p  
\v 3 Ecuaaya Jesosaja esohui jayojja jama atiitiiaña quea jaꞌa nee. Jamajjeya ojjañaa ecuana ba majje Jesosaja esohui shajjaꞌajja cajeꞌyo. Jamaya ameemee ajja baꞌa: —Eꞌe de, Jesosaja epeejji cuana quea mimishi nee poani. Jamajjeya ecuana ojaya epeejji po sa po ajja —jama siajje pomeya epojji pojjeama. 
\p  
\v 4 Chojja. Ecuana ba majje ojjañaa caba cahua ecuana Eyacuiñajjijo quea pame nee chacochacoani jamatii onaa napa caniya tii. Quea pame nee po tiitiiani. Eꞌe, onaaya ecuana quea nee po mee cani, ecuana niñeba cani, Jesosa nijje jjapeequianijo ebaꞌejji quea camaja poani pea cuana quea mimishi poanijo.  
\v 5 Maaya ecuana cuia majamaja canaje, jeanobiajea majamaja canaje, ecuana nijje quea quene nee po majje quea huiso jjachichaquinaje. Ecuana cojja neijo nequi majje janobajjima mimipanajajinaje. Ecuana quea camaja chacochaco majje cahui jjima tii aninaje. Quea shoe po majamajanaje peaꞌai. Jamatii ecuanaaya esohui quea pame Jesosajo huohui majamajaña, hueaꞌama nei nei ecuana poani.  
\v 6 Mimishiꞌama nei nei baꞌyani peaꞌai. Eꞌe, ecuana chacochacoani Jesosajo quea pame nee. Quea huiso esohui Jesosaja ecuanaja eba quea jaꞌa nee. Ecuana quenequene cuaji ajja pea cuana nijje. Quea bei poani. Dejja taiꞌama poani. Edojjoshahua Pameya quea pame nee ameesahua cani peaꞌai. Pea cuana ecuanaja quea jea nee poani eꞌe jojo nei peaꞌai. Jamajjeya ojjañaa ba cani ecuana Jesosa Quitoja echacojji quea jaꞌa nee.  
\v 7 Ecuanaja esohui eꞌe jojo nei poani. Eyacuiñajjiya huohui meesahua canijo ecuanaja esohui quea jaꞌa nee poani. Eyacuiñajjija emimishi cuijeaꞌyo jjejojo ecuana baꞌyani quea jaꞌa. Jamajjeya ecuaaya eshahuaja epeejji cuana mimicuiajeanobiajeaña esohui eꞌe nei mimi majje. Eyacuiñajjiya ameesahua canijo esohui eꞌe nei mimiani tii.  
\v 8 Cuanaya eya quea pame nee poanijo jamaya cuana poani baꞌa: —Pabo quea pame nee poani. 
\p Beca cuana jama poani baꞌa: —Pabo ecuea botiꞌama, Jesosaja esohui huohuijjijojo. 
\p Pea cuana ca ca jama poani baꞌa: —Paboja esohui quea jaꞌa nee. 
\p Beca cuana ca jama poani baꞌa: —Chojja, Paboja esohui shajjaꞌajja sa po ajja ca iña. 
\p Pea cuaa ca jama sajaꞌame acani baꞌa: —Pabo Eyacuiñajjija esohui huohuijji quea jaꞌa nee. 
\p —Chojja, Pabo esohui huohuijji nisho. Oya siajje pojji —jama eya niñebameya acani cuaa. 
\p  
\v 9 —Pabo ecuea eba. Ohuaya quea pame nee huohui cani —beca cuana poani. 
\p Pea cuana ca jama poani baꞌa: —¿Ae shai poani Pabo? Oya ecuea ba jjima —poani. 
\p Pea cuaa eya cuiajea sa acani. Jamatii eya eshe nequi, manoꞌyo jjima. Niñeba majje eya cuia canaje cuaa. Jamatii Eyacuiñajjiya jaahuana canaje jjejojo eya manoꞌyo jjima.  
\v 10 Quea huiso epeejji nisho poanajejo, eya quea yeno poani. Jamatii Eyacuiñajjiya eya quea bihui nee po mee cani. Eya aemaꞌ poanaje peaꞌai. Jamatii ecuea esohui shajjaꞌajja majje quea huiso Jesosaja epeejji poani, quea pame baꞌyani. Eꞌe, Jesosaja epeejji poanijo eseya quea aquiana huiso nee nee jayojja. Jiquio meshijo baꞌyanijo ca ca eya eꞌaquiana mese pojjeama. Jamatii Jesosaja epeejji poanijo ecuea quea huiso aquiana yani eyajo. 
\p  
\v 11 Ecuea epeejji cuana Conitojo baꞌe, eyaya ojjaña ecuea ejjashahuabaquijji huohuiaña quea jaꞌa nee miquiana huasijje miquianaya ecuea quea jea nee nee poanijo.  
\v 12 Eꞌe, miquiana nijje jjapee neineiquiani, miquiana quea jea nee nee poanijo. Miquianaya ca ca enijje jjapee neineiqui sa poꞌyo ajja.  
\v 13 Jamajjeya epeejji cuana, ecuea esohui miquiana huasijje jama baꞌa: —¡Jiquio ecua miya ecuea quea jea nee nee jamaya oe eya acue miquiaaya! ¡Enijje jjapee neineiquicue! —eya poani. 
\s1 ¡Dejja mimishi nijje aꞌa jjapee neineiquijji! 
\p  
\v 14 Miquianaya Jesosaja epeejji cuana poanijo ¡aꞌa nequijji Jesosaja epeejji pojjeama cuana nijje! ¡Ojaya epeejji cuana jayojja aꞌa pojji! Jesosaja ejjashahuabaquijji Edosiquiana neija ejjashahuabaquijji jama pojjeama. Pea oya, de. Jesosaja esohui quea jaꞌa nee cuaquijiji jayojja. Edosiquiana neiya ca ca quea mimishi nee nee, quea tai nee nee acani. Ojee nequi ajja Jesosaja epeejji Edosiquianaja epeejji nijje. Pea oya, de.  
\v 15 Jesosa Quitoja ejjashahuabaquijji quea pame nee nee. Edosiquianaja ca ca quea tai. Pea ojaya, de. Jesosa Quitoja epeejji cuanaja ejjashahuabaquijji quea pame. Ojaya epeejji pojjeama cuanaja ejjashahuabaquijji ca ca quea tai. Pea ojaya, de.  
\v 16 Eyacuiñajjija equi yasijje Jesosaja epeejji cuana dobiquiani ojee Eyacuiñajji bihuiaa, eyacuiñajji nisho bihuiaa pojjeama. Maya quea tai. Cuanaya Jesosaja epeejji cuana huasijje Eyacuiñajji dobiquinaje. Jamajjeya eshahuaja epeejji cuana nijje jjapeequi meemee ajja. Yahuajo nei Eyacuiñajjiya esohui huohui mee ca poa ojaya epeejji cuana huasijje jama baꞌa: 
\q1 “Miquianaya ecuea huapa pojjeama cuana poanijo, eya miquiana huasijje dobiquiani, miquiana nijje jjapee tiitiiquiani peaꞌai. Eꞌe, eya oe nei miquea Eyacuiñajji. Miquianaya jaahuana tiitiiaña peaꞌai. Miquiana ecuea epeejji cuana poani”. 
\m Jamaya pea esohui etehueꞌyo poa peaꞌai baꞌa: 
\q1  
\v 17 “Jamajjeya ¡ecuea epeejji pojjeama cuana nijje aꞌa jjapee tiitiiquijji! ¡Enijje nei oe jjapee tiitiiquicue! ¡Aꞌa quea mimishi pojji! Jamajjeya eyaya miquianaya baꞌe meejeꞌyo enijje.  
\v 18 Cuanaya eya miquianajaya Chii nei poaje. Miquianaya ecuea ebacua piona cuana, ecuea ebacua ejja cuana poajeꞌyo peaꞌai. Eyaya mi jaahuanajji quea caꞌa neeya jamaya aña”. 
\m Jamaya Eyacuiñajjiya yahuajo nei huohui ca poa. 
\c 7  
\p  
\v 1 Ecuea epeejji cuana, ¡shajjaꞌajjacue mo! Eyacuiñajjiya jiquio esohui huohui canaje esejaya ebajji, ese jaahuanajji poaniya. Jamajjeya ¡aꞌa quea mimishi baꞌejji; aꞌa quea mimishi jjashahuabaquijji peaꞌai! Miquianajaya eba Eyacuiñajjiya ojjaña mimishi cuana quea nee nee po mee cajeꞌyo tii tii. Jamajjeya ¡quea pame nee nee oe acue! ¡Eyacuiñajjija ejjashahuabaquijji jama oe pocue! ¡Oya oe shajjaꞌajjacue! 
\s1 Pabo quea bihui nee poanaje 
\p  
\v 2 ¡Eya quea jea nee acue! Eyaya miquianaya quea pame nee aꞌyonaje. Ecuea esohui quea pame poanijojoya miquianaya quea pame nee nee po meejeꞌyo. Eꞌe, miquianaya ecuea edasiajji pojjeama.  
\v 3 Eyaya jiquio esohui huohuiaña miquiana tecueajji pojjeama. Chojja. Yahuajo eyaya huohuinaje jama baꞌa: —Miquianaya ecuea quea jea nee nee. Jamajjeya eya miquiana nijje baꞌe majje quea bihui nee poaje. Cuanaya miquiana nijje nequi majje eya manojeꞌyo pojjaꞌa. Jamatii, jamaya quea pame nee miquianaya ecuea quea jea nee poanijo. 
