\id 1TI - Ese Ejja NT -Bolivia 2012 (DBL -2013) \h 1 TIMOTEO \toc1 Paboja Etehueꞌyo Timoteo Huasijje Ebionei \toc2 1 Timoteo \toc3 1 Ti \mt2 PABOJA ETEHUEꞌYO TIMOTEO HUASIJJE EBIONEI \mt1 1 TIMOTEO \c 1 \s1 Pabohua esohui tehue canaje Timoteo que \p \v 1 Timoteo, eyaya esohui tehueaña mi que miquea ebajji. Eya Pabo, Jesosa Quitoja esohui huohuijji. Jamaya Eyacuiñajjiya, Jesosa Quitohua peaꞌai eya huoojea canaje. Eyacuiñajjiya esejaya mimishi cuana cuijea jeyojeyo caꞌyonaje. Jesosa Quitohua eseya baꞌe tiitii mee cajeꞌyo onijje, esejaya ejjashahuabaquiꞌyojji quea pame jayojja. \v 2 Timoteo, miya ecuea ebacua ejja jayojja poani Jesosa nijje jjapeequianijo. Jamajjeya eyaya esohui tehueaña mi que. \p Eyacuiñajji esejaya Chii ai eyajo ani; Jesosa Quito eseja Emeshi Mese nei poani peaꞌai. ¡Ohuaya miya cajaahuana cahua quea pame nee! ¡Mijo cajjashahuabaquiꞌyahua quea pame nee peaꞌai! ¡Miya quea bei nee capo mee cahua peaꞌai! \s1 ¡Esohui eꞌe nei pojjeama aꞌa shajjaꞌajjajji! \p \v 3 Timoteo, ecuea esohui minijje Masenonia meshi yasijje poquianijo jama eyaya huohuije oꞌoya baꞌa: ¡Epeso cuiñajjijo nequicue! Jamajjeya miyaya pea esohui huohuijji cuana huoojeacue jama baꞌa: —Esohui eꞌe nei pojjeama Jesosajo ¡aꞌa huohui oꞌoyajji! Esohui eꞌe nei pojjeama cuana, esohui quea huiso etiiquianaja peaꞌai ¡aꞌa shajjaꞌajjajji! \v 4 Ma esohui cuanajo jjashahuabaqui majje dejja cuana mimicuiajeanobiajea cani cuaa. Jamajjeya ¡oya cuana eꞌe jojo nei Jesosaja epeejji cuana ca ca jjabahuejja neineiqui meecue! ¡Aꞌa oe esohui quea quehua shajjaꞌajjajji! \v 5 Eꞌe, Eyacuiñajjija esohuijo esohui huohuijji cuana jjashahuabaqui majje mimishi a sa poꞌyo ajja poani. Quea jjashahuabaqui pame poani peaꞌai. Jamajjeya Jesosaja esohui eꞌe jojo nei jama acanijo peaꞌai pea cuana eꞌe jojo nei quea jea nee acajeꞌyo. \v 6 Jamaya po ajja esohui huohuijji shaja. Jamajjeya oya cuana esohui quea jaꞌa pojjeamajo mimimimiani. \v 7 Moisesija esohui etehueꞌyojo huohui sa poani. Ma esohui ojaya ba jjima; quea quehua ojaya. Jamatii mimi neineiani esohui huohuijji shaja cuana. \p \v 8 Jamaya esejaya eba baꞌa: Moisesija esohui etehueꞌyo cuana quea pame nee. ¿Apiojji acuae Moisesiya esohui tehue ca poa? Quea jjashahuabaqui jaꞌa po majje ca oe ¡Moiseija esohui etehueꞌyo jayojjaya jama acue! \v 9 ¡Bacue oe! Eyacuiñajjiya Moisesi esohui tehue mee ca poa dejja quea pame tecueajji pojjeama. Cho, tehue mee canaje shajjamaꞌ cuana tecueajji. Dejja shajjamaꞌ jama poani baꞌa: Esohui etehueꞌyo jayojja jama aꞌajja; emeshi meseja esohui jama a sa po ajja peaꞌai; Eyacuiñajji shajjaꞌajja sa po ajja; quea tai baꞌyani; quea jjashahuabaqui tai poani; Eyacuiñajjijo jjashahuabaqui ajja; oja chii quecuajji poani; oja nae quecuajji poani; pea cuana quecuajji poani peaꞌai. \v 10 Eꞌe, shajjamaꞌ cuana pea cojjojji poani; pea dejja see huejja cojjojji poani; pea epona so cojjojji poani; peaja ebacua sii majje quiajji poani; pea jeameejji poani; siajjepojji poani; oya esohui pajeaꞌyojji poani; peaja esohuijo siajje poani peaꞌai; Eyacuiñajjija esohui etehueꞌyo jama po ajja peaꞌai. \v 11 Eꞌe, jiquio Moisesija etehueꞌyo Eyacuiñajjija esohui quea pame nee nee. Maya eya Eyacuiñajjiya huohui meesahua cani. Oya quea caꞌa nee nee; oe nei quea pame nee nee eya jaahuana cani, Eyacuiñajjiya. \s1 Eyaya Jesosa Quito bihuiaña ohua sohuihuohui meesahua caniya jjejojo \p \v 12 Esejaya Emeshi Mese neija, Jesosa Quitoja eba ojaya esohui pajeaꞌyo ajja tii tii, eya. Jamajjeya ohuaya eya huoojea caꞌyonaje ojaya esohui huohuiya. Jamajjeya eyaya Jesosa Quito bihuiaña ohua sohuihuohui meesahua caniya jjejojo. \v 13 Yahuajo aje eya Jesosa nijje mimijajiꞌyonaje, ojo quea tai miminaje, ojaya epeejji cuana iña meeꞌyonaje ejeanobiajeajji. Jamatii, eya jjashahuabaqui jjimahua, oya ecuea ba jjimahuajo, Jesosa