\p  
\v 4 Ecuea eba miquiaaya ecuea esohui etehueꞌyo jayojja jama ajeꞌyo. Jamajjeya eyaya miquianajo jama huohuiaña baꞌa: —Jesosaja epeejji cuana Conitojo baꞌeya ecuea esohui etehueꞌyo jayojja jama acani —eya poani. 
\p Eꞌe, miquianajo eya quea bihui nee poani. Pea cuaa eya quea nee nee po mee cani Jesosa nijje jjapeequianijo. Jamatii eya quea bihui nee nee poani miquiana quea pame nee nee poanijojo. 
\p  
\v 5 Ecuea epeejji Conitojo baꞌe, eyaya miquianaya huohuije ecuea ebaꞌejjijo pea meshijo. Eya Masenonia meshijo nequi pea cuaa napa majamaja canaje, niñeba majamaja canaje peaꞌai. Jamajjeya eya quea ajjajja poanaje.  
\v 6 Jamatii Eyacuiñajjiya ojaya epeejji quea yeno nee nee poajo jaahuana cani. Jamajjeya ohuaya Tito huoojea caꞌyonaje e quea bihui po meeꞌyojji.  
\v 7 Eꞌe, Tito ba majje eya quea bihui nee poanaje. Ohuaya miquianajo huohui canaje quea pame jama baꞌa: —Pabo, Jesosaja epeejji cuana Conitojo baꞌeya eya, Tito, jaahuana caꞌyonaje quea pame nee. Miya ojjañaja quea jea nee poani, Pabo. Yahuajo onaaya esohui huohuijji nisho shajjaꞌajja canaje. Jamajjeya miya quea yeno poanajejo, miquea epeejji cuana peaꞌai quea yeno poanaje. Miya ona nijje quea bei po mee oꞌoya sa acani cuaa —jamaya Tito poanaje. 
\p Jamajjeya miquianaya ejo jjashahuabaquianijo, eya quea bihui nee poani. 
\p  
\v 8 Yahuajo eyaya pea tehueꞌya poa quea tecue. Ma esohuijoya miquianaya quea yeno poanaje. Quea camaja nee ma esohui etehuejji poanaje, miquiana tecueajji. Jamatii, ma etehueꞌyojo miquianaya quea yeno po tiitii ajja.  
\v 9 Eꞌe, ma esohui etehueꞌyo ba majje miquianaya quea yeno poanaje. Quea yeno po majje miquianajaya mimishi pajeaꞌyonaje. Esohui huohuijji nishoja esohui siajje shajjaꞌajja pajeaꞌyonaje peaꞌai, miquianaaya. Jamajjeya miquianajo eya quea bihui nee poani. Eꞌe, quea yeno poanajejo, Eyacuiñajjiya miquianaya baꞌe meesahua caꞌyonaje quea pame nee. Jamaya quea pame nee miquianajo.  
\v 10 Dejja cuana quea mimishi poani Eyacuiñajjiya quea yeno po mee cani oja mimishi pajeaꞌyojji. Mimishi pajeaꞌyo caꞌyajo, Eyacuiñajjiya ojaya mimishi cuana cuijea caꞌyani. Eshahuaja epeejji cuana quea yeno poani mimishi amajje. Jamatii Eyacuiñajjiya oya cuana quea nee nee po tiitii mee cajeꞌyo mimishi pajea sa poꞌyo ajjajojo.  
\v 11 Eꞌe, Eyacuiñajjiya miquianaya quea yeno po mee caꞌyonaje. Quea yeno po majje miquianaya quea pame nee poani. Shajjamaꞌ cuana, mimishi cuana miquiana nijje nequi. Ojaya mimishi cuana cajaa aña miquianaaya. Oya miquianajaya epeeꞌyojji pojjeama; miquianaya onaya jayojja jama po ajja. Quea quene poanaje peaꞌai esohui huohuijji nisho cuana nijje e siajje ajjijojo. Miquianajaya eba Eyacuiñajjiya quea nee nee po mee cajeꞌyo ojjaña mimishi cuana. Jamajjeya quea mete nee po majje mimishi cuana a sa poꞌyo ajja. Cuanaya enijje jjapee neineiqui sa poani, quea bei. Miquianajaya Eyacuiñajji quea boti nee poanijo esohui shajjaꞌajja oꞌoya sa poani. Eꞌe, miquianaya quea jaꞌa jjashahuabaquianijo, ecuea eba miquianaya mimishi poani nijje jjapeequiꞌyo ajja. Jjabahuejjaqui meesahuajeꞌyo Jesosa nijje ejjapeequijji. Jamaya quea pame nee. 
\p  
\v 12 Jamajoya eyaya yahuajo esohui tehue majje miquiana huasijje huoojeanaje. Eyaya maya esohui tehuenaje miquiana jjashahuabaqui meejji jama baꞌa: —Eꞌe de, Pabo Eyacuiñajjija huoojeaꞌyo esohui huohuijji. Oya ecuanaja quea jea nee. ¡Oja tehue jayojja jama ejjaꞌaqui o quea bihui pojji! —jamaya miquianaya jjashahuabaquinaje. 
\p Maya esohui eyaya tehuenaje dejja quea mimishi cuana tecueajji. Ma dejja cuanaja mimishijo pea cuana quea yeno poanaje. Eyaya ma esohui tehuenaje dejja quea yeno ani cuana yenoꞌama po meeꞌyojji peaꞌai. 
\p  
\v 13 Jamajjeya ecuea etehueꞌyo ba majje miquianaya quea jaꞌa jjashahuabaqui oꞌoyani. Jamajjeya eya quea bihui nee poani. 
\p Yahuajo miquiana nijje mimi jjimahuajo Tito quea yeno jjashahuabaquinaje jama baꞌa: —Jesosaja epeejji cuana Conitojo baꞌe quea mimishi jea nee nee. 
\p Jamatii miquiana nijje mimi majje Tito quea bihui nee poanaje. Jamajjeya eya quea bihui nee poanaje Titoja esohui shajjaꞌajja majje miquianajo ohua huohui cajje.  
\v 14 Yahuajo eyaya oya huohuinaje jama baꞌa: —Tito, Jesosaja epeejji cuana Conitojo baꞌe minijje jjapeequijeꞌyo. Miquea esohui shajjaꞌajja caje peaꞌai —eyaya anaje. 
\p Eꞌe, ecuea esohui Tito nijje jayojja jama aꞌyonaje miquianaaya. Jamajjeya miquianaaya quea pame anaje; eya bichoꞌama miquianajo.  
\v 15 Miquiana huasijje poqui jjimahuaja miquianaya Titoja quea boti nee pishana. Miquiana que poqui majje miquianaya ojaya quea boti nee nee. Oya quea bihui nee nee peaꞌai. Eꞌe, miquianajo jama poani baꞌa: —Eꞌe, Jesosaja epeejji cuaa Conitojo baꞌeya ecuea esohui shajjaꞌajja canaje quea jaji nee. Ohuaya ojjañaa ecuea esohui shajjaꞌajja neinei canaje eya etecuea poajeya jjejojo. Ecuea esohui jayojja jama a sa poanaje —Tito poanaje. 
\p  
\v 16 Eꞌe, ecuea eba miquianaya ecuea esohui jayojja jama poaje. Jamajjeya eya, Pabo, miquianajo quea bihui nee poani, de. 
\c 8  
\s1 ¡Jesosaja epeejji cuana baꞌe meesahuacue! 
\p  
\v 1 Ecuea epeejji cuana Conitojo baꞌe, jjeya eyaya miquianaya huohuije Jesosaja epeejji cuana Masenonia meshijo baꞌejo. Eyacuiñajjiya oya cuana ejjeshejji quia meesahua canaje Jesosaja epeejji cuana Jodea meshijo baꞌe yasijje equiajji.  
\v 2 Eꞌe jojo nei quea camaja nee nee onajaya ebaꞌejji, Masenonia meshijo baꞌeja. Aemaꞌ cuana poanaje. Jamatii onaaya ejjeshejji quia canaje quea bihui nee Jesosaja pea epeejji aemaꞌ nei cuana baꞌe meesahuajji. Quea bihui nee nee poanijo quea huiso quia sa poanaje.  
\v 3 Ecuea eba oya cuana aemaꞌ poanaje. Jamatii ejjeshejji quia canaje. Quia majje quea camaja, aemaꞌ nei poanaje. Ecuea oya cuana huohui jjima ejjeshejji quiajji, pea cuana baꞌe meesahuajji. Chojja. Jamatii quia canaje.  
\v 4 Oya cuana enijje mimi majamajanaje jama baꞌa: —¡Ecuanaja ejjeshejji dojocue! ¡Quiacue Jesosaja epeejji cuana Jodea meshijo baꞌe yasijje ona baꞌe meesahuajji! Jamaya ecuana a sa neinei poani —poanaje Jesosaja epeejji cuana Masenonia meshijo baꞌe. 
\p  
\v 5 Eya jjashahuabaquinaje jama baꞌa: —Onaaya ejjeshejji quia caje oe pojji pojjaꞌa, quea huiso pojjaꞌa. 
\p Chojja de. Oya cuana jama poanaje baꞌa: —Ojjaña ecuanaya Eyacuiñajjija esohui jayojja jama poajeꞌyo. Cuanaya ojjaña ecuanajaya aquiana ojaya poani —jamaya oya cuana poanaje—. ¡Ecuana huohuicue Eyacuiñajjija ejjashahuabaquijji! Miquea esohui jayojja jama ecuana poajeꞌyo —jamaya Jesosaja epeejji cuaa Masenonia meshijo baꞌeya huohui canaje. 
\p  
\v 6 Eꞌe, quea jaꞌa nee acanaje. Jamajjeya eya Tito nijje miminaje jama baꞌa: —Tito, ¡Jesosaja epeejji cuana Conitojo baꞌe yasijje poqui oꞌoyacue! Yahuajo miya ona nijje miminaje ejjeshejji Jesosaja pea epeejji cuana huasijje equiajji, ona baꞌe meesahuajji. Jamatii ejjeshejji huoojea jjima. Jamajjeya ¡jjeya ona nijje mimi oꞌoyacue ejjeshejji equiajjijo! ¡Jama acue baꞌa: “Jesosaja epeejji baꞌe meesahuañajo miquianaya quea pame nee poani Jesosajo” jamaya acue, Tito! —eyaya Tito huoojeaña ma esohui huohuiya. 
\p  
\v 7 Eꞌe epeejji cuana, miquianaya quea pame nee poani jama baꞌa: Jesosaja esohui jayojja jama poani. Miquianajaya esohui Jesosajo quea pame peaꞌai. Miquianajaya eba quea huiso esohui Jesosaja. Eꞌe jojo nei quea jaꞌa nee jjashahuabaquiani peaꞌai. Eya miquianajaya quea jea nee poani peaꞌai. Jamatii jjeya Eyacuiñajjiya miquianaya ejjeshejji quia meesahua cani Jesosaja epeejji Jenosanenajo baꞌe yasijje ona baꞌe meesahuajji. Jamaya quea pame peaꞌai. Onaa napa cajje oya cuana aemaꞌ nei. Napa huichaꞌa huichaꞌa canaje cuaa Jesosaja epeejji poanijojo.  
\v 8 Ecuea Tito miquiana que huoojea jjima ejjeshejji quia meeya. Chojja. Jesosaja pea epeejji cuaa jamatii ejjeshejji quia canaje quea bihui nee. ¿Aꞌa miquianaya onaya jayojja po sa poani peaꞌai? ¿Aꞌa miquianaaya quea pame nee aje peaꞌai?  
\v 9 ¡Jjashahuabaquicue Jesosaa miquianaya quea pame nee nee acanaje! Jama baꞌa: Jesosa ba jjimahuajo miquianaya aemaꞌ jayojja poanaje. Jamatii ohuaya, Jesosa Quitohua, esejaya Emeshi Mese neiya miquianaya baꞌe tiitii mee cajeꞌyo onijje eyajo quea jaꞌa nee nee. Dejja cuana huasijje poe jjimahua Jesosa baꞌeꞌyonaje eyajo quea jaꞌa nee nee. Meshi yasijje poe majje ca ca dejja cuana jayojjaya poanaje, aemaꞌ peaꞌai. Jamaya oya poanaje miquiana baꞌe tiitii meeꞌyojji eyajo. 
\p  
\v 10 Jamajjeya miquianaya ejjeshejji quiajjijo eya jama poani baꞌa: Oe shequiaja yahuajo miquianaya ebionei jjashahuabaquinaje ejjeshejji aema huasijje equiajji. Pea cuana jjashahuabaqui jjimahuajo miquianaya quia sa poanaje.  
\v 11 Eꞌe, miquianaya ejjeshejji quia sa poanaje. Jamajjeya ¡jjeya miquianajaya ejjashahuabaquijji yahuajo jayojja jama acue! ¡Miquianajaya aquiana quea huiso yanijo quea huiso quiacue peaꞌai! ¡Aꞌa quea bejjo nahue pojji!  
\v 12 Aquiana quia sa poanijo, Eyacuiñajji quea bihui nee poani eꞌaquiana mese nijje. Ojaya Eyacuiñajji quea jea nee poanijo eꞌaquiana meseja aquiana quea huiso poanijo quea huiso quia caje pojjaꞌa. Aquiana oe pojji poanijo ca ca oe pojji aquiana quia caje. Jamatii Eyacuiñajjija eba esejaya aquiana quea huiso pojjaꞌa, oe pojji pojjaꞌa. ¿Aꞌa aquiana cuana miquianajaya quea nahue?  
\v 13 Onaa napa cajje aemaꞌ nei nei ani quea camaja. Oya cuana miquianaa aquiana quiajje aemaꞌ nei epoꞌyojji pojjeama. Ma aema huasijje quea huiso aquiana quia majje miquianaya aemaꞌ nei poaje pojjaꞌa. ¡Aꞌa jamaya pojji! Chojja, jamaya eya huohui jjima. Eya jjashahuabaquiani jama baꞌa: —Oe Jesosaja epeejjija aquiana cuana quea huiso poajo epeejji aema huasijje iye huiso quia majje chamaꞌ aemaꞌ poaje. 
\p Jamaya eyaya amee sa aña.  
\v 14 Jjeya nei miquianajaya aquiana quea huiso. ¡Jesasaja epeejji aema huasijje quiacue! Quia majje oya cuana aemaꞌ pojjeama poaje. Quea jaꞌa baꞌejeꞌyo. Quijje miquianaya aemaꞌ poajo, onajaya aquiana yanijo quia cajeꞌyo miquiana huasijje pojjaꞌa. Eꞌe, ojjañaja aquiana cuana pea cuanaja aquiana cuana oya huisoajja poaje.  
\v 15 Eꞌe, esohui etehueꞌyo yahuajo nei jayojjaya jama poani baꞌa: 
\q1 “Beca eque mese cuaa oe pojji bobi chicha canaje. Pea eque mese cuaa bobi quea huiso nee nee chicha majje nahueꞌama poanaje bobijo. Jamajjeya ojjaña cuana bobijji poanaje, pea cuanaja bobi oya huisoajjaya poanaje”. 
\s1 Pabohua Tito huoojea caje Conito cuiñajji yasijje 
\p  
\v 16 Eyaya Eyacuiñajji bihuiaña jama baꞌa: —Eyacuiñajji, miyaya Tito jjashahuabaqui meenaje quea jaꞌa nee miquea epeejji cuanajo, Conitojo baꞌejo. Jamajjeya oya e jayojjaya onajo jjashahuabaquiani. Conitojo baꞌe cuana quea jaꞌa nee baꞌe mee sa acani Jesosajo. Eꞌe Eyacuiñajji, jamaya miyaya Tito ameesahuanaje —jamaya eyaya Eyacuiñajji bihuiaña. 
\p  
\v 17 Eꞌe epeejji cuana, ecuea esohui etehueꞌyo miquiana huasijje ejjeshejji aema huasijje equiajji ba majje Tito quea bihui nee poanaje. Miquiana huasijje poqui sa poani ecuea esohui etehueꞌyo huohuiya. Eyaya oya huoojea jjima. Chojja, oya jamatii poqui sa poani miquiana que.  
\v 18 Tito nijje eyaya pea dejja huoojeaña, Jesosaja epeejji peaꞌai. Maya poquinaje ojjaña Jesosaja epeejji cuana huasijje esohui Jesosajo huohuiya. Shajjaꞌajja majje ojjaña Jesosaja epeejji cuaa huohui canaje jama baꞌa: —Maaya Jesosajo quea pame nee esohui huohui cani —acanaje cuaa. 
\p  
\v 19 Jesosaja epeejji cuaa pea cuiñajji cuanajo baꞌeya jiquio epeejji babaca canaje enijje epoquijji Jenosanena huasijje ejjeshejji aema huasijje dojosahuaa. Jamaya eya ejjeshejji dojo sa neinei poani Jesosaja epeejji aemaꞌ poani yasijje ona baꞌe meesahuajji. Jamajoya pea cuana Jesosajo jjashahuabaquije jama baꞌa: —Eꞌe de, Jesosaa ojaya epeejji cuana quea jaꞌa nee ameesahua cani. Jesosa ca ca oe quea pame nee nee poani —poaje cuana. 
\p  
\v 20 Ma epeejji enijje poquianiya ohuaya ba caje eyaya eꞌe jojo nei ma ejjeshejji aema huasijje quiaña. Jamajjeya pea cuana ejo siajje epojji pojjeama jama baꞌa: —Pabo ejjeshejji siijji pojjaꞌa —pea cuana jamaya epojji pojjeama. 
\p  
\v 21 Eꞌe, eya jjashahuabaquiani jama baꞌa: —Eyaya quea pame nee ejjeshejji dojoje. Jamajjeya ojjañaa ba caje eya siipojji pojjeama. Jesosaja eba eyaya quea jaꞌa nee aña. 
\p  
\v 22 Tito nijje eyaya beca dejja huoojeaña miquiana baa. Maya ecuea eba. Oya peaꞌai quea jaꞌa nee po tiitiiani. Jesosajo chaco cani. Jjeya maya miquiana nijje quea jaꞌa nee nequije. Miquianajo jjashahuabaquiani jama baꞌa: —Jesosaja epeejji cuana Conitojo baꞌe quea pame nee poani. Quea bejjo nahue pojjeama, shajjamaꞌ pojjeama peaꞌai poani. 
\p  
\v 23 Eꞌe pojjaꞌa pea cuaa huohuiꞌajja caje: —¿Aꞌya cuae Tito? 
\p Jamajjeya ¡oya cuana huohuicue jama baꞌa: —Titohua Pabo nijjeya esohui quea pame nee Jesosaja huohui cani. Ohuaya Pabo miquiana nijje chaco meesahua cani —huohuicue! 
\p Pea dejjaa ma beca epeejji cuanajo huohuiꞌajja cajo, jama acajo baꞌa: —¿Aya acuae oya cuana huoojea canaje? —acajo, ¡oya cuana huohuicue jama baꞌa: —Jesosaja epeejji cuaa beca epeejji huoojea canaje miquiana huasijje, miquiana Jesosajo ba meesahuaa. Ohuaya Jesosajo huohui cani quea pame nee nee peaꞌai —acue! 