Quito ejo quea tecue jjashahuaba tiitiiquiꞌyo ajja poanaje, de; \v 14 ejo quea pame nee jjashahuabaquinaje de, esejaya Emeshi Mese nei, Jesosa Quito. Jamajoya jjeya eya ojaya epeejji nei poani; ohuaya eya quea jea nee nee acani, de. \p \v 15 ¡Bacue jiquio esohui eꞌe nei nei, quea pame nee poani! Ojjaña cuaa caba neinei cahua jama baꞌa: Jesosa Quito jiquio meshi yasijje poeyanaje ojjaña cuanaja mimishi cuana cuijeaꞌyohua. Eya jamaya jjashahuabaquiani baꞌa: Ojjaña dejja cuana quea mimishi pishana; eya ca ca quea mimishi nee nee poanaje. \v 16 Jamatii Jesosa Quito ejo quea pame nee jjashahuabaquinaje, de. Jamajjeya oya enijje tecueꞌama poanijo, pea cuaa ba cani oya tecueꞌama enijje, oya tecueꞌama dejja mimishi cuana nijje, ca onijje jjapeequiꞌyajo. Baꞌe tiitii mee cajeꞌyo Eyacuiñajji nijje. \p \v 17 ¡Emeshi Mese nei ejjashajjaꞌajjaqui! ¡Ejjabihuia tiitiiqui peaꞌai! Eyacuiñajji ese huoojeajji poani nequi tiitiijeꞌyo. Eꞌe, oe nei nei Eyacuiñajji yani; pea chamaꞌ. Jamajjeya oya dejja cuanaja ecojja bajji pojjeama. Jamaya capoahua. \s1 Jamaya pea cuana cahuohui cahua Timoteohua \p \v 18 Eꞌe Timoteo, miya ecue bacua ejja jayojja jama poani. Jamajje eyaya miya huoojeaña ecuea esohui huohuiya pea esohui huohuijji cuana huasijje. Yahuajo pishana pea cuaa miya huohui canaje jama baꞌa: —Timoteo, quijje miya esohui huohuijji quea pame nee nee poajeꞌyo —acanaje cuaa miya. \p Jamajjeya ¡esohui eꞌe jojo nei janobajjima nei huohuicue quea bihui nee, dejja quea caꞌa jayojjaa! \v 19 ¡Eyacuiñajjija esohui eꞌe nei shahuaba neineicue! ¡Quea jaꞌa nee baꞌecue eꞌe jojo nei ojaya esohui jayojja jama! Beca cuana jama a sa poꞌyo ajja jjejojo poquiquehuaꞌyonaje. Jamajjeya aemaꞌ nei nei jayojja jama poanaje. Esohui eꞌe jojo nei pajea caꞌyonaje, Jesosa Quitoja. \v 20 Jamaya poanaje dejja bajjani Imeneo, Anejano cuanaya. Jamajje eyaya oya cuana cajaa aꞌyonaje. ¡Edosiquiaa canapa cahua! Jamajjeya ¡oya cuana cajjabahuejjaquiahua Eyacuiñajji nijje emimijaji pajeaꞌyojji! \c 2 \s1 Jesosaja epeejji cuana ojjaña cuanajo camimiquiahua Eyacuiñajji nijje \p \v 1 Ebionei eyaya huohuiaña jama baꞌa: ¡Eyacuiñajji nijje mimicue! Eseya cuana Eyacuiñajji nijje camimiquiahua ojjaña cuanajo. Jamajjeya Eyacuiñajjija epeejji cuana jama ameecue baꞌa: —Ecue Chii ai, Eyacuiñajji, ¡eya baꞌe meesahuacue! ¡Ojjaña cuana baꞌe meesahuacue peaꞌai! Ecuaaya miya bihuiaña. \v 2 Jamajjeya ¡ojjaña cuana jaahuanacue! ¡Emeshi mese cuana, emeshi meseja echacojji cuana peaꞌai huohui meesahuacue quea bei nee! Jamajjeya ecuanaya miquea esohui jayojja jama quea jaꞌa nee baꞌyanijo quea bei nee nequijeꞌyo —jamaya acue cuana. \p \v 3 Eꞌe, jamaya onijje mimianijo Eyacuiñajji quea bihui nee po meeaña, eseyaya. Ohuaya esejaya mimishi cuana cuijea caꞌyonaje, de. \v 4 Ojjañaja mimishi cuana cuijea neineiꞌyo sa poani peaꞌai. Ojaya esohui eꞌe nei ba meesahua sa poani peaꞌai. \v 5 Oya ojjaña nahue sa poani. Eꞌe, Eyacuiñajji eꞌe jojo nei oe nei yani dejja cuiñajji. Cuanaya oe nei yani Jesosa Quito. Eꞌe, Eyacuiñajji dejja quea mimishijo quea tecue poani. Jamajjeya Jesosa Quito Eyacuiñajji nijje mimiani ojjaña dejja mimishi cuanajo. Eyacuiñajji quea bei ona nijje poajeꞌyo. Jesosa Quito Eyacuiñajji; oya dejja peaꞌaiya poanaje. \v 6 Oya manoꞌyonaje ojjañaja mimishi cuijea meeꞌyojji sosejje. Jamaya oya sa poanaje. Jamajoya ojjaña cuana baꞌe tiitii mee sa poani Eyacuiñajji nijje eyajo. \v 7 Jamajjeya Jesosaa huoojea canaje ojaya esohui huohuiya. Eꞌe jojo nei, siajje pojjeama, ohuaya eya huoojea caꞌyonaje Jodio pojjeama cuana huasijje ojaya esohui eꞌe nei huohuiya. Jamajjeya ojjaña cuana eyaya Jesosajo jjabahuejjaqui meejeꞌyo. \s1 Jamaya caꞌa cahua Eyacuiñajjija equijo \p \v 8 Majoya eyaya miya huohuiaña jama baꞌa: Eseya, ojjaña meshi cuanajo baꞌe cuana peaꞌai camimiquiahua Eyacuiñajji nijje ojaya equijo. Onijje mimianijo ¡aꞌa quea mimishi pojji! ¡Aꞌa quea quene pojji pea cuana nijje! ¡Aꞌa jjamimicuiajea nobiajeaquijji peaꞌai! \p \v 9 Majoya eyaya miya huohui meeaña epona cuana jama baꞌa: —Epona cuana, ¡daqui quea pame nee huoshocue! ¡Aꞌa daqui huoshojji quea bicho epo meeꞌyojji! ¡Aquiana quea nahue neeya ehuojja aꞌa ijjia caꞌa meejji! ¡Mei siyosiyo quea nahue nee nee, eijji quea nahue nee nee peaꞌai aꞌa yiijji! ¡Daqui quea nahue nee nee aꞌa huoshojji peaꞌai, eponaa! —jamaya acue, Timoteo, jamajjeya peaja ejea bajji pojjeama. \p \v 10 Timoteo, ¡epona cuana jama acue peaꞌai baꞌa: —Epona cuana, ¡miya Eyacuiñajji bihuiajji poanijo quea jaꞌa nee nee baꞌecue! \v 11 ¡Jjabahuejjaquicue, Jesosaja epeejji nei pocue! ¡Esohui huohuijjiya esohui huohui canijo jjashajjaꞌajjaquicue! ¡Aꞌa mimi neineijji! —jamaya epona cuana acue! \p \v 12 Eyaya epona cuana huoojea ajja dejja cuana huasijje esohui huohuiya. Cuanaya ¡aꞌa dejja cuana huoojeajji eponaa! Cho, jamaya quea pame pojjeama. Epona ca oe cajjashajjaꞌajjaquiahua. \v 13 Eꞌe, Eyacuiñajjiya ebionei dejja Adana bajjani pana coo caꞌya poa. Majoya Adana panaꞌyo majje epona Ema bajjani pana caꞌya poa. \v 14 Edosiquianaja Adana dasiaꞌyo jjima poa; epona ca ca oe dasia caꞌya poa. Dasia cajje shajjamaꞌ poanaje. Quea mimishi acaꞌyonaje Emaa. \v 15 Jamajjeya bacua cuayanijo epona quea nee nee poani. Jamatii, Eyacuiñajjiya eponaja mimishi cuana cuijea cajeꞌyo peaꞌai ca ojaya esohui jayojja jama jjashahuabaquianijo, ojaya epeejji poanijo. (Eyacuiñajjiya epona cuana cuaqui yasijje huoojea ajja ojaya epeejji cuana poanijo.) \c 3 \s1 Jesosaja epeejji jaahuanajji cuana jamaya capoahua \p \v 1 Timoteo, ¡pea esohui shajjaꞌajjacue! Jiquio esohui eꞌe nei, baꞌa: Dejja cuana Jesosaja epeejji cuana jaahuana sa poanijo, jamaya quea pame nee. \v 2 Eꞌe Timoteo, jamajjeya miyaya Jesosaja epeejji jaahuanajji epojji jama huohuicue baꞌa: —¡Quea pame nee baꞌecue! Jamajjeya peaa miya etecueajji pojjeama. ¡Ehuanase oe nei huanacue! ¡Quea jaꞌa nee jjashahuabaquicue, yajjajjaꞌama! Jamajjeya quea mimishi baꞌe ajja. ¡Quea pame nee peaꞌai baꞌecue pea cuana nijje! ¡Jjapeequicue pea cuana nijje! ¡Quea jaꞌa nee Eyacuiñajjija esohui huohuicue! \v 3 ¡Ecahuishi, ejjisese quea sese nee nee aꞌa ishijji! ¡Aꞌa jjacuiaquijji! Cho. ¡Quea bei pocue ojjaña nijje! ¡Aꞌa quea tecue pojji! ¡Aꞌa quea bejjo huiso sa pojji! \v 4 Ojjaña cuana miquea equijo baꞌe jaahuanacue jama baꞌa: ¡Miquea ebacua cuana miquea esohui jayojja jama po meecue! ¡Jjashajjaꞌajjaqui meecue peaꞌai! —jamaya Jesosaja epeejji jaahuanajji epojji acue, Timoteo. \p \v 5 Eꞌe, Jesosaja epeejji jaahuanajjiya ojjaña cuana ojaya equijo baꞌe jaahuanahuana ajjajo Jesosaja epeejji cuana jaahuana ajja peaꞌai poaje. \v 6 Timoteo, ¡Jesosaja epeejji jjeya nei jjapeequi aꞌa huoojeajji Jesosaja epeejji jaahuanaa! Oya shajjamaꞌ po chanaꞌ; quea jaꞌa huohui ajja. Jamajjeya Eyacuiñajjiya oya tecuea ca chanaꞌ. Jamaya Eyacuiñajjiya Edosiquiana shajjamaꞌ poanijo tecueajea caꞌyonaje yahuajo nei nei. \v 7 Eꞌe, Jesosaja epeejji jaahuanajji quea huiso shequiajajo jjapeequiani cabaꞌeyahua quea pame nee. Jamajjeya Jesosaja epeejji pojjeama cuaa ojo huohui caje jama baꞌa: —Eꞌe, oya dejja quea pame nee poani tii. \p Oya quea tai poajo ca ca pea cuaa oya tecueajea cajeꞌyo. Edosiquianaa pea cuana onijje mimijaji mee ca chanaꞌ, dasia ca chanaꞌ. Jamajjeya onaa tecuea cajje quea yeno po majje quea mimishi po chanaꞌ. \s1 Jesosaja epeejjija ebaꞌesahuajji cuana jamaya capoahua \p \v 8 Timoteo, ¡Jesosaja epeejjija ebaꞌesahuajji cuana babacaquicue! Jama acue cuana baꞌa: —¡Quea jaꞌa nee baꞌecue! ¡Eꞌe jojo nei nei mimicue! ¡Aꞌa quea huiso ishijji, aꞌa huoojji! ¡Aꞌa quea dejja tai pojji! ¡Aꞌa edasiajji pojji peaꞌai! \v 9 ¡Ojjaña Eyacuiñajjija esohui eꞌe nei jama