\p  
\v 24 Jamajjeya ¡jiquio Jesosaja epeejji cuana quea jea nee acue! ¡Oya cuana jaahuanacue quea pame nee! ¡Oya cuana shajjaꞌajjacue peaꞌai! Ma ba majje ojjaña Jesosaja epeejji cuaa ba caje miquianaya Jesosaja epeejji quea jaꞌa nee poani peaꞌai. Jamajjeya ojjañaa ba caje ecuanaja esohui quea pame miquianajo eꞌe nei poani peaꞌai. 
\c 9  
\s1 Ejjeshejji Jesosaja epeejji cuana huasijje equiajji 
\p  
\v 1 Eyaya miquiana huasijje esohui etehue majamajajji pojjeama Jesosaja pea epeejji aemaꞌ baꞌe meesahuajji.  
\v 2 Chojja. Ecuea eba miquianaya pea cuana baꞌe meesahua sa neinei poani. Jamajjeya eyaya Jesosaja epeejji cuana Masenonia meshijo baꞌe huohuinaje jama baꞌa: —Jesosaja epeejji cuaa Acaya meshijo baꞌeya ejjeshejji chicha sa acani aema huasijje equiajji. Jamaya ohuaya acanaje oe shequiaja yahuajo —jamaya eyaya pea cuana huohuinaje. 
\p Ma esohui miquianajaya shajjaꞌajja majje pea epeejji cuana ejjeshejji chicha sa poanaje peaꞌai Jesosaja epeejji aema huasijje equiajji.  
\v 3 Jjeya eyaya beca cuana, Jesosaja epeejji cuana huoojeaña miquiana huasijje. Jamajjeya ¡ecuea esohui ma ecua eyaya yahuajo huohuinaje jayojjaya oe acue! Eꞌe, ma beca epeejji cuaa miquianaya ojee iyaa caje ejjeshejji echichajji, aemaꞌ nei Jodea meshijo baꞌe yasijje equiajji. Jamajjeya miquianajaya ejjeshejji equiajji apoa poaje pea cuana poe jjimahuajo.  
\v 4 Eꞌe, Jesosaja epeejji cuana Masenonia meshijo baꞌe miquiana huasijje poeꞌyajo, miquianajaya ejjeshejji aema huasijje equiajji apoa ajjimajo quea bicho nee nee poaje miquianaya. Eya peaꞌai quea bicho poaje miquianaaya ecuea esohui jama ajjimajo. Quea bicho nee eya poaje.  
\v 5 Jamajjeya eyaya Jesosaja epeejji beca cuana huoojeaña pea epeejji cuana miquiana que poe jjimahuajo. Ohuaya miquea ejjeshejji aema huasijje equiajji chicha meesahua caje. ¡Miquianajaya esohui yahuajo jayojjaya jama acue! Jamajjeya miquianajaya ejjeshejji equiajji quea huiso poaje, miquianajaya ejjashahuabaquijji yahuajo jayojjaya. Jamajjeya miquianaaya quea bihui nee quiajeꞌyo. 
\s1 ¡Aꞌa quea dejja tai pojji; aꞌa quea nishehui pojji! 
\p  
\v 6 ¡Jiquio esohui shajjaꞌajjacue peaꞌai! Oe pojji bana majje quijje oe pojji chichajeꞌyo. Jiquio ecua esoꞌ jayojjaya jama miquianajaya ejjeshejji poaje. Jjeya quea dejja tai poanijo, quea nishehui poanijo peaꞌai oe pojji aema huasijje quiajo, quijje Eyacuiñajjiya oe pojji quia cajeꞌyo miquiana huasijje. Jjeya quea huiso quiañajo ca ca, dejja taiꞌama poanijo ca ca quijje Eyacuiñajjiya quea huiso quia cajeꞌyo miquiana huasijje.  
\v 7 Jamajjeya ¡jjashahuaba neineiquicue ache huiso miquianaya quia sa poani! ¡Quea bihui nee quiacue! Eꞌe, ¡jamatii miquianajaya ejjashahuabaquijji jayojja jama quiacue! Eyacuiñajjija quea jea nee ojaya epeejji cuana. Ejjeshejji quea bihui nee quia canijo, dejja taiꞌama poanijo peaꞌai Eyacuiñajji quea bihui nee poani.  
\v 8 Eꞌe, Eyacuiñajjija aquiana cuana quea huiso nee nee yani. Jamajjeya miquianajaya quea huiso ejjeshejji aema huasijje quia majje, jamatii ohuaya miquianajaya aquiana quea huiso po tiitii mee cajeꞌyo. Miquianaya aemaꞌ nei epojji pojjeama. Chojja. Eyacuiñajjiya miquianaya jaahuana cani.  
\v 9 Yahuajo nei nei esohui etehueꞌyo jama poa baꞌa: 
\q1 “Ojjañaa joya ejjeshejji quea huiso quia tiitii canaje aemaꞌ baꞌe meesahuajji quea pame nee poanaje. Jamajjeya jjeyahua nei Eyacuiñajjiya oya quea jaꞌa baꞌe meesahua caje. Quijje peaꞌai baꞌe tiitii mee cajeꞌyo”. 
\m Jamaya yahuajo nei nei esohui etehueꞌyo poa. 
\p  
\v 10 Eyacuiñajjiya esoꞌ quia cani ojjaña huasijje quejo equecuajji. Ohuaya bobi quia cani ojjaña bobiajji peaꞌai. Jamajjeya ohuaya miquiana huasijje esoꞌ, bobi peaꞌai quia majje, ¡miquianaaya aquiana cuana quiacue pea cuana huasijje! Jamaya quea pame nee.  
\v 11 Eꞌe, Eyacuiñajjiya miquiana huasijje aquiana mi baꞌe meejji quia cajeꞌyo. Jamajjeya miquianaaya pea huasijje aquiana o baꞌe meejji quia poquia tiitiije. Jamajoya miquianajaya aquiana quea huiso equiaꞌyo aema huasijje eya quiajje onaaya huohui caje jama baꞌa: —Eyacuiñajji ecuana jaahuanajji quea pame nee nee poani. Ohuaya Conitojo baꞌe cuana ecuana que quia meeshahua canaje quea huiso, ma ecua Pabohua huohui canaje jama acanaje —poaje quea bihui nee. 
\p  
\v 12 Ma aquiana cuana miquianaaya Jesosaja epeejji aemaꞌ cuana huasijje quiañajo, quea jaꞌa nee baꞌe meeaña. Cuanaya ma aquiana quea huiso quiañajo, onaaya Eyacuiñajji bihuia neinei cani: —Eꞌe, Eyacuiñajji, jamaya. Miya quea pame nee poani ecuana nijje —poaje. 
\p  
\v 13 Eꞌe, miquianaya dejja taiꞌama poanijo, aquiana quiañajo quea huiso ba meeaña miquiana Jesosaja epeejji quea jaꞌa nee poani. Jamajjeya oya cuana mimije jama baꞌa: —Eyacuiñajji, miyaya miquea epeejji cuana quea jaꞌa nee po meeaña. Miyaya oya cuana quea huiso aquiana quianaje. Jamajjeya miquea pea epeejji cuana huasijje aquiana quea huiso huoojea canaje ona baꞌe meesahuajji. Eꞌe, miquea epeejji cuaa Conitojo baꞌeya huohui cani oya cuana Jesosa Quitoja epeejji cuana poani. Ecuanaja eba onajaya esohui eꞌe jojo nei poani miquea esohui jayojja jama oya cuana poanijo —jamaya pea cuaa huohui caje miquianajo. 
\p  
\v 14 Jamajjeya miquianaya ojaya quea jea poanijo, Eyacuiñajji nijje mimi majje jama poaje miquianajo baꞌa: —Eyacuiñajji, miyaya quea huiso aquiana quianaje ona que. Majoya Jesosaja epeejji cuana Conitojo baꞌe quea huiso aquiana quia meesahuanaje ecuana que. Ecuana quea jea ameesahuanaje. ¡Quea pame nee poanijo, oya cuana jaahuanacue! —jamaya onaya mimije Eyacuiñajji nijje. 
\p  
\v 15 Eyacuiñajji esejo jjashahuabaquiani. Jamajjeya eyaya oya bihuiaña jama baꞌa: —Eyacuiñajji, miyaya mique Bacua Ejja huoojeanaje ecuana jaahuanaa. Quea pame nee nee poanaje miya —jamaya Eyacuiñajji bihuiaña eyaya. 
\p Mahuiso ecuea esohui ejjeshejji equiajjijo. 
\c 10  
\s1 Pabo esohui huohuijji nei nei 
\p  
\v 1-2 Jjeya eyaya, Pabohua pea esohui tehueaña. Eyacuiñajjiya eya huoojea canaje miquiana sohuihuohuiya. Jamajjeya ¡shajjaꞌajjacue mo! Jesosa Quito ese nijje quea bei poani. Jamajjeya eseya ojaya epeejji poanijo, eya miquiana nijje mimi neineiani jama baꞌa: —Beca siajjepojji cuana miquiana nijje mimiani ejo jama baꞌa: “Pabo aje oe ecuana nijje nequiahua oya caꞌaꞌama, quea mete poanaje. Quea huesha nei nequija jjejojo ca ca quea sohui bishaa, quea tecue peaꞌai poani; poe majje, cho” oya siajje poani. 
\p ¡Aꞌa maya siajjepojji cuana shajjaꞌajjajji! ¡Aꞌa o jayojja jama mimijji! E niñebajji, eyaya miquiana tecueaje poe majje. Eya quea tecue poaje beca cuana nijje ejo quea tai jjashahuabaquianijo. Oya cuana aje oe jjashahuabaquiani jama baꞌa: —Pabo Eyacuiñajjija huoojeaꞌyo jayojja jama po ajja. Ohuaya ojaya ejjashahuabaquijji jayojja jama poani, Jesosaja ejjashahuabaquijji jayojja jama pojjeama —ejo siajje poani beca cuana. 
\p  
\v 3 Chojja de. Eseya Jesosaja epeejji cuana jiquio meshijo baꞌyanijo ojjaña quea mimishi mimicuiajeanobiajea sa seya aña. Jamatii eshahuaja epeejji cuana jayojja jama jjashahuabaqui ajja eseya.  
\v 4 Eshahuaja epeejji cuaa onajaya ejjashahuabaquijji quea tai jayojja jama acani. Eya, chojja. Ecuea ejjashahuabaquijjijo pojjeama eyaya eshahuaja epeejji cuana mimicuiajeanobiajeaña. Eyacuiñajjiya ca ca eya ojaya ejjashahuabaquijji ameesahua cani. Jamajjeya ohuaya eya ojjaña joya quea mimishi nee poani mimicuiajeanobiajea meesahua cani.  
\v 5 Ecuea eba Eyacuiñajjija esohui quea jaꞌa nee. Jamajjeya beca cuana Eyacuiñajjija esohui niñeba canijo, eyaya oya cuana mete mee majje mimicuiajeanobiajeaje; jjaniñebapajeaqui meejeꞌyo. Cuanaya beca cuana Eyacuiñajjijo quea tai jjashahuabaquiani mimicuiajeanobiajeajeꞌyo peaꞌai. Eꞌe, Eyacuiñajjiya eya ameesahua canijo, beca cuana quea tai jjashahuabaquiani eyaya Jesosa Quitoja esohui jayojja jama ameejeꞌyo.  
\v 6 ¡Miquianaaya Jesosaja esohui jayojja jama acue! ¡Ojaya epeejji nei pocue! Majoya eyaya shajjamaꞌ cuana miquiana nijje nequi, ojjaña quea mimishi poani peaꞌai tecueaje. 
\p  
\v 7 Beca cuaa miquiana nijje nequiya e cojja ba majje huohui cani jama baꞌa: —Pabo caꞌaꞌama pojjaꞌa. Sohui sajeaꞌama. Eyacuiñajjija huoojeaꞌyo pojjeama, sohuihuohui sahua jjima pojjaꞌa —jamaya poani e ba pishana majje. 
\p Jamatii ecuea ejjashahuabaquijji Jesosajo onajaya eba pojjeama. Oya nei Jesosa Quitoja epeejji poso jjabaquiani. Cajjashahuabaquiahua jama baꞌa: —Pabo peaꞌai Jesosa Quitoja epeejji poani eꞌe jojo nei. Eꞌe, Pabo ecuana jayojjaya jama poani —cajjashahuabaquiahua. 
\p  
\v 8 Eꞌe, eya bichoꞌama miquiana nijje emimijji. Jama mimi majamajame eya poani baꞌa: —Eya iña iquio Eyacuiñajjija esohui huohuijji. Ohuaya eya huoojea canaje miquiana huasijje oja sohui huohuiya, miquiana ojaya epeejji quea jaꞌa nee po meeya. Eya miquiana jjabahuejjaquianijo quea yeno po mee sa poꞌyo ajja. Cajaa sa poꞌyo ajja peaꞌai —jamaya eya miquiana nijje mimiani. 
\p  
\v 9 Eyaya miquianaya jjabahuejjaquianijo, quea ajjajja po mee sa poꞌyo ajja.  
\v 10 Beca siajjepojji cuana miquiana nijje nequi ejo siajje poani jama baꞌa: —Paboja esohui etehueꞌyo quea sohui jaꞌa poani. Emeshi meseja esohui etehueꞌyo quea jaꞌa jayojja jama poani peaꞌai. Jamatii oya ecuana nijje nequianijo caꞌaꞌama poani. Ojaya esohui quea jaꞌa pojjeama peaꞌai —jamaya siajje poani beca cuana. 
\p  
\v 11 Ma siajjepojji cuana cajjabahuejjaquiahua jiquio jama baꞌa: Miquiana huasijje poqui majje jiquio ecuea esohui etehueꞌyo jayojja jama eyaya ajeꞌyo miquiana huasijje, eꞌe jojo nei. 
\p  
\v 12 Eꞌe, beca siajjepojji, esohui huohuijji nisho cuana miquiana nijje nequi mimiani jama baꞌa: —Ecuana ca ca quea pame nee nee poani. ¡Ecuana oe shajjaꞌajjacue! —jama siajje pomeya poani. 
\p Eya ca ca jjashahuabaqui sa po ajja jama baꞌa: —Pea cuaa aje oe quea tai acani. E jayojja pojjeama onaya. Eyaya ca ca oe quea pame nee aña —chojja, jamaya eya, Pabo po sa poꞌyo ajja. 
\p Ma siajjepojji, esohui huohuijji nisho cuana aje oe jama poani tii baꞌa: —Ecuanaja ejjashahuabaquijji quea jaꞌa nee nee, onajaya, chojja. Ecuana jayojjaya jama capoꞌyahua ojjaña —jamaya poani. 
\p Chojja. Quea jaꞌa pojjeama jjashahuabaquiani, de.  
\v 13 Eyacuiñajjiya ca ca eya huoojea canaje miquiana huasijje ojaya esohui huohuiya. Jamajjeya ojaya esohui eyaya huohuiaña bichoꞌama miquiana huasijje. Ojjaña huasijje ca ca huohui jjima.  
\v 14 Eꞌe, miquiana huasijje esohui Jesosa Quitojo eyaya huohuinaje. ¡Bacue! Eyacuiñajjiya eya huoojea canaje miquiana huasijje esohui huohuiya. Ojaya esohui huohuijji eꞌe jojo nei eya. Eyaya quea jaꞌa nee huohuiaña. Jiquio ecue tehueꞌyojo eya bichoꞌama.  
\v 15 Cuanaya miquianaya sohuihuohuiañajo eya siajje po ajja jama baꞌa: —Eya ee nei ojjaña huasijje esohui huohuijji nei quea jaꞌa nee. Onaya miquiana nijje chaco jjima; siajje poani —eya jama siajje pomeya po ajja. 
\p Esohui huohuijji nisho ca ca oe jama siajje pomeya poani, oe nei esohui huohuijji poso jjabaquiani. Eya ca ca quea pame nee jjashahuabaquiani jama baꞌa: —Miquianaaya Conitojo baꞌeya Jesosa Quitoja esohui jayojjaya jama quea jaꞌa añajo eya pea cuiñajji cuana huasijje esohui huohui meesahuaje Jesosaja. 
\p  
\v 16 Jamajjeya miquianaya jamaya poajo eya poqui meeje pea meshi cuana huasijje esohui quea pame nee huohuiya Jesosajo, onaja esohui huohui jjima huasijje. Esohui huohuijji pea meshi cuanajo enequijo eya ona nijje enequi tiitiijji pojjeama. Iña ca jja ca poquije, de, pea cuana huasijje Jesosaja esohui huohuiya.  
\v 17 Eꞌe, yahuajo nei esohui etehueꞌyo jama poa baꞌa: 
\q1 “¡Aꞌa jama huohuijji baꞌa: —Eyaya jamatii quea pame aña. Chojja, jamaya pojjeama. Jamaya huohuicue baꞌa: —Eyacuiñajjiya eya quea pame nee ameesahua cani. Jamajjeya eyaya quea pame aña —jamaya acue!” 
\m Yahuajo nei esohui etehueꞌyo jamaya poa.  
\v 18 Eyacuiñajji ojaya epeejji quea pame neejo mimiani jama baꞌa: —Jiquio epeejjiya quea pame nee acani. Jamaya ecuea quea boti nee. 
\p Beca cuaa ca ca huohui cani jama baꞌa: —Eya quea pame nee poani jamatii. Jamajjeya ¡ecuea esohui shajjaꞌajjacue! —jamaya esohui huohuijji nisho poani onajaya quea jea eꞌajji. Jamaya ca ca Eyacuiñajjija botiꞌama. 
\c 11  
\s1 Esohui huohuijji nishojo Pabo quea yeno mimiani 
\p  
\v 1 Dejja ma ohua acanajejo jjashahuaba tiitiiquianijo eshoꞌi jama mimijajiani, de. Jamatii ma eya anajejo mimianijo, ¡aꞌa jja oe enijje quea quene pojji! ¡Shajjaꞌajja socue mo!  
\v 2 Eꞌe, miquianaya Eyacuiñajjija quea jea nee nee poanijo, ecuea quea jea nee nee poani peaꞌai. Eꞌe, eyaya miquianaya Jesosa nijje jjapee coo meesahuaquinaje. Jiquio ecua ejeajjiya ojaya ebacuase mimishiꞌama nei huana mee sa acani jayojja jama eyaya miquianaya Jesosa nijje jjapeequi mee sa aña quea boejea nee, eshahua nijje pojjeama.  
\v 3 Ecuea eba miquianaya Jesosaja epeejji eꞌe jojo nei po sa neinei poani. Jjeya ca ca eya quea mete jjashahuabaquiani miquianajo, esohui huohuijji nishohua miquianaya quea tai jjashahuabaqui mee ca chanaꞌ. Jiquio ecua Edosiquiana neiya ma ecua peyo jayojjaa Ema dasia ca poa jayojja jama esohui huohuijji nishohua miquianaya dasia ca chanaꞌ; Jesosa nijje jjapee pajea meequi ca chanaꞌ.  