atiitiicue quea jaꞌa nee! Yahuajo ma esohui Eyacuiñajjija dejja cuana ba meesahua jjima; jjeya ba mee cani quea huiso —jamaya oya cuana acue, Timoteo. \p \v 10 Cuanaya ¡Jesosaja epeejjija ebaꞌesahuajji cuana babaca jjimahua oya ba neineicue! ¡Oya jjabahuejjaqui meecue peaꞌai! ¡Quea pame nee poanijo, oya huoojeacue Jesosaja epeejji baꞌesahuaa! \p \v 11 Jesosaja epeejjija ebaꞌesahuajji cuanaja ehuanase cuanaya jama acue baꞌa, Timoteo: —¡Quea jaꞌa nee baꞌecue, epona! ¡Aꞌa quea mimijjequijea pojji! ¡Aꞌa ishiꞌishijji! ¡Jesosaja epeejji cuana baꞌe meesahuacue; nishehuiꞌama pocue! —jamaya miyaya oya cuana acue, Timoteo. \p \v 12 Eꞌe Timoteo, Jesosaja epeejjija ebaꞌesahuajji babaca majje oya cuana jiquio jama acue baꞌa: —¡Oe ehuanase huanacue! ¡Miquea ebacua cuana, ojjaña miquea equijo baꞌe peaꞌai jaahuanacue quea jaꞌa nee! \v 13 Eꞌe, miyaya quea jaꞌa nee Jesosaja epeejji baꞌesahuañajo, onaaya miya ojjañaa shajjaꞌajja caje quea bihui nee. Jesosa Quitoja esohui bichoꞌama nei huohuime aje, ¡quea jaꞌa nee acue! \p Eꞌe Timoteo, ¡Jesosaja epeejji quea pame nee babacacue Jesosaja epeejji baꞌesahuajji! Jamaya apoa. \s1 Eyacuiñajjija equijo ojaya epeejji jamaya capoahua \p \v 14 Timoteo, jiquio pea esohui cuana eyaya tehueaña mi que. Eya mi baa poqui sa poani quijje pishana. \v 15 Eꞌe pojjaꞌa jjeya eya epoquijji pojjeama mi que. Jamajjeya eyaya mi que esohui tehueaña mi huohuijji achajja Jesosaja epeejji cuana poaje soꞌo quea pame nee epojji. Ecuea esohui etehueꞌyojo miyaya ba meeje cuana. Eꞌe, Eyacuiñajji ca ca enequi eshe tii tii. Ojaya epeejji cuana ojjaña meshijo baꞌyani. Oya cuana Eyacuiñajjija huapa pojjeama jayojja jama poani. Ojaya esohui eꞌe nei ojjaña cuana ba meesahua cani, Eyacuiñajjiya. \v 16 Jamaya eꞌe jojo nei baꞌa: Eyacuiñajjija esohui eꞌe nei, quea pame nee nee. Ma esohui yahuajo ojaya ba mee jjima poa. Jjeya ojaya esohuijo eseya quea jaꞌa nee baꞌejeꞌyo. Jamaya ojaya esohui Jesosa Quitoja baꞌa: \q1 “Eyacuiñajji jiquio meshi yasijje poeyanaje; dejja jayojjaya yamijji baꞌya poa. Edojjoshahua Pameya huohui canaje quea pame nee oya. Eyacuiñajjija esohuidojojji cuaa oya ba canaje. Ojaya epeejji cuaa ojo huohui canaje Jodio pojjeama cuana huasijje. Quea huiso dejja cuaa ojjaña meshi cuanajo oja sohui shajjaꞌajja majje jjabahuejjaqui caꞌyonaje. Quijje Eyacuiñajjiya oya jjequisohua caꞌyonaje eya huasijje”. \m Jamaya yahuajo nei Isaiaa tehue ca poa. \c 4 \s1 Beca cuana Eyacuiñajji nijje poquipajeanaje \p \v 1 Timoteo, pea esohui eyaya huohuije esohui huohuijji nishojo. Yahuajo nei Edojjoshahua Pameya huohui ca poa jama baꞌa: —Quijje Jesosa Quito poe oꞌoya jjimahuajo, Eyacuiñajjija esohuijo jjabahuejjaqui majje beca cuaa ojaya esohui jayojja jama apajea cajeꞌyo. Eshahua cuana shajjaꞌajja caje. Eshahuaja esohui tai cuana jayojja jama acaje. Eshahua cuana aje oe jjadasiaquijji, de. \v 2 Ojaya esohui eꞌe nei pojjeama. Eshahua cuaa beca dejja cuana siajje po mee cani. Jamajjeya ma dejja cuana siajje po majje bichoꞌama poani. \v 3 Jama siajje pome poani baꞌa: —¡Eponajo aꞌa jjahuanaquijji! ¡Aꞌa beca bobi cuana ijjiajji; quea ajja coma! ¡Eshahuaa cuia caje! —poani. \p \v 4 Chojja. Eyacuiñajjiya ojjaña bobi cuana pana caꞌya poa eꞌijjiajji; quea pame nee. Jamajjeya Jesosaja epeejji cuaa esohui eꞌe nei ba majje, Eyacuiñajji bobijo bihuia majje peaꞌai ojjaña bobi quea pame cuana caꞌijjia cahua. \v 5 Jamajjeya Eyacuiñajji nijje mimi majje, ojaya esohui mimi majje peaꞌai quea jaji nee caꞌijjia cahua bobi cuana. \s1 ¡Jesosaja echacojji quea pame nee pocue! \p \v 6 Timoteo, pea esohui eyaya tehueaña mi que Jesosa Quitoja jama baꞌa: ¡Esohui cuana ojo Jesosaja epeejji cuana huasijje huohui majamajacue miyaya! Jamajjeya oya cuana baꞌe meesahuaje quea pame nee. ¡Eyacuiñajjija esohui eꞌe nei cuana ba huichaꞌa huichaꞌacue! Miya