\v 4 Eꞌe de, miquianaaya aje oe ojjaña esohui huohuijji nisho shajjaꞌajjaña. Oya cuana Jesosajo siajje poani, Edojjoshahua Pamejo siajje poani peaꞌai. Esohui quea pame Jesosajo ecuanaja esohui jayojja jama pojjeama huohui cani. ¿Apiojji acuaeya oya cuana shajjaꞌajjaña soꞌo?  
\v 5 Oya cuana ca jja ca oe Eyacuiñajjija huoojeaꞌyo esohui huohuijji eꞌe jojo nei poso nequiaa aña; eya ca jja nequiaa ca oe cajaa aña. Chojja, eya ca ca iña iquio eꞌe jojo nei Eyacuiñajjija huoojeaꞌyo.  
\v 6 Eꞌe pojjaꞌa oya cuana mimiani quea bishaa nee. Jamatii esohui quea pame Jesosaja ecuea eba nei nei. Jamaya miquianajaya eba. Eꞌe, eyaya ma esohui huohui neineinaje ojjaña cuiñajji cuana huasijje. 
\p  
\v 7 Eyaya Eyacuiñajjija esohui quea pame Jesosaja huohuinaje miquiana huasijje sosemaꞌ. Eyaya ecuea ebaꞌejji jjeshenaje peaꞌai ecue chaco sosejje. Miquea echacojji jayojja jama poanaje eya. Jamaya miquianaya Eyacuiñajjija esohui ba meesahuanaje. ¿Aꞌa jamaya quea tai, quea pame pojjeama? Chojja. Jamatii beca cuana jama poani baꞌa: —Pabo pojjaꞌa Eyacuiñajjija huoojeaꞌyo pojjeama. Jamajjeya mi sosequia mee cani esohui huohui cani sosejje —jama siajje pomeya beca cuana poani. 
\p  
\v 8 ¡Bacue! Miquiana huasijje esohui huohuiañajo, Jesosaja epeejji cuaa pea cuiñajjijo baꞌeya eya sosequia canaje. Eya sohuihuohui meesahua canaje. Miquianaya ca ca oe Eyacuiñajjija esohui shajjaꞌajja majje jamatii sosequia jjima.  
\v 9 Eꞌe, Jesosaja epeejji cuaa Masenoniajo baꞌeya poe majje ecuea ebaꞌejji ye canaje. Yahuajo miquiana nijje baꞌeya eyaya miquianajaya bobi ijjia jjima: —¡Che mo oe esohui huohui sosejje! —ajjima ecuea miquianaya. Jamaya eyaya sosemaꞌ esohui huohui poquia tiitiije quijje peaꞌai. 
\p Jamajjeya miquianajaya jama yajji pojjeama baꞌa: —Pabo ecuaaya bobianaje, quea huiso baꞌe meesahuanaje —jamaya eꞌajji pojjeama miquianajaya. 
\p  
\v 10 Chojja. Jamajjeya ojjaña cuaa Acaya meshijo baꞌeya ba caje eyaya esohui huohuinaje miquiana huasijje sosemaꞌ. Jesosa Quitohua ba cani eya eꞌe jojo nei mimiani.  
\v 11 Jamaya eyaya huohuiaña miquiana ecuea quea jea nee nee poanijo. Jamaya Eyacuiñajjija eba.  
\v 12 Eꞌe, eyaya Jesosajo huohui tiitiije miquiana huasijje sosemaꞌ. Jamajjeya esohui huohuijji nishohua jama huohuime yajji pojjeama baꞌa: —Ecuana Pabo jayojja chacochacoani —jamaya eꞌajji pojjeama onajaya. 
\p Esohui huohuijji nisho nequiaa sosequianaje esohui huohui cani sosejje.  
\v 13 Oya cuana ca ca oma Eyacuiñajjija huoojeaꞌyo nisho poani, Eyacuiñajjija huoojeaꞌyo pojjeama. Miquianaya dasia cani; Jesosaja huoojeaꞌyo esohui huohuijji poso nequiaa aña.  
\v 14 Eꞌe de, Edosiquiana nei Satanasa jama oya cuana poani. Ohuaya, Satanasaa ojjaña dasia cani; Jesosaja esohuidojojji quea pame nee poso acani cuaa.  
\v 15 Jamajjeya ojaya echacojji cuaa miquianaya dasia cani peaꞌai jama baꞌa: Oya cuana Eyacuiñajjija echacojji quea pame nee poso nequiaa aña, de. ¡Poe oꞌoya majje Jesosaa oya cuana quea nee nee po mee cajeꞌyo tii tii! 
\s1 Pabo Jesosaja huoojeaꞌyo poanijo quea nee poa 
\p  
\v 16 Jamajjeya eyaya miquianaya huohui oꞌoyaje quea bicho pishana. ¡Aꞌa eya eshoꞌi jama mimiani poso ajji ma eya anajejo mimianijo! ¡Miquiaaya ejo jamaya poso aña, jamatii eya che shajjaꞌajja socue! Ma eya Jesosajo anajejo mimije soꞌo eshoꞌi jama, onajaya quea jea eꞌajji nisho.  
\v 17 Jiquio ca ca ecuea esohui; eya jjeya Jesosa jayojja jama pojjeama mimiani. Eya eshoꞌi jama ma eya anajejo mimiani quea huiso.  
\v 18 Jamatii quea huiso esohui huohuijji nisho eshoꞌi jama ojaya huapa pojjeamajo, ma ohua acanajejo peaꞌai mimimimiani. Jamajjeya ona jayojja jama eya peaꞌai mimije. Eya ca ca iña quea bicho mimije.  
\v 19 Miquianaya aje oe jjashahuabaquiani jama baꞌa: —Ojjaña ecuea eba. Eya ca ca iña jjadasia meequi ajja esohui huohuijji nisho cuana —jjashahuabaquiani. 
\p Jamajjeya shajjaꞌajjaña joya eshoꞌi jama joya ohua acanajejo mimiani peaꞌai.  
\v 20 Eꞌe, ma esohui huohuijji nishohua miya chaco mee cani sosemaꞌ, minijje baꞌyani sosemaꞌ, miquea aquiana mesenaꞌyo sa acani, miya tanacua cani, cojja cuiapojojea cani peaꞌai quea bicho epo meejji. Jamatii miquianaaya aje oe oya cuana shajjaꞌajjaña, de.  
\v 21 ¿Apiojji acuae jja oe shajjaꞌajjaña? Ecuea ca ca jamaya ajjima. Jamajojoya ¿aꞌa eya caꞌaꞌama poso nequiaa aña, de? ¿Aꞌa ma esohui huohuijji nisho cuana eshoꞌi jayojja jama mimiani onaja quea jea eꞌajji? Eꞌe. Jamajjeya eya jamaya mimije peaꞌai.  
\v 22 Esohui huohuijji nisho jama poani baꞌa: —Ecuanaya jja iquio Emeo dejja cuana, Emeo esohui mimiani. 
\p ¡Dee! Eya peaꞌai Emeo dejja, Emeo esohui mimiani. 
\p —Ecuana Isaeni dejja cuana —poani peaꞌai ma esohui huohuijji nisho. 
\p Eya peaꞌai Isaeni dejja, onaya jayojjaya. 
\p —Ecuanaja etiiquiana Amajama bajjani —ma esohui huohuijji nisho poani. 
\p Amajama ecuea etiiquiana peaꞌai, de. 
\p  
\v 23 —Ecuana jja oe Jesosa Quitohua huoojea canaje esohui huohuijji —oya cuana siajje poani. 
\p Eya ca ca eꞌe jojo nei Jesosa Quitoja huoojeaꞌyo, de. Jjeya eya eshoꞌi jama mimiani. Jamatii eyaya janobajjima nei chaconaje Jesosa nijje. Esohui huohuijji nishohua aje oe oe pojji chaco cani. Dejja mimishi cuaa eya jeanobiajea huichaꞌa huichaꞌa canaje esohui eya ehuohui poaje jjejojo. Oya cuana, cho. Jodio etii cuaa eya cuia majamaja canaje Jesosaja esohui eya ehuohui poaje jjejojo. Ma esohui huohuijji nisho pea cuanaja cuia neinei jjima. Eya beshahua nei manoꞌyonaje; quea huiso mano huichaꞌa huichaꞌaꞌajjaꞌyonaje.  
\v 24 Eꞌe, ojjañaa ba canijo, Jodio etii cuaa eya quea huiso cuiasejja neineiꞌajja canaje, 39 cuiasejjame acanaje, de, huaca jee ejeapashajjajjaa. Cuiasejja majamaja canaje, me oejje huisome cuiasejjame acanaje; pea meshijo cuia, pea meshi cuanajo cuia ca iña acanaje cuaa, de. Beshahua nei ca iña manoꞌyonaje mo, de.  
\v 25 Jodio cuaa eya cuiasejja canaje acui sisiya, pea beca peejjima cuiasejjame acanaje peaꞌai. Jaja canaje peaꞌai meiya eya esohui ehuohui poaje jjejojo. Beshahua nei eya huiꞌiꞌyonaje, pea beca peejjima huiꞌime poanaje. Eꞌe de, bishe ai cuana jaanobiquinaje bae ai yasijje. Jamajjeya oe mecajje, oe pojjajo peaꞌai eya bae aijo huepee biajje jjeejjee baꞌeꞌyonaje.  
\v 26 Cuanaya eya poqui huichaꞌa huichaꞌanaje pea cuiñajji cuana huasijje esohui huohuiya. Poquije beshahua nei eya manoꞌyonaje yohuajo baꞌa: cuei quea cuejipashi neijo, siipojji cuanajo, Jodio cuanajo, Jodio pojjeama cuanajo peaꞌai. Cuiñajji quea quemojo, ebiojo peaꞌai dejja mimishi cuaa napa cajje eya beshahua nei manoꞌyonaje. Bae aijo beshahua nei huiꞌiꞌyonaje peaꞌai. Jesosaja epeejji nishohua cuia cajje beshahua nei eya poquijeyoꞌyonaje peaꞌai.  
\v 27 Eyaya chaco neineinaje; cahui jjima poanaje peaꞌai. Quea camajajo hueahueaꞌyonaje. Quea mano poanaje. Quea shoe poanaje. Quea naba taja nee nee poanaje. Bobimajo manoꞌajjaꞌyonaje. Eya quea huoe nei nei poanaje, daqui moomaꞌ poanaje peaꞌai.  
\v 28 Eꞌe, quea camaja ecuea ebaꞌejji. Cuanaya ojjaña pojjajo eya jjashahuaba majamajaquiani ojjaña Jesosaja epeejji cuana jaahuanajji.  
\v 29 Jamajjeya Jesosaja epeejji nei cuana quea mete, caꞌaꞌama poanijo, eya quea yeno nee nee jjashahuabaquiani. Oya cuana quea mimishi poajo, mimishi pajea mee sa neineiaña eyaya. Jamaya eya poanaje. 
\p  
\v 30 Esohui huohuijji nishohua miquianaya dasia canijo, eya camimi majamajaquiahua ecuea ebaꞌejjijo. Jjeya ca ca eyaya miquianaya huohuije pea esohui. Ma ba majje miquianaaya baje eya quea mete, dejja caꞌaꞌama jayojja jama poani.  
\v 31 Eyacuiñajji esejaya Emeshi Mese nei Jesosaja Chii. ¡Oya cabihuia tiitii cahua! Ojaya eba eya eꞌe jojo nei mimiani jama baꞌa: Yahuajo Aneta emeshi mese poa Damasico cuiñajjijo. Ohuaya ojaya echacosahuajji cuana huoojea canaje e saꞌajjaꞌyohua ojjaña ejiojjijje, baꞌyo majje e jeanobiajeajji.  
\v 32 Jamatii eya ojaya iña jjima, de. Eya Damasicojo nequi quehua poquinaje mecajje.  
\v 33 Eꞌe, Jesosaja epeejji cuaa mei jiyojo nequiya equi huejjajje eya jjepai aijo jjabioquiajo, jeaoquea caꞌyonaje cuaa jjonojo. 
\c 12  
\s1 Jesosaa Pabo jjacahuibaqui mee canaje ojaya ebaꞌejji eyajo 
\p  
\v 1 Eya eshoꞌi jama ma eya añajo mimi majamajani miquiana sohui huohuijji nisho eshajjaꞌajja poaje jjejojo. Jjeya ca ca eyaya miquianaya huohuije pea esohui, ma Jesosaa eya jjacahuibaqui mee canaje huohuije.  
\v 2 Yahuajo nei quea shequiaja huiso, 14 shequiajame yahuajo Jesosaa eya ojaya eꞌanijji eyajo jjacahuibaqui mee ca poa. Eya jjacahuibaquinaje pojjaꞌa. Eꞌe pojjaꞌa eya eshe dojosohuaqui ca poa pojjaꞌa. Ecuea ba jjima. Eyacuiñajjija ca ca oe eba.  
\v 3 Eꞌe, eya pojjaꞌa eshe ba mee ca poa. Jjacahuibaqui mee ca pojjaꞌa mo poa. Eyacuiñajjija ca ca oe eba. Ecuea ca ca ba jjima.  
\v 4 Jamatii ecuea eba maya: Jesosaa eya ba mee ca poa; ohuaya eya dojosohuaqui ca poa ojaya ebaꞌejji Quea Pame Nee bajjani yasijje, Panaiso bajjani yasijje. Jomajo eyaya shajjaꞌajjanaje esohui quea bame nee nee. Maya eyaya miquianaya huohui meemee ajja, yajja huohuime yajji jojoya. Eꞌe, Jesosa eyajo baꞌe enijje miminaje.  
\v 5 Jamatii eya ma esohuijo mimi huichaꞌa huichaꞌa ajja eshoꞌi jama. Chojja. Eyaya miya ba meeje eya quea caꞌa nee nee pojjeama. Eꞌe jojo nei Jesosa enijje miminaje eyajo.  
\v 6 Jamajjeya ma eya anajejo mimi huichaꞌa huichaꞌajo jamatii eya esohui huohuijji nisho jama pojjeama mimiani. Ecuea esohui ca ca eꞌe jojo nei. Miquiana nijje baꞌeya eyaya chaco neineinaje miquianaaya banaje. Shajjaꞌajjanaje ecuea esohui Jesosaja esohui huohuiañajo. Jamajjeya ejo jjashahuabaquiani eꞌe jojo nei miquianaya. Jamajjeya ma eya anajejo ehuohui majajji pojjeama eshoꞌi jama, de, miquiana ejo jama ehuohui poaje jjejojo baꞌa: —Pabo ca ca quea pame nee nee Jesosaja epeejji quea caꞌa tii tii —miquianaaya ehuohui poaje jjejojo. 
\p Chojja, eya jamaya pojjeama. 
\p  
\v 7 Jamajjeya Jesosaa eya ojaya ebaꞌejji quea pame nee nee eyajo ba mee majje Eyacuiñajjiya eya quea nee po mee canaje emanomeejjijo pojjaꞌa. Jamajoya eya quea caꞌa tii tii ejjashahuabaquijji pojjeama. Jiquio ecua Edosiquiana neija Satanasaja huoojea e cuiajji jayojja jama jiquio emanomeejji pojjaꞌaa eya quea nee nee po tiitii mee cani.  
\v 8 Eya Jesosa nijje miminaje pea beca peejjima mimime. Jama poanaje baꞌa: —Jesosa Quito, eya quea nee nee nequi. ¡Che mo oe neeꞌama po meecue! —eya mimime poanaje. 
\p  
\v 9 Jamatii Jesosaa eya sajaꞌa canaje jama baꞌa: —Pabo, eꞌe jojo nei eyaya miya jaahuanaje. Eyaya miya chaco meesahuaje. Miya caꞌaꞌama poanijo, chaco neinei meesahuaje, jamatii quea nee —acanaje. 
\p Jamajoya eya caꞌaꞌama poanijo quea bihui nee poani. Eꞌe, ecuea eba Jesosaa quea caꞌa nee nee poaniya eya quea jaꞌa nee ojo chaco meesahua cani.  
\v 10 Jamajjeya eya quea nee nee poanijo, ecuea ebaꞌejji quea camaja poanijo peaꞌai jamatii eya quea bihui nee poani. Pea cuaa eya napa canijo, mimijajianijo peaꞌai, jamatii quea bihui poani. Jesosaja esohui huohuijjijojo, jamaya dejja mimishiya eya acani. Jamatii eya quea bihui nee poani tii. Eꞌe, eya caꞌaꞌama poanijo, Jesosaa eya quea caꞌa nee po mee cani. 
\s1 Pabo Jesosaja epeejji cuana Conitojo baꞌejo quea yeno poanaje 
\p  
\v 11 Eya eshoꞌi jama ma eya anajejo mimi majamajaje miquiana esohui huohuijji nisho eshajjaꞌajja poaje jjejojo. Oya cuana aje oe Eyacuiñajjija huoojeaꞌyo esohui huohuijji poso jjabaquiani. Eya ca ca iña eꞌe jojo nei Eyacuiñajjija huoojeaꞌyo. Miquianaaya ca jja ca oe eya banaje Jesosajo chacochaco aninaje. Jamatii ejo huohui jjima jama baꞌa: —Pabo eꞌe jojo nei Jesosaja huoojeaꞌyo esohui huohuijji —miquiaa mo che ehuohuinaje ese. 
\p Miquianaaya mo oe che quea pame nee mi huohuinaje, jamajjeya eya ecuea ebaꞌejjijo camimiquiahua eshoꞌi jama, de.  
\v 12 Eꞌe, eya miquiana nijje nequi Jesosaa eya atiitii mee canaje quea huiso ma dejjaa ajjima acani amee canaje miquianajaya ebajji. Jamajoya miquea eba eya Jesosaja huoojeaꞌyo esohui huohuijji.  
\v 13 ¿Aꞌa eyaya miquianaya quea pame pishana anaje, Jesosaja epeejji cuana pea cuiñajjijo baꞌe quea pame anaje pojjaꞌa? Chojja. Ohuaya e baꞌe meejji quia canaje. Maya eyaya jjeshenaje. Miquianajaya quia jjima. Jamatii ecuea bobijo huohuiꞌajja jjima. Eꞌe pojjaꞌa eyaya miquianaya ehuohuiꞌajjanaje ese jama baꞌa: —¡Jesosaja pea epeejji jama sosequiameya mo che acue esohui huohuiaña sosejje! —eꞌanaje ese. Jamatii jamaya mimi jjima eya. 
\p  
\v 14 Yahuajo eya miquiana baa poquinaje beca poquime. Jjeya eya apoa. Poquije oꞌoya miquiana baa. Poqui majje eyaya ebaꞌe meejjijo mimimimi ajja poaje. Chojja. Eya miquianajaya ejjeshejji sa po ajja. Miquianaya ca ca eya sa poani ecuea epeejji pojji. Jiquio ecua eshoꞌi cuaa oja chii, ojaya enaese peaꞌai bobia ajja jayojja jama eyaya miquea bobi sa ajja. Jamajjeya eya mique chii jayojja jama poanijo eya mi jaahuanajji poani. Miquianaya ca ca e jaahuanajji pojjeama.  