ojaya esohui huohuijji quea jaꞌa nee poaje peaꞌai. Ma esohui eꞌe nei Jesosa Quitojo yahuajo shajjaꞌajja majje jamaya ahuichaꞌaꞌyonaje miyaya, Timoteo. \v 7 ¡Etiiquianaja esohui quea quehua aꞌa shajjaꞌajjajji, Eyacuiñajjija esohui cuana jayojja jama pojjeama! Onaajaya esohuiya quea pame baꞌe mee nisho cani. ¡Aꞌa jamaya pojji! Timoteo, ¡miyaya oe Eyacuiñajjija esohui jayojja jama amajamajacue! \v 8 Jamaya acue baꞌa: Chaco tiitii majje miquea eyami quea caꞌa poaje. Jamaya quea pame pishana. Eyacuiñajjija esohui jayojja jama atiitii majje ojaya epeejji quea jaꞌa poaje. Jamaya quea pame nee nee. Jamaya poanijo Eyacuiñajjiya miya jjeyahua nei quea pame nee baꞌe mee caje; manoꞌyajo, baꞌe tiitii mee cajeꞌyo eyajo peaꞌai. \p \v 9 Eꞌe, jiquio esohui eꞌe nei nei. Jamajjeya ¡ojjañaa cashajjaꞌajja tiitii cahua! \v 10 Jamajoya Eyacuiñajjija esohui eꞌe nei poanijo ecuana janobajjima nei Jesosaja epeejji cuanajo chacochacoani. Pea ecuana nijje janobajjima mimijajiani. Jamatii Eyacuiñajji eshe yani; o epoe oꞌoyajjijo ecuaaya ishoaꞌajjaña. Ohuaya ojjaña onijje jjapeequi meeꞌyo sa acani. Ojjaña joya eꞌe jojo nei poani ohuaya mimishi cuijea cajeꞌyo. \v 11 Jamajjeya ¡jiquio esohui cuana huohui neineicue! ¡Ojjaña cuana jjabahuejjaqui meecue miyaya, Timoteo! \s1 ¡Quea pame nee baꞌecue, Timoteo! \p \v 12 Timoteo, miya edejja shoꞌi pishana poani. Jamatii pea cuaa miquea esohui cashajjaꞌajja cahua. Jamajjeya ¡quea jaꞌa nee Jesosa Quitojo mimicue, miya! ¡Quea jaji nee oe pocue! ¡Pea cuana quea jea nee acue! ¡Eyacuiñajji nijje jjapee tiitiiquicue eꞌe jojo nei! ¡Ojaya epeejji nei nei pocue! ¡Quea jjashahuabaqui jaꞌa nee oe pocue peaꞌai! Jamajjeya ojjaña Jesosaja epeejji cuana mi jayojjaya poaje. Quea pame nee nee acajeꞌyo cuaa. \p \v 13 Eya, Pabo poeje quijje pishana mi baa. E poe jjimahuajo, ¡Eyacuiñajjija esohui huohuicue ojjaña joya Jesosaja epeejji ejjachichaqui ani yasijje! ¡Ojjaña cuana jjabahuejjaqui meesahuacue; Jesosaja esohui ba meesahuacue peaꞌai! \v 14 Yahuajo Jesosaja epeejji etii cuaa miya huoojea sa poanijo mijo huohui canaje jama baꞌa: —Timoteo quijje esohui huohuijji quea pame nee poajeꞌyo. \p Jamajjeya onaa huoojea cajje miya Eyacuiñajjiya esohui huohui meesahua canaje. ¡Maya aꞌa pajeaꞌyojji! ¡Jamaya po tiitiicue Eyacuiñajjijo! \v 15 Jamajjeya ¡Eyacuiñajjija esohui ba neineicue! ¡Ojaya esohuijo jjashahuaba tiitiiquicue peaꞌai! Jamajjeya ojjañaa miya ba caje jjeya esohui ba neineiꞌyonaje; yahuajo miquea bajea jjima poanaje. \p \v 16 Eꞌe, ¡miquea esohui jayojja jama baꞌe tiitiicue quea pame nee! ¡Esohui eꞌe nei huohui huichaꞌa huichaꞌacue! Jamajjeya miya poquiquehua ajja eshahuaja ejiojji tai yasijje. Pea cuana miquea esohui shajjaꞌajja majje cuaqui yasijje epoquiꞌyojji pojjeama peaꞌai. \c 5 \s1 ¡Jamaya baꞌecue Jesosaja epeejji cuana nijje! \p \v 1 Pea esohui eyaya, Pabohua tehueaña mi que, Timoteo: ¡Edejja tii aꞌa tecueajji! ¡Quea jea acue! Quea mimishi poajo, ¡onijje mimicue, mique chii nijje jama mimimeya pocue! ¡Oya ba meesahuacue peaꞌai! ¡Mique chahua jayojja jama jaahuanameya acue eshoꞌi cuana! \v 2 ¡Epona tii nijje mimicue quea pame nee! Quea mimishi poajo, ¡miquea enaese nijje mimiani jayojjaya jama mimimeya pocue! Epona shoꞌi cuana quea mimishi poajo, ¡mique jjoꞌi nijje jayojja jama mimimeya oe pocue! Eꞌe, ¡epona cuana nijje oe quea pame nee nee pocue! \s1 Eꞌahuemano cuanajo huohui canaje Pabohua \p \v 3 Timoteo, miyaya Jesosaja epeejji cuana eꞌahuemanojo jama huohuicue baꞌa: —¡Eꞌahuemano cuana baꞌe meesahuacue quea pame nee, ca ebacua etii chamajo! \v 4 Eꞌahuemanoja ebacua cuana yanijo, oja osecua cuana yanijo ohuaya cajaahuana cahua oja nae; oja yano mese cuanaya cajaahuana cahua oja equijo. Nishehuiꞌama capoahua. ¡Oja chii etii, oja nae epona tii poꞌyajo peaꞌai cabobia cahua! Eshoꞌyahua eseya eseja naeya bobia ca poa. Jamaya eseyaya eseja nae ajeꞌyo ohua jaahuana ca poa sosejje. Jamaya Eyacuiñajjija quea boti nee nee. \v 5 Beca eꞌahuemano quea yeno nee nee poani; oja bacua cuana chamaꞌ, oja osecua cuana peaꞌai chamaꞌ. Jamajjeya eꞌahuemano aemaꞌ Eyacuiñajji nijje jjapeequiani. Ebacua etii chamajo Eyacuiñajji nijje mimi huichaꞌa huichaꞌani ojjaña pojjajo, mecajje peaꞌai. Onijje mimiani pea cuanajo peaꞌai. Jamajjeya Eyacuiñajjiya pea cuana baꞌe meesahua cani quea pame nee. \p \v 6 Beca cuana eꞌahuemano quea mimishi poani. Yajjajjaꞌama. Poquiquehuani cuaqui yasijje, Eyacuiñajji nijje jjapeequi jjima jayojja jama poani. \v 7 Jamajjeya ¡jiquio esohui cuana huohuicue eꞌahuemanoja bacua cuana huasijje, Jesosaja epeejji cuana huasijje! Jamajjeya pea cuanaja oya cuana etecueajji pojjeama. \v 8 Eꞌe, esejaya huapa pojjeama cuana, ojjaña eseja equijo baꞌe mi jaahuana majje eseyaya Eyacuiñajji cajaa aña. Jamaya quea tai nee nee. Pea cuana Eyacuiñajjija esohui ba po jjima cuana ca ca quea tai pishana poani. \p \v 9 Jamajjeya ¡Jesosaja epeejji eꞌahuemano quea pame nee miquianaaya baꞌe meesahuacue! Ca joya jama baꞌyani baꞌa: Eꞌahuemano epona tii, pea beca peejjima dejjaja pea ejiojji cuana huiso shequiajame, 60 shequiajame etiijo; pea yahuejo jjahueaquiꞌyo jjima; \v 10 ojjaña cuana ojo quea pame mimianijo peaꞌai, ohuaya ebacua quea pame nee tii mee caꞌyonajejo, pea cuana ojaya eba pojjeama bobia canajejo peaꞌai, pea cuanaja equi shabojeajji epo peaꞌai; emanojaa cuana jaahuana canajejo peaꞌai, quea pame nee ahuichaꞌa huichaꞌa caꞌyonajejo peaꞌai, ¡ma eꞌahuemano baꞌe meesahuacue quea pame nee! Eꞌe, oja bajjani catehuequiahua pea eꞌahuemano etii quea pame cuana nijje Jesosaja epeejji cuanaja ebaꞌe meesahuajji. \p \v 11 Ecuea ehuohuijji eꞌahuemano etii pishanajo jama baꞌa: Eꞌahuemano cuana etii pishana ca ca eꞌahuemano etii nei jayojja jama pojjeama; chacochaco ajja Jesosa Quitojo. ¡Aꞌa ojaya bajjani tehuejji pea eꞌahuemano etii quea pame nijje! Quea dejja jea po oꞌoya majje jjahueaquije oꞌoya. Jesosa Quito nijje jjapeequi pajeaꞌyo chanaꞌ. \v 12 Jamajjeya beca cuana ojaya esohui ma ecua oya Jesosa Quito nijje poanaje jama eꞌajji pojjeama. Eꞌe, yahuajo ohuaya huohui canaje jama baꞌa: —Ecuana ejjahueaqui oꞌoyajji pojjeama; Jesosa Quitojo nei chacochacojeꞌyo tii tii —poanaje. \p Ma o Jesosa Quito nijje jama miminaje pajea caꞌyonaje. Jamajjeya Jesosaja epeejji cuaa oya cuana tecuea cajeꞌyo. \v 13 Eꞌahuemano eshoꞌi pishana chacochaco ajjajo quea huea poaje. Poqui majamajaje ojjaña equi cuana huasijje anicuaa. Pea cuana niñeba caje pojjaꞌa. Ojjaña cuanajo quea miminaa nee nee poanijo mimijaji chanaꞌ. \v 14 Timoteo, jamajjeya eya eꞌahuemanojo jjashahuabaquiani jama baꞌa: Eꞌahuemano cuana etii pojjeama cajjahueaqui oꞌoyahua. Ojaya ebacua cuana catii mee cahua; oja equijo cachacochacoquiahua peaꞌai. Jamaya poanijo mimishiꞌama nei. Jamajjeya Jesosaja epeejji pojjeama cuana ojaya epeejji cuana nijje tecuetecue ajja poaje. \v 15 Eya jamaya mimiani oe pojji eꞌahuemano cuana nijje, ma Jesosa nijje jjapeequi pajeaꞌyani nijje, Edosiquiana nijje jjapeequi sa poani nijje peaꞌai. \p \v 16 Jamajjeya Jesosaja epeejji cuaa eꞌahuemano oja huapa pojjeamaa cajaahuana cahua ojaya equijo; ¡aꞌa oya Jesosaja pea epeejji cuana jaahuana meejji! Jamajjeya Jesosaja epeejjiya eꞌahuemano jaahuana caje, ca joya ebacua etii chamajo. \s1 Jesosaja epeejji jaahuanajji etii \p \v 17 Jesosaja epeejji jaahuanajji cuaa Jesosaja epeejji quea pame jaahuana canajejo, cabaꞌe meesahua cahua Jesosaja epeejji cuaa. Eꞌe, ohuaya Eyacuiñajjija esohui etehueꞌyo huohui canaje; onaya jjabahuejjaqui mee canaje peaꞌai. Jamajjeya ¡cabaꞌe meesahua cahua cuaa! \v 18 Eꞌe, yahuajo nei jamaya Moisesija esohui etehueꞌyo poa baꞌa: \q1 “Anaꞌaiya anoso ai dojo cani