\v 15 Jamajjeya eyaya miquianaya Jesosajo ba meesahuaje sosemaꞌ. Jamajjeya eꞌe pojjaꞌa eya aemaꞌ poaje. Cuanaya eyaya quea huiso chacoje miquiana esohui ba meesahuajji. Eya pojjaꞌa hueahueaje miquianaya jaahuanajo. Jamatii. Ecuea miquianaya quea jea nee nee. ¿Apiojji acuae eya miquianajaya quea jea pishana, miquianaya ecuea quea jea nee nee poanijo? 
\p  
\v 16 Miquianajaya eba eya miquiana nijje nequi camajaꞌama miquianajo poa. Chojja. Miquianajaya bobi ijjia jjima ecuea. Jamatii beca cuana aje ejo siajje poani jama baꞌa: —Pabo siajjepojji. Ecuana dasia caꞌyonaje —siajje oya cuana poani. 
\p  
\v 17 Chojja de, ecuea miquianaya dasia jjima. Esohui huohuijjija ma eya huoojeanajeja miquianaya dasia jjima peaꞌai.  
\v 18 Eyaya Tito huoojeanaje jama baꞌa: —¡Poquicue miya Conito huasijje esohui huohuiya Jesosajo! ¡Jesosaja epeejji oe dojocue minijje! —poanaje eya. 
\p ¿Aꞌa Titohua miquianaya dasia canaje? Chojja. Ohuaya eyaya jayojjaya acanaje. Miquianaya ojaya quea jea nee peaꞌai ecuea jayojjaya. 
\p  
\v 19 ¿Aꞌa cuae miquianaya ecuea etehuejo jama jjashahuabaquiani pojjaꞌa baꞌa: —Pabohua aje pojjaꞌa jja oe huohui cani oya eꞌe jojo nei Jesosaja huoojeaꞌyo esohui huohuijji. Ecuana Jesosaja huoojeaꞌyo nisho poani —aꞌa jamaya miquianaya jjashahuaba taiquiani? 
\p ¡Bacue oe! Eyacuiñajjija eba eya Jesosaja esohui jayojja jama eꞌe jojo nei huohuiaña. Epeejji cuana, miquianaya ecuea quea jea nee. Jamajjeya eyaya ojjaña aña miquiana Jesosa nijje quea jaꞌa nee ejjapeequi meesahuajji.  
\v 20 Jjeya eya poquije miquiana baa. Miquianajo quea yeno jjashahuabaquiani jama baꞌa: —¡Dee! Eꞌe pojjaꞌa quea mimishi poani oꞌoya: Jjamimicuiajea nobiajeaquiani, onaja aquiana jea ba cani, quea quene nee nee poani, quea aquiana nahue poani, quea nishehui poani, mimijajiani, pea cuanajo maimaiani, oya jjeshe sa pojji peaꞌai jjejojo mimiani, quea shajjaquijjo, shajjamaꞌ poani peaꞌai pojjaꞌa —jamaya eya jjashahuabaquiani miquianajo, Conitojo baꞌe cuanajo. 
\p Miquianaya jamaya poajo eya quea yeno nee nee poaje. ¿Aꞌa miquianaya quea yeno poaje miquianajaya mimishijo eya tecueajje?  
\v 21 Eꞌe, miquiana quea mimishi poani ba majje eya quea tecue nee nee po chanaꞌ. Eya quea yeno nee, quea bicho poaje miquianajo. Eꞌe pojjaꞌa eya paje miquiana ba majje, ca beca cuanaja mimishi pajeaꞌyo jjimajo, de, quea mimishi baꞌyanijo, quea apo, quea tai, de. Jamaya miquianaya poanijo, eya quea yeno nee nee poaje ba majje. 
\c 13  
\p  
\v 1 Yahuajo eya miquiana huasijje poquinaje becanejjijji peaꞌai poquime poanaje. Jjeya eya poquije oꞌoya miquiana baa. Jamajjeya ¡bacue! Eyacuiñajjija esohui yahuajo etehueꞌyo jama poa baꞌa: 
\q1 “Oe dejja peajo maimaiani ¡aꞌa shajjaꞌajjajji! ¡Becaa, pea beca peejjimaa oya jayojja huohui cajo, shajjaꞌajjacue!” 
\m Jamaya tehue ca poa yahuajo nei. 
\p  
\v 2 Jamajjeya jjeya eya miquiana huasijje poquije oꞌoya pea beca peejjima poquime epojji. Yahuajo miquiana nijje nequiya eyaya huohuinaje jama baꞌa: —Ojjaña joya quea mimishi po tiitiiani, joya jjeya nei quea mimishi poani peaꞌai eyaya tecueajea neineije poe oꞌoya majje —jamaya eyaya jjeya miquianaya huohui oꞌoyaña. 
\p  
\v 3 Eꞌe, Jesosa Quitohua eya huoojea canaje miquiana huasijje ojaya esohui huohuiya. Ohuaya eya huoojea cani miquiana jjabahuejjaqui meejji peaꞌai. Joya miquiana nijje baꞌe quea mimishi poani tii tii quea nee nee po mee cajeꞌyo, ohuaya.  
\v 4 ¡Bacue! Dejja maseya Jesosa yahuajo nei acui ecueataꞌapeejo me cacajea cajje oya manoꞌyonaje. Jesosaja ca ca oya cuana jeabichajea jjima. Jamatii Eyacuiñajjiya quea caꞌa nee nee poaniya Jesosa shequi mee ca oꞌoyanaje; quea caꞌa nee nee baꞌe tiitii mee cani. Yahuajo Jesosa caꞌaꞌama jayojja poa. Jamaya peaꞌai eya caꞌaꞌama. Jamatii Jesosaa eya quea jaꞌa nee ojaya esohui huohui meesahua cani miquiana jjabahuejjaqui meejji. 
\p  
\v 5 ¡Jjashahuabaquicue! ¿Aꞌa Jesosaja esohui jayojja jama aña miquianaaya? Jesosa Quito miquiana nijje yani. ¿Aꞌa miquianajaya ba jjima? Jesosa miquiana nijje pojjeama ca miquianaya ojaya epeejji nishojo, de.  
\v 6 Eya ca ca iña Jesosaja esohui huohuijji eꞌe jojo nei.  
\v 7 Jamajjeya eya Eyacuiñajji nijje mimiani miquiana mimishi pajea meesahuajji jama baꞌa: —Eyacuiñajji, ¡miquea epeejji cuana Conitojo baꞌe mimishiꞌama nei baꞌe meesahuacue! —eya poani. 
\p Eya jama jjashahuabaqui ajja baꞌa: —Jesosaja epeejji Conitojo baꞌeca mimishiꞌama baꞌe ba majje pea cuaa eya bihuia caje, esohui huohuijji nei —jamaya eya po ajja. 
\p Chojja, miquianaaya eya Eyacuiñajjija huoojea pojjeama poso aña; esohui huohuijji nisho poso aña; jamatii eya Eyacuiñajji nijje mimiani miquianaya ojaya epeejji quea jaꞌa nee ebaꞌe meesahuajji.  
\v 8 Eꞌe, dejjaja Eyacuiñajjija esohui eꞌe nei ehuoojea pajea meeꞌyojji pojjeama ojjaña huasijje. Jamajjeya ecuea esohui eꞌe jojo nei, siajje pojjeama.  
\v 9 Jamajjeya miquianaya quea pame, mimishiꞌama baꞌe ba majje eya quea bihui nee poaje. Jamajjeya miquianaya etecueajji pojjeama, jamatii tecuea jjimajo eya Eyacuiñajjija huoojeaꞌyo quea jaꞌa nee pojjeama poso aña. Jamajjeya eya Eyacuiñajji nijje mimiani miquianajo jama baꞌa: —Eyacuiñajji, ¡miquea epeejji cuana quea jaꞌa nee nee baꞌe meesahuacue oe! —eya poani. 
\p  
\v 10 Jamajoya miquiana huasijje poqui jjimahuaa eyaya esohui tehueaña miquianajaya mimishi epajeaꞌyojji. Eꞌe, eya Eyacuiñajjija huoojeaꞌyo esohui huohuijji, miquiana jjabahuejjaqui meejji. Eyacuiñajjija eya huoojea jjima miquiana janobajjima nei tecueajeaa quea yeno nee nee epo meejji. Chojja, ohuaya eya huoojea canaje miquiana quea jaꞌa nee baꞌe meesahuaa. Jamajjeya mi ba majje eyaya miquianaya etecueajeajji pojjeama mimishiꞌama ba majje. 
\p  
\v 11 Mahuiso ecuea esohui. 
\s1 Esohui oe yejje nei etehueꞌyo 
\p Ecuea epeejji cuana, ¡quea bihui nee pocue! ¡Shajjaꞌajjacue ecuea esohui! ¡Jama acue! ¡Jjashahuaba neineiquicue quea jaꞌa nee nee ebaꞌejji! ¡Ojee Jesosa nijje jjapeequicue! ¡Quea bei nee pocue! Jamaya poajo, Eyacuiñajjiya minijje ani tiitiijeꞌyo. Miquianaya ojaya quea jea nee nee. Oya ca ca oe quea bei nee nee. 
\p  
\v 12 ¡Ojjaña Jesosaja epeejji nijje mimicue quea bei! 
\p  
\v 13 Ojjaña enijje nequiya miquianaya huohuiꞌajja cani jama baꞌa: —¿Achajja acuae nequiana soꞌo? —onajaya ebajji. 
\p  
\v 14 ¡Esejaya Emeshi Mese nei Jesosa Quitohua miquianaya cajaahuana cahua! Eyacuiñajjija miquianaya quea jea nee. ¡Onijje cabaꞌe tiitii mee cahua! ¡Edojjoshahua Pame miquiana nijje cajjapeequiahua tii tii! 
\p Mahuiso. Eyaya, Pabohua jiquio esohui tehueꞌyonaje. Apoa.