edaasa biajje. ¡Jamajjeya anoso ai oe pojji quiacue eꞌijjiajji!” \m Yahuajo nei jama poanaje peaꞌai baꞌa: “¡Echacojjiya chaco cajo sosequiacue!” Jamajjeya ¡Jesosaja epeejji jaahuanajji sosequiacue ohua chaco canaje sosejje! \p \v 19 Oe dejjaa Jesosaja epeejji jaahuanajji tecuea cajo, ¡aꞌa shajjaꞌajjajji! ¡Beca, pea beca peejjima pojjaꞌa pea jayojja peaꞌai mimime poajo, shajjaꞌajjacue! \v 20 Jesosaja epeejji jaahuanajji quea mimishi po huichaꞌa huichaꞌanijo, ¡tecueaquicue ejjabahuejjaquijji, ojjañaa ba caqui, ojjaña jjabahuejjaquijji! Jamajjeya pea cuana mimishijo quea mete poaje. \p \v 21 Timoteo, Eyacuiñajjiya, Jesosa Quitohua, esohuidojojji quea pame cuaa cojja ba canijo peaꞌai, eyaya miya huohuiaña jama baꞌa: ¡Miyaya ecuea esohui jama acue! ¡Jjashahuabaquicue quea jaꞌa nee Jesosaja epeejji jaahuanajji cuana tecuea jjimahuajo! ¡Oya jayojjaya ojjaña apeaꞌaicue! \p \v 22 ¡Jesosaja epeejji jjeya nei jjapeequi aꞌa huoojea cuajijji Jesosaja epeejji jaahuanaa! ¡Oya ba neineicue huoojea jjimahuaa! Oya quea mimishi poajo, pea cuaa miya tecuea ca chanaꞌ. ¡Quea jaꞌa nee jjashahuaba tiitiiquicue! Peaa mimishi acanijo, ¡ona nijje aꞌa quea mimishi pojji! \p \v 23 Timoteo, miquea see ai quea nee po huichaꞌa huichaꞌanijo ¡oe pojji acuijjajja na, uva na quea sese pishana ishicue, ena oopana pojjeama! \p \v 24 Jamajje jjeyahua nei beca cuaa mimishi quehuajje pojjeama acani; ojjañaa ba cani. Eyacuiñajjiya oja mimishi cuanajo quea nee nee po mee cajeꞌyo quijje pishana. Pea cuaa mimishi cuana quehuajje acani. Quijje oja mimishi ba majje ojjañaa oya cuana tecuea cajeꞌyo. \v 25 Jamaya peaꞌai beca cuaa quea pame nee acani. Jjeya nei ojjañaa oya ba cani. Oe pojji cuaa quea pame nee quehuajje acani. Quijje ojjañaa ba caje oya quea pame nee nee poani. \c 6 \s1 Echacojji cuaa sosemajo chacochacoaniya o chacomeejji cashajjaꞌajja cahua \p \v 1 Timoteo, echacojji cuana Jesosaja epeejji cuana huohuicue jama baꞌa: —Epeejji cuana, ¡miquianaaya chacoaña sosemajo, mi chacomeejjija esohui shajjaꞌajjacue! Miquiana mi jjashajjaꞌajjaquiajo, pea cuaa Eyacuiñajji niñeba ca chanaꞌ; esejaya esohuijo peaꞌai jjaniñebaqui chanaꞌ. \v 2 Miquea echacomeejji Jesosa nijje jjapeequianijo, edoe mese jayojja tecueꞌama poanijo, ¡aꞌa shajjamaꞌ pojji! Chojja, ¡shajjaꞌajja tiitiicue oya! Mi chacomeejji poani Jesosaja epeejji poanijo Jesosa ojaya quea boti nee peaꞌai. Miya miquea echacomeejjija yajjijo chacochacoanijo quea huiso sosejje poaje ojaya —jamaya acue echacojji cuana, Timoteo. \p Eꞌe Timoteo, ¡jiquio esohui cuana huohui neineicue! ¡Jamaya ojjaña cuana jjabahuejjaqui meesahuacue! \s1 ¡Quea bei baꞌecue esohui eꞌe nei jayojja! \p \v 3 Timoteo, pea dejja cuaa ecuanaja esohui jayojja jama huohui ajjajo, esohui eꞌe nei Jesosajo huohui sa po ajjajo oya cuana shajjamaꞌ, de. Ebaꞌe quea jaꞌa neejo huohui sa po ajjajo peaꞌai oya cuana shajjamaꞌ poani. \v 4 Esohui eꞌe nei onajaya ba jjima. Esohui quea quehuajo mimicuiajeanobiajea sa poani, de. Mimicuiajeanobiajea canijo dejja cuana quea quene po mee cani pea cuana nijje. Quea bei pojjeama po mee cani; pea cuana mimijaji mee cani; quea tai nee jjashahuabaqui mee cani pea cuanajo peaꞌai. \v 5 Eꞌe, esohui eꞌe jojo neijo jjabahuejjaqui mee jjimajo, quea jjashahuabaqui tai neejo peaꞌai quea huiso cuaa mimicuiajeanobiajea huichaꞌa cani. Jamajjeya oya cuana jjashahuaba quehuaquiani jama baꞌa: —Ecuaaya Eyacuiñajjija esohui huohuiañajo quea huiso ejjeshejji chichaje. \p ¡Jiquio dejja cuana nijje aꞌa jjapeequijji! Quea tai nee nee. \p \v 6 Eꞌe jojo nei Eyacuiñajjija esohui jayojja jama baꞌyanijo, quea jaji nee poanijo peaꞌai, quea bihui nee nee poajeꞌyo. \v 7 Eꞌe, eseya cuayanaje aemaꞌ nei nei. Quijje manoꞌyo majje aemaꞌ nei nei poquijeꞌyo. \v 8 Bobi, daqui, equi yani. Jamajjeya se quea bihui nee nee poajeꞌyo. \v 9 Joya quea huiso aquiana nahue sa poani ca ca eshahuaja ejiojji yasijje poqui quehuaꞌyo chanaꞌ. Ejjashahuabaquiꞌyojji cuana quea taijo quea tai baꞌejeꞌyo, quea yeno. Cuaqui yasijje quijje poquijeꞌyo peaꞌai, de. \v 10 Eꞌe, quea huiso ejjeshejji cuana, quea huiso aquiana cuana sa neinei poanijo ojjaña mimishi cuana acani cuaa. Ejjeshejji cuana, aquiana cuana sa neinei poanijo Eyacuiñajjija esohui jayojja jama apajea cani. Jamajjeya quea yeno nee nee poani; quea bei nee baꞌe ajja. \s1 Pabohua Timoteo huoojea cani quea pame ebaꞌejji \p \v 11 Timoteo, miya ca ca oe Eyacuiñajjija epeejji nei, ojo chacochacoani peaꞌai. ¡Ma acajji tai jama aꞌa ajji! Jjashahuabaquicue quea pame nee ebaꞌejji jama baꞌa: ¡Pea cuana quea jea nee acue! ¡Eyacuiñajji jayojja baꞌecue, quea jaꞌa nee! ¡Ojaya esohui jayojja jama atiitiicue! ¡Pea cuaa miya napa cajje quea caꞌa nee nee pocue! ¡Quea bei nee nequicue peaꞌai! \v 12 Jama jjashahuabaquime pocue baꞌa: ¡Dejja quebanei poanijo janobajjima nei nei cuajicuajiani jayojjaya miya Eyacuiñajji nijje quea jaꞌa nee nee jjapeequicue! Hueaꞌama poajo ohuaya miya baꞌe tiitii mee cajeꞌyo onijje, manoꞌyajo. Yahuajo ojjañaa cojja ba canijo miyaya huohuinaje jama baꞌa: —Jesosa Quito ecuea Emeshi Mese nei jjeya poani. \p Jamajjeya miya Jesosaja epeejji poanaje eꞌe jojo nei; Eyacuiñajjiya miya babaca caꞌyonaje onijje ebaꞌe tiitiiꞌyojji. \v 13 Jamajjeya Eyacuiñajjiya ojjaña aquiana eshe po mee caꞌyani; Jesosa quea pame nee miminaje emeshi mese Ponisio Pinato bajjani nijje jama baꞌa: “Eya ca iña Emeshi Mese oe nei; ecuea esohui eꞌe nei nei” poanaje Jesosa. Jamajjeya Eyacuiñajjiya, Jesosa Quitohua peaꞌaiya ba canijo, eyaya miya huohuiaña jama baꞌa: \v 14 ¡Eyacuiñajjija esohui jayojja jama atiitiicue! Jamajjeya pea cuanaja miya etecueajji pojjeama. ¡Jamaya acue Jesosa Quito esejaya Emeshi Mese nei poe oꞌoya jjimahuajo! \p \v 15 ¿Ache shono poeje oꞌoya Jesosa Quito? Eyacuiñajjija eba. Ohuaya Jesosa Quito poe meesahua cajeꞌyo. Eyacuiñajji quea pame nee nee, quea caꞌa nee peaꞌai, ojjaña huoojeaꞌyojji oe nei. Eꞌe, Eyacuiñajji ojjañaja emeshi mese huoojeajji poani. Ojjaña dejja jaahuanajji poani cuana huoojeajji poani oya. \v 16 Oya ca ca oe manoꞌyo ajja tii tii. Oya quea jeajahua nee nee enequi tii tii. Jamajjeya dejja cuana jamatii o que poqui ajja. Dejja cuanaja oya cojja ba jjima poani. Jjeya jjacojjaba meequi ajja peaꞌai. Jamajjeya ojjañaa oya cabihuia cahua. ¡Oya oe nei quea caꞌa nee nee po tiitiiꞌyani! Jamatii oya, de. \s1 Dejja cuana quea aquiana huiso nee neejo \p \v 17 Timoteo, dejja cuana quea aquiana huiso nee nee yasijje huohuicue jama baꞌa: —¡Pea cuana aꞌa cajaa ajji! ¡Miquea aquiana quea huisojo aꞌa jjashahuabaqui tiitiijji! Quea huiso aquiana cuana nequi tiitii ajjajo ¡aꞌa aquiana quea huiso jea bajji! Miyaya ¡Eyacuiñajji eshe tii tii nequi quea jea nee acue! Ohuaya ojjaña aquiana quia cani ese quea jaji pojji. \v 18 ¡Pea quea pame nee acue miyaya! Eꞌe, ¡pea cuana nijje quea pame nee atiitiicue! ¡Aꞌa quea aquiana nahue pojji aemaꞌ cuana nijje; nishehuiꞌama pocue! —jamaya oya cuana acue, Timoteo. \p \v 19 Jamaya poani tiitiijo, quijje Eyacuiñajjiya oya cuana sosequia cajeꞌyo quea huiso eyajo. Jamajjeya Eyacuiñajjiya oya cuana nequi tiitii mee cajeꞌyo eyajo onijje. Ebaꞌejji quea jaꞌa nee nee, quea pame nee nee ojaya poajeꞌyo. \p \v 20 Timoteo, ¡miyaya Eyacuiñajjija esohui quea pame nee jama atiitiicue! ¡Esohui eꞌe nei pojjeama Eyacuiñajjija esohui jayojja jama pojjeama aꞌa shajjaꞌajjajji! Quea quehua, de. \v 21 Jamajjeya beca cuana esohui quea quehua nee, eꞌe nei pojjeama shajjaꞌajja majje poquiquehuaꞌyonaje. Jamajjeya Eyacuiñajjija esohui eꞌe nei pajea caꞌyonaje, onaaya. \p Timoteo, ¡Eyacuiñajjiya miquianaya cajaahuana cahua! Jamaya capoahua. Apoa. \p Eya, Pabo esohui tehuejji.